ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ – ᠠᠯᠲᠠᠨ ᠭᠠᠯᠠᠭᠤ ᠬᠦᠦ(2) Шилэн галзуу баатар – Алтан галуу хүү(2)
197ᠠᠯᠲᠠᠨ ᠭᠠᠯᠠᠭᠤ ᠬᠦᠦ -2
ᠡᠷᠡ ᠴᠢᠳᠠᠯ ᠢ᠋ᠶ᠋ᠠᠷ ᠬᠠᠪᠴᠢᠵᠤ
ᠡᠮᠡᠭᠡᠯ ᠬᠠᠵᠠᠭᠠᠷᠲᠤ ᠮᠣᠷᠢ ᠨᠢ
ᠡᠷᠴᠢᠲᠦ ᠬᠦᠴᠦᠨ ᠢ᠋ᠶ᠋ᠡᠷ ᠬᠠᠷᠠᠢᠵᠤ
ᠬᠥᠷᠥᠰᠥᠲᠦ ᠠᠯᠲᠠᠨ ᠳᠡᠯᠡᠬᠡᠢ ᠳ᠋ᠦ᠍
ᠬᠥᠯ ᠢ᠋ᠶ᠋ᠡᠨ ᠬᠠᠶᠠ ᠲᠥᠷᠥᠨ
ᠬᠥᠪᠥᠩ ᠴᠠᠭᠠᠨ ᠡᠭᠦᠯᠡᠨ ᠳ᠋ᠦ᠍
ᠳᠡᠯ ᠢ᠋ᠶ᠋ᠡᠨ ᠬᠠᠶᠠ ᠱᠦᠷᠭᠦᠭᠡᠨ ᠶᠠᠪᠤᠵᠤ
ᠳᠣᠪᠣ ᠲᠣᠯᠣᠭᠠᠢ ᠶ᠋ᠢᠨ ᠠᠷᠤ ᠪᠠᠷ
ᠳᠣᠬᠢᠭᠤᠷ ᠲᠣᠯᠣᠭᠠᠢ ᠶ᠋ᠢᠨ ᠡᠩᠭᠡᠷ ᠢ᠋ᠶ᠋ᠡᠷ
ᠰᠠᠩ ᠲᠣᠬᠣᠢ ᠶ᠋ᠢ ᠭᠡᠲᠦᠯᠦᠨ
ᠴᠠᠬᠢᠭᠤᠷ ᠲᠣᠯᠣᠭᠠᠢ ᠶ᠋ᠢ ᠳᠠᠪᠠᠬᠤ ᠳ᠋ᠤ᠌
ᠥᠪᠡᠷ ᠦ᠋ᠨ ᠨᠤᠲᠤᠭ ᠪᠢᠰᠢ
ᠥᠰᠢᠶᠡᠲᠡᠨ ᠦ᠌ ᠨᠤᠲᠤᠭ ᠲᠤ᠌ ᠣᠷᠣᠵᠠᠢ᠃
ᠡᠷᠳᠡᠮ ᠤᠪᠠᠳᠢᠰ ᠢ᠋ᠶ᠋ᠠᠨ ᠭᠠᠷᠭᠠᠵᠤ
ᠡᠷᠳᠡᠨᠢᠲᠦ ᠪᠡᠶᠡ ᠪᠡᠨ ᠬᠤᠪᠢᠷᠠᠭᠠᠵᠤ
ᠱᠠᠭᠠᠨᠲᠤ ᠶ᠋ᠢᠨ ᠢ᠋ᠶ᠋ᠡᠨ ᠳᠣᠣᠷᠠ ᠠ᠋ᠴᠠ
ᠰᠢᠷᠠ ᠢᠰᠡᠭᠡᠢ ᠤᠨᠵᠢᠭᠤᠯᠤᠭᠰᠠᠨ
ᠪᠣᠷᠪᠢ ᠶ᠋ᠢᠨ ᠢ᠋ᠶ᠋ᠡᠨ ᠠᠷᠤ ᠠ᠋ᠴᠠ
ᠪᠣᠷᠣ ᠢᠰᠡᠭᠡᠢ ᠤᠨᠵᠢᠭᠤᠯᠤᠭᠰᠠᠨ
ᠶᠠᠷᠠ ᠰᠢᠷᠬᠠᠨ ᠳ᠋ᠤ᠌ ᠪᠣᠭᠣᠭᠳᠠᠭᠰᠠᠨ
ᠨᠢᠰᠤᠬᠠᠢ ᠪᠣᠷᠣ ᠬᠦᠦ ᠪᠣᠯᠵᠤ
ᠳᠡᠷᠡᠰᠦᠨ ᠰᠤᠮᠤ ᠰᠣᠢᠯᠠᠵᠤ
ᠬᠤᠯᠤᠰᠤᠨ ᠨᠤᠮᠤ ᠠᠭᠰᠠᠵᠤ
ᠰᠢᠯᠪᠢᠨ ᠳ᠋ᠡᠭᠡᠨ ᠴᠢᠴᠠᠭᠠ ᠲᠠᠢ
ᠰᠢᠯᠢᠨ ᠳ᠋ᠡᠭᠡᠨ ᠳᠠᠬᠢ ᠲᠠᠢ
ᠡᠷᠡ ᠰᠢᠷᠭᠠ ᠳᠠᠭᠠ ᠤᠨᠤᠭᠰᠠᠨ
ᠡᠷᠢᠯᠴᠢᠨ ᠬᠦᠦ ᠶ᠋ᠢᠨ ᠮᠠᠶᠢᠭ ᠢ᠋ᠶ᠋ᠠᠷ
ᠮᠠᠩᠭᠤᠰ ᠤ᠋ᠨ ᠨᠤᠲᠤᠭ ᠤᠷᠤᠭᠤ
ᠮᠠᠢᠳᠠᠷᠠᠭᠤᠯᠤᠨ ᠬᠠᠲᠠᠷᠢᠭᠤᠯᠤᠭᠠᠳ ᠣᠷᠣᠵᠠᠢ᠃
* * *
ᠲᠠᠯᠠ ᠳᠦᠭᠦᠷᠡᠩ ᠦᠷᠡᠵᠢᠬᠦ
ᠦᠬᠡᠷ ᠦ᠋ᠨ ᠰᠦᠷᠦᠭ ᠬᠠᠷᠠᠭᠳᠠᠵᠠᠢ
ᠲᠠᠯᠠ ᠳ᠋ᠤᠨᠢ ᠬᠦᠷᠦᠭᠡᠳ ᠣᠴᠢᠪᠠᠯ
ᠥᠪᠡᠷ ᠦ᠋ᠨ ᠦᠬᠡᠷ ᠨᠢ ᠪᠠᠢᠵᠠᠢ᠃
ᠦᠬᠡᠷᠴᠢᠨ ᠲᠡᠢ ᠠᠭᠤᠯᠵᠠᠭᠠᠳ ᠠᠰᠠᠭᠤᠭᠰᠠᠨ ᠨᠢ᠄
《ᠲᠠ᠂ ᠬᠡᠨ ᠦ᠌ ᠦᠬᠡᠷᠴᠢᠨ ᠪᠣᠢ?》ᠭᠡᠵᠡᠢ᠃
ᠦᠬᠡᠷᠴᠢᠨ ᠦ᠌ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠪᠠᠨ
ᠠᠯᠲᠠᠨ ᠭᠠᠯᠠᠭᠤ ᠶ᠋ᠢᠨ ᠦᠬᠡᠷᠴᠢᠨ
ᠡᠷᠭᠢᠭᠡᠳ ᠣᠳᠣ ᠪᠣᠯᠬᠤ ᠳ᠋ᠤ᠌
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠤ᠋ᠨ ᠦᠬᠡᠷᠴᠢᠨ᠃》ᠭᠡᠵᠡᠢ᠃
《ᠠᠯᠲᠠᠨ ᠭᠠᠯᠠᠭᠤ ᠬᠦᠦ
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠬᠣᠶᠠᠷ ᠤ᠋ᠨ
ᠠᠯᠪᠠᠲᠤ ᠢᠷᠭᠡᠳ ᠢ᠋ᠶ᠋ᠡᠨ ᠢᠳᠡᠭᠦᠯᠵᠦ ᠤᠤᠭᠤᠯᠭᠠᠬᠤ ᠪᠠᠷ
ᠠᠯᠢ ᠨᠢ ᠰᠠᠢᠨ ᠪᠣᠢ?》
《ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠪᠣᠯ
ᠬᠥᠮᠦᠨ ᠦ᠌ ᠭᠡᠵᠦ ᠬᠥᠭᠡᠭᠡᠵᠦ ᠴᠣᠬᠢᠨᠠ
ᠠᠯᠲᠠᠨ ᠭᠠᠯᠠᠭᠤ ᠪᠣᠯ
ᠥᠪᠡᠷ ᠦ᠋ᠨ ᠭᠡᠵᠦ ᠡᠮᠦᠰᠦᠭᠦᠯᠵᠦ ᠢᠳᠡᠭᠦᠯᠦᠨᠡ》ᠭᠡᠵᠡᠢ᠃
ᠦᠬᠡᠷ ᠦ᠋ᠨ ᠰᠦᠷᠦᠭ ᠲᠦ᠍ ᠪᠡᠨ ᠣᠷᠣᠵᠤ
ᠪᠢᠷᠠᠭᠤ ᠪᠠᠷᠢᠵᠤ ᠠᠯᠠᠵᠤ ᠢᠳᠡᠭᠦᠯᠵᠡᠢ᠃
ᠬᠥᠨᠳᠡᠢ ᠳᠦᠭᠦᠷᠡᠩ ᠢᠳᠡᠰᠢᠯᠡᠬᠦ
ᠬᠣᠨᠢᠨ ᠰᠦᠷᠦᠭ ᠬᠠᠷᠠᠭᠳᠠᠵᠠᠢ᠃
ᠬᠦᠷᠦᠭᠡᠳ ᠳᠡᠷᠭᠡᠳᠡ ᠨᠢ ᠣᠴᠢᠬᠤ ᠳ᠋ᠤ᠌
ᠥᠪᠡᠷᠦᠨ ᠬᠣᠨᠢ ᠨᠢ ᠪᠠᠢᠵᠠᠢ᠂
ᠬᠣᠨᠢᠴᠢᠨ ᠲᠠᠢ ᠠᠭᠤᠯᠵᠠᠭᠠᠳ ᠠᠰᠠᠭᠤᠭᠰᠠᠨ ᠨᠢ᠄
《ᠲᠠ᠂ ᠬᠡᠨ ᠦ᠌ ᠬᠣᠨᠢᠴᠢᠨ ᠪᠣᠢ?》 ᠭᠡᠵᠡᠢ᠃
《ᠡᠷᠲᠡ ᠤᠷᠢᠳᠤ ᠴᠠᠭ ᠲᠠᠭᠠᠨ
