ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠶᠢᠰᠦ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -9
108ᠥᠰᠢᠶᠡ ᠬᠣᠷᠣᠰᠤᠯ ᠤ᠋ᠨ ᠦᠷᠭᠦᠯᠵᠢᠯᠡᠯ
— ᠡᠨᠡ ᠮᠣᠩᠭᠣᠯ ᠢ᠋ ᠪᠠᠢᠰᠢᠩ ᠳ᠋ᠤ᠌ ᠣᠷᠣᠭᠤᠯᠤᠨ ᠴᠣᠣᠵᠢᠯᠠᠭᠠᠳ᠂ ᠮᠠᠷᠭᠠᠰᠢ ᠵᠣᠣ ᠴᠢ ᠮᠢᠨ ᠦ᠌ ᠬᠢᠨ ᠳ᠋ᠦ᠍ ᠬᠦᠷᠭᠡᠵᠦ ᠥᠭ ᠭᠡᠪᠡ᠃ ᠡᠨᠡ ᠲᠤᠬᠠᠢ ᠳ᠋ᠤ᠌ ᠳ᠋ᠠᠨᠽᠠᠨ ᠠᠶᠤᠨ ᠰᠣᠴᠢᠭᠰᠠᠨ ᠶᠠᠭᠤ ᠴᠦ᠍ ᠦᠭᠡᠢ᠂ ᠬᠠᠷᠢᠨ ᠳᠠᠩᠵᠢᠶᠠᠳ ᠤ᠋ᠨ ᠦᠭᠡ ᠪᠦᠷᠢ ᠶ᠋ᠢ ᠲᠣᠳᠣᠷᠬᠠᠢ ᠣᠢᠯᠠᠭᠠᠭᠰᠠᠨ ᠳ᠋ᠠᠭᠠᠨ《ᠪᠢ ᠴᠢᠨᠢ ᠶᠡᠷᠦ ᠰᠣᠭᠲᠣᠭᠠ ᠦᠭᠡᠢ ᠪᠠᠢᠭᠠ ᠶᠤᠮ ᠪᠠᠢᠨᠠ ᠰᠢᠦ》 ᠭᠡᠵᠦ ᠪᠣᠳᠣᠪᠠ᠃ ᠭᠡᠲᠡᠯᠡ ᠠᠷᠤ ᠳ᠋ᠤᠨᠢ ᠭᠤᠷᠪᠠᠨ ᠴᠢᠭᠢᠷᠠᠭ ᠡᠷᠡ ᠣᠷᠣᠵᠤ ᠢᠷᠡᠭᠡᠳ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠠᠵᠢ᠃ ᠲᠡᠳᠡᠨ ᠦ᠌ ᠨᠢᠭᠡᠨ ᠵᠡᠷᠭᠡ ᠭᠠᠷ ᠬᠥᠳᠡᠯᠦᠨ ᠪᠠᠷᠢᠨ ᠠᠪᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠶᠠᠮᠠᠷ ᠴᠦ᠍ ᠡᠰᠡᠷᠭᠦᠴᠡᠯ ᠬᠢᠭᠰᠡᠨ ᠦᠭᠡᠢ᠃ ᠵᠥᠪᠬᠡᠨ《ᠵᠠ ᠣᠳᠣ ᠪᠠᠷᠢᠭᠳᠠᠯᠠ!》 ᠭᠡᠵᠦ ᠪᠣᠳᠣᠨ ᠭᠠᠷ ᠤ᠋ᠨ ᠬᠢᠨᠢ ᠠᠶᠠᠰ ᠢ᠋ᠶ᠋ᠠᠷ ᠴᠢᠷᠦᠭᠳᠡᠨ ᠭᠠᠷᠪᠠ᠃
