ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠠᠩᠴᠢᠨ ᠬᠦᠦ ᠠᠷᠢᠭᠤᠩᠭᠤᠸᠠ Гураван настай гунаган улаан баатар - Анчин хүү ариунговоо
517ᠠᠩᠴᠢᠨ ᠬᠦᠦ ᠠᠷᠢᠭᠤᠩᠭᠤᠸᠠ
ᠬᠠᠭᠠᠨ ᠣᠷᠳᠣᠨ ᠳ᠋ᠠᠭᠠᠨ ᠬᠠᠷᠢᠭᠠᠳ᠂ ᠬᠦᠦ ᠳ᠋ᠡᠭᠡᠨ ᠬᠡᠯᠡᠭᠰᠡᠨ ᠳ᠋ᠦ᠍᠂ ᠬᠦᠦ ᠨᠢ᠄《ᠦᠨᠡᠬᠡᠷ ᠲᠡᠢᠮᠦ ᠭᠠᠢᠬᠠᠯᠲᠠᠢ ᠰᠠᠢᠬᠠᠨ ᠶᠤᠮ ᠪᠣᠯ᠂ ᠡᠴᠢᠭᠡ ᠮᠢᠨᠢ ᠨᠠᠳᠠ ᠠᠪᠴᠤ ᠥᠭ!》 ᠭᠡᠵᠦ ᠡᠳᠦᠷ ᠪᠦᠷᠢ ᠶᠠᠷᠭᠢᠬᠤ ᠪᠣᠯᠵᠤ ᠭᠡᠨᠡ᠃ ᠢᠩᠭᠢᠭᠡᠳ ᠬᠥᠭᠰᠢᠨ ᠬᠠᠭᠠᠨ ᠮᠥᠨ ᠠᠷᠭᠠ ᠦᠭᠡᠢ ᠪᠣᠯᠵᠤ᠂ ᠬᠡᠷᠪᠡ ᠲᠡᠷᠡ ᠠᠪᠠᠭᠠᠢ ᠬᠠᠷᠢ ᠳ᠋ᠤ᠌ ᠮᠣᠷᠳᠠᠭᠠ ᠦᠭᠡᠢ᠂ ᠬᠠᠷᠠ ᠦᠰᠦ ᠪᠡᠨ ᠬᠠᠭᠠᠯᠤᠭᠠ ᠦᠭᠡᠢ ᠪᠣᠯ ᠬᠠᠭᠠᠨ ᠪᠢ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠠᠪᠴᠤ ᠢᠷᠡᠵᠦ ᠪᠣᠯᠤᠨᠠ᠃ ᠭᠡᠲᠡᠯᠡ ᠠᠷᠢᠭᠤᠩᠭᠤᠸᠠ ᠠᠪᠠᠭᠠᠢ ᠨᠢᠭᠡᠨᠲᠡ ᠠᠢᠯ ᠳ᠋ᠤ᠌ ᠣᠴᠢᠵᠤ᠂ ᠠᠮᠠᠷᠠᠭ ᠠᠩᠴᠢᠨ ᠬᠦᠦ ᠲᠡᠢ ᠪᠡᠨ ᠤᠷᠤᠭ ᠬᠣᠯᠪᠣᠭᠰᠠᠨ ᠲᠤᠯᠠ᠂ ᠡᠭᠦᠨ ᠢ᠋ ᠣᠳᠣ ᠶᠠᠭᠠᠬᠢᠬᠤ ᠪᠣᠢ? ᠭᠡᠵᠦ ᠰᠡᠳᠬᠢᠯ ᠵᠣᠪᠠᠵᠤ ᠰᠠᠢᠨ ᠠᠷᠭᠠ ᠣᠯᠬᠤ ᠦᠭᠡᠢ ᠪᠠᠢᠵᠠᠢ᠃
ᠴᠢᠩᠭᠢᠭᠰᠡᠨ ᠳ᠋ᠦ᠍ ᠨᠢᠭᠡᠨ ᠲᠦᠰᠢᠮᠡᠯ ᠡᠭᠦᠨ ᠢ᠋ ᠮᠡᠳᠡᠭᠡᠳ᠂ ᠣᠳᠣ ᠡᠨᠡ ᠨᠢᠭᠡᠨ ᠬᠡᠷᠡᠭ ᠳᠡᠭᠡᠷᠡ ᠡᠴᠡ ᠡᠵᠡᠨ ᠦ᠌ ᠬᠠᠢᠷᠠ ᠶ᠋ᠢ ᠣᠯᠵᠤ᠂ ᠬᠦᠨᠳᠦ ᠬᠡᠰᠢᠭ ᠭᠥᠷᠳᠡᠶᠡ ᠭᠡᠵᠦ ᠪᠣᠳᠣᠭᠠᠳ᠂ ᠬᠠᠭᠠᠨ ᠳ᠋ᠠᠭᠠᠨ᠄《ᠡᠵᠡᠨ ᠮᠢᠨᠢ᠂ ᠲᠦᠰᠢᠮᠡᠯ ᠨᠠᠳᠠ ᠨᠢᠭᠡ ᠠᠷᠭᠠ ᠪᠠᠢᠨᠠ᠃ ᠲᠠ ᠰᠣᠨᠣᠰᠴᠤ ᠦᠵᠡᠨᠡ ᠤᠤ?》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ᠄《ᠵᠠ! ᠴᠢ ᠬᠡᠯᠡ!》 ᠭᠡᠰᠡᠨ ᠳ᠋ᠦ᠍᠂ ᠥᠨᠥ ᠲᠦᠰᠢᠮᠡᠯ ᠨᠢ ᠨᠢᠭᠡ ᠠᠷᠭᠠ ᠭᠠᠷᠭᠠᠭᠰᠠᠨ ᠨᠢ᠄《ᠡᠵᠡᠨ ᠲᠠ ᠤᠳᠠᠯ ᠦᠭᠡᠢ ᠨᠠᠮᠤᠷ ᠤ᠋ᠨ ᠠᠩ ᠳ᠋ᠤ᠌ ᠮᠣᠷᠳᠠᠨᠠ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠮᠥᠨ ᠠᠩᠴᠢᠨ ᠬᠦᠦ ᠳ᠋ᠦ᠍ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ᠂ ᠠᠩ ᠳ᠋ᠤ᠌ ᠳᠠᠭᠠᠭᠤᠯᠤᠭᠠᠳ᠂ ᠬᠠᠮᠤᠭ ᠬᠦᠴᠢᠷ ᠲᠡᠢ ᠪᠡᠷᠬᠡ ᠬᠡᠷᠡᠭ ᠦ᠋ᠳ ᠢ᠋ ᠠᠰᠠᠭᠤᠵᠤ᠂ ᠬᠠᠷᠢᠭᠤᠯᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠᠯ ᠳᠠᠷᠤᠢ ᠶᠠᠯᠠ ᠲᠤᠯᠭᠠᠵᠤ ᠠᠯᠠᠪᠠᠯ᠂ ᠠᠷᠢᠭᠤᠩᠭᠤᠸᠠ ᠠᠪᠠᠭᠠᠢ ᠠᠶᠠᠨᠳᠠᠭᠠᠨ ᠪᠠᠭᠠ ᠡᠵᠡᠨ ᠦ᠌ ᠪᠣᠯᠵᠤ ᠪᠣᠯᠤᠨᠠ᠃》ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠶᠡᠬᠡ ᠪᠠᠶᠠᠷᠯᠠᠵᠤ᠂ ᠡᠨᠡ ᠶᠠᠭᠠᠬᠢᠭᠰᠠᠨ ᠮᠡᠷᠭᠡᠨ ᠠᠷᠭᠠ ᠪᠣᠢ ᠭᠡᠵᠦ ᠥᠨᠥ ᠲᠦᠰᠢᠮᠡᠯ ᠢ᠋ᠶ᠋ᠡᠨ ᠰᠠᠢᠰᠢᠶᠠᠵᠠᠢ᠃
ᠨᠠᠮᠤᠷ ᠤ᠋ᠨ ᠠᠩ ᠳ᠋ᠤ᠌ ᠬᠠᠭᠠᠨ ᠠᠩᠴᠢᠨ ᠬᠦᠦ ᠳ᠋ᠦ᠍ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠳᠠᠭᠠᠭᠤᠯᠤᠭᠠᠳ ᠭᠠᠷᠴᠠᠢ᠃ ᠭᠠᠷᠴᠤ ᠶᠠᠪᠤᠭᠰᠠᠭᠠᠷ ᠬᠡᠳᠦᠨ ᠬᠡᠷᠢᠶᠡ ᠲᠡᠢ ᠲᠣᠬᠢᠶᠠᠯᠳᠤᠭᠠᠳ᠂ ᠬᠠᠭᠠᠨ᠄《ᠠᠩᠴᠢᠨ ᠬᠦᠦ! ᠴᠢ ᠣᠴᠢᠵᠤ ᠲᠡᠷᠡ ᠬᠡᠳᠦᠨ ᠬᠡᠷᠢᠶᠡ ᠶᠠᠭᠤ ᠬᠡᠯᠡᠯᠴᠡᠵᠦ ᠪᠠᠢᠬᠤ ᠶ᠋ᠢ ᠮᠡᠳᠡᠵᠦ ᠢᠷᠡ!》ᠭᠡᠰᠡᠨ ᠳ᠋ᠦ᠍᠂ ᠠᠩᠴᠢᠨ ᠬᠦᠦ ᠄《ᠵᠠ!》ᠭᠡᠵᠦ ᠮᠣᠷᠢ ᠪᠠᠨ ᠲᠠᠰᠢᠭᠤᠷᠳᠠᠨ ᠣᠴᠢᠭᠠᠳ᠂ ᠤᠳᠠᠯ ᠦᠭᠡᠢ ᠬᠠᠷᠢᠵᠤ ᠢᠷᠡᠭᠡᠳ᠂ ᠬᠠᠭᠠᠨ ᠳ᠋ᠤ᠌ ᠬᠡᠯᠡᠭᠰᠡᠨ ᠨᠢ:《ᠲᠡᠷᠡ ᠬᠡᠳᠦᠨ ᠬᠡᠷᠢᠶᠡ ᠥᠪᠡᠷ ᠵᠠᠭᠤᠷᠠ ᠪᠠᠨ ᠢᠩᠭᠢᠵᠦ ᠶᠠᠷᠢᠯᠴᠠᠵᠤ ᠪᠠᠢᠨᠠ᠃《ᠬᠠᠭᠠᠨ ᠡᠵᠡᠨ ᠠᠩ ᠬᠢᠵᠦ᠂ᠤᠯᠠᠢ ᠴᠢᠰᠤ ᠭᠠᠷᠭᠠᠪᠠᠯ᠂ ᠬᠠᠷᠠ ᠬᠡᠷᠢᠶᠡ ᠪᠢᠳᠡ ᠬᠠᠨᠲᠠᠯᠠ ᠪᠠᠨ ᠢᠳᠡᠬᠦ ᠶᠠᠭᠤᠮᠠ ᠲᠠᠢ ᠪᠣᠯᠤᠨᠠ 》ᠭᠡᠵᠦ ᠬᠡᠯᠡᠯᠴᠡᠵᠦ ᠪᠠᠢᠨᠠ᠃ 》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠳᠠᠬᠢᠨ ᠳᠤᠤᠭᠠᠷᠬᠤ ᠦᠭᠡ ᠦᠭᠡᠢ ᠪᠣᠯᠵᠤ ᠶᠠᠪᠤᠵᠠᠢ᠃
ᠲᠡᠭᠡᠭᠡᠳ ᠴᠠᠭᠠᠰᠢ ᠨᠢ ᠶᠠᠪᠤᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠨᠢᠭᠡᠨ ᠦᠬᠦᠳᠡᠯ ᠦ᠋ᠨ ᠬᠡᠭᠦᠷ ᠲᠠᠭᠠᠷᠠᠭᠰᠠᠨ ᠭᠡᠨᠡ᠃ ᠡᠭᠦᠨ ᠳ᠋ᠦ᠍ ᠬᠠᠭᠠᠨ ᠨᠢ᠄《ᠠᠩᠴᠢᠨ ᠬᠦᠦ! ᠴᠢ ᠣᠴᠢᠵᠤ ᠲᠡᠷᠡ ᠦᠬᠦᠭᠰᠡᠨ ᠬᠥᠮᠦᠨ ᠶᠠᠭᠤ ᠪᠣᠳᠣᠵᠤ ᠪᠠᠢᠬᠤ ᠶ᠋ᠢ ᠠᠰᠠᠭᠤᠵᠤ ᠢᠷᠡ!》ᠭᠡᠳ ᠶᠠᠪᠤᠭᠤᠯᠵᠠᠢ᠃ ᠠᠩᠴᠢᠨ ᠬᠦᠦ ᠣᠴᠢᠭᠠᠳ᠂ ᠬᠡᠭᠦᠷ ᠢ᠋ ᠨᠢᠭᠡ ᠲᠣᠭᠣᠷᠢᠵᠤ ᠢᠷᠡᠭᠡᠳ ᠮᠡᠳᠡᠭᠦᠯᠦᠭᠰᠡᠨ ᠨᠢ᠄ 《ᠠᠮᠢᠳᠤ ᠰᠡᠷᠢᠭᠦᠨ ᠬᠥᠮᠦᠨ ᠬᠡᠳᠦᠢ ᠰᠠᠢᠬᠠᠨ ᠪᠣᠢ! ᠡᠵᠡᠨ ᠬᠠᠭᠠᠨ ᠢ᠋ᠶ᠋ᠠᠨ ᠳᠠᠭᠠᠵᠤ᠂ ᠠᠪᠠᠯᠠᠵᠤ ᠳᠠᠪᠠᠯᠠᠵᠤ ᠪᠠᠢᠨᠠ᠃ ᠦᠬᠦᠭᠰᠡᠨ ᠪᠢ ᠭᠠᠵᠠᠷ ᠰᠢᠷᠣᠢ ᠶ᠋ᠢᠨ ᠳᠣᠲᠣᠷᠠ᠂ ᠡᠳᠦᠷ ᠰᠠᠷᠠ ᠶ᠋ᠢ ᠪᠠᠷᠠᠲᠠᠯᠠ ᠬᠡᠪᠲᠡᠵᠦ᠂ ᠶᠠᠮᠠᠷ ᠶᠡᠬᠡ ᠭᠠᠰᠢᠭᠤᠳᠠᠯ ᠲᠠᠢ ᠬᠡᠷᠡᠭ ᠪᠣᠢ!》ᠭᠡᠵᠦ ᠬᠡᠯᠡᠵᠦ ᠪᠠᠢᠨᠠ᠃》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠮᠥᠨ ᠬᠡᠯᠡᠬᠦ ᠦᠭᠡ ᠦᠭᠡᠢ ᠪᠣᠯᠵᠠᠢ᠃ ᠴᠢᠨᠠᠭᠰᠢ ᠶᠠᠪᠤᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠲᠠᠯᠠ ᠶ᠋ᠢᠨ ᠳᠤᠮᠳᠠᠭᠤᠷ ᠨᠢᠭᠡᠨ ᠰᠠᠭᠤᠷᠢ ᠬᠠᠮᠬᠤᠤᠯ ᠬᠡᠢᠰᠵᠦ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠬᠠᠭᠠᠨ᠄《ᠠᠩᠴᠢᠨ ᠬᠦᠦ! ᠴᠢ ᠣᠴᠢᠵᠤ᠂ ᠲᠡᠷᠡ ᠬᠠᠮᠬᠤᠤᠯ ᠶᠠᠭᠤ ᠬᠡᠯᠡᠭᠰᠡᠭᠡᠷ ᠥᠩᠭᠥᠷᠢᠳᠡᠵᠦ ᠪᠠᠢᠬᠤ ᠶ᠋ᠢ ᠮᠡᠳᠡᠵᠦ ᠢᠷᠡ!》 ᠭᠡᠰᠡᠨ ᠳ᠋ᠦ᠍᠂ ᠠᠩᠴᠢᠨ ᠬᠦᠦ ᠮᠥᠨ ᠯᠡ᠄《ᠵᠠ!》 ᠭᠡᠵᠦ ᠬᠡᠯᠡᠭᠡᠳ ᠶᠠᠪᠤᠵᠠᠢ᠃ ᠲᠡᠭᠦᠨ ᠢ᠋ ᠶᠠᠪᠤᠭᠰᠠᠨ ᠬᠣᠢᠨᠠ ᠬᠠᠭᠠᠨ ᠢᠩᠭᠢᠵᠦ ᠪᠣᠳᠣᠵᠠᠢ᠃《ᠪᠢ ᠬᠠᠷᠢᠨ ᠴᠢᠮᠠᠶ᠋ᠢ ᠭᠠᠷᠲᠠᠭᠠᠶᠠ ᠭᠡᠵᠦ ᠬᠣᠶᠠᠷ ᠳᠠᠬᠢᠨ ᠬᠦᠴᠢᠷᠳᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ᠂ ᠴᠢ ᠬᠠᠷᠢᠨ ᠪᠦᠷ ᠬᠡᠯᠡᠵᠦ ᠭᠠᠷᠤᠯᠠ᠃ ᠣᠳᠣ ᠡᠨᠡ ᠤᠳᠠᠭᠠ ᠬᠡᠢᠰᠴᠦ ᠪᠠᠢᠬᠤ ᠬᠠᠮᠬᠤᠤᠯ ᠠ᠋ᠴᠠ ᠴᠢ ᠶᠠᠭᠤ ᠶ᠋ᠢ ᠣᠯᠵᠤ ᠬᠡᠯᠡᠬᠦ ᠪᠣᠢ⁈ ᠣᠳᠣ ᠬᠠᠷᠠ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠴᠠᠪᠴᠢᠵᠤ᠂ ᠬᠠᠢᠷᠠᠲᠠᠢ ᠠᠪᠠᠭᠠᠢ ᠶ᠋ᠢ ᠴᠢᠨᠢ ᠡᠵᠡᠯᠡᠨᠡ᠃》 ᠭᠡᠵᠦ ᠪᠠᠶᠠᠷᠯᠠᠨ ᠵᠣᠭᠰᠣᠵᠤ ᠪᠠᠢᠵᠠᠢ᠃ ᠴᠢᠩᠭᠢᠭᠰᠡᠨ ᠴᠢᠨᠢ ᠠᠩᠴᠢᠨ ᠬᠦᠦ ᠪᠤᠴᠠᠵᠤ ᠢᠷᠡᠭᠡᠳ ᠬᠡᠯᠡᠭᠰᠡᠨ ᠨᠢ᠄《ᠡᠵᠡᠨ ᠬᠠᠭᠠᠨ ᠮᠢᠨᠢ! ᠲᠡᠷᠡ ᠬᠠᠮᠬᠤᠤᠯ ᠢᠩᠭᠢᠵᠦ ᠬᠡᠯᠡᠵᠦ ᠪᠠᠢᠨᠠ᠃《ᠤᠷᠭᠤᠵᠤ ᠭᠠᠷᠬᠤ ᠮᠢᠨᠢ ᠬᠠᠪᠤᠷ᠃ ᠤᠷᠪᠠᠵᠤ ᠬᠡᠢᠰᠬᠦ ᠮᠢᠨᠢ ᠨᠠᠮᠤᠷ᠃ ᠥᠲᠡᠯᠬᠦ ᠮᠢᠨᠢ ᠬᠠᠷᠠ ᠡᠷᠭᠢ᠃ ᠦᠬᠦᠬᠦ ᠮᠢᠨᠢ ᠠᠯᠮᠠᠨ ᠬᠤᠳᠳᠤᠭ᠃》 ᠭᠡᠵᠦ ᠬᠡᠯᠡᠵᠦ ᠪᠠᠢᠨᠠ᠃》 ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠠᠭᠠᠨ ᠶᠠᠭ ᠠᠷᠭᠠ ᠦᠭᠡᠢ ᠪᠣᠯᠵᠤ ᠣᠷᠳᠣᠨ ᠳ᠋ᠠᠭᠠᠨ ᠬᠠᠷᠢᠵᠠᠢ᠃
ᠬᠠᠭᠠᠨ ᠣᠷᠳᠣᠨ ᠳ᠋ᠠᠭᠠᠨ ᠬᠠᠷᠢᠭᠠᠳ ᠠᠩᠴᠢᠨ ᠬᠦᠦ ᠳ᠋ᠦ᠍ ᠲᠤᠰᠢᠶᠠᠭᠰᠠᠨ ᠨᠢ᠄《ᠴᠢ ᠬᠠᠷᠢᠵᠤ ᠨᠠᠳᠠ ᠵᠠᠭᠤᠨ ᠠᠯᠲᠠ ᠦᠨᠡᠰᠦᠨ ᠳᠡᠭᠡᠰᠦ ᠲᠠᠮᠤᠵᠤ ᠠᠪᠴᠢᠷᠠ! ᠦᠭᠡᠢ ᠪᠣᠯ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠤᠨᠠ᠃》 ᠭᠡᠵᠦ ᠶᠠᠪᠤᠭᠤᠯᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠩᠴᠢᠨ ᠬᠦᠦ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ ᠲᠣᠯᠣᠭᠠᠢ ᠪᠠᠨ ᠣᠷᠢᠶᠠᠵᠤ ᠶᠠᠭᠤ ᠴᠤ᠌ ᠳᠤᠤᠭᠠᠷᠬᠤ ᠦᠭᠡᠢ ᠬᠡᠪᠲᠡᠵᠡᠢ᠃ ᠢᠩᠭᠢᠬᠦ ᠳ᠋ᠦ᠍᠂ ᠠᠷᠢᠭᠤᠩᠭᠤᠸᠠ ᠠᠪᠠᠭᠠᠢ ᠨᠢ ᠶᠡᠬᠡ ᠭᠠᠢᠬᠠᠵᠤ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠠᠩᠴᠢᠨ ᠬᠦᠦ᠂ ᠬᠠᠭᠠᠨ ᠤ᠋ ᠭᠤᠷᠪᠠᠨ ᠠᠰᠠᠭᠤᠯᠲᠠ ᠶ᠋ᠢ ᠶᠠᠭᠠᠬᠢᠵᠤ ᠬᠠᠷᠢᠭᠤᠯᠤᠭᠰᠠᠨ ᠪᠠ ᠵᠠᠭᠤᠨ ᠠᠯᠲᠠ ᠦᠨᠡᠰᠦᠨ ᠳᠡᠭᠡᠰᠦ ᠠᠪᠴᠢᠷᠠᠬᠤ ᠦᠭᠡᠢ ᠪᠣᠯ ᠲᠣᠯᠣᠭᠠᠢ ᠶ᠋ᠢ ᠮᠢᠨᠢ ᠠᠪᠤᠨᠠ ᠭᠡᠵᠦ ᠪᠠᠢᠨᠠ ᠭᠡᠬᠦ ᠵᠡᠷᠭᠡ ᠪᠡᠷ ᠬᠡᠯᠡᠵᠡᠢ᠃
ᠡᠭᠦᠨ ᠢ᠋ ᠠᠷᠢᠭᠤᠩᠭᠤᠸᠠ ᠠᠪᠠᠭᠠᠢ ᠨᠢ ᠰᠣᠨᠣᠰᠤᠭᠠᠳ᠄《ᠬᠣᠩᠭᠣᠷ ᠮᠢᠨᠢ! ᠠᠮᠤᠷ ᠰᠠᠢᠬᠠᠨ ᠤᠨᠲᠠᠭᠠᠷᠠᠢ! ᠪᠢ ᠴᠢᠮᠠ ᠳ᠋ᠤ᠌ ᠵᠠᠭᠤᠨ ᠠᠯᠲᠠ ᠦᠨᠡᠰᠦᠨ ᠳᠡᠭᠡᠰᠦ ᠲᠠᠮᠤᠵᠤ ᠥᠭᠭᠦᠶᠡ!》 ᠭᠡᠵᠦ ᠠᠩᠴᠢᠨ ᠬᠦᠦ ᠪᠡᠨ ᠤᠨᠲᠠᠭᠤᠯᠵᠠᠢ᠃
ᠲᠡᠭᠡᠭᠡᠳ ᠠᠷᠢᠭᠤᠩᠭᠤᠸᠠ ᠠᠪᠠᠭᠠᠢ ᠨᠢ ᠭᠠᠳᠠᠨᠠ ᠪᠠᠨ ᠭᠠᠷᠴᠤ ᠨᠡᠯᠢᠶᠡᠳ ᠣᠯᠠᠨ ᠠᠭᠢ ᠡᠪᠡᠰᠦ ᠥᠭᠲᠡᠭᠡᠨ ᠠᠪᠴᠢᠷᠠᠭᠠᠳ᠂ ᠵᠠᠭᠤᠨ ᠠᠯᠲᠠ ᠳᠡᠭᠡᠰᠦ ᠲᠠᠮᠤᠵᠤ᠂ ᠨᠢᠭᠡ ᠶᠡᠬᠡ ᠫᠢᠯᠠ ᠳᠡᠭᠡᠷᠡ ᠣᠷᠢᠶᠠᠨ ᠲᠠᠯᠪᠢᠭᠠᠳ ᠰᠢᠲᠠᠭᠠᠭᠰᠠᠨ ᠳ᠋ᠤ᠌ ᠦᠨᠡᠬᠡᠷ ᠴᠥᠮ ᠣᠷᠢᠶᠠᠯᠳᠤᠭᠰᠠᠨ ᠦᠨᠡᠰᠦᠨ ᠳᠡᠭᠡᠰᠦ ᠪᠣᠯᠵᠤ ᠪᠦᠲᠦᠭᠰᠡᠨ ᠪᠠᠢᠨᠠ᠃ ᠮᠠᠷᠭᠠᠰᠢ ᠨᠢ ᠠᠩᠴᠢᠨ ᠬᠦᠦ ᠫᠢᠯᠠ ᠪᠠᠨ ᠠᠪᠴᠤ ᠶᠠᠪᠤᠬᠤ ᠳ᠋ᠤᠨᠢ᠂ ᠠᠷᠢᠭᠤᠩᠭᠤᠸᠠ ᠨᠢ᠄《ᠠᠩᠴᠢᠨ ᠮᠢᠨᠢ! ᠬᠡᠷᠪᠡ ᠲᠡᠳᠡ ᠴᠢᠮᠠ ᠪᠠᠷ ᠠᠯᠳᠠᠯᠠᠭᠤᠯᠬᠤ ᠭᠡᠪᠡᠯ᠂ ᠴᠢ ᠢᠩᠭᠢᠵᠦ ᠬᠡᠯᠡᠭᠡᠷᠡᠢ!《ᠠᠪᠬᠤ ᠬᠥᠮᠦᠨ ᠠᠯᠳᠠᠯᠠᠵᠤ ᠠᠪᠤᠭᠠᠳ ᠬᠤᠷᠢᠶᠠᠬᠤ ᠠ᠋ᠴᠠ ᠪᠢᠰᠢ᠂ ᠥᠭᠬᠦ ᠬᠥᠮᠦᠨ ᠠᠯᠲᠠᠯᠠᠳᠠᠭ ᠦᠭᠡᠢ》 ᠭᠡᠵᠦ ᠬᠡᠯᠡᠭᠡᠷᠡᠢ!》 ᠭᠡᠵᠦ ᠨᠥᠬᠥᠷ ᠢ᠋ᠶ᠋ᠡᠨ ᠶᠠᠪᠤᠭᠤᠯᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠠᠩᠴᠢᠨ ᠬᠦᠦ ᠬᠠᠭᠠᠨ ᠳ᠋ᠤ᠌ ᠢᠷᠡᠵᠦ ᠫᠢᠯᠠ ᠪᠠᠨ ᠡᠷᠭᠦᠵᠦ᠄《ᠡᠵᠡᠨ ᠮᠢᠨᠢ᠂ ᠵᠠᠭᠤᠨ ᠠᠯᠲᠠ ᠦᠨᠡᠰᠦᠨ ᠳᠡᠭᠡᠰᠦ ᠶ᠋ᠢ ᠴᠥᠮ ᠲᠣᠭᠠ ᠶᠣᠰᠣᠭᠠᠷ ᠲᠠᠮᠤᠵᠤ ᠠᠪᠴᠢᠷᠠᠪᠠ᠃》 ᠭᠡᠵᠦ ᠲᠤᠰᠢᠶᠠᠭᠰᠠᠨ ᠳ᠋ᠤ᠌᠂ ᠬᠠᠭᠠᠨ ᠨᠢ᠄《ᠲᠡᠭᠡᠪᠡᠯ ᠴᠢ ᠨᠠᠳᠠ ᠠᠯᠳᠠᠯᠠᠵᠤ ᠥᠭ!》 ᠭᠡᠰᠡᠨ ᠳ᠋ᠦ᠍᠂ ᠠᠩᠴᠢᠨ ᠬᠦᠦ ᠬᠡᠯᠡᠭᠰᠡᠨ ᠨᠢ᠄《ᠡᠵᠡᠨ ᠮᠢᠨᠢ᠂ ᠠᠪᠬᠤ ᠬᠥᠮᠦᠨ ᠠᠯᠳᠠᠯᠠᠳᠠᠭ᠃ ᠥᠭᠬᠦ ᠬᠥᠮᠦᠨ ᠠᠯᠲᠠᠯᠠᠳᠠᠭ ᠦᠭᠡᠢ ᠪᠢᠯᠡ᠃》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ ᠮᠥᠨ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠨᠡ᠃ ᠲᠡᠭᠡᠭᠡᠳ ᠬᠠᠭᠠᠨ ᠳᠠᠬᠢᠵᠤ ᠪᠠᠰᠠ ᠨᠢᠭᠡ ᠪᠣᠳᠣᠯ ᠣᠯᠤᠭᠠᠳ᠄《ᠴᠢ ᠮᠠᠷᠭᠠᠰᠢ ᠮᠢᠨᠦ ᠡᠨᠳᠡ ᠢᠷᠡᠬᠦ ᠳ᠋ᠡᠭᠡᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ ᠮᠣᠷᠢ ᠤᠨᠤᠵᠤ ᠢᠷᠡ!》ᠭᠡᠵᠦ ᠲᠤᠰᠢᠶᠠᠭᠠᠳ᠂ ᠦᠭᠡᠢ ᠪᠣᠯ ᠲᠣᠯᠣᠭᠠᠢ ᠶ᠋ᠢ ᠴᠢᠨᠢ ᠠᠪᠤᠨᠠ᠃》 ᠭᠡᠵᠦ ᠶᠠᠪᠤᠭᠤᠯᠪᠠ᠃ ᠠᠩᠴᠢᠨ ᠬᠦᠦ ᠭᠡᠷ ᠲᠡᠭᠡᠨ ᠢᠷᠡᠵᠦ᠂ ᠠᠷᠢᠭᠤᠩᠭᠤᠸᠠ ᠠᠪᠠᠭᠠᠢ ᠳ᠋ᠠᠭᠠᠨ ᠬᠡᠯᠡᠭᠰᠡᠨ ᠳ᠋ᠦ᠍᠂ ᠠᠪᠠᠭᠠᠢ ᠨᠢ:《ᠴᠢ ᠤᠨᠲᠠᠭᠠᠷᠠᠢ! ᠮᠠᠷᠭᠠᠰᠢ ᠡᠷᠲᠡ ᠠᠷᠭᠠ ᠪᠠᠢᠵᠤ ᠪᠣᠯᠤᠨᠠ᠃》ᠭᠡᠵᠦ ᠤᠨᠲᠠᠭᠤᠯᠵᠠᠢ᠃ ᠮᠠᠷᠭᠠᠰᠢ ᠨᠢ ᠠᠩᠴᠢᠨ ᠬᠦᠦ ᠳ᠋ᠡᠭᠡᠨ ᠬᠡᠭᠡᠯ ᠲᠡᠢ ᠭᠡᠭᠦᠦ ᠪᠡᠨ ᠤᠨᠤᠭᠤᠯᠵᠤ ᠬᠡᠯᠡᠭᠰᠡᠨ ᠨᠢ:《ᠴᠢ ᠭᠡᠭᠦᠦ ᠪᠡᠨ ᠤᠰᠤᠯᠠᠵᠤ ᠪᠠᠷᠠᠭᠠᠳ᠂ ᠥᠭᠡᠳᠡ ᠲᠠᠭᠠᠷᠠᠪᠠᠯ ᠳᠡᠭᠳᠡᠵᠦ᠂ ᠤᠷᠤᠭᠤ ᠲᠠᠭᠠᠷᠠᠪᠠᠯ ᠲᠠᠲᠠᠵᠤ᠂ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠳᠠᠷᠤᠢ ᠭᠡᠭᠦᠦ ᠪᠡᠨ ᠤᠶᠠᠭᠠᠨ ᠳ᠋ᠤᠨᠢ ᠤᠶᠠᠵᠤ᠂ ᠬᠣᠢᠲᠤ ᠣᠯᠣᠩ ᠢ᠋ ᠨᠢ ᠰᠤᠯᠠᠳᠬᠠᠵᠤ ᠳᠡᠯᠪᠢ! ᠲᠡᠭᠡᠪᠡᠯ ᠭᠡᠭᠦᠦ ᠴᠢᠨᠢ ᠳᠠᠷᠤᠢ ᠤᠨᠠᠭᠠᠯᠠᠬᠤ ᠪᠣᠯᠤᠨᠠ᠃ 》ᠭᠡᠵᠦ ᠶᠠᠪᠤᠭᠤᠯᠪᠠ᠃ ᠠᠩᠴᠢᠨ ᠬᠦᠦ ᠠᠷᠢᠭᠤᠩᠭᠤᠸᠠ ᠠᠪᠠᠭᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠦᠭᠡ ᠪᠡᠷ ᠶᠠᠪᠤᠵᠤ᠂ ᠭᠡᠭᠦᠦ ᠪᠡᠨ ᠤᠰᠤᠯᠠᠭᠠᠳ ᠥᠭᠡᠳᠡ ᠲᠠᠭᠠᠷᠠᠪᠠᠯ ᠳᠠᠪᠬᠢᠵᠤ᠂ ᠤᠷᠤᠭᠤ ᠲᠠᠭᠠᠷᠠᠪᠠᠯ ᠲᠠᠲᠠᠵᠤ᠂ ᠬᠦᠷᠦᠭᠡᠳ ᠤᠶᠠᠭᠠᠨ ᠠ᠋ᠴᠠ ᠨᠢ ᠤᠶᠠᠭᠰᠠᠨ ᠳ᠋ᠤ᠌᠂ ᠬᠠᠭᠠᠨ ᠭᠠᠷᠴᠤ ᠢᠷᠡᠭᠡᠳ ᠦᠵᠡᠬᠦ ᠳ᠋ᠦ᠍᠂ ᠠᠩᠴᠢᠨ ᠬᠦᠦ ᠬᠣᠢᠲᠤ ᠣᠯᠣᠩ ᠢ᠋ ᠨᠢ ᠰᠤᠯᠠᠳᠬᠠᠬᠤ ᠳ᠋ᠤ᠌᠂ ᠭᠡᠭᠦᠦ ᠨᠢ ᠳᠠᠷᠤᠢ ᠤᠨᠠᠭᠠᠯᠠᠪᠠ ᠭᠡᠨᠡ᠃ ᠬᠠᠭᠠᠨ ᠦᠵᠡᠭᠡᠳ ᠶᠠᠭᠤ ᠴᠤ᠌ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠳᠠᠬᠢᠭᠠᠳ ᠬᠠᠭᠠᠨ᠂ ᠠᠩᠴᠢᠨ ᠬᠦᠦ ᠳ᠋ᠦ᠍ ᠬᠡᠯᠡᠭᠰᠡᠨ ᠨᠢ:《ᠴᠢ ᠮᠠᠷᠭᠠᠰᠢ ᠮᠢᠨᠦ ᠣᠷᠳᠣᠨ ᠳ᠋ᠤ᠌ ᠣᠷᠣᠬᠤ ᠦᠭᠡᠢ᠂ ᠭᠠᠷᠬᠤ ᠦᠭᠡᠢ᠂ ᠭᠡᠷ ᠲᠦ᠍ ᠦᠭᠡᠢ᠂ ᠭᠠᠳᠠᠨᠠ ᠦᠭᠡᠢ ᠪᠡᠷ ᠢᠷᠡ!》 ᠭᠡᠵᠦ ᠶᠠᠪᠤᠭᠤᠯᠪᠠ ᠭᠡᠨᠡ᠃ ᠴᠢᠩᠭᠢᠭᠡᠳ ᠠᠷᠢᠭᠤᠩᠭᠤᠸᠠ ᠨᠢ ᠴᠢ ᠮᠠᠷᠭᠠᠰᠢ ᠣᠴᠢᠵᠤ ᠬᠠᠭᠠᠨ ᠤ᠋ ᠬᠠᠭᠠᠯᠭᠠ ᠶ᠋ᠢᠨ ᠡᠭᠦᠳᠡᠨ ᠪᠣᠱᠣᠭᠠ ᠳᠡᠭᠡᠷᠡ ᠨᠢ ᠤᠨᠤᠭᠠᠳ ᠪᠢᠲᠡᠭᠡᠢ ᠬᠥᠳᠡᠯ ᠭᠡᠵᠦ ᠠᠩᠴᠢᠨ ᠬᠦᠦ ᠪᠡᠨ ᠶᠠᠪᠤᠭᠤᠯᠪᠠ ᠭᠡᠨᠡ᠃ ᠴᠢᠩᠭᠢᠭᠡᠳ ᠠᠩᠴᠢᠨ ᠬᠦᠦ ᠨᠢ ᠣᠴᠢᠵᠤ ᠬᠠᠭᠠᠨ ᠤ᠋ ᠭᠡᠷ ᠦ᠋ᠨ ᠪᠣᠱᠣᠭᠠ ᠳᠡᠭᠡᠷᠡ ᠨᠢ ᠵᠠᠢᠳᠠᠯᠠᠵᠤ ᠰᠠᠭᠤᠭᠰᠠᠨ ᠳ᠋ᠤ᠌ ᠬᠠᠭᠠᠨ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠨᠡ᠃ ᠬᠠᠭᠠᠨ᠂ ᠠᠩᠴᠢᠨ ᠬᠦᠦ ᠶ᠋ᠢ ᠭᠠᠷᠲᠠᠭᠠᠵᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠬᠦᠦ ᠪᠡᠨ ᠠᠪᠴᠢᠷᠠᠵᠤ ᠬᠡᠷᠢᠶᠡ ᠶᠠᠭᠤ ᠬᠡᠯᠡᠵᠦ ᠪᠠᠢᠨᠠ ᠪᠣᠢ? ᠭᠡᠰᠡᠨ ᠳ᠋ᠦ᠍᠂ ᠭᠤᠸᠠ ᠭᠤᠸᠠ ᠭᠡᠵᠦ ᠪᠠᠢᠨᠠ ᠭᠡᠰᠡᠨ ᠪᠠ ᠦᠬᠦᠭᠰᠡᠨ ᠬᠥᠮᠦᠨ ᠶᠠᠭᠤ ᠬᠡᠯᠡᠵᠦ ᠪᠠᠢᠨᠠ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠳᠤᠭᠤᠢ ᠪᠠᠢᠨᠠ ᠭᠡᠰᠡᠨ ᠪᠥᠭᠡᠳ ᠬᠠᠮᠬᠤᠤᠯ ᠶᠠᠭᠤ ᠬᠡᠯᠡᠵᠦ ᠪᠠᠢᠨᠠ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠥᠩᠬᠥᠷᠢᠵᠦ ᠪᠠᠢᠨᠠ ᠭᠡᠵᠡᠢ᠃ ᠡᠴᠦᠰ ᠲᠡᠭᠡᠨ ᠬᠠᠭᠠᠨ ᠠᠷᠭᠠ ᠦᠭᠡᠢ ᠪᠣᠯᠤᠨ ᠮᠣᠬᠣᠵᠤ ᠭᠡᠨᠡ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂
ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠪᠠᠯᠤᠰᠦᠭ᠂ ᠬᠡᠯᠡᠰᠣᠶᠣᠯ