ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ – ᠬᠦᠳᠡᠷ ᠠᠯᠲᠠᠢ ᠬᠠᠨ (2) Шилэн галзуу баатар – Хүдэр алтай хан (2)
181ᠬᠦᠳᠡᠷ ᠠᠯᠲᠠᠢ ᠬᠠᠨ - 2
ᠳᠠᠬᠢᠨ ᠠᠷᠪᠠᠨ ᠨᠠᠢ᠍ᠮᠠᠨ ᠵᠢᠯ ᠭᠦᠶᠦᠯᠭᠡᠵᠦ
ᠨᠢᠭᠡᠨ ᠬᠥᠬᠡ ᠮᠥᠩᠭᠥᠨ ᠰᠢᠯᠢ ᠳ᠋ᠦ᠍ ᠭᠠᠷᠬᠤ ᠳ᠋ᠤ᠌
ᠪᠠᠳᠮᠠ ᠭᠡᠷᠡᠯ ᠬᠠᠨ ᠤ᠋ ᠪᠠᠢᠰᠢᠩ ᠤ᠋ᠨ
ᠳᠡᠭᠡᠪᠦᠷ ᠨᠢ ᠦᠵᠡᠭᠳᠡᠪᠡ᠃
ᠴᠠᠰᠢ ᠮᠣᠷᠳᠠᠭᠠᠳ ᠪᠠᠢᠲᠠᠯᠠ
ᠵᠤᠯᠵᠠᠭᠠ ᠮᠣᠳᠣᠨ ᠤᠷᠭᠠ ᠨᠠᠬᠢᠯᠵᠠᠭᠤᠯᠤᠭᠰᠠᠨ
ᠵᠢᠭᠠᠯ ᠬᠦᠦ ᠲᠡᠢ ᠵᠣᠯᠭᠠᠪᠠ᠃
ᠬᠣᠨᠢᠴᠢᠨ ᠬᠦᠦ ᠲᠡᠳᠡᠨ ᠡᠴᠡ᠄
《ᠠᠬᠠ ᠮᠢᠨᠢ ᠠᠮᠠᠷᠬᠠᠨ ᠰᠠᠢᠨ!
ᠣᠷᠣᠨ ᠨᠤᠲᠤᠭ ᠲᠠᠨᠢ ᠬᠠᠮᠢᠭᠠ ᠪᠣᠢ?
ᠨᠢᠭᠤᠷ ᠲᠠᠭᠠᠨ ᠭᠠᠯ ᠲᠠᠢ
ᠨᠢᠳᠦᠨ ᠳ᠋ᠡᠭᠡᠨ ᠴᠣᠭ ᠲᠠᠢ ᠬᠣᠶᠠᠷ ᠬᠦᠦ
ᠲᠠᠨᠠᠷ ᠬᠠᠮᠢᠭᠠ ᠶᠠᠪᠤᠵᠤ ᠪᠠᠢᠨᠠ ᠪᠣᠢ》ᠭᠡᠬᠦ ᠳ᠋ᠦ᠍
ᠴᠡᠩᠭᠡᠯ ᠲᠡᠭᠦᠨ ᠳ᠋ᠦ᠍ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠪᠠᠶᠠᠨ ᠬᠦᠳᠡᠷ ᠠᠯᠲᠠᠢ ᠶ᠋ᠢᠨ
ᠪᠠᠷᠠᠭᠤᠨ ᠰᠤᠭᠤ ᠪᠠᠷ ᠨᠤᠲᠤᠭᠯᠠᠭᠰᠠᠨ
ᠬᠦᠳᠡᠷ ᠠᠯᠲᠠᠢ ᠬᠠᠨ ᠤ᠋
ᠬᠦᠦ ᠴᠡᠩᠭᠡᠯ ᠭᠡᠳᠡᠭ ᠪᠢ ᠮᠥᠨ᠃
ᠮᠠᠨ ᠤ᠋ ᠡᠴᠢᠭᠡ ᠵᠠᠯᠠᠭᠤ ᠦᠶᠡ ᠳ᠋ᠡᠭᠡᠨ
ᠪᠠᠬᠠ ᠲᠠᠢ ᠲᠠᠪᠠ ᠲᠠᠢ ᠶᠠᠪᠤᠬᠤ ᠴᠠᠭ ᠲᠤ᠌
ᠪᠠᠳᠮᠠ ᠭᠡᠷᠡᠯ ᠬᠠᠨ ᠲᠠᠢ ᠬᠣᠶᠠᠭᠤᠯᠠ
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠶ᠋ᠢ ᠨᠢ
ᠪᠠᠭᠤᠯᠭᠠᠵᠤ ᠠᠪᠬᠤ ᠪᠠᠷ ᠢᠷᠡᠪᠡ! 》ᠭᠡᠪᠡ᠃
ᠬᠣᠨᠢᠴᠢᠨ ᠬᠦᠦ ᠬᠡᠯᠡᠭᠰᠡᠨ ᠨᠢ᠄
《ᠲᠠ ᠶᠠᠭᠠᠬᠢᠭᠰᠠᠨ ᠵᠠᠶᠠᠭᠠ ᠲᠠᠢ ᠬᠥᠮᠦᠨ ᠪᠣᠢ?
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠶ᠋ᠢ ᠠᠪᠬᠤ ᠪᠠᠷ
ᠲᠩᠷᠢ ᠶ᠋ᠢᠨ ᠬᠠᠢᠷᠠᠲᠤ ᠪᠥᠬᠡ
ᠬᠠᠷᠠ ᠬᠥᠬᠥᠯ ᠬᠦᠷᠴᠦ ᠢᠷᠡᠭᠡᠳ
ᠠᠷᠪᠠᠨ ᠵᠦᠭ ᠦ᠋ᠨ ᠡᠷᠡᠴᠦᠳ ᠡᠴᠡ
ᠠᠲᠠᠭᠠ ᠮᠠᠷᠭᠤᠭᠠ ᠪᠠᠨ ᠠᠪᠴᠤ
ᠬᠣᠷᠢᠨ ᠵᠦᠭ ᠦ᠋ᠨ ᠵᠠᠯᠠᠭᠤᠴᠤᠳ ᠠ᠋ᠴᠠ
ᠬᠣᠨᠵᠢᠶᠠ ᠮᠠᠷᠭᠤᠭᠠ ᠪᠠᠨ ᠠᠪᠴᠤ
ᠨᠠᠢᠷ ᠬᠤᠷᠢᠮ ᠲᠠᠯᠪᠢᠵᠤ
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠶ᠋ᠢ
ᠪᠠᠭᠤᠯᠭᠠᠵᠤ ᠠᠪᠬᠤ ᠪᠠᠷ ᠰᠢᠢᠳᠴᠦ ᠪᠠᠢᠨᠠ
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠪᠣᠯ
ᠰᠦᠮᠪᠦᠷ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠨᠣᠢᠷᠰᠤᠬᠤ ᠳ᠋ᠤ᠌
ᠪᠠᠷᠠᠭᠤᠨ ᠳᠠᠰᠢ ᠬᠠᠷᠠᠵᠤ ᠤᠨᠲᠠᠬᠤᠯᠠ
ᠪᠠᠷᠠᠭᠤᠨ ᠲᠢᠪ ᠦ᠋ᠨ ᠠᠮᠢᠲᠠᠨ
ᠠᠬᠤᠢ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠢᠵᠦ
ᠠᠮᠢᠳᠤᠷᠠᠯ ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠵᠦ ᠪᠠᠢᠳᠠᠭ᠃
ᠵᠡᠭᠦᠨ ᠳᠠᠰᠢ ᠬᠠᠷᠠᠵᠤ ᠤᠨᠲᠠᠬᠤᠯᠠ
ᠵᠡᠭᠦᠨ ᠲᠢᠪ ᠦ᠋ᠨ ᠠᠮᠢᠲᠠᠳ
ᠠᠬᠤᠢ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠢᠵᠦ
ᠠᠮᠢᠳᠤᠷᠠᠯ ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠵᠦ ᠪᠠᠢᠳᠠᠭ》ᠭᠡᠪᠡ᠃
ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠲᠦᠷᠭᠡᠨ ᠳᠠᠪᠬᠢᠭᠤᠯᠪᠠ᠃
* * *
ᠪᠠᠳᠮᠠ ᠭᠡᠷᠡᠯ ᠬᠠᠨ ᠤ᠋ ᠬᠡᠯᠡᠭᠰᠡᠨ ᠨᠢ᠄
《ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠦ᠋ᠳ ᠦ᠋ᠨ
ᠠᠨᠢᠷ ᠭᠠᠷᠤᠭᠰᠠᠨ ᠰᠢᠭ᠋ ᠪᠣᠯᠵᠤ ᠪᠠᠢᠨᠠ
ᠬᠦᠴᠦ ᠶᠡᠬᠡᠲᠦ ᠪᠣᠳᠣᠩ ᠤᠳ ᠤᠨ ①
ᠳᠠᠭᠤ ᠭᠠᠷᠤᠭᠰᠠᠨ ᠰᠢᠭ᠋ ᠪᠣᠯᠵᠤ ᠪᠠᠢᠨᠠ!》ᠭᠡᠪᠡ᠃
ᠰᠢᠪᠡᠭᠴᠢᠨ ᠮᠤᠬᠤᠯᠠᠢ ᠭᠠᠷᠴᠤ ᠬᠠᠷᠠᠭᠠᠳ
《ᠬᠣᠶᠠᠷ ᠤᠯᠠᠭᠠᠨ ᠠᠭᠤᠯᠠ ᠰᠢᠭ᠋ ᠶᠠᠭᠤᠮᠠ
ᠬᠣᠯᠠ ᠠ᠋ᠴᠠ ᠬᠦᠷᠴᠦ ᠢᠷᠡᠵᠦ ᠪᠠᠢᠨᠠ!》ᠭᠡᠪᠡ᠃
ᠬᠠᠨ ᠲᠡᠭᠡᠭᠡᠳ ᠬᠡᠯᠡᠭᠰᠡᠨ ᠨᠢ᠄
《ᠨᠢᠭᠡ ᠬᠦᠴᠦ ᠪᠠᠭᠠ ᠲᠠᠢ
ᠨᠢᠰᠤᠬᠠᠢ ᠬᠡᠦᠬᠡᠳ ᠢᠷᠡᠵᠦ ᠪᠠᠢᠬᠤ ᠪᠢᠵᠡ!》ᠭᠡᠪᠡ᠃
* * *
ᠬᠣᠶᠠᠷ ᠪᠠᠭᠠᠲᠤᠷ ᠬᠦᠷᠴᠦ ᠣᠴᠢᠭᠠᠳ
ᠬᠥᠭᠰᠢᠨ ᠽᠠᠨᠳᠠᠨ ᠢ᠋ ᠬᠢᠨᠢ ᠰᠡᠭᠦᠳᠡᠷᠯᠡᠭᠦᠯᠦᠨ
ᠵᠠᠯᠠᠭᠤ ᠽᠠᠨᠳᠠᠨ ᠮᠣᠳᠣᠨ ᠠ᠋ᠴᠠ ᠨᠢ
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠦ᠋ᠳ ᠢ᠋ᠶ᠋ᠡᠨ ᠤᠶᠠᠵᠤ
ᠥᠷᠭᠥᠭᠡ ᠭᠡᠷ ᠲᠦ᠋ᠨᠢ ᠣᠷᠣᠭᠠᠳ᠄
《ᠬᠠᠨ ᠪᠤᠭᠤᠷᠤᠯ ᠠᠪᠤ ᠠᠮᠠᠷᠬᠠᠨ ᠰᠠᠢᠨ!
ᠬᠠᠲᠤᠨ ᠪᠤᠭᠤᠷᠤᠯ ᠡᠵᠢ ᠠᠮᠠᠷᠬᠠᠨ ᠰᠠᠢᠨ!》ᠭᠡᠬᠦ ᠳ᠋ᠦ᠍
ᠪᠠᠳᠮᠠ ᠭᠡᠷᠡᠯ ᠬᠠᠨ᠄
《ᠨᠢᠳᠦᠨ ᠳ᠋ᠡᠭᠡᠨ ᠭᠠᠯ ᠲᠠᠢ
ᠨᠢᠭᠤᠷ ᠲᠠᠭᠠᠨ ᠴᠣᠭ ᠲᠠᠢ
ᠬᠣᠶᠠᠷ ᠵᠢᠭᠠᠯ ᠬᠦᠦ
ᠬᠠᠮᠢᠭᠠ ᠠ᠋ᠴᠠ ᠶᠠᠪᠤᠵᠤ ᠪᠠᠢᠬᠤ ᠪᠣᠢ?》ᠭᠡᠬᠦ ᠳ᠋ᠦ᠍
ᠴᠡᠩᠭᠡᠯ ᠥᠭᠡᠳᠡ ᠡᠴᠡ ᠨᠢ᠄
《ᠪᠠᠶᠠᠨ ᠬᠦᠳᠡᠷ ᠠᠯᠲᠠᠢ ᠶ᠋ᠢᠨ
ᠪᠠᠷᠠᠭᠤᠨ ᠰᠤᠭᠤ ᠪᠠᠷ ᠨᠤᠲᠤᠭᠯᠠᠭᠰᠠᠨ
ᠬᠦᠳᠡᠷ ᠠᠯᠲᠠᠢ ᠬᠠᠨ ᠤ᠋
ᠬᠦᠦ ᠴᠡᠩᠭᠡᠯ ᠭᠡᠳᠡᠭ ᠪᠢ ᠪᠢᠯᠡ᠃
ᠮᠠᠨ ᠤ᠋ ᠡᠴᠢᠭᠡ ᠪᠠᠭᠠ ᠦᠶᠡ ᠳ᠋ᠡᠭᠡᠨ
ᠪᠠᠬᠠ ᠲᠠᠢ ᠲᠠᠪᠠ ᠲᠠᠢ ᠶᠠᠪᠤᠬᠤ ᠳ᠋ᠠᠭᠠᠨ
ᠪᠠᠲᠤᠲᠠᠢᠬᠠᠨ ᠭᠤᠷᠪᠠᠨ ᠦᠭᠡ ᠪᠡᠨ
ᠲᠠᠨ ᠲᠠᠢ ᠬᠡᠯᠡᠯᠴᠡᠵᠦ ᠬᠥᠭᠡᠷᠦᠯᠳᠦᠭᠰᠡᠨ ᠭᠡᠨᠡ᠃
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠶ᠋ᠢ ᠴᠢᠨᠢ
ᠵᠠᠯᠠᠵᠤ ᠪᠠᠭᠤᠯᠭᠠᠬᠤ ᠭᠡᠵᠦ ᠢᠷᠡᠪᠡ》 ᠭᠡᠬᠦ ᠳ᠋ᠦ᠍
ᠪᠠᠳᠮᠠ ᠭᠡᠷᠡᠯ ᠬᠠᠨ ᠬᠡᠯᠡᠭᠰᠡᠨ ᠨᠢ᠄
《ᠲᠡᠷᠡ ᠴᠠᠭ ᠠ᠋ᠴᠠ ᠨᠠᠰᠢ
ᠠᠨᠢᠷ ᠦᠭᠡᠢ ᠪᠠᠢᠭᠠᠳ ᠪᠠᠢᠬᠤᠯᠠᠷ
ᠦᠷᠡ ᠦᠨᠳᠦᠰᠦ ᠦᠭᠡᠢ ᠶᠠᠭᠤᠮᠠ ᠪᠣᠯᠭᠤᠵᠠᠢ ᠭᠡᠰᠡᠨ ᠶᠦᠮ
ᠬᠠᠨ ᠬᠥᠮᠦᠨ ᠦ᠌ ᠬᠡᠯᠡᠭᠰᠡᠨ ᠦᠭᠡ
ᠬᠠᠳᠠᠨ ᠳ᠋ᠤ᠌ ᠰᠡᠢᠯᠦᠭᠰᠡᠨ ᠪᠢᠴᠢᠭ ᠠᠳᠠᠯᠢ ! 》 ᠭᠡᠳ
ᠪᠠᠷᠠᠭᠤᠨ ᠡᠪᠦᠳᠦᠭ ᠳᠡᠭᠡᠷᠡ ᠪᠡᠨ ᠳᠠᠪᠰᠢᠭᠠᠳ
ᠪᠠᠬᠠ ᠲᠠᠢ ᠲᠠᠪᠠ ᠲᠠᠢ ᠢᠨᠢᠶᠡᠭᠡᠳ᠄
《ᠠᠷᠪᠠᠨ ᠵᠦᠭ ᠦ᠋ᠨ ᠵᠠᠯᠠᠭᠤᠴᠤᠳ ᠠ᠋ᠴᠠ
ᠠᠲᠠᠭᠠ ᠮᠠᠷᠭᠤᠭᠠ ᠪᠠᠨ ᠠᠪᠴᠤ
ᠨᠠᠷᠠᠨ ᠽᠠᠨᠳᠠᠨ ᠠᠪᠬᠠᠢ ᠲᠠᠢ
ᠨᠠᠢᠷ ᠬᠤᠷᠢᠮ ᠢ᠋ᠶ᠋ᠠᠨ ᠬᠢᠭᠡᠷᠡᠢ !》 ᠭᠡᠪᠡ᠃
ᠠᠲᠠᠭᠠ ᠮᠠᠷᠭᠤᠭᠠ ᠶᠠᠭᠤ ᠪᠠᠢᠳᠠᠭ ᠭᠡᠵᠦ
ᠠᠰᠠᠭᠤᠵᠤ ᠰᠤᠷᠠᠵᠤ ᠬᠡᠯᠡᠬᠦ ᠳ᠋ᠦ᠍
《ᠭᠤᠷᠪᠠᠨ ᠵᠢᠯ ᠣᠨ ᠭᠠᠵᠠᠷ ᠲᠤ᠌
ᠤᠷᠤᠯᠳᠤᠭᠠᠨ ᠣᠷᠣᠯᠳᠣᠳᠠᠭ ᠮᠠᠷᠭᠤᠭᠠ ᠪᠣᠢ
ᠭᠤᠷᠪᠠᠨ ᠵᠢᠯ ᠦ᠋ᠨ ᠭᠠᠵᠠᠷ ᠲᠤ᠌
ᠬᠠᠷᠪᠤᠭᠠ ᠬᠠᠷᠪᠤᠳᠠᠭ ᠮᠠᠷᠭᠤᠭᠠ ᠪᠣᠢ
ᠡᠬᠡ ᠡᠴᠢᠭᠡ ᠶ᠋ᠢᠨ ᠦᠭᠭᠦᠭᠰᠡᠨ
ᠡᠭᠡᠮ ᠳᠠᠯᠤ ᠠ᠋ᠴᠠ ᠪᠣᠯᠤᠭᠰᠠᠨ ᠮᠠᠷᠭᠤᠭᠠ ᠪᠣᠢ》 ᠭᠡᠵᠦ
ᠪᠠᠳᠮᠠ ᠭᠡᠷᠡᠯ ᠬᠠᠨ ᠬᠡᠯᠡᠪᠡ᠃
* * *
ᠭᠤᠷᠪᠠᠨ ᠵᠢᠯ ᠦ᠋ᠨ ᠭᠠᠵᠠᠷ ᠲᠤ᠌
ᠤᠷᠤᠯᠳᠤᠭᠠᠨ ᠬᠢᠬᠦ ᠪᠡᠷ ᠰᠢᠢᠳᠪᠡ᠃
ᠠᠷᠪᠠᠨ ᠵᠦᠭ ᠦ᠋ᠨ ᠠᠳᠤᠭᠤᠴᠢᠨ ᠬᠥᠪᠡᠭᠦᠳ
ᠬᠣᠷᠢᠨ ᠵᠦᠭ ᠦ᠋ᠨ ᠬᠣᠨᠢᠴᠢᠨ ᠬᠥᠪᠡᠭᠦᠳ
ᠲᠩᠷᠢ ᠶ᠋ᠢᠨ ᠬᠠᠢᠷᠠᠲᠤ ᠪᠥᠬᠡ
ᠬᠠᠷᠠ ᠬᠥᠬᠥᠯ ᠦ᠋ᠨ ᠲᠡᠷᠡ ᠮᠠᠭᠤ
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠢ᠋
ᠪᠢᠳᠡ ᠤᠨᠤᠬᠤ ᠦᠭᠡᠢ ᠭᠡᠯᠴᠡᠪᠡ᠃
ᠴᠡᠩᠭᠡᠯ᠂ ᠮᠢᠯ ᠤᠯᠠᠭᠠᠨ ᠬᠣᠶᠠᠷ ᠬᠦᠯᠦᠭ ᠢ᠋
ᠴᠢ ᠤᠨᠤᠨᠠ ᠤᠤ? ᠪᠢ ᠤᠨᠤᠨᠠ ᠤᠤ? ᠭᠡᠵᠦ
ᠪᠤᠯᠢᠶᠠᠯᠳᠤᠭᠠᠳ ᠬᠦᠷᠦᠭᠡᠳ ᠢᠷᠡᠪᠡ ᠭᠡᠨᠡ᠃
ᠨᠢᠭᠡᠨ ᠵᠡᠭᠡᠷᠡ ᠶ᠋ᠢᠨ ᠰᠢᠯᠪᠢ ᠲᠡᠢ
ᠵᠡᠰ ᠬᠣᠩᠰᠢᠶᠠᠷᠲᠤ᠄
《ᠲᠩᠷᠢ ᠶ᠋ᠢᠨ ᠬᠠᠢᠷᠠᠲᠤ ᠬᠠᠷᠠ ᠬᠥᠬᠥᠯ ᠦ᠋ᠨ
ᠵᠡᠭᠳᠡᠯ ᠴᠠᠭᠠᠨ ᠮᠣᠷᠢ ᠶ᠋ᠢ ᠨᠢ ᠤᠨᠤᠶᠠ ᠭᠡᠵᠦ
ᠦᠰᠦᠷᠦᠨ ᠬᠠᠷᠠᠢᠵᠤ ᠢᠷᠡᠭᠡᠳ
ᠲᠡᠷᠡ ᠤᠨᠤᠬᠤ ᠪᠠᠷ ᠪᠣᠯᠪᠠ᠃
ᠠᠷᠪᠠᠨ ᠵᠦᠭ ᠦ᠋ᠨ ᠡᠷᠡᠴᠦᠳ ᠢᠷᠡᠵᠦ
ᠠᠭᠲᠠ ᠬᠦᠯᠦᠭ ᠢ᠋ ᠨᠢ ᠤᠨᠤᠭᠠᠳ
ᠣᠷᠣᠯᠳᠣᠬᠤ ᠪᠠᠷ ᠶᠠᠪᠤᠬᠤ ᠦᠶᠡ ᠳ᠋ᠦ᠍
ᠮᠢᠯ ᠤᠯᠠᠭᠠᠨ ᠬᠦᠦ᠄
《ᠮᠠᠨ ᠤ᠋ ᠬᠣᠶᠠᠷ ᠬᠦᠯᠦᠭ ᠦ᠋ᠨ ᠨᠢᠷᠤᠭᠤᠨ ᠳ᠋ᠤ᠌
ᠭᠤᠷᠪᠠ ᠭᠤᠷᠪᠠᠨ ᠲᠠᠭᠠᠷ ᠡᠯᠡᠰᠦ ᠲᠡᠩᠨᠡᠭᠡᠳ ᠶᠠᠪᠤ》 ᠭᠡᠬᠦ ᠳ᠋ᠦ᠍᠂
ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠨᠢ ᠲᠡᠩᠨᠡᠭᠡᠳ
ᠤᠬᠤᠰᠬᠢᠨ ᠳᠠᠪᠬᠢᠯᠴᠠᠵᠠᠭᠠᠪᠠ᠃
ᠠᠷᠪᠠᠨ ᠵᠦᠭ ᠦ᠋ᠨ ᠡᠷᠡᠴᠦᠳ
ᠭᠤᠷᠪᠠᠨ ᠵᠢᠯ ᠦ᠋ᠨ ᠴᠢᠨᠠᠳᠤ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍
ᠵᠡᠭᠡᠷᠡ ᠶ᠋ᠢᠨ ᠰᠢᠯᠪᠢ ᠲᠡᠢ
ᠵᠡᠰ ᠬᠣᠩᠰᠢᠶᠠᠷᠲᠤ ᠨᠢ
ᠵᠡᠭᠳᠡᠯ ᠴᠠᠭᠠᠨ ᠮᠣᠷᠢ ᠶ᠋ᠢ ᠤᠨᠤᠵᠤ ᠣᠴᠢᠭᠠᠳ᠂
《ᠲᠠᠨ ᠤ᠋ ᠮᠣᠷᠢ ᠡᠢᠮᠦ ᠤᠳᠠᠭᠠᠨ ᠤᠤ?
ᠪᠢ ᠢᠷᠡᠭᠡᠳ ᠭᠤᠷᠪᠠᠨ ᠰᠠᠷᠠ ᠪᠣᠯᠵᠤ ᠪᠠᠢᠨᠠ!》 ᠭᠡᠵᠦ
ᠮᠣᠷᠢ ᠪᠠᠨ ᠲᠣᠭᠲᠠᠭᠠᠵᠤ ᠶᠠᠳᠠᠨ ᠪᠠᠢᠵᠤ
ᠨᠠᠷᠠ ᠶ᠋ᠢ ᠨᠢᠭᠡ ᠪᠤᠷᠤᠭᠤ ᠡᠷᠭᠢᠭᠡᠳ
ᠴᠠᠭᠠᠨ ᠬᠤᠢ ᠪᠣᠯᠤᠨ ᠣᠳᠪᠠ᠃
ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠬᠣᠢᠨᠠ ᠭᠠᠷᠤᠭᠠᠳ
ᠴᠡᠩᠭᠡᠯ᠂ ᠮᠢᠯ ᠤᠯᠠᠭᠠᠨ ᠬᠣᠶᠠᠷ ᠬᠦᠯᠦᠭ
ᠵᠡᠭᠳᠡᠯ ᠴᠠᠭᠠᠨ ᠮᠣᠷᠢ ᠶ᠋ᠢ ᠭᠦᠢᠴᠡᠨ ᠬᠦᠷᠬᠦ ᠳ᠋ᠦ᠍
ᠠᠷᠪᠠᠨ ᠵᠦᠭ ᠦ᠋ᠨ ᠡᠷᠡᠴᠦᠳ
ᠡᠮᠦᠨᠡᠭᠦᠷ ᠨᠢ ᠭᠠᠷᠤᠭᠠᠳ
ᠭᠤᠷᠪᠠ ᠭᠤᠷᠪᠠᠨ ᠲᠠᠭᠠᠷ ᠡᠯᠡᠰᠦ ᠪᠡᠨ
ᠠᠰᠬᠠᠴᠢᠬᠠᠭᠠᠳ ᠳᠠᠪᠬᠢᠭᠤᠯᠪᠠ᠃
ᠴᠡᠩᠭᠡᠯ᠂ ᠮᠢᠯ ᠤᠯᠠᠭᠠᠨ ᠬᠣᠶᠠᠷ
ᠡᠮᠦᠨᠡᠰᠢ ᠭᠤᠷᠪᠠ ᠭᠤᠷᠪᠠ ᠠᠯᠬᠤᠭᠠᠳ ᠵᠣᠭᠰᠣᠪᠠ᠃
ᠲᠩᠷᠢ ᠶ᠋ᠢᠨ ᠬᠠᠢᠷᠠᠲᠤ ᠪᠥᠬᠡ ᠬᠠᠷᠠ ᠬᠥᠬᠥᠯ ᠪᠠᠭᠠᠲᠤᠷ ᠨᠢ᠄
《ᠮᠢᠨᠦ ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠦ᠋ᠨ ᠠᠨᠢᠷ ᠮᠥᠨ ᠪᠠᠢᠨᠠ!
ᠮᠢᠨᠦ ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠦ᠋ᠨ ᠲᠣᠭᠣᠰᠣ ᠮᠥᠨ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠡᠳ
ᠡᠮᠦᠨᠡᠰᠢ ᠭᠤᠷᠪᠠ ᠠᠯᠬᠤᠭᠠᠳ ᠵᠣᠭᠰᠣᠪᠠ᠃
ᠴᠡᠩᠭᠡᠯ᠂ ᠮᠢᠯ ᠤᠯᠠᠭᠠᠨ ᠬᠣᠶᠠᠷ ᠤ᠋ᠨ
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠤᠳ ᠨᠢ
ᠨᠢᠰᠦᠭᠡᠳ ᠬᠦᠷᠦᠭᠡᠳ ᠢᠷᠡᠪᠡ᠃
ᠠᠯᠲᠠᠨ ᠪᠤᠭᠤ ᠶ᠋ᠢᠨ ᠠᠷᠠᠰᠤᠨ ᠳᠡᠭᠡᠰᠦ ᠶ᠋ᠢ
ᠠᠩᠭᠠᠯᠵᠠᠭᠴᠢ ᠠᠮᠠᠨ ᠬᠦᠵᠦᠭᠦᠨ ᠳ᠋ᠦ᠋ᠨᠢ
ᠴᠢᠪᠬᠢᠲᠡᠯᠡ ᠬᠢᠭᠡᠳ ᠪᠠᠷᠢᠭᠠᠳ ᠠᠪᠤᠪᠠ᠃
ᠲᠩᠷᠢ ᠶ᠋ᠢᠨ ᠬᠠᠢᠷᠠᠲᠤ ᠪᠥᠬᠡ
ᠬᠠᠷᠠ ᠬᠥᠬᠥᠯ ᠪᠠᠭᠠᠲᠤᠷ ᠤ᠋ᠨ
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠨᠢ ᠵᠣᠭᠰᠣᠴᠢᠭᠠᠳ
ᠵᠡᠭᠡᠷᠡ ᠶ᠋ᠢᠨ ᠰᠢᠯᠪᠢ ᠲᠡᠢ
ᠵᠡᠰ ᠬᠣᠩᠰᠢᠶᠠᠷᠲᠤ ᠨᠢ
ᠵᠡᠭᠳᠡᠯ ᠴᠠᠭᠠᠨ ᠮᠣᠷᠢᠨ ᠤ᠋ ᠲᠣᠯᠣᠭᠠᠢ ᠶ᠋ᠢ
ᠡᠬᠢ ᠦᠭᠡᠢ ᠰᠢᠪᠬᠠᠳᠠᠭᠠᠳ
ᠨᠢᠯᠪᠤᠰᠤ ᠨᠢ ᠭᠣᠭᠣᠵᠢᠭᠠᠳ
ᠨᠢᠰᠦ ᠲᠡᠢ ᠪᠡᠨ ᠨᠡᠢᠯᠡᠭᠡᠳ
ᠨᠢᠰᠦ ᠨᠢ ᠭᠣᠭᠣᠵᠢᠵᠤ
ᠰᠢᠯᠦᠰᠦ ᠲᠡᠢ ᠪᠡᠨ ᠨᠡᠢᠯᠡᠭᠡᠳ
ᠣᠷᠢᠯᠠᠵᠤ ᠪᠠᠷᠬᠢᠷᠠᠵᠤ ᠬᠦᠷᠴᠦ ᠢᠷᠡᠪᠡ᠃
ᠨᠢᠭᠡ ᠠᠲᠠᠭᠠ ᠮᠠᠷᠭᠤᠭᠠ ᠶ᠋ᠢ
ᠴᠡᠩᠭᠡᠯ ᠬᠦᠦ ᠠᠪᠤᠪᠠ ᠭᠡᠨᠡ᠃
* * *
ᠭᠤᠷᠪᠠᠨ ᠵᠢᠯ ᠦ᠋ᠨ ᠭᠠᠵᠠᠷ ᠲᠤ᠌
ᠥᠨᠥᠴᠢᠨ ᠰᠡᠭᠦᠵᠢ ᠶ᠋ᠢᠨ ᠶᠠᠰᠤ ᠲᠠᠯᠪᠢᠭᠠᠳ
ᠰᠡᠭᠦᠵᠢ ᠶ᠋ᠢᠨ ᠨᠦᠬᠡ ᠪᠡᠷ ᠨᠡᠪᠲᠡ ᠬᠠᠷᠪᠤᠬᠤ ᠪᠣᠯᠵᠤ
ᠲᠩᠷᠢ ᠶ᠋ᠢᠨ ᠬᠠᠢᠷᠠᠲᠤ ᠪᠥᠬᠡ
ᠬᠠᠷᠠ ᠬᠥᠬᠥᠯ ᠪᠠᠭᠠᠲᠤᠷ ᠢᠷᠡᠵᠦ
ᠬᠠᠷᠪᠤᠭᠠ ᠬᠠᠷᠪᠤᠬᠤ ᠳ᠋ᠤ᠌
ᠰᠤᠮᠤ ᠨᠢ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠭᠠᠵᠠᠷ ᠬᠦᠷᠦᠭᠡᠳ
ᠰᠤᠯᠠᠷᠠᠵᠤ ᠳᠣᠷᠣᠭᠰᠢ ᠤᠨᠠᠪᠠ ᠭᠡᠨᠡ᠃
《ᠴᠡᠩᠭᠡᠯ ᠳᠡᠭᠦᠦ ᠮᠢᠨᠢ ᠴᠢ
ᠰᠠᠢᠨ ᠬᠠᠷᠠᠵᠤ ᠪᠠᠢᠭᠠᠷᠠᠢ
ᠠᠯᠤᠰ ᠲᠤ᠌ ᠪᠤᠰᠬᠠᠭᠰᠠᠨ ᠰᠡᠭᠦᠵᠢ ᠶ᠋ᠢ
ᠠᠬᠠ ᠨᠢ ᠪᠢ ᠬᠠᠷᠪᠤᠶᠠ!》 ᠭᠡᠵᠦ ᠬᠡᠯᠡᠭᠡᠳ
ᠮᠢᠯ ᠤᠯᠠᠭᠠᠨ ᠪᠣᠰᠴᠤ ᠢᠷᠡᠭᠡᠳ
ᠬᠠᠷᠪᠤᠭᠠ ᠬᠠᠷᠪᠤᠬᠤ ᠳ᠋ᠤ᠌ ᠰᠤᠮᠤ ᠨᠢ
ᠭᠤᠷᠪᠠᠨ ᠵᠢᠯ ᠦ᠋ᠨ ᠭᠠᠵᠠᠷ ᠲᠤ᠌ ᠪᠠᠢᠭᠠ
ᠥᠨᠥᠴᠢᠨ ᠰᠡᠭᠦᠵᠢᠨ ᠶᠠᠰᠤᠨ ᠤ᠋
ᠥᠴᠦᠬᠡᠨ ᠨᠦᠬᠡᠨ ᠦ᠌ ᠳᠤᠮᠳᠠᠭᠤᠷ ᠭᠠᠷᠤᠭᠠᠳ
ᠲᠦᠮᠡᠨ ᠲᠡᠮᠡᠭᠡᠨ ᠦ᠌ ᠳᠤᠮᠳᠠ
ᠲᠦᠢᠮᠡᠷ ᠪᠤᠲᠠᠷᠠᠨ ᠲᠣᠰᠴᠢᠬᠠᠪᠠ ᠭᠡᠨᠡ᠃
ᠬᠣᠶᠠᠳᠠᠬᠢ ᠮᠠᠷᠭᠤᠭᠠ ᠶ᠋ᠢ ᠪᠠᠰᠠ ᠯᠠ
ᠴᠡᠩᠭᠡᠯ ᠬᠦᠦ ᠣᠯᠪᠠ᠃
* * *
— — — —
① ᠪᠤᠲᠤᠩ – ᠡᠷᠡ ᠵᠡᠷᠯᠢᠭ ᠭᠠᠬᠠᠢ
ᠡᠴᠢᠭᠡ ᠡᠬᠡ ᠶ᠋ᠢᠨ ᠥᠭᠭᠦᠭᠰᠡᠨ
ᠡᠭᠡᠮ ᠳᠠᠯᠤ ᠪᠠᠷ ᠪᠣᠯᠤᠯᠴᠠᠳᠠᠭ
ᠡᠴᠦᠰ ᠦ᠋ᠨ ᠨᠢᠭᠡᠨ ᠮᠠᠷᠭᠤᠭᠠ ᠡᠬᠢᠯᠡᠬᠦ ᠳ᠋ᠦ᠍᠄
《ᠴᠡᠩᠭᠡᠯ ᠳᠡᠭᠦᠦ ᠮᠢᠨᠢ ᠴᠢ
ᠡᠨᠳᠡ ᠠᠮᠠᠷᠠᠵᠤ ᠪᠠᠢᠭᠠᠷᠠᠢ
ᠲᠩᠷᠢ ᠶ᠋ᠢᠨ ᠬᠠᠢᠷᠠᠲᠤ ᠪᠥᠬᠡ ᠲᠡᠢ
ᠠᠬᠠ ᠨᠢ ᠡᠨᠳᠡ ᠠᠪᠤᠯᠴᠠᠶᠠ!》 ᠭᠡᠵᠦ
ᠮᠢᠯ ᠤᠯᠠᠭᠠᠨ ᠬᠡᠯᠡᠭᠡᠳ
ᠮᠠᠭᠰᠢᠵᠤ ᠬᠦᠷᠵᠦ ᠣᠴᠢᠭᠠᠳ
ᠲᠩᠷᠢ ᠶ᠋ᠢᠨ ᠬᠠᠢᠷᠠᠲᠤ ᠪᠥᠬᠡ ᠶ᠋ᠢ
ᠲᠡᠪᠡᠷᠢᠨ ᠪᠠᠷᠢᠵᠤ ᠠᠪᠤᠭᠠᠳ
ᠲᠩᠷᠢ ᠶ᠋ᠢᠨ ᠣᠳᠣ ᠲᠣᠭᠠᠯᠠᠨ ᠡᠷᠭᠢᠭᠦᠯᠵᠦ
ᠭᠠᠵᠠᠷ ᠤ᠋ᠨ ᠦᠨᠳᠦᠰᠦ ᠲᠣᠭᠠᠯᠠᠨ ᠡᠷᠭᠢᠭᠦᠯᠵᠦ
ᠡᠷᠭᠢᠭᠦᠯᠵᠦ ᠡᠷᠭᠢᠭᠦᠯᠵᠦ ᠡᠷᠡᠬᠡᠢ ᠶ᠋ᠢᠨ ᠴᠢᠨᠡᠭᠡ ᠪᠣᠯᠭᠠᠵᠤ
ᠬᠤᠮᠢᠵᠤ ᠬᠤᠮᠢᠵᠤ ᠬᠤᠷᠤᠭᠤᠪᠴᠢ ᠶ᠋ᠢᠨ ᠴᠢᠨᠡᠭᠡ ᠪᠣᠯᠭᠠᠵᠤ ᠬᠠᠶᠠᠭᠠᠳ
ᠴᠡᠭᠡᠵᠢᠨ ᠳᠡᠭᠡᠷᠡ ᠨᠢ ᠰᠠᠭᠤᠵᠤ
ᠰᠢᠩᠭᠡᠨ ᠳᠠᠭᠤ ᠶ᠋ᠢ ᠨᠢ ᠭᠠᠷᠭᠠᠭᠠᠳ
ᠬᠠᠷᠠ ᠲᠣᠩᠭᠣᠷᠠᠭ ᠢ᠋ᠶ᠋ᠠᠨ ᠭᠠᠷᠭᠠᠵᠤ
ᠬᠦᠵᠦᠭᠦᠨ ᠳᠡᠭᠡᠷᠡ ᠨᠢ ᠬᠦᠷᠭᠡᠲᠡᠯᠡ
ᠠᠭᠤᠯᠠ ᠶ᠋ᠢᠨ ᠴᠢᠨᠡᠭᠡ ᠴᠣᠬᠣᠷ ᠮᠣᠷᠢ ᠨᠢ
ᠨᠢᠰᠦᠨ ᠭᠦᠶᠦᠵᠦ ᠬᠦᠷᠴᠦ ᠢᠷᠡᠭᠡᠳ᠄
《ᠡᠭᠦᠨ ᠢ᠋ ᠠᠯᠠᠭᠠᠳ ᠶᠠᠭᠤ ᠬᠢᠨᠡ?
ᠨᠠᠢᠷ ᠬᠤᠷᠢᠮ ᠲᠠᠯᠪᠢᠬᠤ ᠪᠠᠨ ᠶᠠᠭᠠᠬᠢᠯᠠ
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠪᠠᠨ ᠵᠠᠯᠠᠬᠤ ᠪᠠᠨ ᠶᠠᠭᠠᠬᠢᠯᠠ!
ᠳᠡᠭᠦᠦ ᠪᠡᠨ ᠬᠢᠵᠦ ᠠᠪᠤᠭᠠᠳ
ᠮᠣᠷᠢ ᠪᠠᠨ ᠤᠶᠠᠭᠤᠯᠵᠤ
ᠮᠣᠳᠣ ᠪᠠᠨ ᠬᠤᠭᠤᠯᠤᠭᠤᠯᠬᠤ ᠪᠠᠨ ᠶᠠᠭᠠᠬᠢᠯᠠ!》ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍᠄
《ᠡᠪᠡᠰᠦᠨ ᠢᠳᠡᠭᠡᠲᠦ ᠮᠠᠯ ᠢᠩᠭᠢᠵᠦ ᠪᠠᠢᠬᠤ ᠳ᠋ᠤ᠌
ᠡᠷᠡ ᠲᠥᠷᠥᠭᠰᠡᠨ ᠪᠢᠳᠡ ᠬᠣᠶᠠᠷ ᠶᠠᠭᠠᠬᠢᠯᠠ ᠳᠠ!》 ᠭᠡᠵᠦ
ᠠᠷᠤ ᠶ᠋ᠢᠨ ᠰᠢᠷᠣᠢ ᠪᠠᠨ ᠭᠦᠪᠢᠭᠡᠳ
ᠠᠬᠠ ᠳᠡᠭᠦᠦ ᠭᠤᠷᠪᠠ ᠪᠣᠯᠪᠠ᠃
* * *
ᠴᠢᠩ ᠵᠣᠷᠢᠭᠲᠤ ᠬᠦᠦ
ᠡᠷᠡ ᠶ᠋ᠢᠨ ᠭᠤᠷᠪᠠᠨ ᠮᠠᠷᠭᠤᠭᠠ ᠣᠯᠵᠤ
ᠨᠠᠢᠷ ᠬᠤᠷᠢᠮ ᠢ᠋ᠶ᠋ᠠᠨ ᠬᠢᠵᠦ
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠪᠠᠨ ᠵᠠᠯᠠᠪᠠ᠃
ᠬᠠᠨ ᠪᠤᠭᠤᠷᠤᠯ ᠠᠪᠤ ᠨᠢ ᠬᠡᠯᠡᠪᠡ᠄
《ᠬᠡᠦᠬᠡᠨ ᠮᠢᠨᠢ ᠴᠢ ᠳᠤᠷᠠᠲᠠᠢ ᠪᠠᠨ ᠬᠡᠯᠡ
ᠠᠯᠪᠠᠲᠤ ᠬᠣᠰᠢᠭᠤᠨ ᠠ᠋ᠴᠠ ᠪᠠᠨ ᠶᠠᠭᠤ ᠠᠪᠤᠨᠠ ᠪᠣᠢ?
ᠠᠳᠤᠭᠤ ᠮᠠᠯ ᠠ᠋ᠴᠠ ᠪᠠᠨ ᠶᠠᠭᠤ ᠠᠪᠤᠨᠠ ᠪᠣᠢ?
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠬᠡᠯᠡᠪᠡ ᠄
《ᠠᠯᠪᠠᠲᠤ ᠬᠣᠰᠢᠭᠤᠨ ᠤ᠋ ᠪᠠᠨ ᠳᠣᠲᠣᠷᠠ ᠠ᠋ᠴᠠ
ᠬᠡᠦᠬᠡᠳ ᠢ᠋ ᠨᠢ ᠴᠤᠭᠯᠠᠭᠤᠯᠵᠤ ᠥᠭ!
ᠠᠳᠤᠭᠤ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠳᠣᠲᠣᠷᠠ ᠠ᠋ᠴᠠ
ᠲᠥᠯ ᠢ᠋ ᠨᠢ ᠴᠤᠭᠯᠠᠭᠤᠯᠵᠤ ᠥᠭ!》
ᠠᠯᠪᠠᠲᠤ ᠶ᠋ᠢᠨ ᠢ᠋ᠶ᠋ᠡᠨ ᠳᠣᠲᠣᠷᠠ ᠠ᠋ᠴᠠ
ᠬᠡᠦᠬᠡᠳ ᠢ᠋ ᠴᠤᠭᠯᠠᠭᠤᠯᠵᠤ ᠥᠭᠪᠡ᠂
ᠠᠳᠤᠭᠤ ᠮᠠᠯ ᠤ᠋ᠨ ᠢ᠋ᠶ᠋ᠠᠨ ᠳᠣᠲᠣᠷᠠ ᠠ᠋ᠴᠠ
ᠲᠥᠯ ᠢ᠋ ᠨᠢ ᠴᠤᠭᠯᠠᠭᠤᠯᠵᠤ ᠥᠭᠪᠡ᠃
ᠬᠡᠦᠬᠡᠳ ᠢ᠋ ᠨᠢ ᠠᠪᠤᠭᠠᠳ ᠶᠠᠪᠤᠬᠤ ᠳ᠋ᠤ᠌
ᠠᠯᠪᠠᠲᠤ ᠨᠢ ᠤᠬᠢᠯᠠᠨ ᠳᠠᠭᠠᠭᠠᠳ ᠶᠠᠪᠤᠪᠠ᠃
ᠲᠥᠯ ᠢ᠋ ᠨᠢ ᠬᠥᠭᠡᠭᠡᠳ ᠶᠠᠪᠤᠬᠤ ᠳ᠋ᠤ᠌
ᠠᠳᠤᠭᠤ ᠮᠠᠯ ᠨᠢ ᠳᠠᠭᠠᠭᠠᠳ ᠶᠠᠪᠤᠪᠠ᠃
ᠠᠯᠪᠠᠲᠤ ᠬᠥᠮᠦᠨ ᠦᠷᠡ ᠶ᠋ᠢᠨ ᠢ᠋ᠶ᠋ᠡᠨ
ᠠᠷᠤ ᠠ᠋ᠴᠠ ᠳᠠᠭᠠᠳᠠᠭ ᠪᠠᠢᠲᠠᠯᠠ
ᠠᠳᠠᠭ ᠤ᠋ᠨ ᠡᠪᠡᠰᠦᠨ ᠲᠡᠵᠢᠭᠡᠯᠲᠦ ᠮᠠᠯ
ᠲᠥᠯ ᠦ᠋ᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠳᠠᠭᠠᠳᠠᠭ ᠪᠠᠢᠲᠠᠯᠠ
ᠨᠠᠰᠤᠲᠠᠢ ᠪᠢᠳᠡ ᠬᠣᠶᠠᠷ
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠪᠠᠨ
ᠶᠡᠷᠡ ᠶᠢᠰᠦᠨ ᠵᠢᠯ ᠦ᠋ᠨ ᠭᠠᠵᠠᠷ ᠶᠠᠪᠤᠭᠤᠯᠤᠭᠠᠳ
ᠠᠳᠠ ᠶᠠᠭᠠᠬᠢᠵᠤ ᠰᠠᠭᠤᠬᠤ ᠪᠣᠢ ᠭᠡᠳ
ᠪᠠᠳᠮᠠ ᠭᠡᠷᠡᠯ ᠬᠠᠨ ᠤ᠋ ᠬᠢᠨ
ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠳᠠᠭᠠᠵᠤ ᠨᠡᠭᠦᠭᠡᠳ ᠶᠠᠪᠤᠪᠠ᠃
* * *
ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ
ᠪᠠᠳᠮᠠ ᠭᠡᠷᠡᠯ ᠬᠠᠨ ᠢ᠋ ᠨᠡᠭᠦᠯᠭᠡᠵᠦ ᠶᠠᠪᠤᠭᠠᠳ
ᠬᠤᠤᠷᠠᠨ ᠱᠣᠣ ᠳᠠᠯᠠᠢ ᠶ᠋ᠢ ᠭᠡᠲᠦᠯᠦᠨ
ᠬᠣᠣᠷᠲᠠᠨ ᠶᠡᠬᠡ ᠳᠠᠢᠰᠤᠨ ᠠ᠋ᠴᠠ ᠭᠠᠷᠭᠠᠴᠢᠬᠠᠭᠠᠳ
ᠮᠢᠯ ᠤᠯᠠᠭᠠᠨ ᠬᠡᠯᠡᠪᠡ ᠄
《ᠴᠡᠩᠭᠡᠯ ᠪᠡᠳᠡ ᠬᠣᠶᠠᠷ
ᠠᠯᠲᠠᠨ ᠡᠭᠡᠮᠦᠭ ᠢ᠋ᠶ᠋ᠡᠨ ᠰᠣᠯᠢᠵᠤ ᠶᠠᠪᠤᠶᠠ!
ᠴᠢ ᠰᠠᠢᠨ ᠶᠠᠪᠤᠵᠤ ᠪᠠᠢᠪᠠᠯ
ᠴᠢᠨᠦ ᠠᠯᠲᠠᠨ ᠡᠭᠡᠮᠦᠭ
ᠮᠢᠨᠦ ᠴᠢᠬᠢᠨ ᠳ᠋ᠦ᠍ ᠰᠠᠢᠨ ᠥᠩᠭᠡ ᠭᠠᠷᠤᠨᠠ᠃
ᠴᠢ ᠮᠠᠭᠤ ᠶᠠᠪᠤᠵᠤ ᠪᠠᠢᠪᠠᠯ
ᠴᠢᠨᠦ ᠠᠯᠲᠠᠨ ᠡᠭᠡᠮᠦᠭ
ᠮᠢᠨᠦ ᠴᠢᠬᠢᠨ ᠳ᠋ᠦ᠍ ᠮᠠᠭᠤ ᠥᠩᠭᠡ ᠭᠠᠷᠤᠨᠠ᠃
ᠪᠢ ᠰᠠᠢᠨ ᠶᠠᠪᠤᠵᠤ ᠪᠠᠢᠪᠠᠯ
ᠮᠢᠨᠦ ᠠᠯᠲᠠᠨ ᠡᠭᠡᠮᠦᠭ
ᠴᠢᠨᠦ ᠴᠢᠬᠢᠨ ᠳ᠋ᠦ᠍ ᠰᠠᠢᠨ ᠥᠩᠭᠡ ᠭᠠᠷᠤᠨᠠ᠃
ᠪᠢ ᠮᠠᠭᠤ ᠶᠠᠪᠤᠵᠤ ᠪᠠᠢᠪᠠᠯ
ᠮᠢᠨᠦ ᠠᠯᠲᠠᠨ ᠡᠭᠡᠮᠦᠭ
ᠴᠢᠨᠦ ᠴᠢᠬᠢᠨ ᠳ᠋ᠦ᠍ ᠮᠠᠭᠤ ᠥᠩᠭᠡ ᠭᠠᠷᠤᠨᠠ᠃
ᠴᠢ ᠪᠢᠳᠡ ᠬᠣᠶᠠᠷ
ᠰᠠᠢᠨ ᠮᠠᠭᠤ ᠶᠠᠪᠤᠵᠤ ᠪᠠᠢᠬᠤ ᠪᠠᠨ
ᠠᠯᠲᠠᠨ ᠡᠭᠡᠮᠦᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠡᠳᠡᠯᠴᠡᠶᠡ!》 ᠭᠡᠵᠦ ᠬᠡᠯᠡᠭᠡᠳ
ᠡᠭᠡᠮᠦᠭ ᠢ᠋ᠶ᠋ᠡᠨ ᠰᠣᠯᠢᠵᠤ ᠵᠡᠭᠦᠭᠡᠳ
ᠮᠢᠯ ᠤᠯᠠᠭᠠᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠪᠠ᠃
ᠲᠡᠭᠡᠭᠡᠳ ᠴᠡᠩᠭᠡᠯ ᠬᠡᠯᠡᠪᠡ ᠄
《ᠲᠡᠭᠷᠢ ᠶ᠋ᠢᠨ ᠬᠠᠢᠷᠠᠲᠤ ᠪᠥᠬᠡ
ᠬᠠᠷᠠ ᠬᠥᠬᠥᠯ ᠪᠠᠭᠠᠲᠤᠷ ᠴᠢ
ᠪᠠᠳᠮᠠ ᠭᠡᠷᠡᠯ ᠬᠠᠨ ᠢ᠋ ᠨᠡᠭᠦᠯᠭᠡᠵᠦ
ᠳᠠᠭᠠᠭᠠᠳ ᠶᠠᠪᠤᠵᠤ ᠪᠠᠢᠭᠠᠷᠠᠢ!
ᠪᠢ ᠤᠷᠢᠳᠠ ᠪᠠᠷ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠣᠴᠢᠭᠠᠳ
ᠨᠠᠢᠷ ᠬᠤᠷᠢᠮ ᠢ᠋ᠶ᠋ᠠᠨ ᠲᠥᠬᠥᠭᠡᠷᠦᠶᠡ 》 ᠭᠡᠳ
ᠲᠦᠷᠦᠭᠦᠯᠡᠨ ᠭᠦᠶᠦᠯᠭᠡᠵᠦ ᠶᠠᠪᠤᠪᠠ ᠃
* * *
ᠴᠢᠩ ᠵᠣᠷᠢᠭᠲᠤ ᠪᠠᠭᠠᠲᠤᠷ
ᠴᠡᠩᠭᠡᠯ ᠬᠦᠦ ᠶ᠋ᠢᠨ ᠬᠠᠷᠢᠬᠤ ᠳ᠋ᠤ᠌
ᠪᠣᠮᠪᠣᠯᠠᠢ ᠴᠠᠭᠠᠨ ᠥᠷᠭᠥᠭᠡ ᠨᠢ
ᠪᠦᠭᠦᠳᠡ ᠲᠠᠭ ᠴᠢᠭ ᠨᠣᠷᠠᠴᠢᠬᠠᠭᠠᠳ
ᠥᠷᠭᠥᠭᠡ ᠶ᠋ᠢᠨ ᠰᠠᠭᠤᠷᠢ ᠳᠡᠭᠡᠷᠡ ᠨᠢ
ᠥᠨᠳᠥᠷ ᠡᠪᠡᠰᠦ ᠤᠷᠭᠤᠵᠠᠢ᠃
ᠬᠠᠷᠠᠵᠤ ᠠᠵᠢᠭᠯᠠᠭᠠᠳ ᠦᠵᠡᠬᠦ ᠳ᠋ᠦ᠍
ᠬᠠᠷᠠᠭᠳᠠᠬᠤ ᠶᠠᠭᠤᠮᠠ ᠠᠯᠠᠭᠠ ᠪᠠᠢᠪᠠ᠃
ᠬᠥᠬᠡ ᠮᠥᠩᠭᠥᠨ ᠰᠢᠯᠢ ᠳ᠋ᠦ᠍ ᠭᠠᠷᠴᠤ ᠬᠠᠷᠠᠬᠤ ᠳ᠋ᠤ᠌
ᠬᠤᠤᠷᠠᠨ ᠱᠣᠣ ᠳᠠᠯᠠᠢ ᠶ᠋ᠢᠨ ᠬᠥᠪᠡᠭᠡᠨ ᠳ᠋ᠦ᠍
ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠵᠢᠭᠠᠰᠤ ᠱᠦᠭᠦᠵᠦ ᠪᠠᠢᠪᠠ᠃
ᠬᠦᠦ ᠭᠦᠶᠦᠯᠭᠡᠵᠦ ᠶᠠᠪᠤᠭᠠᠳ
ᠬᠦᠷᠴᠦ ᠲᠡᠨᠳᠡ ᠣᠴᠢᠭᠠᠳ
ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠭᠡᠳ
ᠠᠰᠠᠭᠤᠨ ᠰᠤᠷᠠᠵᠤ ᠬᠡᠯᠡᠭᠰᠡᠨ ᠨᠢ᠄
《ᠠᠪᠤ ᠡᠵᠢ ᠶᠠᠭᠠᠬᠢᠴᠢᠬᠠᠪᠠ?
ᠠᠯᠪᠠᠲᠤ ᠬᠣᠰᠢᠭᠤ ᠬᠠᠮᠢᠭᠠ ᠶᠠᠪᠤᠪᠠ? 》 ᠭᠡᠬᠦ ᠳ᠋ᠦ᠍
ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ᠄
ᠵᠡᠭᠦᠨ ᠡᠮᠦᠨᠡ ᠵᠦᠭ ᠲᠦ᠍
ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠮᠤᠤᠰ ①
ᠠᠪᠤᠭᠠᠳ ᠶᠠᠪᠤᠵᠤ ᠣᠳᠪᠠ 》 ᠭᠡᠵᠦ ᠬᠡᠯᠡᠵᠡᠢ᠃
ᠴᠡᠩᠭᠡᠯ ᠬᠦᠦ ᠲᠡᠳᠡᠨ ᠳ᠋ᠦ᠍
ᠪᠢᠲᠡᠭᠦᠦ ᠲᠤᠭᠤᠷᠠᠢᠲᠤ ᠬᠤᠯᠠᠨ
ᠪᠣᠰᠤᠭᠠ ᠰᠤᠷ ᠲᠠᠢ ᠰᠢᠯᠦᠭᠦᠰᠦ
ᠬᠠᠷᠪᠤᠵᠤ ᠠᠯᠠᠵᠤ ᠥᠭᠭᠦᠭᠡᠳ
《ᠨᠤᠲᠤᠭ ᠳᠡᠭᠡᠷᠡ ᠮᠢᠨᠢ ᠣᠴᠢᠭᠠᠳ
ᠨᠠᠰᠤᠲᠠᠢ ᠲᠠ ᠬᠣᠶᠠᠷ
ᠪᠣᠮᠪᠣᠯᠠᠢ ᠴᠠᠭᠠᠨ ᠭᠡᠷ ᠦ᠋ᠨ ᠮᠢᠨᠢ
ᠡᠪᠡᠰᠦ ᠶ᠋ᠢ ᠠᠷᠢᠯᠭᠠᠭᠠᠳ ᠰᠠᠭᠤᠵᠤ ᠪᠠᠢᠭᠠᠷᠠᠢ 》 ᠭᠡᠪᠡ᠃
* * *
ᠴᠢᠩ ᠵᠣᠷᠢᠭᠲᠤ ᠪᠠᠭᠠᠲᠤᠷ
ᠴᠡᠩᠭᠡᠯ ᠬᠦᠦ ᠶ᠋ᠢᠨ ᠬᠣᠯᠠ ᠶᠠᠪᠤᠬᠤ ᠭᠡᠲᠡᠯᠡ
ᠬᠠᠰᠠᠭ ᠲᠣᠳᠬᠠᠢ ᠰᠢᠷᠭᠠ ᠮᠣᠷᠢ ᠨᠢ ᠮᠠᠭᠤᠳᠠᠭᠠᠳ
ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠪᠠ᠃
ᠨᠢᠭᠡ ᠲᠠᠲᠠᠭᠠᠳ ᠠᠪᠬᠤ ᠳ᠋ᠤ᠌
ᠨᠢᠭᠡᠨ ᠠᠯᠬᠤᠮ ᠶᠠᠪᠤᠵᠤ
ᠭᠤᠷᠪᠠ ᠲᠠᠲᠠᠭᠠᠳ ᠠᠪᠬᠤ ᠳ᠋ᠤ᠌
ᠮᠣᠷᠢ ᠨᠢ ᠲᠠᠭ ᠵᠣᠭᠰᠣᠪᠠ᠃
ᠴᠡᠩᠭᠡᠯ ᠬᠦᠦ ᠬᠠᠷᠠᠢᠵᠤ ᠪᠠᠭᠤᠭᠠᠳ᠄
《ᠴᠢ ᠶᠠᠭᠤᠨ ᠳ᠋ᠤ᠌ ᠶᠠᠪᠤᠬᠤ ᠦᠭᠡᠢ ᠪᠣᠢ? 》 ᠭᠡᠵᠦ
ᠮᠣᠷᠢ ᠠ᠋ᠴᠠ ᠪᠠᠨ ᠠᠰᠠᠭᠤᠬᠤ ᠳ᠋ᠤ᠌
《ᠴᠢ ᠬᠥᠮᠦᠨ ᠪᠣᠯᠤᠭᠰᠠᠨ ᠠ᠋ᠴᠠ ᠨᠡᠰᠢ
ᠶᠠᠪᠤᠭᠰᠠᠨ ᠭᠠᠵᠠᠷ ᠴᠢᠨᠢ ᠬᠡᠳᠦᠢ ᠪᠣᠢ
ᠪᠢ ᠬᠦᠯᠦᠭ ᠪᠣᠯᠤᠭᠰᠠᠨ ᠠ᠋ᠴᠠ ᠨᠠᠰᠢ
ᠢᠳᠡᠭᠰᠡᠨ ᠡᠪᠡᠰᠦ ᠮᠢᠨᠢ ᠬᠡᠳᠦᠢ ᠪᠣᠢ? 》 ᠭᠡᠪᠡ᠃
ᠬᠥᠳᠡᠭᠡ ᠶ᠋ᠢᠨ ᠴᠢᠨᠡᠭᠡ
ᠬᠥᠬᠡ ᠮᠥᠩᠭᠥᠨ ᠬᠡᠪᠢᠰ ᠢ᠋ᠶ᠋ᠡᠨ ᠠᠪᠴᠤ ᠳᠡᠪᠢᠰᠦᠭᠡᠳ
ᠬᠥᠲᠥᠯ ᠦ᠋ᠨ ᠴᠢᠨᠡᠭᠡ
ᠬᠥᠬᠡ ᠮᠥᠩᠭᠥᠨ ᠡᠮᠡᠭᠡᠯ ᠢ᠋ᠶ᠋ᠡᠨ ᠠᠪᠴᠤ ᠳᠡᠷᠡᠯᠡᠭᠡᠳ
ᠬᠠᠰᠠᠭ ᠲᠣᠳᠬᠠᠢ ᠮᠣᠷᠢ ᠪᠠᠨ
ᠬᠤᠯᠠᠨ ᠲᠠᠢ ᠨᠡᠢᠯᠡᠭᠦᠯᠦᠨ ᠬᠥᠭᠡᠭᠡᠳ
ᠰᠡᠷᠢᠳᠡᠭ ᠦᠭᠡᠢ ᠤᠨᠲᠠᠯᠲᠠ ᠪᠠᠷ ᠤᠨᠲᠠᠪᠠ ᠃
* * *
ᠮᠢᠯ ᠤᠯᠠᠭᠠᠨ ᠬᠦᠦ
ᠣᠷᠣᠨ ᠨᠤᠲᠤᠭ ᠲᠤ᠌ ᠪᠠᠨ ᠣᠴᠢᠭᠠᠳ ᠪᠠᠢᠬᠤ ᠳ᠋ᠤ᠌
ᠴᠡᠩᠭᠡᠯ ᠦ᠋ᠨ ᠠᠯᠲᠠᠨ ᠡᠭᠡᠮᠦᠭ
ᠵᠢᠭᠲᠡᠢ ᠮᠠᠭᠤ ᠥᠩᠭᠡ ᠭᠠᠷᠴᠤ ᠬᠠᠷᠠᠯᠠᠪᠠ᠃
ᠴᠡᠩᠭᠡᠯ ᠳᠡᠭᠦᠦ ᠪᠡᠨ ᠬᠠᠢᠭᠠᠳ②
ᠮᠢᠯ ᠤᠯᠠᠭᠠᠨ ᠢ᠋ ᠢᠷᠡᠬᠦ ᠳ᠋ᠦ᠍
ᠪᠣᠮᠪᠤᠯᠠᠢ ᠴᠠᠭᠠᠨ ᠥᠷᠭᠥᠭᠡ ᠳᠣᠲᠣᠷᠠ ᠠ᠋ᠴᠠ
ᠲᠣᠬᠣᠢ ᠳ᠋ᠠᠭᠠᠨ ᠬᠦᠷᠲᠡᠯᠡ ᠤᠯᠠᠢᠭᠰᠠᠨ ᠭᠠᠷ ᠲᠠᠢ
ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠭᠠᠷᠴᠤ ᠢᠷᠡᠪᠡ᠃
ᠲᠡᠳᠡᠨ ᠡᠴᠡ ᠴᠡᠩᠭᠡᠯ ᠢ᠋ ᠠᠰᠠᠭᠤᠬᠤ ᠳ᠋ᠤ᠌᠄
《ᠵᠡᠭᠦᠨ ᠡᠮᠦᠨᠡᠲᠦ ᠵᠦᠭ ᠲᠦ᠍
ᠠᠪᠤ ᠡᠵᠢ ᠶ᠋ᠢ ᠨᠢ ᠪᠠᠷᠢᠵᠤ ᠠᠪᠠᠴᠢᠭᠰᠠᠨ
ᠠᠲᠤᠭᠠᠷ ᠬᠠᠷᠠ ᠮᠣᠣᠰ ᠤ᠋ᠨ
ᠠᠷᠤ ᠠ᠋ᠴᠠ ᠨᠢ ᠨᠡᠬᠡᠭᠡᠳ ᠶᠠᠪᠤᠪᠠ!》 ᠭᠡᠪᠡ᠃
ᠮᠢᠯ ᠤᠯᠠᠭᠠᠨ ᠳ᠋ᠠᠭᠠᠨ ᠮᠣᠷᠳᠠᠵᠤ
ᠮᠠᠩᠭᠤᠰ ᠤ᠋ᠨ ᠨᠤᠲᠤᠭ ᠲᠡᠰᠢ ᠭᠦᠶᠦᠯᠭᠡᠵᠦ ᠶᠠᠪᠤᠲᠠᠯᠠ
ᠬᠥᠳᠡᠭᠡ ᠶᠡᠬᠡ ᠰᠢᠯᠢ ᠳᠡᠭᠡᠷᠡ
ᠬᠥᠨᠳᠡᠯᠢᠳᠦᠨ ᠨᠢᠭᠡᠨ ᠡᠷᠡ ᠬᠡᠪᠲᠡᠵᠦ
ᠰᠤᠷ ᠰᠢᠭ᠋ ᠰᠤᠨᠤᠭᠠᠳ
ᠰᠤᠬᠠᠢ ᠰᠢᠭ᠋ ᠤᠯᠠᠢᠵᠤ ᠪᠠᠢᠪᠠ᠃
ᠡᠮᠡᠭᠡᠯ ᠬᠠᠵᠠᠭᠠᠷ ᠢ᠋ ᠨᠢ ᠦᠵᠡᠵᠦ ᠲᠠᠨᠢᠭᠠᠳ
ᠬᠠᠢᠷᠠᠨ ᠰᠠᠢᠨ ᠳᠡᠭᠦᠦ ᠶ᠋ᠢ ᠮᠢᠨᠢ
ᠬᠣᠷᠣᠭᠠᠭᠠᠳ ᠡᠨᠳᠡ ᠣᠷᠬᠢᠵᠠᠢ! ᠭᠡᠵᠦ ᠪᠣᠳᠣᠭᠠᠳ
ᠪᠠᠷᠬᠢᠷᠠᠨ ᠬᠠᠰᠬᠢᠷᠣᠨ ᠣᠴᠢᠬᠤ ᠳ᠋ᠤ᠌
ᠪᠠᠭᠠ ᠳᠡᠭᠦᠦ ᠴᠡᠩᠭᠡᠯ ᠨᠢ ᠰᠡᠷᠢᠭᠡᠳ
ᠪᠠᠶᠠᠷᠯᠠᠵᠤ ᠬᠣᠶᠠᠭᠤᠯᠠ ᠬᠥᠭᠡᠷᠦᠯᠳᠦᠵᠦ ᠪᠠᠢᠲᠠᠯᠠ
ᠬᠠᠰᠠᠭ ᠲᠤᠤᠬᠠᠢ ᠮᠣᠷᠢ ᠨᠢ ᠨᠢᠰᠦᠭᠡᠳ ᠢᠷᠡᠪᠡ᠃
ᠬᠣᠶᠠᠭᠤᠯᠠ ᠪᠠᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ
ᠬᠣᠣᠷᠲᠤ ᠮᠠᠩᠭᠤᠰ ᠤ᠋ᠨ ᠨᠤᠲᠤᠭ ᠲᠤ᠌ ᠣᠷᠣᠬᠤ ᠳ᠋ᠤ᠌
ᠬᠠᠨ ᠪᠤᠭᠤᠷᠤᠯ ᠠᠪᠤ ᠡᠵᠢ ᠨᠢ
ᠮᠣᠣᠰ ᠤ᠋ᠨ ᠦᠬᠡᠷ ᠬᠠᠷᠢᠭᠤᠯᠣᠨ ᠶᠠᠪᠤᠵᠤ ᠪᠠᠢᠪᠠ᠃
ᠲᠠᠨᠢᠳᠠᠭ ᠦᠭᠡᠢ ᠬᠥᠮᠦᠨ ᠶᠠᠩᠵᠤ ᠲᠠᠢ
ᠲᠥᠷᠥᠭᠰᠡᠨ ᠪᠡᠶᠡ ᠪᠡᠨ ᠬᠤᠪᠢᠯᠭᠠᠵᠤ ᠣᠴᠢᠭᠠᠳ᠄
《ᠬᠣᠯᠠ ᠠ᠋ᠴᠠ ᠶᠠᠪᠤᠭᠠ ᠪᠢᠳᠡ ᠬᠣᠶᠠᠷ
ᠬᠣᠭᠣᠯᠠ ᠤᠮᠳᠠ ᠪᠠᠷ ᠳᠤᠲᠠᠵᠤ ᠪᠠᠢᠨᠠ
ᠦᠬᠡᠷ ᠡᠴᠡ ᠪᠡᠨ ᠨᠢᠭᠡ ᠶ᠋ᠢ ᠥᠭᠴᠦ
ᠥᠯᠥᠨ ᠬᠣᠳᠣᠭᠣᠳᠣ ᠶ᠋ᠢ ᠮᠢᠨᠢ ᠳᠦᠭᠦᠷᠭᠡᠵᠦ ᠥᠭᠭᠦᠨᠡ ᠤᠤ?》ᠭᠡᠵᠦ
ᠴᠡᠩᠭᠡᠯ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍
ᠬᠠᠨ ᠪᠤᠭᠤᠷᠤᠯ ᠠᠪᠤ ᠨᠢ ᠬᠠᠷᠢᠭᠤ ᠬᠡᠯᠡᠪᠡ᠄
《ᠬᠠᠢᠨᠤᠭ ᠤ᠋ᠨ ᠲᠥᠷᠥ③ ᠲᠠᠰᠤᠷᠠᠬᠤᠯᠠ
ᠲᠤᠭᠤᠯ ᠤ᠋ᠨ ᠰᠢᠭᠢᠷᠡ ᠬᠣᠯᠳᠠᠷᠠᠬᠤᠯᠡ
ᠬᠠᠷᠠᠲᠤ ᠮᠠᠭᠤ ᠮᠣᠣᠰ ᠮᠠᠨ ᠢ᠋
ᠬᠠᠷᠭᠠᠢ ᠮᠣᠳᠣ ᠶ᠋ᠢ ᠬᠤᠭᠤᠷᠠᠲᠠᠯᠠ
ᠰᠤᠬᠠᠢ ᠮᠣᠳᠣ ᠶ᠋ᠢ ᠰᠤᠨᠳᠠᠯᠠ ᠴᠣᠬᠢᠳᠠᠭ ᠪᠢᠯᠡ!》ᠭᠡᠬᠦ ᠳ᠋ᠦ᠍
ᠴᠡᠩᠭᠡᠯ᠄
《ᠲᠠ ᠶᠠᠪᠤᠭᠠᠳ ᠦᠬᠡᠷ ᠢ᠋ᠶ᠋ᠡᠨ ᠡᠷᠭᠢᠭᠦᠯᠦᠭᠡᠳ ᠢᠷᠡ
ᠪᠢᠳᠡ ᠬᠣᠶᠠᠷ ᠴᠠᠢ ᠴᠢᠨᠠᠵᠤ ᠪᠠᠢᠶᠠ᠃ ᠴᠠᠢ ᠤᠤᠭᠤᠭᠠᠷᠠᠢ!》 ᠭᠡᠪᠡ᠃
— — — —
① ᠮᠣᠣᠰ— ᠮᠠᠩᠭᠤᠰ ᠭᠡᠰᠡᠨ ᠤᠳᠬᠠ ᠲᠠᠢ᠃
② ᠬᠠᠢᠭᠠᠳ— ᠡᠷᠢᠭᠡᠳ
③ ᠲᠥᠷᠥ— ᠬᠠᠮᠠᠷ ᠠ᠋ᠴᠠ ᠬᠡᠯᠬᠢᠭᠰᠡᠨ ᠳᠡᠭᠡᠰᠦ
ᠦᠬᠡᠷ ᠢ᠋ᠶ᠋ᠡᠨ ᠡᠷᠭᠢᠭᠦᠯᠦᠭᠡᠳ ᠢᠷᠡᠬᠦ ᠳ᠋ᠦ᠍ᠨᠢ
ᠦᠬᠡᠷ ᠡᠴᠡ ᠨᠢ ᠨᠢᠭᠡ ᠶ᠋ᠢ ᠦᠬᠦᠭᠦᠯᠴᠢᠬᠡᠳ
ᠮᠢᠬᠠ ᠴᠢᠨᠠᠵᠤ ᠰᠠᠭᠤᠵᠤ ᠪᠠᠢᠪᠠ᠃
ᠡᠪᠦᠭᠡᠨ ᠪᠤᠭᠤᠷᠤᠯ ᠠᠪᠤ ᠨᠢ ᠢᠷᠡᠭᠡᠳ᠄
《ᠲᠠ ᠬᠣᠶᠠᠷ ᠬᠦᠦ ᠴᠢᠨᠢ
ᠢᠩᠭᠢᠵᠦ ᠨᠠᠮᠠᠶ᠋ᠢ ᠠᠯᠠᠭᠤᠯᠬᠤ ᠪᠢᠯᠡ ᠤᠤ?》ᠭᠡᠵᠦ
ᠶᠡᠬᠡᠳᠡ ᠤᠬᠢᠯᠠᠬᠤ ᠳ᠋ᠤ᠌
ᠦᠬᠡᠷ ᠦ᠋ᠨ ᠠᠷᠠᠰᠤᠨ ᠳᠣᠲᠣᠷᠠ ᠨᠢ
ᠡᠪᠡᠰᠦ ᠲᠣᠭᠣᠰᠣ ᠴᠢᠬᠢᠵᠦ ᠭᠥᠪᠳᠡᠭᠡᠳ①
ᠤᠭ ᠤ᠋ᠨ ᠠᠳᠠᠯᠢ ᠦᠬᠡᠷ ᠪᠣᠯᠭᠠᠨ ᠬᠥᠭᠡᠭᠡᠪᠡ᠃
ᠮᠢᠬᠠ ᠰᠢᠷᠠᠵᠤ ᠢᠳᠡᠵᠦ ᠪᠠᠢᠭᠠᠳ
ᠬᠢᠲᠤᠭᠠ ᠪᠠᠨ ᠠᠪᠤ ᠳ᠋ᠠᠭᠠᠨ ᠥᠭᠪᠡ᠃
ᠬᠢᠲᠤᠭᠠ ᠶ᠋ᠢ ᠨᠢ ᠦᠵᠡᠭᠡᠳ ᠰᠠᠭᠤᠭᠠᠳ ᠯᠠ ᠪᠠᠢᠪᠠ᠃
《ᠪᠢᠳᠡ ᠶᠠᠭᠠᠷᠠᠵᠤ ᠪᠠᠢᠨᠠ᠂ ᠶᠠᠪᠤᠨᠠ
ᠬᠢᠲᠤᠭᠠ ᠶ᠋ᠢ ᠲᠦᠷᠭᠡᠨ ᠰᠤᠯᠠ ᠪᠣᠯᠭᠠᠵᠤ ᠥᠭ!》 ᠭᠡᠬᠦ ᠳ᠋ᠦ᠍
《ᠮᠢᠨᠦ ᠬᠦᠦ ᠶ᠋ᠢᠨ ᠬᠢᠲᠤᠭᠠ ᠲᠠᠢ
ᠶᠠᠭ ᠠᠳᠠᠯᠢ ᠶᠤᠮ ᠪᠠᠢᠨᠠ!》 ᠭᠡᠵᠦ ᠬᠡᠯᠡᠪᠡ᠃
《ᠲᠠᠨ ᠤ᠋ ᠬᠦᠦ ᠶ᠋ᠢᠨ ᠬᠢᠲᠤᠭᠠ ᠪᠣᠯ
ᠲᠠᠨ ᠤ᠋ ᠬᠦᠦ ᠶ᠋ᠢᠨ ᠬᠢᠲᠤᠭᠠ ᠪᠢᠵᠡ᠂
ᠬᠣᠣᠷᠲᠠᠨ ᠶᠡᠬᠡ ᠳᠠᠢᠰᠦᠨ ᠲᠠᠢ
ᠬᠤᠳᠬᠤᠯᠳᠤᠨ ᠪᠠᠢᠯᠳᠤᠭᠰᠠᠨ ᠨᠤᠲᠤᠭ ᠳᠡᠭᠡᠷᠡ ᠡᠴᠡ
ᠬᠠᠷᠠᠭᠳᠠᠵᠤ ᠪᠠᠢᠬᠤ ᠳ᠋ᠤ᠌ ᠨᠢ ᠠᠪᠤᠭᠰᠠᠨ ᠶᠤᠮ!》ᠭᠡᠵᠦ
ᠥᠭᠡᠳᠡ ᠡᠴᠡ ᠨᠢ ᠬᠡᠯᠡᠬᠦ ᠳ᠋ᠦ᠍᠄
《ᠮᠢᠨᠦ ᠬᠦᠦ ᠶ᠋ᠢᠨ ᠬᠢᠲᠤᠭᠠ ᠮᠥᠨ ᠪᠠᠢᠨᠠ》ᠭᠡᠵᠦ
ᠡᠮᠦᠨᠡᠰᠢ ᠪᠡᠨ ᠤᠨᠠᠵᠤ ᠮᠠᠩᠨᠠᠢ ᠪᠠᠨ ᠴᠥᠮᠥᠯᠦᠭᠡᠳ
ᠬᠣᠢᠰᠢ ᠪᠠᠨ ᠤᠨᠠᠵᠤ ᠳᠤᠬᠤ ᠪᠠᠨ ᠴᠥᠮᠥᠯᠦᠭᠡᠳ ᠤᠬᠢᠯᠠᠪᠠ᠃
ᠡᠴᠢᠭᠡ ᠬᠥᠮᠦᠨ ᠦ᠌ ᠰᠠᠨᠠᠭᠠ ᠶ᠋ᠢ ᠵᠣᠪᠠᠭᠠᠵᠤ
ᠡᠨᠳᠡᠭᠦᠦ ᠮᠠᠭᠤ ᠪᠣᠯᠤᠭᠰᠠᠨ ᠳ᠋ᠠᠭᠠᠨ
ᠪᠤᠲᠠ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠪᠣᠯᠵᠤ ᠦᠵᠡᠭᠳᠡᠭᠡᠳ᠄
《ᠪᠢᠳᠡᠨ ᠢ᠋ ᠢᠷᠡᠵᠦ ᠪᠠᠢᠨᠠ ᠭᠡᠵᠦ
ᠪᠢᠲᠡᠭᠡᠢ ᠮᠣᠣᠰ ᠲᠤ᠌ ᠬᠡᠯᠡ!》ᠭᠡᠪᠡ᠃
* * *
ᠴᠠᠭᠠᠰᠢ ᠮᠣᠷᠳᠠᠭᠠᠳ ᠭᠦᠶᠦᠯᠭᠡᠵᠦ ᠪᠠᠢᠲᠠᠯᠠ ᠬᠠᠳᠠ ᠶ᠋ᠢᠨ ᠪᠤᠭᠤᠷᠤᠯ ᠡᠵᠢ ᠨᠢ
ᠮᠣᠣᠰ ᠤ᠋ᠨ ᠬᠣᠨᠢ ᠬᠠᠷᠢᠭᠤᠯᠤᠭᠠᠳ ᠶᠠᠪᠤᠵᠤ ᠪᠠᠢᠪᠠ᠃
ᠲᠠᠨᠢᠳᠠᠭ ᠦᠭᠡᠢ ᠬᠥᠮᠦᠨ ᠶᠠᠩᠵᠤ ᠲᠠᠢ
ᠲᠥᠷᠥᠭᠰᠡᠨ ᠪᠡᠶᠡ ᠪᠡᠨ ᠬᠤᠪᠢᠯᠭᠠᠵᠤ ᠣᠴᠢᠭᠠᠳ᠄
《ᠬᠣᠭᠣᠯᠠ ᠤᠮᠳᠠ ᠳᠤᠲᠠᠵᠤ ᠪᠠᠢᠨᠠ
ᠬᠣᠨᠢᠨ ᠠ᠋ᠴᠠ ᠪᠠᠨ ᠨᠢᠭᠡ ᠶ᠋ᠢ ᠥᠭ》 ᠭᠡᠬᠦ ᠳ᠋ᠦ᠍
ᠬᠠᠲᠤᠨ ᠪᠤᠭᠤᠷᠤᠯ ᠡᠵᠢ ᠨᠢ ᠬᠡᠯᠡᠪᠡ᠄
《ᠬᠤᠷᠠᠭᠠᠨ ᠤ᠋ ᠬᠥᠯ ᠬᠤᠭᠤᠷᠠᠬᠤᠯᠠ
ᠢᠰᠢᠭᠡᠨ ᠦ᠌ ᠰᠢᠭᠢᠷᠡ ᠬᠣᠯᠲᠣᠷᠠᠬᠤᠯᠠ
ᠬᠠᠷᠭᠠᠢ ᠮᠣᠳᠣ ᠶ᠋ᠢ ᠬᠤᠭᠤᠷᠠᠲᠠᠯᠠ
ᠰᠤᠬᠠᠢ ᠮᠣᠳᠣ ᠶ᠋ᠢ ᠰᠤᠨᠲᠠᠯᠠ ᠴᠣᠬᠢᠳᠠᠭ᠂
ᠲᠠᠨ ᠳ᠋ᠤ᠌ ᠥᠭᠴᠦ ᠪᠣᠯᠬᠤ ᠦᠭᠡᠢ》 ᠭᠡᠪᠡ᠃
ᠴᠡᠩᠭᠡᠯ ᠥᠭᠡᠳᠡ ᠡᠴᠡ ᠨᠢ᠄
《ᠲᠠ ᠶᠠᠪᠤᠭᠠᠳ ᠬᠣᠨᠢ ᠪᠠᠨ ᠡᠷᠭᠢᠭᠦᠯᠦᠭᠡᠳ ᠢᠷᠡ
ᠪᠢᠳᠡ ᠴᠠᠢ ᠴᠢᠨᠠᠵᠤ ᠪᠠᠢᠶᠠ᠂
ᠢᠷᠡᠭᠡᠳ ᠴᠠᠢ ᠤᠤᠭᠤᠭᠠᠷᠠᠢ》 ᠭᠡᠪᠡ᠃
ᠬᠣᠨᠢ ᠪᠠᠨ ᠡᠷᠭᠢᠭᠦᠯᠦᠭᠡᠳ ᠢᠷᠡᠬᠦ ᠳ᠋ᠦ᠍ᠨᠢ
ᠨᠢᠭᠡᠨ ᠬᠣᠨᠢ ᠦᠬᠦᠭᠦᠯᠴᠢᠬᠡᠳ
ᠮᠢᠬᠠ ᠶ᠋ᠢ ᠨᠢ ᠴᠢᠨᠠᠵᠤ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌᠄
《ᠲᠠ ᠬᠣᠶᠠᠷ ᠬᠦᠦ ᠨᠠᠮᠠᠶ᠋ᠢ
ᠢᠩᠭᠢᠵᠦ ᠠᠯᠠᠭᠤᠯᠬᠤ ᠪᠢᠯᠡ ᠤᠤ?》 ᠭᠡᠳ
ᠡᠵᠢ ᠨᠢ ᠤᠬᠢᠯᠠᠪᠠ᠃
ᠬᠣᠨᠢᠨ ᠤ᠋ ᠬᠢᠨᠢ ᠠᠷᠠᠰᠤᠨ ᠤ᠋ ᠳᠣᠲᠣᠷᠠ
ᠬᠣᠭ ᠡᠪᠡᠰᠦ ᠬᠢᠵᠦ ᠭᠥᠪᠳᠡᠭᠡᠳ
ᠤᠭ ᠤ᠋ᠨ ᠠᠳᠠᠯᠢ ᠬᠣᠨᠢ ᠪᠣᠯᠭᠠᠨ ᠬᠥᠭᠡᠭᠡᠪᠡ᠃
ᠮᠢᠬᠠ ᠢᠳᠡᠵᠦ ᠪᠠᠢᠭᠠᠳ
ᠡᠵᠢ ᠳ᠋ᠡᠭᠡᠨ ᠠᠶᠠᠭᠠᠨ ᠳ᠋ᠠᠭᠠᠨ ᠱᠥᠯᠥ ᠬᠢᠭᠡᠳ ᠥᠭᠬᠦ ᠳ᠋ᠦ᠍
ᠠᠶᠠᠭᠠ ᠲᠠᠢ ᠱᠥᠯᠥ ᠶ᠋ᠢ ᠨᠢ
ᠠᠵᠢᠭᠯᠠᠨ ᠰᠠᠭᠤᠭᠠᠳ ᠪᠠᠢᠪᠠ᠃
《ᠪᠢᠳᠡ ᠶᠠᠭᠠᠷᠠᠵᠤ ᠪᠠᠢᠨᠠ᠂ ᠶᠠᠪᠤᠨᠠ
ᠠᠶᠠᠭᠠ ᠶ᠋ᠢ ᠮᠢᠨᠢ ᠲᠦᠷᠭᠡᠨ ᠰᠤᠯᠠᠯᠵᠤ ᠥᠭ ! 》ᠭᠡᠵᠦ
ᠴᠡᠩᠭᠡᠯ ᠦ᠋ᠨ ᠬᠡᠯᠡᠬᠦ ᠳ᠋ᠦ᠍
《ᠮᠢᠨᠦ ᠬᠦᠦ ᠶ᠋ᠢᠨ ᠠᠶᠠᠭᠠ ᠲᠠᠢ
ᠶᠠᠭ ᠠᠳᠠᠯᠢ ᠪᠠᠢᠨᠠ !》 ᠭᠡᠪᠡ ᠃
《ᠲᠠᠨ ᠤ᠋ ᠬᠦᠦ ᠶ᠋ᠢᠨ ᠠᠶᠠᠭᠠ ᠪᠣᠯ
ᠲᠠᠨ ᠤ᠋ ᠬᠦᠦ ᠶ᠋ᠢᠨ ᠠᠶᠠᠭᠠ ᠪᠢᠵᠡ
ᠬᠣᠣᠷᠲᠠᠨ ᠶᠡᠬᠡ ᠳᠠᠢᠰᠦᠨ ᠲᠠᠢ
ᠬᠤᠳᠬᠤᠯᠳᠤᠨ ᠪᠠᠢᠯᠳᠤᠵᠤ ᠪᠠᠢᠭᠰᠠᠨ ᠭᠠᠵᠠᠷ ᠠ᠋ᠴᠠ
ᠪᠢᠳᠡ ᠣᠯᠵᠤ ᠠᠪᠤᠭᠰᠠᠨ ᠶᠤᠮ ᠠ᠋》 ᠭᠡᠪᠡ᠃
《ᠬᠠᠢᠷᠠᠨ ᠬᠦᠦ ᠶ᠋ᠢ ᠮᠢᠨᠢ
ᠲᠡᠨᠳᠡ ᠬᠣᠷᠣᠭᠠᠭᠰᠠᠨ ᠶᠤᠮ ᠪᠠᠢᠨᠠ》 ᠭᠡᠵᠦ
ᠡᠮᠦᠨᠡᠰᠢ ᠤᠨᠠᠵᠤ ᠮᠠᠩᠨᠠᠢ ᠪᠠᠨ ᠴᠥᠮᠥᠯᠵᠦ
ᠬᠣᠢᠰᠢ ᠢᠶᠠᠨ ᠤᠨᠠᠵᠤ ᠳᠤᠬᠤ ᠪᠠᠨ ᠴᠥᠮᠥᠯᠵᠦ ᠤᠬᠢᠯᠠᠪᠠ᠃
ᠡᠬᠡ ᠬᠥᠮᠦᠨ ᠢ᠋ ᠵᠣᠪᠠᠭᠠᠭᠰᠠᠨ
ᠡᠨᠳᠡᠭᠦᠦ ᠮᠠᠭᠤ ᠪᠣᠯᠤᠭᠰᠠᠨ ᠳ᠋ᠠᠭᠠᠨ
ᠪᠤᠲᠠ ᠪᠡᠶᠡ ᠳ᠋ᠡᠭᠡᠨ ᠪᠣᠯᠵᠤ ᠦᠵᠡᠭᠳᠡᠭᠡᠳ
《ᠮᠠᠨ ᠢ᠋ ᠢᠷᠡᠵᠦ ᠪᠠᠢᠨᠠ ᠭᠡᠵᠦ
ᠮᠤᠤᠰ ᠲᠤ᠌ ᠪᠤᠤ ᠬᠡᠯᠡ ! 》 ᠭᠡᠪᠡ ᠃
* * *
ᠦᠳᠡ ᠶ᠋ᠢᠨ ᠳᠡᠭᠡᠷᠡ ᠨᠠᠷᠠ ᠲᠠᠢ ᠳ᠋ᠤ᠌
ᠦᠬᠡᠷ ᠬᠣᠨᠢ ᠶ᠋ᠢ ᠨᠢ ᠬᠥᠭᠡᠭᠡᠳ
ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠬᠦᠷᠴᠦ ᠣᠴᠢᠭᠠᠳ᠄
《ᠮᠤᠤᠰ ᠴᠢᠨᠦ ᠵᠠᠶᠠᠭᠠ ᠴᠢᠨᠢ ᠮᠠᠭᠤᠳᠠᠪᠠ
ᠮᠢᠨᠦ ᠵᠠᠶᠠᠭᠠ ᠰᠠᠢᠨ ᠪᠣᠯᠪᠠ 》 ᠭᠡᠵᠦ ᠬᠡᠯᠡᠪᠡ ᠃
ᠮᠤᠣᠰ᠄《ᠬᠡᠳᠦ ᠴᠠᠳᠬᠠᠪᠠᠯ ᠢᠩᠭᠢᠳᠡᠭ ᠶᠦᠮ》 ᠭᠡᠵᠦ
ᠰᠢᠪᠡᠭᠴᠢᠨ ᠮᠤᠬᠤᠯᠠᠢ ᠪᠠᠷ ᠢ᠋ᠶ᠋ᠠᠨ
ᠬᠠᠷᠭᠠᠢ ᠮᠣᠳᠣ ᠶ᠋ᠢ ᠬᠤᠭᠤᠷᠠᠲᠠᠯᠠ
ᠰᠤᠬᠠᠢ ᠮᠣᠳᠣ ᠶ᠋ᠢ ᠰᠤᠨᠲᠠᠯᠠ
ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠢ᠋ ᠴᠣᠬᠢᠭᠤᠯᠪᠠ᠃
* * *
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ
ᠨᠠᠷᠠ ᠭᠠᠷᠴᠤ ᠪᠠᠢᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍
ᠮᠢᠯ ᠤᠯᠠᠭᠠᠨ᠂ ᠴᠡᠩᠭᠡᠯ ᠬᠣᠶᠠᠷ
ᠮᠤᠤᠰ ᠤ᠋ᠨ ᠳ᠋ᠤ᠌ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍
ᠬᠠᠨ ᠪᠤᠭᠤᠷᠤᠯ ᠠᠪᠤ ᠨᠢ
ᠬᠠᠲᠤᠨ ᠪᠤᠭᠤᠷᠤᠯ ᠡᠵᠢ ᠨᠢ
《ᠮᠤᠤᠰ ᠴᠢᠨᠦ ᠨᠠᠷᠠᠨ ᠨᠢᠭᠤᠨᠠ ᠭᠡᠭᠴᠢ ᠡᠨᠡ !
ᠮᠢᠨᠦ ᠨᠠᠷᠠᠨ ᠭᠠᠷᠤᠨᠠ ᠭᠡᠭᠴᠢ ᠡᠨᠡ 》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍
ᠳᠠᠯᠠᠨ ᠤᠳᠠᠭᠠ ᠳᠠᠪᠲᠠᠭᠰᠠᠨ
ᠳᠠᠮᠵᠢᠭᠤᠷ ᠬᠠᠷᠠ ᠬᠢᠲᠤᠭᠠ ᠪᠠᠨ ᠪᠠᠷᠢᠵᠤ
ᠮᠤᠤᠰ ᠦᠰᠦᠷᠦᠨ ᠭᠠᠷᠴᠤ ᠢᠷᠡᠭᠡᠳ ᠭᠡᠨᠡᠳᠲᠡ
ᠴᠢᠩ ᠵᠣᠷᠢᠭᠲᠤ ᠴᠡᠩᠭᠡᠯ ᠦ᠋ᠨ
ᠵᠠᠭᠤᠨ ᠬᠥᠮᠦᠨ ᠦ᠌ ᠰᠦᠷ ᠢ᠋ ᠳᠠᠷᠤᠳᠠᠭ
ᠵᠤᠳ ᠤᠯᠠᠭᠠᠨ ᠴᠢᠷᠠᠢ ᠶ᠋ᠢ ᠨᠢ ᠦᠵᠡᠭᠡᠳ
ᠲᠦᠮᠡᠨ ᠬᠥᠮᠦᠨ ᠦ᠌ ᠰᠦᠷ ᠢ᠋ ᠳᠠᠷᠤᠳᠠᠭ
ᠲᠦᠭᠦᠬᠡᠢ ᠤᠯᠠᠭᠠᠨ ᠴᠢᠷᠠᠢ ᠶ᠋ᠢ ᠨᠢ ᠦᠵᠡᠭᠡᠳ
ᠦᠩᠬᠦᠯᠴᠡᠭ ᠨᠢ ᠬᠠᠭᠠ ᠲᠠᠰᠤᠷᠠᠭᠠᠳ ᠦᠬᠦᠪᠡ᠃
ᠴᠡᠩᠭᠡᠯ ᠮᠢᠯ ᠤᠯᠠᠭᠠᠨ ᠬᠣᠶᠠᠭᠤᠯᠠ
ᠠᠪᠤ ᠡᠵᠢ ᠪᠡᠨ ᠠᠪᠤᠷᠠᠭᠠᠳ
ᠠᠯᠪᠠᠲᠤ ᠬᠣᠰᠢᠭᠤ ᠪᠠᠨ ᠴᠤᠭᠯᠠᠭᠤᠯᠤᠭᠠᠳ
ᠠᠩᠬᠠᠨ ᠤ᠋ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠵᠤ ᠣᠴᠢᠪᠠ᠃
ᠪᠠᠳᠮᠠ ᠭᠡᠷᠡᠯ ᠬᠠᠨ
ᠪᠠᠢᠳᠠᠭ ᠤᠯᠤᠰ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠢᠷᠡᠪᠡ᠃
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠪᠠᠨ
ᠨᠠᠰᠤᠲᠠᠢ ᠠᠪᠤ ᠡᠵᠢ ᠳ᠋ᠡᠭᠡᠨ ᠵᠣᠯᠭᠠᠭᠤᠯᠤᠭᠠᠳ
ᠪᠠᠬᠠ ᠲᠠᠢ ᠶᠡᠬᠡ ᠬᠤᠷᠢᠮ ᠢ᠋ᠶ᠋ᠠᠨ ᠬᠢᠵᠦ
ᠪᠠᠳᠤᠷ ᠶᠡᠬᠡ ᠨᠠᠢᠷ ᠢ᠋ᠶ᠋ᠠᠨ ᠨᠠᠢᠷᠯᠠᠵᠤ
ᠷᠠᠰᠢᠶᠠᠨ ᠪᠣᠯᠤᠭᠰᠠᠨ ᠴᠠᠢ ᠪᠠᠨ ᠴᠢᠨᠠᠵᠤ
ᠠᠶᠤᠩᠭᠠ ᠮᠡᠲᠦ ᠬᠡᠩᠭᠡᠷᠭᠡ ᠪᠡᠨ ᠳᠡᠯᠡᠳᠴᠦ
ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠠᠢ᠃
— — — —
① ᠭᠥᠪᠳᠡᠭᠡᠳ— ᠰᠢᠪᠰᠢᠭᠡᠳ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠬᠥᠬᠡ ᠮᠣᠩᠭᠣᠯ
ᠬᠢᠨᠠᠭᠴᠢ᠄ ᠨᠠᠷᠠᠨ