ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ – ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ Шилэн галзуу баатар – Шилэн галзуу баатар
201ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠡᠩᠬᠡ ᠪᠣᠯᠣᠳ ᠬᠠᠨ ᠤ᠋ ᠥᠨᠥᠴᠢᠨ ᠬᠦᠦ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠭᠡᠵᠦ ᠪᠠᠢᠵᠠᠢ᠃
ᠡᠨᠡ ᠪᠠᠭᠠᠲᠤᠷ ᠢ᠋ ᠬᠡᠯᠡᠪᠡᠯ :
ᠲᠥᠷᠥᠬᠦ ᠡᠴᠡ ᠪᠡᠨ ᠲᠣᠢᠳ ᠲᠠᠢ
ᠲᠡᠮᠦᠷ ᠬᠤᠶᠠᠭ ᠲᠤᠭᠤᠯᠠᠭᠠ ᠲᠠᠢ
ᠭᠠᠷᠬᠤ ᠠ᠋ᠴᠠ ᠪᠠᠨ ᠭᠠᠢ ᠲᠠᠢ
ᠭᠠᠩ ᠬᠤᠶᠠᠭ ᠲᠤᠭᠤᠯᠠᠭᠠ ᠲᠠᠢ
ᠭᠠᠩ ᠲᠡᠮᠦᠷ ᠢᠯᠳᠦ ᠶ᠋ᠢ
ᠭᠠᠷ ᠲᠠᠭᠠᠨ ᠪᠠᠷᠢᠭᠠᠳ ᠲᠥᠷᠥᠭᠰᠡᠨ
ᠭᠠᠯᠵᠠᠭᠤ ᠮᠤᠤᠰᠠᠢᠨ ᠳᠠᠢᠰᠤᠨ ᠤ᠋
ᠵᠢᠷᠦᠬᠡ ᠶ᠋ᠢ ᠠᠣᠡᠡᠠᠤᠵᠦ ᠲᠥᠷᠥᠭᠰᠡᠨ
ᠬᠥᠬᠡ ᠲᠡᠮᠦᠷ ᠭᠤᠲᠤᠯ ᠢ᠋
ᠬᠥᠯ ᠳ᠋ᠡᠭᠡᠨ ᠡᠮᠦᠰᠴᠦ ᠲᠥᠷᠥᠭᠰᠡᠨ
ᠬᠥᠨᠥᠭᠡᠯᠲᠦ ᠮᠤᠤᠰᠠᠢᠨ ᠳᠠᠢᠰᠤᠨ ᠤ᠋
ᠰᠥᠰᠥ ᠶ᠋ᠢ ᠳᠠᠷᠤᠵᠤ ᠲᠥᠷᠥᠭᠰᠡᠨ
ᠬᠣᠭᠵᠢᠷᠠᠵᠤ ᠬᠡᠭᠵᠡᠷᠡᠳᠡᠭ ᠦᠭᠡᠢ
ᠬᠣᠷᠢᠨ ᠳᠠᠪᠬᠤᠷ ᠬᠤᠢᠬᠠ ᠲᠠᠢ
ᠲᠣᠯᠢᠷᠠᠵᠤ ᠬᠡᠦᠷᠡᠳᠡᠭ ᠦᠭᠡᠢ
ᠳᠣᠯᠣᠭᠠᠨ ᠳᠠᠪᠬᠤᠷ ᠶᠠᠰᠤ ᠲᠠᠢ᠃
ᠳᠠᠢᠰᠤᠨ ᠢ᠋ ᠦᠵᠡᠪᠡᠯ ᠳᠠᠪᠬᠢᠳᠠᠭ
ᠳᠠᠪᠬᠢᠭᠠᠳ ᠣᠴᠢᠪᠠᠯ ᠳᠠᠷᠤᠳᠠᠭ
ᠬᠥᠨᠥᠭᠡᠯᠲᠡᠨ ᠢ᠋ ᠦᠵᠡᠪᠡᠯ ᠬᠥᠭᠡᠭᠡᠳᠡᠭ
ᠬᠥᠭᠡᠭᠡᠭᠡᠳ ᠣᠴᠢᠪᠠᠯ ᠠᠯᠠᠳᠠᠭ
ᠡᠢᠮᠦ ᠨᠢᠭᠡ ᠰᠠᠢᠨ ᠡᠷᠡ ᠪᠠᠢᠵᠠᠢ᠂᠂
* * *
ᠰᠠᠭᠤᠳᠠᠭ ᠣᠷᠣ ᠨᠢ ᠭᠡᠪᠡᠯ ᠄
ᠬᠣᠯᠪᠣᠭᠠ ᠬᠤᠸᠠ ᠶ᠋ᠢᠨ ᠡᠩᠭᠡᠷ ᠳᠡᠭᠡᠷᠡ
ᠬᠣᠶᠠᠷ ᠭᠣᠣᠯ ᠤ᠋ᠨ ᠡᠬᠢᠨ ᠳᠡᠭᠡᠷᠡ
ᠲᠠᠯᠠ ᠭᠠᠵᠠᠷ ᠤ᠋ᠨ ᠳᠤᠮᠳᠠ
ᠲᠠᠪᠴᠠᠩ ᠭᠠᠵᠠᠷ ᠪᠠᠢᠭᠤᠯᠤᠭᠰᠠᠨ
ᠰᠢᠵᠢᠷ ᠠᠯᠳᠠᠨᠠ ᠳᠡᠭᠡᠪᠦᠷ ᠲᠡᠢ
ᠴᠤᠯᠤ ᠮᠥᠩᠭᠥᠨ ᠲᠤᠭᠤᠷᠭᠠ ᠲᠠᠢ
ᠱ᠌ᠢᠷᠦ ᠡᠷᠳᠡᠨᠢ ᠪᠠᠭᠠᠨᠠ ᠲᠠᠢ
ᠰᠢᠯ ᠪᠣᠯᠣᠷ ᠴᠣᠩᠬᠣ ᠲᠠᠢ᠃
ᠭᠠᠳᠠᠭᠠᠳᠤ ᠳᠥᠷᠪᠡᠨ ᠥᠨᠴᠥᠭ ᠲᠣᠨᠢ
ᠭᠠᠷᠤᠳᠢ ᠰᠢᠪᠠᠭᠤᠨ ᠤ᠋ ᠪᠠᠷᠢᠮᠠᠯ ᠲᠠᠢ
ᠳᠣᠲᠣᠭᠠᠳᠤ ᠳᠥᠷᠪᠡᠨ ᠪᠠᠭᠠᠨᠠ ᠳ᠋ᠤᠨᠢ
ᠲᠣᠭᠰᠢᠨ ᠮᠠᠲᠠᠷ ᠤ᠋ᠨ ᠰᠡᠢᠯᠪᠦᠷᠢ ᠲᠡᠢ
ᠡᠢᠮᠤ ᠨᠢᠭᠡ ᠰᠠᠢᠬᠠᠨ ᠤᠷᠲᠤ ᠲᠠᠢ᠃
* * *
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠲᠤ᠌
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠲᠡᠢ :
ᠨᠢᠭᠡ ᠨᠢ ᠰᠢᠨᠡ ᠳᠣᠯᠣᠭᠠᠨ ᠨᠠᠰᠤᠲᠠᠢ
ᠪᠣᠳᠢ ᠭᠠᠯᠪᠠ ᠬᠠᠨ᠃
ᠨᠢᠭᠡ ᠨᠢ ᠰᠠᠶᠢ ᠭᠤᠷᠪᠠᠨ ᠨᠠᠰᠤᠲᠠᠢ
ᠪᠤᠷᠮᠠ ᠶᠠᠩᠰᠠᠨ ᠳᠠᠭᠢᠨᠢ᠃
* * *
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠤ᠋ᠨ
ᠰᠢᠯᠢᠵᠦ ᠰᠣᠩᠭᠣᠵᠤ ᠤᠨᠤᠳᠠᠭ ᠮᠣᠷᠢ ᠨᠢ :
ᠮᠣᠯᠣᠷ ᠡᠷᠳᠡᠨᠢ ᠲᠣᠯᠣᠭᠠᠢ ᠲᠠᠢ
ᠮᠣᠨᠴᠣᠭ ᠡᠷᠳᠡᠨᠢ ᠰᠡᠭᠦᠯ ᠲᠡᠢ
ᠲᠤᠩ ᠴᠠᠭᠠᠨ ᠰᠢᠳᠦ ᠲᠡᠢ
ᠳᠤᠷᠠᠨ ᠬᠠᠷᠠ ᠨᠢᠳᠦ ᠲᠡᠢ
ᠬᠣᠣᠷᠠ ᠶᠢᠨ ᠵᠡᠪᠡ ᠴᠢᠬᠢ ᠪᠡᠨ
ᠬᠣᠢᠰᠢ ᠤᠷᠤᠭᠰᠢ ᠬᠠᠢᠴᠢᠯᠠᠭᠰᠠᠨ
ᠬᠣᠣᠷᠠᠲᠤ ᠮᠣᠭᠠᠢ ᠶ᠋ᠢᠨ ᠬᠡᠯᠡ ᠪᠡᠨ
ᠤᠯᠠᠪ ᠵᠢᠯᠡᠪ ᠳᠣᠯᠢᠶᠠᠭᠰᠠᠨ
ᠴᠢᠮᠡᠭᠡ ᠦᠭᠡᠢ ᠭᠦᠶᠦᠳᠡᠯ ᠲᠡᠢ
ᠴᠢᠭᠯᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠠᠢᠳᠠᠭ᠂
ᠴᠢᠩ ᠰᠢᠯᠤᠭᠤᠨ ᠵᠢᠷᠦᠬᠡ ᠲᠡᠢ
ᠴᠢᠭᠡᠴᠢ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠴᠢᠬᠡᠴᠢ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠪᠠᠨ ᠤᠨᠤᠵᠤ
ᠠᠩ ᠬᠦᠷᠦᠭᠡ ᠬᠢᠬᠦ ᠪᠡᠷ
ᠠᠯᠤᠰ ᠭᠠᠵᠠᠷ ᠮᠣᠷᠳᠠᠵᠠᠢ᠃
* * *
ᠵᠡᠭᠦᠨ ᠬᠣᠢᠲᠤ ᠵᠦᠭ ᠲᠦ᠍
ᠳᠣᠯᠣᠭᠠᠨ ᠶᠣᠳᠠᠷ ᠤ᠋ᠨ ᠡᠩᠭᠡᠷ
ᠭᠠᠯᠪᠠ ᠭᠠᠯᠪᠠ ᠳ᠋ᠤ᠌ ᠭᠠᠢᠬᠠᠭᠳᠠᠭᠰᠠᠨ
ᠭᠠᠭᠴᠠ ᠬᠣᠶᠠᠷ ᠢ᠋ ᠲᠡᠭᠦᠭᠰᠡᠨ
ᠦᠶᠡ ᠦᠶᠡ ᠳ᠋ᠦ᠍ ᠵᠢᠭᠰᠢᠭᠳᠡᠭᠰᠡᠨ
ᠥᠨᠥᠴᠢᠨ ᠥᠷᠥᠭᠡᠰᠦᠨ ᠢ᠋ ᠪᠣᠭᠣᠯᠴᠢᠯᠠᠭᠰᠠᠨ
ᠰᠠᠯᠬᠢᠨ ᠬᠣᠣᠷᠠ ᠨᠡᠷᠡ ᠲᠡᠢ
ᠰᠢᠪᠰᠢᠭᠲᠦ ᠨᠢᠭᠡ ᠮᠠᠩᠭᠤᠰ ᠪᠠᠢᠵᠠᠢ᠃
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ
ᠰᠠᠨᠠᠭᠠ ᠠᠯᠳᠠᠵᠤ ᠪᠣᠰᠤᠭᠠᠳ ᠄
《ᠴᠢᠬᠡᠴᠢ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠲᠠᠢ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠤ᠋ᠨ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠪᠡᠷ ᠨᠢ
ᠡᠭᠦᠳᠡᠨ ᠦ᠌ ᠪᠡᠨ ᠪᠣᠭᠣᠯ ᠬᠢᠶᠡ!》ᠭᠡᠵᠦ
ᠠᠪᠤ ᠶ᠋ᠢᠨ ᠦᠶᠡ ᠡᠴᠡ ᠬᠡᠷᠡᠭᠯᠡᠭᠰᠡᠨ
ᠠᠷᠵᠠᠭᠠᠢ ᠰᠢᠷᠠ ᠳᠥᠯᠭᠡᠨ ᠳ᠋ᠡᠭᠡᠨ ᠦᠵᠡᠪᠡᠯ :
《ᠴᠢᠬᠡᠴᠢ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠲᠠᠢ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠤ᠋ᠨ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠠᠪᠴᠢᠷᠠᠪᠠᠯ :
ᠦᠷᠡ ᠦᠨᠳᠦᠰᠦ ᠴᠢᠨᠢ ᠲᠠᠰᠤᠷᠠᠨᠠ ! 》 ᠭᠡᠵᠦ ᠲᠥᠯᠭᠡ ᠪᠠᠭᠤᠵᠠᠢ᠃
