ᠳᠠᠷᠢᠭᠠᠩᠭᠠ ᠠᠶᠠᠯᠭᠤ - ᠸᠠᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷ Дарьганга аялгуу - Очирбатын Дашбалбар
299ᠳᠠᠷᠢᠭᠠᠩᠭᠠ ᠠᠶᠠᠯᠭᠤ
ᠠᠯᠢᠶᠠ ᠪᠠᠭᠠᠬᠠᠨ ᠬᠦᠦ ᠲᠡᠢ ᠪᠡᠨ ᠡᠷᠲᠡᠬᠡᠨ ᠤᠴᠠᠷᠠᠬᠤ ᠨᠢ ᠶᠠᠭᠠᠬᠢᠪᠠ ᠳᠠ
ᠠᠯᠠᠭᠯᠠᠨ ᠠᠯᠠᠭᠯᠠᠨ ᠤᠷᠭᠤᠪᠠᠴᠤ᠂ ᠠᠮᠠᠷᠬᠠᠨ ᠭᠠᠩᠳᠠᠬᠤ ᠴᠡᠴᠡᠭᠡᠰ
ᠠᠮᠢᠲᠠᠨ ᠤ᠋ ᠵᠢᠭᠠᠬᠠᠨ ᠦᠷᠡ ᠶ᠋ᠢ ᠪᠡᠨ ᠬᠡᠳᠦᠢ ᠪᠣᠯᠲᠠᠯᠠ ᠤᠢᠮᠤᠷᠠᠬᠤ ᠪᠣᠢ
ᠡᠵᠢ ᠶ᠋ᠢᠨ ᠣᠶᠣᠭᠰᠠᠨ ᠳᠡᠪᠡᠯ ᠦ᠋ᠨ ᠡᠩᠭᠡᠷ ᠢ᠋ ᠨᠣᠷᠭᠠᠵᠤ ᠤᠬᠢᠯᠠᠭᠰᠠᠨ ᠴᠤ᠌
ᠡᠨᠡ ᠯᠡ ᠶᠠᠪᠤᠭᠠ ᠨᠠᠰᠤᠨ ᠳ᠋ᠤ᠌ ᠣᠷᠣᠢᠲᠠᠭᠰᠠᠨ ᠬᠠᠢᠷᠠ ᠮᠢᠨᠢ ᠳᠡ
ᠡᠭᠡᠴᠢ ᠶ᠋ᠢᠨ ᠬᠡᠯᠡᠭᠰᠡᠨ ᠦᠭᠡ ᠶ᠋ᠢᠨ ᠡᠷᠴᠢ ᠶ᠋ᠢ ᠰᠤᠯᠠᠷᠠᠭᠤᠯᠵᠤ ᠪᠣᠳᠣᠭᠰᠠᠨ ᠴᠤ᠌
ᠡᠷᠪᠡᠭᠡᠷ ᠪᠠᠭᠠ ᠥᠬᠢᠨ ᠳ᠋ᠦ᠍ ᠳᠠᠰᠤᠭᠰᠠᠨ ᠰᠡᠳᠬᠢᠯ ᠮᠢᠨᠢ ᠳᠡ
ᠳᠣᠯᠣᠭᠠᠨ ᠪᠤᠷᠬᠠᠨ ᠢ᠋ ᠵᠢᠰᠦᠯᠡᠵᠦ ᠳᠣᠲᠣᠨᠣᠬᠠᠨ ᠲᠡᠭᠦᠨ ᠳ᠋ᠡᠭᠡᠨ ᠥᠭᠭᠦᠭᠡᠳ
ᠳᠣᠣᠷᠠ ᠶ᠋ᠢᠨ ᠨᠠᠮᠤᠭᠤᠨ ᠰᠥᠨᠢ ᠪᠡᠷ ᠳᠣᠭᠳᠣᠯᠵᠤ ᠶᠠᠪᠤᠭᠰᠠᠨ ᠮᠢᠨᠢ ᠳᠡ
ᠨᠠᠮᠤᠷ ᠣᠷᠣᠢ ᠶ᠋ᠢᠨ ᠴᠢᠯᠥᠭᠡᠨ ᠳ᠋ᠦ᠍ ᠬᠡᠨ ᠬᠡᠨ ᠳ᠋ᠡᠭᠡᠨ ᠠᠭᠤᠰᠴᠤ
ᠨᠡᠷᠡᠲᠦ ᠶᠢᠷᠲᠢᠨᠴᠦ ᠶ᠋ᠢ ᠠᠷᠭᠠᠳᠠᠭᠠᠳ ᠨᠠᠭᠠᠳᠴᠤ ᠶᠠᠪᠤᠭᠰᠠᠨ ᠦᠶᠡ ᠮᠢᠨᠢ
ᠳᠡᠭᠳᠡᠭᠡᠬᠡᠢ ᠪᠡᠨ ᠳᠠᠭᠠᠭᠤᠯᠤᠭᠠᠳ ᠬᠣᠣᠰ ᠢ᠋ᠶ᠋ᠠᠷ ᠨᠢᠰᠦᠭᠰᠡᠨ ᠠᠩᠭᠢᠷ ᠰᠢᠭ᠋
ᠳᠡᠯᠡᠬᠡᠢ ᠳᠡᠭᠡᠷᠡ ᠪᠢ ᠴᠢᠮᠠ ᠲᠠᠢ ᠪᠠᠨ ᠪᠠᠷᠳᠠᠮᠬᠠᠨ ᠴᠤ᠌ ᠶᠠᠪᠤᠳᠠᠭ ᠰᠠᠨ᠃
ᠰᠢᠪᠡᠷᠡᠭᠡ ᠨᠠᠮᠤᠭᠤᠨ ᠪᠣᠷᠣᠭᠠ ᠨᠢ ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠳᠡᠪᠲᠦᠭᠡᠵᠦ
ᠰᠢᠪᠡᠨᠡᠵᠦ ᠶᠠᠷᠢᠭᠰᠠᠨ ᠦᠭᠡᠰ ᠢ᠋ ᠠᠭᠤᠯᠠᠰ ᠴᠢᠮᠡᠭᠡ ᠦᠭᠡᠢ ᠰᠣᠨᠣᠰᠳᠠᠭ ᠰᠠᠨ᠃
ᠬᠠᠯᠢᠭᠤᠨ ᠨᠠᠮᠤᠷ ᠤ᠋ᠨ ᠪᠤᠭᠤ ᠨᠢ ᠬᠠᠶᠠ ᠬᠠᠶᠠ ᠣᠷᠣᠮᠳᠠᠵᠤ
ᠬᠠᠯᠠᠭᠤᠨ ᠪᠦᠯᠢᠶᠡᠨ ᠨᠢᠯᠪᠤᠰᠤ᠂ ᠬᠠᠴᠠᠷ ᠳᠠᠭᠠᠭᠠᠳ ᠪᠥᠮᠪᠥᠷᠢᠨᠡ᠃
ᠬᠠᠯᠬᠠ ᠶ᠋ᠢᠨ ᠰᠠᠢᠬᠠᠨ ᠥᠬᠢᠨ ᠢ᠋ ᠬᠠᠢᠷᠠᠯᠠᠨ ᠬᠠᠢᠷᠠᠯᠠᠨ ᠠᠭᠤᠵᠢᠷᠠᠭᠠᠳ
