ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠲᠠᠪᠤ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -5
213ᠡᠴᠦᠰ ᠦ᠋ᠨ ᠵᠣᠷᠢᠬᠯᠠᠯ
ᠲᠣᠯᠣᠭᠠᠢ ᠪᠦᠲᠡᠭᠡᠭᠰᠡᠨ ᠳᠡᠪᠡᠯ ᠦ᠋ᠨ ᠬᠣᠷᠮᠣᠢ ᠶ᠋ᠢ ᠦᠯᠦ ᠮᠡᠳᠡᠭ ᠰᠡᠬᠦᠨ ᠬᠠᠷᠠᠬᠤ ᠳ᠋ᠤ᠌ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠶᠠᠭ ᠮᠠᠢᠬᠠᠨ ᠤ᠋ ᠡᠭᠦᠳᠡᠨ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠪᠠ᠃ ᠲᠡᠭᠦᠨ ᠦ᠌ ᠢᠨᠠᠳᠤ ᠤᠷᠲᠤ ᠴᠠᠭᠠᠨ ᠯᠠ ᠰᠢᠲᠠᠨ ᠳᠠᠭᠤᠰᠬᠤ ᠰᠢᠬᠠᠵᠤ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠲᠡᠭᠦᠨ ᠢ᠋ ᠨᠢᠳᠦ ᠰᠠᠯᠭᠠᠯ ᠦᠭᠡᠢ ᠰᠢᠷᠳᠡᠨ ᠤᠨᠲᠠᠷᠠᠭᠠᠵᠤ ᠠᠪᠤᠭᠠᠳ ᠨᠤᠭᠤᠷᠬᠠᠢ ᠬᠤᠴᠢᠯᠭᠠ ᠠ᠋ᠴᠠ ᠪᠠᠨ ᠬᠥᠯ ᠢ᠋ᠶ᠋ᠡᠨ ᠭᠠᠷᠭᠠᠨ ᠮᠠᠢᠬᠠᠨ ᠤ᠋ ᠬᠠᠶᠠᠭᠠ ᠤᠷᠤᠭᠤ ᠭᠤᠯᠭᠤᠪᠠ᠃ ᠵᠢᠷᠦᠬᠡ ᠨᠢ ᠴᠡᠭᠡᠵᠢᠨ ᠳ᠋ᠡᠭᠡᠨ ᠣᠪᠣᠯᠵᠠᠬᠤ ᠠ᠋ᠴᠠ ᠥᠭᠡᠷᠡ ᠴᠢᠮᠡᠭᠡ ᠭᠠᠷᠤᠭᠰᠠᠨ ᠦᠭᠡᠢ᠃ ᠬᠥᠯ ᠨᠢᠴᠦᠭᠦᠨ ᠭᠠᠳᠠᠭᠠ ᠭᠠᠷᠬᠤ ᠳ᠋ᠤ᠌ ᠬᠦᠢᠲᠡᠨ ᠵᠢᠪᠠᠷ ᠤᠭᠲᠤᠨ ᠴᠣᠬᠢᠵᠤ᠂ ᠭᠤᠲᠤᠯ ᠢ᠋ᠶ᠋ᠠᠨ ᠰᠠᠨᠠᠪᠠ᠃ ᠭᠠᠷ ᠢ᠋ᠶ᠋ᠠᠨ ᠪᠤᠴᠠᠭᠠᠨ ᠲᠡᠮᠲᠡᠷᠢᠬᠦ ᠳ᠋ᠦ᠍ ᠮᠠᠨᠠᠭᠠ᠂《ᠪᠢᠲᠡᠭᠡᠢ ᠬᠥᠳᠡᠯ!》 ᠭᠡᠵᠦ ᠵᠠᠩᠳᠤᠷᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠳ᠋ᠠᠨᠽᠡᠨ ᠵᠡᠭᠦᠳᠦᠯᠡᠭᠡᠴᠢ ᠪᠣᠯᠤᠨ ᠠᠮᠠ ᠪᠠᠨ ᠲᠠᠮᠰᠢᠶᠠᠯᠠᠵᠤ᠂ ᠬᠡᠰᠡᠭ ᠬᠥᠳᠡᠯᠦᠯ ᠦᠭᠡᠢ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠳᠠᠬᠢᠨ ᠭᠠᠷ ᠰᠤᠩᠭᠠᠨ ᠱᠠᠬᠠᠢ ᠪᠠᠨ ᠣᠯᠵᠤ ᠠᠪᠬᠤ ᠳᠡᠯᠢᠮ ᠳ᠋ᠦ᠍ ᠵᠢᠷᠭᠤᠭᠠᠨ ᠬᠠᠢᠷᠴᠠᠭ ᠶᠠᠩᠵᠤᠤᠷ ᠠᠪᠤᠭᠠᠳ ᠬᠠᠢᠷᠴᠠᠭ ᠴᠦᠳᠡᠨᠵᠡ ᠳᠠᠭᠠᠷᠢᠯᠳᠤᠭᠰᠠᠨ ᠢ᠋ ᠣᠯᠵᠠᠭᠤᠷᠬᠠᠨ ᠠᠪᠤᠯᠠ᠃ ᠠᠴᠢ ᠢᠷᠡᠬᠦ ᠳ᠋ᠦ᠍ ᠡᠨᠡ ᠰᠥᠨᠢ ᠲᠠᠭ ᠬᠠᠷᠠᠩᠭᠤᠢ᠂ ᠬᠥᠮᠦᠨ ᠬᠥᠮᠦᠨ ᠢ᠋ᠶ᠋ᠡᠨ ᠣᠯᠵᠤ ᠬᠠᠷᠠᠬᠤ ᠪᠠᠢᠲᠤᠭᠠᠢ ᠭᠠᠷ ᠤ᠋ᠨ ᠬᠤᠷᠤᠭᠤ ᠶ᠋ᠢ ᠬᠠᠮᠠᠷ ᠤ᠋ᠨ ᠦᠵᠦᠭᠦᠷ ᠲᠦ᠍ ᠠᠪᠠᠴᠢᠬᠤ ᠳ᠋ᠤ᠌ ᠴᠦ᠍ ᠦᠯᠦ ᠦᠵᠡᠭᠳᠡᠨᠡ᠃ ᠡᠢᠮᠦ ᠳ᠋ᠦ᠍ ᠳ᠋ᠠᠨᠽᠡᠨ ᠵᠥᠪᠬᠡᠨ ᠴᠢᠮᠡᠭᠡ ᠭᠠᠷᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ ᠱᠠᠬᠠᠢ ᠪᠠᠨ ᠪᠠᠷᠢᠨ ᠪᠠᠷᠠᠭᠤᠨ ᠬᠣᠢᠰᠢ ᠴᠢᠭᠯᠡᠨ ᠠᠯᠬᠤᠯᠠᠪᠠ᠃ ᠬᠥᠯ ᠦ᠋ᠨ ᠨᠣᠢᠲᠠᠨ ᠰᠢᠷᠣᠢ᠂ ᠬᠦᠢᠲᠡᠨ ᠴᠢᠯᠠᠭᠤ᠂ ᠡᠯᠳᠡᠪ ᠶᠠᠭᠤᠮᠠᠰ ᠭᠢᠰᠬᠢᠭᠳᠡᠬᠦ ᠨᠢ ᠶᠣᠰᠣᠲᠠᠢ ᠶᠠᠭᠤ ᠴᠦ᠍ ᠪᠢᠰᠢ ᠪᠠᠢᠵᠠᠢ᠃
ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠪᠣᠯᠤᠭᠰᠠᠨ ᠰᠡᠭᠦᠯᠴᠢ ᠶ᠋ᠢᠨ ᠤᠳᠠᠭᠠ ᠶ᠋ᠢᠨ ᠰᠢᠷᠦᠭᠦᠨ ᠲᠤᠯᠤᠯᠳᠤᠭᠠᠨ ᠳ᠋ᠤ᠌ ᠠᠮᠢ ᠦᠷᠡᠭᠳᠡᠭᠰᠡᠳ ᠦ᠋ᠨ ᠪᠤᠯᠠᠰᠢᠨ ᠳᠤᠮᠳᠠᠭᠤᠷ ᠭᠠᠷᠬᠤ ᠬᠡᠷᠡᠭᠲᠡᠢ ᠪᠣᠯᠤᠭᠰᠠᠨ ᠪᠥᠭᠡᠳ ᠪᠤᠭ ᠴᠢᠳᠬᠥᠷ ᠰᠠᠨᠠᠭᠠᠨ ᠳ᠋ᠤᠨᠢ ᠣᠷᠣᠨ ᠳᠣᠲᠣᠷᠠ ᠨᠢ ᠵᠢᠷᠢᠰᠬᠢᠪᠡ᠃ ᠭᠡᠪᠡᠴᠦ ᠦᠬᠦᠭᠰᠡᠨ ᠨᠢ ᠪᠣᠰᠤᠨ ᠬᠠᠷᠠᠢᠵᠤ ᠢᠷᠡᠭᠡᠳ ᠠᠮᠢᠳᠤ ᠶ᠋ᠢ ᠪᠡᠨ ᠪᠠᠷᠢᠵᠤ ᠠᠪᠳᠠᠭ ᠦᠭᠡᠢ ᠭᠡᠵᠦ ᠪᠣᠳᠣᠬᠤ ᠳ᠋ᠤ᠌ ᠵᠣᠷᠢᠭ ᠣᠷᠣᠪᠠ᠃
ᠮᠣᠩᠭᠣᠯ ᠬᠥᠮᠦᠨ ᠪᠣᠯ ᠬᠠᠷᠠ ᠪᠠᠭᠠ ᠠ᠋ᠴᠠ ᠠᠭᠤᠯᠠ ᠬᠠᠳᠠᠨ ᠳ᠋ᠤ᠌ ᠡᠳᠦᠷ ᠰᠥᠨᠢ ᠶ᠋ᠢ ᠦᠯᠦ ᠢᠯᠭᠠᠨ ᠶᠠᠪᠤᠵᠤ ᠰᠤᠷᠤᠭᠰᠠᠨ ᠪᠠᠢᠳᠠᠭ ᠲᠤᠯᠠ ᠳ᠋ᠠᠨᠽᠡᠨ ᠵᠦᠭ ᠴᠢᠭ ᠠᠯᠳᠠᠬᠤ ᠦᠭᠡᠢ ᠪᠠᠢᠭᠰᠠᠨ ᠪᠥᠭᠡᠳ᠂ ᠨᠢᠭᠡ ᠤᠳᠠᠭᠠ ᠪᠤᠲᠠᠨ ᠤ᠋ ᠢᠷᠣᠭᠠᠷ ᠲᠤ ᠤᠨᠲᠠᠭᠰᠠᠨ ᠪᠣᠷᠣ ᠰᠢᠪᠠᠭᠤ ᠭᠡᠨᠡᠳᠲᠡ ᠳᠡᠷᠬᠢᠨ ᠨᠢᠰᠬᠦ ᠳ᠋ᠦ᠍ ᠰᠣᠴᠢᠭᠰᠠᠨ ᠠ᠋ᠴᠠ ᠥᠭᠡᠷᠡ ᠶᠠᠮᠠᠷ ᠴᠦ᠍ ᠠᠶᠤᠯ ᠦᠯᠦ ᠳᠠᠭᠠᠷᠢᠯᠳᠤᠪᠠ᠃
ᠦᠷ ᠴᠠᠢᠬᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠳ᠋ᠠᠨᠽᠡᠨ ᠶᠡᠬᠡ ᠰᠢᠭᠤᠢ ᠶ᠋ᠢᠨ ᠵᠠᠬᠠ ᠳ᠋ᠤ᠌ ᠬᠦᠷᠦᠯᠡ᠃ ᠰᠠᠨᠠᠭᠠ ᠰᠡᠳᠬᠢᠯ ᠪᠦᠷᠢᠨ ᠲᠠᠢᠪᠤᠰᠢᠷᠠᠬᠤ ᠳ᠋ᠤ᠌ ᠰᠥᠨᠢ ᠶ᠋ᠢᠨ ᠤᠷᠭᠤᠨ ᠭᠠᠷᠤᠭᠰᠠᠨ ᠶᠠᠪᠤᠳᠠᠯ ᠰᠡᠳᠬᠢᠯ ᠳ᠋ᠦ᠍ ᠶᠠᠭᠤᠲᠠᠢ ᠪᠠᠬᠠᠲᠠᠢ ᠰᠠᠨᠠᠭᠳᠠᠨᠠ ᠪᠣᠢ? ᠣᠳᠣ ᠢᠩᠭᠢᠭᠡᠳ ᠬᠠᠮᠢᠭᠠ ᠣᠴᠢᠬᠤ ᠪᠣᠢ? ᠭᠡᠵᠦ ᠥᠪᠡᠷ ᠡᠴᠡ ᠪᠡᠨ ᠠᠰᠠᠭᠤᠬᠤ ᠳ᠋ᠤ᠌ ᠶᠠᠭᠤᠨ ᠤ᠋ ᠤᠷᠢᠳ ᠵᠠᠮ ᠮᠥᠷ ᠪᠤᠷᠤᠭᠤᠯᠠᠭᠤᠰᠢᠲᠠᠢ ᠪᠣᠳᠣᠭᠳᠠᠨᠠ᠃ ᠭᠠᠵᠠᠷ ᠤ᠋ᠨ ᠥᠭᠡᠳᠡ ᠠᠪᠠᠷᠢᠨ ᠶᠠᠪᠤᠬᠤ ᠳ᠋ᠤ᠌ ᠤᠶᠠᠭᠠ ᠪᠠᠨ ᠲᠠᠰᠤᠯᠤᠭᠤᠯᠤᠭᠰᠠᠨ ᠨᠣᠬᠠᠢ ᠶᠤᠮ ᠤᠤ᠂ ᠲᠣᠣᠷ ᠠ᠋ᠴᠠ ᠭᠠᠷᠤᠭᠰᠠᠨ ᠰᠢᠪᠠᠭᠤ ᠡᠢᠮᠦᠷᠬᠦ ᠪᠠᠢᠳᠠᠭ ᠪᠣᠯ ᠤᠤ ᠭᠡᠮᠡᠷ ᠬᠥᠯ ᠥᠪᠡᠷ ᠢ᠋ᠶ᠋ᠡᠨ ᠲᠡᠮᠡᠦᠯᠬᠦ ᠡᠴᠡ ᠭᠠᠳᠠᠨᠠ《ᠴᠢᠭᠯᠡᠭᠡᠳ ᠢᠷᠡᠭᠰᠡᠨ ᠴᠢᠴᠧ ᠲᠡᠷᠭᠡᠨ ᠦ᠌ ᠴᠢᠬᠢ ᠶ᠋ᠢ ᠮᠤᠯᠲᠤᠯᠤᠭᠠᠳ ᠨᠠᠯᠮᠠᠢᠨᠠ ᠳᠠ ᠠᠢ ᠬᠦ》 ᠭᠡᠳᠡᠭ ᠳᠠᠭᠤᠤ ᠠᠮᠠᠨ ᠳ᠋ᠤ᠌ ᠠᠶᠠᠨᠳᠠᠭᠠᠨ ᠣᠷᠣᠵᠤ ᠢᠷᠡᠬᠦ ᠳ᠋ᠦ᠍ ᠳᠠᠭᠤᠯᠠᠬᠤ ᠦᠭᠡᠢ ᠪᠠᠢᠵᠤ ᠶᠠᠭᠠᠬᠢᠨ ᠴᠢᠳᠠᠬᠤ ᠪᠢᠯᠡ᠃
ᠬᠥᠮᠦᠨ ᠠᠮᠢᠲᠠᠨ ᠬᠡᠵᠢᠶᠡ ᠴᠦ᠍ ᠶᠠᠪᠤᠭᠠ ᠦᠭᠡᠢ ᠪᠣᠯ ᠤᠤ ᠭᠡᠮᠡᠷ ᠰᠢᠭᠢᠭᠦᠨ ᠰᠢᠷᠡᠩᠭᠢᠨ ᠳᠣᠲᠣᠷᠠ ᠣᠷᠣᠨ ᠶᠠᠪᠤᠵᠤ ᠪᠠᠢᠲᠠᠯᠠ ᠭᠡᠨᠡᠳᠲᠡ ᠪᠥᠭᠡᠮ ᠶᠠᠭᠤᠮᠠ ᠪᠣᠰᠤᠨ ᠨᠢᠭᠤᠷ ᠥᠭᠡᠳᠡ ᠦᠰᠦᠷᠬᠦ ᠰᠢᠭ ᠪᠣᠯᠪᠠ᠃ ᠠᠶᠤᠨ ᠰᠠᠨᠳᠤᠷᠬᠤ ᠳ᠋ᠤ᠌ ᠨᠢᠳᠦ ᠶ᠋ᠢ ᠨᠢ ᠶᠠᠭᠤᠮᠠ ᠪᠢᠲᠡᠭᠦᠦ ᠪᠦᠷᠬᠦᠪᠡ᠃ ᠶᠠᠭᠠᠷᠠᠨ ᠠᠷᠴᠢᠨ ᠬᠠᠷᠠᠬᠤ ᠳ᠋ᠤ᠌ ᠨᠢᠭᠡ ᠭᠠᠮᠢᠩ! ᠶᠠᠭ ᠴᠦ᠍ ᠦᠭᠡᠢ᠂ ᠴᠡᠭᠡᠵᠢ ᠥᠷᠭᠡᠨ᠂ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠬᠦᠷᠡᠩ ᠪᠣᠷᠣ᠂ ᠨᠢᠳᠦ ᠬᠤᠷᠴᠠ᠂ ᠤᠷᠤᠭᠤᠯ ᠨᠢ ᠵᠤᠵᠠᠭᠠᠨ ᠪᠥᠭᠡᠳ ᠬᠥᠮᠥᠭᠡᠢ ᠵᠠᠭᠤᠨ ᠫᠤᠤ ᠶ᠋ᠢᠨ ᠢ᠋ᠶ᠋ᠡᠨ ᠵᠠᠮᠤᠭ ᠢ᠋ ᠳᠡᠰ ᠨᠢᠰ ᠪᠠᠭᠤᠯᠭᠠᠨ ᠲᠤᠯᠭᠠᠵᠤ᠄
— ᠵᠣᠭᠰᠣ! ᠪᠢ ᠴᠢᠮᠠᠶ᠋ᠢ ᠫᠤᠤᠳᠠᠨᠠ ᠭᠡᠵᠦ ᠵᠠᠨᠤᠯᠲᠠᠢ ᠪᠣᠯᠪᠠᠴᠤ ᠰᠢᠪᠡᠨᠡᠨ ᠬᠡᠯᠡᠪᠡ᠃ ᠳ᠋ᠠᠨᠽᠡᠨ ᠠᠩᠬᠠᠨ ᠳ᠋ᠠᠭᠠᠨ ᠶᠡᠬᠡᠳᠡ ᠰᠣᠴᠢᠭᠰᠠᠨ ᠪᠣᠯᠪᠠᠴᠤ᠂ ᠪᠠᠷᠢᠯᠴᠠᠨ ᠠᠪᠬᠤ ᠳᠡᠭᠡᠷᠡ ᠬᠦᠷᠪᠡᠯ ᠪᠢ ᠳᠡᠢᠯᠦᠨᠡ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠲᠠᠢᠪᠤᠰᠢᠷᠠᠪᠠ᠃ ᠲᠡᠭᠡᠭᠡᠳ ᠳᠠᠬᠢᠨ᠄
— ᠴᠢ ᠬᠡᠨ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ
— ᠪᠢ ᠮᠣᠩᠭᠣᠯ ᠭᠡᠪᠡ᠃ ᠭᠠᠮᠢᠩ᠄
— ᠮᠣᠩᠭᠣᠯ? ᠭᠡᠵᠦ ᠭᠠᠢᠬᠠᠨ ᠠᠮᠠᠨ ᠳ᠋ᠠᠭᠠᠨ ᠳᠠᠪᠲᠠᠨ ᠬᠡᠯᠡᠭᠰᠡᠨ ᠢ᠋ᠶ᠋ᠡᠨ᠂
— ᠮᠣᠩᠭᠣᠯ ᠭᠡᠵᠦ ᠶᠠᠭᠤ ᠪᠣᠢ?
— ᠮᠣᠩᠭᠣᠯ ᠭᠡᠵᠦ ᠬᠥᠮᠦᠰ ᠪᠠᠢᠳᠠᠭ ᠢ᠋ ᠮᠡᠳᠡᠬᠦ ᠦᠭᠡᠢ ᠭᠡᠵᠢ ᠤᠤ?
ᠭᠠᠮᠢᠩ《ᠠᠢ》 ᠭᠡᠵᠦ ᠳᠤᠤᠭᠠᠷᠤᠨ ᠢᠨᠢᠶᠡᠮᠰᠦᠭᠯᠡᠨ ᠫᠤᠤ ᠪᠠᠨ ᠬᠣᠢᠰᠢ ᠲᠠᠲᠠᠭᠠᠳ᠂
— ᠴᠢ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠭᠡᠬᠦ ᠳ᠋ᠦ᠍᠂
— ᠪᠢ ᠣᠷᠭᠣᠳᠤᠯ ᠬᠥᠮᠦᠨ ᠭᠡᠵᠦ ᠬᠠᠷᠢᠭᠤᠯᠪᠠ᠃
ᠣᠷᠭᠣᠳᠤᠯ ᠬᠥᠮᠦᠨ᠂ ᠮᠥᠨ ᠣᠷᠭᠣᠳᠤᠯ ᠲᠠᠢ ᠪᠠᠨ ᠳᠠᠭᠠᠷᠢᠯᠳᠤᠭᠰᠠᠨ ᠳ᠋ᠠᠭᠠᠨ ᠪᠠᠶᠠᠷᠯᠠᠨᠠ᠃
— ᠪᠢ ᠣᠷᠭᠣᠳᠤᠯ ᠭᠡᠬᠦ ᠳ᠋ᠦ᠍ ᠭᠠᠮᠢᠩ
—《ᠬᠣᠣ!》 ᠭᠡᠵᠦ ᠢᠨᠢᠶᠡᠨ ᠫᠤᠤ ᠪᠠᠨ ᠮᠥᠷᠦᠨ ᠳ᠋ᠡᠭᠡᠨ ᠡᠯᠭᠦᠨ ᠳ᠋ᠠᠨᠽᠡᠨ ᠦ᠌ ᠭᠠᠷ ᠢ᠋ ᠰᠢᠭᠦᠷᠦᠨ ᠠᠪᠤᠯᠠ᠃
— ᠴᠢ ᠶᠠᠭᠤᠨ ᠳ᠋ᠤ᠌ ᠤᠷᠭᠤᠨᠠ ᠪᠣᠢ?
— ᠬᠠᠢ᠂ ᠲᠡᠢᠨ ᠦ᠌ ᠬᠡᠷᠡᠭ ᠨᠠᠳᠠ ᠳ᠋ᠤ᠌ ᠠᠯᠠᠭᠠ᠂ ᠴᠢᠮᠠ ᠳ᠋ᠤ᠌ ᠪᠠᠰᠠ ᠲᠡᠢᠮᠦ ᠪᠣᠯᠤᠭᠠ ᠪᠢᠵᠡ ᠳᠡ?
— ᠦᠭᠡᠢ ᠪᠢ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠪᠢᠰᠢ᠂ ᠲᠡᠮᠡᠭᠡᠨ ᠵᠢᠩ ᠲᠡᠭᠡᠭᠡᠵᠦ ᠶᠠᠪᠤᠭᠠᠳ ᠲᠠᠨ ᠤ᠋ ᠬᠢᠨ ᠳ᠋ᠦ᠍ ᠪᠠᠷᠢᠭᠳᠠᠭᠰᠠᠨ ᠶᠤᠮ᠃
— ᠠᠢ ᠲᠡᠢᠮᠦ ᠪᠢ ᠮᠡᠳᠡᠨᠡ᠃ ᠪᠤᠰᠤᠳ ᠴᠢᠨᠢ ᠶᠠᠭᠠᠬᠢᠭᠰᠠᠨ ᠪᠣᠢ?
— ᠪᠤᠰᠤᠳ ᠮᠠᠨᠢ ᠮᠥᠨ ᠤᠷᠭᠤᠭᠰᠠᠨ᠃
— ᠮᠠᠰᠢ ᠰᠠᠢᠨ᠃ ᠬᠠᠷᠢᠨ ᠲᠠ ᠨᠠᠷ ᠠᠯᠢ ᠲᠦᠷᠦᠭᠦᠨ ᠦ᠌ ᠤᠷᠭᠤᠬᠤ ᠦᠭᠡᠢ ᠶᠠᠭᠠᠬᠢᠭᠰᠠᠨ ᠤᠯᠤᠰ ᠪᠣᠢ?
— ᠶᠠᠭᠠᠬᠢᠶᠠ ᠭᠡᠬᠦ ᠪᠣᠢ᠂ ᠦᠷᠭᠦᠯᠵᠢ ᠮᠠᠨᠠᠭᠠ ᠲᠠᠢ ᠪᠠᠢᠯᠠ᠃
— ᠮᠠᠨᠠᠭᠠ ᠶᠠᠭᠤᠨ ᠤ᠋ ᠬᠠᠮᠢᠶᠠ᠂ ᠪᠢ ᠥᠴᠥᠭᠡᠳᠦᠷ ᠵᠢᠭᠤᠲᠠᠶᠠ ᠭᠡᠵᠦ ᠪᠣᠳᠣᠬᠤ ᠲᠠᠢ ᠵᠡᠷᠭᠡ ᠪᠦᠬᠦ ᠶᠠᠭᠤᠮᠠ ᠪᠠᠨ ᠪᠡᠯᠡᠳᠬᠡᠨ ᠰᠥᠨᠢ ᠮᠠᠨᠠᠭᠠᠨ ᠤ᠋ ᠬᠠᠵᠠᠭᠤ ᠪᠠᠷ ᠮᠥᠯᠬᠥᠨ ᠭᠠᠷᠪᠠ ᠭᠡᠳ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠶᠠᠪᠤᠳᠠᠯ ᠠ᠋ᠴᠠ ᠦᠷᠭᠦᠯᠵᠢᠯᠡᠭᠦᠯᠦᠨ ᠶᠠᠷᠢᠪᠠ᠃ ᠳᠠᠷᠠᠭᠠ ᠨᠢ᠄
— ᠲᠡᠭᠡᠭᠡᠳ ᠣᠳᠣ ᠴᠢ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠬᠤ ᠪᠣᠢ? ᠭᠡᠬᠦ ᠳ᠋ᠦ᠍ ᠭᠠᠮᠢᠩ᠂ ᠪᠠᠷᠠᠭᠤᠨ ᠲᠡᠢᠰᠢ ᠵᠢᠭᠠᠭᠰᠠᠨ ᠢ᠋ᠶ᠋ᠠᠨ᠄
— ᠴᠢ? ᠭᠡᠵᠦ ᠠᠰᠠᠭᠤᠪᠠ᠃ ᠳ᠋ᠠᠨᠽᠡᠨ᠄
— ᠪᠢ ᠴᠦ᠍ ᠪᠠᠰᠠ ᠲᠡᠷᠡ ᠵᠦᠭ ᠶᠠᠪᠤᠨᠠ ᠭᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠳᠠᠪᠰᠢᠯᠲᠦ