ᠠᠪᠠᠭᠠ ᠬᠠᠷᠠ （ᠬᠠᠷᠠ） ᠠᠭᠤᠯᠠ - ᠣᠳᠬᠣᠨᠪᠠᠶᠠᠷ Abaga khar uul-OtgonbayarАбага хар уул-Отгонбаяр
506ᠠᠪᠠᠭᠠ ᠬᠠᠷᠠ （ᠬᠠᠷᠠ） ᠠᠭᠤᠯᠠ
ᠬᠣᠯᠪᠣᠭᠠ
ᠣᠳᠬᠣᠨᠪᠠᠶᠠᠷ
ᠠᠯᠤᠰ ᠤ᠋ᠨ ᠬᠣᠯᠠ ᠠ᠋ᠴᠠ ᠰᠠᠷᠠᠪᠴᠢᠯᠠᠬᠤ ᠳ᠋ᠤ᠌
ᠠᠭᠯᠠᠭ ᠰᠦᠷᠯᠢᠭ ᠠᠪᠠᠭᠠ ᠠᠭᠤᠯᠠ
ᠠᠶᠠᠯᠠᠵᠤ ᠣᠴᠢᠭᠠᠳ ᠵᠤᠭᠠᠴᠠᠬᠤ ᠳ᠋ᠤ᠌
ᠠᠷᠢᠭᠤᠨ ᠪᠠᠢᠭᠠᠯᠢ ᠠᠪᠠᠭᠠ ᠠᠭᠤᠯᠠ
ᠪᠠᠷᠠ ᠶ᠋ᠢᠨ ᠬᠣᠯᠠ ᠠ᠋ᠴᠠ ᠰᠠᠷᠠᠪᠴᠢᠯᠠᠬᠤ ᠳ᠋ᠤ᠌
ᠰᠦᠷᠯᠢᠭ ᠰᠠᠢᠬᠠᠨ ᠠᠪᠠᠭᠠ ᠠᠭᠤᠯᠠ
ᠪᠠᠬᠠᠷᠬᠠᠵᠤ ᠣᠴᠢᠭᠠᠳ ᠵᠤᠭᠠᠴᠠᠬᠤ ᠳ᠋ᠤ᠌
ᠪᠠᠢᠭᠠᠯᠢ ᠭᠣᠶᠣᠬᠠᠨ ᠠᠪᠠᠭᠠ ᠠᠭᠤᠯᠠ ᠬᠦ
ᠠᠷᠤ ᠥᠪᠥᠷ ᠢ᠋ᠶ᠋ᠡᠷ ᠨᠢ ᠥᠩᠭᠡᠷᠡᠬᠦᠯᠡᠷ
ᠠᠯᠠᠭ ᠴᠡᠴᠡᠭ ᠦ᠋ᠨ ᠮᠢᠷᠠᠯᠵᠠᠭᠠᠨ ᠲᠠᠢ
ᠠᠰᠬᠠ ᠬᠠᠳᠠᠨ ᠳ᠋ᠤ᠌ ᠨᠢ ᠣᠢᠷᠠᠳᠬᠤᠯᠠᠷ
ᠠᠷᠴᠠ ᠶ᠋ᠢᠨ ᠦᠨᠦᠷ ᠰᠡᠩᠭᠢᠨᠡᠭᠡᠨ ᠲᠡᠢ
ᠵᠠᠪᠢ ᠶ᠋ᠢᠨ ᠠᠮᠠ ᠪᠠᠷ ᠨᠢ ᠣᠷᠣᠬᠤᠯᠠᠷ
ᠵᠠᠭᠤᠨ ᠥᠩᠭᠡ ᠶ᠋ᠢᠨ ᠮᠢᠷᠠᠯᠵᠠᠭᠠᠨ ᠲᠠᠢ
ᠵᠢᠪᠠᠷ ᠤ᠋ᠨ ᠳᠣᠣᠭᠤᠷ ᠨᠢ ᠭᠠᠷᠬᠤᠯᠠᠷ
ᠵᠠᠭᠠᠷ ᠤ᠋ᠨ ᠦᠨᠦᠷ ᠰᠡᠩᠭᠢᠨᠡᠭᠡᠨ ᠲᠡᠢ
