ᠪᠦᠯᠵᠢᠬᠢᠨ ᠬᠠᠲᠤᠨ– [ᠮᠣᠩᠭᠣᠯ] ᠳᠠᠮᠪᠠ ᠶᠢᠨ ᠲᠥᠷᠥᠪᠠᠲᠤ <ᠲᠡᠷᠢᠭᠦᠨ ᠪᠦᠯᠦᠭ 4–7> Бүлжхэн хатан– [монгол] Дамбын Төрбат <тэргүүн бүлэг 4–7>
160 ᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠬᠠᠷᠰᠢ ᠶ᠋ᠢᠨ ᠵᠡᠰ ᠲᠣᠨᠣᠭ ᠲᠠᠢ ᠶᠡᠬᠡ ᠬᠠᠭᠠᠯᠭᠠ ᠴᠢᠯᠠᠭᠤᠨ ᠬᠡᠷᠡᠮ ᠦ᠋ᠨ ᠲᠡᠷᠲᠡᠭᠡ ᠳ᠋ᠦ᠍ ᠬᠦᠷᠲᠡᠯᠡ ᠴᠤᠤᠷᠢᠶᠠ ᠲᠠᠲᠠᠭᠤᠯᠤᠨ ᠣᠩᠭᠣᠢᠬᠤ ᠳ᠋ᠤ᠌ ᠬᠣᠨᠢ ᠬᠤᠷᠠᠭᠠ ᠨᠡᠢᠯᠡᠭᠰᠡᠨ ᠮᠡᠲᠦ ᠱᠤᠤᠭᠢᠯᠳᠤᠨ᠂ ᠤᠬᠢᠯᠠᠯᠳᠤᠨ ᠠᠭᠰᠠᠨ ᠰᠢᠷᠣᠢ ᠶ᠋ᠢᠨ ᠲᠦᠮᠡᠨ ᠬᠥᠮᠦᠨ ᠵᠤᠨ ᠨᠠᠮ ᠭᠦᠮ ᠪᠣᠯᠪᠠ᠃ ᠶᠡᠬᠡ ᠬᠥᠨᠳᠡᠢ ᠳᠦᠭᠦᠷᠡᠩ ᠤᠴᠠᠷᠠᠯ᠂ ᠬᠠᠭᠠᠴᠠᠯ ᠪᠤᠴᠠᠯᠵᠤ ᠪᠠᠢᠵᠠᠢ᠃ ᠴᠡᠷᠢᠭ ᠦ᠋ᠨ ᠡᠷᠳᠡᠮ ᠤᠬᠠᠭᠠᠨ ᠳ᠋ᠤ᠌ ᠬᠡᠳᠦᠢᠨ ᠡᠴᠡ ᠭᠠᠷᠭᠠᠭᠤᠳ ᠬᠠᠪᠤᠯ ᠬᠠᠭᠠᠨ ᠤ᠋ ᠲᠠᠪᠤᠨ ᠬᠦᠦ ᠨᠦ᠍ᠭᠦᠳ ᠥᠪᠡᠷ ᠥᠪᠡᠷ ᠦ᠋ᠨ ᠲᠦᠮᠡᠨ ᠢ᠋ ᠲᠤᠰ ᠲᠤᠰ ᠲᠤᠨᠢ ᠰᠠᠭᠠᠬᠠᠯᠲᠠ ᠶ᠋ᠢᠨ ᠵᠠᠢ ᠲᠠᠢ ᠪᠠᠭᠤᠯᠭᠠᠵᠠᠢ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠤᠷᠲᠤ ᠬᠣᠲᠠᠬᠠᠨ ᠢ᠋ ᠬᠠᠭᠠᠰ ᠪᠦᠰᠡᠯᠡᠬᠦ ᠮᠠᠶᠢᠭ ᠲᠠᠢ ᠬᠤᠸᠠᠷᠠᠩᠨᠠᠭᠰᠠᠨ ᠢ᠋ ᠶᠧᠯᠢᠦᠢ ᠲᠡᠰᠢ ᠪᠣᠱᠣᠭᠠ ᠠᠯᠬᠤᠩᠭᠤᠲᠠ ᠪᠠᠨ ᠣᠯᠵᠤ ᠬᠠᠷᠠᠪᠠ᠃ ᠶᠡᠷᠦ ᠶᠠᠭᠤ ᠴᠣ ᠪᠣᠯᠵᠤ ᠮᠡᠳᠡᠨᠡ ᠭᠡᠵᠦ ᠶᠡᠬᠡ ᠪᠠᠭᠠ ᠦᠭᠡᠢ᠂ ᠬᠥᠭᠰᠢᠨ ᠵᠠᠯᠠᠭᠤ ᠦᠭᠡᠢ ᠪᠣᠳᠣᠵᠤ ᠪᠠᠢᠭᠰᠠᠨ ᠠᠵᠢ᠃ ᠲᠡᠷᠡ ᠪᠡᠷ ᠪᠣᠳᠣᠯ ᠤ᠋ᠨ ᠨᠡᠭᠦᠳᠡᠯ ᠳ᠋ᠦ᠍ ᠭᠠᠷᠴᠠ ᠦᠭᠡᠢ ᠪᠣᠯᠵᠠᠢ᠃ ᠦᠭᠡ ᠶ᠋ᠢᠨ ᠱᠠᠯᠠᠭᠠ ᠪᠠᠷ ᠮᠤᠬᠤᠷᠳᠠᠯ ᠳ᠋ᠤ᠌ ᠣᠷᠣᠭᠤᠯᠤᠭᠰᠠᠨ ᠡᠪᠦᠭᠡᠨ ᠬᠠᠨ ᠥᠪᠡᠷ ᠢ᠋ ᠪᠡᠨ ᠲᠡᠳᠦᠢ ᠦᠭᠡᠢ ᠶᠧᠯᠢᠦᠢ ᠲᠡᠰᠢ ᠶ᠋ᠢ ᠴᠦ᠍ ᠠᠪᠤᠷᠠᠭᠰᠠᠨ ᠰᠠᠨᠠᠭᠳᠠᠪᠠ᠃ ᠵᠠᠯᠠᠭᠤ ᠺᠢᠳᠠᠨ ᠡᠷᠡ ᠲᠣᠭᠣᠰᠣ ᠮᠠᠨᠠᠷᠠᠭᠰᠠᠨ ᠶᠡᠬᠡ ᠬᠤᠸᠠᠷᠠᠨ ᠢ᠋ ᠬᠠᠷᠠᠴᠠ ᠭᠦᠶᠦᠯᠭᠡᠨ ᠬᠠᠷᠠᠯᠠ᠃ ᠬᠣᠯᠠᠬᠠᠨ ᠰᠠᠭᠠᠬᠠᠯᠲᠠ ᠶ᠋ᠢᠨ ᠵᠠᠢ ᠳ᠋ᠤ᠌ ᠳᠥᠷᠥᠭᠡ ᠮᠤᠯᠲᠤᠯᠤᠭᠰᠠᠨ ᠬᠦᠷᠢᠶᠡ ᠪᠦᠷᠢ ᠳ᠋ᠦ᠍ ᠠᠪᠤ ᠳ᠋ᠠᠭᠠᠨ ᠦᠨᠦᠰᠦᠭᠦᠯᠦᠭᠰᠡᠨ ᠡᠷᠡ ᠴᠡᠷᠢᠭ ᠪᠠᠶᠠᠷ ᠤ᠋ᠨ ᠨᠢᠯᠪᠤᠰᠤ ᠪᠠᠨ ᠴᠢᠮᠡᠭᠡ ᠦᠭᠡᠢ ᠠᠷᠴᠢᠨᠠ᠃ ᠦᠯᠡᠳᠡᠭᠡᠭᠰᠡᠨ ᠬᠠᠴᠠᠷ ᠢ᠋ᠶ᠋ᠠᠨ ᠦᠨᠦᠰᠴᠦ ᠠᠮᠵᠢᠭᠠ ᠦᠭᠡᠢ ᠦᠬᠦᠯ ᠳ᠋ᠦ᠍ ᠬᠦᠦ ᠪᠡᠨ ᠠᠯᠳᠠᠭᠰᠠᠨ ᠪᠤᠭᠤᠷᠤᠯ ᠢᠵᠢᠢ ᠤᠬᠢᠯᠠᠪᠠᠴᠤ ᠭᠣᠷᠢᠳᠠᠯ ᠦᠯᠦ ᠲᠠᠰᠤᠷᠠᠨ ᠰᠤᠷᠠᠭᠯᠠᠨᠠ᠃ ᠠᠮᠠᠷᠠᠭ ᠢ᠋ᠶ᠋ᠠᠨ ᠬᠠᠢᠭᠰᠠᠨ ᠵᠠᠯᠠᠭᠤ ᠪᠦᠰᠡᠭᠦᠢ ᠲᠠᠪᠠᠭ ᠲᠠᠢ ᠢᠳᠡᠭᠡ ᠪᠡᠨ ᠠᠰᠬᠠᠨ ᠴᠢᠳᠬᠤᠨ ᠬᠦᠷᠢᠶᠡ ᠬᠦᠷᠢᠶᠡ ᠬᠡᠰᠦᠨ ᠭᠦᠶᠦᠨᠡ᠃ ᠨᠢᠳᠦᠨ ᠦ᠌ ᠬᠢᠨ ᠭᠠᠯ ᠤᠨᠲᠠᠷᠠᠵᠤ᠂ ᠨᠢᠭᠡᠨ ᠬᠣᠷᠣᠮ ᠤ᠋ᠨ ᠳᠣᠲᠣᠷᠠ ᠪᠤᠭᠤᠷᠤᠯᠲᠤᠨ ᠥᠲᠡᠯᠬᠦ ᠰᠢᠭ ᠪᠣᠯᠤᠨᠠ᠃ ᠬᠠᠯᠲᠤ ᠬᠠᠷᠠᠬᠤ ᠳ᠋ᠤ᠌ ᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠬᠦᠷᠢᠶᠡ ᠬᠥᠯ ᠲᠣᠯᠣᠭᠠᠢ ᠦᠭᠡᠢ ᠮᠡᠲᠦ ᠪᠤᠵᠢᠭᠢᠨᠠᠨᠠ᠃ ᠭᠡᠪᠡᠴᠦ ᠲᠥᠷᠥ ᠶ᠋ᠢᠨ ᠶᠡᠬᠡ ᠬᠡᠩᠭᠡᠷᠭᠡ ᠲᠦᠭᠰᠢᠭᠦᠷᠢ ᠵᠠᠷᠯᠠᠨ ᠬᠦᠩᠭᠢᠨᠡᠬᠦ ᠳ᠋ᠦ᠍ ᠡᠷᠡ ᠡᠮᠡ ᠦᠭᠡᠢ ᠢᠯᠳᠦ ᠠᠭᠰᠠᠭᠠᠳ ᠪᠣᠰᠴᠤ ᠴᠢᠳᠠᠬᠤ ᠶ᠋ᠢ ᠶᠧᠯᠢᠦᠢ ᠲᠡᠰᠢ ᠭᠠᠳᠠᠷᠯᠠᠬᠤ ᠪᠢᠯᠡ᠃ ᠡᠢᠮᠦ ᠣᠮᠣᠭᠯᠠᠩ ᠠᠷᠠᠳ ᠣᠯᠠᠨ ᠢ᠋ ᠬᠣᠶᠠᠷ ᠵᠠᠭᠤᠨ ᠵᠢᠯ ᠨᠣᠶᠠᠯᠠᠵᠤ ᠴᠢᠳᠠᠭᠰᠠᠨ᠂ ᠳᠠᠷᠤᠯᠠᠵᠤ ᠴᠢᠳᠠᠭᠰᠠᠨ ᠡᠪᠦᠭᠡ ᠳᠡᠭᠡᠳᠦᠰ ᠲᠡᠭᠡᠨ ᠪᠠᠶᠠᠷᠯᠠᠨ ᠴᠢᠮᠡᠭᠡ ᠦᠭᠡᠢ ᠬᠠᠨᠴᠤᠢ ᠳᠣᠲᠣᠷᠠ ᠪᠠᠨ ᠵᠠᠯᠪᠠᠷᠢᠵᠤ ᠠᠪᠠᠢ᠃ ᠲᠡᠷᠡ ᠪᠡᠷ ᠶᠡᠬᠡ ᠬᠥᠮᠦᠨ ᠳ᠋ᠦ᠍ ᠯᠡ ᠵᠠᠶᠠᠭᠠᠬᠤ ᠳᠠᠯᠳᠠ ᠵᠦᠩ ᠢ᠋ᠶ᠋ᠡᠷ ᠨᠢᠳᠦᠨ ᠳ᠋ᠡᠭᠡᠨ ᠭᠠᠯ ᠲᠠᠢ᠂ ᠨᠢᠭᠤᠷᠤᠨ ᠳ᠋ᠠᠭᠠᠨ ᠴᠣᠭ ᠲᠠᠢ ᠨᠡᠭᠦᠳᠡᠯ ᠬᠥᠯ ᠦ᠋ᠨ ᠶᠡᠬᠡ ᠲᠦᠮᠡᠨ ᠳ᠋ᠦ᠍ ᠤᠳᠠᠬᠤ ᠦᠭᠡᠢ ᠳᠡᠯᠪᠡ ᠲᠠᠲᠠᠬᠤ ᠶᠠᠮᠠᠷ ᠨᠢᠭᠡᠨ ᠶᠡᠬᠡ ᠤᠪᠠᠳᠢᠰ᠂ ᠶᠠᠮᠠᠷ ᠨᠢᠭᠡᠨ ᠶᠡᠬᠡ ᠬᠡᠢᠮᠣᠷᠢ ᠴᠠᠭ ᠮᠥᠴᠡ ᠳᠣᠳᠣᠮ ᠬᠤᠷᠠᠮᠳᠤᠯᠠᠭᠳᠠᠨ ᠪᠣᠢ ᠶ᠋ᠢ ᠮᠡᠳᠡᠷᠡᠪᠡᠢ᠃ ᠶᠡᠷᠦ ᠬᠥᠮᠦᠨ ᠪᠦᠬᠦᠨ ᠦ᠌ ᠨᠢᠳᠦ ᠭᠡᠷᠡᠯᠲᠦᠨ ᠨᠢᠭᠡ ᠶ᠋ᠢ ᠡᠷᠢᠵᠦ᠂ ᠨᠥᠭᠦᠭᠡ ᠶ᠋ᠢ ᠬᠠᠢᠬᠤ ᠮᠡᠲᠦ ᠭᠢᠯᠠᠯᠵᠠᠬᠤ ᠶ᠋ᠢ ᠣᠯᠵᠤ ᠬᠠᠷᠠᠪᠠᠢ᠃ ᠪᠤᠷᠬᠠᠨ ᠥᠷᠥᠰᠢᠶᠡ᠃ ᠬᠠᠪᠤᠯ ᠬᠠᠭᠠᠨ ᠲᠡᠭᠦᠨ ᠢ᠋ ᠠᠪᠤᠷᠠᠪᠠ ᠪᠤᠰᠤ ᠤᠤ!
ᠡᠨᠡ ᠬᠢᠷᠢ ᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠬᠠᠷᠰᠢ ᠶ᠋ᠢ ᠪᠦᠰᠡᠯᠡᠨ ᠵᠣᠭᠰᠣᠭᠰᠠᠨ ᠲᠣᠭᠰᠢᠨ ᠰᠢᠷᠭᠠ ᠠᠵᠢᠷᠭᠠ ᠲᠠᠢ ᠺᠢᠳᠠᠨ ᠲᠣᠷᠭᠠᠨ ᠴᠡᠷᠢᠭ ᠦ᠋ᠳ᠂ ᠤᠷᠲᠤ ᠬᠠᠪᠢ ᠪᠠᠷ ᠰᠣᠨᠢᠭᠤᠴᠢᠷᠬᠠᠨ ᠪᠤᠵᠢᠭᠢᠨᠠᠬᠤ ᠣᠯᠠᠨ ᠢ᠋ ᠲᠠᠰᠢᠭᠤᠷᠳᠠᠬᠤ ᠶ᠋ᠢ ᠨᠢ ᠲᠠᠰᠢᠭᠤᠷᠳᠠᠵᠤ᠂ ᠵᠢᠳᠠᠯᠠᠬᠤ ᠶ᠋ᠢ ᠨᠢ ᠵᠢᠳᠠᠯᠠᠵᠤ ᠬᠥᠭᠡᠭᠡᠨ ᠨᠢᠭᠡᠨ ᠶᠡᠬᠡ ᠤᠷᠲᠤ ᠭᠤᠲᠤᠮ ᠭᠠᠷᠭᠠᠵᠤ ᠬᠣᠶᠠᠷ ᠡᠩᠨᠡᠭᠡ ᠪᠣᠯᠪᠠ᠃ ᠬᠥᠯ ᠬᠥᠩᠭᠡᠨ ᠵᠠᠷᠤᠴᠠ᠂ ᠪᠣᠭᠣᠯᠴᠤᠳ ᠡᠯᠡ ᠰᠠᠴᠠᠭᠤ ᠱᠠᠯᠠᠪᠯᠠᠨ ᠭᠦᠶᠦᠵᠦ ᠴᠠᠯᠮᠠ ᠴᠠᠭᠠᠨ ᠢᠰᠡᠭᠡᠢ ᠠᠮᠠ ᠳᠠᠷᠤᠨ ᠳᠡᠪᠢᠰᠬᠦ ᠳ᠋ᠦ᠍ ᠶᠧᠯᠢᠦᠢ ᠲᠡᠰᠢ ᠬᠡᠭᠡᠷᠡ ᠶ᠋ᠢᠨ ᠠᠷᠪᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠨᠣᠶᠠᠳ᠂ ᠥᠪᠡᠷ ᠦ᠋ᠨ ᠠᠷᠪᠠᠨ ᠭᠤᠷᠪᠠᠨ ᠰᠢᠳᠠᠷ ᠢ᠋ ᠳᠠᠭᠠᠭᠤᠯᠤᠨ ᠡᠯᠡ ᠵᠠᠮ ᠢ᠋ᠶ᠋ᠠᠷ ᠶᠡᠬᠡᠮᠰᠦᠭ ᠲᠦᠪᠰᠢᠨ ᠠᠯᠬᠤᠭᠰᠠᠭᠠᠷ ᠬᠠᠳᠠᠲᠤ ᠥᠨᠳᠥᠷᠯᠢᠭ ᠦ᠋ᠨ ᠬᠢᠭᠢᠷᠢ ᠬᠡᠢᠰᠬᠡᠭᠰᠡᠨ ᠲᠣᠷᠭᠠᠨ ᠣᠷᠣᠢ ᠳ᠋ᠤ᠌ ᠵᠠᠯᠠᠷᠠᠯᠠ᠃ ᠴᠢᠨ ᠲᠣᠯᠣᠭᠠᠢ ᠲᠣᠭᠣᠷᠢᠨ ᠵᠦ᠋ᠪᠦ᠋ ᠠᠷᠪᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠲᠣᠯᠣᠭᠠᠢ ᠲᠠᠢ ᠪᠦᠬᠦᠨ ᠴᠤᠭᠯᠠᠭᠰᠠᠨ ᠮᠡᠲᠦ ᠬᠥᠯ ᠳᠠᠷᠤᠭᠰᠠᠨ ᠢ᠋ ᠡᠨᠳᠡ ᠡᠴᠡ ᠲᠣᠭᠲᠠᠭᠤᠨ ᠬᠠᠷᠠᠵᠤ ᠪᠣᠯᠬᠤ ᠪᠢᠯᠡ᠃
ᠮᠣᠩᠭᠣᠯ ᠤ᠋ᠨ ᠲᠠᠪᠤᠨ ᠲᠦᠮᠡᠲᠦ ᠡᠩᠨᠡᠨ ᠪᠠᠭᠤᠳᠠᠯᠯᠠᠵᠤ ᠳᠠᠭᠤᠯᠠᠵᠤ ᠤᠴᠠᠷᠠᠯᠳᠤᠭᠰᠠᠨ᠂ ᠤᠬᠢᠯᠠᠵᠤ ᠬᠠᠭᠠᠴᠠᠯᠳᠤᠭᠰᠠᠨ ᠣᠯᠠᠨ ᠤ᠋ ᠱᠤᠤᠭᠢᠶᠠᠨ ᠡᠭᠦᠯᠡ ᠬᠥᠪᠰᠥᠯᠵᠡᠭᠦᠯᠵᠦ ᠪᠠᠢᠬᠤ ᠪᠥᠯᠥᠭᠡ᠃ ᠥᠷᠥᠨᠡ ᠶ᠋ᠢ ᠵᠠᠬᠠᠯᠠᠵᠤ ᠪᠠᠭᠤᠭᠰᠠᠨ ᠬᠤᠯᠠᠨ ᠲᠠᠢᠵᠢ ᠶ᠋ᠢᠨ ᠲᠦᠮᠡᠲᠦ ᠡᠴᠡ ᠴᠢᠳᠥᠷ ᠦ᠋ᠨ ᠮᠣᠷᠢ ᠢᠳᠡᠰᠢᠯᠡᠬᠦ ᠬᠢᠷᠢ ᠶ᠋ᠢᠨ ᠵᠠᠢ ᠳ᠋ᠤ᠌ ᠥᠨᠥᠴᠢᠨ ᠬᠡᠷᠡᠢᠳ ᠦ᠋ᠨ ᠬᠦᠷᠢᠶᠡ᠂ ᠲᠡᠭᠡᠭᠡᠳ ᠨᠠᠢ᠍ᠮᠠᠨ᠂ ᠮᠡᠷᠭᠢᠳ᠂ ᠬᠣᠩᠭᠢᠷᠠᠳ ᠤ᠋ᠳ ᠪᠠᠭᠤᠷᠢ ᠵᠠᠰᠠᠨ ᠠᠰᠠᠷ ᠴᠠᠴᠠᠷ ᠢ᠋ᠶ᠋ᠠᠨ ᠪᠤᠰᠬᠠᠵᠠᠢ᠃ ᠬᠡᠭᠡᠷᠡ ᠶ᠋ᠢᠨ ᠳᠠᠢᠨᠴᠢ ᠲᠦᠮᠡᠨ ᠳ᠋ᠦ᠍ ᠵᠡᠭᠦᠦ ᠣᠷᠣᠬᠤ ᠵᠠᠢ ᠦᠭᠡᠢ ᠪᠦᠰᠡᠯᠡᠭᠳᠡᠭᠰᠡᠨ ᠮᠡᠲᠦ ᠰᠠᠨᠠᠭᠳᠠᠭᠰᠠᠨ ᠨᠢ ᠪᠣᠢ᠃ ᠡᠢᠨ ᠪᠠᠭᠤᠳᠠᠯᠯᠠᠭᠰᠠᠨ ᠢ᠋ ᠨᠢᠳᠦ ᠭᠦᠶᠦᠯᠭᠡᠨ ᠬᠠᠷᠠᠭᠰᠠᠨ ᠬᠠᠪᠤᠯ ᠬᠠᠭᠠᠨ《ᠮᠢᠨᠦ ᠬᠦᠦ ᠨᠦ᠍ᠭᠦᠳ ᠴᠤ᠌ ᠡᠷᠡ ᠪᠣᠯᠵᠠᠢ》 ᠭᠡᠮᠡᠨ ᠪᠣᠳᠣᠵᠤ ᠡᠯᠡ ᠪᠣᠳᠣᠯ ᠢ᠋ᠶ᠋ᠠᠨ ᠶᠧᠯᠢᠦᠢ ᠳᠠᠰᠢ ᠠ᠋ᠴᠠ ᠨᠢᠭᠤᠵᠤ ᠠᠯᠤᠰ ᠢ᠋ ᠰᠠᠷᠠᠪᠴᠢᠯᠠᠪᠠᠯ ᠴᠢᠨ ᠨᠠᠭᠤᠷ ᠤ᠋ᠨ ᠭᠦᠨ ᠴᠡᠩᠬᠡᠷ ᠤᠰᠤ ᠲᠣᠭᠣᠷᠢᠨ ᠶᠸᠯᠢᠦᠢ ᠳᠠᠰᠢ ᠶ᠋ᠢᠨ ᠶᠡᠬᠡ ᠨᠡᠭᠦᠳᠡᠯ ᠦ᠋ᠨ ᠲᠡᠷᠢᠭᠦᠨ ᠲᠦᠮᠡᠲᠦ ᠪᠠᠭᠤᠭᠰᠠᠨ ᠬᠠᠷᠠᠭᠳᠠᠬᠤ ᠠᠭᠠᠳ ᠬᠠᠳᠠᠭ ᠤ᠋ᠨ ᠵᠡᠷᠭᠡᠯᠭᠡ ᠮᠢᠷᠠᠯᠵᠠᠬᠤ ᠪᠦᠷᠢ ᠠᠯᠤᠰ ᠲᠤ᠌ ᠲᠩᠷᠢ ᠭᠠᠵᠠᠷ ᠤ᠋ᠨ ᠰᠠᠪᠰᠠᠯᠭᠠ ᠪᠠᠷ ᠲᠡᠮᠡᠭᠡᠨ ᠠᠴᠢᠶᠠ᠂ ᠭᠡᠷ ᠲᠡᠷᠭᠡ᠂ ᠨᠢᠷᠤᠭᠤ ᠠᠴᠢᠭᠰᠠᠨ ᠦᠬᠡᠷ᠂ ᠮᠤᠬᠤᠯᠠᠭ ᠲᠡᠷᠭᠡᠨ ᠳ᠋ᠦ᠍ ᠵᠠᠯᠠᠷᠠᠭᠰᠠᠨ ᠬᠠᠲᠤᠳ ᠴᠤᠪᠤᠷᠠᠨ ᠪᠣᠢ ᠪᠥᠯᠥᠭᠡ᠃ ᠬᠠᠪᠤᠯ ᠬᠠᠭᠠᠨ ᠤ᠋ ᠬᠠᠷᠠᠴᠠ ᠬᠠᠮᠢᠭᠠ ᠲᠣᠰᠴᠤ ᠪᠣᠢ ᠶ᠋ᠢ ᠮᠡᠳᠡᠭᠰᠡᠨ ᠶᠸᠯᠢᠦᠢ ᠲᠡᠰᠢ᠂
一 ᠮᠢᠨᠦ ᠬᠥᠰᠬᠡ ᠲᠠᠨ ᠤ᠋ ᠨᠤᠲᠤᠭ ᠢ᠋ᠶ᠋ᠠᠷ ᠬᠠᠭᠠᠰ ᠵᠢᠯ ᠬᠦᠪᠦᠷᠡᠬᠦ ᠪᠣᠯᠤᠨᠠ᠃ ᠡᠳ᠋ ᠮᠥᠩᠭᠥ᠂ ᠡᠮᠡᠰ ᠥᠬᠢᠳ᠂ ᠡᠷᠡ ᠴᠡᠷᠢᠭ ᠲᠦ᠍ ᠵᠢᠳᠠᠨ ᠤ᠋ ᠦᠵᠦᠭᠦᠷ᠂ ᠰᠡᠯᠡᠮᠡᠨ ᠦ᠌ ᠢᠷ ᠬᠦᠷᠭᠡᠬᠦ ᠦᠭᠡᠢ ᠭᠡᠵᠦ ᠬᠠᠭᠠᠨ ᠲᠠᠨ ᠳ᠋ᠤ᠌ ᠵᠠᠮ ᠵᠢᠭᠡᠯᠡᠬᠦ ᠪᠡᠯᠡᠭ ᠥᠭᠭᠦᠯᠡ᠃ ᠪᠢ ᠢᠲᠡᠭᠡᠵᠦ ᠪᠣᠯᠤᠨᠠ ᠪᠢᠵᠡ ᠭᠡᠬᠦ ᠳ᠋ᠦ᠍ ᠡᠪᠦᠭᠡᠨ ᠬᠠᠭᠠᠨ ᠪᠤᠭᠤᠷᠤᠯ ᠰᠠᠬᠠᠯ ᠢ᠋ᠶ᠋ᠠᠨ ᠬᠡᠮᠡᠯᠢᠨ᠂
