ᠰᠢᠯᠦᠭ ᠪᠠ ᠰᠡᠳᠬᠢᠯ-ᠪᠦ᠊· ᠳᠠᠯᠠᠨᠲᠠᠢШүлэг ба сэтгэл-Бү·Далантай
352ᠰᠢᠯᠦᠭ ᠪᠠ ᠰᠡᠳᠬᠢᠯ
ᠵᠣᠬᠢᠶᠠᠭᠴᠢ᠄ ᠪᠦ᠊· ᠳᠠᠯᠠᠨᠲᠠᠢ
ᠨᠠᠪᠴᠢᠲᠤ ᠨᠣᠭᠣᠭᠠᠨ ᠲᠠᠯᠠ ᠮᠢᠨᠢ
ᠮᠥᠷ ᠢ᠋ ᠲᠠᠮᠠᠭᠠᠯᠠᠨ ᠬᠠᠳᠠᠭᠠᠯᠠᠵᠤ
ᠨᠠᠭᠤᠷ ᠤ᠋ᠨ ᠲᠤᠩᠭᠠᠯᠠᠭ ᠬᠡᠯᠬᠢᠶᠡ ᠨᠢ
ᠨᠢᠭᠤᠷ ᠢ᠋ ᠵᠢᠷᠤᠭᠯᠠᠨ ᠬᠣᠴᠣᠷᠤᠭᠰᠠᠨ
ᠮᠠᠷᠲᠠᠵᠤ ᠴᠢᠳᠠᠳᠠᠭ ᠦᠭᠡᠢ ᠨᠤᠲᠤᠭ ᠮᠢᠨᠢ
ᠨᠠᠮᠤᠷ ᠲᠤ᠌ ᠪᠠᠨ ᠰᠢᠷᠭᠠᠯᠲᠤᠨ ᠡᠷᠢᠭᠳᠡᠬᠦ ᠶᠦᠮ
ᠮᠠᠩᠬᠠᠨ ᠤ᠋ ᠲᠣᠷᠯᠣᠭ ᠢ᠋ᠶ᠋ᠠᠨ ᠵᠠᠢᠳᠠᠯᠠᠭᠠᠳ
ᠨᠠᠰᠤ ᠮᠢᠨᠢ ᠪᠠᠭᠠ ᠳ᠋ᠤ᠌ ᠪᠠᠨ ᠪᠤᠴᠠᠬᠤ ᠶᠤᠮ
ᠬᠡᠭᠡᠷᠡ ᠶ᠋ᠢᠨ ᠰᠢᠪᠠᠭᠤᠳ ᠤ᠋ᠨ ᠵᠢᠷᠭᠢᠭᠡᠨ ᠳ᠋ᠦ᠍ ᠨᠢ
ᠬᠠᠢᠷᠠ ᠶ᠋ᠢᠨ ᠪᠣᠯᠵᠣᠭᠠ ᠤᠶᠠᠭᠳᠠᠳᠠᠭ
ᠵᠡᠭᠡᠷᠡ ᠶ᠋ᠢᠨ ᠢᠨᠵᠠᠭᠠ ᠤᠮᠳᠠᠯᠠᠳᠠᠭ
ᠬᠠᠢᠯ ᠤ᠋ᠨ ᠤᠰᠤ ᠨᠢ ᠮᠡᠯᠮᠡᠷᠡᠳᠡᠭ
ᠲᠤᠶᠠᠭᠠ ᠰᠠᠴᠤᠭᠰᠠᠨ ᠡᠯᠡᠰᠦᠨ ᠦ᠌ ᠪᠡᠨ
ᠳᠠᠭᠤᠤ ᠲᠠᠢ ᠰᠠᠯᠬᠢ ᠪᠠᠷ ᠠᠷᠴᠢᠭᠤᠯᠵᠦ
ᠲᠣᠷᠭᠠᠨ ᠬᠠᠯᠭᠢᠶᠠ ᠴᠤᠪᠤᠷᠠᠭᠤᠯᠤᠭᠰᠠᠨ
ᠲᠣᠰᠣᠨ ᠬᠤᠷᠠ ᠳ᠋ᠤ᠌ ᠨᠢ ᠤᠬᠢᠶᠠᠭᠳᠠᠳᠠᠭ
ᠲᠣᠮᠣᠭᠠ ᠦᠭᠡᠢ ᠨᠠᠰᠤᠨ ᠳ᠋ᠤ᠌ ᠪᠠᠨ
ᠲᠤᠭᠤᠯᠤᠭᠰᠠᠨ ᠰᠠᠢᠬᠠᠨ ᠳᠤᠷᠠᠳᠬᠠᠯ ᠢ᠋ᠶ᠋ᠠᠨ ᠳᠣᠮᠤᠭᠰᠢᠭᠤᠯᠵᠤ
ᠲᠣᠭᠠ ᠲᠠᠢ ᠨᠠᠰᠤᠨ ᠤ᠋ ᠠᠶᠠᠨ ᠳ᠋ᠤ᠌ ᠪᠠᠨ
ᠰᠠᠨᠴᠢᠭ ᠪᠤᠭᠤᠷᠤᠯᠬᠠᠨ ᠵᠢᠪᠬᠤᠭᠠᠵᠢᠨᠠ
ᠡᠩᠬᠦᠷᠡᠢᠯᠡᠵᠦ ᠲᠣᠷᠨᠢᠭᠤᠯᠤᠭᠰᠠᠨ ᠨᠤᠲᠤᠭ ᠠ᠋ᠴᠠ ᠪᠠᠨ
ᠡᠮᠵᠡᠭᠯᠡᠨ ᠬᠠᠢᠯᠵᠤ ᠮᠣᠷᠳᠠᠬᠤ ᠳ᠋ᠤ᠌ ᠪᠠᠨ
ᠲᠠᠯᠠ ᠰᠢᠭ᠋ ᠰᠡᠳᠬᠢᠯ ᠲᠡᠢ ᠠᠷᠠᠳ ᠠ᠋ᠴᠠ ᠪᠠᠨ
ᠲᠠᠨᠢᠬᠤ ᠦᠭᠡᠢ ᠶᠦᠮ ᠰᠢᠭ ᠰᠠᠯᠤᠯᠴᠠᠬᠤ ᠳ᠋ᠤ᠌ ᠪᠠᠨ
ᠨᠠᠷᠠ ᠨᠢ ᠨᠠᠯᠠᠭᠠᠷ ᠥᠨᠳᠥᠷᠯᠢᠭ ᠦ᠋ᠨ
ᠬᠠᠯᠠᠭᠤᠨ ᠰᠠᠯᠬᠢ ᠪᠠᠷ ᠦᠨᠦᠰᠦᠭᠦᠯᠵᠦ
ᠰᠠᠷᠠ ᠨᠢ ᠲᠡᠷᠭᠡᠯ ᠬᠢᠯᠢ ᠶ᠋ᠢᠨ
ᠰᠥᠨᠢ ᠶ᠋ᠢᠨ ᠮᠠᠨᠠᠭᠠᠨ ᠳ᠋ᠤ᠌ ᠬᠠᠨᠠᠢᠬᠤ ᠳ᠋ᠤ᠌
ᠦᠳᠡᠰᠢ ᠶ᠋ᠢᠨ ᠣᠭᠲᠠᠷᠭᠤᠢ ᠪᠠᠨ ᠮᠠᠨᠠᠨ
ᠣᠳᠣᠳ ᠨᠢ ᠭᠢᠯᠠᠯᠵᠠᠨ ᠰᠢᠪᠡᠨᠡᠳᠡᠭ ᠪᠠᠢᠯᠠ
ᠦᠷ ᠦ᠋ᠨ ᠴᠣᠯᠮᠣᠨ ᠢ᠋ ᠠᠴᠢᠶᠠᠯᠠᠨ
ᠠᠳᠤᠭᠤᠳ ᠨᠢ ᠳᠣᠷᠭᠢᠯᠳᠤᠨ ᠪᠡᠯᠴᠢᠳᠡᠭ ᠪᠠᠢᠯᠠ
ᠬᠦᠯᠦᠭ ᠦ᠋ᠨ ᠶ᠋ᠢᠡᠨ ᠰᠢᠨᠳᠠᠰᠤ ᠶ᠋ᠢ ᠰᠣᠷᠢᠭᠰᠠᠨ
ᠬᠥᠭᠡᠷᠦᠬᠦᠢ ᠠᠪᠤ ᠮᠢᠨᠢ ᠬᠠᠷᠠᠭᠳᠠᠳᠠᠭ ᠪᠠᠢᠯᠠ
ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠴᠢᠮᠡᠭ ᠨᠢ ᠪᠣᠯᠤᠭᠰᠠᠨ
ᠬᠡᠭᠡᠨᠴᠢᠷ ᠡᠵᠢ ᠮᠢᠨᠢ ᠰᠠᠨᠠᠭᠳᠠᠳᠠᠭ ᠪᠠᠢᠯᠠ
ᠬᠠᠷᠪᠤᠭᠰᠠᠨ ᠰᠣᠯᠢᠷ ᠠᠪᠤ ᠶ᠋ᠢᠨ ᠢ᠋ᠶ᠋ᠡᠨ
ᠬᠠᠲᠠᠭᠤ ᠶᠣᠰᠣᠨ ᠤ᠋ ᠬᠡᠯᠲᠡᠷᠬᠡᠢ
ᠬᠠᠯᠢᠭᠰᠠᠨ ᠲᠡᠭᠷᠢ ᠡᠵᠢ ᠶ᠋ᠢᠨ ᠢ᠋ᠶ᠋ᠡᠨ
ᠬᠠᠯᠠᠭᠤᠨ ᠴᠢᠰᠤᠨ ᠤ᠋ ᠲᠠᠰᠤᠷᠬᠠᠢ
ᠠᠬᠠ ᠡᠭᠡᠴᠢ ᠳᠡᠭᠦᠦ ᠳᠠᠶᠠᠭᠠᠷ ᠢ᠋ᠶ᠋ᠠᠨ
ᠠᠮᠤᠭᠤᠯᠠᠩ ᠲᠡᠩᠬᠡᠯᠡᠭᠦᠨ ᠴᠡᠩᠭᠡᠯᠳᠦᠵᠦ
ᠦᠷᠡ ᠠᠴᠢ ᠨᠠᠷ ᠥᠭᠡᠳᠡ ᠲᠡᠢ
ᠥᠨᠢᠷ ᠵᠢᠷᠭᠠᠯ ᠢ᠋ᠶ᠋ᠠᠷ ᠪᠠᠶᠠᠰᠤᠯᠳᠤᠨᠠᠮ
ᠣᠩᠭᠣᠨ ᠴᠡᠩᠬᠡᠷ ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ
ᠣᠭᠣᠨᠣ ᠶ᠋ᠢᠨ ᠰᠦᠷᠦᠭ ᠢ᠋ ᠰᠠᠷᠠᠪᠴᠢᠯᠠᠨ
ᠬᠣᠩᠬᠣᠨ ᠳᠠᠭᠤᠨ ᠢ᠋ᠶ᠋ᠠᠷ ᠬᠣᠴᠣᠷᠭᠠᠳᠠᠭ
ᠬᠣᠮ ᠲᠠᠢ ᠲᠡᠮᠡᠭᠡᠳ ᠢ᠋ᠶ᠋ᠡᠨ ᠦᠭᠡᠢᠯᠡᠨ
ᠲᠦᠪᠰᠢᠨ ᠲᠡᠨᠢᠭᠡᠷ ᠲᠠᠯᠠ ᠮᠢᠨᠢ
ᠲᠥᠷᠥᠯᠬᠢ ᠵᠢᠰᠦ ᠪᠡᠨ ᠪᠤᠯᠢᠶᠠᠭᠳᠠᠬᠤ ᠳ᠋ᠤ᠌
ᠳᠥᠴᠢᠨ ᠵᠢᠯ ᠦ᠋ᠨ ᠮᠥᠷᠥᠭᠡᠳᠦᠯ ᠳ᠋ᠦ᠍ ᠮᠢᠨᠢ
ᠳᠥᠷᠦᠭᠡᠨ ᠳᠠᠭᠤᠨ ᠬᠠᠩᠭᠢᠨᠠᠭᠰᠠᠨ
ᠰᠠᠴᠤᠷᠠᠨ ᠭᠡᠷᠡᠯᠳᠡᠬᠦ ᠨᠤᠲᠤᠭ ᠤ᠋ᠨ ᠮᠢᠨᠢ
ᠰᠠᠯᠬᠢ ᠬᠥᠰᠢᠭᠡᠯᠡᠭᠰᠡᠨ ᠬᠥᠷᠥᠰᠥ ᠡᠴᠡ
ᠰᠠᠭᠠᠯᠢ ᠰᠦᠨ ᠦ᠌ ᠦᠨᠦᠷ ᠲᠡᠢ
ᠰᠠᠢᠬᠠᠨ ᠵᠠᠬᠢᠶᠠ ᠰᠣᠯᠣᠩᠭᠠᠷᠠᠬᠤ ᠳ᠋ᠤ᠌
ᠡᠯᠡᠰᠦᠨ ᠪᠣᠢᠲᠣᠭ ᠲᠠᠢ ᠥᠰᠦᠭᠡᠳ
ᠡᠪᠦᠭᠡᠷᠡᠵᠦ ᠶᠠᠪᠤᠭᠠ ᠨᠢᠭᠡ ᠬᠥᠮᠦᠨ
ᠡᠬᠡ ᠬᠠᠲᠤᠨ ᠤ᠋ ᠤᠷᠤᠰᠬᠠᠯ ᠴᠢᠩᠨᠠᠨ
ᠡᠯᠢᠭᠡᠨ ᠰᠠᠳᠤᠨ ᠢ᠋ᠶ᠋ᠠᠨ ᠮᠥᠷᠥᠭᠡᠳᠬᠦ ᠳ᠋ᠦ᠍ ᠪᠡᠨ
ᠪᠢᠷ ᠪᠡᠬᠡ ᠶ᠋ᠢ ᠢᠨᠠᠭᠰᠢᠭᠤᠯᠤᠨ ᠪᠠᠢᠵᠤ
ᠰᠡᠳᠬᠢᠯ ᠢ᠋ᠶ᠋ᠡᠨ ᠳᠡᠯᠭᠡᠨ ᠰᠢᠩᠭᠡᠵᠦ ᠪᠠᠢᠨᠠ
ᠪᠢᠯᠢᠭ ᠣᠶᠤᠨ ᠢ᠋ᠶ᠋ᠠᠨ ᠢᠳᠡᠭᠡᠰᠢᠭᠦᠯᠦᠨ
ᠰᠢᠯᠦᠭ ᠢ᠋ᠶ᠋ᠡᠨ ᠬᠡᠯᠬᠢᠭᠡᠳ ᠨᠢᠰᠬᠡᠵᠦ ᠪᠠᠢᠨᠠ!
ᠰᠦᠨ ᠰᠠᠴᠤᠯᠢ 《 ᠬᠡg》 ᠬᠣᠯᠪᠣᠭᠠ ᠠ᠋ᠴᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ᠬᠠᠰᠪᠠᠭᠠᠲᠤᠷ᠂ ᠥᠷᠭᠡᠨᠳᠠᠯᠠᠢ᠂ ᠽᠠᠨᠳᠠᠨ4. ᠲᠡᠮᠦᠷ᠂ᠡᠷᠳᠡᠨᠢᠴᠢᠮᠡᠭ᠂ᠨᠠᠷᠠᠨᠲᠣᠭᠣᠰ᠂ᠰᠦᠬᠡ᠂ᠰ·ᠣᠶᠤᠨᠴᠡᠴᠡᠭ᠂ᠪᠠᠶᠠᠨᠪᠢᠯᠢᠭ᠌᠂ᠡᠷᠳᠡᠨᠢᠴᠡᠴᠡᠭ᠂ᠣᠶᠤᠨᠴᠢᠮᠡᠭ᠂ ᠰᠢᠵᠢᠷᠮᠠᠨᠳᠤᠯᠠ᠂ᠠᠯᠲᠠᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠨᠠ᠊· ᠴᠠᠭᠠᠨ᠂ ᠨᠠᠷᠠᠨᠲᠣᠭᠣᠰ᠂ ᠣᠳᠬᠠᠨᠰᠣᠠ