ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ᠂ᠰᠢᠨᠡᠯᠡᠮᠡ ᠶ᠋ᠢᠨ ᠵᠡᠪᠰᠡᠭᠲᠦ ᠲᠡᠮᠡᠴᠡᠯ 2(2–14~17) Шинэлам – 3-р бүлэг᠂ Шинэлмийн зэвсэгт тэмцэл 2(2–14~17)
103 1928 ᠣᠨ ᠤ᠋ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠤ᠋ ᠡᠳᠦᠷ ᠪᠤᠮᠪᠠ ᠪᠤᠯᠠᠭ ᠤ᠋ᠨ ᠪᠠᠢᠯᠳᠤᠭᠠᠨ ᠠ᠋ᠴᠠ ᠬᠣᠢᠰᠢ ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ᠂ ᠲᠠᠮᠠᠭᠠᠯᠠᠢ᠂ ᠰᠦᠮᠡ ᠶ᠋ᠢᠨ ᠵᠠᠳᠠᠭᠠᠢ᠂ ᠮᠤᠬᠤᠷ ᠣᠪᠣᠭᠠᠨ ᠤ᠋ ᠪᠠᠢᠯᠳᠤᠭᠠᠨ ᠨᠤᠭᠤᠳ ᠲᠤ᠌ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠪᠦᠷ ᠢᠯᠠᠭᠳᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡ ᠲᠡᠮᠡᠭᠡᠲᠦ ᠪᠣᠭᠣᠮᠲᠠ(ᠢᠦᠢ ᠯᠢᠨ ᠵᠧᠩ ᠪᠧᠢ ᠲᠡᠢ) ᠳ᠋ᠡᠭᠡᠨ ᠤᠬᠤᠷᠢᠵᠤ ᠬᠠᠷᠢᠭᠰᠠᠨ ᠦᠭᠡᠢ ᠦᠷᠭᠦᠯᠵᠢᠯᠡᠨ ᠬᠤᠸᠠᠲᠣᠯᠣᠭᠠᠢ᠂ ᠤᠯᠠᠭᠠᠨᠲᠣᠯᠣᠭᠠᠢ᠂ ᠰᠢᠪᠡᠷ᠂ ᠲᠠᠮᠠᠭᠠᠯᠠᠢ᠂ ᠬᠣᠩᠨᠠᠢ᠂ ᠪᠠᠶᠠᠨ᠌ᠤ᠋ᠪᠤᠭᠠ ᠵᠡᠷᠭᠡ ᠭᠠᠵᠠᠷ ᠤ᠋ᠳ ᠲᠤ᠌ ᠮᠣᠷᠢᠲᠤ ᠶᠠᠪᠠᠭᠠᠨ ᠬᠣᠶᠠᠷ ᠮᠢᠩᠭᠠ ᠰᠢᠬᠠᠮ ᠴᠡᠷᠢᠭ ᠰᠠᠷᠠ ᠬᠢᠷᠢᠲᠡᠢ ᠰᠠᠭᠤᠵᠤ ᠪᠤᠯᠢᠶᠠᠵᠤ ᠳᠡᠭᠡᠷᠡᠮᠳᠡᠬᠦ᠂ ᠠᠯᠠᠵᠤ ᠬᠢᠳᠤᠬᠤ᠂ ᠬᠤᠯᠠᠭᠠᠢ ᠬᠢᠬᠦ᠂ ᠭᠠᠯᠳᠠᠵᠤ ᠰᠢᠲᠠᠭᠠᠬᠤ ᠵᠡᠷᠭᠡ ᠶᠠᠯᠠᠲᠤ ᠠᠵᠢᠯᠯᠠᠭᠠ ᠪᠦᠬᠦᠨ ᠢ᠋ ᠦᠢᠯᠡᠳᠴᠦ ᠦᠦᠰᠢᠨ ᠬᠣᠰᠢᠭᠤ ᠶ᠋ᠢ ᠬᠣᠭᠣᠰᠣᠷᠠᠭᠤᠯᠬᠤ ᠪᠣᠳᠣᠯᠭᠠ ᠠᠪᠴᠠᠢ᠃
ᠵᠢᠩ ᠶᠤᠸᠠᠢ ᠰᠢᠦ ᠡᠨᠡ ᠣᠷᠴᠢᠮ ᠢᠦᠢ ᠯᠢᠨ ᠦ᠌ ᠮᠠᠲᠠᠯ ᠤ᠋ᠨ ᠠᠷᠪᠠᠨ ᠬᠣᠶᠠᠷ ᠰᠢᠶᠠᠨ ᠤ᠋ ᠭᠠᠵᠠᠷ ᠢ᠋ ᠲᠣᠭᠲᠠᠨᠢᠭᠤᠯᠤᠨ ᠰᠠᠭᠤᠭᠠ ᠬᠠᠷᠢᠶᠠᠲᠤ ᠴᠡᠷᠢᠭ ᠠ᠋ᠴᠠ ᠨᠢᠭᠡ ᠪᠦᠯᠦᠭ ᠢ᠋ ᠨᠢ ᠰᠢᠯᠵᠢᠭᠦᠯᠦᠨ ᠠᠪᠴᠢᠷᠠᠵᠤ ᠨᠡᠢᠲᠡ3000 ᠰᠢᠬᠠᠮ ᠴᠡᠷᠢᠭ ᠢ᠋ᠶ᠋ᠡᠷ ᠤᠮᠠᠷᠠᠰᠢ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠳᠠᠢᠯᠠᠬᠤ ᠪᠠᠷ ᠪᠣᠯᠪᠠ᠃
ᠡᠨᠡ ᠤᠳᠠᠭᠠ ᠶ᠋ᠢᠨ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠳᠣᠪᠲᠣᠯᠬᠤ ᠪᠠᠷ ᠤᠮᠠᠷᠠᠰᠢ ᠴᠡᠷᠢᠭᠯᠡᠬᠦ ᠳ᠋ᠡᠭᠡᠨ ᠵᠢᠭᠰᠠᠭᠠᠯ ᠤ᠋ᠨ ᠡᠮᠦᠨᠡ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠲᠤᠸᠠᠨ᠂ ᠳᠠᠷᠠᠭᠠ ᠨᠢ ᠦᠬᠡᠷ ᠫᠣᠤᠲᠤ ᠴᠡᠷᠢᠭ᠂ ᠲᠡᠭᠦᠨ ᠦ᠌ ᠳᠠᠷᠠᠭᠠ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠨ ᠲᠤᠸᠠᠨ᠂ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠨ ᠳᠠᠮᠨᠠᠭᠤᠷ ᠤ᠋ᠨ ᠠᠩᠭᠢ᠂ ᠬᠠᠮᠤᠭ ᠰᠡᠭᠦᠯ ᠡᠴᠡ ᠨᠢ ᠳᠠᠷᠢ ᠰᠤᠮᠤ᠂ ᠠᠮᠤ ᠪᠤᠳᠠᠭᠠ ᠴᠡᠷᠢᠭ ᠦ᠋ᠨ ᠬᠡᠷᠡᠭᠰᠡᠯ ᠢ᠋ ᠲᠡᠭᠡᠭᠡᠪᠦᠷᠢᠯᠡᠭᠰᠡᠨ ᠠᠴᠢᠶᠠ ᠳᠦᠭᠦᠷᠡᠩ ᠬᠡᠯᠬᠢᠶᠡ ᠲᠡᠮᠡᠭᠡ ᠴᠤᠪᠤᠷᠠᠵᠤ ᠪᠠᠢᠯᠠ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠲᠦ᠍ ᠵᠢᠩᠬᠢᠨᠢ ᠢᠷᠭᠡᠨ ᠦ᠌ ᠴᠡᠷᠢᠭ ᠴᠦ᠍ ᠠᠷᠪᠢᠨ ᠪᠠᠢᠬᠤ ᠲᠤᠯᠠ ᠨᠡᠯᠢᠶᠡᠳ ᠲᠡᠷᠢᠭᠦᠨ ᠦ᠌ ᠵᠠᠷ ᠵᠡᠪᠰᠡᠭ ᠬᠦᠨᠳᠦ ᠬᠥᠩᠭᠡᠨ ᠵᠢᠴᠢᠶᠠᠩ ᠲᠠᠢ᠂ ᠴᠢᠮᠡᠭᠡ ᠬᠣᠯᠪᠣᠭᠠᠨ ᠤ᠋ ᠷᠠᠳᠢᠣ᠋ ᠰᠲ᠋ᠠᠨᠼ ᠲᠠᠢ ᠪᠠᠢᠵᠤ᠂ ᠴᠡᠷᠢᠭ ᠦ᠋ᠨ ᠨᠣᠶᠠᠳ ᠨᠢ ᠠᠯᠤᠰ ᠤ᠋ᠨ ᠬᠠᠷᠠᠯᠲᠠ ᠶ᠋ᠢ ᠢᠯᠭᠠᠨ ᠲᠣᠳᠣᠷᠠᠭᠤᠯᠳᠠᠭ ᠳᠤᠷᠠᠨ ᠢ᠋ ᠬᠦᠵᠦᠭᠦᠨ ᠳ᠋ᠡᠭᠡᠨ ᠡᠯᠭᠦᠵᠦ᠂ ᠪᠠᠷᠠᠭᠤᠨ ᠲᠠᠯᠠ ᠳ᠋ᠠᠭᠠᠨ ᠬᠡᠷᠬᠡᠮ ᠦ᠋ᠨ ᠬᠤᠷᠴᠠ ᠢᠯᠳᠦ ᠰᠤᠭᠤᠷᠠᠨ ᠳᠠᠮᠪᠠᠭᠠᠷ ᠮᠠᠯᠠᠭᠠᠢ ᠵᠡᠭᠦᠭᠰᠡᠨ ᠣᠮᠣᠭ ᠰᠦᠷ ᠲᠡᠢ ᠡᠷᠡᠴᠦᠳ ᠪᠠᠢᠯᠠ᠃
ᠭᠡᠲᠡᠯᠡ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠨᠢ ᠳᠥᠩᠭᠡᠵᠦ200 ᠰᠢᠬᠠᠮ ᠬᠥᠮᠦᠨ ᠪᠠᠢᠵᠤ᠂ ᠬᠡᠳᠦᠢᠪᠡᠷ ᠭᠠᠳᠠᠭᠠᠳᠤ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠬᠣᠯᠠ ᠲᠤᠰᠤᠯᠲᠠ ᠲᠠᠢ᠂ ᠰᠥᠨᠥᠭᠡᠬᠦ ᠬᠦᠴᠦᠨ ᠲᠡᠢ ᠬᠤᠷᠤᠪᠴᠢᠨ ᠬᠠᠷᠠᠭᠠᠲᠤ ᠯᠠᠨᠵᠧᠦ ᠫᠤᠤ(ᠶᠠᠪᠠᠭᠠᠨ ᠫᠤᠤ) ᠲᠠᠢ ᠪᠣᠯᠪᠠᠴᠤ ᠰᠤᠮᠤ ᠶ᠋ᠢ ᠨᠢ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠵᠥᠪᠯᠡᠯᠲᠦ ᠬᠣᠯᠪᠣᠭᠠᠲᠤ ᠤᠯᠤᠰ ᠠ᠋ᠴᠠ ᠬᠠᠯᠬᠠ ᠮᠣᠩᠭᠣᠯ ᠢ᠋ᠶ᠋ᠠᠷ ᠳᠠᠮᠵᠢᠭᠤᠯᠵᠤ ᠣᠷᠣᠭᠤᠯᠳᠠᠭ ᠪᠠᠢᠵᠠᠢ᠃ ᠬᠡᠳᠦᠨ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠥᠪᠡᠷ ᠢ᠋ ᠪᠡᠨ ᠬᠠᠮᠠᠭᠠᠯᠠᠬᠤ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠰᠤᠮᠤ ᠪᠠᠨ ᠨᠡᠯᠢᠶᠡᠳ ᠬᠡᠷᠡᠭᠯᠡᠴᠢᠬᠡᠭᠰᠡᠨ ᠪᠣᠯᠬᠣᠷ ᠣᠳᠣ ᠰᠤᠮᠤ ᠪᠠᠨ ᠠᠯᠢ ᠪᠣᠯᠬᠤ ᠪᠠᠷ ᠭᠠᠮᠨᠠᠵᠤ ᠠᠷᠪᠢᠯᠠᠬᠤ ᠬᠡᠷᠡᠭᠲᠡᠢ ᠳᠡᠭᠡᠷᠡ ᠪᠡᠨ ᠪᠠᠰᠠ ᠴᠤ᠌ ᠳᠠᠢᠰᠤᠨ ᠢ᠋ ᠬᠣᠷᠢᠭᠯᠠᠨ ᠡᠰᠡᠷᠭᠦᠴᠡᠬᠦ ᠬᠡᠷᠡᠭᠲᠡᠢ ᠪᠠᠢᠪᠠ᠃
ᠤᠴᠢᠷ ᠡᠢᠮᠦ ᠡᠴᠡ ᠰᠤᠮᠤ ᠪᠠᠨ ᠭᠠᠮᠨᠠᠪᠠᠯ ᠳᠠᠢᠰᠤᠨ ᠢ᠋ ᠰᠥᠨᠥᠭᠡᠵᠦ ᠴᠢᠳᠠᠬᠤ ᠦᠭᠡᠢ᠂ ᠰᠤᠮᠤ ᠪᠠᠨ ᠰᠦᠢᠳᠬᠡᠬᠦ ᠦᠭᠡᠢ ᠪᠣᠯ ᠢᠯᠠᠯᠲᠠ ᠣᠯᠵᠤ ᠴᠢᠳᠠᠬᠤ ᠦᠭᠡᠢ ᠵᠥᠷᠢᠴᠡᠯ ᠣᠷᠣᠰᠢᠵᠤ ᠪᠠᠢᠯᠠ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠠᠮ ᠨᠡᠪᠲᠡᠷᠡᠭᠦᠯᠭᠡ ᠪᠣᠢᠳᠠ ᠪᠥᠭᠯᠡᠭᠦᠦ᠂ ᠮᠤᠤᠤ᠋ᠰᠤ ᠶ᠋ᠢᠨ ᠶᠡᠬᠡ ᠡᠯᠡᠰᠦᠨ ᠡᠴᠡ ᠤᠨᠤᠭᠠ ᠪᠠᠷ ᠬᠠᠯᠬᠠ᠂ ᠣᠷᠣᠰ ᠵᠡᠷᠭᠡ ᠤᠯᠤᠰ ᠲᠤ᠌ ᠳᠠᠷᠢ ᠰᠤᠮᠤ ᠠᠪᠬᠤ ᠪᠠᠷ ᠶᠠᠪᠤᠨᠠ ᠭᠡᠭᠴᠢ ᠶᠣᠰᠣᠲᠠᠢ ᠮᠠᠨ ᠤ᠋ ᠣᠷᠳᠣᠰ ᠭᠠᠵᠠᠷ ᠤ᠋ᠨ ᠠᠮᠠᠨ ᠶᠠᠷᠢᠶᠠᠨ ᠳ᠋ᠤ᠌ ᠬᠡᠯᠡᠯᠴᠡᠳᠡᠭ《ᠡᠯᠵᠢᠭᠡᠨ ᠵᠢᠯ ᠦ᠋ᠨ ᠬᠣᠷᠢ ᠶᠢᠰᠦᠨ》(ᠡᠢᠮᠦ ᠵᠢᠯ ᠶᠡᠷᠦ ᠨᠢ ᠪᠠᠢᠳᠠᠭ ᠦᠭᠡᠢ ᠭᠡᠰᠡᠨ ᠠᠭᠤᠯᠭᠠ ᠲᠠᠢ) ᠭᠡᠰᠡᠨ ᠦᠭᠡ!
ᠵᠢᠩ ᠲᠦᠩᠯᠢᠩ ᠨᠣᠶᠠᠨ ᠪᠣᠯ ᠤᠯᠠᠭᠠᠨ ᠡᠮᠵᠢᠶᠡᠷᠢ ᠶ᠋ᠢᠨ ᠬᠡᠳᠦᠨ ᠵᠢᠷᠤᠭᠠᠰᠤ ᠲᠠᠢ ᠰᠢᠷᠠ ᠥᠩᠭᠡ ᠪᠡᠷ ᠰᠠᠭᠤᠷᠢᠯᠠᠵᠤ ᠳᠡᠭᠡᠷᠡ ᠨᠢ ᠥᠨᠳᠥᠷ ᠴᠠᠭᠠᠨ ᠱᠣᠪᠣᠭᠣᠷ ᠣᠷᠣᠢ ᠲᠠᠢ ᠬᠡᠷᠬᠡᠮ ᠦ᠋ᠨ ᠮᠠᠯᠠᠭᠠᠢ ᠵᠡᠭᠦᠵᠦ᠂ ᠬᠣᠶᠠᠷ ᠮᠥᠷᠦᠨ ᠳᠡᠭᠡᠷᠡ ᠪᠡᠨ ᠰᠢᠷᠠ ᠥᠩᠭᠡ ᠶ᠋ᠢᠨ ᠰᠠᠴᠤᠭ ᠲᠠᠢ ᠪᠠᠷᠰ ᠤ᠋ᠨ ᠵᠠᠩᠵᠤᠨ ᠤ᠋ ᠲᠡᠮᠳᠡᠭ ᠬᠠᠲᠠᠵᠤ᠂ ᠪᠠᠷᠠᠭᠤᠨ ᠲᠠᠯᠠ ᠳ᠋ᠠᠭᠠᠨ ᠬᠡᠷᠬᠡᠮ ᠦ᠋ᠨ ᠬᠤᠷᠴᠠ ᠰᠡᠯᠡᠮᠡ ᠶ᠋ᠢ ᠭᠢᠯᠠᠷᠠᠭᠤᠯᠵᠤ᠂ ᠭᠥᠯᠢᠭᠡᠷ ᠰᠠᠢᠬᠠᠨ ᠥᠨᠳᠥᠷ ᠴᠡᠷᠢᠭ ᠦ᠋ᠨ ᠭᠤᠲᠤᠯ ᠡᠮᠦᠰᠴᠦ᠂ ᠪᠠᠭᠠ ᠰᠢᠭ᠋ ᠲᠠᠷᠭᠤᠨ ᠪᠡᠶᠡ ᠲᠡᠢ᠂ ᠴᠠᠳᠬᠤᠯᠠᠩ ᠵᠤᠷᠪᠤᠰ ᠬᠠᠷᠠ ᠰᠠᠬᠠᠯ ᠲᠠᠢ ᠨᠡᠯᠢᠶᠡᠳ ᠭᠣᠶᠣ ᠲᠥᠷᠥᠭᠰᠡᠨ ᠬᠥᠮᠦᠨ ᠶᠦᠮ᠃ ᠲᠡᠷᠡ ᠬᠡᠭᠡᠷ ᠵᠢᠰᠦᠮ ᠦ᠋ᠨ ᠮᠣᠷᠢᠨ ᠤ᠋ ᠬᠦᠵᠦᠭᠦᠨ ᠳ᠋ᠦ᠍ ᠬᠡᠷᠬᠡᠮ ᠦ᠋ᠨ ᠤᠯᠠᠭᠠᠨ ᠮᠣᠨᠴᠣᠭ ᠵᠡᠭᠦᠯᠭᠡᠭᠰᠡᠨ ᠣᠨᠴᠠ ᠰᠠᠢᠨ ᠵᠢᠷᠣᠭᠠ ᠮᠣᠷᠢ ᠤᠨᠤᠵᠤ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠢ᠋ᠶ᠋ᠡᠨ ᠳᠤᠮᠳᠠ ᠳᠠᠪᠬᠤᠷ ᠳᠠᠪᠬᠤᠷ ᠬᠠᠮᠠᠭᠠᠯᠠᠯᠲᠠ ᠲᠠᠢ ᠪᠠᠷ ᠴᠡᠷᠢᠭ ᠳᠠᠢᠴᠢᠯᠠᠨ ᠲᠡᠢᠨ ᠵᠢᠯᠣᠭᠣᠳᠴᠤ ᠤᠮᠠᠷᠠᠰᠢ ᠤᠷᠤᠭᠰᠢᠯᠠᠨᠠ᠃
ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠬᠤᠪᠢᠰᠬᠠᠯᠲᠤ ᠴᠡᠷᠢᠭ ᠦ᠋ᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠬᠣᠷᠢᠶᠠᠨ ᠳᠠᠷᠤᠭᠠ ᠰᠢᠨᠡᠯᠡᠮᠡ ᠪᠣᠯ ᠡᠩ ᠦ᠋ᠨ ᠨᠢᠭᠡᠨ ᠨᠠᠰᠤᠲᠠᠢ ᠴᠢᠪᠠᠭᠠᠨᠴᠠ ᠰᠢᠭ᠋ ᠴᠢᠷᠠᠢ ᠲᠠᠢ ᠪᠥᠭᠡᠳ ᠳᠤᠮᠳᠠ ᠶ᠋ᠢᠨ ᠪᠡᠶᠡ ᠲᠡᠢ᠂ ᠣᠷᠳᠣᠰ ᠮᠠᠶᠢᠭ ᠤ᠋ᠨ ᠤᠷᠲᠤ ᠬᠦᠷᠡᠩ ᠥᠩᠭᠡ ᠶ᠋ᠢᠨ ᠮᠣᠩᠭᠣᠯ ᠬᠤᠪᠴᠠᠰᠤ ᠡᠮᠦᠰᠴᠦ ᠰᠢᠷᠠ ᠪᠦᠰᠡ ᠪᠦᠰᠡᠯᠡᠨ ᠬᠦᠵᠦᠭᠦᠨ ᠳ᠋ᠡᠭᠡᠨ ᠮᠠᠨᠢ ᠶ᠋ᠢᠨ ᠰᠢᠷᠠ ᠡᠷᠢᠭᠡ ᠵᠡᠭᠦᠵᠦ ᠶᠠᠪᠤᠳᠠᠭ᠃ ᠴᠠᠭᠠᠨ ᠪᠡᠴᠢᠨ ᠵᠢᠯ ᠦ᠋ᠨ ᠭᠠᠯᠠᠭᠤᠲᠤ ᠶ᠋ᠢᠨ ᠴᠢᠭᠤᠯᠭᠠᠨ ᠳ᠋ᠤ᠌ ᠲᠡᠷᠡ ᠲᠠᠮᠤᠯᠠᠭᠳᠠᠨ ᠬᠦᠨᠳᠦ ᠭᠡᠮᠲᠦᠭᠰᠡᠨ ᠲᠤᠯᠠ ᠬᠥᠯ ᠨᠢᠷᠤᠭᠤᠨ ᠳ᠋ᠤᠨᠢ ᠠᠷᠬᠠᠭ ᠡᠪᠡᠳᠴᠢᠨ ᠲᠡᠢ ᠪᠣᠯᠵᠤ ᠲᠠᠭᠠᠷᠠᠵᠤ ᠪᠡᠭᠡᠷᠡᠪᠡᠯ ᠲᠡᠰᠦᠰᠢ ᠦᠭᠡᠢ ᠬᠠᠳᠬᠤᠯᠠᠨ ᠡᠪᠡᠳᠦᠭᠡᠳ ᠪᠠᠢᠳᠠᠭ ᠲᠤᠯᠠ ᠰᠢᠷᠬᠠ ᠰᠣᠷᠪᠢ ᠪᠠᠨ ᠡᠪᠦᠯ ᠵᠤᠨ ᠦᠭᠡᠢ ᠬᠣᠨᠢᠨ ᠠᠷᠠᠰᠤᠨ ᠨᠡᠬᠡᠢ ᠪᠡᠷ ᠬᠠᠮᠠᠭᠠᠯᠠᠵᠤ ᠶᠠᠪᠤᠳᠠᠭ᠃ ᠵᠡᠭᠡᠷᠳᠡ ᠵᠢᠰᠦᠮ ᠦ᠋ᠨ ᠬᠤᠷᠳᠤᠨ ᠮᠣᠷᠢ ᠤᠨᠤᠵᠤ ᠮᠣᠷᠢᠨ ᠤ᠋ ᠪᠠᠨ ᠳᠡᠭᠡᠷᠡ ᠲᠣᠬᠣᠳᠠᠭ ᠲᠡᠮᠡᠭᠡᠨ ᠨᠣᠣᠰᠣᠨ ᠳᠠᠯᠢᠩ(ᠤᠭᠤᠲᠠ) ᠤᠨ ᠳᠣᠲᠣᠷᠠ ᠪᠠᠭᠠ ᠰᠠᠭᠠ ᠬᠠᠭᠤᠷᠠᠢ ᠬᠦᠨᠡᠰᠦ ᠪᠣᠯᠤᠨ ᠬᠠᠯᠬᠠ ᠮᠣᠩᠭᠣᠯ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠬᠣᠶᠠᠷ ᠲᠣᠬᠣᠢ ᠰᠢᠬᠠᠮ ᠤᠷᠲᠤ ᠣᠷᠣᠰ ᠬᠢᠴᠡ ᠲᠡᠢ ᠳᠤᠷᠠᠨ ᠪᠠ ᠬᠠᠭᠠᠰ ᠲᠣᠬᠣᠢ ᠥᠷᠭᠡᠨ ᠲᠣᠬᠣᠢ ᠬᠠᠭᠠᠰ ᠤᠷᠲᠤ᠂ ᠳᠡᠭᠡᠷᠡᠬᠢ ᠬᠠᠪᠬᠠᠭ ᠤ᠋ᠨ ᠨᠢᠷᠤᠭᠤ ᠨᠢ ᠭᠥᠯᠢᠭᠡᠷ ᠮᠥᠷᠲᠡᠭᠡᠨ ᠳᠤᠮᠳᠠᠬᠢ ᠨᠢ ᠬᠣᠲᠣᠭᠣᠷ ᠰᠢᠭ᠋ ᠨᠠᠯᠠᠤ᠂ ᠬᠠᠭᠠᠰ ᠲᠣᠬᠣᠢ ᠥᠨᠳᠥᠷ᠂ ᠨᠠᠷᠢᠨ ᠰᠢᠷᠬᠡᠭᠲᠡᠢ ᠬᠦᠷᠡᠩ ᠥᠩᠭᠡ ᠶ᠋ᠢᠨ ᠴᠢᠨᠠᠷ ᠰᠠᠢᠨᠲᠠᠢ ᠮᠣᠳᠣ ᠪᠠᠷ ᠤᠷᠠᠯᠠᠵᠤ ᠬᠢᠭᠰᠡᠨ ᠣᠯᠠᠨ ᠬᠡᠷᠡᠭᠴᠡᠭᠡᠲᠦ ᠪᠢᠴᠢᠬᠠᠨ ᠬᠠᠢᠷᠴᠠᠭ ᠳᠣᠲᠣᠷᠠ ᠪᠠᠨ ᠮᠣᠩᠭᠣᠯ ᠲᠥᠪᠡᠳ ᠬᠢᠲᠠᠳ ᠨᠣᠮ ᠮᠠᠲ᠋ᠧᠷᠢᠶᠠᠯ᠂ ᠮᠣᠣᠲᠤᠤ ᠴᠠᠭᠠᠰᠤ᠂ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠦᠰᠦᠨ ᠪᠢᠷ᠂ ᠬᠠᠷᠠ ᠪᠡᠬᠢ ᠰᠠᠪᠠᠯᠠᠳᠠᠭ᠂ ᠪᠢᠴᠢᠬᠠᠨ ᠭᠠᠤᠯᠢᠨ ᠨᠢᠩᠲᠠᠢ ᠳ᠋ᠤ᠌ ᠪᠠᠭᠠ ᠰᠠᠭᠠ ᠡᠮ ᠲᠣᠮ ᠰᠠᠪᠠᠯᠠᠵᠤ ᠰᠢᠷᠠ ᠭᠠᠤᠯᠢᠨ ᠬᠠᠮᠠᠷ ᠲᠡᠭᠡᠪᠴᠢ ᠣᠨᠢᠰᠣ ᠪᠠᠷ ᠣᠨᠢᠰᠤᠯᠠᠵᠤ ᠬᠥᠳᠡᠭᠡ ᠬᠡᠭᠡᠷᠡ ᠠᠮᠠᠷᠠᠵᠤ ᠬᠡᠪᠲᠡᠪᠡᠯ ᠳᠡᠷᠡᠯᠡᠵᠦ ᠪᠣᠯᠳᠠᠭ ᠮᠣᠳᠣᠨ ᠬᠠᠢᠷᠴᠠᠭ(ᠥᠨᠥ ᠭᠠᠯᠠᠭᠤᠲᠤ ᠳ᠋ᠠᠬᠢ ᠰᠢᠨᠠᠯᠠᠮᠠ ᠶ᠋ᠢᠨ ᠬᠠᠭᠤᠴᠢᠨ ᠰᠠᠭᠤᠴᠠ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠠᠳᠠᠭᠠᠯᠠᠵᠤ ᠪᠣᠢ) ᠶᠤᠮ᠃ ᠪᠠᠰᠠ ᠲᠤᠸᠠᠨᠵᠠᠩ ᠢ᠋ ᠪᠡᠶᠡ ᠪᠡᠨ ᠬᠠᠮᠠᠭᠠᠯᠠ ᠭᠡᠮᠡᠨ ᠨᠢᠭᠡᠨ ᠪᠠᠭᠠ ᠫᠤᠤ ᠥᠭᠭᠦᠭᠰᠡᠨ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ᠶ᠋ᠡᠨ ᠦᠷᠭᠦᠯᠵᠢ ᠲᠡᠯᠢᠩ ᠳᠣᠲᠣᠷᠠ ᠰᠠᠪᠠᠯᠠᠵᠤ ᠭᠠᠨᠵᠤᠭᠠᠯᠠᠳᠠᠭ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠤ᠌ ᠠᠪᠴᠤ ᠶᠠᠪᠤᠳᠠᠭ ᠦᠭᠡᠢ ᠵᠠᠩᠰᠢᠯ ᠲᠠᠢ ᠪᠢᠯᠡ!
ᠬᠡᠳᠦᠢᠪᠡᠷ ᠲᠡᠢᠨ ᠦ᠌ ᠭᠠᠯ ᠡᠬᠢᠯᠡᠭᠡᠳᠦᠢ ᠪᠠᠢᠭᠰᠠᠨ ᠴᠤ᠌ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠵᠢᠭᠦᠷ ᠦ᠋ᠨ ᠠᠩᠭᠢ ᠨᠢ ᠬᠣᠯᠠ ᠣᠢᠷᠠ ᠳ᠋ᠤ᠌ ᠰᠦᠷ ᠮᠠᠨᠳᠤᠭᠤᠯᠤᠨ ᠵᠦᠭ ᠪᠣᠯᠭᠠᠨ ᠳ᠋ᠤ᠌ ᠬᠠᠮᠢᠶᠠ ᠨᠠᠮᠢᠶᠠ ᠦᠭᠡᠢ ᠭᠠᠯᠯᠠᠴᠢᠬᠠᠭᠠᠳ ᠤᠷᠤᠭᠰᠢᠯᠠᠵᠤ ᠪᠠᠢᠯᠠ᠃ ᠲᠡᠳᠡ ᠤᠮᠠᠷᠠᠰᠢ ᠪᠠᠨ ᠰᠦᠮᠡ ᠶ᠋ᠢᠨ ᠵᠠᠳᠠᠭᠠᠢ ᠬᠦᠷᠬᠦ ᠳ᠋ᠦ᠍ ᠬᠣᠶᠠᠷ ᠲᠠᠯᠠ ᠪᠠᠷ ᠵᠢᠩᠬᠢᠨᠢ ᠭᠠᠯ ᠠᠪᠤᠯᠴᠠᠵᠤ ᠪᠠᠢᠯᠳᠤᠵᠤ ᠡᠬᠢᠯᠡᠵᠡᠢ᠃
ᠪᠠᠢᠯᠳᠤᠭᠠᠨ ᠡᠬᠢᠯᠡᠭᠡᠳ ᠬᠣᠶᠠᠳᠤᠭᠠᠷ ᠡᠳᠦᠷ ᠪᠣᠯᠬᠤ ᠳ᠋ᠤ᠌ ᠰᠢᠨᠡᠯᠡᠮᠡ ᠪᠠᠶᠠᠨᠰᠢᠯᠢ ᠶ᠋ᠢᠨ ᠥᠨᠳᠥᠷᠯᠢᠭ ᠭᠠᠵᠠᠷ ᠢ᠋ᠶ᠋ᠠᠷ ᠪᠠᠢᠯᠳᠤᠭᠠᠨ ᠢ᠋ ᠵᠢᠯᠣᠭᠣᠳᠴᠤ ᠪᠠᠢᠭᠠᠳ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠳᠠᠪᠠᠭᠤ ᠬᠦᠴᠦᠨ ᠢ᠋ ᠠᠵᠢᠭᠯᠠᠵᠤ ᠦᠵᠡᠭᠡᠳ ᠬᠣᠷᠢᠶᠠᠨ ᠤ᠋ ᠪᠤᠰᠤᠳ ᠨᠣᠶᠠᠳ ᠮᠥᠩᠬᠡᠥ᠌ᠯᠵᠡᠢ᠂ ᠬᠡᠰᠢᠭᠳᠠᠯᠠᠢ᠂ ᠨᠠᠢᠷᠠᠯᠲᠤ᠂ ᠯᠦᠩᠷᠥᠪ ᠵᠡᠷᠭᠡ ᠬᠥᠮᠦᠰ ᠲᠡᠭᠡᠨ᠄《ᠵᠢᠩ ᠶᠤᠸᠠᠢ ᠰᠢᠦ ᠰᠦᠷ ᠲᠡᠢ ᠪᠠᠢᠨᠠ᠂ ᠬᠦᠴᠦ ᠲᠡᠢ ᠴᠦ᠍ ᠪᠠᠢᠨᠠ ᠳᠠ! ᠪᠢᠳᠡ ᠲᠡᠭᠦᠨ ᠢ᠋ ᠤᠯᠠᠮ ᠰᠦᠷ ᠲᠡᠢ ᠪᠣᠯᠭᠠᠵᠤ ᠪᠠᠢᠭᠠᠳ ᠰᠠᠶᠢ ᠮᠡᠳᠡᠶᠡ ᠳᠠ!》 ᠭᠡᠪᠡ᠃ ᠲᠡᠷᠡ ᠬᠠᠷᠪᠤᠵᠤ ᠫᠤᠤᠳᠠᠬᠤ ᠳ᠋ᠠᠭᠠᠨ ᠰᠠᠢᠨ ᠪᠠᠲᠤᠰᠡᠷᠡᠩ ᠢ᠋ ᠳᠠᠭᠠᠭᠤᠯᠤᠨ ᠪᠠᠢᠯᠳᠤᠭᠠᠨ ᠤ᠋ ᠡᠮᠦᠨᠡ ᠹᠷᠣᠨᠲ ᠢ᠋ᠶ᠋ᠠᠷ ᠲᠣᠭᠣᠷᠢᠨ ᠵᠢᠯᠣᠭᠣᠳᠴᠤ ᠶᠠᠪᠤᠬᠤ ᠵᠠᠭᠤᠷᠠ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠪᠠᠷᠠᠭᠤᠨ ᠡᠮᠦᠨᠡᠬᠢ ᠬᠣᠩᠬᠣᠳᠠᠢ ᠶ᠋ᠢᠨ ᠪᠠᠯᠠᠷ ᠲᠤ᠌ ᠪᠠᠢᠯᠳᠤᠵᠤ ᠪᠠᠢᠭᠠ ᠨᠢᠭᠡᠳᠦᠭᠡᠷ ᠯᠢᠶᠠᠨ ᠤ᠋ ᠴᠡᠷᠢᠭ ᠵᠦᠭ ᠶᠠᠪᠤᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ《ᠰᠢᠨᠠᠯᠠᠮᠠ ᠶ᠋ᠢ ᠠᠮᠢᠳᠤ ᠪᠠᠷ ᠪᠠᠷᠢᠶᠠ᠁》 ᠭᠡᠮᠡᠨ ᠬᠠᠰᠬᠢᠷᠤᠯᠳᠤᠨ ᠨᠢᠭᠡ ᠪᠦᠯᠦᠭ ᠴᠡᠷᠢᠭ ᠥᠭᠡᠳᠡ ᠡᠴᠡ ᠨᠢ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠳᠠᠭᠠᠷᠢᠨ ᠢᠷᠡᠯᠡ᠃ ᠰᠢᠨᠠᠯᠠᠮᠠ ᠪᠡᠶᠡ ᠳ᠋ᠡᠭᠡᠨ ᠫᠤᠤ ᠦᠭᠡᠢ᠂ ᠭᠠᠭᠴᠠ ᠬᠦ᠌ ᠪᠠᠲᠤᠰᠡᠷᠡᠩ ᠫᠤᠤ ᠲᠠᠢ ᠪᠠᠢᠵᠠᠢ᠃ ᠲᠡᠷᠡ ᠬᠣᠶᠠᠭᠤᠯᠠ ᠮᠣᠷᠢᠨ ᠤ᠋ ᠵᠢᠯᠣᠭᠣ ᠶ᠋ᠢ ᠰᠤᠩᠭᠠᠨ ᠵᠠᠢᠯᠠᠬᠤ ᠶ᠋ᠢᠨ ᠳᠠᠭᠠᠤ ᠪᠠᠲᠤᠰᠡᠷᠡᠩ ᠮᠣᠷᠢᠨ ᠳᠡᠭᠡᠷᠡ ᠡᠴᠡ ᠪᠡᠨ ᠭᠡᠳᠡᠷᠭᠡᠨ ᠬᠠᠷᠪᠤᠵᠤ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠮᠣᠷᠢ ᠨᠢ ᠭᠡᠨᠡᠳᠲᠡ ᠵᠡᠷᠯᠢᠭ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠵᠤ ᠬᠥᠮᠦᠨ ᠲᠡᠢ ᠮᠣᠷᠢ ᠲᠠᠢ ᠪᠠᠨ ᠣᠢᠴᠢᠴᠢᠬᠠᠯᠠ᠃ ᠪᠠᠲᠤᠰᠡᠷᠡᠩ ᠳᠣᠣᠷᠠ ᠨᠢ ᠮᠣᠷᠢ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ᠂《ᠲᠤᠸᠠᠨᠵᠠᠩ ᠪᠠᠭᠰᠢ ᠠ᠋! ᠲᠠ ᠮᠢᠨᠦ ᠮᠣᠷᠢ ᠶ᠋ᠢ ᠤᠨᠤᠭᠠᠳ ᠬᠤᠷᠳᠤᠨ ᠳᠤᠲᠠᠭᠠ! ᠪᠢ ᠲᠠᠨ ᠢ᠋ ᠬᠠᠮᠠᠭᠠᠯᠠᠶᠠ!》 ᠭᠡᠳ ᠮᠣᠷᠢ ᠪᠠᠨ ᠤᠨᠤᠭᠤᠯᠤᠨ ᠳᠣᠪᠲᠣᠯᠭᠠᠪᠠ᠃ ᠪᠠᠲᠤᠰᠡᠷᠡᠩ ᠦ᠋ᠨ ᠬᠣᠷᠢᠭᠯᠠᠯᠲᠠ ᠪᠠᠷ ᠰᠢᠨᠡᠯᠡᠮᠡ ᠨᠡᠯᠢᠶᠡᠳ ᠬᠣᠯᠠ ᠳᠠᠪᠬᠢᠨ ᠶᠠᠪᠤᠯᠠ᠃ ᠪᠠᠲᠤᠰᠡᠷᠡᠩ ᠴᠠᠢᠳᠠᠮ ᠤ᠋ᠨ ᠭᠣᠣᠯ ᠳ᠋ᠤ᠌ ᠬᠡᠪᠲᠡᠭᠡᠳ ᠨᠡᠬᠡᠮᠵᠢᠯᠡᠨ ᠢᠷᠡᠬᠦ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠤᠭᠲᠤᠨ ᠭᠠᠯᠯᠠᠵᠤ ᠡᠷᠭᠢᠨ ᠬᠥᠷᠪᠡᠨ ᠮᠥᠯᠬᠥᠵᠦ ᠪᠠᠢᠭᠰᠠᠭᠠᠷ ᠰᠠᠨᠠᠭᠠᠨ ᠳ᠋ᠤ᠌ ᠦᠭᠡᠢ ᠪᠡᠷ ᠴᠠᠢᠳᠠᠮ ᠤ᠋ᠨ ᠳᠤᠮᠳᠠᠬᠢ ᠮᠠᠯ ᠤᠰᠤᠯᠠᠳᠠᠭ ᠠᠯᠮᠠᠨ ᠬᠤᠳᠳᠤᠭ ᠲᠤ᠌ ᠣᠷᠣᠴᠢᠬᠠᠯᠠ᠃ ᠡᠨᠡ ᠬᠠᠷᠢᠨ ᠤᠰᠤ ᠦᠭᠡᠢ ᠬᠠᠭᠤᠷᠠᠢ ᠬᠤᠳᠳᠤᠭ ᠪᠠᠢᠵᠤ ᠪᠤᠷᠬᠠᠨ ᠵᠠᠪᠰᠠᠷᠯᠠᠯᠠ᠃ ᠢᠩᠭᠢᠭᠡᠳ ᠲᠡᠷᠡ ᠪᠡᠶᠡ ᠪᠡᠨ ᠳᠠᠯᠳᠠᠯᠠᠵᠤ ᠠᠶᠤᠮᠰᠢᠭ ᠦᠭᠡᠢ ᠳᠠᠭᠠᠷᠢᠨ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠢ᠋ ᠨᠢᠭᠡᠳ ᠨᠢᠭᠡ ᠪᠡᠷ ᠬᠠᠷᠪᠤᠨ ᠤᠨᠠᠭᠠᠵᠤ ᠪᠠᠢᠯᠠ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠰᠤᠮᠤ ᠮᠥᠨᠳᠥᠷ ᠤᠨᠠᠭᠰᠠᠨ ᠮᠡᠲᠦ ᠲᠣᠰᠴᠤ ᠪᠠᠢᠪᠠᠴᠤ ᠬᠤᠳᠳᠤᠭ ᠳᠣᠲᠣᠷᠠᠬᠢ ᠬᠥᠮᠦᠨ ᠢ᠋ ᠬᠡᠷᠬᠢᠨ ᠣᠨᠣᠭᠠᠵᠤ ᠴᠢᠳᠠᠬᠤ ᠠᠵᠢ᠃ ᠬᠠᠷᠢᠨ ᠨᠢᠴᠦᠭᠦᠨ ᠲᠠᠯᠠ ᠳᠡᠭᠡᠷᠡ ᠳᠠᠭᠠᠷᠢᠨ ᠢᠷᠡᠬᠦ ᠴᠡᠷᠢᠭ ᠢ᠋ ᠲᠡᠷᠡ ᠨᠢᠭᠡᠳ ᠨᠢᠭᠡ ᠪᠡᠷ ᠲᠣᠨᠢᠯᠭᠠᠵᠤ᠂ ᠡᠨᠡ ᠬᠦ᠌ ᠪᠢᠴᠢᠬᠠᠨ ᠪᠡᠬᠢᠯᠡᠯᠲᠡ ᠡᠴᠡ ᠨᠡᠢᠲᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠳᠡᠭᠡᠷᠡᠮ ᠦ᠋ᠨ ᠴᠡᠷᠢᠭ ᠢ᠋ ᠤᠰᠠᠳᠬᠠᠭᠰᠠᠨ ᠪᠢᠯᠡ᠃ ᠲᠡᠷᠡ ᠦᠬᠦᠭᠰᠡᠨ ᠴᠡᠷᠢᠭ ᠦ᠋ᠨ ᠫᠤᠤ ᠰᠤᠮᠤ ᠶ᠋ᠢ ᠬᠣᠷᠢᠶᠠᠨ ᠴᠤᠭᠯᠠᠭᠤᠯᠵᠤ ᠨᠢᠭᠡ ᠳᠣᠣᠷᠠ ᠣᠪᠣᠭᠠᠯᠠᠭᠠᠳ ᠬᠠᠵᠠᠭᠤ ᠳ᠋ᠤᠨᠢ ᠰᠠᠭᠤᠵᠤ ᠲᠠᠮᠠᠬᠢ ᠰᠣᠷᠣᠨ ᠲᠡᠢᠨ ᠦ᠌ ᠶᠠᠳᠠᠷᠠᠭᠠ ᠪᠠᠨ ᠳᠡᠢᠯᠦᠨᠡ᠃ ᠭᠡᠨᠡᠳᠲᠡ ᠪᠠᠷᠠᠭᠤᠨ ᠵᠦᠭ ᠡᠴᠡ ᠲᠣᠭᠣᠰᠣ ᠮᠠᠨᠠᠨ ᠲᠠᠲᠠᠭᠰᠠᠭᠠᠷ ᠨᠢᠭᠡ ᠪᠦᠯᠦᠭ ᠮᠣᠷᠢᠲᠤ ᠴᠡᠷᠢᠭ ᠳᠠᠪᠬᠢᠨ ᠠᠢᠰᠤᠢ᠃ ᠪᠠᠲᠤᠰᠡᠷᠡᠩ ᠳᠣᠲᠣᠷᠠ ᠪᠠᠨ᠄《ᠣᠳᠣ ᠴᠤ᠌ ᠪᠠᠷᠠᠯᠠ ᠳᠠ! ᠶᠠᠭᠤ ᠴᠤ᠌ ᠭᠡᠰᠡᠨ ᠫᠤᠤᠳᠠᠵᠤ ᠪᠠᠢᠭᠠᠳ ᠶᠠᠭᠠᠬᠢᠪᠠᠯ ᠶᠠᠭᠠᠬᠢᠭ!》 ᠭᠡᠵᠦ ᠪᠣᠳᠣᠨᠠ᠃ ᠲᠡᠷᠡ ᠣᠯᠵᠠᠯᠠᠭᠰᠠᠨ ᠫᠤᠤ ᠰᠤᠮᠤ ᠪᠠᠨ ᠡᠭᠦᠷᠦᠨ ᠪᠢᠴᠢᠬᠠᠨ ᠪᠡᠬᠢᠯᠡᠯᠲᠡ ᠳ᠋ᠡᠭᠡᠨ ᠳᠠᠬᠢᠨ ᠣᠷᠣᠵᠤ ᠬᠠᠷᠪᠤᠬᠤ ᠪᠠᠷ ᠫᠤᠤ ᠪᠠᠨ ᠴᠡᠨᠡᠭᠯᠡᠨ ᠬᠦᠯᠢᠶᠡᠵᠦ ᠪᠠᠢᠲᠠᠯᠠ᠂ ᠲᠡᠳᠡᠨᠦᠰ ᠨᠢ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠰᠢᠭ ᠦᠵᠡᠭᠳᠡᠪᠡ᠃ ᠤᠤᠯ ᠨᠢ ᠰᠢᠨᠠᠯᠠᠮᠠ ᠨᠢᠭᠡᠳᠦᠭᠡᠷ ᠯᠢᠶᠠᠨ ᠤ᠋ ᠨᠢᠭᠡ ᠰᠠᠯᠠᠭᠠ ᠮᠣᠷᠢᠲᠤ ᠴᠡᠷᠢᠭ ᠢ᠋ ᠳᠠᠭᠠᠭᠤᠯᠤᠨ ᠪᠠᠲᠤᠰᠡᠷᠡᠩ ᠢ᠋ ᠠᠪᠤᠷᠠᠬᠤ ᠪᠠᠷ ᠢᠷᠡᠭᠰᠡᠨ ᠪᠠᠢᠵᠠᠢ᠃ ᠪᠠᠲᠤᠰᠡᠷᠡᠩ ᠪᠠᠶᠠᠷᠯᠠᠭᠰᠠᠨ ᠳ᠋ᠠᠭᠠᠨ ᠲᠡᠳᠡᠨ ᠢ᠋ ᠦᠵᠡᠮᠡᠭᠴᠡ᠄《ᠠᠷᠪᠠᠨ ᠵᠢᠷᠭᠤᠭᠠ》 ᠭᠡᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠬᠠᠰᠬᠢᠷᠤᠨᠠ᠃ ᠲᠡᠳᠡ ᠶᠠᠭᠤᠨ ᠤ᠋ ᠠᠷᠪᠠᠨ ᠵᠢᠷᠭᠤᠭᠠ ᠭᠡᠳᠡᠭ ᠢ᠋ ᠣᠢᠯᠠᠭᠠᠬᠤ ᠦᠭᠡᠢ ᠡᠨᠡ ᠠᠪᠤᠭᠠᠢ ᠰᠣᠯᠢᠶᠠᠷᠠᠴᠢᠬᠠᠭᠰᠠᠨ ᠪᠢᠰᠢ ᠪᠠ? ᠭᠡᠵᠦ ᠭᠠᠢᠬᠠᠰᠢ ᠠᠯᠳᠠᠵᠤ ᠪᠠᠢᠲᠠᠯᠠ ᠰᠠᠶᠢ ᠬᠣᠶᠠᠷᠬᠠᠨ ᠴᠠᠭ ᠤ᠋ᠨ ᠵᠠᠪᠰᠠᠷ ᠲᠤ᠌ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠳᠡᠭᠡᠷᠡᠮ ᠢ᠋ ᠤᠰᠠᠳᠬᠠᠭᠰᠠᠨ ᠭᠡᠳᠡᠭ ᠢ᠋ ᠣᠢᠯᠠᠭᠠᠭᠠᠳ ᠬᠠᠮᠲᠤ ᠪᠠᠷ ᠪᠠᠶᠠᠷᠯᠠᠯᠳᠤᠨᠠ᠃
ᠪᠠᠲᠤᠰᠡᠷᠡᠩ ᠦ᠋ᠨ ᠬᠣᠶᠠᠷ ᠨᠢᠳᠦ ᠨᠢ ᠤᠭ ᠠ᠋ᠴᠠ ᠪᠠᠨ ᠲᠣᠮᠣ ᠪᠥᠭᠡᠳ ᠬᠤᠷᠴᠠᠯᠢᠭ ᠬᠠᠷᠠᠴᠠ ᠲᠠᠢ ᠪᠠᠢᠵᠠᠢ᠃ ᠰᠡᠭᠦᠯᠡᠷ ᠨᠢ ᠬᠥᠮᠦᠰ ᠪᠠᠲᠤᠰᠡᠷᠡᠩ ᠬᠡᠳᠦᠬᠡᠨ ᠴᠠᠭ ᠤ᠋ᠨ ᠳᠣᠲᠣᠷᠠ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠳᠠᠢᠰᠤᠨ ᠢ᠋ ᠠᠯᠠᠴᠢᠬᠠᠭᠠᠳ ᠨᠢᠳᠦ ᠨᠢ ᠤᠯᠠᠮ ᠰᠦᠷ ᠲᠡᠢ ᠪᠥᠭᠡᠳ ᠲᠣᠮᠣ ᠬᠠᠷᠠᠭᠳᠠᠬᠤ ᠪᠣᠯᠴᠢᠬᠠᠵᠠᠢ ᠭᠡᠵᠦ ᠬᠡᠯᠡᠯᠴᠡᠳᠡᠭ᠃
ᠪᠠᠲᠤᠰᠡᠷᠡᠩ ᠰᠢᠨᠠᠯᠠᠮᠠ ᠶ᠋ᠢ ᠳᠠᠭᠠᠵᠤ ᠨᠢᠭᠡᠳᠦᠭᠡᠷ ᠯᠢᠶᠠᠨ ᠤ᠋ ᠪᠠᠢᠯᠳᠤᠭᠴᠢᠳ ᠲᠠᠢ ᠬᠠᠮᠲᠤ ᠪᠠᠷ ᠨᠠᠷᠭᠢᠵᠤ ᠶᠠᠪᠤᠬᠤ ᠳ᠋ᠠᠭᠠᠨ᠄《ᠡᠨᠡ ᠤᠳᠠᠭᠠ ᠶ᠋ᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠪᠢ16 ᠶ᠋ᠢ ᠨᠢ ᠠᠯᠠᠴᠢᠬᠠᠭᠰᠠᠨ ᠰᠢᠦ! ᠣᠳᠣ ᠲᠠᠨᠤᠰ ᠶᠠᠭᠠᠬᠢᠵᠤ ᠪᠠᠢᠨᠠ ᠤᠤ?᠁》 ᠭᠡᠵᠦ ᠱᠣᠭ ᠭᠠᠷᠭᠠᠨᠠ᠃ ᠪᠤᠰᠤᠳ ᠨᠢ ᠮᠠᠨᠤᠰ ᠥᠨᠥᠳᠥᠷ ᠪᠡᠶᠡᠯᠡᠭᠦᠯᠦᠭᠰᠡᠨ ᠦᠭᠡᠢ ᠪᠣᠯᠪᠠᠴᠤ ᠮᠠᠷᠭᠠᠰᠢ ᠪᠡᠶᠡᠯᠡᠭᠦᠯᠴᠢᠬᠡᠨᠡ! ᠭᠡᠳ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠶ᠋ᠢ ᠠᠰᠢᠭᠯᠠᠨ ᠦᠷᠭᠦᠯᠵᠢᠯᠡᠨ ᠪᠠᠢᠯᠳᠤᠬᠤ ᠪᠠᠷ ᠠᠭᠲᠠ ᠶ᠋ᠢᠨ ᠵᠢᠯᠣᠭᠣ ᠰᠤᠩᠭᠠᠵᠠᠭᠠᠨᠠ᠃
ᠵᠠᠮᠢᠶᠠᠨᠵᠠᠪ ᠤ᠋ᠨ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠤ᠋ ᠬᠡᠳᠦᠨ ᠪᠠᠢᠯᠳᠤᠭᠴᠢ ᠴᠠᠭᠳᠠᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠲᠠᠪᠤᠨ ᠴᠡᠷᠢᠭ ᠰᠢᠪᠠᠭ ᠳᠤᠮᠳᠠ ᠤᠨᠲᠠᠵᠤ ᠪᠠᠢᠭᠠ ᠶ᠋ᠢ ᠣᠯᠵᠤ ᠦᠵᠡᠪᠡ᠃ ᠲᠡᠳᠡᠨᠦᠰ ᠮᠣᠷᠢ ᠪᠠᠨ ᠪᠤᠷᠭᠠᠰᠤᠨ ᠳᠣᠲᠣᠷᠠ ᠤᠶᠠᠴᠢᠬᠠᠭᠠᠳ ᠫᠤᠤ ᠪᠠᠨ ᠠᠳᠬᠤᠨ ᠮᠥᠯᠬᠥᠭᠰᠡᠭᠡᠷ ᠬᠠᠵᠠᠭᠤ ᠳ᠋ᠤᠨᠢ ᠬᠦᠷᠴᠦ ᠣᠴᠢᠪᠠ᠃ ᠳᠠᠢᠰᠤᠨ ᠤ᠋ ᠳᠡᠷᠭᠡᠳᠡ ᠨᠢᠭᠡᠨ ᠬᠦᠨᠳᠦ ᠵᠢᠭᠤᠸᠠᠨᠴᠢᠶᠠᠩ ᠲᠠᠯᠪᠢᠭᠠᠲᠠᠢ ᠪᠠᠢᠬᠤ ᠶ᠋ᠢ ᠦᠵᠡᠭᠡᠳ ᠡᠨᠡ ᠰᠢᠨᠡ ᠮᠠᠶᠢᠭ ᠤ᠋ᠨ ᠵᠡᠪᠰᠡᠭ ᠨᠢ ᠳᠡᠭᠡᠷᠡᠮ ᠡᠴᠡ ᠴᠢᠬᠤᠯᠠ ᠰᠠᠨᠠᠭᠳᠠᠵᠤ᠂ ᠤᠷᠢᠳ ᠢ᠋ᠶ᠋ᠠᠷ ᠵᠢᠭᠤᠸᠠᠨᠴᠢᠶᠠᠩ ᠢ᠋ ᠨᠢ ᠪᠤᠯᠢᠶᠠᠵᠤ ᠳᠠᠷᠠᠭᠠ ᠨᠢ ᠰᠠᠶᠢ ᠲᠡᠷᠡ ᠲᠠᠪᠤᠭᠤᠯᠠ ᠶ᠋ᠢ ᠣᠯᠵᠠᠯᠠᠪᠠ᠃ ᠢᠩᠭᠢᠭᠡᠳ ᠡᠨᠡ ᠬᠡᠳᠦᠨ ᠪᠠᠢᠯᠳᠤᠭᠴᠢ ᠨᠢᠭᠡ ᠫᠤᠤ ᠴᠤ᠌ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ ᠪᠡᠷ ᠲᠠᠪᠤᠨ ᠴᠡᠷᠢᠭ ᠪᠣᠯᠤᠨ ᠨᠢᠭᠡ ᠰᠢᠨᠡ ᠮᠠᠶᠢᠭ ᠤ᠋ᠨ ᠵᠡᠪᠰᠡᠭ ᠣᠯᠤᠭᠰᠠᠨ ᠳ᠋ᠠᠭᠠᠨ ᠣᠨᠴᠠᠭᠠᠢ ᠪᠠᠶᠠᠷᠯᠠᠨ ᠣᠮᠣᠭᠰᠢᠵᠤ ᠯᠢᠶᠠᠨ ᠤ᠋ ᠵᠠᠬᠢᠷᠭᠠ ᠳ᠋ᠠᠭᠠᠨ ᠣᠴᠢᠵᠠᠢ᠃
ᠪᠠᠢᠯᠳᠤᠭᠠᠨ ᠦᠷᠭᠦᠯᠵᠢᠯᠡᠭᠡᠳ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠦ᠋ᠨ ᠦᠳᠡ ᠪᠣᠯᠬᠤ ᠳ᠋ᠤ᠌ ᠰᠢᠨᠡᠯᠡᠮᠡ᠂ ᠮᠥᠩᠬᠡᠦ᠌ᠯᠵᠠᠢ᠂ ᠬᠡᠰᠢᠭ᠌ᠳᠠᠯᠠᠢ ᠵᠡᠷᠭᠡ ᠬᠣᠷᠢᠶᠠᠨ ᠤ᠋ ᠨᠥᠬᠥᠳ ᠲᠡᠢ ᠪᠡᠨ ᠵᠥᠪᠳᠡᠯᠴᠡᠭᠡᠳ᠄《ᠪᠢᠳᠡ ᠰᠠᠨᠠᠭᠠᠴᠢᠯᠠᠭᠠ ᠲᠠᠢ ᠪᠠᠷ ᠤᠮᠠᠷᠠᠰᠢ ᠤᠬᠤᠷᠢᠵᠤ ᠲᠡᠳᠡᠨ ᠢ᠋ ᠬᠠᠮᠠᠷᠯᠠᠨ ᠬᠥᠲᠥᠯᠵᠦ ᠪᠠᠶᠠᠨᠰᠢᠯᠢ ᠶ᠋ᠢᠨ ᠪᠠᠷᠠᠭᠤᠨ ᠶᠡᠬᠡ ᠪᠠᠯᠠᠷ ᠪᠣᠯᠤᠨ ᠪᠤᠵᠠᠢ ᠶ᠋ᠢᠨ ᠶᠡᠬᠡ ᠪᠠᠯᠠᠷ ᠡᠯᠡᠰᠦ᠂ ᠪᠣᠷᠣᠯᠠᠨ ᠰᠢᠯᠢ ᠶ᠋ᠢᠨ ᠶᠡᠬᠡ ᠶᠠᠰᠢᠯᠲᠤ ᠣᠢ᠂ ᠮᠠᠩᠬᠠᠲᠤ ᠶ᠋ᠢᠨ ᠶᠡᠬᠡ ᠪᠤᠷᠭᠠᠰᠤᠨ ᠳ᠋ᠤ᠌ ᠣᠷᠣᠭᠤᠯᠵᠤ ᠳᠠᠬᠢᠨ ᠲᠡᠳᠡᠨ ᠢ᠋ ᠪᠦᠯᠦᠭ ᠪᠦᠯᠦᠭ ᠢ᠋ᠶ᠋ᠡᠷ ᠪᠠᠯᠠᠷ ᠡᠯᠡᠰᠦᠨ ᠳᠥᠭᠥᠮ ᠦ᠋ᠳ ᠲᠦ᠍ ᠬᠠᠭᠠᠵᠤ ᠤᠰᠠᠳᠬᠠᠶᠠ᠃ ᠨᠢᠭᠡ ᠪᠦᠯᠦᠭ ᠰᠠᠢᠨ ᠮᠣᠷᠢ ᠬᠤᠷᠴᠠ ᠵᠡᠪᠰᠡᠭ ᠲᠡᠢ ᠴᠡᠷᠢᠭ ᠳᠠᠢᠰᠤᠨ ᠤ᠋ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠨᠢ ᠭᠡᠨᠡᠳᠡᠭᠦᠯᠦᠨ ᠰᠢᠷᠦᠭᠦᠨ ᠳᠠᠭᠠᠷᠢᠵᠤ ᠠᠷᠤ ᠤᠲᠠᠰᠤ ᠶ᠋ᠢ ᠨᠢ ᠲᠠᠰᠤᠯᠬᠤ ᠶ᠋ᠢᠨ ᠳᠠᠭᠠᠤ ᠬᠣᠢᠰᠢ ᠳᠠᠭᠠᠷᠢᠯᠲᠠ ᠬᠢᠨᠡ》 ᠭᠡᠵᠦ ᠲᠣᠭᠲᠠᠭᠰᠠᠨ ᠪᠠᠢᠨᠠ᠃
ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠭᠡᠨᠡᠳᠲᠡ ᠤᠬᠤᠷᠢᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠳ᠋ᠤ᠌ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ《ᠵᠡᠭᠦᠳᠦ ᠪᠡᠷ ᠢ᠋ᠶ᠋ᠡᠨ ᠱᠠᠯᠪᠢᠩ ᠢᠳᠡᠭᠰᠡᠨ ᠰᠢᠭ》 ᠪᠠᠶᠠᠷᠯᠠᠵᠤ ᠰᠠᠨᠠᠭᠠ ᠠᠮᠤᠷ ᠤᠮᠠᠷᠠᠰᠢ ᠤᠷᠤᠭᠰᠢᠯᠠᠨᠠ᠃ ᠪᠠᠢᠯᠳᠤᠭᠠᠨ ᠤ᠋ ᠳᠥᠷᠪᠡᠳᠦᠭᠡᠷ ᠡᠳᠦᠷ ᠦ᠋ᠨ ᠣᠷᠣᠢ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦᠨᠳᠦᠰᠦᠨ ᠳ᠋ᠡᠭᠡᠨ ᠬᠠᠮᠠᠷᠯᠠᠭᠰᠠᠨ ᠲᠡᠮᠡᠭᠡ ᠬᠥᠲᠥᠯᠦᠭᠳᠡᠭᠰᠡᠨ ᠰᠢᠭ ᠪᠠᠯᠠᠷ ᠪᠠᠷᠲᠠᠭᠠᠯᠠᠩ ᠳ᠋ᠤ᠌ ᠤᠭᠤᠳᠠᠯᠠᠭᠳᠠᠨ ᠣᠷᠣᠬᠤ ᠳ᠋ᠤ᠌ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠲᠡᠳᠡᠨ ᠢ᠋ ᠪᠦᠯᠦᠭ ᠪᠦᠯᠦᠭ ᠢ᠋ᠶ᠋ᠡᠷ ᠬᠣᠮᠣᠷᠣᠨ ᠪᠦᠰᠡᠯᠡᠵᠦ ᠤᠰᠠᠳᠬᠠᠵᠤ ᠡᠬᠢᠯᠡᠪᠡ᠃
ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠪᠣᠯ ᠨᠤᠲᠤᠭ ᠤ᠋ᠨ ᠬᠥᠮᠦᠰ ᠲᠤᠯᠠ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠪᠠᠨ ᠰᠠᠢᠨ ᠣᠢᠯᠠᠭᠠᠵᠤ ᠳᠥᠭᠥᠮ ᠳᠠᠯᠠᠩ ᠤ᠋ᠨ ᠬᠠᠮᠢᠭᠠᠭᠤᠷ ᠨᠢ ᠪᠠᠢᠬᠤ ᠶ᠋ᠢ ᠰᠢᠷᠡᠯᠲᠡᠯᠡ ᠲᠣᠳᠣᠷᠬᠠᠢ ᠮᠡᠳᠡᠨᠡ᠂ ᠤᠨᠤᠭᠰᠠᠨ ᠮᠣᠷᠢ ᠨᠢ ᠦᠦᠰᠢᠨ ᠠᠳᠤᠭᠤᠨ ᠤ᠋ ᠤᠨᠠᠭᠠ ᠲᠤᠯᠠ ᠪᠠᠯᠠᠷ ᠡᠯᠡᠰᠦ ᠮᠠᠩᠬᠠᠨ ᠳ᠋ᠤ᠌ ᠳᠣᠪᠲᠣᠯᠵᠤ ᠭᠦᠶᠦᠬᠦ ᠳ᠋ᠦ᠍ ᠳᠠᠳᠬᠠᠯᠰᠢᠭᠰᠠᠨ ᠮᠣᠷᠢᠳ ᠶᠤᠮ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠮᠣᠷᠢᠳ ᠨᠢ ᠡᠯᠡᠰᠦ ᠮᠠᠩᠬᠠᠨ ᠳ᠋ᠤ᠌ ᠭᠦᠶᠦᠵᠦ ᠳᠣᠪᠲᠣᠯᠬᠤ ᠪᠠᠷ ᠮᠠᠭᠤ᠂ ᠵᠣᠭᠰᠣᠵᠤ ᠪᠣᠭᠰᠢᠴᠢᠬᠠᠭᠰᠠᠨ ᠮᠣᠷᠢᠳ ᠣᠯᠠᠨ ᠭᠠᠷᠴᠠᠢ᠃ ᠢᠯᠠᠩᠭᠤᠶᠠ ᠣᠯᠠᠩᠬᠢ ᠴᠡᠷᠢᠭ ᠨᠢ ᠰᠢᠷᠠ ᠬᠥᠷᠥᠰᠥᠲᠦ ᠥᠨᠳᠥᠷᠯᠢᠭ ᠦ᠋ᠨ ᠠᠭᠤᠯᠠ ᠵᠡᠪᠡ᠂ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠵᠡᠷᠭᠡ ᠢᠪᠴᠤᠤ ᠭᠠᠵᠠᠷ ᠢ᠋ᠶ᠋ᠠᠷ ᠲᠠᠷᠢᠶᠠᠯᠠᠵᠤ ᠠᠮᠢᠳᠤᠷᠠᠭᠰᠠᠨ ᠪᠤᠶᠤ ᠬᠣᠲᠠ ᠪᠠᠯᠭᠠᠰᠤᠨ ᠳ᠋ᠤ᠌ ᠰᠠᠭᠤᠭᠠ ᠬᠥᠮᠦᠰ ᠲᠤᠯᠠ ᠬᠥᠳᠡᠭᠡ ᠶ᠋ᠢᠨ ᠬᠠᠷᠠᠩᠭᠤᠢ ᠣᠢ ᠲᠠᠢ ᠪᠠᠯᠠᠷ ᠮᠠᠩᠬᠠᠨ ᠳ᠋ᠤ᠌ ᠪᠠᠢᠯᠳᠤᠬᠤ ᠪᠠᠢᠲᠤᠭᠠᠢ ᠨᠢᠭᠡ ᠬᠣᠶᠠᠷ ᠢ᠋ᠶ᠋ᠠᠷ ᠶᠠᠪᠤᠬᠤ ᠠ᠋ᠴᠠ ᠴᠤ᠌ ᠵᠢᠷᠦᠬᠡᠰᠢᠶᠡᠵᠦ《ᠮᠠ ᠶᠣᠣ(妈哟)!》 ᠭᠡᠵᠦ ᠠᠶᠤᠳᠠᠰ ᠬᠦᠷᠳᠡᠭ ᠭᠡᠨᠡ᠃ ᠬᠡᠳᠦᠢᠪᠡᠷ ᠡᠢᠮᠦ ᠦᠭᠡᠨᠴᠡ ᠳᠣᠷᠣᠢ ᠲᠠᠯᠠ ᠲᠠᠢ ᠪᠣᠯᠪᠠᠴᠤ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠵᠡᠭᠦᠨ ᠬᠣᠢᠲᠤ ᠪᠡᠶᠡ ᠶ᠋ᠢᠨ ᠮᠠᠯᠴᠢᠨ ᠲᠦᠮᠡᠨ ᠦ᠌ ᠢᠳᠡᠭᠡᠨ ᠦ᠌ ᠳᠠᠪᠤᠰᠤ ᠪᠣᠯᠤᠨ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠠᠯᠪᠠᠨ ᠵᠠᠷᠤᠳᠠᠯ ᠢ᠋ ᠰᠢᠢᠳᠪᠦᠷᠢᠯᠡᠳᠡᠭ ᠬᠥᠬᠡᠲᠣᠯᠣᠭᠠᠢ ᠶ᠋ᠢᠨ ᠳᠠᠪᠤᠰᠤᠨ ᠨᠠᠭᠤᠷ ᠢ᠋ ᠪᠤᠯᠢᠶᠠᠨ ᠡᠵᠡᠯᠡᠬᠦ ᠪᠡᠷ ᠵᠣᠷᠢᠯᠭᠠ ᠲᠠᠢ ᠪᠠᠢᠭᠰᠠᠨ ᠵᠢᠩ ᠶᠤᠸᠠᠢ ᠰᠢᠦ᠂ ᠪᠣᠷᠣᠯᠠᠨ ᠰᠢᠯᠢ ᠶ᠋ᠢᠨ ᠥᠨᠳᠥᠷ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠬᠣᠢᠰᠢ ᠪᠠᠨ ᠳᠤᠷᠠᠨᠳᠠᠵᠤ ᠦᠵᠡᠭᠡᠳ᠄《ᠦ! ᠲᠠᠨᠤᠰ ᠦᠵᠡᠬᠦ ᠦᠭᠡᠢ ᠤᠤ? ᠬᠥᠬᠡᠲᠣᠯᠣᠭᠠᠢ ᠶ᠋ᠢᠨ ᠳᠠᠪᠤᠰᠤᠨ ᠨᠠᠭᠤᠷ ᠡᠨᠡ ᠠᠷᠤ ᠳ᠋ᠤ᠌ ᠪᠠᠢᠬᠤ ᠪᠢᠰᠢ ᠤᠤ!᠁》 ᠭᠡᠵᠦ ᠪᠠᠶᠠᠷᠯᠠᠨᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠪᠠᠢᠭᠰᠠᠨ ᠹᠦᠭᠤᠸᠠᠨ ᠵᠠᠪᠰᠠᠷ ᠠ᠋ᠴᠠ ᠨᠢ ᠦᠭᠡ ᠡᠯᠭᠦᠵᠦ᠄《ᠳᠠᠪᠤᠰᠤᠨ ᠨᠠᠭᠤᠷ ᠡᠨᠳᠡ ᠡᠴᠡ ᠪᠠᠷᠤᠭ ᠨᠠᠶᠠᠭᠠᠳ ᠰᠢᠬᠠᠮ ᠭᠠᠵᠠᠷ ᠪᠣᠢ! ᠥᠨᠥ ᠰᠧᠯᠢᠩ ᠳ᠋ᠦ᠍ ᠦᠵᠡᠭᠳᠡᠳᠡᠭ ᠨᠢ ᠪᠢᠴᠢᠬᠠᠨ ᠣᠮᠪᠣᠢ ᠶ᠋ᠢᠨ ᠨᠠᠭᠤᠷ ᠰᠢᠦ! ᠪᠢ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠠᠪᠤ ᠪᠠᠨ ᠳᠠᠭᠠᠵᠤ ᠲᠡᠮᠡᠭᠡ ᠪᠡᠷ ᠣᠯᠠᠨ ᠤᠳᠠᠭᠠ ᠳᠠᠪᠤᠰᠤ ᠲᠡᠭᠡᠭᠡᠪᠦᠷᠢᠯᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠬᠥᠬᠡᠲᠣᠯᠣᠭᠠᠢ ᠶ᠋ᠢᠨ ᠨᠠᠭᠤᠷ ᠡᠨᠳᠡ ᠡᠴᠡ ᠦᠵᠡᠭᠳᠡᠬᠦ ᠦᠭᠡᠢ᠁》 ᠭᠡᠮᠡᠨ ᠬᠠᠷᠠᠭᠤᠯᠵᠠᠢ᠃ ᠬᠥᠬᠡᠨᠠᠭᠤᠷ᠂ ᠪᠠᠷᠰᠤᠩᠭᠠ ᠶ᠋ᠢᠨ ᠨᠠᠭᠤᠷ᠂ ᠣᠮᠪᠣᠢ ᠶ᠋ᠢᠨ ᠨᠠᠭᠤᠷ ᠵᠡᠷᠭᠡ ᠳᠠᠪᠤᠰᠤ ᠬᠤᠵᠢᠷ ᠭᠠᠷᠳᠠᠭ ᠦᠭᠡᠢ ᠪᠠᠭᠠ ᠨᠠᠭᠤᠷ ᠤ᠋ᠳ ᠤ᠋ᠨ ᠠᠯᠢ ᠶ᠋ᠢ ᠨᠢ ᠡᠨᠳᠡᠭᠦᠦ ᠦᠵᠡᠴᠢᠬᠡᠭᠡᠳ ᠬᠣᠭᠣᠰᠣᠨ ᠪᠠᠶᠠᠷᠯᠠᠭᠰᠠᠨ ᠨᠢ ᠡᠨᠡ ᠪᠠᠢᠵᠠᠢ᠃
ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠬᠣᠯᠪᠣᠭᠠᠴᠢᠨ ᠴᠡᠷᠢᠭ ᠬᠦᠷᠴᠦ ᠢᠷᠡᠭᠡᠳ ᠵᠢᠩ ᠶᠤᠸᠠᠢ ᠰᠢᠦ ᠳ᠋ᠦ᠍ ᠨᠢᠭᠡᠨ ᠪᠠᠴᠢᠮ ᠮᠡᠳᠡᠭᠦᠯᠦᠯᠲᠡ ᠶ᠋ᠢᠨ ᠪᠢᠴᠢᠭ ᠭᠠᠷᠳᠠᠭᠤᠯᠪᠠ᠃ ᠡᠨᠡ ᠨᠢ ᠳᠠᠷᠤᠢ ᠡᠮᠦᠨᠡᠬᠢ ᠪᠠᠢᠯᠳᠤᠭᠠᠨ ᠨᠡᠢᠳᠡᠮ ᠢᠯᠠᠭᠳᠠᠵᠤ ᠪᠠᠢᠭᠠ ᠪᠠᠢᠳᠠᠯ ᠢ᠋ᠶ᠋ᠠᠨ ᠮᠡᠳᠡᠭᠦᠯᠦᠭᠰᠡᠨ ᠪᠢᠴᠢᠭ ᠪᠠᠢᠭᠰᠠᠨ ᠪᠣᠯᠤᠯᠲᠠᠢ! ᠲᠡᠷᠡ ᠦᠵᠡᠭᠡᠳ ᠠᠭᠤᠷ ᠲᠠᠢ ᠪᠠᠷ᠄《ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠪᠤᠳᠠᠭᠠᠨ ᠲᠤᠯᠤᠮ ᠤ᠋ᠳ᠂ ᠨᠣᠬᠠᠢ ᠲᠡᠵᠢᠭᠡᠭᠰᠡᠨ ᠳ᠋ᠦ᠍ ᠴᠦ᠍ ᠬᠦᠷᠬᠦ ᠦᠭᠡᠢ᠁》 ᠭᠡᠵᠦ ᠵᠠᠩᠳᠤᠷᠤᠨᠠ᠃ ᠵᠢᠩ ᠶᠤᠸᠠᠢ ᠰᠢᠦ ᠳᠤᠷᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠪᠠᠢᠯᠳᠤᠭᠠᠨ ᠤ᠋ ᠡᠮᠦᠨᠡ ᠹᠷᠣᠨᠲ ᠤ᠋ᠨ ᠪᠠᠢᠳᠠᠯ ᠢ᠋ ᠦᠵᠡᠵᠦ ᠦᠵᠡᠭᠡᠳ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ ᠪᠠᠷ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠵᠦᠭ ᠤᠬᠤᠷᠢᠯᠠ᠃
ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠡᠮᠦᠨᠡ ᠡᠳᠦᠷ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠤᠬᠤᠷᠢᠵᠤ ᠬᠥᠳᠡᠭᠡ ᠬᠡᠭᠡᠷᠡ ᠪᠠᠯᠠᠷ ᠪᠤᠷᠭᠠᠰᠤᠨ ᠳᠥᠭᠥᠮ ᠦ᠋ᠳ ᠢ᠋ᠶ᠋ᠡᠷ ᠡᠷᠭᠢᠴᠡᠵᠦ᠂ ᠰᠢᠨᠡᠯᠡᠮᠡ ᠲᠤᠸᠠᠨᠵᠠᠩ ᠬᠠᠮᠢᠭᠠ ᠶᠠᠪᠤᠵᠤ ᠪᠠᠢᠪᠠᠯ ᠲᠡᠨᠳᠡ ᠳᠠᠷᠤᠢ ᠲᠤᠸᠠᠨᠪᠦ᠋ ᠪᠠᠢᠵᠤ᠂ ᠡᠨᠡ ᠬᠦ᠌ ᠪᠠᠢᠯᠳᠤᠭᠠᠨ ᠤ᠋ ᠬᠠᠲᠠᠭᠤ ᠪᠡᠷᠬᠡ ᠡᠳᠦᠷ ᠦ᠋ᠳ ᠲᠦ᠍ ᠳᠡᠭᠡᠳᠦᠰ ᠦ᠋ᠨ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠪᠠᠢᠭᠤᠯᠤᠭᠰᠠᠨ ᠲᠥᠷᠥ ᠰᠢᠭ ᠶᠠᠪᠤᠵᠤ ᠵᠢᠯᠣᠭᠣᠳᠴᠤ᠂ ᠪᠠᠢᠯᠳᠤᠵᠤ ᠢᠯᠠᠯᠲᠠ ᠣᠯᠵᠤ ᠪᠠᠢᠯᠠ᠃
ᠡᠨᠡ ᠤᠳᠠᠭᠠ ᠶ᠋ᠢᠨ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠠᠢᠯᠳᠤᠭᠠᠨ ᠤ᠋ ᠲᠤᠬᠠᠢ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠤ᠋ ᠰᠠᠯᠠᠭᠠᠨ ᠳᠠᠷᠤᠭᠠ᠂ ᠤᠭ ᠤ᠋ᠨ ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠵᠠᠬᠢᠷᠭᠠ ᠶ᠋ᠢᠨ ᠳᠠᠷᠤᠭᠠ ᠠᠷᠪᠢᠨᠪᠠᠶᠠᠷ(ᠸᠠᠩ ᠶᠤᠸᠠᠢ ᠹᠧᠩ) ᠨᠠᠰᠤᠲᠠᠨ ᠵᠢᠷᠠᠭᠠᠳ ᠣᠨ ᠳ᠋ᠤ᠌ ᠭᠠᠯᠠᠭᠤᠲᠤ ᠶ᠋ᠢᠨ ᠬᠥᠬᠡᠨᠠᠭᠤᠷ ᠭᠠᠴᠠᠭᠠᠨ ᠳ᠋ᠤ᠌ ᠨᠢᠭᠡᠨ ᠪᠦᠯᠦᠭ ᠲᠡᠦᠬᠡ ᠰᠤᠳᠤᠯᠭᠠᠨ ᠤ᠋ ᠡᠷᠳᠡᠮᠲᠡᠨ᠂ ᠲᠤᠰᠬᠠᠢ ᠮᠡᠷᠭᠡᠵᠢᠯᠲᠡᠨ ᠲᠡᠢ ᠬᠠᠮᠲᠤ ᠪᠠᠷ ᠰᠢᠨᠠᠯᠠᠮᠠ ᠶ᠋ᠢᠨ ᠲᠤᠬᠠᠢ ᠪᠠᠢᠴᠠᠭᠠᠯᠲᠠ ᠬᠢᠵᠦ ᠶᠠᠪᠤᠭᠠ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠬᠥᠮᠦᠰ ᠲᠦ᠍ ᠵᠣᠭᠣᠭ ᠪᠣᠯᠭᠠᠨ᠄《 ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠪᠦᠯᠦᠭ ᠪᠦᠯᠦᠭ ᠢ᠋ᠶ᠋ᠡᠷ ᠲᠠᠰᠤᠯᠵᠤ ᠪᠤᠷᠭᠠᠰᠤᠨ ᠳᠥᠭᠥᠮ ᠳ᠋ᠦ᠍ ᠬᠠᠭᠠᠵᠤ ᠪᠦᠰᠡᠯᠡᠨ ᠤᠰᠠᠳᠬᠠᠬᠤ᠂ ᠠᠷᠤ ᠤᠲᠠᠰᠤᠨ ᠤ᠋ ᠬᠠᠩᠭᠠᠯᠲᠠ ᠶ᠋ᠢ ᠲᠠᠰᠤᠯᠬᠤ᠂ ᠠᠷᠭᠠ ᠭᠠᠷᠭᠠᠨ ᠲᠡᠳᠡᠨ ᠢ᠋ ᠬᠠᠷᠢᠯᠴᠠᠨ ᠠᠯᠠᠯᠳᠤᠭᠤᠯᠬᠤ᠂ ᠴᠠᠭᠠᠨ ᠮᠠᠩᠬᠠᠨ ᠭᠣᠣᠯ ᠳ᠋ᠤ᠌ ᠬᠥᠭᠡᠭᠡᠵᠦ ᠨᠡᠬᠡᠮᠵᠢᠯᠡᠬᠦ ᠵᠡᠷᠭᠡ ᠶ᠋ᠢᠨ ᠲᠡᠢᠨ ᠦ᠌ ᠪᠣᠳᠣᠯᠭᠠ ᠪᠠᠷ ᠤᠷᠢᠳ ᠬᠣᠵᠢᠳ ᠳᠣᠯᠣᠭᠠᠨ ᠡᠳᠦᠷ ᠪᠠᠢᠯᠳᠤᠪᠠ᠃ ᠪᠠᠢᠯᠳᠤᠭᠠᠨ ᠤ᠋ ᠳᠠᠷᠠᠭᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠦᠬᠦᠳᠡᠯ ᠪᠤᠷᠭᠠᠰᠤᠨ ᠳᠥᠭᠥᠮ ᠢ᠋ᠶ᠋ᠡᠷ ᠲᠡᠷᠡᠢᠵᠦ᠂ ᠡᠯᠡᠰᠦ ᠮᠠᠩᠬᠠᠨ ᠳ᠋ᠤ᠌ ᠳᠤᠲᠠᠭᠠᠵᠤ ᠪᠠᠢᠭᠠᠳ ᠭᠡᠭᠡᠭᠰᠡᠨ ᠴᠡᠷᠢᠭ ᠦ᠋ᠨ ᠱᠠᠬᠠᠢ ᠨᠢ ᠴᠦ᠍ ᠦᠬᠡᠷ ᠦ᠋ᠨ ᠠᠷᠭᠠᠯ ᠰᠢᠭ᠋ ᠬᠠᠷᠠᠯᠠᠵᠤ᠂ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠠᠭᠲᠠ ᠮᠣᠷᠢᠨ ᠤ᠋ ᠬᠥᠯ ᠳ᠋ᠦ᠍ ᠰᠠᠭᠠᠳ ᠪᠣᠯᠵᠤ ᠪᠠᠢᠭᠰᠠᠨ ᠰᠢᠦ ᠳᠡ!᠁》 ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ ᠭᠡᠨᠡ᠃
ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠡᠨᠡ ᠤᠳᠠᠭᠠ ᠦᠬᠦᠵᠦ ᠰᠢᠷᠬᠠᠲᠤᠵᠤ᠂ ᠰᠠᠷᠨᠢᠵᠤ ᠳᠤᠲᠠᠭᠠᠭᠰᠠᠨ ᠢ᠋ ᠭᠠᠷᠭᠠᠪᠠᠯ ᠦᠯᠡᠳᠡᠭᠰᠡᠨ ᠴᠡᠷᠢᠭ ᠦ᠋ᠳ ᠨᠢ ᠲᠡᠢᠨ ᠦ᠌ ᠲᠠᠯᠠᠪᠠᠢ ᠠ᠋ᠴᠠ ᠡᠮᠦᠨᠡᠰᠢ ᠤᠬᠤᠷᠢᠵᠤ ᠪᠤᠴᠠᠭᠠᠳ ᠲᠠᠮᠠᠭᠠᠯᠠᠢ ᠳ᠋ᠤ᠌ ᠰᠠᠭᠤᠯᠠ᠃ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠠᠢᠯᠳᠤᠭᠠᠨ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠢᠯᠠᠯᠲᠠ ᠣᠯᠤᠭᠰᠠᠨ᠂ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠲᠤᠸᠠᠨᠵᠠᠩ ᠰᠢᠨᠡᠯᠡᠮᠡ ᠮᠠᠨᠽᠤᠰᠢᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠪᠠᠢᠵᠠᠢ᠃①
— — — —
① ᠲᠤᠰ ᠠᠭᠤᠯᠭᠠ ᠶ᠋ᠢ1980 ᠣᠨ ᠳ᠋ᠤ᠌ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠤᠯᠤᠰ ᠲᠥᠷᠥ ᠶ᠋ᠢᠨ ᠵᠥᠪᠯᠡᠯᠭᠡᠨ ᠦ᠌ ᠳᠡᠳ᠋ ᠲᠡᠷᠢᠭᠦᠯᠡᠭᠴᠢ᠂ ᠬᠠᠭᠤᠴᠢᠨ ᠪᠢᠴᠢᠭ ᠦ᠋ᠨ ᠬᠥᠮᠦᠨ ᠴᠠᠭᠠᠨᠪᠣᠨᠳᠣᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠰᠠᠷᠠᠨᠲᠤᠶᠠᠭᠠ᠂ ᠣᠶᠤᠨᠪᠠᠲᠤ᠂ ᠪᠠᠯ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠠᠯᠲᠠᠨᠱᠠ
15. ᠮᠠᠰᠠᠩ ᠬᠦᠷᠢᠶᠡ ᠶ᠋ᠢᠨ ᠪᠠᠢᠯᠳᠤᠭᠠᠨ
ᠮᠠᠰᠠᠩ ᠬᠦᠷᠢᠶᠡ ᠭᠡᠳᠡᠭ ᠭᠠᠵᠠᠷ ᠥᠨᠥ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠢᠦᠢ ᠯᠢᠨ ᠬᠣᠲᠠ ᠶ᠋ᠢᠨ ᠮᠠᠩᠬᠠ ᠰᠢᠶᠠᠩ ᠤ᠋ᠨ ᠮᠠᠰᠠᠩ ᠬᠦᠷᠢᠶᠡ ᠲᠣᠰᠬᠣᠨ ᠪᠣᠯᠤᠨᠠ᠃ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠡᠨᠳᠡ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠤᠢᠭᠤᠷᠵᠢᠨ ᠣᠪᠣᠭ ᠤ᠋ᠨ ᠲᠠᠢᠵᠢ ᠢᠵᠠᠭᠤᠷᠲᠠᠨ ᠮᠠᠰᠠᠩ ᠭᠡᠳᠡᠭ ᠡᠷᠦᠬᠡ ᠰᠠᠭᠤᠷᠢᠰᠢᠵᠤ᠂ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠠᠷᠢᠶᠠᠯᠠᠬᠤ ᠰᠣᠶᠣᠯ ᠤ᠋ᠨ ᠨᠥᠯᠥᠭᠡ ᠪᠡᠷ ᠭᠡᠷ ᠦ᠋ᠨ ᠭᠠᠳᠠᠨᠠ ᠪᠠᠨ ᠶᠡᠬᠡ ᠶᠠᠰᠢᠯ ᠤ᠋ᠨ ᠬᠦᠷᠢᠶᠡ ᠭᠠᠷᠭᠠᠵᠤ ᠮᠠᠨᠵᠢᠨ ᠲᠥᠮᠥᠰᠥ᠂ ᠨᠠᠪᠴᠢ ᠨᠣᠭᠣᠭᠠ᠂ ᠴᠢᠩᠺᠧ ᠲᠠᠷᠢᠵᠤ ᠡᠯᠪᠡᠭ ᠬᠤᠷᠢᠶᠠᠯᠲᠠ ᠲᠠᠢ ᠮᠠᠯ ᠲᠠᠷᠢᠶᠠ ᠶ᠋ᠢ ᠤᠶᠠᠯᠳᠤᠭᠤᠯᠤᠭᠰᠠᠨ ᠮᠣᠩᠭᠣᠯ ᠡᠷᠦᠬᠡ ᠪᠠᠢᠵᠠᠢ᠃ ᠬᠤᠵᠢᠷ ᠳᠠᠪᠤᠰᠤᠨ ᠤ᠋ ᠲᠡᠭᠡᠭᠡᠪᠦᠷᠢ ᠶ᠋ᠢᠨ ᠶᠡᠬᠡ ᠵᠠᠮ ᠡᠨᠡᠭᠦᠷ ᠥᠩᠭᠡᠷᠡᠵᠦ ᠬᠣᠢᠨᠠ ᠡᠮᠦᠨᠡᠬᠢ ᠶ᠋ᠢ ᠬᠣᠯᠪᠣᠭᠰᠠᠨ ᠴᠢᠬᠤᠯᠠ ᠵᠠᠮ ᠱᠤᠭᠤᠮ ᠪᠣᠯᠬᠤ ᠲᠤᠯᠠ ᠡᠳᠦᠷᠵᠢᠨ ᠰᠥᠨᠢᠵᠢᠨ ᠠᠶᠠᠨᠴᠢᠨ ᠵᠢᠭᠤᠯᠴᠢᠯᠠᠭᠰᠠᠳ ᠴᠤᠪᠤᠷᠠᠳᠠᠭ ᠪᠣᠯᠬᠣᠷ《ᠮᠠᠰᠠᠩ ᠬᠦᠷᠢᠶᠡ》(ᠮᠠᠰᠠᠩ ᠭᠡᠳᠡᠭ ᠡᠷᠦᠬᠡ ᠶ᠋ᠢᠨ ᠶᠡᠬᠡ ᠬᠦᠷᠢᠶᠡ ᠭᠡᠰᠡᠨ ᠠᠭᠤᠯᠭᠠ ᠲᠠᠢ) ᠭᠡᠵᠦ ᠳᠠᠭᠤᠳᠠᠬᠤ ᠪᠣᠯᠵᠠᠢ᠃ ᠬᠣᠵᠢᠮ ᠡᠨᠡ ᠡᠷᠦᠬᠡ ᠶ᠋ᠢᠨ ᠰᠠᠭᠤᠷᠢᠰᠢᠯ ᠨᠤᠲᠤᠭ ᠢ᠋ ᠬᠢᠲᠠᠳ ᠢᠷᠭᠡᠴᠤᠳ ᠲᠤ᠌ 40 ᠯᠠᠩ ᠮᠥᠩᠭᠥ ᠪᠡᠷ ᠬᠤᠳᠠᠯᠳᠤᠴᠢᠬᠠᠭᠰᠠᠨ ᠲᠤᠯᠠ ᠮᠠᠰᠠᠩ ᠨᠠᠰᠤᠲᠠᠨ ᠠᠷᠭᠠ ᠪᠤᠰᠤ ᠥᠨᠥ ᠶ᠋ᠢᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠭᠠᠯᠠᠭᠤᠲᠤ ᠬᠡᠮᠡᠬᠦ ᠭᠠᠵᠠᠷ ᠨᠡᠭᠦᠳᠡᠯᠯᠡᠨ ᠢᠷᠡᠵᠦ ᠰᠠᠭᠤᠷᠢᠰᠢᠪᠠ᠃ ᠭᠡᠪᠡᠴᠦ ᠮᠠᠰᠠᠩ ᠬᠡᠮᠡᠬᠦ ᠮᠣᠩᠭᠣᠯ ᠡᠷᠦᠬᠡ ᠶ᠋ᠢᠨ ᠨᠤᠲᠤᠭ ᠨᠢ ᠦᠬᠦᠲᠡᠯᠡ ᠣᠷᠣᠰᠢᠬᠤ ᠮᠣᠩᠭᠣᠯᠵᠢᠨ ᠨᠤᠲᠤᠭ ᠪᠢᠰᠢ ᠪᠣᠯᠪᠠᠴᠤ《ᠮᠠᠰᠠᠩ ᠬᠦᠷᠢᠶᠡ》 ᠭᠡᠬᠦ ᠨᠡᠷᠡ ᠨᠢ ᠦᠶᠡ ᠶ᠋ᠢᠨ ᠦᠶᠡ ᠪᠡᠷ ᠭᠠᠵᠠᠷ ᠵᠦᠢ ᠶ᠋ᠢᠨ ᠨᠡᠷᠡ ᠪᠣᠯᠵᠤ ᠣᠯᠠᠨ ᠦᠶᠡ ᠶ᠋ᠢᠨ ᠬᠥᠮᠦᠰ ᠲᠦ᠍ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠲᠡᠦᠬᠡ ᠪᠣᠯᠤᠨ ᠬᠠᠳᠠᠭᠳᠠᠴᠢᠬᠠᠯᠠ᠃
ᠰᠢᠨᠠᠯᠠᠮᠠ᠂ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠲᠦ᠍ ᠡᠵᠡᠯᠡᠭᠳᠡᠭᠰᠡᠨ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠤᠷᠠᠨ ᠠᠷᠭᠠ ᠪᠠᠷ ᠡᠭᠡᠭᠦᠯᠦᠨ ᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠤᠬᠠᠢ ᠶ᠋ᠢᠨ ᠭᠠᠵᠠᠷ ᠨᠤᠲᠤᠭ ᠤ᠋ᠨ ᠮᠠᠯᠴᠢᠨ ᠲᠦᠮᠡᠨ ᠢ᠋ ᠲᠣᠬᠣᠨᠢᠭᠤᠯᠬᠤ ᠠᠵᠢᠯ ᠢ᠋ ᠬᠢᠬᠦ ᠶ᠋ᠢᠨ ᠬᠠᠮᠲᠤ ᠴᠡᠷᠢᠭ ᠠᠩᠭᠢ ᠪᠠᠨ ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠰᠠᠭᠤᠯᠭᠠᠵᠤ᠂ ᠢᠷᠡᠵᠦ ᠮᠡᠳᠡᠬᠦ ᠲᠡᠢᠨ ᠪᠠᠢᠯᠳᠤᠭᠠᠨ ᠢ᠋ ᠠᠷᠭᠠᠴᠠᠭᠠᠬᠤ ᠪᠠᠷ ᠴᠡᠷᠢᠭ ᠦ᠋ᠨ ᠪᠣᠯᠪᠠᠰᠤᠷᠠᠯ ᠬᠢᠵᠦ ᠲᠡᠢᠨ ᠦ᠌ ᠪᠡᠯᠡᠳᠬᠡᠯ ᠢ᠋ᠶ᠋ᠡᠨ ᠴᠢᠩᠭᠠᠳᠬᠠᠭᠰᠠᠨ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠮᠠᠯᠴᠢᠳ ᠨᠢᠭᠡᠨ ᠬᠤᠭᠤᠴᠠᠭᠠ ᠲᠠᠢᠪᠤᠩ ᠲᠣᠭᠲᠠᠭᠤᠨ ᠪᠣᠯᠤᠯᠠ᠃ ᠭᠡᠪᠡᠴᠦ ᠲᠠᠢᠪᠤᠩ ᠴᠠᠭ ᠲᠤ᠌ ᠮᠢᠨᠴᠦᠭᠦᠷᠡᠬᠦ ᠡᠴᠡ ᠵᠠᠢᠯᠠᠰᠬᠢᠵᠦ᠂ ᠰᠢᠨᠠᠯᠠᠮᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠪᠠᠰᠠ ᠳᠠᠬᠢᠨ ᠦᠦᠰᠢᠨ ᠬᠣᠰᠢᠭᠤ ᠳ᠋ᠤ᠌ ᠳᠠᠭᠠᠷᠢᠯᠲᠠ ᠬᠢᠬᠦ ᠶ᠋ᠢ ᠰᠡᠷᠡᠮᠵᠢᠯᠡᠬᠦ ᠶ᠋ᠢᠨ ᠲᠤᠰᠠᠳᠠ ᠦᠷᠭᠦᠯᠵᠢ ᠴᠡᠷᠢᠭ ᠭᠠᠷᠭᠠᠨ ᠱᠠᠨᠰᠢ ᠪᠣᠯᠤᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠬᠢᠯᠢ ᠭᠠᠵᠠᠷ ᠢ᠋ ᠲᠣᠭᠣᠷᠢᠨ ᠴᠠᠭᠳᠠᠨ ᠪᠠᠢᠴᠠᠭᠠᠯᠭᠠᠵᠠᠢ᠃
ᠪᠠᠭᠠᠲᠤᠷ(ᠬᠥᠮᠦᠰ ᠯᠤᠤ ᠪᠠᠭᠠᠲᠤᠷ ᠭᠡᠵᠦ ᠳᠠᠭᠤᠳᠠᠳᠠᠭ)᠂ ᠪᠣᠩᠬᠤᠸᠠ ᠵᠡᠷᠭᠡ ᠲᠠᠪᠤᠨ ᠪᠠᠢᠯᠳᠤᠭᠴᠢ ᠮᠠᠰᠩ ᠬᠦᠷᠢᠶᠡ ᠪᠣᠯᠤᠨ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠡᠮᠦᠨᠡ ᠪᠦᠷᠢᠳᠦ ᠶ᠋ᠢᠨ ᠡᠷᠢᠶᠡᠨ ᠲᠣᠯᠣᠭᠠᠢ ᠵᠡᠷᠭᠡ ᠭᠠᠵᠠᠷ ᠢ᠋ ᠴᠠᠭᠳᠠᠨ ᠪᠠᠢᠴᠠᠭᠠᠬᠤ ᠪᠠᠷ ᠮᠣᠷᠳᠠᠪᠠ᠃
ᠨᠢᠭᠡᠨ ᠡᠳᠦᠷ ᠲᠡᠳᠡ ᠶᠡᠬᠡ ᠪᠤᠷᠭᠠᠰᠤᠨ ᠳᠥᠭᠥᠮ ᠳᠣᠲᠣᠷᠠ ᠮᠣᠷᠢ ᠪᠠᠨ ᠡᠮᠡᠭᠡᠯ ᠲᠡᠢ ᠨᠢ ᠴᠢᠳᠥᠷᠯᠡᠨ ᠢᠳᠡᠰᠢᠯᠡᠭᠦᠯᠵᠦ᠂ ᠥᠪᠡᠷᠰᠡᠳ ᠢ᠋ᠶ᠋ᠡᠨ ᠬᠠᠭᠤᠷᠠᠢ ᠬᠦᠨᠡᠰᠦ ᠪᠡᠨ ᠢᠳᠡᠵᠦ ᠶᠠᠳᠠᠷᠠᠭᠠ ᠴᠢᠯᠡᠭᠡ ᠪᠡᠨ ᠲᠠᠢᠯᠬᠤ ᠪᠠᠷ ᠬᠡᠪᠲᠡᠵᠦ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠠᠭᠲᠠ ᠮᠣᠷᠢᠳ ᠤ᠋ᠨ ᠲᠦᠪᠡᠷᠭᠡᠨ ᠰᠣᠨᠣᠰᠲᠠᠯᠠ᠃ ᠠᠳᠤᠭᠤᠨ ᠰᠦᠷᠦᠭ ᠦ᠋ᠨ ᠴᠢᠮᠡᠭᠡ ᠴᠦ᠍ ᠶᠦᠮ ᠤᠤ? ᠠᠶᠤᠮᠰᠢᠭᠲᠤ ᠳᠠᠢᠰᠤᠨ ᠤ᠋ ᠴᠢᠮᠡᠭᠡ ᠴᠦ᠍ ᠶᠦᠮ ᠤᠤ? ᠠᠯᠢ ᠨᠢ ᠪᠣᠯᠬᠤ ᠶ᠋ᠢ ᠠᠵᠢᠭᠯᠠᠬᠤ ᠪᠠᠷ ᠵᠠᠷᠢᠮ ᠨᠢ ᠬᠣᠢᠲᠤ ᠰᠡᠷᠪᠡᠩ ᠲᠡᠢ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠬᠠᠷᠠᠬᠤᠯᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠨᠢᠭᠡᠨ ᠪᠦᠯᠦᠭ ᠴᠡᠷᠢᠭ ᠨᠢᠭᠡᠨᠲᠡ ᠲᠡᠷᠡ ᠬᠡᠳᠦᠭᠦᠯᠡ ᠶ᠋ᠢ ᠪᠦᠰᠡᠯᠡᠨ ᠬᠣᠮᠣᠷᠴᠢᠬᠠᠵᠠᠢ᠃ ᠲᠡᠳᠡ ᠬᠠᠷᠢᠯᠴᠠᠨ ᠭᠠᠯ ᠠᠪᠤᠯᠴᠠᠵᠤ ᠪᠠᠢᠯᠳᠤᠭᠠᠨ ᠡᠬᠢᠯᠡᠯᠡ᠃ ᠲᠡᠳᠡ ᠮᠣᠷᠢᠳ ᠢ᠋ᠶ᠋ᠠᠨ ᠪᠠᠷᠢᠵᠤ ᠤᠨᠤᠭᠠᠳ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠪᠦᠰᠡᠯᠡᠯᠲᠡ ᠶ᠋ᠢ ᠰᠢᠪᠲᠤᠯᠬᠤ ᠶ᠋ᠢᠨ ᠳᠠᠭᠠᠤ ᠦᠷᠭᠦᠯᠵᠢᠯᠡᠨ ᠮᠣᠷᠢᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠡᠴᠡ ᠨᠡᠬᠡᠮᠵᠢᠯᠡᠬᠦ ᠴᠡᠷᠢᠭ ᠢ᠋ ᠬᠠᠷᠪᠤᠵᠤ ᠪᠠᠢᠯᠠ᠃ ᠲᠡᠳᠡ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠶ᠋ᠢᠨ ᠰᠤᠭᠤᠯ ᠲᠠᠰᠢᠭᠤ ᠳᠥᠭᠥᠮ ᠳᠠᠯᠠᠩ ᠤ᠋ᠳ ᠢ᠋ ᠠᠰᠢᠭᠯᠠᠨ ᠳᠤᠲᠠᠭᠠᠭᠠᠳ ᠨᠡᠯᠢᠶᠡᠳ ᠬᠣᠯᠠᠳᠠᠭᠰᠠᠨ ᠪᠣᠯᠪᠠᠴᠤ ᠰᠤᠮᠤ ᠪᠠᠨ ᠪᠠᠷᠠᠴᠢᠬᠠᠯᠠ᠃《ᠵᠡᠪᠰᠡᠭ ᠦᠭᠡᠢ ᠴᠡᠷᠢᠭ ᠪᠣᠯ ᠮᠤᠩᠬᠠᠭ ᠴᠡᠷᠢᠭ》 ᠭᠡᠳᠡᠭᠴᠢᠯᠡᠨ ᠶᠠᠭᠠᠬᠢᠬᠤ ᠪᠠᠨ ᠣᠯᠬᠤ ᠦᠭᠡᠢ ᠪᠠᠢᠲᠠᠯᠠ ᠪᠣᠩᠬᠣᠸᠠ ᠪᠠᠴᠢᠮ ᠪᠠᠢᠳᠠᠯ ᠢ᠋ ᠠᠷᠭᠠᠴᠠᠭᠠᠬᠤ ᠶ᠋ᠢᠨ ᠲᠤᠰᠠᠳᠠ᠄《 ᠪᠢᠳᠡ ᠡᠳᠦᠷ ᠰᠥᠨᠢ ᠦᠭᠡᠢ ᠵᠠᠮ ᠬᠥᠭᠡᠭᠡᠭᠰᠡᠭᠡᠷ ᠪᠠᠢᠵᠤ ᠮᠣᠷᠢᠳ ᠴᠤ᠌ ᠲᠠᠭᠳᠠᠵᠤ ᠵᠣᠭᠰᠣᠴᠢᠬᠠᠯᠠ᠃ ᠣᠳᠣ ᠢᠩᠭᠢᠵᠦ ᠣᠷᠣᠯᠳᠣᠭᠠᠳ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠠᠶᠤᠯ ᠠ᠋ᠴᠠ ᠮᠤᠯᠲᠤᠷᠠᠵᠤ ᠳᠡᠢᠯᠬᠦ ᠦᠭᠡᠢ ᠰᠢᠦ᠁ ᠪᠢᠳᠡ ᠲᠠᠪᠤᠭᠤᠯᠠ ᠬᠥᠮᠦᠨ ᠪᠦᠷᠢ ᠨᠢᠭᠡ ᠰᠡᠷᠪᠡᠩ ᠦ᠋ᠨ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠮᠣᠷᠢ ᠪᠠᠨ ᠯᠦᠦᠯᠢᠴᠡᠬᠡᠶᠡ(ᠤᠷᠤᠯᠳᠤᠭᠠᠨ ᠮᠣᠷᠢᠨ ᠤ᠋ ᠠᠮᠢᠰᠬᠤᠯ ᠢ᠋ ᠲᠣᠭᠲᠠᠭᠠᠬᠤ ᠶ᠋ᠢᠨ ᠲᠥᠯᠥᠭᠡ ᠮᠣᠷᠢᠨ ᠤ᠋ ᠪᠠᠨ ᠴᠤᠯᠪᠤᠭᠤᠷ ᠠ᠋ᠴᠠ ᠪᠠᠷᠢᠵᠤ ᠮᠣᠷᠢ ᠶ᠋ᠢ ᠪᠡᠶᠡ ᠪᠡᠨ ᠲᠣᠭᠣᠷᠢᠭᠤᠯᠤᠨ ᠡᠷᠭᠢᠭᠦᠯᠬᠦ ᠶ᠋ᠢ ᠬᠡᠯᠡᠨᠡ)》 ᠭᠡᠵᠦ ᠬᠡᠯᠡᠯᠴᠡᠭᠡᠳ ᠬᠣᠶᠠᠷ ᠲᠠᠢᠰᠢ ᠲᠠᠷᠬᠠᠵᠤ ᠲᠤᠰ ᠲᠤᠰ ᠲᠠᠭᠠᠨ ᠥᠨᠳᠥᠷ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠮᠣᠷᠢᠨ ᠠ᠋ᠴᠠ ᠪᠠᠭᠤᠵᠤ ᠮᠣᠷᠢ ᠪᠠᠨ ᠯᠦᠦᠯᠢᠴᠡᠭᠡᠯᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠯᠤᠤ ᠪᠠᠭᠠᠲᠤᠷ ᠴᠠᠭᠠᠨ ᠠᠯᠴᠢᠭᠤᠷ ᠢ᠋ᠶ᠋ᠠᠨ ᠬᠤᠷᠤᠢᠯᠠᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ《ᠨᠢᠭᠡ᠂ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠪᠠᠷᠠᠭᠤᠨ ᠲᠠᠯᠠ ᠪᠠᠷ᠂ ᠭᠤᠷᠪᠠ ᠳᠥᠷᠪᠡᠳᠦᠭᠡᠷ ᠯᠢᠶᠠᠨ ᠵᠡᠭᠦᠨ ᠰᠡᠷᠪᠡᠩ ᠢ᠋ᠶ᠋ᠡᠷ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠶ᠋ᠢ ᠠᠰᠢᠭᠯᠠᠵᠤ ᠪᠠᠢᠯᠳᠤᠬᠤ ᠪᠠᠷ ᠪᠡᠯᠡᠳᠭᠡ!》 ᠭᠡᠵᠦ ᠳᠠᠬᠢᠨ ᠳᠠᠪᠲᠠᠨ ᠬᠢᠲᠠᠳ ᠮᠣᠩᠭᠣᠯ ᠢ᠋ᠶ᠋ᠠᠷ ᠬᠠᠰᠬᠢᠷᠤᠯᠠ᠃ ᠥᠨᠳᠥᠷ ᠰᠡᠷᠪᠡᠩ ᠦ᠋ᠨ ᠣᠷᠣᠢ ᠳ᠋ᠤ᠌ ᠪᠠᠢᠭᠰᠠᠨ ᠪᠤᠰᠤᠳ ᠬᠡᠳᠦ ᠨᠢ ᠮᠡᠳᠡᠯᠡ ᠭᠡᠮᠡᠨ ᠴᠠᠭᠠᠨ ᠠᠯᠴᠢᠭᠤᠷ ᠪᠤᠶᠤ ᠭᠠᠷ ᠢ᠋ᠶ᠋ᠠᠨ ᠳᠠᠯᠠᠯᠤᠨ ᠬᠠᠷᠢᠭᠤ ᠬᠠᠰᠬᠢᠷᠤᠨᠠ᠃
ᠬᠠᠰᠬᠢᠷᠬᠤ ᠳᠠᠭᠤᠨ ᠢ᠋ ᠰᠣᠨᠣᠰᠤᠭᠰᠠᠨ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠳ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠡᠨᠡ ᠬᠡᠳᠦᠬᠡᠨ ᠴᠡᠷᠢᠭ ᠦᠨᠡᠨ ᠳᠤᠲᠠᠭᠠᠭᠰᠠᠨ ᠪᠢᠰᠢ᠂ ᠬᠠᠷᠢᠨ ᠬᠠᠭᠤᠷᠮᠠᠭ ᠢ᠋ᠶ᠋ᠠᠷ ᠪᠢᠳᠡᠨ ᠢ᠋ ᠳᠠᠭᠠᠭᠤᠯᠤᠨ ᠪᠠᠯᠠᠷ ᠪᠤᠷᠭᠠᠰᠤᠨ ᠳᠣᠲᠣᠷᠠ ᠪᠠᠨ ᠠᠪᠠᠴᠢᠵᠤ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠦᠴᠦ(ᠰᠢᠨᠠᠯᠠᠮᠠ ᠳᠥᠷᠪᠡᠨ ᠯᠢᠶᠠᠨ ᠮᠣᠷᠢᠲᠤ ᠴᠡᠷᠢᠭ ᠲᠡᠢ ᠭᠡᠳᠡᠭ ᠢ᠋ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠪᠦᠷ ᠮᠡᠳᠡᠬᠦ ᠶᠦᠮ) ᠢ᠋ᠶ᠋ᠡᠷ ᠪᠢᠳᠡᠨ ᠢ᠋ ᠰᠥᠨᠥᠭᠡᠬᠦ ᠭᠡᠵᠦ ᠪᠠᠢᠨᠠ ᠭᠡᠮᠡᠨ ᠡᠯᠳᠡᠪ ᠢ᠋ᠶ᠋ᠡᠷ ᠰᠡᠵᠢᠭᠯᠡᠭᠰᠡᠨ ᠡᠴᠡ ᠲᠠᠪᠤᠨ ᠴᠡᠷᠢᠭ ᠢ᠋ ᠦᠷᠭᠦᠯᠵᠢᠯᠡᠨ ᠨᠡᠬᠡᠮᠵᠢᠯᠡᠬᠦ ᠪᠡᠨ ᠵᠣᠭᠰᠣᠵᠤ᠂ ᠡᠴᠦᠰ ᠲᠡᠭᠡᠨ ᠪᠣᠷᠣ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠬᠤᠷᠢᠨ ᠶᠠᠪᠤᠯᠠ᠃
ᠢᠩᠭᠢᠭᠡᠳ ᠴᠠᠭᠳᠠᠭᠠᠨ ᠳ᠋ᠤ᠌ ᠶᠠᠪᠤᠭᠰᠠᠨ ᠲᠠᠪᠤᠬᠠᠨ ᠴᠡᠷᠢᠭ《ᠮᠤᠬᠤᠷᠳᠠᠬᠤ ᠳ᠋ᠤ᠌ ᠮᠤᠬᠤᠷ ᠪᠢᠷᠠᠭᠤ ᠪᠠᠷ ᠲᠠᠷᠢᠶᠠ ᠲᠠᠷᠢᠪᠠ》 ᠭᠡᠭᠴᠢ ᠪᠡᠷ ᠰᠤᠮᠤ ᠪᠠᠨ ᠪᠠᠷᠠᠴᠢᠬᠠᠭᠰᠠᠨ ᠴᠤ᠌ ᠮᠤᠬᠤᠷᠳᠠᠭᠰᠠᠨ ᠦᠭᠡᠢ ᠬᠠᠷᠢᠨ ᠠᠷᠭᠠ ᠪᠠᠷ ᠮᠡᠬᠡᠯᠡᠵᠦ ᠠᠮᠵᠢᠯᠲᠠ ᠣᠯᠵᠠᠢ᠃①
— — — —
① ᠲᠤᠰ ᠠᠭᠤᠯᠭᠠ ᠶ᠋ᠢ1975 ᠣᠨ ᠳ᠋ᠤ᠌ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠲᠦ᠍ ᠶᠠᠪᠤᠵᠤ ᠪᠠᠢᠭᠰᠠᠨ ᠡᠮᠴᠢ ᠪᠣᠩᠬᠤᠸᠠ ᠨᠠᠰᠤᠲᠠᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠲᠡᠮᠳᠡᠭᠯᠡᠪᠡ᠃
ᠵᠡᠭᠦᠯᠲᠡ
(1) ᠥᠴᠦᠬᠡᠨ ᠲᠠᠢᠵᠢ ᠠᠷᠠᠳ ᠴᠡᠷᠢᠭ ᠨᠡᠢᠲᠡ ᠪᠡᠷ ᠬᠢᠴᠢᠶᠡᠩᠭᠦᠢᠯᠡᠨ ᠶᠡᠬᠡ ᠶᠠᠮᠤᠨᠠ ᠡᠷᠭᠦᠨ ᠪᠠᠷᠢᠪᠠ ᠮᠡᠳᠡᠭᠦᠯᠬᠦ ᠶ᠋ᠢᠨ ᠤᠴᠢᠷ ᠡᠨᠡ ᠡᠪᠦᠯ ᠦ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠲᠠᠪᠤᠨᠠ᠃
ᠨᠢᠳᠤᠨᠤᠨ ᠵᠢᠯ ᠦ᠋ᠨ ᠬᠠᠪᠤᠷ ᠤ᠋ᠨ ᠳᠤᠮᠳᠠᠳᠤ ᠰᠠᠷᠠ ᠶ᠋ᠢᠨ ᠬᠣᠷᠢᠨ ᠭᠤᠷᠪᠠᠨᠠ ᠮᠠᠨ ᠤ᠋ ᠪᠡᠢᠯᠡ ᠨᠣᠶᠠᠨ ᠤ᠋ ᠰᠢᠳᠠᠷ ᠴᠡᠷᠢᠭ ᠪᠤᠶᠠᠨᠳᠣᠭᠲᠠᠬᠤ᠂ ᠡᠷᠬᠢᠮᠴᠡᠩᠬᠡᠯ ᠨᠠᠷ ᠭᠡᠨᠡᠳᠲᠡ ᠢᠦᠢ ᠯᠢᠨ ᠦ᠌ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠵᠢᠶᠠᠩ ᠲᠤᠸᠠᠨᠵᠠᠩ ᠤ᠋ᠨ ᠭᠤᠷᠪᠠᠨ ᠵᠠᠭᠤ ᠬᠢᠷᠢ ᠮᠣᠷᠢᠲᠤ ᠴᠡᠷᠢᠭ ᠢ᠋ ᠳᠠᠭᠠᠭᠤᠯᠤᠨ ᠢᠷᠡᠵᠦ ᠥᠴᠦᠬᠡᠨ ᠮᠠᠨ ᠢ᠋ ᠬᠡᠳᠦᠨ ᠤᠳᠠᠭᠠ ᠬᠣᠮᠣᠷᠴᠤ ᠬᠤᠰᠢᠭᠤᠨ ᠤ᠋ ᠨᠤᠲᠤᠭ ᠤ᠋ᠨ ᠬᠠᠭᠠᠰ ᠥᠩᠭᠡᠷᠡᠲᠡᠯᠡ ᠬᠥᠭᠡᠭᠡᠨ ᠪᠠᠢᠯᠳᠤᠵᠤ ᠮᠠᠨ ᠤ᠋ ᠴᠡᠷᠢᠭ ᠡᠴᠡ ᠬᠥᠮᠦᠨ ᠮᠣᠷᠢ ᠬᠡᠳᠦᠨ ᠠᠷᠪᠠ ᠶ᠋ᠢ ᠫᠤᠤᠳᠠᠨ ᠴᠠᠪᠴᠢᠵᠤ ᠬᠣᠬᠢᠷᠠᠭᠤᠯᠤᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠪᠡᠢᠯᠡ ᠨᠣᠶᠠᠨ ᠤ᠋ ᠱᠠᠩ ᠶᠠᠮᠤᠨ ᠤ᠋ ᠳᠠᠩᠰᠠ ᠬᠠᠷᠠ ᠡᠳ᠋ᠯᠡᠯ ᠲᠠᠸᠠᠷ ᠫᠤᠤ ᠵᠡᠪᠰᠡᠭ ᠪᠠ ᠰᠦᠮᠡ ᠬᠡᠢᠳ᠂ ᠠᠢᠯ ᠭᠡᠷ ᠦ᠋ᠳ ᠦ᠋ᠨ ᠡᠳ᠋ ᠮᠠᠯ ᠬᠥᠷᠥᠩᠭᠡ ᠦᠵᠡᠭᠳᠡᠭᠰᠡᠨ ᠪᠦᠬᠦᠨ ᠢ᠋ ᠴᠥᠮ ᠳᠡᠭᠡᠷᠡᠮᠯᠡᠨ ᠠᠪᠤᠭᠠᠳ ᠦᠯᠡᠳᠡᠭᠰᠡᠨ ᠢ᠋ ᠭᠡᠷ ᠣᠷᠣᠨ ᠤ᠋ ᠬᠠᠮᠲᠤ ᠰᠢᠲᠠᠭᠠᠨ ᠳᠡᠭᠡᠷᠡᠮᠳᠡᠭᠰᠡᠨ ᠪᠠ ᠨᠢᠭᠡᠮᠦᠰᠦᠨ ᠦᠭᠡᠢ ᠪᠣᠯᠭᠠᠨ ᠲᠠᠯᠠᠭᠳᠠᠬᠤ ᠪᠠᠷ ᠡᠭᠡᠯ ᠬᠣᠭᠣᠰᠣᠨ ᠪᠣᠯᠭᠠᠭᠰᠠᠨ ᠠᠨᠤ ᠶᠡᠷᠦ ᠪᠠᠭᠠ ᠦᠭᠡᠢ ᠪᠢᠯᠡ᠃ ᠳᠠᠷᠠᠭᠠ ᠪᠠᠷ ᠮᠥᠨ ᠨᠠᠮᠤᠷ ᠤ᠋ᠨ ᠳᠤᠮᠳᠠᠳᠤ ᠰᠠᠷᠠ ᠳ᠋ᠤᠷ ᠮᠠᠨ ᠤ᠋ ᠴᠢᠭᠤᠯᠭᠠᠨ ᠤ᠋ ᠲᠡᠷᠢᠭᠦᠨ ᠳᠡᠳ᠋ ᠳᠡ ᠨᠣᠶᠠᠨ ᠤ᠋ ᠲᠦᠰᠢᠮᠡᠯ ᠴᠡᠷᠢᠭ ᠢ᠋ ᠪᠢᠴᠢᠭᠡᠴᠢ ᠷᠢᠨᠴᠢᠨᠷᠠᠭᠪᠠ᠂ ᠬᠣᠣᠪᠠᠳᠠᠢ᠂ ᠳᠣᠯᠣᠭᠠᠨᠵᠢᠩ ᠨᠠᠷ ᠡᠬᠢᠯᠡᠨ ᠮᠠᠨ ᠤ᠋ ᠪᠡᠢᠯᠡ ᠨᠣᠶᠠᠨ ᠤ᠋ ᠴᠡᠷᠢᠭ ᠪᠤᠶᠠᠨᠳᠣᠭᠲᠠᠬᠤ᠂ ᠪᠠᠷᠢᠨᠲᠠᠭ᠂ ᠡᠷᠬᠢᠮᠴᠡᠩᠬᠡᠯ᠂ ᠴᠣᠢᠷᠣᠭᠵᠠᠯᠰᠠᠨ᠂ ᠠᠷᠪᠢᠨᠬᠡᠰᠢᠭ᠂ ᠪᠠᠶᠠᠨᠰᠡᠷᠡᠩ᠂ ᠲᠠᠢᠵᠢ ᠪᠠᠪᠠ ᠨᠠᠷ ᠲᠠᠢ ᠭᠤᠷᠪᠠᠨ ᠵᠠᠭᠤ ᠰᠢᠬᠠᠮ ᠮᠣᠩᠭᠣᠯ ᠴᠡᠷᠢᠭ᠂ ᠢᠦᠢ ᠯᠢᠨ ᠦ᠌ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠬᠠᠷᠢᠶᠠᠲᠤ ᠵᠢᠶᠠᠩ ᠲᠤᠸᠠᠨᠵᠠᠩ ᠨᠠᠷ ᠤ᠋ᠨ ᠮᠢᠩᠭᠠ ᠢᠯᠡᠭᠦᠦ ᠴᠡᠷᠢᠭ ᠲᠡᠢ ᠨᠡᠢᠯᠡᠵᠦ ᠬᠣᠶᠠᠷ ᠮᠢᠩᠭᠠ ᠰᠢᠬᠠᠮ ᠴᠡᠷᠢᠭ ᠬᠤᠰᠢᠭᠤᠨ ᠤ᠋ ᠵᠡᠭᠦᠨ ᠪᠠ ᠡᠮᠦᠨᠡ ᠵᠠᠬᠠ ᠠ᠋ᠴᠠ ᠣᠷᠣᠵᠤ ᠮᠡᠢᠷᠡᠨ ᠰᠦᠮᠡ᠂ ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ᠂ ᠪᠡᠢᠯᠡ ᠨᠣᠶᠠᠨ ᠤ᠋ ᠱᠠᠩ ᠶᠠᠮᠤᠨ ᠳ᠋ᠤᠷ ᠢᠷᠡᠬᠦ ᠳ᠋ᠦ᠍ᠷ ᠬᠤᠰᠢᠭᠤᠨ ᠤ᠋ ᠪᠠᠷᠠᠭᠤᠨ ᠵᠠᠬᠠ ᠠ᠋ᠴᠠ ᠢᠦᠢ ᠯᠢᠨ ᠦ᠌ ᠳ᠋ᠤᠸᠠᠨ ᠲᠤᠸᠠᠨᠵᠠᠩ᠂ ᠵᠠᠩ ᠬᠣᠩ ᠱᠦᠩ ᠲᠠᠪᠤᠨ ᠵᠠᠭᠤᠭᠠᠳ ᠴᠡᠷᠢᠭ ᠲᠡᠢ ᠰᠢᠪᠠᠷ ᠰᠦᠮᠡ᠂ ᠰᠢᠷᠠ ᠵᠣᠣ᠂ ᠥᠯᠥᠩ ᠵᠡᠷᠭᠡ ᠶ᠋ᠢᠨ ᠰᠦᠮᠡᠰ ᠪᠠ ᠮᠠᠨ ᠤ᠋ ᠪᠠᠷᠠᠭᠤᠨ ᠬᠦᠩ ᠲᠤᠰᠠᠯᠠᠭᠴᠢ ᠶ᠋ᠢᠨ ᠱᠠᠩ ᠢ᠋ᠶ᠋ᠠᠷ ᠡᠳᠡᠭᠡᠷ ᠬᠣᠶᠠᠷ ᠮᠢᠩᠭᠠ ᠢᠯᠡᠭᠦᠦ ᠴᠡᠷᠢᠭ ᠣᠷᠣᠵᠤ ᠢᠷᠡᠭᠡᠳ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠨᠤᠲᠤᠭ ᠤ᠋ᠨ ᠠᠷᠪᠠᠨ ᠬᠤᠪᠢ ᠶ᠋ᠢᠨ ᠨᠠᠢ᠍ᠮᠠᠨ ᠬᠤᠪᠢ ᠨᠤᠲᠤᠭ ᠢ᠋ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠵᠦ ᠬᠣᠬᠢᠷᠠᠭᠤᠯᠤᠨ ᠤᠰᠠᠳᠬᠠᠭᠰᠠᠨ ᠵᠦᠢᠯ ᠠᠨᠤ ᠵᠠᠰᠠᠭ ᠪᠡᠢᠯᠡ ᠶ᠋ᠢᠨ ᠨᠣᠶᠠᠨ ᠱᠠᠩ ᠶᠠᠮᠤᠨ ᠪᠠ ᠬᠦᠩ ᠲᠤᠰᠠᠯᠠᠭᠴᠢ ᠶ᠋ᠢᠨ ᠱᠠᠩ ᠤ᠋ᠨ ᠡᠳ᠋ᠯᠡᠯ ᠲᠠᠸᠠᠷ ᠳᠠᠩᠰᠠ ᠬᠠᠷᠠ᠂ ᠮᠠᠯ ᠬᠥᠷᠥᠩᠭᠡ ᠪᠠ ᠰᠢᠷᠠ ᠵᠣᠣ᠂ ᠰᠢᠪᠠᠷ᠂ ᠪᠣᠷᠣ ᠬᠣᠰᠢᠭᠤ᠂ ᠪᠦᠷᠢᠳᠦ᠂ ᠥᠯᠥᠩ᠂ ᠬᠤᠸᠠᠷᠲᠠᠢ᠂ ᠤᠯᠠᠭᠠᠨᠲᠣᠯᠣᠭᠠᠢ᠂ ᠮᠠᠩᠬᠠᠲᠤ᠂ ᠮᠡᠢᠷᠡᠨ ᠰᠦᠮᠡ ᠵᠡᠷᠭᠡ ᠶ᠋ᠢᠨ ᠶᠢᠰᠦᠨ ᠰᠦᠮᠡ ᠶ᠋ᠢᠨ ᠪᠤᠷᠬᠠᠨ ᠰᠢᠲᠦᠭᠡᠨ ᠪᠠ ᠨᠣᠮ ᠰᠤᠳᠤᠷ ᠬᠡᠷᠡᠭᠰᠡᠯ ᠡᠳ᠋ᠯᠡᠯ᠂ ᠯᠠᠮᠠ ᠨᠠᠷ ᠤ᠋ᠨ ᠨᠣᠮ ᠤ᠋ᠨ ᠬᠤᠪᠴᠠᠰᠤ᠂ ᠬᠦᠨᠡᠰᠦ ᠬᠡᠷᠡᠭᠯᠡᠯ ᠢ᠋ ᠪᠦᠷᠢᠮᠦᠰᠦᠨ ᠳᠡᠭᠡᠷᠡᠮᠳᠡᠨ ᠠᠪᠤᠭᠠᠳ ᠦᠯᠡᠳᠡᠭᠰᠡᠨ ᠢ᠋ ᠨᠢ ᠬᠡᠮᠬᠡᠴᠢᠨ ᠲᠠᠯᠬᠠᠳᠠᠭᠰᠠᠨ ᠠ᠋ᠴᠠ ᠭᠠᠳᠠᠨᠠ ᠡᠳ᠋ ᠮᠠᠯ ᠬᠥᠷᠥᠩᠭᠡ ᠶ᠋ᠢ ᠬᠣᠭᠣᠰᠣᠷᠠᠲᠠᠯᠠ ᠳᠡᠭᠡᠷᠡᠮᠳᠡᠵᠦ᠂ ᠪᠠᠷᠤᠭᠯᠠᠪᠠᠰᠤ ᠬᠣᠣᠷᠯᠠᠭᠳᠠᠨ ᠠᠯᠠᠭᠳᠠᠭᠰᠠᠨ ᠴᠡᠷᠢᠭ ᠪᠠ ᠠᠢᠯ ᠭᠡᠷ ᠦ᠋ᠨ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠨᠢᠯᠬᠠ ᠬᠡᠦᠬᠡᠳ ᠲᠡᠢ ᠨᠡᠢᠲᠡ ᠠᠷᠪᠠᠨ ᠭᠤᠷᠪᠠ ᠪᠠᠷᠢᠭᠳᠠᠵᠤ᠂ ᠢᠦᠢ ᠯᠢᠨ ᠳ᠋ᠦ᠍ ᠠᠪᠠᠴᠢᠵᠤ ᠬᠣᠷᠢᠭᠳᠠᠭᠰᠠᠨ ᠴᠡᠷᠢᠭ ᠬᠣᠶᠠᠷ᠂ ᠰᠢᠲᠠᠭᠠᠨ ᠲᠦᠢᠮᠡᠷᠳᠡᠭᠰᠡᠨ ᠠᠢᠯ ᠡᠷᠦᠬᠡ ᠳᠥᠴᠢ ᠢᠯᠡᠭᠦᠦ᠂ ᠨᠢᠳᠤᠨᠤᠨ ᠬᠠᠪᠤᠷ ᠠ᠋ᠴᠠ ᠣᠳᠣ ᠬᠦᠷᠲᠡᠯᠡ ᠲᠡᠳᠡᠨ ᠳ᠋ᠦ᠍ ᠠᠯᠠᠭᠳᠠᠭᠰᠠᠨ ᠳᠥᠷᠪᠡᠨ ᠵᠦᠢᠯ ᠦ᠋ᠨ ᠮᠠᠯ ᠨᠢᠭᠡ ᠲᠦᠮᠡ ᠢᠯᠡᠭᠦᠦ᠂ ᠠᠯᠳᠠᠭᠳᠠᠭᠰᠠᠨ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠪᠠᠷᠤᠭᠴᠠᠭᠠᠨ ᠦᠨᠡ ᠪᠡᠷ ᠪᠣᠳᠣᠪᠠᠯ ᠬᠣᠶᠠᠷ ᠵᠠᠭᠤᠨ ᠲᠦᠮᠡᠨ ᠯᠠᠩ ᠳ᠋ᠤᠷ ᠬᠦᠷᠴᠡᠢ᠃ ᠲᠡᠭᠡᠭᠡᠳ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠨᠠᠮ ᠤ᠋ᠨ ᠲᠥᠪ ᠬᠣᠷᠢᠶᠠᠨ ᠠ᠋ᠴᠠ ᠬᠠᠷᠠᠴᠢᠨ ᠤ᠋ ᠰᠠᠢᠨᠪᠠᠶᠠᠷ ᠨᠠᠷ ᠢ᠋ ᠲᠣᠮᠢᠯᠠᠨ ᠬᠣᠶᠠᠷ ᠵᠠᠭᠤᠭᠠᠳ ᠴᠡᠷᠢᠭ ᠣᠷᠣᠵᠤ ᠲᠤᠰᠠᠯᠠᠨ ᠪᠠᠢᠯᠳᠤᠯᠴᠠᠵᠤ ᠲᠡᠳᠡᠭᠡᠷ ᠳᠡᠭᠡᠷᠡᠮ ᠢ᠋ ᠭᠡᠳᠡᠷᠭᠦ ᠡᠭᠡᠭᠦᠯᠦᠭᠰᠡᠨ ᠪᠠᠢᠨᠠ᠃ ᠁ ᠮᠥᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠳ᠋ᠦ᠍ ᠭᠡᠨᠡᠳᠲᠡ ᠢᠦᠢ ᠯᠢᠨ ᠦ᠌ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠬᠠᠷᠢᠶᠠᠲᠤ ᠶᠠᠩ ᠶᠢᠩᠵᠠᠩ᠂ ᠳ᠋ᠠᠢ ᠯᠢᠶᠠᠨᠵᠠᠩ ᠨᠠᠷ ᠤ᠋ᠨ ᠮᠢᠩᠭᠠ ᠭᠠᠷᠤᠢ ᠴᠡᠷᠢᠭ ᠯᠦ᠍ᠭᠡ ᠮᠠᠨ ᠤ᠋ ᠪᠡᠢᠯᠡ ᠨᠣᠶᠠᠨ ᠤ᠋ ᠵᠢᠰᠤᠷ ᠵᠠᠯᠢᠬᠠᠢ ᠪᠠᠢᠯᠳᠤᠭᠴᠢ ᠸᠠᠩᠴᠣᠭᠷᠠᠪᠳᠠᠨ᠂ ᠪᠤᠶᠠᠨᠴᠣᠭ᠂ ᠪᠠᠶᠠᠨᠰᠡᠷᠡᠩ᠂ ᠪᠤᠶᠠᠨᠳᠣᠭᠲᠠᠬᠤ᠂ ᠡᠷᠬᠢᠮᠴᠡᠩᠭᠡᠯ᠂ ᠪᠠᠷᠠᠩ᠂ ᠲᠠᠢᠵᠢ ᠪᠠᠪᠠ᠂ ᠲᠡᠭᠦᠰᠵᠢᠷᠭᠠᠯᠠᠩ᠂ ᠴᠢᠯᠠᠭᠤ᠂ ᠪᠠᠲᠤ ᠨᠠᠷ ᠤ᠋ᠨ ᠵᠢᠷᠠᠭᠠᠳ ᠴᠡᠷᠢᠭ ᠢ᠋ ᠵᠠᠯᠠᠨ ᠤ᠋ ᠵᠠᠩᠭᠢ ᠪᠤᠶᠠᠨᠳᠡᠯᠭᠡᠷ ᠵᠠᠬᠢᠷᠤᠨ ᠲᠣᠮᠢᠯᠠᠵᠤ ᠬᠠᠮᠲᠤ ᠨᠡᠢᠯᠡᠨ ᠢᠷᠡᠭᠡᠳ ᠤᠯᠠᠭᠠᠨᠲᠣᠯᠣᠭᠠᠢ᠂ ᠮᠠᠩᠬᠠᠲᠤ ᠰᠦᠮᠡ᠂ ᠨᠣᠶᠠᠨ ᠤ᠋ ᠱᠠᠩ ᠶᠠᠮᠤᠨ ᠢ᠋ᠶ᠋ᠠᠷ ᠡᠩᠨᠡᠨ ᠰᠠᠭᠤᠭᠠᠳ ᠥᠴᠦᠬᠡᠨ ᠪᠢᠳᠡᠨ ᠢ᠋ ᠦᠷᠭᠦᠯᠵᠢ ᠬᠣᠮᠣᠷᠣᠨ ᠫᠤᠤᠳᠠᠵᠤ᠂ ᠪᠠᠰᠠ ᠬᠦ᠌ ᠶᠡᠬᠡ ᠫᠤᠤ ᠪᠠ ᠳ᠋ᠢᠯᠸᠡᠢ(ᠳᠡᠯᠪᠡᠴᠡᠬᠦ ᠮᠢᠨᠠ ᠪᠣᠯᠤᠯᠲᠠᠢ— ᠵᠣᠬᠢᠶᠠᠭᠴᠢ ᠠ᠋ᠴᠠ) ᠵᠡᠷᠭᠡ ᠶ᠋ᠢᠨ ᠣᠯᠠᠨ ᠶᠡᠬᠡ ᠫᠤᠤ ᠲᠠᠯᠪᠢᠵᠤ᠂ ᠠᠢᠯ ᠭᠡᠷ ᠦ᠋ᠨ ᠨᠣᠮᠣᠬᠠᠨ ᠬᠥᠮᠦᠰ ᠪᠠ ᠮᠠᠯ ᠢ᠋ ᠬᠣᠣᠷᠯᠠᠨ ᠠᠯᠠᠭᠰᠠᠨ ᠠᠨᠤ ᠴᠥᠭᠡᠨ ᠦᠭᠡᠢ ᠪᠢᠯᠡ᠂ ᠵᠢᠴᠢ ᠬᠤᠰᠢᠭᠤᠨ ᠤ᠋ ᠶᠡᠬᠡ ᠬᠠᠭᠠᠰ ᠨᠤᠲᠤᠭ ᠤ᠋ᠨ ᠰᠦᠮᠡ ᠬᠡᠢᠳ ᠦ᠋ᠨ ᠪᠤᠷᠬᠠᠨ ᠰᠢᠲᠦᠭᠡᠨ ᠪᠠ ᠰᠤᠳᠤᠷ ᠨᠣᠮ᠂ ᠱᠠᠪᠢᠨᠠᠷ ᠤ᠋ᠨ ᠨᠣᠮ ᠤ᠋ᠨ ᠬᠤᠪᠴᠠᠰᠤ᠂ ᠬᠡᠷᠡᠭᠰᠡᠯ ᠡᠳ᠋ᠯᠡᠯ ᠲᠠᠸᠠᠷ ᠪᠥᠭᠡᠳ᠂ ᠴᠠᠭ ᠵᠢᠯ ᠦ᠋ᠨ ᠬᠣᠪᠣᠷ ᠭᠠᠴᠢᠭ ᠲᠤᠷ ᠲᠤᠢᠯ ᠤ᠋ᠨ ᠵᠦᠳᠡᠷᠡᠨ ᠡᠭᠦᠷᠲᠦᠭᠰᠡᠨ ᠠᠢᠯ ᠠᠷᠠᠳ ᠤ᠋ᠨ ᠠᠮᠢᠨ ᠲᠡᠵᠢᠭᠡᠯ ᠦ᠋ᠨ ᠡᠳ᠋ ᠮᠠᠯ ᠬᠥᠷᠥᠩᠭᠡ ᠶ᠋ᠢ ᠨᠢᠭᠡᠮᠦᠰᠦᠨ ᠳᠡᠭᠡᠷᠡᠮᠯᠡᠨ ᠠᠪᠴᠤ ᠪᠦᠷᠢᠯᠭᠡᠭᠡᠳ ᠦᠯᠡᠳᠡᠭᠡᠬᠦ ᠡᠳ᠋ᠯᠡᠯ ᠪᠠᠷᠠᠭᠠ ᠭᠡᠷ ᠢ᠋ ᠢᠨᠦ ᠲᠠᠯᠬᠠᠳᠠᠨ ᠲᠦᠢᠮᠡᠷᠳᠡᠵᠦ ᠰᠦᠢᠳᠬᠡᠭᠡᠳ ᠡᠳᠦᠭᠡ ᠥᠴᠦᠬᠡᠨ ᠪᠢᠳᠡ ᠳ᠋ᠦ᠍ᠷ ᠬᠡᠷᠡᠭᠰᠡᠬᠦ ᠠᠶᠠᠭᠠ ᠰᠢᠨᠠᠭᠠ᠂ ᠲᠣᠭᠣᠭᠠ ᠤᠭᠤᠷ ᠮᠠᠨᠴᠤ ᠴᠤ᠌ ᠦᠭᠡᠢ ᠡᠴᠡ ᠠᠩᠭᠢᠳᠠ ᠪᠠᠯᠠᠷ ᠬᠥᠳᠡᠭᠡ ᠳ᠋ᠦ᠍ᠷ ᠨᠢᠭᠤᠭᠰᠠᠨ ᠬᠥᠮᠦᠰ ᠢ᠋ ᠲᠤᠰᠬᠠᠢ ᠡᠷᠢᠨ ᠣᠯᠵᠤ ᠪᠠᠷᠢᠭᠠᠳ ᠳᠡᠭᠦᠵᠢᠯᠡᠨ ᠵᠠᠨᠴᠢᠵᠤ ᠰᠢᠷᠠᠵᠤ ᠲᠦᠯᠡᠬᠦ᠂ ᠠᠷᠪᠠᠨ ᠶᠡᠬᠡ ᠲᠣᠭᠠᠲᠤ ᠮᠥᠩᠭᠥ ᠮᠠᠯ ᠲᠣᠭᠲᠠᠭᠠᠨ ᠠᠪᠬᠤ ᠪᠠ ᠡᠰᠡ ᠦᠯᠦ ᠦᠭᠪᠡᠰᠦ ᠢᠦᠢ ᠯᠢᠨ ᠳ᠋ᠦ᠍ᠷ ᠠᠪᠠᠴᠢᠵᠤ ᠭᠢᠨᠳᠠᠨ ᠳ᠋ᠤᠷ ᠬᠣᠷᠢᠬᠤ ᠭᠡᠮᠡᠨ ᠠᠶᠤᠯᠭᠠᠨ ᠬᠢᠬᠠᠭᠳᠠᠭᠤᠯᠵᠤ ᠳᠥᠷᠪᠡᠨ ᠰᠠᠷᠠ ᠢᠯᠡᠭᠦᠦ ᠬᠣᠷᠭᠣᠳᠠᠨ ᠰᠠᠭᠤᠵᠤ ᠪᠠᠢᠭᠠᠳ ᠠᠷᠠᠢᠬᠠᠨ ᠪᠤᠴᠠᠵᠤ ᠤᠬᠤᠷᠢᠭᠰᠠᠨ ᠪᠣᠯᠪᠠᠴᠤ ᠮᠠᠨ ᠤ᠋ ᠨᠣᠶᠠᠨ ᠤ᠋ ᠰᠢᠳᠠᠷ ᠶᠠᠪᠤᠭᠴᠢ ᠪᠢᠯᠳᠠᠤᠴᠢ ᠵᠠᠯᠢᠬᠠᠢ ᠳᠡᠭᠡᠷᠡᠮᠴᠢ ᠴᠡᠷᠢᠭ ᠦ᠋ᠳ᠂ ᠢᠷᠭᠡᠨ ᠲᠠᠷᠢᠶᠠᠯᠠᠩ ᠤ᠋ᠨ ᠭᠠᠵᠠᠷ ᠰᠠᠭᠤᠭᠠᠳ ᠵᠡᠭᠦᠨ ᠪᠠᠷᠠᠭᠤᠨ ᠳ᠋ᠤᠷ ᠭᠡᠷᠦᠨ ᠬᠡᠰᠦᠵᠦ ᠠᠢᠯ ᠭᠡᠷ ᠦ᠋ᠳ ᠡᠴᠡ ᠠᠯᠢ ᠲᠠᠭᠠᠲᠠᠢ ᠦᠵᠡᠭᠳᠡᠭᠰᠡᠨ ᠪᠦᠬᠦᠨ ᠢ᠋ ᠳᠡᠭᠡᠷᠡᠮᠯᠡᠨ ᠠᠪᠬᠤ ᠪᠠ ᠪᠡᠯᠴᠢᠭᠡᠷ ᠳᠠᠬᠢ ᠮᠣᠷᠢ ᠦᠬᠡᠷ ᠢ᠋ ᠭᠤᠴᠢ ᠳᠥᠴᠢ ᠪᠡᠷ ᠲᠠᠭᠤᠵᠤ ᠢᠦᠢ ᠯᠢᠨ ᠳ᠋ᠦ᠍ ᠠᠪᠠᠴᠢᠨ ᠰᠤᠮᠤ ᠬᠤᠳᠠᠯᠳᠤᠨ ᠠᠪᠬᠤ ᠪᠠ ᠠᠯᠠᠵᠤ ᠢᠳᠡᠬᠦ᠂ ᠵᠢᠴᠢ ᠠᠮᠵᠢᠭᠤᠯ ᠠᠴᠢᠬᠤ ᠪᠠᠷ ᠶᠠᠪᠤᠭᠰᠠᠨ ᠶᠠᠳᠠᠭᠤ ᠠᠷᠠᠳ ᠢ᠋ ᠵᠠᠮ ᠲᠣᠰᠴᠤ ᠥᠴᠦᠬᠡᠨ ᠲᠡᠳᠦᠢ ᠢᠳᠡᠰᠢ ᠠᠪᠬᠤ ᠦᠨᠡ ᠪᠠ ᠤᠨᠤᠭᠠ ᠶ᠋ᠢ ᠪᠤᠯᠢᠶᠠᠨ ᠳᠡᠭᠡᠷᠡᠮᠯᠡᠬᠦ ᠵᠦᠢᠯ ᠢ᠋ᠶ᠋ᠡᠷ ᠡᠳᠦᠭᠡ ᠪᠣᠯᠲᠠᠯᠠ ᠵᠣᠪᠠᠭᠠᠵᠤ ᠪᠠᠢᠨᠠ᠃ ᠡᠢᠮᠦ ᠤᠴᠢᠷ ᠢ᠋ ᠮᠡᠳᠡᠭᠦᠯᠬᠦ ᠡᠴᠡ ᠥᠭᠡᠷᠡ ᠤᠷᠢᠳ ᠠ᠋ᠴᠠ ᠨᠣᠶᠠᠨ ᠡᠵᠡᠨ ᠢ᠋ᠶ᠋ᠡᠨ ᠵᠠᠯᠠᠯᠭᠠ ᠲᠠᠯᠪᠢᠵᠤ ᠠᠢᠯᠠᠳᠬᠠᠨ ᠬᠠᠭᠤᠴᠢᠨ ᠵᠢᠷᠤᠮ ᠢ᠋ᠶ᠋ᠠᠷ ᠶᠠᠪᠤᠬᠤ ᠶ᠋ᠢ ᠬᠦᠰᠡᠵᠦ ᠪᠣᠢ ᠪᠠᠢᠲᠠᠯᠠ ᠪᠢᠳᠡᠨ ᠦ᠌ ᠮᠣᠩᠭᠣᠯ ᠬᠤᠰᠢᠭᠤᠨ ᠳ᠋ᠤᠷ ᠣᠭᠲᠣ ᠬᠠᠮᠢᠶᠠ ᠦᠭᠡᠢ ᠵᠢᠩ ᠶᠤᠸᠠᠢ ᠰᠢᠦ ᠡᠴᠡ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠨᠠᠭᠤᠷ ᠭᠠᠵᠠᠷ ᠲᠤᠷ ᠳᠤᠷᠠᠯᠠᠵᠤ ᠠᠰᠢᠭ ᠢ᠋ ᠡᠷᠬᠢᠯᠡᠬᠦ ᠳ᠋ᠡᠭᠡᠨ ᠨᠣᠶᠠᠨ ᠭᠡᠭᠡᠨ ᠢ᠋ ᠶᠠᠪᠤᠭᠤᠯᠵᠤ ᠦᠭᠡᠢ ᠡᠴᠡ ᠦᠯᠦ ᠪᠠᠷᠠᠮ ᠬᠠᠷᠢᠨ ᠦᠦᠰᠢᠨ ᠪᠡᠢᠯᠡ ᠮᠥᠨ ᠬᠦ᠌ ᠢᠦᠢ ᠯᠢᠨ ᠬᠣᠲᠠ ᠳ᠋ᠤᠷ ᠵᠦᠭᠡᠷ ᠰᠠᠭᠤᠵᠤ ᠪᠠᠰᠠ ᠬᠦ᠌ ᠳᠠᠬᠢᠨ ᠳᠡᠭᠡᠷᠡᠮᠳᠡᠨ ᠪᠤᠯᠢᠶᠠᠵᠤ ᠡᠨᠡ ᠮᠡᠲᠦ ᠢᠨᠦ ᠴᠢᠩ ᠦᠨᠡᠨ ᠭᠡᠮᠡᠨ ᠭᠦᠳᠬᠡᠵᠦ᠂ ᠶᠡᠷᠦᠩᠬᠡᠢ ᠰᠧᠯᠢᠩ ᠦ᠋ᠨ ᠭᠠᠵᠠᠷ ᠬᠣᠪᠯᠠᠨ ᠮᠡᠳᠡᠭᠦᠯᠦᠭᠰᠡᠨ ᠮᠤᠰᠬᠢᠭᠳᠠᠯ ᠢ᠋ ᠲᠠᠢᠯᠤᠨ ᠥᠷᠥᠰᠢᠶᠡᠯᠭᠡᠬᠦ ᠶ᠋ᠢ ᠭᠤᠶᠤᠬᠤ ᠠ᠋ᠴᠠ ᠭᠠᠳᠠᠨᠠ ᠪᠠᠰᠠ ᠵᠡᠭᠦᠨᠭᠠᠷ ᠤ᠋ᠨ ᠵᠠᠰᠠᠭ ᠬᠠᠮᠢᠶᠠᠷᠤᠭᠰᠠᠨ ᠬᠦᠩ ᠲᠤᠰᠠᠯᠠᠭᠴᠢ ᠨᠣᠶᠠᠨ ᠠ᠋ᠴᠠ ᠵᠠᠬᠢᠳᠠᠯ ᠢ᠋ᠶ᠋ᠠᠷ ᠬᠠᠷᠢᠶᠠᠲᠤ ᠵᠠᠰᠠᠭ ᠪᠡᠢᠯᠡ ᠨᠣᠶᠠᠨ ᠢ᠋ᠶ᠋ᠠᠨ ᠵᠠᠯᠠᠯᠭᠠ ᠠᠢᠯᠠᠳᠬᠠᠵᠤ ᠱᠠᠩ ᠶᠠᠮᠤᠨ ᠳ᠋ᠤᠷ ᠠᠨᠤ ᠰᠠᠭᠠᠲᠠᠭᠤᠯᠰᠤᠭᠠᠢ ᠭᠡᠮᠡᠨ ᠲᠤᠰᠢᠶᠠᠭᠰᠠᠨ ᠢ᠋ ᠳᠠᠭᠠᠵᠤ ᠬᠠᠷᠢᠶᠠᠲᠤ ᠬᠦᠩ ᠲᠤᠰᠠᠯᠠᠭᠴᠢ ᠲᠦᠰᠢᠮᠡᠳ ᠲᠦ᠍ ᠮᠡᠳᠡᠭᠦᠯᠵᠦ ᠤᠳᠠᠭᠠ ᠳᠠᠷᠠᠭᠠ ᠪᠠᠷ ᠲᠦᠰᠢᠮᠡᠯ ᠤᠲᠤᠭᠤᠯᠤᠨ ᠵᠠᠯᠠᠯᠭᠠ ᠠᠢᠯᠠᠳᠬᠠᠭᠰᠠᠭᠠᠷ ᠪᠣᠢ᠂ ᠡᠳᠦᠭᠡ ᠪᠣᠯᠲᠠᠯᠠ ᠪᠠᠭᠤᠨ ᠰᠠᠭᠠᠲᠠᠭᠠ ᠦᠭᠡᠢ ᠪᠥᠭᠡᠳ ᠥᠴᠦᠬᠡᠨ ᠣᠯᠠᠨ ᠪᠢᠳᠡᠨ ᠢ᠋ ᠬᠠᠷᠢᠶᠠᠲᠤ ᠬᠦᠩ ᠲᠤᠰᠠᠯᠠᠭᠴᠢ ᠨᠣᠶᠠᠳ ᠲᠦᠰᠢᠮᠡᠳ ᠨᠠᠷ ᠰᠢᠢᠳᠬᠡᠨ ᠲᠣᠬᠣᠨᠢᠭᠤᠯᠵᠤ ᠮᠡᠳᠡᠭᠦᠯᠦᠭᠰᠡᠨ ᠡᠴᠡ ᠬᠣᠢᠰᠢ ᠤᠯᠠᠭᠠᠨ ᠨᠠᠮ ᠤ᠋ᠨ ᠰᠠᠨᠠᠭᠠᠨ ᠤ᠋ ᠵᠢᠷᠤᠮ ᠢ᠋ ᠳᠡᠯᠭᠡᠷᠡᠭᠦᠯᠦᠨ ᠵᠠᠷᠯᠠᠵᠤ ᠮᠣᠩᠭᠣᠯ ᠢᠷᠭᠡᠨ ᠢ᠋ ᠴᠢᠷᠦᠭᠳᠡᠭᠦᠯᠦᠨ ᠵᠣᠪᠠᠭᠠᠵᠤ ᠪᠠᠰᠠ ᠴᠤ᠌ ᠵᠠᠰᠠᠭ ᠤ᠋ᠨ ᠠᠯᠪᠠᠨ ᠤ᠋ ᠬᠡᠷᠡᠭ ᠢ᠋ ᠬᠥᠨᠳᠡᠯᠢᠳᠦᠨ ᠪᠣᠭᠣᠭᠳᠠᠭᠤᠯᠤᠭᠰᠠᠨ ᠵᠦᠢᠯ ᠣᠭᠲᠣ ᠦᠭᠡᠢ᠃ ᠬᠠᠭᠤᠴᠢᠨ ᠵᠢᠷᠤᠮᠴᠢᠯᠠᠨ ᠳ᠋ᠠᠭᠠᠨ ᠶᠠᠪᠤᠵᠤ ᠪᠣᠢ ᠦᠨᠡᠨ ᠤᠴᠢᠷ ᠤ᠋ᠳ ᠢ᠋ ᠲᠣᠳᠣᠷᠬᠠᠢᠯᠠᠨ ᠭᠠᠷᠭᠠᠵᠤ ᠡᠷᠭᠦᠨ ᠮᠡᠳᠡᠭᠦᠯᠪᠡ᠃ ᠣᠯᠳᠠᠬᠤᠯᠠ ᠳᠣᠯᠢᠴᠢᠨ ᠥᠷᠥᠰᠢᠶᠡᠵᠦ ᠴᠢᠭᠤᠯᠭᠠᠨ ᠤ᠋ ᠲᠡᠷᠢᠭᠦᠨ ᠵᠢᠶᠦ᠋ᠨ ᠸᠠᠩ ᠨᠣᠶᠠᠨ ᠤ᠋ ᠭᠠᠵᠠᠷ ᠲᠤᠷ ᠶᠠᠭᠠᠷᠠᠪᠴᠢᠯᠠᠨ ᠶᠠᠪᠤᠭᠤᠯᠵᠤ ᠬᠡᠰᠢᠭ ᠬᠦᠷᠲᠡᠭᠡᠬᠦ ᠶ᠋ᠢ ᠠᠵᠢᠶᠠᠮᠤᠢ᠂ ᠡᠭᠦᠨ ᠦ᠌ ᠲᠤᠯᠠ ᠡᠷᠭᠦᠨ ᠪᠠᠷᠢᠪᠠ᠃
ᠳᠤᠮᠳᠠᠳᠤ ᠢᠷᠭᠡᠨ ᠤᠯᠤᠰ ᠤ᠋ᠨ ᠠᠷᠪᠠᠨ ᠳᠣᠯᠣᠳᠤᠭᠠᠷ ᠣᠨ
ᠰᠢᠷᠠ ᠯᠤᠤ ᠵᠢᠯ ᠦ᠋ᠨ ᠡᠪᠦᠯ ᠦ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠵᠢᠷᠭᠤᠭᠠᠨᠠ᠃
(2) ᠲᠡᠢᠨ ᠦ᠌ ᠳᠠᠷᠠᠭᠠᠬᠢ ᠠᠵᠢᠯ ᠤ᠋ᠨ ᠲᠠᠯᠠ ᠪᠠᠷ ᠪᠦᠬᠦ ᠬᠤᠰᠢᠭᠤᠨ ᠤ᠋ ᠠᠷᠪᠠᠨ ᠳᠣᠯᠣᠭᠠᠨ ᠡᠭᠦᠷ ᠲᠦ᠍ ᠮᠡᠳᠡᠭᠳᠡᠭᠰᠡᠨ ᠰᠢᠨᠡᠯᠡᠮᠡ ᠶ᠋ᠢᠨ ᠭᠠᠷ ᠪᠢᠴᠢᠮᠡᠯ ᠦ᠋ᠨ ᠤᠤᠯ ᠡᠬᠡ
ᠬᠣᠰᠢᠭᠤ ᠬᠣᠷᠢᠶᠠ ᠪᠠ᠂ ᠴᠡᠷᠢᠭ ᠦ᠋ᠨ ᠲᠤᠸᠠᠨ ᠠ᠋ᠴᠠ᠂ ᠲᠠᠪᠴᠠᠭ ᠨᠤᠲᠤᠭ ᠤ᠋ᠨ ᠳᠥᠷᠪᠡᠳᠦᠭᠡᠷ ᠡᠭᠦᠷ ᠦ᠋ᠨ ᠳᠠᠷᠤᠭᠠ ᠨᠠᠷ ᠪᠠ ᠳᠠᠭᠠᠴᠠᠩ ᠨᠠᠷ ᠲᠤ᠌ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠵᠠᠷᠯᠢᠭ ᠰᠠᠭᠤᠯᠶᠤ ᠶᠠᠪᠤᠭᠤᠯᠬᠤ ᠤᠴᠢᠷ᠂ ᠮᠥᠨᠥᠬᠡᠨ ᠲᠥᠪ ᠬᠣᠷᠢᠶᠠᠨ ᠠ᠋ᠴᠠ ᠵᠠᠷᠯᠠᠨ ᠢᠷᠡᠭᠰᠡᠨ ᠪᠢᠴᠢᠭ ᠪᠠ ᠲᠤᠰᠬᠠᠢ ᠲᠣᠮᠢᠯᠠᠨ ᠢᠷᠡᠭᠰᠡᠨ ᠲᠥᠪ ᠬᠣᠷᠢᠶᠠᠨ ᠤ᠋ ᠨᠠᠷᠢᠨ ᠪᠢᠴᠢᠭ ᠦ᠋ᠨ ᠳᠠᠷᠤᠭᠠ ᠮᠡᠳᠡᠯᠲᠦ ᠶ᠋ᠢᠨ ᠬᠤᠷᠠᠯᠳᠤᠨ ᠢᠯᠡᠳᠬᠡᠭᠰᠡᠨ ᠢ᠋ ᠬᠠᠷᠢᠶᠠᠲᠤ ᠠᠷᠪᠠᠨ ᠳᠣᠯᠣᠭᠠᠨ ᠡᠭᠦᠷ ᠲᠡᠭᠡᠨ ᠵᠠᠩᠶᠥ᠋ᠨ ᠦ᠌ ᠶᠡᠬᠡ ᠴᠡᠷᠢᠭ ᠢ᠋ ᠬᠥᠳᠡᠯᠭᠡᠨ ᠢᠷᠡᠭᠦᠯᠵᠦ ᠮᠠᠨ ᠤ᠋ ᠳᠠᠢᠰᠤᠨ ᠢ᠋ ᠤᠰᠠᠳᠬᠠᠨ ᠠᠷᠢᠯᠭᠠᠶᠤ ᠨᠠᠮ ᠤ᠋ᠨ ᠪᠢᠳᠡ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠬᠤ ᠴᠠᠭ ᠪᠣᠯᠤᠭᠰᠠᠨ ᠮᠠᠨᠤ ᠮᠠᠭᠤᠲᠠᠢ ᠶ᠋ᠢ ᠮᠡᠳᠡᠭᠳᠡᠨ ᠲᠤᠩᠭᠠᠯᠠᠭ ᠶᠠᠪᠤᠭᠤᠯᠤᠶᠠ᠃ ᠬᠦᠷᠬᠦᠯᠡ ᠳᠠᠷᠤᠭᠠ ᠳᠠᠭᠠᠴᠠᠩ ᠨᠠᠷ᠂ ᠳᠠᠢᠰᠤᠨ ᠤ᠋ ᠭᠠᠯ ᠤᠰᠤᠨ ᠤ᠋ ᠠᠶᠤᠯ ᠳ᠋ᠤ᠌ ᠠᠮᠢ ᠪᠡᠶᠡ ᠭᠡᠷ ᠬᠥᠷᠥᠩᠭᠡ ᠪᠡᠨ ᠠᠯᠳᠠᠵᠤ᠂ ᠠᠶᠤᠨ ᠰᠣᠴᠢᠵᠤ ᠪᠠᠯᠠᠷ ᠪᠤᠷᠭᠠᠰᠤᠨ ᠳ᠋ᠤ᠌ ᠪᠥᠭᠰᠢᠨ ᠪᠦᠬᠦᠢ ᠬᠥᠭᠰᠢᠨ ᠵᠠᠯᠠᠭᠤ ᠨᠢᠯᠬᠠᠰ ᠲᠤ᠌ ᠵᠠᠷᠯᠠᠵᠤ᠂ ᠡᠳᠦᠭᠡ ᠪᠢᠳᠡ ᠨᠠᠷ ᠡᠷᠬᠡ ᠴᠢᠯᠥᠭᠡ ᠪᠡᠨ ᠣᠯᠵᠤ ᠤᠰᠤ ᠰᠢᠷᠣᠢ ᠳ᠋ᠠᠭᠠᠨ ᠡᠵᠡᠨ ᠪᠣᠯᠵᠤ ᠰᠠᠭᠤᠬᠤ ᠠᠨᠤ ᠮᠠᠭᠠᠳ ᠲᠠᠢ ᠲᠤᠯᠠ ᠠᠷᠭᠠ ᠶ᠋ᠢ ᠡᠷᠢᠵᠦ ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠣᠷᠭᠢᠯ ᠦᠭᠡᠢ ᠲᠦᠳᠡᠭᠡᠯᠵᠡᠨ᠂ ᠳᠠᠷᠤᠢ ᠲᠤᠰᠠᠯᠠᠨ ᠲᠡᠳᠬᠦᠬᠦ ᠶ᠋ᠢ ᠨᠢᠳᠦᠨ ᠳ᠋ᠦ᠍ᠷ ᠰᠠᠭᠤᠯᠤᠭᠠᠳ (ᠰᠠᠭᠤᠯᠭᠠᠭᠠᠳ)᠂ ᠬᠠᠷᠭᠢᠰ ᠳᠣᠭᠰᠢᠨ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠦ᠋ᠨ ᠴᠡᠷᠢᠭ ᠲᠦ᠍ ᠬᠣᠬᠢᠷᠠᠨ᠂ ᠠᠯᠳᠠᠭᠳᠠᠭᠰᠠᠨ ᠵᠦᠢᠯ ᠪᠦᠭᠦᠳᠡ ᠶ᠋ᠢ ᠠᠯᠢ ᠬᠡᠨ ᠦ᠌ ᠨᠡᠷᠡ ᠶ᠋ᠢᠨ ᠳᠣᠣᠷᠠ ᠲᠣᠳᠣᠷᠬᠠᠢ ᠳᠠᠩᠰᠠ ᠦᠢᠯᠡᠳᠴᠦ ᠢᠷᠡᠭᠦᠯᠬᠦ ᠡᠴᠡ ᠭᠠᠳᠠᠨᠠ᠂ ᠡᠭᠦᠷ ᠪᠦᠷᠢ ᠡᠴᠡ ᠲᠦᠷᠭᠡᠨ ᠴᠢᠬᠤᠯᠠ ᠢᠷᠡᠭᠦᠯᠪᠡᠰᠦ ᠵᠣᠬᠢᠬᠤ ᠦᠨᠡᠯᠡᠨ ᠠᠪᠬᠤ ᠮᠣᠷᠢ ᠨᠢᠭᠡ᠂ ᠤᠯᠠᠭᠠᠴᠢ ᠶ᠋ᠢᠨ ᠪᠤᠵᠢᠮᠠᠭᠠᠢ ᠢᠳᠡᠷ ᠬᠥᠮᠦᠨ ᠭᠤᠷᠪᠠ ᠭᠤᠷᠪᠠ ᠲᠤᠰ ᠪᠦᠷᠢ ᠤᠨᠤᠭᠠ ᠲᠠᠢ ᠬᠦᠨᠡᠰᠦᠲᠠᠢ᠂ ᠴᠡᠷᠢᠭ ᠮᠣᠷᠢ ᠲᠡᠮᠡᠭᠡ᠂ ᠤᠯᠠᠭᠠ ᠶ᠋ᠢᠨ ᠮᠣᠷᠢᠳ᠂ ᠨᠢᠵᠡᠭᠡᠳ ᠦ᠋ᠨ ᠬᠣᠨᠢ᠂ ᠪᠣᠯᠤᠭᠰᠠᠨ ᠲᠦᠭᠦᠬᠡᠢ ᠴᠠᠭᠠᠨ ᠠᠮᠤ᠂ ᠨᠤᠲᠤᠭ ᠨᠤᠲᠤᠭ ᠤ᠋ᠨ ᠴᠠᠩᠴᠠ ᠶ᠋ᠢᠨ ᠠᠮᠤ ᠡᠳᠡᠭᠡᠷ ᠵᠦᠢᠯ ᠢ᠋ ᠡᠨᠡ ᠬᠣᠷᠢᠨ ᠭᠤᠷᠪᠠᠨᠠ ᠮᠠᠨ ᠤ᠋ ᠪᠦᠬᠦᠢ ᠭᠠᠵᠠᠷᠠ᠂ ᠣᠰᠣᠯᠳᠠᠯ ᠦᠭᠡᠢ ᠪᠡᠶᠡ ᠪᠡᠷ ᠬᠦᠷᠭᠡᠵᠦ ᠢᠷᠡᠭᠲᠦᠨ᠂ ᠡᠨᠡ ᠢᠨᠦ ᠲᠦᠷᠭᠡᠨ ᠴᠢᠬᠤᠯᠠ ᠶ᠋ᠢᠨ ᠶᠠᠪᠤᠳᠠᠯ ᠲᠤᠯᠠ ᠳᠡᠮᠡᠢ ᠠᠷᠭᠠ ᠰᠢᠯᠲᠠᠭ ᠡᠭᠦᠰᠬᠡᠨ ᠬᠣᠵᠢᠮᠳᠠᠨ ᠰᠠᠭᠠᠲᠠᠭᠤᠯᠵᠤ ᠣᠭᠲᠣ ᠦᠯᠦ ᠪᠣᠯᠤᠮᠤᠢ᠂ ᠣᠰᠣᠯᠳᠠᠭᠴᠢᠳ ᠢ᠋ ᠴᠡᠷᠢᠭ ᠦ᠋ᠨ ᠴᠢᠬᠤᠯᠠ ᠲᠣᠭᠲᠠᠭᠠᠯ ᠢ᠋ᠶ᠋ᠠᠷ ᠬᠡᠯᠡᠯᠴᠡᠬᠦ ᠶ᠋ᠢ ᠮᠡᠳᠡᠲᠦᠭᠡᠢ ᠭᠡᠮᠡᠨ ᠡᠭᠦᠨ ᠦ᠌ ᠲᠤᠯᠠ ᠳᠣᠪᠲᠣᠯᠭᠠᠵᠤ ᠲᠤᠰᠢᠶᠠᠨ ᠢᠯᠡᠭᠡᠪᠡ᠃②
— — — —
② ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠳᠠᠩᠰᠠ ᠡᠪᠬᠡᠮᠡᠯ ᠦ᠋ᠨ ᠰᠠᠩ ᠤ᠋ᠨ ᠤᠤᠯ ᠡᠬᠡ ᠡᠴᠡ᠃
(3) ᠲᠡᠮᠡᠭᠡᠲᠦ ᠶ᠋ᠢᠨ ᠭᠤᠴᠢᠨ ᠵᠢᠷᠭᠤᠭᠠᠨ ᠬᠠᠩ ᠳ᠋ᠦᠩ ᠳ᠋ᠦ᠍ᠷ ᠢᠯᠡᠭᠡᠭᠰᠡᠨ ᠵᠠᠬᠢᠳᠠᠯ
ᠳᠤᠮᠳᠠᠳᠤ ᠢᠷᠭᠡᠨ ᠤᠯᠤᠰ ᠤ᠋ᠨ ᠲᠥᠷᠥ ᠪᠣᠯᠤᠭᠰᠠᠨ ᠠ᠋ᠴᠠ ᠮᠠᠨ ᠤ᠋ ᠨᠤᠲᠤᠭ ᠲᠤ᠌ ᠴᠠᠭ ᠦᠷᠭᠦᠯᠵᠢ ᠳ᠋ᠤᠯᠢ ᠬᠤᠯᠠᠭᠠᠢ ᠢᠷᠡᠵᠦ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠨ ᠬᠣᠬᠢᠷᠠᠭᠤᠯᠵᠤ᠂ ᠣᠷᠣᠨ ᠭᠡᠷ᠂ ᠰᠦᠮᠡ᠂ ᠮᠣᠩᠭᠣᠯ ᠢᠷᠭᠡᠨ ᠦ᠌ ᠠᠮᠢᠳᠤᠷᠠᠯ ᠤ᠋ᠨ ᠠᠯᠢᠪᠠ ᠦᠷᠡ ᠬᠥᠷᠥᠩᠭᠡ ᠶ᠋ᠢᠨ ᠮᠠᠯ ᠡᠳ᠋ᠯᠡᠯ ᠵᠦᠢᠯ ᠦ᠋ᠳ ᠢ᠋ ᠴᠥᠮ ᠬᠣᠭᠣᠰᠣᠨ ᠪᠣᠯᠭᠠᠲᠠᠯᠠ ᠳᠡᠭᠡᠷᠡᠮᠯᠡᠨ ᠠᠪᠤᠭᠠᠳ᠂ ᠠᠳᠠᠭ ᠲᠤᠷ ᠪᠠᠰᠠ ᠦᠵᠡᠭᠳᠡᠭᠰᠡᠨ ᠰᠠᠢᠨ ᠪᠠ ᠮᠠᠭᠤ ᠬᠥᠮᠦᠨ ᠪᠦᠬᠦᠨ ᠢ᠋ ᠼᠠᠢ ᠱᠧᠨ ᠭᠡᠵᠦ ᠪᠠᠷᠢᠭᠠᠳ ᠵᠠᠨᠴᠢᠬᠤ ᠪᠠ ᠳᠡᠭᠦᠵᠢᠯᠡᠬᠦ᠂ ᠰᠢᠷᠠᠬᠤ ᠪᠠ ᠠᠯᠠᠬᠤ ᠪᠠᠷ ᠠᠶᠤᠯᠭᠠᠨ᠂ ᠬᠡᠲᠦᠷᠬᠡᠢ ᠶᠡᠬᠡ ᠮᠥᠩᠭᠥ᠂ ᠣᠯᠠᠨ ᠲᠣᠭᠠ ᠶ᠋ᠢᠨ ᠮᠠᠯ ᠢ᠋ᠶ᠋ᠠᠷ ᠬᠡᠯᠡᠯᠴᠡᠭᠡ ᠪᠣᠯᠭᠠᠨ ᠠᠪᠬᠤ ᠵᠡᠷᠭᠡ ᠶ᠋ᠢᠨ ᠡᠯᠳᠡᠪ ᠭᠠᠰᠢᠭᠤᠨ ᠤᠰᠤ ᠭᠠᠯ ᠤ᠋ᠨ ᠠᠶᠤᠯ ᠮᠡᠲᠦ ᠲᠤᠢᠯ ᠢ᠋ᠶ᠋ᠠᠷ ᠬᠣᠬᠢᠷᠠᠭᠤᠯᠵᠤ᠂ ᠣᠷᠣᠨ ᠨᠤᠲᠤᠭ ᠲᠤᠷ ᠠᠮᠢᠳᠤᠷᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠳ᠋ᠦ᠍ ᠬᠦᠷᠦᠭᠰᠡᠨ ᠤᠴᠢᠷ᠂ ᠮᠠᠨ ᠤ᠋ ᠣᠯᠠᠨ ᠬᠤᠰᠢᠭᠤᠳ ᠤ᠋ᠨ ᠴᠣᠬᠣᠮ ᠦᠨᠡᠬᠡᠷ ᠵᠦᠳᠡᠷᠡᠭᠰᠡᠨ ᠣᠯᠠᠨ ᠲᠠᠢᠵᠢ᠂ ᠠᠷᠠᠳ ᠪᠢᠳᠡ ᠨᠠᠷ ᠥᠪᠡᠷᠦᠨ ᠭᠠᠵᠠᠷ ᠨᠤᠲᠤᠭ ᠣᠷᠣᠨ ᠭᠡᠷ ᠢ᠋ᠶ᠋ᠡᠨ ᠰᠡᠷᠭᠡᠢᠯᠡᠨ ᠴᠠᠭᠳᠠᠵᠤ ᠬᠠᠮᠠᠭᠠᠯᠠᠬᠤ ᠪᠠᠷ ᠰᠢᠭᠤᠳᠴᠤ ᠠᠷᠠᠳ ᠤᠯᠤᠰ ᠤ᠋ᠨ ᠬᠤᠶᠠᠭ ᠴᠡᠷᠢᠭ ᠪᠣᠯᠵᠤ᠂ ᠲᠤᠰ ᠪᠦᠷᠢ ᠶ᠋ᠢᠨ ᠬᠤᠰᠢᠭᠤᠨ ᠳ᠋ᠠᠭᠠᠨ ᠠᠷᠠᠳ ᠤ᠋ᠨ ᠬᠤᠷᠠᠯ ᠤ᠋ᠨ ᠳᠤᠭᠤᠢᠯᠠᠩ ᠪᠣᠯᠤᠭᠰᠠᠨ ᠪᠢᠯᠡ᠃ ᠬᠡᠳᠦᠢᠪᠡᠷ ᠡᠭᠡᠯ ᠬᠣᠭᠣᠰᠣᠨ ᠶᠠᠳᠠᠭᠤ ᠵᠦᠳᠡᠭᠦᠦ ᠭᠡᠪᠡᠴᠦ ᠡᠢᠨ ᠬᠦ᠌ ᠴᠠᠭᠳᠠᠨ ᠰᠡᠷᠭᠡᠢᠯᠡᠬᠦ ᠳ᠋ᠦ᠍ ᠠᠯᠢᠪᠠ ᠬᠡᠷᠡᠭᠯᠡᠯ ᠡᠷᠬᠢᠮ ᠴᠢᠬᠤᠯᠠ ᠲᠤᠯᠠ ᠮᠠᠨ ᠤ᠋ ᠮᠣᠩᠭᠣᠯ ᠤ᠋ᠨ ᠲᠠᠢᠵᠢ ᠪᠠ ᠠᠷᠠᠳ ᠪᠢᠳᠡ ᠪᠦᠬᠦᠨ ᠢ᠋ᠶ᠋ᠡᠷ ᠮᠠᠯ ᠤ᠋ᠨ ᠠᠬᠠᠷ ᠨᠣᠯᠤᠤᠷ ᠠᠷᠠᠰᠤ ᠵᠦᠢᠯ ᠢ᠋ᠶ᠋ᠡᠨ ᠬᠡᠳᠦᠬᠡᠨ ᠵᠢᠯ ᠦ᠋ᠨ ᠬᠤᠭᠤᠴᠠᠭᠠ ᠪᠠᠷ ᠭᠡᠷᠡ ᠪᠢᠴᠢᠭ ᠢ᠋ᠶ᠋ᠡᠷ ᠪᠠᠲᠤᠯᠠᠨ᠂ ᠭᠠᠳᠠᠭᠠᠳᠤ ᠣᠷᠣᠰ ᠤᠯᠤᠰ ᠤ᠋ᠨ ᠮᠥᠩᠭᠥᠨ ᠫᠦᠰᠡ ᠳ᠋ᠦ᠍ ᠥᠭᠴᠦ ᠲᠡᠢᠨ ᠬᠦ᠌ ᠣᠷᠣᠰ ᠤ᠋ᠨ ᠮᠥᠩᠭᠥᠨ ᠦ᠌ ᠰᠠᠩ ᠠ᠋ᠴᠠ ᠮᠠᠨ ᠤ᠋ ᠮᠣᠩᠭᠣᠯᠴᠤᠳ ᠮᠥᠩᠭᠥ ᠶ᠋ᠢ ᠶᠡᠬᠡ ᠪᠡᠷ ᠠᠪᠬᠤ ᠪᠥᠭᠡᠳ ᠵᠢᠴᠢ ᠪᠠᠰᠠ ᠳᠤᠲᠠᠭᠳᠠᠵᠤ ᠪᠠᠢᠬᠤ ᠡᠯᠳᠡᠪ ᠬᠡᠷᠡᠭᠰᠡᠯ ᠶᠠᠭᠤᠨ ᠢ᠋ ᠠᠪᠬᠤ ᠪᠣᠯᠪᠠᠯ ᠶᠠᠭᠤᠨ ᠢ᠋ ᠬᠢᠯᠪᠠᠷ ᠳᠥᠭᠥᠮ ᠪᠣᠳᠣᠨᠠ ᠭᠡᠵᠦ ᠵᠥᠪᠯᠡᠯᠳᠦᠨ ᠬᠡᠯᠡᠯᠴᠡᠪᠡ᠃
ᠡᠭᠦᠨ ᠳ᠋ᠦ᠍ᠷ ᠪᠠᠰᠠ ᠨᠢᠭᠡᠨᠲᠡᠭᠡᠭᠦᠷ ᠬᠡᠯᠡᠯᠴᠡᠪᠡᠯ᠂ ᠡᠳᠦᠭᠡ ᠪᠢᠳᠡ ᠮᠤᠬᠤᠷᠳᠠᠨ ᠭᠠᠴᠢᠭᠳᠠᠬᠤ ᠳ᠋ᠠᠭᠠᠨ ᠮᠥᠩᠭᠥ ᠬᠡᠷᠡᠭᠰᠡᠯ ᠠᠭᠰᠠᠨ ᠠᠪᠬᠤ ᠪᠠᠷ ᠯᠠᠪ ᠭᠡᠷᠡ ᠲᠣᠭᠲᠠᠭᠠᠬᠤ ᠪᠣᠯᠪᠠᠴᠤ᠂ ᠬᠡᠳᠦᠢ ᠴᠠᠭ ᠠ᠋ᠴᠠ ᠢᠨᠠᠭᠰᠢ ᠠᠢᠯ ᠠᠢᠮᠠᠭ ᠨᠠᠢᠷᠠᠯᠲᠠᠢ ᠪᠠᠷ ᠰᠠᠭᠤᠵᠠᠭᠠᠵᠤ᠂ ᠬᠠᠷᠢᠯᠴᠠᠨ ᠬᠤᠳᠠᠯᠳᠤᠯᠴᠠᠵᠤ᠂ ᠪᠦᠭᠦᠳᠡᠭᠡᠷ ᠠᠮᠤᠷ ᠲᠦᠪᠰᠢᠨ ᠠᠵᠤ ᠲᠥᠷᠥᠨ ᠶᠠᠪᠤᠭᠰᠠᠭᠠᠷ ᠮᠠᠰᠢ ᠵᠢᠯ ᠤᠳᠠᠭᠰᠠᠨ ᠲᠠᠨᠢᠯ ᠤᠷᠤᠭ ᠪᠢᠳᠡ ᠨᠠᠷ ᠡᠯᠡ ᠤᠴᠢᠷ ᠢ᠋ ᠢᠯᠡᠳᠬᠡᠯ ᠦᠭᠡᠢ ᠡᠢᠨ ᠬᠦ᠌ ᠶᠠᠪᠤᠭᠤᠯᠪᠠᠯ᠂ ᠡᠷᠬᠢᠮ ᠣᠯᠠᠨ ᠤᠷᠤᠭ ᠲᠠᠨᠢᠯ ᠬᠤᠳᠠᠯᠳᠤᠭᠠᠴᠢᠨ ᠠᠬᠠ ᠳᠡᠭᠦᠦ ᠨᠠᠷ ᠠ᠋ᠴᠠ ᠵᠠᠷᠢᠮ ᠤ᠋ᠳ ᠨᠢ ᠪᠠᠴᠢᠮᠳᠠᠨ ᠭᠠᠰᠠᠯᠬᠤ ᠬᠣᠷᠣᠰᠬᠤ ᠴᠤ᠌ ᠪᠣᠯᠵᠣᠰᠢ ᠦᠭᠡᠢ ᠪᠣᠯᠪᠠᠤ ᠭᠡᠵᠦ ᠡᠭᠦᠨ ᠢ᠋ ᠡᠷᠲᠡᠬᠡᠨ ᠡᠴᠡ ᠢᠯᠡᠳᠬᠡᠨ ᠰᠣᠨᠣᠰᠬᠠᠪᠠᠢ᠃ ᠡᠨᠡ ᠪᠢᠴᠢᠭ ᠬᠦᠷᠦᠮᠡᠭᠴᠡ ᠪᠢᠶᠠᠨ ᠺᠧ(边客) ᠤᠷᠤᠭ ᠤ᠋ᠳ ᠪᠦᠭᠦᠳᠡᠭᠡᠷ ᠬᠢᠨᠠᠨ ᠦᠵᠡᠭᠡᠳ᠂ ᠡᠨᠡ ᠵᠦᠢᠯ ᠦ᠋ᠨ ᠵᠥᠪᠯᠡᠯᠳᠦᠵᠦ ᠪᠠᠢᠬᠤ ᠪᠢᠳᠡ ᠣᠯᠠᠨ ᠤ᠋ ᠶᠣᠰᠣᠭᠠᠷ ᠪᠣᠯᠬᠤ ᠪᠤᠶᠤ ᠡᠰᠡᠪᠡᠰᠦ ᠥᠭᠡᠷᠡ ᠰᠠᠢᠨ ᠠᠷᠭᠠ ᠪᠠᠢᠭᠠᠳ ᠣᠯᠠᠨ ᠪᠢᠳᠡᠨ ᠳ᠋ᠦ᠍ ᠲᠤᠰᠠᠯᠠᠵᠤ᠂ ᠢᠵᠠᠭᠤᠷ ᠠ᠋ᠴᠠ ᠵᠡᠷᠭᠡᠯᠡᠳᠡᠭᠡ ᠨᠤᠲᠤᠭᠯᠠᠨ ᠨᠠᠢᠷᠲᠠᠢ ᠰᠠᠢᠬᠠᠨ ᠶᠠᠪᠤᠭᠰᠠᠨ ᠠᠢᠮᠠᠭ ᠪᠢᠳᠡ ᠪᠦᠭᠦᠳᠡᠭᠡᠷ ᠠᠵᠤ ᠠᠮᠢᠳᠤᠷᠠᠯ ᠤ᠋ᠨ ᠬᠥᠷᠥᠩᠭᠡ ᠪᠡᠨ ᠬᠠᠳᠠᠭᠠᠯᠠᠵᠤ ᠠᠮᠤᠷ ᠠᠵᠤ ᠲᠥᠷᠥᠨ᠂ ᠨᠢᠭᠡᠨ ᠰᠡᠳᠬᠢᠯ ᠨᠡᠢᠲᠡ ᠶ᠋ᠢᠨ ᠬᠦᠴᠦ ᠪᠡᠷ ᠡᠩᠬᠡ ᠲᠦᠪᠰᠢᠨ ᠠᠮᠢᠳᠤᠷᠠᠨ ᠰᠠᠭᠤᠵᠤ ᠪᠣᠯᠬᠤ ᠶ᠋ᠢᠨ ᠬᠠᠷᠢᠭᠤ ᠶ᠋ᠢ ᠡᠨᠡ ᠬᠠᠪᠤᠷ ᠤ᠋ᠨ ᠬᠤᠭᠤᠰ ᠤ᠋ᠨ ᠤᠷᠢᠳᠠ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠠᠷᠠᠳ ᠤ᠋ᠨ ᠪᠦᠬᠦ ᠬᠤᠷᠠᠯ ᠤ᠋ᠨ ᠭᠠᠵᠠᠷ ᠲᠤ᠌ ᠶᠠᠭᠠᠬᠢᠪᠠᠴᠤ ᠬᠣᠢᠰᠢ ᠢᠯᠡᠬᠡᠨ ᠢᠷᠡᠭᠦᠯᠬᠦ ᠶ᠋ᠢ ᠮᠡᠳᠡᠭᠳᠡᠪᠡ᠃ ᠡᠭᠦᠨ ᠦ᠌ ᠲᠤᠯᠠ ᠣᠷᠳᠣᠰ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠤ᠋ ᠠᠷᠠᠳ ᠤ᠋ᠨ ᠳᠤᠭᠤᠢᠯᠠᠩ ᠠ᠋ᠴᠠ ᠢᠯᠡᠭᠡᠪᠡ᠃
ᠲᠣᠳᠣᠷᠬᠠᠢᠯᠠᠯ
ᠰᠢᠨᠠᠯᠠᠮᠠ ᠶ᠋ᠢᠨ ᠡᠨᠡ ᠵᠠᠬᠢᠳᠠᠯ ᠪᠣᠯᠪᠠᠰᠤ ᠬᠣᠢᠨᠠᠬᠢ ᠭᠡᠳᠡᠭ ᠨᠢ《ᠣᠷᠣᠰ》 ᠢ᠋ ᠵᠢᠭᠠᠵᠤ᠂ ᠡᠮᠦᠨᠡᠬᠢ ᠭᠡᠳᠡᠭ ᠨᠢ《ᠲᠡᠮᠡᠭᠡᠲᠦ》 ᠶ᠋ᠢ ᠵᠢᠭᠠᠵᠠᠢ᠃ ᠪᠠᠴᠢᠮᠳᠠᠭᠤᠯᠬᠤ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠵᠦ ᠡᠮᠦᠨᠡ ᠡᠴᠡ ᠢᠷᠡᠵᠦ ᠳᠡᠭᠡᠷᠡᠮᠳᠡᠨ ᠬᠣᠭᠣᠰᠣᠷᠠᠭᠤᠯᠤᠭᠰᠠᠨ ᠢ᠋ ᠨᠡᠷᠡ ᠳᠤᠷᠠᠳᠬᠤ ᠦᠭᠡᠢ ᠪᠡᠷ ᠳᠠᠯᠳᠠ ᠪᠠᠷ ᠢᠯᠡᠴᠢᠯᠡᠵᠦ᠂ ᠲᠡᠮᠡᠭᠡᠲᠦ ᠶ᠋ᠢᠨ ᠶᠡᠬᠡ ᠪᠠᠶᠠᠴᠤᠳ ᠠ᠋ᠴᠠ ᠮᠠᠯᠴᠢᠨ ᠮᠣᠩᠭᠣᠯᠴᠤᠳ ᠤ᠋ᠨ ᠮᠠᠯ ᠤ᠋ᠨ ᠠᠰᠢᠭ ᠰᠢᠮᠡ ᠶ᠋ᠢᠨ ᠭᠠᠷᠤᠯᠲᠠ ᠶ᠋ᠢ ᠬᠤᠳᠠᠯᠳᠤᠨ ᠠᠪᠬᠤ ᠳ᠋ᠠᠭᠠᠨ ᠬᠡᠲᠦᠷᠬᠡᠢ ᠮᠥᠯᠵᠢᠬᠦ ᠶ᠋ᠢ ᠬᠢᠵᠠᠭᠠᠷᠯᠠᠬᠤ ᠪᠠ ᠣᠯᠠᠨ ᠦᠶᠡ ᠪᠡᠷ ᠵᠡᠷᠭᠡᠯᠡᠳᠡᠭᠡ ᠰᠠᠭᠤᠷᠢᠰᠢᠵᠤ ᠠᠵᠤ ᠠᠬᠤᠢ ᠰᠣᠶᠣᠯ ᠤ᠋ᠨ ᠬᠠᠷᠢᠴᠠᠭᠠ ᠪᠠᠷ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠲᠦᠷᠢᠮᠡᠬᠡᠢᠯᠡᠯ ᠢ᠋ ᠪᠤᠷᠤᠭᠤᠰᠢᠶᠠᠭᠰᠠᠨ ᠭᠦᠨ ᠳᠠᠯᠳᠠ ᠤᠳᠬᠠ ᠪᠦᠬᠦᠢ ᠵᠠᠬᠢᠳᠠᠯ ᠪᠣᠯᠤᠨᠠ᠃ ᠡᠨᠡ ᠵᠠᠬᠢᠳᠠᠯ ᠲᠡᠷᠡ ᠳᠠᠷᠤᠢ ᠳ᠋ᠤᠨᠢ ᠦᠢᠯᠡᠳᠦᠯ ᠢ᠋ᠶ᠋ᠡᠷ ᠠᠨᠠᠢ ᠪᠣᠯᠪᠠᠴᠤ ᠵᠣᠬᠢᠬᠤ ᠬᠤᠭᠤᠴᠠᠭᠠᠨ ᠤ᠋ ᠳᠠᠷᠠᠭᠠ ᠶᠡᠬᠡ ᠦᠢᠯᠡᠳᠦᠯ ᠦᠵᠡᠭᠦᠯᠵᠦ ᠲᠡᠮᠡᠭᠡᠲᠦ ᠶ᠋ᠢᠨ ᠭᠤᠴᠢᠨ ᠵᠢᠷᠭᠤᠭᠠᠨ ᠲᠣᠮᠣ ᠬᠤᠳᠠᠯᠳᠤᠭᠠᠴᠢᠳ ᠤ᠋ᠨ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠶ᠋ᠢᠨ ᠮᠣᠩᠭᠣᠯ ᠭᠠᠵᠠᠷ ᠳᠠᠬᠢ ᠪᠣᠷᠣᠯᠠᠭᠤᠯᠤᠯᠲᠠ ᠪᠠ ᠠᠵᠤ ᠠᠬᠤᠢ ᠰᠣᠶᠣᠯ ᠤ᠋ᠨ ᠬᠠᠷᠢᠴᠠᠭᠠ ᠨᠢ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠵᠡᠪᠰᠡᠭ ᠦ᠋ᠨ ᠮᠥᠷᠭᠥᠯᠳᠦᠭᠡᠨ ᠡᠴᠡ ᠪᠣᠯᠵᠤ ᠵᠣᠭᠰᠣᠩᠭᠤᠢᠷᠠᠭᠰᠠᠨ ᠪᠠᠢᠵᠠᠢ᠃ ᠡᠢᠮᠦ ᠡᠴᠡ ᠭᠤᠴᠢᠨ ᠵᠢᠷᠭᠤᠭᠠᠨ ᠲᠣᠮᠣ ᠪᠠᠶᠠᠴᠤᠳ ᠵᠢᠩ ᠲᠦᠩᠯᠢᠩ ᠠᠪᠤᠭᠠᠢ ᠳ᠋ᠠᠭᠠᠨ ᠡᠰᠡᠷᠭᠦᠴᠡᠯ ᠭᠠᠷᠭᠠᠭᠰᠠᠨ ᠭᠡᠳᠡᠭ᠃
ᠰᠢᠨᠠᠯᠠᠮᠠ᠂ ᠡᠨᠡ ᠬᠦ᠌ ᠵᠠᠬᠢᠳᠠᠯ ᠢ᠋ᠶ᠋ᠠᠷ ᠲᠡᠮᠡᠭᠡᠲᠦ ᠶ᠋ᠢᠨ ᠲᠣᠮᠣ ᠪᠠᠶᠠᠴᠤᠳ ᠢ᠋ᠶ᠋ᠠᠷ ᠮᠣᠭᠠᠢ ᠠᠳᠬᠤᠭᠤᠯᠵᠤ ᠵᠢᠩ ᠲᠦᠩᠯᠢᠩ ᠢ᠋ ᠬᠠᠳᠬᠤᠭᠤᠯᠤᠭᠰᠠᠨ《ᠪᠤᠮᠳᠠᠷᠢ ᠶ᠋ᠢ ᠪᠤᠮᠳᠠᠷᠢ ᠳ᠋ᠤᠨᠢ ᠵᠠᠷᠤᠭᠰᠠᠨ》 ᠤᠷᠠᠨ ᠠᠷᠭᠠ ᠪᠣᠯᠤᠨᠠ᠃ ᠡᠭᠦᠨ ᠦ᠌ ᠬᠠᠮᠲᠤ ᠰᠢᠨᠡᠯᠡᠮᠡ ᠡᠴᠡ《ᠪᠢᠳᠡ ᠤᠳᠠᠯ ᠦᠭᠡᠢ ᠲᠡᠮᠡᠭᠡᠲᠦ ᠬᠣᠲᠠ ᠶ᠋ᠢ ᠪᠦᠰᠡᠯᠡᠨ ᠴᠣᠬᠢᠵᠤ ᠵᠢᠩ ᠶᠤᠸᠠᠢ ᠰᠢᠦ ᠳ᠋ᠦ᠍ ᠬᠠᠷᠢᠭᠤ ᠴᠠᠢ ᠪᠠᠷᠢᠬᠤ ᠪᠠᠷ ᠴᠡᠷᠢᠭ ᠦ᠋ᠨ ᠪᠣᠯᠪᠠᠰᠤᠷᠠᠯ ᠬᠢᠵᠦ ᠪᠠᠢᠨᠠ》 ᠭᠡᠵᠦ ᠦᠦᠰᠢᠨ᠂ ᠲᠡᠮᠡᠭᠡᠲᠦ ᠶ᠋ᠢᠨ ᠮᠣᠩᠭᠣᠯ ᠬᠢᠲᠠᠳ ᠬᠥᠮᠦᠨ ᠤᠴᠠᠷᠠᠪᠠᠯ ᠰᠦᠷᠳᠡᠭᠦᠯᠦᠯ ᠦ᠋ᠨ ᠴᠢᠨᠠᠷ ᠲᠠᠢ ᠦᠭᠡ ᠲᠠᠷᠬᠠᠭᠠᠭᠰᠠᠨ ᠳ᠋ᠤ᠌ ᠡᠨᠡ ᠬᠦ᠌ ᠶᠠᠷᠢᠶᠠ ᠬᠡᠯᠡᠯᠭᠡ ᠨᠢ ᠲᠡᠮᠡᠭᠡᠲᠦ ᠬᠣᠲᠠ ᠶ᠋ᠢᠨ ᠠᠷᠠᠯᠵᠢᠶᠠᠴᠢᠨ ᠪᠠᠶᠠᠴᠤᠳ ᠲᠤ᠌ ᠠᠶᠤᠮᠰᠢᠭᠲᠤ ᠴᠢᠮᠡᠭᠡ ᠪᠣᠯᠤᠭᠰᠠᠨ ᠭᠡᠳᠡᠭ᠃
16. ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠠ᠋ᠴᠠ ᠤᠬᠤᠷᠢᠭᠰᠠᠨ ᠰᠢᠯᠲᠠᠭᠠᠨ
(1) ᠲᠡᠮᠡᠭᠡᠲᠦ ᠬᠣᠲᠠ ᠶ᠋ᠢᠨ ᠭᠤᠴᠢᠨ ᠵᠢᠷᠭᠤᠭᠠᠨ ᠪᠠᠶᠠᠴᠤᠳ ᠳᠤᠷᠠ ᠦᠭᠡᠢᠴᠡᠵᠦ᠂ ᠰᠢᠨᠡᠯᠡᠮᠡ ᠴᠦ᠍ ᠲᠣᠬᠢᠶᠠᠯ ᠢ᠋ ᠠᠰᠢᠭᠯᠠᠵᠤ ᠭᠤᠴᠢᠨ ᠵᠢᠷᠭᠤᠭᠠᠨ ᠬᠠᠩ ᠳ᠋ᠦᠩ ᠳ᠋ᠦ᠍ᠷ ᠢᠯᠡ ᠵᠠᠬᠢᠳᠠᠯ ᠶᠠᠪᠤᠭᠤᠯᠤᠭᠰᠠᠨ ᠠ᠋ᠴᠠ ᠲᠡᠳᠡᠭᠡᠷ ᠪᠠᠶᠠᠴᠤᠳ ᠤ᠋ᠨ ᠠᠵᠤ ᠠᠬᠤᠢ ᠶ᠋ᠢᠨ ᠠᠰᠢᠭ ᠬᠣᠣᠷ ᠤ᠋ᠨ ᠨᠢᠭᠡᠨ ᠦᠶᠡ ᠶ᠋ᠢᠨ ᠬᠣᠬᠢᠷᠠᠯ ᠠ᠋ᠴᠠ ᠪᠣᠯᠵᠤ ᠵᠢᠩ ᠲᠦᠩᠯᠢᠩ ᠨᠣᠶᠠᠨ ᠳ᠋ᠠᠭᠠᠨ ᠡᠰᠡᠷᠭᠦᠴᠡᠯ ᠭᠣᠮᠣᠳᠠᠯ ᠭᠠᠷᠭᠠᠭᠰᠠᠨ ᠭᠡᠳᠡᠭ᠃
(2) ᠰᠢᠨᠡᠯᠡᠮᠡ ᠶ᠋ᠢᠨ ᠲᠡᠮᠡᠭᠡᠲᠦ ᠶ᠋ᠢ ᠪᠦᠰᠡᠯᠡᠨ ᠴᠣᠬᠢᠬᠤ ᠪᠠᠷ ᠴᠡᠷᠢᠭ ᠲᠡᠢᠨ ᠦ᠌ ᠪᠡᠯᠡᠳᠬᠡᠯ ᠢ᠋ ᠱᠠᠯᠠᠪᠳᠠᠨ ᠬᠢᠵᠦ ᠪᠠᠢᠨᠠ ᠭᠡᠬᠦ ᠰᠦᠷᠳᠡᠭᠦᠯᠦᠯ ᠦ᠋ᠨ ᠴᠢᠨᠠᠷ ᠲᠠᠢ ᠥᠳᠥᠭᠡᠯᠭᠡ ᠶ᠋ᠢ ᠦᠨᠡᠨ ᠬᠦ᠌ ᠢᠲᠡᠭᠡᠵᠦ ᠠᠶᠤᠭᠰᠠᠨ ᠪᠣᠯᠤᠯᠲᠠᠢ! ᠬᠥᠮᠦᠨ ᠶᠡᠷᠦ ᠨᠢ《ᠬᠥᠮᠦᠨ ᠦ᠌ ᠬᠢ ᠳᠡᠭᠡᠷᠡ ᠬᠦᠷᠡᠩ ᠡᠷᠢᠶᠡᠨ ᠪᠦᠷᠭᠦᠳ᠂ ᠥᠪᠡᠷ ᠦ᠋ᠨ ᠬᠢ ᠳᠡᠭᠡᠷᠡ ᠪᠡᠨ ᠥᠨᠳᠡᠭᠡ ᠳᠠᠷᠤᠭᠰᠠᠨ ᠰᠢᠪᠠᠭᠤ》 ᠭᠡᠳᠡᠭ ᠢ᠋ᠶ᠋ᠡᠷ ᠵᠢᠩ ᠶᠤᠸᠠᠢ ᠰᠢᠦ ᠪᠤᠰᠤᠳ ᠢ᠋ ᠲᠦᠷᠢᠮᠡᠬᠡᠢᠯᠡᠨ ᠪᠤᠯᠢᠶᠠᠵᠤ ᠳᠡᠭᠡᠷᠡᠮᠳᠡᠬᠦ ᠳ᠋ᠦ᠍ ᠥᠴᠦᠬᠡᠨ ᠴᠦ᠍ ᠲᠠᠲᠠᠭᠠᠯᠵᠠᠬᠤ ᠦᠭᠡᠢ ᠪᠣᠯᠪᠠᠴᠤ ᠮᠢᠩ ᠤᠯᠤᠰ ᠤ᠋ᠨ ᠵᠣ᠌ ᠶᠤᠸᠠᠨ ᠵᠠᠩ(ᠬᠣᠩ ᠡᠦ ᠬᠠᠭᠠᠨ) ᠤ᠋ ᠡᠬᠢᠨ ᠦ᠌ ᠦᠶᠡ ᠳ᠋ᠦ᠍ ᠪᠠᠢᠭᠤᠯᠤᠭᠳᠠᠭᠰᠠᠨ ᠡᠷᠲᠡᠨ ᠦ᠌ ᠮᠣᠳᠣᠨ ᠪᠠᠷᠢᠯᠭᠠ᠂ ᠵᠢᠷᠤᠭ ᠤᠷᠠᠯᠠᠯ ᠤ᠋ᠨ ᠰᠣᠶᠣᠯ ᠲᠡᠦᠬᠡ ᠲᠡᠢ ᠪᠥᠭᠡᠳ ᠬᠥᠮᠦᠨ ᠠᠮᠠ ᠲᠥᠪᠯᠡᠷᠡᠵᠦ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠬᠥᠭᠵᠢᠭᠰᠡᠨ ᠨᠢᠭᠡᠨ ᠪᠣᠭᠣᠮᠲᠠ ᠶ᠋ᠢᠨ ᠲᠣᠮᠣ ᠬᠣᠲᠠ ᠲᠡᠮᠡᠭᠡᠲᠦ ᠬᠡᠷᠪᠡ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠬᠥᠯ ᠳ᠋ᠦ᠍ ᠳᠠᠭᠠᠷᠢᠭᠳᠠᠪᠠᠯ ᠶᠡᠬᠡ ᠦᠷᠡᠭᠳᠡᠯ ᠰᠦᠢᠳᠦᠯ ᠭᠠᠷᠴᠤ ᠲᠤᠩ ᠠᠰᠢᠭ ᠦᠭᠡᠢ ᠪᠣᠯᠬᠤ ᠶ᠋ᠢ ᠤᠷᠢᠳᠴᠢᠯᠠᠨ ᠪᠣᠳᠣᠵᠤ ᠣᠯᠤᠭᠰᠠᠨ ᠪᠠᠢᠬᠠ!
(3) ᠲᠡᠮᠡᠭᠡᠲᠦ ᠬᠣᠲᠠ ᠶ᠋ᠢᠨ ᠪᠠᠶᠠᠴᠤᠳ ᠤ᠋ᠨ ᠦᠦᠰᠢᠨ ᠦ᠌ ᠭᠠᠵᠠᠷ ᠲᠤ᠌ ᠰᠦᠷᠦᠭ ᠲᠠᠯᠪᠢᠵᠤ ᠪᠠᠢᠭᠰᠠᠨ ᠮᠠᠯ ᠰᠦᠷᠦᠭ ᠨᠢ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠬᠥᠯ ᠳ᠋ᠦ᠍ ᠳᠠᠭᠠᠷᠢᠭᠳᠠᠵᠤ ᠴᠥᠭᠡᠨ ᠪᠤᠰᠤ ᠰᠦᠢᠳᠴᠡᠢ᠃ ᠵᠢᠱ᠌ᠢᠶᠡᠯᠡᠪᠡᠯ ᠲᠡᠮᠡᠭᠡᠲᠦ ᠶ᠋ᠢᠨ ᠭᠤᠴᠢᠨ ᠵᠢᠷᠭᠤᠭᠠᠨ ᠪᠠᠶᠠᠴᠤᠳ ᠤ᠋ᠨ ᠲᠦᠷᠦᠭᠦᠨ ᠳ᠋ᠦ᠍ ᠵᠢᠬᠰᠠᠭᠠᠭᠳᠠᠬᠤ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠹᠦᠭᠤᠸᠠᠨ ᠱᠠᠩ ᠽᠦᠩ ᠮᠢ ᠪᠣᠯ ᠲᠤᠩ ᠠᠷᠪᠢᠨ ᠮᠠᠯ ᠰᠦᠷᠦᠭ ᠲᠡᠢ ᠪᠠᠶᠠᠨ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠮᠣᠩᠭᠣᠯ ᠭᠠᠵᠠᠷ ᠤ᠋ᠨ ᠮᠠᠯᠴᠢᠳ ᠲᠤ᠌ ᠪᠠᠷᠠᠭᠠ ᠲᠠᠸᠠᠷ ᠪᠣᠷᠣᠯᠠᠭᠤᠯᠵᠤ ᠵᠣᠭᠣᠰᠤᠨ ᠤ᠋ ᠣᠷᠣᠨ ᠳ᠋ᠤ᠌ ᠮᠠᠯ ᠤᠨᠤᠭᠠ ᠪᠣᠳᠣᠵᠤ ᠠᠪᠤᠭᠠᠳ ᠲᠤᠰ ᠡᠷᠦᠬᠡ ᠳ᠋ᠦ᠍ᠨᠢ ᠴᠢᠬᠢ ᠲᠠᠮᠠᠭᠠ ᠪᠠᠨ ᠲᠠᠯᠪᠢᠴᠢᠬᠠᠭᠠᠳ ᠨᠢᠭᠡᠮᠦᠰᠦᠨ ᠳᠠᠭᠠᠭᠠᠴᠢᠯᠠᠭᠤᠯᠳᠠᠭ᠃ ᠥᠬᠢᠨ ᠦᠷᠡ ᠶ᠋ᠢᠨ ᠮᠠᠯ ᠠ᠋ᠴᠠ ᠲᠥᠯ ᠭᠠᠷᠤᠭᠰᠠᠭᠠᠷ ᠳᠠᠷᠠᠭᠠ ᠬᠠᠪᠤᠷ ᠨᠢ ᠢᠷᠡᠵᠦ ᠴᠢᠬᠢ ᠲᠠᠮᠠᠭᠠ ᠪᠠᠨ ᠲᠠᠯᠪᠢᠵᠤ ᠥᠪᠡᠷ ᠦ᠋ᠨ ᠳᠠᠩᠰᠠᠨ ᠳ᠋ᠠᠭᠠᠨ ᠲᠡᠮᠳᠡᠭᠯᠡᠵᠦ ᠪᠦᠷᠢᠳᠬᠡᠳᠡᠭ᠃ ᠬᠣᠵᠢᠮ ᠲᠡᠭᠦᠨ ᠦ᠌ ᠮᠠᠯ ᠦᠬᠦᠪᠡᠯ᠂ ᠦᠬᠦᠭᠰᠡᠨ ᠮᠠᠯ ᠤ᠋ᠨ ᠲᠠᠮᠠᠭᠠ ᠲᠠᠢ ᠴᠢᠬᠢ ᠪᠤᠶᠤ ᠡᠪᠡᠷ ᠢ᠋ ᠨᠢ ᠦᠵᠡᠭᠦᠯᠴᠢᠬᠡᠪᠡᠯ ᠲᠣᠭᠠᠨ ᠠ᠋ᠴᠠ ᠬᠠᠰᠤᠭᠠᠳ ᠶᠠᠯᠠ ᠲᠣᠷᠭᠠᠭᠤᠯᠢ ᠬᠢᠬᠦ ᠦᠭᠡᠢ ᠥᠩᠭᠡᠷᠡᠴᠢᠬᠡᠳᠡᠭ᠃ ᠲᠡᠭᠦᠨ ᠦ᠌ ᠰᠢᠪᠠᠷ ᠤ᠋ᠨ ᠴᠠᠢᠳᠠᠮ ᠳ᠋ᠤ᠌ ᠪᠠᠢᠭᠰᠠᠨ ᠲᠣᠭᠠ ᠦᠭᠡᠢ ᠦᠬᠡᠷ ᠮᠠᠯ ᠨᠢ ᠲᠡᠢᠨ ᠦ᠌ ᠬᠥᠯ ᠳ᠋ᠦ᠍ ᠳᠠᠭᠠᠷᠢᠭᠳᠠᠭᠠᠳ ᠬᠣᠭᠣᠰᠣᠷᠠᠴᠢᠬᠠᠵᠠᠢ ᠭᠡᠨᠡ᠃
(4) ᠬᠡᠳᠦᠨ ᠵᠢᠯ ᠦ᠋ᠨ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠳᠤᠮᠳᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠰᠢᠷᠬᠠᠳᠤᠭᠰᠠᠨ᠂ ᠦᠬᠦᠵᠦ ᠬᠣᠬᠢᠷᠠᠭᠰᠠᠨ ᠨᠢ ᠲᠤᠩ ᠠᠷᠪᠢᠨ ᠪᠥᠭᠡᠳ ᠲᠡᠢᠨ ᠦ᠌ ᠳᠤᠮᠳᠠ ᠰᠠᠷᠨᠢᠵᠤ ᠳᠤᠲᠠᠭᠠᠭᠰᠠᠨ᠂ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠠᠯᠳᠠᠭᠰᠠᠨ ᠵᠡᠷᠭᠡ ᠨᠥᠬᠥᠪᠥᠷᠢᠯᠡᠵᠦ ᠴᠢᠳᠠᠰᠢ ᠦᠭᠡᠢ ᠦᠷᠡᠭᠳᠡᠯ ᠰᠦᠢᠳᠦᠯ ᠡᠴᠡ ᠴᠦ᠍ ᠰᠢᠯᠲᠠᠭᠯᠠᠵᠤ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠳᠡᠭᠡᠷᠡ ᠡᠴᠡ ᠭᠡᠨᠡᠳᠲᠡ ᠡᠮᠦᠨᠡᠰᠢᠯᠡᠵᠦ ᠶᠡᠬᠡ ᠤᠬᠤᠷᠢᠯᠲᠠ ᠬᠢᠭᠰᠡᠨ ᠪᠠᠢᠨᠠ᠃
17.《ᠮᠠᠨ ᠤ᠋ ᠲᠤᠸᠠᠨᠵᠠᠩ》(ᠳᠠᠭᠤᠤ)
ᠲᠤᠰ ᠳᠠᠭᠤᠤ ᠶ᠋ᠢ1928 ᠣᠨ ᠳ᠋ᠤ᠌ ᠣᠲᠣᠭ ᠬᠤᠰᠢᠭᠤᠨ ᠤ᠋ ᠰᠥᠮᠡᠲᠦ ᠨᠤᠲᠤᠭ ᠤ᠋ᠨ ᠴᠣᠢᠮᠪᠠᠯ᠂ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠰᠢᠨᠠᠯᠠᠮᠠ ᠶ᠋ᠢᠨ ᠭᠡᠷ ᠲᠦ᠍ ᠢᠷᠡᠵᠦ ᠬᠣᠶᠠᠭᠤᠯᠠ ᠬᠡᠳᠦ ᠬᠣᠨᠣᠭ ᠨᠠᠷᠭᠢᠵᠤ ᠰᠠᠭᠤᠬᠤ ᠳ᠋ᠠᠭᠠᠨ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠲᠡᠢᠨ ᠦ᠌ ᠢᠯᠠᠯᠲᠠ ᠶ᠋ᠢ ᠰᠣᠨᠣᠰᠤᠭᠠᠳ ᠵᠣᠬᠢᠶᠠᠭᠰᠠᠨ ᠭᠡᠳᠡᠭ᠃ ᠡᠨᠡ ᠳᠠᠭᠤᠤ ᠱᠠᠨᠰᠢ ᠮᠣᠵᠢ ᠳ᠋ᠠᠬᠢ ᠢᠷᠭᠡᠨ ᠤᠯᠤᠰ ᠤ᠋ᠨ80 ᠳ᠋ᠤᠭᠠᠷ ᠱᠢ(ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ) ᠦ᠋ᠨ ᠴᠡᠷᠢᠭ ᠦ᠋ᠨ ᠢᠯᠠᠭᠳᠠᠯ ᠢ᠋ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠲᠡᠦᠬᠡᠲᠦ ᠠᠷᠠᠳ ᠤ᠋ᠨ ᠳᠠᠭᠤᠤ ᠪᠣᠯᠤᠨᠠ᠃
ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠲᠤᠸᠠᠨᠵᠠᠩ ᠨᠢ
ᠮᠠᠨᠽᠤᠰᠢᠷᠢ ᠶ᠋ᠢᠨ ᠬᠤᠪᠢᠯᠭᠠᠨ ᠰᠢᠦ᠂
ᠮᠠᠨ ᠤ᠋ ᠮᠠᠯᠴᠢᠨ ᠠᠷᠠᠳ ᠲᠠᠭᠠᠨ
ᠮᠠᠰᠢ ᠬᠠᠯᠠᠭᠤᠨ ᠰᠡᠳᠬᠢᠯ ᠲᠡᠢ᠃
ᠰᠠᠯᠪᠤᠷᠢ ᠴᠡᠷᠢᠭ ᠦ᠋ᠨ ᠨᠣᠶᠠᠳ ᠮᠢᠨᠢ
ᠰᠠᠨᠠᠭᠠ ᠰᠡᠳᠬᠢᠯ ᠨᠢᠭᠡᠲᠡᠢ ᠪᠠᠢᠨᠠ᠂
ᠰᠠᠮᠠᠭᠤᠨ ᠬᠤᠯᠠᠭᠠᠢ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢ
ᠰᠠᠷᠨᠢᠭᠤᠯᠵᠤ ᠴᠣᠬᠢᠭᠠᠳ ᠬᠥᠭᠡᠭᠡᠴᠢᠬᠡᠯᠡ᠃
ᠵᠢᠩ ᠦ᠋ᠨ ᠴᠡᠷᠢᠭ ᠴᠢ ᠪᠢᠩ ᠲᠤᠸᠠᠨ
ᠵᠡᠷᠭᠡ ᠪᠡᠷ ᠮᠣᠷᠳᠠᠭᠠᠳ ᠢᠷᠡᠯᠡ᠂
ᠵᠢᠩ ᠭᠠᠩ ᠰᠤᠮᠤ ᠶ᠋ᠢ ᠨᠢ ᠬᠦᠷᠲᠡᠭᠦᠯᠦᠭᠡᠳ
ᠵᠢᠯᠪᠢ ᠶ᠋ᠢ ᠨᠢ ᠳᠠᠷᠤᠭᠠᠳ ᠬᠥᠭᠡᠭᠡᠴᠢᠬᠡᠯᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠯ᠂ ᠣᠶᠤᠨᠪᠠᠲᠤ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠪᠠᠯ