ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ – ᠬᠦᠳᠡᠷ ᠠᠯᠲᠠᠢ ᠬᠠᠨ (1) Шилэн галзуу баатар – Хүдэр алтай хан (1)
181ᠬᠦᠳᠡᠷ ᠠᠯᠲᠠᠢ ᠬᠠᠨ (1)
ᠭᠠᠵᠠᠷ ᠢ᠋ ᠭᠠᠯ ᠭᠣᠯᠣᠮᠲᠠ ᠶ᠋ᠢᠨ ᠴᠢᠨᠡᠭᠡ ᠪᠠᠢᠬᠤ ᠳ᠋ᠤ᠌
ᠳᠡᠭᠡᠷᠡ ᠪᠡᠨ ᠨᠣᠶᠠᠨ ᠦᠭᠡᠢ
ᠳᠡᠷᠭᠡᠳᠡ ᠪᠡᠨ ᠳᠠᠢᠰᠤᠨ ᠦᠭᠡᠢ
ᠪᠠᠶᠠᠨ ᠥᠨᠳᠥᠷ ᠠᠯᠲᠠᠢ ᠶ᠋ᠢᠨ
ᠪᠠᠷᠠᠭᠤᠨ ᠰᠤᠭᠤ ᠪᠠᠷ ᠨᠤᠲᠤᠭᠯᠠᠭᠰᠠᠨ
ᠬᠦᠳᠡᠷ ᠠᠯᠲᠠᠢ ᠬᠠᠨ ᠭᠡᠵᠦ
ᠬᠦᠴᠦᠲᠦ ᠨᠢᠭᠡᠨ ᠡᠷᠡ ᠪᠠᠢᠵᠠᠢ᠃
ᠬᠦᠳᠡᠷ ᠠᠯᠲᠠᠢ ᠬᠠᠨ ᠤ᠋ ᠰᠠᠭᠤᠳᠠᠭ
ᠪᠤᠮᠪᠤᠯᠠᠢ ᠴᠠᠭᠠᠨ ᠭᠡᠷ ᠨᠢ ᠭᠡᠪᠡᠯ᠄
ᠵᠠᠭᠤᠨ ᠨᠠᠢ᠍ᠮᠠᠨ ᠬᠠᠨᠠ ᠲᠠᠢ
ᠵᠢᠷᠭᠤᠭᠠᠨ ᠮᠢᠩᠭᠠᠨ ᠣᠨᠢ ᠲᠠᠢ
ᠳᠠᠭᠠ ᠪᠠᠷ ᠣᠷᠣᠯᠳᠣᠳᠠᠭ ᠭᠠᠵᠠᠷ ᠢ᠋
ᠲᠥᠭᠡᠯᠡᠨ ᠪᠠᠢᠵᠤ ᠪᠠᠷᠢᠭᠠᠳ
ᠣᠷᠣᠢ ᠶ᠋ᠢᠨ ᠬᠢᠨᠢ ᠥᠨᠳᠥᠷ ᠢ᠋
ᠤᠷᠤᠭ ᠰᠢᠷᠭᠠᠯ ᠡᠭᠦᠯᠡᠨ ᠳ᠋ᠦ᠍ ᠲᠤᠯᠭᠠᠭᠰᠠᠨ ᠭᠡᠨᠡ᠃
* * *
ᠬᠣᠢᠭᠤᠷ ᠢ᠋ᠶ᠋ᠠᠨ ᠪᠡᠯᠴᠢᠨ ᠭᠠᠷᠳᠠᠭ
ᠬᠤᠸᠠ ᠤᠯᠠᠭᠠᠨ ᠪᠠᠯᠢᠶᠠᠮ① ᠲᠠᠢ
ᠡᠮᠦᠨᠡᠭᠦᠷ ᠢ᠋ᠶ᠋ᠡᠨ ᠪᠡᠯᠴᠢᠨ ᠭᠠᠷᠳᠠᠭ
ᠦᠯᠦ② ᠮᠠᠩᠬᠠᠨ ᠲᠡᠮᠡᠭᠡ ᠲᠡᠢ
ᠬᠣᠲᠣᠩ ᠤ᠋ᠨ ᠭᠣᠣᠯ ᠢ᠋ᠶ᠋ᠠᠷ ᠳᠦᠭᠦᠷᠦᠭᠰᠡᠨ
ᠬᠣᠶᠠᠷ ᠪᠤᠮ ᠬᠣᠨᠢ ᠲᠠᠢ
ᠨᠠᠷᠠᠨ ᠤ᠋ ᠬᠥᠯ ᠳᠣᠣᠷᠠ ᠮᠠᠨᠠᠷᠠᠭᠠᠳ ᠪᠠᠢᠳᠠᠭ
ᠨᠠᠶᠠᠨ ᠪᠤᠮ ᠬᠣᠩᠭᠣᠷ ᠠᠳᠤᠭᠤ ᠲᠠᠢ ᠭᠡᠨᠡ᠃
* * *
ᠬᠦᠳᠡᠷ ᠠᠯᠲᠠᠢ ᠬᠠᠨ ᠳ᠋ᠤ᠌
ᠬᠠᠰᠠᠭ ᠲᠤᠤᠬᠠᠢ ᠭᠡᠳᠡᠭ
ᠬᠠᠢᠷᠠᠲᠤ ᠰᠢᠷᠭᠠ ᠮᠣᠷᠢ ᠲᠠᠢ
ᠡᠨᠡ ᠮᠣᠷᠢ ᠶ᠋ᠢ ᠬᠡᠯᠡᠪᠡᠯ᠄
ᠵᠠᠭᠤᠨ ᠠᠯᠲᠠ ᠬᠦᠵᠦᠭᠦᠦ ᠲᠡᠢ
ᠵᠠᠭᠤᠷᠠ ᠬᠣᠨᠣᠵᠤ ᠬᠦᠷᠬᠦ ᠶ᠋ᠢᠨ ᠨᠢᠷᠤᠭᠤ ᠲᠠᠢ
ᠨᠠᠶᠠᠨ ᠨᠢᠭᠡᠨ ᠠᠯᠲᠠ ᠰᠡᠭᠦᠯ ᠲᠡᠢ
ᠨᠠᠴᠢᠨ ᠱᠣᠩᠬᠣᠷ ᠤ᠋ᠨ ᠨᠢᠳᠦ ᠲᠡᠢ
ᠲᠤᠩ ᠪᠦᠷᠢᠶᠡ ᠬᠠᠮᠠᠷ ᠲᠠᠢ
ᠳᠤᠷᠠᠨ ᠰᠠᠢᠬᠠᠨ ᠨᠢᠳᠦ ᠲᠡᠢ
ᠰᠤᠮᠤᠨ ᠬᠣᠶᠠᠷ ᠴᠢᠬᠢ ᠲᠡᠢ
ᠱᠣᠪᠣᠭᠣᠷ ᠰᠠᠢᠬᠠᠨ ᠬᠣᠩᠰᠢᠶᠠᠷ ᠲᠠᠢ
ᠮᠣᠯᠣᠷ ᠡᠷᠳᠡᠨᠢ ᠶ᠋ᠢᠨ ᠲᠣᠯᠣᠭᠠᠢ ᠲᠠᠢ
ᠮᠣᠨᠴᠣᠭ ᠵᠢᠯᠠᠭᠠ ᠶ᠋ᠢᠨ ᠳᠡᠯ ᠲᠡᠢ
ᠪᠣᠭᠣᠨᠢ ᠬᠠᠪᠢᠷᠭᠠ ᠨᠢ ᠬᠥᠲᠥᠬᠡᠷ
ᠪᠣᠭᠳᠤᠭᠤᠰᠣ ᠴᠢᠮᠥᠭᠡ ᠨᠢ ᠮᠠᠲᠠᠭᠠᠷ
ᠲᠡᠢᠮᠦ ᠨᠢᠭᠡᠨ ᠰᠠᠢᠬᠠᠨ ᠬᠦᠯᠦᠭ ᠭᠡᠨᠡ᠃
* * *
ᠨᠢᠭᠡᠨ ᠡᠳᠦᠷ ᠪᠣᠯᠬᠤ ᠳ᠋ᠤ᠌
ᠨᠢᠭᠡᠨ ᠰᠠᠢᠨ ᠬᠦᠦ ᠭᠡᠢᠪᠡ③ ᠭᠡᠨᠡ᠃
ᠵᠠᠭᠤᠨ ᠡᠷᠭᠢ ᠶ᠋ᠢᠨ ᠡᠯᠡᠰᠦ ᠶ᠋ᠢ
ᠵᠥᠭᠡᠭᠡᠵᠦ ᠨᠡᠢᠯᠡᠭᠦᠯᠵᠦ ᠮᠠᠨᠴᠤᠢᠯᠠᠭᠠᠳ
ᠥᠨᠳᠥᠷ ᠠᠭᠤᠯᠠ ᠶ᠋ᠢ ᠲᠦᠰᠢᠭᠦᠯᠦᠨ
ᠢᠰᠬᠦᠯᠡᠬᠦᠷ ᠲᠠᠯᠪᠢᠵᠤ ᠠᠪᠤᠭᠠᠳ
ᠴᠢᠩ ᠵᠣᠷᠢᠭᠲᠤ ᠪᠠᠭᠠᠲᠤᠷ
ᠴᠡᠩᠭᠡᠯ ᠬᠦᠦ ᠭᠡᠵᠦ ᠨᠡᠷᠡᠯᠡᠵᠡᠢ᠃
ᠡᠨᠡ ᠴᠡᠩᠭᠡᠯ ᠬᠦᠦ ᠪᠣᠯ
ᠭᠤᠨᠠ ᠲᠠᠢ ᠳ᠋ᠠᠭᠠᠨ ᠮᠣᠷᠳᠠᠵᠤ
ᠭᠤᠷᠪᠠᠨ ᠪᠠᠢᠷᠢ④ ᠡᠪᠳᠡᠵᠦ ᠪᠠᠭᠤᠪᠠ ᠭᠡᠨᠡ᠃
ᠳᠥᠨᠡ ᠲᠡᠢ ᠳ᠋ᠡᠭᠡᠨ ᠮᠣᠷᠳᠠᠵᠤ
ᠳᠥᠷᠪᠡᠨ ᠪᠠᠢᠷᠢ ᠡᠪᠳᠡᠨ ᠪᠠᠭᠤᠪᠠ ᠭᠡᠨᠡ᠃
* * *
ᠨᠢᠭᠡᠨ ᠡᠳᠦᠷ ᠪᠣᠯᠪᠠ ᠭᠡᠨᠡ
ᠴᠢᠩ ᠵᠣᠷᠢᠭᠲᠤ ᠴᠡᠩᠭᠡᠯ ᠬᠦᠦ
ᠨᠠᠢ᠍ᠮᠠᠨ ᠬᠥᠯ ᠲᠡᠢ
ᠨᠠᠢᠭᠤᠭᠠ ᠠᠯᠲᠠᠨ ᠰᠢᠷᠡᠭᠡᠨ ᠡᠴᠡ ᠪᠡᠨ
ᠬᠠᠷᠭᠠᠢ ᠶ᠋ᠢᠨ ᠣᠴᠢ ᠮᠡᠲᠦ
ᠴᠢᠪᠬᠢᠲᠡᠯᠡ ᠦᠰᠦᠷᠦᠨ ᠪᠠᠭᠤᠴᠢᠭᠠᠳ
ᠪᠤᠯᠲᠠᠭᠠᠷ ᠰᠠᠢᠬᠠᠨ ᠲᠣᠯᠣᠭᠠᠢ ᠪᠠᠨ
ᠪᠥᠬᠥᠢᠨ ᠮᠡᠬᠦᠰᠬᠢᠵᠦ ᠮᠡᠨᠳᠦᠯᠡᠭᠡᠳ
ᠪᠣᠯᠣᠳ ᠮᠡᠲᠦ ᠡᠪᠦᠳᠦᠭ ᠢ᠋ᠶ᠋ᠡᠨ
ᠳᠠᠷᠤᠨ ᠮᠡᠨᠳᠦᠯᠡᠭᠡᠳ ᠠᠢᠯᠠᠳᠬᠠᠵᠤ
《ᠬᠠᠨ ᠪᠤᠭᠤᠷᠤᠯ ᠠᠪᠤ ᠮᠢᠨᠢ
ᠬᠠᠲᠤᠨ ᠪᠤᠭᠤᠷᠤᠯ ᠡᠵᠢ ᠮᠢᠨᠢ
ᠡᠷᠡ ᠬᠥᠮᠦᠨ ᠪᠣᠯᠪᠠᠯ
ᠭᠡᠷ ᠲᠦ᠍ ᠲᠥᠷᠥᠳᠡᠭ ᠶᠣᠰᠣᠲᠠᠢ
ᠬᠡᠭᠡᠷᠡ ᠦᠬᠦᠳᠡᠭ ᠵᠢᠷᠤᠮ ᠲᠠᠢ
ᠮᠢᠨᠦ ᠶᠠᠪᠤᠳᠠᠭ ᠭᠠᠵᠠᠷ ᠬᠠᠮᠢᠭᠠ ᠪᠣᠢ?
ᠵᠣᠷᠢᠳᠠᠭ ᠵᠣᠷᠢᠭ ᠮᠢᠨᠢ ᠶᠠᠭᠤᠨ ᠳ᠋ᠤ᠌ ᠪᠣᠢ?》
ᠠᠪᠤ ᠡᠵᠢ ᠡᠴᠡ ᠪᠡᠨ ᠠᠰᠠᠭᠤᠬᠤ ᠳ᠋ᠤ᠌
ᠬᠠᠨ ᠪᠤᠭᠤᠷᠤᠯ ᠠᠪᠤ ᠨᠢ᠄
《ᠪᠠᠭᠠ ᠪᠠᠢᠬᠤ ᠦᠶᠡ ᠳ᠋ᠡᠭᠡᠨ ᠪᠢ
ᠪᠠᠬᠠ ᠲᠠᠢ ᠲᠠᠪᠠ ᠲᠠᠢ ᠶᠠᠪᠤᠬᠤ ᠴᠠᠭ ᠲᠤ᠌
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍ ᠪᠠᠢᠳᠠᠭ
ᠪᠠᠳᠮᠠ ᠭᠡᠷᠡᠯ ᠬᠠᠨ ᠲᠠᠢ ᠬᠣᠶᠠᠭᠤᠯᠠ
ᠪᠠᠲᠤᠲᠠᠢᠬᠠᠨ ᠭᠤᠷᠪᠠᠨ ᠦᠭᠡ ᠪᠡᠨ ᠬᠡᠯᠡᠯᠴᠡᠭᠰᠡᠨ ᠪᠢᠯᠡ᠃
ᠨᠠᠷᠠᠨ ᠽᠠᠨᠳᠠᠨ ᠠᠪᠠᠬᠠᠢ ᠶ᠋ᠢ ᠨᠢ
ᠵᠠᠯᠠᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠶᠦᠮ ᠠ᠋!》 ᠭᠡᠵᠦ ᠬᠡᠯᠡᠭᠡᠳ᠄
《ᠬᠦᠦ ᠮᠢᠨᠢ ᠴᠢᠨᠦ
ᠮᠢᠬᠠ ᠴᠢᠨᠢ ᠮᠢᠬᠠᠵᠢᠭᠠᠳᠤᠢ ᠪᠢᠰᠢᠦ?
