ᠮᠤᠯᠤᠨ ᠲᠣᠶ᠋ᠢᠨ ᠡᠬᠡ ᠶ᠋ᠢᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠤᠭᠰᠠᠨ ᠲᠣᠣᠯᠢ - ᠨᠢᠭᠡ - ᠰ· ᠠᠯᠲᠠᠨᠳᠤᠭᠤᠯᠭᠠ ᠨᠠᠶ᠋ᠢᠷᠠᠭᠤᠯᠪᠠ Молон тойн эхийн ачийг харуулсан тууль - 1 - С· Алтантуулга найруулав
420ᠮᠤᠯᠤᠨ ᠲᠣᠶ᠋ᠢᠨ ᠡᠬᠡ ᠶ᠋ᠢᠨ ᠠᠴᠢ ᠶ᠋ᠢ ᠬᠠᠷᠢᠭᠤᠯᠤᠭᠰᠠᠨ ᠲᠣᠣᠯᠢ - ᠨᠢᠭᠡ
ᠰ·ᠠᠯᠲᠠᠨᠳᠤᠭᠤᠯᠭᠠ ᠨᠠᠢᠷᠠᠭᠤᠯᠪᠠ
ᠣᠷᠴᠢᠯᠠᠩ ᠳ᠋ᠤᠷ ᠨᠠᠷᠠᠨ ᠮᠠᠨᠳᠤᠵᠤ
ᠣᠭᠲᠠᠷᠭᠤᠢ ᠳ᠋ᠤᠷ ᠰᠠᠷᠠᠨ ᠭᠡᠢᠭᠡᠵᠦ
ᠳᠥᠷᠪᠡᠨ ᠳᠠᠯᠠᠢ ᠳᠥᠯᠭᠡᠨ ᠬᠠᠯᠭᠢᠵᠤ
ᠬᠥᠪᠬᠦ ᠡᠭᠦᠯᠡ ᠬᠥᠷᠪᠡᠨ ᠪᠠᠳᠮᠠᠯᠠᠵᠤ
ᠬᠦᠪᠦᠷᠡᠬᠦ ᠦᠷᠡ ᠬᠥᠷᠥᠰᠥᠨ ᠳ᠋ᠦ᠍ ᠬᠠᠳᠬᠤᠵᠤ
ᠬᠥᠷᠥᠪᠡᠵᠢᠬᠦ ᠠᠮᠢ ᠬᠥᠯᠯᠡᠨ ᠵᠣᠭᠰᠣᠵᠤ
ᠡᠷᠲᠡ ᠤᠷᠢᠳᠤ ᠶ᠋ᠢᠨ ᠡᠨᠡ ᠮᠥᠴᠡ ᠳ᠋ᠦ᠍
ᠡᠯᠦᠨᠴᠡ ᠬᠤᠯᠤᠨᠴᠠ ᠶ᠋ᠢᠨ ᠲᠡᠷᠡ ᠴᠠᠭ ᠲᠤ
ᠤᠵᠠᠭᠤᠷ ᠲᠡᠦᠬᠡ ᠤᠷᠤᠰᠤᠨ ᠤᠷᠤᠰᠤᠭᠰᠠᠭᠠᠷ
ᠤᠯᠠᠷᠢᠨ ᠬᠤᠪᠢᠰᠴᠤ ᠤᠴᠢᠷᠯᠠᠨ ᠪᠠᠢᠭᠰᠠᠭᠠᠷ
ᠠᠯᠤᠰ ᠲᠩᠷᠢ ᠶ᠋ᠢᠨ ᠣᠳᠣᠨ ᠮᠡᠴᠢᠳ
ᠠᠪᠠᠷ ᠳᠡᠪᠡᠷ ᠪᠠᠢᠬᠤ ᠶ᠋ᠢᠨ ᠦᠶᠡ
ᠠᠯᠲᠠᠨ ᠳᠡᠯᠡᠬᠡᠢ ᠶ᠋ᠢᠨ ᠤᠯᠤᠰ ᠭᠦᠷᠦᠨ
ᠨᠢᠭᠡ ᠯᠡ ᠬᠣᠶᠠᠷ ᠪᠠᠢᠬᠤ ᠶ᠋ᠢᠨ ᠦᠶᠡ
