ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠪᠣᠷᠣᠯᠳᠠᠢ ᠡᠪᠦᠭᠡᠨ ᠦ᠌ ᠳᠣᠯᠣᠭᠠᠨ ᠵᠥᠪ Гураван настай гунаган улаан баатар - Боролдой өвгөний долоон зөв
227ᠪᠣᠷᠣᠯᠳᠠᠢ ᠡᠪᠦᠭᠡᠨ ᠦ᠌ ᠳᠣᠯᠣᠭᠠᠨ ᠵᠥᠪ
ᠪᠣᠷᠣᠯᠳᠠᠢ ᠡᠪᠦᠭᠡᠨ ᠪᠣᠷᠣ ᠠᠯᠠᠭ ᠬᠣᠨᠢ ᠪᠠᠨ ᠬᠠᠷᠢᠭᠤᠯᠬᠤ ᠳ᠋ᠠᠭᠠᠨ᠂ ᠪᠣᠷᠣ ᠬᠤᠷᠠᠭᠠ ᠭᠠᠷᠤᠭᠠᠰᠠᠢ! ᠪᠣᠭᠳᠠ ᠲᠩᠷᠢ ᠪᠡᠨ ᠲᠠᠬᠢᠶᠠ᠃ ᠬᠤᠨ ᠬᠤᠷᠠᠭᠠ ᠭᠠᠷᠤᠭᠠᠰᠠᠢ! ᠬᠤᠷᠮᠤᠰᠲᠠ ᠲᠩᠷᠢ ᠪᠡᠨ ᠲᠠᠬᠢᠶᠠ ᠭᠡᠳ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠨᠢᠭᠡᠨ ᠬᠤᠨ ᠬᠤᠷᠠᠭᠠ ᠭᠠᠷᠴᠤ ᠭᠡᠨᠡ᠃ ᠡᠭᠦᠨ ᠳ᠋ᠦ᠍ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠪᠠᠶᠠᠷᠯᠠᠵᠤ᠂ ᠪᠣᠷᠣ ᠤᠭᠤᠲᠠᠨ ᠳ᠋ᠤ᠌ ᠪᠠᠨ ᠬᠢᠪᠡᠯ ᠪᠤᠵᠠᠷ ᠪᠣᠯᠬᠤ ᠮᠠᠭᠠᠳ ᠦᠭᠡᠢ᠂ ᠭᠬᠢᠷ ᠲᠡᠢ ᠤᠭᠤᠲᠠᠨ ᠳ᠋ᠤ᠌ ᠪᠠᠨ ᠬᠢᠪᠡᠯ᠂ ᠭᠬᠢᠷᠲᠦᠵᠦ ᠪᠤᠵᠠᠷᠳᠠᠬᠤ ᠮᠠᠭᠠᠳ ᠦᠭᠡᠢ ᠭᠡᠳ᠂ ᠥᠯ ᠰᠢᠮᠡᠲᠡᠢ ᠭᠠᠵᠠᠷ ᠥᠨᠳᠥᠷ ᠬᠠᠳᠠ ᠶ᠋ᠢᠨ ᠨᠥᠮᠥᠷᠢ ᠳ᠋ᠦ᠍ ᠲᠠᠯᠪᠢᠭᠠᠳ ᠭᠡᠷ ᠡᠴᠡ ᠪᠡᠨ ᠭᠬᠢᠷ ᠦᠭᠡᠢ ᠤᠭᠤᠲᠠ ᠠᠪᠴᠢᠷᠠᠬᠤ ᠪᠠᠷ ᠶᠠᠪᠤᠭᠰᠠᠨ ᠬᠣᠭᠣᠷᠣᠨᠳᠣ ᠨᠢ ᠬᠠᠷᠢᠨ ᠬᠡᠷᠢᠶᠡ ᠬᠡᠷᠢᠶᠡ ᠡᠴᠡ ᠬᠡᠷᠡᠭ ᠥᠭᠡᠷᠡ᠂ ᠠᠮᠢᠲᠠᠨ ᠠᠮᠢᠲᠠᠨ ᠠ᠋ᠴᠠ ᠠᠳᠠ ᠥᠭᠡᠷᠡ᠂ ᠲᠡᠮᠦᠷ ᠬᠣᠰᠢᠭᠤ ᠲᠠᠢ ᠬᠡᠷᠢᠶᠡ ᠢᠷᠡᠭᠡᠳ ᠨᠢᠳᠦ ᠶ᠋ᠢ ᠨᠢ ᠣᠬᠣᠴᠢᠬᠠᠵᠠᠢ᠃
ᠡᠭᠦᠨ ᠳ᠋ᠦ᠍ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠠᠭᠤᠷᠯᠠᠬᠤ ᠶ᠋ᠢᠨ ᠶᠡᠬᠡᠪᠡᠷ ᠠᠭᠤᠷᠯᠠᠵᠤ᠂ ᠤᠴᠠᠭᠠᠷᠳᠠᠬᠤ ᠶ᠋ᠢᠨ ᠶᠡᠬᠡᠪᠡᠷ ᠤᠴᠠᠭᠠᠷᠳᠠᠵᠤ᠂ ᠲᠡᠮᠦᠷ ᠬᠣᠰᠢᠭᠤ ᠲᠠᠢ ᠬᠡᠷᠢᠶᠡ ᠳ᠋ᠦ᠍ᠨᠢ ᠡᠪᠡᠷ ᠬᠣᠰᠢᠭᠤ ᠬᠢᠭᠡᠳ ᠲᠠᠯᠪᠢᠭᠰᠠᠨ ᠳ᠋ᠤ᠌᠂ ᠬᠡᠷᠢᠶᠡ ᠠᠭᠤᠷᠯᠠᠨ ᠤᠤᠯ ᠬᠣᠰᠢᠭᠤ ᠪᠠᠨ ᠨᠡᠬᠡᠵᠦ᠂ ᠤᠯᠠᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠬᠤᠷᠮᠤᠰᠲᠠ ᠳ᠋ᠤ᠌ ᠣᠴᠢᠵᠤ ᠵᠠᠭᠠᠯᠳᠤᠵᠠᠢ᠃
ᠬᠤᠷᠮᠤᠰᠲᠠ ᠲᠩᠷᠢ ᠨᠢ ᠬᠣᠭᠣᠯᠠ ᠬᠤᠱ᠌ᠢ ᠪᠠᠵᠠᠭᠠᠳᠠᠭ᠂ ᠬᠣᠪ ᠰᠢᠪ ᠵᠥᠭᠡᠭᠡᠳᠡᠭ ᠬᠡᠷᠢᠶᠡ ᠶ᠋ᠢᠨ ᠮᠢᠨᠢ ᠬᠣᠩᠰᠢᠶᠠᠷ ᠢ᠋ ᠨᠢ ᠠᠪᠤᠯᠠ ᠭᠡᠵᠦ ᠠᠭᠤᠷᠯᠠᠵᠤ᠂ ᠥᠯᠥᠨ ᠬᠥᠬᠡ ᠴᠢᠨᠣᠠ ᠶ᠋ᠢ ᠶᠠᠪᠤᠭᠤᠯᠵᠤ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠦ᠌ ᠰᠠᠢᠨ ᠪᠣᠷᠣ ᠮᠣᠷᠢ ᠶ᠋ᠢ ᠨᠢ ᠢᠳᠡᠴᠢᠬᠡᠭᠡᠳ ᠢᠷᠡ ᠭᠡᠳ ᠶᠠᠪᠤᠭᠤᠯᠵᠠᠢ᠃
ᠪᠣᠷᠣᠯᠳᠠᠢ ᠡᠪᠦᠭᠡᠨ ᠡᠨᠡ ᠪᠠᠷᠤᠭ ᠢ᠋ ᠨᠢ ᠮᠡᠳᠡᠵᠦ᠂ ᠮᠠᠭᠤ ᠪᠣᠷᠣ ᠮᠣᠷᠢ ᠪᠠᠨ ᠤᠶᠠᠭᠠᠨ ᠳ᠋ᠠᠭᠠᠨ ᠳᠡᠩᠬᠡᠢᠲᠡᠯᠡ ᠨᠢ ᠰᠣᠢᠵᠤ ᠤᠶᠠᠭᠠᠳ᠂ ᠰᠠᠢᠨ ᠪᠣᠷᠣ ᠮᠣᠷᠢ ᠪᠠᠨ ᠪᠣᠷᠣ ᠢᠰᠡᠭᠡᠢ ᠪᠡᠷ ᠨᠠᠮᠨᠠᠵᠤ ᠨᠠᠮᠨᠠᠵᠤ ᠬᠥᠲᠥᠯᠦᠭᠡᠳ ᠶᠠᠪᠤᠵᠠᠢ᠃ ᠡᠭᠦᠨ ᠳ᠋ᠦ᠍ ᠴᠢᠨᠣᠠ ᠢᠷᠡᠵᠦ ᠠᠵᠢᠭᠯᠠᠨ ᠦᠵᠡᠵᠦ ᠨᠡᠮᠨᠡᠭᠰᠡᠨ ᠢ᠋ ᠨᠢ ᠦᠵᠡᠬᠦ ᠳ᠋ᠦ᠍ ᠮᠠᠭᠤ ᠨᠢ ᠪᠠᠢᠯᠭᠦᠢ ᠳᠡ᠂ ᠰᠣᠢᠭᠰᠠᠨ ᠢ᠋ ᠨᠢ ᠦᠵᠡᠬᠦ ᠳ᠋ᠦ᠍ ᠰᠠᠢᠨ ᠨᠢ ᠪᠠᠢᠯᠭᠦᠢ ᠳᠡ ᠭᠡᠳ ᠮᠠᠭᠤ ᠪᠣᠷᠣ ᠮᠣᠷᠢ ᠶ᠋ᠢ ᠨᠢ ᠢᠳᠡᠬᠦ ᠳ᠋ᠦ᠍ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠥᠯᠥᠨ ᠬᠥᠬᠡ ᠴᠢᠨᠣᠠ ᠶ᠋ᠢ ᠪᠠᠷᠢᠨ ᠠᠪᠴᠤ ᠠᠬᠠᠷ ᠰᠡᠭᠦᠯ ᠡᠴᠡ ᠨᠢ ᠠᠪᠤᠭᠠᠳ ᠰᠠᠷᠢᠰᠤᠨ ᠬᠠᠮᠠᠷ ᠢ᠋ ᠨᠢ ᠬᠦᠷᠲᠡᠯᠡ ᠠᠷᠠᠰᠤ ᠶ᠋ᠢ ᠨᠢ ᠥᠪᠴᠢᠵᠦ ᠶᠠᠪᠤᠭᠤᠯᠵᠠᠢ᠃
ᠴᠢᠨᠣᠠ ᠠᠭᠤᠷᠯᠠᠨ ᠥᠯ ᠢ᠋ᠶ᠋ᠡᠨ ᠳᠠᠷᠤᠭᠰᠠᠨ ᠦᠭᠡᠢ ᠮᠥᠷᠲᠡᠭᠡᠨ ᠥᠪᠡᠷ ᠦ᠋ᠨ ᠠᠷᠠᠰᠤ ᠪᠠᠨ ᠥᠪᠴᠢᠭᠦᠯᠦᠯᠡ ᠭᠡᠵᠦ ᠬᠤᠷᠮᠤᠰᠲᠠ ᠳ᠋ᠤ᠌ ᠣᠴᠢᠵᠤ ᠵᠠᠭᠠᠯᠳᠤᠵᠠᠢ᠃ ᠬᠤᠷᠮᠤᠰᠲᠠ ᠪᠠᠰᠠ ᠥᠯ ᠬᠣᠭᠣᠯᠠ ᠵᠠᠯᠭᠠᠳᠠᠭ᠂ ᠡᠮᠦᠨᠡ ᠬᠣᠢᠨᠠ ᠨᠢ ᠭᠦᠶᠦᠳᠡᠭ ᠥᠯᠥᠨ ᠬᠥᠬᠡ ᠴᠢᠨᠣᠠ ᠶ᠋ᠢ ᠮᠢᠨᠢ ᠢᠩᠭᠢᠯᠡ ᠭᠡᠵᠦ ᠪᠣᠰᠢᠭᠣ ᠭᠠᠪᠰᠢᠭᠠᠢ ᠶ᠋ᠢ ᠶᠠᠪᠤᠭᠤᠯᠵᠤ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠢ᠋ ᠠᠯᠠᠭᠠᠳ ᠢᠷᠡ ᠭᠡᠳ ᠶᠠᠪᠤᠭᠤᠯᠵᠠᠢ᠃
ᠪᠣᠷᠣᠯᠳᠠᠢ ᠡᠪᠦᠭᠡᠨ ᠡᠨᠡ ᠪᠠᠷᠤᠭ ᠢ᠋ ᠨᠢ ᠮᠡᠳᠡᠵᠦ᠂ ᠪᠣᠷᠣ ᠳᠠᠬᠤ ᠪᠠᠨ ᠪᠣᠰᠤᠭᠠ ᠬᠥᠮᠦᠨ ᠰᠢᠭ ᠪᠣᠯᠭᠠᠨ ᠲᠠᠯᠪᠢᠵᠤ᠂ ᠥᠪᠡᠷᠲᠡᠭᠡᠨ ᠰᠠᠭᠤᠭᠠᠯᠢ(ᠭᠥᠷᠥᠭᠡᠰᠦ ᠠᠯᠠᠬᠤ ᠳ᠋ᠤ᠌ ᠬᠡᠪᠲᠡᠳᠡᠭ ᠨᠦᠬᠡ) ᠳ᠋ᠦ᠍ ᠬᠡᠪᠲᠡᠵᠦ ᠪᠠᠢᠲᠠᠯᠠ᠂ ᠪᠤᠰᠢᠭᠤ ᠭᠠᠪᠰᠢᠭᠠᠢ ᠢᠷᠡᠵᠦ ᠪᠣᠷᠣᠯᠠᠭ ᠬᠣᠨᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠪᠣᠰᠤᠭᠠ ᠵᠣᠭᠰᠣᠬᠤ ᠶ᠋ᠢ ᠨᠢ ᠦᠵᠡᠵᠦ ᠪᠣᠰᠬᠠᠭᠰᠠᠨ ᠳᠠᠬᠤ ᠶ᠋ᠢ ᠨᠢ ᠪᠤᠲᠠᠷᠠᠲᠠᠯᠠ ᠴᠣᠬᠢᠬᠤ ᠳ᠋ᠤ᠌᠂ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠰᠡᠮᠡᠬᠡᠷ ᠦᠵᠡᠵᠦ ᠯᠤᠤ ᠶ᠋ᠢᠨ ᠲᠣᠯᠣᠭᠠᠢ ᠰᠡᠢᠯᠦᠭᠰᠡᠨ᠂ ᠯᠤᠲᠤ ᠪᠦᠳᠦᠭᠦᠨ ᠲᠠᠶᠠᠭ ᠢ᠋ᠶ᠋ᠠᠨ ᠪᠠᠷᠢᠵᠤ᠂ ᠠᠷᠰᠯᠠᠨ ᠲᠣᠯᠣᠭᠠᠢ ᠰᠡᠢᠯᠦᠭᠰᠡᠨ᠂ ᠠᠶᠤᠯᠲᠤ ᠪᠦᠳᠦᠭᠦᠨ ᠲᠠᠶᠠᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠡᠭᠡᠯᠵᠢᠨ ᠰᠣᠯᠢᠨ ᠪᠠᠯᠪᠠᠭᠰᠠᠨ ᠳ᠋ᠤ᠌᠂ ᠪᠣᠰᠢᠭᠣ ᠭᠠᠪᠰᠢᠭᠠᠢ ᠶ᠋ᠢᠨ ᠳᠠᠯᠤ ᠮᠥᠷᠥ ᠨᠢ ᠳᠡᠯᠪᠡᠷᠡᠵᠦ᠂ ᠲᠠᠰᠢᠶᠠᠨ ᠤ᠋ ᠲᠣᠯᠣᠭᠠᠢ ᠨᠢ ᠬᠡᠮᠬᠡᠷᠡᠵᠦ᠂ ᠥᠨᠳᠡᠰ ᠥᠨᠳᠡᠰ ᠪᠥᠮᠪᠥᠭᠡᠨᠡᠵᠦ ᠥᠷᠥᠭᠡᠯ ᠳᠣᠭᠣᠯᠠᠩ᠂ ᠳᠣᠬᠢᠯᠵᠠᠵᠤ ᠬᠠᠷᠢᠭᠠᠳ ᠬᠠᠨ ᠬᠤᠷᠮᠤᠰᠲᠠ ᠳ᠋ᠠᠭᠠᠨ ᠵᠠᠭᠠᠯᠳᠤᠵᠠᠢ᠃
ᠬᠠᠨ ᠬᠤᠷᠮᠤᠰᠲᠠ ᠶ᠋ᠢᠨ ᠬᠠᠷᠠ ᠠᠭᠤᠷ ᠨᠢ ᠬᠦᠷᠴᠦ᠂ ᠬᠠᠮᠤᠭ ᠢ᠋ ᠳᠡᠢᠯᠦᠭᠴᠢ ᠳᠣᠯᠣᠭᠠᠨ ᠴᠢᠳᠬᠥᠷ ᠢ᠋ ᠶᠠᠪᠤᠭᠤᠯᠵᠤ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠢ᠋ ᠨᠢᠲᠤᠯᠤᠭᠠᠳ ᠢᠷᠡ ᠭᠡᠳ ᠶᠠᠪᠤᠭᠤᠯᠵᠠᠢ᠃
ᠪᠣᠷᠣᠯᠳᠠᠢ ᠡᠪᠦᠭᠡᠨ ᠪᠣᠷᠣ ᠮᠣᠷᠢᠨ ᠤ᠋ ᠪᠠᠨ ᠪᠤᠵᠠᠷ ᠤ᠋ᠨ ᠮᠢᠬᠠ ᠶ᠋ᠢ ᠴᠢᠨᠠᠵᠤ ᠭᠠᠷᠭᠠᠭᠠᠳ᠂ ᠤᠯᠠᠭᠠᠨ ᠲᠣᠷᠭᠠᠨ ᠴᠣᠭ ᠤ᠋ᠨ ᠳᠡᠭᠡᠷᠡ ᠲᠣᠰᠣ ᠲᠠᠢ ᠤᠬᠢᠶᠠᠳᠠᠰᠤ ᠳᠠᠷᠭᠢᠯᠠᠭᠤᠯᠵᠤ ᠠᠯᠲᠠᠨ ᠬᠠᠷᠭᠠᠨᠠ ᠶ᠋ᠢᠨ ᠱᠦᠭᠦᠷ ᠢ᠋ᠶ᠋ᠡᠨ ᠪᠠᠷᠢᠵᠤ᠂ ᠠᠭᠠᠵᠢᠮᠬᠠᠨ ᠤᠬᠢᠶᠠᠵᠤ ᠪᠠᠢᠲᠠᠯᠠ᠂ ᠬᠠᠮᠤᠭ ᠢ᠋ ᠳᠡᠢᠯᠦᠭᠴᠢ ᠳᠣᠯᠣᠭᠠ ᠬᠠᠷᠢᠨ ᠪᠠᠬᠠᠨ ᠰᠦᠷᠳᠡᠵᠦ᠂ ᠪᠣᠷᠣ ᠭᠡᠷ ᠦ᠋ᠨ ᠭᠠᠳᠠᠨᠠ ᠨᠢ ᠪᠣᠪᠣᠷ ᠪᠣᠪᠣᠷ ᠭᠡᠯᠳᠦᠨ᠂ ᠬᠠᠷᠠ ᠭᠡᠷ ᠦ᠋ᠨ ᠭᠠᠳᠠᠨᠠ ᠨᠢ ᠬᠠᠪᠢᠷ ᠬᠠᠪᠢᠷ ᠭᠡᠯᠳᠦᠨ᠂ ᠴᠢ ᠲᠡᠷᠢᠭᠦᠯᠡ ᠭᠡᠲᠡᠯᠡ ᠪᠢ ᠰᠡᠭᠦᠯ ᠳ᠋ᠦ᠍ᠨᠢ ᠭᠡᠵᠡᠭᠡᠭᠡᠳ᠂ ᠠᠷᠭᠠ ᠶᠠᠳᠠᠬᠤ ᠳ᠋ᠠᠭᠠᠨ ᠪᠣᠷᠣ ᠢᠰᠡᠭᠡᠢ ᠶ᠋ᠢ ᠨᠢ ᠴᠤᠭᠤᠯᠤᠭᠠᠳ ᠬᠠᠷᠠᠮᠠᠭᠴᠠ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠪᠤᠴᠠᠯᠵᠤ ᠪᠠᠢᠭᠰᠠᠨ ᠤᠬᠢᠶᠠᠳᠠᠰᠤ ᠪᠠᠨ ᠭᠠᠭᠴᠠᠬᠠᠨ ᠰᠠᠴᠤᠮᠠᠭᠴᠨ᠂ ᠬᠠᠮᠤᠭ ᠢ᠋ ᠲᠠᠢᠯᠤᠭᠴᠢ ᠳᠣᠯᠣᠭᠠ ᠶ᠋ᠢᠨ ᠬᠠᠷᠠᠬᠤ ᠨᠢᠳᠦ ᠨᠢ ᠬᠠᠷᠠᠩᠭᠤᠢᠳᠠᠵᠤ᠂ ᠦᠵᠡᠬᠦ ᠨᠢᠳᠦᠨ ᠨᠢ ᠡᠭᠦᠯᠡᠲᠦᠵᠦ᠂ ᠳᠡᠭᠡᠷᠡ ᠳᠣᠣᠷᠠ ᠠᠯᠬᠤᠭᠰᠠᠭᠠᠷ᠂ ᠳᠡᠮᠡᠢ ᠪᠠᠯᠠᠢ ᠲᠡᠨᠦᠭᠰᠡᠭᠡᠷ ᠬᠠᠨ ᠬᠤᠷᠮᠤᠰᠲᠠ ᠳ᠋ᠠᠭᠠᠨ ᠵᠠᠭᠠᠯᠳᠤᠵᠠᠢ᠃
ᠬᠠᠨ ᠬᠤᠷᠮᠤᠰᠲᠠ ᠶ᠋ᠢᠨ ᠬᠠᠷᠠ ᠠᠭᠤᠷ ᠨᠢ ᠬᠦᠷᠴᠦ᠂ ᠬᠠᠮᠤᠭ ᠪᠡᠶᠡ ᠨᠢ ᠴᠡᠴᠡᠷᠡᠵᠦ᠂ ᠤᠰᠤ ᠪᠠᠷ ᠨᠢᠯᠪᠤᠵᠤ᠂ ᠴᠢᠰᠤ ᠪᠠᠷ ᠣᠭᠰᠢᠵᠤ᠂ ᠬᠤᠷᠮᠤᠰᠲᠠ ᠬᠠᠭᠠᠨ ᠰᠢᠯᠵᠢᠵᠦ᠂ ᠬᠣᠷᠸᠠ ᠶᠢᠷᠲᠢᠨᠴᠦ ᠳ᠋ᠦ᠍ ᠪᠠᠭᠤᠵᠤ᠂ ᠪᠣᠭᠳᠠ ᠬᠠᠭᠠᠨ ᠰᠢᠯᠵᠢᠵᠦ᠂ ᠪᠣᠱᠣᠭᠠ ᠡᠭᠦᠳᠡ ᠪᠡᠨ ᠠᠯᠬᠤᠵᠤ᠂ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠲᠡᠢ ᠶᠣᠰᠣ ᠬᠡᠯᠡᠯᠴᠡᠬᠦ ᠪᠡᠷ ᠢᠷᠡᠵᠦ᠄《ᠴᠢ ᠮᠢᠨᠦ ᠲᠡᠮᠦᠷ ᠬᠣᠰᠢᠭᠤ ᠲᠠᠢ ᠬᠡᠷᠢᠶᠡ ᠶ᠋ᠢᠨ ᠬᠣᠩᠰᠢᠶᠠᠷ ᠢ᠋ ᠶᠠᠭᠤᠨ ᠳ᠋ᠤ᠌ ᠡᠪᠡᠷ ᠬᠣᠰᠢᠭᠤ ᠪᠣᠯᠭᠠᠪᠠ᠃》 ᠭᠡᠵᠡᠢ᠃ ᠪᠣᠷᠣᠯᠳᠠᠢ ᠡᠪᠦᠭᠡᠨ᠄《ᠪᠢ ᠨᠢᠭᠡᠨ ᠨᠠᠰᠤᠨ ᠳ᠋ᠠᠭᠠᠨ ᠪᠣᠷᠣ ᠬᠤᠷᠠᠭᠠ ᠭᠠᠷᠪᠠᠯ᠂ ᠪᠣᠭᠳᠠ ᠲᠩᠷᠢ ᠶ᠋ᠢ ᠲᠠᠬᠢᠶᠠ᠃ ᠬᠤᠨ ᠬᠤᠷᠠᠭᠠ ᠭᠠᠷᠪᠠᠯ᠂ ᠬᠤᠷᠮᠤᠰᠲᠠ ᠲᠩᠷᠢ ᠶ᠋ᠢ ᠲᠠᠬᠢᠶᠠ ᠭᠡᠵᠦ ᠪᠠᠢᠲᠠᠯᠠ᠂ ᠬᠣᠪᠴᠢ ᠬᠠᠷᠠ ᠬᠡᠷᠢᠶᠡ ᠪᠡᠨ ᠶᠠᠪᠤᠭᠤᠯᠤᠭᠠᠳ ᠬᠤᠷᠠᠭᠠᠨ ᠤ᠋ ᠮᠢᠨᠢ ᠨᠢᠳᠦ ᠶ᠋ᠢ ᠮᠠᠯᠲᠠᠭᠤᠯᠬᠤᠯᠠᠷ ᠨᠢ᠂ ᠲᠩᠷᠢ ᠨᠠᠮᠠᠶ᠋ᠢ ᠦᠵᠡᠬᠦ ᠦᠭᠡᠢ ᠶᠦᠮ᠃ ᠲᠡᠨᠡᠭ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠬᠦ ᠦᠭᠡᠢ ᠶᠦᠮ ᠭᠡᠳ ᠲᠡᠮᠦᠷ ᠬᠣᠰᠢᠭᠤ ᠶ᠋ᠢ ᠨᠢ ᠠᠪᠤᠭᠠᠳ᠂ ᠡᠪᠡᠷ ᠬᠣᠰᠢᠭᠤ ᠬᠢᠭᠰᠡᠨ ᠨᠢ ᠡᠪᠦᠭᠡᠨ ᠮᠢᠨᠦ ᠥᠷᠥᠰᠢᠶᠡᠭᠰᠡᠨ ᠬᠡᠷᠡᠭ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ》 ᠭᠡᠵᠡᠢ᠃
ᠬᠤᠷᠮᠤᠰᠲᠠ᠄《ᠴᠢᠩᠭᠢᠭᠡᠳ ᠴᠢ ᠶᠠᠭᠤᠨ ᠳ᠋ᠤ᠌ ᠴᠢᠨᠣᠠ ᠶ᠋ᠢᠨ ᠮᠢᠨᠢ ᠠᠷᠠᠰᠤ ᠶ᠋ᠢ ᠥᠪᠴᠢᠪᠡ?》 ᠭᠡᠵᠡᠢ᠃ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠬᠡᠯᠡᠵᠡᠢ᠄《ᠰᠠᠨᠰᠠᠷ ᠲᠩᠷᠢ ᠶ᠋ᠢᠨ ᠡᠯᠴᠢ ᠭᠡᠵᠦ ᠪᠠᠢᠭᠠᠳ ᠰᠠᠢᠨ ᠪᠣᠷᠣ ᠮᠣᠷᠢ ᠶ᠋ᠢ ᠨᠢ ᠢᠳᠡᠭᠡᠳ ᠢᠷᠡ ᠭᠡᠵᠦ ᠪᠠᠢᠲᠠᠯᠠ᠂ ᠰᠠᠢᠨ ᠮᠠᠭᠤ ᠬᠣᠶᠠᠷ ᠮᠣᠷᠢ ᠶ᠋ᠢ ᠢᠯᠭᠠᠬᠤ ᠦᠭᠡᠢ᠂ ᠮᠠᠭᠤ ᠪᠣᠷᠣ ᠮᠣᠷᠢ ᠶ᠋ᠢ ᠮᠢᠨᠢ ᠢᠳᠡᠬᠦᠯᠡᠷ ᠨᠢ᠂ ᠰᠠᠨᠰᠠᠷ ᠲᠩᠷᠢ ᠶ᠋ᠢᠨ ᠵᠠᠷᠯᠢᠭ ᠢ᠋ ᠰᠠᠭᠠᠷᠮᠠᠭᠳᠠᠭᠤᠯᠠᠵᠤ ᠶᠠᠪᠤᠳᠠᠭ ᠳᠠᠮᠰᠢᠭ ᠭᠡᠳ ᠠᠷᠠᠰᠤ ᠶ᠋ᠢ ᠨᠢ ᠥᠪᠴᠢᠭᠰᠡᠨ ᠨᠢ ᠦᠨᠡᠨ》 ᠭᠡᠵᠡᠢ᠃
ᠬᠤᠷᠮᠤᠰᠲᠠ᠄《ᠴᠢᠩᠭᠢᠭᠡᠳ ᠴᠢ ᠶᠠᠭᠤᠨ ᠳ᠋ᠤ᠌ ᠮᠢᠨᠦ ᠪᠣᠰᠢᠭᠣ ᠭᠠᠪᠰᠢᠭᠠᠢ ᠶ᠋ᠢ ᠥᠷᠥᠭᠡᠯ ᠳᠣᠭᠣᠯᠠᠩ ᠪᠣᠯᠭᠠᠪᠠ?》 ᠭᠡᠵᠡᠢ᠃ ᠪᠣᠷᠣᠯᠳᠠᠢ ᠡᠪᠦᠭᠡᠨ᠄《ᠪᠣᠭᠳᠠ ᠡᠵᠡᠨ ᠲᠠᠨ ᠤ᠋ ᠵᠠᠷᠯᠢᠭ ᠪᠣᠰᠢᠭᠣ ᠭᠠᠪᠰᠢᠭᠠᠢ ᠪᠠᠨ ᠶᠠᠪᠤᠭᠤᠯᠤᠭᠠᠳ᠂ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠢ᠋ ᠠᠯᠠᠭᠠᠳ ᠢᠷᠡ ᠭᠡᠰᠡᠨ ᠪᠣᠯᠬᠤ ᠠ᠋ᠴᠠ ᠪᠢᠰᠢ᠂ ᠪᠣᠷᠣ ᠳᠠᠬᠤᠨ ᠮᠠᠨᠠᠭᠤᠯ ᠢ᠋ ᠨᠢ ᠤᠨᠠᠭᠠᠴᠢᠭᠠᠳ ᠢᠷᠡ ᠭᠡᠵᠦ ᠬᠡᠯᠡᠪᠡ ᠭᠡᠵᠦ ᠤᠤ》 ᠭᠡᠵᠡᠢ᠃
ᠬᠤᠷᠮᠤᠰᠲᠠ᠄《ᠴᠢᠩᠭᠢᠭᠡᠳ ᠴᠢ ᠶᠠᠭᠤᠨ ᠳ᠋ᠤ᠌ ᠮᠢᠨᠦ ᠬᠠᠮᠤᠭ ᠢ᠋ ᠳᠡᠢᠯᠦᠭᠴᠢ ᠳᠣᠯᠣᠭᠠ ᠶ᠋ᠢᠨ ᠨᠢᠳᠦ ᠶ᠋ᠢ ᠨᠢ ᠰᠣᠬᠣᠯᠪᠠ!》 ᠭᠡᠵᠡᠢ᠃ ᠪᠣᠷᠣᠯᠳᠠᠢ ᠡᠪᠦᠭᠡᠨ᠄《ᠬᠠᠨ ᠬᠤᠷᠮᠤᠰᠲᠠ ᠲᠠᠨ ᠤ᠋ ᠵᠠᠷᠯᠢᠭ᠂ ᠬᠠᠮᠤᠭ ᠢ᠋ ᠲᠠᠢᠯᠤᠭᠴᠢ ᠳᠣᠯᠣᠭᠠ ᠪᠠᠨ ᠶᠠᠪᠤᠭᠤᠯᠤᠭᠠᠳ ᠬᠠᠷᠠᠴᠤ ᠪᠣᠷᠣᠯᠳᠠᠢ ᠶ᠋ᠢ ᠪᠠᠷᠢᠵᠤ ᠠᠪ ᠭᠡᠰᠡᠨ ᠪᠣᠯᠬᠤ ᠠ᠋ᠴᠠ ᠪᠢᠰᠢ᠂ ᠬᠠᠷᠠ ᠢᠰᠡᠭᠡᠢ ᠶ᠋ᠢ ᠨᠢ ᠴᠤᠭᠤᠯᠤᠭᠠᠳ᠂ ᠬᠠᠨᠠ ᠶ᠋ᠢᠨ ᠨᠦᠬᠡ ᠪᠡᠷ ᠨᠢ ᠱᠠᠭᠠᠢᠭᠠᠳ ᠢᠷᠡ ᠭᠡᠵᠦ ᠬᠡᠯᠡᠪᠡ ᠭᠡᠵᠦ ᠤᠤ?》 ᠭᠡᠵᠡᠢ᠃
ᠬᠤᠷᠮᠤᠰᠲᠠ ᠡᠨᠡ ᠴᠢᠨᠢ ᠳᠣᠯᠣᠭᠠᠨ ᠵᠥᠪ ᠭᠡᠵᠦ ᠠᠮᠠ ᠨᠡᠭᠡᠭᠡᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠤ᠂ ᠠᠷᠤ ᠰᠢᠯᠢ ᠪᠡᠨ ᠮᠠᠭᠠᠵᠢᠵᠤ᠂ ᠬᠡᠯᠡᠬᠦ ᠶᠠᠷᠢᠬᠤ ᠦᠭᠡ ᠦᠭᠡᠢ ᠪᠣᠯᠵᠤ᠂ ᠬᠡᠬᠦᠳᠡᠭ ᠴᠡᠭᠡᠵᠢ ᠪᠡᠨ ᠴᠣᠬᠢᠯᠵᠤ᠂ ᠬᠤᠷᠭᠠᠵᠤ ᠣᠷᠣᠬᠤ ᠪᠣᠷᠣᠭᠠᠨ ᠰᠢᠭ᠋᠂ ᠬᠤᠢᠯᠠᠷᠠᠵᠤ ᠬᠡᠢᠰᠬᠦ ᠰᠠᠯᠬᠢᠨ ᠰᠢᠭ᠋᠂ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠠᠯᠠᠭᠠ ᠪᠣᠯᠵᠠᠢ᠃
ᠪᠣᠷᠣᠯᠳᠠᠢ ᠡᠪᠦᠭᠡᠨ ᠪᠣᠭᠳᠠ ᠬᠤᠷᠮᠤᠰᠲᠠ ᠶ᠋ᠢᠨ ᠡᠮᠦᠨᠡ ᠪᠤᠴᠠᠯᠲᠠ ᠦᠭᠡᠢ ᠬᠡᠯᠡᠯᠴᠡᠵᠦ᠂ ᠪᠤᠷᠤᠭᠤ ᠵᠥᠪ ᠢ᠋ᠶ᠋ᠡᠨ ᠢᠯᠭᠠᠵᠤ᠂ ᠬᠠᠨ ᠬᠤᠷᠮᠤᠰᠲᠠ ᠲᠠᠢ ᠲᠡᠮᠡᠴᠡᠵᠦ᠂ ᠬᠠᠯᠠᠰᠢᠷᠠᠯ ᠦᠭᠡᠢ ᠬᠡᠯᠡᠯᠴᠡᠴᠦ ᠬᠠᠮᠤᠭ ᠵᠥᠪ ᠢ᠋ᠶ᠋ᠡᠨ ᠠᠪᠴᠤ᠂ ᠪᠣᠷᠣ ᠬᠣᠨᠢ ᠪᠠᠨ ᠥᠰᠬᠡᠵᠦ᠂ ᠪᠤᠮ ᠲᠦᠮᠡ ᠪᠣᠯᠭᠠᠵᠤ᠂ ᠪᠣᠯᠵᠣᠭᠠᠲᠤ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠪᠦᠷᠬᠦᠭᠦᠯᠵᠦ᠂ ᠬᠤᠨ ᠬᠣᠨᠢ ᠪᠠᠨ ᠥᠰᠬᠡᠵᠦ᠂ ᠬᠣᠷᠣᠭᠠᠨ ᠳ᠋ᠤ᠌ ᠪᠠᠭᠲᠠᠬᠤ ᠦᠭᠡᠢ ᠪᠣᠯᠭᠠᠵᠤ᠂ ᠬᠤᠮᠠᠬᠢ ᠶ᠋ᠢᠨ ᠲᠣᠭᠣᠰᠣ ᠰᠢᠭ᠋ ᠣᠯᠠᠰᠢᠷᠠᠭᠤᠯᠵᠤ᠂ ᠠᠢᠯ ᠤ᠋ᠨ ᠳᠤᠮᠳᠠ ᠪᠠᠨ ᠠᠬᠠᠮᠠᠳ᠂ ᠠᠵᠢᠯ ᠤ᠋ᠨ ᠳᠤᠮᠳᠠ ᠪᠠᠨ ᠮᠠᠩᠯᠠᠢ᠂ ᠪᠤᠶᠠᠨ ᠶᠡᠬᠡᠲᠡᠢ ᠪᠣᠷᠣᠯᠳᠠᠢ ᠡᠪᠦᠭᠡᠨ ᠠᠯᠳᠠᠷᠲᠠᠢ ᠪᠣᠯᠤᠭᠠᠳ ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠵᠢᠷᠭᠠᠵᠤ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂ ᠪᠠᠢ·ᠰᠠᠷᠠᠨᠠ᠂
ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ᠂ ᠭᠡᠷᠡᠯ᠂ ᠡᠷᠴᠢᠨ᠂ ᠠᠯᠲᠠᠨᠴᠡᠴᠡᠭ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠭᠠᠷᠮᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠣᠶᠤᠨᠴᠢᠮᠡᠭ᠂ ᠬᠡᠯᠡᠰᠣᠶᠣᠯ(ᠪᠤᠤ ᠸᠧᠨ ᠬᠤᠸᠠ)᠂ ᠭᠡᠷᠡᠯ᠂ ᠮᠣᠩᠭᠣᠯ ᠰᠦᠨᠡᠰᠦ