ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠠᠷᠪᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -10
83ᠦᠨᠡᠨᠴᠢ ᠨᠠᠢᠵᠠ
ᠨᠢᠭᠡ ᠲᠠᠯᠠ ᠪᠠᠷ ᠠᠶᠤᠯ ᠵᠣᠪᠠᠯᠠᠩ ᠠ᠋ᠴᠠ ᠭᠠᠷᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠨᠠ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠳᠠᠬᠢᠨ ᠠᠶᠤᠯ ᠵᠣᠪᠠᠯᠠᠩ ᠳ᠋ᠤ᠌ ᠤᠨᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠬᠤ ᠳ᠋ᠠᠭᠠᠨ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠡᠮᠦᠨᠡ ᠡᠴᠡ ᠢᠷᠡᠬᠦ ᠠᠵᠢᠯ ᠲᠥᠷᠥᠯ ᠦ᠋ᠨ ᠬᠥᠮᠦᠰ ᠢ᠋ ᠨᠢᠭᠤᠷ ᠪᠤᠷᠤᠭᠤᠯᠠᠨ ᠥᠩᠭᠡᠷᠡᠭᠡᠨᠡ᠃ ᠢᠳᠡᠬᠦ ᠵᠦᠢᠯ ᠡᠪᠦᠷ ᠲᠦ᠍ ᠶᠠᠪᠤᠭᠠ ᠲᠤᠯᠠ ᠭᠡᠳᠡᠰᠦ ᠴᠠᠳᠬᠤᠯᠠᠩ᠃ ᠭᠠᠭᠴᠠᠬᠠᠨ ᠠᠮᠠ ᠨᠢ ᠰᠦᠷᠡᠬᠡᠢ ᠴᠠᠩᠭᠠᠨᠠ᠃
ᠦᠵᠡᠲᠡᠯᠡ ᠡᠨᠳᠡ ᠬᠡᠳᠦᠬᠡᠨ ᠬᠣᠨᠣᠭ ᠤ᠋ᠨ ᠶᠡᠬᠡ ᠴᠠᠰᠤ ᠣᠷᠣᠭᠰᠠᠨ ᠪᠠᠢᠪᠠᠴᠤ᠂ ᠲᠡᠷᠡ ᠨᠢ ᠰᠢᠷᠦᠭᠦᠨ ᠰᠠᠯᠬᠢᠨ ᠳ᠋ᠤ᠌ ᠦᠯᠢᠶᠡᠭᠳᠡᠨ ᠰᠢᠷᠣᠢ ᠲᠠᠢ ᠬᠤᠳᠬᠤᠯᠳᠤᠨ ᠠᠮᠠᠨ ᠳ᠋ᠤ᠌ ᠬᠢᠬᠦ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠤᠭᠰᠠᠨ ᠠᠵᠢ᠃
ᠳᠡᠷᠭᠡᠳᠡᠬᠢ ᠨᠢᠭᠡᠨ ᠬᠥᠪᠡᠭᠡᠨ ᠦ᠌ ᠴᠠᠭᠠᠨᠠ ᠬᠤᠳᠳᠤᠭ ᠪᠠᠢᠭᠰᠠᠨ ᠨᠢ ᠰᠠᠨᠠᠭᠳᠠᠨᠠ᠃ ᠰᠡᠳᠬᠢᠯ ᠶᠠᠭᠠᠷᠠᠨ ᠬᠥᠯ ᠦ᠋ᠨ ᠬᠤᠷᠳᠤ ᠶ᠋ᠢ ᠨᠡᠮᠡᠬᠦ ᠳᠣᠳᠣᠮ ᠡᠮᠦᠨᠡᠬᠢ ᠭᠠᠵᠠᠷ ᠰᠤᠩᠬᠤ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠶᠠᠪᠤ ᠶᠠᠪᠤᠭᠰᠠᠭᠠᠷ ᠬᠥᠲᠥᠯ ᠳᠡᠭᠡᠷᠡ ᠭᠠᠷᠬᠤ ᠳ᠋ᠤ᠌ ᠦᠨᠡᠬᠡᠷ ᠬᠤᠳᠳᠤᠭ ᠤ᠋ᠨ ᠪᠠᠷᠠ ᠬᠠᠷᠠᠭᠳᠠᠬᠤ ᠪᠥᠭᠡᠳ ᠤᠷᠢᠲᠠᠢ ᠲᠠᠯᠠ ᠳ᠋ᠤᠨᠢ ᠨᠢᠭᠡᠨ ᠥᠪᠥᠭᠡᠷ ᠬᠠᠷᠠ ᠶᠠᠭᠤᠮᠠ ᠪᠣᠢ ᠪᠣᠯᠤᠭᠰᠠᠨ ᠪᠠᠢᠯᠠ᠃ ᠭᠠᠵᠠᠷ ᠤᠷᠤᠭᠤ ᠬᠥᠯ ᠰᠤᠩᠭᠠᠨ ᠭᠢᠰᠬᠢᠯᠡᠬᠦ ᠳ᠋ᠡᠭᠡᠨ ᠲᠡᠷᠡ ᠬᠠᠷᠠ ᠶᠠᠭᠤᠮᠠ ᠶ᠋ᠢ ᠪᠠᠢᠨ ᠪᠠᠢᠨ ᠠᠵᠢᠭᠯᠠᠭᠰᠠᠨ ᠤ᠋ ᠪᠠᠨ ᠡᠴᠦᠰ ᠲᠦ᠍ ᠤᠷᠤᠭᠰᠢ ᠬᠠᠷᠠᠨ ᠬᠡᠪᠲᠡᠭᠰᠡᠨ ᠭᠠᠭᠴᠠ ᠲᠡᠮᠡᠭᠡ ᠪᠣᠯᠬᠤ ᠶ᠋ᠢ ᠲᠠᠨᠢᠪᠠ᠃ ᠣᠢᠷᠠᠲᠤᠨ ᠣᠴᠢᠭᠠᠳ ᠳ᠋ᠠᠨᠽᠠᠨ᠂ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠬᠠᠮᠲᠤ ᠪᠠᠷᠢᠭᠳᠠᠨ᠂ ᠡᠯᠳᠡᠪ ᠵᠣᠪᠠᠯᠠᠩ ᠢ᠋ ᠨᠢᠭᠡᠨ ᠠᠳᠠᠯᠢ ᠡᠳ᠋ᠯᠡᠭᠰᠡᠨ ᠬᠠᠷᠠ ᠪᠤᠤᠷᠠ ᠪᠣᠯᠬᠤ ᠶ᠋ᠢ ᠨᠢ ᠲᠠᠨᠢᠯᠠ᠃ ᠪᠤᠤᠷᠠ ᠪᠠᠰᠠ ᠳ᠋ᠠᠨᠽᠠᠨ ᠢ᠋ ᠲᠠᠨᠢᠵᠠᠢ᠃ ᠪᠠᠷᠠᠭᠠᠨ ᠤ᠋ ᠭᠠᠵᠠᠷ ᠠ᠋ᠴᠠ ᠲᠣᠮᠣ ᠲᠣᠯᠣᠭᠠᠢ ᠪᠠᠨ ᠡᠷᠭᠢᠭᠦᠯᠦᠨ ᠪᠠᠢᠨ ᠪᠠᠢᠨ ᠠᠵᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳ᠋ᠠᠨᠽᠠᠨ ᠳᠡᠷᠭᠡᠳᠡ ᠨᠢ ᠬᠦᠷᠦᠭᠡᠳ ᠢᠷᠡᠬᠦ ᠳ᠋ᠦ᠍ ᠰᠢᠲᠦ ᠪᠡᠨ ᠬᠢᠬᠤᠲᠤᠨᠠᠭᠤᠯᠤᠨ ᠬᠠᠪᠢᠷᠴᠤ᠂ ᠬᠦᠵᠦᠭᠦᠦ ᠰᠤᠩᠭᠠᠨ ᠤᠭᠲᠤᠪᠠ᠃