－ᠲᠠᠨ ᠤ᠋ ᠨᠣᠮᠣᠨ ᠠ᠋ᠴᠠ ᠰᠤᠮᠤ ᠠᠯᠳᠠᠭᠤᠷᠠᠬᠤ ᠦᠭᠡᠢ ᠪᠣᠯ ᠮᠠᠨ ᠤ᠋ ᠬᠣᠢᠨᠠ ᠠ᠋ᠴᠠ ᠰᠡᠯᠡᠮᠡ ᠰᠤᠭᠤᠷᠠᠬᠤ ᠦᠭᠡᠢ ᠬᠡᠮᠡᠵᠡᠢ᠃ ᠲᠡᠳᠡ ᠡᠢᠨ ᠨᠠᠮᠤᠭᠤᠬᠠᠨ ᠳᠠᠭᠤ ᠪᠠᠷ ᠶᠡᠬᠡᠮᠰᠦᠭ ᠬᠦᠦᠷᠨᠢᠯᠳᠦᠨ ᠡᠷᠬᠢᠮᠰᠦᠭ ᠳᠥᠯᠭᠡᠨ ᠠᠯᠬᠤᠯᠠᠭᠰᠠᠭᠠᠷ ᠬᠠᠳᠠᠲᠤ ᠥᠨᠳᠥᠷ ᠦ᠋ᠨ ᠣᠷᠣᠢ ᠳ᠋ᠤ᠌ ᠢᠷᠡᠪᠡ᠃ ᠶᠡᠬᠡᠰ ᠳᠡᠭᠡᠳᠦᠰ ᠬᠢᠭᠢᠷᠢ ᠳ᠋ᠦ᠍ ᠵᠠᠯᠠᠷᠠᠭᠰᠠᠨ ᠢ᠋ ᠬᠠᠷᠠᠵᠤ ᠣᠢᠷᠠ ᠬᠢ ᠣᠯᠠᠨ ᠤ᠋ ᠴᠢᠮᠡᠭᠡ ᠠᠶᠠᠳᠠᠵᠤ᠂ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠬᠣᠯᠠ ᠪᠤᠵᠢᠭᠢᠨᠠᠬᠤ ᠲᠦᠮᠡᠨ ᠦ᠌ ᠱᠤᠤᠭᠢᠶᠠᠨ ᠨᠠᠮᠳᠠᠵᠤ ᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠴᠢᠯᠠᠭᠤᠨ ᠣᠷᠳᠣᠨ ᠤ᠋ ᠬᠥᠨᠳᠡᠢ ᠦᠳᠡ ᠶ᠋ᠢᠨ ᠨᠠᠷᠠᠨ ᠳᠣᠣᠷᠠ ᠢᠯᠠᠭᠠ ᠨᠢᠰᠦᠭᠰᠡᠨ ᠴᠦ᠍ ᠳᠣᠭᠣᠯᠳᠠᠮᠠ ᠨᠠᠮ ᠭᠦᠮ ᠳᠤᠨᠢᠶᠠᠷᠲᠤᠪᠠ᠃ ᠬᠠᠭᠠᠨ ᠪᠦᠷᠢᠶᠡ ᠭᠤᠷᠪᠠᠨᠲᠠ ᠳᠠᠭᠤᠳᠠᠯᠭᠠ ᠥᠭᠭᠦᠯᠡ᠃ ᠴᠢᠨ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠡᠴᠡ ᠬᠣᠯᠠ ᠮᠣᠷᠢᠲᠠᠢ ᠵᠠᠭᠤᠨ ᠴᠡᠷᠢᠭ᠂ ᠨᠢᠭᠡᠨ ᠶᠡᠬᠡ ᠶᠠᠮᠪᠠᠲᠠᠨ ᠤ᠋ ᠮᠤᠬᠤᠯᠠᠭ ᠲᠡᠷᠭᠡ ᠶ᠋ᠢ ᠳᠤᠮᠳᠠ ᠪᠠᠨ ᠬᠢᠵᠦ ᠲᠣᠭᠣᠰᠣ ᠲᠠᠲᠠᠭᠤᠯᠤᠨ ᠨᠠᠭᠠᠰᠢᠯᠠᠬᠤ ᠳ᠋ᠤ᠌᠂ ᠮᠥᠨᠥᠬᠡᠨ ᠰᠢᠷᠭᠠ ᠮᠣᠷᠢᠲᠠᠢ ᠲᠣᠷᠭᠠᠨ ᠮᠢᠩᠭᠠᠲᠤ ᠶ᠋ᠢᠨ ᠲᠡᠷᠢᠭᠦᠨ ᠵᠠᠭᠤᠲᠤ ᠲᠣᠰᠣᠨ ᠤᠬᠤᠰᠬᠢᠵᠦ᠂ ᠬᠠᠳᠠᠲᠤ ᠬᠤᠸᠠ ᠶ᠋ᠢᠨ ᠡᠩᠭᠡᠷ ᠪᠠᠯ ᠳ᠋ᠤ᠌ ᠴᠢᠭᠤᠯᠤᠭᠰᠠᠨ ᠣᠯᠠᠨ ᠢ᠋ ᠬᠠᠭᠠ ᠵᠦᠰᠦᠨ ᠭᠤᠲᠤᠮ ᠭᠠᠷᠭᠠᠵᠤ᠂ ᠠᠢᠰᠤᠢ ᠶᠠᠪᠤᠭᠠ ᠵᠠᠭᠤᠲᠤ ᠳ᠋ᠤ᠌ ᠵᠠᠮ ᠭᠠᠷᠭᠠᠵᠠᠢ᠃ ᠬᠣᠯᠠ ᠮᠣᠷᠢᠲᠤ ᠨᠤᠭᠤᠳ ᠮᠤᠬᠤᠯᠠᠭ ᠲᠡᠷᠭᠡᠨ ᠳ᠋ᠦ᠍ ᠬᠥᠯᠯᠡᠭᠰᠡᠨ ᠳᠥᠷᠪᠡᠨ ᠮᠣᠷᠢ ᠶ᠋ᠢ ᠰᠢᠪᠠᠳᠠᠭᠤᠯᠤᠨ ᠲᠠᠰᠢᠭᠤᠷᠳᠠᠭᠰᠠᠭᠠᠷ ᠬᠤᠷᠠᠭᠰᠠᠨ ᠣᠯᠠᠨ ᠤ᠋ ᠵᠠᠬᠠ ᠳ᠋ᠤ᠌ ᠢᠷᠡᠭᠡᠳ ᠵᠢᠯᠣᠭᠣ ᠲᠠᠲᠠᠬᠤ ᠳ᠋ᠤ᠌ ᠰᠢᠷᠭᠠ ᠮᠣᠷᠢᠲᠠᠨ ᠵᠠᠭᠤᠲᠤ ᠶ᠋ᠢᠨ ᠶᠢᠰᠦᠨ ᠬᠦᠯᠦᠭ ᠪᠠᠭᠠᠲᠤᠷ ᠲᠣᠰᠣᠨ ᠡᠯᠳᠡᠭᠰᠡᠭᠡᠷ ᠬᠠᠳᠠᠲᠤ ᠲᠣᠯᠣᠭᠠᠢ ᠳ᠋ᠤ᠌ ᠵᠠᠰᠠᠭᠰᠠᠨ ᠴᠠᠭᠠᠵᠠ ᠶ᠋ᠢᠨ ᠲᠠᠪᠴᠠᠩ ᠤ᠋ᠨ ᠳᠡᠷᠭᠡᠳᠡ ᠠᠪᠴᠢᠷᠠᠯᠠ᠃ ᠰᠠᠶᠢ ᠯᠠ ᠤᠴᠢᠷ ᠢ᠋ ᠤᠬᠠᠭᠰᠠᠨ ᠣᠯᠠᠨ ᠲᠦᠮᠡᠨ ᠳᠠᠯᠳᠠ ᠠᠶᠤᠳᠠᠰᠤ ᠳ᠋ᠤ᠌ ᠬᠦᠯᠢᠭᠳᠡᠵᠦ ᠪᠦᠷ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ᠃ ᠳᠡᠭᠡᠳᠦᠰ ᠦ᠋ᠨ ᠵᠢᠨᠳᠠᠭᠠ ᠳᠠᠭᠠᠵᠤ ᠨᠣᠶᠠᠨ ᠳ᠋ᠠᠭᠠᠨ ᠣᠢᠷᠠ ᠵᠣᠭᠰᠣᠭᠰᠠᠨ ᠢᠯᠠᠮᠠ ᠭᠤᠸᠠ ᠬᠠᠲᠤᠨ᠂ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠰᠣᠭᠰᠣᠭᠠ ᠲᠠᠢ ᠲᠣᠯᠣᠭᠠᠢ ᠶ᠋ᠢ ᠡᠩᠭᠡᠷ ᠲᠡᠭᠡᠨ ᠨᠠᠭᠠᠵᠤ᠂
— ᠲᠣᠭᠣᠷᠢᠯ ᠠ᠋! ᠬᠣᠶᠠᠭᠤᠯᠠ ᠶᠠᠪᠤᠰᠤ ᠭᠡᠵᠦ ᠴᠡᠴᠡᠷᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠥᠭᠦᠯᠡᠪᠡᠯ ᠬᠥᠪᠡᠭᠦᠨ᠂
— ᠡᠪᠦᠭᠡ ᠪᠣᠶᠣᠷᠤᠭ ᠢ᠋ ᠦᠬᠦᠭᠦᠯᠦᠭᠰᠡᠨ ᠬᠥᠮᠦᠨ ᠡᠴᠡ ᠥᠰᠢᠶᠡ ᠪᠡᠨ ᠠᠪᠬᠤ ᠶ᠋ᠢ ᠬᠠᠷᠠᠵᠤ ᠦᠯᠦ ᠪᠣᠯᠤᠨᠠ ᠭᠡᠵᠦ ᠤᠤ ᠬᠡᠮᠡᠭᠰᠡᠨ ᠢ᠋ᠶ᠋ᠡᠨ ᠡᠨᠡ ᠬᠢᠷᠢ ᠠᠮᠢᠳᠤ ᠪᠢᠰᠢᠷᠡᠯ ᠰᠢᠲᠦᠭᠡᠨ ᠨᠢ ᠪᠣᠯᠤᠭᠰᠠᠨ ᠺᠢᠳᠠᠨ ᠵᠠᠩᠵᠤᠨ ᠤᠷᠤᠭᠤ ᠬᠠᠷᠠᠯᠠ᠃ ᠶᠸᠯᠢᠤᠢ ᠲᠡᠰᠢ ᠮᠤᠬᠤᠯᠠᠭ ᠲᠡᠷᠭᠡᠨ ᠡᠴᠡ ᠬᠢᠯᠢᠩᠲᠦ ᠬᠠᠷᠠᠴᠠ ᠪᠠᠨ ᠰᠠᠶᠢ ᠰᠠᠯᠭᠠᠵᠤ᠂ ᠶᠡᠬᠡ ᠯᠡ ᠳᠣᠭᠳᠣᠯᠤᠨ ᠵᠣᠭᠰᠣᠭᠠ ᠬᠤᠷᠵᠠᠬᠤᠰ ᠪᠣᠶᠣᠷᠤᠭ ᠲᠤ᠌ ᠰᠢᠯᠵᠢᠭᠦᠯᠵᠦ᠂
— ᠲᠠ᠁ ᠭᠡᠰᠡᠨ ᠡᠴᠡ ᠥᠭᠡᠷᠡ ᠦᠭᠡ ᠬᠡᠯᠡᠭᠰᠡᠨ ᠦᠭᠡᠢ᠃ ᠭᠤᠸᠠ ᠪᠣᠶᠤᠷᠤᠭ ᠡᠴᠢᠭᠡ ᠶ᠋ᠢᠨ ᠥᠰᠢᠶᠡ ᠠᠪᠬᠤ ᠬᠦᠰᠡᠯᠡᠩ ᠭᠤᠷᠪᠠᠨ ᠨᠠᠮᠤᠷ ᠤ᠋ᠨ ᠲᠤᠷᠰᠢ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠳᠦᠷᠡᠯᠵᠡᠵᠦ ᠶᠠᠪᠤᠭᠰᠠᠨ ᠠᠲᠠᠯᠠ ᠴᠠᠭ ᠨᠢ ᠲᠤᠯᠤᠭᠠᠳ ᠢᠷᠡᠬᠦ ᠪᠡᠷ ᠰᠡᠯᠡᠮᠡᠨ ᠦ᠌ ᠪᠡᠨ ᠪᠠᠷᠢᠭᠤᠯ ᠢ᠋ ᠲᠡᠮᠲᠡᠷᠢᠨ ᠭᠠᠷ ᠨᠢ ᠴᠡᠴᠡᠷᠡᠵᠦ ᠪᠠᠢᠪᠠ᠃
ᠲᠡᠭᠦᠨ ᠢ᠋ ᠶᠧᠯᠢᠦᠢ ᠲᠡᠰᠢ ᠰᠣᠷᠭᠣᠭ ᠠᠩᠵᠠᠭᠠᠷᠠᠵᠤ᠂
— ᠢᠯᠠᠭᠳᠠᠭᠰᠠᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠦᠷᠦ ᠡᠪᠡᠳᠬᠦ ᠨᠢ ᠠᠯᠠᠭᠳᠠᠭᠰᠠᠨ ᠬᠣᠢᠨᠠ ᠪᠠᠨ ᠢᠯᠠᠭᠴᠢ ᠪᠣᠯᠬᠤ ᠶ᠋ᠢᠨ ᠴᠣᠨᠳᠣᠩ ᠪᠠᠢᠳᠠᠭ ᠶᠤᠮ ᠭᠡᠬᠦ ᠳ᠋ᠦ᠍ ᠳᠡᠭᠦᠦ ᠭᠦᠷᠬᠠᠨ ᠤᠤᠬᠠᠢ ᠶ᠋ᠢᠨ ᠲᠠᠰᠤ ᠳᠡᠮᠵᠢᠵᠦ᠂ ᠬᠦᠷᠦ ᠬᠠᠨ
— ᠠᠬᠠ ᠲᠠ ᠰᠠᠶᠢᠬᠠᠨ ᠴᠠᠪᠴᠢᠨ ᠠᠯᠠᠬᠤ ᠶᠠᠯᠠ ᠴᠤ᠌ ᠬᠥᠩᠭᠡᠳᠡᠨᠡ ᠭᠡᠵᠦ ᠰᠠᠭᠤᠭᠰᠠᠨ ᠪᠢᠯᠡ᠃ ᠬᠠᠲᠠᠵᠤ ᠠᠯᠠᠭᠰᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠥᠰᠢᠶᠡ ᠶ᠋ᠢ ᠴᠠᠪᠴᠢᠵᠤ ᠠᠪᠬᠤ ᠶᠠᠭᠤ ᠨᠢ ᠪᠤᠷᠤᠭᠤ ᠪᠢᠯᠡ᠃ ᠴᠢ ᠡᠰᠡ ᠴᠢᠳᠠᠪᠠᠯ ᠭᠡᠬᠦ ᠳ᠋ᠦ᠍ ᠢᠯᠮᠠ ᠬᠠᠲᠤᠨ ᠵᠣᠪᠠᠭᠤᠷᠢᠲᠠᠶᠠ ᠰᠠᠨᠠᠭᠠ ᠠᠯᠳᠠᠵᠠᠢ᠃ ᠡᠷᠡᠴᠦᠦᠯ ᠠᠯᠠᠯᠴᠠᠬᠤ ᠪᠠᠷ ᠰᠢᠢᠳᠴᠡᠢ᠃ ᠡᠮᠡᠰ ᠯᠡ ᠬᠥᠯ ᠳ᠋ᠦ᠍ᠨᠢ ᠦᠷᠡᠭᠳᠡᠳᠡᠭ ᠳᠡ ᠭᠡᠵᠦ ᠪᠣᠳᠣᠪᠠ᠃ ᠴᠢᠩᠭᠢᠲᠡᠯᠡ ᠵᠠᠮ ᠤ᠋ᠨ ᠲᠣᠭᠣᠰᠣ ᠳᠠᠷᠤᠭᠰᠠᠨ ᠮᠤᠬᠤᠯᠠᠭ ᠲᠡᠷᠭᠡᠨ ᠦ᠌ ᠬᠠᠭᠠᠯᠭᠠ ᠵᠤᠭᠤᠤᠬᠠᠨ ᠣᠩᠭᠣᠢᠵᠤ᠂ ᠠᠶᠠᠨᠰᠢᠵᠤ ᠶᠠᠳᠠᠷᠠᠭᠰᠠᠨ ᠬᠡᠳᠦᠢ ᠴᠦ᠍ ᠰᠠᠬᠠᠯ ᠦᠰᠦ ᠪᠡᠨ ᠴᠡᠮᠴᠡᠢᠲᠡᠯᠡ ᠬᠤᠰᠤᠵᠤ᠂ ᠭᠦᠷᠦᠮᠡᠯ ᠭᠡᠵᠢᠭᠡ ᠪᠡᠨ ᠨᠢᠮᠪᠠᠢ ᠰᠦᠯᠵᠢᠭᠰᠡᠨ ᠥᠨᠳᠥᠷ ᠴᠠᠭᠠᠨ ᠡᠷᠡ ᠭᠠᠷᠴᠤ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠴᠡᠭᠡᠵᠢ ᠬᠠᠩᠬᠠᠷ᠂ ᠪᠡᠯᠬᠡᠭᠦᠰᠦ ᠨᠠᠷᠢᠨ᠂ ᠬᠠᠷᠠᠴᠠ ᠪᠦᠷᠭᠦᠳ ᠦ᠋ᠨ ᠨᠢᠳᠦ ᠮᠡᠲᠦ ᠲᠣᠭᠰᠢᠨ ᠠᠵᠢ᠃
— ᠴᠠᠷᠺᠢᠯ ᠨᠣᠳᠤᠢ! ᠭᠡᠵᠦ ᠬᠣᠷᠵᠠᠬᠤᠰ ᠰᠢᠪᠡᠨᠡᠬᠦ ᠳ᠋ᠡᠭᠡᠨ ᠥᠪᠡᠷ ᠡᠴᠡ ᠨᠢ ᠪᠠᠢᠲᠤᠭᠠᠢ ᠬᠡᠷᠡᠢᠳ ᠳᠠᠶᠠᠭᠠᠷ ᠭᠤᠸᠠ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠠᠪᠤ ᠠ᠋ᠴᠠ ᠨᠢ ᠴᠦ᠍ ᠦᠵᠡᠰᠬᠦᠯᠡᠩ ᠲᠡᠭᠦᠰ ᠡᠷᠡ ᠪᠠᠢᠭᠰᠠᠨ ᠳ᠋ᠤ᠌ ᠥᠰᠢᠬᠦ ᠡᠴᠡ ᠪᠡᠨ ᠢᠯᠡᠭᠦᠦ ᠬᠣᠷᠣᠰᠤᠨ ᠠᠲᠠᠭᠠᠷᠬᠠᠵᠤ ᠪᠢᠯᠡ᠃ ᠰᠢᠷᠭᠠ ᠮᠣᠷᠢᠲᠠᠨ ᠠ᠋ᠴᠠ ᠳᠥᠷᠪᠡᠨ ᠬᠦᠯᠦᠭ ᠪᠠᠭᠠᠲᠤᠷ ᠬᠦ ᠬᠤᠶᠠᠭ ᠢ᠋ᠶ᠋ᠠᠨ ᠬᠠᠷᠰᠢᠭᠤᠯᠤᠨ ᠣᠴᠢᠵᠤ ᠬᠠᠷᠠ ᠬᠠᠳᠠᠭ ᠢ᠋ᠶ᠋ᠠᠷ ᠬᠣᠶᠠᠷ ᠭᠠᠷ ᠢ᠋ ᠨᠢ ᠬᠦᠯᠢᠬᠦ ᠭᠡᠲᠡᠯᠡ ᠴᠠᠷᠺᠢᠯ ᠨᠤᠳᠣᠢ ᠬᠣᠢᠰᠢ ᠲᠦᠯᠬᠢᠭᠡᠳ ᠮᠤᠬᠤᠯᠠᠭ ᠲᠡᠷᠭᠡ ᠤᠷᠤᠭᠤ ᠠᠭᠠᠵᠢᠭᠤᠬᠠᠨ ᠡᠷᠭᠢᠭᠰᠡᠨ ᠢ᠋ᠶ᠋ᠡᠨ ᠳᠣᠯᠣᠭᠠ ᠬᠢᠷᠢ ᠶ᠋ᠢᠨ ᠨᠠᠰᠤᠨ ᠤ᠋ ᠬᠦᠦ ᠪᠡᠨ ᠳᠡᠭᠡᠷᠡ ᠭᠡᠭᠴᠢ ᠡᠷᠭᠦᠨ᠂
— ᠡᠳᠦᠢ ᠥᠨᠳᠥᠷ ᠪᠣᠯᠤᠭᠠᠷᠠᠢ! ᠭᠡᠮᠡᠨ ᠲᠡᠨᠢᠭᠡᠷ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠦᠨᠦᠰᠦᠭᠡᠳ ᠪᠠᠭᠤᠯᠭᠠᠬᠤ ᠳ᠋ᠠᠭᠠᠨ᠂
— ᠬᠠᠭᠠᠨ ᠠᠪᠤ ᠶ᠋ᠢ ᠨᠢ ᠣᠳᠣ ᠬᠠᠳᠠᠨ ᠰᠡᠨᠳᠡᠢ ᠳ᠋ᠦ᠍ ᠵᠠᠯᠠᠨᠠ᠃ ᠶᠠᠭᠠᠬᠢᠵᠤ ᠴᠤ᠌ ᠠᠯᠠᠭᠰᠠᠨ ᠮᠢᠨᠦ ᠬᠦᠦ ᠨᠢᠳᠦ ᠪᠡᠨ ᠴᠠᠪᠴᠢᠯ ᠦᠭᠡᠢ ᠬᠠᠷᠠᠭᠠᠷᠠᠢ᠃ ᠠᠮᠢᠳᠤᠷᠠᠵᠤ ᠴᠢᠳᠠᠭᠰᠠᠨ ᠬᠥᠮᠦᠨ᠂ ᠦᠬᠦᠵᠦ ᠪᠠᠰᠠ ᠴᠢᠳᠠᠳᠠᠭ ᠪᠠᠢᠬᠤ ᠶᠣᠰᠣᠲᠠᠢ ᠶᠤᠮ ᠰᠢᠦ᠂ᠲᠡᠮᠦᠵᠢᠨ ᠦᠭᠡ ᠭᠡᠪᠡ᠃ ᠲᠡᠭᠡᠭᠡᠳ ᠮᠤᠬᠤᠯᠠᠭ ᠲᠡᠷᠭᠡᠨ ᠡᠴᠡ ᠵᠢᠷᠤᠭ ᠤ᠋ᠨ ᠬᠤᠸᠠᠷ ᠰᠢᠭ᠋ ᠵᠠᠯᠠᠭᠤ ᠬᠠᠲᠤᠨ ᠢ᠋ᠶ᠋ᠠᠨ ᠲᠦᠰᠢᠵᠦ ᠪᠠᠭᠤᠯᠭᠠᠭᠠᠳ᠂
— ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠮᠢᠨᠢ᠂ ᠪᠦᠯᠲᠡᠭᠡᠷ ᠦᠭᠡ ᠦᠷᠡ ᠮᠢᠨᠢ᠃ ᠬᠥᠮᠦᠨ ᠲᠣᠯᠣᠭᠠᠢ ᠵᠡᠭᠦᠵᠦ ᠲᠥᠷᠥᠭᠰᠡᠨ ᠪᠢ ᠴᠢᠨ ᠲᠣᠯᠣᠭᠠᠢ ᠶ᠋ᠢ ᠲᠠᠬᠢᠬᠤ ᠵᠢᠷᠤᠭ ᠲᠠᠢ ᠪᠠᠢᠵᠠᠢ ᠭᠡᠰᠡᠨ ᠢ᠋ᠶ᠋ᠡᠨ ᠳᠤᠬᠤᠨ ᠳᠡᠭᠡᠷᠡ ᠨᠢ ᠦᠨᠦᠷᠯᠡᠵᠦ᠃
— ᠴᠢ ᠬᠥᠮᠦᠨ ᠦ᠌ ᠳᠣᠣᠷᠠ ᠣᠷᠣᠬᠤ ᠶᠠᠭᠠᠬᠢᠬᠤ ᠪᠣᠢ᠃ ᠬᠦᠦ ᠬᠥᠮᠦᠨ ᠦ᠌ ᠳᠣᠣᠷᠠ ᠣᠷᠣᠵᠤ ᠪᠣᠯᠬᠤ ᠦᠭᠡᠢ᠃ ᠡᠮᠡ ᠬᠥᠮᠦᠨ ᠳ᠋ᠦ᠍ ᠭᠡᠷ ᠦ᠋ᠨ ᠰᠦᠯᠳᠡ᠂ ᠡᠷᠡ ᠬᠥᠮᠦᠨ ᠳ᠋ᠦ᠍ ᠲᠥᠷᠥ ᠶ᠋ᠢᠨ ᠰᠦᠯᠳᠡ ᠶᠠᠪᠤᠳᠠᠭ ᠶᠤᠮ ᠰᠢᠦ ᠭᠡᠪᠡ᠃ ᠴᠢᠩᠭᠢᠭᠡᠳ ᠶᠡᠷᠦ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠮᠣᠷᠳᠠᠬᠤ ᠪᠠᠷ ᠬᠥᠲᠥᠴᠢ ᠪᠠᠭᠠᠲᠤᠷ ᠤ᠋ᠳ ᠤᠷᠤᠭᠤ ᠪᠠᠨ ᠶᠠᠪᠤᠵᠤ ᠪᠣᠢ ᠮᠡᠲᠦ ᠬᠣᠶᠠᠷ ᠲᠠᠰᠢᠶᠠᠨ ᠳᠡᠭᠡᠷᠡ ᠪᠡᠨ ᠨᠠᠢᠭᠤᠰᠬᠢᠨ ᠠᠯᠬᠤᠵᠤ ᠣᠴᠢᠭᠠᠳ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠠᠷᠤ ᠳ᠋ᠠᠭᠠᠨ ᠪᠠᠷᠢᠬᠤ ᠳ᠋ᠤ᠌ ᠬᠦᠯᠦᠭ ᠳᠥᠷᠪᠡᠨ ᠴᠡᠷᠢᠭ ᠰᠠᠢᠲᠤᠷ ᠴᠢᠩᠭᠠᠯᠠᠨ ᠤᠶᠠᠬᠤ ᠦᠶᠡᠰ ᠰᠡᠯᠡᠮᠡ ᠬᠠᠷ ᠬᠢᠨ ᠰᠤᠭᠤᠷᠠᠵᠤ ᠬᠣᠶᠠᠷ ᠨᠢᠭᠡᠨ ᠬᠥᠮᠦᠨ ᠨᠠᠭᠠᠰᠢᠯᠠᠬᠤ ᠬᠥᠯ ᠦ᠋ᠨ ᠴᠢᠮᠡᠭᠡ ᠲᠦᠮᠡ ᠴᠤᠭᠯᠠᠭᠰᠠᠨ ᠨᠠᠮ ᠭᠦᠮ ᠦ᠋ᠨ ᠳᠤᠮᠳᠠ ᠲᠤᠩ ᠰᠣᠳᠣᠨ ᠰᠣᠨᠣᠰᠳᠠᠪᠠ᠃ ᠬᠣᠷᠵᠠᠬᠤᠰ ᠪᠠᠷᠢᠭᠰᠠᠨ ᠰᠡᠯᠡᠮᠡᠨ ᠦ᠌ ᠪᠡᠨ ᠬᠣᠪᠢᠯ ᠢ᠋ ᠨᠠᠷᠠᠨ ᠳ᠋ᠤ᠌ ᠭᠢᠯᠠᠯᠵᠠᠭᠤᠯᠤᠨ ᠢᠷᠡᠭᠰᠡᠨ ᠢ᠋ᠶ᠋ᠡᠨ᠂
— ᠨᠢᠳᠦ ᠶ᠋ᠢ ᠨᠢ ᠪᠤᠭᠤ! ᠭᠡᠬᠦ ᠳ᠋ᠦ᠍ ᠴᠠᠷᠺᠯ ᠨᠣᠳᠣᠢ ᠳᠣᠭᠣᠭᠢ ᠲᠠᠢ ᠮᠦᠰᠢᠶᠡᠵᠦ᠂
