ᠭᠤᠷᠪᠠᠨ ᠨᠠᠰᠤᠲᠠᠢ ᠭᠤᠨᠠᠭᠠᠨ ᠤᠯᠠᠭᠠᠨ ᠪᠠᠭᠠᠲᠤᠷ - ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ Гураван настай гунаган улаан баатар - жагар бүрдийн хаан
165ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠠᠭᠤᠳᠠᠮ ᠮᠣᠩᠭᠣᠯ ᠤ᠋ᠨ ᠨᠤᠲᠤᠭ ᠳᠡᠭᠡᠷᠡ
ᠵᠠᠭᠠᠷ ᠪᠦᠷᠢᠳᠦ ᠨᠡᠷᠡ ᠲᠡᠢ
ᠵᠠᠯᠠᠭᠤ ᠨᠢᠭᠡᠨ ᠬᠠᠭᠠᠨ᠂
ᠡᠵᠡᠨ ᠲᠥᠷᠥ ᠪᠡᠨ ᠡᠵᠡᠮᠰᠢᠵᠦ
ᠡᠩ ᠦᠭᠡᠢ ᠶᠡᠬᠡ ᠵᠢᠷᠭᠠᠯ ᠢ᠋ᠶ᠋ᠠᠷ
ᠠᠵᠤ ᠲᠥᠷᠥᠨ ᠪᠠᠢᠭᠰᠠᠨ ᠳ᠋ᠤ᠌᠂
ᠠᠲᠠᠭᠠᠲᠠᠨ ᠳᠠᠢᠰᠤᠨ ᠳᠠᠭᠠᠷᠢᠵᠤ
ᠠᠯᠲᠠᠨ ᠬᠢᠯᠢ ᠶ᠋ᠢ ᠨᠢ ᠬᠠᠯᠳᠠᠵᠤ
ᠠᠷᠠᠳ ᠣᠯᠠᠨ ᠢ᠋ ᠨᠢ ᠵᠣᠪᠠᠭᠠᠨ
ᠠᠳᠤᠭᠤ ᠮᠠᠯ ᠢ᠋ ᠨᠢ ᠲᠠᠭᠤᠵᠤ
ᠠᠢᠪᠤᠩ ᠲᠠᠢᠪᠤᠩ ᠠᠮᠢᠳᠤᠷᠠᠭᠤᠯᠬᠤ ᠥᠬᠡᠢ
ᠠᠮᠤᠷ ᠲᠦᠪᠰᠢᠨ ᠰᠠᠭᠤᠯᠭᠠᠬᠤ ᠦᠭᠡᠢ
ᠠᠯᠠᠵᠤ ᠲᠦᠢᠮᠡᠷᠳᠡᠨ ᠢᠷᠡᠬᠦ ᠳ᠋ᠦ᠍᠂
ᠵᠠᠭᠠᠷ ᠪᠦᠷᠢᠳᠦ ᠬᠠᠭᠠᠨ
ᠵᠠᠨᠤᠯ ᠬᠣᠷᠣᠰᠤᠯ ᠪᠠᠳᠠᠷᠠᠵᠤ
ᠵᠠᠷᠯᠢᠭ ᠲᠤᠩᠬᠠᠭ ᠭᠠᠷᠭᠠᠵᠤ
ᠵᠠᠭᠤᠨ ᠮᠢᠩᠭᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠨᠥᠷᠢᠵᠦ᠂
ᠵᠠᠬᠠ ᠶ᠋ᠢ ᠵᠠᠯᠭᠢᠭᠰᠠᠨ ᠳᠠᠢᠰᠤᠨ ᠢ᠋
ᠵᠠᠪᠠᠯ ᠪᠤᠲᠠ ᠨᠢᠷᠭᠡᠨᠡ ᠭᠡᠵᠦ᠂
ᠬᠢᠵᠠᠭᠠᠷ ᠢ᠋ ᠬᠠᠯᠳᠠᠭᠰᠠᠨ ᠳᠠᠢᠰᠤᠨ ᠢ᠋
ᠬᠠᠮᠬᠠ ᠴᠣᠬᠢᠵᠤ ᠰᠥᠨᠥᠭᠡᠬᠦ ᠪᠡᠷ
ᠦᠵᠦᠮ ᠦ᠋ᠨ ᠤᠯᠠᠭᠠᠨ ᠲᠤᠭ ᠢ᠋ ᠪᠡᠨ
ᠤᠬᠤᠨᠠ ᠠᠯᠠᠨ ᠳᠠᠬᠢᠵᠤ
ᠥᠩᠭᠡᠯᠵᠡᠵᠦ ᠢᠷᠡᠭᠰᠡᠨ ᠳᠡᠭᠡᠷᠡᠮᠴᠢᠳ ᠢ᠋
ᠦᠬᠦᠯ ᠦ᠋ᠨ ᠵᠠᠮ ᠳ᠋ᠤᠨᠢ ᠣᠷᠣᠭᠤᠯᠤᠨᠠ ᠭᠡᠵᠦ
ᠪᠠᠭᠠᠲᠤᠷ ᠴᠣᠯᠠ ᠲᠠᠢ ᠴᠡᠷᠢᠭ ᠢ᠋ᠶ᠋ᠡᠨ
ᠪᠤᠳᠠᠭᠠᠯᠠᠨ ᠬᠤᠷᠢᠮᠯᠠᠵᠤ ᠮᠣᠷᠳᠠᠬᠤ ᠳ᠋ᠠᠭᠠᠨ᠂
ᠲᠥᠪ ᠣᠷᠳᠣᠨ ᠢ᠋ᠶ᠋ᠠᠨ ᠳᠠᠭᠠᠷᠢᠨ
ᠲᠥᠷᠥᠭᠰᠡᠨ ᠡᠭᠡᠴᠢ ᠳᠡᠭᠦᠦ ᠪᠣᠯᠤᠭᠴᠢ
ᠲᠥᠷᠥ ᠶ᠋ᠢᠨ ᠭᠤᠷᠪᠠᠨ ᠬᠠᠲᠤᠨ ᠡᠴᠡ ᠪᠡᠨ
ᠲᠦᠭᠡᠮᠡᠯ ᠢᠷᠦᠭᠡᠯ ᠭᠤᠶᠤᠭᠰᠠᠨ ᠳ᠋ᠤ᠌᠂
ᠲᠡᠷᠢᠭᠦᠨ ᠶᠡᠬᠡ ᠬᠠᠲᠤᠨ ᠨᠢ᠄
《ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠭᠠᠳ ᠢᠷᠡᠪᠡᠯ᠂
ᠳᠠᠯᠠᠨ ᠭᠤᠷᠪᠠᠨ ᠲᠣᠪᠴᠢ ᠲᠠᠢ
ᠳᠠᠨᠳᠠᠭᠠᠷ ᠬᠠᠷᠠ ᠬᠦᠷᠮᠡ ᠬᠢᠵᠦ
ᠢᠯᠠᠭᠰᠠᠨ ᠪᠠᠶᠠᠷ ᠢ᠋ ᠴᠢᠨᠢ ᠪᠡᠯᠡᠭᠯᠡᠵᠦ
ᠢᠷᠦᠭᠡᠯ ᠪᠣᠯᠭᠠᠨ ᠤᠭᠲᠤᠨᠠ》ᠭᠡᠪᠡ᠃
ᠬᠣᠶᠠᠳᠤᠭᠠᠷ ᠬᠠᠲᠤᠨ ᠨᠢ᠄
《ᠮᠠᠨᠳᠤᠭᠰᠠᠨ ᠲᠤᠭ ᠢ᠋ᠶ᠋ᠠᠨ ᠬᠡᠢᠰᠬᠡᠵᠦ
ᠮᠠᠯᠠᠭᠠᠢ ᠬᠠᠶᠠᠨ ᠳᠠᠭᠤᠯᠠᠬᠤ ᠳ᠋ᠤ᠌ ᠴᠢᠨᠢ
ᠮᠠᠨᠵᠤ ᠶ᠋ᠢᠨ ᠠᠯᠳᠠᠷᠲᠤ ᠡᠳ᠋
ᠮᠠᠬᠠᠢ ᠭᠤᠲᠤᠯ ᠢ᠋ᠶ᠋ᠠᠷ ᠪᠠᠷᠠᠳᠠᠨᠠ》 ᠭᠡᠪᠡ᠃
ᠣᠳᠬᠠᠨ ᠪᠠᠭᠠ ᠬᠠᠲᠤᠨ ᠨᠢ᠂
ᠣᠷᠣᠭᠰᠢ ᠪᠠᠨ ᠳᠠᠪᠰᠢᠨ ᠠᠯᠬᠤᠵᠤ
《ᠠᠲᠠᠭᠠᠲᠠᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠠᠯᠠᠵᠤ
ᠠᠯᠳᠠᠷ ᠴᠣᠯᠠ ᠪᠠᠨ ᠪᠠᠳᠠᠷᠠᠭᠤᠯᠤᠨ
ᠠᠷᠤ ᠶ᠋ᠢᠨ ᠬᠤᠶᠠᠭ ᠢ᠋ᠶ᠋ᠠᠨ ᠲᠠᠢᠯᠵᠤ
ᠠᠮᠠᠭᠠᠢ ᠭᠠᠷᠭᠠᠨ ᠠᠮᠠᠷᠠᠬᠤ ᠳ᠋ᠤ᠌ ᠴᠢᠨᠢ
ᠠᠯᠲᠠᠨ ᠴᠡᠭᠡᠵᠢ᠂ ᠮᠥᠩᠭᠥᠨ ᠪᠥᠭᠰᠡ ᠲᠡᠢ
ᠠᠷᠢᠭᠤᠨ ᠬᠦᠦ ᠲᠥᠷᠥᠵᠦ ᠤᠭᠲᠤᠨᠠ᠃》 ᠭᠡᠪᠡ᠃
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠᠬᠠ ᠳᠠᠷᠠᠭᠠᠯᠠᠨ ᠰᠣᠨᠣᠰᠴᠤ
ᠰᠡᠳᠬᠢᠯ ᠳᠦᠭᠦᠷᠡᠩ ᠪᠠᠶᠠᠷᠯᠠᠵᠤ
ᠰᠠᠯᠬᠢᠨ ᠲᠠᠲᠠᠭᠤᠯᠤᠨ ᠮᠣᠷᠳᠠᠪᠠ᠃
ᠬᠣᠴᠣᠷᠤᠭᠰᠠᠨ ᠭᠤᠷᠪᠠᠨ ᠬᠠᠲᠤᠨ ᠤ᠋
ᠬᠣᠣᠷ ᠲᠠᠢ ᠬᠣᠶᠠᠷ ᠡᠭᠡᠴᠢ ᠨᠢ
ᠬᠣᠪᠢᠨ ᠤ᠋ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ ᠪᠠᠲᠤᠯᠠᠵᠤ
ᠬᠣᠶᠠᠭᠤᠯᠠ ᠬᠠᠷᠢᠯᠴᠠᠨ ᠵᠥᠪᠳᠡᠭᠰᠡᠨ ᠨᠢ᠄
《ᠪᠢᠳᠡ ᠬᠣᠶᠠᠷ ᠤ᠋ᠨ ᠬᠢᠭᠰᠡᠨ ᠨᠢ
ᠪᠦᠳᠦᠭᠦᠨ ᠪᠣᠯᠬᠢ ᠡᠳ᠋ ᠪᠠᠢᠨᠠ᠃
ᠮᠠᠨ ᠤ᠋ ᠪᠠᠭᠠ ᠬᠡᠦᠬᠡᠨ ᠳᠡᠭᠦᠦ
ᠮᠠᠭᠠᠳ ᠬᠥᠪᠡᠭᠦᠨ ᠲᠥᠷᠥᠪᠡᠯ
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠᠪᠠᠯ ᠲᠡᠷᠡ ᠶ᠋ᠢ ᠬᠠᠢᠷᠠᠯᠠᠨᠠ᠃
ᠡᠢᠮᠦ ᠬᠡᠷᠡᠭ ᠲᠣᠳᠣᠷᠠᠪᠠᠯ
ᠡᠭᠡᠴᠢ ᠪᠢᠳᠡ ᠬᠣᠶᠠᠭᠤᠯᠠ ᠬᠣᠬᠢᠷᠠᠨᠠ ᠭᠡᠵᠦ
ᠡᠩᠬᠦᠷᠡᠢ ᠳᠡᠭᠦᠦ ᠳ᠋ᠡᠭᠡᠨ ᠥᠰᠢᠵᠦ
ᠡᠯᠳᠡᠪ ᠠᠷᠭᠠ ᠭᠠᠷᠭᠠᠨ᠂
ᠠᠩᠭᠠ ᠲᠥᠷᠥᠬᠦ ᠳᠡᠭᠦᠦ ᠪᠡᠨ
ᠠᠶᠤᠯᠭᠠᠨ ᠬᠡᠯᠡᠵᠦ ᠬᠠᠭᠤᠷᠤᠭᠠᠳ᠂
ᠲᠥᠷᠥᠬᠦ ᠲᠡᠷᠡ ᠦᠶᠡᠰ
ᠲᠦᠮᠡᠨ ᠪᠡᠷᠬᠡᠰᠢᠶᠡᠯ ᠲᠡᠢ ᠴᠠᠭ ᠲᠤᠨᠢ
ᠨᠢᠳᠦ ᠴᠢᠬᠢ ᠶ᠋ᠢ ᠨᠢ ᠲᠠᠭᠯᠠᠵᠤ᠂
ᠨᠢᠯᠬᠠ ᠬᠥᠪᠡᠭᠦᠨ ᠨᠢ ᠲᠥᠷᠥᠭᠰᠡᠨ ᠳ᠋ᠦ᠍
ᠪᠣᠷᠪᠢ ᠶ᠋ᠢᠨ ᠴᠢᠨᠡᠭᠡᠨ ᠬᠦᠦ ᠶ᠋ᠢ ᠨᠢ
ᠪᠣᠭᠣᠵᠤ ᠪᠠᠭᠯᠠᠨ ᠬᠠᠢᠷᠴᠠᠭᠯᠠᠵᠤ
ᠪᠣᠱᠣᠭᠠ ᠬᠠᠲᠠᠪᠴᠢ ᠶ᠋ᠢᠨ ᠳᠣᠣᠷᠠ ᠨᠢ
ᠪᠤᠯᠠᠵᠤ ᠨᠢᠭᠤᠨ ᠲᠠᠯᠪᠢᠭᠠᠳ
ᠬᠠᠷᠠ ᠮᠤᠤᠷ ᠤ᠋ᠨ ᠵᠤᠯᠵᠠᠭᠠ ᠶ᠋ᠢ
ᠬᠠᠷᠠᠩᠭᠤᠢᠳᠠᠵᠤ ᠬᠡᠪᠲᠡᠭᠰᠡᠨ ᠳᠡᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ
ᠬᠠᠵᠠᠭᠤ ᠲᠠᠯᠠ ᠳ᠋ᠤᠨᠢ ᠣᠷᠣᠯᠠᠭᠤᠯᠵᠤ᠂
ᠬᠠᠬᠢᠷ ᠬᠠᠲᠠᠭᠤ ᠮᠠᠭᠤ ᠪᠠᠷ
ᠬᠠᠷᠢᠶᠠᠨ ᠮᠠᠭᠤᠴᠢᠯᠠᠵᠤ ᠬᠡᠯᠡᠭᠰᠡᠨ ᠨᠢ᠄
《ᠵᠠᠶᠠᠭᠠ ᠬᠢᠷᠢ ᠪᠡᠨ ᠮᠡᠳᠡᠬᠦ ᠦᠭᠡᠢ
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢ ᠬᠠᠭᠤᠷᠴᠤ᠂
ᠠᠯᠲᠠᠨ ᠴᠡᠭᠡᠵᠢ ᠲᠡᠢ ᠬᠦᠦ ᠲᠥᠷᠥᠨᠡ ᠭᠡᠳ᠂
ᠠᠷᠢᠶᠠᠲᠠᠨ ᠤ᠋ ᠵᠤᠯᠵᠠᠭᠠ ᠲᠥᠷᠥᠪᠡ》 ᠭᠡᠵᠦ
ᠠᠯᠢ ᠪᠦᠬᠦᠨ ᠢ᠋ ᠨᠢ ᠬᠤᠷᠢᠶᠠᠮᠵᠢᠯᠠᠵᠤ
ᠠᠵᠢᠯ ᠤ᠋ᠨ ᠰᠠᠩ ᠳ᠋ᠤ᠌ ᠨᠡᠭᠦᠯᠭᠡᠭᠡᠳ
ᠠᠶᠠᠭᠠᠴᠢᠨ ᠪᠣᠯᠭᠠᠵᠤ ᠵᠠᠷᠤᠪᠠ ᠭᠡᠨᠡ᠃
ᠵᠠᠬᠠ ᠶ᠋ᠢ ᠲᠦᠪᠰᠢᠳᠬᠡᠬᠦ ᠪᠡᠷ ᠮᠣᠷᠳᠠᠭᠰᠠᠨ
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠᠨᠤᠯᠲᠤ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠵᠤ᠂
ᠵᠠᠯᠠᠭᠠᠲᠤ ᠲᠤᠭ ᠢ᠋ᠶ᠋ᠠᠨ ᠬᠡᠢᠰᠬᠡᠨ
ᠭᠠᠷᠴᠤ ᠮᠣᠷᠳᠠᠬᠤ ᠦᠶᠡᠰ ᠲᠤᠨᠢ
ᠭᠠᠢᠬᠠᠯᠲᠠᠢ ᠰᠠᠢᠨ ᠬᠠᠲᠤᠳ ᠤ᠋ᠨ ᠢ᠋ᠶ᠋ᠠᠨ
ᠭᠠᠪᠢᠶᠠᠯᠠᠨ ᠵᠥᠪᠰᠢᠶᠡᠷᠡᠭᠰᠡᠨ ᠢ᠋ ᠨᠢ ᠪᠣᠳᠣᠵᠤ
ᠭᠠᠵᠠᠷ ᠨᠤᠲᠤᠭ ᠢ᠋ᠶ᠋ᠠᠨ ᠰᠠᠨᠠᠵᠤ
ᠢᠷᠠᠭᠤ ᠠᠯᠳᠠᠷ ᠢ᠋ᠶ᠋ᠠᠨ ᠪᠠᠳᠠᠷᠠᠭᠤᠯᠤᠨ
ᠢᠯᠠᠭᠰᠠᠨ ᠳᠠᠭᠤᠤ ᠪᠠᠨ ᠳᠠᠭᠤᠯᠠᠵᠤ
ᠶᠠᠭᠠᠷᠠᠠ ᠪᠤᠴᠠᠵᠤ ᠡᠷᠭᠢᠭᠡᠳ
ᠶᠠᠪᠤᠭᠰᠠᠭᠠᠷ ᠣᠢᠷᠠᠳᠴᠤ ᠢᠷᠡᠬᠦ ᠳ᠋ᠡᠭᠡᠨ
ᠣᠳᠬᠠᠨ ᠬᠠᠲᠤᠨ ᠤ᠋ ᠪᠠᠨ ᠬᠡᠯᠡᠭᠰᠡᠨ
ᠡᠵᠡᠨ ᠲᠥᠷᠥ ᠶ᠋ᠢ ᠨᠢ ᠡᠵᠡᠮᠰᠢᠳᠡᠭ
ᠡᠷᠡᠯᠬᠡᠭ ᠬᠦᠦ ᠮᠡᠨᠳᠦᠯᠡᠨᠡ ᠭᠡᠰᠡᠨ᠂
ᠤᠳᠠᠯ ᠦᠭᠡᠢ ᠠᠭᠤᠯᠵᠠᠵᠤ
ᠤᠯᠠᠭᠠᠨ ᠪᠠᠭᠠ ᠬᠠᠴᠠᠷ ᠢ᠋ ᠨᠢ
ᠦᠨᠦᠰᠦᠨ ᠲᠠᠭᠠᠯᠠᠵᠤ ᠲᠡᠪᠡᠷᠢᠨᠡ ᠭᠡᠵᠦ
ᠥᠨᠳᠡᠢᠨ ᠬᠠᠷᠠᠵᠤ ᠦᠵᠡᠭᠰᠡᠨ ᠳ᠋ᠦ᠍
ᠤᠭᠲᠤᠯ ᠤ᠋ᠨ ᠣᠯᠠᠨ ᠠᠷᠠᠳ ᠨᠢ
ᠤᠷᠢᠳᠠᠬᠢ ᠵᠠᠮ ᠢ᠋ ᠨᠢ ᠲᠣᠰᠴᠤ
ᠡᠭᠡᠯᠢᠲᠡᠢ ᠪᠡᠷ ᠳᠠᠯᠠᠯᠤᠨ ᠵᠣᠭᠰᠣᠵᠤ
ᠡᠷᠬᠢᠮ ᠪᠡᠯᠡᠭ ᠪᠠᠷᠢᠨᠠ᠃
ᠠᠶᠠᠭᠠ ᠳᠦᠭᠦᠷᠡᠩ ᠠᠷᠢᠬᠢ
ᠰᠢᠯ ᠳᠦᠭᠦᠷᠡᠩ ᠴᠡᠬᠡ ᠪᠡᠷ
ᠰᠢᠯᠢᠳᠡᠭ ᠣᠯᠠᠨ ᠪᠠᠢᠯᠳᠤᠭᠴᠢᠳ ᠲᠤ᠌
ᠢᠷᠦᠭᠡᠯ ᠲᠠᠯᠪᠢᠨ ᠪᠠᠷᠢᠵᠤ
ᠶᠣᠰᠣᠯᠠᠯ ᠬᠢᠨ ᠪᠡᠯᠡᠭᠯᠡᠨᠡ᠃
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠᠢᠯᠠᠭᠰᠠᠨ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ
ᠪᠡᠶᠡ ᠪᠥᠬᠥᠢᠨ ᠬᠠᠷᠢᠭᠤᠯᠵᠤ
ᠪᠦᠷᠬᠦᠭᠡ ᠠᠯᠠᠭᠠᠳᠠᠨ ᠰᠠᠢᠰᠢᠶᠠᠨ
ᠣᠷᠳᠣᠨ ᠤ᠋ ᠡᠭᠦᠳᠡᠨ ᠳ᠋ᠦ᠍ ᠢᠷᠡᠵᠦ᠂
ᠤᠨᠤᠭᠰᠠᠨ ᠬᠥᠯᠭᠡ ᠡᠴᠡ ᠪᠡᠨ ᠪᠠᠭᠤᠵᠤ
ᠣᠢᠷᠠᠲᠤᠨ ᠢᠷᠡᠵᠦ ᠬᠠᠷᠠᠢᠭᠰᠠᠨ ᠳ᠋ᠤ᠌
ᠬᠣᠶᠠᠷ ᠶᠡᠬᠡ ᠬᠠᠲᠤᠨ ᠨᠢ
ᠬᠣᠷᠮᠣᠢ ᠳᠠᠷᠤᠨ ᠤᠭᠲᠤᠵᠤ
ᠬᠤᠪᠢ ᠬᠣᠪᠢᠨ ᠤ᠋ ᠬᠢᠭᠰᠡᠨ ᠢ᠋ᠶ᠋ᠡᠨ
ᠬᠣᠯᠠ ᠠ᠋ᠴᠠ ᠮᠠᠴᠤᠯᠤᠨ ᠡᠷᠭᠦᠬᠦ ᠳ᠋ᠦ᠍
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ ᠤ᠋
ᠵᠠᠢᠯᠠᠰᠢ ᠦᠭᠡᠢ ᠨᠢᠳᠦ ᠨᠢ
ᠵᠠᠯᠢᠬᠠᠢ ᠠᠷᠭᠠᠨ ᠳ᠋ᠤᠨᠢ ᠤᠨᠠᠭᠰᠠᠨ
ᠵᠢᠭᠠᠬᠠᠨ ᠳᠡᠭᠦᠦ ᠶ᠋ᠢ ᠨᠢ ᠡᠷᠢᠭᠰᠡᠨ ᠢ᠋ ᠮᠡᠳᠡᠵᠦ
ᠬᠠᠮᠲᠤ ᠪᠠᠷ ᠤᠷᠤᠭᠰᠢ ᠲᠠᠪᠰᠢᠵᠤ
ᠬᠠᠮᠤᠭ ᠮᠠᠭᠤ ᠪᠠᠷ ᠬᠡᠯᠡᠭᠰᠡᠨ ᠨᠢ᠄
《ᠡᠵᠡᠨ ᠦ᠌ ᠬᠠᠢᠷᠠᠲᠤ ᠬᠠᠲᠤᠨ ᠴᠢᠨᠢ
ᠡᠭᠳᠡᠭᠦᠲᠡᠢ ᠰᠢᠮᠨᠤᠰ ᠲᠥᠷᠥᠵᠦ
ᠡᠵᠡᠨ ᠦ᠌ ᠨᠢᠭᠤᠷ ᠢ᠋ ᠡᠪᠬᠡᠨ
ᠡᠴᠢᠭᠡ ᠳᠡᠭᠡᠳᠦᠰ ᠦ᠋ᠨ ᠨᠤᠲᠤᠭ ᠢ᠋
ᠡᠩ ᠲᠡᠢ ᠪᠤᠵᠠᠷᠯᠠᠨ ᠭᠤᠲᠤᠭᠠᠭᠰᠠᠨ ᠳ᠋ᠤ᠌
ᠠᠷᠭᠠ ᠪᠠᠨ ᠪᠢᠳᠡ ᠪᠠᠷᠠᠵᠤ
ᠠᠮᠢᠨ ᠤ᠋ ᠲᠥᠷᠥᠭᠰᠡᠨ ᠳᠡᠭᠦᠦ ᠭᠡᠪᠡᠴᠦ
ᠠᠮᠠᠷᠠᠭ ᠡᠵᠡᠨ ᠢ᠋ ᠵᠣᠪᠠᠭᠠᠬᠤ ᠪᠣᠯᠪᠠ ᠤᠤ ᠭᠡᠵᠦ᠂
ᠠᠯᠠᠵᠤ ᠬᠠᠶᠠᠰᠤᠭᠠᠢ ᠭᠡᠵᠦ ᠪᠣᠳᠣᠭᠰᠠᠨ ᠪᠣᠯᠪᠠᠴᠤ
ᠠᠷᠠᠢ ᠲᠦᠪᠳᠡᠬᠦ ᠦᠭᠡᠢ ᠲᠤᠯᠠ ᠪᠢᠳᠡ᠂
ᠠᠰᠲᠠᠭᠠᠨ ᠬᠥᠮᠦᠨ ᠳ᠋ᠦ᠍ ᠮᠡᠳᠡᠭᠦᠯᠦᠭᠰᠡᠨ ᠦᠭᠡᠢ
ᠠᠶᠤᠮᠰᠢᠭᠲᠤ ᠮᠤᠤᠷ ᠤ᠋ᠨ ᠵᠤᠯᠵᠠᠭᠠ ᠶ᠋ᠢ ᠨᠢ
ᠠᠷᠢᠯᠭᠠᠨ ᠲᠣᠨᠢᠯᠭᠠᠨ ᠴᠢᠯᠠᠭᠤᠳᠠᠵᠤ
ᠠᠵᠢᠯ ᠤ᠋ᠨ ᠰᠠᠩ ᠳ᠋ᠤ᠌ ᠰᠢᠯᠵᠢᠭᠦᠯᠵᠦ
ᠠᠶᠠᠭᠠᠴᠢᠨ ᠬᠡᠦᠬᠡᠨ ᠪᠣᠯᠭᠠᠪᠠ》 ᠭᠡᠰᠡᠨ ᠳ᠋ᠦ᠍
ᠵᠠᠭᠠᠷ ᠪᠦᠷᠢᠳᠦ ᠬᠠᠭᠠᠨ
ᠵᠠᠩᠭᠢᠷᠠᠭᠰᠠᠨ ᠬᠥᠮᠥᠰᠬᠡ ᠪᠡᠨ ᠠᠲᠤᠷᠢᠭᠤᠯᠵᠤ
ᠰᠠᠢᠨ ᠮᠠᠭᠤ ᠬᠣᠶᠠᠭᠤᠯᠠ ᠶ᠋ᠢ
ᠰᠠᠯᠭᠠᠵᠤ ᠨᠢᠭᠡ ᠴᠦ᠍ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ
ᠳᠣᠲᠣᠭᠰᠢ ᠠᠯᠬᠤᠨ ᠣᠷᠣᠬᠤ ᠳ᠋ᠤ᠌
ᠡᠭᠦᠳᠡᠨ ᠪᠣᠱᠣᠭᠠ ᠬᠥᠳᠡᠯᠵᠦ
ᠡᠵᠡᠨ ᠦ᠌ ᠬᠥᠯ ᠢ᠋ ᠳᠣᠷᠭᠣᠨ
ᠡᠯᠢᠭᠡ ᠲᠦᠷᠦᠭᠦᠦ ᠪᠡᠷ ᠨᠢ ᠤᠨᠠᠭᠠᠪᠠ᠃
ᠡᠷᠭᠢᠨ ᠬᠠᠷᠠᠨ ᠦᠵᠡᠭᠰᠡᠨ ᠳ᠋ᠦ᠍
ᠡᠭᠦᠳᠡᠨ ᠦ᠌ ᠲᠡᠷᠡ ᠪᠣᠱᠣᠭᠠ ᠨᠢ
ᠡᠷᠲᠡᠨ ᠡᠷᠲᠡᠨ ᠬᠥᠳᠡᠯᠬᠦ ᠳ᠋ᠦ᠍
ᠡᠵᠡᠨ ᠲᠡᠷᠡ ᠭᠠᠢᠬᠠᠵᠤ᠄
《ᠡᠭᠦᠨ ᠢ᠋ ᠨᠠᠳᠠ ᠤᠬᠤᠵᠤ ᠠᠯᠢ》 ᠭᠡᠰᠡᠨ ᠳ᠋ᠦ᠍
ᠬᠣᠶᠠᠷ ᠶᠡᠬᠡ ᠬᠠᠲᠤᠨ ᠨᠢ
ᠬᠣᠷᠢᠭᠯᠠᠨ ᠲᠡᠭᠦᠨ ᠢ᠋ ᠬᠡᠯᠡᠭᠰᠡᠨ ᠨᠢ
《ᠡᠵᠡᠨ ᠬᠠᠭᠠᠨ ᠬᠥᠮᠦᠨ ᠴᠢ
ᠡᠩ ᠦᠭᠡᠢ ᠪᠠᠶᠠᠷᠲᠠᠢ ᠡᠳᠦᠷ
ᠡᠭᠦᠳᠡᠨ ᠦ᠌ ᠪᠣᠱᠣᠭᠠ ᠪᠠᠨ ᠣᠬᠣᠪᠠᠯ
ᠡᠷᠦᠬᠡ ᠡᠪᠳᠡᠷᠡᠬᠦ ᠲᠡᠮᠳᠡᠭ》 ᠭᠡᠵᠦ
ᠵᠠᠭᠠᠷ ᠪᠦᠷᠢᠳᠦ ᠬᠠᠭᠠᠨ ᠢ᠋
ᠵᠠᠯᠢᠬᠠᠢ ᠠᠷᠭᠠ ᠪᠠᠷ ᠮᠡᠬᠡᠯᠡᠨ
ᠵᠠᠢᠯᠠᠭᠤᠯᠤᠨ ᠳᠣᠲᠣᠭᠰᠢ ᠴᠢᠩᠭᠠᠭᠠᠵᠤ
ᠵᠠᠯᠠᠵᠤ ᠭᠡᠷ ᠲᠦ᠍ ᠪᠡᠨ ᠠᠪᠠᠴᠢᠭᠠᠳ᠂
ᠰᠥᠨᠢ ᠣᠷᠣᠢ ᠪᠣᠯᠤᠭᠰᠠᠨ ᠳ᠋ᠤ᠌
ᠰᠦᠷᠡᠬᠡᠢ ᠬᠣᠶᠠᠷ ᠡᠭᠡᠴᠢ ᠨᠢ᠂
ᠪᠣᠱᠣᠭᠠᠨ ᠳᠣᠣᠷᠠ ᠪᠤᠯᠠᠪᠠᠯ
ᠪᠠᠷᠴᠢᠳ ᠪᠣᠯᠬᠤ ᠮᠠᠭᠠᠳ ᠦᠭᠡᠢ ᠭᠡᠳ
ᠪᠠᠭᠠ ᠬᠦᠦ ᠶ᠋ᠢ ᠮᠠᠯᠲᠠᠨ ᠭᠠᠷᠭᠠᠵᠤ
ᠪᠣᠭᠣᠯᠲᠠ ᠲᠠᠢ ᠴᠢᠯᠠᠭᠤᠨ ᠳ᠋ᠤ᠌ ᠬᠢᠵᠦ
ᠠᠷᠪᠠᠨ ᠲᠦᠮᠡᠨ ᠠᠳᠤᠭᠤ ᠤᠰᠤᠯᠠᠳᠠᠭ
ᠠᠷᠤ ᠶ᠋ᠢᠨ ᠶᠡᠬᠡ ᠬᠤᠤᠳᠤᠭ ᠲᠤᠨᠢ
ᠣᠷᠬᠢᠨ ᠬᠠᠶᠠᠵᠤ ᠲᠣᠨᠣᠭᠤᠯᠤᠭᠠᠳ
ᠣᠳᠣ ᠬᠡᠷᠡᠭ ᠪᠠᠷᠠᠪᠠ ᠭᠡᠵᠦ
ᠣᠨᠴᠣᠭᠣᠢ ᠪᠠᠶᠠᠷᠲᠠᠢ ᠬᠠᠷᠢᠭᠠᠳ
ᠤᠨᠲᠠᠵᠤ ᠮᠠᠷᠭᠠᠰᠢ ᠪᠣᠯᠤᠭᠰᠠᠨ ᠳ᠋ᠤ᠌᠂
ᠠᠳᠤᠭᠤ ᠮᠠᠯ ᠬᠠᠷᠢᠭᠤᠯᠤᠭᠴᠢ
ᠠᠷᠪᠠ ᠲᠠᠪᠤᠨ ᠬᠥᠮᠦᠨ ᠢᠷᠡᠵᠦ᠄
ᠠᠷᠤ ᠶ᠋ᠢᠨ ᠶᠡᠬᠡ ᠬᠤᠤᠳᠤᠭ ᠠ᠋ᠴᠠ
ᠠᠷᠪᠠᠨ ᠥᠩᠭᠡᠲᠡᠢ ᠰᠣᠯᠣᠩᠭᠠ ᠲᠠᠲᠠᠵᠤ
ᠠᠳᠤᠭᠤ ᠤᠰᠤᠯᠠᠬᠤ ᠠᠷᠭᠠ ᠦᠭᠡᠢ ᠭᠡᠰᠡᠨ ᠳ᠋ᠦ᠍
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠ! ᠪᠢ ᠣᠴᠢᠵᠤ ᠦᠵᠡᠶᠡ ᠭᠡᠳ
ᠪᠣᠰᠤᠨ ᠭᠠᠷᠴᠤ ᠶᠠᠪᠤᠬᠤ ᠳ᠋ᠤ᠌
ᠬᠣᠣᠷᠲᠠᠢ ᠮᠠᠭᠤ ᠡᠭᠡᠴᠢ ᠨᠦ᠍ᠭᠦᠳ ᠨᠢ
ᠬᠣᠶᠠᠭᠤᠯᠠ ᠬᠠᠮᠲᠤᠪᠠᠷ ᠪᠣᠰᠴᠤ
ᠬᠣᠶᠠᠷ ᠭᠠᠷ ᠠ᠋ᠴᠠ ᠨᠢ ᠲᠠᠲᠠᠵᠤ
ᠬᠤᠷᠬᠢᠷᠠᠨ ᠤᠬᠢᠯᠠᠵᠤ ᠬᠡᠯᠡᠭᠰᠡᠨ ᠨᠢ᠄
《ᠠᠷᠪᠠᠨ ᠥᠩᠭᠡᠲᠡᠢ ᠰᠣᠯᠣᠩᠭᠠ ᠭᠡᠭᠴᠢ
ᠠᠲᠠᠭᠠᠲᠠᠨ ᠤ᠋ ᠰᠦᠨᠡᠰᠦ ᠪᠠᠢᠨᠠ᠃
ᠠᠮᠠᠷᠠᠭ ᠡᠵᠡᠨ ᠢ᠋ ᠮᠡᠬᠡᠯᠡᠨ ᠠᠪᠠᠴᠢᠵᠤ
ᠠᠮᠢ ᠪᠡᠶᠡ ᠶ᠋ᠢ ᠴᠢᠨᠢ ᠬᠣᠣᠷᠯᠠᠬᠤ ᠭᠡᠵᠦ ᠪᠠᠢᠨᠠ
ᠥᠴᠥᠭᠡᠳᠦᠷ ᠣᠷᠣᠢ ᠶ᠋ᠢᠨ ᠵᠡᠭᠦᠳᠦᠨ ᠳ᠋ᠦ᠍
ᠥᠪ ᠦᠨᠡᠬᠡᠷ ᠣᠷᠣᠭᠰᠠᠨ ᠶᠤᠮ》 ᠭᠡᠵᠦ
ᠦᠳᠡᠰᠢ ᠪᠣᠯᠲᠠᠯᠠ ᠵᠠᠭᠤᠷᠠᠵᠤ
ᠥᠨᠳᠡᠢᠯᠭᠡᠨ ᠪᠤᠰᠬᠠᠵᠤ ᠶᠠᠪᠤᠭᠤᠯᠤᠭᠰᠠᠨ ᠦᠭᠡᠢ᠃
ᠬᠠᠷᠠᠩᠭᠤᠢ ᠰᠥᠨᠢ ᠪᠣᠯᠤᠭᠰᠠᠨ ᠴᠤ᠌
ᠬᠠᠷᠭᠢᠰ ᠬᠣᠶᠠᠭᠤᠯᠠ ᠪᠠᠨ ᠪᠣᠰᠴᠤ
ᠬᠣᠢᠲᠤ ᠶᠡᠬᠡ ᠬᠤᠳᠳᠤᠭ ᠲᠤ᠌
ᠬᠤᠷᠴᠠ ᠳᠡᠭᠡᠭᠡ ᠲᠠᠯᠪᠢᠵᠤ
ᠪᠣᠷᠪᠢ ᠪᠠᠭᠠ ᠬᠦᠦ ᠶ᠋ᠢ ᠨᠢ ᠭᠠᠷᠭᠠᠵᠤ
ᠪᠤᠴᠠᠯᠤᠭᠰᠠᠨ ᠤᠰᠤᠨ ᠳ᠋ᠤ᠌ ᠴᠢᠨᠠᠭᠠᠳ
ᠬᠦᠷᠡᠭᠴᠢ ᠦᠨᠢᠶᠡ ᠠᠪᠴᠢᠷᠠᠵᠤ
ᠬᠦᠷᠲᠡᠭᠦᠯᠵᠦ ᠪᠦᠭᠦᠳᠡ ᠶ᠋ᠢ ᠨᠢ ᠤᠤᠭᠤᠯᠭᠠᠪᠠ᠃
ᠬᠦᠷᠡᠭᠴᠢ ᠦᠨᠢᠶᠡ ᠤᠤᠭᠤᠭᠰᠠᠨ ᠳᠠᠷᠤᠢ
ᠰᠠᠪᠠ ᠶᠡᠬᠡ ᠭᠡᠳᠡᠰᠦ ᠨᠢ ᠬᠡᠭᠡᠯᠲᠦᠵᠦ
ᠰᠠᠷᠠ ᠡᠳᠦᠷ ᠤᠳᠠᠭᠰᠠᠨ ᠦᠭᠡᠢ
ᠰᠠᠢᠬᠠᠨ ᠠᠯᠠᠭ ᠲᠤᠭᠤᠯ ᠲᠥᠷᠥᠪᠡ᠃
ᠡᠪᠴᠢᠭᠦᠦ ᠴᠠᠭᠠᠨ ᠲᠤᠭᠤᠯ ᠨᠢ
ᠡᠵᠡᠨ ᠵᠠᠭᠠᠷ ᠪᠦᠷᠢᠳᠦ ᠳ᠋ᠡᠭᠡᠨ ᠬᠠᠢᠷᠠᠯᠠᠭᠳᠠᠨ᠂
ᠡᠷᠦᠬᠡ ᠭᠡᠷ ᠲᠡᠭᠡᠨ ᠬᠣᠷᠢᠵᠤ
ᠡᠨᠡᠷᠢᠨ ᠠᠰᠠᠷᠠᠨ ᠲᠡᠵᠢᠭᠡᠬᠦ ᠳ᠋ᠦ᠍
ᠵᠠᠯᠢᠬᠠᠢ ᠬᠣᠶᠠᠷ ᠬᠠᠲᠤᠨ ᠨᠢ
ᠵᠠᠨᠤᠵᠤ ᠬᠣᠷᠣᠰᠤᠨ ᠬᠡᠯᠡᠯᠴᠡᠭᠰᠡᠨ ᠨᠢ᠄
《ᠡᠨᠡ ᠮᠠᠭᠤ ᠠᠯᠠᠭ ᠲᠤᠭᠤᠯ ᠢ᠋
ᠡᠵᠡᠨ ᠡᠢᠮᠦ ᠬᠠᠢᠷᠠᠯᠠᠭᠰᠠᠨ ᠢ᠋ᠶ᠋ᠠᠷ
ᠡᠷᠲᠡ ᠣᠷᠣᠢ ᠦᠭᠡᠢ ᠮᠡᠳᠡᠭᠳᠡᠪᠡᠯ
ᠡᠭᠡᠴᠢ ᠳᠡᠭᠦᠦ ᠪᠢᠳᠡ ᠬᠣᠶᠠᠭᠤᠯᠠ
ᠠᠮᠢᠳᠤ ᠭᠠᠷᠤᠨᠠ ᠭᠡᠵᠦ ᠤᠤ ᠳᠠ!
ᠠᠮᠠᠷᠬᠠᠨ ᠪᠢᠲᠡᠭᠡᠢ ᠰᠠᠨᠠ᠂
ᠠᠷᠭᠠ ᠨᠢᠭᠡ ᠶ᠋ᠢ ᠪᠣᠳᠣᠵᠤ
ᠠᠷᠢᠯᠭᠠᠨ ᠪᠦᠷᠢᠯᠭᠡᠨ ᠲᠠᠯᠪᠢᠶᠠ》 ᠭᠡᠳ
ᠡᠷᠭᠢᠵᠦ ᠢᠷᠡᠬᠦ ᠡᠳᠦᠷ ᠨᠢ
ᠡᠭᠡᠴᠢ ᠨᠢ ᠲᠣᠩᠭᠣᠢᠨ ᠬᠡᠪᠲᠡᠵᠦ
ᠡᠯᠢᠭᠡ ᠵᠢᠷᠦᠬᠡ ᠡᠪᠡᠳᠦᠨᠡ ᠭᠡᠵᠦ
ᠡᠪᠴᠢᠭᠦᠦ ᠪᠡᠨ ᠲᠡᠪᠡᠷᠢᠨ ᠶᠣᠢᠯᠠᠵᠤ᠄
《ᠡᠯᠡᠢ ᠬᠠᠯᠠᠢ ᠮᠠᠭᠤ ᠪᠠᠢᠨᠠ᠃
ᠡᠨᠡ ᠡᠳᠦᠷ ᠦᠬᠦᠬᠦ ᠶᠦᠮ ᠪᠠᠢᠨᠠ》 ᠭᠡᠵᠦ
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ ᠢ᠋
ᠵᠠᠢ ᠵᠠᠪᠰᠠᠷ ᠦᠭᠡᠢ ᠱᠠᠭᠠᠷᠳᠠᠵᠤ
ᠬᠣᠶᠠᠳᠤᠭᠠᠷ ᠬᠠᠲᠤᠨ ᠨᠢ
ᠬᠣᠢᠰᠢ ᠣᠷᠣᠭᠰᠢ ᠭᠦᠶᠦᠵᠦ᠄
《ᠡᠭᠡᠴᠢ ᠮᠢᠨᠢ ᠦᠬᠦᠬᠦ ᠭᠡᠵᠦ ᠪᠠᠢᠬᠤ ᠳ᠋ᠤ᠌
ᠡᠵᠡᠨ ᠶᠠᠭᠤᠨ ᠳ᠋ᠤ᠌ ᠬᠠᠮᠢᠶᠠᠷᠬᠤ ᠦᠭᠡᠢ ᠪᠣᠢ?
ᠡᠷᠲᠡᠬᠡᠨ ᠠᠷᠭᠠ ᠭᠠᠷᠭᠠᠨ
ᠡᠪᠡᠳᠴᠢᠨ ᠢ᠋ ᠨᠢ ᠠᠨᠠᠭᠠᠶᠠ》 ᠭᠡᠰᠡᠨ ᠳ᠋ᠦ᠍
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠᠮ ᠮᠥᠷ ᠢ᠋ᠶ᠋ᠡᠨ ᠠᠯᠳᠠᠵᠤ
《ᠣᠳᠣ ᠡᠭᠦᠨ ᠢ᠋ ᠶᠠᠭᠠᠬᠢᠬᠤ ᠪᠣᠢ?
ᠣᠨᠴᠣᠭᠣᠢ ᠠᠷᠭᠠ ᠪᠠᠢᠨᠠ ᠤᠤ?》 ᠭᠡᠰᠡᠨ ᠳ᠋ᠦ᠍
《ᠠᠷᠭᠠ ᠨᠢᠭᠡ ᠪᠠᠢᠨᠠ᠃
ᠠᠶᠤᠮᠰᠢᠭ ᠦᠭᠡᠢ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ》 ᠭᠡᠰᠡᠨ ᠳ᠋ᠦ᠍
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠ ᠦᠭᠡᠢ ᠶᠡᠬᠡ ᠪᠠᠴᠢᠮᠳᠠᠵᠤ᠄
《ᠬᠥᠮᠦᠨ ᠦ᠌ ᠠᠮᠢ ᠴᠢᠬᠤᠯᠠ
ᠬᠦᠰᠡᠯᠲᠦ ᠵᠠᠰᠠᠯᠭᠠ ᠪᠠᠨ ᠬᠡᠯᠡ》 ᠭᠡᠰᠡᠨ ᠳ᠋ᠦ᠍
《ᠬᠠᠭᠠᠨ ᠡᠵᠡᠨ ᠦ᠌ ᠬᠠᠢᠷᠠᠯᠠᠳᠠᠭ
ᠬᠠᠷᠠᠬᠠᠨ ᠠᠯᠠᠭ ᠲᠤᠭᠤᠯ ᠤ᠋ᠨ
ᠲᠠᠷᠢᠬᠢ ᠶ᠋ᠢ ᠨᠢ ᠢᠳᠡᠪᠡᠯ
ᠲᠡᠩᠬᠡᠷᠡᠵᠦ ᠪᠣᠯᠤᠨᠠ》 ᠭᠡᠰᠡᠨ ᠳ᠋ᠦ᠍
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠰᠢᠲᠦ ᠪᠡᠨ ᠵᠠᠭᠤᠨ ᠬᠠᠲᠠᠭᠤᠵᠢᠵᠤ᠄
《ᠴᠢᠷᠦᠨ ᠠᠪᠠᠴᠢᠵᠤ ᠠᠯᠠ》ᠭᠡᠪᠡ᠃
ᠬᠣᠶᠠᠳᠤᠭᠠᠷ ᠬᠠᠲᠤᠨ ᠨᠢ ᠰᠣᠨᠣᠰᠤᠭᠠᠳ
ᠬᠣᠢᠰᠢᠯᠠᠬᠤ ᠦᠭᠡᠢ ᠶᠠᠭᠠᠷᠠᠵᠤ
ᠬᠤᠷᠴᠠ ᠰᠦᠬᠡ ᠳᠠᠯᠠᠢᠵᠤ
ᠬᠥᠭᠡᠷᠦᠬᠦᠨ ᠲᠤᠭᠤᠯ ᠢ᠋ ᠴᠠᠪᠴᠢᠭᠰᠠᠨ ᠳ᠋ᠤ᠌
ᠬᠦᠷᠢᠶᠡ ᠳᠦᠭᠦᠷᠡᠩ ᠭᠡᠷᠡᠯ ᠭᠠᠷᠴᠤ
ᠥᠨᠥ ᠪᠠᠭᠠ ᠲᠤᠭᠤᠯ ᠨᠢ ᠬᠤᠪᠢᠯᠵᠤ
ᠦᠵᠡᠰᠬᠦᠯᠡᠩ ᠰᠠᠢᠬᠠᠨ ᠬᠦᠦ ᠪᠣᠯᠪᠠ᠃
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠᠷᠴᠢᠮ ᠢ᠋ᠶ᠋ᠠᠨ ᠠᠯᠲᠠᠨ ᠪᠠᠶᠠᠷᠯᠠᠵᠤ
ᠵᠠᠭᠤᠷᠠᠨ ᠲᠡᠪᠡᠷᠢᠵᠦ ᠦᠨᠦᠰᠦᠭᠰᠡᠨ ᠳ᠋ᠦ᠍᠂
ᠵᠢᠭᠠᠬᠠᠨ ᠪᠠᠭᠠ ᠬᠦᠦ ᠶ᠋ᠢᠨ ᠬᠡᠯᠡᠭᠰᠡᠨ ᠨᠢ᠄
《ᠡᠴᠢᠭᠡ ᠬᠠᠭᠠᠨ ᠮᠢᠨᠢ ᠰᠣᠨᠣᠰ!
ᠡᠷᠬᠢᠮ ᠲᠠᠨ ᠢ᠋ ᠮᠣᠷᠢᠯᠠᠵᠤ
ᠡᠰᠡᠷᠭᠦᠦ ᠳᠠᠢᠰᠤᠨ ᠢ᠋ ᠳᠠᠷᠤᠬᠤ ᠳ᠋ᠤ᠌
ᠡᠬᠡ ᠮᠢᠨᠢ ᠢᠷᠥᠭᠡᠨ ᠪᠠᠲᠤᠯᠠᠭᠰᠠᠨ
ᠠᠯᠲᠠᠨ ᠴᠡᠭᠡᠵᠢ ᠲᠡᠢ ᠦᠷᠡ
ᠮᠥᠩᠭᠥᠨ ᠪᠥᠭᠰᠡ ᠲᠡᠢ ᠬᠦᠦ ᠭᠡᠰᠡᠨ ᠨᠢ
ᠮᠢᠨᠦ ᠪᠡᠶᠡ ᠮᠥᠨ᠃
ᠡᠵᠢ ᠮᠢᠨᠢ ᠲᠥᠷᠥᠬᠦ ᠳ᠋ᠦ᠍
ᠠᠪᠠᠭᠠ ᠨᠠᠷ ᠤ᠋ᠳ ᠠᠲᠠᠭᠠᠷᠬᠠᠵᠤ
ᠠᠶᠤᠮᠰᠢᠭᠲᠠᠢ ᠠᠷᠭᠠ ᠭᠠᠷᠭᠠᠵᠤ
ᠠᠮᠠᠷᠠᠭ ᠡᠵᠢ ᠶ᠋ᠢ ᠮᠢᠨᠢ ᠬᠣᠣᠷᠯᠠᠵᠤ
ᠠᠷᠢᠶᠠᠲᠠᠨ ᠤ᠋ ᠵᠤᠯᠵᠠᠭᠠ ᠪᠠᠷ ᠰᠣᠯᠢᠵᠤ
ᠠᠯᠢ ᠮᠠᠭᠤ ᠪᠠᠷ ᠳᠣᠷᠣᠮᠵᠢᠯᠠᠵᠤ
ᠠᠶᠠᠭᠠᠴᠢᠨ ᠬᠡᠦᠬᠡᠨ ᠪᠣᠯᠭᠠᠭᠠᠳ
ᠠᠪᠤ ᠲᠠᠨ ᠤ᠋ ᠰᠠᠨᠠᠯ ᠪᠠ
ᠠᠰᠢᠳᠠ ᠶ᠋ᠢᠨ ᠡᠷᠬᠢᠮ ᠵᠢᠷᠭᠠᠯ ᠢ᠋
ᠠᠮᠢ ᠪᠡᠶᠡ ᠳ᠋ᠡᠭᠡᠨ ᠲᠠᠲᠠᠨᠠ ᠭᠡᠵᠦ
ᠰᠠᠶᠢ ᠭᠠᠷᠤᠭᠰᠠᠨ ᠨᠠᠮᠠ ᠶ᠋ᠢ
ᠰᠢᠷᠦᠭᠦᠨ ᠪᠥᠰ ᠲᠦ᠍ ᠬᠤᠴᠢᠵᠤ
ᠪᠣᠱᠣᠭᠠ ᠶ᠋ᠢᠨ ᠳᠣᠣᠷᠠ ᠳᠠᠷᠤᠵᠤ
ᠪᠤᠯᠠᠵᠤ ᠨᠢᠭᠤᠨ ᠲᠠᠯᠪᠢᠭᠰᠠᠨ ᠳ᠋ᠤ᠌
ᠡᠴᠢᠭᠡ ᠶ᠋ᠢᠨ ᠬᠥᠯ ᠢ᠋ ᠪᠢ ᠲᠣᠷᠭᠣᠵᠤ
ᠡᠭᠦᠨ ᠢ᠋ᠶ᠋ᠡᠷ ᠳᠣᠬᠢᠶᠠ ᠪᠣᠯᠭᠠᠶᠠ ᠭᠡᠰᠡᠨ ᠳ᠋ᠦ᠍
ᠬᠣᠣᠷᠲᠠᠢ ᠠᠪᠠᠭᠠ ᠨᠠᠷ ᠬᠠᠭᠤᠷᠴᠤ
ᠬᠤᠳᠳᠤᠭ ᠲᠤ᠌ ᠨᠠᠮᠠ ᠶ᠋ᠢ ᠴᠢᠯᠠᠭᠤᠳᠠᠭᠰᠠᠨ ᠳ᠋ᠤ᠌
ᠠᠷᠪᠠᠨ ᠥᠩᠭᠡ ᠶ᠋ᠢᠨ ᠰᠣᠯᠣᠩᠭᠠ ᠪᠠᠷ
ᠠᠪᠤ ᠲᠠᠨ ᠳ᠋ᠤ᠌ ᠰᠣᠨᠢᠷᠬᠠᠯ ᠥᠭᠭᠦᠭᠰᠡᠨ ᠳ᠋ᠦ᠍
ᠠᠪᠠᠭᠠ ᠨᠠᠷ ᠤ᠋ᠳ ᠬᠣᠷᠢᠭᠯᠠᠵᠤ
ᠣᠷᠣᠢ ᠰᠥᠨᠢ ᠪᠡᠷ ᠣᠴᠢᠵᠤ
ᠤᠰᠤᠨ ᠳ᠋ᠤ᠌ ᠨᠠᠮᠠ ᠶ᠋ᠢ ᠴᠢᠨᠠᠭᠠᠳ
ᠬᠦᠷᠡᠭᠴᠢ ᠦᠨᠢᠶᠡᠨ ᠳ᠋ᠦ᠍ ᠤᠤᠭᠤᠯᠭᠠᠵᠤ
ᠬᠥᠷᠥᠰᠥ ᠦᠭᠡᠢ ᠪᠣᠯᠭᠠᠶᠠ ᠭᠡᠰᠡᠨ ᠳ᠋ᠦ᠍
ᠡᠵᠢ ᠶ᠋ᠢᠨ ᠮᠢᠨᠢ ᠲᠡᠵᠢᠭᠡᠭᠰᠡᠨ
ᠡᠬᠡ ᠶ᠋ᠢᠨ ᠰᠠᠨᠠᠯ ᠲᠠᠢ ᠦᠨᠢᠶᠡ
ᠡᠷᠭᠢᠨ ᠨᠠᠮᠠ ᠶ᠋ᠢ ᠲᠥᠷᠥᠵᠦ
ᠡᠷᠢᠶᠡᠨ ᠲᠤᠭᠤᠯ ᠪᠣᠯᠭᠠᠭᠰᠠᠨ ᠳ᠋ᠤ᠌
ᠬᠠᠭᠠᠨ ᠡᠴᠢᠭᠡ ᠬᠠᠢᠷᠠᠯᠠᠵᠤ
ᠬᠠᠯᠠᠭᠤᠨ ᠬᠦᠢᠲᠡᠨ ᠢ᠋ ᠲᠠᠭᠠᠷᠠᠭᠤᠯᠬᠤ ᠳ᠋ᠤ᠌
ᠬᠠᠷᠭᠢᠰ ᠠᠪᠠᠭᠠ ᠨᠠᠷ ᠰᠡᠵᠢᠭᠯᠡᠵᠦ
ᠬᠠᠷᠠ ᠵᠢᠷᠦᠬᠡ ᠭᠠᠷᠭᠠᠵᠤ
ᠬᠠᠭᠤᠷᠮᠠᠭ ᠡᠪᠡᠳᠦᠨ ᠬᠡᠪᠲᠡᠭᠡᠳ
ᠬᠠᠭᠠᠨ ᠡᠴᠢᠭᠡ ᠶ᠋ᠢ ᠮᠡᠬᠡᠯᠡᠵᠦ
ᠬᠠᠢᠷᠠᠬᠠᠨ ᠪᠡᠶᠡ ᠶ᠋ᠢ ᠮᠢᠨᠢ ᠠᠯᠠᠭᠠᠳ
ᠬᠣᠭ ᠲᠣᠭᠣᠰᠣ ᠦᠭᠡᠢ ᠪᠣᠯᠭᠠᠶᠠ ᠭᠡᠰᠡᠨ ᠳ᠋ᠦ᠍
ᠬᠣᠶᠠᠳᠤᠭᠠᠷ ᠠᠪᠠᠭᠠ ᠶ᠋ᠢᠨ ᠰᠦᠬᠡ
ᠬᠣᠷᠢᠭᠳᠠᠯ ᠲᠠᠲᠠᠭᠳᠠᠯ ᠢ᠋ ᠮᠢᠨᠢ ᠲᠠᠢᠯᠵᠤ
ᠬᠥᠮᠦᠨ ᠦ᠌ ᠪᠠᠢᠷᠢ ᠳ᠋ᠤ᠌ ᠮᠢᠨᠢ ᠬᠠᠷᠢᠭᠤᠯᠪᠠ》 ᠭᠡᠰᠡᠨ ᠳ᠋ᠦ᠍
ᠵᠠᠭᠠᠷ ᠪᠦᠷᠢᠳᠦ ᠶ᠋ᠢᠨ ᠬᠠᠭᠠᠨ
ᠵᠠᠷᠯᠢᠭ ᠪᠠᠭᠤᠯᠭᠠᠨ ᠬᠡᠯᠡᠭᠰᠡᠨ ᠨᠢ᠄
《ᠦᠷᠡ ᠬᠦᠦ ᠪᠡᠨ ᠣᠯᠪᠠ ᠪᠢ᠃
ᠥᠰᠢᠶᠡᠲᠡᠨ ᠳᠠᠢᠰᠤᠨ ᠢ᠋ᠶ᠋ᠠᠨ ᠳᠠᠷᠤᠪᠠ ᠪᠢ》 ᠭᠡᠵᠦ
ᠠᠶᠠᠭᠠᠴᠢᠨ ᠪᠠᠢᠭᠰᠠᠨ ᠬᠠᠲᠤᠨ ᠢ᠋ᠶ᠋ᠠᠨ
ᠬᠢᠯᠢᠰᠳᠡᠪᠡ ᠭᠡᠵᠦ ᠲᠣᠬᠣᠨᠢᠭᠤᠯᠵᠤ
ᠬᠠᠲᠤᠨ ᠴᠣᠯᠠ ᠶ᠋ᠢ ᠨᠢ ᠥᠰᠬᠡᠵᠦ
ᠬᠠᠷᠭᠢᠰ ᠬᠣᠶᠠᠷ ᠡᠭᠡᠴᠢ ᠶ᠋ᠢ ᠨᠢ
ᠬᠢᠵᠠᠭᠠᠷ ᠭᠠᠷᠲᠠᠯᠠ ᠴᠥᠯᠡᠭᠡᠳ
ᠬᠠᠮᠤᠭ ᠰᠠᠢᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠨᠡᠢᠯᠡᠵᠦ
ᠬᠢᠵᠠᠭᠠᠯᠠᠰᠢ ᠦᠭᠡᠢ ᠪᠠᠶᠠᠷ ᠢ᠋ᠶ᠋ᠠᠷ
ᠬᠠᠷᠢᠯᠴᠠᠨ ᠢᠨᠠᠭᠯᠠᠨ ᠬᠠᠢᠷᠠᠯᠠᠯᠴᠠᠵᠤ
ᠠᠮᠤᠷ ᠰᠠᠢᠨ ᠳ᠋ᠠᠭᠠᠨ ᠵᠢᠷᠭᠠᠪᠠ ᠭᠡᠨᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠮᠥᠩᠭᠥᠨ᠂ ᠨᠠᠷᠠᠨᠲᠤᠶᠠᠭᠠ᠂ ᠬᠡᠯᠡᠰᠣᠶᠣᠯ(ᠪᠤᠤ ᠸᠧᠨ ᠬᠤᠸᠠ)᠂
ᠡ · ᠭᠤᠸᠠ᠂ ᠠᠯᠲᠠᠨᠴᠢᠮᠡᠭ᠂ ᠤᠷᠠᠨᠴᠢᠮᠡᠭ᠂ ᠪᠠᠢ·ᠰᠠᠷᠠᠨᠠ᠂
ᠪᠠᠶᠠᠨᠴᠡᠴᠡᠭ᠂ ᠡᠭᠦᠯᠡᠩᠬᠤᠸᠠᠷ᠂ ᠣᠶᠤᠨᠴᠢᠮᠡᠭ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠣᠠ᠂ ᠰᠡᠬᠡᠭᠡᠷᠡᠯ᠂ ᠪᠠᠯ᠂ ᠡᠭᠦᠯᠡᠩᠬᠤᠸᠠᠷ