ᠮᠤᠯᠤᠨ ᠲᠣᠶ᠋ᠢᠨ ᠡᠬᠡ ᠶ᠋ᠢᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠤᠭᠰᠠᠨ ᠲᠣᠣᠯᠢ - ᠭᠤᠷᠪᠠ - ᠰ· ᠠᠯᠲᠠᠨᠳᠤᠭᠤᠯᠭᠠ ᠨᠠᠶ᠋ᠢᠷᠠᠭᠤᠯᠪᠠ Молон тойн эхийн ачийг харуулсан тууль - 3 - С· Алтантуулга найруулав
191ᠮᠤᠯᠤᠨ ᠲᠣᠶ᠋ᠢᠨ ᠡᠬᠡ ᠶ᠋ᠢᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠤᠭᠰᠠᠨ ᠲᠣᠣᠯᠢ - ᠭᠤᠷᠪᠠ
– ᠦᠷᠭᠦᠯᠵᠢᠯᠡᠯ – 3
ᠬᠠᠳᠠᠨ ᠠ᠋ᠴᠠ ᠬᠠᠲᠠᠭᠤ᠂
ᠠᠭᠤᠯᠠᠨ ᠠ᠋ᠴᠠ ᠬᠦᠨᠳᠦ
ᠬᠡᠨ ᠬᠥᠮᠦᠨ ᠵᠥᠷᠢᠴᠡᠪᠡᠰᠦ
ᠶᠢᠰᠦᠨ ᠲᠠᠮᠤ ᠶ᠋ᠢᠨ ᠢᠷᠣᠭᠠᠷ ᠲᠤ
ᠢᠷᠣᠠ ᠶ᠋ᠢᠨ ᠮᠠᠭᠤ ᠪᠠᠷ ᠦᠬᠦᠮᠦᠢ᠃
ᠪᠤᠰᠢᠭᠤᠬᠠᠨ ᠵᠠᠢᠯᠠ!
ᠪᠤᠷᠤᠭᠤᠯᠠᠨ ᠳᠠᠯᠳᠢᠷᠠ!
ᠨᠠᠢᠵᠠ ᠴᠢᠨᠢ ᠭᠤᠶᠤᠰᠤᠭᠠᠢ᠂ ᠭᠤᠶᠤᠰᠤᠭᠠᠢ!》 ᠭᠡᠳ
ᠡᠪᠦᠳᠦᠭ ᠨᠤᠭᠤᠯᠤᠨ
ᠥᠯᠮᠡᠢ ᠳᠠᠷᠤᠵᠤ᠂
ᠥᠷᠭᠡᠨ ᠨᠢᠷᠤᠭᠤ ᠪᠥᠬᠥᠢᠨ
ᠦᠰᠦᠲᠦ ᠲᠡᠷᠢᠭᠦᠨ ᠮᠥᠷᠭᠥᠬᠦᠶᠡ᠄
ᠬᠣᠶᠠᠷ ᠨᠠᠢᠵᠠ ᠠᠨᠤ
ᠬᠣᠷᠣᠮᠬᠠᠨ ᠵᠠᠭᠤᠷᠠ
ᠬᠤᠢ ᠲᠠᠲᠠᠭᠤᠯᠤᠨ
ᠬᠣᠯᠠ ᠳᠠᠯᠳᠢᠷᠠᠪᠠ᠃
ᠠᠨᠳᠠ ᠳ᠋ᠠᠭᠠᠨ ᠠᠮᠠᠷᠠᠭ
ᠠᠲᠠᠭᠠᠲᠠᠨ ᠳ᠋ᠤ᠌ ᠬᠣᠷᠣᠰᠤᠯ ᠲᠠᠢ
ᠬᠤᠸᠠᠩ ᠴᠤᠤ ᠪᠠᠭᠠᠲᠤᠷ
ᠲᠡᠷᠡ ᠳᠣᠣᠷᠠ ᠪᠠᠨ
ᠠᠭᠤᠷ ᠣᠮᠣᠭ ᠲᠥᠷᠥᠵᠦ
ᠠᠭᠤᠰᠬᠢ ᠵᠢᠷᠦᠬᠡ ᠳᠡᠯᠪᠡᠷᠡᠨ᠂
ᠰᠢᠷᠪᠥᠰᠥ ᠪᠤᠯᠴᠢᠩ ᠵᠠᠩᠭᠢᠷᠠᠵᠤ
ᠰᠢᠲᠦ ᠵᠠᠭᠤᠨ ᠬᠢᠯᠢᠩᠨᠡᠵᠦ᠂
ᠬᠥᠬᠡ ᠯᠤᠤ ᠶ᠋ᠢᠨ ᠬᠤᠪᠢᠯᠭᠠᠨ
ᠬᠥᠩᠭᠡᠨ ᠰᠠᠭᠠᠷᠠᠯ ᠳ᠋ᠠᠭᠠᠨ ᠠᠯᠠᠪᠬᠢᠨ᠂
ᠠᠭᠤᠯᠠ ᠭᠠᠩᠭᠠ ᠪᠠᠷ ᠬᠠᠷᠠᠢᠯᠭᠠᠨ
ᠤᠲᠤᠭᠠ ᠮᠠᠨᠠᠨ ᠲᠠᠲᠠᠭᠤᠯᠤᠭᠰᠠᠭᠠᠷ᠂
ᠡᠭᠦᠷ ᠡᠭᠦᠷ ᠱᠤᠯᠤᠮ ᠤᠷᠤᠭᠤ
ᠪᠥᠭᠡᠮ ᠪᠥᠭᠡᠮ ᠳᠠᠢᠰᠤᠨ ᠤᠷᠤᠭᠤ
ᠪᠦᠷᠭᠦᠳ ᠰᠢᠭ ᠨᠢᠰᠦᠨ ᠣᠴᠢᠵᠤ
ᠱᠣᠩᠬᠣᠷ ᠰᠢᠭ᠋ ᠱᠤᠮᠪᠠᠨ ᠬᠦᠷᠦᠭᠡᠳ
ᠬᠠᠷᠠᠴᠤ ᠠᠷᠠᠳ ᠢ᠋ᠶ᠋ᠠᠷ ᠣᠪᠯᠠᠵᠤ
ᠬᠠᠰᠢᠶᠠ ᠬᠦᠷᠢᠶᠡᠨ ᠳ᠋ᠦ᠍ ᠨᠢᠭᠤᠭᠳᠠᠭᠰᠠᠨ᠂
ᠬᠠᠭᠠᠨ ᠲᠥᠷᠥ ᠶ᠋ᠢ ᠮᠡᠬᠡᠯᠡᠵᠦ
ᠬᠠᠮᠰᠠᠭᠠ ᠰᠦᠯᠪᠡᠭᠡ ᠪᠠᠢᠭᠤᠯᠤᠭᠰᠠᠨ᠂
ᠨᠣᠮᠣᠬᠠᠨ ᠠᠷᠠᠳ ᠢ᠋ᠶ᠋ᠠᠷ ᠣᠪᠯᠠᠵᠤ
ᠨᠤᠲᠤᠭ ᠰᠢᠷᠣᠢ ᠶ᠋ᠢ ᠲᠠᠯᠬᠠᠳᠠᠭᠰᠠᠨ᠂
ᠨᠣᠶᠠᠨ ᠲᠥᠷᠥ ᠶ᠋ᠢ ᠮᠡᠬᠡᠯᠡᠵᠦ
ᠨᠢᠭᠤᠴᠠ ᠬᠣᠣᠷ ᠢ᠋ ᠦᠢᠯᠡᠳᠦᠭᠰᠡᠨ᠂
ᠠᠯᠢ ᠨᠢᠭᠡ ᠪᠡᠷ ᠨᠢ
ᠢᠯᠳᠦ ᠶ᠋ᠢᠨ ᠢ᠋ᠶ᠋ᠡᠨ
ᠢᠷ ᠢ᠋ ᠨᠢ ᠮᠢᠯᠢᠶᠠᠵᠤ
ᠢᠳᠡ ᠶ᠋ᠢ ᠨᠢ ᠰᠢᠯᠭᠠᠨᠠ᠃
ᠰᠡᠯᠡᠮᠡ ᠶ᠋ᠢᠨ ᠢ᠋ᠶ᠋ᠡᠨ
ᠰᠡᠪ ᠢ᠋ ᠨᠢ ᠳᠠᠷᠤᠵᠤ
ᠰᠣᠴᠢᠶᠠ ᠶ᠋ᠢ ᠨᠢ ᠭᠠᠷᠭᠠᠨᠠ ᠭᠡᠮᠡᠨ
ᠪᠣᠳᠣᠭᠰᠠᠨ ᠪᠣᠳᠣᠯ ᠢ᠋ᠶ᠋ᠠᠨ
ᠪᠤᠯᠴᠢᠩ ᠳ᠋ᠠᠭᠠᠨ ᠵᠠᠩᠭᠢᠷᠠᠭᠤᠯᠵᠤ᠂
ᠪᠤᠯᠭᠢᠭᠰᠠᠨ ᠠᠭᠲᠠ ᠪᠠᠨ
ᠪᠤᠷᠤᠭᠤᠰᠢ ᠪᠠᠨ ᠵᠠᠯᠠᠵᠤ᠂
ᠠᠷᠵᠠᠭᠠᠷ ᠨᠢᠭᠡᠨ ᠬᠥᠭᠰᠢᠨ ᠨᠠᠷᠠᠰᠤ ᠶ᠋ᠢ
ᠠᠰ ᠳᠤᠮᠳᠠᠭᠤᠷ ᠨᠢ ᠲᠠᠰᠤ ᠴᠠᠪᠴᠢᠭᠰᠠᠨᠠ᠂
ᠡᠨᠡ ᠮᠣᠳᠣ
《ᠠᠶᠠ》 ᠭᠡᠮᠡᠨ
ᠳᠠᠭᠤ ᠲᠠᠯᠪᠢᠨ ᠪᠠᠷᠬᠢᠷᠠᠵᠤ ᠠᠪᠤᠭᠠᠳ
ᠰᠠᠯᠠᠭᠠ ᠨᠠᠮᠠᠭᠠ ᠠᠨᠤ
ᠰᠠᠭᠯᠠᠢᠨ ᠯᠦᠭᠯᠦᠢᠨ ᠪᠠᠭᠤᠵᠤ᠂
ᠰᠡᠯᠡᠮᠡ ᠶ᠋ᠢᠨ ᠢᠷ ᠡᠴᠡ
ᠴᠢᠰᠤ ᠪᠤᠷᠭᠢᠨ ᠳᠤᠰᠤᠯᠠᠵᠤ᠂
ᠬᠥᠭᠰᠢᠨ ᠮᠣᠳᠣᠨ ᠤ᠋ ᠬᠥᠨᠳᠡᠢ ᠡᠴᠡ
ᠬᠥᠭᠡᠷᠦᠬᠦᠢ ᠬᠣᠶᠠᠷ ᠬᠥᠮᠦᠨ ᠦ᠌ ᠲᠣᠯᠣᠭᠠᠢ
ᠲᠦᠰ ᠨᠢᠰ ᠪᠥᠮᠪᠥᠷᠢᠨ ᠤᠨᠠᠵᠤ ᠢᠷᠡᠯᠡ᠁
ᠲᠡᠷᠡ ᠡᠩᠬᠦᠷᠡᠢ ᠬᠠᠨᠢ ᠬᠤᠪᠢᠯᠭᠠᠨ ᠬᠦᠯᠦᠭ ᠦ᠋ᠨ ᠢ᠋ᠶ᠋ᠡᠨ
ᠬᠦᠵᠦᠭᠦᠦ ᠶ᠋ᠢ ᠲᠡᠪᠡᠷᠢᠨ ᠭᠠᠰᠢᠭᠤᠳᠠᠭᠰᠠᠨ ᠢ᠋ᠶ᠋ᠠᠨ
《ᠨᠠᠢᠵᠠ ᠪᠢᠰᠢ ᠱᠤᠯᠤᠮ ᠶᠤᠮ ᠪᠣᠯᠬᠣᠷ
ᠲᠩᠷᠢ ᠶ᠋ᠢᠨ ᠵᠠᠶᠠᠭᠠᠨ ᠠ᠋ᠴᠠ
ᠮᠢᠨᠦ ᠢᠯᠳᠦ ᠶ᠋ᠢ ᠯᠡ ᠮᠢᠯᠢᠶᠠᠬᠤ
ᠵᠠᠶᠠᠭᠠᠨ ᠤ᠋ ᠬᠣᠶᠠᠷ ᠪᠠᠢᠵᠠᠢ ᠤᠤ ᠳᠠ》 ᠭᠡᠮᠡᠨ
ᠰᠠᠨᠠᠭᠠ ᠠᠯᠲᠠᠨ ᠥᠭᠦᠯᠡᠭᠡᠳ
ᠬᠠᠷᠠᠰᠠᠭᠰᠠᠨ ᠰᠡᠳᠬᠢᠯ ᠢ᠋ᠶ᠋ᠡᠨ
ᠠᠶᠤᠤᠯᠢᠬᠠᠢ ᠳ᠋ᠠᠭᠠᠨ ᠴᠢᠩᠭᠠᠯᠠᠵᠤ᠂
ᠬᠠᠷᠠᠭᠳᠠᠭᠰᠠᠨ ᠣᠮᠣᠭ ᠢ᠋ᠶ᠋ᠠᠨ
ᠠᠷᠠᠭᠠᠨ ᠳ᠋ᠠᠭᠠᠨ ᠵᠠᠭᠤᠵᠤ᠂
ᠠᠭᠲᠠ ᠶ᠋ᠢᠨ ᠵᠢᠯᠣᠭᠣ ᠡᠭᠡᠭᠦᠯᠦᠨ
ᠠᠶᠤᠩᠭᠠ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠨ᠂
ᠵᠣᠷᠢᠭᠰᠠᠨ ᠭᠠᠵᠠᠷ ᠢ᠋ᠶ᠋ᠠᠨ ᠴᠢᠭᠯᠡᠨ
ᠱᠤᠯᠤᠮ ᠤ᠋ᠨ ᠡᠭᠦᠷ ᠲᠡᠢᠰᠢ ᠳᠠᠢᠯᠠᠨ ᠣᠷᠣᠪᠠ᠃
ᠡᠵᠡᠨ ᠲᠩᠷᠢ ᠡᠴᠡ ᠲᠣᠮᠢᠯᠠᠭᠰᠠᠨ
ᠡᠷᠡᠮᠡᠬᠡᠢ ᠪᠠᠭᠠᠲᠤᠷ ᠬᠤᠸᠠᠩ ᠴᠤᠤ ᠶ᠋ᠢᠨ
ᠬᠤᠷᠳᠤᠨ ᠬᠦᠯᠦᠭ ᠨᠢ ᠠᠭᠰᠤᠯᠵᠠᠭᠠᠳ
ᠬᠤᠶᠠᠭ ᠳᠤᠭᠤᠯᠠᠭᠠ ᠨᠢ ᠭᠢᠯᠠᠯᠵᠠᠭᠠᠳ
ᠰᠤᠮᠤ ᠠᠳᠠᠯᠢ ᠬᠠᠷᠪᠤᠭᠠᠳ ᠭᠠᠷᠤᠯᠠ᠂
ᠰᠤᠷ ᠠᠳᠠᠯᠢ ᠨᠣᠴᠣᠭᠠᠳ ᠣᠷᠣᠯᠠ᠂
ᠬᠤᠢ ᠲᠠᠲᠠᠭᠤᠯᠤᠨ ᠨᠢᠰᠦᠭᠡᠳ ᠣᠷᠣᠯᠠ᠂
ᠬᠣᠮᠣᠬᠠᠢ ᠶ᠋ᠢᠨ ᠭᠠᠪᠠᠯᠠ ᠶ᠋ᠢ ᠴᠠᠪᠴᠢᠭᠠᠳ ᠣᠷᠣᠯᠠ᠃
ᠭᠠᠩ ᠢᠯᠳᠦ ᠨᠢ ᠭᠢᠯᠠᠰᠤᠭᠠᠳ ᠢᠷᠡᠯᠡ᠂
ᠭᠠᠵᠠᠷ ᠲᠤᠷᠭᠢᠮᠠ ᠪᠠᠷᠬᠢᠷᠠᠭᠠᠳ ᠢᠷᠡᠯᠡ᠂
ᠭᠠᠯᠵᠠᠭᠤ ᠪᠠᠷᠰ ᠮᠡᠲᠦ ᠬᠠᠷᠬᠢᠷᠠᠭᠠᠳ ᠢᠷᠡᠯᠡ᠃
ᠱᠤᠯᠤᠮ ᠤ᠋ᠨ ᠡᠭᠦᠷ ᠲᠦ᠍
ᠱᠤᠤᠭᠢᠶᠠᠨ ᠪᠣᠰᠤᠯᠠ᠂
ᠰᠢᠭᠤᠷᠭᠠ ᠮᠠᠨᠠᠨ
ᠱᠤᠤᠭᠢᠭᠠᠳ ᠢᠷᠡᠯᠡ᠃
ᠰᠢᠨᠤᠬᠠᠢ ᠳᠠᠢᠰᠤᠨ ᠳᠡᠪᠵᠢᠶᠡᠨ ᠪᠣᠯᠤᠯᠠ᠂
ᠰᠢᠷᠭᠤᠬᠤ ᠭᠠᠵᠠᠷ ᠦᠭᠡᠢ ᠪᠠᠯᠠᠭᠳᠠᠭᠠᠳ ᠢᠷᠡᠯᠡ᠃
ᠭᠠᠪᠠᠯᠠ ᠪᠠᠨ ᠲᠡᠪᠡᠷᠢᠭᠡᠳ ᠣᠷᠢᠯᠠᠵᠤ ᠪᠠᠢᠨᠠ᠂
ᠭᠠᠵᠠᠷ ᠤ᠋ᠨ ᠠᠩ ᠢ᠋ᠶ᠋ᠠᠷ ᠣᠷᠣᠮᠠᠷ ᠪᠠᠢᠨᠠ᠃
ᠵᠤᠯᠵᠠᠭᠠ ᠪᠠᠨ ᠴᠢᠷᠦᠭᠡᠳ ᠵᠢᠭᠤᠲᠠᠵᠤ ᠪᠠᠢᠨᠠ᠂
ᠵᠤᠷᠠᠮᠠ ᠶ᠋ᠢᠨ ᠨᠦᠬᠡ ᠪᠡᠷ ᠣᠷᠣᠮᠠᠷ ᠪᠠᠢᠨᠠ᠃
ᠮᠥᠷᠭᠥᠵᠦ ᠰᠥᠭᠥᠳᠦᠭᠡᠳ ᠴᠡᠴᠡᠷᠡᠵᠦ ᠪᠠᠢᠨᠠ᠂
ᠮᠥᠨᠴᠢᠭᠡᠷ ᠳᠡᠭᠡᠷᠡ ᠪᠡᠨ ᠴᠠᠪᠴᠢᠭᠤᠯᠵᠤ ᠪᠠᠢᠨᠠ᠃
ᠥᠩᠬᠥᠷᠢᠵᠦ ᠤᠨᠠᠭᠠᠳ ᠭᠠᠰᠠᠯᠵᠤ ᠪᠠᠢᠨᠠ᠂
ᠥᠳᠬᠡᠨ ᠰᠢᠩᠭᠡᠨ ᠢ᠋ᠶ᠋ᠡᠨ ᠭᠠᠷᠭᠠᠵᠤ ᠪᠠᠢᠨᠠ᠃
ᠨᠢᠭᠤᠬᠤ ᠲᠣᠰᠤᠮ
ᠨᠢᠷᠤᠭᠤ ᠨᠢ ᠢᠯᠡᠬᠡᠨ
ᠳᠠᠯᠳᠠᠯᠠᠬᠤ ᠲᠣᠰᠤᠮ
ᠳᠠᠯᠠ ᠨᠢ ᠢᠯᠡᠬᠡᠨ᠃
ᠭᠡᠳᠡᠢᠨ ᠭᠡᠲᠡᠯᠡ
ᠭᠡᠳᠡᠰᠦ ᠨᠢ ᠢᠯᠡᠬᠡᠨ᠂
ᠪᠥᠬᠥᠢᠨ ᠭᠡᠢᠲᠡᠯᠡ
ᠪᠥᠭᠰᠡ ᠨᠢ ᠢᠯᠡᠬᠡᠨ᠃
ᠤᠭ ᠳᠦᠷᠢ ᠨᠢ
ᠤᠷᠠᠭᠳᠠᠭᠠᠳ ᠭᠠᠷᠤᠯᠠ᠂
ᠤᠯᠴᠠᠭᠠᠷ ᠮᠠᠩᠭᠤᠰ
ᠤᠯᠠᠢᠭᠠᠳ ᠢᠷᠡᠯᠡ᠃
ᠱᠤᠯᠤᠮ ᠰᠢᠨᠵᠢ ᠨᠢ
ᠢᠯᠡᠷᠡᠭᠡᠳ ᠭᠠᠷᠤᠯᠠ᠂
ᠰᠢᠨᠤᠬᠠᠢ ᠮᠠᠩᠭᠤᠰ
ᠰᠢᠷᠭᠤᠯᠠᠭᠠᠳ ᠳᠠᠭᠠᠷᠢᠯᠠ᠃
ᠢᠳᠡ ᠲᠡᠢ ᠱᠤᠯᠤᠮ
ᠢᠷᠡᠵᠦ ᠯᠠ ᠪᠠᠢᠨᠠ᠂
ᠶᠧᠯᠸᠢ ᠲᠡᠢ ᠴᠢᠳᠬᠥᠷ
ᠨᠥᠷᠢᠵᠦ ᠯᠡ ᠪᠠᠢᠨᠠ᠃
ᠢᠷ ᠲᠡᠢ ᠵᠢᠳᠠ
ᠴᠢᠴᠢᠯᠡᠵᠦ ᠯᠡ ᠪᠠᠢᠨᠠ᠂
ᠢᠰᠬᠡᠷᠳᠡᠭ ᠵᠡᠪᠡ
ᠨᠢᠰᠴᠦ ᠯᠡ ᠪᠠᠢᠨᠠ᠃
ᠬᠤᠸᠠᠩ ᠴᠤᠤ ᠪᠠᠭᠠᠲᠤᠷ
ᠬᠣᠷᠣᠰᠤᠯ ᠲᠥᠷᠥᠨ
ᠬᠤᠮᠢᠵᠤ ᠠᠪᠤᠭᠠᠳ
ᠴᠠᠪᠴᠢᠯᠠᠨ ᠭᠠᠷᠤᠯᠠ᠃
ᠬᠤᠪᠢᠯᠭᠠᠨ ᠰᠡᠯᠡᠮᠡ ᠪᠡᠨ
ᠪᠢᠯᠠᠭᠤ ᠪᠣᠯᠭᠠᠨ
ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠨᠢ
ᠰᠢᠳᠡᠯᠡᠨ ᠭᠠᠷᠤᠯᠠ᠃
ᠴᠢᠨᠣᠠ ᠶ᠋ᠢᠨ ᠰᠢᠳᠦᠨ ᠪᠢᠯᠠᠭᠤ ᠶ᠋ᠢ
ᠴᠣᠬᠢᠭᠠᠳ ᠴᠣᠬᠢᠭᠠᠳ ᠭᠠᠷᠭᠠᠲᠠᠯᠠ᠂
ᠴᠣᠭ ᠪᠣᠯᠤᠨ ᠤᠯᠠᠢᠵᠤ
ᠴᠣᠭᠣᠯᠲᠤᠷ ᠪᠣᠯᠤᠨ ᠥᠷᠥᠮᠳᠡᠵᠦ᠂
ᠪᠠᠷᠰ ᠤ᠋ᠨ ᠶᠠᠰᠤᠨ ᠪᠢᠯᠠᠭᠤ ᠶ᠋ᠢ
ᠪᠢᠯᠠᠭᠤᠳᠠᠭᠠᠳ ᠪᠢᠯᠠᠭᠤᠳᠠᠭᠠᠳ ᠶᠠᠪᠤᠭᠤᠯᠲᠠᠯᠠ᠂
ᠪᠣᠯᠣᠳ ᠪᠣᠯᠤᠨ ᠡᠷᠴᠢᠯᠡᠵᠦ
ᠪᠤᠷᠬᠢ ᠪᠣᠯᠤᠨ ᠥᠷᠥᠮᠳᠡᠵᠦ᠂
ᠵᠦᠭ ᠵᠦᠭ ᠲᠦ᠋ᠨᠢ ᠤᠨᠠᠭᠠᠵᠤ ᠪᠠᠢᠨᠠ᠃
ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠪᠠᠨ ᠪᠤᠵᠢᠭᠢᠨᠠᠵᠤ ᠪᠠᠢᠨᠠ᠃
ᠵᠦᠰᠦᠭᠡᠳ ᠵᠦᠰᠦᠭᠡᠳ ᠬᠠᠶᠠᠯᠠᠵᠤ ᠪᠠᠢᠨᠠ᠂
ᠵᠦᠭ ᠢ᠋ᠶ᠋ᠡᠨ ᠠᠯᠳᠠᠭᠠᠳ ᠨᠢᠴᠠᠷᠠᠵᠤ ᠪᠠᠢᠨᠠ᠃
ᠰᠠᠪᠠᠷ ᠭᠠᠷ ᠰᠠᠮᠠᠷᠳᠠᠵᠤ ᠪᠠᠢᠨᠠ᠂
ᠰᠠᠯᠠᠭᠠ ᠲᠣᠯᠣᠭᠠᠢ ᠰᠠᠯᠵᠤ ᠪᠠᠢᠨᠠ᠃
ᠰᠠᠪᠠᠵᠤ ᠤᠨᠠᠭᠠᠳ ᠰᠡᠷᠪᠡᠯᠵᠡᠵᠦ ᠪᠠᠢᠨᠠ᠂
ᠰᠠᠯᠠᠩᠨᠠᠵᠤ ᠠᠪᠤᠭᠠᠳ ᠰᠠᠷᠪᠠᠢᠵᠤ ᠪᠠᠢᠨᠠ᠃
ᠮᠣᠭᠠᠢ ᠶ᠋ᠢᠨ ᠱᠤᠯᠤᠮ
ᠮᠤᠰᠬᠢᠷᠠᠵᠤ ᠬᠣᠣᠷ ᠢ᠋ᠶ᠋ᠠᠨ ᠬᠠᠷᠪᠤᠵᠤ ᠪᠠᠢᠨᠠ᠃
ᠮᠡᠳᠡᠷᠡᠵᠦ ᠣᠴᠢᠭᠠᠳ ᠰᠤᠮᠤᠳᠠᠵᠤ ᠪᠠᠢᠨᠠ᠂
ᠰᠤᠩᠵᠥ ᠠᠪᠤᠭᠠᠳ ᠰᠤᠯᠳᠠᠢᠵᠤ ᠪᠠᠢᠨᠠ᠃
ᠦᠨᠡᠭᠡᠨ ᠰᠡᠭᠦᠯ ᠭᠤᠶᠤᠳᠠᠯᠠᠵᠤ ᠪᠠᠢᠨᠠ᠂
ᠥᠩᠬᠥᠷᠢᠵᠦ ᠤᠨᠠᠭᠠᠳ ᠭᠠᠰᠠᠯᠵᠤ ᠪᠠᠢᠨᠠ᠃
ᠦᠰᠦᠷᠴᠦ ᠠᠪᠤᠭᠠᠳ ᠲᠠᠲᠠᠵᠤ ᠪᠠᠢᠨᠠ᠂
ᠦᠬᠦᠯ ᠦ᠋ᠨ ᠳᠠᠪᠠᠭᠠᠨ ᠳ᠋ᠤ᠌ ᠲᠡᠯᠴᠢᠯᠡᠵᠦ ᠪᠠᠢᠨᠠ᠃
ᠪᠤᠭ ᠴᠢᠳᠬᠥᠷ ᠪᠤᠯᠲᠠᠵᠤ ᠪᠠᠢᠨᠠ᠂
ᠪᠤᠯᠤᠩ ᠮᠥᠷᠭᠥᠭᠡᠳ ᠪᠤᠷᠤᠭᠤᠯᠠᠵᠤ ᠪᠠᠢᠨᠠ᠃
ᠪᠣᠷᠵᠢᠨ ᠲᠣᠯᠣᠭᠠᠢ ᠨᠢ ᠪᠤᠯᠭᠤᠷᠠᠵᠤ ᠪᠠᠢᠨᠠ᠂
ᠪᠤᠵᠠᠷ ᠨᠥᠵᠢ ᠨᠢ ᠪᠤᠲᠠᠷᠠᠵᠤ ᠪᠠᠢᠨᠠ᠃