ᠳᠡᠭᠡᠳᠦ ᠲᠩᠷᠢ ᠶ᠋ᠢᠨ ᠣᠳᠣᠨ ᠮᠡᠴᠢᠳ
ᠲᠡᠨᠳᠡ ᠡᠨᠳᠡ ᠪᠠᠢᠬᠤ ᠶ᠋ᠢᠨ ᠦᠶᠡ
ᠳᠡᠯᠡᠬᠡᠢ ᠳᠠᠬᠢᠨ ᠤ᠋ ᠤᠯᠤᠰ ᠭᠦᠷᠦᠨ
ᠨᠢᠭᠡ ᠯᠡ ᠬᠣᠶᠠᠷ ᠪᠠᠢᠬᠤ ᠳ᠋ᠤ᠌ ᠭᠡᠨᠡ᠃
ᠳᠥᠷᠪᠡᠨ ᠤᠯᠠᠷᠢᠯ ᠡᠭᠡᠯᠵᠢᠯᠡᠨ ᠵᠢᠷᠭᠢᠵᠦ
ᠬᠠᠯᠠᠭᠤᠨ ᠬᠦᠢᠲᠡᠨ ᠵᠣᠬᠢᠴᠠᠨ ᠪᠠᠢᠬᠤ ᠳ᠋ᠤ᠌
ᠲᠦᠮᠡᠨ ᠪᠣᠳᠠᠰ ᠢᠯᠭᠠᠷᠠᠨ ᠪᠦᠷᠢᠳᠴᠦ
ᠲᠦᠪᠰᠢᠨ ᠵᠢᠷᠭᠠᠯᠠᠩ ᠤᠨᠳᠤᠷᠤᠨ ᠪᠠᠢᠬᠤ ᠳ᠋ᠤ᠌
ᠬᠤᠷᠠ ᠪᠣᠷᠣᠭᠠᠨ ᠱᠠᠭᠢᠨ ᠪᠠᠢᠬᠤ ᠳ᠋ᠤ᠌
ᠬᠠᠭᠤᠷᠠᠢ ᠨᠣᠢᠲᠠᠨ ᠲᠡᠩᠴᠡᠭᠦᠬᠡᠨ ᠪᠠᠢᠬᠤ ᠳ᠋ᠤ᠌
ᠬᠥᠮᠦᠨ ᠠᠮᠢᠲᠠᠨ ᠦᠷᠡᠵᠢᠨ ᠪᠠᠢᠬᠤ ᠳ᠋ᠤ᠌
ᠬᠥᠪᠴᠢᠨ ᠪᠠᠢᠭᠠᠯᠢ ᠴᠡᠴᠡᠭᠯᠡᠨ ᠪᠠᠢᠬᠤ ᠳ᠋ᠤ᠌
ᠴᠡᠩᠬᠡᠷ ᠨᠣᠮᠢᠨ ᠤᠨᠢᠶᠠᠷᠲᠤᠨ ᠪᠠᠢᠬᠤ ᠳ᠋ᠤ᠌
ᠴᠡᠪᠡᠷ ᠠᠭᠠᠷ ᠰᠡᠪᠡᠯᠵᠡᠨ ᠪᠠᠢᠬᠤ ᠳ᠋ᠤ᠌
ᠴᠡᠯᠡᠭᠡᠷ ᠲᠠᠯᠠ ᠨᠣᠭᠣᠭᠠᠷᠠᠨ ᠪᠠᠢᠬᠤ ᠳ᠋ᠤ᠌
ᠴᠡᠴᠡᠭᠲᠦ ᠬᠥᠨᠳᠡᠢ ᠮᠢᠷᠠᠯᠵᠠᠨ ᠪᠠᠢᠬᠤ ᠳ᠋ᠤ᠌
ᠨᠠᠭᠤᠷ ᠤ᠋ᠨ ᠵᠡᠭᠡᠰᠦ ᠨᠠᠢᠭᠤᠨ ᠪᠠᠢᠬᠤ ᠳ᠋ᠤ᠌
ᠨᠤᠭᠤᠰᠤ ᠭᠠᠯᠠᠭᠤ ᠭᠠᠩᠭᠠᠨᠠᠨ ᠪᠠᠢᠬᠤ ᠳ᠋ᠤ᠌
ᠨᠤᠲᠤᠭ ᠤ᠋ᠨ ᠰᠠᠬᠢᠭᠤᠰᠤ ᠨᠠᠮᠠᠨᠴᠢᠯᠠᠨ ᠪᠠᠢᠬᠤ ᠳ᠋ᠤ᠌
ᠨᠣᠮᠢᠨ ᠬᠥᠳᠡᠭᠡ ᠨᠣᠢᠷᠮᠤᠭᠯᠠᠨ ᠪᠠᠢᠬᠤ ᠳ᠋ᠤ᠌
ᠦᠦᠷ ᠦ᠋ᠨ ᠭᠢᠯᠠᠯᠵᠠᠨ ᠪᠠᠢᠬᠤ ᠳ᠋ᠤ᠌
ᠦᠨᠡᠭᠡ ᠴᠢᠨᠣᠠ ᠰᠢᠩᠰᠢᠯᠡᠨ ᠪᠠᠢᠬᠤ ᠳ᠋ᠤ᠌
ᠲᠠᠯᠠ ᠶ᠋ᠢᠨ ᠲᠠᠤᠯᠠᠢ ᠲᠣᠩᠭᠣᠴᠢᠨ ᠪᠠᠢᠬᠤ ᠳ᠋ᠤ᠌
ᠲᠠᠷᠪᠠᠭᠠ ᠵᠡᠭᠡᠷᠡ ᠲᠤᠭᠴᠢᠨ ᠪᠠᠢᠬᠤ ᠳ᠋ᠤ᠌
ᠬᠠᠩᠭᠠᠢ ᠶ᠋ᠢᠨ ᠰᠢᠷᠣᠢ ᠮᠥᠴᠢᠯᠡᠨ ᠪᠠᠢᠬᠤ ᠳ᠋ᠤ᠌
ᠬᠠᠨᠳᠠᠭᠠᠢ ᠪᠤᠭᠤ ᠬᠠᠷᠠᠢᠯᠠᠨ ᠪᠠᠢᠬᠤ ᠳ᠋ᠤ᠌
ᠬᠠᠳᠠᠲᠤ ᠣᠷᠭᠢᠯ ᠰᠡᠬᠦᠢᠯᠴᠡᠨ ᠪᠠᠢᠬᠤ ᠳ᠋ᠤ᠌
ᠬᠠᠷᠴᠠᠭᠠᠢ ᠱᠣᠩᠬᠣᠷ ᠬᠠᠯᠢᠨ ᠪᠠᠢᠬᠤ ᠳ᠋ᠤ᠌
ᠠᠭᠤᠯᠠ ᠶ᠋ᠢᠨ ᠨᠠᠷᠠᠰᠤ ᠬᠥᠬᠡᠷᠡᠨ ᠪᠠᠢᠬᠤ ᠳ᠋ᠤ᠌
ᠤᠷᠠᠨ ᠰᠢᠪᠠᠭᠤᠳ ᠳᠣᠩᠭᠣᠳᠤᠨ ᠪᠠᠢᠬᠤ ᠳ᠋ᠤ᠌
ᠤᠰᠤᠨ ᠤ᠋ ᠵᠢᠷᠠᠭᠠᠬᠠᠢ ᠤᠮᠪᠠᠯᠴᠠᠨ ᠪᠠᠢᠬᠤ ᠳ᠋ᠤ᠌
ᠬᠠᠭᠠᠨ ᠲᠥᠷᠥ ᠲᠣᠭᠲᠠᠭᠤᠨ ᠪᠠᠢᠬᠤ ᠳ᠋ᠤ᠌
ᠬᠠᠷᠠᠴᠤ ᠠᠷᠠᠳ ᠰᠢᠳᠦᠷᠭᠤᠨ ᠪᠠᠢᠬᠤ ᠳ᠋ᠤ᠌
ᠡᠵᠡᠨ ᠲᠩᠷᠢ ᠡᠶᠡᠷᠡᠭᠦᠨ ᠪᠠᠢᠬᠤ ᠳ᠋ᠤ᠌
ᠡᠭᠡᠯ ᠲᠦᠮᠡᠨ ᠢᠳᠡᠷᠡᠭᠦᠨ ᠪᠠᠢᠬᠤ ᠳ᠋ᠤ᠌
ᠠᠮᠤ ᠦᠷᠡ ᠪᠡᠨ ᠠᠷᠠᠴᠢᠯᠠᠨ ᠪᠠᠢᠬᠤ ᠳ᠋ᠤ᠌
ᠠᠳᠤᠭᠤ ᠮᠠᠯ ᠢ᠋ᠶ᠋ᠠᠨ ᠪᠡᠯᠴᠢᠭᠡᠨ ᠪᠠᠢᠬᠤ ᠳ᠋ᠤ᠌
ᠠᠩ ᠬᠦᠷᠦᠭᠡ ᠠᠩᠨᠠᠨ ᠪᠠᠢᠬᠤ ᠳ᠋ᠤ᠌
ᠠᠵᠤ ᠲᠥᠷᠥᠨ ᠠᠵᠢᠯᠯᠠᠨ ᠪᠠᠢᠬᠤ ᠳ᠋ᠤ᠌
ᠶᠢᠷᠲᠢᠨᠴᠦ ᠬᠡᠮᠡᠭᠴᠢ ᠶᠡᠷᠦ ᠶ᠋ᠢᠨ ᠪᠤᠰᠤ
ᠬᠣᠷᠸᠠ ᠬᠡᠮᠡᠭᠴᠢ ᠬᠣᠶᠠᠷ ᠲᠠᠯᠠ ᠲᠠᠢ
ᠡᠳᠦᠷ ᠰᠥᠨᠢ ᠶ᠋ᠢᠨ ᠰᠣᠯᠢᠯᠴᠠᠭᠠᠨ ᠳᠤᠮᠳᠠ
ᠥᠷᠯᠥᠭᠡ ᠦᠳᠡᠰᠢ ᠡᠭᠡᠯᠵᠢᠯᠡᠭᠡᠳ ᠪᠠᠢᠳᠠᠭ
ᠥᠨᠳᠥᠷ ᠪᠣᠭᠣᠨᠢ ᠶ᠋ᠢᠨ ᠵᠦᠷᠢᠶᠡᠨ ᠳᠤᠮᠳᠠ
ᠥᠭᠡᠳᠡᠯᠡᠬᠦ ᠤᠷᠤᠭᠤᠳᠠᠬᠤ ᠥᠭᠰᠥᠭᠡᠳ ᠪᠠᠢᠳᠠᠭ
ᠥᠷᠭᠡᠨ ᠨᠠᠷᠢᠨ ᠤ᠋ ᠵᠠᠢ ᠶ᠋ᠢᠨ ᠳᠤᠮᠳᠠ
ᠦᠨᠡᠨ ᠬᠤᠳᠠᠯ ᠬᠤᠳᠬᠤᠭᠠᠳ ᠪᠠᠢᠳᠠᠭ᠂
ᠥᠰᠢᠬᠦ ᠥᠷᠥᠰᠢᠶᠡᠬᠦ ᠶ᠋ᠢᠨ ᠮᠥᠷᠭᠦᠭᠡᠨ ᠳᠤᠮᠳᠠ
ᠥᠭᠬᠦ ᠠᠪᠬᠤ ᠥᠭᠡᠷᠡᠲᠦᠭᠡᠳ ᠪᠠᠢᠳᠠᠭ᠃
ᠬᠠᠷᠠ ᠴᠠᠭᠠᠨ ᠤ᠋ ᠬᠠᠷᠰᠢᠶᠠᠨ ᠳ᠋ᠤ᠌
ᠬᠠᠷᠠᠩᠭᠤᠢ ᠭᠡᠭᠡᠨ ᠬᠠᠷᠭᠤᠭᠠᠳ ᠪᠠᠢᠳᠠᠭ᠂
ᠬᠠᠯᠠᠭᠤᠨ ᠬᠦᠢᠲᠡᠨ ᠦ᠌ ᠬᠢᠮᠤᠷᠠᠭᠠᠨ ᠳᠤᠮᠳᠠ
ᠬᠠᠲᠠᠭᠤ ᠵᠥᠭᠡᠯᠡᠨ ᠬᠠᠪᠢᠷᠤᠭᠠᠳ ᠪᠠᠢᠳᠠᠭ᠃
ᠡᠷᠡ ᠡᠮᠡ ᠶ᠋ᠢᠨ ᠡᠭᠡᠳᠡᠷᠡᠭᠡᠨ ᠳᠤᠮᠳᠠ
ᠡᠪᠰᠡᠯ ᠵᠠᠳᠠᠷᠠᠯ ᠡᠷᠭᠢᠭᠡᠳ ᠪᠠᠢᠳᠠᠭ᠂
ᠦᠬᠦᠬᠦ ᠲᠥᠷᠥᠬᠦ ᠶ᠋ᠢᠨ ᠢᠷᠦᠭᠡᠯ ᠦ᠋ᠨ ᠳᠤᠮᠳᠠ
ᠡᠭᠦᠰᠴᠦ ᠳᠠᠭᠤᠰᠬᠤ ᠦᠵᠡᠭᠳᠡᠭᠡᠳ ᠪᠠᠢᠳᠠᠭ᠃
ᠰᠠᠢᠨ ᠪᠠᠢᠪᠠᠯ ᠮᠠᠭᠤ ᠪᠠᠢᠵᠤ
ᠰᠠᠯᠬᠤ ᠪᠠᠢᠪᠠᠯ ᠨᠡᠢᠯᠡᠬᠦ ᠪᠠᠢᠵᠤ
ᠦᠨᠳᠦᠰᠦ ᠪᠠᠢᠪᠠᠯ ᠨᠠᠮᠠᠭᠠ ᠪᠠᠢᠵᠤ
ᠦᠯᠢᠭᠡᠷ ᠪᠠᠢᠪᠠᠯ ᠰᠠᠯᠪᠤᠷᠢ ᠡᠭᠦᠰᠳᠡᠭ᠃
ᠣᠷᠴᠢᠯᠠᠩ ᠤ᠋ᠨ ᠡᠨᠡᠬᠦ ᠵᠢᠮᠡ ᠭᠡᠭᠴᠢ
ᠣᠷᠣᠰᠢᠵᠤ ᠰᠥᠨᠥᠬᠦ ᠶ᠋ᠢᠨ ᠵᠦᠢ ᠪᠤᠶᠤ
ᠣᠨᠳᠣᠣᠰᠢᠵᠤ ᠬᠤᠪᠢᠰᠬᠤ ᠶ᠋ᠢᠨ ᠤᠴᠢᠷ ᠪᠤᠶᠤ
ᠣᠯᠵᠤ ᠠᠯᠳᠠᠬᠤ ᠶ᠋ᠢᠨ ᠡᠭᠡᠯᠵᠢ ᠪᠤᠶᠤ
