ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠬᠣᠶᠠᠷ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -2
128ᠠᠵᠢᠯ ᠤ᠋ᠨ ᠬᠥᠯᠥᠰᠥ
ᠳᠡ ᠯᠣᠣᠶᠧ ᠶ᠋ᠢᠨ ᠳ᠋ᠦ᠍ ᠠᠵᠢᠯᠯᠠᠬᠤ ᠳ᠋ᠤ᠌ ᠡᠳᠦᠷ ᠳᠤᠮᠳᠠ ᠨᠢᠭᠡ ᠬᠣᠭᠣᠯᠠ ᠢᠳᠡᠬᠦ ᠪᠡᠷ ᠵᠣᠭᠰᠣᠬᠤ ᠦᠭᠡᠢ᠂ ᠣᠷᠣᠢ ᠶ᠋ᠢᠨ ᠨᠠᠷᠠ ᠵᠢᠷᠭᠠᠨ ᠫᠧᠩ ᠦ᠋ᠨ ᠳᠣᠲᠣᠷᠠ ᠬᠠᠷᠠᠩᠭᠤᠢ ᠪᠣᠯᠤᠨ ᠠᠵᠢᠯ ᠵᠣᠭᠰᠣᠬᠤ ᠳ᠋ᠤ᠌ ᠬᠣᠶᠠᠳᠠᠬᠢ ᠬᠣᠭᠣᠯᠠ ᠢᠳᠡᠨᠡ᠃ ᠡᠨᠡ ᠬᠣᠶᠠᠷ ᠬᠣᠭᠣᠯᠠ ᠶ᠋ᠢᠨ ᠬᠡᠮᠵᠢᠶᠡ ᠮᠠᠰᠢ ᠶᠡᠬᠡ᠂ ᠶᠣᠰᠣᠲᠠᠢ ᠭᠡᠳᠡᠰᠦ ᠮᠡᠳᠡᠨ ᠢᠳᠡᠬᠦ ᠪᠡᠷ ᠠᠷᠪᠢᠨ ᠠᠷᠪᠢᠨ ᠢᠷᠡᠳᠡᠭ ᠢ᠋ ᠳ᠋ᠠᠨᠽᠡᠨ ᠶᠡᠬᠡᠳᠡ ᠣᠯᠵᠠᠷᠬᠠᠨᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠳ᠋ᠠᠨᠽᠡᠨ ᠬᠡᠮᠵᠢᠶᠡᠨ ᠡᠴᠡ ᠬᠡᠲᠦᠷᠡᠭᠦᠯᠵᠦ ᠣᠷᠬᠢᠭᠠᠳ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠠᠮᠢᠰᠬᠤᠭᠠᠳᠠᠨ ᠰᠠᠨᠳᠤᠷᠳᠠᠭ ᠪᠠᠢᠯᠠ᠃
— ᠦᠭᠡᠢ ᠶᠠᠭᠤᠨ ᠳ᠋ᠤ᠌ ᠡᠢᠮᠦ ᠶᠡᠬᠡ ᠥᠭᠭᠦᠨᠡ ᠪᠣᠢ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌ ᠯᠤᠤ ᠯᠢ ᠤᠷᠢᠳ ᠡᠮᠦᠨᠡ ᠡᠢᠮᠦ ᠪᠠᠢᠭᠠ ᠦᠭᠡᠢ ᠪᠣᠯᠪᠠᠴᠤ ᠳᠠ ᠯᠣᠣᠶᠧ ᠶ᠋ᠢᠨ ᠠᠷᠢᠭᠤᠨ ᠰᠢᠳᠤᠷᠭᠤ ᠪᠣᠯᠤᠭᠠᠳ ᠠᠵᠢᠯ ᠬᠢᠭᠰᠡᠨ ᠬᠥᠮᠦᠨ ᠢ᠋ ᠦᠷᠭᠦᠯᠵᠢ ᠠᠩᠬᠠᠷᠤᠨ ᠦᠵᠡᠳᠡᠭ ᠦ᠋ᠨ ᠬᠢ ᠪᠢᠵᠡ ᠠ᠋ ᠭᠡᠵᠦ ᠬᠠᠷᠢᠭᠤᠯᠤᠨᠠ᠃
ᠦᠨᠡᠬᠡᠷ ᠴᠦ᠍ ᠳᠠ ᠯᠣᠣᠶᠧ ᠳ᠋ᠠᠨᠽᠡᠨ ᠢ᠋ ᠶᠡᠬᠡᠳᠡ ᠲᠠᠯᠠᠷᠬᠠᠬᠤ ᠮᠡᠲᠦ ᠥᠷᠯᠥᠭᠡ ᠪᠦᠷᠢ ᠠᠵᠢᠯ ᠤ᠋ᠨ ᠢᠳᠡ ᠶᠠᠪᠤᠴᠠ ᠳᠤᠮᠳᠠᠭᠤᠷ ᠠᠩᠬᠠᠨ ᠤ᠋ ᠪᠠᠨ ᠡᠳᠦᠷ ᠦ᠋ᠨ ᠬᠢ ᠰᠢᠭ ᠢ᠋ᠶ᠋ᠡᠨ ᠫᠧᠩ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠢᠷᠡᠨᠡ᠃ ᠴᠢᠬᠢᠷᠰᠦᠨ ᠡᠭᠦᠳᠡ ᠶ᠋ᠢ ᠬᠠᠭᠠᠰ ᠨᠥᠮᠥᠷᠦᠨ ᠵᠣᠭᠰᠣᠵᠤ ᠪᠠᠬᠠᠨ ᠠᠵᠢᠭᠯᠠᠨᠠ᠃ ᠳᠠᠷᠠᠭᠠ ᠨᠢ ᠪᠠᠷᠤᠭ ᠬᠣᠭᠣᠯᠠ ᠢᠳᠡᠬᠦ ᠪᠦᠷᠢ ᠳᠡᠭᠡᠷᠡ ᠳᠠᠬᠢᠨ ᠢᠷᠡᠵᠦ᠂ ᠯᠠᠨᠲᠤᠭᠠᠷ ᠢᠰᠡᠭᠡᠢ ᠱᠠᠬᠠᠢ ᠪᠠᠷ ᠢ᠋ᠶ᠋ᠠᠨ ᠮᠤᠤᠷ ᠰᠢᠭ᠋ ᠭᠡᠲᠡᠨ ᠳᠥᠷᠪᠡ ᠲᠠᠪᠤᠨ ᠠᠯᠬᠤᠮ ᠤ᠋ᠨ ᠵᠠᠢ ᠲᠠᠢ ᠵᠣᠭᠰᠣᠵᠤ ᠪᠠᠰᠠ ᠯᠠ ᠪᠠᠬᠠᠨ ᠠᠵᠢᠭᠯᠠᠨᠠ᠃ ᠤᠴᠢᠷ ᠨᠢ ᠳᠡ ᠯᠣᠣᠶᠧ ᠳ᠋ᠠᠨᠽᠡᠨ ᠦ᠌ ᠬᠦᠨᠳᠦ ᠲᠡᠭᠡᠷᠮᠡ ᠳ᠋ᠦ᠍ ᠬᠡᠨᠡᠭ ᠦᠭᠡᠢ ᠵᠢᠳᠬᠦᠵᠦ ᠪᠠᠢᠭᠠ ᠶ᠋ᠢ ᠬᠡᠴᠢᠨᠡᠭᠡᠨ ᠦᠵᠡᠪᠡᠴᠦ ᠪᠠᠬᠠᠷᠬᠠᠯ ᠡᠰᠡ ᠬᠠᠨᠤᠨᠠ᠃ ᠪᠠᠰᠠ ᠢᠳᠡᠬᠦ ᠨᠢ ᠪᠤᠰᠤᠳ ᠠ᠋ᠴᠠ ᠣᠨᠴᠠᠭᠠᠢ ᠶ᠋ᠢ ᠬᠠᠴᠢᠷᠬᠠᠨ ᠰᠣᠨᠢᠷᠬᠠᠨᠠ᠃ ᠭᠡᠲᠡᠯᠡ ᠪᠠᠰᠠ ᠶᠠᠭᠤᠮᠠ ᠵᠠᠵᠢᠯᠬᠤ ᠳ᠋ᠤᠨᠢ ᠰᠢᠨᠠ ᠳ᠋ᠤᠨᠢ ᠵᠠᠩᠭᠢᠷᠠᠭᠰᠠᠨ ᠪᠤᠯᠴᠢᠩ ᠪᠣᠢ ᠪᠣᠯᠤᠨ ᠥᠪᠥᠰ ᠲᠥᠪᠥᠰ ᠬᠥᠳᠡᠯᠬᠦ ᠨᠢ ᠪᠦᠷ ᠴᠦ᠍ ᠬᠠᠴᠢᠨ ᠪᠠᠢᠳᠠᠭ ᠪᠠᠢᠵᠠᠢ᠃
ᠤᠷᠢᠳ ᠡᠮᠦᠨᠡ ᠳᠡ ᠯᠣᠣᠶᠧ ᠡᠨᠡ ᠫᠧᠩ ᠳ᠋ᠦ᠍ ᠬᠣᠶᠠᠷ ᠰᠠᠢᠬᠠᠨ ᠡᠯᠵᠢᠭᠡ ᠪᠡᠨ ᠦᠵᠡᠨ ᠰᠡᠳᠬᠢᠯ ᠪᠠᠶᠠᠰᠬᠠᠬᠤ ᠪᠠᠷ ᠣᠷᠣᠵᠤ ᠢᠷᠡᠳᠡᠭ ᠪᠠᠢᠭᠰᠠᠨ ᠪᠣᠯ ᠣᠳᠣ ᠵᠥᠪᠬᠡᠨ ᠳ᠋ᠠᠨᠽᠡᠨ ᠢ᠋᠁ ᠡᠢᠮᠦ ᠬᠥᠮᠦᠨ ᠢ᠋ ᠡᠭᠦᠷᠢᠳᠡ ᠡᠵᠡᠮᠰᠢᠬᠦ ᠪᠣᠯᠪᠠᠯ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ? ᠲᠡᠭᠡᠷᠮᠡ ᠳ᠋ᠦ᠍ ᠵᠢᠳᠬᠦᠭᠦᠯᠵᠦ ᠪᠠᠢᠬᠤ ᠠ᠋ᠴᠠ ᠭᠠᠳᠠᠨᠠ᠂ ᠠᠮᠢ ᠪᠡᠶᠡ᠂ ᠡᠳ᠋ ᠬᠣᠭᠰᠢᠯ ᠢ᠋ᠶ᠋ᠠᠨ ᠰᠡᠳᠬᠢᠯ ᠪᠠᠷᠳᠠᠮ ᠬᠠᠮᠠᠭᠠᠯᠠᠭᠤᠯᠬᠤ ᠪᠤᠰᠤ ᠤᠤ? ᠭᠡᠳᠡᠭ ᠪᠣᠳᠣᠯ ᠢ᠋ ᠴᠠᠭ ᠢᠮᠠᠭᠲᠠ ᠡᠪᠦᠷᠯᠡᠨ ᠰᠢᠨᠤᠬᠠᠢᠷᠠᠨᠠ᠃ ᠲᠡᠭᠡᠭᠡᠳ ᠶᠠᠭᠤᠨ ᠤ᠋ ᠤᠷᠢᠳ《ᠬᠣᠭᠣᠯᠠ ᠲᠠᠢ ᠭᠠᠵᠠᠷ ᠠ᠋ᠴᠠ ᠬᠥᠮᠦᠨ ᠵᠢᠭᠤᠲᠠᠬᠤ ᠦᠭᠡᠢ》 ᠭᠡᠭᠴᠢ ᠪᠡᠷ ᠬᠣᠶᠠᠷ ᠡᠯᠵᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠡᠵᠢᠭᠡᠯ ᠦ᠋ᠨ ᠵᠠᠷᠤᠳᠠᠯ ᠢ᠋ ᠬᠠᠰᠤᠵᠤ ᠳ᠋ᠠᠨᠽᠡᠨ ᠦ᠌ ᠢᠳᠡᠬᠦ ᠳ᠋ᠦ᠍ ᠰᠢᠯᠵᠢᠭᠦᠯᠦᠭᠰᠡᠨ ᠪᠠᠢᠵᠠᠢ᠃
ᠢᠩᠭᠢᠵᠦ ᠠᠷᠪᠠᠭᠠᠳ ᠡᠳᠦᠷ ᠥᠩᠭᠡᠷᠡᠬᠦ ᠳ᠋ᠦ᠍ ᠬᠣᠶᠠᠷ ᠡᠯᠵᠢᠭᠡ ᠮᠡᠳᠡᠭᠳᠡᠬᠦᠢᠴᠡ ᠳᠣᠷᠣᠢᠲᠠᠪᠠ᠃ ᠠᠩᠬᠠᠨ ᠤ᠋ ᠡᠳᠦᠷ ᠦ᠋ᠳ ᠲᠦ᠍ ᠲᠡᠷᠡ ᠬᠣᠶᠠᠷ ᠳ᠋ᠠᠨᠽᠡᠨ ᠦ᠌ ᠲᠡᠭᠡᠷᠮᠡ ᠵᠢᠳᠬᠦᠬᠦ ᠶ᠋ᠢ ᠳᠡᠭᠡᠷᠡᠩᠭᠦᠢᠯᠡᠬᠦ ᠪᠠᠢᠳᠠᠯ ᠢ᠋ᠶ᠋ᠠᠷ ᠰᠢᠷᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠣᠯᠢᠭᠠᠳ ᠤᠷᠲᠤ ᠰᠠᠢᠬᠠᠨ ᠴᠢᠬᠢ ᠪᠡᠨ ᠰᠤᠯᠠ ᠬᠠᠶᠠᠨ ᠤᠷᠤᠭᠤ ᠴᠢᠷᠠᠢᠯᠠᠨ ᠭᠠᠵᠠᠷ ᠰᠢᠷᠲᠡᠬᠦ ᠪᠣᠯᠪᠠ᠃ ᠡᠳᠦᠷ ᠳᠤᠮᠳᠠ ᠪᠣᠯᠣᠮᠠᠭᠴᠠ ᠥᠨᠥᠬᠢ ᠲᠢᠪ ᠳᠡᠯᠡᠬᠡᠢ ᠶ᠋ᠢᠨ ᠬᠠᠮᠤᠭ ᠠᠮᠢᠲᠠᠳ ᠲᠤ ᠲᠠᠷᠭᠤᠨ ᠴᠠᠳᠬᠤᠯᠠᠩ ᠪᠠᠢᠭᠠ ᠪᠠᠨ ᠭᠠᠢᠬᠠᠭᠤᠯᠬᠤ ᠰᠢᠭ᠋ ᠬᠦᠴᠦ ᠮᠡᠳᠡᠨ ᠪᠠᠷᠬᠢᠷᠠᠬᠤ ᠨᠢ ᠰᠤᠯᠠᠷᠠᠵᠤ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠠᠭᠠᠬᠢᠯᠠᠨ ᠲᠡᠮᠡᠦᠯᠬᠦ ᠨᠢ ᠴᠦ᠍ ᠪᠦᠷ ᠵᠣᠭᠰᠣᠵᠠᠢ᠃ ᠭᠡᠲᠡᠯᠡ ᠡᠳᠡᠨ ᠢ᠋ ᠠᠩᠬᠠᠷᠬᠤ ᠬᠥᠮᠦᠨ ᠠᠯᠠᠭᠠ᠃ ᠭᠠᠭᠴᠠᠬᠠᠨ ᠳ᠋ᠠᠨᠽᠡᠨ ᠮᠠᠯ ᠳ᠋ᠤ᠌ ᠬᠠᠢᠷᠠᠲᠠᠢ ᠪᠠᠷ ᠢ᠋ᠶ᠋ᠠᠨ ᠠᠵᠢᠭᠯᠠᠨ ᠡᠳᠡᠨ ᠢ᠋ ᠡᠨᠳᠡ ᠢᠩᠭᠢᠵᠦ ᠳᠡᠮᠡᠢ ᠬᠣᠷᠢᠵᠤ ᠪᠠᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠠᠭᠤᠯᠠᠨ ᠳ᠋ᠤ᠌ ᠭᠠᠷᠭᠠᠴᠢᠬᠠᠪᠠᠯ ᠰᠡᠷᠭᠦᠭᠰᠡᠨ ᠪᠠᠢᠭᠠ ᠳᠠ ᠭᠡᠵᠦ ᠪᠣᠳᠣᠨᠠ᠃
ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠴᠤᠤᠷᠢᠶᠠ ᠪᠦᠬᠦ ᠲᠣᠰᠬᠣᠨ ᠢ᠋ᠶ᠋ᠠᠷ ᠳᠡᠭᠳᠡᠪᠡ᠃ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠬᠡᠴᠢᠨᠡᠭᠡᠨ ᠶᠡᠬᠡ ᠪᠠᠶᠠᠷ ᠬᠥᠷ ᠪᠣᠯᠤᠨ ᠬᠦᠯᠢᠶᠡᠵᠦ ᠪᠠᠢᠭᠠ ᠶ᠋ᠢ ᠳ᠋ᠠᠨᠽᠡᠨ ᠯᠤᠤ ᠯᠢ ᠶ᠋ᠢᠨ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠥᠷᠯᠥᠭᠡ ᠪᠦᠷᠢ ᠬᠤᠷᠤᠭᠤ ᠳᠠᠷᠤᠨ ᠬᠣᠨᠣᠭ ᠲᠣᠭᠠᠯᠠᠵᠤ ᠪᠠᠢᠭᠠ ᠠ᠋ᠴᠠ ᠮᠡᠳᠡᠨ ᠮᠥᠨ ᠯᠡ ᠰᠡᠳᠬᠢᠯ ᠬᠥᠳᠡᠯᠦᠨᠡ᠃ ᠯᠤᠤ ᠯᠢ᠂ ᠠᠪᠠᠭᠠᠢ ᠬᠣᠶᠠᠷ ᠴᠦ᠍ ᠭᠡᠰᠡᠨ ᠲᠠᠢᠪᠤᠩ ᠰᠠᠭᠤᠵᠤ ᠴᠢᠳᠠᠬᠤ ᠪᠠᠨ ᠪᠠᠢᠪᠠ᠃ ᠡᠢᠮᠦ ᠲᠡᠢᠮᠦ ᠶᠠᠭᠤᠮᠠ ᠪᠡᠯᠡᠳᠬᠡᠨᠡ ᠭᠡᠵᠦ ᠬᠡᠯᠡᠯᠴᠡᠬᠦ ᠵᠠᠭᠤᠷᠠ ᠥᠪᠡᠷ ᠲᠦ᠍ ᠦᠭᠡᠢ ᠵᠦᠢᠯᠡᠰ ᠢ᠋ ᠬᠠᠮᠢᠭᠠ ᠠ᠋ᠴᠠ ᠶᠠᠪᠤᠵᠤ ᠣᠯᠬᠤ ᠪᠣᠢ? ᠭᠡᠵᠦ ᠰᠡᠳᠬᠢᠯ ᠨᠢ ᠵᠣᠪᠠᠨᠢᠨᠠ᠃
ᠮᠣᠩᠭᠣᠯ ᠳ᠋ᠤ᠌ ᠪᠣᠯ ᠴᠠᠭᠠᠨ ᠰᠠᠷᠠ ᠪᠠᠷ ᠠᠢᠯ ᠪᠦᠷᠢ ᠳ᠋ᠦ᠍ ᠲᠠᠷᠭᠤᠨ ᠬᠣᠨᠢᠨ ᠤ᠋ ᠮᠢᠬᠠ ᠭᠣᠣᠯ ᠪᠣᠯᠤᠨ ᠬᠡᠷᠡᠭᠯᠡᠭᠳᠡᠳᠡᠭ ᠪᠣᠯ ᠡᠨᠳᠡ ᠨᠠᠷᠢᠨ ᠴᠠᠭᠠᠨ ᠭᠤᠯᠢᠷ ᠠᠷᠪᠠ ᠬᠣᠷᠢᠨ ᠵᠢᠩ ᠬᠡᠷᠡᠭᠲᠡᠢ ᠪᠣᠯᠤᠨᠠ᠃ ᠭᠡᠲᠡᠯᠡ ᠲᠡᠢᠮᠦ ᠭᠤᠯᠢᠷ ᠯᠤᠤ ᠯᠢ ᠶ᠋ᠢᠨ ᠳ᠋ᠦ᠍ ᠪᠠᠢᠬᠤ ᠦᠭᠡᠢ ᠪᠣᠯᠬᠣᠷ᠂ ᠳᠠ ᠯᠣᠣᠶᠧ ᠶ᠋ᠢᠨ ᠳ᠋ᠦ᠍ ᠠᠵᠢᠯᠯᠠᠭᠰᠠᠨ ᠬᠥᠯᠥᠰᠥ ᠪᠡᠨ ᠪᠤᠳᠤᠭᠤᠯᠵᠤ ᠭᠤᠯᠢᠷ ᠣᠷᠣᠯᠴᠠᠭᠤᠯᠤᠨ ᠠᠪᠬᠤ ᠪᠠᠷ ᠰᠢᠢᠳᠪᠡ᠃ ᠯᠤᠤ ᠯᠢ ᠳᠡ ᠯᠣᠣᠶᠧ ᠶ᠋ᠢᠨ ᠳ᠋ᠠᠨᠽᠡᠨ ᠢ᠋ ᠴᠠᠭ ᠢᠮᠠᠭᠲᠠ ᠲᠠᠭᠠᠯᠠᠯᠲᠤ ᠨᠢᠳᠦ ᠪᠡᠷ ᠠᠵᠢᠳᠠᠭ ᠢ᠋ ᠰᠠᠢᠨ ᠮᠡᠳᠡᠬᠦ ᠲᠤᠯᠠ ᠳ᠋ᠠᠨᠽᠡᠨ ᠲᠡᠢ ᠣᠷᠣᠪᠠᠯ ᠡᠷᠬᠡ ᠦᠭᠡᠢ ᠰᠠᠢᠨ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠵᠠᠢ᠃ ᠲᠡᠭᠡᠭᠡᠳ ᠳᠡ ᠯᠣᠣᠶᠧ ᠶ᠋ᠢᠨ ᠳ᠋ᠦ᠍ ᠪᠠᠷᠠᠭᠠᠯᠠᠬᠠᠬᠤ ᠳ᠋ᠠᠭᠠᠨ ᠳ᠋ᠠᠨᠽᠡᠨ ᠢ᠋ ᠳᠠᠭᠠᠭᠤᠯᠪᠠ᠃ ᠲᠠᠰᠤᠯᠭᠠᠨ ᠳ᠋ᠤ᠌ ᠨᠢ ᠳᠥᠩᠭᠡᠵᠦ ᠣᠷᠣᠩᠭᠤᠲᠠ ᠪᠠᠨ ᠯᠤᠤ ᠯᠢ ᠪᠣᠱᠣᠭᠠᠨ ᠠ᠋ᠴᠠ ᠨᠢ ᠦᠯᠦ ᠬᠡᠲᠦᠷᠡᠨ ᠬᠡᠳᠦ ᠳᠠᠬᠢᠨ ᠮᠡᠬᠦᠯᠵᠡᠨ ᠮᠥᠷᠭᠥᠬᠦ ᠶ᠋ᠢ ᠳ᠋ᠠᠨᠽᠡᠨ ᠨᠢᠳᠦᠨ ᠦ᠌ ᠪᠡᠨ ᠪᠤᠯᠤᠩ ᠢ᠋ᠶ᠋ᠠᠷ ᠠᠵᠢᠭᠯᠠᠭᠠᠳ ᠲᠠᠭᠠᠨ ᠳᠠᠭᠤᠷᠢᠶᠠᠪᠠ᠃ ᠭᠡᠪᠡᠴᠦ ᠯᠤᠤ ᠯᠢ ᠶ᠋ᠢᠨ ᠡᠪᠦᠳᠦᠭ ᠴᠡᠴᠡᠷᠡᠨ᠂ ᠵᠢᠷᠦᠬᠡ ᠨᠢ ᠴᠣᠬᠢᠯᠠᠵᠤ ᠪᠠᠢᠭᠠ ᠶ᠋ᠢ ᠳᠠᠭᠤᠷᠢᠶᠠᠵᠤ ᠦᠯᠦ ᠪᠣᠯᠬᠤ ᠠᠵᠢ᠃ ᠳ᠋ᠠ ᠯᠣᠣᠶᠧ ᠶ᠋ᠢ ᠠᠵᠢᠬᠤ ᠳ᠋ᠤ᠌ ᠬᠣᠶᠠᠷ ᠲᠠᠯᠠ ᠳ᠋ᠠᠭᠠᠨ ᠲᠣᠬᠣᠢᠯᠳᠠᠬᠤ ᠲᠦᠰᠢᠭᠦᠷ ᠪᠦᠬᠦᠢ ᠶᠠᠩᠬᠢᠭᠠᠷ ᠬᠦᠷᠡᠩ ᠰᠠᠨᠳᠠᠯᠢ ᠳᠡᠭᠡᠷᠡ ᠪᠠᠭᠲᠠᠵᠤ ᠶᠠᠳᠠᠨ ᠯᠠᠬᠠᠢᠯᠠᠵᠤ᠂ ᠠᠮᠢᠰᠬᠤᠯᠠᠬᠤ ᠪᠦᠷᠢ ᠳ᠋ᠡᠭᠡᠨ ᠢᠨᠴᠠᠭᠯᠠᠨᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠮᠥᠰᠥ ᠰᠢᠭ ᠭᠥᠯᠢᠢᠭᠰᠡᠨ ᠬᠥᠬᠡ ᠴᠢᠷᠠᠢ ᠲᠠᠢ ᠣᠨᠣᠭᠣᠲᠠᠢ ᠤᠷᠲᠤ ᠳᠡᠪᠡᠯ ᠡᠮᠦᠰᠦᠭᠰᠡᠨ ᠥᠨᠳᠥᠷ ᠲᠤᠷᠠᠩᠬᠠᠢ ᠪᠡᠶᠡ ᠲᠡᠢ᠂ ᠠᠬᠢᠮᠠᠭ ᠨᠠᠰᠤᠨ ᠤ᠋ ᠬᠥᠮᠦᠨ ᠨᠣᠢᠷᠮᠤᠭᠯᠠᠨ ᠵᠣᠭᠰᠣᠨᠠ᠃ ᠡᠨᠡ ᠬᠥᠮᠦᠨ᠂ ᠳᠡ ᠯᠣᠣᠶᠧ ᠶ᠋ᠢᠨ ᠪᠦᠬᠦ ᠠᠵᠤ ᠠᠬᠤᠢ ᠶ᠋ᠢ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠬᠠᠷᠢᠭᠤᠴᠠᠨ ᠮᠡᠳᠡᠳᠡᠭ ᠯᠢᠦ ᠰᠢᠨ ᠬᠠᠢ ᠭᠡᠳᠡᠭ ᠪᠠᠢᠵᠠᠢ᠃ ᠯᠤᠤ ᠯᠢ ᠶ᠋ᠢᠨ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠠᠮᠠ ᠠ᠋ᠴᠠ ᠪᠠᠨ ᠠᠷᠠᠢᠬᠠᠨ ᠭᠠᠷᠭᠠᠵᠤ ᠬᠡᠯᠡᠬᠦ ᠳ᠋ᠦ᠍ ᠨᠣᠢᠷᠮᠤᠭᠯᠠᠭᠰᠠᠨ ᠨᠢᠳᠦ ᠪᠡᠨ ᠥᠭᠡᠳᠡ ᠳᠠᠲᠠᠯᠭᠦᠢ ᠬᠠᠵᠠᠭᠤ ᠲᠠᠢᠰᠢ ᠡᠷᠭᠢᠨ ᠪᠢᠴᠢᠭ ᠦ᠋ᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠵᠤ᠂ ᠵᠤᠵᠠᠭᠠᠨ ᠭᠡᠭᠴᠢ ᠶ᠋ᠢᠨ ᠳᠠᠩᠰᠠ ᠳᠡᠪᠲᠡᠷ ᠠᠪᠤᠨ ᠰᠡᠬᠦᠵᠦ ᠬᠠᠭᠤᠳᠠᠰᠤ ᠱᠦᠭᠦᠷᠳᠡᠪᠡ᠃
— ᠡᠨᠡ ᠵᠢᠯ ᠶᠧᠪᠡᠩ ᠰᠠᠷᠠ ᠮᠠ ᠶᠦᠦ ᠭᠤᠷᠪᠠᠨ ᠵᠢᠩ ᠭᠡᠵᠦ ᠵᠡᠭᠦᠳᠦᠯᠡᠵᠦ ᠪᠠᠢᠨᠠ ᠤᠤ᠂ ᠭᠡᠮᠡᠷ ᠦᠭᠡ ᠪᠦᠷᠢ ᠳ᠋ᠦ᠍ ᠤᠨᠵᠢᠷᠠᠭᠤᠯᠤᠨ ᠪᠣᠪᠠᠳᠤᠨᠠᠭᠤᠯᠬᠤ ᠳ᠋ᠤᠨᠢ᠄
— ᠠᠢ ᠲᠡᠢᠮᠦ! ᠭᠡᠵᠦ ᠯᠤᠤ ᠯᠢ ᠬᠠᠭᠤᠷᠮᠠᠴᠢ ᠪᠠᠷ ᠢᠨᠢᠶᠡᠨ ᠲᠣᠩᠭᠣᠢᠪᠠ᠃
— ᠨᠢᠳᠤᠨᠤᠨ ᠴᠠᠭᠠᠨ ᠰᠠᠷᠠ ᠳ᠋ᠧᠩ ᠼᠠᠢ ᠮᠢ ᠠᠷᠪᠠᠨ ᠲᠠᠪᠤᠨ ᠵᠢᠩ ᠭᠡᠳ ᠨᠢᠭᠡ ᠬᠡᠰᠡᠭ ᠲᠠᠭ ᠴᠢᠭ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠴᠢᠨᠠᠳᠤ ᠵᠢᠯ ᠱᠠᠨ ᠶᠣᠣ ᠵᠢᠩ ᠢ᠋ᠶ᠋ᠡᠨ ᠭᠡᠬᠦ ᠳ᠋ᠦ᠍ᠨᠢ ᠯᠤᠤ ᠯᠢ᠄
— ᠠᠢ ᠰᠢᠶᠠᠨᠱᠧᠩ ᠠ᠋! ᠡᠳᠡᠭᠡᠷ ᠢ᠋ ᠨᠠᠮᠤᠷ ᠤ᠋ᠨ ᠠᠵᠢᠯ ᠤ᠋ᠨ ᠬᠥᠯᠥᠰᠥᠨ ᠡᠴᠡ ᠰᠠᠭᠤᠭᠳᠠᠭᠰᠠᠨ ᠪᠠᠢᠬᠠ ᠠ᠋!
ᠯᠢᠦ ᠰᠢᠨ ᠬᠠᠢ ᠬᠠᠷᠢᠭᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠳᠠᠩᠰᠠ ᠪᠠᠨ ᠰᠢᠷᠲᠡᠭᠰᠡᠨ ᠴᠢᠭ ᠢ᠋ᠶ᠋ᠡᠷ ᠤᠨᠲᠠᠴᠢᠬᠤ ᠰᠢᠭ᠋ ᠪᠠᠰᠠ ᠭᠥᠯᠢᠷᠡᠨᠡ᠃ ᠲᠡᠭᠡᠭᠡᠳ ᠶᠣᠰᠣᠲᠠᠢ ᠤᠨᠲᠠᠬᠤ ᠰᠢᠭ᠋᠃ ᠡᠨᠡ ᠨᠢ《ᠣᠳᠣ ᠡᠨᠡ ᠴᠢᠳᠬᠥᠷ ᠪᠠᠰᠠ ᠶᠠᠮᠠᠷ ᠶᠠᠭᠤᠮᠠ ᠶ᠋ᠢ ᠭᠠᠷᠭᠠᠵᠤ ᠢᠷᠡᠬᠦ ᠭᠡᠵᠦ ᠪᠠᠢᠭᠠ ᠪᠣᠯ?》 ᠭᠡᠵᠦ ᠬᠦᠯᠢᠶᠡᠭᠰᠡᠨ ᠯᠤᠤ ᠯᠢ ᠳ᠋ᠦ᠍ ᠰᠦᠷᠡᠬᠡᠢ ᠠᠶᠤᠮᠰᠢᠭ ᠪᠠᠢᠯᠠ᠃ ᠳ᠋ᠠᠨᠽᠡᠨ ᠳ᠋ᠦ᠍ ᠪᠣᠯ ᠪᠥᠭᠡᠮ ᠬᠠᠷᠠ ᠤᠢᠳᠬᠠᠷ᠃ ᠲᠣᠮᠣ ᠰᠠᠨᠳᠠᠯᠢ ᠳ᠋ᠤ᠌ ᠵᠣᠭᠣᠭᠳᠠᠭᠰᠠᠨ ᠰᠢᠭ᠋ ᠰᠠᠭᠤᠭᠠ ᠳᠠ ᠯᠣᠣᠶᠧ ᠶ᠋ᠢ ᠬᠥᠮᠦᠨ ᠰᠣᠨᠢᠷᠬᠠᠬᠤ ᠪᠠᠷ ᠦᠯᠦ ᠪᠠᠷᠠᠮ᠂ ᠦᠵᠡᠩᠭᠦᠲᠡ ᠢᠨᠢᠶᠡᠳᠦ ᠠᠯᠳᠠᠬᠤ ᠪᠣᠯᠬᠤᠢᠴᠠ ᠪᠠᠢᠪᠠᠴᠤ ᠡᠭᠦᠨ ᠦ᠌ ᠤᠷᠢᠳ ᠣᠯᠠᠨᠲᠠ ᠦᠵᠡᠨ ᠶᠠᠩᠵᠤ ᠶᠠᠩᠵᠤ ᠪᠠᠷ ᠳᠦᠷᠰᠦᠯᠡᠨ ᠪᠣᠳᠣᠵᠤ ᠭᠦᠢᠴᠡᠭᠰᠡᠨ ᠪᠣᠯᠬᠣᠷ ᠮᠥᠨ ᠯᠡ ᠬᠠᠷᠠ ᠤᠢᠳᠬᠠᠷ ᠲᠥᠷᠥᠭᠦᠯᠬᠦ ᠠᠵᠢ᠃ ᠪᠡᠶᠡ ᠴᠢᠯᠡᠭᠡᠷᠬᠡᠨ ᠪᠠᠢᠵᠤ ᠶᠠᠳᠠᠬᠤ ᠳ᠋ᠠᠭᠠᠨ ᠳ᠋ᠠᠨᠽᠡᠨ᠄《ᠪᠢ ᠭᠠᠷᠤᠶᠠ》 ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠵᠠᠪᠳᠤᠲᠠᠯᠠ ᠯᠢᠦ ᠰᠢᠨ ᠬᠠᠢ᠄
— ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠥᠷᠢ ᠶ᠋ᠢ ᠬᠡᠵᠢᠶᠡ ᠲᠥᠯᠥᠬᠦ ᠪᠣᠢ? ᠭᠡᠬᠦ ᠰᠢᠭ᠃ ᠯᠤᠤ ᠯᠢ ᠰᠣᠴᠢᠨ᠄
— ᠠᠢ ᠳᠡᠭᠡᠷᠡ ᠦᠶᠡ ᠶ᠋ᠢᠨ ᠶᠠᠮᠠᠷ ᠥᠷᠢ ᠪᠣᠢ?
— ᠲᠠᠨ ᠤ᠋ ᠡᠴᠢᠭᠡ᠂ ᠪᠠᠰᠠ ᠡᠴᠢᠭᠡ ᠶ᠋ᠢᠨ ᠴᠢᠨᠢ ᠡᠴᠢᠭᠡ ᠥᠷᠢ ᠲᠡᠢ ᠪᠠᠢᠭᠰᠠᠨ ᠰᠢᠦ ᠳᠡ᠃
— ᠠᠢ ᠪᠢ ᠮᠡᠳᠡᠬᠦ ᠦᠭᠡᠢ ᠶᠦᠮ ᠳᠡ ᠭᠡᠵᠦ ᠯᠤᠤ ᠯᠢ ᠠᠮᠢᠰᠬᠤᠭᠠᠳᠠᠪᠠ᠃ ᠯᠢᠦ ᠰᠢᠨ ᠬᠠᠢ ᠲᠣᠯᠣᠭᠠᠢ ᠡᠷᠭᠢᠭᠦᠯᠦᠨ ᠯᠤᠤ ᠯᠢ ᠶ᠋ᠢ ᠭᠥᠯᠢᠷᠡᠨ ᠰᠢᠷᠳᠡᠵᠦ᠄
— ᠪᠢ ᠴᠦ᠍ ᠮᠡᠳᠡᠬᠦ ᠦᠭᠡᠢ ᠵᠥᠪᠬᠡᠨ ᠡᠨᠡ ᠳᠠᠩᠰᠠ!
ᠯᠤᠤ ᠯᠢ ᠭᠤᠨᠢᠭᠯᠠᠨ ᠳᠣᠷᠣᠭᠰᠢ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ ᠳᠡ ᠯᠣᠣᠶᠧ ᠤᠷᠤᠭᠤ ᠬᠠᠨᠳᠤᠨ᠄
— ᠳᠠ ᠯᠣᠣᠶᠧ ᠡᠨᠡ ᠬᠢᠷᠢ ᠨᠠᠳᠠ ᠡᠪᠦᠭᠡᠳ ᠦ᠋ᠨ ᠥᠷᠢ ᠶ᠋ᠢ ᠲᠥᠯᠥᠬᠦ ᠴᠢᠳᠠᠯ ᠶᠠᠭᠠᠬᠢᠨ ᠪᠠᠢᠬᠤ ᠪᠣᠢ? ᠶᠠᠳᠠᠵᠤ ᠬᠦᠦ ᠴᠡᠷᠢᠭ ᠲᠦ᠍᠂ ᠲᠡᠭᠦᠨ ᠢ᠋ ᠢᠷᠡᠭᠰᠡᠨ ᠦ᠌ ᠬᠣᠢᠨᠠ ᠪᠣᠳᠣᠬᠤ ᠪᠣᠯᠭᠠᠵᠤ ᠥᠭᠭᠦᠨᠡ ᠤᠤ? ᠭᠡᠵᠦ ᠮᠡᠬᠦᠢᠪᠡ᠃
ᠳᠡ ᠯᠣᠣᠶᠧ᠄ ᠵᠧ ᠭᠧ ᠰᠢᠩ(ᠡᠨᠡ ᠪᠣᠯᠤᠨᠠ) ᠭᠡᠳᠡᠭ ᠦᠭᠡ ᠶ᠋ᠢ ᠨᠢᠯᠤᠭᠤᠨ ᠢ᠋ᠶ᠋ᠠᠷ ᠰᠤᠩᠭᠠᠨ ᠤᠨᠵᠢᠷᠠᠭᠤᠯᠤᠭᠠᠳ᠂ ᠤᠭ ᠦᠭᠡ ᠪᠣᠯ ᠰᠢᠩ᠂ ᠭᠠᠭᠴᠠᠬᠠᠨ ᠳᠠ ᠯᠣᠣᠶᠧ ᠬᠡᠯᠡ ᠨᠢ ᠬᠦᠷᠲᠡᠯᠡ ᠬᠡᠳᠦ ᠥᠭᠡᠬᠦᠯᠡᠭᠰᠡᠨ ᠳ᠋ᠡᠭᠡᠨ ᠲᠡᠢᠨᠭᠦ ᠨᠢᠯᠤᠭᠤᠨ ᠢ᠋ᠶ᠋ᠠᠷ ᠰᠤᠩᠭᠠᠳᠠᠭ ᠠᠵᠢ᠃ ᠯᠤᠤ ᠯᠢ ᠪᠠᠶᠠᠷᠯᠠᠨ᠄
— ᠣᠳᠣ ᠪᠢ ᠠᠵᠢᠯᠯᠠᠭᠰᠠᠨ ᠤ᠋ ᠪᠠᠨ ᠬᠥᠯᠥᠰᠥ ᠶ᠋ᠢ ᠪᠤᠳᠤᠭᠤᠯᠤᠨ ᠭᠤᠯᠢᠷ ᠠᠪᠬᠤ ᠶ᠋ᠢ ᠬᠦᠰᠡᠨᠡ ᠭᠡᠬᠦ ᠳ᠋ᠦ᠍᠂
— ᠳᠡ ᠯᠣᠣᠶᠧ ᠳᠠᠬᠢᠨ《ᠰᠢᠩ》 ᠭᠡᠪᠡ᠃
ᠮᠥᠰᠥᠨ ᠭᠥᠯᠢᠭᠡᠷ ᠴᠢᠷᠠᠢᠲᠤ ᠯᠢᠦ ᠰᠢᠨ ᠬᠠᠢ ᠶ᠋ᠢᠨ ᠭᠠᠷ ᠰᠤᠸᠠᠮᠫᠠᠨ ᠤᠷᠤᠭᠤ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠭᠢᠯᠠᠯᠵᠠᠨ《ᠪᠠᠢ ᠼᠠᠢ᠂ ᠲᠥᠮᠥᠰᠥ᠂ ᠰᠣᠩᠭᠢᠨᠠ᠂ ᠬᠤᠯᠤ᠂ ᠰᠢ ᠭᠤᠸᠠ》 ᠭᠡᠬᠦᠴᠢᠯᠡᠯ ᠦ᠋ᠨ ᠦᠭᠡᠰ ᠢ᠋ ᠰᠤᠸᠠᠮᠫᠠᠨ ᠤ᠋ ᠡᠷᠢᠬᠡᠨ ᠦ᠌ ᠰᠢᠳ ᠹᠠᠳ ᠭᠡᠬᠦ ᠲᠡᠢ ᠤᠷᠤᠯᠳᠤᠭᠤᠯᠪᠠ᠃ ᠡᠨᠡ ᠨᠢ ᠯᠤᠤ ᠯᠢ ᠶ᠋ᠢᠨ ᠰᠡᠭᠦᠯ ᠦ᠋ᠨ ᠰᠠᠷᠠ ᠨᠤᠭᠤᠳ ᠲᠤ ᠠᠵᠢᠯ ᠬᠢᠬᠦ ᠵᠠᠭᠤᠷᠠ ᠪᠠᠨ ᠬᠡᠳᠦ ᠭᠤᠷᠪᠠᠨ ᠵᠢᠩ ᠢ᠋ᠶ᠋ᠡᠷ ᠠᠪᠤᠭᠰᠠᠨ ᠵᠦᠢᠯ ᠪᠠᠢᠬᠤ ᠪᠥᠭᠡᠳ ᠯᠤᠤ ᠯᠢ ᠡᠴᠦᠰ ᠲᠦ᠋ᠨᠢ ᠴᠣᠬᠣᠮ ᠶᠠᠭᠤ ᠦᠯᠡᠳᠡᠬᠦ ᠪᠣᠯ ᠭᠡᠬᠦ ᠳ᠋ᠡᠭᠡᠨ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠭᠥᠯᠢᠷᠡᠨ ᠰᠢᠷᠳᠡᠨᠡ᠃ ᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠯᠢᠦ ᠰᠢᠨ ᠬᠠᠢ ᠲᠣᠭᠠᠴᠠᠭᠠ ᠪᠣᠳᠣᠨ ᠳᠠᠭᠤᠰᠴᠤ᠄
— ᠼᠠᠢ ᠮᠢ ᠠᠷᠪᠠᠨ ᠲᠠᠪᠤᠨ ᠵᠢᠩ ᠭᠡᠪᠡ᠃
ᠯᠤᠤ ᠯᠢ᠄ ᠠᠢ ᠭᠡᠵᠦ ᠰᠠᠨᠠᠭᠠ ᠠᠯᠲᠠᠨ ᠰᠢᠶᠠᠨᠱᠧᠩ ᠠ᠋ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠪᠢᠳᠡ ᠬᠣᠶᠠᠭᠤᠯᠠ ᠠᠵᠢᠯᠯᠠᠭᠰᠠᠨ ᠰᠢᠦ ᠭᠡᠬᠦ ᠳ᠋ᠦ᠍᠂ ᠳᠡ ᠯᠣᠣᠶᠧ᠄
— ᠬᠣᠷᠢᠨ ᠲᠠᠪᠤᠨ ᠵᠢᠩ ᠥᠭ! ᠭᠡᠵᠦ ᠨᠢᠯᠤᠭᠤᠨ ᠢ᠋ᠶ᠋ᠠᠷ ᠤᠶᠠᠩᠭᠠᠯᠠᠭᠤᠯᠬᠤ ᠨᠢ ᠶᠣᠰᠣᠲᠠᠢ ᠯᠠ ᠨᠢᠭᠡ ᠶᠠᠭᠤᠮᠠᠨ ᠤ᠋ ᠡᠵᠡᠨ ᠬᠥᠮᠦᠨ ᠦ᠌ ᠵᠠᠷᠯᠢᠭ ᠪᠠᠭᠤᠬᠤ ᠰᠢᠭ᠋᠃
ᠯᠤᠤ ᠯᠢ ᠪᠠᠶᠠᠷᠯᠠᠭᠰᠠᠨ ᠳ᠋ᠠᠭᠠᠨ ᠢᠨᠢᠶᠡᠮᠰᠦᠭᠯᠡᠨ ᠭᠤᠷᠪᠠᠨᠲᠠ ᠮᠡᠬᠦᠯᠵᠡᠪᠡ᠃ ᠬᠣᠷᠢᠨ ᠲᠠᠪᠤᠨ ᠵᠢᠩ ᠳ᠋ᠧᠩ ᠼᠠᠢ ᠮᠢ ᠨᠠᠷᠢᠨ ᠭᠤᠯᠢᠷ ᠢ᠋ᠶ᠋ᠠᠨ ᠵᠢᠩᠨᠡᠭᠦᠯᠵᠦ ᠠᠪᠤᠭᠠᠳ ᠯᠤᠤ ᠯᠢ ᠤᠯᠠᠮ ᠢ᠋ᠶ᠋ᠠᠷ ᠪᠠᠶᠠᠷᠯᠠᠨ᠄《ᠪᠢ᠂ ᠪᠢ》 ᠭᠡᠵᠦ ᠳ᠋ᠠᠨᠽᠡᠨ ᠡᠴᠡ ᠤᠷᠢᠳ ᠰᠢᠭᠦᠷᠡᠨ ᠠᠪᠴᠤ ᠡᠭᠦᠷᠪᠡ᠃ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠵᠤ ᠪᠠᠢᠬᠤ ᠳ᠋ᠠᠭᠠᠨ ᠳᠠ ᠯᠣᠣᠶᠧ ᠶ᠋ᠢ ᠡᠨᠡ ᠬᠠᠪᠢ ᠶ᠋ᠢᠨ ᠠᠯᠢ ᠬᠥᠷᠥᠰᠥ ᠰᠠᠢᠲᠠᠢ ᠭᠠᠵᠠᠷ ᠢ᠋ ᠮᠥᠩᠭᠥ ᠪᠡᠷ ᠵᠣᠳᠣᠨ ᠭᠠᠷ ᠲᠠᠭᠠᠨ ᠠᠪᠴᠤ ᠴᠢᠳᠠᠭᠰᠠᠨ ᠰᠢᠭ᠋ ᠠᠵᠢᠯ ᠰᠠᠢᠨ ᠬᠢᠭᠰᠡᠨ ᠳ᠋ᠦ᠍ ᠶᠡᠬᠡ ᠬᠥᠯᠥᠰᠥ ᠥᠭᠴᠦ ᠴᠢᠳᠠᠳᠠᠭ ᠰᠢᠳᠤᠷᠭᠤ ᠬᠥᠮᠦᠨ ᠭᠡᠵᠦ ᠮᠠᠭᠲᠠᠪᠠ᠃ ᠬᠠᠷᠢᠨ ᠥᠨᠥᠬᠢ ᠯᠢᠦ ᠰᠢᠨ ᠬᠠᠢ᠄《ᠲᠡᠷᠡ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠴᠢᠳᠬᠥᠷ》 ᠭᠡᠳ ᠴᠠᠭᠠᠰᠢ ᠮᠠᠭᠤᠴᠢᠯᠠᠬᠤ ᠶ᠋ᠢ ᠨᠢ ᠰᠣᠨᠣᠰᠪᠠᠯ ᠲᠡᠷᠡ ᠬᠥᠮᠦᠨ ᠵᠢᠯ ᠪᠦᠷᠢ ᠯᠤᠤ ᠯᠢ ᠶ᠋ᠢᠨ ᠡᠮᠦᠨᠡ ᠡᠴᠢᠭᠡ ᠡᠪᠦᠭᠡᠳ ᠦ᠋ᠨ ᠥᠷᠢ ᠭᠡᠭᠴᠢ ᠶ᠋ᠢ ᠳᠤᠷᠠᠰᠤᠨ ᠰᠡᠳᠬᠢᠯ ᠢ᠋ ᠨᠢ ᠵᠣᠪᠠᠭᠠᠳᠠᠭ ᠠᠵᠢ᠃ ᠴᠣᠬᠣᠮ ᠳ᠋ᠠᠭᠠᠨ ᠶᠠᠭᠤ ᠶᠠᠭᠤ ᠠᠪᠤᠭᠰᠠᠨ ᠶᠠᠮᠠᠷ ᠥᠷᠢ ᠪᠠᠢᠳᠠᠭ ᠢ᠋ ᠯᠤᠤ ᠯᠢ ᠦᠯᠦ ᠮᠡᠳᠡᠨᠡ᠃ ᠠᠶᠠ ᠦᠭᠡᠢ ᠪᠣᠯ ᠨᠣᠮ ᠪᠢᠴᠢᠭ ᠮᠡᠳᠡᠬᠦ ᠦᠭᠡᠢ ᠶ᠋ᠢ ᠨᠢ ᠳᠠᠯᠢᠮᠳᠠᠭᠤᠯᠤᠨ ᠣᠷᠣ ᠦᠨᠳᠦᠰᠦ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠳᠤᠷᠠᠳᠤᠨ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠳᠡᠭ ᠴᠦ᠍ ᠪᠠᠢᠬᠤ ᠮᠠᠭᠠᠳ ᠦᠭᠡᠢ ᠰᠢᠭ᠃ ᠭᠡᠯᠡ ᠴᠦ᠍ ᠯᠤᠤ ᠯᠢ ᠶ᠋ᠢᠨ ᠳᠤᠷᠠᠰᠤᠮᠵᠢ ᠠ᠋ᠴᠠ ᠪᠣᠯᠤᠨ ᠳᠠ ᠯᠣᠣᠶᠧ ᠶ᠋ᠢᠨ ᠳ᠋ᠦ᠍ ᠬᠢᠮᠳᠠ ᠦᠨᠡ ᠪᠡᠷ ᠠᠵᠢᠯᠯᠠᠵᠤ ᠪᠠᠢᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠡᠭᠦᠨ ᠢ᠋ᠶ᠋ᠡᠨ ᠯᠤᠤ ᠯᠢ ᠭᠤᠨᠢᠭᠯᠠᠨ ᠶᠠᠷᠢᠭᠠᠳ ᠡᠴᠦᠰ ᠲᠦ᠋ᠨᠢ᠄
— ᠵᠠ ᠡᠨᠡ ᠶᠠᠭᠠᠬᠢᠬᠤᠪ᠃ ᠵᠦᠭᠡᠷ᠂ ᠣᠳᠣ ᠰᠠᠢᠨ ᠳᠡᠭᠦᠦ ᠴᠢᠨᠦ ᠠᠴᠢ ᠪᠠᠷ ᠪᠠᠭᠠ ᠦᠭᠡᠢ ᠬᠥᠯᠥᠰᠥ ᠠᠪᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠶᠠ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠪᠡ᠃
ᠭᠡᠲᠡᠯᠡ《ᠶᠡᠬᠡ ᠬᠥᠯᠥᠰᠥ》 ᠭᠡᠵᠦ ᠨᠡᠷᠡᠯᠡᠭᠳᠡᠬᠦ ᠬᠣᠷᠢᠨ ᠲᠠᠪᠤᠨ ᠵᠢᠩ ᠭᠤᠯᠢᠷ ᠮᠠᠨᠢ ᠶᠠᠭᠤ ᠪᠠᠢᠪᠠ? ᠲᠦᠷᠦᠭᠦᠨ ᠳ᠋ᠠᠨᠽᠡᠨ ᠵᠢᠩᠨᠡᠬᠦ ᠶ᠋ᠢ ᠨᠢ ᠬᠠᠷᠠᠭᠠᠳ ᠬᠤᠰᠤᠮ ᠢ᠋ᠶ᠋ᠠᠨ ᠴᠢᠮᠠᠯᠠᠭᠰᠠᠨ ᠬᠡᠦᠬᠡᠳ ᠰᠢᠭ ᠤᠷᠤᠭᠤ ᠴᠢᠷᠠᠢᠯᠠᠭᠰᠠᠨ ᠪᠣᠯ ᠣᠳᠣ《ᠳᠠ᠂ ᠬᠡ ᠬᠡ! ᠪᠢ ᠡᠭᠦᠷᠦᠶᠡ》 ᠭᠡᠵᠦ ᠠᠪᠤᠨ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠬᠠᠶᠠᠬᠤ ᠳ᠋ᠠᠭᠠᠨ ᠬᠡᠴᠢᠨᠡᠭᠡᠨ ᠥᠴᠦᠬᠡᠨ ᠵᠦᠢᠯ ᠪᠣᠯᠬᠤ ᠶ᠋ᠢ ᠯᠠᠪᠲᠠᠢ ᠮᠡᠳᠡᠨ ᠰᠠᠨᠠᠭᠠ ᠠᠯᠳᠠᠪᠠ᠃
ᠯᠤᠤ ᠯᠢ ᠭᠡᠷ ᠲᠡᠭᠡᠨ ᠳᠥᠩᠭᠡᠵᠦ ᠢᠷᠡᠩᠭᠦᠲᠡ ᠪᠡᠨ᠄《ᠠᠢ ᠯᠤᠤ ᠫᠦᠸᠧ!》 ᠭᠡᠵᠦ ᠠᠪᠠᠭᠠᠢ ᠪᠠᠨ ᠳᠠᠭᠤᠳᠠᠨ᠄ ᠳ᠋ᠧᠩ ᠼᠠᠢ ᠮᠢ ᠬᠣᠷᠢᠨ ᠲᠠᠪᠤᠨ ᠵᠢᠩ! ᠭᠡᠬᠦ ᠳ᠋ᠦ᠍ ᠠᠪᠠᠭᠠᠢ ᠪᠠᠶᠠᠷᠯᠠᠨ《ᠸᠠᠢ!》 ᠭᠡᠵᠦ ᠳᠠᠭᠤ ᠠᠯᠲᠠᠨ ᠤᠭᠲᠤᠵᠤ᠂ ᠤᠷᠢᠳ ᠡᠮᠦᠨᠡ ᠬᠢᠭᠡ ᠦᠭᠡᠢ ᠶᠡᠬᠡ ᠮᠠᠨᠲᠠᠤ ᠬᠢᠨᠡ ᠭᠡᠵᠦ ᠠᠮᠠᠯᠠᠪᠠ᠃ ᠡᠨᠡ ᠴᠢᠮᠡᠭᠡ ᠪᠡᠷ ᠬᠡᠦᠬᠡᠳ ᠦ᠋ᠳ ᠪᠠᠰᠠ ᠪᠠᠶᠠᠷ᠂《ᠳᠣᠲᠣᠷᠠ ᠪᠠᠨ ᠰᠢᠬᠢᠷ ᠲᠡᠢ ᠬᠢᠬᠦ ᠤᠤ᠂ ᠪᠤᠷᠠᠮ ᠲᠠᠢ ᠬᠢᠬᠦ ᠤᠤ》 ᠭᠡᠵᠦ ᠱᠤᠤᠭᠢᠯᠳᠤᠨ ᠡᠬᠡ ᠪᠡᠨ ᠲᠣᠭᠣᠷᠢᠪᠠ᠃ ᠠᠪᠠᠭᠠᠢ ᠲᠡᠳᠡᠨ ᠢ᠋ ᠥᠬᠥᠭᠡᠷᠳᠡᠨ᠄ ᠬᠢᠯᠭᠦᠢ ᠶᠠᠭᠠᠬᠢᠬᠤᠪ᠂ ᠬᠣᠷᠢᠨ ᠲᠠᠪᠤᠨ ᠵᠢᠩ ᠳ᠋ᠧᠩ ᠼᠠᠢ ᠮᠢ ᠪᠠᠢᠨᠠ᠂ ᠬᠣᠢᠨᠠ ᠳᠠᠩᠵᠤᠤᠷ᠂ ᠶᠸᠪᠸᠩ ᠴᠦ᠍ ᠠᠷᠪᠢᠨ ᠢ᠋ᠶ᠋ᠠᠷ ᠬᠢᠨᠡ ᠭᠡᠯᠡ᠃