ᠠᠯᠲᠠᠨ ᠭᠠᠯᠠᠭᠤ ᠶ᠋ᠢᠨ ᠬᠣᠨᠢᠴᠢᠨ
ᠡᠷᠭᠢᠭᠡᠳ ᠣᠳᠣ ᠪᠣᠯᠬᠤ ᠳ᠋ᠤ᠌
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠤ᠋ᠨ ᠬᠣᠨᠢᠴᠢᠨ᠃》
《ᠠᠯᠲᠠᠨ ᠭᠠᠯᠠᠭᠤ ᠬᠦᠦ
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠬᠣᠶᠠᠷ ᠤ᠋ᠨ
ᠠᠯᠪᠠᠲᠤ ᠢᠷᠭᠡᠳ ᠢ᠋ᠶ᠋ᠡᠨ ᠢᠳᠡᠭᠦᠯᠵᠦ ᠤᠤᠭᠤᠯᠭᠠᠬᠤ ᠪᠠᠷ
ᠠᠯᠢ ᠨᠢ ᠰᠠᠢᠨ ᠪᠣᠢ?》
《ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠪᠣᠯ
ᠬᠥᠮᠦᠨ ᠦ᠌ ᠭᠡᠵᠦ ᠬᠥᠭᠡᠭᠡᠵᠦ ᠴᠣᠬᠢᠨᠠ
ᠠᠯᠲᠠᠨ ᠭᠠᠯᠠᠭᠤ ᠪᠣᠯ ᠥᠪᠡᠷᠦᠨ ᠭᠡᠵᠦ
ᠡᠮᠦᠰᠦᠭᠦᠯᠵᠦ ᠢᠳᠡᠭᠦᠯᠦᠨᠡ》 ᠭᠡᠵᠡᠢ᠃
ᠬᠣᠨᠢᠨ ᠰᠦᠷᠦᠭ ᠲᠡᠭᠡᠨ ᠣᠷᠣᠵᠤ ᠲᠠᠷᠭᠤᠨ
ᠬᠣᠨᠢ ᠪᠠᠷᠢᠵᠤ ᠠᠯᠠᠵᠤ ᠢᠳᠡᠭᠦᠯᠵᠡᠢ᠃
* * *
ᠡᠮᠦᠨᠡᠰᠢ ᠳᠠᠪᠬᠢᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ
ᠡᠪᠦᠭᠡᠨ ᠠᠷᠭᠠᠯ ᠲᠡᠭᠦᠬᠦ ᠬᠠᠷᠠᠭᠳᠠᠵᠠᠢ
ᠥᠭᠡᠳᠡ ᠡᠴᠡ ᠨᠢ ᠬᠦᠷᠦᠭᠡᠳ ᠣᠴᠢᠬᠤ ᠳ᠋ᠤ᠌
ᠥᠪᠡᠷᠦᠨ ᠠᠪᠤ ᠨᠢ ᠮᠥᠨ ᠪᠠᠢᠵᠠᠢ᠃
ᠠᠷᠤ ᠳᠡᠭᠡᠷᠡ ᠪᠡᠨ ᠠᠷᠤᠭ ᠬᠦᠯᠢᠭᠦᠯᠦᠭᠡᠳ
ᠭᠠᠷ ᠲᠠᠭᠠᠨ ᠰᠠᠪᠠᠷ ᠤᠶᠠᠭᠤᠯᠤᠭᠠᠳ
ᠠᠷᠭᠠᠯ ᠢ᠋ᠶ᠋ᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ
ᠠᠷᠠᠢ ᠴᠢᠷᠠᠢ ᠠᠯᠬᠤᠵᠤ ᠪᠠᠢᠵᠠᠢ᠃
ᠠᠪᠤ ᠪᠠᠨ ᠬᠠᠷᠠᠭᠠᠳ ᠠᠯᠲᠠᠨ ᠭᠠᠯᠠᠭᠤ
ᠠᠷᠭᠠ ᠤᠬᠠᠭᠠᠨ ᠪᠠᠯᠠᠷᠳᠠᠭᠰᠠᠨ ᠪᠣᠯᠪᠠᠴᠤ
ᠠᠲᠠᠭᠠᠲᠠᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠬᠤ ᠶ᠋ᠢ ᠰᠠᠨᠠᠭᠠᠳ
ᠠᠶᠠᠨ ᠵᠠᠮ ᠤ᠋ᠨ ᠬᠥᠮᠦᠨ ᠰᠢᠭ ᠥᠩᠭᠡᠷᠡᠵᠡᠢ᠃
ᠤᠷᠤᠭᠰᠢ ᠳᠠᠪᠬᠢᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ
ᠤᠰᠤ ᠠᠪᠬᠤ ᠡᠮᠡᠭᠡᠨ ᠬᠠᠷᠠᠭᠳᠠᠵᠠᠢ
ᠣᠢᠷᠠᠳᠴᠤ ᠬᠦᠷᠦᠭᠡᠳ ᠣᠴᠢᠬᠤ ᠳ᠋ᠤ᠌
ᠥᠪᠡᠷᠦᠨ ᠡᠵᠢ ᠨᠢ ᠪᠠᠢᠵᠠᠢ᠃
ᠥᠷᠥᠭᠡᠰᠦᠨ ᠭᠠᠷ ᠲᠠᠭᠠᠨ ᠬᠥᠨᠥᠭ ᠬᠦᠯᠢᠭᠦᠯᠦᠭᠡᠳ
ᠥᠷᠥᠭᠡᠰᠦᠨ ᠭᠠᠷ ᠲᠠᠭᠠᠨ ᠰᠢᠨᠠᠭᠠ ᠤᠶᠠᠭᠤᠯᠤᠭᠠᠳ
ᠤᠰᠤ ᠪᠠᠨ ᠳᠠᠭᠠᠭᠠᠵᠤ ᠶᠠᠳᠠᠨ
ᠤᠬᠢᠯᠠᠨ ᠰᠠᠭᠤᠵᠤ ᠪᠠᠢᠵᠠᠢ᠃
ᠡᠵᠢ ᠪᠡᠨ ᠦᠵᠡᠭᠡᠳ ᠬᠦᠦ
ᠡᠨᠡᠷᠢᠵᠦ ᠵᠣᠪᠠᠭᠰᠠᠨ ᠪᠣᠯᠪᠠᠴᠤ
ᠨᠳᠡᠯ ᠣᠰᠣᠯ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠵᠤ
ᠡᠩ ᠦ᠋ᠨ ᠬᠥᠮᠦᠨ ᠰᠢᠭ ᠥᠩᠭᠡᠷᠡᠵᠡᠢ᠃
ᠠᠯᠲᠠᠨ ᠭᠠᠯᠠᠭᠤ ᠳᠠᠪᠬᠢᠨ ᠶᠠᠪᠤᠭᠰᠠᠭᠠᠷ
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠤ᠋ᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍
ᠮᠠᠩᠭᠤᠰ ᠭᠠᠳᠠᠨᠠ ᠪᠠᠨ ᠠᠷᠢᠬᠢᠳᠠᠵᠤ
ᠮᠠᠭᠠᠰᠠᠢᠵᠤ ᠠᠪᠠᠭᠠᠢ ᠲᠠᠢ ᠪᠠᠨ ᠣᠷᠣᠯᠳᠣᠨᠠ᠃
ᠴᠢᠴᠠᠭᠠ ᠲᠠᠢ ᠳᠠᠭᠠ ᠪᠠᠨ ᠤᠶᠠᠭᠠᠳ
ᠴᠠᠰᠢ ᠮᠠᠩᠭᠤᠰ ᠤ᠋ᠨ ᠡᠮᠦᠨᠡ ᠣᠴᠢᠭᠠᠳ
《ᠬᠠᠨ ᠠᠪᠤ ᠠᠮᠤᠷᠬᠠᠨ ᠤᠤ?
ᠬᠠᠲᠤᠨ ᠡᠵᠢ ᠮᠡᠨᠳᠦ ᠤᠤ?》 ᠭᠡᠵᠡᠢ᠃
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ
ᠠᠷᠠᠭᠠ ᠰᠢᠲᠦ ᠪᠡᠨ ᠬᠠᠪᠢᠷᠤᠨ ᠠᠰᠠᠭᠤᠭᠰᠠᠨ ᠨᠢ᠄
《ᠬᠡᠪ ᠨᠤᠲᠤᠭ ᠬᠠᠮᠢᠭᠠ ᠪᠣᠢ?
ᠬᠡᠳᠦ ᠵᠣᠷᠢᠭ ᠶᠠᠭᠤᠨ ᠳ᠋ᠤ᠌ ᠪᠣᠢ?
ᠶᠠᠪ ᠨᠤᠲᠤᠭ ᠬᠠᠮᠢᠭᠠ ᠪᠣᠢ?
ᠶᠠᠪᠤᠳᠠᠯ ᠤᠴᠢᠷ ᠶᠠᠭᠤᠨ ᠳ᠋ᠤ᠌ ᠪᠣᠢ?》 ᠭᠡᠵᠡᠢ᠃
ᠠᠯᠲᠠᠨ ᠭᠠᠯᠠᠭᠤ ᠬᠡᠯᠡᠭᠰᠡᠨ ᠨᠢ
《ᠬᠡᠪ ᠨᠤᠲᠤᠭ ᠶᠠᠭᠤ ᠪᠠᠢᠬᠤᠪ
ᠬᠡᠳᠦ ᠵᠣᠷᠢᠭ ᠡᠷᠢᠯᠴᠢᠨ
ᠶᠠᠪ ᠨᠤᠲᠤᠭ ᠶᠠᠭᠤ ᠪᠠᠢᠬᠤᠪ
ᠶᠠᠪᠤᠳᠠᠯ ᠤᠴᠢᠷ ᠡᠷᠢᠯᠴᠢᠨ᠃
ᠭᠤᠨᠵᠢᠨ ᠲᠡᠮᠡᠭᠡ ᠠᠯᠳᠠᠭᠠᠳ
ᠭᠤᠷᠪᠠᠨ ᠵᠢᠯ ᠡᠷᠢᠯᠡ
ᠳᠦᠨᠵᠢᠨ ᠲᠡᠮᠡᠭᠡ ᠠᠯᠳᠠᠭᠠᠳ
ᠳᠥᠷᠪᠡᠨ ᠵᠢᠯ ᠡᠷᠢᠯᠡ
ᠳᠣᠯᠣᠭᠠᠨ ᠵᠢᠯ ᠦ᠋ᠨ ᠡᠷᠢᠯᠴᠢᠨ
ᠳᠣᠷᠣᠮᠵᠢᠬᠠᠨ ᠪᠣᠷᠣ ᠬᠦᠦ ᠪᠠᠢᠨᠠ》 ᠭᠡᠵᠡᠢ᠃
《ᠡᠨᠡᠭᠦᠷ ᠲᠡᠷᠡᠭᠦᠷ ᠶᠠᠪᠤᠭᠰᠠᠨ
ᠡᠷᠢᠯᠴᠢᠨ ᠬᠦᠦ ᠴᠢ
ᠡᠨᠡ ᠲᠡᠷᠡ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠵᠤ
ᠡᠯᠳᠡᠪ ᠴᠢᠮᠡᠭᠡ ᠰᠣᠨᠣᠰᠤᠭᠰᠠᠨ ᠤᠤ?
ᠠᠯᠲᠠᠨ ᠭᠠᠯᠠᠭᠤ ᠬᠦᠦ
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ ᠤ᠋ᠨ
ᠠᠯᠢ ᠨᠢ ᠳᠡᠢᠯᠦᠭᠰᠡᠨ ᠢ᠋ ᠮᠡᠳᠡᠪᠡ ᠤᠤ?
ᠠᠢᠯᠠᠳᠬᠠᠵᠤ ᠨᠠᠳᠠ ᠮᠡᠳᠡᠭᠦᠯ!》
《ᠠᠯᠲᠠᠨ ᠭᠠᠯᠠᠭᠤ ᠬᠦᠦ ᠶ᠋ᠢ
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ
ᠦᠬᠡᠷ ᠣᠷᠬᠢᠷᠠᠬᠤ ᠰᠡᠪᠡᠰᠦ ᠦᠭᠡᠢ
ᠦᠨᠡᠭᠡ ᠰᠢᠩᠰᠢᠬᠦ ᠶᠠᠰᠤ ᠦᠭᠡᠢ ᠪᠣᠯᠭᠠᠵᠠᠢ ᠭᠡᠨᠡ᠃》
《ᠰᠠᠢᠨ ᠠᠮᠠ ᠲᠠᠢ ᠬᠦᠦ ᠪᠠᠢᠨᠠ
ᠰᠠᠭᠠᠲᠠᠵᠤ ᠣᠷᠳᠣᠨ ᠳ᠋ᠤ᠌ ᠮᠢᠨᠢ ᠣᠷᠣ
ᠬᠣᠭᠣᠯᠠ ᠴᠠᠢ ᠢᠳᠡᠵᠦ ᠤᠤᠭᠤᠵᠤ
ᠬᠣᠨᠣᠵᠤ ᠥᠨᠵᠢᠭᠡᠳ ᠶᠠᠪᠤ》᠃
* * *
ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠪᠣᠯᠵᠤ ᠬᠦᠦ ᠳ᠋ᠦ᠍
ᠤᠭᠤᠴᠠ ᠡᠪᠴᠢᠭᠦᠦ ᠲᠠᠪᠠᠭᠯᠠᠵᠠᠢ᠃
ᠠᠪᠤ ᠡᠵᠢ ᠨᠢ ᠣᠷᠣᠵᠤ ᠢᠷᠡᠭᠡᠳ
ᠠᠮᠤ ᠪᠤᠳᠠᠭᠠ ᠭᠤᠶᠤᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ
ᠡᠪᠴᠢᠭᠦᠦ ᠤᠭᠤᠴᠠ ᠬᠣᠶᠠᠷ ᠢ᠋ᠶ᠋ᠠᠨ
ᠢᠰᠬᠦᠯᠵᠦ ᠳᠣᠣᠷᠠ ᠤᠨᠠᠭᠠᠭᠠᠳ
ᠠᠩᠬᠠᠷᠤᠯ ᠦᠭᠡᠢ ᠤᠨᠠᠭᠠᠭᠰᠠᠨ ᠶᠠᠩᠵᠤ ᠪᠠᠷ
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠲᠤ᠌᠄
《ᠬᠠᠨ ᠠᠪᠤ ᠶ᠋ᠢᠨ ᠬᠡᠰᠢᠭ ᠢ᠋
ᠬᠠᠷᠠᠮᠰᠠᠯᠲᠠᠢ ᠮᠠᠭᠤᠬᠠᠢ ᠠᠯᠳᠠᠴᠢᠪᠠ
ᠬᠣᠭ ᠰᠢᠷᠣᠢ ᠪᠣᠯᠤᠭᠰᠠᠨ ᠡᠭᠦᠨ ᠢ᠋
ᠬᠣᠯᠠ ᠠᠪᠠᠴᠢᠵᠤ ᠬᠠᠶᠠᠬᠤ ᠤᠤ?》ᠭᠡᠵᠦ ᠠᠰᠠᠭᠤᠵᠠᠢ᠃
ᠠᠭᠤᠷᠯᠠᠵᠤ ᠮᠠᠩᠭᠤᠰ ᠳᠤᠭᠤᠢ ᠪᠠᠢᠲᠠᠯᠠ
ᠤᠰᠤᠨ ᠪᠣᠯᠣᠷ ᠬᠠᠲᠤᠨ ᠬᠠᠵᠠᠭᠤ ᠠ᠋ᠴᠠ ᠬᠡᠯᠡᠭᠰᠡᠨ ᠨᠢ᠄
《ᠬᠠᠶᠠᠵᠤ ᠣᠷᠬᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌
ᠬᠠᠷᠠᠴᠤ ᠪᠣᠭᠣᠯ ᠡᠪᠦᠭᠡᠨ ᠡᠮᠡᠭᠡᠨ ᠳ᠋ᠦ᠍ ᠥᠭ!》ᠭᠡᠵᠡᠢ᠃
ᠡᠪᠴᠢᠭᠦᠦ᠂ ᠤᠭᠤᠴᠠ ᠶ᠋ᠢ ᠨᠢ ᠠᠪᠤᠭᠠᠳ
ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠭᠠᠷᠴᠠᠢ᠃
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠠᠶᠠᠭᠠᠴᠢᠨ ᠰᠢᠨᠠᠭᠠᠴᠢᠨ ᠥᠬᠢᠳ
ᠬᠠᠭᠠᠯᠭᠠ ᠶ᠋ᠢᠨ ᠠᠷᠤ ᠳ᠋ᠤ᠌ ᠱᠤᠤᠭᠢᠯᠳᠤᠨ
ᠬᠠᠷᠢᠯᠴᠠᠨ ᠳᠣᠣᠷᠠ ᠪᠠᠨ ᠰᠢᠪᠡᠨᠡᠯᠳᠦᠭᠰᠡᠨ ᠨᠢ᠄
《ᠡᠨᠡ ᠶᠠᠭᠠᠬᠢᠭᠰᠠᠨ ᠵᠢᠭᠲᠡᠢ ᠬᠥᠮᠦᠨ ᠪᠣᠢ
ᠡᠲᠡᠭᠡᠳ ᠰᠣᠨᠢᠨ ᠠᠮᠢᠲᠠᠨ ᠪᠠᠢᠨᠠ
ᠮᠠᠯᠠᠭᠠᠢ ᠪᠠᠨ ᠠᠪᠬᠤ ᠳ᠋ᠤᠨᠢ
ᠲᠣᠯᠣᠭᠠᠢ ᠠ᠋ᠴᠠ ᠨᠢ ᠭᠡᠷᠡᠯ ᠰᠠᠴᠤᠷᠠᠨᠠ
ᠡᠮᠡᠭᠡᠯ ᠢ᠋ᠶ᠋ᠡᠨ ᠠᠪᠬᠤ ᠳ᠋ᠤᠨᠢ
ᠮᠣᠷᠢᠨ ᠨᠢᠷᠤᠭᠤᠨ ᠠ᠋ᠴᠠ ᠨᠢ ᠭᠠᠯ ᠪᠠᠳᠠᠷᠠᠨᠠ
ᠬᠣᠶᠠᠷ ᠠᠯᠠᠭᠠ ᠨᠢ ᠬᠠᠪᠰᠤᠷᠴᠤ
＜ᠠᠯᠲᠠᠨ ᠭᠠᠯᠠᠭᠤ＞ ᠭᠡᠳᠡᠭ ᠳᠠᠭᠤ ᠭᠠᠷᠴᠤ ᠪᠠᠢᠨᠠ》 ᠭᠡᠵᠡᠢ᠃
《ᠠᠯᠲᠠᠨ ᠭᠠᠯᠠᠭᠤ ᠮᠢᠨᠢ ᠢᠷᠡᠭᠰᠡᠨ ᠪᠣᠯ
ᠠᠷᠴᠢ ᠶ᠋ᠢᠨ ᠬᠠᠷᠠ ᠳ᠋ᠤ᠌ ᠮᠡᠳᠡᠭᠳᠡᠵᠦ ᠪᠣᠯᠬᠤ ᠦᠭᠡᠢ》ᠭᠡᠵᠦ
ᠤᠰᠤᠨ ᠪᠣᠯᠣᠷ ᠬᠠᠲᠤᠨ ᠪᠣᠳᠣᠭᠠᠳ
ᠠᠭᠤᠷᠯᠠᠵᠤ ᠥᠬᠢᠳ ᠢ᠋ ᠬᠥᠭᠡᠭᠡᠨ ᠭᠠᠷᠭᠠᠵᠠᠢ᠃
* * *
ᠣᠷᠣᠢ ᠪᠣᠯᠬᠤ ᠳ᠋ᠤ᠌ ᠮᠠᠩᠭᠤᠰ ᠬᠡᠯᠡᠭᠰᠡᠨ ᠨᠢ᠄
《ᠤᠰᠤᠨ ᠪᠣᠯᠣᠷ ᠬᠠᠲᠤᠨ ᠮᠢᠨᠢ
ᠤᠨᠲᠠᠬᠤ ᠶ᠋ᠢᠨ ᠡᠷᠡᠨ ᠪᠣᠯᠤᠯᠠ
ᠠᠮᠠ ᠰᠠᠢᠲᠠᠢ ᠬᠦᠦ ᠳ᠋ᠦ᠍
ᠠᠶᠠᠲᠠᠢᠬᠠᠨ ᠣᠷᠣ ᠵᠠᠰᠠ!》ᠭᠡᠪᠡ᠃
ᠠᠯᠲᠠᠨ ᠭᠠᠯᠠᠭᠤ ᠬᠠᠵᠠᠭᠤ ᠠ᠋ᠴᠠ ᠨᠢ ᠬᠡᠯᠡᠭᠰᠡᠨ ᠨᠢ᠄
《ᠪᠥᠭᠡᠰᠦ᠂ ᠶᠠᠷᠠ ᠲᠠᠢ ᠨᠠᠮᠠᠶ᠋ᠢ
ᠪᠣᠭᠣᠯ ᠤ᠋ᠨ ᠢ᠋ᠶ᠋ᠠᠨ ᠭᠡᠷ ᠲᠦ᠍ ᠤᠨᠲᠠᠭᠤᠯᠤᠨᠠ ᠤᠤ?》 ᠭᠡᠬᠦ ᠳ᠋ᠦ᠍
ᠪᠣᠭᠣᠯ ᠤ᠋ᠨ ᠭᠡᠷ ᠲᠦ᠍ ᠤᠨᠲᠠᠭᠤᠯᠬᠤ ᠪᠠᠷ ᠪᠣᠯᠵᠤ
ᠪᠣᠯᠣᠷ ᠬᠠᠲᠤᠨ ᠭᠡᠷ ᠵᠢᠭᠠᠬᠤ ᠪᠠᠷ ᠭᠠᠷᠴᠤ
ᠰᠠᠯᠤᠭᠰᠠᠨ ᠬᠣᠶᠠᠷ ᠠᠭᠤᠯᠵᠠᠵᠤ
ᠰᠠᠨᠠᠭᠰᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠯᠴᠠᠵᠠᠢ᠃
ᠠᠯᠲᠠᠨ ᠭᠠᠯᠠᠭᠤ ᠡᠷᠡ ᠳ᠋ᠡᠭᠡᠨ
ᠠᠮᠠᠷᠠᠭ ᠬᠠᠲᠤᠨ ᠨᠢ ᠬᠡᠯᠡᠭᠰᠡᠨ ᠨᠢ᠄
《ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠲᠤ᠌
ᠠᠮᠠᠷᠬᠠᠨ ᠬᠠᠯᠳᠠᠵᠤ ᠪᠣᠯᠬᠤ ᠦᠭᠡᠢ
ᠠᠷᠢᠯᠭᠠᠵᠤ ᠲᠡᠭᠦᠨ ᠢ᠋ ᠰᠥᠨᠥᠭᠡᠬᠦ ᠳ᠋ᠦ᠍
ᠰᠦᠨᠡᠰᠦ ᠶ᠋ᠢ ᠨᠢ ᠤᠷᠢᠳᠠᠪᠡᠷ ᠳᠠᠷᠤᠭᠠᠷᠠᠢ᠃
ᠪᠠᠷᠠᠭᠤᠨ ᠠᠭᠤᠯᠠᠨ ᠳ᠋ᠤ᠌
ᠪᠠᠷᠰ ᠴᠣᠬᠣᠷ ᠵᠥᠭᠡᠢ ᠪᠠᠢᠨᠠ
ᠠᠷᠤ ᠶ᠋ᠢᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌
ᠠᠷᠤᠭ ᠤ᠋ᠨ ᠴᠢᠨᠡᠭᠡ ᠠᠭᠠᠯᠵᠢ ᠪᠠᠢᠨᠠ
ᠵᠡᠭᠦᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌
ᠵᠢᠷᠦᠬᠡ ᠴᠠᠭᠠᠨ ᠨᠣᠬᠠᠢ ᠪᠠᠢᠨᠠ
ᠤᠷᠲᠤ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌
ᠣᠭᠣᠳᠣᠩ ᠮᠤᠬᠤᠷ ᠪᠤᠬᠠ ᠪᠠᠢᠨᠠ᠃
ᠬᠠᠮᠤᠭ ᠤ᠋ᠨ ᠭᠣᠣᠯ ᠰᠦᠨᠡᠰᠦ ᠨᠢ
ᠬᠠᠩᠭᠢᠨᠠᠳᠠᠭ ᠬᠠᠷᠠ ᠲᠣᠭᠣᠭᠠ ᠶᠤᠮ
ᠬᠠᠩᠭᠢᠨᠠᠳᠠᠭ ᠬᠠᠷᠠ ᠲᠣᠭᠣᠭᠠ ᠨᠢ
ᠮᠥᠰᠥᠨ ᠰᠦᠮᠪᠦᠷ ᠠᠭᠤᠯᠠᠨ ᠳᠡᠭᠡᠷᠡ ᠪᠠᠢᠨᠠ᠃
ᠠᠯᠲᠠᠨ ᠭᠠᠯᠠᠭᠤ ᠴᠢ ᠮᠢᠨᠢ
ᠠᠷᠭᠠ ᠬᠦᠴᠦᠨ ᠢ᠋ᠶ᠋ᠡᠨ ᠬᠢᠴᠢᠶᠡᠵᠦ
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠢ᠋
ᠳᠠᠷᠤᠭᠠᠳ ᠠᠮᠤᠷ ᠰᠠᠢᠬᠠᠨ ᠪᠤᠴᠠᠵᠠᠭᠠᠶᠠ!》ᠭᠡᠵᠡᠢ᠃
* * *
ᠠᠯᠲᠠᠨ ᠭᠠᠯᠠᠭᠤ ᠶᠠᠪᠤᠭᠠᠳ
ᠪᠣᠭᠣᠯ ᠤ᠋ᠨ ᠭᠡᠷ ᠲᠦ᠋ᠨᠢ ᠣᠷᠣᠬᠤ ᠳ᠋ᠤ᠌
ᠠᠪᠤ ᠡᠵᠢ ᠬᠣᠶᠠᠷ ᠨᠢ
ᠪᠣᠭᠳᠣᠢᠵᠤ ᠠᠲᠤᠷᠢᠨ ᠰᠠᠭᠤᠭᠠᠳ᠄
《ᠮᠠᠩᠭᠤᠰ ᠲᠤ᠌ ᠪᠠᠷᠢᠭᠳᠠᠭᠰᠠᠨ ᠠ᠋ᠴᠠ ᠨᠡᠰᠢ
ᠮᠢᠬᠠ ᠰᠠᠶᠢ ᠣᠯᠵᠤ ᠢᠳᠡᠪᠡ
ᠪᠤᠶᠠᠨᠲᠠᠢ ᠡᠨᠡ ᠬᠦᠦ ᠢᠷᠡᠵᠦ
ᠪᠣᠭᠣᠯ ᠪᠢᠳᠡᠨ ᠢ᠋ ᠴᠠᠳᠬᠠᠪᠠ!》ᠭᠡᠵᠡᠢ᠃
ᠰᠥᠨᠢ ᠣᠷᠣᠢ ᠪᠣᠯᠵᠤ
ᠬᠥᠯ ᠦ᠋ᠨ ᠴᠢᠮᠡᠭᠡ ᠬᠤᠷᠢᠶᠠᠭᠳᠠᠭᠰᠠᠨ ᠤ᠋ ᠬᠣᠢᠨᠠ
ᠠᠯᠲᠠᠨ ᠭᠠᠯᠠᠭᠤ ᠬᠦᠦ
ᠠᠪᠤ ᠡᠵᠢ ᠳ᠋ᠡᠭᠡᠨ ᠲᠠᠨᠢᠭᠳᠠᠬᠤ ᠭᠡᠵᠦ᠄
《ᠶᠠᠷᠠ ᠰᠢᠷᠬᠠᠨ ᠳ᠋ᠤ᠌ ᠪᠣᠭᠣᠭᠳᠠᠭᠰᠠᠨ
ᠶᠠᠳᠠᠷ ᠳᠣᠷᠣᠢ ᠬᠦᠦ ᠪᠢ
ᠠᠷᠤ ᠨᠢᠷᠤᠭᠤᠨ ᠤ᠋ ᠪᠠᠨ ᠶᠠᠷᠠ ᠶ᠋ᠢ
ᠠᠷᠭᠠᠯ ᠤ᠋ᠨ ᠭᠠᠯ ᠳ᠋ᠤ᠌ ᠴᠢᠨᠢ ᠡᠭᠡᠭᠡᠬᠦ ᠤᠤ?》ᠭᠡᠵᠡᠢ᠃
ᠡᠪᠦᠭᠡᠨ ᠬᠦᠦ ᠶ᠋ᠢ ᠬᠠᠢᠷᠠᠯᠠᠵᠤ
ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠯᠭᠠᠵᠠᠢ
ᠡᠮᠡᠭᠡᠨ ᠠᠷᠭᠠᠯ ᠨᠡᠮᠡᠵᠦ
ᠭᠠᠯ ᠢ᠋ᠶ᠋ᠠᠨ ᠳᠤᠸᠠᠯᠠᠲᠠᠯᠠ ᠲᠦᠯᠡᠵᠡᠢ᠂
ᠠᠯᠲᠠᠨ ᠭᠠᠯᠠᠭᠤ ᠭᠠᠯ ᠳ᠋ᠤᠨᠢ
ᠠᠷᠤ ᠨᠢᠷᠤᠭᠤ ᠪᠠᠨ ᠡᠭᠡᠭᠡᠬᠦ ᠳ᠋ᠦ᠍
ᠠᠯᠢᠪᠠ ᠬᠥᠮᠦᠨ ᠡᠴᠡ ᠢᠯᠭᠠᠭᠠ ᠲᠠᠢ
ᠠᠶᠠᠭᠠᠨ ᠴᠢᠨᠡᠭᠡ ᠮᠡᠩᠭᠡ ᠨᠢ ᠬᠠᠷᠠᠭᠳᠠᠵᠠᠢ
ᠠᠪᠤ ᠨᠢ ᠣᠯᠵᠤ ᠦᠵᠡᠭᠡᠳ᠄
《ᠠ᠂ ᠮᠢᠨᠦ ᠬᠦᠦ! 》 ᠭᠡᠵᠦ ᠬᠠᠰᠬᠢᠷᠴᠠᠢ᠃
ᠡᠵᠢ ᠨᠢ ᠣᠯᠵᠤ ᠦᠵᠡᠭᠡᠳ᠄
《ᠠ᠋ ᠂ ᠬᠦᠦ ᠮᠢᠨᠢ! 》 ᠭᠡᠵᠦ ᠪᠠᠷᠬᠢᠷᠠᠵᠠᠢ᠃
ᠠᠯᠲᠠᠨ ᠭᠠᠯᠠᠭᠤ ᠰᠠᠨᠳᠤᠷᠴᠤ
ᠠᠪᠤ ᠡᠵᠢ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠨᠢ᠄
《 ᠠᠪᠤ ᠠ᠋ ᠠᠪᠤ ᠠ᠋᠂ ᠠᠶᠠᠷᠬᠠᠨ!
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠰᠣᠨᠣᠰᠤᠨᠠ ᠰᠢᠦ
ᠡᠵᠢ ᠠ᠋ ᠡᠵᠢ ᠠ᠋ ᠨᠠᠮᠤᠭᠤᠬᠠᠨ!
ᠡᠵᠡᠷᠬᠡᠭ ᠮᠠᠩᠭᠤᠰ ᠮᠡᠳᠡᠨᠡ ᠰᠢᠦ
ᠠᠯᠲᠠᠨ ᠭᠠᠯᠠᠭᠤ ᠬᠦᠦ ᠴᠢᠨᠢ ᠪᠢ
ᠠᠷᠴᠢ ᠶ᠋ᠢᠨ ᠬᠠᠷᠠ ᠶ᠋ᠢ ᠳᠠᠷᠤᠬᠤ ᠪᠠᠷ ᠢᠷᠡᠪᠡ
ᠠᠷᠴᠢ ᠶ᠋ᠢᠨ ᠬᠠᠷᠠ ᠶ᠋ᠢ ᠰᠥᠨᠥᠭᠡᠭᠰᠡᠨ ᠦ᠌ ᠬᠣᠢᠨᠠ
ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠶᠠ! 》 ᠭᠡᠵᠡᠢ᠃
* * *
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠠᠯᠲᠠᠨ ᠭᠠᠯᠠᠭᠤ
ᠮᠠᠩᠭᠤᠰ ᠤ᠋ᠨ ᠳ᠋ᠤ᠌ ᠣᠴᠢᠭᠠᠳ ᠬᠡᠯᠡᠭᠰᠡᠨ ᠨᠢ᠄
《ᠬᠠᠨ ᠲᠠᠨ ᠤ᠋ ᠠᠴᠢ ᠪᠠᠷ
ᠬᠠᠯᠠᠭᠤᠨ ᠳᠤᠯᠠᠭᠠᠨ ᠬᠣᠨᠣᠯᠠ
ᠬᠠᠢᠷᠠ ᠬᠡᠰᠢᠭ ᠲᠡᠭᠡᠨ ᠪᠠᠭᠲᠠᠭᠠᠵᠤ
ᠬᠠᠢᠷᠠᠯᠠᠵᠤ ᠨᠢᠭᠡ ᠮᠣᠷᠢ ᠱᠠᠩᠨᠠᠨᠠ ᠤᠤ?
ᠶᠠᠳᠠᠭᠤ ᠪᠠᠭᠤᠷᠠᠢ ᠬᠦᠦ ᠪᠢ
ᠶᠠᠪᠤᠭᠰᠠᠨ ᠭᠠᠵᠠᠷ ᠬᠣᠯᠠ
ᠶᠠᠳᠠᠷ ᠳᠣᠷᠣᠢ ᠳᠠᠭᠠ ᠮᠢᠨᠢ
ᠶᠠᠪᠤᠬᠤ ᠴᠢᠳᠠᠯ ᠨᠢ ᠰᠤᠯᠠᠷᠠᠵᠠᠢ 》ᠭᠡᠵᠡᠢ᠃
ᠠᠷᠭᠠ ᠵᠠᠯᠢᠲᠤ ᠮᠠᠩᠭᠤᠰ
ᠠᠯᠲᠠᠨ ᠭᠠᠯᠠᠭᠤ ᠶ᠋ᠢᠨ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ᠄
《ᠡᠷᠢᠯᠴᠢᠨ ᠬᠥᠮᠦᠨ ᠭᠡᠳᠡᠭ ᠴᠢᠨᠢ
ᠡᠯᠳᠡᠪ ᠭᠠᠵᠠᠷ ᠢ᠋ᠶ᠋ᠠᠷ ᠲᠣᠭᠣᠷᠢᠨᠠ
ᠡᠨᠡ ᠮᠠᠭᠤ ᠬᠦᠦ ᠶ᠋ᠢ ᠠᠷᠭᠠᠳᠠᠪᠠᠯ
ᠡᠵᠡᠨ ᠨᠠᠮᠠᠶ᠋ᠢ ᠮᠠᠭᠲᠠᠬᠤ ᠪᠣᠯᠤᠨᠠ》 ᠭᠡᠵᠦ ᠪᠣᠳᠣᠭᠠᠳ
ᠠᠳᠤᠭᠤᠴᠢᠨ ᠢ᠋ᠶ᠋ᠠᠨ ᠳᠠᠭᠤᠳᠠᠵᠤ ᠬᠡᠯᠡᠭᠰᠡᠨ ᠨᠢ᠄
《ᠡᠵᠡᠨ ᠦ᠌ ᠪᠡᠨ ᠲᠣᠯᠣᠭᠠᠢ ᠶ᠋ᠢ ᠬᠠᠵᠠᠭᠰᠠᠨ
ᠥᠨᠥᠬᠢ ᠤᠯᠠᠭᠠᠨ ᠬᠡᠭᠡᠷ ᠮᠣᠷᠢ ᠶ᠋ᠢ ᠪᠠᠷᠢᠵᠤ ᠥᠭ!》 ᠭᠡᠵᠡᠢ᠃
ᠠᠯᠲᠠᠨ ᠭᠠᠯᠠᠭᠤ ᠠᠳᠤᠭᠤᠴᠢᠨ ᠢ᠋ ᠳᠠᠭᠠᠵᠤ
ᠠᠳᠤᠭᠤᠨ ᠤ᠋ ᠵᠠᠬᠠ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍
ᠠᠯᠢᠶᠠ ᠤᠯᠠᠭᠠᠨ ᠬᠡᠭᠡᠷ ᠮᠣᠷᠢ ᠨᠢ
ᠠᠯᠲᠠᠨ ᠭᠠᠯᠠᠭᠤ ᠶ᠋ᠢᠨ ᠢ᠋ᠶ᠋ᠡᠨ
ᠦᠨᠦᠷ ᠢ᠋ ᠠᠪᠤᠭᠠᠳ ᠭᠦᠶᠦᠵᠦ ᠪᠠᠢᠵᠠᠢ᠃
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠤ᠋ᠨ ᠠᠳᠤᠭᠤᠴᠢᠨ
ᠠᠯᠲᠠᠨ ᠭᠠᠯᠠᠭᠤ ᠳ᠋ᠤ᠌ ᠬᠡᠯᠡᠭᠰᠡᠨ ᠨᠢ
ᠡᠨᠡ ᠤᠯᠠᠭᠠᠨ ᠬᠡᠭᠡᠷ ᠮᠣᠷᠢ ᠶ᠋ᠢ
ᠡᠷᠭᠢᠭᠦᠯᠵᠦ ᠭᠦᠢᠴᠡᠭᠰᠡᠨ ᠤᠳᠠᠭᠠ ᠦᠭᠡᠢ
ᠡᠷᠡ ᠴᠢᠳᠠᠯ ᠴᠢᠨᠢ ᠪᠠᠢᠪᠠᠯ ᠴᠢ
ᠥᠪᠡᠷ ᠢ᠋ᠶ᠋ᠡᠨ ᠪᠠᠷᠢᠭᠠᠳ ᠣᠨᠣ!》
ᠠᠯᠲᠠᠨ ᠭᠠᠯᠠᠭᠤ ᠬᠦᠦ
ᠨᠣᠭᠲᠣ ᠠᠪᠤᠭᠠᠳ ᠣᠴᠢᠬᠤ ᠳ᠋ᠤ᠌
ᠤᠯᠠᠭᠠᠨ ᠬᠡᠭᠡᠷ ᠮᠣᠷᠢ ᠨᠢ
ᠤᠭᠲᠤᠵᠤ ᠭᠦᠶᠦᠭᠡᠳ ᠢᠷᠡᠵᠡᠢ᠃
* * *
ᠤᠯᠠᠭᠠᠨ ᠬᠡᠭᠡᠷ ᠮᠣᠷᠢ ᠪᠠᠨ ᠤᠨᠤᠭᠠᠳ
ᠲᠣᠭᠣᠰ ᠬᠦᠷᠡᠩ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠡᠳ
ᠠᠯᠲᠠᠨ ᠭᠠᠯᠠᠭᠤ ᠪᠠᠷᠠᠭᠤᠨᠰᠢ ᠶᠠᠪᠤᠵᠤ
ᠠᠯᠤᠰ ᠤ᠋ᠨ ᠥᠨᠳᠥᠷ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍
ᠬᠠᠷᠠ ᠰᠠᠯᠬᠢ ᠳᠡᠭᠳᠡᠭᠦᠯᠦᠨ
ᠬᠠᠳᠠ ᠴᠢᠯᠠᠭᠤ ᠬᠠᠩᠭᠢᠨᠠᠭᠤᠯᠤᠨ
ᠪᠠᠷᠰ ᠴᠣᠬᠣᠷ ᠵᠥᠭᠡᠢ
ᠪᠠᠷᠢᠵᠤ ᠢᠳᠡᠬᠦ ᠪᠡᠷ ᠢᠷᠡᠬᠦ ᠳ᠋ᠦ᠍
ᠠᠯᠲᠠᠨ ᠭᠠᠯᠠᠭᠤ ᠨᠤᠮᠤ ᠰᠤᠮᠤ ᠪᠠᠨ ᠠᠪᠴᠤ
ᠲᠠᠲᠠᠵᠤ ᠲᠠᠲᠠᠵᠤ ᠲᠠᠰᠢᠶᠠᠨ ᠳ᠋ᠠᠭᠠᠨ ᠲᠤᠯᠭᠠᠵᠤ
ᠳᠡᠯᠢᠵᠦ ᠳᠡᠯᠢᠵᠦ ᠳᠡᠯᠢᠮ ᠢ᠋ᠶ᠋ᠡᠨ ᠳᠦᠭᠦᠷᠭᠡᠵᠦ