ᠬᠡᠳᠡᠷ ᠲᠣᠭᠰᠢᠨ ᠮᠠᠩᠭᠤᠰ
ᠬᠡᠮᠬᠡᠴᠢᠭᠡᠳ ᠲᠥᠯᠭᠡ ᠪᠡᠨ ᠲᠦᠯᠡᠵᠡᠢ᠃
ᠡᠬᠡ ᠶ᠋ᠢᠨ ᠦᠶᠡ ᠡᠴᠡ ᠬᠡᠷᠡᠭᠯᠡᠭᠰᠡᠨ
ᠡᠷᠡᠦ ᠴᠠᠭᠠᠨ ᠳᠥᠯᠭᠡᠨ ᠳ᠋ᠡᠭᠡᠨ ᠦᠵᠡᠪᠡᠯ :
《ᠴᠢᠬᠡᠴᠢ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠲᠠᠢ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠤ᠋ᠨ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠠᠪᠴᠢᠷᠠᠪᠠᠯ
ᠦᠷᠡ ᠦᠨᠳᠦᠰᠦ ᠴᠢᠨᠢ ᠪᠠᠳᠠᠷᠠᠨᠠ !》 ᠭᠡᠵᠦ ᠲᠥᠯᠭᠡ ᠪᠠᠭᠤᠵᠠᠢ᠃
* * *
ᠲᠠᠯᠪᠢᠪᠠᠯ ᠳᠡᠯᠭᠡᠳᠡᠭ
ᠲᠠᠲᠠᠪᠠᠯ ᠠᠭᠰᠢᠳᠠᠭ
ᠶᠡᠷᠡᠨ ᠶᠢᠰᠦᠨ ᠬᠤᠨᠢᠶᠠᠰᠤ ᠲᠠᠢ
ᠶᠢᠯᠸᠢ ᠶ᠋ᠢᠨ ᠲᠡᠮᠦᠷ ᠲᠣᠣᠷ ᠡᠶ᠋ᠠᠨ ᠠᠪᠤᠭᠠᠳ
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ
ᠰᠢᠪᠠᠭᠤ ᠪᠣᠯᠤᠨ ᠬᠤᠪᠢᠷᠠᠭᠠᠳ
ᠡᠭᠦᠯᠡ ᠲᠡᠢ ᠲᠡᠭᠷᠢ ᠶ᠋ᠢᠨ ᠳᠣᠣᠭᠤᠷ
ᠦᠵᠦᠭᠦᠷ ᠲᠡᠢ ᠮᠣᠳᠣᠨ ᠤ᠋ ᠳᠡᠭᠡᠭᠦᠷ
ᠨᠠᠷᠠ ᠲᠠᠢ ᠲᠩᠷᠢ ᠶ᠋ᠢᠨ ᠨᠠᠭᠠᠭᠤᠷ
ᠨᠠᠪᠴᠢ ᠲᠠᠢ ᠮᠣᠳᠣᠨ ᠤ᠋ ᠳᠡᠭᠡᠭᠦᠷ ᠨᠢᠰᠴᠦ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠨᠢ ᠪᠠᠷᠢᠬᠤ ᠪᠠᠷ
ᠰᠢᠯᠢᠨ ᠭᠠᠯᠵᠠᠭᠤ ᠶ᠋ᠢᠨ ᠳ᠋ᠦ᠍ ᠣᠴᠢᠵᠤ
ᠲᠣᠭᠣᠨᠣ ᠪᠠᠷ ᠨᠢ ᠣᠷᠣᠬᠤ ᠭᠡᠬᠦ ᠳ᠋ᠦ᠍
ᠲᠣᠭᠣᠨᠣ ᠨᠢ ᠲᠡᠮᠦᠷ ᠲᠣᠣᠷ ᠲᠠᠢ
ᠡᠭᠦᠳᠡ ᠪᠡᠷ ᠨᠢ ᠣᠷᠣᠬᠤ ᠭᠡᠬᠦ ᠳ᠋ᠦ᠍
ᠡᠭᠦᠳᠡ ᠨᠢ ᠬᠤᠯᠤᠰᠤᠨ ᠴᠦ᠋ ᠲᠡᠢ᠃
ᠲᠠᠯᠪᠢᠪᠠᠯ ᠳᠡᠯᠭᠡᠳᠡᠭ
ᠲᠠᠲᠠᠪᠠᠯ ᠠᠭᠰᠢᠳᠠᠭ
ᠶᠡᠷᠡᠨ ᠶᠢᠰᠦᠨ ᠬᠤᠨᠢᠶᠠᠰᠤ ᠲᠠᠢ
ᠶᠢᠯᠸᠢ ᠶ᠋ᠢᠨ ᠲᠡᠮᠦᠷ ᠲᠣᠣᠷ ᠢ᠋ᠶ᠋ᠠᠨ
ᠡᠭᠦᠳᠡᠨ ᠳ᠋ᠦ᠍ᠨᠢ ᠠᠪᠠᠴᠢᠵᠤ ᠲᠠᠯᠪᠢᠭᠠᠳ
ᠥᠪᠡᠷ ᠢᠶᠡᠨ ᠴᠠᠭᠠᠨᠠ ᠨᠢ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃
ᠰᠢᠨᠡ ᠳᠣᠯᠣᠭᠠᠨ ᠨᠠᠰᠤᠲᠠᠢ
ᠪᠣᠳᠢ ᠭᠠᠯᠪᠠ ᠬᠠᠨ
ᠰᠠᠶᠢ ᠭᠤᠷᠪᠠᠨ ᠨᠠᠰᠤᠲᠠᠢ
ᠪᠤᠷᠮᠠ ᠶᠠᠩᠰᠠᠨ ᠳᠠᠭᠢᠨᠢ ᠬᠣᠶᠠᠷ
ᠪᠤᠷᠬᠠᠨ ᠤ ᠭᠡᠷ ᠲᠡᠭᠡᠨ ᠣᠷᠣᠬᠤ ᠭᠡᠵᠦ ᠭᠠᠷᠬᠤ ᠳ᠋ᠤᠨᠢ
ᠪᠣᠭᠣᠵᠤ ᠲᠣᠣᠷ ᠲᠠᠭᠠᠨ ᠬᠢᠭᠡᠳ ᠶᠠᠪᠤᠬᠤ ᠳ᠋ᠠᠭᠠᠨ
ᠣᠭᠣᠴᠢᠨ ᠤ᠋ ᠪᠠᠨ ᠬᠣᠶᠠᠷ ᠰᠠᠬᠠᠯ ᠢ᠋
ᠣᠷᠣᠨ ᠳ᠋ᠤᠨᠢ ᠦᠯᠡᠳᠡᠭᠡᠵᠦ ᠰᠢᠪᠰᠢᠭᠰᠡᠨ ᠨᠢ᠄
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠢ᠋ ᠢᠷᠡᠬᠦ ᠳ᠋ᠦ᠍
ᠰᠠᠨᠠᠳᠠᠭ ᠬᠣᠶᠠᠷ ᠳᠡᠭᠦᠦ ᠨᠢ ᠪᠣᠯᠵᠤ ᠬᠤᠪᠢᠷᠠᠭᠠᠳ
ᠤᠨᠤᠳᠠᠭ ᠰᠠᠢᠨ ᠮᠣᠷᠢ ᠶ᠋ᠢ ᠨᠢ ᠤᠨᠤᠵᠤ
ᠤᠷᠭᠤᠵᠤ ᠮᠢᠨᠦ ᠬᠣᠢᠨᠠ ᠠ᠋ᠴᠠ ᠶᠠᠪᠤ! 》 ᠭᠡᠵᠡᠢ᠃
* * *
ᠠᠭ᠌ ᠬᠥᠷᠥᠭᠡᠨ ᠡᠴᠡ ᠪᠡᠨ ᠪᠤᠴᠠᠵᠤ
ᠠᠷᠤ ᠭᠡᠷ ᠲᠡᠭᠡᠨ ᠬᠦᠷᠴᠦ ᠢᠷᠡᠭᠡᠳ
ᠴᠢᠬᠡᠴᠢ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠪᠠᠨ ᠤᠶᠠᠭᠠᠳ
ᠰᠢᠯᠢᠨ ᠭᠠᠯᠵᠠᠭᠤ ᠭᠡᠷ ᠲᠡᠭᠡᠨ ᠣᠷᠣᠬᠤ ᠳ᠋ᠤ᠌
ᠥᠨᠥᠬᠢ ᠮᠠᠩᠭᠤᠰ ᠤ᠋ᠨ ᠬᠣᠶᠠᠷ ᠰᠠᠬᠠᠯ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠨᠢ ᠪᠣᠯᠵᠤ ᠬᠤᠪᠢᠷᠠᠭᠠᠳ
ᠡᠭᠦᠳᠡᠨ ᠦ᠌ ᠪᠤᠷᠤᠭᠤ ᠲᠠᠯᠠ ᠪᠠᠷ ᠵᠥᠷᠢᠭᠡᠳ
ᠦᠰᠦᠷᠴᠦ ᠬᠠᠷᠠᠢᠭᠠᠳ ᠭᠠᠳᠠᠭᠰᠢ ᠭᠠᠷᠴᠠᠢ᠃
ᠭᠡᠷ ᠲᠡᠭᠡᠨ ᠣᠷᠣᠭᠠᠳ ᠰᠢᠯᠢᠨ ᠭᠠᠯᠵᠠᠭᠤ
ᠭᠡᠳᠡᠷᠭᠦ ᠪᠡᠨ ᠳᠠᠬᠢᠨ ᠪᠤᠴᠠᠵᠤ ᠭᠠᠷᠠᠬᠤ ᠳ᠋ᠤ᠌
ᠮᠠᠩᠭᠤᠰ ᠤ᠋ᠨ ᠥᠨᠥᠬᠢ ᠬᠣᠶᠠᠷ ᠰᠠᠬᠠᠯ
ᠮᠣᠷᠢ ᠶ᠋ᠢ ᠨᠢ ᠤᠨᠤᠭᠠᠳ ᠵᠡᠭᠦᠨ ᠬᠣᠢᠰᠢ ᠳᠤᠲᠠᠭᠠᠵᠠᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠭᠠᠢᠬᠠᠵᠤ
ᠰᠦᠪᠡᠭᠡ ᠪᠡᠨ ᠲᠤᠯᠤᠨ ᠵᠣᠭᠰᠣᠵᠤ ᠪᠠᠢᠲᠠᠯᠠ
ᠳᠡᠭᠡᠷᠡ ᠡᠴᠡ ᠠᠯᠲᠠᠨ ᠪᠢᠴᠢᠭ ᠪᠠᠭᠤᠵᠠᠢ᠃
ᠲᠡᠭᠦᠨ ᠢ᠋ ᠠᠪᠤᠭᠠᠳ ᠦᠵᠡᠪᠡᠯ᠄
《ᠵᠡᠭᠦᠨ ᠬᠣᠢᠲᠤ ᠵᠦᠭ ᠲᠦ᠍
ᠳᠣᠯᠣᠭᠠᠨ ᠶᠣᠳᠠᠷ ᠤ᠋ᠨ ᠡᠩᠭᠡᠷ ᠲᠦ᠍ ᠰᠠᠭᠤᠳᠠᠭ᠃
ᠭᠠᠯᠪᠠ ᠭᠠᠯᠪᠠ ᠳ᠋ᠤ᠌ ᠭᠠᠢᠬᠠᠭᠳᠠᠭᠰᠠᠨ
ᠭᠠᠭᠴᠠ ᠬᠣᠶᠠᠷ ᠢ᠋ ᠲᠡᠭᠦᠭᠰᠡᠨ
ᠦᠶᠡ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠢᠭᠰᠢᠭᠳᠡᠭᠰᠡᠨ
ᠥᠨᠥᠴᠢᠨ ᠥᠷᠥᠭᠡᠰᠦᠨ ᠢ᠋ ᠪᠣᠭᠣᠯᠴᠢᠯᠠᠭᠰᠠᠨ
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ ᠢᠷᠡᠵᠦ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠴᠢᠨᠢ ᠠᠪᠠᠴᠢᠭᠠᠳ
ᠣᠭᠣᠴᠢᠨ ᠤ᠋ ᠪᠠᠨ ᠬᠣᠶᠠᠷ ᠰᠠᠬᠠᠯ ᠢ᠋
ᠣᠷᠣᠨ ᠳ᠋ᠤᠨᠢ ᠦᠯᠡᠳᠡᠭᠡᠭᠰᠡᠨ ᠶᠦᠮ᠃
《ᠮᠠᠩᠭᠤᠰ ᠤ᠋ᠨ ᠲᠡᠷᠡ ᠬᠣᠶᠠᠷ ᠰᠠᠬᠠᠯ ᠨᠢ
ᠮᠣᠷᠢ ᠶ᠋ᠢ ᠴᠢᠨᠢ ᠤᠨᠤᠭᠠᠳ ᠳᠤᠲᠠᠭᠠᠪᠠ !》 ᠭᠡᠵᠡᠢ᠃
* * *
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠠᠭᠤᠷ ᠴᠤ᠌ ᠮᠠᠭᠤᠬᠠᠢ ᠬᠦᠷᠴᠦ
ᠠᠭᠤᠰᠬᠢ ᠴᠦ᠍ ᠮᠠᠭᠤᠬᠠᠢ ᠰᠠᠭᠭᠠᠵᠤ
ᠪᠤᠷᠬᠠᠨ ᠤ᠋ ᠥᠷᠥᠭᠡᠨ ᠳ᠋ᠡᠭᠡᠨ ᠣᠷᠣᠵᠤ
ᠪᠤᠷᠬᠠᠨ ᠪᠤᠷᠬᠠᠨ ᠢ᠋ ᠠᠪᠴᠤ
ᠪᠤᠷᠤᠭᠤ ᠵᠥᠪ ᠦᠭᠡᠢ ᠰᠢᠳᠡᠭᠡᠳ
《ᠦᠨᠡ ᠦᠭᠡᠢ ᠴᠢᠮᠠᠶ᠋ᠢ ᠳᠠᠭᠢᠬᠤ
ᠦᠨᠢᠶᠡᠨ ᠦ᠌ ᠰᠦ ᠶ᠋ᠢᠨ ᠭᠠᠷᠤᠵᠠ!
ᠰᠢᠪᠠᠷ ᠴᠢᠮᠠᠶ᠋ᠢ ᠳᠠᠭᠢᠬᠤ
ᠢᠷᠠ ᠲᠣᠰᠣᠨ ᠤ᠋ ᠭᠠᠷᠤᠵᠠ!
ᠳᠠᠬᠢᠭᠠᠳ ᠪᠠᠢᠪᠠᠯ ᠪᠤᠷᠬᠠᠨ
ᠲᠠᠶᠠᠨᠳᠠᠭᠠᠳ ᠬᠠᠶᠠᠪᠠᠯ ᠰᠢᠪᠠᠷ
ᠰᠢᠲᠦᠭᠡᠳ ᠪᠠᠢᠪᠠᠯ ᠰᠢᠲᠦᠭᠡᠨ
ᠰᠢᠳᠡᠭᠡᠳ ᠬᠠᠶᠠᠪᠠᠯ ᠬᠥᠷᠥᠭ !》 ᠭᠡᠵᠡᠢ᠃
ᠰᠠᠩ ᠤ᠋ᠨ ᠥᠷᠥᠭᠡᠨ ᠳ᠋ᠡᠭᠡᠨ ᠣᠷᠣᠵᠤ
ᠳᠠᠢᠳᠤᠬᠤ ᠳ᠋ᠠᠭᠠᠨ ᠡᠮᠦᠰᠳᠡᠭ
ᠳᠠᠷᠳᠠᠩ ᠬᠠᠷᠠ ᠬᠤᠶᠠᠭ ᠢᠶᠠᠨ ᠠᠪᠴᠤ ᠡᠮᠦᠰᠦᠭᠡᠳ
ᠳᠠᠯᠠᠨ ᠲᠡᠭᠡ① ᠶ᠋ᠢᠨ ᠡᠪᠡᠷ ᠢ᠋ ᠳᠠᠪᠲᠠᠵᠤ ᠬᠢᠭᠰᠡᠨ
ᠳᠠᠷᠪᠠᠭᠠᠷ ᠬᠠᠷᠠ ᠨᠤᠮᠤ ᠪᠠᠨ
ᠳᠡᠰ ᠦ᠋ᠨ ᠰᠣᠳᠣ ᠶ᠋ᠢ ᠬᠠᠪᠴᠢᠭᠤᠯᠵᠤ ᠬᠢᠭᠰᠡᠨ
ᠳᠡᠰ ᠬᠠᠷᠠ ᠰᠤᠮᠤ ᠲᠠᠢ ᠪᠠᠨ ᠠᠪᠴᠤ ᠰᠤᠢᠯᠠᠭᠠᠳ
ᠬᠤᠢ ᠳ᠋ᠠᠭᠠᠨ ᠪᠠᠢᠬᠤ ᠳ᠋ᠤ᠌
ᠬᠣᠷᠢᠨ ᠬᠣᠶᠠᠷ ᠲᠥᠭᠡ
ᠬᠤᠢ ᠠ᠋ᠴᠠ ᠪᠠᠨ ᠭᠠᠷᠬᠤ ᠳ᠋ᠤ᠌
ᠬᠣᠷᠢᠨ ᠬᠣᠶᠠᠷ ᠠᠯᠲᠠ ᠪᠣᠯᠳᠠᠭ᠃
ᠶᠢᠯᠸᠢ ᠶ᠋ᠢᠨ ᠰᠢᠷᠠ ᠢᠯᠳᠦ ᠪᠡᠨ ᠵᠡᠭᠦᠭᠡᠳ ᠭᠠᠷᠴᠤ :
《ᠡᠷᠡ ᠮᠣᠷᠢ ᠪᠠᠨ ᠪᠠᠢᠬᠤ ᠳ᠋ᠤ᠌ ᠪᠣᠯ
ᠡᠮᠡᠭᠡᠯ ᠬᠠᠵᠠᠭᠠᠷ ᠢ᠋ᠶ᠋ᠠᠨ ᠴᠢᠩᠭᠠᠷᠠᠭᠤᠯᠳᠠᠭ
ᠡᠷᠡ ᠮᠣᠷᠢ ᠪᠠᠨ ᠠᠯᠳᠠᠭᠰᠠᠨ ᠤ᠋ ᠬᠣᠢᠨᠠ
ᠡᠩᠭᠡᠷ ᠵᠠᠭᠠᠮᠠ ᠪᠠᠨ ᠴᠢᠩᠭᠠᠷᠠᠭᠤᠯᠤᠶᠠ!》 ᠭᠡᠵᠦ
ᠤᠷᠲᠤ ᠬᠣᠷᠮᠣᠢ ᠪᠠᠨ
ᠬᠣᠢᠨᠠ ᠪᠠᠨ ᠭᠠᠷᠲᠠᠯᠠ ᠰᠢᠭᠤᠵᠤ
ᠬᠣᠢᠲᠤ ᠬᠣᠷᠮᠣᠢ ᠪᠠᠨ
ᠤᠷᠲᠤ ᠪᠠᠨ ᠭᠠᠷᠲᠠᠯᠠ ᠰᠢᠭᠤᠭᠠᠳ᠂
ᠵᠢᠷᠠᠨ ᠠᠭᠤᠯᠠ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ
ᠬᠣᠯᠪᠣᠵᠤ ᠨᠢᠭᠡ ᠠᠯᠬᠤᠭᠠᠳ
ᠵᠢᠷᠠᠨ ᠵᠢᠯᠠᠭᠠ ᠶ᠋ᠢᠨ ᠡᠬᠢ ᠶ᠋ᠢ
ᠲᠣᠪᠴᠢᠯᠠᠵᠤ ᠨᠢᠭᠡ ᠠᠯᠬᠤᠭᠠᠳ
ᠬᠠᠳᠠ ᠲᠠᠢ ᠭᠠᠵᠠᠷ ᠢ᠋
ᠬᠥᠯ ᠦ᠋ᠨ ᠰᠠᠢᠨ ᠢ᠋ᠶ᠋ᠠᠷ ᠭᠡᠲᠦᠯᠵᠦ
ᠬᠠᠷᠭᠠᠨᠠ ᠲᠠᠢ ᠭᠠᠵᠠᠷ ᠢ᠋
ᠬᠣᠷᠮᠣᠢ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠲᠤᠭᠤᠯᠵᠤ
ᠮᠠᠨ ᠤ᠋ ᠨᠤᠲᠤᠭ ᠪᠢᠰᠢ ᠪᠣᠯᠵᠤ
ᠮᠠᠩᠭᠤᠰ ᠤ᠋ᠨ ᠨᠤᠲᠤᠭ ᠲᠤ᠌ ᠬᠦᠷᠴᠡᠢ᠃
ᠥᠪᠡᠷᠦᠨ ᠨᠤᠲᠤᠭ ᠪᠢᠰᠢ ᠪᠣᠯᠵᠤ
ᠥᠰᠢᠶᠡᠲᠡᠨ ᠦ᠌ ᠨᠤᠲᠤᠭ ᠪᠣᠯᠵᠠᠢ᠃
ᠡᠪᠡᠰᠦ ᠤᠷᠭᠤᠮᠠᠯ ᠨᠢ ᠭᠠᠤᠯᠢ
ᠥᠩᠭᠡ ᠶ᠋ᠢᠨ ᠴᠡᠴᠡᠭ ᠨᠢ ᠵᠡᠰ
ᠬᠣᠷᠣᠬᠠᠢ ᠰᠢᠪᠡᠵᠢ ᠣᠯᠠᠨ
ᠬᠣᠣᠷᠲᠤ ᠠᠮᠢᠲᠠᠨ ᠡᠯᠪᠡᠭ
ᠥᠨᠳᠥᠷ ᠥᠨᠳᠥᠷ ᠬᠠᠳᠠ ᠨᠢ
ᠡᠮᠬᠦᠭᠡᠳ ᠠᠪᠬᠤ ᠶ᠋ᠢᠨ ᠰᠢᠨᠵᠢ ᠲᠡᠢ
ᠦᠵᠦᠭᠦᠷ ᠲᠡᠢ ᠵᠠᠷᠢᠮ ᠬᠠᠳᠠ ᠨᠢ
ᠰᠡᠭᠦᠯ ᠢ᠋ᠶ᠋ᠡᠨ ᠬᠥᠳᠡᠯᠭᠡᠬᠦ ᠰᠢᠨᠵᠢ ᠲᠡᠢ
ᠲᠡᠢᠮᠦ ᠵᠢᠭᠲᠡᠢ ᠣᠷᠣᠨ ᠪᠠᠢᠵᠠᠢ᠂
— — — —
① ᠲᠡᠭᠡ — ᠪᠠᠷᠭᠤ ᠶ᠋ᠢᠨ ᠨᠤᠲᠤᠭ ᠤ᠋ᠨ ᠠᠶᠠᠯᠭᠤᠨ ᠳ᠋ᠤ᠌ ᠤᠬᠤᠨᠠ ᠶ᠋ᠢ ᠲᠡᠭᠡ ᠭᠡᠵᠦ ᠬᠡᠯᠡᠳᠡᠭ᠃
* * *
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠨᠢᠭᠡ ᠳᠣᠪᠣ ᠳᠡᠭᠡᠷᠡ ᠭᠠᠷᠴᠤ ᠰᠠᠭᠤᠭᠠᠳ
ᠭᠠᠩ ᠪᠣᠯᠣᠳ ᠬᠡᠲᠡ ᠪᠡᠨ ᠬᠠᠪᠢᠷᠴᠤ
ᠭᠠᠯᠠᠭᠤᠨ ᠬᠦᠵᠦᠭᠦᠨ ᠭᠠᠩᠰᠠᠨ ᠳ᠋ᠠᠭᠠᠨ
ᠭᠠᠯᠵᠠᠭᠤ ᠤᠯᠠᠭᠠᠨ ᠲᠠᠮᠠᠬᠢ ᠪᠠᠨ ᠨᠡᠷᠡᠭᠡᠳ
ᠭᠠᠭᠴᠠ ᠬᠣᠶᠠᠷ ᠰᠣᠷᠣᠵᠤ ᠰᠠᠭᠤᠲᠠᠯᠠ
ᠵᠦᠭ ᠦ᠋ᠨ ᠮᠠᠭᠤ ᠵᠦᠭ ᠡᠴᠡ
ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠠ᠋ᠴᠠ
ᠡᠭᠦᠯᠡ ᠮᠠᠨᠠᠨ ᠲᠠᠲᠠᠬᠤ ᠰᠢᠭ᠋
ᠥᠨᠳᠥᠷ ᠤᠯᠠᠭᠠᠨ ᠲᠣᠭᠣᠰᠣ ᠭᠠᠷᠴᠠᠢ᠃
《ᠰᠠᠢᠨ ᠵᠦᠢᠯ ᠦ᠋ᠨ ᠲᠣᠭᠣᠰᠣ ᠪᠣᠯ
ᠴᠡᠴᠡᠭ ᠨᠠᠪᠴᠢ ᠳᠡᠯᠭᠡᠷᠡᠳᠡᠭ
ᠮᠠᠭᠤ ᠢᠷᠣᠠ ᠶ᠋ᠢᠨ ᠲᠣᠭᠣᠰᠣ ᠪᠣᠯ
ᠮᠣᠳᠣᠨ ᠨᠠᠪᠴᠢ ᠰᠢᠷᠠᠯᠠᠳᠠᠭ 》 ᠭᠡᠵᠦ
ᠰᠢᠨᠵᠢᠯᠡᠨ ᠰᠠᠭᠤᠵᠤ ᠪᠠᠢᠲᠠᠯᠠ
ᠴᠡᠴᠡᠭ ᠨᠠᠪᠴᠢ ᠳᠡᠯᠭᠡᠷᠡᠵᠡᠢ᠃
ᠡᠮᠡᠭᠡᠯ ᠬᠠᠵᠠᠭᠠᠷ ᠢ᠋ᠶ᠋ᠠᠨ ᠴᠢᠷᠦᠭᠰᠡᠨ
ᠨᠢᠭᠡ ᠶᠠᠨᠳᠠᠩ ᠬᠠᠷᠠ ᠮᠣᠷᠢ
ᠨᠢᠯᠬᠠ ᠬᠡᠦᠬᠡᠳ ᠵᠠᠭᠤᠵᠤ ᠢᠷᠡᠭᠡᠳ
ᠡᠮᠦᠨᠡ ᠨᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠲᠠᠯᠪᠢᠭᠠᠳ ᠬᠡᠯᠡᠭᠰᠡᠨ ᠨᠢ ᠄
《ᠡᠨᠡ ᠬᠦᠦ ᠪᠡᠷ ᠳᠡᠭᠦᠦ ᠪᠡᠨ ᠬᠢᠭᠡᠷᠡᠢ
ᠡᠷᠡ ᠬᠦᠯᠦᠭ ᠨᠠᠮᠠ ᠵᠢ ᠤᠨᠤᠭᠠᠷᠠᠢ! 》 ᠭᠡᠵᠡᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠥᠭᠡᠳᠡ ᠡᠴᠡ ᠨᠢ
ᠰᠢᠳᠮᠡᠬᠡᠢ ᠡᠷᠡᠰ ᠢ᠋ᠶ᠋ᠡᠷ ᠬᠠᠷᠢᠭᠤᠯᠤᠭᠰᠠᠨ ᠨᠢ :
《ᠠᠮᠠᠷᠠᠭ ᠳᠡᠭᠦᠦ ᠨᠠᠷ ᠡᠴᠡ ᠪᠡᠨ ᠰᠠᠯᠤᠭᠰᠠᠨ ᠪᠣᠯᠪᠠᠴᠤ
ᠠᠭᠤᠯᠵᠠᠭᠰᠠᠨ ᠪᠣᠯᠭᠠᠨ ᠢ᠋ᠶ᠋ᠠᠷ ᠳᠡᠭᠦᠦ ᠬᠢᠳᠡᠭ ᠦᠭᠡᠢ
ᠠᠭᠲᠠ ᠬᠦᠯᠦᠭ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠪᠣᠯᠪᠠᠴᠤ
ᠠᠳᠤᠭᠤ ᠪᠣᠯᠭᠠᠨ ᠢ᠋ ᠤᠨᠤᠳᠠᠭ ᠦᠭᠡᠢ! 》 ᠭᠡᠵᠡᠢ᠃
ᠠᠪᠤᠯᠲᠠᠢ ᠴᠤ᠌ ᠬᠥᠮᠦᠨ ᠦ᠌ ᠦᠷᠡ ᠰᠠᠨ
ᠤᠨᠤᠯᠲᠠᠢ ᠴᠤ᠌ ᠭᠡᠭᠦᠦ ᠶ᠋ᠢᠨ ᠤᠨᠠᠭᠠ ᠰᠠᠨ
ᠮᠠᠩᠭᠤᠰ ᠬᠣᠢᠨᠠ ᠠ᠋ᠴᠠ ᠲᠠᠭᠤᠵᠤ
ᠮᠠᠨ ᠢ᠋ ᠪᠠᠷᠢᠬᠤ ᠪᠠᠷ ᠢᠷᠡᠯᠡ !》 ᠭᠡᠳ
ᠶᠠᠨᠳᠠᠩ ᠬᠠᠷᠠ ᠮᠣᠷᠢ
ᠶᠠᠪᠤᠬᠤ ᠪᠠᠷ ᠬᠦᠦ ᠶ᠋ᠢ ᠵᠠᠭᠤᠲᠠᠯᠠ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠪᠣᠰᠴᠤ
ᠰᠢᠨᠡ ᠲᠣᠷᠭᠠ ᠡᠪᠦᠷ ᠡᠴᠡ ᠪᠡᠨ ᠭᠠᠷᠭᠠᠵᠤ
ᠬᠦᠦ ᠶ᠋ᠢ ᠪᠣᠭᠣᠵᠤ ᠡᠪᠦᠷᠲᠦᠯᠡᠭᠡᠳ
ᠬᠦᠯᠦᠭ ᠢ᠋ ᠤᠨᠤᠭᠠᠳ ᠶᠠᠪᠤᠵᠤ ᠪᠠᠢᠲᠠᠯᠠ
ᠵᠦᠭ ᠦ᠋ᠨ ᠮᠠᠭᠤ ᠵᠦᠭ ᠡᠴᠡ
ᠵᠡᠭᠦᠨ ᠬᠣᠢᠲᠤ ᠲᠠᠯᠠ ᠠ᠋ᠴᠠ
ᠲᠩᠷᠢ ᠲᠤᠯᠤᠮᠠ ᠲᠣᠭᠣᠰᠣ ᠲᠠᠲᠠᠮᠤᠢ
ᠳᠥᠨᠳᠥᠭᠡᠷ ᠬᠠᠷᠠ ᠶᠠᠭᠤᠮᠠ ᠬᠠᠷᠠᠭᠳᠠᠬᠤ ᠳ᠋ᠤ᠌ :
《ᠰᠠᠢᠨ ᠤ᠋ ᠵᠦᠢᠯ ᠦ᠋ᠨ ᠲᠣᠭᠣᠰᠣ ᠪᠣᠯ
ᠴᠡᠴᠡᠭ ᠨᠠᠪᠴᠢ ᠳᠡᠯᠭᠡᠷᠡᠳᠡᠭ
ᠮᠠᠭᠤ ᠢᠷᠣᠠ ᠶ᠋ᠢᠨ ᠲᠣᠭᠣᠰᠣ ᠪᠣᠯ
ᠮᠣᠳᠣᠨ ᠤ᠋ ᠨᠠᠪᠴᠢ ᠰᠢᠷᠠᠯᠠᠳᠠᠭ ᠠ᠋!》 ᠭᠡᠵᠦ
ᠪᠣᠳᠣᠵᠤ ᠰᠠᠭᠤᠵᠤ ᠪᠠᠢᠲᠠᠯᠠ
ᠮᠠᠭᠤ ᠢᠷᠣᠠ ᠶ᠋ᠢᠨ ᠲᠣᠭᠣᠰᠣ ᠪᠣᠯᠬᠣᠷ
ᠮᠣᠳᠣᠨ ᠤ᠋ ᠨᠠᠪᠴᠢ ᠰᠢᠷᠠᠯᠠᠵᠠᠢ
ᠬᠣᠯᠠ ᠬᠠᠯᠲᠠᠷ ᠯᠠᠭᠤᠰᠠ ᠲᠠᠢ
ᠬᠤᠪᠠᠬᠠᠢ ᠲᠠᠯᠬᠢᠨ ᠡᠮᠡᠭᠡᠯ ᠲᠡᠢ᠃
ᠰᠠᠷᠪᠠᠢᠭᠰᠠᠨ ᠠᠷᠪᠠᠨ ᠲᠠᠪᠤᠨ ᠲᠣᠯᠣᠭᠠᠢ ᠲᠠᠢ
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ ᠢᠷᠡᠵᠦ ᠬᠡᠯᠡᠭᠰᠡᠨ ᠨᠢ :
《ᠬᠥᠮᠦᠨ ᠦ᠌ ᠬᠦᠦ ᠶ᠋ᠢ ᠠᠪᠤᠷᠠᠨᠠ ᠭᠡᠳ
ᠬᠡᠭᠦᠷ ᠢ᠋ᠶ᠋ᠡᠨ ᠭᠡᠭᠡᠬᠦ ᠶ᠋ᠢ ᠮᠡᠳᠡ!
ᠠᠮᠢᠲᠠᠨ ᠤ᠋ ᠠᠮᠢ ᠶ᠋ᠢ ᠭᠠᠷᠭᠠᠨᠠ ᠭᠡᠳ
ᠠᠮᠢᠰᠬᠤᠯ ᠢ᠋ᠶ᠋ᠠᠨ ᠬᠤᠷᠢᠶᠠᠬᠤ ᠪᠠᠨ ᠮᠡᠳᠡ! 》 ᠭᠡᠵᠡᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠰᠢᠳᠪᠦᠷᠢ ᠲᠡᠢ ᠪᠡᠷ ᠤᠷᠢᠳᠠ ᠠ᠋ᠴᠠ ᠨᠢ :
《ᠬᠣᠷᠭᠣᠢ ᠳᠡᠭᠡᠷᠡ ᠬᠠᠳᠬᠤᠭᠰᠠᠨ ᠯᠤᠤ
ᠬᠤᠷᠠ ᠣᠷᠣᠭᠤᠯᠬᠤ ᠶ᠋ᠢ ᠦᠵᠡᠪᠡ ᠤᠤ?
ᠬᠣᠮᠣᠬᠠᠢ ᠮᠤᠤᠰᠠᠢᠨ ᠮᠠᠩᠭᠤᠰ
ᠮᠠᠨ ᠢ᠋ ᠳᠡᠢᠯᠬᠦ ᠶ᠋ᠢ ᠦᠵᠡᠪᠡ ᠤᠤ?
ᠵᠢᠷᠤᠭ ᠳᠡᠭᠡᠷᠡ ᠪᠠᠢᠳᠠᠭ ᠡᠷᠪᠡᠬᠡᠢ
ᠵᠤᠯᠠ ᠳ᠋ᠤ᠌ ᠣᠢᠬᠤ ᠶ᠋ᠢ ᠦᠵᠡᠪᠡ ᠤᠤ?
ᠵᠠᠭᠤᠷᠠᠳᠤ ᠶ᠋ᠢᠨ ᠮᠤᠤᠰᠠᠢᠨ ᠮᠠᠩᠭᠤᠰ
ᠮᠠᠨ ᠢ᠋ ᠳᠡᠢᠯᠬᠦ ᠶ᠋ᠢ ᠦᠵᠡᠪᠡ ᠤᠤ? 》 ᠭᠡᠳ
ᠬᠣᠶᠠᠭᠤᠯᠠ ᠳᠣᠣᠷᠠ ᠪᠠᠨ ᠪᠠᠢᠯᠳᠤᠵᠠᠢ᠃
ᠠᠭᠤᠯᠠ ᠳᠠᠪᠠᠭᠠ ᠲᠠᠢ ᠭᠠᠵᠠᠷ ᠢ᠋
ᠲᠡᠭᠰᠢᠷᠡᠲᠡᠯᠡ ᠨᠢ ᠪᠠᠢᠯᠳᠤᠵᠤ
ᠤᠰᠤ ᠮᠥᠷᠡᠨ ᠲᠡᠢ ᠭᠠᠵᠠᠷ ᠢ᠋
ᠰᠢᠷᠭᠢᠲᠡᠯᠡ ᠨᠢ ᠪᠠᠢᠯᠳᠤᠵᠤ
ᠬᠥᠨᠳᠡᠢ ᠬᠣᠲᠣᠭᠣᠷ ᠭᠠᠵᠠᠷ ᠢ᠋
ᠨᠠᠭᠤᠷ ᠲᠣᠭᠲᠠᠲᠠᠯᠠ ᠪᠠᠢᠯᠳᠤᠵᠤ
ᠬᠥᠪᠴᠢᠨ ᠣᠢ ᠮᠣᠳᠣ ᠶ᠋ᠢ
ᠵᠣᠮᠣᠭᠣᠯ ᠪᠣᠯᠲᠠᠯᠠ ᠪᠠᠢᠯᠳᠤᠵᠠᠢ᠃
ᠭᠠᠩ ᠪᠣᠯᠣᠳ ᠢᠯᠳᠦ ᠪᠡᠷ ᠢ᠋ᠶ᠋ᠡᠨ
ᠭᠠᠪᠠᠯᠠ ᠳᠤᠬᠤ ᠶ᠋ᠢ ᠨᠢ ᠴᠠᠪᠴᠢᠵᠠᠢ᠂
ᠬᠠᠰ ᠤᠯᠠᠭᠠᠨ ᠪᠢᠯᠠᠭᠤ ᠪᠠᠷ ᠢ᠋ᠶ᠋ᠠᠨ
ᠲᠡᠭᠦᠨ ᠦ᠌ ᠬᠠᠷᠢᠭᠤ ᠴᠣᠬᠢᠵᠠᠢ᠃
ᠶᠢᠯᠸᠢ ᠶ᠋ᠢᠨ ᠰᠢᠷᠠ ᠢᠯᠳᠦ ᠪᠡᠷ ᠢ᠋ᠶ᠋ᠡᠨ
ᠢᠳᠡ ᠬᠦᠴᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠴᠠᠪᠴᠢᠵᠠᠢ᠂
ᠶᠡᠬᠡ ᠤᠯᠠᠭᠠᠨ ᠪᠢᠯᠠᠭᠤ ᠪᠠᠷ ᠢ᠋ᠶ᠋ᠠᠨ
ᠲᠡᠭᠦᠨ ᠦ᠌ ᠬᠠᠷᠢᠭᠤ ᠵᠠᠨᠴᠢᠵᠠᠢ᠃
《ᠥᠪᠡᠷ ᠦ᠋ᠨ ᠪᠡᠶᠡ ᠮᠢᠨᠢ ᠭᠠᠢᠭᠤᠢ ᠳᠠ
ᠡᠪᠦᠷ ᠳᠠᠬᠢ ᠬᠦᠦ ᠬᠥᠭᠡᠷᠦᠬᠦᠢ ᠰᠢᠦ! 》 ᠭᠡᠳ
ᠥᠰᠢᠶᠡᠲᠡᠨ ᠮᠠᠩᠭᠤᠰ ᠤ᠋ᠨ ᠪᠢᠯᠠᠭᠤ ᠶ᠋ᠢ
ᠥᠷᠯᠥᠭ ᠪᠠᠭᠠᠲᠤᠷ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠬᠠᠯᠠᠭᠯᠠᠵᠠᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠤ᠋ᠨ
ᠬᠣᠭᠵᠢᠷᠠᠵᠤ ᠬᠡᠭᠵᠡᠷᠡᠳᠡᠭ ᠦᠭᠡᠢ
ᠬᠣᠷᠢᠨ ᠳᠠᠪᠬᠤᠷ ᠬᠤᠢᠬᠠ ᠨᠢ
ᠬᠣᠭᠵᠢᠷᠠᠨ ᠬᠡᠭᠵᠡᠷᠡᠵᠦ ᠤᠨᠠᠵᠤ ᠯᠠ ᠪᠠᠢᠵᠠᠢ᠃
ᠲᠣᠯᠢᠷᠠᠵᠤ ᠬᠡᠦᠷᠡᠳᠡᠭ ᠦᠭᠡᠢ
ᠳᠣᠯᠣᠭᠠᠨ ᠳᠠᠪᠬᠤᠷ ᠶᠠᠰᠤ ᠨᠢ
ᠲᠣᠯᠢᠷᠠᠵᠤ ᠬᠡᠦᠷᠡᠵᠦ ᠯᠡ ᠪᠠᠢᠵᠠᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠤ᠋ᠨ ᠴᠣᠬᠢᠬᠤ ᠳ᠋ᠤ᠌
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ
ᠰᠠᠨᠳᠤᠷᠴᠤ ᠠᠮᠢ ᠲᠡᠮᠡᠴᠡᠭᠡᠳ
ᠢᠯᠢᠨ ᠢᠯᠢᠨ ᠦᠵᠡᠬᠦ ᠳ᠋ᠦ᠍
ᠢᠯᠡᠭᠦᠦ ᠲᠣᠯᠣᠭᠠᠢᠳ ᠨᠢ ᠦᠭᠡᠢ ᠪᠣᠯᠵᠠᠢ
ᠪᠠᠷᠢᠨ ᠪᠠᠷᠢᠨ ᠦᠵᠡᠬᠦ ᠳ᠋ᠦ᠍
ᠪᠠᠭᠠ ᠲᠣᠯᠣᠭᠠᠢᠳ ᠨᠢ ᠦᠭᠡᠢ ᠪᠣᠯᠵᠠᠢ
ᠭᠣᠣᠯ ᠤ᠋ᠨ ᠭᠠᠭᠴᠠ ᠲᠣᠯᠣᠭᠠᠢ ᠪᠠᠨ ᠬᠠᠮᠠᠭᠠᠯᠠᠵᠤ
ᠭᠤᠳᠤᠷᠠᠨ ᠴᠠᠰᠢ ᠪᠠᠨ ᠳᠤᠲᠠᠭᠠᠵᠠᠢ᠃
ᠳᠠᠯᠠᠨ ᠲᠡᠭᠡ ᠶ᠋ᠢᠨ ᠡᠪᠡᠷ ᠢ᠋ ᠳᠠᠪᠲᠠᠵᠤ ᠬᠢᠭᠰᠡᠨ
ᠳᠠᠷᠪᠠᠭᠠᠷ ᠬᠠᠷᠠ ᠨᠣᠮᠣᠨ ᠳ᠋ᠠᠭᠠᠨ
ᠳᠡᠰ ᠦᠨ ᠰᠣᠳᠣ ᠶ᠋ᠢ ᠬᠠᠪᠴᠢᠭᠤᠯᠵᠤ ᠬᠢᠭᠰᠡᠨ
ᠳᠡᠰ ᠬᠠᠷᠠ ᠰᠤᠮᠤ ᠪᠠᠨ ᠣᠨᠢᠯᠠᠭᠠᠳ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠰᠢᠲᠦ ᠵᠠᠭᠤᠨ ᠬᠣᠷᠣᠰᠴᠤ ᠬᠠᠷᠪᠤᠬᠤ ᠳ᠋ᠤ᠌
ᠰᠤᠮᠤ ᠨᠢ ᠬᠦᠷᠴᠦ ᠣᠴᠢᠭᠠᠳ
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ ᠤ᠋ᠨ
ᠠᠭᠤᠰᠬᠢ ᠵᠢᠷᠦᠬᠡ ᠶ᠋ᠢ ᠨᠢ ᠵᠦᠯᠳᠡᠯᠡᠵᠦ
ᠣᠨᠢᠨ ᠳ᠋ᠠᠭᠠᠨ ᠬᠠᠪᠴᠢᠭᠤᠯᠤᠭᠠᠳ ᠭᠠᠷᠴᠠᠢ᠃
ᠰᠠᠯᠬᠢᠨ ᠬᠠᠷᠠ ᠮᠠᠩᠭᠤᠰ
ᠰᠡᠷᠪᠡᠯᠵᠡᠵᠦ ᠳᠣᠣᠷᠠ ᠤᠨᠠᠬᠤ ᠳ᠋ᠤ᠌
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠰᠤᠮᠤ ᠰᠢᠭ᠋ ᠲᠦᠷᠭᠡᠨ ᠣᠴᠢᠭᠠᠳ
ᠴᠡᠭᠡᠵᠢᠨ ᠳᠡᠭᠡᠷᠡ ᠨᠢ ᠵᠠᠢᠳᠠᠯᠠᠵᠤ
ᠰᠢᠩᠭᠡᠨ ᠳᠠᠭᠤ ᠶ᠋ᠢ ᠨᠢ ᠭᠠᠷᠭᠠᠵᠤ
ᠪᠥᠭᠰᠡᠨ ᠳᠡᠭᠡᠷᠡ ᠨᠢ ᠰᠠᠭᠤᠵᠤ
ᠪᠦᠳᠦᠭᠦᠨ ᠳᠠᠭᠤ ᠶ᠋ᠢ ᠨᠢ ᠭᠠᠷᠭᠠᠵᠠᠢ᠃
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ
ᠠᠮᠠᠨ ᠤ᠋ ᠥᠴᠢᠭ ᠢ᠋ᠶ᠋ᠡᠨ ᠥᠭᠴᠦ ᠭᠤᠶᠤᠭᠰᠠᠨ ᠨᠢ :
《ᠠᠴᠢᠲᠤ ᠪᠠᠭᠠᠲᠤᠷ ᠲᠠ ᠥᠷᠥᠰᠢᠶᠡ
ᠠᠮᠢ ᠪᠡᠶᠡ ᠶ᠋ᠢ ᠮᠢᠨᠢ ᠠᠪᠤᠷᠠ
ᠪᠣᠱᠣᠭᠠ ᠶ᠋ᠢᠨ ᠴᠢᠨᠢ ᠪᠣᠭᠣᠯ ᠪᠣᠯᠤᠶᠠ
ᠪᠤᠷᠬᠠᠨ ᠤ᠋ ᠴᠢᠨᠢ ᠵᠦᠯᠭᠦᠭᠦᠷ ᠪᠣᠯᠤᠶᠠ! 》 ᠭᠡᠵᠡᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠰᠢᠢᠳᠮᠡᠭᠡᠢ ᠥᠭᠡᠳᠡ ᠡᠴᠡ ᠨᠢ ᠬᠠᠷᠢᠭᠤᠯᠤᠭᠰᠠᠨ ᠨᠢ :
《ᠠᠪᠤ ᠶ᠋ᠢᠨ ᠭᠡᠷᠢᠶᠡᠰ ᠢ᠋ ᠰᠠᠨᠠᠬᠤ ᠳ᠋ᠤ᠌
ᠠᠯᠠᠯ ᠦᠭᠡᠢ ᠪᠣᠯᠬᠤ ᠦᠭᠡᠢ᠂ ᠴᠢᠮᠠᠶ᠋ᠢ
ᠡᠵᠢ ᠶ᠋ᠢᠨ ᠭᠡᠷᠢᠶᠡᠰ ᠢ᠋ ᠪᠣᠳᠣᠬᠤ ᠳ᠋ᠤ᠌
ᠡᠪᠳᠡᠯ ᠦᠭᠡᠢ ᠪᠣᠯᠬᠤ ᠦᠭᠡᠢ᠂ ᠴᠢᠮᠠᠶ᠋ᠢ! 》 ᠭᠡᠳ
ᠬᠠᠲᠠᠭᠠᠷᠠᠢ ᠬᠠᠪᠢᠷᠭᠠ ᠶ᠋ᠢ ᠨᠢ ᠬᠠᠳᠤᠵᠤ
ᠬᠠᠯᠠᠭᠤᠨ ᠵᠢᠷᠦᠬᠡ ᠶ᠋ᠢ ᠨᠢ ᠰᠤᠭᠤᠯᠵᠤ
ᠬᠠ ᠭᠤᠶᠠ ᠶ᠋ᠢ ᠨᠢ ᠲᠤᠶᠠᠴᠢᠵᠤ
ᠬᠠᠮᠤᠭ ᠶᠠᠰᠤ ᠶ᠋ᠢ ᠨᠢ ᠰᠠᠯᠭᠠᠭᠠᠳ
ᠡᠷᠭᠢ ᠭᠠᠩᠭᠠ ᠪᠠᠷ ᠬᠠᠶᠠᠵᠤ
ᠡᠯᠢᠶᠡ ᠬᠡᠷᠢᠶᠡ ᠲᠡᠵᠢᠭᠡᠵᠡᠢ᠂
ᠦᠨᠡᠰᠦ ᠬᠤᠮᠠᠭ ᠢ᠋ᠶ᠋ᠠᠷ ᠬᠠᠶᠠᠵᠤ
ᠦᠨᠡᠭᠡ ᠴᠢᠨᠣᠠ ᠲᠡᠵᠢᠭᠡᠵᠡᠢ᠃
ᠲᠠᠬᠢᠷ ᠢᠷ ᠲᠡᠢ ᠬᠠᠳᠤᠭᠤᠷ ᠭᠡᠭᠴᠢ
ᠮᠠᠨ ᠤ᠋ ᠪᠠᠭᠠᠲᠤᠷ ᠢ᠋ ᠬᠡᠯᠡᠳᠡᠭ ᠶᠦᠮ ᠪᠠᠢᠨᠠ
ᠲᠠᠯᠠ ᠳ᠋ᠤ᠌ ᠤᠷᠭᠤᠭᠰᠠᠨ ᠬᠢᠶᠠᠭ ᠭᠡᠭᠴᠢ
ᠮᠡᠠᠩᠭᠤᠰ ᠰᠢᠮᠨᠤᠰ ᠢ᠋ ᠬᠡᠯᠡᠳᠡᠭ ᠶᠦᠮ ᠪᠠᠢᠨᠠ᠂
ᠤᠷᠤᠭᠤ ᠪᠠᠨ ᠢᠷ ᠲᠡᠢ ᠬᠠᠳᠤᠭᠤᠷ ᠭᠡᠭᠴᠢ
ᠮᠠᠨ ᠤ᠋ ᠪᠠᠭᠠᠲᠤᠷ ᠢ᠋ ᠬᠡᠯᠡᠳᠡᠭ ᠶᠦᠮ ᠪᠠᠢᠨᠠ
ᠠᠭᠤᠯᠠᠨ ᠳ᠋ᠤ᠌ ᠤᠷᠭᠤᠭᠰᠠᠨ ᠱᠡᠭᠡᠷ ᠭᠡᠭᠴᠢ
ᠮᠠᠩᠭᠤᠰ ᠰᠢᠮᠨᠤᠰ ᠢ᠋ ᠬᠡᠯᠡᠳᠡᠭ ᠶᠦᠮ ᠪᠠᠢᠨᠠ᠃
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ ᠢ᠋ ᠲᠣᠨᠢᠯᠭᠠᠴᠢᠬᠠᠭᠠᠳ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠦᠳᠡ ᠬᠦᠷᠭᠡᠯ ᠦᠭᠡᠢ ᠡᠳᠡᠭᠡᠭᠡᠳᠡᠭ
ᠦᠨᠡᠭᠡᠨ ᠴᠠᠭᠠᠨ ᠡᠮ ᠢ᠋ᠶ᠋ᠡᠨ ᠬᠢᠵᠦ
ᠡᠪᠡᠳᠴᠦ ᠪᠠᠢᠭᠰᠠᠨ ᠰᠢᠷᠬᠠ ᠪᠠᠨ ᠡᠳᠡᠭᠡᠭᠡᠵᠦ
ᠬᠣᠨᠣᠭ ᠬᠦᠷᠭᠡᠯ ᠦᠭᠡᠢ ᠡᠳᠡᠭᠡᠭᠡᠳᠡᠭ
ᠬᠣᠨᠢᠨ ᠴᠠᠭᠠᠨ ᠡᠮ ᠢ᠋ᠶ᠋ᠡᠨ ᠭᠢᠵᠦ
ᠬᠣᠣᠷᠯᠠᠵᠤ ᠪᠠᠢᠭᠰᠠᠨ ᠰᠢᠷᠬᠠ ᠪᠠᠨ ᠡᠳᠡᠭᠡᠭᠡᠭᠡᠳ
ᠥᠰᠢᠶᠡᠲᠡᠨ ᠮᠠᠩᠭᠤᠰ ᠤ᠋ᠨ ᠨᠤᠲᠤᠭ ᠲᠤ᠌ ᠬᠦᠷᠴᠦ
ᠦᠷᠡ ᠦᠨᠳᠦᠰᠦ ᠶ᠋ᠢ ᠨᠢ ᠲᠠᠰᠤᠯᠵᠤ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠪᠡᠨ ᠠᠪᠤᠷᠠᠵᠤ
ᠥᠪᠡᠷᠦᠨ ᠮᠣᠷᠢ ᠪᠠᠨ ᠠᠪᠬᠤ ᠪᠠᠷ ᠶᠠᠪᠤᠵᠠᠢ᠃
ᠤᠯᠠᠭᠠᠨ ᠳᠡᠪᠡᠯ ᠲᠡᠢ ᠨᠢᠭᠡ ᠠᠪᠠᠭᠠᠢ
ᠤᠷᠢᠳᠠ ᠠ᠋ᠴᠠ ᠨᠢ ᠢᠷᠡᠬᠦ ᠬᠠᠷᠠᠭᠳᠠᠵᠠᠢ᠂
ᠣᠢᠷᠠᠲᠤᠵᠤ ᠬᠦᠷᠦᠭᠡᠳ ᠣᠴᠢᠬᠤ ᠳ᠋ᠤ᠌
ᠣᠨᠴᠠᠭᠠᠢ ᠭᠣᠶᠣ ᠠᠪᠠᠭᠠᠢ ᠪᠠᠢᠵᠠᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠲᠠᠢ
ᠠᠭᠤᠯᠵᠠᠵᠤ ᠰᠢᠨᠵᠢᠯᠡᠵᠦ ᠮᠣᠷᠢ ᠶ᠋ᠢ ᠨᠢ
ᠬᠠᠷᠠᠭᠠᠳ ᠬᠡᠯᠡᠭᠰᠡᠨ ᠨᠢ :
《ᠡᠷᠭᠢᠨ ᠲᠠᠨ ᠤ᠋ ᠤᠨᠤᠵᠤ ᠪᠠᠢᠬᠤ
ᠡᠨᠡ ᠮᠣᠷᠢ ᠴᠢᠨᠢ ᠮᠢᠨᠦ ᠪᠠᠢᠨᠠ᠃
ᠬᠦᠦ ᠶ᠋ᠢ ᠮᠢᠨᠢ ᠲᠠ ᠣᠯᠵᠤ ᠦᠵᠡᠪᠡ ᠤᠤ ?
ᠬᠦᠯᠦᠭ ᠢ᠋ ᠮᠢᠨᠢ ᠪᠤᠴᠠᠭᠠᠵᠤ ᠥᠭᠭᠦᠨᠡ ᠤᠤ ? 》 ᠭᠡᠵᠡᠢ᠃
《ᠠᠷᠭᠠ ᠵᠠᠯᠢᠲᠤ ᠮᠠᠩᠭᠤᠰ ᠤ᠋ᠨ
ᠠᠯᠢ ᠤᠪ ᠵᠢᠪᠳᠡᠨ ᠨᠢ ᠪᠣᠢ? ᠴᠢ》 ᠭᠡᠳ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠰᠢᠯᠢᠳᠡᠵᠦ ᠠᠪᠠᠭᠠᠢ ᠶ᠋ᠢ ᠠᠪᠬᠤ ᠭᠡᠲᠡᠯᠡ
ᠲᠡᠷᠡ ᠠᠪᠠᠭᠠᠢ ᠶ᠋ᠢᠨ ᠬᠡᠯᠡᠭᠰᠡᠨ ᠨᠢ᠄
《ᠪᠠᠢᠵᠠ᠂ ᠪᠠᠢᠵᠠ᠂ ᠬᠦᠯᠢᠶᠡᠭᠡᠴᠢ
ᠪᠠᠭᠠᠲᠤᠷ ᠲᠡᠨᠡᠭ ᠢ᠋ᠶ᠋ᠡᠨ ᠪᠣᠯᠢᠭᠠᠴᠢ!
ᠬᠦᠢ᠂ ᠬᠦᠢ᠂ ᠬᠦᠯᠢᠶᠡᠭᠡᠴᠢ᠂
ᠬᠦᠳᠡᠷ ᠲᠡᠨᠡᠭ ᠢ᠋ᠶ᠋ᠡᠨ ᠪᠣᠯᠢᠭᠠᠴᠢ !
ᠬᠠᠨ ᠬᠤᠷᠮᠤᠰᠲᠠ ᠲᠩᠷᠢ ᠶ᠋ᠢᠨ
ᠬᠠᠮᠤᠭ ᠤ᠋ᠨ ᠣᠳᠬᠣᠨ ᠳᠠᠭᠢᠨᠢ ᠪᠢ ᠮᠥᠨ᠂
ᠬᠠᠷᠭᠢᠰ ᠮᠠᠩᠭᠤᠰ ᠲᠤ᠌ ᠪᠠᠷᠢᠭᠳᠠᠭᠠᠳ
ᠬᠠᠯᠠ ᠲᠠᠮᠤ ᠶ᠋ᠢ ᠦᠵᠡᠵᠦ ᠭᠦᠢᠴᠡᠯᠡ
ᠬᠣᠶᠠᠷ ᠶᠡᠬᠡ ᠬᠡᠦᠬᠡᠳ ᠢ᠋ ᠮᠢᠨᠢ
ᠬᠣᠣᠷᠲᠤ ᠮᠠᠩᠭᠤᠰ ᠵᠠᠯᠬᠢᠴᠢᠬᠠᠪᠠ᠃
ᠰᠠᠶᠢ ᠲᠥᠷᠥᠭᠰᠡᠨ ᠬᠦᠦ ᠶ᠋ᠢ ᠮᠢᠨᠢ
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ ᠵᠠᠯᠭᠢᠬᠤ ᠭᠡᠬᠦ ᠳ᠋ᠦ᠍
ᠠᠷᠭᠠ ᠤᠬᠠᠭᠠᠨ ᠭᠠᠷᠭᠠᠵᠤ
ᠠᠭᠲᠠ ᠮᠣᠷᠢᠨ ᠳ᠋ᠠᠭᠠᠨ ᠵᠠᠭᠤᠯᠭᠠᠵᠤ ᠳᠤᠲᠠᠭᠠᠯᠭᠠᠬᠤ ᠳ᠋ᠤ᠌
ᠠᠷᠢᠶᠠᠲᠠᠨ ᠮᠠᠩᠭᠤᠰ ᠮᠡᠳᠡᠴᠢᠭᠡᠭᠡᠳ ᠠᠯᠠᠬᠤ ᠪᠠᠷ
ᠬᠣᠢᠨᠠ ᠠ᠋ᠴᠠ ᠨᠢ ᠲᠠᠭᠤᠭᠰᠠᠨ ᠶᠤᠮ 》 ᠭᠡᠪᠡ᠃
ᠦᠭᠡ ᠶ᠋ᠢ ᠨᠢ ᠰᠣᠨᠣᠰᠤᠭᠰᠠᠨ ᠤ᠋ ᠬᠣᠢᠨᠠ
ᠡᠪᠦᠷ ᠡᠴᠡ ᠪᠡᠨ ᠬᠦᠦ ᠶ᠋ᠢ ᠭᠠᠷᠭᠠᠵᠠᠢ᠃
ᠬᠦᠦ ᠨᠢ ᠡᠵᠢ ᠪᠡᠨ ᠦᠵᠡᠭᠡᠳ
ᠬᠥᠬᠡᠷᠴᠦ ᠶᠡᠬᠡ ᠪᠡᠷ ᠢᠨᠢᠶᠡᠵᠡᠢ᠃
ᠠᠪᠠᠭᠠᠢ ᠶ᠋ᠢᠨ ᠬᠡᠯᠡᠭᠰᠡᠨ ᠦᠨᠡᠨ ᠢ᠋ ᠮᠡᠳᠡᠵᠦ
ᠠᠭᠲᠠ ᠮᠣᠷᠢᠨ ᠠ᠋ᠴᠠ ᠪᠠᠨ ᠬᠠᠷᠠᠢᠨ ᠪᠠᠭᠤᠵᠤ
ᠬᠦᠯᠦᠭ ᠢ᠋ ᠨᠢ ᠭᠠᠷᠳᠠᠭᠤᠯᠵᠤ ᠥᠭᠭᠦᠭᠡᠳ 》
ᠬᠦᠦ ᠶ᠋ᠢ ᠨᠢ ᠦᠨᠦᠰᠦᠭᠡᠳ ᠲᠡᠪᠡᠷᠢᠭᠦᠯᠵᠡᠢ᠃
ᠬᠦᠦ ᠨᠢ ᠡᠬᠡ ᠳ᠋ᠡᠭᠡᠨ ᠣᠴᠢᠵᠤ
ᠬᠥᠬᠥ ᠪᠡᠨ ᠰᠢᠮᠡᠭᠰᠡᠭᠡᠷ ᠬᠡᠯᠡᠨ ᠳ᠋ᠦ᠍ ᠣᠷᠣᠭᠠᠳ :
《ᠠᠪᠤᠷᠭᠤ ᠪᠠᠭᠠᠲᠤᠷ ᠮᠢᠨᠢ ᠪᠠᠶᠠᠷᠲᠠᠢ᠃
ᠠᠴᠢ ᠶ᠋ᠢ ᠴᠢᠨᠢ ᠪᠢ ᠬᠠᠷᠢᠭᠤᠯᠠᠨᠠ!》 ᠭᠡᠵᠡᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠰᠠᠯᠬᠤ ᠠ᠋ᠴᠠ ᠪᠠᠨ ᠤᠷᠢᠳ ᠠᠪᠠᠭᠠᠢ ᠠ᠋ᠴᠠ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ
ᠥᠪᠡᠷᠦᠨ ᠬᠦᠯᠦᠭ ᠭᠤᠷᠪᠠ ᠪᠠᠨ ᠰᠤᠷᠠᠭᠯᠠᠵᠠᠢ᠃
《ᠬᠠᠢᠷᠠᠲᠤ ᠬᠣᠶᠠᠷ ᠳᠡᠭᠦᠦ ᠴᠢᠨᠢ
ᠬᠠᠮᠢᠭᠠ ᠪᠠᠢᠬᠤ ᠶ᠋ᠢ ᠨᠢ ᠮᠡᠳᠡᠬᠦ ᠦᠭᠡᠢ
ᠬᠠᠷᠢᠨ ᠲᠡᠢᠮᠦ ᠰᠢᠷᠭᠠ ᠮᠣᠷᠢ ᠶ᠋ᠢ
ᠰᠠᠯᠬᠢᠨ ᠬᠣᠣᠷᠠ ᠨᠠᠮᠠᠶ᠋ᠢ ᠵᠠᠷᠤᠵᠤ
＜ ᠶᠠᠰᠤ ᠶ᠋ᠢ ᠨᠢ ᠨᠢᠮᠭᠡᠷᠡᠭᠦᠯᠵᠦ
ᠴᠢᠰᠤ ᠶ᠋ᠢ ᠨᠢ ᠰᠢᠩᠭᠡᠷᠡᠭᠦᠯᠵᠦ
ᠵᠣᠪᠠᠭᠠᠬᠤ ᠶ᠋ᠢᠨ ᠮᠠᠭᠤ ᠪᠠᠷ ᠵᠣᠪᠠᠭᠠᠵᠤ
ᠠᠯᠠᠬᠤ ᠶ᠋ᠢᠨ ᠮᠠᠭᠤ ᠪᠠᠷ ᠠᠯᠠ＞ ᠭᠡᠰᠡᠨ ᠶᠦᠮ᠃
ᠮᠠᠩᠭᠤᠰ ᠤ᠋ᠨ ᠬᠡᠯᠡᠭᠰᠡᠨ ᠦᠭᠡᠨ ᠡᠴᠡ ᠪᠢ
ᠮᠠᠨ ᠤ᠋ ᠪᠠᠭᠠᠲᠤᠷ ᠤ᠋ᠳ ᠤᠨ ᠮᠣᠷᠢ ᠭᠡᠵᠦ ᠮᠡᠳᠡᠭᠡᠳ
ᠪᠤᠯᠠᠭ ᠤ᠋ᠨ ᠤᠰᠤ ᠪᠠᠷ ᠤᠰᠤᠯᠠᠵᠤ
ᠪᠤᠳᠠᠭᠠᠨ ᠤ᠋ ᠦᠷᠡ ᠪᠡᠷ ᠲᠡᠵᠢᠭᠡᠵᠦ
ᠪᠣᠭᠳᠣᠢᠲᠠᠯᠠ ᠲᠠᠷᠭᠤᠯᠠᠭᠤᠯᠤᠭᠠᠳ
ᠪᠣᠢᠳᠠ ᠭᠠᠵᠠᠷ ᠨᠢᠭᠤᠵᠤ ᠪᠠᠢᠨᠠ!》 ᠭᠡᠳ
ᠬᠠᠳᠠᠭᠠᠯᠠᠵᠤ ᠪᠠᠢᠭᠠ ᠭᠠᠵᠠᠷ ᠢ᠋ᠶ᠋ᠠᠨ ᠬᠡᠯᠡᠵᠦ ᠥᠭᠭᠦᠭᠡᠳ
ᠬᠠᠷᠢᠯᠴᠠᠨ ᠰᠠᠯᠬᠤ ᠶᠣᠰᠣ ᠶ᠋ᠢ ᠬᠢᠵᠡᠢ᠃
* * *
ᠠᠪᠠᠭᠠᠢ ᠶ᠋ᠢᠨ ᠵᠢᠭᠠᠭᠰᠠᠨ ᠵᠦᠭ ᠲᠦ᠍ ᠶᠠᠪᠤᠵᠤ
ᠠᠭᠯᠠᠭ ᠪᠣᠢᠳᠠ ᠭᠠᠵᠠᠷ ᠲᠤ᠌ ᠬᠦᠷᠴᠦ
ᠴᠢᠬᠡᠴᠢ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠪᠠᠨ ᠣᠯᠵᠤ ᠤᠨᠤᠭᠠᠳ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠴᠠᠰᠢ ᠶᠠᠪᠤᠲᠠᠯᠠ
ᠪᠤᠯᠲᠠᠭᠠᠷ ᠬᠤᠸᠠ ᠶᠢᠨ ᠠᠷᠤ ᠳ᠋ᠤ᠌
ᠪᠤᠷᠤᠭᠤ ᠬᠠᠵᠠᠭᠤ ᠭᠠᠵᠠᠷ ᠲᠤ᠌
ᠣᠢ ᠰᠢᠭᠤᠢ ᠶ᠋ᠢᠨ ᠳᠣᠲᠣᠷᠠ
ᠣᠩᠭᠣᠢᠭᠰᠠᠨ ᠨᠢᠭᠡ ᠠᠭᠤᠢ ᠪᠠᠢᠵᠠᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠤ᠋ᠨ
ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ ᠣᠷᠣᠬᠤ ᠳ᠋ᠤ᠌
ᠪᠣᠯᠴᠤᠤ ᠴᠢᠯᠠᠭᠤᠨ ᠡᠷᠢᠭᠡ ᠶ᠋ᠢ
ᠪᠣᠰᠢᠭᠣ ᠪᠤᠰᠢᠭᠤ ᠰᠢᠪᠲᠤᠷᠠᠭᠰᠠᠨ
ᠪᠤᠬᠠ ᠶ᠋ᠢᠨ ᠠᠷᠠᠰᠤᠨ ᠬᠡᠩᠭᠡᠷᠭᠡ ᠶ᠋ᠢ
ᠪᠤᠷᠤᠭᠤ ᠵᠥᠪ ᠦᠭᠡᠢ ᠪᠠᠯᠪᠠᠭᠰᠠᠨ
ᠪᠤᠭᠤᠷᠤᠯ ᠲᠣᠯᠣᠭᠠᠢᠲᠤ ᠯᠠᠮᠠ
ᠪᠣᠬᠢᠨᠢᠲᠠᠨ ᠨᠣᠮ ᠤᠩᠰᠢᠵᠤ ᠪᠠᠢᠵᠠᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠲᠡᠷᠡ ᠯᠠᠮᠠ ᠠ᠋ᠴᠠ ᠠᠰᠠᠭᠤᠭᠰᠠᠨ ᠨᠢ :
《ᠶᠠᠭᠤᠨ ᠤ᠋ ᠯᠠᠮᠠ ᠪᠣᠢ ᠴᠢ
ᠶᠠᠭᠤ ᠬᠢᠵᠦ ᠪᠠᠢᠬᠤ ᠴᠢᠨᠢ ᠡᠨᠡ ᠪᠣᠢ? 》 ᠭᠡᠬᠦ ᠳ᠋ᠦ᠍
《ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ ᠬᠠᠨ ᠤ᠋
ᠰᠢᠷᠡᠭᠡᠨ ᠦ᠌ ᠯᠠᠮᠠ ᠪᠢ ᠮᠥᠨ᠃
ᠰᠢᠯᠢᠨ ᠭᠠᠯᠵᠠᠭᠤ ᠶ᠋ᠢ ᠵᠥᠭᠡᠵᠦ
ᠰᠢᠳᠢᠲᠦ ᠲᠠᠷᠨᠢ ᠤᠩᠰᠢᠵᠤ ᠪᠠᠢᠨᠠ! 》 ᠭᠡᠬᠦ ᠳ᠋ᠦ᠍ᠨᠢ
ᠠᠭᠤᠷ ᠬᠦᠷᠴᠦ ᠮᠠᠩᠭᠤᠰ ᠤ᠋ᠨ ᠯᠠᠮᠠ ᠶ᠋ᠢ
ᠤᠯᠠ ᠳ᠋ᠤᠨᠢ ᠲᠤᠯᠲᠠᠯᠠ ᠴᠠᠪᠴᠢᠭᠠᠳ
ᠳᠠᠬᠢᠭᠠᠳ ᠴᠠᠰᠢ ᠶᠠᠪᠤᠵᠤ ᠪᠠᠢᠲᠠᠯᠠ
ᠪᠠᠰᠠ ᠨᠢᠭᠡ ᠠᠭᠤᠢ ᠳᠠᠭᠠᠷᠢᠯᠳᠤᠵᠤ᠂
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠤ᠋ᠨ
ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠭᠠᠳ ᠣᠷᠣᠬᠤ ᠳ᠋ᠤ᠌
ᠡᠭᠦᠳᠡᠨ ᠳᠥᠷᠪᠡᠨ ᠰᠣᠶᠣᠭᠠ ᠨᠢ
ᠡᠷᠡᠦ ᠬᠠᠮᠠᠷ ᠲᠠᠭᠠᠨ ᠲᠤᠯᠤᠭᠰᠠᠨ
ᠡᠷᠡᠦ ᠨᠡᠢᠭᠡᠨ ᠶᠠᠰᠤ ᠨᠢ
ᠡᠷᠳᠡᠢᠵᠦ ᠮᠤᠰᠬᠢᠷᠠᠨ ᠤᠷᠭᠤᠭᠰᠠᠨ
ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠮᠠᠩᠭᠤᠰ
ᠡᠮᠡᠭᠡᠨ ᠨᠢ ᠡᠪᠦᠭᠡᠨ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ᠄
《ᠡᠪᠦᠭᠡᠨ ᠡᠪᠦᠭᠡᠨ ᠪᠤᠰᠢᠭᠤᠯᠠᠭᠠᠴᠢ》
ᠥᠰᠢᠶᠡᠲᠡᠨ ᠳᠠᠢᠰᠤᠨ ᠬᠦᠷᠦᠭᠡᠳ ᠢᠷᠡᠵᠡᠢ
ᠡᠷᠡᠦ ᠪᠡᠷ ᠢ᠋ᠶ᠋ᠡᠨ ᠳᠠᠷᠤᠭᠠᠳ
ᠡᠷᠲᠡᠩ ᠡᠷᠲᠡᠩ ᠬᠢᠶᠠ!
ᠡᠭᠦᠳᠡᠨ ᠰᠣᠶᠣᠭᠠ ᠪᠠᠷ ᠤ᠋ᠨ ᠨᠤᠬᠤᠵᠤ
ᠡᠭᠡᠰ ᠡᠭᠡᠰ ᠬᠢᠶᠡ!》 ᠭᠡᠵᠡᠢ᠃
ᠡᠷᠳᠡᠩ ᠡᠷᠳᠡᠩ ᠭᠡᠲᠡᠯᠡ
ᠡᠷᠡᠦ ᠶ᠋ᠢ ᠨᠢ ᠬᠤᠭᠤ ᠢᠰᠬᠦᠯᠵᠦ
ᠡᠭᠡᠰ ᠡᠭᠡᠰ ᠬᠢᠬᠦ ᠭᠡᠲᠡᠯᠡ ᠨᠢ
ᠰᠣᠶᠣᠭᠠ ᠶ᠋ᠢ ᠨᠢ ᠪᠣᠯᠭᠣ ᠢᠰᠬᠦᠯᠵᠦ
ᠰᠠᠯᠬᠢᠨ ᠬᠣᠣᠷᠠ ᠮᠠᠩᠭᠤᠰ ᠤ᠋ᠨ
ᠡᠴᠢᠭᠡ ᠡᠬᠡ ᠶ᠋ᠢ ᠨᠢ ᠠᠯᠠᠴᠢᠬᠠᠭᠠᠳ
ᠴᠠᠰᠢ ᠪᠠᠭᠠᠲᠤᠷ ᠶᠠᠪᠤᠵᠠᠢ᠃
ᠪᠠᠭᠠᠲᠤᠷ ᠨᠢ ᠴᠠᠰᠢ ᠶᠠᠪᠤᠵᠤ ᠪᠠᠢᠲᠠᠯᠠ
ᠪᠠᠰᠠ ᠨᠢᠭᠡ ᠠᠭᠤᠢ ᠪᠠᠢᠵᠠᠢ᠃
ᠡᠷᠭᠢᠨ ᠲᠣᠭᠣᠷᠢᠨ ᠬᠠᠷᠠᠬᠤ ᠳ᠋ᠤ᠌
ᠡᠭᠦᠳᠡ ᠬᠠᠭᠠᠯᠭᠠ ᠨᠢ ᠲᠦᠭᠵᠢᠶᠡᠰᠦ ᠲᠡᠢ
ᠡᠭᠦᠳᠡ ᠶ᠋ᠢ ᠨᠢ ᠬᠠᠭᠠ ᠢᠰᠬᠦᠯᠦᠭᠡᠳ
ᠦᠮᠡᠬᠡᠢ ᠠᠭᠤᠢ ᠳ᠋ᠤ᠌ ᠣᠷᠣᠬᠤ ᠳ᠋ᠤ᠌
ᠭᠡᠷ ᠦ᠋ᠨ ᠴᠢᠨᠡᠭᠡ ᠭᠡᠳᠡᠰᠦ ᠲᠡᠢ
ᠭᠡᠳᠡᠭᠡᠷ ᠰᠢᠷᠠ ᠮᠠᠩᠭᠤᠰ ᠪᠠᠢᠵᠠᠢ᠃
ᠭᠡᠳᠡᠰᠦ ᠶ᠋ᠢ ᠨᠢ ᠬᠠᠭᠠ ᠴᠢᠴᠢᠬᠦ ᠳ᠋ᠦ᠍
ᠬᠦᠷᠡᠯ ᠬᠦᠦ ᠭᠠᠷᠤᠭᠠᠳ ᠨᠣᠴᠣᠯᠳᠤᠵᠠᠢ
ᠢᠰᠬᠦᠯᠦᠨ ᠢᠰᠬᠦᠯᠦᠨ ᠲᠠᠲᠠᠭᠠᠳ
ᠥᠰᠢᠶᠡᠲᠡᠨ ᠦ᠌ ᠬᠦᠦ ᠳᠠᠷᠤᠭᠠᠳ ᠤᠨᠠᠵᠠᠢ
ᠥᠨᠳᠡᠢᠵᠦ ᠬᠥᠷᠪᠡᠨ ᠪᠣᠰᠤᠭᠠᠳ
ᠰᠢᠯᠢᠨ ᠭᠠᠯᠵᠠᠭᠤ ᠳᠡᠭᠡᠷᠡ ᠨᠢ ᠭᠠᠷᠴᠠᠢ᠃
ᠮᠢᠬᠠ ᠶᠠᠰᠤ ᠶ᠋ᠢ ᠬᠠᠵᠠᠭᠠᠳ
ᠮᠠᠩᠭᠤᠰ ᠤ᠋ᠨ ᠬᠦᠦ ᠬᠥᠷᠪᠡᠲᠡᠯᠡ
ᠮᠠᠭᠰᠢᠵᠤ ᠪᠠᠭᠠᠲᠤᠷ ᠪᠣᠰᠤᠭᠠᠳ
ᠬᠣᠶᠠᠭᠤᠯᠠ ᠪᠠᠨ ᠵᠢᠭᠤᠷᠠᠨ ᠨᠣᠴᠣᠯᠳᠤᠵᠠᠢ᠃
ᠥᠷᠯᠥᠭᠡ ᠨᠠᠷᠠᠨ ᠢ᠋ᠶ᠋ᠠᠷ ᠠᠭᠤᠯᠵᠠᠭᠠᠳ
ᠦᠳᠡᠰᠢ ᠪᠣᠯᠬᠤ ᠣᠢᠷᠠᠲᠤᠬᠤ ᠳ᠋ᠤ᠌
ᠪᠠᠭᠠᠲᠤᠷ ᠤ᠋ᠨ ᠬᠦᠴᠦ ᠰᠤᠯᠠᠷᠠᠵᠤ
ᠪᠢᠴᠢᠬᠠᠨ ᠮᠠᠩᠭᠤᠰ ᠴᠢᠩᠭᠠᠷᠠᠵᠤ ᠪᠠᠢᠲᠠᠯᠠ
ᠲᠩᠷᠢ ᠶ᠋ᠢᠨ ᠤᠳᠬᠤᠨ ᠳᠠᠭᠢᠨᠢ ᠶ᠋ᠢᠨ ᠬᠦᠦ
ᠠᠶᠤᠩᠭᠠ ᠶ᠋ᠢᠨ ᠰᠤᠮᠤ ᠪᠠᠭᠤᠯᠭᠠᠵᠤ
ᠠᠶᠤᠯᠲᠤ ᠮᠠᠩᠭᠤᠰ ᠤ᠋ᠨ ᠬᠦᠦ ᠶ᠋ᠢ ᠨᠢᠷᠭᠡᠭᠦᠯᠦᠭᠡᠳ
ᠠᠴᠢᠲᠤ ᠪᠠᠭᠠᠲᠤᠷ ᠲᠠᠭᠠᠨ ᠲᠤᠰᠠᠯᠠᠵᠠᠢ᠃
* * *
ᠰᠢᠪᠰᠢᠭᠲᠦ ᠮᠠᠩᠭᠤᠰ ᠤ᠋ᠨ ᠦᠨᠳᠦᠰᠦ ᠶ᠋ᠢ ᠲᠠᠰᠤᠯᠤᠭᠠᠳ
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ ᠶᠠᠪᠤᠭᠰᠠᠭᠠᠷ
ᠳᠣᠯᠣᠭᠠᠨ ᠶᠣᠳᠠᠷ ᠤ᠋ᠨ ᠲᠡᠨᠳᠡ ᠬᠦᠷᠴᠦ
ᠵᠣᠭᠰᠣᠭᠠ ᠪᠠᠷ ᠢ᠋ᠶ᠋ᠠᠨ
ᠦᠷᠭᠡᠯᠡᠨ ᠵᠡᠭᠦᠳᠦᠯᠡᠭᠰᠡᠨ ᠨᠢ᠄
《ᠳᠣᠯᠣᠭᠠᠨ ᠨᠠᠰᠤᠲᠠᠢ ᠪᠣᠳᠢ ᠭᠠᠯᠪᠠ
ᠭᠤᠷᠪᠠᠨ ᠨᠠᠰᠤᠲᠠᠢ ᠪᠤᠷᠮᠠ ᠶᠠᠩᠰᠠᠨ ᠪᠣᠯᠤᠨ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠴᠢᠨᠢ
ᠥᠰᠢᠶᠡᠲᠦ ᠮᠡᠠᠩᠭᠤᠰ ᠪᠠᠷᠢᠵᠤ ᠢᠷᠡᠭᠡᠳ
ᠠᠯᠠᠵᠤ ᠣᠭᠲᠣᠯᠬᠤ ᠭᠡᠬᠦ
ᠬᠢᠲᠤᠭᠠ ᠪᠣᠣᠳᠤᠤ ᠳᠠᠭᠠᠭᠠᠬᠤ ᠦᠭᠡᠢ
ᠵᠣᠳᠣᠵᠤ ᠴᠣᠬᠢᠬᠤ ᠳ᠋ᠤ᠌
ᠮᠢᠬᠠ ᠨᠢ ᠡᠪᠡᠳᠬᠦ ᠦᠭᠡᠢ ᠪᠣᠯᠠᠡᠣᠷ
ᠳᠣᠯᠣᠭᠠᠨ ᠶᠣᠳᠠᠷ ᠤ᠋ᠨ ᠳᠣᠣᠷᠠ
ᠬᠣᠷᠢᠭᠳᠠᠭᠰᠠᠨ ᠣᠯᠠᠨ ᠤ᠋ ᠳᠤᠮᠳᠠ
ᠬᠣᠶᠠᠷ ᠳᠡᠭᠦᠦ ᠶ᠋ᠢ ᠴᠢᠨᠢ ᠬᠦᠯᠢᠵᠦ ᠲᠠᠯᠪᠢᠭᠠᠳ
ᠬᠣᠢᠨᠠ ᠤᠷᠢᠳᠠ ᠠ᠋ᠴᠠ ᠨᠢ ᠰᠢᠷᠠᠵᠤ ᠪᠠᠢᠨᠠ! 》
ᠰᠣᠴᠢᠨ ᠰᠡᠷᠢᠭᠡᠳ ᠪᠠᠭᠠᠲᠤᠷ
ᠬᠡᠷᠡᠭᠦᠯ ᠴᠦ᠍ ᠮᠠᠭᠤᠬᠠᠢ ᠬᠦᠷᠴᠦ
ᠬᠡᠨᠲᠡᠭ ② ᠴᠦ᠍ ᠮᠠᠭᠤᠬᠠᠢ ᠬᠥᠳᠡᠯᠵᠦ
ᠠᠠᠭᠤᠷ ᠴᠤ᠌ ᠶᠡᠬᠡᠪᠡᠷ ᠬᠦᠷᠴᠦ
ᠠᠭᠤᠰᠬᠢ ᠴᠦ᠍ ᠶᠡᠬᠡ ᠪᠡᠷ ᠰᠠᠭᠭᠠᠵᠤ
ᠳᠣᠯᠣᠭᠠᠨ ᠶᠣᠳᠠᠷ ᠤ᠋ᠨ ᠣᠷᠣᠢ ᠶ᠋ᠢ
ᠳᠤᠭᠵᠢᠷᠠᠲᠠᠯᠠ ᠬᠣᠪᠬᠤ ᠢᠰᠬᠦᠯᠵᠡᠢ᠃
ᠳᠣᠯᠣᠭᠠᠨ ᠶᠣᠳᠠᠷ ᠤ᠋ᠨ ᠳᠣᠣᠷᠠ
ᠲᠠᠷᠤᠭᠲᠠ᠊ᠵᠣ ᠬᠣᠷᠢᠭᠳᠠᠵᠤ ᠪᠠᠢᠭᠰᠠᠨ
ᠠᠵᠢᠷᠭᠠ ᠪᠠᠷ ᠠᠳᠤᠭᠤ ᠲᠠᠢ
ᠠᠢᠯ ᠢ᠋ᠶ᠋ᠠᠷ ᠤᠯᠤᠰ ᠭᠠᠷᠴᠤ
ᠠᠷᠪᠠᠨ ᠵᠦᠭ ᠲᠡᠭᠡᠨ ᠴᠤᠪᠤᠵᠤ
ᠠᠮᠨ ᠠᠮᠠᠨ ᠳ᠋ᠠᠭᠠᠨ ᠢᠷᠥᠭᠡᠬᠦ ᠨᠢ :
《ᠶᠠᠮᠠᠷ ᠠᠴᠢᠲᠤ ᠪᠠᠭᠠᠲᠤᠷ ᠢᠷᠡᠭᠡᠳ
ᠶᠠᠳᠠᠷᠠᠭᠰᠠᠨ ᠪᠢᠳᠡᠨ ᠢ᠋ ᠠᠪᠤᠷᠠᠪᠠ ᠳᠠ
ᠰᠠᠨᠠᠭᠰᠠᠨ ᠬᠡᠷᠡᠭ ᠨᠢ ᠰᠡᠤᠡᠬᠢᠴᠢᠯᠡᠨ ᠪᠣᠳᠣᠵᠤ
ᠰᠠᠢᠨ ᠰᠠᠢᠬᠠᠨ ᠵᠢᠷᠭᠠᠬᠤ ᠪᠣᠯᠲᠤᠭᠠᠢ !》 ᠭᠡᠵᠡᠢ᠃
ᠬᠤᠷᠢᠬᠳᠠᠠᠭᠰᠠᠨ ᠤᠯᠤᠰ ᠭᠠᠷᠬᠤ ᠳ᠋ᠠᠭᠠᠨ
ᠬᠣᠶᠠᠷ ᠳᠡᠭᠦᠦ ᠶ᠋ᠢᠨ ᠬᠢᠨᠢ ᠬᠦᠯᠢᠶᠡᠰᠦ ᠶ᠋ᠢ ᠳᠡᠢᠯᠵᠡᠢ᠃
ᠰᠢᠯᠢᠨ ᠭᠠᠯᠵᠠᠭᠤ ᠪᠠᠭᠠᠲᠤᠷ
ᠴᠢᠬᠡᠵᠢ ᠶ᠋ᠢᠨ ᠰᠢᠷᠭᠠᠯ ᠮᠣᠷᠢ ᠪᠠᠨ ᠤᠨᠤᠵᠤ
ᠡᠨᠡᠭᠦᠷ ᠲᠡᠷᠡᠭᠦᠷ ᠶᠠᠪᠤᠵᠤ
ᠡᠨᠡ ᠲᠡᠷᠡ ᠬᠥᠮᠦᠨ ᠡᠴᠡ ᠠᠠᠰᠠᠭᠤᠵᠦ
ᠬᠣᠢᠭᠤᠷ ᠤᠷᠳᠤᠭᠤᠷ ᠶᠠᠪᠤᠵᠤ
ᠬᠣᠷᠢᠭᠳᠠᠭᠰᠠᠨ ᠣᠯᠠᠨ ᠠ᠋ᠴᠠ ᠰᠤᠷᠠᠭᠯᠠᠵᠤ
ᠥᠨᠥᠴᠢᠨ ᠬᠣᠶᠠᠷ ᠳᠡᠭᠦᠦ ᠪᠡᠨ ᠣᠯᠵᠤ
ᠡᠮᠦᠨᠡ ᠬᠣᠢᠨᠠ ᠪᠠᠨ ᠤᠨᠤᠭᠤᠯᠤᠭᠠᠳ
ᠥᠰᠴᠦ ᠲᠥᠷᠥᠭᠰᠡᠨ ᠨᠤᠲᠤᠭ ᠲᠠᠭᠠᠨ ᠬᠦᠷᠴᠦ
ᠥᠨᠢ ᠮᠥᠩᠬᠡ ᠰᠠᠢᠬᠠᠨ ᠵᠢᠷᠭᠠᠵᠠᠢ᠃
— — — —
② ᠬᠡᠨᠲᠡᠭ — ᠠᠠᠭᠤᠷ᠂ ᠬᠢᠯᠢᠩ᠂ ᠬᠣᠷᠣᠰᠤᠯ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠥᠬᠡ ᠮᠣᠩᠭᠣᠯ
ᠬᠢᠨᠠᠭᠴᠢ ᠪᠠᠭᠰᠢ᠄ ᠭᠠᠷᠮᠠ