ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠᠨ ᠨᠢᠭᠡ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -11
87ᠶᠠᠳᠠᠭᠤᠰ ᠶᠠᠳᠠᠭᠤ ᠳ᠋ᠠᠭᠠᠨ
ᠳ᠋ᠠᠨᠽᠠᠨ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠠᠮᠤᠷ ᠮᠡᠨᠳᠦ ᠬᠦᠷᠦᠨᠡ ᠭᠡᠳᠡᠭ ᠲᠦ᠍ ᠪᠠᠲᠤ ᠢᠳᠡᠭᠡᠨ ᠰᠢᠯᠤᠭᠤᠨ ᠰᠢᠭᠤᠷᠬᠠᠢ ᠶᠠᠪᠤᠬᠤ ᠶ᠋ᠢ ᠬᠦᠰᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠪᠣᠯᠤᠭᠰᠠᠨ ᠪᠢᠯᠡ᠃ ᠭᠡᠲᠡᠯᠡ ᠪᠤᠤᠷᠠ ᠬᠦᠨᠳᠦ ᠲᠠᠪᠠᠬᠠᠢ ᠪᠠᠨ ᠵᠥᠭᠡᠭᠡᠵᠦ ᠲᠠᠯᠪᠢᠬᠤ ᠨᠢ ᠤᠳᠠᠭᠠᠰᠢᠷᠠᠵᠤ ᠠᠷᠤ ᠳ᠋ᠤᠨᠢ ᠬᠠᠶᠠᠭᠳᠠᠪᠠ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠠᠨ ᠲᠡᠭᠦᠨ ᠢ᠋ ᠬᠡᠷᠬᠢᠬᠦ ᠪᠡᠨ ᠡᠯᠳᠡᠪ ᠢ᠋ᠶ᠋ᠡᠷ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠭᠠᠳ ᠡᠴᠦᠰ ᠲᠦ᠋ᠨᠢ《ᠬᠥᠮᠦᠨ ᠦ᠌ ᠭᠠᠵᠠᠷ ᠮᠠᠯ ᠬᠠᠶᠠᠭᠳᠠᠬᠤ ᠪᠠᠢᠲᠤᠭᠠᠢ ᠬᠠᠨᠢ ᠨᠥᠬᠥᠳ ᠮᠠᠨᠢ ᠨᠠᠮᠠᠶ᠋ᠢ ᠭᠠᠮᠢᠩ ᠤ᠋ᠳ ᠤ᠋ᠨ ᠭᠠᠷ ᠲᠤ ᠬᠠᠶᠠᠨ ᠵᠢᠭᠤᠲᠠᠭᠰᠠᠨ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠨ ᠬᠥᠭᠡᠷᠦᠬᠦᠢ ᠮᠠᠭᠤ ᠪᠤᠤᠷᠠ ᠪᠠᠨ ᠬᠠᠶᠠᠬᠤ ᠪᠠᠷ ᠰᠢᠢᠳᠴᠡᠢ᠃ ᠥᠷᠥᠭᠡᠰᠦᠨ ᠭᠠᠷ ᠢ᠋ᠶ᠋ᠠᠨ ᠰᠠᠨᠵᠢᠭᠢᠨᠠᠭᠤᠯᠤᠨ ᠪᠠᠷᠢᠨ ᠶᠠᠪᠤᠭᠠ ᠸᠠᠳᠠᠩ ᠲᠠᠢ ᠶᠠᠭᠤᠮᠠ ᠪᠠᠨ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠬᠠᠶᠠᠭᠠᠳ ᠨᠥᠭᠦᠭᠡ ᠭᠠᠷ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠢᠭᠡ ᠦᠵᠦᠭᠦᠷ ᠢ᠋ ᠨᠢ ᠪᠠᠷᠢᠨ᠂ ᠨᠥᠭᠦᠭᠡ ᠦᠵᠦᠭᠦᠷ ᠢ᠋ ᠭᠠᠵᠠᠷ ᠴᠢᠷᠦᠭᠦᠯᠦᠨ ᠶᠠᠪᠤᠭᠰᠠᠨ ᠮᠣᠳᠣ ᠶ᠋ᠢ ᠡᠮᠦᠨᠡ ᠪᠡᠨ ᠠᠪᠴᠢᠷᠠᠨ ᠬᠥᠨᠳᠡᠯᠢᠳᠦᠭᠦᠯᠵᠦ ᠠᠪᠤᠭᠠᠳ ᠤᠷᠤᠭᠰᠢ ᠬᠤᠷᠳᠤᠯᠠᠪᠠ᠃ ᠭᠡᠪᠡᠴᠦ ᠰᠡᠳᠬᠢᠯ ᠨᠢ ᠦᠯᠦ ᠲᠦᠪᠳᠡᠬᠦ ᠠᠵᠢ᠃ ᠭᠢᠰᠬᠢᠬᠦ ᠪᠦᠷᠢ ᠳᠡᠭᠡᠷᠡ ᠭᠡᠳᠡᠷᠭᠦ ᠡᠷᠭᠢᠨ ᠬᠠᠷᠠᠭᠤᠰᠢᠲᠠᠢ ᠪᠣᠯᠤᠭᠰᠠᠨ ᠢ᠋ ᠳ᠋ᠠᠨᠽᠠᠨ ᠵᠣᠷᠢᠭᠤᠳᠠ ᠬᠣᠷᠢᠭᠯᠠᠨ ᠳᠣᠷᠣᠭᠰᠢ ᠰᠢᠷᠲᠡᠪᠡ᠃ ᠦᠢ ᠲᠦᠮᠡᠨ ᠠᠮᠢᠲᠠᠨ ᠤ᠋ ᠬᠥᠯ ᠳ᠋ᠦ᠍ ᠣᠯᠠᠨ ᠵᠠᠭᠤᠨ ᠵᠢᠯ ᠢ᠋ᠶ᠋ᠡᠷ ᠥᠷᠭᠡᠳᠡᠨ ᠥ ᠰᠡᠪ ᠨᠢ ᠠᠷᠢᠯᠤᠭᠰᠠᠨ ᠰᠠᠢᠷ ᠴᠢᠯᠠᠭᠤ ᠨᠤᠭᠤᠳ ᠨᠢᠳᠦᠨ ᠳ᠋ᠦ᠍ ᠲᠤᠰᠬᠤ ᠠᠵᠢ᠃ ᠭᠡᠪᠡᠴᠦ ᠪᠤᠤᠷᠠ ᠶ᠋ᠢᠨ ᠲᠥᠯᠥᠭᠡ ᠵᠣᠪᠠᠨᠢᠭᠰᠠᠨ ᠰᠡᠳᠬᠢᠯ ᠢ᠋ ᠥᠭᠡᠷᠡᠴᠢᠯᠡᠵᠦ ᠡᠰᠡ ᠴᠢᠳᠠᠨᠠ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠠᠨ ᠴᠣᠬᠣᠮ ᠬᠡᠨ ᠦ᠌ ᠬᠡᠨ ᠪᠣᠯᠬᠤ ᠪᠣᠯᠬᠤ ᠶ᠋ᠢ ᠬᠡᠨ ᠬᠥᠮᠦᠨ ᠦ᠌ ᠡᠮᠦᠨᠡ ᠬᠡᠵᠢᠶᠡ ᠴᠦ᠍ ᠬᠡᠯᠡᠵᠦ ᠦᠵᠡᠭᠡ ᠦᠭᠡᠢ ᠬᠦᠷᠡᠩ ᠪᠣᠷᠣ ᠴᠢᠷᠠᠢ ᠲᠠᠢ ᠬᠡᠦᠬᠡᠨ ᠢ᠋ᠶ᠋ᠡᠨ ᠪᠣᠳᠣᠬᠤ ᠶ᠋ᠢ ᠣᠷᠣᠯᠳᠣᠪᠠ᠃ ᠡᠨᠡ ᠬᠡᠦᠬᠡᠨ ᠬᠡᠵᠢᠶᠡ ᠪᠣᠯᠪᠠᠴᠤ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠤᠬᠤ ᠪᠦᠷᠢ ᠳ᠋ᠡᠭᠡᠨ ᠲᠤᠩ ᠰᠠᠢᠨ ᠰᠠᠢᠬᠠᠨ ᠢ᠋ ᠵᠥᠩᠨᠡᠭᠦᠯᠦᠨ ᠪᠠᠶᠠᠰᠬᠠᠳᠠᠭ ᠪᠠᠢᠭᠰᠠᠨ ᠨᠢ ᠣᠳᠣ ᠦᠭᠡᠢᠰᠴᠦ ᠣᠷᠣᠨ ᠳ᠋ᠤᠨᠢ ᠮᠥᠨ ᠯᠡ ᠪᠤᠤᠷᠠ᠂ ᠪᠤᠤᠷᠠ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠦ᠍ ᠡᠰᠡ ᠪᠣᠳᠣᠭᠳᠠᠨᠠ᠃
ᠨᠢᠭᠡ ᠳᠠᠪᠠᠭᠠᠨ ᠳᠡᠭᠡᠷᠡ ᠭᠠᠷᠤᠭᠠᠳ ᠡᠷᠭᠢᠨ ᠬᠠᠷᠠᠭᠰᠠᠨ ᠪᠣᠯᠪᠠᠴᠤ᠂ ᠡᠷᠢᠶᠡᠨ ᠲᠡᠷᠯᠡᠨ ᠴᠠᠰᠤᠲᠤ ᠬᠥᠨᠳᠡᠢ ᠳ᠋ᠦ᠍ ᠭᠠᠪ ᠭᠠᠭᠴᠠᠭᠠᠷ ᠲᠣᠷᠣᠢᠨ ᠦᠵᠡᠭᠳᠡᠬᠦ ᠨᠢ ᠦᠨᠡᠬᠡᠷ ᠦᠷᠦ ᠡᠪᠡᠳᠦᠯᠲᠡᠢ ᠠᠵᠢ᠃ ᠳ᠋ᠠᠨᠽᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠳᠣᠷᠣᠭᠰᠢ ᠰᠠᠭᠤᠨ ᠬᠠᠯᠠᠭᠤᠨ ᠬᠠᠢᠷᠠᠲᠤ ᠢᠨᠠᠭ ᠢ᠋ᠶ᠋ᠠᠨ ᠬᠦᠯᠢᠶᠡᠬᠦ ᠮᠡᠲᠦ ᠬᠦᠯᠢᠶᠡᠪᠡ᠃ ᠭᠠᠵᠠᠷ ᠤ᠋ᠨ ᠥᠭᠡᠳᠡ ᠪᠤᠤᠷᠠ ᠤᠷᠲᠤ ᠬᠦᠵᠦᠭᠦᠦ ᠪᠡᠨ ᠰᠤᠩᠭᠠᠨ ᠵᠢᠳᠬᠦᠭᠡᠳ ᠠᠪᠠᠷᠢᠭᠰᠠᠨ ᠢ᠋ᠶ᠋ᠠᠨ ᠲᠠᠮᠢᠷᠳᠠᠨ ᠵᠣᠭᠰᠣᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠮᠥᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠭᠦᠶᠦᠨ ᠬᠦᠷᠪᠡ᠃
ᠡᠨᠡ ᠵᠠᠭᠤᠷᠠ ᠨᠠᠷᠠ ᠵᠢᠷᠭᠠᠪᠠ᠃ ᠳ᠋ᠠᠨᠽᠠᠨ ᠪᠤᠤᠷᠠ ᠶ᠋ᠢ ᠬᠠᠶᠠᠬᠤ ᠭᠡᠰᠡᠨ ᠰᠠᠨᠠᠭᠠ ᠪᠠᠨ ᠪᠦᠷᠢᠮᠦᠰᠦᠨ ᠣᠷᠬᠢᠭᠠᠳ ᠣᠷᠣᠨ ᠳ᠋ᠤᠨᠢ ᠬᠠᠮᠢᠭᠠ ᠨᠢᠭᠡᠲᠡᠢ ᠠᠮᠠᠷᠠᠨ ᠢᠳᠡᠭᠦᠯᠦᠨ ᠬᠣᠨᠣᠬᠤ ᠶ᠋ᠢ ᠪᠣᠳᠣᠬᠤ ᠪᠣᠯᠪᠠ᠃ ᠪᠤᠤᠷᠠ ᠪᠠᠰᠠ ᠳ᠋ᠠᠨᠽᠠᠨ ᠤ᠋ ᠪᠣᠳᠣᠯ ᠢ᠋ ᠮᠡᠳᠡᠭᠰᠡᠨ ᠪᠣᠯᠤᠯᠲᠠᠢ᠂ ᠳᠠᠪᠠᠭᠠᠨ ᠳᠡᠭᠡᠷᠡ ᠭᠠᠷᠴᠤ ᠢᠷᠡᠩᠭᠦᠲᠡ ᠪᠡᠨ ᠬᠦᠵᠦᠭᠦᠦ ᠪᠡᠨ ᠳᠣᠷᠣᠭᠰᠢ ᠲᠠᠯᠪᠢᠨ ᠡᠪᠡᠰᠦ ᠵᠤᠯᠭᠠᠭᠠᠵᠤ ᠡᠬᠢᠯᠡᠪᠡ᠃
ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠠᠨ᠂ ᠲᠡᠨᠳᠡ ᠪᠡᠨ ᠬᠣᠨᠣᠬᠤ ᠶ᠋ᠢ ᠰᠢᠢᠳᠦᠭᠰᠡᠨ ᠪᠥᠭᠡᠳ ᠰᠥᠨᠢ ᠪᠤᠤᠷᠠ ᠪᠠᠨ ᠭᠠᠵᠠᠷ ᠤ᠋ᠨ ᠤᠷᠤᠭᠤ ᠬᠠᠷᠠᠭᠤᠯᠤᠨ ᠬᠡᠪᠲᠡᠭᠦᠯᠵᠦ᠂ ᠥᠪᠡᠷ ᠢ᠋ᠶ᠋ᠡᠨ ᠬᠠᠵᠠᠭᠤ ᠬᠠᠪᠢᠷᠭᠠᠨ ᠳ᠋ᠤᠨᠢ ᠪᠡᠶᠡ ᠪᠡᠨ ᠰᠢᠭᠢᠳᠬᠡᠨ ᠲᠤᠩ ᠰᠠᠢᠬᠠᠨ ᠤᠨᠲᠠᠵᠠᠢ᠃
ᠦᠷᠯᠦᠭᠡ ᠪᠤᠤᠷᠠ ᠪᠠᠨ ᠪᠤᠰᠬᠠᠵᠤ ᠠᠪᠤᠭᠠᠳ ᠶᠠᠪᠤᠬᠤ ᠳ᠋ᠤ᠌ ᠪᠤᠤᠷᠠ ᠨᠢ ᠮᠥᠨ ᠯᠡ ᠳᠠᠭᠠᠨ ᠭᠠᠷᠪᠠ᠃ ᠭᠡᠪᠡᠴᠦ ᠪᠡᠶᠡ ᠶ᠋ᠢᠨ ᠲᠡᠩᠬᠡᠯ ᠥᠴᠥᠭᠡᠳᠦᠷ ᠦ᠋ᠨ ᠡᠴᠡ ᠪᠡᠨ ᠳᠣᠣᠷᠠᠳᠠᠭᠰᠠᠨ ᠠᠵᠢ᠃ ᠳ᠋ᠠᠨᠽᠠᠨ ᠲᠡᠭᠦᠨ ᠢ᠋ ᠣᠷᠣᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠵᠦᠭ ᠵᠠᠮ ᠢ᠋ᠶ᠋ᠠᠨ ᠠᠯᠳᠠᠬᠤ ᠦᠭᠡᠢ ᠶᠠᠪᠤᠬᠤ ᠶ᠋ᠢ ᠰᠠᠢᠨ ᠮᠡᠳᠡᠵᠦ ᠪᠠᠢᠭᠠ ᠲᠤᠯᠠ ᠥᠪᠡᠷ ᠢ᠋ᠶ᠋ᠡᠨ ᠲᠦᠷᠦᠭᠦᠯᠡᠪᠡ᠃ ᠵᠠᠮ ᠤ᠋ᠨ ᠣᠢᠷᠠᠯᠴᠠᠭᠠ ᠠᠢᠯ ᠪᠠᠢᠪᠠᠯ ᠠᠶᠤᠮᠰᠢᠭ ᠦᠭᠡᠢ ᠣᠴᠢᠨ ᠬᠠᠯᠠᠭᠤᠨ ᠤᠮᠳᠠ ᠤᠤᠭᠤᠬᠤ ᠶ᠋ᠢ ᠮᠥᠷᠥᠭᠡᠳᠦᠭᠰᠡᠨ ᠪᠢᠯᠡ᠃ ᠨᠡᠯᠢᠶᠡᠳ ᠶᠠᠪᠤᠭᠠᠳ ᠪᠢᠴᠢᠬᠠᠨ ᠭᠣᠣᠯ ᠤ᠋ᠨ ᠵᠠᠬᠠ ᠳ᠋ᠠᠬᠢ ᠨᠢᠭᠡᠨ ᠲᠣᠰᠬᠣᠨ ᠤᠷᠤᠭᠤ ᠣᠷᠣᠵᠤ ᠢᠷᠡᠪᠡ᠃ ᠣᠢᠷᠠᠲᠤᠨ ᠣᠴᠢᠬᠤ ᠳ᠋ᠤ᠌ ᠭᠤᠷᠪᠠᠨ ᠨᠦᠬᠡᠨ ᠣᠷᠣᠮ ᠳᠠᠭᠠᠷᠢᠯᠳᠤᠨ᠂ ᠲᠤᠰ ᠪᠦᠷᠢ ᠨᠢ ᠰᠢᠪᠠᠷ ᠶᠠᠩᠳᠤᠩ ᠰᠢᠭ᠋ ᠶᠠᠭᠤᠮᠠ ᠠ᠋ᠴᠠ ᠤᠲᠤᠭᠠ ᠤᠭᠤᠭᠢᠨᠠ᠃ ᠤᠷᠢᠳᠠ ᠨᠢ ᠲᠠᠪᠤ ᠵᠢᠷᠭᠤᠭᠠᠨ ᠳᠣᠷᠣᠢ ᠳᠠᠭᠠᠭᠤᠯᠤᠭᠰᠠᠨ ᠬᠠᠷᠠ ᠠᠯᠠᠭ ᠵᠢᠰᠦᠮ ᠦ᠋ᠨ ᠭᠠᠭᠴᠠ ᠲᠤᠷᠠᠩᠬᠠᠢ ᠮᠡᠭᠡᠵᠢ ᠬᠣᠭ ᠤᠷᠪᠠᠭᠤᠯᠤᠨ ᠪᠠᠢᠵᠠᠢ᠃ ᠳ᠋ᠠᠨᠽᠠᠨ ᠲᠡᠭᠦᠨ ᠢ᠋ ᠲᠡᠵᠢᠭᠡᠪᠦᠷᠢ ᠶ᠋ᠢᠨ ᠨᠣᠬᠠᠳ ᠰᠢᠭ᠋ ᠳᠣᠷᠣᠢ ᠨᠤᠭᠤᠳ ᠢ᠋ᠶ᠋ᠠᠨ ᠬᠠᠷᠠᠮᠯᠠᠨ ᠳᠠᠭᠠᠷᠢᠨ ᠳᠠᠪᠬᠢᠳᠠᠭ ᠠᠮᠢᠲᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠭᠡᠵᠦ ᠪᠣᠯᠭᠣᠮᠵᠢᠯᠠᠨ ᠠᠯᠤᠰ ᠢ᠋ᠶ᠋ᠠᠷ ᠲᠣᠭᠣᠷᠢᠨ ᠭᠠᠷᠪᠠ᠃ ᠲᠣᠰᠬᠣᠨ ᠳᠤᠮᠳᠠ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠬᠥᠯ ᠬᠥᠳᠡᠯᠭᠡᠨ ᠣᠭᠲᠣᠬᠠᠨ ᠴᠦ᠍ ᠦᠭᠡᠢ ᠬᠠᠷᠠᠭᠳᠠᠬᠤ ᠠ᠋ᠴᠠ ᠵᠥᠪᠬᠡᠨ ᠨᠠᠪᠲᠠᠭᠠᠢ ᠰᠢᠪᠡᠷ ᠪᠠᠢᠰᠢᠩ ᠤ᠋ᠳ ᠠᠵᠢ᠃ ᠬᠡᠳᠦ ᠬᠡᠳᠦᠨ ᠪᠠᠢᠰᠢᠩ ᠤ᠋ᠨ ᠴᠠᠭᠠᠨᠠ ᠪᠣᠯᠤᠯᠲᠠᠢ᠂ ᠨᠢᠭᠡ ᠲᠠᠬᠢᠶᠠ ᠭᠡᠨᠡᠳᠲᠡ ᠬᠠᠮᠤᠭ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠬᠤ ᠳ᠋ᠤ᠌ ᠪᠠᠷᠤᠭ ᠠᠢᠯ ᠪᠦᠷᠢ ᠶ᠋ᠢᠨ ᠬᠠᠰᠢᠶᠠᠨ ᠳ᠋ᠤ᠌ ᠲᠠᠬᠢᠶᠠ ᠨᠤᠭᠤᠳ ᠤᠳᠠᠭᠠ ᠳᠠᠷᠠᠭᠠ ᠪᠠᠷ ᠢ᠋ᠶ᠋ᠠᠨ ᠬᠠᠰᠬᠢᠷᠤᠨ ᠪᠦᠬᠦ ᠲᠣᠰᠬᠣᠨ ᠢ᠋ ᠨᠢᠭᠡ ᠤᠳᠠᠭᠠ ᠠᠮᠢ ᠣᠷᠣᠭᠤᠯᠬᠤ ᠮᠡᠲᠦ ᠰᠡᠷᠡᠭᠡᠭᠰᠡᠨ ᠢ᠋ᠶ᠋ᠡᠨ ᠳᠠᠭᠤ ᠬᠣᠷᠢᠶᠠᠨ ᠲᠠᠭ ᠴᠢᠭ ᠪᠣᠯᠪᠠ᠃ ᠡᠨᠳᠡᠬᠢ ᠬᠥᠮᠦᠰ ᠭᠡᠷ ᠣᠷᠣᠨ ᠳ᠋ᠠᠭᠠᠨ ᠪᠠᠢᠭᠠ ᠪᠣᠯᠪᠠᠴᠤ ᠬᠡᠳᠦᠨ ᠳᠣᠯᠣᠭᠠ ᠬᠣᠨᠣᠭ ᠤ᠋ᠨ ᠡᠮᠦᠨᠡ ᠬᠣᠷᠢᠶᠠᠨ ᠠᠪᠤᠭᠰᠠᠨ ᠲᠠᠷᠢᠶᠠ ᠪᠤᠳᠠᠭᠠ ᠪᠠᠨ ᠪᠣᠯᠪᠠᠰᠤᠷᠠᠭᠤᠯᠬᠤ ᠠᠵᠢᠯ ᠳ᠋ᠤ᠌ ᠢᠳᠡ ᠳᠠᠷᠤᠭᠳᠠᠨ ᠭᠠᠳᠠᠭᠰᠢ ᠭᠠᠷᠬᠤ ᠵᠠᠪ ᠴᠢᠯᠥᠭᠡ ᠦᠭᠡᠢ ᠪᠠᠢᠵᠠᠢ᠃
ᠦᠨᠡᠬᠡᠷ ᠡᠯᠡᠢ ᠬᠤᠯᠡᠢ᠃ ᠡᠵᠡ ᠦᠭᠡᠢ ᠬᠠᠶᠠᠭᠳᠠᠭᠰᠠᠨ ᠪᠠᠯᠭᠠᠰᠤ ᠰᠢᠭ᠋ ᠪᠠᠢᠭᠠ ᠶ᠋ᠢᠨ ᠳᠤᠮᠳᠠ ᠳ᠋ᠠᠨᠽᠠᠨ ᠭᠠᠪ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠭᠠᠢᠬᠠᠰᠢ ᠲᠠᠰᠤᠷᠠᠨ ᠨᠡᠯᠢᠶᠡᠳ ᠵᠣᠭᠰᠣᠯᠠ᠃ ᠭᠡᠲᠡᠯᠡ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠪᠢᠴᠢᠬᠠᠨ ᠪᠠᠢᠰᠢᠩ ᠠ᠋ᠴᠠ ᠠᠷᠪᠠᠭᠠᠳ ᠬᠢᠷᠢ ᠨᠠᠰᠤᠨ ᠤ᠋ ᠬᠡᠦᠬᠡᠳ ᠭᠦᠶᠦᠨ ᠭᠠᠷᠴᠤ ᠢᠷᠡᠪᠡ᠃ ᠳ᠋ᠠᠨᠽᠠᠨ ᠢ᠋ ᠬᠠᠷᠠᠬᠤ ᠲᠠᠢ ᠪᠠᠨ ᠵᠡᠷᠭᠡ ᠲᠡᠷᠡ ᠬᠦᠦ ᠬᠡ ᠬᠡ ᠢᠷᠡᠯᠡ ᠭᠡᠵᠦ ᠳᠠᠭᠤ ᠠᠯᠲᠠᠨ ᠪᠤᠴᠠᠵᠤ ᠳᠠᠯᠳᠠ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠥᠪᠡᠷ ᠡᠴᠡ ᠪᠡᠨ ᠪᠠᠭᠠ ᠬᠣᠶᠠᠷ ᠵᠢᠭᠠᠯ ᠢ᠋ ᠳᠠᠭᠠᠭᠤᠯᠤᠨ ᠭᠠᠷᠴᠤ ᠢᠷᠡᠪᠡ᠃ ᠲᠡᠭᠡᠭᠡᠳ ᠳ᠋ᠠᠨᠽᠠᠨ ᠳ᠋ᠤ᠌ ᠲᠤᠯᠤᠨ ᠣᠴᠢᠭᠰᠠᠨ ᠢ᠋ᠶ᠋ᠠᠨ ᠪᠢᠰᠢ ᠪᠠᠢᠨᠠ ᠭᠡᠵᠦ ᠬᠡᠯᠡᠨ ᠵᠣᠭ ᠲᠣᠰᠴᠤ ᠬᠣᠢᠰᠢ ᠤᠬᠤᠷᠢᠪᠠ᠃ ᠳ᠋ᠠᠨᠽᠠᠨ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠲᠡᠷᠡᠬᠦ ᠡᠨᠳᠡᠭᠦᠷᠡᠭᠰᠡᠨ ᠢ᠋ ᠯᠠᠪ ᠰᠠᠢᠨ ᠢᠷᠣᠠ ᠪᠣᠯᠪᠠ ᠤᠤ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠠᠶᠠᠷᠯᠠᠪᠠ᠃
— ᠬᠦᠦ ᠴᠢ ᠨᠠᠳᠠ ᠠ᠋ᠴᠠ ᠪᠢᠲᠡᠭᠡᠢ ᠠᠶᠤ᠂ ᠪᠢ ᠴᠢᠮᠠ ᠠ᠋ᠴᠠ ᠶᠠᠭᠤᠮᠠ ᠠᠰᠠᠭᠤᠶᠠ ᠭᠡᠬᠦ ᠳ᠋ᠦ᠍ ᠬᠦᠦ ᠬᠣᠶᠠᠷ ᠵᠢᠭᠠᠯ ᠢ᠋ᠶ᠋ᠠᠨ ᠠᠯᠳᠠᠴᠢᠬᠠᠬᠤ ᠪᠣᠢ ᠭᠡᠰᠡᠨ ᠰᠢᠭ ᠰᠤᠭᠤᠨ ᠳ᠋ᠠᠭᠠᠨ ᠠᠪᠤᠨ ᠲᠡᠪᠡᠷᠢᠵᠦ᠄
— ᠲᠠ ᠴᠡᠷᠢᠭ ᠬᠥᠮᠦᠨ ᠤᠤ?
— ᠲᠡᠢᠮᠦ ᠠ᠋᠂ ᠪᠢ ᠴᠡᠷᠢᠭ ᠬᠥᠮᠦᠨ᠃
— ᠲᠡᠭᠡᠪᠡᠯ ᠲᠠ ᠮᠠᠨ ᠤ᠋ ᠠᠬᠠ ᠶ᠋ᠢ ᠲᠠᠨᠢᠬᠤ ᠤᠤ?
— ᠲᠠᠨᠢᠯᠭᠦᠢ ᠳᠡ᠂ ᠭᠡᠪᠡᠴᠦ ᠬᠠᠮᠢᠭᠠ ᠪᠠᠢᠳᠠᠭ ᠶᠤᠮ ᠪᠣᠢ?
— ᠴᠡᠷᠢᠭ ᠲᠦ᠍ ᠪᠠᠢᠳᠠᠭ ᠶᠤᠮ ᠭᠡᠵᠦ ᠬᠦᠦ ᠢᠨᠢᠶᠡᠮᠰᠦᠭᠯᠡᠪᠡ᠃
— ᠠ᠋᠂ ᠲᠡᠭᠡᠪᠡᠯ ᠪᠢ ᠲᠠᠨᠢᠯᠭᠦᠢ ᠶᠠᠭᠠᠬᠢᠬᠤᠪ ᠭᠡᠵᠦ ᠳ᠋ᠠᠨᠽᠠᠨ ᠲᠡᠷᠡ ᠬᠦᠦ ᠶ᠋ᠢ ᠥᠬᠥᠭᠡᠷᠳᠡᠨ ᠬᠡᠯᠡᠩᠭᠦᠲᠡ ᠪᠡᠨ ᠣᠷᠣᠭᠰᠢ ᠠᠯᠬᠤᠭᠠᠳ᠂ ᠡᠵᠢ ᠴᠢᠨᠢ ᠪᠣᠢ ᠤᠤ? ᠭᠡᠬᠦ ᠳ᠋ᠦ᠍ ᠬᠡᠦᠬᠡᠳ ᠦ᠋ᠳ《ᠪᠣᠢ᠂ ᠪᠣᠢ》 ᠭᠡᠵᠦ ᠪᠡᠶᠡ ᠪᠡᠶᠡ ᠲᠡᠢ ᠪᠡᠨ ᠤᠷᠤᠯᠳᠤᠨ ᠬᠠᠷᠢᠭᠤᠯᠪᠠ᠃ ᠲᠡᠷᠡ ᠳᠤᠮᠳᠠ ᠠ᠋ᠴᠠ ᠶᠡᠬᠡ ᠬᠦᠦ ᠣᠨᠴᠠ ᠶ᠋ᠢᠨ ᠶᠡᠬᠡ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠪᠣᠯᠤᠨ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠡᠷᠭᠢᠨ《 ᠮᠠ— ᠮᠠ᠂ ᠮᠠ— ᠮᠠ》 ᠭᠡᠵᠦ ᠳᠠᠭᠤᠳᠠᠨ ᠪᠠᠢᠰᠢᠩ ᠤᠷᠤᠭᠤ ᠪᠠᠨ ᠭᠦᠶᠦᠪᠡ᠃ ᠬᠣᠢᠨᠠ ᠠ᠋ᠴᠠ ᠨᠢ ᠨᠥᠭᠦᠭᠡ ᠬᠣᠶᠠᠷ ᠨᠢ ᠮᠥᠨ ᠯᠡ ᠮᠠ— ᠮᠠ ᠳᠠᠭᠤᠳᠠᠨ ᠭᠦᠶᠦᠭᠡᠳ᠂ ᠬᠠᠮᠤᠭ ᠤ᠋ᠨ ᠪᠠᠭᠠ ᠨᠢ ᠪᠦᠳᠦᠷᠢᠨ ᠤᠨᠠᠵᠤ ᠪᠥᠭᠡᠮ ᠬᠠᠷᠠ ᠪᠠᠷᠬᠢᠷᠠᠭᠠᠨ ᠪᠣᠯᠪᠠ᠃ ᠪᠠᠢᠰᠢᠩ ᠦᠨ ᠴᠠᠭᠠᠨᠠ ᠠ᠋ᠴᠠ ᠬᠠᠷᠠ ᠬᠥᠬᠡ ᠥᠩᠭᠡ ᠶ᠋ᠢᠨ ᠤᠷᠲᠤ ᠳᠡᠪᠡᠯ ᠲᠡᠢ ᠪᠢᠴᠢᠬᠠᠨ ᠬᠥᠯ ᠲᠡᠢ᠂ ᠨᠢᠷᠤᠭᠤ ᠪᠥᠭᠲᠥᠷ ᠲᠤᠷᠠᠩᠬᠠᠢ ᠠᠪᠠᠭᠠᠢ ᠰᠠᠨᠳᠤᠷᠤᠨ ᠭᠦᠶᠦᠨ ᠭᠠᠷᠴᠤ ᠢᠷᠡᠯᠡ᠃
— ᠶᠠᠭᠠᠬᠢᠪᠠ? ᠶᠠᠭᠤ ᠪᠣᠯᠪᠠ? ᠭᠡᠵᠦ ᠳᠦᠷᠦᠭᠦᠯᠭᠡ ᠪᠡᠨ ᠬᠠᠷᠠᠨ ᠳᠠᠢᠴᠢᠯᠠᠵᠤ ᠪᠠᠢᠭᠠ ᠬᠡᠦᠬᠡᠳ ᠢ᠋ ᠶᠠᠭᠠᠷᠠᠨ ᠪᠣᠰᠬᠠᠭᠰᠠᠨ ᠢ᠋ᠶ᠋ᠠᠨ ᠠᠮᠠ ᠬᠠᠮᠠᠷ ᠠ᠋ᠴᠠ ᠨᠢ ᠴᠢᠰᠤ ᠭᠠᠷᠤᠭᠰᠠᠨ ᠢ᠋ ᠦᠵᠡᠨ᠂
— ᠠ᠋᠂ ᠲᠩᠷᠢ ᠶᠠᠭᠠᠬᠢᠬᠤ ᠪᠢᠯᠡ! ᠭᠡᠵᠦ ᠳᠠᠭᠤ ᠠᠯᠲᠠᠨ ᠬᠡᠦᠬᠡᠳ ᠦ᠋ᠨ ᠢ᠋ᠶ᠋ᠡᠨ ᠠᠮᠠ ᠬᠠᠮᠠᠷ ᠢ᠋ ᠠᠷᠴᠢᠩᠭᠤᠲᠠ ᠪᠠᠨ ᠶᠡᠬᠡ ᠬᠦᠦ ᠤᠷᠤᠭᠤ ᠪᠠᠨ ᠬᠡᠯᠡᠯᠴᠡᠨ᠂ ᠡᠭᠦᠨ ᠢ᠋ ᠬᠡᠨ ᠤᠨᠠᠭᠠᠪᠠ? ᠴᠢ ᠤᠨᠠᠭᠠᠭᠰᠠᠨ ᠤᠤ? ᠪᠢ ᠮᠡᠳᠡᠵᠦ ᠪᠠᠢᠨᠠ᠃ ᠴᠢᠮᠠ ᠠ᠋ᠴᠠ ᠥᠭᠡᠷᠡ ᠬᠡᠨ ᠤᠨᠠᠭᠠᠬᠤ ᠪᠢᠯᠡ? ᠭᠡᠵᠦ ᠳᠠᠪᠰᠢᠯᠠᠪᠠ᠃
ᠬᠠᠷᠢᠭᠤ ᠳ᠋ᠤᠨᠢ ᠲᠡᠷᠡ ᠵᠢᠭᠠᠯ ᠳ᠋ᠠᠨᠽᠠᠨ ᠢ᠋ ᠵᠢᠭᠠᠭᠰᠠᠨ ᠪᠥᠭᠡᠳ ᠳ᠋ᠠᠨᠽᠠᠨ ᠣᠳᠣ ᠥᠪᠡᠷ ᠢ᠋ ᠪᠡᠨ ᠬᠡᠦᠬᠡᠳ ᠤᠨᠠᠭᠠᠭᠰᠠᠨ ᠬᠡᠷᠡᠭ ᠲᠡᠢ ᠬᠣᠯᠪᠣᠭᠳᠠᠪᠠ ᠭᠡᠵᠦ ᠪᠣᠳᠣᠨ ᠤᠬᠠᠭᠠᠨ ᠢ᠋ᠶ᠋ᠠᠨ ᠭᠠᠷᠲᠠᠯᠠ ᠠᠶᠤᠪᠠ᠃ ᠭᠡᠲᠡᠯᠡ ᠬᠦᠦ᠄
— ᠦᠭᠡᠢ᠂ ᠡᠵᠢ ᠠ᠋᠂ ᠡᠨᠡ ᠬᠥᠮᠦᠨ ᠠᠬᠠ ᠶ᠋ᠢᠨ ᠨᠥᠬᠥᠷ᠂ ᠲᠠᠨ ᠢ᠋ ᠰᠤᠷᠠᠭᠰᠠᠨ ᠶᠤᠮ ᠰᠢᠦ ᠭᠡᠵᠦ ᠬᠡᠯᠡᠪᠡ᠃
ᠠᠪᠤᠭᠠᠢ ᠳ᠋ᠠᠨᠽᠠᠨ ᠢ᠋ ᠰᠠᠶᠢ ᠣᠯᠵᠤ ᠬᠠᠷᠠᠨ《ᠠ》 ᠭᠡᠵᠦ ᠳᠠᠭᠤ ᠠᠯᠳᠠᠪᠠ᠃
— ᠦᠭᠡᠢ ᠶᠠᠭᠠᠬᠢᠭᠰᠠᠨ ᠶᠡᠬᠡ ᠪᠠᠶᠠᠷ ᠪᠣᠢ? ᠭᠡᠳ ᠭᠦᠶᠦᠨ ᠢᠷᠡᠵᠦ᠂ ᠴᠡᠭᠡᠵᠢ ᠶ᠋ᠢ ᠨᠢ ᠲᠡᠪᠡᠷᠢᠨ ᠵᠡᠭᠦᠭᠳᠡᠵᠡᠢ᠃ ᠳ᠋ᠠᠨᠽᠠᠨ ᠡᠨᠡ ᠠᠪᠠᠭᠠᠢ ᠶ᠋ᠢᠨ ᠬᠦᠦ ᠶ᠋ᠢ ᠭᠠᠮᠢᠩ ᠤ᠋ᠳ ᠤ᠋ᠨ ᠨᠢᠭᠡ ᠪᠣᠯᠬᠤ ᠶ᠋ᠢ ᠮᠡᠳᠡᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠨᠥᠬᠥᠷ ᠨᠢ ᠪᠣᠯᠤᠨ ᠡᠨᠳᠡᠭᠦᠷᠡᠭᠳᠡᠵᠤ ᠪᠠᠢᠭᠠ ᠳ᠋ᠠᠭᠠᠨ ᠨᠢᠭᠤᠷ ᠬᠠᠯᠠᠨ ᠬᠡᠷᠬᠢᠬᠦ ᠤᠬᠠᠭᠠᠨ ᠢ᠋ᠶ᠋ᠠᠨ ᠣᠯᠬᠤ ᠦᠭᠡᠢ ᠪᠣᠯᠪᠠ᠃ ᠲᠡᠭᠡᠭᠡᠳ ᠳᠡᠮᠡᠢ ᠲᠡᠪᠡᠳᠡᠬᠦ ᠳ᠋ᠡᠭᠡᠨ᠂
— ᠠ᠋᠂ ᠠᠬᠠᠢᠲᠠᠨ ᠬᠣᠭᠣᠯᠠ ᠪᠠᠨ ᠢᠳᠡᠭᠰᠡᠨ ᠤᠤ? ᠭᠡᠵᠦ ᠮᠡᠨᠳᠦᠯᠡᠪᠡ᠃
ᠠᠪᠠᠭᠠᠢ᠄
— ᠢᠳᠡᠭᠰᠡᠨ᠂ ᠢᠳᠡᠭᠰᠡᠨ᠂ ᠴᠢ ᠢᠳᠡᠭᠰᠡᠨ ᠤᠤ?
ᠳ᠋ᠠᠨᠽᠠᠨ ᠬᠠᠷᠢᠭᠤ ᠬᠡᠯᠡᠯ ᠦᠭᠡᠢ ᠪᠥᠬᠥᠯᠵᠡᠪᠡ᠃
ᠠᠪᠠᠭᠠᠢ ᠳ᠋ᠠᠨᠽᠠᠨ ᠤ᠋ ᠴᠡᠭᠡᠵᠢ ᠶ᠋ᠢ ᠲᠠᠯᠪᠢᠨ ᠲᠣᠯᠣᠭᠠᠢ ᠠ᠋ᠴᠠ ᠨᠢ ᠠᠪᠤᠭᠠᠳ ᠬᠥᠯ ᠢ᠋ ᠨᠢ ᠬᠦᠷᠲᠡᠯᠡ ᠠᠵᠢᠭᠯᠠᠭᠰᠠᠨ ᠢ᠋ᠶ᠋ᠠᠨ ᠭᠠᠷ ᠢ᠋ ᠨᠢ ᠰᠢᠷᠦᠭᠦᠨ ᠠᠪᠴᠤ
— ᠴᠢ ᠣᠷᠣ ᠮᠠᠨ ᠤ᠋ ᠳ᠋ᠤ᠌᠂ ᠣᠷᠣᠬᠤ ᠶᠣᠰᠣᠲᠠᠢ ᠭᠡᠳ ᠬᠥᠲᠥᠯᠦᠨ ᠶᠠᠪᠤᠯᠠ᠃ ᠪᠠᠢᠰᠢᠩ ᠨᠢ ᠮᠠᠰᠢ ᠨᠠᠮᠬᠠᠨ᠃ ᠭᠠᠷ ᠡᠷᠭᠦᠪᠡᠯ ᠳᠠᠭᠠᠵᠠᠨ ᠳ᠋ᠤᠨᠢ ᠬᠦᠷᠦᠨᠡ᠃ ᠣᠷᠣᠬᠤ ᠬᠠᠭᠠᠯᠭᠠ ᠨᠢ ᠵᠡᠭᠦᠨ ᠲᠡᠢ ᠪᠡᠨ᠂ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢ ᠨᠢ ᠬᠠᠨᠵᠤ ᠡᠵᠡᠯᠡᠨᠡ᠃ ᠠᠪᠠᠭᠠᠢ ᠳ᠋ᠠᠨᠽᠠᠨ ᠢ᠋ ᠲᠡᠢᠮᠦ ᠪᠠᠢᠰᠢᠩ ᠳ᠋ᠠᠭᠠᠨ ᠣᠷᠣᠭᠤᠯᠵᠤ ᠠᠪᠤᠭᠠᠳ ᠬᠠᠨᠵᠤᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠪᠠ᠃
— ᠬᠦᠦ ᠴᠢ᠂ ᠮᠢᠨᠦ ᠬᠦᠦ ᠶ᠋ᠢᠨ ᠨᠥᠬᠥᠷ ᠶᠦᠮ ᠪᠢᠵᠡ ᠳᠡ᠂ ᠭᠡᠵᠦ ᠬᠡᠯᠡᠨ ᠳᠠᠬᠢᠨ ᠨᠢᠭᠤᠷ ᠢ᠋ ᠨᠢ ᠠᠵᠢᠭᠠᠳ
— ᠠ᠋ ᠳᠠ ᠮᠥᠨ ᠰᠠᠢᠬᠠᠨ ᠪᠠᠶᠠᠷ ᠪᠠᠢᠨᠠ ᠳᠠ! ᠭᠡᠵᠦ ᠠᠮᠢᠰᠬᠤᠭᠠᠳᠠᠨ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠰᠠ ᠨᠢᠭᠤᠷ ᠢ᠋ ᠨᠢ ᠰᠢᠷᠳᠡᠪᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠳ᠋ᠠᠨᠽᠠᠨ᠂ ᠭᠡᠮᠲᠡᠨ ᠰᠢᠭ᠂ ᠬᠤᠯᠮᠠᠯᠵᠠᠨ᠄
— ᠠᠬᠠᠢᠲᠠᠨ ᠮᠢᠨᠢ ᠪᠣᠳᠣᠪᠠᠯ ᠪᠢ ᠲᠠᠨ ᠤ᠋ ᠬᠦᠦ ᠶ᠋ᠢ ᠲᠠᠨᠢᠬᠤ ᠦᠭᠡᠢ ᠪᠢᠵᠡ᠂
— ᠶᠠᠭᠤ? ᠦᠭᠡᠢ ᠴᠢ ᠬᠦᠦ ᠶ᠋ᠢᠨ ᠮᠢᠨᠢ ᠨᠥᠬᠥᠷ ᠭᠡᠵᠦ ᠬᠡᠯᠡᠭᠰᠡᠨ ᠶᠦᠮ ᠪᠢᠰᠢᠦ? ᠭᠡᠵᠦ ᠠᠪᠠᠭᠠᠢ ᠭᠠᠢᠬᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠪᠠ᠃
— ᠦᠭᠡᠢ ᠠ᠋᠂ ᠪᠢ ᠡᠨᠡ ᠬᠦᠦ ᠶ᠋ᠢ᠁ ᠭᠡᠳ ᠥᠬᠥᠭᠡᠷᠳᠡᠨ ᠴᠢᠨᠠᠭᠰᠢᠯᠠᠭᠤᠯᠤᠭᠰᠠᠨ ᠶᠤᠮ ᠭᠡᠵᠦ ᠬᠡᠯᠡᠬᠦ ᠭᠡᠰᠡᠨ ᠪᠣᠯᠪᠠᠴᠤ ᠤᠭ ᠦᠭᠡ ᠶ᠋ᠢ ᠬᠢᠲᠠᠳ ᠢ᠋ᠶ᠋ᠠᠷ ᠡᠪᠯᠡᠭᠦᠯᠦᠨ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠳ᠋ᠦ᠍ ᠭᠦᠷᠦᠨ ᠳᠠᠭᠵᠢᠷᠠᠪᠠ᠃ ᠠᠪᠠᠭᠠᠢ《ᠠᠢ》 ᠭᠡᠵᠦ ᠰᠠᠨᠠᠭᠠ ᠠᠯᠳᠠᠭᠠᠳ ᠬᠦᠦ ᠪᠡᠨ ᠮᠠᠭᠤᠬᠠᠢ ᠬᠠᠷᠠᠨ
— ᠴᠢ ᠶᠠᠭᠤᠨ ᠳ᠋ᠤ᠌ ᠬᠤᠳᠠᠯ ᠬᠡᠯᠡᠪᠡ?
ᠬᠦᠦ ᠨᠢ ᠳᠣᠣᠭᠤᠷ ᠬᠠᠷᠠᠨ ᠬᠠᠮᠠᠷ ᠢ᠋ᠶ᠋ᠠᠨ ᠱᠤᠤᠬᠢᠲᠤᠨᠠᠭᠤᠯᠤᠨ᠂
— ᠦᠭᠡᠢ ᠠ᠋᠂ ᠡᠨᠡ ᠠᠬᠠ ᠥᠪᠡᠷ ᠢ᠋ᠶ᠋ᠡᠨ ᠲᠡᠭᠡᠵᠦ ᠬᠡᠯᠡᠭᠰᠡᠨ ᠶᠦᠮ ᠭᠡᠵᠦ ᠳ᠋ᠠᠨᠽᠠᠨ ᠠ᠋ᠴᠠ ᠪᠢᠰᠢᠭᠦᠷᠬᠡᠨ ᠠᠮᠠᠨ ᠳᠣᠲᠣᠷᠠ ᠪᠠᠨ ᠪᠤᠪᠠᠲᠤᠨᠠᠪᠠ᠃
ᠨᠢᠭᠡ ᠬᠡᠰᠡᠭ ᠶᠠᠷᠢᠶᠠ ᠲᠠᠰᠤᠷᠠᠵᠤ ᠬᠠᠴᠢᠨ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ᠃ ᠲᠡᠷᠡ ᠵᠠᠭᠤᠷᠠ ᠳ᠋ᠠᠨᠽᠠᠨ ᠬᠦᠦ ᠶ᠋ᠢ ᠰᠠᠨᠠᠮᠰᠠᠷ ᠦᠭᠡᠢ ᠬᠠᠭᠤᠷᠤᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠨ ᠭᠡᠮᠰᠢᠪᠡ᠃ ᠪᠠᠰᠠ ᠨᠥᠭᠦᠭᠡ ᠲᠠᠯᠠ ᠪᠠᠷ ᠠᠪᠠᠭᠠᠢ ᠶ᠋ᠢᠨ ᠴᠢᠷᠠᠢ ᠳ᠋ᠤ᠌ ᠣᠢ ᠭᠠᠰᠢᠭᠤᠨ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠦ᠍ ᠦᠭᠡᠢ ᠪᠠᠢᠭᠠ ᠶ᠋ᠢ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠠᠵᠢᠨ ᠬᠠᠯᠠᠰᠢᠷᠠᠨᠠ᠃
— ᠠᠬᠠᠢᠲᠠᠨ ᠮᠢᠨᠢ᠂ ᠪᠢ ᠶᠠᠪᠤᠶᠠ ᠪᠠᠶᠠᠷ ᠲᠠᠢ ᠭᠡᠳ ᠪᠣᠰᠬᠤ ᠳ᠋ᠤ᠌ ᠠᠪᠠᠭᠠᠢ ᠥᠭᠡᠳᠡ ᠡᠴᠡ ᠨᠢ ᠪᠣᠰᠤᠨ ᠢᠷᠡᠵᠦ ᠵᠠᠮ ᠢ᠋ ᠨᠢ ᠲᠠᠭᠯᠠᠨ᠄
— ᠦᠭᠡᠢ᠂ ᠴᠢ ᠰᠠᠭᠤ ᠪᠢ ᠴᠢᠮᠠᠶ᠋ᠢ ᠭᠡᠷ ᠲᠡᠭᠡᠨ ᠤᠷᠢᠨ ᠣᠷᠣᠭᠤᠯᠵᠤ ᠢᠷᠡᠭᠰᠡᠨ ᠪᠣᠯᠬᠣᠷ ᠵᠠᠪᠠᠯ ᠴᠠᠢ ᠤᠤᠭᠤᠯᠭᠠᠬᠤ ᠶᠣᠰᠣᠲᠠᠢ ᠭᠡᠵᠦ ᠰᠠᠭᠤᠯᠭᠠᠭᠠᠳ ᠪᠡᠯᠡᠨ ᠴᠠᠢ ᠠ᠋ᠴᠠ ᠶᠠᠭᠠᠷᠠᠨ ᠠᠶᠠᠭᠠᠯᠠᠵᠤ ᠡᠮᠦᠨᠡ ᠨᠢ ᠪᠠᠷᠢᠪᠠ᠃ ᠳᠠᠷᠠᠭᠠ ᠳ᠋ᠤᠨᠢ ᠳᠠᠩᠵᠤᠤᠷ ᠲᠠᠪᠠᠭᠯᠠᠨ᠃ ᠪᠠᠰᠠ ᠡᠪᠦᠷ ᠡᠴᠡ ᠪᠡᠨ ᠬᠡᠳᠦᠨ ᠲᠦᠯᠬᠢᠭᠦᠷ ᠭᠠᠷᠭᠠᠨ ᠪᠢᠴᠢᠬᠠᠨ ᠬᠠᠢᠷᠴᠠᠭ ᠠᠭᠤᠳᠠᠯᠤᠨ ᠭᠠᠭᠴᠠ ᠰᠢᠷᠬᠡᠭ ᠶᠠᠩᠵᠤᠤᠷ ᠭᠠᠷᠭᠠᠵᠤ ᠥᠭᠪᠡ᠃
ᠢᠩᠭᠢᠬᠦ ᠳ᠋ᠦ᠍ ᠳ᠋ᠠᠨᠽᠠᠨ ᠴᠠᠭ ᠢᠮᠠᠭᠲᠠ ᠠᠪᠠᠭᠠᠢ ᠠ᠋ᠴᠠ ᠬᠠᠯᠠᠰᠢᠷᠠᠨ ᠵᠣᠪᠠᠨᠢᠵᠤ ᠪᠠᠢᠭᠰᠠᠨ ᠤ᠋ ᠡᠷᠬᠡ ᠪᠡᠷ ᠴᠠᠢ ᠶ᠋ᠢᠨ ᠠᠮᠲᠠ ᠴᠣᠬᠣᠮ ᠶᠠᠮᠠᠷ ᠪᠠᠢᠭᠠ ᠶ᠋ᠢ ᠣᠯᠵᠤ ᠡᠰᠡ ᠮᠡᠳᠡᠪᠡ᠃ ᠬᠠᠷᠢᠨ ᠶᠠᠩᠵᠤᠤᠷ ᠢ᠋ ᠲᠠᠲᠠᠬᠤ ᠳ᠋ᠤ᠌ ᠨᠢᠯᠤᠭᠤᠨ ᠨᠢ ᠮᠡᠳᠡᠷᠡᠯ ᠳ᠋ᠦ᠍ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠭᠦᠷᠦᠨ ᠠᠶᠠᠲᠠᠢᠬᠠᠨ ᠪᠠᠢᠪᠠ᠃ ᠭᠡᠲᠡᠯᠡ ᠠᠪᠠᠭᠠᠢ᠄
— ᠵᠠ ᠲᠡᠭᠡᠭᠡᠳ ᠬᠦᠦ ᠴᠢ ᠬᠠᠮᠢᠭᠠ ᠠ᠋ᠴᠠ ᠶᠠᠪᠤᠭᠠ ᠪᠢᠯᠡ? ᠭᠡᠵᠦ ᠠᠰᠠᠭᠤᠪᠠ᠃
— ᠪᠢ ᠲᠡᠢᠨ ᠦ᠌ ᠭᠠᠵᠠᠷ ᠠ᠋ᠴᠠ ᠭᠡᠬᠦ ᠳ᠋ᠦ᠍᠂
— ᠠᠢ᠂ ᠪᠦᠷ ᠫᠤᠤᠳᠠᠯᠴᠠᠭᠠᠨ ᠪᠣᠯᠵᠤ ᠪᠠᠢᠭᠠ ᠶ᠋ᠢᠨ ᠲᠡᠨᠳᠡ ᠡᠴᠡ ᠤᠤ?
