ᠪᠣᠬᠣᠳᠠᠢ ᠵᠤᠨᠳᠤᠢ- ᠬᠠᠭᠤᠴᠢ ᠶᠠᠷᠢᠶᠠ Бохоодой Зундуй -хууч яриа
1473ᠪᠣᠬᠣᠳᠠᠢ ᠵᠤᠨᠳᠤᠢ
ᠮᠣᠩᠭᠣᠯ ᠠᠷᠠᠳ ᠤ᠋ᠨ ᠬᠠᠭᠤᠴᠢ ᠶᠠᠷᠢᠶᠠ
ᠪᠤᠯᠠᠭᠠᠨ ᠠᠢᠮᠠᠭ ᠤ᠋ᠨ ᠬᠡᠰᠢᠭᠦᠨᠳᠡᠷ ᠰᠤᠮᠤᠨ ᠳ᠋ᠤ᠌ ᠪᠣᠬᠣᠳᠠᠢ ᠵᠣᠨᠲᠣᠢ ᠭᠡᠳᠡᠭ ᠡᠪᠦᠭᠡᠨ ᠪᠠᠢᠭᠠᠳ1950 ᠣᠨ ᠤ᠋ ᠣᠷᠴᠢᠮ ᠨᠠᠰᠤ ᠪᠠᠷᠠᠭᠰᠠᠨ ᠶᠤᠮ᠃
ᠲᠡᠷᠡ ᠡᠪᠦᠭᠡᠨ ᠶᠠᠷᠢᠬᠤ ᠳ᠋ᠠᠭᠠᠨ᠂ ᠮᠠᠨ ᠤ᠋ ᠠᠪᠴᠢᠭᠠᠨ ᠬᠤᠪᠢᠯᠭᠠᠨ ᠯᠠᠮᠠ ᠵᠠᠪᠰᠡᠷᠡᠩᠳᠣᠷᠵᠢ ᠴᠤ᠌ ᠮᠡᠷᠭᠡᠨ ᠪᠠᠢᠰᠠ ᠶ᠋ᠢᠨ ᠬᠠᠴᠢᠨ ᠲᠥᠪᠡᠳ ᠯᠠᠮᠠᠴᠢ ᠮᠡᠷᠭᠡᠨ᠂ ᠬᠣᠶᠠᠭᠤᠯᠠ ᠶᠡᠬᠡ ᠮᠡᠷᠭᠡᠨ ᠴᠢᠳᠠᠯ ᠲᠠᠢ ᠯᠠᠮᠠ ᠨᠠᠷ ᠪᠠᠢᠭᠰᠠᠨ ᠳ᠋ᠠ ᠭᠡᠳᠡᠭ᠃ ᠲᠡᠳᠡᠨ ᠢ᠋ ᠮᠡᠷᠭᠡᠨ ᠴᠢᠳᠠᠯ ᠲᠠᠢ ᠶ᠋ᠢ ᠲᠠ ᠶᠠᠭᠠᠬᠢᠵᠤ ᠮᠡᠳᠡᠭᠰᠡᠨ ᠶᠤᠮ ᠭᠡᠬᠦ ᠳ᠋ᠦ᠍᠂ ᠵᠣᠨᠳᠣᠢ ᠭᠤᠸᠠᠢ ᠮᠢᠨᠦ ᠮᠡᠳᠡᠳᠡᠭ ᠶᠠᠭᠤᠮᠠ ᠶᠠᠭᠤ ᠪᠣᠢ ᠭᠡᠬᠦ ᠳ᠋ᠦ᠍ ᠭᠠᠭᠴᠠ ᠳᠠᠯᠤᠤ ᠶᠤᠮ᠃ ᠪᠢ ᠳᠠᠯᠤᠤ ᠣᠪᠣᠭᠠ ᠲᠣᠭᠯᠠᠨᠠ ᠰᠢᠦ ᠭᠡᠳ᠂ ᠮᠥᠷᠥᠢᠴᠡᠭᠡ ᠲᠣᠭᠯᠠᠵᠤ ᠪᠠᠭᠠ ᠰᠠᠭᠠ ᠶᠠᠭᠤᠮᠠ ᠣᠯᠳᠠᠭ ᠪᠠᠢᠯᠠ᠃ ᠨᠢᠭᠡ ᠡᠳᠦᠷ ᠠᠪᠴᠢᠭᠠᠨ ᠬᠤᠪᠢᠯᠭᠠᠨ ᠨᠠᠳᠠᠲᠠᠢ ᠲᠠᠭᠠᠷᠠᠯᠳᠤᠭᠠᠳ᠂ ᠬᠣᠶᠠᠭᠤᠯᠠ ᠪᠠᠨ ᠳᠠᠯᠤᠤ ᠲᠠᠯᠪᠢᠬᠤ ᠤᠤ ᠭᠡᠳᠡᠭ ᠶᠤᠮ ᠪᠠᠢᠨᠠ᠃ ᠪᠢ ᠴᠦ᠍ ᠲᠡᠭᠡᠶᠡ ᠯᠡ ᠭᠡᠯᠡ᠃ ᠲᠡᠭᠡᠭᠡᠳ ᠬᠣᠶᠠᠭᠤᠯᠠ ᠪᠠᠨ ᠳᠠᠯᠤᠤ ᠪᠠᠨ ᠭᠠᠷᠭᠠᠭᠠᠳ ᠲᠣᠭᠯᠠᠬᠤ ᠶᠤᠮ ᠪᠣᠯᠤᠯᠠ ᠭᠡᠰᠡᠨ ᠳ᠋ᠦ᠍᠂ ᠮᠥᠷᠥᠢ ᠲᠡᠢ ᠲᠣᠭᠯᠠᠶᠠ ᠭᠡᠳᠡᠭ ᠪᠠᠢᠨᠠ ᠰᠢᠦ᠃ ᠲᠡᠭᠡᠭᠡᠳ ᠪᠢ ᠴᠦ᠍ ᠵᠠ ᠯᠠ ᠭᠡᠯᠡ᠃ ᠲᠡᠭᠡᠭᠡᠳ ᠬᠤᠪᠢᠯᠭᠠᠨ ᠵᠠ ᠴᠢ ᠮᠥᠷᠥᠢ ᠳ᠋ᠦ᠍ ᠶᠠᠭᠤ ᠲᠠᠯᠪᠢᠬᠤ ᠪᠣᠢ ᠭᠡᠵᠦ ᠪᠠᠢᠨᠠ᠃ ᠨᠠᠳᠠᠳᠤ ᠮᠥᠷᠥᠢ ᠳ᠋ᠦ᠍ ᠲᠠᠯᠪᠢᠬᠤ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠯᠡ ᠭᠡᠴᠢᠬᠡᠯᠡ᠃ ᠪᠢ ᠳᠠᠯᠤᠤ ᠪᠠᠷ ᠲᠡᠷᠡ ᠯᠠᠮᠠ ᠶ᠋ᠢ ᠯᠠᠪ ᠬᠣᠨᠵᠢᠬᠤ ᠪᠣᠯᠬᠣᠷ ᠮᠥᠷᠥᠢ ᠶ᠋ᠢᠨ ᠶᠠᠭᠤᠮᠠ ᠴᠤ᠌ ᠪᠠᠷᠤᠭ ᠬᠡᠷᠡᠭ ᠦᠭᠡᠢ ᠶᠠᠭᠤᠮᠠ ᠰᠢᠭ᠋ ᠪᠣᠳᠣᠭᠳᠠᠵᠤ ᠪᠠᠢᠯᠠ᠃ ᠲᠡᠭᠡᠲᠡᠯᠡ ᠯᠠᠮᠠ ᠬᠡᠯᠡᠵᠦ ᠪᠠᠢᠨᠠ ᠰᠢᠦ᠂ ᠴᠢᠮᠠᠲᠤ ᠶᠠᠭᠠᠬᠢᠭᠠᠳ ᠮᠥᠷᠥᠢ ᠳ᠋ᠦ᠍ ᠲᠠᠯᠪᠢᠬᠤ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠪᠣᠢ᠂ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠲᠣᠯᠣᠭᠠᠢ ᠶ᠋ᠢᠨ ᠬᠡᠷᠡᠭᠯᠡᠯ ᠢ᠋ ᠳᠡᠯᠪᠢ ᠭᠡᠯᠡ᠃ ᠮᠠᠨ ᠤ᠋ ᠡᠬᠡᠨᠡᠷ ᠲᠦ᠍ ᠲᠣᠯᠣᠭᠠᠢ ᠶ᠋ᠢᠨ ᠮᠥᠩᠭᠥᠨ ᠬᠡᠷᠡᠭᠯᠡᠯ ᠪᠠᠢᠳᠠᠭ ᠢ᠋ ᠯᠠᠮᠠ ᠮᠡᠳᠡᠬᠦ ᠶᠤᠮ᠃ ᠪᠢ ᠵᠠ ᠲᠡᠭᠡᠶᠡ ᠭᠡᠳ ᠬᠣᠶᠠᠭᠤᠯᠠ ᠮᠥᠷᠥᠢᠴᠡ ᠲᠣᠭᠯᠠᠯᠠ᠃ ᠪᠢ ᠳᠠᠯᠤᠤ ᠰᠠᠢᠨ ᠲᠠᠯᠪᠢᠳᠠᠭ ᠪᠣᠯᠬᠣᠷ ᠯᠠᠮᠠ ᠶ᠋ᠢ ᠬᠣᠨᠵᠢᠭᠠᠳ ᠪᠠᠢᠯᠠ᠃ ᠯᠠᠮᠠ ᠠ᠋ᠴᠠ ᠬᠣᠶᠠᠷ ᠶᠢᠩᠪᠦ ᠲᠦᠷᠦᠭᠦᠦ ᠲᠡᠢ ᠨᠡᠯᠢᠶᠡᠳ ᠶᠠᠭᠤᠮᠠ ᠶ᠋ᠢ ᠠᠪᠴᠢᠬᠠᠯᠠ᠃ ᠯᠠᠮᠠ ᠨᠠᠮᠠ ᠶ᠋ᠢ ᠠᠵᠢ ᠦᠭᠡᠢ ᠨᠣᠪᠰᠢ᠂ ᠵᠠ ᠪᠣᠯᠢᠶᠠ ᠭᠡᠯᠡ᠃ ᠪᠢ ᠡᠳᠦᠢ ᠲᠡᠳᠦᠢ ᠬᠣᠨᠵᠢᠭᠠᠳ ᠪᠠᠢᠬᠤ ᠳ᠋ᠤ᠌᠂ ᠨᠠᠮᠠ ᠶ᠋ᠢ ᠶᠠᠭᠠᠬᠢᠭᠠᠳ ᠠᠵᠢ ᠦᠭᠡᠢ ᠨᠠᠪᠰᠢ ᠭᠡᠳᠡᠭ ᠶᠤᠮ ᠭᠡᠵᠦ ᠵᠢᠭᠠᠬᠠᠨ ᠭᠠᠢᠬᠠᠯᠠ᠃
ᠲᠡᠭᠡᠭᠡᠳ ᠬᠣᠨᠵᠢᠭᠰᠠᠨ ᠶᠠᠭᠤᠮᠠ ᠪᠠᠨ ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠢᠷᠡᠯᠡ᠂ ᠭᠡᠷ ᠲᠦ᠍ ᠢᠷᠡᠲᠡᠯᠡ ᠡᠬᠡᠨᠡᠷ ᠮᠠᠨᠢ ᠡᠪᠡᠳᠴᠢᠨ ᠲᠡᠢ ᠦᠬᠦᠯᠡᠭᠦᠷ ᠲᠦ᠍ ᠬᠡᠪᠲᠡᠵᠦ ᠪᠠᠢᠪᠠ᠃ ᠪᠢ ᠡᠷᠭᠢᠭᠡᠳ ᠬᠤᠪᠢᠯᠭᠠᠨ ᠯᠠᠮᠠ ᠳ᠋ᠤ᠌ ᠣᠴᠢᠯᠠ᠃ ᠯᠠᠮᠠ ᠨᠡᠯᠢᠶᠡᠳ ᠰᠣᠭᠲᠣᠭᠤ ᠪᠠᠢᠪᠠ᠂ ᠪᠢ ᠡᠬᠡᠨᠡᠷ ᠮᠠᠨᠢ ᠡᠪᠡᠳᠴᠢᠨ ᠲᠡᠢ ᠦᠬᠦᠬᠦ ᠭᠡᠵᠦ ᠪᠠᠢᠨᠠ᠂ ᠯᠠᠮᠠ ᠮᠠᠨᠢ ᠠᠪᠤᠷᠠᠵᠤ ᠥᠷᠥᠰᠢᠶᠡ ᠭᠡᠵᠦ ᠭᠤᠶᠤᠯᠠ᠃ ᠯᠠᠮᠠ ᠡᠬᠡᠨᠡᠷ ᠴᠢᠨᠢ ᠦᠬᠦᠨᠡ ᠦᠬᠦᠨᠡ᠂ ᠴᠢ ᠲᠣᠯᠣᠭᠠᠢ ᠶ᠋ᠢᠨ ᠬᠢᠨ ᠬᠡᠷᠡᠭᠰᠡᠯ ᠢ᠋ ᠬᠠᠷᠠᠮᠯᠠᠭᠠᠳ ᠪᠠᠢᠬᠤ ᠴᠢᠨᠢ ᠭᠡᠰᠡᠨ ᠳ᠋ᠦ᠍ ᠪᠢ ᠵᠢᠭᠠᠬᠠᠨ ᠭᠣᠮᠣᠳᠠᠯᠠ᠃ ᠮᠠᠨ ᠤ᠋ ᠡᠬᠡᠨᠡᠷ ᠲᠦ᠍ ᠲᠣᠯᠣᠭᠠᠢ ᠶ᠋ᠢᠨ ᠬᠡᠷᠡᠭᠰᠡᠯ ᠨᠢ ᠭᠠᠢ ᠪᠣᠯᠤᠭᠠᠳ ᠪᠠᠢᠭᠰᠠᠨ ᠶᠤᠮ ᠪᠣᠯ ᠨᠠᠳᠠᠳᠤ ᠬᠡᠯᠡᠭᠡᠳ ᠠᠪᠴᠤ ᠪᠣᠯᠬᠤ ᠯᠠ ᠪᠠᠢᠭᠰᠠᠨ᠃ ᠮᠠᠨ ᠤ᠋ ᠡᠬᠡᠨᠡᠷ ᠦ᠋ᠨ ᠡᠪᠡᠳᠬᠦ ᠶ᠋ᠢ ᠨᠢ ᠮᠡᠳᠡᠭᠰᠡᠨ ᠶᠤᠮ ᠪᠣᠯ ᠨᠠᠳᠠ ᠤᠴᠢᠷ ᠢ᠋ ᠬᠡᠯᠡᠵᠦ ᠠᠷᠭᠠ ᠵᠠᠰᠠᠯ ᠬᠢᠵᠦ ᠥᠭᠴᠦ ᠪᠣᠯᠬᠤ ᠯᠠ ᠪᠠᠢᠭᠰᠠᠨ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠪᠢ ᠭᠡᠷ ᠲᠡᠭᠡᠨ ᠬᠠᠷᠢᠯᠠ᠃ ᠡᠬᠡᠨᠡᠷ ᠬᠠᠷᠢᠭᠤ ᠦᠭᠡᠢ ᠡᠪᠡᠳᠴᠢᠨ ᠲᠡᠢ ᠪᠣᠯᠬᠣᠷ ᠶᠠᠭᠠᠬᠢᠬᠤ ᠪᠢᠯᠡ ᠭᠡᠵᠦ ᠤᠴᠢᠷ ᠶᠠᠪᠤᠳᠠᠯ ᠶ᠋ᠢᠠᠨ ᠲᠣᠭᠠᠴᠠᠵᠤ᠂ ᠬᠥᠮᠦᠰ ᠡᠴᠡ ᠠᠰᠠᠭᠤᠯᠠ᠃ ᠯᠠᠮᠠ ᠲᠠᠢ ᠮᠥᠷᠥᠢ ᠲᠡᠢ ᠲᠣᠭᠯᠠᠭᠰᠠᠨ ᠢ᠋ᠶ᠋ᠠᠨ ᠴᠤ᠌ ᠬᠡᠯᠡᠯᠡ᠂ ᠪᠢ ᠳᠠᠬᠢᠭᠠᠳ ᠬᠤᠪᠢᠯᠭᠠᠨ ᠯᠠᠮᠠ ᠳ᠋ᠤ᠌ ᠣᠴᠢᠬᠤ ᠭᠡᠬᠦ ᠡᠴᠡ ᠨᠢᠭᠡ ᠯᠡ ᠳᠤᠷᠠ ᠦᠭᠡᠢ ᠬᠦᠷᠦᠭᠡᠳ ᠪᠠᠢᠨᠠ᠃
ᠲᠡᠭᠡᠭᠰᠡᠨ ᠨᠢᠭᠡ ᠨᠥᠬᠥᠷ ᠴᠢ ᠪᠡᠢᠰᠡ ᠶ᠋ᠢᠨ ᠬᠠᠴᠢᠨ ᠳ᠋ᠤ᠌ ᠣᠴᠢᠭᠠᠴᠢ᠃ ᠲᠡᠷᠡ ᠮᠡᠷᠭᠡᠨ ᠬᠥᠮᠦᠨ ᠰᠢᠦ ᠭᠡᠯᠡ᠃ ᠦᠭᠡᠢ ᠨᠠᠭᠤᠷ ᠠ᠋ᠴᠠ ᠪᠠᠷᠠᠭᠤᠨ ᠲᠠᠰᠢ ᠪᠠᠢᠰᠠ ᠶ᠋ᠢᠨ ᠬᠣᠰᠢᠭᠤ ᠭᠡᠵᠦ ᠪᠠᠢᠭᠰᠠᠨ ᠶᠤᠮ᠃ ᠲᠡᠷᠡ ᠬᠤᠰᠢᠭᠤᠨ ᠤ᠋ ᠬᠠᠴᠢᠨ ᠭᠡᠵᠦ ᠨᠢᠭᠡ ᠲᠥᠪᠡᠳ ᠯᠠᠮᠠ ᠪᠠᠢᠭᠰᠠᠨ ᠶᠤᠮ᠃ ᠪᠢ ᠲᠡᠭᠡᠭᠡᠳ ᠬᠥᠮᠦᠨ ᠡᠴᠡ ᠮᠣᠷᠢ ᠭᠤᠶᠤᠵᠤ ᠤᠨᠤᠭᠠᠳ᠂ ᠪᠠᠢᠰᠠ ᠶ᠋ᠢᠨ ᠬᠠᠴᠢᠨ ᠳ᠋ᠤ᠌ ᠡᠳᠦᠷ ᠦ᠋ᠨ ᠲᠤᠷᠰᠢ ᠶᠠᠪᠤᠵᠤ ᠣᠴᠢᠯᠠ᠃ ᠨᠡᠯᠢᠶᠡᠳ ᠬᠣᠯᠠ ᠭᠠᠵᠠᠷ ᠶᠤᠮ᠂ ᠣᠴᠢᠭᠰᠠᠨ ᠴᠢᠨᠢ ᠯᠠᠮᠠ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠣᠯᠠᠨ ᠬᠥᠮᠦᠨ ᠬᠦᠯᠢᠶᠡᠵᠡᠭᠡᠵᠦ ᠪᠠᠢᠨᠠ᠃ ᠣᠳᠣ ᠪᠠᠷ ᠪᠣᠯ ᠳᠠᠷᠠᠭᠠᠯᠠᠨ ᠰᠠᠭᠤᠵᠠᠭᠠᠵᠤ ᠪᠠᠢᠪᠠ᠃ ᠪᠢ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠬᠠᠴᠢᠨ ᠯᠠᠮᠠ ᠳ᠋ᠤ᠌ ᠣᠷᠣᠵᠤ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠡᠯᠡᠭᠡᠳ ᠥᠪᠡᠷ ᠦ᠋ᠨ ᠬᠤᠪᠢᠯᠭᠠᠨ ᠯᠠᠮᠠ ᠠ᠋ᠴᠠ ᠬᠣᠨᠵᠢᠭᠰᠠᠨ ᠨᠢᠭᠡ ᠶᠢᠩᠪᠦ ᠪᠡᠨ ᠪᠠᠷᠢᠵᠤ ᠠᠪᠤᠷᠠᠯ ᠠᠰᠠᠭᠤᠪᠠ᠃
ᠬᠠᠴᠢᠨ ᠱᠣᠣ ᠪᠠᠨ ᠨᠢᠭᠡ ᠣᠷᠬᠢᠵᠤ ᠦᠵᠡᠭᠡᠳ ᠶᠠᠮᠠᠷ ᠴᠤ᠌ ᠠᠷᠭᠠ ᠪᠠᠢᠬᠤ ᠦᠭᠡᠢ᠂ ᠦᠬᠦᠨᠡ ᠰᠢᠦ᠂ ᠦᠬᠦᠬᠦ ᠨᠠᠰᠤ ᠪᠣᠯᠤᠭᠰᠠᠨ ᠰᠢᠦ᠂ ᠬᠣᠷᠢ ᠬᠣᠨᠣᠭ ᠠ᠋ᠴᠠ ᠢᠯᠡᠭᠦᠦ ᠨᠠᠰᠤ ᠪᠠᠢᠬᠤ ᠦᠭᠡᠢ ᠰᠢᠦ ᠭᠡᠵᠦ ᠪᠠᠢᠨᠠ᠃ ᠪᠢ ᠠᠷᠭᠠᠯᠠᠵᠤ ᠠᠯᠢ ᠭᠡᠵᠦ ᠭᠤᠶᠤᠭᠰᠠᠨ ᠪᠣᠯᠪᠠᠴᠤ ᠶᠡᠷᠦ ᠠᠷᠭᠠᠯᠠᠵᠤ ᠥᠭᠭᠦᠭᠰᠡᠨ ᠦᠭᠡᠢ᠃ ᠪᠢ ᠰᠡᠩᠳᠡ ᠶᠢᠩᠬᠠᠨ ᠤ᠋ ᠭᠡᠷ ᠲᠦ᠍ ᠣᠷᠣᠵᠤ ᠴᠠᠢ ᠤᠤᠭᠤᠭᠠᠳ ᠪᠤᠴᠠᠬᠤ ᠪᠣᠯᠤᠯᠠ᠃ ᠶᠢᠩᠪᠤ ᠶ᠋ᠢ ᠨᠢᠭᠡᠨᠲᠡ ᠥᠭᠴᠢᠬᠡᠭᠰᠡᠨ ᠪᠣᠯᠬᠣᠷ ᠶᠠᠭᠠᠬᠢᠨᠠ ᠭᠡᠪᠡ᠃ ᠪᠤᠴᠠᠭᠠᠵᠤ ᠠᠪᠤᠯ ᠲᠠᠢ ᠪᠢᠰᠢ᠂ ᠠᠪᠤᠷᠠᠯ ᠴᠤ᠌ ᠦᠭᠡᠢ᠂ ᠶᠢᠩᠪᠦ ᠴᠦ᠍ ᠦᠭᠡᠢ᠂ ᠤᠷᠮᠠ ᠦᠭᠡᠢ ᠪᠤᠴᠠᠭᠠᠳ ᠱᠣᠭᠰᠢᠵᠤ ᠶᠠᠪᠤᠯᠠ᠃ ᠨᠤᠲᠤᠭ ᠲᠠᠭᠠᠨ ᠢᠷᠡᠭᠡᠳ᠂ ᠭᠡᠷ ᠲᠡᠭᠡᠨ ᠣᠢᠷᠠᠳᠴᠤ ᠶᠠᠪᠤᠲᠠᠯᠠ ᠨᠢᠭᠡ ᠬᠦᠷᠡᠩ ᠮᠣᠷᠢ ᠲᠠᠢ ᠰᠣᠭᠲᠣᠭᠤ ᠯᠠᠮᠠ ᠳᠠᠪᠬᠢᠵᠤ ᠶᠠᠪᠤᠭᠠ ᠬᠠᠷᠠᠭᠳᠠᠯᠠ᠃ ᠲᠡᠷᠡ ᠯᠠᠮᠠ ᠶ᠋ᠢ ᠬᠠᠷᠠᠬᠤ ᠳ᠋ᠤ᠌ ᠮᠠᠨ ᠤ᠋ ᠬᠤᠪᠢᠯᠭᠠᠨ ᠯᠠᠮᠠ ᠮᠥᠨ ᠰᠢᠭ᠌ ᠬᠠᠷᠠᠭᠳᠠᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠰᠣᠭᠲᠣᠭᠤ᠂ ᠳᠣᠪᠣ ᠳᠠᠪᠠᠭᠠᠳ ᠲᠠᠯᠲᠠᠷᠢᠯᠠ᠂ ᠬᠣᠢᠨᠠ ᠠ᠋ᠴᠠ ᠨᠢ ᠬᠥᠭᠡᠭᠡᠳ ᠳᠣᠪᠣ ᠳᠡᠭᠡᠷᠡ ᠭᠠᠷᠤᠭᠠᠳ ᠢᠷᠡᠲᠡᠯᠡ᠂ ᠯᠠᠮᠠ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ ᠪᠡᠶᠡ ᠵᠠᠰᠠᠭᠠᠳ ᠰᠠᠭᠤᠵᠤ ᠪᠠᠢᠪᠠ᠂ ᠪᠢ ᠬᠦᠷᠦᠭᠡᠳ ᠣᠴᠢᠲᠠᠯᠠ᠂ ᠮᠠᠨ ᠤ᠋ ᠬᠤᠪᠢᠯᠭᠠᠨ ᠯᠠᠮᠠ ᠮᠥᠨ ᠪᠠᠢᠨᠠ᠂ ᠨᠡᠯᠢᠶᠡᠳ ᠰᠣᠭᠲᠣᠭᠤ ᠪᠠᠢᠨᠠ᠃ ᠴᠢ ᠬᠠᠮᠢᠭᠠ ᠣᠴᠢᠭᠠᠳ ᠢᠷᠡᠪᠡ ᠭᠡᠳ ᠨᠠᠳᠠ ᠠ᠋ᠴᠠ ᠠᠰᠠᠭᠤᠵᠤ ᠪᠠᠢᠨᠠ᠂ ᠪᠢ ᠴᠦ᠍ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠯᠡ ᠳ᠋ᠠ᠂ ᠡᠬᠡᠨᠡᠷ ᠲᠡᠭᠡᠨ ᠠᠪᠤᠷᠠᠯ ᠢᠷᠡᠵᠦ ᠪᠠᠢᠰᠠ ᠶ᠋ᠢᠨ ᠬᠠᠴᠢᠨ ᠳ᠋ᠤ᠌ ᠣᠴᠢᠯᠠ ᠭᠡᠰᠡᠨ ᠳ᠋ᠦ᠍ ᠯᠠᠮᠠ ᠶᠠᠭᠤ ᠭᠡᠵᠦ ᠪᠠᠢᠨᠠ ᠲᠡᠭᠡᠭᠡᠳ ᠭᠡᠵᠦ ᠰᠢᠷᠦᠭᠦᠬᠡᠨ ᠠᠰᠠᠭᠤᠯᠠ᠃
ᠠ᠂ ᠯᠠᠮᠠ ᠮᠢᠨᠢ ᠡᠬᠡᠨᠡᠷ ᠴᠢᠨᠢ ᠦᠬᠦᠨᠡ ᠠᠷᠭᠠ ᠪᠠᠢᠬᠤ ᠦᠭᠡᠢ ᠭᠡᠵᠦ ᠠᠢᠯᠠᠳᠴᠤ ᠪᠠᠢᠨᠠ ᠭᠡᠪᠡ᠃ ᠲᠡᠭᠡᠭᠡᠳ ᠴᠢᠨᠢ ᠯᠠᠮᠠ ᠪᠢ ᠲᠡᠭᠡᠪᠡᠯ ᠦᠬᠦᠬᠦ ᠦᠭᠡᠢ ᠭᠡᠵᠦ ᠬᠡᠯᠡᠵᠦ ᠪᠠᠢᠨᠠ᠂ ᠦᠬᠦᠬᠦ ᠦᠭᠡᠢ ᠬᠦ ᠭᠡᠯᠡ᠂ ᠪᠢ ᠴᠦ᠍ ᠯᠠᠮᠠ ᠳ᠋ᠤ᠌ ᠡᠷᠭᠦᠬᠦ ᠪᠠᠷᠢᠬᠤ ᠶᠠᠭᠤᠮᠠ ᠴᠤ᠌ ᠪᠠᠢᠭᠰᠠᠨ ᠦᠭᠡᠢ᠂ ᠯᠠᠮᠠ ᠮᠢᠨᠢ ᠠᠪᠤᠷᠠᠵᠤ ᠬᠠᠢᠷᠠᠯᠠ ᠭᠡᠵᠦ ᠲᠡᠢᠮᠦ ᠯᠡ ᠭᠤᠶᠤᠯᠠ᠃ ᠲᠡᠭᠡᠭᠡᠳ ᠭᠡᠷ ᠲᠦ᠍ ᠢᠷᠡᠭᠰᠡᠨ ᠴᠢᠨᠢ ᠡᠬᠡᠨᠡᠷ ᠮᠠᠨᠢ ᠠᠷᠭᠠ ᠦᠭᠡᠢ ᠮᠠᠭᠤ ᠪᠠᠢᠨᠠ ᠳ᠋ᠠ᠂ ᠪᠢ ᠠᠷᠠᠴᠢᠯᠠᠵᠤ ᠰᠤᠪᠢᠯᠠᠵᠤ ᠯᠠ ᠪᠠᠢᠯᠠ᠃ ᠡᠬᠡᠨᠡᠷ ᠮᠠᠭᠤᠳᠠᠨ ᠮᠠᠭᠤᠳᠠᠭᠰᠠᠭᠠᠷ ᠬᠣᠷᠢ ᠬᠣᠨᠣᠯᠠ᠃ ᠥᠨᠥ ᠰᠥᠨᠢ ᠯᠡ ᠦᠬᠦᠬᠦ ᠶᠤᠮ ᠪᠠᠢᠬᠤ ᠳ᠋ᠠ ᠭᠡᠵᠦ ᠪᠠᠢᠭᠰᠠᠨ᠂ ᠲᠡᠭᠡᠲᠡᠯᠡ ᠰᠥᠨᠢ ᠮᠡᠨᠳᠦ ᠬᠣᠨᠣᠴᠢᠬᠠᠯᠠ᠂ ᠮᠠᠷᠭᠠᠰᠢ ᠠ᠋ᠴᠠ ᠨᠢ ᠡᠬᠢᠯᠡᠭᠡᠳ ᠪᠡᠶᠡ ᠨᠢ ᠳᠡᠭᠡᠷᠡᠳᠡᠵᠦ ᠡᠬᠢᠯᠡᠯᠡ᠃ ᠠᠷᠪᠠ ᠬᠣᠨᠣᠬᠤ ᠳ᠋ᠤ᠌ ᠡᠬᠡᠨᠡᠷ ᠮᠠᠨᠢ ᠪᠦᠷ ᠵᠦᠭᠡᠷ ᠪᠣᠯᠴᠢᠬᠠᠯᠠ᠂ ᠲᠡᠭᠡᠭᠰᠡᠨ ᠴᠢᠨᠢ ᠨᠠᠳᠠ ᠨᠢᠭᠡ ᠬᠥᠮᠦᠨ ᠬᠡᠯᠡᠭᠡᠳ ᠪᠠᠢᠬᠤ ᠶᠤᠮ᠃ ᠪᠠᠢᠰᠠ ᠶ᠋ᠢᠨ ᠬᠠᠴᠢᠨ ᠳ᠋ᠤ᠌ ᠣᠴᠢᠵᠤ ᠶᠢᠩᠪᠦ ᠪᠡᠨ ᠨᠡᠬᠡ᠂ ᠡᠬᠡᠨᠡᠷ ᠢ᠋ᠶ᠋ᠡᠨ ᠡᠳᠡᠭᠡᠭᠰᠡᠨ ᠢ᠋ ᠬᠡᠯᠡ᠂ ᠶᠠᠭᠤ ᠬᠢᠨ ᠳᠣᠭᠣᠭᠢᠯᠠ ᠭᠡᠳᠡᠭ ᠶᠤᠮ ᠪᠠᠢᠨᠠ᠃ ᠪᠢ ᠲᠡᠭᠡᠬᠦᠯᠡᠷ ᠨᠢ ᠬᠦᠢᠰ ᠨᠡᠭᠡᠷᠡᠨ ᠲᠡᠭᠡᠶᠡ ᠪᠠᠢᠵᠠ ᠭᠡᠵᠦ ᠪᠣᠳᠣᠭᠠᠳ᠂ ᠪᠠᠰᠠ ᠯᠠ ᠨᠢᠭᠡ ᠮᠣᠷᠢ ᠬᠥᠮᠦᠨ ᠡᠴᠡ ᠭᠤᠶᠤᠵᠤ ᠤᠨᠤᠭᠠᠳ ᠶᠠᠪᠤᠯᠠ᠃ ᠤᠨᠤᠬᠤ ᠤᠨᠤᠭᠠ ᠦᠭᠡᠢ ᠬᠥᠮᠦᠨ ᠪᠠᠰᠠ ᠬᠡᠴᠡᠭᠦᠦ ᠪᠠᠢᠳᠠᠭ ᠶᠤᠮ ᠰᠢᠦ᠂ ᠪᠠᠰᠠ ᠯᠠ ᠪᠠᠢᠰᠠ ᠶ᠋ᠢᠨ ᠬᠠᠴᠢᠨ ᠳ᠋ᠤ᠌ ᠱᠣᠭᠰᠢᠵᠤ ᠣᠴᠢᠪᠠ᠃ ᠮᠥᠨ ᠯᠡ ᠣᠯᠠᠨ ᠬᠥᠮᠦᠨ ᠬᠦᠯᠢᠶᠡᠵᠦ ᠪᠠᠢᠨᠠ᠂ ᠪᠢ ᠴᠦ᠍ ᠬᠦᠯᠢᠶᠡᠵᠦ ᠪᠠᠢᠭᠠᠳ ᠬᠠᠴᠢᠨ ᠳ᠋ᠤ᠌ ᠪᠠᠷᠠᠭᠠᠳᠠᠬᠤ ᠳ᠋ᠠᠭᠠᠨ ᠬᠠᠴᠢᠨ ᠯᠠᠮᠠ ᠨᠠᠮᠠ ᠶ᠋ᠢ ᠲᠠᠨᠢᠵᠤ ᠪᠠᠢᠨᠠ᠃
ᠵᠠ ᠡᠬᠡᠨᠡᠷ ᠴᠢᠨᠢ ᠶᠠᠭᠠᠬᠢᠭᠰᠠᠨ᠂ ᠥᠩᠭᠡᠷᠡᠴᠢᠬᠡᠭᠰᠡᠨ ᠤᠤ ᠭᠡᠵᠦ ᠪᠠᠢᠨᠠ᠂ ᠦᠭᠡᠢ ᠠᠮᠢᠳᠤ᠂ ᠪᠦᠷ ᠡᠳᠡᠭᠡᠴᠢᠬᠡᠭᠡᠳ ᠪᠠᠢᠭᠠ ᠭᠡᠵᠦ ᠪᠢ ᠬᠡᠯᠡᠯᠡ᠃ ᠶᠠᠭᠠᠬᠢᠭᠰᠠᠨ ᠬᠠᠴᠢᠨ ᠶᠠᠭᠤᠮᠠ ᠭᠡᠵᠦ ᠱᠣᠣ ᠪᠠᠨ ᠨᠢᠭᠡ ᠣᠷᠬᠢᠵᠤ ᠦᠵᠡᠭᠡᠳ᠂ ᠲᠠ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠨᠢᠭᠡ ᠪᠤᠷᠬᠠᠨ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠵᠠᠢ᠃ ᠥ᠂ ᠲᠡᠷᠡ ᠯᠠᠮᠠ ᠲᠠᠨ ᠤ᠋ ᠡᠬᠡᠨᠡᠷ ᠲᠦ᠍ ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠨᠠᠰᠤ ᠥᠭᠭᠦᠭᠰᠡᠨ ᠰᠢᠦ ᠭᠡᠯᠡ᠃ ᠨᠠᠮᠠ ᠶ᠋ᠢ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠬᠤᠪᠢᠯᠭᠠᠨ ᠯᠠᠮᠠ ᠲᠠᠢ ᠠᠭᠤᠯᠵᠠᠭᠰᠠᠨ ᠢ᠋ ᠲᠡᠷᠡ ᠮᠡᠳᠡᠵᠦ ᠪᠠᠢᠨᠠ᠂ ᠪᠢ ᠲᠡᠭᠡᠬᠦᠯᠡᠷ ᠶᠢᠩᠪᠦ ᠪᠡᠨ ᠨᠡᠬᠡᠭᠰᠡᠨ ᠴᠦ᠍ ᠦᠭᠡᠢ ᠬᠠᠷᠢᠵᠤ ᠢᠷᠡᠯᠡ᠃ ᠡᠬᠡᠨᠡᠷ ᠮᠠᠨᠢ ᠲᠡᠭᠦᠨ ᠡᠴᠡ ᠬᠣᠢᠰᠢ ᠡᠷᠡᠭᠦᠯ ᠡᠩᠬᠡ ᠰᠠᠢᠨ ᠶᠠᠪᠤᠵᠤ ᠪᠠᠢᠭᠠᠳ ᠵᠢᠷᠭᠤᠭᠠᠨ ᠵᠢᠯ ᠪᠣᠯᠤᠭᠠᠳ ᠨᠠᠰᠤ ᠪᠠᠷᠠᠭᠰᠠᠨ ᠳ᠋ᠠ᠃
ᠡᠭᠦᠨ ᠡᠴᠡ ᠬᠣᠢᠰᠢ ᠪᠢ ᠲᠡᠷᠡ ᠬᠤᠪᠢᠯᠭᠠᠨ᠂ ᠬᠠᠴᠢᠨ ᠯᠠᠮᠠ ᠬᠣᠶᠠᠷ ᠢ᠋ ᠮᠡᠷᠭᠡᠨ ᠤᠯᠤᠰ ᠶᠤᠮ ᠭᠡᠵᠦ ᠢᠲᠡᠭᠡᠳᠡᠭ ᠪᠣᠯᠤᠭᠰᠠᠨ ᠶᠤᠮ ᠳ᠋ᠠ ᠭᠡᠵᠦ ᠶᠠᠷᠢᠭᠰᠠᠨ ᠶᠤᠮ᠃
1975 ᠣᠨ ᠤ᠋ ᠬᠣᠶᠠᠷ ᠰᠠᠷᠠ ᠶ᠋ᠢᠨ ᠭᠤᠷᠪᠠᠨ ᠭᠠᠳᠠᠮ ᠤ᠋ᠨ ᠶᠠᠷᠢᠶᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠠᠯᠲᠠᠨᠴᠢᠮᠡᠭ
ᠦᠰᠦᠭ ᠬᠠᠳᠠᠭᠴᠢ᠄ ᠠᠯᠲᠠᠨᠴᠢᠮᠡᠭ