ᠱᠥᠯᠥ ᠴᠢᠨᠢ ᠱᠦᠯᠦᠵᠢᠭᠡᠳᠦᠢ ᠪᠢᠰᠢᠦ?
ᠡᠬᠡ ᠡᠴᠡ ᠪᠡᠨ ᠪᠢᠰᠢ ᠶ᠋ᠢ ᠦᠵᠡᠭᠡᠳᠦᠢ ᠪᠢᠰᠢᠦ?
ᠡᠷᠭᠢ ᠡᠴᠡ ᠪᠢᠰᠢ ᠶ᠋ᠢ ᠳᠠᠪᠠᠭᠠᠳᠤᠢ ᠪᠢᠰᠢᠦ?
ᠠᠯᠪᠠᠲᠤ ᠶ᠋ᠢᠨ ᠲᠣᠭᠠ ᠲᠠᠰᠤᠷᠠᠵᠤ
ᠠᠷᠪᠠᠨ ᠭᠤᠷᠪᠠᠨ ᠣᠨ ᠪᠣᠯᠤᠭᠰᠠᠨ ᠪᠢᠰᠢᠦ?
ᠠᠳᠠᠯ ᠮᠠᠯ ᠤ᠋ᠨ ᠲᠣᠭᠠ ᠲᠠᠰᠤᠷᠠᠵᠤ
ᠭᠤᠴᠢᠨ ᠭᠤᠷᠪᠠᠨ ᠣᠨ ᠪᠣᠯᠤᠭᠰᠠᠨ ᠪᠢᠰᠢᠦ?
ᠠᠯᠪᠠᠲᠤ ᠬᠣᠰᠢᠭᠤ ᠪᠠᠨ ᠴᠤᠭᠯᠠᠭᠤᠯᠵᠤ
ᠨᠠᠢᠷ ᠬᠤᠷᠢᠮ ᠢ᠋ᠶ᠋ᠠᠨ ᠲᠠᠯᠪᠢᠭᠠᠴᠢ!》 ᠭᠡᠪᠡ᠃
* * *
ᠠᠷᠪᠠᠨ ᠲᠠᠰᠢ ᠪᠠᠨ
ᠠᠷᠪᠠᠨ ᠰᠠᠢᠨ ᠡᠷᠡ ᠮᠣᠷᠳᠠᠭᠤᠯᠵᠤ
ᠨᠠᠢ᠍ᠮᠠᠨ ᠨᠡᠰᠤᠨ ᠡᠴᠡ ᠥᠭᠰᠦᠭᠦᠯᠦᠨ᠋⑤
ᠨᠠᠶᠠᠨ ᠨᠠᠰᠤᠲᠠᠢ ᠠ᠋ᠴᠠ ᠤᠷᠤᠭᠤᠳᠠᠭᠤᠯᠤᠨ⑥
ᠴᠡᠩᠭᠡᠯ ᠦ᠋ᠨ ᠨᠠᠢᠷ ᠬᠤᠷᠢᠮ ᠠ᠋ᠴᠠ
ᠳᠤᠲᠠᠭᠰᠠᠨ ᠬᠥᠮᠦᠨ ᠪᠠᠢᠭᠤᠵᠠᠢ ᠭᠡᠵᠦ ᠵᠠᠷᠯᠠᠪᠠ᠃
* * *
ᠠᠷᠪᠠᠨ ᠵᠦᠭ ᠦ᠋ᠨ ᠡᠷᠡᠴᠦᠳ
ᠠᠷᠠᠵᠠ ᠶ᠋ᠢᠨ ᠠᠮᠲᠠ ᠲᠠᠢ ᠶ᠋ᠢ
ᠬᠣᠣᠷᠠᠵᠠ ᠶ᠋ᠢᠨ ᠬᠤᠷᠰᠢᠭᠤᠨ ᠢ᠋
ᠬᠣᠷᠢᠶᠠᠨ ᠴᠤᠭᠯᠠᠭᠤᠯᠵᠤ ᠢᠷᠡᠪᠡ᠃
ᠪᠠᠢᠳᠠᠰ ᠤ᠋ᠨ ᠭᠡᠭᠦᠦ ᠡᠬᠢᠯᠡᠭᠦᠯᠦᠨ
ᠪᠤᠭ ᠪᠤᠲᠠ ᠮᠠᠯ ᠠᠯᠠᠵᠤ
ᠳᠣᠯᠣᠭᠠᠨ ᠠᠭᠤᠯᠠ ᠶ᠋ᠢᠨ ᠴᠢᠨᠡᠭᠡ
ᠲᠠᠷᠭᠤᠨ ᠮᠢᠬᠠ ᠣᠪᠣᠭᠠᠯᠠᠪᠠ᠃
ᠪᠠᠷᠠᠭᠤᠨ ᠪᠡᠶᠡ ᠥᠭᠡᠳᠡ ᠨᠢ
ᠪᠠᠷᠰ ᠪᠣᠯᠤᠭᠰᠠᠨ ᠡᠷᠡᠴᠦᠳ
ᠪᠠᠭᠲᠠᠵᠤ ᠶᠠᠳᠠᠨ ᠰᠠᠭᠤᠪᠠ᠃
ᠪᠠᠷᠠᠭᠤᠨ ᠪᠡᠶᠡ ᠪᠡᠷ ᠰᠠᠭᠤᠭᠰᠠᠨ ᠡᠷᠡᠴᠦᠳ
ᠪᠠᠭᠲᠠᠵᠤ ᠶᠠᠳᠠᠨ ᠪᠣᠰᠴᠤ ᠢᠷᠡᠭᠡᠳ
ᠪᠠᠭᠠᠬᠠᠨ ᠴᠡᠩᠭᠡᠯ ᠬᠦᠦ ᠳ᠋ᠦ᠍
ᠨᠠᠢ᠍ᠮᠠᠨ ᠬᠥᠮᠦᠨ ᠳᠠᠮᠨᠠᠨ ᠡᠷᠭᠦᠳᠡᠭ
ᠨᠠᠶᠠᠨ ᠬᠥᠮᠦᠨ ᠳᠠᠮᠵᠢᠭᠤᠯᠵᠤ ᠲᠠᠯᠪᠢᠳᠠᠭ
ᠳᠠᠯᠪᠠᠭᠠᠷ ᠴᠠᠭᠠᠨ ᠱᠠᠭᠠᠵᠠᠩ ᠢ᠋ᠶ᠋ᠠᠷ
ᠠᠷᠠᠵᠠ ᠶ᠋ᠢᠨ ᠠᠮᠲᠠ ᠲᠠᠢ ᠠ᠋ᠴᠠ
ᠬᠣᠣᠷᠠᠵᠠ ᠶ᠋ᠢᠨ ᠬᠤᠷᠰᠢᠭᠤᠨ ᠠ᠋ᠴᠠ
ᠳᠠᠪ ᠬᠢᠬᠦ ᠶ᠋ᠢᠨ ᠵᠠᠭᠤᠷᠠ
ᠳᠠᠯᠠᠨ ᠨᠢᠭᠡ ᠵᠣᠭᠣᠭᠯᠠᠭᠤᠯᠪᠠ᠃
ᠵᠡᠭᠦᠨ ᠪᠡᠶᠡ ᠥᠭᠡᠳᠡ ᠨᠢ
ᠵᠣᠷᠢᠭᠲᠤ ᠠᠷᠰᠯᠠᠨ ᠪᠣᠯᠤᠭᠰᠠᠨ ᠡᠷᠡᠴᠦᠳ
ᠵᠡᠷᠭᠡᠯᠡᠲᠡᠨ ᠰᠢᠬᠠᠯᠳᠤᠨ ᠰᠠᠭᠤᠪᠠ᠃
ᠵᠡᠭᠦᠨ ᠪᠡᠶᠡ ᠪᠡᠷ ᠰᠠᠭᠤᠭᠰᠠᠨ ᠡᠷᠡᠴᠦᠳ
ᠵᠡᠷᠭᠡᠯᠡᠳᠡᠨ ᠰᠢᠬᠠᠯᠳᠤᠨ ᠪᠣᠰᠴᠤ ᠢᠷᠡᠭᠡᠳ
ᠵᠢᠭᠠᠯ ᠬᠦᠦ ᠴᠡᠩᠭᠡᠯ ᠳ᠋ᠦ᠍
ᠨᠠᠢ᠍ᠮᠠᠨ ᠬᠥᠮᠦᠨ ᠳᠠᠮᠨᠠᠨ ᠡᠷᠭᠦᠳᠡᠭ
ᠨᠠᠶᠠᠨ ᠬᠥᠮᠦᠨ ᠳᠠᠮᠵᠢᠭᠤᠯᠵᠤ ᠲᠠᠯᠪᠢᠳᠠᠭ
ᠳᠠᠯᠪᠠᠭᠠᠷ ᠴᠠᠭᠠᠨ ᠱᠠᠭᠠᠵᠠᠩ ᠢ᠋ᠶ᠋ᠠᠷ
ᠠᠷᠠᠵᠠ ᠶ᠋ᠢᠨ ᠠᠮᠲᠠ ᠲᠠᠢ ᠠ᠋ᠴᠠ
ᠬᠣᠣᠷᠠᠵᠠ ᠶ᠋ᠢᠨ ᠬᠤᠷᠰᠢᠭᠤᠨ ᠠ᠋ᠴᠠ
ᠳᠠᠪ ᠬᠢᠬᠦ ᠶ᠋ᠢᠨ ᠵᠠᠭᠤᠷᠠ
ᠳᠠᠯᠠᠨ ᠨᠢᠭᠡ ᠵᠣᠭᠣᠭᠯᠠᠭᠤᠯᠪᠠ᠃
ᠰᠣᠷᠭᠣᠭ ᠲᠥᠷᠥᠭᠰᠡᠨ ᠴᠡᠩᠭᠡᠯ ᠬᠦᠦ
ᠰᠣᠭᠲᠣᠬᠤ ᠶ᠋ᠢᠨ ᠳᠦᠷᠢ ᠭᠠᠷᠤᠭᠠᠳ
ᠵᠠᠭᠤᠨ ᠬᠥᠮᠦᠨ ᠦ᠌ ᠰᠦᠷ ᠢ᠋ ᠳᠠᠷᠤᠳᠠᠭ
ᠵᠤᠳ ᠤᠯᠠᠭᠠᠨ ᠴᠢᠷᠠᠢ ᠭᠠᠷᠤᠭᠠᠳ
ᠲᠦᠮᠡᠨ ᠬᠥᠮᠦᠨ ᠦ᠌ ᠰᠦᠷ ᠢ᠋ ᠳᠠᠷᠤᠳᠠᠭ
ᠲᠦᠭᠦᠬᠡᠢ ᠤᠯᠠᠭᠠᠨ ᠴᠢᠷᠠᠢ ᠭᠠᠷᠤᠭᠠᠳ
ᠪᠤᠤᠷᠠ ᠶ᠋ᠢᠨ ᠰᠣᠶᠣᠭᠠ ᠰᠢᠭ᠋ ᠰᠣᠶᠣᠭᠠ ᠨᠢ
ᠢᠷᠠᠯᠵᠠᠭᠠᠳ ᠢᠷᠡᠪᠡ ᠭᠡᠨᠡ᠃
ᠪᠤᠬᠠ ᠶ᠋ᠢᠨ ᠮᠠᠩᠨᠠᠢ ᠰᠢᠭ᠋ ᠮᠠᠩᠨᠠᠢ ᠨᠢ
ᠠᠲᠤᠷᠢᠭᠠᠳ ᠢᠷᠡᠪᠡ ᠭᠡᠨᠡ᠂
ᠪᠣᠳᠣᠵᠤ ᠰᠠᠨᠠᠭᠰᠠᠨ ᠢ᠋ᠶ᠋ᠠᠨ ᠪᠦᠲᠦᠭᠡᠬᠦ ᠪᠡᠷ
ᠮᠣᠷᠳᠠᠬᠤ ᠪᠠᠷ ᠲᠣᠭᠲᠠᠪᠠ ᠭᠡᠨᠡ᠃
* * *
ᠠᠳᠤᠭᠤᠴᠢ ᠠᠭᠰᠠᠬᠠᠯ ᠡᠪᠦᠭᠡᠨ ᠢ᠋
ᠬᠤᠰᠠᠷᠠᠩ ᠭᠡᠭᠦᠦ ᠶ᠋ᠢᠨ ᠤᠨᠠᠬᠠ
ᠬᠣᠯᠠ ᠬᠣᠩᠭᠣᠷ ᠠᠵᠢᠷᠭᠠᠨ ᠳ᠋ᠤ᠌ ᠮᠤᠷᠳᠠᠭᠤᠯᠤᠨ
ᠬᠠᠰᠠᠭ ᠲᠤᠤᠬᠠᠢ ᠭᠡᠳᠡᠭ
ᠬᠠᠢᠷᠠᠲᠤ ᠰᠢᠷᠭᠠ ᠮᠣᠷᠢᠨ ᠳ᠋ᠤ᠌ ᠶᠠᠪᠤᠭᠤᠯᠪᠠ᠃
ᠠᠳᠤᠭᠤᠴᠢ ᠠᠭᠰᠠᠬᠠᠯ ᠡᠪᠦᠭᠡᠨ
ᠠᠯᠲᠠᠢ ᠶ᠋ᠢ ᠠᠷᠪᠠᠨ ᠭᠤᠷᠪᠠ ᠡᠷᠭᠢᠵᠦ
ᠬᠠᠩᠭᠠᠢ ᠶ᠋ᠢ ᠬᠣᠷᠢᠨ ᠭᠤᠷᠪᠠ ᠡᠷᠭᠢᠭᠡᠳ
ᠬᠠᠷᠠᠵᠤ ᠣᠯᠤᠭᠰᠠᠨ ᠦᠭᠡᠢ ᠪᠣᠯᠬᠣᠷ
ᠬᠥᠬᠡ ᠮᠥᠩᠭᠥᠨ ᠰᠢᠯᠢ ᠳ᠋ᠦ᠍ ᠭᠠᠷᠴᠤ
ᠬᠦᠯᠦᠭ ᠮᠣᠷᠢ ᠶ᠋ᠢ ᠬᠠᠷᠠᠬᠤ ᠳ᠋ᠠᠭᠠᠨ
ᠡᠪᠦᠷ ᠡᠴᠡ ᠪᠡᠨ ᠳᠤᠷᠳᠤᠩ ᠠᠯᠴᠢᠭᠤᠷ ᠭᠠᠷᠭᠠᠵᠤ
ᠦᠵᠡᠬᠦ ᠨᠢᠳᠦᠨ ᠦ᠌ ᠪᠡᠨ ᠴᠡᠴᠡᠭᠡᠢ ᠶ᠋ᠢ ᠠᠷᠴᠢᠭᠠᠳ
ᠳᠥᠷᠪᠡᠨ ᠵᠦᠭ ᠨᠠᠢ᠍ᠮᠠᠨ ᠵᠣᠪᠬᠢᠰ ᠲᠤ᠌
ᠳᠤᠷᠠᠨ ᠰᠢᠭ᠋ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠬᠠᠷᠠᠬᠤ ᠳ᠋ᠤ᠌
ᠬᠣᠣᠷᠠᠨ ᠱᠣᠣ ᠳᠠᠯᠠᠢ⑦ ᠶ᠋ᠢᠨ ᠬᠥᠪᠡᠭᠡᠨ ᠳ᠋ᠦ᠍
