ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠬᠣᠶᠠᠷ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -12
161ᠪᠤᠤᠷᠠ ᠶ᠋ᠢ ᠠᠪᠴᠢᠷᠠᠬᠤ ᠵᠠᠮ ᠳ᠋ᠠᠭᠠᠨ
ᠪᠤᠤᠷᠠ ᠶ᠋ᠢᠨ ᠲᠡᠩᠬᠡᠭᠡ ᠤᠯᠠᠮ ᠳᠣᠷᠣᠢᠲᠠᠭᠰᠠᠨ ᠪᠠᠢᠬᠤ ᠪᠣᠯᠪᠠᠴᠤ ᠵᠠᠮ ᠢ᠋ᠶ᠋ᠠᠨ ᠪᠠᠷᠢᠨ ᠭᠠᠷᠴᠤ ᠢᠷᠡᠵᠦ ᠶᠠᠪᠤᠭᠠ ᠠᠵᠢ᠃ ᠳ᠋ᠠᠨᠽᠠᠨ ᠲᠡᠭᠦᠨ ᠢ᠋ ᠳᠣᠣᠷᠠ ᠪᠠᠨ ᠵᠣᠭᠰᠣᠨ ᠬᠦᠯᠢᠶᠡᠪᠡ᠃
— ᠲᠡᠮᠡᠭᠡ ᠳᠡᠭᠦᠦ ᠨᠠᠷ ᠢ᠋ ᠮᠢᠨᠢ ᠢᠳᠡᠬᠦ ᠦᠭᠡᠢ᠂ ᠡᠪᠡᠰᠦ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠢᠳᠡᠳᠡᠭ ᠦᠭᠡᠢ ᠶᠦᠮ ᠭᠡᠬᠦ ᠳ᠋ᠦ᠍ ᠬᠦᠦ᠄
— ᠢᠳᠡᠨᠡ᠂ ᠵᠠᠪᠠᠯ ᠢᠳᠡᠨᠡ᠂ ᠠᠪᠤ ᠡᠵᠢ ᠪᠢᠳᠡᠨ ᠢ᠋ ᠦᠭᠡ ᠲᠤᠭᠤᠯᠬᠤ ᠦᠭᠡᠢ ᠪᠠᠢᠪᠠᠯ ᠲᠡᠮᠡᠭᠡᠨ ᠳ᠋ᠦ᠍ ᠥᠭᠴᠦ ᠢᠳᠡᠭᠦᠯᠦᠨᠡ ᠭᠡᠵᠦ ᠬᠡᠯᠡᠳᠡᠭ᠂ ᠠ᠋᠂ ᠵᠠᠷᠢᠮ ᠳ᠋ᠠᠭᠠᠨ ᠪᠦᠷ ᠯᠤᠤ ᠲᠤᠤ ᠳ᠋ᠤ᠌ ᠥᠭᠴᠦ ᠶᠠᠪᠤᠭᠤᠯᠤᠨᠠ ᠭᠡᠳᠡᠭ ᠰᠢᠦ ᠭᠡᠵᠦ ᠵᠢᠷᠦᠬᠡ ᠠᠯᠳᠠᠨᠠ᠃
ᠯᠤᠤ ᠲᠤᠤ ᠭᠡᠵᠦ ᠮᠣᠩᠭᠣᠯ ᠬᠥᠮᠦᠨ ᠢ᠋ ᠠᠶᠤᠮᠰᠢᠭ ᠪᠣᠯᠭᠠᠨ ᠳᠤᠷᠠᠳᠤᠭᠰᠠᠨ ᠦᠭᠡ ᠠᠵᠢ᠃ ᠲᠡᠭᠦᠨ ᠢ᠋ ᠳ᠋ᠠᠨᠽᠠᠨ ᠦᠯᠦ ᠮᠡᠳᠡᠨᠡ᠃
— ᠲᠠ ᠯᠤᠤ ᠲᠤᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠶᠦᠮ ᠭᠡᠵᠦ ᠤᠤ? ᠯᠤᠤ ᠳ᠋ᠠ ᠪᠣᠯ ᠮᠠᠰᠢ ᠠᠶᠤᠮᠰᠢᠭ ᠲᠠᠢ᠃ ᠡᠪᠦᠯ ᠪᠣᠯᠤᠨ ᠤᠰᠤ ᠬᠥᠯᠳᠡᠵᠦ᠂ ᠴᠠᠰᠤ ᠣᠷᠣᠬᠤ ᠪᠠᠷ ᠯᠤᠤ ᠳ᠋ᠠ ᠪᠣᠯ ᠡᠨᠡ ᠵᠠᠮ ᠢ᠋ᠶ᠋ᠠᠨ ᠣᠯᠠᠨ ᠲᠡᠮᠡᠭᠡ ᠪᠡᠨ ᠴᠤᠪᠤᠷᠠᠭᠤᠯᠤᠨ ᠡᠳᠦᠷ ᠪᠦᠷᠢ ᠶᠠᠪᠤᠨᠠ᠃
ᠳ᠋ᠠᠨᠽᠠᠨ ᠮᠣᠩᠭᠣᠯ ᠬᠥᠮᠦᠨ ᠢ᠋ ᠬᠡᠯᠡᠵᠦ ᠪᠠᠢᠭᠠ ᠶ᠋ᠢ ᠣᠢᠯᠠᠭᠠᠨ᠂
— ᠮᠥᠨ᠂ ᠮᠡᠳᠡᠯᠡ ᠭᠡᠳ ᠵᠤᠨ ᠶᠠᠪᠤᠳᠠᠭ ᠦᠭᠡᠢ ᠶᠦᠮ ᠤᠤ?
— ᠲᠡᠢᠮᠦ ᠠ᠋ ᠶᠠᠪᠤᠬᠤ ᠦᠭᠡᠢ᠂ ᠶᠠᠭᠤᠨ ᠳ᠋ᠤ᠌ ᠭᠡᠪᠡᠯ ᠲᠡᠮᠡᠭᠡ ᠨᠢ ᠴᠠᠰᠤ ᠰᠢᠭ᠋ ᠬᠠᠢᠯᠴᠢᠬᠠᠳᠠᠭ ᠶᠤᠮ ᠭᠡᠨᠡ ᠪᠢᠯᠡ᠃
ᠳ᠋ᠠᠨᠽᠠᠨ ᠲᠡᠰᠬᠡᠯ ᠦᠭᠡᠢ ᠢᠨᠢᠶᠡᠳᠦ ᠠᠯᠳᠠᠪᠠ᠃
— ᠢᠩᠭᠢᠬᠦ ᠳ᠋ᠦ᠍ ᠴᠢ ᠯᠤᠤ ᠳ᠋ᠠ ᠶ᠋ᠢᠨ ᠳᠡᠷᠭᠡᠳᠡ ᠣᠴᠢᠵᠤ ᠦᠵᠡᠭᠰᠡᠨ ᠤᠤ?
— ᠠ᠋ ᠬᠠᠮᠢᠭᠠ ᠠ᠋ᠴᠠ᠂ ᠵᠦᠭᠡᠷ ᠨᠢᠭᠡ ᠤᠳᠠᠭᠠ ᠰᠠᠢᠨ ᠬᠠᠷᠠᠭᠰᠠᠨ ᠭᠡᠳ ᠲᠡᠷᠡ ᠲᠤᠬᠠᠢ ᠪᠠᠨ ᠶᠠᠷᠢᠵᠤ ᠭᠠᠷᠤᠯᠠ᠃
ᠨᠢᠳᠤᠨᠤᠨ ᠡᠪᠦᠯ ᠮᠠᠨ ᠤ᠋ ᠲᠣᠰᠬᠣᠨ ᠳᠤᠮᠳᠠᠭᠤᠷ ᠬᠣᠶᠠᠷ ᠲᠣᠮᠣ ᠯᠤᠤ ᠳ᠋ᠠ ᠲᠡᠮᠡᠭᠡᠨ ᠳᠡᠭᠡᠷᠡ ᠪᠡᠨ ᠬᠥᠨᠳᠡᠯᠡᠨ ᠰᠠᠭᠤᠨ ᠶᠠᠪᠤᠬᠤ ᠳ᠋ᠤᠨᠢ ᠪᠢ ᠪᠠᠢᠰᠢᠩ ᠳ᠋ᠠᠭᠠᠨ ᠵᠢᠭᠤᠲᠠᠨ ᠣᠷᠣᠭᠠᠳ ᠬᠤᠷᠤᠭᠤ ᠪᠠᠨ ᠨᠤᠷᠠᠭᠠᠨ ᠴᠣᠩᠬᠣ ᠪᠠᠨ ᠴᠣᠭᠣᠯᠤᠨ᠂ ᠡᠨᠡ ᠨᠢᠳᠦ ᠪᠡᠷ ᠬᠠᠷᠠᠭᠰᠠᠨ ᠭᠡᠵᠦ ᠵᠡᠭᠦᠨ ᠨᠢᠳᠦ ᠪᠡᠨ ᠠᠨᠢᠨ ᠪᠠᠷᠠᠭᠤᠨ ᠢ᠋ᠶ᠋ᠠᠨ ᠵᠢᠭᠠᠪᠠ᠃
ᠳ᠋ᠠᠨᠽᠠᠨ ᠳᠠᠬᠢᠨ ᠢᠨᠢᠶᠡᠳᠦ ᠠᠯᠳᠠᠪᠠ᠃ ᠭᠡᠲᠡᠯᠡ ᠲᠡᠷᠡ ᠶᠠᠪᠤᠳᠠᠯ ᠬᠦᠦ ᠳ᠋ᠦ᠍ ᠢᠨᠢᠶᠡᠳᠦᠮ ᠪᠢᠰᠢ ᠬᠠᠨᠢᠶᠠᠳᠤᠮ ᠪᠠᠢᠵᠠᠢ᠃
— ᠠ᠋᠂ ᠲᠡᠷᠡ ᠬᠣᠶᠠᠷ ᠯᠤᠤ ᠳ᠋ᠠ ᠦᠨᠡᠬᠡᠷ ᠠᠶᠤᠮᠠᠷ ᠭᠡᠵᠦ ᠢᠷᠪᠠᠢᠭᠠᠳ ᠳᠠᠷᠠᠭᠠ ᠳ᠋ᠤᠨᠢ᠄ ᠬᠣᠶᠠᠭᠤᠯᠠ ᠪᠠᠨ ᠲᠣᠮᠣ ᠴᠠᠭᠠᠨ ᠬᠣᠨᠢᠨ ᠳᠡᠪᠡᠯ ᠲᠡᠢ᠂ ᠮᠠᠯᠠᠭᠠᠢ ᠨᠢ ᠨᠣᠬᠠᠢ ᠠᠲᠠᠯᠠ ᠪᠠᠨ ᠬᠠᠷᠠ ᠪᠢᠰᠢ ᠤᠯᠠᠭᠠᠨ ᠭᠤᠲᠤᠯ ᠭᠡᠪᠡᠯ ᠳᠡᠩᠳᠡᠭᠦᠦ ᠲᠣᠮᠣ᠂ ᠪᠢ ᠪᠣᠳᠣᠪᠠᠯ ᠲᠡᠳᠡ ᠯᠠᠪ ᠬᠡᠦᠬᠡᠳ ᠡᠷᠢᠵᠦ ᠶᠠᠪᠤᠭᠰᠠᠨ ᠪᠢᠵᠡ ᠠ᠋ ᠭᠡᠵᠦ ᠡᠰᠢ ᠲᠡᠢᠰᠢ ᠪᠠᠢᠨ ᠪᠠᠢᠨ ᠬᠠᠷᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠠᠭᠤᠷᠯᠠᠨ᠂ ᠤᠷᠲᠤ ᠮᠣᠳᠣ ᠪᠠᠷ ᠢ᠋ᠶ᠋ᠠᠨ ᠲᠡᠮᠡᠭᠡ ᠪᠡᠨ ᠳᠡᠰ ᠪᠠᠭᠤᠯᠭᠠᠨ ᠵᠣᠳᠣᠪᠠ᠃ ᠲᠡᠮᠡᠭᠡ ᠨᠢ ᠭᠠᠪ ᠳᠤᠤᠭᠠᠷᠤᠨ ᠠᠮᠠᠨ ᠠ᠋ᠴᠠ ᠪᠠᠨ ᠨᠢᠭᠡ ᠶᠠᠭᠤᠮᠠ ᠬᠠᠶᠠᠭᠠᠳ ᠣᠷᠣᠭᠰᠢ ᠭᠦᠶᠦᠯᠭᠡᠨ ᠣᠳᠤᠭᠰᠠᠨ ᠭᠡᠵᠦ ᠲᠠᠢᠪᠤᠩ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠰᠣᠴᠢᠨ᠄
— ᠠ᠋᠂ ᠲᠡᠮᠡᠭᠡ ᠢᠷᠡᠯᠡ ᠭᠡᠳ ᠠᠶᠤᠨ ᠬᠣᠢᠰᠢ ᠤᠬᠤᠷᠢᠵᠠᠢ᠃
ᠳ᠋ᠠᠨᠽᠠᠨ ᠪᠤᠤᠷᠠ ᠪᠠᠨ ᠲᠣᠰᠣᠨ ᠠᠪᠴᠤ ᠲᠣᠯᠣᠭᠠᠢ ᠳ᠋ᠤᠨᠢ ᠨᠣᠭᠲᠣ ᠵᠠᠩᠭᠢᠳᠵᠤ ᠠᠪᠤᠭᠠᠳ ᠲᠣᠰᠬᠣᠨ ᠤ᠋ ᠵᠦᠭ ᠬᠠᠨᠳᠤᠪᠠ᠃ ᠬᠦᠦ ᠤᠷᠢᠳᠠ ᠨᠢ ᠪᠠᠢᠨ ᠪᠠᠢᠨ ᠡᠷᠭᠢᠨ ᠬᠠᠷᠠᠨ ᠪᠥᠨᠲᠥᠭᠡᠨᠡᠨ ᠭᠦᠶᠦᠨ ᠶᠠᠪᠤᠯᠠ᠃
— ᠬᠡ ᠬᠡ ᠮᠢᠨᠢ᠂ ᠡᠨᠡ ᠲᠡᠮᠡᠭᠡ ᠳᠡᠭᠦᠦ ᠨᠠᠷ ᠢ᠋ ᠮᠢᠨᠢ ᠯᠠᠪ ᠢᠳᠡᠨᠡ ᠪᠠᠢᠬᠤ ᠭᠡᠵᠦ ᠠᠮᠢᠰᠬᠤᠭᠠᠳᠠᠨ ᠬᠡᠯᠡᠬᠦ ᠳ᠋ᠦ᠍ᠨᠢ ᠳ᠋ᠠᠨᠽᠠᠨ᠄
— ᠵᠦᠭᠡᠷ! ᠡᠨᠡ ᠲᠡᠮᠡᠭᠡ ᠪᠣᠯ ᠬᠡᠦᠬᠡᠳ ᠲᠦ᠍ ᠬᠠᠢᠷᠠᠲᠠᠢ ᠣᠨᠴᠠᠭᠠᠢ ᠰᠠᠢᠨ ᠲᠡᠮᠡᠭᠡ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠬᠦᠦ ᠶ᠋ᠢᠨ ᠠᠶᠤᠨ ᠰᠦᠷᠳᠡᠬᠦ ᠶᠠᠪᠤᠳᠠᠯ ᠠᠶᠠᠨᠳᠠᠭᠠᠨ ᠪᠠᠭᠠᠰᠤᠭᠰᠠᠨ ᠪᠥᠭᠡᠳ ᠲᠣᠰᠬᠣᠨ ᠤ᠋ ᠵᠠᠬᠠ ᠳ᠋ᠤ᠌ ᠬᠦᠷᠴᠦ ᠢᠷᠡᠬᠦ ᠳ᠋ᠦ᠍᠄
— ᠠ᠋᠂ ᠬᠡ ᠬᠡ᠂ ᠪᠢ ᠨᠢᠭᠡ ᠬᠥᠲᠥᠯᠵᠦ ᠦᠵᠡᠬᠦ ᠤᠤ? ᠭᠡᠵᠦ ᠭᠤᠶᠤᠯᠠ᠃
ᠳ᠋ᠠᠨᠽᠠᠨ ᠪᠤᠷᠠᠨᠲᠠᠭ ᠤ᠋ᠨ ᠦᠵᠦᠭᠦᠷ ᠢ᠋ ᠪᠠᠷᠢᠭᠤᠯᠪᠠ᠃ ᠬᠦᠦ ᠪᠠᠶᠠᠷᠯᠠᠬᠤ ᠪᠣᠯᠪᠠᠴᠤ ᠡᠪᠦᠳᠦᠭ ᠨᠢ ᠴᠡᠴᠡᠷᠡᠨ ᠪᠠᠢᠨ ᠪᠠᠢᠨ ᠡᠷᠭᠢᠨ ᠬᠠᠷᠠᠨᠠ᠃ ᠶᠡᠷᠦ ᠨᠢ ᠡᠨᠳᠡ ᠨᠢᠭᠡ ᠲᠡᠮᠡᠭᠡ ᠪᠣᠢ ᠪᠣᠯᠬᠤ ᠶᠠᠪᠤᠳᠠᠯ ᠮᠠᠰᠢ ᠭᠠᠢᠬᠠᠯᠲᠠᠢ ᠠᠵᠢ᠃ ᠠᠢᠯ ᠪᠦᠷᠢ ᠡᠴᠡ ᠬᠥᠮᠦᠰ ᠯᠤᠤ ᠲᠤᠤ᠂ ᠯᠤᠤ ᠲᠤᠤ ᠭᠡᠵᠦ ᠱᠤᠤᠭᠢᠯᠳᠤᠨ ᠭᠦᠶᠦᠨ ᠭᠠᠷᠴᠤ ᠢᠷᠡᠵᠦ ᠳᠠᠭᠠᠨᠠ᠃ ᠤᠷᠤᠭᠰᠢ ᠶᠠᠪᠤᠬᠤ ᠳᠣᠳᠣᠮ ᠤᠯᠤᠰ ᠠᠮᠢᠲᠠᠨ ᠨᠡᠮᠡᠭᠳᠡᠵᠦ ᠦᠢᠮᠡᠭᠡᠨ ᠱᠤᠤᠭᠢᠶᠠᠨ ᠳᠡᠯᠭᠡᠷᠡᠬᠦ ᠳ᠋ᠦ᠍ ᠪᠤᠤᠷᠠ ᠶ᠋ᠢᠨ ᠲᠡᠩᠬᠡᠯᠡᠭᠦᠨ ᠠᠪᠤᠷᠢ ᠬᠥᠳᠡᠯᠬᠦ ᠮᠡᠲᠦ ᠨᠢᠳᠦ ᠨᠢ ᠰᠦᠷᠪᠦᠯᠵᠡᠨ ᠡᠨᠡ ᠲᠡᠷᠡ ᠶ᠋ᠢ ᠠᠵᠢᠭᠯᠠᠨᠠ᠃ ᠭᠡᠲᠡᠯᠡ ᠬᠦᠦ ᠲᠡᠭᠦᠨᠴᠡ ᠠᠶᠤᠨ ᠰᠦᠷᠳᠡᠬᠦ ᠪᠡᠨ ᠪᠦᠷᠢᠮᠦᠰᠦᠨ ᠪᠣᠯᠢᠭᠰᠠᠨ ᠲᠡᠳᠦᠢ ᠦᠭᠡᠢ ᠬᠠᠷᠢᠨ ᠣᠯᠠᠨ ᠤ᠋ ᠡᠮᠦᠨᠡ《ᠲᠠ ᠨᠠᠷ ᠮᠢᠨᠦ ᠬᠡᠴᠢᠨᠡᠭᠡᠨ ᠵᠣᠷᠢᠭᠲᠠᠢ ᠡᠷᠡ ᠪᠣᠯᠬᠤ ᠶ᠋ᠢ ᠬᠠᠷᠠᠵᠤ ᠪᠠᠢᠨᠠ ᠤᠤ?》 ᠭᠡᠵᠦ ᠭᠠᠢᠬᠠᠭᠤᠯᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠢᠨᠢᠶᠡᠮᠰᠦᠭᠯᠡᠨ ᠠᠯᠬᠤᠬᠤ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠡᠭᠷᠢ ᠡᠵᠢ