ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠶᠠᠪᠤᠭᠤᠳᠠᠢ ᠬᠦᠦ ᠪᠠᠷᠰ ᠢ᠋ ᠪᠠᠷᠰ ᠢ᠋ᠶ᠋ᠠᠷ ᠠᠯᠠᠭᠤᠯᠤᠭᠰᠠᠨ ᠨᠢ Гураван настай гунаган улаан баатар - Явуутай хүү барсыг барсаар алуулсан нь
97ᠶᠠᠪᠤᠭᠤᠳᠠᠢ ᠬᠦᠦ ᠪᠠᠷᠰ ᠢ᠋ ᠪᠠᠷᠰ ᠢ᠋ᠶ᠋ᠠᠷ ᠠᠯᠠᠭᠤᠯᠤᠭᠰᠠᠨ ᠨᠢ
ᠶᠠᠩᠳᠠᠩ ᠬᠠᠭᠠᠨ ᠭᠡᠷ ᠦ᠋ᠨ ᠵᠠᠬᠠ ᠳ᠋ᠤ᠌ ᠶᠠᠭᠠᠬᠢᠰᠢ ᠦᠭᠡᠢ ᠤᠤᠯᠭᠠᠮᠴᠢ ᠪᠡᠯᠡᠩᠴᠢ᠂ ᠶᠠᠳᠠᠷᠠᠭᠰᠠᠨ ᠵᠤᠲᠠᠷᠠᠭᠰᠠᠨ ᠨᠢᠭᠡᠨ ᠬᠥᠭᠰᠢᠨ᠂ ᠶᠠᠩᠳᠠᠩ ᠬᠠᠭᠠᠨ ᠤ᠋ ᠭᠠᠯ ᠤᠰᠤ ᠶ᠋ᠢ ᠨᠢ ᠵᠥᠭᠡᠭᠡᠵᠦ᠂ ᠭᠠᠯᠠᠭᠤ ᠲᠠᠬᠢᠶᠠ ᠶ᠋ᠢ ᠨᠢ ᠲᠡᠵᠢᠭᠡᠵᠦ ᠪᠠᠢᠵᠠᠢ᠃
ᠡᠨᠡ ᠬᠥᠭᠰᠢᠨ ᠪᠣᠯ ᠨᠢᠭᠡ ᠬᠦᠦ ᠲᠡᠢ᠂ ᠬᠦᠦ ᠶ᠋ᠢᠨ ᠨᠡᠷᠡ ᠨᠢ ᠶᠠᠪᠤᠭᠤᠳᠠᠢ ᠭᠡᠳᠡᠭ ᠭᠡᠨᠡ᠃ ᠶᠠᠪᠤᠭᠤᠳᠠᠢ ᠬᠦᠦ ᠪᠣᠯ ᠶᠠᠰᠤ ᠪᠠᠷ ᠬᠢᠭᠰᠡᠨ ᠨᠤᠮᠤ ᠰᠤᠮᠤ ᠲᠠᠢ᠂ ᠶᠠᠪᠤᠭᠠᠴᠢ ᠬᠦᠷᠡᠩ ᠳᠠᠭᠠ ᠲᠠᠢ᠂ ᠡᠨᠡ ᠬᠦᠦ ᠪᠣᠯ ᠡᠳᠦᠷ ᠪᠦᠷᠢ ᠶᠠᠪᠤᠭᠠᠴᠢ ᠬᠦᠷᠡᠩ ᠳᠠᠭᠠ ᠪᠠᠨ ᠤᠨᠤᠵᠤ᠂ ᠶᠠᠰᠤᠨ ᠨᠤᠮᠤ ᠰᠤᠮᠤ ᠪᠠᠨ ᠡᠭᠦᠷᠴᠦ᠂ ᠠᠩ ᠡᠷᠢᠵᠦ ᠠᠪᠠ ᠠᠪᠠᠯᠠᠬᠤ ᠳ᠋ᠠᠭᠠᠨ᠂ ᠡᠨᠡ ᠲᠡᠷᠡ ᠭᠡᠵᠦ ᠬᠠᠮᠢᠶᠠᠷᠬᠤ ᠦᠭᠡᠢ᠂ ᠡᠴᠡᠩᠬᠡᠢ ᠲᠠᠷᠭᠤᠨ ᠭᠡᠵᠦ ᠢᠯᠭᠠᠬᠤ ᠦᠭᠡᠢ᠂ ᠬᠠᠪᠢ ᠪᠠᠷ ᠭᠠᠷᠪᠠᠯ ᠰᠢᠷᠪᠢᠵᠦ᠂ ᠬᠠᠷᠠᠭᠠᠨ ᠳ᠋ᠤᠨᠢ ᠣᠷᠣᠪᠠᠯ ᠬᠠᠷᠪᠤᠳᠠᠭ ᠶᠤᠮ ᠪᠠᠢᠨᠠ᠃
ᠡᠢᠮᠦ ᠤᠴᠢᠷ ᠠ᠋ᠴᠠ ᠡᠨᠡ ᠬᠦᠦ ᠡᠳᠦᠷ ᠪᠣᠯᠭᠠᠨ ᠠᠩ ᠰᠠᠢᠨ᠂ ᠠᠴᠢᠶᠠ ᠬᠦᠨᠳᠦ᠂ ᠭᠠᠷ ᠬᠣᠭᠣᠰᠣᠨ᠂ ᠭᠠᠨᠵᠤᠭᠠᠨ ᠳ᠋ᠤ᠌ ᠳᠡᠩᠨᠡᠭᠡ ᠦᠭᠡᠢ ᠭᠡᠵᠦ ᠶᠡᠷᠦ ᠦᠭᠡᠢ ᠤᠴᠢᠷ ᠠ᠋ᠴᠠ᠂ ᠡᠳᠦᠷ ᠪᠦᠷᠢ ᠠᠩᠨᠠᠭᠰᠠᠨ ᠢ᠋ᠶ᠋ᠠᠨ ᠥᠪᠥᠩ ᠭᠡᠷ ᠲᠦ᠍ ᠪᠡᠨ ᠤᠲᠤᠭᠠ ᠪᠤᠷᠭᠢᠭᠤᠯᠵᠤ᠂ ᠥᠨᠳᠡᠭᠡᠨ ᠲᠣᠭᠣᠭᠠᠨ ᠳ᠋ᠤ᠌ ᠪᠠᠨ ᠪᠢᠯᠬᠠᠮᠠᠬᠠᠨ ᠴᠢᠨᠠᠵᠤ᠂ ᠦᠳᠡᠯᠦᠭᠡ ᠪᠣᠯᠤᠭᠰᠠᠨ ᠡᠵᠢ ᠲᠡᠢ ᠪᠡᠨ ᠬᠣᠶᠠᠭᠤᠯᠠ᠂ ᠡᠳᠦᠷ ᠲᠡᠭᠡᠨ ᠠᠮᠢ ᠪᠠᠨ ᠲᠡᠵᠢᠭᠡᠬᠦ ᠡᠴᠡ ᠭᠠᠳᠠᠨᠠ᠂ ᠦᠯᠡᠪᠦᠷᠢ ᠲᠣᠰᠪᠣᠷᠢ ᠪᠠᠰᠠ ᠪᠠᠭᠠ ᠦᠭᠡᠢ ᠭᠠᠷᠴᠤ᠂ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠳ᠋ᠤ᠌ ᠰᠠᠷᠬᠢᠨᠠᠭ ᠡᠯᠭᠦᠵᠦ᠂ ᠬᠠᠨᠠ ᠶ᠋ᠢᠨ ᠨᠢᠳᠦᠨ ᠳ᠋ᠦ᠍ ᠰᠡᠭᠡᠷ ᠬᠠᠪᠴᠢᠭᠤᠯᠬᠤ ᠲᠠᠢ ᠪᠣᠯᠤᠭᠠᠳ ᠢᠷᠡᠵᠡᠢ᠃
ᠨᠢᠭᠡ ᠡᠳᠦᠷ ᠬᠦᠦ ᠠᠪᠠ ᠳ᠋ᠤ᠌ ᠶᠠᠪᠤᠵᠤ᠂ ᠬᠥᠭᠰᠢᠨ ᠡᠵᠢ ᠨᠢ ᠶᠠᠩᠳᠠᠩ ᠬᠠᠭᠠᠨ ᠤ᠋ ᠭᠡᠷ ᠲᠦ᠍᠂ ᠶᠠᠪᠤᠵᠤ ᠭᠦᠶᠦᠬᠦ ᠳ᠋ᠡᠭᠡᠨ ᠶᠠᠳᠠᠷᠠᠵᠤ᠂ ᠭᠠᠯ ᠤᠰᠤ ᠶ᠋ᠢ ᠨᠢ ᠵᠥᠭᠡᠭᠡᠵᠦ᠂ ᠭᠠᠯᠠᠭᠤ ᠲᠠᠬᠢᠶᠠ ᠶ᠋ᠢ ᠨᠢ ᠲᠡᠵᠢᠭᠡᠵᠦ ᠪᠠᠢᠲᠠᠯᠠ᠂ ᠪᠤᠳᠠᠭᠠ ᠶ᠋ᠢ ᠨᠢ ᠢᠳᠡᠵᠦ᠂ ᠪᠣᠷᠳᠣᠭᠠᠨ ᠳ᠋ᠠᠭᠠᠨ ᠲᠠᠷᠭᠤᠯᠠᠭᠰᠠᠨ᠂ ᠮᠠᠨᠲᠤᠢᠲᠠᠯᠠ ᠢᠳᠡᠵᠦ ᠲᠦᠨᠲᠦᠢᠲᠡᠯᠡ ᠲᠠᠷᠭᠤᠯᠠᠭᠰᠠᠨ ᠭᠠᠯᠠᠭᠤ ᠲᠠᠬᠢᠶᠠ ᠨᠤᠭᠤᠳ ᠨᠢ ᠬᠥᠭᠰᠢᠨ ᠢ᠋ ᠭᠡᠨᠡᠳᠲᠡ ᠬᠠᠷᠢᠶᠠᠵᠠᠢ᠃ ᠬᠣᠪᠴᠢᠭ ᠬᠣᠪᠴᠢᠭ ᠭᠦᠶᠦᠯᠡ ᠴᠢ᠂ ᠬᠣᠭᠣᠯᠠ ᠢᠳᠡᠰᠢ ᠰᠠᠭᠠᠳᠠᠭᠤᠯᠤᠯᠠ ᠴᠢ᠂ ᠶᠠᠳᠠᠷᠠᠭᠰᠠᠨ ᠬᠥᠭᠰᠢᠨ᠂ ᠶᠠᠩᠳᠠᠩ ᠬᠠᠭᠠᠨ ᠤ᠋ ᠳ᠋ᠤ᠌ ᠬᠠᠳᠠ᠂ ᠶᠠᠪᠤᠭᠤᠳᠠᠢ ᠮᠠᠭᠤ ᠬᠦᠦ ᠭᠡᠷ ᠲᠡᠭᠡᠨ ᠬᠠᠳᠠ! ᠶᠠᠰᠤᠨ ᠨᠤᠮᠤ ᠰᠤᠮᠤ ᠨᠢ ᠣᠨᠢᠨ ᠳ᠋ᠠᠭᠠᠨ ᠬᠠᠳᠠ! ᠶᠠᠪᠤᠭᠠᠴᠢ ᠬᠦᠷᠡᠩ ᠳᠠᠭᠠ ᠨᠢ ᠤᠶᠠᠭᠠᠨ ᠳ᠋ᠠᠭᠠᠨ ᠬᠠᠳᠠ! ᠭᠡᠵᠦ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠪᠠᠷᠬᠢᠷᠠᠯᠳᠤᠨ ᠬᠠᠷᠢᠶᠠᠵᠠᠢ᠃ ᠬᠥᠭᠰᠢᠨ ᠳᠣᠲᠣᠷᠠ ᠪᠠᠨ ᠶᠡᠬᠡ ᠠᠭᠤᠷᠯᠠᠨ᠂ ᠬᠥᠮᠦᠨ ᠭᠡᠵᠦ ᠪᠠᠢᠭᠠᠳ᠂ ᠬᠡᠦᠬᠡᠳ ᠨᠣᠬᠠᠢ ᠶ᠋ᠢᠨ ᠳᠣᠭᠣᠭᠢ ᠪᠣᠯᠬᠤ ᠦᠭᠡᠢ᠂ ᠰᠢᠳᠤᠷᠭᠤ ᠰᠠᠢᠬᠠᠨ ᠶᠠᠪᠤᠵᠤ ᠪᠠᠢᠭᠠᠳ ᠰᠢᠪᠠᠭᠤ ᠨᠣᠬᠠᠢ ᠶ᠋ᠢᠨ ᠳᠣᠭᠣᠭᠢ ᠪᠣᠯᠬᠤ ᠦᠭᠡᠢ᠃ ᠬᠦᠦ ᠳ᠋ᠡᠭᠡᠨ ᠬᠡᠯᠡᠵᠦ ᠶᠠᠰᠤ ᠶ᠋ᠢ ᠴᠢᠨᠢ ᠬᠤᠭᠤᠯᠵᠤ᠂ ᠮᠢᠬᠠ ᠶ᠋ᠢ ᠴᠢᠨᠢ ᠱᠤᠯᠤᠵᠤ᠂ ᠰᠢᠷᠪᠥᠰᠥ ᠶ᠋ᠢ ᠴᠢᠨᠢ ᠲᠠᠰᠤᠳᠠᠵᠤ᠂ ᠰᠢᠨᠳᠠᠰᠤ ᠶ᠋ᠢ ᠴᠢᠨᠢ ᠰᠤᠭᠤᠯᠤᠨᠠ ᠤᠤ᠂ ᠦᠭᠡᠢ ᠤᠤ ᠬᠠᠷᠠᠵᠤ ᠪᠠᠢ! ᠭᠡᠵᠦ ᠪᠣᠳᠣᠭᠠᠳ ᠭᠡᠷ ᠲᠡᠭᠡᠨ ᠢᠷᠡᠵᠦ ᠬᠦᠦ ᠳ᠋ᠡᠭᠡᠨ ᠬᠡᠯᠡᠵᠡᠢ᠃
ᠶᠠᠪᠤᠭᠤᠲᠠᠢ ᠬᠦᠦ ᠨᠢ ᠪᠠᠰᠠ ᠠᠭᠤᠷᠯᠠᠨ᠄《ᠡᠵᠢ ᠠ᠋᠂ ᠬᠡᠷᠡᠮ ᠢ᠋ ᠨᠢ ᠴᠣᠭᠣᠯᠵᠤ ᠣᠷᠣᠭᠠᠳ᠂ ᠬᠡᠳᠦᠨ ᠲᠠᠬᠢᠶᠠ ᠭᠠᠯᠠᠭᠤ ᠶ᠋ᠢ ᠨᠢ ᠠᠯᠠᠭᠠᠳ᠂ ᠬᠡᠷᠡᠭ ᠭᠠᠷᠭᠠᠴᠢᠬᠠᠭᠠᠳ ᠢᠷᠡᠶᠡ!》 ᠭᠡᠰᠡᠨ ᠳ᠋ᠦ᠍ ᠬᠥᠭᠰᠢᠨ ᠰᠠᠨᠳᠤᠷᠴᠤ᠄《ᠬᠡ ᠬᠡ ᠬᠡᠷᠡᠭ ᠦᠭᠡᠢ᠂ ᠪᠤ᠌ ᠪᠤ᠌ ᠪᠣᠯᠬᠤ ᠦᠭᠡᠢ᠂ ᠭᠠ ᠭᠠ ᠭᠠᠯᠠᠭᠤ ᠪᠠ᠊ ᠪᠠ᠊ ᠪᠠᠷᠬᠢᠷᠠᠨᠠ》 ᠭᠡᠵᠡᠢ᠃ ᠶᠠᠪᠤᠭᠤᠳᠠᠢ ᠬᠦᠦ ᠶᠠᠭᠠᠬᠢᠵᠤ ᠳᠠᠷᠤᠪᠠᠴᠤ ᠲᠡᠰᠬᠦ ᠦᠭᠡᠢ᠂ ᠲᠥᠭᠡ ᠬᠢᠲᠤᠭᠠ ᠪᠠᠨ ᠲᠦᠷᠡᠢ ᠳ᠋ᠡᠭᠡᠨ ᠬᠢᠵᠦ᠂ ᠲᠡᠮᠦᠷ ᠰᠢᠲᠠᠮ ᠢ᠋ᠶ᠋ᠠᠨ ᠪᠥᠰᠡᠨ ᠳ᠋ᠡᠭᠡᠨ ᠬᠠᠪᠴᠢᠭᠤᠯᠵᠤ᠂ ᠶᠠᠰᠤᠨ ᠨᠤᠮᠤ ᠰᠤᠮᠤ ᠪᠠᠨ ᠣᠨᠢᠯᠠᠵᠤ᠂ ᠶᠠᠩᠵᠤ ᠦᠭᠡᠢ ᠮᠤᠤᠰᠠᠢᠨ ᠲᠠᠬᠢᠶᠠ ᠭᠠᠯᠠᠭᠤ ᠶ᠋ᠢ ᠨᠢ ᠠᠯᠠᠬᠤ ᠨᠢ ᠶᠠᠩᠳᠠᠩ ᠬᠠᠭᠠᠨ ᠢ᠋ ᠠᠯᠠᠭᠰᠠᠨ ᠠ᠋ᠴᠠ ᠥᠭᠡᠷᠡ ᠴᠦ᠍ ᠦᠭᠡᠢ ᠭᠡᠵᠦ ᠨᠢᠭᠡ ᠳᠡᠭᠡᠭᠰᠢ ᠪᠡᠨ ᠬᠠᠷᠪᠤᠪᠠᠯ᠂ ᠡᠭᠴᠡ ᠳᠡᠭᠡᠭᠰᠢ ᠪᠡᠨ ᠬᠠᠷᠪᠤᠭᠰᠠᠨ ᠰᠤᠮᠤ᠂ ᠡᠷᠭᠢᠭᠡᠳ ᠳᠣᠭᠣᠭᠰᠢ ᠪᠠᠨ ᠪᠠᠭᠤᠬᠤ ᠳ᠋ᠠᠭᠠᠨ᠂ ᠭᠠᠯᠠᠭᠤ ᠲᠠᠬᠢᠶᠠ ᠶ᠋ᠢᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠲᠣᠰᠴᠤ᠂ ᠭᠠᠭᠴᠠ ᠭᠠᠭᠴᠠᠬᠠᠨ ᠳᠡᠭᠡᠷᠡ ᠠᠯᠠᠵᠠᠢ᠃ ᠢᠩᠭᠢᠵᠦ ᠬᠡᠳᠦ ᠶ᠋ᠢ ᠠᠯᠠᠭᠠᠳ᠂ ᠭᠡᠷ ᠲᠡᠭᠡᠨ ᠢᠷᠡᠵᠦ ᠡᠵᠢ ᠳ᠋ᠡᠭᠡᠨ ᠬᠡᠯᠡᠵᠡᠢ᠃《ᠶᠠᠩᠳᠠᠩ ᠬᠠᠭᠠᠨ ᠤ᠋ ᠭᠠᠯᠠᠭᠤ ᠶ᠋ᠢ ᠶᠠᠷᠭᠢᠵᠤ ᠳᠤᠤᠭᠠᠷᠬᠤ ᠶ᠋ᠢᠨ ᠠᠮᠵᠢᠯᠲᠠ ᠦᠭᠡᠢ᠂ ᠠᠭᠠᠷ ᠳᠡᠭᠡᠷᠡ ᠡᠴᠡ ᠰᠤᠮᠤ ᠪᠠᠭᠤᠯᠭᠠᠵᠤ ᠠᠶᠤᠩᠭᠠ ᠨᠢᠷᠭᠡᠬᠦ ᠮᠡᠲᠦ ᠠᠯᠠᠵᠤ ᠠᠯᠠᠵᠤ ᠢᠷᠡᠭᠰᠡᠨ᠂ ᠡᠵᠢ ᠪᠤᠤ ᠤᠤᠯᠭᠠᠮᠴᠢ ᠪᠡᠯᠡᠩᠴᠢ ᠵᠠᠩᠨᠠᠵᠤ ᠪᠠᠢᠭᠠᠳ ᠬᠡᠯᠡᠴᠢᠬᠡ ᠳᠡ!》 ᠭᠡᠵᠡᠢ᠃ ᠬᠥᠭᠰᠢᠨ ᠮᠥᠨ ᠯᠡ ᠠᠶᠤᠭᠰᠠᠨ ᠬᠡᠪ ᠢ᠋ᠶ᠋ᠡᠷ᠂ ᠭ᠌ᠡ᠊ ᠭ᠌ᠡ᠊ ᠬᠡᠯᠡᠬᠦ ᠦᠭᠡᠢ ᠪᠤ᠌ ᠪᠤ᠌ ᠪᠣᠯᠬᠤ ᠦᠭᠡᠢ ᠭᠡᠳᠡᠭ ᠶᠦᠮ ᠪᠠᠢᠨᠠ᠃
ᠶᠠᠪᠤᠭᠤᠲᠠᠢ ᠮᠥᠨ ᠯᠡ ᠠᠪᠠ ᠳ᠋ᠠᠭᠠᠨ ᠶᠠᠪᠤᠭᠰᠠᠨ ᠬᠣᠭᠣᠷᠣᠨᠳᠣ᠂ ᠶᠠᠩᠳᠠᠩ ᠬᠠᠭᠠᠨ ᠠᠭᠠᠷ ᠠ᠋ᠴᠠ ᠰᠤᠮᠤ ᠢᠷᠡᠵᠦ ᠭᠠᠯᠠᠭᠤ ᠲᠠᠬᠢᠶᠠ ᠠᠯᠠᠭᠰᠠᠨ ᠬᠡᠷᠡᠭ ᠢ᠋ ᠮᠡᠳᠡᠵᠦ᠂ ᠬᠥᠭᠰᠢᠨ ᠢ᠋ ᠰᠠᠨᠳᠤᠷᠭᠠᠬᠤ ᠪᠠᠷ ᠢᠷᠡᠵᠡᠢ᠃ ᠢᠷᠡᠮᠡᠭᠴᠡ᠂ ᠣᠷᠢᠯᠠᠵᠤ ᠭᠡᠨᠡ᠃ ᠵᠠᠨᠴᠢᠵᠤ ᠭᠡᠨᠡ᠃ ᠬᠠᠷᠢᠶᠠᠵᠤ ᠭᠡᠨᠡ᠃ ᠬᠥᠭᠰᠢᠨ᠂ ᠮᠠ᠊ ᠮᠠ᠊ ᠮᠡᠳᠡᠬᠦ ᠦᠭᠡᠢ ᠭᠡᠬᠦ ᠡᠴᠡ ᠥᠭᠡᠷᠡ ᠦᠭᠡ ᠨᠢᠭᠡᠴᠤ ᠬᠡᠯᠡᠭᠰᠡᠨ ᠦᠭᠡᠢ ᠳ᠋ᠦ᠍ ᠶᠠᠩᠳᠠᠩ ᠬᠠᠭᠠᠨ ᠶᠡᠬᠡ ᠠᠭᠤᠷᠯᠠᠵᠤ᠂ ᠶᠠᠪᠤᠭᠤᠳᠠᠢ ᠬᠦᠦ ᠶ᠋ᠢ ᠴᠢᠨᠢ ᠪᠠᠷᠢᠵᠤ ᠭᠢᠨᠳᠠᠨ ᠳ᠋ᠤ᠌ ᠬᠠᠲᠠᠭᠠᠨᠠ᠃ ᠶᠠᠪᠤᠭᠠᠴᠢ ᠬᠦᠷᠡᠩ ᠳᠠᠭᠠ ᠶ᠋ᠢ ᠴᠢᠨᠢ ᠠᠪᠴᠤ ᠴᠢᠳᠥᠷ ᠲᠦ᠍ ᠬᠠᠲᠠᠭᠠᠨᠠ᠃ ᠶᠠᠰᠤᠨ ᠨᠤᠮᠤ ᠰᠤᠮᠤ ᠶ᠋ᠢ ᠴᠢᠨᠢ ᠬᠤᠷᠢᠶᠠᠵᠤ ᠰᠠᠩ ᠳ᠋ᠤ᠌ ᠬᠠᠲᠠᠭᠠᠨᠠ᠃ ᠶᠠᠭᠠᠬᠢᠰᠢ ᠦᠭᠡᠢ ᠮᠠᠭᠤ ᠬᠥᠭᠰᠢᠨ ᠴᠢᠮᠠᠶ᠋ᠢ ᠠᠪᠠᠴᠢᠵᠤ᠂ ᠦᠨᠡᠰᠦᠨ ᠳᠡᠭᠡᠷᠡ ᠬᠠᠲᠠᠭᠠᠨᠠ᠂ ᠥᠪᠥᠩ ᠭᠡᠷ ᠢ᠋ ᠴᠢᠨᠢ ᠦᠨᠡᠰᠦ ᠪᠣᠯᠭᠠᠨᠠ᠃ ᠥᠨᠳᠡᠭᠡᠨ ᠲᠣᠭᠣᠭᠠᠨ ᠳ᠋ᠤ᠌ ᠴᠢᠨᠢ ᠨᠣᠬᠠᠢ ᠲᠡᠵᠢᠭᠡᠨᠡ᠃ ᠬᠡᠯᠡᠪᠡᠯ ᠡᠨᠡ ᠵᠢᠱ᠌ᠢᠶᠡ᠂ ᠬᠡᠯᠡᠬᠦ ᠦᠭᠡᠢ ᠪᠣᠯ ᠡᠭᠦᠨ ᠡᠴᠡ ᠶᠡᠬᠡ ᠭᠡᠵᠦ ᠤᠷᠤᠭᠰᠢ ᠬᠣᠢᠰᠢ ᠭᠦᠶᠦᠵᠦ᠂ ᠤᠯᠠᠭᠠᠨ ᠭᠠᠯᠵᠠᠭᠤ ᠵᠠᠩᠨᠠᠵᠤ ᠰᠣᠯᠤᠬᠠ ᠶ᠋ᠢ ᠨᠢ ᠲᠠᠯᠪᠢᠭᠰᠠᠨ ᠭᠦᠷᠲᠡᠮᠪᠠ ᠰᠢᠭ᠋᠂ ᠰᠣᠷᠭᠣᠭ ᠣᠷᠣᠭᠰᠠᠨ ᠪᠤᠤᠷᠠ ᠰᠢᠭ᠋᠂ ᠭᠠᠩᠭᠠ ᠦᠨᠦᠷᠲᠦᠭᠰᠡᠨ ᠪᠥᠬᠡ ᠰᠢᠭ᠂ ᠭᠠᠯᠵᠠᠭᠤ ᠲᠤᠰᠤᠭᠰᠠᠨ ᠪᠤᠬᠠ ᠰᠢᠭ᠋ ᠳᠡᠪᠬᠡᠴᠡᠬᠦ ᠳ᠋ᠦ᠍ ᠠᠰᠢᠭ ᠢ᠋ ᠪᠣᠳᠣᠭᠰᠠᠨ ᠨᠣᠶᠠᠳ ᠨᠢ᠂ ᠠᠷᠤ ᠡᠮᠦᠨᠡ ᠨᠢ ᠪᠤᠮᠪᠠᠭᠠᠨᠠᠵᠤ᠂ ᠠᠳᠠᠰᠬᠠ ᠲᠤᠷᠤᠰᠬᠠ ᠶ᠋ᠢ ᠨᠢ ᠡᠷᠭᠢᠭᠦᠯᠵᠦ᠂ ᠠᠮᠠ ᠮᠤᠰᠬᠢᠯᠳᠤᠭᠤᠯᠵᠤ᠂ ᠬᠥᠯ ᠭᠠᠷ ᠢ᠋ᠶ᠋ᠠᠨ ᠵᠡᠷᠭᠡᠴᠡᠭᠦᠯᠵᠦ᠂ ᠬᠥᠨᠳᠡᠢ ᠬᠠᠩᠭᠠᠢ ᠶ᠋ᠢ ᠣᠩᠭᠢᠴᠢᠵᠤ᠂ ᠬᠤᠯᠤᠭᠠᠨᠠ ᠶ᠋ᠢᠨ ᠨᠦᠬᠡ ᠦᠵᠡᠪᠡᠴᠦ ᠬᠤᠷᠤᠭᠤ ᠪᠠᠨ ᠬᠢᠵᠦ ᠲᠡᠮᠲᠡᠷᠢᠬᠦ ᠰᠢᠭ᠂ ᠬᠤᠷᠤᠳ ᠤ᠋ᠨ ᠡᠮᠲᠡᠷᠬᠡᠢ ᠣᠯᠪᠠᠴᠤ᠂ ᠡᠷᠭᠢᠭᠦᠯᠵᠦ ᠲᠣᠭᠣᠷᠢᠭᠤᠯᠵᠤ ᠦᠵᠡᠬᠦ ᠰᠢᠭ᠂ ᠲᠣᠭᠣᠭᠠ ᠲᠤᠯᠭᠠ ᠶ᠋ᠢ ᠨᠢ ᠲᠣᠩᠭᠣᠷᠤᠭᠤᠯᠵᠤ᠂ ᠲᠣᠭᠣᠷᠢᠭᠤᠯ ᠰᠢᠷᠢᠳᠡᠭ ᠢ᠋ ᠨᠢ ᠣᠩᠭᠢᠯᠵᠤ᠂ ᠲᠣᠭᠣᠰᠣ ᠬᠣᠭ ᠢ᠋ ᠨᠢ ᠪᠤᠵᠢᠭᠢᠨᠠᠭᠤᠯᠵᠤ᠂ ᠲᠤᠩ ᠬᠠᠴᠢᠨ ᠳᠡᠪᠬᠡᠴᠡᠬᠦ ᠳ᠋ᠦ᠍᠂ ᠠᠶᠠᠯᠠᠵᠤ ᠶᠠᠪᠤᠳᠠᠭ ᠴᠡᠷᠢᠭ ᠨᠢ ᠠᠮᠠ ᠶ᠋ᠢ ᠨᠢ ᠳᠠᠭᠤᠷᠢᠶᠠᠨ ᠠᠩᠭᠠᠢᠵᠤ᠂ ᠠᠶᠠ ᠶ᠋ᠢ ᠨᠢ ᠳᠠᠭᠤᠷᠢᠶᠠᠨ ᠪᠠᠷᠬᠢᠷᠠᠵᠤ᠂ ᠭᠠᠷ ᠢ᠋ ᠨᠢ ᠳᠠᠭᠤᠷᠢᠶᠠᠵᠤ ᠳᠠᠯᠠᠢᠪᠠᠴᠤ᠂ ᠴᠣᠬᠢᠬᠤ ᠶ᠋ᠢᠨ ᠦᠶᠡ ᠳᠡᠭᠡᠷᠡ ᠠᠯᠳᠠᠵᠤ᠂ ᠬᠥᠯ ᠢ᠋ ᠨᠢ ᠳᠠᠭᠤᠷᠢᠶᠠᠵᠤ ᠲᠡᠢᠷᠪᠡᠴᠦ᠂ ᠢᠰᠬᠦᠯᠬᠦ ᠶ᠋ᠢᠨ ᠦᠶᠡ ᠳᠡᠭᠡᠷᠡ ᠳᠡᠪᠰᠡᠵᠦ᠂ ᠬᠠᠳᠠ ᠶ᠋ᠢᠨ ᠳᠣᠷᠭᠢᠶᠠᠨ ᠰᠢᠭ᠋ ᠬᠠᠩᠭᠢᠨᠠᠭᠤᠯᠵᠤ᠂ ᠠᠭᠤᠯᠠ ᠶ᠋ᠢᠨ ᠳᠣᠷᠭᠢᠶᠠᠨ ᠰᠢᠭ᠋ ᠤᠶᠠᠩᠭᠠᠯᠠᠭᠤᠯᠵᠤ᠂ ᠰᠦᠷ ᠲᠦ᠋ᠨᠢ ᠰᠦᠷ ᠨᠡᠮᠡᠵᠦ᠂ ᠰᠡᠭᠦᠯ ᠳ᠋ᠦ᠍ᠨᠢ ᠲᠠᠰᠢᠭᠤᠷ ᠪᠣᠯᠵᠤ ᠶᠠᠪᠤᠬᠤ ᠳ᠋ᠤ᠌᠂ ᠤᠤᠯᠭᠠᠮᠴᠢ ᠪᠡᠯᠡᠩᠴᠢ ᠬᠥᠭᠰᠢᠨ᠂ ᠤᠬᠠᠭᠠᠨ ᠦᠭᠡᠢ ᠪᠥᠩᠴᠢᠬᠡᠨᠡᠵᠦ᠂ ᠤᠴᠢᠷ ᠦᠭᠡᠢ ᠰᠠᠨᠳᠤᠷᠴᠤ᠂ ᠣᠷᠣᠭᠰᠢ ᠭᠦᠶᠦᠨ ᠤᠨᠠᠵᠤ᠂ ᠬᠣᠢᠰᠢ ᠭᠦᠶᠦᠨ ᠬᠣᠷᠮᠣᠢᠳᠠᠵᠤ᠂ ᠤᠬᠢᠯᠠᠵᠤ ᠤᠨᠵᠢᠬᠤ ᠬᠣᠣᠰᠯᠠᠵᠤ᠂ ᠤᠤᠯᠭᠠᠵᠤ ᠪᠡᠯᠡᠩᠳᠡᠵᠦ ᠰᠠᠨᠳᠤᠷᠤᠨ᠂ ᠠ ᠠ ᠠᠯᠠᠭᠰᠠᠨ᠂ ᠬᠡ ᠬᠡ ᠬᠡᠯᠡᠭᠰᠡᠨ ᠭᠡᠵᠦ ᠥᠩᠬᠥᠷᠢᠬᠦ ᠳ᠋ᠦ᠍᠂ ᠠᠯᠪᠠᠳᠠᠭᠤᠯᠵᠤ ᠢᠷᠡᠭᠰᠡᠨ ᠠᠷᠠᠳ ᠤ᠋ᠳ ᠨᠢ᠂ ᠠᠯᠤᠰ ᠬᠣᠯᠠ ᠵᠠᠢᠯᠠᠵᠤ᠂ ᠠᠰᠯᠠᠵᠤ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠵᠢᠰᠦ ᠴᠢᠷᠠᠢ ᠨᠢ ᠵᠡᠰ ᠰᠢᠭ ᠪᠣᠯᠵᠤ᠂ ᠥᠩᠭᠡ ᠴᠢᠷᠠᠢ ᠨᠢ ᠦᠨᠡᠰᠦ ᠰᠢᠭ ᠪᠣᠯᠵᠤ᠂ ᠬᠠᠨᠴᠤᠢ ᠳᠣᠲᠣᠷᠠ ᠪᠠᠨ ᠭᠠᠷ ᠢ᠋ᠶ᠋ᠠᠨ ᠠᠳᠬᠤᠵᠤ᠂ ᠬᠠᠯᠠᠭᠤᠨ ᠵᠠᠭᠤᠷᠠ ᠪᠠᠨ ᠰᠢᠪᠡᠨᠡᠯᠳᠦᠵᠦ᠂ ᠠᠮᠠᠨ ᠳᠣᠲᠣᠷᠠ ᠪᠠᠨ ᠠᠷᠠᠭᠠ ᠪᠠᠨ ᠬᠠᠪᠢᠷᠴᠤ᠂ ᠠᠬᠠ ᠳᠡᠭᠦᠦ ᠰᠠᠳᠤᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠢᠪᠡᠨᠡᠯᠳᠦᠵᠦ᠂ ᠠᠯᠲᠠ ᠰᠢᠳᠠᠮ ᠲᠠᠢ ᠪᠣᠯᠤᠭᠠᠰᠠᠢ᠂ ᠠᠮᠢ ᠴᠥᠯᠡᠭᠡᠳ ᠦᠵᠡᠬᠦ ᠶᠤᠮᠰᠠᠨ᠃ ᠲᠥᠭᠡ ᠰᠢᠲᠠᠮ ᠲᠠᠢ ᠪᠣᠯᠤᠭᠠᠰᠠᠢ᠂ ᠲᠣᠯᠣᠭᠠᠢ ᠪᠠᠨ ᠴᠥᠯᠡᠭᠡᠳ ᠦᠵᠡᠬᠦ ᠶᠤᠮᠰᠠᠨ ᠭᠡᠵᠦ᠂ ᠬᠡᠩᠬᠦᠳᠡᠭ ᠳᠦᠭᠦᠷᠡᠩ ᠠᠭᠤᠷ᠂ ᠬᠡᠯᠡᠬᠦ ᠶ᠋ᠢᠨ ᠭᠠᠵᠠᠷ ᠦᠭᠡᠢ᠃ ᠠᠭᠤᠰᠬᠢ ᠳᠦᠭᠦᠷᠡᠩ ᠬᠢᠯᠢᠩ᠂ ᠠᠭᠤᠳᠠᠯᠬᠤ ᠶ᠋ᠢᠨ ᠭᠠᠵᠠᠷ ᠦᠭᠡᠢ᠃ ᠬᠦᠴᠦᠲᠡᠢ ᠨᠢᠭᠡ ᠨᠢ ᠭᠠᠷᠬᠤ ᠭᠡᠪᠡᠴᠦ ᠬᠥᠭᠰᠢᠨ ᠨᠢᠭᠡ ᠨᠢ ᠬᠣᠷᠢᠭᠯᠠᠵᠤ᠂ ᠡᠷᠡᠰ ᠵᠣᠷᠢᠭᠲᠠᠢ ᠨᠢ ᠭᠠᠷᠬᠤ ᠭᠡᠪᠡᠴᠦ᠂ ᠡᠪᠦᠭᠡᠨ ᠨᠢᠭᠡ ᠨᠢ ᠤᠭᠵᠠᠷᠠᠵᠤ᠂ ᠭᠠᠪᠰᠢᠭᠠᠢ ᠨᠢᠭᠡ ᠨᠢ ᠭᠠᠷᠬᠤ ᠭᠡᠪᠡᠴᠦ᠂ ᠬᠠᠰᠢᠷ ᠨᠢᠭᠡ ᠨᠢ ᠲᠠᠲᠠᠰᠬᠢᠵᠦ᠂ ᠳᠣᠲᠣᠷᠠ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠪᠠᠷᠬᠢᠷᠠᠶᠠ ᠭᠡᠪᠡᠴᠦ ᠳᠣᠯᠢᠩᠭᠠᠷ ᠨᠢᠭᠡ ᠨᠢ ᠨᠤᠳᠤᠷᠴᠤ᠂ ᠡᠨᠡ ᠮᠡᠲᠦ ᠪᠡᠷ ᠠᠭᠠᠰᠢᠯᠠᠭᠰᠠᠨ ᠠ᠋ᠴᠠ᠂ ᠲᠡᠷᠡ ᠮᠡᠲᠦ ᠪᠡᠷ ᠠᠭᠠᠰᠢᠯᠠᠭᠤᠯᠵᠤ᠂ ᠨᠢᠭᠡ ᠨᠢ ᠨᠢᠭᠡᠨ ᠢ᠋ᠶ᠋ᠡᠨ ᠲᠠᠲᠠᠭᠰᠠᠨ ᠠ᠋ᠴᠠ ᠨᠢᠭᠡᠨ ᠢ᠋ ᠪᠡᠨ ᠴᠦ᠍ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠬᠣᠶᠠᠷ ᠨᠢ ᠬᠣᠶᠠᠷ ᠢ᠋ᠶ᠋ᠠᠨ ᠲᠠᠲᠠᠭᠰᠠᠨ ᠠ᠋ᠴᠠ ᠬᠣᠶᠠᠷ ᠢ᠋ ᠪᠡᠨ ᠴᠦ᠍ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠰᠠᠨᠠᠭᠠ ᠵᠣᠷᠢᠭ ᠨᠢᠭᠡᠳᠬᠡᠭᠰᠡᠨ ᠦᠭᠡᠢ ᠡᠴᠡ ᠰᠠᠭᠠᠬᠠᠯᠲᠠ ᠠᠢᠯ ᠢ᠋ᠶ᠋ᠠᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠠᠷᠰᠯᠠᠨ ᠵᠣᠷᠢᠭ ᠢ᠋ᠶ᠋ᠠᠨ ᠨᠢᠭᠡᠳᠬᠡᠭᠰᠡᠨ ᠦᠭᠡᠢ ᠡᠴᠡ ᠠᠢᠯ ᠠᠢᠮᠠᠭ ᠢ᠋ᠶ᠋ᠠᠨ ᠠᠪᠤᠷᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠠᠰ ᠠᠰᠲᠠᠭᠠᠨ ᠠᠷᠪᠠᠩ ᠳᠠᠷᠪᠠᠩ ᠪᠠᠢᠵᠤ ᠪᠠᠢᠲᠠᠯᠠ᠂ ᠣᠯᠠᠨ ᠤ᠋ ᠣᠯᠠᠨ ᠳᠣᠲᠣᠷᠠ ᠠ᠋ᠴᠠ ᠣᠨᠴᠠ ᠪᠠᠭᠠᠲᠤᠷᠯᠢᠭ ᠬᠡᠳᠦ ᠨᠢ ᠳᠠᠷᠤᠪᠠᠴᠤ ᠳᠡᠷᠳᠡᠢᠵᠦ᠂ ᠪᠤᠯᠠᠪᠠᠴᠤ ᠪᠤᠯᠲᠠᠢᠵᠤ᠂ ᠤᠶᠠᠭᠰᠠᠨ ᠴᠤ᠌ ᠲᠠᠰᠤᠳᠠᠵᠤ᠂ ᠤᠭᠵᠠᠷᠠᠭᠰᠠᠨ ᠴᠤ᠌ ᠤᠷᠤᠭᠰᠢᠯᠠᠵᠤ᠂ ᠬᠦᠯᠢᠭᠰᠡᠨ ᠴᠦ᠍ ᠬᠥᠭᠵᠢᠵᠦ᠂ ᠲᠠᠲᠠᠭᠰᠠᠨ ᠴᠤ᠌ ᠳᠠᠪᠰᠢᠵᠤ᠂ ᠣᠮᠣᠭ ᠲᠠᠢ ᠬᠡᠳᠦ ᠨᠢ ᠣᠭᠢᠯ ᠦᠰᠦᠷᠦᠨ ᠭᠠᠷᠤᠭᠠᠳ ᠣᠷᠢᠯᠠᠯᠳᠤᠨ ᠪᠠᠷᠬᠢᠷᠠᠵᠠᠢ᠃
ᠨᠢᠭᠦᠯᠲᠦ ᠶᠠᠩᠳᠠᠩ ᠢ᠋ ᠨᠢᠰᠪᠡᠴᠦ ᠠᠯᠠᠨᠠ᠃ ᠶᠠᠯᠠᠲᠤ ᠶᠠᠩᠳᠠᠩ ᠢ᠋ ᠶᠠᠭᠠᠬᠢᠪᠠᠴᠤ ᠠᠯᠠᠨᠠ ᠭᠡᠳ ᠬᠡᠳᠦ ᠬᠡᠳᠦ ᠪᠠᠷᠬᠢᠷᠠᠭᠠᠳ ᠠᠪᠤᠭᠰᠠᠨ ᠴᠢᠨᠢ᠂ ᠦᠵᠦᠭᠦᠷᠯᠡᠵᠦ ᠪᠠᠢᠭᠰᠠᠨ ᠶᠠᠩᠳᠠᠩ ᠬᠠᠭᠠᠨ᠂ ᠦᠢᠮᠡᠭᠦᠯᠵᠦ ᠪᠠᠢᠭᠰᠠᠨ ᠨᠣᠶᠠᠳ ᠲᠦᠰᠢᠮᠡᠳ᠂ ᠰᠦᠷ ᠲᠦ᠋ᠨᠢ ᠪᠠᠢᠭᠰᠠᠨ ᠬᠤᠶᠠᠭ ᠴᠡᠷᠢᠭ᠂ ᠰᠦᠯᠵᠢᠵᠦ ᠪᠠᠢᠭᠰᠠᠨ ᠪᠣᠢᠳᠠ ᠲᠠᠬᠠᠷ᠂ ᠣᠯᠠᠨ ᠪᠣᠭᠣᠯ ᠨᠢ ᠠᠭᠰᠤᠷᠬᠤ ᠳ᠋ᠤ᠌᠂ ᠣᠷᠣᠢ ᠶ᠋ᠢᠨ ᠦᠰᠦ ᠨᠢ ᠣᠪᠣᠢᠵᠤ᠂ ᠤᠲᠤᠭᠠ ᠵᠢᠩᠰᠡ ᠨᠢ ᠴᠡᠴᠡᠷᠬᠢᠨᠡᠵᠦ᠂ ᠠᠯᠪᠠᠲᠤ ᠪᠣᠭᠣᠯ ᠨᠢ ᠡᠠᠭᠰᠦᠷᠬᠤ ᠳ᠋ᠤ᠌᠂ ᠠᠮᠢᠨ ᠭᠣᠣᠯ ᠨᠢ ᠲᠠᠲᠠᠯᠳᠤᠵᠤ᠂ ᠠᠯᠲᠠᠨ ᠲᠠᠮᠠᠭᠠ ᠨᠢ ᠳᠣᠭᠳᠣᠯᠪᠠᠴᠤ᠂ ᠬᠡᠷᠡᠭ ᠦ᠋ᠨ ᠡᠵᠡᠨ ᠶᠠᠩᠳᠠᠩ᠂ ᠬᠡᠭᠡᠯ ᠲᠡᠢ ᠦᠨᠢᠶᠡ ᠰᠢᠭ ᠴᠦᠯᠬᠦᠢᠵᠦ᠂ ᠬᠡᠷᠦᠭᠰᠡᠨ ᠪᠤᠬᠠ ᠰᠢᠭ᠋ ᠬᠡᠭᠵᠡᠢᠵᠦ᠂ ᠬᠡᠳᠡᠷᠯᠡᠭᠰᠡᠨ ᠨᠣᠬᠠᠢ ᠰᠢᠭ᠋ ᠢᠷᠵᠠᠢᠵᠤ᠂ ᠦᠭᠡ ᠦᠭᠡᠢ ᠦᠷᠴᠢᠢᠵᠦ᠂ ᠦᠵᠦᠭᠦᠷ ᠲᠡᠢ ᠰᠠᠬᠠᠯ ᠢ᠋ᠶ᠋ᠠᠨ ᠱᠥᠷᠪᠥᠢᠯᠭᠡᠵᠦ᠂ ᠳᠠᠭᠤᠨ ᠦᠭᠡᠢ ᠲᠣᠭᠳᠣᠢᠵᠤ ᠲᠣᠭᠣᠷᠢᠭ ᠨᠢᠳᠦ ᠪᠡᠨ ᠭᠤᠷᠪᠠᠯᠵᠢᠯᠠᠵᠤ ᠵᠣᠭ ᠲᠣᠰᠣᠨ ᠵᠣᠭᠰᠣᠬᠤ ᠳ᠋ᠤ᠌᠂ ᠠᠯᠤᠰ ᠠ᠋ᠴᠠ ᠬᠠᠷᠠᠵᠤ ᠪᠠᠢᠭᠠ ᠠᠯᠪᠠᠲᠤ ᠪᠣᠭᠣᠯ ᠤ᠋ᠳ᠂ ᠠᠭᠰᠤᠷᠤᠭᠰᠠᠨ ᠢ᠋ᠶ᠋ᠠᠨ ᠠᠨᠠᠢ ᠳ᠋ᠤ᠌ ᠪᠣᠳᠣᠭᠰᠠᠨ᠂ ᠠᠭᠤᠷ ᠬᠢᠯᠢᠩ ᠨᠢ ᠨᠠᠮᠵᠢᠭᠠ ᠦᠭᠡᠢ᠂ ᠠᠷᠰᠯᠠᠨ ᠵᠣᠷᠢᠭ ᠲᠠᠢ ᠡᠷᠡᠴᠦᠳ᠂ ᠪᠠᠷᠬᠢᠷᠠᠭᠰᠠᠨ ᠢ᠋ᠶ᠋ᠠᠨ ᠪᠠᠭᠠ ᠳ᠋ᠤ᠌ ᠪᠣᠳᠣᠭᠰᠠᠨ᠂ ᠪᠠᠬᠠ ᠨᠢ ᠬᠠᠨᠤᠭᠠ ᠦᠭᠡᠢ᠂ ᠪᠠᠭᠠᠲᠤᠷ ᠵᠣᠷᠢᠭ ᠲᠠᠢ ᠡᠷᠡᠴᠦᠳ ᠪᠠᠰᠠ ᠳᠠᠬᠢᠨ ᠬᠡᠳᠦ ᠪᠠᠷᠬᠢᠷᠠᠵᠤ᠂ ᠨᠢᠳᠦ ᠪᠡᠨ ᠪᠦᠯᠲᠡᠢᠨ ᠪᠠᠷᠬᠢᠷᠠᠵᠠᠢ᠃ ᠨᠢᠷᠤᠭᠤ ᠪᠠᠨ ᠡᠭᠦᠷᠦᠭᠡᠳ ᠪᠠᠷᠬᠢᠷᠠᠵᠠᠢ᠃ ᠨᠢᠳᠤᠷᠭᠠ ᠪᠠᠨ ᠵᠠᠩᠭᠢᠳᠤᠭᠠᠳ ᠪᠠᠷᠬᠢᠷᠠᠵᠠᠢ᠃ ᠢᠩᠭᠢᠭᠰᠡᠨ ᠴᠢᠨᠢ ᠪᠠᠭᠠᠲᠤᠷ ᠨᠢᠭᠡ ᠨᠢ ᠪᠠᠢᠷᠢᠰᠢᠵᠤ᠂ ᠪᠠᠭᠤᠷᠠᠢ ᠨᠢᠭᠡ ᠨᠢ ᠵᠢᠷᠦᠬᠡ ᠣᠷᠣᠵᠤ᠂ ᠬᠡᠷᠰᠡᠦᠯᠡᠵᠦ ᠪᠠᠢᠭᠰᠠᠨ ᠨᠢ ᠭᠡᠮᠰᠢᠵᠦ᠂ ᠬᠠᠰᠢᠷ ᠪᠠᠢᠭᠰᠠᠨ ᠨᠢ ᠭᠠᠰᠠᠯᠵᠤ᠂ ᠦᠷᠡ ᠠᠴᠢ ᠨᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠡᠯᠡᠭᠰᠡᠨ ᠦᠨᠡᠨ ᠶᠣᠰᠣ ᠶ᠋ᠢ ᠳᠠᠭᠠᠨᠠ ᠭᠡᠳ ᠦᠯᠡᠳᠡᠭᠰᠡᠨ ᠬᠥᠮᠦᠨ ᠭᠡᠵᠦ ᠨᠢᠭᠡ ᠴᠦ᠍ ᠦᠭᠡᠢ᠂ ᠦᠢ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠷᠬᠢᠷᠠᠵᠠᠢ᠃ ᠠᠷᠤ ᠳ᠋ᠤᠨᠢ ᠬᠣᠴᠣᠷᠤᠭᠰᠠᠨ ᠨᠢᠭᠡ ᠴᠦ᠍ ᠦᠭᠡᠢ᠂ ᠠᠮᠠ ᠠᠮᠠ ᠠᠮᠠᠨ ᠳ᠋ᠠᠭᠠᠨ ᠪᠠᠷᠬᠢᠷᠠᠵᠤ ᠠᠬᠠᠮᠠᠳ ᠬᠥᠭᠰᠢᠳ ᠦ᠋ᠨ ᠬᠡᠯᠡᠭᠰᠡᠨ ᠨᠢ᠄ 《ᠡᠷᠭᠢᠭᠡᠳ ᠢᠩᠭᠢ᠂ ᠴᠢᠭᠢᠶᠡᠲᠦᠷᠦᠦ᠂ ᠡᠯᠢᠭᠡᠨ ᠳᠡᠭᠡᠷᠡ ᠴᠢᠨᠢ ᠴᠢᠴᠢᠶᠡ ᠭᠠᠢᠭᠤᠢ᠂ ᠳᠠᠬᠢᠭᠠᠳ ᠢᠩᠭᠢ᠂ ᠴᠢᠭᠢᠶᠡᠲᠦᠷᠦᠦ ᠳᠠᠭᠵᠢᠨ ᠳᠡᠭᠡᠷᠡ ᠴᠢᠨᠢ ᠴᠣᠬᠢᠶᠠ ᠭᠠᠢᠭᠤᠢ᠂ ᠭᠠᠪᠠᠯᠠ ᠴᠢᠨᠢ ᠳᠠᠩᠴᠢ ᠬᠣᠯᠠ ᠪᠠᠢᠨᠠ᠃ ᠭᠠᠷ ᠮᠢᠨᠢ ᠳᠠᠩᠴᠢ ᠬᠣᠭᠣᠰᠣᠨ ᠪᠠᠢᠨᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠪᠠᠨ᠂ ᠲᠡᠭᠦᠨ ᠡᠴᠡ ᠴᠢᠨᠠᠭᠰᠢ ᠪᠠᠨ᠂ ᠶᠣᠳᠠᠷ ᠣᠯᠳᠠᠪᠠᠴᠤ ᠪᠢᠯᠠᠭᠤ ᠲᠠᠢ ᠪᠣᠯᠭᠠᠵᠤ ᠪᠠᠷᠢᠵᠤ ᠪᠠᠢᠶᠠ᠃ ᠶᠣᠵᠤᠤᠷ ᠣᠯᠳᠠᠪᠠᠴᠤ ᠦᠵᠦᠭᠦᠷ ᠲᠡᠢ ᠪᠣᠯᠭᠠᠵᠤ ᠲᠦᠷᠡᠢᠯᠡᠵᠦ ᠪᠠᠢᠶᠠ᠃ ᠰᠢᠳᠡᠮᠡᠰᠦ ᠣᠯᠳᠠᠪᠠᠴᠤ ᠡᠭᠡᠯᠳᠦᠷᠭᠡ ᠬᠢᠭᠡᠳ ᠡᠪᠦᠷᠲᠦᠯᠡᠵᠦ ᠪᠠᠢᠶᠠ᠃ ᠰᠢᠷᠪᠥᠰᠥ ᠣᠯᠳᠠᠪᠠᠴᠤ ᠰᠡᠭᠡᠯᠳᠦᠷᠭᠡ ᠬᠢᠭᠡᠳ ᠵᠡᠭᠦᠵᠦ ᠪᠠᠢᠶᠠ᠃ ᠠᠷᠤᠭ ᠢ᠋ᠶ᠋ᠠᠨ ᠪᠣᠯᠪᠠᠴᠤ ᠪᠦᠬᠡᠯᠡᠬᠦᠨ ᠬᠢᠶᠡ᠃ ᠰᠠᠪᠠᠷ ᠢ᠋ᠶ᠋ᠠᠨ ᠪᠣᠯᠪᠠᠴᠤ ᠪᠡᠬᠢᠯᠡᠬᠦᠨ ᠬᠢᠶᠡ ᠬᠡᠵᠢᠶᠡ ᠪᠣᠯᠪᠠᠴᠤ ᠴᠢ》 ᠭᠡᠵᠦ᠂ ᠤᠷᠤᠭᠤᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠵᠠᠨᠤᠵᠤ᠂ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠵᠢᠭᠠᠵᠤ᠂ ᠨᠢᠭᠤᠷᠤᠨ ᠳ᠋ᠤᠨᠢ ᠨᠢᠯᠪᠤᠵᠤ᠂ ᠨᠢᠳᠦᠨ ᠳ᠋ᠦ᠍ᠨᠢ ᠴᠢᠴᠢᠵᠦ ᠵᠦᠭ ᠵᠦᠭ ᠲᠡᠭᠡᠨ ᠶᠠᠪᠤᠬᠤ ᠳ᠋ᠤ᠌᠄ ᠶᠠᠭᠠᠷᠠᠤ ᠪᠠᠭᠠᠲᠤᠷ ᠨᠢ ᠶᠠᠭᠠᠷᠠᠵᠤ᠂ ᠶᠠᠪᠤᠵᠠᠭᠠᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠠᠭᠰᠤᠷᠴᠤ᠂ ᠬᠡᠢ ᠲᠡᠢ ᠡᠷᠡ ᠨᠢ ᠬᠥᠳᠡᠯᠵᠦ᠂ ᠬᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠵᠠᠩᠭᠠᠵᠤ᠄《ᠬᠠᠵᠠᠢᠭᠰᠠᠨ ᠳᠡᠭᠡᠷᠡ ᠨᠢ ᠨᠤᠳᠤᠷᠤᠶᠠ᠃ ᠠᠶᠤᠭᠰᠠᠨ ᠳᠡᠭᠡᠷᠡ ᠨᠢ ᠠᠯᠠᠶᠠ᠃ ᠰᠤᠮᠤᠨ ᠳᠤᠮᠳᠠᠭᠤᠷ ᠨᠢ ᠰᠢᠷᠭᠤᠯᠠᠵᠤ ᠣᠷᠣᠶᠠ᠃ ᠢᠯᠳᠦᠨ ᠳᠤᠮᠳᠠᠭᠤᠷ ᠨᠢ ᠢᠪᠡᠵᠦ ᠣᠷᠣᠶᠠ᠃ ᠰᠡᠯᠡᠮᠡᠨ ᠳᠤᠮᠳᠠᠭᠤᠷ ᠨᠢ ᠰᠡᠨᠳᠡᠴᠢᠨ ᠣᠷᠣᠵᠤ᠂ ᠪᠦᠭᠭᠦᠭᠰᠡᠨ ᠴᠡᠷᠢᠭ ᠢ᠋ ᠨᠢ ᠪᠦᠷᠬᠦᠨ ᠣᠷᠣᠵᠤ᠂ ᠨᠢᠭᠡ ᠶ᠋ᠢ ᠪᠡᠨ ᠦᠵᠡᠵᠦ ᠨᠡᠬᠡᠢ ᠳᠡᠪᠡᠯ ᠢ᠋ᠶ᠋ᠡᠨ ᠲᠠᠢᠯᠤᠶᠠ᠃ ᠴᠢᠳᠠᠪᠠᠯ ᠠᠯᠠᠵᠤ᠂ ᠶᠠᠳᠠᠪᠠᠯ ᠰᠢᠯᠪᠤᠯᠤᠶᠠ》 ᠭᠡᠵᠡᠢ᠃
ᠬᠠᠰᠢᠷ ᠡᠷᠡ ᠨᠢ ᠭᠠᠷ ᠰᠠᠵᠢᠵᠤ ᠭᠠᠷᠴᠤ ᠢᠷᠡᠵᠦ ᠬᠡᠯᠡᠬᠦ ᠨᠢ᠄《ᠳᠡᠪᠡᠯ ᠳ᠋ᠡᠭᠡᠨ ᠵᠠᠬᠠ ᠲᠠᠢ ᠪᠣᠯᠵᠤ ᠪᠠᠢᠵᠤ᠂ ᠳᠡᠷᠭᠡᠳᠡ ᠪᠡᠨ ᠨᠥᠬᠥᠷ ᠲᠡᠢ ᠪᠣᠯᠵᠤ ᠪᠠᠢᠵᠤ᠂ ᠣᠯᠠᠨ ᠳ᠋ᠠᠭᠠᠨ ᠲᠦᠷᠦᠭᠦᠦ ᠲᠡᠢ ᠪᠣᠯᠵᠤ ᠪᠠᠢᠵᠤ᠂ ᠣᠷᠴᠢᠮ ᠳ᠋ᠠᠭᠠᠨ ᠲᠤᠰᠠᠯᠠᠮᠵᠢ ᠲᠠᠢ ᠪᠣᠯᠵᠤ ᠪᠠᠢᠵᠤ᠂ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠪᠠᠮᠪᠠᠢ ᠲᠠᠢ ᠪᠣᠯᠵᠤ ᠪᠠᠢᠵᠤ᠂ ᠵᠡᠭᠦᠨ ᠭᠠᠷ ᠲᠠᠭᠠᠨ ᠵᠡᠪᠰᠡᠭ ᠲᠡᠢ ᠪᠣᠯᠵᠤ ᠪᠠᠢᠵᠤ᠂ ᠲᠣᠯᠣᠭᠠᠢ ᠳ᠋ᠠᠭᠠᠨ ᠳᠤᠭᠤᠯᠠᠭᠠ ᠲᠠᠢ ᠪᠣᠯᠵᠤ ᠪᠠᠢᠵᠤ᠂ ᠪᠡᠶᠡ ᠳ᠋ᠡᠭᠡᠨ ᠬᠤᠶᠠᠭ ᠲᠠᠢ ᠪᠣᠯᠵᠤ ᠪᠠᠢᠵᠤ᠂ ᠦᠰᠲᠡᠨ ᠳᠠᠢᠰᠤᠨ ᠠ᠋ᠴᠠ ᠨᠢᠭᠡ ᠶ᠋ᠢ ᠴᠣ ᠦᠯᠡᠳᠡᠭᠡᠬᠦ ᠦᠭᠡᠢ᠂ ᠥᠰᠯᠢᠭ ᠬᠥᠮᠦᠨ ᠡᠴᠡ ᠨᠢᠭᠡ ᠶ᠋ᠢ ᠴᠣ ᠦᠬᠦᠭᠦᠯᠬᠦ ᠦᠭᠡᠢ》 ᠭᠡᠵᠡᠢ᠃
ᠡᠷᠡᠰ ᠨᠢᠭᠡ ᠨᠢ ᠭᠠᠷᠴᠤ᠂ ᠡᠭᠦᠨ ᠦ᠌ ᠬᠡᠯᠡᠬᠦ ᠶ᠋ᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ᠂ ᠣᠮᠣᠭᠲᠤ ᠨᠢᠭᠡ ᠨᠢ ᠭᠠᠷᠴᠤ᠂ ᠣᠯᠠᠨ ᠤ᠋ ᠬᠡᠯᠡᠬᠦ ᠶ᠋ᠢ ᠳᠠᠭᠠᠯᠠᠬᠤ ᠦᠭᠡᠢ᠃ ᠣᠷᠢᠯᠠᠨ ᠪᠠᠷᠬᠢᠷᠠᠨ ᠬᠡᠯᠡᠬᠦ ᠨᠢ᠄《ᠠᠯᠠᠭᠠᠳᠠᠵᠤ ᠭᠡᠮ᠂ ᠡᠪᠡᠳᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠶᠤᠮ᠃ ᠠᠯᠠᠯᠳᠤᠵᠤ ᠭᠡᠮ᠂ ᠦᠬᠦᠬᠦ ᠦᠭᠡᠢ ᠶᠠᠭᠠᠬᠢᠬᠤ ᠶᠤᠮ᠃ ᠪᠠᠢᠯᠳᠤᠬᠤ ᠠ᠋ᠴᠠ ᠠᠶᠤᠪᠠᠯ ᠪᠠᠭᠠᠲᠤᠷ ᠪᠣᠯᠬᠤ ᠦᠭᠡᠢ᠃ ᠪᠠᠭᠠᠲᠤᠷᠯᠠᠬᠤ ᠠ᠋ᠴᠠ ᠠᠶᠤᠪᠠᠯ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠬᠤ ᠦᠭᠡᠢ᠃ ᠠᠯᠠᠪᠠᠯ ᠠᠳᠬᠤᠭᠰᠠᠨ ᠨᠢᠳᠤᠷᠭᠠ ᠡᠨᠡ ᠪᠡᠯᠡᠬᠡᠨ ᠪᠠᠢᠨᠠ》ᠭᠡᠵᠦ ᠨᠢᠳᠤᠷᠭᠠ ᠪᠠᠨ ᠦᠵᠡᠭᠦᠯᠵᠦ᠄《 ᠴᠣᠬᠢᠪᠠᠯ ᠴᠣᠬᠢᠭᠤᠯᠤᠭᠰᠠᠨ ᠶᠠᠩᠳᠠᠩ ᠲᠡᠷᠡ ᠪᠡᠯᠡᠬᠡᠨ ᠪᠠᠢᠨᠠ》 ᠭᠡᠵᠦ ᠬᠤᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠵᠢᠭᠠᠬᠤ ᠳ᠋ᠤ᠌᠂ ᠦᠵᠦᠭᠦᠷᠯᠡᠵᠦ ᠪᠠᠢᠭᠰᠠᠨ ᠨᠢ ᠴᠦ᠍ ᠠᠳᠠᠯᠢ᠂ ᠦᠢᠮᠡᠭᠦᠯᠵᠦ ᠪᠠᠢᠭᠰᠠᠨ ᠨᠢ ᠴᠦ᠍ ᠠᠳᠠᠯᠢ᠂ ᠰᠦᠯᠵᠢᠵᠦ ᠪᠠᠢᠭᠰᠠᠨ ᠨᠢ ᠴᠦ᠍ ᠠᠳᠠᠯᠢ᠂ ᠰᠦᠷ ᠲᠤᠨᠢ ᠪᠠᠢᠭᠰᠠᠨ ᠨᠢ ᠴᠦ᠍ ᠬᠡᠯᠡᠯᠭᠡ ᠦᠭᠡᠢ᠂ ᠬᠠᠷᠠᠭᠰᠠᠨ ᠨᠢᠳᠦ ᠪᠡᠨ ᠴᠠᠪᠴᠢᠬᠤ ᠦᠭᠡᠢ᠂ ᠬᠠᠵᠠᠭᠤ ᠪᠠᠷ ᠢ᠋ᠶ᠋ᠠᠨ ᠶᠠᠪᠤᠮᠠᠭᠴᠠ᠂ ᠦᠵᠡᠭᠰᠡᠨ ᠨᠢᠳᠦ ᠪᠡᠨ ᠴᠠᠪᠴᠢᠬᠤ ᠦᠭᠡᠢ᠂ ᠥᠯᠮᠡᠢ ᠪᠡᠷ ᠢ᠋ᠶ᠋ᠡᠨ ᠭᠢᠰᠬᠢᠮᠡᠭᠴᠡ᠂ ᠵᠠᠮ ᠠ᠋ᠴᠠ ᠨᠢ ᠵᠠᠮᠠᠷᠠᠵᠤ᠂ ᠭᠣᠣᠯ ᠠ᠋ᠴᠠ ᠪᠠᠨ ᠭᠤᠢᠪᠢᠯᠵᠠᠵᠤ᠂ ᠡᠬᠢ ᠨᠢ ᠡᠷᠭᠢᠮᠡᠭᠴᠡ᠂ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢ ᠰᠠᠮᠠᠭᠤᠷᠠᠵᠤ᠂ ᠲᠣᠯᠣᠭᠠᠢ ᠨᠢ ᠡᠷᠭᠢᠮᠡᠭᠴᠡ᠂ ᠲᠣᠭᠣᠰᠣ ᠬᠣᠭ ᠪᠤᠵᠢᠭᠢᠨᠠᠵᠤ᠂ ᠡᠷᠡ ᠲᠡᠢ ᠨᠢᠭᠡ ᠨᠢ ᠡᠷᠡ ᠦᠭᠡᠢ ᠨᠢᠭᠡ ᠪᠡᠨ ᠲᠦᠯᠬᠢᠵᠦ᠂ ᠡᠭᠴᠡ ᠤᠷᠤᠭᠰᠢ ᠪᠠᠨ ᠤᠨᠠᠭᠠᠵᠤ᠂ ᠠᠶᠠᠲᠠᠢ ᠭᠡᠳᠡᠭ ᠨᠢᠭᠡ ᠨᠢ᠂ ᠠᠯᠢ ᠮᠠᠭᠤ ᠭᠡᠰᠡᠨ ᠢ᠋ᠶ᠋ᠡᠨ ᠲᠦᠯᠬᠢᠵᠦ᠂ ᠠᠰ ᠭᠡᠳᠡᠷᠭᠦ ᠪᠡᠨ ᠤᠨᠠᠭᠠᠵᠤ᠂ ᠳᠡᠷᠡᠰᠦᠨ ᠳ᠋ᠦ᠍ ᠲᠡᠭᠡᠭᠯᠡᠭᠰᠡᠭᠡᠷ᠂ ᠳᠡᠪᠡᠩ ᠳ᠋ᠦ᠍ ᠪᠦᠳᠦᠷᠢᠭᠰᠡᠭᠡᠷ᠂ ᠪᠤᠷᠭᠠᠰᠤᠨ ᠳ᠋ᠤ᠌ ᠲᠡᠭᠡᠭᠯᠡᠭᠰᠡᠭᠡᠷ᠂ ᠪᠤᠲᠠᠨ ᠳ᠋ᠤ᠌ ᠪᠦᠳᠦᠷᠢᠭᠰᠡᠭᠡᠷ᠂ ᠳᠡᠮᠡᠢ ᠪᠠᠯᠠᠢ ᠪᠠᠷᠬᠢᠷᠠᠭᠰᠠᠭᠠᠷ᠂ ᠶᠠᠩᠳᠠᠩ ᠬᠠᠭᠠᠨ ᠤ᠋ ᠶᠠᠮᠤᠨ ᠳ᠋ᠤ᠌᠂ ᠶᠠᠭ ᠳᠡᠪᠵᠢᠶᠡᠨ ᠪᠣᠯᠤᠨ ᠣᠷᠣᠵᠠᠢ᠃
ᠠᠷᠤ ᠳ᠋ᠤᠨᠢ ᠬᠣᠴᠣᠷᠤᠭᠰᠠᠨ ᠠᠯᠪᠠᠲᠤ ᠨᠤᠭᠤᠳ᠂ ᠠᠩᠬᠠ ᠣᠷᠣᠨ ᠠ᠋ᠴᠠ ᠪᠠᠨ ᠰᠢᠯᠵᠢᠬᠦ ᠦᠭᠡᠢ᠂ ᠵᠢᠭᠠᠭᠰᠠᠨ ᠴᠢᠭ ᠲᠡᠭᠡᠨ ᠵᠢᠭᠠᠵᠤ᠂ ᠵᠠᠩᠭᠠᠭᠰᠠᠨ ᠴᠢᠭ ᠲᠡᠭᠡᠨ ᠵᠠᠩᠭᠠᠵᠤ᠂ ᠶᠠᠩᠳᠠᠩ ᠬᠠᠭᠠᠨ ᠢ᠋ ᠲᠦᠷ ᠨᠡᠬᠡᠬᠦ ᠦᠭᠡᠢ᠃ ᠶᠠᠪᠤᠭᠤᠳᠠᠢ ᠶ᠋ᠢᠨ ᠭᠡᠷ ᠢ᠋ ᠠᠪᠤᠷᠠᠶᠠ ᠭᠡᠳ ᠡᠵᠢ ᠶ᠋ᠢ ᠨᠢ ᠡᠷᠭᠦᠵᠦ᠂ ᠡᠨᠳᠡᠬᠢ ᠶ᠋ᠢ ᠲᠡᠨᠳᠡᠬᠢ ᠶ᠋ᠢ ᠨᠢ ᠲᠢᠭᠯᠡᠵᠦ ᠪᠠᠢᠲᠠᠯᠠ᠂ ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠡᠴᠡ᠂ ᠪᠠᠷᠰ ᠠᠷᠰᠯᠠᠨ ᠬᠦᠯᠦᠭ ᠲᠡᠢ ᠪᠠᠨᠲᠠᠭᠠᠷ ᠤᠯᠠᠭᠠᠨ ᠬᠠᠴᠠᠷ ᠲᠠᠢ᠂ ᠬᠠᠨᠠᠭᠠᠷ ᠥᠷᠭᠡᠨ ᠴᠡᠭᠡᠵᠢ ᠲᠡᠢ᠂ ᠲᠡᠨᠢᠭᠡᠷ ᠥᠷᠭᠡᠨ ᠮᠠᠩᠨᠠᠢ ᠲᠠᠢ᠂ ᠡᠢᠮᠦ ᠨᠢᠭᠡᠨ ᠰᠢᠨᠵᠢ ᠲᠡᠢ ᠲᠡᠢᠮᠦ ᠨᠢᠭᠡ ᠬᠥᠮᠦᠨ ᠠᠢᠰᠤᠢ ᠶ᠋ᠢ ᠪᠠᠷᠠ ᠶ᠋ᠢ ᠨᠢ ᠭᠠᠢᠬᠠᠵᠤ᠂ ᠪᠠᠭᠠᠲᠤᠷ ᠢ᠋ ᠨᠢ ᠦᠵᠡᠨ ᠪᠠᠬᠠᠳᠤᠵᠤ ᠪᠠᠢᠲᠠᠯᠠ᠂ ᠶᠠᠭ ᠣᠢᠷᠠᠬᠠᠨ ᠢᠷᠡᠭᠰᠡᠨ ᠴᠢᠨᠢ ᠶᠠᠪᠤᠭᠤᠳᠠᠢ ᠬᠦᠦ ᠨᠤᠮᠤ ᠰᠤᠮᠤ ᠪᠠᠨ ᠡᠭᠦᠷᠴᠦ᠂ ᠪᠠᠷᠰ ᠤ᠋ᠨ ᠨᠢᠷᠤᠭᠤᠨ ᠳ᠋ᠤ᠌ ᠰᠠᠭᠤᠵᠤ᠂ ᠪᠠᠭᠠᠲᠤᠷᠯᠢᠭ ᠢ᠋ᠶ᠋ᠠᠷ ᠠᠢᠰᠤᠢ ᠶ᠋ᠢ ᠡᠵᠢ ᠨᠢ ᠦᠵᠡᠵᠦ᠂ ᠢᠯᠡᠢ ᠬᠠᠯᠠᠭ ᠭᠡᠵᠦ ᠪᠡᠯᠡᠩᠳᠡᠵᠦ᠄《ᠬᠥᠮᠦᠨ ᠢ᠋ ᠢᠳᠡᠳᠡᠭ ᠪᠠᠷᠰ ᠢ᠋ ᠬᠦᠦ ᠮᠢᠨᠢ ᠶᠠᠭᠠᠬᠢᠭᠠᠳ ᠣᠨᠣᠪᠠ? ᠠᠮᠢᠲᠠᠨ ᠢ᠋ ᠢᠳᠡᠳᠡᠭ ᠪᠠᠷᠰ ᠢ᠋ ᠠᠩᠭᠠ ᠮᠢᠨᠢ ᠶᠠᠭᠠᠬᠢᠭᠠᠳ ᠣᠨᠣᠪᠠ? ᠬᠤᠷᠳᠤᠬᠠᠨ ᠪᠠᠭᠤ᠂ ᠱᠠᠯᠠᠪᠬᠠᠨ ᠰᠠᠯ》 ᠭᠡᠵᠦ ᠪᠠᠷᠬᠢᠷᠠᠵᠠᠢ᠃
ᠶᠠᠪᠤᠭᠤᠳᠠᠢ ᠬᠦᠦ ᠶᠠᠰᠤᠨ ᠨᠤᠮᠤ ᠰᠤᠮᠤ ᠪᠠᠨ ᠡᠭᠦᠷᠦᠭᠰᠡᠭᠡᠷ᠂ ᠪᠠᠷᠰ ᠢ᠋ᠶ᠋ᠠᠨ ᠤᠨᠤᠵᠤ ᠳᠠᠪᠬᠢᠭᠰᠠᠭᠠᠷ ᠪᠠᠭᠠᠬᠠᠨ ᠴᠤ᠌ ᠠᠶᠤᠬᠤ ᠦᠭᠡᠢ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠠᠷᠬᠢᠷᠠᠨ ᠬᠡᠯᠡᠭᠰᠡᠨ ᠨᠢ᠄《ᠬᠥᠮᠦᠨ ᠢ᠋ ᠢᠳᠡᠳᠡᠭ ᠠᠮᠢᠲᠠᠨ ᠢ᠋ ᠬᠦᠦ ᠴᠢᠨᠢ ᠳᠠᠷᠤᠵᠤ ᠴᠢᠳᠠᠨᠠ᠃ ᠠᠮᠢᠲᠠᠨ ᠢ᠋ ᠢᠳᠡᠳᠡᠭ ᠠᠮᠢᠲᠠᠨ ᠢ᠋ ᠠᠩᠭᠠ ᠴᠢᠨᠢ ᠳᠠᠷᠤᠵᠤ ᠴᠢᠳᠠᠨᠠ》 ᠭᠡᠵᠦ ᠨᠠᠢ᠍ᠮᠠᠨ ᠵᠦᠭ ᠢ᠋ ᠰᠢᠷᠲᠡᠵᠦ᠂ ᠢᠨᠠᠭᠰᠢ ᠪᠠᠨ ᠴᠢᠨᠠᠭᠰᠢ ᠪᠠᠨ ᠳᠠᠪᠬᠢᠭᠤᠯᠵᠤ᠂ ᠣᠯᠠᠨ ᠠ᠋ᠴᠠ ᠢᠩᠭᠢᠵᠦ ᠠᠰᠠᠭᠤᠵᠠᠢ᠄《ᠥᠪᠥᠩ ᠭᠡᠷ ᠦ᠋ᠨ ᠳᠡᠭᠡᠭᠦᠷ ᠮᠢᠨᠢ ᠥᠯᠬᠡᠭ ᠲᠣᠭᠣᠰᠣ ᠶᠠᠭᠠᠬᠢᠭᠠᠳ ᠪᠤᠵᠢᠭᠢᠨᠠᠭᠰᠠᠨ ᠪᠣᠢ? ᠥᠨᠳᠥᠷ ᠣᠭᠲᠠᠷᠭᠤᠢ ᠶ᠋ᠢᠨ ᠨᠠᠭᠠᠭᠤᠷ ᠦᠮᠡᠬᠡᠢ ᠦᠨᠦᠷ ᠶᠠᠭᠠᠬᠢᠭᠠᠳ ᠦᠨᠦᠷᠲᠦᠭᠰᠡᠨ ᠪᠣᠢ? ᠥᠯᠥᠨ ᠬᠡᠷᠢᠶᠡ ᠶᠠᠭᠠᠬᠢᠭᠠᠳ ᠭᠤᠸᠠᠭᠯᠠᠭᠰᠠᠨ ᠪᠣᠢ? ᠥᠨᠳᠡᠭᠡᠨ ᠲᠣᠭᠣᠭᠠᠨ ᠳᠣᠲᠣᠷᠠ ᠮᠢᠨᠢ᠂ ᠦᠨᠡᠰᠦ ᠶᠠᠭᠠᠬᠢᠭᠠᠳ ᠪᠢᠯᠬᠠᠭᠰᠠᠨ ᠪᠣᠢ? ᠥᠷᠭᠡᠨ ᠳᠡᠯᠡᠬᠡᠢ ᠶ᠋ᠢᠨ ᠳᠡᠭᠡᠭᠦᠷ᠂ ᠦᠬᠦᠭᠡᠷ ᠶᠠᠭᠠᠬᠢᠭᠠᠳ ᠳᠦᠭᠦᠷᠦᠭᠰᠡᠨ ᠪᠣᠢ? ᠥᠯᠥᠨ ᠴᠢᠨᠣᠠ ᠶᠠᠭᠠᠬᠢᠭᠠᠳ ᠮᠡᠭᠨᠡᠭᠦᠴᠢᠯᠡᠭᠰᠡᠨ ᠪᠣᠢ? ᠣᠯᠠᠨ ᠲᠠ ᠨᠠᠷ ᠤᠴᠢᠷ ᠢ᠋ ᠨᠢ ᠪᠣᠳᠣᠵᠤ ᠦᠵᠡᠭᠡᠳ ᠤᠬᠠᠭᠠᠨ ᠢ᠋ ᠨᠢ ᠬᠡᠯᠡᠭᠡᠳ ᠭᠠᠷᠭᠠ᠂ ᠰᠢᠯᠲᠠᠭᠠᠨ ᠢ᠋ ᠪᠣᠳᠣᠵᠤ ᠦᠵᠡᠭᠡᠳ᠂ ᠱᠠᠯᠠᠪᠬᠠᠨ ᠬᠡᠯᠡᠭᠡᠳ ᠭᠠᠷᠭᠠ》 ᠭᠡᠵᠡᠢ᠃
ᠣᠯᠠᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠨ ᠬᠡᠯᠡᠭᠰᠡᠨ ᠨᠢ᠄《ᠬᠡᠯᠡᠬᠦ ᠦᠭᠡᠢ ᠪᠣᠯᠪᠠᠴᠤ ᠴᠢ ᠮᠡᠳᠡᠨᠡ᠃ ᠪᠣᠳᠣᠬᠤ ᠦᠭᠡᠢ ᠪᠣᠯᠪᠠᠴᠤ ᠪᠤᠯᠲᠤ ᠪᠠᠷ ᠢ᠋ᠶ᠋ᠠᠨ ᠮᠡᠳᠡᠨᠡ᠃ ᠳᠠᠷᠤᠬᠤ ᠵᠦᠭ ᠲᠡᠷᠡ᠃ ᠶᠠᠪᠤᠬᠤ ᠵᠦᠭ ᠡᠨᠡ》 ᠭᠡᠵᠦ ᠶᠠᠩᠳᠠᠩ ᠬᠠᠭᠠᠨ ᠤ᠋ ᠶᠠᠰᠤ ᠶ᠋ᠢ ᠨᠢ ᠰᠢᠮᠰᠢᠷᠡᠮᠡᠷ ᠵᠢᠭᠠᠵᠠᠢ᠃
ᠶᠠᠪᠤᠭᠤᠳᠠᠢ ᠬᠦᠦ ᠶ᠋ᠢᠨ ᠰᠠᠨᠠᠭᠠᠨ ᠳ᠋ᠤ᠌ ᠶᠠᠭ ᠲᠠᠭ ᠲᠠᠭᠠᠷᠠᠭᠰᠠᠨ ᠪᠣᠯᠬᠣᠷ᠂ ᠪᠠᠶᠠᠷᠯᠠᠬᠤ ᠶ᠋ᠢᠨ ᠶᠡᠬᠡᠪᠡᠷ ᠪᠠᠶᠠᠷᠯᠠᠵᠤ᠂ ᠪᠠᠭᠠᠲᠤᠷ ᠳᠠᠭᠤᠤ ᠪᠠᠨ ᠴᠤᠤᠷᠢᠶᠠᠳᠠᠭᠤᠯᠵᠤ᠂ ᠬᠥᠭᠡᠷᠬᠦ ᠶ᠋ᠢᠨ ᠶᠡᠬᠡ ᠪᠡᠷ ᠬᠥᠭᠡᠷᠴᠦ᠂ ᠬᠥᠨᠳᠡᠢ ᠳᠠᠭᠤ ᠪᠠᠨ ᠴᠤᠤᠷᠢᠶᠠᠳᠠᠭᠤᠯᠵᠤ ᠬᠡᠯᠡᠭᠰᠡᠨ ᠨᠢ᠄《ᠵᠣᠷᠢᠭ ᠰᠡᠳᠬᠢᠯ ᠴᠢᠨᠢ ᠨᠢᠭᠡᠳᠦᠭᠰᠡᠨ ᠪᠣᠯ᠂ ᠴᠣᠬᠢᠬᠤ ᠡᠳᠦᠷ ᠥᠨᠥᠳᠥᠷ᠂ ᠰᠠᠨᠠᠭᠠ ᠰᠡᠳᠬᠢᠯ ᠴᠢᠨᠢ ᠨᠢᠭᠡᠳᠦᠭᠰᠡᠨ ᠪᠣᠯ ᠱᠠᠯᠠᠪᠳᠠᠬᠤ ᠡᠳᠦᠷ ᠥᠨᠥᠳᠥᠷ᠂ ᠪᠠᠭᠠᠲᠤᠷ ᠴᠢᠳᠠᠯ ᠢ᠋ᠶ᠋ᠠᠨ ᠴᠦ᠍ ᠦᠵᠡᠭᠦᠯᠦᠨᠡ᠃ ᠪᠠᠷᠰ ᠤ᠋ᠨ ᠬᠦᠴᠦ ᠪᠡᠨ ᠴᠦ᠍ ᠭᠠᠷᠭᠠᠨᠠ᠃ ᠠᠷᠭᠠ ᠤᠬᠠᠭᠠᠨ ᠢ᠋ᠶ᠋ᠠᠨ ᠴᠤ᠌ ᠰᠢᠪᠬᠠᠨᠠ᠃ ᠠᠷᠰᠯᠠᠨ ᠬᠦᠴᠦ ᠪᠡᠨ ᠴᠦ᠍ ᠦᠵᠡᠭᠦᠯᠦᠨᠡ》 ᠬᠡᠮᠡᠮᠡᠭᠴᠡ᠂ ᠨᠢᠭᠡᠳᠦᠭᠰᠡᠨ ᠣᠯᠠᠨ ᠤ᠋ ᠵᠣᠷᠢᠭ᠂ ᠨᠢᠭᠡᠨ ᠳᠠᠭᠤ ᠪᠠᠷ ᠪᠠᠷᠬᠢᠷᠠᠬᠤ ᠨᠢ᠄《ᠶᠠᠩᠳᠠᠩ ᠬᠠᠭᠠᠨ ᠤ᠋ ᠵᠢᠷᠦᠬᠡ ᠶ᠋ᠢ ᠨᠢ ᠦᠵᠡᠵᠦ᠂ ᠦᠬᠦᠳᠡᠯ ᠢ᠋ ᠨᠢ ᠰᠢᠲᠠᠭᠠᠵᠤ᠂ ᠦᠳᠡᠰᠢ ᠶ᠋ᠢᠨ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠬᠡᠶᠡ》 ᠭᠡᠬᠦ ᠨᠢ ᠠᠷᠰᠯᠠᠨ ᠪᠠᠷᠰ ᠬᠦᠷᠬᠢᠷᠡᠬᠦ ᠰᠢᠭ᠂ ᠠᠶᠤᠩᠭᠠ ᠴᠠᠬᠢᠯᠭᠠᠨ ᠨᠢᠵᠢᠭᠢᠨᠡᠬᠦ ᠰᠢᠭ᠂ ᠳᠦᠷᠳ᠋ ᠭᠡᠲᠡᠯᠡ ᠬᠥᠳᠡᠯᠵᠦ᠂ ᠰᠦᠷᠳ᠋ ᠭᠡᠲᠡᠯᠡ ᠤᠷᠤᠭᠰᠢᠯᠠᠬᠤ ᠳ᠋ᠤ᠌᠂ ᠪᠠᠭ ᠪᠠᠭ ᠢ᠋ᠶ᠋ᠠᠷ ᠰᠦᠷᠦᠭᠯᠡᠭᠰᠡᠨ᠂ ᠪᠠᠭᠠᠲᠤᠷ ᠢᠳᠡᠲᠡᠨ ᠦ᠌ ᠡᠮᠦᠨᠡ᠂ ᠪᠠᠷᠰ ᠤ᠋ᠨ ᠬᠦᠯᠦᠭ ᠤᠨᠤᠭᠰᠠᠨ ᠪᠠᠭᠠᠲᠤᠷ ᠤ᠋ᠨ ᠪᠠᠭᠠᠲᠤᠷ ᠲᠡᠷᠢᠭᠦᠯᠡᠵᠦ ᠶᠠᠪᠤᠬᠤ ᠳ᠋ᠤ᠌᠂ ᠳᠣᠲᠣᠷᠠ ᠠᠭᠤᠷ ᠨᠢ ᠰᠠᠭᠰᠠᠯᠵᠠᠵᠤ᠂ ᠲᠣᠪᠴᠢᠨ ᠵᠠᠩᠭᠢᠯᠠᠭᠠ ᠨᠢ ᠴᠢᠩᠭᠠᠷᠠᠵᠤ᠂ ᠵᠠᠪᠠᠵᠢ ᠪᠠᠷ ᠨᠢ ᠬᠥᠭᠡᠰᠦ ᠰᠠᠭᠭᠠᠵᠤ᠂ ᠵᠠᠮ ᠢ᠋ᠶ᠋ᠠᠷ ᠨᠢ ᠲᠣᠭᠣᠰᠣ ᠡᠷᠴᠢᠯᠡᠵᠦ᠂ ᠤᠨᠤᠭᠰᠠᠨ ᠪᠠᠭᠠᠲᠤᠷ ᠬᠢᠯᠢᠩᠯᠡᠮᠡᠭᠴᠡ ᠣᠨᠣᠭᠳᠠᠭᠰᠠᠨ ᠪᠠᠷᠰ ᠰᠢᠷᠦᠭᠦᠳᠴᠦ᠂ ᠶᠠᠪᠠᠭᠠᠨ ᠣᠯᠠᠨ ᠠ᠋ᠴᠠ ᠲᠡᠷᠢᠭᠦᠯᠡᠵᠦ᠂ ᠶᠠᠩᠳᠠᠩ ᠬᠠᠭᠠᠨ ᠤ᠋ ᠳ᠋ᠤ᠌ ᠬᠦᠷᠬᠦ ᠪᠡᠷ ᠶᠠᠪᠤᠬᠤ ᠳ᠋ᠤ᠌᠂ ᠶᠠᠩᠳᠠᠩ ᠬᠠᠭᠠᠨ ᠡᠨᠡ ᠡᠳᠦᠷ᠂ ᠶᠠᠪᠤᠳᠠᠯ ᠳ᠋ᠠᠭᠠᠨ ᠶᠠᠳᠠᠷᠠᠯᠠ ᠭᠡᠵᠦ᠂ ᠶᠠᠭᠠᠬᠢᠰᠢ ᠦᠭᠡᠢ ᠶᠡᠬᠡᠪᠡᠷ ᠵᠦᠳᠡᠷᠡᠯᠡ ᠭᠡᠵᠦ᠂ ᠰᠦᠷ ᠮᠢᠨᠢ ᠪᠠᠭᠤᠷᠠᠯᠠ ᠭᠡᠵᠦ᠂ ᠰᠦᠨᠡᠰᠦ ᠮᠢᠨᠢ ᠵᠠᠢᠯᠠᠯᠠ ᠭᠡᠵᠦ᠂ ᠵᠠᠰᠢᠶᠠᠨ ᠯᠠᠮᠠ ᠪᠠᠷ ᠢ᠋ᠶ᠋ᠠᠨ ᠱᠣᠳᠠᠭᠤᠯᠵᠤ᠂ ᠵᠠᠶᠠᠭᠠ ᠪᠣᠳᠣᠭᠴᠢ ᠪᠠᠷ ᠢ᠋ᠶ᠋ᠠᠨ ᠦᠵᠡᠭᠦᠯᠵᠦ᠂ ᠵᠢᠪᠠᠴᠠ ᠪᠠᠷᠴᠢᠳ ᠢ᠋ᠶ᠋ᠠᠨ ᠠᠷᠢᠯᠭᠠᠨᠠ ᠭᠡᠵᠦ᠂ ᠵᠠᠮᠰᠡᠷᠡᠩ ᠳᠠᠮᠵᠢᠨ ᠳᠠᠬᠢᠭᠤᠯᠵᠤ᠂ ᠦ ᠪᠠᠷᠴᠢᠳ ᠢ᠋ᠶ᠋ᠠᠨ ᠠᠷᠢᠯᠭᠠᠨᠠ ᠭᠡᠵᠦ ᠥᠭᠯᠢᠭᠡ ᠪᠤᠶᠠᠨ ᠦᠢᠯᠡᠳᠴᠦ᠂ ᠲᠣᠷᠲᠣᠭ ᠨᠠᠰᠤ ᠲᠣᠭᠠᠯᠠᠨ᠂ ᠳᠣᠭᠵᠢᠷ ᠮᠡᠩᠭᠡ ᠲᠣᠭᠠᠯᠠᠨ᠂ ᠴᠠᠭᠠᠨ ᠰᠢᠭᠦᠷᠲᠠᠢ ᠨᠠᠰᠤ ᠲᠣᠭᠠᠯᠠᠨ᠂ ᠴᠡᠷᠪᠡᠭᠡ ᠶ᠋ᠢᠨ ᠪᠦᠲᠦᠭᠡᠯ ᠮᠡᠩᠭᠡ ᠲᠣᠭᠠᠯᠠᠨ ᠰᠢᠷᠨᠠᠭ ᠤᠩᠰᠢᠭᠤᠯᠵᠤ ᠰᠢᠳᠡᠯ ᠬᠥᠭᠡᠭᠡᠯᠭᠡᠵᠦ᠂ ᠨᠢᠭᠡ ᠨᠢᠭᠡ ᠪᠡᠷ ᠢ᠋ᠶ᠋ᠡᠨ ᠰᠠᠭᠤᠵᠤ᠂ ᠨᠢᠳᠦ ᠪᠡᠨ ᠠᠨᠢᠨ ᠪᠢᠰᠢᠯᠭᠠᠵᠤ᠂ ᠬᠣᠶᠠᠷ ᠬᠣᠶᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠰᠠᠭᠤᠵᠤ᠂ ᠬᠤᠩᠬᠠ ᠳᠠᠮᠠᠷᠤ ᠲᠠᠴᠢᠭᠢᠨᠠᠭᠤᠯᠵᠤ᠂ ᠬᠡᠳᠦ ᠬᠡᠳᠦ ᠪᠡᠷ ᠢ᠋ᠶ᠋ᠡᠨ ᠰᠠᠭᠤᠵᠤ ᠂ ᠬᠡᠩᠭᠡᠷᠭᠡ ᠴᠠᠩ ᠪᠤᠵᠢᠭᠢᠨᠠᠭᠤᠯᠵᠤ᠂ ᠴᠠᠪ ᠢ᠋ ᠬᠢᠭᠰᠡᠨ ᠪᠣᠭᠣᠯ ᠪᠡᠶᠡᠰᠴᠦ᠂ ᠴᠢᠨᠠᠳᠤ ᠬᠣᠷᠢᠶᠠᠨ ᠳ᠋ᠤ᠌ ᠨᠣᠬᠠᠢ ᠪᠡᠶᠡᠰᠴᠦ᠂ ᠬᠠᠮᠢᠭᠠ ᠬᠠᠮᠢᠭᠠ ᠨᠢ ᠴᠦ᠍ ᠠᠮᠵᠢᠬᠤ ᠦᠭᠡᠢ᠂ ᠬᠠᠷᠠ ᠳᠡᠪᠵᠢᠶᠡᠨ ᠪᠣᠯᠵᠤ ᠪᠠᠢᠲᠠᠯᠠ᠂ ᠶᠠᠪᠤᠭᠤᠳᠠᠢ ᠬᠦᠦ ᠪᠠᠷᠰ ᠤᠨᠤᠭᠠᠳ᠂ ᠶᠠᠩᠳᠠᠩ ᠬᠠᠭᠠᠨ ᠤ᠋ ᠬᠦᠷᠢᠶᠡ ᠶ᠋ᠢ ᠵᠥᠪ ᠭᠤᠷᠪᠠ ᠲᠣᠭᠣᠷᠢᠵᠤ᠂ ᠵᠦᠭ ᠪᠢᠯᠢᠭ ᠢ᠋ ᠲᠣᠳᠣᠯᠠᠵᠤ᠂ ᠪᠤᠷᠤᠭᠤ ᠭᠤᠷᠪᠠ ᠲᠣᠭᠣᠷᠢᠵᠤ᠂ ᠪᠣᠯᠬᠤ ᠡᠰᠡᠬᠦ ᠶ᠋ᠢ ᠬᠢᠨᠠᠵᠤ ᠤᠷᠠᠨ ᠠᠷᠭᠠ ᠭᠠᠷᠭᠠᠵᠤ᠂ ᠤᠬᠠᠭᠠᠨ ᠰᠡᠢᠯᠵᠦ ᠪᠠᠷᠬᠢᠷᠠᠭᠰᠠᠨ ᠨᠢ᠄《ᠪᠠᠷᠠᠭᠤᠨ ᠲᠢᠪ ᠢ᠋ ᠡᠵᠡᠯᠡᠭᠰᠡᠨ᠂ ᠪᠠᠭᠠᠲᠤᠷ ᠰᠡᠴᠡᠨ ᠬᠠᠭᠠᠨ᠂ ᠶᠠᠩᠳᠠᠩ ᠬᠠᠭᠠᠨ ᠲᠠᠨ ᠤ᠋ ᠶᠠᠷᠭᠠᠴᠢᠨ ᠬᠢᠳᠤᠯᠭᠠ ᠠ᠋ᠴᠠ ᠴᠢᠨᠢ ᠠᠶᠤᠵᠤ᠂ ᠰᠦᠮᠪᠦᠷ ᠠᠭᠤᠯᠠ ᠶ᠋ᠢᠨ ᠲᠠᠪᠤᠨ ᠲᠢᠪ ᠢ᠋ ᠰᠥᠨᠢ ᠳ᠋ᠡᠭᠡᠨ ᠳᠣᠪᠲᠣᠯᠤᠭᠠᠳ ᠢᠷᠡᠳᠡᠭ᠂ ᠡᠷᠳᠡᠨᠢ ᠶ᠋ᠢᠨ ᠡᠷᠢᠶᠡᠨ ᠪᠠᠷᠰ ᠢ᠋ ᠪᠡᠨ᠂ ᠡᠨᠡ ᠡᠳᠦᠷ ᠨᠠᠳᠠ ᠪᠠᠷ ᠢᠯᠡᠭᠡᠪᠡ᠃ ᠡᠷᠢᠶᠡᠨ ᠪᠠᠷᠰ ᠢ᠋ ᠤᠨᠤᠵᠤ ᠡᠨᠡ ᠳᠡᠯᠡᠬᠡᠢ ᠶ᠋ᠢ ᠡᠵᠡᠯᠡᠬᠦ ᠳ᠋ᠦ᠍ ᠠᠮᠠᠷᠬᠠᠨ ᠭᠡᠨᠡ᠃ ᠠᠯᠠᠭ ᠪᠠᠷᠰ ᠢ᠋ ᠤᠨᠤᠪᠠᠯ ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠡᠵᠡᠯᠡᠬᠦ ᠳ᠋ᠦ᠍ ᠠᠮᠠᠷᠬᠠᠨ ᠭᠡᠨᠡ᠃ ᠬᠠᠭᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ᠂ ᠲᠠ ᠤᠨᠤᠭᠠᠳ ᠡᠵᠡᠯᠡᠨᠡ ᠤᠤ? ᠬᠠᠷᠠᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ᠂ ᠪᠢ ᠤᠨᠤᠭᠠᠳ ᠡᠵᠡᠯᠡᠬᠦ ᠤᠤ?》 ᠭᠡᠵᠦ ᠪᠠᠷᠬᠢᠷᠠᠨ᠂ ᠬᠥᠨᠳᠡᠯᠡᠨ ᠭᠤᠯᠳᠤ ᠳᠠᠪᠬᠢᠬᠤ ᠶ᠋ᠢ ᠦᠵᠡᠭᠰᠡᠨ ᠬᠥᠮᠦᠨ ᠪᠦᠷᠢ ᠰᠣᠴᠢᠵᠤ᠂ ᠦᠭᠡ ᠦᠭᠡᠢ ᠭᠥᠯᠢᠷᠡᠵᠦ᠂ ᠠᠵᠢᠭᠯᠠᠭᠰᠠᠨ ᠬᠥᠮᠦᠨ ᠪᠦᠷᠢ ᠠᠶᠤᠵᠤ᠂ ᠠᠮᠠ ᠪᠠᠨ ᠪᠠᠷᠢᠨ ᠭᠠᠰᠠᠯᠵᠤ᠄《ᠶᠠᠪᠤᠭᠤᠲᠠᠢ ᠬᠦᠦ ᠰᠣᠯᠢᠶᠠᠷᠠᠪᠠ᠃ ᠶᠠᠩᠳᠠᠩ ᠬᠠᠭᠠᠨ ᠭᠠᠯᠵᠠᠭᠤᠷᠠᠪᠠ》 ᠭᠡᠵᠦ᠂ ᠨᠢᠳᠦ ᠪᠡᠨ ᠳᠠᠷᠤᠨ᠂ ᠴᠢᠬᠢ ᠪᠡᠨ ᠪᠥᠭᠯᠡᠨ ᠶᠠᠪᠤᠵᠠᠭᠠᠨᠠ᠃
ᠡᠭᠦᠨ ᠳ᠋ᠦ᠍᠂ ᠡᠭᠦᠳᠡ ᠶ᠋ᠢ ᠰᠠᠬᠢᠳᠠᠭ ᠪᠠᠭᠠᠲᠤᠷ ᠨᠢ᠂ ᠡᠮᠦᠨᠡ ᠨᠢ ᠭᠦᠶᠦᠳᠡᠭ ᠪᠣᠢᠳᠠ ᠨᠢ᠂ ᠡᠨᠡ ᠦᠭᠡ ᠶ᠋ᠢ ᠡᠵᠡᠨ ᠬᠠᠭᠠᠨ ᠳ᠋ᠠᠭᠠᠨ ᠬᠡᠯᠡᠮᠡᠭᠴᠡ᠂ ᠶᠠᠩᠳᠠᠩ ᠬᠠᠭᠠᠨ ᠶᠠᠭᠠᠷᠠᠵᠤ ᠶᠠᠪᠠᠭᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠣᠷᠢᠯᠠᠵᠤ᠂ ᠲᠠᠯᠠ ᠬᠠᠨᠴᠤᠢ ᠪᠠᠨ ᠰᠤᠭᠤᠯᠳᠤᠷᠭᠠᠯᠠᠵᠤ᠂ ᠪᠡᠯᠬᠡᠨᠡᠭᠰᠡᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠮᠣᠷᠢᠯᠠᠵᠤ᠂ ᠥᠷᠥᠭᠡᠰᠦᠨ ᠭᠤᠲᠤᠯ ᠢ᠋ᠶ᠋ᠠᠨ ᠲᠠᠢᠯᠵᠤ᠂ ᠥᠨᠳᠥᠷ ᠪᠣᠭᠣᠨᠢ ᠠᠯᠬᠤᠯᠠᠵᠤ᠂ ᠭᠠᠳᠠᠨᠠ ᠭᠠᠷᠴᠤ ᠦᠵᠡᠪᠡᠯ ᠶᠠᠪᠤᠭᠤᠳᠠᠢ ᠬᠦᠦ ᠪᠠᠷᠰ ᠢ᠋ᠶ᠋ᠠᠨ ᠤᠨᠤᠵᠤ᠂ ᠠᠩᠬᠠ ᠦᠭᠡ ᠪᠡᠨ ᠪᠦᠭᠦᠳᠡ ᠶ᠋ᠢ ᠬᠡᠯᠡᠵᠦ᠄《ᠬᠠᠭᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠴᠢ ᠤᠨᠤᠭᠠᠳ ᠡᠵᠡᠯᠡᠨᠡ ᠤᠤ? ᠬᠠᠷᠠᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠢ ᠤᠨᠤᠭᠠᠳ ᠡᠵᠡᠯᠡᠬᠦ ᠤᠤ?》 ᠭᠡᠵᠦ ᠪᠠᠢᠬᠤ ᠶ᠋ᠢ ᠶᠠᠩᠳᠠᠩ ᠬᠠᠭᠠᠨ ᠴᠢᠬᠢ ᠪᠡᠷ ᠢ᠋ᠶ᠋ᠡᠨ ᠰᠣᠨᠣᠰᠴᠤ᠂ ᠨᠢᠳᠦ ᠪᠡᠷ ᠢ᠋ᠶ᠋ᠡᠨ ᠦᠵᠡᠵᠦ᠂ ᠡᠵᠡᠯᠡᠨᠡ ᠭᠡᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠴᠤ᠂ ᠡᠯᠢᠭᠡ ᠨᠢ ᠥᠨᠳᠡᠢᠵᠦ᠂ ᠳᠣᠪᠲᠣᠯᠤᠨᠠ ᠭᠡᠰᠡᠨ ᠦᠭᠡ ᠶ᠋ᠢ ᠰᠣᠨᠣᠰᠴᠤ᠂ ᠳᠣᠲᠣᠷᠠ ᠪᠠᠨ ᠪᠠᠶᠠᠷᠯᠠᠵᠤ ᠪᠠᠷᠬᠢᠷᠠᠭᠰᠠᠨ ᠨᠢ᠄《ᠶᠠᠪᠤᠭᠤᠳᠠᠢ ᠬᠦᠦ ᠴᠢᠮᠠ ᠳ᠋ᠤ᠌ ᠶᠠᠪᠤᠭᠠᠴᠢ ᠬᠦᠷᠡᠩ ᠳᠠᠭᠠ ᠴᠢᠨᠢ ᠵᠣᠬᠢᠨᠠ᠃ ᠶᠠᠩᠳᠠᠩ ᠬᠠᠭᠠᠨ ᠨᠠᠳᠠᠳᠤ᠂ ᠶᠠᠪᠤᠭᠠᠴᠢ ᠡᠷᠢᠶᠡᠨ ᠪᠠᠷᠰ ᠴᠢᠨᠢ ᠵᠣᠬᠢᠨᠠ》 ᠭᠡᠵᠦ ᠪᠠᠷᠬᠢᠷᠠᠪᠠ᠃ ᠶᠠᠪᠤᠭᠤᠳᠠᠢ ᠬᠦᠦ ᠶᠠᠭᠠᠷᠠᠨ᠄《ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠬᠠᠷᠢᠭᠤᠯᠵᠤ ᠪᠣᠯᠬᠤ ᠦᠭᠡᠢ᠂ ᠡᠵᠡᠨ ᠦ᠌ ᠵᠠᠷᠯᠢᠭ ᠢ᠋ ᠡᠷᠭᠢᠭᠦᠯᠵᠦ ᠪᠣᠯᠬᠤ ᠦᠭᠡᠢ》 ᠭᠡᠵᠦ ᠪᠠᠷᠰ ᠠ᠋ᠴᠠ ᠪᠠᠨ ᠪᠠᠭᠤᠵᠤ᠂ ᠪᠠᠭᠠ ᠰᠠᠨᠠᠭᠠ ᠠᠯᠳᠠᠬᠤ ᠳ᠋ᠤ᠌᠂ ᠬᠠᠵᠠᠭᠤ ᠳ᠋ᠤᠨᠢ ᠪᠠᠢᠭᠰᠠᠨ ᠨᠣᠶᠠᠳ ᠨᠢ᠂ ᠬᠠᠷᠢᠨ ᠶᠡᠬᠡᠪᠡᠷ ᠵᠠᠩᠳᠤᠷᠤᠨ᠄《ᠬᠠᠷᠠᠴᠤ ᠪᠠᠢᠭᠠᠳ᠂ ᠬᠠᠭᠠᠨ ᠡᠵᠡᠨ ᠳ᠋ᠡᠭᠡᠨ ᠵᠢᠳᠬᠦ! ᠪᠣᠭᠣᠯ ᠪᠠᠢᠭᠠᠳ ᠪᠣᠭᠳᠠ ᠡᠵᠡᠨ ᠳ᠋ᠡᠭᠡᠨ ᠵᠢᠳᠬᠦ!》 ᠭᠡᠬᠦ ᠳ᠋ᠦ᠍᠂ ᠶᠠᠪᠤᠭᠤᠳᠠᠢ ᠬᠦᠦ ᠠᠷᠭᠠ ᠦᠭᠡᠢ ᠰᠢᠭ ᠬᠠᠭᠠᠨ ᠢ᠋ᠶ᠋ᠠᠨ ᠰᠤᠭᠤᠳᠠᠨ ᠮᠣᠷᠳᠠᠭᠤᠯᠵᠤ᠄《ᠴᠢᠬᠢ ᠶ᠋ᠢ ᠨᠢ ᠰᠠᠢᠨ ᠠᠳᠬᠤ᠂ ᠴᠠᠪᠢ ᠶ᠋ᠢ ᠨᠢ ᠰᠠᠢᠨ ᠬᠠᠪᠴᠢ》 ᠭᠡᠳ ᠲᠠᠯᠪᠢᠮᠠᠭᠴᠠ᠂ ᠡᠷᠢᠶᠡᠨ ᠪᠠᠷᠰ ᠡᠭᠴᠡ ᠤᠷᠤᠭᠰᠢ ᠪᠠᠨ ᠦᠰᠦᠷᠴᠦ᠂ ᠡᠷᠭᠢᠨ ᠲᠣᠭᠣᠷᠢᠨ ᠳᠠᠪᠬᠢᠬᠤ ᠳ᠋ᠤ᠌᠂ ᠪᠠᠭᠠᠲᠤᠷ ᠡᠷᠡ ᠶ᠋ᠢᠨ ᠰᠠᠯᠲᠠᠭᠠ ᠠ᠋ᠴᠠ ᠰᠠᠯᠤᠭᠰᠠᠨ ᠪᠠᠷᠰ ᠤ᠋ᠨ ᠬᠠᠪᠢᠷᠭᠠ ᠲᠡᠨᠢᠢᠵᠦ ᠪᠠᠵᠠᠭᠳᠠᠭᠰᠠᠨ ᠭᠠᠷ ᠤ᠋ᠨ ᠠᠳᠬᠤᠯᠲᠠ ᠠ᠋ᠴᠠ ᠰᠠᠯᠤᠭᠰᠠᠨ ᠪᠠᠷᠰ ᠤ᠋ᠨ ᠴᠢᠬᠢ ᠠᠮᠤᠰᠬᠢᠵᠦ᠂ ᠨᠤᠳᠤᠷᠤᠯᠲᠠ ᠨᠢ ᠵᠥᠭᠡᠯᠡᠳᠡᠵᠦ᠂ ᠨᠢᠷᠤᠭᠤ ᠨᠢ ᠬᠥᠩᠭᠡᠷᠡᠵᠦ᠂ ᠬᠠᠮᠬᠤᠤᠯ ᠲᠠᠯᠪᠢᠭᠰᠠᠨ ᠰᠢᠭ᠋ ᠰᠡᠷᠪᠡᠭᠡᠨᠡᠭᠦᠯᠵᠦ᠂ ᠬᠠᠵᠠᠬᠤ ᠰᠠᠨᠠᠭᠠ ᠨᠢ ᠬᠥᠳᠡᠯᠵᠦ᠂ ᠥᠷᠭᠡᠰᠦ ᠲᠠᠯᠪᠢᠭᠰᠠᠨ ᠰᠢᠭ᠋ ᠡᠷᠪᠡᠭᠡᠨᠡᠭᠦᠯᠵᠦ᠂ ᠤᠭ ᠤ᠋ᠨ ᠴᠢᠨᠠᠷ ᠨᠢ ᠰᠡᠷᠭᠦᠵᠦ᠂ ᠪᠠᠷᠠᠭᠤᠨ ᠲᠡᠰᠢ ᠪᠡᠨ ᠡᠷᠭᠢᠵᠦ᠂ ᠪᠠᠷᠠᠭᠤᠨ ᠡᠪᠦᠳᠦᠭ ᠢ᠋ ᠨᠢ ᠬᠠᠵᠠᠵᠤ᠂ ᠵᠡᠭᠦᠨ ᠲᠡᠰᠢ ᠪᠡᠨ ᠡᠷᠭᠢᠵᠦ᠂ ᠵᠡᠭᠦᠨ ᠡᠪᠦᠳᠦᠭ ᠢ᠋ ᠨᠢ ᠬᠠᠵᠠᠬᠤ ᠳ᠋ᠤ᠌᠂ ᠶᠠᠩᠳᠠᠩ ᠬᠠᠭᠠᠨ ᠰᠠᠨᠳᠤᠷᠴᠤ ᠶᠠᠪᠤᠭᠤᠳᠠᠢ ᠬᠦᠦ ᠶ᠋ᠢ ᠠᠪᠤᠷᠠ ᠭᠡᠵᠦ ᠶᠠᠭᠠᠬᠢᠰᠢ ᠦᠭᠡᠢ ᠳᠠᠭᠤ ᠪᠠᠷ ᠪᠠᠷᠬᠢᠷᠠᠬᠤ ᠶᠠᠪᠤᠭᠤᠳᠠᠢ ᠬᠦᠦ᠂ ᠠᠶᠤᠩᠭᠠ ᠶ᠋ᠢᠨ ᠳᠠᠭᠤ ᠪᠠᠷ ᠪᠠᠷᠬᠢᠷᠠᠨ᠂《ᠶᠠᠩᠳᠠᠩ ᠬᠠᠭᠠᠨ ᠤ᠋ ᠶᠠᠰᠤ ᠶ᠋ᠢ ᠦᠵᠡᠶᠡ᠃ ᠥᠰᠲᠡᠢ ᠬᠥᠮᠦᠨ ᠦᠰ ᠢ᠋ᠶ᠋ᠡᠨ ᠠᠪ᠂ ᠥᠷᠢ ᠲᠡᠢ ᠬᠥᠮᠦᠨ ᠥᠷᠢ ᠪᠡᠨ ᠠᠪ!》 ᠭᠡᠵᠦ ᠥᠨᠳᠥᠷ ᠠᠰᠠᠷ ᠢ᠋ ᠳᠣᠷᠭᠢᠲᠠᠯᠠ᠂ ᠦᠷᠭᠡᠯᠡᠭᠰᠡᠨ ᠬᠥᠮᠦᠨ ᠢ᠋ ᠰᠠᠷᠢᠲᠠᠯᠠ᠂ ᠪᠠᠷᠬᠢᠷᠠᠭᠰᠠᠨ ᠳ᠋ᠤ᠌ ᠪᠠᠯᠪᠠ ᠶ᠋ᠢᠨ ᠳᠠᠷᠬᠠᠨ ᠬᠥᠳᠡᠯᠵᠦ᠂ ᠠᠯᠤᠬᠠ ᠪᠠᠨ ᠪᠠᠷᠢᠭᠠᠳ ᠴᠣᠬᠢᠬᠤ ᠭᠡᠨᠡ᠃ ᠪᠠᠭᠠ ᠰᠠᠭᠠ ᠳᠠᠷᠬᠠᠨ ᠴᠤ᠌ ᠬᠥᠳᠡᠯᠵᠦ᠂ ᠪᠠᠭᠠᠵᠢ ᠪᠠᠨ ᠪᠠᠷᠢᠭᠠᠳ ᠴᠣᠬᠢᠬᠤ ᠭᠡᠨᠡ᠃ ᠬᠣᠲᠠ ᠶ᠋ᠢᠨ ᠠᠷᠠᠳ ᠪᠠᠶᠠᠷᠯᠠᠯᠳᠤᠨ᠂ ᠭᠣᠣᠲᠤᠤ ᠪᠠᠨ ᠪᠠᠷᠢᠭᠠᠳ ᠭᠠᠷᠴᠤ ᠭᠡᠨᠡ᠃ ᠰᠠᠭᠠᠬᠠᠯᠲᠠ ᠬᠣᠲᠠ ᠨᠢ ᠪᠠᠶᠠᠷᠯᠠᠯᠳᠤᠨ᠂ ᠰᠠᠨᠳᠤᠤ ᠪᠠᠨ ᠪᠠᠷᠢᠭᠠᠳ ᠰᠢᠷᠪᠢᠵᠦ ᠭᠡᠨᠡ᠃ ᠰᠢᠷᠪᠥᠰᠥ ᠪᠠᠷᠢᠭᠠᠳ ᠬᠥᠭᠰᠢᠨ᠂ ᠭᠣᠭᠴᠣᠭᠠᠯᠠᠵᠤ ᠠᠯᠠᠶᠠ ᠭᠡᠳ ᠭᠦᠶᠦᠵᠡᠢ᠃ ᠰᠢᠳᠡᠮᠡᠰᠦ ᠪᠠᠷᠢᠭᠰᠠᠨ ᠴᠢᠪᠠᠭᠠᠨᠴᠠ᠂ ᠪᠣᠭᠣᠵᠤ ᠠᠯᠠᠶᠠ ᠭᠡᠳ ᠭᠦᠶᠦᠵᠡᠢ᠃ ᠲᠣᠢᠪᠣᠷᠭᠠ ᠪᠠᠷᠢᠭᠰᠠᠨ ᠪᠠᠳᠢᠷᠴᠢᠨ ᠳᠣᠩᠰᠢᠵᠤ ᠠᠯᠠᠶᠠ ᠭᠡᠳ ᠵᠢᠳᠬᠦᠵᠡᠢ᠃ ᠰᠤᠳᠤᠷ ᠲᠡᠪᠡᠷᠢᠭᠰᠡᠨ ᠯᠠᠮᠠ ᠨᠠᠷ ᠤ᠋ᠳ ᠰᠠᠮᠪᠠᠭᠠᠳᠠᠵᠤ ᠠᠯᠠᠶᠠ ᠭᠡᠳ ᠭᠦᠶᠦᠵᠡᠢ᠃ ᠶᠣᠳᠠᠷ ᠪᠠᠷᠢᠭᠰᠠᠨ ᠡᠪᠦᠭᠡᠳ ᠶᠣᠳᠣᠷᠳᠠᠭᠠᠳ ᠠᠪᠴᠤ ᠯᠠ ᠪᠠᠢᠨᠠ᠃ ᠶᠣᠵᠣᠭᠣᠷ ᠪᠠᠷᠢᠭᠰᠠᠨ ᠬᠥᠭᠰᠢᠳ ᠬᠠᠳᠬᠤᠭᠠᠳ ᠬᠠᠳᠬᠤᠭᠠᠳ ᠠᠪᠴᠤ ᠯᠠ ᠪᠠᠢᠨᠠ᠃
ᠪᠠᠷᠰ ᠤᠨᠤᠭᠰᠠᠨ ᠶᠠᠩᠳᠠᠩ ᠪᠠᠭᠤᠶᠠ ᠭᠡᠪᠡᠯ ᠣᠯᠠᠨ ᠠᠯᠠᠨᠠ᠃ ᠪᠠᠭᠤᠬᠤ ᠦᠭᠡᠢ ᠭᠡᠪᠡᠯ ᠪᠠᠷᠰ ᠢᠳᠡᠨᠡ᠃ ᠬᠠᠵᠠᠭᠠᠳ ᠠᠪᠬᠤ ᠪᠠᠷᠰ ᠪᠠᠢᠨᠠ᠃ ᠬᠠᠳᠬᠤᠭᠠᠳ ᠠᠪᠬᠤ ᠣᠯᠠᠨ ᠪᠠᠢᠨᠠ ᠰᠢᠯᠦᠰᠦ ᠴᠢᠰᠤ ᠨᠢᠰᠦ ᠬᠥᠯᠥᠰᠥ ᠪᠡᠨ ᠰᠠᠪᠢᠷᠠᠭᠤᠯᠵᠤ᠂ ᠰᠢᠷᠪᠥᠰᠥ ᠰᠢᠨᠳᠠᠰᠤ ᠠᠷᠠᠰᠤ ᠬᠥᠷᠥᠰᠥ ᠪᠡᠨ ᠬᠣᠷᠣᠰᠤᠭᠤᠯᠵᠤ ᠠᠷᠠᠭᠠ ᠨᠢ ᠵᠠᠪᠠᠭᠠᠷᠠᠵᠤ᠂ ᠠᠮᠢ ᠨᠢ ᠲᠡᠬᠡᠷᠡᠵᠦ ᠥᠷᠥᠭᠡᠰᠦᠨ ᠬᠥᠯ ᠦᠭᠡᠢ ᠲᠠᠢᠷᠠᠩ ᠰᠢᠭ᠂ ᠥᠪᠴᠢ ᠬᠤᠪᠴᠠᠯᠠᠭᠰᠠᠨ ᠦᠭᠡᠢ ᠵᠣᠯᠢᠭ ᠰᠢᠭ᠋᠂ ᠰᠡᠭᠦᠳᠡᠷ ᠦᠭᠡᠢ ᠪᠡᠶᠡ᠂ ᠰᠦᠨᠡᠰᠦ ᠦᠭᠡᠢ ᠴᠢᠳᠬᠥᠷ᠂ ᠥᠷᠭᠡᠨ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ᠂ ᠥᠪᠡᠷ ᠦ᠋ᠨ ᠡᠷᠬᠡ ᠥᠴᠦᠬᠡᠨ ᠴᠦ᠍ ᠦᠭᠡᠢ᠂ ᠦᠬᠦᠨ ᠲᠦᠷᠦᠭᠦᠯᠡᠨ ᠳᠤᠲᠠᠭᠠᠬᠤ ᠳ᠋ᠠᠭᠠᠨ᠂ ᠶᠠᠪᠤᠭᠤᠯ ᠤ᠋ᠨ ᠮᠠᠭᠤ ᠶᠠᠩᠳᠠᠩ ᠬᠠᠭᠠᠨ᠂ ᠢᠷᠵᠠᠢᠨ ᠢᠷᠵᠠᠢᠨ ᠲᠠᠩᠭᠠᠷᠢᠭᠯᠠᠬᠤ ᠨᠢ᠄《ᠥᠪᠡᠷ ᠦ᠋ᠨ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ ᠦᠬᠦᠶᠡ᠃ ᠡᠮᠦᠨᠡ ᠳᠠᠯᠠᠢ ᠳ᠋ᠤ᠌ ᠤᠨᠠᠵᠤ ᠦᠬᠦᠶᠡ》ᠭᠡᠳ ᠶᠠᠪᠤᠬᠤ ᠶ᠋ᠢ᠂ ᠳᠠᠮ ᠳᠠᠮ ᠳ᠋ᠠᠭᠠᠨ ᠰᠣᠨᠣᠰᠴᠤ᠂ ᠳᠠᠯᠠᠢ ᠴᠠᠯᠭᠢᠭᠰᠠᠨ ᠰᠢᠭ᠋ ᠳᠠᠪᠠᠯᠵᠤ ᠳᠠᠶᠠᠨ ᠳᠡᠭᠡᠭᠦᠷ ᠬᠣᠷᠣᠰᠴᠤ᠂ ᠦᠭᠡ ᠦᠭᠡ ᠡᠴᠡ ᠪᠡᠨ ᠤᠯᠠᠮᠵᠢᠯᠠᠵᠤ᠂ ᠦᠢ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠣᠷᠣᠰᠴᠤ᠂ ᠦᠶᠡᠷ ᠦ᠋ᠨ ᠤᠰᠤ ᠰᠢᠭ᠋ ᠵᠥᠰᠥᠯᠵᠣ᠂ ᠥᠴᠢᠭ ᠢ᠋ ᠨᠢ ᠠᠪᠤᠨ ᠴᠣᠬᠢᠯᠵᠤ᠂ ᠭᠣᠷᠢᠳᠠᠵᠤ ᠪᠠᠢᠭᠰᠠᠨ ᠭᠣᠷᠢ ᠶ᠋ᠢ ᠨᠢ ᠭᠣᠣᠲᠤᠤ ᠠᠯᠤᠬᠠ ᠪᠠᠷ ᠪᠠᠯᠪᠠᠵᠤ ᠭᠡᠨᠡ᠃ ᠭᠣᠣᠯ ᠳ᠋ᠤᠨᠢ ᠣᠷᠣᠲᠠᠯᠠ ᠰᠢᠮᠰᠢᠷᠡᠭᠦᠯᠵᠦ ᠭᠡᠨᠡ᠃ ᠰᠠᠮᠠᠷᠳᠠᠵᠤ ᠢᠷᠡᠭᠰᠡᠨ ᠬᠢᠮᠤᠰᠤ ᠶ᠋ᠢ ᠨᠢ ᠰᠠᠨᠳᠤᠤ ᠪᠠᠷ ᠢ᠋ᠶ᠋ᠠᠨ ᠴᠠᠪᠴᠢᠵᠤ ᠭᠡᠨᠡ᠃ ᠰᠠᠨᠠᠭᠠ ᠵᠣᠷᠢᠭ ᠢ᠋ ᠨᠢ ᠮᠣᠬᠣᠭᠠᠵᠤ ᠭᠡᠨᠡ᠃ ᠭᠠᠷᠠᠬᠠᠨ ᠬᠣᠶᠠᠷ ᠨᠢᠳᠦ ᠶ᠋ᠢ ᠭᠠᠪᠠᠯᠠ ᠳᠤᠮᠳᠠ ᠨᠢ ᠰᠢᠷᠭᠢᠭᠦᠯᠵᠣ᠂ ᠭᠠᠬᠠᠢ ᠶ᠋ᠢᠨ ᠳᠥᠷᠪᠡᠨ ᠰᠣᠶᠣᠭᠠ ᠶ᠋ᠢ ᠨᠢ ᠭᠠᠳᠠᠭᠰᠢ ᠪᠠᠨ ᠳᠣᠲᠣᠭᠰᠢ ᠪᠠᠨ ᠴᠥᠮᠥᠴᠢᠵᠦ᠂ ᠳᠠᠭᠵᠢᠨ ᠳ᠋ᠠᠭᠠᠨ ᠰᠢᠷᠬᠠ ᠲᠠᠢ᠂ ᠲᠠᠰᠢᠶᠠᠨ ᠳ᠋ᠠᠭᠠᠨ ᠲᠠᠮᠠᠭᠠ ᠲᠠᠢ᠂ ᠬᠥᠯ ᠳ᠋ᠡᠭᠡᠨ ᠳᠥᠩᠭᠡ ᠴᠢᠷᠴᠦ᠂ ᠬᠦᠵᠦᠭᠦᠨ ᠳ᠋ᠡᠭᠡᠨ ᠪᠣᠭᠣᠮᠢ ᠴᠢᠷᠴᠦ᠂ ᠰᠢᠨᠵᠢ ᠪᠡᠨ ᠦᠵᠡᠭᠦᠯᠵᠦ᠂ ᠰᠢᠪᠰᠢᠭ ᠢ᠋ᠶ᠋ᠡᠨ ᠴᠢᠷᠴᠦ᠄《ᠡᠮᠦᠨᠡ ᠳᠠᠯᠠᠢ ᠳ᠋ᠤ᠌ ᠤᠨᠠᠵᠤ ᠦᠬᠦᠶᠡ᠂ ᠥᠪᠡᠷ ᠦ᠋ᠨ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ ᠦᠬᠦᠶᠡ》ᠭᠡᠳ ᠳᠤᠲᠠᠭᠠᠬᠤ ᠳ᠋ᠤ᠌᠂ ᠨᠢᠭᠡᠳᠦᠭᠰᠡᠨ ᠣᠯᠠᠨ ᠤ᠋ ᠪᠠᠷᠬᠢᠷᠠᠭᠰᠠᠨ ᠳᠠᠭᠤ᠂ ᠨᠢᠵᠢᠭᠢᠨᠡᠬᠦ ᠠᠶᠤᠩᠭᠠ᠂ ᠨᠢᠷᠭᠡᠬᠦ ᠰᠤᠮᠤ ᠪᠣᠯᠵᠤ᠂ ᠲᠦᠮᠡᠨ ᠣᠯᠠᠨ ᠤ᠋ ᠠᠳᠬᠤᠭᠰᠠᠨ ᠨᠢᠳᠤᠷᠭᠠ᠂ ᠲᠦᠮᠡᠨ ᠵᠢᠩ ᠦ᠋ᠨ ᠲᠡᠮᠦᠷ ᠮᠤᠨᠠ ᠪᠣᠯᠵᠤ᠂ ᠶᠠᠪᠤᠭᠤᠯ ᠤ᠋ᠨ ᠮᠠᠭᠤ ᠶᠠᠩᠳᠠᠩ ᠬᠠᠭᠠᠨ ᠢ᠋ ᠵᠠᠬᠠ ᠨᠤᠲᠤᠭ ᠠ᠋ᠴᠠ ᠪᠠᠨ ᠭᠠᠷᠭᠠᠵᠤ ᠭᠡᠨᠡ᠃ᠽᠠᠮᠪᠤᠲᠢᠪ ᠠ᠋ᠴᠠ ᠬᠥᠭᠡᠭᠡᠵᠦ ᠭᠡᠨᠡ᠃ ᠢᠩᠭᠢᠵᠦ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠭᠠᠳ᠂ ᠳᠠᠷᠬᠠᠨ ᠴᠣᠯᠠ ᠪᠠᠨ ᠣᠯᠤᠭᠠᠳ ᠡᠷᠭᠢᠵᠦ ᠪᠤᠴᠠᠬᠤ ᠴᠠᠭ ᠲᠤᠨᠢ ᠵᠥᠪ ᠵᠥᠪ ᠢ᠋ ᠵᠥᠩᠨᠡᠵᠦ ᠮᠡᠳᠡᠳᠡᠭ᠂ ᠵᠥᠪ ᠶᠠᠪᠤᠳᠠᠯ ᠲᠠᠢ ᠶᠠᠪᠤᠭᠤᠳᠠᠢ ᠪᠠᠭᠠᠲᠤᠷ᠂ ᠣᠯᠠᠨ ᠠᠷᠠᠳ ᠤ᠋ᠨ ᠳᠤᠮᠳᠠ ᠪᠠᠨ᠂ ᠣᠨᠴᠠ ᠵᠠᠬᠢᠵᠤ ᠬᠡᠯᠡᠭᠰᠡᠨ ᠨᠢ᠄《ᠶᠠᠪᠤᠭᠤᠯ ᠤ᠋ᠨ ᠮᠠᠭᠤ ᠶᠠᠩᠳᠠᠩ ᠬᠠᠭᠠᠨ ᠤ᠋ ᠰᠦᠷ ᠨᠢ ᠪᠠᠭᠤᠷᠠᠪᠠᠴᠤ᠂ ᠰᠦᠨᠡᠰᠦ ᠨᠢ ᠦᠬᠦᠭᠡᠳᠦᠢ᠃ ᠭᠣᠷᠢ ᠨᠢ ᠲᠠᠰᠤᠷᠠᠪᠠᠴᠤ᠂ ᠭᠣᠣᠯ ᠨᠢ ᠲᠠᠰᠤᠷᠠᠭᠠᠳᠤᠢ᠂ ᠡᠭᠦᠨ ᠡᠴᠡ ᠬᠣᠢᠰᠢ ᠲᠡᠭᠦᠨ ᠡᠴᠡ ᠴᠢᠨᠠᠭᠰᠢ᠂ ᠡᠭᠦᠨ ᠢ᠋ ᠰᠠᠢᠨ ᠬᠢᠴᠢᠶᠡ ᠃ᠲᠡᠭᠦᠨ ᠢ᠋ ᠰᠠᠢᠨ ᠰᠡᠷᠡᠮᠵᠢᠯᠡᠬᠦ ᠳ᠋ᠦ᠍᠂ ᠡᠭᠡᠭᠡ ᠡᠢᠮᠦ ᠪᠠᠢᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠶᠠᠪᠤᠭᠰᠠᠨ ᠵᠦᠭ ᠲᠦ᠋ᠨᠢ ᠰᠢᠷᠳᠡᠵᠦ᠂ ᠶᠠᠰᠤᠨ ᠨᠤᠮᠤ ᠰᠤᠮᠤ ᠪᠠᠨ ᠠᠪᠴᠤ᠂ ᠮᠡᠬᠡᠢᠳᠡᠯᠡ ᠬᠥᠪᠴᠢᠯᠡᠵᠦ᠂ ᠲᠡᠨᠢᠢᠲᠡᠯᠡ ᠲᠠᠲᠠᠵᠤ᠂ ᠤᠳᠠᠲᠠᠯᠠ ᠣᠨᠢᠯᠠᠵᠤ᠂ ᠣᠯᠠᠨ ᠳ᠋ᠠᠭᠠᠨ ᠦᠵᠡᠭᠦᠯᠵᠡᠢ᠃
ᠡᠭᠦᠨ ᠢ᠋ ᠦᠵᠡᠭᠰᠡᠨ ᠣᠯᠠᠨ᠂ ᠰᠡᠳᠬᠢᠯ ᠨᠢ ᠬᠥᠳᠡᠯᠵᠦ᠂ ᠰᠡᠷᠡᠮᠵᠢ ᠨᠢ ᠥᠨᠳᠥᠷᠵᠢᠵᠦ᠄《ᠡᠷᠭᠢᠭᠡᠳ ᠢᠷᠡᠪᠡᠯ ᠡᠷᠡ ᠶ᠋ᠢᠨ ᠵᠣᠷᠢᠭ ᠬᠤᠷᠴᠠ᠂ ᠳᠠᠬᠢᠭᠠᠳ ᠢᠷᠡᠪᠡᠯ᠂ ᠳᠠᠯᠠᠢᠭᠰᠠᠨ ᠢᠯᠳᠦ ᠬᠤᠷᠴᠠ᠂ ᠶᠠᠭᠠᠬᠢᠪᠠᠴᠤ ᠠᠯᠠᠵᠤ᠂ ᠵᠠᠪᠠᠯ ᠴᠤ᠌ ᠰᠥᠨᠥᠭᠡᠨᠡ》 ᠭᠡᠵᠦ ᠲᠠᠩᠭᠠᠷᠢᠭᠯᠠᠭᠠᠳ᠂ ᠭᠣᠯᠣᠮᠲᠠ ᠪᠠᠢᠭᠰᠠᠨ ᠢ᠋ ᠨᠢ ᠬᠤᠰᠤᠵᠤ ᠭᠡᠨᠡ᠃ ᠭᠣᠭᠣᠵᠢᠭᠰᠠᠨ ᠴᠢᠰᠤ ᠶ᠋ᠢ ᠨᠢ ᠠᠷᠢᠭᠤᠳᠬᠠᠵᠤ ᠭᠡᠨᠡ᠃ ᠦᠭᠡᠨᠴᠠ ᠮᠥᠷ ᠢ᠋ ᠨᠢ ᠱᠦᠭᠦᠷᠳᠡᠭᠡᠳ᠂ ᠦᠳᠡᠰᠢ ᠶ᠋ᠢᠨ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠬᠡᠭᠡᠳ᠂ ᠳᠠᠶᠠᠩ ᠳᠡᠯᠡᠬᠡᠢ ᠶ᠋ᠢᠨ ᠳᠣᠲᠣᠷᠠ ᠲᠡᠢᠨ ᠳᠠᠵᠢᠨ ᠦᠭᠡᠢ᠂ ᠳᠠᠶᠠᠭᠠᠷ ᠣᠯᠠᠨ ᠤ᠋ ᠳᠣᠲᠣᠷᠠ ᠳᠠᠷᠤᠯᠠᠯ ᠮᠥᠯᠵᠢᠯ ᠦᠭᠡᠢ᠂ ᠥᠭᠭᠢᠶᠡᠮᠦᠷ ᠪᠣᠷᠣᠭᠠᠨ ᠣᠷᠣᠵᠤ᠂ ᠦᠯᠭᠡᠭ ᠲᠣᠭᠣᠰᠣ ᠳᠠᠷᠤᠭᠳᠠᠵᠤ᠂ ᠥᠷᠭᠡᠨ ᠳᠡᠯᠡᠬᠡᠢ ᠨᠣᠭᠣᠭᠠᠷᠠᠵᠤ᠂ ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠳᠡᠯᠭᠡᠷᠡᠵᠦ᠂ ᠠᠷᠢᠭᠤᠨ ᠦᠨᠦᠷ ᠠᠭᠠᠷ ᠳᠦᠭᠦᠷᠡᠩ ᠠᠩᠬᠢᠯᠵᠤ᠂ ᠠᠷᠪᠢᠨ ᠰᠦᠷᠦᠭ ᠲᠠᠯᠠ ᠳᠦᠭᠦᠷᠡᠩ ᠪᠡᠯᠴᠢᠵᠦ᠂ ᠬᠥᠳᠡᠯᠮᠦᠷᠢ ᠳ᠋ᠡᠭᠡᠨ ᠬᠥᠭᠵᠢᠵᠦ᠂ ᠬᠥᠷᠥᠩᠭᠡ ᠳ᠋ᠡᠭᠡᠨ ᠴᠡᠩᠭᠡᠵᠦ᠂ ᠳᠡᠪᠰᠢᠯᠲᠡ ᠶ᠋ᠢᠨ ᠵᠦᠭ ᠳᠠᠪᠬᠢᠵᠤ᠂ ᠳᠠᠶᠠᠩ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠪᠬᠢᠵᠤ ᠬᠥᠭᠵᠢᠯᠲᠡ ᠶ᠋ᠢᠨ ᠵᠦᠭ ᠬᠥᠭᠵᠢᠵᠦ᠂ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠥᠭᠵᠢᠵᠦ᠂ ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠵᠢᠷᠭᠠᠵᠤ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ(ᠪᠤᠤ ᠸᠧᠨ ᠬᠤᠸᠠ)᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂
ᠤᠷᠠᠨᠴᠢᠮᠡᠭ᠂ ᠨᠠᠷᠠᠨᠲᠤᠶᠠᠭᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠭᠠᠷᠮᠠ᠂ ᠬᠡᠯᠡᠰᠣᠶᠣᠯ