ᠣᠭ᠌ᠶᠤ ᠨᠣᠭᠣᠭᠠᠨ ᠬᠠᠳᠠ ᠨᠤᠭᠤᠳ ᠨᠢ
ᠡᠭᠦᠯᠡᠨ ᠠᠯᠴᠢᠭᠤᠷ ᠣᠷᠢᠶᠠᠴᠢᠬᠠᠵᠠᠢ
ᠤᠳᠠ ᠪᠣᠯᠤᠨ ᠤᠯᠢᠶᠠᠰᠤ ᠨᠤᠭᠤᠳ
ᠤᠨᠵᠢᠯᠭᠠ ᠪᠣᠯᠤᠭᠠᠳ ᠴᠢᠮᠡᠭᠯᠡᠵᠡᠢ
ᠬᠠᠢᠯᠠᠰᠤ ᠪᠣᠯᠤᠨ ᠬᠠᠷᠭᠠᠨᠠ ᠨᠤᠭᠤᠳ
ᠬᠣᠷᠮᠣᠢ ᠪᠦᠷᠬᠦᠨ ᠶᠠᠭᠰᠢᠷᠠᠭᠠᠳ
ᠬᠠᠢᠴᠢᠨ ᠢᠩᠭᠡᠷ ᠰᠢᠪᠠᠭᠤ ᠨᠤᠭᠤᠳ
ᠬᠠᠯᠢᠨ ᠬᠠᠯᠢᠨ ᠳᠣᠩᠭᠣᠳᠴᠠᠢ ᠬᠦ
ᠰᠠᠢᠬᠠᠨ ᠢᠷᠭᠤᠢ ᠳᠡᠯᠭᠡᠷᠡᠳᠡᠭ
ᠰᠠᠷᠬᠢᠭ ᠠᠷᠪᠢᠨ ᠵᠠᠪᠢ ᠨᠤᠭᠤᠳ ᠲᠠᠢ
ᠰᠠᠭᠯᠠᠭᠠᠷ ᠮᠣᠳᠣ ᠪᠠᠷ ᠬᠤᠴᠢᠭᠳᠠᠭᠰᠠᠨ
ᠰᠠᠯᠠᠭᠠ ᠠᠷᠪᠢᠨ ᠵᠢᠯᠠᠭᠠ ᠨᠤᠭᠤᠳ ᠲᠠᠢ
ᠰᠠᠷᠠᠯᠠᠩ ᠮᠠᠨᠤ ᠳᠡᠯᠭᠡᠷᠡᠳᠡᠭ
ᠵᠠᠳᠠᠭᠠᠢ ᠲᠡᠨᠢᠭᠡᠷ ᠬᠠᠮᠠᠷ ᠤ᠋ᠳ ᠲᠠᠢ
ᠰᠠᠢᠨ ᠤ᠋ ᠪᠡᠯᠭᠡ ᠶ᠋ᠢ ᠬᠤᠷᠤᠢᠯᠠᠭᠰᠠᠨ
ᠱᠠᠩ᠊ᠱᠢᠨ ᠲᠠᠬᠢᠯᠭᠠ ᠣᠪᠣᠭᠠ ᠲᠠᠢ ᠬᠦ
ᠮᠠᠯ ᠤ᠋ᠨ ᠬᠥᠮᠦᠨ ᠴᠢᠯᠠᠭᠤ ᠲᠡᠭᠦᠵᠦ
ᠪᠤᠰᠬᠠᠭᠠᠳ ᠲᠡᠭᠡᠭᠰᠡᠨ ᠣᠪᠣᠭᠠ ᠲᠠᠢ
ᠮᠠᠯ ᠢ᠋ᠶ᠋ᠠᠨ ᠥᠰᠬᠡᠬᠦ ᠠᠷᠭᠠ ᠲᠡᠭᠦᠵᠦ
ᠣᠪᠣᠭᠠᠯᠠᠭᠠᠳ ᠲᠡᠭᠡᠭᠰᠡᠨ ᠣᠪᠣᠭᠠ ᠲᠠᠢ
ᠮᠠᠨ ᠤ᠋ ᠲᠠᠨ ᠤ᠋ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ
ᠰᠦᠰᠦᠭᠯᠡᠵᠦ ᠲᠠᠬᠢᠭᠰᠠᠨ ᠠᠪᠠᠭᠠ ᠠᠭᠤᠯᠠ
ᠮᠠᠯᠵᠢᠬᠤ ᠨᠤᠲᠤᠭ ᠤ᠋ᠨ ᠬᠥᠭᠵᠢᠯᠲᠡ ᠳ᠋ᠦ᠍
ᠴᠠᠮᠬᠠᠭ ᠪᠣᠯᠤᠭᠰᠠᠨ ᠠᠪᠠᠭᠠ ᠠᠭᠤᠯᠠ ᠬᠦ
ᠴᠡᠴᠡᠭ ᠦ᠋ᠨ ᠡᠪᠡᠷᠳᠡᠢ ᠪᠤᠭᠤ ᠰᠤᠭᠤ ᠨᠤᠭᠤᠳ
ᠰᠢᠭᠤᠢ ᠳᠣᠲᠣᠷᠠ ᠪᠠᠨ ᠣᠷᠣᠮᠳᠠᠭᠠᠳ
ᠰᠡᠷᠢᠭᠦᠨ ᠪᠤᠯᠠᠭ ᠲᠤ᠌ ᠪᠠᠨ ᠤᠮᠳᠠᠯᠠᠭᠠᠳ
ᠴᠢᠮᠡᠭᠡ ᠠᠪᠤᠨ ᠰᠡᠷᠲᠡᠯᠵᠡᠭᠡᠳ
ᠮᠠᠯᠤᠷ ᠪᠣᠯᠤᠨ ᠲᠠᠤᠯᠠᠢ ᠨᠤᠭᠤᠳ
ᠰᠢᠭᠦᠳᠡᠷᠢ ᠳᠣᠯᠢᠶᠠᠨ ᠳᠡᠯᠳᠡᠭᠡᠨᠡᠭᠡᠳ
ᠮᠠᠨ ᠢ᠋ ᠣᠴᠢᠬᠤ ᠶ᠋ᠢ ᠮᠡᠳᠡᠬᠦ ᠴᠤ᠌ ᠦᠭᠡᠢ
ᠥᠯᠮᠡᠢ ᠳᠣᠣᠷᠠ ᠠ᠋ᠴᠠ ᠪᠣᠰᠤᠯᠴᠠᠭᠠᠳ ᠬᠦ
ᠵᠡᠭᠦᠨ ᠡᠮᠦᠨᠡ ᠨᠢ ᠡᠷᠳᠡᠨᠢ ᠠᠭᠤᠯᠠ
ᠯᠤᠤ ᠪᠥᠬᠥᠢᠭᠰᠡᠨ ᠰᠢᠨᠵᠢ ᠲᠡᠢ
ᠪᠠᠷᠠᠭᠤᠨ ᠬᠣᠢᠨᠠ ᠨᠢ ᠠᠪᠠᠭᠠ ᠬᠠᠷᠠ
ᠪᠠᠢᠷᠢ ᠪᠠᠨ ᠡᠵᠡᠯᠡᠭᠰᠡᠨ ᠲᠥᠯᠥᠪ ᠲᠡᠢ
ᠬᠣᠢᠲᠠᠢ ᠠᠷᠤ ᠳ᠋ᠤ᠌ ᠨᠢ ᠪᠣᠷᠣ ᠬᠣᠲᠠ ᠶ᠋ᠢᠨ
ᠣᠯᠪᠣᠭ ᠬᠠᠶᠠᠭᠰᠠᠨ ᠪᠠᠭᠤᠷᠢ ᠲᠠᠢ
ᠡᠮᠦᠨᠡ ᠡᠩᠭᠡᠷ ᠨᠢ ᠴᠠᠭᠠᠨ ᠬᠣᠲᠠ ᠶ᠋ᠢᠨ
ᠬᠣᠶᠠᠷ ᠪᠤᠬᠠ ᠶ᠋ᠢᠨ ᠮᠥᠷᠭᠥᠭᠡ ᠲᠡᠢ ᠬᠦ
ᠬᠢᠳᠠᠨ ᠯᠢᠶᠣᠣ ᠤᠯᠤᠰ ᠲᠤ᠌ ᠪᠠᠨ
ᠶᠢᠯᠦᠢ ᠢᠦᠢ ᠶ᠋ᠢᠨ ᠤᠯᠠᠭᠠ ᠲᠠᠢ
ᠭᠠᠢᠬᠠᠮᠰᠢᠭᠲᠤ ᠴᠣᠭᠲᠤ ᠶ᠋ᠢᠨ ᠬᠠᠳᠠᠨ ᠳ᠋ᠤ᠌
