ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠠᠷᠭᠠ ᠠᠯᠳᠠᠬᠤ ᠦᠭᠡᠢ ᠪᠣᠯ ᠪᠠᠷᠰ ᠢ᠋ ᠠᠶᠤᠯᠭᠠᠨᠠ Гураван настай гунаган улаан баатар - Арга алдахгүй бол барыг айлгана
121ᠠᠷᠭᠠ ᠠᠯᠳᠠᠬᠤ ᠦᠭᠡᠢ ᠪᠣᠯ ᠪᠠᠷᠰ ᠢ᠋ ᠠᠶᠤᠯᠭᠠᠨᠠ
一 ᠡᠪᠦᠭᠡᠨ ᠦᠵᠡᠭᠡᠳ ᠪᠠᠯᠠᠷᠳᠠᠯᠠ ᠠᠶᠤᠵᠤ᠂ ᠪᠦᠳᠦᠭᠦᠨ ᠴᠠᠭᠠᠨ ᠴᠢᠯᠠᠭᠤᠨ ᠤ᠋ ᠳᠠᠯᠳᠠ ᠣᠷᠣᠵᠤ ᠨᠢᠭᠤᠭᠰᠠᠨ ᠳ᠋ᠤ᠌ ᠪᠠᠷᠰ ᠭᠡᠨᠡᠳᠲᠡ ᠦᠰᠦᠷᠦᠨ ᠪᠣᠰᠴᠤ᠂ ᠬᠡᠨ ᠮᠢᠨᠦ ᠣᠷᠳᠣᠨ ᠳ᠋ᠤ᠌ ᠣᠷᠣᠵᠤ ᠢᠷᠡᠪᠡ? ᠭᠡᠳ ᠶᠡᠬᠡ ᠠᠭᠤᠷᠯᠠᠵᠤ᠂ ᠢᠯᠳᠦ ᠪᠡᠨ ᠰᠤᠭᠤ ᠲᠠᠲᠠᠵᠤ᠂ ᠡᠭᠦᠳᠡᠨ ᠦ᠌ ᠵᠦᠭ ᠨᠢᠭᠡᠨᠲᠡ ᠴᠠᠪᠴᠢᠭᠰᠠᠨ ᠳ᠋ᠤ᠌ ᠢᠯᠳᠦᠨ ᠦ᠌ ᠦᠵᠦᠭᠦᠷ ᠨᠢ ᠪᠦᠳᠦᠭᠦᠨ ᠴᠠᠭᠠᠨ ᠴᠢᠯᠠᠭᠤᠨ ᠳᠡᠭᠡᠷᠡ ᠲᠣᠰᠴᠤ᠂ ᠦᠵᠦᠭᠦᠷ ᠨᠢ ᠦᠭᠡᠢ ᠪᠣᠯᠵᠠᠢ᠃ ᠬᠣᠶᠠᠳᠤᠭᠠᠷ ᠤᠳᠠᠭᠠ ᠴᠠᠪᠴᠢᠭᠰᠠᠨ ᠳ᠋ᠤ᠌ ᠢᠯᠳᠦᠨ ᠦ᠌ ᠳᠤᠮᠳᠠᠭᠤᠷ ᠨᠢ ᠠᠯᠠᠭᠠ ᠪᠣᠯᠵᠤ᠂ ᠭᠤᠷᠪᠠᠳᠤᠭᠠᠷ ᠤᠳᠠᠭᠠ ᠴᠠᠪᠴᠢᠭᠰᠠᠨ ᠳ᠋ᠤ᠌ ᠡᠰᠢ ᠶ᠋ᠢᠨ ᠲᠡᠳᠦᠢᠯᠡ ᠦᠯᠡᠳᠡᠭᠰᠡᠨ ᠳ᠋ᠦ᠍ ᠪᠠᠷᠰ ᠶᠠᠭᠤ ᠪᠣᠯᠤᠭᠰᠠᠨ ᠴᠤ᠌ ᠪᠢ ᠴᠢᠮᠠᠶ᠋ᠢ ᠴᠠᠪᠴᠢᠵᠤ ᠠᠯᠠᠪᠠ ᠭᠡᠳ ᠭᠡᠳᠡᠷᠭᠡᠨ ᠬᠡᠪᠲᠡᠵᠦ ᠬᠤᠷᠬᠢᠷᠠᠨ ᠤᠨᠲᠠᠵᠠᠢ᠃
一 ᠮᠠᠷᠭᠠᠲᠠ ᠥᠷᠯᠥᠭᠡ ᠨᠢ᠂ ᠪᠠᠷᠰ ᠪᠣᠰᠤᠭᠠᠳ ᠦᠵᠡᠭᠰᠡᠨ ᠳ᠋ᠦ᠍ ᠪᠦᠳᠦᠭᠦᠨ ᠴᠠᠭᠠᠨ ᠴᠢᠯᠠᠭᠤᠨ ᠤ᠋ ᠬᠣᠢᠨᠠ ᠨᠢ ᠨᠢᠭᠡᠨ ᠡᠪᠦᠭᠡᠨ ᠬᠠᠮᠠᠷ ᠲᠠᠲᠠᠵᠤ ᠤᠨᠲᠠᠵᠤ ᠪᠠᠢᠵᠠᠢ᠃ ᠪᠠᠷᠰ ᠦᠵᠡᠭᠡᠳ《ᠬᠦᠢ! ᠡᠪᠦᠭᠡᠨ ᠠ᠋! ᠦᠷ ᠴᠠᠢᠵᠤ ᠥᠷᠯᠥᠭᠡ ᠪᠣᠯᠵᠠᠢ᠃ ᠬᠤᠷᠳᠤᠨ ᠪᠣᠰᠤᠭᠲᠤᠨ!》 ᠭᠡᠵᠦ ᠡᠪᠦᠭᠡᠨ ᠢ᠋ ᠲᠦᠯᠬᠢᠭᠰᠡᠨ ᠳ᠋ᠦ᠍᠂ ᠡᠪᠦᠭᠡᠨ ᠨᠢᠳᠦ ᠪᠡᠨ ᠨᠤᠬᠤᠯᠠᠨ ᠪᠣᠰᠤᠭᠠᠳ᠂ ᠮᠠᠭᠤ ᠨᠢᠳᠦ ᠪᠡᠷ ᠪᠠᠷᠰ ᠢ᠋ ᠦᠵᠡᠭᠡᠳ ᠬᠡᠯᠡᠭᠰᠡᠨ ᠨᠢ᠄《ᠴᠢ ᠶᠠᠮᠠᠷ ᠣᠯᠢᠭ ᠦᠭᠡᠢ ᠠᠮᠢᠲᠠᠨ ᠪᠣᠢ! ᠥᠴᠥᠭᠡᠳᠦᠷ ᠰᠥᠨᠢ ᠬᠥᠮᠦᠨ ᠢ᠋ ᠠᠮᠤᠷ ᠤᠨᠲᠠᠭᠤᠯᠬᠤ ᠦᠭᠡᠢ ᠴᠢᠮᠬᠢᠵᠦ ᠨᠢᠰᠠᠯᠠᠭᠠᠳ ᠪᠠᠢᠬᠤ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠪᠠᠷᠰ᠂ ᠮᠡᠳᠡᠭᠡ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠠᠶᠤᠵᠤ᠂ ᠪᠣᠳᠣᠭᠰᠠᠨ ᠨᠢ᠄《ᠲᠩᠷᠢ ᠨᠠᠮᠠᠶ᠋ᠢ ᠠᠪᠤᠷᠠ! ᠪᠢ ᠬᠠᠷᠢᠨ ᠪᠦᠬᠦᠯᠢ ᠪᠡᠶᠡ ᠶ᠋ᠢᠨ ᠪᠦᠬᠦ ᠬᠦᠴᠦ ᠪᠡᠷ ᠢ᠋ᠶ᠋ᠡᠨ ᠴᠠᠪᠴᠢᠭᠰᠠᠨ ᠢ᠋ ᠡᠨᠡ ᠬᠠᠷᠢᠨ ᠴᠢᠮᠬᠢᠵᠦ ᠨᠢᠰᠠᠯᠠᠪᠠ ᠭᠡᠨᠡ᠃ ᠡᠨᠡ ᠶᠠᠮᠠᠷ ᠠᠶᠤᠮᠰᠢᠭ ᠲᠠᠢ ᠠᠮᠢᠲᠠᠨ ᠪᠣᠢ!》 ᠭᠡᠵᠦ ᠴᠡᠴᠡᠷᠡᠨ ᠳᠠᠭᠵᠢᠨ ᠰᠠᠭᠤᠬᠤ ᠳ᠋ᠤ᠌᠂ ᠡᠪᠦᠭᠡᠨ ᠦᠵᠡᠭᠡᠳ ᠡᠨᠡ ᠰᠦᠷᠡᠬᠡᠢ ᠠᠮᠢᠲᠠᠨ ᠮᠢᠨᠦ ᠠᠷᠭᠠ ᠳ᠋ᠤ᠌ ᠣᠨᠣᠭᠳᠠᠪᠠ ᠭᠡᠵᠦ ᠪᠣᠳᠣᠭᠠᠳ᠂ ᠬᠡᠯᠡᠭᠰᠡᠨ ᠨᠢ᠄《ᠪᠢ ᠬᠠᠷᠢᠨ ᠠᠯᠢ ᠴᠤ᠌ ᠡᠳᠦᠷ ᠭᠡᠰᠡᠨ ᠪᠦᠷ ᠭᠠᠳᠠᠭᠰᠢ ᠭᠠᠷᠴᠤ ᠭᠠᠨᠵᠤᠭᠠᠲᠠᠢ ᠬᠠᠷᠢᠳᠠᠭ ᠶᠤᠮ᠃ ᠡᠨᠡ ᠡᠳᠦᠷ ᠬᠠᠷᠢᠨ ᠴᠢᠨᠦ ᠡᠨᠳᠡ ᠢᠷᠡᠭᠡᠳ ᠰᠢᠭᠤᠳᠠᠢ ᠲᠠᠢ ᠮᠥᠩᠭᠥ ᠣᠯᠤᠭᠰᠠᠨ ᠦᠭᠡᠢ ᠪᠣᠯᠪᠠᠴᠤ᠂ ᠰᠦᠷᠡᠬᠡᠢ ᠰᠠᠢᠬᠠᠨ ᠪᠠᠷᠰ ᠤ᠋ᠨ ᠠᠷᠠᠰᠤ ᠬᠠᠷᠠᠭᠳᠠᠨᠠ》 ᠭᠡᠵᠦ ᠪᠠᠷᠰ ᠢ᠋ ᠳᠡᠮᠡᠢᠯᠡ ᠦᠵᠡᠬᠦᠢ ᠳ᠋ᠦ᠍ ᠪᠠᠷᠰ᠄ ᠣᠳᠣ ᠨᠠᠮᠠᠶ᠋ᠢ ᠠᠯᠠᠵᠤ ᠠᠷᠠᠰᠤ ᠶ᠋ᠢ ᠮᠢᠨᠢ ᠠᠪᠤᠨᠠ ᠭᠡᠵᠦ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠠᠳ᠂ ᠶᠡᠬᠡ ᠠᠶᠤᠵᠤ᠂ ᠡᠪᠦᠭᠡᠨ ᠦ᠌ ᠡᠮᠦᠨᠡ ᠲᠦᠰ ᠬᠢᠲᠡᠯᠡ ᠰᠥᠭᠥᠳᠦᠭᠡᠳ᠄《ᠡᠪᠦᠭᠡᠨ ᠭᠤᠸᠠᠢ᠂ ᠠᠮᠢ ᠶ᠋ᠢ ᠮᠢᠨᠢ ᠠᠪᠤᠷᠠ! ᠤᠳᠠᠯ ᠦᠭᠡᠢ ᠪᠢ ᠨᠢᠭᠡᠨ ᠶᠡᠬᠡ ᠳᠡᠭᠲᠦ ᠲᠡᠢ ᠮᠥᠩᠭᠥ ᠬᠦᠷᠭᠡᠵᠦ ᠣᠴᠢᠶᠠ᠃ ᠠᠷᠠᠰᠤ ᠶ᠋ᠢ ᠮᠢᠨᠢ ᠠᠪᠬᠤ ᠪᠠᠨ ᠪᠠᠢᠨᠠ ᠤᠤ!》 ᠭᠡᠰᠡᠨ ᠳ᠋ᠦ᠍ ᠡᠪᠦᠭᠡᠨ ᠶᠡᠬᠡ ᠪᠣᠳᠣᠯᠭᠠ ᠲᠠᠢ ᠰᠢᠭ᠋ ᠰᠠᠭᠤᠵᠤ ᠪᠠᠢᠭᠠᠳ᠄《ᠵᠠ᠂ ᠲᠡᠭᠡᠶᠡ᠂ ᠪᠢ ᠣᠳᠣ ᠶᠠᠪᠤᠨᠠ᠃ ᠴᠢ ᠤᠳᠠᠯ ᠦᠭᠡᠢ ᠮᠢᠨᠦ ᠭᠡᠷ ᠲᠦ᠍ ᠬᠥᠷᠥᠭᠲᠦᠨ᠃ ᠪᠢ ᠴᠢᠮᠠᠶ᠋ᠢ ᠰᠠᠢᠨ ᠵᠣᠴᠢᠨ ᠢ᠋ᠶ᠋ᠠᠷ ᠳᠠᠢᠯᠠᠵᠤ᠂ ᠴᠠᠢ ᠤᠤᠭᠤᠯᠭᠠᠶᠠ》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠴᠠᠢ ᠭᠡᠵᠦ ᠰᠣᠨᠣᠰᠤᠭᠠᠳ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠵᠤ᠄《ᠵᠠ! ᠪᠢ ᠤᠳᠠᠯ ᠦᠭᠡᠢ ᠲᠠᠨ ᠤ᠋ ᠳ᠋ᠤ᠌ ᠬᠦᠷᠦᠨᠡ》 ᠭᠡᠵᠦ ᠲᠠᠩᠭᠠᠷᠢᠭᠯᠠᠭᠠᠳ ᠡᠪᠦᠭᠡᠨ ᠢ᠋ ᠬᠦᠷᠭᠡᠵᠦ ᠶᠠᠪᠤᠭᠤᠯᠪᠠ᠃
ᠡᠪᠦᠭᠡᠨ ᠮᠥᠨ ᠳᠣᠲᠣᠷᠠ ᠪᠠᠨ ᠪᠢ ᠬᠠᠷᠢᠨ ᠡᠢᠮᠦ ᠨᠢᠭᠡᠨ ᠠᠷᠭᠠ ᠪᠠᠷ ᠠᠮᠢ ᠪᠠᠨ ᠠᠪᠤᠷᠠᠪᠠ ᠭᠡᠵᠦ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠡᠳ ᠬᠡᠳᠦᠨ ᠴᠥᠭᠡᠬᠡᠨ ᠬᠣᠨᠢ ᠢᠮᠠᠭᠠ ᠪᠠᠨ ᠬᠣᠷᠢᠶᠠᠨ ᠳ᠋ᠠᠭᠠᠨ ᠬᠣᠷᠢᠵᠤ᠂ ᠭᠡᠷ ᠲᠡᠭᠡᠨ ᠣᠷᠣᠭᠠᠳ᠂ ᠡᠮᠡᠭᠡᠨ ᠳ᠋ᠡᠭᠡᠨ ᠥᠴᠥᠭᠡᠳᠦᠷ ᠰᠥᠨᠢ ᠲᠠᠭᠠᠷᠠᠭᠰᠠᠨ ᠰᠣᠨᠢᠨ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠡᠬᠢ ᠳᠠᠷᠠᠭᠠ ᠪᠠᠷ ᠨᠢ ᠬᠡᠯᠡᠵᠦ ᠥᠭᠭᠦᠭᠡᠳ᠂ ᠪᠠᠰᠠ ᠵᠠᠬᠢᠵᠤ ᠬᠡᠯᠡᠭᠰᠡᠨ ᠨᠢ᠄《ᠤᠳᠠᠯ ᠦᠭᠡᠢ ᠪᠠᠷᠰ ᠢᠷᠡᠬᠦ ᠮᠠᠭᠠᠳ ᠦᠭᠡᠢ᠃ ᠴᠢᠩᠭᠢᠪᠡᠯ ᠴᠢ ᠴᠠᠢ ᠬᠢᠵᠦ ᠥᠭ᠃ ᠴᠢᠩᠭᠢᠭᠡᠳ ᠳᠠᠷᠠᠭᠠ ᠪᠠᠷ ᠨᠢ ᠴᠢ ᠨᠠᠳᠠ ᠠ᠋ᠴᠠ ᠶᠠᠮᠠᠷ ᠬᠣᠭᠣᠯᠠ ᠢᠳᠡᠬᠦ ᠪᠣᠢ ᠭᠡᠵᠦ ᠠᠰᠠᠭᠤᠭᠲᠤᠨ᠃ ᠴᠢᠩᠭᠢᠪᠡᠯ ᠮᠢᠨᠦ ᠬᠠᠷᠢᠭᠤᠯᠬᠤ ᠦᠭᠡ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠡᠮᠡᠭᠡᠨ ᠨᠢ ᠵᠠ ᠭᠡᠵᠦ ᠰᠦ ᠲᠡᠢ ᠴᠠᠢ ᠪᠤᠴᠠᠯᠭᠠᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠥᠨᠥ ᠪᠠᠷᠰ ᠨᠢᠭᠡᠨ ᠶᠡᠬᠡ ᠲᠡᠭᠲᠦ ᠡᠷᠭᠦᠵᠦ᠂ ᠬᠥᠯᠥᠰᠥ ᠪᠠᠭᠠᠰᠤ ᠭᠣᠭᠣᠵᠢᠭᠤᠯᠤᠨ ᠢᠷᠡᠭᠡᠳ᠂ ᠲᠡᠭᠲᠦ ᠲᠡᠢ ᠮᠥᠩᠭᠥ ᠪᠡᠨ ᠬᠦᠷᠢᠶᠡᠨ ᠦ᠌ ᠡᠭᠦᠳᠡᠨ ᠳ᠋ᠦ᠍ ᠲᠠᠯᠪᠢᠭᠠᠳ ᠰᠠᠭᠤᠵᠤ ᠠᠮᠢᠰᠬᠤᠭᠠ ᠳᠡᠭᠡᠷᠡᠳᠡᠵᠦ ᠪᠠᠢᠭᠰᠠᠨ ᠳ᠋ᠤ᠌᠂ ᠡᠪᠦᠭᠡᠨ ᠦ᠌ ᠴᠥᠭᠡᠬᠡᠨ ᠬᠡᠳᠦᠨ ᠬᠣᠨᠢ ᠢᠮᠠᠭᠠ ᠨᠢ ᠦᠷᠭᠦᠨ ᠰᠢᠬᠠᠯᠴᠠᠵᠤ ᠪᠠᠢᠬᠤ ᠳ᠋ᠤ᠌ ᠭᠠᠭᠴᠠ ᠤᠬᠤᠨᠠ ᠨᠢ ᠪᠠᠷᠰ ᠢ᠋ ᠦᠵᠡᠭᠡᠳ ᠶᠡᠬᠡ ᠭᠠᠢᠬᠠᠵᠤ᠂ ᠡᠷᠭᠢᠨ ᠲᠣᠭᠣᠷᠢᠨ ᠪᠠᠢᠴᠠᠭᠠᠬᠤ ᠳ᠋ᠤ᠌᠂ ᠪᠠᠷᠰ ᠴᠤ᠌ ᠤᠬᠤᠨᠠ ᠶ᠋ᠢ ᠦᠵᠡᠭᠡᠳ ᠲᠠᠨᠢᠬᠤ ᠦᠭᠡᠢ ᠲᠤᠯᠠ᠂ ᠪᠠᠰᠠ ᠶᠡᠬᠡ ᠰᠣᠨᠢᠷᠬᠠᠯ ᠪᠣᠯᠭᠠᠵᠤ ᠰᠢᠷᠳᠡᠨ ᠦᠵᠡᠭᠰᠡᠭᠡᠷ᠂ ᠤᠬᠤᠨᠠ ᠶ᠋ᠢᠨ ᠰᠠᠯᠲᠠᠭᠠᠨ ᠳᠣᠲᠣᠷᠠ ᠤᠨᠵᠢᠢᠵᠤ ᠪᠠᠢᠭᠠ ᠶᠠᠭᠤᠮᠠ ᠶ᠋ᠢ ᠨᠢ ᠭᠡᠨᠡᠳᠲᠡ ᠣᠯᠵᠤ ᠦᠵᠡᠭᠡᠳ᠄《ᠬᠥᠶᠢ᠂ ᠠᠪᠤᠭᠠᠢ! ᠲᠠᠨ ᠤ᠋ ᠲᠡᠷᠡ ᠤᠨᠵᠢᠢᠵᠤ ᠪᠠᠢᠭᠠ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠤᠬᠤᠨᠠ᠄《ᠠ! ᠡᠨᠡ ᠪᠣᠯ ᠢᠳᠡᠵᠦ ᠤᠤᠭᠤᠵᠤ ᠦᠯᠡᠳᠡᠭᠰᠡᠨ ᠢ᠋ᠶ᠋ᠡᠨ ᠤᠭᠤᠲᠠᠯᠠᠳᠠᠭ ᠤᠭᠤᠲᠠ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠤᠬᠤᠨᠠ ᠶ᠋ᠢᠨ ᠰᠠᠬᠠᠯ ᠢ᠋ ᠨᠢ ᠦᠵᠡᠭᠡᠳ᠄《ᠡᠨᠡ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠤᠬᠤᠨᠠ᠄《ᠡᠨᠡ ᠪᠣᠯ ᠪᠠᠷᠰ ᠢ᠋ ᠪᠦᠬᠦᠯᠢ ᠪᠡᠷ ᠨᠢ ᠵᠠᠯᠭᠢᠭᠠᠳ ᠠᠮᠠ ᠬᠠᠮᠠᠷ ᠢ᠋ᠶ᠋ᠠᠨ ᠠᠷᠴᠢᠳᠠᠭ ᠠᠯᠴᠢᠭᠤᠷ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠪᠠᠬᠠᠨ ᠠᠶᠤᠵᠤ᠄《ᠠ! ᠲᠡᠢᠮᠦ ᠤᠤ? ᠠᠪᠤᠭᠠᠢ! ᠲᠠᠨ ᠤ᠋ ᠲᠣᠯᠣᠭᠠᠢ ᠳᠡᠭᠡᠷᠡ ᠴᠢᠨᠢ ᠬᠣᠶᠠᠷ ᠦᠵᠦᠭᠦᠷ ᠲᠡᠢ ᠶᠠᠭᠤᠮᠠ ᠴᠢᠨᠢ ᠶᠠᠭᠤ ᠪᠣᠢ?》 ᠭᠡᠵᠦ ᠤᠬᠤᠨᠠ ᠶ᠋ᠢᠨ ᠡᠪᠡᠷ ᠢ᠋ ᠨᠢ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠤᠬᠤᠨᠠ ᠶᠡᠬᠡ ᠮᠠᠶᠢᠭ ᠭᠠᠷᠭᠠᠵᠤ ᠬᠦᠴᠦᠷᠬᠡᠭ ᠳᠠᠭᠤᠨ ᠢ᠋ᠶ᠋ᠠᠷ ᠮᠠᠢᠯᠠᠨ᠄《ᠡᠨᠡ ᠪᠣᠯ ᠴᠢᠮᠠᠶ᠋ᠢ ᠵᠢᠳᠠᠯᠠᠳᠠᠭ ᠵᠢᠳᠠ ᠪᠠᠢᠨᠠ》 ᠭᠡᠵᠦ ᠦᠰᠦᠷᠦᠨ ᠮᠥᠷᠭᠥᠯᠡᠬᠦ ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠴᠢᠴᠠᠭᠠ ᠠᠯᠳᠠᠲᠠᠯᠠ ᠠᠶᠤᠵᠤ᠂ ᠭᠡᠳᠡᠷᠭᠡᠨ ᠵᠠᠢᠯᠠᠭᠠᠳ᠂ ᠡᠪᠦᠭᠡᠨ ᠦ᠌ ᠭᠡᠷ ᠲᠦ᠍ ᠣᠷᠣᠭᠰᠠᠨ ᠳ᠋ᠤ᠌ ᠡᠪᠦᠭᠡᠨ ᠬᠠᠷᠢᠨ ᠬᠣᠢᠨᠠ ᠪᠠᠨ ᠰᠠᠭᠤᠵᠤ᠂ ᠳᠡᠭᠡᠷᠡ ᠪᠡᠶᠡ ᠪᠡᠨ ᠨᠢᠴᠦᠭᠦᠯᠡᠵᠦ ᠴᠠᠢ ᠤᠤᠭᠤᠨ ᠰᠠᠭᠤᠵᠤ ᠪᠠᠢᠨᠠ ᠭᠡᠨᠡ᠃ ᠪᠠᠷᠰ ᠣᠷᠣᠵᠤ ᠢᠷᠡᠭᠡᠳ᠂ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠨᠢ ᠰᠠᠭᠤᠵᠤ᠂ ᠡᠪᠦᠭᠡᠨ ᠳ᠋ᠦ᠍᠄《ᠡᠪᠦᠭᠡᠨ ᠭᠤᠸᠠᠢ ᠴᠢᠨᠦ ᠡᠭᠦᠳᠡ ᠶ᠋ᠢ ᠰᠠᠬᠢᠵᠤ ᠪᠠᠢᠭᠠ ᠲᠡᠷᠡ ᠴᠠᠭᠠᠨ ᠥᠩᠭᠡᠲᠡᠢ ᠬᠣᠣᠰ ᠵᠢᠳᠠ ᠲᠠᠢ ᠠᠮᠢᠲᠠᠨ ᠴᠢᠨᠢ ᠶᠠᠮᠠᠷ ᠬᠡᠴᠡᠭᠦᠦ ᠠᠮᠢᠲᠠᠨ ᠪᠣᠢ? ᠨᠠᠮᠠᠶ᠋ᠢ ᠠᠷᠠᠢ ᠯᠠ ᠵᠢᠳᠠᠯᠠᠵᠤ ᠠᠯᠠᠴᠢᠬᠰᠠᠨ ᠦᠭᠡᠢ》 ᠭᠡᠳ ᠠᠮᠢᠰᠬᠤᠭᠠ ᠳᠡᠭᠡᠷᠡᠳᠡᠵᠦ ᠰᠠᠭᠤᠬᠤ ᠳ᠋ᠤ᠌᠂ ᠡᠪᠦᠭᠡᠨ᠄《ᠵᠠ᠂ ᠴᠢ ᠮᠢᠨᠢ᠂ ᠬᠠᠷᠢᠨ ᠪᠤᠤ ᠠᠶᠤᠵᠤ ᠰᠦᠨᠡᠰᠦ ᠪᠡᠨ ᠠᠯᠳᠠᠴᠢᠬᠠ ᠳᠠ! ᠴᠠᠢ ᠤᠤᠭᠤ!》 ᠭᠡᠵᠦ ᠪᠠᠷᠰ ᠲᠤ᠌ ᠰᠦ ᠲᠡᠢ ᠴᠠᠢ ᠬᠢᠵᠦ ᠤᠤᠭᠤᠯᠭᠠᠬᠤ ᠳ᠋ᠤ᠌ ᠪᠠᠷᠰ ᠬᠠᠷᠢᠨ ᠰᠦ ᠲᠡᠢ ᠴᠠᠢ ᠳ᠋ᠤ᠌ ᠶᠡᠬᠡ ᠳᠤᠷᠠ ᠲᠠᠢ ᠪᠣᠯᠵᠤ ᠬᠡᠳᠦᠨ ᠠᠶᠠᠭᠠ ᠤᠤᠭᠤᠭᠰᠠᠨ ᠬᠣᠢᠨᠠ᠂ ᠡᠮᠡᠭᠡᠨ ᠨᠢ ᠪᠠᠷᠰ ᠤ᠋ᠨ ᠠᠪᠴᠢᠷᠠᠭᠰᠠᠨ ᠲᠡᠭᠲᠦ ᠲᠡᠢ ᠮᠥᠩᠭᠥ ᠶ᠋ᠢ ᠨᠢ ᠬᠤᠷᠢᠶᠠᠮᠵᠢᠯᠠᠨ ᠠᠪᠤᠭᠠᠳ᠂ ᠣᠷᠣᠵᠤ ᠢᠷᠡᠨ ᠡᠪᠦᠭᠡᠨ ᠡᠴᠡ᠄《ᠶᠠᠮᠠᠷ ᠬᠣᠭᠣᠯᠠ ᠢᠳᠡᠬᠦ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠡᠪᠦᠭᠡᠨ ᠶᠡᠬᠡ ᠤᠳᠬᠠ ᠭᠦᠨ ᠰᠢᠭ ᠰᠠᠬᠠᠯ ᠢ᠋ᠶ᠋ᠠᠨ ᠰᠢᠪᠲᠤᠷᠠᠭᠠᠳ᠂ ᠡᠮᠡᠭᠡᠨ ᠢ᠋ᠶ᠋ᠡᠨ ᠵᠠᠩᠨᠠᠭᠰᠠᠨ ᠨᠢ᠄《ᠥᠴᠥᠭᠡᠳᠦᠷ ᠠᠯᠠᠭᠰᠠᠨ ᠪᠠᠷᠰ ᠤ᠋ᠨ ᠡᠪᠴᠢᠭᠦᠦ ᠪᠠᠢᠬᠤ ᠦᠭᠡᠢ ᠤᠤ? ᠤᠷᠵᠢᠳᠤᠷ ᠤ᠋ᠨ ᠪᠠᠷᠢᠭᠰᠠᠨ ᠪᠠᠷᠰ ᠤ᠋ᠨ ᠤᠭᠤᠴᠠ ᠪᠠᠢᠬᠤ ᠦᠭᠡᠢ ᠤᠤ? ᠬᠡᠷᠪᠡ ᠴᠥᠮ ᠪᠠᠷᠠᠭᠳᠠᠭᠰᠠᠨ ᠪᠣᠯ ᠡᠨᠳᠡ ᠰᠠᠭᠤᠵᠤ ᠪᠠᠢᠭᠠ᠁ ᠶ᠋ᠢ ᠣᠯᠵᠤ ᠦᠵᠡᠬᠦ ᠦᠭᠡᠢ ᠪᠠᠢᠨᠠ ᠤᠤ?》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ᠄《ᠠ! ᠨᠠᠮᠠᠶ᠋ᠢ ᠢᠳᠡᠨᠡ ᠭᠡᠵᠦ ᠪᠠᠢᠨᠠ》 ᠭᠡᠳ ᠶᠡᠬᠡᠯᠡ ᠠᠶᠤᠵᠤ ᠭᠣᠳ ᠭᠠᠷᠤᠨ ᠳᠤᠲᠠᠭᠠᠬᠤ ᠳ᠋ᠤ᠌ ᠬᠦᠷᠢᠶᠡᠨ ᠦ᠌ ᠳᠤᠮᠳᠠ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠤᠬᠤᠨᠠ ᠲᠠᠢ ᠠᠭᠤᠯᠵᠠᠨ ᠨᠡᠩ ᠠᠶᠤᠵᠤ᠂ ᠠᠮᠢ ᠲᠠᠯᠪᠢᠨ ᠳᠣᠪᠲᠣᠯᠬᠤ ᠳ᠋ᠤ᠌ ᠤᠬᠤᠨᠠ ᠬᠣᠢᠨᠠ ᠠ᠋ᠴᠠ ᠨᠢ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠮᠠᠢᠯᠠᠵᠤ ᠨᠡᠬᠡᠭᠰᠡᠭᠡᠷ ᠮᠥᠰᠥᠨ ᠳᠡᠭᠡᠷᠡ ᠢᠷᠡᠵᠦ᠂ ᠪᠠᠷᠰ ᠳᠤᠲᠠᠭᠠᠨ ᠭᠠᠷᠪᠠ᠃ ᠤᠬᠤᠨᠠ ᠭᠤᠯᠭᠤᠷᠢᠳᠤᠨ ᠤᠨᠠᠭᠠᠳ᠂ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠭᠰᠠᠨ ᠨᠢ᠄《ᠢᠰᠢ! ᠬᠠᠷᠠᠯᠠ! ᠳᠠᠯᠠᠢ ᠮᠢᠨᠢ ᠲᠠᠰᠤᠷᠠᠪᠠ᠃ ᠦᠭᠡᠢ ᠪᠣᠯ ᠴᠢᠮᠠᠶ᠋ᠢ ᠡᠨᠡ ᠡᠳᠦᠷ ᠪᠠᠷᠢᠵᠤ ᠢᠳᠡᠬᠦ ᠪᠠᠢᠭᠰᠠᠨ ᠶᠤᠮ》 ᠭᠡᠳ ᠬᠠᠷᠢᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠪᠠᠷᠰ ᠨᠢᠭᠡᠨ ᠠᠮᠢᠰᠬᠤᠭᠠ ᠪᠠᠷ ᠭᠦᠶᠦᠵᠦ ᠪᠣᠳᠣᠭᠰᠠᠨ ᠨᠢ᠄《ᠲᠩᠷᠢ ᠨᠠᠮᠠᠶ᠋ᠢ ᠥᠷᠥᠰᠢᠶᠡᠭᠡᠳ ᠲᠡᠷᠡ ᠬᠣᠣᠰ ᠵᠢᠳᠠ ᠲᠠᠢ ᠠᠮᠢᠲᠠᠨ ᠤ᠋ ᠳᠠᠯᠠᠢ ᠶ᠋ᠢ ᠨᠢ ᠲᠠᠰᠤᠯᠪᠠ᠃ ᠦᠭᠡᠢ ᠪᠣᠯ ᠡᠨᠡ ᠡᠳᠦᠷ ᠬᠠᠷᠢᠨ ᠠᠮᠢ ᠪᠠᠨ ᠠᠯᠳᠠᠬᠤ ᠳ᠋ᠤ᠌ ᠬᠦᠷᠪᠡ》 ᠭᠡᠵᠦ ᠭᠦᠶᠦᠵᠦ ᠪᠠᠢᠭᠰᠠᠨ ᠳ᠋ᠤ᠌᠂ ᠨᠢᠭᠡ ᠬᠥᠬᠡ ᠴᠢᠨᠣᠠ ᠲᠣᠬᠢᠶᠠᠯᠳᠤᠭᠠᠳ᠄《ᠪᠠᠷᠰ ᠠᠪᠤᠭᠠᠢ! ᠶᠠᠭᠤᠨ ᠳ᠋ᠤ᠌ ᠲᠡᠢᠮᠦ ᠯᠡ ᠭᠦᠶᠦᠵᠦ ᠪᠠᠢᠨᠠ ᠪᠣᠢ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠪᠠᠷᠰ ᠰᠠᠶᠢ ᠶ᠋ᠢᠨ ᠲᠠᠭᠠᠷᠠᠭᠰᠠᠨ ᠢ᠋ᠶ᠋ᠠᠨ ᠬᠡᠯᠡᠵᠦ ᠦᠭᠭᠦᠭᠰᠡᠨ ᠳ᠋ᠦ᠍ ᠴᠢᠨᠣᠠ ᠶᠡᠬᠡᠯᠡ ᠢᠨᠢᠶᠡᠵᠦ《ᠠᠢ᠂ ᠪᠠᠷᠰ ᠭᠤᠸᠠᠢ! ᠲᠡᠷᠡ ᠴᠢᠨᠢ ᠤᠬᠤᠨᠠ ᠪᠠᠢᠨᠠ᠃ ᠪᠢ ᠣᠴᠢᠵᠤ ᠪᠠᠷᠢᠵᠤ ᠢᠳᠡᠶᠡ!》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠪᠠᠬᠠᠨ ᠢᠲᠡᠭᠡᠵᠦ᠂ ᠬᠣᠶᠠᠭᠤᠯᠠ ᠰᠡᠭᠦᠯ ᠰᠡᠭᠦᠯ ᠢ᠋ᠶ᠋ᠡᠨ ᠬᠣᠯᠪᠣᠵᠤ ᠣᠴᠢᠭᠰᠠᠨ ᠳ᠋ᠤ᠌᠂ ᠡᠪᠦᠭᠡᠨ ᠦ᠌ ᠭᠡᠷ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠣᠢᠷᠠᠳᠴᠤ ᠢᠷᠡᠭᠰᠡᠨ ᠳ᠋ᠦ᠍᠂ ᠡᠪᠦᠭᠡᠨ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠡᠭᠦᠳᠡᠨ ᠳᠡᠭᠡᠷᠡ ᠪᠡᠨ ᠵᠣᠭᠰᠣᠵᠤ᠂ ᠴᠢᠩᠭᠠ ᠳᠠᠭᠤᠨ ᠢ᠋ᠶ᠋ᠠᠷ᠄《ᠬᠥᠭᠰᠢᠨ! ᠥᠨᠥ ᠵᠠᠯᠢᠲᠤ ᠴᠢᠨᠣᠠ ᠴᠢᠨᠢ᠂ ᠥᠷᠢᠨ ᠳ᠋ᠡᠭᠡᠨ ᠨᠢᠭᠡ ᠪᠠᠷᠰ ᠠᠪᠴᠤ ᠢᠷᠡᠵᠢ᠃ ᠠᠪᠤᠨᠠ ᠤᠤ᠂ ᠪᠣᠯᠢᠨᠠ ᠤᠤ?》 ᠭᠡᠰᠡᠨ ᠳ᠋ᠦ᠍ ᠪᠠᠷᠰ ᠪᠠᠯᠭᠠ ᠠᠯᠳᠠᠲᠠᠯᠠ ᠠᠶᠤᠵᠤ ᠴᠢᠨᠣᠠ ᠪᠠᠨ ᠴᠢᠷᠦᠨ ᠭᠦᠶᠦᠵᠦ ᠨᠢᠭᠡᠨ ᠠᠮᠢᠰᠬᠤᠭᠠ ᠪᠠᠷ ᠬᠡᠳᠦᠨ ᠠᠭᠤᠯᠠ ᠶ᠋ᠢ ᠳᠠᠪᠠᠵᠤ᠂ ᠬᠣᠢᠰᠢ ᠬᠠᠨᠳᠤᠨ ᠦᠵᠡᠭᠰᠡᠨ ᠳ᠋ᠦ᠍᠂ ᠴᠢᠨᠣᠠ ᠨᠢ ᠴᠢᠷᠦᠭᠳᠡᠭᠰᠡᠭᠡᠷ ᠰᠢᠲᠦ ᠨᠢ ᠢᠷᠵᠠᠢᠵᠤ᠂ ᠦᠰᠦ ᠨᠢ ᠵᠤᠯᠭᠠᠷᠠᠵᠤ ᠦᠬᠦᠪᠡ ᠭᠡᠨᠡ᠃ ᠪᠠᠷᠰ ᠡᠭᠦᠨ ᠢ᠋ ᠦᠵᠡᠭᠡᠳ ᠶᠡᠬᠡ ᠠᠭᠤᠷᠯᠠᠵᠤ᠂ ᠪᠢ ᠠᠶᠤᠵᠤ ᠪᠠᠢᠬᠤ ᠳ᠋ᠤ᠌ ᠴᠢ ᠢᠨᠢᠶᠡᠨᠡ ᠭᠡᠨᠡ? ᠪᠢ ᠲᠠᠭᠠᠷᠠᠵᠤ ᠪᠠᠢᠬᠤ ᠳ᠋ᠤ᠌ ᠴᠢ ᠬᠠᠯᠠᠭᠤᠴᠠᠨᠠ ᠭᠡᠨᠡ? ᠭᠡᠵᠦ ᠴᠢᠨᠣᠠ ᠪᠠᠨ ᠭᠡᠭᠡᠵᠦ ᠭᠦᠨ ᠠᠭᠤᠯᠠᠨ ᠳ᠋ᠤ᠌ ᠣᠷᠣᠵᠤ ᠠᠮᠢᠳᠤᠷᠠᠪᠠ ᠭᠡᠨᠡ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂
ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠪᠠᠯᠤᠰᠦᠭ᠂ ᠬᠡᠯᠡᠰᠣᠶᠣᠯ