— ᠲᠡᠢᠮᠦ ᠠ᠋᠂ ᠲᠡᠷᠡ ᠭᠠᠵᠠᠷ ᠠ᠋ᠴᠠ᠃
ᠠᠪᠠᠭᠠᠢ ᠶ᠋ᠢᠨ ᠴᠢᠷᠠᠢ ᠠᠶᠤᠨ ᠰᠠᠨᠳᠤᠷᠬᠤ ᠰᠢᠨᠵᠢ ᠲᠡᠢ ᠪᠣᠯᠪᠠ᠃《ᠲᠩᠷᠢ᠂ ᠲᠩᠷᠢ》 ᠭᠡᠵᠦ ᠥᠪᠡᠷᠲᠡᠭᠡᠨ ᠬᠡᠯᠡᠭᠡᠳ᠂
— ᠲᠡᠨᠳᠡ ᠶᠡᠷᠦᠨᠢ ᠣᠯᠠᠨ ᠬᠥᠮᠦᠨ ᠠᠮᠢ ᠦᠷᠡᠭᠳᠡᠵᠦ ᠪᠠᠢᠨᠠ ᠤᠤ? ᠭᠡᠬᠦ ᠳ᠋ᠡᠭᠡᠨ ᠬᠣᠭᠣᠯᠠᠢ ᠨᠢ ᠴᠡᠴᠡᠷᠡᠵᠦ ᠨᠢᠳᠦᠨ ᠳ᠋ᠦ᠍ᠨᠢ ᠨᠢᠯᠪᠤᠰᠤ ᠬᠤᠷᠠᠯᠳᠤᠪᠠ᠃ ᠳ᠋ᠠᠨᠽᠠᠨ ᠡᠨᠡ ᠠᠪᠠᠭᠠᠢ ᠳ᠋ᠤ᠌ ᠦᠨᠡᠨ ᠪᠠᠢᠳᠠᠯ ᠢ᠋ ᠶᠠᠷᠢᠵᠤ ᠬᠡᠷᠬᠢᠪᠡᠴᠦ ᠪᠣᠯᠬᠤ ᠦᠭᠡᠢ ᠶ᠋ᠢ ᠮᠡᠳᠡᠯᠡ᠃
— ᠲᠠ ᠪᠢᠲᠡᠭᠡᠢ ᠵᠣᠪᠠ᠂ ᠲᠡᠨᠳᠡ ᠣᠨᠴᠠ ᠶ᠋ᠢᠨ ᠠᠶᠤᠯ ᠲᠠᠢ ᠶᠠᠭᠤᠮᠠ ᠪᠣᠯᠤᠭᠠ ᠦᠭᠡᠢ ᠪᠠᠢᠭᠠ ᠰᠢᠦ᠂ ᠪᠢ ᠪᠣᠳᠣᠪᠠᠯ ᠳᠠ᠂ ᠲᠡᠢᠨ ᠴᠦ᠍ ᠣᠳᠣ ᠤᠳᠠᠬᠤ ᠦᠭᠡᠢ ᠳᠠᠭᠤᠰᠤᠨᠠ ᠪᠣᠢ ᠭᠡᠪᠡ᠃ ᠠᠪᠠᠭᠠᠢ ᠶ᠋ᠢᠨ ᠴᠢᠷᠠᠢ ᠳᠠᠷᠤᠢ ᠥᠭᠡᠷᠡᠴᠢᠯᠡᠭᠳᠡᠨ᠄
— ᠠ᠋᠂ ᠶᠠᠭᠠᠬᠢᠭᠰᠠᠨ ᠰᠠᠢᠬᠠᠨ ᠴᠢᠮᠡᠭᠡ ᠪᠣᠢ? ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠰᠥᠨᠢ ᠪᠢ ᠲᠠᠩᠳᠠ ᠬᠦᠦ ᠪᠡᠨ ᠦᠵᠡᠨ ᠵᠡᠭᠦᠳᠦᠯᠡᠳᠡᠭ ᠪᠣᠯᠤᠭᠰᠠᠨ ᠶᠤᠮ᠃ ᠦᠭᠡᠢ᠂ ᠶᠡᠷᠦ ᠪᠠᠰᠠ ᠰᠣᠨᠢᠨ ᠠ᠋᠂ ᠡᠢᠮᠦ ᠰᠠᠢᠬᠠᠨ ᠴᠢᠮᠡᠭᠡ ᠲᠤᠭᠤᠯᠬᠤ ᠯᠠ ᠭᠡᠵᠦ ᠪᠠᠢᠵᠤ ᠰᠢᠦ ᠳᠡ ᠭᠡᠵᠦ ᠳ᠋ᠠᠨᠽᠠᠨ ᠳ᠋ᠤ᠌ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ᠄ ᠦᠭᠡᠢ ᠡᠰᠡᠪᠡᠯ ᠬᠦᠦ ᠮᠢᠨᠢ ᠪᠦᠷ ᠢᠷᠡᠵᠦ ᠶᠠᠪᠤᠭᠠ ᠪᠠᠢᠬᠠ᠃ ᠲᠡᠭᠦᠨᠴᠡ ᠪᠢᠰᠢ ᠵᠥᠪᠬᠡᠨ ᠡᠢᠮᠦ ᠴᠢᠮᠡᠭᠡ ᠲᠤᠭᠤᠯᠬᠤ ᠶ᠋ᠢᠨ ᠲᠡᠳᠦᠢ ᠳ᠋ᠦ᠍ ᠶᠠᠭᠠᠬᠢᠭᠰᠠᠨ ᠴᠦ᠍ ᠲᠡᠭᠡᠵᠦ ᠵᠡᠭᠦᠳᠦᠯᠡᠬᠦ ᠦᠭᠡᠢ ᠪᠢᠯᠡ᠃ ᠡᠪᠡᠢ ᠮᠢᠨᠢ᠂ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠯᠡ ᠣᠷᠣᠭᠠᠳ ᠢᠷᠡᠨᠡ ᠳᠠ ᠭᠡᠵᠦ ᠳᠡᠭᠡᠳᠦ ᠲᠠᠭᠠᠵᠠᠨ ᠤ᠋ ᠪᠠᠨ ᠤᠲᠤᠭᠠᠨ ᠳ᠋ᠤ᠌ ᠢᠳᠡᠭᠳᠡᠭᠰᠡᠨ ᠪᠣᠷᠣ ᠴᠠᠭᠠᠰᠤ ᠶ᠋ᠢ ᠨᠢᠳᠦ ᠴᠠᠪᠴᠢᠯ ᠦᠭᠡᠢ ᠰᠢᠷᠲᠡᠨ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠪᠠ᠃
ᠡᠨᠡ ᠨᠢ ᠳ᠋ᠠᠨᠽᠠᠨ ᠳ᠋ᠤ᠌ ᠶᠠᠭᠠᠬᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠰᠣᠯᠢᠶᠠ ᠲᠠᠢ ᠶᠠᠭᠤᠮᠠ ᠰᠢᠭ᠋ ᠦᠵᠡᠭᠳᠡᠭᠰᠡᠨ ᠪᠣᠯᠪᠠᠴᠤ ᠳ᠋ᠠᠨᠽᠠᠨ ᠲᠡᠭᠦᠨ ᠦ᠌ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠣᠯᠤᠭᠰᠠᠨ ᠳ᠋ᠤᠨᠢ ᠰᠡᠳᠬᠢᠯ ᠲᠠᠢᠪᠤᠰᠢᠷᠠᠪᠠ᠃ ᠤᠤᠭᠤᠵᠤ ᠪᠠᠢᠭᠠ ᠴᠠᠢ ᠶ᠋ᠢᠨ ᠠᠮᠲᠠ ᠥᠭᠡᠷᠡᠴᠢᠯᠡᠭᠳᠡᠨ ᠠᠶᠠᠲᠠᠢᠬᠠᠨ ᠪᠣᠯᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡᠪᠡᠷ ᠪᠦᠬᠦ ᠪᠡᠶᠡ ᠲᠠᠯᠪᠢᠭᠳᠠᠨ ᠬᠥᠯᠥᠰᠥ ᠭᠠᠷᠤᠯᠠ᠃ ᠭᠡᠪᠡᠴᠦ ᠳ᠋ᠠᠨᠽᠠᠨ ᠳᠤᠭᠤᠢ ᠰᠠᠭᠤᠬᠤ ᠳ᠋ᠤ᠌ ᠮᠠᠰᠢ ᠪᠡᠷᠬᠡ ᠲᠡᠢ ᠪᠠᠢᠬᠤ ᠲᠤᠯᠠ᠄
— ᠲᠠᠨ ᠤ᠋ ᠬᠦᠦ ᠴᠡᠷᠢᠭ ᠲᠦ᠍ ᠶᠠᠪᠤᠭᠰᠠᠭᠠᠷ ᠤᠳᠠᠵᠤ ᠪᠠᠢᠨᠠ ᠤᠤ?
— ᠬᠣᠶᠠᠷ ᠵᠢᠯ ᠪᠣᠯᠵᠤ ᠪᠠᠢᠨᠠ᠃ ᠭᠡᠪᠡᠴᠦ ᠡᠨᠡ ᠬᠣᠶᠠᠷ ᠵᠢᠯ ᠮᠢᠨᠦ ᠪᠦᠬᠦ ᠡᠳ᠋ᠯᠡᠭᠰᠡᠨ ᠳᠥᠴᠢᠨ ᠬᠣᠶᠠᠷ ᠨᠠᠰᠤᠨ ᠠ᠋ᠴᠠ ᠴᠤ᠌ ᠤᠳᠠᠭᠠᠨ ᠶᠤᠮ ᠰᠢᠭ᠋ ᠥᠩᠭᠡᠷᠡᠯᠡ ᠭᠡᠵᠦ ᠲᠣᠯᠣᠭᠠᠢ ᠤᠨᠠᠭᠠᠨ ᠬᠠᠷᠢᠭᠤᠯᠪᠠ᠃
— ᠠ᠋᠂ ᠬᠥᠭᠡᠷᠦᠬᠦᠢ ᠲᠡᠢᠮᠦ ᠤᠤ? ᠢᠩᠭᠢᠬᠦ ᠳ᠋ᠦ᠍ ᠬᠦᠦ ᠴᠢᠨᠢ ᠥᠪᠡᠷ ᠢ᠋ᠶ᠋ᠡᠨ ᠰᠠᠢᠨ ᠳᠤᠷᠠ ᠪᠠᠷ ᠶᠠᠪᠤᠭᠰᠠᠨ ᠶᠤᠮ ᠤᠤ?
— ᠬᠠᠮᠢᠭᠠ ᠠ᠋ᠴᠠ ᠭᠡᠳ ᠠᠪᠤᠭᠠᠢ ᠰᠣᠴᠢᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ᠄ ᠬᠥᠮᠦᠨ ᠥᠪᠡᠷ ᠦ᠋ᠨ ᠡᠷᠬᠡ ᠪᠡᠷ ᠠᠮᠢᠳᠤᠷᠠᠬᠤ ᠨᠥᠬᠥᠴᠡᠯ ᠦᠭᠡᠢ ᠪᠣᠯᠬᠤ ᠪᠠᠷ ᠢ᠋ᠶ᠋ᠠᠨ ᠥᠯᠪᠡᠷᠴᠦ ᠦᠬᠦᠭᠰᠡᠨ ᠳ᠋ᠦ᠍ ᠣᠷᠣᠪᠠᠯ᠂ ᠲᠡᠢᠨ ᠳ᠋ᠦ᠍ ᠶᠠᠪᠤᠵᠤ ᠬᠣᠭᠣᠯᠠ ᠣᠯᠵᠤ ᠢᠳᠡᠵᠦ ᠶᠠᠪᠤᠭᠠᠳ ᠦᠬᠦᠶᠡ ᠭᠡᠵᠦ ᠶᠠᠪᠤᠳᠠᠭ ᠨᠢᠭᠡ ᠶᠣᠰᠣ ᠪᠣᠢ᠃ ᠵᠠᠷᠢᠮ ᠨᠢᠭᠡ ᠨᠢ ᠭᠠᠪᠢᠶᠠ ᠪᠠᠢᠭᠤᠯᠤᠨ ᠮᠥᠩᠭᠥ ᠶᠠᠩᠴᠢᠶᠠᠨ ᠶᠡᠬᠡ ᠶ᠋ᠢ ᠣᠯᠬᠤ ᠶᠠᠭᠤᠨ ᠤ᠋ ᠮᠠᠭᠠᠳ ᠭᠡᠵᠦ ᠶᠠᠪᠤᠳᠠᠭ ᠴᠤ᠌ ᠶᠣᠰᠣ ᠪᠣᠢ᠃ ᠬᠠᠷᠢᠨ ᠮᠠᠨ ᠤ᠋ ᠬᠦᠦ ᠭᠡᠪᠡᠯ ᠠᠯᠢ ᠠᠯᠢᠨ ᠢ᠋ ᠬᠦᠰᠡᠭᠡ ᠦᠭᠡᠢ ᠶᠦᠮ᠃
— ᠲᠡᠭᠡᠭᠡᠳ ᠶᠠᠭᠤᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠶᠤᠮ ᠪᠣᠢ?
— ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠨᠢᠭᠡ ᠡᠳᠦᠷ᠂ ᠦᠭᠡᠢ ᠠ᠋᠂ ᠲᠡᠷᠡ ᠡᠳᠦᠷ ᠦ᠋ᠨ ᠲᠩᠷᠢ ᠶ᠋ᠢᠨ ᠮᠠᠭᠤᠬᠠᠢ ᠪᠠᠢᠭᠰᠠᠨ ᠢ᠋ ᠶᠠᠭᠠᠬᠢᠨᠠ᠃ ᠠᠷᠪᠠᠭᠠᠳ ᠮᠣᠷᠢᠲᠤ ᠴᠡᠷᠢᠭ ᠳᠠᠪᠬᠢᠨ ᠢᠷᠡᠵᠦ ᠪᠦᠬᠦ ᠲᠣᠰᠬᠣᠨ ᠤ᠋ ᠵᠠᠯᠠᠭᠤᠰ ᠢ᠋ ᠪᠠᠷᠢᠯᠠᠭᠰᠠᠨ ᠰᠢᠦ᠂ ᠲᠡᠭᠦᠨ ᠳ᠋ᠦ᠍ ᠭᠠᠭᠴᠠᠬᠠᠨ ᠪᠠᠶᠠᠴᠤᠳ ᠯᠠ ᠬᠥᠪᠡᠭᠦᠳ ᠢ᠋ᠶ᠋ᠡᠨ ᠶᠠᠪᠤᠭᠤᠯᠤᠭᠠ ᠦᠭᠡᠢ᠃
— ᠪᠠᠶᠠᠴᠤᠳ ᠶᠠᠭᠠᠬᠢᠭᠠᠳ ᠲᠡᠷᠡ ᠪᠣᠢ?
— ᠶᠠᠭᠠᠬᠢᠬᠤᠪ᠂ ᠲᠡᠳᠡ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠭᠠᠷᠭᠠᠨ ᠲᠣᠭᠠᠯᠠᠵᠤ ᠥᠭᠭᠦᠭᠡᠳ ᠲᠡᠷᠡ ᠪᠠᠢᠬᠤ ᠦᠭᠡᠢ ᠤᠤ? ᠮᠠᠨ ᠤ᠋ ᠳ᠋ᠤ᠌ ᠭᠡᠪᠡᠯ ᠲᠡᠢᠮᠦ ᠶᠡᠬᠡ ᠶᠠᠩᠴᠢᠶᠠᠨ ᠬᠠᠮᠢᠭᠠ ᠪᠠᠢᠬᠤ ᠪᠢᠯᠡ᠃ ᠪᠢᠳᠡ ᠪᠣᠯ ᠡᠢᠮᠦ ᠨᠢᠭᠡᠨ ᠪᠢᠴᠢᠬᠠᠨ ᠪᠠᠢᠰᠢᠩ ᠲᠠᠢ᠂ ᠵᠥᠪᠬᠡᠨ ᠥᠪᠡᠷᠰᠡᠳ ᠢ᠋ ᠪᠡᠨ ᠲᠡᠵᠢᠭᠡᠬᠦ ᠠᠮᠠ ᠳᠥᠷᠪᠡᠯᠵᠢᠨ ᠭᠠᠵᠠᠷ ᠲᠠᠢ ᠲᠡᠢᠮᠦ ᠯᠡ ᠠᠢᠯ᠃
ᠭᠡᠪᠡᠴᠦ ᠳᠠᠩᠵᠢᠶᠠᠳ ᠮᠠᠨᠢ ᠬᠦᠦ ᠪᠡᠨ ᠡᠭᠡᠭᠦᠯᠦᠨ ᠠᠪᠬᠤ ᠭᠡᠵᠦ ᠳᠡᠭᠦᠦ ᠥᠬᠢᠨ ᠢ᠋ ᠨᠢ ᠠᠪᠤᠨ ᠵᠠᠩᠴᠢᠬᠦᠦ ᠤᠷᠤᠭᠤ ᠣᠷᠣᠭᠰᠠᠨ᠃ ᠭᠡᠲᠡᠯᠡ ᠲᠡᠷᠡ ᠦᠶᠡ ᠳ᠋ᠦ᠍ ᠠᠶᠠ ᠪᠠᠰᠠ ᠬᠡᠴᠡᠭᠦᠦ᠃ ᠮᠠᠨ ᠤ᠋ ᠬᠢ ᠰᠢᠭ᠋ ᠰᠠᠨᠳᠤᠷᠤᠭᠰᠠᠨ ᠠᠢᠯ᠂ ᠬᠠ ᠶᠠ ᠦᠭᠡᠢ ᠪᠣᠢ ᠪᠣᠯᠵᠤ᠂ ᠥᠬᠢᠳ ᠦ᠋ᠨ ᠦᠨᠡ ᠰᠤᠯᠠ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠪᠤᠰᠤᠳ ᠤ᠋ᠨ ᠮᠠᠲᠠᠯ ᠳ᠋ᠤ᠌ ᠥᠭᠬᠦ ᠳ᠋ᠦ᠍ ᠳᠥᠩᠭᠡᠵᠦ ᠵᠠᠭᠤ ᠲᠠᠪᠢᠨ ᠶᠠᠩᠴᠢᠶᠠᠨ ᠬᠦᠷᠪᠡ᠃ ᠤᠭ ᠨᠢ ᠡᠨᠡ ᠮᠥᠩᠭᠥ ᠶᠠᠭᠤᠨ ᠪᠠᠭᠠ ᠮᠥᠩᠭᠥ ᠪᠠᠢᠬᠤ ᠪᠢᠯᠡ᠃ ᠭᠡᠪᠡᠴᠦ ᠮᠠᠨ ᠤ᠋ ᠥᠬᠢᠨ ᠶᠠᠮᠠᠷ ᠮᠠᠯ ᠪᠢᠰᠢ ᠬᠥᠮᠦᠨ ᠰᠢᠦ ᠳᠡ ᠭᠡᠵᠦ ᠲᠣᠯᠣᠭᠠᠢ ᠰᠠᠨᠵᠢᠭᠢᠨᠠᠭᠤᠯᠤᠨ ᠶᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠲᠠᠰᠤᠯᠤᠨ ᠰᠠᠨᠠᠭᠠ ᠠᠯᠳᠠᠭᠠᠳ᠄ ᠠᠶᠠ ᠢᠩᠭᠢᠬᠦ ᠳ᠋ᠦ᠍ ᠴᠢ ᠪᠠᠰᠠ ᠡᠨᠡ ᠳᠡᠯᠡᠬᠡᠢ ᠶ᠋ᠢᠨ ᠠᠮᠢᠲᠠᠳ ᠢ᠋ ᠶᠠᠮᠠᠷ ᠶᠡᠬᠡ ᠨᠢᠭᠦᠯ ᠲᠡᠢ ᠪᠠᠢᠳᠠᠭ ᠭᠡᠵᠦ ᠰᠠᠨᠠᠨᠠ? ᠵᠠᠷᠢᠮ ᠬᠥᠮᠦᠰ ᠲᠡᠷᠡ ᠮᠥᠩᠭᠥᠨ ᠦ᠌ ᠰᠤᠷᠠᠭ ᠢ᠋ᠶ᠋ᠠᠷ《ᠲᠠᠨ ᠤ᠋ ᠬᠢ ᠶᠠᠭᠠᠬᠢᠭᠰᠠᠨ ᠠᠵᠠ ᠲᠠᠢ ᠪᠣᠢ? ᠣᠳᠣ ᠬᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠣᠢᠨᠠ ᠠ᠋ᠴᠠ ᠶᠠᠪᠤᠬᠤ ᠶ᠋ᠢᠨ ᠴᠦ᠍ ᠬᠡᠷᠡᠭ ᠠᠯᠠᠭᠠ᠂ ᠵᠦᠭᠡᠷ ᠲᠡᠷᠡ ᠶᠡᠬᠡ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠢᠳᠡᠭᠡᠳ ᠠᠮᠤᠷ ᠲᠠᠢᠪᠤᠩ ᠰᠠᠭᠤᠪᠠᠯ ᠪᠣᠯᠬᠤ ᠨᠢ ᠲᠡᠷᠡ》 ᠭᠡᠵᠦ ᠬᠡᠯᠡᠨᠡ᠃ ᠵᠠᠷᠢᠮ ᠨᠢ ᠪᠠᠰᠠ《ᠬᠥᠳᠡᠭᠡ ᠲᠣᠰᠬᠣᠨ ᠤ᠋ ᠶᠠᠳᠠᠭᠤ ᠭᠡᠷ ᠦ᠋ᠨ ᠨᠢᠭᠡ ᠥᠬᠢᠨ ᠲᠡᠳᠦᠢ ᠶᠡᠬᠡ ᠦᠨᠡ ᠬᠦᠷᠬᠦ ᠶᠠᠭᠤᠲᠠᠢ ᠬᠠᠴᠢᠨ ᠪᠣᠢ?》 ᠭᠡᠵᠦ ᠱᠠᠭᠰᠢᠷᠠᠭᠠᠳ《ᠶᠣᠰᠣᠲᠠᠢ ᠡᠩᠬᠦᠷᠡᠢ ᠳᠠᠭᠢᠨᠢ ᠰᠢᠭ᠋ ᠦᠵᠡᠰᠬᠦᠯᠡᠩ ᠭᠤᠸᠠ ᠪᠣᠯᠤᠭᠠᠳ ᠲᠡᠷᠡ ᠪᠣᠢ》 ᠭᠡᠵᠦ ᠠᠲᠠᠭᠠᠷᠬᠠᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠥᠬᠢᠨ ᠦ᠌ ᠵᠢᠰᠦ ᠴᠢᠷᠠᠢ ᠶ᠋ᠢ ᠰᠠᠮ ᠠᠵᠢᠨᠠ᠃
ᠪᠤᠷᠬᠠᠨ ᠤ᠋ ᠡᠮᠦᠨᠡ ᠣᠴᠢᠬᠤ ᠪᠠᠷ ᠢ᠋ᠶ᠋ᠠᠨ ᠬᠥᠮᠦᠨ ᠪᠦᠷᠢ ᠵᠠᠯᠪᠠᠷᠢᠬᠤ ᠠᠲᠠᠯᠠ᠂ ᠦᠨᠡᠨ ᠰᠠᠨᠠᠭᠠᠨ ᠠ᠋ᠴᠠ ᠪᠠᠨ ᠪᠤᠶᠠᠨ ᠦᠢᠯᠡᠳᠬᠦ ᠬᠥᠮᠦᠨ ᠨᠢᠭᠡ ᠴᠦ᠍ ᠠᠯᠠᠭᠠ᠃ ᠰᠦᠮᠡ ᠡᠴᠡ ᠭᠠᠷᠬᠤ ᠲᠠᠢ ᠪᠠᠨ ᠵᠡᠷᠭᠡ ᠳᠠᠩ ᠨᠢᠭᠦᠯ ᠠ᠋᠂ ᠬᠡᠯᠡᠬᠦ ᠬᠥᠳᠡᠯᠬᠦ ᠴᠥᠮ ᠨᠢᠭᠦᠯ ᠯᠡ ᠪᠠᠢᠬᠤ ᠶᠤᠮ ᠭᠡᠵᠦ ᠠᠪᠠᠭᠠᠢ ᠲᠣᠯᠣᠭᠠᠢ ᠪᠠᠨ ᠲᠠᠰᠤᠷᠠᠯᠲᠠ ᠦᠭᠡᠢ ᠬᠥᠳᠡᠯᠭᠡᠭᠡᠨ ᠶᠠᠷᠢᠪᠠ᠃
— ᠲᠠᠨ ᠤ᠋ ᠬᠢ ᠶᠠᠩᠴᠢᠶᠠᠨ ᠲᠠᠢ ᠪᠣᠯᠤᠭᠰᠠᠨ ᠠᠲᠠᠯᠠ ᠬᠦᠦ ᠪᠡᠨ ᠶᠠᠭᠠᠬᠢᠭᠠᠳ ᠠᠪᠴᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠢ ᠳᠠ? ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠄
— ᠠᠶᠠ᠂ ᠶᠠᠭᠠᠬᠢᠭᠠᠳ ᠭᠡᠬᠦ ᠶᠦᠮ ᠪᠠᠢᠬᠤ ᠪᠣᠢ ᠳᠠ᠂ ᠳᠠᠩᠵᠢᠶᠠᠳ ᠮᠠᠨᠢ ᠶᠠᠩᠴᠢᠶᠠᠨ ᠲᠠᠢ ᠪᠣᠯᠬᠤ ᠲᠠᠢ ᠪᠠᠨ ᠵᠡᠷᠭᠡ ᠬᠣᠢᠨᠠ ᠠ᠋ᠴᠠ ᠨᠢ ᠶᠠᠪᠤᠭᠠᠳ ᠶᠠᠭᠤ ᠪᠣᠯᠤᠭᠰᠠᠨ ᠭᠡᠵᠦ ᠰᠠᠨᠠᠨᠠ? ᠡᠳᠦᠢ ᠲᠡᠳᠦᠢ ᠠᠯᠪᠠᠨ ᠭᠠᠵᠠᠷ ᠤ᠋ᠳ ᠢ᠋ᠶ᠋ᠠᠷ ᠳᠠᠮᠵᠢᠨ ᠶᠠᠪᠤᠭᠰᠠᠨ ᠰᠢᠦ᠂ ᠲᠡᠭᠡᠬᠦ ᠳ᠋ᠡᠭᠡᠨ ᠪᠠᠰᠠ ᠣᠷᠣᠭᠰᠠᠨ ᠭᠠᠵᠠᠷ ᠪᠣᠯᠭᠠᠨ ᠤ᠋ ᠪᠠᠨ ᠡᠭᠦᠳᠡᠨ ᠦ᠌ ᠬᠢᠨᠢ ᠨᠣᠶᠠᠨ ᠳ᠋ᠤ᠌ ᠬᠦᠷᠲᠡᠯᠡ ᠥᠨᠥᠬᠢ ᠶᠠᠩᠴᠢᠶᠠᠨ ᠠ᠋ᠴᠠ ᠪᠠᠨ ᠨᠢᠭᠤᠴᠠ ᠠᠯᠪᠠ ᠪᠠᠷᠢᠭᠰᠠᠨ ᠭᠡᠨᠡ ᠪᠢᠯᠡ᠃ ᠲᠡᠭᠡᠭᠡᠳ ᠬᠠᠮᠤᠭ ᠤ᠋ᠨ ᠡᠴᠦᠰ ᠲᠦ᠍ ᠶᠡᠬᠡ ᠨᠣᠶᠠᠨ ᠳ᠋ᠤ᠌ ᠪᠠᠷᠠᠯᠬᠠᠨ ᠵᠠᠭᠤᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠡᠷᠭᠦᠭᠡᠳ ᠬᠦᠦ ᠪᠡᠨ ᠠᠪᠬᠤ ᠪᠢᠴᠢᠭ ᠬᠢᠯᠭᠡᠵᠦ ᠠᠪᠤᠭᠰᠠᠨ ᠶᠤᠮ᠂ ᠭᠡᠲᠡᠯᠡ ᠬᠦᠦ ᠮᠠᠨᠢ ᠣᠯᠳᠠᠬᠤ ᠪᠠᠨ ᠪᠤᠯᠢᠴᠢᠬᠠᠭᠰᠠᠨ ᠪᠠᠢᠯᠠ᠃ ᠪᠢ ᠪᠣᠳᠣᠪᠠᠯ ᠲᠡᠢᠨ ᠦ᠌ ᠭᠠᠵᠠᠷ ᠯᠠ ᠶᠠᠪᠤᠴᠢᠬᠠᠭᠠᠳ ᠲᠡᠷᠡ ᠪᠣᠢ᠃ ᠶᠠᠭᠤ ᠠᠲᠤᠭᠠᠢ ᠪᠢᠳᠡ ᠢᠩᠭᠢᠭᠡᠳ ᠬᠦᠦ ᠴᠦ᠍ ᠦᠭᠡᠢ᠂ ᠬᠡᠦᠬᠡᠨ ᠴᠦ᠍ ᠦᠭᠡᠢ᠂ ᠮᠥᠩᠭᠥ ᠴᠦ᠍ ᠦᠭᠡᠢ ᠪᠣᠯᠤᠭᠰᠠᠨ ᠳᠠ ᠭᠡᠳ ᠨᠢᠭᠡ ᠬᠡᠰᠡᠭ ᠪᠣᠳᠣᠭᠰᠠᠨ ᠳ᠋ᠠᠭᠠᠨ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ ᠵᠢᠭᠠᠨ ᠡᠳᠡ ᠮᠠᠨᠢ ᠨᠢᠯᠬᠠ᠂ ᠨᠢᠯᠬᠠ ᠮᠥᠷᠲᠡᠭᠡᠨ ᠢᠳᠡᠬᠦ ᠨᠢ ᠭᠦᠢᠴᠡᠭᠳᠡᠳᠡᠭ ᠦᠭᠡᠢ ᠢᠷᠣᠭᠠᠷ ᠦᠭᠡᠢ ᠬᠡᠦᠳᠡᠢ ᠨᠦ᠍ᠭᠦᠳ᠂ ᠳᠠᠩᠵᠢᠶᠠᠳ ᠮᠠᠨᠢ ᠡᠨᠡ ᠬᠡᠦᠳᠡᠢ ᠨᠦ᠍ᠭᠦᠳ ᠢ᠋ ᠴᠠᠯᠴᠢᠯᠭᠠᠴᠢᠬᠤ ᠦᠭᠡᠢ ᠪᠠᠢᠯᠭᠠᠬᠤ ᠭᠡᠵᠦ ᠥᠷᠯᠥᠭᠡ ᠪᠦᠷᠢ ᠡᠷᠲᠡ ᠭᠠᠷᠤᠭᠠᠳ ᠣᠷᠣᠢ ᠳ᠋ᠠᠭᠠᠨ ᠢᠷᠡᠳᠡᠭ᠃ ᠥᠪᠡᠷ ᠦ᠋ᠨ ᠠᠵᠢᠯ ᠳᠠᠭᠤᠰᠤᠭᠰᠠᠨ ᠪᠠᠢᠪᠠᠯ ᠣᠢᠷᠠ ᠬᠠᠪᠢ ᠶ᠋ᠢᠨ ᠪᠠᠶᠠᠴᠤᠳ ᠤ᠋ᠨ ᠠᠵᠢᠯ ᠠ᠋ᠴᠠ ᠬᠢᠯᠴᠡᠨᠡ᠃ ᠪᠢ ᠭᠡᠪᠡᠯ ᠠᠶᠠ ᠬᠡᠴᠡᠭᠦᠦ᠂ ᠡᠳᠡᠨ ᠳ᠋ᠦ᠍ ᠬᠣᠷᠭᠣᠳᠠᠭᠠᠳ ᠨᠡᠮᠡᠷᠢ ᠪᠣᠯᠵᠤ ᠴᠢᠳᠠᠳᠠᠭ ᠦᠭᠡᠢ ᠭᠡᠵᠦ ᠮᠥᠨ ᠯᠡ ᠦᠢᠯᠡ ᠭᠤᠨᠢᠭ ᠪᠣᠯᠤᠨ ᠬᠡᠯᠡᠪᠡ᠃
ᠳ᠋ᠠᠨᠽᠠᠨ ᠠᠪᠠᠭᠠᠢ ᠶ᠋ᠢᠨ ᠶᠠᠩᠴᠢᠶᠠᠨ ᠠ᠋ᠴᠠ ᠠᠷᠤ ᠭᠡᠷ ᠢ᠋ᠶ᠋ᠡᠨ ᠰᠠᠨᠠᠯᠠ᠃ ᠬᠥᠭᠰᠢᠨ ᠡᠬᠡ ᠪᠡᠨ ᠮᠥᠨ ᠯᠡ ᠡᠭᠦᠨ ᠰᠢᠭ ᠡᠨᠡ ᠲᠡᠷᠡ ᠶ᠋ᠢ ᠬᠤᠳᠬᠤᠯᠳᠤᠭᠤᠯᠤᠨ ᠶᠠᠷᠢᠵᠤ᠂ ᠪᠤᠰᠤᠳ ᠤ᠋ᠨ ᠡᠮᠦᠨᠡ ᠰᠣᠯᠢᠶᠠ ᠲᠠᠢ ᠶᠤᠮ ᠰᠢᠭ᠋ ᠦᠵᠡᠭᠳᠡᠵᠦ ᠪᠠᠢᠭᠠ ᠪᠠᠢᠬᠤ ᠳᠠ ᠵᠠᠢᠯᠠᠭᠤᠯ ᠭᠡᠬᠦ ᠡᠴᠡ ᠵᠢᠷᠦᠬᠡ ᠴᠣᠬᠢᠯᠠᠨ ᠡᠯᠢᠭᠡ ᠡᠮᠲᠡᠷᠡᠨᠡ᠃ ᠶᠡᠷᠦ ᠨᠢᠭᠡᠨᠲᠡ ᠡᠢᠮᠦ ᠰᠡᠳᠬᠢᠯ ᠰᠠᠨᠠᠭᠠᠨ ᠤ᠋ ᠵᠣᠪᠠᠯᠠᠩ ᠪᠣᠯᠤᠭᠰᠠᠨ ᠬᠥᠮᠦᠨ ᠢ᠋ ᠶᠠᠮᠠᠷ ᠢ᠋ᠶ᠋ᠠᠷ ᠪᠣᠯᠪᠠᠴᠤ ᠲᠠᠢᠳᠬᠤᠷᠠᠭᠤᠯᠬᠤ ᠶᠣᠰᠣᠲᠠᠢ ᠳᠠ ᠭᠡᠵᠦ ᠪᠣᠳᠣᠪᠠ᠃
— ᠠᠬᠠᠢᠲᠠᠨ ᠮᠢᠨᠢ ᠲᠠ ᠰᠡᠳᠬᠢᠯ ᠵᠣᠪᠠᠬᠤ ᠬᠡᠷᠡᠭ ᠦᠭᠡᠢ᠃ ᠲᠠᠨ ᠤ᠋ ᠬᠦᠦ ᠢᠷᠡᠨᠡ᠃ ᠲᠡᠨᠳᠡ ᠲᠡᠢᠨ ᠪᠣᠯᠵᠤ ᠪᠠᠢᠭᠠ ᠭᠡᠬᠦ ᠪᠣᠯᠪᠠᠴᠤ ᠪᠢ ᠬᠥᠮᠦᠨ ᠦᠬᠦᠬᠦ ᠶ᠋ᠢ ᠪᠠᠷᠤᠭ ᠦᠵᠡᠭᠡ ᠦᠭᠡᠢ ᠰᠢᠦ᠃
— ᠠ᠋ ᠪᠢ ᠢᠲᠡᠭᠡᠶᠡ᠂ ᠴᠢ ᠡᠢᠮᠦ ᠰᠠᠢᠬᠠᠨ ᠦᠭᠡ ᠶ᠋ᠢ ᠲᠦᠷᠦᠭᠦᠨ ᠨᠢᠭᠡ ᠬᠡᠯᠡᠭᠰᠡᠨ᠂ ᠣᠳᠣ ᠪᠠᠰᠠ ᠳᠠᠪᠲᠠᠨ ᠬᠡᠯᠡᠯᠡ ᠭᠡᠵᠦ ᠠᠪᠠᠭᠠᠢ ᠲᠠᠢᠪᠤᠰᠢᠷᠠᠨ ᠠᠩᠬᠠ ᠤᠳᠠᠭᠠ ᠪᠠᠨ ᠢᠨᠢᠶᠡᠮᠰᠦᠭᠯᠡᠨ ᠬᠡᠦᠬᠡᠳ ᠦ᠋ᠳ ᠢ᠋ᠶ᠋ᠡᠨ《ᠲᠠ ᠨᠠᠷ ᠲᠣᠭᠣᠯᠤᠭᠠ ᠪᠢᠵᠡ? ᠴᠠᠭᠠᠨᠠ ᠴᠢᠨᠢ ᠠᠬᠠ ᠴᠢᠨᠢ ᠤᠳᠠᠬᠤ ᠦᠭᠡᠢ ᠢᠷᠡᠬᠦ ᠭᠡᠵᠦ ᠪᠠᠢᠭᠠ ᠶ᠋ᠢ? ᠶᠠᠪᠤᠬᠤ ᠳ᠋ᠠᠭᠠᠨ ᠶᠠᠭᠤ ᠶᠠᠭᠤ ᠶ᠋ᠢ ᠵᠠᠬᠢᠯᠠ᠂ ᠲᠡᠷᠡ ᠶᠣᠰᠣᠭᠠᠷ ᠲᠠ ᠨᠠᠷ ᠳᠠᠷᠤᠢ ᠨᠣᠭᠣᠭᠠᠨ ᠤ᠋ ᠵᠠᠪᠰᠠᠷ ᠲᠦ ᠤᠷᠭᠤᠭᠰᠠᠨ ᠮᠠᠭᠤ ᠡᠪᠡᠰᠦ ᠶ᠋ᠢ ᠡᠳᠦᠷ ᠪᠦᠷᠢ ᠵᠤᠯᠭᠠᠭᠠᠵᠤ᠂ ᠥᠷᠯᠥᠭᠡ ᠪᠦᠷᠢ ᠱᠤᠤᠳᠠᠭᠤ ᠶ᠋ᠢᠨ ᠤᠰᠤ ᠲᠠᠯᠪᠢᠨ ᠠᠪᠤ ᠳ᠋ᠠᠭᠠᠨ ᠲᠤᠰᠠᠯᠠᠵᠤ ᠪᠠᠢ ᠮᠠᠲᠠᠪᠠᠤ?》 ᠶᠡᠬᠡ ᠬᠦᠦ ᠡᠬᠡ ᠪᠡᠨ ᠬᠡᠨᠡᠭ ᠦᠭᠡᠢ ᠰᠢᠷᠲᠡᠨ᠄
— ᠦᠭᠡᠢ ᠠ᠋᠂ ᠪᠢ ᠮᠡᠳᠡᠭᠡ ᠦᠭᠡᠢ ᠭᠡᠯᠡ᠃
— ᠶᠠᠭᠤ? ᠶᠠᠭᠠᠬᠢᠭᠠᠳ ᠴᠢ ᠮᠡᠳᠡᠭᠡ ᠦᠭᠡᠢ ᠪᠠᠢᠨᠠ ᠪᠣᠢ? ᠭᠡᠵᠦ ᠡᠬᠡ ᠨᠢ ᠵᠠᠩᠳᠤᠷᠲᠠᠯᠠ ᠬᠦᠦ ᠬᠠᠷᠢᠭᠤ ᠳ᠋ᠤᠨᠢ᠄
— ᠣᠳᠣ ᠤᠷᠭᠤᠵᠤ ᠪᠠᠢᠭᠠ ᠨᠣᠭᠣᠭᠠ ᠬᠠᠮᠢᠭᠠ ᠴᠦ᠍ ᠪᠠᠢᠬᠤ ᠦᠭᠡᠢ᠂ ᠱᠤᠤᠳᠠᠭᠣ ᠪᠠᠰᠠ ᠬᠥᠯᠳᠡᠴᠢᠭᠰᠡᠨ ᠰᠢᠦ ᠳᠡ ᠭᠡᠪᠡ᠃
ᠡᠬᠡ ᠳᠠᠷᠤᠢ ᠢᠨᠢᠶᠡᠨ
— ᠠ᠋ ᠴᠢ ᠮᠥᠨ ᠴᠦ᠍ ᠤᠬᠠᠭᠠᠨ ᠲᠠᠢ ᠪᠠᠢᠨᠠ᠂ ᠬᠣᠢᠰᠢᠳᠠ ᠪᠠᠨ ᠮᠥᠨ ᠯᠡ ᠡᠢᠮᠦ ᠤᠬᠠᠭᠠᠨ ᠲᠠᠢ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠢᠭᠠᠷᠠᠢ᠂ ᠮᠠᠲᠠᠪᠠᠤ?
— ᠮᠡᠳᠡᠯᠡ᠃
— ᠲᠡᠭᠡᠪᠡᠯ᠂ ᠭᠠᠷᠴᠠᠭᠠ᠃ ᠲᠦᠯᠡᠰᠢ ᠤᠷᠤᠭᠤᠯ᠃ ᠪᠢ ᠬᠣᠭᠣᠯᠠ ᠬᠢᠨᠡ᠃ ᠬᠠᠷᠢᠨ ᠲᠠ ᠨᠠᠷ ᠲᠤ ᠪᠢᠰᠢ ᠡᠨᠡ᠂ ᠠᠬᠠ ᠶ᠋ᠢᠨ ᠴᠢᠨᠢ ᠨᠥᠬᠥᠷ ᠲᠦ᠍ ᠰᠢᠦ᠃
ᠬᠡᠦᠬᠡᠳ ᠦ᠋ᠳ ᠭᠦᠶᠦᠯᠳᠦᠨ ᠭᠠᠷᠴᠤ ᠲᠠᠷᠢᠶᠠᠨ ᠤ᠋ ᠮᠤᠰᠬᠢᠬᠰᠠᠨ ᠰᠦᠷᠡᠯ ᠣᠷᠣᠭᠤᠯᠵᠤ ᠢᠷᠡᠪᠡ᠃ ᠠᠪᠠᠭᠠᠢ ᠤᠭᠲᠤᠨ ᠠᠪᠴᠤ ᠵᠠᠭᠠᠵᠤᠤᠷ ᠢ᠋ᠶ᠋ᠠᠷ ᠴᠠᠪᠴᠢᠯᠠᠨ ᠬᠡᠰᠡᠭᠯᠡᠵᠦ ᠪᠢᠴᠢᠬᠠᠨ ᠰᠢᠪᠡᠷ ᠵᠤᠤᠬᠠᠨ ᠳ᠋ᠠᠭᠠᠨ ᠵᠢᠷᠤᠨ ᠠᠰᠠᠭᠠᠪᠠ᠃
— ᠢᠩᠭᠢᠬᠦ ᠳ᠋ᠦ᠍ ᠨᠤᠲᠤᠭ ᠴᠢᠨᠢ ᠬᠠᠮᠢᠭᠠ ᠪᠢᠯᠡ ᠳᠠ?
— ᠭᠠᠳᠠᠭᠠᠳᠤ ᠮᠣᠩᠭᠣᠯ ᠳ᠋ᠤ᠌᠃
— ᠭᠠᠳᠠᠭᠠᠳᠤ ᠮᠣᠩᠭᠣᠯ?
— ᠲᠡᠢᠮᠦ ᠠ᠋᠂ ᠪᠢ ᠴᠦ᠍ ᠭᠠᠳᠠᠭᠠᠳᠤ ᠮᠣᠩᠭᠣᠯ ᠬᠥᠮᠦᠨ᠃
— ᠵᠠ᠂ ᠵᠠ ᠣᠳᠣ ᠮᠡᠳᠡᠯᠡ᠃ ᠪᠢ ᠴᠢᠨᠦ ᠶᠠᠷᠢᠶᠠᠨ ᠤ᠋ ᠪᠠᠢᠳᠠᠯ ᠢ᠋ ᠭᠠᠢᠬᠠᠭᠠᠳ ᠪᠠᠢᠯᠠ᠃ ᠲᠡᠭᠡᠭᠰᠡᠨ ᠴᠢᠨᠢ ᠭᠠᠳᠠᠭᠠᠳᠤ ᠮᠣᠩᠭᠣᠯ ᠬᠥᠮᠦᠨ ᠪᠠᠢᠵᠠᠢ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠂ ᠢᠩᠭᠢᠬᠦ ᠳ᠋ᠦ᠍ ᠭᠠᠳᠠᠭᠠᠳᠤ ᠮᠣᠩᠭᠣᠯ ᠬᠥᠮᠦᠨ ᠮᠠᠨᠢ ᠡᠨᠳᠡᠬᠢ ᠶ᠋ᠢᠨ ᠴᠡᠷᠢᠭ ᠲᠦ᠍ ᠶᠠᠪᠤᠬᠤ ᠶᠠᠭᠤ ᠪᠢᠯᠡ?
— ᠦᠭᠡᠢ ᠳᠡ᠂ ᠪᠢ ᠵᠢᠩᠴᠢᠨ ᠬᠥᠮᠦᠨ᠂ ᠨᠢᠳᠤᠨᠤᠨ ᠵᠢᠩ ᠲᠡᠭᠡᠭᠡᠨ ᠵᠠᠩᠴᠢᠭᠦᠦ ᠳ᠋ᠦ᠍ ᠢᠷᠡᠭᠡᠳ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠭᠰᠠᠨ ᠶᠤᠮ᠃
— ᠠᠶᠠ ᠭᠡᠵᠦ ᠠᠪᠠᠭᠠᠢ ᠤᠤᠯᠭᠠ ᠠᠯᠳᠠᠭᠠᠳ ᠲᠡᠭᠡᠭᠡᠳ ᠴᠢ ᠶᠠᠭᠠᠬᠢᠵᠤ ᠭᠠᠷᠴᠤ ᠢᠷᠡᠪᠡ?
ᠡᠨᠡ ᠲᠤᠬᠠᠢ ᠳ᠋ᠤ᠌ ᠳ᠋ᠠᠨᠽᠠᠨ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠬᠦ ᠶ᠋ᠢ ᠲᠠᠲᠠᠭᠠᠯᠵᠠᠨᠠ᠃
— ᠶᠡᠬᠡ ᠨᠣᠶᠠᠨ ᠨᠠᠮᠠᠶ᠋ᠢ ᠬᠠᠷᠢ ᠭᠡᠵᠦ ᠲᠤᠰᠢᠶᠠᠭᠰᠠᠨ ᠭᠡᠵᠦ ᠬᠡᠨᠡᠭ ᠦᠭᠡᠢ ᠪᠠᠢᠳᠠᠯ ᠦᠵᠡᠭᠦᠯᠬᠦ ᠶ᠋ᠢ ᠤᠷᠤᠯᠳᠤᠨ ᠪᠡᠶᠡ ᠪᠡᠨ ᠪᠠᠷᠢᠨ ᠬᠡᠯᠡᠪᠡ᠃ ᠠᠪᠠᠭᠠᠢ ᠨᠢᠳᠦ ᠰᠡᠷᠭᠦᠨ᠄
— ᠶᠠᠭᠠᠬᠢᠭᠠᠳ ᠲᠡᠷᠡ ᠪᠣᠢ?
— ᠪᠤᠤ ᠮᠡᠳᠡ᠂ ᠶᠠᠪᠤᠬᠤ ᠦᠭᠡᠢ ᠭᠡᠬᠦ ᠳ᠋ᠦ᠍ ᠵᠠᠪᠠᠯ ᠶᠠᠪᠤ ᠭᠡᠵᠦ ᠲᠤᠰᠢᠶᠠᠯᠠ᠃
— ᠠ᠋ ᠴᠢ ᠶᠠᠭᠠᠬᠢᠭᠰᠠᠨ ᠲᠣᠮᠣᠭᠠ ᠦᠭᠡᠢ ᠪᠣᠢ? ᠲᠡᠨᠳᠡ ᠬᠣᠷᠭᠣᠳᠠᠬᠤ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠢᠯᠡ?
— ᠣᠳᠣ ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ? ᠲᠡᠮᠡᠭᠡ ᠨᠦ᠍ᠭᠦᠳ ᠲᠡᠭᠡᠨ ᠬᠣᠷᠭᠣᠳᠠᠭᠠᠳ ᠯᠠ ᠲᠡᠷᠡ ᠳᠠ᠃
— ᠠ᠋ ᠲᠡᠮᠡᠭᠡ ᠶᠠᠭᠤᠨ ᠤ᠋ ᠬᠠᠮᠢᠶᠠ ᠭᠡᠰᠡᠨ ᠢ᠋ᠶ᠋ᠡᠨ ᠠᠪᠠᠭᠠᠢ᠄ ᠦᠭᠡᠢ ᠮᠢᠨᠦ ᠬᠦᠦ ᠨᠢᠭᠡ ᠡᠳᠦᠷ ᠢᠩᠭᠢᠭᠡᠳ ᠬᠦᠷᠦᠭᠡᠳ ᠢᠷᠡᠪᠡᠯ ᠶᠠᠭᠠᠬᠢᠨᠠ? ᠭᠡᠵᠦ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠷᠢᠨ ᠭᠠᠵᠠᠷ ᠰᠢᠷᠳᠡᠪᠡ᠃ ᠭᠡᠪᠡᠴᠦ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠳ᠋ᠠᠨᠽᠠᠨ ᠤ᠋ ᠬᠡᠯᠡᠭᠰᠡᠨ ᠦᠭᠡᠰ ᠢ᠋ ᠡᠷᠭᠢᠴᠡᠭᠦᠯᠦᠨ ᠪᠣᠳᠣᠵᠠᠢ᠃ ᠪᠠᠶᠠᠴᠤᠳ ᠵᠠᠷᠤᠴᠠ ᠨᠠᠷ ᠢ᠋ᠶ᠋ᠠᠨ ᠬᠥᠭᠡᠭᠡᠵᠦ ᠶᠠᠪᠤᠭᠤᠯᠳᠠᠭ ᠠ᠋ᠴᠠ ᠪᠢᠰᠢ᠂ ᠨᠣᠶᠠᠳ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠨ ᠬᠥᠭᠡᠭᠡᠨ ᠶᠠᠪᠤᠭᠤᠯᠳᠠᠭ ᠢ᠋ ᠪᠢ ᠲᠣᠭᠣᠯᠤᠭᠠ ᠦᠭᠡᠢ ᠴᠦ᠍ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠨᠡᠪᠡ᠃
— ᠦᠭᠡᠢ ᠬᠦᠦ ᠴᠢ ᠨᠠᠳᠠ ᠳ᠋ᠤ᠌ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡ᠂ ᠲᠡᠨᠳᠡᠬᠢ ᠶ᠋ᠢᠨ ᠨᠣᠶᠠᠨ ᠴᠢᠮᠠᠶ᠋ᠢ ᠨᠡᠭᠡᠷᠡᠨ ᠬᠥᠭᠡᠭᠡᠨ ᠶᠠᠪᠤᠭᠤᠯᠪᠠᠤ?
— ᠲᠡᠢᠮᠦ ᠳᠡ᠂ ᠨᠣᠶᠠᠨ ᠯᠠ ᠶᠠᠪᠤ ᠭᠡᠰᠡᠨ ᠭᠡᠵᠦ ᠳ᠋ᠠᠨᠽᠠᠨ ᠨᠢᠳᠦ ᠴᠠᠪᠴᠢᠯᠠᠨ ᠬᠡᠯᠡᠪᠡ᠃
ᠲᠡᠭᠡᠪᠡᠯ ᠨᠡᠭᠡᠷᠡᠨ ᠲᠡᠢᠨ ᠳᠠᠭᠤᠰᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠠᠪᠠᠭᠠᠢ ᠢᠨᠢᠶᠡᠮᠰᠦᠭᠯᠡᠭᠡᠳ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠢ᠋ᠶ᠋ᠡᠨ ᠨᠡᠮᠡᠨ ᠣᠷᠣᠭᠤᠯᠵᠤ ᠢᠷᠡᠭᠰᠡᠨ ᠡᠪᠡᠰᠦ ᠶ᠋ᠢ ᠤᠭᠲᠤᠨ ᠠᠪᠴᠤ ᠵᠠᠭᠠᠵᠤᠤᠷᠳᠠᠪᠠ᠃
ᠳ᠋ᠠᠨᠽᠠᠨ ᠲᠡᠷᠡ ᠳᠡᠯᠢᠮ ᠳ᠋ᠦ᠍ᠨᠢ ᠠᠪᠠᠭᠠᠢ ᠶ᠋ᠢᠨ ᠪᠠᠢᠳᠠᠯ ᠢ᠋ ᠲᠠᠪᠠᠲᠠᠢ ᠨᠢ ᠠᠷᠭᠠ ᠦᠭᠡᠢ ᠠᠵᠢᠭᠯᠠᠪᠠ᠃ ᠢᠩᠭᠢᠬᠦ ᠳ᠋ᠦ᠍ ᠠᠪᠠᠭᠠᠢ ᠥᠪᠡᠷ ᠦ᠋ᠨ ᠬᠢᠨᠢ ᠡᠬᠡ ᠲᠡᠢ ᠲᠤᠩ ᠠᠳᠠᠯᠢᠬᠠᠨ ᠦᠵᠡᠭᠳᠡᠭᠰᠡᠨ ᠪᠥᠭᠡᠳ ᠲᠡᠭᠦᠨ ᠦ᠌ ᠡᠮᠦᠨᠡ ᠡᠯᠳᠡᠪ ᠬᠤᠳᠠᠯ ᠢ᠋ ᠶᠠᠷᠢᠵᠤ ᠪᠠᠢᠭᠠ ᠪᠠᠨ ᠰᠠᠨᠠᠬᠤ ᠳ᠋ᠤ᠌ ᠨᠢᠭᠤᠷ ᠤᠯᠠᠢᠨ ᠰᠠᠭᠤᠵᠤ ᠪᠠᠢᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠪᠠ᠃
— ᠠ᠋ ᠠᠬᠠᠢᠲᠠᠨ ᠠ᠋! ᠪᠢ ᠶᠠᠪᠤᠶᠠ᠃ ᠪᠠᠶᠠᠷ ᠲᠠᠢ ᠭᠡᠳ ᠪᠣᠰᠬᠤ ᠳ᠋ᠤ᠌ ᠠᠪᠠᠭᠠᠢ᠂
— ᠦᠭᠡᠢ ᠴᠢ ᠰᠠᠭᠤ ᠭᠡᠵᠦ ᠲᠦᠷᠦᠭᠦᠴᠢ ᠶ᠋ᠢᠨ ᠠᠳᠠᠯᠢ ᠪᠣᠰᠤᠨ ᠵᠠᠮ ᠲᠠᠭᠯᠠᠭᠠᠳ᠂ ᠴᠢ ᠮᠠᠨ ᠤ᠋ ᠳ᠋ᠤ᠌ ᠬᠣᠭᠣᠯᠠ ᠢᠳᠡᠬᠦ ᠶᠣᠰᠣᠲᠠᠢ᠂ ᠲᠡᠷᠡ ᠪᠠᠢᠲᠤᠭᠠᠢ ᠬᠣᠨᠣ᠂ ᠬᠡᠳᠦ ᠬᠣᠨᠣᠭᠰᠠᠨ ᠴᠤ᠌ ᠶᠠᠭᠠᠬᠢᠬᠤᠪ᠂ ᠵᠦᠭᠡᠷ ᠠᠮᠠᠷᠠ᠃
ᠡᠨᠡ ᠦᠭᠡᠨ ᠳ᠋ᠦ᠍ ᠳ᠋ᠠᠨᠽᠠᠨ ᠤᠯᠠᠮ ᠢ᠋ᠶ᠋ᠠᠷ ᠠᠶᠤᠨ ᠰᠣᠴᠢᠪᠠ᠃
— ᠵᠦᠭᠡᠷ᠂ ᠪᠢ ᠶᠠᠳᠠᠷᠠᠭᠠ ᠦᠭᠡᠢ ᠶᠠᠪᠤᠭᠠ᠃
— ᠬᠤᠳᠠᠯ ᠠ᠋᠃ ᠵᠢᠰᠦ ᠴᠢᠷᠠᠢ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠡᠮᠦᠰᠦᠭᠰᠡᠨ ᠨᠢ ᠬᠦᠷᠲᠡᠯᠡ ᠢᠩᠭᠢᠵᠦ ᠬᠥᠮᠦᠨ ᠡᠴᠡ ᠭᠠᠳᠠᠭᠤᠷ ᠪᠣᠯᠤᠭᠰᠠᠨ᠂ ᠬᠠᠮᠢᠭᠠ ᠠ᠋ᠴᠠ ᠶᠠᠳᠠᠷᠠᠭᠠ ᠦᠭᠡᠢ ᠪᠠᠢᠬᠤ ᠪᠢᠯᠡ ᠭᠡᠵᠦ ᠬᠣᠢᠰᠢ ᠲᠦᠷᠢᠨ ᠬᠠᠨᠵᠤᠨ ᠳᠡᠭᠡᠷᠡ ᠪᠡᠨ ᠰᠠᠭᠤᠯᠭᠠᠪᠠ᠃
— ᠦᠭᠡᠢ ᠪᠢ ᠡᠵᠢ ᠲᠡᠢ ᠪᠡᠨ ᠠᠭᠤᠯᠵᠠᠬᠤ ᠭᠡᠵᠦ ᠶᠠᠭᠠᠷᠠᠵᠤ ᠶᠠᠪᠤᠭᠠ ᠬᠥᠮᠦᠨ ᠰᠢᠦ ᠭᠡᠵᠦ ᠨᠡᠮᠡᠨ᠂ ᠪᠠᠰᠠ ᠬᠤᠳᠠᠯ ᠬᠡᠯᠡᠬᠦ ᠳ᠋ᠦ᠍᠄
— ᠠ᠋ ᠴᠢ ᠶᠠᠭᠠᠬᠢᠭᠰᠠᠨ ᠰᠠᠢᠨ ᠬᠦᠦ ᠪᠣᠢ? ᠭᠡᠵᠦ ᠨᠢᠳᠦᠨ ᠳ᠋ᠡᠭᠡᠨ ᠨᠢᠯᠪᠤᠰᠤ ᠬᠤᠷᠠᠯᠳᠤᠭᠤᠯᠤᠭᠠᠳ᠂
— ᠡᠬᠡ ᠶ᠋ᠢᠨ ᠲᠥᠯᠥᠭᠡ ᠶᠠᠳᠠᠷᠠᠬᠤ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠶᠠᠪᠤᠭᠠ ᠪᠠᠷ ᠢ᠋ᠶ᠋ᠠᠨ ᠴᠢ ᠰᠠᠢᠨ ᠶᠤᠮ ᠭᠡᠵᠦ ᠨᠢᠳᠦᠨ ᠦ᠌ ᠨᠢᠯᠪᠤᠰᠤ ᠶ᠋ᠢ ᠠᠷᠴᠢᠨᠠ᠃
— ᠠᠯᠢ᠂ ᠴᠢ ᠨᠠᠭᠠᠰᠢ ᠬᠠᠷᠠ᠂ ᠪᠢ ᠴᠢᠮᠠᠶ᠋ᠢ ᠳᠠᠬᠢᠨ ᠨᠢᠭᠡ ᠠᠵᠢᠭᠯᠠᠶᠠ ᠭᠡᠰᠡᠨ ᠳ᠋ᠦ᠍ ᠳ᠋ᠠᠨᠽᠠᠨ ᠠᠷᠭᠠ ᠪᠤᠶᠤ ᠲᠠᠭᠠᠯᠠᠯ ᠢ᠋ ᠨᠢ ᠳᠠᠭᠠᠭᠤᠯᠤᠨ ᠥᠭᠡᠳᠡ ᠡᠴᠡ ᠨᠢ ᠬᠠᠷᠠᠪᠠ᠃ ᠨᠢᠯᠪᠤᠰᠤ ᠴᠡᠢᠯᠡᠭᠡᠨᠡᠭᠰᠡᠨ ᠨᠢᠳᠦ᠂ ᠦᠷᠭᠦᠯᠵᠢᠯᠡᠨ ᠴᠡᠴᠡᠷᠬᠢᠨᠡᠵᠤ ᠪᠠᠢᠭᠠ ᠤᠷᠤᠭᠤᠯ᠂ ᠡᠨᠡ ᠲᠡᠷᠡ ᠨᠢ ᠬᠡᠳᠦᠢ ᠪᠡᠷ ᠪᠠᠶᠠᠷ ᠤ᠋ᠨ ᠪᠣᠯᠪᠠᠴᠤ ᠳ᠋ᠠᠨᠽᠠᠨ ᠳ᠋ᠤ᠌ ᠠᠶᠤᠨ ᠵᠢᠭᠤᠲᠠᠮᠠᠷ ᠦᠵᠡᠭᠳᠡᠪᠡ᠃
— ᠠ᠋ ᠴᠢ ᠶᠣᠰᠣᠲᠠᠢ ᠰᠠᠢᠨ ᠬᠦᠦ ᠪᠠᠢᠨᠠ᠂ ᠡᠵᠢ ᠳ᠋ᠡᠭᠡᠨ ᠶᠠᠭᠠᠷᠠᠵᠤ ᠶᠠᠪᠤᠭᠠ ᠪᠠᠷ ᠢ᠋ᠶ᠋ᠠᠨ ᠯᠠ ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠰᠢᠪᠡᠭᠡᠨᠡᠭᠡᠳ
— ᠭᠡᠲᠡᠯᠡ ᠨᠤᠲᠤᠭ ᠴᠢᠨᠢ ᠬᠣᠯᠠ ᠰᠢᠦ ᠳᠡ᠃ ᠲᠡᠮᠡᠭᠡᠨ ᠵᠢᠩ ᠦ᠋ᠨ ᠬᠥᠮᠦᠰ ᠰᠠᠷᠠ ᠰᠢᠬᠠᠮ ᠶᠠᠪᠤᠳᠠᠭ ᠭᠡᠵᠦ ᠤᠯᠤᠰ ᠤ᠋ᠨ ᠬᠡᠯᠡᠯᠴᠡᠬᠦ ᠶ᠋ᠢ ᠪᠢ ᠲᠤᠭᠤᠯᠤᠭᠰᠠᠨ᠃ ᠡᠢᠮᠦ ᠳ᠋ᠦ᠍ ᠴᠢ ᠪᠢᠲᠡᠭᠡᠢ ᠶᠠᠭᠠᠷᠠ ᠭᠡᠵᠦ ᠶᠣᠰᠣᠲᠠᠢ ᠡᠬᠡ ᠶ᠋ᠢᠨ ᠰᠠᠢᠬᠠᠨ ᠬᠠᠯᠠᠭᠤᠨ ᠠᠮᠢᠰᠬᠤᠯ ᠢ᠋ᠶ᠋ᠠᠷ ᠬᠡᠯᠡᠪᠡ᠃ ᠬᠠᠷᠢᠭᠤ ᠳ᠋ᠤᠨᠢ ᠳ᠋ᠠᠨᠽᠠᠨ᠄ ᠵᠠ ᠭᠡᠯᠡ᠃
ᠠᠪᠠᠭᠠᠢ ᠴᠡᠩᠬᠡᠷ ᠫᠠᠯᠠᠩ ᠲᠠᠢ ᠲᠥᠮᠫᠦᠨ ᠢ᠋ ᠬᠠᠨᠵᠤᠨ ᠳᠣᠣᠷᠠ ᠠ᠋ᠴᠠ ᠭᠠᠷᠭᠠᠨ ᠭᠤᠷᠪᠠᠨ ᠲᠤᠯᠭᠠᠭᠤᠷᠢᠲᠤ ᠲᠠᠯᠪᠢᠭᠤᠷ ᠳᠡᠭᠡᠷᠡ ᠲᠠᠯᠪᠢᠨ ᠤᠰᠤ ᠬᠢᠵᠦ᠂ ᠵᠠ ᠣᠳᠣ ᠭᠠᠷ ᠨᠢᠭᠤᠷ ᠢ᠋ᠶ᠋ᠠᠨ ᠤᠬᠢᠶᠠ ᠭᠡᠳ ᠰᠢᠨᠡ ᠴᠠᠭᠠᠨ ᠠᠯᠴᠢᠭᠤᠷ᠂ ᠴᠡᠴᠡᠭ ᠦ᠋ᠨ ᠦᠨᠦᠷ ᠲᠡᠢ ᠰᠠᠪᠤᠩ ᠭᠠᠷᠭᠠᠵᠤ ᠥᠭᠪᠡ᠃ ᠳ᠋ᠠᠨᠽᠠᠨ ᠠᠪᠠᠭᠠᠢ ᠶ᠋ᠢᠨ ᠡᠷᠬᠡᠨ ᠳ᠋ᠦ᠍ ᠪᠦᠷᠢᠮᠦᠰᠦᠨ ᠣᠷᠣᠭᠰᠠᠨ ᠮᠡᠲᠦ ᠦᠭᠡ ᠳᠠᠭᠤᠨ ᠦᠭᠡᠢ ᠪᠣᠰᠤᠨ ᠰᠠᠷᠯᠤᠭ ᠤ᠋ᠨ ᠬᠢ ᠰᠢᠭ ᠪᠣᠯᠤᠭᠰᠠᠨ ᠲᠣᠯᠣᠭᠠᠢ ᠪᠠᠨ ᠬᠦᠷᠲᠡᠯᠡ ᠰᠠᠪᠤᠩᠳᠠᠨ ᠤᠬᠢᠶᠠᠵᠤ ᠡᠬᠢᠯᠡᠪᠡ᠃ ᠠᠪᠠᠭᠠᠢ ᠭᠣᠯᠤᠵᠠ᠂ ᠭᠠᠮᠪᠠᠨᠵᠠ ᠬᠣᠶᠠᠷ ᠢ᠋ᠶ᠋ᠠᠨ ᠡᠮᠦᠨᠡ ᠪᠡᠨ ᠲᠠᠯᠪᠢᠨ ᠬᠣᠭᠣᠯᠠ ᠬᠢᠬᠦ ᠠᠵᠢᠯ ᠳ᠋ᠠᠭᠠᠨ ᠣᠷᠣᠪᠠ᠃ ᠳ᠋ᠠᠨᠽᠠᠨ ᠤ᠋ ᠣᠷᠣᠨ ᠨᠤᠲᠤᠭ ᠤ᠋ᠨ ᠪᠠᠢᠳᠠᠯ᠂ ᠠᠷᠤ ᠭᠡᠷ ᠦ᠋ᠨ ᠬᠢᠨᠢ ᠠᠵᠤ ᠠᠮᠢᠳᠤᠷᠠᠯᠭᠠ ᠠ᠋ᠴᠠ ᠨᠢ ᠠᠰᠠᠭᠤᠨ ᠰᠣᠨᠢᠷᠬᠠᠬᠤ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠨᠡ ᠨᠢ ᠳ᠋ᠠᠨᠽᠡᠨ ᠦ᠌ ᠰᠡᠳᠬᠢᠯ ᠢ᠋ ᠠᠮᠤᠷ ᠲᠠᠢᠪᠤᠩ ᠪᠣᠯᠭᠠᠪᠠ᠃ ᠴᠠᠭᠠᠰᠢ ᠶᠠᠷᠢᠯᠴᠠᠬᠤ ᠳᠣᠳᠣᠮ ᠢ᠋ᠶ᠋ᠠᠨ ᠠᠪᠠᠭᠠᠢ ᠶ᠋ᠢᠨ ᠦᠷᠡ ᠪᠡᠨ ᠭᠡᠰᠡᠨ ᠮᠥᠷᠥᠭᠡᠳᠦᠯ᠂ ᠥᠭᠡᠷᠡ ᠪᠤᠰᠤᠳ ᠢ᠋ ᠡᠨᠡᠷᠢᠨ ᠬᠠᠢᠷᠠᠯᠠᠵᠤ ᠪᠣᠢ ᠠᠷᠢᠭᠤᠨ ᠰᠡᠳᠬᠢᠯ ᠢ᠋ ᠬᠦᠨᠳᠦᠳᠬᠡᠨ ᠦᠵᠡᠬᠦ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠦᠭᠡᠢ ᠪᠣᠯᠵᠠᠢ᠃ ᠡᠢᠮᠦ ᠬᠥᠮᠦᠨ ᠢ᠋ ᠪᠢ ᠶᠠᠭᠤ ᠪᠠᠷ ᠢ᠋ᠶ᠋ᠠᠨ ᠪᠠᠶᠠᠰᠬᠠᠬᠤ ᠪᠢᠯᠡ? ᠭᠡᠰᠡᠨ ᠳ᠋ᠡᠭᠡᠨ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠤ᠋ ᠪᠠᠨ ᠡᠪᠦᠷ ᠲᠦ᠍ ᠭᠠᠷ ᠢ᠋ᠶ᠋ᠠᠨ ᠬᠢᠨ ᠮᠥᠩᠭᠥᠨ ᠶᠠᠩᠴᠢᠶᠠᠨ ᠢ᠋ᠶ᠋ᠠᠨ ᠲᠡᠮᠲᠡᠷᠢᠨ ᠪᠠᠷᠢᠭᠰᠠᠨ ᠢ᠋ᠶ᠋ᠠᠨ ᠡᠭᠦᠨ ᠡᠴᠡ ᠪᠡᠨ ᠥᠭᠭᠦᠭᠰᠡᠨ ᠳ᠋ᠦ᠍ ᠣᠷᠣᠪᠠᠯ ᠪᠤᠤᠷᠠ ᠪᠠᠨ ᠥᠭᠪᠡᠯ ᠶᠠᠭᠠᠬᠢᠭᠰᠠᠨ ᠶᠤᠮ ᠪᠣᠢ? ᠲᠡᠷᠡ ᠮᠠᠨᠢ ᠲᠡᠷᠡ ᠲᠡᠢ᠂ ᠲᠡᠷᠡ ᠦᠭᠡᠢ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ ᠰᠢᠦ ᠳᠡ ᠭᠡᠵᠦ ᠪᠣᠳᠣᠪᠠ᠃
— ᠪᠢ ᠨᠢᠭᠡ ᠲᠡᠮᠡᠭᠡ ᠲᠡᠢ ᠶᠠᠪᠤᠭᠠ ᠬᠥᠮᠦᠨ᠂ ᠲᠡᠭᠦᠨ ᠢ᠋ᠶ᠋ᠡᠨ ᠥᠭᠪᠡᠯ ᠲᠠᠨ ᠤ᠋ ᠳ᠋ᠤ᠌ ᠬᠡᠷᠡᠭ ᠪᠣᠯᠬᠤ ᠤᠤ? ᠭᠡᠪᠡ᠃
ᠠᠪᠠᠭᠠᠢ ᠡᠨᠡ ᠦᠭᠡ ᠶ᠋ᠢ ᠲᠣᠳᠣᠷᠬᠠᠢ ᠲᠤᠭᠤᠯᠤᠭᠰᠠᠨ ᠪᠣᠯᠪᠠᠴᠤ᠂ ᠴᠢᠬᠢᠨ ᠳ᠋ᠡᠭᠡᠨ ᠢᠲᠡᠭᠡᠯ ᠦᠭᠡᠢ ᠥᠨᠳᠡᠢᠵᠦ᠂
— ᠶᠠᠭᠤ? ᠲᠡᠮᠡᠭᠡ ᠭᠡᠨᠡ?
— ᠲᠡᠢᠮᠦ ᠠ᠋᠂ ᠲᠡᠮᠡᠭᠡ᠃ ᠣᠳᠣᠬᠠᠨ ᠳ᠋ᠠᠭᠠᠨ ᠶᠠᠳᠠᠷᠠᠯ ᠤ᠋ᠨ ᠲᠤᠢᠯ ᠳ᠋ᠤ᠌ ᠭᠦᠷᠦᠨ ᠶᠠᠪᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠣᠯᠪᠠᠴᠤ ᠤᠭ ᠲᠡᠮᠡᠭᠡ ᠡᠷᠡᠭᠦᠯ᠂ ᠪᠢᠷᠠ ᠴᠢᠳᠠᠯ ᠮᠠᠰᠢ ᠶᠡᠬᠡ ᠰᠠᠢᠨ ᠲᠡᠮᠡᠭᠡ᠃
ᠲᠡᠭᠡᠪᠡᠯ ᠴᠢ ᠲᠡᠭᠦᠨ ᠢ᠋ᠶ᠋ᠡᠨ ᠪᠤᠰᠤᠳ ᠲᠤ ᠥᠭᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠡᠳᠦᠨ ᠬᠣᠨᠣᠭ ᠮᠠᠨ ᠤ᠋ ᠳ᠋ᠤ᠌ ᠪᠠᠢᠨ ᠲᠡᠩᠬᠡᠭᠡ ᠣᠷᠣᠭᠤᠯᠵᠤ ᠠᠪᠤᠭᠠᠳ ᠶᠠᠪᠤᠪᠠᠯ ᠳᠡᠭᠡᠷᠡ ᠪᠢᠰᠢ ᠤᠤ?
— ᠦᠭᠡᠢ᠂ ᠡᠵᠢ ᠮᠢᠨᠢ᠂ ᠲᠡᠭᠦᠨ ᠦ᠌ ᠲᠡᠩᠬᠡᠭᠡ ᠣᠷᠣᠬᠤ ᠶ᠋ᠢ ᠬᠦᠯᠢᠶᠡᠪᠡᠯ ᠪᠢ ᠲᠠᠨ ᠤ᠋ ᠳ᠋ᠤ᠌ ᠳᠣᠣᠷᠠ ᠬᠠᠶᠠᠭᠠᠳ ᠬᠣᠶᠠᠷ ᠰᠠᠷᠠ ᠪᠣᠯᠬᠤ ᠰᠢᠦ ᠳᠡ᠃
ᠠᠪᠠᠭᠠᠢ ᠥᠪᠡᠷ ᠢ᠋ ᠪᠡᠨ ᠡᠵᠢ ᠭᠡᠵᠦ ᠳᠠᠭᠤᠳᠠᠭᠰᠠᠨ ᠳ᠋ᠤ᠌ ᠪᠠᠶᠠᠷᠯᠠᠨ᠂《ᠬᠦᠦ ᠮᠢᠨᠢ》 ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠭᠡᠳ᠄
— ᠮᠠᠨ ᠤ᠋ ᠳ᠋ᠤ᠌ ᠬᠣᠶᠠᠷ ᠰᠠᠷᠠ ᠴᠢᠨᠢ ᠬᠠᠮᠢᠶᠠ ᠦᠭᠡᠢ᠂ ᠭᠠᠭᠴᠠᠬᠠᠨ ᠴᠢᠮᠠᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠭᠠ ᠡᠬᠡ ᠴᠢᠨᠢ ᠯᠡ ᠬᠡᠴᠡᠭᠦᠦ ᠪᠠᠢᠨᠠ ᠪᠠᠢᠬᠤ ᠳᠠ ᠭᠡᠳ ᠬᠱᠡᠨ ᠵᠠᠭᠤᠷᠠ ᠵᠣᠪᠠᠨᠢᠬᠤ ᠴᠢᠷᠠᠢ ᠭᠠᠷᠠᠬᠠᠨ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠄
— ᠲᠡᠭᠡᠭᠡᠳ ᠲᠡᠷᠡ ᠴᠢᠨᠢ ᠣᠳᠣ ᠬᠠᠮᠢᠭᠠ ᠪᠠᠢᠭᠠ ᠲᠡᠮᠡᠭᠡ ᠪᠣᠢ?
— ᠣᠢᠷᠠᠬᠠᠨ᠂ ᠪᠢ ᠣᠷᠬᠢᠭᠠᠳ ᠢᠷᠡᠭᠰᠡᠨ᠃
— ᠲᠡᠭᠦᠨ ᠢ᠋ ᠴᠢᠨᠢ ᠮᠠᠨ ᠤ᠋ ᠳᠠᠩᠵᠢᠶᠠᠳ ᠯᠠᠪ ᠰᠠᠢᠨ ᠪᠣᠯᠭᠠᠵᠤ ᠴᠢᠳᠠᠨᠠ ᠪᠣᠢ ᠭᠡᠳ ᠠᠪᠠᠭᠠᠢ ᠳ᠋ᠢᠵᠠ ᠲᠠᠪᠠᠭ᠂ ᠮᠣᠳᠣᠨ ᠰᠠᠪᠬᠠ ᠵᠡᠷᠭᠡ ᠶ᠋ᠢ ᠰᠢᠷᠡᠭᠡᠨ ᠳᠡᠭᠡᠷᠡ ᠠᠪᠴᠢᠷᠠᠨ ᠲᠠᠯᠪᠢᠪᠠ᠃
ᠬᠡᠦᠬᠡᠳ ᠦ᠋ᠳ ᠪᠠᠢᠰᠢᠩ ᠤ᠋ᠨ ᠢ᠋ᠶ᠋ᠠᠨ ᠪᠤᠯᠤᠩ ᠳ᠋ᠤ᠌ ᠲᠣᠮᠣᠭᠠᠲᠠᠢ ᠵᠣᠭᠰᠣᠨ᠂ ᠦᠭᠡ ᠶᠠᠷᠢᠶᠠ ᠴᠢᠩᠨᠠᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ᠂ ᠯᠤᠤ ᠲᠤᠤ᠂ ᠯᠤᠤ ᠲᠤᠤ! ᠭᠡᠵᠦ ᠦᠭᠦᠯᠡᠯᠳᠦᠨ᠂ ᠲᠣᠮᠣ ᠨᠢ ᠪᠠᠭᠠ ᠶ᠋ᠢ ᠪᠡᠨ᠂《ᠤᠬᠢᠯᠠᠳᠠᠭ ᠬᠡᠦᠬᠡᠳ ᠢ᠋ ᠬᠠᠵᠠᠳᠠᠭ᠂ ᠠᠭᠤᠯᠠ ᠰᠢᠭ᠋ ᠲᠣᠮᠣ ᠠᠮᠢᠲᠠᠨ ᠪᠠᠢᠳᠠᠭ ᠶᠤᠮ》 ᠭᠡᠵᠦ ᠠᠶᠤᠯᠭᠠᠨ ᠲᠠᠢᠯᠪᠤᠷᠢᠯᠠᠵᠤ ᠪᠠᠢᠯᠠ᠃ ᠠᠪᠠᠭᠠᠢ ᠳ᠋ᠠᠨᠽᠠᠨ ᠤ᠋ ᠡᠮᠦᠨᠡ ᠲᠠᠬᠢᠶᠠᠨ ᠤ᠋ ᠥᠨᠳᠡᠭᠡ ᠲᠡᠢ ᠱᠥᠯᠥ᠂ ᠬᠠᠭᠤᠷᠤᠭᠰᠠᠨ ᠨᠣᠭᠣᠭᠠ᠂ ᠬᠠᠭᠤᠷᠠᠢ ᠬᠠᠭᠠᠷᠢᠭᠰᠠᠨ ᠪᠢᠩ ᠲᠠᠯᠪᠢᠵᠤ《ᠢᠳᠡ᠂ ᠢᠳᠡ》 ᠭᠡᠵᠦ ᠱᠠᠭᠠᠷᠳᠠᠨᠠ᠃
《ᠢᠳᠡ᠂ ᠢᠳᠡ》 ᠭᠡᠵᠦ ᠱᠠᠭᠠᠷᠳᠠᠬᠤ ᠨᠢ ᠡᠨᠡ ᠭᠠᠵᠠᠷ ᠤ᠋ᠨ ᠶᠣᠰᠣ᠂《ᠢᠳᠡ᠂ ᠢᠳᠡ》 ᠭᠡᠵᠦ ᠪᠠᠢᠵᠤ ᠢᠳᠡᠭᠦᠯᠵᠦ ᠣᠷᠬᠢᠭᠠᠳ ᠡᠴᠦᠰ ᠲᠦ᠋ᠨᠢ《ᠢᠳᠡ᠂ ᠢᠳᠡ》 ᠭᠡᠬᠦ ᠨᠢ ᠬᠥᠮᠦᠨ ᠦ᠌ ᠶᠣᠰᠣ᠂ ᠢᠲᠡᠴᠢᠬᠡᠳ ᠶᠠᠪᠤᠬᠤ ᠪᠣᠯ ᠮᠠᠨ ᠤ᠋ ᠶᠣᠰᠣ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠳᠠᠩᠵᠢᠶᠠᠳ ᠨᠠᠷ ᠤ᠋ᠨ ᠵᠦᠢᠷ ᠦᠭᠡ ᠪᠠᠢᠳᠠᠭ ᠢ᠋ ᠮᠣᠩᠭᠣᠯ ᠬᠥᠮᠦᠨ ᠮᠡᠳᠡᠭᠦᠰᠢᠲᠡᠢ ᠰᠢᠦ ᠬᠡᠦᠬᠡᠳ ᠦ᠋ᠳ ᠠ᠋ ᠭᠡᠵᠦ ᠳᠡᠭᠡᠷᠡ ᠴᠠᠭ ᠲᠤ ᠬᠦᠷᠡᠯ ᠦ᠋ᠨ ᠬᠡᠯᠡᠵᠦ ᠪᠠᠢᠭᠰᠠᠨ ᠢ᠋ ᠳ᠋ᠠᠨᠽᠠᠨ ᠰᠠᠨᠠᠪᠠ᠃ ᠭᠡᠪᠡᠴᠦ ᠡᠨᠡ ᠠᠪᠠᠭᠠᠢ ᠶ᠋ᠢᠨ《ᠢᠳᠡ᠂ ᠢᠳᠡ》 ᠭᠡᠬᠦ ᠨᠢ ᠦᠨᠡᠨ ᠰᠠᠨᠠᠭᠠᠨ ᠠ᠋ᠴᠠ ᠪᠠᠨ ᠪᠠᠢᠯᠠ᠃ ᠬᠡᠷᠪᠡ ᠢᠳᠡᠬᠦ ᠦᠭᠡᠢ ᠪᠣᠯ ᠠᠪᠠᠭᠠᠢ ᠭᠤᠨᠢᠨ ᠭᠤᠲᠤᠷᠠᠬᠤ ᠨᠢ ᠢᠯᠡᠳᠲᠡ ᠪᠠᠢᠬᠤ ᠲᠤᠯᠠ᠂ ᠳ᠋ᠠᠨᠽᠠᠨ ᠡᠷᠡᠭᠡ ᠴᠡᠭᠡᠷ ᠦᠭᠡᠢ ᠢᠳᠡᠬᠦ ᠪᠣᠯᠪᠠ᠃
ᠭᠤᠷᠪᠠᠨ ᠬᠡᠦᠬᠡᠳ ᠳ᠋ᠠᠨᠽᠠᠨ ᠳ᠋ᠤ᠌ ᠣᠢᠷᠠᠲᠤᠨ ᠢᠷᠡᠭᠡᠳ ᠰᠢᠷᠡᠭᠡ ᠤᠷᠤᠭᠤ ᠰᠢᠷᠲᠡᠨ ᠰᠢᠯᠦᠰᠦ ᠪᠡᠨ ᠵᠠᠯᠭᠢᠯᠠᠨᠠ᠂ ᠠᠪᠠᠭᠠᠢ ᠲᠡᠳᠡᠨ ᠢ᠋ᠶ᠋ᠡᠨ ᠬᠠᠷᠠᠭᠠᠳ᠄
— ᠵᠣᠴᠢᠳ ᠤ᠋ᠨ ᠬᠣᠭᠣᠯᠠ ᠢᠳᠡᠬᠦ ᠤᠷᠤᠭᠤ ᠬᠡᠦᠬᠡᠳ ᠬᠠᠷᠠᠪᠠᠯ ᠬᠡᠦᠬᠡᠳ ᠦ᠋ᠨ ᠨᠢᠳᠦ ᠡᠪᠡᠳᠳᠡᠭ ᠭᠡᠳᠡᠭ ᠪᠢᠯᠡ᠂ ᠲᠠ ᠨᠠᠷ ᠮᠢᠨᠢ ᠵᠦᠭᠡᠷ ᠭᠠᠷᠴᠠᠭᠠᠵᠤ ᠦᠵᠡ ᠭᠡᠳ ᠨᠢᠭᠡ ᠨᠢᠭᠡᠨ ᠲᠠᠩᠵᠣᠣᠷ ᠪᠠᠷᠢᠭᠤᠯᠤᠨ ᠬᠥᠭᠡᠭᠡᠨ ᠭᠠᠷᠭᠠᠪᠠ᠃ ᠬᠡᠦᠬᠡᠳ ᠦ᠋ᠳ ᠦ᠋ᠨ ᠭᠠᠷᠤᠮᠠᠭᠴᠠ ᠳ᠋ᠠᠨᠽᠠᠨ ᠤ᠋ ᠰᠡᠳᠬᠢᠯ ᠴᠢᠯᠥᠭᠡ ᠲᠡᠢ ᠪᠣᠯᠤᠯᠠ᠃ ᠬᠣᠭᠣᠯᠠᠨ ᠤ᠋ ᠬᠣᠯᠢᠴᠠᠭᠠᠨ ᠳ᠋ᠤ᠌ ᠮᠢᠬᠠ ᠦᠭᠡᠢ ᠪᠠᠢᠬᠤ ᠠᠲᠠᠯᠠ ᠪᠠᠨ ᠮᠢᠬᠠ ᠲᠠᠢ ᠠ᠋ᠴᠠ ᠢᠯᠭᠠᠭᠠ ᠦᠭᠡᠢ ᠰᠠᠢᠬᠠᠨ ᠠᠮᠲᠠ ᠪᠣᠢ ᠶ᠋ᠢ ᠭᠠᠢᠬᠠᠨᠠ᠃ ᠢᠳᠡ ᠢᠳᠡᠭᠰᠡᠭᠡᠷ ᠳ᠋ᠠᠨᠽᠠᠨ ᠤᠷᠤᠭᠰᠢ ᠪᠥᠬᠥᠢᠬᠦ ᠳ᠋ᠦ᠍ ᠭᠡᠳᠡᠰᠦ ᠲᠤᠯᠭᠠᠷᠠᠨ ᠢᠨᠴᠠᠭᠯᠠᠬᠤ ᠪᠣᠯᠬᠤ ᠳ᠋ᠤ᠌ ᠰᠠᠶᠢ ᠴᠠᠳᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠨ ᠰᠠᠪᠬᠠ ᠪᠠᠨ ᠬᠣᠢᠰᠢ ᠲᠠᠯᠪᠢᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠭᠠᠲᠤᠷ