ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠨᠠᠢ᠍ᠮᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -18
102ᠬᠥᠯ ᠦᠢᠮᠡᠭᠡᠨ ᠦ᠌ ᠴᠤᠤᠷᠢᠶᠠ
ᠳᠣᠷᠵᠢ ᠶ᠋ᠢᠨ ᠠᠮᠢ ᠶ᠋ᠢ ᠠᠪᠤᠷᠠᠭᠰᠠᠨ ᠠᠶᠠᠨᠴᠢᠳ ᠨᠢ ᠡᠭᠡᠭᠡ ᠯᠡ ᠬᠦᠷᠡᠯ᠂ ᠳᠣᠷᠵᠢ᠂ ᠳ᠋ᠠᠨᠽᠠᠨ ᠨᠠᠷ ᠤ᠋ᠨ ᠠᠳᠠᠯᠢ᠃ ᠵᠤᠮᠪᠠᠭᠠᠨ ᠭᠡᠳᠡᠭ ᠳᠠᠭᠠᠭᠠᠮᠠᠯ ᠲᠠᠢ᠂ ᠫᠧᠯᠵᠡᠢ ᠭᠡᠳᠡᠭ ᠳᠠᠭᠠᠯᠲᠠ ᠲᠠᠢ᠂ ᠸᠠᠩᠳᠠᠩ ᠭᠡᠳᠡᠭ ᠬᠥᠲᠥᠯ ᠲᠡᠢ ᠮᠥᠨ ᠲᠠᠪᠢ ᠭᠠᠷᠤᠢ ᠲᠡᠮᠡᠭᠡ ᠬᠥᠲᠥᠯᠦᠭᠰᠡᠨ ᠤᠯᠤᠰ ᠪᠠᠢᠵᠠᠢ᠃ ᠭᠡᠪᠡᠴᠦ ᠢᠯᠭᠠᠭᠠ ᠶᠡᠬᠡ ᠪᠣᠢ᠃ ᠳᠠᠭᠠᠭᠠᠮᠠᠯ ᠵᠤᠮᠪᠠᠭᠠᠨ ᠳ᠋ᠤ᠌ ᠬᠦᠷᠡᠯ ᠦ᠋ᠨ ᠰᠠᠢᠬᠠᠨ ᠴᠢᠨᠠᠷ ᠠᠯᠠᠭᠠ᠃ ᠴᠠᠭ ᠢᠮᠠᠭᠲᠠ ᠠᠭᠤᠷᠯᠠᠨ ᠬᠤᠪᠢᠷᠭᠠᠨᠠᠵᠤ᠂ ᠬᠠᠨᠢ ᠨᠥᠬᠥᠳ ᠢ᠋ᠶ᠋ᠡᠨ ᠠᠮᠤᠷ ᠵᠠᠶᠠᠭᠠ ᠦᠯᠦ ᠦᠵᠡᠭᠦᠯᠦᠨᠡ᠃ ᠢᠯᠠᠩᠭᠤᠶᠠ ᠬᠥᠲᠥᠯ ᠳ᠋ᠡᠭᠡᠨ ᠣᠨᠴᠠ ᠰᠢᠷᠦᠭᠦᠨ᠃ ᠤᠨᠲᠠᠬᠤ ᠳ᠋ᠠᠭᠠᠨ ᠳᠡᠷᠡ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠵᠠᠰᠠᠭᠤᠯᠤᠨ ᠬᠥᠯ ᠢ᠋ᠶ᠋ᠡᠨ ᠬᠤᠴᠢᠭᠤᠯᠬᠤ ᠠ᠋ᠴᠠ ᠡᠬᠢᠯᠡᠭᠡᠳ ᠭᠠᠭᠴᠠᠬᠠᠨ ᠵᠠᠷᠤᠬᠤ ᠵᠠᠩᠳᠤᠷᠬᠤ ᠪᠠᠨ ᠯᠠ ᠮᠡᠳᠡᠨᠡ᠃ ᠭᠡᠲᠡᠯᠡ ᠸᠠᠩᠳᠠᠩ ᠳ᠋ᠤ᠌ ᠳ᠋ᠠᠨᠽᠠᠨ ᠤ᠋ ᠴᠣᠭ ᠵᠣᠯᠪᠣᠭᠠ ᠠᠯᠠᠭᠠ᠃ ᠠᠵᠢᠯ ᠪᠣᠯᠭᠠᠨ ᠳᠡᠭᠡᠷᠡ ᠬᠢᠬᠦ ᠡᠴᠡ ᠪᠡᠨ ᠡᠮᠦᠨᠡ ᠬᠠᠮᠠᠷ ᠢ᠋ᠶ᠋ᠠᠨ ᠱᠤᠤᠬᠢᠨᠠᠭᠤᠯᠤᠨ ᠵᠣᠭᠰᠣᠮᠠᠲᠠᠭᠠᠢ᠃ ᠲᠡᠮᠡᠭᠡᠨ ᠳᠡᠭᠡᠷᠡ ᠶᠠᠪᠤᠬᠤ ᠳ᠋ᠠᠭᠠᠨ ᠬᠦᠷᠲᠡᠯᠡ ᠭᠠᠷ ᠢ᠋ᠶ᠋ᠠᠨ ᠬᠠᠨᠴᠤᠢ ᠳ᠋ᠠᠭᠠᠨ ᠵᠥᠷᠢᠭᠦᠯᠦᠨ ᠪᠡᠪᠡᠢᠨ ᠦᠬᠦᠭᠡᠨᠴᠡ ᠣᠷᠬᠢᠨ ᠶᠠᠪᠤᠨᠠ᠃ ᠬᠠᠷᠢᠨ ᠫᠧᠯᠵᠡᠢ ᠨᠢ ᠵᠣᠯᠪᠣᠭᠠ ᠲᠠᠢ᠂ ᠨᠠᠢᠵᠠᠷᠬᠠᠭ ᠠᠶᠠᠲᠠᠢᠬᠠᠨ ᠨᠢ ᠴᠦ᠍ ᠠᠷᠭᠠ ᠦᠭᠡᠢ ᠡᠷᠡ ᠪᠠᠢᠪᠠ᠃
ᠡᠳᠡᠨ ᠦ᠌ ᠲᠡᠮᠡᠭᠡ ᠪᠠᠷᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠴᠢᠶᠠ ᠦᠭᠡᠢ᠃ ᠤᠭ ᠨᠢ ᠵᠠᠩᠴᠢᠬᠦᠦ ᠳ᠋ᠦ᠍ ᠠᠷᠠᠰᠤ ᠰᠢᠷᠢ ᠣᠷᠣᠭᠤᠯᠤᠭᠠᠳ ᠪᠤᠴᠠᠬᠤ ᠳ᠋ᠠᠭᠠᠨ ᠪᠠᠷᠠᠭᠠ ᠲᠡᠭᠡᠭᠡᠬᠦ ᠶᠣᠰᠣᠲᠠᠢ ᠪᠠᠢᠵᠠᠢ᠃ ᠭᠡᠲᠡᠯᠡ ᠫᠦᠰᠡ ᠶ᠋ᠢᠨ ᠳᠠᠩᠵᠢᠶᠠᠳ《ᠬᠠᠯᠬᠠ ᠣᠷᠣᠨ ᠳ᠋ᠤ᠌ ᠬᠥᠯ ᠦᠢᠮᠡᠭᠡᠨ ᠭᠠᠷᠤᠭᠰᠠᠨ》 ᠭᠡᠳ ᠲᠡᠭᠡᠭᠡᠪᠦᠷᠢᠯᠡᠬᠦ ᠪᠠᠷᠠᠭᠠ ᠥᠭᠭᠦᠭᠡ ᠦᠭᠡᠢ ᠡᠴᠡ ᠪᠦᠬᠦ ᠵᠢᠩ ᠦ᠋ᠨ ᠬᠥᠯᠥᠰᠥ ᠶ᠋ᠢ ᠬᠠᠭᠠᠰ ᠣᠯᠭᠣᠭᠰᠠᠨ ᠭᠡᠨᠡ᠃ ᠡᠨᠡ ᠲᠤᠬᠠᠢ ᠵᠤᠮᠪᠠᠭᠠᠨ ᠪᠥᠭᠡᠮ ᠠᠭᠤᠷ᠂ ᠠᠮᠠᠨ ᠳ᠋ᠤ᠌ ᠣᠷᠣᠳᠠᠭ ᠨᠢ ᠯᠡ《ᠬᠣᠭ ᠤ᠋ᠨ ᠯᠤᠢᠪᠠᠷᠴᠢᠨ᠂ ᠭᠠᠤᠯᠢᠨ ᠭᠠᠩᠰᠠᠨ ᠳ᠋ᠠᠭᠠᠨ ᠭᠤᠳᠤᠷᠠᠭᠤᠯᠵᠤ ᠦᠬᠦᠮᠡᠷ!》 ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠲᠡᠭᠡᠭᠡᠳ ᠳᠣᠷᠵᠢ ᠶ᠋ᠢᠨ ᠪᠦᠬᠦ ᠶᠠᠪᠤᠳᠠᠯ ᠢ᠋ ᠰᠣᠨᠣᠰᠤᠭᠰᠠᠨ ᠠ᠋ᠴᠠ ᠪᠠᠨ ᠬᠣᠢᠰᠢ ᠥᠭᠡᠷᠡᠴᠢᠯᠡᠭᠳᠡᠨ᠄《ᠠᠢ ᠳᠠ᠂ ᠮᠠᠨ ᠤ᠋ ᠳᠠᠩᠵᠢᠶᠠᠳ ᠤᠤ᠂ ᠰᠢᠳᠤᠷᠭᠤ ᠳᠠ》 ᠭᠡᠬᠦ ᠪᠣᠯᠤᠭᠰᠠᠨ ᠤ᠋ ᠪᠠᠨ ᠳᠡᠭᠡᠷᠡ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠠᠵᠠ ᠬᠡᠢ ᠮᠣᠷᠢ ᠶ᠋ᠢ ᠪᠠᠬᠠᠳᠤᠨ ᠭᠠᠢᠬᠠᠭᠤᠯᠤᠨᠠ᠃ ᠭᠡᠯᠡ ᠴᠦ᠍ ᠰᠡᠳᠬᠢᠯ ᠥᠯᠥᠨ᠂《ᠣᠯᠵᠠ ᠣᠮᠣᠭ ᠣᠯᠤᠭᠠ ᠦᠭᠡᠢ ᠬᠡᠪᠲᠡᠵᠦ᠂ ᠠᠶᠠᠨ ᠤ᠋ ᠲᠡᠮᠡᠭᠡ ᠶ᠋ᠢ ᠰᠣᠩᠭᠣᠨ ᠲᠣᠷᠭᠠᠵᠤ ᠶᠠᠭᠤ ᠬᠢᠨᠡ》 ᠭᠡᠵᠦ ᠥᠨᠵᠢᠨ ᠬᠣᠨᠣᠬᠤ ᠶ᠋ᠢ ᠶᠡᠬᠡᠪᠴᠢᠯᠡᠨᠡ᠃
ᠠᠷᠪᠠᠨ ᠲᠠᠪᠤᠳᠠᠬᠢ ᠬᠣᠨᠣᠭ ᠳᠡᠭᠡᠷᠡ ᠪᠡᠨ ᠬᠠᠯᠬᠠ ᠨᠤᠲᠤᠭ ᠲᠤ ᠠᠷᠠᠢ ᠴᠢᠷᠠᠢ ᠣᠷᠣᠵᠤ ᠢᠷᠡᠭᠡᠳ ᠲᠡᠨᠳᠡ ᠡᠴᠡ ᠳᠣᠯᠣᠭᠠ ᠬᠣᠨᠣᠭ ᠳᠡᠭᠡᠷᠡ ᠪᠡᠨ ᠵᠠᠩᠵᠤᠨ ᠴᠤᠢᠷ ᠠᠭᠤᠯᠠᠨ ᠤ᠋ ᠪᠠᠷᠠ ᠶ᠋ᠢ ᠠᠱ᠌ᠢᠭᠦᠢ ᠨᠢᠭᠡ ᠬᠠᠷᠠᠪᠠ᠃ ᠡᠨᠳᠡ ᠡᠴᠡ ᠲᠡᠷᠡ ᠬᠥᠮᠦᠰ ᠪᠠᠷᠠᠭᠤᠨ ᠵᠦᠭ ᠰᠠᠢᠨ ᠬᠠᠨ ᠤ᠋ ᠠᠢᠮᠠᠭ ᠴᠢᠭᠯᠡᠬᠦ ᠪᠣᠯᠤᠭᠰᠠᠨ ᠳ᠋ᠤ᠌ ᠳᠣᠷᠵᠢ ᠰᠠᠯᠬᠤ ᠪᠣᠯᠤᠯᠠ᠃ ᠳᠠᠭᠠᠭᠠᠮᠠᠯ ᠵᠤᠮᠪᠠᠭᠠᠨ ᠲᠤᠩ ᠬᠠᠷᠠᠮᠴᠢ᠂ ᠬᠥᠬᠡᠭᠡ ᠡᠪᠦᠯ ᠦ᠋ᠨ ᠬᠦᠢᠲᠡᠨ᠂ ᠬᠥᠷ ᠴᠠᠰᠤᠨ ᠤ᠋ ᠬᠠᠭᠠᠷᠢᠭᠠᠨ ᠳ᠋ᠤ᠌ ᠭᠠᠮᠢᠩ ᠴᠡᠷᠢᠭ ᠦ᠋ᠨ ᠵᠤᠨ ᠤ᠋ ᠬᠤᠪᠴᠠᠰᠤ ᠲᠠᠢ ᠶᠠᠭᠠᠬᠢᠵᠤ ᠶᠠᠪᠤᠬᠤ ᠪᠢᠯᠡ? ᠭᠡᠬᠦ ᠳ᠋ᠦ᠍᠄
— ᠦᠭᠡᠢ ᠶᠡᠷᠦ ᠶᠠᠭᠠᠬᠢᠬᠤ ᠪᠢᠯᠡ ᠭᠡᠵᠦ ᠵᠤᠮᠪᠠᠭᠠᠨ ᠪᠠᠷᠭᠢᠯ ᠰᠥᠭᠡᠩᠭᠢ ᠬᠣᠭᠣᠯᠠᠢ ᠪᠠᠷ ᠥᠭᠦᠯᠡᠨ ᠪᠠᠬᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠄
— ᠵᠠ᠂ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠡᠷᠡ ᠬᠥᠮᠦᠨ ᠦ᠌ ᠵᠠᠮ ᠤ᠋ᠨ ᠬᠦᠵᠦᠭᠦᠦ ᠤᠷᠲᠤ᠂ ᠠᠯᠤᠰ ᠨᠢ ᠪᠢᠳᠡ ᠠᠭᠤᠯᠵᠠᠬᠤ ᠯᠠ ᠪᠠᠢᠯᠭᠦᠢ᠂ ᠢᠨᠠᠳᠤ ᠳᠠᠬᠤ ᠪᠠᠨ ᠠᠪᠤᠭᠠᠳ ᠶᠠᠪᠤᠨᠠ ᠤᠤ ᠳᠠ ᠭᠡᠵᠦ ᠳᠣᠷᠵᠢ ᠳᠤ ᠨᠥᠮᠥᠷᠢᠭᠦᠯᠦᠭᠰᠡᠭᠡᠷ ᠢᠷᠡᠭᠰᠡᠨ ᠳᠠᠬᠤ ᠪᠠᠨ ᠵᠢᠭᠠᠪᠠ᠃ ᠡᠨᠡ ᠳᠠᠬᠤ ᠪᠣᠯ ᠣᠶᠣᠳᠠᠯ ᠬᠠᠩᠵᠠᠷᠬᠠᠢ᠂ ᠦᠰᠦ ᠬᠠᠯᠴᠠᠷᠠᠮᠠᠯ᠂ ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ ᠳᠠᠬᠤ ᠪᠠᠢᠭᠰᠠᠨ ᠠ᠋ᠴᠠ ᠨᠢ ᠳᠠᠬᠤ ᠭᠡᠵᠦ ᠨᠡᠷᠡᠯᠡᠬᠦ ᠡᠴᠡ ᠪᠢᠰᠢ᠂ ᠠᠯᠢ ᠬᠡᠳᠦᠢᠨᠡᠢ ᠨᠣᠬᠠᠢ ᠶ᠋ᠢᠨ ᠬᠡᠪᠲᠡᠷᠢ ᠳ᠋ᠦ᠍ ᠵᠣᠷᠢᠭᠤᠯᠤᠭᠳᠠᠬᠤ ᠪᠣᠯᠤᠭᠰᠠᠨ ᠡᠳ᠋ ᠪᠠᠢᠪᠠ᠃ ᠫᠧᠯᠵᠡᠢ ᠬᠠᠵᠠᠭᠤ ᠠ᠋ᠴᠠ ᠳᠣᠷᠵᠢ ᠳ᠋ᠤ᠌ ᠨᠢᠳᠦ ᠢᠷᠮᠡᠨ ᠲᠡᠷᠡ ᠬᠠᠷᠠᠮᠴᠢ ᠶ᠋ᠢ ᠶᠣᠵᠣᠯᠠᠵᠤ᠄
— ᠡᠷᠡ ᠬᠥᠮᠦᠨ ᠳ᠋ᠦ᠍ ᠲᠣᠬᠢᠶᠠᠯᠳᠤᠬᠤ ᠭᠠᠷᠤᠵᠠ ᠠᠯᠢ ᠶ᠋ᠢ ᠨᠢ ᠲᠡᠷᠡ ᠭᠡᠬᠦ ᠪᠣᠢ᠂ ᠮᠠᠢ! ᠡᠭᠦᠨ ᠢ᠋ ᠬᠥᠯ ᠳ᠋ᠡᠭᠡᠨ ᠤᠭᠯᠠᠭᠠᠳ ᠶᠠᠪᠤ! ᠭᠡᠵᠦ ᠴᠣ ᠰᠢᠨᠡᠬᠡᠨ ᠴᠢᠨᠣᠠ ᠶ᠋ᠢᠨ ᠳᠡᠭᠲᠡᠢ ᠪᠡᠨ ᠲᠠᠢᠯᠤᠨ ᠥᠭᠪᠡ᠃ ᠪᠠᠰᠠ ᠬᠡᠳᠦᠨ ᠬᠣᠨᠣᠭ ᠤ᠋ᠨ ᠢᠳᠡᠬᠦ ᠬᠠᠭᠤᠷᠠᠢ ᠬᠡᠷᠡᠭᠯᠡᠯ ᠥᠭᠴᠡᠢ᠃
ᠡᠢᠮᠦ ᠳ᠋ᠦ᠍ ᠳᠣᠷᠵᠢ ᠡᠪᠦᠷ ᠲᠡᠭᠡᠨ ᠢᠳᠡᠬᠦ ᠲᠡᠢ᠂ ᠪᠡᠶᠡ ᠳ᠋ᠡᠭᠡᠨ ᠳᠠᠬᠤ ᠲᠠᠢ᠂ ᠬᠥᠯ ᠳ᠋ᠡᠭᠡᠨ ᠲᠡᠭᠳᠡᠢ ᠭᠠᠷ ᠲᠤ ᠪᠠᠰᠠ ᠬᠤᠭᠤᠷᠠᠭᠰᠠᠨ ᠱᠠᠲᠤᠨ ᠤ᠋ ᠬᠡᠰᠡᠭ ᠲᠡᠢ ᠬᠦᠷᠢᠶᠡ ᠵᠠᠮ ᠢ᠋ ᠪᠠᠷᠢᠨ ᠭᠠᠷᠤᠯᠠ᠃ ᠡᠮᠦᠨᠡ ᠡᠴᠡ ᠶᠣᠰᠣᠲᠠᠢ ᠬᠥᠷ ᠴᠠᠰᠤᠨ ᠤ᠋ ᠬᠠᠭᠠᠷᠢᠭᠠ ᠬᠥᠨᠳᠡᠢ ᠲᠠᠯᠠ ᠶ᠋ᠢᠨ ᠵᠢᠪᠠᠷ ᠳᠡᠰ ᠨᠢᠰ ᠬᠠᠭᠠᠷᠢᠪᠠᠴᠤ ᠠᠵᠢᠭ ᠦᠭᠡᠢ ᠠᠯᠬᠤᠯᠠᠨᠠ᠃ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠬᠥᠳᠡᠭᠡ ᠬᠣᠨᠣᠪᠠ᠃ ᠮᠠᠷᠭᠠᠰᠢ ᠨᠢ ᠦᠳᠡ ᠡᠴᠡ ᠬᠣᠢᠰᠢ ᠨᠢᠭᠡ ᠬᠣᠲᠠ ᠶ᠋ᠢᠨ ᠪᠠᠷᠠ ᠬᠠᠷᠠᠪᠠ᠃ ᠭᠡᠪᠡᠴᠦ ᠪᠠᠶᠠᠷᠯᠠᠬᠤ ᠶᠠᠭᠤᠮᠠ ᠠᠯᠠᠭᠠ᠃ ᠠᠶᠤᠨ ᠰᠣᠴᠢᠬᠤ ᠴᠣ ᠶᠠᠭᠤ ᠪᠠᠢᠬᠤ ᠪᠢᠯᠡ᠃ ᠮᠠᠭᠤ ᠳᠠᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠷᠮᠣᠢ ᠶ᠋ᠢ ᠨᠠᠪᠠᠰ ᠰᠠᠪᠠᠰ ᠪᠠᠭᠤᠯᠭᠠᠨ ᠬᠦᠷᠴᠦ᠂ ᠤᠭᠲᠤᠨ ᠢᠷᠡᠭᠰᠡᠨ ᠨᠣᠬᠠᠳ ᠲᠠᠢ ᠨᠢ ᠵᠠᠳᠠ ᠲᠤᠯᠤᠯᠳᠤᠨᠠ᠃ ᠪᠠᠷᠠᠭᠤᠨ ᠤᠷᠢᠳᠠ ᠲᠠᠯᠠ ᠶ᠋ᠢᠨ ᠭᠡᠷ ᠦ᠋ᠨ ᠭᠠᠳᠠᠭᠠ ᠢᠷᠡᠭᠡᠳ《ᠨᠣᠬᠠᠢ ᠬᠣᠷᠢ ᠠ᠋!》 ᠴᠦ᠍ ᠬᠡᠯᠡᠬᠦᠢ ᠰᠢᠭᠤᠳ ᠣᠷᠣᠪᠠ᠃ ᠭᠡᠷ ᠲᠦ᠍ ᠠᠬᠢᠮᠠᠭ ᠨᠠᠰᠤᠲᠠᠢ ᠠᠪᠠᠭᠠᠢ᠂ ᠨᠢᠭᠡ ᠬᠡᠦᠬᠡᠳ᠂ ᠡᠪᠦᠭᠡᠨ ᠭᠤᠷᠪᠠᠭᠤᠯᠠ ᠪᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠶᠤᠨ ᠰᠣᠴᠢᠵᠤ ᠪᠠᠷᠤᠭ ᠪᠣᠰᠤᠨ ᠬᠠᠷᠠᠢᠬᠤ ᠰᠢᠬᠠᠪᠠ᠃ ᠠᠮᠤᠷ ᠮᠡᠨᠳᠦ ᠮᠡᠳᠡᠬᠦ ᠳ᠋ᠦ᠍ ᠲᠡᠳᠡ ᠴᠡᠴᠡᠷᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠳᠤᠲᠠᠭᠤ ᠳᠤᠯᠢᠮᠠᠭ ᠬᠠᠷᠢᠭᠤᠯᠤᠨ ᠪᠡᠶᠡ ᠪᠡᠶᠡ ᠪᠡᠨ ᠰᠢᠷᠲᠡᠨᠡ᠃ ᠳᠠᠷᠠᠭᠠᠬᠠᠨ ᠲᠠᠢ ᠨᠢ ᠰᠢᠷᠢᠮᠡᠯ ᠰᠢᠷᠢᠳᠡᠭ ᠦ᠋ᠨ ᠡᠭᠦᠳᠡ ᠨᠢ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠣᠩᠭᠣᠯᠵᠠᠵᠤ ᠬᠠᠭᠠᠯᠭᠠ ᠪᠠᠷ ᠪᠠᠭᠲᠠᠵᠤ ᠶᠠᠳᠠᠭᠰᠠᠨ ᠲᠣᠮᠣ ᠲᠣᠮᠣ ᠨᠡᠬᠡᠢ ᠳᠡᠪᠡᠯ ᠲᠡᠢ ᠡᠷᠡᠴᠦᠳ ᠣᠷᠣᠵᠤ ᠢᠷᠡᠨᠡ᠃ ᠲᠡᠷᠡ ᠪᠦᠷᠢ ᠪᠡᠷ ᠢ᠋ᠶ᠋ᠡᠨ ᠠᠮᠤᠷ ᠮᠡᠨᠳᠦ ᠮᠡᠳᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠰᠢᠷᠦᠭᠦᠨ ᠳᠣᠷᠢᠭᠤᠨ ᠬᠠᠷᠠᠨ《ᠦᠭᠡᠢ ᠡᠨᠡ ᠶᠠᠭᠤ ᠪᠣᠢ?》 ᠭᠡᠵᠦ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠠᠰᠠᠭᠤᠨᠠ᠃ ᠳᠣᠷᠵᠢ ᠲᠡᠳᠡᠨ ᠢ᠋ ᠡᠭᠳᠡᠭᠦᠴᠡᠨᠡ᠃
— ᠪᠢ ᠮᠣᠩᠭᠣᠯ ᠬᠥᠮᠦᠨ! ᠭᠡᠵᠦ ᠲᠥᠷᠥᠯᠬᠢ ᠶ᠋ᠢᠨ ᠬᠡᠨᠡᠭ ᠦᠭᠡᠢ ᠪᠡᠷ ᠬᠡᠯᠡᠬᠦ ᠳ᠋ᠦ᠍᠄《ᠪᠢ ᠥᠨᠥᠬᠢ ᠴᠢᠨᠳᠠᠷᠤᠤ ᠨᠤᠭᠤᠳ ᠠ᠋ᠴᠠ ᠢᠷᠡᠪᠡᠦ》 ᠭᠡᠵᠦ ᠠᠶᠤᠪᠠ ᠰᠢᠦ᠃《ᠦᠭᠡᠢ ᠪᠢ ᠴᠦ᠍ ᠪᠠᠰᠠ ᠲᠡᠭᠡᠵᠦ ᠪᠣᠳᠣᠭᠰᠠᠨ ᠬᠡ》 ᠭᠡᠵᠦ ᠢᠨᠢᠶᠡᠯᠴᠡᠨᠡ᠃ ᠳᠣᠷᠵᠢ ᠶ᠋ᠢᠨ ᠬᠠᠮᠢᠭᠠ ᠶᠠᠪᠤᠭᠠ ᠬᠡᠨ ᠪᠣᠯᠬᠤ ᠶ᠋ᠢ ᠠᠰᠠᠭᠤᠨ ᠯᠠᠪᠯᠠᠭᠠᠳ᠄ ᠠᠩᠬᠠ ᠨᠤᠲᠤᠭ ᠠ᠋ᠴᠠ ᠠᠶᠠᠨ ᠵᠢᠩ ᠢ᠋ᠶ᠋ᠡᠷ ᠭᠠᠷᠤᠭᠠᠳ ᠶᠠᠭᠤ ᠶᠠᠭᠤ ᠲᠠᠢ ᠲᠣᠬᠢᠶᠠᠯᠳᠤᠨ ᠶᠣᠰᠣᠲᠠᠢ ᠠᠮᠢ ᠨᠠᠭᠠᠨᠠ᠂ ᠲᠠᠮᠤ ᠴᠠᠭᠠᠨᠠ ᠭᠡᠭᠴᠢ ᠪᠣᠯᠤᠨ ᠭᠠᠷᠴᠤ ᠢᠷᠡᠭᠰᠡᠨ ᠢ᠋ ᠶᠠᠷᠢᠬᠤ ᠳ᠋ᠤ᠌᠂ ᠡᠬᠡᠨᠡᠷ ᠬᠡᠦᠬᠡᠳ ᠦ᠋ᠳ ᠱᠠᠭᠰᠢᠷᠠᠨ ᠨᠠᠮᠠᠨᠴᠢᠯᠠᠵᠤ᠂ ᠢᠳᠡᠵᠦ ᠤᠤᠭᠤᠬᠤ ᠶ᠋ᠢ ᠡᠮᠦᠨᠡ ᠨᠢ ᠠᠪᠴᠢᠷᠠᠨ ᠣᠪᠣᠭᠠᠯᠠᠨᠠ᠃ ᠡᠷᠡᠴᠦᠳ ᠨᠢ᠄《ᠦᠭᠡᠢ᠂ ᠶᠣᠷᠣ ᠠ᠋!》 ᠭᠡᠵᠦ ᠳᠠᠭᠤ ᠠᠯᠲᠠᠨ ᠵᠦᠭ ᠪᠦᠷᠢ ᠡᠴᠡ ᠳᠥᠭᠥᠨ ᠰᠠᠭᠤᠵᠤ ᠨᠢᠳᠦ ᠪᠦᠯᠲᠡᠢᠯᠭᠡᠨᠡ᠃ ᠨᠢᠭᠡ ᠨᠢ ᠳᠣᠷᠵᠢ ᠶ᠋ᠢᠨ ᠶᠠᠷᠢᠶᠠ ᠶ᠋ᠢ ᠲᠠᠰᠤᠯᠤᠨ᠄
— ᠬᠦᠷᠢᠶᠡᠨ ᠳ᠋ᠦ᠍ ᠲᠡᠢᠨ ᠪᠣᠯᠬᠤ ᠭᠡᠵᠦ ᠪᠠᠢᠭᠠ ᠰᠢᠦ ᠳᠡ᠃
— ᠦᠭᠡᠢ ᠶᠠᠭᠠᠬᠢᠨᠠ ᠭᠡᠨᠡ ᠠ᠋? ᠬᠡᠨ ᠨᠢ ᠬᠡᠨ ᠲᠡᠢ ᠪᠡᠨ ᠳᠠᠢᠳᠤᠬᠤ ᠭᠡᠵᠦ ᠪᠠᠢᠭᠠ ᠬᠡᠷᠡᠭ ᠪᠣᠢ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌
— ᠲᠠᠪᠤᠳᠤᠭᠠᠷ ᠪᠣᠭᠳᠠ ᠶ᠋ᠢᠨ ᠬᠤᠪᠢᠯᠭᠠᠨ᠂ ᠭᠠᠮᠢᠩ ᠤ᠋ᠳ ᠢ᠋ ᠬᠦᠢᠰᠦ ᠲᠡᠮᠲᠡᠷᠢᠬᠦ ᠭᠡᠵᠦ ᠪᠠᠢᠭᠠ ᠳᠠ᠃
— ᠦ᠂ ᠶᠠᠭᠠᠬᠢᠭᠰᠠᠨ ᠭᠠᠢᠬᠠᠯᠲᠠᠢ ᠪᠣᠢ! ᠦᠭᠡᠢ ᠲᠡᠭᠡᠭᠡᠳ ᠲᠡᠷᠡ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠴᠢᠨᠢ ᠬᠠᠮᠢᠭᠠ ᠠ᠋ᠴᠠ ᠭᠠᠷᠤᠭᠠᠳ ᠢᠷᠡᠵᠦ ᠪᠠᠢᠭᠠ ᠪᠣᠭᠳᠠ ᠪᠠᠢᠨᠠ ᠳᠠ?
— ᠠᠶᠠᠷ᠂ ᠪᠣᠭᠳᠠ ᠶ᠋ᠢᠨ ᠠᠯᠳᠠᠷ ᠢ᠋ ᠪᠢᠲᠡᠭᠡᠢ ᠰᠢᠷᠦᠭᠦᠨ ᠬᠡᠯᠡ! ᠭᠡᠵᠦ ᠥᠭᠡᠷᠡ ᠨᠢᠭᠡ ᠨᠢ ᠣᠷᠣᠢ ᠳᠡᠭᠡᠷᠡ ᠪᠡᠨ ᠨᠠᠮᠠᠨᠴᠢᠯᠠᠭᠠᠳ᠂ ᠪᠢᠳᠡ ᠪᠢᠰᠢ ᠪᠣᠭᠳᠠ ᠪᠣᠯᠤᠭᠰᠠᠨ ᠬᠣᠢᠨᠠ ᠬᠠᠮᠢᠭᠠ ᠠ᠋ᠴᠠ ᠲᠣᠳᠣᠷᠠᠬᠤ ᠨᠢ ᠬᠠᠮᠢᠶᠠ ᠦᠭᠡᠢ᠂ ᠵᠦᠭᠡᠷ ᠪᠢᠳᠡ ᠵᠠᠯᠪᠠᠷᠢᠪᠠᠯ ᠪᠠᠷᠠᠪᠠ᠃
ᠳᠣᠷᠵᠢ ᠡᠢᠮᠦ ᠮᠠᠭᠤᠬᠠᠢ ᠰᠣᠬᠣᠷ ᠶᠠᠭᠤᠮᠠ ᠶ᠋ᠢ ᠣᠯᠵᠤ ᠰᠣᠨᠣᠰᠴᠤ ᠪᠠᠢᠭᠠ ᠳ᠋ᠠᠭᠠᠨ ᠭᠠᠪᠤᠨ ᠭᠠᠢᠬᠠᠨᠠ᠃ ᠣᠷᠣᠢ ᠨᠠᠷᠠ ᠵᠢᠷᠭᠠᠵᠤ᠂ ᠠᠮᠢᠲᠠᠨ ᠤ᠋ ᠬᠥᠯ ᠲᠠᠲᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠪᠠᠯ ᠮᠥᠨ ᠯᠡ ᠬᠠᠴᠢᠨ᠄《ᠬᠣᠰᠢᠭᠤ ᠱᠠᠪᠢ ᠶ᠋ᠢᠨ ᠳᠡᠭᠡᠳᠦᠰ ᠦ᠋ᠳ ᠲᠠᠪᠤᠳᠤᠭᠠᠷ ᠪᠣᠭᠳᠠ ᠵᠠᠩᠵᠤᠨ ᠳ᠋ᠤ᠌ ᠴᠡᠷᠢᠭ ᠡᠷᠡ᠂ ᠠᠭᠲᠠ ᠮᠣᠷᠢᠳ᠂ ᠬᠣᠭᠣᠯᠠ ᠬᠦᠨᠡᠰᠦ ᠨᠡᠢᠯᠡᠭᠦᠯᠵᠦ ᠪᠠᠢᠭᠠ ᠭᠡᠨᠡ ᠪᠢᠯᠡ》 ᠭᠡᠵᠦ ᠣᠪᠣᠭᠠ ᠶᠡᠷᠦ ᠶ᠋ᠢᠨ ᠣᠢᠯᠠᠭᠠᠮᠵᠢ ᠲᠠᠢ ᠶᠠᠭᠤᠮᠠ ᠶᠠᠷᠢᠵᠤ ᠡᠬᠢᠯᠡᠭᠰᠡᠨ ᠢ᠋ᠶ᠋ᠡᠨ᠄《ᠦᠭᠡᠢ ᠲᠡᠷᠡ ᠪᠠᠷᠤᠨ ᠵᠠᠩᠵᠤᠨ ᠤ᠋ ᠴᠡᠷᠢᠭ ᠲᠦ᠍ ᠶᠠᠪᠤᠭᠰᠠᠨ ᠬᠥᠮᠦᠨ ᠢ᠋ ᠫᠤᠤ ᠶ᠋ᠢᠨ ᠰᠤᠮᠤ ᠳᠠᠭᠠᠭᠠᠬᠤ ᠦᠭᠡᠢ ᠭᠡᠨᠡ᠂ ᠳᠠᠭᠠᠭᠠᠭᠳᠠᠨ ᠠᠮᠢ ᠦᠷᠡᠭᠳᠡᠪᠡᠴᠦ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠣᠴᠢᠬᠤ ᠭᠡᠨᠡ》 ᠭᠡᠵᠦ ᠥᠭᠡᠷᠡ ᠲᠠᠢᠰᠢ ᠬᠠᠵᠠᠢᠭᠠᠳ᠂ ᠪᠣᠭᠳᠠ ᠪᠠᠷᠤᠨ ᠵᠠᠩᠵᠤᠨ ᠥᠪᠡᠷ ᠢ᠋ᠶ᠋ᠡᠨ ᠨᠢᠭᠡ ᠠᠪᠳᠠᠷᠠ ᠳᠦᠭᠦᠷᠡᠩ ᠲᠡᠮᠦᠷ ᠴᠡᠷᠢᠭ ᠲᠡᠢ ᠭᠡᠨᠡ᠂ ᠠᠪᠳᠠᠷᠠ ᠶ᠋ᠢ ᠨᠡᠭᠡᠭᠡᠮᠡᠭᠴᠡ ᠬᠡᠳᠦᠨ ᠲᠦᠮᠡᠨ ᠴᠡᠷᠢᠭ《ᠬᠠᠮᠢᠭᠠ ᠪᠠᠢᠨᠠ᠂ ᠬᠠᠮᠢᠭᠠ ᠪᠠᠢᠨᠠ》 ᠭᠡᠵᠦ ᠱᠤᠤᠭᠢᠯᠳᠤᠨ ᠭᠠᠷᠴᠤ ᠳᠠᠢᠰᠤᠨ ᠢ᠋ ᠬᠢᠶᠠᠷ ᠬᠢᠳᠤᠬᠤ ᠭᠡᠨᠡ᠃
ᠡᠢᠮᠦ ᠵᠦᠢᠯ ᠢ᠋ ᠳᠣᠷᠵᠢ ᠬᠡᠵᠢᠶᠡ ᠴᠦ᠍ ᠡᠰᠡ ᠦᠨᠡᠮᠰᠢᠨᠡ᠃ ᠡᠨᠡ ᠬᠥᠮᠦᠨ ᠶᠡᠷᠦ ᠨᠢ ᠨᠠᠳᠠ ᠪᠠᠷ ᠳᠠᠭᠠᠵᠢᠩᠨᠠᠵᠤ ᠪᠠᠢᠨᠠ ᠤᠤ? ᠭᠡᠵᠦ ᠠᠵᠢᠬᠤ ᠳ᠋ᠤ᠌ ᠪᠠᠰᠠ ᠴᠦ᠍ ᠲᠡᠢᠮᠦ ᠪᠢᠰᠢ᠂ ᠨᠢᠭᠤᠷ ᠲᠤᠨᠢ ᠪᠠᠬᠠᠷᠬᠠᠯ᠂ ᠭᠠᠷ ᠨᠢ ᠤᠷᠢᠳᠠ ᠪᠠᠨ ᠵᠠᠯᠪᠠᠷᠢᠭᠠᠰᠤᠲᠠᠢ ᠦᠵᠡᠭᠳᠡᠨᠡ᠃
— ᠦᠭᠡᠢ ᠲᠡᠢᠮᠦ ᠣᠯᠠᠨ ᠲᠡᠮᠦᠷ ᠴᠡᠷᠢᠭ ᠲᠡᠢ ᠶᠦᠮ ᠪᠣᠯ ᠴᠡᠷᠢᠭ ᠡᠷᠡ ᠶ᠋ᠢ ᠲᠡᠳᠡᠨ ᠨᠡᠢᠯᠡᠭᠦᠯᠵᠦ ᠶᠠᠭᠠᠬᠢᠬᠤ ᠨᠢ ᠪᠣᠢ? ᠭᠡᠬᠦ ᠳ᠋ᠦ᠍᠄
— ᠤᠭ ᠨᠢ ᠲᠡᠢᠮᠦ ᠯᠡ ᠪᠠᠢᠮᠠᠷ᠃ ᠭᠡᠲᠡᠯᠡ ᠲᠡᠷᠡ ᠲᠡᠮᠦᠷ ᠴᠡᠷᠢᠭ ᠢ᠋ ᠠᠪᠳᠠᠷᠠ ᠠ᠋ᠴᠠ ᠨᠢᠭᠡ ᠭᠠᠷᠭᠠᠴᠢᠬᠠᠪᠠᠯ ᠪᠤᠴᠠᠭᠠᠳ ᠴᠤᠭᠯᠠᠭᠤᠯᠬᠤ ᠳ᠋ᠤ᠌ ᠲᠤᠩ ᠪᠡᠷᠬᠡ ᠲᠡᠢ᠂ ᠬᠡᠴᠡᠭᠦᠦ ᠳᠣᠭᠰᠢᠨ ᠭᠠᠢᠬᠠᠯ ᠤ᠋ᠳ ᠳᠠᠭ ᠠ᠋ ᠭᠡᠵᠦ ᠠᠮᠠ ᠲᠠᠭᠯᠠᠨᠠ᠃ ᠳᠣᠷᠵᠢ ᠡᠯᠡ ᠶᠠᠷᠢᠶᠠ ᠶ᠋ᠢ ᠬᠡᠳᠦᠢᠪᠡᠷ ᠡᠰᠡ ᠦᠨᠡᠮᠰᠢᠪᠡᠴᠦ ᠪᠠᠷᠤᠨ ᠵᠠᠩᠵᠤᠨ ᠭᠡᠳᠡᠭ ᠨᠢᠭᠡ ᠰᠦᠷᠡᠬᠡᠢ ᠬᠥᠮᠦᠨ ᠪᠣᠢ ᠪᠣᠯᠵᠤ ᠭᠠᠮᠢᠩ ᠲᠠᠢ ᠪᠠᠢᠯᠳᠤᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠲᠠᠭᠠᠪᠤᠷᠢᠯᠠᠨ ᠪᠠᠶᠠᠷᠯᠠᠨᠠ᠃ ᠮᠠᠷᠭᠠᠰᠢ ᠨᠢ ᠭᠡᠷ ᠦ᠋ᠨ ᠡᠵᠡᠨ᠂ ᠡᠬᠡᠨᠡᠷ ᠬᠣᠶᠠᠷ ᠬᠡᠳᠦ ᠬᠣᠨᠣᠨ ᠪᠡᠶᠡ ᠪᠡᠨ ᠠᠮᠠᠷᠠᠭᠠᠬᠤ ᠶ᠋ᠢ ᠱᠠᠭᠠᠷᠳᠠᠭᠰᠠᠨ ᠳ᠋ᠤ᠌ ᠳᠣᠷᠵᠢ ᠲᠡᠭᠡᠬᠦ ᠪᠡᠷ ᠪᠣᠯᠪᠠ᠃ ᠦᠭᠡ ᠪᠦᠷᠢ ᠡᠰᠡ ᠦᠨᠡᠮᠰᠢᠭᠳᠡᠬᠦ ᠪᠣᠯᠪᠠᠴᠤ ᠡᠷᠬᠡ ᠦᠭᠡᠢ ᠣᠷᠣ ᠮᠥᠷ ᠲᠡᠢ ᠪᠢᠵᠡ ᠠ᠋ ᠭᠡᠵᠦ ᠢᠲᠡᠭᠡᠭᠳᠡᠭᠰᠡᠨ ᠲᠡᠢᠨ ᠲᠤᠯᠤᠯᠳᠤᠭᠠᠨ ᠤ᠋ ᠶᠠᠪᠤᠳᠠᠯ ᠰᠡᠳᠬᠢᠯ ᠳ᠋ᠦ᠍ ᠦᠷᠭᠦᠯᠵᠢᠯᠡᠨ ᠡᠷᠭᠢᠯᠳᠦᠨᠡ᠃ ᠣᠯᠠᠨ ᠬᠣᠨᠣᠭ ᠲᠠᠭᠠᠷᠠᠨ ᠴᠡᠴᠡᠷᠡᠵᠦ ᠶᠠᠪᠤᠭᠰᠠᠨ ᠪᠡᠶᠡ ᠪᠦᠷᠢᠨ ᠳᠤᠯᠠᠭᠠᠴᠠᠵᠤ᠂ ᠦᠶᠡ ᠮᠥᠴᠢ ᠪᠣᠯᠭᠠᠨ ᠲᠡᠨᠢᠢᠭᠰᠡᠨ ᠦ᠌ ᠳᠡᠭᠡᠷᠡ ᠥᠭᠡᠬᠦ ᠲᠣᠰᠣᠨ ᠳ᠋ᠤ᠌ ᠭᠡᠳᠡᠰᠦ ᠬᠠᠨᠤᠨ᠂ ᠬᠡᠩᠬᠡᠭ ᠠᠷᠢᠯᠤᠭᠰᠠᠨ ᠠ᠋ᠴᠠ ᠬᠥᠮᠦᠨ ᠦ᠌ ᠡᠮᠦᠨᠡ᠂ ᠬᠥᠮᠦᠨ ᠦ᠌ ᠳᠦᠷᠰᠦ ᠲᠡᠢ ᠦᠵᠡᠭᠳᠡᠬᠦ ᠶ᠋ᠢ ᠴᠦ᠍ ᠬᠦᠰᠡᠨ ᠮᠥᠷᠥᠭᠡᠳᠬᠦ ᠪᠣᠯᠪᠠ᠃ ᠣᠯᠠᠨ ᠰᠠᠷᠠ ᠶ᠋ᠢᠨ ᠲᠤᠷᠰᠢ ᠳᠤᠷᠠ ᠵᠣᠷᠢᠭ ᠢ᠋ᠶ᠋ᠠᠷ ᠤᠷᠭᠤᠭᠰᠠᠨ ᠰᠢᠷᠦᠭᠦᠨ ᠬᠠᠷᠠ ᠦᠰᠦ ᠪᠡᠨ ᠠᠪᠤᠭᠤᠯᠬᠤ ᠭᠡᠵᠦ ᠡᠷᠢᠯ ᠰᠤᠷᠠᠯ ᠪᠣᠯᠤᠨ ᠪᠠᠢᠵᠤ᠂ ᠨᠢᠭᠡ ᠲᠣᠩᠭᠣᠷᠠᠭ ᠣᠯᠵᠤ ᠭᠡᠷ ᠦ᠋ᠨ ᠡᠵᠡᠨ ᠢ᠋ᠶ᠋ᠡᠷ ᠬᠤᠰᠤᠭᠤᠯᠵᠤ ᠡᠬᠢᠯᠡᠪᠡ᠃ ᠬᠠᠷᠠᠮᠰᠠᠯᠲᠠᠢ ᠨᠢ ᠠᠷᠭᠠ ᠦᠭᠡᠢ ᠲᠡᠷᠡ ᠲᠣᠩᠭᠣᠷᠠᠭ ᠡᠰᠡ ᠳᠠᠭᠠᠭᠠᠨ ᠵᠤᠯᠠᠢ ᠠ᠋ᠴᠠ ᠪᠤᠰᠤᠳ ᠢ᠋ ᠬᠠᠢᠴᠢ ᠪᠠᠷ ᠬᠢᠷᠭᠠᠭᠤᠯᠬᠤ ᠳ᠋ᠤ᠌ ᠬᠦᠷᠪᠡ᠃ ᠡᠭᠦᠨᠴᠢᠯᠡᠨ ᠨᠠᠪᠠᠰ ᠰᠠᠪᠠᠰ ᠪᠠᠭᠤᠭᠰᠠᠨ ᠮᠠᠭᠤ ᠳᠠᠬᠤ ᠪᠠᠨ ᠮᠥᠳᠬᠡᠨ ᠰᠡᠯᠪᠢᠵᠦ ᠥᠭᠡᠳᠡ ᠲᠠᠲᠠᠯᠠ᠃ ᠲᠡᠷᠡ ᠠᠢᠯ ᠳᠤᠲᠠᠭᠤ ᠡᠯᠳᠡᠭᠰᠡᠨ ᠠᠵᠢᠷᠭᠠᠨ ᠦᠰᠦ ᠲᠡᠢ ᠨᠡᠬᠡᠢ ᠨᠢᠭᠡ ᠶ᠋ᠢ ᠥᠭᠭᠦᠭᠰᠡᠨ ᠢ᠋ᠶ᠋ᠡᠷ ᠯᠣᠪᠤᠤᠵᠠ ᠮᠠᠶᠢᠭ ᠤ᠋ᠨ ᠨᠢᠭᠡ ᠰᠠᠢᠬᠠᠨ ᠶᠠᠭᠤᠮᠠ ᠬᠢᠵᠦ ᠠᠪᠤᠪᠠ᠃
ᠶᠡᠷᠦ ᠳᠣᠷᠵᠢ ᠬᠥᠮᠦᠨ ᠪᠣᠯᠤᠭᠰᠠᠨ ᠢ᠋ᠶ᠋ᠠᠷ ᠠᠵᠤ ᠲᠥᠷᠥᠨ ᠠᠮᠢ ᠪᠠᠨ ᠠᠷᠭᠠᠯᠠᠬᠤ ᠶ᠋ᠢ ᠠᠩᠬᠠ ᠤᠳᠠᠭᠠ ᠤᠬᠠᠭᠠᠷᠠᠭᠰᠠᠨ ᠲᠡᠳᠦᠢ ᠦᠭᠡᠢ ᠤᠯᠤᠰ ᠣᠷᠣᠨ ᠤ᠋ ᠪᠠᠨ ᠲᠥᠯᠥᠭᠡ ᠰᠡᠳᠬᠢᠯ ᠲᠠᠯᠪᠢᠬᠤ ᠪᠣᠯᠪᠠ᠃ ᠥᠨᠥᠬᠢ ᠬᠣᠲᠠᠨᠠ ᠭᠤᠷᠪᠠ ᠬᠣᠨᠣᠬᠤ ᠳ᠋ᠤ᠌ ᠭᠠᠳᠠᠭᠰᠢ ᠶᠠᠪᠤᠭᠰᠠᠨ ᠬᠥᠮᠦᠨ ᠴᠦ᠍ ᠦᠭᠡᠢ᠃ ᠭᠠᠳᠠᠨᠠ ᠠ᠋ᠴᠠ ᠢᠷᠡᠭᠰᠡᠨ ᠴᠦ᠍ ᠶᠠᠭᠤᠮᠠ ᠦᠭᠡᠢ ᠪᠠᠢᠬᠤ ᠠᠲᠠᠯᠠ ᠥᠨᠥᠬᠢ ᠱᠤᠤᠭᠢᠶᠠᠨ ᠨᠡᠮᠡᠭᠳᠡᠬᠦ ᠶ᠋ᠢ ᠶᠠᠭᠠᠬᠢᠨᠠ?