ᠠᠯᠠᠭ ᠪᠠᠮᠪᠤᠤAlag bambuuАлаг бамбуу
115ᠠᠯᠠᠭ ᠪᠠᠮᠪᠤᠤ
ᠲᠤᠰ ᠡᠮ ᠪᠣᠯ ᠳ᠋ᠢᠳᠠᠩ ᠴᠣᠬᠣ ᠶ᠋ᠢᠨ ᠢᠵᠠᠭᠤᠷ ᠤ᠋ᠨ ᠰᠢᠪᠠᠵᠢ ᠪᠣᠯᠬᠤ ᠵᠢᠵᠢᠭ ᠠᠯᠠᠭ ᠪᠠᠮᠪᠤᠤ ᠪᠤᠶᠤ ᠡᠮᠦᠨᠡᠲᠦ ᠶ᠋ᠢᠨ ᠲᠤᠷᠤᠭ ᠪᠠᠮᠪᠤᠤ ᠶ᠋ᠢᠨ ᠬᠠᠲᠠᠭᠠᠭᠰᠠᠨ ᠪᠦᠬᠦᠯᠢ ᠪᠡᠶᠡ ᠮᠥᠨ᠃ ᠪᠠᠰᠠ ᠵᠠᠩᠷᠾᠠ᠂ ᠵᠠᠩᠥᠠ ᠭᠡᠳᠡᠭ᠃
[ ᠤᠤᠯ ᠠᠮᠢᠲᠠᠨ]1. ᠵᠢᠵᠢᠭ ᠠᠯᠠᠭ ᠪᠠᠮᠪᠤᠤ ᠪᠡᠶᠡ ᠭᠦᠢᠴᠡᠭᠰᠡᠨ ᠬᠣᠷᠣᠬᠠᠢ ᠶ᠋ᠢᠨ ᠪᠡᠶᠡ ᠶ᠋ᠢᠨ ᠤᠷᠲᠤ ᠨᠢ10~15mm᠂ ᠬᠠᠷᠠ ᠥᠩᠭᠡ ᠲᠡᠢ᠂ ᠤᠷᠲᠤ ᠦᠰᠦ ᠲᠡᠢ᠃ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠡᠮᠲᠡᠷᠬᠡᠢ ᠳᠤᠰᠤᠯ ᠲᠠᠢ᠂ ᠪᠥᠭᠡᠷᠡᠨ ᠬᠡᠯᠪᠡᠷᠢᠲᠦ ᠨᠡᠢᠯᠡᠮᠡᠯ ᠨᠢᠳᠦ ᠲᠡᠢ᠂ ᠲᠡᠮᠲᠡᠷᠢᠭᠦᠯ ᠦ᠋ᠨ ᠰᠡᠭᠦᠯ ᠦ᠋ᠨ ᠬᠡᠳᠦᠨ ᠦᠶᠡ ᠨᠢ ᠲᠣᠮᠣᠷᠠᠵᠤ᠂ ᠤᠭ ᠤ᠋ᠨ ᠬᠡᠳᠦᠨ ᠦᠶᠡ ᠨᠢ ᠵᠢᠵᠢᠭ᠂11 ᠦᠶᠡ ᠲᠡᠢ᠃ ᠲᠤᠭᠲᠤᠢᠯᠢᠭ ᠳᠠᠯᠠᠪᠴᠢ ᠨᠢ ᠬᠥᠨᠳᠡᠯᠡᠨ ᠰᠢᠷᠠ ᠪᠦᠰᠡ ᠲᠡᠢ᠂ ᠮᠥᠷᠦᠨ ᠦ᠌ ᠬᠡᠰᠡᠭ ᠦ᠋ᠨ ᠣᠶᠣᠳᠠᠯ ᠤ᠋ᠨ ᠤᠭ ᠤ᠋ᠨ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠲᠠᠯᠠ ᠳ᠋ᠤ᠌ ᠲᠤᠰ ᠪᠦᠷᠢ ᠨᠢᠭᠡ ᠡᠷᠢᠶᠡᠨ ᠠᠷᠲᠠᠢ᠂ ᠭᠣᠣᠯ ᠠ᠋ᠴᠠ ᠵᠢᠭᠠᠬᠠᠨ ᠡᠮᠦᠨᠡ ᠪᠣᠯᠤᠨ ᠬᠣᠢᠨᠠ ᠨᠢ ᠠᠳᠠᠯᠢ ᠬᠥᠨᠳᠡᠯᠡᠨ ᠪᠦᠰᠡ ᠲᠡᠢ᠂ᠲᠤᠰ ᠪᠦᠰᠡ ᠶ᠋ᠢᠨ ᠡᠮᠦᠨᠡ ᠬᠣᠢᠨᠠ ᠬᠥᠪᠡᠭᠡ ᠨᠢ ᠳᠣᠯᠭᠢᠶᠠᠯᠢᠭ᠂ ᠲᠤᠭᠲᠤᠢᠯᠢᠭ ᠳᠠᠯᠠᠪᠴᠢ ᠶ᠋ᠢᠨ ᠬᠠᠷᠠ ᠥᠩᠭᠡ ᠲᠡᠢ ᠬᠡᠰᠡᠭ ᠲᠤᠨᠢ ᠳᠤᠰᠤᠯ ᠨᠢ ᠨᠡᠩ ᠢᠬᠴᠤ᠂ ᠰᠢᠷᠠ ᠬᠡᠰᠡᠭ ᠦ᠋ᠨ ᠳᠤᠰᠤᠯ ᠨᠢ ᠪᠦᠳᠦᠭᠦᠨ᠃ ᠪᠡᠶᠡ ᠬᠡᠪᠡᠯᠢ ᠶ᠋ᠢᠨ ᠬᠡᠰᠡᠭ ᠪᠠ ᠬᠥᠯ ᠳ᠋ᠦ᠍ᠨᠢ ᠬᠠᠷᠠ ᠤᠷᠲᠤ ᠨᠣᠣᠯᠣᠭᠤᠷ ᠦᠰᠦ ᠲᠡᠢ᠃
2. ᠡᠮᠦᠨᠡᠲᠦ ᠶ᠋ᠢᠨ ᠲᠤᠷᠤᠭ ᠠᠯᠠᠭ ᠪᠠᠮᠪᠤᠤ ᠪᠡᠶᠡ ᠶ᠋ᠢᠨ ᠤᠷᠲᠤ ᠨᠢ15~30mm᠂ ᠬᠠᠷᠠ ᠥᠩᠭᠡ ᠲᠡᠢ ᠂ ᠬᠠᠷᠠ ᠨᠣᠣᠯᠣᠭᠤᠷ ᠦᠰᠦ ᠲᠡᠢ᠃ ᠲᠣᠯᠣᠭᠠᠢ ᠶ᠋ᠢᠨ ᠬᠡᠰᠡᠭ ᠲᠦ᠋ᠨᠢ ᠪᠦᠳᠦᠭᠦᠨ ᠢᠬᠴᠤ ᠡᠮᠲᠡᠷᠬᠡᠢ ᠳᠤᠰᠤᠯ ᠲᠠᠢ᠂ ᠲᠣᠮᠣ ᠨᠡᠢᠯᠡᠮᠡᠯ ᠨᠢᠳᠦ ᠲᠡᠢ᠂ ᠪᠥᠭᠡᠷᠡᠯᠢᠭ ᠬᠡᠯᠪᠡᠷᠢ ᠲᠡᠢ᠂ ᠲᠡᠮᠲᠡᠷᠢᠭᠦᠯ ᠨᠢ ᠤᠲᠠᠰᠤᠯᠢᠭ᠂11 ᠦᠶᠡ ᠲᠡᠢ᠂ ᠲᠡᠮᠲᠡᠷᠢᠭᠦᠯ ᠦ᠋ᠨ ᠬᠠᠮᠤᠭ ᠰᠡᠭᠦᠯᠴᠢ ᠶ᠋ᠢᠨ ᠦᠶᠡ ᠨᠢ10 ᠳ᠋ᠤᠭᠠᠷ ᠦᠶᠡ ᠡᠴᠡ ᠪᠡᠨ ᠮᠡᠳᠡᠭᠳᠡᠮᠡ ᠨᠠᠷᠢᠨ᠃ ᠲᠤᠭᠲᠤᠢᠯᠢᠭ ᠵᠢᠭᠦᠷ ᠦ᠋ᠨ ᠦᠵᠦᠭᠦᠷ ᠨᠢ ᠤᠭ ᠠ᠋ᠴᠠ ᠪᠠᠨ ᠥᠷᠭᠡᠨ᠂ ᠰᠠᠭᠤᠷᠢ ᠥᠩᠭᠡ ᠨᠢ ᠬᠠᠷᠠ᠂ ᠵᠢᠭᠦᠷ ᠪᠦᠬᠦᠨ ᠦ᠌ ᠤᠭ ᠲᠤᠨᠢ ᠲᠤᠰ ᠪᠦᠷᠢ2 ᠲᠣᠮᠣ ᠰᠢᠷᠠ ᠴᠣᠬᠣᠷ ᠲᠠᠢ᠃ ᠵᠢᠭᠦᠷ ᠦ᠋ᠨ ᠭᠣᠣᠯ ᠠ᠋ᠴᠠ ᠡᠮᠦᠨᠡ ᠬᠣᠢᠨᠠ ᠲᠤᠰ ᠪᠦᠷᠢ ᠨᠢᠭᠡ ᠰᠢᠷᠠ ᠥᠩᠭᠡᠲᠦ ᠳᠣᠯᠭᠢᠶᠠᠯᠢᠭ ᠬᠥᠨᠳᠡᠯᠡᠨ ᠪᠦᠰᠡ ᠲᠡᠢ᠃ ᠬᠥᠯ ᠳᠡᠭᠡᠷᠡ ᠨᠢ ᠬᠠᠷᠠ ᠤᠷᠲᠤ ᠨᠣᠣᠯᠣᠭᠤᠷ ᠦᠰᠦ ᠲᠡᠢ᠂ ᠡᠮᠦᠨᠡ ᠬᠥᠯ ᠂ᠳᠤᠮᠳᠠ ᠬᠥᠯ ᠦ᠋ᠨ ᠥᠯᠮᠡᠢ ᠨᠢ4 ᠦᠶᠡ ᠲᠡᠢ᠂ ᠬᠣᠢᠨᠠ ᠬᠥᠯ ᠦ᠋ᠨ ᠥᠯᠮᠡᠢ ᠨᠢ4 ᠦᠶᠡ ᠲᠡᠢ᠃ ᠬᠡᠪᠡᠯᠢ ᠨᠢ ᠮᠥᠨ ᠴᠦ᠍ ᠬᠠᠷᠠ ᠥᠩᠭᠡ ᠲᠡᠢ᠂ ᠤᠷᠲᠤ ᠨᠣᠣᠯᠣᠭᠤᠷ ᠦᠰᠦ ᠲᠡᠢ᠃
[ ᠠᠮᠢᠳᠤᠷᠠᠬᠤ ᠣᠷᠴᠢᠨ ᠬᠢᠭᠡᠳ ᠲᠠᠷᠬᠠᠴᠠ] ᠬᠣᠶᠠᠷ ᠵᠦᠢᠯ ᠦ᠋ᠨ ᠰᠢᠪᠡᠵᠢ ᠶ᠋ᠢᠨ ᠠᠮᠢᠳᠤᠷᠠᠯ ᠤ᠋ᠨ ᠳᠠᠳᠬᠠᠯ ᠬᠢᠭᠡᠳ ᠲᠠᠷᠬᠠᠴᠠ ᠨᠢ ᠦᠨᠳᠦᠰᠦᠨ ᠳ᠋ᠡᠭᠡᠨ ᠠᠳᠠᠯᠢ᠃ ᠣᠯᠠᠩᠬᠢ ᠳ᠋ᠠᠭᠠᠨ ᠰᠦᠷᠦᠭᠯᠡᠵᠦ᠂ ᠪᠤᠷᠴᠠᠭ ᠤ᠋ᠨ ᠴᠡᠴᠡᠭ᠂ ᠨᠠᠪᠴᠢ᠂ ᠯᠤᠬᠠᠱᠧᠩ᠂ ᠬᠠᠰᠢ ᠶ᠋ᠢᠨ ᠨᠠᠪᠴᠢ ᠪᠣᠯᠤᠨ ᠬᠥᠪᠥᠩ ᠦ᠋ᠨ ᠨᠠᠬᠢᠶᠠ᠂ ᠨᠠᠪᠴᠢ᠂ ᠴᠡᠴᠡᠭ ᠵᠡᠷᠭᠡ ᠪᠡᠷ ᠢᠳᠡᠰᠢᠯᠡᠳᠡᠭ᠃ ᠮᠠᠨ ᠤ᠋ ᠤᠯᠤᠰ ᠤ᠋ᠨ ᠣᠯᠠᠩᠬᠢ ᠭᠠᠵᠠᠷ ᠣᠷᠣᠨ ᠳ᠋ᠤ᠌ ᠲᠠᠷᠬᠠᠴᠠ ᠲᠠᠢ᠃
[ ᠡᠳ᠋ᠰᠢᠭᠦᠯᠦᠨ ᠪᠣᠯᠪᠠᠰᠤᠷᠠᠭᠤᠯᠬᠤ]7~8 ᠳ᠋ᠤᠭᠠᠷ ᠰᠠᠷᠠ ᠳ᠋ᠤ᠌ ᠰᠢᠭᠦᠳᠡᠷᠢ ᠡᠭᠰᠢᠭᠡᠳᠦᠢ ᠦᠶᠡ ᠳ᠋ᠦ᠍ ᠪᠠᠷᠢᠵᠤ᠂ ᠪᠥᠰ ᠤᠭᠤᠲᠠ ᠳ᠋ᠤ᠌ ᠬᠢᠵᠦ᠂ ᠪᠤᠴᠠᠯᠤᠭᠰᠠᠨ ᠤᠰᠤ ᠪᠠᠷ ᠲᠠᠩᠨᠠᠨ ᠠᠯᠠᠭᠠᠳ ᠨᠠᠷᠠᠨ ᠳ᠋ᠤ᠌ ᠬᠠᠲᠠᠭᠠᠵᠤ ᠬᠡᠷᠡᠭᠯᠡᠬᠦ ᠳ᠋ᠡᠭᠡᠨ ᠨᠣᠮᠣᠬᠠᠳᠬᠠᠨᠠ᠃
[ ᠠᠮᠲᠠ᠂ ᠴᠢᠨᠠᠷ᠂ ᠡᠷᠳᠡᠮ] ᠭᠠᠰᠢᠭᠤᠨ᠂ ᠭᠤᠱᠤᠭᠤᠨ ᠠᠮᠲᠠ ᠲᠠᠢ ;ᠲᠡᠭᠰᠢ ᠴᠢᠨᠠᠷ ᠲᠠᠢ ; ᠶᠡᠬᠡ ᠬᠣᠣᠷ ᠲᠠᠢ᠃
[ ᠴᠢᠳᠠᠯ ᠪᠠ ᠭᠣᠣᠯᠳᠠᠭᠤ ᠵᠠᠰᠠᠬᠤ] ᠰᠢᠭᠡᠯᠭᠡᠬᠦ᠂ ᠰᠤᠳᠠᠯ ᠤ᠋ᠨ ᠡᠪᠡᠳᠴᠢᠨ ᠢ᠋ ᠳᠣᠭᠣᠯᠭᠠᠬᠤ᠂ ᠬᠣᠣᠷ ᠢ᠋ ᠳᠠᠷᠤᠬᠤ ᠴᠢᠳᠠᠯ ᠲᠠᠢ᠃ ᠭᠣᠣᠯᠳᠠᠭᠤ ᠭᠠᠯᠵᠠᠭᠤ ᠡᠪᠡᠳᠴᠢᠨ᠂ ᠰᠤᠳᠠᠯ ᠤ᠋ᠨ ᠡᠪᠡᠳᠴᠢᠨ᠂ ᠬᠣᠵᠢᠭᠢᠷ᠂ ᠨᠢᠰᠤᠭᠤ᠂ ᠴᠠᠩᠬᠠ᠂ ᠬᠤᠯᠤᠭᠠᠨᠠ ᠶ᠋ᠢᠨ ᠶᠠᠷᠠ᠂ ᠬᠣᠣᠷᠲᠤ ᠶᠠᠷᠠ ᠵᠡᠷᠭᠡ ᠶ᠋ᠢ ᠵᠠᠰᠠᠬᠤ ᠳ᠋ᠤ᠌ ᠬᠡᠷᠡᠭᠯᠡᠨᠡ᠃
[ ᠠᠩᠬᠠᠷᠤᠯ] ᠵᠢᠷᠮᠦᠰᠦᠨ ᠂ ᠳᠤᠰᠤᠯ ᠴᠤᠪᠤᠷᠠᠬᠤ᠂ ᠲᠠᠮᠢᠷ ᠳᠣᠷᠣᠢ ᠬᠥᠮᠦᠰ ᠲᠦ᠍ ᠬᠡᠷᠡᠭᠯᠡᠵᠦ ᠪᠣᠯᠬᠤ ᠦᠭᠡᠢ᠃
ᠬᠢᠲᠠᠳ ᠨᠡᠷᠡ᠄斑蝥（1.黄黑小斑蝥 2. 南方大斑蝥）
ᠠᠩᠭ᠌ᠯᠢ ᠨᠡᠷᠡ᠄
1.Mylabris cichorii Linnaeus 2.Mylabris phalerata Palls
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠲᠤᠶᠠᠭᠠ
ᠬᠢᠨᠠᠭᠴᠢ᠄ ᠴᠡᠪᠡᠷᠴᠡᠴᠡᠭ