ᠬᠠᠷᠠᠬᠠᠨ ᠨᠢᠳᠦᠨ ᠳ᠋ᠦ᠍ ᠤᠨᠠᠵᠤ᠂ ᠨᠢᠭᠦᠯ ᠪᠤᠶᠠᠨ ᠢ᠋ ᠮᠠᠷᠲᠠᠨᠠ᠃
ᠪᠣᠭᠳᠠ ᠳᠥᠷᠪᠡᠨ ᠠᠭᠤᠯᠠ ᠶ᠋ᠢᠨ ᠬᠣᠷᠮᠣᠢ ᠶᠣ᠌ ᠶ᠋ᠢ ᠨᠢ ᠳᠡᠷᠡᠯᠡᠭᠡᠳ
ᠪᠣᠷᠣ ᠪᠣᠷᠣᠬᠠᠨ ᠵᠢᠷᠦᠬᠡ ᠪᠡᠨ ᠴᠢᠩᠨᠠᠵᠤ ᠬᠡᠪᠲᠡᠳᠡᠭ ᠶᠤᠮᠰᠠᠨ
ᠪᠣᠰᠤᠨ ᠰᠠᠭᠤᠨ ᠵᠢᠷᠭᠢᠬᠦ ᠬᠥᠭᠡᠷᠦᠬᠦᠨ ᠪᠣᠯᠵᠣᠮᠣᠷ ᠢ᠋ ᠨᠢ ᠥᠬᠥᠭᠡᠷᠳᠡᠭᠡᠳ
ᠪᠣᠷᠣᠭ ᠡᠪᠡᠰᠦᠨ ᠳᠤᠮᠳᠠ ᠨᠢ ᠬᠡᠨ ᠬᠡᠨ ᠢ᠋ᠶ᠋ᠡᠨ ᠡᠩᠬᠦᠷᠡᠢᠯᠡᠳᠡᠭ ᠰᠠᠨ᠃
ᠰᠠᠨᠠᠭᠠ ᠠᠯᠳᠠᠬᠤ ᠲᠣᠭᠠᠯᠠᠩ ᠳ᠋ᠤ᠌ ᠨᠠᠮᠤᠷ ᠤ᠋ᠨ ᠨᠠᠪᠴᠢᠰ ᠤᠨᠠᠵᠤ
ᠰᠠᠷᠠᠨ ᠭᠡᠷᠡᠯᠲᠦᠭᠰᠡᠨ ᠡᠳᠦᠷ ᠢ᠋ᠶ᠋ᠡᠷ ᠰᠠᠨᠴᠢᠭ ᠢ᠋ ᠨᠢ ᠢᠯᠪᠢᠨ ᠡᠷᠬᠡᠯᠡᠳᠡᠭ ᠰᠠᠨ᠃
ᠡᠷᠳᠡᠨᠢᠲᠦ ᠬᠥᠮᠦᠨ ᠪᠣᠯᠵᠤ ᠡᠨᠡᠬᠡᠨ ᠳᠡᠯᠡᠬᠡᠢ ᠳ᠋ᠦ᠍ ᠲᠥᠷᠥᠭᠡᠳ
ᠡᠷᠲᠡᠨ ᠦ᠌ ᠰᠠᠢᠬᠠᠨ ᠢᠷᠦᠭᠡᠯ ᠢ᠋ᠶ᠋ᠡᠷ ᠴᠢᠮᠠ ᠶ᠋ᠢ ᠪᠡᠨ ᠬᠦᠯᠢᠶᠡᠵᠦ ᠶᠠᠪᠤᠵᠤ ᠳᠠ ᠁
ᠲᠦᠮᠣᠩ ᠲᠦᠮᠣᠩ ᠤᠷᠤᠰᠬᠠᠯ ᠲᠠᠢ ᠨᠠᠮᠤᠷ ᠤ᠋ᠨ ᠭᠣᠣᠯ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍
ᠲᠥᠯᠥᠭᠡᠨ ᠲᠥᠯᠥᠭᠡᠨ ᠰᠢᠷᠳᠡᠯᠴᠡᠭᠰᠡᠨ ᠳᠥᠷᠪᠡᠨ ᠠᠯᠠᠭ ᠨᠢᠳᠦ ᠪᠡᠨ
ᠨᠠᠷᠠᠨ ᠰᠠᠷᠠᠨ ᠡᠭᠡᠯᠵᠢᠯᠡᠭᠰᠡᠨ ᠨᠠᠮᠤᠭᠤᠨ ᠡᠨᠡᠬᠡᠨ ᠬᠣᠷᠸᠠ ᠳ᠋ᠤ᠌
ᠨᠠᠢᠭᠤᠯᠵᠠᠭᠰᠠᠨ ᠴᠡᠴᠡᠭ ᠦ᠋ᠨ ᠳᠤᠮᠳᠠ ᠨᠠᠢᠷᠠᠭᠰᠠᠨ ᠨᠡᠢᠯᠡᠭᠰᠡᠨ ᠬᠠᠢᠷᠠ ᠠ᠋
ᠵᠢᠷᠭᠤᠭᠠᠨ ᠰᠠᠷᠠ ᠶ᠋ᠢᠨ ᠨᠠᠰᠤᠲᠠᠢ ᠴᠡᠴᠡᠭ ᠦ᠋ᠳ ᠢ᠋ ᠥᠷᠥᠪᠳᠦᠭᠰᠡᠨ ᠶᠤᠮᠰᠠᠨ
ᠵᠠᠭᠤᠨ ᠵᠢᠯ ᠬᠠᠭᠠᠴᠠᠯ ᠦᠭᠡᠢ ᠵᠢᠷᠭᠠᠬᠤ ᠶ᠋ᠢ ᠮᠥᠷᠥᠭᠡᠳᠦᠭᠰᠡᠨ ᠶᠤᠮᠰᠠᠨ
ᠵᠠᠭᠤᠷᠠᠳᠤ ᠶ᠋ᠢᠨ ᠶᠢᠷᠲᠢᠨᠴᠦ ᠶ᠋ᠢ ᠮᠥᠩᠬᠡ ᠳ᠋ᠦ᠍ ᠰᠠᠨᠠᠨ ᠳᠠᠭᠤᠯᠠᠭᠰᠠᠨ ᠶᠤᠮᠰᠠᠨ
ᠵᠤᠷᠪᠤᠰᠬᠠᠨ ᠠᠮᠢᠳᠤᠷᠠᠯ ᠢ᠋ ᠡᠭᠦᠷᠢᠳᠡ ᠪᠡᠷ ᠪᠣᠳᠣᠨ ᠠᠮᠢᠳᠤᠷᠠᠭᠰᠠᠨ ᠶᠤᠮᠰᠠᠨ᠃
ᠠᠯᠲᠠᠨᠴᠡᠴᠡᠭ ᠠ᠋᠂ ᠨᠣᠬᠠᠢ ᠪᠠᠨ ᠬᠣᠷᠢᠭᠠᠷᠠᠢ! ᠭᠡᠵᠦ ᠳᠠᠭᠤᠳᠠᠵᠤ ᠶᠠᠪᠤᠭᠰᠠᠨ
ᠠᠯᠢᠶᠠᠬᠠᠨ ᠪᠠᠭᠠ ᠨᠠᠰᠤ ᠮᠢᠨᠢ ᠠᠬᠢᠭᠠᠳ ᠨᠠᠳᠠ ᠳ᠋ᠠᠭᠠᠨ ᠢᠷᠡᠬᠦ ᠦᠭᠡᠢ ᠴᠦ᠍
ᠠᠮᠠᠷᠠᠭᠯᠠᠨ ᠬᠠᠢᠷᠠᠯᠠᠵᠤ ᠠᠷᠠᠳ ᠤ᠋ᠨ ᠳᠠᠭᠤᠨ ᠳ᠋ᠠᠭᠠᠨ ᠤᠶᠠᠷᠠᠭᠰᠠᠨ ᠮᠢᠨᠢ
ᠠᠶᠠᠯᠭᠤᠲᠤ ᠱᠠᠨᠵᠠᠨ ᠤ᠋ ᠦᠵᠦᠭᠦᠷ ᠡᠴᠡ ᠰᠠᠯᠬᠢᠨ ᠪᠣᠯᠵᠤ ᠭᠠᠷᠤᠨᠠ !