ᠣᠷᠣᠨ ᠵᠠᠢ ᠶ᠋ᠢᠨ ᠵᠥᠷᠢᠶᠡ ᠪᠤᠶᠤ
ᠵᠠ! ᠡᠨᠡ ᠦᠶᠡ ᠳ᠋ᠦ᠍
ᠬᠠᠳᠠᠨ ᠠ᠋ᠴᠠ ᠬᠠᠭᠠᠷᠠᠭᠰᠠᠨ ᠴᠦ᠍ ᠶᠤᠮ ᠤᠤ
ᠬᠠᠢᠷ ᠠ᠋ᠴᠠ ᠬᠡᠢᠰᠦᠭᠡᠳ ᠴᠦ᠍ ᠶᠤᠮ ᠤᠤ
ᠬᠠᠮᠢᠭᠠ ᠠ᠋ᠴᠠ ᠬᠡᠵᠢᠶᠡ ᠢᠷᠡᠭᠰᠡᠨ ᠢ᠋ ᠪᠤᠤ ᠮᠡᠳᠡ
ᠪᠢᠷᠢᠳ ᠭᠡᠳᠡᠭ ᠨᠡᠷᠡ ᠲᠡᠢ
ᠪᠡᠷᠬᠡ ᠶ᠋ᠢᠨ ᠲᠦᠢᠳᠦᠭᠴᠢ ᠨᠢᠭᠡᠨ ᠡᠮᠡᠭᠡᠨ
ᠬᠥᠮᠦᠨ ᠶᠢᠷᠲᠢᠨᠴᠦ ᠳ᠋ᠦ᠍ᠷ ᠢᠷᠡᠵᠦ
ᠬᠡᠷᠡᠭ ᠵᠠᠷᠭᠤ ᠲᠠᠲᠠᠵᠤ᠂
ᠬᠡᠷᠡᠭᠦᠯ ᠵᠠᠭᠤᠷᠠᠭᠠᠨ ᠡᠭᠦᠰᠬᠡᠵᠦ
ᠬᠡᠴᠡᠭᠦᠦ ᠮᠠᠭᠤᠬᠠᠢ ᠶ᠋ᠢ ᠦᠢᠯᠡᠳᠳᠡᠭ ᠶᠦᠮ ᠭᠡᠨᠡ᠃
ᠲᠡᠷᠡ ᠦᠳᠡᠰᠢ ᠶ᠋ᠢᠨ ᠭᠡᠭᠡ ᠲᠠᠰᠤᠷᠠᠮᠠᠭᠴᠠ
ᠡᠭᠦᠷᠭᠡ ᠡᠭᠦᠷᠦᠭᠡᠳ ᠭᠠᠷᠳᠠᠭ ᠭᠡᠨᠡ᠂
ᠦᠦᠷ ᠦ᠋ᠨ ᠭᠡᠭᠡ ᠴᠠᠢᠬᠤ ᠶ᠋ᠢᠨ ᠦᠶᠡ
ᠦᠦᠳᠡᠭ ᠪᠦᠦᠳᠡᠭ ᠬᠠᠷᠢᠳᠠᠭ ᠭᠡᠨᠡ᠃
ᠲᠡᠷᠡ ᠥᠷᠢ ᠨᠢᠭᠦᠯ ᠲᠠᠷᠢᠨ
ᠥᠯᠥᠰᠬᠦᠯᠡᠩ ᠨᠢᠴᠦᠭᠦᠨ ᠢ᠋ ᠲᠣᠨᠣᠳᠠᠭ ᠭᠡᠨᠡ᠂
ᠥᠰᠢᠶᠡ ᠬᠣᠷᠣᠰᠤᠯ ᠳᠡᠭᠳᠡᠭᠡᠨ
ᠥᠪᠡᠷ ᠪᠤᠰᠤᠳ ᠢ᠋ ᠵᠣᠪᠠᠭᠠᠳᠠᠭ ᠭᠡᠨᠡ᠃
ᠬᠠᠵᠠᠭᠴᠢ ᠬᠠᠷᠭᠢᠰ ᠵᠠᠩᠨᠠᠨ
ᠬᠠᠯᠠ ᠲᠠᠢ ᠬᠠᠲᠠᠭᠤ ᠪᠠᠢᠳᠠᠭ ᠭᠡᠨᠡ᠂
ᠬᠠᠷᠠᠮᠴᠢ ᠳᠣᠯᠣᠮᠴᠢ ᠪᠢᠷᠢᠳᠯᠡᠨ
ᠬᠠᠷᠠ ᠲᠠᠢ ᠬᠣᠣᠷ ᠲᠠᠢ ᠠᠭᠠᠰᠢᠯᠠᠳᠠᠭ ᠭᠡᠨᠡ᠃
ᠲᠡᠷᠡ ᠤᠷᠭᠤᠵᠤ ᠪᠠᠢᠭᠠ ᠨᠣᠭᠣᠭᠠ ᠶ᠋ᠢ
ᠤᠭ ᠢ᠋ᠶ᠋ᠠᠷ ᠨᠢ ᠦᠭᠲᠡᠭᠡᠵᠦ ᠬᠠᠶᠠᠳᠠᠭ ᠭᠡᠨᠡ᠂
ᠤᠮᠳᠠᠭᠠᠰᠴᠤ ᠪᠠᠢᠬᠤ ᠲᠠᠷᠢᠶᠠ ᠶ᠋ᠢᠨ
ᠤᠰᠤ ᠶ᠋ᠢ ᠨᠢ ᠲᠠᠰᠤᠯᠠᠵᠤ ᠣᠷᠬᠢᠳᠠᠭ ᠭᠡᠨᠡ᠃
ᠬᠥᠮᠦᠨ ᠢ᠋ ᠦᠵᠡᠪᠡᠯ ᠡᠭᠳᠡᠭᠦᠴᠡᠳᠡᠭ ᠭᠡᠨᠡ
ᠬᠡᠦᠬᠡᠳ ᠲᠠᠭᠠᠷᠠᠪᠠᠯ ᠬᠥᠭᠡᠷᠦᠬᠦᠢᠯᠡᠳᠡᠭ ᠭᠡᠨᠡ᠂
ᠪᠠᠭᠠ ᠰᠠᠭᠠ ᠶᠠᠭᠤᠮᠠ ᠳ᠋ᠤ᠌ ᠰᠠᠭᠭᠠᠳᠠᠭ ᠭᠡᠨᠡ
ᠪᠠᠢᠭᠰᠠᠨ ᠲᠠᠯᠪᠢᠭᠰᠠᠨ ᠢ᠋ᠶ᠋ᠠᠨ ᠠᠯᠳᠠᠳᠠᠭ ᠭᠡᠨᠡ᠃
ᠤᠬᠠᠭᠠᠨ ᠪᠣᠳᠣᠯ ᠪᠢᠳᠠᠭᠤ ᠭᠡᠨᠡ
ᠠᠭᠤᠷ ᠣᠮᠣᠭ ᠶᠡᠬᠡᠲᠡᠢ ᠭᠡᠨᠡ᠂
ᠤᠬᠢᠯᠠᠬᠤ ᠵᠣᠪᠠᠬᠤ ᠳᠤᠷᠠᠲᠠᠢ ᠭᠡᠨᠡ
ᠤᠤᠭᠤᠵᠤ ᠢᠳᠡᠬᠦ ᠪᠡᠨ ᠮᠡᠳᠡᠭᠡ ᠦᠭᠡᠢ ᠭᠡᠨᠡ᠃
ᠬᠦᠢ! ᠬᠥᠱ᠌ᠢ ᠠ᠋
ᠡᠮᠡᠭᠡᠨ ᠬᠥᠮᠦᠨ ᠳᠠᠢᠰᠤᠨ ᠪᠣᠰᠬᠤ ᠭᠡᠳᠡᠭ
ᠡᠲᠡᠭᠡᠳ ᠶᠣᠰᠣᠨ ᠶᠠᠭᠤ ᠪᠣᠯᠤᠭᠠ ᠭᠡᠮᠡᠨ
ᠡᠵᠡᠨ ᠬᠠᠭᠠᠨ ᠶᠡᠬᠡᠳᠡ ᠭᠠᠢᠬᠠᠰᠢᠷᠠᠨ
ᠡᠯᠳᠡᠪ ᠢ᠋ ᠠᠰᠠᠭᠤᠨ ᠲᠤᠩᠭᠠᠭᠰᠠᠨᠠ᠄
ᠪᠢᠷᠢᠳ ᠡᠮᠡᠭᠡᠨ ᠪᠠᠴᠢᠮᠳᠠᠨ ᠰᠠᠨᠳᠤᠷᠴᠤ
《ᠥᠬᠢᠨ ᠪᠡᠶᠡ ᠶ᠋ᠢ ᠠᠪᠴᠤ ᠲᠥᠷᠥᠭᠰᠡᠨ ᠴᠦ᠍
ᠦᠷᠡ ᠶ᠋ᠢᠨ ᠵᠠᠶᠠᠭᠠ ᠦᠭᠡᠢ ᠪᠢ
ᠬᠦᠢᠰᠦᠨ ᠬᠣᠯᠪᠣᠭᠠ ᠲᠠᠢ ᠭᠠᠭᠴᠠ ᠬᠦᠦ ᠪᠡᠨ
ᠬᠤᠢ ᠰᠠᠯᠬᠢᠨ ᠳ᠋ᠤ᠌ ᠬᠡᠢᠰᠬᠡᠨ ᠠᠯᠳᠠᠭᠠᠳ
ᠡᠳᠦᠷ ᠰᠥᠨᠢ ᠦᠭᠡᠢ ᠥᠨᠥᠴᠢᠷᠡᠨ ᠰᠠᠨᠠᠵᠤ
ᠡᠪᠡᠳᠴᠢᠨ ᠳ᠋ᠦ᠍ ᠣᠷᠢᠶᠠᠭᠳᠠᠨ ᠪᠤᠬᠢᠨᠢᠳᠤᠭᠠᠳ
ᠦᠵᠡᠭᠳᠡᠭᠰᠡᠨ ᠪᠦᠭᠦᠳᠡ ᠥᠰᠢᠶᠡᠲᠡᠢ ᠬᠠᠷᠠᠭᠳᠠᠨ
ᠦᠢᠯᠡ ᠪᠦᠬᠦᠨ ᠮᠢᠨᠢ ᠵᠦᠭ ᠢ᠋ᠶ᠋ᠡᠨ ᠠᠯᠳᠠᠪᠠᠢ》 ᠭᠡᠰᠡᠨ ᠭᠡᠨᠡ᠃
ᠡᠳᠡᠭᠡᠷ ᠢ᠋ ᠮᠡᠳᠡᠭᠰᠡᠨ ᠡᠵᠡᠨ ᠲᠩᠷᠢ ᠭᠱᠠᠨ ᠵᠠᠭᠤᠷᠠ
ᠡᠬᠡ ᠦᠷᠡ ᠶ᠋ᠢ ᠰᠠᠯᠭᠠᠭᠰᠠᠨ
ᠡᠨᠡᠷᠢᠯ ᠵᠢᠷᠤᠮ ᠢ᠋ ᠤᠮᠠᠷᠲᠠᠭᠰᠠᠨ
ᠤᠴᠢᠷ ᠵᠦᠢ ᠶ᠋ᠢ ᠤᠬᠠᠵᠤ
ᠬᠥᠬᠡ ᠮᠠᠨᠳᠠᠯ ᠤ᠋ᠨ ᠴᠠᠭᠠᠨᠠ ᠠ᠋ᠴᠠ
ᠬᠥᠪᠥᠩ ᠴᠠᠭᠠᠨ ᠡᠭᠦᠯᠡᠨ ᠳ᠋ᠦ᠍ᠷ ᠬᠦᠯᠦᠭᠦᠯᠦᠭᠡᠳ᠂
ᠮᠤᠯᠠᠩᠲᠠᠢ ᠪᠤᠷᠬᠠᠨ ᠢ᠋ ᠳᠣᠷᠣᠭᠰᠢ ᠪᠠᠭᠤᠯᠭᠠᠨ
ᠮᠥᠷᠥᠭᠡᠳᠦᠯ ᠦ᠋ᠨ ᠬᠠᠢᠷᠠᠲᠤ ᠡᠬᠡ ᠪᠢᠷᠢᠳ ᠡᠮᠡᠭᠡᠨ ᠲᠡᠢ
ᠮᠥᠷᠭᠥᠨ ᠰᠥᠭᠥᠳᠦᠨ ᠤᠴᠠᠷᠠᠭᠤᠯᠪᠠ ᠰᠠᠨᠵᠠᠢ᠃
ᠡᠯᠢᠭᠡ ᠵᠢᠷᠦᠬᠡ ᠶ᠋ᠢ ᠰᠢᠮᠰᠢᠷᠡᠭᠦᠯᠦᠮᠡ
ᠡᠬᠡ ᠦᠷᠡ ᠶ᠋ᠢᠨ ᠠᠭᠤᠯᠵᠠᠯᠲᠠ᠂
ᠡᠩᠬᠡ ᠮᠡᠨᠳᠦ ᠶ᠋ᠢᠨ ᠢᠷᠦᠭᠡᠯ᠂
ᠡᠨᠡ ᠬᠣᠷᠸᠠ ᠶ᠋ᠢᠨ ᠲᠠᠪᠢᠯᠠᠩ᠂
ᠢᠩᠭᠢᠵᠦ ᠰᠠᠢᠬᠠᠨ ᠪᠣᠯᠬᠤ ᠦᠶᠡ᠂
ᠬᠡᠦᠬᠡᠳ ᠦ᠋ᠨ ᠪᠣᠢᠪᠣᠭ ᠪᠠᠷᠢᠭᠰᠠᠨ
ᠬᠥᠭᠡᠷᠦᠬᠦᠢ ᠬᠥᠪᠡᠭᠦᠨ ᠮᠤᠯᠠᠩᠲᠠᠢ ᠪᠤᠷᠬᠠᠨ
ᠰᠥᠭᠥᠳᠦᠨ ᠥᠭᠦᠯᠡᠷᠦᠨ᠄
《ᠡᠵᠢ ᠠ᠋! ᠪᠢ ᠪᠣᠯᠪᠠᠰᠤ ᠬᠦᠦ ᠴᠢᠨᠢ ᠮᠤᠯᠠᠩᠲᠠᠢ ᠪᠢᠯᠡ!
ᠡᠵᠡᠨ ᠲᠩᠷᠢ ᠨᠠᠮᠠᠶ᠋ᠢ ᠢᠷᠡᠭᠦᠯᠦᠨ
〈ᠡᠵᠢ ᠪᠡᠨ ᠠᠪᠴᠢᠷᠠᠨ ᠠᠴᠢᠯᠠ!
ᠡᠨᠡᠷᠢᠯ ᠠᠴᠢ ᠶ᠋ᠢ ᠨᠢ ᠬᠠᠷᠢᠭᠤᠯᠠ!〉 ᠭᠡᠮᠡᠨ ᠵᠠᠷᠯᠢᠭᠳᠠᠪᠠᠢ᠃
ᠣᠳᠣ ᠪᠢ ᠴᠢᠮᠠᠶ᠋ᠢ ᠠᠪᠤᠭᠠᠳ
ᠬᠤᠷᠮᠤᠰᠲᠠ ᠲᠩᠷᠢ ᠳ᠋ᠦ᠍ ᠭᠠᠷᠤᠮᠤᠢ》 ᠭᠡᠳ
ᠪᠢᠷᠢᠳ ᠡᠮᠡᠭᠡᠨ ᠶᠠᠭᠠᠬᠢᠵᠤ ᠶᠠᠭᠠᠬᠢᠬᠤ ᠶ᠋ᠢᠨ ᠵᠠᠪ ᠦᠭᠡᠢ
ᠡᠵᠢ ᠪᠡᠨ ᠡᠭᠦᠷᠦᠭᠡᠳ ᠮᠤᠯᠠᠩᠲᠠᠢ ᠪᠤᠷᠬᠠᠨ
ᠠᠯᠤᠰ ᠲᠩᠷᠢ ᠲᠠᠢᠰᠢ ᠳᠡᠭᠳᠡᠨ ᠣᠳᠪᠠ᠃
ᠪᠢᠷᠢᠳ ᠬᠥᠭᠰᠢᠨ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ
ᠪᠢᠲᠡᠭᠦᠦ ᠬᠠᠭᠠᠯᠭᠠ ᠣᠩᠭᠣᠢᠬᠤ ᠪᠣᠯᠪᠠ᠂
ᠪᠡᠶᠡ ᠪᠡᠶᠡᠰ ᠢ᠋ᠶ᠋ᠡᠨ ᠦᠵᠡᠬᠦ ᠪᠣᠯᠪᠠ᠂
ᠪᠢᠰᠬᠢᠭᠦᠷ ᠪᠦᠷᠢᠶᠡ ᠬᠠᠩᠭᠢᠨᠠᠬᠤ ᠪᠣᠯᠪᠠ᠂
ᠬᠥᠭᠰᠢᠨ ᠲᠦᠢᠳᠦᠭᠴᠢ ᠶᠠᠪᠤᠭᠰᠠᠨ ᠠ᠋ᠴᠠ ᠬᠣᠢᠰᠢ
ᠬᠥᠳᠡᠭᠡ ᠭᠠᠵᠠᠷ ᠲᠠᠢᠪᠤᠩ ᠪᠣᠯᠪᠠ᠂
ᠬᠥᠮᠦᠨ ᠦ᠌ ᠰᠡᠳᠬᠢᠯ ᠠᠮᠤᠷ ᠪᠣᠯᠪᠠ᠂
ᠬᠥᠬᠥᠭᠡ ᠰᠢᠪᠠᠭᠤ ᠳᠣᠩᠭᠣᠳᠬᠤ ᠪᠣᠯᠪᠠ᠃
ᠤᠳᠠᠯ ᠦᠭᠡᠢ ᠡᠬᠡ ᠬᠥᠪᠡᠭᠦᠨ ᠬᠣᠶᠠᠭᠤᠯᠠ
ᠡᠵᠡᠨ ᠲᠩᠷᠢ ᠶ᠋ᠢᠨ ᠣᠷᠳᠣᠨᠠ ᠬᠦᠷᠬᠦ ᠳ᠋ᠦ᠍
ᠠᠶᠤᠮᠠᠷ ᠬᠣᠶᠠᠷ ᠠᠷᠰᠯᠠᠨ
ᠠᠩᠭᠠᠢᠨ ᠠᠷᠵᠠᠢᠨ ᠰᠠᠭᠤᠭᠠᠳ
ᠡᠩᠬᠡ ᠲᠩᠷᠢ ᠶ᠋ᠢᠨ ᠣᠷᠳᠣᠨ ᠤ᠋
ᠡᠭᠦᠳᠡ ᠶ᠋ᠢ ᠵᠢᠭᠦᠷᠯᠡᠨ ᠰᠠᠬᠢᠵᠤ ᠪᠠᠢᠯᠠ
ᠰᠦᠷᠲᠡᠢ ᠬᠣᠶᠠᠷ ᠠᠷᠰᠯᠠᠨ
ᠰᠦᠭᠯᠡᠢᠨ ᠯᠦᠭᠯᠦᠢᠨ ᠰᠠᠭᠤᠭᠠᠳ
ᠰᠦᠯᠳᠡ ᠲᠩᠷᠢ ᠶ᠋ᠢᠨ ᠬᠠᠭᠠᠯᠭᠠ ᠶ᠋ᠢ
ᠰᠥᠨᠢᠵᠢᠨ ᠡᠳᠦᠷᠵᠢᠨ ᠰᠠᠬᠢᠵᠤ ᠪᠠᠢᠯᠠ᠃
ᠠᠯᠲᠠᠨ ᠬᠣᠶᠠᠷ ᠠᠷᠰᠯᠠᠨ
ᠠᠯᠠᠭᠠᠨ ᠳᠣᠣᠷᠠ ᠪᠠᠨ ᠰᠢᠳᠢ ᠲᠡᠢ ᠭᠡᠨᠡ᠂
ᠠᠷᠪᠠᠨ ᠵᠦᠭ ᠦ᠋ᠨ ᠰᠢᠮᠨᠤᠰ ᠢ᠋
ᠠᠳᠬᠤᠵᠤ ᠰᠠᠭᠤᠳᠠᠭ ᠠᠯᠪᠠ ᠲᠠᠢ ᠭᠡᠨᠡ᠃
ᠲᠩᠷᠢ ᠶ᠋ᠢᠨ ᠬᠣᠶᠠᠷ ᠠᠷᠰᠯᠠᠨ
ᠲᠡᠩᠬᠡᠭᠡ ᠬᠦᠴᠦᠨ ᠰᠦᠷ ᠲᠡᠢ ᠭᠡᠨᠡ᠂
ᠲᠡᠨᠦᠭᠦᠯᠴᠢ ᠲᠦᠢᠳᠦᠭᠴᠢ ᠰᠢᠮᠨᠤᠰ ᠢ᠋
ᠳᠠᠷᠤᠵᠤ ᠰᠠᠭᠤᠳᠠᠭ ᠠᠯᠪᠠ ᠲᠠᠢ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠬᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