ᠡᠨᠡ ᠶᠠᠪᠤᠳᠠᠯ ᠳ᠋ᠠᠨᠽᠠᠨ ᠳ᠋ᠤ᠌ ᠵᠡᠭᠦᠳᠦ ᠰᠢᠭ ᠪᠠᠢᠯᠠ᠃ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤᠨᠢ ᠭᠠᠵᠠᠷ ᠢ᠋ ᠠᠵᠢᠬᠤ ᠳ᠋ᠤ᠌ ᠭᠠᠮᠢᠩ ᠴᠡᠷᠢᠭ ᠦ᠋ᠨ ᠱᠠᠬᠠᠢ ᠲᠠᠢ ᠭᠠᠭᠴᠠ ᠬᠥᠮᠦᠨ ᠦ᠌ ᠮᠥᠷ ᠬᠡᠳᠦᠨ ᠠᠷᠪᠠᠨ ᠤᠳᠠᠭᠠ ᠲᠣᠭᠣᠷᠢᠭᠰᠠᠨ ᠰᠢᠭ᠋ ᠪᠠᠢᠬᠤ ᠲᠤᠯᠠ ᠳᠣᠷᠵᠢ ᠶ᠋ᠢᠨ ᠡᠨᠳᠡ ᠢᠷᠡᠭᠡᠳ ᠪᠤᠤᠷᠠ ᠪᠠᠨ ᠥᠶᠡᠩᠭᠡᠳᠦᠭᠦᠯᠤᠨ ᠬᠠᠶᠠᠭᠰᠠᠨ ᠢ᠋ ᠮᠡᠳᠡᠪᠡ᠃《ᠭᠦᠦᠭ!》 ᠬᠠᠰᠬᠢᠷᠤᠨ ᠪᠤᠰᠬᠠᠬᠤ ᠭᠡᠬᠦ ᠳ᠋ᠦ᠍ ᠪᠤᠤᠷᠠ ᠴᠡᠭᠡᠵᠢᠨ ᠪᠡᠶᠡ ᠪᠡᠨ ᠥᠨᠳᠡᠢᠯᠭᠡᠨ ᠨᠢᠭᠡ ᠤᠳᠠᠭᠠ ᠵᠢᠳᠬᠦᠭᠰᠡᠨ ᠢ᠋ᠶ᠋ᠡᠨ ᠲᠡᠩᠬᠡᠯ ᠠᠯᠲᠠᠨ ᠳᠣᠷᠣᠭᠰᠢ ᠰᠠᠭᠤᠨᠠ᠃ ᠲᠡᠮᠡᠭᠡ ᠪᠣᠯ ᠶᠠᠪᠤ ᠶᠠᠪᠤᠭᠰᠠᠭᠠᠷ ᠨᠢᠭᠡ ᠡᠳᠦᠷ ᠦ᠋ᠨ ᠬᠡᠪᠲᠡᠷᠢ ᠳᠡᠭᠡᠷᠡ ᠡᠴᠡ ᠪᠡᠨ ᠪᠣᠰᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠳᠠᠭ ᠪᠣᠯᠪᠠᠴᠤ᠂ ᠡᠷᠭᠢᠭᠦᠯᠦᠨ ᠪᠣᠰᠬᠠᠭᠰᠠᠨ ᠤ᠋ ᠪᠠᠨ ᠳᠠᠷᠠᠭᠠ ᠪᠠᠰᠠ ᠬᠡᠳᠦᠨ ᠬᠣᠨᠣᠭ ᠶᠠᠪᠤᠵᠤ ᠴᠢᠳᠠᠳᠠᠭ ᠢ᠋ ᠳ᠋ᠠᠨᠽᠠᠨ ᠮᠡᠳᠡᠬᠦ ᠪᠢᠯᠡ᠃ ᠠᠷᠤ ᠳ᠋ᠤᠨᠢ ᠭᠠᠷᠴᠤ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠠᠯᠠᠭᠠ ᠶ᠋ᠢ ᠨᠢᠯᠪᠤᠨ ᠨᠣᠷᠭᠠᠵᠤ ᠬᠣᠭᠣᠷᠣᠨᠳᠣ ᠨᠢ ᠬᠠᠯᠠᠲᠠᠯᠠ ᠦᠷᠡᠵᠦ ᠠᠪᠤᠭᠠᠳ᠂ ᠰᠡᠭᠦᠵᠢ ᠶ᠋ᠢᠨ ᠬᠢᠨᠢ ᠭᠡᠷᠳᠡᠭᠡᠷ ᠶᠠᠰᠤᠨ ᠳᠣᠣᠭᠤᠷ ᠬᠢᠨ《ᠭᠦᠦᠭ》 ᠬᠠᠰᠬᠢᠷᠤᠨ ᠳᠡᠭᠡᠭᠰᠢ ᠡᠷᠭᠦᠪᠡ᠃ ᠪᠤᠤᠷᠠ ᠪᠠᠰᠠ ᠤᠴᠢᠷ ᠮᠡᠳᠡᠨ ᠳᠡᠭᠡᠭᠰᠢ ᠵᠢᠳᠬᠦᠪᠡ᠃ ᠭᠡᠪᠡᠴᠦ ᠳ᠋ᠠᠨᠽᠠᠨ ᠤ᠋ ᠭᠠᠷ ᠪᠦᠰᠡᠯᠡᠬᠦ ᠡᠴᠡ ᠪᠡᠨ ᠥᠩᠭᠡᠷᠡᠬᠦ ᠲᠡᠢ ᠪᠡᠨ ᠵᠡᠷᠭᠡ ᠴᠠᠭᠠᠰᠢ ᠡᠷᠭᠦᠬᠦ ᠨᠥᠬᠥᠴᠡᠯ ᠦᠭᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠪᠤᠤᠷᠠ ᠨᠢ ᠪᠣᠰᠤᠭᠠ ᠬᠡᠪᠲᠡᠭᠡ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠵᠣᠭᠣᠭᠳᠠᠪᠠ᠃ ᠳ᠋ᠠᠨᠽᠠᠨ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠮᠠᠢᠬᠠᠨ ᠤ᠋ ᠡᠭᠦᠳᠡ ᠰᠢᠭ ᠣᠩᠭᠣᠢᠭᠰᠠᠨ ᠲᠣᠮᠣ ᠰᠠᠯᠲᠠᠭᠠ ᠤᠷᠤᠭᠤ ᠪᠥᠬᠥᠢᠨ ᠣᠷᠣᠵᠤ ᠭᠡᠳᠡᠰᠦᠨ ᠪᠡᠶᠡ ᠡᠴᠡ ᠨᠢ ᠲᠤᠯᠤᠨ᠂《ᠬᠥᠥᠭ》 ᠬᠠᠰᠬᠢᠷᠤᠯᠠ᠃ ᠡᠨᠡ ᠳᠠᠷᠤᠢ ᠨᠢᠷᠤᠭᠤᠨ ᠤ᠋ ᠦᠶᠡ ᠨᠦᠵᠢᠭᠢᠨᠡᠨ᠂ ᠳᠣᠣᠷᠠᠬᠢ ᠭᠠᠵᠠᠷ ᠬᠠᠷᠠ ᠨᠣᠭᠣᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠭᠰᠡᠨ ᠢ᠋ᠶ᠋ᠡᠨ ᠭᠡᠨᠡᠳᠲᠡ ᠠᠭᠠᠷ ᠲᠤ ᠳᠡᠭᠳᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠨᠡ ᠨᠢ ᠪᠤᠤᠷᠠ ᠶ᠋ᠢᠨ ᠪᠣᠰᠬᠤ ᠶ᠋ᠢ ᠪᠦᠬᠦ ᠪᠡᠶᠡ ᠪᠡᠷ ᠬᠠᠷᠢᠭᠤᠴᠠᠨ ᠡᠷᠭᠦᠭᠰᠡᠨ ᠦ᠌ ᠬᠢ ᠪᠠᠢᠵᠠᠢ᠃ ᠪᠣᠰᠤᠭᠰᠠᠨ ᠪᠤᠤᠷᠠ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠪᠡᠶᠡ ᠪᠡᠨ ᠠᠪᠤᠨ ᠬᠠᠵᠠᠭᠤ ᠳ᠋ᠤᠨᠢ ᠭᠠᠷᠤᠭᠰᠠᠨ ᠬᠣᠢᠨᠠ ᠬᠦᠷᠲᠡᠯᠡ ᠨᠢᠳᠦ ᠡᠷᠢᠶᠡᠯᠵᠢᠯᠡᠨ ᠠᠯᠤᠰ ᠦᠨ ᠶᠠᠭᠤᠮᠠᠰ ᠪᠦᠷᠬᠦᠯᠵᠡᠨ ᠪᠠᠢᠪᠠ᠃
ᠪᠤᠤᠷᠠ ᠭᠦᠰᠢᠭ᠍ᠰᠡᠨ ᠪᠡᠶᠡ ᠪᠡᠨ ᠰᠤᠨᠢᠶᠠᠨ ᠠᠯᠤᠰ ᠪᠠᠷᠠᠭᠤᠨ ᠢ᠋ ᠨᠢᠭᠡ ᠠᠵᠢᠭᠠᠳ᠂ ᠳᠠᠷᠠᠭᠠ ᠳ᠋ᠤᠨᠢ ᠳ᠋ᠠᠨᠽᠠᠨ ᠢ᠋ ᠦᠨᠦᠷᠯᠡᠨ ᠪᠤᠰᠤᠳ ᠤ᠋ᠨ ᠶᠠᠭᠤᠮᠠ ᠰᠢᠭ᠋ ᠳᠣᠷᠣᠭᠰᠢ ᠤᠨᠵᠢᠭᠰᠠᠨ ᠳᠠᠯᠪᠠᠭᠠᠷ ᠤᠷᠤᠭᠤᠯ ᠢ᠋ᠶ᠋ᠠᠨ ᠱᠠᠯ ᠫᠠᠯ ᠳᠤᠤᠭᠠᠷᠭᠠᠨ᠂ ᠲᠣᠯᠣᠭᠠᠢ ᠪᠠᠨ ᠳᠡᠭᠡᠭᠰᠢ ᠡᠷᠭᠦᠪᠡ᠃ ᠡᠭᠦᠨ ᠢ᠋ ᠨᠢ ᠳ᠋ᠠᠨᠽᠠᠨ ᠦᠬᠦᠯ ᠦ᠋ᠨ ᠬᠠᠷᠠ ᠬᠡᠪᠲᠡᠷᠢ ᠡᠴᠡ ᠪᠣᠰᠤᠭᠰᠠᠨ ᠳ᠋ᠠᠭᠠᠨ ᠰᠡᠳᠬᠢᠯ ᠬᠥᠳᠡᠯᠦᠨ ᠪᠠᠶᠠᠷᠯᠠᠵᠤ ᠪᠠᠢᠨᠠ ᠭᠡᠵᠦ ᠦᠵᠡᠪᠡ᠃
ᠳ᠋ᠠᠨᠽᠠᠨ ᠲᠤᠩ ᠰᠠᠶᠢᠬᠠᠨ ᠠᠮᠠ ᠴᠠᠩᠭᠠᠨ ᠲᠡᠪᠡᠳᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠷᠣ ᠲᠠᠰᠤ ᠮᠠᠷᠲᠠᠭᠰᠠᠨ ᠪᠠᠢᠪᠠ᠃ ᠣᠳᠣ ᠲᠡᠭᠦᠨ ᠢ᠋ᠶ᠋ᠡᠨ ᠰᠠᠨᠠᠬᠤ ᠲᠠᠢ ᠪᠠᠨ ᠵᠡᠷᠭᠡ ᠬᠤᠳᠳᠤᠭ ᠳᠡᠭᠡᠷᠡ ᠭᠦᠶᠦᠨ ᠬᠦᠷᠪᠡ᠃ ᠭᠡᠲᠡᠯᠡ ᠡᠨᠳᠡ ᠬᠣᠪᠣᠭᠣ ᠠᠯᠠᠭᠠ᠃ ᠥᠩᠭᠡᠢᠨ ᠬᠠᠷᠠᠬᠤ ᠳ᠋ᠤ᠌ ᠡᠷᠭᠢᠯᠳᠦᠭᠰᠡᠨ ᠬᠠᠷᠠ ᠨᠦᠬᠡ ᠲᠡᠷᠲᠡᠭᠡ ᠳᠣᠣᠷᠠ ᠦᠵᠡᠭᠳᠡᠨᠡ᠃ ᠤᠷᠢᠳ ᠡᠨᠳᠡ ᠬᠣᠨᠣᠭ ᠲᠠᠭᠠᠷᠠᠭᠤᠯᠤᠨ ᠪᠠᠭᠤᠭᠠᠳ ᠤᠰᠤ ᠠᠪᠬᠤ ᠳ᠋ᠤ᠌ ᠭᠤᠷᠪᠠᠨ ᠠᠯᠲᠠ ᠲᠠᠲᠠᠯᠠᠭᠠ ᠣᠷᠣᠵᠤ ᠪᠠᠢᠭᠰᠠᠨ ᠶᠠᠪᠤᠳᠠᠯ ᠰᠠᠨᠠᠭᠳᠠᠨᠠ᠃ ᠡᠢᠮᠦ ᠳ᠋ᠦ᠍ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠠᠷᠭᠠ ᠪᠠᠷᠠᠭᠳᠠᠨ ᠠᠮᠠᠰᠠᠷ ᠳᠡᠭᠡᠷᠡ ᠨᠢ ᠰᠠᠨᠳᠠᠢᠯᠠᠨ ᠰᠠᠭᠤᠵᠤ ᠪᠠᠢᠲᠠᠯᠠ ᠪᠤᠤᠷᠠ ᠢᠷᠡᠪᠡ᠃ ᠲᠡᠭᠦᠨ ᠦ᠌ ᠠᠮᠠ ᠪᠦᠷ ᠳ᠋ᠠᠨᠽᠠᠨ ᠤ᠋ ᠬᠢ ᠡᠴᠡ ᠢᠯᠡᠭᠦᠦ ᠲᠡᠢ ᠴᠠᠩᠭᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ᠃ ᠬᠤᠳᠳᠤᠭ ᠤᠷᠤᠭᠤ ᠲᠣᠩᠭᠣᠢᠨ ᠦᠨᠦᠷᠯᠡᠵᠦ ᠦᠵᠡᠭᠰᠡᠨ ᠢ᠋ᠶ᠋ᠡᠨ ᠮᠥᠨ ᠯᠡ ᠭᠠᠢᠬᠠᠰᠢ ᠲᠠᠰᠤᠷᠠᠬᠤ ᠮᠡᠲᠦ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠠᠳ ᠳᠠᠷᠠᠭᠠ ᠳ᠋ᠤᠨᠢ ᠲᠣᠯᠣᠭᠠᠢ ᠪᠠᠭᠤᠯᠭᠠᠨ ᠬᠤᠳᠳᠤᠭ ᠤ᠋ᠨ ᠬᠠᠵᠠᠭᠤ ᠳ᠋ᠠᠬᠢ ᠰᠢᠭᠤᠷᠭᠠᠨ ᠳ᠋ᠤ᠌ ᠬᠥᠭᠡᠭᠡᠭᠳᠡᠨ ᠬᠤᠷᠠᠯᠳᠤᠭᠰᠠᠨ ᠰᠢᠷᠣᠢ ᠲᠠᠢ ᠴᠠᠰᠤ ᠶ᠋ᠢ ᠲᠣᠮᠣ ᠲᠣᠮᠣ ᠡᠮᠬᠦᠯᠡᠵᠦ ᠡᠬᠢᠯᠡᠪᠡ᠃ ᠳ᠋ᠠᠨᠽᠠᠨ ᠲᠡᠭᠦᠨ ᠢ᠋ ᠬᠠᠷᠠᠭᠠᠳ᠂ ᠠᠮᠠᠨ ᠤ᠋ ᠬᠢᠨᠢ ᠴᠠᠩᠭᠠᠭᠠ ᠲᠡᠰᠦᠰᠢ ᠦᠭᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ᠂ ᠭᠠᠷ ᠢ᠋ᠶ᠋ᠠᠨ ᠴᠠᠰᠤ ᠤᠷᠤᠭᠤ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠡᠷᠪᠡᠢᠨ ᠠᠮᠠ ᠪᠠᠨ ᠬᠣᠢᠨᠠ ᠠ᠋ᠴᠠ ᠨᠢ ᠠᠩᠭᠠᠢᠨ ᠲᠡᠮᠡᠦᠯᠵᠡᠢ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠠᠮᠠᠨ ᠳᠣᠲᠣᠷᠠ ᠡᠯᠡᠰᠦ᠂ ᠰᠢᠷᠣᠢ ᠱᠠᠵᠢᠭᠢᠨᠠᠵᠤ ᠪᠠᠢᠪᠠᠴᠤ ᠥᠨᠥᠬᠢ ᠴᠠᠰᠤᠨ ᠠ᠋ᠴᠠ ᠣᠢ ᠪᠠᠨ ᠭᠣᠳᠣᠲᠠᠯᠠ ᠢᠳᠡᠪᠡ᠃
ᠢᠩᠭᠢᠭᠡᠳ ᠡᠨᠳᠡ ᠡᠴᠡ ᠪᠠᠷᠠᠭᠤᠨ ᠲᠠᠢᠰᠢ ᠶᠠᠪᠤᠬᠤ ᠳ᠋ᠤᠨᠢ ᠪᠤᠤᠷᠠ ᠥᠪᠡᠷ ᠢ᠋ᠶ᠋ᠡᠨ ᠳᠠᠭᠠᠨ ᠰᠠᠵᠢᠯᠠᠪᠠ᠃ ᠳ᠋ᠠᠨᠽᠠᠨ ᠳ᠋ᠤ᠌ ᠴᠤ᠌ ᠲᠡᠭᠦᠨ ᠢ᠋ ᠬᠠᠶᠠᠬᠤ ᠰᠡᠳᠬᠢᠯ ᠪᠠᠢᠭᠰᠠᠨ ᠦᠭᠡᠢ᠃ ᠬᠠᠷᠢᠨ ᠨᠢᠭᠡ ᠭᠠᠯ ᠢ᠋ᠶ᠋ᠠᠷ ᠬᠠᠮᠲᠤ ᠶᠠᠪᠤᠬᠤ ᠬᠠᠨᠢ ᠲᠠᠢ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠨᠠ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠡᠨᠡᠬᠦ ᠦᠬᠦᠨ ᠦᠬᠦᠲᠡᠯᠡ ᠪᠡᠨ ᠵᠥᠪᠬᠡᠨ ᠬᠥᠮᠦᠨ ᠦ᠌ ᠲᠥᠯᠥᠭᠡ ᠬᠦᠴᠦ ᠴᠢᠳᠠᠯ ᠢ᠋ᠶ᠋ᠠᠨ ᠵᠣᠷᠢᠭᠤᠯᠬᠤ ᠳ᠋ᠤ᠌ ᠵᠠᠶᠠᠭᠠᠭᠰᠠᠨ ᠰᠢᠳᠤᠷᠭᠤ ᠠᠮᠢᠲᠠᠨ ᠢ᠋ ᠣᠷᠣᠨ ᠨᠤᠲᠤᠭ ᠲᠠᠭᠠᠨ ᠬᠦᠷᠬᠡᠶᠡ ᠭᠡᠵᠦ ᠪᠣᠳᠣᠯᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠭᠠᠲᠤᠷ