ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠬᠣᠨᠢᠨ ᠤ᠋ ᠤᠭᠤᠴᠠ Гураван настай гунаган улаан баатар - Хонины ууц
219ᠬᠣᠨᠢᠨ ᠤ᠋ ᠤᠭᠤᠴᠠ
ᠵᠠ! ᠲᠡᠭᠡᠭᠡᠳ ᠲᠡᠷᠡ ᠨᠢᠭᠡᠨ ᠵᠢᠯ ᠦ᠋ᠨ ᠪᠢᠲᠡᠭᠦᠨ ᠦ᠌ ᠣᠷᠣᠢ ᠮᠥᠨ ᠳᠡᠭᠡᠷᠡᠬᠢ ᠬᠡᠯᠡᠭᠰᠡᠨ ᠰᠢᠭ ᠲᠡᠢᠮᠦ ᠬᠣᠶᠠᠷ ᠪᠠᠳᠢᠷᠴᠢᠨ ᠶᠠᠪᠤᠵᠤ ᠪᠠᠢᠭᠰᠠᠭᠠᠷ ᠨᠢᠭᠡᠨ ᠠᠢᠯ ᠳ᠋ᠤ᠌ ᠲᠠᠭᠠᠷᠠᠵᠤ ᠣᠷᠣᠭᠰᠠᠨ ᠳ᠋ᠤ᠌᠂ ᠬᠠᠷᠢᠨ ᠭᠠᠭᠴᠠ ᠡᠮᠡᠭᠲᠡᠢ ᠰᠢᠨᠡ ᠶ᠋ᠢᠨ ᠶᠠᠭᠤᠮᠠ ᠪᠠᠨ ᠪᠡᠯᠡᠳᠬᠡᠨ ᠣᠷᠣᠨ ᠭᠠᠷᠤᠨ ᠰᠠᠨᠳᠤᠷᠴᠤ ᠪᠠᠢᠬᠤ ᠲᠠᠢ ᠲᠣᠬᠢᠶᠠᠯᠳᠤᠵᠤ ᠠᠮᠤᠷ ᠮᠡᠨᠳᠦ ᠪᠡᠨ ᠮᠡᠳᠡᠯᠴᠡᠨ ᠰᠠᠭᠤᠭᠰᠠᠨ ᠳ᠋ᠤ᠌᠂ ᠭᠡᠷ ᠦ᠋ᠨ ᠡᠵᠡᠨ ᠡᠮᠡᠭᠲᠡᠢ ᠮᠥᠨ ᠣᠷᠣᠨ ᠭᠠᠷᠤᠨ ᠶᠠᠭᠠᠷᠠᠵᠤ ᠪᠠᠢᠬᠤ ᠵᠠᠪᠰᠠᠷ ᠲᠤ᠌᠂ ᠡᠨᠡ ᠬᠣᠶᠠᠷ ᠪᠠᠳᠢᠷᠴᠢᠨ ᠢᠩᠭᠢᠵᠦ ᠴᠢᠩᠭᠢᠵᠦ ᠪᠠᠢᠭᠠᠳ᠂ ᠲᠣᠭᠣᠭᠠᠨ ᠳᠣᠲᠣᠷᠠ ᠨᠢ ᠴᠢᠨᠠᠵᠤ ᠪᠠᠢᠭᠠ ᠬᠣᠨᠢᠨ ᠤ᠋ ᠤᠭᠤᠴᠠ ᠶ᠋ᠢ ᠨᠢ ᠣᠯᠵᠤ ᠦᠵᠡᠭᠡᠳ᠂ ᠬᠣᠶᠠᠭᠤᠯᠠ ᠪᠠᠨ ᠬᠤᠯᠠᠭᠤᠬᠤ ᠠᠷᠭᠠ ᠪᠠᠨ ᠬᠡᠯᠡᠯᠴᠡᠨ ᠲᠣᠭᠲᠠᠭᠠᠳ᠂ ᠭᠡᠨᠡᠳᠲᠡ ᠪᠣᠰᠤᠯᠴᠠᠨ ᠵᠣᠳᠣᠯᠴᠠᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠷᠢᠶᠠᠯᠳᠤᠨ ᠨᠣᠴᠣᠯᠳᠤᠬᠤ ᠳ᠋ᠤ᠌᠂ ᠭᠠᠳᠠᠨᠠ ᠪᠠᠢᠭᠰᠠᠨ ᠡᠮᠡᠭᠲᠡᠢ ᠶᠠᠭᠤ ᠪᠣᠯᠪᠠ ᠭᠡᠵᠦ ᠭᠡᠷ ᠲᠡᠭᠡᠨ ᠣᠷᠣᠵᠤ ᠦᠵᠡᠭᠰᠡᠨ ᠳ᠋ᠦ᠍᠂ ᠬᠠᠷᠢᠨ ᠬᠣᠶᠠᠷ ᠪᠠᠳᠢᠷᠴᠢᠨ ᠶᠠᠭᠤᠨ ᠤ᠋ ᠲᠤᠯᠠ ᠭᠡᠷᠡᠯᠲᠦᠭᠰᠡᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠵᠢᠭᠤᠷᠠᠯᠳᠤᠵᠤ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ᠂ᠬᠣᠶᠠᠭᠤᠯᠠ ᠶ᠋ᠢ ᠰᠠᠯᠭᠠᠨ ᠭᠠᠳᠠᠨᠠ ᠠᠪᠴᠤ ᠭᠠᠷᠤᠭᠰᠠᠨ ᠳ᠋ᠤ᠌᠂ ᠨᠢᠭᠡ ᠨᠢ:《ᠡᠭᠡᠴᠢ ᠮᠢᠨᠢ ᠴᠢ ᠡᠭᠦᠨ ᠢ᠋ ᠲᠡᠪᠡᠷᠢᠵᠦ ᠪᠠᠢ᠃ ᠪᠢ ᠣᠷᠣᠵᠤ ᠡᠭᠦᠷᠭᠡ ᠪᠡᠨ ᠠᠪᠤᠶᠠ᠃ ᠲᠠ ᠨᠠᠮᠠᠶ᠋ᠢ ᠶᠠᠪᠤᠭᠰᠠᠨ ᠬᠣᠢᠨᠠ ᠡᠭᠦᠨ ᠢ᠋ ᠰᠠᠶᠢ ᠲᠠᠯᠪᠢᠭᠠᠷᠠᠢ! 》 ᠭᠡᠵᠦ ᠭᠡᠷ ᠲᠦ᠋ᠨᠢ ᠣᠷᠣᠭᠰᠠᠨ ᠳ᠋ᠤ᠌ ᠭᠠᠳᠠᠨᠠ ᠬᠣᠴᠣᠷᠤᠭᠰᠠᠨ ᠨᠢ ᠳᠡᠭᠡᠷᠡ ᠳᠡᠭᠡᠷᠡ ᠦᠰᠦᠷᠴᠦ ᠬᠠᠷᠢᠶᠠᠨ ᠶᠡᠬᠡ ᠬᠣᠷᠣᠰᠤᠭᠰᠠᠨ ᠮᠠᠶᠢᠭ ᠭᠠᠷᠭᠠᠬᠤ ᠳ᠋ᠤ᠌᠂ ᠳᠣᠲᠣᠷᠠ ᠣᠷᠣᠭᠰᠠᠨ ᠨᠢᠭᠡ ᠨᠢ ᠶᠠᠭᠠᠷᠠᠨ ᠣᠷᠣᠵᠤ ᠲᠣᠭᠣᠭᠠᠨ ᠳᠣᠲᠣᠷᠠ ᠠ᠋ᠴᠠ ᠤᠭᠤᠴᠠ ᠶ᠋ᠢ ᠨᠢ ᠭᠠᠷᠭᠠᠨ ᠠᠪᠤᠶᠠ ᠭᠡᠰᠡᠨ ᠳ᠋ᠦ᠍᠂ ᠬᠠᠷᠢᠨ ᠶᠡᠬᠡ ᠬᠠᠯᠠᠭᠤᠨ ᠪᠥᠭᠡᠳ ᠭᠠᠷ ᠨᠢ ᠬᠠᠯᠠᠵᠤ ᠠᠪᠬᠤ ᠳ᠋ᠤ᠌ ᠪᠡᠷᠬᠡ ᠲᠡᠢ ᠲᠤᠯᠠ᠂ ᠠᠷᠭᠠ ᠦᠭᠡᠢ ᠪᠣᠯᠵᠤ ᠭᠠᠳᠠᠨᠠ ᠬᠥᠮᠦᠨ ᠳ᠋ᠡᠭᠡᠨ ᠮᠡᠳᠡᠭᠳᠡᠶᠡ ᠭᠡᠵᠦ᠂ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠷᠢᠶᠠᠭᠰᠠᠨ ᠨᠢ᠄《ᠴᠢᠮᠠ ᠮᠠᠭᠤ ᠠᠮᠢᠲᠠᠨ᠂ ᠰᠢᠲᠠᠩᠬᠠᠢ ᠲᠦᠯᠡᠩᠬᠡᠢ ᠴᠢᠭᠢᠶᠡᠲᠦᠷᠦᠦ》 ᠭᠡᠰᠡᠨ ᠳ᠋ᠦ᠍᠂ ᠭᠠᠳᠠᠨᠠ᠂ ᠡᠮᠡᠭᠲᠡᠢ ᠳ᠋ᠦ᠍ ᠪᠠᠷᠢᠭᠳᠠᠨ ᠵᠣᠭᠰᠣᠭᠰᠠᠨ ᠨᠢ᠂ ᠲᠡᠭᠦᠨ ᠦ᠌ ᠤᠳᠬᠠ ᠶ᠋ᠢ ᠮᠡᠳᠡᠵᠦ ᠳᠣᠲᠣᠷᠠ ᠪᠠᠨ ᠦᠨᠡᠬᠡᠷ ᠲᠡᠢᠮᠦ ᠬᠠᠯᠠᠭᠤᠨ ᠪᠣᠯ ᠶᠠᠭᠤᠨ ᠳ᠋ᠤ᠌ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠲᠥᠷᠥᠵᠦ ᠠᠪᠬᠤ ᠦᠭᠡᠢ ᠪᠣᠢ ᠭᠡᠵᠦ ᠪᠣᠳᠣᠭᠠᠳ ᠭᠡᠳᠡᠷᠭᠦ ᠬᠠᠷᠢᠶᠠᠭᠰᠠᠨ ᠨᠢ᠄《ᠴᠢᠮᠠ ᠮᠠᠭᠤ ᠠᠮᠢᠲᠠᠨ᠂ ᠬᠦᠢᠲᠡᠨ ᠭᠣᠣᠯ ᠳ᠋ᠤ᠌ ᠴᠠᠷᠴᠠᠵᠤ ᠦᠬᠦᠭᠰᠡᠨ ᠴᠢᠭᠢᠶᠡᠲᠦᠷᠦᠦ》 ᠭᠡᠰᠡᠨ ᠳ᠋ᠦ᠍ ᠳᠣᠲᠣᠷᠠ ᠪᠠᠢᠭᠰᠠᠨ ᠨᠢᠭᠡ ᠨᠢ ᠮᠡᠳᠡᠵᠦ᠂ ᠤᠭᠤᠴᠠ ᠶ᠋ᠢ ᠬᠦᠢᠲᠡᠨ ᠤᠰᠤᠨ ᠳ᠋ᠤ᠌ ᠲᠥᠷᠥᠵᠦ ᠭᠠᠷᠭᠠᠭᠠᠳ᠂ ᠡᠭᠦᠷᠭᠡ ᠳ᠋ᠡᠭᠡᠨ ᠬᠢᠬᠦ ᠭᠡᠰᠡᠨ ᠳ᠋ᠦ᠍ ᠬᠠᠷᠢᠨ ᠪᠠᠭᠲᠠᠬᠤ ᠦᠭᠡᠢ ᠲᠤᠯᠠ ᠶᠡᠬᠡ ᠰᠠᠨᠳᠤᠷᠴᠤ ᠬᠠᠷᠢᠶᠠᠭᠰᠠᠨ ᠨᠢ᠄《ᠴᠢᠮᠠ ᠮᠠᠭᠤ ᠠᠮᠢᠲᠠᠨ᠂ ᠠᠷᠤ ᠥᠪᠥᠷ ᠰᠤᠮᠤᠨ ᠳ᠋ᠠᠭᠠᠨ ᠪᠠᠭᠲᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠴᠢᠭᠢᠶᠡᠲᠦᠷᠦᠦ》 ᠭᠡᠰᠡᠨ ᠳ᠋ᠦ᠍ ᠭᠠᠳᠠᠨᠠ ᠪᠠᠢᠭᠰᠠᠨ ᠨᠢ ᠡᠭᠦᠷᠭᠡ ᠳ᠋ᠦ᠍ ᠪᠠᠭᠲᠠᠬᠤ ᠦᠭᠡᠢ ᠪᠠᠢᠨᠠ ᠭᠡᠵᠦ ᠮᠡᠳᠡᠭᠡᠳ ᠬᠤᠭᠤᠯᠵᠤ ᠬᠢᠪᠡᠯ ᠪᠣᠯᠬᠤ ᠶᠤᠮ ᠭᠡᠳ᠄《ᠴᠢᠮᠠ ᠮᠠᠭᠤ ᠠᠮᠢᠲᠠᠨ᠂ ᠨᠢᠷᠤᠭᠤ ᠪᠠᠷ ᠢ᠋ᠶ᠋ᠠᠨ ᠨᠤᠭᠤᠯᠤᠭᠤᠯᠵᠤ᠂ ᠨᠤᠭᠤᠰᠤ ᠪᠠᠷ ᠢ᠋ᠶ᠋ᠠᠨ ᠲᠠᠰᠤᠯᠤᠭᠤᠯᠵᠤ ᠦᠬᠦᠭᠰᠡᠨ ᠴᠢᠭᠢᠶᠡᠲᠦᠷᠦᠦ》 ᠭᠡᠰᠡᠨ ᠳ᠋ᠦ᠍ ᠳᠣᠲᠣᠷᠠ ᠪᠠᠢᠬᠤ ᠨᠢ᠄《ᠠ! ᠨᠠᠮᠠᠶ᠋ᠢ ᠬᠤᠭᠤᠯᠵᠤ ᠡᠭᠦᠷᠭᠡᠨ ᠳ᠋ᠦ᠍ ᠪᠡᠨ ᠤᠷᠤᠭᠤᠯ ᠭᠡᠵᠦ ᠪᠠᠢᠨᠠ᠂》 ᠭᠡᠳ ᠤᠭᠤᠴᠠ ᠶ᠋ᠢ ᠬᠤᠭᠤᠯᠬᠤ ᠳ᠋ᠤ᠌᠂ ᠬᠢᠲᠤᠭᠠ ᠣᠯᠳᠠᠬᠤ ᠦᠭᠡᠢ ᠪᠣᠯᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ᠄《 ᠴᠢ ᠮᠠᠭᠤ ᠶᠡᠷᠦ ᠬᠣᠭᠣᠯᠠᠢ ᠪᠠᠨ ᠣᠭᠲᠣᠯᠬᠤ ᠬᠢᠲᠤᠭᠠ ᠦᠭᠡᠢ ᠭᠤᠢᠷᠠᠨᠴᠢ ᠠᠮᠢᠲᠠᠨ ᠰᠢᠦ》 ᠭᠡᠵᠦ ᠬᠠᠷᠢᠶᠠᠭᠰᠠᠨ ᠳ᠋ᠤ᠌ ᠭᠠᠳᠠᠨᠠ ᠪᠠᠢᠭᠰᠠᠨ ᠨᠢ᠄《 ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠠ᠋ᠴᠠ ᠳᠡᠭᠦᠵᠢᠯᠡᠭᠳᠡᠵᠦ ᠦᠬᠦᠭᠰᠡᠨ ᠴᠢᠭᠢᠶᠡᠲᠦᠷᠦᠦ》 ᠭᠡᠰᠡᠨ ᠳ᠋ᠦ᠍ ᠳᠣᠲᠣᠷᠠ ᠪᠠᠢᠭᠰᠠᠨ ᠨᠢᠭᠡ ᠨᠢ ᠬᠠᠨᠠ ᠶ᠋ᠢᠨ ᠲᠣᠯᠣᠭᠠᠢ ᠠ᠋ᠴᠠ ᠬᠢᠲᠤᠭᠠ ᠶ᠋ᠢ ᠨᠢ ᠠᠪᠴᠤ ᠤᠭᠤᠴᠠ ᠶ᠋ᠢ ᠨᠢ ᠰᠠᠯᠭᠠᠨ ᠡᠭᠦᠷᠭᠡᠨ ᠳ᠋ᠡᠭᠡᠨ ᠬᠢᠵᠦ ᠭᠠᠷᠴᠤ ᠢᠷᠡᠭᠡᠳ᠄《ᠵᠠ ! ᠡᠭᠡᠴᠢ ᠮᠢᠨᠢ ᠨᠠᠮᠠᠶ᠋ᠢ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠬᠣᠢᠨᠠ᠂ ᠡᠭᠦᠨ ᠢ᠋ ᠳᠡᠯᠪᠢ》 ᠭᠡᠵᠦ ᠬᠡᠯᠡᠭᠡᠳ ᠪᠠᠷᠠᠭᠤᠨᠰᠢ ᠭᠠᠷᠴᠤ ᠶᠠᠪᠤᠵᠠᠢ᠃ ᠢᠩᠭᠢᠭᠡᠳ ᠨᠡᠯᠢᠶᠡᠳ ᠶᠠᠪᠤᠭᠰᠠᠨ ᠬᠣᠢᠨᠠ᠂ ᠡᠮᠡᠭᠲᠡᠢ ᠭᠠᠳᠠᠨᠠ ᠪᠠᠢᠭᠰᠠᠨ ᠢ᠋ ᠨᠢ ᠲᠠᠯᠪᠢᠭᠰᠠᠨ ᠳ᠋ᠤ᠌᠂ ᠲᠡᠷᠡ ᠠᠭᠤᠷᠲᠠᠢ ᠪᠠᠷ ᠡᠷᠬᠡᠪᠰᠢ ᠬᠥᠭᠡᠭᠡᠵᠦ ᠭᠦᠢᠴᠡᠵᠦ ᠠᠯᠠᠶᠠ ᠭᠡᠵᠦ ᠨᠡᠬᠡᠵᠦ ᠭᠦᠶᠦᠵᠡᠢ᠃
ᠴᠢᠩᠭᠢᠭᠡᠳ ᠳᠠᠯᠳᠠ ᠣᠷᠣᠵᠤ ᠬᠣᠶᠠᠷ ᠪᠠᠳᠢᠷᠴᠢᠨ ᠬᠠᠷᠢᠯᠴᠠᠨ ᠪᠡᠶᠡ ᠪᠡᠶᠡ ᠪᠡᠨ ᠮᠠᠭᠲᠠᠯᠴᠠᠨ ᠬᠤᠢᠬᠤᠷ ᠠᠷᠭᠠ ᠪᠠᠨ ᠭᠠᠢᠬᠠᠭᠤᠯᠤᠨ ᠤᠭᠤᠴᠠ ᠪᠠᠨ ᠢᠳᠡᠵᠦ ᠶᠠᠪᠤᠪᠠ ᠭᠡᠨᠡ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂
ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠪᠠᠯᠤᠰᠦᠭ᠂ ᠬᠡᠯᠡᠰᠣᠶᠣᠯ