ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠠᠷᠤ ᠥᠪᠥᠷ ᠦᠨ ᠰᠠᠢᠨ ᠡᠷᠡ Гураван настай гунаган улаан баатар - Ар өврийн сайн эр
127ᠠᠷᠤ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠴᠠᠭ ᠲᠤ᠌ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠭᠡᠵᠦ ᠬᠣᠶᠠᠷ ᠰᠠᠢᠨ ᠡᠷᠡ ᠪᠠᠢᠭᠰᠠᠨ ᠭᠡᠨᠡ᠃ ᠡᠨᠡ ᠬᠣᠶᠠᠷ ᠰᠠᠢᠨ ᠡᠷᠡ ᠪᠣᠯ ᠶᠡᠷᠦ ᠳ᠋ᠡᠭᠡᠨ ᠶᠠᠳᠠᠭᠤ ᠶ᠋ᠢ ᠲᠤᠰᠠᠯᠠᠵᠤ᠂ ᠣᠮᠣᠷᠬᠠᠭ ᠢ᠋ ᠴᠣᠬᠢᠵᠤ᠂ ᠨᠣᠶᠠᠳ ᠪᠠᠶᠠᠳ ᠲᠠᠢ ᠮᠥᠴᠡᠭᠡᠷᠬᠡᠨ ᠶᠠᠪᠤᠳᠠᠭ ᠭᠡᠨᠡ᠃
ᠴᠢᠩᠭᠢᠭᠡᠳ ᠨᠢᠭᠡᠨ ᠡᠳᠦᠷ᠂ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠨᠢ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠲᠡᠢ ᠪᠡᠨ ᠠᠭᠤᠯᠵᠠᠵᠤ᠂ ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠵᠦ᠂ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠨᠢ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠡᠴᠡ ᠪᠡᠨ᠄《ᠵᠠ! ᠨᠥᠬᠥᠷ ᠮᠢᠨᠢ᠂ ᠴᠢ ᠣᠳᠣ ᠶᠠᠭᠤ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ ᠪᠣᠢ!》 ᠭᠡᠰᠡᠨ ᠳ᠋ᠦ᠍᠂ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ᠄《ᠪᠢ ᠣᠳᠣ ᠭᠠᠭᠴᠠ ᠬᠠᠭᠠᠨ ᠤ᠋ ᠠᠷᠪᠠᠨ ᠲᠠᠪᠤᠨ ᠳᠠᠪᠬᠤᠷ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠪᠠᠢᠭᠠ ᠠᠯᠲᠠ ᠮᠥᠩᠭᠥ ᠶ᠋ᠢ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠃》 ᠭᠡᠰᠡᠨ ᠳ᠋ᠦ᠍᠂ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠨᠢ᠄《ᠵᠠ! ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠬᠣᠶᠠᠭᠤᠯᠠ ᠪᠠᠨ ᠠᠷᠭᠠᠯᠠᠵᠤ ᠪᠠᠢᠭᠠᠳ᠂ ᠲᠡᠷᠡ ᠠᠷᠪᠠᠨ ᠲᠠᠪᠤᠨ ᠳᠠᠪᠬᠤᠷ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠪᠠᠢᠭᠠ ᠠᠯᠲᠠ ᠮᠥᠩᠭᠥ ᠶ᠋ᠢ ᠠᠪᠴᠤ ᠦᠵᠡᠶᠡ!》 ᠭᠡᠳ᠂ ᠨᠢᠭᠡᠨ ᠶᠡᠬᠡ ᠲᠣᠭᠣᠭᠠᠨ ᠳᠣᠲᠣᠷᠠ ᠳᠦᠭᠦᠷᠲᠡᠯᠡ ᠴᠠᠪᠠᠤ ᠪᠤᠴᠠᠯᠭᠠᠵᠤ᠂ ᠰᠥᠨᠢ ᠬᠠᠷᠠᠩᠭᠤᠢ ᠪᠣᠯᠤᠭᠰᠠᠨ ᠳ᠋ᠤ᠌᠂ ᠬᠣᠶᠠᠭᠤᠯᠠ ᠪᠠᠨ ᠡᠨᠡ ᠴᠠᠪᠠᠤ ᠲᠠᠢ ᠲᠣᠭᠣᠭᠠ ᠪᠠᠨ ᠳᠠᠮᠨᠠᠵᠤ᠂ ᠬᠠᠭᠠᠨ ᠤ᠋ ᠠᠷᠪᠠᠨ ᠲᠠᠪᠤᠨ ᠳᠠᠪᠬᠤᠷ ᠠᠰᠠᠷ ᠤ᠋ᠨ ᠬᠣᠢᠨᠠ ᠨᠢ ᠠᠪᠠᠴᠢᠵᠤ ᠲᠠᠯᠪᠢᠭᠠᠳ᠂ ᠲᠣᠭᠣᠷᠢᠵᠤ ᠦᠵᠡᠭᠰᠡᠨ ᠳ᠋ᠦ᠍᠂ ᠬᠠᠭᠠᠯᠭᠠ ᠶ᠋ᠢᠨ ᠳᠡᠭᠡᠷᠡ ᠨᠢ ᠬᠠᠷᠠ ᠪᠠᠷᠰ ᠤ᠋ᠨ ᠲᠣᠯᠣᠭᠠᠢ ᠶ᠋ᠢᠨ ᠣᠨᠢᠰᠣ ᠪᠠᠷ ᠣᠨᠢᠰᠤᠯᠠᠵᠤ ᠂ ᠬᠠᠲᠠᠭᠤ ᠴᠠᠬᠢᠷᠠᠭ ᠲᠠᠪᠢᠨ ᠴᠡᠷᠢᠭ᠂ ᠬᠠᠶᠠᠭᠠ ᠪᠠᠨ ᠲᠦᠰᠢᠵᠦ ᠬᠠᠮᠠᠷ ᠲᠡᠳᠡᠨ ᠤᠨᠲᠠᠵᠤ ᠪᠠᠢᠨᠠ ᠭᠡᠨᠡ᠃ ᠬᠣᠶᠠᠷ ᠰᠠᠢᠨ ᠡᠷᠡ ᠴᠥᠮ ᠪᠠᠢᠴᠠᠭᠠᠵᠤ ᠪᠠᠷᠠᠭᠠᠳ᠂ ᠠᠰᠠᠷ ᠤ᠋ᠨ ᠬᠣᠢᠨᠠ ᠨᠢ ᠢᠷᠡᠵᠦ ᠭᠠᠷ ᠬᠥᠯ ᠳ᠋ᠡᠭᠡᠨ ᠪᠦᠷ ᠴᠠᠪᠠᠤ ᠪᠢᠯᠳᠠᠵᠤ᠂ ᠠᠷᠪᠠᠨ ᠲᠠᠪᠤᠨ ᠳᠠᠪᠬᠤᠷ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠮᠠᠭᠰᠢᠨ ᠭᠠᠷᠴᠤ ᠬᠣᠢᠲᠤ ᠴᠣᠩᠬᠣ ᠶ᠋ᠢ ᠨᠢ ᠲᠦᠯᠬᠢᠨ ᠣᠷᠣᠭᠠᠳ ᠦᠵᠡᠭᠰᠡᠨ ᠳ᠋ᠦ᠍᠂ ᠦᠨᠡᠬᠡᠷ ᠦᠬᠡᠷ ᠦ᠋ᠨ ᠠᠷᠠᠰᠤᠨ ᠠᠪᠳᠠᠷᠠ ᠶ᠋ᠢ ᠥᠨᠴᠥᠭ ᠵᠡᠷᠭᠡᠴᠡᠭᠦᠯᠦᠨ ᠲᠠᠯᠪᠢᠵᠤ᠂ ᠠᠪᠳᠠᠷᠠ ᠪᠦᠷᠢ ᠠᠯᠲᠠ ᠮᠥᠩᠭᠥ ᠳᠦᠭᠦᠷᠡᠩ ᠬᠠᠳᠠᠭᠠᠯᠠᠭᠰᠠᠨ ᠪᠠᠢᠨᠠ ᠭᠡᠨᠡ᠃ ᠴᠢᠩᠭᠢᠭᠡᠳ ᠬᠣᠶᠠᠭᠤᠯᠠ ᠪᠠᠷᠠᠭᠤᠨ ᠲᠠᠢ ᠨᠢ ᠪᠠᠢᠬᠤ ᠬᠣᠶᠠᠷ ᠠᠪᠳᠠᠷᠠ ᠶ᠋ᠢ ᠨᠡᠭᠡᠭᠡᠵᠦ᠂ ᠳᠣᠲᠣᠷᠠ ᠨᠢ ᠪᠠᠢᠭᠰᠠᠨ ᠠᠯᠲᠠ ᠮᠥᠩᠭᠥ ᠶ᠋ᠢ ᠨᠢ ᠴᠥᠮ ᠬᠣᠢᠲᠤ ᠴᠣᠩᠬᠣ ᠪᠠᠷ ᠨᠢ ᠴᠢᠯᠠᠭᠤᠳᠠᠨ ᠭᠠᠷᠭᠠᠭᠠᠳ᠂ ᠠᠰᠠᠷ ᠠ᠋ᠴᠠ ᠪᠠᠭᠤᠵᠤ᠂ ᠠᠯᠲᠠ ᠮᠥᠩᠭᠥ ᠪᠡᠨ ᠴᠤᠭᠯᠠᠭᠤᠯᠵᠤ᠂ ᠠᠢᠯ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ᠂ ᠣᠯᠵᠤ ᠢᠷᠡᠭᠰᠡᠨ ᠠᠯᠲᠠ ᠮᠥᠩᠭᠥ ᠪᠡᠨ ᠠᠮᠢᠳᠤᠷᠠᠯ ᠮᠠᠭᠤ ᠲᠠᠢ ᠬᠥᠮᠦᠨ ᠳ᠋ᠦ᠍ ᠲᠠᠷᠬᠠᠭᠠᠨ ᠥᠭᠴᠦ᠂ ᠠᠷᠢᠬᠢ ᠳᠠᠷᠠᠰᠤ ᠤᠤᠭᠤᠵᠤ᠂ ᠮᠢᠬᠠ ᠬᠣᠭᠣᠯᠠ ᠪᠠᠨ ᠢᠳᠡᠵᠦ ᠤᠨᠲᠠᠪᠠ ᠭᠡᠨᠡ᠃ ᠮᠠᠷᠭᠠᠰᠢ ᠨᠢ ᠬᠠᠭᠠᠨ ᠤ᠋ ᠠᠯᠲᠠ ᠮᠥᠩᠭᠥ ᠶ᠋ᠢ ᠬᠠᠮᠢᠶᠠᠷᠳᠠᠭ᠂ ᠠᠰᠠᠷ ᠲᠠᠭᠲᠤ ᠰᠠᠬᠢᠬᠤ ᠲᠦᠰᠢᠮᠡᠯ ᠨᠢ ᠮᠥᠨ ᠲᠣᠭᠲᠠᠭᠰᠠᠨ ᠬᠡᠪ ᠳᠦᠷᠢᠮ ᠢ᠋ᠶ᠋ᠡᠷ ᠡᠷᠲᠡ ᠪᠣᠰᠴᠤ ᠠᠰᠠᠷ ᠲᠠᠭᠠᠨ ᠠᠪᠠᠷᠢᠵᠤ ᠠᠪᠳᠠᠷᠠ ᠪᠦᠬᠦᠨ ᠢ᠋ᠶ᠋ᠡᠨ ᠪᠠᠢᠴᠠᠭᠠᠨ ᠦᠵᠡᠭᠰᠡᠨ ᠳ᠋ᠦ᠍᠂ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠠᠪᠳᠠᠷᠠ ᠨᠢ ᠬᠣᠭᠣᠰᠣᠨ ᠪᠣᠯᠵᠤ ᠳᠣᠲᠣᠷᠠᠬᠢ ᠠᠯᠲᠠ ᠮᠥᠩᠭᠥ ᠨᠢ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ ᠦᠵᠡᠭᠡᠳ᠂ ᠶᠡᠬᠡᠯᠡ ᠠᠶᠤᠵᠤ᠂ ᠬᠠᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠨᠢ ᠶᠡᠬᠡ ᠰᠣᠴᠢᠵᠤ᠄《ᠮᠢᠨᠦ ᠠᠷᠪᠠᠨ ᠲᠠᠪᠤᠨ ᠳᠠᠪᠬᠤᠷ ᠠᠰᠠᠷ ᠤ᠋ᠨ ᠳᠡᠭᠡᠷᠡᠬᠢ ᠠᠯᠲᠠ ᠮᠥᠩᠭᠥ ᠶ᠋ᠢ ᠠᠪᠤᠭᠰᠠᠨ ᠬᠥᠮᠦᠨ᠂ ᠬᠠᠷᠢᠨ ᠵᠦᠭᠡᠷ ᠬᠥᠮᠦᠨ ᠪᠢᠰᠢ》 ᠭᠡᠳ ᠲᠦᠰᠢᠮᠡᠯ ᠳ᠋ᠡᠭᠡᠨ᠄《ᠴᠢ ᠣᠴᠢᠵᠤ ᠥᠴᠥᠭᠡᠳᠦᠷ ᠦ᠋ᠨ ᠬᠣᠭᠣᠰᠣᠨ ᠪᠣᠯᠤᠭᠰᠠᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠠᠪᠳᠠᠷᠠ ᠳ᠋ᠠᠭᠠᠨ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠠᠪᠳᠠᠷᠠ ᠶ᠋ᠢᠨ ᠠᠯᠲᠠ ᠮᠥᠩᠭᠥ ᠶ᠋ᠢ ᠠᠪᠴᠤ ᠬᠢᠭᠡᠳ᠂ ᠲᠡᠷᠡ ᠬᠣᠭᠣᠰᠣᠨ ᠪᠣᠯᠤᠭᠰᠠᠨ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠠᠪᠳᠠᠷᠠ ᠳ᠋ᠠᠭᠠᠨ ᠳᠦᠭᠦᠷᠲᠡᠯᠡ ᠯᠠᠴᠠ ᠬᠢᠵᠦ ᠲᠠᠯᠪᠢᠭᠲᠤᠨ》 ᠭᠡᠵᠦ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠶᠠᠪᠤᠭᠤᠯᠤᠭᠠᠳ᠂ ᠬᠠᠭᠠᠨ ᠮᠢᠨᠦ ᠠᠯᠲᠠ ᠮᠥᠩᠭᠥ ᠶ᠋ᠢ ᠠᠪᠤᠭᠰᠠᠨ ᠬᠤᠯᠠᠭᠠᠢᠴᠢ ᠴᠢ ᠡᠨᠡ ᠣᠷᠣᠢ ᠢᠷᠡᠵᠦ ᠥᠴᠥᠭᠡᠳᠦᠷ ᠣᠩᠭᠤᠢᠯᠭᠠᠭᠰᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠠᠪᠳᠠᠷᠠ ᠶ᠋ᠢ ᠬᠣᠭᠣᠰᠣᠨ ᠪᠣᠯᠪᠠ ᠭᠡᠵᠦ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠠᠪᠳᠠᠷᠠ ᠶ᠋ᠢ ᠨᠡᠭᠡᠭᠡᠵᠦ ᠯᠠᠴᠠ ᠳ᠋ᠤ᠌ ᠯᠠᠴᠠᠳᠠᠭᠳᠠᠵᠤ ᠪᠠᠷᠢᠭᠳᠠᠬᠤ ᠦᠭᠡᠢ ᠬᠠᠮᠢᠭᠠ ᠣᠴᠢᠬᠤ ᠪᠣᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠠᠶᠠᠷᠯᠠᠨ ᠰᠠᠭᠤᠵᠤ ᠭᠡᠨᠡ᠃
ᠴᠢᠩᠭᠢᠭᠡᠳ ᠣᠷᠣᠢ ᠨᠢ ᠠᠷᠤ ᠥᠪᠥᠷ ᠦ᠋ᠨ ᠬᠣᠶᠠᠷ ᠰᠠᠢᠨ ᠡᠷᠡ ᠮᠥᠨ ᠴᠠᠪᠠᠤ ᠲᠠᠢ ᠲᠣᠭᠣᠭᠠ ᠪᠠᠨ ᠳᠠᠮᠨᠠᠨ ᠢᠷᠡᠵᠦ᠂ ᠭᠠᠷ ᠬᠥᠯ ᠢ᠋ᠶ᠋ᠡᠨ ᠴᠥᠮ ᠴᠠᠪᠠᠤ ᠳ᠋ᠤ᠌ ᠪᠢᠯᠳᠠᠵᠤ᠂ ᠠᠰᠠᠷ ᠤ᠋ᠨ ᠳᠡᠭᠡᠷᠡ ᠠᠪᠠᠷᠢᠨ ᠭᠠᠷᠴᠤ ᠢᠷᠡᠬᠦ ᠳ᠋ᠡᠭᠡᠨ᠂ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠨᠢ ᠵᠠ! ᠡᠨᠡ ᠡᠳᠦᠷ ᠪᠢᠳᠡᠨ ᠪᠠᠰᠠ ᠥᠴᠥᠭᠡᠳᠦᠷ ᠦ᠋ᠨ ᠣᠩᠭᠣᠢᠯᠭᠠᠭᠰᠠᠨ ᠠᠪᠳᠠᠷᠠ ᠪᠠᠨ ᠣᠩᠭᠣᠢᠯᠭᠠᠨᠠ ᠭᠡᠰᠡᠨ ᠳ᠋ᠦ᠍᠂ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠨᠢ ᠴᠢᠩᠭᠢᠭᠡᠳ ᠶᠠᠮᠠᠷ ᠬᠡᠷᠡᠭ ᠪᠠᠢᠬᠤ ᠪᠣᠢ᠂ ᠥᠴᠥᠭᠡᠳᠦᠷ ᠦ᠋ᠨ ᠣᠩᠭᠣᠢᠯᠭᠠᠭᠰᠠᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠠᠪᠳᠠᠷᠠ ᠴᠢᠨᠢ ᠬᠣᠭᠣᠰᠣᠨ ᠪᠣᠯᠤᠭᠰᠠᠨ ᠪᠢᠯᠡ ᠳᠠ᠃ ᠡᠨᠡ ᠡᠳᠦᠷ ᠣᠳᠣ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠠᠪᠳᠠᠷᠠ ᠶ᠋ᠢ ᠨᠡᠭᠡᠭᠡᠵᠦ ᠠᠪᠬᠤ ᠦᠭᠡᠢ ᠶᠠᠭᠤ ᠶ᠋ᠢ ᠠᠪᠬᠤ ᠪᠣᠢ ᠭᠡᠵᠦ᠂ ᠲᠦᠷᠭᠡᠨ ᠲᠦᠷᠭᠡᠨ ᠠᠪᠠᠷᠢᠵᠤ ᠣᠷᠣᠭᠠᠳ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠶ᠋ᠢᠨ ᠬᠡᠯᠡᠵᠦ ᠵᠠᠪᠳᠤᠬᠤ ᠠ᠋ᠴᠠ ᠤᠷᠢᠳ᠂ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠠᠪᠳᠠᠷᠠ ᠶ᠋ᠢ ᠨᠡᠭᠡᠭᠡᠵᠦ ᠭᠠᠷ ᠢ᠋ᠶ᠋ᠠᠨ ᠰᠤᠩᠭᠠᠨ ᠣᠷᠣᠭᠤᠯᠵᠤ ᠯᠠᠴᠠ ᠳ᠋ᠤ᠌ ᠯᠠᠴᠠᠳᠠᠭᠳᠠᠪᠠ᠃ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠨᠢ ᠬᠣᠢᠨᠠ ᠠ᠋ᠴᠠ ᠨᠢ ᠣᠷᠣᠵᠤ ᠢᠷᠡᠭᠡᠳ ᠮᠥᠨ ᠥᠴᠥᠭᠡᠳᠦᠷ ᠣᠩᠭᠣᠢᠯᠭᠠᠭᠰᠠᠨ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠠᠪᠳᠠᠷᠠ ᠪᠠᠨ ᠣᠩᠭᠣᠢᠯᠭᠠᠵᠤ ᠠᠯᠲᠠ ᠮᠥᠩᠭᠥ ᠶ᠋ᠢ ᠨᠢ ᠠᠪᠴᠤ ᠬᠣᠢᠲᠤ ᠴᠣᠩᠬᠣ ᠪᠠᠷ ᠨᠢ ᠭᠠᠳᠠᠭᠰᠢ ᠴᠢᠯᠠᠭᠤᠳᠠᠨ ᠭᠠᠷᠭᠠᠭᠠᠳ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠪᠡᠨ ᠦᠵᠡᠭᠰᠡᠨ ᠳ᠋ᠦ᠍ ᠬᠠᠷᠢᠨ ᠨᠢᠭᠡᠨ ᠬᠡᠰᠡᠭ ᠠᠯᠲᠠ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ ᠪᠥᠭᠡᠳ ᠭᠠᠷ ᠢ᠋ᠶ᠋ᠠᠨ ᠯᠠᠴᠠ ᠳ᠋ᠤ᠌ ᠯᠠᠴᠠᠳᠠᠭᠳᠠᠭᠠᠳ ᠵᠣᠭᠰᠣᠵᠤ ᠪᠠᠢᠨᠠ ᠭᠡᠨᠡ᠃ ᠴᠢᠩᠭᠢᠭᠡᠳ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠨᠢ᠂ ᠴᠢ ᠮᠢᠨᠦ ᠦᠭᠡᠨ ᠳ᠋ᠦ᠍ ᠣᠷᠣᠬᠤ ᠦᠭᠡᠢ ᠡᠨᠡ ᠬᠠᠭᠠᠨ ᠤ᠋ ᠬᠤᠯᠵᠢᠨ ᠠᠷᠭᠠ ᠳ᠋ᠤ᠌ ᠤᠨᠠᠭᠰᠠᠨ ᠪᠢᠰᠢ ᠤᠤ ᠭᠡᠵᠦ ᠭᠠᠰᠢᠭᠤᠳᠠᠬᠤ ᠳ᠋ᠤ᠌᠂ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠨᠢ᠄《ᠵᠠ᠂ ᠪᠢ ᠨᠥᠬᠥᠷ ᠴᠢᠨᠦ ᠦᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠦᠭᠡᠢ᠂ ᠡᠨᠡ ᠬᠠᠭᠠᠨ ᠤ᠋ ᠬᠤᠯᠵᠢᠨ ᠠᠷᠭᠠ ᠳ᠋ᠤ᠌ ᠣᠨᠣᠭᠳᠠᠪᠠ᠃ ᠡᠭᠦᠨ ᠢ᠋ᠶ᠋ᠡᠷ ᠦᠵᠡᠬᠦ ᠳ᠋ᠦ᠍ ᠮᠢᠨᠦ ᠤᠬᠠᠭᠠᠨ ᠡᠨᠡ ᠬᠠᠭᠠᠨ ᠳ᠋ᠤ᠌ ᠬᠦᠷᠬᠦ ᠦᠭᠡᠢ ᠪᠠᠢᠨᠠ᠃ ᠡᠳᠦᠭᠡ ᠶᠠᠭᠠᠬᠢᠪᠠᠴᠤ ᠯᠠᠴᠠ ᠠ᠋ᠴᠠ ᠭᠠᠷ ᠢ᠋ᠶ᠋ᠠᠨ ᠰᠤᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠲᠤᠯᠠ᠂ ᠮᠠᠷᠭᠠᠰᠢ ᠣᠳᠣ ᠨᠠᠮᠠᠶ᠋ᠢ ᠠᠮᠢᠳᠤ ᠪᠠᠷ ᠪᠠᠷᠢᠵᠤ ᠶᠢᠰᠦᠨ ᠦᠶᠡ ᠶ᠋ᠢ ᠬᠦᠢᠰᠦ ᠲᠡᠮᠲᠡᠷᠢᠨᠡ᠃ ᠪᠣᠳᠣᠪᠠᠯ ᠨᠢᠭᠡᠨ ᠠᠢᠯ ᠪᠦᠬᠦᠨ ᠢ᠋ᠶ᠋ᠡᠷ ᠠᠯᠠᠭᠳᠠᠬᠤ ᠠ᠋ᠴᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠦᠬᠦᠬᠦ ᠨᠢ ᠳᠡᠭᠡᠷᠡ᠂ ᠨᠥᠬᠥᠷ ᠮᠢᠨᠢ ᠴᠢ ᠥᠲᠡᠯᠦᠭᠰᠡᠨ ᠡᠵᠢ᠂ ᠡᠬᠡᠨᠡᠷ ᠬᠡᠦᠬᠡᠳ ᠢ᠋ ᠠᠮᠢᠳᠤ ᠶᠠᠪᠤᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ ᠮᠢᠨᠦ ᠲᠣᠯᠣᠭᠠᠢ ᠶ᠋ᠢ ᠣᠭᠲᠣᠯᠤᠨ ᠠᠪᠴᠤ ᠶᠠᠪᠤ ᠭᠡᠵᠦ ᠳᠠᠬᠢᠨ ᠳᠠᠬᠢᠨ ᠱᠠᠭᠠᠷᠳᠠᠬᠤ ᠳ᠋ᠤ᠌᠂ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠨᠢ ᠠᠷᠭᠠ ᠦᠭᠡᠢ ᠪᠣᠯᠵᠤ᠂ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠪᠡᠨ ᠦᠨᠦᠰᠦᠨ ᠤᠬᠢᠯᠠᠵᠤ ᠬᠢᠲᠤᠭᠠ ᠪᠠᠨ ᠭᠠᠷᠭᠠᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠣᠭᠲᠣᠯᠤᠨ ᠠᠪᠴᠤ ᠬᠠᠷᠢᠭᠠᠳ ᠡᠵᠢ ᠳ᠋ᠦ᠍ᠨᠢ ᠶᠠᠭᠠᠬᠢᠵᠤ᠂ ᠦᠭᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠦᠭᠡᠢ ᠭᠠᠷ ᠢ᠋ᠶ᠋ᠠᠨ ᠯᠠᠴᠠ ᠳ᠋ᠤ᠌ ᠲᠥᠷᠥᠵᠦ᠂ ᠪᠡᠶᠡ ᠪᠡᠨ ᠰᠤᠭᠤᠯᠤᠨ ᠴᠢᠳᠠᠬᠤ ᠦᠭᠡᠢ᠂ ᠬᠥᠭᠰᠢᠨ ᠵᠠᠯᠠᠭᠤ ᠪᠠᠨ ᠪᠣᠳᠣᠵᠤ᠂ ᠠᠮᠢᠨ ᠤ᠋ ᠪᠡᠶᠡ ᠪᠡᠨ ᠬᠥᠨᠥᠭᠡᠭᠰᠡᠨ ᠳ᠋ᠦ᠍ ᠬᠦᠷᠲᠡᠯᠡ ᠬᠡᠯᠡᠭᠰᠡᠨ ᠳ᠋ᠦ᠍ ᠡᠵᠢ ᠨᠢ ᠬᠠᠷᠠᠩᠭᠤᠢᠳᠠᠨ ᠤᠬᠢᠯᠠᠵᠤ ᠮᠠᠭᠤᠵᠢᠷᠠᠭᠰᠠᠨ ᠳ᠋ᠤ᠌᠂ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ᠄《ᠡᠵᠢ ᠮᠢᠨᠢ! ᠴᠢ ᠣᠳᠣ ᠤᠬᠢᠯᠠᠬᠤ ᠳ᠋ᠤ᠌ ᠬᠠᠮᠢᠶᠠ ᠦᠭᠡᠢ᠃ ᠭᠡᠪᠡᠴᠦ ᠪᠢ ᠪᠣᠳᠣᠵᠤ ᠦᠵᠡᠬᠦ ᠳ᠋ᠦ᠍ ᠣᠳᠣ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠬᠠᠭᠠᠨ ᠮᠠᠭᠠᠳ ᠴᠠᠭᠠᠨ ᠵᠠᠭᠠᠨ ᠬᠥᠯᠦᠭᠰᠡᠨ ᠲᠡᠷᠭᠡᠨ ᠳᠡᠭᠡᠷᠡ ᠬᠥᠪᠡᠭᠦᠨ ᠦ᠌ ᠴᠢᠨᠢ ᠪᠡᠶᠡ ᠶ᠋ᠢ ᠲᠡᠭᠡᠭᠡᠵᠦ ᠠᠢᠯ ᠬᠡᠰᠦᠵᠦ ᠲᠣᠭᠣᠷᠢᠭᠤᠯᠤᠨ᠂ ᠬᠥᠮᠦᠨ ᠪᠦᠬᠦᠨ ᠳ᠋ᠦ᠍ ᠦᠵᠡᠭᠦᠯᠦᠨ ᠤᠬᠢᠯᠠᠭᠰᠠᠨ ᠬᠥᠮᠦᠨ ᠢ᠋ ᠳᠠᠷᠤᠢ ᠪᠠᠷᠢᠵᠤ ᠠᠯᠠᠨᠠ᠃ ᠡᠵᠢ ᠮᠢᠨᠢ ᠴᠢ ᠥᠪᠡᠷ ᠦ᠋ᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠦᠬᠦᠳᠡᠯ ᠢ᠋ ᠦᠵᠡᠭᠡᠳ ᠤᠬᠢᠯᠠᠬᠤ ᠦᠭᠡᠢ ᠶᠣᠰᠣ ᠪᠠᠢᠨᠠ ᠤᠤ᠃ ᠭᠡᠪᠡᠴᠦ ᠨᠠᠳᠠ ᠠᠷᠭᠠ ᠪᠠᠢᠨᠠ᠃ ᠬᠡᠷᠪᠡ ᠦᠨᠡᠬᠡᠷ ᠴᠠᠭᠠᠨ ᠵᠠᠭᠠᠨ ᠬᠥᠯᠦᠭᠰᠡᠨ ᠲᠡᠷᠭᠡ ᠢᠷᠡᠪᠡᠯ᠂ ᠴᠢ ᠨᠢᠭᠡᠨ ᠭᠦᠵᠡᠭᠡ ᠲᠡᠢ ᠤᠰᠤ ᠪᠠᠷᠢᠨ ᠭᠠᠷᠤᠭᠠᠳ ᠭᠠᠵᠠᠷ ᠠᠯᠳᠠᠵᠤ ᠤᠬᠢᠯᠠᠭᠲᠤᠨ᠃ ᠴᠢᠩᠭᠢᠪᠡᠯ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠴᠢᠮᠠᠶ᠋ᠢ ᠤᠬᠢᠯᠠᠪᠠ ᠭᠡᠵᠦ ᠪᠠᠷᠢᠨᠠ ᠭᠡᠵᠦ ᠠᠭᠠᠰᠢᠯᠠᠪᠠᠯ ᠴᠢ ᠬᠡᠯᠡᠭᠡᠷᠡᠢ᠃《ᠬᠥᠭᠰᠢᠨ ᠪᠢ ᠵᠦᠳᠡᠭᠦᠦ ᠮᠥᠳᠡᠭᠦᠦ ᠬᠢᠵᠦ᠂ ᠬᠣᠯᠠ ᠶ᠋ᠢᠨ ᠬᠤᠳᠳᠤᠭ ᠠ᠋ᠴᠠ ᠬᠡᠳᠦᠨ ᠡᠳᠦᠷ ᠤᠤᠭᠤᠬᠤ ᠤᠰᠤ ᠪᠠᠨ ᠠᠪᠴᠢᠷᠠᠭᠰᠠᠨ ᠳ᠋ᠤ᠌ ᠲᠠ ᠮᠤᠤᠰᠠᠢᠨ ᠠᠮᠢᠲᠠᠨ ᠨᠤᠭᠤᠳ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ ᠦᠭᠡᠢ ᠪᠡᠶᠡ ᠠᠪᠴᠢᠷᠠᠵᠤ ᠬᠥᠮᠦᠨ ᠢ᠋ ᠠᠶᠤᠯᠭᠠᠨ ᠭᠦᠵᠡᠭᠡ ᠲᠡᠢ ᠤᠰᠤ ᠶ᠋ᠢ ᠮᠢᠨᠢ ᠴᠥᠮ ᠠᠰᠬᠠᠭᠤᠯᠪᠠ ᠭᠡᠵᠦ ᠤᠬᠢᠯᠠ᠃ ᠴᠢᠩᠭᠢᠪᠡᠯ ᠪᠢ ᠥᠭᠡᠷᠡ ᠨᠢᠭᠡᠨ ᠠᠷᠭᠠ ᠭᠠᠷᠭᠠᠵᠤ ᠲᠡᠷᠡ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠢ᠋ ᠰᠠᠯᠭᠠᠵᠤ ᠴᠢᠳᠠᠨᠠ ᠭᠡᠵᠦ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠶ᠋ᠢᠨ ᠡᠵᠢ ᠳ᠋ᠦ᠍ᠨᠢ ᠰᠤᠷᠭᠠᠭᠠᠳ᠂ ᠬᠠᠭᠠᠨ ᠤ᠋ ᠡᠷᠡᠦ ᠶ᠋ᠢ ᠵᠠᠢᠳᠠᠭᠤᠯᠬᠤ ᠠᠷᠭᠠ ᠶ᠋ᠢ ᠪᠡᠯᠡᠳᠬᠡᠨ ᠭᠠᠷᠴᠤ ᠣᠴᠢᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠮᠠᠷᠭᠠᠰᠢ ᠨᠢ ᠬᠠᠭᠠᠨ ᠤ᠋ ᠠᠰᠠᠷ ᠰᠠᠬᠢᠳᠠᠭ ᠲᠦᠰᠢᠮᠡᠯ ᠨᠢ ᠠᠷᠪᠠᠨ ᠲᠠᠪᠤᠨ ᠳᠠᠪᠬᠤᠷ ᠳᠡᠭᠡᠷᠡ ᠪᠡᠨ ᠭᠠᠷᠴᠤ ᠦᠵᠡᠭᠰᠡᠨ ᠳ᠋ᠦ᠍ ᠬᠠᠷᠢᠨ ᠨᠢᠭᠡᠨ ᠲᠣᠯᠣᠭᠠᠢ ᠦᠭᠡᠢ ᠬᠥᠮᠦᠨ ᠯᠠᠴᠠ ᠲᠠᠢ ᠠᠪᠳᠠᠷᠠ ᠳ᠋ᠤᠨᠢ ᠭᠠᠷ ᠢ᠋ᠶ᠋ᠠᠨ ᠬᠢᠵᠦ ᠦᠬᠦᠭᠰᠡᠨ ᠢ᠋ ᠦᠵᠡᠭᠡᠳ ᠶᠠᠭᠠᠷᠠᠨ ᠬᠠᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠨᠢ᠄《ᠠ! ᠡᠨᠡ ᠬᠠᠷᠢᠨ ᠬᠣᠶᠠᠷ ᠬᠥᠮᠦᠨ ᠪᠠᠢᠨᠠ᠃ ᠨᠢᠭᠡ ᠨᠢ ᠯᠠᠴᠠ ᠳ᠋ᠤ᠌ ᠯᠠᠴᠠᠳᠠᠭᠳᠠᠭᠰᠠᠨ ᠳ᠋ᠤ᠌ ᠨᠥᠭᠦᠭᠡ ᠨᠢᠭᠡ ᠨᠢ ᠡᠭᠦᠨ ᠢ᠋ᠶ᠋ᠡᠨ ᠠᠮᠢᠳᠤ ᠪᠠᠷᠢᠭᠳᠠᠬᠤ ᠠ᠋ᠴᠠ ᠠᠶᠤᠵᠤ ᠲᠣᠯᠣᠭᠠᠢ ᠶ᠋ᠢ ᠨᠢ ᠣᠭᠲᠣᠯᠵᠤ ᠠᠪᠠᠴᠢᠭᠰᠠᠨ ᠪᠠᠢᠨᠠ᠃ ᠵᠠ! ᠴᠢ ᠡᠭᠦᠨ ᠦ᠌ ᠲᠣᠯᠣᠭᠠᠢ ᠶ᠋ᠢ ᠠᠪᠠᠴᠢᠪᠠᠯ ᠪᠢ ᠴᠢᠮᠠᠶ᠋ᠢ ᠡᠷᠢᠵᠦ ᠣᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ ᠤᠤ? ᠶᠡᠷᠦ ᠳ᠋ᠡᠭᠡᠨ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠭᠡᠷ ᠦ᠋ᠨ ᠤᠯᠤᠰ ᠨᠢ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠦᠬᠦᠳᠡᠯ ᠢ᠋ ᠦᠵᠡᠭᠡᠳ ᠤᠬᠢᠯᠠᠬᠤ ᠦᠭᠡᠢ ᠭᠡᠵᠦ ᠦᠭᠡᠢ᠃ ᠲᠡᠭᠡᠪᠡᠯ ᠮᠥᠨ ᠦᠬᠦᠭᠰᠡᠨ ᠬᠥᠮᠦᠨ ᠦ᠌ ᠭᠡᠷ ᠦ᠋ᠨ ᠤᠯᠤᠰ ᠢ᠋ ᠨᠢ ᠣᠯᠪᠠᠯ ᠴᠢ ᠴᠦ᠍ ᠬᠠᠮᠢᠭᠠ ᠳᠤᠲᠠᠭᠠᠬᠤ ᠪᠣᠢ》 ᠭᠡᠵᠦ᠂ ᠲᠦᠰᠢᠮᠡᠯ ᠳ᠋ᠡᠭᠡᠨ᠄《ᠴᠢ ᠡᠨᠡ ᠲᠣᠯᠣᠭᠠᠢ ᠦᠭᠡᠢ ᠦᠬᠦᠳᠡᠯ ᠢ᠋ ᠴᠠᠭᠠᠨ ᠵᠠᠭᠠᠨ ᠬᠥᠯᠦᠭᠰᠡᠨ ᠲᠡᠷᠭᠡᠨ ᠳ᠋ᠦ᠍ ᠲᠡᠭᠡᠭᠡᠵᠦ᠂ ᠠᠢᠯ ᠬᠥᠳᠡᠭᠡ ᠶ᠋ᠢ ᠬᠡᠰᠦᠵᠦ ᠶᠠᠪᠤ᠃ ᠬᠡᠷᠪᠡ ᠡᠨᠡ ᠦᠬᠦᠳᠡᠯ ᠢ᠋ ᠦᠵᠡᠵᠦ ᠤᠬᠢᠯᠠᠬᠤ ᠬᠥᠮᠦᠨ ᠲᠠᠭᠠᠷᠠᠪᠠᠯ᠂ ᠳᠠᠷᠤᠢ ᠨᠠᠳᠠ ᠪᠠᠷᠢᠵᠤ ᠠᠪᠴᠤ ᠢᠷᠡ᠃ ᠪᠢ ᠲᠡᠭᠦᠨ ᠡᠴᠡ ᠲᠡᠷᠡ ᠦᠬᠦᠳᠡᠯ ᠦ᠋ᠨ ᠲᠣᠯᠣᠭᠠᠢ ᠶ᠋ᠢ ᠠᠪᠠᠴᠢᠭᠰᠠᠨ ᠬᠥᠮᠦᠨ ᠢ᠋ ᠰᠢᠭᠦᠵᠦ ᠠᠰᠠᠭᠤᠨ ᠭᠠᠷᠭᠠᠨᠠ》 ᠭᠡᠳ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠶᠠᠪᠤᠭᠤᠯᠪᠠ᠃
ᠴᠢᠩᠭᠢᠭᠡᠳ ᠲᠦᠰᠢᠮᠡᠯ ᠨᠢ ᠴᠠᠭᠠᠨ ᠵᠠᠭᠠᠨ ᠬᠥᠯᠦᠭᠰᠡᠨ ᠲᠡᠷᠭᠡᠨ ᠳ᠋ᠡᠭᠡᠨ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠶ᠋ᠢᠨ ᠦᠬᠦᠳᠡᠯ ᠢ᠋ ᠲᠡᠭᠡᠭᠡᠵᠦ᠂ ᠠᠢᠯ ᠬᠥᠳᠡᠭᠡ ᠶ᠋ᠢ ᠬᠡᠰᠦᠵᠦ ᠶᠠᠪᠤᠭᠰᠠᠭᠠᠷ᠂ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠶ᠋ᠢᠨ ᠠᠢᠯ ᠳ᠋ᠤᠨᠢ ᠢᠷᠡᠭᠰᠡᠨ ᠳ᠋ᠦ᠍ ᠨᠢᠭᠡᠨ ᠬᠥᠭᠰᠢᠨ ᠡᠵᠢ ᠭᠠᠷ ᠲᠠᠭᠠᠨ ᠭᠦᠵᠡᠭᠡ ᠲᠡᠢ ᠤᠰᠤ ᠠᠳᠬᠤᠨ ᠭᠠᠷᠴᠤ ᠢᠷᠡᠭᠡᠳ ᠲᠡᠭᠦᠨ ᠢ᠋ ᠪᠡᠨ ᠠᠯᠳᠠᠵᠤ ᠠᠰᠬᠠᠭᠠᠳ᠂ ᠲᠡᠷᠭᠡᠨ ᠳᠡᠭᠡᠷᠡᠬᠢ ᠦᠬᠦᠳᠡᠯ ᠢ᠋ ᠦᠵᠡᠭᠡᠳ ᠤᠬᠢᠯᠠᠭᠰᠠᠨ ᠳ᠋ᠤ᠌᠂ ᠬᠠᠭᠠᠨ ᠤ᠋ ᠲᠦᠰᠢᠮᠡᠯ ᠬᠥᠭᠰᠢᠨ ᠢ᠋ ᠪᠠᠷᠢᠨᠠ ᠭᠡᠵᠦ ᠢᠷᠡᠭᠰᠡᠨ ᠳ᠋ᠦ᠍ ᠬᠥᠭᠰᠢᠨ᠄《ᠪᠢ ᠡᠳᠦᠢ ᠬᠥᠭᠰᠢᠷᠡᠵᠦ ᠠᠷᠠᠢ ᠭᠡᠵᠦ ᠬᠤᠳᠳᠤᠭ ᠳᠡᠭᠡᠷᠡ ᠣᠴᠢᠵᠤ ᠬᠡᠳᠦᠨ ᠡᠳᠦᠷ ᠦ᠋ᠨ ᠬᠡᠷᠡᠭᠯᠡᠬᠦ ᠤᠰᠤ ᠪᠠᠨ ᠠᠪᠴᠢᠷᠠᠭᠰᠠᠨ ᠳ᠋ᠤ᠌᠂ ᠲᠠ ᠮᠤᠤᠰᠠᠢᠨ ᠠᠮᠢᠲᠠᠨ ᠨᠤᠭᠤᠳ᠂ ᠲᠣᠯᠣᠭᠠᠢ ᠦᠭᠡᠢ ᠦᠬᠦᠳᠡᠯ ᠲᠡᠭᠡᠭᠡᠵᠦ᠂ ᠬᠥᠮᠦᠨ ᠢ᠋ ᠠᠶᠤᠯᠭᠠᠨ ᠤᠰᠤ ᠶ᠋ᠢ ᠮᠢᠨᠢ ᠴᠥᠮ ᠠᠰᠬᠠᠭᠤᠯᠪᠠ》 ᠭᠡᠵᠦ ᠬᠠᠷᠢᠶᠠᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠣᠷᠣᠭᠰᠠᠨ ᠳ᠋ᠤ᠌᠂ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠬᠣᠢᠨᠠ ᠠ᠋ᠴᠠ ᠨᠢ ᠳᠠᠭᠠᠯᠳᠤᠨ ᠣᠷᠣᠵᠤ ᠬᠥᠭᠰᠢᠨ ᠲᠡᠢ ᠶᠠᠷᠭᠢᠯᠳᠤᠵᠤ ᠬᠥᠭᠰᠢᠨ ᠢ᠋ ᠲᠦᠯᠬᠢᠨ ᠭᠠᠷᠴᠤ ᠢᠷᠡᠭᠰᠡᠨ ᠳ᠋ᠦ᠍᠂ ᠡᠭᠦᠳᠡᠨ ᠦ᠌ ᠭᠠᠳᠠᠨᠠ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠴᠠᠭᠠᠨ ᠵᠠᠭᠠᠨ ᠬᠥᠯᠦᠭᠰᠡᠨ ᠲᠡᠷᠭᠡ ᠨᠢ ᠬᠠᠩᠭᠠᠢᠷᠠᠵᠤ᠂ ᠲᠡᠷᠭᠡᠨ ᠳᠡᠭᠡᠷᠡᠬᠢ ᠦᠬᠦᠳᠡᠯ ᠪᠠ ᠴᠠᠭᠠᠨ ᠵᠠᠭᠠᠨ ᠨᠢ ᠴᠥᠮ ᠪᠠᠷᠠ ᠦᠭᠡᠢ ᠪᠣᠯᠵᠤ᠂ ᠭᠠᠭᠴᠠ ᠲᠡᠷᠭᠡᠨ ᠦ᠌ ᠲᠡᠳᠦᠢᠯᠡ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠴᠡᠷᠢᠭ ᠦ᠋ᠨ ᠤᠯᠤᠰ ᠶᠡᠬᠡ ᠠᠶᠤᠵᠤ᠂ ᠬᠥᠭᠰᠢᠨ ᠢ᠋ ᠬᠠᠶᠠᠭᠠᠳ᠂ ᠬᠠᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ ᠬᠠᠭᠠᠨ ᠨᠢ᠄《ᠡᠨᠡ ᠡᠷᠡ ᠬᠠᠷᠢᠨ ᠶᠡᠬᠡ ᠮᠡᠷᠭᠡᠨ ᠰᠡᠴᠡᠨ ᠡᠷᠡ ᠪᠠᠢᠨᠠ》 ᠭᠡᠵᠦ ᠨᠢᠭᠡᠨ ᠶᠠᠷᠠ ᠰᠢᠷᠬᠠ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠢ᠋ ᠡᠷᠢᠵᠦ ᠠᠪᠴᠢᠷᠠᠭᠠᠳ᠂ ᠠᠳᠤᠭᠤᠨ ᠤ᠋ ᠰᠡᠭᠦᠯ ᠦ᠋ᠨ ᠬᠢᠯᠭᠠᠰᠤ ᠪᠠᠷ ᠲᠡᠮᠳᠡᠭ ᠬᠢᠵᠦ ᠵᠠᠩᠭᠢᠳᠤᠭᠰᠠᠨ ᠰᠢᠵᠢᠮ ᠢ᠋ ᠥᠭᠭᠦᠭᠡᠳ᠄《ᠴᠢ ᠣᠳᠣ ᠠᠢᠯ ᠬᠥᠳᠡᠭᠡ ᠪᠦᠬᠦᠨ ᠢ᠋ ᠲᠣᠭᠣᠷᠢᠵᠤ᠂ ᠴᠠᠭᠠᠨ ᠵᠠᠭᠠᠨ ᠤ᠋ ᠥᠭᠡᠬᠦ ᠭᠤᠶᠤᠵᠤ ᠶᠠᠪᠤ᠃ ᠬᠡᠷᠪᠡ ᠠᠯᠢ ᠠᠢᠯ ᠠ᠋ᠴᠠ ᠵᠠᠭᠠᠨ ᠤ᠋ ᠥᠭᠡᠬᠦ ᠣᠯᠪᠠᠯ ᠳᠠᠷᠤᠢ ᠨᠢᠭᠤᠴᠠ ᠪᠠᠷ ᠡᠨᠡ ᠰᠢᠵᠢᠮ ᠦ᠋ᠨ ᠲᠡᠮᠳᠡᠭ ᠢ᠋ᠶ᠋ᠡᠨ ᠤᠶᠠᠵᠤ ᠢᠷᠡ!》 ᠭᠡᠵᠦ ᠶᠠᠪᠤᠭᠤᠯᠪᠠ ᠭᠡᠨᠡ᠃ ᠴᠢᠩᠭᠢᠭᠡᠳ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ᠂ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠶ᠋ᠢᠨ ᠡᠵᠢ ᠶ᠋ᠢ ᠨᠢ ᠲᠤᠰᠠᠯᠠᠵᠤ ᠴᠠᠭᠠᠨ ᠵᠠᠭᠠᠨ ᠢ᠋ ᠨᠢ ᠴᠡᠷᠢᠭ ᠦ᠋ᠨ ᠤᠯᠤᠰ᠂ ᠭᠡᠷ ᠲᠦ᠍ ᠣᠷᠣᠭᠰᠠᠨ ᠬᠣᠭᠣᠷᠣᠨᠳᠣ᠂ ᠲᠡᠷᠭᠡᠨ ᠡᠴᠡ ᠨᠢ ᠲᠠᠢᠯᠤᠨ ᠠᠪᠤᠭᠠᠳ᠂ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠶ᠋ᠢᠨ ᠦᠬᠦᠳᠡᠯ ᠢ᠋ ᠨᠢ ᠬᠣᠯᠠ ᠠᠭᠤᠯᠠᠨ ᠳ᠋ᠤ᠌ ᠠᠪᠠᠴᠢᠭᠠᠳ᠂ ᠡᠵᠢ ᠳ᠋ᠡᠭᠡᠨ᠄《ᠡᠵᠢ ᠮᠢᠨᠢ! ᠬᠡᠷᠪᠡ ᠴᠠᠭᠠᠨ ᠵᠠᠭᠠᠨ ᠤ᠋ ᠥᠭᠡᠬᠦ ᠭᠤᠶᠤᠬᠤ ᠪᠠᠷ ᠬᠥᠮᠦᠨ ᠢᠷᠡᠪᠡᠯ ᠪᠢᠲᠡᠭᠡᠢ ᠥᠭᠭᠦᠭᠲᠦᠨ》 ᠭᠡᠵᠦ ᠬᠡᠯᠡᠭᠡᠳ ᠠᠩ ᠬᠦᠷᠦᠭᠡ ᠬᠢᠬᠦ ᠪᠡᠷ ᠭᠠᠷᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠨᠢᠭᠡᠨ ᠡᠳᠦᠷ ᠨᠢᠭᠡᠨ ᠮᠠᠭᠤ ᠶᠠᠷᠠ ᠰᠢᠷᠬᠠ ᠳ᠋ᠤ᠌ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠶ᠋ᠢᠨ ᠭᠡᠷ ᠲᠦ᠋ᠨᠢ ᠢᠷᠡᠵᠦ᠂ ᠬᠥᠭᠰᠢᠨ ᠡᠵᠢ ᠳ᠋ᠦ᠍ᠨᠢ ᠮᠥᠷᠭᠥᠵᠦ᠄《ᠬᠥᠭᠰᠢᠨ ᠡᠵᠢ ᠮᠢᠨᠢ ᠪᠢ ᠪᠣᠯ ᠣᠷᠴᠢᠯᠠᠩ ᠳ᠋ᠤ᠌ ᠣᠷᠢᠶᠠᠭᠳᠠᠵᠤ ᠡᠪᠡᠳᠴᠢᠨ ᠳ᠋ᠦ᠍ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠪᠠᠢᠨᠠ᠃ ᠡᠵᠢ ᠲᠠ ᠦᠵᠡ! ᠮᠢᠨᠦ ᠡᠨᠡ ᠶᠠᠷᠠ ᠰᠢᠷᠬᠠ ᠪᠦᠬᠦᠯᠢ ᠪᠡᠶᠡ ᠳ᠋ᠦ᠍ ᠲᠦᠭᠡᠵᠦ ᠦᠬᠦᠬᠦ ᠳ᠋ᠦ᠍ ᠬᠦᠷᠦᠭᠡᠳ ᠪᠠᠢᠨᠠ᠃ ᠬᠡᠷᠪᠡ ᠴᠠᠭᠠᠨ ᠵᠠᠭᠠᠨ ᠤ᠋ ᠥᠭᠡᠬᠦ ᠶ᠋ᠢ ᠣᠯᠵᠤ ᠲᠦᠷᠬᠢᠪᠡᠯ᠂ ᠳᠠᠷᠤᠢ ᠰᠠᠢᠨ ᠪᠣᠯᠵᠤ ᠠᠮᠢᠳᠤᠷᠠᠵᠤ ᠴᠢᠳᠠᠨᠠ》 ᠭᠡᠵᠦ ᠬᠥᠭᠰᠢᠨ ᠡᠴᠡ ᠴᠠᠭᠠᠨ ᠵᠠᠭᠠᠨ ᠤ᠋ ᠥᠭᠡᠬᠦ ᠭᠤᠶᠤᠭᠰᠠᠨ ᠳ᠋ᠤ᠌ ᠬᠥᠭᠰᠢᠨ ᠮᠥᠨ ᠡᠨᠡ ᠬᠥᠮᠦᠨ ᠦ᠌ ᠶᠠᠷᠠ ᠰᠢᠷᠬᠠ ᠶ᠋ᠢ ᠨᠢ ᠦᠵᠡᠵᠦ ᠪᠠᠬᠠᠨ ᠲᠠᠲᠠᠭᠠᠯᠵᠠᠭᠰᠠᠨ ᠳ᠋ᠤ᠌᠂ ᠡᠨᠡ ᠶᠠᠷᠠ ᠰᠢᠷᠬᠠ ᠲᠠᠢ ᠠᠮᠢᠲᠠᠨ ᠤᠯᠠᠮ ᠢᠯᠡᠭᠦᠦ ᠮᠥᠷᠭᠥᠭᠰᠡᠨ ᠳᠡᠭᠡᠷᠡ ᠡᠴᠡ ᠪᠡᠨ ᠮᠥᠷᠭᠥᠵᠦ᠂ ᠭᠤᠶᠤᠭᠰᠠᠨ ᠳᠡᠭᠡᠷᠡ ᠡᠴᠡ ᠪᠡᠨ ᠭᠤᠶᠤᠵᠤ᠂ ᠡᠯᠳᠡᠪ ᠰᠠᠢᠨ ᠢ᠋ ᠬᠡᠯᠡᠭᠰᠡᠭᠡᠷ ᠬᠥᠭᠰᠢᠨ ᠦ᠌ ᠰᠡᠳᠬᠢᠯ ᠢ᠋ ᠬᠥᠳᠡᠯᠭᠡᠵᠦ ᠲᠠᠯᠪᠢᠭᠰᠠᠨ ᠳ᠋ᠤ᠌᠂ ᠬᠥᠭᠰᠢᠨ ᠨᠢᠭᠡ ᠬᠡᠰᠡᠭ ᠠᠶᠠᠭᠠ ᠶ᠋ᠢᠨ ᠲᠡᠳᠦᠢ ᠵᠠᠭᠠᠨ ᠤ᠋ ᠥᠭᠡᠬᠦ ᠥᠭᠴᠦ ᠭᠠᠷᠭᠠᠭᠰᠠᠨ ᠳ᠋ᠤ᠌ ᠡᠨᠡ ᠶᠠᠷᠠ ᠰᠢᠷᠬᠠ ᠲᠠᠢ ᠬᠥᠮᠦᠨ ᠳᠠᠷᠤᠢ ᠲᠡᠷᠡ ᠲᠡᠮᠳᠡᠭ ᠲᠡᠢ ᠬᠢᠯᠭᠠᠰᠤ ᠪᠠᠨ ᠡᠭᠦᠳᠡᠨ ᠳ᠋ᠦ᠍ᠨᠢ ᠤᠶᠠᠵᠤ ᠶᠠᠪᠤᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ᠂ ᠡᠵᠢ ᠡᠴᠡ ᠪᠡᠨ ᠄《ᠵᠠᠭᠠᠨ ᠤ᠋ ᠥᠭᠡᠬᠦ ᠭᠤᠶᠤᠬᠤ ᠪᠠᠷ ᠬᠥᠮᠦᠨ ᠢᠷᠡᠭᠰᠡᠨ ᠤᠤ?》 ᠭᠡᠰᠡᠨ ᠳ᠋ᠦ᠍ ᠬᠥᠭᠰᠢᠨ ᠮᠥᠨ ᠶᠠᠷᠠ ᠰᠢᠷᠬᠠ ᠲᠠᠢ ᠬᠥᠮᠦᠨ ᠢᠷᠡᠵᠦ ᠭᠠᠰᠢᠭᠤᠳᠠᠨ ᠭᠤᠶᠤᠭᠰᠠᠨ ᠳ᠋ᠤ᠌ ᠵᠠᠭᠠᠨ ᠤ᠋ ᠥᠭᠡᠬᠦ ᠨᠢᠭᠡ ᠬᠡᠰᠡᠭ ᠥᠭᠪᠡ ᠭᠡᠰᠡᠨ ᠳ᠋ᠦ᠍᠂ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠶᠡᠬᠡ ᠰᠠᠨᠳᠤᠷᠴᠤ ᠭᠡᠷ ᠢ᠋ᠶ᠋ᠡᠨ ᠲᠣᠭᠣᠷᠢᠵᠤ ᠦᠵᠡᠭᠰᠡᠨ ᠳ᠋ᠦ᠍᠂ ᠡᠭᠦᠳᠡᠨ ᠳᠡᠭᠡᠷᠡ ᠨᠢ ᠬᠢᠯᠭᠠᠰᠤᠨ ᠲᠡᠮᠳᠡᠭ ᠤᠶᠠᠭᠠᠲᠠᠢ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠂ ᠡᠨᠡ ᠪᠣᠯ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠡᠷᠢᠵᠦ ᠢᠷᠡᠬᠦ ᠲᠡᠮᠳᠡᠭ ᠪᠠᠢᠨᠠ ᠭᠡᠳ ᠬᠡᠳᠦᠨ ᠠᠳᠤᠭᠤ ᠪᠠᠨ ᠪᠠᠷᠢᠵᠤ ᠰᠡᠭᠦᠯ ᠦ᠋ᠨ ᠬᠢᠯᠭᠠᠰᠤ ᠶ᠋ᠢ ᠨᠢ ᠬᠠᠢᠴᠢᠯᠠᠨ ᠠᠪᠤᠭᠠᠳ ᠮᠥᠨ ᠲᠡᠮᠳᠡᠭᠲᠦ ᠬᠢᠯᠭᠠᠰᠤ ᠯᠤᠭᠠ ᠠᠳᠠᠯᠢ ᠣᠯᠠᠨ ᠲᠡᠮᠳᠡᠭᠲᠦ ᠬᠢᠯᠭᠠᠰᠤ ᠤᠶᠠᠵᠤ᠂ ᠬᠤᠷᠳᠤᠨ ᠠᠭᠲᠠᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠲᠠᠭᠠᠷᠠᠭᠰᠠᠨ ᠠᠢᠯ ᠪᠦᠬᠦᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ᠨᠢ ᠴᠥᠮ ᠤᠶᠠᠵᠤ ᠲᠠᠯᠪᠢᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠪᠠ ᠭᠡᠨᠡ᠃
ᠲᠡᠨᠳᠡ ᠡᠴᠡ ᠲᠡᠷᠡ ᠶᠠᠷᠠ ᠰᠢᠷᠬᠠ ᠲᠠᠢ ᠬᠥᠮᠦᠨ ᠬᠠᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠵᠠᠭᠠᠨ ᠤ᠋ ᠥᠭᠡᠬᠦ ᠪᠡᠨ ᠦᠵᠡᠭᠦᠯᠵᠦ ᠲᠡᠮᠳᠡᠭ ᠤᠶᠠᠵᠤ ᠢᠷᠡᠪᠡ ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠰᠠᠢᠨ ᠭᠡᠵᠦ᠂ ᠲᠡᠷᠡ ᠶᠠᠷᠠ ᠰᠢᠷᠬᠠ ᠲᠠᠢ ᠬᠥᠮᠦᠨ ᠳ᠋ᠦ᠍ ᠬᠡᠳᠦᠨ ᠬᠡᠰᠡᠭ ᠮᠥᠩᠭᠥ ᠥᠭᠴᠦ ᠬᠠᠷᠢᠭᠤᠯᠤᠭᠠᠳ᠂ ᠳᠠᠷᠤᠢ ᠴᠡᠷᠢᠭ ᠲᠡᠭᠡᠨ᠄《ᠬᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠬᠢᠯᠭᠠᠰᠤᠨ ᠲᠡᠮᠳᠡᠭ ᠤᠶᠠᠵᠤ ᠪᠠᠢᠪᠠᠯ ᠳᠠᠷᠤᠢ ᠲᠡᠷᠡ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠢᠷᠡ!》 ᠭᠡᠵᠦ ᠴᠡᠷᠢᠭ ᠢ᠋ᠶ᠋ᠡᠨ ᠶᠠᠪᠤᠭᠤᠯᠵᠤ ᠭᠡᠨᠡ᠃
ᠮᠠᠷᠭᠠᠰᠢ ᠨᠢ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠬᠠᠷᠢᠵᠤ ᠢᠷᠡᠭᠡᠳ ᠬᠠᠭᠠᠨ ᠳ᠋ᠠᠭᠠᠨ᠄《ᠡᠵᠡᠨ ᠮᠢᠨᠢ! ᠠᠢᠯ ᠪᠦᠬᠦᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠴᠥᠮ ᠪᠦᠷ ᠠᠳᠠᠯᠢ ᠬᠢᠯᠭᠠᠰᠤᠨ ᠲᠡᠮᠳᠡᠭ ᠤᠶᠠᠭᠠᠲᠠᠢ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠨᠢ ᠠᠷᠭᠠ ᠦᠭᠡᠢ ᠪᠣᠯᠵᠤ᠂ ᠵᠠ! ᠣᠳᠣ ᠤᠳᠠᠬᠤ ᠦᠭᠡᠢ ᠣᠪᠣᠭᠠᠨ ᠤ᠋ ᠨᠠᠢᠷ ᠪᠣᠯᠤᠨᠠ᠃ ᠲᠡᠭᠡᠭᠡᠳ ᠪᠢ ᠳᠡᠭᠡᠳᠦ ᠶ᠋ᠢᠨ ᠰᠢᠲᠦᠭᠰᠡᠨ ᠣᠪᠣᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠳᠠᠭᠠᠳᠬᠠᠵᠤ ᠮᠡᠳᠡᠶᠡ ᠭᠡᠵᠦ ᠳᠣᠲᠣᠷᠠ ᠪᠠᠨ᠄《ᠡᠨᠡ ᠡᠷᠡ ᠨᠡᠯᠢᠶᠡᠳ ᠰᠡᠴᠡᠨ ᠡᠷᠡ ᠪᠠᠢᠨᠠ᠃ ᠭᠡᠪᠡᠴᠦ ᠴᠢ ᠣᠪᠣᠭᠠᠨ ᠤ᠋ ᠨᠠᠢᠷ ᠲᠤ᠌ ᠨᠠᠳᠠ ᠮᠡᠳᠡᠭᠳᠡᠬᠦ ᠦᠭᠡᠢ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ》 ᠭᠡᠵᠦ ᠪᠣᠳᠣᠵᠤ ᠭᠡᠨᠡ᠃
ᠬᠡᠳᠦᠨ ᠡᠳᠦᠷ ᠪᠣᠯᠤᠭᠰᠠᠨ ᠳ᠋ᠤ᠌ ᠣᠪᠣᠭᠠᠨ ᠤ᠋ ᠨᠠᠢᠷ ᠪᠣᠯᠤᠭᠠᠳ᠂ ᠬᠠᠭᠠᠨ ᠮᠥᠨ ᠣᠪᠣᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠮᠥᠷᠭᠥᠭᠡᠳ᠄《ᠮᠢᠨᠦ ᠠᠯᠲᠠ ᠮᠥᠩᠭᠥ ᠶ᠋ᠢ ᠠᠪᠴᠤ᠂ ᠴᠠᠭᠠᠨ ᠵᠠᠭᠠᠨ ᠢ᠋ ᠠᠯᠠᠭᠰᠠᠨ ᠬᠥᠮᠦᠨ ᠢ᠋ ᠡᠨᠡ ᠡᠳᠦᠷ ᠣᠪᠣᠭᠠᠨ ᠤ᠋ ᠬᠣᠢᠨᠠ ᠮᠠᠨᠠᠷᠠᠭᠤᠯᠵᠤ ᠤᠨᠠᠭᠠᠨ ᠰᠣᠶᠣᠷᠬᠠ!》 ᠭᠡᠵᠦ ᠳᠠᠬᠢᠨ ᠳᠠᠪᠲᠠᠨ ᠵᠠᠯᠪᠠᠷᠢᠭᠠᠳ᠂ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ᠄《ᠲᠠ ᠨᠠᠷ ᠣᠪᠣᠭᠠᠨ ᠤ᠋ ᠬᠣᠢᠨᠠ ᠣᠴᠢᠵᠤ ᠦᠵᠡᠭᠲᠦᠨ! ᠬᠡᠷᠪᠡ ᠬᠥᠮᠦᠨ ᠤᠨᠠᠵᠤ ᠮᠠᠨᠠᠷᠠᠨ ᠬᠡᠪᠲᠡᠵᠦ ᠪᠠᠢᠪᠠᠯ ᠡᠨᠡ ᠡᠳᠦᠷ ᠣᠪᠣᠭᠠᠨ ᠤ᠋ ᠨᠠᠢᠷ ᠪᠠᠶᠠᠷ ᠳᠡᠭᠡᠷᠡ ᠲᠣᠭᠲᠠᠭᠰᠠᠨ ᠳᠦᠷᠢᠮ ᠢ᠋ᠶ᠋ᠡᠷ᠂ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠪᠣᠯᠬᠤ ᠦᠭᠡᠢ ᠲᠤᠯᠠ᠂ ᠪᠠᠷᠠᠭᠤᠨ ᠬᠥᠮᠥᠰᠬᠡ ᠶ᠋ᠢ ᠨᠢ ᠬᠢᠷᠭᠠᠵᠤ ᠳᠡᠯᠪᠢ!》 ᠭᠡᠵᠦ ᠴᠡᠷᠢᠭ ᠦ᠋ᠨ ᠤᠯᠤᠰ ᠢ᠋ᠶ᠋ᠠᠨ ᠶᠠᠪᠤᠭᠤᠯᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠣᠯᠠᠨ ᠬᠢᠯᠭᠠᠰᠤᠨ ᠲᠡᠮᠳᠡᠭ ᠬᠢᠵᠦ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠢ᠋ ᠬᠠᠭᠤᠷᠤᠨ ᠬᠠᠷᠢᠭᠤᠯᠤᠭᠠᠳ᠂ ᠮᠥᠨ ᠣᠪᠣᠭᠠᠨ ᠤ᠋ ᠨᠠᠢᠷ ᠲᠤ᠌ ᠢᠷᠡᠭᠡᠳ᠂ ᠣᠪᠣᠭᠠᠨ ᠤ᠋ ᠬᠣᠢᠨᠠ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠲᠣᠯᠣᠭᠠᠢ ᠨᠢ ᠡᠷᠭᠢᠵᠦ ᠮᠠᠨᠠᠷᠠᠭᠠᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠣᠢᠴᠢᠵᠤ ᠤᠨᠠᠪᠠ ᠭᠡᠨᠡ᠃ ᠲᠡᠭᠡᠭᠡᠳ ᠬᠠᠭᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠢᠷᠡᠵᠦ ᠦᠵᠡᠭᠰᠡᠨ ᠳ᠋ᠦ᠍ ᠦᠨᠡᠬᠡᠷ ᠨᠢᠭᠡᠨ ᠰᠠᠢᠨ ᠡᠷᠡ ᠮᠠᠨᠠᠷᠠᠨ ᠤᠨᠠᠵᠤ ᠬᠡᠪᠲᠡᠵᠦ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠪᠠᠷᠠᠭᠤᠨ ᠬᠥᠮᠥᠰᠬᠡ ᠶ᠋ᠢ ᠨᠢ ᠬᠢᠷᠭᠠᠵᠤ ᠶᠠᠪᠤᠪᠠ ᠭᠡᠨᠡ᠃
ᠣᠷᠣᠢ ᠨᠢ ᠮᠥᠨ ᠨᠠᠢᠷ ᠲᠠᠷᠬᠠᠵᠤ ᠣᠯᠠᠨ ᠬᠥᠮᠦᠰ ᠭᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠳ᠋ᠤ᠌ ᠥᠲᠡᠯᠦᠭᠰᠡᠨ ᠵᠠᠯᠠᠭᠤ ᠢᠯᠭᠠᠯ ᠦᠭᠡᠢ ᠴᠥᠮ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠷᠢᠬᠢ ᠤᠤᠭᠤᠵᠤ᠂ ᠥᠭᠡᠳᠡ ᠪᠡᠨ ᠤᠷᠤᠭᠤ ᠪᠠᠨ ᠬᠠᠢᠪᠠᠯᠵᠠᠨ ᠶᠠᠪᠤᠵᠤ ᠪᠠᠢᠭᠰᠠᠨ ᠪᠠ ᠮᠥᠨ ᠣᠪᠣᠭᠠ ᠶ᠋ᠢ ᠲᠣᠭᠣᠷᠢᠭᠠᠳ ᠨᠡᠯᠢᠶᠡᠳ ᠣᠯᠠᠨ ᠬᠥᠮᠦᠨ ᠰᠣᠭᠲᠣᠵᠤ᠂ ᠮᠣᠷᠢᠨ ᠠ᠋ᠴᠠ ᠪᠠᠨ ᠤᠨᠠᠵᠤ ᠤᠨᠲᠠᠵᠤ ᠪᠠᠢᠨᠠ ᠭᠡᠨᠡ᠃ ᠴᠢᠩᠭᠢᠭᠡᠳ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠰᠡᠷᠢᠭᠡᠳ᠂ ᠦᠵᠡᠭᠰᠡᠨ ᠳ᠋ᠦ᠍ ᠣᠷᠣᠢ ᠪᠣᠯᠤᠭᠠᠳ ᠪᠠᠢᠭᠰᠠᠨ ᠪᠠ ᠲᠡᠷᠡ᠄《ᠪᠢ ᠶᠠᠭᠠᠬᠢᠭᠠᠳ ᠡᠨᠳᠡ ᠤᠨᠠᠭᠰᠠᠨ ᠪᠣᠢ?》 ᠭᠡᠵᠦ ᠰᠣᠨᠢᠷᠬᠠᠨ ᠪᠡᠶᠡ ᠪᠡᠨ ᠪᠠᠢᠴᠠᠭᠠᠨ ᠦᠵᠡᠭᠰᠡᠨ ᠳ᠋ᠦ᠍ ᠪᠠᠷᠠᠭᠤᠨ ᠬᠥᠮᠥᠰᠬᠡ ᠨᠢ ᠬᠢᠷᠭᠠᠭᠳᠠᠭᠰᠠᠨ ᠪᠠᠢᠵᠠᠢ᠃ ᠢᠩᠭᠢᠭᠡᠳ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ ᠬᠥᠮᠥᠰᠬᠡ ᠬᠢᠷᠭᠠᠭᠳᠠᠭᠰᠠᠨ ᠤᠴᠢᠷ ᠢ᠋ ᠪᠣᠳᠣᠵᠤ ᠣᠯᠤᠭᠠᠳ᠂ ᠳᠠᠷᠤᠢ ᠬᠢᠲᠤᠭᠠ ᠪᠠᠨ ᠭᠠᠷᠭᠠᠵᠤ ᠣᠪᠣᠭᠠᠨ ᠤ᠋ ᠨᠠᠢᠷ ᠲᠤ᠌ ᠢᠷᠡᠵᠦ᠂ ᠠᠷᠢᠬᠢ ᠤᠤᠭᠤᠵᠤ ᠰᠣᠭᠲᠣᠭᠰᠠᠨ ᠪᠠ ᠮᠣᠷᠢᠨ ᠠ᠋ᠴᠠ ᠪᠠᠨ ᠣᠢᠴᠢᠵᠤ᠂ ᠬᠥᠳᠡᠭᠡ ᠬᠡᠪᠲᠡᠭᠰᠡᠨ ᠬᠥᠮᠦᠰ ᠦ᠋ᠨ ᠪᠠᠷᠠᠭᠤᠨ ᠬᠥᠮᠥᠰᠬᠡ ᠶ᠋ᠢ ᠨᠢ ᠴᠥᠮ ᠬᠢᠷᠭᠠᠭᠠᠳ ᠭᠡᠷ ᠲᠡᠭᠡᠨ ᠬᠠᠷᠢᠪᠠ ᠭᠡᠨᠡ᠃ ᠮᠠᠷᠭᠠᠰᠢ ᠨᠢ ᠬᠠᠭᠠᠨ ᠴᠡᠷᠢᠭ ᠲᠡᠭᠡᠨ᠄《ᠲᠠ ᠨᠠᠷ ᠶᠠᠪᠤᠵᠤ ᠪᠠᠷᠠᠭᠤᠨ ᠬᠥᠮᠥᠰᠬᠡ ᠨᠢ ᠬᠢᠷᠭᠠᠭᠳᠠᠭᠰᠠᠨ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠢᠷᠡ! ᠪᠣᠳᠣᠪᠠᠯ ᠲᠡᠷᠡ ᠬᠥᠮᠦᠨ᠂ ᠥᠷᠥᠭᠡᠰᠦᠨ ᠬᠥᠮᠥᠰᠬᠡ ᠪᠡᠷ ᠰᠠᠭᠤᠬᠤ ᠦᠭᠡᠢ ᠭᠡᠳ᠂ ᠬᠣᠶᠠᠷ ᠬᠥᠮᠥᠰᠬᠡ ᠪᠡᠨ ᠴᠥᠮ ᠬᠢᠷᠭᠠᠭᠰᠠᠨ ᠴᠤ᠌ ᠮᠠᠭᠠᠳ ᠦᠭᠡᠢ᠃ ᠬᠣᠶᠠᠷ ᠬᠥᠮᠥᠰᠬᠡ ᠨᠢ ᠦᠭᠡᠢ ᠬᠥᠮᠦᠨ ᠢ᠋ ᠴᠦ᠍ ᠪᠠᠰᠠ ᠪᠠᠷᠢᠵᠤ ᠢᠷᠡ!》 ᠭᠡᠵᠦ ᠶᠠᠪᠤᠭᠤᠯᠵᠠᠢ᠃ ᠢᠩᠭᠢᠭᠡᠳ ᠣᠳᠣ ᠴᠢᠮᠠᠶ᠋ᠢ ᠣᠯᠵᠤ ᠪᠠᠷᠢᠪᠠ ᠭᠡᠵᠦ ᠪᠠᠶᠠᠷᠯᠠᠵᠤ ᠪᠠᠢᠲᠠᠯᠠ᠂ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠨᠢ ᠪᠠᠷᠠᠭᠤᠨ ᠬᠥᠮᠥᠰᠬᠡ ᠨᠢ ᠬᠢᠷᠭᠠᠭᠳᠠᠭᠰᠠᠨ ᠪᠠ ᠬᠣᠶᠠᠷ ᠬᠥᠮᠥᠰᠬᠡ ᠨᠢ ᠬᠢᠷᠭᠠᠭᠳᠠᠭᠰᠠᠨ ᠬᠥᠮᠦᠨ ᠢ᠋ ᠬᠡᠴᠢᠨᠡᠨ ᠣᠯᠠᠨ ᠪᠠᠷᠢᠵᠤ ᠠᠪᠴᠢᠷᠠᠭᠰᠠᠨ ᠳ᠋ᠤ᠌ ᠬᠠᠭᠠᠨ ᠠᠷᠭᠠ ᠦᠭᠡᠢ ᠪᠣᠯᠵᠤ᠄《ᠵᠠ! ᠮᠢᠨᠦ ᠠᠯᠲᠠ ᠮᠥᠩᠭᠥ ᠶ᠋ᠢ ᠠᠪᠴᠤ᠂ ᠴᠠᠭᠠᠨ ᠵᠠᠭᠠᠨ ᠢ᠋ ᠠᠯᠠᠭᠰᠠᠨ ᠬᠥᠮᠦᠨ᠂ ᠥᠪᠡᠰᠦᠪᠡᠨ ᠭᠠᠷᠴᠤ ᠢᠷᠡ! ᠮᠢᠨᠦ ᠠᠷᠭᠠ ᠲᠡᠭᠦᠨ ᠳ᠋ᠦ᠍ ᠬᠦᠷᠬᠦ ᠦᠭᠡᠢ ᠪᠠᠢᠨᠠ᠃ ᠪᠢ ᠲᠡᠷᠡ ᠬᠥᠮᠦᠨ ᠳ᠋ᠦ᠍ ᠬᠠᠭᠠᠨ ᠰᠢᠷᠡᠭᠡᠨ ᠡᠴᠡ ᠪᠡᠨ ᠪᠠᠭᠤᠵᠤ ᠥᠭᠭᠦᠶᠡ!》 ᠭᠡᠵᠦ ᠪᠠᠭᠤᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠠᠷᠤ ᠶ᠋ᠢᠨ ᠰᠠᠢᠨ ᠡᠷᠡ᠂ ᠭᠠᠷᠴᠤ ᠢᠷᠡᠭᠡᠳ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ᠨᠢ ᠰᠠᠭᠤᠵᠤ ᠥᠪᠥᠷ ᠦ᠋ᠨ ᠰᠠᠢᠨ ᠡᠷᠡ ᠶ᠋ᠢᠨ ᠡᠵᠢ ᠡᠬᠡᠨᠡᠷ᠂ ᠬᠡᠦᠬᠡᠳ ᠪᠠ ᠥᠪᠡᠷ ᠦ᠋ᠨ ᠭᠡᠷ ᠦ᠋ᠨ ᠤᠯᠤᠰ ᠢ᠋ᠶ᠋ᠠᠨ ᠠᠪᠴᠢᠷᠠᠵᠤ ᠥᠯᠵᠡᠢ ᠮᠥᠷ ᠲᠡᠢ ᠠᠮᠢᠳᠤᠷᠠᠵᠤ᠂ ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠵᠢᠷᠭᠠᠵᠤ ᠭᠡᠨᠡ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂
ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠪᠠᠯᠤᠰᠦᠭ᠂ ᠬᠡᠯᠡᠰᠣᠶᠣᠯ