ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠭᠡᠵᠢᠭᠡᠨ ᠬᠦᠦ Гураван настай гунаган улаан баатар - Гэзгэн хүү
362ᠭᠡᠵᠢᠭᠡᠨ ᠬᠦᠦ
ᠢᠩᠭᠢᠭᠡᠳ ᠶᠠᠪᠤᠵᠤ ᠪᠠᠢᠭᠰᠠᠨ ᠴᠢᠨᠢ᠂ ᠭᠡᠨᠡᠳᠲᠡ ᠣᠯᠠᠨ ᠨᠦᠬᠡᠨ ᠳ᠋ᠦ᠍ ᠰᠣᠯᠣᠩᠭᠠ ᠭᠦᠶᠦᠵᠦ ᠣᠷᠣᠪᠠ᠃ ᠭᠡᠵᠢᠭᠡᠨ ᠬᠦᠦ ᠲᠡᠭᠦᠨ ᠢ᠋ ᠤᠳᠤᠭᠠᠳ ᠰᠠᠭᠤᠵᠤ ᠪᠠᠢᠭᠰᠠᠨ ᠴᠢᠨᠢ᠂ ᠬᠠᠭᠠᠨ ᠤ᠋ ᠠᠳᠤᠭᠤᠨ ᠤ᠋ ᠬᠥᠮᠦᠨ᠂ ᠬᠤᠯᠤᠰᠤᠨ ᠦᠶᠡ ᠲᠡᠢ ᠤᠷᠭᠠ ᠪᠠᠨ ᠪᠠᠷᠢᠵᠤ᠂ ᠬᠤᠪᠠᠬᠠᠢ ᠮᠣᠳᠣᠨ ᠢ᠋ᠶ᠋ᠠᠨ ᠲᠣᠬᠣᠵᠤ᠂ ᠬᠤᠷ ᠳᠡᠯ ᠲᠡᠢ ᠠᠵᠢᠷᠭᠠ ᠪᠠᠨ ᠤᠨᠤᠵᠤ ᠢᠷᠡᠭᠡᠳ᠂ ᠭᠡᠵᠢᠭᠡᠨ ᠬᠦᠦ ᠡᠴᠡ᠄《ᠴᠢ ᠶᠠᠮᠠᠷ ᠬᠥᠮᠦᠨ ᠪᠣᠢ? ᠶᠠᠭᠤ ᠬᠢᠵᠦ ᠪᠠᠢᠭᠠ ᠶᠤᠮ ᠪᠣᠢ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠭᠡᠵᠢᠭᠡᠨ ᠬᠦᠦ᠄《ᠪᠢ ᠪᠣᠯ ᠭᠡᠵᠢᠭᠡᠨ ᠬᠦᠦ ᠭᠡᠳᠡᠭ᠃ ᠪᠤᠰᠢᠭᠤᠬᠠᠨ ᠪᠣᠷᠣ ᠳᠠᠭᠠ ᠪᠠᠨ ᠤᠨᠤᠭᠠᠳ᠂ ᠲᠥᠪᠥᠭᠡᠷᠬᠡᠨ ᠵᠠᠮ ᠢ᠋ᠶ᠋ᠠᠷ ᠰᠢᠪᠬᠠᠷᠠᠨ ᠭᠤᠶᠠᠳᠠᠭᠠᠳ ᠢᠰᠬᠡᠷᠦᠨ ᠳᠠᠪᠬᠢᠵᠤ ᠪᠠᠢᠭᠰᠠᠨ ᠳ᠋ᠤ᠌᠂ ᠭᠡᠨᠡᠳᠲᠡ ᠣᠯᠠᠨ ᠨᠦᠬᠡᠨ ᠳ᠋ᠦ᠍ ᠰᠣᠯᠣᠩᠭᠠ ᠭᠦᠶᠦᠵᠦ ᠣᠷᠣᠪᠠ᠃ ᠴᠢᠩᠭᠢᠭᠡᠳ ᠪᠢ ᠲᠡᠭᠦᠨ ᠢ᠋ ᠤᠲᠤᠵᠤ ᠪᠠᠢᠨᠠ 》 ᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠠᠳᠤᠭᠤᠨ ᠤ᠋ ᠬᠥᠮᠦᠨ ᠬᠡᠯᠡᠭᠰᠡᠨ ᠨᠢ᠄《ᠴᠢ ᠶᠠᠭᠠᠬᠢᠭᠰᠠᠨ ᠣᠯᠠᠨ ᠦᠭᠡ ᠲᠡᠢ ᠬᠥᠮᠦᠨ ᠪᠣᠢ? ᠰᠣᠯᠣᠩᠭᠠ ᠤᠲᠤᠵᠤ ᠪᠠᠢᠨᠠ ᠭᠡᠪᠡᠯ ᠨᠢᠭᠡ ᠯᠡ ᠦᠭᠡ ᠪᠢᠰᠢ ᠤᠤ?》 