ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠠᠭᠤᠯᠠ ᠶᠢᠨ ᠬᠦᠦ Гураван настай гунаган улаан баатар - Уулын хүү
107ᠠᠭᠤᠯᠠ ᠶᠢᠨ ᠬᠦᠦ
ᠡᠷᠲᠡ ᠤᠷᠢᠳᠤ ᠴᠠᠭ ᠲᠤ᠌ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ ᠪᠠᠢᠭᠰᠠᠨ ᠭᠡᠨᠡ᠃ ᠲᠡᠷᠡ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ᠂ ᠦᠷᠡ ᠶ᠋ᠢᠨ ᠭᠠᠭᠴᠠ ᠬᠦᠦ ᠲᠡᠢ ᠭᠡᠨᠡ᠃ ᠲᠡᠷᠡ ᠬᠦᠦ ᠨᠢ ᠭᠠᠯᠵᠠᠭᠤ ᠬᠢᠯᠢᠩ ᠮᠣᠷᠢ ᠲᠠᠢ᠂ ᠭᠠᠩ ᠪᠣᠯᠣᠳ ᠨᠤᠮᠤ ᠲᠠᠢ᠂ ᠠᠭᠤᠯᠠ ᠬᠠᠩᠭᠠᠢ ᠶ᠋ᠢ ᠲᠣᠭᠣᠷᠢᠵᠤ᠂ ᠠᠩ ᠬᠦᠷᠦᠭᠡ ᠬᠢᠵᠦ ᠠᠪᠤ ᠡᠵᠢ ᠪᠡᠨ ᠠᠰᠠᠷᠠᠨ ᠶᠠᠪᠤᠳᠠᠭ ᠲᠤᠯᠠ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠢ᠋ ᠠᠭᠤᠯᠠ ᠶ᠋ᠢᠨ ᠬᠦᠦ ᠭᠡᠵᠦ ᠨᠡᠷᠡᠯᠡᠬᠦ ᠠᠵᠢ᠃
ᠡᠨᠡ ᠬᠦᠦ ᠶ᠋ᠢᠨ ᠣᠷᠣᠰᠢᠨ ᠰᠠᠭᠤᠵᠤ ᠪᠠᠢᠭᠠ ᠤᠯᠤᠰ ᠤ᠋ᠨ ᠬᠠᠭᠠᠨ ᠨᠢ ᠬᠠᠷᠭᠢᠰ ᠨᠢᠭᠡᠨ ᠬᠠᠲᠤᠨ ᠲᠠᠢ ᠭᠡᠨᠡ᠃
ᠴᠢᠩᠭᠢᠭᠡᠳ ᠨᠢᠭᠡᠨ ᠡᠳᠦᠷ ᠬᠠᠲᠤᠨ ᠨᠢ᠄《ᠮᠠᠨ ᠤ᠋ ᠪᠠᠷᠠᠭᠤᠨ ᠬᠣᠢᠨᠠ ᠪᠠᠢᠭᠠ ᠭᠦᠨ ᠨᠠᠭᠤᠷ ᠤ᠋ᠨ ᠳᠣᠲᠣᠷᠠ ᠠᠷᠪᠠᠨ ᠠᠯᠲᠠ ᠪᠡᠶᠡ ᠲᠡᠢ ᠤᠰᠤᠨ ᠤ᠋ ᠠᠮᠢᠲᠠᠨ ᠡᠳᠦᠷ ᠪᠦᠷᠢ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠤᠰᠤᠨ ᠤ᠋ ᠳᠤᠮᠳᠠ᠂ ᠬᠠᠭᠠᠰ ᠪᠡᠶᠡ ᠪᠡᠨ ᠭᠠᠷᠭᠠᠵᠤ ᠨᠠᠷᠠᠨ ᠳ᠋ᠤ᠌ ᠡᠭᠡᠭᠡᠳᠡᠭ ᠭᠡᠨᠡ᠃ ᠬᠡᠷᠪᠡ ᠡᠵᠡᠨ ᠲᠠ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠲᠡᠭᠦᠨ ᠢ᠋ ᠠᠯᠠᠵᠤ ᠠᠷᠠᠰᠤ ᠪᠠᠷ ᠨᠢ ᠳᠡᠪᠡᠯ ᠬᠢᠵᠦ ᠡᠮᠦᠰᠪᠡᠯ᠂ ᠬᠠᠯᠠᠭᠤᠨ ᠵᠤᠨ ᠤ᠋ ᠴᠠᠭ ᠲᠤ᠌ ᠰᠡᠷᠢᠭᠦᠨ ᠪᠥᠭᠡᠳ ᠬᠠᠬᠢᠷ ᠡᠪᠦᠯ ᠦ᠋ᠨ ᠴᠠᠭ ᠲᠤ᠌ ᠳᠤᠯᠠᠭᠠᠨ ᠪᠠᠢᠳᠠᠭ ᠭᠡᠨᠡ》 ᠭᠡᠵᠦ ᠬᠠᠭᠠᠨ ᠳ᠋ᠠᠭᠠᠨ ᠬᠡᠯᠡᠵᠡᠢ᠃ ᠴᠢᠩᠭᠢᠭᠰᠡᠨ ᠳ᠋ᠦ᠍ ᠬᠠᠭᠠᠨ᠂ ᠲᠡᠷᠡ ᠳᠣᠣᠷᠠ ᠪᠠᠨ ᠠᠷᠪᠠᠨ ᠵᠠᠩᠵᠤᠨ᠂ ᠵᠠᠭᠤᠨ ᠴᠡᠷᠢᠭ ᠲᠦ᠍ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠨᠢ᠄《ᠲᠠ ᠨᠠᠷ ᠣᠳᠣ ᠣᠴᠢᠵᠤ ᠲᠡᠷᠡ ᠪᠠᠷᠠᠭᠤᠨ ᠬᠣᠢᠨᠠᠬᠢ ᠶᠡᠬᠡ ᠨᠠᠭᠤᠷ ᠤ᠋ᠨ ᠳᠤᠮᠳᠠ ᠪᠠᠢᠭᠠ ᠠᠮᠢᠲᠠᠨ ᠢ᠋ ᠠᠯᠠᠵᠤ ᠢᠷᠡ᠃ ᠪᠢ ᠲᠡᠭᠦᠨ ᠦ᠌ ᠠᠷᠠᠰᠤ ᠪᠠᠷ ᠳᠡᠪᠡᠯ ᠬᠢᠵᠦ ᠡᠮᠦᠰᠦᠨᠡ᠃ ᠬᠡᠷᠪᠡ ᠲᠠ ᠨᠠᠷ ᠠᠷᠪᠠᠨ ᠲᠠᠪᠤᠨ ᠡᠳᠦᠷ ᠲᠦ᠍ ᠲᠡᠷᠡ ᠠᠮᠢᠲᠠᠨ ᠢ᠋ ᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯ ᠲᠠ ᠪᠦᠭᠦᠳᠡ ᠶ᠋ᠢ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠠ᠋ᠴᠠ ᠵᠥᠷᠢᠴᠡᠭᠰᠡᠨ ᠶᠠᠯᠠ ᠲᠤᠯᠭᠠᠵᠤ ᠠᠯᠠᠨᠠ》 ᠭᠡᠳ᠂ ᠲᠣᠭᠣᠭᠠ ᠰᠢᠨᠠᠭᠠ ᠮᠠᠢᠬᠠᠨ ᠬᠥᠰᠬᠡ ᠥᠭᠴᠦ ᠶᠠᠪᠤᠭᠤᠯᠪᠠ ᠭᠡᠨᠡ᠃
ᠡᠨᠡ ᠣᠯᠠᠨ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠶᠠᠭᠠᠬᠢᠵᠤ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠠ᠋ᠴᠠ ᠵᠥᠷᠢᠴᠡᠵᠦ ᠴᠢᠳᠠᠨᠠ ᠳᠠ! ᠮᠠᠷᠭᠠᠰᠢ ᠠ᠋ᠴᠠ ᠨᠢ ᠨᠠᠷᠠᠨ ᠢ᠋ᠶ᠋ᠠᠷ ᠭᠠᠷᠴᠤ ᠨᠠᠭᠤᠷ ᠤ᠋ᠨ ᠬᠥᠪᠡᠭᠡᠨ ᠳ᠋ᠦ᠍ ᠵᠣᠭᠰᠣᠨ ᠪᠡᠯᠡᠳᠬᠡᠵᠦ᠂ ᠲᠡᠷᠡ ᠠᠮᠢᠲᠠᠨ ᠢ᠋ ᠭᠠᠷᠴᠤ ᠢᠷᠡᠮᠡᠭᠴᠡ ᠴᠤᠭᠭᠠᠷ ᠳᠣᠬᠢᠶᠠ ᠲᠠᠯᠪᠢᠵᠤ ᠬᠠᠷᠪᠤᠭᠰᠠᠨ ᠪᠣᠯᠪᠠᠴᠤ ᠨᠠᠭᠠᠨᠠ ᠨᠢ ᠲᠤᠰᠬᠤ ᠦᠭᠡᠢ ᠪᠣᠯ ᠴᠠᠭᠠᠨᠠ ᠨᠢ ᠲᠣᠰᠴᠤ ᠬᠠᠵᠠᠭᠤ ᠳ᠋ᠤᠨᠢ ᠲᠤᠰᠬᠤ ᠦᠭᠡᠢ ᠪᠣᠯ ᠬᠡᠯᠲᠡᠭᠡᠢ ᠲᠣᠰᠴᠤ ᠶᠡᠷᠦ ᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠢᠵᠠᠢ᠃ ᠢᠩᠭᠢᠭᠡᠳ ᠴᠡᠷᠢᠭ ᠦ᠋ᠨ ᠤᠯᠤᠰ ᠡᠯᠳᠡᠪ ᠠᠷᠭᠠ ᠭᠠᠷᠭᠠᠵᠤ ᠣᠢᠷᠠᠳᠴᠤ ᠬᠠᠷᠪᠤᠭᠰᠠᠨ ᠴᠤ᠌ ᠶᠡᠷᠦ ᠰᠤᠮᠤ ᠨᠢ ᠣᠷᠣᠬᠤ ᠦᠭᠡᠢ ᠭᠡᠨᠡ᠃ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠰᠠᠨᠳᠤᠷᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠰᠠᠨᠳᠤᠷᠴᠤ ᠡᠳᠦᠷ ᠪᠦᠷᠢ ᠬᠠᠷᠪᠤᠭᠰᠠᠭᠠᠷ ᠬᠠᠷᠠᠵᠤ ᠪᠠᠢᠲᠠᠯᠠ ᠠᠷᠪᠠᠨ ᠳᠥᠷᠪᠡᠨ ᠡᠳᠦᠷ ᠪᠣᠯᠵᠤ ᠪᠦᠭᠦᠳᠡᠭᠡᠷ ᠶᠡᠬᠡ ᠯᠡ ᠠᠶᠤᠵᠤ ᠪᠦᠷ ᠰᠡᠭᠦᠯ ᠦ᠋ᠨ ᠠᠷᠪᠠᠨ ᠲᠠᠪᠤᠳᠤᠭᠠᠷ ᠡᠳᠦᠷ ᠲᠤᠨᠢ ᠵᠠᠩᠵᠤᠨ ᠴᠡᠷᠢᠭ ᠲᠡᠢ ᠪᠡᠨ ᠵᠠᠢ ᠵᠠᠪᠰᠠᠷ ᠦᠭᠡᠢ ᠬᠠᠷᠪᠤᠨ᠂ ᠰᠤᠮᠤᠨ ᠪᠣᠷᠣᠭᠠᠨ ᠣᠷᠣᠭᠤᠯᠪᠠᠴᠤ ᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠠᠴᠢᠮᠳᠠᠨ ᠰᠠᠨᠳᠤᠷᠴᠤ ᠪᠠᠢᠵᠠᠢ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠠᠭᠤᠯᠠ ᠶ᠋ᠢᠨ ᠬᠦᠦ ᠣᠢ ᠰᠢᠭᠤᠢ ᠶ᠋ᠢᠨ ᠳᠤᠮᠳᠠ ᠠ᠋ᠴᠠ ᠣᠯᠵᠤ ᠦᠵᠡᠭᠡᠳ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠦ᠋ᠨ ᠳᠡᠷᠭᠡᠳᠡ ᠬᠦᠷᠴᠦ ᠢᠷᠡᠭᠰᠡᠨ ᠳ᠋ᠦ᠍ ᠵᠠᠩᠵᠤᠨ ᠴᠡᠷᠢᠭ ᠤᠤᠯ ᠠ᠋ᠴᠠ ᠪᠠᠨ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠲᠠᠨᠢᠬᠤ ᠲᠤᠯᠠ ᠣᠷᠣᠭᠰᠢ ᠳᠠᠪᠰᠢᠵᠤ᠄《ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ᠋ᠶ᠋ᠠᠷ ᠬᠠᠷᠪᠤᠵᠤ᠂ ᠡᠵᠡᠨ ᠦ᠌ ᠲᠤᠰᠢᠶᠠᠯ ᠢ᠋ᠶ᠋ᠠᠷ ᠡᠯᠳᠡᠪᠴᠢᠯᠡᠪᠡᠴᠦ ᠠᠯᠠᠵᠤ ᠴᠢᠳᠠᠬᠤ ᠦᠭᠡᠢ ᠡᠨᠡ ᠡᠳᠦᠷ ᠬᠤᠭᠤᠴᠠᠭᠠ ᠮᠢᠨᠢ ᠭᠦᠢᠴᠡᠵᠦ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠦᠬᠦᠬᠦ ᠳ᠋ᠦ᠍ ᠬᠦᠷᠦᠭᠡᠳ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠠᠭᠤᠯᠠ ᠶ᠋ᠢᠨ ᠬᠦᠦ ᠳᠤᠭᠤᠢ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ᠄ 《ᠠᠭᠤᠯᠠ ᠶ᠋ᠢᠨ ᠬᠦᠦ ᠭᠤᠸᠠᠢ ᠠᠪᠤᠷᠠᠯ ᠳ᠋ᠠᠭᠠᠨ ᠮᠠᠨ ᠢ᠋ ᠠᠪᠤᠷᠠ ᠳᠠ!》 ᠭᠡᠵᠦ ᠭᠤᠶᠤᠭᠰᠠᠨ ᠳ᠋ᠤ᠌ ᠠᠭᠤᠯᠠ ᠶ᠋ᠢᠨ ᠬᠦᠦ᠄《ᠵᠠ! ᠠᠬᠠ ᠳᠡᠭᠦᠦ ᠨᠠᠷ ᠤ᠋ᠨ ᠠᠮᠢ ᠶ᠋ᠢᠨ ᠴᠢᠨᠢ ᠬᠣᠭᠣᠷᠣᠨᠳᠣ ᠣᠷᠣᠵᠤ ᠥᠭᠭᠦᠶᠡ》 ᠭᠡᠳ ᠭᠠᠩ ᠪᠣᠯᠣᠳ ᠰᠤᠮᠤ ᠪᠠᠨ ᠠᠪᠴᠤ᠂ ᠠᠷᠪᠠᠨ ᠲᠠᠪᠤᠨ ᠤ᠋ ᠰᠠᠷᠠ ᠲᠠᠢ ᠠᠳᠠᠯᠢ ᠲᠦᠭᠦᠷᠡᠭᠰᠢᠲᠡᠯᠡ ᠲᠠᠲᠠᠵᠤ᠂ ᠣᠨᠢᠯᠠᠨ ᠣᠨᠢᠯᠠᠨ ᠲᠠᠯᠪᠢᠭᠰᠠᠨ ᠴᠢᠨᠢ ᠡᠷᠴᠢᠲᠦ ᠰᠤᠮᠤ ᠨᠢᠰᠬᠦ ᠰᠢᠪᠠᠭᠤ ᠰᠢᠭ᠋ ᠱᠤᠩᠪᠠᠨ ᠣᠴᠢᠵᠤ ᠠᠷᠪᠠᠨ ᠠᠯᠲᠠ ᠪᠡᠶᠡ ᠲᠡᠢ ᠤᠰᠤᠨ ᠤ᠋ ᠠᠮᠢᠲᠠᠨ ᠢ᠋ ᠠᠶᠤᠤᠯᠢᠬᠠᠢ ᠴᠡᠭᠡᠵᠢ ᠪᠡᠷ ᠨᠢ ᠨᠡᠪᠲᠡ ᠬᠠᠷᠪᠤᠵᠤ ᠠᠯᠠᠭᠰᠠᠨ ᠳ᠋ᠤ᠌ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠴᠡᠭᠡᠵᠢ ᠪᠡᠨ ᠳᠡᠯᠪᠡᠷᠡᠲᠡᠯᠡ ᠪᠠᠶᠠᠷᠯᠠᠵᠤ᠂ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢᠨ ᠠᠴᠢ ᠳ᠋ᠤ᠌ ᠮᠥᠷᠭᠥᠶᠡ ᠭᠡᠰᠡᠨ ᠳ᠋ᠦ᠍᠂ ᠠᠭᠤᠯᠠ ᠶ᠋ᠢᠨ ᠬᠦᠦ᠄《ᠲᠠ ᠮᠥᠷᠭᠥᠬᠦ ᠬᠡᠷᠡᠭ ᠦᠭᠡᠢ᠂ ᠭᠠᠭᠴᠠ ᠮᠢᠨᠦ ᠬᠦᠰᠡᠬᠦ ᠨᠢ ᠲᠠ ᠨᠠᠷ ᠬᠠᠷᠢᠵᠤ ᠨᠠᠮᠠᠶ᠋ᠢ ᠠᠮᠢᠲᠠᠨ ᠢ᠋ ᠠᠯᠠᠪᠠ ᠭᠡᠵᠦ ᠬᠠᠭᠠᠨ ᠳ᠋ᠠᠭᠠᠨ ᠪᠢᠲᠡᠭᠡᠢ ᠬᠡᠯᠡᠭᠡᠷᠡᠢ!》ᠭᠡᠵᠦ ᠭᠡᠷ ᠲᠡᠭᠡᠨ ᠳᠠᠪᠬᠢᠵᠤ ᠬᠠᠷᠢᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠬᠠᠭᠠᠨ ᠳ᠋ᠠᠭᠠᠨ ᠲᠡᠷᠡ ᠠᠮᠢᠲᠠᠨ ᠢ᠋ ᠠᠪᠴᠢᠷᠠᠵᠤ ᠥᠭᠭᠦᠭᠰᠡᠨ ᠳ᠋ᠦ᠍ ᠬᠠᠭᠠᠨ ᠨᠢ᠄《ᠵᠠ! ᠶᠡᠬᠡ ᠰᠠᠢᠨ᠂ ᠲᠠ ᠨᠠᠷ ᠡᠭᠦᠨ ᠦ᠌ ᠠᠷᠠᠰᠤ ᠶ᠋ᠢ ᠥᠪᠴᠢᠵᠦ᠂ ᠨᠠᠳᠠ ᠳᠡᠪᠡᠯ ᠬᠢᠵᠦ ᠠᠪᠴᠢᠷᠠ!》 ᠭᠡᠰᠡᠨ ᠳ᠋ᠦ᠍᠂ ᠴᠡᠷᠢᠭ ᠦ᠋ᠨ ᠬᠥᠮᠦᠰ ᠨᠢ ᠭᠠᠷᠴᠤ ᠥᠪᠴᠢᠭᠰᠡᠨ ᠳ᠋ᠦ᠍ ᠬᠠᠷᠢᠨ ᠬᠢᠲᠤᠭᠠ ᠨᠢ ᠳᠠᠭᠠᠭᠠᠬᠤ ᠦᠭᠡᠢ ᠶᠦᠮ ᠭᠡᠨᠡ᠃
ᠡᠭᠦᠨ ᠢ᠋ ᠮᠡᠳᠡᠭᠡᠳ ᠬᠠᠭᠠᠨ ᠨᠢ ᠶᠡᠬᠡᠯᠡ ᠠᠭᠤᠷᠯᠠᠵᠤ ᠲᠠ ᠨᠠᠷ ᠠᠯᠠᠵᠤ ᠴᠢᠳᠠᠭᠠᠳ ᠥᠪᠴᠢᠵᠦ ᠴᠢᠳᠠᠬᠤ ᠦᠭᠡᠢ ᠶᠠᠮᠠᠷ ᠤᠴᠢᠷ ᠶᠤᠮ ᠪᠣᠢ? ᠯᠠᠪ ᠥᠭᠡᠷᠡ ᠬᠥᠮᠦᠨ ᠠᠯᠠᠭᠰᠠᠨ ᠪᠠᠢᠬᠤ ᠭᠡᠵᠦ ᠴᠡᠷᠢᠭ ᠵᠠᠩᠵᠤᠨ ᠢ᠋ᠶ᠋ᠠᠨ ᠬᠠᠤᠯᠢᠳᠠᠬᠤ ᠳ᠋ᠤ᠌᠂ ᠴᠡᠷᠢᠭ ᠦ᠋ᠳ ᠠᠷᠭᠠ ᠪᠠᠨ ᠪᠠᠷᠠᠵᠤ ᠠᠭᠤᠯᠠ ᠶ᠋ᠢᠨ ᠬᠦᠦ ᠪᠢᠳᠡᠨ ᠳ᠋ᠦ᠍ ᠠᠯᠠᠵᠤ ᠥᠭᠪᠡ ᠭᠡᠵᠦ ᠮᠡᠳᠡᠭᠦᠯᠦᠭᠰᠡᠨ ᠳ᠋ᠦ᠍ ᠬᠠᠭᠠᠨ ᠨᠢ ᠳᠠᠷᠤᠢ ᠬᠥᠮᠦᠨ ᠵᠠᠷᠤᠵᠤ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠳᠠᠭᠤᠳᠠᠨ ᠠᠪᠴᠢᠷᠠᠭᠠᠳ ᠡᠨᠡ ᠠᠷᠠᠰᠤ ᠶ᠋ᠢ ᠥᠪᠴᠢᠵᠦ ᠳᠡᠪᠡᠯ ᠬᠢᠵᠦ ᠠᠪᠴᠢᠷᠠ ᠭᠡᠵᠦ ᠲᠤᠰᠢᠶᠠᠵᠠᠢ᠃ ᠴᠢᠩᠭᠢᠭᠰᠡᠨ ᠳ᠋ᠦ᠍ ᠠᠭᠤᠯᠠ ᠶ᠋ᠢᠨ ᠬᠦᠦ ᠬᠢᠲᠤᠭᠠ ᠪᠠᠨ ᠭᠠᠷᠭᠠᠵᠤ ᠲᠡᠷᠡ ᠠᠮᠢᠲᠠᠨ ᠤ᠋ ᠠᠷᠠᠰᠤ ᠶ᠋ᠢ ᠥᠪᠴᠢᠭᠡᠳ ᠤᠷᠠᠨ ᠣᠶᠣᠭᠠᠴᠢᠨ ᠢ᠋ ᠠᠪᠴᠢᠷᠠᠵᠤ ᠬᠠᠭᠠᠨ ᠳ᠋ᠤ᠌ ᠳᠡᠪᠡᠯ ᠬᠢᠵᠦ ᠪᠠᠷᠢᠪᠠ ᠭᠡᠨᠡ᠃
ᠬᠠᠭᠠᠨ ᠲᠡᠷᠡ ᠳᠡᠪᠡᠯ ᠢ᠋ ᠡᠮᠦᠰᠴᠦ ᠲᠣᠯᠣᠭᠠᠢ ᠡᠷᠭᠢᠲᠡᠯᠡ ᠪᠠᠶᠠᠷᠯᠠᠵᠤ ᠬᠠᠲᠤᠨ ᠳ᠋ᠠᠭᠠᠨ ᠦᠵᠡᠭᠦᠯᠦᠭᠰᠡᠨ ᠳ᠋ᠦ᠍᠂ ᠬᠠᠲᠤᠨ ᠨᠢ᠄《ᠡᠨᠡ ᠳᠡᠪᠡᠯ ᠦᠨᠡᠬᠡᠷ ᠰᠠᠢᠨ ᠭᠠᠭᠴᠠ ᠬᠠᠭᠠᠨ ᠤ᠋ ᠮᠠᠯᠠᠭᠠᠢ ᠪᠠᠬᠠᠨ ᠦᠵᠡᠮᠵᠢ ᠦᠭᠡᠢ ᠪᠠᠢᠨᠠ᠃ ᠬᠡᠷᠪᠡ ᠮᠠᠩᠭᠤᠰ ᠤ᠋ᠨ ᠲᠠᠷᠨᠢᠴᠢᠨ ᠮᠠᠯᠠᠭᠠᠢ ᠶ᠋ᠢ ᠣᠯᠵᠤ ᠡᠮᠦᠰᠪᠡᠯ ᠣᠳᠣ ᠲᠠᠨ ᠠ᠋ᠴᠠ ᠢᠯᠡᠭᠦᠦ ᠬᠠᠭᠠᠨ ᠡᠵᠡᠨ ᠬᠠᠮᠢᠭᠠ ᠠ᠋ᠴᠠ ᠣᠯᠳᠠᠬᠤ ᠪᠣᠢ!》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠪᠠᠬᠠᠨ ᠰᠡᠳᠬᠢᠯ ᠵᠣᠪᠠᠵᠤ᠄《ᠲᠠᠷᠨᠢᠴᠢᠨ ᠮᠠᠯᠠᠭᠠᠢ ᠭᠡᠭᠴᠢ ᠮᠠᠩᠭᠤᠰ ᠤ᠋ᠨ ᠮᠠᠯᠠᠭᠠᠢ ᠪᠠᠢᠨᠠ᠃ ᠬᠡᠨ ᠠᠶᠤᠮᠰᠢᠭ ᠦᠭᠡᠢ ᠮᠠᠩᠭᠤᠰ ᠤ᠋ᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠡᠴᠡ ᠮᠠᠯᠠᠭᠠᠢ ᠶ᠋ᠢ ᠨᠢ ᠠᠪᠴᠤ ᠴᠢᠳᠠᠬᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠬᠠᠲᠤᠨ ᠣᠳᠣ ᠡᠨᠡ ᠮᠠᠯᠠᠭᠠᠢ ᠶ᠋ᠢ ᠠᠪᠤᠭᠤᠯᠬᠤ ᠪᠠᠷ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠶᠠᠪᠤᠭᠤᠯᠬᠤ ᠦᠭᠡᠢ ᠶᠠᠭᠠᠬᠢᠵᠤ ᠪᠣᠯᠤᠨᠠ᠃ ᠪᠣᠳᠣᠪᠠᠯ ᠠᠭᠤᠯᠠ ᠶ᠋ᠢᠨ ᠬᠦᠦ ᠮᠠᠩᠭᠤᠰ ᠲᠤ᠌ ᠣᠴᠢᠵᠤ ᠨᠡᠷᠡ ᠦᠭᠡᠢ ᠠᠯᠠᠭᠳᠠᠬᠤ ᠪᠣᠯᠤᠨᠠ᠃ ᠦᠭᠡᠢ ᠪᠣᠯ᠂ ᠡᠨᠡ ᠬᠥᠮᠦᠨ ᠬᠡᠷᠪᠡ ᠠᠮᠢᠳᠤ ᠶᠠᠪᠤᠪᠠᠯ ᠬᠣᠵᠢᠮ ᠮᠠᠨ ᠳ᠋ᠤ᠌ ᠠᠰᠢᠭ ᠦᠭᠡᠢ ᠶᠦᠮ᠃ ᠶᠠᠭᠠᠬᠢᠪᠠᠴᠤ ᠡᠭᠦᠨ ᠢ᠋ ᠠᠷᠭᠠᠯᠠᠵᠤ ᠪᠠᠢᠭᠠᠳ ᠠᠯᠠᠶᠠ ᠭᠡᠵᠦ ᠪᠣᠳᠣᠭᠠᠳ᠄《ᠮᠠᠩᠭᠤᠰ ᠤ᠋ᠨ ᠲᠠᠷᠨᠢᠴᠢᠨ ᠮᠠᠯᠠᠭᠠᠢ ᠶ᠋ᠢ ᠥᠭᠡᠷᠡ ᠬᠥᠮᠦᠨ ᠣᠴᠢᠵᠤ ᠠᠪᠴᠢᠷᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠠᠭᠤᠯᠠ ᠶ᠋ᠢᠨ ᠬᠦᠦ ᠰᠢᠭ ᠪᠠᠭᠠᠲᠤᠷ ᠡᠷᠡ ᠰᠠᠶᠢ ᠠᠪᠴᠢᠷᠠᠵᠤ ᠴᠢᠳᠠᠨᠠ》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ᠂ ᠳᠠᠷᠤᠢ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠳᠠᠭᠤᠳᠠᠭᠠᠳ ᠵᠠᠷᠯᠢᠭ ᠪᠣᠯᠤᠭᠰᠠᠨ ᠨᠢ᠄《ᠴᠢ ᠣᠴᠢᠵᠤ ᠮᠠᠩᠭᠤᠰ ᠤ᠋ᠨ ᠲᠠᠷᠨᠢᠴᠢᠨ ᠮᠠᠯᠠᠭᠠᠢ ᠶ᠋ᠢ ᠨᠠᠳᠠ ᠣᠯᠵᠤ ᠠᠪᠴᠢᠷᠠ! ᠦᠭᠡᠢ ᠪᠣᠯ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠤᠨᠠ》 ᠭᠡᠵᠦ ᠶᠠᠪᠤᠭᠤᠯᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠭᠤᠯᠠ ᠶ᠋ᠢᠨ ᠬᠦᠦ ᠭᠠᠯᠵᠠᠭᠤ ᠬᠢᠯᠢᠩ ᠳ᠋ᠡᠭᠡᠨ ᠮᠣᠷᠳᠠᠵᠤ ᠶᠠᠪᠤᠭᠰᠠᠭᠠᠷ ᠪᠠᠷᠲᠠᠭᠠᠨ ᠲᠠᠢ ᠳᠠᠪᠠᠭᠠ ᠶ᠋ᠢ ᠳᠠᠪᠠᠵᠤ᠂ ᠨᠢᠭᠡᠨ ᠪᠣᠷᠣ ᠭᠡᠷ ᠲᠦ᠍ ᠪᠠᠭᠤᠭᠰᠠᠨ ᠳ᠋ᠤ᠌ ᠭᠤᠷᠪᠠᠨ ᠰᠠᠢᠬᠠᠨ ᠥᠬᠢᠨ ᠰᠠᠭᠤᠵᠤ᠂ ᠨᠢᠭᠡ ᠨᠢ ᠤᠬᠢᠯᠠᠵᠤ᠂ ᠨᠢᠭᠡ ᠨᠢ ᠳᠠᠭᠤᠯᠠᠵᠤ᠂ ᠨᠢᠭᠡ ᠨᠢ ᠢᠨᠢᠶᠡᠵᠦ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠳᠣᠲᠣᠷᠠ ᠪᠠᠨ ᠪᠠᠬᠠᠨ ᠰᠣᠨᠢᠷᠬᠠᠵᠤ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠲᠡᠷᠡ ᠭᠤᠷᠪᠠᠨ ᠥᠬᠢᠨ᠄《ᠪᠢᠳᠡ ᠪᠣᠯ ᠬᠠᠭᠠᠨ ᠭᠠᠷᠤᠳᠢ ᠶ᠋ᠢᠨ ᠠᠷᠪᠠᠨ ᠭᠤᠷᠪᠠᠨ ᠥᠬᠢᠨ ᠦ᠌ ᠬᠠᠮᠤᠭ ᠪᠠᠭᠠ ᠭᠤᠷᠪᠠ ᠨᠢ ᠶᠦᠮ᠃ ᠵᠡᠭᠦᠨ ᠬᠣᠢᠨᠠ ᠨᠢᠭᠡᠨ ᠠᠪᠤᠷᠭᠤ ᠮᠣᠭᠠᠢ ᠢᠷᠡᠵᠦ ᠨᠤᠲᠤᠭᠯᠠᠭᠠᠳ ᠮᠠᠨ ᠤ᠋ ᠠᠷᠪᠠᠨ ᠡᠭᠡᠴᠢ ᠶ᠋ᠢ ᠪᠠᠷᠢᠵᠤ ᠵᠠᠯᠭᠢᠪᠠ᠃ ᠡᠬᠡ ᠮᠢᠨᠢ ᠬᠡᠳᠦᠨ ᠤᠳᠠᠭᠠ ᠲᠤᠯᠤᠯᠳᠤᠭᠰᠠᠨ ᠪᠣᠯᠪᠠᠴᠤ ᠶᠡᠷᠦ ᠠᠪᠤᠷᠭᠤ ᠮᠣᠭᠠᠢ ᠶ᠋ᠢ ᠲᠠᠢᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠣᠳᠣ ᠪᠢᠳᠡ ᠭᠤᠷᠪᠠᠭᠤᠯᠠ ᠶ᠋ᠢ ᠪᠠᠰᠠ ᠵᠠᠯᠭᠢᠬᠤ ᠪᠣᠯᠵᠤ ᠪᠠᠢᠨᠠ᠃ ᠪᠢᠳᠡ ᠭᠤᠷᠪᠠᠭᠤᠯᠠ ᠶ᠋ᠢᠨ ᠥᠨᠥᠳᠥᠷ ᠵᠠᠯᠭᠢᠭᠳᠠᠬᠤ ᠨᠢ ᠤᠬᠢᠯᠠᠵᠤ᠂ ᠮᠠᠷᠭᠠᠰᠢ ᠵᠠᠯᠭᠢᠭᠳᠠᠬᠤ ᠨᠢ ᠳᠠᠭᠤᠯᠠᠵᠤ᠂ ᠨᠥᠭᠥᠭᠡᠳᠦᠷ ᠵᠠᠯᠭᠢᠭᠳᠠᠬᠤ ᠨᠢ ᠢᠨᠢᠶᠡᠵᠦ ᠪᠠᠢᠨᠠ ᠭᠡᠰᠡᠨ ᠳ᠋ᠦ᠍᠂ ᠠᠭᠤᠯᠠ ᠶ᠋ᠢᠨ ᠬᠦᠦ᠄《ᠵᠠ! ᠡᠭᠡᠴᠢ ᠳᠡᠭᠦᠦ ᠨᠠᠷ ᠮᠢᠨᠢ ᠵᠣᠪᠠᠬᠤ ᠦᠭᠡᠢ ᠰᠠᠭᠤᠭᠠᠷᠠᠢ᠃ ᠪᠢ ᠲᠠᠨ ᠳ᠋ᠤ᠌ ᠠᠯᠠᠵᠤ ᠥᠭᠭᠦᠶᠡ》 ᠭᠡᠳ ᠭᠠᠯᠵᠠᠭᠤ ᠬᠢᠯᠢᠩ ᠳ᠋ᠡᠭᠡᠨ ᠮᠣᠷᠳᠠᠵᠤ ᠵᠡᠭᠦᠨ ᠬᠣᠢᠲᠤ ᠵᠦᠭ ᠭᠠᠷᠴᠤ ᠠᠪᠤᠷᠭᠤ ᠮᠣᠭᠠᠢ ᠶ᠋ᠢᠨ ᠢᠷᠡᠬᠦ ᠵᠠᠮ ᠢ᠋ ᠬᠥᠨᠳᠡᠯᠢᠳᠴᠦ ᠬᠦᠯᠢᠶᠡᠨ ᠪᠠᠢᠲᠠᠯᠠ᠂ ᠭᠡᠨᠡᠳᠲᠡ ᠲᠩᠷᠢ ᠲᠤᠯᠤᠮᠠ ᠲᠣᠭᠣᠰᠣ ᠪᠣᠰᠴᠤ᠂ ᠡᠯᠡᠰᠦ ᠬᠡᠢᠰᠴᠦ᠂ ᠮᠣᠳᠣ ᠴᠢᠯᠠᠭᠤ ᠬᠥᠳᠡᠯᠦᠨ᠂ ᠬᠠᠷᠠᠵᠤ ᠪᠠᠢᠲᠠᠯᠠ ᠨᠢᠭᠡᠨ ᠲᠣᠮᠣ ᠠᠪᠤᠷᠭᠤ ᠮᠣᠭᠠᠢ ᠠᠮᠠ ᠪᠠᠨ ᠠᠩᠭᠠᠢᠵᠤ ᠢᠷᠡᠬᠦ ᠳ᠋ᠦ᠍ ᠠᠭᠤᠯᠠ ᠶ᠋ᠢᠨ ᠬᠦᠦ᠂ ᠭᠠᠩ ᠪᠣᠯᠣᠳ ᠨᠤᠮᠤ ᠪᠠᠨ ᠲᠠᠲᠠᠵᠤ ᠪᠣᠷᠣᠭᠠᠨ ᠰᠤᠮᠤ ᠪᠠᠨ ᠣᠨᠢᠯᠠᠭᠠᠳ ᠴᠢᠳᠠᠯ ᠤ᠋ᠨ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠲᠡᠯᠡᠵᠦ ᠰᠠᠷᠠᠨ ᠰᠢᠭ᠋ ᠲᠥᠭᠥᠷᠢᠭᠬᠡᠨ ᠪᠣᠯᠭᠠᠭᠠᠳ ᠠᠪᠤᠷᠭᠤ ᠮᠣᠭᠠᠢ ᠶ᠋ᠢᠨ ᠠᠮᠠᠨ ᠳ᠋ᠤᠨᠢ ᠰᠢᠪᠲᠤ ᠬᠠᠷᠪᠤᠨ ᠣᠷᠣᠭᠤᠯᠤᠭᠰᠠᠨ ᠳ᠋ᠤ᠌ ᠠᠪᠤᠷᠭᠤ ᠮᠣᠭᠠᠢ ᠠᠷᠪᠠᠨ ᠠᠯᠲᠠ ᠬᠠᠷᠠᠢᠯᠠᠵᠤ ᠠᠭᠵᠠᠰ ᠭᠡᠵᠦ ᠠᠲᠤᠷᠢᠨ ᠠᠮᠢ ᠪᠠᠨ ᠲᠠᠯᠪᠢᠵᠤ ᠦᠬᠦᠪᠡ ᠭᠡᠨᠡ᠃ ᠴᠢᠩᠭᠢᠭᠡᠳ ᠭᠤᠷᠪᠠᠨ ᠰᠠᠢᠬᠠᠨ ᠥᠬᠢᠨ ᠦ᠌ ᠬᠠᠮᠲᠤ ᠠᠭᠤᠯᠠ ᠶ᠋ᠢᠨ ᠬᠦᠦ ᠠᠪᠤᠷᠭᠤ ᠮᠣᠭᠠᠢ ᠶ᠋ᠢ ᠲᠣᠭᠣᠷᠢᠨ ᠠᠵᠢᠭᠯᠠᠨ ᠬᠠᠷᠠᠵᠤ ᠪᠠᠢᠲᠠᠯᠠ ᠨᠢᠭᠡᠨ ᠬᠡᠰᠡᠭ ᠴᠠᠭᠠᠨ ᠡᠭᠦᠯᠡ ᠲᠣᠯᠣᠭᠠᠢ ᠳᠡᠭᠡᠭᠦᠷ ᠨᠢ ᠡᠷᠭᠢᠭᠰᠡᠨ ᠳ᠋ᠦ᠍ ᠭᠤᠷᠪᠠᠨ ᠥᠬᠢᠨ ᠴᠤᠭᠭᠠᠷ ᠢ᠋ᠶ᠋ᠠᠨ ᠡᠵᠢ ᠮᠢᠨᠢ ᠢᠷᠡᠪᠡ ᠭᠡᠰᠡᠨ ᠳ᠋ᠦ᠍ ᠴᠠᠭᠠᠨ ᠡᠭᠦᠯᠡ ᠯᠠᠪᠰᠠᠯᠠᠨ ᠪᠠᠭᠤᠨ ᠢᠷᠡᠭᠡᠳ ᠬᠠᠨ ᠭᠠᠷᠤᠳᠢ ᠪᠣᠯᠤᠭᠠᠳ᠂ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠡᠨᠡ ᠬᠡᠨ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠥᠬᠢᠳ ᠨᠢ ᠡᠨᠡ ᠪᠣᠯ ᠮᠠᠨ ᠤ᠋ ᠠᠮᠢ ᠶ᠋ᠢ ᠠᠪᠤᠷᠠᠭᠰᠠᠨ ᠬᠥᠮᠦᠨ ᠪᠠᠢᠨᠠ ᠭᠡᠪᠡ᠃ ᠬᠠᠨ ᠭᠠᠷᠤᠳᠢ ᠶᠡᠬᠡ ᠪᠠᠶᠠᠷᠯᠠᠵᠤ᠄《ᠬᠦᠦ ᠬᠠᠮᠢᠭᠠ ᠠ᠋ᠴᠠ ᠬᠠᠮᠢᠭᠠᠰᠢ ᠶᠠᠪᠤᠵᠤ ᠪᠠᠢᠨᠠ ᠪᠣᠢ? ᠠᠯᠤᠰ ᠤ᠋ᠨ ᠵᠣᠷᠢᠯᠭᠠ ᠶᠠᠭᠤ ᠪᠣᠢ? ᠡᠵᠢ ᠳ᠋ᠡᠭᠡᠨ ᠬᠡᠯᠡ! ᠲᠤᠰᠠᠯᠠᠬᠤ ᠬᠡᠷᠡᠭ ᠪᠠᠢᠪᠠᠯ ᠭᠤᠷᠪᠠᠨ ᠥᠬᠢᠨ ᠦ᠌ ᠠᠮᠢ ᠶ᠋ᠢ ᠠᠪᠤᠷᠠᠭᠰᠠᠨ ᠠᠴᠢ ᠳ᠋ᠤ᠌ ᠴᠢᠨᠢ ᠭᠤᠷᠪᠠᠨ ᠤᠳᠠᠭᠠ ᠲᠤᠰᠠᠯᠠᠵᠤ ᠥᠭᠭᠦᠶᠡ!》 ᠭᠡᠰᠡᠨ ᠳ᠋ᠦ᠍ ᠠᠭᠤᠯᠠ ᠶ᠋ᠢᠨ ᠬᠦᠦ ᠬᠠᠷᠢᠭᠤ ᠳ᠋ᠤᠨᠢ᠄《ᠮᠠᠩᠭᠤᠰ ᠤ᠋ᠨ ᠲᠠᠷᠨᠢᠴᠢᠨ ᠮᠠᠯᠠᠭᠠᠢ ᠶ᠋ᠢ ᠠᠪᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ᠃ ᠬᠡᠷᠪᠡ ᠮᠠᠩᠭᠤᠰ ᠤ᠋ᠨ ᠮᠠᠯᠠᠭᠠᠢ ᠶ᠋ᠢ ᠣᠯᠬᠤ ᠦᠭᠡᠢ ᠪᠣᠯ ᠬᠠᠭᠠᠨ᠂ ᠲᠣᠯᠣᠭᠠᠢ ᠶ᠋ᠢ ᠮᠢᠨᠢ ᠠᠪᠤᠨᠠ ᠭᠡᠵᠦ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠠᠨ ᠭᠠᠷᠤᠳᠢ᠄《ᠠ! ᠡᠭᠦᠨ ᠢ᠋ ᠪᠦᠲᠦᠭᠡᠵᠦ ᠴᠢᠳᠠᠨᠠ᠃ ᠴᠢ ᠮᠢᠨᠦ ᠳᠡᠭᠡᠷᠡ ᠣᠨᠣᠭᠲᠤᠨ》 ᠭᠡᠵᠦ ᠤᠨᠤᠭᠤᠯᠤᠭᠠᠳ ᠨᠢᠰᠦᠨ ᠪᠣᠰᠴᠤ ᠮᠠᠩᠭᠤᠰ ᠤ᠋ᠨ ᠨᠤᠲᠤᠭ ᠵᠦᠭ ᠢᠷᠡᠬᠦ ᠳ᠋ᠡᠭᠡᠨ᠂ ᠬᠠᠨ ᠭᠠᠷᠤᠳᠢ ᠠᠭᠤᠯᠠ ᠶ᠋ᠢᠨ ᠬᠦᠦ ᠳ᠋ᠦ᠍ ᠰᠤᠷᠭᠠᠭᠰᠠᠨ ᠨᠢ᠄《ᠮᠠᠩᠭᠤᠰ ᠤ᠋ᠨ ᠭᠡᠷ ᠲᠦ᠍ ᠬᠦᠷᠦᠭᠡᠳ᠂ ᠴᠢ ᠮᠢᠨᠦ ᠵᠡᠭᠦᠨ ᠳᠠᠯᠠᠪᠴᠢᠨ ᠳᠡᠭᠡᠷᠡ ᠰᠠᠭᠤᠵᠤ ᠰᠠᠯᠬᠤ ᠦᠭᠡᠢ ᠠᠳᠬᠤᠵᠤ᠂ ᠮᠠᠩᠭᠤᠰ ᠭᠤᠸᠠᠢ᠂ ᠮᠠᠩᠭᠤᠰ ᠭᠤᠸᠠᠢ ᠲᠦᠷᠭᠡᠨ ᠭᠠᠷᠴᠤ ᠢᠷᠡᠭᠡᠳ ᠨᠠᠷᠠ ᠪᠠᠷᠠᠭᠤᠨ ᠠ᠋ᠴᠠ ᠭᠠᠷᠬᠤ ᠶ᠋ᠢ ᠦᠵᠡᠭᠡᠷᠡᠢ ᠭᠡᠵᠦ ᠬᠠᠰᠬᠢᠷ! ᠴᠢᠩᠭᠢᠪᠡᠯ ᠪᠢ ᠮᠠᠩᠭᠤᠰ ᠢ᠋ ᠪᠠᠷᠢᠵᠤ ᠳᠡᠭᠳᠡᠨᠡ᠃ ᠴᠢ ᠶᠠᠭᠠᠬᠢᠪᠠᠴᠤ ᠵᠢᠭᠦᠷ ᠳᠡᠭᠡᠷᠡ ᠮᠢᠨᠢ ᠨᠠᠭᠠᠯᠳᠤᠵᠤ ᠪᠢᠲᠡᠭᠡᠢ ᠰᠠᠯᠤᠭᠠᠷᠠᠢ!》 ᠭᠡᠵᠦ ᠰᠤᠷᠭᠠᠭᠠᠳ ᠤᠳᠠᠭᠰᠠᠨ ᠦᠭᠡᠢ ᠮᠠᠩᠭᠤᠰ ᠤ᠋ᠨ ᠭᠡᠷ ᠦ᠋ᠨ ᠣᠷᠣᠢ ᠳᠡᠭᠡᠷᠡ ᠨᠢ ᠪᠠᠭᠤᠵᠤ ᠢᠷᠡᠭᠡᠳ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠵᠡᠭᠦᠨ ᠳᠠᠯᠠᠪᠴᠢ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠭᠰᠠᠨ ᠳ᠋ᠤ᠌ ᠠᠭᠤᠯᠠ ᠶ᠋ᠢᠨ ᠬᠦᠦ 《ᠮᠠᠩᠭᠤᠰ ᠭᠤᠸᠠᠢ! ᠲᠦᠷᠭᠡᠨ ᠭᠠᠷᠴᠤ ᠢᠷᠡᠭᠡᠳ ᠨᠠᠷᠠ ᠪᠠᠷᠠᠭᠤᠨ ᠠ᠋ᠴᠠ ᠭᠠᠷᠴᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠷᠡᠢ》 ᠭᠡᠰᠡᠨ ᠳ᠋ᠦ᠍ ᠭᠡᠷ ᠲᠡᠭᠡᠨ ᠰᠠᠭᠤᠵᠤ ᠰᠦ ᠲᠡᠢ ᠴᠠᠢ ᠤᠤᠭᠤᠵᠤ ᠪᠠᠢᠭᠰᠠᠨ ᠮᠠᠩᠭᠤᠰ ᠰᠣᠨᠣᠰᠤᠭᠠᠳ ᠶᠠᠭᠠᠬᠢᠭᠰᠠᠨ ᠵᠥᠭᠡᠯᠡᠨ ᠳᠠᠭᠤᠨ ᠲᠠᠢ ᠶᠤᠮ ᠭᠡᠵᠦ《ᠬᠡ ᠬᠡ᠂ ᠬᠠ ᠬᠠ》ᠭᠡᠭᠰᠡᠭᠡᠷ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ ᠬᠠᠨ ᠭᠠᠷᠤᠳᠢ ᠠᠭᠤᠯᠠ ᠶ᠋ᠢᠨ ᠬᠦᠦ ᠴᠢ ᠯᠠᠪᠳᠠᠭᠤᠨ ᠰᠠᠭᠤᠭᠲᠤᠨ ᠭᠡᠵᠦ ᠮᠠᠩᠭᠤᠰ ᠤ᠋ᠨ ᠮᠠᠯᠠᠭᠠᠢ ᠠ᠋ᠴᠠ ᠨᠢ ᠠᠪᠴᠤ ᠮᠢᠩᠭᠠᠨ ᠵᠠᠩ ᠳᠡᠭᠡᠭᠰᠢ ᠳᠡᠪᠬᠡᠷᠦᠨ ᠭᠠᠷᠤᠭᠰᠠᠨ ᠳ᠋ᠤ᠌ ᠮᠠᠩᠭᠤᠰ ᠮᠠᠯᠠᠭᠠᠢ ᠶ᠋ᠢᠨ ᠰᠠᠭᠠᠯᠳᠤᠷᠭᠠ ᠳ᠋ᠠᠭᠠᠨ ᠡᠷᠡᠦ ᠪᠡᠨ ᠳᠡᠭᠦᠵᠢᠯᠡᠭᠳᠡᠵᠦ ᠰᠠᠭᠠᠯᠳᠤᠷᠭᠠ ᠨᠢ ᠲᠠᠰᠤᠷᠠᠬᠤ ᠦᠭᠡᠢ ᠮᠠᠩᠭᠤᠰ ᠢ᠋ ᠵᠣᠪᠠᠭᠠᠨ ᠪᠠᠢᠲᠠᠯᠠ ᠠᠭᠤᠯᠠ ᠶ᠋ᠢᠨ ᠬᠦᠦ ᠲᠡᠮᠦᠷ ᠪᠣᠯᠣᠳ ᠨᠤᠮᠤ ᠪᠠᠷ ᠢ᠋ᠶ᠋ᠠᠨ ᠮᠠᠩᠭᠤᠰ ᠤ᠋ᠨ ᠲᠣᠯᠣᠭᠠᠢ ᠶ᠋ᠢ ᠬᠦᠴᠦᠯᠡᠨ ᠳᠡᠯᠡᠳᠦᠭᠰᠡᠨ ᠳ᠋ᠦ᠍ ᠮᠠᠩᠭᠤᠰ ᠤ᠋ᠨ ᠮᠠᠯᠠᠭᠠᠢ ᠶ᠋ᠢᠨ ᠰᠠᠭᠠᠯᠳᠤᠷᠭᠠ ᠨᠢ ᠲᠠᠰᠤ ᠣᠴᠢᠵᠤ ᠮᠠᠩᠭᠤᠰ ᠭᠠᠵᠠᠷ ᠳᠡᠭᠡᠷᠡ ᠤᠨᠠᠭᠠᠳ ᠶᠡᠬᠡ ᠯᠡ ᠠᠭᠤᠷᠯᠠᠵᠤ ᠭᠡᠷ ᠲᠡᠭᠡᠨ ᠣᠷᠣᠵᠤ ᠨᠤᠮᠤ ᠰᠤᠮᠤ ᠪᠠᠨ ᠠᠪᠴᠤ ᠭᠠᠷᠴᠤ ᠢᠷᠡᠭᠰᠡᠨ ᠳ᠋ᠦ᠍᠂ ᠴᠡᠯᠮᠡᠭ ᠰᠠᠢᠬᠠᠨ ᠣᠭᠲᠠᠷᠭᠤᠢ ᠳ᠋ᠤ᠌ ᠶᠠᠭᠤ ᠴᠤ᠌ ᠪᠠᠢᠭᠰᠠᠨ ᠦᠭᠡᠢ᠃ ᠮᠠᠩᠭᠤᠰ ᠭᠡᠨᠡᠳᠲᠡ ᠪᠠᠷᠢᠭᠳᠠᠵᠤ ᠳᠡᠭᠦᠵᠢᠯᠡᠭᠳᠡᠭᠰᠡᠨ ᠲᠤᠯᠠ ᠪᠠᠬᠠᠨ ᠤᠬᠠᠭᠠᠨ ᠠᠯᠳᠠᠵᠤ ᠬᠠᠮᠢᠭᠠ ᠠ᠋ᠴᠠ ᠶᠠᠭᠤ ᠢᠷᠡᠵᠦ ᠬᠠᠮᠢᠭᠠᠰᠢ ᠶᠠᠪᠤᠭᠰᠠᠨ ᠢ᠋ ᠣᠯᠵᠤ ᠮᠡᠳᠡᠭᠰᠡᠨ ᠦᠭᠡᠢ ᠭᠡᠨᠡ᠃ ᠴᠢᠩᠭᠢᠭᠡᠳ ᠬᠠᠨ ᠭᠠᠷᠤᠳᠢ ᠭᠡᠷ ᠲᠦ᠍ ᠪᠡᠨ ᠨᠢᠰᠦᠨ ᠬᠠᠷᠢᠵᠤ ᠢᠷᠡᠭᠡᠳ ᠮᠠᠩᠭᠤᠰ ᠤ᠋ᠨ ᠲᠠᠷᠨᠢᠴᠢᠨ ᠮᠠᠯᠠᠭᠠᠢ ᠶ᠋ᠢ ᠠᠭᠤᠯᠠ ᠶ᠋ᠢᠨ ᠬᠦᠦ ᠳ᠋ᠦ᠍ ᠥᠭᠴᠦ ᠬᠠᠷᠢᠭᠤᠯᠵᠠᠢ᠃
ᠠᠭᠤᠯᠠ ᠶ᠋ᠢᠨ ᠬᠦᠦ ᠬᠠᠷᠢᠵᠤ ᠢᠷᠡᠭᠡᠳ ᠬᠠᠭᠠᠨ ᠳ᠋ᠤ᠌ ᠮᠠᠩᠭᠤᠰ ᠤ᠋ᠨ ᠮᠠᠯᠠᠭᠠᠢ ᠶ᠋ᠢ ᠪᠠᠷᠢᠭᠰᠠᠨ ᠳ᠋ᠤ᠌ ᠬᠠᠭᠠᠨ ᠶᠡᠬᠡ ᠯᠡ ᠪᠠᠶᠠᠷᠯᠠᠵᠤ ᠬᠠᠲᠤᠨ ᠳ᠋ᠠᠭᠠᠨ ᠦᠵᠡᠭᠦᠯᠦᠭᠰᠡᠨ ᠳ᠋ᠦ᠍ ᠬᠠᠲᠤᠨ ᠨᠢ᠄《ᠮᠠᠩᠭᠤᠰ ᠴᠤ᠌ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠠᠯᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠠᠮᠢᠳᠤ ᠬᠠᠷᠢᠵᠤ ᠢᠷᠡᠪᠡ᠃ ᠣᠳᠣ ᠶᠠᠮᠠᠷ ᠠᠷᠭᠠ ᠪᠠᠷ ᠡᠭᠦᠨ ᠢ᠋ ᠠᠷᠢᠯᠭᠠᠬᠤ ᠪᠣᠢ》 ᠭᠡᠵᠦ ᠪᠣᠳᠣᠭᠠᠳ ᠭᠡᠨᠡᠳᠲᠡ ᠨᠢᠭᠡᠨ ᠠᠷᠭᠠ ᠣᠯᠵᠤ ᠬᠡᠯᠡᠭᠰᠡᠨ ᠨᠢ᠄《ᠡᠵᠡᠨ ᠲᠠ ᠡᠨᠡ ᠰᠠᠢᠬᠠᠨ ᠳᠡᠪᠡᠯ ᠲᠠᠷᠨᠢᠴᠢᠨ ᠮᠠᠯᠠᠭᠠᠢ ᠶ᠋ᠢ ᠡᠮᠦᠰᠴᠦ ᠦᠨᠡᠬᠡᠷ ᠶᠢᠷᠲᠢᠨᠴᠦ ᠳ᠋ᠦ᠍ ᠬᠣᠣᠰ ᠦᠭᠡᠢ ᠪᠣᠯᠪᠠ᠃ ᠭᠠᠭᠴᠠ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ᠶ᠋ᠠᠷ ᠪᠠᠭᠠ ᠬᠠᠲᠤᠨ ᠪᠣᠯᠭᠠᠬᠤ ᠴᠢᠨᠢ ᠳᠤᠲᠠᠭᠳᠠᠵᠤ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠨᠢ᠄《ᠲᠡᠢᠮᠦ ᠭᠡᠵᠦ᠂ ᠬᠡᠨ ᠢ᠋ ᠶᠠᠪᠤᠭᠤᠯᠵᠤ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠵᠤ ᠢᠷᠡᠭᠦᠯᠬᠦ ᠪᠣᠢ》 ᠭᠡᠰᠡᠨ ᠳ᠋ᠦ᠍᠂ ᠬᠠᠲᠤᠨ ᠨᠢ᠄《ᠠᠭᠤᠯᠠ ᠶ᠋ᠢᠨ ᠬᠦᠦ ᠪᠠᠢᠬᠤ ᠦᠭᠡᠢ ᠤᠤ》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ᠄《ᠲᠡᠢᠮᠦ ᠲᠡᠢᠮᠦ》 ᠭᠡᠵᠦ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠳᠠᠭᠤᠳᠠᠭᠠᠳ᠄《ᠴᠢ ᠣᠴᠢᠵᠤ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠣᠯᠵᠤ ᠢᠷᠡ᠂ ᠦᠭᠡᠢ ᠪᠣᠯ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠤᠨᠠ》 ᠭᠡᠰᠡᠨ ᠳ᠋ᠦ᠍ ᠠᠭᠤᠯᠠ ᠶ᠋ᠢᠨ ᠬᠦᠦ᠂《 ᠬᠠᠭᠠᠨ ᠡᠵᠡᠨ ᠮᠢᠨᠢ ᠥᠭᠡᠷᠡ ᠶᠠᠭᠤ ᠴᠦ᠍ ᠪᠣᠯᠤᠨᠠ᠃ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠶᠠᠭᠠᠬᠢᠵᠤ ᠣᠯᠵᠤ ᠴᠢᠳᠠᠬᠤ ᠪᠣᠢ? ᠪᠢ》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠶᠡᠬᠡ ᠠᠭᠤᠷᠯᠠᠵᠤ《ᠬᠡᠯᠡᠭᠰᠡᠨ ᠦᠭᠡ ᠮᠢᠨᠢ ᠬᠠᠤᠯᠢ ᠪᠠᠢᠳᠠᠭ》 ᠭᠡᠵᠦ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠬᠥᠭᠡᠭᠡᠨ ᠭᠠᠷᠭᠠᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠭᠤᠯᠠ ᠶ᠋ᠢᠨ ᠬᠦᠦ ᠠᠷᠭᠠ ᠦᠭᠡᠢ ᠪᠣᠯᠵᠤ ᠬᠠᠨ ᠭᠠᠷᠤᠳᠢ ᠪᠠᠨ ᠡᠷᠢᠵᠦ ᠢᠷᠡᠭᠰᠡᠨ ᠳ᠋ᠦ᠍᠂ ᠬᠠᠨ ᠭᠠᠷᠤᠳᠢ ᠡᠭᠦᠨ ᠢ᠋ ᠪᠦᠲᠦᠭᠡᠵᠦ ᠴᠢᠳᠠᠨᠠ ᠭᠡᠳ᠂ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠮᠥᠷᠥ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠵᠤ ᠨᠢᠰᠦᠨ ᠶᠠᠪᠤᠭᠰᠠᠭᠠᠷ ᠨᠢᠭᠡᠨ ᠠᠢᠯ ᠳ᠋ᠤ᠌ ᠪᠠᠭᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠠᠢᠯ ᠳ᠋ᠤᠨᠢ ᠡᠮᠡᠭᠡᠨ ᠡᠪᠦᠭᠡᠨ ᠭᠠᠭᠴᠠ ᠥᠬᠢᠨ ᠲᠡᠢ ᠪᠡᠨ ᠰᠠᠭᠤᠵᠤ ᠪᠠᠢᠨᠠ ᠭᠡᠨᠡ᠃
ᠠᠭᠤᠯᠠ ᠶ᠋ᠢᠨ ᠬᠦᠦ ᠣᠷᠣᠵᠤ᠂ ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠨᠳᠦᠯᠴᠡᠵᠦ ᠰᠠᠭᠤᠭᠰᠠᠨ ᠳ᠋ᠤ᠌ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠭᠤᠯᠠ᠄《ᠬᠠᠷᠠ ᠨᠢᠳᠦ ᠲᠡᠢ᠂ ᠪᠣᠷᠣ ᠬᠠᠴᠠᠷ ᠲᠠᠢ ᠬᠦᠦ ᠬᠠᠮᠢᠭᠠ ᠣᠴᠢᠨᠠ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠠᠭᠤᠯᠠ ᠶ᠋ᠢᠨ ᠬᠦᠦ᠄《 ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠵᠤ ᠢᠷᠡᠬᠦ ᠪᠡᠷ ᠶᠠᠪᠤᠵᠤ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍᠂ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠷ᠄《 ᠬᠦᠦ ᠮᠢᠨᠢ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠵᠤ ᠢᠷᠡᠬᠦ ᠳ᠋ᠡᠭᠡᠨ ᠮᠠᠨᠠᠢᠬᠢ ᠶ᠋ᠢ ᠳᠠᠭᠠᠷᠢᠵᠤ ᠢᠷᠡ》 ᠭᠡᠵᠦ ᠠᠭᠤᠯᠠ ᠶ᠋ᠢᠨ ᠬᠦᠦ ᠳ᠋ᠦ᠍ ᠬᠣᠭᠣᠯᠠ ᠪᠤᠳᠠᠭᠠ ᠢᠳᠡᠭᠦᠯᠵᠦ ᠮᠣᠷᠳᠠᠭᠤᠯᠪᠠ᠃
ᠲᠡᠨᠳᠡ ᠡᠴᠡ ᠭᠠᠷᠤᠨ ᠨᠢᠰᠴᠦ ᠶᠠᠪᠤᠭᠰᠠᠭᠠᠷ ᠪᠠᠰᠠ ᠨᠢᠭᠡᠨ ᠠᠢᠯ ᠳ᠋ᠤ᠌ ᠪᠠᠭᠤᠭᠰᠠᠨ ᠳ᠋ᠤ᠌ ᠮᠥᠨ ᠬᠣᠶᠠᠷ ᠬᠥᠭᠰᠢᠨ ᠭᠠᠷᠴᠤ ᠢᠷᠡᠭᠡᠳ᠄《ᠬᠠᠷᠠ ᠨᠢᠳᠦ ᠲᠡᠢ᠂ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠵᠢᠰᠦ ᠲᠡᠢ ᠬᠦᠦ ᠮᠢᠨᠢ ᠬᠠᠮᠢᠭᠠ ᠣᠴᠢᠨᠠ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠄《ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ》 ᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠬᠣᠶᠠᠷ ᠬᠥᠭᠰᠢᠨ᠄《ᠬᠦᠦ ᠮᠢᠨᠢ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠵᠤ ᠡᠷᠭᠢᠬᠦ ᠳ᠋ᠡᠭᠡᠨ ᠠᠪᠤ ᠡᠵᠢ ᠶ᠋ᠢ ᠪᠡᠨ ᠳᠠᠭᠠᠷᠢᠵᠤ ᠢᠷᠡ!》 ᠭᠡᠰᠡᠨ ᠳ᠋ᠦ᠍᠂ ᠠᠭᠤᠯᠠ ᠶ᠋ᠢᠨ ᠬᠦᠦ᠄《ᠴᠢᠩᠭᠢᠶᠡ》 ᠭᠡᠵᠦ ᠴᠢᠨᠠᠭᠰᠢ ᠮᠥᠷᠳᠡᠨ᠂ ᠪᠠᠰᠠ ᠨᠢᠭᠡᠨ ᠠᠢᠯ ᠳ᠋ᠤ᠌ ᠪᠠᠭᠤᠭᠰᠠᠨ ᠳ᠋ᠤ᠌ ᠪᠠᠰᠠ ᠬᠣᠶᠠᠷ ᠬᠥᠭᠰᠢᠨ᠄《ᠬᠠᠮᠢᠭᠠ ᠣᠴᠢᠨᠠ ᠪᠣᠢ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠠᠭᠤᠯᠠ ᠶ᠋ᠢᠨ ᠬᠦᠦ ᠮᠥᠨ᠄《ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍᠂ ᠬᠥᠭᠰᠢᠳ᠄《ᠬᠦᠦ ᠮᠢᠨᠢ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠵᠤ ᠠᠪᠤᠪᠠᠯ ᠡᠭᠦᠨ ᠢ᠋ᠶ᠋ᠡᠷ ᠳᠠᠭᠠᠷᠢᠵᠤ ᠢᠷᠡ!》 ᠭᠡᠵᠦ ᠮᠣᠷᠳᠠᠭᠤᠯᠤᠭᠠᠳ ᠶᠠᠪᠤᠭᠰᠠᠭᠠᠷ ᠶᠠᠪᠤᠭᠰᠠᠭᠠᠷ ᠲᠩᠷᠢ ᠶ᠋ᠢᠨ ᠭᠣᠣᠯ ᠡᠭᠦᠳᠡᠨ ᠳᠡᠭᠡᠷᠡ ᠨᠢ ᠢᠷᠡᠵᠦ ᠪᠠᠭᠤᠭᠰᠠᠨ ᠳ᠋ᠤ᠌ ᠬᠠᠨ ᠭᠠᠷᠤᠳᠢ ᠰᠤᠷᠭᠠᠭᠰᠠᠨ᠄《ᠴᠢ ᠨᠠᠮᠠᠶ᠋ᠢ ᠤᠯᠠᠭᠠᠨ ᠨᠣᠭᠲᠣ ᠪᠠᠷ ᠣᠭᠣᠰᠣᠷᠯᠠᠵᠤ ᠤᠶᠠᠭᠠᠨ ᠤ᠋ ᠲᠥᠪ ᠳᠤᠮᠳᠠ ᠨᠢ ᠤᠶᠠᠭᠠᠷᠠᠢ ᠪᠢ ᠤᠶᠠᠭᠠᠨ ᠳᠡᠭᠡᠷᠡ ᠨᠢ ᠨᠢᠰᠦᠨ ᠪᠣᠰᠤᠨ᠂ ᠨᠢᠰᠦᠨ ᠪᠠᠭᠤᠵᠤ ᠪᠠᠢᠶᠠ᠃ ᠴᠢ ᠣᠷᠣᠵᠤ ᠳᠠᠭᠢᠨᠢᠰ ᠢ᠋ ᠨᠢ ᠭᠤᠶᠤᠬᠤ ᠤᠴᠢᠷ ᠢ᠋ᠶ᠋ᠠᠨ ᠡᠵᠢ ᠳ᠋ᠦ᠍ᠨᠢ ᠬᠡᠯᠡᠵᠦ ᠲᠦᠷᠦᠭᠦᠨ ᠠᠶᠠᠭᠠ ᠴᠠᠢ ᠶ᠋ᠢ ᠨᠢ ᠵᠦᠭᠡᠷ ᠰᠠᠭᠤᠵᠤ ᠤᠤᠭᠤ᠂ ᠬᠣᠶᠠᠳᠤᠭᠠᠷ ᠠᠶᠠᠭᠠ ᠴᠠᠢ ᠶ᠋ᠢ ᠨᠢ ᠥᠨᠳᠡᠢᠯᠭᠡᠵᠦ ᠤᠤᠭᠤ᠂ ᠭᠤᠷᠪᠠᠳᠤᠭᠠᠷ ᠠᠶᠠᠭᠠ ᠴᠠᠢ ᠶ᠋ᠢ ᠨᠢ ᠳᠤᠲᠠᠭᠤ ᠤᠤᠭᠤᠵᠤ ᠭᠠᠷᠴᠤ ᠢᠷᠡ!》 ᠭᠡᠵᠦ ᠰᠤᠷᠭᠠᠭᠠᠳ ᠣᠷᠣᠭᠤᠯᠵᠤ ᠭᠡᠨᠡ᠃
ᠠᠭᠤᠯᠠ ᠶ᠋ᠢᠨ ᠬᠦᠦ ᠴᠥᠮ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠰᠤᠷᠭᠠᠭᠰᠠᠨ ᠢ᠋ᠶ᠋ᠠᠷ ᠬᠢᠵᠦ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍ᠨᠢ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠤ᠋ᠨ ᠡᠵᠢ ᠨᠢ ᠥᠬᠢᠨ ᠢ᠋ᠶ᠋ᠡᠨ ᠳᠠᠭᠤᠳᠠᠵᠤ ᠠᠭᠤᠯᠠ ᠶ᠋ᠢᠨ ᠬᠦᠦ ᠳ᠋ᠦ᠍ ᠲᠤᠰᠢᠶᠠᠭᠰᠠᠨ ᠳ᠋ᠤ᠌ ᠠᠭᠤᠯᠠ ᠶ᠋ᠢᠨ ᠬᠦᠦ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠲᠡᠪᠡᠷᠢᠵᠦ᠂ ᠬᠠᠨ ᠭᠠᠷᠤᠳᠢ ᠳ᠋ᠠᠭᠠᠨ ᠮᠣᠷᠳᠠᠨ ᠨᠢᠰᠴᠦ᠂ ᠤᠳᠠᠭᠰᠠᠨ ᠦᠭᠡᠢ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠬᠤ ᠪᠠᠷ ᠣᠴᠢᠬᠤ ᠦᠶᠡ ᠳ᠋ᠦ᠍᠂ ᠳᠠᠭᠠᠷᠢᠭᠰᠠᠨ ᠠᠢᠯ ᠳ᠋ᠤ᠌ ᠪᠠᠭᠤᠭᠰᠠᠨ ᠳ᠋ᠤ᠌᠂ ᠡᠮᠡᠭᠡᠨ ᠡᠪᠦᠭᠡᠨ ᠬᠣᠶᠠᠭᠤᠯᠠ ᠵᠠ! ᠬᠦᠦ ᠳ᠋ᠡᠭᠡᠨ ᠥᠬᠢᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠶᠠᠪᠤᠭᠤᠯᠤᠶᠠ ᠭᠡᠰᠡᠨ ᠳ᠋ᠦ᠍᠂ ᠥᠬᠢᠨ ᠨᠢ ᠭᠡᠷ ᠡᠴᠡ ᠪᠡᠨ ᠭᠠᠭᠴᠠ ᠨᠢᠭᠡᠨ ᠮᠥᠩᠭᠥᠨ ᠲᠡᠪᠡᠨᠡ ᠠᠪᠴᠤ ᠮᠣᠷᠳᠠᠭᠠᠳ ᠬᠣᠶᠠᠳᠤᠭᠠᠷ ᠠᠢᠯ ᠳ᠋ᠤ᠌ ᠪᠠᠭᠤᠭᠰᠠᠨ ᠳ᠋ᠤ᠌᠂ ᠮᠥᠨ ᠥᠬᠢᠨ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠳ᠋ᠦ᠍᠂ ᠥᠬᠢᠨ ᠨᠢ ᠪᠠᠰᠠ᠂ ᠨᠢᠭᠡᠨ ᠠᠮᠠ ᠶ᠋ᠢᠨ ᠲᠡᠳᠦᠢ ᠰᠢᠷᠠ ᠪᠥᠰ ᠠᠪᠤᠭᠠᠳ ᠮᠣᠷᠳᠠᠵᠤ᠂ ᠪᠠᠰᠠ ᠨᠢᠭᠡᠨ ᠠᠢᠯ ᠳ᠋ᠤᠨᠢ ᠪᠠᠭᠤᠭᠰᠠᠨ ᠳ᠋ᠤ᠌᠂ ᠪᠠᠰᠠ ᠥᠬᠢᠨ ᠢ᠋ᠶ᠋ᠡᠨ ᠥᠭᠭᠦᠭᠰᠡᠨ ᠳ᠋ᠦ᠍ ᠥᠬᠢᠨ ᠨᠢ ᠭᠠᠭᠴᠠ ᠨᠢᠭᠡᠨ ᠪᠠᠭᠠ ᠲᠣᠯᠢ ᠠᠪᠴᠤ ᠲᠠᠪᠤᠭᠤᠯᠠ ᠪᠠᠨ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠨᠢ ᠰᠠᠭᠤᠵᠤ ᠬᠠᠭᠠᠨ ᠤ᠋ ᠣᠷᠳᠣᠨ ᠤ᠋ ᠪᠠᠷᠠᠭᠤᠨ ᠭᠣᠣᠯ ᠤ᠋ᠨ ᠴᠠᠭᠠᠨᠠ ᠨᠢ ᠪᠠᠭᠤᠭᠰᠠᠨ ᠳ᠋ᠤ᠌᠂ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠬᠠᠳᠬᠤᠭᠤᠷ ᠢ᠋ᠶ᠋ᠠᠨ ᠠᠪᠴᠤ ᠬᠣᠭᠣᠰᠣᠨ ᠭᠠᠵᠠᠷ ᠵᠢᠭᠠᠵᠤ ᠬᠥᠰᠢᠭᠡ ᠮᠠᠢᠬᠠᠨ ᠭᠠᠷᠭᠠᠭᠠᠳ ᠬᠣᠭᠣᠯᠠ ᠬᠢᠵᠦ ᠢᠳᠡᠵᠡᠭᠡᠵᠡᠢ᠃
ᠲᠡᠭᠡᠭᠡᠳ ᠠᠭᠤᠯᠠ ᠶ᠋ᠢᠨ ᠬᠦᠦ ᠬᠠᠭᠠᠨ ᠳ᠋ᠤ᠌ ᠢᠷᠡᠵᠦ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠣᠯᠵᠤ ᠢᠷᠡᠪᠡ ᠭᠡᠰᠡᠨ ᠳ᠋ᠦ᠍᠂ ᠬᠠᠲᠤᠨ ᠨᠢ ᠣᠳᠣ ᠶᠠᠭᠠᠬᠢᠪᠠᠴᠤ ᠪᠦᠷ ᠰᠡᠭᠦᠯ ᠦ᠋ᠨ ᠠᠷᠭᠠ ᠪᠠᠷ ᠡᠭᠦᠨ ᠢ᠋ ᠠᠯᠠᠬᠤ ᠦᠭᠡᠢ ᠪᠣᠯ ᠪᠣᠯᠬᠤ ᠦᠭᠡᠢ ᠭᠡᠵᠦ ᠪᠣᠳᠣᠭᠠᠳ ᠬᠠᠭᠠᠨ ᠤ᠋ ᠴᠢᠬᠢᠨ ᠳ᠋ᠦ᠍ᠨᠢ ᠬᠡᠳᠦᠨ ᠦᠭᠡ ᠰᠢᠪᠡᠨᠡᠭᠰᠡᠨ ᠳ᠋ᠦ᠍ ᠬᠠᠭᠠᠨ᠄《ᠵᠠ! ᠮᠠᠷᠭᠠᠰᠢ ᠪᠢ ᠬᠣᠢᠲᠤ ᠠᠭᠤᠯᠠᠨ ᠳᠡᠭᠡᠷᠡ ᠣᠴᠢᠵᠤ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠪᠠᠭᠤᠯᠭᠠᠨ ᠠᠪᠬᠤ ᠲᠤᠯᠠ ᠴᠢ ᠡᠨᠡ ᠨᠢᠭᠡᠨ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ ᠬᠣᠢᠲᠤ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠮᠥᠩᠭᠥᠨ ᠪᠠᠭᠠᠨᠠ ᠲᠠᠢ ᠰᠢᠷᠠ ᠲᠣᠷᠭᠠ ᠪᠠᠷ ᠪᠦᠷᠢᠭᠰᠡᠨ ᠣᠪᠣᠭᠠ ᠪᠣᠰᠬᠠᠵᠤ ᠲᠡᠭᠦᠨ ᠦ᠌ ᠡᠮᠦᠨᠡ ᠨᠢ ᠰᠢᠯ ᠦ᠋ᠨ ᠬᠣᠲᠠ ᠪᠠᠢᠭᠤᠯ᠂ ᠦᠭᠡᠢ ᠪᠣᠯ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠤᠨᠠ》 ᠭᠡᠵᠦ ᠶᠠᠪᠤᠭᠤᠯᠤᠭᠰᠠᠨ ᠳ᠋ᠤ᠌ ᠠᠭᠤᠯᠠ ᠶ᠋ᠢᠨ ᠬᠦᠦ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠲᠤ᠌ ᠡᠨᠡ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ᠄《ᠪᠣᠯᠤᠨᠠ᠂ ᠬᠣᠩᠭᠣᠷ ᠮᠢᠨᠢ ᠤᠨᠲᠠᠭᠠᠷᠠᠢ》 ᠭᠡᠵᠦ ᠰᠥᠨᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠲᠡᠷᠡ ᠭᠤᠷᠪᠠᠨ ᠥᠬᠢᠨ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠬᠣᠢᠲᠤ ᠠᠭᠤᠯᠠ ᠶ᠋ᠢᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠴᠤ ᠬᠡᠳᠦᠨ ᠬᠡᠰᠡᠭ ᠴᠢᠯᠠᠭᠤ ᠣᠪᠣᠭᠠᠯᠠᠵᠤ ᠭᠣᠣᠯ ᠳ᠋ᠤᠨᠢ ᠲᠡᠪᠡᠨᠡ ᠪᠡᠨ ᠬᠠᠳᠬᠤᠵᠤ ᠠᠷᠤ ᠳ᠋ᠤᠨᠢ ᠨᠢᠭᠡᠨ ᠠᠮᠠ ᠰᠢᠷᠠ ᠪᠥᠰ ᠢ᠋ᠶ᠋ᠡᠨ ᠳᠡᠯᠭᠡᠨ ᠲᠠᠯᠪᠢᠭᠠᠳ ᠳᠣᠯᠣᠭᠠᠨ ᠠᠯᠬᠤᠮ ᠤ᠋ᠨ ᠡᠮᠦᠨᠡ ᠨᠢ ᠲᠣᠯᠢ ᠪᠠᠨ ᠪᠤᠯᠠᠵᠤ ᠬᠠᠷᠢᠪᠠ ᠭᠡᠨᠡ᠃
ᠮᠠᠷᠭᠠᠰᠢ ᠨᠢ ᠪᠣᠯᠬᠤ ᠳ᠋ᠤ᠌ ᠬᠣᠢᠲᠤ ᠠᠭᠤᠯᠠᠨ ᠤ᠋ ᠳᠡᠭᠡᠷᠡ ᠨᠢ ᠮᠥᠩᠭᠥᠨ ᠪᠠᠭᠠᠨᠠ ᠲᠠᠢ ᠰᠢᠷᠠ ᠲᠣᠷᠭᠠᠨ ᠪᠦᠷᠢᠶᠡᠰᠦ ᠲᠡᠢ ᠰᠢᠯ ᠦ᠋ᠨ ᠬᠣᠲᠠ ᠲᠠᠢ ᠣᠪᠣᠭᠠ ᠪᠠᠢᠭᠤᠯᠤᠭᠳᠠᠭᠰᠠᠨ ᠳ᠋ᠤ᠌᠂ ᠬᠠᠭᠠᠨ ᠬᠠᠲᠤᠨ ᠬᠣᠶᠠᠭᠤᠯᠠ ᠪᠠᠨ ᠬᠡᠯᠡᠬᠦ ᠦᠭᠡ ᠦᠭᠡᠢ ᠪᠣᠯᠵᠤ ᠴᠡᠷᠢᠭ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠳᠠᠭᠠᠭᠤᠯᠵᠤ ᠰᠢᠭᠤᠳ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠪᠠᠷᠢᠬᠤ ᠪᠠᠷ ᠢᠷᠡᠭᠰᠡᠨ ᠳ᠋ᠦ᠍ ᠡᠳ᠋ ᠵᠠᠰᠠᠯ ᠢ᠋ᠶ᠋ᠠᠨ ᠵᠥᠭᠡᠭᠡᠵᠦ ᠣᠪᠣᠭᠠᠨ ᠤ᠋ ᠳᠡᠷᠭᠡᠳᠡ ᠵᠣᠭᠰᠣᠭᠰᠠᠨ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠠᠭᠤᠯᠠ ᠶ᠋ᠢᠨ ᠬᠦᠦ ᠶ᠋ᠢ ᠬᠠᠷᠪᠤ ᠭᠡᠰᠡᠨ ᠳ᠋ᠦ᠍᠂ ᠠᠭᠤᠯᠠ ᠶ᠋ᠢᠨ ᠬᠦᠦ ᠭᠠᠩ ᠪᠣᠯᠣᠳ ᠨᠤᠮᠤ ᠪᠠᠨ ᠳᠡᠯᠢᠵᠦ ᠪᠣᠷᠣᠭᠠᠨ ᠰᠤᠮᠤ ᠪᠠᠨ ᠲᠠᠯᠪᠢᠭᠰᠠᠨ ᠳ᠋ᠤ᠌ ᠰᠢᠯ ᠦ᠋ᠨ ᠬᠣᠲᠠ ᠨᠢ ᠨᠤᠷᠠᠵᠤ ᠬᠥᠯ ᠦᠭᠡᠢ ᠭᠦᠨ ᠤᠰᠤ ᠪᠣᠯᠤᠭᠠᠳ ᠬᠠᠭᠠᠨ ᠬᠠᠲᠤᠨ ᠲᠠᠢ ᠬᠣᠶᠠᠭᠤᠯᠠ ᠶ᠋ᠢ ᠤᠰᠤ ᠪᠠᠷ ᠴᠠᠴᠠᠭᠠᠵᠤ ᠠᠯᠠᠭᠠᠳ᠂ ᠠᠭᠤᠯᠠ ᠶ᠋ᠢᠨ ᠬᠦᠦ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠢ᠋ ᠡᠬᠡᠨᠡᠷ ᠢ᠋ᠶ᠋ᠡᠨ ᠪᠣᠯᠭᠠᠵᠤ ᠠᠪᠤᠭᠠᠳ᠂ ᠡᠴᠢᠭᠡ ᠡᠬᠡ ᠪᠡᠨ ᠠᠪᠴᠢᠷᠠᠵᠤ ᠠᠰᠠᠷᠠᠨ ᠡᠯᠪᠡᠷᠢᠨ ᠬᠦᠨᠳᠦᠯᠡᠵᠦ᠂ ᠬᠠᠨ ᠭᠠᠷᠤᠳᠢ ᠶ᠋ᠢᠨ ᠭᠤᠷᠪᠠᠨ ᠥᠬᠢᠨ ᠢ᠋ ᠠᠪᠴᠢᠷᠠᠵᠤ᠂ ᠬᠠᠨ ᠭᠠᠷᠤᠳᠢ ᠶ᠋ᠢ ᠬᠠᠮᠤᠭ ᠰᠠᠢᠨ ᠢ᠋ᠶ᠋ᠠᠷ ᠲᠡᠵᠢᠭᠡᠵᠦ᠂ ᠬᠠᠷᠢ ᠶ᠋ᠢᠨ ᠲᠡᠷᠡ ᠭᠤᠷᠪᠠᠨ ᠥᠬᠢᠳ ᠢ᠋ ᠲᠩᠷᠢ ᠶ᠋ᠢᠨ ᠳᠠᠭᠢᠨᠢᠰ ᠤ᠋ᠨ ᠠᠶᠠᠭᠠᠴᠢᠨ ᠥᠬᠢᠨ ᠪᠣᠯᠭᠠᠪᠠ ᠭᠡᠨᠡ᠃ ᠴᠢᠩᠭᠢᠭᠡᠳ ᠠᠭᠤᠯᠠᠨ ᠤ᠋ ᠬᠦᠦ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ᠨᠢ ᠰᠠᠭᠤᠵᠤ ᠬᠠᠮᠤᠭ ᠠᠷᠠᠳ ᠲᠠᠭᠠᠨ ᠮᠠᠭᠲᠠᠭᠳᠠᠵᠤ᠂ ᠠᠯᠢ ᠰᠠᠢᠨ ᠰᠠᠢᠬᠠᠨ ᠢ᠋ ᠪᠠᠳᠠᠷᠠᠭᠤᠯᠵᠤ᠂ ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠵᠢᠷᠭᠠᠪᠠ ᠭᠡᠨᠡ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂
ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠪᠠᠯᠤᠰᠦᠭ᠂ ᠬᠡᠯᠡᠰᠣᠶᠣᠯ