ᠬᠠᠰᠠᠭ ᠲᠤᠤᠬᠠᠢ ᠭᠡᠳᠡᠭ ᠰᠢᠷᠭᠠ ᠮᠣᠷᠢ ᠨᠢ
ᠪᠠᠷᠠᠭᠤᠨ ᠬᠥᠯ ᠢ᠋ᠶ᠋ᠡᠨ ᠰᠣᠢᠯᠤᠭᠠᠳ⑧
ᠪᠠᠷᠠᠭᠤᠨ ᠴᠢᠬᠢ ᠪᠡᠨ ᠳᠡᠪᠢᠰᠦᠭᠡᠳ
ᠵᠡᠭᠦᠨ ᠬᠥᠯ ᠢ᠋ᠶ᠋ᠡᠨ ᠰᠣᠢᠯᠤᠭᠠᠳ
ᠵᠡᠭᠦᠨ ᠴᠢᠬᠢ ᠪᠡᠨ ᠳᠡᠪᠢᠰᠦᠭᠡᠳ
ᠵᠣᠭᠰᠣᠵᠤ ᠪᠠᠢᠪᠠ ᠭᠡᠨᠡ᠃
ᠠᠭᠰᠠᠬᠠᠯ ᠡᠪᠦᠭᠡᠨ
ᠲᠠᠲᠠᠵᠤ ᠲᠠᠯᠪᠢᠵᠤ ᠬᠦᠷᠦᠭᠡᠳ
ᠠᠩᠭᠠᠯᠵᠠᠭᠴᠢ ᠠᠮᠠᠨ ᠬᠦᠵᠦᠭᠦᠨ ᠳ᠋ᠦ᠍ᠨᠢ
ᠠᠯᠳᠠᠯ ᠦᠭᠡᠢ ᠤᠷᠭᠠ ᠪᠠᠨ ᠬᠠᠶᠠᠬᠤ ᠳ᠋ᠤ᠌
ᠠᠭᠲᠠ ᠬᠦᠯᠦᠭ ᠮᠣᠷᠢ ᠠᠪᠴᠤ ᠬᠠᠷᠠᠢᠭᠠᠳ
ᠲᠩᠷᠢ ᠶ᠋ᠢᠨ ᠣᠳᠣ ᠲᠣᠭᠠᠯᠠᠨ ᠪᠤᠯᠭᠢᠪᠠ
ᠲᠡᠩᠬᠡᠭᠡ ᠰᠠᠢᠨ ᠳ᠋ᠠᠭᠠᠨ ᠡᠰᠡ ᠲᠠᠯᠪᠢᠪᠠ
ᠭᠠᠵᠠᠷ ᠤ᠋ᠨ ᠦᠨᠳᠦᠰᠦ ᠲᠣᠭᠠᠯᠠᠨ ᠪᠤᠯᠭᠢᠪᠠ
ᠲᠡᠩᠬᠡᠭᠡ ᠰᠠᠢᠨ ᠳ᠋ᠠᠭᠠᠨ ᠡᠰᠡ ᠲᠠᠯᠪᠢᠪᠠ
ᠲᠠᠲᠠᠵᠤ ᠲᠠᠯᠪᠢᠵᠤ ᠪᠠᠭᠤᠵᠤ ᠣᠴᠢᠭᠠᠳ
ᠬᠠᠰ ᠡᠷᠳᠡᠨᠢ ᠶ᠋ᠢᠨ ᠰᠢᠲᠦᠨ ᠳ᠋ᠦ᠍ᠨᠢ
ᠬᠥᠬᠡ ᠮᠥᠩᠭᠥᠨ ᠬᠠᠵᠠᠭᠠᠷ ᠢ᠋ ᠬᠠᠪᠴᠢᠭᠤᠯᠤᠨ
ᠰᠤᠷ ᠠᠯᠲᠠᠨ ᠵᠢᠯᠣᠭᠣ ᠶ᠋ᠢ ᠨᠢ
ᠰᠠᠪᠰᠠᠬᠠᠷ ᠰᠠᠢᠬᠠᠨ ᠳᠡᠯ ᠳ᠋ᠦ᠍ᠨᠢ
ᠠᠷᠠᠢ ᠬᠦᠷᠭᠡᠵᠦ ᠵᠠᠩᠭᠢᠳᠤᠨ ᠠᠪᠤᠭᠠᠳ
ᠴᠤᠯᠤ ᠮᠥᠩᠭᠥᠨ ᠴᠤᠯᠪᠤᠭᠤᠷ ᠢ᠋ᠶ᠋ᠠᠷ ᠬᠥᠲᠥᠯᠵᠦ ᠬᠠᠷᠢᠭᠠᠳ
ᠴᠢᠳᠬᠤᠮᠠᠯ ᠠᠯᠲᠠᠨ ᠭᠠᠳᠠᠰᠤᠨ ᠳ᠋ᠤ᠌
ᠠᠷᠠᠢ ᠬᠦᠷᠭᠡᠵᠦ ᠤᠶᠠᠪᠠ᠃
ᠬᠥᠳᠡᠭᠡ ᠶ᠋ᠢᠨ ᠴᠢᠨᠡᠭᠡ
ᠬᠥᠬᠡ ᠮᠥᠩᠭᠥᠨ ᠬᠡᠪᠢᠰ ᠢ᠋ ᠲᠣᠬᠣᠪᠠ
ᠬᠥᠲᠥᠯ ᠦ᠋ᠨ ᠴᠢᠨᠡᠭᠡ
ᠬᠥᠬᠡ ᠮᠥᠩᠭᠥᠨ ᠡᠮᠡᠭᠡᠯ ᠢ᠋ ᠳᠤᠬᠤᠪᠠ᠃
ᠬᠣᠢᠰᠢ ᠶᠠᠪᠤᠵᠤ ᠬᠣᠨᠣᠵᠤ ᠥᠨᠵᠢᠵᠦ ᠬᠦᠷᠦᠭᠡᠳ
ᠬᠦᠳᠡᠷ ᠠᠯᠲᠠᠨ ᠬᠤᠳᠠᠷᠭᠠ ᠶ᠋ᠢ
ᠠᠷᠠᠢ ᠬᠦᠷᠭᠡᠵᠦ ᠬᠤᠳᠠᠷᠭᠠᠯᠠᠪᠠ᠂
ᠡᠮᠦᠨᠡᠰᠢ ᠶᠠᠪᠤᠵᠤ ᠬᠦᠷᠦᠭᠡᠳ
ᠬᠦᠳᠡᠷ ᠠᠯᠲᠠᠨ ᠬᠥᠮᠥᠯᠳᠥᠷᠭᠡ ᠶ᠋ᠢ
ᠠᠷᠠᠢ ᠬᠦᠷᠭᠡᠵᠦ ᠬᠥᠮᠥᠯᠳᠥᠷᠭᠡᠯᠡᠪᠡ᠃
* * *
— — — —
① ᠪᠤᠯᠢᠶᠠᠮ— ᠤᠷᠲᠤᠳ ᠠ᠋ᠴᠠ ᠲᠥᠷᠥᠭᠰᠡᠨ ᠦᠬᠡᠷ
② ᠦᠯᠦ— ᠮᠠᠯ ᠤ᠋ᠨ ᠵᠢᠰᠦ
③ ᠭᠡᠢᠪᠡ— ᠲᠥᠷᠥᠪᠡ
④ ᠪᠠᠢᠷᠢ— ᠪᠠᠢᠯᠳᠤᠭᠠᠨ ᠤ᠋ ᠵᠢᠭᠰᠠᠭᠠᠯ ᠤ᠋ᠨ ᠭᠠᠵᠠᠷ
⑤ ᠥᠭᠰᠦᠭᠦᠯᠦᠨ — ᠳᠡᠭᠡᠭᠰᠢ
⑥ ᠳᠣᠷᠣᠭᠰᠢ
⑦ ᠬᠣᠣᠷᠠᠨ ᠱᠣᠣ ᠳᠠᠯᠠᠢ— ᠬᠣᠣᠷᠠᠲᠤ ᠭᠠᠰᠢᠭ ᠤ᠋ᠨ ᠳᠠᠯᠠᠢ
⑧ ᠰᠣᠢᠯᠤᠭᠠᠳ— ᠲᠦᠷᠭᠡᠨ ᠳᠡᠭᠡᠭᠰᠢ ᠡᠷᠭᠦᠬᠦ
ᠴᠢᠩ ᠵᠣᠷᠢᠭᠲᠤ ᠪᠠᠭᠠᠲᠤᠷ
ᠴᠡᠩᠭᠡᠯ ᠬᠦᠦ ᠮᠣᠷᠳᠠᠬᠤ ᠪᠠᠷ ᠰᠢᠳᠪᠡ᠂
ᠪᠠᠷᠠᠭᠤᠨ ᠪᠡᠶᠡ ᠥᠭᠡᠳᠡ ᠨᠢ
ᠪᠠᠭᠲᠠᠨ ᠶᠠᠳᠠᠨ ᠰᠠᠭᠤᠭᠰᠠᠨ ᠡᠷᠡᠴᠦᠳ ᠪᠣᠰᠴᠤ
ᠪᠠᠷᠠᠭᠤᠨ ᠪᠡᠶᠡ ᠶ᠋ᠢᠨ ᠪᠠᠷᠠᠭᠠ① ᠶ᠋ᠢ ᠠᠭᠤᠳᠠᠯᠵᠤ
ᠦᠢ ᠲᠦᠮᠡᠨ ᠲᠣᠪᠴᠢ ᠲᠠᠢ
ᠦᠬᠡᠷ ᠬᠥᠬᠡ ᠬᠤᠶᠠᠭ ᠢ᠋ ᠨᠢ ᠡᠮᠦᠰᠦᠭᠦᠯᠪᠡ᠂
ᠵᠡᠭᠦᠨ ᠪᠡᠶᠡ ᠥᠭᠡᠳᠡ ᠨᠢ
ᠵᠡᠷᠭᠡ ᠮᠡᠳᠡᠨ ᠰᠢᠬᠠᠯᠳᠤᠨ ᠰᠠᠭᠤᠭᠰᠠᠨ ᠡᠷᠡᠴᠦᠳ ᠪᠣᠰᠴᠤ
ᠵᠡᠭᠦᠨ ᠪᠡᠶᠡ ᠶ᠋ᠢᠨ ᠪᠠᠷᠠᠭᠠ ᠶ᠋ᠢ ᠠᠭᠤᠳᠠᠯᠵᠤ
ᠴᠠᠰᠤᠨ ᠠ᠋ᠴᠠ ᠴᠠᠭᠠᠨ
ᠴᠠᠭᠠᠰᠤᠨ ᠠ᠋ᠴᠠ ᠨᠢᠮᠭᠡᠨ
ᠴᠠᠷ ᠮᠥᠩᠭᠥᠨ ᠳᠤᠭᠤᠯᠠᠭᠠ ᠶ᠋ᠢ ᠨᠢ ᠡᠮᠦᠰᠦᠭᠦᠯᠪᠡ᠃
ᠬᠠᠨ ᠪᠤᠭᠤᠷᠤᠯ ᠠᠪᠤ ᠨᠢ
ᠪᠠᠷᠠᠭᠤᠨ ᠭᠠᠷ ᠢ᠋ ᠨᠢ ᠪᠠᠷᠢᠭᠠᠳ
ᠪᠠᠷᠠᠭᠤᠨ ᠬᠠᠴᠠᠷ ᠢ᠋ ᠨᠢ ᠲᠠᠭᠠᠯᠠᠭᠠᠳ᠄
《ᠶᠠᠪᠤᠭᠰᠠᠨ ᠬᠦᠦ ᠮᠢᠨᠢ
ᠠᠮᠤᠷ ᠮᠡᠨᠳᠦ ᠪᠠᠭᠤᠳᠠᠭ ᠪᠢᠯᠡ ᠤᠤ⁈》 ᠭᠡᠳ
ᠮᠣᠢᠯ ᠬᠠᠷᠠ ᠴᠡᠴᠡᠭᠡᠢ ᠡᠴᠡ ᠪᠡᠨ
ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠵᠤ ᠢᠷᠡᠪᠡ᠃
ᠬᠠᠲᠤᠨ ᠪᠤᠭᠤᠷᠤᠯ ᠡᠵᠢ ᠨᠢ
ᠵᠡᠭᠦᠨ ᠭᠠᠷ ᠠ᠋ᠴᠠ ᠨᠢ ᠪᠠᠷᠢᠭᠠᠳ
ᠵᠡᠭᠦᠨ ᠬᠠᠴᠠᠷ ᠢ᠋ ᠨᠢ ᠲᠠᠭᠠᠯᠠᠭᠠᠳ᠄
《ᠶᠠᠪᠤᠭᠰᠠᠨ ᠬᠦᠦ ᠮᠢᠨᠢ
ᠠᠮᠤᠷ ᠮᠡᠨᠳᠦ ᠪᠠᠭᠤᠳᠠᠭ ᠪᠢᠯᠡ ᠤᠤ⁈》 ᠭᠡᠳ
ᠮᠣᠢᠯ ᠬᠠᠷᠠ ᠴᠡᠴᠡᠭᠡᠢ ᠡᠴᠡ ᠪᠡᠨ
ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠪᠠ ᠭᠡᠨᠡ᠃
ᠬᠤᠷᠠᠭᠰᠠᠨ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠬᠤᠯᠠᠨ ᠵᠡᠭᠡᠷᠡ ᠰᠢᠭ
ᠵᠢᠰᠦ ᠵᠢᠰᠦ ᠪᠡᠨ ᠨᠡᠢᠯᠡᠭᠦᠯᠵᠦ
ᠬᠤᠨ ᠭᠠᠯᠠᠭᠤ ᠰᠢᠭ᠋
ᠳᠠᠭᠤ ᠳᠠᠭᠤ ᠪᠠᠨ ᠨᠡᠢᠯᠡᠭᠦᠯᠦᠨ᠄
《ᠶᠠᠪᠤᠭᠰᠠᠨ ᠬᠦᠦ ᠴᠡᠩᠭᠡᠯ
ᠠᠮᠤᠷ ᠮᠡᠨᠳᠦ ᠪᠠᠭᠤᠳᠠᠭ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ!