ᠭᠡᠰᠡᠨ ᠳ᠋ᠦ᠍᠂ ᠭᠡᠵᠢᠭᠡᠨ ᠬᠦᠦ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄《ᠣᠯᠠᠨ ᠦᠭᠡ ᠴᠡᠭᠡᠵᠢᠨ ᠳ᠋ᠦ᠍ ᠪᠠᠢᠳᠠᠭ᠃ ᠣᠭᠣᠲᠣᠷ ᠮᠣᠳᠣ ᠠᠭᠤᠯᠠᠨ ᠳ᠋ᠤ᠌ ᠪᠠᠢᠳᠠᠭ》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍᠂ ᠬᠠᠭᠠᠨ ᠤ᠋ ᠠᠳᠤᠭᠤᠨ ᠤ᠋ ᠬᠥᠮᠦᠨ ᠠᠭᠤᠷᠯᠠᠵᠤ᠄《ᠴᠢ ᠶᠠᠭᠠᠬᠢᠭᠰᠠᠨ ᠬᠡᠳᠡᠷ ᠦᠭᠡ ᠲᠡᠢ ᠬᠥᠮᠦᠨ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠭᠡᠵᠢᠭᠡᠨ ᠬᠦᠦ᠄《 ᠬᠡᠳᠡᠷ ᠦᠭᠡ ᠬᠡᠪᠡᠯᠢ ᠳ᠋ᠦ᠍ ᠪᠠᠢᠳᠠᠭ᠃ ᠬᠡᠳᠡᠷᠭᠡ ᠮᠣᠳᠣ ᠠᠭᠤᠯᠠᠨ ᠳ᠋ᠤ᠌ ᠪᠠᠢᠳᠠᠭ》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠤ᠋ ᠠᠳᠤᠭᠤᠨ ᠤ᠋ ᠬᠥᠮᠦᠨ ᠶᠡᠬᠡ ᠠᠭᠤᠷᠯᠠᠵᠤ《 ᠴᠢ ᠶᠠᠭᠠᠬᠢᠭᠰᠠᠨ ᠬᠣᠣᠰ ᠦᠭᠡ ᠲᠡᠢ ᠬᠥᠮᠦᠨ ᠪᠣᠢ?》 ᠭᠡᠵᠦ ᠵᠠᠩᠳᠤᠷᠬᠤ ᠳ᠋ᠤ᠌᠂ ᠭᠡᠵᠢᠭᠡᠨ ᠬᠦᠦ ᠠᠯᠭᠤᠷ ᠢ᠋ᠶ᠋ᠠᠷ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄《 ᠬᠣᠣᠰ ᠦᠭᠡ ᠵᠢᠷᠦᠬᠡᠨ ᠳ᠋ᠦ᠍ ᠪᠠᠢᠳᠠᠭ᠃ ᠬᠣᠰᠬᠢᠨᠠᠭ ᠪᠥᠭᠰᠡᠨ ᠳ᠋ᠦ᠍ ᠪᠠᠢᠳᠠᠭ ᠶᠤᠮ》 ᠭᠡᠪᠡ᠃
ᠡᠭᠦᠨ ᠳ᠋ᠦ᠍ ᠬᠠᠭᠠᠨ ᠤ᠋ ᠠᠳᠤᠭᠤᠨ ᠤ᠋ ᠬᠥᠮᠦᠨ ᠶᠡᠬᠡᠯᠡ ᠠᠭᠤᠷᠯᠠᠨ ᠶᠠᠪᠤᠵᠤ᠂ ᠳᠠᠷᠤᠢ ᠬᠠᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠮᠡᠳᠡᠭᠦᠯᠵᠡᠢ᠃ ᠮᠠᠷᠭᠠᠰᠢ ᠨᠢ ᠬᠠᠭᠠᠨ ᠤ᠋ ᠴᠡᠷᠢᠭ ᠢᠷᠡᠵᠦ ᠭᠡᠵᠢᠭᠡᠨ ᠬᠦᠦ ᠶ᠋ᠢ ᠬᠠᠭᠠᠨ ᠤ᠋ ᠣᠷᠳᠣᠨ ᠳ᠋ᠤ᠌ ᠳᠠᠭᠤᠳᠠᠨ ᠠᠪᠠᠴᠢᠭᠠᠳ ᠬᠠᠭᠠᠨ ᠤ᠋ ᠪᠠᠭᠠ ᠬᠠᠲᠤᠨ ᠲᠠᠢ ᠠᠭᠤᠯᠵᠠᠭᠤᠯᠪᠠ᠃
ᠭᠡᠵᠢᠭᠡᠨ ᠬᠦᠦ ᠪᠠᠭᠠ ᠬᠠᠲᠤᠨ ᠲᠠᠢ ᠠᠭᠤᠯᠵᠠᠵᠤ ᠬᠡᠯᠡᠭᠰᠡᠨ ᠨᠢ᠄《ᠢᠮᠠᠭᠠᠨ ᠲᠣᠯᠣᠭᠠᠢ ᠶᠠᠩ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠃ ᠶᠠᠭᠵᠠᠭᠠᠷ ᠬᠠᠲᠤᠨ ᠶᠠᠮᠤᠨ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠃ ᠲᠡᠮᠡᠭᠡᠨ ᠲᠣᠯᠣᠭᠠᠢ ᠳᠠᠪᠰᠢᠨ ᠳ᠋ᠤ᠌ ᠣᠷᠣᠳᠠᠭ ᠦᠭᠡᠢ᠂ ᠳᠡᠨᠳᠡᠭᠡᠷ ᠬᠠᠲᠤᠨ ᠲᠥᠷᠥ ᠳ᠋ᠦ᠍ ᠣᠷᠣᠳᠠᠭ ᠦᠭᠡᠢ᠃ ᠡᠷᠬᠢᠮ ᠲᠠ ᠳᠠᠭᠤᠨ ᠦᠭᠡᠢ ᠪᠠᠢᠭᠠᠷᠠᠢ》 ᠭᠡᠵᠦ ᠬᠡᠯᠡᠭᠡᠳ ᠭᠠᠷᠤᠭᠠᠳ ᠶᠠᠪᠤᠴᠢᠬᠠᠵᠠᠢ᠃
ᠡᠭᠦᠨ ᠳ᠋ᠦ᠍ ᠪᠠᠭᠠ ᠬᠠᠲᠤᠨ ᠨᠢ ᠲᠡᠰᠬᠡᠯ ᠦᠭᠡᠢ ᠠᠭᠤᠷᠯᠠᠵᠤ᠂ ᠳᠠᠷᠤᠢ ᠬᠥᠮᠦᠨ ᠳᠠᠭᠤᠳᠠᠵᠤ ᠢᠷᠡᠭᠡᠳ᠂ ᠭᠡᠵᠢᠭᠡᠨ ᠬᠦᠦ ᠶ᠋ᠢ ᠮᠣᠩᠭᠣᠯ ᠲᠡᠷᠭᠡᠨ ᠦ᠌ ᠪᠤᠯᠤ ᠠ᠋ᠴᠠ ᠤᠶᠠᠵᠤ ᠲᠠᠯᠪᠢᠵᠠᠢ᠃ ᠢᠩᠭᠢᠵᠦ ᠪᠠᠢᠲᠠᠯᠠ ᠬᠠᠭᠠᠨ ᠤ᠋ ᠡᠮᠴᠢ ᠯᠠᠮᠠ ᠨᠢ ᠢᠷᠡᠭᠡᠳ᠄《ᠴᠢ ᠶᠠᠮᠠᠷ ᠶᠠᠭᠤᠮᠠ ᠬᠢᠵᠦ ᠪᠠᠢᠭᠠ ᠶᠤᠮ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠭᠡᠵᠢᠭᠡᠨ ᠬᠦᠦ ᠡᠮᠴᠢ ᠯᠠᠮᠠ ᠶ᠋ᠢ ᠭᠢᠯᠤᠢᠨ ᠬᠠᠷᠠᠭᠠᠳ᠄《ᠪᠢ ᠡᠮᠴᠢ ᠯᠠᠮᠠ ᠶ᠋ᠢᠨ ᠡᠪᠡᠷ ᠬᠤᠷᠤᠭᠤ ᠶ᠋ᠢ ᠬᠢᠵᠦ᠂ ᠳᠣᠮᠴᠢ ᠯᠠᠮᠠ ᠶ᠋ᠢᠨ ᠳᠣᠯᠣᠪᠣᠷ ᠬᠤᠷᠤᠭᠤ ᠶ᠋ᠢ ᠬᠢᠵᠦ ᠰᠠᠭᠤᠵᠤ ᠪᠠᠢᠨᠠ》 ᠭᠡᠪᠡ᠃
ᠡᠭᠦᠨ ᠳ᠋ᠦ᠍ ᠡᠮᠴᠢ ᠯᠠᠮᠠ ᠬᠠᠷᠢᠭᠤᠯᠤᠨ ᠬᠡᠯᠡᠬᠦ ᠦᠭᠡ ᠪᠡᠨ ᠣᠯᠤᠭᠰᠠᠨ ᠦᠭᠡᠢ ᠭᠡᠳᠡᠷᠭᠦ ᠤᠬᠤᠷᠢᠵᠤ ᠬᠠᠭᠠᠨ ᠳ᠋ᠠᠭᠠᠨ ᠣᠴᠢᠵᠤ ᠬᠡᠯᠡᠬᠦ ᠳ᠋ᠦ᠍᠂ ᠬᠠᠭᠠᠨ ᠨᠢ ᠳᠠᠷᠤᠢ ᠭᠡᠵᠢᠭᠡᠨ ᠬᠦᠦ ᠶ᠋ᠢ ᠭᠡᠷ ᠲᠡᠭᠡᠨ ᠣᠷᠣᠭᠤᠯᠵᠤ ᠠᠰᠠᠭᠤᠭᠰᠠᠨ ᠨᠢ᠄《ᠮᠢᠨᠦ ᠳᠣᠣᠷᠠ ᠶᠠᠭᠤ ᠪᠠᠢᠨᠠ ᠪᠣᠢ᠂ ᠴᠢ ᠦᠵᠡᠪᠡᠦ?》 ᠭᠡᠰᠡᠨ ᠳ᠋ᠦ᠍᠂ ᠭᠡᠵᠢᠭᠡᠨ ᠬᠦᠦ ᠶ᠋ᠢᠨ ᠬᠠᠷᠢᠭᠤᠯᠤᠭᠰᠠᠨ ᠨᠢ᠄《ᠠᠭᠤᠯᠠᠨ ᠳ᠋ᠤ᠌ ᠤᠷᠭᠤᠭᠰᠠᠨ ᠮᠣᠳᠣ᠂ ᠤᠷᠠᠨ ᠮᠣᠳᠣᠴᠢᠨ ᠢ᠋ᠶ᠋ᠠᠷ ᠰᠡᠢᠯᠦᠭᠦᠯᠦᠭᠰᠡᠨ ᠰᠢᠷᠡᠭᠡ ᠪᠠᠢᠨᠠ》 ᠬᠡᠮᠡᠪᠡ᠃ ᠬᠠᠭᠠᠨ ᠪᠠᠰᠠ ᠠᠰᠠᠭᠤᠭᠰᠠᠨ ᠨᠢ《ᠳᠡᠭᠡᠷᠡ ᠨᠢ ᠶᠠᠭᠤ ᠪᠠᠢᠨᠠ ᠪᠣᠢ?》 ᠭᠡᠬᠦ ᠳ᠋ᠦ᠍᠂ ᠭᠡᠵᠢᠭᠡᠨ ᠬᠦᠦ᠄《ᠲᠠᠩᠭᠤᠳ ᠬᠣᠨᠢᠨ ᠤ᠋ ᠨᠣᠣᠰᠣ᠂ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠪᠣᠳᠣᠭ ᠣᠯᠪᠣᠭ ᠠᠷᠤ ᠳ᠋ᠤ᠌ ᠴᠢᠨᠢ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍ ᠬᠠᠭᠠᠨ᠄《ᠴᠢ ᠭᠠᠳᠠᠭᠤᠷ ᠶᠠᠪᠤᠭᠠᠳ᠂ ᠮᠢᠨᠦ ᠲᠤᠬᠠᠢ ᠶᠠᠮᠠᠷ ᠦᠭᠡ ᠰᠣᠨᠣᠰᠪᠠ?》 ᠭᠡᠵᠦ ᠠᠰᠠᠭᠤᠭᠰᠠᠨ ᠳ᠋ᠤ᠌ ᠭᠡᠵᠢᠭᠡᠨ ᠬᠦᠦ᠄ 《ᠰᠣᠨᠣᠰᠤᠭᠰᠠᠨ ᠦᠭᠡ ᠪᠠᠢᠬᠤ ᠴᠤ᠌ ᠪᠠᠢᠨᠠ᠃ ᠪᠢ ᠬᠡᠯᠡᠪᠡᠯ ᠲᠠᠨ ᠳ᠋ᠤ᠌ ᠲᠤᠰᠠ ᠦᠭᠡᠢ᠃ ᠨᠠᠳᠠ ᠳ᠋ᠤ᠌ ᠬᠣᠣᠷ ᠲᠠᠢ》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ᠄《ᠵᠦᠭᠡᠷ! ᠴᠢ ᠬᠡᠯᠡ!》 ᠭᠡᠵᠦ ᠱᠠᠭᠠᠷᠳᠠᠬᠤ ᠳ᠋ᠤ᠌᠂ ᠭᠡᠵᠢᠭᠡᠨ ᠬᠦᠦ᠄《ᠭᠠᠳᠠᠭᠤᠷ ᠬᠡᠯᠡᠯᠴᠡᠵᠦ ᠪᠠᠢᠬᠤ ᠨᠢ᠄《ᠣᠯᠠᠨ ᠪᠦᠬᠦᠨ ᠨᠢ ᠬᠣᠨᠢ᠂ ᠣᠷᠣᠢ ᠶ᠋ᠢᠨ ᠴᠢᠮᠡᠭ ᠨᠢ ᠴᠢᠨᠣᠠ》 ᠭᠡᠵᠦ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍᠂ ᠬᠠᠭᠠᠨ ᠠᠭᠤᠷᠯᠠᠵᠤ ᠭᠡᠵᠢᠭᠡᠨ ᠬᠦᠦ ᠶ᠋ᠢ ᠬᠥᠭᠡᠭᠡᠨ ᠭᠠᠷᠭᠠᠭᠠᠳ᠂ ᠮᠠᠨᠠᠷᠠᠨ ᠤᠨᠠᠪᠠ᠃
ᠴᠢᠩᠭᠢᠭᠡᠳ ᠭᠡᠵᠢᠭᠡᠨ ᠬᠦᠦ ᠭᠠᠷᠴᠤ ᠢᠷᠡᠭᠡᠳ᠂ᠪᠤᠰᠢᠭᠤᠬᠠᠨ ᠪᠣᠷᠣ ᠳᠠᠭᠠ ᠪᠠᠨ ᠤᠨᠤᠵᠤ ᠲᠥᠪᠥᠭᠡᠷᠬᠡᠨ ᠵᠠᠮ ᠢ᠋ᠶ᠋ᠠᠷ ᠤᠷᠲᠤ ᠶ᠋ᠢᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠵᠤ᠂ ᠥᠷᠭᠡᠨ ᠨᠤᠲᠤᠭ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠳᠠᠪᠬᠢᠵᠤ᠂ ᠠᠭᠠᠷ ᠤ᠋ᠨ ᠨᠠᠷᠠᠨ ᠤ᠋ ᠲᠤᠶᠠᠭᠠ ᠶ᠋ᠢ ᠬᠠᠷᠠᠵᠤ᠂ ᠠᠯᠢ ᠵᠢᠷᠭᠠᠯ ᠤ᠋ᠨ ᠵᠦᠭ ᠲᠡᠭᠡᠨ ᠵᠣᠷᠢᠪᠠ ᠭᠡᠨᠡ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂
ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠪᠠᠯᠤᠰᠦᠭ᠂ ᠬᠡᠯᠡᠰᠣᠶᠣᠯ