ᠶᠠᠰᠤ ᠪᠠᠨ ᠲᠠᠯᠪᠢᠭᠰᠠᠨ ᠣᠩᠭᠣᠨ ᠲᠠᠢ
ᠭᠡᠭᠡᠨ ᠮᠡᠷᠭᠡᠨ ᠴᠣᠷᠵᠢ ᠯᠠᠮᠠ
ᠡᠩᠬᠡ ᠠᠮᠤᠭᠤᠯᠠᠩ ᠪᠢᠰᠢᠷᠡᠯ ᠲᠡᠢ
ᠭᠠᠵᠠᠷ ᠰᠣᠩᠭᠣᠭᠠᠳ ᠬᠠᠨ ᠰᠦᠮᠡ ᠶ᠋ᠢ
ᠲᠣᠭᠲᠠᠭᠠᠵᠤ ᠪᠠᠷᠢᠭᠰᠠᠨ ᠵᠣᠬᠢᠶᠠᠯ ᠲᠠᠢ ᠬᠦ
ᠬᠠᠢᠷᠠᠲᠤ ᠥᠯᠥᠭᠡᠢ ᠨᠤᠲᠤᠭ ᠢ᠋ ᠪᠡᠨ
ᠬᠠᠯᠠᠭᠤᠨ ᠴᠢᠰᠤ ᠪᠠᠷ ᠢ᠋ᠶ᠋ᠠᠨ ᠬᠠᠮᠠᠭᠠᠯᠠᠭᠰᠠᠨ
ᠬᠠᠳᠠᠨ ᠪᠠᠭᠠᠲᠤᠷ ᠯᠢᠭᠳᠡᠨ ᠦ᠌
ᠲᠣᠭᠣᠰᠣ ᠲᠠᠲᠠᠭᠤᠯᠤᠭᠰᠠᠨ ᠵᠡᠷᠭᠡᠯᠭᠡᠨ ᠲᠡᠢ
ᠬᠠᠶᠠᠵᠤ ᠲᠦᠪᠳᠡᠬᠦ ᠦᠭᠡᠢ ᠴᠠᠭ ᠡᠷᠢᠨ ᠳ᠋ᠦ᠍ ᠪᠡᠨ
ᠠᠪᠠᠭᠠ ᠳ᠋ᠤ᠌ ᠪᠠᠨ ᠵᠠᠬᠢᠭᠰᠠᠨ ᠵᠠᠬᠢᠶᠠ ᠲᠠᠢ
ᠬᠠᠨᠠᠭᠠᠷ ᠰᠦᠷᠯᠢᠭ ᠠᠪᠠᠭᠠ ᠬᠠᠷᠠ
ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠬᠢᠭᠰᠠᠨ ᠰᠦᠯᠳᠡ ᠲᠡᠢ ᠬᠦ
ᠲᠤᠩᠭᠠᠯᠠᠭ ᠬᠠᠬᠢᠷ ᠤ᠋ᠨ ᠳᠡᠨᠵᠢᠨ ᠳᠡᠭᠡᠷᠡ
ᠰᠠᠢᠬᠠᠨ ᠭᠸᠪᠠᠢ ᠶ᠋ᠢᠨ ᠵᠤᠰᠠᠯᠠᠩ ᠲᠠᠢ
ᠲᠡᠨᠡᠭ ᠪᠠᠭᠠᠲᠤᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠭᠰᠠᠨ
ᠪᠠᠭᠤᠴᠠ ᠳ᠋ᠤ᠌ ᠣᠷᠣᠭᠰᠠᠨ ᠠᠶᠠᠯᠭᠤ ᠲᠠᠢ
ᠪᠠᠭᠰᠢ ᠬᠤᠪᠢᠯᠭᠠᠨ ᠤ᠋ ᠠᠮᠤᠰᠬᠢᠳᠠᠭ