ᠰᠠᠭᠤᠭᠰᠠᠨ ᠬᠣᠲᠠ ᠬᠣᠰᠢᠭᠤ ᠮᠢᠨᠢ
ᠠᠮᠤᠷ ᠮᠡᠨᠳᠦ ᠪᠠᠢᠳᠠᠭ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ!》 ᠭᠡᠳ
ᠨᠢᠯᠪᠤᠰᠤ ᠠᠰᠬᠠᠷᠠᠭᠤᠯᠪᠠ ᠭᠡᠨᠡ᠃
* * *
ᠬᠠᠳᠠᠨ ᠵᠣᠷᠢᠭᠲᠤ ᠴᠡᠩᠭᠡᠯ ᠬᠦᠦ
ᠬᠠᠰᠠᠭ ᠲᠤᠤᠬᠠᠢ ᠳ᠋ᠠᠭᠠᠨ ᠮᠣᠷᠳᠠᠭᠠᠳ
ᠬᠦᠨᠳᠦ ᠰᠠᠢᠬᠠᠨ ᠰᠠᠭᠤᠳᠠᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ
ᠰᠠᠭᠤᠭᠠᠳ ᠠᠪᠤᠪᠠ ᠭᠡᠨᠡ
ᠬᠦᠷᠡᠩ ᠮᠥᠩᠭᠥᠨ ᠳᠥᠷᠥᠭᠡ ᠪᠡᠨ
ᠬᠦᠨᠳᠡᠷᠲᠡᠯᠡ ᠳᠥᠷᠥᠭᠡᠯᠡᠭᠡᠳ ᠠᠪᠤᠪᠠ ᠭᠡᠨᠡ᠃
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍ ᠲᠡᠮᠡᠴᠡᠨ
ᠲᠡᠰᠢᠭᠦᠯᠦᠨ ᠴᠣᠭᠭᠢᠭᠤᠯᠤᠭᠰᠠᠭᠠᠷ ᠶᠠᠪᠤᠵᠤ
ᠥᠨᠳᠥᠷ ᠡᠪᠡᠰᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠪᠥᠬᠥᠯᠵᠡᠭᠥᠯᠥᠯ ᠦᠭᠡᠢ
ᠨᠠᠷᠢᠨ ᠡᠪᠡᠰᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠨᠠᠬᠢᠯᠵᠠᠭᠤᠯᠤᠯ ᠦᠭᠡᠢ
ᠵᠣᠪᠠᠯᠠᠩ ᠤ᠋ᠨ ᠵᠢᠷᠠᠨ ᠭᠤᠷᠪᠠᠨ ᠠᠶᠤᠩᠭᠠ ᠶ᠋ᠢ
ᠪᠠᠷᠠᠭᠤᠨ ᠠᠳᠠᠭ ᠠᠷᠠᠭᠠᠨ ᠳ᠋ᠠᠭᠠᠨ
ᠢᠰᠬᠢᠷᠦᠨ ᠳᠡᠪᠰᠢᠭᠦᠯᠪᠡ ᠭᠡᠨᠡ
ᠵᠢᠷᠭᠠᠯᠠᠩ ᠤ᠋ᠨ ᠵᠢᠷᠠᠨ ᠵᠢᠷᠭᠤᠭᠠᠨ ᠠᠶᠤᠩᠭᠠ ᠶ᠋ᠢ
ᠵᠡᠭᠦᠨ ᠠᠳᠠᠭ ᠠᠷᠠᠭᠠᠨ ᠳ᠋ᠠᠭᠠᠨ
ᠢᠰᠬᠢᠷᠦᠨ ᠳᠡᠪᠰᠢᠭᠦᠯᠪᠡ ᠭᠡᠨᠡ᠃
ᠴᠠᠰᠤ ᠣᠷᠣᠵᠤ ᠪᠠᠢᠬᠤᠯᠠ
ᠡᠪᠦᠯ ᠪᠣᠯᠵᠤ ᠪᠣᠢ ᠭᠡᠵᠦ ᠪᠣᠳᠣᠭᠠᠳ
ᠨᠣᠭᠣᠭᠠ ᠤᠷᠭᠤᠵᠤ ᠪᠠᠢᠬᠤᠯᠠ
ᠵᠤᠨ ᠪᠣᠯᠵᠤ ᠪᠣᠢ ᠭᠡᠵᠦ ᠪᠣᠳᠣᠭᠠᠳ
ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠶᠠᠪᠤᠵᠤ ᠪᠠᠢᠲᠠᠯᠠ ᠪᠠᠨ
ᠵᠤᠯᠵᠠᠭᠠ ᠮᠣᠳᠣᠨ ᠤᠷᠭᠠ ᠨᠠᠬᠢᠯᠵᠠᠭᠤᠯᠤᠭᠰᠠᠨ
ᠵᠢᠭᠠᠯ ᠬᠦᠦ ᠲᠡᠢ ᠬᠠᠷᠭᠤᠪᠠ ᠭᠡᠨᠡ᠃
ᠴᠡᠩᠭᠡᠯ ᠬᠦᠦ ᠲᠡᠭᠦᠨ ᠡᠴᠡ᠄
《ᠠᠬᠠ ᠮᠢᠨᠢ ᠠᠮᠤᠷᠬᠠᠨ ᠰᠠᠢᠨ!
ᠣᠷᠣᠨ ᠨᠤᠲᠤᠭ ᠲᠠᠨᠢ ᠬᠠᠮᠢᠭᠠ ᠪᠣᠢ?
ᠡᠵᠡᠨ ᠨᠣᠶᠠᠨ ᠴᠢᠨᠢ ᠬᠡᠨ ᠪᠣᠢ?》 ᠭᠡᠬᠦ ᠳ᠋ᠦ᠍
ᠲᠡᠷᠡ ᠬᠣᠨᠢᠴᠢᠨ ᠬᠦᠦ᠄
《ᠪᠢ ᠪᠣᠯ ᠬᠦᠳᠡᠷ ᠠᠯᠲᠠᠢ ᠬᠠᠨ ᠤ᠋
ᠪᠢᠴᠢᠬᠠᠨ ᠠᠯᠪᠠᠲᠤ ᠪᠠᠢᠨᠠ》 ᠭᠡᠪᠡ᠃
ᠠᠮᠤᠷ ᠮᠡᠨᠳᠦ ᠪᠡᠨ ᠠᠰᠠᠭᠤᠯᠴᠠᠵᠤ
ᠠᠬᠠ ᠳᠣᠣᠷᠠ ᠪᠠᠨ ᠰᠣᠷᠠᠯᠴᠠᠵᠣ ②
ᠣᠷᠣᠨ ᠨᠤᠲᠤᠭ ᠢ᠋ᠶ᠋ᠠᠨ ᠲᠠᠨᠢᠯᠴᠠᠵᠤ
ᠬᠣᠶᠠᠷ ᠬᠦᠦ ᠰᠠᠯᠬᠤ ᠪᠣᠯᠬᠤ ᠳ᠋ᠤ᠌
ᠬᠣᠨᠢᠴᠢᠨ ᠬᠦᠦ ᠲᠡᠭᠦᠨ ᠡᠴᠡ
ᠬᠠᠮᠢᠭᠠ ᠶᠠᠪᠤᠵᠤ ᠪᠠᠢᠬᠤ ᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌᠄
《ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍
ᠪᠠᠳᠮᠠ ᠭᠡᠷᠡᠯ ᠬᠠᠨ ᠤ᠋ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠨᠠ!》 ᠭᠡᠵᠦ
ᠴᠡᠩᠭᠡᠯ ᠬᠦᠦ ᠬᠠᠷᠢᠭᠤᠯᠪᠠ᠃
ᠬᠣᠨᠢᠴᠢᠨ ᠬᠦᠦ ᠶ᠋ᠢᠨ ᠬᠡᠯᠡᠭᠰᠡᠨ ᠨᠢ᠄
《ᠡᠷᠡ ᠬᠥᠮᠦᠨ ᠦ᠌
ᠡᠯᠡᠲᠡᠯᠡ ᠶᠠᠪᠤᠳᠠᠭ ᠬᠣᠯᠠ ᠭᠠᠵᠠᠷ ᠭᠡᠯᠡ
ᠡᠯᠢᠶᠡ ᠰᠢᠪᠠᠭᠤ ᠭᠤᠷᠪᠠ ᠥᠨᠳᠡᠭᠡᠯᠡᠵᠦ ᠬᠦᠷᠦᠮᠡ
ᠬᠣᠯᠠ ᠭᠠᠵᠠᠷ ᠭᠡᠯᠡ
ᠲᠤᠷᠤᠭ ᠰᠢᠪᠠᠭᠤ ᠨᠢᠰᠦᠭᠡᠳ
ᠲᠤᠷᠠᠵᠤ ᠬᠦᠷᠦᠮᠡ ᠭᠠᠵᠠᠷ ᠭᠡᠯᠡ
ᠲᠤᠭᠤᠷᠠᠢᠲᠤ ᠮᠣᠷᠢ ᠳᠠᠪᠬᠢᠭᠠᠳ
ᠲᠤᠭᠤᠷᠠᠢ ᠨᠢ ᠮᠤᠯᠲᠤᠷᠠᠮᠠ ᠭᠠᠵᠠᠷ ᠭᠡᠯᠡ
ᠭᠠᠩ ᠰᠢᠯᠢ ᠪᠠᠢᠳᠠᠭ ᠭᠡᠯᠡ
ᠭᠠᠳᠣᠯᠣᠰᠢ ᠦᠭᠡᠢ ᠬᠣᠩᠬᠣᠷ ᠲᠣᠬᠢᠶᠠᠯᠳᠤᠳᠠᠭ ᠭᠡᠯᠡ
ᠬᠤᠤᠷᠠᠨ ᠱᠣᠣ ᠳᠠᠯᠠᠢ ᠶ᠋ᠢ ᠭᠠᠲᠤᠯᠳᠠᠭ ᠭᠡᠯᠡ
ᠬᠣᠣᠷᠠᠳᠠᠨ ᠶᠡᠬᠡ ᠳᠠᠢᠰᠤᠨ ᠲᠠᠢ ᠠᠭᠤᠯᠵᠠᠳᠠᠭ ᠭᠡᠯᠡ》 ᠭᠡᠵᠦ
* * *
ᠠᠬᠢᠭᠠᠳ ᠴᠠᠰᠢ ᠮᠤᠷᠳᠠᠵᠤ ᠶᠠᠪᠤᠭᠠᠳ
ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠪᠣᠯᠬᠤ ᠳ᠋ᠤ᠌
ᠵᠡᠭᠦᠳᠦᠨ ᠴᠦ᠍ ᠶᠦᠮ ᠤᠤ᠂
ᠲᠥᠭᠡᠷᠢᠭᠰᠡᠨ ᠴᠦ᠍ ᠶᠦᠮ ᠤᠤ ? ᠭᠡᠮᠡᠷ ᠪᠣᠯᠵᠤ
ᠴᠢᠩ ᠵᠣᠷᠢᠭᠲᠤ ᠴᠡᠩᠭᠡᠯ ᠬᠦᠦ᠄
《ᠬᠠᠢᠷᠠᠨ ᠰᠠᠢᠬᠠᠨ ᠪᠡᠶᠡ ᠶ᠋ᠢᠨ ᠮᠢᠨᠢ
ᠬᠠᠭᠠᠭᠳᠠᠬᠤ ᠭᠠᠵᠠᠷ ᠡᠨᠡ ᠪᠢᠯᠢᠤ?
ᠬᠠᠷᠠ ᠴᠢᠰᠤᠨ ᠤ᠋ ᠮᠢᠨᠢ
ᠠᠰᠬᠠᠷᠠᠬᠤ ᠭᠠᠵᠠᠷ ᠡᠨᠡ ᠪᠢᠯᠢᠤ?》 ᠭᠡᠳ
ᠬᠥᠬᠡ ᠮᠥᠩᠭᠥᠨ ᠰᠢᠯᠢ ᠳ᠋ᠦ᠍ ᠭᠠᠷᠴᠤ ᠬᠠᠷᠠᠬᠤ ᠳ᠋ᠤ᠌
ᠬᠥᠮᠦᠨ ᠠᠮᠢᠲᠠᠨ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ᠃
ᠴᠢᠩ ᠵᠣᠷᠢᠭᠲᠤ ᠪᠠᠭᠠᠲᠤᠷ
ᠴᠢᠭᠯᠡᠭᠡᠳ ᠴᠠᠭᠠᠰᠢ ᠶᠠᠪᠤᠭᠰᠠᠭᠠᠷ
ᠳᠣᠯᠣᠭᠠ ᠳᠣᠯᠣᠭᠠ ᠳᠥᠴᠢᠨ ᠶᠢᠰᠦᠨ ᠬᠣᠨᠣᠭ ᠪᠣᠯᠬᠤ ᠳ᠋ᠤ᠌
ᠬᠠᠷᠠ ᠴᠠᠭᠠᠨ ᠬᠣᠶᠠᠷ ᠨᠠᠴᠢᠨ ᠰᠢᠪᠠᠭᠤ
ᠬᠠᠯᠢᠨ ᠨᠢᠰᠴᠦ ᠬᠦᠷᠴᠦ ᠢᠷᠡᠭᠡᠳ
ᠬᠠᠵᠠᠭᠤ ᠳ᠋ᠤᠨᠢ ᠳᠣᠯᠣᠭᠠ ᠬᠣᠨᠣᠭ ᠳᠠᠭᠠᠭᠠᠳ
ᠬᠠᠯᠳᠠᠵᠤ ᠰᠢᠭᠦᠷᠦᠨ ᠠᠯᠳᠠᠭᠠᠳ ᠶᠠᠪᠤᠪᠠ᠃
ᠬᠣᠶᠠᠷ ᠳᠣᠯᠣᠭᠠ ᠬᠣᠨᠣᠬᠤ ᠳ᠋ᠤ᠌
ᠬᠠᠰᠠᠷ ᠪᠠᠰᠠᠷ ᠬᠣᠶᠠᠷ ᠨᠣᠬᠠᠢ ᠢᠷᠡᠵᠦ
ᠪᠠᠭᠠ ᠵᠢᠭᠠᠬᠠᠨ ᠴᠡᠩᠭᠡᠯ ᠬᠦᠦ ᠶ᠋ᠢ
ᠪᠠᠷᠢᠨ ᠠᠯᠳᠠᠭᠠᠳ ᠶᠠᠪᠤᠪᠠ
ᠭᠤᠷᠪᠠᠨ ᠳᠣᠯᠣᠭᠠ ᠬᠣᠨᠣᠬᠤ ᠳ᠋ᠤ᠌
ᠴᠠᠷᠬᠢ ᠴᠠᠭᠠᠨ ᠳᠤᠭᠤᠯᠠᠭᠠ ᠶ᠋ᠢᠨ ᠣᠷᠣᠢ
ᠴᠤᠬᠤᠢᠭᠠᠳ ᠢᠷᠡᠪᠡ ᠭᠡᠨᠡ᠃
ᠳᠥᠷᠪᠡᠨ ᠳᠣᠯᠣᠭᠠ ᠬᠣᠨᠣᠬᠤ ᠳ᠋ᠤ᠌
ᠨᠢᠭᠡᠨ ᠰᠠᠢᠨ ᠡᠷᠡ ᠶ᠋ᠢᠨ
ᠴᠡᠭᠡᠵᠢ ᠳᠡᠩᠬᠡᠢᠭᠡᠳ ᠢᠷᠡᠪᠡ ᠭᠡᠨᠡ᠃
ᠲᠠᠪᠤᠨ ᠳᠣᠯᠣᠭᠠ ᠬᠣᠨᠣᠬᠤ ᠳ᠋ᠤ᠌
ᠨᠢᠭᠡᠨ ᠰᠠᠢᠨ ᠠᠭᠲᠠ ᠶ᠋ᠢᠨ ᠴᠢᠬᠢ
ᠴᠤᠬᠤᠢᠭᠠᠳ ᠢᠷᠡᠪᠡ ᠭᠡᠨᠡ᠃
ᠵᠢᠷᠭᠤᠭᠠᠨ ᠳᠣᠯᠣᠭᠠ ᠬᠣᠨᠣᠬᠤ ᠳ᠋ᠤ᠌
ᠨᠢᠭᠡᠨ ᠰᠠᠢᠨ ᠠᠭᠲᠠ ᠶ᠋ᠢᠨ ᠴᠡᠭᠡᠵᠢ
ᠬᠣᠰᠢᠭᠤᠷᠠᠭᠠᠳ ᠢᠷᠡᠪᠡ ᠭᠡᠨᠡ᠃
ᠳᠣᠯᠣᠭᠠᠨ ᠳᠣᠯᠣᠭᠠ ᠬᠣᠨᠣᠬᠤ ᠳ᠋ᠤ᠌
ᠠᠭᠤᠯᠠ ᠶ᠋ᠢᠨ ᠴᠢᠨᠡᠭᠡ ᠴᠣᠬᠣᠷ ᠮᠣᠷᠢ ᠲᠠᠢ
ᠣᠮᠣᠭᠲᠤ ᠨᠢᠭᠡᠨ ᠰᠠᠢᠨ ᠡᠷᠡ
ᠬᠠᠵᠠᠭᠤ ᠳ᠋ᠠᠬᠢ ᠴᠡᠩᠭᠡᠯ ᠢ᠋
ᠬᠠᠷᠠ ᠪᠠᠲᠠᠭᠠᠨᠠ ᠶ᠋ᠢᠨ ᠴᠢᠨᠡᠭᠡ ᠪᠣᠳᠣᠯ ᠦᠭᠡᠢ
ᠲᠡᠮᠡᠦᠯᠦᠨ ᠭᠠᠷᠴᠤ ᠣᠳᠪᠠ ᠭᠡᠨᠡ᠃
ᠴᠡᠩᠭᠡᠯ ᠬᠦᠦ ᠪᠤᠰᠢᠭᠤᠯᠠᠵᠤ
ᠬᠠᠰᠠᠭ ᠲᠤᠤᠬᠠᠢ ᠪᠠᠨ ᠲᠠᠰᠢᠭᠤᠷᠳᠠᠨ
ᠬᠠᠵᠠᠭᠤ ᠳ᠋ᠤᠨᠢ ᠬᠦᠷᠴᠦ ᠣᠴᠢᠭᠠᠳ
ᠵᠥᠪ ᠡᠷᠭᠢᠵᠦ ᠢᠷᠡᠭᠡᠳ᠄
《ᠠᠬᠠ ᠮᠢᠨᠢ ᠠᠮᠤᠷᠬᠠᠨ ᠰᠠᠢᠨ!
ᠣᠷᠣᠨ ᠨᠤᠲᠤᠭ ᠲᠠᠨᠢ ᠬᠠᠮᠢᠭᠠ ᠪᠣᠢ?》 ᠭᠡᠵᠦ
ᠲᠡᠭᠦᠨ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌
ᠬᠠᠷᠠᠵᠤ ᠦᠵᠡᠬᠦ ᠴᠦ᠍ ᠦᠭᠡᠢ ᠶᠠᠪᠤᠭᠠᠳ ᠪᠠᠢᠪᠠ᠃
ᠳᠠᠬᠢᠨ ᠭᠦᠢᠴᠡᠵᠦ ᠣᠴᠢᠭᠠᠳ
ᠪᠤᠷᠤᠭᠤ ᠡᠷᠭᠢᠵᠦ ᠢᠷᠡᠭᠡᠳ᠄
《ᠠᠬᠠ ᠮᠢᠨᠢ ᠠᠮᠠᠷᠬᠠᠨ ᠰᠠᠢᠨ!
ᠨᠣᠶᠠᠨ ᠲᠠᠨ ᠬᠡᠨ ᠪᠣᠢ?》 ᠭᠡᠵᠦ
ᠲᠡᠭᠦᠨ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌
ᠳᠠᠭᠤ ᠦᠭᠡᠢ ᠶᠠᠪᠤᠭᠠᠳ ᠪᠠᠢᠪᠠ᠃
ᠴᠢᠩ ᠵᠣᠷᠢᠭᠲᠤ ᠪᠠᠭᠠᠲᠤᠷ
ᠴᠡᠩᠭᠡᠯ ᠬᠦᠦ ᠲᠡᠭᠦᠨ ᠦ᠌ ᠥᠭᠡᠳᠡ᠄
《ᠬᠣᠶᠠᠷ ᠡᠷᠡ ᠬᠥᠮᠦᠨ
ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠬᠠᠷᠭᠤᠴᠢᠭᠠᠳ
ᠠᠮᠤᠷ ᠮᠡᠨᠳᠦ ᠪᠡᠨ ᠠᠰᠠᠭᠤᠯᠴᠠᠭᠠᠳ ᠭᠠᠷᠳᠠᠭ ᠪᠠᠢᠲᠤᠭᠠᠢ
ᠬᠣᠶᠠᠷ ᠬᠡᠦᠬᠡᠳ ᠬᠥᠮᠦᠨ
ᠬᠠᠭᠠᠯᠭᠠ ᠵᠠᠮ ᠳᠡᠭᠡᠷᠡ ᠬᠠᠷᠭᠤᠪᠠᠯ
ᠠᠮᠤᠷ ᠮᠡᠨᠳᠦ ᠪᠡᠨ ᠠᠰᠠᠭᠤᠯᠴᠠᠭᠠᠳ
ᠠᠬᠠ ᠳᠡᠭᠦᠦ ᠪᠡᠨ ᠰᠤᠷᠠᠭᠯᠠᠭᠠᠳ
ᠭᠠᠷᠳᠠᠭ ᠪᠢᠰᠢᠦ ᠪᠢᠯᠢᠤ?》ᠭᠡᠵᠦ ᠬᠡᠯᠡᠪᠡ᠃
《ᠠᠮᠠ ᠴᠢᠨᠢ ᠶᠠᠮᠠᠷ ᠶᠡᠬᠡ ᠬᠦᠦ ᠪᠣᠢ?
ᠴᠢᠳᠠᠯ ᠴᠢᠨᠢ ᠶᠠᠮᠠᠷ ᠪᠠᠭᠠ ᠬᠦᠦ ᠪᠣᠢ?》ᠭᠡᠵᠦ
ᠲᠡᠷᠡ ᠬᠥᠮᠦᠨ ᠠᠭᠤᠷᠯᠠᠭᠠᠳ
ᠬᠠᠢᠷᠰᠤᠲᠤ ᠬᠠᠷᠠ ᠮᠢᠯᠠᠭᠠ ᠪᠠᠷ ᠢ᠋ᠶ᠋ᠠᠨ
ᠴᠠᠷᠬᠢ ᠴᠠᠭᠠᠨ ᠲᠤᠭᠤᠯᠭᠠ ᠤᠷᠤᠭᠤ ᠨᠢ
ᠨᠢᠭᠡ ᠲᠠᠲᠠᠭᠠᠳ ᠠᠪᠤᠪᠠ ᠭᠡᠨᠡ᠃
《ᠠᠬᠠ ᠮᠢᠨᠢ ᠶᠠᠮᠠᠷ ᠪᠣᠢ?
ᠣᠳᠣ ᠮᠢᠨᠦ ᠡᠭᠡᠯᠵᠢ ᠪᠣᠯᠪᠠ? 》ᠭᠡᠵᠦ
ᠴᠡᠩᠭᠡᠯ ᠬᠦᠦ ᠶ᠋ᠢ ᠬᠡᠯᠡᠬᠦ ᠳ᠋ᠦ᠍᠄
《ᠴᠢᠨᠦ ᠡᠭᠡᠯᠵᠢ ᠪᠣᠯᠬᠤ ᠨᠢ ᠲᠡᠷᠡ!》ᠭᠡᠵᠦ
ᠲᠡᠷᠡ ᠡᠷᠡ ᠬᠠᠷᠢᠭᠤᠯᠪᠠ᠃
ᠴᠢᠩ ᠵᠣᠷᠢᠭᠲᠤ ᠪᠠᠭᠠᠲᠤᠷ
ᠴᠡᠩᠭᠡᠯ ᠬᠦᠦ ᠬᠠᠷᠢᠭᠤ ᠳ᠋ᠤᠨᠢ
ᠨᠠᠢ᠍ᠮᠠᠨ ᠱᠠᠷ ᠤᠨ ᠠᠷᠠᠰᠤᠨ ᠳᠣᠲᠣᠷ ᠲᠠᠢ
ᠨᠠᠶᠠᠨ ᠱᠠᠷ ᠤ᠋ᠨ ᠠᠷᠠᠰᠤᠨ ᠭᠠᠳᠠᠷ ᠲᠠᠢ
ᠭᠣᠷ ᠤ᠋ᠨ ᠰᠣᠶᠣᠭᠠᠨ ᠡᠰᠢ ᠲᠡᠢ
ᠭᠤᠨᠠ ᠶ᠋ᠢᠨ ᠬᠦᠵᠦᠭᠦᠨ ᠰᠠᠭᠠᠯᠳᠤᠷᠭᠠ ᠲᠠᠢ
ᠬᠠᠢᠷᠰᠤᠲᠤ ᠬᠠᠷᠠ ᠮᠢᠯᠠᠭᠠ ᠪᠠᠷ ᠢ᠋ᠶ᠋ᠠᠨ
ᠨᠢᠭᠡ ᠲᠠᠲᠠᠭᠠᠳ ᠠᠪᠤᠪᠠ᠃
ᠲᠡᠭᠡᠭᠡᠳ ᠲᠡᠳᠡ ᠬᠣᠶᠠᠷ
ᠮᠠᠨ ᠤ ᠬᠣᠶᠠᠷ ᠬᠥᠮᠦᠨ
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠦ᠋ᠳ ᠦ᠋ᠨ
ᠬᠦᠴᠦ ᠪᠡᠷ ᠨᠢᠭᠡ ᠪᠣᠯᠤᠯᠴᠠᠶᠠ ᠭᠡᠳ
ᠳᠠᠬᠢ ᠶ᠋ᠢᠨ ᠠᠷᠠᠰᠤᠨ ᠵᠣᠳᠣᠭ ᠤ᠋ᠳ ᠢ᠋
ᠲᠠᠰᠢᠶᠠᠨ ᠳᠡᠭᠡᠷᠡ ᠪᠡᠨ ᠨᠥᠮᠥᠷᠦᠭᠡᠳ
ᠪᠤᠭᠤ ᠶ᠋ᠢᠨ ᠠᠷᠠᠰᠤᠨ ᠵᠣᠳᠣᠭ ᠤ᠋ᠳ ᠢ᠋
ᠪᠤᠯᠴᠢᠩ ᠳᠡᠭᠡᠷᠡ ᠪᠡᠨ ᠣᠷᠬᠢᠭᠠᠳ
ᠬᠦᠯᠦᠭ ᠦ᠋ᠨ ᠳᠡᠭᠡᠷᠡ ᠪᠡᠨ ᠦᠵᠡᠯᠴᠡᠭᠡᠳ
ᠬᠡᠨ ᠠᠯᠢᠨ ᠴᠣ ᠳᠡᠢᠯᠦᠭᠰᠡᠨ ᠦᠭᠡᠢ᠃
* * *
— — — —
① ᠪᠠᠷᠠᠭᠠ— ᠠᠪᠳᠠᠷᠠ
② ᠰᠣᠷᠠᠯᠴᠠᠵᠣ— ᠨᠠᠰᠤ ᠨᠠᠰᠤ ᠪᠠᠨ ᠠᠰᠠᠭᠤᠯᠴᠠᠵᠤ᠂ ᠠᠬᠠᠮᠠᠳ ᠳᠡᠭᠦᠮᠡᠳ ᠢ᠋ᠶ᠋ᠡᠨ ᠮᠡᠳᠡᠯᠴᠡᠬᠦ
ᠴᠢ ᠪᠢᠳᠡ ᠬᠣᠶᠠᠷ ᠬᠥᠮᠦᠨ
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠦ᠋ᠳ ᠦ᠋ᠨ
ᠬᠦᠴᠦᠨ ᠢ᠋ᠶ᠋ᠡᠷ ᠦᠵᠡᠭᠡᠳ ᠬᠦᠴᠦᠷᠡᠬᠦ ᠦᠭᠡᠢ
ᠣᠳᠣ ᠪᠢᠳᠡ ᠬᠣᠶᠠᠷ
ᠤᠷᠠᠴᠤᠳ ᠤ᠋ᠨ ᠤᠷᠠᠯᠠᠵᠤ ᠬᠢᠭᠰᠡᠨ
ᠬᠥᠬᠡ ᠲᠡᠮᠦᠷ ᠢ᠋ᠶ᠋ᠡᠷ ᠪᠣᠯᠤᠯᠴᠠᠶᠠ ᠭᠡᠳ
ᠪᠠᠷᠠᠭᠤᠨ ᠵᠡᠭᠦᠨ ᠠᠭᠤᠯᠠ ᠶ᠋ᠢᠨ
ᠪᠠᠯ ᠪᠠᠷᠢᠯᠴᠠᠨ ᠪᠣᠯᠤᠯᠴᠠᠬᠤ ᠪᠣᠯᠵᠤ
ᠦᠢ ᠲᠦᠮᠡᠨ ᠲᠣᠪᠴᠢ ᠲᠠᠢ
ᠦᠬᠡᠷ ᠬᠤᠶᠠᠭ ᠢ᠋ᠶ᠋ᠠᠨ ᠲᠠᠢᠯᠵᠤ ᠲᠠᠯᠪᠢᠬᠤ ᠳ᠋ᠤ᠌
ᠠᠭᠤᠯᠠ ᠶ᠋ᠢᠨ ᠵᠡᠷᠭᠡ ᠣᠪᠣᠭᠠ ᠪᠣᠯᠪᠠ᠃
ᠪᠠᠷᠠᠭᠤᠨ ᠵᠡᠭᠦᠨ ᠬᠣᠶᠠᠷ ᠠᠭᠤᠯᠠᠨ ᠤ᠋
ᠣᠷᠣᠢ ᠳ᠋ᠤ᠌ ᠭᠠᠷᠬᠤ ᠪᠠᠷ ᠰᠠᠯᠬᠤ ᠳ᠋ᠠᠭᠠᠨ
ᠪᠢᠴᠢᠬᠠᠨ ᠪᠠᠭᠠᠲᠤᠷ ᠴᠡᠩᠭᠡᠯ᠄
《ᠠᠬᠠ ᠮᠢᠨᠢ ᠲᠠ ᠤᠷᠢᠳᠠ ᠬᠠᠷᠪᠤᠬᠤ ᠤᠤ?
ᠪᠢ ᠤᠷᠢᠳᠠ ᠪᠠᠷ ᠬᠠᠷᠪᠤᠬᠤ ᠤᠤ?》ᠭᠡᠬᠦ ᠳ᠋ᠦ᠍᠄
《ᠴᠢ ᠮᠠᠭᠤ ᠬᠦᠦ ᠬᠠᠷᠪᠤᠳᠠᠭ ᠶᠤᠮ ᠤᠤ?
ᠪᠢ ᠤᠷᠢᠳᠠ ᠬᠠᠷᠪᠤᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠳ
ᠪᠠᠷᠠᠭᠤᠨᠰᠢ ᠵᠡᠭᠦᠨᠰᠢ ᠰᠠᠯᠵᠤ ᠶᠠᠪᠤᠭᠠᠳ
ᠲᠡᠷᠡ ᠬᠥᠮᠦᠨ ᠰᠤᠮᠤ ᠪᠠᠨ ᠣᠨᠢᠯᠠᠭᠠᠳ
ᠦᠷ ᠦ᠋ᠨ ᠰᠢᠷᠠ ᠭᠡᠷᠡᠯ ᠡᠴᠡ ᠲᠠᠲᠠᠵᠤ
ᠦᠳᠡᠰᠢ ᠶ᠋ᠢᠨ ᠰᠢᠷᠠ ᠭᠡᠷᠡᠯ ᠪᠣᠯᠬᠤ ᠦᠶᠡ ᠳ᠋ᠦ᠍
ᠡᠷᠡᠬᠡᠢ ᠳᠣᠯᠣᠪᠣᠷ ᠬᠣᠶᠠᠷ ᠠ᠋ᠴᠠ ᠪᠠᠨ
ᠬᠤᠯᠠᠨ ᠦᠬᠡᠷ ᠦ᠋ᠨ ᠴᠢᠨᠡᠭᠡ ᠨᠥᠵᠢ
ᠪᠤᠯᠲᠤ ᠪᠤᠯᠲᠤ ᠶ᠋ᠢᠨ ᠠᠬᠤ ᠦᠶᠡ ᠳ᠋ᠦ᠍ ᠲᠠᠯᠪᠢᠬᠤ ᠳ᠋ᠤ᠌
ᠴᠡᠩᠭᠡᠯ ᠦ᠋ᠨ ᠠᠪᠳᠠᠷᠠ ᠰᠠᠢᠬᠠᠨ ᠴᠡᠭᠡᠵᠢ ᠶ᠋ᠢᠨ ᠬᠢᠨᠢ
ᠠᠰ ᠳᠤᠮᠳᠠ ᠨᠢ ᠲᠣᠰᠤᠭᠠᠳ
ᠬᠠᠩᠭᠢᠷ ᠬᠢᠩᠭᠢᠷ ᠭᠡᠵᠦ ᠳᠤᠤᠭᠠᠷᠤᠭᠠᠳ
ᠬᠣᠢᠰᠢ ᠬᠡᠳᠡᠷᠡᠬᠦ ᠰᠤᠮᠤ ᠨᠢ ᠤᠨᠠᠵᠤ ᠣᠳᠪᠠ᠃
ᠴᠡᠩᠭᠡᠯ ᠬᠦᠦ ᠶ᠋ᠢᠨ ᠡᠭᠡᠯᠵᠢ ᠪᠣᠯᠵᠤ
ᠳᠡᠪᠬᠡ ᠳᠡᠭᠡᠷᠡ ᠨᠢ ᠲᠡᠭᠡ ᠬᠤᠴᠠ ᠮᠥᠷᠭᠥᠯᠳᠦᠬᠦᠯᠦᠨ ᠰᠡᠢᠯᠦᠭᠰᠡᠨ
ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢ ᠨᠤᠭᠤᠰᠤ ᠭᠠᠯᠠᠭᠤ ᠰᠢᠬᠦᠷᠦᠯᠳᠦᠬᠦᠯᠦᠨ ᠰᠡᠢᠯᠦᠭᠰᠡᠨ
ᠪᠠᠷᠢᠭᠤᠯ ᠳᠡᠭᠡᠷᠡ ᠨᠢ ᠪᠠᠷᠰ ᠠᠷᠰᠯᠠᠨ ᠪᠠᠷᠢᠯᠳᠤᠭᠤᠯᠤᠨ ᠰᠡᠢᠯᠦᠭᠰᠡᠨ
ᠶᠡᠷᠡᠨ ᠲᠡᠭᠡ ᠶ᠋ᠢᠨ ᠡᠪᠡᠷ ᠢ᠋ᠶ᠋ᠡᠷ ᠬᠢᠭᠰᠡᠨ
ᠶᠡᠬᠡ ᠬᠠᠷᠠ ᠨᠤᠮᠤ ᠳ᠋ᠠᠭᠠᠨ ᠰᠤᠮᠤ ᠪᠠᠨ ᠣᠨᠢᠯᠠᠭᠠᠳ
ᠦᠷ ᠦ᠋ᠨ ᠰᠢᠷᠠ ᠭᠡᠷᠡᠯ ᠢ᠋ᠶ᠋ᠡᠷ ᠲᠠᠲᠠᠭᠠᠳ
ᠦᠳᠡᠰᠢ ᠶ᠋ᠢᠨ ᠨᠢᠭᠤᠬᠤ ᠰᠢᠷᠠ ᠭᠡᠷᠡᠯ ᠪᠣᠯᠬᠤ ᠳ᠋ᠤ᠌
ᠡᠷᠡᠬᠡᠢ ᠳᠣᠯᠣᠪᠣᠷ ᠬᠣᠶᠠᠷ ᠠ᠋ᠴᠠ ᠪᠠᠨ
ᠭᠤᠨᠠᠨ ᠦᠬᠡᠷ ᠦ᠋ᠨ ᠴᠢᠨᠡᠭᠡᠨ ᠨᠥᠵᠢ
ᠪᠤᠯᠲᠤ ᠪᠤᠯᠲᠤ ᠤᠨᠠᠬᠤ ᠳ᠋ᠤ᠌ ᠲᠠᠯᠪᠢᠬᠤ ᠳ᠋ᠠᠭᠠᠨ᠄
《ᠠᠪᠳᠠᠷᠠ ᠰᠠᠢᠬᠠᠨ ᠴᠡᠭᠡᠵᠢᠨ ᠦ᠌ ᠬᠢᠨᠢ
ᠠᠰ ᠳᠤᠮᠳᠠᠭᠤᠷ ᠨᠢ ᠨᠡᠪᠲᠡᠯᠵᠦ ᠭᠠᠷᠤᠭᠠᠳ
ᠲᠦᠮᠡᠨ ᠲᠡᠮᠡᠭᠡᠨ ᠦ᠌ ᠳᠤᠮᠳᠠ
ᠲᠦᠢᠮᠡᠷ ᠪᠠᠳᠠᠷᠠᠭᠤᠯᠤᠨ ᠲᠣᠰᠤᠭᠠᠷᠠᠢ!》 ᠭᠡᠵᠦ
ᠰᠢᠪᠰᠢᠭᠡᠳ ᠲᠠᠯᠪᠢᠪᠠ ᠭᠡᠨᠡ᠃
ᠲᠡᠷᠡ ᠬᠥᠮᠦᠨ ᠦ᠌ ᠠᠪᠳᠠᠷᠠ ᠰᠠᠢᠬᠠᠨ ᠴᠡᠭᠡᠵᠢᠨ ᠦ᠌
ᠠᠰ ᠳᠤᠮᠳᠠ ᠨᠢ ᠲᠣᠰᠤᠭᠠᠳ
ᠬᠦᠩ ᠬᠠᠩ ᠭᠡᠵᠦ ᠳᠤᠤᠭᠠᠷᠤᠭᠠᠳ
ᠰᠤᠮᠤ ᠨᠢ ᠭᠡᠳᠡᠷᠭᠦ ᠤᠨᠠᠪᠠ ᠭᠡᠨᠡ᠃
* * *
ᠲᠡᠭᠡᠭᠡᠳ ᠲᠡᠷᠡ ᠬᠣᠶᠠᠭᠤᠯᠠ ᠪᠠᠨ
ᠡᠴᠢᠭᠡ ᠡᠬᠡ ᠶ᠋ᠢᠨ ᠥᠭᠭᠦᠭᠰᠡᠨ
ᠡᠷᠬᠢᠮ ᠳᠠᠯᠤ ᠪᠠᠷ ᠪᠣᠯᠤᠯᠴᠠᠶᠠ ᠭᠡᠳ
ᠬᠣᠨᠣᠭ ᠤ᠋ᠨ ᠭᠠᠵᠠᠷ ᠠ᠋ᠴᠠ
ᠬᠣᠨᠢᠨ ᠴᠢᠨᠡᠭᠡᠨ ᠴᠢᠯᠠᠭᠤ ᠪᠠᠷ ᠴᠣᠬᠢᠯᠳ᠋ᠤᠨ ᠢᠷᠡᠵᠦ
ᠡᠳᠦᠷ ᠦ᠋ᠨ ᠭᠠᠵᠠᠷ ᠠ᠋ᠴᠠ
ᠦᠬᠡᠷ ᠦ᠋ᠨ ᠴᠢᠨᠡᠭᠡ ᠴᠢᠯᠠᠭᠤ ᠪᠠᠷ ᠴᠣᠬᠢᠯᠳ᠋ᠤᠨ ᠢᠷᠡᠵᠦ
ᠬᠠᠳᠠ ᠶ᠋ᠢᠨ ᠢᠷ ᠲᠡᠢ ᠶ᠋ᠢ
ᠬᠠᠭᠠᠯᠵᠤ ᠠᠪᠤᠨ ᠴᠣᠬᠢᠯᠳᠤᠨ ᠢᠷᠡᠵᠦ
ᠬᠠᠷᠭᠠᠢ ᠶ᠋ᠢᠨ ᠦᠨᠳᠦᠰᠦ ᠲᠡᠢ ᠶ᠋ᠢ
ᠲᠠᠰᠤᠳᠠᠨ ᠴᠣᠬᠢᠯᠳᠤᠭᠠᠳ ᠢᠷᠡᠵᠦ
ᠠᠭᠤᠯᠠ ᠶ᠋ᠢ ᠳᠠᠭᠠᠷᠢᠵᠤ ᠬᠥᠳᠡᠭᠡ ᠪᠣᠯᠭᠠᠵᠤ
ᠤᠰᠤ ᠶ᠋ᠢ ᠳᠠᠭᠠᠷᠢᠵᠤ ᠱᠠᠯᠪᠠ ᠪᠣᠯᠭᠠᠵᠤ
ᠮᠣᠳᠣ ᠶ᠋ᠢ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠭᠠᠵᠤ
ᠤᠰᠤ ᠶ᠋ᠢ ᠰᠢᠷᠭᠢᠭᠡᠬᠦ ᠳ᠋ᠦ᠍ ᠬᠦᠷᠭᠡᠵᠦ ᠢᠷᠡᠪᠡ ᠭᠡᠨᠡ᠃
ᠪᠠᠷᠢᠭᠰᠠᠨ ᠭᠠᠵᠠᠷ ᠠ᠋ᠴᠠ ᠪᠠᠨ
ᠪᠠᠷᠢᠭᠤᠯ ᠤ᠋ᠨ ᠴᠢᠨᠡᠭᠡ ᠮᠢᠬᠠ
ᠲᠠᠰᠤᠴᠢᠨ ᠬᠠᠶᠠᠯᠠᠭᠠᠳ ᠢᠷᠡᠪᠡ
ᠬᠦᠷᠦᠭᠰᠡᠨ ᠭᠠᠵᠠᠷ ᠠ᠋ᠴᠠ ᠪᠠᠨ
ᠬᠦᠷᠵᠡ ᠶ᠋ᠢᠨ ᠴᠢᠨᠡᠭᠡ ᠮᠢᠬᠠ
ᠲᠠᠰᠤᠴᠢᠨ ᠬᠠᠶᠠᠯᠠᠭᠠᠳ ᠢᠷᠡᠪᠡ ᠭᠡᠨᠡ᠃
* * *
ᠲᠡᠷᠡ ᠡᠷᠡ ᠨᠢᠭᠡᠨ ᠡᠳᠦᠷ
ᠠᠷᠤ ᠶ᠋ᠢᠨ ᠠᠭᠤᠯᠠ ᠶ᠋ᠢ ᠠᠪᠤᠭᠠᠳ
ᠠᠰᠯᠠᠭᠤᠯᠵᠤ ᠴᠣᠬᠢᠭᠠᠳ ᠢᠷᠡᠵᠦ ᠭᠡᠨᠡ
ᠥᠪᠥᠷ ᠦ᠋ᠨ ᠠᠭᠤᠯᠠ ᠶ᠋ᠢ ᠠᠪᠤᠭᠠᠳ
ᠥᠭᠡᠳᠡ ᠡᠴᠡ ᠨᠢ ᠴᠣᠬᠢᠭᠠᠳ ᠢᠷᠡᠪᠡ ᠭᠡᠨᠡ᠃
ᠴᠢᠩ ᠵᠣᠷᠢᠭᠲᠤ ᠴᠡᠩᠭᠡᠯ ᠬᠦᠦ ᠶ᠋ᠢᠨ
ᠬᠠᠷᠠ ᠴᠢᠰᠤ ᠨᠢ ᠠᠰᠬᠠᠷᠠᠭᠠᠳ
ᠬᠠᠳᠠᠨ ᠶᠠᠰᠤ ᠨᠢ ᠬᠡᠦᠷᠡᠭᠡᠳ ᠢᠷᠡᠬᠦ ᠳ᠋ᠦ᠍
ᠪᠠᠲᠤᠲᠠᠢ ᠭᠤᠷᠪᠠᠨ ᠪᠣᠳᠣᠯ ᠢ᠋ᠶ᠋ᠠᠨ ᠪᠣᠳᠣᠭᠠᠳ
ᠪᠠᠭᠠᠲᠤᠷ ᠢᠳᠡ ᠬᠦᠴᠦ ᠪᠡᠨ ᠭᠠᠷᠭᠠᠭᠠᠳ
ᠠᠷᠠᠭᠠ ᠰᠢᠳᠦ ᠪᠡᠨ ᠵᠠᠭᠤᠵᠤ
ᠠᠯᠠᠯᠳᠤᠵᠤ ᠣᠷᠣᠵᠤ ᠣᠴᠢᠭᠠᠳ
ᠠᠷᠤ ᠶ᠋ᠢᠨ ᠠᠭᠤᠯᠠ ᠶ᠋ᠢ ᠠᠪᠴᠤ ᠠᠰᠯᠠᠭᠤᠯᠤᠨ ᠴᠣᠬᠢᠭᠠᠳ
ᠥᠪᠥᠷ ᠦ᠋ᠨ ᠠᠭᠤᠯᠠ ᠶ᠋ᠢ ᠠᠪᠴᠤ
ᠥᠭᠡᠳᠡ ᠡᠴᠡ ᠨᠢ ᠴᠣᠬᠢᠵᠤ ᠣᠴᠢᠭᠠᠳ
ᠠᠩᠭᠠᠯᠵᠠᠭᠴᠢ ᠠᠮᠠᠨ ᠬᠦᠵᠦᠭᠦᠦ ᠳᠡᠭᠡᠷᠡ ᠨᠢ ᠰᠠᠭᠤᠵᠤ
ᠠᠯᠠᠵᠤ ᠰᠦᠢᠳᠬᠡᠬᠦ ᠪᠡᠷ ᠪᠡᠯᠡᠳᠬᠡᠭᠡᠳ
ᠬᠠᠷᠠ ᠲᠣᠩᠭᠣᠷᠠᠭ ᠢ᠋ᠶ᠋ᠠᠨ ᠭᠠᠷᠭᠠᠵᠤ
ᠬᠠᠭᠠᠯᠵᠤ ᠡᠪᠳᠡᠯᠡᠬᠦ ᠶ᠋ᠢᠨ ᠡᠮᠦᠨᠡ᠄
《ᠠᠬᠠ ᠮᠢᠨᠢ ᠠᠮᠠᠷᠬᠠᠨ ᠰᠠᠢᠨ!
ᠠᠷᠤ ᠨᠤᠲᠤᠭ ᠲᠠᠨᠢ ᠬᠠᠮᠢᠭᠠ ᠪᠣᠢ?
ᠠᠯᠳᠠᠷ ᠨᠡᠷᠡ ᠴᠢᠨᠢ ᠬᠡᠨ ᠪᠣᠢ?
ᠠᠯᠤᠰ ᠤ᠋ᠨ ᠵᠣᠷᠢᠯᠭᠠ ᠶᠠᠭ ᠤ᠋ᠨ ᠳ᠋ᠤ᠌ ᠪᠣᠢ?》 ᠭᠡᠬᠦ ᠳ᠋ᠦ᠍
ᠲᠡᠷᠡ ᠬᠥᠮᠦᠨ ᠥᠭᠡᠳᠡ ᠡᠴᠡ ᠨᠢ᠄
《ᠴᠢ ᠶᠠᠭᠠᠬᠢᠭᠰᠠᠨ ᠡᠷᠭᠢᠭᠦᠦ ᠬᠦᠦ ᠪᠣᠢ?
ᠦᠬᠦᠬᠦ ᠪᠣᠯᠤᠭᠰᠠᠨ ᠬᠥᠮᠦᠨ
ᠣᠷᠣᠨ ᠨᠤᠲᠤᠭ ᠢ᠋ᠶ᠋ᠠᠨ ᠲᠠᠨᠢᠭᠤᠯᠤᠭᠠᠳ
ᠣᠪᠣᠭ ᠨᠡᠷᠡ ᠪᠡᠨ ᠬᠡᠯᠡᠳᠡᠭ ᠶᠦᠮ ᠤᠤ?
ᠴᠢᠨᠦ ᠲᠡᠷᠡ ᠮᠠᠭᠤ ᠬᠠᠷᠠ ᠲᠣᠩᠭᠣᠷᠠᠭ
ᠴᠡᠭᠡᠵᠢᠨ ᠪᠡᠶᠡ ᠶ᠋ᠢ ᠮᠢᠨᠢ ᠡᠪᠳᠡᠵᠦ ᠳᠠᠭᠠᠭᠠᠬᠤ ᠦᠭᠡᠢ᠃
ᠠᠷᠠᠰᠤᠨ ᠭᠤᠲᠤᠯ ᠤ᠋ᠨ ᠮᠢᠨᠢ ᠤᠯᠠ ᠳ᠋ᠤ᠌
ᠠᠯᠲᠠᠨ ᠬᠠᠷᠠ ᠲᠣᠩᠭᠣᠷᠠᠭ ᠪᠣᠢ
ᠲᠡᠭᠦᠨ ᠢ᠋ ᠣᠯᠵᠤ ᠭᠠᠷᠭᠠᠭᠠᠳ
ᠲᠦᠷᠭᠡᠨ ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠮᠢᠨᠢ ᠰᠠᠯᠭᠠᠴᠢᠬᠠ!
ᠡᠨᠡ ᠨᠢᠭᠡᠨ ᠤᠳᠠᠭᠠ ᠶ᠋ᠢᠨ
ᠠᠲᠠᠭᠠ ᠮᠠᠷᠭᠤᠭᠠ ᠶ᠋ᠢ ᠴᠢ ᠠᠪᠤᠭᠰᠠᠨ ᠪᠣᠯᠪᠠᠴᠤ
ᠡᠭᠦᠨ ᠡᠴᠡ ᠬᠣᠢᠰᠢ ᠠᠲᠠᠭᠠ ᠮᠠᠷᠭᠤᠭᠠ ᠶ᠋ᠢ
ᠴᠢ ᠠᠪᠬᠤ ᠦᠭᠡᠢ!》ᠭᠡᠵᠦ ᠵᠣᠷᠢᠭᠲᠠᠢ ᠬᠡᠯᠡᠪᠡ᠃
ᠠᠷᠠᠰᠤᠨ ᠭᠤᠲᠤᠯ ᠤ᠋ᠨ ᠬᠢᠨᠢ ᠤᠯᠠ ᠠ᠋ᠴᠠ
ᠠᠯᠲᠠᠨ ᠬᠠᠷᠠ ᠲᠣᠩᠭᠣᠷᠠᠭ ᠢ᠋ ᠨᠢ ᠭᠠᠷᠭᠠᠭᠠᠳ
ᠠᠯᠠᠬᠤ ᠭᠡᠵᠦ ᠪᠠᠢᠲᠠᠯᠠ
ᠠᠭᠤᠯᠠ ᠶ᠋ᠢᠨ ᠴᠢᠨᠡᠭᠡ ᠴᠣᠬᠣᠷ ᠮᠣᠷᠢ ᠨᠢ
ᠨᠢᠰᠦᠨ ᠬᠦᠷᠴᠦ ᠢᠷᠡᠭᠡᠳ ᠬᠡᠯᠡᠭᠰᠡᠨ ᠨᠢ᠄
《ᠴᠢ ᠡᠭᠦᠨ ᠢ᠋ ᠠᠯᠠᠭᠠᠳ ᠶᠠᠭᠤ ᠭᠡᠨᠡ?
ᠴᠢ ᠡᠭᠦᠨ ᠢ᠋ᠶ᠋ᠡᠷ ᠠᠯᠠᠭᠤᠯᠤᠭᠠᠳ ᠶᠠᠭᠤ ᠬᠢᠨᠡ?》ᠭᠡᠵᠦ
ᠢᠳᠬᠠᠨ ᠬᠣᠶᠠᠭᠤᠯᠠ ᠶ᠋ᠢ ᠬᠡᠯᠡᠪᠡ᠃
ᠬᠠᠰᠠᠭ ᠲᠤᠤᠬᠠᠢ ᠭᠡᠳᠡᠭ ᠰᠢᠷᠭᠠ ᠮᠣᠷᠢ ᠨᠢ
ᠬᠠᠯᠢᠵᠤ ᠨᠢᠰᠦᠨ ᠬᠦᠷᠴᠦ ᠢᠷᠡᠭᠡᠳ᠄
《ᠴᠢ ᠡᠭᠦᠨ ᠢ᠋ᠶ᠋ᠡᠷ ᠠᠯᠠᠭᠤᠯᠤᠭᠠᠳ ᠶᠠᠭᠤ ᠬᠢᠨᠡ?
ᠴᠢ ᠡᠭᠦᠨ ᠢ᠋ ᠠᠯᠠᠭᠠᠳ ᠶᠠᠭᠤ ᠬᠢᠨᠡ?
ᠠᠬᠠ ᠪᠠᠨ ᠭᠡᠵᠦ ᠶᠠᠪᠤᠭᠠᠳ
ᠮᠣᠷᠢ ᠪᠠᠨ ᠤᠶᠠᠭᠤᠯᠬᠤ ᠴᠢᠨᠢ ᠶᠠᠭᠠᠬᠢᠭᠠ ᠪᠣᠢ?
ᠮᠣᠳᠣ ᠪᠠᠨ ᠬᠤᠭᠤᠯᠤᠭᠤᠯᠬᠤ ᠴᠢᠨᠢ ᠶᠠᠭᠠᠬᠢᠭᠠ ᠪᠣᠢ?
ᠭᠠᠩ ᠬᠠᠭᠤᠷᠠᠢ ᠰᠢᠯᠢ ᠶ᠋ᠢ ᠲᠤᠭᠤᠯᠬᠤ ᠳ᠋ᠤ᠌
ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠭᠰᠠᠨ ᠠ᠋ᠴᠠ ᠳᠡᠭᠡᠷᠡ ᠪᠢᠰᠢᠦ?
ᠭᠠᠳᠤᠯᠤᠰᠢ ᠦᠭᠡᠢ ᠬᠣᠩᠬᠣᠷ ᠢᠶᠡᠷ ᠭᠠᠷᠬᠤ ᠳ᠋ᠤ᠌
ᠬᠣᠶᠠᠭᠤᠯᠠ ᠲᠤᠭᠤᠯᠬᠤ ᠳ᠋ᠤ᠌ ᠰᠠᠢᠨ ᠪᠢᠰᠢᠦ?
ᠪᠢᠳᠡ ᠬᠣᠶᠠᠷ ᠮᠣᠷᠢ
ᠠᠬᠠ ᠳᠡᠭᠦᠦ ᠪᠣᠯᠴᠢᠬᠠᠭᠠᠳ ᠶᠠᠪᠤᠨᠠ!》 ᠭᠡᠪᠡ᠃
《ᠠᠳᠠᠭ ᠤ᠋ᠨ ᠡᠪᠡᠰᠦᠨ ᠢᠳᠡᠭᠡ ᠲᠡᠢ ᠮᠠᠯ
ᠢᠩᠭᠢᠵᠦ ᠰᠠᠢᠬᠠᠨ ᠪᠠᠢᠬᠤ ᠳ᠋ᠤ᠌
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢᠨ ᠬᠥᠮᠦᠨ ᠪᠠᠢᠭᠠᠳ
ᠢᠩᠭᠢᠵᠦ ᠮᠠᠭᠤᠬᠠᠢ ᠪᠣᠯᠤᠭᠠᠳ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠵᠦ
ᠬᠣᠶᠠᠭᠤᠯᠠ ᠪᠣᠰᠤᠭᠠᠳ
ᠠᠮᠠᠨ ᠤ ᠪᠠᠨ ᠰᠢᠷᠣᠢ ᠶ᠋ᠢ ᠠᠯᠠᠭᠠ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠭᠠᠳ
ᠨᠢᠳᠦᠨ ᠦ᠌ ᠪᠡᠨ ᠰᠢᠷᠣᠢ ᠶ᠋ᠢ ᠨᠢᠳᠤᠷᠭᠠ ᠪᠠᠷ ᠢ᠋ᠶ᠋ᠠᠨ ᠠᠷᠴᠢᠭᠠᠳ
ᠠᠬᠠ ᠳᠡᠭᠦᠦ ᠬᠣᠶᠠᠷ ᠪᠣᠯᠤᠭᠠᠳ
ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠭᠡᠳ
ᠠᠯᠳᠠᠷ ᠨᠡᠷᠡ ᠪᠡᠨ ᠠᠰᠠᠭᠤᠯᠴᠠᠬᠤ ᠳ᠋ᠤ᠌
ᠲᠡᠷᠡ ᠪᠠᠭᠠᠲᠤᠷ ᠤ᠋ᠨ ᠬᠡᠯᠡᠭᠰᠡᠨ ᠨᠢ᠄
《ᠦᠬᠡᠷ ᠬᠠᠷᠠ ᠴᠢᠯᠠᠭᠤᠨ ᠡᠴᠡ ᠡᠭᠦᠰᠦᠭᠰᠡᠨ
ᠡᠯᠢᠭᠡᠨ ᠬᠠᠷᠠ ᠴᠢᠯᠠᠭᠤᠨ ᠡᠴᠡ ᠭᠠᠷᠤᠭᠰᠠᠨ
ᠮᠠᠩᠭᠤᠰ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠳᠠᠰᠤᠯᠤᠨ ᠪᠦᠲᠦᠭᠰᠡᠨ
ᠮᠢᠯ ᠤᠯᠠᠭᠠᠨ ᠭᠡᠳᠡᠭ ᠪᠢ ᠮᠥᠨ!》 ᠭᠡᠳ
《ᠳᠡᠭᠦᠦ ᠮᠢᠨᠢ ᠴᠢᠨᠦ
ᠣᠷᠣᠨ ᠨᠤᠲᠤᠭ ᠴᠢᠨᠢ ᠬᠠᠮᠢᠭᠠ ᠪᠣᠢ?
ᠣᠪᠣᠭ ᠨᠡᠷᠡ ᠴᠢᠨᠢ ᠬᠡᠨ ᠪᠣᠢ?