— ᠬᠠᠷᠠᠴᠠᠨ ᠠ᠋ᠴᠠ ᠨᠢ ᠳᠠᠯᠳᠢᠷᠠᠭᠠᠳ ᠳᠠᠢᠰᠤᠨ ᠢ᠋ᠶ᠋ᠠᠨ ᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠬᠠᠭᠠᠨ ᠪᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠭᠡᠯᠡ᠃ ᠬᠣᠷᠵᠠᠬᠤᠰ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠦᠭᠡᠢ ᠂ ᠬᠠᠷᠠ ᠬᠠᠳᠠᠭ ᠢ᠋ᠶ᠋ᠠᠨ ᠪᠠᠷᠢᠵᠤ ᠭᠠᠢᠬᠠᠰᠢᠷᠠᠨ ᠵᠣᠭᠰᠣᠬᠤ ᠳᠥᠷᠪᠡᠨ ᠴᠡᠷᠢᠭ ᠢ᠋《ᠬᠣᠯᠠᠳ》 ᠭᠡᠵᠦ ᠳᠣᠬᠢᠪᠠ᠃ ᠴᠢᠩᠭᠢᠲᠡᠯᠡ ᠬᠥᠷ ᠬᠠᠨ ᠤ᠋ ᠴᠡᠭᠡᠯ ᠳᠠᠭᠤ ᠬᠠᠩᠭᠢᠨᠠᠵᠤ᠂
— ᠵᠦᠪᠦ᠋ ᠠᠷᠪᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠬᠠᠭᠠᠳ ᠶᠡᠬᠡᠰ᠂ ᠬᠠᠷᠠᠴᠤ ᠠᠷᠠᠳᠤᠰ ᠠ᠋! ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠨ ᠬᠦᠦ᠂ ᠬᠠᠪᠤᠯ ᠬᠠᠭᠠᠨ ᠤ᠋ ᠬᠠᠢᠷᠠᠲᠠᠢ ᠬᠥᠮᠦᠨ ᠬᠠᠲᠠᠭᠠᠨ ᠪᠠᠭᠠᠲᠤᠷ ᠢ᠋ ᠦᠭᠡ ᠪᠡᠷ ᠬᠠᠭᠤᠷᠴᠤ᠂ ᠮᠡᠰᠡ ᠪᠡᠷ ᠠᠯᠠᠭᠰᠠᠨ᠂ ᠥᠨᠥᠴᠢᠨ ᠬᠡᠷᠡᠢᠳ ᠦ᠋ᠨ ᠦᠷᠦ ᠶ᠋ᠢ ᠡᠪᠡᠳᠬᠡᠵᠦ ᠬᠠᠭᠠᠨ ᠡᠴᠢᠭᠡ ᠮᠠᠷᠬᠣᠰ ᠢ᠋ ᠠᠯᠲᠠᠨ ᠤᠯᠤᠰ ᠲᠤ᠌ ᠪᠠᠷᠢᠨ ᠥᠭᠴᠦ᠂ ᠮᠣᠳᠣᠨ ᠡᠯᠵᠢᠭᠡᠨ ᠳ᠋ᠦ᠍ ᠬᠠᠳᠠᠨ ᠦᠬᠦᠭᠦᠯᠦᠭᠰᠡᠨ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠨᠢᠭᠦᠯ ᠶᠡᠬᠡ ᠲᠤᠯᠠ ᠬᠠᠭᠠᠨ ᠴᠠᠷᠺᠢᠯ ᠨᠣᠳᠣᠢ ᠳ᠋ᠤ᠌ ᠶᠠᠯᠠ ᠲᠤᠯᠭᠠᠵᠤ᠂ ᠴᠠᠪᠴᠢᠨ ᠠᠯᠠᠰᠤᠭᠠᠢ! ᠭᠡᠰᠡᠨ ᠦᠭᠡ ᠠᠨᠢᠷ ᠭᠦᠮ ᠦ᠋ᠨ ᠳᠡᠭᠡᠭᠦᠷ ᠵᠡᠳᠯᠡᠨ ᠵᠠᠮᠬᠠᠷᠠᠪᠠ᠃ ᠡᠯᠡ ᠦᠭᠡᠰ ᠬᠥᠮᠦᠨ ᠪᠦᠷᠢ ᠶ᠋ᠢᠨ ᠵᠢᠷᠦᠬᠡᠨ ᠳ᠋ᠦ᠍ ᠵᠡᠪᠡ ᠮᠡᠲᠦ ᠲᠤᠰᠴᠠᠢ᠃ ᠥᠬᠢᠳ ᠭᠦᠩᠵᠦ ᠨᠠᠷ ᠵᠢᠷᠦᠬᠡᠨ ᠳ᠋ᠡᠭᠡᠨ《ᠰᠠᠢᠬᠠᠨ ᠡᠷᠡ》 ᠭᠡᠵᠦ ᠬᠠᠯᠬᠠᠯᠠᠨ ᠬᠠᠷᠠᠴᠠ ᠪᠤᠷᠤᠭᠤᠯᠠᠵᠤ᠂ ᠡᠮᠡᠭᠡᠳ ᠡᠪᠦᠭᠡᠳ ᠠᠮᠠᠨ ᠳᠣᠲᠣᠷᠠ ᠪᠠᠨ《ᠬᠥᠭᠡᠷᠦᠬᠦᠢ》 ᠭᠡᠵᠦ ᠥᠮᠥᠯᠵᠡᠪᠡᠴᠦ ᠤᠷᠤᠭᠤᠯ ᠳᠠᠪᠠᠴᠢᠬᠠᠭᠰᠠᠨ ᠪᠠᠢᠬᠤ ᠪᠣᠢ ᠭᠡᠮᠡᠨ ᠬᠠᠵᠠᠭᠤ ᠳ᠋ᠠᠬᠢ ᠠ᠋ᠴᠠ ᠪᠠᠨ ᠡᠮᠢᠶᠡᠵᠦ᠂ ᠬᠠᠷᠢᠨ ᠬᠠᠯᠠ ᠦᠵᠡᠭᠰᠡᠨ ᠬᠠᠰᠢᠷ ᠴᠡᠷᠢᠭ ᠦ᠋ᠳ《ᠢᠩᠭᠢᠵᠦ ᠯᠡ ᠪᠠᠢᠳᠠᠭ ᠶᠤᠮ》 ᠭᠡᠵᠦ ᠲᠦᠪᠡᠭᠰᠢᠶᠡᠭᠰᠡᠨ ᠮᠡᠲᠦ ᠬᠠᠷᠠᠬᠤ ᠪᠥᠯᠥᠭᠡ᠃ ᠶᠸᠯᠢᠦᠢ ᠳᠠᠰᠢ ᠨᠢᠭᠡᠨᠲᠡ ᠰᠢᠷᠪᠢᠭᠰᠡᠨ ᠢ᠋ᠶ᠋ᠡᠨ᠂
— ᠨᠢᠳᠦᠨ ᠡᠴᠡ ᠳᠠᠯᠳᠠ ᠪᠣᠯᠭᠠ ᠭᠡᠬᠦ ᠵᠠᠷᠯᠢᠭ ᠢ᠋ᠶ᠋ᠠᠷ ᠳᠥᠷᠪᠡᠨ ᠬᠦᠯᠦᠭ ᠪᠠᠭᠠᠲᠤᠷ ᠤᠬᠤᠰᠬᠢᠬᠦ ᠳ᠋ᠦ᠍᠂ ᠴᠠᠷᠭᠢᠯ ᠨᠤᠳᠣᠢ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠵᠠᠩᠳᠤᠷᠤᠨ ᠵᠣᠭᠰᠣᠭᠠᠪᠠ᠃ ᠴᠢᠩᠭᠢᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡᠨ ᠬᠠᠳᠠᠨ ᠤ᠋ ᠠᠷᠤ ᠳ᠋ᠤ᠌ ᠣᠴᠢᠵᠤ ᠰᠥᠬᠥᠷᠡᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠬᠦᠦ ᠬᠠᠲᠤᠨ ᠬᠣᠶᠠᠷ ᠢ᠋ᠶ᠋ᠠᠨ ᠤᠳᠠᠭᠠᠨ ᠬᠠᠷᠠᠪᠠ᠃ ᠲᠡᠭᠡᠭᠡᠳ ᠬᠠᠳᠠ ᠳᠡᠷᠡᠯᠡᠨ ᠨᠢᠳᠦ ᠪᠡᠨ ᠠᠨᠢᠯᠠ᠃ ᠬᠣᠷᠵᠠᠬᠤᠰ ᠬᠠᠳᠠᠲᠤ ᠥᠨᠳᠥᠷ ᠦ᠋ᠨ ᠡᠯᠢᠭᠡᠨ ᠤᠯᠠᠭᠠᠨ ᠴᠢᠯᠠᠭᠤᠳ ᠢ᠋ ᠬᠠᠷᠰᠢᠭᠤᠯᠤᠨ ᠣᠴᠢᠬᠤ ᠳ᠋ᠤ᠌ ᠪᠦᠯᠵᠢᠭᠡᠨ ᠬᠠᠲᠤᠨ ᠨᠢᠳᠦ ᠳᠠᠯᠳᠢᠷᠠᠨ᠂ ᠲᠡᠮᠦᠵᠢᠨ ᠦᠭᠡ ᠶ᠋ᠢ ᠮᠤᠬᠤᠯᠠᠭ ᠲᠡᠷᠭᠡ ᠤᠷᠤᠭᠤ ᠬᠥᠲᠥᠯᠬᠦ ᠭᠡᠲᠡᠯᠡ᠂
— ᠬᠠᠲᠤᠨ ᠡᠵᠢ ᠲᠠ ᠥᠷᠥᠰᠢᠶᠡ᠃ ᠬᠠᠭᠠᠨ ᠠᠪᠤ ᠶ᠋ᠢᠨ ᠵᠠᠷᠯᠢᠭ ᠳᠠᠭᠠᠵᠤ ᠬᠠᠷᠠᠶᠠ! ᠲᠣᠮᠣ ᠪᠣᠯᠤᠭᠠᠳ ᠪᠢ ᠡᠨᠡ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠠᠪᠬᠤ ᠤᠴᠢᠷ ᠲᠠᠢ ᠶᠤᠮ ᠭᠡᠯᠡ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠬᠦᠦ ᠪᠡᠨ ᠡᠨᠡ ᠤᠳᠠᠭᠠ ᠪᠤᠷᠤᠭᠤᠳᠬᠠᠵᠤ ᠡᠰᠡ ᠴᠢᠳᠠᠪᠠ᠃ ᠴᠠᠷᠺᠢᠯ ᠨᠣᠳᠣᠢ ᠦᠬᠦᠯ ᠦ᠋ᠨ ᠡᠮᠦᠨᠡ ᠥᠪᠡᠷ ᠢ᠋ᠶ᠋ᠡᠨ ᠪᠤᠷᠤᠭᠤ ᠲᠠᠢ ᠴᠤ᠌ ᠭᠡᠰᠡᠨ ᠥᠨᠥᠳᠥᠷ ᠢ᠋ ᠬᠦᠷᠲᠡᠯᠡ ᠲᠡᠭᠦᠨ ᠢ᠋ ᠪᠤᠷᠤᠭᠤᠳᠬᠠᠵᠤ ᠢᠷᠡᠭᠰᠡᠨ ᠰᠡᠳᠬᠢᠯ ᠨᠢᠯᠬᠠᠮᠰᠠᠨ ᠵᠥᠭᠡᠯᠡᠷᠡᠵᠦ᠂
— ᠡᠷᠡ ᠡᠨᠳᠡᠵᠦ᠂ ᠡᠷᠭᠢ ᠨᠤᠷᠠᠳᠠᠭ ᠰᠢᠦ ᠳᠡ ᠭᠡᠮᠡᠨ ᠳᠣᠲᠣᠷᠠ ᠪᠠᠨ ᠰᠢᠪᠡᠨᠡᠵᠦ᠂ ᠳᠡᠪᠢᠭᠦᠷ ᠰᠠᠢᠬᠠᠨ ᠰᠣᠷᠮᠤᠤᠰᠤ ᠪᠠᠨ ᠠᠨᠢᠬᠤ ᠬᠣᠷᠣᠮ ᠳ᠋ᠤ᠌ ᠬᠠᠳᠠᠨ ᠪᠣᠯᠣᠳ ᠢᠯᠳᠦᠨ ᠦ᠌ ᠬᠠᠳᠠ ᠴᠠᠪᠴᠢᠨ ᠬᠠᠩ ᠬᠢᠬᠦ ᠳᠠᠭᠤ ᠰᠣᠨᠣᠰᠳᠠᠬᠤ ᠰᠠᠴᠠᠭᠤ ᠬᠦᠦ ᠶ᠋ᠢᠨ ᠬᠢᠨᠢ᠂
— ᠠᠪᠤ ᠠ᠋! ᠭᠡᠬᠦ ᠳᠠᠭᠤ ᠴᠠᠩᠭᠢᠨᠠᠵᠤ ᠭᠠᠷ ᠠ᠋ᠴᠠ ᠨᠢ ᠠᠯᠳᠠᠭᠤᠷᠠᠬᠤ ᠶ᠋ᠢ ᠪᠦᠦᠷ ᠲᠦᠦᠷᠬᠡᠨ ᠤᠬᠠᠭᠠᠷᠠᠵᠤ᠂
— ᠮᠢᠨᠦ ᠬᠦᠦ! ᠭᠡᠵᠦ ᠠᠶᠠᠷᠬᠠᠨ ᠰᠢᠪᠡᠨᠡᠭᠡᠳ ᠠᠷᠤ ᠠ᠋ᠴᠠ ᠨᠢ ᠲᠠᠨᠲᠠᠷ ᠲᠤᠨᠲᠠᠷ ᠠᠯᠬᠤᠪᠠ᠃ ᠨᠢᠳᠦ ᠪᠡᠨ ᠨᠡᠭᠡᠭᠡᠬᠦ ᠵᠣᠷᠢᠭ ᠳᠤᠲᠠᠪᠠᠴᠤ᠂ ᠬᠦᠦ ᠪᠡᠨ ᠣᠯᠵᠤ ᠲᠡᠪᠡᠷᠢᠬᠦ ᠬᠦᠰᠡᠯᠡᠩ ᠲᠡᠭᠦᠨ ᠢ᠋ ᠤᠷᠤᠭᠰᠢ ᠬᠥᠲᠥᠯᠵᠦ᠂
— ᠲᠡᠮᠦᠵᠢᠨ ᠦᠭᠡ ᠠ᠋᠂ ᠭᠡᠰᠡᠨ ᠢ᠋ᠶ᠋ᠡᠨ《ᠤᠬᠠᠭᠠᠨ ᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ》 ᠭᠡᠮᠡᠨ ᠥᠪᠡᠷᠲᠡᠭᠡᠨ ᠰᠢᠪᠡᠨᠡᠵᠡᠢ᠃ ᠡᠨᠡ ᠦᠭᠡ ᠴᠠᠷᠺᠢᠯ ᠨᠣᠳᠤᠢ ᠠᠮᠢᠳᠤ ᠳ᠋ᠠᠭᠠᠨ《ᠬᠥᠮᠦᠨ ᠳ᠋ᠦ᠍ ᠮᠠᠭᠤ ᠪᠠᠨ ᠦᠵᠡᠭᠦᠯᠵᠦ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠬᠡᠯᠡᠳᠡᠭ ᠲᠡᠷᠡ ᠯᠠ ᠥᠩᠭᠡ᠂ ᠠᠶᠠᠰ ᠢ᠋ᠶ᠋ᠠᠷ ᠰᠣᠨᠣᠰᠳᠠᠵᠠᠢ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠨᠢᠳᠦ ᠪᠡᠨ ᠵᠤᠭᠤᠤᠬᠠᠨ ᠨᠡᠭᠡᠭᠡᠪᠡᠯ᠂ ᠶᠠᠭᠤ ᠶᠠᠭᠤᠨ ᠤ᠋ ᠲᠡᠷᠢᠭᠦᠨ ᠳ᠋ᠦ᠍ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠥᠩᠬᠥᠷᠢᠵᠦ ᠶᠠᠪᠤᠭᠠ ᠴᠢᠰᠤ ᠲᠠᠢ ᠲᠣᠯᠣᠭᠠᠢ᠂ ᠲᠡᠭᠦᠨ ᠦ᠌ ᠠᠷᠤ ᠠ᠋ᠴᠠ᠂
— ᠠᠪᠤ ᠠ᠋! ᠠᠪᠤ ᠠ᠋! ᠭᠡᠮᠡᠨ ᠪᠠᠷᠬᠢᠷᠠᠨ ᠭᠦᠶᠦᠵᠦ ᠶᠠᠪᠤᠭᠠ ᠲᠣᠬᠣᠢ ᠶ᠋ᠢᠨ ᠴᠢᠨᠡᠭᠡ ᠬᠦᠦ ᠨᠢ ᠦᠵᠡᠭᠳᠡᠪᠡ᠃ ᠭᠣᠣᠯ ᠥᠭᠡᠳᠡ ᠨᠢ ᠨᠢᠭᠡ ᠶᠡᠬᠡ ᠶᠠᠭᠤᠮᠠ ᠠᠭᠰᠢᠨ ᠵᠠᠩᠭᠢᠷᠠᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠬᠠᠮᠠᠷ ᠤ᠋ᠨ ᠤᠷᠠᠨ ᠰᠠᠮᠰᠠ ᠨᠢ ᠱᠠᠷᠬᠢᠷᠠᠨ᠂ ᠲᠤᠩᠭᠠᠯᠠᠭ ᠬᠠᠷᠠᠬᠠᠨ ᠨᠢᠯᠪᠤᠰᠤ ᠵᠠᠳᠠᠭᠠᠢ ᠠᠰᠬᠠᠷᠠᠯᠠ᠃ ᠶᠡᠷᠦ ᠪᠦᠯᠵᠢᠭᠡᠨ ᠬᠠᠲᠤᠨ ᠰᠢᠭ᠋ ᠡᠢᠨ ᠮᠡᠭᠰᠢᠬᠦ ᠨᠣᠢᠲᠠᠨ ᠵᠣᠪᠬᠢ ᠲᠠᠢ ᠬᠠᠷᠠ ᠨᠢᠳᠦ ᠬᠤᠷᠠᠭᠰᠠᠨ ᠣᠯᠠᠨ ᠤ᠋ ᠳᠣᠲᠣᠷᠠ ᠴᠥᠭᠡᠨ ᠦᠭᠡᠢ ᠪᠠᠢᠵᠤ ᠪᠢᠯᠡ᠃ ᠬᠠᠳᠠᠲᠤ ᠥᠨᠳᠥᠷ ᠦ᠋ᠨ ᠴᠢᠯᠠᠭᠤ ᠲᠠᠢ ᠪᠠᠯ ᠳ᠋ᠤ᠌ ᠣᠴᠢᠵᠤ ᠲᠣᠭᠲᠠᠭᠰᠠᠨ ᠵᠠᠯᠠᠭᠤ ᠡᠴᠢᠭᠡ ᠶ᠋ᠢᠨ ᠴᠢᠰᠤ ᠲᠠᠢ ᠲᠣᠯᠣᠭᠠᠢ ᠶ᠋ᠢ ᠲᠠᠰᠤ ᠲᠡᠪᠡᠷᠢᠨ ᠴᠢᠮᠡᠭᠡ ᠲᠠᠰᠤᠷᠠᠪᠠ᠃ ᠴᠢᠨ ᠲᠣᠯᠣᠭᠠᠢ ᠪᠦᠷᠬᠦᠨ ᠴᠢᠭᠤᠯᠤᠭᠰᠠᠨ ᠵᠤᠨ ᠣᠯᠠᠨ ᠴᠤ᠌ ᠠᠮᠢᠰᠬᠤᠭᠠ ᠳᠠᠷᠤᠵᠤ᠂ ᠬᠠᠶᠠ ᠨᠢᠭᠡ ᠮᠣᠷᠢ ᠲᠤᠷᠭᠢᠬᠤ᠂ ᠳᠥᠷᠥᠭᠡ ᠬᠠᠷᠰᠢᠬᠤ ᠯᠠ ᠰᠣᠨᠣᠰᠳᠠᠬᠤ ᠨᠠᠮ ᠭᠦᠮ ᠳ᠋ᠦ᠍ ᠬᠦᠦ ᠵᠤᠭᠤᠤᠬᠠᠨ ᠥᠨᠳᠡᠢᠯᠡ᠃ ᠲᠣᠭᠣᠷᠢᠭᠰᠠᠨ ᠣᠯᠠᠨ ᠢ᠋ ᠨᠣᠢᠲᠠᠨ ᠨᠢᠳᠦ ᠪᠡᠷ ᠴᠢᠮᠡᠭᠡ ᠦᠭᠡᠢ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠱᠠᠷᠬᠢᠭᠤᠯᠤᠨ ᠪᠣᠰᠴᠤ ᠠᠯᠬᠤᠪᠠ᠃ ᠵᠢᠭᠠᠯ ᠬᠦᠦ ᠶ᠋ᠢᠨ ᠴᠢᠬᠢᠨ ᠳ᠋ᠡᠬᠢ ᠲᠥᠷᠥ ᠲᠡᠢ ᠠᠯᠲᠠᠨ ᠡᠭᠡᠮᠦᠭ ᠲᠦ᠍ ᠳᠤᠰᠤᠯ ᠨᠢᠯᠪᠤᠰᠤ ᠰᠢᠭᠢᠳᠬᠡᠭᠡ ᠮᠡᠲᠦ ᠭᠢᠯᠠᠯᠵᠠᠬᠤ ᠠᠭᠠᠳ ᠲᠣᠷᠭᠠᠨ ᠡᠯᠢᠭᠡᠪᠴᠢᠨ ᠦ᠌ ᠡᠩᠭᠡᠷ ᠪᠡᠶᠡ ᠡᠴᠢᠭᠡ ᠶ᠋ᠢᠨ ᠴᠢᠰᠤᠨ ᠳ᠋ᠤ᠌ ᠨᠡᠪᠴᠢᠵᠡᠢ᠃ ᠪᠦᠯᠵᠢᠭᠡᠨ ᠬᠠᠲᠤᠨ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢ ᠲᠠᠰᠤ ᠲᠡᠪᠡᠷᠢᠭᠡᠳ ᠬᠠᠳᠠ ᠴᠢᠯᠠᠭᠤᠨ ᠳ᠋ᠤ᠌ ᠪᠦᠳᠦᠴᠢᠨ ᠥᠭᠰᠥᠬᠦ ᠬᠦᠦ ᠪᠡᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠭᠠᠪᠠ᠃ ᠭᠡᠨᠡᠳᠲᠡ ᠨᠢᠳᠦᠨ ᠦ᠌ ᠦᠵᠦᠭᠦᠷ ᠲᠦ᠍ ᠲᠣᠷᠣᠯᠵᠠᠬᠤ ᠪᠠᠷᠠᠭᠠᠨ ᠳᠦᠷᠰᠦᠨ ᠡᠴᠡ ᠳᠠᠪ ᠬᠢᠲᠡᠯᠡ ᠴᠣᠴᠢᠵᠠᠢ᠃ ᠡᠨᠡ ᠬᠠᠯᠠᠭᠤᠨ ᠳ᠋ᠤ᠌ ᠦᠰᠦ ᠲᠡᠢ ᠳᠡᠪᠡᠯ ᠡᠮᠦᠰᠴᠦ᠂ ᠳᠡᠯ ᠲᠡᠢ ᠰᠠᠷᠯᠤᠭ ᠤᠨᠤᠭᠰᠠᠨ ᠮᠥᠨᠥᠬᠡᠨ ᠬᠣᠷᠴᠢ ᠣᠯᠠᠨ ᠤ᠋ ᠳᠤᠮᠳᠠ ᠢᠨᠢᠶᠡᠵᠦ ᠵᠣᠭᠰᠣᠪᠠ᠃ ᠲᠡᠷᠡ ᠲᠡᠨᠡᠭ ᠶᠦᠮ ᠤᠤ᠂ ᠰᠣᠯᠢᠶᠠ ᠲᠠᠢ ᠬᠥᠮᠦᠨ ᠪᠢᠰᠢ ᠪᠣᠯᠵᠤ ᠲᠠᠭᠠᠷᠠᠯᠠ᠃ ᠬᠡᠭᠡᠷᠡ ᠶ᠋ᠢᠨ ᠠᠢᠮᠠᠭ ᠤ᠋ᠨ ᠨᠣᠶᠠᠳ ᠬᠠᠮᠤᠭ ᠤ᠋ᠨ ᠬᠡᠷᠡᠭᠲᠡᠢ ᠬᠥᠮᠦᠨ ᠢ᠋ᠶ᠋ᠡᠨ ᠬᠠᠮᠤᠭ ᠤ᠋ᠨ ᠠᠳᠠᠭ ᠤ᠋ᠨ ᠠᠮᠢᠲᠠᠨ ᠤ᠋ ᠳᠦᠷᠢ ᠪᠡᠷ ᠨᠢᠭᠤᠭᠰᠠᠨ ᠪᠤᠰᠤ ᠤᠤ? ᠵᠦ᠋ᠪᠦ᠋ ᠠᠷᠪᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠪᠠᠷᠠᠵᠤ᠂ ᠢᠳᠡᠬᠦ ᠬᠣᠭᠣᠯᠠ ᠪᠢᠰᠢ ᠠᠵᠢ᠃ ᠲᠡᠳᠡ ᠴᠡᠴᠡᠨ ᠴᠡᠯᠮᠡᠭ ᠳᠡᠭᠡᠳᠦᠰ ᠦ᠋ᠨ ᠵᠣᠪᠠᠯᠠᠩ ᠦᠵᠡᠭᠰᠡᠨ ᠦᠷᠡᠰ ᠶᠦᠮ᠃ ᠤᠯᠠᠮ ᠤᠬᠠᠭᠠᠵᠢᠨᠠ ᠪᠣᠢ ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠦᠰᠦ ᠲᠡᠢ ᠲᠣᠯᠣᠭᠠᠢ ᠠᠷᠵᠠᠰᠬᠢᠬᠦ ᠰᠢᠭ ᠪᠣᠯᠵᠤ᠂ ᠪᠤᠰᠢᠭᠤᠬᠠᠨ ᠯᠠ ᠶᠢᠷᠲᠢᠨᠴᠦ ᠳ᠋ᠦ᠍ ᠲᠦᠰᠢᠭ ᠪᠣᠯᠬᠤ ᠭᠠᠭᠴᠠ ᠬᠦᠦ ᠪᠡᠨ ᠪᠠᠷᠠᠲᠠᠯᠠ᠃
ᠲᠡᠮᠦᠵᠢᠨ ᠦᠭᠡ ᠶ᠋ᠢᠨ ᠨᠢᠯᠪᠤᠰᠤ ᠴᠢᠮᠡᠭᠡ ᠦᠭᠡᠢ ᠤᠷᠤᠰᠪᠠᠴᠤ ᠳᠠᠭᠤ ᠲᠠᠯᠪᠢᠵᠤ ᠮᠡᠭᠰᠢᠭᠰᠡᠨ ᠦᠭᠡᠢ᠂ ᠪᠢᠴᠢᠬᠠᠨ ᠬᠥᠮᠥᠭᠡᠢ ᠪᠡᠨ ᠴᠢᠰᠤ ᠭᠠᠷᠲᠠᠯᠠ ᠵᠠᠭᠤᠵᠠᠢ᠃ ᠲᠡᠷᠡ ᠪᠡᠷ ᠬᠠᠭᠠᠨ ᠡᠴᠢᠭᠡ ᠶ᠋ᠢᠨ ᠲᠣᠯᠣᠭᠠᠢ ᠦᠭᠡᠢ ᠱᠠᠷᠢᠯ ᠤ᠋ᠨ ᠡᠮᠦᠨᠡ ᠣᠴᠢᠵᠤ ᠬᠠᠳᠠᠨ ᠳᠡᠭᠡᠷᠡ ᠶᠠᠭᠬᠢᠲᠠᠯᠠ ᠰᠥᠬᠥᠷᠡᠨ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠭᠠᠭᠴᠠ ᠴᠣ ᠪᠤᠭᠤᠷᠤᠯ ᠦᠰᠦ ᠦᠭᠡᠢ ᠭᠦᠷᠦᠮᠡᠯ ᠭᠡᠵᠢᠭᠡᠨ ᠦ᠌ ᠬᠢᠨᠢ ᠰᠦᠯᠵᠢᠶᠡ ᠶ᠋ᠢ ᠵᠠᠳᠠᠯᠵᠤ ᠡᠬᠢᠯᠡᠬᠦ ᠳ᠋ᠦ᠍ ᠪᠦᠯᠵᠢᠭᠡᠨ ᠬᠠᠲᠤᠨ ᠬᠠᠷᠠᠵᠤ ᠬᠠᠷᠠᠵᠤ ᠰᠠᠶᠢ ᠤᠬᠠᠭᠠᠨ ᠣᠷᠣᠭᠰᠠᠨ ᠮᠡᠲᠦ ᠠᠮᠢ ᠲᠠᠯᠪᠢᠭᠰᠠᠨ ᠡᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠷ ᠢ᠋ ᠬᠦᠯᠢᠭᠰᠡᠨ ᠬᠠᠷᠠ ᠬᠠᠳᠠᠭ ᠤ᠋ᠨ ᠵᠠᠩᠭᠢᠯᠠᠭᠠ ᠶ᠋ᠢ ᠳᠡᠢᠯᠦᠯᠡ᠃ ᠵᠢᠷᠦᠬᠡ ᠵᠦᠰᠦᠮᠡ ᠭᠤᠨᠢᠭᠲᠤ ᠶᠠᠪᠤᠳᠠᠯ ᠤ᠋ᠨ ᠠᠮᠢᠳᠤ ᠭᠡᠷᠡᠴᠢ ᠪᠣᠯᠤᠭᠰᠠᠨ ᠬᠥᠮᠦᠰ ᠳᠣᠣᠷᠠ ᠳᠣᠣᠷᠠ ᠪᠠᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠨ᠂ ᠬᠤᠷᠠᠭᠰᠠᠨ ᠣᠯᠠᠨ ᠵᠠᠬᠠ ᠠ᠋ᠴᠠ ᠪᠠᠨ ᠰᠡᠮᠡᠷᠡᠵᠦ ᠡᠬᠢᠯᠡᠪᠡ᠃
5
ᠶᠧᠯᠢᠦᠢ ᠳᠠᠰᠢ ᠶ᠋ᠢᠨ ᠶᠡᠬᠡ ᠳᠡᠯ ᠲᠡᠢ ᠠᠭᠰᠤᠮ ᠮᠣᠷᠢ ᠶ᠋ᠢ ᠠᠪᠴᠢᠷᠠᠵᠤ ᠥᠭᠬᠦ ᠳ᠋ᠦ᠍ ᠠᠯᠠᠪᠬᠢᠨ ᠮᠣᠷᠳᠠᠭᠰᠠᠨ ᠢ᠋ᠶ᠋ᠠᠨ᠂
— ᠬᠠᠭᠠᠨ ᠬᠠᠪᠤᠯ ᠭᠤᠷᠪᠠᠨ ᠮᠢᠩᠭᠠᠨ ᠴᠠᠭᠠᠨ ᠲᠠᠲ᠋ᠠᠷ ᠢ᠋ᠶ᠋ᠠᠨ ᠠᠪᠰᠤᠭᠠᠢ! ᠭᠡᠪᠡᠯ ᠡᠪᠦᠭᠡᠨ ᠬᠠᠭᠠᠨ ᠬᠠᠳᠠᠲᠤ ᠥᠨᠳᠥᠷᠯᠢᠭ ᠥᠭᠡᠳᠡ ᠮᠣᠷᠢᠨ ᠤ᠋ ᠬᠤᠷᠳᠤ ᠪᠠᠷ ᠳᠡᠭᠦᠯᠢᠨ ᠠᠢᠰᠤᠢ ᠡᠷᠡᠰ ᠢ᠋ ᠵᠢᠭᠠᠵᠤ᠂
— ᠡᠷᠬᠢᠮ ᠳᠡᠭᠡᠳᠦᠰ ᠲᠣᠭᠲᠠᠵᠤ ᠬᠠᠢᠷᠠᠯᠠ᠃ ᠠᠪᠬᠤ ᠡᠵᠡᠳ ᠨᠢ ᠠᠢᠰᠤᠢ ᠶᠠᠪᠤᠬᠤ ᠰᠢᠭ᠋ ᠪᠠᠢᠨᠠ ᠭᠡᠯᠡ᠃ ᠨᠡᠭᠡᠷᠡᠨ ᠴᠦ᠍ ᠠᠮᠠ ᠪᠤᠯᠢᠶᠠᠨ ᠲᠡᠮᠡᠦᠯᠬᠦ ᠰᠠᠷᠠ ᠲᠠᠢ ᠵᠡᠭᠡᠷᠳᠡ ᠮᠣᠷᠢᠨ ᠤ᠋ ᠴᠤᠯᠪᠤᠭᠤᠷ ᠢ᠋ ᠬᠥᠲᠥᠴᠢ ᠴᠡᠷᠢᠭ ᠲᠡᠭᠡᠨ ᠰᠢᠳᠡᠵᠦ ᠥᠭᠭᠦᠭᠰᠡᠨ ᠢ᠋ᠶ᠋ᠡᠨ ᠡᠷᠡ ᠳᠤᠮᠳᠠ ᠶ᠋ᠢᠨ ᠨᠠᠰᠤᠨ ᠤ᠋ ᠪᠠᠭᠠᠲᠤᠷ᠂
一 ᠬᠠᠭᠠᠨ ᠠᠪᠤ ᠠᠮᠤᠭᠤᠯᠠᠩ ᠤᠤ? ᠭᠡᠮᠡᠨ ᠵᠣᠯᠭᠠᠬᠤ ᠨᠢ ᠣᠮᠣᠭ ᠶᠡᠬᠡᠲᠦ ᠥᠬᠢᠨᠪᠠᠷᠬᠠᠭ ᠪᠥᠯᠥᠭᠡ᠃
一 ᠠᠮᠤᠭᠤᠯᠠᠩ! ᠭᠡᠳ ᠬᠠᠪᠤᠯ ᠬᠠᠭᠠᠨ ᠤᠤᠭᠠᠨ ᠬᠦᠦ ᠪᠡᠨ ᠬᠥᠯ ᠡᠴᠡ ᠲᠣᠯᠣᠭᠠᠢ ᠬᠦᠷᠲᠡᠯᠡ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
一 ᠲᠡᠢᠨ ᠳ᠋ᠦ᠍ ᠪᠢᠰᠢ ᠨᠠᠢᠷ ᠲᠤ᠌ ᠶᠠᠪᠤᠭᠠᠳ ᠢᠷᠡᠭᠰᠡᠨ ᠶᠦᠮ ᠰᠢᠭ ᠪᠠᠢᠬᠤ ᠴᠢᠨᠢ ᠶᠠᠭᠤ ᠪᠣᠢ ᠭᠡᠮᠡᠨ ᠨᠠᠷᠠᠨ ᠳ᠋ᠤ᠌ ᠬᠠᠯᠠᠭᠰᠠᠨ ᠬᠦᠷᠡᠩ ᠬᠠᠳᠠ ᠬᠠᠩ ᠬᠢᠲᠡᠯᠡ ᠢᠨᠢᠶᠡᠯᠳᠦᠵᠦ ᠰᠠᠭᠤᠲᠠᠯᠠ ᠪᠠᠷᠳᠠᠨᠪᠠᠭᠠᠲᠤᠷ ᠢᠷᠡᠵᠡᠢ᠃ ᠲᠡᠷᠡ ᠪᠡᠷ ᠮᠥᠷᠥ ᠪᠡᠨ ᠪᠦᠲᠡᠭᠡᠵᠦ ᠪᠠᠭᠤᠭᠰᠠᠨ ᠲᠠᠰᠤ ᠬᠠᠷᠠ ᠦᠰᠦ ᠪᠡᠨ ᠬᠦᠷᠦᠵᠦ ᠰᠦᠯᠵᠢᠬᠦ ᠨᠢ ᠦᠭᠡᠢ ᠠᠭᠠᠳ ᠢᠳᠡᠷ ᠶᠢᠰᠦ ᠶ᠋ᠢᠨ ᠬᠦᠢᠲᠡᠨ ᠳ᠋ᠦ᠍ ᠴᠦ᠍ ᠲᠣᠯᠣᠭᠠᠢ ᠨᠢᠴᠦᠭᠦᠨ ᠶᠠᠪᠤᠬᠤ ᠪᠢᠯᠡ᠃
一 ᠡᠴᠢᠭᠡ ᠬᠠᠭᠠᠨ ᠡᠰᠡᠨ ᠠᠮᠤᠭᠤᠯᠠᠩ ᠤᠤ?
一 ᠮᠡᠨᠳᠦ ᠠ᠋! ᠭᠡᠰᠡᠨ ᠢ᠋ᠶ᠋ᠡᠨ ᠶᠢᠰᠦᠭᠡᠢ ᠠᠴᠢ ᠪᠠᠨ ᠳᠡᠷᠭᠡᠳᠡ ᠪᠡᠨ ᠲᠡᠳᠡᠨ ᠰᠠᠭᠤᠯᠭᠠᠨ᠄
一 ᠲᠣᠮᠣ ᠡᠷᠡ ᠪᠣᠯᠵᠠᠢ ᠤᠤ? ᠭᠡᠯᠡ᠃ ᠨᠡᠭᠡᠷᠡᠨ ᠯᠡ ᠵᠠᠪᠢᠯᠠᠭᠰᠠᠨ ᠬᠣᠢᠨᠠ ᠪᠠᠨ ᠴᠤ᠌ ᠡᠪᠦᠭᠡᠨ ᠬᠠᠭᠠᠨ ᠠ᠋ᠴᠠ ᠥᠨᠳᠥᠷ ᠬᠠᠷᠠᠭᠳᠠᠬᠤ ᠪᠥᠯᠥᠭᠡ᠃ ᠲᠡᠳᠦᠢ ᠯᠡ ᠤᠳᠠᠯ ᠦᠭᠡᠢ ᠬᠤᠲᠤᠭᠲᠤ ᠮᠣᠩᠬᠣᠷ᠂ ᠬᠤᠯᠠᠨ᠂ ᠬᠣᠲᠣᠯᠠ ᠭᠤᠷᠪᠠ ᠳᠠᠪᠬᠢᠯᠳᠤᠨ ᠢᠷᠡᠵᠦ᠂ ᠬᠠᠪᠤᠯ ᠬᠠᠭᠠᠨ ᠬᠠᠯᠠᠭᠤᠨ ᠪᠦᠯᠢ ᠪᠡᠨ ᠴᠤᠭᠯᠠᠭᠤᠯᠵᠤ ᠠᠪᠤᠭᠠᠳ ᠰᠠᠶᠢ ᠶᠸᠯᠢᠦᠢ ᠲᠡᠰᠢ ᠤᠷᠤᠭᠤ ᠬᠠᠷᠠᠴᠠ ᠢᠯᠡᠭᠡᠵᠦ᠂
一 ᠡᠵᠡᠨ ᠳᠡᠭᠡᠳᠦᠰ ᠮᠢᠨᠢ᠂ ᠲᠠᠨ ᠤ᠋ ᠶᠡᠬᠡ ᠴᠡᠷᠢᠭ ᠲᠦ᠍ ᠲᠠᠪᠤᠨ ᠲᠦᠮᠡᠲᠦ ᠠᠬᠠᠯᠠᠵᠤ᠂ ᠢᠰᠬᠡᠷᠬᠦ ᠵᠡᠪᠡ᠂ ᠢᠷᠲᠦ ᠵᠢᠳᠠ ᠶ᠋ᠢ ᠰᠥᠷᠭᠡᠵᠦ ᠶᠠᠪᠤᠭᠰᠠᠨ ᠬᠥᠪᠡᠭᠦᠳ ᠲᠦ᠍ ᠮᠢᠨᠢ ᠠᠯᠪᠠᠲᠤ ᠪᠠᠨ ᠬᠠᠢᠷᠠᠯᠠ! ᠡᠪᠦᠭᠡᠨ ᠨᠠᠳᠠ ᠳ᠋ᠤ᠌ ᠬᠠᠲᠤᠨ᠂ ᠨᠤᠭᠤᠨ ᠬᠣᠶᠠᠷ ᠪᠣᠯᠤᠨᠠ ᠭᠡᠯᠡ᠃ ᠶᠸᠯᠢᠦᠢ ᠲᠡᠰᠢ᠂
一 ᠲᠠᠨ ᠤ᠋ ᠲᠠᠭᠠᠯᠠᠯ ᠮᠡᠳᠡᠭ ᠭᠡᠰᠡᠨ ᠢ᠋ᠶ᠋ᠡᠨ ᠣᠮᠣᠭᠯᠠᠩ ᠬᠦᠯᠦᠭ ᠢ᠋ᠶ᠋ᠡᠨ ᠦᠯᠦ ᠶᠠᠯᠢᠭ ᠳᠠᠪᠢᠷᠠᠬᠤ ᠳ᠋ᠤ᠌ ᠠᠭᠤᠯᠠ ᠶ᠋ᠢᠨ ᠤᠷᠤᠭᠤ ᠤᠯᠠᠭᠠᠨ ᠲᠣᠭᠣᠰᠣ ᠲᠠᠢ ᠪᠠᠨ ᠣᠷᠣᠵᠤ ᠶᠠᠪᠤᠴᠢᠬᠠᠪᠠ᠃ ᠴᠢᠨ ᠲᠣᠯᠣᠭᠠᠢ ᠶ᠋ᠢ ᠬᠥᠮᠦᠨ ᠲᠣᠯᠣᠭᠠᠢ ᠪᠠᠷ ᠲᠠᠬᠢᠬᠰᠠᠨ ᠬᠠᠳᠠᠲᠤ ᠥᠨᠳᠥᠷ ᠦ᠋ᠨ ᠬᠢᠷᠠᠭᠤᠲᠤ ᠣᠷᠣᠢ ᠳ᠋ᠤ᠌ ᠳᠥᠷᠪᠡᠨ ᠬᠥᠮᠦᠨ ᠯᠡ ᠪᠥᠷᠲᠥᠯᠵᠡᠨ ᠦᠯᠡᠳᠡᠵᠦ᠂ ᠰᠦᠷᠲᠦ ᠶᠣᠰᠣᠯᠠᠯ ᠤ᠋ᠨ ᠭᠤᠨᠢᠭᠲᠤ ᠲᠡᠭᠦᠰᠬᠡᠯ ᠳ᠋ᠦ᠍ ᠰᠦᠷᠡᠬᠡᠢ ᠴᠣᠴᠢᠷᠳᠠᠭᠰᠠᠨ ᠣᠯᠠᠨ ᠲᠦᠮᠡᠨ ᠴᠢᠨ ᠨᠠᠭᠤᠷ ᠤ᠋ᠨ ᠬᠥᠨᠳᠡᠢ᠂ ᠷᠠᠰᠢᠶᠠᠨᠲᠤ ᠪᠦᠷᠢᠳᠦ ᠶ᠋ᠢᠨ ᠬᠥᠪᠡᠭᠡ ᠪᠡᠷ ᠠᠷᠤ ᠶ᠋ᠢᠨ ᠨᠢᠭᠡ ᠲᠠᠷᠠᠵᠤ᠂ ᠠᠮᠢᠳᠤ ᠢᠷᠡᠭᠰᠡᠨ ᠴᠡᠷᠢᠭ ᠦ᠋ᠳ ᠠᠪᠤ ᠡᠵᠢ᠂ ᠠᠮᠠᠷᠠᠭ ᠰᠠᠳᠤᠨ ᠲᠠᠢ ᠪᠠᠨ ᠭᠠᠯ ᠨᠢᠭᠡᠰᠦᠨ ᠪᠠᠶᠠᠷᠯᠠᠯᠳᠤᠵᠤ᠂ ᠦᠬᠦᠵᠦ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠦ᠋ᠨ ᠠᠷᠤ ᠭᠡᠷ ᠦ᠋ᠨ ᠬᠢᠨ ᠣᠢ ᠳ᠋ᠤ᠌ ᠠᠪᠲᠠᠨ ᠮᠠᠢᠬᠠᠨ ᠢ᠋ᠶ᠋ᠠᠨ ᠠᠴᠢᠶᠠᠯᠠᠵᠤ ᠤᠢᠲᠠᠨ ᠬᠠᠷᠭᠤᠢ ᠳ᠋ᠤ᠌ ᠭᠠᠷᠴᠤ ᠪᠠᠢᠯᠠ᠃ ᠡᠯᠡ ᠶᠡᠬᠡ ᠬᠥᠯ ᠬᠥᠳᠡᠯᠭᠡᠭᠡᠨ ᠢ᠋ ᠤᠳᠠᠭᠠᠨ ᠠᠵᠢᠵᠤ ᠰᠠᠭᠤᠭᠰᠠᠨ ᠬᠠᠪᠤᠯ ᠬᠠᠭᠠᠨ ᠠᠴᠢ ᠬᠦᠦ ᠪᠡᠨ ᠬᠠᠨᠢᠰᠢᠶᠠᠨ᠂
— ᠶᠢᠰᠦᠭᠡᠢ ᠪᠠᠭᠠᠲᠤᠷ᠂ ᠴᠢ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠷᠢᠭᠦᠯᠡᠵᠦ ᠮᠣᠷᠳᠠᠭᠰᠠᠨ ᠡᠷᠡᠰ ᠢ᠋ ᠢᠯᠠᠭᠳᠠᠭᠰᠠᠨ ᠴᠡᠷᠢᠭ ᠭᠡᠳ ᠡᠰᠡ ᠲᠣᠭᠣᠵᠤ ᠪᠠᠢᠯᠠ ᠤᠤ? ᠭᠡᠬᠦ ᠳ᠋ᠦ᠍ ᠬᠠᠭᠠᠨ ᠡᠪᠦᠭᠡ ᠬᠥᠮᠦᠨ ᠭᠡᠮᠡᠨ ᠲᠣᠭᠣᠵᠤ ᠦᠭᠡ ᠰᠣᠯᠢᠭᠰᠠᠨ ᠳ᠋ᠤ᠌ ᠶᠢᠰᠦᠭᠡᠢ ᠶᠡᠬᠡ ᠯᠡ ᠪᠡᠶᠡᠰᠴᠦ᠂
— ᠬᠠᠭᠠᠨ ᠡᠪᠦᠭᠡ ᠮᠢᠨᠢ᠂ ᠮᠠᠨ ᠤ᠋ ᠴᠡᠷᠢᠭ ᠠᠯᠲᠠᠨ ᠤᠯᠤᠰ ᠤ᠋ᠨ ᠴᠡᠷᠢᠭ ᠲᠦ᠍ ᠬᠢᠶᠠᠷ ᠴᠣᠬᠢᠭᠤᠯᠤᠭᠰᠠᠨ ᠭᠡᠰᠡᠨ ᠬᠡᠮᠡᠪᠡᠯ ᠪᠤᠭᠤᠷᠤᠯ ᠬᠠᠭᠠᠨ ᠭᠦᠳ ᠭᠦᠳ ᠢᠨᠢᠶᠡᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠮᠡᠭᠡᠷᠲᠦᠭᠡᠳ᠂
— ᠺᠢᠳᠠᠨ ᠢᠯᠠᠭᠳᠠᠵᠤ᠂ ᠪᠢᠳᠡ ᠢᠯᠠᠭᠰᠠᠨ ᠠ᠋ ᠬᠦ ᠭᠡᠯᠡ᠃ ᠶᠢᠰᠦᠭᠡᠢ ᠬᠥᠪᠡᠭᠦᠨ ᠦ᠌ ᠴᠣᠭᠯᠢᠭ ᠨᠢᠳᠦᠨ ᠳ᠋ᠦ᠍ ᠭᠠᠢᠬᠠᠰᠢᠷᠠᠯ ᠨᠢᠭᠡᠨᠲᠡ ᠬᠢᠯᠠᠰᠬᠢᠵᠦ᠂
— ᠶᠠᠭᠠᠬᠢᠭᠠᠳ ᠭᠡᠪᠡᠯ ᠡᠪᠦᠭᠡᠨ ᠬᠠᠭᠠᠨ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠦᠭᠡᠢ᠂ ᠲᠠᠰᠢᠭᠤᠷ ᠢ᠋ᠶ᠋ᠠᠨ ᠲᠤᠯᠤᠨ ᠪᠣᠰᠤᠭᠠᠳ ᠬᠠᠳᠠᠲᠤ ᠥᠨᠳᠥᠷ ᠦ᠋ᠨ ᠣᠷᠣᠢ ᠰᠢᠷᠳᠡᠪᠡ᠃ ᠶᠠᠭᠤᠬᠠᠨ ᠢ᠋ ᠴᠦ᠍ ᠭᠡᠯᠡ 《ᠶᠠᠭᠠᠬᠢᠭᠠᠳ》ᠭᠡᠮᠡᠨ ᠯᠠᠪᠯᠠᠵᠤ ᠠᠰᠠᠭᠤᠪᠠᠯ ᠬᠥᠬᠢᠵᠦ ᠪᠡᠶᠡᠰᠴᠦ᠂ ᠬᠥᠬᠢᠭᠦᠯᠦᠨ ᠱᠠᠩᠨᠠᠬᠤ ᠤᠭᠯᠠᠭᠤᠷᠭᠠ ᠶ᠋ᠢ ᠨᠢ ᠲᠡᠮᠲᠡᠷᠢᠵᠦ ᠤᠴᠢᠷ ᠢ᠋ ᠨᠢ ᠲᠠᠢᠯᠵᠤ ᠥᠭᠳᠡᠭ ᠪᠤᠭᠤᠷᠤᠯ ᠬᠠᠭᠠᠨ ᠡᠪᠦᠭᠡ ᠡᠨᠡ ᠤᠳᠠᠭᠠ ᠬᠠᠷᠢᠭᠤ ᠡᠰᠡ ᠬᠡᠯᠡᠭᠰᠡᠨ ᠨᠢ《ᠬᠦᠦ ᠴᠢ ᠡᠷᠡ ᠶ᠋ᠢᠨ ᠴᠡᠭᠡᠯ ᠳ᠋ᠦ᠍ ᠬᠦᠷᠪᠡ᠂ ᠥᠪᠡᠷ ᠢ᠋ᠶ᠋ᠡᠨ ᠲᠠᠢᠯᠵᠤ ᠣᠯ 》ᠭᠡᠰᠡᠨ ᠦᠭᠡ ᠦᠭᠡᠢ ᠬᠠᠷᠢᠭᠤ ᠴᠤ᠌ ᠪᠠᠢᠵᠤ ᠪᠣᠯᠬᠤ ᠶᠤᠮ᠃ ᠡᠨᠡ ᠬᠢᠷᠢ ᠳᠥᠷᠥᠭᠡ ᠭᠥᠯᠢᠮ ᠬᠠᠪᠢᠷᠠᠬᠣ᠂ ᠠᠮᠠᠭᠠᠢ ᠲᠡᠩᠭᠡᠯᠢᠭ ᠬᠠᠩᠭᠢᠨᠠᠬᠤ ᠰᠣᠨᠣᠰᠳᠠᠵᠤ ᠬᠥᠲᠥᠴᠢ ᠴᠡᠷᠢᠭ ᠬᠠᠭᠠᠨ ᠬᠦᠯᠦᠭ ᠢ᠋ ᠠᠪᠴᠢᠷᠠᠯᠠ᠃ ᠬᠠᠪᠤᠯ ᠵᠢᠯᠣᠭᠣ ᠴᠤᠯᠪᠤᠭᠤᠷ ᠢ᠋ᠶ᠋ᠠᠨ ᠬᠤᠮᠢᠵᠤ ᠵᠠᠯᠠᠭᠤ ᠬᠥᠮᠦᠨ ᠮᠡᠲᠦ ᠰᠡᠪ ᠬᠢᠨ ᠮᠣᠷᠳᠠᠭᠰᠠᠨ ᠢ᠋ᠶ᠋ᠠᠨ ᠪᠠᠷᠠ ᠪᠤᠯᠤᠭᠠᠴᠢᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠬᠠᠳᠠᠲᠤ ᠥᠨᠳᠥᠷ ᠦ᠋ᠨ ᠬᠢᠷᠠᠭᠤᠲᠤ ᠣᠷᠣᠢ ᠤᠷᠤᠭᠤ ᠵᠢᠳᠬᠦᠯᠡᠨ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠵᠣᠪᠠᠯᠠᠩ ᠳ᠋ᠤ᠌ ᠠᠪᠲᠠᠭᠰᠠᠨ ᠢᠵᠢᠢ ᠬᠦᠦ ᠬᠣᠶᠠᠷ ᠵᠡᠭᠦᠳᠦ ᠵᠡᠷᠭᠡᠯᠭᠡ ᠮᠡᠲᠦ ᠰᠡᠭᠦᠳᠡᠢᠨ ᠪᠣᠰᠴᠤ ᠢᠷᠡᠪᠡ᠃ ᠦᠬᠦᠯ ᠦ᠋ᠨ ᠦᠨᠦᠷ ᠠᠪᠤᠭᠰᠠᠨ ᠮᠡᠲᠦ ᠮᠣᠷᠢᠳ ᠬᠠᠮᠠᠷ ᠲᠠᠴᠢᠭᠢᠨᠠᠭᠤᠯᠤᠨ ᠬᠤᠤᠬᠢᠷᠴᠤ ᠮᠢᠩᠭᠠ ᠳᠠᠪᠢᠷᠠᠪᠠᠴᠤ ᠣᠷᠣᠭᠰᠢ ᠠᠯᠬᠤᠭᠰᠠᠨ ᠦᠭᠡᠢ ᠠᠵᠢ᠃ ᠬᠠᠪᠤᠯ ᠬᠠᠭᠠᠨ ᠬᠣᠭᠣᠯᠠᠢ ᠵᠠᠰᠠᠨ ᠴᠢᠮᠡᠭᠡ ᠦᠭᠭᠦᠭᠡᠳ ᠨᠢᠭᠦᠯᠡᠰᠦᠩᠭᠦᠢ ᠨᠢᠳᠦ ᠪᠡᠷ ᠬᠠᠷᠠᠪᠠᠯ ᠥᠨᠥᠴᠢᠨ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠲᠡᠭ ᠳᠥᠷᠪᠡᠯᠵᠢᠨ ᠴᠢᠯᠠᠭᠤ ᠭᠣᠷᠲᠢᠭ ᠲᠠᠲᠠᠵᠤ ᠥᠭᠡᠳᠡ ᠪᠣᠯᠤᠭᠠᠴᠢ ᠬᠠᠭᠠᠨ ᠢ᠋ ᠨᠤᠲᠤᠭᠯᠠᠭᠤᠯᠵᠠᠢ᠃ ᠲᠠᠰᠤ ᠴᠠᠪᠴᠢᠭᠤᠯᠤᠭᠰᠠᠨ ᠲᠣᠯᠣᠭᠠᠢ ᠶ᠋ᠢ ᠨᠢ ᠶᠡᠬᠡ ᠪᠡᠶᠡ ᠳ᠋ᠦ᠍ᠨᠢ ᠡᠪᠯᠡᠭᠦᠯᠦᠨ ᠲᠠᠯᠪᠢᠵᠤ ᠦᠰᠦ ᠶ᠋ᠢ ᠨᠢ ᠵᠠᠳᠠᠯᠤᠨ ᠨᠢᠭᠤᠷ ᠢ᠋ ᠨᠢ ᠪᠦᠲᠡᠭᠡᠵᠦ᠂ ᠬᠦᠦ ᠲᠠᠵᠢ ᠲᠣᠷᠭᠠᠨ ᠡᠯᠢᠭᠡᠪᠴᠢ ᠪᠡᠨ᠂ ᠬᠠᠲᠤᠨ ᠬᠣᠷᠭᠣᠢ ᠤᠤᠵᠢ ᠪᠠᠨ ᠲᠠᠭᠠᠷᠠᠬᠤ ᠪᠣᠢ ᠭᠡᠰᠡᠨ ᠰᠢᠭ ᠳᠠᠪᠬᠤᠷᠯᠠᠨ ᠨᠥᠮᠥᠷᠭᠡᠵᠦ ᠣᠷᠬᠢᠭᠰᠠᠨ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠶᠢᠰᠦᠭᠡᠢ ᠬᠥᠪᠡᠭᠦᠨ ᠦ᠌ ᠴᠡᠭᠡᠵᠢ ᠤᠷᠤᠭᠤ ᠨᠢᠭᠡ ᠶᠠᠭᠤᠮᠠ ᠣᠭᠰᠢᠭᠠᠳ ᠢᠷᠡᠬᠦ ᠰᠢᠭ ᠪᠣᠯᠪᠠ᠃ ᠲᠡᠷᠡ ᠪᠡᠷ ᠡᠪᠦᠭᠡᠨ ᠬᠠᠭᠠᠨ ᠠ᠋ᠴᠠ ᠨᠢᠯᠪᠤᠰᠤ ᠪᠠᠨ ᠨᠢᠭᠤᠵᠤ᠂ ᠨᠢᠳᠦ ᠪᠡᠨ ᠡᠰᠡ ᠴᠠᠪᠴᠢᠨ ᠮᠡᠯᠡᠢᠲᠡᠯᠡ ᠰᠢᠷᠳᠡᠬᠦ ᠳ᠋ᠦ᠍ ᠮᠥᠨᠥᠬᠢ ᠭᠤᠸᠠ ᠬᠠᠲᠤᠨ ᠠᠪᠠᠬᠠᠢ ᠴᠠᠷᠺᠢᠯ ᠨᠣᠳᠤᠢ ᠶ᠋ᠢᠨ ᠪᠠᠷᠠ ᠰᠦᠷ ᠮᠠᠭᠤ ᠲᠠᠢ ᠱᠠᠷᠢᠯ ᠢ᠋ ᠨᠠᠷᠠ ᠵᠥᠪ ᠭᠤᠷᠪᠠ ᠲᠣᠭᠣᠷᠢᠭᠠᠳ ᠬᠥᠯ ᠳ᠋ᠦ᠍ᠨᠢ ᠰᠥᠭᠥᠳᠦᠯᠡ᠃ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠠᠯᠠᠭ ᠨᠢᠳᠦᠨ ᠡᠴᠡ ᠨᠢᠯᠪᠤᠰᠤ ᠤᠷᠤᠰᠤᠭᠰᠠᠭᠠᠷ ᠬᠡᠳᠦᠢ ᠴᠦ᠍ ᠡᠭᠰᠢᠵᠦ ᠮᠡᠭᠰᠢᠭᠰᠡᠨ ᠦᠭᠡᠢ᠂ ᠭᠤᠨᠢᠭ ᠲᠤ᠌ ᠠᠪᠲᠠᠭᠰᠠᠨ ᠴᠤ᠌ ᠲᠣᠯᠣᠭᠠᠢ ᠭᠠᠨᠵᠤᠭᠠᠯᠠᠭᠰᠠᠨ ᠦᠭᠡᠢ ᠶᠡᠬᠡᠮᠰᠦᠭ ᠳᠥᠯᠭᠡᠨ ᠠᠯᠬᠤᠵᠤ ᠮᠤᠬᠤᠯᠠᠭ ᠲᠡᠷᠭᠡᠨᠡ ᠪᠠᠷᠢᠭᠳᠠᠵᠤ ᠪᠤᠰᠤ ᠵᠠᠯᠠᠭᠳᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠣᠷᠣᠵᠤ ᠶᠠᠪᠤᠴᠢᠬᠠᠪᠠ᠃ ᠶᠢᠰᠦᠭᠡᠢ ᠳ᠋ᠦ᠍ ᠪᠠᠬᠠᠷᠬᠠᠬᠤ᠂ ᠪᠠᠰᠠ ᠬᠦ᠌ ᠥᠭᠡᠷᠡ ᠡᠲᠡᠭᠡᠳ ᠨᠢᠭᠡᠨ ᠰᠡᠳᠬᠢᠯ ᠲᠥᠷᠥᠵᠦ ᠪᠢᠯᠡ᠃ ᠶᠡᠷᠦ ᠬᠠᠲᠤᠨ ᠲᠡᠭᠦᠨ ᠢ᠋ ᠬᠥᠮᠦᠨ ᠪᠠᠢᠨᠠ ᠭᠡᠵᠦ ᠲᠣᠭᠣᠵᠤ ᠬᠠᠷᠠᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠬᠠᠨ ᠬᠥᠪᠡᠭᠦᠨ ᠦ᠌ ᠪᠢᠴᠢᠬᠠᠨ ᠴᠡᠭᠡᠵᠢᠨᠡ ᠣᠮᠣᠭᠲᠤ ᠵᠢᠷᠦᠬᠡ ᠨᠢ ᠪᠠᠭᠲᠠᠵᠤ ᠶᠠᠳᠠᠨ ᠳᠡᠯᠡᠰᠴᠦ ᠳᠠᠬᠢᠨ ᠨᠢᠭᠡ ᠬᠠᠷᠠᠬᠤ ᠰᠠᠨ ᠭᠡᠬᠦ ᠬᠢᠵᠠᠭᠠᠷ ᠦᠭᠡᠢ ᠬᠦᠰᠡᠯᠡᠩ ᠳ᠋ᠦ᠍ ᠡᠭᠡᠷᠡᠭᠳᠡᠵᠦ ᠠᠪᠠᠢ᠃ ᠡᠢᠨ ᠭᠥᠯᠢᠷᠡᠵᠦ ᠵᠣᠭᠰᠣᠬᠤ ᠦᠶᠡᠰ ᠥᠵᠢᠨ ᠢᠵᠢᠢ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠬᠣᠢ ᠡᠷᠭᠦᠵᠦ ᠲᠦᠰᠢᠭᠰᠡᠨ ᠵᠢᠭᠠᠯ ᠬᠦᠦ ᠬᠢᠯᠢᠩ ᠪᠠᠳᠠᠷᠠᠭᠰᠠᠨ ᠨᠣᠢᠲᠠᠨ ᠨᠢᠳᠦ ᠪᠡᠷ ᠶᠢᠰᠦᠭᠡᠢ ᠶ᠋ᠢ ᠴᠣᠭᠣ ᠰᠢᠷᠲᠡᠨ ᠥᠩᠭᠡᠷᠡᠪᠡ᠃ ᠣᠷᠣ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠰᠢᠪᠦᠭᠡ ᠪᠡᠷ ᠬᠠᠳᠬᠤᠬᠤ ᠮᠡᠲᠦ ᠴᠣᠷᠭᠢᠵᠤ ᠰᠢᠷᠲᠡᠭᠰᠡᠨ ᠳ᠋ᠦ᠍ ᠬᠠᠷᠠᠴᠠ ᠲᠠᠯᠲᠠᠷᠢᠭᠰᠠᠨ ᠶᠢᠰᠦᠭᠡᠢ᠂
— ᠬᠠᠭᠠᠨ ᠡᠪᠦᠭᠡ ᠠ᠋! ᠡᠨᠡ ᠵᠢᠭᠠᠯ ᠬᠦᠦ ᠶ᠋ᠢ ᠬᠡᠨ ᠭᠡᠳᠡᠭ ᠶᠦᠮ ᠪᠣᠢ ᠭᠡᠪᠡᠯ ᠬᠠᠪᠤᠯ ᠬᠠᠭᠠᠨ ᠮᠥᠨᠥᠬᠢ ᠬᠣᠶᠠᠷ ᠢ᠋ ᠪᠣᠳᠣᠯᠭᠠᠰᠢᠷᠠᠩᠭᠤᠢ ᠨᠢᠳᠦ ᠪᠡᠷ ᠳᠠᠭᠠᠭᠤᠯᠤᠨ ᠬᠠᠷᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂
— ᠲᠡᠮᠦᠵᠢᠨ ᠦᠭᠡ᠁ ᠶᠢᠰᠦᠨ ᠲᠠᠲ᠋ᠠᠷ ᠤ᠋ᠨ ᠬᠠᠭᠠᠨ ᠴᠠᠷᠭᠢᠯ ᠨᠣᠳᠤᠢ ᠶ᠋ᠢᠨ ᠠᠭᠡ ᠨᠢ ᠭᠡᠯᠡ᠃ ᠬᠣᠭᠣᠷᠣᠨᠳᠣ ᠪᠠᠨ ᠳᠦᠷᠪᠡᠭᠡᠨ ᠨᠠᠰᠤᠨ ᠤ᠋ ᠵᠥᠷᠢᠶᠡ ᠲᠡᠢ ᠲᠥᠷᠥᠭᠰᠡᠨ ᠬᠣᠶᠠᠷ ᠡᠷᠡ ᠬᠥᠮᠦᠨ ᠠᠩᠬᠠ ᠤᠳᠠᠭᠠ ᠬᠠᠷᠠᠴᠠ ᠰᠣᠯᠢᠯᠴᠠᠵᠤ ᠪᠠᠢᠭᠠ ᠬᠡᠳᠦᠢ ᠴᠦ᠍ ᠶᠠᠰᠤ ᠶᠠᠩᠭᠢᠨᠠᠲᠠᠯᠠ ᠦᠰ ᠵᠠᠩᠭᠢᠳᠬᠤ ᠰᠢᠭ᠋ ᠰᠠᠨᠠᠭᠳᠠᠨ ᠵᠢᠷᠦᠬᠡ ᠬᠦᠢᠲᠡ ᠳᠠᠭᠠᠭᠠᠵᠤ ᠪᠢᠯᠡ᠃ ᠬᠡᠳᠦᠬᠡᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠡᠯᠡ ᠬᠠᠷᠠᠴᠠ ᠶ᠋ᠢ ᠮᠡᠰᠡᠨ ᠦ᠌ ᠢᠷ ᠢ᠋ᠶ᠋ᠡᠷ ᠲᠠᠰᠤᠳᠠᠵᠤ ᠳᠠᠭᠤᠰᠬᠠᠬᠤ ᠶᠤᠮ ᠭᠡᠵᠦ ᠡᠨᠡ ᠬᠢᠷᠢ ᠬᠡᠨ ᠴᠦ᠍ ᠡᠰᠡ ᠮᠡᠳᠡᠵᠦ ᠪᠥᠯᠥᠭᠡ᠃ ᠲᠣᠭᠣᠰᠣ ᠪᠣᠯᠤᠭᠰᠠᠨ ᠮᠤᠬᠤᠯᠠᠭ ᠲᠡᠷᠭᠡ ᠠᠯᠭᠤᠷᠬᠠᠨ ᠬᠥᠳᠡᠯᠵᠦ᠂ ᠬᠡᠰᠢᠭᠲᠡᠨ ᠡᠷᠡᠰ ᠬᠣᠶᠠᠷ ᠡᠩᠨᠡᠭᠡ ᠪᠣᠯᠤᠨ ᠳᠠᠭᠠᠯᠳᠤᠵᠤ᠂ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠲᠣᠬᠢᠯᠠᠵᠤ ᠪᠠᠭᠤᠭᠰᠠᠨ ᠬᠦᠷᠢᠶᠡ ᠲᠡᠢᠰᠢ ᠣᠳᠴᠠᠢ᠃
ᠬᠠᠪᠤᠯ ᠬᠠᠭᠠᠨ ᠭᠦᠨ ᠪᠣᠳᠣᠯ ᠳ᠋ᠤ᠌ ᠠᠪᠲᠠᠵᠤ ᠬᠥᠯ ᠳᠠᠷᠤᠭᠰᠠᠨ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠮᠣᠷᠢᠨ ᠤ᠋ ᠵᠦᠩ ᠢ᠋ᠶ᠋ᠡᠷ ᠬᠡᠯᠲᠦᠷᠢᠭᠦᠯᠬᠦ ᠳ᠋ᠦ᠍ ᠮᠠᠷᠭᠠᠰᠢ ᠶ᠋ᠢᠨ ᠶᠡᠬᠡ ᠨᠠᠢᠷ ᠨᠠᠭᠠᠳᠤᠮ ᠳ᠋ᠤ᠌ ᠵᠣᠳᠣᠭᠯᠠᠬᠤ ᠪᠠᠷ ᠬᠦᠴᠦᠲᠡᠨ ᠡᠷᠡᠰ ᠬᠥᠰᠢᠯᠳᠦᠵᠦ᠂ ᠠᠢᠮᠠᠭ ᠠᠢᠮᠠᠭ ᠠ᠋ᠴᠠ ᠢᠷᠡᠭᠦᠯ ᠳ᠋ᠦ᠍ ᠮᠣᠷᠳᠠᠬᠤ ᠪᠠᠭᠠᠲᠤᠷ ᠤ᠋ᠳ ᠴᠡᠭᠡᠵᠢ ᠳᠠᠷᠤᠵᠤ ᠮᠡᠬᠦᠢᠨ ᠥᠩᠭᠡᠷᠡᠭᠡᠨᠡ᠃ ᠲᠡᠷᠡ ᠴᠦ᠍ ᠪᠠᠢᠲᠤᠭᠠᠢ ᠣᠢ ᠳ᠋ᠤ᠌ ᠠᠪᠲᠠᠭᠰᠠᠨ ᠵᠠᠷᠢᠮ ᠨᠢ ᠠᠴᠢᠶᠠᠯᠠᠵᠤ ᠪᠠᠢᠭᠰᠠᠨ ᠴᠠᠴᠠᠷ ᠮᠠᠢᠬᠠᠨ ᠢ᠋ᠶ᠋ᠠᠨ ᠣᠷᠬᠢᠨ ᠰᠥᠭᠥᠳᠴᠦ᠂ ᠮᠠᠢ ᠳ᠋ᠤ᠌ ᠡᠭᠡᠷᠡᠭᠦᠯᠦᠭᠰᠡᠨ ᠨᠥᠭᠦᠭᠡ ᠬᠡᠰᠡᠭ ᠨᠢ ᠴᠢᠨᠠᠵᠤ ᠪᠠᠢᠭᠰᠠᠨ ᠴᠠᠢᠨ ᠠ᠋ᠴᠠ ᠳᠡᠭᠡᠵᠢ ᠡᠷᠭᠦᠨ ᠰᠥᠰᠥᠯᠡᠬᠦ ᠪᠥᠯᠥᠭᠡ᠃ ᠲᠡᠷᠡ ᠪᠦᠭᠦᠳᠡ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠨᠢᠭᠡᠨ ᠶᠡᠬᠡ ᠢᠲᠡᠭᠡᠯ᠂ ᠨᠢᠭᠡᠨ ᠶᠡᠬᠡ ᠬᠦᠰᠡᠯᠡᠩ ᠦ᠋ᠨ ᠠᠳᠠ ᠲᠠᠢ ᠭᠠᠯ ᠠᠰᠠᠭᠰᠠᠨ ᠪᠠᠢᠬᠤ ᠶ᠋ᠢ ᠡᠪᠦᠭᠡᠨ ᠬᠠᠭᠠᠨ ᠠᠵᠢᠵᠤ ᠠᠮᠵᠢᠪᠠ᠃ ᠮᠠᠭᠠᠳ ᠦᠭᠡᠢ ᠢᠯᠳᠦ ᠪᠡᠷ ᠪᠤᠰᠤ ᠦᠭᠡ ᠪᠡᠷ ᠪᠠᠢᠯᠳᠤᠵᠤ ᠭᠠᠵᠠᠷ ᠰᠢᠷᠣᠢ ᠪᠠᠨ ᠪᠦᠷᠢᠨ ᠪᠦᠲᠦᠨ ᠠᠪᠴᠤ ᠦᠯᠡᠳᠡᠭᠰᠡᠨ ᠭᠠᠪᠢᠶᠠ ᠨᠢ ᠠᠮᠠᠨ ᠠ᠋ᠴᠠ ᠠᠮᠠ ᠳᠠᠮᠵᠢᠨ ᠨᠡᠮᠡᠭᠰᠡᠭᠡᠷ ᠡᠳᠦᠭᠡ ᠳᠣᠮᠣᠭ ᠪᠣᠯᠤᠭᠰᠠᠨ ᠪᠠᠢᠵᠤ ᠴᠤ᠌ ᠮᠡᠳᠡᠬᠦ ᠪᠢᠯᠡ᠃ ᠠᠯᠪᠠᠲᠤ ᠣᠯᠠᠨ ᠤ᠋ ᠪᠠᠨ ᠨᠢᠳᠦᠨ ᠦ᠌ ᠭᠠᠯ ᠢ᠋ ᠣᠯᠵᠤ ᠬᠠᠷᠠᠭᠰᠠᠨ ᠬᠠᠭᠠᠨ ᠤ᠋ ᠠᠯᠵᠢᠶᠠᠯ ᠬᠣᠷᠣᠮᠬᠠᠨ ᠠᠷᠢᠯᠵᠤ᠂ ᠮᠠᠨᠳᠤᠬᠤ ᠶ᠋ᠢᠨ ᠤᠯᠠᠭᠠᠨ ᠨᠠᠷᠠᠨ ᠢ᠋ᠶ᠋ᠠᠷ ᠶᠧᠯᠢᠦᠢ ᠳᠠᠰᠢ ᠶ᠋ᠢ ᠬᠣᠯᠠ ᠵᠠᠮ ᠳ᠋ᠤ᠌ ᠦᠳᠡᠬᠦ ᠶᠡᠬᠡ ᠨᠠᠢᠷ ᠤ᠋ᠨ ᠲᠤᠬᠠᠢ ᠪᠣᠳᠣᠪᠠ᠃ ᠳᠣᠣᠷᠠ ᠬᠠᠶᠠᠵᠤ ᠯᠠ ᠵᠠᠭᠤᠨ ᠡᠷᠦᠬᠡ ᠪᠣᠭᠣᠯ ᠢ᠋ᠶ᠋ᠠᠷ ᠱᠠᠩᠨᠠᠭᠤᠯᠤᠭᠰᠠᠨ ᠵᠦ᠋ᠪᠦ᠋ ᠠᠷᠪᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠤ᠋ᠨ ᠶᠡᠬᠡᠰ ᠳᠡᠭᠡᠳᠦᠰ ᠠᠯᠢ ᠪᠠᠢᠳᠠᠭ ᠢ᠋ᠶ᠋ᠠᠨ ᠲᠡᠮᠲᠡᠷᠢᠬᠦ ᠪᠢᠵᠡ᠃ ᠶᠡᠷᠦ ᠬᠡᠭᠡᠷᠡ ᠶ᠋ᠢᠨ ᠨᠣᠶᠠᠳ ᠤ᠋ᠨ ᠵᠢᠰᠦ ᠴᠢᠷᠠᠢ ᠭᠡᠷᠡᠯᠲᠦᠨ ᠴᠠᠭᠠᠨᠠ ᠪᠠᠨ ᠯᠠ ᠨᠢᠭᠡ ᠬᠡᠢᠮᠣᠷᠢᠯᠢᠭ ᠪᠣᠯᠤᠭᠰᠠᠨ ᠢ᠋ ᠥᠨᠥᠳᠥᠷ ᠬᠠᠷᠠᠵᠠᠢ᠃ ᠡᠪᠦᠭᠡᠨ ᠬᠠᠭᠠᠨ ᠤ᠋ ᠪᠤᠭᠤᠷᠤᠯ ᠰᠣᠪᠢᠩ ᠴᠤ᠌ ᠦᠭᠡ ᠶ᠋ᠢᠨ ᠲᠡᠢᠨ ᠳ᠋ᠦ᠍ ᠲᠠᠮᠢᠷᠳᠠᠭᠰᠠᠨ ᠰᠡᠳᠬᠢᠯ ᠳ᠋ᠦ᠍ᠨᠢ ᠶᠡᠬᠡ ᠬᠡᠢ ᠮᠣᠷᠢ ᠶ᠋ᠢᠨ ᠠᠯᠤᠰ ᠤ᠋ᠨ ᠵᠦᠩ ᠰᠢᠪᠡᠨᠡᠵᠦ ᠠᠷᠭᠠᠳᠠᠬᠤ ᠳ᠋ᠤ᠌ ᠮᠣᠷᠢᠲᠠᠨ ᠲᠠᠷᠴᠤᠭᠯᠠᠬᠤ ᠴᠠᠭ ᠢ᠋ ᠦᠵᠡᠬᠦ ᠨᠠᠰᠤ ᠨᠠᠳᠠ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠦᠭᠡᠢ ᠳᠡ ᠭᠡᠵᠦ ᠭᠤᠨᠢᠭᠯᠠᠪᠠᠴᠤ ᠮᠢᠨᠦ ᠵᠢᠷᠭᠤᠭᠠᠨ ᠬᠦᠦ᠂ ᠠᠷᠪᠠᠨ ᠠᠴᠢ ᠶᠠᠭᠤ ᠡᠰᠡ ᠶ᠋ᠢ ᠦᠵᠡᠬᠦ ᠪᠢᠯᠡ ᠭᠡᠮᠡᠨ ᠲᠠᠢᠳᠬᠤᠷᠠᠨᠠ᠃
ᠡᠢᠨ ᠳᠣᠲᠣᠷᠠ ᠬᠥᠮᠦᠨ ᠲᠡᠢ ᠪᠡᠨ ᠮᠠᠷᠭᠤᠯᠳᠤᠨ᠂ ᠮᠡᠳᠬᠡᠯᠴᠡᠨ ᠶᠠᠪᠤᠬᠤ ᠬᠠᠪᠤᠯ ᠬᠠᠭᠠᠨ ᠳ᠋ᠤ᠌ ᠵᠠᠮ ᠭᠣᠳᠣᠰ ᠤ᠋ᠨ ᠣᠪᠣᠭ ᠠᠢᠮᠠᠭ ᠤ᠋ᠨ ᠣᠯᠠᠨ ᠴᠠᠢᠨ ᠤ᠋ ᠳᠡᠭᠡᠵᠢ᠂ ᠢᠳᠡᠭᠡᠨ ᠦ᠌ ᠳᠡᠭᠡᠳᠦ ᠪᠡᠨ ᠡᠷᠭᠦᠬᠦ ᠨᠢ ᠶᠢᠰᠦᠭᠡᠢ ᠬᠥᠪᠡᠭᠦᠨ ᠳ᠋ᠦ᠍ ᠪᠠᠬᠠᠷᠬᠠᠯ ᠲᠥᠷᠥᠭᠦᠯᠵᠦ᠂ ᠮᠥᠨᠥᠬᠡᠨ ᠶᠡᠬᠡᠮᠰᠦᠭ ᠬᠠᠲᠤᠨ ᠢ᠋ ᠬᠠᠷᠠᠭᠠᠰᠠᠢ ᠭᠡᠵᠦ ᠬᠦᠰᠡᠪᠡ᠃ ᠡᠯᠡ ᠡᠲᠡᠭᠡᠳ ᠦ᠋ᠨ ᠬᠦᠰᠡᠯᠡᠩ ᠡᠴᠡ ᠴᠦ᠍ ᠪᠣᠯᠤᠭᠰᠠᠨ ᠤᠤ᠂ ᠶᠢᠰᠦᠭᠡᠢ ᠬᠥᠪᠡᠭᠦᠨ᠂
— ᠮᠠᠷᠭᠠᠰᠢ ᠶ᠋ᠢᠨ ᠢᠷᠡᠭᠦᠯ ᠳ᠋ᠦ᠍ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠨᠡᠷᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠬᠡᠨ ᠪᠣᠰᠬᠤ ᠪᠣᠯ? ᠭᠡᠮᠡᠨ ᠠᠰᠠᠭᠤᠭᠰᠠᠨ ᠨᠢ ᠪᠣᠢ᠃ ᠬᠠᠪᠤᠯ ᠬᠠᠭᠠᠨ ᠮᠥᠷᠭᠥᠨ ᠰᠦᠰᠦᠭᠯᠡᠬᠦ ᠣᠯᠠᠨ ᠢ᠋ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ᠂
— ᠥᠬᠢᠨᠪᠠᠷᠬᠠᠭ ᠠᠪᠠᠭᠠ ᠴᠢᠨᠢ ᠮᠣᠷᠳᠠᠨᠠ᠃ ᠲᠡᠷᠡ ᠬᠥᠮᠦᠨ ᠦ᠌ ᠡᠪ ᠣᠯᠬᠤ ᠳ᠋ᠠᠭᠠᠨ ᠮᠠᠭᠤ ᠴᠤ᠌ ᠬᠠᠳᠬᠤᠯᠳᠤᠬᠤ ᠳ᠋ᠠᠭᠠᠨ ᠰᠠᠢᠨ ᠰᠢᠦ ᠭᠡᠯᠡ᠃
— ᠶᠡᠷᠡᠨ ᠨᠤᠮᠤ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠭᠤᠷᠪᠠᠨ ᠰᠤᠮᠤ ᠲᠠᠯᠪᠢᠬᠤ ᠬᠠᠷᠪᠤᠯᠳᠤᠭᠠᠨ ᠳ᠋ᠤ᠌ ᠬᠡᠨ ᠪᠣᠰᠬᠤ ᠪᠣᠯ?
— ᠠᠪᠤ ᠴᠢᠨᠢ᠂ ᠪᠠᠷᠳᠠᠨ ᠬᠦᠦ ᠮᠢᠨᠢ ᠣᠮᠣᠭ ᠲᠠᠢ ᠨᠢ ᠳᠡᠩᠳᠡᠭᠦᠦ ᠴᠦ᠍ ᠴᠡᠴᠡᠨ ᠲᠡᠢ ᠨᠢ ᠭᠠᠷᠭᠠᠭᠤᠳ ᠯᠠ ᠳᠠ᠃
— ᠲᠡᠭᠡᠪᠡᠯ ᠪᠥᠬᠡ ᠶ᠋ᠢᠨ ᠪᠠᠷᠢᠯᠳᠤᠭᠠᠨ ᠳ᠋ᠤ᠌?
— ᠬᠣᠲᠣᠯᠠ ᠠᠪᠠᠭᠠ ᠴᠢᠨᠢ ᠪᠣᠰᠤᠭ᠃ ᠲᠡᠢᠨ ᠳ᠋ᠦ᠍ ᠠᠭᠤᠷᠯᠠᠵᠤ ᠪᠣᠯᠬᠤ ᠴᠤ᠌ ᠨᠠᠢᠷ ᠲᠤ᠌ ᠠᠭᠤᠷᠯᠠᠵᠤ ᠦᠯᠦ ᠪᠣᠯᠬᠤ ᠶ᠋ᠢ ᠬᠠᠷᠢᠨ ᠰᠠᠨᠠᠭᠤᠯᠤᠭᠤᠰᠢᠲᠠᠢ ᠭᠡᠪᠡ᠃
ᠶᠢᠰᠦᠭᠡᠢ ᠶ᠋ᠢᠨ ᠬᠦᠰᠡᠯ ᠲᠠᠯᠠᠭᠠᠷ ᠪᠣᠯᠵᠠᠢ᠃ ᠲᠡᠷᠡ ᠪᠡᠷ ᠤᠭ ᠨᠢ ᠡᠷᠡ ᠶ᠋ᠢᠨ ᠬᠡᠢ ᠮᠣᠷᠢ ᠰᠡᠷᠭᠦᠭᠡᠭᠰᠡᠨ ᠶᠡᠬᠡ ᠭᠤᠷᠪᠠᠨ ᠰᠣᠷᠢᠯᠭᠠ ᠳ᠋ᠤ᠌ ᠡᠪᠦᠭᠡ ᠬᠠᠭᠠᠨ ᠥᠪᠡᠷ ᠢ᠋ ᠨᠢ ᠨᠡᠷᠡ ᠶ᠋ᠢ ᠴᠣᠬᠣᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠭᠣᠷᠢᠳᠠᠭᠰᠠᠨ ᠶᠤᠮ ᠰᠠᠨᠵᠠᠢ᠃ ᠲᠠᠲ᠋ᠠᠷ ᠬᠠᠲᠤᠨ ᠤ᠋ ᠨᠢᠳᠦᠨ ᠳ᠋ᠦ᠍ ᠰᠠᠢᠬᠠᠨ ᠬᠠᠷᠠᠭᠳᠠᠬᠤ ᠶ᠋ᠢ ᠬᠦᠰᠡᠭᠰᠡᠨ ᠡᠨᠳᠡ ᠲᠡᠭᠦᠨ ᠢ᠋ ᠡᠢᠨ ᠬᠠᠳᠬᠤᠭᠰᠠᠨ ᠬᠡᠷᠡᠭ ᠶᠦᠮ᠃ ᠭᠡᠪᠡᠴᠦ ᠡᠰᠡ ᠪᠦᠲᠦᠵᠡᠢ᠃ ᠬᠥᠪᠡᠭᠦᠨ ᠬᠡᠭᠡᠷᠡ ᠶ᠋ᠢᠨ ᠴᠠᠴᠠᠷ ᠲᠠᠭᠠᠨ ᠢᠷᠡᠪᠡᠯ ᠠᠶᠠᠨ ᠲᠡᠢᠨ ᠡᠴᠡ ᠡᠭᠡᠨ ᠢᠷᠡᠭᠰᠡᠨ ᠡᠴᠢᠭᠡ ᠪᠠᠷᠠᠳᠠᠨᠪᠠᠭᠠᠲᠤᠷ ᠰᠠᠯᠬᠢᠨ ᠳᠡᠭᠡᠷᠡ ᠨᠢ ᠠᠯᠲᠠᠨ ᠲᠠᠷᠮᠠ ᠪᠠᠨ ᠪᠤᠰᠬᠠᠵᠤ ᠮᠢᠩᠭᠠᠲᠤ ᠶ᠋ᠢᠨ ᠨᠣᠶᠠᠳ ᠲᠠᠢ ᠪᠠᠨ ᠴᠢᠭᠤᠯᠤᠨ ᠪᠠᠢᠬᠤ ᠲᠤᠯᠠ ᠪᠢᠴᠢᠬᠠᠨ ᠴᠠᠴᠠᠷ ᠲᠠᠭᠠᠨ ᠣᠷᠣᠵᠤ᠂ ᠪᠠᠭᠤᠷᠴᠢ ᠴᠢᠷᠬᠠ ᠡᠪᠦᠭᠡᠨ ᠦ᠌ ᠠᠶᠠᠭᠠᠨ ᠳ᠋ᠤ᠌ ᠬᠥᠰᠬᠥᠯᠡᠵᠦ ᠣᠷᠬᠢᠭᠰᠠᠨ ᠠᠯᠠᠭ ᠮᠢᠬᠠᠨ ᠳᠡᠭᠡᠷᠡ ᠬᠠᠯᠠᠭᠤᠨ ᠰᠦ ᠲᠡᠢ ᠴᠠᠢ ᠬᠢᠵᠦ ᠤᠤᠭᠤᠭᠠᠳ ᠨᠣᠢᠷᠰᠤᠵᠠᠢ᠃ ᠦᠷ ᠴᠦᠷ ᠢ᠋ᠶ᠋ᠡᠷ ᠪᠥᠭᠡᠮ ᠳᠠᠭᠤ ᠴᠢᠮᠡᠭᠡ ᠲᠡᠭᠦᠨ ᠢ᠋ ᠰᠡᠷᠡᠭᠡᠪᠡ᠃ ᠲᠡᠷᠮᠡ ᠪᠦᠬᠦᠨ ᠡᠴᠡ ᠨᠣᠶᠠᠳ᠂ ᠬᠠᠲᠤᠳ ᠭᠠᠳᠠᠭᠠᠯᠠᠵᠤ᠂ ᠴᠠᠴᠠᠷ ᠪᠦᠷᠢ ᠡᠴᠡ ᠠᠭᠡ᠂ ᠭᠦᠩᠵᠦ ᠭᠦᠶᠦᠯᠳᠦᠨ ᠭᠠᠷᠴᠤ᠂ ᠮᠠᠢᠬᠠᠨ ᠪᠣᠯᠭᠠᠨ ᠠ᠋ᠴᠠ ᠠᠯᠪᠠᠲᠤ ᠢᠷᠭᠡᠳ ᠱᠤᠤᠭᠢᠯᠳᠤᠨ ᠱᠠᠭᠠᠢᠵᠤ ᠮᠥᠨᠥᠬᠡᠨ ᠥᠴᠥᠭᠡᠳᠦᠷ ᠦ᠋ᠨ ᠬᠥᠮᠦᠨ ᠲᠠᠬᠢᠬᠰᠠᠨ ᠴᠢᠨ ᠲᠣᠯᠣᠭᠠᠢ ᠥᠭᠡᠳᠡ ᠳᠣᠯᠢᠶᠠᠪᠤᠷ ᠢ᠋ᠶ᠋ᠠᠷ ᠳᠣᠬᠢᠨ ᠱᠤᠤᠭᠢᠯᠳᠤᠵᠤ ᠪᠠᠢᠪᠠ᠃ ᠲᠡᠷᠡ ᠳᠤᠮᠳᠠ ᠳᠠᠭᠤ ᠨᠡᠮᠡᠷᠢᠯᠡᠵᠦ ᠴᠠᠬᠢᠷᠳᠠᠭᠰᠠᠨ ᠬᠣᠭᠣᠯᠠᠢ ᠪᠠᠷ ᠬᠠᠰᠬᠢᠴᠢᠨ ᠵᠣᠭᠰᠣᠬᠤ ᠪᠥᠭᠲᠥᠷ ᠴᠢᠷᠬᠠ ᠪᠠᠭᠤᠷᠴᠢ ᠶ᠋ᠢᠨ ᠮᠥᠷᠥ ᠡᠴᠡ ᠲᠡᠳᠡᠨ᠂
— ᠴᠢᠷᠬᠠ ᠠᠬᠠ ᠠ᠋᠂ ᠶᠠᠭᠤ ᠪᠣᠯᠤᠭᠠ ᠪᠣᠢ? ᠭᠡᠯᠡ᠃ ᠴᠢᠷᠬᠠ ᠶ᠋ᠢᠨ ᠣᠨᠢᠭᠠᠷ ᠨᠢᠳᠦ ᠠᠶᠠᠭᠠᠨ ᠤ᠋ ᠴᠢᠨᠡᠭᠡ ᠲᠣᠮᠣᠷᠠᠵᠤ᠂
一 ᠥᠴᠥᠭᠡᠳᠦᠷ ᠣᠷᠣᠢ ᠰᠠᠯᠭᠠᠭᠠᠳ ᠬᠠᠶᠠᠴᠢᠬᠠᠭᠰᠠᠨ ᠬᠥᠯ ᠲᠣᠯᠣᠭᠠᠢ ᠬᠣᠶᠠᠷ ᠨᠡᠢᠯᠡᠭᠡᠳ ᠣᠷᠭᠣᠴᠢᠬᠠᠵᠠᠢ ᠭᠡᠨᠡ ᠭᠡᠵᠦ ᠶᠡᠬᠡ ᠳᠠᠭᠤ ᠪᠠᠷ ᠥᠭᠦᠯᠡᠬᠦ ᠳ᠋ᠦ᠍ ᠲᠡᠮᠦᠵᠢᠨ ᠦᠭᠡ ᠶ᠋ᠢᠨ ᠬᠢᠯᠢᠩᠲᠦ ᠬᠠᠷᠠᠴᠠ᠂ ᠪᠦᠯᠵᠢᠭᠡᠨ ᠬᠠᠲᠤᠨ ᠤ᠋ ᠨᠢᠯᠪᠤᠰᠤ ᠲᠠᠢ ᠠᠯᠠᠭ ᠨᠢᠳᠦ ᠵᠢᠷᠤᠰᠬᠢᠨ ᠰᠡᠳᠬᠢᠯ ᠳ᠋ᠦ᠍ ᠦᠵᠡᠭᠳᠡᠵᠦ ᠡᠷᠭᠢᠵᠦ ᠬᠠᠷᠠᠪᠠᠯ᠂ ᠵᠢᠭᠠᠯ ᠨᠣᠶᠠᠨ ᠤ᠋ ᠰᠢᠪᠦᠭᠡ ᠮᠡᠲᠦ ᠬᠠᠷᠠᠴᠠ ᠲᠠᠢ ᠬᠠᠯᠵᠠ ᠮᠥᠷᠭᠥᠯᠳᠦᠪᠡ᠃ ᠦᠵᠡᠰᠬᠦᠯᠡᠩᠲᠦ ᠬᠠᠲᠤᠨ ᠬᠡᠨ ᠢ᠋ ᠴᠦ᠍ ᠪᠤᠰᠤ᠂ ᠭᠠᠭᠴᠠ ᠬᠦ᠌ ᠡᠵᠡᠨ ᠨᠣᠶᠠᠨ ᠤ᠋ ᠪᠠᠨ ᠱᠠᠷᠢᠯ ᠣᠷᠣᠰᠢᠭᠰᠠᠨ ᠬᠠᠳᠠᠲᠤ ᠥᠨᠳᠥᠷ ᠤᠷᠤᠭᠤ ᠪᠦᠭᠦᠳᠡ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠶᠡᠬᠡᠮᠰᠦᠭ ᠬᠠᠷᠠᠴᠠ ᠪᠠᠷ ᠢ᠋ᠶ᠋ᠠᠨ ᠭᠢᠰᠬᠢᠯᠡᠬᠦ ᠠᠵᠢ᠃ ᠲᠡᠭᠦᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠲᠩᠷᠢ ᠶ᠋ᠢᠨ ᠬᠥᠮᠦᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠠ ᠪᠢᠵᠡ ᠭᠡᠬᠦ ᠣᠮᠤᠷᠬᠠᠭᠯᠠᠯ ᠭᠡᠷᠡᠯᠲᠦᠨ ᠪᠠᠢᠯᠠ᠃ ᠣᠯᠵᠠᠨ ᠳ᠋ᠤ᠌ ᠬᠡᠳᠦᠢ ᠴᠦ᠍ ᠣᠮᠣᠭ ᠲᠡᠭᠦᠯᠳᠡᠷ ᠪᠠᠢᠶᠠ ᠭᠡᠮᠡᠨ ᠪᠠᠲᠤ ᠨᠤᠲᠠ ᠪᠣᠳᠣᠬᠤ ᠳ᠋ᠤ᠌ ᠲᠠᠯᠠᠷᠬᠠᠨ ᠪᠡᠯᠭᠡᠰᠢᠶᠡᠬᠦ ᠮᠡᠲᠦ ᠬᠣᠯᠠ ᠶ᠋ᠢᠨ ᠬᠣᠯᠠ ᠳ᠋ᠤ᠌ ᠬᠦᠯᠦᠭ ᠮᠣᠷᠢᠨ ᠢᠨᠴᠠᠭᠠᠵᠠᠢ᠃
7
ᠬᠦᠯᠦᠭ ᠮᠣᠷᠢᠨ ᠬᠠᠩᠭᠢᠨᠠᠲᠠᠯᠠ ᠢᠨᠴᠠᠭᠠᠬᠤ ᠰᠢᠭ᠋ ᠪᠣᠯᠪᠠ᠃ ᠬᠥᠩᠬᠥᠷ ᠬᠣᠷᠴᠢ ᠬᠥᠬᠡ ᠲᠡᠭᠷᠢ ᠶ᠋ᠢᠨ ᠵᠦᠭ ᠵᠢᠭᠦᠷᠯᠡᠨ ᠣᠳᠬᠤ ᠮᠡᠲᠦ ᠠᠯᠤᠰᠯᠠᠨ ᠠᠨᠢᠷᠯᠠᠬᠤ ᠡᠯᠡ ᠴᠢᠮᠡᠭᠡ ᠶ᠋ᠢ ᠴᠢᠬᠢ ᠲᠠᠯᠪᠢᠨ ᠬᠡᠰᠡᠭ ᠴᠢᠩᠨᠠᠭᠰᠠᠨ ᠢ᠋ᠶ᠋ᠠᠨ ᠬᠤᠭᠤᠷ ᠤ᠋ᠨ ᠢ᠋ᠶ᠋ᠠᠨ ᠴᠢᠪᠬᠠᠳᠠᠰᠤ ᠶ᠋ᠢ ᠬᠤᠷᠤᠭᠤᠨ ᠤ᠋ ᠪᠠᠨ ᠥᠨᠳᠡᠭᠡ ᠪᠡᠷ ᠠᠶᠠᠷᠬᠠᠨ ᠢᠯᠢᠵᠦ᠂ ᠪᠦᠬᠦ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠨᠠᠢᠭᠤᠰᠬᠢᠨ ᠬᠥᠪᠴᠢ ᠪᠡᠨ ᠲᠠᠲᠠᠬᠤ ᠳ᠋ᠤ᠌ ᠭᠡᠭᠡᠯᠭᠡᠨ ᠴᠡᠩᠬᠡᠷ ᠠᠶᠠᠯᠭᠤ ᠡᠭᠡᠰᠢᠭᠯᠡᠯᠡ᠃ ᠬᠥᠩᠬᠥᠷ ᠬᠣᠷᠴᠢ ᠨᠢᠳᠦ ᠪᠡᠨ ᠬᠠᠭᠠᠰ ᠠᠨᠢᠵᠤ᠂
ᠬᠠᠭᠠᠨ ᠲᠩᠷᠢ ᠡᠴᠢᠭᠡ ᠳᠠᠭᠤᠳᠠᠵᠤ
ᠬᠠᠳᠠᠨ ᠭᠡᠷ ᠲᠦ᠍ ᠴᠢᠨᠢ ᠠᠪᠴᠢᠷᠠᠪᠠ
ᠬᠠᠨᠠᠨ ᠭᠡᠷ ᠲᠠᠨᠢ ᠦᠯᠡᠳᠡᠪᠡ
ᠬᠠᠨ ᠲᠠ ᠠᠮᠤᠭᠤᠯᠠᠩ ᠨᠣᠢᠷᠰᠤ ᠠ᠋!
ᠡᠵᠡᠨ ᠲᠩᠷᠢ ᠡᠴᠢᠭᠡ ᠳᠠᠭᠤᠳᠠᠵᠤ
ᠡᠩᠭᠡᠷ ᠭᠡᠷ ᠲᠦ᠍ ᠴᠢᠨᠢ ᠠᠪᠴᠢᠷᠠᠪᠠ
ᠡᠬᠡᠨᠡᠷ ᠬᠡᠦᠬᠡᠳ ᠲᠠᠨᠢ ᠦᠯᠡᠳᠡᠪᠡ
ᠡᠨᠳᠡ ᠪᠡᠨ ᠲᠠ ᠲᠠᠢᠪᠤᠩ ᠨᠣᠢᠷᠰᠤ ᠠ᠋!
ᠬᠤᠷᠮᠤᠰᠲᠠ ᠲᠩᠷᠢ ᠡᠴᠢᠭᠡ ᠳᠠᠭᠤᠳᠠᠵᠤ
ᠬᠤᠪᠢ ᠵᠠᠶᠠᠭᠠᠨ ᠳ᠋ᠤ᠌ ᠴᠢᠨᠢ ᠠᠪᠴᠢᠷᠠᠪᠠ᠃
ᠬᠤᠷᠢᠶᠠᠭᠰᠠᠨ ᠤᠯᠤᠰ ᠲᠠᠨᠢ ᠦᠯᠡᠳᠡᠪᠡ᠃
ᠬᠤᠲᠤᠭᠲᠤ ᠲᠠ ᠲᠦᠪᠰᠢᠨ ᠨᠣᠢᠷᠰᠤ ᠠ᠋! ᠭᠡᠮᠡᠨ ᠠᠶᠠᠯᠭᠤᠯᠠᠨ ᠤᠩᠰᠢᠨᠠ᠃
ᠲᠡᠭᠦᠨ ᠦ᠌ ᠤᠷᠢᠳᠤᠬᠢ ᠲᠡᠭᠰᠢᠬᠡᠨ ᠬᠥᠬᠡ ᠬᠠᠳᠠᠨ ᠳᠡᠭᠡᠷᠡ ᠴᠡᠷᠺᠢᠯ ᠨᠣᠳᠣᠢ ᠬᠠᠨ ᠤ᠋ ᠱᠠᠷᠢᠯ ᠪᠠᠢᠬᠤ ᠠᠭᠠᠳ ᠬᠥᠬᠡ ᠲᠩᠷᠢ ᠳ᠋ᠦ᠍ ᠬᠠᠷᠠ ᠰᠢᠪᠠᠭᠤᠳ ᠭᠤᠨᠢᠭ ᠲᠠᠢ ᠡᠷᠭᠢᠯᠳᠦᠵᠦ ᠪᠠᠢᠯᠠ᠃ ᠬᠥᠩᠬᠥᠷ ᠬᠣᠷᠴᠢ ᠡᠢᠨ ᠠᠮᠢ ᠦᠭᠡᠢ ᠴᠣᠭᠴᠠᠰ ᠲᠤ᠌ ᠠᠢᠯᠠᠳᠬᠠᠯ ᠡᠷᠭᠦᠭᠡᠳ ᠬᠥᠬᠡ ᠲᠩᠷᠢ ᠡᠴᠢᠭᠡ ᠳ᠋ᠦ᠍ᠨᠢ ᠵᠠᠯᠠᠭᠤ ᠬᠠᠨ ᠤ᠋ ᠨᠢᠭᠤᠷ ᠢ᠋ ᠬᠠᠷᠠᠭᠤᠯᠵᠤ ᠦᠰᠦ ᠶ᠋ᠢ ᠨᠢ ᠬᠣᠢᠰᠢᠯᠠᠭᠤᠯᠤᠨ ᠬᠣᠷᠣᠮ ᠬᠢᠷᠢ ᠪᠣᠯᠪᠠ᠃ ᠴᠢᠩᠭᠢᠭᠡᠳ ᠬᠤᠨ ᠬᠤᠭᠤᠷ ᠢ᠋ᠶ᠋ᠠᠨ ᠬᠠᠳᠠ ᠲᠦᠰᠢᠭᠦᠯᠦᠨ ᠲᠠᠯᠪᠢᠵᠤ ᠠᠩᠬᠢᠯᠤᠭᠤᠨ ᠦᠨᠦᠷᠲᠦ ᠠᠷᠴᠠᠨ ᠤ᠋ ᠮᠥᠴᠢᠷ ᠢ᠋ᠶ᠋ᠡᠷ ᠵᠠᠯᠠᠭᠤ ᠬᠠᠨ ᠤ᠋ ᠠᠮᠢ ᠦᠭᠡᠢ ᠪᠡᠶᠡ ᠶ᠋ᠢ ᠥᠪᠴᠢ ᠬᠤᠴᠢᠭᠰᠠᠨ ᠢ᠋ᠶ᠋ᠠᠨ᠂
— ᠬᠠᠨᠳᠠᠨ ᠮᠢᠨᠢ᠂ ᠬᠥᠮᠦᠨ ᠲᠥᠷᠥᠯ ᠦ᠋ᠨ ᠵᠠᠶᠢᠭ ᠲᠠᠭᠠᠨ ᠬᠦᠨᠳᠦᠯᠡᠵᠦ ᠲᠠᠨ ᠢ᠋ ᠲᠩᠷᠢ ᠳ᠋ᠦ᠍ ᠦᠳᠡᠰᠦ ᠪᠢ᠃ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠣᠮᠣᠭ ᠬᠡᠢ ᠮᠣᠷᠢ ᠳ᠋ᠠᠭᠠᠨ ᠡᠷᠳᠦᠵᠦ ᠵᠦ᠋ᠪᠦ᠋ ᠠᠷᠪᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠢ᠋ ᠳᠠᠯᠠᠨ ᠳᠡᠭᠡᠷᠡᠮᠳᠡᠵᠦ ᠶᠠᠪᠤᠪᠠ ᠲᠠ᠃ ᠡᠷᠡ ᠶ᠋ᠢᠨ ᠶᠣᠰᠣᠭᠠᠷ ᠢᠯᠳᠦ ᠵᠥᠷᠢᠭᠦᠯᠵᠦ ᠡᠰᠡ ᠲᠤᠯᠤᠭᠰᠠᠨ ᠠᠲᠠᠯᠠ ᠰᠣᠷᠴᠢᠯᠠᠵᠤ ᠬᠠᠷᠠᠭᠰᠠᠨ ᠡᠷᠡᠴᠦᠦᠯ ᠢ᠋ᠶ᠋ᠡᠨ ᠣᠯᠵᠠᠯᠠᠵᠤ ᠠᠪᠤᠨ ᠠᠯᠲᠠᠨ ᠤᠯᠤᠰ ᠲᠤ᠌ ᠢᠯᠡᠭᠡᠳᠡᠭ ᠪᠠᠢᠪᠠ ᠲᠠ᠃ ᠬᠦᠴᠦᠷᠬᠡᠭ ᠤᠯᠤᠰ ᠤ᠋ᠨ ᠪᠥᠭᠡᠷᠡᠨ ᠳ᠋ᠦ᠍ ᠠᠮᠢ ᠵᠢᠭᠤᠭᠰᠠᠨ ᠵᠢᠵᠢᠭ ᠠᠢᠮᠠᠭ ᠤ᠋ᠨ ᠠᠷᠭᠠ ᠶᠠᠳᠠᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠲᠠ ᠶᠠᠭᠤᠨ ᠳ᠋ᠤ᠌ ᠵᠠᠮᠨᠠᠪᠠ᠃ ᠲᠠᠲ᠋ᠠᠷ ᠠᠢᠮᠠᠭ ᠢ᠋ ᠠᠪᠴᠤ ᠦᠯᠡᠳᠡᠬᠦ ᠪᠤᠰᠤ ᠠᠯᠠᠵᠤ ᠪᠤᠯᠠᠰᠢᠯᠠᠬᠤ ᠵᠠᠮ ᠪᠠᠢᠪᠠ ᠪᠤᠰᠤ ᠤᠤ? ᠭᠡᠮᠡᠨ ᠤᠷᠢ ᠭᠠᠭᠴᠠᠭᠠᠷ ᠥᠭᠦᠯᠡᠬᠦ ᠠᠪᠠᠢ᠃ ᠡᠢᠨ ᠠᠷᠴᠠᠨ ᠤ᠋ ᠨᠣᠭᠣᠭᠠᠨ ᠮᠥᠴᠢᠷ ᠢ᠋ᠶ᠋ᠡᠷ ᠪᠢᠲᠡᠭᠦᠦ ᠬᠤᠴᠢᠭᠰᠠᠨ ᠴᠣᠭᠴᠠᠰ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠰᠠᠶᠢ ᠠᠮᠠ ᠬᠠᠮᠬᠢᠨ᠂ ᠨᠠᠷᠠ ᠵᠥᠪ ᠭᠤᠷᠪᠠ ᠭᠣᠷᠢᠶᠠᠯᠠᠪᠠ᠃ ᠳᠠᠷᠠᠭᠠ ᠨᠢ ᠬᠠᠭᠤᠷᠠᠢ ᠱᠤᠷᠭᠠᠭ ᠦᠵᠦᠭᠦᠷ᠂ ᠦᠵᠦᠭᠦᠷ ᠢ᠋ ᠨᠢ ᠲᠦᠰᠢᠭᠦᠯᠦᠨ ᠲᠠᠯᠪᠢᠵᠤ᠂ ᠮᠥᠨᠥᠬᠡᠨ ᠱᠠᠷᠢᠯ ᠳᠡᠭᠡᠷᠡ ᠣᠪᠣᠬᠠᠢ ᠮᠡᠲᠦ ᠶ᠋ᠢ ᠪᠣᠰᠬᠠᠯᠠ᠃ ᠡᠨᠡ ᠪᠣᠯᠲᠠᠯᠠ ᠶᠠᠭᠤ ᠴᠤ᠌ ᠡᠰᠡ ᠳᠤᠤᠭᠠᠷᠴᠠᠢ᠃ ᠭᠠᠭᠴᠠ ᠬᠦ᠌ ᠡᠯᠡ ᠪᠤᠶᠠᠨ ᠤ᠋ ᠦᠢᠯᠡ ᠶ᠋ᠢ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠲᠤᠩ ᠣᠢᠭᠠ ᠦᠭᠡᠢ ᠦᠢᠯᠡᠳᠴᠦ ᠳᠠᠭᠤᠰᠬᠠᠪᠠ᠃ ᠲᠡᠭᠡᠭᠡᠳ ᠬᠤᠨ ᠬᠤᠭᠤᠷ ᠢ᠋ᠶ᠋ᠠᠨ ᠠᠪᠴᠤ ᠨᠢᠴᠦᠭᠦᠨ ᠬᠡᠦᠬᠡᠳ ᠡᠪᠦᠷ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠡᠪᠲᠡᠢᠬᠡᠨ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠠᠶᠠᠷᠬᠠᠨ ᠡᠬᠡᠰᠢᠭ ᠭᠤᠶᠤᠨ ᠬᠤᠭᠤᠷᠳᠠᠵᠤ᠂
