ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠲᠠᠷᠭᠤᠨ ᠴᠠᠭᠠᠨ ᠤᠬᠤᠨᠠ ᠲᠠᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ Гураван настай гунаган улаан баатар - Тарган цагаан ухнатай өвгөн эмгэн хоёр
154ᠲᠠᠷᠭᠤᠨ ᠴᠠᠭᠠᠨ ᠤᠬᠤᠨᠠ ᠲᠠᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ
ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍᠂ ᠪᠤᠯᠠᠭ ᠮᠥᠷᠡᠨ ᠦ᠌ ᠵᠠᠬᠠ ᠳᠡᠭᠡᠷᠡ᠂ ᠪᠤᠭᠤᠷᠤᠯ ᠠᠪᠤ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠨᠤᠲᠤᠭ ᠳᠡᠭᠡᠷᠡ᠂ ᠥᠨᠳᠡᠭᠡᠨ ᠴᠠᠭᠠᠨ ᠭᠡᠷ ᠲᠡᠢ᠂ ᠲᠠᠷᠭᠤᠨ ᠴᠠᠭᠠᠨ ᠤᠬᠤᠨᠠ ᠲᠠᠢ ᠳᠣᠯᠣᠭᠠᠨ ᠡᠮᠡ ᠢᠮᠠᠭᠠ ᠲᠠᠢ᠂ ᠠᠢᠯ ᠭᠡᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠠᠮᠢᠳᠤᠷᠠᠵᠤ᠂ ᠠᠵᠤ ᠲᠥᠷᠥᠨ ᠰᠠᠭᠤᠬᠤ ᠳ᠋ᠠᠭᠠᠨ ᠣᠨ ᠢᠷᠡᠬᠦ ᠳᠣᠳᠣᠮ ᠣᠯᠠᠰᠢᠷᠠᠭᠤᠯᠵᠤ᠂ ᠵᠢᠯ ᠢᠷᠡᠬᠦ ᠳᠣᠳᠣᠮ ᠳᠡᠭᠡᠭᠰᠢᠯᠡᠭᠦᠯᠵᠦ ᠪᠠᠢᠳᠠᠭ ᠭᠡᠨᠡ᠃
ᠡᠪᠦᠭᠡᠨ ᠡᠳᠦᠷ ᠪᠦᠷᠢ ᠢᠮᠠᠭᠠ ᠪᠠᠨ ᠬᠠᠷᠢᠭᠤᠯᠵᠤ ᠶᠠᠪᠤᠬᠤ ᠳ᠋ᠠᠭᠠᠨ ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠲᠦ᠍᠂ ᠪᠤᠯᠠᠭ ᠮᠥᠷᠡᠨ ᠦ᠌ ᠵᠠᠬᠠ ᠪᠠᠷ ᠰᠣᠷᠭᠣᠭ ᠰᠠᠢᠬᠠᠨ ᠪᠡᠯᠴᠢᠭᠡᠷ ᠲᠡᠢ᠂ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠤᠰᠤ ᠲᠠᠢ᠂ ᠠᠪᠤ ᠳᠡᠭᠡᠳᠦᠰ ᠦ᠋ᠨ ᠨᠤᠲᠤᠭ ᠭᠡᠵᠦ ᠰᠡᠳᠬᠢᠯ ᠳᠣᠲᠣᠷᠠ ᠪᠠᠨ ᠪᠠᠬᠠᠷᠴᠤ ᠬᠡᠯᠡᠳᠡᠭ ᠨᠢ᠄《ᠠᠭᠤᠯᠠ ᠶ᠋ᠢ ᠪᠦᠷᠢᠨ ᠴᠢᠮᠡᠭᠯᠡᠭᠰᠡᠨ ᠠᠭᠠᠷᠤ ᠽᠠᠨᠳᠠᠨ ᠮᠣᠳᠣ ᠲᠠᠢ᠂ ᠠᠭᠤᠵᠢᠮ ᠲᠠᠯᠠ ᠳ᠋ᠤᠨᠢ ᠤᠷᠭᠤᠭᠰᠠᠨ ᠠᠲᠠᠷ ᠰᠠᠢᠬᠠᠨ ᠪᠡᠯᠴᠢᠭᠡᠷ ᠲᠡᠢ᠂ ᠠᠷᠠᠯ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠳ᠋ᠦ᠍ᠨᠢ ᠠᠷᠪᠠᠨ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠳᠡᠯᠭᠡᠷᠡᠭᠰᠡᠨ᠂ ᠠᠯᠤᠰ ᠬᠣᠯᠠ ᠶ᠋ᠢᠨ ᠳᠥᠷᠪᠡᠨ ᠵᠦᠭ ᠲᠦ᠍ ᠴᠡᠩᠬᠡᠷ ᠵᠡᠷᠭᠡᠯᠭᠡᠨ ᠲᠠᠲᠠᠵᠤ᠂ ᠵᠤᠨ ᠤ᠋ ᠳᠥᠷᠪᠡᠨ ᠰᠠᠷᠠ ᠪᠣᠯᠬᠤ ᠳ᠋ᠤ᠌ ᠵᠢᠭᠦᠷᠲᠡᠨ ᠰᠢᠪᠠᠭᠤᠳ ᠵᠢᠷᠭᠢᠯᠳᠡᠨ᠂ ᠴᠢᠬᠢᠨ ᠦ᠌ ᠴᠢᠮᠡᠭ ᠪᠣᠯᠳᠠᠭ》 ᠭᠡᠵᠦ᠂ ᠠᠭᠤᠯᠠ ᠣᠷᠣᠨ ᠢ᠋ᠶ᠋ᠠᠨ ᠮᠠᠭᠲᠠᠵᠤ᠂ ᠵᠤᠨ ᠤ᠋ ᠤᠯᠠᠷᠢᠯ ᠢ᠋ ᠤᠭᠲᠤᠵᠤ᠂ ᠡᠪᠦᠭᠡᠨ ᠰᠡᠳᠬᠢᠯ ᠳᠦᠭᠦᠷᠡᠩ ᠪᠠᠶᠠᠷᠲᠠᠢ ᠶᠠᠪᠤᠳᠠᠭ ᠪᠠᠢᠨᠠ᠃ ᠡᠮᠡᠭᠡᠨ ᠡᠳᠦᠷ ᠪᠦᠷᠢ ᠭᠡᠷ ᠲᠡᠭᠡᠨ ᠰᠦ ᠰᠠᠭᠠᠯᠢ ᠪᠠᠨ ᠰᠠᠭᠠᠵᠤ᠂ ᠬᠤᠷᠤᠳ ᠥᠷᠥᠮᠡ ᠪᠡᠨ ᠭᠠᠷᠭᠠᠵᠤ᠂ ᠤᠯᠠᠭᠠᠨ ᠴᠠᠢ ᠪᠠᠨ ᠴᠢᠨᠠᠵᠤ᠂ ᠠᠢᠯ ᠭᠡᠷ ᠢ᠋ᠶ᠋ᠡᠨ ᠠᠯᠳᠠᠷᠠᠭᠤᠯᠬᠤ ᠦᠭᠡᠢ᠂ ᠠᠮᠢᠳᠤᠷᠠᠯᠭᠠ ᠪᠠᠨ ᠬᠡᠯᠲᠡᠢᠯᠭᠡᠬᠦ ᠦᠭᠡᠢ ᠬᠢᠳᠡᠭ ᠭᠡᠨᠡ᠃
ᠵᠠ! ᠨᠢᠭᠡᠨ ᠡᠳᠦᠷ ᠡᠪᠦᠭᠡᠨ ᠢᠮᠠᠭᠠ ᠪᠠᠨ ᠬᠠᠷᠢᠭᠤᠯᠵᠤ ᠠᠭᠤᠯᠠᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠵᠡᠭᠦᠨ ᠡᠴᠡ ᠬᠠᠷᠠ ᠡᠭᠦᠯᠡ ᠳᠡᠭᠳᠡᠵᠦ᠂ ᠬᠠᠷᠠᠩᠭᠤᠢ ᠰᠠᠯᠬᠢᠨ ᠭᠠᠷᠴᠤ᠂ ᠪᠣᠷᠣᠭᠠᠨ ᠣᠷᠣᠬᠤ ᠰᠢᠭ᠋ ᠪᠣᠯᠪᠠ᠃ ᠡᠪᠦᠭᠡᠨ ᠰᠠᠨᠳᠤᠷᠴᠤ᠂ ᠢᠮᠠᠭᠠ ᠪᠠᠨ ᠬᠥᠭᠡᠭᠡᠵᠦ ᠠᠭᠤᠯᠠ ᠶ᠋ᠢᠨ ᠡᠩᠭᠡᠷ ᠨᠥᠮᠦᠷᠢᠲᠡᠢ ᠭᠠᠵᠠᠷ ᠣᠷᠣᠪᠠ᠃ ᠤᠷᠭᠤᠮᠠᠯ ᠮᠣᠳᠣᠨ ᠭᠤᠢᠪᠢᠯᠵᠠᠭᠰᠠᠨ᠂ ᠬᠣᠭ ᠰᠢᠷᠣᠢ ᠳᠡᠭᠳᠡᠭᠰᠡᠨ ᠬᠠᠷᠠᠩᠭᠤᠢ ᠲᠣᠭᠣᠰᠣᠨ ᠣ ᠳᠤᠮᠳᠠ᠂ ᠭᠡᠨᠡᠳᠲᠡ ᠡᠪᠦᠭᠡᠨ ᠦ᠌ ᠵᠡᠭᠦᠨ ᠨᠢᠳᠦᠨ ᠳ᠋ᠦ᠍ ᠨᠢᠭᠡᠨ ᠪᠠᠭᠠ ᠶᠠᠭᠤᠮᠠ ᠬᠡᠢᠰᠴᠦ ᠣᠷᠣᠭᠰᠠᠨ ᠳ᠋ᠤ᠌᠂ ᠭᠠᠢ ᠲᠠᠢ ᠰᠠᠯᠬᠢᠨ ᠭᠠᠢ ᠪᠣᠯᠪᠠ᠂ ᠲᠣᠢᠳ ᠲᠠᠢ ᠰᠠᠯᠬᠢᠨ ᠲᠣᠢᠳ ᠪᠣᠯᠪᠠ ᠭᠡᠵᠦ ᠠᠭᠤᠷ ᠬᠦᠷᠴᠦ ᠪᠠᠢᠲᠠᠯᠠ ᠰᠠᠯᠬᠢᠨ ᠵᠣᠭᠰᠣᠵᠤ ᠶᠡᠬᠡ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠣᠷᠣᠭᠰᠠᠨ ᠳ᠋ᠤ᠌ ᠡᠪᠦᠭᠡᠨ ᠨᠣᠷᠬᠤ ᠠ᠋ᠴᠠ ᠠᠶᠤᠭᠠᠳ᠂ ᠲᠠᠷᠭᠤᠨ ᠴᠠᠭᠠᠨ ᠤᠬᠤᠨᠠ ᠶ᠋ᠢᠨ ᠰᠠᠬᠠᠯ ᠤ᠋ᠨ ᠳᠣᠣᠷᠠ ᠰᠠᠭᠤᠭᠠᠳ᠂ ᠪᠣᠷᠣᠭᠠᠨ ᠳ᠋ᠤ᠌ ᠨᠢᠭᠡᠴᠤ ᠨᠣᠷᠤᠭᠰᠠᠨ ᠦᠭᠡᠢ ᠭᠡᠨᠡ᠃
ᠪᠣᠷᠣᠭᠠᠨ ᠠᠷᠢᠯᠤᠭᠰᠠᠨ ᠤ᠋ ᠬᠣᠢᠨᠠ᠂ ᠢᠮᠠᠭᠠ ᠪᠠᠨ ᠬᠥᠭᠡᠭᠡᠵᠦ ᠭᠡᠷ ᠲᠡᠭᠡᠨ ᠬᠦᠷᠦᠭᠰᠡᠨ ᠦ᠌ ᠬᠣᠢᠨᠠ᠂ ᠡᠮᠡᠭᠡᠨ ᠦ᠌ ᠪᠡᠯᠡᠳᠬᠡᠭᠰᠡᠨ ᠤᠯᠠᠭᠠᠨ ᠴᠠᠢ ᠶ᠋ᠢ ᠤᠤᠭᠤᠭᠰᠠᠭᠠᠷ ᠡᠮᠡᠭᠡᠨ ᠳ᠋ᠡᠭᠡᠨ᠄《ᠡᠨᠡ ᠡᠳᠦᠷ ᠶᠡᠬᠡ ᠰᠠᠯᠬᠢᠨ ᠭᠠᠷᠴᠤ᠂ ᠠᠭᠤᠯᠠᠨ ᠤ᠋ ᠬᠣᠭ ᠰᠢᠷᠣᠢ ᠬᠥᠳᠡᠯᠦᠭᠡᠳ ᠮᠢᠨᠦ ᠵᠡᠭᠦᠨ ᠨᠢᠳᠦᠨ ᠳ᠋ᠦ᠍ ᠨᠢᠭᠡᠨ ᠪᠠᠭᠠ ᠶᠠᠭᠤᠮᠠ ᠣᠷᠣᠴᠢᠬᠠᠪᠠ᠃》 ᠭᠡᠰᠡᠨ ᠳ᠋ᠦ᠍ ᠡᠮᠡᠭᠡᠨ ᠨᠢ ᠠᠪᠴᠤ ᠥᠭᠭᠦᠶᠡ ᠭᠡᠪᠡ᠃ ᠡᠮᠡᠭᠡᠨ ᠨᠢ ᠦᠵᠡᠭᠡᠳ᠂ ᠪᠠᠭᠠ ᠣᠩᠭᠣᠴᠠᠨ ᠳ᠋ᠤ᠌ ᠰᠠᠭᠤᠭᠠᠳ ᠬᠠᠭᠠᠰ ᠴᠠᠭ ᠪᠣᠯᠵᠤ᠂ ᠡᠪᠦᠭᠡᠨ ᠦ᠌ ᠨᠢᠳᠦᠨ ᠡᠴᠡ ᠨᠢᠭᠡᠨ ᠦᠬᠡᠷ ᠦ᠋ᠨ ᠳᠠᠯᠤ ᠶ᠋ᠢᠨ ᠶᠠᠰᠤ ᠶ᠋ᠢ ᠠᠷᠠᠢ ᠴᠢᠷᠠᠢ ᠠᠪᠴᠤ ᠭᠠᠷᠭᠠᠵᠠᠢ᠃
ᠲᠡᠷᠡ ᠦᠶᠡ ᠳ᠋ᠦ᠍ ᠡᠪᠦᠭᠡᠨ ᠦ᠌ ᠨᠢᠳᠦ ᠡᠪᠡᠳᠬᠦ ᠦᠭᠡᠢ ᠪᠣᠯᠵᠤ᠂ ᠡᠪᠦᠭᠡᠨ ᠪᠦᠳᠦᠭᠦᠨ ᠬᠦᠷᠡᠩ ᠪᠤᠬᠠ ᠪᠠᠷ ᠢ᠋ᠶ᠋ᠠᠨ ᠳᠠᠯᠤ ᠶ᠋ᠢᠨ ᠶᠠᠰᠤ ᠶ᠋ᠢ ᠴᠢᠷᠦᠭᠦᠯᠵᠦ ᠭᠡᠷ ᠡᠴᠡ ᠪᠡᠨ ᠡᠮᠦᠨᠡ ᠠᠪᠠᠴᠢᠭᠠᠳ ᠬᠠᠶᠠᠭᠰᠠᠨ ᠭᠡᠨᠡ᠃
ᠨᠢᠭᠡᠨ ᠡᠳᠦᠷ ᠨᠢᠭᠡ ᠬᠠᠷᠠ ᠬᠡᠷᠢᠶᠡ ᠨᠢᠰᠴᠦ ᠢᠷᠡᠭᠡᠳ ᠲᠡᠷᠡ ᠳᠠᠯᠤ ᠶ᠋ᠢᠨ ᠶᠠᠰᠤ ᠶ᠋ᠢ ᠵᠠᠭᠤᠵᠤ ᠠᠪᠠᠴᠢᠭᠠᠳ ᠨᠡᠯᠢᠶᠡᠳ ᠵᠠᠢᠲᠠᠢ ᠬᠠᠶᠠᠴᠢᠬᠠᠵᠠᠢ ᠭᠡᠨᠡ᠃
ᠡᠭᠦᠨ ᠡᠴᠡ ᠬᠣᠢᠰᠢ ᠬᠡᠳᠦᠨ ᠵᠢᠯ ᠪᠣᠯᠵᠤ ᠬᠣᠭ ᠰᠢᠷᠣᠢ ᠴᠤᠭᠯᠠᠭᠰᠠᠭᠠᠷ ᠨᠢᠭᠡᠨ ᠪᠠᠭᠠ ᠳᠣᠪᠣ ᠪᠣᠯᠵᠠᠢ᠃
ᠵᠠ! ᠨᠢᠭᠡᠨ ᠡᠳᠦᠷ ᠵᠡᠭᠦᠨ ᠭᠤᠷᠪᠠᠨ ᠵᠦᠭ ᠡᠴᠡ ᠵᠦᠭ ᠮᠠᠭᠤ ᠶ᠋ᠢᠨ ᠣᠷᠣᠨ ᠠ᠋ᠴᠠ ᠣᠩᠭᠣᠯ ᠴᠣᠩᠭᠤᠯ ᠭᠠᠵᠠᠷ ᠠ᠋ᠴᠠ ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠢᠷᠡᠨᠡ ᠭᠡᠵᠦ ᠰᠣᠨᠣᠰᠳᠠᠪᠠ ᠭᠡᠨᠡ᠃
ᠵᠠ! ᠬᠡᠳᠦᠨ ᠡᠳᠦᠷ ᠪᠣᠯᠤᠭᠰᠠᠨ ᠳ᠋ᠤ᠌᠂ ᠨᠢᠭᠡᠨ ᠡᠳᠦᠷ ᠰᠡᠷ ᠰᠡᠷ ᠰᠠᠯᠬᠢᠯᠠᠭᠰᠠᠭᠠᠷ᠂ ᠰᠡᠷᠢᠭᠦᠨ ᠪᠣᠷᠣᠭᠠᠨ ᠣᠷᠣᠭᠰᠠᠭᠠᠷ᠂ ᠦᠮᠡᠬᠡᠢ ᠰᠦᠮᠡᠬᠡᠢ ᠦᠨᠦᠷᠲᠦᠭᠰᠡᠭᠡᠷ᠂ ᠦᠵᠡᠯ ᠮᠠᠭᠤ ᠲᠠᠢ ᠠᠮᠢᠲᠠᠨ ᠨᠤᠭᠤᠳ ᠨᠠᠷᠢᠨ ᠵᠠᠮ ᠢ᠋ᠶ᠋ᠠᠷ ᠴᠤᠪᠤᠷᠠᠵᠤ ᠶᠠᠭ ᠲᠡᠷᠡ ᠲᠠᠯᠤᠨ ᠶᠠᠰᠤᠨ ᠳᠣᠪᠣ ᠳᠡᠭᠡᠷᠡ ᠴᠠᠴᠠᠷ ᠮᠠᠢᠬᠠᠨ ᠪᠤᠰᠬᠠᠵᠤ ᠲᠠᠯᠪᠢᠭᠠᠳ ᠴᠡᠷᠢᠭ ᠪᠠᠭᠤᠪᠠ᠃
ᠬᠥᠭᠰᠢᠨ ᠵᠠᠯᠠᠭᠤ ᠬᠡᠯᠡᠯᠴᠡᠭᠡᠨ ᠪᠣᠯᠵᠤ᠂ ᠬᠣᠲᠠᠨ ᠤ᠋ ᠨᠣᠬᠠᠢ ᠬᠣᠷᠭᠣᠭᠣᠵᠤ ᠪᠠᠢᠲᠠᠯᠠ᠂ ᠲᠠᠷᠭᠤᠨ ᠴᠠᠭᠠᠨ ᠤᠬᠤᠨᠠ ᠲᠠᠢ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠤ᠋ᠨ ᠬᠣᠲᠠᠴᠢ ᠰᠢᠷᠠ ᠨᠣᠬᠠᠢ ᠨᠢ ᠰᠢᠭᠤᠳ ᠰᠢᠩᠰᠢᠨ ᠶᠠᠪᠤᠭᠰᠠᠭᠠᠷ ᠳᠠᠯᠤ ᠶ᠋ᠢᠨ ᠳᠣᠪᠣᠭ ᠢ᠋ ᠲᠣᠭᠣᠷᠢᠨ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠬᠣᠭ ᠰᠢᠷᠣᠢ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠳᠠᠯᠤ ᠶ᠋ᠢᠨ ᠶᠠᠰᠤᠨ ᠤ᠋ ᠨᠢᠭᠡᠨ ᠥᠨᠴᠥᠭ ᠦᠵᠡᠭᠳᠡᠭᠰᠡᠨ ᠳ᠋ᠦ᠍ ᠲᠡᠷᠡ ᠶᠠᠰᠤᠨ ᠤ᠋ ᠥᠨᠴᠥᠭ ᠢ᠋ ᠰᠢᠷᠠ ᠨᠣᠬᠠᠢ ᠵᠠᠭᠤᠭᠠᠳ᠂ ᠬᠦᠴᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠠᠲᠠᠭᠰᠠᠨ ᠳ᠋ᠤ᠌ ᠲᠡᠷᠡ ᠪᠠᠭᠠ ᠳᠣᠪᠣ ᠰᠠᠭᠤᠷᠢ ᠪᠠᠷ ᠢ᠋ᠶ᠋ᠠᠨ ᠳᠠᠢᠪᠠᠯᠵᠠᠨ ᠬᠥᠳᠡᠯᠦᠭᠰᠡᠨ ᠭᠡᠨᠡ᠃
ᠳᠣᠪᠣ ᠶ᠋ᠢᠨ ᠳᠡᠭᠡᠷᠡ ᠪᠠᠢᠭᠰᠠᠨ ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠲᠦᠷᠦᠭᠦᠦ ᠲᠡᠢ ᠲᠠᠪᠢᠭᠠᠳ ᠴᠡᠷᠢᠭ ᠰᠠᠨᠳᠤᠷᠤᠨ᠂ ᠡᠨᠡ ᠭᠠᠵᠠᠷ ᠤᠳᠠᠭᠠᠨ ᠰᠠᠭᠤᠵᠤ ᠪᠣᠯᠬᠤ ᠦᠭᠡᠢ ᠭᠡᠳ᠂ ᠴᠠᠴᠠᠷ ᠮᠠᠢᠬᠠᠨ ᠢ᠋ᠶ᠋ᠠᠨ ᠪᠠᠭᠤᠯᠭᠠᠭᠠᠳ᠂ ᠢᠷᠡᠭᠰᠡᠨ ᠵᠠᠮ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠤᠴᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠡᠷᠭᠢᠨ ᠡᠷᠭᠢᠨ ᠬᠠᠷᠠᠵᠤ᠂ ᠢᠯᠡᠭᠦᠦ ᠲᠣᠯᠣᠭᠠᠢ ᠪᠠᠨ ᠦᠵᠡᠨ᠂ ᠳᠠᠬᠢᠨ ᠳᠠᠬᠢᠨ ᠬᠠᠷᠠᠵᠤ ᠳᠠᠪᠬᠤᠷ ᠲᠣᠯᠣᠭᠠᠢ ᠪᠠᠨ ᠦᠵᠡᠨ ᠶᠠᠪᠤᠭᠰᠠᠭᠠᠷ ᠣᠷᠣ ᠪᠠᠷᠠ ᠦᠭᠡᠢ ᠶᠠᠪᠤᠭᠰᠠᠨ ᠭᠡᠨᠡ᠃
ᠡᠪᠦᠭᠡᠨ ᠢ᠋ ᠪᠣᠷᠣᠭᠠᠨ ᠳ᠋ᠤ᠌ ᠨᠣᠷᠭᠠᠭᠰᠠᠨ ᠦᠭᠡᠢ ᠰᠠᠬᠠᠯ ᠲᠠᠢ ᠤᠬᠤᠨᠠ ᠪᠦᠳᠦᠭᠦᠨ ᠤᠤ? ᠡᠮᠡᠭᠡᠨ ᠢ᠋ᠶ᠋ᠡᠨ ᠨᠢᠳᠦᠨ ᠳ᠋ᠡᠭᠡᠨ ᠣᠷᠣᠭᠤᠯᠤᠭᠰᠠᠨ ᠡᠪᠦᠭᠡᠨ ᠪᠦᠳᠦᠭᠦᠨ ᠤᠤ? ᠬᠦᠷᠡᠩ ᠪᠤᠬᠠ ᠪᠠᠷ ᠴᠢᠷᠦᠭᠦᠯᠵᠦ ᠬᠠᠶᠠᠭᠰᠠᠨ ᠳᠠᠯᠤ ᠶ᠋ᠢᠨ ᠶᠠᠰᠤ ᠶ᠋ᠢ ᠠᠪᠴᠤ ᠭᠠᠷᠭᠠᠭᠰᠠᠨ ᠡᠮᠡᠭᠡᠨ ᠪᠦᠳᠦᠭᠦᠨ ᠤᠤ? ᠲᠡᠷᠡ ᠮᠡᠲᠦ ᠶᠡᠬᠡ ᠶᠠᠰᠤ ᠵᠠᠭᠤᠵᠤ ᠠᠪᠴᠢᠷᠠᠭᠰᠠᠨ ᠬᠠᠷᠠ ᠬᠡᠷᠢᠶᠡ ᠪᠦᠳᠦᠭᠦᠨ ᠤᠤ? ᠲᠠᠪᠢᠭᠠᠳ ᠴᠡᠷᠢᠭ ᠢ᠋ ᠳᠣᠪᠣ ᠲᠠᠢ ᠬᠥᠳᠡᠯᠭᠡᠭᠰᠡᠨ ᠰᠢᠷᠠ ᠨᠣᠬᠠᠢ ᠨᠢ ᠪᠦᠳᠦᠭᠦᠨ ᠤᠤ?
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠨᠠᠷᠠᠨᠲᠤᠶᠠᠭᠠ᠂ ᠠᠯᠲᠠᠨᠴᠢᠮᠡᠭ᠂ ᠤᠷᠠᠨᠴᠢᠮᠡᠭ᠂ ᠡᠭᠦᠯᠡᠩᠬᠤᠸᠠᠷ᠂
ᠭᠡᠷᠡᠯ᠂ ᠮᠥᠩᠭᠥᠨ᠂ ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂
ᠪᠠᠶᠠᠨᠴᠡᠴᠡᠭ᠂ ᠪᠦᠦ ᠸᠧᠨ ᠬᠤᠸᠠ
ᠬᠢᠨᠠᠭᠴᠢ ᠪᠠᠭᠰᠢ᠄ ᠣᠳᠬᠠᠨᠰᠣᠠ᠂ ᠭᠠᠷᠮᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠮᠣᠩᠭᠣᠯ ᠰᠦᠨᠡᠰᠦ᠂
ᠪᠤᠤ ᠸᠧᠨ ᠬᠤᠸᠠ᠂ ᠪᠠᠶᠠᠨᠴᠡᠴᠡᠭ