ᠨᠢᠭᠡ ᠪᠠᠢᠰᠢᠩ ᠤ᠋ᠨ ᠡᠮᠦᠨᠡ ᠠᠪᠠᠴᠢᠭᠠᠳ ᠲᠦᠯᠬᠢᠨ ᠣᠷᠣᠭᠤᠯᠬᠤ ᠳ᠋ᠤᠨᠢ ᠳᠦᠷᠦᠭᠦᠯᠭᠡ ᠪᠡᠨ ᠬᠠᠷᠠᠨ ᠤᠨᠠᠭᠠᠳ᠂ ᠬᠠᠭᠠᠯᠭᠠ ᠬᠠᠮᠬᠢᠭᠳᠠᠨ ᠬᠠᠷᠠᠩᠭᠤᠢ ᠪᠣᠯᠵᠤ᠂ ᠲᠦᠯᠬᠢᠭᠦᠷ ᠴᠣᠣᠵᠢ ᠱᠠᠵᠢᠭᠢᠨᠠᠬᠤ ᠶ᠋ᠢ ᠳᠠᠮ ᠲᠣᠮ ᠮᠡᠳᠡᠪᠡ᠃ ᠲᠡᠭᠡᠭᠡᠳ ᠮᠥᠨ ᠯᠡ ᠭᠤᠨᠢᠨ ᠭᠤᠲᠤᠭᠰᠠᠨ ᠵᠦᠢᠯ ᠦᠭᠡᠢ᠂《ᠠ ᠡᠵᠢ ᠮᠢᠨᠢ ᠠ᠋᠂ ᠣᠷᠣᠨ ᠨᠤᠲᠤᠭ ᠤ᠋ᠨ ᠮᠢᠨᠢ ᠯᠤᠤᠰ ᠰᠠᠪᠳᠠᠭ ᠤ᠋ᠳ ᠠ᠋᠂ ᠨᠠᠮᠠᠶ᠋ᠢ ᠪᠠᠨ ᠠᠪᠤᠷᠠ!》 ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠶᠣᠰᠣ ᠪᠣᠯᠭᠠᠨ ᠬᠡᠯᠡᠭᠡᠳ᠂ ᠨᠢᠳᠦ ᠪᠡᠨ ᠠᠨᠢᠪᠠ᠃ ᠢᠩᠭᠢᠬᠦ ᠳ᠋ᠦ᠍᠂ ᠳᠣᠣᠷᠠᠲᠤ ᠭᠠᠵᠠᠷ ᠨᠢ ᠦᠷᠭᠦᠯᠵᠢᠯᠡᠨ ᠳᠡᠭᠡᠷᠡ ᠳᠣᠣᠷᠠ ᠣᠷᠣᠨ ᠬᠥᠳᠡᠯᠬᠦ ᠠᠵᠢ᠃《ᠵᠠ ᠪᠢ ᠳᠦᠭᠦᠷᠦᠯᠡ》 ᠭᠡᠵᠦ ᠰᠡᠳᠬᠢᠯ ᠳ᠋ᠦ᠍ᠨᠢ ᠪᠠᠭᠤᠬᠤ ᠪᠣᠯᠪᠠᠴᠤ ᠮᠥᠨ ᠠᠶᠤᠬᠤ ᠶᠠᠭᠤᠮᠠ ᠪᠠᠢᠭᠰᠠᠨ ᠦᠭᠡᠢ᠃ ᠶᠠᠭᠤᠨ ᠳ᠋ᠤ᠌ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠠᠵᠢᠬᠤ ᠪᠠᠷ ᠠᠨᠢᠭᠰᠠᠨ ᠨᠢᠳᠦ ᠪᠡᠨ ᠠᠯᠪᠠᠲᠠᠨ ᠨᠡᠭᠡᠭᠡᠨ ᠬᠠᠷᠠᠬᠤ ᠳ᠋ᠤ᠌ ᠤᠷᠢᠳᠠ ᠨᠢ ᠪᠣᠣᠪᠣ᠂ ᠰᠢᠬᠢᠷ᠂ ᠲᠠᠩᠵᠤᠤᠷ᠂ ᠶᠡᠪᠧᠩ ᠦᠷᠭᠦᠯᠵᠢᠯᠡᠨ ᠬᠡᠪᠲᠡᠵᠦ ᠪᠠᠢᠭᠠ ᠦᠵᠡᠭᠳᠡᠨᠡ᠃《ᠡᠨᠡ ᠶᠠᠭᠠᠬᠢᠭᠰᠠᠨ ᠭᠠᠢᠬᠠᠯᠲᠠᠢ ᠪᠣᠢ?》 ᠭᠡᠵᠦ ᠠᠮᠠᠨ ᠳᠣᠲᠣᠷᠠ ᠪᠠᠨ ᠬᠡᠯᠡᠭᠡᠳ ᠭᠠᠷ ᠲᠠᠭᠠᠨ ᠪᠠᠷᠢᠭᠳᠠᠭᠰᠠᠨ ᠢ᠋ ᠠᠪᠴᠤ ᠨᠢᠳᠦᠨ ᠳ᠋ᠡᠭᠡᠨ ᠲᠤᠯᠭᠠᠨ ᠦᠵᠡᠬᠦ ᠳ᠋ᠦ᠍ ᠦᠨᠡᠬᠡᠷ ᠨᠢᠭᠡ ᠪᠣᠷᠣ ᠶᠧᠪᠧᠩ ᠪᠠᠢᠯᠠ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠠᠨ ᠰᠠᠶᠢ ᠳᠦᠷᠦᠭᠦᠯᠭᠡ ᠪᠡᠨ ᠬᠠᠷᠠᠨ ᠤᠨᠠᠬᠤ ᠳ᠋ᠤ᠌ ᠸᠠᠳᠠᠩ ᠲᠠᠢ ᠶᠠᠭᠤᠮᠠᠨ ᠤ᠋ ᠪᠠᠨ ᠦᠰᠦᠷᠦᠭᠰᠡᠨ ᠢ᠋ ᠮᠡᠳᠡᠪᠡ᠃ ᠬᠣᠷᠢᠶᠠᠨ ᠠᠪᠬᠤ ᠭᠡᠬᠦ ᠳ᠋ᠦ᠍ ᠴᠥᠮ ᠠᠮᠢ ᠣᠷᠣᠭᠰᠠᠨ ᠶᠤᠮ ᠰᠢᠭ᠋ ᠨᠠᠭᠠᠰᠢ ᠴᠠᠭᠠᠰᠢ ᠥᠩᠬᠥᠷᠢᠨ ᠭᠠᠷ ᠠ᠋ᠴᠠ ᠮᠤᠯᠲᠤᠷᠠᠨᠠ᠃ ᠣᠢᠭᠠ ᠦᠭᠡᠢ ᠬᠥᠭᠡᠭᠡᠴᠡᠯᠳᠦᠭᠰᠡᠭᠡᠷ ᠪᠠᠢᠭᠠᠳ ᠡᠴᠦᠰ ᠲᠦ᠋ᠨᠢ ᠤᠨᠲᠠᠵᠤ ᠣᠷᠬᠢᠭᠰᠠᠨ ᠠᠵᠢ᠃
ᠰᠥᠨᠢ ᠳᠤᠮᠳᠠ ᠶ᠋ᠢᠨ ᠴᠠᠭ ᠪᠣᠯᠵᠤ᠂ ᠬᠠᠮᠢᠭᠠ ᠨᠢᠭᠡ ᠲᠡᠢ ᠪᠠᠢᠭᠠ ᠰᠦᠮᠡ ᠶ᠋ᠢᠨ ᠲᠣᠮᠣ ᠬᠠᠷᠠᠩᠭᠠ ᠴᠣᠬᠢᠭᠳᠠᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠦ᠌ ᠰᠠᠢᠬᠠᠨ ᠠᠪᠢᠶᠠ ᠪᠦᠬᠦ ᠬᠣᠲᠠ ᠶ᠋ᠢᠨ ᠳᠡᠭᠡᠭᠦᠷ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠴᠢᠯᠥᠭᠡᠲᠡᠢ ᠴᠤᠤᠷᠢᠶᠠᠲᠤᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠰᠡᠷᠡᠪᠡ᠃
ᠳᠣᠲᠣᠷᠠ ᠲᠤᠩ ᠠᠶᠠᠭᠦᠢ᠂ ᠲᠣᠯᠣᠭᠠᠢ ᠬᠠᠭᠠᠷᠠᠬᠤ ᠭᠡᠵᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠠᠩᠭᠠᠯᠵᠠᠨ ᠠᠢᠬᠤᠪᠲᠤᠷ ᠡᠪᠡᠳᠴᠦ ᠪᠠᠢᠯᠠ᠃《ᠦᠭᠡᠢ ᠡᠨᠡ ᠴᠢᠨᠢ ᠪᠢ ᠬᠠᠮᠢᠭᠠ ᠪᠠᠢᠭᠠ ᠪᠢᠯᠡ》 ᠭᠡᠬᠦ ᠡᠴᠡ ᠲᠠᠰᠤᠯᠭᠠ ᠤᠷᠤᠭᠤ ᠲᠦᠯᠬᠢᠭᠳᠡᠨ ᠤᠨᠠᠭᠰᠠᠨ ᠪᠠ ᠤᠷᠢᠳᠠ ᠨᠢ ᠪᠣᠣᠪᠣ ᠰᠢᠬᠢᠷ ᠦ᠋ᠨ ᠵᠦᠢᠯ ᠦᠷᠭᠦᠯᠵᠢᠯᠡᠨ ᠬᠡᠪᠲᠡᠵᠦ᠂ ᠬᠣᠷᠢᠶᠠᠨ ᠠᠪᠬᠤ ᠭᠡᠬᠦ ᠳ᠋ᠦ᠍ ᠪᠠᠷᠢᠭᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠵᠡᠷᠭᠡ ᠶᠠᠪᠤᠳᠠᠯ ᠤ᠋ᠳ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠃ ᠲᠡᠭᠡᠭᠡᠳ ᠪᠣᠰᠴᠤ ᠲᠡᠮᠲᠡᠷᠢᠨ ᠦᠵᠡᠬᠦ ᠳ᠋ᠦ᠍ ᠪᠦᠭᠦᠳᠡ ᠶ᠋ᠢ ᠬᠣᠷᠢᠶᠠᠨ ᠸᠠᠳᠠᠩ ᠳ᠋ᠠᠭᠠᠨ ᠬᠢᠵᠦ ᠴᠢᠳᠠᠭᠰᠠᠨ ᠪᠠᠢᠯᠠ᠃ ᠭᠡᠲᠡᠯᠡ᠂ ᠳᠠᠩᠵᠢᠶᠠᠳ ᠤ᠋ᠨ《ᠵᠣᠣ ᠴᠢ ᠮᠢᠨ ᠦ᠌ ᠬᠢᠨ ᠳ᠋ᠦ᠍ ᠲᠤᠰᠢᠶᠠ!》 ᠭᠡᠵᠦ ᠪᠠᠢᠭᠰᠠᠨ ᠨᠢ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠯᠠ᠃ ᠳᠠᠷᠤᠢ ᠠᠶᠤᠬᠤ᠂ ᠪᠤᠬᠢᠨᠢᠳᠤᠬᠤ᠂ ᠬᠣᠷᠣᠰᠬᠤ ᠴᠥᠮ ᠪᠣᠢ ᠪᠣᠯᠤᠨ ᠪᠣᠰᠤᠨ ᠬᠠᠷᠠᠢᠪᠠ᠃ ᠭᠡᠲᠡᠯᠡ ᠲᠠᠰᠤᠯᠭᠠ ᠲᠠᠭ ᠬᠠᠷᠠᠩᠭᠤᠢ᠃ ᠬᠠᠷᠠᠩᠭᠤᠢ ᠳᠣᠲᠣᠷᠠ ᠠ᠋ᠴᠠ ᠰᠠᠯᠤᠨ ᠣᠳᠤᠭᠰᠠᠨ ᠨᠥᠬᠥᠷ ᠨᠢ᠄《ᠬᠠᠢ! ᠨᠢᠢ ᠪᠦ ᠫᠠ!》 ᠭᠡᠵᠦ ᠬᠡᠯᠡᠬᠦ ᠰᠢᠭ ᠪᠣᠯᠪᠠ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠠᠨ ᠠᠶᠤᠨ ᠴᠡᠴᠡᠷᠡᠬᠦ ᠶ᠋ᠢ ᠬᠣᠢᠰᠢ ᠲᠠᠯᠪᠢᠨ ᠠᠮᠢ ᠭᠠᠷᠲᠠᠯᠠ ᠲᠡᠮᠡᠴᠡᠯᠳᠦᠬᠦ ᠶ᠋ᠢ ᠰᠠᠨᠠᠪᠠ᠃ ᠭᠠᠮᠢᠩ ᠴᠠᠮᠴᠠᠨ ᠤ᠋ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠠᠬᠢ ᠡᠪᠦᠷ ᠲᠡᠭᠡᠨ ᠭᠠᠷ ᠬᠢᠨ ᠲᠡᠮᠲᠡᠷᠢᠬᠦ ᠳ᠋ᠦ᠍᠂ ᠪᠠᠰᠠ ᠭᠠᠢᠬᠠᠯᠲᠠᠢ᠃ ᠬᠦᠨᠳᠦ ᠴᠢᠨᠠᠷ ᠤ᠋ᠨ ᠳᠤᠭᠤᠢ ᠬᠡᠯᠪᠡᠷᠢ ᠲᠡᠢ ᠶᠠᠭᠤᠮᠠᠰ ᠪᠠᠷᠢᠭᠳᠠᠪᠠ᠃ ᠡᠨᠡ ᠪᠣᠯ ᠶᠠᠩᠴᠢᠶᠠᠨ ᠫᠦ ᠵᠢᠩ ᠳᠡᠪᠡᠯ ᠬᠤᠪᠴᠠᠰᠤ ᠠᠪᠴᠤ ᠥᠭᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠡᠪᠦᠷ ᠲᠦ᠋ᠨᠢ ᠰᠠᠮ ᠬᠢᠭᠰᠡᠨ ᠠᠷᠪᠠ ᠭᠠᠷᠤᠢ ᠶᠠᠩᠴᠢᠶᠠᠨ ᠪᠠᠢᠯᠠ᠃ ᠳ᠋ᠠᠨᠽᠠᠨ ᠤᠭ ᠬᠡᠷᠡᠭ ᠢ᠋ ᠮᠡᠳᠡᠬᠦ ᠲᠡᠢ ᠪᠡᠨ ᠵᠡᠷᠭᠡ᠂ ᠥᠪᠡᠷ ᠢ᠋ ᠪᠡᠨ ᠣᠷᠣ ᠲᠠᠰᠤ ᠭᠠᠷ ᠬᠣᠭᠣᠰᠣᠨ ᠭᠡᠵᠦ ᠪᠣᠳᠣᠨ ᠳᠠᠩᠵᠢᠶᠠᠳ ᠲᠤ ᠣᠷᠣᠵᠤ ᠢᠷᠡᠭᠰᠡᠨ ᠢ᠋ᠶ᠋ᠡᠨ ᠰᠠᠨᠠᠨ ᠭᠣᠣᠯ ᠬᠠᠷᠠᠯᠠᠪᠠ᠃ ᠲᠡᠭᠡᠭᠡᠳ ᠣᠳᠣ ᠶᠠᠭᠠᠬᠢᠳᠠᠭ ᠪᠢᠯᠡ? ᠭᠡᠬᠦ ᠡᠴᠡ ᠠᠯᠠᠯᠴᠠᠨ ᠲᠤᠯᠤᠯᠳᠤᠬᠤ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠨ ᠵᠣᠷᠢᠭ ᠲᠥᠷᠥᠪᠡ᠃
ᠨᠥᠭᠦᠭᠡ ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠡᠪᠦᠷ ᠢ᠋ ᠲᠡᠮᠲᠡᠷᠢᠬᠦ ᠳ᠋ᠦ᠍ ᠠᠯᠢ ᠨᠢᠭᠡᠨ ᠴᠠᠭ ᠲᠤ ᠬᠠᠢᠷᠴᠠᠭ ᠠ᠋ᠴᠠ ᠪᠠᠨ ᠰᠤᠭᠤᠷᠠᠨ ᠦᠯᠡᠳᠡᠭᠰᠡᠨ ᠬᠡᠳᠦᠨ ᠴᠦᠳᠡᠨᠴᠡ ᠪᠠᠷᠢᠭᠳᠠᠵᠠᠢ᠃ ᠲᠡᠭᠦᠨ ᠦ᠌ ᠨᠢᠭᠡ ᠶ᠋ᠢ ᠱᠠᠬᠠᠢ ᠶ᠋ᠢᠨ ᠢ᠋ᠶ᠋ᠡᠨ ᠣᠯᠠᠨ ᠳ᠋ᠤ᠌ ᠬᠠᠪᠢᠷᠤᠨ ᠠᠰᠠᠭᠠᠬᠤ ᠳ᠋ᠤ᠌ ᠠᠩᠬᠠ ᠨᠥᠬᠥᠳ ᠲᠡᠢ ᠪᠡᠨ ᠢᠷᠡᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠠᠢᠰᠢᠩ ᠳ᠋ᠤ᠌ ᠪᠠᠢᠭᠠ ᠠᠵᠢ᠃
ᠲᠡᠷᠡ ᠴᠠᠭ ᠲᠤ ᠳ᠋ᠠᠨᠽᠠᠨ᠂ ᠬᠠᠨᠵᠤ ᠶ᠋ᠢ ᠴᠣᠬᠣᠮ ᠶᠠᠭᠤ ᠪᠠᠷ ᠬᠡᠷᠬᠢᠨ ᠬᠢᠭᠰᠡᠨ ᠢ᠋ ᠰᠣᠨᠢᠷᠬᠠᠨ ᠠᠵᠢᠭᠯᠠᠬᠤ ᠳ᠋ᠠᠭᠠᠨ ᠪᠥᠬᠡ ᠪᠠᠩᠵᠠ ᠨᠤᠭᠤᠳ ᠢ᠋ ᠳᠡᠷᠡᠯᠡᠭᠦᠯᠦᠨ ᠲᠠᠯᠪᠢᠭᠰᠠᠨ ᠤᠷᠲᠤ ᠴᠠᠷᠠᠰᠤᠨ ᠮᠣᠳᠣ ᠪᠠᠢᠭᠠ ᠶ᠋ᠢ ᠦᠵᠡᠭᠰᠡᠨ ᠪᠥᠭᠡᠳ ᠲᠡᠭᠦᠨ ᠦ᠌ ᠶᠠᠰᠤ ᠴᠢᠨᠠᠷ ᠢ᠋ ᠶᠡᠬᠡᠳᠡ ᠭᠠᠢᠬᠠᠭᠰᠠᠨ ᠠᠵᠢ᠃ ᠣᠳᠣ ᠲᠡᠷᠡ ᠨᠢ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠨ ᠬᠠᠨᠵᠤ ᠶ᠋ᠢ ᠬᠡᠮᠬᠡᠴᠢᠵᠦ ᠥᠨᠥᠬᠢ ᠮᠣᠳᠣ ᠶ᠋ᠢ ᠰᠤᠭᠤᠯᠤᠨ ᠠᠪᠤᠪᠠ᠃ ᠲᠡᠭᠡᠭᠡᠳ ᠴᠠᠭᠠᠰᠤᠨ ᠪᠦᠷᠬᠦᠭᠡᠰᠦᠲᠦ ᠴᠣᠩᠬᠣ ᠶ᠋ᠢ ᠴᠥᠮᠥ ᠴᠣᠬᠢᠨ ᠱᠠᠭᠠᠢᠬᠤ ᠳ᠋ᠤ᠌ ᠲᠩᠷᠢ ᠳ᠋ᠦ᠍ ᠰᠠᠷᠠ ᠲᠠᠢ᠂ ᠡᠷᠭᠢᠨ ᠲᠣᠭᠣᠷᠢᠨ ᠤ᠋ ᠶᠠᠭᠤᠮᠠᠰ ᠲᠣᠳᠣᠬᠠᠨ ᠬᠠᠷᠠᠭᠳᠠᠨᠠ᠃ ᠸᠠᠳᠠᠩ ᠲᠠᠢ ᠶᠠᠭᠤᠮᠠ ᠪᠠᠨ ᠪᠠᠭᠯᠠᠵᠤ ᠨᠢᠷᠤᠭᠤᠨ ᠳ᠋ᠠᠭᠠᠨ ᠠᠪᠤᠨ ᠲᠤᠯᠤᠯᠳᠤᠬᠤ ᠰᠢᠲᠠᠮ ᠢ᠋ᠶ᠋ᠠᠨ ᠤᠷᠢᠳᠠ ᠪᠠᠨ ᠪᠠᠷᠢᠨ ᠴᠣᠩᠬᠣ ᠪᠠᠷ ᠦᠰᠦᠷᠦᠨ ᠭᠠᠷᠪᠠ᠃ ᠬᠠᠰᠢᠶᠠᠨ ᠳᠣᠲᠣᠷᠠ ᠬᠡᠨ ᠴᠦ᠍ ᠦᠭᠡᠢ᠃ ᠣᠷᠣᠨ ᠪᠠᠢᠰᠢᠩ ᠶᠠᠭᠤᠲᠠᠢ ᠬᠦᠦᠲᠡᠢ ᠪᠡᠨ ᠨᠠᠮ ᠭᠦᠮ ᠦ᠋ᠨ ᠳᠣᠲᠣᠷᠠ ᠨᠣᠢᠷᠰᠤᠵᠤ ᠪᠠᠢᠭᠠ ᠮᠡᠲᠦ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠷᠮᠠ