ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠳᠣᠯᠣᠭᠠ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -7
153ᠵᠠᠩᠴᠢᠬᠦᠦ ᠳᠡᠭᠡᠷᠡ
— ᠡᠨᠡ ᠭᠤᠸᠠᠩᠵᠠ ! ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠨᠥᠬᠥᠷ ᠢ᠋ᠶ᠋ᠡᠨ ᠬᠠᠷᠠᠪᠠ᠃
— ᠳ᠋ᠠᠨᠽᠡᠨ ᠬᠠᠷᠢᠭᠤ ᠢᠨᠢᠶᠡᠮᠰᠦᠭᠯᠡᠨ᠄ ᠲᠡᠢᠮᠦ ᠠ᠋ ᠭᠤᠸᠠᠩᠵᠠ! ᠭᠡᠬᠦ ᠪᠣᠯᠪᠠᠴᠤ᠂ ᠡᠨᠳᠡ ᠣᠷᠣᠭᠰᠠᠭᠠᠷ ᠵᠠᠪᠠᠯ ᠮᠥᠩᠭᠥ ᠬᠡᠷᠡᠭᠲᠡᠢ ᠪᠣᠯᠳᠠᠭ ᠢ᠋ ᠰᠠᠨᠠᠨ᠄
— ᠮᠥᠩᠭᠥ ᠶᠠᠭᠠᠬᠢᠬᠤᠪ?
ᠫᠦ ᠵᠢᠩ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳ᠋ᠠᠬᠢ ᠮᠥᠩᠭᠥ ᠪᠡᠨ ᠬᠥᠳᠡᠯᠭᠡᠨ ᠳᠤᠤᠭᠠᠷᠭᠠᠵᠤ᠂ ᠳᠠᠬᠢᠨ ᠢᠨᠢᠶᠡᠮᠰᠦᠭᠯᠡᠭᠡᠳ ᠬᠠᠭᠠᠯᠭᠠ ᠲᠡᠳᠡᠨ ᠳᠣᠲᠣᠭᠰᠢ ᠣᠷᠣᠪᠠ᠃ ᠠᠮᠲᠠᠯᠢᠭ ᠪᠦᠬᠦᠨ ᠦ᠌ ᠰᠠᠢᠬᠠᠨ ᠦᠨᠦᠷ ᠬᠠᠩᠬᠤᠯᠵᠤ᠂ ᠬᠠᠷᠠ ᠥᠩᠭᠡ ᠶ᠋ᠢᠨ ᠴᠡᠪᠡᠷᠬᠡᠨ ᠥᠮᠥᠳᠥ ᠴᠠᠮᠴᠠ᠂ ᠬᠠᠷᠠ ᠬᠢᠯᠢᠩ ᠱᠠᠬᠠᠢ ᠵᠡᠷᠭᠡ ᠶ᠋ᠢ ᠡᠮᠦᠰᠦᠭᠰᠡᠨ ᠠᠬᠢᠮᠠᠭ ᠨᠠᠰᠤᠲᠠᠢ ᠪᠢᠴᠢᠬᠠᠨ ᠪᠡᠶᠡ ᠲᠡᠢ ᠬᠥᠮᠦᠨ ᠭᠣᠯᠣᠪ ᠱᠣᠯᠣᠪ ᠬᠥᠳᠡᠯᠦᠨ ᠲᠣᠰᠣᠨ ᠠᠪᠴᠤ᠄
— ᠬᠣᠭᠣᠯᠠ ᠪᠠᠨ ᠢᠳᠡᠭᠰᠡᠨ ᠤᠤ? ᠭᠡᠵᠦ ᠮᠡᠬᠦᠯᠵᠡᠬᠦ ᠠᠵᠢ᠃
— ᠢᠳᠡᠭᠰᠡᠨ᠃ ᠲᠠ ᠢᠳᠡᠭᠰᠡᠨ ᠤᠤ ᠭᠡᠵᠦ ᠫᠦ ᠵᠢᠩ ᠬᠡᠨᠡᠭ ᠦᠭᠡᠢ ᠬᠠᠷᠢᠭᠤᠯᠪᠠ᠃
ᠳ᠋ᠠᠨᠽᠡᠨ ᠬᠣᠭᠣᠯᠠ ᠪᠠᠨ ᠢᠳᠡᠬᠦ ᠪᠠᠢᠲᠤᠭᠠᠢ ᠥᠯᠥᠰᠬᠦᠯᠡᠩ ᠦᠬᠦᠬᠦ ᠭᠡᠵᠦ ᠶᠠᠪᠤᠭᠠ ᠪᠠᠢᠵᠤ ᠢᠩᠭᠢᠵᠦ ᠬᠡᠯᠡᠬᠦ ᠨᠢ ᠶᠠᠭᠤ ᠪᠣᠢ? ᠭᠡᠵᠦ ᠨᠥᠬᠥᠷ ᠢ᠋ᠶ᠋ᠡᠨ ᠭᠠᠢᠬᠠᠪᠠ᠃
ᠤᠭᠲᠤᠨ ᠠᠪᠤᠭᠰᠠᠨ ᠬᠥᠮᠦᠨ ᠲᠡᠷᠡ ᠬᠣᠶᠠᠷ ᠢ᠋ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠣᠷᠣᠭᠤᠯᠤᠨ ᠤᠳᠤᠷᠢᠳᠴᠤ ᠵᠡᠭᠦᠨ ᠬᠣᠢᠲᠤ ᠪᠤᠯᠤᠩ ᠤ᠋ᠨ ᠳᠤᠭᠤᠢ ᠰᠢᠷᠡᠭᠡᠨᠡ ᠰᠠᠭᠤᠯᠭᠠᠪᠠ᠃ ᠡᠨᠡ ᠬᠥᠮᠦᠨ ᠪᠣᠯ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ᠂ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠳᠤᠬᠤᠨ ᠲᠠᠯᠪᠢᠭᠰᠠᠨ ᠴᠠᠭᠠᠨ ᠠᠯᠴᠢᠭᠤᠷ ᠢ᠋ ᠰᠢᠪᠲᠤ ᠲᠡᠳᠡᠨ᠂ ᠥᠩᠭᠡ ᠨᠢ ᠨᠢᠭᠤᠷ ᠦᠵᠡᠭᠳᠡᠮᠡᠷ ᠭᠢᠯᠠᠯᠵᠠᠭᠰᠠᠨ ᠬᠦᠷᠡᠩ ᠰᠤᠮᠤᠨ ᠰᠢᠷᠡᠭᠡ ᠶ᠋ᠢ ᠭᠠᠪᠰᠢᠭᠠᠢᠯᠠᠨ ᠠᠷᠴᠢᠵᠤ᠄
— ᠳᠠᠩᠵᠢᠶᠠᠳ ᠶᠠᠭᠤ ᠢᠳᠡᠬᠦ ᠪᠣᠢ? ᠶᠠᠭᠤ ᠤᠤᠭᠤᠬᠤ ᠪᠣᠢ? ᠮᠠᠨ ᠤ᠋ ᠭᠤᠸᠠᠩᠵᠠᠨ ᠳ᠋ᠤ᠌ ᠶᠠᠭᠤᠮᠠ ᠪᠦᠬᠦᠨ ᠪᠠᠢᠨᠠ᠃ ᠨᠤᠭᠤᠰᠤ ᠰᠢᠪᠠᠭᠤ ᠶ᠋ᠢ ᠪᠣᠯᠪᠠᠴᠤ ᠵᠢᠩᠬᠢᠨᠢ ᠪᠡᠭᠡᠵᠢᠩ ᠮᠠᠶᠢᠭ ᠢ᠋ᠶ᠋ᠠᠷ ᠮᠠᠰᠢ ᠬᠤᠷᠳᠤᠨ᠂ ᠮᠠᠰᠢ ᠰᠠᠢᠨ ᠰᠢᠷᠠᠨᠠ᠃
— ᠠᠬᠠ ᠲᠠ ᠪᠢᠲᠡᠭᠡᠢ ᠪᠤᠷᠤᠭᠤᠰᠢᠶᠠᠭᠠᠷᠠᠢ᠂ ᠪᠢᠳᠡ ᠲᠤᠩ ᠰᠠᠶᠢᠬᠠᠨ ᠬᠣᠭᠣᠯᠠ ᠪᠠᠨ ᠢᠳᠡᠭᠰᠡᠨ᠂ ᠲᠡᠢᠮᠦ ᠶᠡᠬᠡ ᠶᠠᠭᠤᠮᠠ ᠢᠳᠡᠬᠦ ᠦᠭᠡᠢ᠂ ᠵᠦᠭᠡᠷ ᠠᠷ ᠰᠠᠷᠬᠠᠨ ᠯᠠ ᠶᠠᠭᠤᠮᠠ ᠢᠳᠡᠶᠡ ᠭᠡᠳ ᠫᠦ ᠵᠢᠩ ᠳ᠋ᠠᠨᠽᠡᠨ ᠦ᠌ ᠦᠯᠦ ᠮᠡᠳᠡᠬᠦ ᠡᠳᠦᠢ ᠲᠡᠳᠦᠢ ᠬᠣᠭᠣᠯᠠᠨ ᠤ᠋ ᠨᠡᠷᠡ ᠳᠤᠷᠠᠳᠤᠨ ᠬᠤᠷᠤᠭᠤ ᠳᠠᠷᠤᠨ ᠲᠣᠭᠠᠴᠢᠵᠤ ᠵᠠᠬᠢᠶᠠᠯᠠᠪᠠ᠃ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠫᠦ ᠵᠢᠩ ᠦ᠋ᠨ ᠬᠤᠷᠤᠭᠤ ᠳᠠᠷᠤᠬᠤ ᠳᠣᠳᠣᠮ ᠪᠡᠶᠡᠰᠦᠨ᠄ ᠠᠢ᠂ ᠠᠢ ᠭᠡᠵᠦ ᠮᠡᠬᠦᠯᠵᠡᠨ ᠨᠠᠢᠷᠰᠠᠭᠠᠳ ᠠᠷᠪᠠᠨ ᠨᠠᠢ᠍ᠮᠠ ᠶ᠋ᠢᠨ ᠲᠣᠭᠠᠨ ᠳ᠋ᠤ᠌ ᠬᠦᠷᠬᠦ ᠳ᠋ᠦ᠍ ᠶᠣᠰᠣᠲᠠᠢ ᠪᠠᠬᠠ ᠬᠠᠨᠤᠨ ᠲᠡᠷᠡ ᠪᠦᠷᠢ ᠶ᠋ᠢᠨ ᠨᠡᠷᠡ ᠶ᠋ᠢ ᠪᠠᠢᠰᠢᠩ ᠴᠤᠤᠷᠢᠶᠠᠲᠤᠭᠤᠯᠤᠨ ᠬᠠᠰᠬᠢᠷᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠲᠣᠭᠣᠭᠠᠴᠢ《ᠠᠢ》 ᠬᠠᠰᠬᠢᠷᠴᠤ ᠭᠣᠯᠤᠵᠠ ᠭᠠᠮᠫᠠᠨᠵᠠ ᠳᠡᠰ ᠨᠢᠰ ᠪᠠᠭᠤᠯᠭᠠᠨ ᠲᠠᠴᠢᠭᠢᠨᠠᠭᠤᠯᠵᠤ ᠭᠠᠷᠪᠠ᠃ ᠳ᠋ᠠᠨᠽᠡᠨ ᠥᠪᠡᠷ ᠦ᠋ᠨ ᠦᠯᠦ ᠮᠡᠳᠡᠬᠦ ᠠᠷᠪᠠᠨ ᠨᠠᠢ᠍ᠮᠠᠨ ᠲᠥᠷᠥᠯ ᠦ᠋ᠨ ᠬᠣᠭᠣᠯᠠ ᠶ᠋ᠢ ᠰᠣᠨᠢᠷᠬᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠮᠢᠶᠡᠨᠲ᠋ᠤᠤᠵᠠ᠂ ᠪᠤᠤᠵᠠ᠂ ᠬᠤᠱᠤᠤᠷ ᠭᠤᠷᠪᠠ ᠶ᠋ᠢ ᠪᠣᠳᠣᠬᠤ ᠶ᠋ᠢᠨ ᠳᠡᠭᠡᠷᠡ ᠨᠠᠢᠵᠢ ᠶ᠋ᠢᠨ ᠢ᠋ᠶ᠋ᠡᠨ ᠮᠥᠩᠭᠥ ᠶ᠋ᠢ ᠬᠠᠷᠠᠮᠰᠠᠬᠤ ᠠᠵᠢ᠃
— ᠴᠢ ᠶᠡᠬᠡ ᠬᠣᠭᠣᠯᠠ ᠵᠠᠬᠢᠨᠠ ᠪᠣᠢ? ᠮᠥᠩᠭᠥ ᠶᠡᠬᠡ ᠣᠷᠣᠬᠤ ᠪᠢᠰᠢ ᠤᠤ? ᠭᠡᠬᠦ ᠳ᠋ᠦ᠍ ᠫᠦ ᠵᠢᠩ ᠬᠠᠵᠠᠭᠤ ᠶ᠋ᠢᠨ ᠰᠢᠷᠡᠭᠡᠨ ᠦ᠌ ᠬᠥᠮᠦᠰ ᠡᠴᠡ ᠢᠴᠢᠨ ᠨᠢᠭᠤᠷ ᠤᠯᠠᠢᠵᠤ᠄
— ᠮᠥᠩᠭᠥ ᠭᠠᠢᠭᠤᠢ! ᠥᠨᠥᠳᠥᠷ ᠪᠣᠯ ᠪᠢᠳᠡᠨ ᠳ᠋ᠦ᠍ ᠪᠠᠶᠠᠷ ᠤ᠋ᠨ ᠡᠳᠦᠷ ᠭᠡᠵᠦ ᠵᠣᠷᠢᠭᠤᠳᠠ ᠴᠢᠩᠭᠠ ᠬᠡᠯᠡᠨ ᠬᠠ ᠬᠠ ᠢᠨᠢᠶᠡᠨᠡ᠃
— ᠬᠠᠷᠢᠨ ᠮᠢᠨᠦ ᠰᠠᠨᠠᠬᠤ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠮᠠᠭᠤ ᠡᠳᠦᠷ ᠳᠡ ᠭᠡᠬᠦ ᠳ᠋ᠦ᠍᠂
— ᠠᠢ ᠭᠡᠵᠦ ᠳᠠᠭᠤ ᠠᠯᠲᠠᠨ ᠢᠷᠪᠠᠢᠵᠤ᠄ ᠡᠢᠮᠦ ᠮᠠᠭᠤ ᠦᠭᠡ ᠪᠢᠲᠡᠭᠡᠢ ᠬᠡᠯᠡ! ᠰᠠᠢᠨ ᠨᠥᠬᠥᠷ ᠴᠢᠨᠢ ᠪᠢᠳᠡᠨ ᠦ᠌ ᠳᠡᠷᠭᠡᠳᠡ ᠪᠠᠢᠭᠠ ᠭᠡᠵᠦ ᠨᠢᠭᠤᠴᠠᠯᠠᠨ ᠰᠢᠪᠡᠨᠡᠪᠡ᠃
— ᠶᠠᠮᠠᠷ ᠨᠥᠬᠥᠷ? ᠭᠡᠵᠦ ᠰᠣᠴᠢᠨ ᠠᠰᠠᠭᠤᠪᠠ᠃
— ᠶᠠᠭᠠᠬᠢᠭᠠ ᠪᠣᠢ᠂ ᠨᠠᠰᠤ ᠪᠠᠷᠠᠭᠰᠠᠨ ᠨᠥᠬᠥᠷ ᠴᠢᠨᠢ᠃ ᠮᠥᠩᠭᠥ ᠭᠠᠢᠭᠤᠢ᠂ ᠪᠢᠳᠡ ᠰᠠᠢᠬᠠᠨ ᠵᠣᠴᠢᠯᠠᠨᠠ᠃ ᠳᠠᠷᠠᠭᠠ ᠨᠢ ᠪᠢᠳᠡ ᠬᠣᠶᠠᠷ ᠲᠤᠰ ᠲᠤᠰ ᠤ᠋ᠨ ᠢ᠋ᠶ᠋ᠠᠨ ᠨᠤᠲᠤᠭ ᠤᠷᠤᠭᠤ ᠶᠠᠪᠤᠨᠠ᠃ ᠠᠢ ᠰᠠᠢᠨ᠂ ᠮᠠᠰᠢ ᠰᠠᠢᠨ᠂ ᠠᠮᠢᠳᠤᠷᠠᠯ ᠳ᠋ᠤ᠌ ᠡᠢᠮᠦ ᠰᠠᠢᠬᠠᠨ ᠶᠠᠭᠤᠮᠠ ᠳᠠᠭᠠᠷᠢᠯᠳᠤᠬᠤ ᠦᠭᠡᠢ ᠭᠡᠳ ᠬᠣᠢᠰᠢ ᠡᠷᠭᠢᠨ᠄ ᠠᠢ ᠠᠬᠠ ᠰᠣᠨᠣᠰ! ᠪᠢᠳᠡ ᠭᠤᠷᠪᠠᠨ ᠬᠥᠮᠦᠨ ᠰᠢᠦ᠃
ᠳ᠋ᠠᠨᠽᠡᠨ ᠣᠳᠣ ᠣᠢᠯᠠᠭᠠᠯᠠ᠃ ᠬᠢᠲᠠᠳ ᠤ᠋ᠨ ᠶᠣᠰᠣ ᠰᠤᠷᠲᠠᠬᠤᠨ ᠢ᠋ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠡᠯᠳᠡᠪ ᠢ᠋ᠶ᠋ᠡᠷ ᠪᠣᠳᠣᠯᠠᠨ ᠰᠢᠪᠰᠢᠭ ᠪᠣᠯᠭᠠᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠨ᠄
— ᠰᠠᠢᠨ᠂ ᠮᠠᠰᠢ ᠰᠠᠢᠨ ᠭᠡᠪᠡ᠃
ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠶ᠋ᠢᠨ ᠬᠤᠷᠳᠤᠨ ᠭᠠᠪᠰᠢᠭᠠᠢ ᠶ᠋ᠢ ᠬᠡᠨ ᠪᠣᠯᠪᠠᠴᠤ ᠭᠠᠢᠬᠠᠬᠤ ᠪᠣᠢ ᠵᠠ᠃ ᠬᠡᠳᠦᠬᠡᠨ ᠦᠭᠡ ᠰᠣᠯᠢᠯᠴᠠᠬᠤ ᠵᠠᠭᠤᠷᠠ ᠠᠶᠠᠭᠠ ᠠᠪᠴᠢᠷᠠᠨ ᠴᠠᠢ ᠳᠦᠭᠦᠷᠭᠡᠭᠰᠡᠨ᠂ ᠰᠠᠪᠬᠠ᠂ ᠳᠠᠪᠤᠰᠤ ᠲᠠᠢ ᠨᠣᠭᠣᠭᠠ᠂ ᠠᠷᠢᠬᠢᠨ ᠤ᠋ ᠬᠤᠨᠳᠠᠭᠠ ᠲᠤᠰ ᠪᠦᠷᠢ ᠶ᠋ᠢ ᠡᠭᠡᠯᠵᠢ ᠳᠠᠷᠠᠭᠠᠯᠠᠨ ᠠᠪᠴᠢᠷᠠᠭᠰᠠᠨ ᠪᠠᠢᠯᠠ᠃ ᠭᠡᠲᠡᠯᠡ ᠲᠣᠭᠣᠭᠠᠴᠢ ᠶ᠋ᠢᠨ ᠠᠵᠢᠯᠯᠠᠭᠠ ᠪᠦᠷ ᠴᠦ᠍ ᠭᠠᠢᠬᠠᠯᠲᠠᠢ᠃ ᠭᠣᠯᠣᠵᠠ᠂ ᠭᠠᠮᠫᠠᠨᠵᠠ ᠵᠠᠭᠠᠵᠤᠤᠷ ᠭᠤᠷᠪᠠ ᠨᠢ ᠮᠥᠨᠳᠥᠷ ᠰᠢᠭ ᠲᠠᠵᠢᠭᠢᠨᠠᠭᠰᠠᠨ ᠢ᠋ᠶ᠋ᠠᠷ ᠠᠶᠠᠭᠠ ᠴᠠᠢ ᠶ᠋ᠢ ᠬᠠᠷᠠᠬᠠᠨ ᠪᠠᠷᠢᠵᠤ ᠤᠤᠭᠤᠭᠠ ᠦᠭᠡᠢ ᠪᠠᠢᠬᠤ ᠳ᠋ᠤ᠌ ᠲᠣᠭᠣᠭᠠ ᠪᠠᠨ ᠬᠠᠩ ᠶᠠᠩ ᠪᠠᠭᠤᠯᠭᠠᠵᠤ《ᠠᠢ》 ᠭᠡᠵᠦ ᠬᠠᠰᠬᠢᠷᠤᠨᠠ᠃ ᠡᠨᠡ ᠨᠢ ᠤᠭ ᠬᠣᠭᠣᠯᠠ ᠶ᠋ᠢ ᠬᠢᠵᠦ ᠳᠠᠭᠤᠰᠤᠭᠰᠠᠨ ᠤ᠋ ᠳᠣᠬᠢᠶᠠ ᠠᠵᠢ᠃ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠬᠠᠷᠢᠭᠤ《ᠠᠢ》 ᠬᠠᠰᠬᠢᠷᠤᠨ ᠭᠣᠳ ᠦᠰᠦᠷᠦᠨ ᠭᠦᠶᠦᠨᠡ᠃ ᠬᠠᠭᠤᠷᠤᠭᠰᠠᠨ ᠵᠢᠩᠭᠢᠨᠡᠭᠰᠡᠨ ᠡᠴᠡ ᠠᠪᠤᠭᠠᠳ ᠱᠥᠯᠥ ᠲᠡᠢ ᠱᠥᠯᠥ ᠦᠭᠡᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠶᠠᠭᠤᠮᠠᠰ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠪᠠᠨ ᠵᠠᠯᠭᠠᠨ ᠢᠷᠡᠵᠦ ᠰᠢᠷᠡᠭᠡ ᠳᠦᠭᠦᠷᠭᠡᠨᠡ᠃ ᠲᠡᠭᠦᠨ ᠢ᠋ ᠬᠣᠶᠠᠷ ᠬᠥᠮᠦᠨ ᠬᠡᠷᠬᠢᠪᠡᠴᠦ ᠪᠠᠷᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠨᠢᠭᠡ ᠬᠡᠢ ᠬᠥᠮᠦᠨ ᠪᠠᠢᠨᠠ᠃ ᠲᠡᠷᠡ ᠪᠣᠯ ᠬᠦᠷᠡᠯ᠃ ᠲᠡᠭᠦᠨ ᠳ᠋ᠦ᠍ ᠵᠣᠷᠢᠭᠤᠯᠤᠨ ᠠᠶᠠᠭᠠ᠂ ᠲᠠᠪᠠᠭ᠂ ᠰᠠᠪᠬᠠ᠂ ᠳ᠋ᠢᠵᠠ ᠶᠠᠭᠤᠮᠠ ᠪᠦᠬᠦᠨ ᠦ᠌ ᠬᠡᠷᠡᠭᠯᠡᠯ ᠲᠠᠯᠪᠢᠭᠰᠠᠨ ᠢ᠋ ᠮᠥᠨ ᠵᠣᠬᠢᠬᠤ ᠵᠦᠢᠯ ᠪᠦᠷᠢ ᠪᠡᠷ ᠳᠦᠭᠦᠷᠭᠡᠨᠡ᠃ ᠳ᠋ᠠᠨᠽᠡᠨ ᠲᠦᠷᠦᠭᠦᠦ ᠶᠣᠰᠣ ᠮᠡᠳᠡᠬᠦ ᠦᠭᠡᠢ ᠡᠴᠡ ᠪᠣᠯᠤᠨ ᠪᠠᠬᠠᠨ ᠮᠤᠩᠭᠠᠨᠢᠭᠰᠠᠨ ᠢ᠋ᠶ᠋ᠠᠨ ᠴᠠᠭ ᠢᠮᠠᠭᠲᠠ ᠪᠣᠳᠣᠨ ᠫᠦ ᠵᠢᠩ ᠦ᠋ᠨ ᠬᠥᠳᠡᠯᠬᠦ ᠪᠦᠷᠢ ᠶ᠋ᠢ ᠰᠠᠮ ᠠᠵᠢᠭᠯᠠᠨ ᠳᠠᠭᠠᠨ ᠳᠠᠭᠤᠷᠢᠶᠠᠨᠠ᠃ ᠣᠯᠠᠨ ᠲᠥᠷᠥᠯ ᠦ᠋ᠨ ᠬᠣᠭᠣᠯᠠ ᠠ᠋ᠴᠠ ᠢᠳᠡᠵᠦ ᠦᠵᠡᠬᠦ ᠳ᠋ᠦ᠍ ᠰᠠᠯᠤᠰᠢ ᠦᠭᠡᠢ ᠰᠠᠢᠬᠠᠨ ᠠᠮᠲᠠᠲᠠᠢ ᠴᠦ᠍ ᠪᠠᠢᠨᠠ᠃ ᠬᠡᠯᠡ ᠬᠦᠷᠭᠡᠵᠦ ᠪᠣᠯᠣᠰᠢ ᠦᠭᠡᠢ ᠭᠠᠰᠢᠭᠤᠨ ᠨᠢᠰᠤᠭᠤᠨ ᠴᠦ᠍ ᠶᠠᠭᠤᠮᠠ ᠳᠠᠭᠠᠷᠢᠯᠳᠤᠨᠠ᠃ ᠭᠡᠪᠡᠴᠦ ᠳ᠋ᠠᠨᠽᠡᠨ᠂《ᠰᠠᠢᠨ᠂ ᠮᠠᠰᠢ ᠰᠠᠢᠨ》 ᠭᠡᠵᠦ ᠳᠠᠩ ᠪᠠᠬᠠᠳᠤᠨ ᠪᠠᠶᠠᠷᠯᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ ᠰᠠᠭᠤᠨᠠ᠃ ᠠᠷᠢᠬᠢᠨ ᠤ᠋ ᠵᠦᠢᠯᠡᠰ ᠨᠢ ᠠᠯᠢ ᠲᠦᠷᠦᠭᠦᠦ ᠢᠷᠡᠭᠰᠡᠨ ᠪᠥᠭᠡᠳ ᠭᠠᠤᠯᠢᠨ ᠭᠦᠴᠡᠨ ᠳ᠋ᠦ᠍ ᠬᠠᠯᠠᠭᠠᠭᠰᠠᠨ ᠢ᠋ ᠡᠷᠭᠢᠪᠴᠢ ᠭᠡᠵᠦ ᠨᠡᠷᠡᠯᠡᠪᠡᠯ ᠵᠣᠬᠢᠬᠤ ᠪᠢᠴᠢᠬᠠᠨ ᠬᠤᠨᠳᠠᠭᠠ ᠪᠠᠷ ᠳ᠋ᠠᠨᠽᠡᠨ ᠭᠤᠷᠪᠠ ᠳᠠᠬᠢᠨ ᠤᠤᠭᠤᠭᠠᠳ ᠪᠡᠶᠡ ᠪᠡᠨ ᠠᠵᠢᠪᠠ᠃ ᠤᠷᠤᠭᠤᠯ ᠨᠢ ᠴᠢᠮᠴᠢᠭᠢᠨᠡᠨ ᠭᠡᠳᠡᠰᠦᠨ ᠳᠣᠲᠣᠷᠠ ᠠ᠋ᠴᠠ ᠠᠶᠠᠲᠠᠢᠬᠠᠨ ᠢ᠋ᠶ᠋ᠠᠷ ᠬᠠᠯᠠᠭᠤᠴᠠᠨ ᠪᠠᠢᠭᠠ ᠶ᠋ᠢᠨ ᠳᠡᠭᠡᠷᠡ ᠮᠠᠭᠤ ᠵᠦᠭ ᠦ᠋ᠨ ᠶᠠᠭᠤᠮᠠ ᠪᠦᠬᠦᠨ ᠮᠠᠷᠲᠠᠭᠳᠠᠵᠤ᠂ ᠰᠡᠳᠬᠢᠯ ᠳ᠋ᠦ᠍ᠨᠢ ᠳᠠᠩ ᠪᠠᠶᠠᠷ᠂ ᠲᠡᠷᠡ ᠪᠠᠢᠲᠤᠭᠠᠢ ᠬᠠᠷᠠᠭᠰᠠᠨ ᠵᠦᠭ ᠪᠣᠯᠭᠠᠨ ᠤ᠋ ᠶᠠᠭᠤᠮᠠᠰ ᠴᠥᠮ ᠰᠠᠢᠬᠠᠨ ᠬᠠᠮᠢᠭᠠ ᠬᠠᠮᠢᠶᠠ ᠦᠭᠡᠢ ᠲᠠᠨᠢᠬᠤ ᠦᠭᠡᠢ ᠬᠥᠮᠦᠨ ᠢ᠋ ᠪᠣᠯᠪᠠᠴᠤ《ᠠᠬᠠ ᠳᠡᠭᠦᠦ》 ᠭᠡᠵᠦ ᠳᠠᠭᠤᠳᠠᠨ ᠬᠦᠵᠦᠭᠦᠳᠡᠨ ᠠᠪᠤᠭᠤᠰᠢᠲᠠᠢ ᠰᠠᠨᠠᠭᠳᠠᠨᠠ᠃
ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠡᠨ ᠳᠠᠬᠢᠨ ᠤᠤᠭᠤᠯᠠ᠃ ᠨᠥᠬᠥᠷ ᠦ᠋ᠨ ᠱᠠᠭᠠᠷᠳᠠᠯᠭᠠ ᠪᠠᠷ ᠪᠢᠰᠢ᠂ ᠬᠠᠷᠢᠨ ᠨᠥᠬᠥᠷ ᠢ᠋ᠶ᠋ᠡᠨ ᠱᠠᠭᠠᠷᠳᠠᠨ ᠳᠥᠷᠪᠡᠳᠡᠬᠢ ᠲᠠᠪᠤᠳᠠᠬᠢ ᠪᠠᠨ ᠤᠤᠭᠤᠭᠠᠳ ᠪᠡᠶᠡ ᠪᠡᠨ ᠠᠵᠢᠬᠤ ᠳ᠋ᠤ᠌ ᠨᠢᠭᠡ ᠪᠢᠰᠢ᠂ ᠨᠢᠳᠦ ᠪᠡᠨ ᠲᠤᠰᠬᠤ ᠪᠦᠬᠦᠨ ᠳ᠋ᠦ᠍ ᠵᠢᠵᠢᠭᠬᠡᠨ ᠬᠠᠷᠠ ᠳᠣᠪᠣ ᠪᠣᠢ ᠪᠣᠯᠤᠭᠰᠠᠨ ᠤ᠋ ᠳᠡᠭᠡᠷᠡ᠂ ᠪᠦᠬᠦ ᠪᠠᠢᠰᠢᠩ ᠲᠡᠷᠡ ᠠᠶᠠ ᠪᠠᠷ ᠢ᠋ᠶ᠋ᠠᠨ ᠳᠠᠢᠪᠠᠯᠵᠠᠨ ᠬᠥᠳᠡᠯᠦᠨᠡ᠃ ᠳ᠋ᠠᠨᠽᠡᠨ ᠰᠣᠭᠲᠣᠵᠤ ᠪᠠᠢᠭᠠ ᠪᠠᠨ ᠮᠡᠳᠡᠯᠡ᠃ ᠭᠡᠪᠡᠴᠦ ᠬᠥᠮᠦᠨ ᠰᠣᠭᠲᠣᠨ ᠤᠬᠠᠭᠠ ᠠᠯᠲᠠᠨ ᠤᠨᠠᠳᠠᠭ ᠲᠠᠢ ᠪᠡᠶᠡ ᠪᠡᠨ ᠵᠦᠢᠷᠯᠡᠨ ᠦᠵᠡᠬᠦ ᠳ᠋ᠦ᠍ ᠶᠠᠭᠠᠬᠢᠭᠠ ᠴᠦ᠍ ᠦᠭᠡᠢ ᠪᠠᠢᠭᠠ ᠰᠢᠭ᠋ ᠰᠠᠨᠠᠭᠳᠠᠨᠠ᠃《ᠲᠡᠢᠮᠦ ᠠ᠋᠂ ᠶᠠᠭᠠᠬᠢᠭᠠ ᠴᠦ᠍ ᠦᠭᠡᠢ》 ᠭᠡᠵᠦ ᠮᠣᠩᠭᠣᠯ ᠢ᠋ᠶ᠋ᠠᠷ ᠥᠭᠦᠯᠡᠭᠡᠳ ᠵᠢᠷᠭᠤᠳᠠᠬᠢ ᠬᠤᠨᠳᠠᠭᠠ ᠶ᠋ᠢ ᠰᠢᠭᠦᠷᠦᠨ ᠠᠪᠴᠤ ᠬᠥᠨᠲᠥᠷᠪᠡ᠃ ᠭᠡᠲᠡᠯᠡ ᠭᠦᠴᠡ ᠬᠣᠭᠣᠰᠣᠷᠠᠭᠠᠳ ᠪᠠᠢᠭᠰᠠᠨ ᠠᠵᠢ᠃ ᠫᠦ ᠵᠢᠩ᠄ ᠠᠢ ᠶᠡᠬᠡ ᠠᠬᠠ ᠠ᠋! ᠪᠢᠳᠡᠨ ᠳ᠋ᠦ᠍ ᠳᠠᠬᠢᠨ ᠠᠷᠢᠬᠢ ᠬᠡᠷᠡᠭᠲᠡᠢ ᠭᠡᠵᠦ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠰᠢᠭ᠋ ᠵᠠᠩᠳᠤᠷᠤᠩᠭᠤᠢ ᠳᠠᠭᠤ ᠪᠠᠷ ᠬᠠᠰᠬᠢᠷᠪᠠ᠃ ᠳ᠋ᠠᠨᠽᠡᠨ《ᠰᠠᠢᠨ》 ᠭᠡᠵᠦ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠪᠤᠰᠬᠠᠨ ᠢᠨᠢᠶᠡᠳᠦ ᠠᠯᠳᠠᠭᠠᠳ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠶ᠋ᠢᠨ ᠭᠦᠴᠡ ᠶ᠋ᠢ ᠠᠪᠤᠨ ᠣᠳᠬᠤ ᠳ᠋ᠤ᠌《ᠬᠠᠯᠠᠭᠠᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠨᠥᠬᠥᠷ ᠢ᠋ᠶ᠋ᠡᠨ ᠳᠠᠭᠤᠷᠢᠶᠠᠨ ᠬᠠᠰᠬᠢᠷᠪᠠ᠃
— ᠥᠨᠥᠳᠥᠷ ᠶᠠᠩ ᠮᠧᠢ ᠳᠢ ᠧᠦ᠋ᠷᠣᠫᠠ ᠶ᠋ᠢᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠳᠥᠷᠪᠡᠨ ᠪᠢᠲᠡᠭᠡᠢ ᠮᠠᠷᠲᠠᠭᠠᠷᠠᠢ! ᠭᠡᠳ ᠫᠦ ᠵᠢᠩ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠶ᠋ᠢᠨ ᠠᠪᠴᠢᠷᠠᠵᠤ ᠪᠠᠢᠭᠠ ᠭᠦᠴᠡ ᠲᠡᠢ ᠠᠷᠢᠬᠢ ᠶ᠋ᠢ ᠬᠦᠯᠢᠶᠡᠨ ᠠᠪᠴᠤ ᠬᠤᠨᠳᠠᠭᠠᠯᠠᠭᠠᠳ᠄
— ᠰᠠᠯᠬᠤ ᠶ᠋ᠢᠨ ᠪᠠᠶᠠᠷ ᠲᠤ᠃
