ᠠᠪᠤ ᠬᠥᠮᠦᠨ -ᠭᠣᠢᠵᠢᠳᠨᠤᠷᠪᠤAav khün-GoijdnorovАав хүн-Гойждноров
1584ᠠᠪᠤ ᠬᠥᠮᠦᠨ
ᠭᠣᠢᠵᠢᠳᠨᠤᠷᠪᠤ ᠵᠣᠬᠢᠶᠠᠵᠤ
ᠭᠣᠢᠵᠢᠳᠨᠤᠷᠪᠤ ᠬᠤᠭᠤᠷᠳᠠᠪᠠ
ᠬᠦᠷᠡᠩ ᠽᠠᠨᠳᠠᠨ ᠬᠤᠭᠤᠷ ᠢ᠋ᠶ᠋ᠠᠨ ᠲᠠᠲᠠᠬᠤ ᠳ᠋ᠤ᠌
ᠬᠦᠩᠭᠢᠨᠡᠬᠦ ᠠᠶᠠᠰ ᠨᠢ ᠤᠶᠠᠷᠠᠭᠤᠨ ᠪᠠᠢᠨᠠ
ᠬᠦᠨᠳᠦᠲᠦ ᠠᠪᠤ ᠪᠠᠨ ᠮᠠᠭᠲᠠᠨ ᠳᠠᠭᠤᠯᠠᠬᠤ ᠳ᠋ᠤ᠌
ᠬᠡᠬᠦᠳᠡᠭ ᠴᠡᠭᠡᠵᠢ ᠮᠢᠨᠢ ᠳᠣᠭᠳᠣᠯᠤᠨ ᠪᠠᠢᠨᠠ
ᠬᠤᠭᠤᠷ ᠤ᠋ᠨ ᠰᠠᠢᠬᠠᠨ ᠡᠭᠡᠰᠢᠭ ᠮᠢᠨᠢ ᠳ᠋ᠠ
ᠬᠣᠷᠸᠠ ᠳᠡᠯᠡᠬᠡᠢ ᠳ᠋ᠦ᠍ ᠴᠤᠤᠷᠢᠶᠠᠲᠤᠬᠤ ᠶᠤᠮ
ᠬᠡᠦᠬᠡᠳ ᠨᠢ ᠠᠪᠤ ᠪᠠᠨ ᠮᠠᠭᠲᠠᠨ ᠳᠠᠭᠤᠯᠠᠬᠤ ᠳ᠋ᠤ᠌
ᠬᠤᠷᠮᠤᠰᠲᠠ ᠲᠩᠷᠢ ᠮᠦᠰᠢᠶᠡᠬᠦ ᠯᠡ ᠶᠤᠮ
ᠰᠦᠮᠪᠦᠷ ᠨᠡᠷᠡ ᠲᠡᠢ ᠰᠦᠷᠯᠢᠭ ᠠᠭᠤᠯᠠ
ᠰᠦᠮᠡᠢᠬᠦ ᠪᠠᠷᠠ ᠨᠢ ᠲᠩᠷᠢ ᠲᠤᠯᠪᠠᠴᠤ
ᠰᠦᠵᠢᠭ ᠦ᠋ᠨ ᠲᠩᠷᠢ ᠠᠪᠤ ᠬᠥᠮᠦᠨ ᠦ᠌
ᠰᠣᠶᠣᠷᠬᠠᠯ ᠬᠠᠢᠷᠠ ᠶ᠋ᠢ ᠨᠢ ᠭᠦᠢᠴᠡᠨᠡ ᠤᠤ ᠳ᠋ᠠ
ᠭᠠᠯᠪᠠ ᠶ᠋ᠢᠨ ᠨᠣᠭᠣᠭᠠᠨ ᠳᠡᠨᠵᠢᠨ ᠳᠡᠭᠡᠷᠡ
ᠭᠠᠯ ᠪᠣᠯᠵᠤ ᠳᠦᠷᠡᠯᠵᠡᠳᠡᠭ ᠠᠪᠤ ᠬᠥᠮᠦᠨ
ᠭᠠᠢᠬᠠᠮᠰᠢᠭᠲᠤ ᠲᠠᠩᠰᠤᠭ ᠠᠮᠢᠳᠤᠷᠠᠯ ᠢ᠋ᠶ᠋ᠠᠨ
ᠭᠠᠪᠰᠢᠭᠠᠢᠯᠠᠵᠤ ᠪᠠᠢᠭᠤᠯᠳᠠᠭ ᠠᠪᠤ ᠬᠥᠮᠦᠨ
ᠥᠷᠥᠰᠢᠶᠡᠯ ᠬᠠᠢᠷᠠ ᠶ᠋ᠢᠨ ᠥᠷᠭᠡᠨ ᠬᠠᠷᠭᠤᠢ ᠳ᠋ᠤ᠌
ᠥᠪᠡᠷ ᠢ᠋ ᠪᠡᠨ ᠵᠣᠷᠢᠭᠤᠯᠳᠠᠭ ᠠᠪᠤ ᠬᠥᠮᠦᠨ
ᠥᠷᠥᠭᠡ ᠭᠡᠷ ᠲᠡᠭᠡᠨ ᠲᠤᠯᠭᠠᠭᠤᠷᠢ ᠪᠣᠯᠤᠭᠰᠠᠨ
ᠡᠭᠦᠷᠭᠡ ᠨᠢ ᠬᠦᠨᠳᠦ ᠠᠪᠤ ᠬᠥᠮᠦᠨ
ᠠᠭᠰᠢᠷᠠᠭᠠ ᠪᠤᠭᠤᠷᠤᠯ ᠠᠪᠤ ᠡᠵᠢ ᠳ᠋ᠡᠭᠡᠨ
ᠠᠴᠢᠯᠠᠯ ᠵᠢᠷᠤᠮᠲᠠᠢ ᠠᠪᠤ ᠬᠥᠮᠦᠨ
ᠠᠪᠠᠭᠠᠢ ᠬᠣᠩᠭᠣᠷ᠂ ᠬᠡᠦᠬᠡᠳ ᠨᠢᠯᠬᠠ ᠳ᠋ᠠᠭᠠᠨ
ᠠᠷᠤ ᠶ᠋ᠢᠨ ᠲᠦᠰᠢᠯᠭᠡ ᠠᠪᠤ ᠬᠥᠮᠦᠨ
ᠡᠷᠦᠬᠡ ᠭᠡᠷ ᠢ᠋ᠶ᠋ᠡᠨ ᠥᠭᠡᠳᠡᠯᠡᠭᠦᠯᠬᠦ ᠪᠡᠷ
ᠡᠷᠡ ᠬᠦᠴᠦ ᠪᠡᠨ ᠰᠢᠪᠬᠠᠳᠠᠭ ᠠᠪᠤ ᠬᠥᠮᠦᠨ
ᠡᠯᠪᠡᠭ ᠠᠮᠢᠳᠤᠷᠠᠯ ᠢ᠋ ᠡᠳ᠋ᠯᠡᠭᠦᠯᠬᠦ ᠪᠡᠷ
ᠡᠷᠲᠡᠯᠡᠵᠦ ᠣᠷᠣᠢᠯᠠᠳᠠᠭ ᠠᠪᠤ ᠬᠥᠮᠦᠨ
ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠬᠠᠷᠠᠭᠠᠳ ᠦᠵᠡᠪᠡᠯ
ᠥᠷᠥᠴᠡᠨ ᠳ᠋ᠡᠭᠡᠨ ᠪᠠᠶᠠᠷᠯᠠᠳᠠᠭ ᠠᠪᠤ ᠬᠥᠮᠦᠨ
ᠤᠬᠠᠭᠠᠨ ᠰᠠᠨᠠᠭᠠ ᠲᠠᠢ ᠬᠥᠮᠦᠵᠢᠭᠦᠯᠬᠦ ᠪᠡᠷ
ᠣᠶᠤᠨ ᠢ᠋ᠶ᠋ᠠᠨ ᠵᠦᠳᠡᠭᠡᠳᠡᠭ ᠠᠪᠤ ᠬᠥᠮᠦᠨ
ᠬᠥᠯ ᠢ᠋ ᠳᠥᠷᠦᠭᠡᠨ ᠳ᠋ᠦ᠍ ᠬᠦᠷᠭᠡᠬᠦ ᠪᠡᠷ
ᠬᠦᠰᠡᠵᠦ ᠶᠠᠭᠠᠷᠠᠳᠠᠭ ᠠᠪᠤ ᠬᠥᠮᠦᠨ
ᠬᠦᠰᠡᠯᠡᠩ ᠢᠷᠡᠭᠡᠳᠦᠢ ᠲᠡᠢ ᠪᠣᠯᠭᠠᠬᠤ ᠪᠠᠷ
ᠬᠦᠴᠦᠯᠡᠨ ᠴᠢᠷᠮᠠᠢᠳᠠᠭ ᠠᠪᠤ ᠬᠥᠮᠦᠨ
ᠠᠷᠠᠰᠤᠨ ᠳᠡᠪᠡᠯ ᠢ᠋ ᠴᠦ᠍ ᠬᠦᠰᠡᠳᠡᠭ ᠦᠭᠡᠢ ᠶᠤᠮ ᠰᠢᠦ
ᠠᠴᠢᠯᠠᠯ ᠤ᠋ᠨ ᠲᠩᠷᠢ ᠠᠪᠤ ᠬᠥᠮᠦᠨ
ᠠᠮᠢᠳᠤᠷᠠᠯ ᠤ᠋ᠨ ᠠᠶᠠᠨ ᠳ᠋ᠠᠭᠠᠨ ᠶᠠᠳᠠᠷᠠᠭᠰᠠᠨ ᠴᠤ᠌
ᠠᠶᠤᠤᠯᠢᠬᠠᠢ ᠳ᠋ᠠᠭᠠᠨ ᠪᠠᠶᠠᠷᠲᠠᠢ ᠠᠪᠤ ᠬᠥᠮᠦᠨ
ᠡᠷᠳᠡᠮ ᠰᠣᠶᠣᠯ ᠢ᠋ ᠡᠵᠡᠮᠰᠢᠵᠦ ᠶᠠᠪᠤᠬᠤ ᠳ᠋ᠤ᠌ ᠨᠢ
ᠡᠷᠴᠢ ᠵᠣᠷᠢᠭ ᠨᠡᠮᠡᠳᠡᠭ ᠠᠪᠤ ᠬᠥᠮᠦᠨ
ᠡᠩᠬᠦᠷᠡᠢ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ
ᠡᠷᠡ ᠪᠡᠶᠡ ᠪᠡᠨ ᠴᠦᠯᠡᠳᠡᠭ ᠠᠪᠤ ᠬᠥᠮᠦᠨ
ᠶᠢᠷᠲᠢᠨᠴᠦ ᠳᠡᠯᠡᠬᠡᠢ ᠶ᠋ᠢᠨ ᠭᠠᠵᠠᠷ ᠳᠡᠭᠡᠷᠡ
ᠡᠴᠢᠭᠡ ᠬᠥᠮᠦᠨ ᠦᠨᠡᠬᠡᠷ ᠬᠦᠨᠳᠦᠳᠬᠡᠯᠲᠡᠢ ᠶᠤᠮ ᠰᠢᠦ
ᠦᠷᠡ ᠨᠢ ᠪᠣᠯᠤᠭᠰᠠᠨ ᠬᠥᠮᠦᠨ ᠪᠦᠬᠦᠨ
ᠥᠷᠥᠰᠢᠶᠡᠯ ᠬᠠᠢᠷᠠ ᠶ᠋ᠢ ᠨᠢ ᠣᠮᠲᠣᠭᠠᠢᠯᠠᠵᠤ ᠪᠣᠯᠬᠤ ᠦᠭᠡᠢ
ᠠᠪᠤ ᠬᠥᠮᠦᠨ ᠦ᠌ ᠠᠴᠢ ᠭᠠᠪᠢᠶᠠ ᠶ᠋ᠢ
ᠠᠯᠲᠠ ᠮᠥᠩᠭᠥ ᠪᠡᠷ ᠰᠣᠯᠢᠭᠠᠳ ᠣᠯᠬᠤ ᠦᠭᠡᠢ ᠶᠤᠮ ᠰᠢᠦ
ᠠᠴᠢᠯᠠᠯ ᠰᠢᠳᠤᠷᠭᠤ ᠶ᠋ᠢ ᠭᠦᠢᠴᠡᠳᠬᠡᠵᠦ ᠴᠢᠳᠠᠪᠠᠯ
ᠠᠪᠤ ᠬᠥᠮᠦᠨ ᠠᠮᠤᠭᠤᠯᠠᠩ ᠪᠠᠶᠠᠰᠬᠤ ᠶᠤᠮ ᠠ᠋!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠦᠰᠦᠭ ᠬᠠᠲᠠᠭᠴᠢ᠄ ᠠᠯᠲᠠᠨᠴᠢᠮᠡᠭ