ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠵᠢᠷᠭᠤᠭᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -16
123ᠬᠦᠨᠳᠦ ᠡᠷᠡᠭᠦᠦ ᠰᠢᠭᠦᠯᠲᠡ
— ᠲᠠᠨ ᠤ᠋ ᠪᠡᠶᠡ ᠠᠱ᠌ᠢᠭᠦᠢ ᠵᠦᠭᠡᠷ ᠤᠤ᠂ ᠲᠠᠪᠠᠲᠠᠢ ᠨᠣᠢᠷᠰᠤᠵᠤ ᠬᠣᠨᠣᠭᠠ ᠪᠢᠵᠡ ᠳᠡ? ᠦᠨᠡᠨ ᠢ᠋ ᠬᠡᠯᠡᠬᠦ ᠳ᠋ᠦ᠍ ᠥᠴᠥᠭᠡᠳᠦᠷ ᠲᠠ ᠪᠢᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠲᠤᠩ ᠡᠪ ᠦᠭᠡᠢ ᠶᠠᠪᠤᠳᠠᠯ ᠪᠣᠯᠤᠭᠰᠠᠨ ᠪᠠᠢᠨᠠ᠃ ᠬᠠᠷᠢᠨ ᠥᠨᠥᠳᠥᠷ ᠡᠪ ᠲᠡᠢ ᠰᠠᠢᠬᠠᠨ ᠶᠠᠷᠢᠯᠴᠠᠨᠠ ᠰᠢᠦ ᠳᠡ ᠭᠡᠵᠦ ᠥᠭᠦᠯᠡᠪᠦᠷᠢ ᠪᠣᠯᠭᠠᠨ ᠳᠡᠭᠡᠷᠡ ᠪᠡᠨ ᠢᠨᠢᠶᠡᠮᠰᠦᠭᠯᠡᠨ ᠪᠠᠢᠴᠠᠭᠠᠯᠲᠠ ᠪᠠᠨ ᠡᠬᠢᠯᠡᠪᠡ᠃ ᠳᠠᠮᠵᠢᠭᠤᠯᠬᠤ ᠭᠡᠰᠡᠨ ᠶᠦᠮ ᠰᠢᠭ ᠠᠶᠠᠲᠠᠢᠬᠠᠨ ᠵᠠᠩ ᠭᠠᠷᠭᠠᠨᠠ᠃
ᠪᠠᠯᠳᠠᠨᠴᠡᠷᠢᠩ ᠳᠠᠭᠤ ᠦᠭᠡᠢ ᠯᠡ ᠪᠠᠢᠯᠠ᠃
— ᠲᠠ ᠶᠠᠭᠤᠨ ᠳ᠋ᠤ᠌ ᠳᠠᠭᠤ ᠦᠭᠡᠢ ᠪᠠᠢᠨᠠ? ᠠᠷᠠᠢ ᠨᠠᠳᠠ ᠲᠠᠢ ᠳᠤᠤᠭᠠᠷᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠨ ᠶᠠᠭᠤᠮᠠ ᠪᠢᠰᠢ ᠪᠣᠢ ᠊ᠶᠠ? ᠬᠡᠷᠪᠡ ᠲᠡᠢᠮᠦ ᠪᠣᠯ ᠳᠡᠮᠡᠢ! ᠲᠤᠩ ᠳᠡᠮᠡᠢ! ᠨᠢᠭᠡ ᠳ᠋ᠦ᠍᠂ ᠪᠢ ᠲᠠᠨ ᠢ᠋ ᠶᠠᠮᠠᠷ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠤᠷᠠ ᠪᠠᠷ ᠡᠮᠦᠨᠡ ᠪᠡᠨ ᠠᠪᠴᠢᠷᠠᠨ ᠪᠠᠢᠴᠠᠭᠠᠵᠤ ᠪᠠᠢᠭᠠ ᠪᠢᠰᠢ᠂ ᠬᠣᠶᠠᠷ ᠲᠤ᠂ ᠪᠢ ᠪᠣᠯ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠡᠭᠡᠳᠦ ᠨᠣᠶᠠᠳ ᠳᠠᠷᠤᠭᠠ ᠨᠠᠷ ᠤ᠋ᠨ ᠲᠤᠰᠢᠶᠠᠯ ᠢ᠋ ᠦᠭᠡ ᠳᠠᠭᠤ ᠦᠭᠡᠢ ᠭᠦᠢᠴᠡᠳᠬᠡᠬᠦ ᠡᠭᠦᠷᠭᠡ ᠲᠡᠢ ᠴᠡᠷᠢᠭ ᠦ᠋ᠨ ᠬᠥᠮᠦᠨ᠃ ᠡᠨᠡ ᠤᠴᠢᠷ ᠠ᠋ᠴᠠ ᠲᠠ ᠶᠠᠮᠠᠷ ᠪᠣᠯᠪᠠᠴᠤ ᠪᠠᠢᠴᠠᠭᠠᠴᠢ ᠮᠢᠨᠦ ᠡᠮᠦᠨᠡ ᠴᠢᠩ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠦᠭᠡᠢ ᠪᠠᠢᠵᠤ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ᠃ ᠲᠠ ᠠᠰᠠᠭᠤᠭᠰᠠᠨ ᠪᠦᠬᠦᠨ ᠢ᠋ ᠦᠨᠡᠨ ᠮᠥᠨ ᠢ᠋ᠶ᠋ᠡᠷ ᠨᠢ ᠬᠠᠷᠢᠭᠤᠯᠵᠤ᠂ ᠥᠪᠡᠷ ᠲᠡᠭᠡᠨ ᠬᠠᠯᠠ ᠪᠡᠯᠡ ᠦᠭᠡᠢ ᠪᠡᠷ ᠡᠨᠳᠡᠴᠡ ᠮᠤᠯᠲᠤᠷᠠᠨ ᠭᠠᠷᠬᠤ ᠴᠤ᠌ ᠶᠣᠰᠣᠲᠠᠢ ᠰᠢᠦ ᠳᠡ᠃ ᠵᠠ ᠲᠠ ᠶᠠᠷᠢ᠃ ᠪᠢ ᠴᠦ᠍ ᠲᠠᠨ ᠤ᠋ ᠬᠡᠷᠡᠭ ᠢ᠋ ᠠᠯᠢ ᠪᠣᠯᠬᠣᠷ ᠬᠥᠩᠭᠡᠨ ᠪᠣᠯᠭᠠᠬᠤ ᠶ᠋ᠢ ᠪᠣᠳᠣᠵᠤ ᠦᠵᠡᠶᠡ᠃
— ᠪᠢ ᠲᠠᠨ ᠲᠠᠢ ᠶᠠᠷᠢᠯᠴᠠᠬᠤ ᠳ᠋ᠤ᠌ ᠪᠡᠯᠡᠬᠡᠨ ᠪᠠᠢᠨᠠ᠃ ᠭᠡᠪᠡᠴᠦ ᠨᠠᠮᠠᠶ᠋ᠢ ᠭᠡᠮᠲᠦ ᠡᠲᠡᠭᠡᠳ ᠭᠡᠵᠦ ᠦᠵᠡᠭᠡᠳ ᠬᠢᠭᠰᠡᠨ ᠬᠡᠷᠡᠭ ᠢ᠋ᠶ᠋ᠡᠨ ᠬᠡᠯᠡ ᠭᠡᠵᠦ ᠲᠤᠯᠭᠠᠵᠤ ᠪᠠᠢᠭᠠ ᠪᠣᠯᠬᠣᠷ ᠨᠠᠳᠠ ᠳ᠋ᠤ᠌ ᠶᠠᠷᠢᠬᠤ ᠶᠠᠭᠤᠮᠠ ᠠᠯᠠᠭᠠ᠃
— ᠡᠨᠡ ᠲᠠᠨ ᠤ᠋ ᠵᠥᠪ ᠪᠠᠢᠵᠤ ᠪᠣᠯᠤᠨᠠ᠃ ᠪᠢ ᠴᠦ᠍ ᠲᠠᠨ ᠢ᠋ ᠬᠦᠨᠳᠦ ᠬᠡᠷᠡᠭᠲᠡᠨ ᠭᠡᠵᠦ ᠦᠵᠡᠵᠦ ᠪᠠᠢᠭᠠ ᠪᠢᠰᠢ ᠰᠢᠦ᠃ ᠬᠦᠯᠢᠶᠡᠬᠦ ᠵᠦᠢᠯ ᠴᠢᠨᠢ ᠨᠢᠭᠡ ᠳ᠋ᠦ᠍ ᠲᠠ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠠᠭᠤᠯᠵᠠᠵᠤ ᠪᠠᠢᠭᠰᠠᠨ ᠤ᠋ ᠪᠠᠨ ᠤᠴᠢᠷ ᠢ᠋ ᠲᠣᠳᠣᠷᠬᠠᠢᠯᠠᠴᠢᠬᠠ! ᠬᠣᠶᠠᠷ ᠲᠤ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠶᠠᠭᠤ ᠶᠠᠭᠤ ᠬᠡᠯᠡᠵᠦ ᠪᠠᠢᠭᠰᠠᠨ ᠢ᠋ ᠨᠢᠭᠤᠯ ᠦᠭᠡᠢ ᠬᠡᠯᠡᠴᠢᠬᠡ! ᠢᠩᠭᠢᠭᠡᠳ ᠯᠡ ᠲᠠᠨ ᠤ᠋ ᠬᠡᠷᠡᠭ ᠭᠦᠢᠴᠡᠨᠡ᠃ ᠲᠠ ᠱᠣᠷᠣᠩ ᠠ᠋ᠴᠠ ᠭᠠᠷᠤᠨᠠ᠃
— ᠣᠢᠯᠠᠭᠠᠯᠠ! ᠭᠡᠲᠡᠯᠡ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠨᠠᠳᠠ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠠᠭᠤᠯᠵᠠᠵᠤ ᠪᠠᠢᠭᠰᠠᠨ ᠤᠳᠠᠭᠠ ᠠᠯᠠᠭᠠ᠃
— ᠠᠢ! ᠭᠡᠵᠦ ᠪᠠᠢᠴᠠᠭᠠᠴᠢ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ ᠰᠢᠷᠲᠡᠵᠦ᠄
— ᠨᠢᠮᠠᠵᠠᠪ ᠨᠣᠶᠠᠨ ᠰᠦᠬᠡᠪᠠᠭᠠᠲᠤᠷ ᠲᠠ ᠬᠣᠶᠠᠷ ᠤ᠋ᠨ ᠠᠭᠤᠯᠵᠠᠳᠠᠭ ᠪᠠᠢᠭᠰᠠᠨ ᠢ᠋ ᠬᠡᠯᠡᠵᠦ ᠪᠠᠢᠬᠤ ᠳ᠋ᠤ᠌ ᠲᠠ ᠢᠩᠭᠢᠵᠦ ᠬᠡᠯᠡᠵᠦ ᠶᠠᠭᠠᠬᠢᠵᠤ ᠪᠣᠯᠤᠨᠠ ᠪᠣᠢ?
— ᠲᠡᠷᠡ ᠪᠣᠯ ᠣᠷᠣ ᠦᠨᠳᠦᠰᠦ ᠦᠭᠡᠢ ᠵᠦᠢᠯ᠃
— ᠬᠡᠷᠪᠡ ᠲᠠ ᠢᠩᠭᠢᠵᠦ ᠵᠢᠳᠬᠦᠪᠡᠯ ᠪᠢ ᠲᠠᠨ ᠳ᠋ᠤ᠌ ᠡᠷᠡᠭᠦᠦ ᠰᠢᠭᠦᠯᠲᠡ ᠲᠤᠯᠭᠠᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠠᠯᠠᠭᠠ᠃
— ᠣᠳᠣ ᠲᠠ ᠪᠣᠳᠣ! ᠲᠠ ᠣᠳᠣ ᠥᠴᠥᠭᠡᠳᠦᠷ ᠦ᠋ᠨ ᠬᠢ ᠡᠴᠡ ᠪᠦᠷ ᠬᠡᠳᠦᠨ ᠬᠤᠪᠢ ᠬᠦᠨᠳᠦ ᠶᠠᠭᠤᠮᠠ ᠦᠵᠡᠬᠦ ᠪᠣᠯᠤᠨᠠ᠃
— ᠣᠳᠣ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠃
ᠪᠠᠢᠴᠠᠭᠠᠭᠴᠢ ᠠᠮᠠᠨ ᠳᠣᠲᠣᠷᠠ ᠪᠠᠨ ᠬᠠᠷᠢᠶᠠᠯ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠲᠦᠳᠡᠬᠡᠨ ᠴᠢᠷᠠᠢ ᠪᠠᠨ ᠲᠥᠪ ᠪᠣᠯᠭᠠᠵᠤ᠂ ᠤᠴᠠᠭᠠᠷᠯᠠᠬᠤ ᠪᠠᠢᠳᠠᠯ ᠳ᠋ᠤ᠌ ᠣᠷᠣᠯᠠ᠃ ᠲᠡᠭᠦᠨ ᠦ᠌ ᠦᠭᠡ ᠪᠡᠷ ᠪᠣᠯ ᠥᠪᠡᠷ ᠢ᠋ᠶ᠋ᠡᠨ《ᠨᠠᠨᠵᠢᠩ ᠬᠣᠲᠠ ᠳ᠋ᠤ᠌ ᠰᠢᠭᠦᠬᠦ ᠴᠠᠭᠠᠵᠠ ᠶ᠋ᠢᠨ ᠰᠤᠷᠭᠠᠭᠤᠯᠢ ᠲᠡᠭᠦᠰᠦᠭᠰᠡᠨ ᠬᠥᠮᠦᠨ ᠭᠡᠨᠡ᠃ ᠪᠠᠢᠴᠠᠭᠠᠨ ᠰᠢᠯᠭᠠᠬᠤ ᠲᠤᠬᠠᠢ ᠥᠭᠦᠯᠡᠬᠦ ᠳ᠋ᠡᠭᠡᠨ᠂ ᠬᠡᠷᠡᠭᠲᠡᠨ ᠡᠲᠡᠭᠡᠳ ᠢ᠋ ᠰᠢᠭᠦᠯᠲᠡ ᠪᠡᠷ ᠬᠠᠳᠠᠭᠤᠯᠬᠤ ᠨᠢ ᠵᠦᠢ ᠶ᠋ᠢᠨ ᠬᠡᠷᠡᠭ ᠪᠣᠯᠪᠠᠴᠤ ᠦᠨᠡᠨ ᠵᠥᠪ ᠢ᠋ ᠣᠯᠬᠤ ᠳ᠋ᠤ᠌ ᠵᠣᠬᠢᠰ ᠲᠠᠢ ᠠᠷᠭᠠ ᠪᠢᠰᠢ》 ᠭᠡᠨᠡ᠃ ᠶᠠᠭᠠᠬᠢᠭᠠᠳ ᠪᠣᠢ? ᠭᠡᠵᠦ ᠪᠠᠢᠴᠠᠭᠠᠴᠢ ᠠᠰᠠᠭᠤᠯᠲᠠ ᠲᠠᠯᠪᠢᠨ ᠥᠪᠡᠷ ᠢ᠋ᠶ᠋ᠡᠨ ᠬᠠᠷᠢᠭᠤᠯᠬᠤ ᠳ᠋ᠠᠭᠠᠨ᠂《ᠬᠥᠮᠦᠨ ᠵᠣᠪᠠᠨ ᠲᠠᠷᠴᠢᠯᠠᠵᠤ ᠠᠶᠤᠨ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠪᠤᠷᠤᠭᠤ ᠵᠥᠷᠢᠭᠦᠦ ᠮᠡᠳᠡᠭᠦᠯᠭᠡ ᠭᠠᠷᠭᠠᠨ᠂ ᠪᠠᠢᠴᠠᠭᠠᠭᠴᠢ ᠶ᠋ᠢᠨ ᠲᠠᠯᠠ ᠠ᠋ᠴᠠ ᠦᠨᠡᠨ ᠢ᠋ ᠨᠢ ᠰᠢᠯᠭᠠᠨ ᠣᠯᠬᠤ ᠶᠠᠪᠤᠳᠠᠯ ᠳ᠋ᠤ᠌ ᠪᠡᠷᠬᠡᠰᠢᠶᠡᠯ ᠤᠴᠠᠷᠠᠭᠤᠯᠤᠨᠠ ᠭᠡᠨᠡ᠃ ᠲᠡᠭᠦᠪᠡᠷ ᠴᠦ᠍ ᠪᠠᠷᠠᠬᠤ ᠦᠭᠡᠢ ᠵᠠᠷᠢᠮ ᠬᠡᠷᠡᠭᠲᠡᠨ ᠬᠦᠨᠳᠦ ᠡᠷᠡᠭᠦᠦ ᠰᠢᠭᠦᠯᠲᠡ ᠡᠴᠡ ᠪᠣᠯᠤᠨ ᠥᠴᠢᠨᠡᠨ ᠲᠥᠴᠢᠨᠡᠨ ᠢᠯᠡᠭᠦᠦ ᠶᠠᠭᠤᠮᠠ ᠥᠪᠡᠷ ᠳᠡᠭᠡᠷᠡ ᠪᠡᠨ ᠣᠪᠣᠭᠠᠯᠠᠨ ᠣᠨᠣᠭᠳᠠᠬᠤ ᠶᠠᠯᠠ ᠪᠠᠨ ᠬᠦᠨᠳᠦᠷᠡᠭᠦᠯᠬᠦ ᠴᠦ᠍ ᠶᠠᠪᠤᠳᠠᠯ ᠪᠣᠢ》 ᠭᠡᠵᠦ ᠪᠠᠢᠴᠠᠭᠠᠭᠴᠢ ᠦᠨᠡᠬᠡᠷ ᠠᠷᠢᠭᠤᠨ ᠰᠢᠳᠤᠷᠭᠤ ᠰᠢᠭᠦᠭᠴᠢ ᠶ᠋ᠢᠨ ᠳᠦᠷᠢ ᠪᠠᠷᠢᠨ ᠬᠡᠯᠡᠪᠡ᠃ ᠳᠠᠷᠠᠭᠠ ᠨᠢ ᠪᠠᠢᠴᠠᠭᠠᠭᠴᠢ ᠬᠠᠤᠯᠢ ᠶ᠋ᠢᠨ ᠳᠣᠲᠣᠷᠠᠬᠢ ᠠᠭᠤᠯᠭᠠ ᠳ᠋ᠤ᠌ ᠣᠷᠣᠬᠤ ᠳ᠋ᠠᠭᠠᠨ᠁ ᠬᠠᠤᠯᠢ ᠪᠣᠯ ᠨᠠᠷᠢᠨ ᠭᠡᠨᠡ᠃ ᠬᠠᠤᠯᠢ ᠪᠣᠯ ᠰᠢᠳᠤᠷᠭᠤ ᠭᠡᠨᠡ᠃ ᠭᠡᠪᠡᠴᠦ ᠬᠠᠤᠯᠢ ᠶ᠋ᠢᠨ ᠰᠢᠳᠤᠷᠭᠤ ᠪᠠᠢᠬᠤ ᠡᠰᠡᠬᠦ ᠶ᠋ᠢ ᠭᠠᠭᠴᠠ ᠪᠠᠢᠴᠠᠭᠠᠭᠴᠢ ᠪᠢᠰᠢ᠂ ᠪᠠᠢᠴᠠᠭᠠᠭᠴᠢ ᠬᠡᠷᠡᠭᠲᠡᠨ ᠬᠣᠶᠠᠷ ᠤ᠋ᠨ ᠰᠢᠳᠤᠷᠭᠤ ᠬᠠᠷᠢᠯᠴᠠᠬᠤ ᠡᠰᠡᠬᠦ ᠡᠴᠡ ᠪᠣᠯᠬᠤ ᠭᠡᠨᠡ᠃ ᠢᠩᠭᠢᠭᠡᠳ ᠪᠠᠢᠴᠠᠭᠠᠭᠴᠢ ᠬᠡᠷᠡᠭ ᠨᠡᠬᠡᠮᠵᠢᠯᠡᠬᠦ ᠠᠵᠢᠯ ᠳ᠋ᠠᠭᠠᠨ ᠠᠶᠠᠲᠠᠢᠬᠠᠨ ᠢ᠋ᠶ᠋ᠠᠷ ᠬᠡᠯᠪᠡᠢᠨ ᠣᠷᠣᠵᠤ᠂ ᠪᠠᠬᠠᠨ ᠶᠠᠷᠢᠭᠠᠳ ᠡᠴᠦᠰ ᠲᠦ᠋ᠨᠢ ᠪᠢ ᠪᠣᠳᠣᠪᠠᠯ ᠲᠠ ᠣᠳᠣ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠬᠡᠳᠦᠨ ᠤᠳᠠᠭᠠ ᠠᠭᠤᠯᠵᠠᠭᠰᠠᠨ᠂ ᠲᠡᠭᠦᠨ ᠦ᠌ ᠶᠠᠭᠤ ᠶᠠᠭᠤ ᠶᠠᠷᠢᠭᠰᠠᠨ ᠢ᠋ ᠨᠢᠭᠡ ᠳ᠋ᠦ᠍ ᠨᠢᠭᠡ ᠦᠭᠡᠢ ᠮᠡᠳᠡᠭᠦᠯᠬᠦ ᠪᠢᠵᠡ᠃ ᠬᠠᠷᠢᠨ ᠮᠢᠨᠦ ᠲᠠᠯᠠ ᠠ᠋ᠴᠠ ᠰᠠᠨᠠᠭᠤᠯᠬᠤ ᠳ᠋ᠤ᠌᠂ ᠲᠠ ᠢᠯᠡᠭᠦᠦ ᠶᠠᠭᠤᠮᠠ ᠪᠢᠲᠡᠭᠡᠢ ᠬᠡᠯᠡᠭᠡᠷᠡᠢ᠃ ᠲᠡᠷᠡ ᠪᠠᠢᠲᠤᠭᠠᠢ ᠰᠠᠨᠠᠭᠠᠨ ᠳ᠋ᠠᠭᠠᠨ ᠲᠣᠳᠣᠷᠬᠠᠢ ᠪᠢᠰᠢ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢ ᠴᠦ᠍ ᠳᠤᠷᠠᠳᠬᠤ ᠶ᠋ᠢᠨ ᠬᠡᠷᠡᠭ ᠦᠭᠡᠢ᠃ ᠢᠯᠠᠩᠭᠤᠶᠠ ᠰᠦᠬᠡᠪᠠᠭᠠᠲᠤᠷ ᠳᠡᠭᠡᠷᠡ᠃ ᠰᠦᠬᠡᠪᠠᠭᠠᠲᠤᠷ ᠬᠡᠳᠦᠢᠪᠡᠷ ᠤᠯᠠᠭᠠᠨ ᠣᠷᠣᠰ ᠲᠠᠢ ᠰᠦᠯᠪᠡᠭᠡᠯᠳᠡᠨ ᠡᠬᠡ ᠣᠷᠣᠨ ᠠ᠋ᠴᠠ ᠪᠠᠨ ᠤᠷᠪᠠᠨ ᠲᠡᠷᠰᠯᠡᠵᠦ ᠪᠠᠢᠭᠠ ᠬᠥᠮᠦᠨ ᠪᠣᠯᠪᠠᠴᠤ ᠬᠠᠤᠯᠢ ᠲᠡᠭᠦᠨ ᠢ᠋ ᠮᠥᠨ ᠬᠠᠢᠷᠠᠯᠠᠨ ᠡᠨᠡᠷᠢᠨᠡ᠃ ᠵᠠ ᠲᠠ ᠶᠠᠷᠢ! ᠪᠢ ᠪᠢᠴᠢᠶᠡ᠃
ᠪᠢᠷ ᠢ᠋ᠶ᠋ᠡᠨ ᠰᠢᠭᠦᠷᠦᠨ ᠠᠪᠴᠤ ᠶᠠᠨ᠌ᠲ᠋ᠡᠢ ᠳ᠋ᠡᠭᠠᠨ ᠨᠡᠢᠯᠡᠨ ᠬᠦᠯᠢᠶᠡᠪᠡ᠃
ᠪᠠᠯᠳᠠᠨᠴᠡᠷᠢᠩ ᠡᠬᠢᠯᠡᠭᠡᠳ ᠪᠠᠢᠴᠠᠭᠠᠭᠴᠢ ᠶ᠋ᠢᠨ ᠶᠠᠷᠢᠶᠠ ᠶᠢ ᠲᠤᠩ ᠲᠣᠭᠣᠮᠰᠠᠷ ᠦᠭᠡᠢ ᠵᠥᠪᠬᠡᠨ ᠭᠠᠳᠠᠨᠠ ᠪᠠᠨ ᠬᠢᠴᠢᠶᠡᠩᠭᠦᠢᠯᠡᠨ ᠴᠢᠩᠨᠠᠬᠤ ᠪᠠᠢᠳᠠᠯ ᠭᠠᠷᠭᠠᠭᠰᠠᠨ ᠪᠢᠯᠡ᠃ ᠭᠡᠪᠡᠴᠦ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠤᠷᠠᠨ ᠦᠭᠡᠨ ᠳ᠋ᠦ᠍ ᠠᠪᠲᠠᠭᠳᠠᠨ᠂ ᠥᠴᠢᠭ ᠮᠡᠳᠡᠭᠦᠯᠬᠦ ᠦᠭᠡᠢ ᠪᠠᠢᠬᠤ ᠭᠡᠰᠡᠨ ᠬᠠᠲᠠᠭᠤᠵᠢᠯ᠂ ᠤᠭ ᠤ᠋ᠨ ᠬᠢᠨᠠᠭᠤᠷ ᠬᠤᠷᠴᠠ ᠤᠬᠠᠭᠠᠨ ᠬᠣᠶᠠᠷ ᠢ᠋ᠶ᠋ᠠᠨ ᠠᠯᠲᠠᠨ《ᠡᠨᠡ ᠪᠠᠢᠴᠠᠭᠠᠭᠴᠢ ᠠᠷᠭᠠ ᠦᠭᠡᠢ ᠮᠡᠷᠭᠡᠨ ᠤᠬᠠᠭᠠᠨ ᠲᠠᠢ ᠪᠣᠯᠤᠭᠠᠳ᠂ ᠦᠨᠡᠨ ᠰᠢᠳᠤᠷᠭᠤ ᠶ᠋ᠢ ᠪᠠᠷᠢᠮᠲᠠᠯᠠᠭᠰᠠᠨ ᠬᠥᠮᠦᠨ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ?》 ᠭᠡᠵᠦ ᠪᠣᠳᠣᠵᠤ ᠡᠬᠢᠯᠡᠭᠰᠡᠨ ᠪᠥᠭᠡᠳ ᠲᠡᠷᠡ ᠨᠢ ᠤᠯᠠᠮ ᠢ᠋ᠶ᠋ᠠᠷ ᠭᠦᠨᠵᠡᠭᠡᠢᠷᠡᠵᠦ《ᠶᠡᠷᠦᠨᠢ ᠰᠦᠬᠡᠪᠠᠭᠠᠲᠤᠷ ᠲᠠᠢ ᠠᠭᠤᠯᠵᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠪᠡᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠨᠠᠳᠠ ᠳ᠋ᠤ᠌ ᠴᠠᠭᠠᠰᠢ ᠬᠣᠯᠪᠣᠭᠠ ᠦᠭᠡᠢ ᠪᠥᠭᠡᠳ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠶᠠᠷᠢᠭᠰᠠᠨ ᠢ᠋ ᠡᠨᠳᠡ ᠬᠡᠯᠡᠯᠡ ᠴᠦ᠍ ᠭᠡᠰᠡᠨ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠣᠷᠣ ᠰᠤᠷᠠᠭ ᠦᠭᠡᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠬᠥᠮᠦᠨ ᠲᠤᠯᠠ ᠠᠶᠤᠯ ᠤᠴᠠᠷᠠᠬᠤ ᠶᠠᠭᠤᠮᠠ ᠠᠯᠠᠭᠠ》 ᠭᠡᠰᠡᠨ ᠨᠢᠭᠡ ᠪᠣᠳᠣᠯ ᠰᠡᠳᠬᠢᠯ ᠳ᠋ᠦ᠍ᠨᠢ ᠡᠷᠭᠢᠯᠳᠦᠨᠡ᠃ ᠭᠡᠪᠡᠴᠦ ᠶᠠᠮᠠᠷ ᠰᠢᠦ ᠮᠠᠶᠢᠭ ᠢ᠋ᠶ᠋ᠠᠷ ᠡᠪᠯᠡᠭᠦᠯᠦᠨ ᠬᠡᠯᠡᠬᠦ ᠪᠣᠢ? ᠡᠭᠦᠨ ᠢ᠋ ᠪᠣᠯᠪᠠᠰᠤᠷᠠᠭᠤᠯᠬᠤ ᠳ᠋ᠤ᠌ ᠶᠠᠯᠢᠮ ᠦᠭᠡᠢᠬᠡᠨ ᠬᠤᠭᠤᠴᠠᠭᠠ ᠬᠡᠷᠡᠭᠲᠡᠢ ᠪᠣᠯᠪᠠ᠃
— ᠲᠠ ᠵᠢᠭᠠᠬᠠᠨ ᠬᠦᠯᠢᠶᠡ᠃ ᠪᠢ ᠤᠷᠢᠳᠠ ᠪᠠᠷ ᠪᠣᠳᠣᠶᠠ᠃
ᠪᠠᠢᠴᠠᠭᠠᠭᠴᠢ ᠪᠡᠶᠡᠰᠦᠨ᠄
— ᠰᠠᠢᠨ᠂ ᠮᠠᠰᠢ ᠰᠠᠢᠨ! ᠲᠠ ᠪᠣᠳᠣᠬᠤ ᠬᠡᠷᠡᠭᠲᠡᠢ᠂ ᠭᠡᠬᠦ ᠳ᠋ᠡᠭᠡᠨ ᠬᠠ ᠬᠠ᠁ ᠭᠡᠵᠦ ᠢᠨᠢᠶᠡᠬᠦ ᠲᠡᠳᠦᠢ ᠦᠭᠡᠢ ᠲᠣᠯᠣᠭᠠᠢ ᠳᠠᠷᠤᠨ ᠶᠣᠰᠣᠯᠠᠵᠤ᠂ ᠪᠢᠷ ᠢ᠋ᠶ᠋ᠡᠨ ᠳᠣᠷᠣᠭᠰᠢ ᠲᠠᠯᠪᠢᠪᠠ᠃
ᠪᠠᠯᠳᠠᠨᠴᠡᠷᠢᠩ ᠦᠭᠡ ᠪᠡᠨ ᠪᠣᠯᠪᠠᠰᠤᠷᠠᠭᠤᠯᠵᠤ ᠠᠪᠤᠭᠠᠳ ᠠᠮᠠ ᠨᠡᠭᠡᠭᠡᠬᠦ ᠭᠡᠲᠡᠯᠡ ᠬᠠᠭᠠᠯᠭᠠ ᠨᠡᠭᠡᠭᠡᠭᠳᠡᠨ ᠰᠠᠭᠠᠳ ᠪᠣᠯᠤᠯᠠ᠃
ᠬᠡᠨ ᠣᠷᠣᠵᠤ ᠢᠷᠡᠪᠡ᠃ ᠦᠭᠡᠢ ᠡᠨᠡ ᠴᠢᠨᠢ ᠶᠠᠮᠠᠷ ᠭᠠᠢᠬᠠᠯᠲᠠᠢ ᠯᠠ ᠶᠠᠭᠤᠮᠠ ᠭᠡᠭᠴᠢ ᠪᠣᠯᠤᠭᠠᠳ ᠪᠠᠢᠨᠠ ᠳᠠ! ᠨᠢᠳᠤᠨᠤᠨ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠨᠠ ᠭᠡᠵᠦ ᠭᠡᠷ ᠡᠴᠡ ᠭᠠᠷᠴᠤ ᠠᠯᠠᠭᠠ ᠪᠣᠯᠤᠭᠰᠠᠨ ᠭᠠᠭᠴᠠ ᠱᠠᠪᠢ ᠨᠠᠮᠰᠠᠷᠠᠢ ᠨᠢ ᠣᠷᠣᠭᠠᠳ ᠢᠷᠡᠴᠢᠭᠰᠡᠨ ᠪᠠᠢᠨᠠ᠃ ᠣᠳᠣ ᠨᠠᠮᠰᠠᠷᠠᠢ ᠭᠠᠮᠢᠩ ᠴᠡᠷᠢᠭ ᠦ᠋ᠨ ᠬᠠᠭᠤᠴᠢᠷᠠᠭᠰᠠᠨ ᠮᠠᠭᠤ ᠬᠤᠪᠴᠠᠰᠤᠨ ᠤ᠋ ᠲᠡᠮᠳᠡᠭ ᠲᠡᠢ᠂ ᠲᠡᠷᠡ ᠮᠥᠷᠲᠡᠭᠡᠨ ᠭᠠᠮᠢᠩ ᠴᠡᠷᠢᠭ ᠰᠢᠭ ᠱᠣᠪᠣᠰᠬᠢᠨ ᠶᠣᠰᠣᠯᠠᠵᠤ᠂《ᠳᠠᠷᠤᠭᠠ ᠲᠠᠨ ᠳ᠋ᠤ᠌ ᠶᠡᠬᠡ ᠨᠣᠶᠠᠨ ᠤ᠋ ᠢᠯᠡᠭᠡᠭᠰᠡᠨ ᠪᠢᠴᠢᠭ ᠢ᠋ ᠪᠠᠷᠢᠵᠤ ᠪᠣᠯᠬᠤ ᠪᠣᠯᠪᠠᠤ?》 ᠭᠡᠵᠦ ᠬᠢᠲᠠᠳ ᠢ᠋ᠶ᠋ᠠᠷ ᠥᠭᠦᠯᠡᠬᠦ ᠨᠢ ᠶᠠᠭᠤ ᠪᠣᠢ?
ᠡᠨᠡ ᠪᠣᠯ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠶᠣᠰᠣᠲᠠᠢ ᠵᠣᠯᠢᠭ ᠮᠣᠨᠳᠢ᠂ ᠭᠠᠢ ᠭᠠᠮᠰᠢᠭ ᠭᠡᠭᠴᠢ ᠪᠠᠢᠯᠠ᠃
ᠨᠠᠮᠰᠠᠷᠠᠢ ᠪᠠᠯᠳᠠᠨᠴᠡᠷᠢᠩ ᠢ᠋ ᠬᠠᠷᠠᠬᠤ ᠲᠠᠢ ᠵᠡᠷᠭᠡ ᠨᠢᠭᠤᠷ ᠪᠤᠷᠤᠭᠤᠯᠠᠨ ᠪᠠᠢᠴᠠᠭᠠᠭᠴᠢ ᠳ᠋ᠤ᠌ ᠲᠣᠭᠳᠣᠢ ᠲᠠᠢ ᠪᠢᠴᠢᠭ ᠢ᠋ ᠭᠠᠷᠭᠠᠵᠤ ᠥᠭᠭᠦᠭᠡᠳ᠂ ᠮᠥᠨ ᠨᠢᠭᠤᠷ ᠪᠤᠷᠤᠭᠤᠯᠠᠭᠰᠠᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠷᠪᠠ᠃ ᠪᠠᠢᠴᠠᠭᠠᠭᠴᠢ ᠲᠣᠭᠳᠣᠢ ᠶ᠋ᠢ ᠨᠡᠭᠡᠭᠡᠨ᠂ ᠨᠢᠭᠡ ᠬᠠᠭᠤᠳᠠᠰᠤ ᠳᠦᠭᠦᠷᠡᠩ ᠪᠢᠴᠢᠭ ᠭᠠᠷᠭᠠᠵᠤ᠂ ᠨᠢᠳᠦ ᠭᠦᠶᠦᠯᠭᠡᠵᠦ᠂ ᠠᠮᠠ ᠬᠥᠳᠡᠯᠭᠡᠨ ᠤᠩᠰᠢᠨᠠ᠃ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠤᠷᠪᠠᠬᠤ ᠭᠡᠳᠡᠭ ᠦᠭᠡ ᠠᠷᠪᠠ ᠳᠠᠬᠢᠨ ᠡᠷᠭᠢᠯᠳᠦᠵᠦ᠂ ᠤᠷᠪᠠᠭᠰᠠᠳ ᠢ᠋ ᠬᠡᠳᠦᠨ ᠠᠷᠪᠠᠨ ᠳᠠᠪᠬᠤᠷ ᠵᠠᠨᠤᠨᠠ᠃ ᠭᠡᠲᠡᠯᠡ ᠣᠳᠣ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ ᠪᠡᠨ ᠰᠤᠨᠵᠢᠨ ᠦᠵᠡᠬᠦ ᠳ᠋ᠦ᠍ ᠮᠥᠨ ᠤᠷᠪᠠᠬᠤ᠂ ᠤᠷᠪᠠᠬᠤ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠢᠷᠡᠭᠡᠳ ᠪᠠᠢᠭᠠ ᠨᠢ ᠲᠣᠳᠣᠷᠬᠠᠢ ᠪᠠᠢᠬᠤ ᠲᠤᠯᠠ ᠭᠣᠣᠯ ᠬᠠᠷᠠᠯᠠᠨ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠬᠤᠷᠠᠯᠳᠤᠨᠠ᠃ ᠪᠠᠢᠴᠠᠭᠠᠭᠴᠢ ᠪᠢᠴᠢᠭ ᠢ᠋ᠶ᠋ᠡᠨ ᠤᠩᠰᠢᠵᠤ ᠳᠠᠭᠤᠰᠬᠠᠭᠠᠳ᠂ ᠲᠣᠯᠣᠭᠠᠢ ᠭᠡᠯᠵᠡᠢᠯᠭᠡᠨ ᠨᠢᠭᠡ ᠬᠡᠰᠡᠭ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠠ ᠠᠯᠳᠠᠪᠠ᠃ ᠲᠡᠭᠡᠭᠡᠳ ᠪᠢᠴᠢᠭ ᠢ᠋ᠶ᠋ᠡᠨ ᠤᠩᠰᠢᠵᠤ ᠡᠭᠡᠭᠦᠯᠵᠦ ᠲᠣᠭᠳᠣᠢ ᠳ᠋ᠤᠨᠢ ᠰᠢᠷᠭᠤᠭᠤᠯᠪᠠ᠃ ᠡᠭᠦᠨ ᠡᠴᠡ ᠨᠢ ᠦᠵᠡᠬᠦ ᠳ᠋ᠦ᠍ ᠲᠡᠷᠡ ᠪᠢᠴᠢᠭ ᠲᠦ᠍ ᠶᠠᠮᠠᠷ ᠨᠢᠭᠡᠨ ᠠᠮᠤᠷ ᠦᠭᠡᠢ ᠶᠠᠪᠤᠳᠠᠯ ᠪᠠᠢᠭᠠ ᠨᠢ ᠢᠯᠡᠷᠬᠡᠢ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠪᠠᠢᠴᠠᠭᠠᠭᠴᠢ ᠶ᠋ᠢ ᠠᠵᠢᠭᠰᠠᠨ ᠵᠦᠢᠯ ᠦᠭᠡᠢ᠃ ᠤᠷᠪᠠᠭᠰᠠᠨ ᠱᠠᠪᠢ᠂ ᠤᠷᠪᠠᠭᠰᠠᠨ ᠨᠢᠮᠠᠵᠠᠪ ᠪᠠᠢᠰᠠ ᠬᠣᠶᠠᠷ ᠢ᠋ ᠥᠪᠡᠷ ᠦ᠋ᠨ ᠭᠠᠷ ᠢ᠋ᠶ᠋ᠠᠷ ᠵᠢᠷᠦᠬᠡ ᠶ᠋ᠢ ᠨᠢ ᠰᠤᠭᠤᠯᠬᠤ ᠰᠠᠨ ᠯᠠ ᠭᠡᠵᠦ ᠪᠣᠳᠣᠨᠠ᠃
— ᠵᠠ ᠲᠠ ᠣᠳᠣ ᠪᠣᠳᠣᠵᠤ ᠭᠦᠢᠴᠡᠭᠡ ᠪᠢᠵᠡ ᠳᠡ ᠭᠡᠵᠦ ᠡᠶᠡᠯᠳᠡᠭᠬᠡᠨ ᠢ᠋ᠶ᠋ᠡᠷ ᠥᠭᠦᠯᠡᠬᠦ ᠶ᠋ᠢ ᠪᠠᠯᠳᠠᠨᠴᠡᠷᠢᠩ ᠰᠣᠨᠣᠰᠤᠭᠠᠳ ᠲᠣᠯᠣᠭᠠᠢ ᠡᠷᠭᠦᠨ ᠬᠠᠷᠠᠪᠠᠯ᠂ ᠪᠠᠢᠴᠠᠭᠠᠭᠴᠢ ᠬᠡᠨ ᠪᠦᠬᠦᠨ ᠢ᠋ ᠮᠠᠳᠠᠭ ᠦᠭᠡᠢ ᠲᠥᠭᠡᠷᠢᠯᠳᠦᠭᠦᠯᠵᠦ ᠴᠢᠳᠠᠳᠠᠭ ᠠᠶᠠᠲᠠᠢᠬᠠᠨ ᠢᠨᠢᠶᠡᠮᠰᠦᠭᠯᠡᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠢᠷ ᠢ᠋ᠶ᠋ᠡᠨ ᠶᠠᠨᠲ᠋ᠨ᠌ᠢ ᠳ᠋ᠠᠭᠠᠨ ᠨᠡᠢᠯᠡᠵᠦ ᠪᠠᠢᠭᠠ ᠦᠵᠡᠭᠳᠡᠨᠡ᠃
— ᠨᠠᠳᠠ ᠮᠡᠳᠡᠭᠦᠯᠬᠦ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ ᠠ᠋᠃ ᠪᠢ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠮᠡᠳᠡᠭᠦᠯᠦᠭᠰᠡᠭᠡᠷ ᠢᠷᠡᠭᠰᠡᠨ ᠪᠢᠯᠡ ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠪᠠᠢᠴᠠᠭᠠᠭᠴᠢ ᠠ᠋ᠴᠠ ᠠᠶᠤᠨ ᠲᠡᠪᠡᠳᠡᠬᠦ ᠳ᠋ᠡᠭᠡᠨ ᠪᠢᠰᠢ᠂ ᠠᠷᠠᠳ ᠲᠦᠮᠡᠨ ᠡᠴᠡ ᠤᠷᠪᠠᠭᠰᠠᠳ ᠢ᠋ ᠥᠰᠢᠨ ᠵᠠᠨᠤᠭᠰᠠᠨ ᠠᠭᠤᠷ ᠲᠠᠭᠠᠨ ᠬᠣᠭᠣᠯᠠᠢ ᠴᠡᠴᠡᠷᠡᠭᠦᠯᠦᠨ ᠥᠭᠦᠯᠡᠪᠡ᠃
ᠪᠠᠢᠴᠠᠭᠠᠭᠴᠢ᠄
— ᠶᠠᠭᠤ? ᠭᠡᠵᠦ ᠳᠠᠭᠤ ᠠᠯᠲᠠᠨ ᠪᠣᠰᠤᠨ ᠬᠠᠷᠠᠢᠪᠠ᠃
ᠣᠳᠣ ᠦᠵᠡᠪᠡᠯ ᠡᠨᠡ ᠪᠠᠢᠴᠠᠭᠠᠭᠴᠢ ᠳ᠋ᠤ᠌ ᠰᠠᠢᠬᠠᠨ ᠶᠠᠭᠤᠮᠠ ᠶᠡᠷᠦ ᠠᠯᠠᠭᠠ᠃ ᠰᠠᠢᠬᠠᠨ ᠲᠤᠩᠭᠠᠯᠠᠭ ᠴᠠᠭᠠᠨ ᠴᠢᠷᠠᠢ ᠴᠤ᠌ ᠠᠯᠠᠭᠠ᠂ ᠣᠶᠤᠨ ᠤᠬᠠᠭᠠᠨ ᠤ᠋ ᠠᠷᠢᠭᠤᠨ ᠰᠢᠳᠤᠷᠭᠤ ᠶ᠋ᠢᠨ ᠶᠠᠮᠠᠷ ᠴᠤ᠌ ᠦᠨᠦᠷ ᠠᠯᠠᠭᠠ᠃ ᠲᠡᠭᠦᠨ ᠳ᠋ᠦ᠍ ᠪᠠᠢᠭᠠ ᠶᠠᠭᠤᠮᠠ ᠭᠡᠪᠡᠯ ᠴᠥᠮ ᠶᠧᠯᠸᠢ᠂ ᠷᠢᠳᠢ ᠰᠢᠳᠢ᠃ ᠬᠥᠮᠦᠨ ᠢ᠋ ᠦᠨᠡᠭᠡ ᠰᠢᠭ ᠵᠠᠯᠢᠯᠠᠨ ᠮᠡᠬᠡᠯᠡᠬᠦ᠂ ᠡᠷᠡᠭᠦᠳᠡᠨ ᠲᠠᠮᠤᠯᠠᠬᠤ ᠬᠣᠶᠠᠷ ᠢ᠋ ᠡᠭᠡᠯᠵᠢᠯᠡᠭᠦᠯᠦᠨ ᠬᠡᠷᠡᠭᠯᠡᠬᠦ ᠳ᠋ᠦ᠍ ᠮᠡᠷᠭᠡᠵᠢᠭᠰᠡᠨ ᠶᠣᠰᠣᠲᠠᠢ ᠯᠠ ᠬᠥᠮᠦᠨ ᠦ᠌ ᠶᠠᠰᠤ ᠮᠢᠬᠠ ᠶ᠋ᠢ ᠠᠮᠢᠳᠤ ᠪᠠᠷ ᠨᠢ ᠬᠡᠮᠡᠯᠢᠭᠴᠢ ᠠᠷᠢᠶᠠᠲᠠᠨ ᠦᠵᠡᠭᠳᠡᠨᠡ᠃
— ᠨᠠᠳᠠ ᠮᠡᠳᠡᠭᠦᠯᠬᠦ ᠶᠠᠭᠤᠮᠠ ᠪᠠᠢᠬᠤ ᠦᠭᠡᠢ! ᠭᠡᠵᠦ ᠪᠠᠯᠳᠠᠨᠴᠡᠷᠢᠩ ᠲᠡᠭᠦᠨ ᠦ᠌ ᠰᠣᠴᠢᠨ ᠳᠠᠭᠤ ᠠᠯᠳᠠᠭᠰᠠᠨ ᠠ᠋ᠴᠠ ᠨᠢ ᠠᠷᠠᠢ ᠳᠠᠪᠠᠭᠤ ᠳᠠᠭᠤ ᠪᠠᠷ ᠬᠡᠯᠡᠪᠡ᠃ ᠭᠠᠤᠯᠢᠨ ᠶᠠᠨᠲ᠋ᠨ᠌ᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠳᠡᠰ ᠪᠠᠭᠤᠨ ᠬᠡᠯᠡᠬᠦ ᠤᠤ᠂ ᠦᠭᠡᠢ ᠤᠤ? ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠤᠨᠢ ᠴᠣᠩᠬᠣᠨ ᠤ᠋ ᠰᠢᠯ ᠳᠣᠷᠭᠢᠨᠠ᠃ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠰᠦᠷᠳᠡᠬᠦ ᠶᠠᠭᠤᠮᠠ ᠠᠯᠠᠭᠠ᠃ ᠦᠬᠦᠲᠡᠯᠡ ᠪᠡᠨ ᠲᠡᠮᠡᠴᠡᠬᠦ᠂ ᠦᠬᠦᠭᠰᠡᠨ ᠬᠣᠢᠨᠠ ᠪᠠᠨ ᠪᠠᠰᠠ ᠲᠡᠮᠡᠴᠡᠬᠦ ᠡᠢᠮᠦ ᠪᠣᠳᠣᠯ ᠳ᠋ᠤ᠌ ᠪᠦᠬᠦ ᠰᠡᠳᠬᠢᠯ ᠮᠡᠳᠡᠷᠡᠯ ᠨᠢ ᠡᠵᠡᠯᠡᠭᠳᠡᠭᠰᠡᠨ ᠪᠠᠢᠯᠠ᠃
— ᠪᠢ ᠡᠬᠡ ᠣᠷᠣᠨ ᠠᠷᠠᠳ ᠲᠦᠮᠡᠨ ᠡᠴᠡ ᠪᠡᠨ ᠬᠡᠵᠢᠶᠡ ᠴᠦ᠍ ᠤᠷᠪᠠᠬᠤ ᠦᠭᠡᠢ ᠭᠡᠵᠦ ᠬᠠᠷᠢᠭᠤ ᠬᠠᠰᠬᠢᠷᠤᠨ ᠥᠭᠡᠳᠡ ᠡᠴᠡ ᠨᠢ ᠦᠰᠦᠷᠪᠡ᠃ ᠭᠡᠪᠡᠴᠦ ᠣᠷᠣᠭᠰᠢ ᠦᠰᠦᠷᠦᠭᠰᠡᠨ ᠦ᠌ ᠠᠰᠢᠭ ᠶᠠᠭᠤ ᠪᠠᠢᠬᠤ ᠪᠢᠯᠡ? ᠬᠡᠯᠡᠮᠦᠷᠴᠢ ᠤᠷᠢᠳᠤᠭᠤᠷ ᠨᠢ ᠣᠷᠣᠨ ᠪᠠᠢᠴᠠᠭᠠᠭᠴᠢ ᠪᠠᠨ ᠬᠠᠮᠠᠭᠠᠯᠠᠨᠠ᠃ ᠠᠷᠤ ᠠ᠋ᠴᠠ ᠨᠢ ᠪᠠᠰᠠ ᠯᠠ ᠬᠣᠶᠠᠷ ᠬᠥᠮᠦᠨ ᠪᠠᠷᠢᠨ ᠠᠪᠤᠯᠠ᠃《ᠴᠣᠬᠢ ᠪᠠᠩᠵᠠᠳᠠ!》 ᠭᠡᠵᠦ ᠪᠠᠢᠴᠠᠭᠠᠭᠴᠢ ᠬᠠᠰᠬᠢᠷᠤᠭᠰᠠᠨ ᠢ᠋ᠶ᠋ᠠᠷ ᠬᠣᠶᠠᠷ ᠡᠷᠡᠭᠦᠳᠡᠭᠴᠢ ᠬᠡᠯᠡᠮᠦᠷᠴᠢ ᠲᠡᠢ ᠬᠠᠮᠲᠤᠷᠠᠨ ᠳᠡᠪᠡᠯ ᠲᠠᠢᠯᠤᠨ ᠥᠮᠥᠳᠥ ᠰᠢᠪᠲᠤᠯᠤᠨᠠ᠃ ᠥᠭᠡᠳᠡ ᠡᠴᠡ ᠨᠢ ᠪᠠᠯᠳᠠᠨᠴᠡᠷᠢᠩ ᠬᠠᠷᠢᠶᠠᠪᠠ ᠵᠠᠨᠤᠪᠠ᠃ ᠭᠠᠷ ᠬᠥᠯ᠂ ᠪᠦᠬᠦ ᠪᠠᠢᠭᠠ ᠪᠠᠷ ᠢ᠋ᠶ᠋ᠠᠨ ᠡᠰᠡᠷᠭᠦᠴᠡᠨ ᠲᠤᠯᠤᠯᠳᠤᠪᠠ᠃ ᠭᠡᠯᠡ ᠴᠦ᠍ ᠨᠡᠮᠡᠷᠢ ᠠᠯᠠᠭᠠ ᠳᠠᠩᠴᠤ ᠠᠯᠠᠭᠠ᠃ ᠱᠠᠯᠳᠠᠩ ᠭᠤᠶᠠᠨ ᠳᠡᠭᠡᠷᠡ ᠤᠷᠲᠤ ᠬᠤᠯᠤᠰᠤᠨ ᠪᠠᠩᠵᠠ ᠨᠠᠬᠢᠰ ᠪᠠᠭᠤᠵᠤ᠂ ᠪᠠᠢᠴᠠᠭᠠᠭᠴᠢ ᠶ᠋ᠢᠨ᠄《ᠪᠠᠯᠪᠠ! ᠴᠣᠬᠢ! ᠬᠡᠯᠡ!》 ᠭᠡᠵᠦ ᠲᠠᠰᠤᠷᠠᠯᠲᠠ ᠦᠭᠡᠢ ᠬᠠᠰᠬᠢᠷᠬᠤ ᠶ᠋ᠢ ᠬᠡᠯᠡᠮᠦᠷᠴᠢ ᠪᠠᠰᠠ ᠮᠣᠩᠭᠣᠯ ᠢ᠋ᠶ᠋ᠠᠷ ᠳᠠᠪᠲᠠᠨᠠ᠃ ᠢᠩᠭᠢᠭᠰᠡᠭᠡᠷ ᠤᠳᠠᠯᠠ᠃ ᠲᠤᠩ ᠶᠡᠬᠡ ᠤᠳᠠᠯᠠ᠃
ᠪᠠᠯᠳᠠᠨᠴᠡᠷᠢᠩ ᠡᠨᠡ ᠡᠳᠦᠷ ᠪᠠᠢᠴᠠᠭᠠᠯᠲᠠ ᠳᠠᠭᠤᠰᠴᠤ ᠬᠣᠶᠠᠷ ᠬᠥᠮᠦᠨ ᠢ᠋ᠶ᠋ᠡᠷ ᠳᠠᠮᠵᠢᠭᠤᠯᠤᠨ᠂ ᠱᠣᠷᠣᠩ ᠳ᠋ᠤ᠌ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠦᠯᠦ ᠮᠡᠳᠡᠨᠡ᠃ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠴᠢ ᠵᠠᠮᠢᠶᠠᠨ ᠤ᠋ ᠬᠦᠢᠲᠡᠨ ᠶᠠᠭᠤᠮᠠ ᠠᠮᠠ ᠤᠷᠤᠭᠤ ᠬᠢᠵᠦ ᠪᠠᠢᠬᠤ ᠳ᠋ᠤᠨᠢ ᠤᠬᠠᠭᠠᠨ ᠣᠷᠣᠪᠠ᠃ ᠬᠠᠮᠤᠭ ᠤ᠋ᠨ ᠲᠦᠷᠦᠭᠦᠦ ᠨᠢ ᠪᠥᠭᠰᠡᠨ ᠪᠡᠶᠡ ᠬᠠᠯᠠᠭᠤᠨ ᠣᠷᠬᠢᠨ ᠱᠠᠷᠬᠢᠷᠠᠵᠤ ᠪᠠᠢᠭᠠ ᠨᠢ ᠮᠡᠳᠡᠭᠳᠡᠨᠡ᠃ ᠪᠠᠢᠴᠠᠭᠠᠭᠴᠢ ᠪᠠ ᠲᠡᠭᠦᠨ ᠦ᠌ ᠡᠷᠡᠭᠦᠳᠡᠭᠴᠢ ᠨᠠᠷ ᠵᠥᠪᠬᠡᠨ ᠬᠣᠶᠠᠷ ᠬᠣᠩᠭᠣ ᠪᠠᠯᠪᠠᠭᠠᠳ ᠵᠣᠭᠰᠣᠭᠰᠠᠨ ᠪᠢᠰᠢ᠂ ᠴᠡᠭᠡᠵᠢᠨ ᠪᠡᠶᠡ ᠳ᠋ᠦ᠍ ᠬᠥᠨᠳᠡᠭᠦᠷᠯᠡᠬᠦ ᠭᠠᠵᠠᠷ ᠣᠯᠠᠨ ᠪᠠᠢᠨᠠ᠃ ᠬᠠᠵᠠᠭᠤ ᠠ᠋ᠴᠠ ᠨᠢ ᠨᠢᠭᠡ ᠬᠥᠮᠦᠨ《ᠬᠡᠷᠡᠭ ᠬᠦᠯᠢᠶᠡᠭᠰᠡᠨ ᠤᠤ?》 ᠭᠡᠵᠦ ᠠᠰᠠᠭᠤᠬᠤ ᠰᠢᠭ᠋᠃ ᠦᠨᠡᠨ ᠦᠨᠡᠨ ᠳ᠋ᠡᠭᠡᠨ ᠬᠡᠨ ᠴᠦ᠍ ᠠᠰᠠᠭᠤᠭᠰᠠᠨ ᠪᠢᠰᠢ᠂ ᠵᠥᠪᠬᠡᠨ ᠰᠡᠳᠬᠢᠯ ᠳ᠋ᠦ᠍ ᠪᠣᠳᠣᠭᠳᠠᠭᠰᠠᠨ ᠢ᠋ ᠰᠣᠨᠣᠰᠪᠠ ᠭᠡᠵᠦ ᠲᠠᠰᠢᠶᠠᠷᠠᠭᠰᠠᠨ ᠠᠵᠢ᠃《ᠦᠭᠡᠢ ᠠ᠋᠂ ᠥᠪᠡᠷ ᠦ᠋ᠨ ᠤᠬᠠᠭᠠᠨ ᠲᠠᠢ ᠪᠠᠢᠬᠤ ᠳ᠋ᠠᠭᠠᠨ ᠯᠠ ᠦᠭᠡᠢ》 ᠭᠡᠵᠦ ᠬᠡᠯᠡᠭᠡᠳ ᠪᠠᠯᠳᠠᠨᠴᠡᠷᠢᠩ᠂ ᠤᠬᠠᠭᠠᠨ ᠠᠯᠳᠠᠭᠰᠠᠨ ᠬᠣᠢᠨᠠ ᠪᠠᠨ ᠦᠭᠡ ᠠᠯᠲᠠᠨ ᠭᠠᠷ ᠤ᠋ᠨ ᠦᠰᠦᠭ ᠵᠢᠷᠣᠭᠠ ᠦᠭᠡᠢ ᠪᠠᠢᠭᠠ ᠭᠡᠵᠦ ᠪᠣᠳᠣᠨ ᠵᠣᠪᠠᠨᠢᠨᠠ᠃ ᠰᠥᠨᠢ ᠳ᠋ᠡᠭᠡᠨ ᠪᠡᠶᠡ ᠨᠢ ᠠᠠᠢᠬᠤᠪᠲᠤᠷ ᠬᠠᠯᠠᠭᠤᠷᠠᠪᠠ᠃ ᠬᠥᠳᠡᠯᠬᠦ ᠪᠦᠷᠢ ᠳ᠋ᠦ᠍ ᠪᠠᠯᠪᠠᠭᠤᠯᠤᠭᠰᠠᠨ ᠭᠠᠵᠠᠷ ᠤ᠋ᠨ ᠠᠷᠠᠰᠤ ᠮᠢᠬᠠ ᠲᠠᠲᠠᠯᠳᠤᠨ ᠡᠮᠵᠡᠭᠯᠡᠨᠡ᠃ ᠡᠭᠦᠨᠴᠡ ᠪᠠᠯᠳᠠᠨᠴᠡᠷᠢᠩ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠬᠦᠨᠳᠦ ᠪᠡᠷ ᠡᠷᠡᠭᠦᠳᠡᠭᠦᠯᠦᠭᠰᠡᠨ ᠬᠥᠮᠦᠰ ᠦ᠋ᠨ ᠰᠥᠨᠢ ᠳ᠋ᠡᠭᠡᠨ ᠶᠡᠬᠡᠳᠡ ᠠᠮᠢᠰᠬᠤᠭᠠᠳᠠᠨ ᠢᠨᠴᠠᠭᠯᠠᠬᠤ ᠶ᠋ᠢᠨ ᠤᠴᠢᠷ ᠢ᠋ ᠣᠯᠵᠤ ᠮᠡᠳᠡᠪᠡ᠃ ᠲᠡᠭᠡᠭᠡᠳ ᠥᠪᠡᠷ ᠢ᠋ᠶ᠋ᠡᠨ ᠠᠯᠢ ᠪᠣᠯᠬᠣᠷ ᠴᠢᠯᠥᠭᠡ ᠲᠡᠢ ᠠᠮᠢᠰᠬᠤᠯᠠᠨ ᠪᠡᠶᠡ ᠪᠡᠨ ᠠᠮᠠᠷᠠᠬᠤ ᠶ᠋ᠢ ᠶ᠋ᠢ ᠪᠣᠳᠣᠨ ᠲᠣᠪ ᠳᠤᠭᠤᠢ ᠪᠠᠢᠬᠤ ᠪᠥᠭᠡᠳ ᠰᠡᠳᠬᠢᠯ ᠳ᠋ᠦ᠍ᠨᠢ ᠡᠬᠢ ᠠᠳᠠᠭ ᠦᠭᠡᠢ ᠶᠠᠭᠤᠮᠠᠰ ᠣᠷᠣᠵᠤ ᠢᠷᠡᠨ ᠨᠣᠢᠷ ᠬᠤᠯᠵᠢᠨᠠ᠃ ᠭᠡᠲᠡᠯᠡ ᠲᠡᠨᠳᠡ ᠨᠢᠭᠡ ᠬᠥᠮᠦᠨ ᠵᠡᠭᠦᠳᠦᠯᠡᠵᠦ ᠪᠠᠢᠨᠠ᠃《ᠠᠢ ᠥᠷᠥᠰᠢᠶᠡ! ᠨᠠᠳᠠ ᠮᠡᠳᠡᠭᠦᠯᠬᠦ ᠶᠠᠭᠤᠮᠠ ᠠᠯᠠᠭᠠ᠂ ᠠᠯᠠᠭᠠ᠁》 ᠭᠡᠵᠦ ᠠᠮᠠ ᠳ᠋ᠠᠭᠠᠨ ᠥᠭᠦᠯᠡᠨᠡ᠂ ᠥᠭᠡᠷᠡ ᠨᠢᠭᠡ ᠭᠠᠵᠠᠷ ᠡᠷᠡᠭᠦᠦ ᠰᠢᠭᠦᠯᠲᠡ ᠶ᠋ᠢ ᠦᠵᠡᠭᠡ ᠦᠭᠡᠢ ᠬᠥᠮᠦᠨ ᠪᠠᠢᠬᠤ ᠠᠲᠠᠯᠠ《ᠦᠬᠦᠬᠦ ᠨᠢ᠂ ᠦᠬᠦᠬᠦ ᠨᠢ᠂ ᠶᠠᠭᠠᠬᠢᠬᠤ ᠪᠢᠯᠡ》 ᠭᠡᠵᠦ ᠠᠮᠢᠰᠬᠤᠭᠠᠳᠠᠨᠠ᠃ ᠪᠦᠷ ᠬᠣᠢᠨᠠ᠂ ᠶᠡᠬᠡᠰ ᠳᠡᠭᠡᠳᠦᠰ ᠦ᠋ᠳ ᠦ᠋ᠨ ᠳᠤᠮᠳᠠ ᠪᠣᠯᠤᠯᠲᠠᠢ ᠨᠢᠭᠡ ᠬᠥᠮᠦᠨ ᠪᠠᠢᠵᠤ ᠶᠠᠳᠠᠨ ᠢᠨᠴᠠᠭᠯᠠᠨᠠ᠃ ᠲᠡᠷᠡ ᠪᠣᠯ ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦ᠋ᠷᠦᠩ᠃ ᠮᠠᠨᠵᠤ ᠬᠢᠲᠠᠳ ᠤ᠋ᠨ ᠳᠠᠷᠤᠯᠠᠯ ᠤ᠋ᠨ ᠡᠰᠡᠷᠭᠦ ᠢᠳᠡᠷ ᠵᠠᠯᠠᠭᠤ ᠴᠠᠭ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠲᠡᠮᠡᠴᠡᠭᠰᠡᠨ ᠲᠡᠦᠬᠡᠲᠦ ᠬᠥᠮᠦᠨ ᠪᠣᠯᠬᠤ ᠤᠴᠢᠷ᠂ ᠭᠠᠮᠢᠩ ᠤ᠋ᠳ ᠲᠤ᠌ ᠬᠠᠮᠤᠭ ᠤ᠋ᠨ ᠶᠡᠬᠡ ᠥᠰᠢᠭᠲᠡᠨ ᠵᠠᠨᠤᠭᠳᠠᠭᠰᠠᠨ ᠬᠥᠮᠦᠨ ᠠᠵᠢ᠃ ᠡᠳᠦᠷ ᠪᠦᠷᠢ ᠪᠠᠢᠴᠠᠭᠠᠭᠳᠠᠨ᠂ ᠲᠡᠷᠡ ᠪᠦᠷᠢ ᠳᠡᠭᠡᠷᠡ ᠪᠡᠨ᠂ ᠡᠷᠡᠭᠦᠦ ᠰᠢᠭᠦᠯᠲᠡ ᠳᠠᠪᠬᠤᠷ ᠳᠠᠪᠬᠤᠷ ᠦᠵᠡᠭᠦᠯᠦᠭᠰᠡᠭᠡᠷ ᠭᠠᠮᠢᠩ ᠤ᠋ᠳ ᠥᠪᠡᠷ ᠦ᠋ᠨ ᠤᠬᠠᠭᠠᠨ ᠦᠭᠡᠢ ᠪᠣᠯᠲᠠᠯᠠ ᠨᠢ ᠪᠠᠯᠪᠠᠭᠠᠳ᠂ ᠦᠬᠦᠯ ᠦ᠋ᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠢᠷᠡᠬᠦ ᠪᠡᠷ ᠨᠢ ᠳᠠᠮᠨᠠᠨ ᠠᠪᠴᠢᠷᠠᠵᠤ ᠱᠣᠷᠣᠩ ᠤ᠋ᠨ ᠮᠤᠬᠤᠷ ᠲᠤ ᠬᠠᠶᠠᠨᠠ᠃
ᠦᠷ ᠴᠠᠢᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠪᠠᠯᠳᠠᠨᠴᠡᠷᠢᠩ ᠬᠦᠨᠳᠦ ᠶᠠᠳᠠᠷᠠᠯ ᠳ᠋ᠤ᠌ ᠳᠠᠷᠤᠭᠳᠠᠨ ᠤᠬᠠᠭᠠᠨ ᠦᠭᠡᠢ ᠤᠨᠲᠠᠯᠠ᠃ ᠡᠳᠦᠷ ᠳᠤᠮᠳᠠ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠬᠥᠮᠦᠰ ᠰᠠᠨᠳᠤᠷᠤᠨ《ᠶᠠᠭᠠᠬᠢᠬᠤ ᠪᠢᠯᠡ᠂ ᠦᠬᠦᠬᠦ ᠨᠢ᠂ ᠥᠩᠭᠡᠷᠡᠬᠦ ᠨᠢ!》 ᠭᠡᠵᠦ ᠰᠠᠮ ᠦᠭᠦᠯᠡᠯᠳᠦᠨ ᠪᠣᠰᠬᠤ ᠴᠢᠮᠡᠭᠡ ᠪᠡᠷ ᠰᠡᠷᠡᠪᠡ᠃ ᠨᠢᠭᠡ ᠬᠥᠮᠦᠨ ᠬᠦᠨᠳᠦ ᠪᠡᠷ ᠠᠮᠢᠰᠬᠤᠭᠠᠳᠠᠨ ᠲᠠ ᠮᠢᠨᠢ ᠨᠠᠮᠠᠶ᠋ᠢ ᠳᠡᠯᠪᠢ᠂ ᠪᠢᠲᠡᠭᠡᠢ ᠳᠥᠰᠢ᠂ ᠪᠢ ᠥᠪᠡᠷ ᠢ᠋ᠶ᠋ᠡᠨ ᠥᠨᠳᠡᠢᠨᠡ᠃ ᠥᠪᠡᠷ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ᠁ ᠭᠡᠵᠦ ᠠᠭᠠᠬᠢᠯᠠᠨ ᠬᠡᠯᠡᠬᠦ ᠰᠣᠨᠣᠰᠳᠠᠨᠠ᠃
ᠡᠨᠡ ᠪᠣᠯ ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦ᠋ᠷᠦᠩ᠃ ᠲᠣᠯᠣᠭᠠᠢ ᠪᠠᠨ ᠳᠠᠭᠠᠭᠠᠬᠤ ᠦᠭᠡᠢ ᠪᠣᠯᠤᠨ ᠬᠥᠮᠦᠨ ᠦ᠌ ᠭᠠᠷ ᠲᠤ ᠣᠷᠣᠭᠰᠠᠨ ᠬᠥᠮᠦᠨ ᠠᠲᠠᠯᠠ ᠥᠪᠡᠷ ᠢ᠋ᠶ᠋ᠡᠨ ᠥᠨᠳᠡᠢᠪᠡ᠃ ᠪᠠᠰᠠ ᠴᠠᠭᠠᠰᠢ ᠪᠣᠰᠬᠤ ᠭᠡᠵᠦ ᠲᠡᠮᠡᠦᠯᠦᠨᠡ᠃ ᠬᠥᠮᠦᠰ ᠲᠡᠭᠦᠨ ᠢ᠋ ᠬᠠᠢᠷᠠᠯᠠᠨ ᠬᠠᠯᠠᠭᠤᠨ ᠳᠡᠮᠵᠢᠯᠭᠡ ᠦᠵᠡᠭᠦᠯᠬᠦ ᠰᠠᠨ ᠭᠡᠬᠦ ᠳ᠋ᠡᠭᠡᠨ ᠲᠤᠰ ᠪᠦᠷᠢ ᠪᠡᠨ ᠭᠠᠷ ᠰᠠᠷᠪᠠᠢᠯᠭᠠᠨ ᠰᠢᠷᠲᠡᠨᠡ᠃ ᠭᠡᠲᠡᠯᠡ ᠳᠠᠮᠳᠢᠨᠰᠦ᠋ᠷᠦᠩ《ᠦᠭᠡᠢ ᠠ᠋ ᠪᠠᠢᠵᠠ! ᠪᠢ ᠥᠪᠡᠷ ᠢ᠋ᠶ᠋ᠡᠨ! ᠥᠪᠡᠷ ᠢ᠋ᠶ᠋ᠡᠨ ᠪᠣᠰᠬᠤ ᠮᠢᠨᠢ!》 ᠭᠡᠵᠦ ᠳᠡᠭᠡᠭᠰᠢ ᠵᠢᠳᠬᠦᠭᠰᠡᠨ ᠢ᠋ᠶ᠋ᠡᠨ ᠡᠰᠡ ᠴᠢᠳᠠᠪᠠ᠃ ᠬᠣᠶᠠᠳᠠᠬᠢ ᠳᠡᠭᠡᠷᠡ ᠪᠡᠨ ᠮᠥᠨ ᠡᠰᠡ ᠴᠢᠳᠠᠬᠤ ᠪᠣᠯᠪᠠᠴᠤ ᠱᠣᠷᠣᠩ ᠤ᠋ᠨ ᠪᠦᠳᠦᠭᠦᠨ ᠳ᠋ᠦᠨᠵᠡᠨ ᠬᠠᠨᠠ ᠶ᠋ᠢ ᠲᠦᠰᠢᠨ ᠠᠪᠤᠯᠠ᠃ ᠲᠡᠭᠡᠭᠡᠳ ᠲᠡᠨᠳᠡ ᠡᠴᠡ ᠳᠡᠭᠡᠭᠰᠢ ᠠᠪᠠᠷᠢᠬᠤ ᠶ᠋ᠢ ᠣᠷᠣᠯᠳᠣᠨᠠ᠃ ᠨᠠᠰᠤᠨ ᠤ᠋ ᠥᠲᠡᠯᠦᠯᠲᠡ ᠳ᠋ᠦ᠍ ᠠᠷᠠᠰᠤ ᠬᠥᠷᠥᠰᠥ ᠨᠢ ᠦᠷᠴᠢᠢᠵᠦ᠂ ᠱᠣᠷᠣᠩ ᠤ᠋ᠨ ᠶᠠᠳᠠᠷᠠᠯᠲᠠ ᠳ᠋ᠤ᠌ ᠲᠤᠷᠠᠭᠠᠯ ᠤ᠋ᠨ ᠲᠤᠢᠯ ᠪᠣᠯᠤᠭᠰᠠᠨ ᠤᠷᠲᠤ ᠭᠠᠷ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠰᠤᠩᠭᠠᠨ ᠬᠠᠨᠠ ᠶ᠋ᠢᠨ ᠳ᠋ᠦᠨᠵᠡᠨ ᠨᠦ᠍ᠭᠦᠳ ᠢ᠋ ᠰᠠᠮᠤᠷᠳᠠᠨ ᠮᠠᠭᠠᠵᠢᠯᠠᠨᠠ᠃ ᠨᠢᠭᠡ ᠬᠥᠮᠦᠨ ᠲᠡᠰᠴᠦ ᠶᠠᠳᠠᠨ ᠲᠤᠰᠠᠯᠠᠬᠤ ᠭᠡᠬᠦ ᠳ᠋ᠦ᠍ ᠬᠠᠵᠠᠭᠤ ᠠ᠋ᠴᠠ ᠨᠢ ᠨᠢᠭᠡ ᠬᠥᠮᠦᠨ《ᠪᠠᠢᠭ! ᠥᠪᠡᠷ ᠢ᠋ᠶ᠋ᠡᠨ ᠪᠣᠰᠤᠭ! ᠥᠪᠡᠷ ᠢ᠋ᠶ᠋ᠡᠨ ᠪᠣᠰᠬᠤ ᠭᠡᠵᠦ ᠵᠢᠳᠬᠦᠬᠦ ᠨᠢ ᠤᠴᠢᠷ ᠲᠠᠢ ᠬᠡᠷᠡᠭ》 ᠭᠡᠵᠦ ᠰᠢᠪᠡᠨᠡᠪᠡ᠃ ᠢᠩᠭᠢᠵᠦ ᠬᠡᠯᠡᠭᠰᠡᠨ ᠲᠡᠷᠡ ᠬᠥᠮᠦᠨ ᠨᠢ ᠬᠠᠯᠬᠠ ᠳᠠᠶᠠᠭᠠᠷ ᠲᠤ ᠠᠮᠢᠳᠤ ᠪᠤᠷᠬᠠᠨ ᠭᠡᠵᠦ ᠠᠯᠳᠠᠷᠰᠢᠭᠰᠠᠨ ᠵᠠᠯᠠᠬᠠᠵᠠ ᠬᠤᠲᠤᠭᠲᠤ ᠪᠠᠢᠬᠤ ᠲᠤᠯᠠ ᠨᠥᠭᠦᠭᠡ ᠬᠥᠮᠦᠨ ᠭᠠᠷ ᠢ᠋ᠶ᠋ᠠᠨ ᠶᠠᠭᠠᠷᠠᠨ ᠬᠣᠢᠰᠢ ᠲᠠᠲᠠᠯᠠ᠃
ᠳᠠᠮᠳᠢᠨᠰᠦ᠋ᠷᠦᠩ ᠶᠠᠭᠤ ᠶᠠᠭᠤ ᠦᠭᠡᠢ ᠪᠣᠰᠬᠤ ᠶ᠋ᠢᠨ ᠳᠠᠪᠠᠭᠠᠨ ᠳᠡᠭᠡᠷᠡ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠲᠡᠩᠬᠡᠯ ᠠᠯᠲᠠᠨ ᠨᠢᠭᠡ ᠬᠡᠰᠡᠭ ᠵᠣᠭᠰᠣᠪᠠ᠃ ᠳᠠᠬᠢᠨ ᠴᠠᠭᠠᠰᠢ ᠵᠢᠳᠬᠦᠯᠡ᠃ ᠭᠠᠷ ᠤ᠋ᠨ ᠬᠢᠨᠢ ᠬᠤᠷᠤᠭᠤ ᠨᠤᠭᠤᠳ ᠳ᠋ᠦᠨᠵᠡ ᠮᠣᠳᠣᠨ ᠳ᠋ᠤ᠌ ᠬᠠᠳᠠᠭᠠᠰᠤ ᠮᠡᠲᠦ ᠰᠢᠭᠢᠳᠦᠨ ᠮᠠᠭᠠᠵᠢᠯᠠᠵᠤ ᠪᠠᠢᠭᠠ ᠨᠢ ᠲᠣᠳᠣᠬᠠᠨ ᠰᠣᠨᠣᠰᠤᠭᠳᠠᠨᠠ᠃
ᠳᠠᠮᠳᠢᠨᠰᠦ᠋ᠷᠦᠩ ᠪᠣᠰᠤᠯᠠ᠃ ᠪᠦᠷ ᠬᠥᠯ ᠳᠡᠭᠡᠷᠡ ᠪᠡᠨ ᠪᠣᠰᠴᠤ ᠴᠢᠳᠠᠭᠰᠠᠨ ᠳ᠋ᠠᠭᠠᠨ ᠳᠠᠮᠳᠢᠨᠰᠦ᠋ᠷᠦᠩ ᠪᠠᠶᠠᠷᠯᠠᠨ ᠬᠥᠯᠥᠰᠥ ᠴᠢᠬᠠᠷᠠᠭᠰᠠᠨ ᠪᠠᠷᠠᠭᠠᠨ ᠨᠢᠭᠤᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠲᠣᠭᠣᠷᠢᠨ ᠵᠣᠭᠰᠣᠭᠰᠠᠨ ᠬᠠᠨᠢ ᠨᠥᠬᠥᠳ ᠢ᠋ᠶ᠋ᠡᠨ ᠢᠨᠢᠶᠡᠮᠰᠦᠭᠯᠡᠨ ᠬᠠᠷᠠᠪᠠ᠃ ᠡᠨᠡ ᠨᠢ ᠶᠣᠰᠣᠲᠠᠢ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠡᠷᠡᠭ ᠪᠠᠢᠯᠭᠦᠢ᠃ ᠬᠣᠶᠠᠷ ᠨᠢᠳᠦ ᠨᠢ ᠵᠠᠯᠠᠭᠤ ᠬᠥᠮᠦᠨ ᠦ᠌ ᠬᠢ ᠰᠢᠭ ᠭᠠᠯ ᠲᠠᠢ ᠪᠢᠰᠢ ᠪᠣᠯᠪᠠᠴᠤ ᠨᠢᠭᠤᠷ ᠳᠦᠭᠦᠷᠡᠩ ᠭᠦᠨ ᠰᠠᠭᠤᠭᠰᠠᠨ ᠣᠯᠠᠨ ᠵᠢᠷᠤᠭᠠᠰᠤ ᠨᠤᠭᠤᠳ ᠤ᠋ᠨ ᠢ᠋ᠶ᠋ᠠᠨ ᠬᠠᠮᠲᠤ ᠪᠠᠷ ᠱᠣᠷᠣᠩ ᠤ᠋ᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠲᠣᠳᠣᠬᠠᠨ ᠬᠠᠷᠠᠭᠳᠠᠨᠠ᠃ ᠲᠡᠷᠡ ᠪᠠᠢᠲᠤᠭᠠᠢ ᠥᠷᠭᠡᠨ ᠴᠡᠭᠡᠵᠢ ᠶ᠋ᠢᠨ ᠬᠢᠨᠢ ᠶᠠᠩᠭᠠᠷ ᠶᠠᠰᠤ᠂ ᠡᠮᠦᠰᠦᠭᠰᠡᠨ ᠳᠡᠪᠡᠯ ᠡᠴᠡ ᠪᠡᠨ ᠨᠡᠪᠲᠡ ᠬᠠᠷᠠᠭᠳᠠᠬᠤ ᠰᠢᠭ᠋᠃ ᠲᠡᠭᠡᠭᠡᠳ ᠴᠣᠬᠣᠮ ᠶᠠᠭᠤ ᠰᠢᠭ᠋ ᠪᠠᠢᠪᠠ? ᠡᠭᠡᠭᠡ ᠯᠡ ᠬᠠᠳᠠ! ᠬᠠᠳᠠ ᠬᠠᠳᠠ ᠳ᠋ᠠᠭᠠᠨ ᠬᠠᠯᠠᠭᠤᠨ ᠨᠠᠷᠠᠨ᠂ ᠬᠠᠷᠠᠩᠭᠤᠢ ᠰᠥᠨᠢ ᠵᠥᠭᠡᠯᠡᠨ ᠪᠣᠷᠣᠭᠠᠨ᠂ ᠤᠷᠢᠬᠠᠨ ᠰᠠᠯᠬᠢ᠂ ᠰᠢᠷᠦᠭᠦᠨ ᠮᠥᠨᠳᠥᠷ᠂ ᠲᠣᠭᠰᠢᠨ ᠰᠠᠯᠬᠢ᠂ ᠠᠶᠤᠩᠭᠠ ᠠᠭᠠᠳᠠᠷ ᠠᠯᠢ ᠪᠦᠭᠦᠳᠡ ᠶ᠋ᠢ ᠦᠵᠡᠨ ᠪᠦᠭᠦᠳᠡ ᠳ᠋ᠦ᠍ ᠡᠯᠡᠭᠳᠡᠨ ᠬᠠᠭᠤᠴᠢᠷᠠᠭᠰᠠᠨ ᠥᠨᠳᠥᠷ ᠭᠡᠭᠴᠢ ᠶ᠋ᠢᠨ ᠬᠠᠳᠠᠨ ᠴᠣᠬᠢᠶᠠ ᠰᠢᠭ᠋ ᠪᠠᠢᠬᠤ ᠲᠡᠳᠦᠢ ᠦᠭᠡᠢ᠂ ᠬᠣᠢᠰᠢᠳᠠ ᠪᠠᠨ ᠮᠥᠨ ᠬᠡᠵᠢᠶᠡ ᠬᠡᠳᠦᠢ ᠳ᠋ᠦ᠍ ᠴᠦ᠍ ᠶᠠᠭ ᠡᠨᠡ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠣᠭᠰᠣᠵᠤ ᠪᠠᠢᠬᠤ ᠰᠢᠭ᠋ ᠯᠡ ᠦᠵᠡᠭᠳᠡᠨᠡ᠃
ᠭᠡᠲᠡᠯᠡ ᠡᠨᠡ ᠬᠠᠳᠠ ᠪᠦᠷᠦᠩᠬᠦᠢ ᠪᠣᠯᠪᠠᠴᠤ᠂ ᠪᠦᠬᠦ ᠱᠣᠷᠣᠩ ᠤ᠋ᠨ ᠬᠠᠷᠠᠩᠭᠤᠢ ᠬᠥᠨᠳᠡᠢ ᠳ᠋ᠦ᠍ ᠳᠦᠭᠦᠷᠡᠩ ᠰᠣᠨᠣᠰᠤᠭᠳᠠᠬᠤ ᠳᠠᠭᠤ ᠪᠠᠷ᠄ ᠭᠠᠮᠢᠩ ᠤ᠋ᠳ ᠨᠠᠰᠤᠨ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠮᠢᠨᠦ ᠠᠷᠠᠰᠤ ᠮᠢᠬᠠ ᠠ᠋ᠴᠠ ᠥᠯᠥᠰᠬᠦᠯᠡᠩ ᠴᠢᠨᠣᠠ ᠰᠢᠭ᠋ ᠵᠤᠯᠭᠠᠭᠠᠨ ᠭᠡᠪᠳᠡᠭᠦᠯᠦᠭᠰᠡᠨ ᠪᠢᠯᠢᠤ? ᠭᠡᠵᠦ ᠠᠮᠠ ᠠᠰᠠᠭᠤᠬᠤ ᠮᠡᠲᠦ ᠢᠨᠢᠶᠡᠮᠰᠦᠭᠯᠡᠭᠡᠳ᠂ ᠳᠠᠷᠠᠭᠠ ᠨᠢ ᠦᠭᠡᠢ ᠯᠡ ᠳᠡ᠂ ᠲᠡᠳᠡ ᠨᠠᠮᠠᠶ᠋ᠢ ᠭᠡᠪᠳᠡᠭᠦᠯᠵᠦ ᠴᠢᠳᠠᠭᠠ ᠦᠭᠡᠢ᠂ ᠪᠢ ᠬᠥᠯ ᠳᠡᠭᠡᠷᠡ ᠪᠡᠨ ᠵᠣᠭᠰᠣᠵᠤ ᠪᠠᠢᠨᠠ᠃ ᠲᠡᠢᠮᠦ ᠪᠢᠵᠡ ᠳᠡ?
—ᠲᠡᠢᠮᠦ ᠠ᠋᠂ ᠲᠠ ᠬᠥᠯ ᠳᠡᠭᠡᠷᠡ ᠪᠡᠨ ᠵᠣᠭᠰᠣᠵᠤ ᠪᠠᠢᠨᠠ ᠭᠡᠵᠦ ᠬᠥᠮᠦᠰ ᠬᠠᠷᠢᠭᠤᠯᠪᠠ᠃
— ᠭᠠᠮᠢᠩ ᠤ᠋ᠳ ᠮᠢᠨᠦ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠲᠡᠮᠡᠴᠡᠯ ᠳ᠋ᠦ᠍ ᠪᠤᠷᠤᠭᠤ ᠶ᠋ᠢ ᠬᠦᠯᠢᠶᠡᠯᠭᠡᠬᠦ ᠭᠡᠵᠦ ᠤᠯᠠᠢᠰᠬᠠᠭᠰᠠᠨ ᠬᠠᠯᠠᠭᠤᠨ ᠲᠡᠮᠦᠷ ᠢ᠋ᠶ᠋ᠡᠷ ᠬᠦᠷᠲᠡᠯᠡ ᠬᠠᠭᠠᠷᠢᠵᠤ ᠪᠠᠢᠭᠰᠠᠨ᠃ ᠲᠡᠢᠮᠦ ᠪᠢᠵᠡ ᠳᠡ?
— ᠲᠡᠢᠮᠦ ᠠ᠋᠂ ᠪᠢᠳᠡ ᠡᠭᠦᠨ ᠢ᠋ ᠨᠢᠳᠦ ᠪᠡᠷ ᠦᠵᠡᠭᠰᠡᠨ᠂ ᠬᠡᠵᠢᠶᠡ ᠴᠦ᠍ ᠮᠠᠷᠲᠠᠬᠤ ᠦᠭᠡᠢ ᠭᠡᠵᠦ ᠬᠥᠮᠦᠰ ᠬᠠᠷᠢᠭᠤᠯᠪᠠ᠃
— ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠦᠭᠡ ᠠᠯᠳᠠᠮᠠᠷ ᠡᠷᠡᠭᠦᠦ ᠰᠢᠭᠦᠯᠲᠡ ᠶ᠋ᠢ ᠪᠢ ᠣᠯᠠᠨᠲᠠ ᠦᠵᠡᠯᠡ᠃ ᠭᠡᠪᠡᠴᠦ ᠲᠡᠷᠡ ᠪᠦᠷᠢ ᠳᠡᠭᠡᠷᠡ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠳᠠᠢᠰᠤᠨ ᠳ᠋ᠤ᠌ ᠢᠯᠠᠭᠳᠠᠨ ᠪᠠᠭᠤᠵᠤ ᠥᠭᠬᠦ ᠰᠢᠭ ᠭᠤᠲᠤᠮᠰᠢᠭ ᠡᠨᠡ ᠬᠣᠷᠸᠠ ᠳ᠋ᠤ᠌ ᠦᠭᠡᠢ ᠭᠡᠵᠦ ᠪᠣᠳᠣᠭᠰᠠᠨ ᠨᠢᠭᠡ ᠪᠣᠳᠣᠯ᠂ ᠥᠪᠡᠷ ᠦ᠋ᠨ ᠬᠡᠷᠡᠭ ᠢ᠋ ᠢᠯᠡᠴᠢᠯᠡᠭᠰᠡᠭᠡᠷ ᠬᠠᠢᠷᠠᠲᠤ ᠬᠠᠨᠢ ᠨᠥᠬᠥᠳ ᠢ᠋ᠶ᠋ᠡᠨ ᠬᠡᠯᠡᠵᠦ ᠥᠭᠬᠦ ᠳ᠋ᠦ᠍ ᠬᠦᠷᠳᠡᠭ ᠪᠠᠰᠠ ᠨᠢᠭᠡ ᠭᠤᠲᠤᠮᠰᠢᠭ᠂ ᠡᠨᠡ ᠬᠣᠶᠠᠷ ᠮᠢᠨᠦ ᠬᠡᠯᠡ ᠶ᠋ᠢ ᠬᠥᠨᠳᠡᠯᠡᠨ ᠵᠠᠭᠤᠯᠭᠠᠵᠤ ᠪᠠᠢᠭᠰᠠᠨ ᠤ᠋ ᠳᠡᠭᠡᠷᠡ᠂ ᠤᠯᠤᠰ ᠣᠷᠣᠨ ᠤ᠋ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠨᠢ ᠠᠮᠢᠳᠤ ᠬᠥᠮᠦᠨ ᠦ᠌ ᠬᠤᠪᠢ ᠵᠠᠶᠠᠭᠠᠨ ᠤ᠋ ᠬᠡᠷᠡᠭ ᠪᠣᠯᠪᠠᠴᠤ ᠠᠮᠢ ᠪᠡᠶᠡ ᠬᠠᠢᠷᠠ ᠦᠭᠡᠢ ᠵᠢᠳᠬᠦᠭᠰᠡᠳ ᠦ᠋ᠨ ᠲᠡᠮᠡᠴᠡᠯ ᠢ᠋ᠶ᠋ᠡᠷ ᠪᠠᠲᠤᠵᠢᠨ ᠪᠣᠢᠵᠢᠨᠠ ᠭᠡᠰᠡᠨ ᠮᠢᠨᠦ ᠲᠥᠷᠥᠯᠬᠢ ᠶ᠋ᠢᠨ ᠰᠠᠨᠠᠭᠠ ᠡᠭᠦᠷᠢᠳᠡ ᠶ᠋ᠢᠨ ᠢᠲᠡᠭᠡᠯ᠂ ᠬᠣᠢᠰᠢᠳᠠ ᠶ᠋ᠢᠨ ᠬᠦᠰᠡᠯ ᠡᠨᠡ ᠪᠦᠭᠦᠳᠡ ᠨᠠᠮᠠᠶ᠋ᠢ ᠬᠠᠳᠠ ᠴᠢᠯᠠᠭᠤ ᠰᠢᠭ᠋ ᠪᠣᠯᠭᠠᠵᠤ ᠪᠠᠢᠪᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠠᠷᠠᠰᠤ ᠮᠢᠬᠠᠨ ᠤ᠋ ᠡᠮᠵᠡᠭᠯᠡᠨ ᠡᠪᠡᠳᠬᠦ ᠶ᠋ᠢ ᠡᠰᠡ ᠬᠠᠢᠬᠤᠷᠤᠨ ᠪᠣᠰᠴᠤ᠂ ᠮᠠᠩᠯᠠᠢ ᠸᠠᠩᠲᠠᠨ ᠤ᠋ ᠡᠮᠦᠨᠡ ᠵᠣᠭᠰᠣᠵᠤ ᠪᠠᠢᠯᠠ᠃ ᠠᠷᠤ ᠳ᠋ᠤᠨᠢ ᠨᠢᠭᠡ ᠬᠥᠮᠦᠨ ᠮᠡᠭᠰᠢᠨ ᠤᠬᠢᠯᠠᠬᠤ ᠰᠣᠨᠣᠰᠳᠠᠨᠠ᠃ ᠡᠷᠭᠢᠨ ᠬᠠᠷᠠᠪᠠᠯ ᠵᠠᠮᠢᠶᠠᠨ ᠬᠦᠩ᠂ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠣᠳᠤᠷᠠᠯᠳᠤ ᠨᠢᠭᠤᠷ ᠢ᠋ᠶ᠋ᠠᠨ ᠬᠠᠪ ᠳᠠᠷᠤᠨ ᠮᠡᠭᠰᠢᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠦᠷ ᠢᠩᠭᠢᠨᠡᠨ ᠤᠬᠢᠯᠠᠬᠤ ᠪᠣᠯᠤᠯᠠ᠃
ᠶᠠᠭᠤᠨ ᠳ᠋ᠤ᠌ ᠡᠨᠡ ᠪᠣᠢ?
ᠡᠨᠡ ᠬᠥᠮᠦᠨ ᠬᠡᠷᠡᠭ ᠬᠦᠯᠢᠶᠡᠭᠰᠡᠨ ᠬᠥᠮᠦᠨ ᠠᠵᠢ᠃ ᠬᠡᠷᠡᠭ ᠬᠦᠯᠢᠶᠡᠨ ᠬᠠᠨᠢ ᠨᠥᠬᠥᠳ ᠢ᠋ᠶ᠋ᠡᠨ ᠢᠯᠡᠴᠢᠯᠡᠵᠦ ᠣᠷᠬᠢᠭᠰᠠᠨ ᠳ᠋ᠠᠭᠠᠨ ᠣᠳᠣ ᠭᠣᠣᠯ ᠬᠠᠷᠠᠯᠠᠨ ᠤᠬᠢᠯᠠᠵᠤ ᠪᠠᠢᠭᠠ ᠠᠵᠢ᠃
ᠸᠠᠩ ᠤ᠋ᠨ ᠤᠷᠤᠭᠤᠯ ᠲᠠᠲᠠᠯᠳᠤᠨ ᠬᠥᠳᠡᠯᠪᠡ᠃ ᠡᠨᠡ ᠪᠣᠯ ᠢᠨᠢᠶᠡᠮᠰᠦᠭᠯᠡᠯ᠂ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠢᠭᠠ ᠶ᠋ᠢ ᠨᠢ ᠬᠥᠮᠦᠰ ᠣᠢᠯᠠᠭᠠᠪᠠ᠃ ᠠᠮᠠ ᠨᠢ ᠨᠠᠭᠠᠰᠢ ᠴᠠᠭᠠᠰᠢ ᠲᠠᠲᠠᠯᠳᠤᠨ ᠠᠬᠢᠨ ᠠᠬᠢᠨ ᠬᠥᠳᠡᠯᠦᠨᠡ᠃ ᠡᠨᠡ ᠪᠣᠯ ᠲᠡᠭᠦᠨ ᠦ᠌ ᠶᠠᠷᠢᠵᠤ ᠪᠠᠢᠭᠠ ᠬᠡᠷᠡᠭ! ᠪᠢ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠳ᠋ᠤ᠌ ᠬᠡᠪᠲᠡᠭᠡ ᠪᠡᠷ ᠢ᠋ᠶ᠋ᠡᠨ ᠦᠬᠦᠬᠦ ᠦᠭᠡᠢ ᠶ᠋ᠢ ᠵᠣᠷᠢᠨ ᠪᠣᠰᠴᠤ ᠴᠢᠳᠠᠯᠠ᠃ ᠡᠭᠦᠪᠡᠷ ᠦᠵᠡᠪᠡᠯ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠵᠣᠷᠢᠭᠰᠠᠨ ᠶᠡᠬᠡ ᠬᠡᠷᠡᠭ ᠵᠠᠪᠠᠯ ᠪᠡᠶᠡᠯᠡᠬᠦ ᠶᠦᠮ ᠪᠠᠢᠨᠠ ᠭᠡᠵᠦ ᠬᠡᠯᠡᠭᠰᠡᠨ ᠨᠢ ᠬᠥᠮᠦᠰ ᠦ᠋ᠨ ᠴᠢᠬᠢᠨ ᠳ᠋ᠦ᠍ ᠠᠯᠤᠰ ᠤ᠋ᠨ ᠠᠯᠤᠰ ᠠ᠋ᠴᠠ ᠳᠠᠮᠵᠢᠨ ᠢᠷᠡᠬᠦ ᠴᠤᠤᠷᠢᠶᠠ ᠮᠡᠲᠦ ᠰᠣᠨᠣᠰᠳᠠᠪᠠ᠃
ᠸᠠᠩ ᠤ᠋ᠨ ᠠᠮᠢᠰᠬᠤᠯ ᠵᠣᠭᠰᠣᠯᠠ᠃ ᠴᠢᠰᠤ ᠨᠢ ᠭᠦᠶᠦᠬᠦ ᠪᠡᠨ ᠪᠣᠯᠢᠵᠤ᠂ ᠴᠢᠷᠠᠢ ᠨᠢ ᠬᠥᠬᠡᠷᠡᠨ᠂ ᠲᠥᠪ ᠬᠥᠳᠡᠯᠭᠡᠭᠡᠨ ᠦᠭᠡᠢ ᠪᠣᠯᠬᠤ ᠪᠣᠯᠪᠠᠴᠤ ᠥᠨᠥᠬᠢ ᠬᠠᠨᠠᠨ ᠳ᠋ᠠᠭᠠᠨ ᠵᠣᠭᠰᠣᠭᠰᠠᠭᠠᠷ ᠪᠠᠢᠬᠤ ᠨᠢ ᠭᠠᠢᠬᠠᠯᠲᠠᠢ᠃ ᠭᠡᠲᠡᠯᠡ ᠭᠡᠨᠡᠳᠲᠡ ᠪᠡᠬᠢ ᠪᠠᠲᠤ ᠭᠡᠭᠴᠢ ᠶ᠋ᠢᠨ ᠥᠨᠳᠥᠷ ᠪᠠᠭᠠᠨᠠ ᠬᠠᠵᠠᠭᠤ ᠲᠡᠢᠰᠢ ᠬᠠᠵᠠᠢᠬᠤ ᠮᠡᠲᠦ ᠬᠠᠵᠠᠢᠪᠠ᠃ ᠬᠠᠵᠠᠢᠨ ᠬᠠᠵᠠᠢᠭᠰᠠᠭᠠᠷ ᠫᠠᠰ ᠪᠠᠭᠤᠨ ᠤᠨᠠᠪᠠ᠃ ᠡᠨᠡ ᠳᠠᠷᠤᠢ ᠢᠷᠦᠭᠡᠯ ᠡᠬᠢᠯᠡᠯᠡ᠃
ᠵᠠᠯᠠᠬᠠᠵᠠ ᠬᠤᠲᠤᠭᠲᠤ᠂ ᠳᠠᠷᠢ ᠡᠬᠡ ᠯᠠᠮᠠᠳᠠᠨ᠂ ᠳᠤᠢᠩᠬᠤᠷ ᠤ᠋ᠨ ᠳᠠ ᠯᠠᠮᠠ ᠡᠨᠡ ᠭᠤᠷᠪᠠ ᠤᠶᠠᠬᠠᠨ ᠨᠠᠮᠤᠭᠤᠨ ᠬᠣᠭᠣᠯᠠᠢ ᠪᠠᠷ ᠡᠬᠢᠯᠡᠭᠰᠡᠨ ᠦ᠌ ᠳᠠᠷᠠᠭᠠ ᠲᠡᠷᠡ ᠢᠷᠦᠭᠡᠯ ᠢ᠋ ᠮᠡᠳᠡᠳᠡᠭ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠠᠭᠠᠨ ᠤᠩᠰᠢᠪᠠ᠃ ᠢᠩᠭᠢᠬᠦ ᠳ᠋ᠦ᠍ ᠡᠨᠡ ᠣᠷᠣᠨ ᠥᠨᠥᠬᠢ ᠭᠠᠮᠢᠩ ᠤ᠋ᠨ ᠦᠮᠡᠬᠡᠢ ᠱᠣᠷᠣᠩ ᠪᠢᠰᠢ ᠪᠣᠯᠤᠯᠠ᠂ ᠶᠡᠷᠦ ᠡᠴᠡ ᠪᠡᠨ ᠭᠠᠵᠠᠷ ᠳᠣᠣᠷᠠ ᠪᠠᠷᠢᠭᠳᠠᠭᠰᠠᠨ ᠬᠠᠷᠠᠩᠭᠤᠢ ᠣᠷᠣᠨ ᠴᠤ᠌ ᠪᠢᠰᠢ᠂ ᠬᠠᠷᠢᠨ ᠴᠤ᠌ ᠮᠠᠨ ᠤ᠋ ᠭᠠᠵᠠᠷ ᠳᠡᠯᠡᠬᠡᠢ ᠳᠡᠭᠡᠷᠡ! ᠳᠡᠭᠡᠷᠡ ᠳᠡᠭᠡᠷᠡ ᠪᠡᠨ ᠳᠡᠯᠡᠬᠡᠢ ᠳ᠋ᠦ᠍ ᠪᠢᠰᠢ ᠳᠡᠭᠡᠷᠡ ᠲᠩᠷᠢ ᠳ᠋ᠦ᠍ ᠪᠠᠢᠳᠠᠭ ᠳ᠋ᠧᠪᠠᠵᠠᠨ ᠤ᠋ ᠣᠷᠣᠨ ᠭᠡᠭᠴᠢ ᠶ᠋ᠢ ᠰᠠᠨᠠᠭᠳᠠᠭᠤᠯᠤᠨᠠ᠃ ᠭᠡᠪᠡᠴᠦ ᠭᠠᠭᠴᠠ ᠳ᠋ᠧᠪᠠᠵᠠᠨ ᠢ᠋ ᠪᠢᠰᠢ᠂ ᠭᠠᠵᠠᠷ ᠳᠡᠭᠡᠷᠡ《ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠵᠣᠷᠢᠭᠰᠠᠨ ᠶᠡᠬᠡ ᠬᠡᠷᠡᠭ ᠵᠠᠪᠠᠯ ᠪᠡᠶᠡᠯᠡᠬᠦ ᠶᠦᠮ ᠪᠠᠢᠨᠠ》 ᠭᠡᠵᠦ ᠸᠠᠩᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ ᠳᠠᠪᠬᠤᠷ ᠰᠠᠨᠠᠨ ᠢᠷᠦᠭᠡᠯ ᠤᠩᠰᠢᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠪᠠᠭᠠᠲᠤᠷ