ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠭᠤᠷᠪᠠᠳᠤᠭᠠᠷ ᠪᠦᠯᠦᠭ 〔ᠨᠢᠭᠡ〕 Цаг төрийн үймээн – Д ᠂ Намдаг - Цаг төрийн үймээн ᠂ гуравдугаар бүлэг -1
117ᠭᠤᠷᠪᠠᠳᠤᠭᠠᠷ ᠪᠦᠯᠦᠭ – ᠬᠥᠮᠥᠨ ᠬᠥᠮᠥᠨ ᠦ ᠬᠤᠪᠢ ᠲᠠᠪᠢᠯᠠᠩ -1
ᠬᠥᠳᠡᠯᠮᠦᠷᠢ
( ᠳ᠋ᠠᠨᠽᠡᠨ ᠦ᠌ ᠶᠠᠪᠤᠳᠠᠯ)
ᠳ᠋ᠠᠨᠽᠡᠨ ᠥᠨᠥ ᠠᠢᠯ ᠳ᠋ᠠᠭᠠᠨ ᠠᠩᠬᠠ ᠢᠷᠡᠵᠦ ᠬᠣᠨᠣᠭᠰᠠᠨ ᠤ᠋ ᠪᠠᠨ ᠥᠷᠯᠥᠭᠡ᠂ ᠲᠣᠰᠬᠣᠨ ᠤ᠋ ᠤᠷᠢᠳᠤᠬᠢ ᠵᠠᠮ ᠢ᠋ᠶ᠋ᠠᠷ ᠬᠠᠯᠬᠠ ᠠᠶᠠᠨᠴᠢᠳ ᠵᠠᠪᠠᠯ ᠶᠠᠪᠤᠨᠠ ᠭᠡᠵᠦ ᠪᠠᠲᠤ ᠢᠳᠡᠭᠡᠨ ᠡᠷᠲᠡᠯᠡᠨ ᠪᠣᠰᠴᠤ ᠭᠠᠳᠠᠭᠠ ᠭᠠᠷᠤᠨ᠂ ᠲᠡᠷᠡ ᠵᠦᠭ ᠰᠢᠷᠳᠡᠨ ᠠᠵᠢᠪᠠ᠃ ᠴᠡᠩᠬᠡᠷᠯᠡᠨ ᠮᠠᠨᠠᠯᠵᠠᠬᠤ ᠥᠷᠯᠥᠭᠡ ᠶ᠋ᠢᠨ ᠵᠢᠪᠠᠷ ᠲᠤ ᠦᠵᠡᠭᠳᠡᠬᠦ ᠶᠠᠭᠤᠮᠠ ᠣᠭᠲᠣ ᠦᠭᠡᠢ ᠲᠤᠯᠠ《ᠣᠳᠣᠬᠠᠨ ᠳ᠋ᠠᠭᠠᠨ ᠠᠶᠠᠨᠴᠢᠳ ᠬᠥᠳᠡᠯᠬᠦ ᠬᠠᠷᠠᠬᠠᠨ ᠪᠣᠯᠤᠭᠠ ᠦᠭᠡᠢ ᠡᠷᠲᠡ ᠪᠠᠢᠬᠤ ᠰᠢᠪ ᠳᠡ》 ᠭᠡᠵᠦ ᠪᠣᠳᠣᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠭᠤᠷᠪᠠ᠃ ᠪᠤᠴᠠᠵᠤ ᠣᠷᠣᠬᠤ ᠳ᠋ᠤ᠌ ᠪᠦᠳᠦᠭᠦᠨ ᠴᠢᠬᠢᠷᠰᠦᠨ ᠳᠡᠪᠢᠰᠬᠡᠷ ᠲᠡᠢ ᠪᠢᠴᠢᠬᠠᠨ ᠬᠠᠨᠵᠤᠨ ᠳᠡᠭᠡᠷᠡ ᠪᠠᠭᠲᠠᠵᠤ ᠶᠠᠳᠠᠨ ᠬᠣᠨᠣᠭᠰᠠᠨ ᠲᠣᠮᠣ ᠵᠢᠵᠢᠭ ᠵᠢᠷᠭᠤᠭᠠᠨ ᠬᠥᠮᠦᠨ ᠦ᠌ ᠬᠠᠯᠠᠭᠤᠨ ᠠᠮᠢᠰᠬᠤᠯ ᠪᠠ ᠬᠥᠯᠥᠰᠥᠨ ᠦ᠌ ᠦᠨᠦᠷ᠂ ᠭᠠᠵᠠᠷ ᠤ᠋ᠨ ᠳᠠᠪᠲᠠᠮᠠᠯ ᠰᠢᠷᠣᠢ ᠶ᠋ᠢᠨ ᠱᠠᠯᠠ ᠶ᠋ᠢᠨ ᠦᠬᠦᠮᠡᠯ ᠴᠢᠭᠢᠭ᠂ ᠥᠴᠥᠭᠡᠳᠦᠷ ᠦ᠋ᠨ ᠬᠢᠭᠰᠡᠨ ᠬᠣᠭᠣᠯᠠ ᠤᠮᠳᠠ ᠶ᠋ᠢᠨ ᠠᠭᠤᠷ ᠴᠠᠩ᠂ ᠲᠡᠭᠦᠨ ᠦ᠌ ᠳᠡᠭᠡᠷᠡ ᠪᠠᠢᠼᠠᠢ᠂ ᠮᠠᠨᠵᠢᠩ᠂ ᠰᠣᠩᠭᠢᠨᠠ᠂ ᠰᠠᠷᠢᠮᠰᠠᠭ᠂ ᠼᠤᠤ᠂ ᠵᠢᠶᠠᠩ ᠤ᠋ᠨ ᠦᠨᠦᠷ ᠵᠡᠷᠭᠡ ᠡᠨᠡ ᠣᠯᠠᠨ ᠬᠣᠯᠢᠯᠳᠤᠭᠰᠠᠨ ᠮᠠᠭᠤᠬᠠᠢ ᠦᠨᠦᠷ᠂ ᠠᠭᠯᠠᠭ ᠬᠡᠭᠡᠷᠡ ᠠᠭᠤᠯᠠ ᠲᠠᠯᠠ ᠶ᠋ᠢᠨ ᠡᠷᠡᠭᠦᠯ ᠴᠡᠩᠭᠡᠭ ᠠᠭᠠᠷ ᠢ᠋ᠶ᠋ᠠᠷ ᠲᠡᠵᠢᠭᠡᠯᠭᠡᠵᠦ ᠥᠰᠦᠭᠰᠡᠨ ᠳ᠋ᠠᠨᠽᠡᠨ ᠦ᠌ ᠬᠠᠮᠠᠷ ᠲᠤ ᠶᠠᠭᠤᠲᠠᠢ ᠠᠶᠤᠮᠰᠢᠭᠲᠠᠢ ᠶᠠᠭᠤᠲᠠᠢ ᠬᠦᠨᠳᠦ ᠪᠡᠷ ᠬᠠᠩᠬᠤᠨ ᠲᠤᠰᠤᠭᠰᠠᠨ ᠭᠡᠬᠦ ᠪᠣᠢ!《ᠦᠭᠡᠢ ᠡᠨᠡ ᠴᠢᠨᠢ ᠶᠠᠭᠤ ᠪᠢᠯᠡ? ᠪᠢ ᠡᠢᠮᠦ ᠠᠢᠬᠤᠪᠲᠤᠷ ᠶᠠᠭᠤᠮᠠᠨ ᠳᠣᠲᠣᠷᠠ ᠬᠣᠨᠣᠭᠰᠠᠨ ᠭᠡᠵᠢ ᠤᠤ?》 ᠭᠡᠵᠦ ᠳ᠋ᠠᠨᠽᠡᠨ ᠰᠣᠴᠢᠨ ᠨᠢᠭᠡ ᠦᠶᠡ ᠠᠮᠢᠰᠬᠤᠯ ᠪᠠᠷᠢᠨ ᠬᠤᠷᠢᠶᠠᠭᠰᠠᠨ ᠢ᠋ᠶ᠋ᠠᠨ《ᠵᠠ ᠶᠠᠭᠠᠬᠢᠬᠤᠪ᠂ ᠪᠢ ᠡᠨᠳᠡ ᠶᠠᠮᠠᠷ ᠣᠯᠠᠨ ᠬᠣᠨᠣᠬᠤ ᠪᠠᠷ ᠪᠢᠰᠢ᠂ ᠶᠡᠬᠡ ᠪᠣᠳᠣᠵᠤ ᠬᠣᠶᠠᠷ ᠯᠠ ᠬᠣᠨᠣᠬᠤ ᠪᠣᠢ ᠵᠠ》 ᠭᠡᠵᠦ ᠳᠠᠬᠢᠨ ᠰᠡᠳᠬᠢᠯ ᠢ᠋ᠶ᠋ᠡᠨ ᠵᠠᠰᠠᠪᠠ᠃ ᠲᠡᠭᠡᠭᠡᠳ ᠳ᠋ᠠᠨᠽᠡᠨ ᠲᠡᠷᠡ ᠡᠳᠦᠷ ᠪᠠᠢᠰᠢᠩ ᠠ᠋ᠴᠠ ᠠᠷᠪᠠᠨ ᠭᠤᠷᠪᠠ ᠳᠠᠬᠢᠨ ᠭᠠᠷᠴᠤ᠂ ᠤᠭ ᠵᠠᠮ ᠢ᠋ ᠠᠷᠪᠠᠨ ᠳᠠᠬᠢᠨ ᠰᠢᠷᠲᠡᠪᠡ᠃ ᠭᠡᠪᠡᠴᠦ ᠰᠢᠷᠳᠡᠬᠦ ᠪᠦᠷᠢ ᠳ᠋ᠦ᠍ ᠬᠦᠰᠡᠭᠰᠡᠨ ᠭᠣᠷᠢᠳᠠᠭᠰᠠᠨ ᠶᠠᠭᠤᠮᠠ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠷᠠ ᠶ᠋ᠢ ᠨᠢᠭᠡ ᠴᠦ᠍ ᠤᠳᠠᠭᠠ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ᠃
ᠳ᠋ᠠᠨᠽᠡᠨ ᠪᠠᠢᠰᠢᠩ ᠠ᠋ᠴᠠ ᠠᠷᠪᠠᠨ ᠭᠤᠷᠪᠠ ᠳᠠᠬᠢᠨ ᠥᠨᠥᠳᠥᠷ ᠦ᠋ᠨ ᠢ᠋ᠶ᠋ᠡᠨ ᠰᠢᠷᠲᠡᠯᠲᠡ ᠳ᠋ᠦ᠍ ᠤᠷᠮᠠ ᠬᠤᠭᠤᠷᠠᠵᠤ ᠮᠣᠬᠣᠭᠰᠠᠨ ᠦᠭᠡᠢ᠂ ᠮᠠᠷᠭᠠᠰᠢ ᠨᠢ ᠮᠥᠨ ᠯᠡ ᠰᠢᠷᠲᠡᠪᠡ᠃ ᠮᠥᠨ ᠯᠡ ᠲᠠᠭ ᠴᠢᠭ᠃ ᠨᠥᠭᠥᠭᠡᠳᠦᠷ ᠨᠢ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ᠃ ᠶᠡᠷᠦᠨᠢ ᠬᠡᠴᠢᠨᠡᠨ ᠴᠦ᠍ ᠡᠳᠦᠷ ᠰᠢᠷᠲᠡᠭᠡᠳ ᠶᠠᠭᠤ ᠴᠦ᠍ ᠦᠵᠡᠭᠳᠡᠵᠦ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠬᠣᠷ ᠡᠴᠦᠰ ᠲᠦ᠋ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠭᠣᠷᠢᠳᠠᠯᠭᠠ ᠲᠠᠰᠤᠷᠠᠨ ᠭᠤᠲᠤᠷᠠᠨᠠ᠃ ᠰᠡᠳᠬᠢᠯ ᠳ᠋ᠦ᠍ᠨᠢ《ᠡᠨᠡ ᠵᠢᠯ ᠶᠠᠭᠠᠬᠢᠭᠠᠳ ᠠᠶᠠᠨᠴᠢᠳ ᠶᠠᠪᠤᠬᠤ ᠪᠠᠨ ᠪᠣᠯᠢᠴᠢᠬᠠᠪᠠ》 ᠭᠡᠳᠡᠭ ᠪᠣᠳᠣᠯ ᠲᠠᠰᠤᠷᠠᠯᠲᠠ ᠦᠭᠡᠢ ᠡᠷᠭᠢᠯᠳᠦᠬᠦ ᠪᠣᠯᠵᠤ ᠴᠣᠬᠣᠮ ᠲᠡᠭᠡᠬᠦ ᠳᠣᠳᠣᠮ ᠴᠠᠭ ᠢᠮᠠᠭᠲᠠ ᠰᠢᠨᠠ ᠪᠠᠨ ᠲᠤᠯᠵᠤ᠂ ᠰᠠᠨᠠᠭᠠ ᠠᠯᠲᠠᠨ ᠰᠠᠭᠤᠳᠠᠭ ᠪᠣᠯᠤᠯᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠠᠪᠠᠭᠠᠢ᠄ ᠠᠢ ᠬᠦᠦ ᠮᠢᠨᠢ ᠴᠢ ᠣᠷᠣᠨ ᠨᠤᠲᠤᠭ ᠤᠷᠤᠭᠤ ᠪᠠᠨ ᠶᠠᠪᠤᠬᠤ ᠶ᠋ᠢ ᠪᠦᠦ ᠶᠠᠭᠠᠷᠠ! ᠠᠶᠠᠨᠴᠢᠨ ᠶᠠᠪᠤᠯᠠ ᠴᠦ᠍ ᠭᠡᠰᠡᠨ ᠣᠳᠣ ᠳ᠋ᠦᠩ ᠡᠪᠦᠯ᠂ ᠠᠭᠤᠯᠠ ᠤᠰᠤ᠂ ᠭᠣᠣᠯ ᠭᠣᠷᠣᠬᠠ ᠴᠥᠮ ᠲᠠᠭ ᠶᠠᠭ ᠬᠥᠯᠳᠡᠭᠰᠡᠨ ᠪᠠᠢᠬᠤ ᠳ᠋ᠤ᠌ ᠶᠠᠪᠤᠭᠠᠳ ᠶᠠᠭᠤ ᠬᠢᠨᠡ᠃ ᠵᠦᠭᠡᠷ ᠡᠨᠳᠡ ᠪᠡᠨ ᠡᠪᠦᠯᠵᠢ᠃ ᠰᠡᠳᠬᠢᠯ ᠠᠭᠤᠵᠢᠮ᠂ ᠪᠡᠶᠡ ᠠᠮᠤᠷ ᠰᠠᠭᠤᠵᠤ ᠯᠠ ᠪᠠᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠴᠠᠰᠤ ᠮᠥᠰᠥ᠂ ᠠᠶᠠᠨᠳᠠᠭᠠᠨ ᠬᠠᠢᠯᠤᠨ ᠬᠠᠩᠵᠠᠷᠠᠵᠤ᠂ ᠭᠣᠣᠯ ᠭᠣᠷᠣᠬᠠ ᠨᠢ ᠵᠢᠷᠢᠯᠵᠡᠨ ᠤᠷᠤᠰᠤᠨᠠ᠃ ᠠᠢ ᠳᠠ ᠲᠡᠷᠡ ᠴᠠᠭ ᠲᠤ ᠯᠠ ᠴᠢ ᠮᠢᠨᠢ ᠶᠠᠪᠤᠵᠤ ᠦᠵᠡ!
ᠬᠤᠨᠴᠢᠨ ᠰᠢᠪᠠᠭᠤ ᠨᠤᠭᠤᠳ ᠴᠦ᠍ ᠴᠢᠮᠠᠶ᠋ᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠠᠭᠤᠳᠠᠭᠠᠳ ᠢᠷᠡᠨᠡ᠃ ᠤᠷᠢᠳᠤ ᠵᠦᠭ ᠦ᠋ᠨ ᠬᠠᠯᠠᠭᠤᠨ ᠠ᠋ᠴᠠ ᠵᠢᠭᠤᠲᠠᠨ ᠲᠠᠨ ᠤ᠋ ᠨᠤᠲᠤᠭ ᠤ᠋ᠨ ᠵᠦᠭ ᠶᠠᠪᠤᠬᠤ ᠳ᠋ᠠᠭᠠᠨ ᠮᠠᠨ ᠤ᠋ ᠲᠣᠰᠬᠣᠨ ᠳᠡᠭᠡᠭᠦᠷ ᠡᠭᠡᠭᠡ ᠲᠠᠨ ᠤ᠋ ᠬᠢᠨ ᠦ᠌ ᠠᠶᠠᠨ ᠵᠢᠩ ᠦ᠋ᠨ ᠴᠤᠪᠤᠭᠠ ᠰᠢᠭ᠋ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠣᠷᠣᠨ᠂ ᠭᠠᠷᠴᠢᠨ ᠭᠤᠷᠴᠢᠨ ᠳᠠᠭᠤᠯᠠᠯᠳᠤᠨ ᠥᠩᠭᠡᠷᠡᠨᠡ᠃ ᠡᠰᠡᠪᠡᠯ ᠭᠤᠷᠪᠠᠯᠵᠢᠯᠠᠨ ᠵᠡᠭᠯᠡᠵᠦ ᠶᠠᠪᠤᠨᠠ᠃ ᠶᠠᠭᠠᠬᠢᠭᠠᠳ ᠲᠡᠭᠡᠵᠦ ᠶᠠᠪᠤᠳᠠᠭ ᠶᠤᠮ ᠪᠣᠢ? ᠭᠡᠪᠡᠯ ᠪᠤᠷᠬᠠᠨ ᠲᠡᠳᠡᠨ ᠢ᠋ ᠡᠭᠦᠯᠡ ᠮᠠᠨᠠᠨ ᠳᠤᠮᠳᠠ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠲᠥᠭᠡᠷᠢᠭᠦᠰᠡᠢ ᠭᠡᠵᠦ ᠵᠢᠭᠠᠵᠤ ᠥᠭᠭᠦᠭᠰᠡᠨ ᠶᠦᠮ ᠭᠡᠨᠡ ᠪᠢᠯᠡ᠃ ᠢᠩᠭᠢᠬᠦᠯᠡᠷ ᠶᠠᠭᠤᠮᠠ ᠪᠦᠬᠦᠨ ᠤᠴᠢᠷ ᠲᠠᠢ᠃ ᠴᠢᠨᠦ ᠡᠨᠳᠡ ᠢᠷᠡᠭᠰᠡᠨ ᠴᠢᠨᠢ ᠴᠦ᠍ ᠤᠴᠢᠷ ᠲᠠᠢ᠃ ᠴᠢᠮᠠᠶ᠋ᠢ ᠬᠠᠪᠤᠷ ᠶᠠᠪᠤᠭᠠᠰᠠᠢ ᠭᠡᠵᠦ ᠮᠢᠨᠦ ᠪᠣᠳᠣᠬᠤ ᠴᠦ᠍ ᠪᠠᠰᠠ ᠤᠴᠢᠷ ᠲᠠᠢ᠃ ᠪᠤᠷᠬᠠᠨ ᠬᠥᠮᠦᠨ ᠠᠮᠢᠲᠠᠳ ᠲᠤ ᠠᠴᠢ ᠠᠪᠤᠷᠠᠯ ᠢ᠋ᠶ᠋ᠠᠨ ᠬᠠᠢᠷᠠᠯᠠᠬᠤ ᠳ᠋ᠠᠭᠠᠨ ᠢᠩᠭᠢᠵᠦ ᠯᠡ ᠥᠪᠡᠷᠰᠡᠳ ᠲᠤᠨᠢ ᠦᠯᠦ ᠮᠡᠳᠡᠭᠳᠡᠬᠦ ᠠᠷᠭᠠ ᠪᠠᠷ ᠬᠠᠢᠷᠠᠯᠠᠳᠠᠭ ᠶᠤᠮ ᠭᠡᠨᠡ ᠪᠢᠯᠡ ᠭᠡᠵᠦ ᠢᠳᠬᠠᠨᠠ᠃ ᠦᠨᠡᠨ ᠳ᠋ᠡᠭᠡᠨ ᠴᠦ᠍ ᠠᠪᠠᠭᠠᠢ ᠳ᠋ᠠᠨᠽᠡᠨ ᠢ᠋ ᠭᠡᠷ ᠲᠡᠭᠡᠨ ᠪᠠᠢᠯᠭᠠᠭᠠᠳ ᠪᠠᠢᠬᠤ ᠶ᠋ᠢ ᠬᠦᠰᠡᠬᠦ ᠪᠥᠭᠡᠳ ᠠᠩᠬᠠ ᠢᠷᠡᠭᠰᠡᠨ ᠡᠳᠦᠷ ᠡᠴᠡ ᠨᠢ ᠡᠬᠢᠯᠡᠨ《ᠬᠦᠦ ᠡᠴᠡ ᠮᠢᠨᠢ ᠶᠠᠭᠤᠨ ᠤ᠋ ᠢᠯᠭᠠᠭᠠ》 ᠭᠡᠵᠦ ᠪᠣᠳᠣᠭᠰᠠᠨ ᠨᠢ ᠡᠳᠦᠷ ᠬᠣᠨᠣᠭ ᠢᠷᠡᠬᠦ ᠳᠣᠳᠣᠮ ᠭᠦᠨᠵᠡᠭᠡᠢᠷᠡᠵᠦ᠂ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠰᠠᠨᠠᠨ ᠮᠥᠷᠥᠭᠡᠳᠴᠦ ᠪᠠᠢᠭᠰᠠᠨ ᠬᠦᠦ ᠪᠡᠨ ᠮᠠᠷᠲᠠᠭᠠᠳ᠂ ᠲᠡᠭᠦᠨ ᠢ᠋ᠶ᠋ᠡᠨ ᠢᠷᠡᠨᠡ ᠪᠠᠢᠬᠤ ᠴᠦ᠍ ᠭᠡᠵᠦ ᠬᠦᠯᠢᠶᠡᠬᠦ ᠪᠡᠨ ᠪᠣᠯᠢᠵᠠᠢ᠃ ᠡᠭᠦᠨ ᠢ᠋ ᠯᠤᠤ ᠯᠢ ᠭᠤᠸᠠᠢ ᠠᠯᠢ ᠬᠡᠳᠦᠢᠨ ᠮᠡᠳᠡᠵᠦ ᠪᠠᠶᠠᠷᠯᠠᠬᠤ ᠳ᠋ᠠᠭᠠᠨ ᠠᠷᠠᠢ ᠴᠢᠷᠠᠢ ᠲᠡᠵᠢᠭᠡᠵᠦ ᠪᠠᠢᠭᠠ ᠠᠮᠠ ᠪᠦᠯᠢ ᠳᠡᠭᠡᠷᠡ ᠪᠠᠰᠠ ᠤᠷᠢᠳ ᠡᠮᠦᠨᠡ ᠦᠵᠡᠭᠳᠡᠭᠡ ᠦᠭᠡᠢ ᠨᠢᠭᠡ ᠲᠣᠮᠣ ᠭᠡᠭᠴᠢ ᠶ᠋ᠢᠨ ᠬᠣᠭᠣᠯᠠᠨ ᠤ᠋ ᠰᠠᠪᠠ ᠨᠡᠮᠡᠭᠳᠡᠭᠰᠡᠨ ᠢ᠋ ᠡᠰᠡ ᠰᠠᠨᠠᠨ᠂《ᠠᠢ ᠬᠦᠦ ᠴᠢ ᠡᠪᠦᠯᠵᠢ!》 ᠭᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠷᠭᠡᠴᠡᠭᠡ ᠪᠡᠷ《ᠴᠢ ᠶᠠᠭᠤ ᠶᠠᠭᠤ ᠦᠭᠡᠢ ᠭᠠᠯᠵᠠᠭᠤᠷᠠᠬᠤ ᠭᠡᠵᠦ ᠪᠠᠢᠭᠰᠠᠨ ᠡᠬᠡᠨᠡᠷ ᠢ᠋ ᠮᠢᠨᠢ ᠡᠨᠡ ᠪᠡᠶᠡ ᠪᠡᠷ ᠡᠮᠨᠡᠨ ᠡᠳᠡᠭᠡᠷᠡᠭᠦᠯᠦᠭᠰᠡᠨ ᠰᠢᠦ》 ᠭᠡᠵᠦ ᠲᠠᠯᠠ ᠥᠭᠭᠦᠨ ᠰᠠᠮ ᠰᠢᠪᠡᠨᠡᠨᠡ᠃ ᠬᠡᠦᠬᠡᠳ ᠦ᠋ᠳ ᠨᠢ ᠴᠦ᠍ ᠮᠥᠨ ᠳ᠋ᠠᠨᠽᠡᠨ ᠳ᠋ᠦ᠍ ᠰᠠᠢᠨ᠃ ᠬᠠᠮᠤᠭ ᠪᠠᠭᠠ ᠨᠢ ᠡᠪᠦᠷ ᠳᠡᠭᠡᠷᠡ ᠨᠢ ᠦᠷᠭᠦᠯᠵᠢ ᠰᠠᠭᠤᠵᠤ ᠬᠣᠶᠠᠷ ᠡᠪᠦᠳᠦᠭ ᠲᠡᠢ ᠨᠢ ᠨᠣᠴᠣᠯᠳᠤᠨ ᠲᠣᠭᠯᠠᠨᠠ᠃ ᠳᠤᠮᠳᠠᠬᠢ ᠨᠢ ᠴᠦ᠍ ᠠᠷᠤ ᠨᠢᠷᠤᠭᠤ ᠥᠭᠡᠳᠡ ᠠᠪᠠᠷᠢᠵᠤ᠂ ᠮᠥᠷᠦᠨ ᠳᠡᠭᠡᠷᠡ ᠭᠠᠷᠤᠨ ᠴᠢᠬᠢᠨ ᠡᠴᠡ ᠵᠣᠭᠠᠳᠠᠨ ᠤᠢᠳᠬᠠᠷ ᠢ᠋ᠶ᠋ᠠᠨ ᠰᠡᠷᠭᠦᠭᠡᠨᠡ᠃ ᠲᠣᠮᠣ ᠨᠢ ᠡᠨᠡ ᠳᠡᠯᠡᠬᠡᠢ ᠡᠴᠡ ᠦᠵᠡᠭᠰᠡᠨ᠂ ᠰᠣᠨᠣᠰᠤᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠨ ᠬᠠᠴᠢᠨ ᠰᠣᠨᠢᠷᠬᠠᠨ ᠢ᠋ᠶ᠋ᠠᠷ ᠡᠪᠯᠡᠭᠦᠯᠦᠨ ᠶᠠᠷᠢᠵᠤ ᠳ᠋ᠠᠨᠽᠡᠨ ᠦ᠌ ᠤᠢᠳᠬᠠᠷ ᠢ᠋ ᠰᠡᠷᠭᠦᠭᠡᠨᠡ᠃
ᠡᠢᠨᠬᠦ ᠳ᠋ᠠᠨᠽᠡᠨ ᠲᠡᠳᠡᠨ ᠦ᠌ ᠬᠥᠮᠦᠨ ᠨᠢᠭᠡ ᠪᠦᠷᠢ ᠲᠡᠢ ᠢᠵᠢᠯᠢ ᠳᠠᠰᠤᠯ ᠪᠣᠯᠵᠤ ᠪᠠᠢᠯᠠ᠃ ᠲᠡᠷᠡ ᠪᠠᠢᠲᠤᠭᠠᠢ ᠢᠪᠴᠤᠤ ᠰᠢᠪᠡᠷ ᠪᠠᠢᠰᠢᠩ ᠤ᠋ᠨ ᠬᠦᠨᠳᠦ ᠠᠭᠠᠷ᠂ ᠬᠠᠴᠢᠨ ᠦᠨᠦᠷ ᠲᠠᠨᠢᠷ ᠲᠠᠢ ᠬᠦᠷᠲᠡᠯᠡ ᠭᠠᠵᠢ ᠪᠤᠷᠤᠭᠤ ᠶᠠᠭᠤᠮᠠ ᠦᠭᠡᠢ ᠪᠣᠯᠵᠤ᠂ ᠣᠷᠣᠨ ᠨᠤᠲᠤᠭ ᠤ᠋ᠨ ᠵᠦᠭ ᠶᠠᠭᠠᠷᠠᠬᠤ ᠪᠠᠨ ᠬᠣᠢᠰᠢ ᠲᠠᠯᠪᠢᠬᠤ ᠪᠣᠯᠪᠠ᠃ ᠭᠡᠪᠡᠴᠦ ᠰᠡᠳᠬᠢᠯ ᠳ᠋ᠦ᠍ ᠥᠭᠡᠷᠡ ᠲᠦᠭᠰᠢᠭᠦᠷᠢ ᠡᠷᠭᠢᠯᠳᠦᠨᠡ᠃ ᠡᠨᠡ ᠨᠢ ᠪᠠᠢᠵᠤ ᠪᠠᠢᠭᠠ ᠠᠢᠯ ᠤ᠋ᠨ ᠬᠢᠨᠢ ᠶᠠᠳᠠᠭᠤ ᠵᠦᠳᠡᠭᠦᠦ ᠲᠡᠢ ᠬᠣᠯᠪᠣᠭᠳᠠᠬᠤ ᠲᠦᠭᠰᠢᠭᠦᠷᠢ ᠪᠥᠭᠡᠳ ᠳ᠋ᠠᠨᠽᠡᠨ ᠬᠣᠭᠣᠯᠠ ᠤᠮᠳᠠ ᠶ᠋ᠢ ᠨᠢ ᠳᠡᠮᠡᠢ ᠬᠣᠷᠣᠭᠠᠨ ᠰᠠᠭᠤᠬᠤ ᠠ᠋ᠴᠠ ᠪᠠᠨ ᠰᠡᠳᠬᠢᠯ ᠵᠣᠪᠠᠨᠢᠨ ᠶᠠᠮᠠᠷ ᠨᠢᠭᠡ ᠶᠠᠭᠤᠮᠠ ᠬᠢᠵᠦ ᠨᠡᠮᠡᠷᠢ ᠪᠣᠯᠬᠤ ᠶ᠋ᠢ ᠪᠣᠳᠣᠬᠤ ᠪᠣᠯᠵᠠᠢ᠃
ᠨᠢᠭᠡ ᠡᠳᠦᠷ ᠯᠤᠤ ᠯᠢ ᠵᠡᠷᠭᠡᠯᠡᠳᠡᠭᠡ ᠲᠣᠰᠬᠣᠨ ᠤ᠋《ᠳᠠ ᠯᠣᠣᠶᠧ》 ᠭᠡᠭᠴᠢ ᠶ᠋ᠢᠨ ᠳ᠋ᠦ᠍ ᠡᠳᠦᠷ ᠪᠦᠷᠢ ᠣᠴᠢᠵᠤ ᠠᠵᠢᠯᠯᠠᠳᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠵᠢᠯᠯᠠᠬᠤ ᠪᠠᠷ ᠶᠠᠪᠤᠭᠠᠳ ᠣᠷᠣᠢ ᠢᠷᠡᠬᠦ ᠳ᠋ᠡᠭᠡᠨ ᠶᠠᠳᠠᠷᠠᠭᠰᠠᠨ ᠨᠢ ᠲᠤᠩ ᠶᠡᠬᠡ᠂ ᠪᠠᠢᠰᠢᠩ ᠳ᠋ᠠᠭᠠᠨ ᠠᠷᠠᠢᠬᠠᠨ ᠣᠷᠣᠵᠤ ᠪᠣᠱᠣᠭᠠᠨ ᠳᠡᠭᠡᠷᠡ ᠠᠮᠢᠰᠬᠤᠭᠠᠳᠠᠨ ᠠᠮᠠᠷᠠᠭᠠᠳ ᠲᠡᠨᠳᠡ ᠡᠴᠡ ᠪᠡᠨ ᠰᠤᠯᠠᠷᠠᠭᠰᠠᠨ ᠬᠥᠯ ᠢ᠋ᠶ᠋ᠡᠨ ᠰᠠᠯᠭᠠᠨᠠᠨ ᠭᠢᠰᠬᠢᠯᠡᠵᠦ ᠬᠠᠨᠵᠤ ᠪᠠᠨ ᠬᠦᠷᠦᠭᠡᠳ ᠪᠡᠶᠡ ᠰᠤᠯᠠ ᠬᠠᠶᠠᠨ ᠬᠠᠵᠠᠭᠤᠯᠳᠠᠨ ᠤᠨᠠᠵᠤ᠂ ᠥᠷᠥᠭᠡᠰᠦᠨ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠥᠯᠢᠷᠡᠭᠰᠡᠨ ᠨᠢᠳᠦ ᠪᠡᠨ ᠬᠠᠪ ᠳᠠᠷᠤᠪᠠ᠃ ᠤᠷᠢᠳᠠ ᠡᠮᠦᠨᠡ ᠢᠩᠭᠢᠵᠦ ᠪᠠᠢᠭᠰᠠᠨ ᠤᠳᠠᠭᠠ ᠦᠭᠡᠢ᠂ ᠭᠡᠷ ᠦ᠋ᠨ ᠬᠥᠮᠦᠰ ᠴᠥᠮ ᠰᠣᠴᠢᠨ ᠰᠠᠨᠳᠤᠷᠪᠠ᠃
— ᠳᠠᠩᠵᠢᠶᠠᠳ ᠮᠢᠨᠢ᠂ ᠶᠠᠭᠤ ᠪᠣᠯᠪᠠ᠂ ᠡᠪᠡᠳᠴᠢᠨ ᠬᠦᠷᠦᠭᠡ ᠤᠤ? ᠭᠡᠵᠦ ᠠᠪᠠᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠴᠡᠴᠡᠷᠬᠢᠯᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠰᠢᠪᠡᠨᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠯᠤᠤ ᠯᠢ ᠨᠢᠳᠦ ᠪᠡᠨ ᠳᠠᠷᠤᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠲᠣᠯᠣᠭᠠᠢ ᠰᠡᠭᠰᠦᠷᠬᠦ ᠰᠢᠭ ᠪᠣᠯᠪᠠ᠃ ᠨᠡᠯᠢᠶᠡᠳ ᠮᠥᠴᠡ ᠥᠩᠭᠡᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠳ᠋ᠠᠨᠽᠡᠨ᠄
— ᠳ᠋ᠠᠶᠧ ᠮᠢᠨᠢ᠂ ᠶᠠᠭᠤ ᠪᠣᠯᠪᠠ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠄
— ᠠᠢ ᠭᠡᠵᠦ ᠰᠠᠨᠠᠭᠠ ᠠᠯᠲᠠᠨ᠂ ᠪᠦᠬᠦ ᠬᠦᠴᠦ ᠪᠡᠨ ᠳᠠᠢᠴᠢᠯᠠᠨ ᠥᠨᠳᠡᠢᠵᠦ᠂ ᠥᠨᠥᠳᠥᠷ ᠪᠢ ᠲᠡᠭᠡᠷᠮᠡ ᠳ᠋ᠦ᠍ ᠵᠢᠳᠬᠦᠯᠡ ᠭᠡᠵᠦ ᠰᠠᠯᠭᠠᠨᠠᠭᠰᠠᠨ ᠭᠠᠷ ᠢ᠋ᠶ᠋ᠠᠷ ᠭᠠᠩᠰᠠᠨ ᠲᠠᠮᠠᠬᠢ ᠪᠠᠨ ᠲᠡᠮᠲᠡᠴᠢᠨ ᠠᠪᠤᠪᠠ᠃
— ᠲᠡᠷᠡ ᠲᠡᠭᠡᠷᠮᠡ ᠳ᠋ᠦ᠍ ᠡᠳᠦᠷ ᠪᠦᠷᠢ ᠵᠢᠳᠬᠦᠳᠡᠭ ᠶᠦᠮ ᠪᠢᠰᠢᠦ ᠭᠡᠬᠦ ᠳ᠋ᠦ᠍᠄
— ᠲᠡᠢᠮᠦ ᠠ᠋᠂ ᠡᠳᠦᠷ ᠪᠦᠷᠢ᠃ ᠭᠡᠪᠡᠴᠦ ᠥᠨᠥᠳᠥᠷ ᠪᠠᠭᠠ ᠲᠡᠭᠡᠷᠮᠡ ᠳ᠋ᠦ᠍ ᠪᠢᠰᠢ᠂ ᠲᠣᠮᠣ ᠲᠡᠭᠡᠷᠮᠡ ᠳ᠋ᠦ᠍ ᠭᠡᠳ ᠲᠠᠮᠠᠬᠢ ᠪᠠᠨ ᠲᠠᠲᠠᠪᠠ᠃ ᠠᠵᠢᠪᠠᠯ ᠯᠤᠤ ᠯᠢ ᠲᠠᠮᠠᠬᠢ ᠪᠠᠨ ᠤᠷᠢᠳᠠ ᠶ᠋ᠢᠨ ᠠᠳᠠᠯᠢ ᠤᠭᠵᠠ ᠤᠭᠵᠠ ᠪᠢᠰᠢ᠂ ᠲᠡᠩᠬᠡᠯ ᠦᠭᠡᠢᠬᠡᠨ ᠪᠥᠭᠡᠳ ᠠᠯᠭᠤᠷᠬᠠᠨ ᠢ᠋ᠶ᠋ᠠᠷ ᠰᠣᠷᠣᠵᠤ ᠤᠲᠤᠭᠠ ᠶ᠋ᠢ ᠨᠢ ᠠᠭᠤᠰᠬᠢᠨ ᠳ᠋ᠠᠭᠠᠨ ᠪᠦᠭᠦᠳᠡ ᠶ᠋ᠢ ᠨᠢ ᠰᠢᠩᠭᠡᠭᠡᠬᠦ ᠭᠡᠰᠡᠨ ᠰᠢᠭ ᠨᠢᠭᠡ ᠦᠶᠡ ᠠᠮᠠ ᠪᠠᠨ ᠵᠢᠮᠢᠢᠨ ᠬᠠᠳᠠᠭᠠᠯᠠᠨᠠ᠃ ᠲᠡᠭᠡᠭᠡᠳ《ᠠᠶᠠ》 ᠭᠡᠵᠦ ᠳᠤᠤᠭᠠᠷᠤᠨ ᠠᠮᠢᠰᠬᠤᠯ ᠲᠠᠯᠪᠢᠭᠤᠨ ᠪᠣᠯᠵᠤ ᠳᠠᠬᠢᠭᠠᠳ ᠯᠠ ᠰᠤᠷᠤᠨᠠ᠃
— ᠳ᠋ᠠᠶᠧ ᠮᠢᠨᠢ᠂ ᠲᠡᠷᠡ ᠲᠡᠭᠡᠷᠮᠡ ᠳ᠋ᠦ᠍ ᠵᠢᠳᠬᠦᠬᠦ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠣᠢ? ᠳ᠋ᠠᠨᠽᠡᠨ ᠠᠰᠠᠭᠤᠬᠤ ᠳ᠋ᠤ᠌᠂
ᠯᠤᠤ ᠯᠢ᠄
— ᠬᠠᠢ! ᠵᠢᠳᠬᠦᠬᠦ ᠦᠭᠡᠢ ᠪᠣᠯ ᠮᠠᠭᠤ ᠰᠠᠢᠨ ᠬᠡᠦᠬᠡᠳ ᠦ᠋ᠳ ᠶᠠᠭᠤ ᠢᠳᠡᠨᠡ ᠠ᠋? ᠭᠡᠵᠦ ᠤᠴᠠᠭᠠᠷᠯᠠᠭᠰᠠᠨ ᠳᠠᠭᠤ ᠪᠠᠷ ᠬᠠᠷᠢᠭᠤᠯᠪᠠ᠃
ᠢᠩᠭᠢᠭᠡᠳ ᠴᠠᠭᠠᠰᠢ ᠨᠢ ᠶᠠᠷᠢᠬᠤ ᠴᠦ᠍ ᠬᠡᠷᠡᠭ ᠠᠯᠠᠭᠠ᠂ ᠶᠠᠷᠢᠭᠤᠯᠬᠤ ᠬᠡᠷᠡᠭ ᠴᠦ᠍ ᠠᠯᠠᠭᠠ᠂ ᠪᠦᠬᠦ ᠶᠠᠭᠤᠮᠠ ᠳ᠋ᠠᠨᠽᠡᠨ ᠳ᠋ᠦ᠍ ᠲᠣᠳᠣᠷᠬᠠᠢ ᠪᠣᠯᠪᠠ᠃ ᠪᠠᠢᠰᠢᠩ ᠳᠣᠲᠣᠷᠠᠬᠢ ᠡᠨᠡ ᠠᠢᠯ ᠤ᠋ᠨ ᠨᠡᠢᠲᠡ ᠬᠠᠯᠠᠭᠤᠨ ᠠᠮᠠ ᠪᠦᠯᠢ ᠶ᠋ᠢᠨ ᠬᠢᠨ ᠦ᠌ ᠶᠠᠭ ᠡᠨᠡᠬᠡᠨ ᠦᠶᠡ ᠶ᠋ᠢᠨ ᠪᠠᠢᠳᠠᠯ ᠴᠦ᠍ ᠴᠣᠬᠣᠮ ᠬᠦ᠌ ᠡᠪᠦᠭᠡᠨ ᠤᠷᠤᠭᠤ ᠳᠣᠷᠣᠢ ᠴᠢᠷᠠᠢ ᠶ᠋ᠢ ᠴᠦ᠍ ᠪᠠᠲᠤᠯᠠᠬᠤ ᠮᠡᠲᠦ᠃ ᠭᠤᠷᠪᠠᠨ ᠨᠠᠰᠤᠲᠠᠢ ᠪᠢᠴᠢᠬᠠᠨ ᠥᠬᠢᠨ ᠨᠢ ᠪᠣᠯᠪᠠᠴᠤ ᠭᠤᠨᠢᠭᠲᠤ ᠴᠢᠷᠠᠢ ᠪᠠᠷ ᠱᠠᠯᠠ ᠰᠢᠷᠲᠡᠨ ᠨᠢᠳᠦ ᠴᠠᠪᠴᠢᠯᠠᠨᠠ᠃ ᠬᠥᠭᠡᠷᠦᠬᠦᠢ ᠪᠣᠯᠤᠭᠰᠠᠨ ᠡᠳᠡᠨ ᠦ᠌ ᠳᠤᠮᠳᠠ ᠳ᠋ᠠᠨᠽᠡᠨ ᠡᠳᠦᠷ ᠳᠣᠳᠣᠮ ᠪᠠᠭᠠ ᠦᠭᠡᠢ ᠬᠣᠭᠣᠯᠠ ᠬᠣᠷᠣᠭᠠᠵᠤ ᠰᠠᠭᠤᠭᠠ ᠪᠠᠨ ᠰᠠᠨᠠᠨ ᠰᠡᠳᠬᠢᠯ ᠵᠣᠪᠠᠯᠠ᠃ ᠠᠪᠠᠭᠠᠢ ᠯᠤᠤ ᠯᠢ ᠳ᠋ᠦ᠍ ᠰᠢᠩᠭᠡᠨ ᠬᠠᠷᠠ ᠴᠠᠢ ᠠᠯᠢ ᠬᠡᠳᠦᠢᠨᠡᠢ ᠠᠶᠠᠭᠠᠯᠠᠨ ᠬᠠᠵᠠᠭᠤᠳᠠᠬᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠲᠠᠯᠪᠢᠵᠠᠢ᠃ ᠲᠡᠷᠡ ᠴᠠᠢ ᠣᠳᠣ ᠪᠠᠷᠤᠭ ᠬᠦᠷᠥᠴᠢᠭᠡᠳ ᠪᠠᠢᠭᠠ ᠪᠣᠯᠪᠠᠴᠤ ᠯᠤᠤ ᠯᠢ ᠰᠦᠷᠴᠢᠭᠢᠨᠡᠭᠦᠯᠦᠨ ᠰᠣᠷᠣᠬᠤ ᠨᠢ ᠱᠠᠯ ᠳᠡᠮᠡᠢ ᠮᠠᠶᠢᠭᠯᠠᠯ ᠰᠢᠭ᠋᠃ ᠭᠡᠪᠡᠴᠦ ᠣᠯᠠᠨ ᠦᠷᠴᠢᠯᠡᠭᠡᠰᠦᠲᠦ ᠭᠠᠤᠯᠢᠨ ᠰᠢᠷᠠ ᠮᠠᠩᠨᠠᠢ ᠳ᠋ᠤᠨᠢ ᠬᠥᠯᠥᠰᠥ ᠭᠠᠷᠬᠤ ᠲᠡᠳᠦᠢ ᠦᠭᠡᠢ᠂ ᠰᠢᠨᠡ ᠶ᠋ᠢ ᠳᠠᠭᠠᠨ ᠤᠷᠤᠰᠴᠤ᠂ ᠵᠠᠪᠢᠯᠠᠨ ᠰᠠᠭᠤᠭᠰᠠᠨ ᠡᠪᠦᠳᠦᠭ ᠦ᠋ᠨ ᠬᠢᠨᠢ ᠥᠮᠥᠳᠥ ᠨᠥᠬᠦᠭᠡᠰᠦᠨ ᠳᠡᠭᠡᠷᠡ ᠰᠢᠷᠬᠡᠭ ᠰᠢᠷᠬᠡᠭ ᠢ᠋ᠶ᠋ᠡᠷ ᠳᠤᠰᠤᠯᠠᠵᠤ ᠡᠬᠢᠯᠡᠬᠦ ᠶ᠋ᠢ ᠳ᠋ᠠᠨᠽᠡᠨ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠳᠡᠨ《ᠠᠢ ᠬᠥᠭᠡᠷᠦᠬᠦᠢ ᠠᠮᠢᠳᠤᠷᠠᠬᠤ ᠭᠡᠳᠡᠭ ᠠᠯᠠᠯᠴᠠᠬᠤ ᠳᠠᠢᠰᠤᠨ ᠠ᠋ᠴᠠ ᠬᠡᠴᠡᠭᠦᠦ ᠭᠡᠳᠡᠭ ᠡᠨᠡ ᠪᠠᠢᠵᠠᠢ》 ᠭᠡᠵᠦ ᠪᠣᠳᠣᠪᠠ᠃
ᠮᠠᠷᠭᠠᠰᠢ ᠨᠢ ᠯᠤᠤ ᠯᠢ ᠥᠴᠥᠭᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠬᠦᠨᠳᠦ ᠠᠵᠢᠯ ᠳ᠋ᠤ᠌ ᠨᠢᠴᠠ ᠪᠢᠴᠠ ᠳᠠᠷᠤᠭᠳᠠᠭᠰᠠᠨ ᠢ᠋ᠶ᠋ᠠᠨ ᠣᠷᠣ ᠲᠠᠰᠤ ᠮᠠᠷᠲᠠᠭᠰᠠᠨ ᠰᠢᠭ᠋ ᠥᠷᠯᠥᠭᠡᠨ ᠦ᠌ ᠪᠡᠨ ᠴᠠᠢ ᠶ᠋ᠢ ᠶᠠᠭᠠᠷᠠᠨ ᠤᠤᠭᠤᠵᠤ ᠶᠠᠪᠤᠬᠤ ᠪᠠᠷ ᠪᠡᠯᠡᠳᠬᠡᠪᠡ᠃ ᠭᠡᠲᠡᠯᠡ ᠪᠡᠶᠡ ᠨᠢ ᠥᠴᠥᠭᠡᠳᠦᠷ ᠦ᠋ᠨ ᠠᠵᠢᠯ ᠤ᠋ᠨ ᠢ᠋ᠶ᠋ᠠᠨ ᠬᠦᠨᠳᠦ ᠶ᠋ᠢ ᠶᠡᠷᠦ ᠮᠠᠷᠲᠠᠭᠠ ᠦᠭᠡᠢ ᠮᠡᠲᠦ ᠬᠦᠴᠦᠯᠡᠨ ᠵᠢᠳᠬᠦᠬᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠬᠥᠰᠢᠯᠳᠦᠨ ᠬᠥᠳᠡᠯᠦᠨᠡ᠃ ᠬᠥᠯ ᠨᠢ ᠶᠠᠭᠤᠲᠠᠢ ᠨᠦᠰᠡᠷ ᠬᠦᠨᠳᠦ ᠪᠠᠢᠬᠤ ᠶᠤᠮ ᠪᠣᠢ? ᠣᠯᠠᠨ ᠳᠠᠪᠬᠤᠷ ᠳᠠᠪᠤᠤ ᠱᠠᠬᠠᠢ ᠪᠠᠨ ᠭᠠᠵᠠᠷ ᠠ᠋ᠴᠠ ᠬᠥᠨᠳᠡᠢᠷᠡᠭᠦᠯᠬᠦ ᠴᠢᠳᠠᠯ ᠠᠯᠠᠭᠠ᠃ ᠭᠠᠷ ᠨᠢ ᠪᠠᠰᠠ ᠶᠠᠭᠠᠬᠢᠴᠢᠬᠠᠭᠠᠳ ᠪᠠᠢᠭᠠ ᠶ᠋ᠢ ᠪᠦᠦ ᠮᠡᠳᠡ᠃ ᠯᠤᠤ ᠯᠢ ᠭᠠᠷ ᠢ᠋ᠶ᠋ᠠᠨ ᠬᠥᠳᠡᠯᠭᠡᠬᠦ ᠪᠦᠷᠢ ᠳ᠋ᠡᠭᠡᠨ《ᠠᠶᠤᠤ ᠠᠶᠤᠤ᠁》 ᠭᠡᠬᠦ ᠨᠢ ᠮᠣᠩᠭᠣᠯ ᠢ᠋ᠶ᠋ᠠᠷ ᠪᠣᠯ《ᠶᠣᠣ ᠶᠣᠬᠣ᠁》 ᠭᠡᠳ ᠪᠠᠢᠭᠠ ᠤᠬᠠᠭᠠᠨ ᠲᠠᠢ ᠠᠵᠢ᠃ ᠲᠡᠭᠡᠭᠡᠳ ᠯᠤᠤ ᠯᠢ ᠯᠠᠨᠲᠤᠭᠠᠷ ᠱᠠᠬᠠᠢ ᠪᠠᠨ ᠳᠡᠪᠲᠦᠮᠡᠯ ᠰᠢᠷᠣᠢ ᠶ᠋ᠢᠨ ᠱᠠᠯᠠ ᠳᠡᠭᠡᠭᠦᠷ ᠰᠦᠷ ᠫᠡᠷ ᠴᠢᠷᠦᠨ ᠠᠶᠠ ᠠᠶᠠᠯᠭᠤ ᠥᠭᠦᠯᠡᠨ ᠭᠠᠷᠬᠤ ᠭᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠡᠨ᠄
— ᠳ᠋ᠠᠶᠧ! ᠪᠢ ᠬᠠᠮᠲᠤ ᠶᠠᠪᠤᠶᠠ ᠭᠡᠯᠡ᠃
— ᠴᠢ ᠶᠠᠪᠤᠵᠤ ᠶᠠᠭᠠᠬᠢᠬᠤ ᠨᠢ ᠪᠣᠢ?
— ᠲᠠᠨ ᠤ᠋ ᠠᠵᠢᠯ ᠳ᠋ᠤ᠌ ᠲᠤᠰᠠᠯᠠᠯᠴᠠᠶᠠ᠃
ᠯᠤᠤ ᠯᠢ ᠲᠦᠷ ᠵᠣᠭᠰᠣᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠄
— ᠠᠢ ᠳᠡᠮᠡᠢ᠂ ᠲᠡᠷᠡ ᠠᠵᠢᠯ ᠴᠢᠮᠠ ᠳ᠋ᠤ᠌ ᠲᠠᠭᠠᠷᠠᠬᠤ ᠦᠭᠡᠢ᠃
— ᠶᠠᠭᠠᠬᠢᠭᠠᠳ?
— ᠴᠢ ᠪᠣᠯ ᠮᠠᠨ ᠤ᠋ ᠬᠥᠮᠦᠨ ᠰᠢᠭ ᠭᠠᠵᠠᠷ ᠲᠠᠷᠢᠶᠠᠨ ᠤ᠋ ᠬᠥᠮᠦᠨ ᠪᠢᠰᠢ ᠪᠣᠯᠬᠣᠷ ᠲᠡᠭᠡᠷᠮᠡ ᠳ᠋ᠦ᠍ ᠵᠢᠳᠬᠦᠬᠦ ᠪᠡᠷ ᠲᠩᠷᠢ ᠴᠢᠨᠢ ᠬᠢᠯᠢᠩᠨᠡᠨ ᠵᠠᠶᠠᠭᠠ ᠴᠢᠨᠢ ᠭᠣᠮᠣᠳᠠᠨᠠ᠃
— ᠠᠢ ᠬᠠᠮᠢᠭᠠ ᠠ᠋ᠴᠠ! ᠮᠠᠨ ᠤ᠋ ᠨᠤᠲᠤᠭ ᠲᠤ ᠪᠠᠰᠠ ᠲᠠᠷᠢᠶᠠ ᠪᠠᠢᠳᠠᠭ᠃ ᠪᠢᠳᠡ ᠲᠠᠷᠢᠶᠠ ᠶ᠋ᠢ ᠮᠠᠭᠤ ᠳ᠋ᠤ᠌ ᠦᠵᠡᠳᠡᠭ ᠦᠭᠡᠢ᠃ ᠬᠠᠷᠢᠨ ᠶᠡᠬᠡ ᠪᠤᠶᠠᠨ ᠬᠡᠰᠢᠭ ᠦ᠋ᠨ ᠵᠦᠢᠯ ᠭᠡᠵᠦ ᠦᠵᠡᠳᠡᠭ ᠭᠡᠳ ᠳ᠋ᠠᠨᠽᠡᠨ ᠪᠠᠢᠰᠢᠩ ᠠ᠋ᠴᠠ ᠳᠠᠭᠠᠨ ᠭᠠᠷᠪᠠ᠃ ᠲᠡᠭᠡᠭᠡᠳ ᠳ᠋ᠠᠨᠽᠡᠨ ᠬᠢᠲᠠᠳ ᠬᠥᠮᠦᠨ ᠦ᠌ ᠵᠠᠩᠰᠢᠯ ᠢ᠋ᠶ᠋ᠠᠷ ᠯᠤᠤ ᠯᠢ ᠲᠡᠢ ᠮᠥᠷᠥ ᠵᠡᠷᠭᠡᠴᠡᠯ ᠦᠭᠡᠢ ᠠᠷᠤ ᠠ᠋ᠴᠠ ᠨᠢ ᠳᠠᠭᠠᠪᠠ᠃
ᠡᠨᠡ ᠬᠣᠶᠠᠷ ᠤ᠋ᠨ ᠲᠣᠰᠬᠣᠨ ᠠ᠋ᠴᠠ ᠳᠥᠩᠭᠡᠵᠦ ᠭᠠᠷᠤᠮᠠᠭᠴᠠ ᠴᠠᠰᠤᠨ ᠤ᠋ ᠥᠩᠭᠡᠨ ᠲᠠᠯᠠ ᠶ᠋ᠢ ᠢᠯᠢᠨ ᠬᠡᠢᠰᠦᠭᠰᠡᠨ ᠵᠢᠪᠠᠷ ᠲᠠᠢ ᠰᠢᠭᠤᠷᠭᠠ ᠤᠭᠲᠤᠨ ᠠᠪᠤᠪᠠ᠃ ᠡᠨᠡ ᠨᠢ ᠯᠤᠤ ᠯᠢ ᠡᠪᠦᠭᠡᠨ ᠦ᠌ ᠶᠠᠳᠠᠷᠠᠭᠰᠠᠨ ᠳᠣᠷᠣᠢ ᠪᠡᠶᠡ ᠶ᠋ᠢ ᠲᠠᠰᠤ ᠬᠤᠮᠬᠢᠨᠠ ᠃ ᠳ᠋ᠠᠨᠽᠡᠨ ᠪᠣᠯ ᠲᠡᠢᠮᠦ ᠪᠢᠰᠢ᠂ ᠬᠦᠢᠲᠡᠨ ᠵᠢᠪᠠᠷ ᠬᠣᠭᠣᠯᠠᠢ ᠤᠷᠤᠭᠤ ᠨᠢ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠰᠡᠩᠭᠢᠨᠡᠵᠦ᠂ ᠠᠭᠤᠰᠬᠢ ᠴᠡᠭᠡᠵᠢ ᠶ᠋ᠢ ᠠᠷᠢᠭᠤᠳᠬᠠᠬᠤ ᠮᠡᠲᠦ ᠨᠢ ᠲᠥᠷᠥᠭᠰᠡᠨ ᠨᠤᠲᠤᠭ ᠤ᠋ᠨ ᠳ᠋ᠦᠩ ᠡᠪᠦᠯ ᠦ᠋ᠨ ᠰᠠᠢᠬᠠᠨ ᠢ᠋ ᠨᠢᠭᠡ ᠦᠶᠡ ᠰᠠᠨᠠᠭᠳᠠᠭᠤᠯᠵᠤ ᠨᠢᠭᠡ ᠦᠶᠡ ᠮᠠᠷᠲᠠᠭᠤᠯᠤᠨᠠ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠳ᠋ᠠᠨᠽᠡᠨ ᠡᠨᠡ ᠳᠡᠯᠡᠬᠡᠢ ᠳ᠋ᠦ᠍ ᠬᠣᠣᠰ ᠦᠭᠡᠢ ᠰᠠᠢᠬᠠᠨ ᠰᠡᠳᠬᠢᠯᠲᠡᠨ ᠭᠡᠵᠦ ᠦᠵᠡᠳᠡᠭ ᠯᠤᠤ ᠯᠢ ᠶ᠋ᠢᠨ ᠠᠵᠢᠯ ᠬᠡᠷᠡᠭ ᠲᠦ᠍ ᠣᠳᠣ ᠯᠠ ᠨᠢᠭᠡ ᠲᠤᠰᠠ ᠨᠡᠮᠡᠷᠢ ᠪᠣᠯᠬᠤ ᠭᠡᠵᠦ ᠶᠠᠪᠤᠭᠠ ᠳ᠋ᠠᠭᠠᠨ ᠪᠠᠶᠠᠷᠯᠠᠨᠠ᠃
ᠶᠡᠬᠡ ᠪᠠᠭᠠ ᠬᠣᠶᠠᠷ ᠲᠣᠰᠬᠣᠨ ᠳ᠋ᠤ᠌ ᠳᠠ ᠯᠣᠣᠶᠧ ᠠᠯᠳᠠᠷ ᠢ᠋ᠶ᠋ᠠᠨ ᠮᠠᠨᠳᠤᠭᠤᠯᠤᠭᠰᠠᠨ ᠭᠠᠵᠠᠷ ᠤ᠋ᠨ ᠡᠵᠡᠨ ᠦ᠌ ᠪᠠᠢᠰᠢᠩ ᠢ᠋ ᠦᠵᠡᠪᠡᠯ ᠭᠠᠢᠬᠠᠯᠲᠠᠢ ᠴᠦ᠍ ᠶᠠᠭᠤᠮᠠ ᠠᠯᠠᠭᠠ᠃ ᠬᠠᠯᠬᠠ ᠨᠤᠲᠤᠭ ᠤ᠋ᠨ ᠬᠥᠳᠡᠭᠡ ᠬᠢ ᠰᠦᠮᠡ ᠬᠡᠢᠳ ᠦ᠋ᠳ ᠦ᠋ᠨ ᠳᠡᠷᠭᠡᠳᠡ ᠪᠠᠢᠳᠠᠭ ᠵᠢᠵᠢᠭ ᠲᠤᠤᠵᠤᠤᠷ ᠫᠦᠰᠡ ᠨᠦ᠍ᠭᠦᠳ ᠦ᠋ᠨ ᠬᠢ ᠰᠢᠭ ᠴᠠᠭᠠᠰᠤᠨ ᠴᠣᠩᠬᠣ ᠨᠤᠭᠤᠳ ᠲᠠᠢ ᠲᠡᠩᠨᠡᠬᠡᠷ ᠣᠷᠣᠢ ᠲᠠᠢ ᠰᠢᠪᠡᠷ ᠪᠠᠢᠰᠢᠩ᠃ ᠭᠡᠪᠡᠴᠦ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠨᠢ ᠦᠷᠭᠦᠯᠵᠢᠯᠡᠨ ᠬᠦᠷᠢᠶᠡᠯᠡᠭᠰᠡᠨ ᠣᠯᠠᠨ ᠰᠢᠪᠡᠷ ᠫᠧᠩ ᠰᠠᠷᠠᠪᠴᠢ ᠲᠠᠢ ᠶ᠋ᠢ ᠨᠢ ᠦᠵᠡᠬᠦ ᠳ᠋ᠦ᠍ ᠳᠣᠲᠣᠭᠤᠷ ᠬᠥᠷᠥᠩᠭᠡ ᠪᠡᠷ ᠲᠤᠩ ᠪᠠᠭᠠ ᠦᠭᠡᠢ ᠨᠢ ᠢᠯᠡᠷᠬᠡᠢ᠃
ᠳ᠋ᠠᠨᠽᠡᠨ ᠯᠤᠤ ᠯᠢ ᠬᠣᠶᠠᠷ ᠬᠠᠭᠠᠯᠭᠠ ᠶ᠋ᠢᠨ ᠰᠠᠮᠪᠠᠷᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠪᠦᠲᠦᠭᠡᠨ ᠴᠢᠬᠢᠷᠰᠦᠨ ᠰᠦᠯᠵᠢᠮᠡᠯ ᠢ᠋ ᠤᠨᠵᠢᠭᠤᠯᠤᠭᠰᠠᠨ ᠲᠣᠮᠣ ᠫᠧᠩ ᠳ᠋ᠦ᠍ ᠣᠷᠣᠪᠠ᠃ ᠡᠨᠡ ᠪᠣᠯ ᠲᠡᠭᠡᠷᠮᠡ ᠶ᠋ᠢᠨ ᠭᠠᠵᠠᠷ ᠪᠠᠢᠯᠠ᠃ ᠲᠡᠷᠡ ᠫᠧᠩ ᠦ᠋ᠨ ᠳᠤᠮᠳᠠ ᠮᠣᠩᠭᠣᠯ ᠭᠡᠷ ᠦ᠋ᠨ ᠲᠣᠮᠣ ᠲᠣᠭᠣᠨᠣ ᠶ᠋ᠢᠨ ᠬᠢᠷᠢ ᠲᠡᠢ ᠪᠣᠷᠵᠢᠨ ᠴᠢᠯᠠᠭᠤᠨ ᠬᠦᠨᠳᠦ ᠲᠡᠭᠡᠷᠮᠡ ᠬᠥᠳᠡᠯᠬᠦ ᠪᠡᠨ ᠬᠦᠯᠢᠶᠡᠬᠦ ᠮᠡᠲᠦ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠲᠡᠭᠦᠨ ᠦ᠌ ᠴᠠᠭᠠᠨᠠ ᠪᠤᠭᠤ ᠶ᠋ᠢᠨ ᠵᠢᠰᠦ ᠲᠡᠢ ᠰᠤᠭᠤ ᠶ᠋ᠢᠨ ᠬᠡᠯᠪᠡᠷᠢᠲᠡᠢ ᠬᠣᠶᠠᠷ ᠰᠠᠢᠬᠠᠨ ᠡᠯᠵᠢᠭᠡ ᠤᠶᠠᠭᠠᠲᠠᠢ ᠪᠠᠢᠨᠠ᠃ ᠤᠭ ᠨᠢ ᠡᠨᠳᠡ ᠪᠠᠢᠭᠠ ᠭᠤᠯᠢᠷ ᠤ᠋ᠨ ᠬᠦᠨᠳᠦ ᠲᠡᠭᠡᠷᠮᠡ ᠶ᠋ᠢ ᠯᠤᠤ ᠯᠢ ᠪᠢᠰᠢ ᠳ᠋ᠠᠨᠽᠡᠨ ᠴᠦ᠍ ᠪᠢᠰᠢ᠂ ᠳᠡᠷᠭᠡᠳᠡ ᠨᠢ ᠪᠠᠢᠭᠠ ᠲᠡᠷᠡ ᠬᠣᠶᠠᠷ ᠡᠯᠵᠢᠭᠡ ᠬᠥᠳᠡᠯᠭᠡᠬᠦ ᠶᠣᠰᠣᠲᠠᠢ ᠪᠠᠢᠪᠠ᠃
— ᠠᠢ ᠳ᠋ᠠᠶᠧ! ᠡᠨᠡ ᠬᠣᠶᠠᠷ ᠢ᠋ ᠲᠡᠭᠡᠷᠮᠡ ᠳ᠋ᠦ᠍ ᠶᠠᠭᠠᠬᠢᠭᠠᠳ ᠣᠷᠣᠭᠤᠯᠳᠠᠭ ᠦᠭᠡᠢ ᠶᠦᠮ ᠪᠣᠢ? ᠭᠡᠵᠦ ᠳ᠋ᠠᠨᠽᠡᠨ ᠦ᠌ ᠠᠰᠠᠭᠤᠬᠤ ᠳ᠋ᠤ᠌ ᠯᠤᠤ ᠯᠢ᠂
— ᠳᠡ ᠯᠣᠣᠶᠧ ᠡᠨᠡ ᠬᠣᠶᠠᠷ ᠲᠠᠭᠠᠨ ᠬᠠᠢᠷᠠᠲᠠᠢ ᠶᠤᠮ ᠭᠡᠵᠦ ᠬᠠᠷᠢᠭᠤᠯᠪᠠ᠃
— ᠶᠠᠭᠠᠬᠢᠭᠠᠳ ᠲᠡᠷᠡ ᠪᠣᠢ?
— ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠡᠨᠡ ᠬᠣᠶᠠᠷ ᠤ᠋ᠨ ᠵᠠᠶᠠᠭᠠ! ᠭᠡᠳ ᠢᠨᠢᠶᠡᠮᠰᠦᠭᠯᠡᠭᠰᠡᠨ ᠢ᠋ᠶ᠋ᠡᠨ ᠬᠤᠪᠢᠷᠠᠨ ᠭᠤᠲᠤᠷᠠᠬᠤ ᠨᠢ《ᠪᠢ ᠡᠨᠡ ᠬᠣᠶᠠᠷ ᠠ᠋ᠴᠠ ᠳᠣᠣᠷᠠ ᠵᠠᠶᠠᠭᠠ ᠲᠠᠢ》 ᠭᠡᠵᠦ ᠰᠢᠭᠤᠳ ᠬᠡᠯᠡᠬᠦ ᠰᠢᠭ ᠪᠣᠯᠪᠠ᠃ ᠭᠡᠪᠡᠴᠦ ᠯᠤᠤ ᠯᠢ ᠳᠠᠬᠢᠨ ᠢᠨᠢᠶᠡᠮᠰᠦᠭᠯᠡᠵᠦ ᠡᠨᠡ ᠬᠣᠶᠠᠷ ᠤ᠋ᠨ ᠵᠠᠶᠠᠭᠠ ᠦᠨᠡᠬᠡᠷ ᠥᠨᠳᠥᠷ᠂ ᠲᠡᠷᠡ ᠨᠢ ᠨᠠᠳᠠ ᠪᠣᠯᠪᠠᠴᠤ ᠥᠯᠵᠡᠢ ᠪᠣᠯᠵᠤ ᠪᠠᠢᠭᠠ ᠶᠤᠮ ᠰᠢᠦ ᠭᠡᠪᠡ᠃
— ᠵᠠ ᠲᠠᠨ ᠳ᠋ᠤ᠌ ᠶᠠᠭᠠᠬᠢᠵᠤ ᠥᠯᠵᠡᠢ ᠪᠣᠯᠤᠭᠰᠠᠨ ᠪᠣᠢ?
— ᠳᠡ ᠯᠣᠣᠶᠧ ᠡᠨᠡ ᠬᠣᠶᠠᠷ ᠢ᠋ᠶ᠋ᠠᠨ ᠡᠰᠡ ᠬᠠᠢᠷᠠᠯᠠᠨ ᠲᠡᠭᠡᠷᠮᠡ ᠳ᠋ᠦ᠍ ᠣᠷᠣᠭᠤᠯᠪᠠᠯ ᠨᠠᠳᠠ ᠳ᠋ᠤ᠌ ᠬᠢᠬᠦ ᠠᠵᠢᠯ ᠬᠡᠷᠬᠢᠪᠡᠴᠦ ᠣᠯᠳᠠᠬᠤ ᠦᠭᠡᠢ ᠭᠡᠳ ᠯᠤᠤ ᠯᠢ᠂ ᠥᠨᠥᠬᠢ ᠬᠦᠨᠳᠦ ᠲᠡᠭᠡᠷᠮᠡ ᠳ᠋ᠦ᠍ ᠣᠷᠣᠬᠤ ᠶ᠋ᠢ ᠵᠠᠪᠳᠤᠪᠠ᠃ ᠳ᠋ᠠᠨᠽᠡᠨ ᠬᠠᠵᠠᠭᠤ ᠠ᠋ᠴᠠ ᠨᠢ《ᠪᠢ ᠪᠢ》 ᠭᠡᠯᠡ᠃
《ᠪᠢ ᠪᠢ》 ᠭᠡᠰᠡᠨ ᠴᠢᠭ ᠢ᠋ᠶ᠋ᠡᠷ ᠳ᠋ᠠᠨᠽᠡᠨ ᠡᠯᠵᠢᠭᠡᠨ ᠦ᠌ ᠬᠥᠮᠥᠯᠳᠥᠷᠭᠡ ᠶ᠋ᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠣᠷᠣᠭᠤᠯᠵᠤ ᠣᠷᠣᠭᠰᠢ ᠵᠢᠳᠬᠦᠪᠡ᠃
ᠠᠩᠬᠠᠨ ᠤ᠋ ᠵᠢᠳᠬᠦᠯᠲᠡ ᠳ᠋ᠦ᠍ ᠳ᠋ᠠᠨᠽᠡᠨ ᠲᠡᠭᠡᠷᠮᠡ ᠶ᠋ᠢ ᠬᠠᠷᠠᠬᠠᠨ ᠬᠥᠳᠡᠯᠭᠡᠵᠦ ᠡᠰᠡ ᠴᠢᠳᠠᠪᠠ᠃ ᠬᠣᠶᠠᠳᠠᠬᠢ ᠳᠡᠭᠡᠷᠡ ᠪᠡᠨ ᠪᠦᠬᠦ ᠬᠦᠴᠦ ᠪᠡᠨ ᠴᠡᠭᠡᠵᠢᠨ ᠳ᠋ᠡᠭᠡᠨ ᠬᠤᠷᠠᠯᠳᠤᠭᠤᠯᠤᠨ ᠣᠩᠭᠣᠨ ᠮᠣᠷᠢ ᠰᠢᠭ᠋ ᠤᠭᠵᠠ ᠲᠠᠲᠠᠬᠤ ᠳ᠋ᠠᠭᠠᠨ ᠠᠱᠶ᠋ᠭᠦᠢ ᠬᠥᠳᠡᠯᠭᠡᠪᠡ᠃ ᠠᠷᠤ ᠳ᠋ᠤᠨᠢ ᠰᠠᠢᠷ ᠴᠢᠯᠠᠭᠤ ᠠᠰᠬᠠᠷᠠᠬᠤ ᠰᠢᠭ᠋ ᠠᠪᠢᠶᠠ ᠭᠠᠷᠤᠨᠠ᠃ ᠬᠣᠭᠣᠷᠣᠨᠳᠣᠭᠤᠷ ᠢ᠋ᠶ᠋ᠠᠨ ᠣᠷᠣᠭᠰᠠᠨ ᠦᠷᠡ ᠲᠠᠷᠢᠶᠠ ᠶ᠋ᠢ ᠨᠢᠴᠠ ᠪᠢᠴᠠ ᠳᠠᠷᠤᠭᠴᠢ ᠬᠣᠶᠠᠷ ᠬᠦᠨᠳᠦ ᠴᠢᠯᠠᠭᠤ ᠬᠠᠪᠢᠷᠤᠯᠳᠤᠬᠤ ᠳ᠋ᠠᠭᠠᠨ ᠡᠢᠨᠬᠦ ᠳᠤᠤᠭᠠᠷᠳᠠᠭ ᠪᠠᠢᠵᠠᠢ᠃ ᠳ᠋ᠠᠨᠽᠡᠨ ᠣᠳᠣ ᠨᠢᠭᠡᠨᠲᠡ ᠬᠥᠳᠡᠯᠭᠡᠵᠦ ᠠᠪᠤᠭᠰᠠᠨ ᠤ᠋ ᠬᠢ ᠭᠡᠰᠡᠨ ᠰᠢᠭ ᠤᠷᠮᠠ ᠵᠣᠷᠢᠭᠲᠠᠢᠬᠠᠨ ᠠᠯᠬᠤᠯᠠᠵᠤ ᠠᠷᠤ ᠳ᠋ᠤᠨᠢ ᠥᠨᠥᠬᠢ ᠰᠦᠷᠴᠢᠭᠢᠨᠡᠬᠦ ᠠᠪᠢᠶᠠ ᠴᠢᠬᠢᠨ ᠳ᠋ᠦ᠍ᠨᠢ ᠴᠢᠮᠡᠭ ᠪᠣᠯᠤᠨ ᠦᠷᠭᠦᠯᠵᠢᠯᠡᠨᠡ᠃ ᠭᠡᠲᠡᠯᠡ ᠵᠥᠪᠬᠡᠨ ᠨᠢᠭᠡ ᠭᠠᠵᠠᠷ ᠡᠷᠭᠢᠭᠦᠦ ᠮᠠᠯ ᠰᠢᠭ᠋ ᠡᠷᠭᠢᠯᠳᠦᠵᠦ ᠪᠠᠢᠭᠠ ᠠ᠋ᠴᠠ ᠨᠢᠳᠦ ᠡᠷᠢᠶᠡᠯᠵᠡᠨ ᠲᠣᠯᠣᠭᠠᠢ ᠡᠷᠭᠢᠬᠦ ᠮᠠᠶᠢᠭ ᠲᠠᠢ ᠪᠣᠯᠵᠤ ᠢᠷᠡᠬᠦ ᠳ᠋ᠦ᠍ ᠳ᠋ᠠᠨᠽᠡᠨ《ᠡᠨᠡ ᠴᠢᠨᠢ ᠠᠶᠠ ᠦᠭᠡᠢ ᠪᠣᠯ ᠡᠷᠭᠢᠭᠦᠦ ᠡᠪᠡᠳᠴᠢᠨ ᠣᠯᠵᠤ ᠮᠠᠭᠠᠳ ᠦᠭᠡᠢ ᠠᠵᠢᠯ ᠪᠠᠢᠬᠤ ᠨᠢ ᠠ᠋》 ᠭᠡᠵᠦ ᠪᠣᠳᠣᠨ ᠨᠢᠳᠦ ᠪᠡᠨ ᠠᠨᠢᠪᠠ᠃ ᠵᠠᠷᠢᠮ ᠳ᠋ᠠᠭᠠᠨ ᠴᠦ᠍ ᠬᠠᠭᠠᠰ ᠠᠨᠢᠨ ᠳᠣᠣᠷᠠᠲᠤ ᠭᠠᠵᠠᠷ ᠤ᠋ᠨ ᠪᠠᠷᠠ ᠶ᠋ᠢ ᠬᠠᠭᠠᠰ ᠬᠤᠭᠤᠰ ᠠᠵᠢᠭᠯᠠᠨᠠ᠃ ᠶᠠᠪᠤᠬᠤ ᠳᠣᠳᠣᠮ ᠲᠡᠭᠡᠷᠮᠡ ᠶ᠋ᠢᠨ ᠴᠢᠯᠠᠭᠤᠨ ᠳ᠋ᠤ᠌ ᠡᠷᠴᠢ ᠣᠷᠣᠨ ᠬᠥᠩᠭᠡᠷᠡᠬᠦ ᠶ᠋ᠢ ᠳ᠋ᠠᠨᠽᠡᠨ ᠮᠡᠳᠡᠵᠦ᠂ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠤᠷᠳᠤᠰᠬᠠᠪᠠ᠃ ᠪᠠᠷᠤᠭ ᠭᠦᠶᠦᠬᠦ ᠰᠢᠬᠠᠮ ᠪᠣᠯᠬᠤ ᠳ᠋ᠤ᠌ ᠯᠤᠤ ᠯᠢ《ᠠᠢ》 ᠭᠡᠵᠦ ᠳᠠᠭᠤ ᠠᠯᠳᠠᠭᠠᠳ᠄
— ᠳᠡᠭᠦᠦ ᠮᠢᠨᠢ ᠠᠶᠠᠷ! ᠭᠡᠯᠡ᠃
— ᠶᠠᠭᠤᠨ ᠳ᠋ᠤ᠌ ᠲᠡᠷᠡ ᠪᠣᠢ? ᠬᠤᠷᠳᠤᠨ ᠶᠠᠪᠤᠪᠠᠯ ᠬᠥᠩᠭᠡᠨ ᠪᠠᠢᠨᠠ᠃
— ᠲᠡᠢᠮᠦ᠃ ᠭᠡᠪᠡᠴᠦ ᠬᠥᠩᠭᠡᠷᠡᠭᠰᠡᠨ ᠡᠴᠡ ᠪᠣᠯᠤᠨ ᠭᠤᠯᠢᠷ ᠪᠦᠲᠦᠭᠡᠨ ᠭᠠᠷᠤᠨᠠ᠃
— ᠮᠡᠳᠡᠯᠡ᠃ ᠶᠠᠮᠠᠷᠬᠠᠨ ᠬᠡᠮᠵᠢᠶᠡ ᠪᠡᠷ ᠶᠠᠪᠤᠬᠤ ᠪᠣᠢ?
— ᠡᠯᠵᠢᠭᠡᠨ ᠦ᠌ ᠰᠠᠵᠢᠯᠠᠯᠲᠠ ᠪᠠᠷ ᠶᠠᠪᠤᠪᠠᠯ ᠲᠠᠭᠠᠷᠠᠨᠠ᠃
— ᠵᠠ ᠭᠡᠳ ᠳ᠋ᠠᠨᠽᠡᠨ ᠶᠠᠪᠤᠯᠲᠠ ᠪᠠᠨ ᠤᠳᠠᠭᠠᠰᠢᠷᠠᠭᠤᠯᠬᠤ ᠳ᠋ᠤ᠌ ᠲᠡᠭᠡᠷᠮᠡ ᠬᠦᠨᠳᠦᠷᠡᠨᠡ᠃ ᠰᠦᠷᠴᠢᠭᠢᠨᠡᠬᠦ ᠠᠪᠢᠶᠠ ᠨᠢ ᠴᠦ᠍ ᠨᠠᠮᠵᠢᠷᠠᠨ ᠵᠠᠯᠬᠠᠭᠤ ᠬᠦᠷᠦᠮᠡ ᠤᠢᠳᠬᠠᠷ ᠲᠠᠢ ᠪᠣᠯᠵᠤ ᠢᠷᠡᠪᠡ᠃ ᠰᠡᠳᠬᠢᠯ ᠳ᠋ᠦ᠍ᠨᠢ《ᠡᠯᠵᠢᠭᠡᠨ ᠦ᠌ ᠰᠠᠵᠢᠯᠠᠯᠲᠠ ᠪᠠᠷ᠁》 ᠭᠡᠰᠡᠨ ᠦᠭᠡ ᠬᠠᠳᠠᠭᠠᠯᠠᠭᠳᠠᠬᠤ ᠤᠴᠢᠷ᠂ ᠶᠣᠰᠣᠲᠠᠢ ᠡᠯᠵᠢᠭᠡ ᠰᠢᠭ ᠰᠠᠵᠢᠯᠠᠬᠤ ᠠᠵᠢ᠃ ᠭᠡᠲᠡᠯᠡ《ᠪᠢ ᠣᠳᠣ ᠳ᠋ᠠᠨᠽᠡᠨ ᠪᠢᠰᠢ᠂ ᠡᠯᠵᠢᠭᠡ ᠪᠣᠯᠤᠭᠠᠳ ᠶᠠᠪᠤᠵᠤ ᠪᠠᠢᠨᠠ》 ᠭᠡᠰᠡᠨ ᠰᠣᠨᠢᠬᠠᠨ ᠪᠣᠳᠣᠯ ᠲᠥᠷᠥᠪᠡ᠃ ᠲᠡᠭᠡᠭᠡᠳ ᠪᠦᠷ ᠡᠯᠵᠢᠭᠡ ᠲᠡᠢ ᠢᠵᠢᠯᠰᠢᠬᠦ ᠭᠡᠰᠡᠨ ᠰᠢᠭ ᠫᠧᠩ ᠳ᠋ᠦ᠍ ᠤᠶᠠᠭᠠᠲᠠᠢ ᠪᠠᠢᠭᠠ ᠬᠣᠶᠠᠷ ᠡᠯᠵᠢᠭᠡ ᠳ᠋ᠦ᠍ ᠪᠡᠶᠡ ᠳᠠᠰᠢᠶᠠᠷᠯᠠᠨ ᠣᠴᠢᠬᠤ ᠪᠦᠷᠢ ᠳ᠋ᠡᠭᠡᠨ ᠠᠵᠢᠬᠤ ᠳ᠋ᠤ᠌ ᠬᠣᠶᠠᠷ ᠡᠯᠵᠢᠭᠡ ᠠᠵᠢᠯ ᠦᠭᠡᠢ ᠳᠡᠮᠡᠢ ᠪᠠᠢᠭᠠ ᠳ᠋ᠠᠭᠠᠨ ᠪᠡᠶᠡ ᠴᠢᠯᠡᠭᠦᠷᠬᠡᠨ ᠤᠢᠳᠬᠠᠷᠯᠠᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠮᠥᠷᠲᠡᠭᠡᠨ ᠲᠤᠩ ᠶᠡᠬᠡᠮᠰᠦᠭ᠂ ᠬᠠᠷᠢᠨ ᠴᠦ᠍《ᠲᠡᠭᠡᠷᠮᠡ ᠳ᠋ᠦ᠍ ᠣᠷᠣᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢ ᠡᠯᠵᠢᠭᠡ᠂ ᠡᠵᠡᠨ ᠳ᠋ᠡᠭᠡᠨ ᠬᠠᠢᠷᠠᠯᠠᠭᠳᠠᠨ ᠵᠦᠭᠡᠷ ᠲᠡᠵᠢᠭᠡᠭᠳᠡᠵᠦ ᠪᠠᠢᠭᠠ ᠪᠠᠷ ᠢ᠋ᠶ᠋ᠠᠨ ᠪᠢ ᠬᠥᠮᠦᠨ》 ᠭᠡᠰᠡᠨ ᠰᠢᠭ ᠲᠡᠭᠡᠷᠮᠡ ᠶ᠋ᠢᠨ ᠵᠦᠭ ᠰᠢᠷᠲᠡᠨ ᠪᠠᠢᠭᠠ ᠳ᠋ᠤ᠌ ᠳ᠋ᠠᠨᠽᠡᠨ ᠦ᠌ ᠠᠭᠤᠷ ᠭᠡᠨᠡᠳᠲᠡ ᠬᠦᠷᠦᠨᠡ᠃《ᠰᠢ ᠲᠠ ᠮᠠ ᠳᠢ》 ᠭᠡᠬᠦ ᠬᠢᠲᠠᠳ ᠬᠠᠷᠢᠶᠠᠯ ᠠᠮᠠᠨ ᠳ᠋ᠤᠨᠢ ᠠᠶᠠᠨ ᠳ᠋ᠠᠭᠠᠨ ᠣᠷᠣᠵᠤ ᠢᠷᠡᠪᠡ᠃ ᠡᠨᠡ ᠵᠠᠭᠤᠷᠠ ᠯᠤᠤ ᠯᠢ ᠭᠤᠸᠠᠢ ᠳ᠋ᠤ᠌ ᠬᠢᠬᠦ ᠠᠵᠢᠯ ᠶᠡᠷᠦ ᠮᠤᠩᠳᠠᠭᠰᠠᠨ ᠦᠭᠡᠢ ᠤᠷᠢᠳᠠ ᠤᠷᠢᠳᠠ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠷᠡᠮᠳᠡᠨ ᠭᠠᠷᠭᠠᠵᠤ ᠠᠪᠳᠠᠷᠠᠯᠠᠭᠰᠠᠨ ᠭᠤᠯᠢᠷ ᠢ᠋ᠶ᠋ᠠᠨ ᠱᠤᠤᠳᠠᠢᠯᠠᠬᠤ᠂ ᠱᠤᠤᠳᠠᠢᠯᠠᠭᠰᠠᠨ ᠢ᠋ᠶ᠋ᠠᠨ ᠴᠡᠭᠴᠡᠯᠡᠨ ᠬᠤᠷᠢᠶᠠᠬᠤ᠂ ᠲᠡᠷᠡ ᠵᠠᠪᠰᠠᠷ ᠲᠠᠭᠠᠨ ᠲᠡᠭᠡᠷᠮᠡ ᠳ᠋ᠦ᠍ ᠪᠤᠭᠤᠳᠠᠢ ᠬᠢᠬᠦ᠂ ᠳᠡᠭᠡᠷᠡᠮᠳᠡᠭᠳᠡᠭᠰᠡᠨ ᠢ᠋ ᠠᠪᠬᠤ ᠵᠡᠷᠭᠡ ᠪᠡᠷ ᠳᠡᠷᠭᠡᠳᠡ ᠲᠠᠰᠤᠷᠠᠯᠲᠠ ᠦᠭᠡᠢ ᠬᠥᠳᠡᠯᠦᠭᠰᠡᠭᠡᠷ ᠪᠠᠢᠪᠠ᠃
ᠴᠢᠬᠢᠷᠰᠦᠨ ᠡᠭᠦᠳᠡ ᠰᠡᠪᠬᠢᠨ ᠡᠷᠭᠦᠭᠳᠡᠵᠦ ᠫᠧᠩ ᠦ᠋ᠨ ᠳᠣᠲᠣᠷᠠ ᠲᠥᠭᠥᠷᠢᠭ ᠴᠠᠭᠠᠨ ᠭᠡᠷᠡᠯ ᠲᠤᠰᠪᠠ᠃ ᠳ᠋ᠠᠨᠽᠡᠨ ᠡᠭᠦᠳᠡᠨᠡ ᠲᠠᠰᠢᠷᠯᠠᠨ ᠢᠷᠡᠬᠦ ᠳᠡᠯᠢᠮ ᠳ᠋ᠡᠭᠡᠨ ᠬᠠᠷᠠᠭᠠ ᠲᠠᠯᠪᠢᠬᠤ ᠳ᠋ᠤ᠌ ᠪᠤᠬᠠ ᠰᠢᠭ᠋ ᠪᠦᠲᠦᠭᠦᠨ ᠬᠠᠷᠠ ᠶᠠᠭᠤᠮᠠ ᠴᠢᠬᠢᠷᠰᠦᠨ ᠡᠭᠦᠳᠡ ᠶ᠋ᠢ ᠬᠠᠭᠠᠰ ᠨᠥᠮᠥᠷᠦᠨ ᠵᠣᠭᠰᠣᠵᠤ ᠪᠠᠢᠭᠠ ᠶ᠋ᠢ ᠬᠠᠯᠲᠤ ᠬᠠᠷᠠᠨ ᠥᠩᠭᠡᠷᠡᠭᠡᠳ ᠳᠠᠷᠠᠭᠠᠴᠢ ᠶ᠋ᠢᠨ ᠡᠷᠭᠢᠯᠲᠡ ᠳᠡᠭᠡᠷᠡ ᠪᠤᠬᠠ ᠪᠢᠰᠢ ᠬᠥᠮᠦᠨ ᠪᠣᠯᠬᠤ ᠶ᠋ᠢ ᠯᠠᠪᠲᠠᠢ ᠲᠠᠨᠢᠪᠠ᠃ ᠭᠡᠪᠡᠴᠦ ᠰᠡᠳᠬᠢᠯ ᠳ᠋ᠦ᠍ ᠬᠥᠮᠦᠨ ᠪᠢᠰᠢ᠂ ᠪᠦᠲᠦᠭᠡᠨ ᠭᠡᠭᠴᠢ ᠭᠣᠯᠢᠶᠠ ᠳᠦᠷᠰᠦᠯᠡᠭᠳᠡᠨᠡ᠃ ᠳ᠋ᠠᠨᠽᠡᠨ ᠳᠠᠷᠠᠭᠠᠴᠢ ᠶ᠋ᠢᠨ ᠡᠷᠭᠢᠯᠲᠡ ᠨᠦ᠍ᠭᠦᠳ ᠲᠡᠭᠡᠨ ᠡᠭᠦᠳᠡᠨᠡ ᠲᠠᠰᠢᠷᠯᠠᠨ ᠢᠷᠡᠬᠦ ᠪᠦᠷᠢ ᠰᠠᠮ ᠠᠵᠢᠭᠰᠠᠨ ᠤ᠋ ᠳ᠋ᠦᠩ ᠳ᠋ᠦ᠍《ᠵᠤᠵᠠᠭᠠᠨ ᠬᠥᠪᠥᠩ ᠲᠡᠢ ᠬᠠᠷᠠ ᠳᠠᠪᠤᠤ ᠳᠡᠪᠡᠯ ᠳ᠋ᠦ᠍ ᠪᠠᠭᠲᠠᠵᠤ ᠶᠠᠳᠠᠭᠰᠠᠨ ᠴᠦᠨᠳᠦᠭᠡᠷ ᠭᠡᠳᠡᠰᠦ ᠲᠡᠢ ᠨᠢᠭᠤᠷ ᠲᠠᠯᠠ ᠨᠢ ᠬᠠᠪᠤᠩᠨᠠᠭᠰᠠᠨ ᠮᠡᠲᠦ ᠴᠡᠯᠴᠡᠭᠡᠷ ᠬᠥᠬᠡ ᠥᠩᠭᠡ ᠲᠡᠢ᠂ ᠪᠡᠮᠪᠡᠭᠡᠷ ᠲᠣᠯᠣᠭᠠᠢ᠂ ᠲᠡᠭᠦᠨ ᠳᠡᠭᠡᠷᠡ ᠪᠡᠨ ᠪᠢᠴᠢᠬᠠᠨ ᠬᠠᠷᠠ ᠲᠣᠷᠭᠠᠨ ᠲᠣᠭᠣᠷᠴᠣᠭ ᠰᠢᠭᠢᠳᠬᠡᠨ ᠡᠮᠦᠰᠦᠭᠰᠡᠨ ᠪᠥᠭᠡᠳ ᠬᠥᠯ ᠳ᠋ᠡᠭᠡᠨ ᠯᠠᠨᠲᠤᠭᠠᠷ ᠴᠠᠭᠠᠨ ᠢᠰᠡᠭᠡᠢ ᠱᠠᠬᠠᠢ ᠤᠭᠯᠠᠵᠤ᠂ ᠥᠷᠭᠡᠨ ᠥᠮᠦᠳᠦᠨ ᠦ᠌ ᠪᠡᠨ ᠱᠤᠮᠠᠭᠠᠢ ᠶ᠋ᠢ ᠴᠡᠩᠬᠡᠷ ᠥᠩᠭᠡ ᠶ᠋ᠢᠨ ᠳ᠋ᠠᠢᠵᠠ ᠶ᠋ᠢ ᠰᠢᠭᠢᠳᠲᠡᠯᠡ ᠣᠷᠢᠶᠠᠭᠰᠠᠨ ᠬᠥᠮᠦᠨ ᠪᠠᠢᠭᠠ ᠶ᠋ᠢ ᠲᠣᠳᠣᠷᠬᠠᠢ ᠣᠯᠵᠤ ᠬᠠᠷᠠᠪᠠ᠃ ᠭᠡᠪᠡᠴᠦ ᠰᠡᠳᠬᠢᠯ ᠳ᠋ᠦ᠍ ᠭᠣᠯᠢᠶᠠ ᠯᠠ ᠰᠠᠨᠠᠭᠳᠠᠨᠠ᠃
ᠡᠭᠦᠳᠡᠨ ᠳ᠋ᠦ᠍ ᠵᠣᠭᠰᠣᠭᠰᠠᠨ ᠬᠥᠮᠦᠨ ᠴᠦ᠍ ᠳ᠋ᠠᠨᠽᠡᠨ ᠢ᠋ ᠮᠥᠨ ᠣᠢᠭᠠ ᠦᠭᠡᠢ ᠠᠵᠢᠨ ᠰᠢᠷᠳᠡᠨᠡ᠃ ᠲᠡᠷᠡ ᠬᠥᠮᠦᠨ᠂ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠳ᠋ᠠᠨᠽᠡᠨ ᠦ᠌ ᠬᠢ ᠰᠢᠭ ᠳᠦᠭᠦᠰᠢᠨ ᠳ᠋ᠡᠭᠡᠨ ᠣᠪᠣᠩ ᠳᠣᠪᠣᠩ ᠵᠠᠩᠭᠢᠷᠠᠭᠰᠠᠨ ᠪᠤᠯᠴᠢᠩ ᠲᠠᠢ ᠥᠷᠭᠡᠨ ᠰᠢᠨᠠ ᠲᠠᠢ ᠬᠥᠨᠳᠡᠯᠡᠨ ᠨᠢᠳᠦ᠂ ᠭᠡᠨᠡᠨ ᠬᠠᠷᠠᠴᠠ᠂ ᠥᠷᠭᠡᠨ ᠴᠡᠭᠡᠵᠢ᠂ ᠪᠠᠳᠠᠷᠠᠭᠤᠨ ᠭᠠᠷ᠂ ᠪᠣᠷᠭᠢᠯ ᠬᠥᠳᠡᠯᠭᠡᠭᠡᠨ ᠲᠡᠢ ᠠᠮᠢᠲᠠᠨ ᠢ᠋ ᠦᠵᠡᠭᠡ ᠦᠭᠡᠢ ᠳ᠋ᠡᠭᠡᠨ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠣᠨᠢᠷᠬᠠᠨ ᠰᠢᠷᠳᠡᠭᠡᠳ ᠡᠴᠦᠰ ᠲᠦ᠋ᠨᠢ ᠠᠶᠠ ᠦᠭᠡᠢ ᠪᠣᠯ ᠬᠣᠶᠠᠷ ᠡᠯᠵᠢᠭᠡ ᠣᠷᠣᠭᠤᠯᠬᠤ ᠳ᠋ᠤ᠌ ᠬᠦᠷᠳᠡᠭ ᠲᠡᠭᠡᠷᠮᠡ ᠳ᠋ᠦ᠍ ᠲᠡᠳᠦᠢ ᠯᠡ ᠳᠦᠭᠦᠷᠡᠳᠡᠬᠦ ᠦᠭᠡᠢ ᠵᠢᠳᠬᠦᠵᠦ ᠶᠠᠪᠤᠭᠠ ᠶ᠋ᠢ ᠨᠢ ᠰᠣᠨᠢᠷᠬᠠᠭᠠᠳ ᠪᠦᠷ ᠡᠴᠦᠰ ᠲᠦ᠋ᠨᠢ《ᠬᠡᠷᠪᠡ ᠬᠡᠵᠢᠶᠡ ᠨᠢᠭᠡ ᠰᠥᠨᠢ ᠡᠢᠮᠦ ᠠᠮᠢᠲᠠᠨ ᠠᠪᠳᠠᠷᠠ ᠳ᠋ᠠᠬᠢ ᠮᠥᠩᠭᠥᠨ ᠳ᠋ᠦ᠍ ᠮᠢᠨᠢ ᠰᠢᠨᠤᠨ ᠣᠷᠣᠵᠤ ᠢᠷᠡᠭᠡᠳ ᠪᠠᠭᠠᠯᠵᠠᠭᠤᠷ ᠰᠢᠬᠠᠪᠠᠯ ᠶᠠᠭᠠᠬᠢᠨᠠ》 ᠭᠡᠵᠦ ᠪᠣᠳᠣᠭᠳᠠᠬᠤ ᠳ᠋ᠤ᠌ ᠳᠣᠲᠣᠷᠠ ᠵᠢᠷᠢᠰᠬᠢᠵᠦ ᠡᠷᠭᠢᠨ ᠶᠠᠪᠤᠵᠠᠢ᠃
ᠲᠡᠷᠡ ᠬᠥᠮᠦᠨ ᠢ᠋ ᠳᠠᠯᠳᠠ ᠣᠷᠣᠮᠠᠭᠴᠠ ᠯᠤᠤ ᠯᠢ ᠠᠵᠢᠯ ᠢ᠋ᠶ᠋ᠠᠨ ᠲᠦᠷ ᠵᠣᠭᠰᠣᠨ᠄
— ᠴᠢ ᠠᠵᠢᠪᠠᠤ? ᠳ᠋ᠠ ᠯᠣᠣᠶᠧ! ᠲᠡᠷᠡ ᠴᠢᠮᠠᠶ᠋ᠢ ᠶᠡᠬᠡᠳᠡ ᠲᠠᠭᠠᠯᠠᠨ ᠠᠵᠢᠪᠠ ᠭᠡᠵᠦ ᠪᠠᠶᠠᠰᠤᠩᠭᠤᠢ ᠬᠡᠯᠡᠪᠡ᠃ ᠳ᠋ᠠᠨᠽᠡᠨ ᠣᠳᠣ ᠡᠭᠦᠨ ᠦ᠌ ᠤᠷᠢᠳᠠ ᠯᠤᠤ ᠯᠢ ᠶ᠋ᠢᠨ ᠭᠡᠷ ᠦ᠋ᠨ ᠬᠢᠨ ᠦ᠌ ᠣᠯᠠᠨ ᠲᠠᠢ ᠪᠢᠰᠢᠷᠡᠨ ᠶᠠᠷᠢᠭᠰᠠᠨ ᠳᠠ ᠯᠣᠣᠶᠧ ᠭᠡᠭᠴᠢ ᠪᠣᠯᠬᠤ ᠶ᠋ᠢ ᠰᠠᠶᠢ ᠮᠡᠳᠡᠪᠡ᠃ ᠭᠡᠪᠡᠴᠦ ᠲᠡᠭᠦᠨ ᠦ᠌ ᠥᠪᠡᠷ ᠢ᠋ ᠨᠢ ᠲᠠᠭᠠᠯᠠᠨ ᠠᠵᠢᠭᠰᠠᠨ ᠭᠡᠳᠡᠭ ᠢ᠋ ᠰᠣᠨᠢᠷᠬᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠬᠠᠷᠢᠨ ᠪᠡᠶᠡ ᠶ᠋ᠢᠨ ᠬᠢᠨᠢ ᠣᠨᠴᠠᠭᠠᠢ ᠪᠠᠢᠳᠠᠯ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠤᠨ᠄
— ᠶᠠᠮᠠᠷ ᠭᠡᠭᠴᠢ ᠶ᠋ᠢᠨ ᠪᠦᠳᠦᠭᠦᠨ ᠴᠦ᠍ ᠠᠮᠢᠲᠠᠨ ᠪᠣᠢ ᠳᠠ ᠭᠡᠵᠦ ᠢᠨᠢᠶᠡᠪᠡ᠃
— ᠲᠡᠢᠮᠦ ᠠ᠋᠂ ᠶᠣᠰᠣᠲᠠᠢ ᠪᠤᠶᠠᠨ ᠲᠠᠢ ᠬᠥᠮᠦᠨ᠃
ᠳ᠋ᠠᠨᠽᠡᠨ ᠶᠡᠬᠡ ᠪᠤᠶᠠᠨᠲᠠᠨ ᠢ᠋ ᠱᠣᠣᠯᠠᠵᠤ ᠪᠠᠢᠭᠠ ᠪᠠᠨ ᠭᠡᠨᠡᠳᠲᠡ ᠰᠠᠨᠠᠨ ᠭᠡᠮᠰᠢᠵᠦ ᠢᠨᠢᠶᠡᠳᠦ ᠪᠡᠨ ᠲᠡᠳᠡᠨ ᠠᠮᠠ ᠬᠠᠮᠬᠢᠪᠠ᠃ ᠬᠠᠵᠠᠭᠤ ᠠ᠋ᠴᠠ ᠬᠣᠶᠠᠷ ᠡᠯᠵᠢᠭᠡ ᠢᠪᠡᠭᠡᠯᠲᠦ ᠡᠵᠡᠨ ᠢ᠋ ᠮᠢᠨᠢ ᠳᠣᠷᠣᠮᠵᠢᠯᠠᠪᠠ ᠭᠡᠵᠦ ᠵᠠᠩᠳᠤᠷᠬᠤ ᠮᠡᠲᠦ ᠭᠡᠨᠡᠳᠲᠡ ᠨᠢᠭᠡ ᠵᠡᠷᠭᠡᠴᠡᠭᠡ ᠪᠡᠷ ᠣᠷᠢᠯᠠᠨ ᠰᠢᠪᠠᠷ ᠫᠧᠩ ᠢ᠋ ᠲᠤᠷᠭᠢᠭᠤᠯᠪᠠ᠃ ᠡᠨᠡ ᠰᠠᠴᠠᠭᠤ ᠭᠠᠳᠠᠭᠠ ᠴᠦ᠍ ᠪᠠᠰᠠ ᠱᠤᠤᠭᠢᠶᠠᠨ ᠪᠣᠯᠪᠠ᠃ ᠲᠠᠬᠢᠶᠠ ᠨᠤᠭᠤᠳ ᠳᠠᠭᠤ ᠳᠠᠭᠤ ᠪᠠᠨ ᠠᠪᠤᠯᠴᠠᠨ ᠲᠡᠩᠬᠡ ᠭᠠᠷᠭᠠᠨ ᠬᠠᠰᠬᠢᠷᠤᠯᠳᠤᠨᠠ᠃ ᠲᠡᠢᠨᠬᠦ ᠨᠢᠭᠡ ᠦᠶᠡ ᠠᠢᠬᠤᠪᠲᠤᠷ ᠱᠤᠤᠭᠢᠶᠠᠨ ᠳᠡᠭᠳᠡᠨ ᠨᠠᠮᠵᠢᠬᠤ ᠳ᠋ᠤ᠌ ᠳᠡᠷᠭᠡᠳᠡᠬᠢ ᠬᠣᠶᠠᠷ ᠡᠯᠵᠢᠭᠡ ᠯᠡ ᠪᠠᠷᠬᠢᠷᠠᠯᠳᠤᠭᠰᠠᠭᠠᠷ ᠬᠣᠰᠢᠭᠤ ᠬᠣᠰᠢᠭᠤ ᠪᠠᠨ ᠲᠠᠴᠢᠶᠠᠯᠠᠨ ᠦᠨᠦᠷᠯᠡᠵᠦ ᠤᠶᠠᠭᠳᠠᠭᠰᠠᠨ ᠤᠶᠠᠭᠠ ᠪᠠᠨ ᠠᠳᠠ ᠦᠵᠡᠨ ᠪᠡᠶᠡ ᠪᠡᠶᠡ ᠤᠷᠤᠭᠤ ᠪᠠᠨ ᠤᠬᠠᠭᠠᠨ ᠦᠭᠡᠢ ᠲᠡᠮᠡᠦᠯᠬᠦ ᠶ᠋ᠢ ᠨᠢ ᠠᠵᠢᠪᠠᠯ ᠨᠢᠭᠡ ᠨᠢ ᠭᠡᠭᠦᠦ ᠨᠥᠭᠦᠭᠡ ᠨᠢ ᠠᠵᠢᠷᠭᠠ ᠶᠤᠮ ᠰᠠᠨᠵᠢ᠃
— ᠠᠵᠢᠯ ᠢ᠋ᠶ᠋ᠠᠨ ᠵᠣᠭᠰᠣᠶᠠ! ᠥᠯᠵᠡᠢ ᠪᠤᠶᠠᠨ ᠤ᠋ ᠴᠠᠭ ᠪᠣᠯᠪᠠ ᠭᠡᠵᠦ ᠯᠤᠤ ᠯᠢ ᠬᠡᠯᠡᠪᠡ᠃
ᠥᠯᠵᠡᠢ ᠪᠤᠶᠠᠨ ᠤ᠋ ᠴᠠᠭ ᠭᠡᠵᠦ ᠡᠳᠦᠷ ᠳᠤᠮᠳᠠ ᠪᠣᠯᠬᠤ ᠶ᠋ᠢ ᠬᠡᠯᠡᠳᠡᠭ ᠪᠠᠢᠵᠠᠢ᠃
ᠡᠳᠦᠷ ᠳᠤᠮᠳᠠ ᠪᠣᠯᠣᠮᠠᠭᠴᠠ ᠡᠯᠵᠢᠭᠡ ᠪᠠᠷᠬᠢᠷᠠᠵᠤ᠂ ᠲᠠᠬᠢᠶᠠ ᠳᠣᠩᠭᠣᠳᠴᠤ ᠠᠵᠢᠯ ᠵᠣᠭᠰᠣᠳᠠᠭ ᠪᠠᠢᠵᠠᠢ᠃ ᠴᠠᠭᠠᠰᠢ ᠶᠠᠭᠤ ᠪᠣᠯᠬᠤ ᠪᠣᠢ? ᠭᠡᠪᠡᠯ ᠠᠵᠢᠯᠯᠠᠵᠤ ᠪᠠᠢᠭᠠ ᠬᠥᠮᠦᠨ ᠳ᠋ᠦ᠍ ᠬᠣᠭᠣᠯᠠ ᠢᠷᠡᠨᠡ᠃ ᠴᠢᠬᠢᠷᠰᠦᠨ ᠡᠭᠦᠳᠡ ᠰᠡᠪᠬᠢᠨ ᠨᠡᠭᠡᠭᠡᠭᠳᠡᠵᠦ ᠬᠠᠷᠠᠴᠤ ᠬᠥᠮᠦᠨ ᠬᠣᠭᠣᠯᠠ ᠣᠷᠣᠭᠤᠯᠵᠤ ᠥᠭᠭᠦᠭᠰᠡᠨ ᠢ᠋ ᠨᠥᠭᠦᠭᠡ ᠬᠣᠶᠠᠷ ᠬᠦᠯᠢᠶᠡᠨ ᠠᠪᠤᠪᠠ᠃ ᠯᠤᠤ ᠯᠢ ᠲᠦᠷᠦᠭᠦᠴᠢ ᠶ᠋ᠢᠨ ᠳᠡ ᠯᠣᠣᠶᠧ ᠶ᠋ᠢᠨ ᠬᠠᠴᠠᠷ ᠰᠢᠭ᠋ ᠴᠡᠯᠴᠡᠭᠡᠷ ᠬᠥᠬᠡ ᠥᠩᠭᠡ ᠶ᠋ᠢᠨ ᠲᠣᠮᠣ ᠮᠠᠨᠲᠠᠤ ᠣᠯᠠᠨ ᠢᠷᠡᠭᠰᠡᠨ ᠢ᠋ ᠦᠵᠡᠭᠡᠳ᠂
— ᠠᠢ ᠳᠠ ᠯᠣᠣᠶᠧ ᠴᠢᠮᠠᠶ᠋ᠢ ᠦᠨᠡᠬᠡᠷ ᠳᠠᠭᠠᠯᠠᠭᠰᠠᠨ ᠪᠠᠢᠨᠠ ᠰᠢᠦ ᠭᠡᠵᠦ ᠳᠠᠪᠲᠠᠨ ᠪᠡᠶᠡᠰᠪᠡ᠃
ᠢᠷᠡᠭᠰᠡᠨ ᠬᠣᠭᠣᠯᠠ ᠨᠢ ᠮᠠᠨᠲᠠᠤ᠂ ᠤᠰᠤᠨ ᠳ᠋ᠤ᠌ ᠴᠢᠨᠠᠭᠰᠠᠨ ᠰᠢᠷᠠ ᠪᠤᠳᠠᠭᠠ ᠬᠤᠶᠠᠷ ᠪᠠᠢᠭᠠ ᠪᠢᠯᠡ᠃ ᠠᠵᠢᠯ ᠳᠥᠩᠭᠡᠵᠦ ᠵᠣᠭᠰᠣᠮᠠᠭᠴᠠ ᠫᠧᠩ ᠦ᠋ᠨ ᠵᠢᠬᠡᠭᠦᠨ ᠵᠢᠪᠠᠷ᠂ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠶ᠋ᠢ ᠨᠡᠪᠲᠡ ᠵᠢᠩᠳᠡᠬᠦ ᠲᠤᠯᠠ ᠨᠥᠭᠦᠭᠡ ᠬᠣᠶᠠᠷ ᠬᠠᠯᠠᠭᠤᠨ ᠬᠣᠭᠣᠯᠠ ᠪᠠᠷ ᠳᠣᠲᠣᠷᠠ ᠠ᠋ᠴᠠ ᠪᠠᠨ ᠳᠤᠯᠠᠭᠠᠴᠠᠬᠤ ᠭᠡᠵᠦ ᠶᠠᠭᠠᠷᠠᠨ ᠰᠦᠷᠡᠬᠡᠢ ᠳᠠᠭᠤ ᠴᠢᠮᠡᠭᠡ ᠲᠡᠢ ᠢᠳᠡᠵᠦ ᠭᠠᠷᠤᠯᠠ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠳᠡ ᠯᠣᠣᠶᠧ ᠣᠷᠣᠵᠤ ᠢᠷᠡᠭᠰᠡᠨ ᠪᠠᠢᠪᠠ᠃ ᠲᠡᠭᠦᠨ ᠢ᠋ ᠳ᠋ᠠᠨᠽᠡᠨ ᠲᠦᠷᠦᠭᠦᠨ ᠬᠡᠳᠦ ᠠᠵᠢᠭᠯᠠᠭᠰᠠᠨ ᠲᠤᠯᠠ ᠳᠠᠬᠢᠨ ᠠᠵᠢᠭᠯᠠᠬᠤ ᠬᠡᠷᠡᠭ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠳᠠ ᠯᠣᠣᠶᠧ ᠳ᠋ᠦ᠍ ᠳ᠋ᠠᠨᠽᠡᠨ ᠦ᠌ ᠳᠦᠷᠢ ᠢᠯᠠᠩᠭᠤᠶᠠ ᠲᠦᠬᠦᠰᠢᠨ ᠳ᠋ᠦ᠍ᠨᠢ ᠵᠠᠩᠭᠢᠷᠠᠭᠰᠠᠨ ᠶᠡᠬᠡ ᠪᠤᠯᠴᠢᠩ ᠰᠡᠳᠬᠢᠯ ᠳ᠋ᠦ᠍ᠨᠢ ᠴᠠᠭ ᠦᠷᠭᠦᠯᠵᠢ ᠬᠠᠳᠠᠭᠳᠠᠨ《ᠡᠢᠮᠦ ᠬᠠᠴᠢᠨ ᠪᠣᠯᠠᠢ ᠠᠮᠢᠲᠠᠨ ᠤ᠋ ᠢᠳᠡᠬᠦ ᠶᠠᠮᠠᠷ ᠪᠠᠢᠳᠠᠭ ᠪᠢᠯᠡ?》 ᠭᠡᠰᠡᠨ ᠰᠠᠪᠠᠭᠠ ᠦᠭᠡᠢ ᠰᠡᠳᠬᠢᠯ ᠲᠥᠷᠥᠭᠰᠡᠨ ᠢ᠋ᠶ᠋ᠡᠷ ᠵᠠᠷᠤᠴᠠ ᠳ᠋ᠠᠭᠠᠨ ᠠᠷᠪᠠᠨ ᠶᠡᠬᠡ ᠮᠠᠨᠲᠠᠤ ᠥᠭᠬᠦ ᠶ᠋ᠢ ᠲᠤᠰᠢᠶᠠᠭᠠᠳ ᠳᠠᠷᠠᠭᠠ ᠨᠢ ᠥᠪᠡᠷ ᠢ᠋ᠶ᠋ᠡᠨ ᠦᠵᠡᠬᠦ ᠪᠡᠷ ᠢᠷᠡᠭᠰᠡᠨ ᠨᠢ ᠲᠡᠷᠡ ᠪᠠᠢᠵᠠᠢ᠃ ᠡᠨᠡ ᠶᠠᠪᠤᠳᠠᠯ ᠢ᠋ ᠳ᠋ᠠᠨᠽᠡᠨ ᠦᠯᠦ ᠮᠡᠳᠡᠬᠦ ᠨᠢ ᠮᠡᠳᠡᠭᠡᠵᠢ᠃ ᠥᠪᠡᠷ ᠦ᠋ᠨ ᠬᠢᠨᠢ ᠭᠠᠵᠢ ᠪᠤᠷᠤᠭᠤ ᠪᠦᠳᠦᠭᠦᠨ ᠪᠡᠶᠡ ᠶ᠋ᠢ ᠨᠢ ᠰᠣᠨᠢᠷᠬᠠᠬᠤ ᠶ᠋ᠢ ᠴᠦ᠍ ᠪᠣᠳᠣᠭᠰᠠᠨ ᠦᠭᠡᠢ᠃ ᠵᠥᠪᠬᠡᠨ ᠪᠤᠶᠠᠨᠲᠠᠨ ᠤ᠋ ᠪᠤᠶᠠᠨ ᠥᠭᠭᠦᠭᠰᠡᠨ ᠳᠡᠭᠡᠷᠡ ᠨᠢ ᠭᠡᠵᠦ ᠲᠣᠮᠣ ᠲᠣᠮᠣ ᠡᠮᠬᠦᠯᠡᠨᠡ᠃
ᠳᠡ ᠯᠣᠣᠶᠧ ᠳ᠋ᠠᠨᠽᠡᠨ ᠦ᠌ ᠤᠭ ᠠ᠋ᠴᠠ ᠬᠠᠲᠠᠭᠤ ᠭᠦᠳᠡᠭᠦᠦ ᠶ᠋ᠢ ᠬᠤᠯᠠᠨ ᠵᠠᠵᠢᠯᠵᠤ ᠵᠠᠩᠰᠢᠭᠰᠠᠨ ᠡᠷᠡᠦ ᠶ᠋ᠢᠨ ᠬᠥᠳᠡᠯᠭᠡᠭᠡᠨ᠂ ᠲᠦᠬᠦᠰᠢᠨ ᠳ᠋ᠡᠬᠢ ᠣᠪᠣᠰ ᠲᠣᠪᠣᠰ ᠭᠡᠬᠦ ᠪᠤᠯᠴᠢᠩ ᠢ᠋ ᠣᠨᠴᠠᠯᠠᠨ ᠰᠣᠨᠢᠷᠬᠠᠭᠰᠠᠨ ᠢ᠋ᠶ᠋ᠠᠨ ᠠᠷᠢᠶᠠᠲᠠᠨ ᠤ᠋ ᠰᠢᠨᠵᠢ ᠳᠡᠭᠡᠷᠡ ᠠᠪᠠᠴᠢᠪᠠ᠃ ᠭᠡᠪᠡᠴᠦ ᠵᠢᠭᠰᠢᠯ ᠢ᠋ᠶ᠋ᠡᠷ ᠪᠢᠰᠢ ᠲᠦᠷᠦᠭᠦᠨ ᠬᠦᠨᠳᠦ ᠲᠡᠭᠡᠷᠮᠡ ᠳ᠋ᠦ᠍ ᠬᠡᠨᠡᠭ ᠦᠭᠡᠢ ᠵᠢᠳᠬᠦᠵᠦ ᠪᠠᠢᠭᠰᠠᠨ ᠲᠠᠢ ᠨᠢ ᠬᠣᠯᠪᠣᠨ《ᠬᠡᠷᠪᠡ ᠪᠢ ᠡᠢᠮᠦ ᠵᠠᠷᠤᠴᠠ ᠲᠠᠢ ᠪᠣᠯ ᠶᠠᠭᠤᠲᠠᠢ ᠰᠠᠢᠬᠠᠨ ᠪᠣᠢ᠂ ᠢᠳᠡᠬᠦ ᠶ᠋ᠢᠨ ᠬᠢᠨᠢ ᠦᠨᠡ ᠡᠯᠵᠢᠭᠡᠨ ᠦ᠌ ᠡᠴᠡ ᠳᠠᠪᠠᠵᠤ ᠮᠠᠭᠠᠳ ᠪᠣᠯᠪᠠᠴᠤ ᠠᠰᠢᠭ ᠪᠣᠯᠬᠤ ᠲᠠᠯᠠ ᠪᠠᠷ ᠬᠠᠮᠢᠶᠠ ᠦᠭᠡᠢ ᠳᠠᠪᠠᠭᠤ ᠲᠠᠢ ᠪᠠᠢᠬᠤ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