ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠳᠥᠷᠪᠡ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -4
216ᠠᠱ᠌ᠢᠭᠦᠢ ᠨᠢᠭᠡ ᠵᠠᠪᠰᠢᠶᠠᠨ
— ᠦᠭᠡᠢ ᠬᠦ᠂ ᠡᠨᠡ ᠴᠤ᠌ ᠯᠠᠪ ᠡᠳ᠋ ᠬᠥᠷᠥᠩᠭᠡ ᠪᠡᠨ ᠪᠤᠯᠢᠶᠠᠯᠳᠤᠭᠰᠠᠨ ᠬᠡᠷᠡᠭ ᠪᠣᠢ ᠭᠡᠵᠦ ᠨᠢᠭᠡᠨ ᠦ᠌ ᠪᠡᠨ ᠦᠭᠦᠯᠡᠬᠦ ᠳ᠋ᠦ᠍᠄
— ᠬᠠᠮᠢᠭᠠ ᠠ᠋ᠴᠠ! ᠡᠳ᠋ ᠬᠥᠷᠥᠩᠭᠡ ᠶ᠋ᠢᠨ ᠮᠥᠷ ᠳᠡᠭᠡᠷᠡ ᠡᠴᠡ ᠪᠣᠯᠤᠭᠰᠠᠨ ᠪᠣᠯ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠡᠳᠦᠢ ᠲᠡᠳᠦᠢ ᠬᠥᠷᠥᠩᠭᠡ ᠮᠥᠩᠭᠥᠨ ᠦ᠌ ᠦᠨᠡ ᠲᠡᠢ ᠶᠠᠭᠤᠮᠠᠰ ᠢ᠋ ᠭᠠᠵᠠᠷ ᠰᠢᠳᠡᠨ ᠲᠤᠯᠤᠯᠳᠤᠬᠤ ᠪᠢᠯᠡ? ᠵᠦᠭᠡᠷ ᠮᠢᠨᠦ ᠪᠣᠳᠣᠬᠤ ᠳ᠋ᠤ᠌ ᠶᠠᠮᠠᠷ ᠨᠢᠭᠡ ᠦᠵᠡᠰᠭᠦᠯᠡᠩᠲᠦ ᠬᠡᠦᠬᠡᠨ ᠢ᠋ ᠯᠡ ᠪᠤᠯᠢᠶᠠᠯᠳᠤᠭᠰᠠᠨ ᠬᠡᠷᠡᠭ ᠪᠠᠢᠬᠤ ᠭᠡᠵᠦ ᠨᠥᠭᠦᠭᠡ ᠨᠢ ᠦᠭᠦᠯᠡᠬᠦ ᠳ᠋ᠦ᠍᠄
— ᠵᠠ ᠬᠠᠮᠢᠭᠠ ᠠ᠋ᠴᠠ! ᠬᠡᠦᠬᠡᠨ ᠦ᠌ ᠮᠥᠷ ᠳᠡᠭᠡᠷᠡ ᠪᠣᠯ ᠡᠳᠦᠢ ᠣᠯᠠᠨ ᠠᠮᠢᠲᠠᠨ ᠶᠠᠭᠤᠨ ᠳ᠋ᠤ᠌ ᠢᠩᠭᠢᠵᠦ ᠠᠮᠢ ᠦᠷᠡᠭᠳᠡᠨ ᠲᠤᠯᠤᠯᠳᠤᠵᠤ ᠦᠬᠦᠬᠦ ᠪᠢᠯᠡ᠃ ᠬᠠᠷᠢᠨ ᠱᠠᠰᠢᠨ ᠮᠥᠷᠭᠥᠯ ᠦ᠋ᠨ ᠶᠠᠪᠤᠳᠠᠯ ᠳᠡᠭᠡᠷᠡ ᠡᠴᠡ ᠯᠡ ᠪᠣᠯᠤᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ ᠪᠠᠢᠨᠠ ᠭᠡᠵᠦ ᠨᠢᠭᠡ ᠨᠢ ᠦᠭᠦᠯᠡᠬᠦᠶᠡ᠄
— ᠱᠠᠰᠢᠨ ᠮᠥᠷᠭᠥᠯ ᠦ᠋ᠨ? ᠦᠭᠡᠢ ᠠ᠋᠃ ᠡᠳᠡ ᠴᠢᠨᠢ ᠨᠢᠭᠡ ᠬᠡᠯᠡ ᠲᠡᠢ᠂ ᠨᠢᠭᠡᠨ ᠨᠣᠮ ᠤ᠋ᠨ ᠤᠯᠤᠰ᠃ ᠵᠠ ᠲᠡᠭᠡᠭᠡᠳ ᠲᠡᠢᠮᠦ ᠪᠠᠢᠯᠠ ᠴᠤ᠌ ᠭᠡᠰᠡᠨ ᠱᠠᠰᠢᠨ ᠮᠥᠷᠭᠥᠯ ᠶᠠᠭᠤᠨ ᠤ᠋ ᠬᠠᠮᠢᠶᠠ᠂ ᠬᠤᠪᠢ ᠬᠣᠪᠢᠨ ᠤ᠋ ᠪᠠᠨ ᠰᠢᠳᠦᠨ ᠪᠢᠰᠢᠷᠡᠳᠡᠭ ᠲᠡᠭᠡᠨ ᠵᠠᠯᠪᠠᠷᠢᠨ ᠭᠡᠷ ᠣᠷᠣᠨ ᠳ᠋ᠠᠭᠠᠨ ᠰᠠᠭᠤᠵᠤ ᠪᠠᠢᠨᠠ ᠪᠢᠵᠡ᠃ ᠢᠩᠭᠢᠬᠦᠯᠡᠷ ᠡᠬᠡᠨᠡᠷ ᠦ᠋ᠨ ᠯᠡ ᠶᠠᠪᠤᠳᠠᠯ ᠪᠠᠢᠬᠤ ᠶᠣᠰᠣᠲᠠᠢ᠃ ᠭᠡᠬᠦᠴᠢᠯᠡᠨ ᠡᠯᠳᠡᠪ ᠢ᠋ᠶ᠋ᠡᠷ ᠬᠡᠯᠡᠯᠴᠡᠬᠦ ᠪᠥᠭᠡᠳ ᠵᠠᠷᠢᠮ ᠳ᠋ᠠᠭᠠᠨ ᠥᠪᠡᠷ ᠥᠪᠡᠷ ᠦ᠋ᠨ ᠬᠢ ᠪᠡᠨ ᠵᠥᠪᠲᠥᠭᠡᠬᠦ ᠭᠡᠵᠦ ᠮᠡᠳᠬᠡᠯᠴᠡᠨ ᠠᠭᠤᠷᠯᠠᠯᠠᠴᠠᠬᠤ ᠳ᠋ᠤ᠌ ᠴᠤ᠌ ᠬᠦᠷᠳᠡᠭ ᠠᠪᠠᠢ᠃
ᠬᠦᠷᠡᠯ ᠨᠢ ᠡᠯᠡ ᠶᠠᠷᠢᠶᠠᠨ ᠳ᠋ᠤ᠌ ᠣᠷᠣᠯᠴᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠵᠠᠪ ᠯᠠ ᠭᠠᠷᠪᠠᠯ ᠮᠡᠳᠡᠳᠡᠭ ᠴᠢᠳᠠᠳᠠᠭ ᠨᠣᠮ ᠪᠦᠷᠢ ᠪᠡᠨ ᠤᠩᠰᠢᠨ ᠵᠠᠯᠪᠠᠷᠢᠯ ᠪᠣᠯᠳᠠᠭ ᠪᠠᠢᠵᠠᠢ᠃ ᠭᠡᠪᠡᠴᠦ ᠤᠷᠢᠳᠤ ᠵᠦᠭ ᠦ᠋ᠨ ᠨᠢᠭᠡᠨ ᠬᠣᠲᠠ ᠠ᠋ᠴᠠ ᠵᠡᠪᠰᠡᠭ ᠳᠡᠭᠡᠬᠡᠨ ᠶᠠᠪᠤᠬᠤ ᠵᠠᠭᠤᠷᠠ ᠪᠠᠨ᠄
— ᠦᠭᠡᠢ ᠲᠠ ᠨᠠᠷ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠱᠠᠰᠢᠨ ᠪᠤᠷᠬᠠᠨ᠂ ᠣᠷᠣᠨ ᠨᠤᠲᠤᠭ ᠤ᠋ᠨ ᠢ᠋ᠶ᠋ᠠᠨ ᠯᠤᠤᠰ ᠰᠠᠪᠳᠠᠭ ᠲᠤ ᠠᠮᠢ ᠪᠡᠶᠡ ᠪᠡᠨ ᠳᠠᠭᠠᠳᠬᠠᠨ ᠵᠠᠯᠪᠠᠷᠢᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠭᠤᠨ ᠳ᠋ᠤ᠌ ᠡᠨᠡ ᠳᠡᠮᠡᠢ ᠶᠠᠭᠤᠮᠠ ᠶ᠋ᠢ ᠶᠠᠷᠢᠵᠤ ᠶᠠᠪᠤᠳᠠᠭ ᠤᠯᠤᠰ ᠪᠣᠢ? ᠭᠡᠵᠦ ᠪᠠᠢᠨ ᠪᠠᠢᠨ ᠵᠢᠮᠡᠯᠡᠳᠡᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠵᠢᠮᠡᠯᠡᠭᠡᠳ ᠳᠠᠷᠠᠭᠠ ᠨᠢ ᠲᠠᠢᠯᠪᠤᠷᠢᠯᠠᠨ ᠬᠡᠯᠡᠬᠦ ᠳ᠋ᠡᠭᠡᠨ᠄
— ᠦᠭᠡᠢ ᠶᠡᠷᠦ ᠮᠡᠳᠡᠵᠦ ᠴᠢᠳᠠᠬᠤ ᠶᠠᠭᠤ ᠪᠠᠢᠬᠤ ᠪᠢᠯᠡ᠂ ᠵᠡᠷᠭᠡ ᠵᠢᠩᠰᠡ ᠪᠠᠨ ᠯᠠ ᠪᠤᠯᠢᠶᠠᠯᠳᠤᠨᠠ ᠪᠢᠵᠡ ᠭᠡᠯᠡ᠃ ᠡᠭᠦᠨ ᠢ᠋ ᠨᠥᠭᠦᠭᠡ ᠬᠣᠶᠠᠷ ᠦᠭᠡᠢ ᠳᠠᠭᠤ ᠦᠭᠡᠢ ᠵᠥᠪᠰᠢᠶᠡᠷᠡᠭᠰᠡᠨ ᠪᠥᠭᠡᠳ ᠲᠡᠭᠦᠨᠴᠡ ᠬᠣᠢᠰᠢ ᠵᠡᠷᠭᠡ ᠵᠢᠩᠰᠡ ᠶ᠋ᠢᠨ ᠲᠤᠬᠠᠢ ᠴᠠᠭ ᠦᠷᠭᠦᠯᠵᠢ ᠰᠣᠨᠢᠷᠬᠠᠨ ᠬᠦᠦᠷᠨᠢᠬᠦ ᠪᠣᠯᠪᠠ᠃ ᠢᠩᠭᠢᠬᠦ ᠳ᠋ᠦ᠍ ᠵᠡᠷᠭᠡ ᠵᠢᠩᠰᠡ ᠶ᠋ᠢᠨ ᠲᠥᠯᠥᠭᠡ ᠲᠡᠮᠡᠴᠡᠯᠳᠦᠬᠦ ᠶᠠᠪᠤᠳᠠᠯ ᠭᠠᠵᠠᠷ ᠪᠦᠷᠢ ᠪᠠᠢᠳᠠᠭ ᠠᠵᠢ᠃ ᠮᠠᠨᠵᠤ ᠶ᠋ᠢᠨ ᠦᠶᠡ ᠳ᠋ᠦ᠍ ᠭᠡᠪᠡᠯ ᠮᠣᠩᠭᠣᠯ ᠤ᠋ᠨ ᠳᠡᠭᠡᠳᠦ ᠬᠠᠭᠠᠳ ᠨᠣᠶᠠᠳ ᠵᠡᠷᠭᠡ ᠵᠢᠩᠰᠡ ᠶ᠋ᠢ ᠬᠤᠳᠠᠯᠳᠤᠨ ᠠᠪᠬᠤ ᠭᠡᠵᠦ ᠠᠷᠠᠳ ᠣᠯᠠᠨ ᠳ᠋ᠠᠭᠠᠨ ᠰᠦᠷᠡᠬᠡᠢ ᠶᠡᠬᠡ ᠠᠯᠪᠠᠨ ᠲᠠᠲᠠᠪᠤᠷᠢ ᠭᠠᠷᠭᠠᠨ ᠰᠠᠨᠳᠤᠷᠭᠠᠳᠠᠭ ᠪᠠᠢᠭᠰᠠᠨ ᠢ᠋ ᠣᠷᠣᠨ ᠨᠤᠲᠤᠭ ᠤ᠋ᠨ ᠠᠬᠠᠮᠠᠳ ᠨᠠᠰᠤᠲᠠᠨ ᠨᠤᠭᠤᠳ ᠬᠡᠯᠡᠯᠴᠡᠳᠡᠭ ᠪᠠᠢᠵᠠᠢ᠃ ᠰᠡᠭᠦᠯ ᠦ᠋ᠨ ᠦᠶᠡ ᠳ᠋ᠦ᠍ ᠳᠣᠣᠷᠠᠲᠤ ᠨᠣᠶᠠᠳ᠂ ᠲᠠᠢᠵᠢ ᠨᠠᠷ ᠵᠠᠷᠭᠤ ᠵᠠᠭᠠᠯᠢᠬᠠᠢ ᠪᠣᠯᠤᠨ ᠲᠠᠪᠬᠢᠯᠴᠠᠳᠠᠭ ᠪᠠᠢᠵᠠᠢ᠃ ᠲᠡᠷᠡᠬᠦ ᠰᠡᠭᠦᠯ ᠦ᠋ᠨ ᠬᠡᠷᠡᠭ ᠶᠠᠪᠤᠳᠠᠯ ᠢ᠋ ᠳᠣᠷᠵᠢ᠂ ᠳ᠋ᠠᠨᠽᠠᠨ ᠬᠣᠶᠠᠷ ᠪᠦᠷ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠦᠵᠡᠭᠰᠡᠨ ᠠᠵᠢ᠃ ᠭᠡᠲᠡᠯᠡ ᠬᠠᠮᠤᠭ ᠤ᠋ᠨ ᠡᠴᠦᠰ ᠲᠦ᠍ ᠲᠥᠷᠥ ᠶ᠋ᠢᠨ ᠶᠡᠬᠡ ᠰᠠᠢᠳ ᠡᠷᠳᠡᠨᠢ ᠱᠠᠨᠵᠠᠪ ᠪᠠᠳᠮᠠᠳᠣᠷᠵᠢ ᠭᠡᠭᠴᠢ ᠬᠢᠲᠠᠳ ᠤ᠋ᠨ ᠨᠢᠭᠡ ᠲᠣᠮᠣ ᠨᠣᠶᠠᠨ ᠴᠸᠨ ᠢ ᠭᠡᠳᠡᠭ ᠲᠦ᠍ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠪᠦᠷ ᠵᠡᠷᠭᠡ ᠵᠢᠩᠰᠡ᠂ ᠠᠯᠲᠠ ᠮᠥᠩᠭᠥ ᠠᠪᠬᠤ ᠪᠠᠷ ᠬᠤᠳᠠᠯᠳᠤᠵᠤ ᠣᠷᠬᠢᠭᠰᠠᠨ ᠢ᠋ ᠳᠣᠷᠵᠢ᠂ ᠠᠶᠠᠯᠠᠨ ᠭᠠᠷᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠡᠮᠦᠨᠡ ᠡᠴᠢᠭᠡ ᠶ᠋ᠢᠨ ᠢ᠋ᠶ᠋ᠡᠨ ᠠᠮᠠᠨ ᠠ᠋ᠴᠠ ᠳᠤᠭᠤᠯᠤᠭᠰᠠᠨ ᠪᠠᠢᠪᠠ᠃ ᠡᠢᠮᠦ ᠳ᠋ᠦ᠍ ᠲᠡᠳᠡ᠄《ᠭᠠᠢ ᠲᠠᠢ ᠬᠠᠷᠠ ᠵᠡᠷᠭᠡ ᠵᠢᠩᠰᠡ ᠪᠦᠷᠢ ᠶ᠋ᠢᠨ ᠬᠥᠮᠦᠨ ᠠᠷᠠᠳ ᠤ᠋ᠨ ᠠᠮᠤᠷ ᠵᠢᠷᠭᠠᠯ ᠢ᠋ ᠰᠦᠢᠳᠬᠡᠵᠦ ᠪᠠᠢᠨᠠ᠃ ᠡᠨᠳᠡ ᠪᠢᠳᠡᠨ ᠦ᠌ ᠪᠠᠷᠢᠭᠳᠠᠭᠰᠠᠨ ᠶᠠᠪᠤᠳᠠᠯ ᠴᠤ᠌ ᠲᠡᠭᠦᠨ ᠦ᠌ ᠭᠠᠢ᠃ ᠶᠡᠷᠦ ᠨᠢ ᠵᠡᠷᠭᠡ ᠵᠢᠩᠰᠡ ᠶ᠋ᠢ ᠬᠦᠰᠡᠭᠴᠢᠳ ᠲᠥᠷᠥ ᠱᠠᠰᠢᠨ᠂ ᠬᠥᠮᠦᠨ ᠠᠮᠢᠲᠠᠨ᠂ ᠭᠠᠵᠠᠷ ᠳᠡᠯᠡᠬᠡᠢ᠂ ᠣᠷᠣᠨ ᠪᠠᠢᠰᠢᠩ ᠪᠦᠭᠦᠳᠡ ᠶ᠋ᠢᠨ ᠳᠠᠢᠰᠤᠨ ᠶᠤᠮ》 ᠭᠡᠵᠦ ᠳᠣᠷᠵᠢ᠂ ᠳ᠋ᠠᠨᠽᠠᠨ ᠬᠣᠶᠠᠷ ᠪᠣᠳᠣᠬᠤ ᠳ᠋ᠠᠭᠠᠨ ᠲᠡᠳᠡᠨ ᠢ᠋ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠥᠰᠢᠨ ᠵᠠᠨᠤᠬᠤ ᠪᠣᠯᠵᠠᠢ᠃ ᠲᠡᠮᠡᠭᠡ ᠮᠠᠯ ᠨᠢ ᠭᠡᠪᠡᠯ ᠬᠥᠮᠦᠨ ᠦ᠌ ᠨᠤᠲᠤᠭ ᠤ᠋ᠨ ᠬᠡᠲᠦᠷᠬᠡᠢ ᠳᠤᠯᠠᠭᠠᠨ ᠠᠭᠠᠷ᠂ ᠤᠰᠤᠨ ᠳᠤᠮᠳᠠᠭᠤᠷ ᠬᠠᠲᠠᠭᠤ ᠰᠢᠷᠦᠭᠦᠨ ᠡᠳ᠋ᠯᠡᠭᠳᠡᠨ ᠲᠤᠷᠠᠭᠠᠯ ᠤ᠋ᠨ ᠲᠤᠢᠯ ᠳ᠋ᠤ᠌ ᠬᠦᠷᠬᠦ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ ᠬᠠᠮᠠᠭᠤ ᠡᠪᠡᠳᠴᠢᠨ ᠳ᠋ᠦ᠍ ᠪᠠᠷᠢᠭᠳᠠᠭᠰᠠᠨ ᠪᠠᠢᠪᠠ᠃ ᠲᠡᠳᠡ ᠨᠠᠷ ᠨᠢ ᠬᠥᠮᠦᠨ ᠦ᠌ ᠠᠳᠠᠯᠢ ᠢᠨᠠᠳᠤ ᠴᠢᠨᠠᠳᠤ ᠶ᠋ᠢ ᠪᠣᠳᠣᠨ ᠭᠠᠰᠠᠯᠤᠯ ᠵᠣᠪᠠᠯᠠᠩ ᠢ᠋ ᠲᠣᠭᠠᠴᠢᠬᠤ ᠦᠭᠡᠢ ᠪᠣᠯᠪᠠᠴᠤ ᠭᠥᠷᠳᠡᠬᠡᠷ ᠬᠦᠵᠦᠭᠦᠦ ᠪᠡᠨ ᠴᠠᠭ ᠢᠮᠠᠭᠲᠠ ᠳᠡᠭᠡᠭᠰᠢ ᠰᠣᠩᠭᠣᠨ ᠪᠠᠷᠠᠭᠤᠨ ᠵᠦᠭ ᠦ᠋ᠨ ᠲᠩᠷᠢ ᠶ᠋ᠢᠨ ᠬᠠᠶᠠᠭᠠ ᠶ᠋ᠢ ᠰᠢᠷᠲᠡᠨ᠂ ᠦᠶᠡ ᠦᠶᠡ ᠪᠥᠭᠡᠮ ᠪᠥᠭᠡᠮ ᠨᠢᠯᠪᠤᠰᠤ ᠲᠤᠰᠤᠯᠤᠭᠤᠯᠬᠤ ᠪᠤᠶᠤ᠂ ᠡᠰᠡᠬᠦᠯᠡ ᠬᠤᠷᠴᠠ ᠰᠢᠳᠦ ᠪᠡᠨ ᠬᠠᠪᠢᠷᠤᠨ ᠭᠠᠰᠠᠯᠠᠩ ᠤ᠋ᠨ ᠠᠪᠢᠶᠠ ᠪᠠᠷ ᠬᠢᠬᠤᠲᠤᠨᠠᠭᠤᠯᠤᠨ ᠡᠵᠡᠳ ᠦ᠋ᠨ ᠢ᠋ᠶ᠋ᠡᠨ ᠵᠢᠷᠦᠬᠡ ᠶ᠋ᠢ ᠳᠣᠩᠰᠣᠯᠭᠠᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠡᠵᠡᠳ ᠦ᠋ᠨ ᠬᠢᠨᠢ ᠪᠡᠶᠡᠰ ᠬᠡᠳᠦᠢᠪᠡᠷ ᠡᠷᠡᠭᠦᠯ ᠮᠡᠨᠳᠦ ᠪᠠᠢᠭᠠ ᠪᠣᠯᠪᠠᠴᠤ ᠶᠠᠭᠠᠬᠢᠨ ᠬᠡᠪ ᠦ᠋ᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠪᠠᠢᠬᠤ ᠪᠢᠯᠡ᠃
ᠳᠣᠷᠵᠢ ᠭᠡᠵᠦ ᠨᠢᠭᠡ ᠶᠡᠬᠡ ᠳᠡᠩᠬᠡᠷ ᠲᠣᠯᠣᠭᠠᠢ᠂ ᠠᠮᠠ ᠨᠢ ᠲᠥᠷᠥᠯᠬᠢ ᠶ᠋ᠢᠨ ᠲᠣᠮᠣ ᠶ᠋ᠢᠨ ᠢ᠋ᠶ᠋ᠡᠨ ᠳᠡᠭᠡᠷᠡ ᠤᠯᠠᠮ ᠢ᠋ᠶ᠋ᠠᠷ ᠲᠣᠮᠣ ᠪᠣᠯᠤᠭᠰᠠᠨ ᠪᠥᠭᠡᠳ ᠬᠦᠵᠦᠭᠦᠦ ᠨᠢ ᠨᠠᠷᠢᠰᠤᠨ ᠬᠥᠮᠦᠨ ᠦ᠌ ᠬᠢ ᠡᠴᠡ ᠭᠠᠳᠠᠭᠤᠷ ᠪᠣᠯᠤᠭᠰᠠᠨ ᠨᠢ ᠵᠢᠭᠲᠡᠢᠬᠡᠨ᠃ ᠭᠡᠪᠡᠴᠦ ᠳᠣᠷᠵᠢ ᠵᠣᠪᠠᠯᠠᠩ ᠵᠦᠳᠡᠭᠦᠷᠡᠯ ᠨᠡᠮᠡᠭᠳᠡᠬᠦ ᠳᠣᠳᠣᠮ ᠭᠤᠨᠢᠨ ᠭᠤᠲᠤᠷᠠᠬᠤ ᠶ᠋ᠢ ᠬᠣᠢᠰᠢ ᠲᠠᠯᠪᠢᠨ ᠣᠷᠣᠨ ᠳ᠋ᠤᠨᠢ ᠴᠠᠭ ᠦᠷᠭᠦᠯᠵᠢ ᠠᠯᠢᠶᠠᠯᠠᠨ ᠮᠠᠷᠵᠠᠩᠨᠠᠬᠤ ᠪᠣᠯᠤᠭᠰᠠᠨ ᠪᠥᠭᠡᠳ ᠡᠨᠡ ᠨᠢ ᠲᠡᠭᠦᠨ ᠦ᠌ ᠰᠡᠳᠬᠢᠯ ᠢ᠋ᠶ᠋ᠡᠨ ᠰᠡᠷᠭᠦᠭᠡᠬᠦ ᠳ᠋ᠦ᠍ ᠬᠡᠷᠡᠭᠲᠡᠢ ᠪᠠᠢᠵᠠᠢ᠃ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠨᠢ ᠠᠯᠢ ᠬᠡᠳᠦᠢᠨ ᠪᠡᠶᠡ ᠬᠠᠯᠬᠠᠯᠠᠬᠤ ᠶᠠᠭᠤᠮᠠ ᠦᠭᠡᠢ ᠪᠣᠯᠬᠤ ᠳ᠋ᠤᠨᠢ ᠰᠸᠯᠸᠳᠢ ᠫᠤᠤ ᠲᠠᠢ ᠨᠣᠶᠠᠨ᠂ ᠠᠯᠠᠭᠳᠠᠭᠰᠠᠨ ᠴᠡᠷᠢᠭ ᠦ᠋ᠨ ᠴᠢᠰᠤ ᠰᠢᠷᠣᠢ ᠬᠣᠶᠠᠷ ᠲᠠᠢ ᠬᠤᠳᠬᠤᠯᠳᠤᠭᠰᠠᠨ ᠪᠠᠬᠠᠨ ᠬᠤᠪᠴᠠᠰᠤ ᠠᠪᠴᠢᠷᠠᠭᠰᠠᠨ ᠪᠠᠢᠪᠠ᠃ ᠲᠡᠭᠡᠬᠦ ᠳ᠋ᠦ᠍ ᠳᠣᠷᠵᠢ ᠲᠡᠭᠦᠨ ᠡᠴᠡ ᠨᠢ ᠳ᠋ᠠᠨᠽᠠᠨ ᠲᠠᠢ ᠪᠠᠨ ᠡᠷᠬᠡ ᠦᠭᠡᠢ ᠰᠢᠯᠢᠨ ᠪᠡᠶᠡ ᠳ᠋ᠡᠭᠡᠨ ᠲᠣᠬᠢᠷᠠᠭᠤᠯᠤᠨ ᠠᠪᠴᠤ ᠡᠮᠦᠰᠦᠭᠰᠡᠨ ᠠᠵᠢ᠃ ᠬᠢᠲᠠᠳ ᠬᠡᠯᠡ ᠳ᠋ᠠᠨᠽᠠᠠ ᠠ᠋ᠴᠠ ᠲᠤᠲᠠᠭᠤ ᠰᠤᠷᠤᠭᠰᠠᠨ ᠪᠣᠯᠪᠠᠴᠤ ᠬᠠᠷᠢᠶᠠᠯ ᠤ᠋ᠨ ᠦᠭᠡᠰ ᠢ᠋ ᠲᠣᠭᠲᠠᠭᠠᠭᠰᠠᠨ ᠨᠢ ᠨᠢᠭᠡᠳᠦᠭᠡᠷ ᠵᠡᠷᠭᠡ ᠳ᠋ᠦ᠍ ᠣᠷᠣᠨᠠ᠃
ᠬᠦᠷᠡᠯ ᠭᠡᠪᠡᠯ ᠨᠠᠰᠤ ᠠᠬᠢᠮᠠᠭ ᠬᠥᠮᠦᠨ ᠪᠣᠯᠬᠣᠷ ᠶᠠᠳᠠᠷᠠᠭᠰᠠᠨ ᠨᠢ ᠲᠤᠩ ᠶᠡᠬᠡ᠃ ᠶᠠᠭᠤ ᠶᠠᠭᠤᠨ ᠤ᠋ ᠤᠷᠢᠳ ᠠᠲᠤᠷᠢᠶᠠ ᠰᠠᠭᠤᠭᠰᠠᠨ ᠥᠳᠬᠡᠨ ᠮᠠᠩᠨᠠᠢ ᠶ᠋ᠢᠨ ᠳᠣᠣᠷᠠᠬᠢ ᠨᠣᠮᠢᠨ ᠨᠣᠭᠣᠭᠠᠨ ᠨᠢᠳᠦ ᠭᠠᠯ ᠦᠭᠡᠢ ᠪᠣᠯᠵᠤ ᠡᠬᠢᠯᠡᠭᠡᠳ ᠳᠠᠷᠠᠭᠠ ᠨᠢ ᠡᠳᠦᠷ ᠬᠣᠨᠣᠭ ᠢᠷᠡᠬᠦ ᠳᠣᠳᠣᠮ ᠡᠴᠡᠨ ᠲᠤᠷᠠᠭᠰᠠᠭᠠᠷ ᠨᠤᠮᠤ ᠬᠡᠯᠪᠡᠷᠢ ᠶ᠋ᠢᠨ ᠨᠢᠭᠡ ᠶᠡᠬᠡ ᠤᠷᠲᠤ ᠪᠡᠶᠡ ᠲᠡᠢ ᠠᠮᠢᠲᠠᠨ ᠪᠣᠯᠵᠤ᠂ ᠦᠰᠦ ᠰᠠᠬᠠᠯ ᠨᠢ ᠲᠠᠯᠠ ᠲᠠᠯᠠ ᠲᠠᠢᠰᠢ ᠪᠠᠨ ᠤᠷᠭᠤᠨ ᠴᠠᠳᠢᠭ ᠢ᠋ᠶ᠋ᠠᠨ ᠠᠯᠳᠠᠭᠠᠳ ᠣᠷᠣᠰ᠂ ᠮᠣᠩᠭᠣᠯ᠂ ᠲᠠᠩᠭᠤᠳ᠂ ᠲᠥᠪᠡᠳ ᠲᠠᠪᠤᠨ ᠬᠡᠯᠡᠨ ᠦ᠌ ᠠᠮᠢᠲᠠᠳ ᠤ᠋ᠨ ᠠᠯᠢᠨ ᠲᠠᠢ ᠨᠢ ᠴᠦ᠍ ᠢᠵᠢᠯ ᠦᠭᠡᠢ ᠪᠣᠯᠵᠠᠢ᠃ ᠡᠮᠦᠰᠦᠭᠰᠡᠨ ᠬᠤᠪᠴᠠᠰᠤ ᠨᠢ ᠮᠥᠨ ᠪᠤᠰᠤᠳ ᠤ᠋ᠨ ᠠᠳᠠᠯᠢ᠂ ᠠᠯᠢ ᠬᠡᠳᠦᠢᠨ ᠡᠯᠡᠭᠳᠡᠭᠰᠡᠨ ᠪᠠᠢᠬᠤ ᠨᠢ ᠮᠡᠳᠡᠭᠡᠵᠢ ᠶ᠋ᠢᠨ ᠬᠡᠷᠡᠭ᠃ ᠭᠡᠲᠡᠯᠡ ᠠᠯᠠᠭᠳᠠᠭᠰᠠᠨ ᠭᠠᠮᠢᠩ ᠤ᠋ᠨ ᠬᠤᠪᠴᠠᠰᠤ ᠠ᠋ᠴᠠ ᠡᠮᠦᠰᠪᠡᠯ ᠬᠣᠢᠲᠤ ᠨᠠᠰᠤᠨ ᠳ᠋ᠠᠭᠠᠨ ᠭᠠᠮᠢᠩ ᠪᠣᠯᠵᠤ ᠲᠥᠷᠥᠨᠡ ᠭᠡᠵᠦ ᠰᠡᠵᠢᠭᠯᠡᠨ ᠠᠪᠤᠭᠠ ᠦᠭᠡᠢ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠬᠤᠪᠴᠠᠰᠤ ᠪᠠᠨ ᠡᠳᠦᠷ ᠪᠦᠷᠢ ᠲᠡᠮᠡᠭᠡᠨ ᠤᠩᠭᠠᠰᠤ ᠨᠡᠢᠳᠬᠡᠨ ᠣᠶᠣ ᠣᠶᠣᠭᠰᠠᠭᠠᠷ ᠴᠣᠯ ᠤᠲᠠᠰᠤᠨ ᠬᠡᠷᠡᠭᠡᠰᠦ ᠪᠣᠯᠭᠠᠪᠠ᠃ ᠶᠡᠷᠦ ᠨᠢ ᠬᠦᠷᠡᠯ᠂ ᠨᠢᠭᠤᠷ ᠤ᠋ᠨ ᠪᠤᠶᠠᠨ ᠲᠠᠢ ᠬᠥᠮᠦᠨ ᠪᠠᠢᠪᠠ᠃ ᠰᠸᠯᠸᠳᠢ ᠫᠤᠤ ᠲᠠᠢ ᠨᠣᠶᠠᠨ ᠠ᠋ᠴᠠ ᠠᠪᠤᠭᠠᠳ ᠪᠠᠰᠠ ᠪᠤᠰᠤᠳ ᠭᠠᠮᠢᠩ ᠴᠥᠮ ᠳᠣᠲᠣᠨᠣᠴᠢᠯᠠᠨ ᠦᠵᠡᠨᠡ᠃ ᠬᠢᠲᠠᠳ ᠬᠡᠯᠡ ᠡᠴᠡ ᠭᠠᠭᠴᠠᠬᠠᠨ《ᠪᠦ ᠳ᠋ᠦᠩ ᠳᠢ》 ᠯᠡ ᠭᠡᠵᠦ ᠲᠣᠭᠲᠠᠭᠠᠵᠠᠢ᠃ ᠲᠡᠭᠡᠭᠡᠳ ᠲᠡᠭᠦᠨ ᠢ᠋ᠶ᠋ᠡᠨ ᠬᠢᠲᠠᠳ ᠪᠦᠷᠢ ᠶ᠋ᠢᠨ ᠡᠮᠦᠨᠡ ᠬᠡᠯᠡᠭᠰᠡᠭᠡᠷ ᠪᠠᠢᠭᠠᠳ《ᠪᠦᠳᠦᠭᠦᠨ ᠳ᠋ᠠᠢ》 ᠭᠡᠵᠦ ᠨᠡᠷᠡᠯᠡᠳᠡᠭ ᠪᠣᠯᠵᠠᠢ᠃
ᠢᠩᠭᠢᠬᠦ ᠳ᠋ᠦ᠍ ᠬᠠᠮᠤᠭ ᠤ᠋ᠨ ᠶᠠᠳᠠᠷᠠᠭᠠ ᠦᠭᠡᠢ ᠨᠢ ᠳ᠋ᠠᠨᠽᠠᠨ ᠪᠠᠢᠯᠠ᠃ ᠠᠩᠬᠠᠨ ᠤ᠋ ᠪᠠᠨ ᠦᠶᠡ ᠣᠯᠤᠭᠰᠠᠨ ᠣᠯᠵᠠ ᠡᠳ᠋ ᠬᠥᠷᠥᠩᠭᠡ ᠳ᠋ᠡᠭᠡᠨ ᠬᠠᠷᠠᠭᠤᠰᠠᠨ ᠶᠡᠬᠡᠳᠡ ᠭᠤᠳᠤᠷᠠᠭᠰᠠᠨ ᠢ᠋ ᠬᠦᠷᠡᠯ ᠡᠯᠳᠡᠪ ᠢ᠋ᠶ᠋ᠡᠷ ᠢᠳᠬᠠᠨ ᠵᠣᠭᠰᠣᠭᠠᠭᠰᠠᠨ ᠪᠥᠭᠡᠳ ᠲᠡᠭᠦᠨᠴᠡ ᠬᠣᠢᠰᠢ ᠳ᠋ᠠᠨᠽᠠᠨ ᠰᠠᠨᠠᠭᠠ ᠰᠢᠯᠤᠭᠤᠳᠤᠨ ᠵᠥᠪᠬᠡᠨ ᠬᠢᠲᠠᠳ ᠬᠡᠯᠡ ᠰᠤᠷᠬᠤ ᠳ᠋ᠤ᠌ ᠬᠠᠮᠤᠭ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠠᠯᠪᠢᠵᠠᠢ᠃
ᠡᠨᠡ ᠵᠠᠭᠤᠷᠠ ᠵᠢᠩᠴᠢᠳ ᠰᠤᠮᠤ ᠵᠥᠭᠡᠭᠡᠬᠦ ᠠᠵᠢᠯ ᠢ᠋ ᠳᠠᠩ ᠵᠠᠩᠴᠢᠬᠦᠦ ᠡᠴᠡ ᠪᠢᠰᠢ᠂ ᠤᠷᠢᠳᠤ ᠵᠦᠭ ᠦ᠋ᠨ ᠨᠡᠷᠡ ᠲᠡᠢ᠂ ᠨᠡᠷᠡ ᠦᠭᠡᠢ ᠶᠠᠩᠵᠤ ᠪᠦᠷᠢ ᠶ᠋ᠢᠨ ᠬᠣᠲᠠ ᠲᠣᠰᠬᠣᠨ ᠠ᠋ᠴᠠ ᠲᠡᠭᠡᠭᠡᠪᠦᠷᠢᠯᠡᠨ ᠬᠠᠭᠠᠰ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠰᠡᠭᠦᠯᠴᠢ ᠶ᠋ᠢᠨ ᠲᠡᠭᠡᠭᠡᠪᠦᠷᠢ ᠶ᠋ᠢ ᠬᠢᠭᠡᠳ ᠪᠠᠢᠵᠠᠢ᠃ ᠵᠠᠮ ᠵᠠᠭᠤᠷᠠ ᠳ᠋ᠤ᠌ ᠬᠡᠳᠦ ᠬᠡᠳᠦᠨ ᠲᠡᠮᠡᠭᠡ ᠶᠠᠪᠤᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠬᠤ ᠳ᠋ᠤ᠌ ᠠᠴᠢᠶᠠ ᠶ᠋ᠢ ᠨᠢ ᠬᠢᠲᠠᠳ ᠮᠣᠩᠭᠣᠯ ᠴᠥᠮ ᠬᠤᠪᠢᠶᠠᠨ ᠠᠪᠴᠤ ᠡᠭᠦᠷᠬᠦ ᠳ᠋ᠦ᠍ ᠬᠦᠷᠴᠡᠢ᠃ ᠲᠡᠭᠡᠬᠦ ᠳ᠋ᠦ᠍ ᠰᠸᠯᠸᠳᠢ ᠫᠤᠤ ᠲᠠᠢ ᠨᠣᠶᠠᠨ ᠬᠦᠷᠡᠯ ᠳ᠋ᠦ᠍ ᠦᠷᠦ ᠡᠪᠡᠳᠴᠢᠬᠡᠨ ᠰᠡᠳᠬᠢᠯ ᠭᠠᠷᠭᠠᠵᠤ ᠬᠤᠪᠢ ᠳ᠋ᠤᠨᠢ ᠣᠨᠣᠭᠳᠠᠭᠰᠠᠨ ᠢ᠋ ᠥᠪᠡᠷ ᠲᠡᠭᠡᠨ ᠠᠪᠤᠨ ᠡᠴᠢᠨᠡᠨ ᠲᠡᠴᠢᠨᠡᠨ ᠬᠣᠯᠠ ᠭᠠᠵᠠᠷ ᠶᠠᠪᠤᠵᠠᠢ᠃ ᠶᠡᠷᠦ ᠨᠢ ᠲᠡᠷᠡ ᠬᠥᠮᠦᠨ ᠦᠶᠡ ᠦᠶᠡ ᠡᠷᠯᠢᠭ ᠦ᠋ᠨ ᠡᠯᠴᠢ ᠰᠢᠭ ᠳᠣᠭᠰᠢᠨ ᠰᠢᠷᠦᠭᠦᠨ ᠠᠪᠤᠷᠢᠯᠠᠬᠤ ᠪᠣᠯᠪᠠᠴᠤ ᠦᠨᠡᠨ ᠳ᠋ᠡᠭᠡᠨ ᠳᠡᠭᠡᠳᠦ ᠠᠬᠠᠯᠠᠬᠤ ᠬᠥᠮᠦᠰ ᠲᠡᠭᠡᠨ ᠴᠠᠭ ᠦᠷᠭᠦᠯᠵᠢ ᠤᠬᠤᠷᠬᠠᠢ ᠪᠠᠨ ᠰᠢᠷᠭᠢᠲᠡᠯᠡ ᠵᠠᠩᠨᠠᠭᠤᠯᠵᠤ ᠶᠠᠪᠤᠳᠠᠭ ᠮᠥᠨ ᠦᠢᠯᠡ ᠲᠡᠢ ᠠᠮᠢᠲᠠᠨ ᠪᠠᠢᠪᠠ᠃
ᠵᠢᠱ᠌ᠢᠶᠡᠯᠡᠪᠡᠯ ᠭᠤᠷᠪᠠᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠨᠢᠭᠡᠨ ᠡᠳᠦᠷ᠂ ᠵᠡᠭᠦᠨ ᠲᠠᠯᠠ ᠶ᠋ᠢᠨ ᠢ᠋ᠶ᠋ᠡᠨ ᠡᠩᠭᠡᠷ ᠳᠡᠭᠡᠷᠡ ᠲᠣᠮᠣ ᠱᠠᠵᠠᠩ ᠠᠶᠠᠭᠠᠨ ᠤ᠋ ᠢᠷᠣᠭᠠᠷ ᠤ᠋ᠨ ᠬᠢᠷᠢ ᠲᠡᠢ ᠮᠥᠩᠭᠥᠨ ᠴᠢᠮᠡᠭ ᠵᠡᠭᠦᠭᠰᠡᠨ ᠣᠮᠣᠭ ᠲᠠᠢ ᠨᠣᠶᠠᠨ ᠥᠪᠡᠷ ᠢ᠋ᠶ᠋ᠡᠨ ᠶᠠᠪᠤᠳᠠᠭ ᠭᠤᠷᠪᠠᠨ ᠳᠤᠭᠤᠢ ᠲᠠᠢ ᠲᠡᠷᠭᠡ ᠪᠡᠷ ᠫᠠᠵᠢᠭᠢᠨᠠᠭᠤᠯᠤᠨ ᠳᠠᠪᠬᠢᠵᠤ ᠢᠷᠡᠨ ᠲᠠᠷᠢᠬᠢ ᠲᠦᠷᠦᠭᠦᠦ ᠦᠭᠡᠢ ᠵᠠᠩᠨᠠᠭᠰᠠᠨ ᠲᠡᠳᠦᠢ ᠦᠭᠡᠢ᠂ ᠬᠠᠮᠠᠷ ᠠ᠋ᠴᠠ ᠨᠢ ᠴᠢᠰᠤ ᠰᠡᠳᠡᠷᠡᠲᠡᠯᠡ ᠠᠯᠠᠭᠠᠳᠠᠬᠤ ᠶ᠋ᠢ ᠵᠢᠩᠴᠢᠳ ᠦᠵᠡᠪᠡ᠃ ᠡᠭᠦᠨᠴᠢᠯᠡᠨ ᠥᠭᠡᠷᠡ ᠪᠤᠰᠤᠳ ᠨᠣᠶᠠᠳ ᠲᠤ ᠴᠤ᠌ ᠠᠳᠠᠯᠢ ᠵᠠᠩᠨᠠᠭᠤᠯᠤᠨ ᠵᠣᠳᠣᠭᠤᠯᠳᠠᠭ ᠪᠠᠢᠵᠠᠢ᠃ ᠰᠸᠯᠸᠳᠢ ᠫᠤᠤ ᠲᠠᠢ ᠨᠣᠶᠠᠨ ᠪᠤᠰᠤᠳ ᠠ᠋ᠴᠠ ᠶᠠᠯᠠ ᠵᠢᠮᠡᠯᠡᠯ ᠬᠦᠯᠢᠶᠡᠬᠦ ᠲᠡᠢ ᠪᠡᠨ ᠵᠡᠷᠭᠡ ᠣᠨᠴᠠ ᠬᠡᠷᠴᠡᠭᠡᠢ ᠪᠣᠯᠳᠠᠭ ᠲᠤᠯᠠ ᠳᠡᠷᠭᠡᠳᠡ ᠨᠢ ᠶᠠᠪᠤᠭᠠ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠭᠦᠨ ᠢ᠋ ᠬᠡᠵᠢᠶᠡ ᠢᠮᠠᠭᠲᠠ ᠬᠡᠨ ᠳ᠋ᠦ᠍ ᠴᠤ᠌ ᠪᠢᠲᠡᠭᠡᠢ ᠵᠢᠮᠡᠯᠡᠭᠦᠯᠦᠭᠡᠰᠡᠢ ᠭᠡᠵᠦ ᠪᠣᠳᠣᠨᠠ᠃
ᠪᠦᠬᠦ ᠲᠡᠮᠡᠭᠡ ᠬᠥᠳᠡᠯᠬᠦ ᠴᠢᠳᠠᠯ ᠦᠭᠡᠢ ᠪᠣᠯᠤᠨ ᠵᠣᠭᠰᠣᠬᠤ ᠳ᠋ᠤ᠌ ᠡᠨᠳᠡᠬᠢ ᠶ᠋ᠢᠨ ᠳᠡᠭᠡᠳᠦ ᠨᠣᠶᠠᠳ ᠠᠯᠢ ᠪᠣᠯᠬᠤ ᠲᠦᠷᠭᠡᠨ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠲᠡᠩᠬᠡᠷᠡᠭᠦᠯᠬᠦ ᠶ᠋ᠢ ᠲᠤᠰᠢᠶᠠᠭᠰᠠᠨ ᠪᠠᠢᠪᠠ᠃ ᠡᠵᠡᠳ ᠢ᠋ ᠨᠢ ᠮᠥᠨ ᠢᠷᠡᠭᠡᠳᠦᠢ ᠳ᠋ᠦ᠍ ᠲᠡᠩᠬᠡᠷᠡᠭᠰᠡᠨ ᠲᠡᠮᠡᠭᠡ ᠲᠡᠢ ᠨᠢ ᠴᠣᠭ ᠬᠡᠷᠡᠭᠯᠡᠬᠦ ᠪᠡᠷ ᠬᠠᠷᠠᠭᠤᠯ ᠮᠠᠨᠠᠭᠠ ᠪᠠᠷ ᠰᠠᠬᠢᠭᠤᠯᠤᠭᠰᠠᠭᠠᠷ ᠠᠵᠢ᠃ ᠡᠯᠵᠢᠭᠡ ᠮᠣᠳᠣᠨ ᠬᠤᠳᠠᠷᠭᠠᠨ ᠳ᠋ᠠᠭᠠᠨ ᠳᠤᠷᠠ ᠲᠠᠢ ᠭᠡᠭᠴᠢ ᠪᠡᠷ ᠵᠢᠩᠴᠢᠳ ᠬᠡᠪ ᠭᠡᠨᠡᠳᠲᠡ ᠵᠦᠭᠡᠷ ᠰᠠᠭᠤᠬᠤ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠤᠢᠳᠬᠠᠷᠯᠠᠨ ᠪᠠᠢᠵᠤ ᠶᠠᠳᠠᠬᠤ ᠪᠣᠯᠤᠭᠰᠠᠨ ᠪᠢᠯᠡ᠃
