ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ᠂ᠰᠢᠨᠡᠯᠡᠮᠡ ᠶ᠋ᠢᠨ ᠵᠡᠪᠰᠡᠭᠲᠦ ᠲᠡᠮᠡᠴᠡᠯ 2(2–6~13) Шинэлам – 3-р бүлэг᠂ Шинэлмийн зэвсэгт тэмцэл 2(2–6~13)
202 ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠲᠥᠪ— ᠳᠠᠪᠴᠠᠭ ᠪᠠᠯᠭᠠᠰᠤᠨ ᠠ᠋ᠴᠠ ᠵᠡᠭᠦᠨ ᠲᠡᠢ ᠬᠣᠷᠢᠨ ᠬᠡᠳᠦᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠠᠯᠤᠰ ᠲᠤ᠌ ᠳᠠᠪᠴᠠᠭ ᠠ᠋ᠴᠠ ᠳ᠋ᠦᠩᠱᠧᠩ ᠬᠦᠷᠬᠦ ᠴᠠᠷᠳᠠᠮᠠᠯ ᠵᠠᠮ ᠢ᠋ ᠰᠤᠨᠳᠠᠯᠠᠭᠰᠠᠨ ᠮᠣᠩᠭᠣᠯ ᠭᠡᠷ ᠦ᠋ᠨ ᠲᠣᠭᠣᠨᠣ ᠮᠡᠲᠦ ᠦᠵᠡᠭᠳᠡᠬᠦ ᠥᠨᠳᠥᠷ ᠰᠠᠢᠬᠠᠨ ᠰᠢᠯᠢ ᠪᠠᠢᠳᠠᠭ ᠪᠢᠯᠡ᠂ ᠡᠨᠡ ᠪᠣᠯ ᠳᠠᠯᠠᠢ ᠶ᠋ᠢᠨ ᠲᠦᠪᠰᠢᠨ ᠡᠴᠡ ᠮᠢᠩᠭᠠ ᠭᠠᠷᠤᠢ ᠮᠧᠲ᠋ᠷ ᠥᠨᠳᠥᠷ ᠡᠷᠭᠦᠭᠳᠡᠵᠦ ᠰᠢᠪᠠᠭ ᠬᠠᠷᠭᠠᠨᠠ ᠪᠤᠲᠠ ᠪᠤᠷᠭᠠᠰᠤ ᠪᠣᠯᠤᠨ ᠶᠠᠰᠢᠯ ᠤ᠋ᠨ ᠣᠢ ᠰᠦᠨᠳᠡᠷᠯᠡᠭᠰᠡᠨ ᠲᠣᠭᠣᠨᠣᠲᠤ ᠶ᠋ᠢᠨ ᠰᠢᠯᠢ ᠪᠣᠯᠤᠨᠠ᠃ ᠡᠨᠳᠡᠬᠢ ᠮᠣᠩᠭᠣᠯᠴᠤᠳ ᠨᠤᠲᠤᠭ ᠤᠰᠤ ᠪᠠᠨ ᠬᠠᠢᠷᠠᠯᠠᠵᠤ ᠬᠠᠮᠠᠭᠠᠯᠠᠬᠤ ᠪᠠ ᠡᠬᠡ ᠪᠠᠢᠭᠠᠯᠢ᠂ ᠨᠤᠲᠤᠭ ᠪᠡᠯᠴᠢᠭᠡᠷ ᠡᠴᠡ ᠬᠥᠮᠦᠨ ᠠᠮᠢᠲᠠᠨ ᠳ᠋ᠤ᠌ ᠣᠯᠭᠣᠭᠰᠠᠨ ᠬᠠᠢᠷᠠ ᠬᠡᠰᠢᠭ ᠦ᠋ᠨ ᠳᠠᠯᠳᠠ ᠬᠦᠴᠦᠨ ᠢ᠋ ᠢᠳᠡᠭᠡᠨ ᠪᠢᠰᠢᠷᠡᠵᠦ ᠶᠠᠪᠤᠳᠠᠭ ᠨᠢ ᠡᠷᠲᠡᠨ ᠳᠡᠭᠡᠳᠦ ᠡᠴᠡ ᠤᠯᠠᠮᠵᠢᠯᠠᠭᠰᠠᠨ ᠤᠳᠤᠮᠰᠢᠯᠲᠤ ᠵᠠᠩ ᠦᠢᠯᠡ ᠪᠢᠯᠡ᠃ ᠮᠣᠩᠭᠣᠯᠴᠤᠳ ᠮᠥᠨ ᠴᠦ᠍ ᠡᠨᠡ ᠬᠦ᠌ ᠲᠠᠩᠰᠤᠭ ᠰᠠᠢᠬᠠᠨ ᠨᠤᠲᠤᠭ ᠢ᠋ᠶ᠋ᠠᠨ ᠪᠤᠰᠤᠳ ᠢ᠋ᠶ᠋ᠠᠷ ᠡᠪᠳᠡᠯᠡᠭᠦᠯᠵᠦ ᠬᠠᠭᠠᠯᠪᠤᠷᠢᠯᠠᠭᠤᠯᠬᠤ ᠳᠤᠷᠠ ᠦᠭᠡᠢ ᠪᠠᠢᠳᠠᠭ᠃
1927 ᠣᠨ ᠤ᠋10 ᠰᠠᠷᠠ ᠶ᠋ᠢᠨ ᠳᠤᠮᠳᠠᠴᠢ ᠪᠠᠷ ᠵᠠᠩᠭᠤᠲᠤ ᠶ᠋ᠢᠨ ᠪᠠᠢᠯᠳᠤᠭᠠᠨ ᠳᠥᠩᠭᠡᠵᠦ ᠳᠠᠭᠤᠰᠤᠮᠠᠭᠴᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢᠯᠠᠭᠳᠠᠯ ᠬᠣᠬᠢᠷᠠᠯ ᠤ᠋ᠨ ᠥᠰᠢᠶᠡ ᠪᠡᠨ ᠠᠪᠬᠤ ᠪᠠᠷ10 ᠰᠠᠷᠠ ᠶ᠋ᠢᠨ30 ᠤ᠋ ᠡᠳᠦᠷ ᠮᠣᠷᠢᠲᠤ ᠶᠠᠪᠠᠭᠠᠨ ᠮᠢᠩᠭᠠ ᠰᠢᠬᠠᠮ ᠴᠡᠷᠢᠭ ᠲᠣᠮᠢᠯᠠᠵᠤ᠂ ᠲᠣᠭᠣᠨᠣᠲᠤ ᠶ᠋ᠢᠨ ᠰᠢᠯᠢ ᠶ᠋ᠢ ᠡᠵᠡᠯᠡᠯᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠵᠠᠰᠠᠭ ᠬᠤᠰᠢᠭᠤᠨ ᠤ᠋ ᠵᠠᠰᠠᠭ ᠵᠣᠣ ᠳᠡᠭᠡᠷᠡ ᠵᠠᠩᠭᠤᠲᠤ ᠶ᠋ᠢᠨ ᠪᠠᠢᠯᠳᠤᠭᠠᠨ ᠤ᠋ ᠰᠡᠭᠦᠯ ᠬᠤᠷᠢᠶᠠᠬᠤ ᠠᠵᠢᠯ ᠤ᠋ᠳ ᠢ᠋ᠶ᠋ᠠᠨ ᠰᠠᠶᠢᠬᠠᠨ ᠪᠠᠷᠠᠭᠠᠭᠠᠳ᠂ ᠣᠯᠠᠩᠬᠢ ᠴᠡᠷᠢᠭ ᠮᠣᠷᠢ ᠪᠠᠨ ᠠᠮᠠᠷᠠᠭᠠᠵᠤ ᠭᠡᠷ ᠭᠡᠷ ᠲᠦ᠋ᠨᠢ ᠴᠢᠯᠥᠭᠡ ᠥᠭᠴᠦ ᠢᠳᠡᠰᠢ ᠬᠦᠨᠡᠰᠦ᠂ ᠡᠪᠦᠯ ᠦ᠋ᠨ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ᠶ᠋ᠠᠨ ᠠᠪᠴᠢᠷᠠᠭᠤᠯᠬᠤ ᠪᠠᠷ ᠶᠠᠪᠤᠭᠤᠯᠴᠢᠬᠠᠭᠰᠠᠨ ᠪᠠᠢᠵᠠᠢ᠃ ᠰᠢᠨᠠᠯᠠᠮᠠ ᠲᠠᠪᠢ ᠰᠢᠬᠠᠮ ᠴᠡᠷᠢᠭ ᠲᠡᠢ ᠪᠡᠨ ᠮᠡᠢᠷᠡᠨ ᠰᠦᠮᠡ ᠳ᠋ᠦ᠍ ᠪᠠᠢᠭᠰᠠᠨ ᠲᠤᠯᠠ ᠮᠠᠭᠤ ᠴᠢᠮᠡᠭᠡ ᠶ᠋ᠢ ᠰᠣᠨᠣᠰᠤᠮᠠᠭᠴᠠ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠡᠷ ᠳᠣᠪᠲᠣᠯᠤᠭᠤᠯᠤᠭᠰᠠᠭᠠᠷ ᠲᠣᠭᠣᠨᠣᠲᠤ ᠶ᠋ᠢᠨ ᠰᠢᠯᠢ ᠶ᠋ᠢᠨ ᠵᠡᠭᠦᠨ ᠬᠣᠢᠨᠠ ᠪᠠᠢᠭᠠ ᠰᠦᠮᠡ ᠶ᠋ᠢᠨ ᠵᠠᠳᠠᠭᠠᠢ ᠶ᠋ᠢᠨ ᠳᠡᠷᠭᠡᠳᠡᠬᠢ ᠵᠡᠷᠭᠡᠯᠡᠳᠡᠭᠡ ᠬᠣᠶᠠᠷ ᠡᠷᠦᠬᠡ ᠳ᠋ᠦ᠍ ᠪᠠᠭᠤᠳᠠᠯᠯᠠᠪᠠ᠃ ᠲᠡᠨᠳᠡ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠠᠢᠯ ᠡᠷᠦᠬᠡ ᠶ᠋ᠢᠨ ᠦᠬᠡᠷ ᠬᠣᠨᠢ ᠶ᠋ᠢ ᠳᠡᠭᠡᠷᠡᠮᠳᠡᠨ ᠰᠦᠷᠦᠭ ᠰᠦᠷᠦᠭ ᠢ᠋ᠶ᠋ᠡᠷ ᠡᠮᠦᠨᠡᠰᠢ ᠪᠡᠨ ᠲᠠᠭᠤᠵᠤ ᠶᠠᠪᠤᠭᠠ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠵᠠᠢ᠃
ᠰᠢᠨᠠᠯᠠᠮᠠ ᠬᠣᠭᠣᠯᠠ ᠢᠳᠡᠬᠦ ᠶ᠋ᠢᠨ ᠵᠠᠭᠤᠷᠠ᠄《ᠵᠢᠩ ᠶᠤᠸᠠᠢ ᠰᠢᠦ ᠲᠡᠭᠦᠰᠠᠠᠮᠤᠭᠤᠯᠠᠩ ᠬᠣᠶᠠᠭᠤᠯᠠ᠂ ᠮᠠᠨ ᠤ᠋ ᠴᠡᠷᠢᠭ ᠦ᠋ᠨ ᠴᠢᠯᠥᠭᠡ ᠲᠠᠯᠪᠢᠬᠤ ᠶ᠋ᠢ ᠮᠡᠳᠡᠴᠢᠬᠡᠭᠰᠡᠨ ᠰᠢᠭ ᠠᠷᠠᠳ ᠢ᠋ ᠭᠡᠨᠡᠳᠡᠭᠦᠯᠬᠦ ᠶ᠋ᠢ ᠶᠡᠷᠦ ᠰᠠᠨᠠᠵᠤ ᠣᠯᠤᠭᠰᠠᠨ ᠦᠭᠡᠢ ᠳᠡ! ᠵᠠ᠂ ᠴᠢᠩᠭᠢᠪᠡᠴᠦ ᠲᠡᠳᠡᠨᠦᠰ ᠢ᠋ ᠠᠷᠢᠯᠭᠠᠬᠤ ᠠᠷᠭᠠ ᠨᠠᠳᠠ ᠪᠠᠢᠨᠠ᠁》 ᠭᠡᠵᠦ ᠴᠡᠷᠢᠭ ᠲᠡᠢ ᠪᠡᠨ ᠰᠤᠯᠠ ᠶᠠᠷᠢᠯᠴᠠᠵᠤ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠪᠠᠶᠠᠨᠰᠢᠯᠢ᠂ ᠰᠦᠮᠡ ᠶ᠋ᠢᠨ ᠵᠠᠳᠠᠭᠠᠢ᠂ ᠲᠣᠭᠣᠨᠣᠲᠤ ᠵᠡᠷᠭᠡ ᠭᠠᠵᠠᠷ ᠭᠡᠷ ᠲᠡᠢ ᠨᠤᠲᠤᠭ ᠤ᠋ᠨ ᠴᠡᠷᠢᠭ ᠡᠴᠡ ᠪᠠᠪᠠ ᠯᠢᠶᠡᠨᠵᠠᠩ ᠬᠡᠳᠦ ᠶ᠋ᠢ ᠳᠠᠭᠠᠭᠤᠯᠤᠨ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠢ᠋ ᠲᠠᠩᠨᠠᠨ ᠣᠢᠯᠠᠭᠠᠬᠤ ᠪᠠᠷ ᠶᠠᠪᠤᠵᠠᠭᠠᠯᠠ᠃ ᠲᠡᠳᠡ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠮᠣᠷᠢᠲᠤ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠳ ᠲᠣᠭᠣᠨᠣᠲᠤ ᠶ᠋ᠢᠨ ᠰᠢᠯᠢ ᠶ᠋ᠢᠨ ᠡᠮᠦᠨᠡᠭᠦᠷ ᠬᠢ ᠠᠢᠯ ᠤ᠋ᠳ ᠲᠤ᠌ ᠪᠦᠯᠦᠭ ᠪᠦᠯᠦᠭ ᠢ᠋ᠶ᠋ᠡᠷ ᠬᠣᠨᠣᠭᠯᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠪᠡ᠃ ᠬᠣᠶᠠᠷ ᠴᠡᠷᠢᠭ ᠲᠡᠳᠡᠨ ᠦ᠌ ᠳᠣᠲᠣᠭᠠᠳᠤ ᠪᠠᠢᠳᠠᠯ ᠢ᠋ ᠨᠠᠷᠢᠨ ᠣᠢᠯᠠᠭᠠᠬᠤ ᠪᠠᠷ ᠨᠢᠭᠡ ᠠᠢᠯ ᠤ᠋ᠨ ᠣᠢᠷᠠᠬᠠᠨ ᠬᠦᠷᠬᠦ ᠳ᠋ᠦ᠍ ᠬᠣᠲᠠᠴᠢ ᠨᠣᠬᠠᠢ ᠨᠢ ᠬᠤᠴᠠᠵᠤ ᠡᠬᠢᠯᠡᠪᠡ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠠᠷᠠᠭᠤᠯ《ᠬᠡᠨ ᠪᠣᠢ? ᠠᠮᠠᠨ ᠳᠣᠬᠢᠶᠠ!》 ᠭᠡᠵᠦ ᠵᠠᠩᠳᠤᠷᠬᠤ ᠳ᠋ᠤ᠌᠂ ᠲᠡᠷᠡ ᠬᠣᠶᠠᠭᠤᠯᠠ ᠶ᠋ᠢᠨ ᠪᠡᠶᠡ ᠡᠴᠡ ᠬᠦᠢᠲᠡᠨ ᠬᠥᠯᠥᠰᠥ ᠠᠰᠬᠠᠷᠠᠨ ᠶᠠᠭᠠᠬᠢᠬᠤ ᠪᠠᠨ ᠴᠤ᠌ ᠣᠯᠬᠤ ᠦᠭᠡᠢ ᠪᠠᠢᠲᠠᠯᠠ ᠬᠣᠲᠠᠴᠢ ᠨᠣᠬᠠᠢ ᠵᠡᠷᠭᠡᠯᠡᠳᠡᠭᠡ ᠡᠷᠦᠬᠡ ᠶ᠋ᠢᠨ ᠬᠥᠮᠦᠨ ᠭᠡᠳᠡᠭ ᠢ᠋ ᠲᠠᠨᠢᠭᠠᠳ ᠰᠡᠭᠦᠯ ᠰᠡᠷᠪᠡᠢᠨ ᠬᠤᠴᠠᠬᠤ ᠪᠠᠨ ᠪᠠᠢᠵᠤ ᠭᠡᠷ ᠵᠦᠭ ᠢ᠋ᠶ᠋ᠡᠨ ᠶᠠᠪᠤᠯᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠬᠣᠶᠠᠭᠤᠯᠠ ᠵᠣᠷᠢᠭ ᠣᠷᠣᠵᠤ ᠣᠷᠣᠭᠰᠢ ᠮᠥᠯᠬᠥᠭᠰᠡᠭᠡᠷ᠂ ᠨᠣᠬᠠᠢ ᠶ᠋ᠢ ᠢᠲᠡᠭᠡᠵᠦ ᠲᠠᠢᠪᠤᠰᠢᠷᠠᠭᠰᠠᠨ ᠬᠠᠷᠠᠭᠤᠯ ᠢ᠋ ᠪᠠᠭᠠᠯᠵᠤᠤᠷᠳᠠᠨ ᠰᠢᠬᠠᠵᠤ ᠠᠮᠠ ᠳ᠋ᠤᠨᠢ ᠠᠯᠴᠢᠭᠤᠷ ᠴᠢᠬᠢᠵᠦ ᠴᠢᠷᠴᠦ ᠶᠠᠪᠤᠭᠠᠳ ᠯᠢᠶᠡᠨᠵᠠᠩ ᠳ᠋ᠠᠭᠠᠨ ᠠᠪᠴᠤ ᠬᠦᠷᠴᠡᠢ᠃ ᠡᠨᠡ ᠦᠶᠡ ᠳ᠋ᠦ᠍ ᠰᠢᠨᠡᠯᠡᠮᠡ ᠶ᠋ᠢᠨ ᠳᠠᠭᠠᠭᠤᠯᠤᠭᠰᠠᠨ ᠳᠥᠴᠢ ᠭᠠᠷᠤᠢᠬᠠᠨ ᠴᠡᠷᠢᠭ ᠴᠦ᠍ ᠠᠷᠤ ᠠ᠋ᠴᠠ ᠨᠢ ᠬᠦᠷᠴᠦ ᠢᠷᠡᠪᠡ᠃ ᠢᠩᠭᠢᠭᠡᠳ ᠲᠡᠳᠡ ᠣᠯᠵᠠᠯᠠᠭᠳᠠᠭᠰᠠᠨ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠢ᠋ ᠰᠢᠭᠦᠨ ᠠᠰᠠᠭᠤᠭᠰᠠᠨ ᠳ᠋ᠤ᠌᠂ ᠲᠡᠷᠡ ᠪᠣᠯ ᠬᠥᠳᠡᠭᠡ ᠶ᠋ᠢᠨ ᠵᠢᠷ ᠦ᠋ᠨ ᠨᠢᠭᠡᠨ ᠲᠠᠷᠢᠶᠠᠴᠢᠨ ᠵᠠᠯᠠᠭᠤ ᠪᠠᠢᠵᠤ ᠲᠦᠷᠦᠭᠦᠬᠡᠨ ᠰᠠᠶᠢ ᠲᠣᠰᠬᠣᠨ ᠠ᠋ᠴᠠ ᠪᠠᠨ ᠪᠠᠷᠢᠭᠳᠠᠵᠤ ᠴᠡᠷᠢᠭ ᠲᠦ᠍ ᠲᠠᠲᠠᠪᠤᠷᠢᠯᠠᠭᠳᠠᠭᠰᠠᠨ ᠲᠤᠯᠠ ᠲᠡᠳᠡᠨ ᠦ᠌ ᠴᠡᠷᠢᠭ ᠦ᠋ᠨ ᠳᠣᠲᠣᠭᠠᠳᠤ ᠤᠴᠢᠷ ᠢ᠋ ᠮᠡᠳᠡᠬᠦ ᠦᠭᠡᠢ ᠰᠢᠭ ᠪᠣᠯᠪᠠᠴᠤ ᠴᠡᠷᠢᠭ ᠦ᠋ᠨ ᠲᠣᠭᠠ ᠶ᠋ᠢᠨ ᠪᠠᠷᠤᠭᠴᠠᠭᠠᠯᠠᠯ᠂ ᠥᠨᠥ ᠰᠥᠨᠢ ᠬᠠᠮᠢᠭᠠᠭᠤᠷ ᠬᠡᠳᠦᠨ ᠪᠦᠯᠦᠭ ᠪᠠᠢᠬᠤ ᠶ᠋ᠢ ᠨᠠᠷᠢᠨ ᠥᠴᠢᠭᠯᠡᠭᠰᠡᠨ ᠪᠠᠢᠨᠠ᠃ ᠡᠨᠡ ᠪᠠᠢᠳᠠᠯ ᠢ᠋ ᠰᠢᠨᠡᠯᠡᠮᠡ ᠣᠢᠯᠠᠭᠠᠭᠰᠠᠨ ᠤ᠋ ᠰᠡᠭᠦᠯᠡᠷ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠶ᠋ᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠲᠡᠳᠡᠨ ᠦ᠌ ᠪᠦᠯᠦᠭ ᠦ᠋ᠳ ᠦ᠋ᠨ ᠳᠤᠮᠳᠠ ᠣᠷᠣᠵᠤ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ《ᠠᠯᠠ!》 ᠭᠡᠮᠡᠨ ᠬᠠᠰᠬᠢᠷᠤᠨ ᠬᠣᠭᠣᠷᠣᠨᠳᠣ ᠨᠢ ᠡᠷᠦᠢ ᠬᠤᠷᠤᠢ ᠦᠭᠡᠢ ᠰᠢᠷᠦᠭᠦᠨ ᠭᠠᠯᠯᠠᠭᠠᠳ ᠳᠠᠬᠢᠨ ᠲᠡᠳᠡᠨ ᠦ᠌ ᠳᠣᠲᠣᠷᠠ ᠠ᠋ᠴᠠ ᠳᠠᠪᠬᠢᠨ ᠭᠠᠷᠴᠤ ᠬᠣᠢᠲᠤ ᠥᠨᠳᠥᠷ ᠲᠣᠭᠣᠨᠣᠲᠤ ᠶ᠋ᠢᠨ ᠣᠷᠣᠢ ᠶ᠋ᠢᠨ ᠠᠰᠢᠭ ᠲᠠᠢ ᠪᠠᠢᠷᠢ ᠶ᠋ᠢ ᠡᠵᠡᠯᠡᠵᠡᠢ᠃ ᠡᠨᠡ ᠪᠠᠢᠯᠳᠤᠭᠠᠨ ᠢᠩᠭᠢᠵᠦ ᠡᠭᠦᠰᠦᠭᠡᠳ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠪᠦᠯᠦᠭ ᠪᠦᠯᠦᠭ ᠢ᠋ᠶ᠋ᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠨᠠᠷᠠ ᠭᠠᠷᠲᠠᠯᠠ ᠭᠠᠯ ᠠᠪᠤᠯᠴᠠᠵᠤ᠂ ᠴᠣᠬᠣᠮ ᠬᠡᠴᠢᠨᠡᠭᠡᠨ ᠴᠡᠷᠢᠭ ᠢ᠋ᠶ᠋ᠡᠨ ᠬᠣᠬᠢᠷᠠᠭᠤᠯᠵᠤ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠢ᠋ ᠪᠤᠤ ᠮᠡᠳᠡ᠃ ᠥᠷᠯᠥᠭᠡ ᠪᠣᠯᠬᠤ ᠳ᠋ᠤ᠌ ᠬᠠᠷᠢᠯᠴᠠᠨ ᠠᠯᠠᠯᠳᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠪᠡᠴᠦ ᠰᠤᠮᠤ ᠪᠠᠨ ᠪᠦᠷᠢᠯᠭᠡᠵᠦ᠂ ᠬᠥᠮᠦᠨ ᠢ᠋ᠶ᠋ᠡᠨ ᠬᠣᠬᠢᠷᠠᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠰᠦᠷᠡᠬᠡᠢ ᠠᠭᠤᠷᠯᠠᠵᠤ ᠡᠴᠢᠭᠡ ᠡᠪᠦᠭᠡ ᠪᠡᠨ ᠵᠢᠭᠠᠵᠤ ᠳᠡᠭᠡᠷᠡ ᠳᠣᠣᠷᠠ ᠦᠭᠡᠢ ᠬᠠᠷᠢᠶᠠᠯᠴᠠᠵᠤ ᠪᠠᠢᠪᠠ᠃ ᠲᠣᠭᠣᠨᠣᠲᠤ ᠶ᠋ᠢᠨ ᠥᠨᠳᠥᠷ ᠣᠷᠣᠢ ᠳᠡᠭᠡᠷᠡ ᠡᠴᠡ ᠰᠢᠨᠠᠯᠠᠮᠠ ᠣᠷᠣᠰ ᠬᠢᠴᠡ ᠲᠡᠢ ᠬᠣᠶᠠᠷ ᠲᠣᠬᠣᠢ ᠰᠢᠬᠠᠮ ᠤᠷᠲᠤ ᠳᠤᠷᠠᠨ ᠢ᠋ᠶ᠋ᠠᠷ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠰᠠᠮᠠᠭᠤᠷᠠᠯ ᠢ᠋ ᠦᠵᠡᠭᠡᠳ ᠬᠣᠢᠲᠤ ᠵᠦᠭ ᠡᠴᠡ ᠨᠢ ᠳᠣᠪᠲᠣᠯᠤᠨ ᠳᠠᠭᠠᠷᠢᠪᠠ᠃ ᠦᠳᠡ ᠪᠣᠯᠬᠤ ᠳ᠋ᠤ᠌ ᠦᠦᠰᠢᠨ ᠦ᠌ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠰᠠᠭᠤᠷᠢᠰᠢᠵᠤ ᠪᠠᠢᠭᠰᠠᠨ ᠲᠥᠪ ᠬᠣᠷᠢᠶᠠᠨ ᠤ᠋ ᠴᠡᠷᠢᠭ ᠴᠦ᠍ ᠪᠠᠷᠠᠭᠤᠨ ᠪᠠᠯᠠᠷ ᠡᠯᠡᠰᠦᠨ ᠡᠴᠡ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ ᠬᠢᠭᠰᠡᠨ ᠳ᠋ᠦ᠍ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠮᠣᠷᠢᠲᠤ ᠴᠡᠷᠢᠭ ᠨᠢ ᠬᠡᠰᠡᠭ ᠦᠶᠡ ᠪᠠᠢᠯᠳᠤᠭᠰᠠᠨ ᠤ᠋ ᠳᠠᠷᠠᠭᠠ ᠤᠬᠤᠷᠢᠵᠠᠢ᠃ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠨ ᠲᠤᠸᠠᠨ ᠨᠢ ᠠᠮᠢ ᠠᠮᠢ ᠪᠠᠨ ᠪᠣᠳᠣᠭᠠᠳ ᠦᠬᠦᠳᠡᠯ ᠢ᠋ᠶ᠋ᠡᠨ ᠬᠠᠶᠠᠵᠤ ᠰᠢᠷᠬᠠᠳᠤᠭᠰᠠᠳ ᠢ᠋ᠶ᠋ᠠᠨ ᠣᠷᠬᠢᠨ ᠡᠮᠦᠨᠡ ᠵᠦᠭ ᠲᠦ᠍ ᠪᠠᠷᠬᠢᠷᠠᠯᠳᠤᠨ ᠳᠤᠲᠠᠭᠠᠵᠠᠢ᠃
ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ᠂ ᠮᠣᠬᠣᠭᠰᠠᠨ ᠬᠤᠯᠠᠭᠠᠢ ᠶ᠋ᠢ ᠢᠯᠠᠯᠲᠠ ᠶ᠋ᠢᠨ ᠡᠷᠴᠢ ᠪᠡᠷ ᠨᠡᠬᠡᠮᠵᠢᠯᠡᠨ ᠤᠰᠠᠳᠬᠠᠭᠰᠠᠭᠠᠷ ᠦᠳᠡᠰᠢ ᠶ᠋ᠢᠨ ᠬᠠᠷᠠᠩᠭᠤᠢ ᠪᠣᠯᠬᠤ ᠳ᠋ᠤ᠌ ᠲᠡᠢᠨ ᠦ᠌ ᠭᠠᠯ ᠵᠣᠭᠰᠣᠵᠤ᠂ ᠳᠠᠢᠴᠢᠨ ᠮᠣᠷᠢᠲᠤ ᠴᠡᠷᠢᠭ ᠢᠯᠠᠯᠲᠠ ᠲᠠᠢ ᠪᠠᠷ ᠪᠠᠷᠠᠭᠤᠨᠰᠢᠯᠠᠨ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠵᠦᠭ ᠮᠣᠷᠳᠠᠵᠠᠢ᠃ ①
— — — —
① ᠲᠤᠰ ᠠᠭᠤᠯᠭᠠ ᠶ᠋ᠢ ᠳᠠᠯᠠᠭᠠᠳ ᠣᠨ ᠳ᠋ᠤ᠌ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠤ᠋ ᠪᠠᠢᠯᠳᠤᠭᠴᠢ ᠴᠢᠨᠰᠠᠩ ᠨᠠᠰᠤᠲᠠᠨ ᠠ᠋ᠴᠠ ᠰᠣᠨᠣᠰᠴᠤ ᠡᠮᠬᠢᠳᠬᠡᠪᠡ᠃
7. ᠳᠠᠭᠤᠲᠤ ᠶ᠋ᠢᠨ ᠪᠠᠢᠯᠳᠤᠭᠠᠨ
ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠵᠡᠭᠦᠨ ᠡᠮᠦᠨᠡᠲᠦ ᠬᠢᠵᠠᠭᠠᠷ ᠲᠤ᠌ ᠪᠠᠢᠷᠢᠰᠢᠵᠤ ᠪᠠᠢᠭᠠ ᠳᠠᠭᠤᠲᠤ(ᠥᠨᠥ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠢᠦᠢ ᠯᠢᠨ ᠬᠣᠲᠠ ᠶ᠋ᠢᠨ ᠰᠢᠶᠣᠤ ᠬᠤ᠌ ᠳ᠋ᠣᠣ ᠰᠢᠶᠠᠩ ᠳ᠋ᠤ᠌ ᠪᠣᠢ) ᠪᠣᠯ ᠡᠷᠲᠡᠨ ᠦ᠌ ᠦᠶᠡ ᠡᠴᠡ ᠤᠯᠠᠮᠵᠢᠯᠠᠭᠰᠠᠨ ᠠᠯᠲᠠᠨ ᠤᠨᠠᠭᠠ ᠲᠣᠭᠯᠠᠵᠤ ᠢᠨᠴᠠᠭᠠᠨ᠂ ᠣᠯᠠᠨ ᠰᠢᠪᠠᠭᠤᠳ ᠳᠣᠩᠭᠣᠳᠤᠭᠰᠠᠨ ᠬᠤᠯᠤᠰᠤ ᠪᠠᠭᠠᠯᠠᠭᠤᠷ ᠢᠭᠴᠢ ᠰᠠᠬᠤᠯᠠᠭ ᠤᠷᠭᠤᠭᠰᠠᠨ ᠬᠥᠯ ᠦᠭᠡᠢ ᠭᠦᠨ᠂ ᠬᠤᠵᠢᠷ ᠦᠭᠡᠢ ᠲᠤᠩᠭᠠᠯᠠᠭ ᠰᠠᠢᠬᠠᠨ ᠳᠠᠭᠤᠲᠤ ᠶ᠋ᠢᠨ ᠵᠠᠳᠠᠭᠠᠢ ᠶ᠋ᠢ ᠡᠷᠲᠡ ᠦᠶᠡ ᠶ᠋ᠢᠨ ᠮᠣᠩᠭᠣᠯᠴᠤᠳ《ᠳᠠᠭᠤᠲᠤ ᠶ᠋ᠢᠨ ᠵᠠᠳᠠᠭᠠᠢ》 ᠭᠡᠮᠡᠨ ᠤᠳᠠᠵᠤᠬᠤᠢ᠃ ᠥᠨᠥ ᠴᠦ᠍ ᠪᠠᠰᠠ ᠢᠷᠭᠡᠨᠴᠤᠳ《ᠲᠤᠤ ᠳ᠋ᠣᠣ》 ᠭᠡᠮᠡᠨ ᠳᠠᠭᠤᠳᠠᠭᠰᠠᠭᠠᠷ ᠪᠣᠢ᠃
ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠬᠣᠶᠠᠷ ᠮᠣᠵᠢ ᠶ᠋ᠢᠨ ᠭᠠᠵᠠᠷ ᠲᠤ᠌ ᠠᠯᠳᠠᠷᠲᠠᠢ ᠡᠨᠡ ᠰᠠᠢᠬᠠᠨ ᠳᠠᠭᠤᠲᠤ ᠳ᠋ᠤ᠌ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠳᠡᠭᠡᠷᠡ ᠤᠳᠠᠭᠠ ᠦᠦᠰᠢᠨ ᠦ᠌ ᠲᠣᠭᠣᠨᠣᠲᠤ ᠳ᠋ᠤ᠌ ᠢᠯᠠᠭᠳᠠᠭᠰᠠᠨ ᠮᠥᠬᠥᠯ ᠢ᠋ᠶ᠋ᠡᠨ ᠠᠪᠤᠷᠠᠬᠤ ᠪᠠᠷ ᠳᠠᠬᠢᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠵᠡᠭᠦᠨ ᠡᠮᠦᠨᠡᠲᠦ ᠭᠠᠵᠠᠷ ᠢ᠋ᠶ᠋ᠠᠷ ᠳᠦᠷᠢᠮ ᠭᠣᠷᠢᠮ ᠦᠭᠡᠢ ᠰᠠᠬᠢᠯᠭᠠ ᠪᠠᠲᠤ ᠦᠭᠡᠢ ᠴᠡᠷᠢᠭ ᠦ᠋ᠳ ᠢ᠋ᠶ᠋ᠡᠷ ᠮᠠᠯᠴᠢᠨ ᠠᠢᠯ ᠡᠷᠦᠬᠡ ᠶ᠋ᠢ ᠳᠡᠭᠡᠷᠡᠮᠳᠡᠭᠦᠯᠵᠦ ᠮᠠᠯᠴᠢᠳ ᠤ᠋ᠨ ᠬᠡᠳᠦᠨ ᠦᠶᠡ ᠪᠡᠷ ᠬᠤᠷᠠᠮᠳᠤᠭᠤᠯᠤᠭᠰᠠᠨ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠦᠭᠡᠢᠷᠡᠭᠦᠯᠵᠦ ᠣᠷᠣᠬᠤ ᠡᠭᠦᠳᠡ ᠤᠤᠭᠤᠬᠤ ᠠᠶᠠᠭᠠ ᠦᠭᠡᠢ ᠪᠣᠯᠲᠠᠯᠠ ᠬᠣᠭᠣᠰᠣᠷᠠᠭᠤᠯᠵᠠᠢ᠃
ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ᠂ ᠬᠠᠷᠠᠴᠢᠨ ᠴᠡᠷᠢᠭ ᠲᠡᠢ ᠬᠠᠮᠲᠤᠷᠠᠵᠤ ᠵᠠᠭᠤ ᠢᠯᠡᠭᠦᠬᠡᠨ ᠮᠣᠷᠢᠲᠤ ᠴᠡᠷᠢᠭ ᠢ᠋ᠶ᠋ᠡᠷ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠵᠡᠭᠦᠨ ᠡᠮᠦᠨᠡᠰᠢ ᠮᠣᠷᠳᠠᠵᠤ ᠨᠢᠭᠡ ᠰᠥᠨᠢ ᠠᠶᠠᠯᠠᠭᠠᠳ ᠵᠠᠭᠤ ᠭᠠᠷᠤᠢ ᠭᠠᠵᠠᠷ ᠤ᠋ᠨ ᠶᠡᠬᠡ ᠪᠠᠯᠠᠷ ᠣᠢ ᠳᠤᠮᠳᠠᠭᠤᠷ ᠠᠶᠠᠯᠠᠭᠰᠠᠭᠠᠷ10 ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ8 ᠤ᠋ ᠥᠷᠯᠥᠭᠡ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠣᠢᠷᠠᠬᠠᠨ ᠬᠦᠷᠴᠦ ᠣᠴᠢᠵᠠᠢ᠃
ᠰᠣᠨᠣᠰᠬᠤᠯᠠᠷ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠠᠢᠯ ᠡᠷᠦᠬᠡ ᠶ᠋ᠢ ᠳᠡᠭᠡᠷᠡᠮᠳᠡᠵᠦ ᠶᠠᠪᠤᠬᠤ ᠶ᠋ᠢᠨ ᠵᠠᠭᠤᠷᠠ ᠱᠠᠷᠠᠯᠲᠠᠢ ᠭᠡᠭᠴᠢ ᠠᠢᠯ ᠤ᠋ᠨ ᠭᠠᠳᠠᠨᠠ ᠬᠦᠷᠴᠡᠢ᠃ ᠲᠡᠷᠡ ᠠᠢᠯ ᠤ᠋ᠨ ᠬᠣᠲᠠᠴᠢ ᠨᠣᠬᠠᠢ ᠴᠡᠷᠢᠭ ᠦ᠋ᠳ ᠢ᠋ ᠰᠦᠷᠡᠬᠡᠢ ᠬᠤᠴᠠᠵᠤ ᠭᠡᠷ ᠲᠡᠭᠡᠨ ᠣᠢᠷᠠᠲᠤᠭᠤᠯᠬᠤ ᠦᠭᠡᠢ ᠪᠠᠢᠭᠰᠠᠨ ᠳ᠋ᠤ᠌ ᠲᠡᠳᠡ ᠨᠣᠬᠠᠢ ᠶ᠋ᠢ ᠨᠢ ᠫᠤᠤᠳᠠᠵᠤ ᠠᠯᠠᠭᠰᠠᠨ ᠢ᠋ᠶ᠋ᠠᠷ ᠦᠯᠦ ᠪᠠᠷᠠᠮ ᠨᠣᠬᠠᠢ ᠪᠠᠨ ᠬᠣᠷᠢᠭᠰᠠᠨ ᠦᠭᠡᠢ ᠭᠡᠵᠦ ᠱᠠᠷᠠᠯᠲᠠᠢ ᠶ᠋ᠢ ᠪᠠᠷᠢᠵᠤ ᠤᠶᠠᠭᠠᠳ ᠪᠦᠬᠦ ᠭᠡᠷ ᠦ᠋ᠨ ᠬᠥᠭᠰᠢᠨ ᠵᠠᠯᠠᠭᠤ ᠦᠭᠡᠢ ᠲᠠᠮᠤᠯᠠᠵᠤ ᠵᠣᠳᠣᠵᠠᠢ᠃ ᠢᠩᠭᠢᠭᠡᠳ ᠱᠠᠷᠠᠯᠲᠠᠢ ᠶ᠋ᠢ ᠤᠶᠠᠵᠤ ᠲᠠᠭᠤᠭᠠᠳ ᠲᠡᠳᠡᠨ ᠦ᠌ ᠭᠡᠷ ᠡᠴᠡ ᠬᠡᠳᠦᠨ ᠭᠠᠵᠠᠷ ᠤ᠋ᠨ ᠵᠠᠢ ᠳ᠋ᠤ᠌ ᠠᠪᠠᠴᠢᠨ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ ᠨᠢ ᠴᠥᠮ ᠲᠠᠢᠯᠵᠤ᠂ ᠤᠷᠲᠤ ᠬᠠᠷᠠ ᠭᠡᠵᠢᠭᠡ(ᠲᠡᠷᠡ ᠦᠶᠡ ᠳ᠋ᠦ᠍ ᠴᠢᠩ ᠦ᠋ᠨ ᠦᠶᠡ ᠶ᠋ᠢᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠦᠰᠦ ᠭᠡᠵᠢᠭᠡ ᠪᠡᠨ ᠠᠪᠳᠠᠭ ᠦᠭᠡᠢ ᠭᠤᠷᠪᠠ ᠪᠠᠷ ᠰᠣᠯᠪᠢᠵᠤ ᠭᠦᠷᠦᠳᠡᠭ ᠡᠷᠡᠭᠲᠡᠢ ᠪᠠᠰᠠ ᠪᠠᠢᠭᠰᠠᠨ) ᠠ᠋ᠴᠠ ᠨᠢ ᠳᠡᠭᠡᠰᠦ ᠵᠠᠯᠭᠠᠵᠤ ᠴᠢᠷᠴᠦ ᠶᠠᠪᠤᠭᠠᠳ ᠨᠢᠭᠤᠷ ᠴᠢᠷᠠᠢ ᠶ᠋ᠢ ᠨᠢ ᠲᠡᠮᠡᠭᠡ ᠰᠠᠮᠨᠠᠳᠠᠭ ᠲᠡᠮᠦᠷ ᠰᠠᠮ ᠢ᠋ᠶ᠋ᠠᠷ ᠲᠠᠨᠢᠭᠳᠠᠬᠤ ᠦᠭᠡᠢ ᠪᠣᠯᠲᠠᠯᠠ ᠰᠠᠮᠨᠠᠪᠠ᠃ ᠨᠢᠷᠤᠭᠤᠨ ᠭᠣᠣᠯ ᠢ᠋ ᠨᠢ ᠵᠢᠳᠠᠯᠠᠭᠠᠳ ᠰᠢᠷᠬᠠᠨ ᠳ᠋ᠤᠨᠢ ᠳᠠᠪᠤᠰᠤ ᠬᠤᠵᠢᠷ ᠲᠦᠷᠬᠢᠵᠦ᠂ ᠲᠤᠢᠯ ᠤ᠋ᠨ ᠬᠠᠷᠠᠰᠠᠯᠲᠠᠢ ᠪᠠᠷ ᠲᠠᠮᠤᠯᠠᠵᠤ ᠠᠯᠠᠵᠠᠢ᠃ ᠨᠣᠬᠠᠢ ᠪᠠᠨ ᠬᠣᠷᠢᠭᠰᠠᠨ ᠦᠭᠡᠢ ᠵᠢᠷ ᠦ᠋ᠨ ᠨᠢᠭᠡᠨ ᠮᠠᠯᠴᠢᠨ ᠢ᠋ ᠢᠩᠭᠢᠵᠦ ᠲᠠᠮᠤᠯᠠᠵᠤ ᠠᠯᠠᠭᠰᠠᠨ ᠨᠢ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠦ᠋ᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠮᠠᠯᠴᠢᠨ ᠲᠦᠮᠡᠨ ᠳ᠋ᠦ᠍ ᠬᠠᠨᠳᠤᠭᠰᠠᠨ ᠨᠡᠢᠲᠡᠯᠢᠭ ᠣᠪᠣᠷ ᠪᠣᠯᠤᠨᠠ᠃ ᠱᠠᠷᠠᠯᠲᠠᠢ ᠶ᠋ᠢᠨ ᠬᠠᠷᠠᠰᠠᠯᠲᠤ ᠤᠴᠢᠷ ᠢ᠋ ᠰᠣᠨᠣᠰᠤᠭᠰᠠᠨ ᠪᠤᠶᠤ ᠬᠡᠭᠦᠷ ᠢ᠋ ᠦᠵᠡᠭᠰᠡᠨ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠬᠢᠯᠢᠩ ᠬᠣᠷᠣᠰᠤᠯ ᠨᠢ ᠳᠡᠭᠳᠡᠵᠦ᠂ ᠱᠠᠷᠠᠯᠲᠠᠢ ᠶ᠋ᠢᠨ ᠥᠰᠢᠶᠡ ᠶ᠋ᠢ ᠯᠠᠪ ᠠᠪᠤᠨᠠ ᠭᠡᠮᠡᠨ ᠲᠠᠩᠭᠠᠷᠢᠭᠯᠠᠵᠤ ᠪᠠᠢᠪᠠ᠃
ᠬᠠᠷᠠᠴᠢᠨ ᠴᠡᠷᠢᠭ ᠦ᠋ᠨ ᠰᠠᠢᠰᠢᠩᠭᠠ ᠶᠢᠩᠵᠠᠩ ᠬᠡᠳᠦᠨ ᠮᠣᠷᠢᠲᠤ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠢ᠋ ᠲᠤᠷᠰᠢᠬᠤ ᠪᠠᠷ ᠶᠠᠪᠤᠵᠠᠢ᠃ ᠥᠨᠳᠥᠷ ᠪᠤᠷᠭᠠᠰᠤ ᠪᠤᠲᠠ ᠤᠷᠭᠤᠭᠰᠠᠨ ᠰᠡᠷᠪᠡᠩ ᠦ᠋ᠳ ᠢ᠋ ᠲᠠᠰᠢᠶᠠᠯᠠᠨ ᠨᠢᠭᠤᠵᠤ ᠲᠤᠷᠰᠢᠭᠤᠯ ᠬᠢᠵᠦ ᠶᠠᠪᠤᠭᠰᠠᠭᠠᠷ ᠪᠠᠢᠲᠠᠯᠠ ᠨᠢᠭᠡ ᠶᠡᠬᠡ ᠲᠠᠪᠠᠭ(ᠰᠠᠭᠤᠷᠢ) ᠪᠤᠷᠭᠠᠰᠤᠨ ᠤ᠋ ᠴᠠᠭᠠᠨᠠ ᠨᠢᠭᠡᠨ ᠮᠣᠷᠢ ᠪᠠᠷᠢᠵᠤ ᠫᠤᠤ ᠲᠠᠢ ᠴᠡᠷᠢᠭ ᠵᠣᠭᠰᠣᠭᠰᠠᠨ ᠨᠢ ᠦᠵᠡᠭᠳᠡᠨᠡ᠃ ᠰᠠᠢᠨ ᠠᠵᠢᠭᠯᠠᠬᠤᠯᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠪᠠᠢᠭᠰᠠᠨ ᠲᠤᠯᠠ᠂ ᠬᠠᠷᠠᠴᠢᠨ ᠤ᠋ ᠬᠣᠶᠠᠷ ᠪᠠᠢᠯᠳᠤᠭᠴᠢ ᠪᠤᠲᠠ ᠰᠢᠪᠠᠭ ᠤ᠋ᠨ ᠳᠤᠮᠳᠠᠭᠤᠷ ᠨᠢᠭᠤᠨ ᠮᠥᠯᠬᠥᠭᠰᠡᠭᠡᠷ ᠲᠡᠷᠡ ᠬᠠᠷᠠᠭᠤᠯ ᠢ᠋ ᠠᠮᠢᠳᠤ ᠪᠠᠷ ᠪᠠᠷᠢᠬᠤ ᠰᠢᠬᠠᠲᠠᠯᠠ ᠰᠠᠨᠠᠮᠰᠠᠷ ᠦᠭᠡᠢ ᠲᠡᠭᠦᠨ ᠳ᠋ᠦ᠍ ᠰᠡᠷᠡᠭᠳᠡᠭᠡᠳ ᠨᠢᠭᠡ ᠪᠠᠢᠯᠳᠤᠭᠴᠢ ᠨᠢ ᠫᠤᠤᠳᠠᠭᠳᠠᠨ ᠠᠯᠠᠭᠳᠠᠪᠠ᠃
ᠲᠡᠷᠡ ᠬᠠᠷᠠᠭᠤᠯ ᠮᠣᠷᠢ ᠪᠠᠨ ᠤᠨᠤᠭᠠᠳ ᠥᠪᠡᠷ ᠦ᠋ᠨ ᠬᠤᠸᠠᠷᠠᠨ ᠵᠦᠭ ᠳᠠᠪᠬᠢᠲᠠᠯᠠ ᠰᠠᠢᠰᠢᠩᠭᠠ ᠶᠢᠩᠵᠠᠩ ᠤ᠋ᠨ ᠳᠠᠭᠠᠯ ᠴᠡᠷᠢᠭ ᠦ᠋ᠨ ᠬᠠᠷᠪᠤᠭᠰᠠᠨ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠵᠤ ᠮᠣᠷᠢ ᠲᠠᠢ ᠪᠠᠨ ᠲᠣᠩᠭᠣᠷᠴᠠᠭᠯᠠᠨ ᠤᠨᠠᠵᠤ ᠦᠬᠦᠯᠡ᠃ ᠡᠨᠡ ᠦᠶᠡ ᠡᠴᠡ ᠡᠬᠢᠯᠡᠨ ᠬᠣᠶᠠᠷ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠦ᠋ᠳ ᠬᠠᠷᠢᠯᠴᠠᠨ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠪᠠᠨ ᠠᠰᠢᠭᠯᠠᠨ ᠭᠠᠯ ᠠᠪᠤᠯᠴᠠᠯᠠ᠃ ᠲᠡᠳᠡ ᠪᠦᠬᠦᠯᠢ ᠡᠳᠦᠷ ᠪᠠᠢᠯᠳᠤᠵᠤ ᠰᠥᠨᠢ ᠪᠣᠯᠬᠤ ᠳ᠋ᠤ᠌ ᠭᠠᠯ ᠵᠣᠭᠰᠣᠪᠠ᠃ ᠰᠢᠨᠠᠯᠠᠮᠠ ᠶ᠋ᠢᠨ ᠳᠠᠭᠠᠭᠤᠯᠤᠭᠰᠠᠨ ᠭᠤᠷᠪᠠᠳᠤᠭᠠᠷ ᠯᠢᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠭᠤᠷᠪᠠᠨ ᠴᠥᠷᠬᠡᠯᠡᠭᠡ ᠲᠡᠮᠡᠭᠡ(ᠪᠠᠷᠤᠭ ᠬᠣᠷᠢᠭᠠᠳ ᠲᠡᠮᠡᠭᠡ) ᠬᠥᠲᠥᠯᠦᠭᠰᠡᠨ ᠲᠠᠪᠢ ᠭᠠᠷᠤᠢ ᠴᠡᠷᠢᠭ ᠲᠡᠢ ᠤᠴᠠᠷᠠᠯᠳᠤᠵᠤ ᠨᠢᠭᠡᠨ ᠦᠶᠡ ᠭᠠᠯ ᠠᠪᠤᠯᠴᠠᠪᠠ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠮᠤᠤᠷ ᠮᠢᠬᠠ ᠵᠠᠭᠤᠭᠰᠠᠨ ᠰᠢᠭ᠋ ᠲᠡᠮᠡᠭᠡᠨ ᠵᠢᠩ ᠢ᠋ᠶ᠋ᠡᠨ ᠦᠬᠦᠨ ᠬᠠᠮᠠᠭᠠᠯᠠᠭᠰᠠᠨ ᠴᠤ᠌ ᠪᠣᠯᠤᠭᠰᠠᠨ ᠦᠭᠡᠢ ᠠᠷᠭᠠ ᠮᠤᠬᠤᠷᠳᠠᠬᠤ ᠳ᠋ᠠᠭᠠᠨ ᠪᠦᠰᠡᠯᠡᠯᠲᠡ ᠶ᠋ᠢᠨ ᠳᠤᠮᠳᠠᠭᠤᠷ ᠳᠤᠲᠠᠭᠠᠨ ᠭᠠᠷᠴᠤ ᠵᠠᠷᠢᠮ ᠨᠢ ᠫᠤᠤ ᠪᠠᠨ ᠡᠷᠭᠦᠨ ᠪᠠᠭᠤᠵᠤ ᠥᠭᠭᠦᠯᠡ᠃ ᠡᠳᠡᠭᠡᠷ ᠲᠡᠮᠡᠭᠡᠨ ᠵᠢᠩ ᠪᠣᠯ ᠦᠦᠰᠢᠨ ᠦ᠌ ᠮᠠᠯᠴᠢᠳ ᠠ᠋ᠴᠠ ᠪᠤᠯᠢᠶᠠᠨ ᠳᠡᠭᠡᠷᠡᠮᠳᠡᠭᠰᠡᠨ ᠡᠳ᠋ ᠬᠣᠭᠰᠢᠯ ᠬᠤᠪᠴᠠᠰᠤ ᠬᠤᠨᠠᠷ ᠪᠣᠯᠤᠨ ᠡᠳᠦᠢ ᠲᠡᠳᠦᠢ ᠳᠠᠷᠢ ᠰᠤᠮᠤ ᠴᠡᠷᠢᠭ ᠦ᠋ᠨ ᠬᠡᠷᠡᠭᠰᠡᠯ ᠦ᠋ᠳ ᠪᠠᠢᠵᠠᠢ᠃ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠡᠳᠡᠭᠡᠷ ᠢ᠋ ᠣᠯᠵᠠᠯᠠᠨ ᠠᠪᠤᠭᠰᠠᠨ ᠪᠥᠭᠡᠳ ᠦᠷᠭᠦᠯᠵᠢᠯᠡᠨ ᠨᠡᠬᠡᠮᠵᠢᠯᠡᠬᠦ ᠭᠡᠰᠡᠨ ᠳ᠋ᠦ᠍ ᠰᠢᠨᠠᠯᠠᠮᠠ ᠠ᠋ᠴᠠ ᠱᠠᠨᠰᠢ ᠶ᠋ᠢᠨ ᠵᠠᠬᠠ ᠬᠢᠵᠠᠭᠠᠷ ᠲᠤ᠌ ᠣᠷᠣᠴᠢᠬᠠᠭᠰᠠᠨ ᠲᠤᠯᠠ ᠨᠡᠬᠡᠮᠵᠢᠯᠡᠬᠦ ᠬᠡᠷᠡᠭ ᠦᠭᠡᠢ ᠭᠡᠳ ᠴᠡᠷᠢᠭ ᠤᠬᠤᠷᠢᠵᠤ ᠪᠤᠴᠠᠯᠠ᠃ ᠰᠢᠨᠠᠯᠠᠮᠠ ᠴᠡᠷᠢᠭ ᠢ᠋ᠶ᠋ᠡᠨ ᠦᠦᠰᠢᠨ ᠡᠴᠡ ᠭᠠᠳᠠᠨᠠ ᠪᠤᠰᠤᠳ ᠤ᠋ᠨ ᠬᠠᠷᠢᠶᠠᠲᠤ ᠭᠠᠵᠠᠷ ᠲᠤ ᠪᠠᠢᠯᠳᠤᠭᠠᠨ ᠬᠢᠯᠭᠡᠳᠡᠭ ᠦᠭᠡᠢ ᠪᠠᠢᠵᠠᠢ᠃①
— — — —
①
ᠲᠤᠰ ᠠᠭᠤᠯᠭᠠ ᠶ᠋ᠢ1961 ᠣᠨ ᠳ᠋ᠤ᠌
ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠳᠥᠭᠥᠮ ᠦ᠋ᠨ ᠪᠤᠩᠬᠤᠤᠠ ᠠ᠋ᠴᠠ ᠰᠣᠨᠣᠰᠴᠤ
ᠡᠮᠬᠢᠳᠬᠡᠪᠡ᠃
8. ᠲᠣᠭᠣᠨᠣᠲᠤ ᠶ᠋ᠢᠨ ᠰᠢᠯᠢ ᠶ᠋ᠢᠨ ᠬᠣᠶᠠᠳᠠᠬᠢ ᠤᠳᠠᠭᠠᠨ ᠤ᠋ ᠪᠠᠢᠯᠳᠤᠭᠠᠨ
1928 ᠣᠨ ᠤ᠋ ᠬᠠᠪᠤᠷ ᠤ᠋ᠨ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠨᠢᠭᠡ ᠡᠳᠦᠷ᠂ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ700 ᠭᠠᠷᠤᠢ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠ ᠨᠢ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠮᠠᠰᠠᠩ ᠬᠦᠷᠢᠶᠡ᠂ ᠳᠠᠷᠠᠰᠤ ᠵᠡᠷᠭᠡ ᠭᠠᠵᠠᠷ(ᠥᠨᠥ ᠱᠠᠨᠰᠢ ᠶ᠋ᠢᠨ ᠢᠦᠢ ᠯᠢᠨ ᠦ᠌ ᠢᠦᠢ ᠶᠠᠩ ᠲᠣᠭᠣᠷᠢᠭ ᠤ᠋ᠨ ᠮᠠᠩᠬᠠ ᠲᠣᠰᠬᠣᠨ) ᠢ᠋ᠶ᠋ᠠᠷ ᠭᠡᠨᠡᠳᠡᠭᠦᠯᠦᠨ ᠣᠷᠣᠭᠠᠳ ᠪᠠᠶᠠᠨ᠌ᠤ᠋ᠪᠤᠭᠠ ᠲᠣᠭᠣᠨᠣᠲᠤ ᠶ᠋ᠢᠨ ᠵᠦᠭ ᠳᠣᠪᠲᠣᠯᠪᠠ᠃
ᠰᠢᠨᠡᠯᠡᠮᠡ᠂ ᠪᠠᠪᠠ ᠯᠢᠶᠡᠨᠵᠠᠩ ᠤ᠋ᠨ ᠨᠢᠭᠡᠳᠦᠭᠡᠷ ᠯᠢᠶᠠᠨ ᠤ᠋40 ᠭᠠᠷᠤᠢ ᠮᠣᠷᠢᠲᠤ ᠴᠡᠷᠢᠭ ᠢ᠋ ᠳᠠᠭᠠᠭᠤᠯᠤᠨ ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ ᠡᠴᠡ ᠪᠠᠷᠠᠭᠤᠨᠰᠢᠯᠠᠵᠤ ᠪᠠᠶᠠᠨ᠌ᠤ᠋ᠪᠤᠭᠠ ᠣᠷᠴᠢᠮ ᠢ᠋ᠶ᠋ᠠᠷ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠵᠢᠭᠦᠷ ᠦ᠋ᠨ ᠠᠩᠭᠢ ᠲᠠᠢ ᠲᠤᠯᠤᠯᠳᠤᠵᠤ ᠬᠣᠶᠠᠷ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠭᠠᠯ ᠠᠪᠤᠯᠴᠠᠭᠰᠠᠨ ᠪᠠᠢᠨᠠ᠃
ᠡᠨᠡ ᠤᠳᠠᠭᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠡᠨᠡ ᠬᠦ᠌ ᠵᠢᠭᠦᠷ ᠦ᠋ᠨ ᠬᠣᠰᠢᠭᠤᠴᠢ ᠴᠡᠷᠢᠭ ᠦ᠋ᠳ ᠨᠢ ᠬᠠᠷᠪᠤᠵᠤ ᠭᠠᠯᠯᠠᠬᠤ ᠳ᠋ᠠᠭᠠᠨ ᠣᠨᠣᠪᠴᠢᠲᠠᠢ᠂ ᠫᠤᠤ ᠶ᠋ᠢᠨ ᠲᠤᠰᠤᠯᠲᠠ ᠨᠢ ᠬᠣᠯᠠ᠂ ᠬᠤᠷᠴᠠ ᠵᠡᠪᠰᠡᠭ ᠲᠡᠢ ᠮᠥᠷᠲᠡᠭᠡᠨ ᠦᠬᠦᠬᠦ ᠡᠴᠡ ᠠᠶᠤᠬᠤ ᠦᠭᠡᠢ ᠠᠮᠢ ᠴᠦᠯᠡᠭᠴᠢᠳ ᠪᠠᠢᠭᠰᠠᠨ ᠲᠤᠯᠠ ᠮᠣᠩᠭᠣᠯ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ ᠳ᠋ᠤ᠌ ᠬᠡᠳᠦ ᠤᠳᠠᠭᠠ ᠤᠴᠠᠷᠠᠭᠰᠠᠨ ᠴᠤ᠌ ᠤᠷᠤᠭᠰᠢᠯᠠᠬᠤ ᠠ᠋ᠴᠠ ᠪᠢᠰᠢ ᠤᠬᠤᠷᠢᠬᠤ ᠦᠭᠡᠢ ᠪᠠᠢᠯᠠ᠃
ᠡᠨᠡ ᠪᠠᠢᠳᠠᠯ ᠳ᠋ᠤ᠌ ᠴᠢᠭᠯᠡᠭᠦᠯᠵᠦ ᠰᠢᠨᠠᠯᠠᠮᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠲᠥᠭᠡᠷᠢᠭᠳᠡᠭᠦᠯᠵᠦ᠂ ᠪᠠᠢᠯᠳᠤᠬᠤ ᠵᠣᠷᠢᠭ ᠢ᠋ ᠨᠢ ᠰᠤᠯᠠᠷᠠᠭᠤᠯᠬᠤ ᠪᠠ ᠮᠡᠬᠡᠯᠡᠬᠦ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠭᠰᠡᠨ ᠪᠠᠢᠨᠠ᠃ ᠲᠡᠷᠡ ᠨᠢᠭᠡ ᠪᠦᠯᠦᠭ ᠮᠣᠷᠢᠲᠤ ᠴᠡᠷᠢᠭ ᠢ᠋ᠶ᠋ᠡᠨ ᠥᠨᠳᠥᠷ ᠳᠠᠯᠠᠩ ᠢ᠋ᠶ᠋ᠠᠷ ᠲᠠᠰᠤᠷᠠᠯᠲᠠ ᠦᠭᠡᠢ ᠳᠥᠭᠥᠮ ᠬᠣᠲᠣᠭᠣᠷ ᠲᠤ᠌ ᠣᠷᠣᠭᠤᠯᠤᠭᠠᠳ ᠥᠭᠡᠷᠡ ᠵᠠᠮ ᠢ᠋ᠶ᠋ᠠᠷ ᠪᠤᠴᠠᠭᠤᠯᠵᠤ᠂ ᠳᠠᠬᠢᠨ ᠶᠠᠪᠤᠭᠰᠠᠨ ᠵᠠᠮ ᠢ᠋ᠶ᠋ᠠᠷ ᠨᠢ ᠥᠨᠳᠥᠷ ᠳᠠᠯᠠᠩ ᠢ᠋ᠶ᠋ᠠᠷ ᠴᠤᠪᠤᠷᠠᠭᠤᠯᠤᠨ ᠥᠩᠭᠡᠷᠡᠭᠡᠪᠡ᠂ ᠡᠨᠡ ᠮᠡᠲᠦ ᠪᠡᠷ(ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ) ᠵᠠᠯᠭᠠᠭᠠ ᠵᠠᠯᠭᠠᠭᠠ ᠪᠠᠷ ᠢᠷᠡᠵᠦ ᠪᠠᠢᠭᠠ ᠰᠢᠭ᠋ ᠲᠡᠳᠡᠨ ᠢ᠋ ᠲᠥᠭᠡᠷᠢᠭᠳᠡᠭᠦᠯᠪᠡ᠃
ᠲᠡᠭᠡᠭᠡᠳ ᠨᠢᠭᠡ ᠪᠦᠯᠦᠭ ᠰᠠᠢᠨ ᠮᠣᠷᠢᠲᠠᠢ ᠬᠤᠷᠴᠠ ᠵᠡᠪᠰᠡᠭ ᠲᠡᠢ ᠴᠡᠷᠢᠭ ᠨᠢ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠵᠡᠭᠦᠨ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠨᠢ ᠭᠠᠯᠯᠠᠵᠤ᠂ ᠵᠠᠷᠢᠮ ᠳ᠋ᠠᠭᠠᠨ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠨ ᠵᠢᠭᠰᠠᠭᠠᠯ ᠤ᠋ᠨ ᠰᠡᠭᠦᠯ ᠡᠴᠡ ᠭᠠᠯᠯᠠᠵᠤ ᠥᠳᠥᠭᠡᠪᠡ᠃ ᠵᠠᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠰᠡᠭᠦᠯᠴᠢ ᠶ᠋ᠢᠨ ᠪᠦᠯᠦᠭ ᠨᠢ ᠬᠤᠷᠴᠠ ᠴᠡᠷᠢᠭ ᠪᠢᠰᠢ ᠪᠣᠯᠬᠣᠷ ᠫᠤᠤ ᠳᠤᠤᠭᠠᠷᠪᠠᠯ ᠠᠶᠤᠴᠢᠬᠠᠳᠠᠭ᠂ ᠮᠣᠷᠢᠲᠤ ᠴᠡᠷᠢᠭ ᠢ᠋ ᠦᠵᠡᠪᠡᠯ ᠳᠤᠲᠠᠭᠠᠭᠠᠳ ᠵᠢᠭᠠᠬᠠᠨ ᠴᠤ᠌ ᠡᠰᠡᠷᠭᠦᠴᠡᠬᠦ ᠴᠢᠳᠠᠯ ᠦᠭᠡᠢ ᠪᠠᠭᠠᠷᠠᠩ ᠤ᠋ᠳ ᠪᠠᠢᠯᠠ᠃
ᠪᠠᠰᠠ ᠨᠢᠭᠡ ᠪᠦᠯᠦᠭ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠴᠡᠷᠢᠭ ᠨᠢ ᠲᠣᠭᠣᠨᠣᠲᠤ ᠶ᠋ᠢᠨ ᠥᠨᠳᠥᠷ ᠳᠠᠯᠠᠩ ᠢ᠋ ᠠᠰᠢᠭᠯᠠᠨ ᠠᠰ ᠬᠣᠢᠨᠠ ᠠ᠋ᠴᠠ ᠨᠢ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ ᠬᠢᠵᠦ ᠵᠢᠭᠦᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠤᠮᠠᠷᠠᠰᠢ ᠤᠷᠤᠭᠰᠢᠯᠠᠬᠤ ᠶ᠋ᠢ ᠬᠣᠷᠢᠭᠯᠠᠪᠠ᠃
ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠨᠢ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠲᠠᠰᠤᠷᠠᠯᠲᠠ ᠦᠭᠡᠢ ᠣᠷᠣᠢ ᠳᠠᠯᠠᠩ ᠢ᠋ᠶ᠋ᠠᠷ ᠦᠷᠭᠦᠯᠵᠢᠯᠡᠨ ᠴᠡᠷᠢᠭ ᠨᠥᠬᠥᠪᠥᠷᠢᠯᠡᠵᠦ᠂ ᠠᠩᠬᠠᠨ ᠳ᠋ᠠᠭᠠᠨ ᠬᠣᠷᠢᠭᠯᠠᠯᠲᠠ ᠬᠢᠵᠦ ᠪᠠᠢᠭᠰᠠᠨ ᠪᠣᠯ ᠥᠨᠥ ᠳᠥᠷᠪᠡᠨ ᠲᠠᠯᠠ ᠠ᠋ᠴᠠ ᠪᠢᠳᠡᠨ ᠦ᠌ ᠵᠢᠭᠰᠠᠭᠠᠯ ᠢ᠋ ᠡᠪᠳᠡᠵᠦ ᠰᠢᠷᠦᠭᠦᠨ ᠳᠠᠭᠠᠷᠢᠯᠲᠠ ᠬᠢᠬᠦ ᠪᠣᠯᠴᠢᠬᠠᠯᠠ ᠭᠡᠮᠡᠨ ᠡᠨᠳᠡᠭᠦᠷᠡᠭᠡᠳ ᠢᠷᠡᠭᠰᠡᠨ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠬᠤᠷᠢᠨ ᠳᠤᠲᠠᠭᠠᠯᠠ᠃
ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠡᠷᠳᠡᠨᠢ ᠭᠡᠨᠳᠦᠨᠯᠢᠭ᠌ᠰᠣᠭ ᠶᠢᠩᠵᠠᠩ ᠨᠠᠷ ᠬᠤᠷᠴᠠ ᠴᠡᠷᠢᠭ ᠢ᠋ᠶ᠋ᠡᠷ ᠨᠡᠬᠡᠮᠵᠢᠯᠡᠨ ᠪᠠᠶᠠᠨ ᠳᠥᠭᠥᠮ ᠭᠡᠳᠡᠭ ᠭᠠᠵᠠᠷ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠬᠡᠳᠦᠨ ᠲᠠᠰᠤᠭ ᠴᠡᠷᠢᠭ ᠢ᠋ ᠤᠰᠠᠳᠬᠠᠯᠠ᠃ ᠢᠩᠭᠢᠭᠡᠳ ᠥᠨᠥ ᠶ᠋ᠢᠨ ᠪᠠᠶᠠᠨ ᠳᠥᠭᠥᠮ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠳᠠᠢᠰᠤᠨ ᠤ᠋ ᠦᠬᠦᠳᠡᠯ ᠢ᠋ᠶ᠋ᠡᠷ ᠳᠦᠭᠦᠷᠴᠡᠢ᠃
ᠰᠢᠨᠡᠯᠡᠮᠡ ᠴᠥᠭᠡᠬᠡᠨ ᠢ᠋ᠶ᠋ᠡᠷ ᠣᠯᠠᠨ ᠢ᠋ ᠢᠯᠠᠭᠠᠳ ᠮᠣᠩᠭᠣᠯᠴᠤᠳ ᠤ᠋ᠨ ᠡᠷᠲᠡ ᠳᠡᠭᠡᠳᠦᠰ ᠡᠴᠡ ᠪᠡᠨ ᠲᠣᠭᠰᠢᠭᠤᠯᠵᠤ ᠳᠠᠬᠢᠵᠤ ᠢᠷᠡᠭᠰᠡᠨ ᠲᠣᠭᠣᠨᠣᠲᠤ ᠶ᠋ᠢᠨ ᠰᠢᠯᠢ ᠶ᠋ᠢᠨ ᠬᠠᠮᠤᠭ ᠥᠨᠳᠥᠷ《ᠰᠦᠯᠳᠡ ᠶ᠋ᠢᠨ ᠣᠷᠣᠢ》 ᠳ᠋ᠤ᠌ ᠴᠡᠷᠢᠭ ᠢ᠋ᠶ᠋ᠡᠨ ᠪᠦᠷᠢᠳᠬᠡᠵᠦ ᠪᠠᠢᠯᠳᠤᠭᠠᠨ ᠤ᠋ ᠢᠯᠠᠯᠲᠠ ᠪᠠᠨ ᠪᠡᠯᠭᠡᠯᠡᠵᠡᠢ᠃①
— — — —
① ᠲᠤᠰ ᠠᠭᠤᠯᠭᠠ ᠶ᠋ᠢ1961 ᠣᠨ ᠳ᠋ᠤ᠌ ᠲᠣᠭᠣᠨᠣᠲᠤ ᠳ᠋ᠤ᠌ ᠨᠤᠲᠤᠭ ᠲᠠᠢ ᠲᠣᠪᠴᠢ ᠶ᠋ᠢᠨ ᠪᠠᠪᠠ ᠨᠠᠰᠤᠲᠠᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠲᠡᠮᠳᠡᠭᠯᠡᠪᠡ᠃
9. ᠪᠤᠮᠪᠠ ᠪᠤᠯᠠᠭ ᠤ᠋ᠨ ᠪᠠᠢᠯᠳᠤᠭᠠᠨ
ᠣᠳᠣ ᠶ᠋ᠢᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠵᠡᠭᠦᠨ ᠡᠮᠦᠨᠡ ᠬᠥᠪᠡᠭᠡ ᠨᠢ ᠱᠠᠨᠰᠢ ᠶ᠋ᠢᠨ ᠢᠦᠢ ᠯᠢᠨ ᠬᠣᠲᠠ ᠶ᠋ᠢᠨ ᠮᠠᠰᠠᠩ ᠬᠦᠷᠢᠶᠡ ᠲᠣᠰᠬᠣᠨ ᠲᠠᠢ ᠵᠠᠭᠠᠭᠯᠠᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠡᠷᠢᠶᠡᠨ ᠪᠠᠯᠠᠷ ᠲᠠᠢ ᠪᠤᠷᠭᠠᠰᠤ᠂ ᠴᠢᠴᠠᠷᠭᠠᠨᠠ᠂ ᠶᠠᠰᠢᠯ ᠤ᠋ᠨ ᠣᠢ ᠢᠭᠴᠢ ᠰᠠᠬᠤᠯᠠᠭ ᠪᠠᠭᠰᠢᠷᠠᠨ ᠤᠷᠭᠤᠵᠤ᠂ ᠪᠤᠯᠠᠭ ᠭᠣᠷᠣᠬᠠ ᠬᠤᠷᠴᠢᠭᠢᠨᠠᠨ ᠤᠷᠤᠰᠴᠤ ᠴᠢᠳᠥᠷ ᠲᠡᠢ ᠮᠣᠷᠢ ᠪᠠᠨ ᠲᠠᠯᠪᠢᠴᠢᠬᠠᠭᠠᠳ ᠪᠠᠭᠠ ᠯᠠ ᠤᠳᠠᠴᠢᠬᠠᠪᠠᠯ ᠴᠢᠮᠡᠭᠡ ᠨᠢ ᠰᠣᠨᠣᠰᠳᠠᠬᠤ ᠠ᠋ᠴᠠ ᠪᠢᠰᠢ ᠮᠣᠷᠢ ᠨᠢ ᠦᠵᠡᠭᠳᠡᠬᠦ ᠥᠬᠡᠢ ᠪᠣᠯᠴᠢᠬᠠᠳᠠᠭ ᠪᠠᠯᠠᠷ ᠡᠷᠲᠡᠨ ᠦ᠌ ᠪᠠᠢᠭᠠᠯᠢᠯᠢᠭ ᠰᠠᠢᠬᠠᠨ ᠭᠠᠵᠠᠷ ᠪᠠᠢᠭᠰᠠᠨ ᠭᠡᠨᠡ᠃ ᠡᠨᠡ ᠰᠠᠢᠬᠠᠨ ᠨᠤᠲᠤᠭ ᠤᠰᠤ ᠪᠠᠨ ᠡᠨᠳᠡᠬᠢ ᠮᠣᠩᠭᠣᠯᠴᠤᠳ ᠪᠤᠮᠪᠠ ᠪᠤᠯᠠᠭ ᠭᠡᠵᠦ ᠨᠡᠷᠡᠢᠳᠦᠭᠡᠳ ᠣᠨ ᠤᠳᠠᠴᠢᠬᠠᠭᠰᠠᠨ ᠪᠣᠯᠤᠯᠲᠠᠢ᠃
1928 ᠣᠨ ᠤ᠋ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠤ᠋ ᠡᠳᠦᠷ ᠦᠦᠰᠢᠨ ᠨᠣᠶᠠᠨ ᠤ᠋ ᠨᠢᠭᠡ ᠯᠢᠶᠠᠨ ᠴᠡᠷᠢᠭ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ300 ᠭᠠᠷᠤᠢ ᠮᠣᠷᠢᠲᠤ ᠴᠡᠷᠢᠭ ᠢ᠋ ᠳᠠᠭᠠᠭᠤᠯᠤᠨ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠬᠤᠵᠢᠷ ᠳᠠᠪᠤᠰᠤᠨ ᠤ᠋ ᠪᠠᠷᠠᠭᠤᠨ ᠶᠡᠬᠡ ᠵᠠᠮ ᠢ᠋ ᠳᠠᠭᠠᠨ ᠤᠮᠠᠷᠠᠰᠢᠯᠠᠵᠤ᠂ ᠨᠥᠭᠦᠭᠡ ᠬᠡᠳᠦᠨ ᠪᠦᠯᠦᠭ ᠦ᠋ᠨ1000 ᠰᠢᠬᠠᠮ ᠮᠣᠷᠢᠲᠤ ᠶᠠᠪᠠᠭᠠᠨ ᠴᠡᠷᠢᠭ ᠨᠢ ᠵᠡᠭᠦᠨ ᠵᠠᠮ ᠢ᠋ᠶ᠋ᠠᠷ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ᠂ ᠤᠯᠠᠭᠠᠨᠲᠤᠯᠤᠭᠠᠢ᠂ ᠬᠤᠸᠠᠲᠤᠯᠤᠭᠠᠢ ᠪᠠᠷ ᠤᠮᠠᠷᠠᠰᠢ ᠬᠥᠨᠳᠡᠯᠡᠨ ᠵᠢᠭᠰᠠᠭᠠᠯ ᠤ᠋ᠨ ᠬᠡᠯᠪᠡᠷᠢ ᠪᠡᠷ ᠱᠦᠭᠦᠷᠳᠡᠯᠲᠡ ᠬᠢᠵᠦ ᠤᠷᠤᠭᠰᠢᠯᠠᠵᠠᠢ᠃
ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠨᠤᠲᠤᠭ ᠳᠡᠪᠢᠰᠬᠡᠷ ᠢ᠋ᠶ᠋ᠡᠷ ᠠᠭᠤᠳᠠᠮ ᠪᠣᠯᠪᠠᠴᠤ᠂ ᠬᠥᠮᠦᠨ ᠠᠮᠠ ᠴᠥᠭᠡᠬᠡᠨ ᠮᠥᠷᠲᠡᠭᠡᠨ ᠲᠠᠷᠠᠬᠠᠢ ᠪᠤᠲᠠᠷᠬᠠᠢ ᠰᠠᠭᠤᠷᠢᠰᠢᠭᠰᠠᠨ ᠮᠠᠯᠴᠢᠳ ᠪᠠᠯᠠᠷ ᠡᠯᠡᠰᠦᠨ ᠳ᠋ᠦ᠍ ᠬᠣᠶᠠᠷᠬᠠᠨ ᠫᠤᠤ ᠲᠠᠢ ᠴᠡᠷᠢᠭ ᠦᠵᠡᠭᠰᠡᠭᠡᠷ ᠠᠶᠤᠵᠤ ᠰᠣᠴᠢᠳᠠᠭ ᠪᠠᠢᠭᠰᠠᠨ ᠪᠣᠯ ᠥᠨᠥᠳᠥᠷ2000 ᠰᠢᠬᠠᠮ ᠮᠣᠷᠢᠲᠤ ᠶᠠᠪᠠᠭᠠᠨ ᠴᠡᠷᠢᠭ ᠦ᠋ᠨ ᠲᠦᠷᠢᠮᠡᠬᠡᠢᠯᠡᠯ ᠳ᠋ᠦ᠍ ᠤᠴᠠᠷᠠᠬᠤ ᠨᠢ ᠲᠤᠩ ᠠᠶᠤᠯ ᠲᠦᠭᠰᠢᠭᠦᠷᠢᠲᠦ ᠶᠠᠪᠤᠳᠠᠯ ᠪᠠᠢᠯᠠ᠃
ᠡᠨᠡ ᠬᠦ᠌ ᠪᠠᠴᠢᠮ ᠲᠦᠭᠰᠢᠭᠦᠷᠢᠲᠡᠢ ᠴᠠᠭ ᠮᠥᠴᠡ ᠳ᠋ᠦ᠍ ᠭᠤᠷᠪᠠᠳᠤᠭᠠᠷ ᠯᠢᠶᠠᠨ ᠤ᠋ ᠯᠢᠶᠨᠨᠵᠠᠩ ᠠᠷᠪᠢᠨᠪᠠᠶᠠᠷ ᠬᠣᠶᠠᠷ ᠲᠠᠰᠤᠭ ᠮᠣᠷᠢᠲᠤ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠪᠠᠷᠠᠭᠤᠨ ᠵᠠᠮ ᠢ᠋ᠶ᠋ᠠᠷ ᠡᠮᠦᠨᠡᠰᠢᠯᠡᠵᠦ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠥᠨᠳᠡᠯᠡᠨ ᠵᠢᠭᠰᠠᠭᠠᠯ ᠤ᠋ᠨ ᠪᠠᠷᠠᠭᠤᠨ ᠦᠵᠦᠭᠦᠷ ᠳᠠᠷᠤᠢ ᠪᠤᠮᠪᠠ ᠪᠤᠯᠠᠭ ᠢ᠋ ᠴᠢᠭᠯᠡᠵᠦ ᠡᠰᠡᠷᠭᠦ ᠳᠠᠭᠠᠷᠢᠯᠲᠠ ᠬᠢᠬᠦ ᠪᠡᠷ ᠮᠣᠷᠳᠠᠯᠠ᠃ ᠲᠡᠳᠡ ᠪᠤᠮᠪᠠ ᠪᠤᠯᠠᠭ ᠤ᠋ᠨ ᠲᠣᠮᠣ ᠪᠤᠷᠭᠠᠰᠤᠨ ᠣᠢ ᠳ᠋ᠤ᠌ ᠪᠡᠶᠡ ᠳᠠᠯᠳᠠᠯᠠᠵᠤ ᠡᠰᠡᠷᠭᠦᠦ ᠡᠲᠡᠭᠡᠳ ᠦᠨ ᠢᠶᠡᠨ ᠪᠠᠢᠳᠠᠯ ᠢ᠋ ᠲᠡᠩᠨᠡᠵᠦ᠂ ᠦᠦᠰᠢᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠪᠤᠮᠪᠠ ᠪᠤᠯᠠᠭ ᠤ᠋ᠨ ᠪᠤᠷᠭᠠᠰᠤᠨ ᠰᠢᠭᠤᠢ ᠶ᠋ᠢᠨ ᠵᠡᠭᠦᠨ ᠡᠮᠦᠨᠡ ᠬᠥᠪᠡᠭᠡ ᠳ᠋ᠦ᠍ ᠪᠠᠢᠭᠠ ᠥᠯᠵᠡᠢᠪᠠᠶᠠᠷ ᠤ᠋ᠨ ᠳ᠋ᠤ᠌ ᠪᠠᠭᠤᠳᠠᠯᠯᠠᠵᠤ᠂ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠨᠢ ᠥᠯᠵᠡᠢᠪᠠᠶᠠᠷ ᠤ᠋ᠨ ᠡᠮᠦᠨᠡ ᠴᠠᠢᠳᠠᠮ ᠳ᠋ᠤ᠌ ᠪᠠᠭᠤᠳᠠᠯᠯᠠᠭᠰᠠᠨ ᠢ᠋ ᠠᠩᠬᠠ ᠠᠯᠬᠤᠮ ᠣᠢᠯᠠᠭᠠᠵᠠᠢ᠃ ᠢᠩᠭᠢᠭᠡᠳ ᠠᠷᠪᠢᠨᠪᠠᠶᠠᠷ ᠤ᠋ᠨ ᠴᠡᠷᠢᠭ ᠨᠠᠷᠠ ᠲᠠᠢ ᠭᠡᠭᠡ ᠲᠡᠢ ᠪᠠᠢᠬᠤ ᠳ᠋ᠤ᠌ ᠡᠷᠲᠡᠬᠡᠨ ᠪᠠᠢᠯᠳᠤᠵᠤ ᠢᠯᠡᠭᠦᠦ ᠬᠡᠳᠦᠨ ᠬᠥᠮᠦᠨ ᠢ᠋ ᠤᠰᠠᠳᠬᠠᠬᠤ ᠪᠠᠷ ᠰᠠᠨᠳᠤᠷᠴᠠᠭᠠᠨᠠ᠃ ᠭᠡᠪᠡᠴᠦ ᠯᠢᠶᠡᠨᠵᠠᠩ ᠠ᠋ᠴᠠ ᠵᠠᠷᠯᠢᠭ ᠦᠭᠡᠢ ᠲᠤᠯᠠ ᠵᠥᠪᠬᠡᠨ ᠰᠠᠨᠳᠤᠷᠬᠤ ᠠ᠋ᠴᠠ ᠥᠭᠡᠷᠡ ᠠᠷᠭᠠ ᠦᠭᠡᠢ ᠪᠠᠢᠯᠠ᠃
ᠪᠤᠮᠪᠠ ᠪᠤᠯᠠᠭ ᠤ᠋ᠨ ᠪᠤᠷᠭᠠᠰᠤᠨ ᠣᠢ ᠪᠣᠯ ᠲᠦᠮᠡᠨ ᠴᠡᠷᠢᠭ ᠰᠢᠷᠭᠤᠭᠰᠠᠨ ᠴᠤ᠌ ᠦᠵᠡᠭᠳᠡᠬᠦ ᠦᠭᠡᠢ ᠨᠢᠭᠤᠵᠤ ᠳᠠᠯᠳᠠᠯᠠᠵᠤ ᠪᠣᠯᠬᠤ ᠠᠰᠢᠭᠲᠠᠢ ᠰᠠᠢᠬᠠᠨ ᠭᠠᠵᠠᠷ ᠪᠠᠢᠯᠠ᠃ ᠭᠤᠷᠪᠠᠳᠤᠭᠠᠷ ᠯᠢᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠥᠯᠵᠡᠢᠪᠠᠶᠠᠷ ᠤ᠋ᠨ ᠪᠠᠷᠠᠭᠤᠨ ᠪᠤᠷᠭᠠᠰᠤᠨ ᠳᠤᠮᠳᠠᠭᠤᠷ ᠡᠰᠡᠷᠭᠦᠦ ᠡᠲᠡᠭᠡᠳ ᠢ᠋ᠶ᠋ᠡᠨ ᠰᠡᠮᠡᠷᠬᠡᠨ ᠢ᠋ᠶ᠋ᠡᠷ ᠭᠡᠲᠡᠬᠦ ᠶ᠋ᠢᠨ ᠳᠠᠭᠠᠤ ᠤᠷᠤᠭᠰᠢᠯᠠᠨ ᠣᠢᠷᠠᠳᠴᠤ ᠪᠠᠢᠯᠠ᠃
ᠶᠠᠭ ᠡᠨᠡ ᠪᠠᠴᠢᠮ ᠦᠶᠡ ᠳ᠋ᠦ᠍ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠶᠠᠪᠠᠭᠠᠨ ᠫᠤᠤ ᠪᠠᠨ ᠮᠥᠷᠥᠯᠡᠵᠦ ᠭᠤᠷᠪᠠᠳᠤᠭᠠᠷ ᠯᠢᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠡᠮᠦᠨᠡ ᠡᠴᠡ ᠪᠤᠷᠭᠠᠰᠤᠨ ᠳᠤᠮᠳᠠᠭᠤᠷ ᠬᠣᠶᠠᠷ ᠮᠥᠷ ᠢ᠋ᠶ᠋ᠡᠷ ᠤᠷᠤᠭᠰᠢᠯᠠᠵᠤ ᠪᠠᠢᠯᠠ᠁ ᠲᠡᠳᠡ ᠰᠠᠨᠳᠤᠷᠴᠤ᠂ ᠮᠠᠨᠤᠰ ᠢ᠋ ᠨᠢᠭᠡᠨᠲᠡ ᠦᠵᠡᠴᠢᠬᠡᠭᠰᠡᠨ ᠪᠠᠢᠯᠲᠠᠢ! ᠪᠢᠳᠡᠨ ᠲᠡᠢ ᠪᠠᠢᠯᠳᠤᠬᠤ ᠪᠠᠷ ᠢᠷᠡᠯᠡ ᠪᠠ? ᠭᠡᠮᠡᠨ ᠲᠠᠭᠠᠮᠠᠭᠯᠠᠵᠠᠭᠠᠨᠠ᠃ ᠢᠯᠠᠯᠲᠠ ᠲᠠᠢ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠨᠣᠶᠠᠨ ᠤ᠋ ᠴᠡᠷᠢᠭ ᠬᠡᠳᠦᠢ ᠣᠢᠷᠠᠳᠬᠤ ᠳᠣᠳᠣᠮ ᠲᠡᠳᠦᠢ ᠰᠠᠢᠨ᠂ ᠥᠨᠥᠳᠥᠷ ᠲᠡᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠫᠤᠤ ᠶ᠋ᠢᠨ ᠪᠥᠭᠯᠡᠭᠡ ᠪᠣᠯᠬᠤ ᠶᠤᠮ ᠪᠠᠢᠨᠠ ᠭᠡᠵᠦ ᠪᠤᠷᠭᠠᠰᠤᠨ ᠳᠣᠲᠣᠷᠠ ᠠ᠋ᠴᠠ ᠫᠤᠤ ᠪᠠᠨ ᠣᠨᠢᠯᠠᠨ ᠪᠠᠢᠯᠳᠤᠭᠠᠨ ᠤ᠋ ᠪᠡᠯᠡᠳᠬᠡᠯ ᠳ᠋ᠦ᠍ ᠣᠷᠣᠭᠠᠳ ᠪᠠᠢᠪᠠ᠃ ᠲᠡᠳᠡ ᠳᠠᠬᠢᠭᠠᠳ ᠰᠠᠢᠨ ᠠᠵᠢᠭᠯᠠᠪᠠᠯ ᠵᠢᠭᠰᠠᠭᠠᠯ ᠤ᠋ᠨ ᠬᠠᠵᠠᠭᠤ ᠳ᠋ᠤ᠌ ᠨᠢᠭᠡ ᠮᠠᠷᠠᠯ ᠬᠦᠷᠡᠩ ᠤᠯᠠᠭᠠᠨ ᠶᠠᠭᠤᠮᠠ ᠠᠢᠰᠤᠢ᠃ ᠬᠡᠳᠦᠨ ᠴᠡᠷᠢᠭ ᠳᠤᠮᠳᠠ ᠪᠠᠨ ᠨᠢᠭᠡ ᠭᠣᠵᠢᠭᠢᠷ ᠶᠠᠭᠤᠮᠠ ᠳᠠᠮᠨᠠᠨ ᠶᠠᠪᠤᠨᠠ᠃ ᠲᠡᠳᠡ ᠪᠠᠢᠯᠳᠤᠬᠤ ᠮᠠᠶᠢᠭ ᠥᠬᠡᠢ ᠯᠠᠪ ᠯᠠᠪᠳᠠᠭᠤᠨ ᠫᠤᠤ ᠪᠠᠨ ᠮᠥᠷᠥᠯᠡᠨ ᠠᠯᠬᠤᠵᠤ ᠪᠠᠢᠬᠤ ᠪᠠᠷ ᠦᠵᠡᠪᠡᠯ ᠨᠢᠭᠡ ᠨᠢ ᠦᠬᠦᠴᠢᠬᠡᠭᠡᠳ ᠬᠡᠭᠦᠷ ᠢ᠋ ᠨᠢ ᠳᠠᠮᠨᠠᠵᠤ ᠶᠠᠪᠤᠭᠠ ᠴᠤ᠌ ᠶᠤᠮ ᠤᠤ? ᠭᠡᠵᠦ ᠪᠣᠳᠣᠭᠳᠠᠭᠤᠯᠤᠨᠠ᠃ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠲᠥᠪᠳᠡᠨᠪᠠᠯᠪᠤᠷ ᠠᠷᠪᠢᠨᠪᠠᠶᠠᠷ ᠯᠢᠶᠡᠨᠵᠠᠩ ᠤ᠋ᠨ ᠳᠡᠷᠭᠡᠳᠡ ᠰᠡᠮᠡᠷᠬᠡᠨ ᠢᠷᠡᠵᠦ᠄《ᠪᠢ ᠦᠵᠡᠪᠡᠯ ᠬᠠᠷᠢᠭᠤᠯᠭᠠ(ᠪᠠᠯᠢᠩ ᠤ᠋ᠨ ᠨᠡᠷᠡ) ᠬᠠᠶᠠᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠭᠠ ᠰᠢᠭ᠋᠁》 ᠭᠡᠨᠡ᠃ ᠲᠡᠳᠡ ᠬᠣᠶᠠᠭᠤᠯᠠ ᠪᠤᠷᠭᠠᠰᠤᠨ ᠳᠤᠮᠳᠠᠭᠤᠷ ᠮᠥᠯᠬᠥᠵᠦ ᠣᠢᠷᠠᠳᠴᠤ ᠦᠵᠡᠬᠦᠯᠡ᠂ ᠨᠣᠶᠠᠨ ᠤ᠋ ᠴᠡᠷᠢᠭ ᠨᠡᠯᠢᠶᠡᠳ ᠴᠠᠭᠠᠨᠠ ᠮᠥᠷᠯᠡᠨ ᠵᠣᠭᠰᠣᠵᠤ ᠲᠡᠳᠡᠨ ᠦ᠌ ᠨᠠᠭᠠᠲᠠᠢ ᠬᠣᠷᠢᠭᠠᠳ ᠠᠯᠲᠠ ᠭᠠᠵᠠᠷ ᠲᠤ᠌ ᠣᠪᠣᠭᠠᠯᠠᠳᠠᠢ ᠪᠤᠷᠭᠠᠰᠤᠨ ᠲᠦᠯᠡᠭᠡ ᠶ᠋ᠢ ᠰᠢᠲᠠᠭᠠᠵᠤ᠂ ᠬᠠᠵᠠᠭᠤ ᠳ᠋ᠤᠨᠢ ᠬᠣᠶᠠᠷ ᠬᠥᠮᠦᠨ ᠤᠯᠠᠭᠠᠨ ᠥᠩᠭᠡᠲᠦ ᠭᠤᠷᠪᠠᠯᠵᠢᠨ ᠳᠣᠭᠵᠢᠷ ᠢ᠋ ᠲᠣᠮᠣ ᠮᠣᠳᠣᠨ ᠵᠠᠭᠠᠮᠠᠯ ᠳᠡᠪᠰᠡᠭ ᠲᠦ᠍ ᠬᠢᠭᠡᠳ ᠳᠠᠮᠨᠠᠵᠤ ᠵᠣᠭᠰᠣᠨᠠ᠃ ᠳᠣᠭᠵᠢᠷ(ᠴᠢᠩᠭᠦᠧ ᠭᠤᠯᠢᠷ ᠰᠢᠷᠠ ᠲᠣᠰᠣ ᠪᠤᠷᠠᠮ ᠲᠠᠢ ᠬᠣᠯᠢᠵᠤ ᠨᠤᠬᠤᠵᠤ ᠨᠠᠢᠷᠠᠭᠤᠯᠤᠭᠰᠠᠨ ᠭᠤᠷᠪᠠᠯᠵᠢᠨ ᠬᠡᠯᠪᠡᠷᠢᠲᠡᠢ ᠲᠣᠮᠣ ᠪᠠᠯᠢᠩ) ᠤ᠋ᠨ ᠠᠷᠤ ᠳ᠋ᠤ᠌ ᠲᠡᠭᠦᠰᠠᠠᠮᠤᠭᠤᠯᠠᠩ ᠨᠣᠶᠠᠨ ᠢ᠋ ᠳᠠᠭᠠᠵᠤ ᠲᠤᠰᠬᠠᠢᠯᠠᠨ ᠪᠤᠷᠬᠠᠨ ᠳᠠᠬᠢᠵᠤ《ᠰᠢᠪᠳᠠᠩ》 ᠤᠩᠰᠢᠳᠠᠭ ᠦᠦᠰᠢᠨᠵᠦᠦ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠷᠠᠪᠵᠤᠤᠷ ᠯᠠᠮᠠ(ᠬᠣᠵᠢᠮ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠢᠯᠳᠤᠭᠠᠨ ᠤ᠋ ᠳᠠᠷᠠᠭᠠ ᠡᠳᠦᠷ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠠ᠋ᠴᠠ ᠪᠠᠷᠠᠭᠤᠨᠰᠢ ᠶᠠᠪᠤᠵᠤ ᠪᠠᠢᠭᠠᠳ ᠵᠠᠮ ᠳ᠋ᠠᠭᠠᠨ ᠠᠯᠠᠭᠳᠠᠭᠰᠠᠨ ᠠᠷᠪᠠᠨ ᠨᠠᠢ᠍ᠮᠠᠨ ᠬᠥᠮᠦᠨ ᠦ᠌ ᠨᠢᠭᠡ ᠨᠢ) ᠬᠦᠷᠡᠩ ᠴᠠᠮᠴᠠ ᠡᠮᠦᠰᠴᠦ ᠳᠡᠭᠡᠭᠦᠷ ᠢ᠋ᠶ᠋ᠡᠨ ᠤᠯᠠᠭᠠᠨ ᠣᠷᠬᠢᠮᠵᠢ ᠬᠡᠳᠡᠷᠴᠦ ᠲᠣᠯᠣᠭᠠᠢ ᠳ᠋ᠠᠭᠠᠨ ᠭᠣᠵᠢᠭᠢᠷ ᠰᠢᠷᠠ ᠮᠠᠯᠠᠭᠠ ᠵᠡᠭᠦᠵᠦ ᠵᠡᠭᠦᠨ ᠭᠠᠷ ᠲᠠᠭᠠᠨ ᠵᠡᠰ ᠬᠣᠩᠬᠣ ᠪᠠᠷᠢᠨ ᠰᠠᠵᠢᠵᠤ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠷᠠᠮᠪᠠᠷ ᠡᠷᠭᠢᠭᠦᠯᠵᠦ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠽᠣᠷ ᠴᠣᠬᠢᠬᠤ ᠬᠠᠷᠢᠭᠤᠯᠭᠠ ᠶ᠋ᠢᠨ ᠨᠣᠮ(ᠬᠠᠷᠢᠶᠠᠯ ᠤ᠋ᠨ ᠨᠣᠮ) ᠤᠩᠰᠢᠵᠤ ᠵᠣᠭᠰᠣᠨᠠ᠃ ᠲᠣᠮᠣ ᠪᠠᠯᠢᠩ ᠤ᠋ᠨ ᠣᠷᠣᠢ ᠳ᠋ᠤ᠌ ᠴᠠᠭᠠᠰᠤᠨ ᠳᠡᠭᠡᠷᠡ ᠬᠥᠮᠦᠨ ᠦ᠌ ᠭᠠᠪᠠᠯᠠ ᠲᠣᠯᠣᠭᠠᠢ ᠵᠢᠷᠤᠵᠤ ᠨᠠᠷᠢᠬᠠᠨ ᠮᠣᠳᠣᠨ ᠳ᠋ᠤ᠌ ᠬᠠᠳᠬᠤᠵᠤ ᠲᠠᠯᠪᠢᠵᠠᠢ᠃
ᠷᠠᠪᠵᠤᠤᠷ ᠯᠠᠮᠠ ᠶ᠋ᠢᠨ ᠬᠠᠵᠠᠭᠤ ᠳ᠋ᠤ᠌ ᠦᠦᠰᠢᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠫᠠᠢᠵᠠᠩ ᠰᠠᠢᠨ᠌ᠥ᠌ᠯᠵᠡᠢ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠭᠠᠷ ᠫᠤᠤ ᠠᠳᠬᠤᠨ ᠵᠡᠭᠦᠨ ᠪᠠᠷᠠᠭᠤᠨ ᠢ᠋ ᠠᠵᠢᠭᠯᠠᠨ ᠨᠠᠭᠠᠰᠢ ᠴᠠᠭᠠᠰᠢ ᠡᠷᠭᠢᠴᠡᠵᠦ ᠴᠢᠳᠬᠥᠷ ᠢ᠋ ᠣᠯᠵᠤ ᠦᠵᠡᠭᠡᠳ ᠫᠤᠤᠳᠠᠴᠢᠬᠠᠮᠠᠷ ᠯᠠ ᠮᠠᠶᠢᠭ ᠲᠠᠢ ᠣᠪᠯᠠᠨᠠ᠃ ᠨᠣᠮ ᠤᠩᠰᠢᠭᠰᠠᠨ ᠯᠠᠮᠠ ᠭᠤᠸᠠᠢ ᠳᠣᠭᠵᠢᠷ ᠢ᠋ᠶ᠋ᠠᠨ ᠭᠠᠯ ᠤᠷᠤᠭᠤ ᠴᠣᠬᠢᠬᠤ ᠶ᠋ᠢᠨ ᠬᠠᠮᠲᠤ ᠠᠮᠠᠨ ᠳ᠋ᠠᠭᠠᠨ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ《ᠰᠢᠨᠠᠯᠠᠮᠠ ᠳᠠᠮᠴᠢᠳ ᠨᠦᠪᠡᠢ ᠭᠢᠩ ᠯᠡ ᠳ᠋ᠤᠭ ᠁ 》 ᠭᠡᠵᠦ ᠤᠩᠰᠢᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠰᠠᠢᠨ᠌ᠥ᠌ᠯᠵᠡᠢ ᠳᠣᠭᠵᠢᠷ ᠤᠷᠤᠭᠤ ᠬᠣᠢᠨᠠ ᠬᠣᠢᠨᠠ ᠠ᠋ᠴᠠ ᠨᠢ ᠭᠤᠷᠪᠠ ᠬᠠᠷᠪᠤᠯᠠ᠃
ᠲᠥᠪᠳᠡᠨᠪᠠᠯᠪᠤᠷ ᠤᠤᠯ ᠳ᠋ᠠᠭᠠᠨ ᠰᠠᠢᠨ ᠨᠣᠮ ᠲᠠᠢ ᠯᠠᠮᠠ ᠪᠠᠢᠭᠰᠠᠨ ᠲᠤᠯᠠ ᠲᠡᠷᠡ᠄《ᠦ! ᠡᠨᠡ ᠴᠢᠨᠢ ᠰᠢᠨᠠᠯᠠᠮᠠ ᠳ᠋ᠤ᠌ ᠬᠠᠷᠢᠶᠠᠯ ᠬᠢᠵᠦ ᠪᠠᠢᠭᠠ ᠶᠤᠮ ᠪᠠᠢᠨᠠ》 ᠭᠡᠵᠦ ᠯᠢᠶᠡᠨᠵᠠᠩ ᠳ᠋ᠠᠭᠠᠨ ᠬᠡᠯᠡᠬᠦ ᠳ᠋ᠦ᠍ ᠯᠢᠶᠡᠨᠵᠠᠩ ᠨᠢ《ᠣᠳᠣ ᠴᠢ ᠬᠠᠷᠪᠤ》 ᠭᠡᠪᠡ᠃ ᠲᠥᠪᠳᠡᠨᠪᠠᠯᠪᠤᠷ ᠨᠢᠭᠡᠯᠬᠡᠨ ᠰᠤᠮᠤ ᠪᠠᠷ ᠰᠠᠢᠨ᠌ᠥ᠌ᠯᠵᠡᠢ ᠫᠠᠢᠵᠠᠩ ᠢ᠋ ᠳᠣᠭᠵᠢᠷ ᠤ᠋ᠨ ᠳᠡᠷᠭᠡᠳᠡ ᠤᠨᠠᠭᠠᠵᠤ᠂ ᠪᠠᠰᠠ ᠨᠢᠭᠡ ᠬᠠᠷᠪᠤᠬᠤ ᠳ᠋ᠤ᠌ ᠷᠠᠪᠵᠤᠤᠷ ᠯᠠᠮᠠ ᠶ᠋ᠢᠨ ᠭᠣᠵᠢᠭᠢᠷ ᠮᠠᠯᠠᠭᠠ ᠶ᠋ᠢ ᠤᠨᠠᠭᠠᠯᠠ᠃《ᠬᠥᠮᠦᠨ ᠢ᠋ ᠴᠣᠬᠢᠨᠠ ᠭᠡᠰᠡᠨ ᠡᠷᠭᠢᠭᠦᠦ ᠰᠤᠮᠤ ᠡᠵᠡᠨ ᠳ᠋ᠡᠭᠡᠨ》 ᠭᠡᠭᠴᠢ ᠪᠡᠷ ᠰᠢᠨᠠᠯᠠᠮᠠ ᠳ᠋ᠤ᠌ ᠬᠠᠷᠢᠶᠠᠯ ᠬᠢᠭᠰᠡᠨ ᠰᠠᠢᠨ᠌ᠥ᠌ᠯᠵᠡᠢ ᠬᠠᠷᠢᠶᠠᠯ ᠤ᠋ᠨ ᠳᠣᠭᠵᠢᠷ ᠲᠠᠢ ᠪᠠᠨ ᠠᠳᠠᠯᠢ ᠲᠡᠭᠦᠰᠦᠯ ᠢ᠋ᠶ᠋ᠡᠨ ᠣᠯᠤᠯᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠨᠢᠭᠡᠨᠲᠡ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠣᠯᠤᠭᠰᠠᠨ ᠲᠤᠯᠠ ᠬᠣᠶᠠᠷ ᠡᠲᠡᠭᠡᠳ ᠬᠠᠷᠢᠯᠴᠠᠨ ᠪᠠᠢᠯᠳᠤᠭᠰᠠᠨ ᠪᠣᠯᠪᠠᠴᠤ ᠳᠡᠮᠡᠢ ᠤᠳᠠᠯ ᠦᠭᠡᠢ ᠪᠠᠢᠯᠳᠤᠭᠠᠨ ᠵᠣᠭᠰᠣᠵᠤ ᠪᠤᠮᠪᠠ ᠪᠤᠯᠠᠭ ᠤ᠋ᠨ ᠦᠳᠡᠰᠢ ᠶ᠋ᠢᠨ ᠰᠥᠨᠢ ᠶ᠋ᠢᠨ ᠳᠠᠷᠢ ᠶ᠋ᠢᠨ ᠤᠲᠤᠭᠠ ᠠᠷᠢᠯᠪᠠ᠃
ᠬᠣᠵᠢᠮ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠳ᠄
ᠳᠣᠲᠣᠷᠠ ᠮᠠᠭᠤ ᠲᠠᠢ ᠫᠠᠢᠵᠠᠩ ᠨᠢ
ᠳᠣᠭᠵᠢᠷ ᠤ᠋ᠨ ᠬᠠᠮᠲᠤ ᠲᠣᠨᠢᠯᠠᠯᠠ᠂
ᠲᠣᠭᠰᠢᠨ ᠬᠡᠷᠴᠡᠭᠡᠢ ᠴᠡᠷᠢᠭ ᠦ᠋ᠳ ᠨᠢ
ᠳᠣᠣᠷᠠ ᠪᠠᠨ ᠡᠷᠭᠢᠨ ᠳᠤᠲᠠᠭᠠᠯᠠ᠃
ᠭᠡᠵᠦ ᠰᠢᠯᠦᠭ ᠵᠣᠬᠢᠶᠠᠵᠤ ᠲᠠᠷᠬᠠᠭᠠᠭᠰᠠᠨ ᠭᠡᠳᠡᠭ᠃①
— — — —
①
ᠲᠤᠰ ᠠᠭᠤᠯᠭᠠ ᠶ᠋ᠢ1961 ᠣᠨ ᠳ᠋ᠤ᠌
ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠰᠠᠢᠨᠵᠢᠷᠭᠠᠯ ᠨᠠᠰᠤᠲᠠᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠷ ᠡᠮᠬᠢᠳᠬᠡᠪᠡ᠃
10. ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠠᠢᠯᠳᠤᠭᠠᠨ
ᠪᠤᠮᠪᠠ ᠪᠤᠯᠠᠭ ᠤ᠋ᠨ ᠪᠠᠢᠯᠳᠤᠭᠠᠨ ᠤ᠋ ᠰᠥᠨᠢ ᠨᠣᠶᠠᠨ ᠤ᠋ ᠴᠡᠷᠢᠭ ᠪᠣᠯᠤᠨ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠨᠢᠭᠡᠨ ᠪᠦᠯᠦᠭ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠵᠡᠭᠦᠨ ᠬᠣᠢᠰᠢ ᠤᠷᠤᠭᠰᠢᠯᠠᠵᠤ ᠵᠡᠭᠦᠨ ᠵᠠᠮ ᠤ᠋ᠨ ᠴᠡᠷᠢᠭ ᠲᠡᠢ ᠪᠡᠨ ᠨᠡᠢᠯᠡᠵᠦ500 ᠭᠠᠷᠤᠢ ᠮᠣᠷᠢᠲᠤ ᠴᠡᠷᠢᠭ ᠤᠯᠠᠭᠠᠨᠲᠣᠯᠣᠭᠠᠢ ᠬᠤᠳᠤᠯᠤᠭᠠᠢ(ᠬᠤᠸᠠᠲᠣᠯᠣᠭᠠᠢ) ᠪᠠᠷ ᠰᠠᠭᠤᠷᠢᠰᠢᠪᠠ᠃ ᠲᠡᠳᠡ ᠣᠢᠷᠠ ᠣᠷᠴᠢᠮ ᠤ᠋ᠨ ᠠᠢᠯ ᠡᠷᠦᠬᠡ ᠶ᠋ᠢ ᠳᠡᠭᠡᠷᠡᠮᠳᠡᠵᠦ ᠮᠠᠯ ᠰᠦᠷᠦᠭ ᠢ᠋ ᠪᠤᠯᠢᠶᠠᠨ ᠠᠯᠠᠵᠤ ᠵᠠᠮ ᠤ᠋ᠨ ᠬᠦᠨᠡᠰᠦ ᠪᠡᠨ ᠪᠣᠯᠭᠠᠨ ᠤᠮᠠᠷᠠᠰᠢ ᠦᠷᠭᠦᠯᠵᠢᠯᠡᠨ ᠱᠦᠭᠦᠷᠳᠡᠯᠲᠡ ᠬᠢᠪᠡ᠃ ᠪᠡᠯᠴᠢᠭᠡᠷ ᠳᠠᠬᠢ ᠬᠣᠨᠢ ᠮᠠᠯ ᠪᠠᠷᠢᠭᠳᠠᠬᠤ ᠦᠭᠡᠢ ᠶ᠋ᠢ ᠨᠢ ᠫᠤᠤᠳᠠᠨ ᠠᠯᠠᠵᠤ᠂ ᠠᠯᠠᠭᠰᠠᠨ ᠬᠣᠨᠢ ᠢᠮᠠᠭᠠ ᠪᠠᠨ ᠠᠷᠭᠠᠯ ᠤ᠋ᠨ ᠭᠠᠯ ᠢᠶᠠᠷ ᠰᠢᠷᠠᠵᠤ᠂ ᠲᠦᠭᠦᠬᠡᠢ ᠪᠣᠯᠤᠭᠰᠠᠨ ᠢ᠋ ᠬᠠᠢᠬᠤᠷᠬᠤ ᠦᠭᠡᠢ ᠫᠤᠤ ᠶ᠋ᠢᠨ ᠵᠢᠳᠠ ᠪᠠᠷ ᠢ᠋ᠶ᠋ᠠᠨ ᠣᠭᠲᠣᠯᠵᠤ ᠶᠠᠭᠠᠷᠠᠯᠳᠤᠨ ᠢᠳᠡᠵᠦ ᠪᠠᠢᠯᠠ᠃
ᠠᠳᠤᠭᠤ ᠮᠠᠯ ᠪᠡᠯᠴᠢᠭᠡᠷᠯᠡᠳᠡᠭ ᠲᠦᠮᠡᠨ ᠮᠠᠯ ᠤ᠋ᠨ ᠰᠠᠢᠬᠠᠨ ᠪᠡᠯᠴᠢᠭᠡᠷ ᠪᠣᠯᠬᠤ ᠰᠢᠪᠠᠷ ᠤ᠋ᠨ ᠴᠠᠢᠳᠠᠮ ᠭᠱᠠᠨ ᠵᠠᠭᠤᠷᠠ ᠡᠯᠦᠢ ᠬᠤᠯᠤᠢ ᠪᠣᠯᠵᠤ ᠬᠣᠭᠣᠰᠣᠷᠠᠭᠰᠠᠨ ᠪᠥᠭᠡᠳ ᠡᠷᠲᠡ ᠳᠡᠭᠡᠳᠦ ᠡᠴᠡ ᠪᠡᠨ ᠰᠦᠰᠦᠭᠯᠡᠨ ᠳᠠᠬᠢᠬᠰᠠᠨ ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠠᠯᠲᠠ ᠮᠥᠩᠭᠥᠨ ᠪᠤᠷᠬᠠᠨ ᠪᠠᠢᠲᠤᠭᠠᠢ ᠰᠢᠪᠠᠷ ᠢ᠋ᠶ᠋ᠠᠷ ᠱᠤᠭᠤᠵᠤ ᠰᠢᠷ ᠢ᠋ᠶ᠋ᠡᠷ ᠪᠣᠳᠣᠭᠰᠠᠨ ᠪᠤᠷᠬᠠᠨ ᠴᠤ᠌ ᠦᠯᠡᠳᠡᠭᠡᠯ ᠦᠭᠡᠢ ᠳᠡᠭᠡᠷᠡᠮᠳᠡᠭᠳᠡᠵᠡᠢ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠥᠯ ᠳ᠋ᠦ᠍ ᠳᠠᠭᠠᠷᠢᠭᠳᠠᠭᠰᠠᠨ ᠮᠠᠯᠴᠢᠳ ᠦᠷᠡ ᠬᠡᠦᠬᠡᠳ ᠢ᠋ᠶ᠋ᠡᠨ ᠡᠭᠦᠷᠴᠦ ᠲᠣᠯᠣᠭᠠᠢ ᠶ᠋ᠢᠨ ᠵᠠᠰᠠᠯ ᠴᠢᠮᠡᠭᠯᠡᠯ ᠢ᠋ᠶ᠋ᠡᠨ ᠡᠯᠡᠰᠦᠨ ᠳ᠋ᠦ᠍ ᠪᠤᠯᠠᠴᠢᠬᠠᠭᠠᠳ ᠨᠠᠰᠤᠲᠠᠢᠴᠤᠳ ᠢ᠋ᠶ᠋ᠠᠨ ᠬᠥᠲᠥᠯᠵᠦ ᠪᠠᠯᠠᠷ ᠪᠤᠷᠭᠠᠰᠤᠨ ᠳ᠋ᠤ᠌ ᠵᠠᠢᠯᠠᠨ ᠨᠢᠭᠤᠵᠤ ᠰᠠᠭᠤᠵᠠᠭᠠᠨᠠ᠃ ᠡᠷᠢᠭᠡ ᠪᠠᠷᠢᠵᠤ ᠮᠠᠨᠢ ᠲᠣᠭᠠᠯᠠᠭᠰᠠᠨ ᠨᠠᠰᠤᠲᠠᠢᠴᠤᠳ ᠭᠠᠰᠢᠭᠤᠳᠠᠨ ᠵᠣᠪᠠᠵᠤ᠄《ᠠᠢ ᠳᠠ! ᠪᠤᠷᠬᠠᠨ ᠠ᠋! ᠶᠠᠮᠠᠷ ᠦᠶᠡ ᠳ᠋ᠦ᠍ ᠬᠢᠭᠰᠡᠨ ᠯᠠᠢ ᠯᠠᠨᠴᠢᠭ ᠭᠡᠭᠴᠢ ᠪᠣᠢ? ᠵᠢᠯ ᠦ᠋ᠨ ᠲᠤᠷᠰᠢ ᠬᠤᠯᠠᠭᠠᠢ ᠰᠠᠮᠠᠭᠤᠷᠠᠵᠤ ᠠᠮᠤᠷ ᠠᠮᠢᠳᠤᠷᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠴᠢᠬᠠᠯᠠ ᠁ 》 ᠭᠡᠵᠡᠭᠡᠨᠡ᠃
ᠪᠡᠯᠴᠢᠭᠡᠷ ᠳᠦᠭᠦᠷᠡᠩ ᠬᠥᠨᠳᠡᠯᠡᠨ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠤᠮᠠᠷᠠᠰᠢ ᠤᠷᠤᠭᠰᠢᠯᠠᠵᠤ ᠶᠠᠪᠤᠭᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠠᠷᠭᠠᠴᠠᠬᠤ ᠳ᠋ᠤ᠌ ᠠᠰ ᠲᠤᠯᠤᠨ ᠬᠣᠷᠢᠭᠯᠠᠬᠤ ᠳ᠋ᠤ᠌ ᠪᠡᠷᠬᠡ ᠪᠠᠢᠵᠤ᠂ ᠰᠢᠨᠡᠯᠡᠮᠡ ᠴᠡᠷᠢᠭ ᠢ᠋ᠶ᠋ᠡᠨ ᠬᠡᠰᠡᠭ ᠪᠦᠯᠦᠭ ᠢ᠋ᠶ᠋ᠡᠷ ᠪᠢᠯᠵᠤᠤᠬᠠᠢ ᠶ᠋ᠢᠨ ᠲᠡᠢᠨ ᠬᠢᠬᠦ ᠬᠡᠯᠪᠡᠷᠢ ᠪᠡᠷ ᠪᠠᠢᠷᠢᠯᠠᠭᠤᠯᠪᠠ᠃ ᠲᠡᠷᠡ ᠥᠪᠡᠷ ᠢ᠋ᠶ᠋ᠡᠨ ᠬᠠᠮᠤᠭ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠪᠠᠶᠠᠨᠭᠤᠤᠯ ᠤ᠋ᠨ ᠰᠢᠷᠠ ᠵᠦᠯᠭᠡ ᠶ᠋ᠢᠨ ᠡᠯᠡᠰᠦᠨ ᠳ᠋ᠦ᠍ ᠨᠢᠭᠡ ᠲᠠᠰᠤᠭ ᠴᠡᠷᠢᠭ ᠳᠠᠢᠴᠢᠯᠠᠨ ᠡᠨᠳᠡ ᠲᠡᠨᠳᠡ ᠡᠴᠡ ᠨᠢ ᠬᠠᠷᠪᠤᠵᠤ ᠲᠡᠳᠡᠨ ᠦ᠌ ᠤᠷᠤᠭᠰᠢᠯᠠᠬᠤ ᠶ᠋ᠢ ᠬᠣᠷᠢᠭᠯᠠᠵᠤ ᠪᠠᠢᠯᠠ᠃ ᠪᠠᠢᠯᠳᠤᠭᠠᠨ ᠬᠣᠶᠠᠷ ᠡᠳᠦᠷ ᠦᠷᠭᠦᠯᠵᠢᠯᠡᠵᠦ᠂ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠨᠡᠯᠢᠶᠡᠳ ᠶᠡᠬᠡ ᠬᠣᠬᠢᠷᠠᠯ ᠠᠮᠰᠠᠵᠤ ᠦᠷᠭᠦᠯᠵᠢᠯᠡᠨ ᠤᠷᠤᠭᠰᠢᠯᠠᠬᠤ ᠵᠣᠷᠢᠭ ᠦᠭᠡᠢ ᠪᠣᠯᠵᠠᠢ᠃ ᠭᠡᠪᠡᠴᠦ ᠮᠥᠨ ᠡᠷᠭᠢᠵᠦ ᠤᠬᠤᠷᠢᠬᠤ ᠦᠭᠡᠢ ᠪᠠᠢᠯᠠ᠃
ᠰᠢᠨᠡᠯᠡᠮᠡ ᠥᠪᠡᠷ ᠦ᠋ᠨ ᠴᠡᠷᠢᠭ ᠨᠢ ᠲᠠᠪᠢ ᠭᠠᠷᠤᠢᠬᠠᠨ ᠪᠠᠢᠵᠤ ᠦᠷᠭᠦᠯᠵᠢᠯᠡᠨ ᠪᠠᠢᠯᠳᠤᠬᠤ ᠳ᠋ᠤ᠌ ᠠᠰᠢᠭ ᠦᠭᠡᠢ ᠲᠤᠯᠠ ᠭᠡᠨᠡᠳᠲᠡ ᠴᠡᠷᠢᠭ ᠢ᠋ᠶ᠋ᠡᠨ ᠲᠠᠲᠠᠵᠤ ᠳᠡᠯᠭᠡᠷ ᠬᠤᠷᠠᠬᠤ ᠶ᠋ᠢᠨ ᠣᠪᠣᠭᠠᠨ ᠤ᠋ ᠬᠣᠢᠨᠠ ᠴᠠᠭᠠᠨᠬᠥᠢ᠍ᠳᠡᠭᠡ ᠵᠦᠭ ᠰᠢᠯᠵᠢᠭᠦᠯᠵᠦ᠂ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠡᠯᠡᠰᠦᠨ ᠳᠣᠲᠣᠷᠠ ᠬᠥᠲᠥᠯᠵᠦ ᠠᠪᠠᠴᠢᠨ ᠤᠰᠠᠳᠬᠠᠬᠤ ᠪᠠᠷ ᠪᠠᠢᠷᠢᠯᠠᠭᠤᠯᠤᠯᠲᠠ ᠬᠢᠵᠡᠢ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠤᠬᠤᠷᠢᠭᠰᠠᠨ ᠢ᠋ ᠮᠡᠳᠡᠭᠡᠳ ᠣᠮᠣᠭ ᠨᠡᠮᠡᠭᠳᠡᠵᠦ ᠣᠳᠣ ᠢᠯᠠᠯᠲᠠ ᠣᠯᠤᠯᠠ ᠭᠡᠮᠡᠨ ᠵᠡᠭᠦᠳᠦ ᠪᠡᠷ ᠢ᠋ᠶ᠋ᠡᠨ ᠱᠠᠯᠪᠢᠩ ᠢᠳᠡᠵᠦ ᠪᠠᠢᠲᠠᠯᠠ ᠴᠠᠭᠠᠨᠬᠥ᠋ᠳᠡᠭᠡ ᠶ᠋ᠢᠨ ᠡᠯᠡᠰᠦᠨ ᠳ᠋ᠦ᠍ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠰᠢᠷᠦᠭᠦᠨ ᠭᠠᠯᠯᠠᠯᠲᠠ ᠳ᠋ᠤ᠌ ᠤᠴᠠᠷᠠᠯᠠ᠃
ᠪᠠᠢᠯᠳᠤᠭᠠᠨ ᠤ᠋ ᠳᠤᠮᠳᠠ ᠰᠢᠨᠡᠯᠡᠮᠡ ᠨᠢᠭᠡᠨ ᠡᠯᠡᠰᠦᠨ ᠳᠥᠭᠥᠮ ᠳ᠋ᠦ᠍ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠮᠣᠷᠢ ᠪᠠᠨ ᠬᠥᠲᠥᠯᠵᠦ ᠠᠭᠠᠵᠢᠮ ᠢ᠋ᠶ᠋ᠠᠷ ᠠᠯᠬᠤᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠬᠡᠳᠦᠨ ᠮᠣᠷᠢᠲᠤ ᠴᠡᠷᠢᠭ ᠲᠦ᠍ ᠪᠦᠰᠡᠯᠡᠭᠳᠡᠵᠦ᠂ ᠪᠠᠢᠳᠠᠯ ᠭᠱᠠᠨ ᠵᠠᠭᠤᠷᠠ ᠠᠶᠤᠯ ᠲᠦᠭᠰᠢᠭᠦᠷᠢᠲᠡᠢ ᠪᠣᠯᠴᠢᠬᠠᠯᠠ᠃
ᠰᠢᠨᠡᠯᠡᠮᠡ ᠦᠷᠭᠦᠯᠵᠢ ᠬᠦᠷᠡᠩ ᠥᠩᠭᠡ ᠲᠡᠢ ᠣᠷᠳᠣᠰ ᠮᠠᠶᠢᠭ ᠤ᠋ᠨ ᠮᠣᠩᠭᠣᠯ ᠬᠤᠪᠴᠠᠰᠤ ᠡᠮᠦᠰᠴᠦ ᠬᠦᠵᠦᠭᠦᠨ ᠳ᠋ᠡᠭᠡᠨ ᠨᠢᠭᠡᠨ ᠬᠡᠯᠬᠢᠶᠡ ᠰᠢᠷᠠ ᠮᠠᠨᠢ ᠶ᠋ᠢᠨ ᠡᠷᠢᠭᠡ ᠵᠡᠭᠦᠵᠦ ᠮᠠᠬᠠᠢ ᠭᠤᠲᠤᠯ ᠡᠮᠦᠰᠴᠦ ᠶᠠᠪᠤᠳᠠᠭ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠲᠡᠭᠦᠨ ᠢ᠋ ᠲᠠᠨᠢᠬᠤ ᠦᠭᠡᠢ ᠪᠣᠯᠪᠠᠴᠤ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠲᠠᠨᠢᠯᠴᠠᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠰᠢᠨᠠᠯᠠᠮᠠ ᠶᠠᠮᠠᠷ ᠰᠢᠦ ᠪᠠᠢᠳᠠᠯ ᠲᠠᠢ ᠭᠡᠳᠡᠭ ᠢ᠋ ᠶᠡᠬᠡ ᠲᠥᠯᠥᠪ ᠦᠨᠳᠦᠰᠦᠨ ᠳ᠋ᠡᠭᠡᠨ ᠪᠠᠷᠤᠭᠴᠠᠯᠠᠭᠠᠳ᠄《ᠬᠦᠢ! ᠰᠢᠨᠠᠯᠠᠮᠠ ᠵᠣᠭᠰᠣ! ᠰᠢᠨᠡᠯᠡᠮᠡ ᠡᠨᠳᠡ ᠪᠠᠢᠨᠠ᠂ ᠠᠮᠢᠳᠤ ᠪᠠᠷ ᠪᠠᠷᠢᠶᠠ!》 ᠭᠡᠵᠦ ᠰᠠᠨᠳᠤᠷᠤᠨ ᠬᠠᠰᠬᠢᠷᠤᠯᠳᠤᠨᠠ᠃
ᠰᠢᠨᠠᠯᠠᠮᠠ ᠪᠠᠢᠳᠠᠯ ᠮᠠᠭᠤ ᠪᠣᠯᠤᠭᠰᠠᠨ ᠢ᠋ ᠦᠵᠡᠭᠡᠳ ᠬᠤᠷᠳᠤᠨ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠪᠦᠰᠡᠯᠡᠯᠲᠡ ᠶ᠋ᠢ ᠰᠢᠪᠲᠤᠯᠤᠨ ᠳᠤᠲᠠᠭᠠᠯᠠ᠃ ᠫᠤᠤ ᠶ᠋ᠢᠨ ᠰᠤᠮᠤ ᠬᠣᠢᠨᠠ ᠠ᠋ᠴᠠ ᠨᠢ ᠴᠣᠷᠭᠢᠪᠠᠴᠤ ᠲᠤᠰᠤᠯᠲᠠ ᠨᠢ ᠣᠨᠣᠪᠴᠢᠲᠠᠢ ᠪᠢᠰᠢ ᠵᠥᠪᠬᠡᠨ ᠮᠣᠷᠢᠨ ᠤ᠋ ᠬᠠᠵᠠᠭᠤ ᠶ᠋ᠢᠨ ᠡᠯᠡᠰᠦ ᠰᠢᠷᠣᠢ ᠶ᠋ᠢ ᠪᠤᠲᠠᠷᠠᠭᠤᠯᠤᠨᠠ᠃ ᠲᠡᠳᠡᠨ ᠦ᠌ ᠮᠣᠷᠢᠳ ᠨᠢ ᠡᠯᠡᠰᠦᠨ ᠳ᠋ᠦ᠍ ᠳᠠᠪᠬᠢᠬᠤ ᠪᠠᠷ ᠠᠨᠠᠢ ᠪᠠᠢᠵᠤ᠂ ᠬᠠᠷᠢᠨ ᠰᠢᠨᠡᠯᠡᠮᠡ ᠶ᠋ᠢᠨ ᠤᠨᠤᠭᠰᠠᠨ ᠨᠤᠲᠤᠭ ᠤ᠋ᠨ ᠮᠣᠷᠢ ᠨᠢ ᠠᠯᠢ ᠬᠡᠳᠦᠢᠨᠡᠢ ᠬᠣᠯᠠ ᠳᠠᠪᠬᠢᠨ ᠣᠳᠴᠠᠢ᠃
ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠬᠡᠳᠦᠨ ᠴᠡᠷᠢᠭ ᠬᠣᠢᠨᠠ ᠠ᠋ᠴᠠ ᠨᠢ ᠰᠠᠯᠤᠯ ᠦᠭᠡᠢ ᠨᠡᠬᠡᠮᠵᠢᠯᠡᠨᠡ᠃ ᠰᠢᠨᠠᠯᠠᠮᠠ ᠳᠠᠪᠬᠢᠭᠰᠠᠭᠠᠷ ᠲᠡᠳᠡᠨ ᠡᠴᠡ ᠬᠣᠶᠠᠷ ᠮᠠᠩᠬᠠᠨ ᠳᠥᠭᠥᠮ ᠠᠯᠤᠰᠯᠠᠭᠰᠠᠨ ᠶᠡᠬᠡ ᠪᠤᠷᠭᠠᠰᠤᠨ ᠳᠥᠭᠥᠮ ᠳ᠋ᠦ᠍ ᠣᠷᠣᠬᠤᠯᠠᠷ ᠡᠮᠦᠨᠡ ᠨᠢ ᠳᠦᠭᠦᠷᠡᠩ ᠠᠷᠭᠠᠯ ᠲᠠᠢ ᠠᠷᠤᠭ ᠪᠠᠢᠬᠤ ᠶ᠋ᠢ ᠣᠯᠵᠤ ᠦᠵᠡᠪᠡ᠃ ᠪᠤᠶᠠᠨᠲᠤ ᠬᠥᠮᠦᠨ ᠦ᠌ ᠪᠣᠳᠣᠯ ᠬᠤᠷᠳᠤᠨ ᠭᠡᠭᠴᠢ ᠪᠡᠷ ᠲᠡᠷᠡ ᠮᠣᠷᠢ ᠪᠠᠨ ᠪᠤᠷᠭᠠᠰᠤᠨ ᠳᠥᠭᠥᠮ ᠳ᠋ᠦ᠍ ᠬᠠᠶᠠᠴᠢᠬᠠᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠬᠤᠷᠳᠤᠨ ᠭᠡᠭᠴᠢ ᠠᠷᠤᠭ ᠲᠠᠢ ᠠᠷᠭᠠᠯ ᠢ᠋ ᠡᠭᠦᠷᠦᠨ ᠳᠤᠲᠠᠭᠠᠭᠰᠠᠨ ᠮᠥᠷ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠡᠳᠡᠷᠭᠦ ᠳᠠᠭᠠᠵᠤ ᠶᠠᠪᠤᠪᠠ᠃ ᠲᠡᠭᠡᠭᠡᠳ ᠭᠠᠷ ᠲᠠᠭᠠᠨ ᠪᠤᠷᠭᠠᠰᠤᠨ ᠮᠣᠳᠣᠨ ᠲᠠᠶᠠᠭ ᠲᠤᠯᠵᠤ ᠠᠷᠤᠭ ᠲᠠᠢ ᠠᠷᠭᠠᠯ ᠢ᠋ᠶ᠋ᠠᠨ ᠡᠭᠦᠷᠴᠦ ᠶᠠᠳᠠᠭᠰᠠᠨ ᠰᠢᠭ᠋ ᠪᠠᠢᠳᠠᠯ ᠲᠠᠢ ᠠᠮᠢᠰᠬᠤᠭᠠ ᠠᠯᠲᠠᠨ ᠴᠥᠮᠴᠥᠷᠢᠨ ᠠᠯᠬᠤᠵᠤ ᠶᠠᠭᠤ ᠨᠢᠭᠡ ᠶ᠋ᠢ ᠪᠣᠳᠣᠯᠬᠢᠯᠠᠨᠠ᠃
ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠮᠣᠷᠢ ᠨᠢ ᠰᠢᠪᠡᠷ ᠬᠥᠯᠥᠰᠥ ᠭᠠᠷᠲᠠᠯᠠ ᠳᠠᠪᠬᠢᠵᠤ᠂ ᠴᠡᠷᠢᠭ ᠦ᠋ᠳ ᠨᠢ ᠠᠮᠢᠰᠬᠤᠭᠠ ᠪᠥᠭᠯᠡᠷᠡᠲᠡᠯᠡ ᠨᠡᠬᠡᠮᠵᠢᠯᠡᠭᠰᠡᠭᠡᠷ ᠰᠢᠨᠠᠯᠠᠮᠠ ᠲᠠᠢ ᠶᠠᠪ ᠴᠠᠪ ᠲᠠᠭᠠᠷᠠᠯᠳᠤᠴᠢᠬᠠᠯᠠ᠃ ᠲᠡᠳᠡ᠄《ᠰᠢᠨᠠᠯᠠᠮᠠ ᠵᠣᠭᠰᠣ᠂ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠷᠭᠦ》 ᠭᠡᠮᠡᠨ ᠵᠠᠩᠳᠤᠷᠤᠨᠠ᠃ ᠰᠢᠨᠠᠯᠠᠮᠠ ᠣᠢᠰᠢᠶᠠᠬᠤ ᠴᠤ᠌ ᠦᠭᠡᠢ ᠪᠡᠷ ᠠᠷᠤᠭ ᠲᠠᠢ ᠠᠷᠭᠠᠯ ᠢ᠋ᠶ᠋ᠠᠨ ᠡᠭᠦᠷᠴᠦ ᠵᠣᠭᠰᠣᠨᠠ᠃ ᠵᠠᠷᠢᠮ ᠴᠡᠷᠢᠭ ᠨᠢ ᠰᠢᠨᠠᠯᠠᠮᠠ ᠶ᠋ᠢ ᠲᠣᠭᠣᠷᠢᠨ ᠰᠠᠢᠨ ᠠᠵᠢᠭᠯᠠᠵᠤ ᠦᠵᠡᠭᠡᠳ᠄《ᠴᠢᠷᠠᠢ ᠵᠢᠰᠦ ᠬᠤᠪᠴᠠᠰᠤ ᠬᠤᠨᠠᠷ ᠢ᠋ ᠦᠵᠡᠬᠦᠯᠡᠷ ᠠᠷᠭᠠᠯ ᠡᠭᠦᠷᠦᠭᠰᠡᠨ ᠬᠥᠳᠡᠭᠡ ᠶ᠋ᠢᠨ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠪᠠᠢᠨᠠ ᠰᠢᠦ!》 ᠭᠡᠵᠦ ᠢᠨᠢᠶᠡᠯᠴᠡᠨᠡ᠃ ᠵᠠᠷᠢᠮ ᠨᠢ ᠲᠡᠭᠦᠨ ᠢ᠋ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠬᠡᠳᠦ ᠭᠤᠶᠠᠳᠠᠭᠠᠳ᠄《ᠣᠳᠣᠬᠠᠨ ᠡᠨᠡᠭᠦᠷ ᠳᠤᠲᠠᠭᠠᠭᠰᠠᠨ ᠬᠥᠮᠦᠨ ᠢ᠋ ᠦᠵᠡᠪᠡ ᠤᠤ?》 ᠭᠡᠬᠦ ᠳ᠋ᠦ᠍ ᠰᠢᠨᠠᠯᠠᠮᠠ᠄《ᠦ᠂ ᠣᠳᠣᠬᠠᠨ ᠮᠢᠨᠦ ᠬᠠᠵᠠᠭᠤ ᠪᠠᠷ ᠵᠡᠭᠦᠨᠰᠢ ᠨᠢᠭᠡᠨ ᠮᠣᠷᠢ ᠤᠨᠤᠭᠰᠠᠨ ᠬᠥᠮᠦᠨ ᠳᠠᠪᠬᠢᠭᠠᠳ ᠭᠠᠷᠤᠭᠰᠠᠨ ᠶᠤᠮ ᠰᠢᠦ!》 ᠭᠡᠪᠡ᠃ ᠲᠡᠳᠡ ᠬᠤᠷᠳᠤᠨ ᠨᠡᠬᠡᠮᠵᠢᠯᠡᠶᠡ ᠭᠡᠵᠦ ᠬᠠᠰᠬᠢᠷᠤᠯᠳᠤᠨ ᠶᠠᠪᠤᠵᠠᠭᠠᠯᠠ᠃ ᠰᠢᠨᠠᠯᠠᠮᠠ ᠵᠢᠰᠦ ᠪᠤᠷᠤᠭᠤᠯᠠᠨ ᠠᠶᠤᠯ ᠠ᠋ᠴᠠ ᠭᠠᠷᠤᠭᠰᠠᠨ ᠳ᠋ᠠᠭᠠᠨ ᠪᠡᠶᠡᠰᠴᠦ ᠮᠠᠩᠬᠠᠨ ᠣᠷᠣᠢ ᠳ᠋ᠤ᠌ ᠭᠠᠷᠴᠤ ᠮᠠᠯ ᠰᠦᠷᠦᠭ ᠢ᠋ᠶ᠋ᠡᠨ ᠪᠠᠷᠠᠯᠠᠭᠰᠠᠨ ᠰᠢᠭ᠋ ᠢ᠋ᠶ᠋ᠡᠷ ᠲᠡᠢᠨ ᠦ᠌ ᠪᠠᠢᠳᠠᠯ ᠢ᠋ ᠠᠩᠬᠠᠷᠴᠤ ᠦᠵᠡᠨᠡ᠃
ᠰᠢᠨᠡᠯᠡᠮᠡ ᠶ᠋ᠢ ᠨᠡᠬᠡᠮᠵᠢᠯᠡᠭᠰᠡᠨ ᠴᠡᠷᠢᠭ ᠦ᠋ᠳ ᠲᠡᠭᠦᠨ ᠦ᠌ ᠵᠢᠭᠠᠭᠰᠠᠨ ᠶᠣᠰᠣᠭᠠᠷ ᠵᠡᠭᠦᠨᠰᠢ ᠨᠡᠬᠡᠮᠵᠢᠯᠡᠬᠦ ᠳ᠋ᠦ᠍ ᠠᠭᠠᠯᠵᠢᠨ ᠲᠣᠣᠷ ᠮᠡᠲᠦ ᠮᠣᠷᠢᠳ ᠤ᠋ᠨ ᠮᠥᠷ ᠦ᠋ᠨ ᠴᠣᠬᠣᠮ ᠬᠡᠨ ᠦ᠌ ᠴᠡᠷᠢᠭ᠂ ᠠᠯᠢ ᠡᠲᠡᠭᠡᠳ ᠦ᠋ᠨ ᠴᠡᠷᠢᠭ ᠦ᠋ᠨ ᠮᠣᠷᠢᠨ ᠤ᠋ ᠮᠥᠷ ᠭᠡᠳᠡᠭ ᠨᠢ ᠢᠯᠭᠠᠭᠳᠠᠬᠤᠶᠠ ᠪᠡᠷᠬᠡ ᠪᠣᠯᠵᠠᠢ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠬᠡᠳᠦᠨ ᠴᠡᠷᠢᠭ《ᠠᠮᠠᠨ ᠳ᠋ᠤ᠌ ᠣᠷᠣᠭᠰᠠᠨ ᠰᠢᠬᠢᠷ ᠢ᠋ᠶ᠋ᠡᠨ ᠬᠡᠯᠡ ᠪᠡᠷ ᠢ᠋ᠶ᠋ᠡᠨ ᠲᠦᠯᠬᠢᠵᠦ ᠬᠣᠭᠣᠰᠣᠨ ᠪᠣᠯᠵᠤ ᠲᠡᠭᠦᠰᠦᠯᠡ》᠃
ᠰᠢᠨᠡᠯᠡᠮᠡ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠢᠷᠠᠭᠠᠳ ᠨᠠᠰᠤᠨ ᠤ᠋ ᠬᠥᠮᠦᠨ ᠪᠠᠢᠭᠰᠠᠨ ᠲᠤᠯᠠ ᠠᠲᠤᠷᠢᠶᠠ ᠲᠠᠢ ᠨᠢᠭᠤᠷ ᠪᠥᠭᠴᠥᠭᠡᠷ ᠪᠡᠶᠡ ᠨᠢ ᠬᠥᠭᠰᠢᠨ ᠴᠢᠪᠠᠭᠠᠨᠴᠠ ᠰᠢᠭ᠋ ᠬᠠᠷᠠᠭᠳᠠᠵᠤ ᠮᠡᠳᠡᠨᠡ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠨᠢ ᠦᠦᠰᠢᠨ ᠰᠢᠨᠡᠯᠡᠮᠡ ᠭᠡᠭᠴᠢ ᠨᠡᠷᠡ ᠠᠯᠳᠠᠷ ᠶᠡᠬᠡᠲᠡᠢ ᠴᠡᠷᠢᠭ ᠦ᠋ᠨ ᠲᠤᠸᠠᠨᠵᠠᠩ ᠨᠣᠶᠠᠨ ᠲᠤᠯᠠ ᠯᠠᠪ ᠵᠢᠩ ᠶᠤᠸᠠᠢ ᠰᠢᠦ ᠰᠸᠯᠢᠩ ᠰᠢᠦ ᠲᠠᠷᠭᠤᠨ ᠮᠠᠷᠢᠶᠠ ᠲᠠᠢ ᠴᠡᠷᠢᠭ ᠦ᠋ᠨ ᠬᠤᠪᠴᠠᠰᠤᠨ ᠳᠡᠭᠡᠷᠡ ᠪᠡᠨ ᠨᠣᠶᠠᠨ ᠵᠡᠷᠭᠡ ᠶ᠋ᠢᠨ ᠣᠳᠣ ᠭᠢᠯᠠᠯᠵᠠᠭᠤᠯᠤᠭᠰᠠᠨ ᠶᠡᠬᠡ ᠨᠣᠶᠠᠨ ᠤ᠋ ᠮᠠᠶᠢᠭ ᠲᠠᠢ ᠬᠥᠮᠦᠨ ᠭᠡᠵᠦ ᠵᠢᠱ᠌ᠢᠵᠦ ᠪᠣᠳᠣᠭᠰᠠᠨ ᠠ᠋ᠴᠠ《 ᠬᠥᠭᠰᠢᠨ ᠴᠢᠪᠠᠭᠠᠨᠴᠠ》 ᠶ᠋ᠢ ᠠᠩᠬᠠᠷᠤᠯ ᠳ᠋ᠠᠭᠠᠨ ᠠᠪᠤᠭᠰᠠᠨ ᠦᠭᠡᠢ ᠪᠣᠯᠴᠢᠬᠠᠵᠠᠢ᠃①
— — — —
① ᠲᠤᠰ ᠦᠯᠢᠭᠡᠷ ᠢ᠋ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ᠂ ᠨᠡᠷᠡᠲᠡᠢ ᠮᠠᠯᠴᠢᠨ ᠡᠮᠴᠢ ᠭᠡᠵᠦ ᠪᠠᠢᠭᠰᠠᠨ ᠳᠥᠭᠥᠮ ᠪᠣᠩᠬᠣᠸᠠ ᠨᠠᠰᠤᠲᠠᠨ1974 ᠣᠨ ᠳ᠋ᠤ᠌ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠵᠡᠢ᠃
11᠂ ᠲᠠᠮᠠᠭᠠᠯᠠᠢ ᠶ᠋ᠢᠨ ᠪᠠᠢᠯᠳᠤᠭᠠᠨ
ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠬᠣᠢᠨᠠ ᠡᠮᠦᠨᠡᠰᠢ ᠬᠣᠢᠰᠢ ᠪᠠᠨ ᠤᠷᠲᠤᠯᠵᠢᠨ ᠶᠡᠬᠡ ᠴᠠᠢᠳᠠᠮ ᠤ᠋ᠨ ᠵᠡᠭᠦᠨ ᠬᠣᠢᠨᠠ ᠳᠡᠯᠭᠡᠷ ᠬᠤᠷᠠᠬᠤ ᠶ᠋ᠢᠨ ᠣᠪᠣᠭᠠ᠂ ᠠᠰ ᠬᠣᠢᠨᠠ ᠨᠢ ᠮᠠᠩᠬᠠᠲᠤ ᠬᠤᠷᠠᠬᠤ ᠶ᠋ᠢᠨ ᠣᠪᠣᠭᠠ᠂ ᠲᠡᠭᠦᠨ ᠦ᠌ ᠪᠠᠷᠠᠭᠤᠨ ᠡᠮᠦᠨᠡ ᠨᠢ ᠰᠦᠯᠳᠡ ᠶ᠋ᠢᠨ ᠣᠷᠣᠢ ᠭᠡᠵᠦ ᠣᠯᠠᠨ ᠦᠶᠡ ᠶ᠋ᠢᠨ ᠮᠣᠩᠭᠣᠯᠴᠤᠳ ᠤ᠋ᠨ ᠪᠥᠬᠡ ᠮᠥᠷᠭᠥᠯ ᠦ᠋ᠨ ᠰᠢᠲᠦᠭᠡᠨ ᠦ᠌ ᠲᠠᠬᠢᠯᠭᠠ ᠶ᠋ᠢᠨ ᠭᠠᠵᠠᠷ ᠤ᠋ᠳ ᠪᠠᠢᠳᠠᠭ᠃ ᠡᠳᠡᠭᠡᠷ ᠭᠠᠵᠠᠷ ᠢ᠋ ᠰᠣᠩᠭᠣᠵᠤ ᠰᠠᠭᠤᠷᠢᠰᠢᠭᠰᠠᠨ ᠦᠦᠰᠢᠨ ᠨᠣᠶᠠᠨ ᠤ᠋ ᠱᠠᠩ ᠣᠷᠳᠣᠨ ᠨᠢ ᠡᠨᠡ ᠬᠦ᠌ ᠴᠠᠢᠳᠠᠮ ᠤ᠋ᠨ ᠪᠠᠷᠠᠭᠤᠨ ᠰᠢᠪᠠᠷ ᠳᠣᠪᠣᠴᠠᠭ ᠲᠤ᠌ ᠪᠣᠢ᠃ ᠡᠨᠡ ᠪᠣᠯ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠪᠣᠯᠤᠨᠠ᠃ ᠥᠨᠥ ᠰᠦᠨᠳᠡᠷᠯᠡᠭᠰᠡᠨ ᠡᠪᠦᠭᠡᠨ ᠬᠠᠢᠯᠠᠰᠤ ᠶ᠋ᠢᠨ ᠰᠠᠭᠤᠷᠢᠰᠢᠯ ᠳᠡᠭᠡᠷᠡ ᠪᠠᠲᠤᠴᠢᠯᠠᠭᠤ ᠭᠡᠳᠡᠭ ᠡᠷᠦᠬᠡ ᠰᠠᠭᠤᠭᠠ ᠪᠢᠯᠡ᠃
1928 ᠣᠨ ᠤ᠋ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠮᠣᠷᠢᠲᠤ ᠶᠠᠪᠠᠭᠠᠨ2000 ᠰᠢᠬᠠᠮ ᠴᠡᠷᠢᠭ ᠭᠤᠷᠪᠠᠨ ᠵᠠᠮ ᠬᠤᠪᠢᠶᠠᠵᠤ ᠤᠮᠠᠷᠠᠰᠢ ᠳᠣᠪᠲᠣᠯᠬᠤ ᠳ᠋ᠠᠭᠠᠨ ᠳᠤᠮᠳᠠ ᠵᠠᠮ ᠤ᠋ᠨ ᠴᠡᠷᠢᠭ ᠨᠢ ᠵᠠᠮ ᠲᠤᠷᠰᠢ ᠬᠣᠭᠣᠰᠣᠷᠠᠲᠠᠯᠠ ᠳᠡᠭᠡᠷᠡᠮᠳᠡᠭᠰᠡᠭᠡᠷ ᠦᠦᠰᠢᠨ ᠨᠣᠶᠠᠨ ᠱᠠᠩ ᠲᠠᠮᠠᠭᠠᠯᠠᠢ ᠳ᠋ᠤ᠌ ᠬᠦᠷᠴᠦ᠂ ᠡᠨᠳᠡᠬᠢ ᠬᠠᠷᠠᠭᠤᠯ ᠮᠠᠨᠠᠭᠠ ᠬᠣᠷᠢᠭᠯᠠᠯᠲᠠ ᠰᠡᠷᠭᠡᠢᠯᠡᠯᠲᠡ ᠪᠡᠨ ᠲᠤᠢᠯ ᠢ᠋ᠶ᠋ᠠᠷ ᠴᠢᠩᠭᠠᠯᠠᠨ ᠬᠥᠬᠡ ᠲᠩᠷᠢ ᠴᠠᠭᠠᠨ ᠨᠠᠷᠠ ᠲᠠᠢ ᠢᠷᠭᠡᠨ ᠤᠯᠤᠰ ᠤ᠋ᠨ ᠲᠤᠭ ᠢ᠋ᠶ᠋ᠠᠨ ᠮᠠᠨᠳᠤᠭᠤᠯᠵᠤ ᠲᠡᠢᠨ ᠢ᠋ ᠵᠢᠯᠣᠭᠣᠳᠬᠤ ᠶᠡᠷᠦᠩᠬᠡᠢ ᠱᠲ᠋ᠠᠪ ᠤ᠋ᠨ ᠭᠠᠵᠠᠷ ᠢ᠋ᠶ᠋ᠠᠨ ᠪᠠᠢᠷᠢᠯᠠᠭᠤᠯᠤᠨ ᠵᠢᠩ ᠶᠤᠸᠠᠢ ᠰᠢᠦ ᠰᠸᠯᠢᠩ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠡᠨᠳᠡ ᠢᠷᠡᠵᠦ ᠡᠨᠡ ᠤᠳᠠᠭᠠ ᠶ᠋ᠢᠨ ᠪᠠᠢᠯᠳᠤᠭᠠᠨ ᠢ᠋ ᠵᠢᠯᠣᠭᠣᠳᠤᠭᠰᠠᠨ ᠪᠠᠢᠨᠠ᠃ ᠵᠢᠩ ᠶᠤᠸᠠᠢ ᠰᠢᠦ ᠪᠣᠯ ᠢᠷᠭᠡᠨ ᠤᠯᠤᠰ ᠠ᠋ᠴᠠ ᠲᠤᠰᠬᠠᠢᠯᠠᠨ ᠰᠧᠴᠤᠸᠠᠨ ᠠ᠋ᠴᠠ ᠱᠠᠨᠰᠢ ᠳ᠋ᠤ᠌ ᠰᠢᠯᠵᠢᠭᠦᠯᠦᠨ ᠲᠡᠮᠡᠭᠡᠲᠦ(ᠢᠦᠢ ᠯᠢᠨ) ᠳ᠋ᠦ᠍ ᠰᠠᠭᠤᠯᠭᠠᠨ ᠳ᠋ᠢᠩ ᠪᠧᠢ ᠰᠢᠶᠠᠨ ᠠ᠋ᠴᠠ ᠹᠦ ᠭᠦᠸᠧ ᠰᠢᠶᠠᠨ ᠬᠦᠷᠲᠡᠯᠡᠬᠢ ᠱᠠᠨᠪᠸᠢ ᠶ᠋ᠢᠨ ᠠᠷᠪᠠᠨ ᠬᠣᠶᠠᠷ ᠰᠢᠶᠠᠨ ᠬᠣᠲᠠ ᠶ᠋ᠢᠨ ᠴᠡᠷᠢᠭ ᠵᠠᠰᠠᠭ ᠤ᠋ᠨ ᠡᠷᠬᠡ ᠶ᠋ᠢ ᠪᠦᠭᠦᠳᠡ ᠵᠠᠬᠢᠷᠤᠭᠤᠯᠤᠭᠰᠠᠨ ᠲᠦᠩᠯᠢᠩ(ᠬᠥᠮᠦᠰ ᠲᠡᠭᠦᠨ ᠢ᠋ ᠵᠢᠩ ᠲᠦᠩᠯᠢᠩ ᠭᠡᠳᠡᠭ) ᠪᠣᠯᠤᠨᠠ᠃ ᠲᠡᠷᠡ ᠣᠯᠠᠨ ᠤᠳᠠᠭᠠ ᠴᠡᠷᠢᠭ ᠲᠣᠮᠢᠯᠠᠨ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠲᠡᠢᠨ ᠦ᠌ ᠱᠦᠭᠦᠷᠳᠡᠯᠲᠡ ᠬᠢᠭᠰᠡᠨ ᠪᠣᠯᠪᠠᠴᠤ ᠪᠦᠷ ᠢᠯᠠᠭᠳᠠᠭᠰᠠᠨ ᠲᠤᠯᠠ ᠡᠨᠡ ᠤᠳᠠᠭᠠ ᠲᠤᠰᠬᠠᠢ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠳᠠᠢᠴᠢᠯᠠᠨ ᠡᠮᠦᠨᠡ ᠹᠷᠣᠨᠲ ᠲᠤ᠌ ᠢᠷᠡᠵᠦ ᠲᠠᠮᠠᠭᠠᠯᠠᠢ ᠳ᠋ᠤ᠌ ᠰᠠᠷᠠ ᠰᠢᠬᠠᠮ ᠰᠠᠭᠤᠭᠰᠠᠨ ᠭᠡᠨᠡ᠃
ᠡᠨᠡ ᠤᠳᠠᠭᠠᠨ ᠤ᠋ ᠱᠦᠭᠦᠷᠳᠡᠯᠲᠡ ᠨᠢ ᠠᠯᠢ ᠴᠤ᠌ ᠤᠳᠠᠭᠠ ᠠ᠋ᠴᠠ ᠶᠡᠬᠡ ᠪᠠᠢᠵᠤ᠂ ᠮᠣᠷᠢᠲᠤ ᠶᠠᠪᠠᠭᠠᠨ ᠴᠡᠷᠢᠭ ᠨᠢ ᠲᠣᠭᠠ ᠪᠠᠷ ᠬᠠᠮᠤᠭ ᠠᠷᠪᠢᠨ ᠪᠥᠭᠡᠳ ᠶᠠᠪᠠᠭᠠᠨ ᠫᠤᠤ᠂ ᠳᠡᠯᠪᠡᠷᠡᠬᠦ ᠮᠢᠨᠠ᠂ ᠭᠠᠷᠨᠠᠲᠠ᠂ ᠬᠦᠨᠳᠦ ᠬᠥᠩᠭᠡᠨ ᠵᠢᠴᠢᠶᠠᠩ᠂ ᠦᠬᠡᠷ ᠫᠣᠤᠲᠤ ᠴᠡᠷᠢᠭ ᠵᠡᠷᠭᠡ ᠣᠯᠠᠨ ᠶᠠᠩᠵᠤ ᠶ᠋ᠢᠨ ᠵᠡᠪᠰᠡᠭ ᠢ᠋ᠶ᠋ᠡᠷ ᠵᠡᠪᠰᠡᠭᠯᠡᠭᠰᠡᠨ ᠬᠤᠷᠴᠠ ᠴᠡᠷᠢᠭ ᠪᠠᠢᠯᠠ᠃ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠡᠴᠡ ᠡᠨᠡ ᠤᠳᠠᠭᠠ ᠶ᠋ᠢᠨ ᠲᠡᠢᠨ ᠳ᠋ᠦ᠍ ᠣᠷᠣᠯᠴᠠᠭᠰᠠᠨ ᠨᠢ ᠬᠡᠳᠦᠨ ᠯᠢᠶᠠᠨ ᠮᠣᠷᠢᠲᠤ ᠴᠡᠷᠢᠭ ᠪᠣᠯᠪᠠᠴᠤ ᠬᠥᠮᠦᠨ ᠦ᠌ ᠲᠣᠭᠠ ᠨᠢ ᠳᠥᠩᠭᠡᠵᠦ ᠵᠠᠭᠤ ᠭᠠᠷᠤᠢᠬᠠᠨ ᠪᠠᠢᠵᠤ ᠡᠨᠡ ᠬᠦ᠌ ᠬᠤᠷᠴᠠ ᠰᠦᠷᠡᠬᠡᠢ ᠢᠷᠭᠡᠨ ᠦ᠌ ᠴᠡᠷᠢᠭ ᠢ᠋ ᠬᠣᠷᠢᠭᠯᠠᠨ ᠡᠰᠡᠷᠭᠦᠴᠡᠬᠦ ᠡᠭᠦᠷᠭᠡ ᠨᠢ ᠲᠤᠩ ᠬᠦᠨᠳᠦ ᠨᠣᠴᠢᠲᠠᠢ ᠪᠣᠯᠵᠠᠢ᠃
ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠡᠨᠳᠡ ᠲᠡᠨᠳᠡ ᠡᠴᠡ ᠳᠡᠭᠡᠷᠡᠮᠳᠡᠵᠦ ᠠᠪᠤᠭᠰᠠᠨ ᠮᠠᠯᠴᠢᠳ ᠤ᠋ᠨ ᠥᠪ ᠬᠥᠷᠥᠩᠭᠡ ᠶ᠋ᠢ ᠬᠡᠳᠦᠨ ᠴᠥᠷᠬᠡᠯᠡᠭᠡ ᠲᠡᠮᠡᠭᠡ ᠪᠡᠷ ᠡᠮᠦᠨᠡᠰᠢ ᠲᠡᠮᠡᠭᠡᠲᠦ ᠵᠦᠭ ᠵᠥᠭᠡᠭᠡᠪᠦᠷᠢᠯᠡᠭᠰᠡᠨ ᠭᠡᠳᠡᠭ᠃
ᠵᠢᠩ ᠶᠤᠸᠠᠢ ᠰᠢᠦ᠄《ᠮᠠᠨ ᠤ᠋ ᠴᠡᠷᠢᠭ ᠰᠢᠨᠡᠯᠡᠮᠡ ᠶ᠋ᠢᠨ ᠭᠣᠣᠯ ᠰᠠᠭᠤᠷᠢᠰᠢᠯ— ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ ᠶ᠋ᠢ ᠡᠵᠡᠯᠡᠵᠦ᠂ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠢ᠋ ᠪᠠᠰᠠ ᠡᠵᠡᠯᠡᠴᠢᠬᠡᠯᠡ᠃ ᠪᠢᠳᠡ ᠲᠣᠬᠢᠶᠠᠯ ᠢ᠋ ᠠᠰᠢᠭᠯᠠᠵᠤ ᠤᠮᠠᠷᠠᠰᠢ ᠳᠠᠭᠠᠷᠢᠯᠲᠠ ᠬᠢᠵᠦ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ᠂ ᠬᠥᠬᠡᠲᠣᠯᠣᠭᠠᠢ ᠶ᠋ᠢᠨ ᠳᠠᠪᠤᠰᠤᠨ ᠨᠠᠭᠤᠷ᠂ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ᠂ ᠮᠠᠩᠬᠠᠲᠤ ᠶ᠋ᠢᠨ ᠨᠠᠭᠤᠷ ᠢ᠋ ᠡᠷᠬᠡᠰᠢᠶᠡᠯ ᠳ᠋ᠡᠭᠡᠨ ᠣᠷᠣᠭᠤᠯᠴᠢᠬᠠᠪᠠᠯ ᠳᠠᠷᠤᠢ ᠦᠦᠰᠢᠨ ᠬᠣᠰᠢᠭᠤ ᠶ᠋ᠢ ᠡᠵᠡᠮᠰᠢᠴᠢᠬᠡᠨᠡ》 ᠭᠡᠵᠦ ᠶᠠᠷᠢᠵᠤ ᠪᠠᠢᠵᠠᠢ᠃ ᠡᠨᠡ ᠨᠢ ᠶᠠᠪᠤᠭᠰᠠᠭᠠᠷ ᠪᠠᠢᠭᠠᠳ《ᠮᠠᠭᠤ ᠫᠤᠤᠴᠢ ᠶ᠋ᠢᠨ ᠰᠠᠨᠠᠭᠠ ᠴᠠᠭᠠᠳᠤ ᠵᠠᠬᠠ ᠶ᠋ᠢᠨ ᠣᠭᠣᠨᠣ ᠭᠡᠭᠰᠡᠭᠡᠷ ᠬᠠᠷᠢᠨ ᠰᠢᠷᠠᠭᠴᠢᠨ ᠴᠤ᠌ ᠦᠭᠡᠢ ᠪᠣᠯᠴᠢᠬᠠᠬᠤ》 ᠶ᠋ᠢ ᠵᠢᠩ ᠲᠦᠩᠯᠢᠩ ᠶᠡᠷᠦ ᠪᠣᠳᠣᠵᠤ ᠣᠯᠤᠭᠠᠳᠤᠢ ᠪᠠᠢᠭᠠ᠃ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠨᠤᠲᠤᠭ ᠤᠰᠤ᠂ ᠮᠠᠯᠴᠢᠨ ᠲᠦᠮᠡᠨ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠬᠤ ᠲᠡᠢᠨ ᠳ᠋ᠦ᠍ᠷ ᠤᠷᠠᠨ ᠠᠷᠭᠠ ᠪᠠᠷ ᠳᠠᠭᠠᠷᠢᠯᠲᠠ ᠬᠢᠵᠦ ᠴᠥᠭᠡᠬᠡᠨ ᠢ᠋ᠶ᠋ᠡᠷ ᠣᠯᠠᠨ ᠢ᠋ ᠢᠯᠠᠵᠤ ᠶᠠᠪᠤᠭᠰᠠᠨ ᠬᠠᠰᠢᠷ ᠡᠷᠡᠴᠦᠳ ᠪᠣᠯᠬᠣᠷ ᠬᠠᠷᠢᠨ ᠡᠰᠡᠷᠭᠦᠦ ᠡᠲᠡᠭᠡᠳ ᠢ᠋ᠶ᠋ᠡᠨ《ᠠᠢᠯ ᠤ᠋ᠨ ᠲᠣᠭᠰᠢᠨ ᠨᠣᠬᠠᠢ ᠶ᠋ᠢᠨ ᠬᠢᠷᠢᠲᠡᠢ ᠴᠦ᠍ ᠦᠵᠡᠳᠡᠭ ᠦᠭᠡᠢ》᠂ ᠬᠡᠳᠦ ᠬᠡᠳᠦ ᠪᠡᠷ ᠢ᠋ᠶ᠋ᠡᠨ ᠰᠡᠷᠪᠡᠩ ᠪᠤᠷᠭᠠᠰᠤᠨ ᠳᠤᠮᠳᠠᠭᠤᠷ ᠰᠢᠷᠭᠤᠵᠤ ᠪᠠᠢᠭᠠᠳ ᠡᠨᠳᠡ ᠲᠡᠨᠳᠡ ᠡᠴᠡ ᠨᠢ ᠬᠡᠳᠦ ᠴᠣᠷᠭᠢᠴᠢᠬᠠᠪᠠᠯ ᠡᠷᠭᠢᠭᠡᠳ ᠥᠭᠡᠷᠡ ᠵᠦᠭ ᠡᠴᠡ ᠨᠢ ᠪᠠᠰᠠ ᠭᠠᠯᠯᠠᠨᠠ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠵᠥᠪᠬᠡᠨ ᠲᠠᠯᠠ ᠭᠠᠵᠠᠷ ᠢ᠋ᠶ᠋ᠠᠷ ᠶᠠᠪᠤᠬᠤ ᠠ᠋ᠴᠠ ᠪᠢᠰᠢ ᠪᠠᠯᠠᠷ ᠪᠤᠷᠭᠠᠰᠤᠨ ᠳᠥᠭᠥᠮ ᠳᠣᠲᠣᠷᠠ ᠣᠷᠣᠵᠤ ᠴᠢᠳᠠᠳᠠᠭ ᠦᠭᠡᠢ᠂ ᠪᠤᠷᠭᠠᠰᠤᠨ ᠳᠣᠲᠣᠷᠠᠬᠢ ᠰᠢᠨᠡᠯᠡᠮᠡ ᠶ᠋ᠢᠨ ᠨᠢᠭᠤᠭᠳᠠᠮᠠᠯ ᠴᠡᠷᠢᠭ ᠲᠦ᠍ ᠭᠡᠨᠡᠳᠲᠡ ᠬᠣᠮᠣᠷᠣᠭᠳᠠᠵᠤ ᠠᠯᠠᠭᠳᠠᠬᠤ ᠠ᠋ᠴᠠ ᠦᠬᠦᠨ ᠠᠶᠤᠵᠠᠭᠠᠳᠠᠭ ᠭᠡᠨᠡ᠃ ᠲᠡᠳᠡ ᠶᠡᠷᠦ ᠨᠢ ᠴᠥᠭᠡᠬᠡᠨ ᠢ᠋ᠶ᠋ᠡᠷ ᠶᠠᠪᠤᠵᠤ ᠴᠢᠳᠠᠳᠠᠭ ᠦᠭᠡᠢ ᠪᠠᠢᠵᠠᠢ᠃
ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠨᠤᠲᠤᠭ ᠤᠰᠤᠨ ᠤ᠋ ᠪᠠᠨ ᠪᠠᠯᠠᠷ ᠡᠯᠡᠰᠦᠨ ᠳ᠋ᠦ᠍ ᠫᠠᠷᠲ᠋ᠢᠽᠠᠨ ᠲᠡᠢᠨ ᠬᠢᠵᠦ᠂ ᠨᠢᠭᠡ ᠪᠦᠯᠦᠭ ᠰᠢᠯᠢᠳᠡᠭ ᠴᠡᠷᠢᠭ ᠨᠢ ᠬᠣᠢᠲᠤ ᠲᠠᠯᠠ ᠠ᠋ᠴᠠ ᠨᠢ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠤᠷᠤᠭᠰᠢᠯᠠᠬᠤ ᠶ᠋ᠢ ᠬᠣᠷᠢᠭᠯᠠᠨ ᠡᠰᠡᠷᠭᠦᠴᠡᠪᠡ᠃ ᠡᠭᠦᠨ ᠦ᠌ ᠳᠠᠭᠠᠤ ᠰᠢᠨᠠᠯᠠᠮᠠ ᠪᠦᠬᠦ ᠬᠤᠰᠢᠭᠤᠨ ᠤ᠋ ᠨᠠᠮ ᠤ᠋ᠨ ᠡᠭᠦᠷ ᠦ᠋ᠳ ᠲᠦ᠍ ᠵᠠᠬᠢᠶᠠ ᠵᠠᠷᠯᠢᠭ ᠶᠠᠪᠤᠭᠤᠯᠵᠤ᠂ ᠠᠩᠴᠢᠳ ᠭᠠᠯ ᠫᠤᠤ ᠪᠠᠨ ᠡᠭᠦᠷᠴᠦ᠂ ᠵᠠᠯᠠᠭᠤᠴᠤᠳ ᠨᠢᠵᠡᠭᠡᠳ ᠡᠳᠦᠷ ᠦ᠋ᠨ ᠬᠠᠭᠤᠷᠠᠢ ᠬᠦᠨᠡᠰᠦ ᠪᠣᠯᠤᠨ ᠠᠶᠠᠨ ᠵᠠᠮ ᠳ᠋ᠤ᠌ ᠬᠡᠷᠡᠭᠯᠡᠳᠡᠭ ᠪᠢᠴᠢᠬᠠᠨ ᠭᠠᠤᠯᠢᠨ ᠲᠣᠭᠣᠭᠠ ᠰᠢᠨᠠᠭᠠ ᠲᠠᠢ ᠰᠠᠢᠨ ᠤᠨᠤᠭᠠ ᠮᠣᠷᠢ ᠤᠨᠤᠭᠠᠳ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠳᠠᠷᠤᠢ ᠲᠦᠷᠭᠡᠨ ᠢᠷᠡᠰᠦᠭᠡᠢ ᠭᠡᠮᠡᠨ ᠳᠠᠭᠤᠳᠠᠭᠰᠠᠨ ᠪᠠᠢᠨᠠ᠃ ᠲᠡᠳᠡ ᠢᠷᠡᠭᠰᠡᠨ ᠦ᠌ ᠳᠠᠷᠠᠭᠠ ᠰᠢᠨᠠᠯᠠᠮᠠ ᠶ᠋ᠢᠨ ᠲᠣᠬᠢᠷᠠᠭᠤᠯᠭᠠ ᠪᠠᠷ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠡᠴᠡ ᠳᠤᠲᠠᠭᠠᠵᠤ ᠨᠢᠭᠤᠵᠤ ᠶᠠᠪᠤᠭᠠ ᠮᠠᠯᠴᠢᠳ ᠲᠠᠢ ᠬᠠᠮᠲᠤᠷᠠᠭᠤᠯᠵᠤ ᠡᠳᠦᠷ ᠨᠢ ᠪᠦᠯᠦᠭ ᠪᠦᠯᠦᠭ ᠢ᠋ᠶ᠋ᠡᠷ ᠮᠣᠷᠢ ᠪᠠᠨ ᠤᠨᠤᠵᠤ ᠰᠡᠷᠪᠡᠩ ᠮᠠᠩᠬᠠᠨ ᠤ᠋ ᠣᠷᠣᠢ ᠪᠠᠷ ᠡᠷᠭᠢᠴᠡᠵᠦ᠂ ᠪᠠᠰᠠ ᠵᠠᠷᠢᠮ ᠨᠢ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠭᠡᠨᠡᠳᠡᠭᠦᠯᠦᠨ ᠬᠠᠷᠪᠤᠵᠤ ᠪᠠᠢᠯᠠ᠃ ᠲᠡᠳᠡ ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠵᠡᠭᠦᠨ ᠬᠣᠢᠨᠠ ᠰᠢᠷᠠ ᠵᠦᠯᠭᠡ᠂ ᠣᠩᠭᠣᠨ ᠪᠠᠯᠠᠷ᠂ ᠪᠠᠶᠠᠷ ᠤ᠋ᠨ ᠬᠣᠣ᠂ ᠳᠡᠯᠭᠡᠷ ᠬᠤᠷᠠᠬᠤ ᠶ᠋ᠢᠨ ᠣᠪᠣᠭᠠ᠂ ᠰᠦᠮᠡ ᠶ᠋ᠢᠨ ᠵᠠᠳᠠᠭᠠᠢ ᠶ᠋ᠢᠨ ᠵᠡᠭᠦᠨ ᠰᠡᠷᠪᠡᠩ᠂ ᠰᠦᠯᠳᠡ ᠶ᠋ᠢᠨ ᠣᠷᠣᠢ᠂ ᠲᠠᠮᠠᠭᠠᠯᠠᠢ ᠶ᠋ᠢᠨ ᠪᠠᠷᠠᠭᠤᠨ ᠰᠢᠯᠢ᠂ ᠴᠠᠭᠠᠨᠲᠠᠯᠠ᠂ ᠪᠠᠢᠬᠤᠢ ᠶ᠋ᠢᠨ ᠣᠷᠣᠢ᠂ ᠲᠠᠮᠠᠭᠠᠯᠠᠢ ᠶ᠋ᠢᠨ ᠬᠣᠢᠲᠤ ᠪᠠᠯᠠᠷ᠂ ᠬᠤᠩᠨᠠᠢ ᠶ᠋ᠢᠨ ᠣᠷᠣᠢ ᠵᠡᠷᠭᠡ ᠥᠨᠳᠥᠷᠯᠢᠭ ᠭᠠᠵᠠᠷ ᠢ᠋ᠶ᠋ᠠᠷ ᠡᠷᠭᠢᠨ ᠲᠣᠭᠣᠷᠢᠨ ᠵᠠᠭᠤ ᠭᠠᠷᠤᠢ ᠭᠠᠵᠠᠷ ᠤ᠋ᠨ ᠤᠷᠲᠤ ᠱᠤᠭᠤᠮ ᠳ᠋ᠤ᠌ ᠲᠠᠯᠠ ᠰᠠᠷᠠᠨ ᠬᠡᠯᠪᠡᠷᠢᠲᠡᠢ ᠪᠡᠷ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠬᠣᠷᠢᠭᠯᠠᠨ ᠪᠦᠰᠡᠯᠡᠪᠡ᠃ ᠰᠥᠨᠢ ᠪᠣᠯᠤᠭᠰᠠᠭᠠᠷ ᠡᠯᠪᠡᠭ ᠶᠡᠬᠡ ᠬᠠᠭᠤᠷᠠᠢ ᠪᠤᠷᠭᠠᠰᠤ ᠰᠢᠪᠠᠭ ᠢ᠋ ᠣᠪᠣᠭᠠᠯᠠᠵᠤ ᠲᠦᠯᠡᠭᠡᠳ ᠳᠦᠷᠡᠯᠵᠡᠭᠰᠡᠨ ᠭᠠᠯ ᠨᠢ ᠠᠯᠤᠰ ᠠ᠋ᠴᠠ ᠦᠵᠡᠬᠦ ᠳ᠋ᠦ᠍ ᠲᠤᠩᠭᠠᠯᠠᠭ ᠰᠥᠨᠢ ᠶ᠋ᠢᠨ ᠣᠳᠣᠳ ᠰᠢᠭ᠋ ᠭᠢᠯᠠᠯᠵᠠᠵᠤ ᠹᠣᠰᠹᠣᠷ ᠤ᠋ᠨ ᠭᠠᠯ ᠰᠢᠭ᠋ ᠤᠯᠠᠯᠵᠠᠨᠠ᠃《ᠣᠯᠠᠨ ᠭᠠᠵᠠᠷ ᠠ᠋ᠴᠠ ᠢᠷᠡᠭᠰᠡᠨ ᠠᠩᠴᠢᠳ ᠬᠥᠳᠡᠭᠡ ᠶ᠋ᠢᠨ ᠰᠢᠪᠠᠠᠭ ᠪᠤᠷᠭᠠᠰᠤᠨ ᠵᠠᠪᠰᠠᠷ ᠢ᠋ᠶ᠋ᠠᠷ ᠭᠤᠷᠭᠤᠤᠯ ᠲᠠᠤᠯᠠᠢ ᠠᠩᠨᠠᠵᠤ ᠪᠠᠢᠭᠰᠠᠨ ᠠ᠋ᠴᠠ ᠪᠠᠨ ᠪᠠᠢᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠳ᠋ᠤ᠌ ᠳ᠋ᠤᠯᠢ ᠳᠡᠭᠡᠷᠡᠮ ᠢ᠋ ᠠᠯᠠᠵᠤ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠳ᠋ᠠᠭᠠᠨ ᠣᠮᠣᠭᠰᠢᠨ ᠪᠠᠶᠠᠷᠯᠠᠵᠤ ᠢᠳᠡᠰᠢ ᠬᠦᠨᠡᠰᠦ ᠨᠢ ᠪᠠᠷᠠᠭᠳᠠᠭᠰᠠᠨ ᠴᠤ᠌ ᠪᠠᠢᠯᠳᠤᠭᠠᠨ ᠤ᠋ ᠲᠠᠯᠠᠪᠠᠢ ᠠ᠋ᠴᠠ ᠭᠡᠷ ᠲᠡᠭᠡᠨ ᠬᠠᠷᠢᠬᠤ ᠳᠤᠷᠠ ᠦᠭᠡᠢ ᠪᠠᠢᠭᠰᠠᠨ ᠰᠢᠦ ᠳᠡ᠁ 》 ᠭᠡᠵᠦ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠲᠦ᠍ ᠶᠠᠪᠤᠵᠤ ᠪᠠᠢᠭᠰᠠᠨ ᠰᠠᠷᠠᠭᠤᠯᠨᠤᠲᠤᠭ ᠤ᠋ᠨ ᠴᠡᠩᠬᠡᠯᠡᠣᠪᠣᠭᠠ ᠶ᠋ᠢᠨ ᠰᠠᠢᠨᠵᠢᠷᠭᠠᠯ ᠨᠠᠰᠤᠲᠠᠨ ᠰᠣᠨᠢᠨ ᠦᠯᠢᠭᠡᠷ ᠪᠣᠯᠭᠠᠨ ᠬᠡᠯᠡᠵᠦ ᠪᠠᠢᠭᠰᠠᠨ ᠪᠢᠯᠡ᠃
ᠲᠡᠳᠡ ᠵᠠᠷᠢᠮ ᠦᠶᠡ ᠳ᠋ᠦ᠍ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠢᠬᠤ ᠶ᠋ᠢ ᠨᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠰᠠᠢᠨ ᠠᠭᠲᠠ ᠬᠤᠷᠴᠠ ᠴᠡᠷᠢᠭ ᠢ᠋ᠶ᠋ᠡᠷ ᠭᠱᠠᠨ ᠵᠠᠭᠤᠷᠠ ᠴᠥᠮᠥᠷᠡᠨ ᠣᠷᠣᠵᠤ ᠰᠢᠷᠦᠭᠦᠨ ᠳᠠᠭᠠᠷᠢᠵᠤ ᠠᠯᠠᠵᠤ ᠰᠢᠷᠬᠠᠲᠤᠭᠤᠯᠴᠢᠬᠠᠭᠠᠳ ᠪᠤᠴᠠᠭᠠᠳ ᠢᠷᠡᠳᠡᠭ᠃ ᠢᠩᠭᠢᠵᠦ ᠴᠡᠷᠢᠭ ᠠᠷᠠᠳ ᠠᠩᠴᠢᠨ ᠬᠠᠮᠲᠤᠷᠠᠭᠰᠠᠨ ᠠᠷᠠᠳ ᠤ᠋ᠨ ᠲᠡᠢᠨ ᠰᠠᠷᠠ ᠰᠢᠬᠠᠮ ᠶᠠᠪᠤᠭᠳᠠᠵᠤ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠰᠢᠬᠠᠮᠳᠠᠭᠤᠯᠤᠨ ᠰᠦᠷᠳᠡᠭᠦᠯᠦᠭᠡᠳ ᠡᠳᠦᠷ ᠰᠥᠨᠢ ᠦᠭᠡᠢ ᠲᠥᠭᠡᠷᠢᠭᠳᠡᠭᠦᠯᠵᠦ᠂ ᠲᠡᠳᠡᠨ ᠦ᠌ ᠦᠷᠭᠦᠯᠵᠢᠯᠡᠨ ᠤᠷᠤᠭᠰᠢᠯᠠᠬᠤ ᠶ᠋ᠢ ᠨᠢ ᠬᠣᠷᠢᠭᠯᠠᠵᠤ ᠴᠢᠳᠠᠭᠰᠠᠨ ᠪᠠᠢᠨᠠ᠃
— — — —
① ᠲᠤᠰ ᠠᠭᠤᠯᠭᠠ ᠶ᠋ᠢ1960 ᠣᠨ ᠳ᠋ᠤ᠌ ᠰᠠᠢᠨᠵᠢᠷᠭᠠᠯ ᠨᠠᠰᠤᠲᠠᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠪᠡ᠃
12. ᠰᠦᠮᠡ ᠶ᠋ᠢᠨ ᠵᠠᠳᠠᠭᠠᠢ ᠶ᠋ᠢᠨ ᠪᠠᠢᠯᠳᠤᠭᠠᠨ
ᠰᠢᠨᠠᠯᠠᠮᠠ ᠶ᠋ᠢᠨ ᠭᠡᠷ ᠡᠴᠡ ᠵᠡᠭᠦᠨ ᠬᠣᠢᠨᠠ ᠪᠠᠭᠠ ᠵᠡᠭᠡᠷᠡ ᠲᠠᠰᠢᠭᠰᠠᠨ ᠵᠢᠷᠭᠢᠨᠲᠠᠯᠠ ᠶ᠋ᠢᠨ ᠵᠡᠭᠡᠷᠭᠡᠨᠡ ᠤᠷᠭᠤᠭᠰᠠᠨ ᠪᠣᠷᠯᠣᠨ ᠰᠢᠯᠢ ᠨᠢ ᠬᠡᠵᠢᠶᠡᠳᠡ ᠵᠡᠷᠭᠡᠯᠭᠡᠨ ᠲᠠᠲᠠᠭᠰᠠᠨ ᠪᠠᠢᠭᠠᠯᠢ ᠶ᠋ᠢᠨ ᠰᠣᠨᠢᠬᠠᠨ ᠦᠵᠡᠮᠵᠢ ᠶ᠋ᠢ ᠬᠥᠮᠦᠰ ᠦ᠋ᠨ ᠨᠢᠳᠦᠨ ᠳ᠋ᠦ᠍ ᠲᠣᠷᠭᠠᠮᠰᠤᠭ ᠰᠠᠢᠬᠠᠨ ᠢᠯᠡᠷᠡᠭᠦᠯᠳᠡᠭ ᠪᠢᠯᠡ᠃ ᠲᠡᠭᠦᠨ ᠦ᠌ ᠡᠩᠭᠡᠷ ᠲᠡᠬᠢ ᠨᠢᠭᠡᠨ ᠪᠢᠴᠢᠬᠠᠨ ᠰᠦᠮᠡ ᠨᠢ《ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ》 ᠭᠡᠮᠡᠨ ᠨᠡᠷᠡᠯᠡᠭᠳᠡᠪᠡ᠃ ᠪᠤᠷᠯᠤᠨ ᠰᠢᠯᠢ ᠶ᠋ᠢᠨ ᠵᠡᠭᠦᠨ ᠳᠣᠣᠷᠠ ᠪᠠᠢᠭᠠ ᠲᠦᠭᠦᠬᠡᠢ ᠬᠤᠵᠢᠷ ᠤ᠋ᠨ ᠠᠭᠤᠯᠠᠭᠳᠠᠴᠠ ᠪᠠᠷ ᠪᠠᠭᠠ ᠴᠡᠪᠡᠷ ᠳᠠᠪᠤᠰᠤᠨ ᠨᠠᠭᠤᠷ ᠮᠠᠯᠴᠢᠨ ᠲᠦᠮᠡᠨ ᠦ᠌ ᠠᠵᠤ ᠠᠮᠢᠳᠤᠷᠠᠯ ᠳ᠋ᠤ᠌ ᠲᠦᠮᠡᠨ ᠬᠡᠷᠡᠭᠴᠡᠭᠡᠲᠦ《ᠮᠠᠩᠬᠠᠲᠤ ᠶ᠋ᠢᠨ ᠨᠠᠭᠤᠷ》 ᠨᠢ ᠲᠣᠯᠢ ᠮᠡᠲᠦ ᠬᠠᠷᠠᠭᠳᠠᠨᠠ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠶ᠋ᠢᠨ ᠪᠦᠳᠦᠭᠦᠯᠢᠭ ᠬᠣᠴᠣᠷᠤᠩᠭᠤᠢ ᠪᠠᠢᠳᠠᠯ ᠳᠣᠣᠷᠠ ᠴᠠᠭᠠᠨ ᠬᠡᠷᠡᠮ ᠡᠴᠡ ᠡᠮᠦᠨᠡᠬᠢ ᠬᠥᠮᠦᠰ ᠪᠣᠯᠤᠨ ᠵᠢᠩ ᠲᠦᠩᠯᠢᠩ ᠳᠠᠪᠤᠰᠤᠨ ᠨᠠᠭᠤᠷ ᠲᠤ᠌ ᠨᠢᠳᠦ ᠤᠯᠠᠢᠵᠤ ᠬᠠᠷᠠᠴᠠ ᠪᠠᠨ ᠲᠥᠪᠯᠡᠷᠡᠭᠦᠯᠦᠭᠰᠡᠨ ᠪᠠᠢᠯᠲᠠᠢ⁈
ᠡᠨᠡ ᠦᠶᠡ ᠳ᠋ᠦ᠍ ᠰᠢᠨᠠᠯᠠᠮᠠ ᠴᠡᠷᠢᠭ ᠠᠷᠠᠳ ᠢ᠋ᠶ᠋ᠠᠨ ᠶᠡᠷᠦᠩᠬᠡᠢᠯᠡᠨ ᠵᠢᠯᠣᠭᠣᠳᠴᠤ᠂ ᠨᠢᠭᠡ ᠪᠦᠯᠦᠭ ᠴᠡᠷᠢᠭ ᠢ᠋ᠶ᠋ᠡᠨ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠤᠬᠤᠷᠢᠭᠤᠯᠵᠤ ᠴᠡᠷᠢᠭ ᠮᠣᠷᠢ ᠪᠠᠨ ᠡᠭᠡᠯᠵᠢᠶᠡ ᠪᠡᠷ ᠠᠮᠠᠷᠠᠭᠤᠯᠳᠠᠭ ᠪᠠᠢᠵᠠᠢ᠃ ᠨᠢᠭᠡᠨ ᠡᠳᠦᠷ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠤ᠋ ᠯᠢᠶᠡᠨᠵᠠᠩ ᠵᠠᠮᠢᠶᠠᠨᠵᠠᠪ ᠤ᠋ᠨ ᠲᠣᠮᠢᠯᠠᠯᠲᠠ ᠪᠠᠷ ᠴᠢᠨᠰᠠᠩ ᠵᠡᠷᠭᠡ ᠭᠤᠷᠪᠠᠨ ᠴᠡᠷᠢᠭ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠵᠡᠭᠦᠨ ᠡᠮᠦᠨᠡᠰᠢ ᠮᠣᠷᠳᠠᠨ ᠲᠦᠷᠦᠭᠦᠦ ᠰᠥᠨᠢ ᠶ᠋ᠢᠨ ᠡᠮᠦᠨᠡ ᠹᠷᠣᠨᠲ ᠤ᠋ᠨ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠬᠤ ᠪᠠᠷ ᠶᠠᠪᠤᠵᠠᠢ᠃ ᠲᠡᠷᠡ ᠭᠤᠷᠪᠠᠭᠤᠯᠠ ᠮᠠᠩᠬᠠᠲᠤ ᠶ᠋ᠢᠨ ᠨᠠᠭᠤᠷ ᠬᠦᠷᠬᠦ ᠶᠡᠬᠡ ᠳᠠᠪᠤᠰᠤᠨ ᠵᠠᠮ ᠢ᠋ ᠳᠠᠭᠠᠵᠤ ᠡᠮᠦᠨᠡᠰᠢ ᠪᠡᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠠᠰ ᠡᠮᠦᠨᠡ ᠡᠴᠡ ᠨᠢ ᠠᠷᠪᠠᠭᠠᠳ ᠮᠣᠷᠢᠲᠤ ᠴᠡᠷᠢᠭ ᠢᠷᠡᠬᠦ ᠨᠢ ᠬᠠᠷᠠᠭᠳᠠᠪᠠ᠃ ᠮᠠᠨ ᠤ᠋ ᠪᠠᠰᠠ ᠨᠢᠭᠡᠨ ᠪᠦᠯᠦᠭ ᠴᠡᠷᠢᠭ ᠠᠮᠠᠷᠠᠬᠤ ᠪᠠᠷ ᠢᠷᠡᠵᠦ ᠪᠠᠢᠨᠠ ᠰᠢᠦ ᠭᠡᠮᠡᠨ ᠲᠡᠳᠡ ᠭᠤᠷᠪᠠᠭᠤᠯᠠ ᠶᠠᠷᠢᠯᠴᠠᠭᠰᠠᠭᠠᠷ ᠵᠠᠮ ᠤ᠋ᠨ ᠬᠠᠵᠠᠭᠤ ᠶ᠋ᠢᠨ ᠥᠨᠳᠥᠷ ᠮᠠᠩᠬᠠᠨ ᠣᠷᠣᠢ ᠳ᠋ᠤ᠌ ᠭᠠᠷᠪᠠ᠃ ᠭᠤᠷᠪᠠᠭᠤᠯᠠ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠲᠡᠳᠡᠨ ᠦ᠌ ᠣᠢᠷᠠᠳᠴᠤ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠨ ᠪᠠᠢᠯᠳᠤᠭᠠᠨ ᠤ᠋ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠬᠤ ᠪᠠᠷ ᠭᠠᠩᠰᠠ ᠲᠠᠮᠠᠬᠢ ᠲᠠᠲᠠᠵᠠᠭᠠᠨᠠ᠃
ᠮᠣᠷᠢᠲᠠᠢ ᠴᠡᠷᠢᠭ ᠨᠡᠯᠢᠶᠡᠳ ᠣᠢᠷᠠᠳᠴᠤ ᠢᠷᠡᠭᠡᠳ ᠭᠡᠨᠡᠳᠲᠡ ᠭᠤᠷᠪᠠᠭᠤᠯᠠ ᠶ᠋ᠢᠨ ᠰᠠᠭᠤᠭᠠ ᠮᠠᠩᠬᠠ ᠵᠦᠭ ᠭᠠᠯᠯᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠲᠡᠷᠡ ᠭᠤᠷᠪᠠᠭᠤᠯᠠ ᠰᠠᠶᠢ ᠳᠠᠢᠰᠤᠨ ᠤ᠋ ᠴᠡᠷᠢᠭ ᠢ᠋ ᠥᠪᠡᠷ ᠦ᠋ᠨ ᠴᠡᠷᠢᠭ ᠭᠡᠵᠦ ᠡᠨᠳᠡᠭᠦᠷᠡᠭᠰᠡᠨ ᠢ᠋ᠶ᠋ᠡᠨ ᠮᠡᠳᠡᠵᠦ ᠳᠠᠷᠤᠢ ᠲᠦᠷᠭᠡᠨ ᠪᠡᠶᠡ ᠳᠠᠯᠳᠠᠯᠠᠵᠤ ᠲᠡᠳᠡᠨ ᠦ᠌ ᠥᠭᠡᠳᠡ ᠡᠴᠡ ᠬᠣᠷᠢᠭᠯᠠᠨ ᠫᠤᠤᠳᠠᠯᠠ᠃ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠪᠠᠢᠭᠰᠠᠨ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠳᠠᠪᠬᠢᠨ ᠢᠷᠡᠵᠦ ᠬᠦᠴᠦ ᠬᠠᠮᠲᠤᠷᠠᠨ ᠭᠠᠯᠯᠠᠪᠠ᠃
ᠵᠠᠮᠢᠶᠠᠨᠵᠠᠪ ᠯᠢᠶᠡᠨᠵᠠᠩ ᠬᠥᠬᠡ ᠬᠠᠢᠯᠠᠩ ᠤᠷᠲᠤ ᠬᠤᠪᠴᠠᠰᠤᠨ ᠳᠡᠭᠡᠷᠡ ᠪᠡᠨ ᠲᠣᠷᠭᠠᠨ ᠪᠦᠰᠡ ᠪᠦᠰᠡᠯᠡᠵᠦ᠂ ᠲᠣᠯᠣᠭᠠᠢ ᠳ᠋ᠠᠭᠠᠨ ᠬᠠᠷᠠ ᠲᠣᠭᠣᠷᠴᠣᠭ ᠮᠠᠯᠠᠭᠠᠢ ᠵᠡᠭᠦᠵᠦ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠲᠠᠰᠢᠭᠤᠷ ᠪᠠᠷᠢᠵᠤ ᠴᠡᠷᠢᠭ ᠢ᠋ᠶ᠋ᠡᠨ᠄《ᠲᠠᠨᠤᠰ ᠶᠠᠭᠤᠨ ᠳ᠋ᠤ᠌ ᠶᠠᠭᠠᠷᠠᠭᠠᠳ ᠫᠤᠤᠳᠠᠵᠤ ᠪᠠᠢᠬᠤ ᠪᠣᠢ᠂ ᠭᠡᠳᠡᠭᠰᠢ ᠤᠬᠤᠷᠢᠵᠠᠭᠠᠶᠠ!》 ᠭᠡᠵᠦ ᠵᠠᠩᠳᠤᠷᠤᠨ ᠵᠠᠷᠯᠢᠭᠳᠠᠪᠠ᠃ ᠡᠨᠡ ᠦᠶᠡ ᠳ᠋ᠦ᠍ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠬᠡᠳᠦᠨ ᠭᠠᠵᠠᠷ ᠬᠣᠢᠰᠢ ᠤᠬᠤᠷᠢᠵᠤ ᠣᠳᠣ ᠶ᠋ᠢᠨ ᠪᠠᠶᠠᠨᠰᠢᠯᠢ ᠶ᠋ᠢᠨ ᠠᠷᠤ ᠬᠦᠷᠴᠦ ᠡᠮᠦᠨᠡ ᠡᠴᠡ ᠨᠡᠬᠡᠮᠵᠢᠯᠡᠨ ᠢᠷᠡᠬᠦ ᠴᠡᠷᠢᠭ ᠢ᠋ ᠬᠦᠯᠢᠶᠡᠪᠡ᠃ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠰᠢᠨᠡᠯᠡᠮᠡ ᠶ᠋ᠢᠨ ᠬᠡᠳᠦᠬᠡᠨ ᠴᠡᠷᠢᠭ ᠬᠦᠴᠦ ᠮᠡᠬᠦᠰᠳᠡᠭᠡᠳ ᠤᠬᠤᠷᠢᠴᠢᠬᠠᠯᠠ ᠭᠡᠮᠡᠨ ᠡᠨᠳᠡᠭᠦᠦ ᠵᠢᠱ᠌ᠢᠭᠰᠡᠨ ᠡᠴᠡ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠰᠢᠷᠦᠭᠦᠨ ᠳᠣᠪᠲᠣᠯᠵᠤ ᠢᠷᠡᠬᠦ ᠳ᠋ᠦ᠍᠂ ᠵᠠᠮ ᠤ᠋ᠨ ᠬᠠᠵᠠᠭᠤ᠂ ᠰᠢᠪᠠᠭ ᠪᠤᠷᠭᠠᠰᠤᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠳᠠᠯᠳᠠᠯᠠᠨ ᠠᠵᠢᠭᠯᠠᠵᠤ ᠪᠠᠢᠭᠰᠠᠨ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠭᠡᠨᠡᠳᠲᠡ ᠵᠡᠷᠭᠡ ᠪᠡᠷ ᠭᠠᠯᠯᠠᠭᠰᠠᠨ ᠳ᠋ᠤ᠌ ᠬᠡᠳᠦ ᠬᠡᠳᠦ ᠶ᠋ᠢ ᠲᠣᠩᠭᠣᠷᠴᠠᠭᠯᠠᠨ ᠤᠨᠠᠭᠠᠯᠠ᠃ ᠢᠩᠭᠢᠭᠡᠳ ᠪᠤᠰᠤᠳ ᠨᠢ ᠪᠠᠢᠳᠠᠯ ᠮᠠᠭᠤ ᠪᠣᠯᠤᠭᠰᠠᠨ ᠢ᠋ ᠮᠡᠳᠡᠵᠦ ᠭᠡᠳᠡᠷᠭᠦ ᠤᠬᠤᠷᠢᠨ ᠭᠣᠳ ᠳᠤᠲᠠᠭᠠᠭᠰᠠᠨ ᠪᠠᠢᠨᠠ᠃ ①
— — — —
① ᠡᠨᠡ ᠠᠭᠤᠯᠭᠠ ᠶ᠋ᠢ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠤ᠋ ᠪᠠᠢᠯᠳᠤᠭᠴᠢ ᠪᠠᠢᠭᠰᠠᠨ ᠴᠢᠨᠰᠠᠩ ᠨᠠᠰᠤᠲᠠᠨ ᠤ᠋1974 ᠣᠨ ᠤ᠋ ᠬᠡᠯᠡᠭᠰᠡᠨ ᠢ᠋ ᠡᠮᠬᠢᠳᠬᠡᠨ ᠨᠠᠢᠷᠠᠭᠤᠯᠪᠠ᠃
ᠳᠠᠭᠠᠯᠳᠤᠭᠤᠯᠤᠯ
ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠤ᠋ᠨ ᠣᠷᠳᠣᠨ
ᠥᠨᠥ ᠶ᠋ᠢᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠤᠯᠠᠭᠠᠨᠲᠣᠯᠤᠭᠠᠢ ᠪᠠᠯᠭᠠᠰᠤ ᠠ᠋ᠴᠠ ᠵᠡᠭᠦᠨ ᠬᠣᠢᠰᠢ ᠭᠤᠷᠪᠠᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠭᠠᠵᠠᠷ ᠲᠤ᠌ ᠦᠦᠰᠢᠨ— ᠳ᠋ᠦᠩᠱᠧᠩ ᠦ᠋ᠨ ᠴᠠᠷᠳᠠᠮᠠᠯ ᠵᠠᠮ ᠤ᠋ᠨ ᠡᠮᠦᠨᠡ ᠨᠢᠭᠡᠨ ᠪᠣᠷᠣᠯᠵᠢᠨ ᠳᠣᠪᠣᠴᠠᠭ ᠳᠡᠭᠡᠷᠡ ᠥᠨᠳᠥᠷ ᠥᠨᠳᠥᠷ ᠬᠠᠢᠯᠠᠰᠤᠨ ᠮᠣᠳᠣᠳ ᠰᠦᠨᠳᠡᠷᠯᠡᠨ ᠬᠠᠷᠠᠭᠳᠠᠨᠠ᠃ ᠡᠨᠡ ᠪᠣᠯ1905~1930 ᠣᠨ ᠬᠦᠷᠲᠡᠯᠡ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠨᠣᠶᠠᠨ ᠱᠠᠩ ᠪᠣᠯᠬᠤ《ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠤ᠋ᠨ ᠣᠷᠳᠣᠨ》 ᠤ᠋ ᠬᠠᠭᠤᠴᠢᠨ ᠪᠠᠭᠤᠷᠢ ᠪᠣᠯᠬᠤ ᠶᠤᠮ᠃
2006ᠣᠨ ᠤ᠋6 ᠰᠠᠷᠠ ᠳ᠋ᠤ᠌ ᠪᠢ ᠬᠠᠮᠲᠤ ᠰᠤᠷᠤᠯᠭᠠᠲᠠᠨ ᠪᠠᠲᠣᠴᠢᠯᠠᠭᠤ ᠲᠠᠢ ᠬᠠᠮᠲᠤ ᠡᠨᠡ ᠬᠦ᠌ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠤ᠋ᠨ ᠣᠷᠳᠣᠨ ᠤ᠋ ᠪᠠᠭᠤᠷᠢ ᠶ᠋ᠢᠨ ᠲᠤᠬᠠᠢ ᠬᠠᠭᠤᠴᠢ ᠰᠤᠳᠤᠯᠤᠯ ᠤ᠋ᠨ ᠪᠠᠢᠴᠠᠭᠠᠯᠲᠠ ᠬᠢᠵᠦ᠂ ᠡᠭᠦᠨ ᠦ᠌ ᠲᠤᠬᠠᠢ ᠶ᠋ᠢᠨ ᠪᠤᠭᠤᠷᠤᠯᠴᠤᠳ ᠪᠠᠶᠠᠨᠳᠠᠯᠠᠢ ᠪᠣᠷᠣᠴᠢᠯᠠᠭᠤ ᠬᠡᠰᠢᠭ᠌ᠳᠠᠯᠠᠢ ᠨᠠᠷ ᠤ᠋ᠨ ᠤᠯᠠᠮᠵᠢᠯᠠᠯᠲᠤ ᠶᠠᠷᠢᠶᠠ ᠶ᠋ᠢ ᠰᠣᠨᠣᠰᠴᠤ ᠬᠠᠷᠢᠴᠠᠭᠤᠯᠤᠭᠰᠠᠨ ᠰᠠᠭᠤᠷᠢᠨ ᠳᠡᠭᠡᠷᠡ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠤ᠋ᠨ ᠪᠠᠢᠷᠢᠰᠢᠯ ᠵᠢᠷᠤᠭ ᠢ᠋ ᠵᠢᠷᠤᠵᠤ ᠭᠠᠷᠭᠠᠪᠠ᠃ ᠳᠠᠷᠠᠭᠠ ᠨᠢ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠤᠯᠤᠰ ᠲᠥᠷᠥ ᠶ᠋ᠢᠨ ᠵᠥᠪᠯᠡᠯᠭᠡᠨ ᠦ᠌ ᠳᠡᠳ᠋ ᠲᠡᠷᠢᠭᠦᠯᠡᠭᠴᠢ ᠠᠯᠲᠠᠨᠵᠠᠩᠭᠠ᠂ ᠤᠯᠤᠰ ᠲᠥᠷᠥ ᠶ᠋ᠢᠨ ᠵᠥᠪᠯᠡᠯᠭᠡᠨ ᠦ᠌ ᠳᠡᠳ᠋ ᠲᠡᠷᠢᠭᠦᠯᠡᠭᠴᠢ ᠤᠭ ᠤ᠋ᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠦᠶᠡ ᠶ᠋ᠢᠨ ᠵᠠᠰᠠᠭ ᠨᠣᠶᠠᠨ ᠤ᠋ ᠬᠥᠪᠡᠭᠦᠨ ᠴᠢ ᠴᠠᠭᠠᠯᠠᠢ(ᠴᠢ ᠵᠢᠩ ᠵᠢᠶᠠᠩ)᠂ ᠵᠠᠩ ᠦᠢᠯᠡ ᠶ᠋ᠢᠨ ᠰᠤᠳᠤᠯᠤᠭᠴᠢ ᠪᠦᠷᠢᠨᠵᠢᠷᠭᠠᠯ ᠨᠠᠷ ᠲᠤ᠌ ᠳᠡᠪᠰᠢᠭᠦᠯᠦᠨ ᠬᠢᠨᠠᠭᠤᠯᠵᠤ᠂ ᠲᠡᠳᠡᠨ ᠦ᠌ ᠰᠠᠨᠠᠯ ᠵᠢᠯᠣᠭᠣᠳᠤᠯᠭᠠ ᠪᠠᠷ ᠳᠠᠬᠢᠨ ᠵᠠᠰᠠᠯᠲᠠ ᠣᠷᠣᠭᠤᠯᠪᠠ( ᠵᠢᠷᠤᠭ ᠢ᠋ ᠲᠤᠰ ᠨᠣᠮ ᠤ᠋ᠨ ᠡᠬᠢᠨ ᠦ᠌ ᠨᠢᠭᠤᠷ ᠲᠤ᠌ ᠦᠵᠡᠭᠡᠷᠡᠢ)᠃
ᠪᠠᠷᠢᠯᠭᠠ ᠶ᠋ᠢᠨ ᠪᠠᠢᠷᠢᠰᠢᠯ ᠪᠣᠯᠤᠨ ᠪᠠᠢᠳᠠᠯ
1. ᠭᠠᠳᠠᠷ ᠬᠡᠷᠡᠮ ᠬᠦᠷᠢᠶᠡ ᠨᠢ ᠵᠡᠭᠦᠨ ᠡᠮᠦᠨᠡᠰᠢ ᠪᠡᠨ ᠨᠠᠷᠠ ᠭᠠᠷᠬᠤ ᠵᠦᠭ ᠬᠠᠨᠳᠤᠵᠤ᠂ ᠲᠠᠯᠠ ᠪᠦᠷᠢ ᠨᠢ83.3 ᠮᠧᠲ᠋ᠷ ᠤᠷᠲᠤ ᠲᠡᠭᠰᠢ ᠳᠥᠷᠪᠡᠯᠵᠢᠨ ᠬᠡᠷᠡᠮ ᠨᠢ ᠬᠠᠭᠤᠴᠢᠨ ᠬᠡᠪ ᠦ᠋ᠨ4~6 ᠤ᠋ ᠬᠥᠬᠡ ᠲᠣᠭᠣᠰᠬᠠ ᠪᠠᠷ ᠠᠯᠲᠠ ᠥᠨᠳᠥᠷ ᠪᠠᠷᠢᠵᠤ᠂ ᠬᠡᠷᠡᠮ ᠦ᠋ᠨ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠬᠣᠶᠠᠷ ᠥᠨᠴᠥᠭ ᠲᠦ᠍ ᠲᠤᠰ ᠪᠦᠷᠢ ᠬᠥᠮᠦᠰ ᠦ᠋ᠨ ᠣᠷᠣᠵᠤ ᠭᠠᠷᠬᠤ ᠡᠭᠦᠳᠡ ᠲᠡᠢ᠂ ᠬᠣᠢᠨᠠᠬᠢ ᠨᠢ ᠬᠠᠲᠤᠨ ᠪᠣᠯᠤᠨ ᠰᠢᠪᠡᠭᠴᠢᠨ ᠵᠠᠷᠤᠴᠠ ᠨᠠᠷ ᠤ᠋ᠨ ᠡᠩ ᠦ᠋ᠨ ᠦᠶᠡ ᠳ᠋ᠦ᠍ ᠰᠤᠯᠠ ᠪᠠᠷ ᠭᠠᠷᠴᠤ ᠣᠷᠣᠬᠤ᠂ ᠣᠷᠳᠣᠨ ᠤ᠋ ᠬᠣᠭ ᠨᠣᠪᠰᠢ ᠵᠥᠭᠡᠭᠡᠬᠦ᠂ ᠭᠠᠳᠠᠭᠠᠯᠠᠬᠤ ᠡᠭᠦᠳᠡ ᠪᠣᠯᠤᠨᠠ᠃ ᠥᠨᠥ ᠴᠦ᠍ ᠬᠣᠭ ᠤ᠋ᠨ ᠣᠪᠣᠭᠠ ᠨᠢ ᠲᠣᠳᠣᠷᠬᠠᠢ ᠪᠣᠢ᠃ ᠡᠮᠦᠨᠡᠬᠢ ᠨᠢ ᠱᠠᠩ ᠶᠠᠮᠤᠨ ᠤ᠋ ᠠᠵᠢᠯᠲᠠᠨ᠂ ᠵᠠᠷᠤᠴᠠ ᠠᠯᠪᠠᠲᠤ ᠶ᠋ᠢᠨ ᠣᠷᠣᠵᠤ ᠭᠠᠷᠬᠤ᠂ ᠭᠠᠳᠠᠭᠠᠯᠠᠬᠤ᠂ ᠬᠣᠭ ᠯᠣᠪᠰᠢ ᠵᠥᠭᠡᠭᠡᠬᠦ ᠡᠭᠦᠳᠡ ᠪᠣᠯᠤᠨᠠ᠃ ᠥᠨᠥ ᠴᠦ᠍ ᠬᠣᠭ ᠤ᠋ᠨ ᠣᠪᠣᠭᠠ ᠨᠢ ᠲᠣᠳᠣᠷᠬᠠᠢ ᠪᠣᠢ᠃
ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠬᠡᠷᠡᠮ ᠦ᠋ᠨ ᠬᠣᠶᠠᠷ ᠥᠨᠴᠥᠭ ᠲᠦ᠍ ᠪᠠᠰᠠ ᠲᠤᠰ ᠪᠦᠷᠢ ᠭᠠᠷᠴᠤ ᠣᠷᠣᠬᠤ ᠡᠭᠦᠳᠡ ᠪᠣᠢ᠃ ᠬᠣᠢᠨᠠᠬᠢ ᠨᠢ ᠨᠣᠶᠠᠨ ᠪᠣᠯᠤᠨ ᠲᠦᠰᠢᠮᠡᠳ᠂ ᠰᠦᠮᠡ ᠶ᠋ᠢᠨ ᠭᠣᠨᠢᠷ ᠯᠠᠮᠠ ᠨᠠᠷ ᠤ᠋ᠨ ᠣᠷᠣᠵᠤ ᠭᠠᠷᠬᠤ ᠡᠭᠦᠳᠡ ᠪᠣᠯᠤᠨᠠ᠃ ᠡᠮᠦᠨᠡᠬᠢ ᠨᠢ ᠭᠠᠳᠠᠨᠠ ᠳᠣᠲᠣᠨᠠᠬᠢ ᠵᠣᠴᠢᠳ ᠤ᠋ᠨ ᠣᠷᠣᠵᠤ ᠭᠠᠷᠬᠤ ᠡᠭᠦᠳᠡ ᠪᠣᠯᠤᠨᠠ᠃
ᠡᠮᠦᠨᠡ ᠲᠠᠯᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠭᠣᠣᠯ ᠳ᠋ᠤ᠌ 3 ᠮᠧᠲ᠋ᠷ ᠢᠯᠡᠭᠦᠦ ᠠᠭᠤᠵᠢᠮ(ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ) ᠨᠡᠯᠢᠶᠡᠳ ᠥᠨᠳᠥᠷ ᠶᠡᠬᠡ ᠡᠭᠦᠳᠡ ᠪᠠᠢᠵᠤ᠂ ᠳᠡᠭᠡᠷᠡᠬᠢ ᠨᠢ ᠪᠣᠰᠤᠭᠠ ᠪᠠᠢᠰᠢᠩ ᠤ᠋ᠨ ᠬᠡᠯᠪᠡᠷᠢᠲᠡᠢ ᠸᠠᠭᠠᠷ ᠰᠢᠭᠢᠳᠬᠡᠵᠦ᠂ ᠬᠣᠶᠠᠷ ᠲᠠᠯᠠ ᠳ᠋ᠤᠨᠢ ᠭᠠᠳᠠᠭᠰᠢ ᠬᠠᠨᠳᠤᠭᠰᠠᠨ ᠮᠡᠩ ᠦ᠋ᠨ ᠲᠣᠯᠣᠭᠠᠢ ᠲᠠᠢ ᠠᠰᠠᠷ ᠪᠣᠢ᠃ ᠡᠭᠦᠳᠡᠨ ᠭᠠᠳᠠᠨᠠ ᠨᠢ ᠣᠴᠣᠢᠭᠰᠠᠨ ᠬᠣᠶᠠᠷ ᠲᠣᠮᠣ ᠬᠠᠳᠠᠨ ᠠᠷᠰᠯᠠᠨ ᠪᠣᠢ᠃ ᠡᠩ ᠦ᠋ᠨ ᠦᠶᠡ ᠳ᠋ᠦ᠍ ᠡᠨᠡ ᠡᠭᠦᠳᠡ ᠪᠡᠷ ᠬᠥᠮᠦᠨ ᠭᠠᠷᠴᠤ ᠣᠷᠣᠳᠠᠭ ᠦᠭᠡᠢ᠂ ᠴᠢᠬᠤᠯᠠ ᠲᠠᠢ ᠦᠶᠡ ᠳ᠋ᠦ᠍ ᠨᠣᠶᠠᠨ ᠬᠠᠲᠤᠨ ᠲᠦᠰᠢᠮᠡᠳ᠂ ᠬᠦᠨᠳᠦᠲᠦ ᠵᠣᠴᠢᠳ ᠣᠷᠣᠵᠤ ᠭᠠᠷᠳᠠᠭ ᠪᠠᠢᠵᠠᠢ᠃
ᠡᠨᠡ ᠬᠦ᠌ ᠲᠣᠮᠣ ᠡᠭᠦᠳᠡᠨ ᠦ᠌ ᠡᠮᠦᠨᠡ ᠨᠡᠯᠢᠶᠡᠳ ᠵᠠᠢ ᠲᠠᠢ ᠭᠠᠵᠠᠷ ᠲᠤ᠌ ᠲᠣᠮᠣ ᠭᠡᠭᠴᠢ ᠬᠥᠬᠡ ᠲᠣᠭᠣᠰᠬᠠ ᠪᠠᠷ ᠦᠷᠦᠭᠰᠡᠨ ᠣᠷᠳᠣᠰ ᠮᠣᠩᠭᠣᠯᠴᠤᠳ ᠤ᠋ᠨ ᠬᠡᠢᠮᠣᠷᠢ ᠶ᠋ᠢᠨ ᠤᠰᠠᠩ ᠤ᠋ᠨ ᠲᠠᠢᠰᠠ ᠪᠣᠢ᠃ ᠤᠰᠠᠩ ᠤ᠋ᠨ ᠲᠠᠢᠰᠠ ᠠ᠋ᠴᠠ ᠡᠮᠦᠨᠡᠰᠢ ᠪᠡᠨ6 ᠮᠧᠲ᠋ᠷ ᠦ᠋ᠨ ᠣᠷᠴᠢᠮ ᠳ᠋ᠤ᠌ ᠬᠣᠢᠰᠢ ᠬᠠᠨᠳᠤᠭᠰᠠᠨ ᠪᠢᠴᠢᠬᠠᠨ ᠬᠣᠷᠯᠣ ᠶ᠋ᠢᠨ ᠰᠦᠮᠡ ᠪᠠᠢᠵᠤ᠂ ᠰᠦᠮᠡ ᠶ᠋ᠢᠨ ᠬᠣᠶᠠᠷ ᠥᠨᠴᠥᠭ ᠡᠴᠡ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠢᠰᠢ ᠪᠠᠨ ᠮᠤᠷᠤᠢᠵᠤ ᠬᠠᠨᠳᠤᠭᠰᠠᠨ ᠬᠥᠬᠡ ᠲᠣᠭᠣᠰᠬᠠᠨ ᠬᠡᠷᠡᠮ ᠲᠡᠢ᠃ ᠬᠣᠷᠯᠣ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠡᠮᠦᠨᠡᠭᠦᠷ《ᠭᠠᠵᠠᠷ ᠤᠰᠤᠨ ᠡᠵᠡᠳ ᠢ᠋ ᠲᠠᠬᠢᠬᠤ᠂ ᠣᠷᠣᠨ ᠨᠤᠲᠤᠭ ᠤ᠋ᠨ ᠡᠵᠡᠳ ᠢ᠋ ᠲᠠᠬᠢᠬᠤ᠂ ᠰᠢᠪᠠᠷ ᠰᠢᠷᠣᠢ ᠶ᠋ᠢᠨ ᠡᠵᠡᠳ ᠢ᠋ ᠲᠠᠬᠢᠬᠤ ᠰᠦᠮᠡ》 ᠵᠡᠷᠭᠡ ᠭᠤᠷᠪᠠᠨ ᠪᠢᠴᠢᠬᠠᠨ ᠰᠢᠪᠲᠠᠩ ᠤ᠋ᠨ ᠰᠦᠮᠡ ᠪᠠᠢᠵᠠᠢ᠃
ᠬᠡᠷᠡᠮ ᠦ᠋ᠨ ᠭᠠᠳᠠᠨᠠᠬᠢ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠨᠢᠵᠡᠭᠡᠳ ᠰᠢᠪᠡᠷ ᠪᠠᠢᠰᠢᠩ ᠪᠠᠢᠵᠤ᠂ ᠠᠭᠲᠠ ᠮᠣᠷᠢᠳ ᠢ᠋ ᠠᠷᠠᠴᠢᠯᠠᠨ ᠲᠡᠵᠢᠭᠡᠭᠴᠢᠳ ᠰᠠᠭᠤᠳᠠᠭ ᠪᠥᠭᠡᠳ ᠪᠠᠰᠠ ᠮᠣᠷᠢᠨ ᠫᠧᠩ ᠰᠠᠷᠠᠪᠴᠢ᠂ ᠡᠪᠡᠰᠦᠨ ᠪᠠᠢᠰᠢᠩ ᠤ᠋ᠳ ᠪᠠᠢᠵᠠᠢ᠃
ᠬᠡᠷᠡᠮ ᠦ᠋ᠨ ᠭᠠᠳᠠᠨᠠᠬᠢ ᠵᠡᠭᠦᠨ ᠲᠠᠯᠠ ᠳ᠋ᠤᠨᠢ ᠮᠥᠨ ᠠᠳᠠᠯᠢᠬᠠᠨ ᠰᠢᠪᠡᠷ ᠪᠠᠢᠰᠢᠩ ᠤ᠋ᠳ ᠪᠠᠢᠵᠤ᠂ ᠪᠤᠯᠤ ᠲᠡᠭᠡᠷᠮᠡ ᠶ᠋ᠢᠨ ᠪᠠᠢᠰᠢᠩ᠂ ᠮᠣᠳᠣ ᠲᠦᠯᠡᠭᠡ ᠵᠥᠭᠡᠭᠡᠪᠦᠷᠢᠯᠡᠬᠦ ᠬᠠᠰᠠᠭ ᠲᠡᠷᠭᠡ ᠶ᠋ᠢᠨ ᠤᠨᠤᠭᠠ ᠮᠠᠯ ᠲᠡᠵᠢᠭᠡᠬᠦ ᠫᠧᠩ ᠪᠣᠯᠤᠨ ᠵᠠᠷᠤᠴᠠ ᠨᠠᠷ ᠤ᠋ᠨ ᠣᠷᠣᠨ ᠰᠠᠭᠤᠴᠠ ᠪᠠᠢᠵᠠᠢ᠃
2᠂ ᠬᠡᠷᠡᠮ ᠦ᠋ᠨ ᠳᠣᠲᠣᠷᠠᠬᠢ ᠪᠠᠷᠢᠯᠭᠠ
(1) ᠬᠣᠰᠢᠭᠤ ᠵᠠᠰᠠᠭ ᠨᠣᠶᠠᠨ ᠤ᠋ ᠣᠷᠳᠣᠨ ᠨᠢ ᠶᠡᠬᠡ ᠬᠦᠷᠢᠶᠡᠨ ᠦ᠌ ᠳᠣᠲᠣᠷᠠ ᠬᠣᠢᠲᠤ ᠲᠠᠯᠠ ᠳ᠋ᠤ᠌ 0᠂7 ᠮᠧᠲ᠋ᠷ ᠦ᠋ᠨ ᠥᠨᠳᠥᠷ ᠲᠣᠭᠣᠰᠬᠠᠨ ᠰᠠᠭᠤᠷᠢ ᠳᠡᠭᠡᠷᠡ ᠡᠮᠦᠨᠡᠰᠢ ᠬᠠᠨᠳᠤᠭᠰᠠᠨ9 ᠲᠠᠰᠤᠯᠭᠠ ᠣᠷᠳᠣᠨ ᠪᠠᠢᠵᠤ ᠬᠣᠶᠠᠷ ᠥᠨᠴᠥᠭ ᠦ᠋ᠨ ᠲᠤᠰ ᠪᠦᠷᠢ ᠨᠢᠭᠡ ᠲᠠᠰᠤᠯᠭᠠ ᠨᠢ ᠡᠮᠦᠨᠡᠰᠢ3 ᠮᠧᠲ᠋ᠷ ᠤᠷᠲᠤ ᠭᠠᠷᠭᠠᠨ ᠨᠣᠶᠠᠳ ᠲᠦᠰᠢᠮᠡᠳ ᠰᠡᠷᠢᠭᠦᠴᠡᠵᠦ ᠠᠮᠠᠷᠠᠬᠤ15.12 ᠲᠡᠭᠰᠢ ᠳᠥᠷᠪᠡᠯᠵᠢᠨ ᠮᠧᠲ᠋ᠷ ᠦ᠋ᠨ ᠲᠠᠯᠠᠪᠠᠢ ᠲᠠᠢ ᠲᠣᠭᠣᠰᠬᠠᠨ ᠶᠡᠨᠳᠡᠷ ᠲᠠᠢᠰᠠ ᠳ᠋ᠤ᠌᠂ 7 ᠶᠡᠬᠡ ᠬᠥᠬᠡ ᠬᠠᠳᠠᠨ ᠳᠤᠭᠤᠢ ᠳᠡᠪᠢᠰᠬᠡᠷ ᠳᠡᠭᠡᠷᠡ ᠡᠷᠳᠡᠨᠢ ᠶ᠋ᠢᠨ ᠯᠤᠤ ᠣᠷᠢᠶᠠᠭᠰᠠᠨ ᠲᠥᠪᠡᠳ ᠮᠣᠩᠭᠣᠯ ᠬᠡ ᠤᠭᠠᠯᠵᠠ ᠬᠤᠸᠠᠷ ᠲᠠᠢ ᠪᠦᠳᠦᠭᠦᠨ ᠮᠣᠳᠣᠨ ᠲᠤᠯᠭᠠᠭᠤᠷᠢ ᠲᠠᠢ᠂ ᠰᠠᠷᠠᠪᠴᠢᠨ ᠤ᠋ ᠳᠡᠭᠡᠷᠡᠬᠢ ᠵᠢᠵᠢᠭ ᠸᠠᠭᠠᠷ ᠢ᠋ ᠡᠷᠡ ᠡᠮᠡ ᠶ᠋ᠢ ᠨᠢ ᠳᠠᠪᠬᠤᠷᠯᠠᠨ ᠰᠢᠭᠢᠳᠬᠡᠭᠰᠡᠨ ᠪᠢᠲᠡᠭᠦᠦ ᠰᠠᠷᠠᠪᠴᠢᠨ ᠣᠷᠣᠢ ᠲᠠᠢ᠂ ᠠᠷᠤ ᠳ᠋ᠠᠬᠢ ᠵᠠᠯᠭᠠᠭᠠ ᠶᠡᠬᠡ ᠪᠠᠢᠰᠢᠩ ᠤ᠋ᠨ ᠣᠷᠣᠢ ᠨᠢ ᠡᠮᠦᠨᠡ ᠰᠠᠷᠠᠪᠴᠢᠨ ᠠ᠋ᠴᠠ ᠪᠠᠨ ᠨᠡᠯᠢᠶᠡᠳ ᠥᠨᠳᠥᠷ ᠪᠣᠰᠤᠭᠠ ᠨᠢᠷᠤᠭᠤ ᠲᠠᠢ ᠮᠥᠨ ᠠᠳᠠᠯᠢ ᠪᠠᠷ ᠵᠢᠵᠢᠭ ᠸᠠᠭᠠᠷ ᠢ᠋ ᠳᠠᠪᠬᠤᠷᠯᠠᠨ ᠰᠢᠭᠢᠳᠬᠡᠵᠦ ᠬᠣᠶᠠᠷ ᠲᠠᠯᠠ ᠶ᠋ᠢᠨ ᠥᠨᠴᠥᠭ ᠲᠦ᠍ ᠯᠤᠤ ᠮᠡᠩ ᠦ᠋ᠨ ᠠᠰᠠᠷ ᠭᠠᠷᠭᠠᠵᠤ᠂ ᠴᠣᠩᠬᠣ ᠡᠭᠦᠳᠡ ᠨᠢ ᠨᠠᠷᠢᠯᠢᠭ ᠰᠠᠢᠬᠠᠨ ᠮᠣᠳᠣᠨ ᠬᠡ ᠬᠤᠸᠠᠷ ᠢ᠋ᠶ᠋ᠠᠷ ᠤᠷᠠᠯᠠᠵᠤ ᠱᠣᠩᠨᠣᠭᠰᠠᠨ ᠦᠵᠡᠮᠡᠷ ᠰᠠᠢᠬᠠᠨ ᠰᠦᠷᠯᠢᠭ ᠶᠡᠬᠡᠮᠰᠦᠭ ᠬᠢᠲᠠᠳ ᠮᠣᠩᠭᠣᠯ ᠲᠥᠪᠡᠳ ᠪᠠᠷᠢᠯᠭᠠ ᠶ᠋ᠢᠨ ᠰᠣᠶᠣᠯ ᠬᠠᠷᠢᠯᠴᠠᠨ ᠤᠶᠠᠯᠳᠤᠭᠰᠠᠨ ᠡᠷᠲᠡᠨ ᠦ᠌ ᠪᠠᠷᠢᠯᠭᠠ ᠪᠠᠢᠵᠠᠢ᠃
(2) ᠪᠤᠷᠬᠠᠨ ᠤ᠋ ᠰᠦᠮᠡ᠄ ᠨᠣᠶᠠᠨ ᠤ᠋ ᠣᠷᠳᠣᠨ ᠤ᠋ ᠪᠠᠷᠠᠭᠤᠨ ᠲᠠᠯᠠ ᠳ᠋ᠤ᠌ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠨᠢᠭᠡ ᠱᠤᠭᠤᠮ ᠳᠡᠭᠡᠷᠡ ᠣᠷᠳᠣᠨ ᠠ᠋ᠴᠠ ᠠᠰᠲᠠᠭᠠᠨ ᠬᠡᠳᠦᠨ ᠮᠧᠲ᠋ᠷ ᠵᠠᠢ ᠲᠠᠢ ᠶᠡᠨᠳᠡᠷ ᠲᠠᠢᠰᠠᠨ ᠳᠡᠭᠡᠷᠡ3 ᠲᠠᠰᠤᠯᠭᠠ ᠡᠮᠦᠨᠡᠰᠢ ᠬᠠᠨᠳᠤᠭᠰᠠᠨ ᠰᠦᠮᠡ ᠪᠠᠢᠳᠠᠭ᠃ ᠣᠷᠣᠢ ᠳ᠋ᠤᠨᠢ ᠭᠡᠷᠡᠯ ᠰᠠᠴᠤᠷᠠᠭᠰᠠᠨ ᠠᠯᠲᠠᠨ ᠭᠠᠨᠵᠢᠷᠠ ᠲᠠᠢ᠂ ᠰᠦᠮᠡ ᠶ᠋ᠢᠨ ᠡᠭᠦᠳᠡ ᠨᠢ ᠡᠮᠦᠨᠡᠰᠢ(ᠳᠡᠭᠡᠭᠦᠷ) ᠰᠠᠷᠠᠪᠴᠢᠯᠠᠵᠤ ᠱᠠᠰᠢᠨ ᠤ᠋ ᠬᠡ ᠤᠭᠠᠯᠵᠠ ᠭᠠᠷᠭᠠᠭᠰᠠᠨ ᠬᠤᠸᠠᠷ ᠢᠯᠡ ᠮᠣᠳᠣᠨ ᠲᠤᠯᠭᠠᠭᠤᠷᠢ ᠲᠠᠢ᠃ ᠡᠨᠡ ᠰᠦᠮᠡ ᠳ᠋ᠦ᠍ ᠵᠠᠰᠠᠭ ᠨᠣᠶᠠᠨ ᠪᠣᠯᠤᠨ ᠬᠣᠰᠢᠭᠤ ᠨᠡᠢᠲᠡ ᠶ᠋ᠢᠨ ᠲᠤᠰᠠ ᠶ᠋ᠢᠨ ᠲᠤᠯᠠᠳᠠ ᠵᠤᠯᠠ ᠬᠦᠵᠢ᠂ ᠲᠠᠬᠢᠯ ᠤ᠋ᠨ ᠤᠩᠰᠢᠯᠭᠠ ᠥᠷᠯᠥᠭᠡ ᠦᠳᠡᠰᠢ ᠣᠰᠣᠯᠳᠠᠯ ᠦᠭᠡᠢ ᠦᠷᠭᠦᠯᠵᠢᠯᠡᠵᠦ᠂ ᠲᠤᠰᠬᠠᠢ ᠬᠠᠢᠷᠴᠠᠭ ᠲᠤ᠌ ᠪᠢᠲᠡᠭᠦᠮᠵᠢᠯᠡᠭᠰᠡᠨ ᠬᠣᠰᠢᠭᠤ《ᠵᠠᠰᠠᠭ ᠲᠠᠮᠠᠭᠠ》 ᠶ᠋ᠢ ᠰᠢᠷᠠ ᠲᠣᠷᠭᠠ ᠪᠠᠷ ᠪᠦᠲᠡᠭᠡᠵᠦ ᠳᠠᠬᠢᠳᠠᠭ ᠪᠥᠭᠡᠳ ᠪᠠᠶᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ ᠶ᠋ᠢᠨ《ᠨᠣᠭᠣᠭᠠᠨ ᠭᠦᠮᠪᠦ ᠪᠤᠷᠬᠠᠨ》 ᠢ᠋ ᠲᠣᠭᠰᠢᠭᠤᠯᠵᠤ ᠳᠠᠬᠢᠳᠠᠭ᠃ ᠳᠡᠭᠡᠳᠦ ᠦᠶᠡ ᠳ᠋ᠦ᠍ ᠦᠦᠰᠢᠨ ᠨᠣᠶᠠᠨ ᠱᠠᠩ ᠤ᠋ᠨ ᠣᠷᠳᠣᠨ ᠪᠠᠶᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠪᠠᠢᠷᠢᠰᠢᠵᠤ ᠪᠠᠢᠵᠠᠢ᠃
ᠱᠠᠩ ᠤ᠋ᠨ ᠣᠷᠳᠣᠨ ᠤ᠋ ᠰᠦᠮᠡ ᠶ᠋ᠢᠨ ᠪᠤᠷᠬᠠᠨ ᠢ᠋ ᠳᠠᠬᠢᠳᠠᠭ ᠭᠣᠨᠢᠷ ᠯᠠᠮᠠ ᠶ᠋ᠢ ᠦᠦᠰᠢᠨᠵᠦᠦ ᠰᠦᠮᠡ ᠶ᠋ᠢᠨ ᠰᠤᠩᠳᠣᠢ ᠠ᠋ᠴᠠ ᠲᠤᠰᠬᠠᠢ ᠲᠣᠮᠢᠯᠠᠳᠠᠭ ᠪᠠᠢᠵᠠᠢ᠃
ᠣᠷᠳᠣᠨ ᠠ᠋ᠴᠠ ᠠᠰ ᠡᠮᠦᠨᠡ ᠬᠦᠷᠢᠶᠡᠨ ᠦ᠌ ᠭᠣᠣᠯ ᠳ᠋ᠤ᠌ ᠳ᠋ᠢᠶᠠᠮᠧᠲ᠋ᠷ ᠨᠢ10 ᠲᠡᠭᠰᠢ ᠳᠥᠷᠪᠡᠯᠵᠢᠨ ᠮᠧᠲ᠋ᠷ ᠣᠷᠴᠢᠮ ᠤ᠋ᠨ ᠬᠥᠬᠡ ᠲᠣᠭᠣᠰᠬᠠᠨ ᠲᠠᠢᠰᠠ(ᠳᠤᠭᠤᠢ) ᠳᠡᠭᠡᠷᠡ ᠨᠠᠢ᠍ᠮᠠᠨ ᠬᠠᠨᠠ ᠲᠠᠢ ᠶᠡᠬᠡ ᠮᠣᠩᠭᠣᠯ ᠭᠡᠷ ᠢ᠋ ᠡᠮᠦᠨᠡᠰᠢ ᠪᠡᠨ ᠬᠠᠨᠳᠤᠭᠤᠯᠤᠨ ᠪᠠᠷᠢᠵᠤ ᠮᠣᠩᠭᠣᠯ ᠬᠡ ᠤᠭᠠᠯᠵᠠ ᠲᠠᠢ ᠨᠣᠣᠰᠣᠨ ᠬᠢᠴᠡ ᠲᠡᠢ ᠪᠦᠷᠢᠶᠡᠰᠦ ᠲᠡᠢ ᠣᠷᠳᠣᠨ ᠪᠣᠢ᠃ ᠡᠨᠡ ᠮᠣᠩᠭᠣᠯ ᠭᠡᠷ ᠲᠦ᠍《ᠲᠠᠮᠠᠭᠠ ᠶ᠋ᠢᠨ ᠬᠤᠷᠠᠯ》(ᠲᠠᠮᠠᠭᠠ ᠶ᠋ᠢᠨ ᠴᠢᠭᠤᠯᠭᠠᠨ᠂ ᠲᠠᠮᠠᠭᠠ ᠶ᠋ᠢᠨ ᠪᠦᠷᠢᠳᠬᠡᠯ᠂ ᠲᠠᠮᠠᠭᠠ ᠨᠡᠭᠡᠭᠡᠬᠦ ᠭᠡᠵᠦ ᠠᠳᠠᠯᠢ ᠪᠤᠰᠤ ᠪᠠᠷ ᠬᠡᠯᠡᠳᠡᠭ) ᠪᠣᠯᠤᠨ ᠶᠡᠬᠡ ᠶᠡᠬᠡ ᠬᠤᠷᠠᠯ ᠴᠤᠭᠯᠠᠭᠠᠨ ᠢ᠋ ᠬᠢᠳᠡᠭ ᠶᠣᠰᠣᠯᠠᠯ ᠤ᠋ᠨ ᠣᠷᠳᠣᠨ ᠪᠣᠯᠤᠨᠠ᠃
(3) ᠱᠠᠩ ᠣᠷᠳᠣᠨ ᠤ᠋ ᠳᠡᠮᠴᠢ ᠶ᠋ᠢᠨ ᠭᠡᠷ ᠣᠷᠣᠨ᠄ ᠵᠡᠭᠦᠨ ᠬᠡᠷᠡᠮ ᠡᠴᠡ ᠪᠠᠷᠠᠭᠤᠨᠰᠢ3 ᠮᠧᠲ᠋ᠷ ᠣᠷᠴᠢᠮ ᠳ᠋ᠤ᠌ ᠪᠠᠷᠠᠭᠤᠨᠰᠢ ᠬᠠᠨᠳᠤᠭᠰᠠᠨ9 ᠲᠠᠰᠤᠯᠭᠠ ᠬᠥᠬᠡ ᠲᠣᠭᠣᠰᠬᠠᠨ ᠪᠠᠢᠰᠢᠩ ᠪᠣᠢ᠃ ᠡᠨᠳᠡ ᠱᠠᠩ ᠣᠷᠳᠣᠨ ᠤ᠋ ᠪᠦᠬᠦ ᠠᠮᠢᠳᠤᠷᠠᠯ᠂ ᠵᠢᠯ ᠦ᠋ᠨ ᠣᠷᠣᠯᠭᠠ ᠵᠠᠷᠤᠯᠭᠠ ᠶ᠋ᠢ ᠲᠣᠬᠢᠷᠠᠭᠤᠯᠤᠭᠴᠢ ᠶᠡᠬᠡ ᠪᠠᠭᠠ ᠳᠡᠮᠴᠢ ᠨᠢᠷᠪᠠ ᠰᠠᠩ ᠬᠠᠮᠢᠶᠠᠷᠤᠭᠴᠢ᠂ ᠨᠣᠶᠠᠨ ᠬᠠᠲᠤᠨ ᠤ᠋ ᠬᠢᠶᠡ ᠨᠠᠷ ᠤ᠋ᠨ ᠰᠠᠭᠤᠴᠠ ᠶ᠋ᠢ ᠭᠠᠷᠭᠠᠪᠠᠯ ᠪᠤᠰᠤᠳ ᠨᠢ ᠡᠳ᠋ ᠪᠣᠳᠠᠰ ᠢ᠋ ᠬᠤᠷᠢᠶᠠᠵᠤ ᠬᠠᠳᠠᠭᠠᠯᠠᠬᠤ ᠬᠥᠮᠥᠷᠭᠡ ᠪᠣᠯᠤᠨᠠ᠃
(4) ᠬᠣᠰᠢᠭᠤ ᠲᠦᠰᠢᠮᠡᠳ ᠪᠣᠯᠤᠨ ᠶᠠᠮᠤᠨ ᠤ᠋ ᠪᠢᠴᠢᠭᠡᠴᠢ ᠶ᠋ᠢᠨ ᠣᠷᠣᠨ᠄ ᠪᠠᠷᠠᠭᠤᠨ ᠬᠡᠷᠡᠮ ᠡᠴᠡ ᠵᠡᠭᠦᠨᠰᠢ2 ᠮᠧᠲ᠋ᠷ ᠣᠷᠴᠢᠮ ᠳ᠋ᠤ᠌ ᠵᠡᠭᠦᠨᠰᠢ ᠬᠠᠨᠳᠤᠭᠰᠠᠨ9 ᠲᠠᠰᠤᠯᠭᠠ ᠬᠥᠬᠡ ᠲᠣᠭᠣᠰᠬᠠᠨ ᠪᠠᠢᠰᠢᠩ ᠪᠣᠢ᠃ ᠡᠨᠳᠡ ᠱᠠᠩ ᠶᠠᠮᠤᠨ ᠤ᠋ ᠲᠦᠰᠢᠮᠡᠳ᠂ ᠶᠠᠮᠤᠨ ᠤ᠋ ᠰᠠᠭᠤᠳᠠᠯ ᠤ᠋ᠨ ᠪᠢᠴᠢᠭᠡᠴᠢ᠂ ᠠᠯᠪᠠ ᠡᠷᠬᠢᠯᠡᠬᠦ ᠬᠥᠮᠦᠰ ᠰᠠᠭᠤᠬᠤ ᠪᠥᠭᠡᠳ ᠵᠠᠷᠢᠮ ᠦᠶᠡ ᠳ᠋ᠦ᠍ ᠭᠠᠳᠠᠨᠠ ᠶ᠋ᠢᠨ ᠵᠣᠴᠢᠳ ᠰᠠᠭᠤᠳᠠᠭ ᠣᠷᠣᠨ ᠰᠠᠭᠤᠴᠠ ᠪᠣᠯᠤᠨᠠ᠃ ᠲᠡᠳᠡᠨ ᠳ᠋ᠦ᠍ ᠶᠡᠷᠦ ᠨᠢ ᠠᠯᠪᠠ ᠡᠷᠬᠢᠯᠡᠬᠦ ᠠᠯᠪᠠᠨ ᠭᠡᠷ ᠪᠠᠢᠳᠠᠭ ᠦᠭᠡᠢ ᠲᠤᠯᠠ ᠰᠠᠭᠤᠬᠤ ᠣᠷᠣᠨ ᠳ᠋ᠠᠭᠠᠨ ᠠᠯᠪᠠ ᠡᠷᠬᠢᠯᠡᠳᠡᠭ ᠪᠠᠢᠵᠠᠢ᠃
(5) ᠬᠣᠢᠰᠢ ᠬᠠᠨᠳᠤᠭᠰᠠᠨ ᠣᠷᠣᠨ ᠭᠡᠷ ᠦ᠋ᠳ᠄ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠬᠠᠨᠳᠤᠭᠰᠠᠨ ᠪᠠᠢᠰᠢᠩ ᠤ᠋ᠨ ᠡᠮᠦᠨᠡ ᠱᠤᠭᠤᠮ ᠢ᠋ ᠲᠠᠭᠠᠷᠠᠭᠤᠯᠵᠤ ᠡᠮᠦᠨᠡ ᠲᠠᠯᠠ ᠶ᠋ᠢᠨ ᠶᠡᠬᠡ ᠬᠡᠷᠡᠮ ᠡᠴᠡ ᠬᠣᠢᠰᠢ15 ᠮᠧᠲ᠋ᠷ ᠣᠷᠴᠢᠮ ᠤ᠋ᠨ ᠵᠠᠢ ᠳᠡᠭᠡᠷᠡ ᠬᠣᠢᠰᠢ ᠬᠠᠨᠳᠤᠭᠰᠠᠨ9 ᠲᠠᠰᠤᠯᠭᠠ ᠬᠥᠬᠡ ᠲᠣᠭᠣᠰᠬᠠᠨ ᠪᠠᠢᠰᠢᠩ ᠪᠣᠢ᠂ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ3 ᠲᠠᠰᠤᠯᠭᠠ ᠶᠡᠬᠡ ᠪᠠᠢᠰᠢᠩ ᠳ᠋ᠤ᠌ ᠵᠢᠯ ᠴᠠᠭᠠᠨ ᠰᠠᠷᠠ ᠪᠣᠯᠪᠠᠯ ᠠᠷᠪᠢᠨ ᠬᠤᠸᠠᠷᠠᠭ ᠤ᠋ᠳ ᠢ᠋ ᠵᠠᠯᠠᠵᠤ ᠠᠪᠴᠢᠷᠠᠨ《ᠳ᠋ᠠᠷᠠ ᠡᠬᠡ》᠂《ᠪᠦᠲᠦᠭᠡᠯ ᠪᠦᠲᠦᠭᠡᠬᠦ》 ᠵᠡᠷᠭᠡ ᠶ᠋ᠢᠨ ᠶᠡᠬᠡ ᠬᠤᠷᠠᠯ ᠢ᠋ ᠡᠨᠳᠡ ᠤᠩᠰᠢᠭᠤᠯᠳᠠᠭ ᠭᠡᠨᠡ᠃ ᠲᠡᠭᠦᠨ ᠦ᠌ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠪᠠᠭᠠ ᠰᠢᠭ᠋ ᠬᠥᠯᠥᠨ ᠡᠭᠦᠳᠡ ᠲᠡᠢ᠂ ᠡᠭᠦᠳᠡᠨ ᠦ᠌ ᠵᠡᠭᠦᠨ ᠲᠠᠯᠠ ᠳ᠋ᠤ᠌2 ᠲᠠᠰᠤᠯᠭᠠ ᠪᠠᠢᠰᠢᠩ ᠪᠣᠢ᠂ ᠲᠡᠭᠦᠨ ᠦ᠌ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠶᠡᠬᠡ ᠬᠥᠯᠥᠨ ᠡᠭᠦᠳᠡ ᠪᠣᠢ᠂ ᠡᠭᠦᠳᠡᠨ ᠵᠡᠭᠦᠨ ᠲᠠᠯᠠ ᠳ᠋ᠤ᠌ ᠪᠠᠰᠠ2 ᠲᠠᠰᠤᠯᠭᠠ ᠪᠠᠢᠰᠢᠩ ᠲᠠᠢ᠃
ᠡᠳᠡᠭᠡᠷ ᠪᠠᠢᠰᠢᠩ ᠨᠢ ᠪᠣᠰᠤᠭᠠ ᠨᠢᠷᠤᠭᠤ ᠲᠠᠢ ᠪᠥᠭᠡᠳ ᠪᠠᠷᠠᠭᠤᠨ ᠪᠠᠭᠠ ᠡᠭᠦᠳᠡ᠂ ᠵᠡᠭᠦᠨ ᠶᠡᠬᠡ ᠡᠭᠦᠳᠡ ᠨᠢ ᠱᠠᠩ ᠤ᠋ᠨ ᠳᠣᠲᠣᠷᠠ ᠬᠦᠷᠢᠶᠡᠨ(ᠬᠣᠢᠲᠤ ᠬᠦᠷᠢᠶᠡᠨ) ᠳ᠋ᠦ᠍ ᠨᠡᠪᠲᠡᠷᠡᠬᠦ ᠪᠣᠯᠪᠠᠴᠤ ᠳᠡᠭᠡᠷᠡᠬᠢ ᠨᠢ ᠪᠠᠢᠰᠢᠩ ᠲᠠᠢ ᠪᠠᠨ ᠠᠳᠠᠯᠢ ᠪᠠᠢᠵᠤ ᠪᠦᠷ ᠬᠥᠯᠥᠨ ᠡᠭᠦᠳᠡ ᠪᠣᠯᠤᠨᠠ᠃ ᠭᠠᠭᠴᠠ ᠬᠦ᠌ ᠵᠡᠭᠦᠨ ᠪᠠᠢᠰᠢᠩ ᠪᠣᠯᠤᠨ(ᠪᠠᠷᠠᠭᠤᠨᠰᠢ ᠬᠠᠨᠳᠤᠭᠰᠠᠨ ᠪᠠᠢᠰᠢᠩ ᠢ᠋ ᠬᠡᠯᠡᠵᠦ ᠪᠣᠢ) ᠡᠨᠡ ᠪᠠᠢᠰᠢᠩ ᠤ᠋ᠨ ᠬᠣᠭᠣᠷᠣᠨᠳᠣ ᠪᠠᠭᠠ ᠬᠠᠪᠴᠢᠯ ᠨᠢ ᠬᠣᠢᠰᠢ ᠨᠡᠪᠲᠡᠷᠡᠬᠦ ᠡᠩ ᠦ᠋ᠨ ᠡᠭᠦᠳᠡ ᠪᠣᠯᠤᠨᠠ᠃
ᠦᠨᠡᠨ ᠳ᠋ᠡᠭᠡᠨ9 ᠲᠠᠰᠤᠯᠭᠠ ᠪᠣᠯᠪᠠᠴᠤ ᠬᠣᠶᠠᠷ ᠡᠭᠦᠳᠡᠨ ᠦ᠌ ᠵᠠᠢ ᠶ᠋ᠢ ᠭᠠᠷᠭᠠᠴᠢᠬᠠᠪᠠᠯ7 ᠲᠠᠰᠤᠯᠭᠠ ᠪᠠᠢᠰᠢᠩ ᠪᠣᠯᠤᠨᠠ᠃ ᠡᠳᠡᠭᠡᠷ ᠪᠠᠢᠰᠢᠩ ᠳ᠋ᠤ᠌ ᠱᠠᠩ ᠶᠠᠮᠤᠨ ᠤ᠋ ᠠᠮᠤᠷ ᠢ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠦ᠋ᠳ ᠡᠭᠡᠯᠵᠢᠶᠡ ᠪᠡᠷ ᠰᠠᠭᠤᠳᠠᠭ ᠪᠠᠢᠵᠠᠢ᠃
(6) ᠵᠡᠭᠦᠨ ᠬᠡᠷᠡᠮ ᠪᠣᠯᠤᠨ ᠱᠠᠩ ᠤ᠋ᠨ ᠣᠷᠳᠣᠨ ᠤ᠋ ᠳᠡᠮᠴᠢ ᠶ᠋ᠢᠨ ᠭᠡᠷ ᠣᠷᠣᠨ ᠤ᠋ ᠬᠣᠭᠣᠷᠣᠨᠳᠣ ᠪᠠᠷᠠᠭᠤᠨᠰᠢ ᠬᠠᠨᠳᠤᠭᠰᠠᠨ11 ᠲᠠᠰᠤᠯᠭᠠ ᠬᠥᠬᠡ ᠲᠣᠭᠣᠰᠬᠠᠨ ᠪᠠᠢᠰᠢᠩ ᠪᠣᠢ᠃ ᠡᠨᠳᠡ ᠱᠠᠩ ᠤ᠋ᠨ ᠣᠷᠳᠣᠨ ᠳ᠋ᠤ᠌ ᠲᠤᠰᠬᠠᠢ ᠬᠡᠷᠡᠭ ᠤᠴᠢᠷ ᠢ᠋ᠶ᠋ᠠᠷ ᠢᠷᠡᠭᠰᠡᠳ᠂ ᠵᠠᠷᠭᠤ ᠵᠠᠭᠠᠯᠳᠤᠯᠭᠠ ᠳ᠋ᠤ᠌ ᠬᠣᠯᠪᠣᠭᠳᠠᠭᠰᠠᠳ᠂ ᠲᠦᠷ ᠴᠠᠭ ᠶᠠᠮᠤᠨ ᠳ᠋ᠤ᠌ ᠰᠠᠭᠤᠬᠤ ᠤᠴᠢᠷ ᠲᠠᠢ ᠭᠠᠳᠠᠨᠠ ᠶ᠋ᠢᠨ ᠵᠣᠴᠢᠳ᠂ ᠮᠠᠢᠮᠠᠢ ᠠᠷᠠᠯᠵᠢᠶᠠᠴᠢᠳ ᠵᠡᠷᠭᠡ ᠬᠥᠮᠦᠰ ᠰᠠᠭᠤᠳᠠᠭ᠃
ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠣᠷᠳᠣᠨ ᠤ᠋ ᠬᠣᠢᠨᠠ ᠭᠤᠷᠪᠠᠨ ᠵᠦᠭ ᠲᠦ᠍ ᠦᠦᠰᠢᠨ13 ᠬᠤᠷᠠᠬᠤ ᠶ᠋ᠢᠨ ᠣᠪᠣᠭᠠᠨ ᠤ᠋《ᠳᠡᠯᠭᠡᠷ ᠬᠤᠷᠠᠬᠤ》᠂ 《ᠮᠠᠩᠬᠠᠲᠤ ᠬᠤᠷᠠᠬᠤ》 ᠪᠣᠯᠤᠨ《ᠰᠦᠯᠳᠡ ᠶ᠋ᠢᠨ ᠣᠷᠣᠢ》 ᠰᠦᠨᠳᠡᠷᠯᠡᠵᠦ᠂ ᠵᠡᠭᠦᠨ ᠲᠠᠯᠠ ᠪᠠᠷ ᠡᠮᠦᠨᠡᠰᠢ ᠬᠣᠢᠰᠢ25 ᠺᠢᠯᠣᠮᠧᠲ᠋ᠷ ᠦᠷᠭᠦᠯᠵᠢᠯᠡᠭᠰᠡᠨ ᠲᠠᠮᠠᠭᠠᠯᠠᠢ ᠶ᠋ᠢᠨ ᠴᠠᠢᠳᠠᠮ᠂ ᠰᠢᠪᠠᠷ ᠤ᠋ᠨ ᠴᠠᠢᠳᠠᠮ ᠨᠣᠭᠣᠭᠠᠷᠠᠨ᠂ ᠪᠠᠷᠠᠭᠤᠨ ᠲᠠᠯᠠ ᠪᠠᠷ ᠢ᠋ᠶ᠋ᠠᠨ ᠣᠳᠣᠬᠠᠨ ᠳ᠋ᠤ᠌ ᠬᠠᠢᠨ ᠰᠢᠨᠵᠢᠵᠦ ᠢᠯᠡᠷᠡᠭᠦᠯᠦᠭᠰᠡᠨ ᠳᠡᠯᠡᠬᠡᠢ ᠳ᠋ᠦ᠍ ᠬᠣᠪᠣᠷ ᠪᠣᠯᠬᠤ ᠠᠭᠤᠷᠬᠠᠢ ᠶ᠋ᠢᠨ ᠪᠤᠯᠠᠭᠳᠠᠴᠠ ᠠᠨᠠᠯᠽᠠᠲ(ᠪᠤᠴᠠᠯᠤᠮᠠᠯ ᠴᠢᠯᠠᠭᠤ) ᠪᠠᠷ ᠪᠦᠷᠢᠯᠳᠦᠭᠰᠡᠨ ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠥᠨᠳᠥᠷ ᠰᠢᠯᠢ ᠨᠦ᠍ᠭᠦᠳ ᠰᠦᠨᠳᠡᠷᠯᠡᠨᠡ᠃ ᠡᠮᠦᠨᠡ ᠵᠦᠭ ᠦ᠋ᠨ ᠠᠯᠤᠰ ᠲᠤ᠌ ᠰᠢᠷᠠ ᠬᠥᠷᠥᠰᠥᠲᠦ ᠥᠨᠳᠥᠷᠯᠢᠭ ᠳᠠᠬᠢ ᠤᠷᠲᠤ ᠴᠠᠭᠠᠨ ᠬᠡᠷᠡᠮ ᠤᠭᠠᠯᠵᠠᠯᠠᠭᠰᠠᠨ ᠰᠢᠨᠵᠢ ᠲᠡᠭᠦᠰ ᠪᠦᠷᠢᠳᠦᠭᠰᠡᠨ ᠰᠠᠢᠬᠠᠨ ᠭᠠᠵᠠᠷ ᠪᠠᠢᠵᠠᠢ᠃
ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠥᠷᠨᠢᠭᠰᠡᠨ ᠠᠷᠪᠠᠨ ᠬᠣᠶᠠᠷ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠡᠴᠡ ᠡᠬᠢᠯᠡᠭᠡᠳ ᠮᠠᠨᠵᠤ ᠴᠢᠩ ᠦ᠋ᠨ ᠨᠣᠶᠠᠷᠬᠠᠯ ᠢ᠋ ᠲᠦᠯᠬᠢᠨ ᠤᠨᠠᠭᠠᠬᠤ ᠪᠠᠷ ᠪᠦᠬᠦ ᠤᠯᠤᠰ ᠲᠤ᠌ ᠥᠷᠨᠢᠭᠰᠡᠨ ᠴᠠᠭᠠᠭᠴᠢᠨ ᠭᠠᠬᠠᠢ ᠵᠢᠯ ᠦ᠋ᠨ ᠬᠤᠪᠢᠰᠬᠠᠯ ᠲᠠᠢ ᠤᠷᠤᠰᠬᠠᠯ ᠨᠡᠢᠯᠡᠭᠰᠡᠨ ᠰᠢᠨᠡᠯᠡᠮᠡ ᠶ᠋ᠢᠨ ᠡᠭᠦᠰᠬᠡᠨ ᠪᠠᠢᠭᠤᠯᠵᠤ ᠤᠳᠤᠷᠢᠳᠤᠭᠰᠠᠨ ᠠᠷᠪᠠᠨ ᠨᠢᠭᠡᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ᠂1916 ᠣᠨ ᠤ᠋ ᠳᠠᠯᠠᠨ ᠠᠨᠳᠠ ᠶ᠋ᠢᠨ ᠳᠤᠭᠤᠢᠯᠠᠩ᠂1926 ᠣᠨ ᠳ᠋ᠤ᠌ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠪᠠᠢᠭᠤᠯᠵᠤ᠂ ᠬᠣᠰᠢᠭᠤ ᠬᠣᠷᠢᠶᠠ ᠪᠠᠢᠭᠤᠯᠤᠭᠰᠠᠨ ᠪᠠ ᠴᠡᠷᠢᠭ ᠪᠠᠢᠭᠤᠯᠵᠤ ᠢᠯᠠᠯᠲᠠ ᠲᠠᠢ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ ᠬᠣᠷᠢ ᠭᠠᠷᠤᠢ ᠵᠢᠯ ᠦ᠋ᠨ ᠪᠤᠳᠤᠯᠢᠶᠠᠨᠲᠠᠢ ᠴᠠᠭ ᠬᠤᠭᠤᠴᠠᠭᠠᠨ ᠳ᠋ᠤ᠌ (ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠣᠷᠳᠣᠨ) ᠨᠢ ᠣᠷᠳᠣᠰ ᠤ᠋ᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠡᠰᠡᠷᠭᠦ ᠲᠠᠯᠠ ᠶ᠋ᠢᠨ ᠰᠠᠭᠤᠷᠢᠨ ᠭᠠᠵᠠᠷ ᠪᠠᠢᠵᠠᠢ᠃
13. ᠮᠤᠬᠤᠷ ᠣᠪᠣᠭᠠᠨ ᠤ᠋ ᠪᠠᠢᠯᠳᠤᠭᠠᠨ
ᠮᠤᠬᠤᠷ ᠣᠪᠣᠭᠠ ᠪᠣᠯ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠤᠯᠠᠭᠠᠨᠲᠣᠯᠣᠭᠠᠢ ᠰᠤᠮᠤᠨ ᠤ᠋ ᠰᠦᠮᠡ ᠶ᠋ᠢᠨ ᠵᠠᠳᠠᠭᠠᠢ ᠭᠡᠬᠦ ᠶᠡᠬᠡ ᠳᠥᠭᠥᠮ ᠦ᠋ᠨ ᠵᠡᠭᠦᠨ ᠬᠣᠢᠲᠠᠢ ᠪᠠᠢᠷᠢᠰᠢᠵᠤ ᠪᠠᠢᠳᠠᠭ᠃ ᠱᠠᠨᠰᠢ ᠶ᠋ᠢᠨ ᠢᠦᠢ ᠯᠢᠨ(ᠲᠡᠮᠡᠭᠡᠲᠦ) ᠡᠴᠡ ᠤᠮᠠᠷᠠᠰᠢ ᠰᠢᠭᠤᠳ ᠬᠥᠬᠡᠲᠣᠯᠣᠭᠠᠢ ᠶ᠋ᠢᠨ ᠳᠠᠪᠤᠰᠤᠨ ᠨᠠᠭᠤᠷ ᠬᠦᠷᠬᠦ《ᠬᠤᠵᠢᠷ ᠳᠠᠪᠤᠰᠤᠨ ᠤ᠋ ᠶᠡᠬᠡ ᠵᠠᠮ》 ᠡᠨᠡ ᠮᠤᠬᠤᠷ ᠣᠪᠣᠭᠠᠨ ᠤ᠋ ᠵᠡᠭᠦᠨ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠳᠡᠭ᠃
1928 ᠣᠨ ᠤ᠋ ᠵᠤᠨ ᠤ᠋ ᠡᠬᠢᠨ ᠰᠠᠷᠠ ᠳ᠋ᠤ᠌ ᠰᠢᠨᠠᠯᠠᠮᠠ ᠶ᠋ᠢᠨ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠤ᠋ ᠪᠠᠢᠯᠳᠤᠭᠴᠢ ᠷᠠᠪᠰᠠᠯ ᠵᠡᠷᠭᠡ ᠲᠠᠪᠤᠨ ᠴᠡᠷᠢᠭ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠭᠠᠷᠴᠤ ᠮᠤᠬᠤᠷ ᠣᠪᠣᠭᠠᠨ ᠤ᠋ ᠵᠡᠭᠦᠨ ᠶᠡᠬᠡ ᠵᠠᠮ ᠢ᠋ ᠴᠠᠭᠳᠠᠨ ᠪᠠᠢᠴᠠᠭᠠᠬᠤ ᠪᠠᠷ ᠶᠠᠪᠤᠵᠤ ᠪᠠᠢᠲᠠᠯᠠ ᠵᠠᠮ ᠤ᠋ᠨ ᠵᠡᠭᠦᠨ ᠬᠠᠪᠢ ᠳ᠋ᠤ᠌ ᠨᠢᠭᠡ ᠪᠢᠴᠢᠬᠠᠨ ᠠᠴᠢᠶᠠᠨ ᠤ᠋ ᠮᠠᠢᠬᠠᠨ ᠬᠥᠰᠬᠡ ᠰᠢᠭ ᠶᠠᠭᠤᠮᠠ ᠦᠵᠡᠭᠳᠡᠯᠡ᠃ ᠲᠡᠳᠡ ᠰᠡᠮᠡᠷᠬᠡᠨ ᠢ᠋ᠶ᠋ᠡᠷ ᠣᠴᠢᠭᠠᠳ ᠠᠵᠢᠭᠯᠠᠬᠤᠯᠠᠷ ᠨᠢᠭᠡ ᠪᠦᠯᠦᠭ ᠬᠠᠭᠠᠷᠬᠠᠢ ᠪᠠᠯᠪᠠᠷᠬᠠᠢ ᠱᠠᠭᠠᠵᠠᠩ ᠰᠠᠪᠠ ᠪᠠᠢᠪᠠ᠃ ᠲᠡᠳᠡ ᠳᠠᠪᠤᠰᠤ ᠲᠡᠭᠡᠭᠡᠪᠦᠷᠢᠯᠡᠬᠦ ᠪᠡᠷ ᠶᠠᠪᠤᠭᠰᠠᠨ ᠠᠷᠠᠳ ᠤ᠋ᠳ ᠴᠡᠷᠢᠭ ᠡᠴᠡ ᠨᠢᠭᠤᠵᠤ ᠠᠶᠤᠬᠤ ᠳ᠋ᠠᠭᠠᠨ ᠶᠠᠭᠤᠮᠠ ᠬᠡᠦᠮᠡ ᠪᠡᠨ ᠲᠡᠭᠡᠭᠡᠵᠦ ᠵᠠᠪᠳᠤᠭᠰᠠᠨ ᠦᠭᠡᠢ ᠳᠤᠲᠠᠭᠠᠴᠢᠬᠠᠭᠰᠠᠨ ᠪᠠᠢᠬᠠ ᠭᠡᠮᠡᠨ ᠲᠠᠭᠠᠮᠠᠭᠯᠠᠵᠠᠢ᠃ ᠦᠷᠭᠦᠯᠵᠢᠯᠡᠨ ᠴᠠᠭᠠᠰᠢ ᠶᠠᠪᠤᠬᠤᠯᠠ ᠵᠠᠮ ᠤ᠋ᠨ ᠭᠣᠣᠯ ᠢ᠋ᠶ᠋ᠠᠷ ᠭᠠᠤᠯᠢᠨ ᠲᠣᠭᠣᠭᠠ ᠠᠶᠠᠭᠠ ᠱᠠᠭᠠᠵᠠᠩ ᠪᠠ ᠢᠳᠡᠭᠡᠳ ᠬᠠᠶᠠᠭᠰᠠᠨ ᠪᠣᠣᠪᠣ ᠪᠣᠭᠣᠷᠰᠣᠭ ᠬᠠᠷᠠᠭᠳᠠᠵᠤ ᠪᠠᠢᠯᠠ᠃
ᠲᠡᠳᠡ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠲᠡᠳᠡᠭᠡᠷ ᠶᠠᠭᠤᠮᠠᠰ ᠢ᠋ ᠯᠠᠪᠳᠠᠭᠤᠯᠤᠨ ᠦᠵᠡᠬᠦᠯᠡ ᠬᠠᠷᠢᠨ ᠨᠠᠷᠢᠬᠠᠨ ᠤᠲᠠᠰᠤ ᠪᠠᠷ ᠬᠣᠯᠪᠣᠵᠤ ᠬᠠᠶᠠᠭᠰᠠᠨ ᠲᠥᠯᠥᠪ ᠲᠡᠢ᠂ ᠰᠠᠨᠳᠤᠷᠤᠤ ᠵᠠᠩ ᠲᠠᠢ ᠨᠢᠭᠡ ᠪᠠᠢᠯᠳᠤᠭᠴᠢ ᠰᠠᠨᠠᠮᠰᠠᠷ ᠦᠭᠡᠢ ᠨᠢᠭᠡ ᠭᠠᠤᠯᠢᠨ ᠲᠣᠭᠣᠭᠠ ᠶ᠋ᠢ ᠨᠢ ᠢᠰᠬᠦᠯᠦᠭᠰᠡᠨ ᠳ᠋ᠦ᠍ ᠲᠩᠷᠢ ᠳᠣᠩᠭᠣᠳᠤᠭᠰᠠᠨ ᠰᠢᠭ᠋ ᠳᠡᠯᠪᠡᠷᠡᠯᠲᠡ ᠶ᠋ᠢᠨ ᠳᠠᠭᠤᠨ ᠭᠠᠷᠴᠤ ᠳᠡᠭᠳᠡᠭᠰᠡᠨ ᠲᠣᠭᠣᠰᠣ ᠰᠢᠷᠣᠢ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠲᠡᠭᠦᠨ ᠢ᠋ ᠭᠦᠨ ᠪᠤᠯᠠᠭᠰᠠᠨ ᠪᠣᠯᠪᠠᠴᠤ ᠠᠷᠠᠢ ᠭᠡᠵᠦ ᠠᠮᠢᠳᠤ ᠪᠠᠢᠯᠠ᠃《ᠭᠠᠢ ᠭᠠᠵᠠᠷ ᠳᠣᠣᠷᠠ ᠠ᠋ᠴᠠ》 ᠭᠡᠳᠡᠭᠴᠢᠯᠡᠨ ᠲᠣᠭᠣᠰᠣ ᠮᠠᠨᠠᠨ ᠠᠷᠢᠯᠬᠤ ᠠ᠋ᠴᠠ ᠡᠮᠦᠨᠡᠬᠡᠨ《ᠠᠮᠢᠳᠤ ᠪᠠᠷ ᠪᠠᠷᠢᠶᠠ ᠁》 ᠭᠡᠰᠡᠨ ᠣᠷᠢᠯᠠᠬᠤ ᠳᠠᠭᠤᠨ ᠪᠢᠴᠢᠬᠠᠨ ᠳᠣᠪᠣᠴᠠᠭ ᠤ᠋ᠨ ᠳᠠᠯᠠᠩ ᠤ᠋ᠨ ᠴᠠᠭᠠᠨᠠ ᠠ᠋ᠴᠠ ᠰᠣᠨᠣᠰᠳᠠᠵᠤ᠂ ᠬᠣᠶᠠᠷ ᠡᠲᠡᠭᠡᠳ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠭᠠᠯ ᠠᠪᠤᠯᠴᠠᠯᠠ᠃
ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠨᠢᠭᠡ ᠲᠠᠰᠤᠭ ᠴᠡᠷᠢᠭ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠠᠷᠤ ᠲᠠᠯᠠ ᠶ᠋ᠢᠨ ᠪᠠᠢᠳᠠᠯ ᠢ᠋ ᠴᠠᠭᠳᠠᠨ ᠪᠠᠢᠴᠠᠭᠠᠬᠤ ᠪᠠᠷ ᠶᠠᠪᠤᠵᠤ ᠶᠡᠬᠡ ᠵᠠᠮ ᠤ᠋ᠨ ᠳᠤᠮᠳᠠ ᠮᠠᠰᠢ ᠠᠷᠪᠢᠨ ᠳ᠋ᠢᠯᠧᠢ ᠪᠤᠯᠠᠵᠤ᠂ ᠲᠡᠭᠦᠨ ᠢ᠋ᠶ᠋ᠡᠨ ᠨᠠᠷᠢᠨ ᠤᠲᠠᠰᠤ ᠪᠠᠷ ᠬᠥᠮᠦᠨ ᠢ᠋ ᠮᠡᠬᠡᠯᠡᠳᠡᠭ ᠡᠯᠳᠡᠪ ᠦ᠋ᠨ ᠶᠠᠭᠤᠮᠠ ᠲᠠᠢ ᠬᠣᠯᠪᠣᠵᠤ ᠤᠶᠠᠪᠠ᠃ ᠰᠠᠨᠠᠮᠰᠠᠷ ᠦᠭᠡᠢ ᠬᠥᠨᠳᠡᠬᠦ ᠳ᠋ᠦ᠍ ᠬᠦᠷᠪᠡᠯ ᠭᠡᠨᠡᠳᠲᠡ ᠳᠡᠯᠪᠡᠷᠡᠵᠦ ᠬᠥᠮᠦᠨ ᠮᠠᠯ ᠢ᠋ ᠠᠯᠠᠵᠤ ᠰᠢᠷᠬᠠᠲᠤᠭᠤᠯᠳᠠᠭ᠃ ᠲᠡᠭᠡᠭᠡᠳ ᠳᠣᠪᠣᠴᠠᠭ ᠳᠠᠯᠠᠩ ᠤ᠋ᠨ ᠴᠠᠭᠠᠨᠠ ᠨᠢᠭᠤᠨ ᠳᠠᠯᠳᠠᠯᠠᠵᠤ ᠳᠡᠯᠪᠡᠷᠡᠯᠲᠡ ᠶ᠋ᠢ ᠳᠠᠯᠢᠮᠳᠠᠭᠤᠯᠵᠤ ᠳᠠᠭᠠᠷᠢᠨ ᠰᠥᠨᠥᠭᠡᠬᠦ ᠪᠡᠷ ᠲᠥᠯᠥᠪᠯᠡᠭᠰᠡᠨ ᠵᠢᠰᠤᠷ ᠠᠷᠭᠠ ᠪᠠᠢᠵᠠᠢ᠃
ᠰᠠᠨᠠᠮᠰᠠᠷ ᠦᠭᠡᠢ ᠨᠢᠭᠡ ᠭᠠᠤᠯᠢᠨ ᠲᠣᠭᠣᠭᠠ ᠶ᠋ᠢ ᠢᠰᠬᠦᠯᠵᠦ ᠳ᠋ᠢᠯᠧᠢ ᠶ᠋ᠢᠨ ᠳᠡᠯᠪᠡᠷᠡᠯᠲᠡ ᠭᠠᠷᠭᠠᠭᠰᠠᠨ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠨᠢᠭᠡ ᠠᠭᠲᠠ ᠮᠣᠷᠢ ᠰᠢᠷᠬᠠᠲᠤᠵᠤ ᠦᠬᠦᠯᠡ᠃
ᠷᠠᠪᠰᠠᠯ ᠪᠣᠯ ᠨᠡᠷᠡ ᠴᠤᠤᠲᠠᠢ ᠰᠠᠢᠨ ᠵᠢᠷᠣᠭᠠ ᠮᠣᠷᠢ ᠤᠨᠤᠳᠠᠭ ᠪᠠᠨᠴᠢᠨ ᠰᠦᠮᠡ ᠶ᠋ᠢᠨ ᠯᠠᠮᠠ ᠶᠤᠮ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠲᠡᠷᠡ ᠠᠷᠪᠠᠨ ᠬᠡᠳᠦᠨ ᠨᠠᠰᠤᠨ ᠤ᠋ ᠵᠠᠯᠠᠭᠤ ᠪᠠᠢᠵᠤ ᠵᠣᠷᠢᠭ ᠰᠥᠰᠥᠲᠡᠢ ᠲᠤᠯᠠ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠳᠤᠮᠳᠠᠭᠤᠷ ᠬᠡᠳᠦᠨ ᠤᠳᠠᠭᠠ ᠮᠣᠷᠢ ᠪᠠᠨ ᠵᠢᠷᠣᠭᠠᠯᠠᠭᠤᠯᠵᠤ ᠳᠠᠭᠠᠷᠢᠯᠲᠠ ᠬᠢᠭᠰᠡᠨ ᠪᠣᠯᠪᠠᠴᠤ ᠬᠤᠯᠠᠭᠠᠢ ᠰᠤᠮᠤᠨ ᠳ᠋ᠤ᠌ ᠶᠡᠷᠦ ᠣᠨᠣᠭᠳᠠᠭᠰᠠᠨ ᠦᠭᠡᠢ ᠬᠠᠷᠢᠨ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠢ᠋ ᠬᠡᠳᠦ ᠶ᠋ᠢ ᠨᠢ ᠰᠢᠷᠬᠠᠲᠤᠭᠤᠯᠤᠭᠰᠠᠨ ᠪᠠᠢᠨᠠ᠃
ᠪᠠᠢᠯᠳᠤᠭᠠᠨ ᠨᠢᠭᠡ ᠡᠳᠦᠷ ᠰᠢᠬᠠᠮ ᠦᠷᠭᠦᠯᠵᠢᠯᠡᠵᠦ ᠬᠣᠶᠠᠷ ᠲᠠᠯᠠ ᠪᠠᠷ ᠬᠥᠮᠦᠨ ᠦᠬᠦᠭᠰᠡᠨ ᠦᠭᠡᠢ᠃①
— — — —
① ᠲᠤᠰ ᠦᠯᠢᠭᠡᠷ ᠢ᠋ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠤ᠋ ᠪᠠᠢᠯᠳᠤᠭᠴᠢ ᠷᠠᠪᠰᠠᠯ ᠤ᠋ᠨ1980 ᠣᠨ ᠳ᠋ᠤ᠌ ᠬᠡᠯᠡᠭᠰᠡᠨ ᠢ᠋ ᠨᠠᠢᠷᠠᠭᠤᠯᠤᠨ ᠪᠢᠴᠢᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠯ᠂ ᠴᠤᠯᠮᠤᠨᠭᠡᠷᠡᠯ᠂ ᠰᠠᠷᠠᠨᠲᠤᠶᠠᠭᠠ᠂ ᠠᠯᠲᠠᠨᠱᠠ᠂ ᠣᠶᠤᠨᠪᠠᠲᠤ᠂ ᠴᠡᠩᠬᠡᠯᠴᠡᠴᠡᠭ
ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠠᠯᠲᠠᠨᠱᠠ᠂ ᠣᠢ᠌ᠢᠭᠤᠷᠵᠢᠨ ᠣᠳᠬᠣᠨ᠂ ᠲ· ᠬᠦᠮᠦᠵᠢᠯᠲᠦ᠂ ᠴᠤᠯᠮᠤᠨᠭᠡᠷᠡᠯ