ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ – ᠠᠪᠤᠷᠠᠯᠲᠤ ᠬᠠᠨ Шилэн галзуу баатар – Авралт хан
114ᠠᠪᠤᠷᠠᠯᠲᠤ ᠬᠠᠨ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠨᠢᠭᠡᠨ ᠰᠠᠢᠬᠠᠨ ᠴᠠᠭ ᠲᠤ
ᠨᠠᠷᠠ ᠰᠠᠶᠢ ᠮᠠᠨᠳᠤᠵᠤ ᠪᠠᠢᠬᠤ ᠳ᠋ᠤ᠌
ᠨᠠᠪᠴᠢ ᠰᠠᠶᠢ ᠳᠡᠯᠭᠡᠷᠡᠵᠦ ᠪᠠᠢᠬᠤ ᠳ᠋ᠤ᠌
ᠰᠠᠷᠠ ᠰᠠᠶᠢ ᠮᠠᠨᠳᠤᠵᠤ ᠪᠠᠢᠬᠤ ᠳ᠋ᠤ᠌
ᠰᠠᠮᠤᠷ ᠰᠠᠶᠢ ᠰᠠᠭᠤᠵᠤ ᠪᠠᠢᠬᠤ ᠳ᠋ᠤ᠌
ᠣᠭᠲᠠᠷᠭᠤᠢ ᠶ᠋ᠢᠨ ᠣᠳᠣᠳ ᠢ᠋
ᠤᠭᠣᠴᠢᠩ ᠴᠤᠭᠣᠴᠢᠩ ① ᠪᠠᠢᠬᠤ ᠳ᠋ᠤ᠌
ᠣᠷᠴᠢᠯᠠᠩ ᠤ᠋ᠨ ᠠᠮᠢᠲᠠᠳ ᠢ᠋
ᠭᠠᠭᠴᠠ ᠬᠣᠶᠠᠷ ᠪᠠᠢᠬᠤ ᠳ᠋ᠤ᠌
ᠰᠦᠨ ᠶᠡᠬᠡ ᠳᠠᠯᠠᠢ ᠶ᠋ᠢ
ᠱᠠᠯᠪᠠᠭ ᠲᠡᠳᠦᠢ ᠪᠠᠢᠬᠤ ᠳ᠋ᠤ᠌
ᠰᠦᠮᠪᠦᠷ ᠶᠡᠬᠡ ᠠᠭᠤᠯᠠ ᠶ᠋ᠢ
ᠳᠣᠪᠣ ᠲᠡᠳᠦᠢ ᠪᠠᠢᠬᠤ ᠳ᠋ᠤ᠌
ᠶᠠᠩᠴᠢᠶᠠᠨ ② ᠴᠠᠭᠠᠨ ᠭᠥᠷᠥᠭᠡᠰᠦ ᠶ᠋ᠢ
ᠢᠨᠵᠠᠭᠠ ᠨᠢᠭᠡᠨ ᠪᠠᠢᠬᠤ ᠳ᠋ᠤ᠌
ᠬᠤᠯᠠᠨ ᠴᠢᠬᠢᠲᠡᠢ ᠠᠳᠤᠭᠤ ᠶ᠋ᠢ
ᠤᠨᠠᠭᠠ ᠨᠢᠭᠡᠨ ᠪᠠᠢᠬᠤ ᠳ᠋ᠤ᠌
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠭᠡᠵᠦ ᠪᠠᠢᠵᠠᠢ᠃
ᠠᠪᠤᠷᠠᠯᠲᠤ ᠬᠠᠨ ᠤ᠋ ᠪᠡᠶᠡ
ᠠᠩᠬᠠ ᠲᠥᠷᠥᠬᠦ ᠡᠴᠡ ᠪᠡᠨ
ᠬᠣᠯᠲᠣᠷᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠬᠣᠶᠠᠷ ᠳᠠᠪᠬᠤᠷ ᠶᠠᠰᠤ ᠲᠠᠢ
ᠬᠣᠮᠬᠣᠷᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠬᠣᠷᠢᠨ ᠳᠠᠪᠬᠤᠷ ᠬᠥᠷᠥᠰᠥ ᠲᠡᠢ ᠶᠤᠮᠰᠠᠨᠵᠠᠢ᠃
ᠠᠪᠤᠷᠠᠯᠲᠤ ᠬᠠᠨ ᠤ᠋ ᠭᠡᠷ ᠲᠦ᠍
ᠠᠯᠳᠠᠷ ᠨᠡᠷᠡ ᠨᠢ ᠮᠠᠨᠳᠤᠭᠰᠠᠨ
ᠠᠪᠤ ᠶ᠋ᠢᠨ ᠦᠶᠡ ᠡᠴᠡ ᠬᠣᠴᠣᠷᠤᠭᠰᠠᠨ
ᠠᠴᠢ ᠬᠠᠢᠷᠠ ᠪᠠᠨ ᠬᠦᠷᠭᠡᠭᠰᠡᠨ
ᠨᠠᠶᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ
ᠭᠠ ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ ᠲᠡᠢ ᠶᠤᠮᠰᠠᠨᠵᠠᠢ᠃
* * *
ᠠᠪᠤᠷᠠᠯᠲᠤ ᠬᠠᠨ ᠳ᠋ᠤ᠌
ᠠᠷᠪᠠᠨ ᠨᠠᠢ᠌ᠮᠠᠨ ᠨᠠᠰᠤᠲᠠᠢ
ᠠᠯᠲᠠᠨᠰᠢᠭᠦᠷ ᠬᠠᠲᠤᠨ ᠲᠠᠢ᠃
ᠡᠨᠡ ᠬᠠᠲᠤᠨ ᠢ᠋ ᠬᠡᠯᠡᠪᠡᠯ :
《ᠲᠤᠩ ᠴᠠᠭᠠᠨ ᠰᠢᠳᠦ ᠲᠡᠢ
ᠲᠥᠭᠥᠷᠢᠭ ᠬᠠᠷᠠ ᠨᠢᠳᠦ ᠲᠡᠢ
ᠭᠡᠷ ᠨᠡᠪᠲ᠌ᠨ᠋ ᠭᠡᠭᠡ ᠲᠡᠢ
ᠭᠡᠭᠡᠨ ᠤᠯᠠᠭᠠᠨ ᠬᠠᠴᠠᠷ ᠲᠠᠢ
ᠲᠤᠭᠤᠷᠭᠠ ᠨᠡᠪᠲᠡ ᠲᠤᠶᠠᠭᠠ ᠲᠠᠢ
ᠲᠤᠨᠤᠨ ③ ᠤᠯᠠᠭᠠᠨ ᠬᠠᠴᠠᠷ ᠲᠠᠢ
ᠠᠷᠤ ᠶ᠋ᠢᠨ ᠰᠠᠢᠬᠠᠨ ᠲᠤᠶᠠᠭᠠᠨ ᠳ᠋ᠤᠨᠢ
ᠠᠳᠤᠭᠤ ᠮᠠᠯ ᠢ᠋ᠶ᠋ᠠᠨ ᠮᠠᠨᠠᠳᠠᠭ
ᠥᠪᠥᠷ ᠦ᠋ᠨ ᠰᠠᠢᠬᠠᠨ ᠲᠤᠶᠠᠭᠠᠨ ᠳ᠋ᠤᠨᠢ
ᠦᠢᠯᠡ ᠣᠶᠣᠳᠠᠯ ᠢ᠋ᠶ᠋ᠠᠨ ᠣᠶᠣᠳᠠᠭ
ᠠᠯᠬᠤᠵᠤ ᠶᠠᠪᠤᠭᠰᠠᠨ ᠭᠠᠵᠠᠷ ᠲᠤᠨᠢ
ᠠᠯᠢᠮᠠ ᠵᠢᠮᠢᠰ ᠤᠷᠭᠤᠳᠠᠭ
ᠠᠯᠢᠮᠠ ᠵᠢᠮᠢᠰ ᠦ᠋ᠳ ᠨᠢ
ᠠᠯᠢᠶᠠ ᠬᠡᠦᠬᠡᠳ ᠪᠤᠯᠢᠶᠠᠯᠳᠤᠳᠠᠭ
ᠰᠠᠭᠤᠭᠰᠠᠨ ᠭᠠᠵᠠᠷ ᠲᠤᠨᠢ
ᠰᠤᠪᠤᠳ ᠱ᠌ᠢᠷᠦ ᠪᠦᠲᠦᠳᠡᠭ
ᠰᠤᠪᠤᠳ ᠱ᠌ᠢᠷᠦ ᠨᠤᠬᠦᠳ ᠢ᠋ ᠨᠢ
ᠰᠣᠷᠭᠣᠭ ᠥᠬᠢᠳ ᠴᠤᠭᠯᠠᠭᠤᠯᠳᠠᠭ᠃
* * *
ᠰᠠᠭᠤᠳᠠᠭ ᠰᠠᠢᠬᠠᠨ ᠥᠷᠥᠭᠡ ᠶ᠋ᠢ ᠨᠢ
ᠱᠠᠭᠰᠢᠨ ᠮᠠᠭᠲᠠᠵᠤ ᠬᠡᠯᠡᠪᠡᠯ᠄
ᠲᠠᠮᠪᠤ ᠲᠣᠷᠭᠠᠨ ᠳᠡᠭᠡᠪᠦᠷ ᠲᠡᠢ
ᠬᠠᠩᠪᠤ ᠲᠣᠷᠭᠠᠨ ᠬᠠᠶᠠᠭᠠᠪᠴᠢ ᠲᠠᠢ
ᠰᠤᠪᠤᠳ ᠡᠷᠳᠡᠨᠢ ᠲᠣᠭᠣᠭᠣ ᠲᠠᠢ
ᠱ᠌ᠢᠷᠦ ᠡᠷᠳᠡᠨᠢ ᠬᠠᠪᠲᠠᠰᠤ ᠲᠠᠢ
ᠴᠠᠭᠠᠨ ᠽᠠᠨᠳᠠᠨ ᠣᠨᠢ ᠲᠠᠢ᠃
ᠬᠦᠷᠡᠩ ᠽᠠᠨᠳᠠᠨ ᠬᠠᠨᠠ ᠲᠠᠢ
ᠬᠥᠬᠡ ᠮᠠᠩᠨᠤᠭ ᠡᠭᠦᠳᠡ ᠲᠡᠢ
ᠬᠦᠷᠡᠩ ᠮᠠᠩᠨᠤᠭ ᠡᠷᠦᠬᠡ ᠲᠡᠢ
ᠳᠥᠷᠪᠡᠨ ᠲᠠᠯᠠ ᠳ᠋ᠠᠭᠠᠨ ᠬᠠᠭᠠᠯᠭᠠ ᠲᠠᠢ
ᠲᠥᠭᠥᠷᠢᠭ ᠰᠠᠢᠬᠠᠨ ᠥᠷᠥᠭᠡ ᠲᠡᠢ ᠶᠤᠮᠰᠠᠨᠵᠠᠢ᠃
ᠤᠷᠲᠤ ᠵᠦᠭ ᠦ᠋ᠨ ᠬᠠᠭᠠᠯᠭᠠᠨ ᠳ᠋ᠤᠨᠢ
ᠤᠷᠠᠨ ᠯᠤᠤ ᠵᠣᠭᠰᠣᠭᠠᠵᠠᠢ᠂
ᠤᠷᠠᠨ ᠯᠤᠤ ᠶ᠋ᠢᠨ ᠰᠡᠭᠦᠯ ᠳ᠋ᠦ᠍
ᠤᠰᠤᠨ ᠲᠠᠷᠨᠢ ᠪᠦᠲᠦᠭᠡᠵᠡᠢ
ᠤᠷᠠᠨ ᠯᠤᠤ ᠨᠢᠷᠭᠡᠮᠡᠷ
ᠤᠰᠤᠨ ᠲᠠᠷᠨᠢ ᠬᠣᠣᠷᠯᠠᠮᠠᠷ
ᠤᠷᠲᠤ ᠵᠦᠭ ᠦ᠋ᠨ ᠠᠮᠢᠲᠠᠨ
ᠲᠡᠭᠦᠨ ᠢ᠋ ᠬᠠᠷᠠᠨ ᠪᠥᠬᠥᠢᠵᠡᠢ
ᠪᠠᠷᠠᠭᠤᠨ ᠵᠦᠭ ᠦ᠋ᠨ ᠬᠠᠭᠠᠯᠭᠠᠨ ᠳ᠋ᠤ᠌
ᠪᠠᠷᠰ᠂ ᠯᠤᠤ ᠵᠣᠭᠰᠣᠭᠠᠵᠠᠢ
ᠪᠠᠷᠰ᠂ ᠯᠤᠤ ᠶ᠋ᠢᠨ ᠰᠡᠬᠦᠯᠦᠨ(ᠰᠡᠭᠦᠯ) ᠳ᠋ᠦ᠍
ᠪᠠᠳᠮᠠ ᠶ᠋ᠢᠨ ᠲᠠᠷᠨᠢ ᠪᠦᠲᠦᠭᠡᠵᠡᠢ᠂
ᠪᠠᠷᠰ᠂ ᠯᠤᠤ ᠨᠢᠷᠭᠡᠮᠡᠷ
ᠪᠠᠳᠮᠠ ᠶ᠋ᠢᠨ ᠲᠠᠷᠨᠢ ᠬᠣᠣᠷᠯᠠᠮᠠᠷ
ᠪᠠᠷᠠᠭᠤᠨ ᠵᠦᠭ ᠦ᠋ᠨ ᠠᠮᠢᠲᠠᠨ
ᠲᠡᠭᠦᠨ ᠢ᠋ ᠬᠠᠷᠠᠨ ᠪᠥᠬᠥᠢᠵᠡᠢ᠂
ᠬᠣᠢᠲᠤ ᠵᠦᠭ ᠦ᠋ᠨ ᠬᠠᠭᠠᠯᠭᠠᠨ ᠳ᠋ᠤ᠌
ᠬᠣᠣᠷᠲᠤ ᠯᠤᠤ ᠵᠣᠭᠰᠣᠭᠠᠵᠠᠢ
ᠬᠣᠣᠷᠲᠤ ᠯᠤᠤ ᠶ᠋ᠢᠨ ᠰᠡᠭᠦᠯᠦᠨ(ᠰᠡᠭᠦᠯ) ᠳ᠋ᠦ᠍
ᠬᠣᠩᠰᠢᠮ ᠤ᠋ᠨ ᠲᠠᠷᠨᠢ ᠪᠦᠲᠦᠭᠡᠵᠡᠢ᠃
ᠬᠣᠣᠷᠲᠤ ᠯᠤᠤ ᠨᠢᠷᠭᠡᠮᠡᠷ
ᠬᠣᠩᠰᠢᠮ ᠤ᠋ᠨ ᠲᠠᠷᠨᠢ ᠬᠣᠣᠷᠯᠠᠮᠠᠷ
ᠬᠣᠢᠲᠤ ᠵᠦᠭ ᠦ᠋ᠨ ᠠᠮᠢᠲᠠᠨ
ᠲᠡᠭᠦᠨ ᠢ᠋ ᠬᠠᠷᠠᠨ ᠪᠥᠬᠥᠢᠵᠡᠢ᠂
ᠵᠡᠭᠦᠨ ᠵᠦᠭ ᠦ᠋ᠨ ᠬᠠᠭᠠᠯᠭᠠᠨ ᠳ᠋ᠤ᠌
ᠵᠦᠷ᠂ ᠯᠤᠤ ᠵᠣᠭᠰᠣᠭᠠᠵᠠᠢ᠂
ᠵᠦᠷ᠂ ᠯᠤᠤ ᠶ᠋ᠢᠨ ᠰᠡᠭᠦᠯᠦᠨ(ᠰᠡᠭᠦᠯ) ᠳ᠋ᠦ᠍
ᠵᠢᠷᠦᠬᠡᠨ ᠦ᠌ ᠲᠠᠷᠨᠢ ᠪᠦᠲᠦᠭᠡᠵᠡᠢ᠃
ᠵᠦᠷ᠂ ᠯᠤᠤ ᠨᠢᠷᠭᠡᠮᠡᠷ
ᠵᠢᠷᠦᠬᠡᠨ ᠦ᠌ ᠲᠠᠷᠨᠢ ᠬᠣᠣᠷᠯᠠᠮᠠᠷ
ᠵᠡᠭᠦᠨ ᠵᠦᠭ ᠦ᠋ᠨ ᠠᠮᠢᠲᠠᠨ
ᠲᠡᠭᠦᠨ ᠢ᠋ ᠬᠠᠷᠠᠨ ᠪᠥᠬᠥᠢᠵᠡᠢ᠃
* * *
ᠰᠢᠨᠡ ᠶ᠋ᠢᠨ ᠨᠠᠢ᠍ᠮᠠᠨ ᠤ᠋ ᠰᠥᠨᠢ
ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠦᠶᠡ ᠳ᠋ᠦ᠍
ᠠᠷᠪᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ
ᠠᠯᠳᠠᠨᠰᠢᠬᠦᠢ ᠬᠠᠲᠤᠨ ᠨᠢ᠄
《ᠵᠦᠭ ᠦ᠋ᠨ ᠮᠠᠭᠤ ᠵᠦᠭ ᠡᠴᠡ
ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠠ᠋ᠴᠠ
ᠪᠤᠶᠠᠨ ᠦᠭᠡᠢ ᠵᠦᠭ ᠡᠴᠡ
ᠪᠤᠷᠬᠠᠨ ᠦᠭᠡᠢ ᠲᠠᠯᠠ ᠠ᠋ᠴᠠ
ᠶᠡᠷᠡ ᠶᠢᠰᠦᠨ ᠮᠠᠩᠭᠤᠰ
ᠢᠷᠡᠵᠦ ᠨᠡᠰᠢ ᠶᠠᠪᠤᠨᠠ᠃
<ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠢ᠋ ᠠᠯᠠᠵᠤ
ᠠᠷᠪᠠᠨ ᠨᠠᠢ᠌ᠮᠠᠨ ᠨᠠᠰᠤᠲᠠᠢ
ᠠᠯᠳᠠᠨᠰᠢᠭᠦᠷ ᠬᠠᠲᠤᠨ ᠢ᠋ ᠨᠢ ᠪᠤᠯᠢᠶᠠᠨᠠ!>
ᠭᠡᠵᠦ ᠢᠷᠡᠯᠡ! 》 ᠭᠡᠵᠦ
ᠵᠡᠭᠦᠳᠦᠯᠡᠨ ᠨᠢᠭᠡ ᠰᠡᠷᠢᠭᠡᠳ(ᠰᠡᠷᠡᠭᠡᠳ)
ᠳ᠋ᠧᠩ ᠯᠡ ᠪᠡᠨ ᠠᠰᠠᠭᠠᠵᠤ
ᠳᠡᠷᠭᠡᠳᠡᠬᠢ ᠬᠠᠨ ᠢ᠋ᠶ᠋ᠠᠨ ᠰᠡᠷᠢᠭᠡᠵᠦ(ᠰᠡᠷᠡᠭᠡᠵᠦ)
ᠵᠡᠭᠦᠳᠦ ᠪᠡᠨ ᠲᠣᠭᠠᠴᠢᠨ ᠬᠡᠯᠡᠵᠡᠢ᠃
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠠᠭᠤᠷᠯᠠᠵᠤ
《ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦᠨ
ᠬᠠᠰᠢ ᠶᠠᠰᠢ ᠪᠠᠢᠳᠠᠭ ᠶᠤᠮ᠂
ᠪᠦᠷᠦᠩᠬᠦᠢ ᠰᠥᠨᠢ ᠶ᠋ᠢᠨ ᠵᠡᠭᠦᠳᠦᠨ
ᠪᠦᠦᠳᠡᠢ ᠲᠦᠦᠳᠡᠢ ᠪᠠᠢᠳᠠᠭ ᠶᠤᠮ
ᠪᠦᠰᠡᠭᠦᠢ ᠬᠥᠮᠦᠨ ᠪᠠᠢᠭᠠᠳ
ᠪᠤᠤ ᠣᠯᠠᠨ ᠴᠠᠯᠴᠢ! 》 ᠭᠡᠵᠡᠢ᠃
ᠬᠠᠲᠤᠨ ᠬᠡᠪᠲᠡᠭᠡᠳ ᠤᠨᠲᠠᠵᠠᠢ᠂
ᠬᠠᠷᠠᠬᠠᠨ ᠦᠷ ᠴᠠᠢᠬᠤ ᠶ᠋ᠢᠨ ᠡᠮᠦᠨᠡ
ᠬᠠᠷᠢᠨ ᠪᠠᠰᠠ ᠯᠠ ᠵᠡᠭᠦᠳᠦᠯᠡᠭᠡᠳ
ᠬᠠᠨ ᠢᠶᠠᠨ ᠰᠡᠷᠢᠭᠡᠨ(ᠰᠡᠷᠡᠭᠡᠨ) ᠬᠡᠯᠡᠵᠡᠢ᠃
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠥᠪᠡᠷ ᠢ᠋ᠶ᠋ᠡᠨ
ᠬᠠᠷᠠ ᠦᠷ ᠢ᠋ᠶ᠋ᠡᠷ ᠪᠣᠰᠴᠤ
ᠬᠠᠨᠲᠠᠭᠠᠵᠠ ᠥᠮᠥᠳᠥ ᠪᠡᠷ ᠭᠠᠷᠴᠤ
ᠠᠪᠤ ᠶ᠋ᠢᠨ ᠦᠶᠡ ᠶ᠋ᠢᠨ ᠪᠠᠢᠭᠤᠯᠤᠭᠰᠠᠨ
ᠠᠯᠲᠠᠨ ᠥᠨᠳᠥᠷ ᠰᠤᠪᠤᠷᠭᠠᠨ ᠳ᠋ᠠᠭᠠᠨ
ᠳᠠᠯᠠᠨ ᠦᠶᠡ ᠲᠡᠢ ᠱᠠᠲᠤ ᠪᠠᠷ ᠢ᠋ᠶ᠋ᠠᠨ
ᠳᠠᠮᠵᠢᠨ ᠨᠢᠭᠡ ᠭᠠᠷᠤᠭᠠᠳ
ᠠᠶᠠᠭᠠᠨ ᠴᠢᠨᠡᠭᠡ ᠨᠢᠳᠦ ᠪᠡᠨ
ᠠᠷᠴᠢᠨ ᠪᠠᠢᠵᠤ ᠬᠠᠷᠠᠵᠠᠢ᠂
ᠠᠷᠤ ᠽᠠᠮᠪᠤᠲᠢᠪ ᠢ᠋
ᠡᠷᠭᠢᠭᠦᠯᠦᠨ ᠳᠡᠷᠪᠡᠭᠦᠯᠦᠨ ᠬᠠᠷᠠᠵᠠᠢ᠃
ᠲᠠᠪᠢᠨ ᠵᠢᠯ ᠦ᠋ᠨ ᠴᠢᠨᠡᠳᠡᠢ
ᠵᠢᠷᠠᠨ ᠵᠢᠯ ᠦ᠋ᠨ ᠨᠠᠭᠠᠲᠠᠢ
ᠪᠦᠷᠳᠦᠯᠵᠢᠬᠦ ᠨᠢᠭᠡᠨ ᠪᠠᠷᠠ
ᠪᠦᠦᠳᠡᠢ ᠳᠥᠦᠲᠡᠢ ᠬᠠᠷᠠᠭᠳᠠᠵᠠᠢ
ᠠᠪᠤᠷᠠᠯᠲᠤ ᠬᠠᠨ ᠰᠠᠨᠳᠤᠷᠴᠤ
ᠭᠱᠠᠨ ᠵᠠᠭᠤᠷᠠ ᠪᠠᠭᠤᠵᠤ ᠢᠷᠡᠭᠡᠳ
ᠨᠠᠶᠠᠨ ᠨᠠᠢ᠌ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ ᠢ᠋ᠶ᠋ᠡᠨ
ᠰᠣᠯᠢᠵᠤ④ ᠨᠢᠭᠡᠨ ᠠᠪᠴᠢᠷᠠᠭᠠᠳ
ᠰᠣᠨᠣᠰᠤᠭᠰᠠᠨ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡᠭᠡᠳ
ᠬᠣᠣᠷᠲᠠᠨ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠪᠠᠷ
ᠬᠣᠶᠠᠭᠤᠯᠠ ᠪᠠᠨ ᠶᠠᠪᠤᠬᠤ ᠪᠠᠷ ᠲᠣᠭᠲᠠᠵᠠᠢ᠃
* * *
— — — —
①* ᠤᠭᠤᠴᠢᠩ ᠴᠣᠤᠭᠤᠴᠢᠩ — ᠰᠡᠢᠷᠡᠭ ᠴᠥᠭᠡᠨ᠂ ᠡᠨᠳᠡ ᠲᠡᠨᠳᠡ᠃
②* ᠶᠠᠩᠴᠢᠶᠠᠨ— ᠮᠥᠩᠭᠥᠨ ᠵᠣᠭᠣᠰ᠂ ᠡᠨᠳᠡ ᠮᠥᠩᠭᠥᠨ ᠴᠠᠭᠠᠨ ᠭᠡᠰᠡᠨ ᠤᠳᠬᠠ ᠲᠠᠢ᠃
③* ᠲᠤᠨᠤᠨ— ᠨᠢᠭᠡᠨ ᠵᠦᠢᠯ ᠦ᠋ᠨ ᠤᠯᠠᠭᠠᠨ ᠥᠩᠭᠡᠲᠡᠢ ᠵᠢᠮᠢᠰ
④* ᠰᠣᠯᠢᠵᠤ— ᠤᠷᠢᠵᠤ᠂ ᠵᠠᠯᠠᠵᠤ
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ ᠠᠪᠤᠷᠠᠯᠲᠤ ᠬᠠᠨ ᠨᠢ
ᠠᠶᠠᠨ ᠲᠡᠢᠨ ᠳ᠋ᠡᠭᠠᠨ ᠤᠨᠤᠳᠠᠭ
ᠠᠯᠲᠠᠨ ᠰᠢᠷᠭᠠᠯ ᠮᠣᠷᠢ ᠪᠠᠨ
ᠬᠠᠵᠠᠭᠠᠷ ᠢ᠋ᠶ᠋ᠠᠷ ᠢᠶᠠᠨ ᠭᠤᠷᠪᠠ ᠭᠤᠷᠪᠠ
ᠡᠮᠡᠭᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠤᠷᠪᠠ ᠭᠤᠷᠪᠠ ᠳᠠᠯᠠᠯᠵᠠᠢ᠃
ᠠᠶᠠᠨ ᠲᠡᠢᠨ ᠳ᠋ᠦ᠍ ᠤᠨᠤᠳᠠᠭ
ᠠᠯᠲᠠᠨ ᠰᠢᠷᠭᠠᠯ ᠮᠣᠷᠢ ᠨᠢ᠄
《ᠬᠠᠨ ᠶᠠᠭᠤᠨ ᠳ᠋ᠤ᠌ ᠳᠠᠭᠤᠳᠠᠪᠠ?
ᠬᠠᠵᠠᠭᠠᠷ ᠶᠠᠭᠤᠨ ᠳ᠋ᠤ᠌ ᠬᠠᠩᠭᠢᠨᠠᠪᠠ?
ᠡᠵᠡᠨ ᠶᠠᠭᠤᠨ ᠳ᠋ᠤ᠌ ᠳᠠᠭᠤᠳᠠᠪᠠ?
ᠡᠮᠡᠭᠡᠯ ᠶᠠᠭᠤᠨ ᠳ᠋ᠤ᠌ ᠬᠠᠩᠭᠢᠨᠠᠪᠠ? 》 ᠭᠡᠳ
ᠰᠦᠨ ᠳᠠᠯᠠᠢ ᠶ᠋ᠢᠨ ᠤᠰᠤ ᠶ᠋ᠢ
ᠪᠠᠯᠭᠤᠨ ᠪᠠᠢᠵᠤ ᠴᠢᠩᠡᠨᠡᠵᠤ
ᠰᠦᠮᠪᠦᠷ ᠠᠭᠤᠯᠠ ᠶ᠋ᠢᠨ ᠡᠪᠡᠰᠦ ᠶ᠋ᠢ
ᠬᠠᠵᠠᠯᠠᠨ ᠪᠠᠢᠵᠤ ᠴᠢᠩᠨᠠᠭᠠᠳ
ᠬᠤᠷ ᠰᠠᠢᠬᠠᠨ ᠳᠡᠯ ᠢ᠋ᠶ᠋ᠡᠨ
ᠬᠤᠷᠮᠤᠰᠲᠠ ᠲᠡᠭᠷᠢ ᠳ᠋ᠦ᠍ ᠬᠡᠢᠰᠬᠡᠵᠦ
ᠬᠤᠷᠴᠠ ᠳᠥᠷᠪᠡᠨ ᠲᠤᠭᠤᠷᠠᠢ ᠪᠠᠨ
ᠽᠠᠮᠪᠤᠲᠢᠪ ᠲᠤ᠌ ᠲᠠᠷᠬᠠᠭᠠᠵᠤ
ᠬᠦᠷᠴᠦ ᠨᠢᠭᠡᠨ ᠣᠴᠢᠭᠠᠳ
ᠭᠠᠳᠠᠭᠠ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ
ᠳᠣᠲᠣᠷᠠ ᠬᠦᠷᠢᠶᠡᠨ ᠦ᠌ ᠭᠠᠳᠠᠭᠠ
ᠵᠣᠭᠰᠣᠵᠤ ᠪᠠᠷᠢᠬᠤ ᠶ᠋ᠢ ᠬᠦᠯᠢᠶᠡᠵᠡᠢ
* * *
ᠨᠠᠶᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ
ᠵᠢᠷᠠᠨ ᠳᠥᠷᠪᠡᠨ ᠰᠣᠶᠣᠭᠠ ᠲᠠᠢ
ᠵᠠᠭᠠᠨᠠ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠪᠠᠨ
ᠬᠠᠵᠠᠭᠠᠷ ᠢ᠋ᠶ᠋ᠠᠷ ᠢᠶᠠᠨ ᠭᠤᠷᠪᠠ ᠭᠤᠷᠪᠠ
ᠡᠮᠡᠭᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠤᠷᠪᠠ ᠭᠤᠷᠪᠠ ᠳᠠᠯᠠᠯᠵᠠᠢ᠃
ᠵᠢᠷᠠᠨ ᠳᠥᠷᠪᠡᠨ ᠰᠣᠶᠣᠭᠠ ᠲᠠᠢ
ᠵᠠᠭᠠᠨᠠ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠨᠢ
ᠣᠯᠠᠨ ᠣᠯᠠᠨ ᠠᠳᠤᠭᠤᠨ ᠠ᠋ᠴᠠ
ᠣᠨᠴᠣᠭᠣᠢ ᠭᠠᠭᠴᠠᠭᠠᠷ ᠭᠠᠷᠴᠤ
ᠬᠡᠰᠡᠭ ᠬᠡᠰᠡᠭ ᠠᠳᠤᠭᠤᠨ ᠠ᠋ᠴᠠ
ᠬᠡᠯᠲᠡᠭᠡᠢ ᠭᠠᠭᠴᠠᠭᠠᠷ ᠭᠠᠷᠴᠤ
ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠲᠣᠭᠯᠠᠵᠤ
ᠲᠣᠭᠣᠰᠣᠨ ᠠ᠋ᠴᠠ ᠪᠠᠨ ᠪᠤᠯᠭᠢᠵᠤ
ᠰᠡᠭᠦᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠣᠭᠯᠠᠵᠤ
ᠰᠡᠭᠦᠳᠡᠷ ᠡᠴᠡ ᠪᠡᠨ ᠪᠤᠯᠭᠢᠵᠤ
ᠪᠤᠲᠠ ᠬᠠᠷᠠᠪᠠᠯ ᠪᠣᠰᠬᠠᠵᠤ
ᠪᠤᠯᠠᠭᠠ ᠬᠠᠷᠠᠪᠠᠯ ᠳᠠᠭᠠᠷᠢᠵᠤ
ᠬᠠᠳᠠ ᠬᠠᠷᠠᠪᠠᠯ ᠬᠠᠯᠢᠰᠬᠢᠵᠤ
ᠬᠠᠯᠢᠭᠤ ᠬᠠᠷᠠᠪᠠᠯ ᠳᠠᠭᠠᠷᠢᠵᠤ
ᠬᠦᠷᠴᠦ ᠨᠢᠭᠡᠨ ᠣᠴᠢᠭᠠᠳ
ᠭᠠᠳᠠᠭᠠ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ
ᠳᠣᠲᠣᠷᠠ ᠬᠦᠷᠢᠶᠡᠨ ᠦ᠌ ᠭᠠᠳᠠᠭᠠ
ᠵᠣᠭᠰᠣᠵᠤ ᠪᠠᠷᠢᠬᠤ ᠶ᠋ᠢ ᠬᠦᠯᠢᠶᠡᠵᠡᠢ᠃
* * *
ᠬᠠᠨ᠂ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ
ᠬᠣᠶᠠᠷ ᠮᠣᠷᠢ ᠪᠠᠨ ᠪᠠᠷᠢᠵᠤ
ᠨᠢᠭᠡ ᠬᠣᠨᠣᠭ ᠤᠶᠠᠵᠤ
ᠨᠢᠮᠭᠡᠨ ᠮᠢᠬᠠ ᠶ᠋ᠢ ᠨᠢ ᠴᠢᠩᠭᠠᠷᠠᠭᠤᠯᠵᠤ
ᠬᠣᠶᠠᠷ ᠬᠣᠨᠣᠭ ᠤᠶᠠᠵᠤ
ᠬᠣᠩᠭᠣ ᠶ᠋ᠢᠨ ᠮᠢᠬᠠ ᠶ᠋ᠢ ᠨᠢ ᠴᠢᠩᠭᠠᠷᠠᠭᠤᠯᠵᠤ
ᠭᠤᠷᠪᠠᠨ ᠬᠣᠨᠣᠭ ᠤᠶᠠᠵᠤ
ᠭᠤᠶᠠ ᠶ᠋ᠢᠨ ᠮᠢᠬᠠ ᠶ᠋ᠢ ᠨᠢ ᠴᠢᠩᠭᠠᠷᠠᠭᠤᠯᠵᠤ
ᠳᠥᠷᠪᠡᠨ ᠬᠣᠨᠣᠭ ᠤᠶᠠᠵᠤ
ᠳᠥᠷᠦᠭᠡᠨ ᠮᠢᠬᠠ ᠶ᠋ᠢ ᠨᠢ ᠴᠢᠩᠭᠠᠷᠠᠭᠤᠯᠵᠤ
ᠲᠠᠪᠤᠨ ᠬᠣᠨᠣᠭ ᠤᠶᠠᠵᠤ
ᠲᠠᠰᠢᠶᠠᠨ ᠮᠢᠬᠠ ᠶ᠋ᠢ ᠨᠢ ᠴᠢᠩᠭᠠᠷᠠᠭᠤᠯᠵᠤ
ᠵᠢᠷᠭᠤᠭᠠᠨ ᠬᠣᠨᠣᠭ ᠤᠶᠠᠵᠤ
ᠵᠣᠷᠠᠭᠠᠨ ①ᠮᠢᠬᠠ ᠶ᠋ᠢ ᠨᠢ ᠴᠢᠩᠭᠠᠷᠠᠭᠤᠯᠵᠤ
ᠳᠣᠯᠣᠭᠠᠨ ᠬᠣᠨᠣᠭ ᠤᠶᠠᠵᠤ
ᠳᠣᠲᠣᠷ ᠬᠡᠪᠡᠯᠢ ᠶ᠋ᠢ ᠨᠢ ᠴᠢᠩᠭᠠᠷᠠᠭᠤᠯᠵᠤ
ᠨᠠᠢ᠌ᠮᠠᠨ ᠬᠣᠨᠣᠭ ᠤᠶᠠᠵᠤ
ᠨᠠᠷᠢᠨ ᠬᠡᠪᠡᠯᠢ ᠶ᠋ᠢ ᠨᠢ ᠴᠢᠩᠭᠠᠷᠠᠭᠤᠯᠵᠤ
ᠶᠢᠰᠦᠨ ᠬᠣᠨᠣᠭ ᠤᠶᠠᠵᠤ
ᠶᠡᠷᠦᠳᠡᠭᠡᠨ ᠰᠣᠢᠯᠭᠠ ᠳᠠᠭᠤᠰᠴᠠᠢ᠃
ᠬᠣᠶᠠᠷ ᠳᠠᠢᠴᠢᠨ ᠬᠦᠯᠦᠭ ᠨᠢ
ᠰᠠᠪᠬᠠ ᠶ᠋ᠢᠨ ᠴᠢᠨᠡᠭᠡ ᠰᠢᠭᠡᠵᠦ
ᠱᠠᠯᠵᠠ ᠶ᠋ᠢᠨ ᠴᠢᠨᠡᠭᠡ ᠪᠠᠭᠠᠵᠠᠢ᠃
ᠬᠣᠶᠠᠷ ᠪᠠᠭᠠᠲᠤᠷ ᠡᠵᠡᠨ ᠨᠢ
ᠭᠤᠨᠵᠢᠨ ᠦᠨᠢᠶᠡ ᠠᠯᠠᠵᠤ
ᠭᠤᠷᠪᠠᠨ ᠬᠣᠨᠣᠭ ᠨᠠᠢᠷᠯᠠᠵᠠᠢ᠃
ᠳᠦᠨᠵᠢᠨ ᠦᠨᠢᠶᠡ ᠠᠯᠠᠵᠤ
ᠳᠥᠷᠪᠡᠨ ᠬᠣᠨᠣᠭ ᠨᠠᠢᠷᠯᠠᠵᠠᠢ᠃
ᠠᠷᠢᠬᠢᠨ ᠳ᠋ᠤ᠌ ᠳᠤᠷᠠᠲᠠᠢ ᠡᠪᠦᠭᠡᠴᠦᠳ
ᠠᠱᠠᠷ ② ᠪᠣᠯᠣᠶᠠ ᠭᠡᠵᠡᠢ᠂
ᠥᠭᠡᠬᠦᠨ ᠳ᠋ᠦ᠍ ᠳᠤᠷᠠᠲᠠᠢ ᠡᠪᠦᠭᠡᠴᠦᠳ
ᠥᠷᠯᠥᠭᠡ ᠪᠣᠯᠤᠶᠠ ᠭᠡᠵᠡᠢ᠃
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠭᠠᠷᠴᠤ
ᠠᠶᠠᠨ ᠲᠡᠢᠨ ᠳ᠋ᠡᠭᠠᠨ ᠤᠨᠤᠳᠠᠭ
ᠠᠯᠲᠠᠨ ᠰᠢᠷᠭᠠᠯ ᠮᠣᠷᠢᠨ ᠳ᠋ᠠᠭᠠᠨ
ᠲᠠᠪᠢᠨ ᠯᠠᠩ ᠤ᠋ᠨ ᠬᠠᠵᠠᠭᠠᠷ ᠢ᠋
ᠲᠡᠷᠢᠭᠦᠨ ᠤᠷᠤᠭᠤ ᠨᠢ ᠲᠠᠭᠠᠷᠠᠭᠤᠯᠵᠤ
ᠵᠠᠭᠤᠨ ᠯᠠᠩ ᠤ᠋ᠨ ᠬᠤᠳᠠᠷᠭᠠ ᠶ᠋ᠢ
ᠵᠣ ᠤᠷᠤᠭᠤ ᠨᠢ ᠲᠠᠭᠠᠷᠠᠭᠤᠯᠵᠤ
ᠴᠢᠮᠪᠠᠢ ᠨᠡᠷᠡᠲᠡᠢ ᠴᠠᠯᠠᠮ③ ᠢ᠋
ᠰᠢᠪᠬᠢᠲᠡᠯᠡ ᠲᠠᠲᠠᠵᠤ
ᠤᠮᠪᠠᠢ ᠨᠡᠷᠡᠲᠡᠢ ᠣᠯᠣᠮ④ ᠢ᠋
ᠣᠮ ᠪᠠᠭᠤᠲᠠᠯᠠ ᠲᠠᠲᠠᠵᠤ
ᠳᠠᠯᠠᠨ ᠭᠤᠷᠪᠠᠨ ᠲᠡᠷᠭᠡᠨ ᠦ᠌
ᠵᠠᠬᠠ ᠶ᠋ᠢᠨ ᠲᠡᠷᠭᠡᠨ ᠡᠴᠡ ᠤᠶᠠᠭᠠᠳ
ᠡᠷᠭᠢᠵᠦ ᠭᠡᠷ ᠲᠡᠭᠡᠨ ᠣᠷᠣᠭᠠᠳ
ᠡᠳ᠋ᠯᠡᠯ ᠬᠡᠷᠡᠭᠰᠡᠯ ᠢ᠋ᠶ᠋ᠡᠨ ᠪᠡᠯᠡᠳᠬᠡᠵᠦ
ᠳᠠᠯᠠᠨ ᠬᠣᠶᠠᠷ ᠲᠣᠪᠴᠢ ᠲᠠᠢ
ᠳᠤᠷᠳᠤᠩ ᠮᠠᠩᠨᠤᠭ ᠳᠡᠪᠡᠯ ᠢ
ᠰᠣᠶᠣᠭᠠᠲᠠᠨ ᠪᠠᠢᠵᠤ ᠡᠮᠦᠰᠴᠡᠢ᠃
ᠬᠣᠷᠢᠨ ᠳᠥᠷᠪᠡᠨ ᠤᠭᠠᠯᠵᠠ ᠲᠠᠢ
ᠬᠣᠲᠠᠯᠠ ᠶᠠᠩᠵᠤ ᠶ᠋ᠢᠨ ᠭᠤᠲᠤᠯ ᠢ
ᠭᠢᠯᠪᠢᠨ ᠪᠠᠢᠵᠤ ᠡᠮᠦᠰᠴᠡᠢ᠃
ᠠᠯᠲᠠᠨ ᠰᠢᠷᠠ ᠮᠠᠯᠠᠭᠠᠢ ᠪᠠᠨ
ᠠᠷᠴᠢᠨ ᠨᠢᠭᠡ ᠡᠮᠦᠰᠴᠡᠢ
ᠡᠷᠳᠡᠨᠢ ᠶ᠋ᠢᠨ ᠨᠣᠭᠣᠭᠠᠨ ᠪᠦᠰᠡ ᠪᠡᠨ
ᠡᠷᠭᠢᠭᠦᠯᠦᠨ ᠨᠢᠭᠡ ᠪᠦᠰᠡᠯᠡᠵᠡᠢ᠃
ᠪᠤᠷᠬᠠᠨ ᠤ᠋ ᠥᠷᠥᠭᠡᠨ ᠳ᠋ᠡᠭᠡᠨ ᠣᠷᠣᠵᠤ
ᠪᠣᠯᠣᠳ ᠰᠡᠯᠡᠮᠡ ᠪᠡᠨ ᠠᠪᠴᠤ
ᠰᠠᠩ ᠤ᠋ᠨ ᠥᠷᠥᠭᠡᠨ ᠳ᠋ᠡᠭᠡᠨ ᠣᠷᠣᠵᠤ
ᠰᠠᠭᠠᠳᠠᠭ ᠨᠤᠮᠤ ᠪᠠᠨ ᠠᠭᠰᠠᠵᠠᠢ᠃
ᠨᠠᠶᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ
ᠬᠤᠷᠳᠤᠨ ᠮᠣᠷᠢ ᠪᠠᠨ ᠡᠮᠡᠭᠡᠯᠯᠡᠭᠡᠳ
ᠬᠤᠶᠠᠭ ᠳᠤᠭᠤᠯᠠᠭᠠ ᠪᠠᠨ ᠡᠮᠦᠰᠦᠭᠡᠳ
ᠵᠢᠷᠠᠨ ᠵᠢᠷᠭᠤᠭᠠᠨ ᠠᠯᠲᠠ ᠶ᠋ᠢᠨ
ᠵᠢᠳᠠ ᠪᠠᠨ ᠰᠢᠭᠦᠷᠦᠨ ᠠᠪᠴᠤ᠄
《ᠳᠠᠢᠰᠤᠨ ᠬᠠᠮᠢᠭᠠ ᠪᠠᠢᠪᠠᠯ
ᠳᠠᠷᠤᠵᠤ ᠯᠠ ᠬᠦᠷᠴᠦ ᠢᠷᠡᠨᠡ ᠳᠠ! 》 ᠭᠡᠵᠡᠢ᠃
ᠠᠪᠤᠷᠠᠯᠲᠤ ᠬᠠᠨ ᠮᠣᠷᠳᠠᠵᠤ
ᠠᠶᠠᠨ ᠲᠡᠢᠨ ᠳ᠋ᠦ᠍ ᠶᠠᠪᠤᠬᠤ ᠳ᠋ᠤᠨᠢ
ᠠᠷᠪᠠᠨ ᠨᠠᠢ᠌ᠮᠠᠨ ᠨᠠᠰᠤᠲᠠᠢ
ᠠᠯᠳᠠᠨᠰᠢᠭᠦᠷ ᠬᠠᠲᠤᠨ ᠨᠢ᠄
《ᠡᠷᠲᠡ ᠶ᠋ᠢᠨ ᠨᠠᠷᠠ ᠶ᠋ᠢ ᠮᠠᠨᠳᠤᠬᠤ ᠳ᠋ᠤ᠌
ᠡᠷᠳᠡᠨᠢ ᠶ᠋ᠢᠨ ᠵᠢᠩ ᠢ᠋ᠶ᠋ᠡᠨ ᠳᠡᠯᠡᠳᠦᠭᠡᠳ
ᠡᠪᠡᠷᠲᠦ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠭᠠᠳ
ᠡᠷᠭᠢᠵᠦ ᠬᠣᠲᠠᠨ ᠳ᠋ᠠᠭᠠᠨ ᠪᠠᠭᠤᠭᠠᠷᠠᠢ᠃
ᠲᠦᠷᠦᠭᠦᠴᠢ ᠶ᠋ᠢᠨ ᠨᠠᠷᠠ ᠶ᠋ᠢ ᠭᠠᠷᠬᠤ ᠳ᠋ᠤ᠌
ᠲᠡᠮᠦᠷ ᠵᠢᠩ ᠢ᠋ᠶ᠋ᠡᠨ ᠳᠡᠯᠡᠳᠦᠭᠡᠳ
ᠲᠦᠢᠳᠬᠡᠷᠲᠦ ᠮᠠᠩᠭᠤᠰ ᠢ᠋ ᠳᠠᠷᠤᠭᠠᠳ
ᠲᠥᠷᠥᠭᠰᠡᠨ ᠬᠣᠲᠠᠨ ᠳ᠋ᠠᠭᠠᠨ ᠪᠠᠭᠤᠭᠠᠷᠠᠢ !》 ᠭᠡᠳ
ᠬᠠᠨ᠂ ᠪᠠᠭᠠᠲᠤᠷ ᠬᠣᠶᠠᠷ ᠢ᠋ᠶ᠋ᠠᠨ
ᠬᠠᠷᠢᠲᠠᠨ ᠳᠠᠢᠰᠤᠨ ᠳ᠋ᠤ᠌ ᠮᠣᠷᠳᠠᠭᠤᠯᠵᠠᠢ᠃
* * *
ᠬᠥᠨᠳᠡᠢ ᠬᠥᠨᠳᠡᠢ ᠭᠠᠵᠠᠷ
ᠬᠥᠯ ᠢ᠋ᠶ᠋ᠡᠨ ᠲᠥᠷᠥᠯ ᠦᠭᠡᠢ ᠭᠠᠷᠴᠠᠢ᠂
ᠬᠥᠲᠥᠯ ᠦ᠋ᠨ ᠭᠤᠷᠪᠠᠨ ᠳᠠᠪᠠᠭᠠᠨ ᠳ᠋ᠤ᠌
ᠰᠠᠭᠠᠲᠠᠯ ᠴᠦ ᠦᠭᠡᠢ ᠶᠠᠪᠤᠵᠠᠢ᠃
ᠬᠥᠨᠳᠡᠢ ᠬᠥᠲᠥᠯ ᠦ᠋ᠨ ᠠᠮᠢᠲᠠᠨ
ᠬᠥᠯ ᠪᠣᠯᠤᠨ ᠱᠤᠤᠭᠢᠯᠳᠤᠵᠤ᠄
《ᠬᠦᠷᠦᠭᠡᠳ ᠢᠷᠡᠯᠡ ᠶᠠᠭᠠᠬᠢᠬᠤ ᠪᠢᠯᠡ?
ᠬᠥᠳᠡᠭᠡᠭᠦᠷ ᠭᠠᠷᠤᠯᠠ ᠭᠠᠢᠭᠤᠢ ᠳᠠ!
ᠣᠷᠣᠭᠠᠳ ᠢᠷᠡᠯᠡ ᠶᠠᠭᠠᠬᠢᠬᠤ ᠪᠢᠯᠡ?
ᠣᠷᠬᠢᠭᠠᠳ ᠶᠠᠪᠤᠯᠠ ᠭᠠᠢᠭᠤᠢ ᠳᠠ!
ᠳᠠᠭᠠᠷᠢᠭᠠᠳ ᠢᠷᠡᠯᠡ ᠶᠠᠭᠠᠬᠢᠬᠤ ᠪᠢᠯᠡ?
ᠳᠠᠯᠳᠠᠭᠤᠷ ᠭᠠᠷᠤᠯᠠ ᠭᠠᠢᠭᠤᠢ ᠳᠠ! 》 ᠭᠡᠳ
ᠴᠠᠪ ᠴᠠᠭᠠᠨ ᠢᠮᠠᠭᠠ ᠭᠡᠨᠡ
ᠰᠠᠬᠠᠯ ᠬᠡᠢᠰᠬᠡᠨ ᠵᠢᠭᠤᠲᠠᠵᠠᠢ᠂
ᠴᠡᠯ ᠪᠤᠭᠤᠷᠠᠯ ᠯᠠᠮᠠ ᠨᠠᠷ ᠭᠡᠨᠡ
ᠰᠠᠨᠠᠭᠠ ᠠᠯᠲᠠᠨ ᠵᠢᠭᠤᠲᠠᠵᠠᠢ᠃
ᠲᠡᠮᠡᠭᠡ ᠬᠦᠷᠲᠡᠯᠡ
ᠲᠡᠭᠷᠢ ᠶ᠋ᠢᠨ ᠠᠶᠤᠯ ᠪᠣᠯᠤᠯᠠ ᠭᠡᠳ ᠵᠢᠭᠤᠲᠠᠵᠠᠢ᠃
ᠭᠠᠬᠠᠢ ᠬᠦᠷᠲᠡᠯᠡ
ᠭᠠᠵᠠᠷ ᠤ᠋ᠨ ᠠᠶᠤᠯ ᠪᠣᠯᠤᠯᠠ ᠭᠡᠳ ᠵᠢᠭᠤᠲᠠᠵᠠᠢ᠃
ᠬᠠᠨ᠂ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ
ᠪᠣᠯᠵᠣᠭᠠᠲᠤ ᠶ᠋ᠢᠨ ᠪᠣᠷᠣ ᠲᠣᠯᠣᠭᠠᠢ ᠳ᠋ᠤ᠌ ᠬᠦᠷᠴᠦ
ᠠᠮᠤᠰᠬᠢᠵᠦ ᠵᠢᠭᠠᠬᠠᠨ ᠰᠠᠭᠤᠵᠤ
ᠠᠮᠠᠨ ᠤ᠋ ᠠᠭᠰᠢᠭᠠ ᠪᠠᠨ ᠭᠠᠷᠭᠠᠵᠠᠢ᠃
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠨᠢ
ᠭᠠᠩ ᠪᠣᠯᠣᠳ ᠵᠢᠳᠠ ᠪᠠᠨ
ᠭᠠᠭᠴᠠ ᠬᠣᠶᠠᠷ ᠬᠠᠪᠢᠷᠴᠤ
ᠭᠠᠯᠵᠠᠭᠤ ᠤᠨᠯᠠᠭᠠᠨ ᠲᠠᠮᠠᠬᠢ ᠪᠠᠨ
ᠭᠠᠭᠴᠠ ᠬᠣᠶᠠᠷ ᠤᠭᠤᠭᠢᠭᠤᠯᠵᠠᠢ᠃
ᠠᠮᠠᠨ ᠤ᠋ ᠬᠢᠨᠢ ᠤᠲᠤᠭᠠ
ᠠᠷᠤ ᠲᠢᠪ ᠢ᠋ ᠪᠦᠷᠬᠦᠵᠡᠢ᠂
ᠵᠠᠪᠠᠵᠢᠨ ᠤ᠋ ᠬᠢᠨᠢ ᠤᠲᠤᠭᠠ
ᠽᠠᠮᠪᠤᠲᠢᠪ ᠢ᠋ ᠪᠦᠷᠬᠦᠵᠡᠢ᠃
ᠤᠷᠤᠭᠤᠯ ᠤ᠋ᠨ ᠬᠢᠨᠢ ᠤᠲᠤᠭᠠ
ᠤᠷᠢᠳᠤ ᠲᠢᠪ ᠢ᠋ ᠪᠦᠷᠬᠦᠵᠡᠢ᠃
ᠢᠩᠭᠢᠵᠦ ᠪᠠᠬᠠᠨ ᠰᠠᠭᠤᠵᠤ
ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠰᠢᠷᠲᠡᠵᠦ ᠪᠠᠢᠲᠠᠯᠠ
ᠵᠡᠭᠦᠨ ᠬᠣᠢᠲᠤ ᠵᠦᠭ ᠡᠴᠡ
ᠠᠭᠤᠯᠠ ᠭᠡᠬᠦ ᠳ᠋ᠦ᠍ ᠠᠭᠤᠯᠠ ᠪᠢᠰᠢ
ᠡᠭᠦᠯᠡ ᠭᠡᠬᠦ ᠳ᠋ᠦ᠍ ᠡᠭᠦᠯᠡ ᠪᠢᠰᠢ
ᠨᠢᠭᠡ ᠯᠡ ᠶᠡᠬᠡ ᠪᠠᠷᠠ ᠬᠠᠷᠠᠭᠳᠠᠵᠠᠢ᠃
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠪᠣᠭᠳᠠ ᠬᠠᠨ ᠤ᠋
ᠬᠠᠮᠤᠭ ᠪᠡᠶᠡ ᠨᠢ ᠠᠷᠵᠠᠰᠬᠢᠵᠦ
ᠬᠠᠷᠠ ᠬᠥᠯᠥᠰᠥ ᠨᠢ ᠴᠢᠬᠠᠷᠠᠵᠠᠢ᠃
ᠮᠥᠯᠳᠡᠭ ᠬᠣᠶᠠᠷ ᠡᠪᠡᠷ ᠨᠢ
ᠮᠥᠷᠦᠨ ᠡᠴᠡ ᠨᠢ ᠤᠷᠭᠤᠭᠰᠠᠨ
ᠠᠷᠪᠠᠨ ᠲᠠᠪᠤᠨ ᠲᠣᠯᠣᠭᠠᠢ ᠲᠠᠢ
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ ᠮᠥᠨ᠃
ᠬᠣᠯᠠ ᠬᠠᠯᠲᠠᠷ ᠯᠠᠭᠤᠰᠠ ᠲᠠᠢ
ᠬᠤᠪᠠᠬᠠᠢ ᠲᠠᠯᠬᠢᠨ ᠡᠮᠡᠭᠡᠯ ᠲᠡᠢ
ᠬᠥᠮᠦᠨ ᠬᠥᠮᠦᠨ ᠦ᠌ ᠮᠢᠬᠠ ᠶ᠋ᠢ
ᠬᠡᠦᠳᠡᠢ ᠬᠡᠦᠳᠡᠢ ᠲᠡᠩᠨᠡᠵᠡᠢ᠂
ᠳᠠᠩ ᠬᠥᠮᠦᠨ ᠦ᠌ ᠮᠢᠬᠠ ᠶ᠋ᠢ
ᠳᠠᠯᠢᠩᠪᠤ ᠳᠠᠯᠢᠩᠪᠤ ⑤ ᠲᠠᠩᠨᠠᠵᠠᠢ᠃
ᠨᠠᠶᠠᠨ ᠨᠠᠢ᠌ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ᠄
《ᠬᠡᠪ ᠨᠤᠲᠤᠭ ᠬᠠᠮᠢᠭᠠ ᠪᠣᠢ?
ᠬᠡᠳᠦ ᠵᠣᠷᠢᠭ ᠬᠡᠨ ᠪᠣᠢ?
ᠶᠠᠪ ᠨᠤᠲᠤᠭ ᠬᠠᠮᠢᠭᠠ ᠪᠣᠢ?
ᠶᠠᠪᠤᠳᠠᠯ ᠤᠴᠢᠷ ᠬᠡᠨ ᠳ᠋ᠦ᠍ ᠪᠣᠢ?
ᠤᠨᠤᠭᠰᠠᠨ ᠤᠨᠤᠭᠠ ᠴᠢᠨᠢ ᠶᠠᠮᠠᠷ ᠶᠤᠮ?
ᠪᠠᠷᠢᠭᠰᠠᠨ ᠪᠠᠭᠠᠵᠢ ᠴᠢᠨᠢ ᠬᠢᠷᠷ ᠶᠦᠮ?
ᠳᠠᠭᠠᠭᠤᠯᠤᠭᠰᠠᠨ ᠨᠥᠬᠥᠷ ᠴᠢᠨᠢ ᠬᠡᠳᠦ ᠶᠦᠮ?
ᠪᠢᠷᠠ ᠲᠡᠩᠬᠡᠭᠡ ᠴᠢᠨᠢ ᠬᠢᠷᠢ ᠶᠦᠮ?》 ᠭᠡᠵᠡᠢ᠃
ᠠᠷᠪᠠᠨ ᠲᠠᠪᠤᠨ ᠲᠣᠯᠣᠭᠠᠢ ᠲᠠᠢ
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ :
《ᠬᠡᠪ ᠨᠤᠲᠤᠭ ᠵᠡᠭᠦᠨ ᠬᠣᠢᠨᠠ
ᠬᠡᠳᠦ ᠵᠣᠷᠢᠭ ᠪᠠᠷᠠᠭᠤᠨ ᠤᠷᠲᠤ
ᠶᠠᠪ ᠨᠤᠲᠤᠭ ᠵᠡᠭᠦᠨ ᠬᠣᠢᠨᠠ
ᠶᠠᠪᠤᠳᠠᠯ ᠤᠴᠢᠷ ᠪᠠᠷᠠᠭᠤᠨ ᠤᠷᠲᠤ᠃
ᠤᠨᠤᠭᠰᠠᠨ ᠤᠨᠤᠭᠠ ᠶ᠋ᠢ ᠬᠡᠯᠡᠪᠡᠯ
ᠳᠠᠯᠤ ᠳᠤᠮᠳᠠ ᠪᠠᠨ ᠲᠠᠭᠠᠷᠢ ᠲᠠᠢ
ᠲᠠᠬᠢᠷ⑥ ᠬᠣᠯᠠ ᠬᠠᠯᠲᠠᠷ ᠯᠠᠭᠤᠰᠠ ᠳᠠ! ᠭᠡᠪᠡᠯ
ᠳᠠᠪᠬᠢᠳᠠᠭ ᠲᠠᠬᠢᠷ ᠰᠡᠭᠦᠯ ᠨᠢ ᠭᠤᠳᠤᠢᠳᠠᠭ ᠣ! ᠭᠡᠪᠡᠯ
ᠣᠨᠳᠣᠴᠢᠳᠠᠭ ᠣᠭᠣᠳᠣᠩ ᠰᠡᠭᠦᠯ ᠨᠢ ᠭᠣᠳᠣᠢᠳᠠᠭ᠃
ᠪᠠᠷᠢᠭᠰᠠᠨ ᠪᠠᠭᠠᠵᠢ ᠶ᠋ᠢ ᠬᠡᠯᠡᠪᠡᠯ
ᠭᠠᠯᠪᠠ ᠭᠠᠯᠪᠠ ᠳ᠋ᠤ᠌ ᠭᠠᠢᠬᠠᠭᠳᠠᠭᠰᠠᠨ
ᠭᠠᠰ ᠤᠯᠠᠭᠠᠨ ᠪᠢᠯᠠᠭᠤ
ᠲᠦᠷᠥᠰᠡᠨ ᠪᠦᠭᠦᠳᠡ ᠶᠢ ᠲᠦᠢᠪᠡᠭᠡᠳᠡᠭ
ᠲᠦᠭᠦᠬᠡᠢ ᠤᠯᠠᠭᠠᠨ ᠪᠢᠯᠠᠭᠤ᠃
ᠳᠠᠭᠠᠭᠤᠯᠤᠭᠰᠠᠨ ᠨᠥᠬᠥᠳ ᠢ᠋ ᠬᠡᠯᠡᠪᠡᠯ᠄
ᠢᠷᠡᠭᠰᠡᠨ ᠪᠦᠭᠦᠳᠡ ᠶ᠋ᠢ ᠢᠪᠡᠭᠡᠯᠳᠡᠭ
ᠶᠡᠷᠡᠨ ᠨᠠᠢ᠌ᠮᠠᠨ ᠨᠥᠬᠥᠷ ᠶᠦᠮ᠃
ᠪᠢᠷᠠ ᠲᠡᠩᠬᠡᠭᠡ ᠶ᠋ᠢ ᠬᠡᠯᠡᠪᠡᠯ
ᠳᠡᠭᠡᠳᠦ ᠬᠦᠴᠦᠨ ᠳ᠋ᠡᠭᠡᠨ
ᠶᠡᠷᠡᠨ ᠶᠢᠰᠦᠨ ᠲᠡᠭᠷᠢ ᠶ᠋ᠢᠨ ᠬᠦᠴᠦᠲᠡᠢ
ᠳᠣᠣᠷᠠᠲᠤ ᠬᠦᠴᠦᠨ ᠳ᠋ᠡᠭᠡᠨ
ᠮᠢᠩᠭᠠᠨ ᠯᠤᠤ ᠶ᠋ᠢᠨ ᠬᠦᠴᠦᠲᠡᠢ! 》 ᠭᠡᠳ
ᠨᠠᠶᠠᠨ ᠨᠠᠢ᠌ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ ᠡᠴᠡ ᠠᠰᠠᠭᠤᠭᠰᠠᠨ ᠨᠢ᠄
《ᠬᠡᠪ ᠨᠤᠲᠤᠭ ᠬᠠᠮᠢᠭᠠ ᠪᠣᠢ?
ᠬᠡᠳᠦ ᠵᠣᠷᠢᠭ ᠬᠡᠨ ᠳ᠋ᠦ᠍ ᠪᠣᠢ?
ᠶᠠᠪ ᠨᠤᠲᠤᠭ ᠬᠠᠮᠢᠭᠠ ᠪᠣᠢ?
ᠶᠠᠪᠤᠳᠠᠯ ᠤᠴᠢᠷ ᠬᠡᠨ ᠳ᠋ᠦ᠍ ᠪᠣᠢ? 》 ᠭᠡᠵᠡᠢ᠃
《ᠬᠡᠪ ᠨᠤᠲᠤᠭ ᠪᠠᠷᠠᠭᠤᠨ ᠤᠷᠲᠤ
ᠬᠡᠳᠦ ᠵᠣᠷᠢᠭ ᠵᠡᠭᠦᠨ ᠬᠣᠢᠨᠠ
ᠶᠠᠪ ᠨᠤᠲᠤᠭ ᠪᠠᠷᠠᠭᠤᠨ ᠤᠷᠲᠤ
ᠶᠠᠪᠤᠳᠠᠯ ᠤᠴᠢᠷ ᠵᠡᠭᠦᠨ ᠬᠣᠢᠨᠠ᠃
ᠬᠣᠯᠲᠣᠷᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠬᠣᠶᠠᠷ ᠳᠠᠪᠬᠤᠷ ᠶᠠᠰᠤ ᠲᠠᠢ
ᠬᠣᠮᠬᠣᠷᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ
ᠬᠣᠷᠢᠨ ᠳᠠᠪᠬᠤᠷ ᠬᠤᠢᠬᠠ ᠲᠠᠢ
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠤ᠋ ᠭᠡᠷ ᠦ᠋ᠨ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ ᠪᠢ ᠪᠠᠢᠨᠠ! 》 ᠭᠡᠵᠡᠢ᠃
* * *
— — — —
① ᠵᠤᠷᠠᠭᠠᠨ ᠮᠢᠬᠠ— ᠭᠤᠶᠠ ᠶ᠋ᠢᠨ ᠮᠢᠬᠠ
② ᠠᠱᠠᠷ— ᠠᠯᠭᠤᠷ᠂ ᠳᠠᠷᠠᠭᠠ᠂ ᠬᠣᠵᠢᠮ
③ ᠴᠠᠯᠠᠮ— ᠵᠢᠷᠢᠮ
④ ᠣᠯᠣᠮ — ᠣᠯᠣᠩ
⑤ ᠳᠠᠯᠢᠩᠪᠤᠤ— ᠬᠥᠨᠳᠡᠯᠡᠨ ᠰᠢᠷᠬᠡᠭ ᠲᠡᠢ ᠵᠤᠵᠠᠭᠠᠨ ᠪᠦᠰ ᠢᠶᠠᠷ ᠬᠢᠭᠰᠡᠨ ᠬᠡᠦᠳᠡᠢ
⑥ ᠲᠠᠬᠢᠷ— ᠳᠠᠩ ᠭᠠᠭᠴᠠ᠂ ᠬᠠᠢᠰᠠᠩ ᠬᠣᠢᠷᠠᠭᠤ᠂ ᠡᠯᠳᠡᠪ ᠦ᠋ᠨ ᠵᠠᠩ ᠠᠭᠠᠰᠢ ᠲᠠᠢ᠂ ᠬᠠᠯᠠ ᠦᠵᠡᠭᠰᠡᠨ
ᠣᠷᠣᠢ ᠶ᠋ᠢᠨ ᠦᠰᠦ ᠨᠢ ᠥᠷᠪᠥᠰᠬᠢᠵᠦ
ᠣᠭᠣᠴᠢ ᠶ᠋ᠢᠨ ᠰᠠᠬᠠᠯ ᠨᠢ ᠰᠦᠷᠪᠡᠰᠬᠢᠭᠡᠳ
ᠮᠠᠩᠭᠤᠰ ᠶᠡᠬᠡ ᠰᠣᠴᠢᠭᠠᠳ
ᠮᠠᠷᠭᠠᠰᠢ ᠡᠪᠦᠭᠡᠨ ᠲᠡᠢ ᠲᠤᠯᠤᠯᠳᠤᠬᠤ ᠪᠠᠷ ᠲᠣᠭᠲᠠᠵᠠᠢ᠃
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ
ᠪᠤᠴᠠᠭᠠᠳ ᠬᠠᠨ ᠤ᠋ ᠪᠠᠨ ᠵᠦᠭ ᠳᠠᠪᠬᠢᠵᠠᠢ᠃
ᠪᠤᠰᠤᠰᠬᠢᠭᠰᠡᠨ ᠲᠣᠭᠣᠰᠣ ᠨᠢ ᠭᠡᠨᠡ
ᠪᠤᠭ ᠮᠠᠩᠭᠤᠰ ᠤ᠋ᠨ ᠡᠮᠦᠨᠡ ᠭᠡᠨᠡ
ᠪᠤᠭᠳᠤᠢᠰᠬᠢᠭᠰᠠᠨ ᠡᠪᠦᠭᠡᠨ ᠭᠡᠨᠡ
ᠪᠣᠭᠳᠠ ᠬᠠᠨ ᠤ᠋ ᠡᠮᠦᠨᠡ ᠭᠡᠨᠡ᠃
ᠬᠠᠨ ᠳ᠋ᠠᠭᠠᠨ ᠤᠴᠢᠷ ᠢ᠋ᠶ᠋ᠠᠨ ᠮᠡᠳᠡᠭᠦᠯᠵᠦ
ᠬᠣᠶᠠᠭᠤᠯᠠ ᠪᠠᠨ ᠵᠥᠪᠯᠡᠵᠦ ᠲᠣᠭᠲᠠᠭᠰᠠᠨ ᠨᠢ ᠄᠄
ᠲᠦᠷᠦᠭᠦᠦ ᠭᠠᠭᠴᠠ ᠮᠠᠩᠭᠤᠰ ᠲᠠᠢ ᠨᠢ
ᠬᠠᠨ ᠪᠠᠢᠯᠳᠤᠬᠤ ᠪᠠᠷ ᠪᠣᠯᠵᠠᠢ᠂
ᠲᠡᠭᠦᠨ ᠡᠴᠡ ᠪᠤᠰᠤᠳ ᠮᠠᠩᠭᠤᠰ ᠢ᠋ ᠨᠢ
ᠡᠪᠦᠭᠡᠨ ᠠᠯᠠᠬᠤ ᠪᠠᠷ ᠪᠡᠯᠡᠳᠬᠡᠵᠡᠢ᠃
* * *
ᠥᠷᠯᠥᠭᠡ ᠡᠷᠲᠡ ᠨᠢ ᠪᠣᠯᠵᠠᠢ
ᠥᠰᠢᠶᠡᠲᠡᠨ ᠳᠠᠢᠰᠤᠨ ᠲᠠᠢ ᠪᠠᠨ ᠤᠴᠠᠷᠠᠵᠠᠢ᠃
ᠡᠡᠷᠪᠡᠨ ᠲᠠᠪᠤᠨ ᠲᠣᠯᠣᠭᠠᠢ ᠲᠠᠢ
ᠠᠨᠳᠠᠯᠠᠢ ᠰᠢᠷᠠ ᠮᠡᠠᠩᠭᠤᠰ
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠤ᠋ ᠥᠭᠡᠳᠡ ᠡᠴᠡ
ᠭᠠᠯᠪᠠ ᠭᠠᠯᠪᠠ ᠳ᠋ᠤ᠌ ᠭᠠᠢᠬᠠᠭᠳᠠᠭᠰᠠᠨ
ᠭᠠᠰ ᠤᠯᠠᠭᠠᠨ ᠪᠢᠯᠠᠭᠤ ᠪᠠᠨ᠂
ᠲᠥᠷᠥᠭᠰᠡᠨ ᠪᠦᠭᠦᠳᠡ ᠶ᠋ᠢ ᠲᠦᠢᠪᠡᠭᠡᠳᠡᠭ
ᠲᠦᠭᠦᠬᠡᠢ ᠤᠯᠠᠭᠠᠨ ᠪᠢᠯᠠᠭᠤ ᠪᠠᠨ᠄
《ᠭᠠᠷᠬᠤ ᠳ᠋ᠠᠭᠠᠨ ᠭᠠᠯ ᠤᠯᠠᠭᠠᠨ
ᠭᠠᠵᠠᠷ ᠤ᠋ᠨ ᠳᠤᠮᠳᠠ ᠴᠣᠭ ᠤᠯᠠᠭᠠᠨ
ᠬᠦᠷᠬᠦ ᠳ᠋ᠡᠭᠡᠨ ᠬᠦᠷᠡᠩ ᠤᠯᠠᠭᠠᠨ
ᠬᠦᠷᠦᠭᠰᠡᠨ ᠬᠣᠢᠨᠠ ᠪᠠᠨ ᠠᠶᠤᠩᠭᠠ ᠪᠣᠯᠵᠤ᠂
ᠨᠢᠷᠤᠭᠤ ᠪᠦᠭᠦᠳᠡ ᠶ᠋ᠢ ᠨᠢ ᠨᠤᠭᠤᠯ!
ᠨᠤᠭᠤᠰᠤ ᠪᠦᠭᠦᠳᠡ ᠶ᠋ᠢ ᠨᠢ ᠳᠠᠰᠤᠯ !
ᠰᠡᠭᠡᠷ ᠪᠦᠭᠦᠳᠡ ᠶ᠋ᠢ ᠨᠢ ᠰᠡᠲᠡᠯ!
ᠰᠡᠮᠡᠵᠡ ᠪᠦᠭᠦᠳᠡ ᠶ᠋ᠢ ᠨᠢ ᠬᠡᠷᠴᠢᠯᠡ!
ᠴᠢᠮᠥᠭᠡ ᠪᠦᠭᠦᠳᠡ ᠶ᠋ᠢ ᠨᠢ ᠬᠠᠭᠠᠯ!
ᠰᠢᠷᠪᠥᠰᠥ ᠪᠦᠭᠦᠳᠡ ᠶ᠋ᠢ ᠨᠢ ᠤᠭᠲᠤᠯ!》 ᠭᠡᠳ ᠰᠢᠲᠡᠵᠡᠢ᠃
ᠠᠯᠲᠠᠨ ᠰᠢᠷᠭᠠᠯ ᠮᠣᠷᠢ ᠨᠢ
ᠠᠪᠤᠷᠠᠯᠲᠤ ᠬᠠᠨ ᠢ᠋ᠶ᠋ᠠᠨ ᠠᠪᠤᠭᠠᠳ
ᠬᠤᠷᠮᠤᠰᠲᠠ ᠲᠡᠭᠷᠢ ᠳ᠋ᠦ᠍ ᠭᠠᠷᠴᠤ
ᠬᠣᠣᠷᠲᠤ ᠵᠡᠪᠰᠡᠭ ᠤᠨ ᠠᠶᠤᠯ ᠠ᠋ᠴᠠ ᠵᠠᠢᠯᠠᠵᠠᠢ᠃
ᠭᠠᠯᠪᠠ ᠭᠠᠯᠪᠠ ᠳ᠋ᠤ᠌ ᠭᠠᠢᠬᠠᠭᠳᠠᠭᠰᠠᠨ
ᠭᠠᠰ ᠤᠯᠠᠭᠠᠨ ᠪᠢᠯᠠᠭᠤ ᠨᠢ
ᠲᠥᠷᠥᠭᠰᠡᠨ ᠪᠦᠭᠦᠳᠡ ᠶ᠋ᠢ ᠲᠦᠢᠪᠡᠭᠡᠳᠡᠭ
ᠲᠦᠭᠦᠬᠡᠢ ᠤᠯᠠᠭᠠᠨ ᠪᠢᠯᠠᠭᠤ ᠨᠢ
ᠭᠠᠷᠬᠤ ᠳ᠋ᠠᠭᠠᠨ ᠭᠠᠯ ᠤᠯᠠᠭᠠᠨ
ᠭᠠᠵᠠᠷ ᠤ᠋ᠨ ᠳᠤᠮᠳᠠ ᠴᠣᠭ ᠤᠯᠠᠭᠠᠨ
ᠬᠦᠷᠬᠦ ᠳ᠋ᠡᠭᠡᠨ ᠬᠦᠷᠡᠩ ᠤᠯᠠᠭᠠᠨ
ᠬᠦᠷᠦᠭᠰᠡᠨ ᠬᠣᠢᠨᠠ ᠪᠠᠨ ᠠᠶᠤᠩᠭᠠ ᠪᠣᠯᠵᠤ
ᠪᠣᠯᠵᠣᠭᠠᠲᠤ ᠶ᠋ᠢᠨ ᠪᠣᠷᠣ ᠲᠣᠯᠣᠭᠠᠢ ᠶ᠋ᠢ
ᠪᠤᠯᠲᠤ ᠣᠩᠭᠢᠴᠡᠨ ᠬᠠᠶᠠᠵᠠᠢ᠃
* * *
ᠠᠪᠤᠷᠠᠯᠲᠤ ᠬᠠᠨ ᠲᠡᠭᠷᠢ ᠡᠴᠡ ᠪᠠᠭᠤᠭᠠᠳ
ᠠᠨᠳᠠᠯᠠᠢ ᠰᠢᠷᠠ ᠮᠡᠠᠩᠭᠤᠰ ᠤ᠋ᠨ ᠵᠦᠭ
ᠡᠴᠢᠭᠡ ᠶ᠋ᠢᠨ ᠦᠶᠡ ᠡᠴᠡ ᠡᠳ᠌ᠯᠡᠭᠰᠡᠨ
ᠡᠷᠳᠡᠨᠢ ᠶ᠋ᠢᠨ ᠴᠠᠭᠠᠨ ᠰᠤᠮᠤ ᠪᠠᠨ
ᠡᠷᠭᠢᠭᠦᠯᠦᠨ ᠨᠢᠭᠡ ᠪᠠᠷᠢᠵᠤ
ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠦᠶᠡ ᠡᠴᠡ ᠪᠠᠷᠢᠭᠰᠠᠨ
ᠠᠯᠠᠭ ᠡᠷᠢᠶᠡᠨ ᠨᠤᠮᠤ ᠪᠠᠨ
ᠠᠯᠳᠠᠯᠠᠨ ᠨᠢᠭᠡ ᠲᠠᠲᠠᠵᠤ
ᠮᠠᠩᠭᠤᠰ ᠤ᠋ᠨ ᠠᠳᠠᠯᠢ ᠰᠢᠪᠰᠢᠵᠦ
ᠮᠠᠰᠢ ᠬᠣᠷᠣᠰᠤᠯ ᠲᠠᠢ ᠬᠠᠷᠪᠤᠵᠠᠢ᠄
ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠦᠶᠡ ᠡᠴᠡ ᠡᠳ᠌ᠯᠡᠭᠰᠡᠨ
ᠡᠷᠳᠡᠨᠢ ᠶ᠋ᠢᠨ ᠴᠠᠭᠠᠨ ᠰᠤᠮᠤ ᠨᠢ
ᠭᠠᠷᠬᠤ ᠳ᠋ᠠᠭᠠᠨ ᠭᠠᠯ ᠤᠯᠠᠭᠠᠨ
ᠭᠠᠵᠠᠷ ᠤ᠋ᠨ ᠳᠤᠮᠳᠠ ᠴᠣᠭ ᠤᠯᠠᠭᠠᠨ
ᠬᠦᠷᠬᠦ ᠳ᠋ᠡᠭᠡᠨ ᠬᠦᠷᠡᠩ ᠤᠯᠠᠭᠠᠨ
ᠬᠦᠷᠦᠭᠰᠡᠨ ᠬᠣᠢᠨᠠ ᠪᠠᠨ ᠠᠶᠤᠩᠭᠠ ᠪᠣᠯᠵᠤ
ᠨᠢᠷᠤᠭᠤ ᠪᠦᠭᠦᠳᠡ ᠶ᠋ᠢ ᠨᠢ ᠨᠤᠭᠤᠯᠵᠠᠢ᠂
ᠨᠤᠭᠤᠰᠤ ᠪᠦᠭᠦᠳᠡ ᠶ᠋ᠢ ᠨᠢ ᠲᠠᠰᠤᠯᠵᠠᠢ᠂
ᠰᠡᠭᠡᠷ ᠪᠦᠭᠦᠳᠡ ᠶ᠋ᠢ ᠨᠢ ᠰᠡᠲᠡᠯᠵᠡᠢ᠂
ᠰᠡᠮᠡᠵᠡ ᠪᠦᠭᠦᠳᠡ ᠶ᠋ᠢ ᠨᠢ ᠬᠡᠷᠴᠢᠯᠡᠵᠡᠢ᠂
ᠴᠢᠮᠥᠭᠡ ᠪᠦᠭᠦᠳᠡ ᠶ᠋ᠢ ᠨᠢ ᠬᠠᠭᠠᠯᠵᠠᠢ᠂
ᠰᠢᠷᠪᠥᠰᠥ ᠪᠦᠭᠦᠳᠡ ᠶ᠋ᠢ ᠨᠢ ᠣᠬᠲᠦᠯᠵᠠᠢ᠂
《ᠡᠷᠡ ᠬᠥᠮᠦᠨ ᠪᠣᠯᠤᠭᠰᠠᠨ ᠤ ᠬᠣᠢᠨᠠ
ᠡᠨᠡᠦᠬᠡᠨ ᠰᠢᠷᠬᠠᠨ ᠳ᠋ᠤ᠌ ᠶᠠᠭᠠᠬᠢᠬᠤ ᠪᠣᠢ!》 ᠭᠡᠳ
ᠠᠷᠪᠠᠨ ᠲᠠᠪᠤᠨ ᠲᠣᠯᠣᠭᠠᠢ ᠲᠠᠢ
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠡᠡᠪᠤᠷᠠᠯᠲᠦ ᠬᠠᠨ ᠲᠠᠢ ᠣᠴᠢᠭᠠᠳ ᠨᠣᠴᠣᠯᠳᠤᠵᠠᠢ᠃
ᠬᠡᠳᠦ ᠬᠣᠨᠣᠭ ᠨᠣᠴᠣᠯᠳᠤᠵᠤ
ᠬᠡᠨ ᠠᠯᠢᠨ ᠨᠢ ᠴᠦ᠍ ᠳᠡᠢᠯᠬᠦ ᠦᠭᠡᠢ
ᠣᠭᠲᠠᠷᠭᠤᠢ ᠳ᠋ᠤ᠌ ᠭᠠᠷᠴᠤ
ᠣᠳᠣ ᠲᠣᠭᠠᠯᠠᠨ ᠨᠣᠴᠣᠯᠳᠤᠵᠤ
ᠡᠷᠭᠢᠵᠦ ᠪᠠᠭᠤᠵᠤ ᠢᠷᠡᠭᠡᠳ
ᠡᠪᠡᠰᠦ ᠲᠣᠭᠠᠯᠠᠨ ᠨᠣᠴᠣᠯᠳᠤᠵᠤ
ᠠᠭᠤᠯᠠᠨ ᠳ᠋ᠤ᠌ ᠭᠠᠷᠴᠤ
ᠴᠢᠯᠠᠭᠤ ᠲᠣᠭᠠᠯᠠᠨ ᠨᠣᠴᠣᠯᠳᠤᠵᠤ
ᠤᠰᠤᠨ ᠳ᠋ᠤ᠌ ᠣᠷᠣᠵᠤ
ᠵᠢᠷᠠᠭᠠᠭᠠᠢ ᠲᠣᠭᠠᠯᠠᠨ ᠨᠣᠴᠣᠯᠳᠤᠵᠠᠢ᠃
ᠠᠪᠤᠷᠠᠯᠲᠤ ᠬᠠᠨ ᠤ᠋ ᠪᠡᠶᠡ ᠶ᠋ᠢᠨ
ᠠᠭᠤᠷ ᠬᠢᠯᠢᠭ ᠨᠢ ᠣᠷᠭᠢᠯᠵᠤ
ᠠᠪᠤᠷᠭᠤ ᠬᠦᠴᠦ ᠨᠢ ᠪᠠᠳᠠᠷᠠᠵᠤ᠂
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ ᠤ᠋ᠨ
ᠠᠷᠭᠠ ᠬᠦᠴᠦ ᠨᠢ ᠪᠠᠷᠠᠭᠳᠠᠵᠤ
ᠠᠮᠠᠨ ᠠ᠋ᠴᠠ ᠨᠢ ᠨᠥᠵᠢ ᠤᠨᠠᠬᠤ ᠳ᠋ᠤ᠌
ᠪᠠᠭᠠᠲᠤᠷ ᠨᠢ ᠮᠠᠩᠭᠤᠰ ᠢ᠋
ᠡᠪᠬᠡᠵᠦ ᠡᠪᠬᠡᠵᠦ
ᠡᠷᠡᠬᠡᠢ ᠶ᠋ᠢᠨ ᠴᠢᠨᠡᠭᠡ ᠪᠣᠯᠭᠠᠵᠤ
ᠬᠤᠮᠢᠵᠤ ᠬᠤᠮᠢᠵᠤ
ᠬᠤᠷᠤᠭᠤᠪᠴᠢᠨ ᠴᠢᠨᠡᠭᠡ ᠪᠣᠯᠭᠠᠵᠤ ᠤᠨᠠᠭᠠᠭᠠᠳ
ᠡᠪᠦᠳᠦᠭ ᠳᠣᠣᠷᠠ ᠪᠠᠨ ᠳᠠᠷᠤᠵᠤ
ᠥᠴᠢᠭ ᠲᠠᠩᠭᠠᠷᠢᠭ ᠢ᠋ ᠨᠢ ᠰᠣᠨᠣᠰᠴᠠᠢ᠃
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ
ᠠᠨᠳᠠᠭᠠᠢᠯᠠᠵᠤ ᠦᠭᠡ ᠪᠡᠨ ᠬᠡᠯᠡᠭᠰᠡᠨ ᠨᠢ᠄
《ᠨᠣᠮᠣᠬᠠᠨ ᠮᠣᠷᠢᠨ ᠤ᠋ ᠴᠢᠨᠢ
ᠨᠣᠭᠲᠣ ᠪᠣᠯᠤᠶᠠ!
ᠲᠣᠭᠰᠢᠨ ᠮᠣᠷᠢᠨ ᠤ᠋ ᠴᠢᠨᠢ
ᠴᠢᠳᠥᠷ ᠪᠣᠯᠤᠶᠠ!
ᠭᠠᠳᠠᠭᠠ ᠮᠣᠷᠢᠨ ᠤ᠋ ᠴᠢᠨᠢ
ᠤᠶᠠᠭᠠ ᠪᠣᠯᠤᠶᠠ!
ᠭᠠᠩᠭᠠᠩ ᠬᠥᠮᠦᠨ ᠦ᠌ ᠴᠢᠨᠢ
ᠵᠠᠷᠤᠴᠠ ᠪᠣᠯᠤᠶᠠ!
ᠬᠣᠯᠠ ᠶᠠᠪᠤᠬᠤ ᠳ᠋ᠤ᠌ ᠴᠢᠨᠢ
ᠬᠠᠨᠢ ᠪᠣᠯᠤᠶᠠ!
ᠣᠢᠷᠠ ᠶᠠᠪᠤᠬᠤ ᠳ᠋ᠤ᠌ ᠴᠢᠨᠢ
ᠪᠠᠷᠠᠭᠠ ᠪᠣᠯᠤᠶᠠ!
ᠬᠦᠦ ᠶ᠋ᠢᠨ ᠴᠢᠨᠢ
ᠪᠣᠭᠣᠯ ᠪᠣᠯᠤᠶᠠ!
ᠬᠡᠦᠬᠡᠨ ᠦ᠌ ᠴᠢᠨᠢ
ᠢᠨᠵᠢ ᠪᠣᠯᠤᠶᠠ!
ᠤᠲᠠᠰᠤᠨ ᠴᠢᠨᠡᠭᠡ ᠤᠯᠠᠭᠠᠨ ᠭᠣᠣᠯ ᠢ᠋ ᠮᠢᠨᠢ
ᠦᠯᠡᠳᠡᠭᠡᠵᠦ ᠦᠵᠡᠭᠡᠴᠢ᠂
ᠠᠪᠤᠷᠠᠭᠠᠷᠠᠢ!》 ᠭᠡᠵᠡᠢ᠃
ᠠᠷᠪᠠᠨ ᠭᠤᠷᠪᠠᠨ ᠨᠠᠰᠤᠲᠠᠢ
ᠠᠪᠤᠷᠠᠯᠲᠤ ᠬᠠᠨ ᠤ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄
《ᠠᠪᠤ ᠶ᠋ᠢᠨ ᠦᠶᠡ ᠡᠴᠡ ᠬᠣᠴᠣᠷᠤᠭᠰᠠᠨ
ᠠᠴᠢ ᠬᠠᠢᠷᠠ ᠪᠠᠨ ᠬᠦᠷᠲᠡᠭᠡᠭᠰᠡᠨ
ᠨᠠᠶᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ ᠡᠴᠡ
ᠠᠰᠠᠭᠤᠵᠤ ᠵᠥᠪᠯᠡᠵᠦ ᠪᠠᠢᠭᠠᠳ
ᠠᠯᠠᠵᠤ ᠠᠪᠤᠷᠠᠬᠤ ᠶ᠋ᠢ ᠲᠣᠭᠲᠠᠭᠠᠶᠠ!》ᠭᠡᠵᠡᠢ᠃
* * *
ᠨᠠᠶᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ ᠤ᠋ᠨ
ᠠᠷᠤ ᠳ᠋ᠠᠭᠠᠨ ᠳᠠᠭᠠᠭᠤᠯᠵᠤ ᠢᠷᠡᠭᠰᠡᠨ
ᠶᠡᠷᠡᠨ ᠨᠠᠢ᠍ᠮᠠᠨ ᠨᠥᠬᠥᠷ ᠢ᠋ ᠨᠢ
ᠢᠪᠡᠷᠡᠲᠡᠯᠡ ᠳᠠᠭᠠᠷᠢᠵᠤ ᠠᠯᠠᠭᠠᠳ
ᠵᠡᠭᠦᠨ ᠬᠣᠢᠲᠤ ᠵᠦᠭ ᠡᠴᠡ
ᠬᠦᠷᠴᠦ ᠨᠢᠭᠡ ᠢᠷᠡᠵᠡᠢ᠃
ᠠᠪᠤᠷᠠᠯᠲᠤ ᠬᠠᠨ ᠪᠠᠶᠠᠷᠯᠠᠵᠤ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ ᠳ᠋ᠡᠭᠡᠨ
ᠠᠨᠳᠠᠯᠠᠢ ᠰᠢᠷᠠ ᠶ᠋ᠢᠨ ᠠᠨᠳᠠᠭᠠᠢ ᠶ᠋ᠢ ᠬᠡᠯᠡᠵᠦ
ᠠᠯᠠᠵᠤ ᠠᠪᠤᠷᠠᠬᠤ ᠶ᠋ᠢ ᠠᠰᠠᠭᠤᠬᠤ ᠳ᠋ᠤ᠌
ᠨᠠᠶᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ ᠨᠢ᠄
《ᠮᠠᠩᠬᠠ ᠡᠯᠡᠰᠦ ᠡᠯᠪᠡᠭ ᠪᠣᠯᠪᠠᠴᠤ
ᠭᠤᠯᠢᠷ ᠬᠢᠵᠦ ᠪᠣᠯᠬᠤ ᠦᠭᠡᠢ
ᠮᠠᠩᠭᠤᠰ ᠰᠢᠮᠨᠤᠰ ᠣᠯᠠᠨ ᠪᠣᠯᠪᠠᠴᠤ
ᠠᠯᠪᠠᠲᠤ ᠬᠢᠵᠦ ᠪᠣᠯᠳᠠᠭ ᠦᠭᠡᠢ
ᠬᠡᠰᠡᠭ ᠬᠡᠰᠡᠭ ᠣᠭᠲᠣᠯᠵᠤ
ᠬᠡᠷᠢᠶᠡ ᠱᠠᠭᠠᠵᠠᠭᠠᠢ ᠴᠠᠳᠬᠠᠭᠠ!
ᠣᠯᠠᠨ ᠣᠯᠠᠨ ᠣᠭᠲᠣᠯᠵᠤ
ᠣᠯᠠᠨ ᠤ᠋ ᠨᠣᠬᠠᠢ ᠴᠠᠳᠬᠠᠭᠠ!
ᠡᠷᠬᠡᠯᠡᠭᠰᠡᠨ ᠰᠢᠭ ᠪᠣᠯᠤᠭᠠᠳ
ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠨᠢ ᠤᠭᠲᠤᠯ!
ᠲᠣᠭᠯᠠᠭᠰᠠᠨ ᠰᠢᠭ᠋ ᠪᠣᠯᠤᠭᠠᠳ
ᠲᠣᠯᠣᠭᠠᠢ ᠲᠠᠷᠢᠬᠢ ᠶ᠋ᠢ ᠨᠢ ᠤᠨᠠᠭᠠ! 》 ᠭᠡᠵᠡᠢ᠃
ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠨᠢ ᠪᠣᠯᠭᠠᠵᠤ
ᠬᠡᠷᠡᠭ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠲᠡᠭᠦᠰᠬᠡᠵᠦ
ᠠᠨᠳᠠᠯᠠᠢ ᠰᠢᠷᠠ ᠮᠠᠩᠭᠤᠰ ᠤᠨ
ᠠᠮᠢ ᠨᠠᠰᠤ ᠶ᠋ᠢ ᠳᠠᠭᠤᠰᠬᠠᠵᠠᠢ᠃
* * *
ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ
ᠳᠠᠷᠬᠠᠨ ᠴᠣᠯᠠ ᠣᠯᠤᠯᠠ
ᠥᠰᠢᠶᠡᠲᠡᠨ ᠢ᠋ᠶ᠋ᠡᠨ ᠳᠠᠷᠤᠵᠤ
ᠥᠷᠭᠡᠨ ᠴᠣᠯᠠ ᠪᠠᠨ ᠮᠠᠨᠳᠤᠭᠤᠯᠤᠯᠠ ᠭᠡᠳ
ᠬᠠᠨ ᠪᠠᠭᠠᠲᠤᠷ ᠬᠣᠶᠠᠭᠤᠯᠠ ᠪᠠᠨ
ᠬᠠᠷᠢᠵᠤ ᠪᠤᠴᠠᠬᠤ ᠪᠠᠷ ᠶᠠᠪᠤᠬᠤ ᠳ᠋ᠤ᠌
ᠠᠯᠲᠠᠨ ᠰᠢᠷᠭᠠᠯ ᠮᠣᠷᠢ ᠨᠢ
ᠢᠨᠴᠠᠭᠠᠵᠤ ᠭᠡᠨᠡᠳᠲᠡ ᠵᠣᠭᠰᠣᠵᠠᠢ᠃
ᠠᠪᠤᠷᠠᠯᠲᠤ ᠬᠠᠨ ᠰᠠᠨᠳᠤᠷᠴᠤ
ᠠᠭᠲᠠ ᠬᠦᠯᠦᠭ ᠡᠴᠡ ᠪᠡᠨ ᠠᠰᠠᠭᠤᠭᠰᠠᠨ ᠨᠢ᠄
《ᠠᠯᠲᠠᠨ ᠰᠢᠷᠭᠠᠯ ᠮᠣᠷᠢ ᠮᠢᠨᠢ
ᠢᠨᠴᠠᠭᠠᠵᠤ ᠶᠠᠭᠤᠨ ᠳ᠋ᠤ᠌ ᠵᠣᠭᠰᠣᠪᠠ?
ᠡᠪ ᠦᠭᠡᠢ ᠤᠴᠢᠷ ᠶᠠᠭᠤ ᠪᠣᠯᠪᠠ
ᠡᠵᠡᠨ ᠳ᠋ᠡᠭᠡᠨ ᠲᠦᠷᠭᠡᠨ ᠬᠡᠯᠡᠨᠡ ᠤᠤ? 》 ᠭᠡᠬᠦ ᠳ᠋ᠦ᠍
ᠠᠯᠲᠠᠨ ᠰᠢᠷᠭᠠᠯ ᠮᠣᠷᠢ ᠨᠢ
ᠠᠴᠢᠲᠤ ᠡᠵᠡᠨ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠨᠢ᠄
《ᠬᠠᠷᠢᠳᠠᠨ ᠳᠠᠢᠰᠤᠨ ᠢ᠋ ᠳᠠᠷᠤᠯᠠ
ᠬᠠᠷᠢᠨ ᠪᠠᠰᠠ ᠳᠤᠲᠠᠭᠤ ᠪᠠᠢᠨᠠ
ᠵᠡᠭᠦᠨ ᠬᠣᠢᠲᠤ ᠵᠦᠭ ᠲᠦ᠍
ᠰᠢᠷᠠ᠂ ᠨᠣᠭᠣᠭᠠᠨ᠂ ᠬᠠᠷᠠ
ᠭᠤᠷᠪᠠᠨ ᠭᠡᠷ ᠮᠠᠩᠭᠤᠰ
ᠭᠤᠲᠤᠷᠠᠯ ᠦᠭᠡᠢ ᠬᠡᠪᠲᠡᠵᠦ ᠪᠠᠢᠨᠠ! 》 ᠭᠡᠵᠡᠢ᠃
* * *
ᠨᠠᠶᠠᠨ ᠨᠠᠢ᠍ᠮᠠᠨ ᠨᠠᠰᠤᠲᠠᠢ
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ
ᠬᠥᠳᠡᠯᠦᠭᠡᠳ ᠨᠢᠭᠡᠨ ᠥᠭᠴᠡᠢ
ᠬᠦᠷᠦᠭᠡᠳ ᠨᠢᠭᠡ ᠣᠴᠢᠵᠠᠢ᠃
ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠰᠢᠷᠠ ᠭᠡᠷ ᠢ᠋
ᠪᠠᠯᠪᠠ ᠢᠰᠬᠦᠯᠦᠨ ᠣᠷᠣᠵᠠᠢ᠃
ᠵᠠᠷᠠᠭᠠᠨ ᠠᠷᠠᠰᠤᠨ ᠵᠠᠩᠴᠢ ᠲᠠᠢ
ᠵᠠᠢᠷ ᠴᠢᠯᠠᠭᠤᠨ ᠡᠷᠢᠭᠡ ᠲᠡᠢ
ᠬᠣᠷᠢᠨ ᠲᠠᠪᠤᠨ ᠲᠣᠯᠣᠭᠠᠢ ᠲᠠᠢ
ᠬᠣᠯᠳᠣᠯᠠᠢ ᠰᠢᠷᠠ ᠯᠠᠮᠠ ᠪᠠᠢᠵᠠᠢ᠃
ᠬᠣᠷᠢᠨ ᠲᠠᠪᠤᠨ ᠲᠣᠯᠣᠭᠠᠢ ᠶ᠋ᠢ ᠨᠢ
ᠬᠣᠢᠰᠢ ᠣᠷᠣᠭᠰᠢ ᠤᠨᠠᠭᠠᠴᠢᠬᠠᠵᠠᠢ᠂
ᠳᠤᠮᠳᠠ ᠲᠠᠯᠠ ᠶ᠋ᠢᠨ ᠨᠣᠭᠣᠭᠠᠨ ᠭᠡᠷ ᠢ᠋
ᠳᠣᠭᠳᠣᠯᠲᠠᠯᠠ ᠬᠠᠰᠬᠢᠷᠤᠭᠠᠳ ᠣᠷᠣᠵᠠᠢ᠃
ᠡᠷᠡᠦ ᠡᠪᠦᠳᠦᠭ ᠨᠢ ᠨᠡᠢᠯᠡᠭᠰᠡᠨ
ᠡᠮᠰᠢᠩ᠂ ᠳᠤᠮᠰᠢᠡᠭ ᠭᠡᠰᠡᠨ
ᠠᠷᠪᠠᠨ ᠲᠠᠪᠤᠨ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠡᠪᠦᠭᠡᠨ ᠡᠮᠡᠭᠡᠨ ᠮᠠᠩᠭᠤᠰ ᠄
《ᠴᠢ ᠮᠠᠨ ᠤ᠋ ᠬᠦᠦ ᠤᠤ?
ᠠᠨᠳᠠᠯᠠᠢ ᠰᠢᠷᠠ ᠮᠢᠨᠢ ᠢᠷᠡᠪᠡ ᠤᠤ?
ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠪᠠ ᠤᠤ?
ᠳᠠᠷᠬᠠᠨ ᠴᠣᠯᠠ ᠪᠠᠨ ᠣᠯᠪᠠ ᠤᠤ?
ᠥᠰᠢᠶᠡᠲᠡᠨ ᠢ᠋ᠶ᠋ᠡᠨ ᠳᠠᠷᠤᠪᠠ ᠤᠤ?
ᠥᠷᠭᠡᠨ ᠴᠣᠯᠠ ᠪᠠᠨ ᠮᠠᠨᠳᠤᠭᠤᠯᠪᠠ ᠤᠤ? 》 ᠭᠡᠵᠡᠢ᠃
《ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ
ᠳᠠᠷᠬᠠᠨ ᠴᠣᠯᠠ ᠪᠠᠨ ᠣᠯᠳᠠᠭ ᠨᠢ
ᠲᠠᠨ ᠤ᠋ ᠬᠦᠦ ᠴᠢᠨᠢ ᠯᠡ ᠶᠦᠮ ᠤᠤ?
ᠥᠰᠢᠶᠡᠲᠡᠨ ᠢ᠋ᠶ᠋ᠡᠨ ᠳᠠᠷᠤᠵᠤ
ᠥᠷᠭᠡᠨ ᠴᠣᠯᠠ ᠪᠠᠨ ᠣᠯᠳᠠᠭ ᠨᠢ
ᠲᠠᠨ ᠤ᠋ ᠬᠦᠦ ᠴᠢᠨᠢ ᠯᠠ ᠶᠦᠮ ᠤᠤ? 》 ᠭᠡᠳ
ᠠᠷᠪᠠᠨ ᠲᠠᠪᠤᠨ ᠲᠣᠯᠣᠭᠠᠢ ᠶ᠋ᠢ ᠨᠢ
ᠠᠷᠤ ᠥᠪᠥᠷ ᠤᠷᠤᠭᠤ ᠨᠢ ᠪᠥᠮᠪᠥᠷᠢᠭᠦᠯᠵᠡᠢ᠃
ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠠᠷᠠ ᠭᠡᠷ ᠢ᠋
ᠵᠠᠳᠠ ᠢᠰᠬᠦᠯᠦᠭᠡᠳ ᠣᠷᠣᠬᠤ ᠳ᠋ᠤ᠌
ᠭᠡᠷ ᠦ᠋ᠨ ᠴᠢᠨᠡᠭᠡ ᠭᠡᠳᠡᠰᠦ ᠲᠡᠢ
ᠭᠡᠳᠡᠭᠡᠷ ᠰᠢᠷᠠ ᠮᠠᠩᠭᠤᠰ ᠪᠠᠢᠵᠠᠢ᠃
ᠭᠡᠳᠡᠰᠦ ᠶ᠋ᠢ ᠨᠢ ᠬᠠᠭᠠ ᠴᠢᠴᠢᠬᠦ ᠳ᠋ᠦ᠍
ᠲᠥᠭᠡ ᠬᠢᠷᠢ ᠶᠢᠨ ᠪᠡᠶᠡ ᠲᠡᠢ
ᠲᠡᠮᠦᠷ ᠬᠤᠶᠠᠭ ᠲᠠᠢ ᠬᠦᠦ ᠭᠠᠷᠤᠭᠠᠳ
ᠡᠪᠦᠭᠡᠨ ᠲᠡᠢ ᠰᠢᠭᠤᠳ ᠨᠣᠴᠣᠯᠳᠤᠵᠠᠢ᠃
ᠡᠪᠦᠭᠡᠨ ᠢ᠋ ᠳᠡᠢᠯᠬᠦ ᠦᠭᠡᠢ ᠳ᠋ᠡᠭᠡᠨ
ᠦᠬᠦᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠬᠡᠯᠡᠭᠰᠡᠨ ᠨᠢ᠄
《ᠠᠷᠪᠠᠨ ᠰᠠᠷᠠ ᠪᠣᠯᠤᠭᠠ ᠦᠭᠡᠢ
ᠨᠢᠭᠡᠨ ᠶᠡᠬᠡ ᠭᠣᠮᠣᠳᠠᠯ ᠲᠠᠢ
ᠠᠩᠭᠢᠷ ᠤᠭᠤᠷᠠᠭ ᠢ᠋ᠶ᠋ᠠᠨ ᠬᠥᠬᠥᠭᠡ ᠦᠭᠡᠢ
ᠬᠣᠶᠠᠷ ᠶᠡᠬᠡ ᠭᠣᠮᠣᠳᠠᠯ ᠲᠠᠢ
ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ ᠨᠢᠭᠤᠷ ᠢ᠋ ᠦᠵᠡᠭᠡ ᠦᠭᠡᠢ
ᠭᠤᠷᠪᠠᠨ ᠶᠡᠬᠡ ᠭᠣᠮᠣᠳᠠᠯ ᠲᠠᠢ! 》 ᠭᠡᠵᠡᠢ᠃
* * *
ᠪᠠᠭᠠᠲᠤᠷ ᠪᠣᠯᠣᠳ ᠡᠪᠦᠭᠡᠨ
ᠪᠤᠭ ᠮᠠᠩᠭᠤᠰ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠤᠭᠠᠳ
ᠠᠪᠤᠷᠠᠯᠲᠤ ᠬᠠᠨ ᠲᠠᠢ ᠪᠠᠨ ᠬᠣᠶᠠᠭᠤᠯᠠ
ᠠᠩᠬᠠᠨ ᠨᠤᠲᠤᠭ ᠲᠠᠭᠠᠨ ᠬᠦᠷᠦᠭᠡᠳ
ᠡᠷᠲᠡ ᠶ᠋ᠢᠨ ᠨᠠᠷᠠ ᠶ᠋ᠢ ᠮᠠᠨᠳᠤᠬᠤ ᠳ᠋ᠤ᠌
ᠡᠷᠳᠡᠨᠢ ᠶ᠋ᠢᠨ ᠵᠢᠩ ᠢ᠋ᠶ᠋ᠡᠨ ᠳᠡᠯᠡᠳᠦᠭᠡᠳ
ᠡᠪᠡᠷᠲᠦ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠭᠠᠳ
ᠡᠷᠭᠢᠵᠦ ᠬᠣᠲᠠᠨ ᠳ᠋ᠠᠭᠠᠨ ᠪᠠᠭᠤᠵᠠᠢ᠃
ᠲᠦᠷᠦᠭᠦᠴᠢ ᠶ᠋ᠢᠨ ᠨᠠᠷᠠ ᠶ᠋ᠢ ᠭᠠᠷᠬᠤ ᠳ᠋ᠤ᠌
ᠲᠡᠮᠦᠷ ᠵᠢᠩ ᠢᠶᠠᠨ ᠳᠡᠯᠡᠰᠦᠭᠡᠳ
ᠲᠦᠢᠳᠬᠡᠷᠲᠦ ᠮᠠᠩᠭᠤᠰ ᠢ᠋ ᠳᠠᠷᠤᠭᠠᠳ
ᠲᠥᠷᠥᠭᠰᠡᠨ ᠬᠣᠲᠠᠨ ᠳ᠋ᠠᠭᠠᠨ ᠪᠠᠭᠤᠵᠠᠢ᠃
ᠭᠤᠨᠵᠢᠨ ᠦᠨᠢᠶᠡ ᠠᠯᠠᠵᠤ
ᠭᠤᠷᠪᠠᠨ ᠬᠣᠨᠣᠭ ᠨᠠᠢᠷᠯᠠᠵᠤ
ᠳᠦᠨᠵᠡᠨ ᠦᠨᠢᠶᠡ ᠠᠯᠠᠵᠤ
ᠳᠥᠷᠪᠡᠨ ᠬᠣᠨᠣᠭ ᠨᠠᠢᠷᠯᠠᠵᠤ
ᠬᠢᠲᠤᠭᠠ ᠲᠠᠯᠪᠢᠯ ᠦᠭᠡᠢ
ᠮᠢᠬᠠ ᠢᠳᠡᠵᠦ
ᠬᠤᠨᠳᠠᠭᠠ ᠲᠠᠯᠪᠢᠯ ᠦᠭᠡᠢ
ᠠᠷᠢᠬᠢ ᠤᠤᠭᠤᠵᠤ
ᠠᠷᠢᠬᠢᠨ ᠳᠤ ᠳᠤᠷᠠᠲᠠᠢ ᠡᠪᠦᠭᠡᠴᠦᠳ
ᠠᠱᠠᠷ ᠪᠣᠯᠤᠶᠠ ᠭᠡᠵᠡᠢ᠂
ᠥᠭᠡᠬᠦᠨ ᠳᠤ ᠳᠤᠷᠠᠲᠠᠢ ᠡᠪᠦᠭᠡᠴᠦᠳ
ᠥᠷᠯᠥᠭᠡ ᠪᠣᠯᠤᠶᠠ ᠭᠡᠵᠡᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠬᠥᠬᠡ ᠮᠣᠩᠭᠣᠯ
ᠬᠢᠨᠠᠭᠴᠢ᠄ ᠪᠠᠶᠠᠨᠴᠡᠴᠡᠭ