ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠮᠠᠨᠽᠤᠰᠢᠷᠢ ᠠᠪᠤᠷᠠᠭᠰᠠᠨ ᠦᠭᠡᠢ᠂ ᠮᠠᠩᠬᠠᠨ ᠤ᠋ ᠲᠠᠤᠯᠠᠢ ᠠᠪᠤᠷᠠᠪᠠ Гураван настай гунаган улаан баатар - Манзошир аварсангүй᠂ манхны туулай аврав
138ᠮᠠᠨᠽᠤᠰᠢᠷᠢ ᠠᠪᠤᠷᠠᠭᠰᠠᠨ ᠦᠭᠡᠢ᠂ ᠮᠠᠩᠬᠠᠨ ᠤ᠋ ᠲᠠᠤᠯᠠᠢ ᠠᠪᠤᠷᠠᠪᠠ
ᠬᠣᠪᠣᠷ ᠬᠣᠪᠣᠷ ᠶᠠᠪᠤᠵᠤ᠂ ᠬᠣᠶᠠᠷ ᠡᠳᠦᠷ ᠦ᠋ᠨ ᠵᠠᠮ ᠢ᠋ ᠨᠢᠭᠡᠨ ᠡᠳᠦᠷ ᠶᠠᠪᠤᠵᠤ᠂ ᠭᠣᠪᠣᠷ ᠭᠣᠪᠣᠷ ᠶᠠᠪᠤᠵᠤ᠂ ᠭᠤᠷᠪᠠᠨ ᠡᠳᠦᠷ ᠦ᠋ᠨ ᠵᠠᠮ ᠢ᠋ ᠨᠢᠭᠡᠨ ᠡᠳᠦᠷ ᠶᠠᠪᠤᠵᠤ᠂ ᠬᠡᠳᠦᠨ ᠰᠠᠷᠠ ᠶᠠᠪᠤᠵᠤ ᠪᠠᠢᠲᠠᠯᠠ ᠬᠡᠭᠡᠯ ᠨᠢ ᠬᠦᠨᠳᠦᠷᠡᠵᠦ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ᠂ ᠰᠠᠨᠠᠭᠠ ᠨᠢ ᠪᠠᠢᠪᠠᠴᠤ᠂ ᠴᠢᠳᠠᠯ ᠨᠢ ᠬᠦᠷᠬᠦ ᠦᠭᠡᠢ᠂ ᠰᠠᠵᠢᠯᠠᠵᠤ ᠪᠠᠢᠪᠠᠴᠤ ᠵᠠᠮ ᠨᠢ ᠬᠣᠷᠣᠬᠤ ᠦᠭᠡᠢ᠂ ᠡᠢᠰᠢ ᠲᠠᠢᠰᠢ ᠪᠠᠨ ᠬᠠᠷᠠᠵᠤ᠂ ᠡᠷᠡᠭᠡᠯᠵᠡᠨ ᠵᠣᠭᠰᠣᠵᠤ ᠪᠠᠢᠲᠠᠯᠠ᠂ ᠥᠯᠥᠨ ᠬᠥᠬᠡ ᠴᠢᠨᠣᠠ ᠱᠣᠭᠰᠢᠨ ᠢᠷᠡᠵᠦ ᠪᠠᠶᠠᠷᠯᠠᠨ᠄《ᠪᠡᠯᠡᠨ ᠴᠠᠪ᠂ ᠪᠦᠯᠢᠶᠡᠨ ᠮᠠᠩᠵᠠ᠂ ᠬᠣᠨᠢ ᠴᠢᠮᠠᠶ᠋ᠢ ᠢᠳᠡᠨᠡ》 ᠭᠡᠵᠡᠢ᠃ ᠬᠣᠨᠢ ᠶᠡᠬᠡ ᠰᠠᠨᠳᠤᠷᠤᠨ᠄《ᠪᠢ ᠮᠠᠨᠽᠤᠰᠢᠷᠢ ᠶ᠋ᠢᠨ ᠭᠡᠭᠡᠨ ᠳ᠋ᠦ᠍ ᠮᠥᠷᠭᠥᠵᠦ᠂ ᠮᠠᠭᠠᠳ ᠰᠠᠢᠨ ᠢ᠋ᠶ᠋ᠠᠨ ᠳᠠᠭᠠᠳᠬᠠᠵᠤ᠂ ᠵᠠᠩᠭᠢᠶᠠ ᠪᠤᠷᠬᠠᠨ ᠳ᠋ᠤ᠌ ᠮᠥᠷᠭᠥᠵᠦ ᠵᠠᠶᠠᠭᠠᠨ ᠲᠩᠷᠢ ᠪᠡᠨ ᠳᠠᠬᠢᠭᠤᠯᠵᠤ ᠂ ᠡᠳᠦᠭᠡ ᠪᠠ ᠬᠣᠢᠲᠤ ᠪᠠᠨ ᠳᠠᠭᠠᠳᠬᠠᠵᠤ᠂ ᠡᠯᠳᠡᠪ ᠪᠠᠷᠴᠢᠳ ᠢ᠋ᠶ᠋ᠠᠨ ᠦᠭᠡᠢ ᠪᠣᠯᠭᠠᠶᠠ ᠭᠡᠰᠡᠨ ᠶᠦᠮ》 ᠭᠡᠵᠦ ᠭᠤᠶᠤᠭᠰᠠᠨ ᠳ᠋ᠤ᠌᠂ ᠴᠢᠨᠣᠠ ᠶᠡᠷᠦ ᠬᠦᠯᠢᠶᠡᠬᠦ ᠦᠭᠡᠢ᠄《ᠤᠲᠠᠢ ᠳ᠋ᠤ᠌ ᠮᠥᠷᠭᠥᠬᠦ ᠶ᠋ᠢ ᠬᠠᠮᠢᠶᠠᠷᠬᠤ ᠦᠭᠡᠢ᠂ ᠥᠯᠥᠰᠬᠦ ᠠᠷᠢᠯᠪᠠᠯ ᠪᠣᠯᠤᠨᠠ᠃ ᠭᠡᠮ ᠲᠡᠢ ᠭᠡᠮ ᠦᠭᠡᠢ ᠶ᠋ᠢ ᠬᠠᠮᠢᠶᠠᠷᠬᠤ ᠦᠭᠡᠢ᠂ ᠭᠡᠳᠡᠰᠦ ᠴᠠᠳᠪᠠᠯ ᠪᠣᠯᠤᠨᠠ᠃ ᠬᠣᠨᠢ ᠭᠤᠸᠠᠢ ᠴᠢ ᠬᠤᠳᠠᠯ ᠬᠡᠯᠡᠵᠦ ᠪᠠᠢᠨᠠ》 ᠭᠡᠵᠡᠢ᠃
ᠬᠣᠨᠢ ᠰᠠᠨᠳᠤᠷᠴᠤ ᠬᠠᠮᠠᠷ ᠳᠡᠭᠡᠷᠡᠬᠢ ᠰᠢᠷᠠ ᠲᠣᠰᠣ ᠪᠠᠨ ᠵᠢᠭᠠᠵᠤ ᠬᠤᠳᠠᠯ ᠭᠡᠪᠡᠯ ᠡᠭᠦᠨ ᠢ᠋ ᠦᠵᠡ ᠭᠡᠵᠦ ᠬᠠᠮᠠᠷ ᠢ᠋ᠶ᠋ᠠᠨ ᠵᠢᠭᠠᠵᠤ᠄《ᠬᠣᠨᠢ ᠭᠤᠸᠠᠢ ᠨᠠᠮᠠᠶ᠋ᠢ ᠢᠳᠡᠬᠦ ᠭᠡᠪᠡᠯ ᠡᠷᠭᠢᠭᠡᠳ ᠢᠷᠡᠬᠦ ᠳᠡᠭᠡᠷᠡ ᠢᠳᠡ ᠳᠠ! 》 ᠭᠡᠵᠦ ᠭᠤᠶᠤᠭᠰᠠᠨ ᠳ᠋ᠤ᠌᠂ ᠴᠢᠨᠣᠠ ᠰᠠᠶᠢ ᠵᠥᠪᠰᠢᠶᠡᠷᠡᠨ᠄《ᠡᠷᠭᠢᠭᠡᠳ ᠢᠷᠡᠬᠦ ᠳ᠋ᠦ᠍ ᠴᠢᠨᠢ᠂ ᠡᠷᠬᠡᠪᠰᠢ ᠴᠢᠮᠠᠶ᠋ᠢ ᠢᠳᠡᠨᠡ᠂ ᠪᠤᠴᠠᠭᠠᠳ ᠢᠷᠡᠬᠦ ᠳ᠋ᠦ᠍ ᠴᠢᠨᠢ᠂ ᠪᠤᠴᠠᠯᠲᠠ ᠦᠭᠡᠢ ᠴᠢᠮᠠᠶ᠋ᠢ ᠢᠳᠡᠨᠡ!》 ᠭᠡᠵᠦ ᠭᠡᠷᠡ ᠲᠣᠭᠲᠠᠭᠠᠳ ᠶᠠᠪᠤᠭᠤᠯᠵᠠᠢ᠃
ᠬᠠᠷᠠ ᠬᠠᠯᠵᠠᠨ ᠬᠣᠨᠢ ᠤᠲᠠᠢ ᠳ᠋ᠤ᠌ ᠬᠦᠷᠴᠦ᠂ ᠬᠠᠯᠵᠠᠨ ᠬᠤᠷᠠᠭᠠ ᠭᠠᠷᠭᠠᠵᠤ ᠡᠬᠡ ᠬᠤᠷᠠᠭᠠ ᠬᠣᠶᠠᠭᠤᠯᠠ᠂ ᠡᠷᠭᠢᠯ ᠮᠥᠷᠭᠥᠯ ᠬᠢᠵᠦ ᠭᠡᠨᠡ᠃ ᠡᠨᠡ ᠲᠡᠷᠡ ᠪᠡᠨ ᠳᠠᠭᠠᠳᠬᠠᠵᠤ ᠭᠡᠨᠡ᠃ ᠡᠬᠡ ᠶ᠋ᠢᠨ ᠠᠭᠤᠢ ᠳ᠋ᠤ᠌ ᠰᠢᠷᠭᠤᠵᠤ᠂ ᠡᠷᠭᠢᠵᠦ ᠲᠥᠷᠥᠬᠦ ᠪᠡᠨ ᠳᠠᠭᠠᠳᠬᠠᠵᠤ ᠭᠡᠨᠡ᠃ ᠰᠠ ᠶ᠋ᠢᠨ ᠬᠣᠣᠷ ᠢ᠋ ᠣᠯᠬᠤ ᠦᠭᠡᠢ ᠭᠡᠵᠦ ᠰᠠᠷᠠᠨ ᠬᠤᠳᠳᠤᠭ ᠢ᠋ ᠥᠩᠭᠡᠢᠵᠦ ᠭᠡᠨᠡ᠃ ᠰᠠᠴᠤᠷᠠᠬᠤ ᠬᠡᠢ ᠮᠣᠷᠢ ᠪᠠᠨ ᠰᠡᠷᠭᠦᠭᠡᠨᠡ ᠭᠡᠵᠦ ᠰᠠᠨᠰᠠᠷ ᠤ᠋ᠨ ᠣᠷᠣᠢ ᠳ᠋ᠤ᠌ ᠪᠠᠰᠠ ᠭᠠᠷᠴᠤ ᠭᠡᠨᠡ᠃ ᠬᠠᠷᠠ ᠬᠠᠯᠵᠠᠨ ᠬᠣᠨᠢ ᠢᠩᠭᠢᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠣᠴᠢᠭᠰᠠᠨ ᠦᠭᠡᠢ ᠣᠷᠣᠨ ᠴᠤ᠌ ᠭᠡᠵᠦ ᠦᠭᠡᠢ᠂ ᠮᠥᠷᠭᠥᠭᠰᠡᠨ ᠦᠭᠡᠢ ᠪᠤᠷᠬᠠᠨ ᠴᠤ᠌ ᠭᠡᠵᠦ ᠦᠭᠡᠢ᠂ ᠡᠪᠡᠰᠦ ᠨᠢ ᠪᠣᠯᠪᠠᠴᠤ ᠠᠳᠢᠰ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠵᠠᠭᠤᠵᠤ᠂ ᠠᠮᠲᠠᠯᠠᠨ ᠰᠢᠮᠡᠵᠦ᠂ ᠤᠰᠤ ᠨᠢ ᠪᠣᠯᠪᠠᠴᠤ ᠷᠠᠰᠢᠶᠠᠨ ᠭᠡᠵᠦ ᠤᠮᠳᠠᠯᠠᠨ ᠰᠢᠮᠡᠵᠦ᠂ ᠣᠷᠣᠢ ᠳᠡᠭᠡᠷᠡ ᠪᠡᠨ ᠲᠦᠷᠬᠢᠵᠦ᠂ ᠢᠩᠭᠢᠵᠦ ᠪᠤᠶᠠᠨ ᠢ᠋ᠶ᠋ᠠᠨ ᠬᠢᠭᠡᠳ ᠡᠷᠭᠢᠵᠦ ᠪᠤᠴᠠᠨ ᠶᠠᠪᠤᠵᠠᠢ᠃
ᠢᠩᠭᠢᠵᠦ ᠪᠤᠴᠠᠨ ᠶᠠᠪᠤᠬᠤ ᠳ᠋ᠠᠭᠠᠨ ᠠᠯᠤᠰ ᠵᠠᠮ ᠢ᠋ ᠬᠥᠭᠡᠭᠡᠵᠦ ᠭᠠᠷᠬᠤ ᠦᠭᠡᠢ᠂ ᠠᠷᠭᠠ ᠦᠭᠡᠢ ᠶᠠᠳᠠᠷᠠᠵᠤ ᠬᠣᠯᠠ ᠵᠠᠮ ᠢ᠋ ᠬᠥᠭᠡᠭᠡᠵᠦ ᠭᠠᠷᠬᠤ ᠦᠭᠡᠢ᠂ ᠬᠣᠩᠭᠣ ᠰᠡᠭᠦᠯ ᠨᠢ ᠰᠤᠯᠠᠷᠠᠵᠤ᠂ ᠡᠬᠡ ᠬᠤᠷᠠᠭᠠ ᠬᠣᠶᠠᠭᠤᠯᠠ᠂ ᠡᠮᠭᠡᠨᠢᠨ ᠵᠣᠪᠠᠵᠤ᠂ ᠡᠮᠭᠡᠨᠢᠨ ᠮᠠᠢᠯᠠᠵᠤ᠂ ᠣᠷᠣᠭᠰᠢ ᠶᠠᠪᠤᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ᠂ ᠤᠶᠠᠷᠠᠨ ᠵᠣᠪᠠᠵᠤ᠂ ᠤᠬᠢᠯᠠᠨ ᠰᠠᠭᠤᠵᠤ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠵᠠᠮ ᠤ᠋ᠨ ᠬᠠᠵᠠᠭᠤ ᠠ᠋ᠴᠠ ᠨᠢᠭᠡ ᠲᠠᠤᠯᠠᠢ ᠭᠠᠷᠴᠤ ᠬᠣᠨᠢᠨ ᠠ᠋ᠴᠠ᠄《ᠴᠢ ᠶᠠᠭᠤ ᠭᠡᠵᠦ ᠤᠬᠢᠯᠠᠵᠤ ᠪᠠᠢᠨᠠ ᠪᠣᠢ?》 ᠭᠡᠵᠦ ᠠᠰᠠᠭᠤᠵᠠᠢ᠃ ᠬᠣᠨᠢ ᠶᠠᠳᠠᠷᠠᠭᠰᠠᠨ ᠤᠴᠢᠷ ᠪᠣᠯᠤᠭᠠᠳ ᠴᠢᠨᠣᠠ ᠶ᠋ᠢᠨ ᠤᠴᠢᠷ ᠢ᠋ ᠬᠡᠯᠡᠵᠦ᠄《ᠪᠢ ᠮᠠᠨᠽᠤᠰᠢᠷᠢ ᠪᠤᠷᠬᠠᠨ ᠳ᠋ᠤ᠌ ᠮᠥᠷᠭᠥᠭᠰᠡᠨ᠂ ᠮᠠᠭᠠᠳ ᠰᠠᠢᠨ ᠢ᠋ᠶ᠋ᠠᠨ ᠳᠠᠭᠠᠳᠬᠠᠭᠰᠠᠨ᠂ ᠤᠲᠠᠢ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠮᠥᠷᠭᠥᠭᠰᠡᠨ᠂ ᠦᠢᠯᠡ ᠵᠣᠪᠠᠯᠠᠩ ᠢ᠋ᠶ᠋ᠠᠨ ᠳᠠᠭᠠᠳᠬᠠᠭᠰᠠᠨ᠂ ᠲᠡᠨᠳᠡ ᠪᠠᠢᠬᠤ ᠳ᠋ᠤ᠌ ᠠᠶᠤᠭᠰᠠᠨ ᠦᠭᠡᠢ᠂ ᠡᠨᠳᠡ ᠢᠷᠡᠭᠰᠡᠨ ᠳ᠋ᠦ᠍ ᠠᠶᠤᠭᠠᠳ ᠪᠠᠢᠨᠠ》 ᠭᠡᠵᠡᠢ᠃
ᠲᠠᠤᠯᠠᠢ ᠰᠠᠨᠳᠤᠷᠤᠨ ᠣᠮᠣᠭᠣᠷ ᠤᠷᠤᠭᠤᠯ ᠢ᠋ᠶ᠋ᠠᠨ ᠳᠠᠷᠪᠠᠯᠵᠠᠭᠤᠯᠵᠤ᠂ ᠤᠷᠲᠤ ᠴᠢᠬᠢ ᠪᠡᠨ ᠰᠣᠯᠪᠢᠯᠵᠡᠭᠤᠯᠵᠦ ᠬᠡᠳᠦ ᠪᠣᠳᠣᠭᠠᠳ ᠴᠢᠮᠠᠶ᠋ᠢ ᠴᠢᠨᠣᠠ ᠶ᠋ᠢᠨ ᠠᠶᠤᠯ ᠠ᠋ᠴᠠ ᠪᠢ ᠨᠢᠭᠡ ᠭᠠᠷᠭᠠᠵᠤ ᠦᠵᠡᠶᠡ ᠭᠡᠳ ᠭᠤᠷᠪᠠᠭᠤᠯᠠ ᠶᠠᠪᠤᠵᠤ᠂ ᠨᠢᠭᠡᠨ ᠠᠢᠯ ᠤ᠋ᠨ ᠡᠪᠦᠯᠵᠢᠶᠡ ᠳᠡᠭᠡᠷᠡ ᠬᠦᠷᠴᠦ᠂ ᠡᠷᠢᠨ ᠡᠷᠢᠭᠰᠡᠭᠡᠷ ᠪᠠᠢᠭᠠᠳ᠂ ᠨᠢᠭᠡ ᠡᠭᠡᠷᠡᠦᠯ᠂ ᠨᠢᠭᠡ ᠪᠠᠷᠢᠭᠤᠯ᠂ ᠨᠢᠭᠡ ᠬᠠᠲᠠᠭᠤ ᠴᠠᠢ ᠶ᠋ᠢᠨ ᠳᠥᠷᠪᠡᠯᠵᠢᠨ ᠰᠢᠷᠠ ᠴᠠᠭᠠᠰᠤ ᠣᠯᠵᠤ᠂ ᠲᠠᠤᠯᠠᠢ ᠬᠣᠨᠢ ᠶ᠋ᠢᠨ ᠵᠦᠭ ᠬᠡᠯᠡᠭᠰᠡᠨ ᠨᠢ᠄《ᠵᠠ᠂ ᠡᠨᠡ ᠬᠡᠳᠦᠨ ᠵᠦᠢᠯ ᠦ᠋ᠨ ᠶᠠᠭᠤᠮᠠ ᠪᠠᠷ ᠲᠠ ᠨᠠᠷ ᠤ᠋ᠨ ᠠᠮᠢ ᠶ᠋ᠢ ᠠᠪᠤᠷᠠᠶᠠ》 ᠭᠡᠵᠡᠢ᠃ ᠬᠣᠨᠢ ᠡᠰᠡ ᠲᠣᠭᠣᠵᠤ ᠲᠣᠯᠣᠭᠠᠢ ᠪᠠᠨ ᠳᠠᠮᠠᠷᠤᠳᠠᠬᠤ ᠳ᠋ᠤ᠌᠂ ᠲᠠᠤᠯᠠᠢ ᠬᠣᠨᠢᠨ ᠤ᠋ ᠴᠢᠬᠢᠨ ᠳ᠋ᠦ᠍ ᠰᠢᠪᠡᠨᠡᠨ ᠬᠡᠯᠡᠬᠦ ᠳ᠋ᠦ᠍᠂ ᠬᠣᠨᠢ ᠰᠠᠶᠢ ᠲᠣᠯᠣᠭᠠᠢ ᠳᠣᠬᠢᠨ ᠳᠠᠭᠠᠵᠤ ᠶᠠᠪᠤᠵᠠᠢ᠃
ᠬᠡᠳᠦᠭᠦᠯᠡ ᠪᠢᠴᠢᠬᠠᠨ ᠶᠠᠪᠤᠲᠠᠯᠠ᠂ ᠥᠯᠥᠨ ᠬᠥᠬᠡ ᠴᠢᠨᠣᠠ ᠥᠭᠡᠳᠡ ᠡᠴᠡ ᠨᠢ ᠢᠷᠡᠵᠦ ᠱᠣᠳᠣᠭᠣᠷ ᠰᠡᠭᠦᠯ ᠢ᠋ᠶ᠋ᠡᠨ ᠪᠣᠷᠪᠢᠨ ᠳ᠋ᠠᠭᠠᠨ ᠬᠠᠪᠴᠢᠵᠤ᠂ ᠰᠣᠶᠣᠭᠠ ᠰᠢᠲᠦ ᠪᠡᠨ ᠢᠷᠵᠠᠢᠯᠭᠠᠨ᠂ ᠭᠡᠮ ᠨᠢ ᠵᠢᠰᠦᠨ ᠳ᠋ᠡᠭᠡᠨ ᠢᠯᠡᠷᠡᠵᠦ᠂ ᠭᠡᠳᠡᠰᠦ ᠨᠢ ᠨᠢᠷᠤᠭᠤᠨ ᠳ᠋ᠠᠭᠠᠨ ᠨᠠᠭᠠᠯᠳᠤᠵᠤ᠂ ᠠᠩᠬᠠ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠳᠤᠷᠠᠰᠴᠤ᠂ ᠠᠶᠤᠮᠠᠷ ᠰᠦᠷᠲᠡᠢ ᠵᠠᠩᠨᠠᠵᠤ ᠠᠮᠠ ᠪᠠᠨ ᠠᠩᠭᠠᠢᠨ ᠢᠷᠡᠬᠦ ᠳ᠋ᠦ᠍᠂ ᠲᠠᠤᠯᠠᠢ ᠲᠣᠩᠭᠣᠰ ᠲᠣᠩᠭᠣᠰ ᠳᠡᠭᠳᠡᠵᠦ ᠬᠣᠨᠢ ᠶ᠋ᠢᠨ ᠡᠮᠦᠨᠡ ᠭᠠᠷᠴᠤ ᠳᠣᠪᠣᠢᠲᠠᠯᠠ ᠰᠠᠭᠤᠵᠤ ᠪᠠᠢᠭᠠᠳ ᠲᠤᠩ ᠴᠤ᠌ ᠶᠡᠬᠡᠮᠰᠦᠭ ᠢ᠋ᠶ᠋ᠡᠷ ᠬᠡᠯᠡᠭᠰᠡᠨ ᠨᠢ᠄《ᠠᠰᠯᠠᠵᠤ ᠢᠷᠡᠭᠰᠡᠨ ᠵᠣᠷᠢᠭ ᠢ᠋ᠶ᠋ᠠᠷ ᠠᠲᠠᠷ ᠲᠠᠯᠠ ᠳᠡᠭᠡᠷᠡ ᠭᠦᠢᠴᠡᠳᠬᠡᠶᠡ᠃ ᠴᠣᠬᠣᠯᠠᠵᠤ ᠢᠷᠡᠭᠰᠡᠨ ᠵᠣᠷᠢᠭ ᠢ᠋ᠶ᠋ᠠᠨ ᠴᠣᠬᠣᠮ ᠡᠨᠳᠡ ᠭᠦᠢᠴᠡᠳᠬᠡᠶᠡ》 ᠭᠡᠵᠡᠢ᠃
ᠴᠢᠨᠣᠠ᠂ ᠦᠭᠡ ᠶ᠋ᠢ ᠨᠢ ᠮᠡᠳᠡᠬᠦ ᠦᠭᠡᠢ ᠦᠯᠪᠡᠯᠵᠡᠵᠦ᠂ ᠤᠬᠠᠭᠠᠨ ᠢ᠋ ᠨᠢ ᠣᠯᠬᠤ ᠦᠭᠡᠢ ᠤᠯᠠᠪᠠᠯᠵᠠᠵᠤ ᠪᠠᠢᠲᠠᠯᠠ᠂ ᠲᠠᠤᠯᠠᠢ᠄《ᠣᠯᠪᠣᠭ ᠢ᠋ᠶ᠋ᠠᠨ ᠳᠡᠪᠢᠰ》 ᠭᠡᠵᠡᠢ᠃ ᠬᠣᠨᠢ ᠪᠠᠷᠢᠭᠤᠯ ᠢ᠋ᠶ᠋ᠠᠨ ᠠᠪᠠᠴᠢᠭᠠᠳ ᠳᠡᠪᠢᠰᠴᠡᠢ᠃ ᠲᠠᠤᠯᠠᠢ ᠲᠡᠭᠦᠨ ᠳᠡᠭᠡᠷᠡ ᠨᠢ ᠲᠣᠪᠬᠢᠲᠠᠯᠠ ᠰᠠᠭᠤᠵᠠᠢ᠃ ᠲᠠᠤᠯᠠᠢ᠄《 ᠲᠤᠭ ᠢ᠋ᠶ᠋ᠠᠨ ᠪᠤᠰᠬᠠ》 ᠭᠡᠵᠡᠢ᠃
ᠬᠣᠨᠢ ᠡᠭᠡᠷᠡᠦᠯ ᠢ᠋ᠶ᠋ᠡᠨ ᠠᠪᠠᠴᠢᠭᠠᠳ ᠬᠠᠳᠬᠤᠵᠠᠢ᠃ ᠲᠠᠤᠯᠠᠢ᠄《ᠪᠢᠴᠢᠭ ᠢ᠋ᠶ᠋ᠡᠨ ᠠᠪᠴᠤ ᠢᠷᠡ》 ᠭᠡᠵᠡᠢ᠃ ᠬᠣᠨᠢ ᠰᠢᠷᠠ ᠴᠠᠭᠠᠰᠤ ᠪᠠᠨ ᠠᠪᠴᠢᠷᠠᠭᠠᠳ ᠥᠭᠴᠡᠢ᠃ ᠲᠠᠤᠯᠠᠢ ᠪᠢᠴᠢᠭ ᠢ᠋ ᠠᠪᠤᠨ᠂ ᠣᠴᠣᠢᠨ ᠰᠠᠭᠤᠵᠤ᠂ ᠥᠨᠳᠥᠷ ᠡᠷᠭᠦᠵᠦ᠂᠂ ᠠᠭᠠᠵᠢᠮᠬᠠᠨ ᠦᠭᠡ ᠪᠡᠷ᠂ ᠠᠭᠰᠢᠭᠤᠨ ᠳᠠᠭᠤᠨ ᠢ᠋ᠶ᠋ᠠᠷ ᠠᠶᠠᠯᠤᠨ ᠤᠩᠰᠢᠵᠠᠢ᠃《ᠳᠡ ᠴᠢᠩ ᠡᠵᠡᠨ ᠬᠠᠭᠠᠨ ᠠ᠋ᠴᠠ᠂ ᠳᠠᠯᠠᠢ ᠯᠠᠮᠠ ᠶ᠋ᠢᠨ ᠭᠡᠭᠡᠨ ᠲᠠᠨ ᠳ᠋ᠤ᠌ ᠳᠠᠩᠰᠢᠭ ᠮᠠᠨᠳᠤᠯ ᠡᠷᠭᠦᠨᠡ ᠭᠡᠵᠦ ᠳᠠᠯᠠᠨ ᠬᠣᠶᠠᠷ ᠴᠢᠨᠣᠠ ᠶ᠋ᠢᠨ ᠠᠷᠠᠰᠤ ᠶ᠋ᠢ ᠳᠠᠪ ᠳᠠᠷᠤᠢ ᠠᠪᠴᠢᠷᠠᠬᠤ ᠶ᠋ᠢ ᠳᠠᠬᠢᠨ ᠳᠠᠬᠢᠨ ᠰᠢᠪᠠᠳᠠᠨ ᠵᠠᠷᠯᠠᠪᠠ》ᠭᠡᠰᠡᠨ ᠳ᠋ᠦ᠍ ᠴᠢᠨᠣᠠ ᠠᠶᠤᠭᠰᠠᠨ ᠪᠠᠢᠳᠠᠯ ᠲᠠᠢ ᠪᠠᠢᠬᠤ ᠶ᠋ᠢ ᠲᠠᠤᠯᠠᠢ ᠮᠡᠳᠡᠵᠦ ᠨᠡᠩ ᠶᠡᠬᠡ ᠳᠠᠭᠤ ᠪᠠᠷ ᠪᠠᠰᠠ ᠬᠡᠯᠡᠵᠡᠢ᠃《ᠡᠵᠡᠨ ᠦ᠌ ᠵᠠᠷᠯᠢᠭ ᠢ᠋ ᠡᠷᠭᠢᠭᠦᠯᠵᠦ ᠪᠣᠯᠬᠤ ᠦᠭᠡᠢ᠂ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ ᠬᠠᠯᠢᠷᠠᠵᠤ ᠪᠣᠯᠬᠤ ᠦᠭᠡᠢ᠃ ᠳᠠᠯᠠᠢ ᠳ᠋ᠤ᠌ ᠳᠤᠰᠤᠯ ᠨᠡᠮᠡᠷᠢ᠂ ᠳᠠᠩᠰᠢᠭ ᠲᠤ᠌ ᠬᠠᠳᠠᠭ ᠨᠡᠮᠡᠷᠢ᠂ ᠨᠢᠭᠡ ᠶ᠋ᠢ ᠥᠷᠲᠥᠭᠰᠡᠨ ᠴᠦ᠍ ᠨᠢᠳᠤᠷᠴᠤ ᠪᠠᠢ! ᠬᠣᠶᠠᠷ ᠢ᠋ ᠥᠷᠲᠥᠭᠰᠡᠨ ᠴᠦ᠍ ᠬᠣᠷᠣᠭᠠᠵᠤ ᠪᠠᠢ! ᠬᠣᠨᠢ ᠭᠤᠸᠠᠢ ᠪᠣᠰ! ᠴᠢᠨᠣᠠ ᠭᠤᠸᠠᠢ ᠶ᠋ᠢ ᠪᠡᠷᠢ!》ᠭᠡᠵᠦ ᠪᠠᠷᠬᠢᠷᠠᠭᠰᠠᠨ ᠳ᠋ᠤ᠌᠂ ᠥᠯᠥᠨ ᠴᠢᠨᠣᠠ ᠶ᠋ᠢᠨ ᠦᠰᠦ ᠨᠢ ᠵᠠᠷᠠᠢᠵᠤ᠂ ᠦᠶᠡ ᠨᠢ ᠴᠠᠷᠴᠠᠵᠤ᠂ ᠰᠦᠷ ᠨᠢ ᠪᠠᠭᠤᠷᠠᠨ ᠰᠦᠨᠡᠰᠦ ᠨᠢ ᠵᠠᠢᠯᠠᠨ ᠱᠦᠷᠳ᠋ ᠭᠡᠲᠡᠯᠡ ᠳᠤᠲᠠᠭᠠᠪᠠ᠃
ᠲᠠᠤᠯᠠᠢ ᠠᠷᠭᠠ ᠪᠦᠲᠦᠭᠰᠡᠨ ᠳ᠋ᠡᠭᠡᠨ ᠪᠠᠶᠠᠷᠯᠠᠨ ᠠᠭᠠᠵᠢᠮ ᠢ᠋ᠶ᠋ᠠᠷ ᠰᠤᠨᠢᠶᠠᠨ ᠪᠣᠰᠴᠤ᠂ ᠬᠠᠷᠠ ᠬᠠᠯᠵᠠᠨ ᠬᠣᠨᠢᠨ ᠤ᠋ ᠬᠠᠮᠠᠷ ᠤ᠋ᠨ ᠲᠣᠰᠣ ᠶ᠋ᠢ ᠨᠢ ᠵᠢᠭᠠᠵᠤ:《ᠮᠠᠨᠽᠤᠰᠢᠷᠢ ᠴᠢᠮᠠᠶ᠋ᠢ ᠠᠪᠤᠷᠠᠭᠰᠠᠨ ᠦᠭᠡᠢ᠂ ᠮᠠᠩᠬᠠ ᠶ᠋ᠢᠨ ᠲᠠᠤᠯᠠᠢ ᠠᠪᠤᠷᠠᠪᠠ᠃ ᠡᠨᠡ ᠶᠡᠬᠡ ᠦᠯᠢᠭᠡᠷ ᠢ᠋ᠶ᠋ᠡᠨ ᠡᠭᠦᠷᠢᠳᠡ ᠪᠢᠲᠡᠭᠡᠢ ᠮᠠᠷᠲᠠ!》ᠭᠡᠳ ᠲᠣᠩᠭᠣᠰ ᠲᠣᠩᠭᠣᠰ ᠲᠣᠯᠣᠭᠠᠢ ᠰᠠᠵᠢᠨ ᠶᠠᠪᠤᠵᠤ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ(ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂ ᠪᠠᠢ·ᠰᠠᠷᠠᠨᠠ᠂
ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ᠂ ᠭᠡᠷᠡᠯ᠂ ᠡᠷᠴᠢᠨ᠂ ᠠᠯᠲᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠭᠠᠷᠮᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠣᠶᠤᠨᠴᠢᠮᠡᠭ ᠂ ᠬᠡᠯᠡᠰᠣᠶᠣᠯ(ᠪᠤᠤ ᠸᠧᠨ ᠬᠤᠸᠠ)᠂ ᠭᠡᠷᠡᠯ᠂ ᠮᠣᠩᠭᠣᠯ ᠰᠦᠨᠡᠰᠦ