ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠵᠢᠩᠬᠢᠨᠢ ᠳᠣᠪᠴᠢ– ᠬᠦᠰᠡᠬᠦᠢ ᠨᠠᠷ ᠨᠠᠢᠷᠠᠭᠤᠯᠵᠤ ᠬᠥᠬᠡᠯᠤᠤ ᠮᠣᠩᠭᠣᠯᠴᠢᠯᠠᠪᠠ –ᠨᠢᠭᠡᠳᠦᠭᠡᠷ ᠪᠣᠲᠢ-2 Идээ ундааны жинхэнэ товч– Хүсэхүй нар найруулж Хөхлуу монголчлов – Нэгдүгээр боть-2
197ᠪᠡᠶᠡ ᠶ᠋ᠢᠨ ᠰᠤᠪᠢᠯᠠᠯᠲᠠ ᠶ᠋ᠢᠨ ᠴᠡᠭᠡᠷᠯᠡᠯ
ᠠᠯᠢᠪᠠ ᠬᠠᠯᠠᠭᠤᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠢ᠋ ᠢᠳᠡᠵᠦ ᠤᠤᠭᠤᠭᠠᠳ ᠬᠥᠯᠥᠷᠡᠪᠡᠰᠦ ᠵᠢᠪᠠᠷ ᠰᠠᠯᠬᠢᠨ ᠲᠠᠢ ᠭᠠᠵᠠᠷᠠ ᠪᠠᠢᠵᠤ ᠦᠯᠦ ᠪᠣᠯᠤᠮᠤᠢ ᠡᠨᠡ ᠪᠣᠯ ᠲᠠᠲᠠᠯᠳᠤᠨ ᠵᠢᠭᠤᠷᠠᠬᠤ᠂ ᠲᠣᠯᠣᠭᠠᠢ ᠡᠪᠡᠳᠬᠦ᠂ ᠨᠢᠳᠦ ᠰᠢᠷᠦᠭᠦᠰᠬᠦ ᠪᠠ ᠤᠨᠳᠠᠮᠭᠠᠢ ᠪᠣᠯᠬᠤ ᠵᠡᠷᠭᠡ ᠭᠡᠮ ᠳ᠋ᠦ᠍ ᠨᠡᠷᠪᠡᠭᠳᠡᠬᠦ ᠡᠴᠡ ᠰᠡᠷᠭᠡᠢᠯᠡᠭᠰᠡᠨ ᠰᠠᠨᠠᠭᠠ ᠪᠣᠯᠠᠢ᠃
ᠰᠥᠨᠢ ᠣᠷᠣᠢ ᠪᠣᠯᠪᠠᠰᠤ ᠳᠡᠩᠳᠡᠭᠦᠦ ᠢᠯᠡᠭᠦᠦ ᠢᠳᠡᠵᠦ ᠤᠤᠭᠤᠵᠤ ᠦᠯᠦ ᠪᠣᠯᠤᠮᠤᠢ᠃ ᠤᠨᠲᠠᠵᠤ ᠬᠡᠪᠲᠡᠬᠦ ᠳ᠋ᠡᠭᠡᠨ ᠵᠢᠪᠠᠷ ᠰᠠᠯᠬᠢᠨ ᠠ᠋ᠴᠠ ᠵᠠᠢᠯᠠᠰᠬᠢᠳᠣᠭᠠᠢ᠃
ᠬᠣᠭᠣᠯᠠ ᠢᠳᠡᠭᠰᠡᠨ ᠦ᠌ ᠰᠡᠭᠦᠯᠡᠷ ᠪᠦᠯᠢᠶᠡᠨ ᠤᠰᠤ ᠪᠠᠷ ᠠᠮᠠ ᠪᠠᠨ ᠵᠠᠢᠯᠠᠭᠤᠯᠪᠠᠰᠤ ᠰᠢᠳᠦᠨ ᠡᠪᠡᠳᠴᠢᠨ ᠣᠯᠬᠤ ᠦᠭᠡᠢ ᠠᠮᠠᠨ ᠠ᠋ᠴᠠ ᠦᠮᠡᠬᠡᠢ ᠦᠨᠦᠷ ᠭᠠᠷᠬᠤ ᠦᠭᠡᠢ᠃
ᠬᠥᠯᠥᠰᠥ ᠬᠥᠯᠥᠷᠡᠭᠰᠡᠨ ᠦᠶᠡ ᠳ᠋ᠦ᠍ᠷ ᠪᠢᠲᠡᠭᠡᠢ ᠳᠡᠪᠢᠭᠦᠷᠳᠡᠨ ᠰᠡᠷᠢᠭᠦᠴᠡ᠂ ᠡᠨᠡ ᠢᠨᠦ ᠲᠠᠯᠠ ᠪᠡᠶᠡ ᠶ᠋ᠢᠨ ᠬᠠᠲᠠᠩᠭᠢᠷᠠᠯ (ᠰᠠ ᠡᠪᠡᠳᠴᠢᠨ) ᠡᠴᠡ ᠰᠡᠷᠡᠮᠵᠢᠯᠡᠭᠰᠡᠨ ᠤᠬᠠᠭᠠᠨ ᠪᠣᠯᠠᠢ᠃
ᠪᠠᠷᠠᠭᠤᠨ ᠬᠣᠢᠲᠤ ᠵᠦᠭ ᠲᠦ᠍ ᠬᠠᠨᠳᠤᠵᠤ᠂ ᠪᠢᠲᠡᠭᠡᠢ ᠬᠣᠶᠠᠷ ᠮᠥᠷ ᠦᠵᠡᠭᠲᠦᠨ᠂ (ᠥᠳᠬᠡᠨ ᠮᠥᠷ ᠪᠠ ᠰᠢᠩᠭᠡᠨ ᠮᠥᠷ ᠦᠵᠡᠬᠦ ᠶ᠋ᠢ ᠬᠡᠯᠡᠭᠰᠡᠨ )᠃
ᠥᠳᠬᠡᠨ ᠰᠢᠩᠭᠡᠨ ᠬᠣᠶᠠᠷ ᠮᠥᠷ ᠢ᠋ᠶ᠋ᠡᠨ ᠪᠢᠲᠡᠭᠡᠢ ᠬᠦᠴᠦᠯᠡᠨ ᠬᠣᠷᠢᠭᠯᠠ᠃ ᠡᠨᠡ ᠢᠨᠦ ᠡᠪᠦᠳᠦᠭ ᠬᠡᠰᠡᠭ ᠢ᠋ᠶ᠋ᠡᠷ ᠵᠢᠩᠭᠢᠨᠡᠵᠦ ᠱᠠᠷᠬᠢᠷᠠᠬᠤ ᠡᠪᠡᠷᠰᠢᠶᠡᠯ ᠢ᠋ ᠰᠡᠷᠭᠡᠢᠯᠡᠭᠰᠡᠨ ᠲᠥᠯᠥᠭᠡ ᠪᠣᠯᠠᠢ᠃
ᠣᠳᠣᠨ ᠭᠠᠷᠠᠭ ᠨᠠᠷᠠᠨ ᠰᠠᠷᠠᠨ᠂ ᠰᠦᠮᠡ ᠬᠡᠢᠳ ᠷᠠᠰᠠᠩ ᠳᠤᠭᠠᠩ ᠵᠦᠭ ᠬᠠᠨᠳᠤᠵᠤ᠂ ᠪᠢᠲᠡᠭᠡᠢ ᠰᠢᠭᠡᠵᠦ ᠪᠠᠭᠠᠲᠤᠭᠠᠢ᠃
ᠰᠥᠨᠢ ᠦᠳᠡᠰᠢ ᠬᠡᠰᠦᠵᠦ ᠶᠠᠪᠤᠬᠤ ᠳ᠋ᠠᠭᠠᠨ ᠪᠢᠲᠡᠭᠡᠢ ᠳᠠᠭᠤᠯᠠᠵᠤ ᠭᠢᠩᠰᠢᠨ ᠬᠠᠰᠬᠢᠷᠤᠭᠲᠤᠨ᠃
ᠨᠢᠭᠡᠨ ᠡᠳᠦᠷ ᠦ᠋ᠨ ᠴᠡᠭᠡᠷᠯᠡᠯ ᠪᠣᠯᠪᠠᠰᠤ ᠰᠥᠨᠢ ᠣᠷᠣᠢ ᠪᠢᠲᠡᠭᠡᠢ ᠴᠠᠳᠲᠠᠯᠠ ᠢᠳᠡᠭᠲᠦᠨ᠃
ᠨᠢᠭᠡᠨ ᠰᠠᠷᠠ ᠶ᠋ᠢᠨ ᠴᠡᠭᠡᠷᠯᠡᠯ ᠪᠣᠯᠪᠠᠰᠤ ᠪᠢᠲᠡᠭᠦᠨ ᠦ᠌ ᠡᠳᠦᠷ ᠪᠤᠤ ᠱᠠᠯ ᠰᠣᠭᠲᠣᠲᠠᠯᠠ ᠠᠷᠢᠬᠢ ᠤᠤᠭᠤᠲᠤᠭᠠᠢ᠃
ᠨᠢᠭᠡᠨ ᠵᠢᠯ ᠦ᠋ᠨ ᠴᠡᠭᠡᠷᠯᠡᠯ ᠪᠣᠯᠪᠠᠰᠤ ᠰᠥᠨᠢ ᠣᠷᠣᠢ ᠪᠢᠲᠡᠭᠡᠢ ᠬᠣᠯᠠ ᠶᠠᠪᠤᠭᠲᠤᠨ᠃
ᠨᠢᠭᠡᠨ ᠨᠠᠰᠤᠨ ᠤ᠋ ᠴᠡᠭᠡᠷᠯᠡᠯ ᠪᠣᠯᠪᠠᠰᠤ ᠪᠢᠲᠡᠭᠡᠢ ᠳ᠋ᠧᠩ ᠵᠤᠯᠠ ᠠᠰᠠᠭᠠᠵᠤ ᠪᠠᠢᠭᠠᠳ ᠬᠤᠷᠢᠴᠠᠯ ᠦᠢᠯᠡᠳ᠃
ᠮᠢᠩᠭᠠᠨ ᠡᠳᠦᠷ ᠢ᠋ᠶ᠋ᠡᠷ ᠡᠮ ᠲᠣᠮ ᠤᠤᠭᠤᠬᠤ ᠠᠨᠤ ᠭᠠᠭᠴᠠ ᠪᠡᠶᠡ ᠪᠡᠷ ᠨᠢᠭᠡ ᠰᠥᠨᠢ ᠮᠠᠩᠰᠢᠭᠤᠷᠠᠲᠠᠯᠠ ᠨᠣᠢᠷᠰᠤᠬᠤ ᠶ᠋ᠢ ᠦᠯᠦ ᠬᠥᠷᠥᠮᠦᠢ᠃
ᠲᠤᠰ ᠪᠡᠶᠡ ᠶ᠋ᠢᠨ ᠲᠥᠷᠥᠭᠰᠡᠨ ᠡᠳᠦᠷ ᠪᠠ ᠡᠴᠢᠭᠡ ᠡᠬᠡ ᠶ᠋ᠢᠨ ᠲᠥᠷᠥᠭᠰᠡᠨ ᠡᠳᠦᠷᠡ ᠲᠣᠰᠪᠣᠷᠢ ᠲᠥᠷᠥᠭᠰᠡᠨ ᠡᠳᠦᠷ ᠦ᠋ᠨ ᠠᠷᠪᠠᠨ ᠬᠣᠶᠠᠷ ᠡᠷᠬᠡᠲᠡᠨ ᠦ᠌ ᠬᠠᠮᠢᠶᠠ ᠲᠠᠢ ᠲᠡᠷᠡ ᠮᠢᠬᠠ ᠶ᠋ᠢ ᠪᠢᠲᠡᠭᠡᠢ ᠢᠳᠡᠭᠲᠦᠨ᠃
ᠠᠯᠢᠪᠠ ᠬᠥᠮᠦᠰ ᠰᠠᠭᠤᠬᠤ ᠳ᠋ᠠᠭᠠᠨ ᠡᠷᠬᠡᠪᠰᠢ ᠲᠥᠪ ᠰᠠᠭᠤᠭᠠᠳ ᠰᠡᠳᠬᠢᠯ ᠢ᠋ᠶ᠋ᠡᠨ ᠲᠥᠪᠯᠡᠭᠦᠯᠬᠦ ᠬᠡᠷᠡᠭᠲᠡᠢ᠃
ᠠᠯᠢᠪᠠ ᠬᠥᠮᠦᠰ ᠵᠣᠭᠰᠣᠬᠤᠢ ᠳ᠋ᠠᠭᠠᠨ ᠡᠷᠬᠡᠪᠰᠢ ᠲᠥᠪ ᠵᠣᠭᠰᠣᠭᠠᠳ ᠪᠡᠶᠡ ᠪᠡᠨ ᠠᠰᠬᠠᠨ ᠪᠠᠢᠯᠭᠠᠬᠤ ᠬᠡᠷᠡᠭᠲᠡᠢ᠃
ᠶᠠᠰᠤ ᠭᠡᠮᠳᠦᠭᠳᠡᠭᠦᠵᠡᠢ ᠭᠡᠮᠡᠨ ᠤᠳᠠᠲᠠᠯᠠ ᠵᠣᠭᠰᠣᠵᠤ ᠦᠯᠦ ᠪᠣᠯᠤᠮᠤᠢ᠃
ᠴᠢᠰᠤ ᠭᠡᠮᠳᠦᠭᠳᠡᠭᠦᠵᠡᠢ ᠭᠡᠮᠡᠨ ᠤᠳᠠᠲᠠᠯᠠ ᠰᠠᠭᠤᠵᠤ ᠦᠯᠦ ᠪᠣᠯᠤᠮᠤᠢ᠃
ᠰᠢᠷᠪᠥᠰᠥ ᠶ᠋ᠢ ᠭᠡᠮᠳᠦᠭᠳᠡᠭᠦᠵᠡᠢ ᠭᠡᠮᠡᠨ ᠤᠳᠠᠲᠠᠯᠠ ᠠᠯᠬᠤᠯᠠᠵᠤ ᠦᠯᠦ ᠪᠣᠯᠤᠮᠤᠢ᠃
ᠲᠠᠮᠢᠷ ᠬᠥᠨᠥᠭᠡᠭᠳᠡᠭᠦᠵᠡᠢ ᠭᠡᠮᠡᠨ ᠤᠳᠠᠲᠠᠯᠠ ᠬᠡᠪᠲᠡᠵᠦ ᠦᠯᠦ ᠪᠣᠯᠤᠮᠤᠢ᠃
ᠲᠠᠮᠢᠷ ᠪᠠᠷᠠᠭᠳᠠᠭᠤᠵᠠᠢ ᠭᠡᠮᠡᠨ ᠤᠳᠠᠲᠠᠯᠠ ᠠᠵᠢᠵᠤ ᠬᠠᠷᠠᠵᠤ ᠦᠯᠦ ᠪᠣᠯᠤᠮᠤᠢ᠃
ᠲᠣᠯᠣᠭᠠᠢ ᠶ᠋ᠢᠨ ᠬᠡᠢ ᠡᠪᠡᠳᠴᠢᠨ ᠢ᠋ ᠡᠭᠦᠰᠬᠡᠭᠦᠵᠡᠢ ᠭᠡᠮᠡᠨ ᠢᠳᠡᠵᠦ ᠴᠠᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠪᠦᠦ ᠲᠣᠯᠣᠭᠠᠢ ᠪᠠᠨ ᠤᠬᠢᠶᠠᠭᠲᠤᠨ᠃
ᠬᠡᠷᠪᠡ ᠨᠢᠳᠦ ᠤᠯᠠᠢᠵᠤ ᠡᠪᠡᠳᠦᠭᠰᠡᠨ ᠪᠣᠯ ᠲᠠᠴᠢᠶᠠᠯ ᠤ᠋ᠨ ᠦᠢᠯᠡ ᠶ᠋ᠢ ᠴᠢᠩᠭᠠ ᠴᠡᠭᠡᠷᠯᠡᠬᠦ ᠬᠡᠷᠡᠭᠲᠡᠢ᠃ ᠡᠰᠡ ᠲᠡᠢᠮᠦ ᠪᠣᠯᠪᠠᠰᠤ ᠨᠢᠳᠦᠨ ᠳ᠋ᠦ᠍ᠷ ᠴᠠᠭᠠ ᠤᠨᠠᠮᠤᠢ᠃
ᠪᠡᠶᠡ ᠶ᠋ᠢᠨ ᠤᠬᠢᠶᠠᠯ ᠬᠢᠭᠰᠡᠨ ᠬᠣᠢᠨᠠ ᠠᠷᠠᠰᠤ ᠮᠢᠬᠠ ᠶ᠋ᠢᠨ ᠰᠦᠪᠡ ᠪᠦᠬᠦᠨ ᠨᠡᠭᠡᠭᠡᠭᠳᠡᠬᠦ ᠤᠴᠢᠷ ᠵᠢᠪᠠᠷ ᠰᠠᠯᠬᠢᠨ ᠳᠡᠭᠡᠷᠡ ᠪᠠᠢᠵᠤ ᠦᠯᠦ ᠪᠣᠯᠤᠮᠤᠢ᠃ ᠡᠨᠡ ᠪᠣᠯᠪᠠᠰᠤ ᠠᠮᠠᠷᠬᠠᠨ ᠵᠢᠪᠠᠷ ᠰᠠᠯᠬᠢᠨ ᠠᠪᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠭᠰᠡᠨ ᠶᠠᠪᠤᠳᠠᠯ ᠪᠣᠯᠠᠢ᠃
ᠥᠨᠳᠥᠷ ᠲᠣᠷ ᠠᠪᠠᠷᠢᠨ ᠪᠠᠷᠲᠠᠭᠠᠲᠤ ᠭᠠᠵᠠᠷ ᠢ᠋ᠶ᠋ᠠᠷ ᠲᠤᠭᠤᠯᠠᠬᠤ᠂ ᠲᠡᠷᠭᠡ ᠮᠣᠷᠢ ᠪᠠᠷ ᠬᠡᠮᠵᠢᠶᠡ ᠳᠠᠮᠵᠢᠶᠠ ᠦᠭᠡᠢ ᠨᠢᠰᠣᠯᠬᠢᠯᠡᠨ ᠳᠠᠪᠬᠢᠵᠤ ᠪᠣᠯᠬᠤ ᠦᠭᠡᠢ᠃ ᠡᠰᠡ ᠲᠡᠢᠮᠦ ᠪᠣᠯᠪᠠᠰᠤ ᠬᠡᠢ ᠰᠠᠮᠠᠭᠤᠷᠠᠨ ᠭᠣᠣᠯ ᠵᠢᠷᠦᠬᠡ ᠰᠠᠪᠠᠭᠠᠨᠠᠨ ᠰᠦᠨᠡᠰᠦ ᠰᠦᠯᠳᠡ ᠵᠠᠮᠬᠠᠷᠠᠮᠤᠢ᠃
ᠲᠣᠭᠰᠢᠨ ᠰᠢᠭᠤᠷᠭᠠᠨ ᠰᠢᠷᠦᠭᠦᠨ ᠪᠣᠷᠣᠭᠠᠨ ᠪᠣᠯᠤᠨ ᠲᠡᠰᠬᠢᠮᠡ ᠬᠦᠢᠲᠡᠨ ᠰᠢᠷᠠᠮᠠ ᠬᠠᠯᠠᠭᠤᠨ ᠡᠳᠦᠷᠡ ᠂ ᠪᠢᠲᠡᠭᠡᠢ ᠣᠷᠣᠨ ᠭᠠᠷᠤᠨ ᠪᠠᠢᠭᠠᠳ ᠳᠡᠮᠡᠢ ᠯᠡ ᠡᠨᠡ ᠲᠡᠷᠡ ᠶ᠋ᠢ ᠦᠢᠯᠡᠳ᠃
ᠲᠠᠮᠢᠷ ᠬᠦᠴᠦᠨ ᠢ᠋ ᠬᠣᠷᠣᠭᠳᠠᠭᠤᠯᠬᠤ ᠦᠭᠡᠢ ᠶ᠋ᠢᠨ ᠲᠤᠰᠠ ᠳ᠋ᠤ᠌ ᠳ᠋ᠧᠩ ᠵᠤᠯᠠ ᠶ᠋ᠢ ᠪᠤᠤ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠦᠯᠢᠶᠡᠭᠲᠦᠨ᠃
ᠨᠢᠳᠦ ᠪᠡᠨ ᠬᠣᠣᠷᠯᠠᠭᠤᠯᠬᠤ ᠦᠭᠡᠢ ᠶ᠋ᠢᠨ ᠲᠤᠰᠠ ᠳ᠋ᠤ᠌ ᠨᠠᠷᠠᠨ ᠤ᠋ ᠬᠤᠷᠴᠠ ᠭᠡᠷᠡᠯ ᠲᠠᠰᠢ ᠲᠡᠢᠰᠢ ᠪᠤᠤ ᠰᠢᠯᠵᠢᠰᠢ ᠦᠭᠡᠢ ᠰᠢᠷᠲᠡᠭᠲᠦᠨ᠃ ᠠᠯᠤᠰ ᠬᠣᠯᠠ ᠶ᠋ᠢᠨ ᠪᠠᠷᠠᠭᠠ ᠶ᠋ᠢ ᠠᠯᠭᠠᠰᠠᠯ ᠦᠭᠡᠢ ᠲᠤᠢᠯ ᠳ᠋ᠤᠨᠢ ᠲᠤᠯᠲᠠᠯᠠ ᠪᠢᠲᠡᠭᠡᠢ ᠬᠠᠷᠠᠲᠤᠭᠠᠢ᠃ ᠡᠨᠡ ᠪᠣᠯᠪᠠᠰᠤ ᠨᠢᠳᠦᠨ ᠲᠠᠮᠢᠷ ᠢ᠋ᠶ᠋ᠠᠨ ᠪᠠᠷᠠᠭᠳᠠᠭᠤᠯᠤᠭᠤᠵᠠᠢ ᠬᠡᠮᠡᠭᠰᠡᠨ ᠤᠳᠬᠠ ᠪᠣᠯᠠᠢ᠃
ᠴᠢᠭᠢᠭ ᠰᠠᠯᠬᠢ ᠲᠠᠢ ᠭᠠᠵᠠᠷ ᠪᠦᠦ ᠰᠠᠭᠤᠵᠤ ᠬᠡᠪᠲᠡᠲᠦᠭᠡᠢ᠃
ᠰᠥᠨᠢ ᠲᠤᠷᠰᠢ ᠪᠢᠲᠡᠭᠡᠢ ᠳ᠋ᠧᠩ ᠵᠤᠯᠠ ᠳᠤᠸᠠᠯᠠᠭᠤᠯᠵᠤ ᠤᠨᠲᠠ᠃ ᠡᠨᠡ ᠪᠣᠯᠪᠠᠰᠤ ᠭᠣᠣᠯ ᠲᠠᠮᠢᠷ ᠢ᠋ᠶ᠋ᠠᠨ ᠰᠠᠬᠢᠵᠤ ᠦᠯᠦ ᠴᠢᠳᠠᠬᠤ ᠠ᠋ᠴᠠ ᠬᠢᠴᠢᠶᠡᠭᠰᠡᠨ ᠬᠡᠷᠡᠭ ᠪᠥᠯᠥᠭᠡ᠃
ᠲᠠᠮᠢᠷ ᠬᠦᠴᠦᠨ ᠢ᠋ᠶ᠋ᠡᠨ ᠬᠣᠷᠣᠭᠳᠠᠭᠤᠯᠬᠤ ᠦᠭᠡᠢ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠬᠠᠷᠠ ᠡᠳᠦᠷ ᠢ᠋ᠶ᠋ᠡᠷ ᠬᠠᠨᠤᠲᠠᠯᠠ ᠨᠣᠢᠷᠰᠤᠵᠤ ᠦᠯᠦ ᠵᠣᠬᠢᠮᠤᠢ᠃
ᠲᠠᠮᠢᠷ ᠬᠦᠴᠦᠨ ᠢ᠋ᠶ᠋ᠡᠨ ᠬᠥᠨᠥᠭᠡᠬᠦ ᠦᠭᠡᠢ ᠶ᠋ᠢᠨ ᠡᠭᠦᠳᠡᠨ ᠡᠴᠡ ᠢᠳᠡᠵᠦ ᠤᠤᠭᠤᠬᠤ ᠪᠠ ᠤᠨᠲᠠᠵᠤ ᠬᠡᠪᠲᠡᠬᠦ ᠳ᠋ᠡᠭᠡᠨ ᠪᠤᠤ ᠳᠡᠮᠡᠢ ᠶᠠᠩᠱ᠍ᠢᠵᠦ ᠨᠤᠷᠱᠤᠭᠲᠤᠨ᠃
ᠠᠯᠢᠪᠠ ᠰᠦᠮᠡ ᠬᠡᠢᠳ ᠷᠠᠰᠠᠩ ᠳᠤᠭᠠᠩ ᠢ᠋ᠶ᠋ᠠᠷ ᠳᠠᠭᠠᠷᠢᠵᠤ ᠥᠩᠭᠡᠷᠡᠬᠦ ᠦᠶᠡ ᠳ᠋ᠦ᠍ᠷ ᠪᠦᠦ ᠴᠦᠯᠳᠡᠮᠬᠡᠨ ᠣᠷᠣᠭᠲᠤᠨ᠃
ᠠᠯᠢᠪᠠ ᠰᠠᠯᠬᠢᠯᠠᠬᠤ ᠪᠣᠷᠣᠭᠠᠯᠠᠬᠤ ᠠᠶᠤᠩᠭᠠᠯᠠᠬᠤ ᠴᠠᠬᠢᠯᠭᠠᠯᠠᠬᠤ ᠦᠶᠡᠰ᠂ ᠡᠭᠦᠳᠡ ᠬᠠᠭᠠᠯᠭᠠ ᠪᠠᠨ ᠳᠠᠷᠤᠭᠠᠳ ᠦᠨᠦᠷᠲᠦ ᠬᠦᠵᠢ ᠶ᠋ᠢ ᠠᠰᠠᠭᠠᠵᠤ ᠡᠪᠲᠡᠢᠬᠡᠨ ᠲᠥᠪ ᠰᠠᠭᠤᠬᠤ ᠬᠡᠷᠡᠭᠲᠡᠢ᠃ ᠡᠨᠡ ᠪᠣᠯᠪᠠᠯ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠨᠤᠭᠤᠳ ᠡᠨᠡᠭᠦᠷ ᠥᠩᠭᠡᠷᠡᠬᠦ ᠶᠠᠭᠤᠨ ᠮᠠᠭᠠᠳ ᠭᠡᠮᠡᠨ ᠬᠢᠴᠢᠶᠡᠩᠭᠦᠢᠯᠡᠭᠰᠡᠨ ᠪᠣᠯᠠᠢ᠃
ᠬᠢᠯᠢᠩᠯᠡᠪᠡᠰᠦ ᠪᠢᠲᠡᠭᠡᠢ ᠬᠡᠲᠦᠷᠬᠡᠢ ᠳᠣᠭᠰᠢᠷᠠᠨ ᠬᠢᠯᠢᠩᠯᠡᠨ᠂ ᠡᠨᠡ ᠢᠨᠦ ᠬᠡᠢ ᠡᠪᠡᠳᠴᠢᠨ ᠪᠠ ᠮᠠᠭᠤ ᠶᠠᠷᠠ ᠰᠢᠷᠬᠠ ᠪᠠᠷ ᠡᠪᠡᠳᠴᠢᠯᠡᠭᠦᠵᠡᠢ ᠭᠡᠮᠡᠨ ᠰᠡᠷᠭᠡᠢᠯᠡᠭᠰᠡᠨ ᠪᠣᠯᠠᠢ᠃
ᠬᠣᠯᠠ ᠨᠢᠯᠪᠤᠬᠤ ᠠᠨᠤ ᠣᠢᠷᠬᠠᠨ ᠨᠢᠯᠪᠤᠬᠤ ᠶ᠋ᠢ ᠬᠦᠷᠬᠦ ᠦᠭᠡᠢ᠂ ᠣᠢᠷᠬᠠᠨ ᠨᠢᠯᠪᠤᠬᠤ ᠠᠨᠤ ᠦᠯᠦ ᠨᠢᠯᠪᠤᠬᠤ ᠶ᠋ᠢ ᠬᠦᠷᠬᠦ ᠦᠭᠡᠢ᠃
ᠪᠠᠷᠰ ᠢᠷᠪᠢᠰ ᠦ᠋ᠨ ᠠᠷᠠᠰᠤ ᠶ᠋ᠢ ᠮᠢᠬᠠᠨ ᠹᠦᠰᠡᠨ ᠦ᠌ ᠳ᠋ᠦ᠍ᠷ ᠬᠠᠪᠢᠳᠠᠭᠤᠯᠤᠨ ᠣᠢᠷᠠᠲᠤᠭᠤᠯᠵᠤ ᠦᠯᠦ ᠪᠣᠯᠤᠮᠤᠢ᠂ ᠡᠨᠡ ᠠᠨᠤ ᠬᠥᠮᠦᠨ ᠦ᠌ ᠨᠢᠳᠦᠨ ᠢ᠋ ᠬᠣᠣᠷᠯᠠᠭᠤᠯᠬᠤ ᠠ᠋ᠴᠠ ᠬᠢᠴᠢᠶᠡᠭᠰᠡᠨ ᠪᠣᠯᠠᠢ᠃
ᠥᠩᠭᠡ ᠡᠴᠡ ᠵᠠᠢᠯᠠᠬᠤ ᠶ᠋ᠢ ᠰᠤᠮᠤ ᠠ᠋ᠴᠠ ᠵᠠᠢᠯᠠᠬᠤ ᠮᠡᠲᠦ ᠦᠵᠡᠨ᠂ ᠰᠠᠯᠬᠢᠨ ᠠ᠋ᠴᠠ ᠵᠠᠢᠯᠠᠬᠤ ᠶ᠋ᠢ ᠥᠰᠢᠶᠡᠲᠡᠨ ᠡᠴᠡ ᠵᠠᠢᠯᠠᠬᠤ ᠮᠡᠲᠦ ᠦᠵᠡ᠃
ᠥᠯᠥᠨ ᠭᠡᠳᠡᠰᠦ ᠪᠡᠷ ᠪᠢᠲᠡᠭᠡᠢ ᠴᠠᠢ ᠤᠤᠭᠤ᠂ ᠪᠡᠴᠢᠨ ᠴᠠᠭ ᠠ᠋ᠴᠠ ᠬᠣᠢᠨᠠ ᠰᠢᠩᠭᠡᠨ ᠪᠤᠳᠠᠭᠠ ᠶ᠋ᠢ ᠪᠠᠷᠤᠭᠲᠠᠢ ᠯᠠ ᠢᠳᠡ᠃
ᠡᠷᠲᠡᠨ ᠦ᠌ ᠬᠥᠮᠦᠨ ᠦ᠌ ᠥᠭᠦᠯᠡᠭᠰᠡᠨ ᠢᠨᠦ ᠰᠤᠷᠭᠠᠭᠤᠯᠢ ᠳ᠋ᠤᠷ ᠰᠠᠭᠤᠭᠴᠢᠳ ᠥᠷᠯᠥᠭᠡ ᠳ᠋ᠡᠭᠡᠨ ᠪᠤᠤ ᠥᠯᠥᠨ ᠰᠠᠭᠤ᠂ ᠣᠷᠣᠢ ᠳ᠋ᠠᠭᠠᠨ ᠪᠤᠤ ᠬᠡᠲᠦᠷᠬᠡᠢ ᠴᠠᠳᠬᠤᠯᠠᠩ ᠪᠠᠢᠲᠤᠭᠠᠢ ᠬᠡᠮᠡᠭᠰᠡᠨ ᠪᠣᠯᠠᠢ᠃ ᠭᠠᠭᠴᠠ ᠬᠦ᠌ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠰᠠᠭᠤᠭᠴᠢᠳ ᠢ᠋ᠶ᠋ᠠᠷ ᠵᠢᠱ᠌ᠢᠶᠡ ᠲᠠᠲᠠᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠮ ᠠᠯᠢᠪᠠ ᠬᠥᠮᠦᠰ ᠡᠷᠲᠡ ᠥᠷᠯᠥᠭᠡ ᠳ᠋ᠡᠭᠡᠨ ᠴᠥᠮ ᠭᠡᠳᠡᠰᠦ ᠬᠣᠭᠣᠰᠣᠨ ᠢ᠋ᠶ᠋ᠠᠷ ᠥᠩᠭᠡᠷᠡᠭᠡᠬᠦ ᠶ᠋ᠢ ᠴᠡᠭᠡᠷᠯᠡᠪᠡᠰᠦ ᠵᠣᠬᠢᠮᠤᠢ᠃
ᠡᠷᠲᠡᠨ ᠦ᠌ ᠬᠥᠮᠦᠨ ᠥᠭᠦᠯᠡᠭᠰᠡᠨ ᠢᠨᠦ ᠮᠢᠶᠠᠨᠲ᠋ᠢᠶᠣᠣᠰ ᠢ᠋ ᠰᠢᠯᠵᠠᠷᠠᠲᠠᠯᠠ᠂ ᠮᠢᠬᠠ ᠶ᠋ᠢ ᠵᠥᠭᠡᠯᠡᠷᠡᠲᠡᠯᠡ ᠴᠢᠨᠠᠵᠤ᠂ ᠠᠷᠢᠬᠢ ᠶ᠋ᠢ ᠪᠠᠭᠠ ᠤᠤᠭᠤ ᠭᠠᠨᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠬᠣᠨᠣᠵᠤ ᠬᠡᠪᠲᠡᠲᠦᠭᠡᠢ ᠬᠡᠮᠡᠵᠦᠬᠦᠢ᠃
ᠡᠷᠲᠡᠨ ᠦ᠌ ᠬᠥᠮᠦᠨ ᠶᠡᠷᠦ ᠶ᠋ᠢᠨ ᠡᠳᠦᠷ ᠦ᠋ᠨ ᠶᠠᠪᠤᠳᠠᠯ ᠮᠥᠷ ᠲᠡᠭᠡᠨ ᠪᠡᠶᠡ ᠪᠡᠨ ᠰᠤᠪᠢᠯᠠᠵᠤ᠂ ᠡᠳᠦᠭᠡ ᠶ᠋ᠢᠨ ᠬᠥᠮᠦᠨ ᠪᠣᠯᠪᠠᠰᠤ ᠬᠥᠭᠰᠢᠷᠡᠭᠰᠡᠨ ᠦᠶᠡ ᠳ᠋ᠦ᠍ᠷ ᠰᠠᠶᠢ ᠪᠡᠶᠡ ᠪᠡᠨ ᠭᠠᠮᠨᠠᠳᠠᠭ ᠠᠨᠤ ᠲᠤᠰᠠ ᠦᠯᠦ ᠪᠣᠯᠬᠤ ᠪᠠᠬᠠᠨᠠ᠃
ᠰᠥᠨᠢ ᠤᠨᠲᠠᠬᠤ ᠪᠠᠷ ᠬᠡᠪᠲᠡᠭᠰᠡᠨ ᠦ᠌ ᠳᠠᠷᠠᠭᠠ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠱᠦᠷᠭᠦᠭᠡᠵᠦ ᠬᠠᠯᠠᠭᠤᠷᠠᠭᠤᠯᠤᠭᠠᠳ ᠨᠢᠳᠦ ᠪᠡᠨ ᠨᠤᠬᠤᠯᠠᠪᠠᠰᠤ ᠡᠭᠦᠷᠢᠳᠡ ᠨᠢᠳᠦᠨ ᠡᠪᠡᠳᠴᠢᠨ ᠦᠯᠦ ᠲᠤᠰᠤᠮᠤᠢ᠃
ᠰᠥᠨᠢ ᠤᠨᠲᠠᠬᠤ ᠪᠠᠷ ᠬᠡᠪᠲᠡᠭᠰᠡᠨ ᠦ᠌ ᠰᠡᠭᠦᠯᠡᠷ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠱᠦᠷᠭᠦᠭᠡᠵᠦ ᠬᠠᠯᠠᠭᠤᠷᠠᠭᠤᠯᠤᠭᠠᠳ ᠨᠢᠭᠤᠷ ᠢ᠋ᠶ᠋ᠠᠨ ᠢᠯᠪᠢᠪᠡᠰᠦ᠂ ᠨᠢᠭᠤᠷ ᠳᠡᠭᠡᠷᠡ ᠢᠨᠦ᠂ ᠬᠠᠷᠠᠪᠲᠤᠷ ᠶᠠᠷᠠ ᠪᠢᠵᠢᠷᠡᠦ ᠦᠯᠦ ᠭᠠᠷᠤᠮᠤᠢ᠃ ᠠᠮᠠᠨ ᠤ᠋ ᠬᠠᠯᠠᠭᠤᠨ ᠠᠭᠤᠷ ᠢ᠋ᠶ᠋ᠠᠨ ᠨᠢᠭᠡ ᠦᠯᠢᠶᠡᠭᠡᠳ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠠᠷᠪᠠᠨᠲᠠ ᠱᠦᠷᠭᠦᠭᠡᠵᠦ᠂ ᠨᠢᠭᠡᠨᠲᠡ ᠱᠦᠷᠭᠦᠭᠡᠭᠡᠳ ᠨᠢᠭᠤᠷ ᠢ᠋ᠶ᠋ᠠᠨ ᠠᠷᠪᠠᠨᠲᠠ ᠢᠯᠪᠢᠬᠦ ᠶᠣᠰᠣ ᠪᠠᠷ ᠬᠢᠵᠦ ᠤᠳᠠᠪᠠᠰᠤ᠂ ᠠᠷᠠᠰᠤ ᠨᠢᠭᠤᠷ ᠴᠢᠷᠠᠢ ᠳ᠋ᠤᠷ ᠠᠲᠤᠷᠢᠶᠠ ᠬᠤᠨᠢᠶᠠᠰᠤ ᠪᠠᠷ ᠪᠠᠭᠠ ᠪᠣᠯᠬᠤ ᠪᠥᠭᠡᠳ ᠥᠩᠭᠡ ᠵᠢᠰᠦ ᠰᠠᠢᠵᠢᠷᠠᠮᠤᠢ᠃
ᠬᠠᠷᠠ ᠥᠷᠯᠥᠭᠡ ᠬᠠᠯᠠᠭᠤᠨ ᠤᠰᠤ ᠪᠠᠷ ᠨᠢᠳᠦ ᠪᠡᠨ ᠤᠬᠢᠶᠠᠪᠠᠰᠤ ᠶᠡᠷᠦ ᠨᠢᠳᠦᠨ ᠡᠪᠡᠳᠴᠢᠨ ᠣᠯᠬᠤ ᠦᠭᠡᠢ᠃
ᠥᠷᠯᠥᠭᠡ ᠡᠷᠲᠡ ᠳ᠋ᠦ᠍ ᠰᠢᠳᠦ ᠪᠡᠨ ᠱᠤᠸᠠᠽᠢᠳᠠᠬᠤ ᠶ᠋ᠢ ᠪᠣᠳᠣᠪᠠᠯ ᠣᠷᠣᠢ ᠳ᠋ᠠᠭᠠᠨ ᠱᠤᠸᠠᠽᠢᠳᠠᠬᠤ ᠶ᠋ᠢ ᠬᠦᠷᠬᠦ ᠦᠭᠡᠢ᠃ ᠡᠢᠨᠬᠦ ᠭᠦᠢᠴᠡᠳᠬᠡᠪᠡᠰᠦ ᠰᠢᠳᠦᠨ ᠡᠪᠡᠳᠴᠢᠨ ᠳ᠋ᠦ᠍ᠷ ᠨᠡᠷᠪᠡᠭᠳᠡᠬᠦ ᠦᠭᠡᠢ᠃
ᠰᠥᠨᠢ ᠤᠨᠲᠠᠬᠤ ᠠ᠋ᠴᠠ ᠡᠮᠦᠨᠡ ᠭᠡᠵᠢᠭᠡ ᠦᠰᠦ ᠪᠡᠨ ᠵᠠᠭᠤᠨᠲᠠ ᠰᠠᠮᠨᠠᠪᠠᠰᠤ ᠶᠡᠷᠦ ᠲᠣᠯᠣᠭᠠᠢ ᠶ᠋ᠢᠨ ᠬᠡᠢ ᠡᠪᠡᠳᠴᠢᠨ ᠳ᠋ᠦ᠍ᠷ ᠨᠡᠷᠪᠡᠭᠳᠡᠬᠦ ᠢᠨᠦ ᠴᠥᠭᠡᠨ᠃ ᠰᠥᠨᠢ ᠤᠨᠲᠠᠬᠤ ᠶ᠋ᠢᠨ ᠤᠷᠢᠳ ᠬᠠᠯᠠᠭᠤᠨ ᠤᠰᠤ ᠪᠠᠷ ᠬᠥᠯ ᠢ᠋ᠶ᠋ᠡᠨ ᠳᠡᠪᠲᠦᠭᠡᠪᠡᠰᠦ᠂ ᠳᠥᠷᠪᠡᠨ ᠮᠥᠴᠢ ᠢᠨᠦ ᠬᠦᠢᠲᠡᠨ ᠡᠪᠡᠳᠴᠢᠨ ᠳ᠋ᠦ᠍ ᠨᠡᠷᠪᠡᠭᠳᠡᠬᠦ ᠦᠭᠡᠢ᠃
ᠡᠭᠡᠮᠡ ᠬᠠᠯᠠᠭᠤᠨ ᠤᠯᠠᠷᠢᠯ ᠳ᠋ᠤ᠌ ᠪᠢᠲᠡᠭᠡᠢ ᠬᠦᠢᠲᠡᠨ ᠤᠰᠤ ᠪᠠᠷ ᠨᠢᠭᠤᠷ ᠤᠬᠢᠶᠠᠲᠤᠭᠠᠢ᠃ ᠡᠰᠡ ᠲᠡᠢᠮᠦ ᠪᠥᠭᠡᠰᠦ ᠨᠢᠳᠦᠨ ᠡᠪᠡᠳᠴᠢᠨ ᠣᠯᠤᠮᠤᠢ᠃
ᠬᠤᠪᠠᠬᠠᠢ ᠮᠣᠳᠣ ᠪᠠ ᠪᠦᠳᠦᠭᠦᠨ ᠮᠣᠳᠣᠨ ᠤ᠋ ᠳᠣᠣᠷᠠᠬᠢ ᠴᠢᠭᠢᠭ ᠨᠣᠢᠲᠠᠨ ᠰᠡᠭᠦᠳᠡᠷ ᠭᠠᠵᠠᠷ ᠤᠳᠠᠲᠠᠯᠠ ᠰᠠᠭᠤᠵᠤ ᠦᠯᠦ ᠪᠣᠯᠤᠮᠤᠢ᠃ ᠡᠨᠡ ᠢᠨᠦ ᠴᠢᠭᠢᠭ ᠨᠣᠢᠲᠠᠨ ᠠᠭᠤᠷ ᠲᠤ᠌ ᠠᠪᠲᠠᠭᠳᠠᠬᠤ ᠠ᠋ᠴᠠ ᠰᠡᠷᠭᠡᠢᠯᠡᠭᠰᠡᠨ ᠪᠥᠯᠥᠭᠡ᠃
ᠨᠠᠮᠤᠷ ᠣᠷᠣᠭᠰᠠᠨ ᠡᠳᠦᠷ ᠲᠦ᠍ ᠤᠰᠤᠨ ᠳ᠋ᠤ᠌ ᠣᠷᠣᠵᠤ ᠤᠬᠢᠶᠠᠯᠭᠠ ᠬᠢᠵᠦ ᠦᠯᠦ ᠪᠣᠯᠤᠮᠤᠢ᠃ ᠡᠰᠡ ᠲᠡᠢᠮᠦ ᠪᠥᠭᠡᠰᠦ ᠠᠷᠠᠰᠤ ᠬᠥᠷᠥᠰᠥ ᠬᠠᠲᠠᠩᠭᠢᠷᠠᠨ ᠰᠢᠷᠦᠭᠦᠰᠴᠦ ᠴᠠᠭᠠᠨ ᠮᠠᠷᠢᠶᠠ ᠭᠠᠷᠴᠤ ᠮᠡᠳᠡᠮᠦᠢ᠃
ᠦᠷᠭᠦᠯᠵᠢᠳᠡ ᠨᠠᠮᠠᠨᠴᠢᠯᠠᠨ ᠨᠠᠮ ᠳᠤᠭᠤᠢ ᠠᠬᠤᠯᠠ ᠭᠣᠣᠯ ᠲᠠᠮᠢᠷ ᠬᠣᠷᠣᠭᠳᠠᠬᠤ ᠦᠭᠡᠢ᠃
ᠪᠠᠷᠤᠭᠲᠠᠢᠬᠠᠨ ᠪᠣᠳᠣᠯᠬᠢᠯᠠᠪᠠᠰᠤ ᠪᠠᠳᠠᠷᠠᠯᠲᠤ ᠯᠠᠪ ᠮᠡᠲᠦ ᠪᠡᠷ ᠬᠡᠬᠦᠳᠡᠭ ᠴᠡᠬᠡᠵᠢᠨᠡ ᠭᠡᠭᠡᠬᠡᠨ ᠰᠡᠷᠭᠦᠯᠡᠩ᠃
ᠬᠢᠯᠢᠩᠯᠡᠨ ᠠᠭᠤᠷᠯᠠᠬᠤ ᠦᠭᠡᠢ ᠪᠣᠯᠪᠠᠰᠤ ᠬᠡᠢ ᠲᠠᠮᠢᠷ ᠠᠮᠤᠷᠯᠢᠩᠭᠤᠢ ᠲᠠᠯᠪᠢᠭᠤ᠃
ᠡᠭᠳᠡᠭᠦᠴᠡᠨ ᠲᠡᠨᠴᠢᠭᠦᠷᠡᠬᠦ ᠦᠭᠡᠢ ᠪᠣᠯᠪᠠᠰᠤ ᠡᠯᠢᠭᠡ ᠵᠢᠷᠦᠬᠡ ᠲᠤᠩᠭᠠᠯᠠᠭ ᠰᠡᠷᠭᠡᠭ᠃
ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠢ᠋ ᠲᠤᠢᠯ ᠳ᠋ᠤᠨᠢ ᠪᠦᠦ ᠬᠦᠷᠭᠡ᠃
ᠲᠠᠴᠢᠶᠠᠩᠭᠤᠢ ᠬᠦᠰᠡᠯ ᠢ᠋ ᠲᠠᠪᠠ ᠳᠤᠷᠠ ᠪᠠᠷ ᠪᠦᠦ ᠪᠣᠯᠭᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠭᠠᠸᠠ
ᠬᠢᠨᠠᠭᠴᠢ᠄ ᠲᠤᠭᠴᠢ ᠰᠠᠷᠠᠨᠠ