ᠤᠴᠢᠷ ᠶᠠᠪᠤᠳᠠᠯ ᠶᠠᠭᠤᠨ ᠳ᠋ᠤ᠌ ᠪᠣᠢ?》 ᠭᠡᠬᠦ ᠳ᠋ᠦ᠍
《ᠪᠠᠶᠠᠨ ᠬᠦᠳᠡᠷ ᠠᠯᠲᠠᠢ ᠶ᠋ᠢᠨ
ᠪᠠᠷᠠᠭᠤᠨ ᠰᠤᠭᠤ ᠪᠠᠷ ᠨᠤᠲᠤᠭᠯᠠᠭᠰᠠᠨ
ᠬᠦᠳᠡᠷ ᠠᠯᠲᠠᠢ ᠬᠠᠨ ᠤ᠋
ᠬᠦᠦ ᠴᠡᠩᠭᠡᠯ ᠪᠢ ᠮᠥᠨ᠃
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍
ᠪᠠᠳᠮᠠ ᠭᠡᠷᠡᠯ ᠬᠠᠨ ᠤ᠋ ᠳ᠋ᠤ᠌ ᠶᠠᠪᠤᠵᠤ ᠪᠣᠢ》 ᠭᠡᠵᠦ
ᠬᠡᠯᠡᠬᠦ ᠳ᠋ᠦ᠍ ᠮᠢᠯ ᠤᠯᠠᠭᠠᠨ᠄
《ᠬᠣᠯᠠ ᠭᠠᠵᠠᠷ ᠪᠠᠢᠳᠠᠭ ᠪᠢᠯᠡ
ᠬᠣᠣᠷᠠᠨ ᠱᠣᠣ ᠳᠠᠯᠠᠢ ᠶ᠋ᠢ ᠭᠠᠲᠤᠯᠳᠠᠭ ᠪᠢᠯᠡ
ᠬᠣᠣᠷᠲᠠᠨ ᠶᠡᠬᠡ ᠳᠠᠢᠰᠤᠨ ᠲᠠᠢ ᠨᠢᠭᠤᠷᠳᠠᠳᠠᠭ ᠪᠢᠯᠡ
ᠠᠬᠠ ᠴᠢᠨᠢ ᠪᠢ ᠣᠳᠣ
ᠠᠮᠠᠷᠠᠭ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠡᠷᠡᠭ ᠲᠦ᠍
ᠶᠠᠪᠤᠯ ᠦᠭᠡᠢ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ!》 ᠭᠡᠵᠦ ᠬᠡᠯᠡᠭᠡᠳ
ᠬᠣᠶᠠᠭᠤᠯᠠ ᠪᠠᠨ ᠮᠣᠷᠳᠠᠪᠠ᠃
* * *
ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠶᠠᠪᠤᠭᠠᠳ
ᠨᠢᠭᠡ ᠬᠥᠬᠡ ᠮᠥᠩᠭᠥᠨ ᠰᠢᠯᠢ ᠳ᠋ᠦ᠍ ᠭᠠᠷᠴᠤ
ᠨᠢᠳᠦ ᠪᠡᠨ ᠠᠷᠴᠢᠨ ᠬᠠᠷᠠᠬᠤ ᠳ᠋ᠤ᠌
ᠨᠢᠭᠡᠨ ᠤᠯᠠᠭᠠᠨ ᠠᠭᠤᠯᠠ ᠰᠢᠭ᠋ ᠶᠠᠭᠤᠮᠠ
ᠴᠤᠬᠤᠢᠰᠬᠢᠨ ᠵᠢᠯᠢᠢᠪᠡ᠃
《ᠠᠬᠠ ᠮᠢᠨᠢ᠂ ᠲᠡᠷᠡ ᠨᠢᠭᠡ ᠤᠯᠠᠭᠠᠨ
ᠴᠤᠬᠤᠢᠰᠬᠢᠨ ᠣᠳᠬᠤ ᠶᠠᠭᠤᠮᠠ ᠶᠠᠭᠤ ᠪᠣᠢ?》 ᠭᠡᠵᠦ
ᠴᠡᠩᠭᠡᠯ ᠦ᠋ᠨ ᠠᠰᠠᠭᠤᠬᠤ ᠳ᠋ᠤ᠌᠄
《ᠲᠥᠷᠥ ᠶ᠋ᠢᠨ ᠳᠣᠯᠣᠭᠠᠨ ᠤᠯᠠᠭᠠᠨ ᠲᠠᠷᠪᠠᠭᠠ ᠭᠡᠭᠴᠢ
ᠲᠡᠭᠦᠨ ᠢ᠋ ᠬᠡᠯᠡᠳᠡᠭ ᠪᠢᠯᠡ᠃
ᠵᠢᠯ ᠦ᠋ᠨ ᠭᠠᠵᠠᠷ ᠲᠤ᠌ ᠦᠨᠦᠷ ᠢ᠋ᠶ᠋ᠡᠷ ᠮᠡᠳᠡᠳᠡᠭ
ᠰᠠᠷᠠ ᠶ᠋ᠢᠨ ᠭᠠᠵᠠᠷ ᠲᠤ᠌ ᠠᠨᠢᠷ ᠢ᠋ᠶ᠋ᠠᠷ ᠮᠡᠳᠡᠳᠡᠭ》 ᠭᠡᠵᠦ
ᠮᠢᠯ ᠤᠯᠠᠭᠠᠨ ᠬᠡᠯᠡᠪᠡ᠃
《ᠠᠬᠠ ᠮᠢᠨᠢ ᠠ᠋!
ᠲᠡᠭᠦᠨ ᠢ᠋ ᠶᠠᠭᠠᠬᠢᠵᠤ ᠭᠡᠲᠦᠯᠳᠡᠭ ᠪᠣᠢ?》 ᠭᠡᠵᠦ
ᠴᠡᠩᠭᠡᠯ ᠳᠠᠬᠢᠨ ᠠᠰᠠᠭᠤᠬᠤ ᠳ᠋ᠤ᠌
ᠮᠢᠯ ᠤᠯᠠᠭᠠᠨ ᠤ᠋ ᠬᠡᠯᠡᠭᠰᠡᠨ ᠨᠢ᠄
《ᠳᠣᠯᠣᠭᠠᠨ ᠬᠣᠨᠣᠭ ᠤ᠋ᠨ ᠬᠠᠯᠭᠤ᠋ᠨ ᠪᠣᠯᠭᠠᠵᠤ
ᠳᠣᠣᠷᠠ ᠨᠦᠬᠡᠨ ᠳ᠋ᠡᠭᠡᠨ ᠣᠷᠣᠬᠤ ᠳ᠋ᠤᠨᠢ
ᠬᠠᠵᠠᠭᠤ ᠪᠠᠷ ᠨᠢ ᠭᠠᠷᠤᠭᠠᠳ
ᠬᠠᠲᠠᠷᠢᠭᠤᠯᠵᠤ ᠶᠠᠪᠤᠵᠤ ᠪᠣᠯᠳᠠᠭ》 ᠭᠡᠪᠡ᠃
ᠲᠡᠭᠦᠨ ᠢ᠋ᠶ᠋ᠡᠷ ᠥᠩᠭᠡᠷᠡᠨ ᠭᠠᠷᠬᠤ ᠳ᠋ᠤ᠌
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠦ᠋ᠳ ᠦ᠋ᠨ
ᠬᠥᠭᠡᠷᠦᠬᠦᠨ ᠴᠢᠬᠢ ᠨᠢ ᠰᠢᠲᠠᠭᠠᠳ ᠣᠳᠪᠠ᠃
* * *
ᠳᠠᠬᠢᠨ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠶᠠᠪᠤᠭᠠᠳ
ᠨᠢᠭᠡᠨ ᠬᠥᠬᠡ ᠮᠥᠩᠭᠥᠨ ᠰᠢᠯᠢ ᠳ᠋ᠦ᠍ ᠭᠠᠷᠴᠤ
ᠬᠣᠯᠠ ᠶ᠋ᠢᠨ ᠵᠠᠮ ᠢ᠋ ᠬᠠᠷᠠᠵᠤ ᠦᠵᠡᠬᠦ ᠳ᠋ᠦ᠍
ᠨᠢᠭᠡᠨ ᠬᠥᠬᠡ ᠠᠭᠤᠯᠠ ᠰᠢᠭ᠋ ᠶᠠᠭᠤᠮᠠ
ᠴᠤᠬᠤᠢᠰᠬᠢᠨ ᠵᠢᠯᠢᠢᠪᠡ᠃
ᠲᠥᠷᠥ ᠶ᠋ᠢᠨ ᠲᠡᠮᠦᠷ ᠬᠥᠬᠡ ᠮᠣᠭᠠᠢ ᠭᠡᠳᠡᠭ
ᠲᠤᠢᠯ ᠤ᠋ᠨ ᠬᠣᠣᠷᠲᠤ ᠠᠮᠢᠲᠠᠨ ᠲᠡᠷᠡ ᠭᠡᠨᠡ᠃
ᠮᠢᠯ ᠤᠯᠠᠭᠠᠨ ᠤ᠋ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ
ᠬᠦᠢᠲᠡᠨ ᠮᠥᠨᠳᠥᠷ ᠣᠷᠣᠭᠤᠯᠵᠤ
ᠳᠣᠯᠣᠭᠠ ᠬᠣᠨᠣᠭ ᠪᠣᠯᠬᠤ ᠳ᠋ᠤ᠌
ᠨᠦᠬᠡᠨ ᠦ᠌ ᠪᠡᠨ ᠪᠤᠯᠤᠩ ᠳ᠋ᠤ᠌
ᠨᠢᠭᠡ ᠠᠲᠤᠰᠬᠢᠬᠤ ᠵᠠᠭᠤᠷᠠ ᠭᠠᠷᠤᠭᠠᠳ ᠣᠳᠪᠠ᠃
* * *
ᠳᠠᠬᠢᠨ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠶᠠᠪᠤᠭᠠᠳ
ᠨᠢᠭᠡᠨ ᠬᠥᠬᠡ ᠮᠥᠩᠭᠥᠨ ᠰᠢᠯᠢ ᠳ᠋ᠦ᠍ ᠭᠠᠷᠴᠤ
ᠬᠣᠯᠠ ᠶ᠋ᠢᠨ ᠵᠠᠮ ᠢ᠋ᠶ᠋ᠠᠨ ᠬᠠᠷᠠᠵᠤ ᠦᠵᠡᠬᠦ ᠳ᠋ᠦ᠍
ᠨᠢᠭᠡᠨ ᠴᠠᠭᠠᠨ ᠠᠭᠤᠯᠠ ᠰᠢᠭ᠋ ᠶᠠᠭᠤᠮᠠ
ᠴᠤᠬᠤᠢᠰᠬᠢᠨ ᠵᠢᠯᠢᠢᠪᠡ᠃
ᠬᠣᠣᠷᠠᠨ ᠱᠣᠣ ᠳᠠᠯᠠᠢ ᠭᠡᠳᠡᠭ ᠲᠡᠷᠡ ᠪᠠᠢᠯᠠ᠃
ᠮᠢᠯ ᠤᠯᠠᠭᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠦ᠋ᠳ ᠦ᠋ᠨ
ᠬᠦᠴᠦᠨ ᠴᠢᠳᠠᠯ ᠢᠶᠡᠷ ᠭᠠᠷᠬᠤ ᠪᠣᠯᠵᠤ
ᠬᠦᠯᠦᠭ ᠦ᠋ᠨ ᠢ᠋ᠶ᠋ᠡᠨ ᠴᠢᠮᠥᠭᠡ ᠶ᠋ᠢ ᠨᠢ ᠴᠢᠬᠠᠷᠠᠲᠠᠯᠠ
ᠨᠢᠭᠡ ᠨᠢᠭᠡ ᠲᠠᠰᠢᠭᠤᠷᠳᠠᠭᠠᠳ ᠠᠪᠤᠪᠠ᠃
ᠬᠦᠨᠳᠦ ᠬᠥᠯᠲᠦ ᠬᠦᠯᠦᠭ ᠤᠳ ᠨᠢ
ᠬᠡᠢ ᠦᠰᠦᠷᠦᠭᠡᠳ ᠭᠠᠷᠬᠤ ᠳ᠋ᠠᠭᠠᠨ
ᠪᠡᠯᠭᠡ ᠲᠡᠢ ᠪᠠᠢᠨᠠ ᠭᠡᠵᠦ
ᠨᠢᠭᠡ ᠨᠢᠭᠡ ᠬᠥᠯ ᠢ᠋ᠶ᠋ᠡᠨ ᠲᠥᠷᠥᠭᠡᠳ ᠣᠳᠪᠠ
ᠨᠢᠭᠡ ᠨᠢᠭᠡ ᠲᠤᠭᠤᠷᠠᠢ ᠨᠢ
ᠮᠥᠯᠲᠥ ᠮᠥᠯᠲᠥ ᠲᠠᠰᠤᠷᠠᠭᠠᠳ ᠤᠨᠠᠪᠠ᠃
ᠦᠳᠡᠯᠡᠭᠦᠯᠳᠡᠭ ᠦᠭᠡᠢ ᠦᠨᠡᠭᠡᠨ ᠴᠠᠭᠠᠨ①
ᠦᠨᠡᠲᠦ ᠡᠮ ᠢ᠋ᠶ᠋ᠡᠨ ᠲᠦᠷᠬᠢᠵᠦ
ᠬᠣᠨᠣᠭᠤᠯᠳᠠᠭ ᠦᠭᠡᠢ ᠬᠣᠨᠢᠨ ᠴᠠᠭᠠᠨ
ᠬᠣᠪᠣᠷ ᠡᠮ ᠢ᠋ᠶ᠋ᠡᠨ ᠲᠦᠷᠬᠢᠵᠦ
ᠡᠳᠡᠭᠡᠭᠡᠵᠦ ᠠᠶᠠᠳᠠᠭᠠᠳ ᠣᠳᠪᠠ᠃
* * *
— — — —
① ᠦᠨᠡᠭᠡᠨ ᠴᠠᠭᠠᠨ— ᠦᠨᠡᠭᠡᠨ ᠭᠡᠳᠡᠭ ᠨᠢ ᠢᠰᠢᠭᠡ ᠶ᠋ᠢ ᠵᠢᠭᠠᠵᠤ ᠪᠣᠢ᠃ ᠡᠨᠳᠡ ᠴᠠᠭᠠᠨ ᠢᠰᠢᠭᠡ ᠰᠢᠭ ᠭᠡᠰᠡᠨ ᠤᠳᠬᠠ ᠲᠠᠢ᠃
~ ᠦᠷᠭᠦᠯᠵᠢᠯᠡᠯ ᠪᠣᠢ ~
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠬᠥᠬᠡ ᠮᠣᠩᠭᠣᠯ
ᠬᠢᠨᠠᠭᠴᠢ᠄ ᠨᠠᠷᠠᠨ