ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠠᠬᠠ ᠳᠡᠭᠦᠦ ᠭᠤᠷᠪᠠ Гураван настай гунаган улаан баатар - Ах дүү гурв
203ᠠᠬᠠ ᠳᠡᠭᠦᠦ ᠭᠤᠷᠪᠠ
ᠡᠷᠲᠡ ᠤᠷᠢᠳᠤ ᠦᠶᠡ ᠳ᠋ᠦ᠍᠂ ᠠᠬᠠ ᠳᠡᠭᠦᠦ ᠭᠤᠷᠪᠠ ᠪᠠᠢᠭᠰᠠᠨ ᠭᠡᠨᠡ᠃ ᠡᠨᠡ ᠠᠬᠠ ᠳᠡᠭᠦᠦ ᠭᠤᠷᠪᠠ ᠶ᠋ᠢᠨ ᠶᠡᠬᠡ ᠠᠬᠠ ᠨᠢ᠂ ᠠᠵᠢᠯ ᠬᠢᠪᠡᠯ ᠳᠤᠤᠭᠠᠷᠬᠤ ᠦᠭᠡᠢ ᠵᠠᠩ ᠲᠠᠢ ᠭᠡᠨᠡ᠃ ᠬᠣᠶᠠᠳᠤᠭᠠᠷ ᠨᠢ᠂ ᠠᠷᠠᠯᠵᠢᠭᠠ ᠮᠠᠢᠮᠠᠢ ᠬᠢᠬᠦ ᠳ᠋ᠦ᠍᠂ ᠶᠡᠷᠦ ᠳ᠋ᠡᠭᠡᠨ ᠬᠣᠨᠵᠢᠭᠳᠠᠬᠤ ᠦᠭᠡᠢ ᠴᠢᠳᠠᠯ ᠲᠠᠢ ᠭᠡᠨᠡ᠃ ᠭᠤᠷᠪᠠᠳᠤᠭᠠᠷ ᠨᠢ᠂ ᠠᠵᠢᠯ ᠬᠢᠬᠦ ᠳ᠋ᠡᠭᠡᠨ ᠬᠣᠶᠠᠷ ᠦᠵᠦᠭᠦᠷ ᠦ᠋ᠨ ᠨᠠᠷᠠ ᠶ᠋ᠢ ᠦᠵᠡᠬᠦ ᠦᠭᠡᠢ ᠰᠢᠳᠤᠷᠭᠤ ᠠᠵᠢᠯᠯᠠᠳᠠᠭ ᠭᠡᠨᠡ᠃
ᠴᠢᠩᠭᠢᠭᠡᠳ ᠨᠢᠭᠡᠨ ᠡᠳᠦᠷ᠂ ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ ᠪᠠᠨ ᠠᠵᠢᠯ ᠡᠷᠢᠬᠦ ᠪᠡᠷ ᠶᠠᠪᠤᠵᠤ᠂ ᠨᠢᠭᠡ ᠶᠡᠬᠡ ᠠᠢᠯ ᠤ᠋ᠨ ᠳᠤᠮᠳᠠ ᠣᠷᠣᠵᠤ ᠢᠷᠡᠭᠡᠳ᠂ ᠦᠳᠡᠯᠡᠵᠦ ᠭᠠᠷᠤᠶᠠ ᠭᠡᠵᠦ᠂ ᠨᠢᠭᠡᠨ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠭᠠᠳᠠᠨᠠ ᠰᠠᠭᠤᠵᠤ ᠲᠠᠮᠠᠬᠢ ᠲᠠᠲᠠᠳᠠᠭ ᠨᠢ ᠲᠠᠮᠠᠬᠢ ᠪᠠᠨ ᠲᠠᠲᠠᠵᠤ᠂ ᠲᠠᠲᠠᠳᠠᠭ ᠦᠭᠡᠢ ᠨᠢ ᠬᠤᠷᠤᠳ ᠢ᠋ᠶ᠋ᠠᠨ ᠬᠡᠮᠡᠯᠢᠵᠦ ᠪᠠᠢᠭᠰᠠᠨ ᠳ᠋ᠤ᠌᠂ ᠥᠨᠥ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠡᠵᠡᠨ᠂ ᠨᠢᠭᠡᠨ ᠲᠠᠭᠳᠠᠭᠠᠷ ᠪᠡᠶᠡ ᠲᠡᠢ ᠲᠠᠷᠭᠤᠨ ᠬᠥᠮᠦᠨ᠂ ᠬᠣᠶᠠᠷ ᠣᠬᠣᠷ ᠬᠥᠯ ᠢ᠋ᠶ᠋ᠡᠨ ᠨᠡᠭᠦᠯᠭᠡᠭᠰᠡᠭᠡᠷ ᠡᠳᠡ ᠠᠬᠠ ᠳᠡᠭᠦᠦ ᠭᠤᠷᠪᠠ ᠶ᠋ᠢᠨ ᠳᠡᠷᠭᠡᠳᠡ ᠢᠷᠡᠭᠡᠳ᠄《ᠲᠠ ᠭᠤᠷᠪᠠᠭᠤᠯᠠ ᠶᠠᠭᠤᠨ ᠳ᠋ᠤ᠌ ᠠᠵᠢᠯ ᠬᠢᠬᠦ ᠦᠭᠡᠢ ᠵᠦᠭᠡᠷ ᠠᠢᠯ ᠬᠡᠰᠦᠵᠦ ᠶᠠᠪᠤᠵᠤ ᠪᠠᠢᠨᠠ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠠᠬᠠ ᠨᠢ᠄《 ᠪᠢᠳᠡ ᠪᠣᠯ ᠰᠢᠳᠤᠷᠭᠤ ᠨᠡᠷᠡ ᠲᠡᠢ ᠡᠪᠦᠭᠡᠨ ᠦ᠌ ᠬᠡᠦᠬᠡᠳ ᠪᠢᠯᠡ᠃ ᠡᠴᠢᠭᠡ ᠮᠢᠨᠢ ᠨᠢᠭᠡ ᠨᠠᠰᠤᠨ ᠳ᠋ᠠᠭᠠᠨ᠂ ᠠᠷᠪᠠᠢ ᠨᠡᠷᠡ ᠲᠡᠢ ᠪᠠᠶᠠᠨ ᠳ᠋ᠤ᠌ ᠠᠵᠢᠯᠯᠠᠵᠤ ᠥᠭᠭᠦᠭᠡᠳ᠂ ᠶᠠᠭᠤ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ᠂ ᠨᠢᠷᠤᠭᠤ ᠪᠠᠨ ᠪᠥᠭᠲᠥᠷ ᠪᠣᠯᠲᠠᠯᠠ᠂ ᠨᠢᠭᠤᠷ ᠢ᠋ᠶ᠋ᠠᠨ ᠳᠣᠷᠣᠰᠬᠠ ᠪᠣᠯᠲᠠᠯᠠ ᠶᠠᠪᠤᠵᠤ᠂ ᠡᠴᠦᠰ ᠲᠡᠭᠡᠨ ᠬᠥᠪᠡᠭᠦᠳ ᠲᠡᠭᠡᠨ ᠶᠠᠭᠤ ᠴᠤ᠌ ᠦᠯᠡᠳᠡᠭᠡᠵᠦ ᠥᠭᠭᠦᠭᠰᠡᠨ ᠦᠭᠡᠢ ᠨᠠᠰᠤ ᠨᠥᠭᠴᠢᠪᠡ》 ᠭᠡᠰᠡᠨ ᠳ᠋ᠦ᠍᠂ ᠫᠠᠭᠳᠠᠭᠠᠷ ᠪᠠᠶᠠᠨ ᠰᠣᠨᠣᠰᠤᠭᠠᠳ᠂ ᠶᠡᠬᠡᠯᠡ ᠢᠨᠢᠶᠡᠵᠦ᠄《ᠶᠠᠭᠤᠨ ᠳ᠋ᠤ᠌ ᠶᠠᠭᠤ ᠴᠤ᠌ ᠦᠯᠡᠳᠡᠭᠡᠵᠦ ᠥᠭᠭᠦᠭᠰᠡᠨ ᠦᠭᠡᠢ ᠭᠡᠵᠦ ᠬᠡᠯᠡᠨᠡ ᠪᠣᠢ᠃ ᠲᠠ ᠭᠤᠷᠪᠠ ᠰᠢᠭ᠋ ᠡᠢᠮᠦ ᠴᠠᠬᠢᠷᠠᠭ ᠵᠠᠯᠠᠭᠤ ᠶ᠋ᠢ ᠣᠷᠴᠢᠯᠠᠩ ᠳ᠋ᠤ᠌ ᠦᠯᠡᠳᠡᠭᠡᠭᠰᠡᠨ ᠴᠢᠨᠢ᠂ ᠮᠠᠨ ᠤ᠋ ᠠᠳᠠᠯᠢ ᠡᠳ᠋ ᠢ᠋ᠶ᠋ᠡᠷ ᠣᠯᠠᠨ᠂ ᠬᠦᠴᠦ ᠪᠡᠷ ᠳᠤᠲᠠᠭᠤ ᠬᠥᠮᠦᠨ ᠳ᠋ᠦ᠍ ᠶᠡᠬᠡ ᠲᠤᠰᠠ ᠬᠢᠭᠰᠡᠨ ᠪᠢᠰᠢᠦ! ᠲᠠ ᠨᠠᠷ ᠣᠳᠣ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠨᠠ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠄《 ᠬᠠᠮᠢᠭᠠ ᠠᠵᠢᠯ ᠲᠠᠢ ᠪᠣᠯ ᠳᠠᠷᠤᠢ ᠲᠡᠨᠳᠡ ᠣᠴᠢᠨᠠ》 ᠭᠡᠵᠡᠢ᠃
ᠫᠠᠭᠳᠠᠭᠠᠷ ᠪᠠᠶᠠᠨ᠄《ᠡᠨᠡ ᠭᠤᠷᠪᠠᠨ ᠬᠥᠮᠦᠨ᠂ ᠭᠡᠷ ᠡᠷᠦᠬᠡ ᠦᠭᠡᠢ᠃ ᠠᠵᠢᠯ ᠡᠷᠢᠵᠦ ᠪᠠᠢᠨᠠ᠃ ᠬᠡᠷᠪᠡ ᠡᠳᠡᠨ ᠢ᠋ ᠦᠯᠡᠳᠡᠭᠡᠵᠦ ᠠᠪᠤᠪᠠᠯ ᠬᠦᠴᠦ ᠶ᠋ᠢ ᠨᠢ ᠶᠡᠬᠡ ᠭᠠᠷᠭᠠᠭᠤᠯᠵᠤ᠂ ᠬᠥᠯᠥᠰᠥ ᠮᠥᠩᠭᠥ ᠶ᠋ᠢ ᠨᠢ ᠪᠠᠭᠠ ᠥᠭᠴᠦ ᠵᠠᠷᠤᠵᠤ ᠪᠣᠯᠤᠨᠠ᠃ ᠢᠩᠭᠢᠪᠡᠯ ᠨᠠᠳᠠ ᠲᠤᠰᠠ ᠲᠠᠢ》 ᠭᠡᠵᠦ ᠪᠣᠳᠣᠭᠠᠳ᠄《ᠵᠠ᠂ ᠲᠠ ᠭᠤᠷᠪᠠ ᠶ᠋ᠢ ᠪᠢ ᠠᠵᠢᠯ ᠤ᠋ᠨ ᠬᠥᠮᠦᠨ ᠢ᠋ᠶ᠋ᠡᠷ ᠠᠪᠤᠶᠠ᠃ ᠲᠠ ᠭᠤᠷᠪᠠᠭᠤᠯᠠ ᠴᠥᠮ ᠶᠠᠮᠠᠷ ᠶᠠᠮᠠᠷ ᠠᠵᠢᠯ ᠬᠢᠵᠦ ᠴᠢᠳᠠᠳᠠᠭ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠄《ᠪᠢᠳᠡ ᠭᠤᠷᠪᠠ ᠶᠠᠮᠠᠷ ᠴᠤ᠌ ᠠᠵᠢᠯ ᠴᠥᠮ ᠬᠢᠵᠦ ᠴᠢᠳᠠᠨᠠ᠃ ᠬᠡᠷᠪᠡ ᠴᠢ ᠮᠠᠨ ᠤ᠋ ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ ᠶ᠋ᠢ ᠬᠥᠯᠥᠰᠥᠯᠡᠪᠡᠯ᠂ ᠪᠢᠳᠡ ᠭᠤᠷᠪᠠᠭᠤᠯᠠ ᠳ᠋ᠤ᠌ ᠬᠥᠮᠦᠨ ᠪᠦᠷᠢ ᠳ᠋ᠦ᠍ ᠨᠢᠭᠡ ᠨᠢᠭᠡ ᠵᠠᠩᠰᠢᠯ ᠲᠠᠢ᠃ ᠴᠢ ᠬᠡᠷᠪᠡ ᠪᠢᠳᠡᠨ ᠦ᠌ ᠵᠠᠩᠰᠢᠯ ᠳ᠋ᠤ᠌ ᠳᠤᠷᠠᠲᠠᠢ ᠪᠣᠯ ᠪᠢᠳᠡ ᠴᠢᠮᠠᠲᠤ ᠠᠵᠢᠯᠯᠠᠵᠤ ᠥᠭᠭᠦᠨᠡ᠃ ᠪᠠᠰᠠ ᠪᠢᠳᠡ ᠨᠠᠷ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠵᠢᠯ ᠬᠢᠵᠦ ᠪᠠᠢᠬᠤ ᠳ᠋ᠤ᠌ ᠲᠠ ᠬᠣᠷᠢᠭᠯᠠᠵᠤ ᠪᠣᠯᠬᠤ ᠦᠭᠡᠢ》 ᠭᠡᠰᠡᠨ ᠳ᠋ᠦ᠍ ᠫᠠᠭᠳᠠᠭᠠᠷ ᠪᠠᠶᠠᠨ᠄《ᠲᠠ ᠴᠥᠮ ᠶᠠᠮᠠᠷ ᠵᠠᠩᠰᠢᠯ ᠲᠠᠢ ᠪᠣᠢ? ᠪᠢ ᠰᠣᠨᠣᠰᠴᠤ ᠦᠵᠡᠶᠡ᠃》 ᠭᠡᠰᠡᠨ ᠳ᠋ᠦ᠍᠂ ᠶᠡᠬᠡ ᠠᠬᠠ ᠨᠢ᠄《ᠪᠢ ᠪᠣᠯ ᠠᠵᠢᠯ ᠬᠢᠬᠦ ᠳ᠋ᠦ᠍᠂ ᠨᠢᠭᠡ ᠴᠦ᠍ ᠦᠭᠡ ᠬᠡᠯᠡᠬᠦ ᠦᠭᠡᠢ ᠵᠠᠩᠰᠢᠯ ᠲᠠᠢ ᠪᠥᠭᠡᠳ ᠠᠮᠢᠨ ᠬᠡᠷᠡᠭ ᠭᠠᠷᠴᠤ ᠪᠠᠢᠪᠠᠴᠤ ᠬᠠᠢᠬᠤᠷᠬᠤ ᠦᠭᠡᠢ ᠠᠵᠢᠯᠯᠠᠳᠠᠭ᠃ ᠠᠵᠢᠯᠯᠠᠬᠤ ᠬᠣᠭᠣᠷᠣᠨᠳᠣ ᠶᠠᠭᠤ ᠠᠰᠠᠭᠤᠪᠠᠴᠤ ᠬᠠᠷᠢᠭᠤᠯᠬᠤ ᠦᠭᠡᠢ ᠳᠤᠭᠤᠢ ᠠᠵᠢᠯᠯᠠᠳᠠᠭ ᠵᠠᠩᠰᠢᠯ ᠲᠠᠢ ᠪᠢᠯᠡ》 ᠭᠡᠰᠡᠨ ᠳ᠋ᠦ᠍᠂ ᠫᠠᠭᠳᠠᠭᠠᠷ ᠪᠠᠶᠠᠨ ᠰᠣᠨᠣᠰᠤᠭᠠᠳ ᠳᠣᠲᠣᠷᠠ ᠪᠠᠨ ᠪᠠᠶᠠᠷᠯᠠᠭᠰᠠᠨ ᠨᠢ᠄《ᠡᠢᠮᠦ ᠬᠥᠮᠦᠨ ᠢ᠋ᠶ᠋ᠡᠷ ᠠᠵᠢᠯ ᠬᠢᠯᠭᠡᠪᠡᠯ᠂ ᠶᠠᠭᠤ ᠴᠤ᠌ ᠳᠤᠤᠭᠠᠷᠬᠤ ᠦᠭᠡᠢ᠂ ᠮᠢᠨᠦ ᠲᠥᠯᠥᠭᠡ ᠠᠵᠢᠯᠯᠠᠵᠤ ᠥᠭᠬᠦ ᠨᠢ ᠰᠠᠢᠨ᠃ ᠥᠭᠡᠷᠡ ᠬᠡᠨ ᠪᠠᠰᠠ ᠮᠢᠨᠦ ᠲᠥᠯᠥᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠡᠷ ᠠᠵᠢᠯᠯᠠᠵᠤ ᠥᠭᠬᠦ ᠪᠣᠢ!》 ᠭᠡᠵᠦ ᠪᠣᠳᠣᠭᠠᠳ᠄《ᠵᠠ! ᠡᠨᠡ ᠵᠠᠩᠰᠢᠯ ᠢ᠋ ᠴᠢᠨᠢ ᠪᠢ ᠵᠥᠪᠰᠢᠶᠡᠷᠡᠨᠡ》 ᠭᠡᠳ ᠬᠣᠶᠠᠳᠤᠭᠠᠷ ᠢ᠋ ᠨᠢ ᠵᠢᠭᠠᠵᠤ᠄《ᠴᠢ ᠶᠠᠮᠠᠷ ᠵᠠᠩᠰᠢᠯ ᠲᠠᠢ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠄《ᠪᠢ ᠪᠣᠯ ᠠᠷᠠᠯᠵᠢᠶᠠ ᠮᠠᠢᠮᠠᠢ ᠬᠢᠬᠦ ᠳ᠋ᠦ᠍ ᠬᠡᠵᠢᠶᠡ ᠴᠦ᠍ ᠬᠥᠮᠦᠨ ᠳ᠋ᠦ᠍ ᠬᠣᠨᠵᠢᠭᠳᠠᠬᠤ ᠦᠭᠡᠢ》 ᠭᠡᠰᠡᠨ ᠳ᠋ᠦ᠍ ᠫᠠᠭᠳᠠᠭᠠᠷ ᠪᠠᠶᠠᠨ ᠳᠣᠲᠣᠷᠠ ᠪᠠᠨ᠄《ᠡᠨᠡ ᠬᠥᠮᠦᠨ ᠢ᠋ᠶ᠋ᠡᠷ ᠪᠢ ᠭᠠᠳᠠᠭᠰᠢ ᠳᠣᠲᠣᠭᠰᠢ ᠬᠣᠲᠠ ᠵᠡᠭᠡᠯᠢ ᠳ᠋ᠦ᠍ ᠶᠠᠪᠤᠭᠤᠯᠵᠤ ᠮᠠᠢᠮᠠᠢ ᠬᠢᠯᠭᠡᠪᠡᠯ ᠠᠰᠢᠭ ᠲᠠᠢ》 ᠭᠡᠵᠦ ᠪᠣᠳᠣᠭᠠᠳ᠄《ᠰᠠᠢᠨ᠃ ᠪᠢ ᠴᠢᠨᠦ ᠵᠠᠩᠰᠢᠯ ᠢ᠋ ᠵᠥᠪᠰᠢᠶᠡᠷᠡᠪᠡ》 ᠭᠡᠵᠦ ᠬᠠᠷᠢᠭᠤᠯᠤᠭᠠᠳ ᠭᠤᠷᠪᠠᠳᠤᠭᠠᠷ ᠠ᠋ᠴᠠ ᠨᠢ᠄《ᠴᠢ ᠶᠠᠮᠠᠷ ᠵᠠᠩᠰᠢᠯ ᠲᠠᠢ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠄《ᠪᠢ ᠪᠣᠯ ᠠᠵᠢᠯᠯᠠᠬᠤ ᠦᠶᠡ ᠳ᠋ᠦ᠍ ᠡᠳᠦᠷ ᠦ᠋ᠨ ᠬᠣᠶᠠᠷ ᠦᠵᠦᠭᠦᠷ ᠦ᠋ᠨ ᠨᠠᠷᠠ ᠶ᠋ᠢ ᠦᠵᠡᠬᠦ ᠦᠭᠡᠢ ᠠᠵᠢᠯᠯᠠᠳᠠᠭ ᠵᠠᠩᠰᠢᠯ ᠲᠠᠢ》 ᠭᠡᠰᠡᠨ ᠳ᠋ᠦ᠍ ᠫᠠᠭᠳᠠᠭᠠᠷ ᠪᠠᠶᠠᠨ ᠶᠡᠬᠡ ᠪᠠᠶᠠᠷᠯᠠᠵᠤ᠂ ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ ᠶ᠋ᠢ ᠴᠥᠮ ᠠᠵᠢᠯᠯᠠᠭᠤᠯᠬᠤ ᠪᠠᠷ ᠠᠪᠴᠤ ᠰᠠᠭᠤᠭᠰᠠᠨ ᠭᠡᠨᠡ᠃ ᠴᠢᠩᠭᠢᠭᠡᠳ ᠦᠨᠡᠬᠡᠷ ᠡᠨᠡ ᠭᠤᠷᠪᠠᠭᠤᠯᠠ ᠵᠠᠩᠰᠢᠯ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠵᠢᠯᠯᠠᠵᠤ ᠶᠠᠪᠤᠬᠤ ᠶ᠋ᠢ ᠦᠵᠡᠵᠦ ᠫᠠᠭᠳᠠᠭᠠᠷ ᠪᠠᠶᠠᠨ ᠮᠠᠰᠢ ᠪᠠᠶᠠᠷᠯᠠᠵᠤ᠂ ᠡᠢᠮᠦ ᠰᠢᠳᠤᠷᠭᠤ ᠪᠠᠷ ᠮᠢᠨᠦ ᠲᠥᠯᠥᠭᠡ ᠠᠵᠢᠯᠯᠠᠵᠤ ᠥᠭᠬᠦ ᠬᠥᠮᠦᠨ ᠴᠢᠨᠢ ᠦᠨᠡᠬᠡᠷ ᠰᠠᠢᠨ ᠪᠠᠢᠨᠠ᠃ ᠭᠡᠪᠡᠴᠦ᠂ ᠳᠣᠲᠣᠷᠠ ᠪᠠᠨ᠄《ᠡᠨᠡ ᠭᠤᠷᠪᠠᠨ ᠲᠡᠨᠡᠭ ᠡᠷᠡ》 ᠭᠡᠵᠦ ᠳᠣᠮᠣᠭᠯᠠᠨ ᠮᠠᠭᠤᠯᠠᠳᠠᠭ ᠪᠠᠢᠵᠠᠢ᠃ ᠴᠢᠩᠭᠢᠭᠡᠳ ᠡᠨᠡ ᠮᠡᠲᠦ ᠪᠡᠷ ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ ᠫᠠᠭᠳᠠᠭᠠᠷ ᠪᠠᠶᠠᠨ ᠤ᠋ ᠭᠡᠷ ᠲᠦ᠍ ᠠᠵᠢᠯᠯᠠᠭᠰᠠᠭᠠᠷ ᠨᠢᠭᠡᠨ ᠡᠳᠦᠷ ᠠᠬᠠ ᠨᠢ ᠬᠤᠳᠳᠤᠭ ᠠ᠋ᠴᠠ ᠣᠢᠷᠠᠬᠠᠨ ᠠᠵᠢᠯᠯᠠᠵᠤ ᠪᠠᠢᠭᠰᠠᠨ ᠳ᠋ᠤ᠌ ᠫᠠᠭᠳᠠᠭᠠᠷ ᠪᠠᠶᠠᠨ ᠤ᠋ ᠪᠢᠴᠢᠬᠠᠨ ᠬᠦᠦ ᠨᠢ ᠭᠦᠶᠦᠨ ᠢᠷᠡᠵᠦ ᠬᠤᠳᠳᠤᠭ ᠲᠤ᠌ ᠪᠦᠳᠦᠷᠢᠨ ᠤᠨᠠᠪᠠ ᠭᠡᠨᠡ᠃ ᠶᠡᠬᠡ ᠠᠬᠠ ᠨᠢ ᠡᠨᠡ ᠬᠦᠦ ᠶ᠋ᠢᠨ ᠬᠤᠳᠳᠤᠭ ᠤ᠋ᠨ ᠵᠦᠭ ᠭᠦᠶᠦᠵᠦ ᠢᠷᠡᠨ ᠤᠨᠠᠬᠤ ᠶ᠋ᠢᠨ ᠡᠮᠦᠨᠡ ᠨᠢ ᠣᠯᠵᠤ ᠦᠵᠡᠭᠰᠡᠨ ᠪᠣᠯᠪᠠᠴᠤ᠂ ᠬᠤᠳᠳᠤᠭ ᠪᠠᠢᠨᠠ ᠭᠡᠵᠦ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠦᠭᠡᠢ ᠪᠥᠭᠡᠳ ᠬᠤᠳᠳᠤᠭ ᠲᠤ᠌ ᠤᠨᠠᠭᠰᠠᠨ ᠬᠣᠵᠢᠮ ᠨᠢ ᠪᠠᠰᠠ ᠴᠤ᠌ ᠥᠪᠡᠷ ᠦ᠋ᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠵᠢᠯ ᠢ᠋ᠶ᠋ᠠᠨ ᠬᠢᠵᠦ ᠪᠠᠢᠬᠤ ᠳᠤᠮᠳᠠ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠠᠵᠢᠯ ᠪᠠᠷᠠᠭᠠᠳ ᠬᠡᠯᠡᠵᠦ ᠥᠭᠭᠦᠶᠡ ᠭᠡᠵᠦ ᠪᠣᠳᠣᠭᠠᠳ ᠲᠣᠯᠣᠭᠠᠢ ᠳᠠᠷᠤᠵᠤ ᠠᠵᠢᠯᠯᠠᠪᠠ ᠭᠡᠨᠡ᠃ ᠤᠳᠠᠭᠰᠠᠨ ᠦᠭᠡᠢ ᠫᠠᠭᠳᠠᠭᠠᠷ ᠪᠠᠶᠠᠨ ᠬᠦᠦ ᠪᠡᠨ ᠡᠷᠢᠵᠦ ᠡᠨᠳᠡ ᠲᠡᠨᠳᠡ ᠭᠦᠶᠦᠵᠦ ᠶᠡᠬᠡ ᠠᠬᠠ ᠶ᠋ᠢᠨ ᠬᠢᠨᠢ ᠳᠡᠷᠭᠡᠳᠡ ᠢᠷᠡᠵᠦ᠄《ᠬᠦᠢ! ᠴᠢ ᠮᠢᠨᠦ ᠬᠦᠦ ᠶ᠋ᠢ ᠣᠯᠵᠤ ᠦᠵᠡᠪᠡᠦ?》 ᠭᠡᠰᠡᠨ ᠳ᠋ᠦ᠍ ᠶᠡᠬᠡ ᠠᠬᠠ ᠨᠢ ᠮᠠᠭᠤ ᠨᠢᠳᠦ ᠪᠡᠷ ᠫᠠᠭᠳᠠᠭᠠᠷ ᠪᠠᠶᠠᠨ ᠢ᠋ ᠬᠠᠷᠠᠵᠤ ᠦᠵᠡᠭᠡᠳ ᠶᠠᠭᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠃ ᠠᠵᠢᠯ ᠢ᠋ᠶ᠋ᠠᠨ ᠬᠢᠬᠦ ᠳ᠋ᠦ᠍ ᠫᠠᠭᠳᠠᠭᠠᠷ ᠪᠠᠶᠠᠨ ᠠᠷᠭᠠ ᠦᠭᠡᠢ᠂ ᠡᠨᠡ ᠬᠥᠮᠦᠨ ᠦ᠌ ᠵᠠᠩᠰᠢᠯ ᠡᠢᠮᠦ ᠪᠠᠢᠨᠠ ᠭᠡᠵᠦ ᠴᠢᠨᠠᠭᠰᠢ ᠭᠦᠶᠦᠵᠦ ᠶᠠᠪᠤᠪᠠ᠃ ᠣᠷᠣᠢ ᠨᠢ ᠶᠡᠬᠡ ᠠᠬᠠ ᠨᠢ ᠠᠵᠢᠯ ᠢ᠋ᠶ᠋ᠠᠨ ᠬᠢᠵᠦ ᠪᠠᠷᠠᠭᠠᠳ᠂ ᠬᠠᠷᠢᠵᠤ ᠢᠷᠡᠭᠡᠳ ᠫᠠᠭᠳᠠᠭᠠᠷ ᠪᠠᠶᠠᠨ ᠳ᠋ᠤ᠌ ᠬᠡᠯᠡᠭᠰᠡᠨ ᠨᠢ᠄《ᠡᠨᠡ ᠡᠳᠦᠷ ᠦᠳᠡ ᠶ᠋ᠢᠨ ᠬᠢᠷᠢ ᠳ᠋ᠦ᠍ ᠬᠦᠦ ᠴᠢᠨᠢ ᠲᠡᠷᠡ ᠪᠠᠭᠠᠬᠠᠨ ᠤᠰᠤ ᠲᠠᠢ ᠬᠤᠳᠳᠤᠭ ᠲᠤ᠌ ᠤᠨᠠᠪᠠ》 ᠭᠡᠰᠡᠨ ᠳ᠋ᠦ᠍ ᠫᠠᠭᠳᠠᠭᠠᠷ ᠪᠠᠶᠠᠨ ᠶᠡᠬᠡ ᠠᠭᠤᠷᠯᠠᠵᠤ᠂ ᠳᠡᠭᠡᠷᠡ ᠦᠰᠦᠷᠦᠨ ᠵᠠᠩᠨᠠᠵᠤ᠄《 ᠪᠢ ᠴᠢᠮᠠ ᠠ᠋ᠴᠠ ᠬᠦᠦ ᠶ᠋ᠢ ᠮᠢᠨᠢ ᠦᠵᠡᠪᠡᠦ ᠭᠡᠰᠡᠨ ᠳ᠋ᠦ᠍ ᠴᠢ ᠶᠠᠭᠤᠨ ᠳ᠋ᠤ᠌ ᠬᠡᠯᠡᠬᠦ ᠦᠭᠡᠢ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠶᠡᠬᠡ ᠠᠬᠠ ᠶ᠋ᠢᠨ ᠬᠢᠨᠢ ᠬᠡᠯᠡᠭᠰᠡᠨ ᠨᠢ᠄《 ᠮᠢᠨᠦ ᠵᠠᠩᠰᠢᠯ ᠪᠣᠯ ᠠᠵᠢᠯ ᠬᠢᠵᠦ ᠪᠠᠢᠬᠤ ᠬᠣᠭᠣᠷᠣᠨᠳᠣ ᠦᠭᠡ ᠬᠡᠯᠡᠬᠦ ᠦᠭᠡᠢ ᠪᠥᠭᠡᠳ ᠥᠭᠡᠷᠡ ᠶᠠᠪᠤᠳᠠᠯ ᠢ᠋ ᠬᠠᠮᠢᠶᠠᠷᠬᠤ ᠦᠭᠡᠢ ᠭᠡᠰᠡᠨ ᠢ᠋ ᠴᠢ ᠬᠡᠵᠢᠶᠡᠨᠡᠢ ᠵᠥᠪᠰᠢᠶᠡᠷᠡᠭᠰᠡᠨ ᠪᠥᠭᠡᠳ ᠪᠠᠰᠠ ᠶᠠᠭᠤᠨ ᠳ᠋ᠤ᠌ ᠠᠭᠤᠷᠯᠠᠵᠤ ᠪᠠᠢᠨᠠ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠫᠠᠭᠳᠠᠭᠠᠷ ᠪᠠᠶᠠᠨ ᠳᠤᠤᠭᠠᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠂ ᠣᠴᠢᠵᠤ ᠬᠦᠦ ᠪᠡᠨ ᠭᠠᠷᠭᠠᠵᠤ ᠠᠪᠴᠢᠷᠠᠭᠰᠠᠨ ᠳ᠋ᠤ᠌᠂ ᠬᠦᠦ ᠨᠢ ᠬᠤᠳᠳᠤᠭ ᠲᠤ᠌ ᠤᠨᠠᠭᠠᠳ ᠮᠠᠨᠠᠷᠠᠵᠤ ᠳᠥᠩᠭᠡᠵᠢ ᠰᠡᠷᠭᠦᠪᠡ ᠭᠡᠨᠡ᠃
ᠴᠢᠩᠭᠢᠭᠡᠳ ᠬᠣᠶᠠᠳᠤᠭᠠᠷ ᠠᠬᠠ ᠶ᠋ᠢ ᠨᠢ ᠶᠠᠪᠤᠭᠤᠯᠵᠤ᠄《 ᠴᠢ ᠶᠠᠪᠤᠵᠤ ᠡᠮ ᠬᠤᠳᠠᠯᠳᠤᠨ ᠠᠪᠴᠤ ᠢᠷᠡ》 ᠭᠡᠰᠡᠨ ᠳ᠋ᠦ᠍ ᠬᠣᠶᠠᠳᠤᠭᠠᠷ ᠠᠬᠠ ᠨᠢ᠄《ᠵᠠ! ᠪᠣᠯᠤᠨᠠ 》ᠭᠡᠳ ᠬᠣᠲᠠᠨ ᠳ᠋ᠤ᠌ ᠣᠴᠢᠭᠠᠳ ᠬᠡᠳᠦᠨ ᠠᠷᠪᠠᠨ ᠲᠡᠷᠭᠡ ᠡᠮ ᠠᠪᠤᠭᠠᠳ ᠬᠠᠷᠢᠵᠤ ᠢᠷᠡᠵᠡᠢ᠃
ᠫᠠᠭᠳᠠᠭᠠᠷ ᠪᠠᠶᠠᠨ ᠦᠵᠡᠭᠡᠳ ᠮᠠᠰᠢ ᠠᠭᠤᠷᠯᠠᠵᠤ᠄《 ᠴᠢ ᠬᠠᠷᠢᠨ ᠡᠳᠦᠢ ᠠᠷᠪᠢᠨ ᠡᠮ ᠠᠪᠤᠭᠠᠳ ᠶᠠᠭᠠᠬᠢᠶᠠ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠬᠣᠶᠠᠳᠤᠭᠠᠷ ᠠᠬᠠ ᠨᠢ᠄《ᠪᠢ ᠬᠠᠷᠢᠨ ᠪᠠᠭᠠ ᠠᠪᠤᠶᠠ ᠭᠡᠰᠡᠨ ᠳ᠋ᠦ᠍᠂ ᠯᠠᠩ ᠨᠢ ᠠᠷᠪᠠᠨ ᠵᠣᠭᠣᠰ ᠣᠷᠣᠨᠠ᠂ ᠬᠡᠷᠪᠡ ᠶᠡᠬᠡ ᠪᠡᠷ ᠠᠪᠤᠪᠠᠯ ᠯᠠᠩ ᠨᠢ ᠨᠠᠢ᠍ᠮᠠᠨ ᠵᠣᠭᠣᠰ ᠲᠤᠯᠠ ᠪᠣᠳᠣᠪᠠᠯ ᠶᠡᠬᠡ ᠠᠪᠤᠭᠰᠠᠨ ᠨᠢ ᠬᠣᠨᠵᠢᠭᠳᠠᠬᠤ ᠦᠭᠡᠢ ᠪᠥᠭᠡᠳ ᠦᠨᠡ ᠨᠢ ᠬᠢᠮᠳᠠ ᠤᠴᠢᠷ ᠠ᠋ᠴᠠ ᠶᠡᠬᠡ ᠪᠡᠷ ᠠᠪᠤᠪᠠ᠃ ᠡᠨᠡ ᠪᠣᠯ ᠮᠢᠨᠦ ᠠᠷᠠᠯᠵᠢᠭᠠ ᠬᠢᠬᠦ ᠳ᠋ᠦ᠍ ᠬᠣᠨᠵᠢᠭᠳᠠᠬᠤ ᠦᠭᠡᠢ ᠵᠠᠩᠰᠢᠯ ᠮᠢᠨᠢ ᠡᠢᠮᠦ ᠪᠢᠯᠡ》 ᠭᠡᠰᠡᠨ ᠳ᠋ᠦ᠍ ᠫᠠᠭᠳᠠᠭᠠᠷ ᠪᠠᠶᠠᠨ ᠭᠠᠷ ᠢ᠋ᠶ᠋ᠠᠨ ᠨᠤᠬᠤᠯᠠᠵᠤ ᠶᠠᠭᠤ ᠴᠤ᠌ ᠬᠡᠯᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠭᠡᠨᠡ᠃ ᠬᠡᠳᠦᠨ ᠡᠳᠦᠷ ᠪᠣᠯᠵᠤ᠂ ᠡᠪᠡᠳᠴᠢᠨᠲᠡᠢ ᠬᠦᠦ ᠨᠢ ᠰᠠᠢᠨ ᠪᠣᠯᠤᠭᠰᠠᠨ ᠳ᠋ᠤ᠌᠂ ᠣᠳᠣ ᠬᠣᠨᠢ ᠠᠯᠠᠵᠤ ᠢᠳᠡᠭᠦᠯᠦᠶᠡ ᠭᠡᠵᠦ᠂ ᠭᠤᠷᠪᠠᠳᠤᠭᠠᠷ ᠳᠡᠭᠦᠦ ᠶ᠋ᠢ ᠨᠢ ᠳᠠᠭᠤᠳᠠᠵᠤ᠄《ᠵᠠ᠂ ᠴᠢ ᠶᠠᠪᠤᠵᠤ ᠬᠣᠨᠢ ᠠᠯᠠᠵᠤ ᠢᠷᠡ》 ᠭᠡᠰᠡᠨ ᠳ᠋ᠦ᠍ ᠭᠤᠷᠪᠠᠳᠤᠭᠠᠷ ᠨᠢ ᠡᠷᠲᠡ ᠶᠠᠪᠤᠵᠤ ᠣᠷᠣᠢ ᠪᠣᠯᠲᠠᠯᠠ ᠢᠷᠡᠬᠦ ᠦᠭᠡᠢ ᠳ᠋ᠦ᠍᠂ ᠫᠠᠭᠳᠠᠭᠠᠷ ᠪᠠᠶᠠᠨ ᠡᠨᠡ ᠶᠠᠭᠠᠬᠢᠭᠠᠳ ᠪᠣᠢ? ᠭᠡᠵᠦ ᠬᠣᠨᠢᠨ ᠰᠦᠷᠦᠭ ᠲᠡᠭᠡᠨ ᠢᠷᠡᠵᠦ ᠦᠵᠡᠭᠰᠡᠨ ᠳ᠋ᠦ᠍ ᠡᠷᠲᠡ ᠡᠴᠡ ᠣᠷᠣᠢ ᠪᠣᠯᠲᠠᠯᠠ ᠬᠡᠴᠢᠨᠡᠨ ᠠᠷᠪᠢᠨ ᠬᠣᠨᠢ ᠶ᠋ᠢ ᠨᠢ ᠠᠯᠠᠵᠤ ᠯᠠ ᠪᠠᠢᠵᠤ ᠭᠡᠨᠡ᠃ ᠫᠠᠭᠳᠠᠭᠠᠷ ᠪᠠᠶᠠᠨ ᠦᠵᠡᠮᠡᠭᠴᠡ ᠶᠡᠬᠡ ᠠᠭᠤᠷᠯᠠᠵᠤ ᠄《ᠴᠢ ᠮᠢᠨᠦ ᠬᠣᠨᠢ ᠶ᠋ᠢ ᠪᠦᠷ ᠠᠯᠠᠭᠠᠳ ᠳᠠᠭᠤᠰᠬᠠᠪᠠ》 ᠭᠡᠵᠦ ᠦᠰᠦᠷᠦᠭᠰᠡᠭᠡᠷ ᠢᠷᠡᠬᠦ ᠳ᠋ᠦ᠍᠂ ᠭᠤᠷᠪᠠᠳᠤᠭᠠᠷ ᠨᠢ᠄《ᠴᠢ ᠮᠢᠨᠦ ᠠᠵᠢᠯᠯᠠᠪᠠᠯ ᠬᠣᠶᠠᠷ ᠦᠵᠦᠭᠦᠷ ᠦ᠋ᠨ ᠨᠠᠷᠠ ᠶ᠋ᠢ ᠦᠵᠡᠬᠦ ᠦᠭᠡᠢ ᠠᠵᠢᠯᠯᠠᠳᠠᠭ ᠵᠠᠩᠰᠢᠯ ᠢ᠋ ᠶᠠᠮᠠᠷ ᠮᠡᠳᠡᠬᠦ ᠦᠭᠡᠢ ᠪᠢᠰᠢ ᠳᠡ! ᠶᠠᠭᠤᠨ ᠳ᠋ᠤ᠌ ᠪᠠᠭᠢᠷᠠᠨᠠ ᠪᠣᠢ?》 ᠭᠡᠰᠡᠨ ᠳ᠋ᠦ᠍ ᠫᠠᠭᠳᠠᠭᠠᠷ ᠪᠠᠶᠠᠨ ᠯᠠᠭ ᠬᠢᠲᠡᠯᠡ ᠬᠥᠰᠡᠷ ᠰᠠᠭᠤᠵᠤ᠂ ᠮᠠᠩᠨᠠᠢ ᠪᠠᠨ ᠴᠣᠬᠢᠵᠤ᠂ ᠪᠢ ᠣᠳᠣ《ᠬᠥᠮᠦᠨ ᠢ᠋ ᠤᠨᠠᠭᠠᠶᠠ ᠭᠡᠵᠦ ᠨᠦᠬᠡ ᠪᠤᠤ ᠮᠠᠯᠲᠠ! ᠥᠪᠡᠰᠦᠪᠡᠨ ᠤᠨᠠᠬᠤ ᠪᠠᠨ ᠮᠡᠳᠡ》 ᠭᠡᠰᠡᠨ ᠦᠭᠡ ᠶ᠋ᠢ ᠰᠠᠶᠢ ᠣᠯᠵᠤ ᠮᠡᠳᠡᠪᠡ᠃ ᠪᠢ ᠬᠠᠷᠢᠨ ᠥᠭᠡᠷᠡ ᠬᠥᠮᠦᠨ ᠢ᠋ ᠵᠠᠪᠰᠢᠶᠠ ᠭᠡᠵᠦ ᠪᠠᠢᠭᠠᠳ᠂ ᠥᠪᠡᠰᠦᠪᠡᠨ ᠬᠡᠲᠦᠷᠬᠡᠢ ᠬᠣᠬᠢᠷᠠᠪᠠ ᠭᠡᠵᠦ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠠᠬᠠ ᠳᠡᠭᠦᠦ ᠭᠤᠷᠪᠠᠭᠤᠯᠠ ᠶ᠋ᠢᠨ ᠬᠦᠴᠦᠨ ᠦ᠌ ᠮᠥᠩᠭᠥ ᠶ᠋ᠢ ᠴᠥᠮ ᠥᠭᠴᠦ ᠶᠠᠪᠤᠭᠤᠯᠪᠠ ᠭᠡᠨᠡ᠃ ᠴᠢᠩᠭᠢᠭᠡᠳ ᠭᠤᠷᠪᠠᠭᠤᠯᠠ ᠪᠠᠨ ᠬᠦᠴᠦᠨ ᠦ᠌ ᠮᠥᠩᠭᠥ ᠪᠡᠷ ᠢ᠋ᠶ᠋ᠡᠨ ᠭᠡᠷ ᠭᠣᠯᠣᠮᠲᠠ ᠪᠤᠰᠬᠠᠵᠤ ᠬᠣᠨᠢ ᠮᠠᠯ ᠠᠪᠴᠤ ᠮᠠᠰᠢ ᠵᠢᠷᠭᠠᠯ ᠲᠠᠢ ᠠᠮᠢᠳᠤᠷᠠᠪᠠ ᠭᠡᠨᠡ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂
ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ·ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠪᠠᠯᠤᠰᠦᠭ᠂ ᠬᠡᠯᠡᠰᠣᠶᠣᠯ