ᠠᠮᠤᠷ ᠮᠣᠳᠣᠨ ᠤ᠋ ᠰᠡᠭᠦᠳᠡᠷ ᠲᠡᠢ
ᠪᠠᠳᠠᠭᠯᠠᠵᠤ ᠬᠡᠯᠡᠭᠡᠳ ᠪᠠᠷᠠᠰᠢ ᠦᠭᠡᠢ
ᠪᠠᠢᠭᠠᠯᠢ ᠭᠣᠶᠣᠬᠠᠨ ᠠᠪᠠᠭᠠ ᠠᠭᠤᠯᠠ ᠬᠦ
ᠣᠷᠭᠢᠯ ᠱᠣᠷᠣᠩ ᠣᠯᠠᠨ ᠲᠠᠢ
ᠲᠠᠯᠠᠪᠠᠢ ᠨᠢ ᠶᠡᠬᠡ ᠠᠪᠠᠭᠠ ᠠᠭᠤᠯᠠ
ᠣᠯᠠᠨ ᠮᠢᠩᠭᠠᠨ ᠤ᠋ ᠳᠣᠮᠣᠭ ᠲᠠᠢ
ᠲᠡᠦᠬᠡ ᠵᠤᠵᠠᠭᠠᠨ ᠠᠪᠠᠭᠠ ᠠᠭᠤᠯᠠ
ᠣᠳᠬᠣᠨᠪᠠᠶᠠᠷ ᠮᠢᠨᠦ ᠪᠡᠶᠡ
ᠬᠡᠯᠡᠭᠡᠳ ᠪᠠᠷᠠᠬᠤ ᠦᠭᠡᠢ ᠠᠪᠠᠭᠠ ᠠᠭᠤᠯᠠ
ᠣᠯᠠᠨ ᠲᠦᠮᠡᠨ ᠪᠦᠬᠦᠨ ᠳ᠋ᠦ᠍ ᠪᠡᠨ
ᠱᠠᠭᠰᠢᠭᠠᠳ ᠪᠠᠷᠠᠬᠤ ᠦᠭᠡᠢ ᠠᠪᠠᠭᠠ ᠠᠭᠤᠯᠠ ᠬᠦ
ᠠᠯᠤᠰ ᠤ᠋ᠨ ᠬᠣᠯᠠ ᠶᠠᠪᠤᠭᠰᠠᠨ ᠴᠤ᠌
ᠰᠡᠳᠬᠢᠯ ᠡᠴᠡ ᠭᠠᠷᠬᠤ ᠦᠭᠡᠢ ᠠᠪᠠᠭᠠ ᠠᠭᠤᠯᠠ
ᠠᠮᠲᠠᠲᠤ ᠵᠡᠭᠦᠳᠦᠨ ᠳ᠋ᠦ᠍ ᠣᠷᠣᠴᠢᠬᠠᠭᠠᠳ
ᠰᠠᠯᠬᠤ ᠴᠤ᠌ ᠦᠭᠡᠢ ᠠᠪᠠᠭᠠ ᠠᠭᠤᠯᠠ
ᠠᠷᠠᠭᠠ ᠪᠠᠨ ᠤᠨᠠᠲᠠᠯᠠ ᠮᠠᠭᠲᠠᠯᠠ ᠭᠡᠳ
ᠬᠠᠨᠣᠬᠣ ᠴᠤ᠌ ᠦᠭᠡᠢ ᠠᠪᠠᠭᠠ ᠠᠭᠤᠯᠠ
ᠠᠷᠤ ᠬᠣᠷᠴᠢᠨ ᠨᠤᠲᠤᠭ ᠤ᠋ᠨ ᠮᠢᠨᠢ
ᠰᠦᠯᠳᠡ ᠨᠢ ᠪᠣᠯᠤᠭᠰᠠᠨ ᠠᠪᠠᠭᠠ ᠠᠭᠤᠯᠠ ᠬᠦ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠤᠷᠢᠶᠠᠩᠬᠠᠢ ᠨᠠᠷᠠᠨᠮᠠᠨᠳᠠ