ᠠᠯᠴᠢᠭᠤᠷ ᠠᠯᠴᠢᠭᠤᠷ ᠢ᠋ᠶ᠋ᠠᠷ ᠤᠬᠢᠯᠠᠪᠠᠴᠤ ᠠᠰᠬᠠᠷᠠᠵᠤ ᠪᠠᠷᠠᠬᠤ ᠦᠭᠡᠢ ᠨᠢᠯᠪᠤᠰᠤ
ᠠᠮᠠᠷᠠᠭ ᠴᠢᠮᠠ ᠶ᠋ᠢ ᠪᠡᠨ ᠭᠡᠭᠰᠡᠭᠡᠷ ᠴᠦ᠍ ᠠᠮᠢᠳᠤᠷᠠᠵᠤ ᠴᠢᠳᠠᠭᠠ ᠦᠭᠡᠢ ᠭᠠᠰᠠᠯᠠᠩ
ᠠᠨᠳᠠᠭᠤᠷᠠᠵᠤ ᠠᠨᠳᠠᠭᠤᠷᠠᠭᠰᠠᠭᠠᠷ ᠶᠠᠪᠤᠪᠠᠴᠤ ᠲᠠᠨᠢᠵᠤ ᠪᠠᠷᠠᠭᠠᠳᠤᠢ ᠬᠣᠷᠸᠠ
ᠠᠬᠠ ᠨᠢ᠂ ᠠᠬᠠ ᠨᠢ ᠭᠡᠭᠰᠡᠭᠡᠷ ᠠᠯᠳᠠᠵᠤ ᠣᠷᠬᠢᠭᠰᠠᠨ ᠲᠠᠪᠢᠯᠠᠩ᠃
ᠲᠣᠭᠠᠯᠠᠰᠢ ᠦᠭᠡᠢ ᠵᠢᠯ ᠦ᠋ᠨ ᠴᠢᠨᠠᠳᠤ ᠠᠭᠤᠯᠠᠰ ᠪᠠᠢᠵᠤ ᠳᠠ
ᠲᠤᠯᠤᠭᠠᠳ ᠮᠢᠨᠢ ᠲᠣᠮᠣᠷᠠᠭᠰᠠᠭᠠᠷ ᠲᠣᠮᠣᠷᠠᠭᠰᠠᠭᠠᠷ ᠡᠷᠡ ᠬᠥᠮᠦᠨ ᠪᠣᠯᠵᠤ ᠳᠠ ᠬᠡᠦᠬᠡᠳ ᠮᠢᠨᠢ
ᠨᠠᠮ ᠭᠦᠮᠬᠡᠨ ᠠᠮᠢᠳᠤᠷᠠᠭᠰᠠᠭᠠᠷ ᠨᠡᠷᠡᠲᠦ ᠶ᠋ᠢ ᠡᠯᠡᠭᠡᠬᠦ ᠶᠤᠮᠰᠠᠨ᠂ ᠡᠪᠦᠭᠡᠳ ᠮᠢᠨᠢ
ᠨᠠᠳᠠ ᠠ᠋ᠴᠠ ᠴᠢᠮᠠ ᠶ᠋ᠢ ᠬᠠᠷᠠᠮᠯᠠᠭᠠ ᠦᠭᠡᠢ ᠡᠨᠡᠬᠡᠨ ᠪᠤᠭᠤᠷᠤᠯ ᠬᠣᠷᠸᠠ !
ᠠᠷᠰᠠᠭᠠᠷ ᠪᠠᠷᠰᠠᠭᠠᠷ ᠬᠠᠳᠠ ᠨᠢ ᠠᠷᠰᠯᠠᠨ᠂ ᠪᠠᠷᠰ ᠨᠣᠴᠣᠯᠳᠤᠬᠤ ᠰᠢᠭ᠋᠂
ᠠᠵᠢᠵᠤ ᠰᠠᠢᠨ ᠬᠠᠷᠠᠪᠠᠯ ᠡᠷᠲᠡᠨ ᠦ᠌ ᠨᠡᠭᠦᠳᠡᠯ ᠠᠢᠰᠤᠢ ᠰᠢᠭ᠋᠂
ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠳᠡᠷᠪᠡᠭᠦᠯᠦᠭᠰᠡᠭᠡᠷ ᠴᠢ ᠮᠢᠨᠢ ᠬᠥᠰᠬᠡ ᠲᠡᠷᠭᠡ ᠬᠥᠲᠥᠯᠬᠦ ᠰᠢᠭ᠂
ᠠᠯᠪᠢᠨ ᠰᠢᠳᠢ ᠲᠡᠢ ᠶᠢᠷᠲᠢᠨᠴᠦ ᠳ᠋ᠦ᠍ ᠢᠷᠡᠬᠦ ᠯᠡ ᠶᠣᠰᠣᠲᠠᠢ ᠪᠠᠢᠵᠤ ᠳᠠ
ᠵᠠᠳᠠᠭᠠᠢ ᠴᠠᠭᠠᠨ ᠡᠭᠦᠯᠡ ᠨᠢ ᠬᠡᠰᠡᠭ ᠪᠤᠰᠠᠭ ᠢ᠋ᠶ᠋ᠠᠷ ᠨᠡᠭᠦᠨᠡ
ᠵᠠᠯᠠᠭᠤ ᠪᠠᠭᠠᠬᠠᠨ ᠠᠨᠢᠮᠠ ᠮᠢᠨᠦᠬᠢ ᠪᠡᠨ ᠠᠶᠠᠰ ᠢ᠋ᠶ᠋ᠠᠷ ᠭᠡᠬᠢᠯᠵᠡᠨᠡ
ᠬᠡᠷᠡᠮᠡᠯ ᠴᠠᠭᠠᠨ ᠡᠭᠦᠯᠡ ᠨᠢ ᠡᠨᠳᠡ ᠲᠡᠨᠳᠡ ᠦᠭᠡᠢ ᠨᠡᠭᠦᠨᠡ
ᠨᠡᠩ ᠪᠠᠭᠠᠬᠠᠨ ᠠᠨᠢᠮᠠ ᠮᠢᠨᠦᠬᠢ ᠪᠡᠨ ᠠᠶᠠᠰ ᠢ᠋ᠶ᠋ᠠᠷ ᠰᠠᠷᠪᠠᠯᠵᠠᠨᠠ
ᠡᠪᠡᠰᠦ ᠨᠣᠭᠣᠭᠠ ᠨᠡᠯᠦ ᠳ᠋ᠡᠭᠡᠨ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠣᠷᠣᠬᠤ ᠨᠠᠮᠤᠷ ᠢ᠋ᠶ᠋ᠠᠷ
ᠡᠮᠦᠨᠡ ᠵᠦᠭ ᠦ᠋ᠨ ᠠᠭᠤᠯᠠᠰ ᠮᠢᠨᠢ ᠥᠨᠳᠡᠯᠵᠡᠨ ᠥᠨᠳᠡᠯᠵᠡᠨ ᠦᠵᠡᠭᠳᠡᠨᠡ
ᠥᠪᠡᠷ ᠦ᠋ᠨ ᠭᠡᠭᠰᠡᠭᠡᠷ ᠶᠠᠪᠤᠭᠠᠳ ᠬᠥᠮᠦᠨ ᠦ᠌ ᠦᠷᠡ ᠳ᠋ᠦ᠍ ᠠᠯᠳᠠᠬᠤ ᠦᠭᠡᠢ ᠠ᠋᠂ ᠪᠢ
ᠡᠪᠦᠷ ᠳᠦᠭᠦᠷᠡᠩ ᠨᠢᠯᠪᠤᠰᠤ ᠲᠠᠢ ᠴᠤ᠌᠂ ᠥᠩᠭᠡᠴᠡᠬᠡᠨ ᠬᠣᠷᠸᠠ ᠳ᠋ᠤ᠌ ᠪᠦᠳᠦᠷᠢᠬᠦ ᠦᠭᠡᠢ ᠠ᠋!
ᠰᠠᠷᠠᠭᠤᠯ ᠨᠠᠮᠤᠷ ᠤ᠋ᠨ ᠲᠠᠯᠠ ᠨᠢ ᠠᠯᠤᠰᠯᠠᠨ ᠠᠯᠤᠰᠯᠠᠨ ᠴᠠᠯᠠᠢᠨᠠ
ᠰᠠᠢᠨ ᠬᠥᠮᠦᠨ ᠦ᠌ ᠦᠷᠡ ᠶ᠋ᠢ ᠰᠠᠯᠤᠭᠠᠳ ᠶᠠᠪᠤᠭᠰᠠᠨ ᠴᠤ᠌ ᠰᠠᠨᠠᠨᠠ᠃
ᠡᠷᠡᠭᠦᠯ ᠰᠠᠯᠬᠢᠨ ᠪᠥᠵᠢᠵᠦ ᠤᠷᠤᠰᠬᠠᠯ ᠢ᠋ᠶ᠋ᠠᠷ ᠲᠠᠯᠠ ᠮᠢᠨᠢ ᠳᠣᠯᠭᠢᠯᠠᠵᠤ
ᠡᠷᠡ᠂ ᠡᠮᠡ ᠬᠥᠮᠦᠨ ᠦ᠌ ᠰᠡᠳᠬᠢᠯ ᠢ᠋ ᠬᠥᠳᠡᠯᠭᠡᠨ ᠭᠡᠵᠢᠭᠡᠳᠡᠨᠡ᠃
ᠬᠠᠶᠠᠭᠠ ᠪᠠᠷ ᠰᠡᠪᠡᠯᠵᠡᠬᠦ ᠰᠠᠯᠬᠢ ᠨᠢ ᠬᠠᠷᠢᠬᠤ ᠶ᠋ᠢᠨ ᠤᠢᠳᠬᠠᠷ ᠲᠥᠷᠥᠭᠦᠯᠦᠨᠡ
ᠬᠠᠢᠷᠠᠯᠠᠨ ᠬᠠᠢᠷᠠᠯᠠᠨ ᠳᠠᠰᠤᠭᠰᠠᠨ ᠴᠤ᠌᠂ ᠬᠠᠶᠠᠬᠠᠨ ᠪᠠᠰᠠ ᠭᠣᠮᠣᠳᠠᠨᠠ᠃
ᠬᠠᠭᠠᠯᠭᠠ ᠪᠠᠷ ᠰᠡᠪᠡᠯᠵᠡᠬᠦ ᠰᠠᠯᠬᠢ ᠨᠢ ᠬᠠᠯᠠᠭᠤᠨ ᠭᠤᠨᠢᠭ ᠢ᠋ ᠥᠳᠥᠭᠡᠨᠡ᠃
ᠬᠠᠯᠠᠰᠢᠷᠠᠨ ᠬᠠᠯᠠᠰᠢᠷᠠᠨ ᠳᠠᠰᠤᠭᠠᠳ᠂ ᠬᠠᠷᠢᠵᠤ ᠪᠤᠴᠠᠬᠤ ᠵᠠᠮ ᠦᠭᠡᠢ ᠠ᠋ !
ᠲᠦᠮᠡᠨ ᠠᠭᠲᠠ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠣᠳᠣᠨ ᠰᠢᠷᠭᠠ ᠮᠢᠨᠢ
ᠲᠦᠮᠡᠨ ᠥᠬᠢᠳ ᠦ᠋ᠨ ᠳᠤᠮᠳᠠ ᠠ᠋ᠴᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠠᠢᠬᠠᠨ ᠠᠨᠢᠮᠠ ᠮᠢᠨᠢ
ᠣᠭᠲᠠᠷᠭᠤᠢ ᠣᠯᠠᠨ ᠣᠳᠣᠳ ᠠ᠋ᠴᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠣᠳᠣᠨ ᠨᠠᠷᠠᠨ ᠮᠢᠨᠢ
ᠣᠷᠴᠢᠯᠠᠩ ᠤ᠋ᠨ ᠣᠯᠠᠨ ᠪᠦᠰᠡᠭᠦᠢ ᠡᠴᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠰᠠᠢᠬᠠᠨ ᠠᠨᠢᠮᠠ ᠮᠢᠨᠢ
ᠡᠪᠦᠭᠡᠨ ᠪᠤᠭᠤᠷᠤᠯ ᠡᠴᠢᠭᠡ ᠡᠴᠡ ᠪᠡᠨ ᠠᠳᠢᠰ ᠨᠢᠭᠡ ᠠᠪᠬᠤ ᠦᠭᠡᠢ ᠪᠣᠯ
ᠥᠨᠢ ᠶ᠋ᠢᠨ ᠶᠣᠰᠣ ᠶ᠋ᠢ ᠵᠥᠷᠢᠴᠡᠵᠦ᠂ ᠠᠵᠠ ᠶ᠋ᠢᠨ ᠲᠠᠪᠢᠯᠠᠩ ᠬᠡᠯᠲᠡᠢᠨᠡ᠃
ᠡᠮᠡᠭᠡᠨ ᠪᠤᠭᠤᠷᠤᠯ ᠡᠵᠢ ᠡᠴᠡ ᠪᠡᠨ ᠢᠷᠦᠭᠡᠯ ᠨᠢᠭᠡᠨ ᠬᠦᠷᠲᠡᠬᠦ ᠦᠭᠡᠢ ᠪᠣᠯ
ᠡᠷᠲᠡᠨ ᠦ᠌ ᠵᠢᠮᠡ ᠶ᠋ᠢ ᠵᠥᠷᠢᠴᠡᠵᠦ᠂ ᠡᠯᠳᠡᠪ ᠦ᠋ᠨ ᠬᠣᠪ ᠲᠤ᠌ ᠥᠷᠲᠥᠨᠡ᠃
ᠠᠯᠲᠠᠢ ᠳᠡᠭᠡᠭᠦᠷ ᠭᠡᠢᠳᠡᠭ ᠠᠯᠲᠠᠨ ᠨᠠᠷᠠᠨ ᠳ᠋ᠤ᠌ ᠥᠰᠦᠭᠰᠡᠨ ᠶᠦᠮ
ᠠᠷᠪᠠᠭᠤᠯᠠ ᠶ᠋ᠢ ᠮᠢᠨᠢ ᠲᠥᠷᠥᠭᠦᠯᠦᠭᠰᠡᠨ ᠠᠪᠤ᠂ ᠡᠵᠢ ᠬᠣᠶᠠᠷ ᠲᠠᠢ ᠶᠤᠮ᠃
ᠪᠠᠭᠤᠵᠤ ᠮᠣᠷᠳᠠᠬᠤ ᠬᠣᠷᠸᠠ ᠳ᠋ᠠᠭᠠᠨ ᠪᠤᠷᠤᠭᠤ ᠮᠥᠷ ᠦᠭᠡᠢ ᠶᠠᠪᠤᠶᠠ
ᠪᠤᠶᠠᠨᠲᠤ ᠬᠠᠢᠷᠠ ᠶ᠋ᠢᠨ ᠵᠠᠶᠠᠭᠠᠨ ᠳ᠋ᠤ᠌ ᠭᠬᠢᠷ ᠰᠠᠭᠤᠯᠭᠠᠯ ᠦᠭᠡᠢ ᠥᠲᠡᠯᠦᠶᠡ !
ᠦᠳᠡᠰᠢ ᠣᠷᠣᠢ ᠪᠣᠯᠲᠠᠯᠠ ᠠᠨᠢᠮᠠ ᠲᠠᠢ ᠪᠠᠨ ᠬᠣᠶᠠᠭᠤᠯᠠ ᠬᠥᠲᠥᠯᠦᠯᠴᠡᠭᠡᠳ
ᠦᠷᠭᠡᠯᠡᠭᠰᠡᠨ ᠮᠣᠳᠣᠳ ᠢ᠋ ᠰᠦᠯᠵᠢᠨ᠂ ᠮᠥᠷ ᠢ᠋ᠶ᠋ᠡᠨ ᠭᠠᠷᠭᠠᠵᠤ ᠶᠠᠪᠤᠭᠰᠠᠨ ᠰᠠᠨ
ᠪᠤᠭᠤ ᠶ᠋ᠢᠨ ᠡᠪᠡᠷ ᠰᠢᠭ ᠮᠥᠴᠢᠷ ᠢ᠋ ᠪᠦᠯᠢᠶᠡᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠢᠯᠪᠢᠬᠦ ᠳ᠋ᠦ᠍
ᠪᠤᠳᠠᠩ ᠨᠡᠪᠲᠡᠯᠦᠭᠴᠢ ᠰᠠᠷᠠᠨ᠂ ᠴᠠᠭᠠᠨ ᠭᠥᠷᠥᠭᠡᠰᠦ ᠰᠢᠭ ᠬᠠᠷᠠᠭᠳᠠᠨᠠ
ᠴᠠᠭᠠᠬᠠᠨ ᠬᠤᠰᠤ ᠶ᠋ᠢ ᠨᠠᠷᠠᠰᠤ ᠮᠣᠳᠣ ᠬᠥᠲᠥᠯᠦᠭᠡᠳ ᠶᠠᠪᠤᠬᠤ ᠰᠢᠭ᠋
ᠴᠠᠭ ᠬᠤᠭᠤᠴᠠᠭᠠ ᠶ᠋ᠢ ᠲᠤᠭᠠᠴᠢᠨ ᠣᠢ ᠶ᠋ᠢᠨ ᠳᠤᠮᠳᠠᠭᠤᠷ ᠠᠯᠬᠤᠯᠠᠭᠰᠠᠨ
ᠢᠨᠠᠭ ᠤ᠋ᠨ ᠮᠢᠨᠢ ᠮᠠᠩᠨᠠᠢ ᠳ᠋ᠤ᠌ ᠳᠣᠯᠣᠭᠠᠨ ᠪᠤᠷᠬᠠᠨ ᠬᠡᠷᠡᠯᠳᠦᠵᠦ
ᠶᠠᠭ ᠮᠢᠨᠦ ᠵᠤᠯᠠᠢ ᠳ᠋ᠤ᠌ ᠭᠤᠷᠪᠠᠨ ᠮᠠᠷᠠᠯ ᠰᠢᠬᠦᠷᠯᠡᠨᠡ
ᠬᠠᠰᠢᠶᠠᠨ ᠤ᠋ ᠨᠥᠮᠥᠷᠢ ᠳ᠋ᠦ᠍ ᠰᠠᠭᠤᠵᠤ ᠴᠡᠭᠡᠵᠢᠨ ᠳ᠋ᠦ᠍ ᠨᠢ ᠨᠢᠭᠤᠷ ᠢ᠋ᠶ᠋ᠠᠨ ᠨᠠᠭᠠᠨᠠ
ᠬᠠᠪᠢᠷᠭᠠᠨ ᠰᠠᠷᠠ ᠶ᠋ᠢ ᠦᠰᠦᠨ ᠦ᠌ ᠬᠢᠨᠢ ᠴᠢᠮᠡᠭ ᠪᠣᠯᠭᠠᠨ ᠲᠣᠭᠯᠠᠨᠠ
ᠬᠠᠶᠠ ᠰᠠᠨᠠᠭᠠ ᠠᠯᠳᠠᠬᠤ ᠳ᠋ᠤ᠌ ᠡᠪᠡᠰᠦ ᠨᠣᠭᠣᠭᠠ ᠰᠠᠷᠪᠠᠯᠵᠠᠨᠠ
ᠬᠢᠷᠠᠭᠤ ᠤᠨᠠᠭᠰᠠᠨ ᠰᠥᠨᠢ ᠯᠡ ᠴᠠᠭᠠᠨ ᠳᠠᠯᠠᠪᠴᠢ ᠪᠠᠨ ᠳᠡᠯᠭᠡᠨᠡ
ᠬᠠᠷᠠ ᠮᠠᠯᠠᠭᠠᠢ ᠲᠠᠢ᠂ ᠲᠠᠶᠠᠭ ᠲᠤᠯᠤᠭᠰᠠᠨ ᠬᠥᠮᠦᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠨᠡ
ᠬᠠᠢᠷᠠᠲᠤ ᠮᠢᠨᠢ ᠠᠶᠤᠰᠬᠢᠵᠤ᠂ ᠮᠢᠨᠦ ᠴᠡᠭᠡᠵᠢᠨ ᠳ᠋ᠦ᠍ ᠨᠠᠭᠠᠯᠳᠤᠨᠠ
ᠵᠦᠭᠡᠷ᠂ ᠪᠤᠤ ᠠᠶᠤ᠂ ᠶᠠᠭᠤ ᠴᠤ᠌ ᠪᠣᠯᠤᠭᠠ ᠦᠭᠡᠢ ᠁ ᠭᠡᠵᠦ ᠪᠢ ᠲᠠᠢᠪᠤᠰᠢᠷᠠᠭᠤᠯᠤᠨᠠ
ᠵᠠᠭᠤᠨ ᠠᠢᠯ ᠤ᠋ᠨ ᠲᠣᠭᠣᠨᠣ ᠪᠠᠷ ᠭᠠᠭᠴᠠ ᠨᠢᠭᠡ ᠣᠴᠢ ᠭᠢᠯᠠᠰᠬᠢᠨ ᠤᠨᠲᠠᠷᠠᠨᠠ
ᠠᠯᠲᠠᠨ ᠰᠡᠦᠬᠡ ᠲᠡᠢ ᠲᠡᠷᠭᠡᠨ ᠳ᠋ᠦ᠍ ᠺᠷᠢᠰᠢᠨᠠ ᠲᠡᠭᠷᠢ ᠵᠠᠯᠠᠷᠠᠵᠤ
ᠠᠭᠠᠷ ᠰᠡᠩᠭᠢᠨᠡᠭᠦᠯᠦᠨ ᠥᠩᠭᠡᠷᠡᠬᠦ ᠳ᠋ᠦ᠍ ᠨᠠᠮᠤᠷ ᠤ᠋ᠨ ᠴᠡᠴᠡᠭᠡᠰ ᠦᠨᠦᠷᠳᠡᠨᠡ
ᠥᠯᠵᠡᠢᠲᠦ ᠡᠨᠡ ᠦᠳᠡᠰᠢ᠂ ᠴᠢ ᠮᠢᠨᠢ ᠳᠣᠯᠣᠭᠠᠨ ᠪᠤᠷᠬᠠᠨ ᠤ᠋ ᠥᠬᠢᠨ !
ᠡᠪᠦᠳᠦᠭ ᠢ᠋ ᠴᠢᠨᠢ ᠳᠡᠷᠡᠯᠡᠭᠰᠡᠨ ᠪᠢ ᠭᠤᠷᠪᠠᠨ ᠮᠠᠷᠠᠯ ᠤ᠋ᠨ ᠬᠦᠦ !
ᠠᠮᠢᠳᠤᠷᠠᠵᠤ ᠶᠠᠪᠤᠭᠠ ᠡᠳᠦᠷ ᠦ᠋ᠳ ᠦ᠋ᠨ ᠮᠢᠨᠢ ᠴᠣᠷ ᠤ᠋ᠨ ᠭᠠᠭᠴᠠ ᠴᠢᠮᠡᠭ
ᠠᠶᠠᠯᠠᠵᠤ ᠶᠠᠪᠤᠭᠠ ᠳᠠᠭᠤᠨ ᠤ᠋ ᠮᠢᠨᠢ ᠶᠡᠷᠦ ᠶ᠋ᠢᠨ ᠪᠤᠰᠤ ᠡᠬᠡᠰᠢᠭ
ᠦᠯᠦ ᠮᠡᠳᠡᠭᠬᠡᠨ ᠰᠡᠪᠬᠡ ᠲᠡᠢ᠂ ᠤᠶᠠᠩᠭᠠᠯᠢᠭ ᠵᠢᠭᠠᠬᠠᠨ ᠠᠨᠢᠮᠠ
ᠦᠳᠡᠰᠢ ᠶ᠋ᠢᠨ ᠵᠡᠭᠦᠳᠦ ᠡᠵᠡᠩᠨᠡᠵᠦ᠂ ᠦᠦᠷ ᠦ᠋ᠨ ᠨᠣᠢᠷ ᠬᠤᠯᠵᠢᠭᠠᠨᠠ
ᠶᠢᠷᠲᠢᠨᠴᠦ ᠶ᠋ᠢᠨ ᠨᠠᠢᠷ ᠲᠤ᠌ ᠤᠷᠢᠭᠳᠠᠭᠠᠳ᠂ ᠴᠢᠮᠠ ᠶ᠋ᠢ ᠪᠡᠨ ᠣᠯᠵᠤ ᠬᠠᠷᠠᠭᠰᠠᠨ ᠪᠢ
ᠢᠷᠦᠭᠡᠯ ᠲᠠᠪᠢᠯᠠᠩ ᠳ᠋ᠤ᠌ ᠮᠢᠨᠢ ᠡᠭᠦᠨ ᠡᠴᠡ ᠢᠯᠡᠭᠦᠦ ᠬᠤᠪᠢ ᠪᠣᠢ ᠭᠡᠵᠦ ᠤᠤ !
ᠵᠡᠭᠦᠳᠦ ᠰᠢᠭ ᠬᠣᠭᠣᠰᠣᠨ ᠢ᠋ ᠭᠠᠲᠤᠯᠤᠭᠠᠳ ᠡᠨᠡ ᠬᠣᠷᠸᠠ ᠠ᠋ᠴᠠ ᠶᠠᠪᠤᠬᠤ ᠳ᠋ᠠᠭᠠᠨ ᠪᠢ
ᠵᠢᠷᠦᠬᠡ ᠪᠡᠨ ᠬᠠᠢᠷᠠ ᠪᠠᠷ ᠳᠦᠭᠦᠷᠭᠡᠨ ᠠᠨᠢᠮᠠ ᠶ᠋ᠢ ᠪᠡᠨ ᠳᠠᠭᠠᠭᠤᠯᠤᠭᠠᠳ ᠪᠤᠴᠠᠨᠠ !
ᠳᠡᠭᠡᠪᠦᠷ ᠳᠡᠪᠢᠭᠰᠡᠨ ᠰᠠᠯᠬᠢᠨ ᠳ᠋ᠤ᠌ ᠳᠡᠨᠵᠢ ᠶ᠋ᠢᠨ ᠨᠣᠭᠣᠭᠠ ᠰᠢᠷᠠᠯᠠᠨᠠ
ᠳᠡᠯᠡᠬᠡᠢ ᠳ᠋ᠦ᠍ ᠢᠷᠡᠭᠡᠳ ᠪᠤᠴᠠᠬᠤ ᠳ᠋ᠠᠭᠠᠨ ᠳᠡᠮᠡᠢ ᠪᠣᠳᠣᠯ ᠠ᠋ᠴᠠ ᠪᠠᠨ ᠰᠠᠯᠤᠨᠠ
ᠡᠷᠦᠬᠡ ᠳᠡᠪᠢᠭᠰᠡᠨ ᠰᠠᠯᠬᠢᠨ ᠳ᠋ᠤ᠌ ᠡᠪᠡᠰᠦᠨ ᠦ᠌ ᠲᠣᠯᠣᠭᠠᠢ ᠭᠠᠩᠳᠠᠨᠠ
ᠥᠪᠡᠷ ᠦ᠋ᠨ ᠪᠣᠯᠭᠠᠭᠠᠳ ᠠᠪᠤᠭᠰᠠᠨ ᠴᠤ᠌ ᠥᠨᠢᠳᠡ ᠵᠢᠷᠦᠬᠡ ᠮᠢᠨᠢ ᠰᠢᠮᠰᠢᠷᠡᠨᠡ
ᠰᠡᠷᠢᠭᠦᠨ ᠨᠠᠮᠤᠷ ᠤ᠋ᠨ ᠣᠭᠲᠠᠷᠭᠤᠢ ᠳ᠋ᠤ᠌ ᠨᠠᠢ᠍ᠮᠠᠨ ᠲᠣᠭᠣᠷᠤᠤ ᠨᠢᠰᠦᠨᠡ
ᠰᠡᠳᠬᠢᠯ ᠦ᠋ᠨ ᠬᠦᠢᠲᠡᠨ ᠢ᠋ ᠪᠦᠯᠢᠶᠡᠰᠬᠡᠵᠦ᠂ ᠨᠠᠮᠠ ᠶ᠋ᠢ ᠳᠠᠭᠠᠭᠤᠯᠤᠨ ᠨᠢᠰᠦᠨᠡ
ᠠᠭᠤᠯᠠ ᠠᠭᠤᠯᠠ ᠶ᠋ᠢ ᠳᠠᠪᠠᠭᠰᠠᠭᠠᠷ ᠣᠶᠤᠨ ᠰᠡᠳᠬᠢᠯ ᠮᠢᠨᠢ ᠨᠢᠰᠦᠨᠡ
ᠤᠢᠳᠬᠠᠷ ᠬᠦᠢᠲᠡᠨ ᠵᠢᠪᠠᠷ ᠢ᠋ ᠠᠨᠢᠮᠠ ᠶ᠋ᠢᠨ ᠢᠯᠴᠢ ᠪᠡᠷ ᠳᠠᠪᠠᠨᠠ᠃
ᠳᠤᠨᠢᠶᠠᠷᠲᠤᠭᠴᠢ ᠡᠨᠡᠬᠡᠨ ᠳᠡᠯᠡᠬᠡᠢ ᠳ᠋ᠡᠭᠡᠨ ᠮᠥᠩᠬᠡ ᠯᠡ ᠠᠮᠢᠳᠤᠷᠠᠬᠤ ᠦᠭᠡᠢ ᠬᠣᠢᠨᠠ
ᠳᠠᠭᠤᠤ ᠪᠣᠯᠭᠠᠵᠤ ᠬᠤᠪᠢᠷᠠᠭᠠᠨᠠ ᠠᠨᠢᠮᠠ ᠮᠢᠨᠢ᠂ ᠪᠢ ᠴᠢᠮᠠ ᠶ᠋ᠢ ᠪᠡᠨ
ᠴᠠᠢᠪᠤᠷᠲᠤᠭᠴᠢ ᠡᠨᠡᠬᠡᠨ ᠳᠡᠯᠡᠬᠡᠢ ᠳ᠋ᠡᠭᠡᠨ ᠮᠥᠩᠬᠡ ᠯᠡ ᠦᠯᠡᠳᠡᠬᠦ ᠦᠭᠡᠢ ᠬᠣᠢᠨᠠ
ᠴᠠᠭ ᠤ᠋ᠨ ᠴᠠᠭ ᠲᠤ᠌ ᠠᠮᠢᠳᠤᠷᠠᠬᠤ ᠬᠠᠢᠷᠠ ᠪᠣᠯᠭᠠᠨᠠ᠂ ᠪᠢ ᠴᠢᠮᠠ ᠶ᠋ᠢ ᠪᠡᠨ
ᠨᠠᠢᠭᠤᠨ ᠨᠠᠢᠭᠤᠨ ᠨᠠᠢᠭᠤᠭᠠᠳ ᠯᠠ ᠨᠠᠮᠤᠷ ᠤ᠋ᠨ ᠬᠣᠷᠸᠠ ᠰᠦᠮᠡᠯᠵᠡᠨᠡ
ᠨᠠᠳᠠ ᠳ᠋ᠤ᠌ ᠵᠠᠶᠠᠭᠠᠭᠰᠠᠨ ᠬᠥᠮᠦᠨ ᠦ᠌ ᠦᠷᠡ᠂ ᠡᠢᠮᠦ ᠯᠡ ᠨᠢᠭᠡᠨ ᠠᠨᠢᠮᠠ᠃
ᠨᠠᠢᠷᠠᠭᠰᠠᠨ ᠨᠠᠢᠷᠠᠭᠰᠠᠨ ᠨᠠᠢᠷᠰᠠᠳ ᠯᠠ ᠨᠠᠪᠴᠢᠰ ᠤ᠋ᠨ ᠰᠡᠷᠴᠢᠭᠢᠨᠡᠭᠡ ᠱᠠᠷᠬᠢᠨᠠ
ᠨᠠᠰᠤᠨ ᠳ᠋ᠠᠭᠠᠨ ᠮᠠᠷᠲᠠᠮᠠ ᠦᠭᠡᠢ ᠬᠥᠮᠦᠨ ᠦ᠌ ᠦᠷᠡ᠂ ᠮᠢᠨᠦ ᠯᠡ ᠨᠢᠭᠡᠨ ᠠᠨᠢᠮᠠ
ᠠᠭᠠᠰᠢ ᠵᠠᠩ ᠤ᠋ᠨ ᠬᠢᠨᠢ ᠢᠯᠳᠠᠮ ᠳ᠋ᠤᠨᠢ ᠠᠷᠰᠯᠠᠨ ᠪᠠᠷᠰ ᠴᠤ᠌ ᠨᠣᠮᠣᠬᠠᠷᠠᠮᠠᠷ
ᠠᠷᠠᠳ ᠤ᠋ᠨ ᠳᠠᠭᠤᠨ ᠤ᠋ ᠭᠦᠨ ᠡᠴᠡ ᠥᠪᠡᠷ ᠢ᠋ᠶ᠋ᠡᠨ ᠭᠠᠷᠤᠭᠠᠳ ᠢᠷᠡᠭᠰᠡᠨ ᠭᠡᠮᠡᠷ᠂
ᠣᠭᠲᠠᠷᠭᠤᠢ ᠶ᠋ᠢᠨ ᠳᠤᠮᠳᠠ ᠡᠷᠭᠢᠯᠳᠦᠭᠴᠢ ᠵᠤᠤᠪᠠᠩ ᠡᠨᠡ ᠳᠡᠯᠡᠬᠡᠢ ᠳᠡᠭᠡᠷᠡ
ᠣᠯᠠᠨ ᠮᠢᠩᠭᠠᠨ ᠵᠢᠯ ᠳ᠋ᠦ᠍ ᠨᠢᠭᠡ ᠯᠡ ᠢᠷᠡᠭᠰᠡᠨ ᠠᠮᠠᠷᠠᠭ ᠮᠢᠨᠢ
ᠦᠯᠡᠮᠵᠢ ᠡᠷᠲᠡᠨ ᠦ᠌ ᠳᠡᠯᠡᠬᠡᠢ ᠮᠢᠨᠢ ᠣᠭᠲᠠᠷᠭᠤᠢ ᠶ᠋ᠢᠨ ᠠᠭᠤᠳᠠᠮ ᠳ᠋ᠤ᠌ ᠭᠠᠭᠴᠠᠭᠠᠷᠳᠠᠵᠤ
ᠡᠭᠦᠯᠡᠨ ᠵᠠᠷᠤᠳᠠᠰᠤ ᠢᠯᠡᠭᠡᠵᠦ᠂ ᠭᠠᠯᠢᠳᠠᠰᠤ ᠴᠢᠮᠠ ᠶ᠋ᠢ ᠮᠢᠨᠢ ᠡᠷᠢᠵᠡᠢ᠃
ᠲᠣᠭᠠᠯᠠᠰᠢ ᠦᠭᠡᠢ ᠴᠠᠭ ᠤ᠋ᠨ ᠲᠡᠷᠲᠡᠭᠡ ᠮᠢᠨᠦ ᠯᠡ ᠭᠡᠷᠭᠡᠢ ᠪᠠᠢᠭᠰᠠᠨ ᠴᠢ
ᠲᠤᠯᠤᠭᠠᠳ᠂ ᠲᠡᠷᠡ ᠴᠠᠭ ᠲᠤ᠌ ᠰᠦᠷᠲᠦ ᠶᠡᠬᠡ ᠠᠭᠤᠯᠠᠰ ᠪᠠᠢᠭᠰᠠᠨ ᠶᠤᠮ ᠰᠢᠦ !
ᠳᠡᠯᠡᠬᠡᠢ ᠶ᠋ᠢᠨ ᠠᠭᠤᠯᠠ ᠲᠠᠯᠠ ᠪᠠᠷ ᠳᠠᠭᠠᠭᠤᠯᠵᠤ ᠶᠠᠪᠤᠭᠰᠠᠨ ᠪᠢ᠂ ᠴᠢᠮᠠ ᠶ᠋ᠢ ᠪᠡᠨ
ᠳᠡᠨᠵᠢ ᠨᠤᠭᠤ ᠶ᠋ᠢᠨ ᠰᠠᠶᠢ ᠰᠠᠶᠢ ᠴᠡᠴᠡᠭᠡᠰ ᠥᠯᠮᠡᠢ ᠶ᠋ᠢ ᠴᠢᠨᠢ ᠦᠨᠦᠰᠦᠭᠰᠡᠨ᠃
ᠶᠢᠰᠦᠨ ᠨᠠᠮᠤᠷ ᠤ᠋ᠨ ᠰᠦᠮᠡᠨ ᠡᠪᠡᠰᠦᠨ ᠦ᠌ ᠦᠨᠦᠷ ᠲᠦ᠍ ᠮᠠᠩᠰᠢᠭᠤᠷᠠᠨ ᠴᠡᠩᠭᠡᠵᠦ
ᠶᠢᠷᠲᠢᠨᠴᠦ ᠶ᠋ᠢᠨ ᠪᠦᠬᠦ ᠭᠣᠣᠯ ᠮᠥᠷᠡᠨ ᠦ᠌ ᠤᠰᠤᠨ ᠳ᠋ᠤ᠌ ᠭᠡᠵᠢᠭᠡ ᠶ᠋ᠢ ᠴᠢᠨᠢ ᠨᠣᠷᠭᠠᠭᠰᠠᠨ !
ᠪᠥᠭᠡᠮ ᠪᠥᠭᠡᠮ ᠢ᠋ᠶ᠋ᠡᠷ ᠴᠣᠭᠴᠠᠯᠠᠪᠠᠴᠤ᠂ ᠪᠦᠭᠦᠳᠡ ᠵᠠᠮᠬᠠᠷᠠᠬᠤ ᠡᠭᠦᠯᠡᠨ ᠠᠳᠠᠯᠢ
ᠪᠥᠭᠡᠷᠡᠩᠬᠡᠢ ᠣᠷᠴᠢᠯᠠᠩ ᠳ᠋ᠤ᠌ ᠴᠤᠭᠭᠠᠷ ᠢᠷᠡᠪᠡᠴᠦ᠂ ᠴᠤᠪᠤᠷᠠᠭᠰᠠᠭᠠᠷ ᠶᠠᠪᠤᠨᠠ
ᠰᠠᠭᠯᠠᠭᠠᠷ ᠮᠣᠳᠣᠨ ᠤ᠋ ᠰᠡᠭᠦᠳᠡᠷ ᠲᠦ᠍ ᠰᠠᠢᠬᠠᠨ ᠴᠢᠮᠠ ᠶ᠋ᠢ ᠪᠡᠨ ᠲᠡᠪᠡᠷᠢᠭᠰᠡᠨ ᠴᠦ᠍
ᠰᠠᠯᠤᠭᠠᠳ ᠣᠳᠬᠤ ᠶ᠋ᠢᠨ ᠴᠠᠭ ᠨᠢ ᠬᠣᠵᠢᠮ ᠤ᠋ᠨ ᠨᠢᠭᠡᠨ ᠡᠳᠦᠷ ᠲᠦ᠍ !