ᠬᠠᠭᠠᠨ ᠲᠩᠷᠢ ᠡᠴᠢᠭᠡ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ
ᠬᠠᠯᠠᠭᠤᠨ ᠤᠯᠠᠭᠠᠨ ᠬᠦᠯᠦᠭ ᠢ᠋ᠶ᠋ᠡᠨ ᠰᠣᠢᠪᠠ
ᠳᠥᠯᠥ ᠴᠣᠷᠣᠯᠵᠠᠭᠰᠠᠨ ᠭᠡᠭᠡᠨ ᠤᠨᠤᠭᠠ ᠪᠠᠨ
ᠳᠥᠷᠥᠭᠡᠯᠡᠵᠦ ᠬᠠᠢᠷᠠᠯᠠ᠂ ᠬᠠᠨ ᠡᠵᠡᠨ ᠠ᠋
ᠡᠷᠬᠡᠰ ᠲᠩᠷᠢ ᠡᠴᠢᠭᠡ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ
ᠡᠷᠳᠡᠨᠢ ᠶ᠋ᠢᠨ ᠭᠠᠯ ᠬᠦᠯᠦᠭ ᠢ᠋ᠶ᠋ᠡᠨ ᠡᠮᠡᠭᠡᠯᠯᠡᠪᠡ
ᠣᠴᠢᠰ ᠪᠠᠳᠠᠷᠠᠭᠰᠠᠨ ᠣᠩᠭᠣᠨ ᠤᠨᠤᠭᠠ ᠪᠠᠷ
ᠣᠭᠲᠠᠷᠭᠤᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠣᠳᠣᠨ ᠰᠣᠶᠣᠷᠬᠠ
ᠬᠤᠷᠮᠤᠰᠲᠠ ᠲᠡᠭᠷᠢ ᠡᠴᠢᠭᠡ ᠶ᠋ᠢᠨ ᠳ᠋ᠦ᠍ ᠣᠴᠢᠬᠤ
ᠬᠤᠷᠳᠤᠨ ᠳᠥᠯᠥ ᠬᠦᠯᠦᠭ ᠢ᠋ᠶ᠋ᠡᠨ ᠬᠠᠵᠠᠭᠠᠷᠯᠠᠪᠠ
ᠳᠦᠷᠡᠯᠵᠡᠨ ᠪᠠᠳᠮᠠᠯᠠᠬᠤ ᠭᠡᠭᠡᠨ ᠬᠦᠯᠦᠭ ᠢ᠋ᠶ᠋ᠡᠷ
ᠳᠡᠭᠦᠯᠢᠵᠦ ᠰᠣᠶᠣᠷᠬᠠ᠂ ᠬᠠᠨ ᠡᠵᠡᠨ᠁ ᠭᠡᠮᠡᠨ ᠵᠠᠯᠠᠭᠤ ᠬᠠᠨ ᠤ᠋ ᠠᠮᠢ ᠦᠭᠡᠢ ᠴᠣᠭᠴᠠᠰ ᠲᠤ᠌ ᠬᠦᠨᠳᠦᠳᠬᠡᠯ ᠦᠵᠡᠭᠦᠯᠵᠦ ᠭᠤᠷᠪᠠᠨᠲᠠ ᠮᠡᠬᠦᠢᠭᠡᠳ᠂ ᠱᠤᠷᠭᠠᠭ ᠤ᠋ᠨ ᠣᠪᠣᠭᠠᠨ ᠤ᠋ ᠶᠣᠵᠣᠭᠣᠷ ᠲᠤ᠌ ᠰᠥᠬᠥᠷᠡᠨ ᠰᠠᠭᠤᠵᠤ ᠴᠠᠬᠢᠭᠤᠷ ᠴᠠᠬᠢᠵᠤ᠂ ᠭᠠᠯ ᠢ᠋ᠶ᠋ᠠᠨ ᠪᠠᠳᠠᠷᠠᠭᠠᠪᠠᠢ᠃ ᠬᠠᠭᠤᠷᠠᠢ ᠮᠥᠴᠢᠷ ᠱᠠᠷᠵᠢᠭᠢᠨᠠᠨ ᠠᠰᠠᠵᠤ ᠵᠠᠯᠠᠭᠤ ᠬᠠᠨ ᠤ᠋ ᠰᠦᠷ ᠰᠦᠯᠳᠡ ᠶ᠋ᠢ ᠰᠠᠨᠠᠭᠤᠯᠬᠤ ᠮᠡᠲᠦ ᠣᠮᠣᠭ ᠲᠠᠢ ᠳᠦᠷᠡᠯᠵᠡᠨ᠂ ᠴᠣᠷᠣᠯᠵᠠᠨ ᠠᠰᠠᠵᠠᠢ᠃ ᠬᠥᠩᠬᠥᠷ ᠬᠣᠷᠴᠢ ᠦᠰᠦ ᠲᠡᠢ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠡᠪᠦᠷ ᠤᠬᠤᠵᠤ ᠬᠣᠶᠠᠷ ᠨᠢᠭᠡᠨ ᠠᠭᠠᠷᠤᠤᠯ᠂ ᠭᠠᠭᠴᠠ ᠬᠣᠶᠠᠷ ᠡᠭᠡᠵᠡᠭᠡᠢ ᠰᠡᠯᠲᠡ ᠶ᠋ᠢ ᠭᠠᠯ ᠤᠷᠤᠭᠤ ᠰᠢᠳᠡᠯᠡᠨ ᠡᠷᠭᠦᠭᠡᠳ ᠡᠷᠭᠢᠵᠦ ᠬᠠᠷᠠᠯ ᠦᠭᠡᠢ ᠠᠭᠤᠯᠠ ᠶ᠋ᠢᠨ ᠤᠷᠤᠭᠤ ᠪᠤᠰᠢᠭᠤᠬᠠᠨ ᠪᠠᠭᠤᠯᠠ᠃ ᠶᠡᠬᠡ ᠬᠠᠳᠠᠨ ᠤ᠋ ᠬᠦᠮᠦᠭ ᠳᠣᠣᠷᠠᠬᠢ ᠭᠠᠭᠴᠠ ᠮᠣᠳᠣᠨ ᠠ᠋ᠴᠠ ᠤᠶᠠᠵᠤ ᠬᠣᠴᠣᠷᠤᠭᠰᠠᠨ ᠵᠣᠭᠳᠣᠷ ᠶᠡᠬᠡᠲᠦ ᠰᠠᠷᠯᠤᠭ ᠢ᠋ᠶ᠋ᠠᠨ ᠤᠨᠤᠨ ᠭᠠᠵᠠᠷ ᠤ᠋ᠨ ᠪᠠᠯ ᠤᠷᠤᠭᠤ ᠴᠢᠯᠠᠭᠤ᠂ ᠰᠢᠷᠣᠢ ᠲᠠᠢ ᠬᠣᠯᠢᠯᠳᠤᠨ ᠪᠦᠮᠪᠤᠷᠢᠴᠢᠬᠦ ᠰᠢᠭ ᠪᠣᠯᠪᠠ᠃ ᠰᠣᠯᠵᠢᠷ ᠡᠪᠡᠷ ᠲᠡᠢ ᠬᠤᠸᠬᠠᠴᠢᠨ ᠰᠠᠷᠯᠤᠭ ᠬᠥᠩᠬᠥᠷ ᠬᠣᠷᠴᠢ ᠳ᠋ᠤ᠌ ᠳᠥᠷᠦᠯᠡᠭᠦᠯᠵᠦ ᠶᠢᠷᠲᠢᠨᠴᠦ ᠶ᠋ᠢ ᠲᠣᠭᠣᠷᠢᠨ ᠠᠯᠳᠠᠭᠰᠠᠨ ᠠᠮᠢᠲᠠᠨ ᠪᠢᠯᠡ᠃ ᠲᠡᠷᠡ ᠪᠡᠷ ᠵᠡᠯᠢᠭᠦᠳ ᠪᠣᠢᠳᠠ ᠬᠠᠳᠠᠨ ᠠᠭᠤᠯᠠᠰ ᠬᠢᠭᠡᠳ ᠡᠲᠡᠭᠡᠳ ᠥᠨᠳᠥᠷ ᠡᠴᠡ ᠰᠠᠪᠰᠠᠨ ᠪᠠᠭᠠᠭᠢᠬᠤ ᠤᠲᠤᠭᠠ ᠰᠡᠯᠲᠡ ᠡᠴᠡ ᠦᠷᠭᠦᠭᠰᠡᠨ ᠮᠡᠲᠦ ᠪᠥᠮᠪᠥᠯᠵᠡᠲᠡᠯᠡ ᠱᠣᠭᠰᠢᠵᠠᠢ᠃ ᠶᠡᠷᠦ ᠬᠥᠩᠭᠡᠨ ᠬᠥᠯ ᠲᠡᠢ ᠮᠠᠯ ᠶᠤᠮ᠃ ᠬᠥᠩᠬᠥᠷ ᠬᠣᠷᠴᠢ ᠨᠢᠭᠡ ᠶᠡᠬᠡ ᠠᠵᠢᠯ ᠪᠦᠲᠦᠭᠡᠭᠰᠡᠨ ᠮᠡᠲᠦ ᠤᠴᠢᠷ ᠦᠭᠡᠢ ᠲᠠᠢᠪᠤᠰᠢᠷᠠᠵᠤ ᠦᠨᠡᠭᠡᠨ ᠯᠣᠪᠤᠤᠵᠠ ᠪᠠᠨ ᠠᠷᠤ ᠰᠢᠯᠢ ᠤᠷᠤᠭᠤ ᠪᠠᠨ ᠬᠠᠶᠠᠭᠠᠳ᠂
ᠣᠨᠢᠰᠣᠭᠠ ᠬᠣᠯᠠ ᠶ᠋ᠢᠨ ᠵᠡᠷᠭᠡᠯᠭᠡ ᠶ᠋ᠢ ᠨᠢ ᠬᠦ
ᠪᠠᠷᠢᠨ ᠲᠠᠯᠪᠢᠨ ᠪᠣᠳᠣᠯᠠ ᠬᠦ
ᠣᠳᠣ ᠲᠠᠢ ᠨᠡᠢᠯᠡᠨ ᠳᠠᠭᠠᠪᠠᠯ ᠬᠥᠭᠡᠷᠦᠬᠦᠢ
ᠪᠠᠶᠠᠷ ᠤ᠋ᠨ ᠰᠤᠷᠠᠭ ᠨᠢ ᠬᠣᠭᠣᠰᠣᠨ ᠠ᠋ ᠬᠦ
ᠳᠣᠮᠣᠭ ᠠᠯᠤᠰ ᠤ᠋ᠨ ᠮᠠᠨᠠᠨ ᠢ᠋ ᠨᠢ ᠬᠦ
ᠪᠠᠷᠢᠨ ᠲᠠᠯᠪᠢᠨ ᠪᠣᠳᠣᠯᠠ ᠬᠦ
ᠳᠣᠪᠲᠣᠯᠤᠨ ᠣᠴᠢᠭᠠᠳ ᠬᠠᠷᠠᠪᠠᠯ ᠬᠥᠭᠡᠷᠦᠬᠦᠢ
ᠪᠠᠷᠯᠤᠭ ᠤ᠋ᠨ ᠵᠠᠶᠠᠭᠠ ᠰᠢᠭ᠋ ᠬᠣᠭᠣᠰᠣᠨ ᠠ᠋ ᠬᠦ ᠭᠡᠵᠦ ᠬᠠᠩᠭᠢᠨᠠᠲᠠᠯᠠ ᠳᠠᠭᠤᠯᠠᠵᠤ ᠠᠪᠠᠢ᠃ ᠲᠡᠭᠦᠨ ᠦ᠌ ᠦᠰᠦ ᠦᠭᠡᠢ ᠪᠥᠭᠡᠷᠡᠩᠬᠡᠢ ᠲᠣᠯᠣᠭᠠᠢ ᠠ᠋ᠴᠠ ᠠᠭᠤᠷ ᠰᠠᠪᠰᠠᠵᠤ᠂ ᠵᠤᠨ ᠤ᠋ ᠨᠠᠷᠠᠨ ᠳ᠋ᠤ᠌ ᠬᠥᠯᠥᠰᠥ ᠨᠢ ᠪᠥᠩᠵᠢᠭᠡᠨᠡᠨ ᠶᠠᠪᠤᠯᠠ᠃ ᠴᠢᠨᠣᠠ ᠣᠯᠢᠬᠤ ᠮᠡᠲᠦ ᠤᠷᠲᠤ ᠪᠠᠷ ᠤᠶᠠᠩᠭᠠᠯᠠᠭᠤᠯᠤᠨ ᠱᠤᠷᠠᠩᠬᠠᠢᠯᠠᠬᠤ ᠡᠯᠡ ᠳᠠᠭᠤᠤ ᠶ᠋ᠢ ᠲᠦᠷᠢᠵᠦ᠂ ᠳᠠᠪᠠᠭᠠ ᠳᠠᠪᠠᠭᠠᠨ ᠤ᠋ ᠴᠢᠨᠠᠳᠤ ᠠ᠋ᠴᠠ ᠰᠤᠷ ᠤ᠋ᠨ ᠤᠤᠬᠠᠢ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠬᠥᠩᠬᠥᠷ ᠬᠣᠷᠴᠢ ᠰᠠᠶᠢ ᠰᠠᠨᠠᠬᠤ ᠮᠡᠲᠦ ᠣᠪᠤᠭᠤᠰᠬᠢᠨ ᠰᠠᠷᠯᠤᠭ ᠢ᠋ᠶ᠋ᠠᠨ ᠳᠠᠪᠢᠷᠠᠵᠤ᠂
— ᠴᠢ ᠪᠢᠳᠡ ᠬᠣᠶᠠᠷ ᠮᠠᠷᠲᠠᠭᠰᠠᠨ ᠪᠠᠢᠨᠠ᠃ ᠥᠨᠥᠳᠥᠷ ᠴᠢᠨᠢ ᠺᠢᠳᠡᠨ ᠤᠭᠰᠠᠭᠠᠨ ᠤ᠋ ᠶᠧᠯᠢᠦᠢ ᠳᠠᠰᠢ ᠵᠠᠩᠵᠤᠨ ᠤ᠋ ᠲᠦᠭᠡᠭᠡᠯ ᠲᠠᠷᠠᠭᠠᠬᠤ ᠡᠳᠦᠷ ᠪᠣᠯᠤᠨᠠ᠃ ᠴᠥᠬᠥ! ᠴᠥᠬᠥ! ᠭᠡᠮᠡᠨ ᠰᠢᠪᠠᠳᠠᠭᠤᠯᠤᠯᠠ᠃ ᠰᠣᠯᠵᠢᠷ ᠬᠤᠸᠠᠭᠴᠢᠨ ᠰᠠᠷᠯᠤᠭ ᠴᠤ᠌ ᠡᠵᠡᠨ ᠬᠣᠷᠴᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ ᠤᠬᠠᠭᠠᠷᠠᠭᠰᠠᠨ ᠮᠡᠲᠦ ᠤᠯᠠᠭᠠᠨ ᠰᠢᠷᠣᠢ ᠶ᠋ᠢᠨ ᠵᠠᠮ ᠢ᠋ᠶ᠋ᠠᠷ ᠫᠦᠭ ᠫᠦᠭ ᠱᠣᠭᠰᠢᠭᠤᠯᠤᠭᠰᠠᠭᠠᠷ ᠦᠵᠦᠭᠦᠷ ᠲᠦᠷᠦᠭᠦᠦ ᠪᠤᠯᠢᠶᠠᠴᠠᠯᠳᠤᠬᠤ ᠪᠥᠬᠡᠴᠦᠦᠯ ᠭᠠᠷᠴᠤ ᠪᠠᠢᠬᠤ ᠳ᠋ᠤ᠌ ᠨᠠᠭᠠᠳᠤᠮ ᠤ᠋ᠨ ᠲᠠᠯᠠᠪᠠᠢ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡ ᠠ᠋᠃ ᠵᠡᠭᠦᠨ ᠮᠠᠩᠨᠠᠢ ᠳ᠋ᠤ᠌ ᠵᠦ᠋ᠪᠦ᠋ ᠠᠷᠪᠠᠨ ᠨᠠᠢ᠍ᠮᠠᠨ ᠠᠢᠮᠠᠭ ᠲᠠᠭᠠᠨ ᠪᠣᠰᠤᠭᠠ ᠭᠡᠮᠡᠨ ᠭᠠᠢᠬᠠᠭᠳᠠᠬᠤ ᠮᠡᠷᠭᠢᠳ ᠦ᠋ᠨ ᠲᠤᠯᠴᠤ ᠪᠥᠬᠡ ᠲᠠᠪᠢᠨ ᠰᠢᠪᠡᠵᠦ ᠪᠠᠢᠯᠠ᠃ ᠪᠡᠶᠡᠷᠬᠡᠦ ᠡᠷᠡ ᠶ᠋ᠢᠨ ᠭᠠᠷ ᠠᠰᠠᠷ ᠤ᠋ᠨ ᠳᠡᠭᠡᠭᠦᠷ ᠭᠢᠯᠠᠯᠵᠠᠵᠤ᠂ ᠨᠣᠭᠲᠣᠯᠠᠵᠤ ᠪᠣᠭᠣᠭᠰᠠᠨ ᠲᠣᠮᠣ ᠬᠠᠷᠠ ᠭᠤᠲᠤᠯ ᠤ᠋ᠨ ᠬᠢᠨᠢ ᠣᠯᠠᠨ ᠳᠣᠣᠷᠠ ᠠ᠋ᠴᠠ ᠤᠯᠠᠭᠠᠨ ᠲᠣᠭᠣᠰᠣ ᠫᠣᠷ ᠫᠣᠷ ᠫᠣᠷᠬᠢᠵᠤ ᠪᠠᠢᠪᠠ᠃ ᠲᠡᠷᠡ ᠪᠡᠷ ᠳᠡᠪᠢᠬᠦ ᠨᠢ ᠬᠠᠨ ᠭᠠᠷᠤᠳᠢ ᠰᠢᠭ᠋᠂ ᠰᠢᠪᠠᠬᠤ ᠨᠢ ᠵᠤᠭᠳᠤᠷᠲᠤ ᠬᠠᠷᠠ ᠠᠷᠰᠯᠠᠨ ᠰᠢᠭ᠋ ᠰᠦᠷ ᠲᠡᠢ ᠡᠷᠡ ᠶᠦᠮ᠃ ᠥᠭᠡᠳᠡ ᠡᠴᠡ ᠨᠢ ᠦᠷᠦᠬᠦ ᠬᠣᠲᠣᠯᠠ ᠨᠣᠶᠠᠨ ᠮᠥᠷᠥ ᠪᠡᠷ ᠨᠢ ᠲᠠᠲᠠᠬᠤ ᠠᠵᠢ᠃ ᠭᠡᠲᠡᠯᠡ ᠮᠥᠨᠥᠬᠡᠨ ᠬᠥᠩᠬᠥᠷ ᠬᠣᠷᠴᠢ ᠬᠠᠪᠤᠯ ᠬᠠᠭᠠᠨ ᠤ᠋ ᠬᠣᠲᠣᠯᠠ ᠨᠣᠶᠠᠨ ᠤ᠋ ᠮᠥᠷᠥ ᠪᠡᠷ ᠲᠠᠲᠠᠬᠤ ᠪᠥᠯᠥᠭᠡ᠃ ᠲᠤᠯᠴᠤ ᠪᠥᠬᠡ ᠪᠠᠷᠢᠴᠠ ᠣᠯᠵᠤ ᠠᠪᠬᠤ ᠪᠠᠷ ᠵᠣᠷᠢᠮᠠᠭ ᠬᠠᠯᠢᠨ ᠲᠡᠪᠰᠢᠯᠡᠵᠦ᠂ ᠬᠥᠪᠡᠭᠦᠨ ᠬᠣᠲᠣᠯᠠ ᠨᠣᠶᠠᠨ ᠬᠠᠷᠴᠠᠭᠠᠢ ᠳ᠋ᠤ᠌ ᠬᠥᠭᠡᠭᠡᠭᠳᠡᠭᠰᠡᠨ ᠪᠣᠯᠵᠣᠮᠣᠷ ᠮᠡᠲᠦ ᠵᠢᠭᠤᠲᠠᠵᠤ ᠪᠠᠢᠪᠠ᠃ ᠶᠡᠬᠡ ᠨᠠᠭᠠᠳᠤᠮ ᠤ᠋ᠨ ᠠᠮᠲᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠬᠥᠮᠦᠨ ᠵᠤᠨ ᠪᠦᠬᠦᠨ ᠢ᠋ ᠮᠠᠷᠲᠠᠨ ᠮᠡᠯᠡᠷᠡᠵᠡᠢ᠃ ᠡᠯᠡ ᠣᠯᠠᠨ ᠤ᠋ ᠳᠤᠮᠳᠠ ᠶᠡᠷᠦ ᠥᠴᠥᠭᠡᠳᠦᠷᠬᠡᠨ ᠶᠣᠰᠣᠯᠠᠭᠰᠠᠨ ᠡᠷᠡ ᠪᠡᠨ ᠴᠠᠭᠠᠵᠠ ᠪᠠᠷ ᠠᠪᠬᠠᠭᠤᠯᠤᠭᠰᠠᠨ ᠭᠤᠸᠠ ᠬᠠᠲᠤᠨ ᠪᠠᠢᠨ ᠪᠠᠢᠨ ᠤᠷᠤᠭᠤᠯ ᠢ᠋ᠶ᠋ᠠᠨ ᠵᠢᠯᠡᠮᠳᠡᠨ ᠨᠢᠳᠦ ᠦᠯᠦ ᠴᠠᠪᠴᠢᠨ ᠪᠥᠬᠡ ᠰᠢᠷᠲᠡᠵᠦ ᠵᠣᠭᠰᠣᠪᠠ᠃ ᠬᠥᠩᠬᠥᠷ ᠬᠣᠷᠴᠢ《᠁ ᠬᠡᠩ᠂ ᠮᠥᠨ ᠠᠷᠢᠯᠴᠢᠬᠠᠭᠰᠠᠨ ᠳᠣᠲᠣᠷ ᠲᠠᠢ ᠠᠮᠢᠲᠠᠨ ᠠ᠋! ᠳᠣᠯᠣᠭᠠᠨ ᠡᠷᠳᠡᠨᠢ ᠶ᠋ᠢᠨ ᠨᠢᠭᠡ ᠨᠢ ᠡᠢᠮᠦ ᠪᠠᠢᠬᠤ ᠳ᠋ᠤ᠌ ᠲᠠᠲ᠋ᠠᠷ ᠤ᠋ᠨ ᠲᠥᠷᠥ ᠶᠠᠭᠠᠬᠢᠵᠤ ᠥᠭᠡᠳᠡᠯᠡᠬᠦ ᠪᠣᠢ》 ᠭᠡᠮᠡᠨ ᠰᠡᠵᠢᠭᠯᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ《᠁ ᠪᠠᠢᠵᠠ᠂ ᠪᠠᠢᠵᠠ》 ᠭᠡᠮᠡᠨ ᠠᠬᠢᠭᠤᠯᠤᠨ ᠬᠠᠷᠠᠯᠠ᠃ ᠬᠠᠲᠤᠨ ᠤ᠋ ᠭᠠᠷ ᠭᠠᠪᠠ ᠲᠠᠢ ᠠᠭᠠᠳ ᠲᠣᠭᠲᠠᠭᠤᠨ ᠠᠵᠢᠪᠠᠯ ᠪᠡᠶᠡ ᠪᠡᠶᠡ ᠪᠡᠨ ᠬᠠᠯᠠᠵᠤ ᠬᠥᠭᠡᠭᠡᠬᠦ ᠪᠥᠬᠡ ᠶ᠋ᠢ ᠪᠤᠰᠤ᠂ ᠡᠩᠭᠡᠷ ᠡᠴᠡ ᠨᠢ ᠤᠲᠤᠭᠠ ᠤᠭᠤᠭᠢᠬᠤ ᠶᠡᠬᠡ ᠡᠯᠢᠭᠡᠨ ᠠᠭᠤᠯᠠᠰ ᠢ᠋ ᠰᠢᠷᠳᠡᠨ ᠰᠢᠷᠳᠡᠨ ᠪᠠᠢᠪᠠ᠃ ᠬᠥᠬᠡ ᠰᠦᠮᠪᠦᠷ ᠣᠷᠭᠢᠯ ᠤ᠋ᠨ ᠡᠩᠭᠡᠷ ᠡᠴᠡ ᠲᠣᠰᠣ ᠲᠠᠢ ᠬᠠᠷᠠ ᠰᠤᠷ ᠡᠷᠴᠢᠯᠡᠬᠦ ᠰᠢᠭ ᠨᠠᠷᠢᠬᠠᠨ ᠬᠠᠷᠠ ᠤᠲᠤᠭᠠ ᠣᠯᠤᠭᠠᠢᠳᠠᠨ ᠵᠠᠮᠬᠠᠷᠠᠵᠤ ᠪᠠᠢᠯᠠ᠃ ᠴᠢᠩᠭᠢᠲᠡᠯᠡ ᠬᠣᠷᠮᠣᠢᠳᠠᠨ ᠳᠠᠭᠠᠬᠤ ᠵᠢᠭᠠᠯ ᠨᠣᠶᠠᠨ ᠬᠠᠲᠤᠨ ᠢᠵᠢᠢ ᠶ᠋ᠢᠨ ᠢ᠋ᠶ᠋ᠡᠨ ᠭᠠᠪᠠ ᠲᠠᠢ ᠭᠠᠷ ᠠ᠋ᠴᠠ ᠳᠤᠭᠲᠤᠷᠤᠨ ᠨᠢᠭᠡ ᠶ᠋ᠢ ᠰᠢᠯᠭᠠᠭᠠᠪᠠ᠃ ᠬᠠᠲᠤᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠳᠤᠬᠤᠨ ᠳᠡᠭᠡᠷᠡ ᠦᠨᠦᠷᠯᠡᠵᠦ ᠨᠢᠭᠡ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍ ᠠᠷᠤ ᠳ᠋ᠤᠨᠢ ᠵᠣᠭᠰᠣᠵᠤ ᠠᠭᠰᠠᠨ ᠢᠯᠳᠦ ᠲᠡᠢ ᠴᠡᠷᠢᠭ ᠬᠠᠲᠤᠨ ᠤ᠋ ᠪᠤᠯᠪᠠᠷᠠᠢ ᠮᠥᠷᠦᠨ ᠡᠴᠡ ᠵᠡᠷᠯᠢᠭ ᠲᠦᠷᠢᠮᠡᠬᠡᠢ ᠳᠤᠭᠲᠤᠴᠢᠨ ᠲᠠᠭᠤᠭᠠᠳ ᠠᠪᠴᠤ ᠣᠳᠤᠯᠠ᠃ ᠬᠥᠩᠬᠥᠷ ᠬᠣᠷᠴᠢ ᠶ᠋ᠢᠨ ᠬᠠᠷᠠᠭᠠ ᠭᠦᠢᠴᠡᠭᠰᠡᠨ ᠦᠭᠡᠢ᠂ ᠣᠯᠠᠨ ᠤ᠋ ᠳᠤᠮᠳᠠ ᠠᠭᠤᠰᠤᠨ ᠳᠠᠯᠳᠠ ᠣᠷᠣᠵᠠᠢ᠃ ᠡᠨᠡ ᠦᠶᠡᠰ ᠠᠮᠢᠰᠬᠤᠭᠠ ᠳᠠᠷᠤᠨ ᠰᠠᠭᠤᠭᠰᠠᠨ ᠨᠠᠭᠠᠳᠤᠮᠴᠢ ᠣᠯᠠᠨ ᠳᠡᠯᠪᠡᠷᠡᠬᠦ ᠮᠡᠲᠦ ᠨᠢᠷ ᠬᠢᠨ ᠳᠠᠭᠤ ᠠᠯᠳᠠᠵᠤ᠂ ᠲᠡᠷᠡ ᠰᠠᠴᠠᠭᠤ ᠪᠥᠬᠡ ᠶ᠋ᠢᠨ ᠲᠠᠯᠠᠪᠠᠢ ᠳ᠋ᠤ᠌ ᠤᠯᠠᠭᠠᠨ ᠲᠣᠭᠣᠰᠣ ᠲᠠᠲᠠᠭᠠᠳ ᠶᠠᠪᠤᠴᠢᠬᠠᠵᠠᠢ᠃ ᠲᠡᠷᠡ ᠬᠦ᠌ ᠮᠠᠨᠠᠷᠠᠨ ᠪᠣᠰᠤᠭᠰᠠᠨ ᠤᠯᠠᠭᠠᠨ ᠮᠠᠨᠠᠨ ᠳᠤᠮᠳᠠ ᠬᠡᠨ ᠳᠠᠪᠠᠵᠤ᠂ ᠬᠡᠨ ᠡᠪᠦᠳᠦᠭ ᠰᠢᠷᠣᠢᠳᠠᠭᠰᠠᠨ ᠨᠢ ᠡᠰᠡ ᠮᠡᠳᠡᠭᠳᠡᠨ ᠬᠣᠷᠣᠮ ᠬᠢᠷᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠬᠤᠨ ᠤ᠋ ᠥᠲᠥᠨ ᠭᠡᠴᠢᠷ ᠲᠡᠢ ᠬᠤᠰᠤᠨ ᠴᠠᠭᠠᠨ ᠰᠤᠮᠤ ᠮᠡᠲᠦ ᠬᠣᠲᠣᠯᠠ ᠨᠣᠶᠠᠨ ᠲᠠᠪᠢᠨ ᠲᠠᠪᠢᠨ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠬᠤᠷᠠᠭᠰᠠᠨ ᠣᠯᠠᠨ ᠳᠦᠷᠬᠢᠷᠡᠨ ᠬᠤᠷᠤᠢᠯᠠᠪᠠ᠃
— ᠬᠣᠲᠣᠯᠠ᠁ ᠬᠣᠲᠣᠯᠠ᠁ ᠬᠣᠲᠣᠯᠠ᠁ ᠭᠡᠮᠡᠨ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠬᠠᠰᠬᠢᠷᠤᠯᠳᠤᠬᠤ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠭᠦᠶᠦᠨ ᠬᠦᠷᠴᠦ᠂ ᠠᠰᠠᠷ ᠤ᠋ᠨ ᠬᠣᠢᠮᠣᠷ ᠬᠠᠩᠬᠠᠢᠨ ᠰᠠᠭᠤᠬᠤ ᠬᠠᠪᠤᠯ ᠬᠠᠭᠠᠨ ᠤ᠋ ᠡᠮᠦᠨᠡ ᠰᠥᠭᠥᠳᠦᠨ᠂ ᠵᠣᠳᠣᠭ ᠢ᠋ᠶ᠋ᠠᠨ ᠲᠠᠢᠯᠬᠤ ᠳ᠋ᠤ᠌ ᠬᠥᠯ ᠦ᠋ᠨ ᠴᠡᠴᠡ ᠶ᠋ᠢᠨ ᠡᠪᠦᠭᠡᠨ ᠨᠣᠶᠠᠨ ᠬᠡᠰᠢᠭ ᠦ᠋ᠨ ᠪᠣᠭᠣᠷᠰᠣᠭ ᠳᠦᠭᠦᠷᠡᠩ ᠬᠢᠵᠦ ᠥᠭᠭᠦᠯᠡ᠃ ᠬᠠᠪᠤᠯ ᠬᠠᠭᠠᠨ ᠤ᠋ ᠬᠠᠷᠠ ᠨᠢᠳᠦ᠂ ᠴᠠᠭᠠᠨ ᠬᠥᠮᠥᠰᠬᠡ ᠳᠣᠣᠷᠠ ᠠ᠋ᠴᠠ ᠴᠣᠭ ᠵᠢᠪᠬᠤᠯᠠᠩ ᠲᠠᠢ ᠭᠢᠯᠠᠯᠵᠠᠵᠤ᠂
— ᠡᠷᠡ ᠬᠥᠮᠦᠨ ᠬᠦ᠁ ᠭᠤᠷᠪᠠᠨ ᠮᠡᠷᠭᠢᠳ ᠲᠦ᠍ ᠪᠥᠬᠡ ᠶ᠋ᠢᠨ ᠲᠦᠷᠦᠭᠦᠦ ᠠᠯᠳᠠᠭᠰᠠᠨ ᠦᠭᠡᠢ ᠰᠢᠦ ᠭᠡᠮᠡᠨ ᠤᠷᠮᠠ ᠪᠠᠷ ᠱᠠᠩᠨᠠᠪᠠ᠃ ᠬᠣᠲᠣᠯᠠ ᠳᠠᠪᠠᠭᠰᠠᠨ ᠪᠥᠬᠡ ᠶ᠋ᠢᠨ ᠬᠡᠰᠢᠭ ᠦ᠋ᠨ ᠪᠣᠭᠣᠷᠰᠣᠭ ᠰᠠᠴᠤᠯᠠᠨ ᠭᠦᠶᠦᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡᠨ ᠭᠤᠨᠢᠭᠲᠤ ᠬᠠᠷᠠᠴᠠ ᠲᠠᠢ ᠮᠥᠷᠭᠥᠯᠳᠦᠨ ᠶᠠᠭ ᠵᠣᠭᠰᠣᠪᠠ᠃ ᠲᠡᠷᠡ ᠬᠦ᠌ ᠨᠢᠯᠪᠤᠰᠤ ᠲᠠᠢ ᠨᠢᠳᠦ ᠲᠡᠭᠦᠨ ᠢ᠋ ᠴᠣᠬᠢᠭᠠᠳ ᠠᠪᠬᠤ ᠰᠢᠭ᠋ ᠪᠣᠯᠵᠠᠢ᠃ ᠪᠦᠯᠵᠢᠭᠡᠨ ᠭᠤᠸᠠ ᠬᠠᠲᠤᠨ ᠤᠷᠤᠭᠤ ᠬᠣᠶᠠᠷ ᠨᠢᠭᠡᠨ ᠪᠣᠭᠣᠷᠰᠣᠭ ᠰᠢᠳᠡᠬᠦ ᠳ᠋ᠦ᠍ ᠭᠠᠷ ᠨᠢ ᠲᠣᠰᠴᠤ ᠠᠪᠬᠤ ᠪᠠᠷ ᠰᠠᠷᠪᠠᠭᠠᠰᠬᠢᠬᠰᠡᠨ ᠪᠣᠯᠪᠠᠴᠤ ᠠᠮᠵᠢᠯ ᠪᠣᠯᠤᠭᠰᠠᠨ ᠦᠭᠡᠢ᠃ ᠭᠠᠪᠠ ᠭᠢᠨᠵᠢ ᠬᠠᠩᠭᠢᠷ ᠵᠢᠩᠭᠢᠷ ᠬᠢᠨ ᠦᠯᠡᠳᠡᠵᠡᠢ᠃ ᠬᠣᠲᠣᠯᠠ ᠶ᠋ᠢᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠦᠭᠡᠢ ᠪᠣᠯᠪᠠ᠃ ᠴᠢᠮᠡᠭᠡ ᠦᠭᠡᠢ ᠬᠠᠷᠠᠵᠤ ᠬᠠᠷᠠᠵᠤ ᠫᠣᠳ ᠫᠣᠳ ᠬᠢᠨ ᠨᠢᠯᠪᠤᠰᠤ ᠮᠡᠲᠦ ᠳᠤᠰᠤᠯᠠᠬᠤ ᠪᠣᠭᠣᠷᠰᠣᠭ ᠢ᠋ᠶ᠋ᠠᠨ ᠰᠠᠴᠤᠯᠠᠨ ᠬᠥᠯ ᠦ᠋ᠨ ᠴᠡᠴᠡ ᠤᠷᠤᠭᠤ ᠭᠦᠶᠦᠵᠡᠢ᠃ ᠡᠨᠡ ᠪᠦᠭᠦᠳᠡ ᠶ᠋ᠢ ᠭᠢᠷᠠᠬᠠᠢ ᠠᠵᠢᠵᠤ ᠰᠠᠭᠤᠭᠰᠠᠨ ᠶᠧᠯᠢᠦᠢ ᠳᠠᠰᠢ᠂
— ᠭᠤᠷᠪᠠᠨ ᠨᠠᠭᠠᠳᠤᠮ ᠲᠠᠨ ᠤ᠋ ᠪᠣᠯᠪᠠ ᠠ᠋ ᠭᠡᠯᠡ᠃ ᠬᠠᠪᠤᠯ ᠬᠠᠭᠠᠨ ᠲᠠᠰᠢᠶᠠᠯᠳᠤᠨ ᠴᠡᠭᠡᠵᠢ ᠪᠡᠷ ᠢ᠋ᠶ᠋ᠡᠨ ᠬᠠᠭᠠᠰ ᠡᠷᠭᠢᠵᠦ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ᠂
— ᠨᠣᠶᠠᠨ ᠲᠠ ᠶᠠᠭᠤ ᠶᠠᠷᠢᠨᠠ? ᠪᠢ ᠴᠢᠨᠢ ᠳᠥᠷᠪᠡᠨ ᠨᠠᠭᠠᠳᠤᠮ ᠠᠪᠴᠢᠬᠠᠭᠠᠳ ᠪᠠᠢᠨᠠ ᠰᠢᠦ ᠳᠡ ᠭᠡᠪᠡᠯ ᠶᠧᠯᠢᠦᠢ ᠳᠠᠰᠢ ᠭᠦᠶᠦᠬᠦ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠲᠤᠯᠠᠳᠠ ᠪᠠᠨ ᠦᠭᠡ ᠶ᠋ᠢᠨ ᠣᠴᠢᠭ ᠢ᠋ ᠰᠦᠷᠡᠬᠡᠢ ᠲᠡᠮᠲᠡᠷᠢᠵᠦ᠂
— ᠨᠡᠭᠡᠷᠡᠨ ᠲᠠ ᠴᠢᠨᠢ ᠨᠠᠮᠠᠶ᠋ᠢ ᠳᠠᠪᠠᠭᠰᠠᠨ ᠯᠠ ᠳᠠ ᠭᠡᠳ ᠶᠠᠭᠤ ᠴᠣ ᠪᠣᠯᠤᠭᠠ ᠦᠭᠡᠢ ᠮᠡᠲᠦ ᠢᠨᠢᠶᠡᠪᠬᠢᠯᠡᠪᠡ᠃ ᠨᠡᠭᠡᠷᠡᠨ ᠯᠡ ᠶᠧᠯᠢᠦᠢ ᠳᠠᠰᠢ ᠡᠪᠦᠭᠡᠨ ᠬᠠᠪᠤᠯ ᠳ᠋ᠤ᠌ ᠨᠡᠭᠦᠳᠡᠯ ᠠᠯᠲᠠᠨ ᠬᠣᠵᠢᠭᠳᠠᠵᠤ᠂ ᠥᠷᠥᠨᠡ ᠵᠦᠭ ᠲᠦ᠍ ᠨᠡᠭᠦᠬᠦ ᠡᠴᠡ ᠥᠭᠡᠷᠡ ᠦᠭᠡ ᠦᠭᠡᠢ ᠱᠠᠯᠠᠭᠠᠨ ᠳ᠋ᠤ᠌ ᠣᠷᠣᠴᠢᠬᠠᠭᠠᠳ ᠪᠠᠢᠭᠠ ᠪᠢᠯᠡ᠃ ᠭᠡᠪᠡᠴᠦ ᠨᠢᠭᠡᠨᠲᠡ ᠠᠯᠳᠠᠭᠰᠠᠨ ᠪᠤᠲᠠ᠂ ᠠᠯᠳᠠᠭᠰᠠᠨ ᠪᠣᠳᠣᠯ ᠳ᠋ᠤ᠌ ᠬᠠᠷᠠᠮᠰᠠᠭᠠᠳ ᠪᠠᠢᠬᠤ ᠴᠠᠭ ᠪᠤᠰᠤ ᠲᠤᠯᠠ ᠣᠪᠰᠣᠭᠠ ᠭᠠᠷᠭᠠᠨ ᠰᠠᠮᠪᠠᠭᠠᠴᠢᠯᠠᠵᠤ ᠮᠥᠩᠭᠥᠨ ᠲᠣᠨᠣᠭ ᠲᠠᠢ ᠰᠢᠷᠢᠨ ᠪᠦᠰᠡ ᠪᠡᠨ ᠲᠠᠢᠯᠤᠨ ᠬᠣᠲᠣᠯᠠ ᠶ᠋ᠢᠨ ᠭᠠᠷ ᠳᠡᠭᠡᠷᠡ ᠲᠠᠯᠪᠢᠭᠠᠳ᠂
— ᠤᠯᠠᠮ ᠰᠠᠢᠨ ᠪᠠᠷᠢᠯᠳᠤᠭᠠᠷᠠᠢ! ᠭᠡᠪᠡ᠃ ᠬᠤᠷᠠᠭᠰᠠᠨ ᠣᠯᠠᠨ ᠪᠦᠰᠡ ᠰᠣᠯᠢᠯᠴᠠᠵᠤ ᠠᠬᠠ ᠳᠡᠭᠦᠦ ᠪᠣᠯᠤᠯᠴᠠᠪᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠠᠩᠵᠤ ᠲᠠᠢ ᠬᠤᠷᠤᠢᠯᠠᠨ ᠠᠵᠢ᠃
— ᠲᠠ ᠴᠦ᠍ ᠰᠠᠢᠬᠠᠨ ᠬᠦᠦ ᠨᠤᠭᠦᠳ ᠲᠡᠢ ᠶᠦᠮ ᠠ᠋᠃
—《ᠪᠦᠷ ᠴᠦ᠍ ᠰᠠᠢᠬᠠᠨ ᠬᠦᠦ ᠪᠠᠢᠭᠰᠠᠨ ᠶᠤᠮ ᠠ᠋》 ᠭᠡᠵᠦ ᠠᠮᠢᠳᠤ ᠠ᠋ᠴᠠ ᠨᠢ ᠢᠯᠡᠭᠦᠦ ᠦᠬᠦᠭᠰᠡᠨ ᠢ᠋ᠶ᠋ᠡᠨ ᠦᠭᠡᠢᠯᠡᠨ ᠰᠢᠮᠰᠢᠷᠡᠬᠦ ᠳ᠋ᠦ᠍ ᠡᠪᠦᠭᠡᠨ ᠬᠠᠭᠠᠨ ᠤ᠋ ᠰᠠᠮᠰᠠ ᠱᠠᠷᠬᠢᠷᠠᠵᠤ᠂ ᠪᠤᠭᠤᠷᠤᠯ ᠬᠥᠮᠥᠰᠬᠡ ᠨᠢ ᠴᠡᠴᠡᠷᠭᠡᠨᠡᠨ᠂
— ᠪᠠᠢᠭ᠂ ᠲᠦᠢ! ᠲᠦᠢ! ᠭᠡᠯᠡ᠃ ᠬᠠᠲᠠᠭᠠᠨ ᠬᠦᠦ ᠳ᠋ᠡᠭᠡᠨ ᠬᠠᠢᠷᠠᠲᠠᠢ ᠶᠠᠪᠤᠭᠰᠠᠨ ᠶᠤᠮ ᠠ᠋᠃
— ᠢᠷᠡᠭᠦᠯ ᠳ᠋ᠦ᠍ ᠥᠬᠢᠨᠪᠠᠷᠬᠠᠭ ᠪᠣᠰᠤᠭᠠ ᠦᠯᠡᠳᠡᠪᠡ᠃ ᠲᠡᠭᠦᠨ ᠦ᠌ ᠰᠡᠯᠡᠮᠡ ᠳᠠᠭᠠᠭᠠᠯᠭᠠᠬᠤ᠂ᠵᠢᠳᠠ ᠴᠢᠴᠢᠯᠡᠬᠦ ᠡᠷᠳᠡᠮ ᠬᠣᠣᠰ ᠦᠭᠡᠢ ᠶᠦᠮ᠃ ᠪᠢ ᠶᠠᠳᠠᠵᠤ ᠭᠤᠴᠢᠨ ᠡᠢᠮᠦ ᠴᠡᠷᠢᠭ ᠲᠡᠢ ᠪᠠᠢᠭᠰᠠᠨ ᠪᠣᠯᠤᠭᠠᠰᠠᠢ ᠭᠡᠵᠦ ᠶᠸᠯᠢᠣᠢ ᠳᠠᠰᠢ ᠠᠳᠬᠠᠬᠤ ᠳ᠋ᠤ᠌ ᠬᠠᠪᠤᠯ ᠬᠠᠨ ᠴᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠠᠭᠠᠵᠢᠭᠤ ᠰᠢᠪᠲᠤᠷᠠᠨ᠂
— ᠥᠷᠥᠨᠡᠲᠦ ᠶ᠋ᠢᠨ ᠡᠷᠡᠰ ᠢ᠋ ᠲᠡᠩᠬᠡᠭᠡᠯᠢᠭ ᠭᠡᠵᠦ ᠪᠢ ᠲᠤᠭᠤᠯᠤᠭᠰᠠᠨ ᠶᠤᠮ ᠪᠠᠢᠨᠠ ᠬᠡᠮᠡᠵᠡᠢ᠃ ᠶᠸᠯᠢᠣᠢ ᠳᠠᠰᠢ ᠴᠢᠮᠡᠭᠡ ᠦᠭᠡᠢ ᠢᠨᠢᠶᠡᠭᠰᠡᠨ ᠢ᠋ᠶ᠋ᠡᠨ᠂
— ᠪᠠᠰᠠ ᠮᠡᠷᠭᠡᠨ ᠬᠠᠷᠪᠤᠭᠠ ᠶ᠋ᠢ ᠲᠠ ᠠᠪᠤᠯᠠ᠃ ᠲᠠᠨ ᠤ᠋ ᠬᠦᠦ ᠪᠠᠷᠠᠳᠠᠨᠪᠠᠭᠠᠲᠤᠷ ᠤ᠋ᠨ ᠲᠠᠲᠠᠯᠲᠠ᠂ ᠲᠠᠯᠪᠢᠯᠲᠠ ᠶ᠋ᠢ ᠬᠠᠷᠠᠭᠰᠠᠨ ᠪᠢᠵᠡ? ᠪᠢ ᠡᠢᠮᠦ ᠴᠡᠷᠢᠭ ᠲᠡᠢ ᠪᠣᠯ᠁ ᠭᠡᠰᠡᠨ ᠢ᠋ᠶ᠋ᠡᠨ ᠬᠡᠯᠡ ᠪᠡᠨ ᠬᠠᠵᠠᠨ ᠴᠢᠮᠡᠭᠡ ᠲᠠᠰᠤᠷᠠᠪᠠ᠃ ᠬᠠᠮᠤᠭ ᠮᠣᠩᠭᠣᠯ ᠤ᠋ᠨ ᠬᠠᠭᠠᠨ ᠬᠠᠪᠤᠯ ᠬᠠᠷᠢᠭᠤ ᠬᠡᠯᠡᠭᠰᠡᠨ ᠦᠭᠡᠢ᠃ ᠬᠠᠷᠢᠨ ᠬᠥᠬᠡ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠰᠢᠷᠳᠡᠨ ᠴᠢᠮᠡᠭᠡ ᠴᠢᠩᠨᠠᠬᠤ ᠮᠡᠲᠦ ᠬᠣᠷᠣᠮ ᠬᠢᠷᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ᠂
— ᠶᠠᠯᠠᠲᠤ ᠲᠠᠲ᠋ᠠᠷ ᠤ᠋ᠨ ᠴᠢᠪᠢᠯᠲᠦ ᠬᠠᠲᠤᠨ! ᠭᠡᠯᠡ᠃ ᠴᠣᠬᠣᠮ ᠡᠯᠡ ᠵᠠᠷᠯᠢᠭ ᠢ᠋ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠢᠯᠳᠦᠲᠦ ᠴᠡᠷᠢᠭ ᠭᠠᠪᠠ ᠲᠠᠢ ᠬᠠᠲᠤᠨ ᠢ᠋ ᠳᠥᠩᠭᠡ ᠲᠡᠢ ᠬᠥᠪᠡᠭᠦᠨ ᠦ᠌ ᠬᠠᠮᠲᠤ ᠴᠢᠴᠢᠯᠡᠨ ᠲᠦᠯᠬᠢᠴᠢᠨ ᠲᠠᠭᠤᠵᠤ ᠶᠡᠬᠡ ᠬᠠᠭᠠᠳ ᠤ᠋ᠨ ᠥᠯᠮᠡᠢ ᠶ᠋ᠢᠨ ᠲᠤᠰ ᠠᠪᠴᠢᠷᠠᠪᠠ᠃ ᠬᠠᠪᠤᠯ ᠬᠠᠭᠠᠨ ᠲᠩᠷᠢ ᠶ᠋ᠢᠨ ᠡᠭᠦᠯᠡᠨ ᠮᠡᠲᠦ ᠴᠠᠭᠠᠨ ᠰᠠᠬᠠᠯ ᠢ᠋ᠶ᠋ᠠᠨ ᠢᠯᠢᠨ᠂
— ᠣᠯᠵᠠᠯᠠᠵᠤ ᠢᠷᠡᠭᠰᠡᠨ ᠣᠮᠣᠭᠳᠠᠨ ᠣᠯᠠᠨ ᠤ᠋ ᠨᠢᠳᠦᠨ ᠳᠡᠭᠡᠷᠡ᠂ ᠣᠯᠵᠠᠯᠠᠭᠤᠯᠵᠤ ᠶᠠᠪᠤᠭᠰᠠᠨ ᠣᠪᠣᠭ ᠤ᠋ᠨ ᠣᠯᠠᠨ ᠤ᠋ ᠨᠢᠭᠤᠷᠤᠨ ᠳᠡᠭᠡᠷᠡ ᠴᠢᠮᠠ ᠳ᠋ᠤ᠌ ᠶᠠᠯᠠ ᠣᠨᠣᠭᠠᠰᠤ! ᠨᠢᠭᠡᠨ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠲᠠ ᠠᠢᠯ ᠠᠢᠯ ᠤ᠋ᠨ ᠲᠣᠭᠣᠭᠠ ᠥᠩᠭᠡᠢᠵᠦ ᠠᠮᠢ ᠵᠢᠭᠤᠵᠤ ᠶᠠᠪᠤᠰᠤᠭᠠᠢ! ᠬᠡᠮᠡᠪᠡ᠃ ᠪᠦᠯᠵᠢᠭᠡᠨ ᠭᠤᠸᠠ ᠴᠢᠮᠡᠭᠡ ᠦᠭᠡᠢ ᠮᠡᠬᠦᠢᠰᠬᠢᠬᠦ ᠳ᠋ᠦ᠍ ᠬᠣᠲᠣᠯᠠ ᠶ᠋ᠢᠨ ᠵᠢᠷᠦᠬᠡ ᠡᠮᠲᠡᠷᠡᠬᠦ ᠰᠢᠭ ᠪᠣᠯᠵᠤ᠂ ᠲᠦᠷᠦᠭᠦᠦ ᠪᠥᠬᠡ ᠶ᠋ᠢᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠣᠷᠣ ᠦᠭᠡᠢ ᠵᠠᠮᠬᠠᠷᠠᠵᠤ ᠠᠪᠠᠢ᠃ ᠵᠤᠯᠠᠢ ᠢᠯᠢᠬᠦ ᠰᠠᠯᠬᠢᠨ ᠤ᠋ ᠲᠡᠷᠲᠡᠭᠡ ᠬᠥᠬᠡ ᠲᠡᠭᠷᠢ ᠶ᠋ᠢᠨ ᠭᠦᠨ ᠳ᠋ᠦ᠍ ᠶᠡᠷᠦ ᠪᠤᠰᠤ ᠶ᠋ᠢᠨ ᠶᠡᠬᠡ ᠬᠡᠢ ᠮᠣᠷᠢ᠂ ᠰᠦᠯᠳᠡ ᠡᠭᠦᠯᠡᠨ ᠮᠡᠲᠦ ᠬᠤᠷᠠᠯᠳᠤᠨ ᠪᠣᠢ ᠶ᠋ᠢ ᠯᠡ ᠳᠠᠮ ᠲᠣᠮᠬᠠᠨ ᠮᠡᠳᠡᠷᠡᠵᠦ ᠪᠠᠶᠠᠷ ᠭᠤᠨᠢᠭ ᠵᠡᠷᠭᠡᠴᠡᠨ ᠪᠠᠢᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠢᠯᠢᠭ᠌᠂ ᠨᠠᠷᠠᠨᠲᠤᠶᠠᠭᠠ᠂ ᠭᠡᠷᠡᠯ᠂ ᠬᠡᠯᠡᠰᠣᠶᠣᠯ(ᠪᠤᠤ ᠸᠧᠨ ᠬᠤᠸᠠ)᠂
ᠮᠥᠩᠭᠥᠨ᠂ ᠤᠷᠠᠨᠴᠢᠮᠡᠭ᠂ ᠡᠭᠦᠯᠡᠩᠬᠤᠸᠠᠷ᠂ ᠪᠠᠶᠠᠨᠴᠡᠴᠡᠭ᠂ ᠪᠠᠢ᠂ ᠰᠠᠷᠠᠨᠠ᠂
ᠬᠡᠷᠡᠢᠳ ᠮᠥᠩᠬᠡᠨᠠᠰᠤᠨ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂ ᠡᠷᠳᠡᠨᠢᠭᠤᠸᠠ᠂ ᠰᠣᠶᠣᠯᠲᠤ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠭᠠᠷᠮᠠ᠂ ᠨᠠᠷᠠᠨ᠂ ᠪᠠᠯ᠂ ᠪᠠᠶᠠᠨᠴᠡᠴᠡᠭ᠂ ᠮᠣᠩᠭᠣᠯ ᠰᠦᠨᠡᠰᠦ᠂
ᠬᠡᠯᠡᠰᠣᠶᠣᠯ( ᠪᠦᠦ ᠸᠧᠨ ᠬᠤᠸᠠ)᠂ ᠡᠭᠦᠯᠡᠩᠬᠤᠸᠠᠷ