ᠳ᠋ᠠᠨᠽᠡᠨ ᠣᠷᠣᠨ ᠨᠤᠲᠤᠭ ᠤ᠋ᠨ ᠵᠦᠭ ᠴᠢᠭᠯᠡᠭᠰᠡᠨ ᠶᠡᠬᠡ ᠵᠠᠮ ᠨᠢᠳᠦᠨ ᠳ᠋ᠦ᠍ᠨᠢ ᠲᠤᠰᠤᠭᠰᠠᠨ ᠰᠢᠭ᠋ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ᠂ ᠫᠦ ᠵᠢᠩ ᠦ᠋ᠨ ᠨᠠᠭᠤᠷ ᠤ᠋ᠨ ᠵᠠᠬᠠ ᠳ᠋ᠤ᠌ ᠶᠠᠷᠢᠭᠰᠠᠨ ᠶᠠᠷᠢᠶᠠ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠵᠠᠢ᠃
— ᠠᠢ ᠲᠡᠢᠮᠦ᠂ ᠪᠢᠳᠡ ᠡᠨᠳᠡ ᠡᠴᠡ ᠰᠠᠯᠤᠨᠠ᠃ ᠴᠢ ᠲᠡᠷᠡ ᠬᠦᠩ ᠴᠡᠨ ᠳ᠋ᠠᠩ ᠤ᠋ᠨ ᠵᠠᠮ ᠢ᠋ᠶ᠋ᠠᠷ ᠰᠠᠢᠨ ᠶᠠᠪᠤᠭᠠᠷᠠᠢ! ᠭᠡᠲᠡᠯᠡ ᠫᠦ ᠵᠢᠩ ᠶᠡᠬᠡᠳᠡ ᠰᠠᠨᠳᠤᠷᠤᠨ᠄
— ᠬᠠᠢ ᠴᠢ ᠶᠠᠭᠤᠨ ᠳᠡᠮᠡᠢ ᠶᠠᠭᠤᠮᠠ ᠶᠠᠷᠢᠨᠠ ᠪᠣᠢ? ᠪᠢ ᠲᠡᠷᠡ ᠵᠠᠮ ᠢ᠋ ᠪᠠᠷᠢᠭᠴᠢ ᠪᠢᠰᠢ᠂ ᠬᠠᠷᠢᠨ ᠡᠰᠡᠷᠭᠦᠴᠡᠭᠴᠢ ᠭᠡᠵᠦ ᠴᠢᠩᠭᠠ ᠪᠠᠷ ᠬᠡᠯᠡᠨ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠢᠨᠢᠶᠡᠪᠡ᠃ ᠳ᠋ᠠᠨᠽᠡᠨ ᠭᠠᠢᠬᠠᠯᠠ᠃ ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠰ ᠢ᠋ ᠠᠵᠢᠬᠤ ᠳ᠋ᠤ᠌ ᠴᠥᠮ ᠦ᠋ᠨ ᠨᠢᠳᠦ ᠥᠪᠡᠷ ᠳᠡᠭᠡᠷᠡ ᠰᠡᠵᠢᠭᠯᠡᠭᠳᠡᠨ ᠲᠤᠰᠤᠭᠰᠠᠨ ᠪᠠᠢᠬᠤ ᠪᠥᠭᠡᠳ ᠵᠠᠷᠢᠮ ᠨᠢᠭᠡ ᠨᠢ ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍ ᠰᠠᠮ ᠰᠢᠪᠡᠨᠡᠬᠦ ᠠᠵᠢ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠡᠨ ᠬᠡᠨ ᠬᠥᠮᠦᠨ ᠦ᠌ ᠳᠡᠷᠭᠡᠳᠡ ᠬᠠᠮᠢᠶᠠ ᠦᠭᠡᠢ ᠬᠡᠯᠡᠵᠦ ᠪᠣᠯᠳᠠᠭ ᠦᠭᠡᠢ ᠭᠡᠮᠲᠦ ᠦᠭᠡ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠣᠢᠯᠠᠭᠠᠪᠠ᠃ ᠫᠦ ᠵᠢᠩ ᠴᠦ᠍ ᠲᠠᠢᠪᠤᠩ ᠪᠠᠢᠳᠠᠯ ᠢ᠋ᠶ᠋ᠠᠨ ᠠᠯᠳᠠᠵᠤ ᠤᠷᠢᠳᠠᠬᠢ ᠬᠤᠨᠳᠠᠭᠠ ᠪᠠᠨ ᠳᠦᠭᠦᠷᠭᠡᠨ ᠶᠠᠭᠠᠷᠠᠨ ᠤᠤᠭᠤᠭᠠᠳ᠂ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠶ᠋ᠢ ᠳᠠᠭᠤᠳᠠᠨ ᠢᠷᠡᠭᠦᠯᠵᠦ᠂ ᠬᠣᠭᠣᠯᠠᠨ ᠤ᠋ ᠲᠣᠭᠠᠴᠠᠭᠠ ᠠᠰᠠᠭᠤᠪᠠ᠃ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠰᠢᠷᠡᠭᠡᠨ ᠳᠡᠭᠡᠷᠡᠬᠢ ᠠᠶᠠᠭᠠ ᠲᠠᠪᠠᠭ ᠤ᠋ᠳ ᠢ᠋ᠶ᠋ᠠᠷ ᠶᠠᠭᠤ ᠶᠠᠭᠤ ᠥᠭᠭᠦᠭᠰᠡᠨ ᠢ᠋ᠶ᠋ᠡᠨ ᠪᠦᠷᠢᠳᠬᠡᠩᠭᠦᠲᠡ ᠪᠡᠨ ᠵᠣᠬᠢᠬᠤ ᠦᠨᠡ ᠳᠡᠭᠡᠷᠡ ᠳᠡᠭᠡᠷᠡ ᠡᠴᠡ ᠨᠢ ᠨᠡᠮᠡᠵᠦ ᠭᠤᠷᠪᠠᠨ ᠶᠠᠩᠴᠢᠶᠠᠨ ᠲᠠᠪᠢᠨ ᠮᠥᠩᠭᠥ ᠪᠣᠯᠭᠠᠪᠠ᠃ ᠫᠦ ᠵᠢᠩ ᠮᠥᠩᠭᠥ ᠶᠠᠩᠴᠢᠶᠠᠨ ᠢ᠋ ᠴᠠᠭ ᠦᠷᠭᠦᠯᠵᠢ ᠤᠰᠤ ᠰᠢᠭ᠋ ᠤᠷᠤᠰᠬᠠᠨ ᠰᠦᠢᠳᠬᠡᠵᠦ ᠰᠤᠷᠤᠭᠰᠠᠨ ᠬᠥᠮᠦᠨ ᠦ᠌ ᠶᠠᠩᠵᠤ ᠪᠠᠷ ᠲᠠᠰᠢᠶᠠᠨ ᠤ᠋ ᠪᠠᠨ ᠡᠪᠦᠷ ᠲᠦ᠍ ᠭᠠᠷ ᠬᠢᠬᠦ ᠲᠡᠢ ᠪᠡᠨ ᠵᠡᠷᠭᠡ ᠳᠥᠷᠪᠡᠨ ᠶᠠᠩᠴᠢᠶᠠᠨ ᠭᠠᠷᠭᠠᠨ ᠭᠠᠷ ᠳᠡᠭᠡᠷᠡ ᠨᠢ ᠬᠠᠶᠠᠪᠠ᠃ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠰᠢᠭᠦᠷᠦᠨ ᠠᠪᠤᠩᠭᠤᠲᠠ ᠪᠠᠨ ᠣᠯᠠᠨ ᠤ᠋ ᠡᠮᠦᠨᠡ ᠪᠠᠬᠠᠳᠤᠯ ᠪᠣᠯᠭᠠᠬᠤ ᠮᠡᠲᠦ ᠳᠡᠭᠡᠭᠰᠢ ᠰᠢᠳᠡᠨ ᠬᠠᠩ ᠶᠠᠩ ᠪᠠᠭᠤᠯᠭᠠᠨ ᠪᠠᠷᠢᠵᠤ ᠠᠪᠤᠭᠠᠳ᠄
— ᠲᠠᠪᠢᠨ ᠮᠥᠩᠭᠥᠨ ᠦ᠌ ᠬᠡᠰᠢᠭ ᠪᠠᠭᠤᠯᠠ! ᠭᠡᠵᠦ ᠴᠡᠭᠡᠯᠬᠡᠨ ᠬᠣᠭᠣᠯᠠᠢ ᠪᠠᠷ ᠪᠦᠬᠦ ᠪᠠᠢᠰᠢᠩ ᠢ᠋ ᠳᠣᠷᠭᠢᠲᠠᠯᠠ ᠬᠠᠰᠬᠢᠷᠪᠠ᠃ ᠭᠡᠲᠡᠯᠡ ᠲᠣᠭᠣᠭᠠᠴᠢᠳ ᠨᠢ ᠪᠠᠶᠠᠷᠯᠠᠯᠠ ᠭᠡᠵᠦ ᠬᠣᠭᠣᠯᠠᠢ ᠨᠡᠢᠯᠡᠭᠦᠯᠦᠨ ᠬᠠᠰᠬᠢᠷᠬᠤ ᠰᠣᠨᠣᠰᠳᠠᠨᠠ᠃
ᠶᠠᠪᠤᠬᠤ ᠪᠠᠷ ᠪᠣᠯᠤᠨ ᠪᠣᠰᠬᠤ ᠳ᠋ᠤ᠌ ᠬᠣᠭᠣᠯᠠ ᠵᠥᠭᠡᠭᠡᠭᠴᠢ ᠰᠣᠢᠵᠠ ᠪᠠᠷᠢᠨ ᠭᠦᠶᠦᠨ ᠢᠷᠡᠵᠦ ᠫᠦ ᠵᠢᠩ ᠦ᠋ᠨ ᠬᠡᠨ ᠪᠦᠬᠦᠨ ᠦ᠌ ᠡᠮᠦᠰᠳᠡᠭ ᠦᠭᠡᠢ ᠴᠡᠮᠪᠡᠢ ᠬᠤᠪᠴᠠᠰᠤ ᠶ᠋ᠢ ᠪᠠᠢᠲᠤᠭᠠᠢ ᠳ᠋ᠠᠨᠽᠡᠨ ᠦ᠌ ᠭᠬᠢᠷ ᠪᠤᠷᠲᠠᠭ ᠲᠤ ᠳᠠᠷᠤᠭᠳᠠᠭᠰᠠᠨ ᠴᠡᠷᠢᠭ ᠬᠤᠪᠴᠠᠰᠤᠨ ᠤ᠋ ᠲᠠᠮᠲᠤᠭ ᠢ᠋ ᠬᠦᠷᠲᠡᠯᠡ ᠴᠡᠪᠡᠷᠯᠡᠨ᠂ ᠬᠠᠭᠠᠯᠭᠠ ᠭᠠᠷᠭᠠᠨ ᠦᠳᠡᠭᠡᠳ᠂ ᠬᠣᠢᠨᠠ ᠠ᠋ᠴᠠ ᠪᠠᠰᠠ᠄ ᠠᠢ ᠡᠷᠬᠢᠮ ᠳᠠᠩᠵᠢᠶᠠᠳ ᠠᠪᠤᠭᠠᠢ ᠨᠠᠷ ᠠ᠋᠂ ᠳᠠᠬᠢᠨ ᠮᠣᠷᠢᠯᠠᠵᠤ ᠢᠷᠡᠵᠡᠭᠡᠬᠦ ᠶ᠋ᠢ ᠬᠦᠰᠡᠶᠡ! ᠭᠡᠵᠦ ᠳᠠᠭᠤᠳᠠᠨ ᠪᠠᠢᠯᠠ᠃
ᠳ᠋ᠠᠨᠽᠡᠨ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠠᠷᠢᠬᠢ ᠭᠡᠳᠡᠭ ᠢ᠋ ᠠᠩᠬᠠ ᠤᠳᠠᠭᠠ ᠤᠤᠭᠤᠵᠤ ᠮᠥᠨ ᠠᠩᠬᠠ ᠤᠳᠠᠭᠠ ᠪᠠᠨ ᠰᠣᠭᠲᠣᠵᠤ ᠪᠠᠢᠭᠠ ᠨᠢ ᠡᠨᠡ ᠪᠥᠭᠡᠳ ᠬᠥᠮᠦᠨ ᠳ᠋ᠦ᠍ ᠪᠠᠰᠠ ᠬᠦᠨᠳᠦᠳᠬᠡᠭᠳᠡᠵᠦ ᠦᠵᠡᠭᠡ ᠦᠭᠡᠢ ᠪᠡᠷ ᠢ᠋ᠶ᠋ᠡᠨ ᠬᠦᠨᠳᠦᠯᠡᠭᠳᠡᠭᠰᠡᠨ ᠳ᠋ᠡᠭᠡᠨ ᠰᠡᠳᠬᠢᠯ ᠨᠢ ᠰᠦᠷᠡᠬᠡᠢ ᠬᠥᠭᠡᠷᠬᠦ ᠠᠵᠢ᠃ ᠫᠦ ᠵᠢᠩ ᠪᠦᠷ ᠴᠦ᠍ ᠢᠯᠡᠭᠦᠦ ᠰᠣᠭᠲᠣᠭᠰᠠᠨ ᠪᠠᠢᠪᠠ᠃ ᠨᠢᠭᠡ ᠪᠤᠯᠤᠩ ᠲᠣᠭᠣᠷᠢᠭᠰᠠᠨ ᠢ᠋ᠶ᠋ᠠᠨ ᠵᠣᠭᠰᠣᠨ ᠳ᠋ᠠᠨᠽᠡᠨ ᠢ᠋ ᠢᠨᠢᠶᠡᠨ ᠰᠢᠷᠲᠡᠵᠦ᠄
— ᠴᠢ ᠲᠦᠷᠦᠭᠦᠨ ᠮᠠᠨ ᠤ᠋ ᠨᠢᠭᠤᠴᠠ ᠶ᠋ᠢ ᠣᠯᠠᠨ ᠤ᠋ ᠳᠡᠷᠭᠡᠳᠡ ᠬᠡᠯᠡᠭᠰᠡᠨ ᠪᠣᠯᠪᠠᠴᠤ ᠪᠢ ᠠᠶᠤᠭᠠ ᠦᠭᠡᠢ᠃
— ᠰᠠᠢᠨ᠂ ᠪᠢ ᠴᠦ᠍ ᠠᠶᠤᠳᠠᠭ ᠦᠭᠡᠢ ᠵᠣᠷᠢᠭᠲᠠᠨ ᠬᠥᠮᠦᠨ ᠪᠣᠯᠤᠭᠠᠳ ᠬᠠᠮᠢᠶᠠ ᠦᠭᠡᠢ ᠬᠡᠯᠡᠭᠰᠡᠨ ᠶᠦᠮ ᠭᠡᠵᠦ ᠳ᠋ᠠᠨᠽᠡᠨ ᠬᠠᠷᠢᠭᠤ ᠢᠨᠢᠶᠡᠪᠡ᠃ ᠢᠩᠭᠢᠭᠡᠳ ᠪᠡᠶᠡ ᠪᠡᠶᠡ ᠪᠡᠨ ᠶᠣᠷᠭᠢᠨ《ᠪᠦ ᠫᠠ! ᠪᠦ ᠫᠠ!》(ᠠᠶᠤᠬᠤ ᠦᠭᠡᠢ᠂ ᠠᠶᠤᠬᠤ ᠦᠭᠡᠢ᠁) ᠬᠠᠰᠬᠢᠷᠤᠯᠳᠤᠨ ᠬᠦᠵᠦᠭᠦᠦ ᠰᠡᠭᠡᠷ ᠢ᠋ᠶ᠋ᠡᠨ ᠲᠡᠪᠡᠷᠢᠯᠴᠡᠨ ᠴᠠᠭᠠᠰᠢ ᠶᠠᠪᠤᠪᠠ᠃ ᠦᠨᠡᠬᠡᠷ ᠴᠦ᠍ ᠠᠶᠤᠨ ᠡᠮᠢᠶᠡᠬᠦ ᠶᠠᠭᠤ ᠴᠦ᠍ ᠦᠭᠡᠢ ᠪᠣᠯᠲᠠᠯᠠ ᠪᠠᠨ ᠰᠣᠭᠲᠣᠭᠰᠠᠨ ᠪᠥᠭᠡᠳ ᠫᠦ ᠵᠢᠩ《ᠮᠧᠢ ᠬᠤᠸᠠᠷ᠂ ᠮᠧᠢ ᠬᠤᠸᠠᠷ ᠴᠢ ᠰᠠᠢᠨ ᠤᠤ?》 ᠭᠡᠳᠡᠭ ᠳᠠᠭᠤᠤ ᠪᠠᠨ ᠬᠥᠭᠵᠢᠯ ᠲᠡᠢ ᠳᠠᠭᠤᠯᠠᠵᠤ ᠡᠬᠢᠯᠡᠪᠡ᠃ ᠬᠠᠵᠠᠭᠤ ᠳ᠋ᠤᠨᠢ ᠳ᠋ᠠᠨᠽᠡᠨ᠄《ᠮᠢᠳᠠᠭᠮᠡ᠂ ᠮᠢᠳᠠᠭᠮᠡ ᠮᠢᠨᠦ ᠬᠠᠢᠷᠠᠲᠠᠨ ᠮᠢᠳᠠᠭᠮᠡ ᠭᠡᠵᠦ ᠠᠶᠠ ᠨᠡᠢᠯᠡᠭᠦᠯᠬᠦ ᠶ᠋ᠢ ᠣᠷᠣᠯᠳᠣᠬᠤ ᠪᠣᠯᠪᠠᠴᠤ ᠵᠡᠷᠯᠢᠭ ᠢ᠋ᠶ᠋ᠡᠷ ᠬᠠᠰᠬᠢᠴᠢᠨᠠ᠃ ᠭᠤᠳᠤᠮᠵᠢᠨ ᠤ᠋ ᠬᠥᠮᠦᠰ ᠰᠣᠨᠢᠷᠬᠠᠨ ᠵᠣᠭᠰᠣᠵᠤ᠂ ᠰᠠᠪᠠᠭᠠ ᠦᠭᠡᠢ ᠵᠠᠯᠠᠭᠤᠰ ᠠᠷᠤ ᠠ᠋ᠴᠠ ᠨᠢ ᠳᠠᠭᠠᠨᠠ᠃ ᠭᠡᠪᠡᠴᠦ ᠬᠣᠶᠠᠭᠤᠯᠠ ᠠᠵᠢᠭ ᠦᠭᠡᠢ ᠬᠡᠳᠦ ᠬᠡᠳᠦᠨ ᠭᠤᠳᠤᠮᠵᠢ ᠥᠩᠭᠡᠷᠡᠭᠡᠭᠰᠡᠨ ᠢ᠋ᠶ᠋ᠡᠨ ᠪᠡᠯᠡᠨ ᠬᠤᠪᠴᠠᠰᠤᠨ ᠤ᠋ ᠪᠢᠴᠢᠬᠠᠨ ᠫᠦᠰᠡᠨ ᠳ᠋ᠦ᠍ ᠣᠷᠣᠪᠠ᠃ ᠵᠠᠯᠠᠭᠤᠬᠠᠨ ᠴᠠᠭᠠᠨ ᠴᠢᠷᠠᠢ ᠲᠠᠢ ᠣᠪᠵᠢᠨ ᠬᠤᠳᠠᠯᠳᠤᠭᠴᠢ ᠤᠭᠲᠤᠨ ᠠᠪᠤᠪᠠ᠃
— ᠠᠢ ᠳᠠᠩᠵᠢᠶᠠᠳ ᠭᠤᠸᠠᠢ ᠬᠣᠭᠣᠯᠠ ᠪᠠᠨ ᠵᠣᠭᠣᠭᠯᠠᠭᠰᠠᠨ ᠤᠤ? ᠭᠡᠵᠦ ᠥᠭᠦᠯᠡᠬᠦ ᠳ᠋ᠦ᠍ᠨᠢ ᠬᠣᠶᠠᠭᠤᠯᠠ ᠪᠠᠨ᠄ ᠢᠳᠡᠭᠰᠡᠨ! ᠭᠡᠵᠦ ᠬᠣᠭᠣᠯᠠᠢ ᠨᠡᠢᠯᠡᠭᠦᠯᠦᠨ ᠬᠡᠯᠡᠵᠦ᠂ ᠬᠦᠷᠡᠩ ᠵᠡᠭᠡᠷᠳᠡ ᠪᠣᠯᠤᠭᠰᠠᠨ ᠴᠢᠷᠠᠢ ᠪᠠᠷ ᠢᠨᠢᠶᠡᠮᠰᠦᠭᠯᠡᠵᠡᠭᠡᠨᠡ᠃
— ᠲᠠᠨ ᠳ᠋ᠤ᠌ ᠶᠠᠭᠤ ᠬᠡᠷᠡᠭᠲᠡᠢ ᠰᠠᠨ ᠪᠣᠯ?
— ᠬᠤᠪᠴᠠᠰᠤ! ᠨᠢᠭᠡ ᠬᠥᠮᠦᠨ ᠦ᠌ ᠪᠦᠷᠢᠨ ᠬᠤᠪᠴᠠᠰᠤ᠃
— ᠠᠢ ᠪᠣᠯᠤᠨᠠ᠂ ᠶᠠᠮᠠᠷ ᠪᠣᠯ ᠶᠠᠮᠠᠷ᠃
— ᠳᠠᠷᠤᠢ ᠠᠪᠴᠢᠷᠠ! ᠫᠦ ᠵᠢᠩ ᠦ᠋ᠨ ᠳᠡᠭᠡᠷᠡᠩᠭᠦᠢ ᠪᠡᠷ ᠬᠡᠯᠡᠬᠦ ᠳ᠋ᠦ᠍ ᠬᠤᠳᠠᠯᠳᠤᠭᠴᠢ᠂ ᠴᠢᠨᠦ ᠠᠪᠤᠷᠢ ᠬᠠᠮᠢᠶᠠ ᠦᠭᠡᠢ ᠮᠥᠩᠭᠥ ᠶ᠋ᠢ ᠴᠢᠨᠢ ᠯᠡ ᠰᠠᠯᠭᠠᠪᠠᠯ ᠪᠠᠷᠠᠪᠠ ᠭᠡᠰᠡᠨ ᠶᠠᠩᠵᠤ ᠲᠠᠢ ᠪᠢᠯᠳᠠᠤᠴᠢᠯᠠᠨ ᠢᠨᠢᠶᠡᠵᠦ᠂ ᠡᠯᠭᠦᠭᠡᠰᠦᠲᠡᠢ ᠬᠤᠪᠴᠠᠰᠤ ᠨᠤᠭᠤᠳ ᠠ᠋ᠴᠠ ᠶᠠᠭᠠᠷᠠᠨ ᠪᠠᠭᠤᠯᠭᠠᠪᠠ᠃《ᠠᠢ ᠡᠨᠡ ᠰᠠᠢᠨ᠂ ᠶᠣᠰᠣᠲᠠᠢ ᠪᠡᠭᠡᠵᠢᠩ ᠮᠠᠶᠢᠭ᠃ ᠲᠡᠷᠡ ᠪᠣᠯ ᠪᠦᠷ ᠰᠠᠢᠨ ᠲᠢᠶᠠᠨᠵᠢᠨ ᠬᠢᠴᠡ᠃ ᠠᠢ ᠡᠨᠡ ᠪᠣᠯ ᠲᠤᠩ ᠬᠣᠪᠣᠷ ᠵᠦᠢᠯ ᠮᠧᠢ— ᠭᠦᠸᠧ ᠠᠮᠧᠷᠢᠺᠠ ᠡᠳ᠋ ᠭᠠᠭᠴᠠᠬᠠᠨ ᠮᠠᠨ ᠤ᠋ ᠳ᠋ᠤ᠌ ᠯᠠ ᠪᠠᠢᠨᠠ᠃》 ᠭᠡᠵᠦ ᠡᠨᠡ ᠲᠡᠷᠡ ᠪᠣᠯᠤᠨ ᠠᠪᠴᠢᠷᠠᠭᠰᠠᠨ ᠶᠠᠭᠤᠮᠠᠰ ᠢ᠋ᠶ᠋ᠠᠨ ᠢᠯᠪᠢᠴᠢᠯᠡᠨ ᠬᠥᠮᠦᠨ ᠦ᠌ ᠪᠠᠢᠳᠠᠯ ᠢ᠋ᠶ᠋ᠠᠷ ᠳᠡᠭᠡᠷᠡ ᠳᠣᠣᠷᠠ ᠣᠷᠣᠭᠤᠯᠤᠨ ᠭᠢᠯᠠᠯᠵᠠᠭᠤᠯᠤᠨᠠ᠃ ᠲᠡᠭᠡᠭᠡᠳ ᠫᠦ ᠵᠢᠩ ᠲᠣᠭᠣᠮᠰᠠᠷ ᠦᠭᠡᠢ ᠪᠠᠢᠬᠤ ᠶ᠋ᠢ ᠰᠠᠮ ᠠᠵᠢᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡ ᠬᠤᠪᠴᠠᠰᠤ ᠶ᠋ᠢ ᠰᠢᠭᠦᠷᠦᠨ ᠠᠪᠴᠤ ᠪᠡᠶᠡ ᠳ᠋ᠦ᠍ᠨᠢ ᠪᠠᠷᠢᠪᠠ᠃ ᠫᠦ ᠵᠢᠩ᠂
— ᠪᠢ ᠡᠮᠦᠰᠬᠦ ᠶᠠᠭᠤᠮᠠ ᠪᠢᠰᠢ᠂ ᠡᠨᠡ ᠬᠥᠮᠦᠨ ᠳ᠋ᠦ᠍ ᠭᠡᠬᠦ ᠳ᠋ᠦ᠍ ᠬᠤᠳᠠᠯᠳᠤᠭᠠᠴᠢᠨ ᠤ᠋ ᠢᠳᠡᠪᠬᠢ ᠨᠢ ᠰᠤᠯᠠᠷᠠᠨᠠ᠃ ᠲᠦᠷᠦᠭᠦᠦ ᠨᠢ ᠨᠢᠳᠦᠨ ᠦ᠌ ᠪᠤᠯᠤᠩ ᠢ᠋ᠶ᠋ᠠᠷ ᠪᠠᠢᠨ ᠪᠠᠢᠨ ᠦᠵᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠳᠣ ᠲᠣᠭᠣᠮᠰᠠᠷ ᠦᠭᠡᠢ ᠪᠡᠷ ᠨᠢᠭᠤᠷ ᠰᠢᠷᠳᠡᠨ᠄
— ᠦ᠂ ᠡᠨᠡ ᠬᠥᠮᠦᠨ ᠳ᠋ᠦ᠍ ᠤᠤ? ᠰᠠᠢᠨ᠃ ᠦᠨᠡ ᠬᠢᠮᠳᠠ ᠲᠠᠢ ᠪᠣᠯᠤᠭᠠᠳ ᠪᠥᠬᠡ ᠡᠳ᠋ᠯᠡᠯ ᠢ᠋ᠶ᠋ᠡᠷ ᠬᠢᠭᠳᠡᠭᠰᠡᠨ ᠰᠠᠢᠨ ᠬᠤᠪᠴᠠᠰᠤ ᠴᠦ᠍ ᠪᠠᠢᠨᠠ ᠠ᠋᠂ ᠭᠡᠰᠡᠨ ᠢ᠋ᠶ᠋ᠡᠨ ᠠᠭᠠᠵᠢᠭᠤᠬᠠᠨ ᠬᠥᠳᠡᠯᠵᠦ᠂ ᠯᠠᠩᠭᠦᠢ ᠶ᠋ᠢᠨ ᠢ᠋ᠶ᠋ᠡᠨ ᠳᠣᠣᠷᠠ ᠠ᠋ᠴᠠ ᠪᠠᠷᠪᠠᠭᠠᠷ ᠡᠳ᠋ᠯᠡᠯ ᠢ᠋ᠶ᠋ᠡᠷ ᠬᠢᠭᠳᠡᠭᠰᠡᠨ ᠶᠠᠭᠤᠮᠠᠰ ᠢ᠋ ᠭᠠᠷᠭᠠᠪᠠ᠃ ᠫᠦ ᠵᠢᠩ ᠡᠭᠳᠡᠭᠦᠴᠡᠨ《ᠬᠠᠢ!》 ᠬᠠᠰᠬᠢᠷᠴᠤ᠄
— ᠡᠢᠮᠦ ᠶᠠᠭᠤᠮᠠ ᠶ᠋ᠢ ᠴᠢᠨᠢ ᠬᠡᠨ ᠡᠮᠦᠰᠬᠦ ᠶᠦᠮ ᠪᠣᠢ?
ᠬᠤᠳᠠᠯᠳᠤᠭᠴᠢ ᠨᠢᠳᠦ ᠴᠠᠪᠴᠢᠯᠠᠨ ᠭᠠᠢᠬᠠᠪᠠ᠃
— ᠳᠠᠩᠵᠢᠶᠠᠳ ᠲᠠ ᠥᠷᠥᠰᠢᠶᠡ᠂ ᠪᠢ ᠵᠦᠭᠡᠷ ᠶᠠᠭᠤ ᠶᠠᠭᠤ ᠪᠠᠢᠳᠠᠭ ᠢ᠋ᠶ᠋ᠠᠨ ᠰᠣᠨᠢᠷᠬᠠᠭᠤᠯᠵᠤ ᠪᠠᠢᠨᠠ ᠰᠢᠦ ᠭᠡᠳ ᠲᠦᠷᠦᠭᠦᠴᠢ ᠶ᠋ᠢᠨ ᠬᠢ ᠶ᠋ᠢ ᠳᠠᠬᠢᠨ ᠮᠠᠭᠲᠠᠵᠤ ᠳ᠋ᠠᠨᠽᠡᠨ ᠦ᠌ ᠪᠡᠶᠡ ᠳ᠋ᠦ᠍ ᠪᠠᠷᠢᠪᠠ᠃
ᠳ᠋ᠠᠨᠽᠡᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠬᠤᠪᠴᠠᠰᠤ ᠠᠪᠴᠤ ᠥᠭᠭᠦ ᠭᠡᠵᠦ ᠪᠠᠢᠭᠠ ᠶ᠋ᠢ ᠮᠡᠳᠡᠭᠰᠡᠨ ᠡᠴᠡ ᠬᠣᠢᠰᠢ ᠰᠡᠳᠬᠢᠯ ᠨᠢ ᠨᠢᠭᠡ ᠯᠡ ᠠᠶᠠ ᠦᠭᠡᠢ ᠪᠣᠯᠤᠭᠰᠠᠨ ᠪᠢᠯᠡ᠃ ᠶᠠᠭᠤᠨ ᠳ᠋ᠤ᠌ ᠭᠡᠪᠡᠯ᠄ ᠥᠪᠡᠷ ᠦ᠋ᠨ ᠬᠢᠨᠢ《ᠣᠷᠣᠨ ᠨᠤᠲᠤᠭ ᠬᠣᠯᠠ᠂ ᠠᠷᠤ ᠭᠡᠷ ᠶᠠᠳᠠᠭᠤ᠂ ᠠᠬᠠ ᠳᠡᠭᠦᠦ ᠨᠠᠷ ᠣᠯᠠᠨ ᠲᠠᠢ》 ᠭᠡᠵᠦ ᠶᠠᠷᠢᠭᠰᠠᠨ ᠪᠣᠯᠬᠣᠷ ᠮᠥᠩᠭᠥ ᠶ᠋ᠢ ᠨᠢ ᠬᠠᠢᠷᠠᠯᠠᠭᠰᠠᠨ ᠬᠡᠷᠡᠭ᠃
— ᠬᠠᠢ ᠶᠠᠭᠤ ᠬᠢᠨᠡ᠃ ᠨᠠᠳᠠ ᠳ᠋ᠤ᠌ ᠬᠤᠪᠴᠠᠰᠤ ᠬᠡᠷᠡᠭ ᠦᠭᠡᠢ ᠭᠡᠵᠦ ᠬᠤᠳᠠᠯᠳᠤᠭᠴᠢᠳ ᠫᠦᠰᠡᠨ ᠳ᠋ᠦ᠍ ᠣᠷᠣᠭᠰᠠᠨ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳᠡᠭᠡᠷᠡᠩᠭᠦᠢ ᠪᠠᠢᠳᠠᠭ ᠰᠢᠭ᠋ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠬᠡᠯᠡᠪᠡ᠃
— ᠶᠠᠭᠤ ? ᠭᠡᠵᠦ ᠫᠦ ᠵᠢᠩ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠪᠠ᠃
— ᠵᠦᠭᠡᠷ᠂ ᠪᠢ ᠡᠨᠡ ᠬᠤᠪᠴᠠᠰᠤ ᠪᠠᠷ ᠬᠠᠷᠢᠵᠤ ᠴᠢᠳᠠᠨᠠ᠃
— ᠬᠠᠶᠠ! ᠨᠢᠭᠡ ᠳ᠋ᠦ᠍ ᠨᠤᠲᠤᠭ ᠴᠢᠨᠢ ᠬᠣᠯᠠ᠂ ᠬᠣᠶᠠᠷ ᠲᠤ ᠴᠢ ᠣᠷᠭᠣᠳᠠᠭᠤᠯ᠂ ᠬᠤᠪᠴᠠᠰᠤ ᠰᠣᠯᠢᠬᠤ ᠦᠭᠡᠢ ᠪᠠᠢᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠦ ᠫᠦ ᠵᠢᠩ ᠪᠦᠬᠦ ᠪᠡᠶᠡ ᠪᠡᠨ ᠥᠭᠡᠷᠡᠴᠢᠯᠡᠨ ᠬᠢᠴᠢᠶᠡᠩᠭᠦᠢᠯᠡᠨ ᠪᠠᠷᠢᠵᠤ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠰᠠᠨᠠᠭᠠ ᠠᠯᠲᠠᠨ ᠬᠡᠯᠡᠪᠡ᠃
ᠭᠡᠲᠡᠯᠡ ᠬᠠᠵᠠᠭᠤ ᠳ᠋ᠤᠨᠢ᠄《ᠣᠩ!》 ᠭᠡᠵᠦ ᠳᠠᠭᠤ ᠠᠯᠳᠠᠬᠤ ᠰᠣᠨᠣᠰᠤᠭᠳᠠᠨᠠ᠃ ᠠᠵᠢᠪᠠᠯ ᠬᠤᠳᠠᠯᠳᠤᠭᠴᠢ ᠲᠡᠷᠡ ᠬᠣᠶᠠᠷ ᠢ᠋ ᠵᠠᠨᠤᠯᠬᠢᠯᠠᠨ ᠰᠢᠷᠲᠡᠵᠦ ᠪᠠᠢᠭᠠ ᠦᠵᠡᠭᠳᠡᠪᠡ᠃
— ᠬᠠᠮᠢᠭᠠ ᠠ᠋ᠴᠠ ᠤᠷᠭᠤᠭᠰᠠᠨ ᠬᠥᠮᠦᠨ ᠪᠣᠢ? ᠭᠡᠵᠦ ᠳᠥᠭᠥᠨ ᠢᠷᠡᠭᠰᠡᠨ ᠳ᠋ᠦ᠍ ᠫᠦ ᠵᠢᠩ ᠰᠠᠶᠢ ᠦᠭᠡ ᠠᠯᠳᠠᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠪᠡ᠃ ᠲᠡᠭᠦᠨ ᠦ᠌ ᠢᠨᠢᠶᠡᠨ ᠪᠢᠯᠳᠠᠤᠴᠢᠯᠠᠬᠤ ᠪᠠᠨ ᠣᠷᠣ ᠮᠥᠷ ᠦᠭᠡᠢ ᠪᠣᠯᠭᠠᠨ ᠰᠢᠷᠳᠡᠵᠦ ᠪᠠᠢᠭᠠ ᠵᠢᠪᠡᠭᠦᠨ ᠴᠢᠷᠠᠢ ᠶ᠋ᠢ ᠨᠢᠭᠡ ᠬᠡᠰᠡᠭ ᠨᠢᠳᠦ ᠴᠠᠪᠴᠢᠯᠠᠨ ᠠᠵᠢᠭᠠᠳ ᠳᠠᠷᠤᠢ ᠭᠠᠷᠬᠤ ᠶ᠋ᠢᠨ ᠮᠥᠷᠥᠭᠡᠳᠡᠰᠦ ᠪᠣᠯᠤᠨ ᠬᠣᠢᠰᠢ ᠤᠬᠤᠷᠢᠪᠠ᠃
ᠬᠤᠳᠠᠯᠳᠤᠭᠴᠢ᠄ ᠬᠠᠢ ᠵᠣᠭᠰᠣ! ᠭᠡᠵᠦ ᠬᠠᠰᠬᠢᠷᠪᠠ᠃ ᠬᠠᠭᠠᠯᠭᠠ ᠶ᠋ᠢᠨ ᠡᠮᠦᠨᠡ ᠦᠰᠦᠷᠦᠨ ᠬᠦᠷᠴᠦ ᠪᠡᠶᠡ ᠪᠡᠷ ᠲᠠᠭᠯᠠᠵᠤ ᠠᠪᠤᠭᠠᠳ᠄ ᠪᠢᠲᠡᠭᠡᠢ ᠬᠥᠳᠡᠯ!《ᠪᠢ ᠲᠠ ᠨᠠᠷ ᠢ᠋ ᠪᠠᠷᠢᠨ ᠴᠠᠭᠳᠠᠭᠠ ᠳ᠋ᠤ᠌ ᠲᠤᠰᠢᠶᠠᠨᠠ᠂ ᠡᠰᠡᠪᠡᠯ᠁》
— ᠡᠰᠡᠪᠡᠯ ᠶᠠᠭᠤ ᠭᠡᠵᠦ? ᠫᠦ ᠵᠢᠩ ᠨᠢᠭᠡᠨᠲᠡ ᠠᠶᠤᠨ ᠰᠣᠴᠢᠭᠰᠠᠨ ᠢ᠋ᠶ᠋ᠠᠨ ᠪᠤᠴᠠᠭᠠᠨ ᠠᠪᠴᠤ ᠴᠢᠳᠠᠯ ᠦᠭᠡᠢ ᠠᠰᠠᠭᠤᠪᠠ᠃
— ᠡᠰᠡᠪᠡᠯ ᠲᠠᠪᠤᠨ ᠶᠠᠩᠴᠢᠶᠠᠨ!
ᠫᠦ ᠵᠢᠩ ᠠᠶᠤᠭᠰᠠᠨ ᠬᠡᠪ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠳ᠋ᠠᠨᠽᠡᠨ ᠢ᠋ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠨᠢᠭᠡᠨᠲᠡ ᠵᠣᠷᠢᠭ ᠣᠷᠣᠨ《ᠪᠦ ᠫᠠ!》 ᠭᠡᠵᠦ ᠰᠢᠪᠡᠨᠡᠬᠦ ᠳ᠋ᠦ᠍ ᠳ᠋ᠠᠨᠽᠡᠨ《ᠪᠦ ᠫᠠ!》 ᠭᠡᠵᠦ ᠬᠠᠰᠬᠢᠷᠪᠠ᠃ ᠢᠩᠭᠢᠭᠡᠳ ᠶᠣᠰᠣᠲᠠᠢ᠄《ᠪᠦ ᠫᠠ!》(ᠪᠢᠲᠡᠭᠡᠢ ᠠᠶᠤ) ᠭᠡᠭᠴᠢ ᠡᠬᠢᠯᠡᠯᠡ᠃
ᠫᠦ ᠵᠢᠩ᠄《ᠪᠦ ᠫᠠ!》 ᠬᠠᠰᠬᠢᠷᠤᠨ ᠬᠤᠳᠠᠯᠳᠤᠭᠴᠢ ᠶ᠋ᠢ ᠪᠠᠷᠢᠨ ᠠᠪᠴᠤ ᠪᠠᠢᠰᠢᠩ ᠤ᠋ᠨ ᠬᠠᠨᠠ ᠶ᠋ᠢ ᠬᠣᠶᠠᠷ ᠳᠠᠬᠢᠨ ᠮᠥᠷᠭᠥᠭᠦᠯᠦᠭᠡᠳ ᠴᠠᠭᠠᠰᠢ ᠪᠠᠰᠠ ᠪᠠᠯᠪᠠᠵᠤ ᠭᠠᠷᠤᠯᠠ᠃ ᠳ᠋ᠠᠨᠽᠡᠨ ᠬᠠᠵᠠᠭᠤ ᠳ᠋ᠤᠨᠢ᠄《ᠪᠦ ᠫᠠ! ᠪᠦ ᠫᠠ᠁》 ᠬᠠᠰᠬᠢᠷᠤᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠠᠭᠤᠷ ᠣᠮᠣᠭ ᠢ ᠤᠯᠠᠮ ᠢ᠋ᠶ᠋ᠠᠷ ᠳᠡᠪᠡᠷᠭᠡᠨᠡ᠃ ᠬᠤᠳᠠᠯᠳᠤᠭᠴᠢ ᠠᠩᠬᠠᠨ ᠳ᠋ᠠᠭᠠᠨ《ᠠᠶᠠ!》 ᠭᠡᠵᠦ ᠳᠠᠭᠤ ᠠᠯᠳᠠᠭᠠᠳ᠂ ᠳᠠᠷᠠᠭᠠ ᠨᠢ ᠥᠷᠥᠰᠢᠶᠡᠯ ᠭᠤᠶᠤᠨ ᠣᠭᠢᠯᠭᠠᠨ ᠤᠨᠵᠢᠭᠠᠨ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠴᠦᠰ ᠲᠦ᠋ᠨᠢ ᠪᠡᠶᠡ ᠪᠡᠨ ᠰᠤᠯᠠ ᠬᠠᠶᠠᠵᠤ ᠭᠠᠵᠠᠷ ᠤᠨᠠᠵᠤ᠄《ᠶᠠᠭᠤ ᠳᠤᠷᠠ ᠲᠠᠢ ᠪᠠᠨ ᠠᠪ!》 ᠭᠡᠬᠦ ᠰᠣᠨᠣᠰᠳᠠᠪᠠ᠃ ᠭᠡᠪᠡᠴᠦ ᠫᠦ ᠵᠢᠩ ᠶᠠᠭᠤᠮᠠ ᠠᠪᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌᠄ ᠬᠡᠷᠪᠡ ᠴᠢ ᠣᠷᠣᠨ ᠪᠠᠢᠰᠢᠩ ᠢ᠋ᠶ᠋ᠠᠨ ᠬᠠᠷᠠ ᠨᠡᠭᠦᠷᠡᠰᠦ ᠪᠣᠯᠭᠠᠭᠤᠯᠬᠤ ᠶ᠋ᠢ ᠬᠦᠰᠡᠭᠡ ᠦᠭᠡᠢ ᠪᠣᠯ ᠪᠤᠯᠢᠭᠠᠷᠠᠢ! ᠭᠡᠳ ᠬᠣᠶᠠᠷ ᠶᠠᠩᠴᠢᠶᠠᠨ ᠭᠠᠷᠭᠠᠨ ᠨᠣᠬᠠᠢ ᠳ᠋ᠤ᠌ ᠥᠭᠴᠦ ᠪᠠᠢᠭᠠ ᠶᠤᠮ ᠰᠢᠭ᠋ ᠭᠠᠵᠠᠷ ᠬᠠᠶᠠᠭᠠᠳ ᠳ᠋ᠠᠨᠽᠡᠨ ᠦ᠌ ᠭᠠᠷ ᠠ᠋ᠴᠠ ᠰᠢᠭᠦᠷᠦᠨ ᠠᠪᠴᠤ ᠭᠠᠷᠪᠠ᠃ ᠠᠷᠤ ᠳ᠋ᠤᠨᠢ ᠬᠤᠳᠠᠯᠳᠤᠭᠴᠢ ᠥᠷᠥᠰᠢᠶᠡᠯ ᠭᠤᠶᠤᠨ ᠦᠯᠡᠳᠡᠪᠡ᠃
ᠫᠦ ᠵᠢᠩ ᠭᠤᠳᠤᠮᠵᠢᠨ ᠳ᠋ᠤ᠌ ᠭᠠᠷᠬᠤ ᠲᠠᠢ ᠪᠠᠨ ᠵᠡᠷᠭᠡ ᠶᠡᠬᠡ ᠭᠤᠲᠤᠷᠠᠯ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠮᠡᠲᠦ ᠦᠭᠡ ᠳᠠᠭᠤ ᠦᠭᠡᠢ ᠪᠣᠯᠪᠠ᠃ ᠡᠨᠡ ᠨᠢ ᠰᠠᠶᠢ ᠪᠣᠯᠤᠭᠰᠠᠨ ᠬᠡᠷᠡᠭ ᠡᠴᠡ ᠪᠢᠰᠢ᠂ ᠪᠠᠰᠠ ᠠᠷᠢᠬᠢᠨ ᠤ᠋ ᠮᠠᠨᠠᠨ ᠳ᠋ᠤ᠌ ᠴᠣᠬᠢᠭᠳᠠᠨ ᠤᠬᠠᠭᠠᠨ ᠮᠡᠳᠡᠷᠡᠯ ᠨᠢ ᠡᠯᠡᠢ ᠪᠠᠯᠠᠢ ᠶᠠᠪᠤᠭᠠ ᠳ᠋ᠠᠭᠠᠨ ᠴᠦ᠍ ᠪᠢᠰᠢ᠃ ᠢᠷᠡᠭᠡᠳᠦᠢ ᠶ᠋ᠢᠨ ᠵᠠᠮ ᠳ᠋ᠤ᠌ ᠰᠠᠶᠢ ᠶ᠋ᠢᠨ ᠬᠢ ᠰᠢᠭ ᠣᠯᠢᠭ ᠦᠭᠡᠢ ᠬᠥᠮᠦᠰ ᠬᠡᠳᠦ ᠬᠡᠴᠢᠨᠡᠨ ᠴᠦ᠍ ᠳᠠᠭᠠᠷᠢᠯᠳᠤᠬᠤ ᠪᠣᠯᠬᠤ ᠰᠢᠦ ᠳᠡ ᠭᠡᠰᠡᠨ ᠨᠢᠭᠡ ᠪᠣᠳᠣᠯ ᠰᠡᠳᠬᠢᠯ ᠳ᠋ᠦ᠍ᠨᠢ ᠭᠦᠨᠵᠡᠭᠡᠢ ᠡᠷᠭᠢᠯᠳᠦᠭᠰᠡᠨ ᠦ᠌ ᠬᠢ ᠪᠠᠢᠯᠠ᠃ ᠠᠷᠭᠠ ᠪᠠᠷ ᠡᠰᠡ ᠪᠣᠯᠵᠤ ᠥᠭᠪᠡᠯ ᠬᠦᠴᠦ ᠪᠡᠷ ᠳᠠᠪᠠᠨ ᠲᠤᠭᠤᠯᠬᠤ ᠶᠣᠰᠣᠲᠠᠢ ᠭᠡᠵᠦ ᠳᠣᠲᠣᠷᠠ ᠪᠠᠨ ᠪᠣᠳᠣᠨ《ᠪᠦ ᠫᠠ!》 ᠭᠡᠵᠦ ᠠᠮᠠᠨ ᠳ᠋ᠠᠭᠠᠨ ᠥᠭᠦᠯᠡᠪᠡ᠃ ᠠᠷᠤ ᠳ᠋ᠤᠨᠢ ᠳ᠋ᠠᠨᠽᠡᠨ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠬᠡᠪ ᠭᠡᠨᠡᠳᠲᠡ ᠳᠠᠭᠤ ᠱᠣᠣ ᠦᠭᠡᠢ ᠪᠣᠯᠤᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌᠄《ᠪᠢ ᠭᠣᠮᠣᠳᠠᠭᠠᠵᠤ ᠣᠷᠬᠢᠭᠠ ᠦᠭᠡᠢ ᠪᠠᠢᠭᠠ ᠳᠠ》 ᠭᠡᠵᠦ ᠵᠣᠪᠠᠨ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ᠄《ᠪᠦ ᠫᠠ!》 ᠭᠡᠵᠦ ᠬᠡᠯᠡᠬᠦ ᠰᠢᠭ ᠪᠣᠯᠤᠭᠰᠠᠨ ᠳ᠋ᠤᠨᠢ ᠰᠡᠳᠬᠢᠯ ᠪᠠᠭᠠ ᠵᠡᠷᠭᠡ ᠣᠩᠭᠣᠢᠵᠠᠢ᠃ ᠪᠣᠣᠪᠣ ᠰᠢᠬᠢᠷ ᠦ᠋ᠨ ᠳᠡᠯᠭᠡᠭᠦᠷ ᠲᠦ᠍ ᠣᠷᠣᠭᠠᠳ ᠫᠦ ᠵᠢᠩ ᠨᠡᠯᠢᠶᠡᠳ ᠢ᠋ ᠠᠪᠤᠨ ᠳ᠋ᠠᠨᠽᠡᠨ ᠳ᠋ᠦ᠍ ᠪᠣᠭᠣᠯᠭᠠᠵᠤ᠂ ᠳ᠋ᠠᠨᠽᠡᠨ ᠳ᠋ᠦ᠍ ᠪᠠᠷᠢᠭᠤᠯᠤᠨ ᠮᠥᠩᠭᠥ ᠪᠡᠨ ᠥᠭᠬᠦ ᠳ᠋ᠡᠭᠡᠨ ᠮᠥᠨ ᠯᠡ ᠪᠦ ᠫᠠ! ᠭᠡᠰᠡᠨ ᠳ᠋ᠦ᠍ ᠬᠤᠳᠠᠯᠳᠤᠭᠴᠢ ᠰᠣᠴᠢᠨ ᠨᠢᠭᠡ ᠤᠳᠠᠭᠠ ᠶᠡᠬᠡ ᠪᠡᠷ ᠬᠠᠷᠠᠪᠠ᠃ ᠭᠡᠯᠡ ᠴᠦ᠍ ᠶᠠᠭᠤ ᠴᠦ᠍ ᠪᠣᠯᠤᠭᠰᠠᠨ ᠦᠭᠡᠢ᠃ ᠲᠡᠨᠳᠡᠴᠡ ᠭᠠᠷᠤᠨ ᠨᠢᠭᠡ ᠭᠤᠳᠤᠮᠵᠢ ᠥᠩᠭᠡᠷᠡᠵᠦ᠂ ᠨᠥᠭᠦᠭᠡ ᠭᠤᠳᠤᠮᠵᠢᠨ ᠳ᠋ᠤ᠌ ᠣᠷᠣᠭᠰᠠᠨ ᠢ᠋ᠶ᠋ᠠᠨ ᠫᠦ ᠵᠢᠩ ᠢᠨᠢᠶᠡᠮᠰᠦᠭᠯᠡᠨ ᠡᠷᠭᠢᠵᠦ᠄
— ᠴᠢ ᠲᠤᠭᠤᠯᠵᠤ ᠪᠠᠢᠨᠠ ᠤᠤ? ᠭᠠᠯᠲᠤ ᠲᠡᠷᠭᠡ!
ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠬᠤ ᠳ᠋ᠤ᠌ ᠫᠦᠩ ᠫᠠᠩ ᠭᠡᠰᠡᠨ ᠠᠪᠢᠶᠠ ᠴᠢᠬᠢᠨ ᠳ᠋ᠦ᠍ ᠪᠠᠷᠢᠭᠳᠠᠭᠰᠠᠨ ᠢ᠋ᠶ᠋ᠠᠨ ᠭᠤᠸᠠᠭᠠᠯᠠᠨ ᠬᠠᠰᠬᠢᠷᠬᠤ ᠨᠢ ᠲᠣᠳᠣᠬᠠᠨ ᠰᠣᠨᠣᠰᠳᠠᠨᠠ᠃
ᠡᠭᠦᠨ ᠦ᠌ ᠤᠷᠢᠳᠤ ᠳ᠋ᠠᠨᠽᠡᠨ ᠭᠠᠯᠲᠤ ᠲᠡᠷᠭᠡ ᠭᠡᠭᠴᠢ ᠶ᠋ᠢ ᠨᠢᠭᠡ ᠤᠳᠠᠭᠠ ᠬᠣᠯᠠ ᠠ᠋ᠴᠠ ᠬᠣᠶᠠᠳᠠᠬᠢ ᠳᠡᠭᠡᠷᠡ ᠪᠡᠨ ᠣᠢᠷᠠᠬᠠᠨ ᠠ᠋ᠴᠠ ᠣᠯᠵᠤ ᠬᠠᠷᠠᠭᠰᠠᠨ ᠪᠥᠭᠡᠳ ᠲᠡᠭᠡᠬᠦ ᠳ᠋ᠡᠭᠡᠨ ᠣᠯᠠᠨ ᠲᠣᠮᠣ ᠮᠤᠬᠤᠯᠠᠭ ᠲᠡᠷᠭᠡ ᠨᠦ᠍ᠭᠦᠳ ᠦ᠋ᠨ ᠲᠣᠯᠣᠭᠠᠢ ᠳ᠋ᠤ᠌ ᠣᠷᠭᠢᠯᠤᠭᠰᠠᠨ ᠬᠠᠷᠠ ᠤᠲᠤᠭᠠ ᠶ᠋ᠢ ᠣᠭᠲᠠᠷᠭᠤᠢ ᠲᠩᠷᠢ ᠳ᠋ᠦ᠍ ᠠᠰᠬᠠᠷᠠᠭᠤᠯᠤᠭᠰᠠᠨ ᠠᠢᠬᠤᠪᠲᠤᠷ ᠲᠣᠮᠣ ᠲᠣᠮᠣ ᠵᠤᠤᠬᠠ ᠲᠠᠢ ᠶᠠᠭᠤᠮᠠ ᠶᠠᠪᠤᠭᠰᠠᠨ ᠢ᠋ ᠲᠣᠳᠣᠷᠬᠠᠢ ᠬᠠᠷᠠᠭᠰᠠᠨ ᠪᠥᠭᠡᠳ ᠴᠣᠬᠣᠮ ᠥᠪᠡᠷ ᠢ᠋ᠶ᠋ᠡᠨ ᠶᠠᠪᠤᠬᠤ ᠪᠣᠯᠤᠭᠰᠠᠨ ᠰᠢᠯᠲᠠᠭᠠᠨ ᠢ᠋ ᠬᠡᠳᠦᠨ ᠠᠷᠪᠠᠨ ᠵᠦᠢᠯ ᠢ᠋ᠶ᠋ᠡᠷ ᠪᠣᠳᠣᠨ ᠣᠯᠤᠭᠠ ᠦᠭᠡᠢ ᠪᠢᠯᠡ᠃ ᠭᠠᠭᠴᠠᠬᠠᠨ ᠬᠠᠮᠲᠤ ᠶᠠᠪᠤᠭᠰᠠᠨ ᠬᠦᠷᠡᠯ ᠤᠭ ᠵᠠᠮ ᠢ᠋ ᠦᠵᠡᠭᠡᠳ᠄《ᠴᠠᠭ ᠤ᠋ᠨ ᠴᠡᠪᠡᠭᠦᠨ ᠪᠣᠯᠬᠤ ᠳ᠋ᠤ᠌ ᠲᠡᠮᠦᠷ ᠮᠣᠭᠠᠢ ᠳᠡᠯᠡᠬᠡᠢ ᠶ᠋ᠢ ᠭᠤᠷᠪᠠ ᠣᠷᠢᠶᠠᠨᠠ》 ᠭᠡᠵᠦ ᠪᠣᠭᠳᠠ ᠶ᠋ᠢᠨ ᠯᠦᠩᠲᠠᠩ ᠳ᠋ᠤ᠌ ᠪᠠᠢᠳᠠᠭ ᠮᠠᠨᠢ ᠡᠨᠡ ᠪᠠᠢᠵᠤ ᠭᠡᠵᠦ ᠪᠠᠢᠭᠰᠠᠨ ᠢ᠋ ᠬᠡᠵᠢᠶᠡᠳᠡ ᠮᠠᠷᠲᠠᠬᠤ ᠪᠠᠷ ᠦᠭᠡᠢ ᠲᠣᠭᠲᠠᠭᠠᠭᠰᠠᠨ ᠪᠥᠭᠡᠳ ᠣᠳᠣ ᠲᠡᠷᠡ ᠲᠡᠮᠦᠷ ᠵᠠᠮ ᠳᠡᠯᠡᠬᠡᠢ ᠶ᠋ᠢ ᠭᠤᠷᠪᠠ ᠣᠷᠢᠶᠠᠬᠤ ᠳ᠋ᠠᠭᠠᠨ ᠮᠠᠨ ᠤ᠋ ᠮᠣᠩᠭᠣᠯ ᠣᠷᠣᠨ ᠢ᠋ ᠯᠡ ᠪᠤᠤ ᠳᠠᠭᠠᠷᠢᠭᠠᠰᠠᠢ ᠭᠡᠵᠦ ᠪᠣᠳᠣᠨᠠ᠃
— ᠲᠡᠢᠮᠦ᠂ ᠭᠠᠯᠲᠤ ᠲᠡᠷᠭᠡ ᠢᠷᠡᠵᠦ ᠶᠠᠪᠤᠨᠠ᠃ ᠬᠣᠶᠠᠭᠤᠯᠠ ᠪᠠᠨ ᠣᠴᠢᠵᠤ ᠦᠵᠡᠬᠦ ᠤᠤ ᠭᠡᠰᠡᠨ ᠳ᠋ᠦ᠍ ᠫᠦ ᠵᠢᠩ᠄
— ᠣᠳᠣ ᠪᠢᠳᠡᠨ ᠦ᠌ ᠰᠠᠯᠬᠤ ᠴᠠᠭ ᠪᠣᠯᠤᠭᠰᠠᠨ᠃ ᠴᠢ ᠡᠨᠡ ᠬᠣᠲᠠᠨ ᠠ᠋ᠴᠠ ᠶᠠᠭᠠᠷᠠᠨ ᠭᠠᠷ! ᠡᠰᠡ ᠲᠡᠭᠡᠪᠡᠯ ᠪᠠᠷᠢᠭᠳᠠᠬᠤ ᠮᠠᠭᠠᠳ᠂ ᠵᠠ ᠪᠠᠶᠠᠷᠲᠠᠢ!
ᠳ᠋ᠠᠨᠽᠡᠨ ᠦ᠌ ᠰᠡᠳᠬᠢᠯ ᠲᠤᠩ ᠠᠶᠠ ᠦᠭᠡᠢ ᠪᠣᠯᠪᠠ᠃ ᠭᠡᠲᠡᠯᠡ ᠲᠡᠷᠭᠡ ᠳᠠᠬᠢᠨ ᠭᠤᠸᠠᠭᠯᠠᠬᠤ ᠰᠣᠨᠣᠰᠳᠠᠪᠠ᠃ ᠨᠥᠬᠥᠷ ᠲᠡᠭᠡᠨ ᠶᠠᠮᠠᠷ ᠨᠢᠭᠡᠨ ᠰᠠᠢᠬᠠᠨ ᠦᠭᠡ ᠣᠯᠵᠤ ᠬᠡᠯᠡᠬᠦ ᠶ᠋ᠢ ᠡᠷᠢᠯᠬᠢᠯᠡᠨ ᠳᠣᠷᠣᠭᠰᠢ ᠰᠢᠷᠳᠡᠭᠡᠳ ᠬᠦᠩ ᠴᠠᠨ ᠳ᠋ᠠᠩ ᠤ᠋ᠨ ᠵᠠᠮ ᠢ᠋ᠶ᠋ᠠᠷ ᠰᠠᠢᠨ ᠶᠠᠪᠤᠭᠠᠷᠠᠢ ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠰᠢᠢᠳᠦᠨ ᠲᠣᠯᠣᠭᠠᠢ ᠪᠠᠨ ᠳᠡᠭᠡᠭᠰᠢ ᠲᠠᠲᠠᠪᠠᠯ ᠫᠦ ᠵᠢᠩ ᠨᠢ ᠠᠯᠠᠭᠠ᠃ ᠡᠨᠳᠡ ᠡᠴᠡ ᠰᠠᠯᠤᠨ ᠣᠯᠠᠨ ᠬᠥᠮᠦᠨ ᠦ᠌ ᠳᠤᠮᠳᠠ ᠣᠷᠣᠬᠤ ᠲᠠᠢ ᠪᠠᠨ ᠵᠡᠷᠭᠡ ᠫᠦ ᠵᠢᠩ ᠣᠷᠣ ᠮᠥᠷ ᠦᠭᠡᠢ ᠠᠯᠠᠭᠠ ᠪᠣᠯᠤᠭᠰᠠᠨ ᠪᠠᠢᠵᠠᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