ᠳᠡᠭᠡᠵᠢ – ᠬᠠᠳᠠᠨᠪᠠᠭᠠᠲᠤᠷ Дээж – Хаданбаатар
432ᠳᠡᠭᠡᠵᠢ
ᠬᠠᠲᠠᠨᠪᠠᠭᠠᠲᠤᠷ
ᠠᠮᠤᠷ ᠰᠠᠢᠨ ᠪᠠᠢᠨᠠ ᠤᠤ ᠭᠡᠵᠦ ᠮᠡᠨᠳᠦᠴᠢᠯᠡᠨ ᠵᠣᠯᠭᠠᠬᠤ ᠳ᠋ᠤ᠌
ᠠᠬᠠᠮᠠᠳ ᠳᠡᠭᠡᠳᠦᠰ ᠡᠴᠡ ᠤᠯᠠᠮᠵᠢᠯᠠᠵᠤ ᠰᠤᠷᠤᠭᠰᠠᠨ ᠮᠡᠨᠳᠦᠴᠢᠯᠡᠭᠡᠨ ᠦ ᠳᠡᠭᠡᠵᠢ ᠲᠡᠷᠡ
ᠠᠶᠠᠭᠠ ᠲᠠᠢ ᠴᠠᠢ ᠪᠠᠨ ᠠᠶᠠᠭᠠᠯᠠᠵᠤ ᠥᠷᠥᠮᠡ ᠰᠢᠭᠦᠮᠡᠯ ᠢᠶᠡᠨ ᠲᠠᠯᠪᠢᠬᠤ
ᠠᠢᠯᠴᠢᠨ ᠭᠡᠢᠴᠢᠨ ᠢᠶᠡᠨ ᠬᠦᠨᠳᠦᠯᠡᠬᠦ ᠢᠳᠡᠭᠡᠨ ᠦ ᠳᠡᠭᠡᠵᠢ ᠲᠡᠷᠡ
ᠠᠷᠢᠬᠢ ᠰᠠᠷᠬᠤᠳ ᠢᠶᠠᠨ ᠪᠠᠷᠢᠵᠤ ᠬᠦᠨᠳᠦ ᠶᠢᠨ ᠶᠣᠰᠣᠭᠠᠷ ᠵᠣᠴᠢᠯᠠᠬᠤ
ᠠᠬᠠᠰ ᠵᠠᠬᠠᠰ ᠠᠴᠠ ᠰᠣᠷᠣᠭᠰᠠᠨ ᠤᠮᠳᠠᠭᠠᠨ ᠤ ᠳᠡᠭᠡᠵᠢ ᠲᠡᠷᠡ
ᠠᠯᠠᠭ ᠦᠷᠡ ᠪᠡᠨ ᠠᠷᠠᠳ ᠤᠨ ᠰᠤᠷᠭᠠᠭᠤᠯᠢ ᠳᠤ ᠬᠦᠷᠭᠡᠵᠦ
ᠠᠯᠲᠠᠨ ᠰᠤᠷᠭᠠᠯ ᠢ ᠬᠦᠷᠲᠡᠭᠡᠬᠦ ᠠᠪᠤ ᠡᠵᠢ ᠶᠢᠨ ᠰᠡᠳᠬᠢᠯ ᠦᠨ ᠳᠡᠭᠡᠵᠢ ᠲᠡᠷᠡ
ᠥᠳᠬᠡ ᠰᠢᠭᠦᠰᠦ ᠪᠡᠨ ᠲᠠᠯᠪᠢᠵᠤ ᠢᠷᠦᠭᠡᠵᠦ ᠳᠡᠭᠡᠵᠢᠯᠡᠬᠦ ᠨᠢ
ᠦᠶᠡ ᠳᠠᠮᠵᠢᠨ ᠤᠯᠠᠮᠵᠢᠯᠠᠭᠳᠠᠭᠰᠠᠨ ᠬᠦᠨᠳᠦ ᠶᠢᠨ ᠳᠡᠭᠡᠵᠢ ᠲᠡᠷᠡ
ᠦᠭᠡ ᠶᠢᠨ ᠲᠣᠬᠢᠯᠢᠭ ᠢᠶᠠᠷ ᠰᠤᠷᠭᠠᠵᠤ ᠦᠨᠡᠨ ᠢᠶᠡᠷ ᠬᠥᠮᠥᠵᠢᠭᠦᠯᠬᠦ ᠨᠢ
ᠦᠷᠡ ᠠᠴᠢᠷ ᠲᠠᠭᠠᠨ ᠦᠯᠡᠳᠡᠭᠡᠬᠦ ᠰᠤᠷᠭᠠᠯ ᠤᠨ ᠳᠡᠭᠡᠵᠢ ᠲᠡᠷᠡ
ᠥᠮᠴᠢᠷᠬᠡᠨ ᠤᠩᠰᠢᠵᠤ ᠰᠤᠷᠬᠤ 《ᠮᠣᠩᠭᠣᠯ ᠤᠨ ᠨᠢᠭᠤᠴᠠ ᠳᠣᠪᠴᠢᠶᠠᠨ》
ᠤᠭᠰᠠᠭᠠ ᠲᠦᠮᠡᠨ ᠦ ᠮᠡᠳᠡᠭᠦᠰᠢᠲᠡᠢ ᠥᠪ ᠰᠣᠶᠣᠯ ᠤᠨ ᠳᠡᠭᠡᠵᠢ ᠲᠡᠷᠡ
ᠤᠳᠤᠮ ᠤᠨ ᠤᠳᠤᠮ ᠢᠶᠠᠷ ᠤᠯᠠᠮᠵᠢᠯᠠᠵᠤ ᠬᠦᠢᠴᠡᠳᠬᠡᠵᠦ ᠢᠷᠡᠭᠰᠡᠨ ᠵᠠᠩ ᠦᠢᠯᠡ
ᠦᠨᠳᠦᠰᠦᠲᠡᠨ ᠶᠠᠰᠤᠲᠠᠨ ᠤ ᠠᠷᠢᠭᠤᠨ ᠳᠡᠭᠡᠳᠦ ᠵᠠᠩᠰᠢᠯ ᠤᠨ ᠳᠡᠭᠡᠵᠢ ᠲᠡᠷᠡ
ᠦᠵᠡᠬᠦ ᠬᠣᠶᠠᠷ ᠨᠢᠳᠦ ᠪᠡᠷ ᠢᠶᠡᠨ ᠡᠩᠬᠦᠷᠡᠢᠯᠡᠨ ᠬᠠᠷᠠᠬᠤ ᠨᠢ
ᠦᠨᠡᠨ ᠵᠢᠷᠦᠬᠡᠨ ᠡᠴᠡ ᠭᠠᠷᠤᠭᠰᠠᠨ ᠬᠠᠷᠠᠴᠠᠨ ᠤ ᠳᠡᠭᠡᠵᠢ ᠲᠡᠷᠡ
ᠤᠷᠲᠤ ᠲᠣᠷᠭᠠᠨ ᠬᠠᠳᠠᠭ ᠢᠶᠠᠨ ᠳᠡᠯᠭᠡᠵᠦ ᠮᠥᠷᠭᠥᠨ ᠵᠣᠯᠭᠠᠬᠤ ᠨᠢ
ᠥᠨᠳᠥᠷ ᠨᠠᠰᠤᠲᠠᠢ ᠬᠥᠮᠥᠨ ᠢᠶᠡᠨ ᠪᠠᠶᠠᠰᠬᠠᠬᠤ ᠬᠦᠨᠳᠦᠯᠡᠬᠦ ᠶᠢᠨ ᠳᠡᠭᠡᠵᠢ ᠲᠡᠷᠡ᠃
2022᠂ 6᠂15
ᠳᠡᠭᠡᠵᠢ ᠶᠣᠰᠣᠨ ᠢᠶᠠᠨ ᠮᠡᠳᠡᠷᠡᠵᠦ
ᠶᠣᠰᠣᠴᠢᠯᠠᠨ ᠪᠡᠶᠡᠯᠡᠭᠦᠯᠬᠦ ᠪᠢᠳᠠᠨ ᠤ ᠵᠠᠮ