ᠡᠭᠦᠯᠡᠨ ᠴᠢᠯᠥᠭᠡᠨ ᠦ᠌ ᠨᠠᠷᠠ ᠰᠢᠭ᠋ ᠡᠨᠡ ᠯᠡ ᠶᠠᠪᠤᠭᠠ ᠨᠠᠰᠤᠨ ᠳ᠋ᠠᠭᠠᠨ
ᠦᠢᠯᠡ ᠶ᠋ᠢᠨ ᠦᠷᠡ ᠪᠡᠷ ᠤᠴᠠᠷᠠᠭᠰᠠᠨ ᠪᠢᠳᠡᠨ ᠬᠣᠶᠠᠷ ᠬᠥᠭᠡᠷᠦᠬᠦᠢ
ᠦᠳᠡ ᠶ᠋ᠢᠨ ᠨᠠᠷᠠᠨ ᠪᠦᠯᠢᠶᠡᠬᠡᠨ ᠴᠦ᠍᠂ ᠦᠳᠡᠰᠢ ᠶ᠋ᠢᠨ ᠰᠠᠷᠠ ᠨᠢ ᠬᠦᠢᠲᠡᠨ
ᠦᠶᠡᠷ ᠦ᠋ᠨ ᠤᠰᠤ ᠰᠢᠭ᠋ ᠰᠡᠳᠬᠢᠯ ᠦ᠋ᠨ ᠠᠶᠠᠰ ᠢ᠋ ᠳᠠᠭᠠᠬᠤ ᠬᠡᠴᠡᠭᠦᠦ
ᠡᠷᠪᠡᠢᠵᠦ ᠰᠡᠷᠪᠡᠢᠭᠰᠡᠨ ᠬᠠᠢᠯᠠᠰᠤ᠂ ᠡᠨᠡᠦᠬᠡᠨ ᠮᠠᠢᠬᠠᠨ ᠳ᠋ᠤ᠌ ᠨᠠᠪᠴᠢᠯᠠᠵᠠᠢ
ᠡᠷᠳᠡᠨᠢ ᠶ᠋ᠢᠨ ᠴᠠᠭᠠᠨ ᠽᠠᠨᠳᠠᠨ᠂ ᠲᠡᠷᠲᠡᠭᠡ ᠠᠭᠤᠯᠠᠨ ᠳ᠋ᠤ᠌ ᠤᠷᠭᠤᠵᠠᠢ᠃
ᠡᠨᠡ ᠯᠡ ᠬᠣᠶᠠᠷ ᠢ᠋ ᠨᠡᠢᠯᠡᠭᠦᠯᠦᠭᠡᠳ ᠨᠢᠭᠡᠨ ᠳᠣᠣᠷᠠ ᠰᠠᠭᠤᠯᠭᠠᠪᠠᠯ
ᠡᠷᠲᠡᠨ ᠦ᠌ ᠵᠢᠮᠡ ᠪᠡᠷ ᠲᠥᠷᠥᠯᠰᠡᠭᠡᠳ ᠢᠵᠢᠯᠢᠳᠦᠨ ᠣᠯᠪᠠᠬᠤ ᠲᠠᠪᠢᠯᠠᠩ ᠲᠠᠢ᠃
ᠬᠣᠶᠠᠷ ᠥᠭᠡᠷᠡ ᠠᠭᠤᠯᠠᠨ ᠳ᠋ᠤᠨᠢ ᠬᠣᠷᠸᠠ ᠶ᠋ᠢᠨ ᠵᠢᠮᠡ ᠶ᠋ᠢ ᠳᠠᠭᠠᠭᠤᠯᠪᠠᠯ
ᠬᠣᠯᠠ ᠠ᠋ᠴᠠ ᠪᠡᠶᠡᠰ ᠢ᠋ᠶ᠋ᠡᠨ ᠦᠭᠡᠢᠯᠡᠭᠰᠡᠭᠡᠷ᠂ ᠬᠣᠷᠴᠢᠢᠵᠤ ᠬᠠᠲᠠᠬᠤ ᠨᠢ ᠯᠠᠪᠲᠠᠢ
ᠳᠣᠯᠣᠭᠠᠨ ᠪᠤᠷᠬᠠᠨ ᠣᠳᠣᠳ ᠨᠢ ᠬᠠᠢᠯᠠᠰᠤᠨ ᠤ᠋ ᠮᠥᠴᠢᠷ ᠲᠡᠭᠡᠨ ᠠᠰᠠᠵᠤ
ᠳᠣᠭᠣᠯᠠᠩ ᠨᠢᠯᠪᠤᠰᠤ ᠲᠠᠢ ᠲᠡᠷᠡ ᠮᠢᠨᠢ ᠮᠢᠨᠦᠬᠢ ᠪᠡᠨ ᠴᠡᠭᠡᠵᠢ ᠶ᠋ᠢ ᠲᠦᠰᠢᠨᠡ
ᠰᠠᠷᠠᠨ ᠬᠡᠭᠡᠷᠡ ᠬᠣᠨᠣᠭᠰᠠᠨ ᠰᠠᠷᠠᠭᠤᠯ ᠨᠠᠮᠤᠷ ᠤ᠋ᠨ ᠥᠷᠯᠥᠭᠡ
ᠰᠠᠯᠬᠢ ᠪᠠᠷ ᠭᠠᠩᠬᠤᠬᠤ ᠡᠪᠡᠰᠦᠨ ᠳ᠋ᠦ᠍ ᠮᠥᠩᠭᠥᠨ ᠬᠢᠷᠠᠭᠤ ᠴᠡᠪᠴᠡᠢᠨᠡ
ᠰᠠᠨᠠᠭᠰᠠᠭᠠᠷ ᠶᠠᠪᠤᠭᠠᠳ ᠠᠭᠤᠯᠵᠠᠭᠰᠠᠨ ᠴᠤ᠌᠂ ᠰᠠᠨᠠᠭᠠ ᠰᠡᠳᠬᠢᠯ ᠭᠡᠬᠢᠯᠵᠡᠨᠡ
ᠰᠠᠢᠬᠠᠨ ᠲᠥᠷᠥᠭᠰᠡᠨ ᠠᠨᠢᠮᠠ ᠮᠢᠨᠢ ᠱᠠᠨᠵᠠ ᠪᠠᠨ ᠲᠦᠰᠢᠭᠡᠳ ᠮᠡᠯᠮᠡᠷᠡᠨᠡ᠃
《ᠡᠷᠳᠡᠨᠢ ᠵᠠᠰᠠᠭ ᠤ᠋ᠨ ᠤᠨᠠᠭᠠ》ᠤᠶᠠᠭᠠᠨ ᠳᠡᠭᠡᠷᠡ ᠪᠡᠨ ᠦᠦᠷᠰᠡᠨᠡ
ᠡᠨᠡᠬᠡᠨ ᠽᠠᠮᠪᠤᠯᠢᠩ ᠤ᠋ᠨ ᠲᠣᠭᠣᠰᠣ ᠶ᠋ᠢ ᠡᠷᠡ ᠶ᠋ᠢᠨ ᠶᠣᠰᠣᠭᠠᠷ ᠳᠣᠭᠣᠯᠤᠶᠠ
《ᠡᠷᠡ ᠪᠣᠷᠣ ᠬᠠᠷᠴᠠᠭᠠᠢ》ᠨᠢ ᠠᠶᠠᠯᠭᠤᠨ ᠳᠤᠮᠳᠠ ᠠ᠋ᠴᠠ ᠪᠠᠨ ᠴᠤᠢᠯᠠᠨᠠ
ᠡᠷᠪᠡᠭᠡᠷ ᠵᠢᠭᠠᠬᠠᠨ ᠲᠡᠭᠦᠨ ᠲᠡᠢ ᠪᠡᠨ ᠡᠷᠲᠡᠨ ᠦ᠌ ᠢᠷᠦᠭᠡᠯ ᠢ᠋ᠶ᠋ᠡᠷ ᠵᠣᠯᠭᠠᠶᠠ᠃