ᠪᠠᠷᠢᠵᠤ ᠪᠠᠷᠢᠵᠤ ᠪᠠᠷᠰ ᠤ᠋ᠨ ᠳᠠᠭᠤ ᠭᠠᠷᠭᠠᠭᠠᠳ
ᠬᠣᠩ ᠬᠡᠷᠢᠶᠡᠨ ᠰᠣᠳᠣᠳᠤ ᠰᠤᠮᠤ ᠪᠠᠨ ᠬᠠᠷᠪᠤᠬᠤ ᠳ᠋ᠤ᠌
ᠬᠣᠣᠷᠲᠤ ᠵᠥᠭᠡᠢ ᠣᠨᠣᠨᠠᠳᠠᠵᠤ
ᠬᠠᠷᠠ ᠰᠠᠯᠬᠢᠨ ᠠᠷᠢᠯᠵᠤ
ᠬᠠᠩᠭᠢᠨᠠᠬᠤ ᠴᠢᠮᠡᠭᠡ ᠨᠢ ᠲᠠᠰᠤᠷᠠᠵᠠᠢ᠃
* * *
ᠲᠣᠭᠣᠰ ᠬᠦᠷᠡᠩ ᠮᠣᠷᠢ ᠪᠠᠨ ᠤᠨᠤᠭᠠᠳ
ᠤᠯᠠᠭᠠᠨ ᠬᠡᠭᠡᠷ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠡᠳ
ᠠᠯᠲᠠᠨ ᠭᠠᠯᠠᠭᠤ ᠶᠠᠪᠤᠭᠠᠳ
ᠠᠷᠤ ᠶ᠋ᠢᠨ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍
ᠠᠷᠤᠭ ᠤ᠋ᠨ ᠴᠢᠨᠡᠭᠡ ᠠᠭᠠᠯᠵᠢ ᠨᠢ
ᠠᠶᠤᠩᠭᠠ ᠴᠠᠬᠢᠯᠭᠠᠨ ᠨᠢᠷᠭᠡᠭᠦᠯᠵᠦ
ᠠᠭᠠᠳᠠᠷ ᠪᠣᠷᠣᠭᠠᠨ ᠣᠷᠣᠭᠤᠯᠤᠨ
ᠠᠮᠢᠳᠤ ᠪᠠᠷ ᠨᠢ ᠵᠠᠯᠭᠢᠬᠤ ᠪᠠᠷ ᠢᠷᠡᠬᠦ ᠳ᠋ᠦ᠍
ᠠᠯᠲᠠᠨ ᠭᠠᠯᠠᠭᠤ ᠨᠤᠮᠤ ᠰᠤᠮᠤ ᠪᠠᠨ ᠠᠪᠴᠤ
ᠲᠠᠲᠠᠵᠤ ᠲᠠᠲᠠᠵᠤ ᠲᠠᠰᠢᠶᠠᠨ ᠳ᠋ᠠᠭᠠᠨ ᠲᠤᠯᠭᠠᠵᠤ
ᠳᠡᠯᠢᠵᠦ ᠳᠡᠯᠢᠵᠦ ᠳᠡᠯᠢᠮ ᠢ᠋ᠶ᠋ᠡᠨ ᠳᠦᠭᠦᠷᠭᠡᠵᠦ
ᠪᠠᠷᠢᠵᠤ ᠪᠠᠷᠢᠵᠤ ᠪᠠᠷᠰ ᠤ᠋ᠨ ᠳᠠᠭᠤ ᠭᠠᠷᠭᠠᠭᠠᠳ
ᠬᠣᠩ ᠬᠡᠷᠢᠶᠡᠨ ᠰᠣᠳᠣᠳᠤ ᠰᠤᠮᠤ ᠪᠠᠨ ᠬᠠᠷᠪᠤᠬᠤ ᠳ᠋ᠤ᠌
ᠬᠣᠣᠷᠠᠲᠤ ᠠᠭᠠᠯᠵᠢ ᠣᠨᠣᠭᠳᠠᠵᠤ
ᠠᠶᠤᠩᠭᠠ ᠴᠠᠬᠢᠯᠭᠠᠨ ᠠᠷᠢᠯᠵᠤ
ᠠᠭᠠᠳᠠᠷ ᠪᠣᠷᠣᠭᠠᠨ ᠵᠣᠭᠰᠣᠵᠠᠢ᠃
* * *
ᠤᠯᠠᠭᠠᠨ ᠬᠡᠭᠡᠷ ᠮᠣᠷᠢ ᠪᠠᠨ ᠤᠨᠤᠭᠠᠳ
ᠲᠣᠭᠣᠰ ᠬᠦᠷᠡᠩ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠡᠳ
ᠵᠡᠭᠦᠨ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍
ᠵᠢᠷᠦᠬᠡ ᠴᠠᠭᠠᠨ ᠬᠠᠷᠠ ᠨᠣᠬᠠᠢ
ᠠᠷᠠᠭᠠ ᠰᠢᠲᠦ ᠪᠡᠨ ᠢᠷᠵᠠᠢᠯᠭᠠᠭᠠᠳ
ᠠᠯᠲᠠ ᠬᠡᠯᠡ ᠪᠡᠨ ᠭᠣᠯᠪᠠᠯᠵᠠᠭᠤᠯᠤᠭᠠᠳ
ᠠᠰᠯᠠᠵᠤ ᠳᠠᠭᠠᠷᠢᠭᠠᠳ ᠢᠷᠡᠬᠦ ᠳ᠋ᠦ᠍ᠨᠢ
ᠠᠯᠲᠠᠨ ᠭᠠᠯᠠᠭᠤ ᠨᠤᠮᠤ ᠰᠤᠮᠤ ᠪᠠᠨ ᠠᠪᠴᠤ
ᠲᠠᠲᠠᠵᠤ ᠲᠠᠲᠠᠵᠤ ᠲᠠᠰᠢᠶᠠᠨ ᠳ᠋ᠠᠭᠠᠨ ᠲᠤᠯᠭᠠᠵᠤ
ᠳᠡᠯᠢᠵᠦ ᠳᠡᠯᠢᠵᠦ ᠳᠡᠯᠢᠮ ᠳᠦᠭᠦᠷᠭᠡᠵᠦ
ᠠᠯᠳᠠᠯᠠᠵᠤ ᠠᠯᠳᠠᠯᠠᠵᠤ ᠠᠷᠰᠯᠠᠨ ᠤ᠋ ᠳᠠᠭᠤ ᠭᠠᠷᠭᠠᠭᠠᠳ
ᠲᠣᠭᠣᠰ ᠤ᠋ᠨ ᠰᠣᠳᠣᠳᠤ ᠰᠤᠮᠤ ᠪᠠᠨ ᠬᠠᠷᠪᠤᠬᠤ ᠳ᠋ᠤ᠌
ᠵᠢᠷᠦᠬᠡ ᠴᠠᠭᠠᠨ ᠬᠠᠷᠠ ᠨᠣᠬᠠᠢ ᠶ᠋ᠢᠨ
ᠵᠢᠷᠦᠬᠡᠨ ᠳ᠋ᠦ᠍ᠨᠢ ᠰᠤᠮᠤ ᠲᠣᠰᠴᠤ
ᠠᠷᠠᠭᠠ ᠰᠢᠲᠦ ᠨᠢ ᠢᠷᠵᠠᠢᠭᠠᠳ
ᠠᠯᠲᠠ ᠬᠡᠯᠡ ᠨᠢ ᠤᠨᠵᠢᠭᠠᠳ ᠦᠬᠦᠵᠡᠢ᠃
* * *
ᠲᠣᠭᠣᠰ ᠬᠦᠷᠡᠩ ᠮᠣᠷᠢ ᠪᠠᠨ ᠤᠨᠤᠭᠠᠳ
ᠤᠯᠠᠭᠠᠨ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠡᠳ
ᠤᠷᠲᠤ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍
ᠣᠭᠣᠳᠣᠩ ᠮᠤᠬᠤᠷ ᠪᠤᠬᠠ
ᠬᠠᠳᠠ ᠴᠢᠯᠠᠭᠤ ᠬᠠᠩᠭᠢᠨᠠᠲᠠᠯᠠ ᠮᠥᠷᠭᠥᠵᠦ
ᠬᠠᠮᠤᠭ ᠠᠮᠢᠲᠠᠨ ᠢ᠋ ᠰᠣᠴᠢᠲᠠᠯᠠ ᠮᠥᠭᠡᠷᠡᠭᠡᠳ
ᠠᠯᠠᠨ ᠳᠠᠭᠠᠷᠢᠭᠠᠳ ᠢᠷᠡᠬᠦ ᠳ᠋ᠦ᠍
ᠠᠯᠲᠠᠨ ᠭᠠᠯᠠᠭᠤ ᠨᠤᠮᠤ ᠰᠤᠮᠤ ᠪᠠᠨ ᠠᠪᠴᠤ
ᠲᠠᠲᠠᠵᠤ ᠲᠠᠲᠠᠵᠤ ᠲᠠᠰᠢᠶᠠᠨ ᠳ᠋ᠠᠭᠠᠨ ᠲᠤᠯᠭᠠᠵᠤ
ᠳᠡᠯᠢᠵᠦ ᠳᠡᠯᠢᠵᠦ ᠳᠡᠯᠢᠮ ᠳᠦᠭᠦᠷᠭᠡᠵᠦ
ᠠᠯᠳᠠᠵᠤ ᠠᠯᠳᠠᠵᠤ ᠠᠷᠰᠯᠠᠨ ᠤ᠋ ᠳᠠᠭᠤ ᠭᠠᠷᠭᠠᠭᠠᠳ
ᠲᠣᠭᠣᠰ ᠤ᠋ᠨ ᠰᠣᠳᠣᠲᠤ ᠰᠤᠮᠤ ᠪᠠᠨ ᠬᠠᠷᠪᠤᠬᠤ ᠳ᠋ᠤ᠌
ᠣᠭᠣᠳᠣᠩ ᠮᠤᠬᠤᠷ ᠪᠤᠬᠠ ᠶ᠋ᠢᠨ
ᠠᠭᠤᠰᠬᠢᠨ ᠳ᠋ᠤᠨᠢ ᠰᠤᠮᠤ ᠲᠣᠰᠴᠤ
ᠣᠯᠠᠨ ᠶᠠᠰᠤ ᠨᠢ ᠰᠠᠯᠤᠭᠠᠳ
ᠤᠯᠠᠭᠠᠨ ᠴᠢᠰᠤ ᠨᠢ ᠤᠷᠤᠰᠤᠭᠠᠳ ᠦᠬᠦᠵᠡᠢ᠃
* * *
ᠤᠯᠠᠭᠠᠨ ᠬᠡᠭᠡᠷᠡ ᠮᠣᠷᠢ ᠪᠠᠨ ᠤᠨᠤᠭᠠᠳ
ᠲᠣᠭᠣᠰ ᠬᠦᠷᠡᠩ ᠮᠣᠷᠢ ᠪᠠᠨ ᠬᠥᠲᠥᠯᠦᠭᠡᠳ
ᠠᠯᠲᠠᠨ ᠭᠠᠯᠠᠭᠤ ᠶᠠᠪᠤᠭᠰᠠᠭᠠᠷ ᠪᠠᠢᠵᠤ
ᠮᠥᠰᠥᠲᠦ ᠰᠦᠮᠪᠦᠷ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠴᠦ
ᠬᠠᠩᠭᠢᠨᠠᠳᠠᠭ ᠬᠠᠷᠠ ᠲᠣᠭᠣᠭᠠ ᠨᠢ
ᠬᠠᠩᠭᠢᠨᠠᠨ ᠳᠠᠩᠭᠢᠨᠠᠨ ᠳᠤᠤᠭᠠᠷᠤᠭᠰᠠᠨ ᠳ᠋ᠤ᠌
ᠬᠠᠨ ᠭᠠᠷᠤᠳᠠᠢ ᠶᠢᠨ ᠰᠣᠳᠤᠲᠤ ᠰᠤᠮᠤ ᠪᠠᠷ ᠢ᠋ᠶ᠋ᠠᠨ
ᠬᠠᠭᠠ ᠪᠤᠲᠠᠷᠠᠲᠠᠯᠠ ᠨᠢ ᠬᠠᠷᠪᠤᠭᠠᠳ
ᠬᠠᠷᠭᠢᠰ ᠬᠡᠷᠴᠡᠭᠡᠢ ᠮᠠᠩᠭᠤᠰ ᠤ᠋ᠨ
ᠬᠠᠮᠤᠭ ᠰᠦᠨᠡᠰᠦ ᠶ᠋ᠢ ᠨᠢ ᠳᠠᠷᠤᠭᠠᠳ
ᠬᠠᠷᠠᠩᠭᠤᠢ ᠰᠥᠨᠢ ᠪᠣᠯᠤᠭᠰᠠᠨ ᠤ᠋ ᠬᠣᠢᠨᠠ
ᠠᠪᠤ ᠡᠵᠢ ᠳ᠋ᠡᠭᠡᠨ ᠣᠴᠢᠵᠠᠢ᠃
* * *
ᠠᠯᠲᠠᠨ ᠭᠠᠯᠠᠭᠤ ᠬᠦᠦ
ᠠᠪᠤ ᠡᠵᠢ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠨᠢ᠄
《ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠠᠯᠢᠪᠠ ᠰᠦᠨᠡᠰᠦ ᠶ᠋ᠢ ᠨᠢ ᠳᠠᠷᠤᠯᠠ᠂
ᠠᠷᠠᠰᠤ ᠮᠢᠬᠠ ᠶ᠋ᠢ ᠨᠢ ᠰᠠᠯᠭᠠᠬᠤ ᠳ᠋ᠤ᠌
ᠠᠮᠠᠷ ᠬᠢᠯᠪᠠᠷ ᠪᠣᠯᠤᠯᠠ᠃
ᠮᠠᠷᠭᠠᠰᠢ ᠥᠷᠯᠥᠭᠡ ᠪᠣᠰᠤᠭᠠᠳ
ᠮᠠᠨᠳᠤᠬᠤ ᠨᠠᠷᠠᠨ ᠤ᠋ ᠡᠷᠡᠨ ᠢ᠋ᠶ᠋ᠡᠷ᠄
＜ ᠮᠠᠨ ᠤ᠋ ᠨᠠᠷᠠ ᠮᠠᠨᠳᠤᠯᠠ
ᠮᠠᠩᠭᠤᠰ ᠤ᠋ᠨ ᠨᠠᠷᠠ ᠤᠨᠠᠯᠠ ᠭᠡᠵᠦ ᠬᠠᠰᠬᠢᠷ!》 ᠭᠡᠵᠡᠢ᠃
ᠠᠪᠤ ᠡᠵᠢ ᠬᠣᠶᠠᠷ ᠨᠢ
ᠠᠯᠲᠠᠨ ᠭᠠᠯᠠᠭᠤ ᠶ᠋ᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ
ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠪᠣᠰᠤᠭᠠᠳ
ᠮᠠᠨᠳᠤᠬᠤ ᠨᠠᠷᠠᠨ ᠤ᠋ ᠡᠷᠡᠨ ᠢ᠋ᠶ᠋ᠡᠷ᠄
《ᠮᠠᠨ ᠤ᠋ ᠨᠠᠷᠠ ᠮᠠᠨᠳᠤᠯᠠ
ᠮᠠᠩᠭᠤᠰ ᠤ᠋ᠨ ᠨᠠᠷᠠ ᠤᠨᠠᠯᠠ! 》 ᠭᠡᠵᠦ ᠬᠠᠰᠬᠢᠷᠴᠠᠢ᠃
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠰᠣᠨᠣᠰᠴᠤ
ᠠᠲᠠᠭᠠ ᠬᠣᠣᠷ ᠨᠢ ᠪᠤᠴᠠᠯᠵᠤ
ᠥᠨᠳᠡᠢᠵᠦ ᠪᠣᠰᠬᠤ ᠭᠡᠲᠡᠯᠡ ᠨᠢ
ᠡᠪᠴᠢᠭᠦᠨ ᠳ᠋ᠦ᠍ᠨᠢ ᠰᠤᠮᠤ ᠲᠣᠰᠴᠤ
ᠥᠩᠬᠥᠷᠢᠭᠡᠳ ᠴᠠᠰᠢ ᠤᠨᠠᠲᠠᠯᠠ ᠨᠢ
ᠥᠷᠥᠨ① ᠳ᠋ᠦ᠍ᠨᠢ ᠬᠢᠲᠤᠭᠠ ᠰᠢᠭᠠᠭᠠᠳ
ᠠᠯᠲᠠᠨ ᠭᠠᠯᠠᠭᠤ ᠢᠷᠡᠵᠦ
ᠠᠷᠴᠢ ᠶ᠋ᠢᠨ ᠬᠠᠷᠠ ᠶ᠋ᠢᠨ ᠠᠮᠢ ᠶ᠋ᠢ ᠲᠠᠰᠤᠯᠵᠠᠢ᠃
ᠬᠠ ᠭᠤᠶᠠ ᠶ᠋ᠢ ᠨᠢ ᠰᠠᠯᠭᠠᠵᠤ
ᠬᠣᠯᠠ ᠬᠣᠯᠠ ᠬᠠᠶᠠᠵᠠᠢ᠂
ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠨᠢ ᠬᠡᠷᠴᠢᠵᠦ
ᠡᠰᠢ ᠲᠡᠰᠢ ᠰᠢᠳᠡᠵᠡᠢ᠃
* * *
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠢ᠋ ᠳᠠᠷᠤᠭᠠᠳ
ᠠᠪᠤ ᠡᠵᠢ ᠪᠡᠨ ᠠᠪᠴᠤ
ᠠᠪᠠᠯᠢ ᠭᠡᠷᠭᠡᠢ ᠪᠡᠨ ᠳᠠᠭᠠᠭᠤᠯᠵᠤ
ᠥᠪᠡᠷ ᠦ᠋ᠨ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠬᠤ ᠳ᠋ᠤ᠌
ᠤᠰᠤᠨ ᠪᠣᠯᠣᠷ ᠬᠠᠲᠤᠨ ᠨᠢ
ᠤᠷᠢᠳᠠ ᠨᠢ ᠢᠷᠡᠵᠦ ᠬᠡᠯᠡᠭᠰᠡᠨ ᠨᠢ᠄
《ᠬᠣᠢᠲᠤ ᠠᠭᠤᠯᠠ ᠶ᠋ᠢᠨ ᠠᠭᠤᠢ ᠳ᠋ᠤ᠌
ᠬᠣᠪᠳᠣᠭ ᠮᠠᠩᠭᠤᠰ ᠤ᠋ᠨ ᠬᠠᠲᠤᠨ ᠪᠣᠢ᠃
ᠬᠣᠮᠣᠬᠠᠢ ᠬᠠᠲᠤᠨ ᠢ᠋ ᠠᠯᠠᠬᠤ ᠦᠭᠡᠢ ᠪᠣᠯ
ᠬᠣᠣᠷ ᠦᠨ ᠦᠨᠳᠦᠰᠦ ᠲᠠᠰᠤᠷᠠᠬᠤ ᠦᠭᠡᠢ!》 ᠭᠡᠵᠡᠢ᠃
ᠠᠪᠤ ᠡᠵᠢ᠂ ᠠᠪᠠᠯᠢ ᠬᠠᠲᠤᠨ᠂
ᠠᠯᠪᠠᠲᠤ ᠢᠷᠭᠡᠳ ᠢ᠋ᠶ᠋ᠡᠨ ᠨᠤᠲᠤᠬ ᠲᠠᠭᠠᠨ ᠪᠤᠴᠠᠭᠠᠵᠤ
ᠠᠯᠲᠠᠨ ᠭᠠᠯᠠᠭᠤ ᠳᠣᠪᠲᠣᠯᠤᠨ ᠣᠴᠢᠵᠤ
ᠠᠷᠤ ᠶ᠋ᠢᠨ ᠠᠭᠤᠯᠠᠨ ᠤ᠋ ᠠᠭᠤᠢ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍
ᠭᠡᠷ ᠦ᠋ᠨ ᠴᠢᠨᠡᠭᠡ ᠭᠡᠳᠡᠰᠦ ᠲᠡᠢ
ᠭᠡᠳᠡᠭᠡᠷ ᠬᠠᠷᠠ ᠮᠠᠩᠭᠤᠰ ᠪᠠᠢᠵᠠᠢ᠃
ᠭᠡᠳᠡᠰᠦ ᠶ᠋ᠢ ᠨᠢ ᠬᠠᠭᠠ ᠴᠢᠴᠢᠬᠦ ᠳ᠋ᠦ᠍
ᠭᠡᠳᠡᠰᠦ ᠨᠢ ᠳᠡᠯᠪᠡᠷᠡᠨ
ᠳᠣᠲᠣᠷᠠ ᠠ᠋ᠴᠠ ᠨᠢ
ᠦᠢ ᠲᠦᠮᠡᠨ ᠬᠥᠮᠦᠨ ᠭᠠᠷᠴᠤ
ᠦᠢᠮᠡᠭᠡᠨ ᠱᠤᠤᠭᠢᠶᠠᠨ ᠪᠣᠯᠵᠤ
《ᠮᠠᠨ ᠤ᠋ ᠨᠠᠷᠠ ᠮᠠᠨᠳᠤᠯᠠ
ᠮᠠᠩᠭᠤᠰ ᠤ᠋ᠨ ᠨᠠᠷᠠ ᠤᠨᠠᠵᠠᠢ! 》 ᠭᠡᠵᠦ
ᠲᠡᠷᠭᠡ ᠲᠡᠢ ᠨᠢ ᠲᠡᠷᠭᠡᠨ ᠳ᠋ᠡᠭᠡᠨ ᠰᠠᠭᠤᠵᠤ
ᠲᠡᠮᠡᠭᠡ ᠲᠡᠢ ᠨᠢ ᠲᠡᠮᠡᠭᠡ ᠪᠡᠨ ᠤᠨᠤᠵᠤ
ᠭᠡᠷ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠵᠦᠭ ᠴᠤᠪᠤᠵᠠᠢ᠃
ᠭᠡᠨᠡᠳᠲᠡ ᠲᠡᠷᠡ ᠵᠠᠪᠰᠠᠷ
ᠳᠡᠰ ᠬᠠᠷᠠ ᠮᠣᠷᠢ ᠲᠠᠢ
ᠲᠡᠮᠦᠷ ᠬᠥᠬᠡ ᠬᠦᠦ ᠢᠷᠡᠭᠡᠳ
《ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠷᠢᠭᠤ ᠶ᠋ᠢ ᠠᠪᠤᠨᠠ》 ᠭᠡᠳ
ᠠᠯᠲᠠᠨ ᠭᠠᠯᠠᠭᠤ ᠲᠠᠢ ᠵᠢᠭᠤᠷᠠᠵᠠᠢ᠃
ᠬᠡᠨ ᠠᠯᠢ ᠨᠢ ᠴᠦ᠍ ᠳᠡᠢᠯᠬᠦ ᠦᠭᠡᠢ
ᠬᠡᠳᠦᠨ ᠡᠳᠦᠷ ᠨᠣᠴᠣᠯᠳᠤᠵᠤ
ᠰᠦᠮᠪᠦᠷ ᠶᠡᠬᠡ ᠠᠭᠤᠯᠠ ᠶ᠋ᠢ
ᠳᠣᠩᠰᠣᠯᠲᠠᠯᠠ ᠨᠢ ᠨᠣᠴᠣᠯᠳᠤᠵᠤ
ᠰᠦᠨ ᠶᠡᠬᠡ ᠳᠠᠯᠠᠢ ᠶ᠋ᠢ
ᠴᠠᠯᠭᠢᠲᠠᠯᠠ ᠨᠢ ᠨᠣᠴᠣᠯᠳᠤᠵᠤ
ᠠᠷᠤ ᠶ᠋ᠢᠨ ᠠᠭᠤᠯᠠ ᠶ᠋ᠢᠨ ᠣᠢ ᠶ᠋ᠢ
ᠵᠤᠯᠭᠠᠷᠠᠲᠠᠯᠠ ᠨᠢ ᠨᠣᠴᠣᠯᠳᠤᠵᠤ
ᠠᠩ ᠠᠷᠢᠶᠠᠲᠠᠨ ᠭᠥᠷᠥᠭᠡᠰᠦ ᠶ᠋ᠢ
ᠦᠷᠭᠦᠲᠡᠯᠡ ᠨᠢ ᠨᠣᠴᠣᠯᠳᠤᠵᠤ
ᠠᠶᠤᠯᠲᠤ ᠮᠠᠩᠭᠤᠰ ᠤ᠋ᠨ ᠬᠦᠦ ᠲᠠᠢᠯᠵᠤ
ᠠᠯᠲᠠᠨ ᠭᠠᠯᠠᠭᠤ ᠳᠠᠷᠤᠭᠳᠠᠮᠠᠷ ᠪᠠᠢᠲᠠᠯᠠ
ᠲᠥᠭᠡ ᠤᠷᠲᠤ ᠴᠢᠬᠢ ᠲᠡᠢ
ᠲᠡᠮᠦᠷ ᠬᠥᠬᠡ ᠤᠨᠠᠭᠠ ᠪᠠᠨ ᠤᠨᠤᠵᠤ
ᠠᠯᠲᠠᠨ ᠭᠠᠯᠠᠭᠤ ᠶ᠋ᠢᠨ ᠬᠦᠦ ᠨᠢ
ᠠᠶᠤᠩᠭᠠ ᠮᠡᠲᠦ ᠳᠤᠤᠭᠠᠷᠤᠭᠠᠳ ᠢᠷᠡᠵᠦ
ᠠᠷᠴᠢ ᠶ᠋ᠢᠨ ᠬᠠᠷᠠ ᠮᠠᠩᠭᠤᠰ ᠤ᠋ᠨ ᠬᠦᠦ ᠶ᠋ᠢᠨ
ᠠᠷᠤ ᠰᠢᠯᠢᠨ ᠡᠴᠡ ᠨᠢ ᠠᠪᠴᠤ ᠳᠤᠭᠲᠤᠷᠤᠨ
ᠠᠮᠠᠨ ᠬᠦᠵᠦᠭᠦᠦ ᠶ᠋ᠢ ᠨᠢ ᠰᠠᠯᠭᠠᠵᠤ
ᠠᠮᠢ ᠭᠣᠣᠯ ᠢ᠋ ᠨᠢ ᠲᠠᠰᠤᠯᠤᠭᠠᠳ
ᠠᠶᠤᠯᠲᠤ ᠮᠠᠩᠭᠤᠰ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠵᠤ
ᠠᠯᠳᠠᠷ ᠴᠣᠯᠠ ᠪᠠᠨ ᠮᠠᠨᠳᠤᠭᠤᠯᠤᠭᠠᠳ
ᠠᠩᠬᠠᠨ ᠤ᠋ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠵᠤ
ᠠᠮᠤᠷ ᠰᠠᠢᠬᠠᠨ ᠵᠢᠷᠭᠠᠵᠠᠢ᠃
ᠭᠤᠨᠵᠢᠨ ᠦᠨᠢᠶᠡ ᠠᠯᠠᠵᠤ
ᠭᠤᠷᠪᠠ ᠬᠣᠨᠣᠭ ᠨᠠᠢᠷᠯᠠᠵᠠᠢ᠂
ᠲᠦᠨᠵᠢᠨ ᠦᠨᠢᠶᠡ ᠠᠯᠠᠵᠤ
ᠳᠥᠷᠪᠡ ᠬᠣᠨᠣᠭ ᠨᠠᠢᠷᠯᠠᠵᠠᠢ᠃
ᠠᠭᠤᠢ ᠤᠯᠠᠭᠠᠨ ᠬᠠᠨ ᠨᠢ
ᠠᠴᠢ ᠪᠠᠨ ᠲᠡᠪᠡᠷᠢᠭᠡᠳ ᠦᠨᠦᠰᠴᠡᠢ᠂
ᠠᠯᠲᠠᠨ ᠭᠠᠯᠠᠭᠤ ᠣᠯᠠᠨ ᠠ᠋ᠴᠠ
ᠬᠦᠦ ᠳ᠋ᠡᠭᠡᠨ ᠨᠡᠷᠡ ᠭᠤᠶᠤᠵᠠᠢ᠃
ᠠᠳᠤᠭᠤᠨ ᠤ᠋ ᠠᠭ ᠰᠠᠬᠠᠯ ᠲᠠᠢ ᠡᠪᠦᠭᠡᠨ ᠨᠢ
ᠪᠢ ᠨᠡᠷᠡ ᠥᠭᠭᠦᠶᠡ ᠭᠡᠳ᠄
ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠭᠰᠠᠨ
ᠳ᠋ᠠᠩ ᠭᠠᠷᠤᠳᠢ ᠬᠦᠦ ᠭᠡᠵᠦ ᠨᠠᠷᠡᠯᠡᠵᠠᠢ᠃
— — — —
① ᠥᠷᠥᠨ— ᠦᠷᠦ
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠄ ᠬᠥᠬᠡ ᠮᠣᠩᠭᠣᠯ
ᠬᠢᠨᠠᠭᠴᠢ᠄ ᠬᠡᠯᠡᠰᠣᠶᠣᠯ ᠪᠠᠭᠰᠢ