ᠡᠢᠨᠬᠦ ᠯᠤᠤ ᠯᠢ ᠶ᠋ᠢᠨ ᠬᠢ ᠪᠦᠬᠦ ᠭᠡᠷ ᠪᠦᠯᠢ ᠪᠡᠷ ᠢ᠋ᠶ᠋ᠡᠨ ᠬᠥᠯ ᠠᠯᠲᠠᠨ ᠪᠠᠶᠠᠷᠯᠠᠬᠤ ᠲᠤᠯᠠ ᠳ᠋ᠠᠨᠽᠡᠨ ᠠᠪᠴᠢᠷᠠᠭᠰᠠᠨ ᠭᠤᠯᠢᠷ ᠢ᠋ᠶ᠋ᠠᠨ ᠴᠢᠮᠠᠯᠠᠬᠤ ᠪᠠᠨ ᠪᠣᠯᠢᠪᠠ᠃ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠳᠠᠷᠠᠭᠠ ᠴᠠᠭᠠᠨ ᠰᠠᠷᠠ ᠶ᠋ᠢ ᠤᠭᠲᠤᠭᠰᠠᠨ ᠪᠢᠲᠡᠭᠦᠨ ᠦ᠌ ᠣᠷᠣᠢ ᠪᠣᠯᠤᠯᠠ᠃ ᠡᠨᠡ ᠵᠠᠭᠤᠷᠠ ᠠᠪᠠᠭᠠᠢ ᠬᠡᠦᠬᠡᠳ ᠦ᠋ᠳ ᠲᠡᠭᠡᠨ ᠮᠥᠨ ᠠᠮᠠᠯᠠᠭᠰᠠᠨ ᠢ᠋ᠶ᠋ᠠᠨ ᠠᠮᠵᠢᠯᠲᠠ ᠲᠠᠢ ᠭᠦᠢᠴᠡᠳᠬᠡᠭᠰᠡᠨ ᠢ᠋ᠶ᠋ᠡᠷ ᠦᠯᠦ ᠪᠠᠷᠠᠮ᠂ ᠮᠠ ᠳᠠᠩ ᠪᠠ ᠰᠦᠯᠰᠢ ᠬᠡᠮᠡᠬᠦ ᠪᠤᠳᠠᠭᠠᠨ ᠤ᠋ ᠭᠤᠯᠢᠷ ᠢ᠋ᠶ᠋ᠠᠷ ᠵᠠ ᠭᠣᠣ ᠭᠡᠳᠡᠭ ᠪᠣᠭᠣᠷᠰᠣᠭ ᠢ᠋ ᠬᠠᠮᠤᠭ ᠤ᠋ᠨ ᠶᠡᠬᠡ ᠪᠡᠷ ᠬᠢᠪᠡ ᠪᠣᠯᠤᠯᠲᠠᠢ᠃
ᠣᠷᠣᠢ ᠬᠠᠨᠵᠤᠨ ᠳ᠋ᠠᠬᠢ ᠪᠠᠢᠰᠢᠩ ᠤ᠋ᠨ ᠲᠤᠭᠤᠷᠭᠠ ᠶ᠋ᠢᠨ ᠭᠣᠣᠯ ᠳ᠋ᠤ᠌ ᠬᠠᠢᠷᠴᠠᠭᠯᠠᠨ ᠬᠠᠲᠠᠭᠰᠠᠨ ᠪᠢᠴᠢᠬᠠᠨ ᠱᠠᠵᠠᠩ ᠡᠪᠦᠭᠡᠨ ᠪᠤᠷᠬᠠᠨ ᠳ᠋ᠠᠭᠠᠨ ᠤᠯᠠᠭᠠᠨ ᠡᠩᠭᠡᠰᠬᠡᠲᠦ ᠵᠢᠵᠢᠭ ᠮᠠᠨᠲᠠᠤ ᠪᠠ ᠪᠠᠰᠠ ᠪᠤᠰᠤᠳ ᠢᠳᠡᠭᠡ ᠪᠡᠷ ᠲᠠᠬᠢᠯ ᠲᠠᠯᠪᠢᠨ ᠯᠠ ᠠᠰᠠᠭᠠᠨ ᠬᠦᠵᠢ ᠰᠢᠲᠠᠭᠠᠨ ᠴᠢᠮᠡᠭᠯᠡᠪᠡ᠃ ᠲᠡᠭᠦᠨ ᠦ᠌ ᠪᠡᠨ ᠳᠣᠣᠷᠠ ᠠᠯᠲᠠᠨ ᠪᠢᠴᠢᠭᠲᠦ ᠤᠯᠠᠭᠠᠨ ᠬᠠᠭᠤᠳᠠᠰᠤ ᠭᠤᠷᠪᠠ ᠶ᠋ᠢ ᠵᠡᠷᠭᠡᠴᠡᠭᠦᠯᠦᠨ ᠨᠠᠭᠠᠪᠠ᠃ ᠯᠤᠤ ᠯᠢ ᠥᠪᠡᠷ ᠢ᠋ᠶ᠋ᠡᠨ ᠨᠣᠮ ᠪᠢᠴᠢᠭ ᠦ᠋ᠨ《ᠵᠠᠶᠠᠭᠠ ᠪᠤᠶᠠᠨ ᠲᠩᠷᠢ ᠡᠴᠡ ᠪᠠᠭᠤᠨᠠ》《ᠲᠠᠪᠤᠨ ᠵᠠᠶᠠᠭᠠ ᠢᠷᠡᠯᠡ》《ᠥᠯᠵᠡᠢ ᠬᠤᠲᠤᠭ ᠣᠷᠣᠰᠢᠬᠤ ᠨᠢ ᠥᠲᠡᠯᠦᠰᠢ ᠦᠭᠡᠢ ᠨᠠᠷᠠᠰᠤᠨ ᠮᠣᠳᠣᠨ ᠤ᠋ ᠠᠳᠠᠯᠢ》 ᠭᠡᠰᠡᠨ ᠢᠷᠦᠭᠡᠯᠲᠦ ᠦᠭᠡ ᠪᠣᠯᠬᠤ ᠶ᠋ᠢ ᠮᠠᠳᠠᠭ ᠦᠭᠡᠢ ᠮᠡᠳᠡᠳᠡᠭ ᠢ᠋ᠶ᠋ᠡᠨ ᠳ᠋ᠠᠨᠽᠡᠨ ᠳ᠋ᠦ᠍ ᠲᠠᠢᠯᠪᠤᠷᠢᠯᠠᠨ ᠲᠠᠨᠢᠭᠤᠯᠵᠤ ᠥᠭᠪᠡ᠃ ᠪᠠᠢᠰᠢᠩ ᠤ᠋ᠨ ᠢ᠋ᠶ᠋ᠠᠨ ᠭᠠᠳᠠᠨᠠ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠭᠠᠷ ᠠᠷᠠᠢ ᠬᠦᠷᠦᠮᠡ ᠦᠭᠡᠢ ᠥᠨᠳᠥᠷ ᠰᠢᠷᠡᠭᠡ ᠮᠡᠲᠦ ᠶ᠋ᠢ ᠵᠠᠰᠠᠨ ᠳᠡᠭᠡᠷᠡ ᠨᠢ ᠠᠯᠲᠠ ᠮᠥᠩᠭᠥᠨ ᠴᠠᠭᠠᠨ ᠶᠤᠸᠠᠮᠪᠤᠤ᠂ ᠡᠯᠳᠡᠪ ᠲᠥᠷᠥᠯ ᠦ᠋ᠨ ᠢᠳᠡᠭᠡ ᠪᠣᠣᠪᠣ ᠪᠠᠷ ᠴᠢᠮᠡᠭᠯᠡᠨ ᠭᠣᠣᠯ ᠳ᠋ᠤᠨᠢ ᠮᠥᠨ ᠯᠡ ᠬᠦᠵᠢ ᠠᠰᠠᠭᠠᠬᠤ ᠨᠢ ᠳᠡᠭᠡᠳᠦ ᠲᠩᠷᠢ ᠳ᠋ᠦ᠍ ᠲᠠᠬᠢᠯ ᠲᠠᠯᠪᠢᠨ ᠳᠡᠭᠡᠵᠢ ᠡᠷᠭᠦᠵᠦ ᠪᠠᠢᠭᠠ ᠨᠢ ᠲᠡᠷᠡ ᠠᠵᠢ᠃
ᠦᠳᠡᠰᠢ ᠶ᠋ᠢᠨ ᠬᠠᠷᠠᠩᠭᠤᠢ ᠪᠣᠯᠣᠮᠠᠭᠴᠠ ᠪᠢᠲᠡᠭᠦᠯᠭᠡ ᠶ᠋ᠢᠨ ᠪᠠᠩᠰᠢ ᠴᠢᠨᠠᠪᠠ᠃ ᠭᠡᠷ ᠦ᠋ᠨ ᠳᠣᠲᠣᠷᠠ ᠠᠪᠠᠭᠠᠢ ᠠ᠋ᠴᠠ ᠪᠤᠰᠤᠳ ᠨᠢ ᠬᠠᠨᠵᠤᠨ ᠳᠡᠭᠡᠷᠡ ᠵᠠᠪᠢᠯᠠᠨ ᠳᠠᠪᠠᠯᠠᠵᠤ ᠲᠡᠷᠡᠬᠦ ᠪᠠᠩᠰᠢ ᠶ᠋ᠢ ᠬᠦᠯᠢᠶᠡᠨᠡ᠃ ᠵᠢᠷ ᠦ᠋ᠨ ᠴᠠᠭ ᠲᠤ ᠬᠡᠵᠢᠶᠡ ᠪᠣᠯ ᠬᠡᠵᠢᠶᠡ ᠭᠡᠭᠡ ᠭᠡᠷᠡᠯ ᠦᠭᠡᠢᠬᠡᠨ ᠪᠠᠢᠳᠠᠭ ᠲᠠᠰᠤᠯᠭᠠ ᠶ᠋ᠢ ᠪᠤᠷᠬᠠᠨ ᠤ᠋ ᠡᠮᠦᠨᠡ ᠬᠣᠶᠠᠷ ᠲᠣᠮᠣ ᠤᠯᠠᠭᠠᠨ ᠯᠠ ᠨᠢᠭᠡ ᠵᠡᠷᠭᠡ ᠭᠡᠷᠡᠯᠲᠦᠭᠦᠯᠵᠦ ᠪᠠᠢᠭᠠ ᠶ᠋ᠢ ᠬᠡᠯᠡᠬᠦ ᠤᠤ? ᠶᠠᠭᠤᠮᠠ ᠪᠦᠬᠦᠨ ᠨᠢᠳᠦᠨ ᠦ᠌ ᠡᠮᠦᠨᠡ ᠲᠣᠪ ᠲᠣᠳᠣᠬᠠᠨ ᠲᠤᠰᠬᠤ ᠶ᠋ᠢᠨ ᠳᠡᠭᠡᠷᠡ ᠰᠠᠢᠬᠠᠨ ᠦᠨᠦᠷᠲᠡᠨ ᠬᠦᠵᠢᠰ ᠦ᠋ᠨ ᠤᠲᠤᠭᠠ ᠰᠡᠳᠬᠢᠯ ᠠᠷᠢᠭᠤᠳᠬᠠᠨ ᠬᠠᠩᠬᠤᠯᠤᠨᠠ᠃ ᠬᠡᠦᠬᠡᠳ ᠪᠠᠭᠠᠴᠤᠳ ᠤ᠋ᠨ ᠢ᠋ᠶ᠋ᠠᠨ ᠦᠨᠡᠬᠡᠷ ᠶᠡᠬᠡ ᠪᠠᠶᠠᠷ ᠬᠥᠷ ᠪᠣᠯᠤᠨ ᠱᠤᠤᠭᠢᠯᠳᠤᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠳᠠᠩᠵᠢᠶᠠᠳ ᠯᠤᠤ ᠯᠢ ᠠᠭᠤᠷᠯᠠᠨ ᠤᠴᠠᠭᠠᠷᠯᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌《ᠠᠢ ᠬᠣᠣ》(ᠵᠠ ᠰᠠᠢᠨ) ᠭᠡᠵᠦ ᠬᠠᠮᠲᠤ ᠪᠠᠶᠠᠰᠤᠯᠴᠠᠨᠠ᠃ ᠶᠡᠷᠦᠨᠢ ᠡᠨᠡ ᠦᠶᠡ ᠡᠴᠡ ᠡᠬᠢᠯᠡᠨ ᠬᠥᠮᠦᠨ ᠪᠦᠷᠢ《ᠠᠢ᠂ ᠬᠣᠣ ᠬᠣᠣ᠁》 ᠭᠡᠬᠦ ᠪᠣᠯᠤᠭᠰᠠᠨ ᠨᠢ ᠨᠢᠭᠡᠨᠲᠡ ᠰᠠᠷᠠ ᠰᠢᠨᠡ ᠶ᠋ᠢ ᠤᠭᠲᠤᠬᠤ ᠳ᠋ᠠᠭᠠᠨ ᠮᠠᠭᠤ ᠮᠠᠭᠤᠬᠠᠢ ᠶ᠋ᠢ ᠬᠡᠯᠡᠬᠦ ᠶ᠋ᠢ ᠴᠡᠭᠡᠷᠯᠡᠬᠦ᠂ ᠬᠣᠶᠠᠷ ᠲᠤ ᠦᠨᠡᠬᠡᠷ ᠴᠦ᠍ ᠰᠠᠨᠠᠭᠠ ᠰᠡᠳᠬᠢᠯ ᠥᠭᠡᠷᠡᠴᠢᠯᠡᠭᠳᠡᠨ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠪᠣᠯᠵᠤ ᠪᠠᠢᠭᠠ ᠶ᠋ᠢᠨ ᠬᠢ ᠪᠠᠢᠵᠠᠢ᠃ ᠡᠨᠡ ᠳᠤᠮᠳᠠ ᠳ᠋ᠠᠨᠽᠡᠨ ᠮᠥᠨ ᠯᠡ ᠪᠠᠶᠠᠷ ᠬᠥᠷ《ᠠᠢ ᠬᠣᠣ》 ᠭᠡᠵᠦ ᠬᠠᠰᠬᠢᠷᠤᠨ ᠭᠤᠶᠠ ᠠᠯᠠᠭᠠᠳᠠᠨ ᠬᠠ ᠬᠠ ᠢᠨᠢᠶᠡᠨ ᠰᠠᠭᠤᠨᠠ᠃
ᠪᠢᠲᠡᠭᠦᠨ ᠦ᠌ ᠪᠡᠨ ᠪᠠᠩᠰᠢ ᠶ᠋ᠢ ᠢᠳᠡᠬᠦ ᠳ᠋ᠡᠭᠡᠨ ᠡᠯᠳᠡᠪ ᠲᠥᠷᠥᠯ ᠦ᠋ᠨ ᠳᠠᠪᠤᠰᠤ ᠲᠠᠢ ᠨᠣᠭᠣᠭᠠ ᠰᠠᠪᠠᠭᠳᠠᠵᠤ᠂ ᠠᠭᠤᠷ ᠰᠠᠪᠰᠠᠲᠠᠯᠠ ᠬᠠᠯᠠᠭᠠᠭᠰᠠᠨ ᠱᠣᠣ ᠵᠢᠦ ᠭᠡᠳᠡᠭ ᠠᠷᠢᠬᠢ ᠶ᠋ᠢ ᠠᠮᠠᠰᠠᠷ ᠪᠢᠴᠢᠬᠠᠨ ᠵᠦᠩᠵᠡᠨ ᠳ᠋ᠦ᠍ ᠬᠢᠨ ᠪᠠᠢᠨ ᠪᠠᠢᠨ ᠤᠤᠭᠤᠨᠠ᠃ ᠳ᠋ᠠᠨᠽᠡᠨ ᠨᠢᠭᠡ ᠪᠠᠩᠰᠢ ᠡᠮᠬᠦᠨ ᠵᠠᠵᠢᠯᠤᠭᠰᠠᠨ ᠢ᠋ᠶ᠋ᠠᠨ《ᠠᠶᠠ》 ᠭᠡᠵᠦ ᠤᠤᠯᠭᠠᠯᠠᠨ ᠠᠮᠠᠨ ᠠ᠋ᠴᠠ ᠪᠠᠨ ᠠᠷᠪᠠᠲᠤ ᠶ᠋ᠢᠨ ᠴᠠᠭᠠᠨ ᠮᠥᠩᠭᠥᠨ ᠵᠣᠭᠣᠰ ᠭᠠᠷᠭᠠᠬᠤ ᠳ᠋ᠤ᠌ ᠪᠦᠬᠦ ᠭᠡᠷ ᠦ᠋ᠨ ᠬᠢᠨ《ᠳᠡ ᠰᠢ》(ᠪᠠᠶᠠᠷ ᠬᠦᠷᠭᠡᠶᠡ) ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃ ᠲᠡᠷᠡ ᠨᠢ ᠠᠵᠠ ᠰᠢᠯᠭᠠᠬᠤ ᠭᠡᠵᠦ ᠬᠢᠭᠰᠡᠨ ᠮᠥᠩᠭᠥ ᠪᠠᠢᠭᠰᠠᠨ ᠪᠥᠭᠡᠳ ᠳ᠋ᠠᠨᠽᠡᠨ ᠳ᠋ᠦ᠍ ᠳᠠᠭᠠᠷᠢᠯᠳᠤᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠠᠪᠠᠭᠠᠢ ᠯᠤᠤ ᠯᠢ ᠬᠣᠶᠠᠷ《ᠡᠨᠡ ᠵᠢᠯ ᠴᠢ ᠲᠤᠩ ᠶᠡᠬᠡ ᠣᠯᠵᠠ ᠣᠯᠤᠨᠠ᠃ ᠴᠢ ᠶᠠᠭᠤ ᠴᠦ᠍ ᠪᠣᠯᠵᠤ ᠮᠠᠭᠠᠳ》 ᠭᠡᠵᠦ ᠬᠥᠭᠡᠷᠦᠯᠳᠦᠨ ᠪᠠᠶᠠᠷ ᠬᠦᠷᠭᠡᠯᠡ᠃ ᠳ᠋ᠠᠨᠽᠡᠨ ᠴᠦ᠍ ᠪᠡᠯᠭᠡᠰᠢᠶᠡᠨ ᠪᠠᠶᠠᠷᠯᠠᠪᠠ᠃
ᠰᠢᠨᠡ ᠶ᠋ᠢᠨ ᠨᠢᠭᠡᠨ ᠦ᠌ ᠥᠷᠯᠥᠭᠡ ᠪᠦᠬᠦ ᠭᠡᠷ ᠪᠦᠯᠢ ᠪᠡᠷ ᠢ᠋ᠶ᠋ᠡᠨ ᠦᠷ ᠦ᠋ᠨ ᠦᠨᠡᠭᠡᠨ ᠬᠠᠷᠠᠩᠭᠤᠢ ᠪᠠᠷ ᠪᠣᠰᠳᠠᠭ ᠪᠠᠢᠵᠠᠢ᠃ ᠯᠤᠤ ᠯᠢ ᠬᠡᠦᠬᠡᠳ ᠪᠠᠭᠠᠴᠤᠳ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠭᠠᠷᠴᠤ᠂ ᠥᠴᠥᠭᠡᠳᠦᠷ ᠡᠭᠦᠳᠡᠨ ᠦ᠌ ᠪᠡᠨ ᠡᠮᠦᠨᠡ ᠭᠤᠷᠪᠠᠨ ᠲᠣᠮᠣ ᠴᠠᠰᠤ ᠪᠥᠭᠡᠷᠡᠩᠬᠡᠢᠯᠡᠨ ᠳᠠᠪᠬᠤᠷᠯᠠᠨ ᠲᠠᠯᠪᠢᠵᠤ ᠴᠠᠰᠤᠨ ᠣᠪᠣᠭᠠ ᠪᠤᠰᠬᠠᠭᠰᠠᠨ ᠳᠡᠭᠡᠷᠡ ᠪᠡᠨ ᠪᠠᠮᠪᠠᠷ ᠬᠠᠳᠬᠤᠨ ᠪᠣᠣᠪᠣ ᠮᠠᠨᠲᠠᠤ ᠪᠠᠷ ᠲᠠᠬᠢᠯ ᠴᠢᠮᠡᠭᠯᠡᠨ ᠦᠢᠯᠡᠳᠦᠭᠰᠡᠨ᠂ ᠡᠮᠦᠨᠡ ᠨᠢ ᠣᠴᠢᠵᠤ ᠭᠠᠷ ᠵᠠᠩᠭᠢᠳᠤᠨ ᠴᠡᠭᠡᠵᠢᠨ ᠳ᠋ᠡᠭᠡᠨ ᠠᠪᠠᠴᠢᠨ ᠬᠠᠪᠰᠤᠷᠭᠠᠵᠤ ᠭᠤᠷᠪᠠᠨᠲᠠ ᠰᠥᠭᠥᠳᠦᠨ ᠮᠥᠷᠭᠥᠬᠦ ᠳ᠋ᠦ᠍ ᠳ᠋ᠠᠨᠽᠡᠨ《ᠤᠰᠤ ᠶ᠋ᠢ ᠨᠢ ᠤᠤᠭᠤᠪᠠᠯ᠂ ᠶᠣᠰᠣ ᠶ᠋ᠢ ᠨᠢ ᠳᠠᠭᠠ》 ᠭᠡᠳᠡᠭ ᠦᠭᠡ ᠶ᠋ᠢ ᠪᠠᠷᠢᠮᠲᠠᠯᠠᠨ ᠶᠠᠭ ᠲᠠᠭ ᠳᠠᠭᠤᠷᠢᠶᠠᠪᠠ᠃ ᠡᠨᠡ ᠨᠢ 《ᠼᠠᠢ ᠱᠸᠨ ᠶᠧ》 ᠬᠡᠮᠡᠬᠦ ᠡᠳ᠋ ᠮᠥᠩᠭᠥᠨ ᠦ᠌ ᠪᠤᠷᠬᠠᠨ ᠢ᠋ ᠳᠠᠬᠢᠨ ᠮᠥᠷᠭᠥᠵᠦ ᠪᠠᠢᠭᠠ ᠠᠵᠢ᠃ ᠲᠡᠨᠳᠡᠴᠡ ᠯᠤᠤ ᠯᠢ ᠪᠤᠴᠠᠵᠤ ᠣᠷᠣᠩᠭᠤᠲᠠ ᠪᠠᠨ ᠭᠡᠷ ᠪᠦᠯᠢ ᠶ᠋ᠢᠨ ᠬᠢᠨ ᠲᠡᠢ ᠮᠥᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠴᠡᠭᠡᠵᠢᠨ ᠳ᠋ᠡᠭᠡᠨ ᠠᠪᠠᠴᠢᠨ《ᠳᠠ ᠹᠠ ᠼᠠᠢ》 ᠭᠡᠵᠦ ᠮᠡᠬᠦᠯᠵᠡᠨ ᠶᠣᠰᠣᠯᠠᠨᠠ᠃
ᠨᠠᠷᠠ ᠭᠠᠷᠤᠨ ᠳᠡᠭᠡᠭᠰᠢ ᠬᠥᠭᠡᠷᠦᠮᠡᠭᠴᠡ ᠤᠷᠤᠭ ᠲᠥᠷᠥᠯ ᠪᠠ ᠲᠠᠨᠢᠯ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠪᠡᠶᠡ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠠᠢᠯᠴᠢᠯᠠᠨ ᠬᠡᠰᠦᠬᠦ ᠠᠵᠢ᠃ ᠣᠷᠣᠵᠤ ᠢᠷᠡᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ《ᠳᠡ ᠹᠠ ᠼᠠᠢ》 ᠭᠡᠵᠦ ᠥᠭᠦᠯᠡᠬᠦ ᠪᠡᠷ ᠡᠬᠢᠯᠡᠨ ᠮᠡᠨᠳᠦᠯᠡᠵᠦ ᠭᠠᠷ ᠢ᠋ᠶ᠋ᠠᠨ ᠴᠡᠭᠡᠵᠢᠨ ᠳ᠋ᠡᠭᠡᠨ ᠠᠪᠠᠴᠢᠨ ᠮᠡᠬᠦᠯᠵᠡᠨ ᠵᠣᠯᠭᠠᠬᠤ ᠶᠣᠰᠣ ᠭᠦᠢᠴᠡᠳᠬᠡᠨᠡ᠃ ᠳᠠᠷᠠᠭᠠ ᠨᠢ ᠰᠢᠨᠡ ᠮᠠᠨᠲᠠᠤ᠂ ᠪᠠᠩᠰᠢ ᠪᠠᠷ ᠵᠣᠴᠢᠯᠠᠭᠤᠯᠬᠤ ᠳ᠋ᠠᠭᠠᠨ ᠪᠡᠶᠡ᠂ ᠪᠡᠶᠡ ᠪᠡᠨ ᠠᠪᠤ ᠡᠵᠢ᠂ ᠠᠴᠢ ᠨᠠᠭᠠᠴᠤ᠂ ᠡᠭᠡᠴᠢ ᠳᠡᠭᠦᠦ ᠡᠨᠡ ᠲᠡᠷᠡ ᠪᠣᠯᠤᠨ ᠳᠠᠭᠤᠳᠠᠯᠴᠠᠵᠤ ᠬᠠ ᠬᠠ ᠢᠨᠢᠶᠡᠯᠳᠦᠨᠡ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠡᠨ ᠬᠦᠷᠲᠡᠯᠡ ᠥᠴᠢᠨᠡᠨ ᠲᠥᠴᠢᠨᠡᠨ ᠤᠷᠤᠭ ᠲᠥᠷᠥᠯ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠪᠣᠯᠵᠠᠢ᠃ ᠪᠦᠬᠦ ᠣᠷᠣᠵᠤ ᠢᠷᠡᠭᠰᠡᠳ ᠦ᠋ᠨ ᠳᠣᠲᠣᠷᠠ ᠭᠣᠶᠣ ᠭᠠᠩᠭᠠᠩ ᠪᠤᠶᠤ ᠰᠢᠨᠡ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠥᠮᠦᠨ ᠨᠢᠭᠡ ᠴᠦ᠍ ᠦᠭᠡᠢ᠃ ᠭᠡᠪᠡᠴᠦ ᠪᠦᠲᠦᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠨᠢ ᠲᠡᠭᠦᠨ ᠳ᠋ᠡᠭᠡᠨ ᠮᠠᠭᠠᠳᠠᠭᠠᠷ᠂ ᠡᠯᠡᠭᠳᠡᠨ ᠬᠠᠭᠤᠴᠢᠷᠠᠭᠰᠠᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠬᠡᠰᠡᠭ ᠨᠢ ᠲᠡᠭᠦᠨ ᠢ᠋ᠶ᠋ᠡᠨ ᠴᠠᠭᠠᠨ ᠰᠠᠷᠠ ᠳ᠋ᠤ᠌ ᠵᠣᠷᠢᠭᠤᠯᠤᠨ ᠨᠥᠬᠥᠨ ᠰᠡᠯᠪᠢᠵᠦ ᠴᠢᠳᠠᠭᠰᠠᠨ ᠳ᠋ᠠᠭᠠᠨ ᠮᠥᠨ ᠯᠡ ᠮᠠᠭᠠᠳᠠᠭᠠᠷ᠃ ᠮᠠᠭᠠᠳᠠᠭᠠᠷ ᠢ᠋ᠶ᠋ᠠᠨ ᠢᠨᠢᠶᠡᠨ ᠮᠠᠭᠠᠳᠠᠭᠠᠷᠬᠠᠨ ᠢ᠋ᠶ᠋ᠠᠷ ᠭᠢᠰᠬᠢᠯᠡᠬᠦ ᠨᠢ ᠳ᠋ᠠᠨᠽᠡᠨ ᠦ᠌ ᠨᠢᠳᠦᠨ ᠳ᠋ᠦ᠍ ᠲᠤᠩ ᠬᠠᠭᠤᠷᠮᠠᠴᠢ᠂ ᠳ᠋ᠠᠨ ᠯᠠ ᠮᠠᠶᠢᠭᠯᠠᠭᠠᠳ ᠪᠠᠢᠬᠤ ᠰᠢᠭ᠋ ᠦᠵᠡᠭᠳᠡᠪᠡ᠃ ᠦᠨᠡᠨ ᠳ᠋ᠡᠭᠡᠨ ᠭᠡᠪᠡᠯ ᠲᠡᠢᠮᠦ ᠪᠢᠰᠢ᠂ ᠪᠦᠬᠦ ᠵᠢᠯ ᠦ᠋ᠨ ᠲᠤᠷᠰᠢ ᠳ᠋ᠠᠭᠠᠨ ᠠᠵᠢᠯ᠂ ᠠᠮᠢᠳᠤᠷᠠᠯ ᠤ᠋ᠨ ᠬᠦᠨᠳᠦ ᠬᠣᠶᠠᠷ ᠲᠤ ᠨᠢᠷᠤᠭᠤ ᠳᠣᠷᠣᠭᠣ ᠪᠠᠨ ᠡᠪᠳᠡᠷᠡᠲᠡᠯᠡ ᠵᠢᠳᠬᠦᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠴᠠᠭ ᠢᠮᠠᠭᠲᠠ ᠳᠠᠷᠤᠯᠠᠭᠳᠠᠯ ᠮᠥᠯᠵᠢᠭᠳᠡᠯ ᠳ᠋ᠦ᠍ ᠬᠠᠪᠴᠢᠭᠳᠠᠬᠤ ᠤᠴᠢᠷ ᠥᠪᠡᠷ ᠦ᠋ᠨ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠢᠨᠢᠶᠡᠨ ᠪᠠᠶᠠᠰᠬᠤ ᠠ᠋ᠴᠠ ᠶᠡᠬᠡᠪᠴᠢᠯᠡᠨ ᠬᠥᠨᠳᠡᠢᠷᠡᠭᠰᠡᠨ ᠪᠠᠢᠬᠤ ᠪᠥᠭᠡᠳ ᠭᠠᠭᠴᠠᠬᠠᠨ ᠴᠠᠭᠠᠨ ᠰᠠᠷᠠ ᠪᠣᠯᠵᠤ ᠠᠷᠠᠢ ᠭᠡᠵᠦ ᠠᠮᠠᠷᠠᠬᠤ ᠳ᠋ᠠᠭᠠᠨ ᠢᠨᠢᠶᠡᠨ ᠪᠠᠶᠠᠰᠬᠤ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠲᠡᠢᠨᠬᠦ ᠮᠠᠭᠠᠳᠠᠭᠠᠷ ᠪᠣᠯᠤᠭᠰᠠᠨ ᠠᠵᠢ᠃
ᠢᠷᠡᠪᠡᠯ ᠵᠣᠬᠢᠬᠤ ᠴᠢᠬᠤᠯᠠ ᠬᠥᠮᠦᠰ ᠦ᠋ᠨ ᠢ᠋ᠶ᠋ᠡᠨ ᠢᠷᠡᠵᠦ ᠭᠦᠢᠴᠡᠮᠡᠭᠴᠡ ᠯᠤᠤ ᠯᠢ ᠳ᠋ᠠᠨᠽᠡᠨ ᠢ᠋ ᠳᠠᠭᠠᠭᠤᠯᠤᠨ ᠠᠢᠯ ᠬᠡᠰᠦᠬᠦ ᠪᠡᠷ ᠭᠠᠷᠪᠠ᠃ ᠳᠠᠭᠠᠷᠢᠯᠳᠤᠭᠰᠠᠨ ᠪᠦᠬᠦᠨ ᠲᠠᠢ ᠪᠠᠨ《ᠳᠠ ᠹᠠ ᠼᠠᠢ!》 ᠭᠡᠵᠦ ᠮᠡᠨᠳᠦᠯᠡᠨ ᠶᠠᠪᠤᠳᠠᠭ ᠶᠣᠰᠣᠲᠠᠢ ᠪᠠᠢᠯᠠ᠃ ᠳ᠋ᠠᠨᠽᠡᠨ ᠬᠥᠮᠦᠨ ᠦ᠌ ᠶᠣᠰᠣ ᠶ᠋ᠢ ᠨᠠᠷᠢᠪᠴᠢᠯᠠᠨ ᠰᠠᠬᠢᠬᠤ ᠶ᠋ᠢ ᠬᠢᠴᠢᠶᠡᠩᠭᠦᠢᠯᠡᠨ ᠡᠨᠡ ᠲᠡᠷᠡ ᠶ᠋ᠢ ᠨᠠᠷᠢᠪᠴᠢᠯᠠᠨ ᠠᠵᠢᠨ ᠬᠥᠯ ᠢ᠋ᠶ᠋ᠡᠨ ᠬᠥᠨᠳᠡᠯᠡᠭᠳᠡᠭᠦᠦ ᠭᠢᠰᠬᠢᠯᠡᠨ ᠶᠣᠰᠣᠲᠠᠢ ᠯᠠ ᠮᠠᠶᠢᠭᠯᠠᠵᠤ ᠭᠠᠷᠪᠠ᠃ ᠠᠢᠯ ᠳ᠋ᠤ᠌ ᠣᠷᠣᠭᠠᠳ ᠪᠠᠰᠠ ᠱᠠᠯ ᠬᠠᠭᠤᠷᠮᠠᠴᠢ ᠪᠠᠷ ᠬᠠ ᠬᠠ ᠢᠨᠢᠶᠡᠨᠡ᠃ ᠭᠡᠯᠡ ᠴᠦ᠍ ᠪᠠᠶᠠᠷ! ᠳ᠋ᠠᠨᠽᠡᠨ ᠨᠤᠲᠤᠭ ᠠ᠋ᠴᠠ ᠭᠠᠷᠤᠭᠰᠠᠨ ᠠ᠋ᠴᠠ ᠪᠠᠨ ᠬᠣᠢᠰᠢ ᠡᠨᠳᠡ ᠯᠡ ᠰᠠᠶᠢ ᠰᠡᠳᠬᠢᠯ ᠲᠡᠨᠢᠢᠨ ᠪᠠᠶᠠᠷᠯᠠᠪᠠ᠃
ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠤ᠋ᠨ ᠡᠳᠦᠷ ᠯᠤᠤ ᠯᠢ ᠰᠦᠮᠡ ᠳ᠋ᠦ᠍ ᠣᠴᠢᠨ ᠭᠠᠵᠠᠷ ᠤ᠋ᠨ ᠪᠤᠷᠬᠠᠨ ᠲᠤ ᠳᠢ ᠶᠧ ᠶ᠋ᠢ ᠲᠠᠬᠢᠨᠠ ᠭᠡᠵᠦ ᠶᠡᠬᠡᠬᠡᠨ ᠬᠥᠯ ᠬᠥᠳᠡᠯᠭᠡᠭᠡᠨ ᠪᠣᠯᠪᠠ᠃ ᠤᠯᠠᠭᠠᠨ ᠡᠩᠭᠡᠰᠬᠡᠲᠦ ᠮᠠᠨᠲᠠᠤ ᠨᠤᠭᠤᠳ ᠪᠠ ᠯᠠ ᠬᠦᠵᠢ ᠪᠠᠰᠠ ᠪᠤᠰᠤᠳ ᠢᠳᠡᠭᠡᠨ ᠦ᠌ ᠪᠡᠨ ᠳᠡᠭᠡᠵᠢ ᠶ᠋ᠢ ᠪᠠᠭᠲᠠᠭᠠᠨ ᠭᠡᠷ ᠪᠦᠯᠢ ᠪᠡᠷ ᠶᠠᠪᠤᠬᠤ ᠭᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠡᠨ ᠠᠵᠠ ᠬᠡᠢ ᠮᠣᠷᠢ᠂ ᠠᠮᠢ ᠨᠠᠰᠤ ᠪᠠᠨ ᠳᠠᠭᠠᠳᠬᠠᠰᠤᠭᠠᠢ ᠭᠡᠵᠦ ᠮᠥᠨ ᠬᠠᠮᠲᠤ ᠶᠠᠪᠤᠯᠴᠠᠨᠠ᠃
ᠬᠥᠷ ᠴᠠᠰᠤᠨ ᠳ᠋ᠤ᠌ ᠪᠢᠲᠡᠭᠦᠦ ᠬᠤᠴᠢᠭᠳᠠᠭᠰᠠᠨ ᠲᠠᠷᠢᠶᠠᠨ ᠤ᠋ ᠥᠷᠭᠡᠨ ᠲᠠᠯᠠᠪᠠᠢ ᠳᠡᠭᠡᠷᠡ ᠬᠥᠮᠦᠰ ᠦ᠋ᠨ ᠶᠠᠪᠤᠭᠰᠠᠨ ᠰᠢᠨᠡᠬᠡᠨ ᠤᠯᠠ ᠮᠥᠷ ᠢ᠋ᠶ᠋ᠡᠷ ᠭᠠᠷᠤᠭᠰᠠᠨ ᠨᠠᠷᠢᠬᠠᠨ ᠵᠠᠮ ᠢ᠋ᠶ᠋ᠠᠷ ᠲᠡᠮᠡᠭᠡᠨ ᠵᠢᠩ ᠰᠢᠭ ᠴᠤᠪᠤᠷᠠᠨ ᠶᠠᠪᠤᠪᠠ᠃ ᠲᠡᠷᠡ ᠵᠠᠭᠤᠷᠠ ᠳ᠋ᠠᠨᠽᠡᠨ ᠶᠠᠮᠠᠷ ᠨᠢᠭᠡ ᠲᠣᠮᠣ ᠰᠠᠢᠬᠠᠨ ᠳᠤᠭᠠᠩ ᠰᠦᠮᠡ ᠳ᠋ᠦ᠍ ᠣᠴᠢᠬᠤ ᠭᠡᠵᠦ ᠶᠠᠪᠤᠭᠠ ᠶᠤᠮ ᠰᠢᠭ᠋ ᠰᠠᠨᠠᠨ ᠰᠡᠳᠬᠢᠯ ᠪᠠᠬᠠᠨ ᠬᠥᠭᠵᠢᠵᠡᠢ᠃ ᠲᠡᠭᠡᠭᠡᠳ ᠯᠤᠤ ᠯᠢ ᠶ᠋ᠢᠨ ᠬᠠᠭᠠᠯᠭᠠ ᠬᠠᠲᠠᠪᠴᠢ ᠦᠭᠡᠢ ᠪᠢᠴᠢᠬᠠᠨ ᠪᠤᠩᠬᠤᠨ ᠰᠢᠭ᠋ ᠶᠠᠭᠤᠮᠠ ᠶ᠋ᠢᠨ ᠡᠮᠦᠨᠡ ᠲᠤᠯᠤᠨ ᠣᠴᠢᠬᠤ ᠳ᠋ᠤᠨᠢ ᠭᠠᠢᠬᠠᠪᠠ᠃ ᠲᠡᠭᠡᠭᠰᠡᠨ ᠴᠢᠨᠢ ᠥᠨᠥᠬᠢ ᠲᠠᠬᠢᠬᠤ ᠭᠡᠰᠡᠨ ᠰᠦᠮᠡ ᠨᠢ ᠲᠡᠷᠡ ᠪᠠᠢᠵᠠᠢ᠃
ᠯᠤᠤ ᠯᠢ ᠲᠥᠷᠥᠭᠦᠯᠦᠭᠰᠡᠨ ᠴᠢᠭ ᠢ᠋ᠶ᠋ᠡᠷ ᠨᠢ ᠳᠣᠷᠣᠭᠰᠢ ᠪᠥᠬᠥᠢᠨ ᠰᠢᠷᠭᠤᠨ ᠣᠷᠣᠵᠤ ᠲᠠᠬᠢᠯ ᠳᠡᠭᠡᠵᠢ ᠪᠡᠨ ᠡᠷᠭᠦᠪᠡ᠃ ᠠᠷᠤ ᠳ᠋ᠤᠨᠢ ᠠᠪᠠᠭᠠᠢ᠂ ᠲᠡᠭᠦᠨ ᠦ᠌ ᠠᠷᠤ ᠳ᠋ᠤ᠌ ᠬᠡᠦᠬᠡᠳ᠂ ᠲᠡᠳᠡᠨ ᠦ᠌ ᠬᠣᠢᠨᠠ ᠳ᠋ᠠᠨᠽᠡᠨ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠰᠠᠭᠤᠨ ᠮᠥᠷᠭᠥᠪᠡ᠃ ᠤᠭ ᠨᠢ ᠳ᠋ᠠᠨᠽᠡᠨ ᠡᠨᠳᠡ ᠠᠮᠢ ᠨᠠᠰᠤ ᠪᠠᠨ ᠳᠠᠭᠠᠳᠬᠠᠬᠤ ᠶ᠋ᠢ ᠪᠣᠳᠣᠵᠤ ᠢᠷᠡᠭᠰᠡᠨ ᠠᠲᠠᠯᠠ ᠣᠳᠣ ᠰᠦᠰᠦᠭ ᠠᠯᠲᠠᠨ ᠳᠣᠲᠣᠷᠠ ᠨᠢ ᠴᠣᠬᠣᠮ ᠶᠠᠭᠤ ᠪᠠᠢᠳᠠᠭ ᠢ᠋ ᠰᠣᠨᠢᠷᠬᠠᠨ ᠠᠵᠢᠭᠯᠠᠪᠠ᠃ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠡᠯᠪᠡᠷᠢ ᠲᠡᠢ ᠶᠡᠬᠡ ᠪᠠᠭᠠ ᠮᠠᠨᠲᠠᠤ᠂ ᠳᠣᠣᠷᠠᠲᠤ ᠱᠠᠯᠠ ᠠ᠋ᠴᠠ ᠳᠡᠭᠡᠭᠰᠢ ᠲᠣᠬᠣᠢ ᠢᠯᠡᠭᠦᠦ ᠲᠡᠢ ᠣᠪᠣᠭᠠᠯᠠᠭᠳᠠᠭᠰᠠᠨ ᠤ᠋ ᠳᠡᠭᠡᠷᠡ ᠬᠡᠳᠦᠨ ᠠᠷᠪᠠᠨ ᠯᠠ ᠠᠰᠠᠭᠠᠰᠤᠲᠠᠢ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠭᠡᠪᠡᠴᠦ ᠡᠨᠳᠡ ᠲᠡᠨᠳᠡ ᠦᠭᠡᠢ ᠬᠦᠵᠢ ᠬᠠᠳᠬᠤᠨ ᠰᠢᠲᠠᠭᠠᠭᠰᠠᠨ ᠲᠤᠯᠠ ᠥᠳᠬᠡᠨ ᠬᠥᠬᠡ ᠤᠲᠤᠭᠠ ᠰᠦᠮᠡ ᠶ᠋ᠢᠨ ᠪᠢᠴᠢᠬᠠᠨ ᠵᠠᠢ ᠳ᠋ᠤ᠌ ᠪᠠᠭᠲᠠᠵᠤ ᠶᠠᠳᠠᠨ ᠠᠰᠠᠵᠤ ᠪᠠᠢᠭᠠ ᠯᠠ ᠶ᠋ᠢᠨ ᠭᠡᠷᠡᠯ ᠢ᠋ ᠠᠷᠠᠢ ᠶᠠᠳᠠᠨ ᠰᠦᠮᠡᠯᠵᠡᠭᠦᠯᠦᠨᠡ᠃ ᠠᠭᠠᠵᠢᠮ ᠳ᠋ᠠᠭᠠᠨ ᠨᠢᠳᠦ ᠳᠠᠰᠤᠨ ᠠᠵᠢᠪᠠᠯ᠂ ᠠᠷᠤ ᠳ᠋ᠤᠨᠢ ᠴᠠᠭᠠᠨ ᠳᠡᠪᠡᠯ ᠲᠡᠢ᠂ ᠴᠠᠭᠠᠨ ᠰᠠᠬᠠᠯ ᠲᠠᠢ᠂ ᠴᠠᠭᠠᠨ ᠴᠢᠷᠠᠢ ᠲᠠᠢ᠂ ᠲᠠᠶᠠᠭ ᠲᠤᠯᠤᠨ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠳᠦᠷᠢ ᠲᠡᠢ ᠰᠢᠪᠡᠷ ᠡᠪᠦᠭᠡᠨ ᠪᠤᠷᠬᠠᠨ ᠪᠠᠢᠬᠤ ᠪᠥᠭᠡᠳ ᠲᠡᠷᠡᠭᠦᠷ ᠮᠠᠨᠠᠷᠠᠭᠰᠠᠨ ᠶᠡᠬᠡ ᠤᠲᠤᠭᠠᠨ ᠳ᠋ᠤ᠌ ᠠᠪᠲᠠᠭᠳᠠᠭᠰᠠᠨ ᠢ᠋ᠶ᠋ᠠᠷ ᠡᠭᠦᠯᠡ ᠭᠥᠯᠥᠭᠡᠯᠡᠨ ᠠᠢᠰᠤᠢ ᠰᠢᠭ᠋ ᠦᠵᠡᠭᠳᠡᠨᠡ᠃ ᠭᠡᠯᠡ ᠴᠦ᠍ ᠳ᠋ᠠᠨᠽᠡᠨ ᠳ᠋ᠦ᠍ ᠰᠦᠰᠦᠭᠯᠡᠨ ᠪᠢᠰᠢᠷᠡᠬᠦ ᠰᠡᠳᠬᠢᠯ ᠲᠥᠷᠥᠭᠰᠡᠨ ᠦᠭᠡᠢ᠂ ᠪᠤᠷᠬᠠᠨ ᠤ᠋ ᠨᠢᠭᠡ ᠲᠠᠯᠠ ᠳ᠋ᠤ᠌ ᠲᠣᠭᠣᠷᠤᠤ᠂ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠪᠤᠭᠤ ᠪᠠᠢᠬᠤ ᠶ᠋ᠢ ᠣᠯᠵᠤ ᠬᠠᠷᠠᠭᠠᠳ《ᠡᠨᠡ ᠬᠣᠶᠠᠷ ᠪᠠᠰᠠ ᠶᠠᠭᠤ ᠪᠣᠢ? ᠶᠠᠭᠠᠬᠢᠭᠠᠳ ᠡᠨᠳᠡ ᠪᠤᠷᠬᠠᠨ ᠪᠣᠯᠤᠨ ᠲᠠᠬᠢᠭᠳᠠᠨ ᠰᠢᠲᠦᠭᠳᠡᠬᠦ ᠪᠣᠯᠪᠠ?》 ᠭᠡᠵᠦ ᠪᠣᠳᠣᠪᠠ᠃ ᠳ᠋ᠠᠨᠽᠡᠨ ᠦ᠌ ᠡᠮᠦᠨᠡ ᠯᠤᠤ ᠯᠢ ᠠᠪᠠᠭᠠᠢ ᠲᠠᠢ ᠪᠠᠨ ᠭᠠᠵᠠᠷ ᠰᠥᠭᠥᠳᠦᠨ ᠳᠠᠭᠠᠳᠬᠠᠯ ᠳᠡᠭᠡᠳᠬᠡᠯ ᠢ᠋ᠶ᠋ᠡᠨ ᠤᠶᠠᠩᠭᠠᠯᠠᠭᠤᠯᠤᠨ ᠮᠥᠷᠭᠥᠵᠦ ᠪᠠᠢᠪᠠ᠃ ᠲᠡᠭᠦᠨ ᠡᠴᠡ ᠨᠢ ᠳ᠋ᠠᠨᠽᠡᠨ ᠳ᠋ᠦ᠍《ᠬᠠᠪᠤᠷ ᠤ᠋ᠨ ᠬᠦᠢᠲᠡᠨ ᠢ᠋ ᠬᠤᠷᠳᠤᠨ ᠵᠠᠢᠯᠠᠭᠤᠯᠵᠤ᠂ ᠭᠠᠵᠠᠷ ᠤ᠋ᠨ ᠬᠥᠷᠥᠰᠥ ᠶ᠋ᠢ ᠭᠡᠰᠬᠡᠵᠦ ᠬᠠᠢᠷᠠᠯᠠ᠃ ᠭᠠᠩ ᠭᠠᠴᠢᠭ ᠢ᠋ ᠦᠵᠡᠭᠦᠯᠦᠯ ᠦᠭᠡᠢ᠂ ᠭᠠᠵᠠᠷ ᠲᠠᠷᠢᠶᠠ ᠶ᠋ᠢ ᠰᠠᠢᠬᠠᠨ ᠤᠷᠭᠤᠭᠤᠯᠵᠤ ᠬᠠᠢᠷᠠᠯᠠ!》 ᠭᠡᠳᠡᠭ ᠲᠣᠢᠮᠣᠲᠠᠢᠬᠠᠨ ᠦᠭᠡᠰ ᠰᠣᠨᠣᠰᠳᠠᠨᠠ᠃
ᠬᠢᠲᠠᠳ ᠣᠷᠣᠨ ᠳ᠋ᠤ᠌ ᠠᠯᠠᠭᠠ ᠶ᠋ᠢᠨ ᠴᠢᠨᠡᠭᠡᠨ ᠭᠠᠵᠠᠷ ᠲᠠᠢ ᠪᠣᠯᠪᠠᠴᠤ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠲᠤ ᠲᠠᠷᠢᠶᠠᠴᠢᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠡᠢᠨᠬᠦ ᠭᠠᠵᠠᠷ ᠤ᠋ᠨ ᠪᠤᠷᠬᠠᠨ ᠲᠤ ᠳᠢ ᠶᠧ ᠳ᠋ᠦ᠍ ᠵᠠᠪᠠᠯ ᠮᠥᠷᠭᠥᠳᠡᠭ ᠪᠥᠭᠡᠳ ᠣᠷᠣ ᠲᠠᠰᠤ ᠭᠠᠵᠠᠷ ᠦᠭᠡᠢ ᠪᠣᠯᠵᠤ ᠶᠡᠬᠡ ᠪᠠᠶᠠᠨ ᠤ᠋ ᠳ᠋ᠤ᠌ ᠵᠥᠪᠬᠡᠨ ᠬᠣᠭᠣᠯᠠ᠂ ᠭᠡᠳᠡᠰᠦ ᠲᠡᠵᠢᠭᠡᠬᠦ ᠲᠡᠳᠦᠢ ᠵᠠᠷᠤᠭᠳᠠᠬᠤ ᠪᠣᠯᠤᠭᠰᠠᠨ ᠲᠠᠷᠢᠶᠠᠴᠢᠨ ᠴᠦ᠍ ᠭᠡᠰᠡᠨ ᠡᠰᠡ ᠮᠥᠷᠭᠥᠪᠡᠯ ᠢᠳᠡᠬᠦ ᠬᠣᠭᠣᠯᠠ ᠣᠯᠳᠠᠬᠤ ᠦᠭᠡᠢ ᠪᠣᠯᠤᠨᠠ ᠭᠡᠵᠦ ᠠᠶᠤᠨ ᠮᠥᠷᠭᠥᠳᠡᠭ ᠪᠠᠢᠵᠠᠢ᠃
ᠰᠠᠯᠬᠢ ᠰᠠᠪᠠᠷ ᠥᠴᠦᠬᠡᠨ ᠴᠦ᠍ ᠦᠭᠡᠢ ᠨᠠᠯᠠᠭᠠᠷ ᠰᠠᠢᠬᠠᠨ ᠲᠡᠷᠡ ᠡᠳᠦᠷ ᠪᠤᠴᠠᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠠᠪᠠᠭᠠᠢ ᠳ᠋ᠠᠨᠽᠡᠨ ᠡᠴᠡ᠄
— ᠦᠭᠡᠢ ᠴᠢ ᠲᠤ ᠳᠢ ᠶᠧ ᠳ᠋ᠦ᠍ ᠵᠠᠯᠪᠠᠷᠢᠭᠰᠠᠨ ᠤᠤ ᠭᠡᠵᠦ ᠰᠡᠵᠢᠭᠯᠡᠨ ᠠᠰᠠᠭᠤᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠳ᠋ᠠᠨᠽᠡᠨ᠄
— ᠠᠢ ᠡᠵᠢ ᠠ᠋᠂ ᠵᠠᠯᠪᠠᠷᠢᠯ ᠦᠭᠡᠢ ᠶᠠᠭᠠᠬᠢᠬᠤᠪ᠃
— ᠰᠠᠢᠨ᠃ ᠭᠡᠪᠡᠴᠦ ᠴᠣᠬᠣᠮ ᠶᠠᠭᠤ ᠭᠡᠵᠦ ᠵᠠᠯᠪᠠᠷᠢᠪᠠ?
— ᠭᠡᠷ ᠣᠷᠣᠨ ᠤᠷᠤᠭᠤ ᠮᠢᠨᠢ ᠪᠤᠴᠠᠬᠤ ᠬᠠᠪᠤᠷ ᠤ᠋ᠨ ᠰᠠᠢᠬᠠᠨ ᠤᠯᠠᠷᠢᠯ ᠢ᠋ ᠬᠤᠷᠳᠤᠨ ᠢᠷᠡᠭᠦᠯᠵᠦ ᠬᠠᠢᠷᠠᠯᠠ ᠭᠡᠵᠦ᠃
— ᠵᠥᠪ! ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠨᠠᠮᠠᠶ᠋ᠢ ᠭᠠᠭᠴᠠᠬᠠᠨ ᠲᠤ ᠳᠢ ᠶᠧ ᠯᠡ ᠲᠡᠳᠬᠦᠨᠡ᠃ ᠶᠡᠷᠦᠨᠢ ᠳᠡ ᠯᠣᠣᠶᠧ ᠶ᠋ᠢᠨ ᠴᠢᠮᠠ ᠳ᠋ᠤ᠌ ᠰᠠᠢᠨ ᠪᠠᠢᠭᠠ ᠶ᠋ᠢ ᠦᠵᠡᠪᠡᠯ ᠲᠤ ᠳᠢ ᠶᠧ ᠲᠡᠳᠬᠦᠭᠰᠡᠭᠡᠷ ᠪᠠᠢᠭᠠ ᠪᠠᠢᠬᠠ᠃ ᠡᠭᠦᠨᠴᠢᠯᠡᠨ ᠴᠢᠮᠠ ᠳ᠋ᠤ᠌ ᠠᠵᠠ ᠶ᠋ᠢᠨ ᠪᠠᠩᠰᠢ ᠣᠴᠢᠭᠰᠠᠨ ᠢ᠋ ᠪᠠᠰᠠ ᠶᠠᠭᠠᠬᠢᠨᠠ᠃ ᠦᠨᠡᠬᠡᠷ ᠴᠢ ᠠᠵᠠ ᠲᠠᠢ! ᠡᠨᠡ ᠵᠢᠯ ᠴᠢ ᠮᠠᠰᠢ ᠶᠡᠬᠡ ᠣᠯᠵᠠ ᠣᠯᠤᠨᠠ ᠭᠡᠵᠦ ᠮᠡᠳᠡ! ᠭᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠡᠨ ᠪᠡᠯᠭᠡᠰᠢᠶᠡᠨ ᠪᠠᠶᠠᠷᠯᠠᠭᠰᠠᠨ ᠢ᠋ᠶ᠋ᠠᠨ ᠰᠠᠶᠢ ᠲᠤ ᠳᠢ ᠶᠧ ᠪᠤᠷᠬᠠᠨ ᠳ᠋ᠤᠨᠢ ᠣᠭᠲᠣ ᠰᠦᠰᠦᠭᠯᠡᠭᠡ ᠦᠭᠡᠢ ᠪᠡᠨ ᠰᠠᠨᠠᠨ《ᠠᠢ ᠳᠠ ᠡᠭᠦᠨᠴᠡ ᠪᠣᠯᠤᠨ ᠬᠠᠮᠤᠭ ᠠᠵᠠ ᠮᠢᠨᠢ ᠬᠠᠷᠢᠴᠢᠬᠠᠬᠤ ᠦᠭᠡᠢ ᠪᠠᠢᠭᠠ ᠳᠠ》 ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠰᠡᠳᠬᠢᠯ ᠵᠣᠪᠠᠬᠤ ᠳ᠋ᠤ᠌ ᠬᠦᠷᠦᠯᠡ᠃