ᠳᠣᠷᠵᠢ ᠮᠢᠬᠠᠨ ᠤ᠋ ᠬᠣᠢᠲᠤ ᠮᠤᠬᠤᠷ ᠲᠤ ᠬᠡᠪᠲᠡᠵᠦ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠬᠡᠦᠬᠡᠳ ᠰᠢᠭ ᠬᠥᠯ ᠭᠠᠷ ᠢ᠋ᠶ᠋ᠠᠨ ᠠᠷᠪᠠᠭᠠᠨᠠᠭᠤᠯᠤᠨ ᠬᠣᠶᠠᠷ ᠲᠠᠢᠰᠢ ᠪᠠᠨ ᠬᠡᠳᠦ ᠳᠠᠬᠢᠨ ᠬᠣᠯᠪᠣᠷᠢᠭᠠᠳ ᠡᠴᠦᠰ ᠲᠦ᠋ᠨᠢ ᠲᠦᠷᠦᠭᠦᠯᠡᠭᠡ ᠪᠡᠨ ᠬᠠᠷᠠᠨ ᠪᠦᠪ ᠪᠥᠭᠡᠷᠡᠩᠬᠡᠢ ᠪᠣᠯᠵᠤ ᠠᠪᠤᠭᠠᠳ ᠤᠨᠲᠠᠬᠤ ᠮᠡᠲᠦ ᠪᠣᠯᠪᠠ᠃ ᠵᠡᠭᠦᠨ ᠤᠷᠢᠲᠠᠢ ᠨᠢ ᠬᠦᠷᠡᠯ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠤᠷᠠᠩᠬᠠᠢ ᠶ᠋ᠢ ᠣᠶᠣᠵᠤ ᠰᠠᠭᠤᠨᠠ᠃ ᠲᠦᠷᠦᠭᠦᠦ ᠶ᠋ᠢᠨ ᠢ᠋ᠶ᠋ᠡᠨ ᠣᠶᠣᠭᠰᠠᠨ ᠢ᠋ ᠳᠠᠬᠢᠨ ᠳᠠᠪᠲᠠᠨ ᠬᠠᠨᠵᠠᠯᠠᠭᠠᠳ ᠣᠶᠣᠬᠤ ᠲᠤᠯᠠ ᠬᠢᠵᠦ ᠪᠠᠷᠠᠭᠳᠠᠬᠤ ᠦᠭᠡᠢ ᠠᠵᠢᠯ ᠲᠡᠷᠡ ᠪᠠᠢᠪᠠ᠃ ᠪᠠᠷᠠᠭᠤᠨᠲᠠᠢ ᠳ᠋ᠠᠨᠽᠠᠨ ᠡᠳᠦᠷ ᠳᠣᠳᠣᠮ ᠥᠭᠳᠡᠭ ᠬᠠᠢᠷᠴᠠᠭ ᠲᠠᠢ ᠶᠠᠩᠵᠤᠤᠷ ᠠ᠋ᠴᠠ ᠵᠣᠷᠢᠭᠤᠳᠠ ᠲᠣᠯᠣᠭᠠᠢ ᠪᠠᠨ ᠮᠢᠨᠴᠦᠷᠡᠭᠦᠯᠦᠨᠡ᠃ ᠥᠩᠭᠡᠷᠡᠭᠰᠡᠨ ᠴᠠᠭ ᠲᠤ ᠬᠠᠮᠲᠤ ᠶᠠᠪᠤᠯᠴᠠᠳᠠᠭ ᠭᠠᠮᠢᠩ ᠤ᠋ᠳ ᠤ᠋ᠨ ᠨᠢᠭᠡ ᠨᠢ ᠭᠠᠭᠴᠠᠬᠠᠨ ᠰᠤᠷᠤᠭᠰᠠᠨ ᠤᠲᠤᠭᠠ ᠪᠠᠷ ᠢ᠋ᠶ᠋ᠠᠨ ᠠᠷᠪᠠᠨ ᠲᠣᠭᠣᠷᠢᠭ ᠦᠯᠢᠶᠡᠨ ᠭᠠᠷᠭᠠᠵᠤ ᠨᠥᠬᠥᠳ ᠲᠡᠭᠡᠨ ᠭᠠᠢᠬᠠᠭᠤᠯᠤᠭᠰᠠᠨ ᠢ᠋ ᠦᠵᠡᠭᠰᠡᠨ ᠢ᠋ᠶ᠋ᠡᠷ ᠳ᠋ᠠᠨᠽᠠᠨ ᠪᠠᠰᠠ ᠲᠡᠢᠮᠦ ᠴᠠᠭᠠᠷᠢᠭ ᠭᠠᠷᠭᠠᠬᠤ ᠶ᠋ᠢ ᠣᠷᠣᠯᠳᠣᠭᠠᠳ ᠡᠰᠡ ᠴᠢᠳᠠᠨ ᠠᠷᠭᠠ ᠪᠠᠷᠠᠭᠳᠠᠨᠠ᠃ ᠡᠷᠭᠢᠨ ᠲᠣᠭᠣᠷᠢᠨ ᠳ᠋ᠤ᠌ ᠴᠤ᠌ ᠠᠨᠢᠷ ᠴᠢᠮᠡᠭᠡ ᠦᠭᠡᠢ ᠤᠢᠳᠬᠠᠷ ᠳᠤ ᠳᠠᠷᠤᠭᠳᠠᠨ ᠪᠠᠢᠬᠤ ᠳ᠋ᠤᠨᠢ ᠰᠸᠯᠸᠳᠢ ᠫᠤᠤ ᠲᠠᠢ ᠨᠣᠶᠠᠨ ᠳᠠᠭᠤ ᠭᠠᠷᠪᠠ᠃
— ᠬᠥᠶᠢ ᠴᠢ ᠶᠠᠪᠤ! ᠮᠣᠩᠭᠣᠯ ᠤ᠋ᠳ ᠢ᠋ ᠠᠪᠤᠨ ᠲᠡᠢᠰᠢ ᠶᠠᠪᠤ! ᠭᠡᠬᠦ ᠰᠣᠨᠣᠰᠲᠠᠯᠠ᠃ ᠳᠣᠷᠵᠢ᠄
— ᠲᠤᠭᠤᠯᠪᠠᠤ ᠲᠡᠷᠡ᠂ ᠪᠢᠳᠡᠨ ᠢ᠋ ᠨᠢᠭᠡ ᠲᠡᠢᠰᠢ ᠨᠢ ᠶᠠᠪᠤᠭᠤᠯᠬᠤ ᠨᠢ! ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠥᠨᠳᠡᠢᠪᠡ᠃
ᠮᠠᠨ ᠤ᠋ ᠡᠭᠦᠳᠡᠨ ᠳᠡᠭᠡᠷᠡ ᠡᠴᠡ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ᠄ ᠬᠠᠢ᠂ ᠪᠣᠰᠴᠠᠭᠠ ᠭᠡᠪᠡ᠃ ᠵᠢᠩᠴᠢᠳ ᠲᠤᠰ ᠪᠦᠷᠢ ᠪᠡᠨ ᠪᠠᠶᠠᠷᠯᠠᠭᠰᠠᠨ ᠴᠢᠷᠠᠢ ᠭᠠᠷᠭᠠᠨ ᠭᠠᠷᠤᠯᠠ᠃ ᠮᠠᠨᠠᠭᠠᠨ ᠤ᠋ ᠬᠥᠮᠦᠰ ᠫᠤᠤ ᠪᠠᠨ ᠮᠥᠷᠥᠪᠴᠢᠯᠡᠩᠭᠦᠲᠡ ᠪᠡᠨ ᠡᠮᠦᠨᠡ ᠨᠢ ᠣᠷᠣᠨ ᠶᠡᠬᠡ ᠴᠡᠷᠢᠭ ᠦ᠋ᠨ ᠬᠤᠸᠠᠷᠠᠨ ᠴᠢᠭᠯᠡᠨ ᠶᠠᠪᠤᠪᠠ᠃ ᠲᠡᠨᠳᠡ ᠡᠷᠡᠭᠦᠯ ᠬᠥᠮᠦᠨ ᠬᠣᠪᠣᠷ᠂ ᠣᠯᠠᠨ ᠮᠢᠩᠭᠠᠨ ᠬᠥᠩᠭᠡᠨ ᠰᠢᠷᠬᠠᠲᠠᠨ ᠪᠠᠢᠭᠠ ᠪᠥᠭᠡᠳ ᠴᠥᠮ ᠨᠢᠭᠡᠨ ᠳᠣᠣᠷᠠ ᠴᠤᠭᠯᠠᠷᠠᠭᠰᠠᠨ ᠠ᠋ᠴᠠ ᠭᠠᠳᠠᠨᠠ᠂ ᠴᠠᠩ ᠬᠡᠩᠭᠡᠷᠭᠡ ᠫᠠᠵᠢᠭᠢᠨᠠᠬᠤ ᠰᠣᠨᠣᠰᠤᠭᠳᠠᠨᠠ᠃ ᠠᠯᠢ ᠨᠢᠭᠡᠨ ᠬᠣᠲᠠ ᠠ᠋ᠴᠠ ᠰᠢᠴᠢᠨ ᠨᠦ᠍ᠭᠦᠳ ᠢᠷᠡᠭᠡᠳ ᠪᠠᠢᠭᠠ ᠠᠵᠢ᠃ ᠭᠡᠲᠡᠯᠡ ᠵᠢᠩᠴᠢᠳ ᠰᠢ ᠶ᠋ᠢ ᠦᠵᠡᠬᠦ ᠪᠠᠢᠲᠤᠭᠠᠢ ᠳᠤᠭᠤᠯᠠᠭᠠ ᠦᠭᠡᠢ ᠤᠯᠤᠰ ᠪᠣᠯᠬᠣᠷ ᠬᠦᠷᠦᠯᠴᠡᠨ ᠣᠴᠢᠬᠤ ᠲᠠᠢ ᠵᠡᠷᠭᠡ ᠠᠮᠠ ᠠᠩᠭᠠᠢᠯᠭᠠᠨ ᠭᠠᠢᠬᠠᠨ ᠰᠢᠷᠳᠡᠨᠡ᠃ ᠣᠯᠠᠨ ᠤ᠋ ᠡᠮᠦᠨᠡ ᠲᠤᠰᠬᠠᠢᠯᠠᠨ ᠵᠠᠰᠠᠭᠰᠠᠨ ᠥᠨᠳᠥᠷ ᠲᠠᠪᠴᠠᠩ ᠳᠡᠭᠡᠷᠡ ᠨᠢᠭᠡ ᠬᠥᠮᠦᠨ ᠬᠣᠶᠠᠷ ᠰᠠᠨᠳᠠᠯᠢ ᠲᠠᠯᠪᠢᠨ ᠭᠣᠶᠣᠮᠰᠣᠭ ᠶᠠᠭᠤᠮᠠ ᠪᠠᠷ ᠪᠦᠲᠦᠭᠡᠭᠡᠳ ᠬᠠᠵᠠᠭᠤ ᠲᠡᠢᠰᠢ ᠣᠷᠣᠪᠠ᠃ ᠵᠢᠶᠠᠩ ᠵᠣᠩ ᠬᠢᠭᠰᠡᠨ ᠬᠥᠭᠵᠢᠮ ᠦ᠋ᠨ ᠠᠪᠢᠶᠠ ᠬᠡᠳᠦᠨ ᠵᠡᠷᠭᠡ ᠵᠢᠩᠭᠢᠨᠡᠵᠦ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠤᠯᠠᠮ ᠢ᠋ᠶ᠋ᠠᠷ ᠴᠢᠭᠴᠢᠡᠯᠳᠦᠭᠡᠳ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠬᠦᠷᠲᠡᠯᠡ ᠣᠷᠣᠭᠰᠢ ᠵᠢᠳᠬᠦᠪᠡ᠃ ᠵᠠ ᠲᠠ ᠮᠢᠨᠢ ᠡᠨᠳᠡ ᠴᠢᠨᠢ ᠶᠠᠭᠤ ᠭᠡᠭᠴᠢ ᠪᠣᠯᠬᠤ ᠭᠡᠵᠦ ᠪᠠᠢᠨᠠ ᠳᠠ? ᠭᠡᠵᠦ ᠳ᠋ᠠᠨᠽᠠᠨ ᠤ᠋ ᠭᠠᠢᠬᠠᠨ ᠠᠰᠠᠭᠤᠬᠤ ᠳ᠋ᠤ᠌ ᠳᠣᠷᠵᠢ᠄
— ᠶᠠᠭᠤ ᠭᠡᠭᠴᠢ ᠶ᠋ᠢ ᠬᠡᠨ ᠮᠡᠳᠡᠯᠡ᠂ ᠶᠠᠭᠤ ᠴᠤ᠌ ᠭᠡᠰᠡᠨ ᠶᠠᠭᠤᠮᠠ ᠯᠠ ᠭᠡᠭᠴᠢ ᠪᠣᠯᠬᠤ ᠨᠢ ᠪᠣᠯᠤᠯᠲᠠᠢ ᠭᠡᠳ ᠤᠷᠢᠳᠤᠬᠢ ᠬᠥᠮᠦᠰ ᠲᠡᠭᠡᠨ ᠬᠠᠷᠢᠶᠠᠯᠭᠠᠨ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠵᠢᠳᠬᠦᠪᠡ᠃ ᠲᠠᠪᠴᠠᠩ ᠤ᠋ᠨ ᠮᠤᠬᠤᠷ ᠠ᠋ᠴᠠ ᠳᠠᠪᠤᠤ ᠡᠭᠦᠳᠡ ᠳᠡᠭᠡᠭᠰᠢ ᠰᠢᠳᠡᠭᠳᠡᠨ ᠲᠥᠭᠡ ᠰᠢᠬᠠᠮ ᠤ᠋ᠨ ᠵᠤᠵᠠᠭᠠᠨ ᠤᠯᠠ ᠲᠠᠢ ᠬᠠᠷᠠ ᠱᠠᠬᠠᠢ ᠲᠠᠢ ᠬᠥᠮᠦᠨ ᠭᠠᠷᠴᠤ ᠢᠷᠡᠬᠦ ᠳ᠋ᠦ᠍᠂ ᠳᠣᠷᠵᠢ ᠯᠠᠪᠯᠠᠨ ᠠᠵᠢᠭᠯᠠᠨᠠ᠃ ᠤᠷᠢᠳ ᠡᠮᠦᠨᠡ ᠳᠠᠩᠴᠤ ᠦᠵᠡᠭᠡ ᠦᠭᠡᠢ ᠭᠣᠶᠣᠮᠰᠣᠭ ᠬᠤᠪᠴᠠᠰᠤ ᠲᠠᠢ᠂ ᠤᠷᠳᠤᠭᠤᠷ ᠢ᠋ᠶ᠋ᠠᠨ ᠠᠷᠰᠯᠠᠨ ᠪᠠᠷᠰ ᠬᠣᠶᠠᠷ ᠤ᠋ᠨ ᠠᠯᠢ ᠨᠢᠭᠡᠨ ᠦ᠌ ᠬᠢᠨᠢ ᠲᠣᠯᠣᠭᠠᠢ ᠪᠣᠯ ᠤᠤ ᠭᠡᠮᠡᠷ ᠠᠮᠢᠲᠠᠨ ᠤ᠋ ᠲᠣᠯᠣᠭᠠᠢ ᠶ᠋ᠢ ᠡᠷᠢᠶᠡᠯᠡᠨ ᠲᠠᠯᠪᠢᠭᠰᠠᠨ ᠬᠥᠭ ᠮᠡᠲᠦ ᠶ᠋ᠢ ᠵᠡᠭᠦᠭᠰᠡᠨ ᠴᠢᠰᠤ ᠤᠯᠠᠭᠠᠨ ᠨᠢᠭᠤᠷ ᠲᠠᠢ ᠬᠥᠮᠦᠨ ᠪᠠᠢᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠬᠥᠮᠦᠨ ᠬᠥᠯ ᠢ᠋ᠶ᠋ᠡᠨ ᠳᠡᠭᠡᠷᠡ ᠡᠷᠭᠦᠨ ᠬᠥᠨᠳᠡᠯᠡᠨ ᠭᠢᠰᠬᠢᠯᠡᠵᠦ ᠡᠷᠡᠭᠦᠦ ᠶ᠋ᠢᠨ ᠳᠣᠣᠷᠠᠬᠢ ᠬᠠᠷᠠ ᠶᠣᠩᠬᠣᠷ ᠴᠠᠴᠤᠭ ᠮᠡᠲᠦ ᠰᠢᠭᠤᠳ ᠳᠣᠭᠣᠭᠰᠢ ᠤᠨᠵᠢᠭᠰᠠᠨ ᠤᠷᠲᠤ ᠰᠠᠬᠠᠯ ᠢ᠋ᠶ᠋ᠠᠨ ᠭᠠᠷ ᠳᠡᠯᠯᠡᠨ ᠢᠯᠪᠢᠵᠦ᠂ ᠬᠠᠵᠠᠭᠤ ᠲᠠᠢᠰᠢ ᠬᠠᠶᠠᠭᠠᠳ᠂ ᠪᠠᠷᠠᠭᠤᠨ ᠭᠠᠷ ᠲᠠᠭᠠᠨ ᠰᠠᠷᠠᠨ ᠰᠦᠬᠡᠲᠦ ᠵᠢᠳᠠ ᠶ᠋ᠢᠨ ᠡᠰᠢ ᠶ᠋ᠢ ᠰᠢᠯᠢᠨ ᠳᠡᠭᠡᠷᠡ ᠲᠦᠰ ᠪᠠᠭᠤᠯᠭᠠᠨ ᠬᠡᠳᠦᠨ ᠦᠭᠡ ᠬᠡᠯᠡᠪᠡ᠃ ᠬᠣᠢᠨᠠ ᠠ᠋ᠴᠠ ᠨᠢ ᠪᠠᠰᠠ ᠨᠢᠭᠡᠨ ᠰᠦᠷᠡᠬᠡᠢ ᠠᠮᠢᠲᠠᠨ ᠭᠠᠷᠴᠤ ᠢᠷᠡᠯᠡ᠃ ᠨᠠᠭᠤᠷ ᠨᠢ ᠬᠠᠷᠠ ᠡᠷᠢᠶᠡᠨ᠂ ᠲᠣᠯᠣᠭᠠᠢ ᠳ᠋ᠤᠨᠢ ᠬᠣᠶᠠᠷ ᠨᠠᠷᠢᠬᠠᠨ ᠤᠷᠲᠤ ᠡᠪᠡᠷ ᠨᠠᠬᠢᠯᠵᠠᠵᠤ᠂ ᠠᠷᠤ ᠨᠢᠷᠤᠭᠤᠨ ᠳ᠋ᠤᠨᠢ ᠡᠷᠢᠶᠡᠨ ᠳᠠᠷᠴᠠᠭ ᠤ᠋ᠳ ᠰᠠᠯᠪᠠᠯᠵᠠᠨᠠ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠭᠠᠷᠴᠤ ᠢᠷᠡᠭᠰᠡᠨ ᠬᠥᠮᠦᠨ ᠲᠡᠢ ᠲᠣᠮᠣ ᠲᠣᠮᠣ ᠳᠠᠭᠤ ᠪᠠᠷ ᠬᠠᠷᠢᠯᠴᠠᠨ ᠶᠠᠷᠢᠯᠴᠠᠬᠤ ᠵᠠᠭᠤᠷᠠ ᠥᠭᠡᠷᠡ ᠪᠤᠰᠤᠳ ᠵᠢᠳᠠ ᠰᠡᠯᠡᠮᠡ ᠮᠤᠨᠠ ᠡᠯᠳᠡᠪ ᠢ᠋ ᠪᠠᠷᠢᠭᠰᠠᠨ ᠶᠣᠰᠣᠲᠠᠢ ᠢᠷᠣᠠ ᠶ᠋ᠢᠨ ᠴᠢᠷᠠᠢ ᠲᠠᠢ ᠠᠮᠢᠲᠠᠳ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠭᠠᠷᠴᠤ ᠢᠷᠡᠭᠰᠡᠨ ᠪᠠᠢᠨᠠ᠃ ᠦᠨᠡᠨ ᠳ᠋ᠡᠭᠡᠨ ᠵᠢᠩᠴᠢᠳ ᠲᠡᠷᠡ ᠪᠦᠷᠢ ᠶ᠋ᠢ ᠨᠢᠳᠦ ᠭᠦᠢᠴᠡᠭᠡᠨ ᠬᠠᠷᠠᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠭᠰᠠᠨ ᠠᠵᠢ᠃
— ᠡᠨᠡ ᠴᠢᠨᠢ ᠣᠳᠣ ᠶᠠᠭᠤ ᠭᠡᠭᠴᠢ ᠪᠣᠢ? ᠭᠡᠵᠦ ᠳᠣᠷᠵᠢ ᠡᠷᠭᠢᠨ᠂ ᠬᠦᠷᠡᠯ ᠡᠴᠡ ᠠᠰᠠᠭᠤᠬᠤ ᠳ᠋ᠤ᠌᠂ ᠬᠦᠷᠡᠯ᠄ ᠬᠠᠢ᠂ ᠬᠠᠢ ᠭᠡᠵᠦ ᠪᠣᠳᠣᠭᠰᠠᠨ ᠢ᠋ᠶ᠋ᠠᠨ᠂
— ᠡᠷᠲᠡ ᠴᠠᠭ ᠲᠤ ᠪᠡᠭᠡᠵᠢᠩ ᠳ᠋ᠦ᠍ ᠵᠢᠱ᠌ᠢᠶᠡᠯᠡᠭᠰᠡᠨ ᠨᠢᠭᠡ ᠲᠦᠰᠢᠮᠡᠯ ᠰᠢ ᠭᠡᠵᠦ ᠡᠢᠮᠦᠷᠬᠦ ᠨᠢᠭᠡᠨ ᠬᠠᠴᠢᠨ ᠶᠧᠯᠸᠢ ᠰᠢᠳᠢ ᠶ᠋ᠢᠨ ᠶᠠᠭᠤᠮᠠ ᠦᠵᠡᠯᠡ ᠭᠡᠵᠦ ᠶᠠᠷᠢᠵᠤ ᠪᠠᠢᠭᠰᠠᠨ᠂ ᠡᠨᠡ ᠴᠤ᠌ ᠯᠠᠪ ᠲᠡᠷᠡ ᠨᠢ ᠯᠡ ᠰᠢᠭ ᠪᠠᠢᠨᠠ ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠡᠨᠡᠭᠦᠬᠡᠨ ᠵᠠᠭᠤᠷᠠ ᠥᠨᠥᠬᠢ ᠬᠥᠮᠦᠰ ᠦ᠋ᠨ ᠳᠡᠭᠡᠷᠡ ᠠᠮᠠ ᠪᠠᠨ ᠡᠭᠡᠭᠡ ᠯᠡ ᠤᠯᠠᠭᠠᠨ ᠬᠣᠰᠢᠭᠤᠲᠤ ᠰᠢᠭ᠋ ᠴᠢᠰ ᠤᠯᠠᠭᠠᠨ ᠢ᠋ᠶ᠋ᠠᠷ ᠪᠣᠳᠣᠭᠰᠠᠨ ᠬᠤᠨᠳᠠᠨ ᠴᠠᠭᠠᠨ ᠴᠢᠷᠠᠢ ᠲᠠᠢ ᠨᠢᠭᠡ ᠬᠡᠦᠬᠡᠨ ᠨᠡᠮᠡᠭᠳᠡᠭᠰᠡᠨ ᠪᠠᠢᠨᠠ᠃ ᠲᠡᠷᠡ ᠬᠡᠦᠬᠡᠨ ᠰᠠᠯᠬᠢᠨ ᠳ᠋ᠤ᠌ ᠭᠤᠢᠪᠢᠬᠤ ᠪᠠᠢᠳᠠᠯ ᠢ᠋ᠶ᠋ᠠᠷ ᠭᠠᠩᠬᠤᠨ ᠨᠠᠭᠠᠰᠢ ᠴᠠᠭᠠᠰᠢ ᠶᠠᠪᠤᠩᠭᠤᠲᠠ ᠪᠠᠨ ᠡᠮᠡᠭᠲᠡᠢ ᠬᠥᠮᠦᠨ ᠦ᠌ ᠬᠣᠭᠣᠯᠠᠢ ᠶ᠋ᠢᠨ ᠬᠠᠮᠤᠭ ᠤ᠋ᠨ ᠰᠢᠩᠭᠡᠨ ᠢ᠋ᠶ᠋ᠡᠷ ᠬᠠᠴᠢᠨ ᠴᠢᠩᠭᠠ ᠳᠠᠭᠤᠯᠠᠨᠠ᠃ ᠬᠠᠵᠠᠭᠤ ᠪᠠᠷ ᠬᠠᠲᠠᠭᠤ ᠴᠤᠤᠷᠢᠶᠠ ᠲᠠᠢ ᠬᠥᠭᠵᠢᠮ ᠦ᠋ᠨ ᠦᠷᠭᠦᠯᠵᠢᠯᠡᠨ ᠵᠢᠩᠭᠢᠨᠡᠵᠦ ᠦᠶᠡ ᠦᠶᠡ ᠴᠢᠬᠢᠨ ᠦ᠌ ᠬᠣᠯᠬᠢ ᠵᠠᠭᠠᠲᠤᠨᠠᠭᠤᠯᠤᠨᠠ᠃ ᠳ᠋ᠠᠨᠽᠠᠨ᠂ ᠬᠡᠦᠬᠡᠨ ᠦ᠌ ᠴᠣᠬᠣᠮ ᠶᠠᠭᠤᠨ ᠲᠤᠬᠠᠢ ᠳᠠᠭᠤᠯᠠᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠬᠦ ᠳ᠋ᠦ᠍ ᠬᠠᠮᠤᠭ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠠᠯᠪᠢᠭᠠᠳ᠂ ᠥᠪᠡᠷ ᠦ᠋ᠨ ᠮᠡᠳᠡᠬᠦ ᠦᠭᠡ ᠡᠴᠡ ᠨᠢᠭᠡ ᠴᠤ᠌ ᠳᠤᠭᠤᠯᠳᠠᠬᠤ ᠦᠭᠡᠢ ᠳ᠋ᠦ᠍ ᠰᠡᠳᠬᠢᠯ ᠭᠣᠮᠣᠳᠠᠬᠤ ᠳ᠋ᠤ᠌ ᠬᠦᠷᠪᠡ᠃ ᠭᠡᠪᠡᠴᠦ ᠳ᠋ᠠᠨᠽᠠᠨ ᠲᠡᠷᠡᠬᠦ ᠬᠡᠦᠬᠡᠨ ᠦ᠌ ᠶᠠᠩᠬᠠᠨ ᠶᠠᠭᠠᠨ ᠥᠩᠭᠡᠲᠦ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠥᠷᠭᠡᠨ ᠬᠠᠨᠴᠤᠢ ᠪᠠᠷ ᠨᠢᠭᠤᠷ ᠬᠠᠯᠬᠠᠯᠠᠨ᠂ ᠬᠣᠭᠣᠯᠠᠢ ᠪᠠᠨ ᠡᠬᠡᠷ ᠲᠠᠲᠠᠭᠤᠯᠤᠨ ᠤᠬᠢᠯᠠᠬᠤ ᠮᠠᠶᠢᠭ ᠦᠵᠡᠭᠦᠯᠬᠦ ᠳ᠋ᠦ᠍ᠨᠢ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠦᠷᠦ ᠡᠪᠡᠳᠦᠪᠡ᠃ ᠳᠠᠷᠠᠭᠠ ᠳ᠋ᠤᠨᠢ ᠬᠡᠦᠬᠡᠨ ᠨᠥᠭᠦᠭᠡ ᠬᠠᠨᠴᠤᠢ ᠠ᠋ᠴᠠ ᠪᠠᠨ ᠬᠢᠲᠤᠭᠠ ᠭᠠᠷᠭᠠᠨ ᠴᠡᠭᠡᠵᠢ ᠤᠷᠤᠭᠤ ᠪᠠᠨ ᠲᠦᠷᠢᠭᠰᠡᠨ ᠪᠣᠯᠤᠭᠠᠳ ᠪᠤᠴᠠᠨ ᠣᠷᠣᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠡᠨᠡ ᠴᠤ᠌ ᠬᠠᠷᠢᠨ ᠱᠠᠯ ᠳᠡᠮᠡᠢ ᠬᠠᠭᠤᠷᠮᠠᠴᠢ ᠬᠡᠷᠡᠭ ᠪᠠᠢᠨᠠ ᠳᠠ ᠭᠡᠵᠦ ᠪᠣᠳᠣᠬᠤ ᠳ᠋ᠠᠭᠠᠨ ᠰᠡᠳᠬᠢᠯ ᠠᠯᠳᠠᠭᠳᠠᠪᠠ᠃ ᠭᠡᠪᠡᠴᠦ ᠪᠤᠰᠤᠳ ᠦᠵᠡᠭᠴᠢᠳ᠂ ᠳᠠᠷᠤᠢ ᠲᠠᠪᠤᠨ ᠮᠢᠩᠭᠠ ᠠ᠋ᠴᠠ ᠳᠣᠷᠣᠭᠰᠢ ᠦᠭᠡᠢ ᠬᠥᠮᠦᠰ ᠨᠢᠭᠡ ᠵᠡᠷᠭᠡ《ᠬᠣᠣ ᠸᠠ》 ᠬᠠᠰᠬᠢᠷᠬᠤ ᠳ᠋ᠤ᠌《ᠡᠨᠡ ᠴᠤ᠌ ᠯᠠᠪ ᠲᠡᠷᠡ ᠬᠡᠦᠬᠡᠨ ᠦ᠌ ᠦᠬᠦᠭᠡ ᠦᠭᠡᠢ ᠳ᠋ᠦ᠍ ᠪᠠᠶᠠᠷᠯᠠᠵᠤ ᠪᠠᠢᠭᠠ ᠪᠣᠢ ᠊ᠶᠠ》 ᠭᠡᠵᠦ ᠪᠣᠳᠣᠨ ᠪᠠᠶᠠᠷᠯᠠᠪᠠ᠃ ᠡᠨᠡ ᠵᠠᠭᠤᠷᠠ ᠬᠦᠷᠡᠯ᠂ ᠲᠠᠪᠴᠠᠩ ᠤ᠋ᠨ ᠶᠠᠭᠤᠮᠠ ᠶ᠋ᠢ ᠰᠣᠨᠢᠷᠬᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠥᠭᠡᠷᠡ ᠵᠦᠢᠯ ᠢ᠋ ᠪᠣᠳᠣᠨ ᠣᠷᠴᠢᠨ ᠲᠣᠭᠣᠷᠢᠨ ᠢ᠋ ᠪᠠᠢᠨ ᠪᠠᠢᠨ ᠠᠵᠢᠭᠯᠠᠪᠠ᠃ ᠲᠡᠭᠡᠭᠡᠳ ᠡᠴᠦᠰ ᠲᠦ᠋ᠨᠢ ᠨᠥᠭᠥᠭᠡᠳᠦᠭᠦᠯᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠣᠬᠣᠢ ᠠ᠋ᠴᠠ ᠲᠡᠳᠡᠨ᠄
— ᠨᠥᠬᠥᠳ ᠮᠢᠨᠢ ᠤᠷᠭᠤᠶᠠ! ᠭᠡᠵᠦ ᠰᠢᠪᠡᠨᠡᠭᠡᠳ ᠳᠠᠬᠢᠨ ᠪᠠᠰᠠ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠭᠯᠠᠨᠠ᠃ ᠤᠷᠭᠤᠬᠤ ᠭᠡᠳᠡᠭ ᠵᠢᠩᠴᠢᠳ ᠦ᠋ᠨ ᠬᠡᠵᠢᠶᠡᠨ ᠦ᠌ ᠬᠦᠰᠡᠯ᠃ ᠭᠠᠭᠴᠠᠬᠠᠨ ᠦᠷᠭᠦᠯᠵᠢ ᠰᠠᠬᠢᠭᠴᠢ ᠮᠠᠨᠠᠭᠠᠨ ᠤ᠋ ᠲᠠᠪᠤ ᠦᠰᠦᠷᠳᠡᠭ ᠰᠧ ᠰᠠᠨ ᠯᠢ ᠬᠠᠮᠢᠭᠠᠭᠤᠷ ᠨᠢ ᠭᠠᠷᠬᠤ ᠪᠣᠢ? ᠭᠡᠳᠡᠭ ᠳᠡᠭᠡᠷᠡ ᠯᠡ ᠡᠷᠭᠢᠯᠳᠦᠭᠰᠡᠭᠡᠷ ᠡᠳᠦᠢ ᠬᠦᠷᠦᠭᠰᠡᠨ ᠬᠡᠷᠡᠭ ᠠᠵᠢ᠃ ᠭᠤᠷᠪᠠᠭᠤᠯᠠ ᠪᠠᠨ ᠰᠡᠳᠬᠢᠯ ᠬᠥᠳᠡᠯᠦᠨ ᠡᠷᠭᠢᠨ ᠲᠣᠭᠣᠷᠢᠨ ᠢ᠋ ᠠᠵᠢᠪᠠᠯ᠂ ᠨᠡᠢᠲᠡ ᠶ᠋ᠢᠨ ᠠᠩᠬᠠᠷᠤᠯ ᠰᠢ ᠳ᠋ᠦ᠍ ᠲᠠᠲᠠᠭᠳᠠᠨᠠ᠃ ᠳᠡᠷᠭᠡᠳᠡ ᠪᠡᠨ ᠦᠬᠡᠷ ᠫᠤᠤ ᠶ᠋ᠢᠨ ᠰᠤᠮᠤ ᠲᠣᠰᠪᠠᠴᠤ ᠮᠡᠳᠡᠮᠡ ᠦᠭᠡᠢ ᠪᠠᠢᠭᠠ ᠠ᠋ᠴᠠ ᠭᠠᠳᠠᠨᠠ᠂ ᠰᠡᠭᠦᠳᠡᠷ ᠮᠡᠲᠦ ᠳᠠᠭᠠᠭᠴᠢ ᠮᠠᠨᠠᠭᠠ ᠨᠢ ᠣᠯᠵᠤ ᠠᠪᠤᠭᠰᠠᠨ ᠪᠠᠢᠷᠢ ᠪᠠᠨ ᠠᠯᠳᠠᠬᠤ ᠦᠭᠡᠢ ᠶ᠋ᠢ ᠬᠢᠴᠢᠶᠡᠨ ᠣᠷᠣᠭᠰᠢ ᠵᠢᠳᠬᠦᠭᠰᠡᠭᠡᠷ ᠪᠠᠢᠯᠠ᠃ ᠳᠣᠷᠵᠢ ᠲᠣᠮᠣ ᠠᠮᠠ ᠪᠠᠨ ᠳᠠᠲᠠᠯᠳᠠᠭᠤᠯᠤᠨ ᠢᠨᠢᠶᠡᠪᠬᠢᠯᠡᠵᠦ ᠨᠢᠳᠦ ᠪᠡᠨ ᠬᠦᠷᠡᠯ ᠳᠡᠭᠡᠷᠡ ᠳᠤᠰᠬᠠᠨᠠ᠃ ᠡᠬᠢᠯᠡᠭᠡᠳ ᠬᠠᠮᠢᠭᠠᠰᠢ ᠪᠠᠨ ᠭᠠᠷᠬᠤ ᠪᠣᠢ? ᠭᠡᠰᠡᠨ ᠳ᠋ᠦ᠍ ᠬᠦᠷᠡᠯ᠄ ᠤᠷᠢᠳ ᠢ᠋ᠶ᠋ᠠᠷ ᠪᠠᠷᠠᠭᠤᠨ ᠲᠠᠯᠠ ᠶ᠋ᠢᠨ ᠮᠠᠢᠬᠠᠨ ᠨᠤᠭᠤᠳ ᠤ᠋ᠨ ᠳᠤᠮᠳᠠᠭᠤᠷ ᠣᠷᠣᠭᠠᠳ᠂ ᠳᠠᠷᠠᠭᠠ ᠨᠢ ᠣᠷᠣᠭᠰᠢ ᠭᠠᠷᠤᠨ ᠲᠡᠮᠡᠭᠡᠨ ᠳᠡᠭᠡᠷᠡ ᠪᠡᠨ ᠣᠴᠢᠬᠤ ᠶ᠋ᠢ ᠪᠣᠳᠣᠶᠠ ᠭᠡᠪᠡ᠃ ᠳ᠋ᠠᠨᠽᠠᠨ ᠪᠠᠢᠵᠤ ᠶᠠᠳᠠᠨ ᠪᠠᠶᠠᠷᠯᠠᠬᠤ ᠳ᠋ᠠᠭᠠᠨ᠂ ᠨᠡᠭᠡᠷᠡᠨ ᠲᠡᠭᠡᠶᠡ! ᠭᠡᠵᠦ ᠴᠢᠩᠭᠠ ᠪᠠᠷ ᠬᠡᠯᠡᠪᠡ᠃ ᠬᠠᠮᠤᠭ ᠭᠠᠢ ᠴᠤ᠌ ᠡᠨᠳᠡ ᠡᠴᠡ ᠡᠬᠢᠯᠡᠯᠡ᠃ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠳ᠋ᠠᠨᠽᠠᠨ ᠤ᠋ ᠳᠠᠭᠤ ᠪᠠᠷ ᠰᠠᠨᠠᠭᠠ ᠠᠪᠤᠨ ᠪᠣᠰᠤᠨ ᠬᠠᠷᠠᠢᠵᠤ ᠢᠷᠡᠭᠡᠳ ᠭᠤᠷᠪᠠᠭᠤᠯᠠ ᠶ᠋ᠢ ᠤᠷᠢᠳᠠ ᠪᠠᠨ ᠣᠷᠣᠭᠤᠯᠤᠨ ᠰᠠᠭᠤᠯᠭᠠᠪᠠ᠃ ᠡᠨᠡ ᠳᠠᠷᠤᠢ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠣᠭᠲᠣ ᠦᠭᠡᠢ ᠪᠣᠯᠵᠤ᠂ ᠨᠥᠭᠦᠭᠡ ᠬᠣᠶᠠᠷ ᠨᠢ ᠳ᠋ᠠᠨᠽᠠᠨ ᠤᠷᠤᠭᠤ ᠬᠢᠯᠠᠢᠯᠴᠠᠨᠠ᠃ ᠳ᠋ᠠᠨᠽᠠᠨ ᠴᠤ᠌ ᠦᠨᠡᠬᠡᠷ ᠪᠤᠷᠤᠭᠤ ᠲᠠᠢ ᠪᠣᠯᠤᠭᠰᠠᠨ ᠲᠤᠯᠠ ᠭᠣᠣᠯ ᠨᠢ ᠬᠠᠷᠠᠯᠠᠨ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠴᠢᠷᠠᠢ ᠶ᠋ᠢ ᠴᠤ᠌ ᠬᠠᠷᠠᠵᠤ ᠴᠢᠳᠠᠬᠤ ᠪᠠᠨ ᠪᠣᠯᠢᠪᠠ᠃ ᠲᠠᠪᠴᠠᠩ ᠳᠡᠭᠡᠷᠡ ᠡᠷᠢᠶᠡᠨ ᠮᠡᠷᠢᠶᠡᠨ ᠨᠢᠭᠤᠷ ᠲᠠᠢ ᠡᠯᠳᠡᠪ ᠱᠠᠯᠳᠠᠪ ᠤ᠋ᠨ ᠭᠣᠶᠣᠮᠰᠣᠭ ᠢ᠋ ᠡᠮᠦᠰᠦᠭᠰᠡᠨ ᠠᠮᠢᠲᠠᠳ ᠴᠠᠩ᠂ ᠪᠥᠮᠪᠥᠷ ᠦ᠋ᠨ ᠳᠠᠭᠤ ᠪᠠᠷ ᠬᠥᠳᠡᠯᠦᠨ ᠬᠠᠷᠠ ᠲᠡᠩᠬᠡ ᠪᠡᠷ ᠢ᠋ᠶ᠋ᠡᠨ ᠳᠠᠭᠤᠯᠠᠯᠳᠤᠨᠠ᠃ ᠳ᠋ᠠᠨᠽᠠᠨ ᠲᠡᠭᠦᠨ ᠢ᠋ ᠰᠣᠨᠢᠷᠬᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠥᠮᠥᠰᠬᠡ ᠪᠡᠨ ᠲᠠᠰᠤ ᠵᠠᠩᠭᠢᠳᠤᠨ ᠳᠠᠩ ᠪᠡᠶᠡ ᠪᠡᠨ ᠵᠢᠮᠡᠯᠡᠨ ᠳᠣᠷᠣᠭᠰᠢ ᠰᠢᠷᠲᠡᠨᠡ᠃ ᠭᠡᠪᠡᠴᠦ ᠴᠠᠭ ᠦᠷᠭᠦᠯᠵᠢ ᠳᠤᠭᠤᠯᠳᠠᠬᠤ ᠶᠠᠭᠤᠮᠠᠨ ᠳ᠋ᠤ᠌ ᠠᠶᠠᠨᠳᠠᠭᠠᠨ ᠲᠠᠲᠠᠭᠳᠠᠨ᠄《ᠡᠨᠡ ᠶᠠᠭᠤ ᠪᠣᠢ? ᠬᠡᠩᠭᠡᠷᠭᠡ ᠤᠤ? ᠠᠢ ᠪᠢᠰᠢ! ᠬᠡᠩᠭᠡᠷᠭᠡ ᠪᠣᠯ ᠡᠢᠮᠦ ᠴᠢᠩᠭᠠ ᠴᠣᠬᠢᠯᠲᠠ ᠶ᠋ᠢᠨ ᠠᠶᠠ ᠶ᠋ᠢ ᠶᠠᠭᠠᠬᠢᠨ ᠳᠠᠭᠠᠭᠠᠬᠤ ᠪᠢᠯᠡ᠃ ᠵᠠ ᠪᠠᠰᠠ ᠬᠠᠵᠠᠭᠤ ᠪᠠᠷ ᠨᠢ ᠴᠠᠩᠭᠢᠨᠠᠭᠠᠳ ᠪᠠᠢᠭᠠ ᠨᠢ ᠶᠠᠭᠤ ᠪᠣᠢ? ᠴᠠᠩ ᠤᠤ᠂ ᠠᠯᠢ ᠬᠠᠷᠠᠩᠭᠠ ᠤᠤ? ᠦᠭᠡᠢ᠂ ᠪᠢᠰᠢ᠃ ᠠᠯᠢᠨ ᠴᠤ᠌ ᠪᠢᠰᠢ ᠬᠡᠷᠪᠡ ᠮᠥᠨ ᠰᠠᠨ ᠪᠣᠯ ᠡᠳᠦᠢ ᠳ᠋ᠦ᠍ ᠠᠯᠢ ᠬᠡᠳᠦᠢᠨᠡᠢ ᠴᠣᠭᠣ ᠦᠰᠦᠷᠦᠭᠡᠳ ᠳᠤᠤᠭᠠᠷᠬᠤ ᠶᠠᠭᠤᠮᠠ ᠦᠭᠡᠢ ᠪᠣᠯᠬᠤ ᠰᠢᠦ ᠳᠡ》 ᠭᠡᠵᠦ ᠪᠣᠳᠣᠨ ᠰᠠᠭᠤᠨᠠ᠃
ᠤᠷᠢᠳ ᠨᠢ ᠬᠥᠮᠦᠰ ᠭᠡᠨᠡᠳᠲᠡ《ᠭᠠᠯ! ᠭᠠᠯ》 ᠭᠡᠵᠦ ᠱᠤᠤᠭᠢᠯᠳᠤᠨ ᠪᠣᠰᠤᠨ ᠬᠠᠷᠠᠢᠪᠠ᠃ ᠨᠢᠭᠡ ᠬᠥᠮᠦᠨ ᠦ᠌ ᠬᠥᠪᠥᠩ ᠲᠡᠢ ᠥᠮᠥᠳᠥᠨ ᠳᠡᠭᠡᠷᠡ ᠬᠠᠵᠠᠭᠤ ᠶ᠋ᠢᠨ ᠬᠢᠨᠢ ᠬᠥᠮᠦᠨ ᠦ᠌ ᠶᠠᠩᠵᠤᠤᠷ ᠤ᠋ᠨ ᠭᠠᠯ ᠤᠨᠠᠨ ᠠᠪᠤᠯᠴᠠᠭᠰᠠᠨ ᠠᠵᠢ᠃ ᠣᠯᠠᠨ ᠤ᠋ ᠦᠢᠮᠡᠭᠡᠨ ᠳ᠋ᠦ᠍ ᠥᠨᠥᠬᠢ ᠭᠠᠯ ᠰᠠᠯᠬᠢ ᠠᠪᠤᠨ ᠳᠦᠷᠡᠯᠵᠡᠬᠦ ᠳ᠋ᠦ᠍ ᠲᠡᠷᠡ ᠬᠥᠮᠦᠨ ᠵᠦᠭ ᠪᠦᠷᠢ ᠤᠷᠤᠭᠤ ᠦᠰᠦᠷᠦᠨ ᠲᠣᠩᠭᠣᠴᠢᠵᠤ ᠪᠥᠭᠡᠮ ᠪᠤᠵᠢᠭᠢᠨᠠᠭᠠᠨ ᠳᠡᠭᠳᠡᠪᠡ᠃ ᠮᠠᠨᠠᠭᠠᠴᠢ ᠡᠨᠡ ᠳᠡᠯᠢᠮ ᠢ᠋ ᠠᠰᠢᠭᠯᠠᠨ ᠳ᠋ᠠᠨᠽᠠᠨ ᠢ᠋ ᠣᠷᠣᠭᠰᠢ ᠲᠥᠷᠥᠨ ᠰᠠᠭᠤᠯᠭᠠᠭᠠᠳ᠂ ᠥᠪᠡᠷ ᠢ᠋ᠶ᠋ᠡᠨ ᠮᠥᠷᠡᠨ ᠳᠡᠭᠡᠷᠡ ᠨᠢ ᠴᠡᠭᠡᠵᠢ ᠲᠠᠩᠨᠠᠨ ᠶᠠᠪᠠᠭᠠᠨ ᠰᠠᠭᠤᠵᠠᠢ᠃ ᠬᠦᠷᠡᠯ᠂ ᠳᠣᠷᠵᠢ ᠬᠣᠶᠠᠷ ᠠᠷᠤ ᠳ᠋ᠤᠨᠢ ᠬᠠᠶᠠᠭᠳᠠᠭᠠᠳ ᠳ᠋ᠠᠨᠽᠠᠨ ᠢ᠋ ᠡᠷᠢᠬᠦ ᠪᠣᠯᠪᠠ᠃ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠢ᠋ ᠠᠷᠤ ᠠ᠋ᠴᠠ ᠨᠢ ᠬᠠᠷᠠᠬᠤ ᠳ᠋ᠠᠭᠠᠨ ᠭᠠᠭᠴᠠᠭᠠᠷ ᠢ᠋ ᠨᠢ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠰᠠᠨ ᠪᠢᠯᠡ᠃
