ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨElbeg nigüülsegch khaanЭлбэг нигүүлсэгч хаан
205ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨ
ᠨᠠᠢᠷᠠᠭᠤᠯᠤᠭᠰᠠᠨ ᠨᠢ ᠄ ᠱ · ᠴᠸᠶᠢᠨ — ᠣᠢᠳᠤᠪ
ᠬᠢᠶᠠᠳ ᠪᠣᠷᠵᠢᠭᠢᠨ ᠣᠪᠣᠭᠲᠤ ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠶ᠋ᠢᠨ ᠥᠨᠳᠥᠷ ᠡᠪᠦᠭᠡ ᠬᠤᠲᠤᠭᠲᠤ ᠬᠦᠰᠡᠯᠡ ᠬᠠᠭᠠᠨ᠂ ᠥᠪᠡᠷ ᠦ᠋ᠨ ᠡᠪᠦᠭᠡ ᠲᠣᠭᠣᠨᠲᠡᠮᠦᠷ ᠬᠠᠭᠠᠨ᠂ ᠡᠴᠢᠭᠡ ᠤᠰᠬᠠᠯ ᠬᠠᠭᠠᠨ ᠶᠤᠮ᠃ ᠠᠬᠠ ᠡᠩᠬᠡ ᠵᠣᠷᠢᠭᠲᠤ ᠬᠠᠭᠠᠨ᠂ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ1361 ᠣᠨ ᠳ᠋ᠤ᠌ ᠲᠥᠷᠥᠵᠡᠢ᠃
1392 ᠣᠨ ᠳ᠋ᠤ᠌ ᠠᠬᠠ ᠡᠩᠬᠡ ᠵᠣᠷᠢᠭᠲᠤ ᠬᠠᠭᠠᠨ ᠨᠠᠰᠤ ᠪᠠᠷᠠᠭᠰᠠᠨ ᠤ᠋ ᠳᠠᠷᠠᠭᠠ ᠭᠡᠷᠢᠶᠡᠰᠯᠡᠯ ᠦ᠋ᠨ ᠳᠠᠭᠤ1393 ᠣᠨ ᠳ᠋ᠤ᠌ ᠬᠠᠭᠠᠨ ᠣᠷᠣ ᠰᠠᠭᠤᠭᠠᠳ ᠬᠠᠭᠠᠨ ᠤ᠋ ᠴᠣᠯᠠ ᠪᠠᠨ《ᠨᠢᠭᠦᠯᠡᠰᠦᠭᠴᠢ》 ᠭᠡᠰᠡᠨ ᠤᠴᠢᠷ ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨ ᠭᠡᠵᠦ ᠨᠡᠷᠡᠯᠡᠵᠡᠢ᠃ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨ ᠪᠣᠯ ᠤᠮᠠᠷᠠᠲᠤ ᠶᠤᠸᠠᠨ ᠤᠯᠤᠰ ᠤ᠋ᠨ ᠳᠥᠷᠪᠡᠳᠡᠬᠢ ᠬᠠᠭᠠᠨ᠂ ᠬᠠᠭᠠᠨᠲᠤ ᠮᠣᠩᠭᠣᠯ ᠤᠯᠤᠰ ᠤ᠋ᠨ 19ᠳᠠᠬᠢ ᠬᠠᠭᠠᠨ ᠪᠢᠯᠡ᠃
1399 ᠣᠨ ᠳ᠋ᠤ᠌ ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨ ᠠᠪᠠ ᠠᠪᠠᠯᠠᠬᠤ ᠪᠠᠷ ᠭᠠᠷᠤᠭᠠᠳ ᠲᠠᠤᠯᠠᠢ ᠶ᠋ᠢᠨ ᠴᠢᠰᠤ ᠰᠢᠨᠡᠬᠡᠨ ᠣᠷᠣᠭᠰᠠᠨ ᠴᠠᠰᠤᠨ ᠳᠡᠭᠡᠷᠡ ᠲᠤᠰᠠᠯᠠᠭᠰᠠᠨ ᠢ᠋ ᠦᠵᠡᠭᠡᠳ《ᠡᠨᠡ ᠴᠠᠰᠤ ᠮᠡᠲᠦ ᠴᠠᠭᠠᠨ ᠴᠢᠷᠠᠢ ᠲᠠᠢ᠂ ᠡᠨᠡ ᠴᠢᠰᠤ ᠮᠡᠲᠦ ᠤᠯᠠᠭᠠᠨ ᠤᠷᠤᠭᠤᠯ ᠲᠠᠢ ᠲᠡᠢᠮᠦ ᠦᠵᠡᠰᠬᠦᠯᠡᠩ ᠭᠤᠸᠠ ᠡᠬᠡᠨᠡᠷ ᠪᠠᠢᠳᠠᠭ ᠪᠣᠯᠪᠠ ᠤᠤ?》 ᠭᠡᠰᠡᠨ ᠳ᠋ᠦ᠍ ᠣᠢᠷᠠᠳ ᠠᠢᠮᠠᠭ ᠤ᠋ᠨ ᠮᠢᠩᠭᠠᠨ ᠣᠪᠣᠭᠲᠤ ᠬᠤᠤᠬᠠᠢ ᠳᠠᠶᠤᠤ《ᠬᠠᠭᠠᠨ ᠲᠠᠨ ᠤ᠋ ᠳᠡᠭᠦᠦ ᠬᠠᠷᠬᠤᠴᠠᠭ ᠲᠠᠢᠵᠢ ᠶ᠋ᠢᠨ ᠭᠡᠷᠭᠡᠢ ᠥᠯᠵᠡᠢᠲᠦ ᠭᠤᠸᠠ ᠪᠠᠢᠵᠢ ᠶ᠋ᠢᠨ ᠥᠩᠭᠡ ᠵᠢᠰᠦ ᠲᠠᠨ ᠤ᠋ ᠡᠨᠡ ᠬᠡᠯᠡᠵᠦ ᠪᠠᠢᠭᠰᠠᠨ ᠠ᠋ᠴᠠ ᠯᠠᠪ ᠠᠷᠪᠠᠨ ᠬᠤᠪᠢ ᠦᠯᠡᠮᠵᠢ ᠰᠠᠢᠬᠠᠨ ᠪᠢᠯᠡ》 ᠭᠡᠵᠦ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠠᠭᠠᠨ ᠶᠡᠬᠡᠳᠡ ᠪᠡᠶᠡᠰᠦᠨ《ᠦᠵᠡᠭᠡ ᠦᠭᠡᠢ ᠶ᠋ᠢ ᠦᠵᠡᠭᠦᠯᠬᠦ ᠶ᠋ᠢ ᠦᠯᠡᠮᠵᠢ ᠬᠦᠰᠡᠯ ᠬᠠᠩᠭᠠᠬᠤ ᠶ᠋ᠢ ᠲᠦᠰᠢᠮᠡᠯ ᠮᠡᠳᠡᠲᠦᠭᠡᠢ᠂ ᠬᠣᠵᠢᠮ ᠪᠢ ᠲᠠᠨ ᠳ᠋ᠤ᠌ ᠴᠢᠩᠰᠠᠩ ᠴᠣᠯᠠ ᠡᠷᠭᠦᠮᠵᠢᠯᠡᠬᠦ ᠳ᠋ᠦ᠍ ᠪᠡᠯᠡᠨ ᠪᠠᠢᠬᠤ ᠪᠣᠯᠤᠨᠠ》 ᠭᠡᠵᠡᠢ᠃
ᠲᠡᠭᠡᠭᠡᠳ ᠬᠠᠷᠬᠤᠴᠠᠭ ᠲᠠᠢᠵᠢ ᠶ᠋ᠢ ᠠᠪᠠ ᠳ᠋ᠤ᠌ ᠶᠠᠪᠤᠭᠰᠠᠨ ᠤ᠋ ᠬᠣᠢᠨᠠ ᠬᠤᠤᠬᠠᠢ ᠳᠠᠶᠤᠤ ᠨᠢᠭᠤᠴᠠ ᠪᠠᠷ ᠥᠯᠵᠡᠢᠲᠦ ᠭᠤᠸᠠ ᠪᠠᠢᠵᠢ ᠳ᠋ᠤ᠌《ᠬᠠᠭᠠᠨ ᠡᠵᠡᠨ ᠴᠢᠨᠦ ᠥᠩᠭᠡ ᠵᠢᠰᠦ ᠶ᠋ᠢ ᠦᠵᠡᠬᠦ ᠭᠡᠵᠦ ᠶᠡᠬᠡᠳᠡ ᠰᠣᠨᠢᠷᠬᠠᠨ ᠬᠦᠰᠡᠵᠦ ᠪᠠᠢᠨᠠ》 ᠭᠡᠵᠦ ᠬᠡᠯᠡᠬᠦ ᠳ᠋ᠦ᠍ ᠥᠯᠵᠡᠢᠲᠦ ᠭᠤᠸᠠ ᠪᠠᠢᠵᠢ ᠵᠢᠬᠡᠭᠦᠴᠡᠨ ᠠᠭᠤᠷᠯᠠᠵᠤ《ᠬᠠᠭᠠᠨ ᠲᠩᠷᠢ ᠡᠬᠡ ᠭᠠᠵᠠᠷ ᠨᠡᠢᠯᠡᠵᠦ ᠪᠣᠯᠳᠠᠭ ᠶᠤᠮ ᠤᠤ? ᠬᠠᠭᠠᠨ ᠡᠵᠡᠨ ᠳᠡᠭᠦᠦ ᠪᠡᠷᠢ ᠪᠡᠨ ᠦᠵᠡᠵᠦ ᠪᠣᠯᠳᠠᠭ ᠶᠤᠮ ᠤᠤ?》 ᠭᠡᠳ ᠬᠥᠭᠡᠭᠡᠭᠡᠳ ᠶᠠᠪᠤᠭᠤᠯᠵᠠᠢ᠃ ᠬᠤᠤᠬᠠᠢ ᠳᠠᠶᠤᠤ ᠪᠤᠴᠠᠵᠤ ᠬᠠᠭᠠᠨ ᠳ᠋ᠤ᠌ ᠬᠡᠯᠡᠬᠦ ᠳ᠋ᠦ᠍ ᠬᠠᠭᠠᠨ ᠠᠭᠤᠷᠯᠠᠵᠤ ᠠᠩ ᠤ᠋ᠨ ᠵᠠᠮ ᠢ᠋ ᠲᠠᠰᠤᠯᠵᠤ ᠳᠡᠭᠦᠦ ᠪᠡᠨ ᠬᠥᠨᠥᠭᠡᠭᠡᠳ ᠭᠤᠷᠪᠠᠨ ᠰᠠᠷᠠ ᠲᠠᠢ ᠪᠠᠢᠭᠰᠠᠨ ᠳᠡᠭᠦᠦ ᠪᠡᠷᠢ ᠪᠡᠨ ᠬᠠᠲᠤᠨ ᠪᠣᠯᠭᠠᠨ ᠠᠪᠴᠠᠢ᠃
ᠲᠤᠰ ᠵᠢᠯ ᠳ᠋ᠦ᠍ ᠪᠡᠨ ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨ ᠠᠪᠠ ᠠᠪᠠᠯᠠᠬᠤ ᠪᠠᠷ ᠮᠣᠷᠳᠠᠬᠤ ᠳ᠋ᠤ᠌ ᠬᠤᠤᠬᠠᠢ ᠳᠠᠶᠤᠤ ᠥᠨᠥᠬᠢ ᠠᠮᠠᠯᠠᠭᠰᠠᠨ ᠴᠢᠩᠰᠠᠩ ᠴᠣᠯᠠ ᠶ᠋ᠢᠨ ᠲᠤᠬᠠᠢ ᠶᠠᠷᠢᠬᠤ ᠪᠠᠷ ᠬᠠᠭᠠᠨ ᠤ᠋ ᠵᠠᠮ ᠲᠣᠰᠣᠨ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠶ᠋ᠢ ᠥᠯᠵᠡᠢᠲᠦ ᠭᠤᠸᠠ ᠪᠠᠢᠵᠢ ᠬᠠᠲᠤᠨ ᠮᠡᠳᠡᠭᠡᠳ ᠬᠥᠮᠦᠨ ᠶᠠᠪᠤᠭᠤᠯᠵᠤ《ᠬᠠᠭᠠᠨ ᠢ᠋ ᠬᠡᠭᠡᠷᠡ ᠬᠦᠯᠢᠶᠡᠬᠦ ᠪᠡᠷ ᠣᠷᠳᠣᠨ ᠳ᠋ᠤ᠌ ᠢᠷᠡᠵᠦ ᠬᠦᠯᠢᠶᠡ》 ᠭᠡᠵᠦ ᠢᠷᠡᠭᠦᠯᠦᠭᠡᠳ ᠠᠰᠤᠷᠤ ᠬᠦᠨᠳᠦᠳᠬᠡᠵᠦ᠂ ᠮᠥᠩᠭᠥᠨ ᠠᠶᠠᠭᠠ ᠳᠦᠭᠦᠷᠡᠩ ᠰᠠᠷᠬᠤᠳ ᠪᠠᠷᠢᠭᠠᠳ《ᠪᠠᠭᠠ ᠪᠡᠶᠡ ᠶ᠋ᠢ ᠮᠢᠨᠢ ᠶᠡᠬᠡ ᠪᠣᠯᠭᠠᠵᠤ᠂ ᠪᠠᠢᠵᠢ ᠨᠠᠮᠠ ᠶ᠋ᠢ ᠬᠠᠲᠤᠨ ᠪᠣᠯᠭᠠᠭᠰᠠᠨ ᠲᠠ ᠠᠴᠢᠲᠠᠢ ᠬᠥᠮᠦᠨ》 ᠭᠡᠮᠡᠨ ᠮᠠᠭᠲᠠᠭᠠᠳ《ᠲᠠᠨ ᠳ᠋ᠤ᠌ ᠨᠡᠩ ᠶᠡᠬᠡ ᠱᠠᠩ ᠬᠦᠷᠲᠡᠭᠡᠬᠦ ᠢ ᠬᠠᠭᠠᠨ ᠮᠡᠳᠡᠲᠦᠭᠡᠢ》 ᠭᠡᠳ ᠠᠷᠢᠬᠢ ᠰᠠᠷᠬᠤᠳ ᠪᠠᠷᠢᠭᠰᠠᠭᠠᠷ ᠪᠠᠢᠵᠤ ᠱᠠᠯ ᠰᠣᠭᠲᠣᠭᠠᠭᠠᠳ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠬᠠᠭᠠᠨ ᠢ᠋ ᠳᠠᠭᠤᠳᠠᠭᠤᠯᠤᠭᠠᠳ ᠳᠠᠷᠠᠭᠠ ᠨᠢ ᠬᠤᠤᠬᠠᠢ ᠳᠠᠶᠤᠤ ᠶ᠋ᠢ ᠬᠠᠭᠠᠨ ᠤ᠋ ᠣᠷᠣ ᠳᠡᠭᠡᠷᠡ ᠬᠡᠪᠲᠡᠭᠦᠯᠦᠭᠡᠳ ᠥᠪᠡᠷ ᠦ᠋ᠨ ᠨᠢᠭᠤᠷ ᠭᠠᠷ ᠢ᠋ᠶ᠋ᠠᠨ ᠮᠠᠭᠠᠵᠢᠵᠤ ᠰᠢᠯᠪᠤᠯᠤᠨ ᠦᠰᠦ ᠭᠡᠵᠢᠭᠡ ᠪᠡᠨ ᠰᠡᠭᠰᠡᠢᠯᠭᠡᠵᠦ ᠰᠠᠭᠤᠬᠤ ᠶ᠋ᠢ ᠬᠠᠭᠠᠨ ᠦᠵᠡᠭᠡᠳ ᠶᠠᠭᠤ ᠪᠣᠯᠤᠭᠰᠠᠨ ᠢ᠋ ᠠᠰᠠᠭᠤᠬᠤ ᠳ᠋ᠤ᠌《ᠡᠨᠡ ᠬᠤᠤᠬᠠᠢ ᠳᠠᠶᠤᠤ ᠣᠷᠳᠣᠨ ᠳ᠋ᠤ᠌ ᠢᠷᠡᠵᠦ ᠨᠠᠮᠠ ᠶ᠋ᠢ ᠲᠠᠲᠠᠵᠤ ᠴᠢᠩᠭᠠᠭᠠᠯᠠ᠂ ᠪᠢ ᠡᠰᠡ ᠵᠥᠪᠰᠢᠶᠡᠷᠡᠨ ᠡᠰᠡᠷᠭᠦᠴᠡᠭᠡᠳ ᠡᠢᠮᠦ ᠪᠣᠯᠤᠯᠠ》 ᠭᠡᠵᠦ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠰᠠᠨ ᠬᠤᠤᠬᠠᠢ ᠳᠠᠶᠤᠤ ᠰᠡᠩᠳᠡ ᠮᠡᠩᠳᠡ ᠵᠢᠭᠤᠲᠠᠵᠠᠢ᠃ ᠬᠠᠭᠠᠨ ᠨᠡᠬᠡᠨ ᠬᠥᠭᠡᠭᠡᠬᠦ ᠳ᠋ᠦ᠍ ᠭᠡᠳᠡᠷᠭᠦ ᠳᠠᠭᠠᠷᠢᠨ ᠬᠠᠭᠠᠨ ᠤ᠋ ᠡᠷᠡᠬᠡᠢ ᠬᠤᠷᠤᠭᠤ ᠶ᠋ᠢ ᠲᠠᠰᠤ ᠬᠠᠷᠪᠤᠭᠰᠠᠨ ᠪᠠᠢᠨᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠣᠷᠳᠣᠨ ᠤ᠋ ᠳᠣᠲᠣᠷᠠᠬᠢ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠢᠷᠡᠵᠦ ᠬᠤᠤᠬᠠᠢ ᠳᠠᠶᠤᠤ ᠶ᠋ᠢ ᠪᠠᠷᠢᠵᠤ ᠠᠯᠠᠪᠠ᠃ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠬᠠᠭᠠᠨ ᠤ᠋ ᠵᠠᠷᠯᠢᠭ ᠢ ᠭᠦᠢᠴᠡᠳᠬᠡᠭᠰᠡᠨ ᠦ᠌ ᠭᠡᠷᠡᠴᠢ ᠪᠣᠯᠭᠠᠨ ᠬᠤᠤᠬᠠᠢ ᠳᠠᠶᠤᠤ ᠶ᠋ᠢᠨ ᠨᠢᠷᠤᠭᠤᠨ ᠤ᠋ ᠠᠷᠠᠰᠤ ᠶ᠋ᠢ ᠥᠪᠴᠢᠵᠦ ᠬᠠᠭᠠᠨ ᠳ᠋ᠤ᠌ ᠦᠵᠡᠭᠦᠯᠦᠭᠰᠡᠨ ᠳ᠋ᠦ᠍ ᠥᠯᠵᠡᠢᠲᠦ ᠭᠤᠸᠠ ᠪᠠᠢᠵᠢ ᠬᠠᠲᠤᠨ᠂ ᠬᠤᠤᠬᠠᠢ ᠳᠠᠶᠤᠤ ᠶ᠋ᠢᠨ ᠠᠷᠠᠰᠤᠨ ᠳᠡᠭᠡᠷᠡ ᠬᠠᠭᠠᠨ ᠤ᠋ ᠲᠠᠰᠤ ᠬᠠᠷᠪᠣᠭᠤᠯᠤᠭᠰᠠᠨ ᠬᠤᠷᠤᠭᠤᠨ ᠤ᠋ ᠴᠢᠰᠤ ᠶ᠋ᠢ ᠲᠤᠰᠬᠠᠵᠤ᠂ ᠲᠣᠰᠣ ᠮᠡᠲᠦ ᠨᠢᠯᠠᠵᠤ ᠬᠡᠳᠦᠨ ᠤᠳᠠᠭᠠ ᠳᠣᠯᠣᠭᠣᠭᠠᠳ《ᠬᠠᠷᠠ ᠰᠠᠨᠠᠭᠠᠲᠤ ᠬᠠᠭᠠᠨ ᠤ᠋ ᠴᠢᠰᠤ ᠶ᠋ᠢ ᠳᠣᠯᠢᠶᠠᠵᠤ᠂ ᠬᠠᠳᠬᠤᠵᠤ ᠦᠬᠦᠭᠦᠯᠦᠭᠰᠡᠨ ᠬᠤᠤᠬᠠᠢ ᠶ᠋ᠢᠨ ᠲᠣᠰᠣ ᠶ᠋ᠢ ᠤᠤᠭᠤᠵᠤ᠂ ᠡᠮᠡ ᠬᠥᠮᠦᠨ ᠪᠢ᠂ ᠡᠷᠡ ᠨᠥᠬᠥᠷ ᠦ᠋ᠨ ᠢ᠋ᠶ᠋ᠡᠨ ᠥᠰᠢᠶᠡ ᠶ᠋ᠢ ᠠᠪᠤᠯᠠ᠂ ᠣᠳᠣ ᠨᠠᠳᠠ ᠦᠬᠦᠪᠡᠴᠦ ᠭᠣᠮᠣᠳᠠᠬᠤ ᠭᠠᠵᠠᠷ ᠦᠭᠡᠢ》 ᠭᠡᠮᠡᠨ ᠥᠴᠢᠵᠡᠢ᠃
ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨ ᠡᠨᠡ ᠦᠶᠡ ᠳ᠋ᠦ᠍ ᠰᠠᠶᠢ ᠬᠠᠲᠤᠨ ᠳ᠋ᠤ᠌ ᠪᠠᠨ ᠮᠡᠬᠡᠯᠡᠭᠳᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠵᠦ ᠬᠡᠳᠦᠢ ᠭᠡᠮᠰᠢᠪᠡᠴᠦ ᠣᠷᠣᠢᠳᠠᠭᠰᠨ ᠲᠤᠯᠠ ᠬᠤᠤᠬᠠᠢ ᠳᠠᠶᠤᠤ ᠶ᠋ᠢᠨ ᠬᠦᠦ ᠪᠠᠲᠤᠯᠠ ᠳ᠋ᠤ᠌ ᠥᠪᠡᠷ ᠦ᠋ᠨ ᠥᠬᠢᠨ ᠢ᠋ᠶ᠋ᠡᠨ ᠬᠠᠲᠤᠨ ᠪᠣᠯᠭᠠᠨ ᠥᠭᠴᠦ᠂ ᠴᠢᠩᠰᠠᠩ ᠴᠣᠯᠠ ᠡᠷᠭᠦᠮᠵᠢᠯᠡᠭᠡᠳ ᠬᠠᠴᠢᠬᠠ ᠨᠣᠶᠠᠨ ᠲᠠᠢ ᠬᠠᠮᠲᠤ ᠳᠥᠷᠪᠡᠨ ᠣᠢᠷᠠᠳ ᠢ᠋ ᠵᠠᠬᠢᠷᠲᠤᠭᠠᠢ ᠭᠡᠮᠡᠨ ᠵᠠᠷᠯᠢᠭ ᠪᠣᠯᠵᠠᠢ᠃
ᠭᠡᠪᠡᠴᠦ ᠪᠠᠲᠤᠯᠠ ᠴᠢᠩᠰᠠᠩ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠥᠰᠢᠶᠡ ᠶ᠋ᠢ ᠵᠠᠪᠠᠯ ᠠᠪᠤᠨᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠭᠰᠠᠨ ᠲᠤᠯᠠ1401 ᠣᠨ ᠳ᠋ᠤ᠌ ᠥᠭᠡᠴᠢ ᠬᠠᠰᠢᠬᠠ ᠨᠣᠶᠠᠨ ᠲᠠᠢ ᠬᠠᠮᠲᠤ ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨᠢ ᠬᠣᠷᠣᠭᠠᠵᠠᠢ᠃ ᠡᠨᠡ ᠪᠣᠯ ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨ ᠤ᠋ ᠬᠠᠮᠤᠭ ᠡᠷᠬᠡ ᠪᠡᠨ ᠠᠯᠳᠠᠬᠤ ᠠ᠋ᠴᠠ ᠳᠤᠷᠠ ᠦᠭᠡᠢᠴᠡᠵᠦ ᠪᠠᠢᠭᠰᠠᠨ ᠳᠥᠷᠪᠡᠨ ᠣᠢᠷᠠᠳ ᠤ᠋ᠨ ᠥᠭᠡᠴᠢ ᠬᠠᠴᠢᠬᠠ ᠡᠴᠢᠭᠡ ᠪᠡᠨ ᠭᠦᠵᠢᠷ ᠢ᠋ᠶ᠋ᠡᠷ ᠠᠯᠠᠭᠯᠠᠭᠰᠠᠨ ᠪᠠᠲᠤᠯᠠ ᠴᠢᠩᠰᠠᠩ ᠬᠣᠶᠠᠷ ᠤ᠋ᠨ ᠠᠯᠢ ᠠᠯᠢᠨ ᠤ᠋ ᠠᠰᠠᠭᠤᠳᠠᠯ ᠪᠠᠢᠵᠠᠢ᠃
1393—1399 ᠣᠨ ᠬᠦᠷᠲᠡᠯᠡ ᠵᠢᠷᠭᠤᠭᠠᠨ ᠵᠢᠯ ᠬᠠᠭᠠᠨ ᠰᠢᠷᠡᠭᠡᠨ ᠳ᠋ᠦ᠍ ᠰᠠᠭᠤᠭᠠᠳ ᠥᠪᠡᠷ ᠦ᠋ᠨ ᠲᠠᠷᠢᠭᠰᠠᠨ ᠨᠢᠭᠦᠯ ᠬᠢᠯᠢᠨᠴᠡ ᠡᠴᠡ ᠪᠣᠯᠵᠤ ᠰᠢᠳᠠᠷ ᠴᠡᠷᠢᠭ ᠦ᠋ᠳ ᠦ᠋ᠨ ᠭᠠᠷ ᠲᠤ᠌ ᠴᠡᠯ ᠵᠠᠯᠠᠭᠤ39 ᠨᠠᠰᠤᠲᠠᠢ ᠳ᠋ᠤ᠌ ᠪᠠᠨ ᠬᠣᠷᠣᠭᠠᠭᠳᠠᠵᠠᠢ᠃
ᠡᠯᠪᠡᠭ ᠨᠢᠭᠦᠯᠡᠰᠦᠭᠴᠢ ᠬᠠᠭᠠᠨ ᠤ᠋ ᠡᠨᠡᠬᠦ ᠶᠣᠰᠣ ᠪᠤᠰᠤ ᠦᠢᠯᠡ ᠠᠵᠢᠯᠯᠠᠭᠠ ᠠ᠋ᠴᠠ ᠣᠢᠷᠠᠳ ᠮᠣᠩᠭᠣᠯ ᠤ᠋ᠨ ᠬᠠᠷᠢᠴᠠᠭᠠᠨ ᠳ᠋ᠤ᠌ ᠴᠠᠪ ᠭᠠᠷᠴᠤ᠂ ᠮᠣᠩᠭᠣᠯ ᠣᠷᠣᠨ ᠳᠣᠲᠣᠷᠠ ᠪᠠᠨ ᠵᠠᠳᠠᠷᠠᠯ ᠪᠤᠲᠠᠷᠠᠯ ᠳ᠋ᠤ᠌ ᠣᠷᠣᠭᠰᠠᠨ ᠢ᠋ᠶ᠋ᠠᠷ ᠪᠠᠷᠠᠬᠤ ᠦᠭᠡᠢ᠂ ᠡᠨᠡ ᠦᠶᠡ ᠡᠴᠡ ᠮᠣᠩᠭᠣᠯ ᠤ᠋ᠨ ᠬᠠᠭᠠᠳ ᠨᠣᠶᠠᠳ ᠤ᠋ᠨ ᠬᠣᠭᠣᠷᠣᠨᠳᠣ ᠳᠣᠲᠣᠭᠠᠳᠤ ᠶ᠋ᠢᠨ ᠲᠡᠢᠨ ᠰᠠᠮᠠᠭᠤᠨ ᠭᠠᠷᠴᠤ ᠡᠬᠢᠯᠡᠭᠰᠡᠨ ᠪᠠᠢᠨᠠ᠃
ᠢᠷᠡᠯᠲᠡ᠄
《ᠮᠣᠩᠭᠣᠯ ᠤ᠋ᠨ ᠭᠤᠴᠢᠨ ᠵᠢᠷᠭᠤᠭᠠᠨ ᠬᠠᠭᠠᠳ ᠤ᠋ᠨ ᠲᠣᠪᠴᠢ ᠨᠠᠮᠲᠠᠷ》 ᠨᠣᠮ ᠠ᠋ᠴᠠ ᠨᠠᠢᠷᠠᠭᠤᠯᠤᠨ ᠰᠣᠩᠭᠣᠵᠤ ᠰᠡᠢᠷᠡᠭᠦᠯᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠴᠢ᠊ · ᠤᠷᠠᠨᠴᠡᠴᠡᠭ