ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ -ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠬᠦᠦ᠂ ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ-3 Гураван настай гунаган улаан баатар -Хаан төгсийн хүү᠂ Ширээтийн мэргэн хаан-3
104 ᠡᠴᠢᠭᠡ ᠬᠦᠦ ᠲᠡᠢ ᠪᠡᠨ ᠠᠭᠤᠯᠵᠠᠵᠤ
ᠬᠦᠵᠦᠭᠦᠦ ᠶ᠋ᠢ ᠨᠢ ᠲᠡᠪᠡᠷᠢᠨ ᠤᠬᠢᠯᠠᠵᠤ
ᠥᠩᠭᠡᠷᠡᠭᠰᠡᠨ ᠢ᠋ᠶ᠋ᠡᠨ ᠬᠡᠯᠡᠯᠴᠡᠵᠦ
ᠥᠰᠢᠶᠡ ᠠᠪᠬᠤ ᠪᠠᠨ ᠵᠥᠪᠳᠡᠪᠡ᠃
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠬᠡᠯᠡᠭᠰᠡᠨ ᠨᠢ
《ᠬᠠᠷᠠ ᠠᠲᠤᠭᠠᠷ ᠮᠠᠩᠭᠤᠰ ᠪᠣᠯ
ᠬᠠᠯᠳᠠᠰᠢ ᠦᠭᠡᠢ ᠠᠷᠪᠠᠨ ᠰᠦᠨᠡᠰᠦ ᠲᠡᠢ
ᠬᠣᠶᠠᠷ ᠰᠦᠨᠡᠰᠦ ᠨᠢ ᠪᠡᠶᠡ ᠳ᠋ᠡᠭᠡᠨ ᠪᠠᠢᠵᠤ
ᠬᠣᠴᠣᠷᠤᠭᠰᠠᠨ ᠪᠦᠬᠦᠨ ᠨᠢ ᠨᠠᠢ᠍ᠮᠠᠨ ᠵᠦᠭ ᠲᠦ᠍ ᠪᠠᠢᠳᠠᠭ᠃
ᠡᠳᠡᠭᠡᠷ ᠢ᠋ ᠣᠯᠵᠤ ᠰᠠᠷᠨᠢᠭᠤᠯᠬᠤ ᠦᠭᠡᠢ ᠪᠣᠯ
ᠡᠭᠦᠷᠢᠳᠡ ᠳᠡᠢᠯᠦᠨᠡ ᠭᠡᠵᠦ ᠪᠤᠤ ᠰᠠᠨᠠ》 ᠭᠡᠰᠡᠨ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠳᠦ ᠪᠡᠨ ᠵᠠᠭᠤᠵᠤ ᠡᠴᠢᠭᠡ ᠳ᠋ᠡᠭᠡᠨ ᠡᠷᠭᠢᠭᠦᠯᠵᠦ ᠬᠡᠯᠡᠭᠰᠡᠨ ᠨᠢ᠄
《ᠡᠭᠡᠵᠦ ᠪᠤᠴᠠᠵᠤ ᠬᠠᠷᠢᠭᠠᠳ
ᠡᠬᠡ ᠳ᠋ᠦ᠍ ᠮᠢᠨᠢ ᠬᠡᠯᠡᠭᠡᠳ
ᠡᠨᠡ ᠣᠷᠣᠢ ᠤᠨᠲᠠᠬᠤ ᠳ᠋ᠠᠭᠠᠨ
ᠮᠠᠩᠭᠤᠰ ᠤ᠋ᠨ ᠡᠷᠦᠬᠡ ᠶ᠋ᠢ ᠳᠠᠷᠤᠬᠤ ᠳ᠋ᠤ᠌
ᠮᠠᠩᠰᠢᠭᠤᠷᠠᠭᠤᠯᠤᠨ ᠶᠠᠭᠤᠮᠠ ᠪᠤᠳᠤᠭᠤᠯᠬᠤ ᠪᠠᠷ᠄
《ᠮᠠᠷᠭᠠᠰᠢ ᠥᠷᠯᠥᠭᠡ ᠶ᠋ᠢᠨ ᠦᠶᠡ ᠳ᠋ᠦ᠍
ᠮᠠᠩᠭᠤᠰ ᠤ᠋ᠨ ᠨᠠᠷᠠᠨ ᠵᠡᠭᠦᠨ ᠬᠣᠢᠲᠤ ᠠ᠋ᠴᠠ
ᠮᠠᠨ ᠤ᠋ ᠨᠠᠷᠠᠨ ᠵᠡᠭᠦᠨ ᠡᠮᠦᠨᠡ ᠡᠴᠡ》ᠭᠡᠵᠦ ᠬᠡᠯᠡᠪᠡᠯ
ᠶᠠᠷᠵᠠᠭᠠᠷ ᠬᠠᠷᠠ ᠮᠠᠩᠭᠤᠰ
ᠶᠠᠮᠠᠷ ᠤᠬᠠᠭᠠᠨᠲᠠᠢ ᠦᠭᠡ ᠪᠣᠢ? ᠭᠡᠵᠦ
ᠶᠠᠳᠠᠷᠠᠲᠠᠯᠠ ᠲᠡᠷᠡ ᠪᠣᠳᠣᠭᠠᠳ
ᠶᠠᠷᠰᠢᠭᠲᠠᠢ ᠮᠠᠭᠤ ᠵᠡᠭᠦᠳᠦᠯᠡᠵᠦ ᠤᠨᠲᠠᠬᠤ ᠶᠤᠮ》 ᠭᠡᠳ
ᠬᠤᠯᠤᠰᠤᠨ ᠰᠢᠷᠭᠠ ᠮᠣᠷᠢ ᠪᠠᠨ ᠭᠤᠶᠠᠳᠠᠵᠤ
ᠬᠣᠯᠠ ᠵᠠᠢᠯᠠᠨ ᠶᠠᠪᠤᠪᠠ ᠭᠡᠨᠡ᠃
ᠴᠢᠩᠭᠢᠭᠡᠳ ᠬᠠᠭᠠᠨ ᠬᠦᠦ ᠶᠠᠪᠤᠵᠤ
ᠡᠮᠦᠨᠡ ᠠᠭᠤᠯᠠᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠳ᠋ᠦ᠍
ᠮᠠᠩᠭᠤᠰ ᠤ᠋ᠨ ᠨᠢᠭᠡᠳᠦᠭᠡᠷ ᠰᠦᠨᠡᠰᠦ ᠨᠢ
ᠲᠡᠮᠡᠭᠡᠨ ᠴᠢᠨᠡᠭᠡ ᠲᠣᠮᠣ ᠠᠭᠠᠯᠵᠢ
ᠲᠩᠷᠢ ᠲᠤᠯᠤᠮᠠ ᠦᠰᠦᠷᠴᠦ
ᠲᠡᠮᠦᠷ ᠬᠥᠯ ᠢ᠋ᠶ᠋ᠡᠨ ᠰᠠᠷᠪᠠᠢᠯᠭᠠᠨ ᠢᠷᠡᠬᠦ ᠳ᠋ᠦ᠍
ᠪᠣᠯᠣᠳ ᠨᠤᠮᠤ ᠪᠠᠨ ᠠᠪᠴᠤ
ᠪᠤᠯᠤ ᠪᠣᠯᠲᠠᠯᠠ ᠳᠡᠯᠢᠵᠦ ᠲᠠᠯᠪᠢᠭᠰᠠᠨ ᠳ᠋ᠤ᠌
ᠲᠡᠮᠡᠭᠡᠨ ᠠᠭᠠᠯᠵᠢ ᠶ᠋ᠢᠨ ᠵᠢᠷᠦᠬᠡᠨ ᠳ᠋ᠦ᠍ᠨᠢ
ᠲᠠᠰᠤ ᠨᠡᠪᠲᠡᠯᠵᠦ ᠤᠷᠤᠭᠰᠠ ᠳ᠋ᠤ᠌᠂
ᠪᠠᠷᠠᠭᠤᠨ ᠡᠮᠦᠨᠡ ᠵᠦᠭ ᠦ᠋ᠨ
ᠭᠠᠯᠵᠠᠭᠤ ᠬᠠᠷᠠ ᠤᠬᠤᠨᠠ ᠨᠢ
ᠭᠠᠩ ᠡᠪᠡᠷ ᠢ᠋ᠶ᠋ᠡᠨ ᠬᠠᠳᠬᠤᠵᠤ
ᠬᠠᠳᠠ ᠮᠥᠷᠭᠥᠨ ᠢᠷᠡᠬᠦ ᠳ᠋ᠦ᠍
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠵᠢᠷ ᠡᠷᠳᠡᠨᠢ ᠶ᠋ᠢᠨ ᠢᠯᠳᠦ ᠪᠡᠨ ᠰᠤᠭᠤ ᠲᠠᠲᠠᠵᠤ
ᠰᠡᠢᠯᠪᠦᠷᠢ ᠭᠠᠷᠲᠠᠯᠠ ᠴᠠᠪᠴᠢᠭᠠᠳ
ᠪᠠᠷᠠᠭᠤᠨ ᠵᠦᠭ ᠲᠦ᠍ ᠶᠠᠪᠤᠭᠰᠠᠨ ᠳ᠋ᠤ᠌
ᠪᠠᠷᠰ ᠲᠣᠭᠯᠠᠨ ᠬᠠᠷᠠᠢᠯᠠᠵᠤ
ᠠᠭᠵᠠᠰ ᠭᠡᠵᠦ ᠨᠣᠴᠣᠯᠳᠤᠨ ᠢᠷᠡᠭᠡᠳ
ᠠᠯᠲᠠᠨ ᠢᠯᠳᠦᠨ ᠳ᠋ᠦ᠍ᠨᠢ ᠴᠠᠪᠴᠢᠭᠳᠠᠵᠤ
ᠠᠩᠭᠢ ᠬᠤᠪᠢᠶᠠᠷᠢᠯᠠᠨ ᠤᠨᠠᠪᠠ᠃
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍
ᠭᠠᠯᠵᠠᠭᠤ ᠬᠤᠴᠠ ᠲᠣᠰᠴᠤ
ᠭᠠᠳᠠᠮᠠ ᠬᠠᠳᠠ ᠶ᠋ᠢᠨ ᠣᠷᠣᠢ ᠠ᠋ᠴᠠ
ᠭᠠᠳᠠᠨ ᠪᠠᠭᠤᠵᠤ ᠢᠷᠡᠬᠦ ᠳ᠋ᠦ᠍᠂
ᠬᠥᠯ ᠨᠢ ᠭᠠᠵᠠᠷ ᠲᠤᠰᠬᠤ ᠠ᠋ᠴᠠ ᠡᠮᠦᠨᠡ
ᠬᠥᠪᠴᠢ ᠶ᠋ᠢᠨ ᠳᠠᠭᠤᠨ ᠭᠠᠷᠤᠮᠠᠭᠴᠠ
ᠬᠥᠳᠡᠯᠵᠦ ᠲᠡᠷᠡ ᠴᠢᠳᠠᠭᠰᠠᠨ ᠦᠭᠡᠢ
ᠬᠥᠨᠳᠡᠢ ᠴᠡᠭᠡᠵᠢ ᠪᠡᠷ ᠨᠢ ᠨᠡᠪᠲᠡᠷᠡᠪᠡ᠃
ᠬᠣᠢᠲᠤ ᠵᠦᠭ ᠲᠦ᠍ ᠬᠡᠢᠰᠬᠡᠨ ᠣᠴᠢᠭᠰᠠᠨ ᠳ᠋ᠤ᠌
ᠠᠪᠤᠷᠭᠤ ᠪᠦᠳᠦᠭᠦᠨ ᠮᠣᠭᠠᠢ
ᠠᠷᠪᠠᠨ ᠰᠢᠯᠢ ᠶ᠋ᠢᠨ ᠭᠠᠵᠠᠷ ᠢ᠋ ᠣᠷᠢᠶᠠᠵᠤ
ᠠᠮᠢᠲᠠᠨ ᠪᠦᠬᠦᠨ ᠢ᠋ ᠰᠣᠷᠣᠵᠤ
ᠠᠲᠠᠷ ᠲᠠᠪᠠ ᠪᠠᠷ ᠢ᠋ᠶ᠋ᠠᠨ ᠬᠡᠪᠲᠡᠭᠡᠳ
ᠬᠠᠭᠠᠨ ᠬᠦᠦ ᠶ᠋ᠢᠨ ᠢᠷᠡᠬᠦ ᠶ᠋ᠢ ᠦᠵᠡᠭᠡᠳ
ᠬᠠᠮᠤᠭ ᠪᠡᠶᠡ ᠪᠡᠨ ᠬᠣᠷᠢᠶᠠᠨ ᠠᠲᠤᠷᠢᠵᠤ
ᠬᠠᠷᠪᠤᠭᠰᠠᠨ ᠰᠤᠮᠤ ᠰᠢᠭ᠋ ᠲᠦᠷᠭᠡᠨ
ᠬᠠᠷᠰᠢᠯᠳᠤᠨ ᠨᠢᠵᠢᠭᠢᠨᠡᠨ ᠢᠷᠡᠬᠦ ᠳ᠋ᠦ᠍᠂
ᠪᠤᠮᠪᠠ ᠪᠠᠨ ᠡᠷᠭᠦᠨ ᠲᠣᠰᠴᠤ
ᠪᠣᠷᠣ ᠲᠣᠯᠣᠭᠠᠢ ᠶ᠋ᠢ ᠨᠢ ᠮᠠᠨᠠᠷᠠᠲᠠᠯᠠ ᠮᠥᠷᠭᠥᠭᠦᠯᠵᠦ
ᠪᠥᠮᠪᠥᠷᠢᠨ ᠤᠷᠪᠠᠨ ᠤᠨᠠᠬᠤ ᠳ᠋ᠤ᠌
ᠪᠤᠰᠢᠭᠤᠬᠠᠨ ᠴᠠᠪᠴᠢᠵᠤ ᠬᠡᠰᠡᠭᠯᠡᠭᠡᠳ
ᠵᠡᠭᠦᠨ ᠬᠣᠢᠲᠤ ᠵᠦᠭ ᠲᠦ᠍ ᠣᠴᠢᠭᠰᠠᠨ ᠳ᠋ᠤ᠌
ᠠᠵᠢᠷᠭᠠ ᠰᠦᠨᠡᠰᠦ ᠲᠡᠢ ᠲᠣᠬᠢᠶᠠᠯᠳᠤᠵᠤ
ᠳᠡᠯ ᠰᠡᠭᠦᠯ ᠢ᠋ᠶ᠋ᠡᠨ ᠬᠤᠷᠤᠢᠯᠠᠵᠤ
ᠳᠥᠷᠪᠡᠨ ᠲᠤᠭᠤᠷᠠᠢ ᠪᠠᠨ ᠴᠠᠪᠴᠢᠯᠠᠬᠤ ᠳ᠋ᠤ᠌
ᠠᠪᠤᠨ ᠬᠠᠷᠪᠤᠨ ᠠᠯᠠᠭᠠᠳ᠂
ᠵᠡᠭᠦᠨ ᠵᠦᠭ ᠲᠦ᠍ ᠣᠴᠢᠭᠰᠠᠨ ᠳ᠋ᠤ᠌
ᠵᠢᠬᠡᠭᠦᠨ ᠰᠠᠯᠬᠢᠨ ᠰᠦᠷᠴᠢᠭᠢᠨᠡᠵᠦ
ᠵᠢᠭᠲᠡᠢ ᠠᠷᠰᠯᠠᠨ ᠦᠰᠦᠷᠦᠨ ᠢᠷᠡᠭᠡᠳ
ᠵᠠᠭᠤᠷᠠᠯᠳᠤᠭᠠᠨ ᠬᠣᠶᠠᠭᠤᠯᠠ ᠭᠠᠵᠠᠷ ᠤᠨᠠᠵᠤ
ᠠᠭᠤᠯᠠᠨ ᠤ᠋ ᠡᠩᠭᠡᠷ ᠡᠴᠡ ᠨᠣᠴᠣᠯᠳᠤᠵᠤ
ᠣᠷᠣᠢ ᠳᠡᠭᠡᠷᠡ ᠨᠢ ᠭᠠᠷᠲᠠᠯᠠ ᠴᠣᠬᠢᠯᠳᠤᠵᠤ
ᠵᠣᠭᠳᠣᠷ ᠳᠡᠯ ᠡᠴᠡ ᠨᠢ ᠠᠳᠬᠤᠵᠤ
ᠵᠠᠭᠤᠷᠮᠠ ᠪᠠᠬᠠᠨ ᠡᠷᠭᠦᠵᠦ ᠪᠠᠢᠭᠠᠳ
ᠵᠠᠭᠤᠨ ᠠᠯᠲᠠ ᠭᠠᠳᠠᠮᠠ ᠬᠠᠳᠠ ᠤᠷᠤᠭᠤ
ᠵᠠᠶᠠᠭᠠ ᠴᠢᠨᠢ ᠮᠡᠳᠡᠭ ᠭᠡᠵᠦ ᠣᠷᠬᠢᠭᠠᠳ
ᠵᠡᠭᠦᠨ ᠡᠮᠦᠨᠡ ᠣᠴᠢᠭᠰᠠᠨ ᠳ᠋ᠤ᠌
ᠵᠡᠪᠡ ᠶ᠋ᠢᠨ ᠲᠤᠰᠤᠯᠲᠠ ᠮᠡᠳᠡᠭ ᠭᠡᠵᠦ
ᠵᠢᠭᠳᠡᠷᠡᠲᠡᠯᠡ ᠲᠠᠲᠠᠵᠤ ᠬᠠᠷᠪᠤᠭᠠᠳ
ᠪᠤᠷᠤᠭᠤᠯᠠᠨ ᠳᠤᠲᠠᠭᠠᠬᠤ ᠪᠤᠬᠠ ᠶ᠋ᠢ
ᠪᠤᠲᠠᠷᠠᠲᠠᠯᠠ ᠬᠠᠷᠪᠤᠨ ᠠᠯᠠᠭᠠᠳ
ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠠᠢᠯ ᠭᠡᠷ ᠲᠦ᠋ᠨᠢ ᠢᠷᠡᠵᠦ
ᠠᠵᠢᠭᠯᠠᠨ ᠰᠠᠷᠠᠪᠴᠢᠯᠠᠵᠤ ᠦᠵᠡᠭᠰᠡᠨ ᠳ᠋ᠦ᠍
ᠲᠡᠮᠦᠷ ᠭᠠᠳᠠᠰᠤᠨ ᠪᠤᠯᠠᠭᠠᠲᠡᠢ
ᠰᠢᠷᠡᠮᠦᠨ ᠥᠷᠭᠡᠰᠦᠨ ᠲᠠᠲᠠᠯᠭᠠ ᠲᠠᠢ
ᠳᠦᠭᠦᠷᠡᠩ ᠶᠡᠬᠡ ᠬᠠᠰᠢᠶᠠᠨ ᠳ᠋ᠠᠭᠠᠨ
ᠲᠦᠮᠡᠨ ᠮᠢᠩᠭᠠᠨ ᠠᠷᠠᠳ ᠢ᠋ ᠬᠣᠷᠢᠵᠤ
ᠡᠳᠦᠷ ᠰᠥᠨᠢ ᠶ᠋ᠢᠨ ᠢᠯᠭᠠᠯ ᠦᠭᠡᠢ
ᠡᠪᠴᠢᠭᠦᠦ ᠬᠡᠮᠬᠡᠷᠡᠲᠡᠯᠡ ᠠᠵᠢᠯᠯᠠᠭᠤᠯᠵᠤ
ᠦᠢᠯᠡᠳᠦᠨ ᠭᠠᠷᠭᠠᠭᠰᠠᠨ ᠡᠳ᠋ ᠢ᠋ ᠨᠢ
ᠥᠪᠡᠷ ᠦ᠋ᠨ ᠰᠠᠩ ᠳ᠋ᠠᠭᠠᠨ ᠲᠠᠲᠠᠳᠠᠭ
ᠶᠠᠰᠤ ᠶ᠋ᠢ ᠨᠢ ᠬᠤᠭᠤᠷᠠᠲᠠᠯᠠ ᠶᠠᠪᠤᠭᠤᠯᠵᠤ
ᠠᠷᠠᠰᠤ ᠶ᠋ᠢ ᠨᠢ ᠢᠵᠠᠷᠠᠲᠠᠯᠠ ᠭᠤᠶᠠᠳᠠᠵᠤ
ᠮᠠᠨᠠᠷᠠᠭᠤᠯᠤᠨ ᠲᠤᠨᠤᠷᠠᠭᠤᠯᠤᠨ ᠤᠨᠠᠭᠠᠵᠤ
ᠮᠢᠬᠠ ᠴᠢᠰᠤ ᠶ᠋ᠢ ᠨᠢ ᠰᠣᠷᠣᠳᠠᠭ
ᠪᠣᠭᠣᠯ ᠰᠢᠪᠡᠭᠴᠢᠨ ᠢ᠋ᠶ᠋ᠡᠷ ᠲᠠᠬᠠᠷᠳᠠᠵᠤ
ᠪᠣᠰᠤᠭᠠ ᠶ᠋ᠢᠨ ᠠᠶᠠᠭᠠᠴᠢ ᠪᠠᠨ ᠪᠣᠯᠭᠠᠵᠤ
ᠪᠥᠭᠲᠦᠭᠡᠷ ᠪᠣᠯᠲᠠᠯᠠ ᠠᠷᠠᠯᠳᠠᠭᠤᠯᠵᠤ
ᠪᠦᠷᠢᠯᠵᠦ ᠠᠷᠢᠯᠲᠠᠯᠠ ᠮᠥᠯᠵᠢᠳᠡᠭ
ᠡᠢᠮᠦ ᠬᠠᠷᠭᠢᠰ ᠮᠠᠩᠭᠤᠰ ᠲᠤ᠌
ᠡᠰᠢ ᠦᠭᠡᠢ ᠶᠡᠬᠡ ᠠᠭᠤᠷᠯᠠᠵᠤ
ᠲᠡᠷᠰᠯᠡᠭᠦᠦ ᠮᠠᠩᠭᠤᠰ ᠢ᠋ ᠠᠷᠢᠯᠭᠠᠬᠤ ᠦᠭᠡᠢ ᠪᠣᠯ
ᠲᠡᠭᠷᠢ ᠬᠠᠷᠠᠬᠤ ᠦᠭᠡᠢ ᠭᠡᠵᠦ ᠲᠠᠩᠭᠠᠷᠢᠭᠯᠠᠵᠤ
ᠨᠢᠭᠦᠯᠲᠦ ᠮᠠᠭᠤ ᠮᠠᠩᠭᠤᠰ ᠲᠠᠢ
ᠨᠢᠭᠡᠨ ᠨᠠᠷᠠᠨ ᠢ᠋ ᠰᠢᠲᠦᠬᠦ ᠦᠭᠡᠢ ᠭᠡᠵᠦ ᠠᠮᠠᠯᠳᠠᠭᠠᠳ
ᠮᠠᠩᠭᠤᠰ ᠤ᠋ᠨ ᠭᠡᠷ ᠡᠷᠦᠬᠡ ᠳ᠋ᠦ᠍ᠨᠢ
ᠮᠢᠷᠠᠨ ᠭᠡᠲᠡᠵᠦ ᠣᠢᠷᠠᠲᠤᠭᠠᠳ
ᠬᠠᠭᠠᠨ ᠲᠡᠭᠦᠰ ᠦ᠋ᠨ ᠪᠡᠶᠡ ᠨᠢ
ᠬᠠᠯᠠᠰᠢᠷᠠᠲᠠᠯᠠ ᠬᠦᠯᠢᠶᠡᠵᠦ ᠪᠠᠢᠵᠠᠢ᠃
ᠡᠴᠢᠭᠡ ᠬᠦᠦ ᠲᠡᠢ ᠪᠡᠨ ᠵᠣᠯᠭᠠᠵᠤ
ᠡᠢᠮᠦ ᠲᠡᠢᠮᠦ ᠭᠡᠵᠦ ᠰᠢᠪᠡᠨᠡᠯᠳᠦᠭᠡᠳ
ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠬᠥᠮᠦᠨ ᠦ᠌ ᠶᠠᠰᠤ ᠪᠠᠷ ᠬᠦᠷᠢᠶᠡᠯᠡᠵᠦ
ᠬᠡᠦᠬᠡᠳ ᠦ᠋ᠨ ᠶᠠᠰᠤ ᠪᠠᠷ ᠬᠤᠴᠢᠭᠰᠠᠨ
ᠭᠠᠪᠠᠯᠠ ᠶ᠋ᠢᠨ ᠶᠠᠰᠤ ᠪᠠᠷ ᠭᠠᠳᠠᠷᠯᠠᠵᠤ
ᠭᠠᠷ ᠬᠥᠯ ᠦ᠋ᠨ ᠶᠠᠰᠤ ᠪᠠᠷ ᠳᠣᠲᠣᠷᠯᠠᠭᠰᠠᠨ
ᠬᠣᠣᠷᠲᠤ ᠮᠣᠭᠠᠢ ᠶ᠋ᠢᠨ ᠪᠦᠰᠡᠯᠡᠭᠦᠷ ᠲᠡᠢ
ᠬᠥᠮᠦᠨ ᠦ᠌ ᠠᠷᠠᠰᠤᠨ ᠬᠠᠶᠠᠭᠠᠪᠴᠢ ᠲᠠᠢ
ᠢᠷᠣᠠ ᠲᠠᠲᠠᠭᠰᠠᠨ ᠭᠡᠷ ᠲᠦ᠋ᠨᠢ
ᠢᠷᠣᠠ ᠮᠠᠭᠤ ᠲᠠᠢ ᠰᠠᠭᠤᠷᠢ ᠳ᠋ᠤᠨᠢ ᠣᠢᠷᠠᠳᠴᠤ᠂
ᠰᠠᠷᠠᠪᠴᠢ ᠶ᠋ᠢ ᠨᠢ ᠳᠡᠭᠡᠭᠰᠢ ᠵᠠᠪᠰᠠᠷᠯᠠᠵᠤ
ᠱᠠᠭᠠᠢᠵᠤ ᠳᠣᠷᠣᠭᠰᠢ ᠬᠠᠷᠠᠭᠰᠠᠨ ᠳ᠋ᠤ᠌᠂
ᠠᠶᠤᠩᠭᠠ ᠶ᠋ᠢᠨ ᠨᠢᠷᠭᠡᠯᠲᠡ ᠳ᠋ᠦ᠍ ᠳᠠᠭᠠᠷᠢᠭᠳᠠᠪᠠ ᠭᠡᠵᠦ
ᠠᠶᠤᠯ ᠵᠢᠭᠲᠡᠢ ᠪᠡᠷ ᠵᠡᠭᠦᠳᠦᠯᠡᠵᠦ
ᠠᠶᠤᠨ ᠡᠮᠢᠶᠡᠨ ᠠᠲᠤᠷᠢᠵᠤ
ᠠᠶᠤᠤᠯᠢᠬᠠᠢ ᠪᠠᠨ ᠢᠷᠡᠨ ᠤᠨᠲᠠᠬᠤ ᠳ᠋ᠤ᠌
ᠬᠠᠮᠠᠷ ᠤ᠋ᠨ ᠬᠣᠶᠠᠷ ᠨᠦᠬᠡᠨ ᠡᠴᠡ ᠨᠢ
ᠬᠠᠷᠠ ᠠᠯᠲᠠᠨ ᠯᠤᠤ ᠰᠦᠯᠵᠢᠵᠦ ᠪᠠᠢᠨᠠ ᠭᠡᠨᠡ᠃
ᠵᠢᠷᠪᠢᠯᠵᠡᠭᠰᠡᠨ ᠬᠣᠶᠠᠷ ᠯᠤᠤ ᠶ᠋ᠢᠨ
ᠵᠡᠷᠭᠡᠴᠡᠬᠦ ᠶ᠋ᠢ ᠲᠠᠭᠠᠷᠠᠭᠤᠯᠵᠤ ᠬᠠᠷᠪᠤᠭᠠᠳ
ᠵᠡᠷᠭᠡ ᠪᠡᠷ ᠨᠢ ᠰᠦᠪᠡᠯᠡᠵᠦ ᠠᠯᠠᠬᠤ ᠳ᠋ᠤ᠌
ᠠᠷᠪᠠᠨ ᠬᠣᠶᠠᠷ ᠲᠣᠯᠣᠭᠠᠢ ᠲᠠᠢ
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ
ᠠᠶᠤᠩᠭᠠ ᠰᠢᠭ᠋ ᠪᠠᠷᠬᠢᠷᠠᠵᠤ
ᠠᠭᠵᠠᠰ ᠭᠡᠵᠦ ᠦᠰᠦᠷᠦᠨ ᠪᠣᠰᠤᠭᠠᠳ
ᠴᠢᠨᠣᠠ ᠶ᠋ᠢᠨ ᠰᠢᠳᠦ ᠲᠡᠢ ᠰᠢᠳᠠᠮ ᠢ᠋ᠶ᠋ᠠᠨ
ᠰᠢᠭᠦᠷᠡᠨ ᠠᠪᠤᠭᠠᠳ ᠵᠠᠨᠴᠢᠭᠰᠠᠨ ᠳ᠋ᠤ᠌
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠳᠠᠮ ᠢ᠋ ᠨᠢ ᠲᠣᠰᠣᠨ ᠴᠠᠪᠴᠢᠵᠤ
ᠳᠣᠣᠷᠠ ᠪᠠᠨ ᠬᠣᠶᠠᠭᠤᠯᠠ ᠲᠤᠯᠤᠯᠳᠤᠵᠤ
ᠳᠣᠯᠣᠭᠠ ᠨᠠᠢ᠍ᠮᠠ ᠵᠥᠷᠢᠯᠳᠦᠨ
ᠡᠷᠭᠢᠵᠦ ᠬᠣᠶᠠᠭᠤᠯᠠ ᠲᠤᠯᠤᠯᠳᠤᠵᠤ
ᠶᠢᠰᠦ ᠠᠷᠪᠠ ᠵᠥᠷᠢᠯᠳᠦᠨ
ᠠᠰ ᠳᠣᠣᠷᠠ ᠪᠠᠨ ᠲᠤᠯᠤᠯᠳᠤᠵᠤ
ᠠᠷᠪᠠ ᠬᠣᠷᠢ ᠵᠥᠷᠢᠯᠳᠦᠨ
ᠬᠤᠷᠳᠤᠨ ᠳᠠᠷᠤᠢ ᠲᠤᠯᠤᠯᠳᠤᠵᠤ
ᠬᠣᠷᠢ ᠭᠤᠴᠢ ᠵᠥᠷᠢᠯᠳᠦᠨ
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠠᠭᠤᠷᠯᠠᠨ
ᠠᠭᠤᠯᠠ ᠪᠠᠷ ᠠᠪᠤᠨ ᠴᠢᠯᠠᠭᠤᠳᠠᠵᠤ
ᠬᠠᠭᠠᠨ ᠬᠦᠦ ᠬᠢᠯᠢᠩᠨᠡᠵᠦ
ᠬᠠᠳᠠ ᠪᠠᠷ ᠠᠪᠤᠨ ᠰᠢᠲᠠᠵᠤ
ᠬᠥᠷᠥᠰᠥᠲᠦ ᠳᠡᠯᠡᠬᠡᠢ ᠶ᠋ᠢ ᠬᠥᠪᠬᠡᠯᠵᠡᠲᠡᠯᠡ
ᠬᠥᠬᠡ ᠳᠠᠯᠠᠢ ᠶ᠋ᠢ ᠴᠠᠯᠭᠢᠭᠤᠯᠵᠤ᠂
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠳᠣᠷᠭᠢᠭᠤᠯᠵᠤ
ᠠᠷᠤ ᠳᠠᠯᠠᠢ ᠶ᠋ᠢ ᠪᠤᠴᠠᠯᠲᠠᠯᠠ
ᠠᠯᠠᠯᠳᠤᠭᠴᠢ ᠨᠢᠭᠡ ᠶ᠋ᠢ ᠪᠣᠳᠣᠬᠤ ᠨᠢ᠄
《ᠠᠪᠤ ᠡᠵᠢ ᠪᠡᠨ ᠬᠠᠮᠠᠭᠠᠯᠠᠵᠤ
ᠠᠷᠠᠳ ᠪᠦᠬᠦᠨ ᠢ᠋ᠶ᠋ᠡᠨ ᠭᠠᠷᠭᠠᠵᠤ
ᠠᠴᠢ ᠬᠡᠦᠬᠡᠳ ᠢ᠋ᠶ᠋ᠡᠨ ᠦᠷᠡᠵᠢᠭᠦᠯᠵᠦ
ᠠᠯᠪᠠᠲᠠᠨ ᠪᠣᠭᠣᠯᠴᠢᠯᠠᠬᠤ ᠠ᠋ᠴᠠ ᠠᠩᠭᠢᠵᠢᠷᠠᠭᠤᠯᠵᠤ
ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠠᠮᠢᠳᠤᠷᠠᠶᠠ》 ᠭᠡᠳ
ᠠᠷᠭᠠ ᠪᠠᠨ ᠭᠦᠢᠴᠡᠳᠬᠡᠨ ᠬᠦᠴᠦᠯᠡᠵᠦ
《ᠭᠣᠯᠣᠮᠲᠠ ᠪᠠᠨ ᠪᠠᠯᠠᠷᠠᠭᠤᠯᠤᠭᠰᠠᠨ ᠦᠰ ᠢ᠋ᠶ᠋ᠡᠨ
ᠭᠣᠮᠣᠳᠠᠯ ᠦᠭᠡᠢ ᠬᠠᠷᠢᠭᠤᠯᠤᠶᠠ》 ᠭᠡᠵᠦ
ᠠᠯᠠᠬᠤ ᠰᠡᠳᠬᠢᠯ ᠰᠢᠭᠤᠳᠴᠠᠢ᠃
ᠠᠰᠲᠠᠭᠠᠨ ᠨᠢᠭᠡ ᠨᠢ ᠪᠣᠳᠣᠭᠰᠠᠨ ᠨᠢ
《ᠠᠭᠠᠷ ᠤ᠋ᠨ ᠨᠠᠷᠠᠨ ᠢ᠋ ᠠᠳᠬᠤᠵᠤ
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢ ᠭᠢᠰᠬᠢᠯᠡᠵᠦ
ᠠᠯᠳᠠᠷᠲᠤ ᠪᠠᠭᠠᠲᠤᠷ ᠤ᠋ᠳ ᠢ᠋ ᠰᠥᠨᠥᠭᠡᠵᠦ
ᠠᠭᠤᠳᠠᠮ ᠣᠷᠣᠨ ᠢ᠋ ᠨᠢ ᠡᠵᠡᠯᠡᠵᠦ
ᠠᠷᠠᠳ ᠣᠯᠠᠨ ᠢ᠋ ᠨᠢ ᠠᠯᠪᠠᠳᠠᠵᠤ
ᠠᠮᠢᠲᠠᠨ ᠪᠦᠬᠦᠨ ᠢ᠋ ᠳᠠᠷᠤᠯᠠᠶᠠ 》 ᠭᠡᠳ
《ᠰᠦᠨᠡᠰᠦ ᠪᠡᠨ ᠠᠯᠳᠠᠭᠰᠠᠨ ᠦᠰ ᠢ᠋ᠶ᠋ᠡᠨ
ᠰᠢᠨᠲᠠᠷᠠᠯ ᠦᠭᠡᠢ ᠠᠪᠤᠶᠠ》 ᠭᠡᠵᠦ
ᠠᠮᠢ ᠪᠠᠨ ᠬᠠᠶᠠᠵᠤ ᠳᠣᠭᠰᠢᠷᠠᠨ
ᠠᠭᠤᠯᠠ ᠬᠠᠳᠠ ᠶ᠋ᠢ ᠨᠤᠷᠠᠲᠠᠯᠠ
ᠠᠭᠤᠳᠠᠮ ᠲᠠᠯᠠ ᠶ᠋ᠢ ᠳᠡᠪᠲᠦᠲᠡᠯᠡ
ᠤᠰᠤ ᠮᠥᠷᠡᠨ ᠢ᠋ ᠣᠷᠭᠢᠯᠲᠠᠯᠠ
ᠣᠢ ᠰᠢᠭᠤᠢ ᠶ᠋ᠢ ᠬᠡᠪᠲᠡᠲᠡᠯᠡ
ᠲᠠᠮᠢᠷ ᠲᠡᠩᠬᠡᠭᠡ ᠪᠡᠨ ᠦᠵᠡᠯᠴᠡᠨ
ᠳᠡᠰ ᠨᠢᠰ ᠵᠣᠳᠣᠯᠴᠠᠨ
ᠡᠷᠡ ᠬᠦᠴᠦ ᠪᠡᠨ ᠦᠵᠡᠯᠴᠡᠨ
ᠡᠷᠭᠢ ᠶᠡᠭᠦᠷᠡᠲᠡᠯᠡ ᠵᠠᠨᠴᠢᠯᠳᠤᠨ
ᠭᠠᠩ ᠵᠡᠪᠰᠡᠭ ᠨᠢ ᠮᠥᠷᠭᠥᠯᠳᠦᠨ
ᠭᠠᠯ ᠤ᠋ᠨ ᠨᠣᠷᠮᠠ ᠨᠢ ᠪᠤᠲᠠᠷᠠᠨ
ᠬᠠᠷᠪᠤᠭᠰᠠᠨ ᠰᠤᠮᠤ ᠨᠢ ᠬᠢᠮᠤᠷᠠᠯᠳᠤᠨ
ᠬᠠᠭᠠ ᠨᠢᠴᠠ ᠣᠴᠢᠵᠤ
ᠬᠥᠲᠥ ᠵᠣᠷᠢᠨ ᠭᠠᠷᠴᠤ
ᠬᠥᠷᠪᠡᠨ ᠳᠠᠬᠢᠨ ᠣᠷᠣᠵᠤ
ᠭᠡᠯᠲᠡ ᠵᠣᠷᠢᠨ ᠭᠠᠷᠴᠤ᠂
ᠬᠡᠯᠪᠡᠷᠢᠨ ᠳᠠᠬᠢᠨ ᠣᠷᠣᠵᠤ
ᠬᠠᠷᠠᠩᠭᠤᠢ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ
ᠬᠠᠷᠠᠭᠠ ᠶ᠋ᠢ ᠨᠢ ᠦᠵᠡᠨ ᠲᠤᠯᠤᠯᠳᠤᠵᠤ
ᠰᠠᠷᠠᠭᠤᠯ ᠰᠥᠨᠢ ᠶ᠋ᠢᠨ ᠬᠣᠭᠣᠷᠣᠨᠳᠣ
ᠰᠡᠭᠦᠳᠡᠷ ᠢ᠋ ᠨᠢ ᠦᠵᠡᠨ ᠪᠠᠢᠯᠳᠤᠵᠤ
ᠠᠯᠠᠶᠠ ᠭᠡᠰᠡᠨ ᠰᠡᠳᠬᠢᠯ ᠨᠢ
ᠠᠭᠠᠷ ᠢ᠋ ᠲᠤᠯᠤᠨ ᠪᠠᠳᠠᠷᠠᠵᠤ
ᠠᠶᠤᠩᠭᠠ ᠮᠡᠲᠦ ᠳᠠᠭᠤᠨ ᠨᠢ
ᠠᠷᠪᠠᠨ ᠰᠢᠯᠢ ᠶ᠋ᠢ ᠪᠦᠷᠬᠦᠵᠦ
ᠵᠠᠨᠤᠯᠲᠤ ᠰᠡᠳᠬᠢᠯ ᠨᠢ ᠪᠠᠳᠠᠷᠠᠵᠤ
ᠵᠠᠪᠠᠯ ᠠᠯᠠᠶᠠ ᠭᠡᠵᠦ ᠪᠣᠳᠣᠭᠠᠳ
ᠵᠢᠭᠠᠵᠤ ᠢᠷᠡᠬᠦ ᠵᠡᠪᠰᠡᠭ ᠦ᠋ᠳ ᠨᠢ
ᠵᠢᠬᠡᠭᠦᠨ ᠰᠠᠯᠬᠢᠨ ᠲᠠᠲᠠᠵᠤ
ᠰᠢᠲᠦ ᠪᠡᠨ ᠬᠠᠪᠢᠷᠤᠭᠰᠠᠨ ᠰᠡᠳᠬᠢᠯ ᠨᠢ
ᠰᠢᠷᠦᠭᠦᠨ ᠠᠶᠤᠮᠠᠷ ᠪᠣᠯᠵᠤ
ᠰᠢᠷᠦᠭᠦᠨ ᠢᠷᠡᠬᠦ ᠵᠡᠪᠰᠡᠭ ᠨᠢ
ᠰᠢᠷᠦᠭᠦᠨ ᠰᠠᠯᠬᠢᠨ ᠳᠡᠭᠳᠡᠭᠡᠵᠦ
ᠳᠠᠬᠢᠨ ᠳᠠᠬᠢᠨ ᠲᠤᠯᠤᠯᠳᠤᠵᠤ
ᠲᠠᠪᠤᠨ ᠡᠳᠦᠷ ᠪᠣᠯᠵᠤ
ᠵᠠᠭᠤᠷᠠᠯᠳᠤᠨ ᠵᠠᠭᠤᠷᠠᠯᠳᠤᠨ ᠨᠣᠴᠣᠯᠳᠤᠵᠤ
ᠵᠢᠷᠭᠤᠭᠠᠨ ᠡᠳᠦᠷ ᠪᠣᠯᠤᠭᠰᠠᠨ ᠳ᠋ᠤ᠌
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ ᠤ᠋ᠨ
ᠠᠤᠭᠠ ᠬᠦᠴᠦ ᠨᠢ ᠪᠠᠭᠤᠷᠠᠵᠤ
ᠠᠳᠬᠤᠭᠰᠠᠨ ᠵᠡᠪᠰᠡᠭ ᠨᠢ ᠬᠦᠨᠳᠦᠷᠡᠵᠦ
ᠠᠷᠤ ᠶ᠋ᠢᠨ ᠬᠥᠯᠥᠰᠥ ᠨᠢ ᠭᠣᠭᠣᠵᠢᠭᠠᠳ
ᠬᠠᠯᠠᠰᠢᠷᠠᠵᠤ ᠳᠣᠲᠣᠷᠠ ᠨᠢ ᠪᠥᠭᠯᠡᠷᠡᠵᠦ
ᠬᠠᠷᠠᠯᠠᠵᠤ ᠳᠣᠲᠣᠷᠠ ᠨᠢ ᠮᠠᠨᠠᠷᠠᠵᠤ
ᠬᠠᠷᠢᠭᠤᠯᠤᠨ ᠵᠣᠳᠣᠬᠤ ᠶ᠋ᠢ ᠬᠡᠯᠡᠬᠦ ᠦᠭᠡᠢ
ᠬᠠᠯᠬᠠᠯᠠᠬᠤ ᠵᠠᠢ ᠴᠤ᠌ ᠣᠯᠳᠠᠬᠤ ᠦᠭᠡᠢ
ᠴᠠᠪᠴᠢᠵᠤ ᠪᠠᠭᠤᠬᠤ ᠢᠯᠳᠦ ᠨᠢ
ᠴᠠᠬᠢᠯᠭᠠᠨ ᠤ᠋ ᠭᠡᠷᠡᠯ ᠰᠢᠭ ᠭᠢᠯᠪᠠᠯᠵᠠᠵᠤ
ᠴᠠᠰᠤ ᠯᠠᠪᠰᠠᠭ ᠪᠠᠭᠤᠬᠤ ᠰᠢᠭ᠋
ᠴᠠᠭᠠᠨᠠ ᠨᠠᠭᠠᠨᠠ ᠨᠢ ᠲᠣᠰᠴᠤ
ᠮᠥᠯᠢᠢᠭᠰᠡᠨ ᠡᠷᠳᠡᠨᠢ ᠶ᠋ᠢᠨ ᠢᠯᠳᠦ ᠨᠢ
ᠮᠤᠩᠬᠠᠭ ᠮᠠᠩᠭᠤᠰ ᠤ᠋ᠨ ᠲᠣᠯᠣᠭᠠᠢ ᠤᠷᠤᠭᠤ
ᠮᠥᠨᠳᠥᠷ ᠣᠷᠣᠬᠤ ᠰᠢᠭ᠋ ᠪᠠᠭᠤᠵᠤ
ᠮᠤᠯᠲᠤ ᠮᠤᠯᠲᠤ ᠴᠠᠪᠴᠢᠭᠰᠠᠨ ᠳ᠋ᠤ᠌
ᠮᠢᠬᠠ ᠤᠨᠠᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢ
ᠮᠠᠩᠭᠤᠰ ᠪᠣᠰᠤᠨ ᠭᠠᠷᠴᠤ
ᠮᠠᠨᠴᠤᠷᠭᠠ ᠪᠠᠨ ᠰᠢᠭᠦᠷᠡᠨ ᠭᠦᠶᠦᠭᠡᠳ
ᠮᠢᠬᠠ ᠢᠳᠡᠶᠡ ᠭᠡᠵᠦ ᠪᠠᠷᠬᠢᠷᠠᠵᠠᠢ᠃
ᠴᠢᠰᠤ ᠲᠤᠰᠤᠭᠰᠠᠨ ᠭᠠᠵᠠᠷ ᠠ᠋ᠴᠠ ᠨᠢ
ᠰᠢᠮᠨᠤᠰ ᠪᠣᠰᠤᠨ ᠭᠠᠷᠴᠤ
ᠰᠢᠳᠠᠮ ᠢ᠋ᠶ᠋ᠠᠨ ᠰᠢᠭᠦᠷᠡᠨ ᠭᠦᠶᠦᠭᠡᠳ
ᠴᠢᠰᠤ ᠤᠤᠭᠤᠶᠠ ᠭᠡᠵᠦ ᠪᠠᠷᠬᠢᠷᠠᠵᠠᠢ᠃
ᠣᠯᠠᠨ ᠮᠠᠩᠭᠤᠰ ᠦᠢᠮᠡᠯᠳᠦᠨ
ᠣᠴᠢᠬᠤ ᠵᠠᠮ ᠢ᠋ ᠨᠢ ᠬᠠᠭᠠᠵᠤ᠂
ᠠᠷᠪᠢᠨ ᠰᠢᠮᠨᠤᠰ ᠠᠷᠵᠠᠢᠵᠤ
ᠠᠯᠬᠤᠬᠤ ᠵᠠᠮ ᠢ᠋ ᠨᠢ ᠬᠠᠭᠠᠵᠤ᠂
ᠡᠷᠭᠢᠨ ᠲᠣᠭᠣᠷᠢᠨ ᠡᠷᠪᠡᠢᠵᠦ
ᠡᠷᠭᠢᠬᠦ ᠵᠠᠮ ᠢ᠋ ᠨᠢ ᠬᠠᠭᠠᠵᠤ᠂
ᠪᠤᠭ ᠴᠢᠳᠬᠥᠷ ᠨᠢ ᠪᠣᠰᠴᠤ
ᠪᠤᠴᠠᠬᠤ ᠵᠠᠮ ᠢ᠋ ᠨᠢ ᠬᠠᠯᠬᠠᠯᠠᠵᠤ᠂
ᠪᠤᠭᠤᠷᠤᠯ ᠰᠠᠭᠠᠷᠠᠯ ᠢ᠋ᠶ᠋ᠠᠷ ᠪᠠᠷᠬᠢᠷᠠᠵᠤ
ᠪᠤᠰᠢᠭᠤᠬᠠᠨ ᠵᠠᠪᠳᠤᠵᠤ ᠢᠷᠡᠨᠡ᠃
ᠵᠦᠭ ᠵᠦᠭ ᠡᠴᠡ ᠨᠢ ᠮᠠᠨᠴᠤᠷᠭᠠᠳᠠᠵᠤ
ᠵᠣᠭᠰᠣᠭᠠᠬᠤ ᠴᠢᠯᠥᠭᠡ ᠣᠯᠭᠣᠬᠤ ᠦᠭᠡᠢ᠂
ᠵᠣᠪᠬᠢᠰ ᠵᠣᠪᠬᠢᠰ ᠠ᠋ᠴᠠ ᠨᠢ ᠰᠢᠳᠠᠮᠳᠠᠵᠤ
ᠵᠠᠢᠯᠠᠬᠤ ᠵᠠᠪᠰᠢᠶᠠᠨ ᠣᠯᠭᠣᠬᠤ ᠦᠭᠡᠢ
ᠬᠤᠯᠠᠭᠤᠨ ᠨᠢᠭᠤᠵᠤ ᠣᠢᠷᠠᠲᠤᠨ
ᠬᠣᠢᠨᠠ ᠠ᠋ᠴᠠ ᠨᠢ ᠭᠡᠲᠡᠵᠦ ᠢᠷᠡᠨ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ ᠶ᠋ᠢ
ᠰᠢᠳᠠᠮᠳᠠᠵᠤ ᠮᠣᠷᠢᠨ ᠠ᠋ᠴᠠ ᠤᠨᠠᠭᠠᠭᠰᠠᠨ ᠳ᠋ᠤ᠌
ᠠᠲᠤᠭᠠᠷ ᠬᠠᠷᠠ ᠮᠠᠩᠭᠤᠰ
ᠠᠮᠠ ᠪᠠᠨ ᠠᠩᠭᠠᠢᠨ ᠪᠠᠶᠠᠷᠯᠠᠵᠤ
ᠠᠮᠢᠳᠤ ᠮᠢᠬᠠ ᠢᠳᠡᠶᠡ ᠭᠡᠵᠦ
ᠠᠷᠪᠠᠢᠨ ᠰᠡᠷᠪᠡᠢᠨ ᠢᠷᠡᠭᠰᠡᠨ ᠳ᠋ᠦ᠍ ᠭ
ᠡᠨᠡᠳᠲᠡ ᠭᠦᠶᠦᠨ ᠪᠣᠰᠴᠤ
ᠭᠡᠳᠡᠰᠦ ᠳᠡᠭᠡᠷᠡ ᠨᠢ ᠣᠨᠢᠯᠠᠵᠤ
ᠭᠡᠳᠡᠷᠭᠡᠨ ᠣᠢᠴᠢᠲᠠᠯᠠ ᠢᠰᠬᠦᠯᠵᠦ
ᠭᠡᠵᠢᠭᠡᠨ ᠡᠴᠡ ᠨᠢ ᠬᠣᠷᠢᠶᠠᠨ ᠪᠠᠷᠢᠭᠰᠠᠨ ᠳ᠋ᠤ᠌
ᠦᠮᠡᠬᠡᠢ ᠮᠠᠭᠤ ᠮᠠᠩᠭᠤᠰ
ᠢᠩᠭᠢᠵᠦ ᠶᠠᠭᠠᠬᠢᠵᠤ ᠪᠣᠯᠬᠤ ᠪᠣᠢ? ᠭᠡᠳ
ᠡᠷᠢᠶᠡᠨ ᠪᠠᠷᠢᠶᠠᠨ ᠪᠠᠷᠬᠢᠷᠠᠵᠤ
ᠡᠷᠭᠢᠨ ᠲᠠᠬᠢᠵᠤ ᠪᠣᠰᠤᠶᠠ ᠭᠡᠲᠡᠯᠡ
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ
ᠰᠢᠯᠢᠨ ᠬᠦᠵᠦᠭᠦᠦ ᠳᠡᠭᠡᠷᠡ ᠨᠢ ᠭᠢᠰᠬᠢᠵᠦ
ᠰᠢᠷᠡᠮᠦᠨ ᠪᠣᠯᠣᠳ ᠨᠢᠳᠤᠷᠭᠠ ᠪᠠᠷ
ᠰᠢᠯᠵᠢᠯ ᠦᠭᠡᠢ ᠴᠣᠬᠢᠭᠰᠠᠨ ᠳ᠋ᠤ᠌
ᠬᠥᠬᠡ ᠨᠢᠳᠦ ᠨᠢ ᠡᠷᠢᠶᠡᠯᠵᠢᠵᠦ
ᠬᠦᠷᠡᠩ ᠬᠡᠯᠡ ᠨᠢ ᠤᠨᠵᠢᠢᠵᠤ
ᠬᠦᠴᠦ ᠲᠠᠮᠢᠷ ᠨᠢ ᠰᠠᠷᠨᠢᠵᠤ
ᠬᠥᠳᠡᠭᠡ ᠳᠠᠰᠢ ᠬᠠᠨᠳᠤᠨ ᠬᠡᠪᠲᠡᠭᠡᠳ᠂
ᠰᠢᠷᠡᠭᠡᠲᠦ ᠶ᠋ᠢᠨ ᠮᠡᠷᠭᠡᠨ ᠬᠠᠭᠠᠨ ᠬᠦᠦ ᠳ᠋ᠦ᠍
ᠰᠢᠯᠵᠢᠯ ᠦᠭᠡᠢ ᠮᠥᠷᠭᠥᠵᠦ
ᠰᠢᠵᠢᠮ ᠲᠡᠳᠦᠢ ᠠᠮᠢ ᠪᠠᠨ
ᠰᠢᠪᠬᠠᠲᠠᠯᠠ ᠪᠠᠨ ᠭᠤᠶᠤᠵᠤ ᠪᠠᠢᠬᠤ ᠨᠢ᠄
《ᠠᠯᠢᠪᠠ ᠬᠥᠷᠥᠩᠭᠡ ᠪᠡᠨ ᠥᠭᠭᠦᠶᠡ ᠪᠢ᠂
ᠠᠯᠲᠠ ᠮᠥᠩᠭᠥ ᠪᠡᠨ ᠪᠠᠷᠢᠶᠠ ᠪᠢ᠂
ᠠᠯᠪᠠᠲᠤ ᠪᠣᠭᠣᠯ ᠴᠢᠨᠢ ᠪᠣᠯᠤᠶᠠ ᠪᠢ᠂
ᠠᠭᠲᠠ ᠶ᠋ᠢᠨ ᠬᠥᠲᠥᠴᠢ ᠪᠡᠷ ᠴᠢᠨᠢ ᠶᠠᠪᠤᠶᠠ ᠪᠢ᠂
ᠲᠠᠰᠢᠭᠤᠷ ᠢ᠋ ᠴᠢᠨᠢ ᠡᠷᠭᠦᠵᠦ
ᠳᠥᠷᠥᠭᠡ ᠶ᠋ᠢ ᠴᠢᠨᠢ ᠲᠦᠰᠢᠵᠦ
ᠬᠠᠷᠠ ᠲᠣᠯᠣᠭᠠᠢ ᠪᠠᠨ ᠳᠠᠷᠤᠵᠤ
ᠬᠠᠮᠤᠭ ᠬᠦᠴᠦ ᠪᠡᠨ ᠡᠷᠭᠦᠶᠡ᠂
ᠠᠮᠢ ᠶ᠋ᠢ ᠮᠢᠨᠢ ᠠᠪᠤᠷᠠᠪᠠᠯ
ᠠᠮᠢᠳᠤ ᠪᠤᠷᠬᠠᠨ ᠰᠢᠭ᠋ ᠰᠢᠲᠦᠶᠡ᠂
ᠠᠯᠠᠬᠤ ᠪᠠᠨ ᠵᠣᠭᠰᠣᠵᠤ
ᠨᠠᠮᠠᠶ᠋ᠢ ᠠᠭᠤᠴᠢᠯᠠᠨ ᠥᠷᠥᠰᠢᠶᠡ》 ᠭᠡᠰᠡᠨ ᠳ᠋ᠦ᠍
ᠮᠠᠩᠭᠤᠰ ᠤ᠋ᠨ ᠶᠠᠯᠠ ᠶ᠋ᠢ ᠨᠢ ᠲᠣᠭᠠᠴᠢᠵᠤ
ᠮᠠᠭᠤ ᠲᠡᠦᠬᠡ ᠶ᠋ᠢ ᠨᠢ ᠶᠠᠷᠢᠵᠤ
ᠣᠯᠠᠨ ᠤ᠋ ᠦᠰ ᠢ᠋ ᠠᠪᠬᠤ ᠳ᠋ᠤ᠌
ᠣᠭᠲᠣ ᠴᠢᠮᠠ ᠶ᠋ᠢ ᠥᠷᠥᠰᠢᠶᠡᠬᠦ ᠦᠭᠡᠢ
ᠴᠢᠨᠦ ᠭᠠᠷ ᠲᠤ᠌ ᠦᠬᠦᠭᠰᠡᠨ
ᠰᠢᠳᠤᠷᠭᠤ ᠠᠷᠠᠳ ᠤ᠋ᠨ ᠲᠥᠯᠥᠭᠡ ᠭᠡᠵᠦ
ᠡᠷᠳᠡᠨᠢ ᠶ᠋ᠢᠨ ᠢᠯᠳᠦ ᠪᠡᠨ ᠳᠠᠯᠠᠢᠵᠤ
ᠡᠷᠭᠢᠭᠦᠦ ᠲᠣᠯᠣᠭᠠᠢ ᠶ᠋ᠢ ᠨᠢ ᠲᠠᠰᠤ ᠴᠠᠪᠴᠢᠭᠠᠳ
ᠲᠡᠮᠦᠷ ᠬᠡᠷᠡᠮ ᠢ᠋ ᠨᠢ ᠡᠪᠳᠡᠵᠦ
ᠲᠦᠪᠡᠭᠳᠡᠭᠰᠡᠨ ᠣᠯᠠᠨ ᠢ᠋ᠶ᠋ᠠᠨ ᠲᠠᠯᠪᠢᠵᠤ
ᠠᠪᠤ ᠡᠵᠢ ᠪᠡᠨ ᠠᠪᠤᠭᠠᠳ
ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠨ ᠳᠠᠭᠠᠭᠤᠯᠵᠤ
ᠠᠴᠢᠶᠠ ᠬᠥᠰᠬᠡ ᠪᠡᠨ ᠵᠠᠰᠠᠵᠤ
ᠠᠶᠠᠨ ᠵᠠᠮ ᠳ᠋ᠠᠭᠠᠨ ᠮᠣᠷᠳᠠᠬᠤ ᠳ᠋ᠠᠭᠠᠨ
ᠮᠠᠩᠭᠤᠰ ᠤ᠋ᠨ ᠨᠢᠭᠦᠯᠲᠦ ᠦᠬᠦᠳᠡᠯ ᠢ᠋
ᠮᠠᠭᠤ ᠬᠠᠷᠰᠢ ᠣᠷᠳᠣᠨ ᠲᠠᠢ ᠨᠢ
ᠵᠢᠩᠰᠡᠷᠭᠡᠯᠡᠨ ᠭᠠᠯ ᠲᠠᠯᠪᠢᠵᠤ
ᠵᠡᠭᠦᠨ ᠡᠮᠦᠨᠡ ᠲᠢᠪ ᠲᠡᠭᠡᠨ ᠢᠷᠡᠭᠰᠡᠨ ᠳ᠋ᠦ᠍
ᠬᠢᠯᠠᠭᠤᠨ ᠮᠡᠷᠭᠡᠨ ᠠᠪᠠᠭᠠᠢ ᠨᠢ
ᠬᠡᠵᠢᠶᠡᠨᠡᠢ ᠬᠦᠷᠴᠦ ᠢᠷᠡᠭᠡᠳ
ᠬᠡᠷᠡᠮ ᠬᠠᠰᠢᠶᠠ ᠪᠠᠨ ᠵᠠᠰᠠᠵᠤ
ᠬᠡᠪ ᠳᠦᠷᠢ ᠪᠡᠷ ᠪᠣᠯᠭᠠᠵᠠᠢ᠃
ᠬᠠᠷᠢᠵᠤ ᠢᠷᠡᠭᠰᠡᠨ ᠤᠯᠤᠰ ᠲᠠᠢ
ᠬᠠᠷᠢᠯᠴᠠᠨ ᠦᠨᠦᠰᠦᠨ ᠲᠡᠪᠡᠷᠢᠯᠳᠦᠵᠦ
ᠬᠠᠯᠠᠭᠤᠨ ᠨᠢᠯᠪᠤᠰᠤ ᠪᠠᠨ ᠠᠰᠬᠠᠷᠠᠭᠤᠯᠵᠤ
ᠬᠢᠵᠠᠭᠠᠯᠠᠰᠢ ᠦᠭᠡᠢ ᠪᠠᠶᠠᠷᠯᠠᠯᠳᠤᠨ
ᠬᠠᠭᠠᠨ ᠲᠡᠭᠦᠰ ᠠᠪᠤ᠂ ᠬᠠᠲᠤᠨ ᠡᠵᠢ ᠳ᠋ᠡᠭᠡᠨ
ᠬᠠᠷᠢ ᠳ᠋ᠤ᠌ ᠢᠷᠡᠭᠰᠡᠨ ᠪᠡᠷᠢ ᠶ᠋ᠢᠨ ᠶᠣᠰᠣ ᠶ᠋ᠢ ᠬᠢᠵᠦ
ᠬᠠᠷᠢᠶᠠᠲᠤ ᠠᠷᠠᠳ ᠣᠯᠠᠨ ᠢ᠋ᠶ᠋ᠠᠨ ᠴᠤᠭᠯᠠᠭᠤᠯᠵᠤ
ᠬᠠᠮᠲᠤᠷᠠᠭᠰᠠᠨ ᠶᠡᠬᠡ ᠪᠠᠶᠠᠷ ᠬᠢᠵᠦ
ᠬᠢᠲᠤᠭᠠ ᠲᠠᠯᠪᠢᠬᠤ ᠦᠭᠡᠢ
ᠴᠠᠳᠲᠠᠯᠠ ᠮᠢᠬᠠ ᠢᠳᠡᠵᠦ
ᠬᠤᠨᠳᠠᠭᠠ ᠲᠠᠯᠪᠢᠯ ᠦᠭᠡᠢ
ᠬᠠᠨᠲᠠᠯᠠ ᠠᠷᠢᠬᠢ ᠤᠤᠭᠤᠵᠤ
ᠨᠠᠶᠠᠨ ᠡᠳᠦᠷ ᠦ᠋ᠨ ᠨᠠᠢᠷ ᠬᠢᠵᠦ
ᠵᠢᠷᠠᠨ ᠡᠳᠦᠷ ᠦ᠋ᠨ ᠵᠢᠷᠭᠠᠯ ᠬᠢᠵᠦ
ᠠᠯᠳᠠᠷᠲᠤ ᠤᠯᠤᠰ ᠢ᠋ᠶ᠋ᠠᠨ ᠪᠠᠢᠭᠤᠯᠵᠤ
ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠵᠢᠷᠭᠠᠭᠰᠠᠨ ᠭᠡᠨᠡ᠃
※ ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠬᠡᠯᠡᠰᠣᠶᠣᠯ( ᠪᠤᠤ ᠸᠧᠨ ᠬᠤᠸᠠ)᠂ ᠤᠷᠠᠨᠴᠢᠮᠡᠭ᠂ ᠪᠠᠶᠠᠨᠴᠡᠴᠡᠭ᠂
ᠨᠠᠷᠠᠨᠲᠤᠶᠠᠭᠠ᠂ ᠡᠭᠦᠯᠡᠩᠬᠤᠸᠠᠷ᠂ ᠠᠯᠲᠠᠨᠴᠢᠮᠡᠭ᠂ ᠣᠶᠤᠨᠴᠢᠮᠡᠭ᠂
ᠪᠠᠢ·ᠰᠠᠷᠠᠨᠠ᠂ ᠬᠡᠷᠡᠢᠳ· ᠮᠥᠩᠬᠡᠨᠠᠰᠤᠨ᠂ ᠮᠥᠩᠭᠥᠨ
※ ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ᠂ ᠤᠷᠠᠨᠴᠢᠮᠡᠭ᠂ ᠭᠠᠷᠮᠠ᠂ ᠰᠡᠬᠡᠭᠡᠷᠡᠯ᠂
ᠨᠠᠷᠠᠨ᠂ ᠪᠠᠯᠤᠰᠦᠭ᠂ ᠬᠡᠯᠡᠰᠣᠶᠣᠯ