ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ - ᠵᠢᠷᠭᠤᠳᠤᠭᠠᠷ ᠪᠦᠯᠦᠭ᠂ 2 ᠲᠠᠬᠢᠯᠭᠠ ᠶᠢᠨ ᠣᠪᠣᠭᠠ Шинэлам – 6-р бүлэг᠂2 тахилгын овоо
206ᠵᠢᠷᠭᠤᠳᠤᠭᠠᠷ ᠪᠦᠯᠦᠭ᠂ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠬᠣᠯᠪᠣᠭᠳᠠᠭᠰᠠᠨ ᠰᠦᠮᠡ ᠬᠡᠢᠳ ᠪᠠ ᠤᠯᠠᠮᠵᠢᠯᠠᠯᠲᠤ ᠲᠠᠬᠢᠯᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠳ
ᠬᠣᠶᠠᠷ᠂ ᠲᠠᠬᠢᠯᠭᠠ ᠶ᠋ᠢᠨ ᠣᠪᠣᠭᠠ
ᠬᠤᠷᠠ ᠲᠤᠨᠤᠳᠠᠰᠤ ᠦᠭᠡᠢ ᠭᠠᠩ ᠲᠠᠢ ᠨᠢᠭᠡᠨ ᠵᠢᠯ᠂ ᠰᠢᠨᠡᠯᠡᠮᠡ ᠡᠮᠲᠦ ᠡᠪᠡᠰᠦ ᠵᠡᠭᠡᠷᠭᠡᠨᠡ ᠤᠷᠭᠤᠵᠤ ᠵᠡᠭᠡᠷᠡ ᠲᠠᠰᠢᠭᠰᠠᠨ ᠠᠲᠠᠷ ᠰᠠᠢᠬᠠᠨ ᠭᠠᠵᠠᠷ ᠤ᠋ᠨ ᠥᠨᠳᠥᠷ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠪᠦᠷᠢᠨᠪᠠᠶᠠᠷ ᠵᠡᠷᠭᠡ ᠡᠷᠦᠬᠡ ᠲᠡᠢ ᠬᠠᠮᠲᠤᠷᠠᠵᠤ ᠪᠣᠷᠣᠭᠠᠨ ᠤᠷᠢᠵᠤ ᠣᠷᠣᠭᠤᠯᠬᠤ ᠪᠠᠷ ᠣᠯᠠᠨ ᠯᠠᠮᠠ ᠨᠠᠷ ᠢ᠋ ᠵᠠᠯᠠᠵᠤ ᠨᠣᠮ ᠤᠩᠰᠢᠭᠤᠯᠤᠨ《ᠪᠦᠲᠦᠭᠡᠭᠦᠯ ᠪᠦᠲᠦᠭᠡᠯᠭᠡᠭᠰᠡᠨ 》(ᠭᠠᠵᠠᠷ ᠤᠰᠤ ᠶ᠋ᠢ ᠲᠠᠬᠢᠬᠤ ᠨᠢᠭᠡ ᠵᠦᠢᠯ ᠦ᠋ᠨ ᠲᠥᠪᠡᠳ ᠨᠣᠮ— ᠵᠣᠬᠢᠶᠠᠭᠴᠢ ᠠ᠋ᠴᠠ) ᠠ᠋ᠴᠠ ᠶᠡᠬᠡ ᠪᠣᠷᠣᠭᠠᠨ ᠣᠷᠣᠵᠠᠢ᠂ ᠲᠡᠷᠡ ᠵᠢᠯ ᠨᠢ ᠡᠪᠡᠰᠦ ᠪᠡᠯᠴᠢᠭᠡᠷ ᠣᠨᠴᠠ ᠰᠠᠢᠨ᠂ ᠲᠠᠷᠢᠶᠠ ᠲᠥᠮᠥᠰᠥ ᠴᠦ᠍ ᠡᠯᠪᠡᠭ ᠬᠤᠷᠢᠶᠠᠯᠲᠠ ᠲᠠᠢ ᠪᠣᠯᠤᠭᠰᠠᠨ ᠭᠡᠨᠡ᠃ ᠲᠡᠢᠮᠦ ᠡᠴᠡ ᠡᠨᠡ ᠣᠷᠴᠢᠮ ᠤ᠋ᠨ ᠠᠢᠯ ᠡᠷᠦᠬᠡ᠂ ᠪᠤᠷᠬᠠᠨ ᠲᠩᠷᠢ ᠢᠪᠡᠭᠡᠭᠰᠡᠨ ᠭᠠᠵᠠᠷ ᠭᠡᠵᠦ ᠪᠢᠰᠢᠷᠡᠨ ᠰᠢᠲᠦᠵᠦ ᠡᠨᠡ ᠣᠷᠣᠢ ᠳ᠋ᠤ᠌ ᠬᠠᠳᠠ ᠴᠢᠯᠠᠭᠤ ᠣᠪᠣᠭᠠᠯᠠᠵᠤ ᠨᠠᠮᠠᠨᠴᠢᠯᠠᠨ ᠶᠠᠪᠤᠳᠠᠭ ᠪᠠᠢᠵᠠᠢ᠃
ᠬᠥᠬᠡ ᠬᠤᠯᠤᠭᠠᠨᠠ ᠵᠢᠯ ᠳᠠᠷᠤᠢ1924 ᠣᠨ ᠤ᠋ ᠵᠤᠨ ᠰᠢᠨᠠᠯᠠᠮᠠ ᠵᠡᠷᠭᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠥᠮᠦᠰ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠭᠡᠷ ᠲᠦ᠍ ᠰᠡᠮᠡᠭᠡᠷᠬᠡᠨ ᠢ᠋ᠶ᠋ᠡᠷ ᠬᠠᠯᠬᠠ ᠮᠣᠩᠭᠣᠯ ᠳ᠋ᠤ᠌ ᠰᠤᠷᠤᠯᠴᠠᠬᠤ ᠪᠠ ᠴᠡᠷᠢᠭ ᠦ᠋ᠨ ᠫᠤᠤ ᠵᠡᠪᠰᠡᠭ ᠦ᠋ᠨ ᠲᠤᠰᠠᠯᠠᠮᠵᠢ ᠣᠯᠬᠤ ᠪᠠᠷ ᠡᠳᠦᠷ ᠦ᠋ᠨ ᠰᠠᠢᠨ ᠵᠦᠭ ᠦ᠋ᠨ ᠰᠠᠢᠨ ᠢ᠋ ᠰᠣᠩᠭᠣᠵᠤ ᠮᠣᠷᠳᠠᠭᠠᠳ ᠡᠨᠡ ᠬᠦ᠌ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢᠨ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠭᠠᠯ ᠴᠣᠭ ᠭᠠᠷᠭᠠᠭᠠᠳ ᠠᠷᠴᠠ ᠬᠦᠵᠢ ᠰᠢᠲᠠᠭᠠᠨ ᠤᠰᠠᠩ ᠲᠠᠯᠪᠢᠵᠤ᠂《ᠬᠣᠯᠠ ᠶ᠋ᠢᠨ ᠵᠠᠮ ᠳ᠋ᠤ᠌ ᠠᠮᠤᠷ ᠮᠡᠨᠳᠦ ᠰᠠᠢᠨ ᠰᠠᠢᠬᠠᠨ ᠶᠠᠪᠤᠭᠠᠳ ᠵᠣᠷᠢᠭᠰᠠᠨ ᠵᠣᠷᠢᠯᠭᠠ ᠶᠣᠰᠣᠴᠢᠯᠠᠨ ᠪᠦᠲᠦᠬᠦ ᠶ᠋ᠢ ᠵᠠᠯᠪᠠᠷᠢᠨ ᠳᠠᠭᠠᠳᠬᠠᠯ ᠬᠢᠵᠦ ᠲᠠᠩᠭᠠᠷᠢᠭᠯᠠᠨ ᠲᠩᠷᠢ ᠭᠠᠵᠠᠷ ᠲᠤ᠌ ᠮᠥᠷᠭᠥᠵᠦ》᠂ ᠤᠮᠠᠷᠠᠰᠢ ᠶᠡᠬᠡ ᠪᠠᠯᠠᠷ ᠳᠤᠮᠳᠠᠭᠤᠷ ᠮᠣᠷᠳᠠᠵᠠᠭᠠᠭᠰᠠᠨ ᠭᠡᠨᠡ᠃ ᠬᠣᠵᠢᠮ ᠪᠠᠰᠠ《ᠲᠠᠩᠭᠠᠷᠢᠭ ᠤ᠋ᠨ ᠣᠪᠣᠭᠠ》 ᠭᠡᠵᠦ ᠬᠡᠯᠡᠳᠡᠭ᠃
ᠡᠨᠡ ᠣᠪᠣᠭᠠ ᠳᠠᠯᠠᠢ ᠶ᠋ᠢᠨ ᠲᠦᠪᠰᠢᠨ ᠡᠴᠡ1300 ᠮᠧᠲ᠋ᠷ ᠥᠨᠳᠥᠷ ᠡᠷᠭᠦᠭᠳᠡᠵᠦ ᠠᠯᠤᠰ ᠬᠣᠯᠠ ᠠ᠋ᠴᠠ ᠬᠠᠷᠠᠯᠠᠨ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠦᠵᠡᠭᠳᠡᠵᠦ᠂ ᠣᠷᠣᠢ ᠳᠡᠭᠡᠷᠡ ᠡᠴᠡ ᠲᠡᠮᠦᠷ ᠣᠪᠣᠭᠠ᠂ ᠪᠠᠷᠰᠤᠩᠭᠠ ᠶ᠋ᠢᠨ ᠣᠪᠣᠭᠠ᠂ ᠭᠠᠭᠴᠠ ᠣᠪᠣᠭᠠ᠂ ᠰᠦᠮᠡᠲᠦ ᠶ᠋ᠢᠨ ᠣᠪᠣᠭᠠ᠂ ᠰᠢᠪᠠᠭ ᠣᠪᠣᠭᠠ᠂ ᠮᠠᠩᠬᠠᠲᠤ ᠬᠤᠷᠠᠬᠤ᠂ ᠭᠣᠵᠣᠩ ᠬᠤᠷᠠᠬᠤ ᠵᠡᠷᠭᠡ ᠳᠣᠯᠣᠭᠠᠨ ᠣᠪᠣᠭᠠ᠂ ᠬᠥᠬᠡᠨᠠᠭᠤᠷ ᠪᠠᠷᠰᠤᠩᠭᠠ ᠶ᠋ᠢᠨ ᠨᠠᠭᠤᠷ᠂ ᠣᠮᠪᠤᠢ ᠶ᠋ᠢᠨ ᠨᠠᠭᠤᠷ᠂ ᠮᠠᠩᠬᠠᠲᠤ ᠶ᠋ᠢᠨ ᠨᠠᠭᠤᠷ᠂ ᠪᠤᠵᠠᠢ ᠨᠠᠭᠤᠷ᠂ ᠪᠠᠶᠠᠨ ᠨᠠᠭᠤᠷ᠂ ᠵᠠᠨᠠᠭᠤᠷ ᠵᠡᠷᠭᠡ ᠳᠣᠯᠣᠭᠠᠨ ᠨᠠᠭᠤᠷ ᠢ᠋ ᠳᠤᠷᠠᠨ ᠢ᠋ᠶ᠋ᠠᠷ ᠪᠢᠰᠢ ᠨᠢᠳᠦ ᠪᠡᠷ ᠬᠥᠮᠦᠰ ᠲᠦ᠍ ᠲᠣᠪ ᠲᠣᠳᠣᠷᠬᠠᠢ ᠦᠵᠡᠭᠦᠯᠳᠡᠭ ᠪᠣᠯᠬᠣᠷ《ᠲᠤᠩᠭᠠᠯᠠᠭ ᠤ᠋ᠨ ᠣᠪᠣᠭᠠ》 ᠭᠡᠮᠡᠨ ᠳᠠᠬᠢᠵᠤ ᠰᠢᠲᠦᠬᠦ ᠪᠣᠯᠵᠠᠢ᠃
ᠲᠤᠩᠭᠠᠯᠠᠭ ᠤ᠋ᠨ ᠣᠪᠣᠭᠠ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠨᠠᠢ᠍ᠮᠠᠨ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠭᠤᠷᠪᠠᠨ ᠤ᠋ ᠡᠳᠦᠷ ᠣᠪᠣᠭᠠᠨ ᠲᠠᠬᠢᠯᠭᠠ ᠨᠠᠢᠷ ᠲᠠᠢ ᠪᠥᠭᠡᠳ ᠭᠠᠯᠠᠭᠤᠲᠤ᠂ ᠳᠠᠪᠴᠠᠭ᠂ ᠲᠣᠯᠢ᠂ ᠤᠯᠠᠭᠠᠨᠲᠣᠯᠣᠭᠠᠢ᠂ ᠦᠦᠰᠢᠨᠵᠦᠦ᠂ ᠲᠤᠭ ᠵᠡᠷᠭᠡ ᠵᠢᠷᠭᠤᠭᠠᠨ ᠰᠤᠮᠤ(ᠪᠠᠯᠭᠠᠰᠤ) ᠶ᠋ᠢᠨ ᠬᠥᠮᠦᠰ ᠬᠦᠷᠦᠯᠴᠡᠨ ᠢᠷᠡᠵᠦ ᠲᠤᠰ ᠭᠠᠵᠠᠷ ᠤ᠋ᠨ ᠢ᠋ᠶ᠋ᠠᠨ ᠬᠤᠷᠳᠤᠨ ᠵᠢᠷᠣᠭᠠ ᠮᠣᠷᠢᠳ ᠢ᠋ᠶ᠋ᠠᠨ ᠠᠪᠴᠢᠷᠠᠵᠤ ᠤᠯᠠᠮᠵᠢᠯᠠᠯᠲᠤ《ᠣᠷᠳᠣᠰ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠤᠷᠤᠯᠳᠤᠭᠠᠨ》 ᠪᠣᠯᠤᠨ《ᠬᠣᠯᠠ ᠶ᠋ᠢᠨ ᠮᠣᠷᠢᠨ ᠤ᠋ ᠤᠷᠤᠯᠳᠤᠭᠠᠨ》 ᠢ᠋ ᠬᠥᠷ ᠬᠥᠭᠵᠢᠯ ᠲᠡᠢ ᠶᠠᠪᠤᠭᠳᠠᠭᠤᠯᠳᠠᠭ᠃ ᠮᠣᠷᠢᠨ ᠰᠣᠶᠣᠯ ᠢ᠋ ᠶᠡᠬᠡ ᠪᠡᠷ ᠬᠦᠨᠳᠦᠳᠬᠡᠳᠡᠭ ᠣᠨᠴᠠᠯᠢᠭ ᠲᠠᠢ ᠭᠠᠵᠠᠷ ᠪᠣᠯᠬᠣᠷ ᠲᠤᠰ ᠪᠤᠵᠠᠢ ᠭᠠᠴᠠᠭᠠᠨ ᠳ᠋ᠤ᠌ ᠬᠤᠷᠳᠤᠨ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠬᠣᠷᠣᠬᠠᠢ ᠲᠠᠢ ᠬᠥᠮᠦᠰ ᠲᠤᠩ ᠠᠷᠪᠢᠨ ᠪᠠᠢᠳᠠᠭ ᠶᠤᠮ᠃
2001 ᠣᠨ ᠳ᠋ᠤ᠌ ᠲᠤᠰ ᠭᠠᠵᠠᠷ ᠤ᠋ᠨ ᠮᠠᠯᠴᠢᠳ ᠥᠭᠯᠢᠭᠡ ᠡᠷᠭᠦᠴᠡ ᠪᠠᠷᠢᠵᠤ ᠨᠢᠭᠡ ᠲᠠᠰᠤᠯᠭᠠ ᠰᠦᠮᠡ ᠪᠠᠢᠭᠤᠯᠪᠠ᠃2002 ᠣᠨ ᠳ᠋ᠤ᠌ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠨᠢ ᠰᠢᠨᠠᠯᠠᠮᠠ ᠪᠠᠨ ᠳᠤᠷᠠᠰᠬᠠᠬᠤ ᠶ᠋ᠢᠨ ᠲᠥᠯᠥᠭᠡ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠣᠨᠴᠠᠯᠢᠭ ᠲᠠᠢ6 ᠮᠧᠲ᠋ᠷ ᠥᠨᠳᠥᠷ ᠴᠠᠭᠠᠨ ᠰᠤᠪᠤᠷᠭᠠ ᠪᠣᠰᠬᠠᠵᠤ᠂ ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠪᠤᠷᠬᠠᠨ ᠱᠠᠰᠢᠨ ᠤ᠋ ᠨᠡᠢᠭᠡᠮᠯᠢᠭ ᠦ᠋ᠨ ᠬᠡᠷᠡᠭ ᠡᠷᠬᠢᠯᠡᠭᠴᠢ ᠦᠦᠰᠢᠨᠵᠦᠦ ᠰᠦᠮᠡ ᠶ᠋ᠢᠨ ᠪᠣᠭᠳᠠ ᠭᠡᠭᠡᠨ ᠷᠠᠪᠳᠠᠨᠳᠣᠷᠵᠢ ᠨᠣᠮ ᠤᠩᠰᠢᠵᠤ ᠠᠷᠢᠭᠤᠳᠬᠠᠨ ᠷᠠᠪᠨᠠᠢᠯᠠᠭᠰᠠᠨ ᠪᠠᠢᠨᠠ᠃2004 ᠣᠨ ᠳ᠋ᠤ᠌ ᠮᠣᠩᠭᠣᠯ ᠭᠡᠷ ᠪᠠᠷᠢᠵᠤ ᠰᠢᠨᠡᠯᠡᠮᠡ ᠶ᠋ᠢᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠦᠵᠡᠰᠬᠦᠯᠡᠩ ᠦ᠋ᠨ ᠣᠷᠳᠣᠨ ᠳ᠋ᠤ᠌ ᠰᠢᠨᠠᠯᠠᠮᠠ ᠶ᠋ᠢᠨ ᠱᠤᠭᠤᠮᠠᠯ ᠢ᠋ ᠪᠤᠰᠬᠠᠵᠤ ᠰᠣᠶᠣᠯ ᠵᠢᠭᠤᠯᠴᠢᠯᠠᠯ ᠤ᠋ᠨ ᠭᠠᠵᠠᠷ ᠪᠣᠯᠭᠠᠨ ᠪᠠᠢᠭᠤᠯᠤᠭᠰᠠᠨ ᠪᠠᠢᠨᠠ᠃
ᠲᠤᠰ ᠣᠪᠣᠭᠠᠨ ᠤ᠋ ᠬᠠᠮᠢᠶᠠᠷᠤᠯᠲᠠ ᠪᠣᠯᠤᠨ ᠬᠠᠮᠠᠭᠠᠯᠠᠯᠲᠠ ᠶ᠋ᠢᠨ ᠭᠠᠵᠠᠷ50000 ᠲᠡᠭᠰᠢ ᠳᠥᠷᠪᠡᠯᠵᠢᠨ ᠮᠧᠲ᠋ᠷ ᠲᠠᠯᠠᠪᠠᠢ ᠭᠠᠵᠠᠷ ᠢ᠋ ᠡᠵᠡᠩᠨᠡᠵᠦ ᠪᠣᠢ᠃
ᠣᠷᠳᠣᠰ ᠤ᠋ᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠲᠡᠦᠬᠡᠲᠦ ᠭᠠᠵᠠᠷ — ᠲᠤᠩᠭᠠᠯᠠᠭ ᠤ᠋ᠨ ᠣᠪᠣᠭᠠᠨ ᠤ᠋ ᠬᠠᠮᠢᠶᠠᠷᠤᠯᠲᠠ ᠶ᠋ᠢᠨ ᠵᠥᠪᠯᠡᠯ ᠢ᠋ ᠰᠢᠨᠠᠯᠠᠮᠠ ᠶ᠋ᠢᠨ ᠲᠥᠷᠥᠭᠰᠡᠨ ᠠᠴᠢ ᠬᠦᠦ ᠠᠯᠲᠠᠨᠳᠠᠯᠠᠢ ᠪᠣᠯᠤᠨ ᠪᠤᠵᠠᠢ ᠭᠠᠴᠠᠭᠠᠨ ᠤ᠋ ᠳᠠᠷᠤᠭᠠ ᠭᠠᠯᠳᠠᠯᠠᠢ᠂ ᠢᠪᠡᠭᠡᠯ᠂ ᠤᠭ ᠤ᠋ᠨ ᠭᠠᠴᠠᠭᠠᠨ ᠤ᠋ ᠳᠠᠷᠤᠭᠠ ᠴᠢᠮᠡᠭᠨᠣᠷᠪᠤ᠂ ᠣᠪᠣᠭᠠᠨ ᠤ᠋ ᠳᠠᠭᠠᠮᠠᠯ ᠣᠳᠬᠠᠨᠪᠠᠭᠠᠰᠤ᠂ ᠣᠳᠬᠠᠨᠪᠠᠶᠠᠷ᠂ ᠰᠣᠶᠣᠯᠲᠤ᠂ ᠪᠠᠷᠯᠤᠤ᠂ ᠨᠤᠲᠤᠭ ᠤ᠋ᠨ ᠶᠡᠬᠡᠮᠡᠳ ᠪᠣᠩᠬᠤᠶᠣ᠂ ᠳᠣᠪᠴᠢᠨᠰᠡᠷᠡᠩ᠂ ᠨᠠᠰᠤᠨᠪᠠᠲᠤ ᠵᠡᠷᠭᠡ ᠬᠣᠷᠢᠨ ᠨᠠᠢ᠍ᠮᠠᠨ ᠬᠥᠮᠦᠨ ᠢ᠋ᠶ᠋ᠡᠷ ᠪᠦᠷᠢᠯᠳᠦᠭᠦᠯᠦᠨ ᠰᠣᠩᠭᠣᠵᠤ᠂ ᠣᠪᠣᠭᠠᠨ ᠤ᠋ ᠪᠦᠲᠦᠭᠡᠨ ᠪᠠᠢᠭᠤᠯᠤᠯᠲᠠ᠂ ᠤᠯᠠᠮᠵᠢᠯᠠᠯᠲᠤ ᠣᠪᠣᠭᠠᠨ ᠤ᠋ ᠲᠠᠬᠢᠯᠭᠠ᠂ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠰᠣᠶᠣᠯ ᠵᠢᠭᠤᠯᠴᠢᠯᠠᠯ᠂ ᠣᠷᠳᠣᠰ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠰᠣᠶᠣᠯ᠂ ᠪᠥᠬᠡ ᠶ᠋ᠢᠨ ᠤᠷᠤᠯᠳᠤᠭᠠᠨ᠂ ᠣᠪᠣᠭᠠᠨ ᠤ᠋ ᠣᠷᠣᠯᠭᠠ ᠵᠠᠷᠤᠯᠭᠠ ᠵᠡᠷᠭᠡ ᠶ᠋ᠢ ᠰᠢᠭᠤᠳ ᠬᠠᠮᠢᠶᠠᠷᠴᠤ ᠪᠣᠢ᠃ ᠥᠨᠥ ᠲᠡᠦᠬᠡ ᠰᠣᠶᠣᠯ ᠤ᠋ᠨ ᠲᠠᠯᠠ ᠪᠠᠷ ᠰᠣᠶᠣᠯ ᠵᠢᠭᠤᠯᠴᠢᠯᠠᠯ ᠤ᠋ᠨ ᠣᠪᠣᠭᠠ ᠪᠣᠯᠵᠤ ᠪᠣᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠯ᠂ ᠰᠠᠷᠠᠨᠲᠤᠶᠠᠭᠠ᠂ ᠪᠠᠳᠮᠠᠰᠡᠴᠡᠨ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠠᠯᠲᠠᠨᠱᠠ᠂ ᠪᠠᠯ