ᠮᠣᠩᠭᠣᠯ ᠦᠨᠳᠦᠰᠦᠲᠡᠨ ᠦ ᠰᠢᠯᠭᠠᠷᠠᠭᠰᠠᠨ ᠠᠷᠠᠳᠴᠢᠯᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠰᠢᠨᠡᠯᠠᠮᠠ - ᠭᠤᠷᠪᠠᠳᠤᠭᠠᠷ ᠪᠦᠯᠦᠭ᠂ᠰᠢᠨᠡᠯᠡᠮᠡ ᠶ᠋ᠢᠨ ᠵᠡᠪᠰᠡᠭᠲᠦ ᠲᠡᠮᠡᠴᠡᠯ 2(1) Шинэлам – 3-р бүлэг᠂ Шинэлмийн зэвсэгт тэмцэл 2(1)
201ᠬᠣᠶᠠᠷ᠂ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠳᠠᠢᠴᠢᠨ ᠲᠡᠮᠳᠡᠭᠯᠡᠯ
(ᠨᠢᠭᠡ) ᠦᠦᠰᠢᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠲᠡᠢ ᠪᠠᠢᠯᠳᠤᠭᠰᠠᠨ
1. ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠪᠦᠰᠡᠯᠡᠭᠰᠡᠨ ᠲᠠᠨᠲᠠᠷ
《ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ》ᠪᠣᠯ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠭᠣᠣᠯ ᠰᠠᠭᠤᠷᠢᠨ ᠭᠠᠵᠠᠷ ᠪᠣᠯᠬᠤ ᠶᠤᠮ᠃ ᠤᠴᠢᠷ ᠨᠢ ᠰᠢᠨᠠᠯᠠᠮᠠ ᠶ᠋ᠢᠨ ᠥᠪᠡᠷ ᠦ᠋ᠨ ᠭᠡᠷ ᠨᠤᠲᠤᠭ ᠨᠢ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠣᠢᠷᠠᠬᠠᠨ ᠪᠤᠵᠠᠢ ᠶ᠋ᠢᠨ ᠨᠠᠭᠤᠷ(ᠫᠤᠤᠴᠢ ᠶ᠋ᠢᠨ ᠨᠠᠭᠤᠷ) ᠤ᠋ᠨ ᠵᠡᠭᠦᠨ ᠪᠠᠯᠠᠷ ᠲᠤ᠌ ᠪᠠᠢᠳᠠᠭ᠃ ᠥᠯᠵᠡᠢᠵᠢᠷᠭᠠᠯ ᠰᠢᠨᠡᠯᠡᠮᠡ ᠪᠣᠯᠤᠭᠰᠠᠨ ᠤ᠋ ᠳᠠᠷᠠᠭᠠ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠰᠠᠭᠤᠬᠤ ᠪᠠᠢᠰᠢᠩ ᠪᠠᠷᠢᠵᠤ᠂ ᠵᠠᠷᠢᠮ ᠴᠠᠭ ᠦᠶᠡ ᠳ᠋ᠦ᠍ ᠢᠷᠡᠵᠦ ᠰᠠᠭᠤᠳᠠᠭ ᠪᠠᠢᠵᠠᠢ᠃ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠭᠣᠣᠯ ᠢᠳᠡᠪᠬᠢᠲᠡᠨ ᠲᠦᠷᠦᠭᠦᠴᠦᠳ ᠡᠨᠡ ᠭᠠᠵᠠᠷ ᠢ᠋ᠶ᠋ᠠᠷ ᠲᠥᠪᠯᠡᠷᠡᠭᠰᠡᠨ ᠢ᠋ᠶ᠋ᠡᠷ ᠪᠠᠷᠠᠬᠤ ᠦᠭᠡᠢ᠂ ᠦᠦᠰᠢᠨ ᠨᠣᠶᠠᠨ ᠤ᠋ ᠱᠠᠩ ᠣᠷᠳᠣᠨ ᠤ᠋ ᠰᠠᠭᠤᠭᠠ ᠭᠠᠵᠠᠷ ᠲᠠᠮᠠᠭᠠᠯᠠᠢ ᠴᠤ᠌ ᠡᠨᠳᠡ ᠡᠴᠡ ᠣᠢᠷᠠᠬᠠᠨ ᠲᠤᠯᠠ ᠬᠣᠯᠠ ᠣᠢᠷᠠ ᠶ᠋ᠢᠨ ᠵᠠᠰᠠᠭ ᠲᠥᠷᠥ ᠶ᠋ᠢᠨ ᠴᠢᠮᠡᠭᠡ ᠰᠣᠨᠣᠰᠬᠠᠯ ᠲᠦᠷᠭᠡᠨ ᠪᠠᠢᠳᠠᠭ᠃ ᠰᠢᠨᠠᠯᠠᠮᠠ ᠶ᠋ᠢᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠡᠰᠡᠷᠭᠦᠦ ᠬᠥᠮᠦᠨ ᠸᠠᠩᠴᠣᠭᠷᠠᠪᠳᠠᠨ ᠲᠠᠢᠵᠢ ᠶ᠋ᠢᠨ ᠭᠡᠷ ᠨᠤᠲᠤᠭ ᠴᠤ᠌ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠲᠤᠩ ᠣᠢᠷᠠᠬᠠᠨ ᠲᠤᠯᠠ ᠡᠨᠡ ᠨᠢ ᠬᠡᠨ ᠠᠯᠢᠨ ᠢ᠋ᠶ᠋ᠠᠨ ᠭᠡᠲᠡᠵᠦ ᠠᠵᠢᠭᠯᠠᠬᠤ ᠥᠷᠢᠰᠦᠯᠳᠦᠭᠡᠨ ᠲᠡᠮᠡᠴᠡᠭᠡᠨ ᠦ᠌ ᠬᠠᠷᠠᠯᠲᠠ ᠶ᠋ᠢᠨ ᠭᠠᠵᠠᠷ ᠪᠣᠯᠤᠭᠰᠠᠨ ᠪᠠᠢᠵᠠᠢ᠃
ᠡᠨᠡ ᠰᠦᠮᠡ ᠣᠷᠳᠣᠰ ᠲᠣᠭᠠᠯᠠᠯ ᠤ᠋ᠨ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠪᠣᠯᠤᠨ ᠠᠷᠪᠠᠨ ᠰᠠᠷᠠ ᠶ᠋ᠢᠨ ᠠᠷᠪᠠᠨ ᠲᠠᠪᠤᠨ ᠳ᠋ᠤ᠌ ᠴᠠᠮ ᠮᠣᠯᠣᠮ ᠲᠠᠢ ᠲᠤᠯᠠ ᠨᠤᠲᠤᠭ ᠣᠷᠣᠨ ᠤ᠋ ᠮᠣᠩᠭᠣᠯᠴᠤᠳ᠂ ᠥᠭᠯᠢᠭᠡ ᠶ᠋ᠢᠨ ᠡᠵᠡᠳ ᠬᠦᠷᠦᠯᠴᠡᠨ ᠢᠷᠡᠳᠡᠭ ᠪᠥᠭᠡᠳ ᠬᠣᠯᠠ ᠶ᠋ᠢᠨ ᠵᠣᠴᠢᠳ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠪᠠᠷᠠᠭᠠ ᠲᠠᠸᠠᠷ ᠡᠯᠪᠡᠭ ᠳᠡᠯᠪᠡᠭ ᠪᠠᠢᠳᠠᠭ ᠠ᠋ᠴᠠ ᠠᠷᠠᠯᠵᠢᠶᠠ ᠬᠤᠳᠠᠯᠳᠤᠭᠠ ᠡᠳ᠋ ᠪᠠᠷᠠᠭᠠ ᠮᠠᠯ ᠤᠨᠤᠭᠠ ᠶ᠋ᠢᠨ ᠰᠣᠯᠢᠯᠴᠠᠭᠠ᠂ ᠰᠦᠮᠡ ᠶ᠋ᠢᠨ ᠴᠠᠮ ᠵᠡᠷᠭᠡ ᠨᠢ ᠬᠥᠷ ᠬᠥᠭᠵᠢᠯ ᠲᠡᠢ ᠶᠠᠪᠤᠭᠳᠠᠵᠤ ᠰᠣᠨᠢᠨ ᠰᠠᠢᠬᠠᠨ ᠣᠯᠠᠨ ᠬᠥᠮᠦᠰ ᠦ᠋ᠨ ᠴᠤᠭᠯᠠᠭᠠᠨ ᠪᠣᠯᠳᠠᠭ ᠪᠠᠢᠵᠠᠢ᠃
1925 ᠣᠨ ᠤ᠋ ᠰᠢᠨᠠᠯᠠᠮᠠ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ ᠳ᠋ᠤ᠌ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠲᠥᠯᠥᠭᠡᠯᠡᠭᠴᠢᠳ ᠦ᠋ᠨ ᠬᠤᠷᠠᠯ ᠳ᠋ᠤ᠌ ᠣᠷᠣᠯᠴᠠᠵᠤ ᠬᠤᠷᠠᠯ ᠲᠡᠭᠦᠰᠦᠭᠰᠡᠨ ᠦ᠌ ᠳᠠᠷᠠᠭᠠ ᠪᠡᠭᠡᠵᠢᠩ ᠬᠣᠲᠠ ᠳ᠋ᠤ᠌ ᠣᠴᠢᠵᠤ ᠯᠢ ᠳᠡ ᠵᠣᠣ ᠨᠥᠬᠥᠷ ᠲᠡᠢ ᠠᠭᠤᠯᠵᠠᠵᠤ ᠪᠤᠴᠠᠵᠤ ᠢᠷᠡᠬᠦ ᠵᠠᠮ ᠳ᠋ᠠᠭᠠᠨ ᠴᠢᠭᠤᠯᠤᠯᠲᠤ ᠬᠠᠭᠠᠯᠭᠠ᠂ ᠪᠤᠭᠤᠲᠤ ᠬᠣᠲᠠ ᠪᠠᠷ ᠳᠠᠭᠠᠷᠢᠵᠤ ᠭᠡᠷ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ ᠢᠷᠡᠵᠡᠢ᠃
ᠭᠠᠳᠠᠭᠠᠳᠤ ᠤᠯᠤᠰ ᠲᠤ᠌ ᠵᠢᠯ ᠢᠯᠡᠭᠦᠦ ᠰᠤᠷᠤᠯᠴᠠᠵᠤ ᠰᠤᠳᠤᠯᠤᠭᠠᠳ ᠤᠯᠤᠰ ᠲᠠᠭᠠᠨ ᠪᠤᠴᠠᠵᠤ ᠢᠷᠡᠮᠡᠭᠴᠡ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠴᠢᠬᠤᠯᠠ ᠬᠤᠷᠠᠯᠳᠤᠭᠠᠨ ᠳ᠋ᠤ᠌ ᠣᠷᠣᠯᠴᠠᠵᠤ ᠳᠠᠬᠢᠨ ᠤᠮᠠᠷᠠᠲᠤ ᠣᠷᠣᠨ ᠤ᠋ ᠨᠠᠮ ᠤ᠋ᠨ ᠤᠳᠤᠷᠢᠳᠬᠤ ᠬᠥᠮᠦᠨ ᠯᠢ ᠳᠡ ᠵᠣᠣ ᠲᠠᠢ ᠤᠴᠠᠷᠠᠵᠤ ᠰᠢᠨᠡ ᠠᠵᠢᠯ ᠢ᠋ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠰᠢᠨᠡᠯᠡᠮᠡ ᠨᠤᠲᠤᠭ ᠤᠰᠤᠨ ᠳ᠋ᠠᠭᠠᠨ ᠶᠡᠬᠡ ᠦᠢᠯᠡᠰ ᠢ᠋ ᠪᠦᠲᠦᠭᠡᠶᠡ ᠭᠡᠰᠡᠨ ᠣᠷᠭᠢᠯᠤᠮᠠ ᠬᠠᠯᠠᠭᠤᠨ ᠰᠡᠳᠬᠢᠯ ᠲᠡᠢ ᠪᠠᠢᠭᠰᠠᠨ ᠲᠤᠯᠠ ᠰᠠᠯᠤᠭᠠᠳ ᠤᠳᠠᠭᠰᠠᠨ ᠥᠪᠡᠷ ᠦ᠋ᠨ ᠭᠡᠷ ᠲᠡᠭᠡᠨ ᠳᠥᠩᠭᠡᠵᠦ ᠢᠷᠡᠮᠡᠭᠴᠡ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ ᠪᠠᠷ ᠨᠢᠭᠡ ᠯᠡ ᠬᠣᠨᠣᠭᠠᠳ ᠦᠷᠭᠦᠯᠵᠢᠯᠡᠨ ᠪᠠᠷᠠᠭᠤᠨᠰᠢᠯᠠᠵᠤ ᠳᠤᠭᠤᠢᠯᠠᠩ ᠤ᠋ᠨ ᠵᠠᠷᠢᠮ ᠨᠥᠬᠥᠳ ᠦ᠋ᠨ ᠢ᠋ᠶ᠋ᠡᠨ ᠭᠡᠷ ᠢ᠋ᠶ᠋ᠡᠷ ᠳᠠᠭᠠᠷᠢᠵᠤ᠂ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠴᠠᠮ ᠳᠡᠭᠡᠷᠡ ᠣᠴᠢᠵᠠᠢ᠃ ᠰᠢᠨᠡᠯᠡᠮᠡ ᠨᠤᠲᠤᠭ ᠣᠷᠣᠨ ᠤ᠋ ᠪᠠᠨ ᠮᠠᠯᠴᠢᠳ ᠲᠠᠢ ᠵᠢᠯ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠵᠣᠯᠭᠠᠯᠲᠠ ᠶ᠋ᠢᠨ ᠮᠡᠨᠳᠦᠴᠢᠯᠡᠯ ᠢ᠋ ᠬᠦᠷᠭᠡᠵᠡᠭᠡᠵᠦ ᠪᠠᠢᠯᠠ᠃
ᠡᠨᠡ ᠡᠳᠦᠷ ᠦ᠋ᠨ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠴᠠᠮ ᠢ᠋ ᠲᠣᠬᠢᠶᠠᠯᠳᠤᠭᠤᠯᠤᠨ ᠰᠢᠨᠡᠯᠡᠮᠡ ᠮᠣᠩᠭᠣᠯ ᠤᠯᠤᠰ ᠠ᠋ᠴᠠ ᠠᠪᠴᠢᠷᠠᠭᠰᠠᠨ ᠰᠣᠨᠢᠨ ᠰᠡᠳᠬᠦᠯ᠂ ᠪᠢᠴᠢᠭ ᠮᠠᠲ᠋ᠧᠷᠢᠶᠠᠯ ᠢ᠋ᠶ᠋ᠠᠨ ᠣᠯᠠᠨ ᠲᠦᠮᠡᠨ ᠳ᠋ᠦ᠍ ᠤᠩᠰᠢᠨ ᠤᠬᠠᠭᠤᠯᠵᠤ ᠬᠣᠶᠠᠷ ᠮᠢᠩᠭᠠ ᠰᠢᠬᠠᠮ ᠬᠥᠮᠦᠨ ᠦ᠌ ᠶᠡᠬᠡ ᠬᠤᠷᠠᠯ ᠳ᠋ᠤ᠌ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠮᠥᠷ ᠦ᠋ᠨ ᠬᠥᠲᠥᠯᠪᠦᠷᠢ ᠶ᠋ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠪᠥᠭᠡᠳ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠨᠠᠮ ᠪᠠᠢᠭᠤᠯᠬᠤ᠂ ᠠᠷᠠᠳ ᠤ᠋ᠨ ᠵᠡᠪᠰᠡᠭᠲᠦ ᠬᠦᠴᠦᠨ ᠢ᠋ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠵᠡᠷᠭᠡ ᠪᠣᠳᠠᠲᠤ ᠤᠴᠢᠷ ᠢ᠋ ᠠᠩᠬᠠ ᠳᠤᠷᠠᠳᠤᠭᠰᠠᠨ ᠪᠠᠢᠨᠠ᠃ ᠭᠣᠣᠯ ᠳᠤᠭᠠᠩ ᠤ᠋ᠨ ᠡᠮᠦᠨᠡᠬᠢ ᠴᠠᠮ ᠤ᠋ᠨ ᠲᠠᠯᠠᠪᠠᠢ ᠳ᠋ᠤ᠌ ᠬᠤᠷᠠᠨ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠬᠥᠮᠦᠰ ᠬᠣᠭᠣᠷᠣᠨᠳᠣ ᠪᠠᠨ᠄《ᠰᠢᠨᠡᠯᠡᠮᠡ ᠬᠠᠰᠢ ᠯᠠ ᠣᠳᠣ ᠲᠠᠢ ᠲᠥᠷᠥᠭᠰᠡᠨ ᠡᠷᠡ ᠪᠠᠢᠨᠠ! ᠵᠢᠷᠭᠤᠭᠠᠨ ᠵᠢᠯ ᠦ᠋ᠨ ᠡᠮᠦᠨᠡ ᠴᠢᠭᠤᠯᠭᠠᠨ ᠤ᠋ ᠲᠦᠰᠢᠮᠡᠯ ᠲᠡᠭᠦᠨ ᠢ᠋ ᠡᠨᠡ ᠲᠠᠯᠠᠪᠠᠢ ᠳ᠋ᠤ᠌ ᠬᠠᠷᠠ ᠲᠠᠰᠢᠭᠤᠷ ᠢ᠋ᠶ᠋ᠠᠷ ᠵᠠᠨᠴᠢᠵᠤ ᠪᠠᠢᠭᠠᠳ ᠬᠤᠨᠳᠤᠴᠤᠭ ᠤ᠋ᠨ ᠮᠢᠬᠠ ᠶ᠋ᠢ ᠨᠢ ᠰᠢᠯᠪᠤᠷᠠᠭᠤᠯᠵᠤ ᠠᠷᠠᠭ ᠶᠠᠰᠤ ᠨᠢ ᠦᠵᠡᠭᠳᠡᠵᠦ ᠪᠠᠢᠭᠰᠠᠨ ᠰᠢᠦ! ᠭᠡᠲᠡᠯᠡ ᠣᠳᠣ ᠲᠡᠷᠡ ᠤᠯᠠᠭᠠᠨᠪᠠᠭᠠᠲᠤᠷ ᠲᠤ᠌ ᠬᠦᠷᠴᠦ ᠰᠤᠷᠤᠯᠴᠠᠭᠠᠳ ᠥᠨᠥᠳᠥᠷ ᠬᠣᠰᠢᠭᠤ ᠨᠤᠲᠤᠭ ᠲᠠᠭᠠᠨ ᠪᠤᠴᠠᠨ ᠢᠷᠡᠵᠦ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠪᠠᠢᠭᠤᠯᠤᠨᠠ ᠭᠡᠵᠦ ᠪᠠᠢᠬᠤ ᠴᠢᠨᠢ ᠦᠨᠡᠬᠡᠷ ᠠᠮᠠᠷ ᠦᠭᠡᠢ᠂ ᠮᠠᠯᠴᠢᠳ ᠪᠠᠰᠠ ᠫᠤᠤ ᠡᠭᠦᠷᠴᠦ ᠨᠤᠲᠤᠭ ᠪᠡᠯᠴᠢᠭᠡᠷ ᠢ᠋ᠶ᠋ᠡᠨ ᠬᠠᠮᠠᠭᠠᠯᠠᠬᠤ ᠶᠤᠮ ᠪᠠᠢᠨᠠ ᠳᠠ ····》 ᠭᠡᠵᠦ ᠶᠠᠷᠢᠯᠴᠠᠵᠠᠭᠠᠨᠠ᠃
ᠰᠢᠨᠡᠯᠡᠮᠡ ᠮᠠᠯᠴᠢᠳ ᠤ᠋ᠨ ᠶᠡᠬᠡ ᠬᠤᠷᠠᠯ ᠳᠡᠭᠡᠷᠡ᠄《 ᠁ ᠪᠢ ᠶᠡᠬᠡ ᠶᠠᠭᠠᠷᠠᠤ ᠰᠢᠦ! ᠨᠠᠷᠠ ᠪᠠᠷᠠᠭᠤᠨᠰᠢ ᠰᠢᠩᠭᠡᠬᠦ ᠡᠴᠡ ᠡᠮᠦᠨᠡ ᠪᠢ ᠶᠠᠪᠤᠨᠠ᠂ ᠤᠴᠢᠷ ᠨᠢ ᠪᠢ ᠡᠨᠡ ᠰᠥᠨᠢ ᠳ᠋ᠡᠭᠡᠨ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠪᠢᠩᠲᠦ ᠶ᠋ᠢᠨ ᠰᠢᠷᠠ ᠵᠣᠣ ᠳ᠋ᠤ᠌ ᠬᠦᠷᠴᠦ ᠮᠠᠷᠭᠠᠰᠢ ᠰᠥᠨᠢ ᠪᠤᠭᠤᠲᠤ ᠬᠣᠲᠠᠨ ᠳ᠋ᠤ᠌ ᠵᠠᠪᠠᠯ ᠬᠦᠷᠬᠦ ᠤᠴᠢᠷ ᠲᠠᠢ ᠁》 ᠭᠡᠵᠦ ᠬᠡᠯᠡᠭᠡᠳ ᠰᠦᠮᠡ ᠶ᠋ᠢᠨ ᠶᠡᠬᠡ ᠲᠠᠢᠰᠠ ᠠ᠋ᠴᠠ ᠪᠠᠭᠤᠵᠤ ᠰᠦᠮᠡ ᠳᠡᠭᠡᠷᠡ ᠪᠠᠢᠭᠠ ᠭᠡᠷ ᠲᠡᠭᠡᠨ ᠬᠠᠷᠢᠵᠠᠢ᠃ ᠲᠡᠷᠡ ᠬᠣᠭᠣᠯᠠ ᠢᠳᠡᠬᠦ ᠶ᠋ᠢᠨ ᠵᠠᠭᠤᠷᠠ ᠦᠰᠦᠨ ᠪᠢᠷ ᠢ᠋ᠶ᠋ᠡᠷ ᠬᠣᠨᠢᠨ ᠴᠠᠭᠠᠰᠤ (ᠮᠣᠣᠲᠤᠤ ᠴᠠᠭᠠᠰᠤ) ᠳᠡᠭᠡᠷᠡ᠄《ᠲᠠᠨᠲᠠᠷ ᠬᠦᠦ ᠲᠣᠯᠣᠭᠠᠢ ᠪᠠᠨ ᠬᠢᠴᠢᠶᠡ!》 ᠭᠡᠰᠡᠨ ᠬᠡᠳᠦᠨ ᠦᠰᠦᠭ ᠪᠢᠴᠢᠭᠡᠳ ᠬᠠᠨᠵᠤᠨ ᠤ᠋ ᠠᠪᠳᠠᠷᠠ ᠳᠡᠭᠡᠷᠡ ᠲᠠᠯᠪᠢᠵᠤ ᠬᠠᠶᠠᠴᠢᠬᠠᠭᠠᠳ ᠭᠡᠷ ᠲᠦ᠋ᠨᠢ ᠰᠠᠭᠤᠭᠠ ᠣᠯᠠᠨ ᠮᠥᠷᠭᠥᠯᠴᠢᠨ ᠵᠣᠴᠢᠳ ᠲᠤ᠌᠄《ᠬᠡᠷᠪᠡ ᠭᠡᠨᠡᠳᠲᠡ ᠲᠠᠨᠲᠠᠷ ᠨᠠᠮᠠᠶ᠋ᠢ ᠰᠤᠷᠬᠠᠯᠠᠬᠤ ᠪᠠᠷ ᠢᠷᠡᠪᠡᠯ ᠡᠭᠦᠨ ᠢ᠋ ᠭᠠᠷᠳᠠᠭᠤᠯᠴᠢᠬᠠ!》 ᠭᠡᠵᠦ ᠵᠠᠬᠢᠪᠠ᠃ ᠲᠡᠭᠡᠭᠡᠳ ᠨᠢᠮᠠᠷᠢᠨᠴᠢᠨ᠂ ᠵᠠᠮᠢᠶᠠᠨᠵᠠᠪ ᠲᠠᠢ ᠭᠤᠷᠪᠠᠭᠤᠯᠠ ᠮᠣᠷᠢ ᠪᠠᠨ ᠤᠨᠤᠨ ᠰᠦᠮᠡ ᠶ᠋ᠢᠨ ᠠᠷᠤ ᠳ᠋ᠠᠬᠢ ᠣᠪᠣᠭᠠᠨ ᠵᠡᠭᠦᠨ ᠵᠠᠮ ᠢ᠋ᠶ᠋ᠠᠷ ᠬᠣᠢᠰᠢ ᠶᠠᠪᠤᠵᠠᠭᠠᠯᠠ᠃
ᠦᠨᠡᠨ ᠳ᠋ᠡᠭᠡᠨ ᠰᠢᠨᠠᠯᠠᠮᠠ ᠶᠠᠪᠤᠭᠰᠠᠨ ᠦᠭᠡᠢ ᠪᠠᠢᠵᠠᠢ᠃ ᠲᠡᠷᠡ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠵᠤ ᠢᠷᠡᠭᠰᠡᠨ ᠡᠴᠡ ᠬᠣᠢᠰᠢ ᠡᠳᠦᠷ ᠰᠥᠨᠢ ᠦᠭᠡᠢ ᠲᠤᠢᠯ ᠤ᠋ᠨ ᠰᠣᠨᠣᠷ ᠰᠡᠷᠡᠮᠵᠢ ᠲᠡᠢ ᠪᠠᠢᠵᠤ᠂ ᠨᠣᠶᠠᠨ ᠤ᠋ ᠡᠲᠡᠭᠡᠳ ᠦ᠋ᠨ ᠬᠢᠨ ᠲᠡᠭᠦᠨ ᠢ᠋ ᠦᠷᠭᠦᠯᠵᠢ ᠭᠡᠲᠡᠵᠦ ᠭᠡᠨᠡᠳᠡᠭᠦᠯᠦᠨ ᠪᠠᠷᠢᠪᠴᠢᠯᠠᠬᠤ ᠭᠡᠰᠡᠨ ᠢ᠋ ᠲᠣᠪ ᠲᠣᠳᠣᠷᠬᠠᠢ ᠵᠢᠱ᠌ᠢᠵᠦ ᠪᠠᠢᠭᠰᠠᠨ ᠲᠤᠯᠠ ᠲᠤᠰ ᠡᠳᠦᠷ ᠦ᠋ᠨ ᠬᠤᠷᠠᠯ ᠤ᠋ᠨ ᠰᠡᠭᠦᠯ ᠳ᠋ᠦ᠍ ᠵᠣᠷᠢᠭᠤᠳᠠ᠄《···· ᠪᠢ ᠡᠨᠡ ᠰᠥᠨᠢ ᠳ᠋ᠡᠭᠡᠨ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠪᠢᠩᠲᠦ ᠶ᠋ᠢᠨ ᠰᠢᠷᠠ ᠵᠣᠣ ᠳ᠋ᠤ᠌ ᠬᠦᠷᠴᠦ ᠮᠠᠷᠭᠠᠰᠢ ᠰᠥᠨᠢ ᠪᠤᠭᠤᠲᠤ ᠬᠣᠲᠠ ᠳ᠋ᠤ᠌ ᠵᠠᠪᠠᠯ ᠬᠦᠷᠬᠦ ᠤᠴᠢᠷ ᠲᠠᠢ ···· 》 ᠭᠡᠵᠦ ᠦᠭᠡ ᠭᠠᠷᠭᠠᠭᠰᠠᠨ ᠪᠠᠢᠵᠠᠢ᠃ ᠳᠠᠷᠠᠭᠠ ᠪᠠᠷ ᠬᠠᠩᠭᠢᠨ ᠤ᠋ ᠪᠢᠩᠲᠦ ᠶ᠋ᠢᠨ ᠰᠢᠷᠠ ᠵᠣᠣ ᠪᠣᠯᠤᠨ ᠪᠤᠭᠤᠲᠤ ᠬᠣᠲᠠ ᠳ᠋ᠤ᠌ ᠣᠴᠢᠬᠤ ᠴᠢᠬᠤᠯᠠ ᠤᠴᠢᠷ ᠲᠠᠢ ᠪᠣᠯᠪᠠᠴᠤ ᠡᠨᠡ ᠰᠥᠨᠢ ᠮᠠᠷᠭᠠᠰᠢ ᠬᠦᠷᠬᠦ ᠪᠢᠰᠢ ᠪᠠᠢᠭᠰᠠᠨ ᠪᠠᠢᠯᠲᠠᠢ!
ᠰᠢᠨᠠᠯᠠᠮᠠ᠂ ᠨᠢᠮᠠᠷᠢᠨᠴᠢᠨ᠂ ᠵᠠᠮᠢᠶᠠᠨᠵᠠᠪ ᠲᠠᠢ ᠭᠤᠷᠪᠠᠭᠤᠯᠠ ᠭᠠᠯᠠᠭᠤᠲᠤ ᠶ᠋ᠢᠨ ᠬᠣᠢᠲᠤ ᠤᠯᠠᠭᠠᠨ ᠪᠤᠷᠭᠠᠰᠤ ᠪᠤᠲᠠ᠂ ᠴᠢᠴᠠᠷᠭᠠᠨᠠ ᠲᠠᠢ ᠢᠭᠴᠢ ᠰᠠᠬᠤᠯᠢᠭ ᠣᠢ ᠳ᠋ᠤ᠌ ᠮᠣᠷᠢ ᠪᠠᠨ ᠴᠢᠳᠥᠷᠯᠡᠵᠦ ᠤᠶᠠᠴᠢᠬᠠᠭᠠᠳ ᠦᠳᠡᠰᠢ ᠶ᠋ᠢᠨ ᠪᠦᠷᠦᠢ ᠪᠡᠷ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠵᠡᠭᠦᠨ ᠬᠣᠢᠲᠤ ᠥᠨᠴᠥᠭ ᠲᠦ᠍ ᠪᠠᠢᠭᠠ ᠨᠢᠭᠡᠨ ᠶᠠᠳᠠᠭᠤ ᠯᠠᠮᠠ ᠶ᠋ᠢᠨ ᠭᠡᠷ ᠲᠦ᠍ ᠪᠡᠶᠡ ᠳᠠᠯᠳᠠᠯᠠᠵᠤ᠂ ᠳᠤᠭᠤᠢᠯᠠᠩ ᠤ᠋ᠨ ᠢᠳᠡᠪᠬᠢᠲᠡᠳ ᠲᠡᠢ ᠪᠡᠨ ᠨᠠᠮ ᠤ᠋ᠨ ᠭᠡᠰᠢᠭᠦᠨ ᠡᠯᠰᠡᠬᠦ᠂ ᠨᠠᠮ ᠤ᠋ᠨ ᠡᠭᠦᠷ ᠪᠠᠢᠭᠤᠯᠬᠤ ᠠᠵᠢᠯ ᠢ᠋ᠶ᠋ᠠᠨ ᠶᠠᠷᠢᠯᠴᠠᠭᠰᠠᠨ ᠪᠠᠢᠨᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠳᠤᠭᠤᠢᠯᠠᠩ ᠤ᠋ᠨ ᠢᠳᠡᠪᠬᠢᠲᠡᠨ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠱᠠᠪᠷᠤᠩ ᠭᠡᠨᠳᠦᠨᠯᠢᠭ᠌ᠰᠣᠭ ᠭᠤᠴᠢᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠠᠯᠤᠰ ᠳᠠᠬᠢ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠬᠤᠷᠳᠤᠨ ᠵᠢᠷᠣᠭᠠ ᠮᠣᠷᠢ ᠪᠠᠷ ᠨᠢᠰᠬᠦ ᠮᠡᠲᠦ ᠳᠠᠪᠬᠢᠨ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠦᠷᠪᠡ᠃ ᠲᠡᠷᠡ ᠬᠡᠯᠡᠬᠦ ᠳ᠋ᠡᠭᠡᠨ᠄《ᠥᠨᠥᠳᠥᠷ ᠦ᠋ᠨ ᠦᠳᠡ ᠶ᠋ᠢᠨ ᠬᠣᠢᠨᠠ ᠨᠣᠶᠠᠨ ᠴᠡᠷᠢᠭ ᠦ᠋ᠨ ᠨᠡᠸᠠᠩᠨᠤᠷᠪᠦ ᠠᠷᠪᠠᠨ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠬᠣᠮᠣᠷᠴᠤ ᠨᠡᠩᠵᠢᠯᠲᠡ ᠬᠢᠬᠦ ᠳ᠋ᠦ᠍ ᠮᠢᠨᠦ ᠰᠣᠯᠪᠠᠩ(ᠳᠠᠭᠠᠯ ᠰᠤᠪᠢᠯᠠᠭᠴᠢ) ᠭᠡᠨᠳᠦᠨᠽᠠᠩᠪᠤ ᠰᠡᠷᠡᠵᠦ ᠮᠡᠳᠡᠭᠡᠳ ᠪᠤᠷᠤᠭᠤᠯᠠᠨ ᠭᠦᠶᠦᠵᠦ ᠮᠠᠨ ᠤ᠋ ᠮᠠᠯ ᠤ᠋ᠨ ᠣᠲᠣᠷ ᠳᠡᠭᠡᠷᠡ ᠢᠷᠡᠵᠦ(ᠰᠡᠷᠡᠩᠷᠤᠯᠮᠠ ᠶ᠋ᠢᠨ ᠭᠡᠷ ᠳᠡᠭᠡᠷᠡ) ᠨᠠᠮᠠ ᠳ᠋ᠤ᠌ ᠰᠦᠮᠡ ᠳᠡᠭᠡᠷᠡ ᠫᠤᠤ ᠲᠠᠢ ᠴᠡᠷᠢᠭ ᠦ᠋ᠳ ᠢᠷᠡᠭᠡᠳ ᠬᠠᠮᠤᠭ ᠤᠷᠢᠳ ᠢ᠋ᠶ᠋ᠠᠷ ᠰᠦᠮᠡ ᠶ᠋ᠢᠨ ᠱᠠᠩ ᠣᠷᠳᠣᠨ ᠵᠦᠭ ᠫᠤᠤ ᠪᠠᠷᠢᠵᠤ ᠬᠠᠰᠬᠢᠷᠤᠯᠳᠤᠨ ᠣᠷᠣᠵᠤ ᠪᠠᠢᠯᠠ ᠭᠡᠪᠡ᠃ ᠪᠢ ᠪᠠᠢᠳᠠᠯ ᠮᠠᠭᠤ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ ᠪᠠᠭᠠᠨᠠ ᠳᠡᠭᠡᠷᠡ ᠤᠶᠠᠭᠠᠲᠠᠢ ᠪᠠᠢᠭᠰᠠᠨ ᠮᠣᠷᠢ ᠪᠠᠨ ᠤᠨᠤᠭᠠᠳ ᠳᠠᠪᠬᠢᠵᠤ ᠢᠷᠡᠯᠡ》 ᠭᠡᠵᠦ ᠰᠢᠨᠠᠯᠠᠮᠠ ᠳ᠋ᠤ᠌ ᠮᠡᠳᠡᠭᠦᠯᠪᠡ᠃ ᠡᠨᠡ ᠦᠶᠡ ᠳ᠋ᠦ᠍ ᠨᠢᠭᠡᠨᠲᠡ ᠲᠩᠷᠢ ᠶ᠋ᠢᠨ ᠣᠳᠣᠨ ᠮᠡᠴᠢᠳ ᠭᠢᠯᠠᠯᠵᠠᠵᠤ ᠰᠥᠨᠢ ᠪᠣᠯᠴᠢᠬᠠᠭᠰᠠᠨ ᠪᠠᠢᠵᠠᠢ᠃
ᠨᠠᠸᠠᠩᠨᠤᠷᠪᠤ ᠵᠡᠷᠭᠡ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠪᠦᠰᠡᠯᠡᠵᠦ ᠭᠡᠨᠳᠦᠨᠯᠢᠭ᠌ᠰᠣᠭ ᠱᠠᠪᠷᠤᠩ ᠢ᠋ ᠪᠠᠷᠢᠬᠤ ᠭᠡᠳ ᠱᠠᠪᠷᠤᠩ ᠱᠠᠩ ᠣᠷᠳᠣᠨ ᠳ᠋ᠠᠭᠠᠨ ᠪᠠᠢᠭᠰᠠᠨ ᠦᠭᠡᠢ ᠲᠤᠯᠠ ᠮᠠᠯ ᠤ᠋ᠨ ᠣᠲᠣᠷ ᠵᠦᠭ ᠳᠠᠪᠬᠢᠨ ᠣᠴᠢᠬᠤ ᠳ᠋ᠤ᠌ ᠲᠡᠷᠡ ᠬᠡᠵᠢᠶᠡᠨᠡᠢ ᠬᠤᠷᠳᠤᠨ ᠮᠣᠷᠢ ᠪᠠᠷ ᠳᠤᠲᠠᠭᠠᠨ ᠶᠠᠪᠤᠴᠢᠬᠠᠵᠠᠢ᠃ ᠢᠩᠭᠢᠭᠡᠳ ᠨᠠᠸᠠᠩᠨᠤᠷᠪᠤ ᠨᠠᠷ ᠭᠠᠷ ᠬᠣᠭᠣᠰᠣᠨ ᠦᠦᠰᠢᠨ ᠨᠣᠶᠠᠨ ᠤ᠋ ᠱᠠᠩ — ᠲᠠᠮᠠᠭᠠᠯᠠᠢ ᠵᠦᠭ ᠵᠣᠷᠢᠭ ᠮᠠᠭᠤᠲᠠᠢ ᠪᠤᠴᠠᠪᠠ᠃ ᠲᠡᠳᠡᠨ ᠦ᠌ ᠭᠣᠣᠯ ᠬᠠᠷᠠᠯᠲᠠ ᠪᠣᠯᠤᠭᠰᠠᠨ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠭᠡᠨᠳᠦᠨᠯᠢᠭ᠌ᠰᠣᠭ ᠱᠠᠪᠷᠤᠩ᠂ ᠨᠠᠸᠠᠩᠨᠤᠷᠪᠤ ᠠ᠋ᠴᠠ ᠭᠤᠴᠢᠨ ᠺᠢᠯᠣᠮᠧᠲ᠋ᠷ ᠦ᠋ᠨ ᠠᠯᠤᠰ ᠳᠠᠬᠢ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠦᠷᠦᠭᠡᠳ ᠰᠢᠨᠠᠯᠠᠮᠠ ᠳ᠋ᠤ᠌ ᠪᠠᠢᠳᠠᠯ ᠢ᠋ᠶ᠋ᠠᠨ ᠮᠡᠳᠡᠭᠦᠯᠵᠦ ᠰᠥᠨᠢ ᠶ᠋ᠢᠨ ᠨᠢᠭᠤᠴᠠ ᠬᠤᠷᠠᠯ ᠳ᠋ᠤ᠌ ᠣᠷᠣᠯᠴᠠᠭᠠᠳ ᠵᠠᠪᠳᠤᠵᠠᠢ᠃
ᠦᠦᠰᠢᠨ ᠨᠣᠶᠠᠨ ᠤ᠋ ᠲᠠᠪᠢᠨ ᠴᠡᠷᠢᠭ ᠦ᠋ᠨ ᠲᠣᠮᠢ ᠲᠠᠨᠲᠠᠷ᠂ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠡᠬᠢ ᠭᠡᠨᠳᠦᠨᠯᠢᠭ᠌ᠰᠣᠭ ᠱᠠᠪᠷᠤᠩ ᠢ᠋ ᠪᠠᠷᠢᠭᠰᠠᠨ ᠡᠰᠡᠬᠦ ᠰᠤᠷᠠᠭ ᠴᠢᠮᠡᠭᠡ ᠶ᠋ᠢ ᠬᠦᠯᠢᠶᠡᠵᠦ ᠶᠠᠳᠠᠨ ᠰᠠᠨᠳᠤᠷᠤᠭᠰᠠᠭᠠᠷ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠠ᠋ᠴᠠ ᠬᠣᠢᠨᠠ ᠪᠠᠢᠭᠠ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠰᠥᠨᠢ ᠪᠡᠷ ᠭᠡᠨᠡᠳᠡᠭᠦᠯᠦᠨ ᠪᠦᠰᠡᠯᠡᠵᠦ ᠳᠤᠭᠤᠢᠯᠠᠩ ᠤ᠋ᠨ ᠢᠳᠡᠪᠬᠢᠲᠡᠨ ᠪᠣᠯᠬᠤ ᠲᠤᠰ ᠰᠦᠮᠡ ᠶ᠋ᠢᠨ ᠱᠠᠪᠢ ᠲᠦᠪᠳᠡᠨᠪᠠᠯᠪᠤᠷ ᠢ᠋ ᠪᠠᠷᠢᠪᠴᠢᠯᠠᠬᠤ ᠭᠡᠳ ᠲᠡᠷᠡ ᠰᠦᠮᠡ ᠳᠡᠭᠡᠷᠡ ᠪᠡᠨ ᠪᠠᠢᠭᠰᠠᠨ ᠦᠭᠡᠢ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠶᠠᠪᠤᠴᠢᠬᠠᠭᠰᠠᠨ ᠪᠠᠢᠵᠠᠢ᠃ ᠢᠩᠭᠢᠪᠡᠴᠦ ᠲᠣᠮᠢ ᠲᠠᠨᠲᠠᠷ ᠬᠣᠭᠣᠰᠣᠨ ᠪᠣᠯᠤᠭᠰᠠᠨ ᠳ᠋ᠠᠭᠠᠨ ᠵᠣᠷᠢᠭ ᠮᠣᠬᠣᠭᠰᠠᠨ ᠦᠭᠡᠢ ᠬᠠᠷᠢᠨ ᠶᠡᠬᠡ ᠶ᠋ᠢ ᠪᠠᠷᠢᠬᠤ ᠬᠣᠣᠷᠲᠤ ᠰᠠᠨᠠᠭᠠ ᠲᠥᠷᠥᠵᠦ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠪᠠᠷᠠᠭᠤᠨ ᠬᠣᠢᠨᠠ ᠪᠠᠢᠭᠠ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠰᠥᠨᠢ ᠪᠡᠷ ᠱᠦᠭᠦᠷᠳᠡᠯᠲᠡ ᠬᠢᠵᠦ ᠳᠤᠭᠤᠢᠯᠠᠩ ᠤ᠋ᠨ ᠤᠳᠤᠷᠢᠳᠤᠭᠴᠢ ᠰᠢᠨᠡᠯᠡᠮᠡ ᠶ᠋ᠢ ᠪᠠᠷᠢᠬᠤ ᠪᠠᠷ ᠦᠷᠭᠦᠯᠵᠢᠯᠡᠨ ᠴᠡᠷᠢᠭ ᠮᠣᠷᠳᠠᠯᠠ᠃
ᠰᠥᠨᠢ ᠶ᠋ᠢᠨ ᠬᠠᠭᠠᠰ ᠥᠩᠭᠡᠷᠡᠵᠦ ᠰᠢᠨᠡᠯᠡᠮᠡ᠂ ᠰᠣᠳᠨᠠᠮᠳᠤᠩᠷᠤᠪ᠂ ᠲᠦᠮᠡᠨᠵᠢᠷᠭᠠᠯ᠂ ᠨᠢᠮᠠᠷᠢᠨᠴᠢᠨ᠂ ᠵᠠᠮᠢᠶᠠᠨᠵᠠᠪ᠂ ᠭᠡᠨᠳᠦᠨᠯᠢᠭ᠌ᠰᠣᠭ᠂ ᠠᠷᠪᠢᠨᠪᠠᠶᠠᠷ ᠨᠠᠷ ᠬᠡᠨ ᠳ᠋ᠦ᠍ ᠴᠦ᠍ ᠦᠯᠦ ᠮᠡᠳᠡᠭᠳᠡᠬᠦ ᠯᠠᠮᠠ ᠶ᠋ᠢᠨ ᠪᠢᠴᠢᠬᠠᠨ ᠭᠡᠷ ᠲᠦ᠍ ᠡᠭᠦᠳᠡ ᠴᠣᠩᠬᠣ ᠶ᠋ᠢ ᠨᠢ ᠲᠠᠭᠯᠠᠴᠢᠬᠠᠭᠠᠳ ᠰᠡᠮᠡᠬᠡᠷ ᠬᠤᠷᠠᠯ ᠢ᠋ᠶ᠋ᠠᠨ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠪᠠᠢᠯᠠ᠃ ᠭᠡᠪᠡᠴᠦ ᠲᠡᠳᠡ ᠲᠤᠰ ᠰᠥᠨᠢ ᠰᠠᠨᠠᠮᠰᠠᠷ ᠦᠭᠡᠢ ᠶᠠᠪᠤᠳᠠᠯ ᠭᠠᠷᠴᠤ ᠮᠡᠳᠡᠨᠡ ᠭᠡᠵᠦ ᠵᠢᠱ᠌ᠢᠭᠰᠡᠨ ᠡᠴᠡ ᠰᠣᠨᠣᠷ ᠰᠡᠷᠡᠮᠵᠢ ᠲᠡᠢ ᠳᠠᠪᠬᠤᠷ ᠳᠠᠪᠬᠤᠷ ᠬᠠᠷᠠᠭᠤᠯ ᠮᠠᠨᠠᠭᠠ ᠲᠠᠢ ᠪᠠᠢᠭᠰᠠᠨ᠃ ᠰᠦᠮᠡ ᠶ᠋ᠢᠨ ᠯᠠᠮᠠ ᠨᠠᠷ ᠤ᠋ᠨ ᠭᠡᠷ ᠦ᠋ᠳ ᠲᠦ᠍ ᠴᠠᠮ ᠤ᠋ᠨ ᠮᠥᠷᠭᠥᠯᠴᠢᠨ ᠭᠡᠢᠴᠢᠳ ᠰᠥᠨᠢ ᠶ᠋ᠢᠨ ᠨᠣᠢᠷ ᠲᠠᠭᠠᠨ ᠨᠣᠢᠷᠰᠤᠵᠠᠭᠠᠨᠠ᠃ ᠭᠡᠨᠡᠳᠲᠡ ᠣᠯᠠᠨ ᠮᠣᠷᠢᠳ ᠤ᠋ᠨ ᠳᠠᠪᠬᠢᠬᠤ ᠲᠤᠭᠤᠷᠠᠢ ᠶ᠋ᠢᠨ ᠴᠢᠮᠡᠭᠡ ᠪᠣᠯᠤᠨ ᠡᠭᠦᠳᠡ ᠨᠡᠭᠡᠭᠡᠯᠭᠡᠬᠦ ᠳᠣᠭᠰᠢᠨ ᠳᠠᠭᠤᠨ ᠬᠠᠰᠬᠢᠷᠤᠯᠳᠤᠨᠠ᠃ ᠰᠡᠷᠡᠮᠵᠢ ᠲᠡᠢ ᠪᠠᠢᠭᠰᠠᠨ ᠰᠢᠨᠡᠯᠡᠮᠡ ᠨᠠᠷ ᠬᠣᠢᠰᠢᠳᠠ ᠠᠵᠢᠯ ᠢ᠋ᠶ᠋ᠠᠨ ᠬᠡᠳᠦᠨ ᠦᠭᠡ ᠪᠡᠷ ᠨᠠᠢᠳᠠᠴᠢᠬᠠᠭᠠᠳ ᠰᠦᠮᠡ ᠶ᠋ᠢᠨ ᠬᠣᠢᠲᠤᠬᠢ ᠶᠡᠬᠡ ᠪᠤᠷᠭᠠᠰᠤᠨ ᠳ᠋ᠤ᠌ ᠳᠤᠲᠠᠭᠠᠨ ᠣᠷᠣᠪᠠ᠃
ᠲᠣᠮᠢ ᠲᠠᠨᠲᠠᠷ ᠵᠡᠷᠭᠡ ᠠᠷᠪᠠᠭᠠᠳ ᠴᠡᠷᠢᠭ ᠰᠢᠨᠡᠯᠡᠮᠡ ᠶ᠋ᠢᠨ ᠭᠤᠷᠪᠠᠨ ᠲᠠᠰᠤᠯᠭᠠ ᠪᠠᠢᠰᠢᠩ ᠤ᠋ᠨ ᠴᠣᠩᠬᠣ ᠪᠠᠷ ᠫᠤᠤ ᠪᠠᠨ ᠰᠢᠷᠭᠤᠭᠤᠯᠵᠤ᠄《ᠰᠢᠨᠡᠯᠡᠮᠡ ᠭᠠᠷᠴᠤ ᠢᠷᠡ! ᠬᠤᠷᠳᠤᠨ ᠭᠠᠷᠴᠤ ᠢᠷᠡᠬᠦ ᠦᠭᠡᠢ ᠪᠣᠯ ᠫᠤᠤᠳᠠᠯᠠ!》 ᠭᠡᠮᠡᠨ ᠬᠡᠳᠦᠨᠲᠡ ᠬᠠᠰᠬᠢᠷᠤᠨ ᠳᠣᠩᠭᠣᠳᠤᠭᠰᠠᠨ ᠳ᠋ᠤ᠌᠂ ᠭᠡᠷ ᠳᠣᠲᠣᠷᠠᠬᠢ ᠮᠥᠷᠭᠥᠯᠴᠢᠳ ᠠᠶᠤᠵᠤ ᠰᠣᠴᠢᠬᠤ ᠳ᠋ᠠᠭᠠᠨ᠄《ᠰᠢᠨᠡ ᠮᠠᠮᠠ ᠦᠭᠡᠢ ᠴᠠᠮ ᠦᠵᠡᠬᠦ ᠪᠡᠷ ᠢᠷᠡᠭᠰᠡᠨ ᠮᠥᠷᠭᠥᠯᠴᠢᠨ ᠪᠠᠢᠨᠠ᠃ ᠰᠢᠨᠡ ᠮᠠᠮᠠ ᠦᠳᠡ ᠶ᠋ᠢᠨ ᠬᠣᠢᠨᠠ ᠶᠠᠪᠤᠴᠢᠬᠠᠭᠰᠠᠨ᠃ ᠰᠥᠨᠢ ᠳ᠋ᠡᠭᠡᠨ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠪᠢᠩᠲᠦ ᠶ᠋ᠢᠨ ᠰᠢᠷᠠ ᠵᠣᠣ ᠳ᠋ᠤ᠌ ᠬᠦᠷᠦᠨᠡ ᠭᠡᠵᠦ ᠬᠡᠯᠡᠵᠦ ᠪᠠᠢᠭᠰᠠᠨ ᠰᠢᠭ᠋᠁》 ᠭᠡᠵᠦ ᠦᠨᠡᠨ ᠢ᠋ᠶ᠋ᠡᠨ ᠬᠡᠯᠡᠵᠦ ᠲᠣᠰᠣᠨ ᠳ᠋ᠧᠩ ᠢ᠋ᠶ᠋ᠡᠨ ᠨᠣᠴᠣᠭᠠᠪᠠ᠃ ᠲᠠᠨᠲᠠᠷ ᠦᠰᠦᠷᠦᠨ ᠣᠷᠣᠵᠤ ᠳᠣᠲᠣᠷᠠᠬᠢ ᠬᠥᠮᠦᠰ ᠢ᠋ ᠨᠢᠭᠡᠳ ᠨᠢᠭᠡ ᠪᠡᠷ ᠪᠠᠢᠴᠠᠭᠠᠵᠤ ᠭᠡᠷ ᠳᠣᠲᠣᠷᠠᠬᠢ ᠠᠪᠳᠠᠷᠠ ᠱᠦᠭᠦᠢ ᠪᠦᠬᠦᠨ ᠢ᠋ ᠨᠡᠩᠵᠢᠭᠰᠡᠨ ᠪᠣᠯᠪᠠᠴᠤ ᠶᠠᠭᠤ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ᠃ ᠰᠢᠨᠡᠯᠡᠮᠡ ᠶ᠋ᠢ ᠪᠠᠷᠢᠪᠴᠢᠯᠠᠬᠤ ᠭᠡᠳ《ᠲᠠᠨᠲᠠᠷ ᠬᠦᠦ ᠲᠣᠯᠣᠭᠠᠢ ᠪᠠᠨ ᠬᠢᠴᠢᠶᠡ!》 ᠭᠡᠰᠡᠨ ᠨᠢᠭᠡᠨ ᠪᠢᠴᠢᠭᠡᠰᠦ ᠶ᠋ᠢ ᠣᠯᠵᠤ ᠠᠪᠤᠭᠠᠳ ᠠᠭᠤᠷᠯᠠᠬᠤ ᠶ᠋ᠢᠨ ᠶᠡᠬᠡ ᠪᠡᠷ ᠠᠭᠤᠷᠯᠠᠪᠠ᠃
ᠲᠣᠮᠢ ᠲᠠᠨᠲᠠᠷ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠲᠦᠪᠳᠡᠨᠪᠠᠯᠪᠤᠷ ᠢ᠋ ᠪᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠬᠣᠭᠣᠰᠣᠳᠠᠵᠤ᠂ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠰᠢᠨᠡᠯᠡᠮᠡ ᠶ᠋ᠢ ᠪᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠪᠠᠰᠠ ᠬᠣᠭᠣᠰᠣᠳᠠᠯᠠ᠃ ᠲᠡᠷᠡ ᠠᠭᠤᠷᠯᠠᠬᠤ ᠳ᠋ᠠᠭᠠᠨ᠄《ᠰᠢᠨᠡᠯᠡᠮᠡ ᠳ᠋ᠦ᠍ ᠮᠡᠳᠡᠭᠡ ᠬᠦᠷᠭᠡᠭᠰᠡᠨ ᠬᠥᠮᠦᠨ ᠢ᠋ ᠪᠠᠷᠢᠪᠴᠢᠯᠠᠨᠠ᠃ ᠭᠡᠨᠳᠦᠨᠯᠢᠭ᠌ᠰᠣᠭ ᠲᠤ᠌ ᠴᠢᠮᠡᠭᠡ ᠬᠦᠷᠭᠡᠭᠰᠡᠨ ᠬᠥᠮᠦᠨ ᠢ᠋ ᠪᠠᠷᠢᠪᠴᠢᠯᠠᠨᠠ᠂ ᠲᠦᠪᠳᠡᠨᠪᠠᠯᠪᠤᠷ ᠲᠤ᠌ ᠦᠭᠡ ᠬᠦᠷᠭᠡᠭᠰᠡᠨ ᠬᠥᠮᠦᠨ ᠢ᠋ ᠪᠠᠷᠢᠪᠴᠢᠯᠠᠨᠠ》 ᠭᠡᠵᠦ ᠣᠯᠠᠨ ᠲᠦᠮᠡᠨ ᠢ᠋ ᠰᠢᠬᠠᠮᠳᠠᠭᠤᠯᠪᠠ᠃
ᠲᠤᠰ ᠡᠳᠦᠷ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠴᠤᠭᠯᠠᠷᠠᠭᠰᠠᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠮᠦᠰ ᠣᠯᠠᠨ ᠪᠣᠯᠪᠠᠴᠤ ᠵᠥᠪᠬᠡᠨ ᠴᠠᠩᠮᠢᠩ(ᠤᠷᠳᠤᠨᠠᠰᠤᠨ)᠂ ᠭᠦᠴᠦᠨᠲᠡᠭᠦᠰ ᠬᠣᠶᠠᠷ ᠫᠤᠤ ᠲᠠᠢ ᠪᠠᠢᠵᠠᠢ᠃ ᠲᠡᠳᠡ ᠬᠣᠶᠠᠭᠤᠯᠠ ᠰᠦᠮᠡ ᠶ᠋ᠢᠨ ᠬᠣᠢᠨᠠᠬᠢ ᠲᠣᠭᠣᠰᠬᠠ ᠰᠢᠲᠠᠭᠠᠵᠤ ᠪᠠᠢᠭᠰᠠᠨ ᠸᠠ ᠶᠣᠣ ᠨᠦᠬᠡᠨ ᠳᠣᠲᠣᠷᠠ ᠪᠡᠶᠡ ᠳᠠᠯᠳᠠᠯᠠᠵᠤ ᠪᠠᠢᠭᠠᠳ ᠨᠣᠶᠠᠨ ᠤ᠋ ᠴᠡᠷᠢᠭ ᠦᠵᠡᠭᠳᠡᠪᠡᠯ ᠬᠠᠷᠪᠤᠬᠤ ᠪᠠᠷ ᠪᠡᠯᠡᠳᠬᠡᠵᠦ ᠪᠠᠢᠲᠠᠯᠠ ᠰᠣᠳᠨᠠᠮᠳᠤᠩᠷᠤᠪ ᠠ᠋ᠴᠠ᠄《ᠬᠠᠷᠪᠤᠵᠤ ᠪᠣᠯᠬᠤ ᠦᠭᠡᠢ᠂ ᠡᠨᠳᠡ ᠴᠤᠭᠯᠠᠷᠠᠭᠰᠠᠨ ᠮᠠᠯᠴᠢᠨ ᠲᠦᠮᠡᠨ ᠦ᠌ ᠠᠮᠢ ᠨᠠᠰᠤ ᠶ᠋ᠢ ᠪᠣᠳᠣᠯᠬᠢᠯᠠᠬᠤ ᠬᠡᠷᠡᠭᠲᠡᠢ》 ᠭᠡᠵᠦ ᠬᠣᠷᠢᠭᠯᠠᠪᠠ᠃ ᠶᠠᠭ ᠡᠨᠡ ᠦᠶᠡ ᠳ᠋ᠦ᠍ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠭᠡᠨᠳᠦᠨᠯᠢᠭ᠌ᠰᠣᠭ ᠱᠠᠪᠷᠤᠩ ᠢ᠋ ᠪᠠᠷᠢᠬᠤ ᠪᠠᠷ ᠶᠠᠪᠤᠭᠠᠳ ᠬᠣᠭᠣᠰᠣᠳᠠᠭᠰᠠᠨ ᠨᠠᠸᠠᠩᠨᠤᠷᠪᠤ ᠬᠦᠷᠴᠦ ᠢᠷᠡᠪᠡ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠨᠡᠮᠡᠭᠳᠡᠭᠡᠳ ᠲᠠᠪᠢ ᠭᠠᠷᠤᠢ ᠪᠣᠯᠵᠤ ᠳᠤᠭᠤᠢᠯᠠᠩ ᠤ᠋ᠨ ᠬᠥᠮᠦᠰ ᠠᠰᠢᠭ ᠦᠭᠡᠢ ᠪᠠᠢᠳᠠᠯ ᠳ᠋ᠤ᠌ ᠲᠤᠯᠭᠠᠷᠠᠬᠤ ᠳ᠋ᠤ᠌ ᠭᠦᠴᠦᠨᠲᠡᠭᠦᠰ᠂ ᠴᠠᠩᠮᠢᠩ ᠬᠣᠶᠠᠭᠤᠯᠠ ᠳᠠᠢᠰᠤᠨ ᠤ᠋ ᠳᠠᠪᠬᠤᠷ ᠳᠠᠪᠬᠤᠷ ᠪᠦᠰᠡᠯᠡᠯᠲᠡ ᠳᠤᠮᠳᠠᠭᠤᠷ ᠨᠢᠰᠬᠦ ᠮᠡᠲᠦ ᠳᠣᠪᠲᠣᠯᠤᠨ ᠲᠩᠷᠢ ᠥᠭᠡᠳᠡ ᠬᠠᠶᠠ ᠫᠤᠤᠳᠠᠵᠤ ᠳᠤᠲᠠᠭᠠᠪᠠ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠠᠷᠠᠯᠲᠠ ᠲᠡᠷᠡ ᠬᠣᠶᠠᠭᠤᠯᠠ ᠶ᠋ᠢᠨ ᠵᠦᠭ ᠰᠢᠯᠵᠢᠬᠦ ᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠳᠤᠭᠤᠢᠯᠠᠩ ᠤ᠋ᠨ ᠨᠡᠯᠢᠶᠡᠳ ᠬᠥᠮᠦᠰ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠳᠤᠲᠠᠭᠠᠨ ᠪᠤᠷᠭᠠᠰᠤᠨ ᠣᠢ ᠳ᠋ᠤ᠌ ᠣᠷᠣᠵᠤ ᠴᠢᠳᠠᠵᠠᠢ᠃
ᠢᠩᠭᠢᠭᠡᠳ ᠲᠠᠨᠲᠠᠷ ᠪᠠᠷᠰ ᠲᠤ᠌ ᠭᠠᠷᠭᠠᠬᠤ ᠠᠭᠤᠷ ᠢ᠋ᠶ᠋ᠠᠨ ᠪᠠᠮᠪᠠᠷ ᠲᠤ᠌ ᠭᠠᠷᠭᠠᠵᠤ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠪᠠᠢᠭᠰᠠᠨ ᠰᠣᠳᠨᠠᠮᠳᠣᠩᠷᠣᠪ᠂ ᠰᠠᠢᠰᠢᠩᠭᠠ᠂ ᠠᠷᠪᠢᠨᠪᠠᠶᠠᠷ᠂ ᠭᠦᠩᠭᠠ᠂ ᠷᠠᠳᠨᠠᠰᠠᠳᠢ ᠵᠡᠷᠭᠡ ᠨᠠᠢ᠍ᠮᠠᠨ ᠬᠥᠮᠦᠨ ᠢ᠋ ᠪᠠᠷᠢᠵᠤ ᠬᠣᠷᠢᠪᠠ᠃
ᠰᠢᠨᠠᠯᠠᠮᠠ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠬᠣᠢᠨᠠᠬᠢ ᠪᠤᠷᠭᠠᠰᠤ ᠴᠢᠴᠠᠷᠭᠠᠨᠠ ᠣᠢ ᠳᠣᠲᠣᠷᠠ ᠠ᠋ᠴᠠ ᠲᠤᠰ ᠡᠳᠦᠷ ᠦ᠋ᠨ ᠦᠨᠡᠨ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠵᠤ ᠮᠡᠳᠡᠭᠡᠳ ᠭᠡᠨᠳᠦᠨᠯᠢᠭ᠌ᠰᠣᠭ᠂ ᠨᠢᠮᠠᠷᠢᠨᠴᠢᠨ᠂ ᠵᠠᠮᠢᠶᠠᠨᠵᠠᠪ᠂ ᠲᠥᠪᠳᠡᠨᠪᠠᠯᠪᠤᠷ ᠢ᠋ ᠳᠠᠭᠠᠭᠤᠯᠤᠨ ᠦᠦᠰᠢᠨ ᠪᠠᠷᠠᠭᠤᠨ ᠬᠦᠩ ᠴᠣᠭᠲᠣᠸᠴᠢᠷ ᠤ᠋ᠨ ᠱᠠᠩ ᠣᠷᠳᠣᠨ ᠳ᠋ᠤ᠌ ᠬᠦᠷᠴᠦ ᠣᠴᠢᠪᠠ᠃ ᠰᠢᠨᠠᠯᠠᠮᠠ ᠪᠠᠷᠠᠭᠤᠨ ᠬᠦᠩ ᠨᠣᠶᠠᠨ ᠪᠣᠯᠤᠨ ᠵᠠᠬᠢᠷᠤᠭᠴᠢ ᠨᠠᠷ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠷᠢᠭᠳᠠᠭᠰᠠᠨ ᠨᠠᠢ᠍ᠮᠠᠨ ᠬᠥᠮᠦᠨ ᠢ᠋ ᠲᠠᠯᠪᠢᠭᠤᠯᠬᠤ ᠠᠷᠭᠠ ᠶ᠋ᠢ ᠲᠣᠭᠲᠠᠭᠠᠪᠠ᠃ ᠭᠤᠷᠪᠠᠳᠤᠭᠠᠷ ᠡᠳᠦᠷ ᠨᠢ ᠰᠢᠨᠠᠯᠠᠮᠠ ᠨᠥᠬᠥᠳ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠣᠲᠣᠭ ᠬᠤᠰᠢᠭᠤᠨ ᠤ᠋ ᠰᠦᠮᠡᠲᠦ ᠨᠤᠲᠤᠭ ᠤ᠋ᠨ ᠴᠣᠢᠮᠫᠧᠯ(ᠬᠣᠵᠢᠮ ᠨᠢ ᠯᠧᠨ ᠢ᠋ᠶ᠋ᠡᠨ ᠴᠣᠢᠮᠪᠠᠯ ᠭᠡᠬᠦ ᠪᠣᠯᠵᠠᠢ) ᠶ᠋ᠢᠨ ᠭᠡᠷ ᠢ᠋ᠶ᠋ᠡᠷ ᠳᠠᠭᠠᠷᠢᠵᠤ ᠦᠷᠭᠦᠯᠵᠢᠯᠡᠨ ᠵᠡᠭᠦᠨ ᠬᠣᠢᠰᠢ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠪᠢᠩᠲᠦ ᠶ᠋ᠢᠨ ᠰᠢᠷᠠ ᠵᠣᠣ ᠳ᠋ᠤ᠌ ᠬᠦᠷᠴᠦ᠂ ᠲᠡᠨᠳᠡ ᠡᠴᠡ ᠪᠤᠭᠤᠲᠤ ᠬᠣᠲᠠ ᠳ᠋ᠤ᠌ ᠬᠦᠷᠴᠡᠢ᠃
ᠴᠣᠭᠲᠣᠸᠴᠢᠷ ᠬᠦᠩ ᠨᠣᠶᠠᠨ ᠪᠣᠯᠤᠨ ᠨᠠᠰᠤᠨᠪᠠᠲᠤ ᠵᠠᠬᠢᠷᠤᠭᠴᠢ ᠨᠠᠷ ᠲᠡᠭᠦᠰᠠᠠᠮᠤᠭᠤᠯᠠᠩ ᠨᠣᠶᠠᠨ ᠳ᠋ᠤ᠌ ᠵᠠᠬᠢᠳᠠᠯ ᠪᠢᠴᠢᠵᠦ᠄《ᠬᠤᠰᠢᠭᠤᠨ ᠡᠵᠡᠨ ᠵᠠᠰᠠᠭ ᠨᠣᠶᠠᠨ ᠮᠢᠨᠢ᠂ ᠲᠠᠨᠲᠠᠷ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠱᠦᠭᠦᠷᠳᠡᠯᠲᠡ ᠬᠢᠵᠦ ᠬᠥᠮᠦᠨ ᠪᠠᠷᠢᠪᠴᠢᠯᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠡᠨᠡ ᠬᠡᠳᠦᠨ ᠡᠳᠦᠷ ᠬᠣᠰᠢᠭᠤ ᠳᠠᠶᠠᠭᠠᠷ ᠪᠠᠬᠠᠨ ᠦᠢᠮᠡᠯᠳᠦᠵᠦ ᠲᠣᠭᠲᠠᠭᠤᠨ ᠦᠭᠡᠢ ᠪᠠᠢᠨᠠ ᠰᠢᠦ! ᠲᠠᠨᠤᠰ ᠪᠠᠷᠢᠪᠴᠢᠯᠠᠶᠠ ᠭᠡᠰᠡᠨ ᠬᠥᠮᠦᠨ ᠢ᠋ᠶ᠋ᠡᠨ ᠪᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠶᠦᠮ ᠴᠢᠨᠢ᠂ ᠪᠠᠷᠢᠭᠰᠠᠨ ᠲᠡᠷᠡ ᠬᠡᠳᠦᠭᠦᠯᠡ ᠶ᠋ᠢ ᠲᠠᠯᠪᠢᠴᠢᠬᠠᠭᠰᠠᠨ ᠨᠢ ᠳᠡᠭᠡᠷᠡ ᠪᠢᠰᠢ ᠤᠤ! ᠣᠳᠣ ᠪᠠᠷᠠᠭᠤᠨ ᠨᠤᠲᠤᠭ ᠤ᠋ᠨ ᠬᠣᠶᠠᠷ ᠮᠢᠩᠭᠠ ᠰᠢᠬᠠᠮ ᠬᠥᠮᠦᠰ ᠴᠤᠭᠯᠠᠷᠠᠨ ᠮᠠᠨᠤᠰ ᠢ᠋ ᠴᠦ᠍ ᠬᠠᠰᠢᠭᠠᠳ ᠥᠨᠥ ᠲᠣᠭᠣᠷᠢᠮ ᠤ᠋ᠨ ᠰᠦᠮᠡ ᠳ᠋ᠦ᠍ ᠬᠦᠷᠴᠡᠢ᠃ ᠪᠣᠳᠣᠪᠠᠯ ᠮᠠᠷᠭᠠᠰᠢ ᠨᠣᠶᠠᠨ ᠱᠠᠩ ᠳ᠋ᠤ᠌ ᠬᠦᠷᠴᠦ ᠮᠡᠳᠡᠨᠡ᠃ ᠨᠣᠶᠠᠨ ᠲᠠ ᠰᠠᠨᠠᠭᠠᠨ ᠳ᠋ᠠᠭᠠᠨ ᠲᠠᠯᠪᠢᠵᠤ ᠰᠠᠷᠠᠭᠤᠯ ᠳ᠋ᠠᠭᠠᠨ ᠲᠤᠩᠭᠠᠬᠤ ᠪᠣᠯᠪᠠᠤ》 ᠭᠡᠵᠦ ᠪᠢᠴᠢᠭᠡᠳ ᠲᠤᠰᠬᠠᠢ ᠬᠥᠮᠦᠨ ᠢ᠋ᠶ᠋ᠡᠷ ᠬᠦᠷᠭᠡᠭᠦᠯᠪᠡ᠃ ᠲᠡᠭᠦᠰᠠᠠᠮᠤᠭᠤᠯᠠᠩ ᠨᠣᠶᠠᠨ ᠰᠢᠬᠠᠭᠳᠠᠬᠤ ᠳ᠋ᠠᠭᠠᠨ ᠠᠷᠭᠠ ᠪᠤᠰᠤ ᠪᠠᠷᠢᠪᠴᠢᠯᠠᠭᠰᠠᠨ ᠬᠥᠮᠦᠰ ᠢ᠋ ᠪᠦᠷ ᠲᠠᠯᠪᠢᠭᠰᠠᠨ ᠭᠡᠨᠡ᠃
ᠬᠣᠵᠢᠮ ᠨᠢ ᠭᠠᠯᠠᠭᠤᠲᠤ᠂ ᠬᠠᠯᠢᠭᠤᠲᠤ᠂ ᠮᠠᠩᠬᠠᠲᠤ ᠵᠡᠷᠭᠡ ᠭᠤᠷᠪᠠᠨ ᠰᠦᠮᠡ ᠳ᠋ᠦ᠍ ᠦᠦᠰᠢᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠰᠢᠨᠠᠯᠠᠮᠠ᠂ ᠭᠡᠨᠳᠦᠨᠯᠢᠭ᠌ᠰᠣᠭ ᠲᠥᠪᠳᠡᠨᠪᠠᠯᠪᠤᠷ ᠭᠤᠷᠪᠠ ᠶ᠋ᠢ ᠪᠠᠷᠢᠵᠤ ᠴᠢᠳᠠᠭᠰᠠᠨ ᠦᠭᠡᠢ ᠤᠴᠢᠷ ᠨᠢ ᠠᠷᠠᠳ ᠤ᠋ᠨ ᠠᠮᠠᠨ ᠵᠣᠬᠢᠶᠠᠯ ᠳ᠋ᠤ᠌ ᠢᠩᠭᠢᠵᠦ ᠤᠯᠠᠮᠵᠢᠯᠠᠭᠳᠠᠵᠠᠢ᠄
ᠰᠢ ᠰᠢ ᠬᠦᠨᠴᠦᠭ ① ᠨᠢ
ᠰᠢᠪ ᠭᠡᠭᠰᠡᠭᠡᠷ
ᠰᠢᠷᠡᠭᠡᠨ ᠯᠠᠮᠠ ᠨᠢ ᠥᠨᠳᠡᠰ ᠭᠡᠵᠦ
ᠬᠤᠷᠳᠤᠨ ᠮᠣᠷᠢ ᠨᠢ ᠬᠣᠰ ᠭᠡᠵᠦ
ᠬᠤᠷᠳᠤᠨ ᠫᠤᠤ ᠨᠢ ᠬᠣᠴᠣᠷᠴᠤ ᠭᠡᠨᠡ᠃
— — — —
① ᠰᠢ ᠰᠢ ᠭᠥᠨᠴᠥᠭ ᠭᠡᠭᠴᠢ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠮᠠᠯ ᠢ᠋ᠶ᠋ᠠᠷ ᠬᠠᠮᠤᠭ ᠠᠷᠪᠢᠨ ᠨᠢᠭᠡᠳᠦᠭᠡᠷ ᠶᠡᠬᠡ ᠪᠠᠶᠠᠨ ᠬᠥᠮᠦᠨ᠂ ᠥᠨᠥ ᠶ᠋ᠢᠨ ᠤᠯᠠᠭᠠᠨᠲᠣᠯᠣᠭᠠᠢ ᠰᠤᠮᠤᠨ ᠤ᠋ ᠪᠠᠶᠠᠨᠰᠢᠯᠢ ᠳ᠋ᠤ᠌ ᠨᠤᠲᠤᠭ ᠲᠠᠢ᠂ ᠦᠦᠰᠢᠨᠵᠣᠤ ᠰᠦᠮᠡ ᠶ᠋ᠢᠨ ᠭᠥᠨᠴᠦᠭᠫᠡᠷᠯᠠᠢ ᠭᠠᠪᠵᠤ ᠶ᠋ᠢ ᠬᠡᠯᠡᠵᠦ ᠪᠣᠢ᠃ ᠲᠡᠭᠦᠨ ᠦ᠌ ᠬᠣᠭᠣᠯᠠᠢ ᠰᠢᠩᠭᠡᠨ ᠳᠠᠭᠤ ᠲᠠᠢ ᠲᠤᠯᠠ ᠬᠥᠮᠦᠰ ᠰᠢ ᠰᠢ ᠭᠡᠵᠦ ᠠᠶᠠᠯᠭᠤ ᠪᠠᠷ ᠳᠠᠭᠤᠳᠠᠳᠠᠭ ᠪᠠᠢᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠰᠢᠨᠡᠯᠡᠮᠡ ᠭᠠᠯᠠᠭᠤᠲᠤ ᠳ᠋ᠤ᠌᠂ ᠲᠥᠪᠳᠡᠨᠪᠠᠯᠪᠤᠷ ᠮᠠᠩᠬᠠᠲᠤ ᠳ᠋ᠤ᠌᠂ ᠭᠡᠨᠳᠦᠨᠯᠢᠭ᠌ᠰᠤᠭ ᠬᠠᠯᠢᠭᠤᠲᠦ ᠳ᠋ᠦ᠍ ᠢᠷᠡᠭᠰᠡᠨ ᠰᠤᠷᠠᠭ ᠴᠢᠮᠡᠭᠡ ᠶ᠋ᠢ ᠰᠢ ᠰᠢ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠬᠠᠵᠠᠭᠠᠷ ᠳᠠ ᠯᠠᠮᠠ (ᠲᠥᠪᠳᠡᠨᠳᠠᠨᠽᠠᠨᠢᠮᠠ) ᠳ᠋ᠤ᠌ ᠬᠡᠯᠡᠵᠦ ᠥᠭᠭᠦᠭᠰᠡᠨ ᠪᠠᠢᠵᠠᠢ᠃ ᠡᠨᠡ ᠰᠢᠯᠦᠭ ᠨᠢ ᠨᠣᠶᠠᠨ ᠤ᠋ ᠴᠡᠷᠢᠭ ᠲᠡᠳᠡ ᠭᠤᠷᠪᠠᠭᠤᠯᠠ ᠶ᠋ᠢ ᠪᠠᠷᠢᠵᠤ ᠣᠯᠤᠭᠰᠠᠨ ᠦᠭᠡᠢ ᠪᠣᠳᠣᠯᠭᠠ ᠬᠣᠭᠣᠰᠣᠨ ᠨᠢᠳᠤᠷᠭᠠ ᠬᠣᠭᠣᠰᠣᠨ ᠬᠤᠷᠳᠤᠨ ᠮᠣᠷᠢᠨ ᠠ᠋ᠴᠠ ᠬᠣᠴᠣᠷᠤᠭᠰᠠᠨ ᠪᠠᠢᠳᠠᠯ ᠢ᠋ ᠢᠯᠡᠳᠬᠡᠭᠰᠡᠨ ᠪᠠᠢᠨᠠ᠃
2 . ᠰᠢᠨᠠᠯᠠᠮᠠ ᠶ᠋ᠢᠨ ᠤᠷᠠᠨ ᠠᠷᠭᠠ ᠳ᠋ᠤ᠌ ᠲᠠᠨᠲᠠᠷ ᠪᠡᠶᠡ ᠪᠡᠨ ᠬᠣᠣᠷᠯᠠᠯᠠ
ᠲᠠᠨᠲᠠᠷ ᠪᠣᠯ ᠤᠤᠯ ᠳ᠋ᠠᠭᠠᠨ ᠰᠢᠨᠠᠯᠠᠮᠠ ᠶ᠋ᠢᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠣᠷᠣᠯᠴᠠᠵᠤ《ᠳᠠᠯᠠᠨ ᠠᠨᠳᠠ》 ᠶ᠋ᠢᠨ ᠪᠦᠯᠦᠭ ᠲᠦ᠍ ᠪᠠᠢᠵᠠᠢ᠃ ᠰᠡᠭᠦᠯᠡᠷ ᠲᠡᠷᠡ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠡᠢᠮᠦ ᠪᠤᠶᠤ ᠲᠡᠢᠮᠦ ᠨᠤᠭᠤᠷᠠᠯ ᠪᠦᠳᠦᠷᠢᠯ ᠳ᠋ᠦ᠍ ᠲᠤᠯᠭᠠᠷᠠᠭᠰᠠᠨ ᠠ᠋ᠴᠠ ᠵᠣᠷᠢᠭ ᠮᠣᠬᠣᠷᠠᠭᠰᠠᠨ ᠶᠤᠮ ᠤᠤ ᠡᠰᠡᠬᠦᠯᠡ ᠦᠦᠰᠢᠨ ᠨᠣᠶᠠᠨ ᠤ᠋ ᠵᠡᠷᠭᠡ ᠮᠥᠩᠭᠥᠨ ᠳ᠋ᠦ᠍ ᠳᠤᠷᠠᠯᠠᠭᠰᠠᠨ ᠴᠤ᠌ ᠮᠠᠭᠠᠳ ᠭᠡᠨᠡᠳᠲᠡ ᠳᠤᠭᠤᠢᠯᠠᠩ ᠠ᠋ᠴᠠ ᠤᠷᠪᠠᠵᠤ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠲᠣᠮᠢ (ᠯᠢᠶᠠᠨᠵᠠᠩ ᠤ᠋ᠨ ᠵᠡᠷᠭᠡ ᠲᠤᠰᠢᠶᠠᠯ ᠲᠠᠢ ᠲᠡᠩᠴᠡᠨᠡ) ᠪᠣᠯᠪᠠ᠃
1927 ᠣᠨ ᠤ᠋ ᠴᠠᠭᠠᠨ ᠰᠠᠷᠠ ᠳ᠋ᠤ᠌ ᠲᠡᠷᠡ ᠬᠣᠶᠠᠷ ᠳᠠᠭᠠᠯ ᠴᠡᠷᠢᠭ ᠢ᠋ᠶ᠋ᠡᠨ ᠭᠡᠷ ᠲᠦ᠋ᠨᠢ ᠬᠠᠷᠢᠭᠤᠯᠵᠤ ᠥᠪᠡᠷ ᠢ᠋ᠶ᠋ᠡᠨ ᠭᠠᠯᠠᠭᠤᠲᠤ ᠶ᠋ᠢᠨ ᠤᠲᠤᠭᠠᠲᠤ ᠳ᠋ᠤ᠌ ᠬᠥᠳᠡᠭᠡ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠰᠢᠨᠠᠯᠠᠵᠠᠢ᠃
ᠰᠢᠨᠡᠯᠡᠮᠡ ᠬᠥᠬᠡᠲᠣᠯᠣᠭᠠᠢ ᠶ᠋ᠢᠨ ᠳᠠᠪᠤᠰᠤᠨ ᠨᠠᠭᠤᠷ ᠳᠡᠭᠡᠷᠡ ᠬᠡᠳᠦᠨ ᠴᠡᠷᠢᠭ ᠲᠡᠢ ᠰᠢᠨᠡᠯᠡᠯᠡ᠃ ᠲᠡᠷᠡ ᠲᠣᠮᠢ ᠲᠠᠨᠲᠠᠷ ᠭᠡᠷ ᠲᠡᠭᠡᠨ ᠢᠷᠡᠵᠦ ᠰᠢᠨᠡᠯᠡᠯᠡ ᠭᠡᠰᠡᠨ ᠴᠢᠮᠡᠭᠡ ᠶ᠋ᠢ ᠣᠯᠵᠤ ᠰᠣᠨᠣᠰᠤᠭᠠᠳ ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠤ᠋ᠨ ᠦᠳᠡᠰᠢ ᠳᠥᠷᠪᠡᠨ ᠴᠡᠷᠢᠭ ᠲᠡᠢ ᠬᠥᠬᠡᠲᠣᠯᠣᠭᠠᠢ ᠶ᠋ᠢᠨ ᠪᠠᠲᠤᠸᠴᠢᠷ ᠤ᠋ᠨ ᠭᠡᠷ ᠲᠦ᠍ ᠢᠷᠡᠵᠦ ᠳᠠᠬᠢᠨ ᠬᠣᠷᠢᠭᠠᠳ ᠭᠠᠵᠠᠷ ᠤ᠋ᠨ ᠠᠯᠤᠰ ᠳᠠᠬᠢ ᠬᠡᠷᠢᠶᠡ ᠷᠠᠭᠪᠠ ᠶ᠋ᠢᠨ ᠳ᠋ᠦ᠍ ᠢᠷᠡᠵᠦ ᠬᠣᠨᠣᠭᠯᠠᠵᠠᠢ᠃ ᠷᠠᠭᠪᠠ ᠪᠣᠯ ᠳᠤᠭᠤᠢᠯᠠᠩ ᠤ᠋ᠨ ᠢᠳᠡᠪᠬᠢᠲᠡᠨ ᠪᠥᠭᠡᠳ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠬᠤᠷᠴᠠ ᠱᠠᠯᠠᠮᠠᠭᠠᠢ ᠪᠠᠭᠠᠲᠤᠷ ᠡᠷᠡ ᠪᠣᠯᠬᠤ ᠶᠤᠮ᠃
ᠰᠢᠨᠠᠯᠠᠮᠠ᠂ ᠷᠠᠭᠪᠠ ᠠ᠋ᠴᠠ ᠲᠠᠨᠲᠠᠷ ᠰᠢᠨᠡ ᠶ᠋ᠢᠨ ᠳᠥᠷᠪᠡᠨ ᠳ᠋ᠦ᠍ ᠦᠦᠰᠢᠨ ᠨᠣᠶᠠᠨ ᠳ᠋ᠠᠭᠠᠨ ᠲᠣᠯᠣᠭᠠᠢ ᠮᠥᠷᠭᠥᠵᠦ ᠰᠢᠨᠡ ᠶ᠋ᠢᠨ ᠳᠡᠭᠡᠵᠢ ᠪᠠᠷᠢᠬᠤ ᠪᠠᠷ ᠶᠠᠪᠤᠬᠤ ᠭᠡᠰᠡᠨ ᠢ᠋ ᠰᠣᠨᠣᠰᠴᠠᠢ᠃ ᠢᠩᠭᠢᠭᠡᠳ ᠰᠢᠨᠡᠯᠡᠮᠡ᠄《ᠪᠢ ᠤᠷᠢᠳ ᠢ᠋ᠶ᠋ᠠᠷ ᠲᠣᠮᠢ ᠲᠠᠨᠲᠠᠷ ᠲᠤ᠌ ᠰᠢᠨᠡ ᠶ᠋ᠢᠨ ᠳᠡᠭᠡᠵᠢ ᠬᠦᠷᠭᠡᠬᠦ ᠰᠠᠨᠠᠭᠠ ᠲᠠᠢ ᠪᠠᠢᠨᠠ᠃ ᠲᠡᠷᠡ ᠳᠥᠷᠪᠡᠨ ᠳ᠋ᠦ᠍ ᠶᠠᠪᠤᠬᠤ ᠶᠤᠮ ᠪᠣᠯ ᠪᠢᠳᠡ ᠮᠠᠷᠭᠠᠰᠢ ᠭᠡᠷ ᠲᠦ᠋ᠨᠢ ᠣᠴᠢᠶᠠ》 ᠭᠡᠪᠡ᠃
ᠲᠡᠳᠡ ᠮᠠᠷᠭᠠᠰᠢ ᠨᠢ ᠠᠷᠪᠠ ᠭᠠᠷᠤᠢ ᠭᠠᠵᠠᠷ ᠤ᠋ᠨ ᠠᠯᠤᠰ ᠳᠠᠬᠢ ᠣᠲᠣᠭᠠᠲᠤ ᠶ᠋ᠢᠨ ᠴᠠᠢᠳᠠᠮ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠭᠠ ᠲᠣᠮᠢ ᠲᠠᠨᠲᠠᠷ ᠤ᠋ᠨ ᠭᠡᠷ ᠢ᠋ ᠴᠢᠭᠯᠡᠨ ᠮᠣᠷᠳᠠᠵᠤ᠂ ᠬᠥᠮᠦᠰ ᠲᠦ᠍ ᠰᠡᠷᠡᠭᠳᠡᠬᠦ ᠦᠭᠡᠢ ᠶ᠋ᠢᠨ ᠲᠤᠰᠠᠳᠠ ᠪᠤᠷᠭᠠᠰᠤ ᠴᠢᠴᠠᠷᠭᠠᠨᠠ ᠲᠠᠢ ᠱᠠᠭᠠᠵᠠᠭᠠᠢᠲᠤ ᠶ᠋ᠢᠨ ᠣᠢ ᠳᠤᠮᠳᠠᠭᠤᠷ ᠤᠮᠠᠷᠠᠰᠢ ᠶᠠᠪᠤᠵᠠᠢ᠃
ᠲᠡᠳᠡ ᠳᠡᠮᠡᠢ ᠤᠳᠠᠭᠰᠠᠨ ᠦᠭᠡᠢ ᠭᠡᠷ ᠦ᠋ᠨ ᠬᠢᠨᠢ ᠣᠢᠷᠠᠯᠴᠠᠭᠠ ᠬᠦᠷᠴᠦ ᠲᠡᠳᠡᠨ ᠦ᠌ ᠭᠠᠳᠠᠨᠠᠬᠢ ᠣᠷᠴᠢᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠤ ᠲᠠᠨᠲᠠᠷ ᠤ᠋ᠨ ᠭᠡᠷ ᠢ᠋ ᠰᠡᠮᠡᠬᠡᠷ ᠪᠦᠰᠡᠯᠡᠨ ᠠᠪᠤᠯᠠ᠃ ᠲᠤᠰ ᠡᠷᠦᠬᠡ ᠶ᠋ᠢᠨ ᠠᠢᠯᠴᠢᠨ ᠵᠣᠴᠢᠳ ᠪᠠᠰᠠ ᠬᠡᠳᠦ ᠪᠠᠢᠬᠤ ᠮᠠᠶᠢᠭ ᠲᠠᠢ᠂ ᠰᠢᠨᠡᠯᠡᠮᠡ ᠲᠣᠮᠢ ᠲᠠᠨᠲᠠᠷ ᠤ᠋ᠨ ᠭᠡᠷ ᠦ᠋ᠨ ᠪᠠᠷᠠᠭᠤᠨ ᠬᠣᠢᠲᠠᠢ ᠣᠢᠷᠠᠬᠠᠨ ᠰᠠᠭᠤᠵᠤ ᠪᠠᠢᠭᠠ ᠯᠢᠦ ᠮᠢᠩ ᠴᠣᠯᠠ ᠲᠠᠢ ᠲᠣᠭᠲᠠᠬᠤ ᠶ᠋ᠢᠨ ᠳ᠋ᠦ᠍ ᠬᠦᠷᠴᠦ ᠲᠡᠭᠦᠨ ᠢ᠋ ᠲᠣᠮᠢ ᠲᠠᠨᠲᠠᠷ ᠲᠤ᠌ ᠦᠭᠡ ᠬᠦᠷᠭᠡᠭᠦᠯᠬᠦ ᠪᠡᠷ ᠶᠠᠪᠤᠭᠤᠯᠵᠠᠢ᠃ ᠰᠢᠨᠡᠯᠡᠮᠡ ᠨᠠᠷ ᠲᠠᠨᠲᠠᠷ ᠤ᠋ᠨ ᠭᠡᠷ ᠦ᠋ᠨ ᠡᠮᠦᠨᠡᠬᠢ ᠪᠤᠷᠭᠠᠰᠤ ᠲᠠᠢ ᠥᠨᠳᠥᠷ ᠰᠡᠷᠪᠡᠩ ᠦ᠋ᠨ ᠣᠷᠣᠢ(ᠲᠡᠳᠡᠨ ᠦ᠌ ᠭᠡᠷ ᠡᠴᠡ ᠬᠡᠳᠦᠨ ᠵᠠᠭᠤᠬᠠᠨ ᠮᠧᠲ᠋ᠷ ᠵᠠᠢᠲᠠᠢ) ᠳᠡᠭᠡᠷᠡ ᠭᠠᠷᠤᠭᠠᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠵᠤ ᠭᠡᠷ ᠦ᠋ᠨ ᠭᠠᠳᠠᠨᠠ ᠳᠣᠲᠣᠨᠠᠬᠢ ᠬᠥᠳᠡᠯᠦᠯ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠵᠠᠭᠠᠨᠠ᠃ ᠯᠢᠦ ᠮᠢᠩ ᠲᠣᠭᠲᠠᠬᠤ ᠪᠣᠯ ᠶᠡᠷᠦ ᠡᠴᠡ ᠶᠠᠭᠤᠨ ᠠ᠋ᠴᠠ ᠴᠤ᠌ ᠠᠶᠤᠳᠠᠭ ᠦᠭᠡᠢ ᠬᠥᠮᠦᠨ ᠪᠥᠭᠡᠳ ᠫᠢᠯᠠ ᠲᠠᠢ ᠴᠠᠷᠠ ᠲᠠᠢ ᠨᠢ ᠬᠡᠯᠡᠴᠢᠬᠡᠳᠡᠭ ᠠᠪᠤᠭᠠᠢ ᠪᠠᠢᠵᠠᠢ᠃ ᠲᠡᠷᠡ ᠲᠠᠨᠲᠠᠷ ᠤ᠋ᠨ ᠭᠡᠷ ᠲᠦ᠍ ᠣᠷᠣᠭᠠᠳ ᠶᠠᠭᠠᠷᠠᠤ ᠰᠠᠨᠳᠤᠷᠤᠤ ᠠᠮᠢᠰᠬᠤᠭᠠ ᠠᠯᠲᠠᠨ ᠬᠡᠯᠡᠭᠰᠡᠨ ᠨᠢ᠄《ᠲᠠᠨᠲᠠᠷ ᠪᠠᠭᠰᠢ! ᠰᠢᠨᠠᠯᠠᠮᠠ ᠳᠥᠷᠪᠡᠨ ᠴᠡᠷᠢᠭ ᠲᠡᠢ ᠲᠠᠨ ᠤ᠋ ᠳ᠋ᠤ᠌ ᠰᠢᠨᠡ ᠶ᠋ᠢᠨ ᠳᠡᠭᠡᠵᠢ ᠪᠠᠷᠢᠬᠤ ᠪᠠᠷ ᠡᠮᠦᠨᠡ ᠣᠷᠣᠢ ᠳᠡᠭᠡᠷᠡ ᠢᠷᠡᠭᠡᠳ ᠪᠠᠢᠨᠠ ᠰᠢᠦ! ᠪᠠᠰᠠ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠰᠧᠳᠧᠩᠨᠣᠷᠪᠤ ᠴᠤ᠌ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠴᠡᠷᠢᠭ ᠳᠠᠭᠠᠭᠤᠯᠵᠤ ᠢᠷᠡᠭᠡᠳ ᠲᠠᠨ ᠤ᠋ ᠭᠡᠷ ᠢ᠋ ᠬᠡᠳᠦᠨ ᠳᠠᠪᠬᠤᠷ ᠪᠦᠰᠡᠯᠡᠴᠢᠬᠡᠯᠡ᠂ ᠣᠳᠣ ᠴᠣᠬᠣᠮ ᠶᠠᠭᠠᠬᠢᠪᠠᠯ ᠰᠠᠢᠨ ᠪᠣᠢ?》 ᠭᠡᠵᠦ ᠬᠡᠯᠡ ᠬᠦᠷᠭᠡᠯᠡ᠃ ᠭᠡᠷ ᠲᠡᠬᠢ ᠭᠡᠢᠴᠢᠨ ᠵᠣᠴᠢᠳ ᠲᠣᠭᠲᠠᠬᠤ ᠶ᠋ᠢᠨ ᠬᠡᠯᠡᠬᠦ ᠶ᠋ᠢ ᠰᠣᠨᠣᠰᠤᠭᠠᠳ ᠶᠡᠬᠡᠳᠡ ᠠᠶᠤᠨ ᠰᠣᠴᠢᠵᠤ ᠰᠠᠨᠳᠤᠷᠴᠠᠭᠠᠪᠠ᠃ ᠪᠠᠶᠠᠷ ᠬᠥᠭᠵᠢᠯ ᠲᠡᠢ ᠪᠠᠢᠭᠰᠠᠨ ᠲᠣᠮᠢ ᠲᠠᠨᠲᠠᠷ ᠥᠪᠡᠷ ᠦ᠋ᠨ ᠪᠡᠶᠡ ᠲᠦᠭᠰᠢᠭᠦᠷᠢᠲᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ ᠱᠠᠯᠠ ᠳ᠋ᠤ᠌ ᠡᠯᠭᠦᠵᠦ ᠪᠠᠢᠭᠰᠠᠨ ᠪᠠᠭᠠ ᠫᠤᠤ ᠪᠠᠨ ᠠᠪᠤᠭᠠᠳ᠄《ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠰᠧᠳᠧᠩᠨᠣᠷᠪᠤ ᠢᠷᠡᠭᠰᠡᠨ ᠪᠣᠯ ᠪᠢ ᠪᠠᠷᠤᠭ᠁》 ᠭᠡᠵᠦ ᠴᠢᠷᠠᠢ ᠨᠢ ᠬᠠᠷᠠᠯᠠᠵᠤ ᠬᠤᠷᠠᠭᠠᠨ ᠳ᠋ᠠᠴᠠᠩ ᠢ᠋ᠶ᠋ᠠᠨ ᠬᠡᠳᠦᠷᠦᠭᠡᠳ ᠭᠠᠳᠠᠭᠰᠢ ᠭᠠᠷᠤᠯᠠ᠃ ᠲᠡᠷᠡ《 ᠬᠡᠷᠪᠡ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠰᠧᠳᠧᠩᠨᠣᠷᠪᠤ ᠢᠷᠡᠭᠰᠡᠨ ᠪᠣᠯ ᠥᠨᠥᠳᠥᠷ ᠮᠢᠨᠦ ᠲᠣᠯᠣᠭᠠᠢ ᠮᠥᠷᠦᠨ ᠳᠡᠭᠡᠷᠡ ᠪᠠᠢᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠴᠢᠬᠠᠯᠠ》 ᠭᠡᠵᠦ ᠵᠡᠭᠦᠨ ᠬᠣᠢᠲᠤ ᠪᠤᠷᠭᠠᠰᠤ ᠴᠢᠴᠠᠷᠭᠠᠨᠠ ᠲᠠᠢ ᠵᠠᠭ ᠵᠦᠭ ᠵᠢᠭᠤᠲᠠᠨ ᠭᠦᠶᠦᠵᠡᠢ᠃
ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠰᠧᠳᠧᠩᠨᠣᠷᠪᠤ ᠬᠡᠳᠦᠢᠪᠡᠷ ᠦᠦᠰᠢᠨ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠪᠠᠴᠤ ᠤᠭ ᠲᠠᠭᠠᠨ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠬᠠᠷᠢᠶᠠᠲᠤ ᠠᠷᠠᠳ ᠲᠤᠯᠠ ᠬᠥᠮᠦᠰ ᠲᠡᠭᠦᠨ ᠢ᠋ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠰᠧᠳᠧᠩᠨᠣᠷᠪᠤ ᠭᠡᠵᠦ ᠳᠠᠭᠤᠳᠠᠳᠠᠭ᠃ ᠲᠡᠭᠦᠨ ᠦ᠌ ᠭᠡᠷ ᠨᠢ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠦᠦᠰᠢᠨᠵᠣᠣ ᠶ᠋ᠢᠨ ᠪᠠᠶᠠᠨᠲᠣᠯᠣᠭᠠᠢ ᠳ᠋ᠤ᠌ ᠰᠠᠭᠤᠵᠤ ᠪᠠᠢᠵᠠᠢ᠃ ᠲᠡᠷᠡ ᠰᠡᠴᠡᠨ ᠰᠡᠷᠭᠦᠯᠡᠩ ᠮᠥᠷᠲᠡᠭᠡᠨ ᠬᠠᠷᠪᠤᠵᠤ ᠨᠠᠮᠨᠠᠬᠤ ᠳ᠋ᠠᠭᠠᠨ ᠲᠤᠢᠯ ᠤ᠋ᠨ ᠮᠡᠷᠭᠡᠰᠢᠭᠰᠡᠨ ᠠᠩᠴᠢᠨ ᠡᠷᠡ ᠪᠠᠢᠵᠠᠢ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠣᠰᠢᠭᠤ ᠪᠣᠯᠤᠨ ᠦᠦᠰᠢᠨ ᠦ᠌ ᠵᠡᠭᠦᠨ ᠬᠥᠪᠡᠭᠡ ᠪᠡᠷ ᠱᠠᠨᠰᠢ᠂ ᠱᠠᠨ ᠰᠢ᠂ ᠤᠯᠠᠭᠠᠨᠴᠠᠪ ᠪᠣᠯᠤᠨ ᠪᠤᠰᠤᠳ ᠭᠠᠵᠠᠷ ᠤ᠋ᠨ ᠶᠠᠪᠤᠭᠤᠯ ᠳ᠋ᠤᠯᠢ ᠳᠡᠭᠡᠷᠡᠮ ᠨᠤᠲᠤᠭ ᠤᠰᠤ ᠶ᠋ᠢ ᠰᠠᠮᠠᠭᠤᠷᠠᠭᠤᠯᠵᠤ ᠮᠠᠯᠴᠢᠳ ᠢ᠋ ᠳᠡᠭᠡᠷᠡᠮᠳᠡᠳᠡᠭ ᠲᠤᠯᠠ ᠰᠧᠳᠧᠩᠨᠣᠷᠪᠤ ᠣᠢᠷᠠ ᠣᠷᠴᠢᠮ ᠤ᠋ᠨ ᠢ᠋ᠶ᠋ᠠᠨ ᠫᠤᠤᠴᠢ ᠠᠩᠴᠢᠳ ᠢ᠋ ᠴᠤᠭᠯᠠᠭᠤᠯᠤᠨ᠂ ᠱᠠᠨᠰᠢ ᠫᠤᠤ(ᠠᠪᠠ ᠶ᠋ᠢᠨ ᠫᠤᠤ) ᠪᠠᠷ ᠶᠠᠩ ᠾᠸ᠋ ᠰᠢᠶᠧ ᠶ᠋ᠢᠨ ᠳᠡᠭᠡᠷᠡᠮ ᠢ᠋ ᠴᠣᠬᠣᠮ ᠬᠡᠴᠡᠭᠦᠦ ᠴᠣᠬᠢᠵᠤ᠂ ᠬᠡᠳᠦᠨ ᠬᠤᠰᠢᠭᠤᠨ ᠤ᠋ ᠠᠭᠤᠯᠵᠠᠷ ᠳᠠᠬᠢ ᠮᠠᠯᠴᠢᠨ ᠲᠦᠮᠡᠨ ᠦ᠌ ᠠᠮᠤᠷ ᠲᠠᠢᠪᠤᠩ ᠢ᠋ ᠬᠠᠮᠠᠭᠠᠯᠠᠬᠤ ᠳ᠋ᠤ᠌ ᠶᠡᠬᠡ ᠬᠦᠴᠦᠨ ᠭᠠᠷᠭᠠᠭᠰᠠᠨ ᠰᠠᠢᠨ ᠡᠷᠡ ᠶᠦᠮ᠃ ᠰᠡᠭᠦᠯᠡᠷ ᠶᠠᠪᠤᠭᠤᠯ ᠳᠡᠭᠡᠷᠡᠮ ᠪᠠᠢᠲᠤᠭᠠᠢ ᠥᠪᠴᠢ ᠵᠡᠪᠰᠡᠭᠯᠡᠭᠰᠡᠨ ᠢᠷᠭᠡᠨ ᠦ᠌ ᠴᠡᠷᠢᠭ ᠠᠩᠭᠢ ᠵᠠᠮ ᠥᠩᠭᠡᠷᠡᠨ ᠭᠠᠷᠬᠤ ᠳ᠋ᠤ᠌ ᠤᠷᠢᠳ ᠢᠶᠡᠷ ᠰᠧᠳᠧᠩᠨᠣᠷᠪᠣ ᠠ᠋ᠴᠠ ᠠᠯᠢ ᠭᠠᠵᠠᠷ ᠤ᠋ᠨ ᠶᠠᠮᠠᠷ ᠵᠠᠮ ᠢ᠋ᠶ᠋ᠠᠷ ᠥᠩᠭᠡᠷᠡᠨ ᠭᠠᠷᠬᠤ《ᠵᠠᠮ ᠭᠤᠶᠤᠳᠠᠭ》 ᠪᠣᠯᠴᠢᠬᠠᠵᠠᠢ᠃ ᠰᠡᠭᠦᠯᠡᠷ ᠲᠡᠭᠦᠨ ᠦ᠌ ᠮᠣᠷᠢᠨ ᠮᠡᠷᠭᠡᠵᠢᠯ᠂ ᠬᠠᠷᠪᠤᠬᠤ ᠮᠡᠷᠭᠡᠵᠢᠯ ᠨᠢ ᠬᠣᠯᠠ ᠣᠢᠷᠠ ᠳ᠋ᠠᠭᠠᠨ ᠠᠯᠳᠠᠷᠰᠢᠭᠠᠳ ᠣᠯᠠᠨ ᠲᠦᠮᠡᠨ ᠦ᠌ ᠬᠦᠷᠢᠶᠡᠯᠡᠯ ᠢ᠋ ᠣᠯᠵᠤ ᠬᠣᠣᠷᠲᠠᠨ ᠳᠠᠢᠰᠤᠨ ᠤ᠋ ᠰᠦᠷ ᠢ᠋ ᠳᠠᠷᠤᠵᠤ ᠬᠡᠳᠦᠨ ᠬᠤᠰᠢᠭᠤᠨ ᠤ᠋ ᠠᠭᠤᠯᠵᠠᠷ ᠳᠠᠬᠢ ᠮᠠᠯᠴᠢᠨ ᠲᠦᠮᠡᠨ ᠠᠮᠤᠷ ᠲᠣᠭᠲᠠᠭᠤᠨ ᠰᠠᠭᠤᠬᠤ ᠪᠣᠯᠵᠠᠢ᠃ ᠡᠢᠮᠦ ᠡᠴᠡ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠸᠠᠩ ᠨᠣᠶᠠᠨ ᠲᠥᠪᠰᠢᠨᠵᠢᠷᠭᠠᠯ ᠲᠡᠭᠦᠨ ᠢ᠋ ᠪᠢᠰᠢᠷᠡᠭᠡᠳ ᠴᠡᠷᠢᠭ ᠦ᠋ᠨ ᠶᠢᠩᠵᠠᠩ ᠤ᠋ᠨ ᠲᠤᠰᠢᠶᠠᠯ ᠥᠭᠴᠦ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠪᠠᠶᠠᠨᠲᠣᠯᠣᠭᠠᠢ ᠠ᠋ᠴᠠ ᠳᠠᠭᠤᠳᠠᠨ ᠠᠪᠠᠴᠢᠵᠤ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠨᠣᠭᠣᠭᠠᠨ ᠪᠤᠯᠠᠭ ᠰᠤᠪᠤᠷᠭᠠ ᠵᠡᠷᠭᠡ ᠭᠠᠵᠠᠷ ᠤ᠋ᠳ ᠲᠤ᠌ ᠴᠡᠷᠢᠭ ᠦ᠋ᠨ ᠴᠠᠢᠵᠠ ᠪᠠᠢᠭᠤᠯᠵᠤ ᠰᠠᠭᠤᠯᠭᠠᠪᠠ᠃ ᠲᠡᠷᠡ ᠪᠣᠯ ᠠᠷᠠᠳ ᠲᠦᠮᠡᠨ ᠦ᠌ ᠠᠰᠢᠭ ᠲᠤᠰᠠ ᠶ᠋ᠢ ᠬᠠᠮᠠᠭᠠᠯᠠᠳᠠᠭ ᠨᠤᠲᠤᠭ ᠣᠷᠣᠨ ᠳ᠋ᠠᠭᠠᠨ ᠬᠠᠢᠷᠠᠲᠠᠢ ᠴᠡᠷᠢᠭ ᠦ᠋ᠨ ᠨᠣᠶᠠᠨ ᠬᠥᠮᠦᠨ ᠪᠢᠯᠡ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠠᠳᠤᠤᠬᠠᠢ ᠶ᠋ᠢᠨ ᠲᠣᠮᠣ ᠭᠠᠵᠠᠷ ᠤ᠋ᠨ ᠡᠵᠡᠨ ᠬᠣᠣ ᠳ᠋ᠠᠨ ᠹᠧᠩ ᠰᠧᠳᠧᠩᠨᠣᠷᠪᠣ ᠶ᠋ᠢ ᠰᠢᠳᠦ ᠵᠠᠭᠤᠨ ᠬᠣᠷᠣᠰᠴᠤ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ ᠦ᠋ᠨ ᠲᠣᠮᠢ ᠲᠠᠨᠲᠠᠷ ᠲᠤ᠌ ᠨᠢᠭᠡ ᠵᠠᠭᠤᠨ ᠴᠠᠭᠠᠨ ᠲᠥᠭᠥᠷᠢᠭ ᠰᠢᠷᠭᠤᠭᠤᠯᠵᠤ᠄《ᠲᠠ ᠰᠧᠳᠧᠩᠨᠣᠷᠪᠣ ᠶ᠋ᠢ ᠠᠷᠭᠠᠯᠠᠵᠤ ᠪᠠᠢᠭᠠᠳ ᠨᠢᠭᠤᠴᠠ ᠪᠠᠷ ᠲᠣᠨᠢᠯᠭᠠᠴᠢᠬᠠ!》 ᠭᠡᠵᠦ ᠰᠡᠮᠡᠷᠬᠡᠨ ᠭᠤᠶᠤᠵᠠᠢ᠃ ᠡᠨᠡ ᠨᠢ ᠭᠣᠣᠯᠳᠠᠭᠤ ᠠᠲᠠᠷ ᠬᠠᠭᠠᠯᠪᠤᠷᠢᠯᠠᠬᠤ ᠲᠠᠷᠢᠶᠠᠯᠠᠬᠤ ᠪᠣᠯᠤᠨ ᠴᠡᠷᠢᠭ ᠮᠣᠷᠢᠨ ᠤ᠋ ᠬᠦᠨᠡᠰᠦ ᠪᠣᠷᠳᠣᠭᠠᠨ ᠤ᠋ ᠠᠰᠠᠭᠤᠳᠠᠯ ᠠ᠋ᠴᠠ ᠪᠣᠯᠤᠭᠰᠠᠨ ᠪᠠᠢᠵᠤ ᠮᠡᠳᠡᠨᠡ᠃ ᠢᠩᠭᠢᠭᠡᠳ ᠲᠣᠮᠢ ᠲᠠᠨᠲᠠᠷ ᠬᠣᠣ ᠣᠪᠣᠭᠲᠤ ᠭᠠᠵᠠᠷ ᠤ᠋ᠨ ᠡᠵᠡᠨ ᠦ᠌ ᠨᠢᠭᠡ ᠵᠠᠭᠤᠨ ᠮᠥᠩᠭᠥᠨ ᠵᠣᠭᠣᠰᠤᠨ ᠳ᠋ᠤ᠌ ᠪᠣᠯᠵᠤ᠂ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠰᠧᠳᠧᠩᠨᠣᠷᠪᠣ ᠶ᠋ᠢ ᠬᠣᠣᠷᠯᠠᠬᠤ ᠭᠡᠵᠦ ᠬᠡᠳᠦ ᠤᠳᠠᠭᠠ ᠣᠷᠣᠯᠳᠣᠭᠰᠠᠨ ᠪᠣᠯᠪᠠᠴᠤ ᠪᠦᠲᠦᠭᠰᠡᠨ ᠦᠭᠡᠢ᠃ ᠲᠡᠢᠮᠦ ᠡᠴᠡ ᠲᠣᠮᠢ ᠲᠠᠨᠲᠠᠷ᠂ ᠰᠧᠳᠧᠩᠨᠣᠷᠪᠤ ᠬᠣᠶᠠᠭᠤᠯᠠ ᠬᠠᠷᠢᠯᠴᠠᠨ ᠥᠰᠢᠶᠡ ᠬᠣᠷᠣᠰᠤᠯ ᠲᠠᠢ ᠪᠣᠯᠤᠭᠠᠳ ᠨᠡᠯᠢᠶᠡᠳ ᠬᠡᠳᠦᠨ ᠵᠢᠯ ᠪᠣᠯᠴᠢᠬᠠᠵᠠᠢ᠃
ᠰᠢᠨᠡᠯᠡᠮᠡ ᠡᠨᠡ ᠤᠴᠢᠷ ᠢ᠋ ᠨᠠᠷᠢᠨ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠪᠥᠭᠡᠳ ᠰᠧᠳᠧᠩᠨᠣᠷᠪᠣ ᠲᠠᠢ ᠲᠤᠩ ᠨᠥᠬᠥᠷᠰᠡᠭ ᠬᠠᠷᠢᠴᠠᠭᠠ ᠲᠠᠢ ᠪᠠᠢᠭᠰᠠᠨ ᠶᠤᠮ᠃ ᠲᠡᠭᠡᠭᠡᠳ ᠲᠣᠮᠢ ᠲᠠᠨᠲᠠᠷ ᠤ᠋ᠨ ᠭᠡᠷ ᠦ᠋ᠨ ᠡᠮᠦᠨᠡᠬᠢ ᠥᠨᠳᠥᠷ ᠡᠯᠡᠰᠦ ᠲᠡᠢ ᠰᠡᠷᠪᠡᠩ ᠦ᠋ᠨ ᠣᠷᠣᠢ ᠳ᠋ᠤ᠌ ᠵᠣᠭᠰᠣᠨ ᠪᠠᠢᠳᠠᠯ ᠢ᠋ ᠠᠵᠢᠭᠯᠠᠬᠤ ᠶ᠋ᠢᠨ ᠳᠠᠭᠠᠤ ᠲᠣᠮᠢ ᠲᠠᠨᠲᠠᠷ ᠲᠤ᠌ ᠰᠢᠨᠡ ᠶ᠋ᠢᠨ ᠳᠡᠭᠡᠵᠢ ᠪᠠᠷᠢᠬᠤ ᠪᠠᠷ ᠲᠤᠰᠬᠠᠢ ᠯᠢᠦ ᠮᠢᠩ ᠲᠣᠭᠲᠠᠬᠤ ᠪᠠᠷ ᠦᠭᠡ ᠶᠠᠪᠤᠭᠤᠯᠤᠭᠰᠠᠨ ᠤ᠋ ᠬᠠᠮᠲᠤ ᠰᠧᠳᠧᠩᠨᠣᠷᠪᠣ ᠴᠤ᠌ ᠭᠡᠷ ᠢ᠋ ᠴᠢᠨᠢ ᠬᠡᠳᠦᠨ ᠳᠠᠪᠬᠤᠷ ᠪᠦᠰᠡᠯᠡᠯᠡ ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠨᠢ《ᠬᠥᠮᠦᠨ ᠦ᠌ ᠭᠠᠷ ᠢ᠋ᠶ᠋ᠠᠷ ᠮᠣᠭᠠᠢ ᠪᠠᠷᠢᠭᠤᠯᠵᠤ ᠬᠢᠲᠤᠭᠠ ᠵᠢᠭᠡᠯᠡᠭᠰᠡᠨ》 ᠤᠴᠢᠷ ᠪᠠᠢᠵᠠᠢ᠃
ᠰᠢᠨᠡᠯᠡᠮᠡ᠂ ᠲᠠᠨᠲᠠᠷ ᠳᠤᠲᠠᠭᠠᠵᠤ ᠪᠠᠢᠭᠠ ᠶ᠋ᠢ ᠰᠡᠷᠪᠡᠩ ᠦ᠋ᠨ ᠣᠷᠣᠢ ᠠ᠋ᠴᠠ ᠲᠣᠪ ᠲᠣᠳᠣᠷᠬᠠᠢ ᠦᠵᠡᠵᠦ ᠵᠣᠭᠰᠣᠨᠠ᠃ ᠲᠡᠭᠦᠨ ᠦ᠌ ᠳᠠᠭᠠᠯ ᠴᠡᠷᠢᠭ ᠨᠢ ᠰᠠᠨᠳᠤᠷᠬᠤ ᠳ᠋ᠠᠭᠠᠨ ᠬᠣᠢᠨᠠ ᠠ᠋ᠴᠠ ᠨᠢ ᠫᠤᠤᠳᠠᠬᠤ ᠭᠡᠬᠦ ᠳ᠋ᠦ᠍᠂ ᠰᠢᠨᠠᠯᠠᠮᠠ ᠪᠢᠲᠡᠭᠡᠢ ᠫᠤᠤᠳᠠ! ᠲᠣᠮᠢ ᠲᠠᠨᠲᠠᠷ ᠳᠤᠲᠠᠭᠠᠪᠠᠴᠤ ᠮᠢᠨᠦ ᠤᠭᠤᠲᠠᠨ ᠳᠣᠲᠣᠷᠠ ᠰᠢᠦ! ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠠᠵᠢᠭᠯᠠᠨᠠ᠃ ᠬᠠᠷᠠᠵᠤ ᠪᠠᠢᠲᠠᠯᠠ ᠲᠣᠮᠢ ᠲᠠᠨᠲᠠᠷ ᠶᠡᠬᠡ ᠪᠤᠷᠭᠠᠰᠤ ᠴᠢᠴᠠᠷᠭᠠᠨᠠ ᠳᠣᠲᠣᠷᠠ ᠣᠷᠣᠴᠢᠬᠠᠯᠠ᠃ ᠵᠠᠷᠢᠮ ᠨᠢ᠄《ᠠᠢ! ᠶᠠᠮᠠᠷ ᠪᠠᠢᠨᠠ᠂ ᠲᠠᠨᠲᠠᠷ ᠣᠳᠣ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠴᠢᠬᠠᠯᠠ ᠰᠢᠦ》 ᠭᠡᠵᠦ ᠭᠠᠰᠠᠯᠤᠨᠠ᠃
ᠦᠦᠰᠢᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠲᠣᠮᠢ ᠲᠠᠨᠲᠠᠷ ᠭᠡᠷ ᠡᠴᠡ ᠪᠡᠨ ᠭᠠᠷᠤᠭᠠᠳ ᠳᠤᠲᠠᠭᠠᠵᠤ ᠪᠠᠢᠬᠤ ᠳ᠋ᠠᠭᠠᠨ ᠰᠢᠨᠠᠯᠠᠮᠠ ᠨᠠᠮᠠᠶ᠋ᠢ ᠶ᠋ᠢ ᠪᠠᠷᠢᠪᠴᠢᠯᠠᠬᠤ ᠪᠠᠷ ᠢᠷᠡᠯᠡ ᠭᠡᠵᠦ ᠣᠭᠲᠣ ᠪᠣᠳᠣᠭᠰᠠᠨ ᠦᠭᠡᠢ ᠬᠠᠷᠢᠨ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠰᠧᠳᠧᠩᠨᠤᠷᠪᠤ ᠨᠠᠮᠠᠶ᠋ᠢ ᠬᠣᠣᠷᠯᠠᠬᠤ ᠪᠣᠯᠤᠯᠠ ᠭᠡᠳ ᠪᠣᠳᠣᠬᠤ ᠳᠣᠳᠣᠮ ᠪᠠᠴᠢᠮᠳᠠᠨ ᠡᠮᠢᠶᠡᠬᠦ ᠳ᠋ᠡᠭᠡᠨ ᠭᠠᠷ ᠫᠤᠤ ᠪᠠᠷ ᠢ᠋ᠶ᠋ᠠᠨ ᠲᠣᠯᠣᠭᠠᠢ ᠪᠠᠨ ᠫᠤᠤᠳᠠᠴᠢᠬᠠᠯᠠ᠃ ᠰᠢᠨᠡᠯᠡᠮᠡ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ ᠰᠣᠨᠣᠰᠤᠭᠠᠳ᠄《ᠵᠠ! ᠣᠳᠣ ᠶᠠᠪᠤᠵᠠᠭᠠᠶᠠ᠂ ᠣᠳᠣ ᠪᠢᠳᠡ ᠲᠣᠮᠢ ᠲᠠᠨᠲᠠᠷ ᠲᠤ᠌ ᠰᠢᠨᠡ ᠶ᠋ᠢᠨ ᠳᠡᠭᠡᠵᠢ ᠪᠠᠷᠢᠶᠠ᠁》 ᠭᠡᠯᠡ᠃ ᠲᠡᠷᠡ ᠬᠡᠳᠦᠭᠦᠯᠡ ᠮᠣᠷᠢ ᠪᠠᠨ ᠬᠥᠲᠥᠯᠦᠨ ᠪᠤᠷᠭᠠᠰᠤᠨ ᠳᠣᠲᠣᠷᠠ ᠣᠷᠣᠵᠤ ᠦᠵᠡᠬᠦᠯᠡᠷ ᠲᠠᠨᠲᠠᠷ ᠪᠡᠶᠡ ᠪᠡᠨ ᠬᠣᠣᠷᠯᠠᠭᠠᠳ ᠦᠬᠦᠴᠢᠬᠡᠵᠡᠢ᠃
ᠰᠢᠨᠡᠯᠡᠮᠡ ᠬᠡᠳᠦᠨ ᠳᠠᠭᠠᠯ ᠴᠡᠷᠢᠭ ᠲᠡᠢ ᠲᠠᠨᠲᠠᠷ ᠤ᠋ᠨ ᠭᠡᠷ ᠦ᠋ᠨ ᠭᠠᠳᠠᠨᠠ ᠬᠦᠷᠴᠦ᠄《ᠲᠠᠨᠲᠠᠷ ᠬᠤᠪᠢ ᠵᠠᠶᠠᠭᠠ ᠦᠭᠡᠢ ᠬᠥᠮᠦᠨ ᠪᠠᠢᠨᠠ᠂ ᠮᠢᠨᠦ ᠳᠥᠷᠪᠡᠨ ᠴᠢᠪᠠᠭᠠ ᠲᠠᠢ ᠰᠢᠨᠡ ᠶ᠋ᠢᠨ ᠪᠣᠭᠣᠷᠰᠣᠭ ᠢ᠋ ᠴᠦ᠍ ᠠᠮᠰᠠᠬᠤ ᠦᠭᠡᠢ ᠪᠡᠷ ᠦᠬᠦᠴᠢᠬᠡᠯᠡ ᠳᠡ》 ᠭᠡᠳ ᠶᠠᠪᠤᠵᠠᠢ᠃
ᠦᠨᠡᠨ ᠢ᠋ ᠬᠡᠯᠡᠪᠡᠯ᠂ ᠲᠠᠨᠲᠠᠷ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠨᠣᠶᠠᠨ ᠴᠡᠷᠢᠭ ᠦ᠋ᠨ ᠲᠣᠮᠢ ᠬᠥᠮᠦᠨ ᠪᠠᠢᠭᠰᠠᠨ ᠴᠤ᠌ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢ ᠪᠦᠰᠡᠯᠡᠵᠦ ᠰᠢᠨᠡᠯᠡᠮᠡ ᠶ᠋ᠢ ᠠᠮᠢᠳᠤ ᠪᠠᠷ ᠪᠠᠷᠢᠬᠤ ᠭᠡᠳ ᠴᠢᠳᠠᠭᠰᠠᠨ ᠦᠭᠡᠢ ᠬᠣᠭᠣᠰᠣᠳᠠᠵᠤ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠭᠡᠷ ᠲᠡᠭᠡᠨ ᠪᠢᠴᠢᠵᠦ ᠬᠠᠶᠠᠭᠰᠠᠨ《ᠲᠠᠨᠲᠠᠷ ᠬᠦᠦ ᠲᠣᠯᠣᠭᠠᠢ ᠪᠠᠨ ᠬᠢᠴᠢᠶᠡ》 ᠭᠡᠰᠡᠨ ᠡᠴᠡ ᠰᠡᠷᠡᠮᠵᠢ ᠠᠪᠤᠭᠰᠠᠨ ᠦᠭᠡᠢ ᠪᠠᠢᠵᠠᠢ᠃ ᠲᠡᠭᠡᠭᠡᠳ ᠠᠷᠠᠳ ᠤ᠋ᠨ ᠳᠤᠮᠳᠠ᠄
ᠲᠠᠪᠤᠨ ᠵᠢᠩᠬᠢᠨ ᠠᠷᠪᠠᠨ ᠵᠠᠯᠠᠨ
ᠲᠤᠰᠠ ᠦᠭᠡᠢ ᠪᠣᠯᠤᠭᠰᠠᠨ ᠰᠢᠦ᠂
ᠲᠠᠪᠢᠨ ᠴᠡᠷᠢᠭ ᠦ᠋ᠨ ᠲᠣᠮᠢ ᠲᠠᠨᠲᠠᠷ
ᠲᠣᠢᠮᠣᠭ ᠪᠣᠯᠵᠤ ᠦᠬᠦᠯᠡ ᠰᠢᠦ᠃
᠁
ᠭᠡᠰᠡᠨ ᠰᠢᠯᠦᠭ ᠳᠠᠭᠤᠤ ᠳᠡᠯᠭᠡᠷᠡᠵᠦ ᠪᠠᠢᠭᠰᠠᠨ ᠶᠤᠮ᠃
ᠲᠣᠳᠣᠷᠬᠠᠢᠯᠠᠯ
ᠵᠠᠷᠢᠮ ᠮᠠᠲ᠋ᠧᠷᠢᠠᠯ ᠪᠤᠶᠤ ᠬᠥᠮᠦᠰ ᠦ᠋ᠨ ᠬᠡᠯᠡᠯᠴᠡᠬᠦ ᠪᠡᠷ ᠰᠢᠨᠡᠯᠡᠮᠡ ᠲᠠᠨᠲᠠᠷ ᠤ᠋ᠨ ᠭᠡᠷ ᠢ᠋ ᠪᠦᠰᠡᠯᠡᠭᠡᠳ ᠲᠠᠨᠲᠠᠷ ᠭᠦᠶᠦᠨ ᠭᠠᠷᠴᠤ ᠢᠷᠡᠭᠰᠡᠨ ᠳ᠋ᠦ᠍ ᠲᠡᠭᠦᠨ ᠢ᠋ ᠫᠤᠤᠳᠠᠵᠤ ᠠᠯᠠᠪᠠ ᠭᠡᠳᠡᠭ᠃ ᠪᠠᠰᠠ ᠵᠠᠷᠢᠮ ᠨᠢ ᠪᠠᠢᠯᠳᠤᠭᠠᠨ ᠳᠡᠭᠡᠷᠡ ᠲᠠᠨᠲᠠᠷ ᠤ᠋ᠨ ᠴᠡᠷᠢᠭ ᠢᠯᠠᠭᠳᠠᠭᠠᠳ ᠲᠠᠨᠲᠠᠷ ᠳᠤᠲᠠᠭᠠᠬᠤ ᠳ᠋ᠤ᠌ ᠬᠣᠢᠨᠠ ᠠ᠋ᠴᠠ ᠨᠢ ᠬᠠᠷᠪᠤᠵᠤ ᠤᠨᠠᠭᠠᠯᠠ ᠭᠡᠳᠡᠭ ᠴᠦ᠍ ᠪᠣᠢ᠂ ᠡᠳᠡᠭᠡᠷ ᠨᠢ ᠪᠠᠷᠢᠮᠲᠠ ᠦᠭᠡᠢ ᠮᠥᠷᠲᠡᠭᠡᠨ ᠦᠨᠡᠨ ᠪᠠᠢᠳᠠᠯ ᠲᠠᠢ ᠨᠡᠢᠴᠡᠬᠦ ᠦᠭᠡᠢ ᠰᠢᠭ ᠰᠠᠨᠠᠭᠳᠠᠨᠠ᠃ ᠳᠡᠭᠡᠷᠡᠬᠢ ᠠᠭᠤᠯᠭᠠ ᠶ᠋ᠢ1979 ᠣᠨ ᠳ᠋ᠤ᠌ ᠬᠡᠷᠢᠶᠡ ᠷᠬᠠᠪᠠ ᠶ᠋ᠢᠨ ᠠᠴᠢ ᠬᠥᠪᠡᠭᠦᠨ ᠪᠦᠳᠡᠤᠠ ᠨᠠᠰᠤᠲᠠᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠪᠡ᠃
ᠨᠢᠭᠡ ᠳ᠋ᠦ᠍᠂ 《ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠲᠡᠦᠬᠡᠲᠦ ᠬᠥᠮᠦᠰ ᠦ᠋ᠨ ᠲᠤᠬᠠᠢ ᠥᠭᠦᠯᠡᠯ ᠦ᠋ᠳ 》1984 ᠣᠨ ᠤ᠋ ᠬᠢᠲᠠᠳ ᠬᠡᠪᠯᠡᠯ ᠳ᠋ᠦ᠍ ᠲᠡᠷᠡ ᠦᠶᠡ ᠶ᠋ᠢᠨ ᠥᠪᠥᠷ ᠮᠣᠩᠭᠣᠯ ᠤ᠋ᠨ ᠨᠡᠢᠭᠡᠮ ᠦ᠋ᠨ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ᠋ ᠬᠦᠷᠢᠶᠡᠯᠡᠩ ᠦ᠋ᠨ ᠳᠡᠳ᠋ ᠳᠠᠷᠤᠭᠠ ᠵᠣᠣ ᠰᠢᠶᠠᠩ ᠪᠢ ᠶ᠋ᠢᠨ ᠪᠢᠴᠢᠭᠰᠡᠨ 《ᠰᠢᠨᠠᠯᠠᠮᠠ ᠶ᠋ᠢᠨ ᠦᠢᠯᠡ ᠶᠠᠪᠤᠳᠠᠯ》 ᠭᠡᠬᠦ ᠥᠭᠦᠯᠡᠯ ᠦ᠋ᠨ ᠳᠥᠷᠪᠡᠳᠦᠭᠡᠷ ᠪᠦᠯᠦᠭ ᠲᠦ᠍ 《ᠤᠷᠪᠠᠭᠴᠢ ᠲᠠᠨᠲᠠᠷ ᠭᠠᠷᠬᠤ ᠵᠠᠮ ᠦᠭᠡᠢ ᠳ᠋ᠡᠭᠡᠨ ᠴᠢᠬᠤᠯᠳᠠᠵᠤ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠨ ᠬᠣᠣᠷᠯᠠᠵᠠᠢ》 ᠭᠡᠵᠦ ᠪᠢᠴᠢᠵᠦ ᠪᠣᠢ᠃ ᠡᠨᠡ ᠨᠢ ᠴᠢᠯᠥᠭᠡᠯᠡᠭᠳᠡᠭᠰᠡᠨ ᠦ᠌ ᠳᠠᠷᠠᠭᠠ ᠲᠠᠪᠢᠭᠠᠳ ᠣᠨ ᠤ᠋ ᠰᠡᠭᠦᠯᠡᠷ ᠲᠥᠪ ᠦ᠋ᠨ ᠴᠥᠭᠡᠨ ᠲᠣᠭᠠᠲᠤ ᠦᠨᠳᠦᠰᠦᠲᠡᠨ ᠦ᠌ ᠨᠡᠢᠭᠡᠮ ᠦ᠋ᠨ ᠲᠡᠦᠬᠡ ᠰᠣᠶᠣᠯ ᠤ᠋ᠨ ᠪᠠᠢᠴᠠᠭᠠᠨ ᠰᠤᠳᠤᠯᠬᠤ ᠪᠦᠯᠬᠦᠮ ᠦ᠋ᠨ ᠪᠢᠴᠢᠭᠰᠡᠨ 《ᠥᠯᠵᠠᠢᠵᠢᠷᠭᠠᠯ ᠤ᠋ᠨ ᠲᠤᠰᠬᠠᠢ ᠪᠦᠯᠦᠭ》 ᠭᠡᠬᠦ ᠲᠣᠰᠣᠨ ᠪᠠᠷ ᠤ᠋ᠨ ᠳᠡᠪᠲᠡᠷ ᠦ᠋ᠨ ᠦᠭᠡᠰ ᠪᠣᠯᠤᠨᠠ᠃
ᠬᠣᠶᠠᠷ ᠲᠤ᠌᠂ ᠰᠢᠨᠠᠯᠠᠮᠠ ᠶ᠋ᠢᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠺᠣᠮᠢᠰᠰᠠᠷ ᠪᠠᠢᠭᠰᠠᠨ ᠯᡁᠥ᠋ᠩᠷᠥᠪ ᠨᠠᠰᠤᠲᠠᠨ 1984 ᠣᠨ ᠤ᠋12 ᠰᠠᠷᠠ ᠶ᠋ᠢᠨ23 ᠤ᠋ ᠡᠳᠦᠷ ᠬᠠᠩᠭᠢᠨ ᠬᠤᠰᠢᠭᠤᠨ ᠤ᠋ ᠪᠠᠶᠠᠡᠩᠭᠡᠷ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠬᠢᠭᠰᠡᠨ ᠰᠢᠩᠭᠡᠭᠡᠯᠲᠡ ᠰᠤᠷᠪᠤᠯᠵᠢᠯᠠᠭᠠ ᠳ᠋ᠤ᠌ ᠲᠠᠨᠲᠠᠷ ᠤ᠋ᠨ ᠲᠤᠬᠠᠢ 《ᠰᠢᠨᠡᠯᠡᠮᠡ ᠤᠲᠤᠭᠠᠲᠤ ᠳ᠋ᠤ᠌ ᠲᠠᠨᠲᠠᠷ ᠤ᠋ᠨ ᠭᠡᠷ ᠲᠦ᠍ ᠰᠢᠨᠡ ᠶ᠋ᠢᠨ ᠳᠡᠭᠡᠵᠢ ᠬᠦᠷᠭᠡᠬᠦ ᠪᠡᠷ ᠣᠴᠢᠬᠤ ᠳ᠋ᠤ᠌ ᠲᠣᠮᠢ ᠲᠠᠨᠲᠠᠷ ᠪᠡᠶᠡ ᠪᠡᠨ ᠫᠤᠤᠳᠠᠵᠤ ᠦᠬᠦᠵᠡᠢ》 ᠭᠡᠵᠦ ᠬᠡᠯᠡᠵᠦ ᠪᠢᠯᠡ᠃
ᠭᠤᠷᠪᠠ ᠳ᠋ᠤ᠌᠂ 1990 ᠣᠨ ᠳ᠋ᠤ᠌ ᠮᠢᠨᠦ ᠪᠡᠶᠡ ᠭᠠᠯᠠᠭᠤᠲᠤ ᠰᠤᠮᠤᠨ ᠳᠡᠭᠡᠷᠡ᠂ ᠰᠤᠮᠤᠨ ᠳᠠᠷᠤᠭᠠ ᠲᠣᠭᠲᠤᠨᠪᠢᠯᠢᠭ᠌ ᠤ᠋ᠨ ᠭᠡᠷ ᠲᠦ᠍ ᠲᠠᠨᠲᠠᠷ ᠤ᠋ᠨ ᠶᠡᠬᠡ ᠬᠡᠦᠬᠡᠨ ᠪᠤᠭᠤᠳᠠᠢ ᠡᠵᠢ ᠲᠡᠢ ᠲᠠᠨᠲᠠᠷ ᠤ᠋ᠨ ᠲᠤᠬᠠᠢ ᠶᠠᠷᠢᠯᠴᠠᠬᠤ ᠳ᠋ᠤ᠌ ᠲᠡᠷᠡ᠄《ᠴᠠᠭᠠᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠡᠳᠦᠨ ᠪᠠᠢᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠨᠠ᠂ ᠠᠪᠠᠢ ᠭᠡᠨᠡᠳᠲᠡ ᠶᠠᠭᠤᠨ ᠠ᠋ᠴᠠ ᠠᠶᠤᠭᠰᠠᠨ ᠢ᠋ ᠮᠡᠳᠡᠭᠰᠡᠨ ᠦᠭᠡᠢ ᠬᠤᠷᠠᠭᠠᠨ ᠳ᠋ᠠᠴᠠᠩ ᠢ᠋ᠶ᠋ᠠᠨ ᠬᠡᠳᠦᠷᠦᠨ ᠫᠤᠤ ᠪᠠᠨ ᠪᠠᠷᠢᠭᠠᠳ ᠭᠠᠳᠠᠭᠰᠢ ᠭᠦᠶᠦᠭᠰᠡᠨ ᠶᠦᠮ᠃ ᠭᠡᠨᠡᠳᠲᠡ ᠠᠪᠠᠢ ᠶ᠋ᠢ ᠪᠡᠶᠡ ᠪᠡᠨ ᠫᠤᠤᠳᠠᠯᠠ ᠭᠡᠵᠦ ᠮᠥᠮᠥ ᠲᠡᠳᠡᠨᠦᠰ ᠨᠢᠯᠪᠤᠰᠤ ᠤᠨᠠᠭᠠᠨ ᠤᠬᠢᠯᠠᠵᠠᠭᠠᠵᠤ ᠪᠠᠢᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠨᠠ᠃ ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠪᠢ ᠠᠷᠪᠠᠭᠠᠳ ᠨᠠᠰᠤᠲᠠᠢ ᠬᠡᠦᠬᠡᠳ ᠪᠠᠢᠭᠰᠠᠨ ᠲᠤᠯᠠ ᠤᠴᠢᠷ ᠤᠬᠠᠭᠠᠨ ᠢ᠋ ᠨᠢ ᠣᠢᠯᠠᠭᠠᠬᠤ ᠦᠭᠡᠢ ᠪᠠᠢᠵᠠᠢ᠁》 ᠭᠡᠵᠦ ᠪᠠᠢᠭᠰᠠᠨ᠃
ᠡᠢᠮᠦ ᠡᠴᠡ ᠲᠠᠨᠲᠠᠷ ᠭᠠᠷᠬᠤ ᠵᠠᠮ ᠦᠭᠡᠢ ᠳ᠋ᠡᠭᠡᠨ ᠠᠶᠤᠵᠤ ᠪᠡᠶᠡ ᠪᠡᠨ ᠬᠣᠣᠷᠯᠠᠭᠰᠠᠨ ᠨᠢ ᠦᠨᠡᠨ ᠪᠠᠢᠵᠤ ᠮᠡᠳᠡᠨᠡ᠃
3. ᠪᠠᠢ ᠵᠢᠶᠠ ᠸᠠᠨ ᠤ᠋ ᠪᠠᠢᠯᠳᠤᠭᠠᠨ
ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠪᠠᠷᠠᠭᠤᠨ ᠡᠮᠦᠨᠡᠲᠦ ᠬᠢᠵᠠᠭᠠᠷ ᠲᠤ᠌ ᠪᠠᠢ ᠣᠪᠣᠭᠲᠠᠳ ᠤ᠋ᠨ ᠴᠤᠭᠯᠠᠷᠠᠨ ᠰᠠᠭᠤᠭᠰᠠᠨ ᠭᠣᠣᠯ ᠤ᠋ᠨ ᠲᠣᠬᠣᠢ ᠪᠠᠢᠳᠠᠭ᠃ ᠡᠭᠦᠨ ᠢ᠋ ᠬᠥᠮᠦᠰ ᠪᠠᠢ ᠵᠢᠶᠠ ᠸᠠᠨ ᠭᠡᠳᠡᠭ᠃ ᠡᠨᠡ ᠬᠦ᠌ ᠭᠣᠣᠯ ᠤ᠋ᠨ ᠲᠣᠬᠣᠢ ᠶ᠋ᠢᠨ ᠡᠷᠭᠢ ᠪᠡᠷ ᠲᠠᠷᠢᠶᠠᠴᠢᠳ ᠨᠦᠬᠡᠨ ᠭᠡᠷ ᠮᠠᠯᠲᠠᠵᠤ ᠰᠠᠭᠤᠷᠢᠰᠢᠳᠠᠭ ᠪᠠᠢᠭᠰᠠᠨ ᠭᠡᠨᠡ(ᠥᠨᠥ ᠶ᠋ᠢᠨ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠾᠧᠩ ᠰᠠᠨ ᠰᠢᠶᠠᠨ ᠤ᠋ ᠯᠢᠦᠢ ᠯᠦᠩ ᠸᠠᠨ ᠰᠢᠶᠠᠩ ᠤ᠋ᠨ ᠭᠠᠵᠠᠷ ᠲᠤ᠌)᠃
1928 ᠣᠨ ᠤ᠋ ᠡᠪᠦᠯ ᠲᠡᠰᠬᠢᠮᠡ ᠬᠦᠢᠲᠡᠨ ᠪᠠᠢᠯᠠ᠂ ᠭᠡᠪᠡᠴᠦ ᠰᠢᠨᠠᠯᠠᠮᠠ ᠶ᠋ᠢᠨ ᠲᠣᠮᠢᠯᠠᠭᠰᠠᠨ ᠨᠢᠭᠡᠳᠦᠭᠡᠷ ᠯᠢᠶᠠᠨ ᠤ᠋ ᠥᠯᠵᠡᠢᠵᠢᠷᠭᠠᠯ ᠲᠦᠷᠦᠭᠦᠲᠠᠢ ᠠᠷᠪᠠᠨ ᠬᠣᠶᠠᠷ ᠴᠡᠷᠢᠭ ᠪᠠᠢ ᠵᠢᠶᠠ ᠸᠠᠨ ᠲᠣᠬᠣᠢ ᠪᠠᠷ ᠬᠦᠢᠲᠡᠨ ᠰᠢᠭᠤᠷᠭᠠᠨ ᠢ᠋ ᠲᠡᠰᠪᠦᠷᠢᠯᠡᠨ ᠴᠠᠭᠳᠠᠨ ᠪᠠᠢᠴᠠᠭᠠᠬᠤ ᠡᠭᠦᠷᠭᠡ ᠶ᠋ᠢ ᠭᠦᠢᠴᠡᠳᠬᠡᠵᠦ ᠶᠠᠪᠤᠵᠤ ᠪᠠᠢᠵᠠᠢ᠃ ᠲᠡᠳᠡ ᠪᠠᠢ ᠵᠢᠶᠠ ᠸᠠᠨ ᠲᠣᠬᠣᠢ ᠳ᠋ᠠᠬᠢ ᠨᠢᠭᠡ ᠲᠠᠷᠢᠶᠠᠴᠢᠨ ᠡᠷᠦᠬᠡ ᠳ᠋ᠦ᠍ ᠪᠠᠭᠤᠵᠤ ᠦᠳᠡ ᠶ᠋ᠢᠨ ᠬᠣᠭᠣᠯᠠ ᠢᠳᠡᠵᠦ ᠪᠠᠢᠲᠠᠯᠠ᠂ ᠲᠡᠮᠡᠭᠡᠲᠦ ᠬᠣᠲᠠ(ᠢᠦᠢ ᠯᠢᠨ) ᠡᠴᠡ ᠢᠷᠡᠭᠰᠡᠨ ᠦᠦᠰᠢᠨ ᠨᠣᠶᠠᠨ ᠤ᠋ ᠭᠤᠴᠢ ᠭᠠᠷᠤᠢ ᠮᠣᠷᠢᠲᠤ ᠴᠡᠷᠢᠭ ᠭᠡᠨᠡᠳᠲᠡ ᠲᠤᠰ ᠡᠷᠦᠬᠡ ᠶ᠋ᠢᠨ ᠨᠦᠬᠡᠨ ᠭᠡᠷ ᠦ᠋ᠨ ᠣᠷᠣᠢ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠭᠡᠳ ᠬᠦᠷᠢᠶᠡᠨ(ᠡᠭᠦᠳᠡᠨ ᠡᠮᠦᠨᠡ) ᠵᠦᠭ ᠫᠤᠤᠳᠠᠪᠠ᠃
ᠭᠱᠠᠨ ᠵᠠᠭᠤᠷᠠ ᠪᠠᠢᠯᠳᠤᠭᠠᠨ ᠰᠢᠷᠦᠭᠦᠰᠴᠦ᠂ ᠲᠠᠷᠢᠶᠠᠴᠢᠨ ᠡᠷᠦᠬᠡ ᠶ᠋ᠢᠨ ᠬᠦᠷᠢᠶᠡᠨ ᠳ᠋ᠦ᠍ ᠪᠠᠢᠭᠰᠠᠨ ᠲᠠᠷᠭᠤᠨ ᠭᠠᠬᠠᠢ ᠴᠤ᠌ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠵᠤ ᠦᠬᠦᠯᠡ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠬᠥᠮᠦᠨ ᠣᠯᠠᠨ ᠮᠥᠷᠲᠡᠭᠡᠨ ᠪᠠᠢᠯᠳᠤᠬᠤ ᠳ᠋ᠤ᠌ ᠠᠰᠢᠭᠲᠠᠢ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠶ᠋ᠢ ᠡᠵᠡᠯᠡᠵᠦ ᠪᠠᠢᠳᠠᠯ ᠮᠠᠰᠢ ᠲᠦᠭᠰᠢᠭᠦᠷᠢᠲᠡᠢ ᠪᠣᠯᠵᠤ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠬᠡᠳᠦᠬᠡᠨ ᠴᠡᠷᠢᠭ ᠢ᠋ ᠨᠦᠬᠡᠨ ᠭᠡᠷ ᠪᠣᠯᠤᠨ ᠬᠦᠷᠢᠶᠡᠨ ᠳᠣᠲᠣᠷᠠ ᠪᠦᠰᠡᠯᠡᠵᠡᠢ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠳᠠᠪᠠᠭᠤ ᠬᠦᠴᠦᠨ ᠳ᠋ᠡᠭᠡᠨ ᠣᠮᠣᠭᠰᠢᠵᠤ ᠡᠴᠢᠭᠡ ᠡᠪᠦᠭᠡ ᠦᠭᠡᠢ ᠳᠣᠯᠣᠭᠠᠨ ᠢ᠋ ᠨᠢ ᠳᠤᠷᠠᠳᠴᠤ᠄《ᠬᠣᠰᠢᠭᠤ ᠶ᠋ᠢ ᠰᠠᠮᠠᠭᠤᠷᠠᠭᠤᠯᠤᠭᠰᠠᠨ ᠵᠣᠯᠢᠭ ᠤ᠋ᠳ! ᠡᠵᠡᠨ ᠨᠣᠶᠠᠨ ᠢ᠋ᠶ᠋ᠠᠨ ᠠᠭᠤᠷᠯᠠᠭᠤᠯᠤᠨ ᠡᠯᠳᠡᠪ ᠢ᠋ ᠦᠢᠯᠡᠳᠦᠭᠰᠡᠨ ᠡᠯᠵᠢᠭᠡ ᠨᠦ᠍ᠭᠦᠳ ᠁ ᠦᠬᠦᠬᠦ ᠴᠠᠭ ᠴᠢᠨᠢ ᠣᠳᠣ ᠲᠤᠯᠵᠠᠢ ᠁》 ᠭᠡᠮᠡᠨ ᠨᠦᠬᠡᠨ ᠭᠡᠷ ᠦ᠋ᠨ ᠣᠷᠣᠢ ᠳᠡᠭᠡᠷᠡ ᠡᠴᠡ ᠬᠠᠷᠢᠶᠠᠬᠤ ᠶ᠋ᠢᠨ ᠳᠠᠭᠠᠤ ᠬᠠᠷᠪᠤᠨᠠ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠣᠶᠠᠳᠤᠭᠠᠷ ᠫᠠᠢ ᠶ᠋ᠢᠨ ᠫᠠᠢᠵᠠᠩ ᠪᠣᠶᠠᠨᠳᠡᠯᠭᠡᠷ ᠦ᠋ᠨ ᠬᠦᠦ ᠪᠠᠶᠠᠨᠰᠠᠩ ᠶᠡᠬᠡ ᠯᠡ ᠣᠮᠣᠭ ᠰᠦᠷ ᠲᠡᠢ ᠪᠡᠷ ᠵᠠᠨᠠᠭ ᠬᠥᠮᠦᠨ ᠦ᠌ ᠬᠠᠷᠢᠶᠠᠯ ᠢ᠋ᠶ᠋ᠠᠷ ᠄《ᠮᠠᠭᠤ ᠬᠦᠦ ᠴᠢ ᠴᠢᠳᠠᠯ ᠪᠠᠢᠪᠠᠯ ᠭᠠᠷᠤᠭᠠᠳ ᠢᠷᠡ! ᠡᠴᠢᠭᠡ ᠴᠢᠨᠢ ᠴᠢᠮᠠᠲᠤ ᠰᠤᠮᠤᠨ ᠤ᠋ ᠠᠮᠲᠠ ᠶ᠋ᠢ ᠦᠵᠡᠭᠦᠯᠦᠶᠡ》 ᠭᠡᠳ ᠭᠠᠷ ᠫᠤᠤ ᠪᠠᠨ ᠭᠠᠷᠭᠠᠨ ᠥᠯᠵᠠᠢᠵᠢᠷᠭᠠᠯ ᠢ᠋ ᠬᠠᠷᠪᠤᠬᠤ ᠵᠠᠪᠳᠤᠲᠠᠯᠠ᠂ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠠᠷᠪᠠᠨ ᠵᠢᠷᠭᠤᠭᠠᠨ ᠳᠡᠭᠡᠷᠡᠮ ᠦ᠋ᠨ ᠴᠡᠷᠢᠭ ᠢ᠋ ᠤᠰᠠᠳᠬᠠᠭᠰᠠᠨ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠪᠠᠲᠤᠰᠡᠷᠡᠩ ᠬᠠᠳᠠᠨ ᠪᠤᠯᠤ ᠶ᠋ᠢᠨ ᠠᠷᠤ ᠠ᠋ᠴᠠ ᠲᠡᠭᠦᠨ ᠢ᠋ ᠨᠢᠭᠡ ᠯᠡ ᠬᠠᠷᠪᠤᠭᠰᠠᠨ ᠳ᠋ᠤ᠌ ᠪᠠᠷᠠᠭᠤᠨ ᠭᠠᠷ ᠨᠢ ᠣᠨᠣᠭᠳᠠᠵᠤ ᠥᠨᠥ ᠶ᠋ᠢᠨ ᠭᠠᠢᠬᠠᠭᠤᠯᠤᠭᠰᠠᠨ ᠭᠠᠷ ᠫᠤᠤ ᠨᠢ ᠴᠦ᠍ ᠭᠠᠵᠠᠷ ᠤᠨᠠᠵᠠᠢ᠃
ᠥᠯᠵᠠᠢᠵᠢᠷᠭᠠᠯ ᠶᠡᠬᠡ ᠳᠠᠭᠤᠨ ᠢ᠋ᠶ᠋ᠠᠷ ᠄《ᠲᠠᠨᠤᠰ ᠬᠠᠷᠪᠤᠬᠤ ᠪᠠᠨ ᠵᠣᠭᠰᠣ! ᠦᠦᠰᠢᠨ ᠬᠥᠮᠦᠨ᠂ ᠦᠦᠰᠢᠨ ᠬᠥᠮᠦᠨ ᠢ᠋ᠶ᠋ᠡᠨ ᠠᠯᠠᠭᠠᠳ ᠶᠠᠭᠠᠬᠢᠬᠤ ᠶᠤᠮ ᠪᠣᠢ⁈ ᠲᠠ ᠨᠠᠷ ᠨᠣᠶᠠᠨ ᠢ᠋ ᠳᠠᠭᠠᠭᠤᠯᠤᠨ ᠬᠤᠰᠢᠭᠤᠨ ᠳ᠋ᠠᠭᠠᠨ ᠬᠠᠷᠢᠵᠤ ᠢᠷᠡᠪᠡᠯ ᠪᠢᠳᠡ ᠪᠠᠶᠠᠷᠯᠠᠨ ᠤᠭᠲᠤᠨᠠ ᠁》 ᠭᠡᠯᠡ᠃ ᠡᠨᠡ ᠦᠶᠡ ᠳ᠋ᠦ᠍᠂ ᠨᠦᠬᠡᠨ ᠭᠡᠷ ᠦ᠋ᠨ ᠣᠷᠣᠢ ᠳᠡᠭᠡᠷᠡ ᠪᠠᠢᠭᠰᠠᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠡᠴᠡ ᠨᠢᠭᠡ ᠵᠠᠯᠠᠭᠤ ᠦᠰᠦᠷᠦᠨ ᠪᠠᠭᠤᠭᠠᠳ᠄ 《ᠪᠢ ᠲᠠᠨᠤᠰ ᠢ᠋ ᠳᠠᠭᠠᠶᠠ》 ᠭᠡᠮᠡᠨ ᠬᠠᠰᠬᠢᠷᠪᠠ᠃ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠲᠡᠭᠦᠨ ᠢ᠋ ᠡᠭᠦᠷᠦᠨ ᠨᠦᠬᠡᠨ ᠭᠡᠷ ᠲᠦ᠍ ᠳᠠᠯᠳᠠᠯᠠᠭᠰᠠᠨ ᠳ᠋ᠤ᠌ ᠬᠠᠷᠢᠯᠴᠠᠨ ᠨᠢᠭᠡᠨ ᠨᠢᠭᠡᠨ ᠳ᠋ᠡᠭᠡᠨ ᠲᠠᠯᠠᠷᠬᠠᠵᠤ ᠪᠠᠢᠯᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠲᠡᠳᠡᠨ ᠦ᠌ ᠳᠠᠯᠳᠠᠯᠠᠵᠤ ᠪᠠᠢᠭᠠ ᠨᠦᠬᠡᠨ ᠭᠡᠷ ᠦ᠋ᠨ ᠡᠮᠦᠨᠡ ᠡᠴᠡ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠤᠯᠠᠭᠠᠢ ᠰᠤᠮᠤ ᠲᠤᠢᠯ ᠤ᠋ᠨ ᠣᠨᠣᠪᠴᠢᠲᠠᠢ ᠲᠣᠰᠴᠤ ᠪᠠᠢᠯᠠ᠃ ᠨᠠᠷᠢᠨ ᠠᠵᠢᠭᠯᠠᠬᠤ ᠳ᠋ᠤ᠌ ᠬᠠᠷᠢᠨ ᠨᠦᠬᠡᠨ ᠭᠡᠷ ᠦ᠋ᠨ ᠣᠢᠷᠠᠯᠴᠠᠭᠠ ᠭᠣᠣᠯ ᠤ᠋ᠨ ᠵᠡᠪᠡ ᠬᠣᠩᠭᠢᠯ ᠳ᠋ᠤ᠌ ᠤᠷᠭᠤᠭᠰᠠᠨ ᠪᠦᠳᠦᠭᠦᠨ ᠤᠳᠠ ᠮᠣᠳᠣᠨ ᠳᠡᠭᠡᠷᠡ ᠡᠴᠡ ᠨᠢᠭᠡ ᠴᠡᠷᠢᠭ ᠨᠦᠬᠡᠨ ᠭᠡᠷ ᠥᠭᠡᠳᠡ ᠣᠨᠣᠪᠴᠢᠲᠠᠢ ᠭᠠᠯᠯᠠᠵᠤ ᠪᠠᠢᠵᠠᠢ᠃ ᠬᠠᠳᠠᠨ ᠪᠤᠯᠤ ᠶ᠋ᠢᠨ ᠠᠷᠤ ᠠ᠋ᠴᠠ ᠪᠠᠲᠦᠰᠡᠷᠡᠩ ᠣᠯᠵᠤ ᠦᠵᠡᠭᠡᠳ ᠲᠡᠭᠦᠨ ᠢ᠋ ᠨᠢᠭᠡ ᠯᠡ ᠬᠠᠷᠪᠤᠭᠰᠠᠨ ᠳ᠋ᠤ᠌ ᠲᠡᠷᠡ ᠴᠡᠷᠢᠭ ᠦ᠋ᠨ ᠲᠣᠯᠣᠭᠠᠢ ᠨᠢ ᠳᠣᠭᠣᠭᠰᠢ ᠬᠠᠨᠳᠤᠨ ᠬᠥᠯ ᠨᠢ ᠮᠣᠳᠣᠨ ᠰᠠᠯᠠᠭᠠᠨ ᠳ᠋ᠤ᠌ ᠳᠡᠭᠦᠵᠢᠯᠡᠭᠳᠡᠨ ᠦᠬᠦᠯᠡ᠃
ᠶᠠᠭ ᠡᠨᠡ ᠵᠠᠪᠰᠢᠶᠠᠨ ᠢ᠋ᠶ᠋ᠠᠷ ᠨᠦᠬᠡᠨ ᠭᠡᠷ ᠪᠣᠯᠤᠨ ᠬᠦᠷᠢᠶᠡᠨ ᠳ᠋ᠦ᠍ ᠪᠡᠶᠡ ᠳᠠᠯᠳᠠᠯᠠᠵᠤ ᠪᠠᠢᠯᠳᠤᠨ ᠪᠠᠢᠭᠠ ᠴᠡᠷᠢᠭ ᠦ᠋ᠳ ᠭᠠᠳᠠᠭᠰᠢ ᠦᠰᠦᠷᠦᠨ ᠭᠠᠷᠴᠤ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠲᠣᠬᠢᠯᠢᠭ ᠭᠠᠵᠠᠷ ᠤ᠋ᠨ ᠪᠠᠢᠴᠠ ᠶ᠋ᠢ ᠠᠰᠢᠭᠯᠠᠵᠤ ᠰᠢᠷᠦᠭᠦᠨ ᠢ᠋ᠶ᠋ᠡᠷ ᠭᠠᠯᠯᠠᠬᠤ ᠳ᠋ᠤ᠌ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠨᠢᠭᠡ ᠬᠥᠮᠦᠨ ᠢ᠋ᠶ᠋ᠡᠨ ᠬᠣᠬᠢᠷᠠᠭᠤᠯᠤᠭᠰᠠᠨ ᠠ᠋ᠴᠠ ᠵᠣᠷᠢᠭ ᠮᠣᠬᠣᠭᠰᠠᠨ ᠶᠤᠮ ᠤᠤ ᠪᠤᠤ ᠮᠡᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠤᠬᠤᠷᠢᠯᠠ᠃ ᠰᠢᠨᠠᠯᠠᠮᠠ ᠶ᠋ᠢᠨ ᠴᠡᠷᠢᠭ ᠦ᠋ᠳ ᠠᠷᠪᠠᠭᠠᠳ ᠭᠠᠵᠠᠷ ᠨᠡᠬᠡᠮᠵᠢᠯᠡᠨ ᠬᠥᠭᠡᠭᠡᠳ ᠨᠢᠭᠡᠨᠲᠡ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠢᠦᠢ ᠯᠢᠨ ᠰᠢᠶᠠᠨ ᠤ᠋ ᠬᠠᠷᠢᠶᠠ ᠭᠠᠵᠠᠷ ᠬᠦᠷᠦᠭᠰᠡᠨ ᠳ᠋ᠦ᠍ ᠨᠡᠬᠡᠮᠵᠢᠯᠡᠬᠦ ᠪᠡᠨ ᠵᠣᠭᠰᠣᠪᠠ᠃ ᠲᠡᠳᠡ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠡᠭᠡᠨ ᠪᠤᠴᠠᠵᠤ ᠴᠡᠷᠢᠭ ᠮᠣᠷᠢ ᠪᠠᠨ ᠠᠮᠠᠷᠠᠭᠤᠯᠤᠭᠰᠠᠨ ᠶᠤᠮ᠃①
— — — —
① ᠡᠨᠡ ᠦᠯᠢᠭᠡᠷ ᠢ᠋1981 ᠣᠨ ᠳ᠋ᠤ᠌ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠬᠠᠭᠤᠴᠢᠨ ᠰᠡᠬᠡᠭᠡᠲᠡᠨ ᠬᠠᠲᠠᠭᠢᠨ ᠴᠠᠭᠠᠨᠳᠤᠩ ᠨᠠᠰᠤᠲᠠᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠪᠡ᠃
4᠂ ᠬᠠᠯᠢᠭᠤᠲᠤ ᠶ᠋ᠢᠨ ᠲᠣᠬᠣᠢ ᠶ᠋ᠢᠨ ᠪᠠᠢᠯᠳᠤᠭᠠᠨ
1927 ᠣᠨ ᠳ᠋ᠤ᠌ ᠦᠦᠰᠢᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠨᠣᠶᠠᠨ ᠲᠡᠭᠦᠰᠠᠠᠮᠤᠭᠤᠯᠠᠩ ᠢ᠋ᠶ᠋ᠠᠨ ᠳᠠᠭᠠᠨ ᠬᠠᠮᠠᠭᠠᠯᠠᠵᠤ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠢᠦᠢ ᠯᠢᠨ(ᠲᠡᠮᠡᠭᠡᠲᠦ ᠬᠣᠲᠠ) ᠳ᠋ᠤ᠌ ᠬᠦᠷᠴᠦ ᠰᠠᠭᠤᠵᠠᠢ᠃
ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠢᠷᠭᠡᠨ ᠤᠯᠤᠰ ᠤ᠋ᠨ86 ᠳ᠋ᠤᠭᠠᠷ ᠱᠢ ᠶ᠋ᠢᠨ ᠴᠡᠷᠢᠭ ᠦ᠋ᠨ ᠲᠦᠷᠦᠭᠦᠦ ᠵᠢᠩ ᠶᠤᠸᠠᠢ ᠰᠢᠦ(ᠴᠡᠷᠢᠭ ᠵᠠᠰᠠᠭ ᠪᠦᠭᠦᠳᠡ ᠶ᠋ᠢ ᠬᠠᠮᠢᠶᠠᠷᠤᠭᠰᠠᠨ ᠲᠦᠩᠯᠢᠩ ᠵᠠᠬᠢᠷᠤᠭᠴᠢ) ᠰᠸᠯᠢᠩ᠂ ᠦᠦᠰᠢᠨ ᠨᠣᠶᠠᠨ ᠲᠡᠭᠦᠰᠠᠠᠮᠤᠭᠤᠯᠠᠩ ᠪᠣᠯᠤᠨ ᠲᠦᠰᠢᠮᠡᠯ ᠳᠠᠭᠠᠯ ᠤ᠋ᠳ ᠢ᠋ ᠢᠦᠢ ᠯᠢᠨ ᠬᠣᠲᠠ ᠶ᠋ᠢᠨ ᠭᠣᠣᠯ ᠵᠡᠭᠡᠯᠢ ᠶ᠋ᠢᠨ ᠶᠡᠬᠡ ᠲᠠᠭᠲᠤ(ᠮᠣᠳᠣᠨ ᠠᠰᠠᠷ) ᠲᠤ᠌ ᠰᠠᠭᠠᠲᠠᠭᠤᠯᠵᠤ᠂ ᠪᠤᠰᠤᠳ ᠴᠡᠷᠢᠭ ᠵᠠᠰᠠᠭ ᠤ᠋ᠨ ᠬᠥᠮᠦᠰ(ᠵᠠᠷᠢᠮ ᠦᠶᠡ ᠳ᠋ᠦ᠍ ᠵᠠᠭᠤ ᠰᠢᠬᠠᠮ ᠬᠥᠮᠦᠨ ᠪᠣᠯᠴᠢᠬᠠᠳᠠᠭ ᠭᠡᠨᠡ) ᠶ᠋ᠢ ᠲᠤᠰᠬᠠᠢ ᠭᠠᠵᠠᠷ ᠲᠣᠬᠢᠷᠠᠭᠤᠯᠵᠤ ᠰᠠᠭᠤᠯᠭᠠᠭᠰᠠᠨ ᠪᠣᠯᠪᠠᠴᠤ ᠲᠡᠳᠡᠨ ᠦ᠌ ᠬᠡᠷᠡᠭᠯᠡᠬᠦ ᠡᠳ᠋ ᠪᠣᠳᠠᠰ᠂ ᠢᠳᠡᠵᠦ ᠤᠤᠭᠤᠬᠤ᠂ ᠴᠡᠷᠢᠭ ᠦ᠋ᠨ ᠠᠭᠲᠠ ᠶ᠋ᠢᠨ ᠲᠡᠵᠢᠭᠡᠯ ᠪᠣᠷᠳᠣᠭᠠ ᠳ᠋ᠤ᠌ ᠮᠥᠩᠭᠥ ᠵᠣᠭᠣᠰ ᠴᠢᠬᠤᠯᠠ ᠲᠠᠢ ᠪᠠᠢᠪᠠ᠃ ᠡᠢᠮᠦ ᠡᠴᠡ ᠲᠡᠳᠡᠭᠡᠷ ᠴᠡᠷᠢᠭ ᠦ᠋ᠨ ᠵᠠᠷᠢᠮ ᠨᠢ ᠦᠦᠰᠢᠨ ᠳ᠋ᠡᠭᠡᠨ ᠨᠢᠭᠤᠴᠠ ᠪᠠᠷ ᠬᠠᠷᠢᠵᠤ ᠢᠷᠡᠭᠡᠳ ᠭᠡᠷ ᠭᠡᠷ ᠡᠴᠡ ᠪᠡᠨ ᠠᠪᠠᠴᠢᠳᠠᠭ ᠪᠠᠢᠨᠠ᠃
ᠰᠢᠨᠡᠯᠡᠮᠡ ᠶ᠋ᠢᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠮᠣᠷᠢᠲᠤ ᠴᠡᠷᠢᠭ ᠦ᠋ᠳ ᠡᠨᠡ ᠪᠠᠢᠳᠠᠯ ᠳ᠋ᠤ᠌ ᠴᠢᠭᠯᠡᠭᠦᠯᠦᠨ ᠮᠡᠢᠷᠡᠨ ᠰᠦᠮᠡ᠂ ᠤᠯᠠᠭᠠᠨᠲᠣᠯᠣᠭᠠᠢ ᠶ᠋ᠢᠨ ᠰᠦᠮᠡ᠂ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ᠂ ᠲᠤᠭᠠᠷ ᠤ᠋ᠨ ᠲᠣᠬᠣᠢ(ᠳᠤᠭᠠᠷᠵᠠᠪ) ᠰᠢᠪᠠᠷ ᠰᠦᠮᠡ ᠵᠡᠷᠭᠡ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠡᠮᠦᠨᠡᠲᠦ ᠵᠠᠬᠠ ᠬᠢᠵᠠᠭᠠᠷ ᠢ᠋ᠶ᠋ᠠᠷ ᠦᠷᠭᠦᠯᠵᠢ ᠴᠠᠭᠳᠠᠨ ᠰᠡᠷᠭᠡᠢᠯᠡᠵᠦ ᠠᠷᠠᠳ ᠢ᠋ ᠠᠮᠤᠷᠵᠢᠭᠤᠯᠤᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠢ᠋ ᠬᠢᠵᠠᠭᠠᠷᠯᠠᠬᠤ ᠠᠷᠭᠠ ᠪᠣᠳᠣᠯᠭᠠ ᠠᠪᠤᠪᠠ᠃ ᠲᠡᠳᠡ ᠤᠯᠠᠮ ᠢ᠋ᠶ᠋ᠠᠷ ᠬᠦᠴᠢᠷᠳᠡᠵᠦ ᠵᠠᠪᠰᠠᠷ ᠵᠠᠪ ᠪᠠᠢᠪᠠᠯ ᠨᠢᠭᠤᠴᠠ ᠪᠠᠷ ᠭᠡᠨᠡᠳᠡᠭᠦᠯᠦᠨ ᠭᠠᠷᠴᠤ ᠢᠷᠡᠭᠡᠳ ᠪᠡᠯᠴᠢᠭᠡᠷ ᠳᠠᠬᠢ ᠮᠠᠯ ᠰᠦᠷᠦᠭ ᠢ᠋ ᠲᠠᠭᠤᠵᠤ ᠬᠤᠯᠠᠭᠠᠢᠯᠠᠨ ᠪᠤᠯᠢᠶᠠᠵᠤ ᠰᠦᠷᠳᠡᠭᠦᠯᠬᠦ ᠵᠡᠷᠭᠡ ᠳᠡᠭᠡᠷᠡᠮᠳᠡᠬᠦ ᠶᠠᠪᠤᠳᠠᠯ ᠤ᠋ᠳ ᠢ᠋ ᠦᠢᠯᠡᠳᠳᠡᠭ ᠪᠣᠯᠵᠠᠢ᠃
1928 ᠣᠨ ᠤ᠋ ᠥᠭᠡᠯᠵᠢᠨ ᠰᠠᠷᠠ ᠶ᠋ᠢᠨ ᠰᠡᠭᠦᠯᠴᠢ ᠪᠡᠷ ᠮᠠᠯᠴᠢᠳ ᠬᠠᠭᠤᠴᠢᠨ ᠵᠢᠯ ᠢ᠋ᠶ᠋ᠡᠨ ᠦᠳᠡᠵᠦ ᠰᠢᠨᠡ ᠵᠢᠯ ᠢ᠋ᠶ᠋ᠡᠨ ᠤᠭᠲᠤᠬᠤ ᠭᠡᠵᠦ ᠶᠠᠭᠠᠷᠠᠯᠳᠤᠵᠤ ᠪᠠᠢᠬᠤ ᠶ᠋ᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠳᠥᠴᠢ ᠭᠠᠷᠤᠢ ᠮᠣᠷᠢᠲᠠᠢ ᠬᠥᠮᠦᠰ ᠬᠠᠯᠢᠭᠤᠲᠤ ᠶ᠋ᠢᠨ ᠭᠣᠣᠯ ᠷᠠᠰᠢᠶᠠᠨ ᠲᠣᠬᠣᠢ ᠭᠡᠳᠡᠭ ᠭᠠᠵᠠᠷ ᠤ᠋ᠳ ᠢ᠋ᠶ᠋ᠠᠷ ᠪᠡᠯᠴᠢᠭᠡᠷᠯᠡᠵᠦ ᠪᠠᠢᠭᠰᠠᠨ ᠮᠣᠷᠢ ᠦᠬᠡᠷ ᠢ᠋ ᠳᠡᠭᠡᠷᠡᠮᠳᠡᠨ ᠠᠪᠴᠤ ᠠᠷᠪᠠᠭᠠᠳ ᠴᠡᠷᠢᠭ ᠨᠢ ᠡᠮᠦᠨᠡᠰᠢ ᠢᠦᠢ ᠯᠢᠨ ᠵᠦᠭ ᠶᠠᠪᠤᠴᠢᠬᠠᠵᠠᠢ᠃ ᠦᠯᠡᠳᠡᠭᠰᠡᠨ ᠭᠤᠴᠢ ᠭᠠᠷᠤᠢ ᠴᠡᠷᠢᠭ ᠨᠢ ᠨᠣᠶᠠᠨ ᠤ᠋ ᠪᠠᠨ ᠨᠢᠭᠤᠴᠠ ᠵᠠᠬᠢᠶᠠ ᠪᠠᠷ᠄《ᠡᠨᠡ ᠬᠡᠳᠦᠨ ᠡᠳᠦᠷ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠮᠣᠯᠣᠮ ᠭᠠᠩᠰᠠ ᠬᠤᠷᠠᠵᠤ ᠪᠠᠢᠬᠤ ᠶᠤᠮ ᠰᠢᠦ! ᠯᠠᠮᠠ ᠨᠠᠷ ᠪᠦᠷ ᠢᠷᠡᠴᠢᠬᠡᠭᠰᠡᠨ ᠪᠠᠢᠬᠠ᠂ ᠲᠠᠨᠤᠰ ᠠᠷᠭᠠᠯᠠᠵᠤ ᠪᠠᠢᠭᠠᠳ ᠭᠡᠨᠳᠦᠨᠯᠢᠭ᠌ᠰᠣᠭ ᠢ᠋ ᠰᠠᠯᠠ ᠳᠠᠪᠠᠭᠠᠨ ᠳ᠋ᠤᠨᠢ ᠮᠣᠷᠳᠠᠭᠤᠯᠤᠭᠠᠴᠢ(ᠠᠯᠠ ᠭᠡᠰᠡᠨ ᠤᠳᠬᠠ ᠲᠠᠢ) !》 ᠭᠡᠰᠡᠨ ᠢ᠋ ᠪᠡᠶᠡᠯᠡᠭᠦᠯᠬᠦ ᠪᠡᠷ ᠬᠣᠴᠣᠷᠤᠭᠰᠠᠨ ᠪᠠᠢᠨᠠ᠃
ᠭᠡᠨᠳᠦᠨᠯᠢᠭ᠌ᠰᠣᠭ ᠪᠣᠯ ᠭᠠᠯᠠᠭᠤᠲᠤ ᠶ᠋ᠢᠨ ᠬᠥᠬᠡᠲᠣᠯᠣᠭᠠᠢ ᠳ᠋ᠤ᠌ ᠨᠤᠲᠤᠭ ᠲᠠᠢ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠱᠠᠪᠷᠤᠩ ᠶᠤᠮ᠃ ᠲᠡᠷᠡ ᠮᠣᠩᠭᠣᠯ ᠲᠥᠪᠡᠳ ᠪᠢᠴᠢᠭ ᠮᠡᠳᠡᠳᠡᠭ ᠨᠣᠮ ᠲᠠᠷᠨᠢ ᠳ᠋ᠤ᠌ ᠴᠠᠭᠠᠷᠠᠭᠰᠠᠨ ᠬᠥᠮᠦᠨ᠃ ᠭᠡᠨᠳᠦᠨᠯᠢᠭ᠌ᠰᠣᠭ ᠱᠠᠪᠷᠤᠩ ᠪᠤᠰᠤᠳ ᠳᠦᠷᠢ ᠶ᠋ᠢᠨ ᠱᠠᠪᠷᠤᠩ ᠬᠤᠲᠤᠭᠲᠠᠨ ᠲᠠᠢ ᠠᠳᠠᠯᠢ《ᠯᠠᠮᠠ ᠶ᠋ᠢᠨ ᠭᠤᠷᠪᠠᠨ ᠡᠷᠳᠡᠨᠢ》 ᠳ᠋ᠡᠭᠡᠨ ᠢᠲᠡᠭᠡᠵᠦ ᠪᠤᠷᠬᠠᠨ ᠢ᠋ᠶ᠋ᠠᠨ ᠵᠢᠭᠠᠭᠠᠳ ᠨᠠᠰᠤ ᠪᠠᠷ ᠢ᠋ᠶ᠋ᠠᠨ ᠨᠡᠢᠭᠡᠮ ᠨᠡᠢᠲᠡ ᠡᠴᠡ ᠵᠠᠢᠳᠠᠵᠤ ᠰᠦᠮᠡ ᠳᠡᠭᠡᠷᠡ ᠪᠡᠨ ᠣᠯᠪᠣᠭ ᠢ᠋ᠶ᠋ᠠᠨ ᠡᠯᠡᠭᠡᠲᠡᠯᠡ ᠰᠠᠭᠤᠵᠤ ᠳ᠋ᠠᠩ ᠭᠠᠭᠴᠠ ᠰᠦᠰᠦᠭ ᠪᠢᠰᠢᠷᠡᠯ ᠢ᠋ ᠪᠢᠰᠢᠯᠭᠠᠭᠰᠠᠨ ᠬᠤᠲᠤᠭᠲᠠᠨ ᠱᠠᠪᠷᠤᠩ ᠪᠤᠰᠤ᠂ ᠬᠠᠷᠢᠨ ᠤᠯᠤᠰ ᠦᠨᠳᠦᠰᠦᠲᠡᠨ ᠦ᠌ ᠡᠷᠬᠡ ᠴᠢᠯᠥᠭᠡ ᠶ᠋ᠢ ᠪᠣᠳᠣᠯᠬᠢᠯᠠᠵᠤ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠳ᠋ᠦ᠍ ᠢᠳᠡᠪᠬᠢᠲᠡᠢ ᠣᠷᠣᠯᠴᠠᠭᠰᠠᠨ ᠬᠤᠪᠢᠰᠬᠠᠯᠴᠢ ᠶᠤᠮ᠃ ᠰᠢᠨᠡᠯᠡᠮᠡ ᠪᠤᠭᠤᠲᠤ ᠬᠣᠲᠠ ᠳ᠋ᠤ᠌ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠴᠡᠷᠢᠭ ᠦ᠋ᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠ ᠶ᠋ᠢ ᠵᠣᠬᠢᠶᠠᠨ ᠪᠠᠢᠭᠤᠯᠬᠤ ᠳ᠋ᠤ᠌ ᠭᠡᠨᠳᠥᠨᠯᠢᠭᠰᠤᠭ ᠨᠢᠭᠡᠳᠦᠭᠡᠷ ᠶᠢᠩ ᠦ᠋ᠨ ᠶᠢᠩᠵᠠᠩ ᠢ᠋ᠶ᠋ᠠᠷ ᠰᠣᠩᠭᠣᠭᠳᠠᠵᠤ᠂ ᠰᠡᠭᠦᠯᠳᠡᠵᠦ ᠦᠦᠰᠢᠨ ᠳ᠋ᠡᠭᠡᠨ ᠪᠤᠴᠠᠨ ᠢᠷᠡᠭᠡᠳ ᠴᠡᠷᠢᠭ ᠳᠠᠢᠴᠢᠯᠠᠵᠤ ᠨᠤᠲᠤᠭ ᠤᠰᠤ ᠪᠠᠨ ᠬᠠᠮᠠᠭᠠᠯᠠᠪᠠ᠃
ᠲᠤᠬᠠᠢ ᠶ᠋ᠢᠨ ᠦᠶᠡ ᠳ᠋ᠦ᠍ ᠣᠯᠠᠨ ᠲᠦᠮᠡᠨ ᠦ᠌ ᠳᠤᠮᠳᠠ᠄
ᠬᠣᠷᠢᠶᠠ ᠶᠢᠩ ᠦ᠋ᠨ ᠶᠢᠩᠵᠠᠩ ᠨᠢ
ᠬᠤᠲᠤᠭᠲᠠᠨ ᠮᠡᠷᠭᠡᠨ ᠨᠣᠶᠠᠳ ᠪᠣᠢ᠂
ᠬᠣᠣᠷᠲᠠᠨ ᠳᠠᠢᠰᠤᠨ ᠢ᠋ ᠤᠰᠠᠳᠬᠠᠬᠤ ᠳ᠋ᠤ᠌
ᠬᠤᠪᠢᠯᠭᠠᠨ ᠴᠣᠢᠵᠣᠩ ᠪᠤᠷᠬᠠᠨ ᠰᠢᠦ!
ᠭᠡᠵᠦ ᠳᠠᠭᠤᠯᠠᠵᠤ ᠪᠠᠢᠭᠰᠠᠨ᠃
ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠷᠠᠰᠢᠶᠠᠨ ᠲᠣᠬᠣᠢ ᠶ᠋ᠢᠨ ᠪᠢᠴᠢᠬᠠᠨ ᠴᠠᠭᠠᠨᠰᠥ᠋ᠮᠡ ᠳᠡᠭᠡᠷᠡ ᠪᠦᠭᠭᠦᠵᠦ ᠭᠡᠨᠳᠥᠨᠯᠢᠭᠰᠤᠭ ᠱᠠᠪᠷᠤᠩ ᠢ᠋ ᠬᠣᠣᠷᠯᠠᠬᠤ ᠪᠠᠷ ᠠᠷᠭᠠ ᠪᠣᠳᠣᠵᠠᠭᠠᠨᠠ᠃
ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠰᠠᠢᠨ ᠡᠷᠡ ᠳᠠᠨᠽᠠᠨᠵᠠᠮᠰᠤ ᠫᠠᠢᠵᠠᠩ ᠪᠡᠶᠡ ᠪᠡᠷ ᠢ᠋ᠶ᠋ᠡᠨ ᠯᠠᠮᠠ ᠬᠤᠪᠴᠠᠰᠤ ᠡᠮᠦᠰᠴᠦ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠣᠴᠢᠵᠤ ᠪᠠᠢᠳᠠᠯ ᠢ᠋ ᠣᠢᠯᠠᠭᠠᠬᠤ ᠶ᠋ᠢᠨ ᠳᠠᠭᠠᠤ ᠲᠣᠬᠢᠶᠠᠯ ᠲᠠᠭᠠᠷᠠᠪᠠᠯ ᠭᠡᠨᠳᠥᠨᠯᠢᠭᠰᠤᠭ ᠱᠠᠪᠷᠤᠩ ᠢ᠋ ᠬᠣᠣᠷᠯᠠᠬᠤ ᠪᠣᠳᠣᠯᠭᠠ ᠲᠠᠢ ᠪᠠᠷ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠶᠠᠪᠤᠯᠠ᠃
ᠲᠡᠷᠡ ᠰᠢᠭᠤᠳ ᠨᠣᠮ ᠤᠩᠰᠢᠨ ᠬᠤᠷᠠᠵᠤ ᠪᠠᠢᠭᠠ ᠰᠦᠮᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠬᠦᠷᠬᠦ ᠳ᠋ᠦ᠍᠂ ᠰᠦᠮᠡ ᠶ᠋ᠢᠨ ᠬᠣᠶᠠᠷ ᠭᠣᠨᠢᠷ ᠯᠠᠮᠠ ᠲᠠᠢ ᠭᠡᠨᠡᠳᠲᠡ ᠤᠴᠠᠷᠠᠴᠢᠬᠠᠯᠠ᠃ ᠳᠠᠨᠽᠠᠨᠵᠠᠮᠰᠤ ᠄《ᠱᠠᠪᠷᠤᠩ ᠪᠠᠭᠰᠢ (ᠭᠡᠨᠳᠥᠨᠯᠢᠭᠰᠤᠭ) ᠬᠤᠷᠠᠯ ᠳ᠋ᠤ᠌ ᠰᠠᠭᠠᠲᠠᠵᠤ ᠪᠠᠢᠨᠠ ᠤᠤ?》 ᠭᠡᠬᠦ ᠳ᠋ᠦ᠍ ᠬᠣᠶᠠᠷ ᠯᠠᠮᠠ᠄《ᠦ᠂ ᠲᠠ ᠴᠢᠨᠢ ᠨᠣᠶᠠᠨ ᠴᠡᠷᠢᠭ ᠦ᠋ᠨ ᠫᠠᠢᠵᠠᠩ ᠪᠣᠯᠴᠢᠬᠠᠭᠰᠠᠨ ᠪᠠᠢᠭᠠᠳ᠂ ᠶᠠᠭᠠᠬᠢᠭᠠᠳ ᠪᠠᠰᠠ ᠯᠠᠮᠠ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠴᠢᠬᠡᠭᠰᠡᠨ ᠪᠣᠢ ᠁ ᠤᠷᠢᠳ ᠢ᠋ᠶ᠋ᠠᠷ ᠯᠠᠮᠠ ᠶ᠋ᠢᠨ ᠱᠠᠩ ᠳ᠋ᠤ᠌ ᠮᠣᠷᠢᠯᠠ᠁》 ᠭᠡᠪᠡ᠃ ᠳᠠᠨᠽᠠᠨᠵᠠᠮᠰᠤ ᠵᠢᠰᠦ ᠪᠡᠨ ᠪᠤᠷᠤᠭᠤᠯᠠᠭᠰᠠᠨ ᠴᠤ᠌ ᠲᠠᠨᠢᠭᠳᠠᠭᠰᠠᠨ ᠳ᠋ᠠᠭᠠᠨ ᠠᠢᠳᠠᠰ ᠬᠦᠷᠴᠦ᠂ ᠡᠨᠳᠡ ᠲᠡᠨᠳᠡ ᠶᠠᠪᠠᠭᠠᠨ ᠫᠤᠤ ᠮᠥᠷᠥᠯᠡᠭᠰᠡᠨ ᠴᠡᠷᠢᠭ ᠦᠵᠡᠭᠳᠡᠬᠦ ᠳ᠋ᠦ᠍ ᠤᠯᠠᠮ ᠡᠮᠢᠶᠡᠵᠦ᠂ ᠲᠡᠷᠡ ᠳᠣᠣᠷᠠ ᠪᠠᠨ ᠤᠶᠠᠭᠠ ᠲᠠᠢ ᠮᠣᠷᠢ ᠪᠠᠨ ᠲᠠᠢᠯᠵᠤ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠠᠳ ᠭᠣᠳ ᠳᠤᠲᠠᠭᠠᠯᠠ᠃
ᠳᠠᠨᠽᠠᠨᠵᠠᠮᠰᠤ ᠵᠢᠷᠣᠭᠠ ᠪᠤᠭᠤᠷᠤᠯ ᠮᠣᠷᠢᠨ ᠤ᠋ ᠪᠠᠨ ᠬᠤᠷᠳᠤᠨ ᠳ᠋ᠤ᠌ ᠳᠤᠲᠠᠭᠠᠵᠤ ᠭᠠᠷᠤᠭᠠᠳ ᠷᠠᠰᠢᠶᠠᠨ ᠲᠣᠬᠣᠢ ᠶ᠋ᠢᠨ ᠴᠠᠭᠠᠨᠰᠦ᠋ᠮᠡ ᠳᠡᠭᠡᠷᠡ ᠬᠦᠷᠪᠡ᠃ ᠲᠡᠷᠡ ᠪᠤᠰᠤᠳ ᠲᠠᠭᠠᠨ ᠲᠡᠩᠨᠡᠵᠦ ᠶᠠᠪᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠭᠳᠡᠵᠦ᠂ ᠬᠠᠷᠢᠭᠤ ᠦᠵᠡᠯᠴᠡᠬᠦ ᠪᠡᠷ ᠵᠠᠮ ᠤ᠋ᠨ ᠠᠮᠠᠰᠠᠷ ᠢ᠋ ᠤᠷᠢᠳᠴᠢᠯᠠᠵᠤ ᠬᠠᠰᠢᠵᠤ ᠠᠪ ᠭᠡᠮᠡᠨ ᠵᠠᠷᠯᠢᠭ ᠪᠣᠯᠤᠯᠠ᠃
ᠭᠡᠨᠳᠤᠨᠯᠢᠭ᠌ᠰᠤᠭ ᠱᠠᠪᠷᠤᠩ ᠪᠣᠯᠤᠨ ᠬᠦᠴᠦᠨᠲᠡᠭᠦᠰ ᠨᠠᠷ ᠠᠷᠪᠠ ᠭᠠᠷᠤᠢᠬᠠᠨ ᠴᠡᠷᠢᠭ ᠢ᠋ᠶ᠋ᠡᠨ ᠳᠠᠭᠠᠭᠤᠯᠤᠨ ᠲᠠᠨᠽᠠᠨᠵᠠᠮᠰᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠨᠡᠬᠡᠮᠵᠢᠯᠡᠨ ᠬᠥᠭᠡᠭᠡᠵᠦ ᠪᠠᠢᠲᠠᠯᠠ ᠡᠮᠦᠨᠡ ᠡᠴᠡ ᠨᠢ ᠬᠣᠶᠠᠷ ᠮᠣᠷᠢᠲᠠᠢ ᠮᠠᠯᠴᠢᠨ ᠳᠠᠪᠬᠢᠨ ᠢᠷᠡᠭᠡᠳ᠄《ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠭᠤᠴᠢ ᠭᠠᠷᠤᠢ ᠬᠥᠮᠦᠰ ᠷᠠᠰᠢᠶᠠᠨ ᠲᠣᠬᠣᠢ ᠶ᠋ᠢᠨ ᠴᠠᠭᠠᠨᠰᠥ᠋ᠮᠡ ᠳ᠋ᠦ᠍ ᠬᠡᠳᠦᠨ ᠡᠳᠦᠷ ᠪᠣᠯᠵᠠᠢ᠃ ᠲᠡᠳᠡ ᠪᠡᠯᠴᠢᠭᠡᠷ ᠡᠴᠡ ᠦᠬᠡᠷ ᠮᠠᠯ ᠲᠠᠭᠤᠵᠤ ᠪᠠᠰᠠ ᠪᠡᠢᠯᠡ ᠨᠣᠶᠠᠨ ᠤ᠋ ᠲᠠᠪᠤᠨ ᠰᠠᠭᠠᠯᠢ ᠶ᠋ᠢ ᠲᠤᠰᠬᠠᠵᠤ᠂ ᠬᠡᠷᠪᠡ ᠥᠭᠴᠦ ᠳᠡᠢᠯᠬᠦ ᠦᠭᠡᠢ ᠪᠣᠯ ᠡᠳ᠋ ᠬᠥᠷᠥᠩᠭᠡ ᠶ᠋ᠢ ᠴᠢᠨᠢ ᠠᠪᠤᠨᠠ ᠭᠡᠵᠦ ᠠᠶᠤᠯᠭᠠᠨ ᠰᠦᠷᠳᠡᠭᠦᠯᠵᠦ ᠪᠣᠢ ᠁》 ᠭᠡᠵᠦ ᠴᠢᠮᠡᠭᠡ ᠮᠡᠳᠡᠭᠦᠯᠦᠯᠡ᠃
ᠡᠳᠡᠭᠡᠷ ᠪᠠᠢᠳᠠᠯ ᠢ᠋ ᠰᠣᠨᠣᠰᠤᠭᠠᠳ ᠬᠦᠴᠦᠨᠲᠡᠭᠦᠰ ᠠᠷᠪᠠ ᠭᠠᠷᠤᠢ ᠴᠡᠷᠢᠭ ᠢ᠋ᠶ᠋ᠡᠨ ᠬᠡᠳᠦᠨ ᠪᠦᠯᠦᠭ ᠬᠤᠪᠢᠶᠠᠵᠤ ᠴᠠᠭᠠᠨᠰᠥ᠋ᠮᠡ ᠶ᠋ᠢ ᠪᠦᠰᠡᠯᠡᠬᠦ ᠪᠡᠷ ᠲᠣᠬᠢᠷᠠᠭᠤᠯᠵᠤ ᠬᠡᠯᠡᠭᠰᠡᠨ ᠨᠢ᠄《ᠪᠢᠴᠢᠬᠠᠨ ᠴᠠᠭᠠᠨᠰᠥ᠋ᠮᠡ ᠪᠣᠯ ᠴᠠᠢᠳᠠᠮ ᠢ᠋ᠶ᠋ᠠᠷ ᠬᠦᠷᠢᠶᠡᠯᠡᠭᠳᠡᠭᠰᠡᠨ ᠥᠨᠳᠥᠷᠯᠢᠭ ᠰᠢᠭ ᠳᠣᠪᠣ ᠳᠡᠭᠡᠷᠡ ᠪᠠᠢᠷᠢᠰᠢᠵᠤ ᠪᠠᠢᠭᠠ ᠲᠤᠯᠠ ᠪᠦᠰᠡᠯᠡᠨ ᠴᠣᠬᠢᠵᠤ ᠳᠠᠭᠠᠷᠢᠯᠲᠠ ᠬᠢᠬᠦ ᠳ᠋ᠦ᠍ ᠠᠰᠢᠭ ᠦᠭᠡᠢ᠂ ᠬᠠᠷᠢᠨ ᠰᠠᠬᠢᠨ ᠬᠠᠮᠠᠭᠠᠯᠠᠬᠤ ᠳ᠋ᠤ᠌ ᠲᠤᠢᠯ ᠤ᠋ᠨ ᠲᠣᠬᠢᠷᠠᠮᠵᠢᠲᠠᠢ ᠭᠠᠵᠠᠷ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠬᠥᠮᠦᠨ ᠣᠯᠠᠨ ᠮᠥᠷᠲᠡᠭᠡᠨ ᠬᠠᠷᠪᠤᠵᠤ ᠨᠠᠮᠨᠠᠬᠤ ᠳ᠋ᠠᠭᠠᠨ ᠴᠠᠭᠠᠷᠠᠵᠤ ᠪᠣᠯᠪᠠᠰᠤᠷᠠᠭᠰᠠᠨ ᠡᠷᠡᠰ ᠦ᠋ᠳ ᠶᠦᠮ ᠰᠢᠦ᠂ ᠲᠡᠳᠡᠨᠦᠰ ᠢ᠋ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠬᠢᠲᠠᠳ ᠴᠡᠷᠢᠭ ᠲᠡᠢ ᠠᠳᠠᠯᠢᠳᠬᠠᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ᠃ ᠪᠢᠳᠡ ᠪᠠᠢᠯᠳᠤᠬᠤ ᠠᠷᠭᠠ ᠶ᠋ᠢᠨ ᠲᠠᠯᠠ ᠪᠠᠷ ᠤᠬᠠᠭᠠᠨ ᠵᠠᠷᠤᠵᠤ ᠲᠡᠳᠡᠨ ᠢ᠋ ᠰᠦᠮᠡ ᠡᠴᠡ ᠭᠠᠳᠠᠭᠰᠢ ᠴᠠᠢᠳᠠᠮ ᠤ᠋ᠨ ᠳᠤᠮᠳᠠ ᠥᠳᠥᠭᠡᠨ ᠢᠷᠡᠭᠦᠯᠦᠭᠰᠡᠨ ᠦ᠌ ᠰᠡᠭᠦᠯᠡᠷ ᠰᠠᠶᠢ ᠮᠡᠳᠡᠶᠡ!》 ᠭᠡᠳ ᠪᠣᠳᠠᠲᠠᠢ ᠡᠭᠦᠷᠭᠡ ᠪᠡᠨ ᠬᠤᠪᠢᠶᠠᠯᠴᠠᠯᠠ᠃
ᠰᠢᠨᠠᠯᠠᠮᠠ ᠶ᠋ᠢᠨ ᠳᠥᠷᠪᠡᠨ ᠮᠣᠷᠢᠲᠠᠢ ᠴᠡᠷᠢᠭ ᠳᠠᠨᠽᠡᠨᠵᠠᠮᠰᠤ ᠶ᠋ᠢᠨ ᠬᠣᠢᠨᠠ ᠠ᠋ᠴᠠ ᠮᠥᠷ ᠢ᠋ ᠨᠢ ᠮᠥᠰᠬᠢᠨ ᠨᠡᠬᠡᠮᠵᠢᠯᠡᠬᠦ ᠶ᠋ᠢᠨ ᠶᠠᠪᠤᠴᠠ ᠳ᠋ᠤ᠌ ᠵᠠᠷᠢᠮ ᠳ᠋ᠠᠭᠠᠨ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠮᠥᠷ ᠮᠥᠰᠬᠢᠵᠦ᠂ ᠵᠠᠷᠢᠮ ᠳ᠋ᠠᠭᠠᠨ ᠰᠢᠭᠡᠵᠦ ᠭᠠᠳᠠᠭᠠᠯᠠᠵᠤ ᠪᠠᠢᠭᠠ ᠰᠢᠭ᠋᠂ ᠵᠠᠷᠢᠮ ᠳ᠋ᠠᠭᠠᠨ ᠮᠣᠷᠢ ᠪᠠᠨ ᠬᠥᠲᠥᠯᠵᠦ᠂ ᠬᠡᠰᠡᠭ ᠦᠶᠡ ᠤᠨᠤᠵᠤ ᠶᠠᠪᠤᠵᠠᠭᠠᠨᠠ᠃ ᠬᠡᠷᠪᠡ ᠳᠠᠢᠰᠤᠨ ᠳ᠋ᠤ᠌ ᠰᠡᠷᠡᠭᠳᠡᠭᠡᠳ ᠡᠮᠦᠨᠡ ᠡᠴᠡ ᠬᠠᠷᠪᠤᠪᠠᠯ ᠬᠠᠷᠢᠭᠤ ᠳ᠋ᠤᠨᠢ ᠬᠡᠳᠦ ᠬᠠᠷᠪᠤᠭᠠᠳ ᠠᠶᠤᠵᠤ ᠰᠣᠴᠢᠭᠰᠠᠨ ᠢ᠋ᠶ᠋ᠠᠷ ᠣᠪᠯᠠᠵᠤ᠂ ᠡᠷᠭᠢᠵᠦ ᠬᠣᠢᠰᠢ ᠤᠬᠤᠷᠢᠨ ᠴᠠᠢᠳᠠᠮ ᠤ᠋ᠨ ᠬᠥᠪᠡᠭᠡ ᠳᠠᠭᠠᠨ ᠳᠤᠲᠠᠭᠠᠨᠠ᠃ ᠬᠡᠷᠪᠡ ᠠᠵᠢᠭ ᠴᠤ᠌ ᠦᠭᠡᠢ ᠪᠣᠯᠬᠤᠯᠠ ᠦᠷᠭᠦᠯᠵᠢᠯᠡᠨ ᠤᠷᠤᠭᠰᠢᠯᠠᠵᠤ᠂ ᠶᠠᠪᠤᠨ ᠶᠠᠪᠤᠭᠰᠠᠭᠠᠷ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠪᠡᠬᠢᠯᠡᠯᠲᠡ ᠪᠣᠯᠬᠤ ᠪᠢᠴᠢᠬᠠᠨ ᠴᠠᠭᠠᠨᠰᠥ᠋ᠮᠡ ᠡᠴᠡ ᠬᠡᠳᠦᠬᠡᠨ ᠵᠠᠭᠤᠨ ᠮᠧᠲ᠋ᠷ ᠦ᠋ᠨ ᠵᠠᠢ ᠳ᠋ᠤ᠌ ᠬᠦᠷᠴᠦ ᠣᠴᠢᠯᠠ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠤᠷᠢᠳᠴᠢᠯᠠᠨ ᠰᠡᠷᠡᠮᠵᠢᠯᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠨᠢᠭᠡ ᠨᠢ ᠳᠣᠪᠣᠴᠠᠭ ᠤ᠋ᠨ ᠴᠠᠭᠠᠨᠠ ᠠ᠋ᠴᠠ᠄《ᠰᠢᠷᠠᠬᠦᠦ! ᠡᠴᠢᠭᠡ ᠳ᠋ᠡᠭᠡᠨ ᠲᠣᠯᠣᠭᠠᠢ ᠪᠠᠨ ᠥᠭᠬᠦ ᠪᠡᠷ ᠡᠨᠳᠡ ᠢᠷᠡᠪᠡᠦ⁈》 ᠭᠡᠮᠡᠨ ᠬᠠᠰᠬᠢᠷᠬᠤ ᠳ᠋ᠤ᠌᠂ ᠰᠢᠨᠠᠯᠠᠮᠠ ᠶ᠋ᠢᠨ ᠳᠥᠷᠪᠡᠨ ᠴᠡᠷᠢᠭ ᠶᠡᠬᠡ ᠯᠡ ᠰᠣᠴᠢᠭᠰᠠᠨ ᠪᠠᠢᠳᠠᠯ ᠭᠠᠷᠭᠠᠨ ᠪᠠᠰᠠ ᠴᠤ᠌ ᠵᠡᠷᠯᠢᠭ ᠰᠤᠮᠤᠨ ᠳ᠋ᠤ᠌ ᠣᠨᠣᠭᠳᠠᠴᠢᠬᠠᠬᠤ ᠠ᠋ᠴᠠ ᠪᠣᠯᠭᠣᠮᠵᠢᠯᠠᠨ《ᠪᠠᠢᠭᠰᠠᠨ! ᠠᠷᠪᠢᠨ ᠴᠡᠷᠢᠭ ᠦ᠋ᠳ ᠢᠷᠡᠯᠡ᠂ ᠬᠤᠷᠳᠤᠨ᠂ ᠬᠤᠷᠳᠤᠨ! ᠳᠤᠲᠠᠭᠠᠶᠠ!》 ᠭᠡᠵᠦ ᠵᠣᠷᠢᠭᠤᠳᠠ ᠥᠨᠳᠥᠷ ᠳᠠᠭᠤᠨ ᠢ᠋ᠶ᠋ᠠᠷ ᠪᠠᠷᠬᠢᠷᠠᠯᠳᠤᠵᠤ ᠬᠣᠢᠰᠢ ᠪᠠᠨ ᠡᠷᠭᠢᠨ ᠬᠠᠷᠠᠵᠤ ᠮᠣᠷᠢᠨ ᠵᠢᠯᠣᠭᠣ ᠪᠠᠨ ᠲᠠᠲᠠᠵᠤ ᠭᠣᠣᠯ ᠤ᠋ᠨ ᠬᠥᠪᠡᠭᠡ ᠳᠠᠭᠠᠤ ᠳᠤᠲᠠᠭᠠᠪᠠ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠲᠡᠳᠡᠨ ᠢ᠋ ᠶᠡᠷᠦ ᠨᠢ ᠳᠦᠷᠪᠡᠭᠡᠨ ᠬᠥᠮᠦᠨ ᠭᠡᠮᠡᠨ ᠪᠠᠰᠤᠮᠵᠢᠯᠠᠭᠠᠳ ᠴᠠᠭᠠᠨᠰᠥ᠋ᠮᠡ ᠶ᠋ᠢᠨ ᠪᠠᠲᠤ ᠪᠡᠬᠢᠯᠡᠯᠲᠡ ᠡᠴᠡ ᠪᠡᠨ ᠬᠡᠳᠦ ᠬᠡᠳᠦ ᠪᠡᠷ ᠴᠤᠪᠤᠷᠠᠨ ᠵᠢᠯᠣᠭᠣ ᠰᠤᠩᠭᠠᠨ ᠬᠣᠢᠨᠠ ᠠ᠋ᠴᠠ ᠨᠢ ᠨᠡᠬᠡᠮᠵᠢᠯᠡᠨ ᠭᠠᠯᠯᠠᠨᠠ᠃
ᠡᠨᠡ ᠦᠶᠡ ᠳ᠋ᠦ᠍ ᠰᠢᠨᠠᠯᠠᠮᠠ ᠶ᠋ᠢᠨ ᠪᠤᠰᠤᠳ ᠴᠡᠷᠢᠭ ᠭᠡᠨᠳᠦᠨᠯᠢᠭ᠌ᠰᠣᠭ᠂ ᠭᠦᠴᠦᠨᠲᠡᠭᠦᠰ ᠦ᠋ᠨ ᠵᠢᠯᠣᠭᠣᠳᠤᠯᠭᠠ ᠪᠠᠷ ᠰᠦᠮᠡ ᠶ᠋ᠢᠨ ᠡᠮᠦᠨᠡ ᠲᠠᠯᠠ ᠠ᠋ᠴᠠ ᠳᠠᠭᠠᠷᠢᠨ ᠣᠷᠣᠵᠤ ᠴᠠᠭᠠᠨᠰᠥ᠋ᠮᠡ ᠶ᠋ᠢ ᠡᠵᠡᠯᠡᠪᠡ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠣᠣ ᠰᠦᠮᠪᠦᠷ᠂ ᠡᠩᠬᠡᠪᠠᠶᠠᠷ ᠬᠣᠶᠠᠭᠤᠯᠠ ᠤᠤᠯ ᠠ᠋ᠴᠠ ᠪᠠᠨ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠲᠦ᠍ ᠣᠷᠣᠵᠤ ᠥᠭᠬᠦ ᠰᠠᠨᠠᠭᠠ ᠲᠠᠢ ᠪᠠᠢᠭᠰᠠᠨ ᠤᠴᠢᠷ ᠠ᠋ᠴᠠ ᠵᠣᠷᠢᠭᠤᠳᠠ ᠴᠠᠭᠠᠨᠰᠥ᠋ᠮᠡ ᠳ᠋ᠦ᠍ ᠬᠣᠴᠣᠷᠴᠤ ᠭᠡᠨᠳᠦᠨᠯᠢᠭ᠌ᠰᠣᠭ᠂ ᠬᠦᠴᠦᠨᠲᠡᠭᠦᠰ ᠨᠠᠷ ᠢ᠋ ᠤᠭᠲᠤᠵᠤ ᠣᠷᠣᠭᠤᠯᠤᠯᠠ᠃
ᠪᠠᠢᠯᠳᠤᠭᠠᠨ ᠲᠤᠢᠯ ᠤ᠋ᠨ ᠬᠤᠷᠴᠠ ᠰᠢᠷᠦᠭᠦᠨ ᠶᠠᠪᠤᠭᠳᠠᠵᠤ ᠲᠡᠢᠨ ᠦ᠌ ᠳᠤᠮᠳᠠ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠵᠢᠷᠣᠭᠠ ᠪᠤᠭᠤᠷᠤᠯ ᠮᠣᠷᠢᠲᠤ ᠫᠠᠢᠵᠠᠩ ᠬᠦᠨᠳᠦ ᠰᠢᠷᠬᠠᠲᠤᠵᠤ ᠮᠣᠷᠢᠨ ᠠ᠋ᠴᠠ ᠣᠢᠴᠢᠵᠤ ᠳᠣᠣᠷᠠ ᠪᠠᠨ ᠦᠬᠦᠪᠡ᠃ ᠵᠢᠷᠣᠭᠠ ᠪᠤᠭᠤᠷᠤᠯ ᠮᠣᠷᠢ ᠨᠢ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠲᠦ᠍ ᠪᠠᠷᠢᠭᠳᠠᠯᠠ᠃ ᠳᠠᠨᠽᠡᠨᠵᠠᠮᠰᠤ᠂ ᠭᠡᠨᠳᠥᠨᠯᠢᠭᠰᠤᠭ ᠢ᠋ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠵᠣᠯᠢᠬᠤ ᠭᠡᠳ ᠪᠤᠷᠬᠠᠨ ᠳ᠋ᠤ᠌ ᠪᠤᠷᠤᠭᠤ ᠪᠠᠷ ᠦᠵᠡᠭᠳᠡᠵᠦ ᠬᠠᠷᠢᠨ ᠥᠪᠡᠷ ᠢ᠋ᠶ᠋ᠡᠨ ᠵᠣᠯᠢᠬᠳᠠᠴᠢᠬᠠᠯᠠ!
ᠳᠠᠨᠽᠡᠨᠵᠠᠮᠰᠤ ᠶ᠋ᠢ ᠬᠥᠭᠡᠭᠡᠵᠦ ᠪᠠᠢᠭᠰᠠᠨ ᠰᠢᠷᠠᠬᠦᠦ ᠫᠠᠢᠵᠠᠩ ᠵᠡᠷᠭᠡ ᠳᠥᠷᠪᠡᠨ ᠴᠡᠷᠢᠭ ᠭᠣᠣᠯ ᠤ᠋ᠨ ᠡᠬᠢᠨ ᠦ᠌ ᠤᠰᠤᠨ ᠬᠣᠩᠬᠣᠷ ᠲᠤ᠌ ᠪᠡᠶᠡ ᠳᠠᠯᠳᠠᠯᠠᠵᠤ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠬᠣᠢᠰᠢ ᠤᠷᠤᠭᠰᠢᠯᠠᠬᠤ ᠶ᠋ᠢ ᠲᠣᠰᠣᠨ ᠡᠰᠡᠷᠭᠦᠴᠡᠯᠡ᠃ ᠬᠣᠯᠠ ᠲᠤᠰᠤᠯᠲᠠ ᠲᠠᠢ ᠯᠢᠶᠠᠨᠵᠦᠦ ᠫᠤᠤ ᠶ᠋ᠢᠨ ᠲᠤᠰᠤᠯᠲᠠ ᠨᠢ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠠᠷᠤ ᠠ᠋ᠴᠠ ᠴᠣᠷᠭᠢᠨᠠ᠃ ᠡᠢᠮᠦ ᠳᠠᠭᠠᠷᠢᠯᠲᠠ ᠳᠣᠣᠷᠠ ᠨᠣᠶᠠᠨ ᠤ᠋ ᠴᠡᠷᠢᠭ ᠭᠣᠣᠯ ᠤ᠋ᠨ ᠲᠣᠬᠣᠢ ᠶ᠋ᠢᠨ ᠨᠠᠷᠢᠬᠠᠨ ᠬᠠᠪᠴᠢᠯ ᠢ᠋ᠶ᠋ᠠᠷ ᠵᠡᠭᠦᠨ ᠡᠮᠦᠨᠡᠰᠢ ᠪᠡᠨ ᠳᠤᠲᠠᠭᠠᠯᠠ᠃
5 . ᠦᠦᠰᠢᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠢ᠋ᠶ᠋ᠡᠷ ᠬᠤᠳᠳᠤᠭ ᠰᠢᠷᠭᠢᠭᠦᠯᠦᠭᠰᠡᠨ ᠤᠷᠠᠨ ᠠᠷᠭᠠ ①
1927 ᠣᠨ ᠤ᠋ ᠵᠤᠨ ᠤ᠋ ᠤᠯᠠᠷᠢᠯ ᠪᠠᠢᠵᠤ ᠪᠢᠯᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠰᠢᠨᠡᠯᠡᠮᠡ ᠶ᠋ᠢᠨ ᠴᠡᠷᠢᠭ ᠦᠦᠰᠢᠨᠵᠣᠣ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠰᠠᠭᠤᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠦᠷᠭᠦᠯᠵᠢ ᠭᠠᠳᠠᠭᠰᠢ ᠭᠠᠷᠴᠤ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠲᠤᠬᠠᠢ ᠤᠬᠠᠭᠤᠯᠭᠠ ᠬᠢᠵᠦ ᠨᠥᠭᠦᠭᠡ ᠲᠠᠯᠠ ᠪᠠᠷ ᠡᠰᠡᠷᠭᠦᠦ ᠡᠲᠡᠭᠡᠳ ᠦ᠋ᠨ ᠶᠠᠷᠢᠶᠠ ᠥᠭᠦᠯᠡᠯ ᠬᠥᠳᠡᠯᠦᠯ ᠪᠠᠢᠳᠠᠯ ᠢ᠋ ᠲᠡᠩᠨᠡᠵᠦ ᠣᠢᠯᠠᠭᠠᠬᠤ ᠪᠠᠷ ᠲᠣᠭᠣᠷᠢᠨ ᠡᠷᠭᠢᠴᠡᠵᠦ ᠶᠠᠪᠤᠳᠠᠭ᠃
ᠨᠣᠶᠠᠨ ᠤ᠋ ᠪᠦᠯᠦᠭ ᠦ᠋ᠨ ᠬᠢᠨ ᠰᠢᠨᠡᠯᠡᠮᠡ ᠶ᠋ᠢᠨ ᠰᠤᠯᠠ ᠡᠷᠭᠢᠴᠡᠵᠦ ᠪᠠᠢᠬᠤ ᠳ᠋ᠤᠨᠢ ᠠᠮᠵᠢᠵᠤ ᠪᠠᠷᠢᠵᠤ ᠠᠪᠬᠤ ᠪᠠᠷ ᠪᠣᠳᠣᠵᠤ ᠪᠠᠢᠪᠠ᠃ ᠡᠨᠡ ᠬᠦ᠌ ᠬᠤᠤᠪᠢᠯᠳᠤᠯᠭᠠ ᠶ᠋ᠢ ᠰᠢᠨᠡᠯᠡᠮᠡ ᠶᠡᠷᠦ ᠨᠢ ᠲᠣᠳᠣᠷᠬᠠᠢ ᠣᠢᠯᠠᠭᠠᠵᠤ ᠪᠠᠢᠭᠰᠠᠨ ᠲᠤᠯᠠ ᠤᠶᠠᠨ ᠬᠠᠳᠠᠨ ᠬᠥᠳᠡᠯᠦᠯ᠂ ᠰᠣᠨᠣᠷ ᠰᠡᠷᠡᠮᠵᠢ ᠲᠡᠢ ᠪᠠᠢᠵᠤ᠂ ᠥᠨᠥᠳᠥᠷ ᠡᠨᠳᠡ ᠪᠠᠢᠪᠠᠯ ᠳᠠᠷᠠᠭᠠ ᠡᠳᠦᠷ ᠨᠢ ᠲᠡᠨᠳᠡ ᠣᠴᠢᠳᠠᠭ᠂ ᠥᠨᠥᠳᠥᠷ ᠮᠣᠷᠢ ᠤᠨᠤᠭᠰᠠᠨ ᠪᠣᠯ ᠮᠠᠷᠭᠠᠰᠢ ᠨᠢ ᠬᠠᠷᠢᠨ ᠡᠯᠵᠢᠭᠡ ᠤᠨᠤᠳᠠᠭ᠂ ᠥᠨᠥᠳᠥᠷ ᠡᠢᠮᠦ ᠬᠤᠪᠴᠠᠰᠤ ᠡᠮᠦᠰᠪᠡᠯ ᠮᠠᠷᠭᠠᠰᠢ ᠨᠢ ᠥᠭᠡᠷᠡ ᠶᠠᠩᠵᠤ ᠪᠠᠷ ᠬᠤᠪᠴᠠᠯᠠᠳᠠᠭ ᠲᠤᠯᠠ ᠡᠰᠡᠷᠭᠦᠦ ᠡᠲᠡᠭᠡᠳ ᠲᠡᠭᠡᠨ ᠣᠢᠯᠠᠭᠠᠭᠳᠠᠬᠤ ᠪᠠᠢᠲᠤᠭᠠᠢ ᠥᠪᠡᠷ ᠦ᠋ᠨ ᠬᠥᠮᠦᠰ ᠨᠢ ᠴᠦ᠍ ᠣᠢᠯᠠᠭᠠᠵᠤ ᠮᠡᠳᠡᠬᠦ ᠦᠭᠡᠢ ᠲᠤᠢᠯ ᠤ᠋ᠨ ᠨᠢᠭᠤᠴᠠ ᠳᠠᠯᠳᠠ ᠪᠠᠢᠳᠠᠭ ᠪᠢᠯᠡ᠃ ᠰᠢᠨᠡᠯᠡᠮᠡ ᠬᠠᠯᠠᠭᠤᠨ ᠵᠤᠨ ᠤ᠋ ᠨᠢᠭᠡᠨ ᠪᠦᠭᠴᠢᠮ ᠡᠳᠦᠷ ᠭᠡᠷ ᠡᠴᠡ ᠪᠡᠨ ᠭᠠᠷᠴᠤ ᠪᠠᠷᠠᠭᠤᠨᠰᠢ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠵᠦᠭ ᠶᠠᠪᠤᠨᠠ᠃ ᠲᠡᠷᠡ ᠸᠠᠩᠴᠤᠭᠷᠠᠪᠳᠠᠨ ᠲᠠᠢᠵᠢ ᠶ᠋ᠢᠨ ᠭᠡᠷ ᠦ᠋ᠨ ᠡᠮᠦᠨᠡᠬᠢ ᠪᠢᠴᠢᠬᠠᠨ ᠡᠯᠡᠰᠦ ᠮᠠᠩᠬᠠ ᠪᠠᠷ ᠭᠠᠷᠬᠤ ᠳ᠋ᠤ᠌ ᠲᠡᠳᠡᠨ ᠦ᠌ ᠮᠣᠷᠢᠨ ᠤ᠋ ᠤᠶᠠᠭᠠᠨ ᠳᠡᠭᠡᠷᠡ ᠬᠡᠳᠦᠨ ᠡᠮᠡᠭᠡᠯ ᠲᠡᠢ ᠮᠣᠷᠢ ᠤᠶᠠᠭᠠᠲᠠᠢ ᠪᠠᠢᠭᠠ ᠶ᠋ᠢ ᠣᠯᠵᠤ ᠦᠵᠡᠯᠡ᠃
ᠰᠢᠨᠡᠯᠡᠮᠡ ᠳᠣᠲᠣᠷᠠ ᠪᠠᠨ᠄《ᠸᠠᠩᠴᠤᠭᠷᠠᠪᠳᠠᠨ ᠤ᠋ ᠮᠣᠷᠢᠳ ᠯᠠᠪ ᠪᠢᠰᠢ᠂ ᠮᠠᠨ ᠤ᠋ ᠣᠷᠴᠢᠮ ᠤ᠋ᠨ ᠠᠢᠯ ᠠᠢᠮᠠᠭ ᠤ᠋ᠨ ᠮᠣᠷᠢᠳ ᠴᠤ᠌ ᠪᠢᠰᠢ᠂ ᠪᠠᠷᠤᠭ ᠨᠣᠶᠠᠨ ᠱᠠᠩ ᠠ᠋ᠴᠠ ᠨᠠᠮᠠᠶ᠋ᠢ ᠲᠠᠩᠨᠠᠬᠤ ᠪᠠᠷ ᠸᠠᠩᠴᠤᠭᠷᠠᠪᠳᠠᠨ ᠤ᠋ ᠳ᠋ᠤ᠌ ᠢᠷᠡᠭᠰᠡᠨ ᠬᠥᠮᠦᠰ ᠪᠠᠢᠵᠤ ᠮᠡᠳᠡᠨᠡ!》 ᠭᠡᠵᠦ ᠲᠠᠭᠠᠮᠠᠭᠯᠠᠭᠠᠳ ᠬᠤᠷᠳᠤᠯᠠᠨ ᠰᠢᠭ᠋ ᠠᠯᠬᠤᠯᠠᠪᠠ᠃
ᠸᠠᠩᠴᠤᠭᠷᠠᠪᠳᠠᠨ᠂ ᠰᠢᠨᠡᠯᠡᠮᠡ ᠬᠣᠶᠠᠭᠤᠯᠠ ᠠᠢᠮᠠᠭ ᠵᠡᠷᠭᠡᠯᠡᠳᠡᠭᠡ ᠡᠷᠦᠬᠡ ᠲᠤᠯᠠ ᠲᠡᠷᠡ ᠭᠡᠷ ᠦ᠋ᠨ ᠢ᠋ᠶ᠋ᠡᠨ ᠬᠦᠷᠢᠶᠡᠨ ᠳᠣᠲᠣᠷᠠ ᠶᠠᠪᠤᠵᠤ ᠪᠠᠢᠭᠠᠳ ᠡᠮᠦᠨᠡᠭᠦᠷ ᠪᠠᠷᠠᠭᠤᠨᠰᠢ ᠥᠩᠭᠡᠷᠡᠬᠦ ᠬᠥᠮᠦᠨ ᠦ᠌ ᠪᠠᠷᠠ ᠶ᠋ᠢ ᠦᠵᠡᠭᠡᠳ᠄《ᠪᠠᠷᠠᠭᠤᠨᠰᠢ ᠬᠦᠷᠡᠩ ᠴᠠᠮᠴᠠ ᠲᠠᠢ ᠬᠥᠮᠦᠨ ᠶᠠᠪᠤᠵᠤ ᠪᠠᠢᠨᠠ᠂ ᠪᠠᠷᠤᠭ ᠰᠢᠨᠠᠯᠠᠮᠠ ᠪᠠᠢᠵᠤ ᠮᠡᠳᠡᠨᠡ! ᠠᠯᠬᠤᠵᠤ ᠭᠢᠰᠬᠢᠬᠦ ᠪᠠᠢᠳᠠᠯ ᠨᠢ ᠶᠡᠷᠦ ᠲᠡᠭᠦᠨ ᠲᠡᠢ ᠠᠳᠠᠯᠢ ᠰᠢᠭ᠋᠃ ᠲᠡᠷᠡ ᠪᠠᠷᠤᠭ ᠭᠡᠷ ᠲᠡᠭᠡᠨ ᠢᠷᠡᠴᠢᠬᠡᠭᠡᠳ ᠣᠳᠣ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠵᠦᠭ ᠢ᠋ᠶ᠋ᠡᠨ ᠶᠠᠪᠤᠵᠤ ᠪᠠᠢᠭᠠ ᠮᠠᠭᠠᠳ ᠦᠭᠡᠢ⁈》 ᠭᠡᠵᠦ ᠭᠡᠷ ᠲᠦ᠍ ᠬᠣᠭᠣᠯᠠ ᠢᠳᠡᠵᠦ ᠪᠠᠢᠭᠠ ᠨᠣᠶᠠᠨ ᠤ᠋ ᠳᠥᠷᠪᠡᠨ ᠴᠡᠷᠢᠭ ᠲᠦ᠍ ᠳᠠᠮᠵᠢᠭᠤᠯᠵᠠᠢ᠃
ᠲᠡᠳᠡ ᠡᠭᠦᠨ ᠢ᠋ ᠰᠣᠨᠣᠰᠤᠮᠠᠭᠴᠠ ᠴᠡᠷᠢᠭ ᠦ᠋ᠨ ᠬᠥᠮᠦᠨ ᠦ᠌ ᠶᠣᠰᠣ ᠪᠠᠷ ᠴᠠᠭ ᠢ᠋ ᠵᠠᠪᠳᠤᠵᠤ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠭᠰᠠᠨ ᠪᠣᠯ ᠰᠢᠨᠡᠯᠡᠮᠡ ᠶ᠋ᠢ ᠲᠡᠷᠡ ᠳᠠᠷᠤᠢ ᠳ᠋ᠤᠨᠢ ᠪᠠᠷᠢᠴᠢᠬᠠᠬᠤ ᠪᠣᠯᠤᠯᠴᠠᠭᠠ ᠪᠦᠷᠢᠨ ᠪᠠᠢᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠲᠡᠳᠡ ᠢᠩᠭᠢᠵᠦ ᠴᠢᠩᠭᠢᠵᠦ ᠪᠠᠢᠭᠰᠠᠭᠠᠷ ᠨᠡᠯᠢᠶᠡᠳ ᠤᠳᠠᠭᠠᠰᠢᠷᠠᠭᠤᠯᠤᠭᠰᠠᠨ ᠠ᠋ᠴᠠ ᠰᠢᠨᠠᠯᠠᠮᠠ ᠳ᠋ᠤ᠌ ᠠᠰᠢᠭᠲᠠᠢ ᠴᠠᠭ ᠣᠯᠭᠤᠵᠠᠢ᠃
ᠰᠢᠨᠡᠯᠡᠮᠡ᠂ ᠸᠠᠩᠴᠤᠭᠷᠠᠪᠳᠠᠨ ᠤ᠋ ᠭᠠᠳᠠᠨᠠ ᠬᠡᠳᠦᠨ ᠡᠮᠡᠭᠡᠯ ᠲᠡᠢ ᠮᠣᠷᠢᠳ ᠤᠶᠠᠵᠤ ᠪᠠᠢᠭᠠ ᠨᠢ ᠯᠠᠪ ᠡᠰᠡᠷᠭᠦᠦ ᠲᠠᠯᠠ ᠶ᠋ᠢᠨ ᠬᠥᠮᠦᠨ ᠪᠠᠢᠬᠤ ᠶ᠋ᠢ ᠰᠡᠵᠢᠭᠯᠡᠵᠦ ᠲᠦᠷᠭᠡᠯᠡᠨ ᠠᠯᠬᠤᠭᠰᠠᠭᠠᠷ ᠴᠠᠭᠠᠨᠨ᠌ᠥ᠋ᠵᠦᠮ ᠦ᠋ᠨ ᠭᠡᠷ ᠦ᠋ᠨ ᠵᠡᠭᠦᠨ ᠬᠣᠢᠲᠤᠬᠢ ᠮᠠᠩᠬᠠᠨ ᠣᠷᠣᠢ ᠪᠠᠷ ᠥᠩᠭᠡᠷᠡᠬᠦ ᠲᠡᠢ ᠵᠡᠷᠭᠡ ᠬᠣᠢᠨᠠ ᠠ᠋ᠴᠠ ᠨᠢ ᠬᠡᠳᠦᠨ ᠮᠣᠷᠢ ᠲᠠᠢ ᠬᠥᠮᠦᠨ ᠨᠡᠬᠡᠮᠵᠢᠯᠡᠨ ᠢᠷᠡᠯᠡ᠃ ᠰᠢᠨᠠᠯᠠᠮᠠ ᠪᠠᠰᠠ ᠨᠢᠭᠡᠨ ᠮᠠᠩᠬᠠ ᠶ᠋ᠢ ᠳᠠᠪᠠᠲᠠᠯᠠ ᠨᠣᠶᠠᠨ ᠤ᠋ ᠨᠢᠭᠡ ᠴᠡᠷᠢᠭ ᠨᠢ ᠮᠠᠩᠬᠠᠨ ᠳᠡᠭᠡᠭᠦᠷ ᠬᠡᠳᠦ ᠫᠤᠤᠳᠠᠪᠠ᠃ ᠰᠢᠨᠠᠯᠠᠮᠠ ᠲᠦᠭᠰᠢᠭᠦᠷᠢᠲᠡᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠮᠡᠳᠡᠵᠦ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠨᠡᠬᠡᠮᠵᠢᠯᠡᠯ ᠡᠴᠡ ᠪᠤᠯᠲᠠᠵᠤ ᠭᠠᠷᠬᠤ ᠤᠬᠠᠭᠠᠨ ᠢ᠋ᠶ᠋ᠠᠨ ᠪᠣᠳᠣᠪᠠ᠃
ᠰᠢᠨᠡᠯᠡᠮᠡ ᠴᠠᠭᠠᠨᠨ᠌ᠥ᠋ᠵᠦᠮ ᠦᠨ ᠮᠠᠯ ᠤ᠋ᠨ ᠬᠤᠳᠳᠤᠭ ᠳᠡᠭᠡᠷᠡ ᠦᠬᠡᠷ ᠤᠰᠤ ᠤᠤᠭᠤᠬᠤ ᠪᠠᠷ ᠬᠣᠮᠣᠷᠴᠦ ᠪᠠᠢᠭᠠ ᠶ᠋ᠢ ᠦᠵᠡᠭᠡᠳ ᠳᠠᠷᠤᠢᠬᠠᠨ ᠬᠤᠳᠳᠤᠭ ᠳᠡᠭᠡᠷᠡ ᠭᠠᠷᠴᠤ ᠣᠩᠭᠣᠴᠠᠨ ᠳ᠋ᠤᠨᠢ ᠬᠡᠳᠦᠨ ᠰᠠᠭᠤᠯᠠᠭᠠ ᠤᠰᠤ ᠬᠢᠴᠢᠬᠡᠭᠡᠳ ᠬᠣᠶᠠᠷ ᠮᠠᠬᠠᠢ ᠪᠠᠨ ᠲᠠᠢᠯᠵᠤ ᠬᠤᠳᠳᠤᠭ ᠤ᠋ᠨ ᠠᠮᠠᠰᠠᠷ ᠳᠡᠭᠡᠷᠡ ᠵᠡᠷᠭᠡᠴᠡᠭᠦᠯᠦᠨ ᠲᠠᠯᠪᠢᠪᠠ᠃ ᠲᠡᠭᠡᠭᠡᠳ ᠨᠢᠭᠡ ᠨᠣᠮᠣᠬᠠᠨ ᠠᠮᠪᠠᠨ ᠱᠠᠷ ᠤ᠋ᠨ ᠨᠢᠷᠤᠭᠤᠨ ᠳᠡᠭᠡᠷᠡ ᠦᠰᠦᠷᠦᠨ ᠭᠠᠷᠴᠤ ᠤᠨᠤᠭᠠᠳ ᠴᠢᠨᠠᠭᠰᠢ ᠦᠯᠳᠡᠵᠦ ᠵᠣᠳᠣᠭᠠᠳ ᠬᠤᠳᠳᠤᠭ ᠤ᠋ᠨ ᠡᠮᠦᠨᠡ ᠪᠢᠴᠢᠬᠠᠨ ᠮᠠᠩᠬᠠᠨ ᠰᠤᠵᠠᠭᠠ ᠪᠠᠷ ᠥᠩᠭᠡᠷᠡᠵᠦ ᠠᠷᠠᠢ ᠯᠠ ᠭᠡᠵᠦ ᠲᠡᠳᠡᠨ ᠳ᠋ᠦ᠍ ᠦᠵᠡᠭᠳᠡᠭᠰᠡᠨ ᠦᠭᠡᠢ ᠪᠡᠷ ᠤᠯᠠᠭᠠᠨ ᠪᠤᠷᠭᠠᠰᠤᠨ ᠳᠥᠭᠥᠮ ᠳ᠋ᠦ᠍ ᠣᠷᠣᠬᠤᠯᠠᠷ 《ᠮᠣᠷᠢᠲᠤ ᠶ᠋ᠢᠨ ᠭᠡᠰᠢᠭ ᠶᠠᠪᠠᠭᠠᠨ ᠳ᠋ᠤ᠌》 ᠭᠡᠭᠴᠢ ᠨᠢᠭᠡᠨ ᠴᠢᠳᠥᠷ ᠲᠡᠢ ᠮᠣᠷᠢ ᠡᠪᠡᠰᠦᠯᠡᠵᠦ ᠪᠠᠢᠭᠠ ᠶ᠋ᠢ ᠣᠯᠵᠤ ᠦᠵᠡᠪᠡ᠃ ᠲᠡᠷᠡ ᠦᠬᠡᠷ ᠦ᠋ᠨ ᠨᠢᠷᠤᠭᠤᠨ ᠠ᠋ᠴᠠ ᠦᠰᠦᠷᠦᠨ ᠪᠠᠭᠤᠭᠠᠳ ᠴᠢᠳᠥᠷ ᠲᠡᠢ ᠮᠣᠷᠢ ᠶ᠋ᠢ ᠪᠠᠷᠢᠵᠤ ᠤᠷᠲᠤ ᠪᠦᠰᠡ ᠪᠣᠯᠤᠨ ᠴᠢᠳᠥᠷ ᠢ᠋ᠶ᠋ᠡᠷ ᠨᠣᠭᠲᠣ ᠬᠢᠵᠦ ᠣᠭᠣᠰᠣᠷᠯᠠᠵᠤ ᠠᠪᠤᠭᠠᠳ ᠣᠨᠣᠮᠠᠭᠴᠠ ᠮᠠᠩᠬᠠᠨ ᠰᠤᠭᠤᠯ᠂ ᠪᠤᠷᠭᠠᠰᠤᠨ ᠳᠥᠭᠥᠮ ᠦ᠋ᠨ ᠵᠠᠪᠰᠠᠷ ᠵᠠᠢ ᠪᠠᠷ ᠨᠢᠭᠤᠵᠤ ᠪᠤᠯᠲᠠᠵᠤ ᠪᠠᠢᠭᠠᠳ ᠠᠶᠤᠯ ᠠ᠋ᠴᠠ ᠬᠡᠯᠲᠦᠷᠢᠵᠡᠢ᠃
ᠨᠣᠶᠠᠨ ᠤ᠋ ᠳᠥᠷᠪᠡᠨ ᠴᠡᠷᠢᠭ ᠮᠠᠩᠬᠠᠨ ᠣᠷᠣᠢ ᠳ᠋ᠤ᠌ ᠳᠠᠪᠬᠢᠵᠤ ᠭᠠᠷᠤᠭᠠᠳ ᠬᠠᠷᠠᠬᠤᠯᠠᠷ ᠰᠠᠶᠢᠬᠢ ᠳᠤᠲᠠᠭᠠᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠦᠵᠡᠭᠳᠡᠬᠦ ᠦᠭᠡᠢ ᠠᠯᠠᠭᠠ ᠪᠣᠯᠵᠠᠢ᠃ ᠠᠷᠠᠢ ᠭᠡᠵᠦ ᠨᠢᠳᠦ ᠢᠷᠮᠡᠬᠦ ᠶ᠋ᠢᠨ ᠵᠠᠭᠤᠷᠠ ᠠᠯᠠᠭᠠ ᠪᠣᠯᠬᠤ ᠶ᠋ᠢ ᠲᠡᠳᠡ ᠣᠢᠯᠠᠭᠠᠭᠰᠠᠨ ᠦᠭᠡᠢ! ᠬᠤᠷᠳᠤᠨ ᠭᠡᠭᠴᠢ ᠴᠠᠭᠠᠨᠨ᠌ᠥ᠋ᠵᠦᠮ ᠦ᠋ᠨ ᠭᠡᠷ ᠵᠦᠭ ᠳᠠᠪᠬᠢᠵᠤ ᠣᠴᠢᠭᠠᠳ ᠮᠣᠷᠢᠳ ᠠ᠋ᠴᠠ ᠪᠠᠨ ᠪᠠᠭᠤᠯ ᠦᠭᠡᠢ ᠪᠡᠷ᠄《ᠰᠢᠨᠠᠯᠠᠮᠠ ᠬᠠᠮᠢᠭᠠ ᠪᠠᠢᠨᠠ?》 ᠭᠡᠵᠦ ᠠᠰᠠᠭᠤᠬᠤ ᠳ᠋ᠤ᠌᠂ ᠴᠠᠭᠠᠨᠨ᠌ᠥ᠋ᠵᠦᠮ᠄《ᠰᠢᠨᠠᠯᠠᠮᠠ ᠦᠦᠰᠢᠨᠵᠦᠦ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠪᠠᠢᠬᠤ ᠰᠤᠷᠠᠭ ᠪᠠᠢᠭᠰᠠᠨ ᠁》 ᠭᠡᠪᠡ᠃ ᠲᠡᠳᠡ ᠰᠠᠨᠳᠤᠷᠬᠤ ᠳ᠋ᠠᠭᠠᠨ᠄《ᠬᠦᠢ! ᠦᠬᠦᠭᠰᠡᠨ ᠮᠠᠭᠤ ᠴᠢᠪᠠᠭᠠᠨᠴᠠ ᠰᠠᠶᠢᠬᠠᠨ ᠫᠤᠤ ᠳᠤᠤᠭᠠᠷᠤᠭᠰᠠᠨ ᠤ᠋ ᠳᠠᠷᠠᠭᠠ ᠲᠠᠨ ᠤ᠋ ᠳ᠋ᠤ᠌ ᠬᠥᠮᠦᠨ ᠢᠷᠡᠭᠰᠡᠨ ᠦᠭᠡᠢ ᠤᠤ?》 ᠭᠡᠵᠦ ᠠᠭᠠᠰᠢᠯᠠᠪᠠ᠃ ᠨᠣᠶᠠᠨ ᠤ᠋ ᠴᠡᠷᠢᠭ ᠮᠣᠷᠢᠨ ᠠ᠋ᠴᠠ ᠪᠠᠨ ᠦᠰᠦᠷᠦᠨ ᠪᠠᠭᠤᠵᠤ ᠡᠨᠡ ᠠᠢᠯ ᠤ᠋ᠨ ᠭᠡᠷ ᠪᠠᠢᠰᠢᠩ ᠠ᠋ᠴᠠ ᠠᠪᠤᠭᠠᠳ ᠭᠠᠬᠠᠢ ᠶ᠋ᠢᠨ ᠡᠭᠦᠷ᠂ ᠣᠪᠣᠭᠠᠯᠠᠭᠰᠠᠨ ᠪᠤᠷᠭᠠᠰᠤ᠂ ᠰᠢᠪᠠᠭ ᠤ᠋ᠨ ᠲᠦᠯᠡᠭᠡ ᠬᠦᠷᠲᠡᠯᠡ ᠨᠡᠩᠵᠢᠭᠡᠳ ᠶᠠᠭᠤ ᠴᠤ᠌ ᠣᠯᠤᠭᠰᠠᠨ ᠦᠭᠡᠢ᠃ ᠳᠠᠬᠢᠨ ᠭᠠᠳᠠᠭᠤᠷ ᠨᠢ ᠬᠡᠳᠦ ᠤᠳᠠᠭᠠ ᠶᠠᠪᠠᠭᠠᠨ ᠬᠥᠮᠦᠨ ᠦ᠌ ᠮᠥᠷ ᠤᠯᠠ ᠶ᠋ᠢ ᠮᠥᠰᠬᠢᠵᠦ ᠪᠠᠢᠴᠠᠭᠠᠭᠰᠠᠨ ᠪᠣᠯᠪᠠᠴᠤ ᠡᠨᠳᠡ ᠰᠠᠶᠢᠬᠠᠨ ᠬᠥᠮᠦᠨ ᠢᠷᠡᠭᠰᠡᠨ ᠤᠯᠠ ᠮᠥᠷ ᠦᠭᠡᠢ ᠲᠤᠯᠠ ᠳᠠᠬᠢᠨ ᠵᠡᠭᠦᠨ ᠬᠣᠢᠲᠤ ᠶᠡᠬᠡ ᠮᠠᠩᠬᠠᠨ ᠤ᠋ ᠣᠷᠣᠢ ᠳ᠋ᠠᠬᠢ ᠰᠢᠨᠡᠯᠡᠮᠡ ᠶ᠋ᠢᠨ ᠮᠥᠷ ᠢ᠋ ᠳᠠᠭᠠᠨ ᠦᠬᠡᠷ ᠦ᠋ᠨ ᠬᠤᠳᠳᠤᠭ ᠳᠡᠭᠡᠷᠡ ᠨᠢᠭᠡ ᠬᠣᠣᠰ ᠤᠯᠠᠭᠠᠨ ᠮᠠᠬᠠᠢ ᠵᠡᠷᠭᠡᠴᠡᠭᠦᠯᠵᠦ ᠲᠠᠯᠪᠢᠵᠤ ᠪᠠᠢᠭᠠ ᠶ᠋ᠢ ᠣᠯᠵᠤ ᠦᠵᠡᠪᠡ᠃ ᠲᠡᠳᠡ ᠡᠨᠡ ᠵᠣᠯᠢᠭ ᠠᠷᠭᠠ ᠠᠯᠳᠠᠬᠤ ᠳ᠋ᠠᠭᠠᠨ ᠬᠤᠳᠳᠤᠭ ᠲᠤ᠌ ᠦᠰᠦᠷᠴᠦ ᠦᠬᠦᠵᠡᠢ ᠭᠡᠵᠦ ᠪᠣᠳᠣᠭᠠᠳ ᠡᠭᠡᠯᠵᠢ ᠪᠡᠷ ᠬᠡᠳᠦᠨ ᠴᠠᠭ ᠵᠠᠷᠤᠴᠠᠭᠤᠯᠵᠤ ᠬᠤᠳᠳᠤᠭ ᠤ᠋ᠨ ᠤᠰᠤ ᠶ᠋ᠢ ᠭᠠᠳᠠᠭᠰᠢ ᠠᠭᠤᠳᠠᠯᠠᠵᠡᠢ᠃ ᠡᠴᠦᠰ ᠲᠡᠭᠡᠨ ᠬᠤᠳᠳᠤᠭ ᠤ᠋ᠨ ᠤᠰᠤ ᠰᠢᠷᠭᠢᠭᠰᠡᠨ ᠪᠣᠯᠪᠠᠴᠤ ᠰᠢᠨᠡᠯᠡᠮᠡ ᠬᠠᠷᠠᠭᠳᠠᠭᠰᠠᠨ ᠦᠭᠡᠢ ᠵᠥᠪᠬᠡᠨ ᠲᠡᠭᠦᠨ ᠦ᠌ ᠨᠢᠭᠡ ᠬᠣᠣᠰ ᠬᠠᠭᠤᠴᠢᠷᠠᠭᠰᠠᠨ ᠤᠯᠠᠭᠠᠨ ᠮᠠᠬᠠᠢ ᠶ᠋ᠢ ᠯᠡ ᠣᠯᠵᠤ ᠦᠵᠡᠵᠡᠢ᠃
ᠰᠢᠨᠠᠯᠠᠮᠠ ᠲᠤᠰ ᠰᠥᠨᠢ ᠳ᠋ᠡᠭᠡᠨ ᠦᠤᠰᠢᠨᠵᠤᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠦᠷᠴᠦ ᠴᠢᠳᠠᠵᠠᠢ᠃ ᠬᠣᠶᠠᠷ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠦᠤᠰᠢᠨᠵᠤᠤ ᠶ᠋ᠢᠨ ᠰᠦᠮᠡ ᠡᠴᠡ ᠲᠤᠰᠬᠠᠢ ᠬᠥᠮᠦᠨ ᠢ᠋ᠶ᠋ᠡᠷ ᠪᠤᠷᠭᠠᠰᠤᠨ ᠳᠥᠭᠥᠮ ᠡᠴᠡ ᠪᠠᠷᠢᠵᠤ ᠤᠨᠤᠭᠰᠠᠨ ᠮᠣᠷᠢ ᠶ᠋ᠢ ᠴᠠᠭᠠᠨᠨ᠌ᠥ᠋ᠵᠦᠮ ᠦ᠋ᠨ ᠳ᠋ᠦ᠍ ᠪᠤᠴᠠᠭᠠᠯᠭᠠᠨ᠄《ᠪᠤᠷᠤᠭᠤ ᠪᠣᠯᠤᠯᠠ᠂ ᠪᠢ ᠳᠤᠷᠠ ᠪᠠᠷ ᠢ᠋ᠶ᠋ᠠᠨ ᠪᠡᠯᠴᠢᠭᠡᠷ ᠲᠦ᠍ ᠡᠪᠡᠰᠦᠯᠡᠵᠦ ᠪᠠᠢᠭᠠ ᠴᠢᠳᠥᠷ ᠲᠡᠢ ᠮᠣᠷᠢ ᠶ᠋ᠢ ᠴᠢᠨᠢ ᠪᠠᠷᠢᠵᠤ ᠤᠨᠤᠭᠰᠠᠨ ᠶᠤᠮ᠃ ᠭᠡᠪᠡᠴᠦ ᠠᠮᠪᠠᠨ ᠱᠠᠷ ᠪᠠ ᠠᠭᠲᠠ ᠮᠣᠷᠢᠨ ᠤ᠋ ᠴᠢᠨᠢ ᠪᠤᠶᠠᠨ ᠢ᠋ᠶ᠋ᠠᠷ ᠠᠮᠢ ᠬᠡᠯᠲᠦᠷᠢᠯᠡ ᠰᠢᠦ!》 ᠭᠡᠵᠦ ᠬᠡᠳᠦᠨ ᠴᠠᠭᠠᠨ ᠲᠥᠭᠥᠷᠢᠭ ᠦ᠋ᠨ ᠠᠴᠢ ᠬᠠᠷᠢᠭᠤᠯᠲᠠ ᠲᠠᠢ ᠬᠦᠷᠭᠡᠵᠦ ᠢᠷᠡᠭᠦᠯᠵᠡᠢ᠃
ᠭᠡᠲᠡᠯᠡ ᠴᠠᠭᠠᠨᠨ᠌ᠥ᠋ᠵᠦᠮ ᠦ᠋ᠨ ᠬᠢᠨ ᠰᠢᠨᠡᠯᠡᠮᠡ ᠮᠠᠨ ᠤ᠋ ᠮᠣᠷᠢ ᠶ᠋ᠢ ᠤᠨᠤᠭᠠᠳ ᠨᠣᠶᠠᠨ ᠤ᠋ ᠴᠡᠷᠢᠭ ᠡᠴᠡ ᠳᠤᠲᠠᠭᠠᠵᠤ ᠭᠠᠷᠤᠭᠰᠠᠨ ᠶᠤᠮ ᠪᠠᠢᠨᠠ ᠭᠡᠳᠡᠭ ᠢ᠋ ᠣᠢᠯᠠᠭᠠᠭᠰᠠᠨ ᠠ᠋ᠴᠠ ᠪᠢᠰᠢ ᠦᠬᠡᠷ ᠦ᠋ᠨ ᠬᠤᠳᠳᠤᠭ ᠳᠡᠭᠡᠷᠡ ᠮᠠᠬᠠᠢ ᠪᠠᠨ ᠲᠠᠢᠯᠵᠤ ᠬᠠᠶᠠᠭᠰᠠᠨ ᠪᠠ ᠠᠮᠪᠠᠨ ᠱᠠᠷ ᠤ᠋ᠨ ᠤᠴᠢᠷ ᠢ᠋ ᠬᠣᠵᠢᠮ ᠰᠢᠨᠠᠯᠠᠮᠠ ᠲᠠᠢ ᠤᠴᠠᠷᠠᠭᠠᠳ ᠰᠠᠶᠢ ᠣᠢᠯᠠᠭᠠᠵᠤ ᠮᠡᠳᠡᠭᠰᠡᠨ ᠭᠡᠨᠡ᠃
— — — —
① ᠡᠨᠡ ᠦᠯᠢᠭᠡᠷ ᠢ᠋1978 ᠣᠨ ᠳ᠋ᠤ᠌ ᠭᠠᠯᠠᠭᠤᠲᠤ ᠶ᠋ᠢᠨ ᠪᠤᠵᠠᠢ ᠭᠠᠴᠠᠭᠠᠨ ᠤ᠋ ᠲᠠᠪᠰᠠᠩ ᠬᠤᠷᠰᠢᠶᠠ ᠶ᠋ᠢᠨ ᠴᠠᠭᠳᠤᠷ ᠨᠠᠰᠤᠲᠠᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠪᠡ᠃
6. 1930 ᠣᠨ ᠤ᠋ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠢᠯᠳᠤᠭᠠᠨ
ᠦᠦᠰᠢᠨ ᠨᠣᠶᠠᠨ ᠲᠡᠭᠦᠰᠠᠠᠮᠦᠭᠤᠯᠠᠩ ᠲᠡᠮᠡᠭᠡᠲᠦ(ᠢᠦᠢ ᠯᠢᠨ) ᠡᠴᠡ ᠭᠠᠷᠴᠤ ᠵᠠᠰᠠᠭ ᠳᠠ ᠶ᠋ᠢᠨ ᠭᠠᠵᠠᠷ ᠣᠴᠢᠵᠤ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠵᠥᠪᠳᠡᠯᠴᠡᠭᠡᠳ ᠲᠦᠷ ᠴᠠᠭ ᠵᠠᠰᠠᠭ ᠬᠤᠰᠢᠭᠤᠨ ᠤ᠋ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠳᠡᠭᠡᠷᠡ ᠣᠴᠢᠵᠤ ᠰᠠᠭᠤᠵᠠᠢ᠃ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠪᠣᠯ ᠡᠳᠦᠭᠡ ᠶ᠋ᠢᠨ ᠡᠵᠡᠨ ᠬᠣᠷᠣᠭᠠ ᠬᠤᠰᠢᠭᠤᠨ ᠤ᠋ ᠰᠢᠨᠡ ᠵᠡᠭᠡᠯᠢ ᠶ᠋ᠢᠨ ᠪᠠᠷᠠᠭᠤᠨ ᠬᠣᠢᠨᠠ ᠰᠦᠨᠳᠡᠷᠯᠡᠨ ᠬᠠᠷᠠᠭᠳᠠᠬᠤ ᠳᠤᠭᠠᠩ ᠬᠤᠷᠠᠬᠤ ᠶ᠋ᠢᠨ ᠣᠪᠣᠭᠠᠨ ᠤ᠋ ᠡᠩᠭᠡᠷ ᠲᠡᠬᠢ ᠨᠡᠯᠢᠶᠡᠳ ᠶᠡᠬᠡ ᠰᠦᠮᠡ ᠪᠠᠢᠵᠠᠢ᠃ ᠡᠨᠡ ᠰᠦᠮᠡ ᠨᠢ ᠵᠠᠰᠠᠭ ᠬᠣᠰᠢᠭᠤ᠂ ᠦᠦᠰᠢᠨ ᠬᠣᠰᠢᠭᠤ ᠬᠣᠶᠠᠷ ᠤ᠋ᠨ ᠠᠭᠤᠯᠵᠠᠷ ᠲᠤ᠌ ᠪᠠᠢᠷᠢᠰᠢᠵᠤ ᠪᠠᠢᠬᠤ ᠲᠤᠯᠠ ᠬᠣᠶᠠᠷ ᠬᠤᠰᠢᠭᠤᠨ ᠠ᠋ᠴᠠ ᠬᠠᠮᠢᠶᠠᠷᠴᠤ ᠬᠣᠶᠠᠷ ᠬᠤᠰᠢᠭᠤᠨ ᠤ᠋ ᠭᠠᠵᠠᠷ ᠠ᠋ᠴᠠ ᠯᠠᠮᠠ ᠬᠤᠸᠠᠷᠠᠭ ᠲᠠᠢ ᠪᠢᠯᠡ᠃ ᠡᠨᠳᠡ ᠬᠣᠶᠠᠷ ᠬᠤᠰᠢᠭᠤᠨ ᠤ᠋ ᠬᠣᠯᠠ ᠣᠢᠷᠠ ᠶ᠋ᠢᠨ ᠴᠢᠮᠡᠭᠡ ᠨᠡᠪᠲᠡᠷᠡᠯᠭᠡ ᠶ᠋ᠢ ᠬᠢᠯᠪᠠᠷᠬᠠᠨ ᠰᠣᠨᠣᠰᠳᠠᠭ᠃ ᠲᠤᠰ ᠰᠦᠮᠡ ᠳ᠋ᠦ᠍ ᠦᠦᠰᠢᠨ ᠨᠣᠶᠠᠨ ᠰᠠᠭᠠᠲᠠᠵᠤ ᠰᠦᠷ ᠣᠮᠣᠭ ᠨᠡᠮᠡᠭᠳᠡᠭᠰᠡᠨ ᠪᠣᠯᠪᠠᠴᠤ ᠠᠯᠠᠵᠤ ᠨᠢᠲᠤᠯᠬᠤ ᠶ᠋ᠢ ᠴᠠᠭᠠᠵᠠᠯᠠᠭᠰᠠᠨ ᠯᠠᠮᠠ ᠨᠠᠷ ᠭᠡᠨᠡᠳᠲᠡ ᠴᠥᠪ ᠦ᠋ᠨ ᠴᠠᠭ ᠤ᠋ᠨ ᠲᠡᠢᠨ ᠪᠠᠢᠯᠳᠤᠭᠠᠨ ᠭᠠᠷᠴᠤ ᠪᠤᠷᠬᠠᠨ ᠴᠣᠢᠵᠣᠩ᠂ ᠰᠦᠮᠡ ᠬᠡᠢᠳ᠂ ᠣᠷᠣᠨ ᠭᠡᠷ᠂ ᠡᠷᠲᠡ ᠡᠳᠦᠭᠡ ᠶ᠋ᠢᠨ ᠲᠡᠦᠬᠡᠲᠦ ᠥᠪ ᠵᠡᠷᠭᠡ ᠡᠪᠳᠡᠵᠦ ᠰᠦᠢᠳᠬᠦ ᠡᠴᠡ ᠠᠶᠤᠵᠤ ᠡᠳᠦᠷ ᠪᠦᠷᠢ ᠪᠤᠷᠬᠠᠨ ᠨᠣᠮ ᠳ᠋ᠠᠭᠠᠨ ᠨᠠᠮᠠᠨᠴᠢᠯᠠᠨ ᠳᠠᠭᠠᠳᠬᠠᠨ ᠰᠦᠰᠦᠭᠯᠡᠵᠦ ᠪᠠᠢᠯᠠ᠃
ᠰᠦᠰᠦᠭ ᠪᠢᠰᠢᠷᠡᠯ ᠢ᠋ᠶ᠋ᠡᠷ ᠳᠠᠭᠠᠳᠬᠠᠭᠰᠠᠨ ᠴᠤ᠌ ᠢᠷᠡᠵᠦ ᠮᠡᠳᠡᠬᠦ ᠲᠡᠢᠨ ᠪᠠᠢᠯᠳᠤᠭᠠᠨ᠂ ᠦᠢᠯᠡ ᠶ᠋ᠢᠨ ᠦᠷᠡ ᠶ᠋ᠢᠨ ᠬᠣᠬᠢᠷᠠᠯ ᠰᠦᠢᠳᠦᠯ ᠢ᠋ ᠵᠠᠢᠯᠠᠭᠤᠯᠵᠤ ᠴᠢᠳᠠᠳᠠᠭ ᠪᠣᠯᠪᠠᠤ⁈ ᠡᠨᠡ ᠠᠰᠠᠭᠤᠳᠠᠯ ᠢ᠋ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠢᠯᠳᠤᠭᠠᠨ ᠠ᠋ᠴᠠ ᠣᠯᠵᠤ ᠮᠡᠳᠡᠬᠦ ᠪᠣᠯᠤᠨᠠ᠃ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠴᠡᠷᠢᠭ ᠠᠩᠭᠢ ᠦᠦᠰᠢᠨ ᠦ᠌ ᠦᠦᠰᠢᠨᠵᠦᠦ ᠰᠦᠮᠡ ᠳᠡᠭᠡᠷᠡ ᠰᠠᠭᠤᠵᠤ᠂ ᠲᠡᠳᠡ ᠶᠠᠭᠤᠨ ᠤ᠋ ᠡᠮᠦᠨᠡ ᠦᠦᠰᠢᠨ ᠨᠣᠶᠠᠨ ᠲᠡᠭᠦᠰᠠᠠᠮᠤᠭᠤᠯᠠᠩ ᠢ᠋ ᠲᠠᠲᠠᠵᠤ ᠠᠪᠬᠤ ᠪᠠᠷ ᠨᠠᠢᠷᠠᠮᠳᠠᠯ ᠤ᠋ᠨ ᠠᠷᠭᠠ ᠪᠠᠷ ᠬᠦᠴᠦᠯᠡᠨ ᠴᠢᠷᠮᠠᠢᠵᠤ ᠪᠠᠢᠯᠠ᠃
ᠬᠣᠷᠢᠶᠠᠨ ᠳᠠᠷᠤᠭᠠ ᠮᠥᠩᠬᠡᠥ᠌ᠯᠵᠠᠢ ᠠ᠋ᠴᠠ ᠶᠠᠭᠤᠨ ᠤ᠋ ᠡᠮᠦᠨᠡ ᠲᠦᠮᠡᠨᠪᠠᠶᠠᠷ᠂ ᠬᠠᠯᠵᠠᠨᠨ᠌ᠥ᠋ᠬᠢᠨ ᠵᠡᠷᠭᠡ ᠳᠥᠷᠪᠡᠨ ᠬᠠᠷᠢᠶᠠᠨ ᠵᠠᠯᠠᠨ ᠢ᠋ ᠲᠤᠰᠬᠠᠢ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠳ᠋ᠤ᠌ ᠶᠠᠪᠤᠭᠤᠯᠵᠤ ᠲᠡᠭᠦᠰᠠᠠᠮᠤᠭᠤᠯᠠᠩ ᠨᠣᠶᠠᠨ ᠢ᠋ ᠬᠤᠰᠢᠭᠤᠨ ᠳ᠋ᠠᠭᠠᠨ ᠰᠠᠭᠠᠳᠠᠭᠠᠷᠠᠢ ᠭᠡᠮᠡᠨ ᠬᠠᠳᠠᠭ ᠰᠠᠮᠪᠠᠢ ᠲᠠᠲᠠᠵᠤ ᠳᠡᠭᠡᠵᠢ ᠰᠠᠪᠠ ᠪᠠᠨ ᠲᠠᠯᠪᠢᠵᠤ ᠤᠷᠢᠪᠠ᠃ ᠨᠣᠶᠠᠨ ᠲᠡᠳᠡᠨ ᠦ᠌ ᠳᠡᠭᠡᠵᠢ ᠶ᠋ᠢ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠪᠠᠢᠳᠠᠯ ᠲᠠᠢ ᠳᠥᠩᠭᠡᠵᠦ ᠮᠥᠷᠭᠥᠬᠦ ᠶ᠋ᠢᠨ ᠰᠠᠢᠨ ᠢ᠋ᠶ᠋ᠠᠷ ᠠᠪᠤᠯᠠ᠃ ᠨᠣᠶᠠᠨ ᠡᠳᠦᠷᠵᠢᠨ ᠬᠠᠨᠵᠤᠨ ᠳᠡᠭᠡᠷᠡ ᠬᠡᠪᠲᠡᠵᠦ ᠠᠮᠠᠷᠠᠭᠠᠳ ᠬᠠᠷᠠ ᠲᠠᠮᠠᠬᠢ ᠲᠠᠲᠠᠬᠤ ᠠ᠋ᠴᠠ ᠪᠢᠰᠢ ᠬᠠᠷᠢᠭᠤ ᠵᠢᠭᠠᠪᠤᠷᠢ ᠦᠭᠡᠢ ᠬᠣᠶᠠᠷ ᠡᠳᠦᠷ ᠥᠩᠭᠡᠷᠡᠴᠢᠬᠡᠯᠡ᠃ ᠨᠣᠶᠠᠨ ᠦᠭᠡ ᠳᠤᠤᠭᠠᠷᠬᠤ ᠦᠭᠡᠢ ᠪᠣᠯᠬᠤᠯᠠ ᠲᠡᠳᠡ ᠳᠥᠷᠪᠡᠭᠦᠯᠡ ᠡᠴᠡ ᠨᠣᠶᠠᠨ ᠤ᠋ ᠵᠠᠬᠠ ᠳ᠋ᠤ᠌ ᠬᠦᠷᠴᠦ ᠮᠥᠷᠭᠥᠭᠡᠳ᠄《ᠪᠢᠳᠡ ᠬᠡᠳᠦᠨ ᠡᠳᠦᠷ ᠬᠦᠯᠢᠶᠡᠯᠡ᠂ ᠨᠣᠶᠠᠨ ᠲᠠ ᠬᠠᠷᠢᠭᠤ ᠵᠢᠭᠠᠪᠤᠷᠢ ᠦᠭᠡᠢ ᠲᠤᠯᠠ ᠪᠢᠳᠡ ᠴᠦ᠍ ᠤᠳᠠᠭᠠᠨ ᠬᠦᠯᠢᠶᠡᠵᠦ ᠲᠡᠰᠬᠦ ᠦᠭᠡᠢ ᠪᠤᠴᠠᠯᠠ᠁》 ᠭᠡᠳ ᠦᠦᠰᠢᠨᠵᠦᠦ ᠰᠦᠮᠡ ᠳᠡᠭᠡᠷᠡ ᠪᠤᠴᠠᠵᠤ ᠢᠷᠡᠭᠡᠳ ᠮᠥᠩᠬᠡᠨ᠌ᠥ᠋ᠯᠵᠡᠢ ᠬᠣᠷᠢᠶᠠᠨ ᠳᠠᠷᠤᠭᠠ ᠳ᠋ᠤ᠌ ᠡᠨᠡ ᠬᠦ᠌ ᠪᠠᠢᠳᠠᠯ ᠢ᠋ᠶ᠋ᠠᠨ ᠬᠠᠷᠢᠭᠤ ᠮᠡᠳᠡᠭᠦᠯᠪᠡ᠃ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠮᠥᠩᠬᠡᠨ᠌ᠥ᠋ᠯᠵᠡᠢ ᠪᠠᠰᠠ ᠬᠡᠳᠦᠨ ᠬᠥᠮᠦᠨ ᠲᠣᠮᠢᠯᠠᠵᠤ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠯᠢᠶᠡᠨᠵᠠᠩ ᠠᠮᠤᠷᠰᠠᠨᠠᠭᠠ ᠶ᠋ᠢ ᠲᠠᠲᠠᠵᠤ ᠠᠪᠬᠤ ᠪᠠᠷ ᠶᠠᠪᠤᠭᠤᠯᠵᠠᠢ᠃ ᠡᠳᠡᠭᠡᠷ ᠬᠥᠮᠦᠰ ᠦ᠋ᠨ ᠨᠢᠭᠤᠴᠠ ᠤᠬᠠᠭᠤᠯᠭᠠ ᠠ᠋ᠴᠠ ᠪᠣᠯᠵᠤ ᠠᠮᠤᠷᠰᠠᠨᠠᠭᠠ ᠶ᠋ᠢᠨ ᠦᠵᠡᠯ ᠰᠠᠨᠠᠭᠠ ᠨᠢ ᠳᠤᠭᠤᠢᠯᠠᠩ ᠥᠭᠡᠳᠡ ᠬᠡᠯᠪᠡᠢᠬᠦ ᠪᠠᠢᠳᠠᠯ ᠲᠠᠢ ᠪᠣᠯᠪᠠ᠃ ᠣᠯᠠᠨ ᠬᠥᠮᠦᠰ ᠴᠦ᠍ ᠬᠣᠶᠠᠷ ᠲᠠᠯᠠ ᠪᠠᠷ ᠪᠠᠬᠠᠨ ᠨᠠᠭᠠᠰᠢ ᠴᠠᠭᠠᠰᠢ ᠶᠠᠪᠤᠯᠴᠠᠵᠤ᠂ ᠲᠡᠢᠨ ᠵᠣᠭᠰᠣᠵᠤ ᠲᠠᠢᠪᠤᠩ ᠢᠷᠡᠬᠦ ᠶ᠋ᠢ ᠬᠦᠰᠡᠵᠦ ᠪᠠᠢᠪᠠ᠃ᠮᠥᠩᠬᠡᠨ᠌ᠥ᠋ᠯᠵᠡᠢ ᠡᠨᠡ ᠪᠠᠢᠳᠠᠯ ᠢ᠋ ᠮᠡᠳᠡᠭᠡᠳ᠄《ᠦ! ᠣᠳᠣ ᠲᠠᠷᠪᠤᠰ ᠤᠯᠠᠢᠵᠤ ᠡᠬᠢᠯᠡᠭᠰᠡᠨ ᠲᠤᠯᠠ ᠬᠢᠲᠤᠭᠠ ᠲᠥᠷᠥᠬᠦ ᠴᠠᠭ ᠪᠣᠯᠵᠠᠢ》 ᠭᠡᠯᠡ᠃ ᠡᠨᠡ ᠦᠭᠡ ᠶ᠋ᠢᠨ ᠤᠳᠬᠠ ᠪᠣᠯᠪᠠᠰᠤ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠲᠣᠯᠣᠭᠠᠢ ᠨᠢ ᠭᠤᠢᠪᠢᠯᠵᠠᠵᠤ ᠴᠡᠷᠢᠭ ᠨᠢ ᠮᠢᠨᠴᠡᠭᠦᠷᠡᠵᠦ ᠪᠠᠢᠭᠠ ᠦᠶᠡ ᠳ᠋ᠦ᠍ ᠪᠠᠢᠯᠳᠤᠪᠠᠯ ᠢᠯᠠᠯᠲᠠ ᠯᠠᠪᠲᠠᠢ ᠪᠢᠳᠡᠨ ᠦ᠌ ᠬᠢ ᠭᠡᠵᠦ ᠵᠢᠱ᠌ᠢᠭᠰᠡᠨ ᠠᠵᠢ᠃
ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠳᠥᠷᠪᠡᠨ ᠯᠢᠶᠠᠨ ᠮᠣᠷᠢᠲᠤ ᠴᠡᠷᠢᠭ ᠦᠦᠰᠢᠨᠵᠦᠦ ᠶ᠋ᠢᠨ ᠰᠦᠮᠡ ᠡᠴᠡ ᠭᠠᠷᠤᠭᠠᠳ ᠲᠠᠷᠬᠠᠨᠯᠠᠮᠠ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠣᠨᠣᠵᠠᠢ᠃ ᠲᠡᠳᠡ ᠰᠦᠮᠡ ᠶ᠋ᠢᠨ ᠣᠪᠣᠭᠠ ᠶ᠋ᠢ ᠬᠥᠬᠡ ᠢᠮᠠᠭᠠᠨ ᠤ᠋ ᠬᠠᠯᠠᠭᠤᠨ ᠴᠢᠰᠤ ᠪᠠᠷ ᠰᠡᠷᠵᠢᠮ ᠡᠷᠭᠦᠵᠦ᠂ ᠵᠢᠷᠦᠬᠡ ᠪᠡᠷ ᠨᠢ ᠵᠦᠯᠳᠡ ᠲᠠᠬᠢᠯᠭᠠ ᠰᠠᠩ ᠰᠡᠷᠵᠢᠮ ᠡᠷᠭᠦᠪᠡ᠃ ᠲᠤᠰ ᠰᠥᠨᠢ ᠨᠢ ᠪᠠᠰᠠ ᠲᠠᠷᠬᠠᠨᠯᠠᠮᠠ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠭᠣᠣᠯ ᠰᠢᠲᠦᠭᠡᠨ ᠪᠣᠯᠬᠤ ᠨᠣᠭᠣᠭᠠᠨ ᠭᠦᠮᠪᠦ ᠪᠤᠷᠬᠠᠨ ᠢ᠋ ᠳᠠᠬᠢᠵᠤ ᠲᠣᠭᠰᠢᠭᠤᠯᠪᠠ᠃ ᠲᠠᠷᠬᠠᠨᠯᠠᠮᠠ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠭᠣᠣᠯ ᠰᠢᠲᠦᠭᠡᠨ ᠪᠣᠯᠬᠤ ᠨᠣᠭᠣᠭᠠᠨ ᠭᠦᠮᠪᠦ ᠪᠤᠷᠬᠠᠨ ᠪᠣᠯ ᠲᠤᠢᠯ ᠤ᠋ᠨ ᠳᠣᠭᠰᠢᠨ ᠲᠤᠯᠠ ᠲᠡᠭᠦᠨ ᠢ᠋ ᠳᠠᠬᠢᠪᠠᠯ ᠠᠯᠠᠵᠤ ᠨᠢᠲᠤᠯᠬᠤ ᠳ᠋ᠤ᠌ ᠬᠡᠢᠮᠣᠷᠢ ᠲᠠᠢ ᠪᠥᠭᠡᠳ ᠤᠷᠤᠭᠰᠢ ᠲᠠᠢ ᠪᠠᠢᠳᠠᠭ ᠭᠡᠨᠡ᠃ ᠮᠠᠷᠭᠠᠰᠢ ᠥᠷᠯᠥᠭᠡ ᠨᠢ ᠲᠡᠳᠡ ᠣᠷᠳᠣᠰ ᠮᠣᠩᠭᠣᠯᠴᠤᠳ ᠤ᠋ᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠤᠰᠠᠩ ᠲᠠᠯᠪᠢᠵᠤ᠂ ᠰᠠᠩ ᠰᠡᠷᠵᠢᠮ ᠡᠷᠭᠦᠵᠦ ᠪᠣᠭᠳᠠ ᠡᠵᠡᠨ ᠳ᠋ᠦ᠍ ᠳᠠᠭᠠᠳᠬᠠᠵᠤ ᠯᠢᠶᠡᠨᠵᠤᠤ ᠫᠤᠤ ᠶ᠋ᠢᠨ ᠠᠮᠠᠰᠠᠷ ᠢ᠋ ᠲᠠᠪᠤᠨ ᠥᠩᠭᠡ ᠶ᠋ᠢᠨ ᠬᠬᠢᠪ ᠲᠣᠷᠭᠠ ᠪᠠᠷ ᠣᠷᠢᠶᠠᠵᠤ ᠨᠠᠪᠰᠠᠯᠵᠠᠭᠤᠯᠤᠨ ᠠᠭᠲᠠ ᠪᠠᠨ ᠤᠨᠤᠵᠤ ᠮᠥᠷᠯᠡᠨ ᠵᠢᠭᠰᠠᠪᠠ᠃ ᠬᠥᠬᠡ ᠰᠠᠭᠠᠷᠠᠯ ᠬᠤᠪᠴᠠᠰᠤ ᠲᠠᠢ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠳᠥᠷᠪᠡᠨ ᠯᠢᠶᠠᠨ ᠴᠡᠷᠢᠭ᠂ ᠳᠥᠷᠪᠡᠨ ᠮᠥᠷ ᠦ᠋ᠨ ᠤᠷᠲᠤ ᠵᠢᠭᠰᠠᠭᠠᠯ ᠢ᠋ᠶ᠋ᠠᠷ ᠬᠣᠷᠢᠨ ᠳᠥᠷᠪᠡ ᠳᠥᠷᠪᠡ ᠪᠡᠷ ᠮᠣᠷᠢᠨ ᠤ᠋ ᠪᠠᠨ ᠥᠩᠭᠡ ᠵᠢᠰᠦᠮ ᠢ᠋ ᠲᠠᠭᠠᠷᠠᠭᠤᠯᠤᠨ ᠮᠣᠷᠳᠠᠵᠤ ᠪᠠᠯᠠᠷ ᠪᠠᠷᠲᠠᠭᠠ ᠶ᠋ᠢ ᠠᠷᠤ ᠳ᠋ᠠᠭᠠᠨ ᠬᠠᠶᠠᠭᠰᠠᠭᠠᠷ ᠤᠷᠤᠭᠰᠢᠯᠠᠵᠠᠭᠠᠪᠠ᠃
ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠶ᠋ᠢᠨ ᠨᠢᠭᠡ ᠬᠣᠶᠠᠳᠤᠭᠠᠷ ᠤᠳᠠᠭᠠᠨ ᠤ᠋ ᠬᠤᠪᠢᠰᠬᠠᠯᠲᠤ ᠲᠡᠢᠨ ᠦ᠌ ᠵᠢᠯ ᠦ᠋ᠳ ᠲᠦ᠍ ᠮᠤᠤᠤ᠋ᠰᠤ ᠶ᠋ᠢᠨ ᠡᠯᠡᠰᠦᠨ ᠪᠠᠯᠠᠷ ᠲᠤ᠌᠂ ᠬᠠᠨᠳᠤᠭᠰᠠᠨ ᠵᠦᠭ ᠲᠦ᠍ ᠳᠠᠢᠰᠤᠨ ᠦᠭᠡᠢ᠂ ᠬᠠᠷᠪᠤᠭᠰᠠᠨ ᠭᠠᠵᠠᠷ ᠲᠤ᠌ ᠬᠣᠭᠣᠰᠣᠨ ᠦᠭᠡᠢ ᠴᠣᠷ ᠤ᠋ᠨ ᠭᠠᠭᠴᠠ ᠢᠯᠠᠯᠲᠠ ᠲᠠᠢ ᠪᠠᠢᠯᠳᠤᠵᠤ ᠶᠠᠪᠤᠭᠰᠠᠨ ᠮᠣᠷᠢᠲᠤ ᠴᠡᠷᠢᠭ ᠦ᠋ᠨ ᠬᠣᠷᠢᠶᠠᠨ ᠤ᠋ ᠳᠠᠷᠤᠭᠠ ᠪᠠᠢᠯᠳᠤᠭᠴᠢᠳ ᠤ᠋ᠨ ᠣᠮᠣᠭ ᠵᠣᠷᠢᠭ᠂ ᠰᠦᠯᠳᠡ ᠬᠡᠢᠮᠣᠷᠢ ᠨᠢ ᠮᠠᠨᠳᠤᠵᠤ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠬᠦᠷᠬᠦ ᠪᠡᠷ ᠶᠠᠭᠠᠷᠠᠯᠳᠤᠨ ᠳᠠᠪᠬᠢᠵᠠᠭᠠᠨᠠ᠃
ᠣᠷᠳᠣᠰ ᠠᠷᠠᠳ ᠤ᠋ᠨ ᠰᠡᠴᠡᠨ ᠦᠭᠡᠨ ᠳ᠋ᠦ᠍᠄《ᠪᠡᠯᠭᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠬᠤᠷᠠ᠂ ᠪᠠᠷᠢᠳ ᠤ᠋ᠨ ᠡᠮᠦᠨᠡ ᠡᠴᠡ ᠲᠣᠭᠣᠰᠣ》 ᠭᠡᠳᠡᠭ ᠢ᠋ᠶ᠋ᠡᠷ ᠡᠨᠡ ᠬᠦ᠌ ᠴᠡᠷᠢᠭ ᠠᠩᠭᠢ ᠳᠠᠷᠠᠬᠠᠯᠠᠮᠠ ᠠ᠋ᠴᠠ ᠮᠣᠷᠳᠠᠭᠠᠳ ᠨᠡᠯᠢᠶᠡᠳ ᠶᠠᠪᠤᠵᠤ ᠪᠠᠢᠲᠠᠯᠠ ᠨᠠᠷᠢᠨ ᠪᠣᠷᠣᠭᠠᠨ ᠰᠢᠪᠡᠷᠡᠯᠡ᠃ ᠴᠡᠷᠢᠭ ᠦ᠋ᠳ ᠵᠠᠷᠢᠮ ᠦᠶᠡ ᠮᠣᠷᠢᠳ ᠢ᠋ᠶ᠋ᠠᠨ ᠬᠥᠲᠥᠯᠵᠦ ᠵᠠᠷᠢᠮ ᠦᠶᠡ ᠤᠨᠤᠵᠤ ᠭᠠᠯᠭᠢᠭᠤᠯᠵᠤ ᠶᠠᠪᠤᠵᠠᠭᠠᠨᠠ᠃ ᠰᠥᠨᠢ ᠪᠦᠷᠦᠢ ᠪᠣᠯᠬᠤ ᠳ᠋ᠤ᠌ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠷᠠᠭᠤᠨ ᠲᠠᠢ ᠬᠥᠬᠡ ᠵᠦᠯᠭᠡ ᠭᠡᠳᠡᠭ ᠭᠠᠵᠠᠷ ᠤ᠋ᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠨᠢᠭᠡ ᠠᠢᠯ ᠳ᠋ᠤ᠌ ᠪᠠᠭᠤᠳᠠᠯᠯᠠᠵᠤ᠂ ᠴᠡᠷᠢᠭ ᠮᠣᠷᠢ ᠪᠠᠨ ᠲᠦᠷ ᠠᠮᠠᠷᠠᠭᠤᠯᠵᠤ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠣᠷᠣᠬᠤ ᠬᠣᠶᠠᠳᠤᠭᠠᠷ ᠳᠡᠰ ᠦ᠋ᠨ ᠪᠡᠯᠡᠳᠬᠡᠯ ᠢ᠋ ᠬᠢᠯᠡ᠃ ᠢᠩᠭᠢᠭᠡᠳ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠶ᠋ᠢ ᠲᠣᠬᠢᠶᠠᠯᠳᠤᠭᠤᠯᠤᠨ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠵᠦᠭ ᠮᠣᠷᠳᠠᠵᠠᠭᠠᠯᠠ᠃
ᠮᠥᠩᠬᠡᠣ᠋ᠢ᠍ᠯᠵᠠᠢ ᠬᠣᠷᠢᠶᠠᠨ ᠳᠠᠷᠤᠭᠠ ᠪᠣᠯᠤᠨ ᠪᠠᠪᠠ ᠯᠢᠶᠠᠨᠵᠠᠩ ᠵᠠᠮᠢᠶᠠᠨᠵᠠᠪ ᠨᠠᠷ ᠴᠡᠷᠢᠭ ᠢ᠋ᠶ᠋ᠡᠨ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠷᠠᠭᠤᠨ ᠰᠤᠭᠤ ᠳ᠋ᠤ᠌ ᠪᠠᠢᠭᠠ ᠶᠡᠬᠡ ᠦᠶᠡᠷ ᠦ᠋ᠨ ᠬᠣᠩᠭᠢᠯ ᠵᠡᠪᠡ ᠳ᠋ᠦ᠍ ᠨᠢᠭᠤᠨ ᠳᠠᠯᠳᠠᠯᠠᠭᠤᠯᠵᠤ ᠪᠠᠢᠯᠳᠤᠭᠠᠨ ᠤ᠋ ᠪᠠᠢᠷᠢᠯᠠᠭᠤᠯᠤᠯᠲᠠ ᠬᠢᠯᠡ᠃ ᠡᠨᠡ ᠨᠢ᠄
(1) ᠬᠦᠴᠣᠨᠲᠡᠭᠦᠰ ᠨᠢᠭᠡ ᠰᠠᠯᠠᠭᠠ ᠴᠡᠷᠢᠭ ᠠᠪᠴᠤ ᠰᠦᠮᠡ ᠶ᠋ᠢᠨ ᠬᠣᠢᠲᠤ ᠳᠤᠭᠠᠩ ᠬᠤᠷᠠᠬᠤ ᠶ᠋ᠢᠨ ᠣᠪᠣᠭᠠᠨ ᠣᠷᠣᠢ ᠳᠡᠭᠡᠷᠡᠬᠢ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠢ᠋ ᠫᠤᠤ ᠳᠤᠤᠭᠠᠷᠭᠠᠬᠤ ᠦᠭᠡᠢ ᠠᠮᠢᠳᠤ ᠪᠠᠷ ᠪᠠᠷᠢᠨᠠ᠃ ᠳᠠᠷᠠᠭᠠ ᠨᠢ ᠰᠦᠮᠡ ᠶ᠋ᠢᠨ ᠭᠣᠷᠢᠶᠠᠨ ᠵᠠᠮ ᠤ᠋ᠨ ᠭᠠᠳᠠᠭᠤᠷ ᠲᠣᠭᠣᠷᠢᠨ ᠶᠠᠪᠤᠵᠤ ᠭᠠᠳᠠᠨᠠ ᠠ᠋ᠴᠠ ᠢᠷᠡᠬᠦ ᠳᠠᠢᠰᠤᠨ ᠢ᠋ ᠰᠠᠢᠲᠤᠷ ᠰᠡᠷᠭᠡᠢᠯᠡᠨ ᠬᠣᠷᠢᠭᠯᠠᠨᠠ᠂ ᠳᠣᠲᠣᠷᠠ ᠠ᠋ᠴᠠ ᠭᠠᠳᠠᠭᠰᠢ ᠪᠠᠨ ᠨᠢᠭᠡ ᠬᠥᠮᠦᠨ ᠢ᠋ ᠴᠦ᠍ ᠭᠠᠷᠭᠠᠵᠤ ᠪᠣᠯᠬᠤ ᠦᠭᠡᠢ᠃
(2) ᠰᠦᠩᠨᠠᠢ ᠳᠥᠷᠪᠡᠳᠦᠭᠡᠷ ᠯᠢᠶᠠᠨ ᠤ᠋ ᠨᠢᠭᠡ ᠰᠠᠯᠠᠭᠠ ᠴᠡᠷᠢᠭ ᠢ᠋ ᠠᠪᠴᠤ ᠰᠦᠮᠡ ᠶ᠋ᠢᠨ ᠯᠠᠮᠠ ᠨᠠᠷ ᠢ᠋ ᠭᠡᠷ ᠡᠴᠡ ᠭᠠᠷᠴᠤ ᠠᠶᠤᠵᠤ ᠳᠤᠲᠠᠭᠠᠬᠤ ᠶ᠋ᠢ ᠬᠣᠷᠢᠭᠯᠠᠨᠠ᠃
(3) ᠨᠢᠭᠡᠳᠦᠭᠡᠷ ᠯᠢᠶᠠᠨ ᠰᠦᠮᠡ ᠶ᠋ᠢᠨ ᠡᠮᠦᠨᠡ ᠲᠠᠯᠠ ᠠ᠋ᠴᠠ᠂ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠰᠦᠮᠡ ᠶ᠋ᠢᠨ ᠵᠡᠭᠦᠨ ᠲᠠᠯᠠ ᠠ᠋ᠴᠠ᠂ ᠭᠤᠷᠪᠠᠳᠤᠭᠠᠷ ᠯᠢᠶᠠᠨ ᠰᠦᠮᠡ ᠶ᠋ᠢᠨ ᠬᠣᠢᠲᠤ ᠲᠠᠯᠠ ᠠ᠋ᠴᠠ᠂ ᠳᠥᠷᠪᠡᠳᠦᠭᠡᠷ ᠯᠢᠶᠠᠨ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠲᠠᠯᠠ ᠠ᠋ᠴᠠ ᠨᠢ ᠲᠤᠰ ᠲᠤᠰ ᠳᠣᠲᠣᠭᠰᠢ ᠳᠠᠷᠤᠨ ᠬᠤᠮᠢᠵᠤ ᠪᠦᠰᠡᠯᠡᠨᠡ᠃
(4) ᠬᠡᠨ ᠬᠡᠷᠪᠡ ᠮᠤᠵᠢᠭᠤᠳᠠᠯᠠᠨ ᠡᠰᠡᠷᠭᠦᠴᠡᠪᠡᠯ ᠲᠡᠭᠦᠨ ᠢ᠋ ᠳᠣᠣᠷᠠ ᠨᠢ ᠠᠯᠠᠬᠤ ᠬᠡᠷᠡᠭᠲᠡᠢ᠃
(5) ᠪᠠᠭᠤᠵᠤ ᠥᠭᠭᠦᠭᠰᠡᠨ ᠪᠠ ᠪᠠᠷᠢᠵᠤ ᠠᠪᠤᠭᠰᠠᠳ ᠢ᠋ ᠪᠦᠷ ᠳᠡᠭᠡᠰᠦ ᠪᠡᠷ ᠤᠶᠠᠨᠠ᠃ ᠰᠦᠮᠡ ᠶ᠋ᠢᠨ ᠯᠠᠮᠠ ᠪᠣᠯᠤᠨ ᠪᠦᠰᠡᠭᠦᠢᠴᠦᠳ ᠡᠰᠡᠷᠭᠦᠴᠡᠬᠦ ᠦᠭᠡᠢ ᠪᠣᠯ ᠤᠶᠠᠬᠤ ᠦᠭᠡᠢ᠂ ᠭᠡᠪᠡᠴᠦ ᠭᠡᠷ ᠲᠦ᠍ ᠬᠣᠷᠢᠵᠤ ᠪᠠᠢᠯᠳᠤᠭᠠᠨ ᠲᠡᠭᠦᠰᠲᠡᠯᠡ ᠭᠠᠳᠠᠭᠰᠢ ᠭᠠᠷᠭᠠᠬᠤ ᠦᠭᠡᠢ᠃
(6) ᠤᠭ ᠤ᠋ᠨ ᠲᠣᠭᠲᠠᠭᠰᠠᠨ ᠶᠣᠰᠣᠭᠠᠷ ᠫᠤᠤ ᠳᠤᠤᠭᠠᠷᠤᠮᠠᠭᠴᠠ ᠲᠡᠳᠡᠨ ᠦ᠌ ᠲᠠᠯᠠ ᠠ᠋ᠴᠠ ᠠᠮᠤᠷᠰᠠᠨᠠᠭᠠ ᠯᠢᠶᠡᠨᠵᠠᠩ ᠭᠠᠷᠴᠤ ᠢᠷᠡᠪᠡᠯ ᠲᠡᠭᠦᠨ ᠢ᠋ ᠮᠥᠨ ᠠᠳᠠᠯᠢ ᠪᠠᠷ ᠤᠶᠠᠬᠤ ᠬᠡᠷᠡᠭᠲᠡᠢ᠂ ᠭᠡᠬᠦ ᠳ᠋ᠡᠭᠡᠨ ᠰᠤᠯᠠᠪᠲᠤᠷ ᠤᠶᠠᠬᠤ ᠬᠡᠷᠡᠭᠲᠡᠢ᠃ ᠬᠡᠷᠪᠡ ᠡᠰᠡᠷᠭᠦᠴᠡᠪᠡᠯ ᠳᠠᠷᠤᠢ ᠳ᠋ᠤᠨᠢ ᠫᠤᠤᠳᠠᠵᠤ ᠠᠯᠠᠨᠠ᠃ ᠨᠣᠶᠠᠨ ᠪᠣᠯᠤᠨ ᠬᠠᠲᠤᠨ ᠢ᠋ ᠰᠠᠭᠤᠭᠰᠠᠨ ᠭᠡᠷ ᠡᠴᠡ ᠭᠠᠷᠭᠠᠯ ᠦᠭᠡᠢ ᠲᠤᠰᠬᠠᠢ ᠴᠡᠷᠢᠭ ᠦ᠋ᠳ ᠴᠢᠩᠭᠠ ᠬᠠᠮᠠᠭᠠᠯᠠᠨᠠ᠃
ᠬᠦᠴᠦᠨᠲᠡᠭᠦᠰ ᠦ᠋ᠨ ᠨᠢᠭᠡ ᠰᠠᠯᠠᠭᠠ ᠴᠡᠷᠢᠭ ᠮᠠᠰᠢ ᠬᠤᠷᠳᠤᠨ ᠢ᠋ᠶ᠋ᠠᠷ ᠳᠤᠭᠠᠩ ᠬᠤᠷᠠᠬᠤ ᠶ᠋ᠢᠨ ᠣᠪᠣᠭᠠᠨ ᠤ᠋ ᠣᠷᠣᠢ ᠳ᠋ᠤ᠌ ᠰᠢᠪᠡᠷᠡᠭᠰᠡᠨ ᠪᠣᠷᠣᠭᠠᠨ ᠳ᠋ᠤ᠌ ᠰᠢᠭᠤᠷᠲᠠᠭᠰᠠᠨ ᠰᠤᠮᠤᠨ ᠮᠠᠨᠠᠭᠠᠨ ᠤ᠋ ᠬᠠᠷᠠᠭᠤᠯ ᠤ᠋ᠨ ᠭᠠᠭᠴᠠ ᠴᠡᠷᠢᠭ ᠰᠥᠨᠭᠥᠳᠡᠢ ᠠᠷᠪᠢᠨᠭᠡᠰᠢᠭ(ᠳᠠᠭᠤ ᠲᠣᠳᠣ ᠦᠭᠡᠢ ᠬᠥᠮᠦᠨ ᠢ᠋ ᠬᠡᠯᠡᠨᠡ) ᠶ᠋ᠢ ᠭᠡᠨᠡᠳᠡᠭᠦᠯᠦᠨ ᠪᠠᠷᠢᠪᠴᠢᠯᠠᠯᠠ᠃ ᠠᠷᠪᠢᠨᠭᠡᠰᠢᠭ᠄《ᠰᠢᠨᠡᠯᠡᠮᠡ ᠶ᠋ᠢᠨ ᠰᠢᠭᠡᠰᠦ ᠶ᠋ᠢ ᠤᠤᠭᠤᠭᠰᠠᠨ ᠮᠠᠭᠤ ᠰᠠᠢᠨ ᠠᠮᠢᠲᠠᠳ᠂ ᠲᠡᠷᠡ ᠡᠴᠢᠭᠡ ᠴᠢᠨᠢ ᠦᠬᠦᠵᠦ ᠠᠮᠠᠷᠠᠯᠠ᠂ ᠣᠳᠣ ᠮᠢᠨᠦ ᠰᠢᠭᠡᠰᠦ ᠶ᠋ᠢ ᠤᠤᠭᠤ!》 ᠭᠡᠵᠦ ᠮᠠᠭᠤᠬᠠᠢ ᠪᠠᠷ ᠬᠠᠷᠢᠶᠠᠭᠰᠠᠨ ᠳ᠋ᠤ᠌᠂ ᠳᠣᠣᠷᠠ ᠨᠢ ᠯᠢᠶᠡᠨᠵᠤᠤ ᠫᠤᠤ ᠶ᠋ᠢᠨ ᠪᠢᠴᠢᠬᠠᠨ ᠢᠯᠳᠦ ᠪᠡᠷ ᠴᠡᠭᠡᠵᠢᠨ ᠳ᠋ᠦ᠍ᠨᠢ ᠲᠥᠷᠥᠵᠦ ᠬᠥᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠡᠮᠡᠷᠳᠡᠭ ᠢ᠋ ᠨᠢ ᠬᠦᠴᠦᠲᠡᠢ ᠬᠡᠳᠦ ᠢᠰᠬᠦᠯᠦᠭᠰᠡᠨ ᠳ᠋ᠦ᠍ ᠦᠬᠦᠴᠢᠬᠡᠯᠡ᠃
ᠪᠡᠯᠭᠡ ᠶ᠋ᠢᠨ ᠡᠮᠦᠨᠡ ᠡᠴᠡ ᠥᠰᠬᠡᠨ ᠬᠤᠷᠠ ᠮᠥᠨ ᠦᠷᠭᠦᠯᠵᠢᠯᠡᠭᠰᠡᠭᠡᠷ᠂ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠪᠠᠢᠯᠳᠤᠭᠴᠢᠳ ᠪᠣᠷᠣᠭᠠᠨ ᠳᠤᠮᠳᠠᠭᠤᠷ ᠨᠢᠭᠡ ᠴᠦ᠍ ᠬᠥᠮᠦᠨ ᠳ᠋ᠦ᠍ ᠰᠡᠷᠡᠭᠳᠡᠭᠰᠡᠨ ᠦᠭᠡᠢ᠂ ᠨᠢᠭᠡ ᠴᠦ᠍ ᠫᠤᠤ ᠳᠤᠤᠭᠠᠷᠭᠠᠭᠰᠠᠨ ᠦᠭᠡᠢ ᠪᠡᠷ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠰᠠᠭᠤᠵᠤ ᠪᠠᠢᠭᠠ ᠪᠠᠢᠰᠢᠩ ᠪᠣᠯᠤᠨ ᠯᠠᠮᠠ ᠨᠠᠷ ᠤ᠋ᠨ ᠪᠠᠢᠰᠢᠩ ᠤ᠋ᠳ ᠢ᠋ ᠪᠦᠰᠡᠯᠡᠵᠦ ᠡᠭᠦᠳᠡ ᠴᠣᠩᠬᠣ ᠪᠠᠷ ᠨᠢ ᠫᠤᠤ ᠰᠢᠷᠭᠤᠭᠤᠯᠤᠨ᠄《ᠪᠢᠲᠡᠭᠡᠢ ᠬᠥᠳᠡᠯ! ᠡᠰᠡᠷᠭᠦᠴᠡᠪᠡᠯ ᠫᠤᠤᠳᠠᠯᠠ》 ᠭᠡᠮᠡᠨ ᠰᠦᠷᠳᠡᠭᠦᠯᠦᠯᠡ᠃
ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠪᠣᠷᠣᠭᠠᠨ ᠲᠠᠢ ᠰᠥᠨᠢ ᠶ᠋ᠢᠨ ᠬᠠᠷᠠᠩᠭᠤᠢ ᠳ᠋ᠤ᠌ ᠠᠮᠲᠠᠲᠤ ᠨᠣᠢᠷ ᠲᠠᠭᠠᠨ ᠨᠣᠢᠷᠰᠤᠭᠰᠠᠨ ᠠ᠋ᠴᠠ ᠪᠢᠰᠢ ᠨᠣᠢᠷ ᠬᠤᠯᠵᠢᠵᠤ ᠰᠡᠷᠭᠡᠭ ᠪᠠᠢᠭᠠ ᠬᠥᠮᠦᠨ ᠨᠢᠭᠡ ᠴᠦ᠍ ᠦᠭᠡᠢ ᠨᠢ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠲᠡᠢᠨ ᠪᠠᠢᠯᠳᠤᠭᠠᠨ ᠤ᠋ ᠢᠯᠠᠯᠲᠠ ᠶ᠋ᠢ ᠣᠯᠬᠤ ᠳ᠋ᠤ᠌ ᠲᠤᠢᠯ ᠤ᠋ᠨ ᠠᠰᠢᠭᠲᠠᠢ ᠪᠠᠢᠵᠠᠢ᠃
ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠯᠢᠶᠡᠨᠪᠦ᠋ ᠰᠠᠭᠤᠭᠠ ᠪᠠᠢᠰᠢᠩ ᠬᠦᠷᠢᠶᠡ ᠶ᠋ᠢᠨ ᠳᠣᠲᠣᠷᠠ ᠪᠣᠷᠣᠭᠠᠨ ᠤ᠋ ᠱᠠᠯᠴᠢᠭ ᠰᠢᠪᠡᠷ᠂ ᠪᠠᠢᠰᠢᠩ ᠤ᠋ᠨ ᠸᠠᠭᠠᠷ ᠠ᠋ᠴᠠ ᠴᠤᠪᠤᠷᠠᠭᠰᠠᠨ ᠤᠰᠤ ᠨᠡᠯᠦᠢᠵᠦ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠨᠢᠭᠡᠨ ᠪᠠᠢᠯᠳᠤᠭᠴᠢ ᠰᠠᠨᠠᠮᠰᠠᠷ ᠦᠭᠡᠢ ᠬᠠᠯᠲᠤᠷᠢᠵᠤ ᠤᠨᠠᠭᠠᠳ ᠰᠤᠮᠤ ᠳᠠᠷᠤᠭᠰᠠᠨ ᠫᠤᠤ ᠨᠢ ᠭᠠᠵᠠᠷ ᠲᠤ᠌ ᠬᠦᠴᠦᠲᠡᠢ ᠤᠨᠠᠵᠤ ᠲᠤᠷᠭᠢᠬᠤ ᠳ᠋ᠠᠭᠠᠨ《ᠲᠦᠩ》 ᠭᠡᠵᠦ ᠳᠤᠤᠭᠠᠷᠪᠠ᠃ ᠰᠠᠨᠠᠮᠰᠠᠷ ᠦᠭᠡᠢ ᠳᠤᠤᠭᠠᠷᠤᠭᠰᠠᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠳ᠋ᠠᠬᠢ ᠪᠤᠷᠬᠠᠨ ᠴᠣᠢᠵᠣᠩ᠂ ᠬᠥᠮᠦᠨ ᠠᠮᠢᠲᠠᠨ ᠢ᠋ ᠰᠣᠴᠢᠭᠠᠨ ᠲᠤᠰ ᠤᠳᠠᠭᠠᠨ ᠤ᠋ ᠪᠠᠢᠯᠳᠤᠭᠠᠨ ᠤ᠋ ᠡᠬᠢᠯᠡᠯᠲᠡ ᠶ᠋ᠢᠨ ᠳᠣᠬᠢᠶᠠ ᠪᠣᠯᠴᠢᠬᠠᠵᠠᠢ᠃ ᠫᠤᠤ ᠦᠷᠭᠦᠯᠵᠢᠯᠡᠨ ᠳᠤᠤᠭᠠᠷᠴᠤ ᠭᠠᠳᠠᠭᠰᠢ ᠤᠷᠭᠤᠨ ᠳᠤᠲᠠᠭᠠᠵᠤ ᠪᠠᠢᠭᠠ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠳ ᠢ᠋ ᠬᠠᠷᠪᠤᠵᠤ᠂ ᠨᠢᠭᠡ ᠪᠦᠯᠦᠭ ᠴᠡᠷᠢᠭ ᠨᠢ ᠯᠢᠶᠡᠨᠪᠦ᠋ ᠳ᠋ᠡᠬᠢ ᠠᠮᠤᠷᠰᠠᠨᠠᠭᠠ ᠯᠢᠶᠡᠨᠵᠠᠩ ᠢ᠋ ᠪᠠᠷᠢᠪᠴᠢᠯᠠᠪᠠ᠃ ᠲᠡᠭᠡᠭᠡᠳ ᠲᠡᠭᠦᠨ ᠢ᠋ ᠰᠤᠯᠠᠪᠲᠤᠷ ᠬᠦᠯᠢᠵᠦ ᠤᠶᠠᠭᠠᠳ ᠦᠦᠰᠢᠨ ᠨᠣᠶᠠᠨ ᠲᠡᠭᠦᠰᠠᠠᠮᠤᠭᠤᠯᠠᠩ ᠤ᠋ᠨ ᠰᠠᠭᠤᠭᠠ ᠭᠡᠷ ᠲᠦ᠍ ᠠᠪᠴᠢᠷᠠᠵᠤ᠂ ᠨᠣᠶᠠᠨ ᠤ᠋ ᠰᠤᠪᠢᠯᠠᠭᠴᠢ ᠬᠢᠶᠡ ᠪᠠᠶᠠᠨᠲᠣᠭᠲᠣᠬᠤ᠂ ᠨᠣᠶᠠᠨ ᠤ᠋ ᠬᠡᠦᠬᠡᠨ ᠳᠡᠭᠦᠦ ᠰᠠᠭᠰᠠ ᠠᠪᠠᠬᠠᠢ ᠨᠠᠷ ᠢ᠋ ᠴᠥᠮ ᠡᠨᠡ ᠭᠡᠷ ᠡᠴᠡ ᠭᠠᠷᠭᠠᠯ ᠦᠭᠡᠢ ᠰᠤᠯᠠ ᠬᠣᠷᠢᠵᠤ ᠴᠡᠷᠢᠭ ᠢ᠋ᠶ᠋ᠡᠷ ᠮᠠᠨᠠᠭᠤᠯᠤᠨ ᠬᠠᠷᠠᠭᠤᠯᠪᠠ᠃
ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠪᠠᠶᠠᠨᠲᠣᠭᠲᠣᠬᠤ᠂ ᠥᠯᠵᠡᠢᠲᠡᠯᠭᠡᠷ ᠵᠡᠷᠭᠡ ᠬᠥᠮᠦᠰ ᠦᠬᠦᠨ ᠡᠰᠡᠷᠭᠦᠴᠡᠵᠦ ᠪᠠᠢᠭᠠᠳ ᠠᠷᠪᠠᠨ ᠳᠥᠷᠪᠡᠨ ᠴᠡᠷᠢᠭ ᠠᠯᠠᠭᠳᠠᠪᠠ᠃ ᠡᠨᠡ ᠬᠦ᠌ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠴᠡᠷᠢᠭ ᠶᠠᠨᠵᠢᠮᠠᠢ ᠱᠠᠵᠠᠩ ᠤ᠋ᠨ ᠳᠠᠭᠠᠯ ᠴᠡᠷᠢᠭ ᠪᠤᠭᠤᠷᠤᠯ ᠵᠡᠪᠡ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠦᠬᠡᠷ ᠪᠠᠪᠤᠤ(ᠴᠣᠯᠠ)᠂ ᠪᠠᠪᠠ ᠬᠣᠶᠠᠭᠤᠯᠠ ᠳ᠋ᠤ᠌ ᠫᠤᠤᠳᠠᠭᠳᠠᠨ ᠰᠢᠷᠬᠠᠳᠤᠯᠠ᠃ ᠶᠠᠨᠵᠢᠮᠠᠢ ᠵᠡᠷᠭᠡ ᠬᠡᠳᠦᠨ ᠬᠥᠮᠦᠨ ᠲᠡᠭᠦᠨ ᠢ᠋ ᠭᠡᠷ ᠲᠦ᠍ ᠳᠠᠮᠨᠠᠨ ᠣᠷᠣᠭᠤᠯᠤᠭᠰᠠᠨ ᠪᠣᠯᠪᠠᠴᠤ ᠰᠢᠷᠬᠠ ᠨᠢ ᠬᠦᠨᠳᠦ ᠴᠢᠰᠤ ᠶᠡᠬᠡ ᠭᠠᠷᠤᠭᠰᠠᠨ ᠪᠣᠯᠬᠣᠷ ᠠᠮᠢ ᠦᠷᠡᠭᠳᠡᠵᠡᠢ᠃
ᠪᠤᠰᠤᠳ ᠴᠡᠷᠢᠭ ᠦ᠋ᠳ ᠦᠬᠡᠷ ᠪᠠᠪᠤᠤ᠂ ᠪᠠᠪᠠ ᠬᠣᠶᠠᠭᠤᠯᠠ ᠶ᠋ᠢ ᠨᠡᠬᠡᠮᠵᠢᠯᠡᠭᠰᠡᠭᠡᠷ ᠪᠠᠢᠭᠠᠳ ᠰᠦᠮᠡ ᠶ᠋ᠢᠨ ᠪᠤᠷᠬᠠᠨ ᠤ᠋ ᠴᠠᠭᠠᠭᠤᠷ ᠨᠢᠭᠤᠵᠤ ᠪᠠᠢᠭᠰᠠᠨ ᠢ᠋ ᠪᠠᠷᠢᠵᠤ ᠠᠪᠤᠭᠠᠳ ᠰᠦᠮᠡ ᠶ᠋ᠢᠨ ᠭᠣᠷᠢᠶᠠᠨ ᠵᠠᠮ ᠤ᠋ᠨ ᠭᠠᠳᠠᠨᠠᠬᠢ ᠪᠦᠷᠦᠯᠵᠡᠨ ᠳ᠋ᠦ᠍ ᠫᠤᠤᠳᠠᠵᠤ ᠠᠯᠠᠪᠠ᠃
ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠨᠢᠭᠡᠳᠦᠭᠡᠷ ᠯᠢᠶᠠᠨ ᠤ᠋ ᠯᠢᠶᠡᠨᠵᠠᠩ ᠪᠠᠪᠠ᠂ ᠬᠣᠶᠠᠳᠤᠭᠠᠷ ᠯᠢᠶᠠᠨ ᠤ᠋ ᠯᠢᠶᠡᠨᠵᠠᠩ ᠵᠠᠮᠢᠶᠠᠨᠵᠠᠪ ᠵᠡᠷᠭᠡ ᠨᠣᠶᠠᠳ᠂ ᠦᠦᠰᠢᠨ ᠪᠡᠢᠯᠡ ᠨᠣᠶᠠᠨ ᠲᠡᠭᠦᠰᠡᠠᠮᠤᠭᠤᠯᠠᠩ ᠤ᠋ᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠭᠡᠷ ᠲᠦ᠍ ᠨᠣᠶᠠᠨ ᠳ᠋ᠤ᠌ ᠪᠠᠷᠠ ᠠᠢᠯᠠᠳᠬᠠᠬᠤ ᠪᠠᠷ ᠣᠷᠣᠵᠠᠭᠠᠯᠠ᠃ ᠵᠠᠮᠢᠶᠠᠨᠵᠠᠪ ᠦᠭᠡ ᠲᠦᠷᠭᠡᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠤᠷᠢᠲᠠᠵᠤ᠄《ᠪᠡᠢᠯᠡ ᠨᠣᠶᠠᠨ ᠴᠢᠨᠦ ᠴᠡᠷᠢᠭ᠂ ᠳᠠᠭᠠᠯ ᠬᠥᠲᠥᠯ ᠪᠦᠷ ᠲᠠᠭᠠᠯᠠᠯ ᠲᠡᠭᠦᠰᠴᠦ ᠡᠷᠯᠢᠭ ᠦ᠋ᠨ ᠡᠭᠦᠳᠡᠨ ᠳ᠋ᠦ᠍ ᠶᠠᠪᠤᠵᠤ ᠳᠠᠭᠤᠰᠴᠠᠢ᠃ ᠲᠠ ᠭᠠᠷ ᠫᠤᠤ ᠪᠠᠨ ᠪᠢᠳᠡᠨ ᠳ᠋ᠦ᠍ ᠲᠤᠰᠢᠶᠠ!》 ᠭᠡᠪᠡ᠃ ᠨᠣᠶᠠᠨ ᠲᠡᠳᠡ ᠬᠡᠳᠦᠭᠦᠯᠡ ᠶ᠋ᠢ ᠮᠠᠭᠤᠬᠠᠢ ᠬᠠᠷᠠᠵᠤ ᠳᠤᠷᠠ ᠲᠠᠢ ᠳᠤᠷᠠ ᠦᠭᠡᠢ ᠰᠢᠭ ᠪᠠᠢᠬᠤ ᠳ᠋ᠤ᠌ ᠥᠯᠵᠡᠢᠪᠠᠲᠤ ᠪᠡᠢᠯᠡ ᠨᠣᠶᠠᠨ ᠳ᠋ᠤ᠌ ᠨᠢᠭᠡ ᠲᠣᠯᠣᠭᠠᠢ ᠮᠥᠷᠭᠥᠴᠢᠬᠡᠭᠡᠳ᠄《ᠨᠣᠶᠠᠨ ᠲᠠ ᠫᠤᠤ ᠪᠠᠨ ᠬᠠᠢᠷᠠᠯᠠᠭᠰᠠᠨ ᠳᠡᠭᠡᠷᠡ ᠪᠠᠢᠬᠠ ᠠ᠋!》 ᠭᠡᠬᠦ ᠳ᠋ᠦ᠍ ᠲᠡᠭᠦᠰᠡᠠᠮᠤᠭᠤᠯᠠᠩ ᠨᠣᠶᠠᠨ ᠳᠡᠷᠡ ᠶ᠋ᠢᠨ ᠳᠣᠣᠷᠠ ᠠ᠋ᠴᠠ ᠪᠠᠨ ᠭᠠᠷ ᠫᠤᠤ ᠪᠠᠨ ᠠᠪᠴᠤ《ᠡᠨᠡ ᠮᠠᠭᠤ ᠶᠠᠭᠤᠮᠠ ᠪᠠᠨ ᠠᠪᠠᠴᠢ!》 ᠭᠡᠮᠡᠨ ᠬᠥᠰᠡᠷ ᠲᠦ᠍ ᠲᠦᠰᠬᠢᠲᠡᠯᠡ ᠰᠢᠳᠡᠵᠡᠢ᠃
ᠬᠡᠳᠦᠨ ᠵᠢᠯ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠲᠡᠢ ᠨᠡᠢᠯᠡᠵᠦ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠳᠦᠢᠪᠡᠭᠡᠵᠦ ᠶᠠᠪᠤᠭᠰᠠᠨ ᠨᠣᠶᠠᠨ ᠥᠨᠥᠳᠥᠷ ᠥᠪᠡᠷ ᠦ᠋ᠨ ᠭᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠲᠤᠰᠢᠶᠠᠵᠤ᠂ ᠳᠠᠭᠠᠵᠤ ᠶᠠᠪᠤᠭᠰᠠᠨ ᠬᠣᠰᠢᠭᠤ ᠴᠡᠷᠢᠭ ᠨᠢ ᠴᠦ᠍ ᠠᠯᠠᠭᠳᠠᠵᠤ ᠪᠠᠷᠢᠭᠳᠠᠭᠠᠳ ᠡᠴᠦᠰ ᠦ᠋ᠨ ᠮᠥᠬᠥᠯ ᠢ᠋ᠶ᠋ᠡᠨ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠳ᠋ᠤ᠌ ᠦᠵᠡᠵᠡᠢ᠃
ᠭᠠᠭᠴᠠ ᠬᠦ᠌ ᠲᠠᠢᠵᠢ ᠸᠠᠩᠴᠤᠭᠷᠠᠪᠳᠠᠨ ᠵᠢᠰᠤᠷ ᠬᠥᠮᠦᠨ ᠪᠣᠯᠬᠤᠯᠠ ᠲᠡᠷᠡ ᠰᠥᠨᠢ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠳ᠋ᠤ᠌ ᠪᠠᠢᠭᠰᠠᠨ ᠦᠭᠡᠢ᠂ ᠰᠦᠮᠡ ᠶ᠋ᠢᠨ ᠡᠮᠦᠨᠡᠬᠢ ᠨᠢᠭᠡᠨ ᠠᠢᠯ ᠤ᠋ᠨ ᠭᠠᠳᠠᠨᠠ ᠮᠠᠢᠬᠠᠨ ᠪᠠᠷᠢᠵᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠲᠤᠯᠠ ᠰᠥᠨᠢ ᠶ᠋ᠢᠨ ᠫᠤᠤ ᠶ᠋ᠢᠨ ᠳᠠᠭᠤᠨ ᠢ᠋ᠶ᠋ᠠᠷ ᠰᠣᠴᠢᠨ ᠦᠷᠭᠦᠵᠦ ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠭᠠᠵᠠᠷ ᠳᠤᠲᠠᠭᠠᠨ ᠶᠠᠪᠤᠪᠠ᠃ ᠰᠡᠭᠦᠯᠡᠷ ᠱᠠᠮᠪᠠ ᠳᠠᠩ ᠬᠡᠮᠡᠬᠦ ᠭᠠᠵᠠᠷ ᠬᠠᠲᠤᠨ ᠭᠣᠣᠯ ᠤ᠋ᠨ ᠬᠣᠢᠲᠤ ᠬᠥᠪᠡᠭᠡᠨ ᠳ᠋ᠦ᠍ ᠬᠥᠯ ᠲᠣᠭᠲᠠᠵᠤ ᠳᠡᠯᠠᠢᠭᠦᠦ ᠶ᠋ᠢᠨ ᠡᠬᠡᠨᠡᠷ ᠮᠥᠩᠭᠦᠨᠴᠡᠴᠡᠭ ᠲᠡᠢ ᠬᠣᠶᠠᠭᠤᠯᠠ ᠳᠣᠯᠣᠭᠠᠨ ᠵᠢᠯ ᠠᠮᠢᠳᠤᠷᠠᠭᠰᠠᠨ ᠭᠡᠨᠡ᠃
ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠢᠯᠳᠤᠭᠠᠨ ᠲᠡᠭᠦᠰᠴᠦ᠂ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠴᠡᠷᠢᠭ ᠠᠩᠭᠢ ᠶᠡᠬᠡ ᠠᠷᠪᠢᠨ ᠫᠤᠤ ᠰᠤᠮᠤ ᠣᠯᠵᠠᠯᠠᠵᠤ ᠵᠢᠷᠭᠤᠭᠠᠨ ᠮᠣᠷᠢᠨ ᠳ᠋ᠤ᠌ ᠳᠦᠭᠦᠷᠲᠡᠯᠡ ᠠᠴᠢᠭᠠᠳ᠂ ᠲᠡᠭᠦᠰᠡᠠᠮᠤᠭᠤᠯᠠᠩ ᠵᠡᠷᠭᠡ ᠬᠣᠷᠢᠭᠠᠳ ᠬᠥᠮᠦᠨ(ᠣᠯᠵᠠᠯᠠᠭᠳᠠᠭᠰᠠᠨ ᠴᠡᠷᠢᠭ ᠴᠦ᠍ ᠪᠠᠭᠲᠠᠨᠠ) ᠶ᠋ᠢ ᠪᠠᠷᠠᠭᠤᠨᠰᠢ ᠮᠡᠢᠷᠡᠨ ᠰᠦᠮᠡ ᠵᠦᠭ ᠠᠪᠴᠤ ᠶᠠᠪᠤᠵᠠᠢ᠃
ᠪᠠᠪᠠ᠂ ᠵᠠᠮᠢᠶᠠᠨᠵᠠᠪ ᠬᠣᠶᠠᠷ ᠯᠢᠶᠡᠨᠵᠠᠩ ᠴᠡᠷᠢᠭ ᠲᠡᠭᠡᠨ ᠵᠠᠷᠯᠢᠭ ᠪᠠᠭᠤᠯᠭᠠᠵᠤ ᠮᠡᠢᠷᠡᠨ ᠰᠦᠮᠡ ᠳ᠋ᠦ᠍ ᠬᠦᠷᠲᠡᠯᠡᠬᠢ ᠬᠣᠷᠢ ᠭᠠᠷᠤᠢ ᠺᠢᠯᠣᠮᠧᠲ᠋ᠷ ᠦ᠋ᠨ ᠵᠠᠮ ᠳ᠋ᠤ᠌ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠨᠡᠯᠢᠶᠡᠳ ᠴᠡᠷᠢᠭ ᠳᠠᠭᠠᠯ ᠢ᠋ ᠫᠤᠤᠳᠠᠵᠤ ᠠᠯᠠᠵᠠᠢ᠃
ᠲᠡᠭᠦᠰᠠᠠᠮᠤᠭᠤᠯᠠᠩ ᠨᠣᠶᠠᠨ ᠡᠨᠡ ᠬᠦ᠌ ᠪᠠᠢᠳᠠᠯ ᠢ᠋ ᠦᠵᠡᠭᠡᠳ ᠮᠠᠭᠤ ᠳᠠᠭᠤᠨ ᠢ᠋ᠶ᠋ᠠᠷ᠄《ᠲᠠᠨᠤᠰ ᠵᠠᠮ ᠳᠠᠭᠤᠰᠤᠨ ᠬᠥᠮᠦᠨ ᠠᠯᠠᠭᠠᠳ ᠶᠠᠭᠠᠬᠢᠬᠤ ᠪᠣᠢ?》 ᠭᠡᠬᠦ ᠳ᠋ᠦ᠍᠂ ᠪᠠᠪᠠ ᠯᠢᠶᠡᠨᠵᠠᠩ ᠠ᠋ᠴᠠ᠄《ᠪᠢᠳᠡ ᠶᠡᠷᠦ ᠡᠴᠡ ᠬᠥᠮᠦᠨ ᠠᠯᠠᠬᠤ ᠳᠤᠷᠠ ᠦᠭᠡᠢ᠂ ᠡᠨᠡ ᠪᠣᠯ ᠲᠠᠨᠤᠰ ᠤ᠋ᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠮᠠᠯᠴᠢᠨ ᠲᠦᠮᠡᠨ ᠳ᠋ᠦ᠍ ᠶᠠᠯᠠ ᠬᠢᠭᠰᠡᠨ ᠦ᠌ ᠬᠠᠷᠢᠭᠤ ᠪᠢᠯᠡ! ᠠᠶᠠ ᠦᠭᠡᠢᠳᠡᠪᠡᠯ ᠴᠢᠮᠠᠲᠤ ᠪᠠᠰᠠ ᠭᠠᠷ ᠬᠦᠷᠴᠦ ᠮᠡᠳᠡᠨᠡ᠁ ᠲᠡᠮᠡᠭᠡᠲᠦ(ᠢᠦᠢ ᠯᠢᠨ) ᠢᠨ ᠲᠡᠨᠳᠡ ᠬᠡᠳᠦᠨ ᠵᠢᠯ ᠰᠢᠷᠭᠤᠵᠤ ᠵᠢᠩ ᠶᠤᠸᠠᠢ ᠰᠢᠦ ᠲᠡᠢ ᠬᠠᠮᠲᠤᠷᠠᠵᠤ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠳᠡᠭᠡᠷᠡᠮᠳᠡᠭᠰᠡᠨ ᠴᠢᠨᠢ ᠣᠳᠣ ᠶᠠᠮᠠᠷ ᠪᠠᠢᠨᠠ?》 ᠭᠡᠮᠡᠨ ᠵᠠᠩᠳᠤᠷᠬᠤ ᠳ᠋ᠤ᠌᠂ ᠲᠡᠭᠦᠰᠡᠠᠮᠤᠭᠤᠯᠠᠩ ᠨᠣᠶᠠᠨ ᠠᠷᠭᠠ ᠪᠤᠰᠤ ᠴᠢᠷᠠᠢ ᠨᠢ ᠬᠠᠷᠠᠯᠠᠭᠠᠳ ᠳᠣᠲᠣᠷᠠ ᠪᠠᠨ ᠶᠠᠭᠤ ᠨᠢᠭᠡ ᠪᠣᠳᠣᠵᠤ ᠪᠠᠢᠪᠠ᠃
ᠲᠡᠳᠡ ᠪᠠᠷᠠᠭᠤᠨᠰᠢ ᠦᠷᠭᠦᠯᠵᠢᠯᠡᠨ ᠤᠷᠤᠭᠰᠢᠯᠠᠬᠤ ᠵᠠᠮ ᠳ᠋ᠠᠭᠠᠨ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠭᠣᠣᠯᠯᠠᠭᠴᠢ ᠡᠲᠡᠭᠡᠳ ᠪᠤᠶᠠᠨᠳᠡᠯᠭᠡᠷ᠂ ᠷᠠᠪᠵᠤᠤᠷ ᠵᠡᠷᠭᠡ ᠠᠷᠪᠠᠨ ᠵᠢᠷᠭᠤᠭᠠᠨ ᠬᠥᠮᠦᠨ ᠢ᠋ ᠫᠤᠤᠳᠠᠨ ᠠᠯᠠᠵᠠᠢ(ᠵᠠᠷᠢᠮ ᠪᠤᠭᠤᠷᠤᠯᠴᠤᠳ ᠤ᠋ᠨ ᠬᠡᠯᠡᠬᠦ ᠪᠡᠷ ᠠᠷᠪᠠᠨ ᠨᠠᠢ᠍ᠮᠠᠨ ᠬᠥᠮᠦᠨ ᠴᠦ᠍ ᠭᠡᠳᠡᠭ)᠃ ᠦᠨᠡᠨ ᠳ᠋ᠡᠭᠡᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠴᠡᠷᠢᠭ ᠠᠩᠭᠢ ᠦᠵᠡᠭᠰᠡᠨ ᠪᠣᠯᠭᠠᠨ ᠢ᠋ ᠪᠠᠷᠢᠵᠤ ᠠᠯᠠᠭᠰᠠᠨ ᠪᠢᠰᠢ ᠪᠢᠯᠡ᠃ ᠤᠳᠠᠭᠠᠨ ᠵᠢᠯ ᠦ᠋ᠨ ᠲᠤᠷᠰᠢ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠢ ᠭᠣᠣᠯᠯᠠᠨ ᠡᠰᠡᠷᠭᠦᠴᠡᠭᠰᠡᠭᠡᠷ ᠢᠷᠡᠭᠰᠡᠨ ᠬᠥᠮᠦᠨ᠂ ᠠᠷᠠᠳ ᠲᠦᠮᠡᠨ ᠬᠣᠷᠣᠰᠤᠯ ᠶᠡᠬᠡ ᠲᠡᠢ ᠡᠰᠡᠬᠦᠯᠡ ᠲᠡᠮᠡᠭᠡᠲᠦ ᠬᠣᠲᠠ ᠳ᠋ᠤ᠌ ᠣᠴᠢᠭᠰᠠᠨ ᠤ᠋ ᠰᠡᠭᠦᠯᠡᠷ ᠵᠢᠩ ᠶᠤᠸᠠᠢ ᠰᠢᠦ ᠶ᠋ᠢᠨ ᠴᠡᠷᠢᠭ ᠲᠡᠢ ᠨᠡᠢᠯᠡᠵᠦ ᠭᠤᠷᠪᠠᠨ ᠵᠢᠯ ᠰᠢᠬᠠᠮ ᠬᠣᠰᠢᠭᠤ ᠨᠤᠲᠤᠭ ᠢ᠋ᠶ᠋ᠠᠨ ᠶᠡᠬᠡ ᠪᠡᠷ ᠳᠡᠭᠡᠷᠡᠮᠳᠡᠭᠰᠡᠨ᠂ ᠲᠡᠢᠨ ᠦ᠌ ᠳᠤᠮᠳᠠ ᠣᠯᠠᠨ ᠤᠳᠠᠭᠠ ᠮᠤᠵᠢᠭᠤᠳᠠ ᠪᠠᠷ ᠡᠰᠡᠷᠭᠦᠴᠡᠭᠰᠡᠨ ᠬᠥᠮᠦᠨ ᠢ᠋ ᠤᠰᠠᠳᠬᠠᠵᠤ ᠡᠷᠯᠢᠭ ᠲᠤᠨᠢ ᠲᠣᠨᠢᠯᠭᠠᠭᠰᠠᠨ ᠪᠠᠢᠵᠠᠢ᠃ ᠡᠭᠦᠨ ᠡᠴᠡ ᠭᠠᠳᠠᠨᠠ ᠲᠤᠰ ᠰᠥᠨᠢ ᠶ᠋ᠢᠨ ᠪᠠᠢᠯᠳᠤᠭᠠᠨ ᠤ᠋ ᠨᠢᠳᠦ ᠦᠭᠡᠢ ᠰᠤᠮᠤᠨ ᠳ᠋ᠤᠷ ᠳᠠᠭᠠᠷᠢᠭᠳᠠᠵᠤ ᠦᠬᠦᠭᠰᠡᠨ ᠴᠦ᠍ ᠣᠯᠠᠨ ᠪᠣᠢ᠃
ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠬᠤᠷᠴᠠ ᠴᠡᠷᠢᠭ ᠠᠩᠭᠢ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠢᠯᠳᠤᠭᠠᠨ ᠳ᠋ᠤ᠌ ᠰᠢᠢᠳᠪᠦᠷᠢᠲᠦ ᠴᠢᠨᠠᠷ ᠲᠠᠢ ᠢᠯᠠᠯᠲᠠ ᠶ᠋ᠢ ᠣᠯᠪᠠ᠃ ᠲᠡᠳᠡ ᠲᠡᠭᠦᠰᠡᠠᠮᠤᠭᠤᠯᠠᠩ ᠨᠣᠶᠠᠨ ᠢ᠋ ᠪᠠᠷᠢᠵᠤ ᠲᠡᠭᠦᠨ ᠦ᠌ ᠬᠡᠦᠬᠡᠨ ᠳᠡᠭᠦᠦ ᠰᠠᠭᠰᠠ ᠠᠪᠠᠬᠠᠢ᠂ ᠲᠡᠭᠦᠨ ᠦ᠌ ᠰᠤᠪᠢᠯᠠᠭᠴᠢ ᠲᠤᠭᠠᠷ ᠤ᠋ᠨ ᠲᠣᠬᠣᠢ ᠶᠢᠨ ᠪᠠᠶᠠᠨᠳᠣᠭᠲᠠᠬᠤ ᠬᠢᠶᠡ᠂ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠯᠢᠶᠡᠨᠵᠠᠩ ᠠᠮᠤᠷᠰᠠᠨᠠᠭᠠ ᠳ᠋ᠤ᠌ ᠮᠣᠷᠢ ᠬᠥᠲᠥᠯᠵᠦ ᠪᠠᠢᠭᠰᠠᠨ ᠪᠠᠨᠽᠠᠷᠭᠠᠷᠤᠳᠢ ᠵᠡᠷᠭᠡ ᠬᠡᠳᠦᠬᠡᠨ ᠬᠥᠮᠦᠨ ᠢ᠋ ᠦᠯᠡᠳᠡᠭᠡᠨ ᠤᠤᠯᠭᠠᠯᠠᠭᠠᠳ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠣᠷᠳᠣᠨ ᠳ᠋ᠤ᠌ ᠬᠦᠷᠭᠡᠵᠦ ᠰᠠᠭᠤᠯᠭᠠᠭᠰᠠᠨ ᠪᠠᠢᠨᠠ᠃
ᠤᠯᠤᠰ ᠤ᠋ᠨ ᠳᠣᠲᠣᠭᠠᠳᠤ ᠶ᠋ᠢᠨ ᠬᠤᠪᠢᠰᠬᠠᠯᠲᠤ ᠲᠡᠢᠨ ᠦ᠌ ᠬᠦᠴᠢᠷ ᠪᠡᠷᠬᠡᠰᠢᠶᠡᠯᠲᠦ ᠵᠢᠯ ᠦ᠋ᠳ ᠲᠦ᠍᠂ ᠰᠢᠨᠠᠯᠠᠮᠠ ᠶ᠋ᠢᠨ ᠠᠷᠪᠠᠨ ᠬᠣᠶᠠᠳᠤᠭᠠᠷ ᠬᠣᠷᠢᠶᠠᠨ ᠤ᠋ ᠳᠠᠷᠤᠭᠠ ᠪᠠᠢᠯᠳᠤᠭᠴᠢᠳ ᠣᠷᠳᠣᠰ ᠤ᠋ᠨ ᠮᠤᠤᠤ᠋ᠰᠤ ᠶ᠋ᠢᠨ ᠡᠯᠡᠰᠦᠨ ᠮᠠᠩᠬᠠᠨ ᠳ᠋ᠤ᠌ ᠴᠥᠭᠡᠬᠡᠨ ᠢ᠋ᠶ᠋ᠡᠷ ᠠᠷᠪᠢᠨ ᠢ᠋ ᠢᠯᠠᠵᠤ ᠪᠠᠭᠤᠷᠠᠢ ᠪᠠᠷ ᠬᠦᠴᠦᠷᠬᠡᠭ ᠢ᠋ ᠢᠯᠠᠭᠠᠳ ᠮᠠᠯᠴᠢᠨ ᠲᠦᠮᠡᠨ ᠦ᠌ ᠠᠮᠤᠷ ᠲᠦᠪᠰᠢᠨ ᠢ᠋ ᠬᠠᠮᠠᠭᠠᠯᠠᠵᠤ᠂ ᠹᠧᠣᠳᠠᠯ ᠤ᠋ᠨ ᠬᠦᠴᠦᠨ ᠢ᠋ ᠡᠷᠬᠡᠰᠢᠶᠡᠯ ᠳ᠋ᠡᠭᠡᠨ ᠣᠷᠣᠭᠤᠯᠵᠤ ᠢᠯᠠᠯᠲᠠ ᠣᠯᠤᠭᠰᠠᠨ ᠴᠣᠷ ᠤ᠋ᠨ ᠭᠠᠭᠴᠠ ᠴᠡᠷᠢᠭ ᠠᠩᠭᠢ ᠪᠣᠯᠵᠤ ᠮᠠᠷᠲᠠᠭᠳᠠᠰᠢ ᠦᠭᠡᠢ ᠲᠡᠦᠬᠡ ᠪᠡᠨ ᠦᠯᠡᠳᠡᠭᠡᠭᠰᠡᠨ ᠪᠢᠯᠡ!①
— — — —
① ᠶᠡᠬᠡ ᠵᠣᠣ ᠠᠢᠮᠠᠭ ᠤ᠋ᠨ ᠳᠠᠩᠰᠠ ᠡᠪᠬᠡᠮᠡᠯ ᠦ᠋ᠨ ᠰᠠᠩ ᠤ᠋ᠨ ᠤᠤᠯ ᠡᠬᠡ ᠡᠴᠡ ᠰᠡᠢᠷᠡᠭᠦᠯᠦᠭᠰᠡᠨ《ᠰᠢᠨᠡᠯᠡᠮᠡ ᠶ᠋ᠢᠨ ᠬᠤᠪᠢᠰᠬᠠᠯᠲᠤ ᠬᠥᠳᠡᠯᠭᠡᠭᠡᠨ ᠦ᠌ ᠲᠤᠬᠠᠢ ᠮᠠᠲ᠋ᠧᠷᠢᠶᠠᠯ ᠤ᠋ᠨ ᠡᠮᠬᠢᠳᠬᠡᠯ》10 ᠳᠡᠪᠲᠡᠷ ᠡᠴᠡ ᠰᠡᠢᠷᠡᠭᠦᠯᠪᠡ᠃
ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠢᠯᠳᠤᠭᠠᠨ ᠪᠣᠯ ᠹᠧᠣᠳᠠᠯ ᠤ᠋ᠨ ᠬᠦᠴᠦᠨ ᠦ᠌ ᠴᠡᠷᠢᠭ ᠵᠠᠰᠠᠭ ᠢ᠋ ᠳᠠᠷᠤᠩᠭᠤᠢᠯᠠᠭᠰᠠᠨ ᠨᠢᠭᠡᠨ ᠤᠳᠠᠭᠠᠨ ᠤ᠋ ᠰᠢᠢᠳᠪᠦᠷᠢᠲᠦ ᠪᠠᠢᠯᠳᠤᠭᠠᠨ ᠪᠣᠯᠤᠨᠠ᠃
ᠡᠨᠡ ᠪᠠᠢᠯᠳᠤᠭᠠᠨ1929 ᠣᠨ ᠤ᠋8 ᠰᠠᠷᠠ ᠶ᠋ᠢᠨ15 ᠳ᠋ᠤ᠌ ᠭᠠᠷᠤᠭᠰᠠᠨ ᠲᠤᠯᠠ ᠡᠨᠡ ᠦᠶᠡ ᠳ᠋ᠦ᠍ ᠰᠢᠨᠠᠯᠠᠮᠠ ᠨᠢᠭᠡᠨᠲᠡ ᠳᠣᠲᠣᠭᠠᠳᠤ ᠶ᠋ᠢᠨ ᠤᠷᠪᠠᠭᠴᠢᠳ ᠲᠤ᠌ ᠬᠣᠣᠷᠯᠠᠭᠳᠠᠭᠠᠳ 6 ᠰᠠᠷᠠ ᠢᠯᠡᠭᠦᠦ ᠪᠣᠯᠤᠭᠰᠠᠨ ᠲᠤᠯᠠ ᠰᠢᠨᠠᠯᠠᠮᠠ ᠶ᠋ᠢ ᠳᠤᠷᠠᠳᠤᠭᠰᠠᠨ ᠦᠭᠡᠢ᠂ ᠦᠨᠡᠨ ᠣᠷᠣᠯᠴᠠᠵᠤ ᠵᠢᠯᠣᠭᠣᠳᠤᠭᠰᠠᠨ᠂ ᠲᠡᠢᠨ ᠢ᠋ ᠤᠳᠤᠷᠢᠳᠤᠭᠰᠠᠨ ᠬᠥᠮᠦᠰ ᠦ᠋ᠨ ᠨᠡᠷᠡ ᠶ᠋ᠢ ᠪᠢᠴᠢᠯᠡ᠃ ᠰᠢᠨᠠᠯᠠᠮᠠ ᠨᠢᠭᠡᠨᠲᠡ ᠬᠣᠣᠷᠯᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠᠬᠢ ᠤᠴᠢᠷ ᠲᠤᠯᠠ ᠪᠢᠴᠢᠭᠰᠡᠨ ᠦ᠌ ᠬᠡᠷᠡᠭ ᠦᠭᠡᠢ ᠭᠡᠵᠦ ᠦᠵᠡᠳᠡᠭ ᠴᠦ᠍ ᠪᠣᠢ᠃ ᠭᠡᠪᠡᠴᠦ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠠᠵᠢᠯᠯᠠᠭᠠ ᠪᠣᠯᠤᠨ ᠣᠷᠳᠣᠰ ᠤ᠋ᠨ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠦ᠌ ᠲᠡᠦᠬᠡᠨ ᠲᠡᠮᠳᠡᠭᠯᠡᠯ ᠦ᠋ᠳ ᠲᠦ᠍1933 ᠣᠨ ᠢ᠋ᠶ᠋ᠠᠷ ᠵᠠᠭᠠᠭ ᠪᠣᠯᠭᠠᠭᠰᠠᠨ ᠰᠢᠭ᠋ ᠪᠠᠢᠨᠠ᠃ ᠡᠢᠮᠦ ᠡᠴᠡ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠤ᠋ᠨ ᠪᠠᠢᠯᠳᠤᠭᠠᠨ ᠪᠤᠶᠤ ᠬᠡᠷᠡᠭ ᠤᠴᠢᠷ ᠨᠢ᠂ ᠰᠢᠨᠡᠯᠡᠮᠡ ᠦᠭᠡᠢ ᠪᠣᠯᠴᠢᠬᠠᠭᠰᠠᠨ ᠴᠤ᠌ ᠰᠢᠨᠠᠯᠠᠮᠠ ᠶ᠋ᠢᠨ ᠠᠮᠢᠳᠤ ᠰᠡᠷᠡᠭᠦᠨ ᠪᠠᠢᠬᠤ ᠦᠶᠡ ᠶ᠋ᠢᠨ ᠬᠦᠰᠡᠯ ᠵᠣᠷᠢᠯᠭᠠ ᠶ᠋ᠢ ᠪᠡᠶᠡᠯᠡᠭᠦᠯᠵᠦ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠹᠧᠣᠳᠠᠯ ᠤ᠋ᠨ ᠬᠦᠴᠦᠨ ᠳ᠋ᠦ᠍ ᠬᠦᠨᠳᠦ ᠴᠣᠬᠢᠯᠲᠠ ᠥᠭᠴᠦ ᠲᠡᠳᠡᠨ ᠢ᠋ ᠰᠦᠢᠷᠡᠭᠦᠯᠦᠭᠰᠡᠨ ᠰᠢᠢᠳᠪᠦᠷᠢᠲᠦ ᠲᠡᠢᠨ ᠲᠤᠯᠠ ᠳᠤᠭᠤᠢᠯᠠᠩ ᠤ᠋ᠨ ᠬᠥᠳᠡᠯᠭᠡᠭᠡᠨ ᠳ᠋ᠡᠬᠢ ᠨᠢᠭᠡᠨ ᠴᠢᠬᠤᠯᠠ ᠲᠡᠦᠬᠡᠲᠦ ᠤᠴᠢᠷ ᠭᠡᠮᠡᠨ ᠦᠵᠡᠵᠦ ᠪᠢᠴᠢᠭᠰᠡᠨ ᠢ᠋ᠶ᠋ᠡᠨ ᠲᠣᠳᠣᠷᠬᠠᠢᠯᠠᠮᠤᠢ᠃
ᠲᠤᠰ ᠦᠯᠢᠭᠡᠷ ᠢ᠋1980 ᠣᠨ ᠳ᠋ᠤ᠌ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠴᠠᠭᠠᠨᠳᠤᠩ ᠨᠠᠰᠤᠲᠠᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠪᠡ᠃
ᠵᠡᠭᠦᠯᠲᠡ
ᠰᠢᠨᠡᠯᠡᠮᠡ ᠬᠣᠣᠷᠯᠠᠭᠳᠠᠭᠰᠠᠨ ᠤ᠋ ᠳᠠᠷᠠᠭᠠ ᠦᠦᠰᠢᠨ ᠪᠡᠢᠯᠡ ᠨᠣᠶᠠᠨ ᠲᠡᠭᠦᠰᠠᠠᠮᠤᠭᠤᠯᠠᠩ᠂ ᠱᠠᠨᠰᠢ ᠶ᠋ᠢᠨ ᠲᠡᠮᠡᠭᠡᠲᠦ ᠬᠣᠲᠠ ᠠ᠋ᠴᠠ ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ ᠳᠡᠭᠡᠷᠡ ᠢᠷᠡᠭᠡᠳ ᠳᠡᠳ᠋ ᠲᠡᠷᠢᠭᠦᠨ ᠵᠠᠰᠠᠭ ᠸᠠᠩ ᠨᠣᠶᠠᠨ ᠳ᠋ᠤ᠌ ᠡᠷᠭᠦᠨ ᠪᠠᠷᠢᠭᠰᠠᠨ ᠪᠢᠴᠢᠭ
᠁ ᠤᠷᠢᠳᠠ ᠣᠯᠠᠨ ᠳᠡᠭᠡᠳᠦ ᠶᠠᠮᠤᠰ ᠲᠤᠷ ᠮᠡᠳᠡᠭᠦᠯᠦᠭᠰᠡᠨ ᠪᠢᠴᠢᠭ ᠦ᠋ᠳ ᠲᠣᠷ᠄ ᠮᠠᠨ ᠤ᠋ ᠬᠤᠰᠢᠭᠤᠨ ᠤ᠋ ᠰᠢᠨᠠᠯᠠᠮᠠ ᠥᠯᠵᠡᠢᠵᠢᠷᠭᠠᠯ ᠤ᠋ᠨ ᠪᠡᠶᠡ ᠤᠷᠢᠳᠠ ᠬᠠᠷᠢᠶᠠᠲᠤ ᠬᠤᠰᠢᠭᠤᠨ ᠤ᠋ ᠣᠯᠠᠨ ᠲᠠᠢᠵᠢ ᠬᠠᠷᠠᠴᠤᠰ ᠨᠠᠷ ᠢ᠋ ᠤᠳᠤᠷᠢᠳᠴᠤ ᠳᠤᠭᠤᠢᠯᠠᠩ ᠪᠣᠯᠭᠠᠨ ᠰᠠᠮᠠᠭᠤᠷᠠᠵᠤ ᠵᠠᠰᠠᠭ ᠪᠡᠢᠯᠡ ᠮᠢᠨᠦ ᠲᠥᠷᠥᠭᠰᠡᠨ ᠡᠴᠢᠭᠡ ᠴᠠᠭᠳᠤᠷᠰᠡᠷᠡᠩ ᠦ᠋ᠨ ᠡᠷᠭᠦᠮᠵᠢᠯᠡᠯᠲᠦ ᠹᠦ ᠿᠧᠨ ᠢ᠋ ᠫᠤᠤᠳᠠᠵᠤ ᠠᠯᠠᠭᠰᠠᠨ ᠪᠠ᠂ ᠪᠠᠰᠠ ᠹᠦ ᠶᠠᠮᠤᠨ ᠢ᠋ ᠬᠣᠮᠣᠷᠴᠦ ᠬᠦᠦ ᠳ᠋ᠦ᠍ᠷ ᠬᠠᠳᠠᠭᠠᠯᠠᠵᠤ ᠪᠠᠢᠭᠰᠠᠨ ᠤᠤᠯ ᠬᠤᠰᠢᠭᠤᠨ ᠤ᠋ ᠴᠡᠷᠢᠭ ᠦ᠋ᠨ ᠵᠠᠷ ᠵᠡᠪᠰᠡᠭ ᠢ᠋ ᠤᠤᠯᠭᠠᠯᠠᠨ ᠪᠤᠯᠢᠶᠠᠨ ᠠᠪᠴᠤ ᠮᠣᠩᠭᠣᠯ ᠨᠠᠩᠭᠢᠶᠠᠳ ᠠᠷᠠᠳ ᠢ᠋ ᠶᠡᠬᠡᠳᠡ ᠳᠦᠢᠪᠡᠭᠡᠵᠦ ᠶᠠᠪᠤᠭᠰᠠᠨ ᠵᠦᠢᠯ ᠵᠦᠢᠯ ᠦ᠋ᠨ ᠬᠡᠷᠡᠭ ᠦ᠋ᠳ ᠢ᠋ ᠬᠠᠷᠢᠶᠠᠲᠤ ᠴᠢᠭᠤᠯᠭᠠᠨ ᠤ᠋ ᠳᠠᠷᠤᠭᠠ ᠨᠠᠷ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠤᠳᠠᠭᠠ ᠳᠠᠷᠠᠭᠠ ᠰᠢᠢᠳᠬᠡᠨ ᠳᠠᠭᠤᠰᠬᠠᠵᠤ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠢ᠋ ᠲᠠᠷᠬᠠᠭᠠᠭᠠᠳ ᠥᠯᠵᠡᠢᠵᠢᠷᠭᠠᠯ ᠢ᠋ ᠶᠠᠯᠠ ᠲᠣᠷᠭᠣᠭᠠᠵᠤ ᠭᠢᠨᠳᠠᠨ ᠳ᠋ᠤᠷ ᠬᠣᠷᠢᠵᠤ ᠪᠠᠢᠲᠠᠯᠠ ᠲᠡᠭᠦᠨ ᠦ᠌ ᠪᠡᠶᠡ ᠰᠢᠷᠣᠢ ᠶ᠋ᠢᠨ ᠬᠤᠯᠠᠭᠠᠢ ᠯᠤᠭᠠ ᠦᠭᠡ ᠰᠦᠯᠪᠡᠭᠡᠯᠳᠦᠵᠦ ᠪᠠᠢᠭᠠᠳ ᠲᠡᠷᠡ ᠬᠦ᠌ ᠬᠤᠯᠠᠭᠠᠢ ᠶ᠋ᠢᠨ ᠡᠲᠡᠭᠡᠳ ᠡᠴᠡ ᠥᠯᠵᠡᠢᠵᠢᠷᠭᠠᠯ ᠢ᠋ ᠲᠠᠯᠪᠢᠨ ᠭᠠᠷᠭᠠᠵᠤ ᠠᠪᠴᠤ ᠶᠠᠪᠤᠭᠰᠠᠨ ᠤ᠋ ᠳᠠᠷᠠᠭᠠ᠂ ᠢᠷᠭᠡᠨ ᠤᠯᠤᠰ ᠤ᠋ᠨ ᠠᠷᠪᠠᠨ ᠲᠠᠪᠤᠳᠤᠭᠠᠷ ᠣᠨ ᠤ᠋ ᠨᠠᠮᠤᠷ ᠤ᠋ᠨ ᠳᠤᠮᠳᠠᠳᠤ ᠰᠠᠷᠠ ᠳ᠋ᠤ᠌᠂ ᠮᠥᠨ ᠥᠯᠵᠡᠢᠵᠢᠷᠭᠠᠯ ᠤ᠋ᠨ ᠪᠡᠶᠡ ᠭᠠᠳᠠᠭᠠᠳᠤ ᠣᠷᠣᠰ ᠤᠯᠤᠰ ᠤ᠋ᠨ ᠡᠯᠴᠢᠨ ᠹᠦᠯᠢᠮ ᠬᠡᠮᠡᠭᠴᠢ ᠪᠠ ᠵᠣᠰᠣᠲᠤ ᠴᠢᠭᠤᠯᠭᠠᠨ ᠤ᠋ ᠮᠣᠩᠭᠣᠯ᠂ ᠪᠢ ᠶᠦᠩ ᠲᠢ ᠬᠡᠮᠡᠬᠦ ᠰᠡᠷᠡᠩᠳᠣᠩᠷᠣᠪ᠂ ᠰᠠᠢᠨᠪᠠᠶᠠᠷ ᠬᠡᠮᠡᠭᠴᠢ ᠨᠠᠷ ᠲᠡᠷᠢᠭᠦᠯᠡᠨ ᠥᠪᠡᠷ ᠪᠤᠰᠤᠳ ᠴᠢᠭᠤᠯᠭᠠᠨ ᠬᠤᠰᠢᠭᠤᠨ ᠤ᠋ ᠭᠤᠷᠪᠠᠨ ᠵᠠᠭᠤ ᠬᠢᠷᠢ ᠬᠥᠮᠦᠨ ᠦ᠌ ᠬᠠᠮᠲᠤ ᠪᠡᠶᠡ ᠥᠩᠭᠡᠷᠡᠭᠰᠡᠨ ᠰᠧᠯᠢᠩ ᠸᠠᠩᠳᠠᠨᠨᠢᠮᠠ ᠶ᠋ᠢᠨ ᠫᠤᠤ ᠵᠡᠪᠰᠡᠭ ᠢ᠋ ᠠᠪᠴᠤ ᠢᠷᠡᠭᠡᠳ᠂ ᠴᠡᠷᠢᠭ ᠦ᠋ᠨ ᠬᠦᠴᠦᠨ ᠢ᠋ᠶ᠋ᠡᠷ ᠵᠠᠰᠠᠭ ᠲᠤᠰᠠᠯᠠᠭᠴᠢ ᠪᠢᠳᠡ ᠨᠠᠷ ᠢ᠋ ᠬᠢᠬᠠᠨ ᠰᠦᠷᠳᠡᠭᠦᠯᠵᠦ ᠬᠡᠯᠡᠬᠦ ᠨᠢ᠄ ᠡᠳᠦᠭᠡ ᠪᠢᠳᠡ ᠲᠠᠨ ᠤ᠋ ᠴᠢᠭᠤᠯᠭᠠᠨ ᠬᠤᠰᠢᠭᠤᠨ ᠤ᠋ ᠭᠠᠵᠠᠷ ᠳᠣᠲᠣᠭᠠᠳᠤ ᠮᠣᠩᠭᠣᠯ ᠤ᠋ᠨ ᠠᠷᠠᠳ ᠤ᠋ᠨ ᠬᠤᠪᠢᠰᠬᠠᠯᠲᠤ ᠨᠠᠮ ᠤ᠋ᠨ ᠬᠤᠷᠠᠯ ᠤ᠋ᠨ ᠲᠥᠪ ᠬᠣᠷᠢᠶᠠᠨ ᠢ᠋ ᠪᠠᠢᠭᠤᠯᠵᠤ᠂ ᠬᠠᠭᠤᠴᠢᠨ ᠮᠣᠩᠭᠣᠯ ᠢᠷᠭᠡᠨ ᠡᠵᠡᠷᠬᠡᠭ ᠬᠠᠷᠭᠢᠰ ᠵᠠᠰᠠᠭ ᠤ᠋ᠳ ᠢ᠋ ᠨᠢᠭᠡᠮᠦᠰᠦᠨ ᠤᠰᠠᠳᠬᠠᠵᠤ ᠠᠷᠠᠳ ᠤ᠋ᠨ ᠡᠷᠬᠡ᠂ ᠵᠠᠰᠠᠭ ᠢ᠋ ᠮᠠᠨᠳᠤᠭᠤᠯᠤᠨ ᠤᠯᠤᠰ ᠤ᠋ᠨ ᠶᠠᠪᠤᠳᠠᠯ ᠢ᠋ ᠬᠤᠪᠢᠰᠬᠠᠨ ᠬᠠᠯᠠᠮᠤᠢ ᠭᠡᠮᠡᠨ ᠮᠥᠨ ᠬᠦ᠌ ᠴᠡᠷᠢᠭ ᠦ᠋ᠨ ᠰᠦᠷ ᠬᠦᠴᠦᠨ ᠢ᠋ᠶ᠋ᠡᠷ ᠳᠣᠣᠷᠠᠲᠤ ᠣᠯᠠᠨ ᠠᠷᠠᠳ ᠢ᠋ ᠬᠦᠴᠦᠲᠡᠨ ᠴᠤᠭᠯᠠᠭᠤᠯᠵᠤ ᠳᠤᠭᠤᠢᠯᠠᠩ ᠪᠣᠯᠭᠠᠭᠠᠳ᠂ ᠠᠯᠢᠪᠠ ᠠᠯᠪᠠᠨ ᠤ᠋ ᠬᠡᠷᠡᠭ ᠵᠦᠢᠯ ᠢ᠋ ᠬᠥᠨᠳᠡᠯᠢᠲᠡᠨ ᠪᠣᠭᠣᠭᠳᠠᠭᠤᠯᠤᠭᠰᠠᠨ ᠳ᠋ᠤᠷ ᠵᠠᠰᠠᠭ᠂ ᠲᠤᠰᠠᠯᠠᠭᠴᠢ ᠪᠢᠳᠡ ᠨᠠᠷ ᠲᠡᠳᠡ ᠯᠦ᠍ᠭᠡ ᠬᠡᠷᠬᠢᠨ ᠡᠰᠡᠷᠭᠦᠴᠡᠯᠳᠦᠪᠡᠰᠦ ᠬᠦᠴᠦᠨ ᠦᠯᠦ ᠬᠦᠷᠬᠦ ᠲᠤᠯᠠ᠂ ᠠᠷᠭᠠ ᠦᠭᠡᠢ ᠬᠠᠷᠢᠶᠠᠲᠤ ᠥᠯᠵᠡᠢᠵᠢᠷᠭᠠᠯ ᠢ᠋ ᠠᠷᠠᠢ ᠢᠯᠪᠢᠨ ᠲᠣᠬᠤᠭᠤᠨᠢᠭᠤᠯᠵᠦ ᠬᠣᠰᠢᠭᠤ ᠨᠤᠲᠤᠭ ᠢ᠋ ᠰᠡᠷᠭᠡᠢᠯᠡᠨ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠪᠣᠯᠭᠠᠭᠠᠳ ᠡᠯᠡ ᠤᠴᠢᠷ ᠢ᠋ ᠳᠡᠭᠡᠳᠦ ᠵᠠᠬᠢᠷᠬᠤ ᠰᠦᠢᠶᠦᠸᠠᠨ ᠳ᠋ᠥ᠋ᠲ᠋ᠦ᠋ᠩ ᠪᠠ ᠴᠢᠭᠤᠯᠭᠠᠨ ᠤ᠋ ᠳᠠᠷᠤᠭᠠ ᠶ᠋ᠢᠨ ᠭᠠᠵᠠᠷ ᠮᠡᠳᠡᠭᠦᠯᠦᠭᠰᠡᠨ ᠪᠣᠯᠪᠠᠴᠤ ᠲᠡᠳᠡ ᠨᠠᠷ ᠮᠥᠨ ᠬᠦ᠌ ᠤᠷᠢᠳᠤ ᠶ᠋ᠢᠨ ᠮᠠᠭᠤ ᠪᠠᠨ ᠬᠠᠯᠠᠬᠤ ᠦᠭᠡᠢ ᠨᠡᠮᠡᠨ ᠨᠡᠮᠡᠨ ᠣᠯᠠᠰᠢᠷᠠᠨ ᠪᠦᠯᠦᠭᠯᠡᠵᠦ ᠬᠥᠮᠦᠨ ᠦ᠌ ᠠᠮᠢᠨ ᠢ᠋ ᠬᠣᠣᠷᠯᠠᠬᠤ ᠪᠠ ᠨᠢᠳᠦᠨ ᠢ᠋ ᠰᠣᠬᠣᠯᠬᠤ᠂ ᠵᠢᠴᠢ ᠪᠠᠰᠠ ᠳᠡᠭᠡᠷᠡᠮᠯᠡᠨ ᠵᠠᠨᠴᠢᠬᠤ ᠶᠠᠯᠠᠯᠠᠬᠤ ᠵᠡᠷᠭᠡ ᠶ᠋ᠢᠨ ᠲᠡᠰᠬᠦᠶᠡ ᠪᠡᠷᠬᠡ ᠡᠷᠡᠭᠦᠦ ᠪᠡᠷ ᠣᠯᠠᠨ ᠠᠷᠠᠳ ᠲᠤᠷ ᠭᠠᠯ ᠤᠰᠤᠨ ᠤ᠋ ᠭᠠᠰᠢᠭᠤᠨ ᠵᠣᠪᠠᠯᠠᠩ ᠢ᠋ ᠡᠳ᠋ᠯᠡᠭᠦᠯᠵᠦ ᠦᠯᠦ ᠲᠡᠰᠬᠦᠢ ᠳ᠋ᠦ᠍ᠷ᠂ ᠬᠠᠷᠢᠶᠠᠲᠤ ᠴᠢᠭᠤᠯᠭᠠᠨ ᠤ᠋ ᠳᠠᠷᠤᠭᠠ ᠨᠠᠷ ᠪᠠ ᠵᠠᠬᠠ ᠵᠡᠷᠭᠡᠯᠡᠳᠡᠭᠡ ᠪᠦᠬᠦᠢ ᠱᠠᠨᠰᠢ ᠶ᠋ᠢᠨ ᠤᠮᠠᠷᠠᠲᠤ ᠵᠢᠩ ᠰᠢᠦ ᠰᠧ ᠨᠠᠷ ᠤ᠋ᠨ ᠭᠠᠵᠠᠷ ᠠ᠋ᠴᠠ ᠬᠣᠷᠢ ᠤᠳᠠᠭᠠ ᠶᠡᠬᠡ ᠴᠡᠷᠢᠭ ᠭᠠᠷᠭᠠᠵᠤ ᠪᠠᠢᠯᠳᠤᠭᠤᠯᠤᠨ ᠶᠡᠬᠡᠳᠡ ᠰᠠᠮᠠᠭᠤᠷᠠᠯ ᠪᠣᠯᠤᠭᠰᠠᠨ ᠳ᠋ᠤᠷ ᠥᠯᠵᠡᠢᠵᠢᠷᠭᠠᠯ ᠤ᠋ᠨ ᠪᠡᠶᠡ ᠨᠥᠬᠥᠷ ᠬᠣᠷᠢᠶᠠ ᠨᠠᠷ ᠤ᠋ᠨ ᠬᠠᠮᠲᠤ ᠵᠠᠰᠠᠭ ᠪᠡᠢᠯᠡ ᠨᠠᠮᠠᠶ᠋ᠢ ᠵᠢᠯ ᠰᠢᠬᠠᠮ ᠪᠣᠯᠲᠠᠯᠠ ᠬᠣᠷᠢᠭᠯᠠᠨ ᠬᠠᠳᠠᠭᠠᠯᠠᠵᠤ ᠪᠠᠢᠭᠠᠳ ᠪᠠᠰᠠ ᠬᠦ᠌ ᠪᠡᠢᠯᠡ ᠨᠠᠳᠤᠷ ᠫᠤᠤ ᠵᠢᠭᠠᠨ ᠠᠶᠤᠯᠭᠠᠵᠤ ᠪᠡᠶᠡ ᠬᠠᠮᠠᠭᠠᠯᠠᠬᠤ ᠶᠡᠬᠡ ᠪᠠᠭᠠ ᠫᠤᠤ ᠶ᠋ᠢ ᠴᠥᠮ ᠪᠤᠯᠢᠶᠠᠨ ᠠᠪᠤᠭᠰᠠᠨ ᠳ᠋ᠤᠷ ᠪᠠᠴᠢᠮᠳᠠᠨ ᠠᠶᠤᠵᠤ ᠠᠷᠠᠢᠬᠠᠨ ᠠᠮᠢ ᠵᠤᠯᠪᠠᠨ ᠪᠡᠶᠡ ᠵᠠᠢᠯᠠᠨ ᠳᠤᠲᠠᠭᠠᠨ ᠭᠠᠷᠪᠠᠢ᠃ ᠡᠭᠦᠨ ᠳ᠋ᠦ᠍ᠷ ᠬᠢᠨᠠᠨ ᠪᠠᠢᠴᠠᠭᠠᠪᠠᠰᠤ ᠡᠨᠡ ᠬᠦ᠌ ᠭᠠᠳᠠᠭᠠᠳᠤ ᠳᠣᠲᠣᠭᠠᠳᠤ ᠶ᠋ᠢᠨ ᠬᠥᠮᠦᠨ ᠤᠯᠠᠮ ᠢ᠋ᠶ᠋ᠠᠷ ᠣᠯᠠᠰᠢᠷᠠᠭᠰᠠᠭᠠᠷ ᠳᠡᠭᠡᠳᠦ ᠳ᠋ᠦ᠍ᠷ ᠪᠣᠯᠪᠠᠰᠤ ᠲᠠᠪᠤᠨ ᠲᠥᠷᠥᠯ ᠦ᠋ᠨ ᠨᠠᠢᠷᠠᠮᠳᠠᠭᠰᠠᠨ ᠮᠠᠨ ᠤ᠋ ᠳᠤᠮᠳᠠᠳᠤ ᠵᠠᠰᠠᠭ ᠲᠤᠷ ᠶᠠᠮᠪᠠᠷ ᠶᠠᠪᠤᠳᠠᠯ ᠭᠠᠷᠭᠠᠬᠤ ᠪᠣᠯᠣᠰᠢ ᠦᠭᠡᠢ ᠡᠴᠡ ᠡᠮᠢᠶᠡᠮᠦᠢ᠂ ᠳᠣᠣᠷᠠᠲᠤ ᠳ᠋ᠤᠷ ᠪᠣᠯᠪᠠᠰᠤ ᠥᠴᠦᠬᠡᠨ ᠮᠠᠨ ᠤ᠋ ᠴᠢᠭᠤᠯᠭᠠᠨ ᠬᠤᠰᠢᠭᠤᠨ ᠤ᠋ ᠣᠯᠠᠨ ᠲᠦᠮᠡᠨ ᠮᠣᠩᠭᠣᠯ ᠨᠠᠩᠭᠢᠶᠠᠳ ᠠᠷᠠᠳ ᠠᠵᠤ ᠲᠥᠷᠥᠨ ᠠᠮᠢᠳᠤᠷᠠᠵᠤ ᠠᠯᠪᠠᠨ ᠲᠠᠩᠨᠠᠬᠤ ᠠᠷᠭᠠ ᠦᠭᠡᠢ ᠪᠣᠯᠵᠤᠬᠤᠢ ᠭᠡᠮᠡᠨ ᠭᠤᠶᠤᠨ ᠮᠡᠳᠡᠭᠦᠯᠦᠭᠰᠡᠨ ᠠᠮᠤᠢ᠂ ᠡᠢᠮᠦ ᠪᠣᠯᠪᠠᠴᠤ ᠡᠳᠦᠭᠡ ᠪᠣᠯᠲᠠᠯᠠ ᠲᠣᠬᠣᠨᠢᠨ ᠲᠣᠭᠲᠠᠨᠢᠭᠠᠳᠤᠢ᠂ ᠡᠨᠡ ᠬᠠᠪᠤᠷ ᠤ᠋ᠨ ᠲᠡᠷᠢᠭᠦᠨ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠬᠣᠶᠠᠷ ᠲᠤ᠌ ᠬᠠᠷᠢᠶᠠᠲᠤ ᠬᠤᠰᠢᠭᠤᠨ ᠤ᠋ ᠴᠣᠬᠣᠮ ᠬᠦ᠌ ᠵᠢᠷᠤᠮᠲᠤ ᠠᠷᠠᠳ ᠡᠷᠬᠢᠮᠳᠠᠯᠠᠢ ᠨᠠᠷ ᠮᠠᠭᠤ ᠬᠤᠯᠠᠭᠠᠢ ᠥᠯᠵᠡᠢᠵᠢᠷᠭᠠᠯ ᠢ᠋ ᠠᠯᠠᠵᠤ ᠬᠤᠰᠢᠭᠤᠨ ᠤ᠋ ᠰᠠᠮᠠᠭᠤᠷᠠᠯ ᠢ᠋ ᠳᠣᠬᠣᠨᠢᠳᠠᠭᠤᠯᠬᠤᠢ ᠪᠠᠷ ᠵᠠᠪᠳᠤᠬᠤ ᠶ᠋ᠢᠨ ᠵᠠᠭᠤᠷᠠ᠂ ᠲᠡᠭᠦᠨ ᠦ᠌ ᠨᠠᠮ ᠤ᠋ᠨ ᠬᠥᠮᠦᠰ ᠲᠠᠢᠵᠢ ᠠᠷᠪᠢᠨᠪᠠᠶᠠᠷ ᠨᠠᠷ ᠤᠷᠢᠳ ᠢ᠋ᠶ᠋ᠠᠷ ᠵᠠᠪᠳᠤᠨ ᠬᠤᠯᠠᠭᠠᠢ ᠥᠯᠵᠡᠢᠵᠢᠷᠭᠠᠯ ᠢ᠋ ᠠᠯᠠᠭᠰᠠᠨ ᠵᠢᠷᠤᠮᠲᠤ ᠠᠷᠠᠳ ᠡᠷᠬᠢᠮᠳᠠᠯᠠᠢ ᠨᠠᠷ ᠤ᠋ᠨ ᠶᠢᠰᠦᠨ ᠬᠥᠮᠦᠨ ᠡᠴᠡ ᠮᠥᠨ ᠡᠷᠬᠢᠮᠳᠠᠯᠠᠢ᠂ ᠳᠡᠯᠭᠡᠷᠰᠡᠷᠡᠩ᠂ ᠪᠦᠷᠢᠨᠵᠢᠷᠭᠠᠯ ᠨᠠᠷ ᠤ᠋ᠨ ᠭᠤᠷᠪᠠᠨ ᠬᠥᠮᠦᠨ ᠢ᠋ ᠠᠯᠠᠵᠤ ᠠᠮᠢ ᠲᠦᠯᠦᠷᠡᠭᠦᠯᠦᠨ ᠲᠤᠢᠯ ᠤ᠋ᠨ ᠡᠷᠡᠭᠦᠦ ᠦᠵᠡᠭᠦᠯᠬᠦ ᠪᠠ ᠪᠠᠰᠠ ᠴᠤ᠌ ᠬᠠᠷᠢᠶᠠᠲᠤ ᠴᠡᠷᠢᠭ ᠳᠣᠲᠣᠭᠠᠳᠤ ᠬᠢᠲᠠᠳ ᠭᠠᠵᠠᠷ ᠢᠦᠢ ᠯᠢᠨ ᠬᠣᠲᠠ ᠶ᠋ᠢᠨ ᠬᠢᠵᠠᠭᠠᠷ ᠤ᠋ᠨ ᠣᠢᠷᠠᠯᠴᠠᠭᠠ ᠰᠠᠭᠤᠵᠤ ᠪᠠᠢᠲᠠᠯᠠ ᠰᠢᠭᠤᠳ ᠬᠠᠯᠳᠠᠷᠠ ᠢᠷᠡᠵᠦ ᠪᠠᠢᠯᠳᠤᠬᠤ ᠠᠨᠤ ᠶ᠋ᠢ ᠦᠵᠡᠪᠡᠰᠦ ᠦᠨᠡᠬᠡᠷ ᠮᠠᠨ ᠤ᠋ ᠬᠣᠰᠢᠭᠤ ᠲᠦᠪᠰᠢᠷᠡᠨ ᠲᠣᠭᠲᠠᠨᠢᠬᠤ ᠠᠨᠤ ᠪᠡᠷᠬᠡ ᠮᠡᠲᠦ ᠪᠥᠭᠡᠳ ᠡᠭᠦᠨ ᠳ᠋ᠦ᠍ᠷ ᠵᠠᠰᠠᠭ ᠪᠡᠢᠯᠡ ᠪᠢ ᠮᠡᠬᠦᠢᠵᠦ ᠰᠠᠨᠠᠪᠠᠰᠤ ᠮᠢᠨᠦ ᠪᠡᠶᠡ ᠶ᠋ᠢ ᠬᠠᠮᠠᠭᠠᠯᠠᠬᠤ ᠴᠡᠷᠢᠭ ᠴᠥᠮ ᠰᠢᠭᠤᠳ ᠬᠤᠰᠢᠭᠤᠨ ᠳ᠋ᠤᠷ ᠣᠷᠣᠬᠤ ᠪᠠᠷ ᠣᠳᠴᠤ ᠴᠢᠳᠠᠬᠤ ᠦᠭᠡᠢ ᠶ᠋ᠢᠨ ᠲᠤᠯᠠ ᠢᠦᠢ ᠯᠢᠨ ᠬᠣᠲᠠ ᠠ᠋ᠴᠠ ᠮᠣᠷᠳᠠᠵᠤ ᠵᠠᠰᠠᠭ ᠬᠤᠰᠢᠭᠤᠨ ᠤ᠋ ᠭᠠᠵᠠᠷ ᠲᠤᠷ ᠣᠷᠣᠵᠤ ᠢᠷᠡᠨ ᠬᠤᠰᠢᠭᠤᠨ ᠤ᠋ ᠰᠠᠪᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠪᠡᠯᠡᠭ ᠵᠢᠷᠭᠠᠯᠠᠩᠲᠤ ᠰᠦᠮᠡ(ᠪᠠᠨᠳᠢᠳᠠ ᠶ᠋ᠢᠨ ᠳᠤᠭᠠᠩ— ᠰᠡᠢᠷᠡᠭᠦᠯᠦᠭᠴᠢ ᠡᠴᠡ) ᠳᠡᠭᠡᠷᠡ ᠴᠡᠷᠢᠭ ᠨᠠᠷ ᠤ᠋ᠨ ᠬᠠᠮᠲᠤ ᠰᠠᠭᠤᠵᠤ ᠪᠣᠢ ᠤᠴᠢᠷ ᠢ᠋ ᠣᠯᠠᠨ ᠳᠡᠭᠡᠳᠦ ᠶᠠᠮᠤᠰ ᠪᠠ ᠵᠠᠰᠠᠭ ᠬᠤᠰᠢᠭᠤᠨ ᠳ᠋ᠤᠷ ᠨᠢᠭᠡᠨ ᠠᠳᠠᠯᠢ ᠡᠷᠭᠦᠨ ᠮᠡᠳᠡᠭᠦᠯᠦᠭᠰᠡᠨ ᠢ᠋ ᠭᠠᠷᠭᠠᠨ ᠮᠡᠳᠡᠭᠦᠯᠦᠶᠡ᠂ ᠥᠷᠥᠰᠢᠶᠡᠪᠡᠰᠦ ᠰᠢᠳᠠᠷ ᠲᠤᠷ ᠶᠠᠪᠤᠬᠤ ᠳᠡᠳ᠋ ᠲᠡᠷᠢᠭᠦᠨ ᠵᠠᠰᠠᠭ ᠸᠠᠩ ᠨᠣᠶᠠᠨ ᠲᠠᠨ ᠲᠣᠯᠢᠳᠠᠨ ᠥᠷᠥᠰᠢᠶᠡᠵᠦ ᠡᠨᠡ ᠮᠡᠲᠦ ᠬᠤᠯᠠᠭᠠᠢ ᠶ᠋ᠢᠨ ᠬᠣᠷᠰᠢᠶᠠ ᠲᠠᠢᠵᠢ ᠠᠷᠪᠢᠨᠪᠠᠶᠠᠷ ᠨᠠᠷ ᠤ᠋ᠨ ᠬᠡᠳᠦᠬᠡᠨ ᠬᠤᠯᠠᠭᠠᠢ ᠶ᠋ᠢ ᠪᠠᠷᠢᠨ ᠠᠪᠴᠤ ᠰᠢᠢᠳᠬᠡᠨ ᠡᠯᠡ ᠮᠠᠭᠤ ᠰᠠᠮᠠᠭᠤᠷᠠᠯ ᠤ᠋ᠨ ᠦᠨᠳᠦᠰᠦᠨ ᠢ᠋ ᠲᠠᠰᠤᠯᠤᠨ ᠰᠢᠢᠳᠬᠡᠵᠦ ᠥᠴᠦᠬᠡᠨ ᠬᠤᠰᠢᠭᠤᠨ ᠤ᠋ ᠣᠯᠠᠨ ᠲᠦᠮᠡᠨ ᠢ᠋ ᠲᠣᠭᠲᠠᠨᠢᠭᠤᠯᠤᠨ ᠠᠮᠤᠷᠵᠢᠭᠤᠯᠵᠤ ᠵᠢᠴᠢ ᠵᠠᠰᠠᠭ ᠮᠢᠨᠦ ᠴᠠᠭᠠᠨ ᠬᠡᠷᠡᠮ ᠦ᠋ᠨ ᠳᠣᠲᠣᠭᠠᠳᠤ ᠭᠠᠳᠠᠭᠠᠳᠤ ᠭᠠᠵᠠᠷ ᠲᠤᠷ ᠭᠡᠷᠦᠨ ᠬᠡᠰᠦᠵᠦ ᠭᠠᠴᠢᠭᠳᠠᠨ ᠶᠠᠪᠤᠬᠤ ᠵᠣᠪᠠᠯᠠᠩ ᠠ᠋ᠴᠠ ᠬᠡᠯᠲᠦᠷᠢᠭᠦᠯᠦᠨ ᠵᠠᠰᠠᠭ ᠵᠠᠰᠠᠯᠲᠠ ᠶ᠋ᠢᠨ ᠵᠢᠷᠤᠮ ᠢ᠋ᠶ᠋ᠠᠷ ᠪᠠᠭᠤᠷᠠᠢ ᠶ᠋ᠢ ᠲᠡᠳᠬᠦᠨ ᠠᠪᠴᠤ ᠶᠠᠪᠤᠭᠤᠯᠬᠤ ᠶ᠋ᠢ ᠭᠤᠶᠤᠵᠤ ᠡᠭᠦᠨ ᠦ᠌ ᠲᠤᠯᠠ ᠡᠷᠭᠦᠨ ᠪᠠᠷᠢᠪᠠ᠃
ᠳᠤᠮᠳᠠᠳᠤ ᠢᠷᠭᠡᠨ ᠤᠯᠤᠰ ᠤ᠋ᠨ ᠠᠷᠪᠠᠨ ᠨᠠᠢ᠍ᠮᠠᠳᠤᠭᠠᠷ ᠣᠨ ᠰᠢᠷᠠᠭᠴᠢᠨ ᠮᠣᠭᠠᠢ ᠵᠢᠯ ᠦ᠋ᠨ
ᠵᠤᠨ ᠤ᠋ ᠰᠡᠭᠦᠯ ᠰᠠᠷᠠ ᠶ᠋ᠢᠨ ᠰᠢᠨᠡ ᠶ᠋ᠢᠨ ᠶᠢᠰᠦᠨᠡ
7᠂ ᠸᠠᠩᠴᠤᠭᠷᠠᠪᠳᠠᠨ ᠢ᠋ ᠪᠠᠷᠢᠪᠴᠢᠯᠠᠭᠰᠠᠨ ᠨᠢ
ᠭᠠᠯᠠᠭᠤᠲᠤ ᠶ᠋ᠢᠨ ᠪᠤᠵᠠᠢ ᠶ᠋ᠢᠨ ᠨᠠᠭᠤᠷ ᠤ᠋ᠨ ᠪᠠᠷᠠᠭᠤᠨ ᠲᠠᠢ ᠥᠯ ᠪᠤᠭᠤ ᠶ᠋ᠢᠨ ᠰᠢᠯᠢ ᠶ᠋ᠢᠨ ᠵᠡᠭᠦᠨ ᠪᠡᠶᠡ ᠳ᠋ᠦ᠍ ᠸᠠᠩᠴᠤᠭᠷᠠᠪᠳᠠᠨ ᠲᠠᠢᠵᠢ ᠶ᠋ᠢᠨ ᠭᠡᠷ ᠪᠠᠢᠳᠠᠭ᠃ ᠪᠤᠵᠠᠢ ᠶ᠋ᠢᠨ ᠨᠠᠭᠤᠷ ᠤ᠋ᠨ ᠵᠡᠭᠦᠨ ᠪᠤᠷᠭᠠᠰᠤᠨ ᠳ᠋ᠤ᠌ ᠰᠢᠨᠡᠯᠡᠮᠡ ᠶ᠋ᠢᠨ ᠭᠡᠷ ᠪᠠᠢᠳᠠᠭ᠃ ᠡᠨᠡ ᠬᠣᠶᠠᠷ ᠥᠰᠢᠶᠡᠲᠡᠨ ᠬᠥᠮᠦᠨ ᠦ᠌ ᠭᠡᠷ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠳᠥᠩᠭᠡᠵᠦ ᠵᠢᠷᠭᠤᠭᠠᠨ ᠺᠢᠯᠣᠮᠧᠲ᠋ᠷ ᠠᠯᠤᠰᠯᠠᠵᠤ ᠠᠢᠮᠠᠭ ᠵᠡᠷᠭᠡᠯᠡᠳᠡᠭᠡ ᠰᠠᠭᠤᠷᠢᠰᠢᠵᠤ ᠪᠠᠢᠭᠠ ᠪᠣᠯᠪᠠᠴᠤ ᠰᠢᠲᠦᠵᠦ ᠪᠢᠰᠢᠷᠡᠳᠡᠭ ᠦᠵᠡᠯ ᠵᠣᠷᠢᠯᠲᠠ ᠪᠠ ᠬᠢᠵᠦ ᠪᠠᠢᠭᠠ ᠠᠵᠢᠯ ᠶᠠᠪᠤᠳᠠᠯ ᠨᠢ ᠬᠣᠭᠣᠷᠣᠨᠳᠣ ᠪᠠᠨ ᠡᠷᠡᠰ ᠠᠳᠠᠯᠢ ᠦᠭᠡᠢ ᠤᠴᠢᠷ ᠠ᠋ᠴᠠ ᠬᠠᠷᠢᠯᠴᠠᠨ ᠨᠢᠭᠡᠨ ᠨᠢᠭᠡᠨ ᠢ᠋ᠶ᠋ᠡᠨ ᠳᠠᠷᠤᠵᠤ ᠤᠨᠠᠭᠠᠬᠤ ᠬᠠᠷᠠᠯᠲᠠ ᠵᠣᠭᠰᠣᠯᠲᠠ ᠲᠠᠢ ᠪᠣᠯᠤᠭᠠᠳ ᠣᠨ ᠵᠢᠯ ᠤᠳᠠᠵᠤᠬᠤᠢ᠃ ᠡᠢᠮᠦ ᠡᠴᠡ ᠲᠡᠷᠡ ᠬᠣᠶᠠᠭᠤᠯᠠ ᠬᠡᠨ ᠠᠯᠢ ᠪᠠᠨ ᠬᠡᠵᠢᠶᠡᠳᠡ ᠠᠵᠢᠭᠯᠠᠨ ᠲᠡᠩᠨᠡᠵᠦ ᠶᠠᠪᠤᠳᠠᠭ ᠪᠠᠢᠵᠠᠢ᠃
ᠨᠢᠭᠡ ᠤᠳᠠᠭᠠ ᠰᠢᠨᠡᠯᠡᠮᠡ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠢᠷᠡᠭᠰᠡᠨ ᠢ᠋ ᠸᠠᠩᠴᠤᠭᠷᠠᠪᠳᠠᠨ ᠮᠡᠳᠡᠭᠡᠳ ᠲᠡᠭᠦᠨ ᠢ᠋ ᠪᠠᠷᠢᠬᠤ ᠪᠠᠷ ᠨᠣᠶᠠᠨ ᠤ᠋ ᠪᠦᠯᠦᠭ ᠦ᠋ᠨ ᠪᠤᠶᠠᠨᠴᠣᠭ ᠲᠤ᠌ ᠰᠡᠮᠡᠬᠡᠷ ᠬᠡᠳᠦᠨ ᠦᠭᠡ ᠪᠢᠴᠢᠵᠦ᠂ ᠡᠨᠡ ᠵᠠᠬᠢᠳᠠᠯ ᠢ᠋ ᠪᠤᠶᠠᠨᠴᠣᠭ ᠠ᠋ᠴᠠ ᠥᠭᠡᠷᠡ ᠬᠥᠮᠦᠨ ᠳ᠋ᠦ᠍ ᠥᠭᠴᠦ ᠪᠣᠯᠬᠤ ᠦᠭᠡᠢ᠂ ᠰᠢᠨᠠᠯᠠᠮᠠ ᠳ᠋ᠤ᠌ ᠠᠨᠢᠷ ᠴᠢᠮᠡᠭᠡ ᠰᠣᠨᠣᠰᠬᠠᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ ᠭᠡᠵᠦ ᠵᠠᠬᠢᠳᠠᠯ ᠬᠦᠷᠭᠡᠭᠴᠢ ᠳ᠋ᠦ᠍ ᠵᠠᠬᠢᠵᠠᠢ᠃ ᠭᠡᠲᠡᠯᠡ ᠲᠡᠷᠡ ᠦᠶᠡ ᠳ᠋ᠦ᠍ ᠵᠠᠮ ᠨᠡᠪᠲᠡᠷᠡᠯᠭᠡ ᠳᠥᠭᠥᠮ ᠦᠭᠡᠢ᠂ ᠪᠢᠴᠢᠭ ᠨᠢᠳᠦᠯᠡᠵᠦ ᠤᠩᠰᠢᠳᠠᠭ ᠬᠥᠮᠦᠨ ᠴᠦ᠍ ᠲᠤᠩ ᠴᠥᠭᠡᠬᠡᠨ ᠪᠠᠢᠭᠰᠠᠨ ᠲᠤᠯᠠ ᠡᠨᠡ ᠬᠦ᠌ ᠴᠢᠬᠤᠯᠠ ᠵᠠᠬᠢᠳᠠᠯ ᠨᠢ ᠬᠥᠮᠦᠨ ᠳᠠᠮᠵᠢᠭᠰᠠᠭᠠᠷ ᠪᠠᠢᠭᠠᠳ ᠸᠠᠩᠴᠤᠭᠷᠠᠪᠳᠠᠨ ᠤ᠋ ᠵᠠᠬᠢᠵᠤ ᠶᠠᠪᠤᠭᠤᠯᠤᠭᠰᠠᠨ ᠦᠭᠡ ᠨᠢ ᠬᠠᠷᠢᠨ ᠰᠢᠨᠠᠯᠠᠮᠠ ᠠ᠋ᠴᠠ ᠥᠭᠡᠷᠡ ᠬᠥᠮᠦᠨ ᠳ᠋ᠦ᠍ ᠥᠭᠴᠦ ᠪᠣᠯᠬᠤ ᠦᠭᠡᠢ ᠭᠡᠵᠦ ᠬᠤᠪᠢᠷᠠᠴᠢᠬᠠᠭᠰᠠᠨ ᠪᠠᠢᠨᠠ᠃ ᠡᠨᠡ ᠵᠠᠬᠢᠳᠠᠯ ᠠᠢᠯ ᠡᠷᠦᠬᠡ ᠳᠠᠮᠵᠢᠭᠰᠠᠭᠠᠷ ᠰᠢᠨᠠᠯᠠᠮᠠ ᠶ᠋ᠢᠨ ᠲᠥᠷᠥᠯ ᠦ᠋ᠨ ᠬᠡᠦᠬᠡᠨ ᠳᠡᠭᠦᠦ ᠪᠣᠯᠬᠤ ᠬᠣᠨᠳᠣᠭ (ᠭᠠᠯᠠᠭᠤᠲᠤ ᠶ᠋ᠢᠨ ᠱᠠᠪᠷᠤᠩ ᠷᠢᠨᠴᠢᠨᠳᠣᠷᠵᠢ ᠶ᠋ᠢᠨ ᠮᠥᠮᠥ) ᠳ᠋ᠦ᠍ ᠬᠦᠷᠭᠡᠭᠳᠡᠵᠦ᠂ ᠬᠣᠨᠳᠣᠭ ᠲᠡᠷᠡ ᠰᠥᠨᠢ ᠳ᠋ᠡᠭᠡᠨ ᠰᠢᠨᠠᠯᠠᠮᠠ ᠶ᠋ᠢᠨ ᠭᠡᠷ ᠲᠦ᠋ᠨᠢ ᠠᠪᠠᠴᠢᠵᠤ ᠥᠭᠴᠡᠢ᠃ ᠰᠢᠨᠠᠯᠠᠮᠠ ᠵᠠᠬᠢᠳᠠᠯ ᠢ᠋ ᠠᠪᠤᠮᠠᠭᠴᠠ᠄《ᠰᠠᠢᠨ ᠬᠡᠦᠬᠡᠨ ᠪᠠᠢᠨᠠ᠂ ᠶᠡᠬᠡ ᠲᠤᠰᠠ ᠪᠣᠯᠤᠯᠠ ᠁》 ᠭᠡᠵᠦ ᠲᠠᠯᠠᠷᠬᠠᠭᠠᠳ ᠪᠢᠴᠢᠭ ᠢ᠋ ᠦᠵᠡᠵᠦ ᠢᠨᠢᠶᠡᠮᠰᠦᠭᠯᠡᠨᠡ᠃ ᠳᠠᠷᠠᠭᠠ ᠡᠳᠦᠷ ᠨᠢ ᠰᠢᠨᠡᠯᠡᠮᠡ ᠶ᠋ᠢᠨ ᠬᠡᠳᠦᠨ ᠴᠡᠷᠢᠭ ᠬᠥᠬᠡᠲᠣᠯᠣᠭᠠᠢ ᠶ᠋ᠢᠨ ᠳᠠᠪᠤᠰᠤᠨ ᠨᠠᠭᠤᠷ ᠠ᠋ᠴᠠ ᠡᠮᠦᠨᠡᠰᠢ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠵᠦᠭ ᠴᠡᠷᠢᠭ ᠰᠢᠯᠵᠢᠵᠦ ᠰᠢᠨᠠᠯᠠᠮᠠ ᠶ᠋ᠢᠨ ᠭᠡᠷ ᠢ᠋ᠶ᠋ᠡᠷ ᠳᠠᠭᠠᠷᠢᠨ ᠥᠩᠭᠡᠷᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠳᠣᠳᠠᠤᠠ᠂ ᠴᠢᠨᠰᠠᠩ᠂ ᠪᠠᠶᠠᠰᠬᠤ᠂ ᠪᠠᠳᠠᠷᠠᠬᠤ᠂ ᠳᠠᠯᠠᠢᠬᠦᠦ᠂ ᠷᠬᠠᠪᠠ ᠵᠡᠷᠭᠡ ᠠᠷᠪᠠᠭᠠᠳ ᠴᠡᠷᠢᠭ ᠭᠡᠷ ᠲᠡᠭᠡᠨ ᠲᠦᠷ ᠬᠠᠷᠢᠬᠤ ᠪᠠᠷ ᠴᠢᠯᠥᠭᠡ ᠭᠤᠶᠤᠭᠰᠠᠨ ᠳ᠋ᠤ᠌ ᠰᠢᠨᠠᠯᠠᠮᠠ ᠠ᠋ᠴᠠ᠄《ᠲᠠᠨᠤᠰ ᠬᠡᠳᠦᠨ ᠡᠳᠦᠷ ᠦ᠋ᠨ ᠳᠠᠷᠠᠭᠠ ᠴᠢᠯᠥᠭᠡ ᠠᠪ! ᠡᠨᠡ ᠬᠡᠳᠦᠨ ᠡᠳᠦᠷ ᠲᠦ᠍ ᠨᠢᠭᠡ ᠤᠴᠢᠷ ᠪᠠᠢᠵᠤ ᠮᠠᠭᠠᠳ! ᠲᠠ ᠨᠠᠷ ᠮᠠᠨ ᠤ᠋ ᠮᠠᠨᠵᠢᠨ ᠲᠠᠷᠢᠳᠠᠭ ᠶᠡᠬᠡ ᠪᠤᠷᠭᠠᠰᠤᠨ ᠳᠥᠭᠥᠮ ᠳ᠋ᠦ᠍ ᠠᠮᠠᠷᠠᠵᠤ ᠮᠣᠷᠢ ᠪᠠᠨ ᠡᠪᠡᠰᠦᠯᠡᠭᠦᠯᠵᠦ ᠠᠮᠠᠷᠠᠵᠠᠭᠠ ᠳᠠ! ᠪᠤᠰᠤᠳ ᠬᠥᠮᠦᠨ ᠳ᠋ᠦ᠍ ᠴᠢᠮᠡᠭᠡ ᠠᠨᠢᠷ ᠣᠭᠲᠣ ᠰᠡᠷᠡᠭᠳᠡᠵᠦ ᠪᠣᠯᠬᠤ ᠦᠭᠡᠢ᠂ ᠮᠠᠨ ᠤ᠋ ᠭᠡᠷ ᠦ᠋ᠨ ᠬᠥᠮᠦᠨ ᠢ᠋ᠶ᠋ᠡᠷ ᠲᠠᠨᠤᠰ ᠲᠤ᠌ ᠴᠠᠢ ᠪᠤᠳᠠᠭᠠ ᠴᠢᠨᠠᠭᠤᠯᠵᠤ ᠬᠦᠷᠭᠡᠶᠡ》 ᠭᠡᠵᠦ ᠵᠠᠬᠢᠪᠠ᠃
ᠲᠡᠳᠡᠭᠡᠷ ᠴᠡᠷᠢᠭ ᠬᠣᠶᠠᠷ ᠡᠳᠦᠷ ᠪᠤᠷᠭᠠᠰᠤᠨ ᠳᠥᠭᠥᠮ ᠳ᠋ᠦ᠍ ᠵᠠᠷᠯᠢᠭ ᠵᠢᠭᠠᠪᠤᠷᠢ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠰᠠᠭᠤᠪᠠ᠃ ᠰᠢᠨᠠᠯᠠᠮᠠ ᠴᠦ᠍ ᠭᠡᠷ ᠲᠡᠭᠡᠨ ᠢᠬᠢᠷ ᠰᠢᠬᠢᠷ ᠠᠵᠢᠯ ᠤ᠋ᠳ ᠢ᠋ ᠬᠢᠵᠦ ᠭᠡᠨᠡᠳᠲᠡ ᠶᠠᠮᠠᠷ ᠬᠥᠮᠦᠨ ᠬᠦᠷᠴᠦ ᠢᠷᠡᠬᠦ ᠶ᠋ᠢ ᠬᠦᠯᠢᠶᠡᠵᠦ ᠶᠠᠳᠠᠨᠠ᠃
ᠰᠢᠨᠡᠯᠡᠮᠡ ᠶ᠋ᠢᠨ ᠬᠣᠲᠠᠴᠢ ᠨᠣᠬᠠᠢ ᠭᠡᠨᠡᠳᠲᠡ ᠨᠢᠭᠡᠨ ᠵᠢᠷᠣᠭᠠ ᠰᠠᠭᠠᠷᠠᠯ ᠮᠣᠷᠢ ᠲᠠᠢ ᠬᠥᠮᠦᠨ ᠢ᠋ ᠰᠦᠷᠡᠬᠡᠢ ᠬᠤᠴᠠᠵᠤ ᠵᠢᠭᠤᠷᠠᠯᠳᠤᠭᠠᠳ ᠮᠣᠷᠢᠨ ᠠ᠋ᠴᠠ ᠨᠢ ᠪᠠᠭᠤᠯᠭᠠᠬᠤ ᠦᠭᠡᠢ ᠪᠠᠢᠭᠠ ᠶ᠋ᠢ ᠰᠢᠨᠠᠯᠠᠮᠠ ᠴᠣᠩᠬᠣ ᠪᠠᠷ ᠠᠵᠢᠵᠤ ᠦᠵᠡᠭᠡᠳ᠄《ᠦ᠂ ᠨᠣᠬᠠᠢ ᠸᠠᠩᠴᠤᠭᠷᠠᠪᠳᠠᠨ ᠢ᠋ ᠬᠠᠵᠠᠬᠤ ᠶᠤᠮ ᠪᠠᠢᠨᠠ᠂ ᠬᠤᠷᠳᠤᠨ ᠭᠠᠷᠴᠤ ᠨᠣᠬᠠᠢ ᠪᠠᠨ ᠬᠣᠷᠢ!》 ᠭᠡᠵᠦ ᠡᠬᠡᠨᠡᠷ ᠸᠠᠩᠴᠢᠮᠢᠳᠤᠭ ᠢ᠋ ᠵᠠᠬᠢᠯᠠ᠃ ᠡᠬᠡᠨᠡᠷ ᠬᠥᠮᠦᠨ ᠳ᠋ᠦ᠍ ᠡᠨᠡ ᠨᠣᠬᠠᠢ ᠥᠨᠥᠳᠥᠷ ᠬᠣᠷᠢᠭᠳᠠᠬᠤ ᠦᠭᠡᠢ ᠵᠢᠭᠤᠷᠠᠯᠳᠤᠭᠠᠳ ᠪᠠᠢᠬᠤ ᠶ᠋ᠢ ᠰᠢᠨᠡᠯᠡᠮᠡ ᠦᠵᠡᠭᠡᠳ ᠬᠡᠷᠪᠡ ᠮᠢᠨᠦ ᠨᠣᠬᠠᠢ ᠥᠨᠥᠳᠥᠷ ᠸᠠᠩᠴᠤᠭᠷᠠᠪᠳᠠᠨ ᠢ᠋ ᠬᠠᠵᠠᠴᠢᠬᠠᠪᠠᠯ ᠬᠡᠷᠡᠭ ᠲᠦ᠍ ᠣᠷᠣᠬᠤ ᠶᠤᠮ ᠰᠢᠦ ᠳᠡ! ᠭᠡᠵᠦ ᠪᠣᠳᠣᠭᠠᠳ ᠥᠪᠡᠷ ᠢ᠋ᠶ᠋ᠡᠨ ᠭᠠᠷᠴᠤ ᠨᠣᠬᠠᠢ ᠪᠠᠨ ᠬᠣᠷᠢᠵᠤ ᠸᠠᠩᠴᠤᠭᠷᠠᠪᠳᠠᠨ ᠲᠠᠢᠵᠢ ᠶ᠋ᠢ ᠤᠭᠲᠤᠯᠠ᠃
ᠸᠠᠩᠴᠤᠭᠷᠠᠪᠳᠠᠨ ᠲᠠᠢᠵᠢ ᠶᠡᠬᠡ ᠯᠡ ᠬᠥᠩᠭᠡᠮᠰᠦᠭ ᠣᠪᠣᠷ ᠢ᠋ᠶ᠋ᠠᠷ ᠬᠦᠬᠦᠷ ᠰᠣᠯᠢᠯᠴᠠᠵᠤ ᠠᠮᠤᠷ ᠮᠡᠨᠳᠦ ᠠᠰᠠᠭᠤᠪᠠ᠃
ᠸᠠᠩᠴᠢᠮᠢᠳᠤᠭ᠂ ᠸᠠᠩᠴᠤᠭᠷᠠᠪᠳᠠᠨ ᠳ᠋ᠤ᠌ ᠴᠠᠭᠠᠨ ᠢᠳᠡᠭᠡ ᠠᠮᠰᠠᠭᠤᠯᠵᠤ ᠰᠢᠷᠠ ᠲᠣᠰᠣ᠂ ᠴᠥᠷᠮᠡ᠂ ᠰᠢᠬᠢᠷ᠂ ᠬᠠᠭᠤᠷᠤᠭᠰᠠᠨ ᠠᠮᠤ ᠲᠠᠢ ᠮᠣᠩᠭᠣᠯ ᠴᠠᠢ ᠬᠣᠭᠣᠯᠠ ᠪᠠᠷ ᠵᠣᠴᠢᠯᠠᠬᠤ ᠳ᠋ᠤ᠌ ᠸᠠᠩᠴᠤᠭᠷᠠᠪᠳᠠᠨ ᠪᠠᠬᠠᠨ ᠰᠠᠨᠳᠤᠷᠴᠤ ᠪᠤᠶᠠᠨᠴᠣᠭ ᠨᠠᠷ ᠶᠠᠭᠠᠬᠢᠭᠠᠳ ᠡᠨᠳᠡ ᠢᠷᠡᠭᠰᠡᠨ ᠦᠭᠡᠢ ᠪᠣᠯᠴᠢᠬᠠᠪᠠ? ᠭᠡᠵᠦ ᠰᠠᠨᠳᠤᠷᠴᠤ ᠪᠣᠳᠣᠯ ᠪᠣᠯᠤᠨᠠ᠃ ᠸᠠᠩᠴᠤᠭᠷᠠᠪᠳᠠᠨ᠂ ᠰᠢᠨᠠᠯᠠᠮᠠ ᠠ᠋ᠴᠠ᠄《ᠲᠠ ᠣᠯᠠᠨ ᠭᠠᠵᠠᠷ ᠰᠠᠢᠨ ᠡᠷᠭᠢᠴᠡᠭᠰᠡᠨ ᠬᠥᠮᠦᠨ ᠶᠦᠮ ᠴᠢᠨᠢ ᠬᠣᠯᠠ ᠣᠢᠷᠠ ᠳ᠋ᠤ᠌ ᠨᠠᠮᠵᠢᠭᠤᠨ ᠲᠣᠭᠲᠠᠭᠤᠨ ᠪᠠᠢᠨᠠ ᠤᠤ?》 ᠭᠡᠬᠦ ᠳ᠋ᠦ᠍᠂ ᠰᠢᠨᠠᠯᠠᠮᠠ ᠠ᠋ᠴᠠ᠄《ᠬᠣᠯᠠ ᠳ᠋ᠤ᠌ ᠶᠡᠬᠡ ᠰᠠᠢᠬᠠᠨ ᠲᠣᠭᠲᠠᠭᠤᠨ ᠪᠠᠢᠨᠠ᠂ ᠬᠠᠷᠢᠨ ᠣᠢᠷᠠ ᠳ᠋ᠤ᠌ ᠠᠶᠤᠯ ᠲᠦᠭᠰᠢᠭᠦᠷᠢᠲᠡᠢ ᠪᠠᠢᠬᠤ ᠰᠢᠭ᠋᠁》 ᠭᠡᠵᠦ ᠪᠢᠲᠡᠭᠦᠦ ᠦᠭᠡ ᠪᠡᠷ ᠶᠠᠷᠢᠯᠴᠠᠵᠠᠭᠠᠵᠤ ᠴᠠᠢ ᠤᠤᠭᠤᠵᠠᠭᠠᠨᠠ᠃
ᠰᠢᠨᠡᠯᠡᠮᠡ ᠡᠬᠡᠨᠡᠷ ᠸᠠᠩᠴᠢᠮᠢᠳᠤᠭ ᠢ᠋ᠶ᠋ᠠᠨ᠄《ᠴᠢ ᠦᠬᠡᠷ ᠢ᠋ᠶ᠋ᠡᠨ ᠤᠰᠤᠯᠠᠬᠤ ᠪᠠᠷ ᠬᠤᠳᠳᠤᠭ ᠲᠤ᠌ ᠶᠠᠪᠤᠭᠠᠳ ᠬᠤᠷᠳᠤᠨ ᠢᠷᠡ! ᠪᠢᠳᠡ ᠬᠣᠶᠠᠷ ᠤᠴᠠᠷᠠᠭᠰᠠᠨ ᠦᠭᠡᠢ ᠤᠳᠠᠴᠢᠬᠠᠭᠰᠠᠨ ᠶᠤᠮ ᠴᠢᠨᠢ ᠶᠠᠷᠢᠯᠴᠠᠵᠤ ᠰᠠᠭᠤᠶᠠ!》 ᠭᠡᠯᠡ᠃ ᠸᠠᠩᠴᠢᠮᠢᠳᠤᠭ ᠭᠡᠷ ᠦ᠋ᠨ ᠤᠷᠲᠤ ᠪᠤᠷᠭᠠᠰᠤᠨ ᠳᠥᠭᠥᠮ ᠳ᠋ᠦ᠍ ᠦᠬᠡᠷ ᠤᠰᠤᠯᠠᠬᠤ ᠪᠠᠷ ᠶᠠᠪᠤᠭᠠᠳ ᠲᠡᠳᠡᠭᠡᠷ ᠴᠡᠷᠢᠭ ᠦ᠋ᠳ ᠲᠦ᠍ ᠭᠡᠷ ᠲᠦ᠍ ᠸᠠᠩᠴᠤᠭᠷᠠᠪᠳᠠᠨ ᠭᠠᠭᠴᠠ ᠪᠠᠷ ᠢᠷᠡᠭᠡᠳ ᠪᠠᠢᠨᠠ ᠭᠡᠵᠦ ᠮᠡᠳᠡᠭᠳᠡᠪᠡ᠃
ᠡᠭᠦᠷᠭᠡ ᠬᠦᠯᠢᠶᠡᠵᠦ ᠪᠠᠢᠭᠰᠠᠨ ᠴᠡᠷᠢᠭ ᠡᠴᠡ ᠸᠠᠩᠴᠤᠭᠷᠠᠪᠳᠠᠨ ᠳ᠋ᠤ᠌ ᠬᠣᠷᠣᠰᠤᠯ ᠲᠠᠢ ᠰᠠᠢᠰᠢᠩᠭᠠ᠂ ᠳᠠᠯᠠᠢᠬᠦᠦ ᠬᠣᠶᠠᠷ ᠭᠡᠨᠡᠳᠲᠡ ᠭᠡᠷ ᠲᠦ᠍ ᠣᠷᠣᠵᠤ ᠢᠷᠡᠮᠡᠭᠴᠡ ᠸᠠᠩᠴᠤᠭᠷᠠᠪᠳᠠᠨ ᠠ᠋ᠴᠠ᠄《ᠲᠠ ᠵᠢᠷᠣᠭᠠ ᠮᠣᠷᠢ ᠪᠠᠨ ᠲᠦᠷ ᠵᠢᠭᠡᠯᠡᠵᠦ ᠥᠭᠭᠦᠨᠡ ᠤᠤ? ᠪᠢᠳᠡ ᠬᠣᠶᠠᠷ ᠪᠦᠷᠢᠨᠪᠠᠶᠠᠷ ᠤ᠋ᠨ ᠳ᠋ᠤ᠌ ᠣᠴᠢᠬᠤ ᠤᠴᠢᠷ ᠲᠠᠢ》 ᠭᠡᠬᠦ ᠳ᠋ᠦ᠍ ᠸᠠᠩᠴᠤᠭᠷᠠᠪᠳᠠᠨ᠄《ᠪᠣᠯᠬᠤ ᠦᠭᠡᠢ᠂ ᠪᠢ ᠣᠳᠣ ᠪᠠᠷ ᠢ᠋ᠶ᠋ᠠᠨ ᠶᠠᠪᠤᠬᠤ ᠶᠠᠭᠠᠷᠠᠤ ᠤᠴᠢᠷ ᠲᠠᠢ》 ᠭᠡᠵᠦ ᠰᠢᠯᠲᠠᠭᠯᠠᠪᠠ᠃ ᠰᠢᠨᠡᠯᠡᠮᠡ᠄《ᠴᠢ ᠡᠭᠦᠨ ᠳ᠋ᠦ᠍ ᠶᠠᠭᠠᠷᠠᠵᠤ ᠪᠠᠢᠭᠠ ᠪᠢᠵᠡ》 ᠭᠡᠳ ᠸᠠᠩᠴᠤᠭᠷᠠᠪᠳᠠᠨ ᠤ᠋ ᠪᠤᠶᠠᠨᠴᠣᠭ ᠲᠤ᠌ ᠥᠭᠭᠦᠭᠰᠡᠨ ᠵᠠᠬᠢᠳᠠᠯ ᠢ᠋ ᠦᠵᠡᠭᠦᠯᠬᠦ ᠳ᠋ᠦ᠍ ᠲᠡᠷᠡ ᠠᠷᠭᠠ ᠪᠤᠰᠤ ᠦᠭᠡ ᠪᠡᠨ ᠬᠡᠯᠡᠵᠦ ᠭᠠᠷᠬᠤ ᠦᠭᠡᠢ ᠪᠣᠯᠬᠤ ᠳ᠋ᠤ᠌ ᠮᠠᠭᠤ ᠮᠣᠳᠣᠨ ᠲᠠᠢᠵᠢ ᠡᠷᠭᠢᠭᠦᠦ ᠰᠤᠮᠤ ᠡᠵᠡᠨ ᠳ᠋ᠡᠭᠡᠨ ᠭᠡᠭᠴᠢ ᠶ᠋ᠢ ᠮᠡᠳᠡᠨᠡ ᠤᠤ ᠭᠡᠭᠰᠡᠭᠡᠷ ᠲᠡᠳᠡ ᠬᠡᠳᠦ ᠲᠡᠭᠦᠨ ᠢ᠋ ᠤᠶᠠᠪᠠ᠃
ᠰᠢᠨᠠᠯᠠᠮᠠ ᠲᠡᠷᠡ ᠳᠠᠷᠤᠢ ᠪᠤᠰᠤᠳ ᠴᠡᠷᠢᠭ ᠲᠡᠭᠡᠨ ᠵᠠᠷᠯᠢᠭ ᠪᠣᠯᠵᠤ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠡᠴᠡ ᠣᠢᠷᠠᠯᠴᠠᠭᠠ ᠪᠠᠢᠭᠠ ᠪᠤᠶᠠᠨᠴᠣᠭ ᠢ᠋ ᠪᠠᠷᠢᠵᠤ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠠᠪᠴᠢᠷᠠ! ᠸᠠᠩᠴᠤᠭᠷᠠᠪᠳᠠᠨ ᠤ᠋ ᠬᠥᠪᠡᠭᠦᠨ ᠲᠡᠭᠦᠰᠵᠢᠷᠭᠠᠯᠠᠩ᠂ ᠨᠣᠶᠠᠨ ᠤ᠋ ᠴᠡᠷᠢᠭ ᠦ᠋ᠨ ᠨᠠᠸᠠᠩᠨᠣᠷᠪᠤ ᠵᠡᠷᠭᠡ ᠶ᠋ᠢ ᠪᠠᠷᠢᠪᠴᠢᠯᠠᠬᠤ ᠪᠠᠷ ᠵᠦᠭ ᠪᠦᠷᠢ ᠳ᠋ᠦ᠍ ᠴᠡᠷᠢᠭ ᠲᠣᠮᠢᠯᠠᠵᠤ ᠶᠠᠪᠤᠭᠤᠯᠵᠠᠢ᠃
ᠲᠡᠳᠡᠭᠡᠷ ᠴᠡᠷᠢᠭ ᠦ᠋ᠳ ᠬᠠᠷᠢᠯᠴᠠᠨ ᠪᠣᠯᠵᠣᠭᠰᠠᠨ ᠶᠤᠮ ᠰᠢᠭ᠋ ᠬᠣᠶᠠᠳᠤᠭᠠᠷ ᠡᠳᠦᠷ ᠳᠡᠭᠡᠷᠡ᠂ ᠵᠦᠭ ᠪᠦᠷᠢ ᠡᠴᠡ ᠸᠠᠩᠴᠤᠭᠷᠠᠪᠳᠠᠨ᠂ ᠲᠡᠭᠦᠰᠵᠢᠷᠭᠠᠯᠠᠩ᠂ ᠪᠤᠶᠠᠨᠴᠣᠭ᠂ ᠨᠠᠸᠠᠩᠨᠣᠷᠪᠤ ᠳᠥᠷᠪᠡᠭᠦᠯᠡ ᠶ᠋ᠢ ᠪᠠᠷᠢᠵᠤ ᠠᠪᠴᠢᠷᠠᠯᠠ᠃
ᠣᠷᠳᠣᠰ ᠠᠷᠠᠳ ᠤ᠋ᠨ ᠬᠠᠭᠤᠴᠢ ᠦᠭᠡᠨ ᠳ᠋ᠦ᠍ᠷ᠄《ᠥᠰᠢᠶᠡᠲᠡᠨ ᠬᠥᠮᠦᠨ ᠦᠢᠯᠡᠷ ᠦ᠋ᠨ ᠳᠠᠪᠠᠭᠠᠨ ᠳ᠋ᠤ᠌》 ᠭᠡᠭᠴᠢ ᠪᠡᠷ ᠲᠡᠳᠡ ᠳᠥᠷᠪᠡᠭᠦᠯᠡ ᠶ᠋ᠢ ᠪᠠᠷᠢᠪᠴᠢᠯᠠᠬᠤ᠂ ᠬᠠᠷᠠᠵᠤ ᠬᠠᠮᠠᠭᠠᠯᠠᠬᠤ ᠠᠯᠢᠪᠠ ᠶᠠᠪᠤᠳᠠᠯ ᠢ᠋ ᠲᠡᠳᠡᠨ ᠦ᠌ ᠥᠰᠢᠶᠡᠲᠡᠨ ᠬᠥᠮᠦᠰ ᠳᠠᠯᠠᠢᠬᠦᠦ᠂ ᠰᠡᠮᠲᠡᠨ᠂ ᠰᠠᠮᠫᠠᠯ᠂ ᠳᠣᠳᠠᠤᠠ᠂ ᠰᠠᠢᠰᠢᠩᠭᠠ ᠵᠡᠷᠭᠡ ᠠᠷᠪᠠᠭᠠᠳ ᠴᠡᠷᠢᠭ ᠬᠠᠮᠢᠶᠠᠷᠴᠤ ᠪᠠᠢᠭᠰᠠᠨ ᠲᠤᠯᠠ ᠰᠢᠨᠠᠯᠠᠮᠠ ᠴᠡᠷᠢᠭ ᠲᠡᠭᠡᠨ᠄《ᠲᠡᠳᠡᠨ ᠦ᠌ ᠠᠮᠢᠨ ᠳ᠋ᠤᠨᠢ ᠬᠦᠷᠴᠦ ᠪᠣᠯᠬᠤ ᠦᠭᠡᠢ᠂ ᠳ᠋ᠧᠩ ᠰᠢᠦ ᠶ᠋ᠢ ᠨᠢ ᠬᠤᠭᠤᠯᠬᠤ ᠳ᠋ᠧᠩ ᠢ᠋ ᠨᠢ ᠤᠨᠲᠠᠷᠠᠭᠠᠬᠤ ᠬᠣᠶᠠᠷ ᠠ᠋ᠴᠠ ᠨᠢᠭᠡ ᠶ᠋ᠢ ᠨᠢ ᠬᠢᠰᠦᠭᠡᠢ》 ᠭᠡᠵᠦ ᠰᠡᠮᠡᠬᠡᠷ ᠵᠠᠬᠢᠯᠠ ᠭᠡᠳᠡᠭ᠃ ᠢᠩᠭᠢᠭᠡᠳ ᠵᠢᠭᠠᠪᠤᠷᠢ ᠶ᠋ᠢ ᠪᠡᠶᠡᠯᠡᠭᠦᠯᠦᠭᠰᠡᠨ ᠪᠤᠶᠤ ᠡᠰᠡᠬᠦᠯᠡ ᠲᠡᠳᠡᠭᠡᠷ ᠳᠥᠷᠪᠡᠨ ᠬᠥᠮᠦᠨ ᠳ᠋ᠦ᠍ ᠬᠣᠷᠣᠰᠤᠯ ᠶᠡᠬᠡ ᠲᠡᠢ ᠬᠥᠮᠦᠰ ᠪᠠᠢᠭᠰᠠᠨ ᠲᠤᠯᠠ ᠠᠭᠤᠷ ᠢ᠋ᠶ᠋ᠠᠨ ᠭᠠᠷᠭᠠᠵᠤ ᠠᠮᠵᠢᠬᠤ ᠲᠣᠬᠢᠶᠠᠯ ᠲᠣᠬᠢᠶᠠᠯᠳᠤᠭᠰᠠᠨ ᠳ᠋ᠤ᠌ ᠵᠠᠷᠢᠮ ᠤ᠋ᠨ ᠬᠢᠨᠢ ᠨᠢᠳᠦ ᠶ᠋ᠢ ᠰᠣᠬᠣᠯᠤᠭᠰᠠᠨ ᠤᠴᠢᠷ ᠭᠠᠷᠴᠠᠢ᠃
ᠬᠣᠵᠢᠮ ᠨᠢ ᠲᠡᠳᠡᠭᠡᠷ ᠢ᠋ 《ᠰᠣᠬᠣᠷ ᠤ᠋ᠳ》 ᠭᠡᠬᠦ ᠪᠤᠶᠤ ᠲᠡᠭᠦᠰᠵᠢᠷᠭᠠᠯ ᠬᠣᠵᠢᠮ ᠨᠢ ᠲᠡᠮᠡᠭᠡᠲᠦ ᠬᠣᠲᠠ ᠳ᠋ᠤ᠌ ᠣᠴᠢᠵᠤ ᠱᠠᠭᠠᠵᠠᠩ ᠨᠢᠳᠦ(ᠬᠠᠭᠤᠷᠮᠠᠭ ᠨᠢᠳᠦ) ᠣᠷᠣᠭᠤᠯᠤᠭᠰᠠᠨ ᠲᠤᠯᠠ ᠲᠡᠭᠦᠨ ᠢ᠋《ᠱᠠᠭᠠᠵᠠᠩ ᠨᠢᠳᠦᠲᠦ》 ᠭᠡᠵᠦ ᠳᠠᠭᠤᠳᠠᠬᠤ ᠵᠠᠩᠰᠢᠯ ᠲᠠᠢ ᠪᠣᠯᠴᠢᠬᠠᠵᠠᠢ᠃
ᠠᠷᠠᠳᠴᠢᠯᠠᠭᠰᠠᠨ ᠦᠵᠡᠯᠲᠡ ᠲᠡᠢ ᠪᠠᠷᠠᠭᠤᠨ ᠬᠦᠩ ᠴᠣᠭᠲᠤᠸᠴᠢᠷ᠂ ᠨᠠᠰᠤᠨᠪᠠᠲᠦ ᠠᠮᠪᠠᠨ ᠨᠠᠷ ᠸᠠᠩᠴᠤᠭᠷᠠᠪᠳᠠᠨ᠂ ᠲᠡᠭᠦᠰᠵᠢᠷᠭᠠᠯ ᠬᠣᠶᠠᠭᠤᠯᠠ ᠶ᠋ᠢᠨ ᠵᠢᠰᠤᠷ ᠵᠣᠯᠪᠢᠩ ᠪᠣᠯᠤᠨ ᠣᠯᠠᠨ ᠵᠦᠢᠯ ᠦ᠋ᠨ ᠬᠡᠷᠡᠭ ᠤᠴᠢᠷ ᠲᠠᠢ ᠬᠣᠯᠪᠣᠭᠳᠠᠭᠰᠠᠨ ᠵᠠᠷᠭᠤ ᠵᠠᠭᠠᠯᠳᠤᠯᠭᠠ ᠶ᠋ᠢ ᠦᠨᠳᠦᠰᠦᠯᠡᠵᠦ ᠱᠠᠷᠯᠢᠭ ᠤ᠋ᠨ ᠰᠦᠮᠡ ᠳᠡᠭᠡᠷᠡ ᠲᠤᠰᠬᠠᠢ ᠳᠠᠩ ᠭᠠᠷᠭᠠᠵᠤ ᠲᠤᠰ ᠲᠤᠰ ᠨᠠᠶᠠᠨ ᠮᠣᠳᠣ ᠵᠠᠨᠴᠢᠪᠠ᠃ ᠡᠭᠦᠨ ᠡᠴᠡ ᠬᠣᠢᠰᠢ ᠸᠠᠩᠴᠤᠭᠷᠠᠪᠳᠠᠨ ᠲᠠᠢᠵᠢ ᠪᠣᠯᠤᠨ ᠲᠡᠭᠦᠨ ᠦ᠌ ᠦᠷᠡ ᠰᠠᠳᠤᠨ ᠢ᠋ ᠬᠣᠰᠢᠭᠤ ᠨᠡᠢᠲᠡ ᠶ᠋ᠢᠨ ᠠᠯᠪᠠᠨ ᠲᠤᠰᠢᠶᠠᠯ ᠳ᠋ᠤ᠌ ᠲᠣᠮᠢᠯᠠᠵᠤ ᠣᠭᠲᠣ ᠪᠣᠯᠬᠤ ᠦᠭᠡᠢ ᠪᠥᠭᠡᠳ ᠴᠠᠭᠠᠨ ᠪᠡᠴᠢᠨ ᠵᠢᠯ ᠦ᠋ᠨ ᠭᠠᠯᠠᠭᠤᠲᠤ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠪᠦᠬᠦ ᠵᠠᠷᠤᠳᠠᠯ ᠢ᠋ ᠸᠠᠩᠴᠤᠭᠷᠠᠪᠳᠠᠨ᠂ ᠲᠡᠭᠦᠰᠵᠢᠷᠭᠠᠯ᠂ ᠪᠤᠶᠠᠨᠴᠣᠭ᠂ ᠨᠠᠸᠠᠩᠨᠣᠷᠪᠤ ᠨᠠᠷ ᠢ᠋ᠶ᠋ᠠᠷ ᠲᠥᠯᠥᠭᠦᠯᠦᠨᠡ ᠭᠡᠵᠦ ᠵᠠᠬᠢᠭᠰᠠᠨ ᠪᠠᠢᠨᠠ᠃①
— — — —
① ᠡᠨᠡ ᠤᠴᠢᠷ ᠢ᠋ ᠭᠠᠯᠠᠭᠤᠲᠤ ᠶ᠋ᠢᠨ ᠪᠤᠵᠠᠢ ᠭᠠᠴᠠᠭᠠᠨ ᠤ᠋ ᠵᠢᠷᠭᠢᠨᠲᠠᠯᠠ ᠬᠤᠷᠰᠢᠶᠠ ᠶ᠋ᠢᠨ ᠳᠠᠮᠪᠠᠷᠠᠪᠰᠠᠯ ᠨᠠᠰᠤᠲᠠᠨ ᠤ᠋1975 ᠣᠨ ᠳ᠋ᠤ᠌ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠪᠡ᠃
8. ᠭᠠᠷᠵᠢ ᠯᠤᠤ ᠡᠦ ᠶ᠋ᠢᠨ ᠯᠢᠶᠡᠨᠵᠠᠩ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠢ᠋ ᠡᠷᠯᠢᠭ ᠲᠦ᠋ᠨᠢ ᠲᠣᠨᠢᠯᠭᠠᠭᠰᠠᠨ ᠨᠢ
ᠭᠠᠷᠵᠢ ᠯᠤᠤ ᠡᠦ ᠭᠡᠳᠡᠭ ᠪᠣᠯ ᠳᠡᠯᠡᠳ ᠬᠤᠰᠢᠭᠤᠨ ᠤ᠋ ᠬᠥᠮᠦᠨ᠂ ᠸᠠᠩᠳᠠᠨᠨᠢᠮᠠ ᠶ᠋ᠢ ᠳᠠᠭᠠᠵᠤ ᠬᠠᠲᠤᠨ ᠭᠣᠣᠯ ᠤ᠋ᠨ ᠬᠠᠩᠬᠠ ᠭᠠᠵᠠᠷ ᠢ᠋ᠶ᠋ᠠᠷ ᠡᠷᠭᠢᠴᠡᠵᠦ ᠫᠠᠷᠲ᠋ᠢᠽᠠᠨ ᠲᠡᠢᠨ ᠬᠢᠵᠦ ᠪᠠᠢᠵᠠᠢ᠃ ᠸᠠᠩᠳᠠᠨᠨᠢᠮᠠ ᠶ᠋ᠢ ᠪᠠᠷᠢᠭᠳᠠᠭᠰᠠᠨ ᠤ᠋ ᠰᠡᠭᠦᠯᠡᠷ ᠲᠡᠷᠡ ᠳᠠᠯᠠᠳ ᠬᠤᠰᠢᠭᠤᠨ ᠤ᠋ ᠤᠯᠤᠰ ᠲᠤᠷ ᠲᠤᠰᠠᠯᠠᠬᠤ ᠬᠦᠩ ᠠᠷᠪᠢᠵᠢᠬᠤ ᠶ᠋ᠢ ᠳᠠᠭᠠᠵᠤ ᠬᠡᠳᠦᠨ ᠵᠠᠭᠤᠨ ᠴᠡᠷᠢᠭ ᠲᠡᠢ ᠪᠣᠯᠵᠤ ᠤᠷᠠᠳ ᠤ᠋ᠨ ᠳᠤᠮᠳᠠᠳᠤ ᠬᠦᠩ ᠦ᠋ᠨ ᠬᠤᠰᠢᠭᠤᠨ ᠤ᠋ ᠰᠠᠢᠨ ᠬᠤᠳᠳᠤᠭ ᠵᠡᠷᠭᠡ ᠭᠠᠵᠠᠷ ᠢ᠋ᠶ᠋ᠠᠷ ᠡᠷᠭᠢᠴᠡᠵᠦ ᠪᠠᠢᠵᠠᠢ᠃1916 ᠣᠨ ᠳ᠋ᠤ᠌ ᠶᠡᠬᠡ ᠵᠣᠣ ᠴᠢᠭᠤᠯᠭᠠᠨ ᠳ᠋ᠠᠭᠠᠨ ᠪᠤᠴᠠᠵᠤ ᠢᠷᠡᠭᠡᠳ ᠤᠯᠠᠭᠠᠨᠴᠠᠪ ᠤ᠋ᠨ ᠹᠧᠩ ᠵᠧᠨ ᠦ᠌ ᠯᠦ᠍ ᠵᠠᠨ ᠺᠦᠢ ᠶ᠋ᠢᠨ ᠪᠦᠯᠦᠭ ᠲᠡᠢ ᠬᠠᠮᠲᠤᠷᠠᠵᠤ ᠶᠡᠬᠡ ᠵᠣᠣ ᠴᠢᠭᠤᠯᠭᠠᠨ ᠤ᠋ ᠣᠯᠠᠨ ᠬᠤᠰᠢᠭᠤᠨ ᠤ᠋ ᠰᠠᠪᠠ ᠬᠢᠵᠠᠭᠠᠷ᠂ ᠱᠠᠨ ᠭᠠᠨ ᠨᠢᠩ ᠬᠢᠵᠠᠭᠠᠷ ᠣᠷᠣᠨ ᠢ᠋ᠶ᠋ᠠᠷ ᠡᠷᠭᠢᠴᠡᠵᠦ ᠪᠠᠭᠠ ᠴᠡᠷᠢᠭ ᠦ᠋ᠨ ᠡᠷᠬᠡᠲᠡᠨ ᠢ᠋ ᠳᠡᠯᠡᠳᠴᠦ ᠲᠣᠮᠣ ᠪᠠᠶᠠᠨ ᠡᠷᠦᠬᠡ ᠶ᠋ᠢ ᠰᠢᠨᠠᠯᠭᠠᠵᠤ ᠮᠠᠯᠴᠢᠨ ᠲᠠᠷᠢᠶᠠᠴᠢᠨ ᠢ᠋ ᠳᠡᠭᠡᠷᠡᠮᠳᠡᠵᠦ ᠶᠠᠪᠤᠳᠠᠭ ᠳ᠋ᠤᠯᠢ ᠪᠣᠯᠴᠢᠬᠠᠵᠠᠢ᠃ ᠱᠠᠨᠵᠢᠮᠢᠳᠤᠭ ᠪᠣᠯ ᠡᠨᠡ ᠬᠦ᠌ ᠳ᠋ᠤᠯᠢ ᠴᠡᠷᠢᠭ ᠦ᠋ᠨ ᠨᠢᠭᠡᠨ ᠯᠢᠶᠠᠨ ᠤ᠋ ᠯᠢᠶᠡᠨᠵᠠᠩ ᠪᠠᠢᠭᠰᠠᠨ ᠠ᠋ᠴᠠ ᠬᠥᠮᠦᠰ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠭᠡᠵᠦ ᠳᠠᠭᠤᠳᠠᠳᠠᠭ᠃ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠪᠣᠯ ᠴᠠᠭᠠᠨ ᠪᠡᠴᠢᠨ ᠵᠢᠯ ᠦ᠋ᠨ ᠭᠠᠯᠠᠭᠤᠲᠤ ᠶ᠋ᠢᠨ ᠴᠢᠭᠤᠯᠭᠠᠨ ᠤ᠋ ᠳᠠᠷᠠᠭᠠ ᠰᠢᠨᠠᠯᠠᠮᠠ ᠶ᠋ᠢ ᠨᠠᠶᠠᠨ ᠵᠢᠩ ᠦ᠋ᠨ ᠲᠡᠮᠦᠷ ᠭᠢᠨᠵᠢᠨ ᠳ᠋ᠦ᠍ ᠬᠠᠳᠠᠭᠳᠠᠵᠤ ᠪᠠᠢᠭᠠ ᠦᠶᠡ ᠳ᠋ᠦ᠍ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠳᠡᠭᠡᠷᠡ ᠲᠡᠮᠦᠷ ᠭᠢᠨᠵᠢ ᠶ᠋ᠢ ᠨᠢ ᠲᠠᠰᠤᠯᠵᠤ ᠭᠢᠨᠳᠠᠨ ᠠ᠋ᠴᠠ ᠠᠪᠤᠷᠠᠨ ᠭᠠᠷᠭᠠᠭᠰᠠᠨ ᠠᠴᠢᠲᠤ ᠬᠥᠮᠦᠨ ᠪᠣᠯᠤᠨᠠ᠃
ᠤᠤᠯ ᠤᠴᠢᠷ ᠢ᠋ ᠬᠡᠯᠡᠪᠡᠯ ᠰᠣᠳᠨᠠᠮᠳᠣᠩᠷᠣᠪ ᠨᠠᠷ ᠪᠠᠷᠠᠭᠤᠨ ᠬᠦᠩ ᠴᠣᠭᠲᠣᠸᠴᠢᠷ᠂ ᠲᠤᠰᠠᠯᠠᠭᠴᠢ ᠨᠠᠰᠤᠨᠪᠠᠲᠤ ᠠᠮᠪᠠᠨ ᠨᠠᠷ ᠲᠠᠢ ᠵᠥᠪᠳᠡᠯᠴᠡᠭᠡᠳ ᠳ᠋ᠤᠯᠢ ᠶ᠋ᠢᠨ ᠮᠥᠷ ᠢ᠋ ᠳᠠᠭᠠᠭᠤᠯᠤᠨ ᠰᠢᠨᠠᠯᠠᠮᠠ ᠶ᠋ᠢ ᠭᠢᠨᠵᠢᠨ ᠡᠴᠡ ᠭᠠᠷᠭᠠᠬᠤ ᠠᠷᠭᠠ ᠶ᠋ᠢ ᠬᠡᠷᠡᠭᠯᠡᠵᠦ ᠱᠠᠨᠪᠧᠢ ᠶ᠋ᠢᠨ ᠰᠤᠬᠠᠢ ᠶ᠋ᠢᠨ ᠪᠠᠢᠰᠢᠩ ᠳ᠋ᠤ᠌ ᠪᠠᠢᠭᠰᠠᠨ ᠳ᠋ᠤᠯᠢ ᠶ᠋ᠢᠨ ᠲᠦᠷᠦᠭᠦᠦ ᠭᠠᠷᠵᠢ ᠯᠤᠤ ᠡᠦ ᠶ᠋ᠢ ᠰᠢᠷᠠ ᠤᠰᠤᠨ ᠭᠣᠣᠯ ᠤ᠋ᠨ ᠶᠡᠬᠡ ᠲᠣᠬᠣᠢ ᠳ᠋ᠤ᠌ ᠤᠷᠢᠵᠤ ᠢᠷᠡᠭᠦᠯᠦᠨ ᠰᠢᠨᠡᠯᠡᠮᠡ ᠶ᠋ᠢ ᠠᠪᠤᠷᠠᠵᠤ ᠭᠠᠷᠭᠠᠬᠤ ᠪᠣᠯᠪᠠᠤ ᠭᠡᠮᠡᠨ ᠠᠷᠪᠠᠨ ᠰᠠᠢᠨ ᠮᠣᠷᠢ ᠪᠠᠷ ᠲᠠᠯᠠᠷᠬᠠᠶᠠ ᠭᠡᠵᠦ ᠲᠤᠰᠬᠠᠢ ᠬᠥᠮᠦᠨ ᠶᠠᠪᠤᠭᠤᠯᠵᠠᠢ᠃
ᠭᠠᠷᠵᠢ ᠯᠤᠤ ᠡᠦ ᠥᠪᠡᠷ ᠦ᠋ᠨ ᠴᠡᠷᠢᠭ ᠦ᠋ᠨ ᠰᠢᠷᠬᠠ ᠣᠯᠤᠭᠰᠠᠨ ᠱᠠᠨᠵᠢᠮᠢᠳᠤᠭ ᠯᠢᠶᠠᠨᠵᠠᠩ ᠢ᠋ᠶ᠋ᠠᠨ ᠦᠯᠡᠳᠡᠭᠡᠵᠦ ᠰᠢᠷᠬᠠ ᠶ᠋ᠢ ᠨᠢ ᠰᠤᠪᠢᠯᠠᠵᠤ ᠡᠳᠡᠭᠡᠷᠡᠭᠦᠯᠬᠦ ᠪᠡᠷ ᠨᠥᠬᠥᠴᠡᠯ ᠪᠣᠯᠭᠠᠵᠤ ᠰᠢᠨᠡᠯᠡᠮᠡ ᠶ᠋ᠢ ᠠᠪᠤᠷᠠᠬᠤ ᠪᠠᠷ ᠪᠣᠯᠵᠤ ᠥᠭᠡᠷᠡ ᠶᠠᠭᠤ ᠴᠤ᠌ ᠠᠪᠬᠤ ᠦᠭᠡᠢ ᠭᠡᠮᠡᠨ ᠲᠣᠭᠲᠠᠭᠰᠠᠨ ᠭᠡᠨᠡ᠃ ᠢᠩᠭᠢᠭᠡᠳ ᠱᠠᠨᠵᠢᠮᠢᠳᠤᠭ ᠶᠡᠬᠡ ᠲᠣᠬᠣᠢ ᠶ᠋ᠢᠨ ᠵᠤᠯᠵᠠᠭᠠ ᠶ᠋ᠢᠨ ᠭᠡᠷ ᠲᠦ᠍ ᠨᠢᠭᠡ ᠰᠠᠷᠠ ᠠᠮᠠᠷᠠᠵᠤ ᠡᠮᠨᠡᠭᠦᠯᠦᠭᠡᠳ ᠡᠷᠡᠭᠦᠯᠵᠢᠪᠡ᠃
ᠢᠩᠭᠢᠭᠡᠳ ᠴᠣᠭᠲᠤᠸᠴᠢᠷ ᠲᠤᠰᠠᠯᠠᠭᠴᠢ ᠴᠠᠮᠬᠠᠭ ᠤ᠋ᠨ ᠳᠤᠭᠤᠢᠯᠠᠩ ᠤ᠋ᠨ ᠲᠣᠮᠢ ᠪᠠᠶᠠᠨᠳᠡᠯᠭᠡᠷ ᠢ᠋ᠶ᠋ᠡᠷ ᠲᠡᠮᠡᠭᠡᠲᠦ ᠶ᠋ᠢᠨ ᠣᠷᠴᠢᠮ ᠰᠠᠭᠤᠵᠤ ᠪᠠᠢᠬᠤ ᠭᠠᠷᠵᠢ ᠯᠤᠤ ᠡᠦ ᠳ᠋ᠦ᠍ ᠲᠡᠭᠦᠨ ᠦ᠌ ᠯᠢᠶᠠᠨᠵᠠᠩ ᠱᠠᠨᠵᠢᠮᠢᠳᠤᠭ ᠢ᠋ ᠬᠣᠶᠠᠷ ᠮᠣᠷᠢᠨ ᠤ᠋ ᠪᠡᠯᠡᠭ ᠲᠡᠢ ᠬᠦᠷᠭᠡᠭᠦᠯᠪᠡ᠃ ᠭᠠᠷᠵᠢ ᠯᠤᠤ ᠡᠦ ᠲᠡᠷᠡ ᠳᠣᠣᠷᠠ ᠨᠢ ᠲᠠᠯᠠᠷᠬᠠᠨ ᠪᠠᠶᠠᠷᠯᠠᠵᠤ ᠱᠠᠨᠵᠢᠮᠢᠳᠤᠭ ᠲᠤ᠌ ᠦᠦᠰᠢᠨ ᠰᠢᠨᠡᠯᠡᠮᠡ ᠶ᠋ᠢ ᠨᠠᠶᠠᠨ ᠵᠢᠩ ᠦ᠋ᠨ ᠬᠦᠨᠳᠦ ᠭᠢᠨᠵᠢᠨ ᠡᠴᠡ ᠠᠪᠤᠷᠠᠨ ᠭᠠᠷᠭᠠᠬᠤ ᠡᠭᠦᠷᠭᠡ ᠲᠤᠰᠢᠶᠠᠪᠠ᠃ ᠲᠡᠷᠡ ᠬᠡᠳᠦᠨ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠮᠠᠩᠬᠠᠲᠤ ᠶ᠋ᠢᠨ ᠰᠦᠮᠡ ᠣᠷᠴᠢᠮ ᠬᠦᠷᠴᠦ ᠰᠣᠳᠨᠠᠮᠳᠣᠩᠷᠣᠪ ᠲᠥᠪᠳᠡᠨᠪᠠᠯᠪᠤᠷ ᠲᠠᠢ ᠠᠭᠤᠯᠵᠠᠵᠤ ᠰᠥᠨᠢ ᠶ᠋ᠢᠨ ᠬᠠᠭᠠᠰ ᠤ᠋ᠨ ᠬᠥᠮᠦᠰ ᠦ᠋ᠨ ᠲᠤᠭ ᠨᠣᠢᠷ ᠢ᠋ ᠲᠣᠬᠢᠶᠠᠯᠳᠤᠭᠤᠯᠤᠨ ᠲᠠᠮᠭᠠᠨᠯᠠᠢ ᠶ᠋ᠢᠨ ᠱᠠᠩ ᠳ᠋ᠤ᠌ ᠬᠦᠷᠴᠦ ᠷᠠᠳᠨᠠᠰᠠᠳᠢ ᠨᠠᠷ ᠢ᠋ ᠭᠡᠷ ᠲᠦ᠋ᠨᠢ ᠬᠠᠷᠢᠭᠤᠯᠤᠨ ᠰᠢᠨᠠᠯᠠᠮᠠ ᠶ᠋ᠢᠨ ᠲᠡᠮᠦᠷ ᠭᠢᠨᠵᠢ ᠶ᠋ᠢ ᠲᠠᠰᠤᠯᠤᠭᠠᠳ ᠳᠠᠭᠠᠭᠤᠯᠵᠤ ᠶᠠᠪᠤᠭᠰᠠᠨ ᠪᠢᠯᠡ᠃ ᠢᠩᠭᠢᠭᠡᠳ ᠤᠴᠢᠷ ᠶᠠᠪᠤᠳᠠᠯ ᠤ᠋ᠨ ᠨᠢᠭᠤᠴᠠ ᠶ᠋ᠢ ᠮᠡᠳᠡᠬᠦ ᠦᠭᠡᠢ ᠬᠥᠮᠦᠰ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠢᠷᠡᠵᠦ ᠰᠢᠨᠡᠯᠡᠮᠡ ᠶ᠋ᠢ ᠪᠤᠯᠢᠶᠠᠵᠤ ᠠᠪᠤᠭᠠᠳ ᠶᠠᠪᠤᠴᠢᠬᠠᠵᠠᠢ ᠭᠡᠨᠡ ᠭᠡᠵᠦ ᠶᠠᠷᠢᠯᠴᠠᠬᠤ ᠪᠣᠯᠵᠠᠢ᠃
ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠴᠡᠷᠢᠭ ᠳᠠᠭᠠᠭᠤᠯᠤᠨ ᠠᠢᠯ ᠳ᠋ᠤ᠌ ᠢᠷᠡᠬᠦ ᠪᠤᠶᠤ ᠭᠠᠳᠠᠭᠤᠷ ᠭᠠᠷᠬᠤ ᠳ᠋ᠠᠭᠠᠨ ᠡᠷᠳᠡᠮ ᠴᠢᠳᠠᠯ ᠢ᠋ᠶ᠋ᠠᠨ ᠭᠠᠢᠬᠠᠭᠤᠯᠤᠨ ᠬᠤᠷᠳᠤᠨ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠬᠤᠷᠳᠤᠴᠠ ᠪᠠᠷ ᠭᠡᠷ ᠦ᠋ᠨ ᠡᠮᠦᠨᠡᠭᠦᠷ ᠬᠥᠨᠳᠡᠯᠡᠨ ᠥᠩᠭᠡᠷᠡᠬᠦ ᠳ᠋ᠡᠭᠡᠨ ᠠᠷᠪᠠᠨ ᠰᠤᠮᠤ ᠲᠠᠢ ᠪᠠᠭᠠ ᠫᠤᠤ ᠪᠠᠷ ᠪᠠᠢᠰᠢᠩ ᠤ᠋ᠨ ᠰᠠᠷᠠᠪᠴᠢᠨ ᠤ᠋ ᠣᠨᠢ ᠶ᠋ᠢᠨ ᠲᠣᠯᠣᠭᠠᠢ ᠶ᠋ᠢ ᠠᠯᠳᠠᠯ ᠦᠭᠡᠢ ᠣᠨᠣᠴᠢᠬᠠᠳᠠᠭ ᠮᠡᠷᠭᠡᠨ ᠬᠠᠷᠪᠤᠭᠠᠴᠢ ᠪᠠᠢᠵᠠᠢ᠃
ᠨᠢᠭᠡ ᠤᠳᠠᠭᠠ ᠶᠡᠬᠡ ᠵᠣᠣ ᠶ᠋ᠢᠨ ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠭᠠᠵᠠᠷ ᠠ᠋ᠴᠠ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠲᠤ᠌《ᠦᠦᠰᠢᠨ ᠰᠢᠨᠠᠯᠠᠮᠠ ᠳᠤᠭᠤᠢ ᠪᠣᠰᠬᠠᠭᠠᠳ ᠣᠯᠠᠨ ᠢ᠋ ᠦᠢᠮᠡᠭᠦᠯᠦᠨ ᠠᠮᠤᠷ ᠪᠤᠰᠤ᠂ ᠴᠢ ᠡᠮᠦᠨᠡ ᠳ᠋ᠡᠭᠡᠨ ᠲᠡᠭᠦᠨ ᠢ᠋ ᠨᠠᠶᠠᠨ ᠵᠢᠩ ᠦ᠋ᠨ ᠲᠡᠮᠦᠷ ᠭᠢᠨᠵᠢᠨ ᠡᠴᠡ ᠭᠠᠷᠭᠠᠵᠤ ᠠᠪᠤᠷᠠᠭᠰᠠᠨ ᠢᠲᠡᠭᠡᠯᠲᠦ ᠬᠥᠮᠦᠨ ᠪᠣᠯᠠᠢ᠃ ᠥᠨᠥ ᠲᠡᠭᠦᠨ ᠢ᠋ ᠠᠷᠭᠠᠯᠠᠵᠤ ᠪᠠᠢᠭᠠᠳ ᠲᠣᠨᠢᠯᠭᠠᠪᠠᠰᠤ ᠴᠢᠮᠠᠳᠤᠷ ᠠᠰᠢᠭ ᠲᠠᠯᠠᠷᠬᠠᠯ ᠢ᠋ ᠶᠡᠬᠡᠳᠡ ᠬᠦᠷᠲᠡᠭᠦᠯᠦᠮᠦᠢ》 ᠭᠡᠵᠡᠢ᠃
ᠱᠠᠨᠵᠢᠮᠢᠳᠤᠭ ᠳᠠ ᠶ᠋ᠢᠨ ᠠᠯᠪᠠ ᠶ᠋ᠢ ᠬᠦᠯᠢᠶᠡᠵᠦ ᠠᠪᠤᠮᠠᠭᠴᠠ ᠲᠠᠷᠢᠬᠢ ᠪᠠᠨ ᠰᠢᠪᠬᠠᠨ ᠠᠷᠭᠠ ᠪᠣᠳᠣᠵᠤ ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠭᠠᠵᠠᠷ ᠲᠤ᠌ ᠴᠢᠰᠤᠨ ᠭᠠᠪᠢᠶᠠ ᠪᠠᠢᠭᠤᠯᠬᠤ ᠪᠠᠷ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠠ᠋ᠴᠠ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠵᠦᠭ ᠮᠣᠷᠳᠠᠯᠠ᠃ ᠲᠡᠷᠡ ᠰᠢᠨᠠᠯᠠᠮᠠ ᠶ᠋ᠢ ᠠᠯᠠᠴᠢᠬᠠᠪᠠᠯ ᠣᠷᠳᠣᠰ ᠤ᠋ᠨ ᠳᠣᠯᠣᠭᠠᠨ ᠬᠤᠰᠢᠭᠤᠨ ᠳ᠋ᠤ᠌ ᠨᠡᠷᠡ ᠠᠯᠳᠠᠷᠰᠢᠭᠰᠠᠨ ᠭᠠᠭᠴᠠᠭᠠᠷ ᠴᠢᠳᠠᠭᠴᠢ ᠪᠣᠯᠬᠤ ᠪᠠᠷ ᠰᠠᠷᠠ ᠲᠠᠢ ᠰᠥᠨᠢ ᠰᠠᠨᠠᠭᠠ ᠪᠠᠨ ᠬᠠᠭᠤᠷᠴᠤ ᠰᠠᠢᠬᠠᠨ ᠵᠡᠭᠦᠳᠦ ᠪᠡᠷ ᠱᠠᠯᠪᠢᠩ ᠢᠳᠡᠭᠰᠡᠨ ᠲᠤᠯᠠ ᠨᠢᠭᠡ ᠴᠦ᠍ ᠬᠥᠮᠦᠨ ᠳᠠᠭᠠᠭᠤᠯᠤᠭᠰᠠᠨ ᠦᠭᠡᠢ ᠪᠡᠷ ᠬᠠᠮᠤᠭ ᠤ᠋ᠨ ᠰᠠᠢᠨ ᠬᠤᠷᠳᠤᠨ ᠵᠢᠷᠣᠭᠠ ᠮᠣᠷᠢ ᠶ᠋ᠢ ᠰᠣᠩᠭᠣᠵᠤ ᠤᠨᠤᠭᠠᠳ ᠠᠷᠪᠠ ᠳᠤᠤᠭᠠᠷᠳᠠᠭ ᠭᠠᠷ ᠫᠤᠤ ᠪᠠᠨ ᠣᠯᠠᠨ ᠠᠷᠪᠢᠨ ᠰᠤᠮᠤ ᠲᠠᠢ ᠠᠪᠴᠤ ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠠᠯᠪᠠ ᠶ᠋ᠢ《ᠣᠯᠳᠠᠰᠢ ᠦᠭᠡᠢ ᠡᠷᠳᠡᠨᠢ》 ᠪᠡᠷ ᠡᠪᠦᠷᠯᠡᠭᠡᠳ ᠮᠣᠷᠳᠠᠯᠠ᠃ ᠲᠡᠷᠡ ᠬᠤᠷᠳᠤᠨ ᠵᠢᠷᠣᠭᠠ ᠮᠣᠷᠢᠨ ᠤ᠋ ᠪᠠᠨ ᠰᠠᠢᠨ ᠳ᠋ᠤ᠌ ᠰᠧᠳᠧᠩᠨᠣᠷᠪᠤ ᠶ᠋ᠢᠨ ᠳ᠋ᠦ᠍ ᠦᠳᠡ ᠶ᠋ᠢᠨ ᠬᠣᠭᠣᠯᠠ ᠢᠳᠡᠵᠦ ᠦᠷᠭᠦᠯᠵᠢᠯᠡᠨ ᠪᠠᠷᠠᠭᠤᠨᠰᠢᠯᠠᠵᠤ ᠲᠤᠰ ᠰᠥᠨᠢ ᠳ᠋ᠡᠭᠡᠨ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠳ᠋ᠤ᠌ ᠬᠦᠷᠴᠦ ᠰᠢᠨᠠᠯᠠᠮᠠ ᠶ᠋ᠢᠨ ᠰᠤᠷᠠᠭ ᠴᠢᠮᠡᠭᠡ ᠶ᠋ᠢ ᠨᠢᠭᠤᠴᠠ ᠪᠠᠷ ᠣᠢᠯᠠᠭᠠᠪᠠ᠃ ᠡᠨᠡ ᠬᠦ᠌ ᠳ᠋ᠤᠯᠢ ᠶ᠋ᠢᠨ ᠲᠦᠷᠦᠭᠦᠦ ᠱᠠᠨᠵᠢᠮᠢᠳᠤᠭ ᠦᠦᠰᠢᠨ ᠨᠣᠶᠠᠨ ᠤ᠋ ᠱᠠᠩ ᠣᠷᠳᠣᠨ ᠳ᠋ᠠᠬᠢ ᠲᠦᠰᠢᠮᠡᠳ ᠲᠡᠢ ᠰᠠᠨᠠᠭᠠ ᠨᠢᠭᠡᠲᠡᠢ ᠪᠠᠢᠪᠠᠴᠤ ᠬᠡᠷᠡᠭ ᠶᠠᠪᠤᠳᠠᠯ ᠪᠦᠲᠦᠬᠦ ᠡᠴᠡ ᠡᠮᠦᠨᠡ ᠰᠢᠨᠡᠯᠡᠮᠡ ᠶ᠋ᠢ ᠬᠣᠣᠷᠯᠠᠬᠤ ᠭᠡᠰᠡᠨ ᠨᠢᠭᠤᠴᠠ ᠪᠠᠨ ᠬᠠᠮᠠᠭᠠᠯᠠᠵᠤ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠲᠤᠬᠠᠢ ᠥᠴᠦᠬᠡᠨ ᠴᠦ᠍ ᠦᠵᠦᠭᠦᠷᠳᠡᠭᠦᠯᠦᠭᠰᠡᠨ ᠦᠭᠡᠢ ᠬᠣᠨᠣᠵᠠᠢ᠃ ᠮᠠᠷᠭᠠᠰᠢ ᠨᠢ ᠶᠠᠪᠤᠬᠤ ᠦᠶᠡ ᠳ᠋ᠡᠭᠡᠨ ᠨᠢᠭᠡ ᠬᠥᠮᠦᠨ ᠡᠴᠡ᠄《ᠰᠢᠨᠠᠯᠠᠮᠠ ᠬᠠᠮᠢᠭᠠ ᠶᠠᠭᠤ ᠬᠢᠵᠦ ᠪᠠᠢᠨᠠ ᠪᠣᠢ?》 ᠭᠡᠰᠡᠨ ᠳ᠋ᠦ᠍᠂ ᠲᠡᠷᠡ ᠬᠥᠮᠦᠨ᠄《ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠪᠠᠢᠨᠠ ᠭᠡᠵᠦ ᠬᠡᠯᠡᠯᠴᠡᠵᠦ ᠪᠠᠢᠭᠰᠠᠨ᠁》 ᠭᠡᠵᠡᠢ᠃ ᠱᠠᠨᠵᠢᠮᠢᠳᠤᠭ《ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ》 ᠭᠡᠰᠡᠨ ᠦᠭᠡ ᠶ᠋ᠢ《ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ》 ᠭᠡᠵᠦ ᠡᠨᠳᠡᠭᠦᠦ ᠪᠡᠷ ᠰᠣᠨᠣᠰᠴᠠᠢ᠃ ᠲᠡᠭᠡᠭᠡᠳ ᠲᠠᠮᠠᠭᠠᠯᠠᠢ ᠶ᠋ᠢᠨ ᠱᠠᠩ ᠠ᠋ᠴᠠ ᠪᠠᠷᠠᠭᠤᠨ ᠡᠮᠦᠨᠡᠰᠢ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠬᠦᠷᠲᠡᠯᠡ30 ᠺᠢᠯᠣᠮᠧᠲ᠋ᠷ ᠦ᠋ᠨ ᠠᠰᠬᠠᠨ ᠵᠠᠮ ᠢ᠋ ᠪᠠᠷᠠᠭᠤᠨ ᠬᠣᠢᠰᠢ ᠭᠠᠯᠠᠭᠤᠲᠤ ᠶ᠋ᠢᠨ ᠰᠦᠮᠡ ᠬᠦᠷᠲᠡᠯᠡ30 ᠺᠢᠯᠣᠮᠧᠲ᠋ᠷ ᠮᠤᠷᠤᠢ ᠵᠠᠮ ᠢ᠋ ᠶᠠᠪᠤᠵᠤ ᠳᠠᠬᠢᠨ ᠭᠠᠯᠠᠭᠤᠲᠤ ᠠ᠋ᠴᠠ ᠪᠠᠷᠠᠭᠤᠨ ᠡᠮᠦᠨᠡᠰᠢ40 ᠺᠢᠯᠣᠮᠧᠲ᠋ᠷ ᠦ᠋ᠨ ᠵᠠᠮ ᠶᠠᠪᠤᠬᠤ ᠳᠡᠭᠡᠷᠡ ᠲᠤᠯᠵᠠᠢ᠃ ᠨᠢᠭᠡᠯᠬᠡᠨ ᠦᠭᠡᠨ ᠦ᠌ ᠵᠥᠷᠢᠶᠡ ᠡᠴᠡ ᠪᠣᠯᠵᠤ ᠴᠡᠷᠢᠭ ᠬᠥᠮᠦᠨ ᠦ᠌ ᠲᠦᠷᠭᠡᠨ ᠬᠥᠳᠡᠯᠦᠯ ᠳ᠋ᠦ᠍70 ᠺᠢᠯᠣᠮᠧᠲ᠋ᠷ ᠦ᠋ᠨ ᠰᠠᠭᠠᠳ ᠲᠣᠳᠬᠠᠷ ᠤᠴᠠᠷᠠᠵᠠᠢ᠃
ᠱᠠᠨᠵᠢᠮᠢᠳᠤᠭ ᠲᠠᠮᠠᠭᠠᠯᠠᠢ ᠠ᠋ᠴᠠ ᠶᠠᠪᠤᠬᠤ ᠳ᠋ᠤ᠌ ᠶᠠᠷᠢᠯᠴᠠᠳᠠᠭ ᠲᠡᠷᠡ ᠬᠥᠮᠦᠨ ᠪᠣᠯᠪᠠᠰᠤ ᠱᠠᠩ ᠤ᠋ᠨ ᠨᠢᠭᠡᠨ ᠡᠩ ᠦ᠋ᠨ ᠠᠳᠤᠭᠤᠴᠢᠨ ᠪᠠᠢᠵᠠᠢ᠃ ᠲᠡᠷᠡ ᠰᠢᠪᠠᠷ ᠤ᠋ᠨ ᠶᠡᠬᠡ ᠴᠠᠢᠳᠠᠮ ᠳ᠋ᠤ᠌ ᠠᠳᠤᠭᠤᠨ ᠳ᠋ᠤ᠌ ᠶᠠᠪᠤᠵᠤ ᠪᠠᠢᠭᠠᠳ ᠪᠠᠰᠠ ᠨᠢᠭᠡᠨ ᠮᠠᠯᠴᠢᠨ ᠲᠠᠢ ᠤᠴᠠᠷᠠᠵᠤ ᠪᠡᠯᠴᠢᠭᠡᠷ ᠳᠡᠭᠡᠷᠡ ᠵᠣᠭᠣᠭ ᠳᠡᠯᠭᠡᠬᠦ ᠳ᠋ᠡᠭᠡᠨ《ᠥᠴᠥᠭᠡᠳᠦᠷ ᠱᠠᠩ ᠳᠡᠭᠡᠷᠡ ᠭᠠᠷ ᠫᠤᠤ ᠰᠦᠢᠷᠡᠵᠦ ᠰᠠᠢᠨ ᠵᠢᠷᠣᠭᠠ ᠮᠣᠷᠢ ᠤᠨᠤᠭᠰᠠᠨ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠭᠡᠭᠴᠢ ᠬᠥᠮᠦᠨ ᠬᠣᠨᠣᠭᠠᠳ ᠰᠢᠨᠠᠯᠠᠮᠠ ᠬᠠᠮᠢᠭᠠ ᠪᠠᠢᠨᠠ ᠭᠡᠵᠦ ᠠᠰᠠᠭᠤᠵᠤ ᠪᠠᠢᠭᠰᠠᠨ᠃ ᠡᠨᠡ ᠥᠷᠯᠥᠭᠡ ᠪᠠᠷᠠᠭᠤᠨ ᠬᠣᠢᠰᠢ ᠬᠠᠨᠳᠤᠭᠠᠳ ᠶᠠᠪᠤᠴᠢᠬᠠᠯᠠ᠃ ᠱᠠᠩ ᠤ᠋ᠨ ᠳᠡᠮᠴᠢ ᠪᠠᠭᠰᠢ ᠨᠠᠷ ᠰᠠᠢᠨ ᠴᠠᠢ ᠪᠤᠳᠠᠭᠠ ᠬᠢᠵᠦ ᠵᠣᠴᠢᠯᠠᠪᠠ ᠁》 ᠭᠡᠵᠦ ᠶᠠᠷᠢᠯᠴᠠᠯᠠ᠃ ᠡᠨᠡ ᠬᠦ᠌ ᠱᠠᠩ ᠤ᠋ᠨ ᠠᠳᠤᠭᠤᠴᠢᠨ ᠲᠠᠢ ᠤᠴᠠᠷᠠᠭᠰᠠᠨ ᠮᠠᠯᠴᠢᠨ ᠪᠣᠯ ᠳᠤᠭᠤᠢᠯᠠᠩ ᠤ᠋ᠨ ᠭᠡᠰᠢᠭᠦᠨ ᠳᠠᠷᠠᠰᠤ ᠶ᠋ᠢᠨ (ᠥᠨᠥ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠢᠦᠢ ᠯᠢᠨ ᠦ᠌ ᠮᠠᠩᠬᠠ ᠰᠢᠶᠠᠩ ᠤ᠋ᠨ ᠳ᠋ᠠᠷᠠᠰᠢ ᠲᠣᠰᠬᠣᠨ ᠳ᠋ᠤ᠌) ᠪᠠᠶᠠᠨ ᠠᠷᠰᠯᠠᠨ ᠪᠠᠢᠭᠰᠠᠨ ᠲᠤᠯᠠ ᠲᠡᠷᠡ ᠳᠣᠣᠷᠠ ᠪᠠᠨ ᠰᠡᠵᠢᠭᠯᠡᠵᠦ ᠮᠣᠷᠢᠨ ᠵᠢᠯᠣᠭᠣ ᠰᠤᠩᠭᠠᠨ ᠪᠠᠷᠠᠭᠤᠨᠰᠢ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳ᠋ᠦ᠍ ᠬᠦᠷᠴᠦ ᠰᠢᠨᠠᠯᠠᠮᠠ ᠳ᠋ᠤ᠌ ᠡᠨᠡ ᠪᠠᠢᠳᠠᠯ ᠢ᠋ ᠳᠠᠮᠵᠢᠭᠤᠯᠪᠠ᠃
ᠵᠠᠮ ᠨᠡᠪᠲᠡᠷᠡᠯᠭᠡ ᠳᠥᠭᠥᠮ ᠦᠭᠡᠢ ᠡᠯᠡᠰᠦᠨ ᠰᠡᠷᠪᠡᠩ ᠳᠥᠭᠥᠮ ᠪᠤᠷᠭᠠᠰᠤ ᠰᠦᠯᠵᠢᠯᠳᠦᠭᠰᠡᠨ᠂ ᠴᠢᠮᠡᠭᠡ ᠬᠣᠯᠪᠣᠭᠠ ᠬᠥᠭᠵᠢᠭᠰᠡᠨ ᠦᠭᠡᠢ ᠴᠠᠭ ᠦᠶᠡ ᠳ᠋ᠦ᠍ ᠰᠢᠨᠡᠯᠡᠮᠡ ᠶ᠋ᠢ ᠬᠣᠣᠷᠯᠠᠬᠤ ᠠᠶᠤᠮᠰᠢᠭᠲᠤ ᠴᠢᠮᠡᠭᠡ ᠬᠡᠳᠦᠢ ᠲᠦᠷᠭᠡᠨ ᠰᠢᠨᠠᠯᠠᠮᠠ ᠳ᠋ᠤ᠌ ᠳᠠᠮᠵᠢᠭᠳᠠᠭᠰᠠᠨ ᠢ᠋ ᠭᠠᠢᠬᠠᠮᠠᠷ! ᠦᠵᠡᠯ ᠨᠢᠭᠡᠲᠡᠢ ᠳᠤᠭᠤᠢᠯᠠᠩ ᠤ᠋ᠨ ᠬᠥᠮᠦᠰ ᠦ᠋ᠨ ᠬᠥᠳᠡᠯᠦᠯ ᠢ᠋ ᠦᠨᠡᠨ ᠪᠢᠰᠢᠷᠡᠮᠡᠷ ᠪᠢᠯᠡ᠃
ᠰᠢᠨᠡᠯᠡᠮᠡ ᠰᠣᠨᠣᠰᠤᠭᠠᠳ《ᠱᠠᠨᠵᠢᠮᠢᠳᠤᠭ ᠨᠠᠮᠠᠶ᠋ᠢ ᠳ᠋ᠤ᠌ ᠤᠴᠠᠷᠠᠬᠤ ᠪᠠᠷ ᠤᠴᠢᠷ ᠲᠠᠢ ᠪᠣᠯ ᠡᠨᠳᠡ ᠰᠢᠭᠤᠳ ᠢᠷᠡᠬᠦ ᠶᠦᠮ᠂ ᠨᠣᠶᠠᠨ ᠱᠠᠩ ᠳ᠋ᠤ᠌ ᠤᠷᠢᠳ ᠢ᠋ᠶ᠋ᠠᠷ ᠣᠴᠢᠵᠤ ᠬᠣᠨᠣᠭᠠᠳ ᠶᠡᠬᠡ ᠪᠡᠷ ᠴᠠᠢ ᠪᠤᠳᠠᠭᠠ ᠪᠠᠷ ᠵᠣᠴᠢᠯᠠᠭᠤᠯᠤᠭᠰᠠᠨ ᠠ᠋ᠴᠠ ᠦᠵᠡᠪᠡᠯ ᠯᠠᠪ ᠰᠠᠢᠨ ᠰᠠᠨᠠᠭᠠ ᠪᠤᠰᠤ ᠳᠠ ᠁》 ᠭᠡᠳ ᠨᠢᠳᠦ ᠪᠡᠨ ᠠᠨᠢᠵᠤ ᠭᠦᠨ ᠪᠣᠳᠣᠯᠭᠠᠰᠢᠷᠠᠪᠠ᠃
ᠲᠡᠷᠡ᠂ ᠴᠡᠷᠢᠭ ᠦ᠋ᠳ ᠲᠡᠭᠡᠨ ᠥᠨᠥᠳᠥᠷ ᠶᠡᠷᠦ ᠪᠤᠰᠤ ᠶ᠋ᠢᠨ ᠬᠣᠯᠠ ᠶ᠋ᠢᠨ ᠭᠡᠢᠴᠢᠨ ᠢᠷᠡᠵᠦ ᠮᠡᠳᠡᠨᠡ᠃ ᠲᠠᠨᠤᠰ ᠬᠠᠷᠠᠭᠤᠯ ᠮᠠᠨᠠᠭᠠ ᠪᠠᠨ ᠳᠠᠪᠬᠤᠷ ᠵᠣᠭᠰᠣᠭᠠᠨ ᠰᠣᠨᠣᠷ ᠰᠡᠷᠡᠮᠵᠢ ᠲᠡᠢ ᠪᠠᠢ! ᠶᠠᠮᠠᠷ ᠬᠥᠮᠦᠨ ᠢᠷᠡᠭᠰᠡᠨ ᠴᠦ᠍ ᠴᠡᠷᠢᠭ ᠲᠡᠢᠨ ᠦ᠌ ᠪᠠᠴᠢᠮ ᠪᠠᠢᠳᠠᠯ ᠲᠠᠢ ᠴᠢᠩᠭᠠ ᠰᠡᠷᠭᠡᠢᠯᠡ᠂ ᠣᠷᠣᠵᠤ ᠭᠠᠷᠬᠤ ᠬᠥᠮᠦᠰ ᠢ᠋ ᠣᠰᠣᠯᠳᠠᠯ ᠦᠭᠡᠢ ᠰᠠᠢᠨ ᠪᠠᠢᠴᠠᠭᠠᠵᠤ ᠪᠠᠢᠭᠲᠤᠨ ᠭᠡᠵᠦ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠪᠠᠢᠭᠠ ᠭᠤᠷᠪᠠᠳᠤᠭᠠᠷ ᠯᠢᠶᠠᠨ ᠤ᠋ ᠬᠦᠴᠦᠨᠲᠡᠭᠦᠰ ᠦ᠋ᠨ ᠨᠢᠭᠡ ᠰᠠᠯᠠᠭᠠ ᠬᠣᠷᠢ ᠰᠢᠬᠠᠮ ᠴᠡᠷᠢᠭ ᠲᠦ᠍ ᠵᠠᠷᠯᠢᠭ ᠪᠣᠯᠤᠭᠰᠠᠨ ᠪᠠᠢᠨᠠ᠃
ᠬᠦᠴᠦᠨᠲᠡᠭᠦᠰ ᠰᠦᠮᠡ ᠡᠴᠡ ᠬᠡᠳᠦᠨ ᠭᠠᠵᠠᠷ ᠤ᠋ᠨ ᠠᠯᠤᠰ ᠲᠤ᠌ ᠶᠠᠪᠤᠭᠤᠯ ᠳᠤᠷᠰᠢᠭᠤᠯᠤᠭᠴᠢ ᠲᠣᠮᠢᠯᠠᠵᠤ ᠰᠦᠮᠡ ᠶ᠋ᠢᠨ ᠭᠤᠷᠢᠶᠠᠨ ᠵᠠᠮ ᠢ᠋ᠶ᠋ᠠᠷ ᠬᠠᠷᠠᠭᠤᠯ ᠭᠠᠷᠭᠠᠵᠤ᠂ ᠰᠦᠮᠡ ᠶ᠋ᠢᠨ ᠱᠠᠩ ᠤ᠋ᠨ ᠡᠭᠦᠳᠡ(ᠳᠠᠷᠤᠢ ᠭᠡᠨᠳᠦᠨᠯᠢᠭ᠌ᠰᠣᠭ ᠱᠠᠪᠷᠤᠩ ᠤ᠋ᠨ ᠱᠠᠩ) ᠳ᠋ᠤ᠌ ᠬᠣᠶᠠᠷ ᠬᠠᠷᠠᠭᠤᠯ ᠵᠣᠭᠰᠣᠭᠠᠵᠤ ᠳᠣᠲᠣᠷᠠ ᠪᠠᠢᠰᠢᠩ ᠤ᠋ᠨ ᠡᠭᠦᠳᠡᠨ ᠳ᠋ᠦ᠍ ᠨᠢᠭᠡ ᠬᠠᠷᠠᠭᠤᠯ᠂ ᠶᠡᠬᠡ ᠪᠠᠢᠰᠢᠩ ᠤ᠋ᠨ ᠳᠣᠲᠣᠷᠠ ᠥᠷᠥᠭᠡ ᠶ᠋ᠢᠨ ᠡᠭᠦᠳᠡᠨ ᠳ᠋ᠦ᠍ ᠬᠣᠶᠠᠷ ᠰᠤᠯᠠ ᠬᠥᠮᠦᠨ ᠨᠠᠭᠠᠰᠢ ᠴᠠᠭᠠᠰᠢ ᠪᠠᠢᠳᠠᠯ ᠳᠠᠮᠵᠢᠭᠤᠯᠬᠤ ᠪᠠᠷ ᠡᠷᠭᠢᠴᠡᠵᠦ ᠶᠠᠭ ᠴᠡᠷᠢᠭ ᠲᠡᠢᠨ ᠦ᠌ ᠪᠠᠴᠢᠮ ᠦᠶᠡ ᠶ᠋ᠢᠨ ᠪᠡᠯᠡᠳᠬᠡᠯ ᠬᠢᠵᠡᠢ᠃
ᠬᠣᠶᠠᠳᠤᠭᠠᠷ ᠡᠳᠦᠷ ᠦ᠋ᠨ ᠥᠷᠯᠥᠭᠡ ᠨᠢᠭᠡᠨ ᠡᠯᠵᠢᠭᠡ ᠤᠨᠤᠭᠰᠠᠨ ᠬᠢᠲᠠᠳ ᠪᠠᠷᠠᠭᠤᠨ ᠵᠠᠮ ᠢ᠋ᠶ᠋ᠠᠷ ᠬᠣᠢᠰᠢ ᠶᠠᠪᠤᠵᠤ ᠪᠠᠢᠭᠠᠳ ᠬᠠᠷᠠᠭᠤᠯ ᠳ᠋ᠤ᠌ ᠰᠡᠷᠡᠭᠳᠡᠵᠦ ᠪᠠᠢᠴᠠᠭᠠᠭᠳᠠᠪᠠ᠃ ᠲᠡᠷᠡ ᠨᠢ ᠰᠣᠷᠣᠭᠤᠯ ᠤ᠋ᠨ ᠯᠣᠩᠬᠣᠨ ᠳ᠋ᠤ᠌ ᠬᠠᠷᠠ ᠲᠠᠮᠠᠬᠢ ᠬᠢᠭᠡᠳ ᠨᠢᠭᠤᠴᠠ ᠪᠠᠷ ᠬᠤᠳᠠᠯᠳᠤᠵᠤ ᠪᠠᠢᠭᠰᠠᠨ ᠬᠥᠮᠦᠨ ᠪᠠᠢᠵᠠᠢ᠃ ᠰᠢᠨᠠᠯᠠᠮᠠ ᠲᠡᠷᠡ ᠬᠢᠲᠠᠳ ᠢ᠋ ᠰᠦᠮᠡ ᠶ᠋ᠢᠨ ᠱᠠᠩ ᠤ᠋ᠨ ᠪᠠᠢᠰᠢᠩ ᠳ᠋ᠤ᠌ ᠠᠰᠠᠭᠤᠨ ᠪᠠᠢᠴᠠᠭᠠᠵᠤ᠄《ᠡᠭᠦᠨ ᠡᠴᠡ ᠬᠣᠢᠰᠢ ᠮᠣᠩᠭᠣᠯ ᠭᠠᠵᠠᠷ ᠢ᠋ᠶ᠋ᠠᠷ ᠡᠨᠡ ᠬᠣᠣᠷ ᠢ᠋ ᠣᠭᠲᠣ ᠬᠤᠳᠠᠯᠳᠤᠵᠤ ᠪᠣᠯᠬᠤ ᠥᠬᠡᠢ》 ᠭᠡᠮᠡᠨ ᠰᠤᠷᠭᠠᠵᠤ ᠪᠠᠢᠲᠠᠯᠠ ᠬᠣᠢᠲᠤ ᠴᠠᠢᠳᠠᠮ ᠳ᠋ᠤ᠌ ᠴᠠᠭᠠᠨ ᠲᠣᠭᠣᠰᠣ ᠮᠠᠨᠠᠷᠠᠭᠤᠯᠤᠭᠰᠠᠨ ᠵᠢᠷᠣᠭᠠ ᠮᠣᠷᠢ ᠲᠠᠢ ᠬᠥᠮᠦᠨ ᠰᠦᠮᠡ ᠵᠦᠭ ᠶᠠᠪᠤᠵᠤ ᠪᠠᠢᠨᠠ ᠭᠡᠵᠦ ᠬᠠᠷᠠᠭᠤᠯ ᠤ᠋ᠨ ᠴᠡᠷᠢᠭ ᠳᠠᠮᠵᠢᠭᠤᠯᠪᠠ᠃ ᠰᠢᠨᠡᠯᠡᠮᠡ᠄《ᠬᠣᠣᠷ ᠡᠪᠦᠷᠯᠡᠵᠦ ᠡᠯᠵᠢᠭᠡ ᠤᠨᠤᠭᠰᠠᠨ ᠠᠷᠠᠯᠵᠢᠶᠠᠴᠢᠨ ᠢ᠋ ᠰᠢᠢᠳᠪᠦᠷᠢᠯᠡᠵᠦ ᠠᠮᠵᠢᠭᠠᠳᠤᠢ ᠪᠠᠢᠲᠠᠯᠠ᠂ ᠫᠤᠤ ᠪᠠᠷᠢᠵᠤ ᠵᠢᠷᠣᠭᠠ ᠮᠣᠷᠢ ᠤᠨᠤᠭᠰᠠᠨ ᠳ᠋ᠤᠯᠢ ᠢᠷᠡᠪᠡ ᠤᠤ? ᠲᠠᠨᠤᠰ ᠰᠠᠢᠨ ᠰᠡᠷᠡᠮᠵᠢ ᠲᠡᠢ ᠪᠠᠢᠭᠲᠤᠨ! ᠦᠨᠡᠨ ᠫᠤᠤ ᠲᠠᠢ ᠬᠥᠮᠦᠨ ᠪᠠᠢᠪᠠᠯ ᠴᠢᠩᠭᠠ ᠣᠷᠣ!》 ᠭᠡᠵᠦ ᠳᠠᠯᠳᠠ ᠤᠴᠢᠷ ᠢ᠋ᠶ᠋ᠠᠨ ᠴᠤᠬᠤᠢᠯᠭᠠᠵᠤ ᠢᠨᠢᠶᠡᠵᠦ ᠬᠡᠯᠡᠯᠡ᠃ ᠢᠩᠭᠢᠲᠡᠯᠡ ᠱᠠᠨᠵᠢᠮᠢᠳᠤᠭ ᠮᠣᠷᠢᠨ ᠤ᠋ ᠬᠤᠷᠳᠤᠨ ᠢ᠋ᠶ᠋ᠠᠷ ᠭᠠᠳᠠᠨᠠ ᠬᠦᠷᠦᠭᠡᠳ ᠢᠷᠡᠴᠢᠬᠡᠯᠡ᠃ ᠲᠡᠷᠡ ᠱᠠᠩ ᠤ᠋ᠨ ᠣᠷᠴᠢᠮ ᠢᠷᠡᠭᠡᠳ ᠬᠠᠷᠠᠭᠤᠯ ᠤ᠋ᠨ ᠵᠠᠬᠢᠶᠠ ᠪᠠᠷ ᠤᠷᠤᠭᠰᠢ ᠠᠯᠬᠤᠭᠰᠠᠨ ᠦᠭᠡᠢ ᠵᠣᠭᠰᠣᠴᠢᠬᠠᠯᠠ᠃ ᠬᠠᠷᠠᠭᠤᠯ ᠠ᠋ᠴᠠ ᠲᠠ ᠶᠠᠭᠤᠨ ᠤ᠋ ᠬᠥᠮᠦᠨ ᠪᠣᠢ? ᠭᠡᠬᠦ ᠳ᠋ᠦ᠍ ᠱᠠᠨᠵᠢᠮᠢᠳᠤᠭ ᠳᠤᠷᠠ ᠦᠭᠡᠢᠴᠡᠭᠰᠡᠨ ᠪᠠᠢᠳᠠᠯ ᠲᠠᠢ ᠣᠮᠣᠷᠬᠠᠭ ᠢ᠋ᠶ᠋ᠠᠷ᠄《ᠲᠠᠨ ᠤ᠋ ᠲᠤᠸᠠᠨᠵᠠᠩ ᠰᠢᠨᠡᠯᠡᠮᠡ ᠬᠠᠮᠢᠭᠠ ᠪᠠᠢᠨᠠ? ᠪᠢ ᠤᠴᠠᠷᠠᠬᠤ ᠴᠢᠬᠤᠯᠠ ᠤᠴᠢᠷ ᠲᠠᠢ》 ᠭᠡᠵᠦ ᠵᠠᠩᠳᠤᠷᠪᠠ᠃ ᠡᠭᠦᠳᠡᠨ ᠬᠠᠷᠠᠭᠤᠯ ᠤ᠋ᠳ᠄《ᠲᠠᠨ ᠢ᠋ ᠪᠠᠢᠴᠠᠭᠠᠭᠰᠠᠨ ᠤ᠋ ᠳᠠᠷᠠᠭᠠ ᠳᠣᠲᠣᠭᠰᠢ ᠮᠡᠳᠡᠭᠦᠯᠵᠦ ᠵᠥᠪᠰᠢᠶᠡᠷᠡᠪᠡᠯ ᠰᠠᠶᠢ ᠪᠣᠯᠤᠨᠠ》 ᠭᠡᠬᠦ ᠳ᠋ᠦ᠍᠂ ᠱᠠᠨᠵᠢᠮᠢᠳᠤᠭ᠄《ᠲᠠᠨᠤᠰ ᠶᠠᠭᠤ ᠮᠡᠳᠡᠬᠦ ᠪᠣᠢ? ᠪᠢ ᠪᠣᠯ ᠲᠠᠨ ᠤ᠋ ᠲᠤᠸᠠᠨᠵᠠᠩ ᠰᠢᠨᠠᠯᠠᠮᠠ ᠶ᠋ᠢ ᠨᠠᠶᠠᠨ ᠵᠢᠩ ᠦ᠋ᠨ ᠲᠡᠮᠦᠷ ᠭᠢᠨᠵᠢᠨ ᠡᠴᠡ ᠭᠠᠷᠭᠠᠵᠤ ᠠᠪᠤᠭᠰᠠᠨ ᠬᠥᠮᠦᠨ᠂ ᠰᠢᠨᠠᠯᠠᠮᠠ ᠶ᠋ᠢᠨ ᠠᠮᠢ ᠶ᠋ᠢ ᠠᠪᠤᠷᠠᠭᠰᠠᠨ ᠠᠴᠢᠲᠤ ᠬᠥᠮᠦᠨ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠭᠡᠭᠴᠢ ᠪᠢ ᠮᠥᠨ᠂ ᠰᠢᠨᠡᠯᠡᠮᠡ ᠳ᠋ᠦ᠍ ᠠᠭᠤᠯᠵᠠᠵᠤ ᠪᠣᠯᠬᠤ ᠦᠭᠡᠢ ᠤᠤ?》 ᠭᠡᠯᠡ᠃ ᠡᠨᠡ ᠦᠭᠡ ᠶ᠋ᠢ ᠰᠣᠨᠣᠰᠤᠭᠠᠳ ᠲᠡᠭᠦᠨ ᠦ᠌ ᠱᠠᠩ ᠤ᠋ᠨ ᠶᠡᠬᠡ ᠭᠡᠷ ᠲᠦ᠍ ᠣᠷᠣᠬᠤ ᠶ᠋ᠢ ᠵᠥᠪᠰᠢᠶᠡᠷᠡᠪᠡ᠃ ᠱᠠᠨᠵᠢᠮᠢᠳᠤᠭ ᠶᠡᠬᠡ ᠭᠡᠷ ᠲᠦ᠍ ᠣᠷᠣᠬᠤ ᠲᠠᠢ ᠵᠡᠷᠭᠡ ᠬᠠᠨᠵᠤᠨ ᠳᠡᠭᠡᠷᠡ ᠨᠢᠭᠡ ᠬᠥᠮᠦᠨ(ᠬᠠᠷᠠ ᠲᠠᠮᠠᠬᠢᠨ ᠤ᠋ ᠠᠷᠠᠯᠵᠢᠶᠠᠴᠢᠨ) ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ ᠦᠵᠡᠭᠡᠳ ᠡᠪᠦᠷ ᠡᠴᠡ ᠪᠡᠨ ᠱᠤᠸᠠᠷᠳ᠋ ᠭᠡᠲᠡᠯᠡ ᠭᠠᠷ ᠫᠤᠤ ᠪᠠᠨ ᠭᠠᠷᠭᠠᠬᠤ ᠳ᠋ᠤ᠌᠂ ᠲᠡᠷᠡ ᠬᠢᠲᠠᠳ《ᠮᠠ ᠶᠣᠣ!》 ᠭᠡᠮᠡᠨ ᠰᠣᠴᠢᠨ ᠪᠠᠷᠬᠢᠷᠠᠪᠠ᠃ ᠭᠡᠷ ᠲᠡᠬᠢ ᠴᠢᠯᠠᠭᠤᠲᠠᠢ᠂ ᠭᠡᠨᠳᠦᠨ ᠬᠣᠶᠠᠷ ᠴᠡᠷᠢᠭ ᠰᠡᠷᠡᠮᠵᠢ ᠲᠡᠢ ᠪᠠᠢᠭᠰᠠᠨ ᠲᠤᠯᠠ ᠱᠠᠨᠵᠢᠮᠢᠳᠤᠭ ᠤ᠋ᠨ ᠭᠠᠷ ᠫᠤᠤ ᠶ᠋ᠢ ᠪᠤᠯᠢᠶᠠᠵᠤ ᠠᠪᠴᠠᠢ᠃ ᠳᠣᠲᠣᠷᠠ ᠥᠷᠥᠭᠡ ᠶ᠋ᠢᠨ ᠪᠢᠴᠢᠬᠠᠨ ᠴᠣᠩᠬᠣ ᠶ᠋ᠢᠨ ᠴᠠᠭᠠᠰᠤᠨ ᠴᠣᠭᠣᠷᠬᠠᠢ ᠪᠠᠷ ᠰᠢᠨᠠᠯᠠᠮᠠ ᠭᠡᠷ ᠳᠣᠲᠣᠷᠠᠬᠢ ᠪᠠᠢᠳᠠᠯ ᠢ᠋ ᠲᠣᠪ ᠲᠣᠳᠣᠷᠬᠠᠢ ᠦᠵᠡᠵᠦ ᠪᠠᠢᠯᠠ᠃
ᠤᠤᠯ ᠨᠢ ᠱᠠᠨᠵᠢᠮᠢᠳᠤᠭ ᠠᠷᠪᠠ ᠳᠤᠤᠭᠠᠷᠳᠠᠭ ᠭᠠᠷ ᠫᠤᠤ ᠳ᠋ᠠᠭᠠᠨ ᠠᠷᠪᠠᠨ ᠰᠤᠮᠤ ᠳᠠᠷᠤᠴᠢᠬᠠᠭᠠᠳ ᠳᠡᠪᠡᠯ ᠦ᠋ᠨ ᠢ᠋ᠶ᠋ᠡᠨ ᠪᠥᠰᠡᠨ ᠳ᠋ᠦ᠍ ᠬᠠᠪᠴᠢᠭᠤᠯᠤᠨ ᠭᠠᠳᠠᠭᠤᠷ ᠨᠢ ᠬᠤᠷᠠᠭᠠᠨ ᠳ᠋ᠠᠴᠠᠩ ᠡᠮᠦᠰᠴᠡᠢ᠃ ᠲᠡᠷᠡ ᠮᠡᠷᠭᠡᠨ ᠬᠠᠷᠪᠤᠬᠤ ᠪᠠ ᠬᠤᠷᠳᠤᠨ ᠮᠣᠷᠢᠨ ᠤ᠋ ᠪᠠᠨ ᠰᠠᠢᠨ ᠳ᠋ᠤ᠌ ᠣᠮᠣᠭᠰᠢᠵᠤ ᠰᠢᠨᠠᠯᠠᠮᠠ ᠶ᠋ᠢ ᠣᠯᠵᠤ ᠦᠵᠡᠮᠡᠭᠴᠡ ᠭᠡᠨᠡᠳᠲᠡᠬᠡᠨ ᠬᠠᠷᠪᠤᠵᠤ ᠠᠯᠠᠭᠠᠳ ᠮᠣᠷᠢᠨ ᠳ᠋ᠠᠭᠠᠨ ᠮᠣᠷᠳᠠᠵᠤ ᠳᠤᠲᠠᠭᠠᠬᠤ ᠪᠠᠷ ᠪᠡᠯᠡᠳᠬᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠶᠡᠬᠡ ᠭᠡᠷ ᠦ᠋ᠨ ᠬᠠᠨᠵᠤᠨ ᠳᠡᠭᠡᠷᠡ ᠨᠢᠭᠡ ᠬᠥᠮᠦᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠢ᠋ ᠰᠢᠨᠡᠯᠡᠮᠡ ᠪᠠᠢᠨᠠ ᠭᠡᠵᠦ ᠡᠨᠳᠡᠭᠦᠷᠡᠴᠢᠬᠡᠭᠰᠡᠨ ᠪᠠᠢᠵᠠᠢ᠃
ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ᠄《ᠲᠠ ᠨᠠᠷ ᠶᠠᠭᠠᠬᠢᠵᠤ ᠪᠣᠢ? ᠶᠠᠭᠤᠨ ᠳ᠋ᠤ᠌ ᠮᠢᠨᠦ ᠠᠮᠢ ᠪᠠᠨ ᠬᠠᠮᠠᠭᠠᠯᠠᠳᠠᠭ ᠭᠠᠷ ᠫᠤᠤ ᠶ᠋ᠢ ᠠᠪᠬᠤ ᠪᠣᠢ?》 ᠭᠡᠪᠡ᠃ ᠵᠠᠯᠠᠭᠤ ᠫᠠᠢᠵᠠᠩ ᠬᠦᠴᠦᠨᠲᠡᠭᠦᠰ ᠳᠣᠲᠣᠷᠠ ᠥᠷᠥᠭᠡᠨ ᠡᠴᠡ ᠭᠠᠷᠴᠤ ᠢᠷᠡᠭᠡᠳ᠄《ᠲᠠ ᠶᠠᠭᠤᠨ ᠳ᠋ᠤ᠌ ᠭᠠᠷ ᠫᠤᠤ ᠳ᠋ᠠᠭᠠᠨ ᠠᠷᠪᠠᠨ ᠰᠤᠮᠤ ᠳᠠᠷᠤᠵᠤ ᠡᠪᠦᠷ ᠳᠣᠲᠣᠷᠠ ᠪᠠᠨ ᠨᠢᠭᠤᠵᠤ᠂ ᠪᠠᠰᠠ ᠶᠠᠭᠤᠨ ᠳ᠋ᠤ᠌ ᠡᠩ ᠦ᠋ᠨ ᠨᠢᠭᠡᠨ ᠠᠷᠠᠯᠵᠢᠶᠠᠴᠢᠨ ᠳ᠋ᠤ᠌ ᠫᠤᠤ ᠵᠢᠭᠠᠬᠤ ᠪᠣᠢ? ᠡᠨᠡ ᠬᠥᠮᠦᠨ ᠢ᠋ ᠬᠦᠯᠢᠵᠦ ᠰᠠᠢᠲᠤᠷ ᠪᠠᠢᠴᠠᠭᠠᠭᠲᠤᠨ!》 ᠭᠡᠮᠡᠨ ᠵᠠᠷᠯᠢᠭ ᠪᠣᠯᠬᠤ ᠳ᠋ᠤ᠌ ᠲᠡᠭᠦᠨ ᠢ᠋ ᠤᠶᠠᠵᠤ ᠨᠡᠩᠵᠢᠭᠰᠡᠨ ᠳ᠋ᠦ᠍ ᠡᠪᠦᠷ ᠲᠤᠨᠢ ᠰᠢᠨᠠᠯᠠᠮᠠ ᠶ᠋ᠢ ᠬᠣᠣᠷᠯᠠᠬᠤ ᠲᠤᠬᠠᠢ ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠭᠠᠵᠠᠷ ᠤ᠋ᠨ ᠠᠯᠪᠠᠨ ᠪᠢᠴᠢᠭ ᠪᠠᠢᠯᠠ᠃ ᠱᠠᠨᠵᠢᠮᠢᠳᠤᠭ ᠤ᠋ᠨ ᠮᠣᠷᠢᠨ ᠳᠡᠭᠡᠷᠡ ᠨᠢ ᠭᠠᠨᠵᠤᠭᠠᠯᠠᠵᠤ ᠪᠠᠢᠭᠠ ᠲᠡᠮᠡᠭᠡᠨ ᠠᠬᠠᠷ ᠢ᠋ᠶ᠋ᠠᠷ ᠳᠡᠯᠳᠡᠵᠦ ᠨᠠᠷᠢᠯᠢᠭ ᠬᠢᠭᠰᠡᠨ ᠲᠡᠯᠢᠩ ᠤᠭᠤᠲᠠᠨ ᠳ᠋ᠤᠨᠢ ᠭᠠᠷ ᠫᠤᠤ ᠶ᠋ᠢᠨ ᠰᠤᠮᠤ ᠪᠠᠰᠠ ᠬᠡᠳᠦᠨ ᠠᠷᠪᠠ ᠪᠠᠢᠯᠠ᠃
ᠬᠦᠴᠦᠨᠲᠡᠭᠦᠰ ᠫᠠᠢᠵᠠᠩ᠂ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠤ᠋ᠨ ᠡᠮᠦᠨᠡᠬᠢ ᠬᠠᠨᠵᠤᠨ ᠤ᠋ ᠰᠢᠷᠡᠭᠡᠨ ᠳᠡᠭᠡᠷᠡ ᠴᠢᠭᠤᠯᠭᠠᠨ ᠳᠠ ᠶ᠋ᠢᠨ ᠠᠯᠪᠠᠨ ᠪᠢᠴᠢᠭ ᠢ᠋ ᠨᠢ ᠭᠠᠷᠭᠠᠵᠤ ᠨᠢᠭᠤᠷᠳᠠᠨ ᠰᠢᠭᠦᠭᠰᠡᠨ ᠳ᠋ᠦ᠍ ᠲᠡᠷᠡ ᠠᠷᠭᠠ ᠪᠤᠰᠤ ᠤᠴᠢᠷ ᠶᠠᠪᠤᠳᠠᠯ ᠢ᠋ᠶ᠋ᠠᠨ ᠮᠡᠳᠡᠷᠡᠬᠦ ᠪᠣᠯᠪᠠᠴᠤ《ᠪᠢ ᠥᠩᠭᠡᠷᠡᠭᠰᠡᠨ ᠳ᠋ᠦ᠍ ᠰᠢᠨᠡᠯᠡᠮᠡ ᠶ᠋ᠢ ᠠᠪᠤᠷᠠᠭᠰᠠᠨ ᠠᠴᠢᠲᠤ ᠬᠥᠮᠦᠨ ᠶᠦᠮ》 ᠭᠡᠬᠦ ᠰᠠᠢᠬᠠᠨ ᠦᠭᠡ ᠶ᠋ᠢ ᠳᠠᠬᠢᠨ ᠳᠠᠪᠲᠠᠨ ᠬᠡᠯᠡᠵᠦ ᠪᠠᠢᠯᠠ᠃ ᠳ᠋ᠤᠯᠢ ᠱᠠᠨᠵᠢᠮᠢᠲᠤᠭ ᠢ᠋ ᠬᠡᠷᠬᠢᠨ ᠰᠢᠢᠳᠬᠡᠬᠦ ᠳ᠋ᠦᠩ ᠭᠠᠷᠤᠭᠠᠳᠤᠢ ᠲᠤᠯᠠ ᠲᠡᠭᠦᠨ ᠢ᠋ ᠲᠤᠰᠬᠠᠢ ᠭᠡᠷ ᠲᠦ᠍ ᠬᠡᠳᠦ ᠬᠣᠨᠣᠭ ᠰᠤᠯᠠ ᠬᠣᠷᠢᠵᠤ ᠴᠢᠩᠭᠠ ᠬᠠᠮᠢᠶᠠᠷᠪᠠ᠃
ᠨᠢᠭᠡᠨ ᠡᠳᠦᠷ ᠵᠢᠶᠦ᠋ᠨ ᠸᠠᠩ ᠤ᠋ᠨ ᠬᠤᠰᠢᠭᠤᠨ ᠤ᠋ ᠰᠧᠳᠧᠩᠨᠣᠷᠪᠤ ᠶ᠋ᠢᠨ ᠲᠣᠮᠢᠯᠠᠭᠰᠠᠨ ᠬᠣᠶᠠᠷ ᠴᠡᠷᠢᠭ ᠨᠢᠭᠡᠨ ᠰᠢᠪᠠᠭᠤᠨ ᠥᠳᠥᠲᠦ ᠵᠠᠬᠢᠳᠠᠯ ᠬᠦᠷᠭᠡᠵᠦ ᠢᠷᠡᠯᠡ᠃ ᠲᠡᠷᠡ ᠦᠶᠡ ᠳ᠋ᠦ᠍ ᠪᠠᠴᠢᠮ ᠴᠢᠬᠤᠯᠠ ᠪᠤᠶᠤ ᠣᠰᠤᠯᠳᠠᠯ ᠦᠭᠡᠢ ᠲᠦᠷᠭᠡᠨ ᠬᠦᠷᠭᠡᠬᠦ ᠵᠠᠬᠢᠳᠠᠯ ᠤ᠋ᠨ ᠤᠭᠤᠲᠠᠨ ᠭᠠᠳᠠᠨᠠ ᠨᠢᠭᠡᠨ ᠪᠢᠴᠢᠬᠠᠨ ᠰᠢᠪᠠᠭᠤᠨ ᠤ᠋ ᠳᠠᠯᠠᠪᠴᠢᠨ ᠦᠷᠪᠢᠭᠦᠯ ᠢ᠋ ᠬᠠᠲᠠᠵᠤ ᠶᠠᠪᠤᠭᠤᠯᠳᠠᠭ ᠪᠠᠢᠵᠠᠢ ᠭᠡᠨᠡ᠃ ᠡᠨᠡ ᠬᠦ᠌ ᠵᠠᠬᠢᠳᠠᠯ ᠤ᠋ᠨ ᠭᠣᠣᠯ ᠠᠭᠤᠯᠭᠠ ᠪᠣᠯᠪᠠᠰᠤ《᠁ ᠰᠢᠨᠠᠯᠠᠮᠠ ᠲᠠ ᠪᠡᠶᠡ ᠪᠡᠨ ᠰᠠᠢᠲᠤᠷ ᠬᠢᠴᠢᠶᠡ! ᠥᠨᠥ ᠨᠣᠶᠠᠨ ᠵᠢᠰᠤᠷ ᠠᠷᠭᠠ ᠭᠠᠷᠭᠠᠵᠤ ᠳᠠᠯᠠᠳ ᠤ᠋ᠨ ᠳ᠋ᠤᠯᠢ ᠱᠠᠨᠵᠢᠮᠢᠲᠤᠭ ᠢ᠋ ᠵᠠᠷᠤᠵᠤ ᠴᠢᠮᠠᠶ᠋ᠢ ᠬᠣᠣᠷᠯᠠᠭᠤᠯᠬᠤ ᠪᠠᠷ ᠲᠣᠮᠢᠯᠠᠭᠰᠠᠨ ᠲᠤᠯᠠ ᠶᠠᠮᠠᠷ ᠶᠠᠩᠵᠤ ᠪᠠᠷ ᠬᠡᠵᠢᠶᠡ ᠨᠢᠭᠡᠨ ᠡᠳᠦᠷ ᠣᠳᠴᠤ ᠣᠴᠢᠬᠤ ᠶ᠋ᠢ ᠪᠤᠤ ᠮᠡᠳᠡ! ᠮᠢᠨᠦ ᠪᠡᠶᠡ ᠲᠤᠰᠬᠠᠢᠯᠠᠨ ᠬᠣᠶᠠᠷ ᠴᠡᠷᠢᠭ ᠲᠣᠮᠢᠯᠠᠵᠤ ᠲᠠᠨ ᠳ᠋ᠤᠷ ᠥᠪᠡᠷ ᠦ᠋ᠨ ᠮᠣᠳᠣᠷ ᠢ᠋ᠶ᠋ᠠᠷ ᠪᠢᠴᠢᠭ ᠪᠢᠴᠢᠵᠦ ᠰᠢᠭᠤᠳ ᠴᠢᠮᠡᠭᠡ ᠢᠯᠡᠭᠡᠪᠡᠢ ᠁》 ᠬᠡᠮᠡᠵᠡᠢ᠃ ᠡᠢᠮᠦ ᠡᠴᠡ ᠰᠢᠨᠠᠯᠠᠮᠠ ᠶ᠋ᠢ ᠬᠣᠣᠷᠯᠠᠬᠤ ᠭᠡᠰᠡᠨ ᠤᠴᠢᠷ ᠶᠠᠪᠤᠳᠠᠯ ᠭᠡᠷᠡᠴᠢ ᠪᠠᠷᠢᠮᠲᠠ ᠲᠣᠳᠣᠷᠬᠠᠢ ᠪᠣᠯᠤᠭᠰᠠᠨ ᠳ᠋ᠤ᠌ ᠱᠠᠨᠵᠢᠮᠢᠲᠤᠭ ᠢ᠋ ᠥᠴᠢᠭᠯᠡᠭᠦᠯᠵᠦ ᠭᠠᠷ ᠤ᠋ᠨ ᠬᠤᠷᠤᠭᠤ ᠶ᠋ᠢ ᠨᠢ ᠳᠠᠷᠤᠭᠤᠯᠵᠤ ᠠᠪᠴᠠᠢ᠃
ᠡᠨᠡ ᠬᠤᠭᠤᠴᠠᠭᠠᠨ ᠳ᠋ᠤ᠌ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠡᠮᠦᠨᠡᠲᠦ ᠵᠠᠬᠠ ᠶ᠋ᠢᠨ ᠲᠠᠷᠢᠶᠠᠴᠢᠳ ᠪᠣᠯᠤᠨ ᠮᠣᠩᠭᠣᠯᠴᠤᠳ ᠳ᠋ᠤᠯᠢ ᠱᠠᠨᠵᠢᠮᠢᠲᠤᠭ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠳᠡᠭᠡᠷᠡ ᠪᠠᠷᠢᠭᠳᠠᠴᠢᠬᠠᠯᠠ ᠭᠡᠰᠡᠨ ᠴᠢᠮᠡᠭᠡ ᠶ᠋ᠢ ᠣᠯᠵᠤ ᠰᠣᠨᠣᠰᠤᠮᠠᠭᠴᠠ ᠡᠳᠦᠷ ᠪᠦᠷᠢ ᠰᠢᠨᠠᠯᠠᠮᠠ ᠳ᠋ᠤ᠌᠄《ᠳ᠋ᠤᠯᠢ ᠱᠠᠨᠵᠢᠮᠢᠲᠤᠭ ᠮᠠᠨ ᠤ᠋ ᠭᠡᠷ ᠡᠴᠡ ᠴᠠᠭᠠᠨ ᠲᠥᠭᠥᠷᠢᠭ ᠢ᠋ ᠳᠡᠭᠡᠷᠡᠮᠳᠡᠭᠰᠡᠨ᠂ ᠠᠮᠤ ᠪᠤᠷᠴᠠᠭ ᠢ᠋ ᠪᠤᠯᠢᠶᠠᠭᠰᠠᠨ᠂ ᠬᠣᠨᠢ ᠮᠠᠯ ᠢ᠋ ᠲᠠᠭᠤᠵᠤ ᠶᠠᠪᠤᠭᠰᠠᠨ᠂ ᠡᠮᠡᠭᠲᠡᠢᠴᠦᠳ ᠦ᠋ᠨ ᠲᠣᠯᠣᠭᠠᠢ ᠶ᠋ᠢᠨ ᠵᠠᠰᠠᠯ ᠢ᠋ ᠪᠤᠯᠢᠶᠠᠭᠰᠠᠨ᠁》 ᠭᠡᠵᠦ ᠵᠠᠭᠠᠯᠳᠤᠬᠤ ᠪᠠᠷ ᠲᠠᠰᠤᠷᠠᠯᠲᠠ ᠦᠭᠡᠢ ᠢᠷᠡᠵᠦ ᠪᠠᠢᠯᠠ᠃
ᠳ᠋ᠤᠯᠢ ᠱᠠᠨᠵᠢᠮᠢᠲᠤᠭ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠡᠮᠦᠨᠡ ᠵᠠᠬᠠ ᠪᠠᠷ ᠮᠠᠯᠵᠢᠬᠤ ᠣᠷᠣᠨ᠂ ᠱᠡᠨᠰᠢ ᠮᠣᠵᠢ ᠶ᠋ᠢᠨ ᠢᠦᠢ ᠯᠢᠨ᠂ ᠾᠧᠩ ᠱᠠᠨ ᠤ᠋ ᠬᠣᠢᠲᠤ ᠵᠠᠬᠠ ᠪᠠᠷ ᠴᠡᠷᠢᠭ ᠰᠠᠭᠤᠵᠤ ᠦᠷᠭᠦᠯᠵᠢ ᠠᠷᠠᠳ ᠢ᠋ ᠳᠡᠭᠡᠷᠡᠮᠳᠡᠵᠦ ᠬᠣᠭᠣᠰᠣᠷᠠᠭᠤᠯᠤᠭᠰᠠᠨ ᠪᠥᠭᠡᠳ ᠵᠠᠷᠢᠮ ᠬᠥᠮᠦᠨ ᠦ᠌ ᠠᠮᠢᠨ ᠳ᠋ᠤ᠌ ᠬᠦᠷᠦᠭᠰᠡᠨ ᠵᠠᠨᠤᠯᠲᠤ ᠤᠴᠢᠷ ᠤ᠋ᠳ ᠪᠠᠢᠬᠤ ᠲᠤᠯᠠ ᠠᠷᠠᠳ ᠤ᠋ᠨ ᠬᠣᠷᠣᠰᠤᠯ ᠢ᠋ ᠲᠠᠢᠯᠵᠤ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠳ᠋ᠤᠯᠢ ᠶ᠋ᠢᠨ ᠲᠦᠢᠪᠡᠭᠡᠨ ᠢ᠋ ᠠᠷᠢᠯᠭᠠᠬᠤ ᠪᠤᠶᠤ ᠳᠠᠬᠢᠨ ᠢᠷᠡᠬᠦ ᠶ᠋ᠢ ᠰᠡᠷᠭᠡᠢᠯᠡᠬᠦ ᠶ᠋ᠢᠨ ᠲᠤᠰᠠᠳᠠ ᠳᠣᠯᠣᠳᠤᠭᠠᠷ ᠡᠳᠦᠷ ᠲᠦ᠍ ᠬᠠᠯᠢᠭᠤᠲᠤ ᠶ᠋ᠢᠨ ᠰᠦᠮᠡ ᠶ᠋ᠢᠨ ᠪᠠᠷᠠᠭᠤᠨ ᠡᠮᠦᠨᠡ ᠱᠠᠨᠰᠢ ᠮᠣᠵᠢ ᠶ᠋ᠢᠨ ᠢᠦᠢ ᠯᠢᠨ ᠬᠣᠲᠠ ᠠ᠋ᠴᠠ ᠣᠲᠣᠭ ᠬᠤᠰᠢᠭᠤᠨ ᠤ᠋ ᠬᠠᠮᠠᠷᠬᠠᠲᠠᠢ ᠶ᠋ᠢᠨ ᠨᠠᠭᠤᠷ᠂ ᠮᠣᠳᠣ ᠴᠠᠭᠠᠨᠨᠠᠭᠤᠷ ᠲᠤ᠌ ᠶᠠᠪᠤᠬᠤ ᠳᠠᠪᠤᠰᠤ ᠬᠤᠵᠢᠷ ᠤ᠋ᠨ ᠶᠡᠬᠡ ᠵᠠᠮ ᠤ᠋ᠨ ᠬᠠᠵᠠᠭᠤ ᠳ᠋ᠠᠬᠢ ᠶᠡᠬᠡ ᠴᠢᠴᠠᠷᠭᠠᠨᠠ ᠶ᠋ᠢᠨ ᠳᠥᠭᠥᠮ ᠳ᠋ᠦ᠍ ᠲᠡᠭᠦᠨ ᠢ᠋ ᠴᠠᠭᠠᠵᠠ ᠪᠠᠷ ᠫᠤᠤᠳᠠᠨ ᠠᠯᠠᠵᠤ᠂ ᠦᠬᠦᠳᠡᠯ ᠢ᠋ ᠨᠢ ᠶᠡᠬᠡ ᠴᠢᠴᠠᠷᠭᠠᠨᠠ ᠶ᠋ᠢᠨ ᠮᠣᠳᠣᠨ ᠳ᠋ᠤ᠌ ᠲᠤᠰᠬᠠᠢ ᠳᠡᠭᠦᠵᠢᠯᠡᠪᠡ᠃ ᠰᠢᠨᠠᠯᠠᠮᠠ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠢ᠋ ᠡᠨᠳᠡ ᠠᠯᠠᠭᠰᠠᠨ ᠭᠡᠰᠡᠨ ᠢ᠋ ᠬᠣᠯᠠ ᠣᠢᠷᠠ ᠶ᠋ᠢᠨ ᠬᠥᠮᠦᠰ ᠲᠦ᠍ ᠦᠵᠡᠭᠦᠯᠦᠨ ᠰᠣᠨᠣᠰᠬᠠᠵᠤ᠂ ᠬᠢᠲᠠᠳ ᠮᠣᠩᠭᠣᠯ ᠳ᠋ᠤᠯᠢ ᠦᠦᠰᠢᠨ ᠬᠤᠰᠢᠭᠤᠨ ᠳ᠋ᠤ᠌ ᠠᠶᠤᠮᠰᠢᠭ ᠦᠭᠡᠢ ᠢᠷᠡᠬᠦ ᠳ᠋ᠦ᠍ ᠤᠷᠢᠳᠴᠢᠯᠠᠨ ᠰᠡᠷᠡᠮᠵᠢ ᠶ᠋ᠢᠨ ᠳᠣᠬᠢᠶᠠ ᠥᠭᠭᠦᠭᠰᠡᠨ ᠪᠠᠢᠵᠠᠢ᠃ ᠳ᠋ᠤᠯᠢ ᠱᠠᠨᠵᠢᠮᠢᠳᠤᠭ ᠭᠤᠷᠪᠠ ᠪᠠᠷ ᠬᠦᠷᠦᠵᠦ ᠲᠠᠮᠤᠭᠰᠠᠨ ᠮᠠᠨᠵᠤ ᠮᠠᠶᠢᠭ ᠤ᠋ᠨ ᠤᠷᠲᠤ ᠭᠡᠵᠢᠭᠡ ᠲᠡᠢ ᠪᠠᠢᠭᠰᠠᠨ ᠲᠤᠯᠠ ᠬᠡᠳᠦᠨ ᠵᠢᠯ ᠦ᠋ᠨ ᠳᠠᠷᠠᠭᠠ ᠦᠬᠦᠳᠡᠯ ᠦ᠋ᠨ ᠭᠦᠷᠦᠮᠡᠯ ᠭᠡᠵᠢᠭᠡ ᠨᠢ ᠴᠢᠴᠠᠷᠭᠠᠨᠠ ᠳ᠋ᠤ᠌ ᠬᠣᠯᠪᠣᠭᠠᠰᠤ ᠲᠠᠢ ᠪᠠᠢᠭᠰᠠᠨ ᠭᠡᠵᠦ ᠬᠥᠮᠦᠰ ᠬᠡᠯᠡᠯᠴᠡᠵᠦ ᠪᠠᠢᠵᠠᠢ᠃ ①
— — — —
① ᠲᠤᠰ ᠦᠯᠢᠭᠡᠷ ᠢ᠋ 1979 ᠣᠨ ᠳ᠋ᠤ᠌ ᠦᠦᠰᠢᠨ ᠬᠤᠰᠢᠭᠤᠨ ᠤ᠋ ᠴᠠᠭᠠᠨᠳᠦᠩ ᠨᠠᠰᠤᠲᠠᠨ ᠤ᠋ ᠶᠠᠷᠢᠭᠰᠠᠨ ᠢ᠋ ᠡᠮᠬᠢᠳᠬᠡᠪᠡ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠣᠶᠤᠨᠪᠢᠯᠢᠭ᠌᠂ ᠣᠶᠤᠨᠪᠠᠲᠤ᠂ ᠮᠧᠢ ᠬᠤᠸᠠ᠂ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ᠂
ᠪᠠᠳᠮᠠᠰᠡᠴᠡᠨ᠂ ᠰᠠᠷᠠᠨᠲᠤᠶᠠᠭᠠ᠂ ᠴᠡᠩᠬᠡᠯᠴᠡᠴᠡᠭ
ᠦᠰᠦᠭ ᠬᠢᠨᠠᠭᠴᠢ᠄ ᠣᠳᠬᠣᠨᠴᠡᠴᠡᠭ᠂ ᠴᠤᠯᠮᠤᠨᠭᠡᠷᠡᠯ᠂ ᠪᠠᠯ