— ᠦᠭᠡᠢ ᠶᠡᠷᠦ᠂ ᠲᠦᠷᠦᠭᠦᠴᠢ ᠶ᠋ᠢᠨ ᠬᠡᠯᠡᠯᠴᠡᠭᠰᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠡᠮᠡᠭᠡ ᠤᠷᠤᠭᠤ ᠶᠠᠪᠤᠴᠢᠬᠠᠭᠰᠠᠨ ᠦᠭᠡᠢ ᠪᠠᠢᠭᠠ ᠳᠠ ᠭᠡᠵᠦ ᠬᠦᠷᠡᠯ ᠨᠣᠭᠣᠭᠠᠨ ᠨᠢᠳᠦ ᠪᠡᠨ ᠡᠷᠭᠢᠯᠳᠦᠭᠦᠯᠦᠭᠰᠡᠨ ᠢ᠋ᠶ᠋ᠡᠨ᠂ ᠶᠠᠭᠤ ᠴᠤ᠌ ᠠᠲᠤᠭᠠᠢ ᠪᠢ ᠲᠡᠭᠦᠪᠡᠷ ᠨᠢᠭᠡ ᠱᠦᠭᠦᠷᠳᠡᠭᠡᠳ ᠢᠷᠡᠶᠡ! ᠭᠡᠳ ᠳᠣᠷᠵᠢ ᠶ᠋ᠢ ᠣᠷᠬᠢᠨ ᠶᠠᠪᠤᠪᠠ᠃ ᠳᠣᠷᠵᠢ ᠶ᠋ᠢ ᠨᠥᠭᠦᠭᠡ ᠲᠠᠯᠠ ᠶ᠋ᠢ ᠨᠢ ᠪᠠᠷᠢᠨ ᠡᠷᠢᠭᠰᠡᠨ ᠪᠥᠭᠡᠳ ᠡᠴᠦᠰ ᠲᠦ᠋ᠨᠢ ᠬᠣᠶᠠᠭᠤᠯᠠ ᠪᠠᠨ ᠡᠰᠡ ᠣᠯᠤᠭᠰᠠᠨ ᠤᠴᠢᠷ《ᠦᠨᠡᠬᠡᠷ ᠤᠷᠭᠤᠨ ᠵᠢᠭᠤᠲᠠᠵᠠᠢ》 ᠭᠡᠵᠦ ᠬᠡᠯᠡᠯᠴᠡᠨ ᠬᠣᠢᠨᠠ ᠠ᠋ᠴᠠ ᠨᠢ ᠶᠠᠭᠠᠷᠠᠨ ᠶᠠᠪᠤᠬᠤ ᠪᠠᠷ ᠪᠣᠯᠪᠠ᠃ ᠲᠠᠪᠴᠠᠩ ᠳᠡᠭᠡᠷᠡ ᠡᠷᠢᠶᠡᠨ ᠮᠡᠷᠢᠶᠡᠨ ᠨᠢᠭᠤᠷ ᠲᠠᠢ ᠬᠥᠮᠦᠰ ᠪᠠᠷᠢᠭᠰᠠᠨ ᠵᠡᠪᠰᠡᠭ ᠢ᠋ᠶ᠋ᠡᠨ ᠰᠡᠩᠰᠡᠨ ᠳᠥᠭᠥᠬᠡᠷ ᠪᠣᠯᠲᠠᠯᠠ ᠡᠷᠭᠢᠯᠳᠦᠭᠦᠯᠵᠦ᠂ ᠵᠠᠷᠢᠮ ᠨᠢ ᠳᠡᠭᠡᠭᠰᠢ ᠦᠰᠦᠷᠦᠨ ᠭᠡᠷ ᠠᠭᠠᠷ ᠳᠤ ᠬᠡᠳᠦ ᠳᠠᠬᠢᠨ ᠲᠣᠩᠭᠣᠷᠠᠬᠤ ᠶ᠋ᠢ ᠳ᠋ᠠᠨᠽᠠᠨ ᠠᠯᠮᠠᠢᠷᠠᠨ ᠰᠢᠷᠲᠡᠨᠡ᠃ ᠬᠥᠮᠦᠨ ᠪᠣᠯᠤᠭᠰᠠᠭᠠᠷ ᠡᠢᠮᠦ ᠬᠠᠴᠢᠨ ᠶᠠᠭᠤᠮᠠ ᠦᠵᠡᠭᠡ ᠦᠭᠡᠢ ᠳ᠋ᠡᠭᠡᠨ ᠪᠦᠷ ᠪᠦᠬᠦ ᠭᠠᠢ ᠭᠠᠮᠰᠢᠭ ᠢ᠋ ᠮᠠᠷᠲᠠᠭᠰᠠᠨ ᠪᠠᠢᠪᠠ᠃ ᠦᠵᠡᠭᠴᠢ ᠣᠯᠠᠨ ᠤᠴᠢᠷ ᠨᠠᠴᠢᠷ ᠦᠭᠡᠢ ᠨᠢᠵᠢᠭᠢᠨᠡᠬᠦ ᠬᠠᠷᠠᠩᠭᠠ ᠪᠥᠮᠪᠥᠷ ᠦ᠋ᠨ ᠳᠠᠭᠤ ᠶ᠋ᠢ ᠦᠶᠡ ᠦᠶᠡ ᠳᠠᠷᠤᠭᠳᠠᠲᠠᠯᠠ ᠨᠢ《ᠬᠣᠣ ᠸᠠ》 ᠬᠠᠰᠬᠢᠷᠤᠯᠳᠤᠬᠤ ᠳ᠋ᠤ᠌ ᠳ᠋ᠠᠨᠽᠠᠨ ᠴᠤ᠌ ᠪᠣᠯᠲᠤᠭᠠᠢ ᠳᠠᠭᠠᠯᠳᠤᠨ ᠬᠠᠰᠬᠢᠷᠤᠨᠠ᠃ ᠡᠴᠦᠰ ᠲᠦ᠋ᠨᠢ ᠳ᠋ᠠᠨᠽᠠᠨ ᠤ᠋ ᠳᠣᠲᠣᠷᠠ ᠪᠠᠴᠢᠭᠤᠷᠠᠨ ᠪᠠᠢᠵᠤ ᠰᠠᠭᠤᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠮᠡᠳᠡᠭᠡᠳ᠂ ᠴᠡᠭᠡᠵᠢ ᠲᠡᠨᠢᠢᠯᠭᠡᠨ ᠠᠮᠢᠰᠬᠤᠯ ᠠᠪᠬᠤ ᠭᠡᠲᠡᠯᠡ ᠳᠡᠭᠡᠷᠡ ᠡᠴᠡ ᠨᠢ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠳᠠᠷᠤᠭᠰᠠᠭᠠᠷ ᠠᠵᠢ᠃
— ᠠᠢ ᠯᠤᠤ ᠶᠠᠩ ᠭᠠᠷ ᠢ᠋ᠶ᠋ᠠᠨ ᠠᠪᠤᠨᠠ ᠤᠤ? ᠭᠡᠬᠦ ᠳ᠋ᠦ᠍ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ᠄
— ᠬᠠᠢ ᠪᠢᠲᠡᠭᠡᠢ ᠳᠤᠤᠭᠠᠷ! ᠭᠡᠵᠦ ᠵᠠᠩᠳᠤᠷᠤᠨ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠳᠠᠯᠤ ᠮᠥᠷᠡᠨ ᠳᠡᠭᠡᠷᠡ ᠵᠥᠷᠢᠭᠦᠯᠦᠨ ᠤᠯᠠᠮ ᠢ᠋ᠶ᠋ᠠᠷ ᠳᠠᠷᠤᠨ ᠲᠡᠩᠨᠡᠪᠡ᠃ ᠡᠭᠦᠡᠴᠡ ᠬᠣᠢᠰᠢ ᠳ᠋ᠠᠨᠽᠠᠨ ᠲᠠᠪᠴᠠᠩ ᠳᠡᠭᠡᠷᠡ ᠠᠩᠬᠠᠷᠤᠯ ᠢ᠋ᠶ᠋ᠠᠨ ᠲᠠᠯᠪᠢᠵᠤ ᠴᠢᠳᠠᠬᠤ ᠶ᠋ᠢ ᠪᠣᠯᠢᠪᠠ᠃ ᠭᠡᠪᠡᠴᠦ ᠳ᠋ᠠᠨᠽᠠᠨ ᠬᠥᠭᠵᠢᠮ ᠦ᠋ᠨ ᠳᠠᠭᠤ ᠭᠡᠨᠡᠳᠲᠡ ᠲᠠᠰᠤᠷᠠᠨ ᠦᠵᠡᠭᠴᠢᠳ ᠦ᠋ᠨ《ᠬᠣᠣ ᠸᠠ》 ᠲᠩᠷᠢ ᠳ᠋ᠦ᠍ ᠬᠠᠲᠠᠬᠤ ᠶ᠋ᠢ ᠳᠠᠭᠠᠨ ᠳᠠᠭᠤᠷᠢᠶᠠᠬᠤ ᠪᠠᠨ ᠣᠷᠬᠢᠭᠠ ᠦᠭᠡᠢ ᠪᠢᠯᠡ᠃
ᠰᠢ ᠳᠠᠭᠤᠰᠤᠮᠠᠭᠴᠠ ᠪᠦᠬᠦ ᠦᠵᠡᠭᠴᠢᠳ ᠨᠢᠭᠡᠨ ᠵᠡᠷᠭᠡ ᠪᠣᠰᠴᠤ ᠪᠠᠬᠠᠳᠤᠨ ᠰᠠᠢᠰᠢᠶᠠᠬᠤ ᠦᠭᠡᠰ ᠢ᠋ ᠠᠮᠠ ᠠᠮᠠ ᠳ᠋ᠠᠭᠠᠨ ᠥᠭᠦᠯᠡᠬᠦ ᠠᠵᠢ᠃ ᠢᠩᠭᠢᠬᠦ ᠳ᠋ᠦ᠍ ᠭᠠᠢ ᠲᠠᠢ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠶᠠᠭᠤᠨ ᠳ᠋ᠤ᠌ ᠰᠠᠭᠤᠭᠰᠠᠭᠠᠷ ᠦᠯᠡᠳᠡᠬᠦ ᠪᠢᠯᠡ᠃ ᠣᠯᠠᠨ ᠤ᠋ ᠬᠠᠮᠲᠤ ᠪᠣᠰᠤᠨ ᠡᠷᠭᠢᠨ ᠬᠠᠷᠠᠭᠰᠠᠨ ᠢ᠋ᠶ᠋ᠠᠨ ᠨᠢᠳᠦ ᠪᠡᠨ ᠲᠣᠮᠣ ᠪᠣᠯᠭᠠᠨ᠄
— ᠠᠢ ᠨᠥᠭᠦᠭᠡ ᠬᠡᠳᠦ ᠴᠢᠨᠢ ᠬᠠᠮᠢᠭᠠ ᠪᠠᠢᠨᠠ? ᠭᠡᠵᠦ ᠳ᠋ᠠᠨᠽᠠᠨ ᠢ᠋ ᠰᠢᠷᠳᠡᠪᠡ᠃ ᠳ᠋ᠠᠨᠽᠠᠨ《ᠮᠡᠳᠡᠬᠦ ᠦᠭᠡᠢ》 ᠭᠡᠳ ᠡᠢᠰᠢ ᠲᠡᠢᠰᠢ ᠬᠠᠷᠠᠪᠠ᠃ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠰᠠᠨᠳᠤᠷᠤᠨ᠂ ᠬᠣᠶᠠᠷ ᠮᠣᠩᠭᠣᠯ᠂ ᠬᠣᠶᠠᠷ ᠮᠣᠩᠭᠣᠯ ᠬᠠᠮᠢᠭᠠ ᠪᠠᠢᠨᠠ᠂ ᠦᠵᠡᠪᠡᠦ ᠲᠠ ᠮᠢᠨᠢ᠂ ᠬᠣᠶᠠᠷ ᠮᠣᠩᠭᠣᠯ ᠬᠥᠮᠦᠨ ᠢ᠋! ᠭᠡᠵᠦ ᠨᠢᠳᠦ ᠪᠦᠯᠲᠡᠭᠡᠨᠡᠭᠦᠯᠦᠨ ᠬᠠᠰᠬᠢᠷᠪᠠ᠃ ᠲᠠᠷᠬᠠᠵᠤ ᠪᠠᠢᠭᠠ ᠬᠥᠮᠦᠰ ᠬᠠᠷᠢᠭᠤ ᠬᠡᠯᠡᠬᠦ ᠪᠠᠢᠲᠤᠭᠠᠢ ᠠᠩᠬᠠᠷᠬᠤ ᠴᠤ᠌ ᠦᠭᠡᠢ ᠠᠵᠢ᠃ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠦ᠌ ᠠᠮᠢᠰᠬᠤᠯ ᠳᠡᠭᠡᠷᠡ ᠬᠥᠬᠡᠷᠡᠨ᠄
— ᠠᠢ᠂ ᠴᠢ ᠮᠡᠳᠡᠬᠦ ᠶᠣᠰᠣᠲᠠᠢ! ᠭᠡᠳ ᠳ᠋ᠠᠨᠽᠠᠨ ᠢ᠋ ᠪᠠᠷᠢᠨ ᠠᠪᠤᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠳ᠋ᠠᠨᠽᠠᠨ᠄《ᠮᠡᠳᠡᠬᠦ ᠦᠭᠡᠢ》 ᠭᠡᠯᠡ᠃ ᠦᠨᠡᠬᠡᠷ ᠮᠡᠳᠡᠬᠦ ᠦᠭᠡᠢ ᠳ᠋ᠡᠭᠡᠨ ᠰᠡᠳᠬᠢᠯ ᠪᠠᠷᠳᠠᠮ ᠪᠠᠢᠯᠠ᠃ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠲᠠᠭ ᠮᠤᠬᠤᠷᠳᠠᠨ ᠭᠠᠭᠴᠠᠭᠠᠷ ᠢ᠋ ᠨᠢ ᠳᠠᠭᠤᠨ ᠶᠠᠪᠤᠪᠠ᠃ ᠮᠠᠢᠬᠠᠨ ᠤ᠋ ᠳᠡᠷᠭᠡᠳᠡ ᠢᠷᠡᠬᠦ ᠲᠡᠢ ᠵᠡᠷᠭᠡ ᠰᠸᠯᠸᠳᠢ ᠲᠡᠢ ᠨᠣᠶᠠᠨ ᠤᠭᠲᠤᠨ ᠠᠪᠴᠤ᠂ ᠨᠥᠭᠦᠭᠡ ᠬᠣᠶᠠᠷ ᠢ᠋ ᠶᠠᠭᠠᠬᠢᠭᠰᠠᠨ ᠪᠣᠢ?
— ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠠᠮᠠ ᠠ᠋ᠴᠠ ᠪᠠᠨ ᠠᠷᠠᠢᠬᠠᠨ ᠭᠠᠷᠭᠠᠵᠤ ᠬᠡᠯᠡᠪᠡ᠃ ᠡᠨᠡ ᠳᠠᠷᠤᠢ ᠫᠤᠤ ᠪᠠᠨ ᠪᠤᠯᠢᠶᠠᠯᠳᠤᠭᠠᠳ
— ᠶᠠᠭᠠᠬᠢᠭᠠᠳ ᠮᠡᠳᠡᠳᠡᠭ ᠦᠭᠡᠢ ᠶᠦᠮ ᠪᠣᠢ? ᠭᠡᠬᠦ ᠦᠭᠡ ᠲᠩᠷᠢ ᠳ᠋ᠦ᠍ ᠬᠠᠳᠠᠪᠠ᠃ ᠢᠩᠭᠢᠭᠡᠳ ᠮᠠᠨᠠᠭᠠᠨ ᠤ᠋ ᠬᠥᠮᠦᠨ ᠶᠣᠰᠣᠲᠠᠢ ᠨᠠᠷᠮᠠᠢᠲᠠᠯᠠ ᠪᠠᠨ ᠪᠠᠯᠪᠠᠭᠤᠯᠵᠤ ᠡᠬᠢᠯᠡᠯᠡ᠃ ᠤᠭ ᠡᠷᠡ ᠶ᠋ᠢᠨ ᠨᠠᠰᠤ ᠲᠤᠩ ᠵᠠᠯᠠᠭᠤ᠂ ᠪᠡᠶᠡ ᠪᠡᠷ ᠨᠠᠷᠢᠬᠠᠨ᠂ ᠨᠢᠭᠤᠷ ᠴᠢᠷᠠᠢ᠂ ᠭᠠᠷ ᠬᠤᠷᠤᠭᠤ ᠴᠥᠮ ᠪᠤᠯᠪᠠᠷᠠᠢ ᠪᠥᠭᠡᠳ ᠡᠭᠡᠭᠡ ᠯᠡ ᠬᠡᠦᠬᠡᠳ ᠦ᠋ᠨ ᠰᠢᠭ ᠰᠢᠩᠭᠡᠨ ᠬᠣᠭᠣᠯᠠᠢ ᠪᠠᠷ ᠵᠢᠩᠭᠢᠨᠡᠨ᠂ ᠬᠣᠶᠠᠷ ᠭᠠᠷ ᠢ᠋ᠶ᠋ᠠᠨ ᠡᠯᠢᠭᠡᠨ ᠳ᠋ᠡᠭᠡᠨ ᠲᠡᠪᠡᠷᠢᠭᠡᠳ《ᠥᠷᠦᠰᠢᠶᠡ! ᠥᠷᠥᠰᠢᠶᠡ!》 ᠭᠡᠵᠦ ᠮᠥᠷᠭᠥᠪᠡᠴᠦ᠂ ᠰᠸᠯᠸᠳᠢ ᠲᠡᠢ ᠨᠣᠶᠠᠨ ᠬᠠᠢᠷᠠ ᠨᠠᠢᠷ ᠦᠭᠡᠢ ᠴᠣᠬᠢᠨ᠂ ᠭᠠᠵᠠᠷ ᠤᠨᠠᠭᠠᠭᠠᠳ ᠳᠤᠤᠭᠠᠷᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠬᠣᠢᠨᠠ ᠨᠢ ᠰᠠᠶᠢ ᠪᠣᠯᠢᠨ ᠫᠤᠤ ᠶ᠋ᠢ ᠨᠢ ᠭᠠᠵᠠᠷ ᠬᠠᠶᠠᠪᠠ᠃ ᠡᠢᠮᠦ ᠶᠠᠭᠤᠮᠠ ᠶ᠋ᠢ ᠳ᠋ᠠᠨᠽᠠᠨ ᠵᠢᠷᠦᠬᠡ ᠠᠯᠲᠠᠨ ᠬᠠᠷᠠᠵᠤ ᠪᠠᠢᠬᠤ ᠳ᠋ᠠᠭᠠᠨ᠂ ᠳᠠᠷᠠᠭᠠ ᠨᠢ ᠥᠪᠡᠷ ᠳᠡᠭᠡᠷᠡ ᠪᠡᠨ ᠮᠥᠨ ᠲᠡᠭᠦᠨ ᠡᠴᠡ ᠳᠣᠣᠷᠠ ᠦᠭᠡᠢ ᠠᠶᠤᠯ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠪᠠᠢᠯᠠ᠃
— ᠨᠥᠬᠥᠳ ᠴᠢᠨᠢ ᠬᠠᠮᠢᠭᠠ ᠣᠴᠢᠭᠰᠠᠨ ᠪᠣᠢ? ᠭᠡᠬᠦ ᠳ᠋ᠦ᠍ᠨᠢ᠄
— ᠮᠡᠳᠡᠬᠦ ᠦᠭᠡᠢ ᠭᠡᠵᠦ ᠮᠥᠨ ᠯᠡ ᠠᠮᠠᠨ ᠠ᠋ᠴᠠ ᠪᠠᠨ ᠠᠷᠠᠢᠬᠠᠨ ᠭᠠᠷᠭᠠᠵᠤ ᠬᠡᠯᠡᠪᠡ᠃
— ᠶᠠᠭᠠᠬᠢᠭᠠᠳ ᠮᠡᠳᠡᠳᠡᠭ ᠦᠭᠡᠢ ᠪᠣᠢ? ᠭᠡᠳ ᠨᠣᠶᠠᠨ ᠰᠸᠯᠸᠳᠢ ᠫᠤᠤ ᠪᠠᠨ ᠬᠠᠮᠠᠷ ᠤ᠋ᠨ ᠬᠢᠨᠢ ᠦᠵᠦᠭᠦᠷ ᠲᠦ᠍ ᠲᠤᠯᠭᠠᠬᠤ ᠳ᠋ᠤ᠌ ᠳ᠋ᠠᠨᠽᠠᠨ᠂ ᠠᠯᠠᠪᠠᠯ ᠴᠤ᠌ ᠠᠯᠠᠭ ᠭᠡᠵᠦ ᠵᠣᠷᠢᠭᠯᠠᠨ᠄
— ᠮᠡᠳᠡᠬᠦ ᠦᠭᠡᠢ! ᠭᠡᠵᠦ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠬᠡᠯᠡᠨ ᠤᠷᠤᠭᠰᠢ ᠳᠠᠪᠰᠢᠪᠠ᠃ ᠨᠣᠶᠠᠨ ᠫᠤᠤᠳᠠᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠳᠠᠯᠤ ᠮᠥᠷᠦᠨ ᠡᠴᠡ ᠨᠢ ᠪᠠᠵᠠᠨ ᠠᠪᠴᠤ ᠮᠠᠢᠬᠠᠨ ᠤ᠋ ᠡᠮᠦᠨᠡ ᠢᠷᠡᠩᠭᠦᠲᠡ ᠪᠡᠨ ᠢᠰᠬᠦᠯᠪᠡ᠃ ᠳ᠋ᠠᠨᠽᠠᠨ ᠲᠡᠭᠦᠨ ᠦ᠌ ᠠᠭᠤᠷ ᠢ᠋ ᠳᠠᠷᠤᠭᠳᠠᠬᠤ ᠪᠣᠯ ᠤᠤ ᠭᠡᠰᠡᠨ ᠳ᠋ᠡᠭᠡᠨ ᠪᠡᠶᠡ ᠪᠡᠨ ᠰᠤᠯᠠ ᠲᠠᠯᠪᠢᠨ ᠮᠠᠢᠬᠠᠨ ᠤ᠋ ᠮᠤᠬᠤᠷ ᠤᠷᠤᠭᠤ ᠲᠣᠯᠣᠭᠠᠢ ᠪᠠᠷ ᠢ᠋ᠶ᠋ᠠᠨ ᠰᠢᠭᠠᠨ ᠤᠨᠠᠯᠠ᠃ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠬᠤ ᠳ᠋ᠤ᠌ ᠨᠣᠶᠠᠨ ᠣᠢᠷᠠ ᠬᠠᠪᠢ ᠶ᠋ᠢᠨ ᠪᠦᠬᠦ ᠬᠥᠮᠦᠰ ᠢ᠋ ᠴᠤᠭᠯᠠᠭᠤᠯᠤᠨ᠂ ᠠᠯᠠᠭᠠ ᠪᠣᠯᠤᠭᠰᠠᠨ ᠢ᠋ ᠣᠯᠬᠤ ᠲᠤᠰᠢᠶᠠᠯ ᠥᠭᠭᠦᠨ ᠲᠠᠯᠠ ᠲᠠᠯᠠ ᠲᠡᠢᠰᠢ ᠨᠢ ᠶᠠᠪᠤᠭᠤᠯᠬᠤ ᠰᠣᠨᠣᠰᠤᠭᠳᠠᠯᠠ᠃ ᠨᠢᠭᠡ ᠦᠶᠡ ᠳᠠᠭᠤ ᠴᠢᠮᠡᠭᠡ ᠲᠠᠭ ᠲᠠᠰᠤᠷᠠᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠠᠷᠪᠠᠭᠠᠳ ᠬᠥᠮᠦᠨ ᠦ᠌ ᠵᠢᠭᠰᠠᠨ ᠢᠷᠡᠬᠦ ᠰᠣᠨᠣᠰᠤᠭᠳᠠᠭᠠᠳ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠨ ᠠᠯᠠᠭᠠ ᠪᠣᠯᠪᠠ᠃ ᠳᠠᠷᠠᠭᠠ ᠨᠢ ᠮᠣᠷᠢᠨ ᠤ᠋ ᠲᠤᠭᠤᠷᠠᠢ ᠰᠣᠨᠣᠰᠤᠭᠳᠠᠭᠠᠳ ᠮᠥᠨ ᠶᠠᠪᠤᠴᠢᠬᠠᠪᠠ᠃ ᠡᠢᠨᠬᠦ ᠦᠶᠡ ᠦᠶᠡ ᠴᠢᠮᠡᠭᠡ ᠭᠠᠷᠤᠨ ᠲᠠᠰᠤᠷᠠᠭᠰᠠᠨ ᠤ᠋ ᠡᠴᠦᠰ ᠲᠦ᠍ ᠥᠪᠡᠷ ᠢ᠋ᠶ᠋ᠡᠨ ᠶᠠᠪᠤᠳᠠᠭ ᠭᠤᠷᠪᠠᠨ ᠳᠤᠭᠤᠢ ᠲᠠᠢ ᠲᠡᠷᠭᠡ ᠫᠢᠵᠢᠭᠢᠨᠡᠨ ᠢᠷᠡᠵᠦ ᠵᠣᠭᠰᠣᠭᠠᠳ᠂ ᠳᠠᠷᠠᠭᠠᠬᠠᠨ ᠲᠠᠢ ᠨᠢᠭᠡ ᠬᠥᠮᠦᠨ᠂ ᠥᠭᠡᠷᠡ ᠪᠤᠰᠤᠳ ᠢ᠋ ᠵᠠᠩᠳᠤᠷᠤᠨ ᠵᠠᠩᠨᠠᠬᠤ ᠪᠣᠯᠤᠭᠰᠠᠨ ᠲᠡᠳᠦᠢ ᠦᠭᠡᠢ᠂ ᠳᠡᠰ ᠨᠢᠰ ᠪᠠᠭᠤᠯᠭᠠᠨ ᠠᠯᠠᠭᠠᠳᠠᠬᠤ ᠪᠣᠯᠪᠠ᠃ ᠮᠠᠢᠬᠠᠨ ᠤ᠋ ᠬᠠᠶᠠᠭᠠ ᠪᠠᠷ ᠱᠠᠭᠠᠢᠨ ᠠᠵᠢᠬᠤ ᠳ᠋ᠤ᠌ ᠭᠤᠷᠪᠠᠨ ᠳᠤᠭᠤᠢ ᠲᠠᠢ ᠲᠡᠷᠭᠡᠨ ᠦ᠌ ᠳᠡᠷᠭᠡᠳᠡ ᠴᠠᠭᠠᠰᠢ ᠬᠠᠷᠠᠨ ᠵᠣᠭᠰᠣᠭᠰᠠᠨ ᠮᠤᠨᠳᠠᠭ ᠲᠣᠮᠣ ᠪᠡᠶᠡ ᠲᠡᠢ ᠨᠢᠭᠡ ᠨᠣᠶᠠᠨ ᠤ᠋ ᠡᠮᠦᠨᠡ ᠰᠸᠯᠸᠳᠢ ᠫᠤᠤ ᠲᠠᠢ ᠨᠣᠶᠠᠨ ᠱᠣᠩ ᠤ᠋ᠨ ᠮᠣᠳᠣ ᠰᠢᠭ᠋ ᠭᠣᠵᠣᠢᠨ ᠵᠣᠭᠰᠣᠵᠤ ᠪᠠᠢᠭᠠ ᠨᠢ ᠦᠵᠡᠭᠳᠡᠪᠡ᠃ ᠶᠡᠷᠦ ᠡᠨᠡ ᠣᠷᠣᠢ ᠶ᠋ᠢᠨ ᠪᠠᠢᠳᠠᠯ ᠲᠤᠩ ᠠᠶᠠᠭᠦᠢ᠃ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠲᠡᠢ ᠢᠷᠡᠳᠡᠭ ᠮᠠᠨᠲᠠᠤ᠂ ᠰᠢᠩᠭᠡᠨ ᠬᠠᠷᠠ ᠴᠠᠢ᠂ ᠶᠠᠩᠵᠤᠤᠷ ᠴᠥᠮ ᠦᠭᠡᠢ ᠪᠣᠯᠪᠠ᠃ ᠭᠣᠣᠯ ᠲᠥᠯᠥᠪ ᠣᠷᠣ ᠨᠢᠭᠡ ᠪᠣᠯᠤᠨ ᠭᠠᠳᠠᠭᠠ ᠪᠠᠢᠳᠠᠭ ᠮᠠᠨᠠᠭᠠᠴᠢ᠂ ᠮᠠᠢᠬᠠᠨ ᠤ᠋ ᠡᠭᠦᠳᠡᠨ ᠡᠴᠡ ᠰᠠᠯᠬᠤ ᠪᠠᠨ ᠪᠣᠯᠢᠨ᠂ ᠨᠢᠳᠦ ᠢᠷᠮᠡᠬᠦ ᠶ᠋ᠢᠨ ᠵᠠᠭᠤᠷᠠ ᠨᠢᠰᠦᠨ ᠣᠳᠬᠤ ᠵᠢᠭᠦᠷᠲᠡᠨ ᠢ᠋ ᠬᠠᠷᠢᠭᠤᠯᠵᠤ ᠪᠠᠢᠭᠠ ᠶᠤᠮ ᠰᠢᠭ᠋ ᠨᠢᠳᠦ ᠰᠠᠯᠬᠤ ᠦᠭᠡᠢ ᠰᠢᠷᠲᠡᠨᠡ᠃ ᠰᠥᠨᠢ ᠶ᠋ᠢᠨ ᠴᠠᠭ ᠢ᠋ᠶ᠋ᠠᠷ ᠬᠠᠷᠠᠩᠭᠤᠢ ᠰᠠᠭᠤᠬᠤ ᠥᠭᠡᠷᠡᠴᠢᠯᠡᠭᠳᠡᠨ ᠦᠳᠡᠰᠢ ᠪᠣᠯᠣᠮᠠᠭᠴᠠ ᠤᠷᠲᠤ ᠴᠠᠭᠠᠨ ᠯᠠ ᠮᠠᠢᠬᠠᠨ ᠤ᠋ ᠭᠣᠣᠯ ᠳ᠋ᠤ᠌ ᠠᠰᠠᠵᠤ ᠪᠠᠢᠬᠤ ᠪᠣᠯᠪᠠ᠃ ᠳ᠋ᠠᠨᠽᠠᠨ ᠲᠠᠮᠲᠤᠭ ᠪᠣᠯᠤᠭᠰᠠᠨ ᠨᠡᠬᠡᠢ ᠳᠡᠪᠡᠯ ᠢ᠋ᠶ᠋ᠡᠨ ᠨᠥᠮᠥᠷᠦᠨ ᠳᠣᠷᠵᠢ ᠶ᠋ᠢᠨ ᠳᠡᠪᠡᠯ ᠦ᠋ᠨ ᠲᠠᠰᠤᠷᠬᠠᠢ ᠪᠠᠷ ᠬᠥᠯ ᠢ᠋ᠶ᠋ᠡᠨ ᠬᠤᠴᠠᠨ ᠬᠡᠪᠲᠡᠪᠡ᠃《ᠨᠥᠬᠥᠳ ᠮᠢᠨᠢ ᠨᠠᠮᠠᠶ᠋ᠢ ᠶᠠᠭᠤᠨ ᠳ᠋ᠤ᠌ ᠬᠠᠶᠠᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠶᠤᠮ ᠪᠣᠯ?》 ᠭᠡᠬᠦ ᠡᠴᠡ ᠶᠠᠳᠠᠭᠤ ᠪᠣᠯᠬᠣᠷ ᠮᠢᠨᠢ᠂ ᠬᠥᠮᠦᠨ ᠭᠡᠵᠦ ᠪᠣᠳᠣᠭᠠ ᠦᠭᠡᠢ ᠪᠣᠢ ᠊ᠶᠠ ᠭᠡᠵᠦ ᠪᠣᠳᠣᠨ ᠭᠤᠨᠢᠨ ᠭᠤᠲᠤᠷᠠᠵᠤ ᠥᠰᠢᠨ ᠵᠠᠨᠤᠬᠤ ᠬᠣᠶᠠᠷ ᠰᠡᠳᠬᠢᠯ ᠳ᠋ᠦ᠍ ᠡᠷᠭᠢᠯᠳᠦᠨᠡ᠃ ᠭᠡᠪᠡᠴᠦ ᠳ᠋ᠠᠨᠽᠠᠨ ᠨᠥᠬᠥᠳ ᠢ᠋ᠶ᠋ᠡᠨ《ᠪᠢᠲᠡᠭᠡᠢ ᠪᠠᠷᠢᠭᠳᠠᠭᠠᠰᠠᠢ!》 ᠭᠡᠬᠦ ᠳ᠋ᠡᠭᠡᠨ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠠᠭᠴᠠ ᠮᠡᠳᠡᠬᠦ《ᠮᠡᠭᠵᠡᠮ》 ᠭᠡᠳᠡᠭ ᠳᠥᠷᠪᠡᠨ ᠱᠠᠳ ᠨᠣᠮ ᠢ᠋ ᠭᠤᠷᠪᠠᠨ ᠳᠣᠯᠣᠭᠠ ᠬᠣᠷᠢᠨ ᠨᠢᠭᠡ᠂ ᠬᠤᠷᠤᠭᠤ ᠳᠠᠷᠤᠨ ᠲᠣᠭᠠᠯᠠᠵᠤ ᠤᠩᠰᠢᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ᠄ ᠲᠡᠭᠷᠢ ᠡᠵᠢ