ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠭᠤᠷᠪᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -13
172ᠭᠡᠷ ᠤᠨ ᠡᠵᠡᠨ
ᠡᠨᠡ ᠬᠥᠮᠦᠨ ᠲᠥᠷᠥᠯᠬᠢ ᠶ᠋ᠢᠨ ᠨᠢᠷᠤᠭᠤ ᠵᠢᠭᠠᠬᠠᠨ ᠪᠥᠭᠲᠥᠷ᠂ ᠲᠡᠭᠦᠨ ᠦ᠌ ᠪᠡᠨ ᠳᠡᠭᠡᠷᠡ ᠤᠯᠠᠮ ᠪᠥᠬᠥᠢᠨ ᠭᠠᠵᠠᠷ ᠰᠢᠷᠲᠡᠨᠡ᠃ ᠵᠤᠵᠠᠭᠠᠨ ᠬᠥᠪᠥᠩ ᠲᠡᠢ ᠪᠠᠷᠠᠭᠠᠷ ᠥᠮᠥᠳᠥᠨ ᠳ᠋ᠡᠭᠡᠨ ᠳᠦᠭᠦᠷᠳᠡᠭᠰᠡᠨ ᠮᠡᠲᠦ᠃ ᠣᠯᠠᠨ ᠳᠠᠪᠬᠤᠷ ᠳᠠᠪᠤᠤ ᠰᠢᠷᠠᠮᠠᠯ ᠬᠦᠨᠳᠦ ᠱᠠᠬᠠᠢ ᠪᠠᠨ ᠣᠢᠷᠠᠬᠠᠨ ᠪᠥᠭᠡᠳ ᠤᠳᠠᠭᠠᠨ ᠢ᠋ᠶ᠋ᠠᠷ ᠵᠥᠭᠡᠭᠡᠵᠦ ᠲᠠᠯᠪᠢᠨ ᠰᠠᠵᠢᠯᠠᠨᠠ᠃ ᠡᠢᠨᠬᠦ ᠪᠡᠶᠡ ᠶᠠᠳᠠᠷᠠᠭᠰᠠᠨ ᠤ᠋ ᠬᠢᠷᠢ ᠪᠡᠷ ᠤᠬᠠᠭᠠᠨ ᠰᠠᠨᠠᠭᠠ ᠰᠤᠯᠠᠷᠠᠭᠰᠠᠨ ᠠᠵᠢ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠣᠳᠣᠭᠳᠠᠬᠤ ᠶᠠᠭᠤᠮᠠ ᠶᠡᠷᠦ ᠦᠭᠡᠢ᠃ ᠵᠥᠪᠬᠡᠨ ᠲᠠᠮᠠᠬᠢ᠂ ᠲᠠᠮᠠᠬᠢ ᠶ᠋ᠢ ᠡᠨᠡ ᠬᠥᠮᠦᠨ ᠬᠡᠲᠦᠷᠬᠡᠢ ᠰᠢᠨᠤᠮᠠᠭᠠᠢ ᠲᠠᠲᠠᠬᠤ ᠠᠵᠢ᠃ ᠲᠠᠮᠠᠬᠢ ᠶ᠋ᠢ ᠠᠰᠠᠭᠠᠵᠤ ᠠᠪᠤᠩᠭᠤᠲᠠ ᠪᠠᠨ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠰᠣᠷᠣᠨ᠂ ᠤᠲᠤᠭᠠ ᠶ᠋ᠢ ᠨᠢ ᠵᠠᠯᠭᠢᠬᠤ ᠪᠠᠷ ᠪᠡᠶᠡ ᠬᠥᠩᠭᠡᠷᠡᠨ ᠰᠠᠨᠠᠭᠠ ᠰᠡᠷᠭᠦᠬᠦ ᠲᠡᠳᠦᠢ ᠦᠭᠡᠢ᠂ ᠡᠳᠦᠷ ᠳᠣᠳᠣᠮ ᠤ᠋ᠨ ᠢ᠋ᠶ᠋ᠠᠨ ᠬᠦᠨᠳᠦ ᠵᠠᠳᠠᠷᠠᠯ ᠢ᠋ ᠣᠷᠣ ᠮᠥᠷ ᠦᠭᠡᠢ ᠮᠠᠷᠲᠠᠨ ᠠᠮᠤᠰᠬᠢᠨᠡ᠃ ᠡᠢᠮᠦ ᠳ᠋ᠦ᠍ ᠯᠤᠤ ᠯᠢ ᠬᠠᠮᠤᠭ ᠤ᠋ᠨ ᠳᠡᠭᠡᠳᠦ ᠵᠢᠷᠭᠠᠯ ᠤ᠋ᠨ ᠢᠳᠡᠭᠡ ᠭᠡᠵᠦ ᠦᠵᠡᠨᠡ᠃ ᠭᠡᠪᠡᠴᠦ ᠣᠳᠣ ᠲᠠᠮᠠᠬᠢ ᠠᠯᠠᠭᠠ᠃ ᠠᠵᠢᠯ ᠳᠡᠭᠡᠷᠡ ᠲᠠᠮᠠᠬᠢ ᠲᠠᠢ ᠪᠠᠢᠭᠰᠠᠭᠠᠷ ᠪᠠᠢᠨ ᠪᠠᠢᠨ ᠲᠠᠲᠠᠬᠤ ᠶᠠᠪᠤᠳᠠᠯ ᠭᠠᠷᠤᠨ ᠰᠠᠭᠠᠳᠴᠦ᠂ ᠠᠪᠬᠤ ᠬᠥᠯᠥᠰᠥ ᠪᠠᠭᠠᠰᠤᠨᠠ ᠭᠡᠵᠦ ᠯᠤᠤ ᠯᠢ ᠲᠠᠮᠠᠬᠢ ᠪᠠᠨ ᠲᠡᠨᠳᠡ ᠪᠡᠨ ᠭᠡᠷ ᠲᠡᠭᠡᠨ ᠣᠷᠬᠢᠳᠠᠭ ᠪᠠᠢᠵᠠᠢ᠃ ᠲᠡᠭᠦᠨᠴᠡ ᠪᠦᠷ ᠠᠶᠤᠯ ᠲᠠᠢ ᠶᠠᠭᠤᠮᠠ ᠶ᠋ᠢ ᠶᠠᠭᠠᠬᠢᠵᠤ ᠮᠡᠳᠡᠬᠦ ᠪᠣᠢ? ᠡᠵᠡᠨ ᠦ᠌ ᠶᠠᠭᠤᠮᠠᠨ ᠳ᠋ᠤ᠌ ᠭᠠᠯ ᠭᠠᠷᠪᠠᠯ ᠶᠠᠭᠤᠨ ᠤ᠋ ᠲᠦᠷᠦᠭᠦᠨ ᠳ᠋ᠦ᠍ ᠪᠢ ᠲᠡᠷᠡ ᠬᠡᠷᠡᠭ ᠲᠦ᠍ ᠰᠡᠵᠢᠭᠯᠡᠭᠳᠡᠨᠡ ᠭᠡᠵᠦ ᠪᠣᠯᠭᠣᠮᠵᠢᠯᠠᠳᠠᠭ ᠴᠤ᠌ ᠪᠠᠢᠵᠠᠢ᠃ ᠭᠠᠵᠠᠷ ᠤ᠋ᠨ ᠳᠤᠮᠳᠠ ᠬᠢᠷᠢ ᠳ᠋ᠦ᠍ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠲᠠᠮᠠᠬᠢ ᠮᠠᠷᠲᠠᠭᠳᠠᠨ ᠠᠭᠠᠭ ᠠᠮᠲᠠ ᠦᠭᠡᠢ ᠪᠣᠯᠪᠠᠴᠤ ᠬᠠᠯᠠᠭᠤᠨ ᠴᠠᠢ ᠪᠣᠳᠣᠭᠳᠠᠨᠠ᠃ ᠠᠮᠠ ᠨᠢ ᠡᠭᠰᠢᠨ᠂ ᠬᠡᠯᠡ ᠨᠢ ᠬᠥᠰᠢᠯᠳᠦᠵᠦ᠂ ᠪᠡᠶᠡ ᠶ᠋ᠢᠨ ᠲᠠᠩᠬᠢᠯ ᠤᠯᠠᠮ ᠳᠣᠷᠣᠢᠲᠠᠨᠠ᠃《ᠭᠡᠷ ᠮᠠᠨᠢ ᠪᠠᠰᠠ ᠯᠠ ᠶᠠᠭᠠᠬᠢᠭᠠ ᠴᠤ᠌ ᠦᠭᠡᠢ᠂ ᠬᠡᠵᠢᠶᠡ ᠬᠦᠷᠦᠨᠡ》 ᠭᠡᠬᠦ ᠡᠴᠡ ᠬᠥᠯ ᠡᠴᠡᠨ᠂ ᠵᠣᠷᠢᠭ ᠰᠢᠨᠲᠠᠷᠠᠨᠠ᠃ ᠭᠡᠲᠡᠯᠡ ᠴᠠᠢ ᠮᠠᠷᠲᠠᠭᠳᠠᠨ ᠬᠠᠨᠵᠤᠨ ᠳᠡᠭᠡᠷᠡ ᠬᠡᠪᠲᠡᠨ ᠠᠮᠠᠷᠠᠬᠤ ᠯᠠ ᠮᠥᠷᠥᠭᠡᠳᠥᠭᠳᠡᠪᠡ᠃ ᠲᠡᠭᠡᠭᠡᠳ ᠭᠡᠷ ᠦ᠋ᠨ ᠡᠮᠦᠨᠡ ᠢᠷᠡᠬᠦ ᠳ᠋ᠦ᠍ ᠲᠠᠮᠠᠬᠢ᠂ ᠴᠠᠢ᠂ ᠬᠠᠨᠵᠤ ᠭᠤᠷᠪᠠᠭᠤᠯᠠ ᠪᠠᠨ ᠨᠢᠭᠡ ᠵᠡᠷᠭᠡ ᠪᠤᠳᠤᠭᠳᠠᠨ ᠰᠠᠨᠳᠤᠷᠭᠠᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠯᠤᠤ ᠯᠢ ᠨᠢᠭᠡᠨᠲᠡ ᠭᠠᠳᠠᠨᠠ ᠪᠠᠨ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠪᠦᠭᠦᠳᠡ ᠪᠡᠯᠡᠨ ᠰᠢᠦ ᠳᠡ ᠭᠡᠵᠦ ᠰᠡᠳᠬᠢᠯ ᠢ᠋ᠶ᠋ᠡᠨ ᠠᠷᠭᠠᠳᠠᠨ ᠳᠣᠲᠣᠭᠰᠢ ᠪᠠᠨ ᠣᠷᠣᠪᠠ᠃ ᠡᠮᠦᠨᠡ ᠡᠴᠡ ᠨᠢ ᠠᠪᠠᠭᠠᠢ᠄ ᠠ᠋ ᠭᠡᠵᠦ ᠤᠤᠯᠭᠠᠯᠠᠨ᠂
— ᠠᠰᠢᠭᠦᠢ ᠴᠢ ᠢᠷᠡᠪᠡᠦ? ᠪᠢ ᠴᠢᠮᠠᠶ᠋ᠢ ᠱᠠᠯᠠᠪᠬᠠᠨ ᠢᠷᠡᠭᠡᠰᠡᠢ ᠭᠡᠵᠦ ᠬᠦᠰᠡᠵᠦ ᠪᠠᠢᠯᠠ ᠭᠡᠵᠦ ᠢᠨᠢᠶᠡᠨ ᠤᠭᠲᠤᠪᠠ᠃ ᠤᠷᠢᠳᠤ ᠡᠮᠦᠨᠡ ᠪᠣᠯ ᠠᠪᠠᠭᠠᠢ ᠨᠢ ᠲᠠᠩᠳᠠ ᠣᠢ ᠭᠠᠰᠢᠭᠤᠨ᠂ ᠭᠣᠣᠯ ᠲᠥᠯᠥᠪ ᠠᠯᠳᠠᠭᠳᠠᠭᠰᠠᠨ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠳᠤᠷᠠᠰᠤᠨ ᠤᠬᠢᠯᠠᠭᠠᠨ ᠤᠨᠵᠠᠭᠠᠨ ᠪᠣᠯᠤᠨ ᠰᠠᠭᠤᠵᠤ ᠪᠠᠢᠳᠠᠭ ᠪᠠᠢᠵᠠᠢ᠃ ᠥᠨᠥᠳᠥᠷ ᠲᠤᠩ ᠥᠭᠡᠷᠡ ᠪᠠᠢᠭᠠ ᠳ᠋ᠤ᠌ ᠯᠤᠤ ᠯᠢ ᠰᠡᠳᠬᠢᠯ ᠬᠠᠴᠢᠨ ᠪᠣᠯᠤᠨ ᠥᠨᠥᠬᠢ ᠬᠦᠰᠡᠨ ᠮᠥᠷᠥᠭᠡᠳᠴᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠪᠦᠭᠦᠳᠡ ᠶ᠋ᠢ ᠮᠠᠷᠲᠠᠪᠠ᠃
— ᠪᠢ ᠥᠨᠥᠳᠥᠷ ᠲᠡᠭᠡᠷᠡᠮᠡ ᠳ᠋ᠦ᠍ ᠵᠢᠳᠬᠦᠨ ᠶᠠᠳᠠᠷᠠᠭᠠᠳ ᠡᠷᠲᠡ ᠢᠷᠡᠯᠡ᠂ ᠴᠢ ᠶᠠᠭᠤ ᠪᠣᠯᠪᠠ? ᠶᠠᠭᠤᠨ ᠳ᠋ᠤ᠌ ᠨᠠᠮᠠᠶ᠋ᠢ ᠬᠦᠯᠢᠶᠡᠭᠡ ᠪᠣᠢ? ᠭᠡᠳ ᠨᠥᠬᠥᠷ ᠨᠢ ᠬᠠᠨᠵᠤᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠪᠠ᠃ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠩᠰᠠ ᠲᠠᠮᠠᠬᠢ ᠠᠪᠴᠤ ᠥᠭᠬᠦ ᠶ᠋ᠢ ᠳᠠᠳᠤᠭᠰᠠᠨ ᠵᠤᠷᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠦᠯᠢᠶᠡᠨ ᠠᠪᠴᠤ ᠴᠦᠳᠡᠨᠵᠡ ᠵᠢᠷᠤᠨ ᠲᠠᠮᠠᠬᠢ ᠪᠠᠨ ᠠᠰᠠᠭᠠᠵᠠᠢ᠃ ᠠᠪᠠᠭᠠᠢ᠄
— ᠳᠠᠩᠵᠢᠶᠠᠳ ᠮᠢᠨᠢ ᠥᠨᠥᠳᠥᠷ ᠮᠠᠨ ᠤ᠋ ᠨᠢᠭᠡ ᠬᠦᠦ᠁
— ᠶᠠᠭᠤ ᠬᠠᠮᠢᠭᠠᠬᠢ ᠶ᠋ᠢᠨ?
— ᠬᠦᠦ ᠶ᠋ᠢᠨ ᠮᠢᠨᠢ ᠦᠶᠡ ᠶ᠋ᠢᠨ ᠬᠦᠦ᠁
— ᠠ᠋᠂ ᠬᠠᠮᠢᠭᠠ ᠠ᠋ᠴᠠ ᠲᠡᠷᠡ ᠪᠣᠢ?
— ᠲᠡᠢᠨ ᠦ᠌ ᠭᠠᠵᠠᠷ ᠠ᠋ᠴᠠ᠁
— ᠬᠠ ᠶᠠᠭᠠᠬᠢᠭᠰᠠᠨ ᠬᠠᠴᠢᠨ ᠬᠡᠷᠡᠭ ᠪᠣᠢ?
— ᠲᠡᠢᠮᠦ᠂ ᠨᠡᠭᠡᠷᠡᠨ ᠬᠠᠴᠢᠨ᠃ ᠭᠠᠳᠠᠭᠠᠳᠤ ᠮᠣᠩᠭᠣᠯ ᠭᠡᠨᠡ᠃ ᠮᠠᠰᠢ ᠬᠠᠴᠢᠨ ᠰᠠᠢᠬᠠᠨ ᠢ᠋ ᠶᠠᠷᠢᠪᠠ ᠭᠡᠳ ᠠᠪᠠᠭᠠᠢ ᠳ᠋ᠠᠨᠽᠠᠨ ᠠ᠋ᠴᠠ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢᠵᠤ ᠡᠬᠢᠯᠡᠪᠡ᠃
ᠯᠤᠤ ᠯᠢ ᠶ᠋ᠢᠨ ᠶᠠᠳᠠᠷᠠᠯ ᠲᠠᠮᠠᠬᠢ᠂ ᠴᠠᠢ ᠬᠣᠶᠠᠷ ᠲᠠᠢ ᠪᠠᠨ ᠠᠭᠤᠯᠵᠠᠬᠤ ᠲᠠᠢ ᠪᠠᠨ ᠵᠡᠷᠭᠡ ᠠᠷᠢᠯᠤᠨᠠ᠃ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠦᠭᠡ ᠶ᠋ᠢ《ᠣᠩ᠂ ᠣᠩ》 ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠣᠣᠭᠤᠷᠤᠨ ᠴᠢᠩᠨᠠᠨᠠ᠃ ᠲᠡᠷᠡ ᠪᠦᠬᠦᠨ ᠢ᠋ ᠶᠡᠷᠦ ᠦᠨᠡᠮᠰᠢᠬᠦ ᠦᠭᠡᠢ ᠪᠠᠢᠪᠠᠴᠤ᠂ ᠬᠥᠭᠡᠷᠦᠬᠦᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠰᠡᠳᠬᠢᠯ ᠳ᠋ᠦ᠍ ᠲᠠᠭᠠᠷᠠᠭᠤᠯᠤᠨ ᠦᠨᠡᠮᠰᠢᠬᠦ ᠪᠠᠢᠳᠠᠯ ᠦᠵᠡᠭᠦᠯᠦᠨ᠂《ᠣᠩ ᠣᠩ》 ᠭᠡᠭᠰᠡᠭᠡᠷ ᠯᠡ ᠰᠠᠭᠤᠨᠠ᠃ ᠲᠡᠭᠦᠨ ᠦ᠌ ᠣᠷᠣᠵᠤ ᠢᠷᠡᠭᠰᠡᠭᠡᠷ ᠲᠡᠳᠦᠢ ᠯᠡ ᠶᠡᠬᠡ ᠤᠳᠠᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠪᠢᠴᠢᠬᠠᠨ ᠪᠠᠢᠰᠢᠩ ᠨᠢ ᠲᠠᠮᠠᠬᠢᠨ ᠤ᠋ ᠤᠲᠤᠭᠠ ᠪᠠᠷ ᠳᠦᠭᠦᠷᠴᠦ᠂ ᠳᠠᠭᠠᠵᠠᠨ ᠤ᠋ ᠪᠣᠷᠣᠯᠠᠭᠰᠠᠨ ᠮᠣᠣᠲᠸᠦ ᠴᠠᠭᠠᠰᠤ ᠦᠵᠡᠭᠳᠡᠬᠦ ᠲᠡᠢ ᠦᠭᠡᠢ ᠲᠡᠢ ᠪᠣᠯᠵᠠᠢ᠃ ᠲᠠᠮᠠᠬᠢᠨ ᠤ᠋ ᠤᠲᠤᠭᠠ ᠬᠡᠳᠦ ᠮᠠᠨᠠᠷᠠᠨ ᠨᠢᠭᠡᠨ ᠪᠤᠯᠤᠩ ᠠ᠋ᠴᠠ ᠨᠥᠭᠦᠭᠡ ᠪᠤᠯᠤᠩ ᠤ᠋ᠨ ᠶᠠᠭᠤᠮᠠ ᠬᠠᠷᠠᠭᠳᠠᠬᠤ ᠦᠭᠡᠢ ᠪᠣᠯᠵᠤ ᠪᠠᠢᠬᠤ ᠳ᠋ᠤ᠌᠂ ᠳ᠋ᠠᠨᠽᠠᠨ ᠣᠷᠣᠵᠤ ᠢᠷᠡᠪᠡ᠃ ᠯᠤᠤ ᠯᠢ ᠶᠠᠭᠠᠷᠠᠨ ᠪᠣᠰᠴᠤ ᠠᠮᠤᠷ ᠡᠷᠢᠭᠡᠳ᠂ ᠬᠠᠨᠵᠤᠨ ᠳ᠋ᠠᠬᠢ ᠰᠢᠷᠡᠭᠡᠨ ᠦ᠌ ᠪᠡᠨ ᠨᠥᠭᠦᠭᠡ ᠲᠠᠯᠠ ᠳ᠋ᠤ᠌ ᠰᠠᠭᠤᠯᠭᠠᠪᠠ᠃ ᠶᠠᠭᠤᠨ ᠤ᠋ ᠤᠷᠢᠳ ᠳ᠋ᠠᠨᠽᠠᠨ ᠲᠡᠭᠦᠨ ᠦ᠌ ᠲᠣᠯᠣᠭᠠᠢ ᠳ᠋ᠠᠭᠠᠨ ᠣᠷᠢᠶᠠᠭᠰᠠᠨ ᠨᠠᠷᠢᠨ ᠰᠦᠯᠵᠢᠮᠡᠯ ᠭᠡᠵᠢᠭᠡ᠂ ᠮᠠᠩᠨᠠᠢ ᠶ᠋ᠢᠨ ᠬᠢᠨᠢ ᠣᠯᠠᠨ ᠳᠠᠪᠬᠤᠷ ᠦᠷᠴᠢᠯᠡᠭᠡᠰᠦ ᠨᠢᠭᠤᠷ ᠤ᠋ᠨ ᠬᠢᠨᠢ ᠬᠥᠯᠥᠰᠥᠨ ᠳ᠋ᠦ᠍ ᠲᠦᠯᠡᠭᠳᠡᠭᠰᠡᠨ ᠮᠡᠲᠦ ᠶ᠋ᠢᠨ ᠰᠢᠷᠠᠩᠭᠤᠢ ᠶ᠋ᠢ ᠠᠵᠢᠭᠯᠠᠨ ᠲᠠᠪᠢ ᠭᠠᠷᠤᠢ ᠨᠠᠰᠤ ᠲᠠᠢ ᠪᠣᠯᠪᠠ ᠤᠤ ᠭᠡᠵᠦ ᠳᠣᠲᠣᠷᠠ ᠪᠠᠨ ᠳᠠᠭᠠᠪᠤᠷᠢᠯᠠᠪᠠ᠃ ᠲᠡᠭᠡᠭᠡᠳ ᠬᠡᠯᠡᠬᠦ ᠦᠭᠡ ᠪᠦᠷᠢ ᠶ᠋ᠢ ᠣᠩ ᠣᠩ ᠳᠤᠤᠭᠠᠷᠤᠨ ᠬᠦᠯᠢᠶᠡᠨ ᠠᠪᠬᠤ᠂ ᠥᠪᠡᠷ ᠦ᠋ᠨ ᠬᠢ ᠳᠡᠭᠡᠷᠡ ᠪᠡᠨ ᠪᠣᠯᠬᠣᠷ ᠲᠠᠮᠠᠬᠢᠨ ᠳ᠋ᠤ᠌ ᠬᠡᠳᠦ ᠰᠢᠷᠠᠯᠠᠭᠰᠠᠨ ᠡᠭᠦᠳᠡᠨ ᠰᠢᠲᠦ ᠪᠡᠨ ᠵᠣᠷᠢᠭᠤᠳᠠ ᠦᠵᠡᠭᠦᠯᠦᠨ ᠢᠨᠢᠶᠡᠮᠰᠦᠭᠯᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ《ᠠ᠋ ᠴᠢ ᠪᠣᠯᠭᠣᠮᠵᠢᠯᠠ!》 ᠭᠡᠵᠦ ᠥᠪᠡᠷᠲᠡᠭᠡᠨ ᠵᠠᠬᠢᠨᠠ᠃ ᠯᠤᠤ ᠯᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠷᠢᠭᠰᠠᠨ ᠠ᠋ᠴᠠ ᠳ᠋ᠠᠨᠽᠠᠨ ᠤ᠋ ᠬᠤᠳᠠᠯ ᠶᠠᠷᠢᠭᠰᠠᠨ ᠢ᠋ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠠ ᠪᠥᠭᠡᠳ ᠣᠳᠣ ᠨᠢᠭᠤᠷ ᠤᠴᠠᠷᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌ ᠦᠨᠡᠨ ᠢ᠋ ᠬᠡᠷᠬᠢᠨ ᠣᠯᠬᠤ ᠪᠢᠯᠡ ᠭᠡᠬᠦ ᠳ᠋ᠡᠭᠡᠨ ᠦᠨᠡᠭᠡᠨ ᠵᠠᠯᠢ ᠭᠠᠷᠭᠠᠬᠤ ᠶ᠋ᠢ ᠪᠣᠳᠣᠨᠠ᠃
— ᠵᠠ ᠴᠢ ᠲᠡᠭᠡᠭᠡᠳ ᠶᠠᠳᠠᠷᠠᠵᠤ ᠶᠠᠪᠤᠨᠠ ᠤᠤ?
— ᠦᠭᠡᠢ ᠠ᠋᠂ ᠶᠡᠷᠦ ᠶᠠᠳᠠᠷᠠᠭᠰᠠᠨ ᠵᠦᠢᠯ ᠦᠭᠡᠢ ᠭᠡᠬᠦ ᠳ᠋ᠦ᠍᠂ ᠯᠤᠤ ᠯᠢ ᠳ᠋ᠠᠨᠽᠠᠨ ᠤ᠋ ᠦᠨᠡᠨ ᠢ᠋ᠶ᠋ᠡᠨ ᠶᠠᠷᠢᠬᠤ ᠶ᠋ᠢ ᠶᠡᠬᠡᠳᠡ ᠴᠡᠭᠡᠷᠯᠡᠵᠦ ᠪᠠᠢᠭᠠ ᠶ᠋ᠢ ᠲᠣᠳᠣᠷᠬᠠᠢ ᠮᠡᠳᠡᠪᠡ᠃
— ᠶᠠᠳᠠᠷᠠᠭᠠ ᠦᠭᠡᠢ ᠪᠣᠯ ᠮᠠᠰᠢ ᠰᠠᠢᠨ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠭᠡᠳ ᠮᠠᠨ ᠤ᠋ ᠡᠬᠡᠨᠡᠷ ᠨᠠᠳᠠ ᠳ᠋ᠤ᠌ ᠶᠠᠷᠢᠬᠤ ᠳ᠋ᠠᠭᠠᠨ ᠴᠢᠮᠠᠶ᠋ᠢ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠭᠡᠵᠦ ᠶᠠᠷᠢᠭᠰᠠᠨ᠃ ᠲᠡᠳᠡᠨ ᠦ᠌ ᠪᠠᠷᠢᠭᠳᠠᠬᠤ ᠪᠣᠯ ᠦᠬᠦᠯ ᠳ᠋ᠦ᠍ ᠤᠨᠠᠯᠠ ᠭᠡᠰᠡᠨ ᠦᠭᠡ ᠭᠡᠳ ᠯᠤᠤ ᠯᠢ ᠶᠠᠭᠤ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠨᠢ ᠬᠦᠯᠢᠶᠡᠪᠡ᠃ ᠭᠡᠲᠡᠯᠡ ᠠᠪᠠᠭᠠᠢ ᠨᠢ ᠵᠤᠤᠬᠠᠨ ᠤ᠋ ᠪᠠᠨ ᠲᠡᠨᠳᠡ ᠡᠴᠡ᠄
— ᠳᠠᠩᠵᠢᠶᠠᠳ ᠮᠢᠨᠢ᠂ ᠴᠢ ᠲᠡᠷᠡ ᠴᠡᠷᠢᠭ ᠲᠡᠢᠨ ᠦ᠌ ᠭᠠᠵᠠᠷ ᠶᠠᠮᠠᠷ ᠪᠠᠢᠭᠠ ᠶ᠋ᠢ ᠠᠰᠠᠭᠤᠭᠠᠴᠢ! ᠪᠢ ᠳᠠᠬᠢᠨ ᠲᠤᠭᠤᠯᠬᠤ ᠶ᠋ᠢ ᠬᠦᠰᠡᠵᠦ ᠪᠠᠢᠨᠠ᠃ ᠯᠤᠤ ᠯᠢ《ᠬᠡ》 ᠭᠡᠵᠦ ᠤᠴᠠᠭᠠᠷᠯᠠᠨ᠂
— ᠡᠬᠡᠨᠡᠷ ᠮᠢᠨᠢ ᠲᠡᠭᠦᠨ ᠢ᠋ ᠡᠨᠡ ᠬᠦᠦ ᠲᠦᠷᠦᠭᠦᠨ ᠴᠢᠮᠠ ᠳ᠋ᠤ᠌ ᠲᠣᠳᠣᠷᠬᠠᠢ ᠶᠠᠷᠢᠭᠰᠠᠨ ᠪᠢᠰᠢᠦ? ᠳᠠᠷᠠᠭᠠ ᠨᠢ ᠴᠢ ᠨᠠᠳᠠ ᠶᠠᠷᠢᠭᠰᠠᠨ ᠪᠣᠯᠬᠣᠷ ᠳᠠᠬᠢᠨ ᠳᠠᠪᠲᠠᠨ ᠶᠠᠷᠢᠭᠠᠳ ᠪᠠᠢᠬᠤ ᠶ᠋ᠢᠨ ᠬᠡᠷᠡᠭ ᠠᠯᠠᠭᠠ ᠭᠡᠳ ᠳ᠋ᠠᠨᠽᠠᠨ ᠤᠷᠤᠭᠤ ᠢᠨᠢᠶᠡᠮᠰᠦᠭᠯᠡᠨ ᠬᠠᠨᠳᠤᠵᠤ᠄
— ᠬᠦᠦ ᠴᠢ ᠮᠠᠨ ᠤ᠋ ᠳ᠋ᠤ᠌ ᠨᠢᠭᠡ ᠲᠡᠮᠡᠭᠡ ᠥᠭᠬᠦ ᠭᠡᠰᠡᠨ ᠭᠡᠯᠡ ᠤᠤ?
— ᠲᠡᠢᠮᠦ ᠠ᠋᠂ ᠥᠭᠭᠦᠶᠡ ᠭᠡᠰᠡᠨ᠃
— ᠲᠡᠮᠡᠭᠡ ᠪᠡᠨ ᠪᠤᠰᠤᠳ ᠲᠤ ᠵᠦᠭᠡᠷ ᠥᠭᠭᠦᠨᠡ ᠭᠡᠳᠡᠭ ᠴᠢᠨᠢ ᠶᠠᠭᠤ ᠭᠡᠰᠡᠨ ᠦᠭᠡ ᠪᠣᠢ? ᠭᠡᠵᠦ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠪᠠᠷ ᠳ᠋ᠠᠨᠽᠠᠨ ᠢ᠋ ᠰᠢᠷᠳᠡᠪᠡ᠃
— ᠲᠡᠷᠡ ᠬᠠᠮᠢᠶᠠ ᠦᠭᠡᠢ ᠠ᠋᠂ ᠶᠠᠳᠠᠷᠠᠯ ᠤ᠋ᠨ ᠲᠤᠢᠯ ᠳ᠋ᠤ᠌ ᠬᠦᠷᠦᠭᠰᠡᠨ ᠮᠠᠭᠤ ᠲᠡᠮᠡᠭᠡ᠂ ᠬᠠᠷᠢᠨ ᠲᠠᠨ ᠤ᠋ ᠳ᠋ᠤ᠌ ᠭᠠᠢ ᠪᠣᠯᠵᠤ ᠮᠠᠭᠠᠳ᠃
— ᠣᠢᠯᠠᠭᠠᠯᠠ᠃ ᠭᠡᠪᠡᠴᠦ ᠲᠡᠮᠡᠭᠡ ᠪᠣᠯ ᠲᠠᠬᠢᠶᠠ ᠪᠢᠰᠢ᠂ ᠴᠢ ᠵᠦᠭᠡᠷ ᠮᠠᠨ ᠤ᠋ ᠳ᠋ᠤ᠌ ᠬᠡᠳᠦᠨ ᠬᠣᠨᠣᠭ ᠲᠡᠮᠡᠭᠡ ᠪᠡᠨ ᠲᠡᠩᠬᠡᠷᠡᠭᠦᠯᠵᠦ ᠠᠪᠤᠭᠠᠳ ᠶᠠᠪᠤᠪᠠᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠳ᠋ᠠᠨᠽᠠᠨ ᠭᠡᠷ ᠦ᠋ᠨ ᠡᠵᠡᠨ ᠦ᠌ ᠦᠨᠡᠨ ᠰᠠᠨᠠᠭᠠᠨ ᠤ᠋ ᠦᠭᠡ ᠶ᠋ᠢ ᠥᠭᠡᠷᠡ ᠪᠡᠷ ᠪᠣᠳᠣᠨ ᠰᠡᠵᠢᠭᠯᠡᠨᠡ᠃
— ᠵᠦᠭᠡᠷ᠂ ᠪᠢ ᠨᠢᠭᠡ ᠬᠣᠨᠣᠭᠠᠳ ᠶᠠᠪᠤᠶᠠ᠃
— ᠬᠦᠦ ᠴᠢ ᠲᠣᠮᠣᠭᠠ ᠦᠭᠡᠢ ᠪᠠᠢᠨᠠ᠃ ᠨᠢᠭᠡ ᠳ᠋ᠦ᠍᠂ ᠨᠤᠲᠤᠭ ᠴᠢᠨᠢ ᠬᠣᠯᠠ᠃ ᠬᠣᠶᠠᠷ᠂ ᠡᠨᠳᠡᠴᠡ ᠶᠠᠪᠤᠬᠤ ᠳᠣᠳᠣᠮ ᠬᠡᠴᠡᠭᠦᠦ ᠪᠣᠯᠤᠨᠠ᠃ ᠶᠠᠳᠠᠵᠤ ᠵᠢᠩᠴᠢᠳ ᠦ᠋ᠨ ᠶᠠᠪᠤᠬᠤ ᠶ᠋ᠢ ᠬᠦᠯᠢᠶᠡ᠃ ᠪᠢ ᠲᠠᠨ ᠤ᠋ ᠬᠥᠮᠦᠨ ᠢ᠋ ᠪᠡᠶᠡ ᠪᠡᠶᠡ ᠳ᠋ᠡᠭᠡᠨ ᠬᠠᠴᠢᠨ ᠲᠤᠰᠠ ᠦᠵᠡᠭᠦᠯᠳᠡᠭ ᠢ᠋ ᠠᠯᠢ ᠬᠠᠷᠠ ᠪᠠᠭᠠ ᠠ᠋ᠴᠠ ᠪᠠᠨ ᠰᠣᠨᠣᠰᠤᠭᠰᠠᠨ᠃ ᠨᠢᠭᠡ ᠨᠢ ᠨᠥᠭᠦᠭᠡ ᠪᠡᠨ ᠠᠪᠤᠭᠠᠳ ᠶᠠᠪᠤᠬᠤ ᠪᠠᠢᠲᠤᠭᠠᠢ ᠬᠣᠭᠣᠯᠠ ᠬᠦᠨᠡᠰᠦ ᠪᠡᠨ ᠬᠤᠪᠢᠶᠠᠨ ᠢᠳᠡᠵᠦ ᠪᠠᠷᠠᠪᠠᠴᠤ ᠬᠠᠮᠢᠶᠠ ᠦᠭᠡᠢ ᠤᠯᠤᠰ ᠭᠡᠨᠡ ᠪᠢᠯᠡ᠃ ᠮᠠᠨ ᠤ᠋ ᠲᠣᠰᠬᠣᠨ ᠤ᠋ ᠤᠷᠢᠳᠤᠭᠤᠷ ᠶᠠᠪᠤᠭᠰᠠᠨ ᠵᠠᠮ ᠪᠠᠢᠨᠠ᠃ ᠡᠭᠦᠪᠡᠷ ᠵᠢᠯ ᠳ᠋ᠦ᠍ ᠵᠢᠩᠴᠢᠳ ᠦᠷᠭᠦᠯᠵᠢ ᠶᠠᠪᠤᠨᠠ᠃ ᠭᠠᠭᠴᠠᠬᠠᠨ ᠡᠨᠡ ᠵᠢᠯ ᠶᠠᠭᠠᠬᠢᠭᠰᠠᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠲᠤᠩ ᠴᠥᠭᠡᠨ ᠶᠠᠪᠤᠵᠤ ᠪᠠᠢᠨᠠ᠂ ᠭᠡᠪᠡᠴᠦ ᠪᠢ ᠮᠡᠳᠡᠵᠦ ᠪᠠᠢᠨᠠ᠂ ᠵᠠᠪᠠᠯ ᠶᠠᠪᠤᠨᠠ᠃
— ᠨᠥᠭᠦᠭᠡ ᠲᠠᠯᠠ ᠠ᠋ᠴᠠ᠄
— ᠠ ᠲᠡᠢᠮᠦ᠂ ᠭᠠᠭᠴᠠᠭᠠᠷ ᠶᠠᠪᠤᠵᠤ ᠶᠠᠭᠠᠬᠢᠭᠰᠠᠨ ᠴᠤ᠌ ᠪᠣᠯᠬᠤ ᠦᠭᠡᠢ᠂ ᠬᠥᠯᠳᠡᠵᠦ ᠦᠬᠦᠨᠡ᠃ ᠠ ᠪᠢ ᠪᠠᠰᠠ ᠲᠤᠭᠤᠯᠤᠭᠰᠠᠨ᠃ ᠲᠠᠨ ᠤ᠋ ᠨᠤᠲᠤᠭ ᠲᠤ ᠴᠢᠨᠣᠠ ᠶᠡᠬᠡ ᠪᠠᠢᠳᠠᠭ ᠭᠡᠨᠡ ᠪᠢᠯᠡ᠃ ᠲᠡᠷᠡ ᠪᠠᠷᠢᠵᠤ ᠢᠳᠡᠨᠡ᠃
ᠭᠡᠷ ᠲᠦ᠍ ᠬᠥᠮᠦᠨ ᠬᠥᠮᠦᠨ ᠲᠡᠢ ᠪᠡᠨ ᠡᠢᠨᠬᠦ ᠲᠠᠨᠢᠯᠴᠠᠵᠤ ᠪᠠᠢᠬᠤ ᠳ᠋ᠤ᠌ ᠭᠠᠳᠠᠨᠠ ᠬᠠᠴᠢᠨ ᠲᠣᠮᠣ ᠬᠠᠷᠠ ᠪᠡᠶᠡ ᠲᠡᠢ ᠠᠮᠢᠲᠠᠨ ᠪᠣᠢ ᠪᠣᠯᠪᠠ ᠭᠡᠵᠦ ᠪᠦᠬᠦ ᠲᠣᠰᠬᠣᠨ ᠤ᠋ ᠬᠢᠨ ᠴᠤᠭᠯᠠᠷᠠᠵᠠᠢ᠃ ᠬᠡᠦᠬᠡᠳ ᠪᠠᠭᠠᠴᠤᠳ ᠭᠡᠷ ᠣᠷᠣᠨ ᠤᠷᠤᠭᠤ ᠪᠠᠢᠨ ᠪᠠᠢᠨ ᠭᠦᠶᠦᠯᠳᠦᠨ ᠰᠣᠩᠭᠢᠨᠠ᠂ ᠰᠠᠷᠢᠮᠰᠠᠭ ᠮᠡᠲᠦ ᠶ᠋ᠢᠨ ᠬᠦᠴᠦᠲᠡᠢ ᠤᠷᠭᠤᠮᠠᠯ ᠢ᠋ ᠠᠪᠴᠢᠷᠠᠨᠠ᠃ ᠲᠡᠭᠦᠨ ᠢ᠋ ᠨᠢ ᠯᠤᠤ ᠯᠢ ᠶ᠋ᠢᠨ ᠬᠦᠦ ᠲᠣᠰᠣᠨ ᠠᠪᠴᠤ ᠬᠠᠷᠠ ᠪᠤᠤᠷᠠ ᠶ᠋ᠢᠨ ᠡᠮᠦᠨᠡ ᠪᠠᠷᠢᠨᠠ᠃ ᠪᠤᠤᠷᠠ ᠶ᠋ᠢᠨ ᠲᠣᠯᠣᠭᠠᠢ ᠮᠠᠰᠢ ᠲᠣᠮᠣ᠂ ᠠᠮᠠ ᠨᠢ ᠪᠣᠯ ᠪᠦᠷ ᠴᠦ᠍ ᠬᠡᠲᠦᠷᠬᠡᠢ᠃ ᠵᠢᠭᠠᠯ ᠬᠦᠦ ᠶ᠋ᠢᠨ ᠪᠦᠬᠦ ᠴᠢᠨᠡᠭᠡ ᠪᠡᠷ ᠢ᠋ᠶ᠋ᠡᠨ ᠲᠡᠪᠡᠷᠢᠭᠰᠡᠨ ᠢ᠋ ᠪᠣᠯᠪᠠᠴᠤ᠂ ᠭᠠᠭᠴᠠᠬᠠᠨ ᠡᠮᠬᠦᠬᠦ ᠨᠢ ᠣᠯᠠᠨ ᠤ᠋ ᠰᠣᠨᠢᠷᠬᠠᠯ ᠢ᠋ ᠣᠨᠴᠠ ᠲᠠᠲᠠᠨᠠ᠃ ᠭᠡᠷ ᠦ᠋ᠨ ᠡᠵᠡᠨ ᠯᠤᠤ ᠯᠢ ᠭᠤᠸᠠᠢ ᠴᠤ᠌ ᠥᠭᠡᠷᠡ ᠴᠤ᠌ ᠦᠭᠡᠢ ᠪᠠᠢᠰᠢᠩ ᠠ᠋ᠴᠠ ᠪᠠᠨ ᠭᠠᠷᠤᠨ ᠬᠠᠷᠠᠩᠭᠤᠲᠠ ᠪᠠᠨ
— ᠦᠭᠡᠢ ᠠ᠋᠂ ᠡᠨᠡ ᠴᠢᠨᠢ ᠭᠡᠵᠦ ᠤᠤᠯᠭᠠ ᠠᠯᠳᠠᠪᠠ᠃
— ᠦᠭᠡᠢ ᠠ᠋᠂ ᠡᠨᠡ ᠴᠢᠨᠢ ᠲᠡᠮᠡᠭᠡ ᠪᠢᠰᠢ᠂ ᠠᠭᠤᠯᠠ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠭᠡᠳ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠭᠤ ᠬᠢᠵᠦ ᠪᠠᠢᠭᠠ ᠶ᠋ᠢ ᠬᠠᠷᠠᠨ ᠪᠠᠰᠠ ᠰᠣᠴᠢᠵᠤ᠂
— ᠬᠥᠶᠢ᠂ ᠴᠢ ᠶᠠᠭᠤ ᠬᠢᠵᠦ ᠪᠠᠢᠨᠠ ᠪᠣᠢ? ᠢᠩᠭᠢᠵᠦ ᠪᠠᠢᠵᠤ ᠵᠠᠯᠭᠢᠭᠤᠯᠴᠢᠬᠠᠬᠤ ᠨᠢ ᠤᠤ?
— ᠦᠭᠡᠢ ᠠ᠋᠂ ᠲᠠ ᠪᠢᠲᠡᠭᠡᠢ ᠠᠶᠤ᠂ ᠡᠨᠡ ᠴᠢᠨᠢ ᠨᠠᠳᠠ ᠳ᠋ᠤ᠌ ᠬᠠᠷᠢᠨ ᠬᠠᠢᠷᠠ ᠲᠠᠢ ᠪᠣᠯᠵᠤ ᠣᠷᠬᠢᠭᠠᠳ ᠬᠠᠷᠢᠨ ᠬᠠᠴᠠᠷ ᠢ᠋ ᠮᠢᠨᠢ ᠦᠨᠦᠰᠬᠦ ᠭᠡᠵᠦ ᠲᠡᠮᠡᠦᠯᠦᠭᠡᠳ ᠪᠠᠢᠨᠠ ᠭᠡᠵᠦ ᠬᠡᠯᠡᠨ ᠣᠯᠠᠨ ᠤ᠋ ᠢᠨᠢᠶᠡᠳᠦᠮ ᠪᠣᠯᠪᠠ᠃ ᠡᠨᠡ ᠴᠢᠮᠡᠭᠡ ᠪᠡᠷ ᠡᠬᠡ ᠨᠢ ᠭᠠᠷᠴᠤ ᠢᠷᠡᠨ᠂ ᠮᠥᠨ ᠯᠡ《ᠬᠠ》 ᠭᠡᠵᠦ ᠳᠠᠭᠤ ᠠᠯᠳᠠᠭᠠᠳ᠂ ᠡᠨᠡ ᠳᠡ ᠯᠣᠣᠶᠧ ᠶᠢᠨ ᠪᠠᠢᠰᠢᠩ ᠠ᠋ᠴᠠ ᠥᠨᠳᠥᠷ ᠪᠣᠢ ᠭᠡᠯᠡ᠃ ᠡᠭᠥᠨᠴᠡ ᠪᠣᠯᠤᠨ ᠣᠯᠠᠨ ᠤ᠋ ᠳᠤᠮᠳᠠ ᠯᠣᠣᠶᠧ ᠶᠢᠨ ᠪᠠᠢᠰᠢᠩ ᠠ᠋ᠴᠠ ᠥᠨᠳᠥᠷ᠂ ᠥᠨᠳᠥᠷ ᠪᠢᠰᠢ ᠭᠡᠵᠦ ᠵᠥᠷᠢᠯᠳᠦᠭᠰᠡᠨ ᠶᠠᠷᠢᠶᠠ ᠭᠠᠷᠪᠠ᠃
ᠪᠠᠢᠰᠢᠩ ᠳ᠋ᠠᠭᠠᠨ ᠡᠭᠡᠵᠦ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠣᠷᠣᠢ ᠶ᠋ᠢᠨ ᠬᠣᠭᠣᠯᠠ ᠪᠡᠯᠡᠨ ᠪᠣᠯᠤᠭᠠᠳ ᠪᠠᠢᠯᠠ᠃ ᠠᠪᠠᠭᠠᠢ ᠬᠠᠷᠢ ᠣᠷᠣᠨ ᠤ᠋ ᠡᠷᠬᠢᠮ ᠵᠣᠴᠢᠨ ᠢᠷᠡᠭᠰᠡᠨ ᠭᠡᠵᠦ ᠦᠵᠡᠬᠦ ᠳ᠋ᠡᠭᠡᠨ ᠠᠯᠢ ᠪᠠᠢᠳᠠᠭ ᠤ᠋ᠨ ᠢ᠋ᠶ᠋ᠠᠨ ᠳᠡᠭᠡᠳᠦ ᠪᠡᠷ ᠰᠦᠷᠡᠬᠡᠢ ᠨᠠᠷᠢᠨ ᠬᠣᠭᠣᠯᠠ ᠬᠢᠭᠰᠡᠨ ᠨᠢ ᠢᠯᠡᠷᠬᠡᠢ᠃ ᠰᠢᠷᠡᠭᠡᠨ ᠳᠡᠭᠡᠷᠡ ᠥᠷᠢᠨ ᠲᠠᠯᠪᠢᠭᠰᠠᠨ ᠢ᠋ ᠬᠡᠦᠬᠡᠳ ᠦ᠋ᠳ ᠨᠢ ᠬᠠᠷᠠᠨ ᠨᠢᠳᠦ ᠰᠡᠷᠭᠦᠨ ᠱᠤᠤᠭᠢᠯᠳᠤᠨᠠ᠃ ᠲᠡᠳᠡᠨ ᠦ᠌ ᠬᠠᠮᠤᠭ ᠤ᠋ᠨ ᠪᠠᠭᠠ ᠳᠥᠷᠪᠡᠨ ᠨᠠᠰᠤᠲᠠᠢ᠂ ᠪᠡᠶᠡ ᠳ᠋ᠡᠭᠡᠨ ᠪᠠᠷᠤᠭ ᠡᠮᠦᠰᠦᠭᠰᠡᠨ ᠶᠠᠭᠤᠮᠠ ᠦᠭᠡᠢ᠂ ᠳ᠋ᠠᠨᠽᠠᠨ ᠢ᠋ ᠡᠬᠡ ᠶ᠋ᠢᠨ ᠢ᠋ᠶ᠋ᠡᠨ ᠴᠠᠭ ᠢᠮᠠᠭᠲᠠ ᠳᠤᠷᠠᠰᠤᠨ ᠪᠠᠢᠳᠠᠭ ᠠᠬᠠ ᠪᠠᠨ ᠮᠥᠨ ᠭᠡᠵᠦ ᠪᠣᠳᠣᠭᠰᠠᠨ ᠠᠵᠢ᠃ ᠡᠬᠢᠯᠡᠭᠡᠳ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠵᠠᠭᠤ ᠳ᠋ᠤ᠌ ᠰᠠᠭᠤᠭᠰᠠᠨ ᠢ᠋ᠶ᠋ᠠᠨ ᠳ᠋ᠠᠨᠽᠠᠨ ᠤᠷᠤᠭᠤ ᠲᠡᠮᠡᠦᠯᠦᠨ ᠢᠷᠡᠵᠦ ᠡᠪᠦᠷ ᠳᠡᠭᠡᠷᠡ ᠨᠢ ᠰᠠᠭᠤᠵᠤ ᠵᠧ ᠬᠡ ᠸᠧ ᠳᠧ ᠳᠢ ᠬᠡ ᠬᠡ(ᠡᠨᠡ ᠮᠢᠨᠦ ᠠᠬᠠ) ᠭᠡᠵᠦ ᠶᠣᠰᠣᠲᠠᠢ ᠠᠩᠭᠢᠷ ᠤ᠋ᠨ ᠵᠤᠯᠵᠠᠭᠠᠨ ᠳᠠᠭᠤ ᠪᠠᠷ ᠥᠭᠦᠯᠡᠨ ᠪᠤᠰᠤᠳ ᠳᠤ ᠪᠠᠨ ᠭᠠᠢᠬᠠᠭᠤᠯᠤᠨᠠ᠃ ᠡᠬᠡ ᠨᠢ ᠭᠡᠪᠡᠯ ᠪᠥᠭᠡᠮ ᠪᠠᠶᠠᠷ᠃ ᠳ᠋ᠠᠨᠽᠠᠨ ᠤ᠋ ᠳᠡᠮᠡᠢ ᠪᠠᠯᠠᠢ ᠶᠠᠷᠢᠭᠰᠠᠨ ᠢ᠋ ᠦᠨᠡᠮᠰᠢᠨ ᠠᠯᠳᠠᠭᠳᠠᠭᠰᠠᠨ ᠬᠦᠦ ᠪᠡᠨ ᠢᠷᠡᠨᠡ ᠭᠡᠵᠦ ᠢᠲᠡᠭᠡᠬᠦ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠯᠠ ᠲᠡᠷᠡ᠃
— ᠳᠠᠩᠵᠢᠶᠠᠳ ᠮᠢᠨᠢ᠂ ᠲᠡᠢᠨ ᠦ᠌ ᠭᠠᠵᠠᠷ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠠᠮᠢ ᠦᠷᠡᠭᠳᠡᠬᠦ ᠦᠭᠡᠢ ᠪᠠᠢᠭᠠ ᠭᠡᠳᠡᠭ ᠰᠢᠦ᠃ ᠪᠠᠰᠠ ᠰᠠᠢᠬᠠᠨᠨᠠ᠃ ᠪᠢ ᠮᠡᠳᠡᠵᠦ ᠪᠠᠢᠨᠠ᠃ ᠲᠡᠢᠨ ᠳᠠᠭᠤᠰᠤᠨᠠ ᠭᠡᠬᠦ ᠳ᠋ᠦ᠍ ᠯᠤᠤ ᠯᠢ᠂
— ᠬᠡ᠂ ᠴᠢ ᠡᠭᠦᠨ ᠢ᠋ ᠪᠠᠢᠨ ᠪᠠᠢᠨ ᠳᠤᠷᠠᠰᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠣᠢ?
— ᠠ᠋᠂ ᠴᠢ ᠬᠦᠦ ᠶ᠋ᠢᠨ ᠲᠤᠬᠠᠢ ᠶᠠᠭᠤᠨ ᠳ᠋ᠤ᠌ ᠶᠠᠷᠢᠬᠤ ᠳᠤᠷᠠ ᠦᠭᠡᠢ ᠪᠠᠢᠨᠠ ᠪᠣᠢ? ᠡᠰᠡᠬᠦᠯᠡ ᠴᠢ ᠬᠦᠦ ᠪᠡᠨ ᠪᠦᠷ ᠪᠢᠲᠡᠭᠡᠢ ᠢᠷᠡᠭᠡᠰᠡᠢ ᠭᠡᠵᠦ ᠪᠣᠳᠣᠳᠠᠭ ᠬᠥᠮᠦᠨ ᠤᠤ?
— ᠡᠬᠡᠨᠡᠷ ᠮᠢᠨᠢ᠂ ᠬᠠᠮᠢᠭᠠ ᠠ᠋ᠴᠠ! ᠳᠤᠤᠭᠠᠷᠳᠠᠭ ᠦᠭᠡᠢ ᠰᠡᠳᠬᠢᠯ ᠲᠦᠮᠡᠨ ᠵᠣᠪᠠᠯᠠᠩ ᠡᠳ᠋ᠯᠡᠨᠡ ᠭᠡᠭᠴᠢ ᠪᠡᠷ ᠪᠢ ᠬᠦᠦ ᠶ᠋ᠢᠨ ᠲᠤᠬᠠᠢ ᠴᠢᠮᠠ ᠠ᠋ᠴᠠ ᠢᠯᠡᠭᠦᠦ ᠲᠡᠢ ᠵᠣᠪᠠᠳᠠᠭ ᠪᠠᠢᠵᠤ ᠮᠠᠭᠠᠳ᠃ ᠲᠡᠭᠡᠭᠡᠳ ᠴᠤ᠌ ᠪᠢ ᠣᠳᠣ ᠬᠦᠦ ᠶ᠋ᠢᠨ ᠪᠡᠶᠡ ᠮᠡᠨᠳᠦ᠂ ᠤᠳᠠᠬᠤ ᠦᠭᠡᠢ ᠡᠷᠭᠢᠵᠦ ᠢᠷᠡᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠯᠡ᠃ ᠢᠩᠭᠢᠬᠦ ᠪᠡᠷ ᠲᠡᠷᠡ ᠲᠤᠬᠠᠢ ᠪᠠᠢᠨ ᠪᠠᠢᠨ ᠶᠠᠷᠢᠵᠤ ᠶᠠᠭᠤ ᠬᠢᠬᠦ ᠪᠣᠢ᠃ ᠵᠦᠭᠡᠷ ᠯᠡ ᠰᠡᠳᠬᠢᠯ ᠠᠮᠤᠷ ᠬᠦᠯᠢᠶᠡᠶᠡ ᠭᠡᠳ ᠯᠤᠤ ᠯᠢ ᠡᠬᠡᠨᠡᠷ ᠦ᠋ᠨ ᠢ᠋ᠶ᠋ᠡᠨ ᠥᠪᠡᠷ ᠲᠡᠭᠡᠨ ᠭᠣᠮᠣᠳᠠᠭᠰᠠᠨ ᠴᠢᠷᠠᠢ ᠶ᠋ᠢ ᠠᠵᠢᠭᠯᠠᠭᠠᠳ᠄
— ᠡᠬᠡᠨᠡᠷ ᠮᠢᠨᠢ ᠬᠣᠶᠠᠭᠤᠯᠠ ᠪᠠᠨ ᠡᠨᠡ ᠬᠦᠦ ᠶ᠋ᠢᠨ ᠣᠷᠣᠨ ᠨᠤᠲᠤᠭ ᠤ᠋ᠨ ᠪᠠᠢᠳᠠᠯ ᠠ᠋ᠴᠠ ᠶᠠᠷᠢᠭᠤᠯᠤᠶᠠ᠃ ᠡᠳᠡᠨ ᠦ᠌ ᠬᠢᠨ ᠪᠣᠯ ᠮᠠᠨᠠᠢᠬᠢᠨ ᠰᠢᠭ᠋ ᠠᠮᠠ ᠳᠥᠷᠪᠡᠯᠵᠢᠨ ᠭᠠᠵᠠᠷ ᠬᠣᠷᠭᠣᠳᠠᠨ ᠡᠵᠡᠳ ᠪᠠᠶᠠᠳ ᠤ᠋ᠨ ᠢ᠋ᠶ᠋ᠠᠨ ᠡᠮᠦᠨᠡ ᠤᠶᠠᠭᠠᠲᠠᠢ ᠶᠠᠭᠤᠮᠠ ᠰᠢᠭ᠋ ᠰᠠᠭᠤᠳᠠᠭ ᠤᠯᠤᠰ ᠪᠢᠰᠢ᠃ ᠥᠨᠳᠥᠷ ᠠᠭᠤᠯᠠᠰ᠂ ᠭᠣᠣᠯ ᠭᠣᠷᠣᠬᠠ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠢᠭᠠ ᠪᠠᠢᠭᠠ ᠰᠠᠢᠬᠠᠨ ᠢ᠋ ᠡᠷᠬᠡ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠬᠡᠰᠦᠨ ᠨᠡᠭᠦᠳᠡᠯᠯᠡᠵᠦ ᠶᠠᠪᠤᠳᠠᠭ ᠤᠯᠤᠰ ᠨᠢᠭᠡ ᠭᠠᠵᠠᠷ ᠪᠠᠭᠤᠨ᠂ ᠬᠡᠳᠦᠨ ᠬᠣᠨᠣᠭ ᠪᠣᠯᠤᠭᠠᠳ ᠨᠡᠭᠦᠬᠦ ᠳ᠋ᠡᠭᠡᠨ ᠮᠢᠩᠭᠠᠨ ᠯᠠᠩ ᠦᠨᠡ ᠲᠡᠢ ᠶᠠᠭᠤᠮᠠ ᠶ᠋ᠢ ᠬᠠᠶᠠᠨᠠ ᠭᠡᠵᠦ ᠣᠴᠢᠵᠤ ᠦᠵᠡᠭᠰᠡᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠯᠡᠯᠴᠡᠳᠡᠭ ᠰᠢᠦ ᠳᠡ ᠭᠡᠵᠦ ᠳ᠋ᠠᠨᠽᠠᠨ ᠠ᠋ᠴᠠ ᠴᠠᠭᠠᠨ ᠮᠥᠭᠥ᠂ ᠬᠤᠨᠴᠢᠷ ᠬᠡᠮᠡᠬᠦ ᠤᠷᠭᠤᠮᠠᠯ ᠤ᠋ᠨ ᠦᠨᠳᠦᠰᠦ᠂ ᠪᠤᠭᠤ ᠶ᠋ᠢᠨ ᠡᠪᠡᠷ ᠱᠥᠢᠵᠢᠩ ᠴᠢᠯᠠᠭᠤ ᠵᠡᠷᠭᠡ ᠶ᠋ᠢ ᠰᠢᠮᠳᠠᠭᠠᠢᠯᠠᠨ ᠠᠰᠠᠭᠤᠨ ᠰᠤᠷᠠᠭᠯᠠᠨᠠ᠃ ᠡᠳᠡᠭᠡᠷ ᠵᠦᠢᠯᠡᠰ ᠬᠢᠲᠠᠳ ᠣᠷᠣᠨ ᠳ᠋ᠤ᠌ ᠬᠣᠪᠣᠷ ᠦᠨᠡ ᠲᠡᠢ ᠪᠠᠢᠳᠠᠭ ᠪᠠᠢᠵᠠᠢ᠃ ᠮᠣᠩᠭᠣᠯ ᠣᠷᠣᠨ ᠳ᠋ᠤ᠌ ᠪᠣᠯ ᠳᠡᠯ ᠰᠤᠯᠠ ᠬᠡᠪᠲᠡᠨ ᠦᠷᠡᠭᠳᠡᠨᠡ᠃ ᠳ᠋ᠠᠨᠽᠠᠨ ᠠ᠋ᠴᠠ ᠲᠡᠷᠡ ᠲᠤᠬᠠᠢ ᠶᠠᠷᠢᠵᠤ ᠬᠡᠯᠡᠬᠦ ᠳ᠋ᠦ᠍ ᠠᠪᠠᠭᠠᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠲᠠᠲᠠᠭᠳᠠᠨ᠂《ᠠ᠋ ᠬᠠᠢᠷᠠᠨ᠂ ᠬᠠᠢᠷᠠᠨ》 ᠭᠡᠵᠦ ᠱᠠᠭᠰᠢᠷᠠᠨᠠ᠃ ᠯᠤᠤ ᠯᠢ《ᠤᠩ ᠤᠩ》 ᠳᠤᠤᠭᠠᠷᠤᠨ ᠴᠢᠩᠨᠠᠬᠤ ᠪᠣᠯᠪᠠᠴᠤ ᠰᠡᠳᠬᠢᠯ ᠳ᠋ᠦ᠍ᠨᠢ ᠥᠭᠡᠷᠡ ᠵᠦᠢᠯ ᠡᠷᠭᠢᠯᠳᠦᠬᠦ ᠠᠵᠢ᠃
— ᠮᠠᠰᠢ ᠰᠣᠨᠢᠨ ᠢ᠋ ᠳᠤᠭᠤᠯᠤᠯᠠ᠃ ᠣᠳᠣ ᠶᠠᠷᠢᠶᠠ ᠪᠠᠨ ᠵᠣᠭᠰᠣᠶᠠ᠃ ᠶᠠᠳᠠᠭᠤ ᠬᠥᠮᠦᠨ ᠳ᠋ᠦ᠍ ᠶᠠᠷᠢᠶᠠ ᠶᠡᠬᠡᠳᠬᠦ ᠵᠣᠬᠢᠴᠠᠬᠤ ᠦᠭᠡᠢ ᠭᠡᠳᠡᠭ ᠰᠢᠦ᠃ ᠡᠬᠡᠨᠡᠷ ᠴᠢ ᠬᠡᠦᠬᠡᠳ ᠦ᠋ᠳ ᠲᠡᠢ ᠭᠠᠷᠴᠤ ᠲᠡᠮᠡᠭᠡ ᠲᠡᠵᠢᠭᠡ᠃ ᠪᠢᠳᠡ ᠬᠣᠶᠠᠷ ᠵᠢᠭᠠᠬᠠᠨ ᠠᠮᠠᠷᠠᠶᠠ᠃
ᠠᠪᠠᠭᠠᠢ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠭᠠᠷᠪᠠ᠃ ᠪᠠᠭᠠ ᠥᠬᠢᠨ ᠳ᠋ᠠᠨᠽᠠᠨ ᠤ᠋ ᠡᠪᠦᠷ ᠳᠡᠭᠡᠷᠡ ᠰᠠᠭᠤᠨ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠨᠲᠠᠵᠤ ᠣᠷᠬᠢᠭᠰᠠᠨ ᠪᠠᠢᠯᠠ᠃ ᠭᠡᠷ ᠦ᠋ᠨ ᠡᠵᠡᠨ ᠬᠠᠵᠠᠭᠤᠯᠠᠨ ᠠᠮᠠᠷᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠣᠷᠣᠭᠰᠢ ᠳᠥᠭᠥᠨ ᠪᠥᠬᠥᠢᠵᠦ᠄
— ᠬᠦᠦ ᠴᠢ ᠲᠦᠷᠦᠭᠦᠨ ᠡᠬᠡᠨᠡᠷ ᠲᠦ᠍ ᠮᠢᠨᠢ ᠯᠠᠪ ᠦᠨᠡᠨ ᠲᠡᠢ ᠶᠠᠭᠤᠮᠠ ᠶ᠋ᠢ ᠶᠠᠷᠢᠭᠠ ᠦᠭᠡᠢ ᠪᠠᠢᠬᠠ ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠤᠨ ᠰᠢᠷᠲᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ ᠤ᠋ ᠳᠣᠲᠣᠷᠠ ᠫᠠᠯ ᠪᠠᠭᠤᠯᠠ᠃ ᠭᠡᠲᠡᠯᠡ ᠯᠤᠤ ᠯᠢ᠄
— ᠵᠠ ᠶᠠᠭᠠᠬᠢᠪᠠ᠂ ᠲᠡᠷᠡ ᠮᠠᠭᠤ ᠪᠢᠰᠢ᠃ ᠬᠠᠷᠢᠨ ᠰᠡᠳᠬᠢᠯ ᠢ᠋ ᠨᠢ ᠲᠠᠢᠳᠬᠤᠷᠠᠭᠤᠯᠤᠭᠰᠠᠨ ᠴᠢᠨᠢ ᠰᠠᠢᠨ᠃ ᠠᠯᠳᠠᠭᠰᠠᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠵᠣᠪᠠᠨ ᠭᠠᠯᠵᠠᠭᠤᠷᠠᠬᠤ ᠰᠢᠬᠠᠭᠰᠠᠨ ᠬᠥᠮᠦᠨ ᠭᠡᠳ ᠦᠭᠡ ᠪᠡᠨ ᠲᠠᠰᠤᠯᠪᠠ᠃ ᠭᠠᠳᠠᠨᠠ ᠨᠠᠷᠠᠨ ᠵᠢᠷᠭᠠᠵᠤ ᠴᠠᠭᠠᠨ ᠭᠡᠭᠡ ᠲᠡᠢ ᠪᠠᠢᠭᠠ ᠪᠣᠯᠪᠠᠴᠤ᠂ ᠨᠠᠪᠲᠠᠭᠠᠷ ᠪᠠᠢᠰᠢᠩ ᠤ᠋ᠨ ᠮᠣᠣᠲᠸᠤ ᠴᠠᠭᠠᠰᠤ ᠪᠠᠷ ᠪᠦᠷᠢᠭᠰᠡᠨ ᠪᠢᠴᠢᠬᠠᠨ ᠴᠣᠩᠬᠣ ᠪᠠᠷ ᠲᠤᠰᠬᠤ ᠭᠡᠷᠡᠯ ᠲᠤᠩ ᠪᠠᠭᠠ᠃ ᠲᠡᠷᠡ ᠳᠤᠮᠳᠠ ᠳ᠋ᠠᠨᠽᠠᠨ ᠤ᠋ ᠵᠢᠷᠦᠬᠡ ᠫᠠᠯ ᠫᠠᠯ ᠪᠠᠭᠤᠨ ᠴᠣᠬᠢᠯᠠᠨᠠ᠃ ᠯᠤᠤ ᠯᠢ᠂ ᠳ᠋ᠠᠨᠽᠠᠨ ᠤ᠋ ᠴᠢᠷᠠᠢ ᠬᠡᠷᠬᠢᠨ ᠥᠭᠡᠷᠡᠴᠢᠯᠡᠭᠳᠡᠨ ᠰᠠᠨᠳᠤᠷᠤᠭᠰᠠᠨ ᠢ᠋ ᠬᠤᠯᠠᠭᠠᠢ ᠨᠢᠳᠦ ᠪᠡᠷ ᠠᠵᠢᠨ ᠲᠡᠷᠡ ᠲᠤᠬᠠᠢ ᠠᠰᠠᠭᠤᠬᠤ ᠶ᠋ᠢ ᠪᠣᠳᠣᠨᠠ᠃
— ᠠ᠋ ᠴᠢ ᠪᠢᠲᠡᠭᠡᠢ ᠵᠣᠪᠠ᠃ ᠪᠢ ᠨᠣᠶᠠᠨ ᠬᠥᠮᠦᠨ ᠪᠢᠰᠢ᠂ ᠪᠠᠶᠠᠨ ᠬᠥᠮᠦᠨ ᠪᠢᠰᠢ᠂ ᠶᠠᠳᠠᠭᠤ ᠲᠠᠷᠢᠶᠠᠴᠢᠨ᠃ ᠨᠡᠷᠡ ᠮᠢᠨᠢ ᠯᠤᠤ ᠯᠢ᠃ ᠮᠠᠨ ᠤ᠋ ᠯᠢ ᠣᠪᠣᠭᠲᠠᠨ ᠳ᠋ᠤ᠌ ᠪᠤᠰᠤᠳ ᠤ᠋ᠨ ᠤᠯᠠ ᠱᠠᠭᠠᠢᠨ ᠮᠠᠭᠤ ᠶ᠋ᠢ ᠦᠵᠡᠬᠦ ᠪᠡᠷ ᠠᠰᠢᠭ ᠵᠠᠪᠰᠢᠶᠠᠨ ᠡᠷᠢᠭᠴᠢ ᠽᠠᠢ ᠭᠦᠩᠽᠢ(ᠡᠳ᠋ ᠦ᠋ᠨ ᠰᠢᠨᠤᠯᠲᠠᠨ) ᠬᠡᠵᠢᠶᠡ ᠴᠤ᠌ ᠪᠠᠢᠭᠰᠠᠨ ᠦᠭᠡᠢ᠃ ᠡᠢᠮᠦ ᠳ᠋ᠦ᠍ ᠴᠢ ᠡᠯᠳᠡᠪ ᠢ᠋ ᠰᠠᠨᠠᠨ ᠵᠣᠪᠠᠯ ᠦᠭᠡᠢ᠂ ᠦᠵᠡᠭᠰᠡᠨ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠶᠠᠷᠢ! ᠭᠡᠵᠦ ᠰᠢᠪᠡᠨᠡᠪᠡ᠃ ᠳ᠋ᠠᠨᠽᠠᠨ ᠴᠤ᠌ ᠶᠠᠷᠢᠬᠤ ᠶ᠋ᠢ ᠰᠢᠢᠳᠦᠯᠡ᠃
— ᠵᠠ ᠪᠢ ᠶᠠᠷᠢᠶᠠ᠃ ᠲᠡᠨᠳᠡ ᠪᠣᠯᠵᠤ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢ ᠡᠨᠳᠡ ᠰᠠᠭᠤᠨ ᠨᠢᠳᠦ ᠪᠡᠷ ᠦᠵᠡᠭᠡ ᠦᠭᠡᠢ ᠬᠥᠮᠦᠨ ᠦᠨᠡᠮᠰᠢᠬᠦ ᠳ᠋ᠦ᠍ ᠪᠡᠷᠬᠡ ᠭᠡᠳ ᠡᠮᠬᠢ ᠵᠠᠮᠪᠠᠷᠠᠭᠠ ᠦᠭᠡᠢᠬᠡᠨ ᠶᠠᠷᠢᠵᠤ ᠭᠠᠷᠤᠯᠠ᠃ ᠤᠭ ᠶᠠᠪᠤᠳᠠᠭ(ᠢᠯᠡᠷᠬᠡᠢᠯᠡᠨ ᠭᠠᠷᠭᠠᠬᠤ ᠳ᠋ᠤ᠌ ᠦᠶᠡ ᠦᠶᠡ ᠦᠭᠡ ᠳᠤᠲᠠᠭᠳᠠᠨ ᠲᠦᠭᠳᠡᠷᠡᠬᠦ ᠪᠥᠭᠡᠳ《ᠳᠡ ᠴᠢᠶᠠᠩ ᠬᠤᠭᠤᠳᠦᠩ ᠬᠤᠭᠤᠳᠦᠩ》( ᠦᠬᠡᠷ ᠫᠤᠤ ᠲᠦᠩ ᠲᠦᠩ) ᠭᠡᠵᠦ ᠰᠠᠭᠤᠳᠠᠯ ᠠ᠋ᠴᠠ ᠪᠠᠨ ᠨᠢᠭᠡ ᠦᠶᠡ ᠥᠨᠳᠡᠢᠵᠦ ᠳᠠᠷᠠᠭᠠ ᠨᠢ《ᠵᠢᠭᠤᠲᠠᠨ ᠴᠢᠶᠠᠩ ᠳᠠ ᠳᠠ ᠳᠠ》 (ᠫᠦᠯᠧᠮᠶᠣᠲ ᠳᠡᠰ ᠳᠡᠰ) ᠭᠡᠵᠦ ᠳᠣᠷᠣᠭᠰᠢ ᠨᠠᠪᠲᠠᠢᠨ《ᠱᠠ᠂ ᠱᠠ》(ᠠᠯᠠᠭᠠᠳ᠂ ᠠᠯᠠᠭᠠᠳ)《ᠰᠧ ᠰᠧ》(ᠦᠬᠦᠭᠡᠳ᠂ ᠦᠬᠦᠭᠡᠳ)《ᠲᠡᠢ ᠳ᠋ᠦᠸᠧ》(ᠲᠤᠩ ᠣᠯᠠᠨ) ᠭᠡᠵᠦ ᠵᠢᠷᠦᠬᠡ ᠠᠯᠲᠠᠨ ᠲᠣᠯᠣᠭᠠᠢ ᠰᠡᠭᠰᠦᠷᠦᠨᠡ᠃ ᠯᠤᠤ ᠯᠢ ᠤᠷᠲᠤ ᠠᠮᠢᠰᠬᠤᠯ ᠢ᠋ᠶ᠋ᠠᠷ《ᠠᠢ》 ᠭᠡᠵᠦ ᠳᠠᠭᠤ ᠠᠯᠳᠠᠨᠠ᠃ ᠭᠠᠵᠠᠷ ᠳᠡᠯᠡᠬᠡᠢ ᠬᠡᠷᠬᠢᠨ ᠳᠣᠩᠰᠣᠯᠵᠤ᠂ ᠣᠷᠣᠨ ᠪᠠᠢᠰᠢᠩ ᠬᠡᠷᠬᠢᠨ ᠰᠢᠲᠠᠵᠤ ᠬᠥᠮᠦᠨ ᠠᠮᠢᠲᠠᠨ ᠶᠠᠮᠠᠷ ᠢ᠋ᠶ᠋ᠠᠷ ᠪᠠᠷᠬᠢᠷᠠᠯᠳᠤᠨ ᠪᠤᠵᠢᠭᠢᠨᠠᠵᠤ ᠪᠠᠢᠭᠠ ᠨᠢ ᠯᠤᠤ ᠯᠢ ᠳ᠋ᠦ᠍ ᠲᠣᠳᠣᠬᠠᠨ ᠬᠠᠷᠠᠭᠳᠠᠬᠤ ᠠᠵᠢ᠃ ᠲᠡᠨᠳᠡ ᠬᠦᠦ ᠨᠢ ᠣᠴᠢᠭᠰᠠᠨ᠃《ᠬᠦᠦ ᠠᠯᠠᠭᠳᠠᠭᠰᠠᠨ᠂ ᠠᠯᠢ ᠬᠡᠳᠦᠢᠨ ᠰᠢᠷᠣᠢ ᠳ᠋ᠤ᠌ ᠪᠤᠯᠠᠭᠳᠠᠵᠠᠢ》 ᠭᠡᠵᠦ ᠪᠣᠳᠣᠬᠤ ᠠ᠋ᠴᠠ ᠲᠥᠷᠥᠯᠬᠢ ᠶ᠋ᠢᠨ ᠰᠢᠷᠠᠩᠭᠤᠢ ᠴᠢᠷᠠᠢ ᠤᠯᠠᠮ ᠢ᠋ᠶ᠋ᠠᠷ ᠰᠢᠷᠭᠠᠯᠳᠠᠨᠠ᠃ ᠶᠡᠷᠦ ᠨᠢ ᠯᠤᠤ ᠯᠢ᠂ ᠨᠢᠳᠤᠨᠤᠨ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠭᠠᠳ ᠣᠯᠤᠭᠠ ᠦᠭᠡᠢ ᠡᠴᠡ ᠪᠡᠨ ᠬᠣᠢᠰᠢ《ᠣᠳᠣ ᠥᠩᠭᠡᠷᠡᠯᠡ》 ᠭᠡᠵᠦ ᠰᠠᠨᠠᠭᠠ ᠰᠢᠯᠤᠭᠤᠳᠤᠭᠰᠠᠨ ᠬᠥᠮᠦᠨ ᠶᠦᠮ᠃ ᠭᠡᠪᠡᠴᠦ ᠵᠣᠪᠠᠨᠠ᠃ ᠪᠤᠰᠤᠳ ᠦᠬᠦᠭᠰᠡᠨ ᠪᠠ ᠦᠬᠦᠬᠦ ᠭᠡᠵᠦ ᠪᠠᠢᠭᠠ ᠦᠢ ᠲᠦᠮᠡᠨ ᠵᠠᠯᠠᠭᠤᠰ᠂ ᠲᠡᠳᠡᠨ ᠦ᠌ ᠠᠷᠤ ᠳ᠋ᠤ᠌ ᠦᠯᠡᠳᠡᠭᠰᠡᠨ ᠡᠴᠢᠭᠡ ᠡᠬᠡ ᠪᠦᠬᠦᠨ ᠦ᠌ ᠲᠥᠯᠥᠭᠡ ᠵᠣᠪᠠᠨᠠ᠃
— ᠣᠳᠣ ᠲᠡᠳᠡ ᠴᠣᠬᠣᠮ ᠶᠠᠮᠠᠷ ᠰᠢᠦ ᠪᠠᠢᠨᠠ ᠳᠠ?
— ᠲᠡᠢᠮᠦ ᠠ᠋᠂ ᠲᠡᠢᠨ᠃
— ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠰᠠᠷᠠ ᠳ᠋ᠤ᠌ ᠣᠪᠣᠭᠠ ᠨᠠᠮᠵᠢᠭᠤᠨ ᠪᠣᠯᠪᠠᠴᠤ᠂ ᠰᠤᠮᠤ ᠬᠡᠷᠡᠭᠯᠡᠯ ᠲᠠᠰᠤᠷᠠᠯᠲᠠ ᠦᠭᠡᠢ ᠨᠡᠮᠡᠭᠳᠡᠨ ᠬᠤᠷᠢᠶᠠᠭᠳᠠᠭᠰᠠᠭᠠᠷ ᠪᠠᠢᠨᠠ᠃
— ᠮᠥᠨ ᠲᠡᠢᠨ ᠳᠠᠭᠤᠰᠤᠭᠠ ᠦᠭᠡᠢ ᠨᠢ ᠠ᠋᠃
— ᠲᠡᠢᠮᠦ ᠳᠡ᠂ ᠳᠠᠭᠤᠰᠤᠭᠠ ᠦᠭᠡᠢ᠃ ᠳ᠋ᠠᠨᠽᠠᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠣᠳᠣᠳᠠᠭ ᠢ᠋ᠶ᠋ᠠᠷ ᠬᠠᠷᠢᠭᠤᠯᠪᠠ᠃ ᠭᠡᠲᠡᠯᠡ ᠬᠡᠯᠡᠭᠰᠡᠨ ᠵᠦᠢᠯ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠵᠤ ᠢᠷᠡᠪᠡ᠃
— ᠲᠠ ᠬᠦᠩ ᠴᠡᠨ ᠳ᠋ᠠᠩ ᠭᠡᠵᠦ ᠶᠠᠭᠤ ᠪᠠᠢᠳᠠᠭ ᠢ᠋ ᠮᠡᠳᠡᠬᠦ ᠤᠤ? ! ᠬᠦᠩ ᠴᠠᠩ ᠳ᠋ᠠᠩ ᠭᠡᠨᠡ? ᠶᠡᠷᠦ ᠲᠤᠭᠤᠯᠭᠠ ᠦᠭᠡᠢ ᠵᠦᠢᠯ ᠭᠡᠵᠦ ᠯᠤᠤ ᠯᠢ ᠳ᠋ᠠᠨᠽᠠᠨ ᠤ᠋ ᠠᠮᠠ ᠶ᠋ᠢ ᠰᠢᠷᠳᠡᠨᠡ᠃ ᠬᠦᠩ ᠴᠠᠩ ᠳ᠋ᠠᠩ ᠪᠣᠯ《ᠡᠪ ᠬᠠᠮᠲᠤ ᠨᠠᠮ》 ᠭᠡᠰᠡᠨ ᠠᠭᠤᠯᠭᠠ ᠲᠠᠢ ᠠ᠋ᠴᠠ ᠯᠤᠤ ᠯᠢ ᠭᠠᠢᠬᠠᠨ ᠰᠣᠨᠢᠷᠬᠠᠬᠤ ᠠᠵᠢ᠃ ᠳ᠋ᠠᠨᠽᠠᠨ ᠦᠨᠡᠨ ᠤᠴᠢᠷ ᠢ᠋ ᠪᠠᠢᠲᠤᠭᠠᠢ ᠲᠡᠷᠡ ᠠᠭᠤᠯᠭᠠ ᠶ᠋ᠢ ᠴᠤ᠌ ᠦᠯᠦ ᠮᠡᠳᠡᠨᠡ᠃
— ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ? ᠴᠢ ᠨᠠᠳᠠ ᠲᠣᠳᠣᠷᠬᠠᠢ ᠶᠠᠷᠢ ᠭᠡᠵᠦ ᠯᠤᠤ ᠯᠢ ᠶ᠋ᠢᠨ ᠱᠠᠭᠠᠷᠳᠠᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠫᠦ ᠵᠢᠩ ᠡᠴᠡ ᠲᠤᠭᠤᠯᠤᠭᠰᠠᠨ ᠢ᠋ᠶ᠋ᠠᠨ ᠨᠠᠭᠠᠨᠠ ᠴᠠᠭᠠᠨᠠ ᠣᠷᠣᠭᠤᠯᠤᠨ ᠶᠠᠷᠢᠵᠤ ᠡᠬᠢᠯᠡᠪᠡ᠃ ᠯᠤᠤ ᠯᠢ ᠦᠭᠡ ᠪᠦᠷᠢ ᠶ᠋ᠢ ᠤᠩ ᠤᠩ ᠭᠡᠵᠦ ᠬᠠᠮᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠤᠤᠭᠤᠷᠤᠨ ᠬᠦᠯᠢᠶᠡᠨ ᠠᠪᠴᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠢᠨᠢᠶᠡᠮᠰᠦᠭᠯᠡᠨ《ᠳ᠋ᠦᠢ ᠳ᠋ᠦᠢ》 ᠭᠡᠬᠦ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠴᠦᠰ ᠲᠦ᠋ᠨᠢ《ᠬᠣᠣ ᠬᠣᠣ》 ᠭᠡᠵᠦ ᠪᠠᠬᠠᠳᠤᠨ ᠪᠠᠶᠠᠷᠯᠠᠬᠤ ᠪᠣᠯᠵᠠᠢ᠃
ᠠᠪᠠᠭᠠᠢ ᠨᠢ ᠣᠷᠣᠵᠤ ᠢᠷᠡᠯᠡ᠃
— ᠦᠭᠡᠢ ᠲᠠ ᠨᠠᠷ ᠴᠢᠨᠢ ᠶᠠᠭᠤ ᠪᠢᠯᠡ? ᠠᠮᠠᠷᠠᠵᠠᠭᠠᠨᠠ ᠭᠡᠰᠡᠨ ᠦᠭᠡᠢ ᠪᠢᠯᠢᠤ? ᠭᠡᠬᠦ ᠳ᠋ᠦ᠍ ᠯᠤᠤ ᠯᠢ᠂ ᠲᠡᠢᠮᠦ ᠠ᠋᠂ ᠭᠡᠪᠡᠴᠦ ᠪᠢᠳᠡ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠢᠷᠡᠭᠡᠳᠦᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠰᠠᠭᠤᠨᠠ ᠰᠢᠦ ᠳᠡ᠃
— ᠠ᠋᠂ ᠡᠨᠡ ᠳᠡᠯᠡᠬᠡᠢ ᠪᠢᠳᠡᠨ ᠳ᠋ᠦ᠍ ᠶᠠᠭᠤᠨ ᠤ᠋ ᠬᠠᠮᠢᠶᠠ᠂ ᠭᠠᠭᠴᠠᠬᠠᠨ ᠬᠦᠦ ᠯᠡ ᠬᠡᠷᠡᠭᠲᠡᠢ ᠭᠡᠵᠦ ᠠᠪᠠᠭᠠᠢ ᠭᠤᠳᠤᠷᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠪᠠ᠃
— ᠦᠭᠡᠢ ᠠ᠋ ᠡᠬᠡᠨᠡᠷ ᠮᠢᠨᠢ ᠴᠢ ᠶᠠᠭᠤᠮᠠ ᠶ᠋ᠢ ᠪᠢᠲᠡᠭᠡᠢ ᠨᠠᠭᠠᠭᠤᠷ ᠪᠣᠳᠣ᠃ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠲᠤᠬᠠᠢ ᠶᠠᠷᠢᠬᠤ ᠪᠣᠯ ᠬᠦᠦ ᠶ᠋ᠢᠨ ᠲᠤᠬᠠᠢ ᠶᠠᠷᠢᠵᠤ ᠪᠠᠢᠭᠠ ᠬᠡᠷᠡᠭ᠃
— ᠵᠠ ᠲᠡᠭᠡᠪᠡᠯ ᠮᠠᠰᠢ ᠰᠠᠢᠨ᠃ ᠭᠡᠪᠡᠴᠦ ᠴᠢ ᠨᠠᠳᠠ ᠬᠡᠯᠡ᠂ ᠬᠦᠦ ᠢᠷᠡᠮᠡᠷ ᠪᠠᠢᠨᠠ ᠤᠤ? ᠦᠭᠡᠢ ᠤᠤ?
— ᠢᠷᠡᠨᠡ ᠠ᠋ ᠢᠷᠡᠨᠡ᠃ ᠲᠡᠢᠨ ᠶᠠᠭᠤ ᠶᠠᠭᠤ ᠦᠭᠡᠢ ᠳᠠᠭᠤᠰᠬᠤ ᠭᠡᠵᠦ ᠪᠠᠢᠭᠠ ᠴᠤ᠌ ᠶᠤᠮ ᠪᠠᠢᠨᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠡᠭᠷᠢ ᠡᠵᠢ