《ᠥᠩᠭᠡᠷᠡᠭᠰᠡᠨ ᠨᠠᠮᠤᠷ ᠪᠠᠷᠤᠨ ᠵᠠᠩᠵᠤᠨᠲᠠᠨ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨᠡ ᠣᠢᠷᠠᠲᠤᠨ ᠣᠴᠢᠭᠠᠳ ᠬᠠᠭᠤᠷᠠᠢ ᠬᠠᠰᠬᠢᠷᠤᠨ ᠳᠠᠭᠠᠷᠢᠬᠤ ᠳ᠋ᠤ᠌ ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ ᠣᠢ ᠬᠦᠷᠢᠶᠡᠨ ᠦ᠌ ᠵᠦᠭ ᠬᠠᠭᠠᠷᠠᠨ ᠨᠠᠢᠭᠤᠭᠰᠠᠨ ᠶᠤᠮ ᠭᠡᠨᠡ》 ᠴᠦ᠍ ᠭᠡᠬᠦ ᠰᠢᠭ᠃《ᠭᠠᠮᠢᠩ ᠤ᠋ᠳ ᠢ᠋ ᠤᠷᠤᠭᠰᠢ ᠵᠢᠭᠤᠲᠠᠬᠤ ᠳ᠋ᠤ᠌ ᠲᠤᠤᠯᠠ ᠭᠣᠣᠯ ᠤ᠋ᠨ ᠮᠥᠰᠥ ᠭᠡᠨᠡᠳᠲᠡ ᠴᠥᠮᠥᠷᠡᠨ ᠡᠳᠦᠢ ᠲᠡᠳᠦᠢ ᠭᠠᠮᠢᠩ ᠵᠢᠪᠦᠭᠰᠡᠨ ᠭᠡᠳᠡᠭ ᠰᠢᠦ》 ᠴᠦ᠍ ᠭᠡᠬᠦ ᠰᠢᠭ ᠶᠡᠷᠦ ᠬᠥᠮᠦᠨ ᠢᠲᠡᠭᠡᠬᠦ ᠶ᠋ᠢᠨ ᠡᠷᠬᠡ ᠦᠭᠡᠢ ᠳᠡᠮᠡᠢ ᠱᠤᠤᠭᠢᠶᠠᠨ ᠳᠣᠣᠷᠠ ᠠ᠋ᠴᠠ ᠪᠠᠨ ᠤᠨᠳᠤᠷᠠᠨ ᠭᠠᠷᠬᠤ ᠨᠢ ᠢᠲᠡᠭᠡᠯ ᠲᠡᠰᠦᠷᠡᠮᠡᠷ ᠪᠠᠢᠪᠠᠴᠤ᠂ ᠳᠣᠷᠵᠢ ᠡᠷᠬᠡ ᠦᠭᠡᠢ ᠨᠢᠭᠡ ᠶᠠᠪᠤᠳᠠᠯ ᠪᠣᠯᠤᠨᠠ ᠪᠣᠢ ᠭᠡᠵᠦ ᠭᠣᠷᠢᠳᠠᠨᠠ᠃
ᠳᠥᠷᠪᠡᠳᠡᠬᠢ ᠡᠳᠦᠷ ᠦ᠋ᠨ ᠢ᠋ᠶ᠋ᠡᠨ ᠥᠷᠯᠥᠭᠡ ᠶᠠᠪᠤᠬᠤ ᠵᠠᠮ ᠳ᠋ᠠᠭᠠᠨ ᠣᠷᠣᠯᠠ᠃ ᠶᠡᠬᠡ ᠲᠠᠯᠠ ᠶ᠋ᠢᠨ ᠵᠢᠪᠠᠷ ᠤᠷᠢᠳ ᠤᠷᠢᠳ ᠤ᠋ᠨ ᠢ᠋ᠶ᠋ᠠᠨ ᠠ᠋ᠴᠠ ᠢᠯᠡᠭᠦᠦ ᠲᠡᠢ ᠰᠡᠩᠭᠢᠨᠡᠪᠡᠴᠦ ᠡᠮᠦᠰᠦᠭᠰᠡᠨ ᠮᠠᠯᠠᠭᠠᠢ ᠬᠠᠯᠠᠭᠤᠨ ᠬᠥᠯᠥᠰᠥ ᠠᠯᠳᠠᠭᠤᠯᠤᠨᠠ᠃ ᠰᠡᠳᠬᠢᠯ ᠳ᠋ᠦ᠍ ᠪᠦᠯᠡᠬᠡ ᠵᠠᠯᠭᠢᠭᠰᠠᠨ ᠶᠤᠮ ᠰᠢᠭ᠋ ᠴᠠᠭ ᠦᠷᠭᠦᠯᠵᠢ ᠪᠣᠭᠰᠢᠵᠤ ᠪᠠᠢᠭᠰᠠᠨ ᠭᠤᠲᠤᠷᠠᠯ ᠠᠷᠢᠯᠵᠤ ᠣᠷᠣᠨ ᠳ᠋ᠤᠨᠢ ᠢᠷᠡᠭᠡᠳᠦᠢ ᠶ᠋ᠢᠨ ᠶᠠᠭᠤᠮᠠ ᠪᠣᠯᠭᠠᠨ ᠰᠡᠳᠬᠢᠯᠴᠢᠯᠡᠨ ᠪᠦᠲᠦᠬᠦ ᠭᠡᠵᠦ ᠪᠠᠢᠭᠠ ᠰᠢᠭ᠋ ᠰᠠᠨᠠᠭᠳᠠᠨᠠ᠃
ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠳᠠᠭᠤᠤ ᠳᠠᠭᠤᠯᠠᠵᠤ ᠦᠵᠡᠭᠡ ᠦᠭᠡᠢ ᠪᠣᠯᠪᠠᠴᠤ《ᠡᠷᠡ ᠪᠣᠷᠣ ᠬᠠᠷᠴᠠᠭᠠᠢ》 ᠭᠡᠳᠡᠭ ᠳᠠᠭᠤᠤ ᠶ᠋ᠢ ᠠᠮᠠᠨ ᠳ᠋ᠠᠭᠠᠨ ᠭᠢᠩᠰᠢᠨ ᠲᠤᠷᠰᠢᠵᠤ ᠦᠵᠡᠭᠡᠳ《ᠢᠳᠡᠷ ᠵᠠᠯᠠᠭᠤ ᠨᠠᠰᠤᠨ ᠳ᠋ᠠᠭᠠᠨ ᠳᠠᠩᠴᠤ ᠠᠵᠢᠮᠠᠭ ᠦᠭᠡᠢ ᠶᠠᠪᠤᠯᠠ》 ᠭᠡᠳᠡᠭ ᠳᠡᠭᠡᠷᠡ ᠨᠢ ᠬᠠᠮᠤᠭ ᠬᠦᠴᠦ ᠪᠡᠨ ᠳᠠᠢᠴᠢᠯᠠᠨ ᠪᠠᠷᠬᠢᠷᠠᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠷᠮᠠ