ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠪᠢᠳᠡ ᠦᠷᠡ ᠠᠴᠢ ᠳ᠋ᠠᠭᠠᠨ ᠬᠦᠯᠢᠶᠡᠯᠭᠡᠵᠦ ᠥᠭᠭᠦᠨᠡ - ᠸᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷЭг орноо бид үр ачдаа хүлээлгэж өгнө-Очирбатын Дашбалбар
45ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠪᠢᠳᠡ ᠦᠷᠡ ᠠᠴᠢ ᠳ᠋ᠠᠭᠠᠨ ᠬᠦᠯᠢᠶᠡᠯᠭᠡᠵᠦ ᠥᠭᠭᠦᠨᠡ
ᠸᠴᠢᠷᠪᠠᠲᠤ ᠶ᠋ᠢᠨ ᠳᠠᠰᠢᠪᠠᠯᠪᠠᠷ
ᠡᠪᠦᠭᠡ ᠳᠡᠭᠡᠳᠦᠰ ᠡᠴᠡ ᠪᠡᠨ ᠪᠢᠳᠡ ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ᠂
ᠦᠷᠡ ᠠᠴᠢ ᠳ᠋ᠠᠭᠠᠨ ᠴᠤ᠌ ᠬᠦᠯᠢᠶᠡᠯᠭᠡᠵᠦ ᠥᠭᠭᠦᠨᠡ!
ᠲᠤᠭ ᠰᠦᠯᠳᠡ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠲᠤᠯᠭᠠ ᠶ᠋ᠢᠨ ᠭᠤᠷᠪᠠᠨ ᠴᠢᠯᠠᠭᠤ
ᠲᠤᠯᠤᠭᠰᠠᠨ ᠭᠠᠯ ᠭᠣᠯᠣᠮᠲᠠ ᠪᠠᠨ
ᠡᠪᠦᠭᠡ ᠳᠡᠭᠡᠳᠦᠰ ᠡᠴᠡ ᠪᠡᠨ ᠪᠢᠳᠡ ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ!
ᠦᠷᠡ ᠠᠴᠢ ᠳ᠋ᠠᠭᠠᠨ ᠴᠦ᠍ ᠬᠦᠯᠢᠶᠡᠯᠭᠡᠵᠦ ᠥᠭᠭᠦᠨᠡ᠃
ᠠᠯᠲᠠᠢ ᠬᠠᠩᠭᠠᠢ᠂ ᠭᠣᠪᠢ᠂ ᠲᠠᠯᠠ ᠪᠠᠨ ᠴᠢᠯᠠᠭᠤ ᠪᠦᠬᠦᠨ ᠲᠡᠢ ᠨᠢ
ᠡᠪᠡᠰᠦ᠂ ᠨᠣᠭᠣᠭᠠ᠂ ᠰᠢᠷᠣᠢ ᠶ᠋ᠢᠨ ᠬᠢᠨᠢ ᠰᠢᠷᠬᠡᠭ ᠪᠦᠬᠦᠨ ᠲᠡᠢ᠂
ᠠᠯᠲᠠᠨ ᠨᠠᠷᠠ᠂ ᠮᠥᠩᠭᠥᠨ ᠰᠠᠷᠠ ᠶ᠋ᠢ ᠲᠣᠭᠠᠯᠠᠬᠤ ᠶ᠋ᠢᠨ ᠠᠷᠭᠠ ᠦᠭᠡᠢ ᠣᠳᠣᠨ ᠮᠡᠴᠢᠳ ᠲᠡᠢ ᠨᠢ
ᠬᠥᠪᠰᠥᠭᠥᠯ᠂ ᠡᠪᠡᠰᠦ᠂ ᠪᠤᠢᠷ ᠢ᠋ ᠤᠰᠤᠨ ᠤ᠋ ᠬᠢᠨᠢ ᠳᠤᠰᠤᠯ᠂ ᠵᠢᠭᠠᠰᠤ ᠪᠦᠬᠦᠨ ᠲᠡᠢ ᠨᠢ
ᠬᠥᠭᠡᠭᠡᠴᠡᠯᠳᠦᠨ ᠨᠠᠭᠠᠳᠬᠤ ᠳᠣᠯᠭᠢᠰ ᠢ᠋ ᠨᠢ ᠬᠦᠷᠲᠡᠯᠡ
ᠡᠪᠦᠭᠡ ᠳᠡᠭᠡᠳᠦᠰ ᠡᠴᠡ ᠪᠡᠨ ᠪᠢᠳᠡ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ
ᠦᠷᠡ ᠠᠴᠢ ᠳ᠋ᠠᠭᠠᠨ ᠴᠤ᠌ ᠬᠦᠯᠢᠶᠡᠯᠭᠡᠵᠦ ᠥᠭᠭᠦᠨᠡ!
ᠭᠠᠵᠠᠷ ᠰᠢᠷᠣᠢ ᠭᠠᠯ ᠭᠣᠯᠣᠮᠲᠠ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ
ᠭᠠᠭᠴᠠ ᠪᠢᠰᠢ ᠲᠦᠮᠡ ᠲᠦᠮᠡᠨ ᠠᠮᠢ ᠪᠠᠷ ᠢ᠋ᠶ᠋ᠠᠨ ᠳ᠋ᠦᠢᠵᠦ ᠬᠠᠮᠠᠭᠠᠯᠠᠭᠰᠠᠨ!
ᠭᠠᠯᠳᠠᠨ ᠪᠣᠱᠣᠭᠲᠤ᠂ ᠸᠠᠩ ᠮᠠᠭᠰᠤᠷᠵᠠᠪ
ᠢᠯᠳᠦ ᠪᠡᠨ ᠳᠠᠯᠠᠢᠵᠤ ᠪᠣᠰᠤᠭᠠ ᠪᠠᠷ ᠢ᠋ᠶ᠋ᠠᠨ ᠨᠥᠭᠴᠢᠭᠰᠡᠨ ᠡᠷᠡᠰ᠂
ᠢᠳᠡᠷᠬᠡᠨ ᠨᠠᠰᠤᠨ ᠳ᠋ᠤ᠌ ᠪᠠᠨ ᠮᠣᠩᠭᠣᠯ ᠢ᠋ᠶ᠋ᠠᠨ ᠠᠪᠤᠷᠠᠭᠰᠠᠨ ᠰᠦᠬᠡ
ᠲᠡᠳᠡ ᠪᠦᠭᠦᠳᠡᠭᠡᠷ ᠢ᠋ᠶ᠋ᠡᠨ ᠠᠬᠢᠵᠤ ᠣᠯᠳᠠᠬᠤ ᠦᠭᠡᠢ ᠡᠬᠡ ᠣᠷᠣᠨ ᠤ᠋ ᠪᠠᠨ
ᠡᠰ ᠰᠢᠷᠬᠡᠭ ᠪᠦᠬᠦᠨ ᠳ᠋ᠦ᠍
ᠠᠯᠲᠠᠨ ᠠᠮᠢ᠂ ᠬᠦᠰᠡᠯ ᠬᠠᠢᠷᠠ ᠪᠠᠨ ᠰᠢᠩᠭᠡᠭᠡᠭᠰᠡᠨ ᠢ᠋!
ᠡᠬᠡ ᠣᠷᠣᠨ ᠬᠣᠢᠴᠢ ᠦᠶᠡ ᠶ᠋ᠢᠨ ᠢ᠋ᠶ᠋ᠡᠨ ᠲᠥᠯᠥᠭᠡ
ᠡᠨᠡ ᠪᠡᠶᠡ ᠳᠡᠭᠡᠳᠦᠰ ᠦ᠋ᠨ ᠲᠠᠩᠭᠠᠷᠢᠭ ᠢ᠋ ᠳᠠᠪᠲᠠᠨᠠᠮ᠃
ᠳᠥᠴᠢᠨ ᠨᠠᠰᠤᠨ ᠠ᠋ᠴᠠ ᠡᠬᠢᠯᠡᠭᠰᠡᠨ ᠬᠤᠪᠢᠰᠬᠠᠯ ᠤ᠋ᠨ ᠲᠡᠦᠬᠡ
ᠲᠤᠭ ᠤ᠋ᠨ ᠳᠡᠭᠡᠷᠡᠬᠢ ᠡᠷᠲᠡᠨ ᠦ᠌ ᠪᠢᠴᠢᠭᠡᠰᠦ᠂ ᠰᠦᠬᠡᠪᠠᠭᠠᠲᠤᠷ ᠤ᠋ᠨ ᠭᠡᠷᠢᠶᠡᠰ ᠲᠡᠢ
ᠭᠤᠴᠢ ᠶᠢᠰᠦ᠂ ᠳᠥᠴᠢᠨ ᠲᠠᠪᠤᠨ ᠣᠨ ᠤ᠋
ᠭᠤᠢᠪᠢᠵᠤ ᠳᠠᠢᠪᠠᠭᠠ ᠦᠭᠡᠢ ᠢᠯᠠᠯᠲᠠ ᠶ᠋ᠢᠨ ᠭᠡᠷᠡᠴᠢ ᠲᠡᠢ
ᠡᠬᠡ ᠣᠷᠣᠨ ᠢ᠋ᠶ᠋ᠠᠨ ᠪᠢᠳᠡ ᠡᠪᠦᠭᠡ ᠳᠡᠭᠡᠳᠦᠰ ᠡᠴᠡ ᠪᠡᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ᠂
ᠦᠷᠡ ᠠᠴᠢ ᠳ᠋ᠠᠭᠠᠨ ᠴᠤ᠌ ᠬᠦᠯᠢᠶᠡᠯᠭᠡᠵᠦ ᠥᠭᠭᠦᠨᠡ᠃
ᠰᠣᠶᠣᠮᠪᠣᠲᠤ ᠲᠤᠭ ᠢ᠋ᠶ᠋ᠠᠨ ᠭᠤᠷᠪᠠᠨ ᠵᠠᠭᠤᠨ ᠤ᠋ ᠲᠡᠷᠲᠡᠭᠡ ᠡᠴᠡ ᠪᠢᠳᠡᠨ ᠳ᠋ᠦ᠍ ᠪᠡᠨ ᠢᠷᠡᠭᠦᠯᠦᠭᠰᠡᠨ
ᠴᠣᠭᠲᠤ ᠬᠣᠩ ᠲᠠᠢᠵᠢ ᠶ᠋ᠢ ᠴᠦ᠍
ᠰᠣᠳᠣ ᠤᠬᠠᠭᠠᠨ ᠢ᠋ᠶ᠋ᠠᠨ( ᠬᠥᠬᠡ ᠰᠤᠳᠤᠷ) ᠲᠤ᠌ ᠪᠠᠨ ᠦᠯᠡᠳᠡᠭᠡᠵᠦ᠂ ᠬᠣᠢᠴᠢ ᠦᠶᠡ ᠳ᠋ᠡᠭᠡᠨ ᠢᠯᠡᠭᠡᠭᠰᠡᠨ
ᠰᠤᠤ ᠪᠢᠯᠢᠭᠲᠦ ᠢᠨᠵᠠᠨᠨᠠᠰᠢ ᠴᠤ᠌᠂
ᠡᠪᠦᠭᠡ ᠳᠡᠭᠡᠳᠦᠰ ᠡᠴᠡ ᠪᠡᠨ ᠪᠢᠳᠡ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ᠂
ᠦᠷᠡ ᠠᠴᠢ ᠳ᠋ᠠᠭᠠᠨ ᠴᠤ᠌ ᠬᠦᠯᠢᠶᠡᠯᠭᠡᠵᠦ ᠥᠭᠭᠦᠨᠡ!
ᠠᠭᠤᠯᠠᠰ ᠢ᠋ ᠥᠨᠳᠡᠯᠵᠡᠭᠦᠯᠵᠦ᠂ ᠤᠰᠤ ᠭᠣᠣᠯ ᠢ᠋ ᠮᠡᠯᠮᠡᠯᠵᠡᠭᠦᠯᠬᠦ
ᠤᠶᠠᠬᠠᠨ ᠬᠣᠶᠠᠷ ᠴᠢᠪᠬᠠᠳᠠᠰᠤᠲᠤ ᠮᠣᠷᠢᠨ ᠬᠤᠭᠤᠷ᠂ ᠤᠷᠲᠤᠬᠠᠨ ᠠᠶᠠᠯᠭᠤᠲᠤ ᠳᠠᠭᠤᠤ
ᠤᠬᠠᠭᠠᠨᠲᠤ ᠠᠷᠠᠳ ᠤ᠋ᠨ ᠢ᠋ᠶ᠋ᠠᠨ ᠢᠷᠠᠭᠤᠬᠠᠨ ᠠᠯᠳᠠᠷ ᠮᠣᠩᠭᠣᠯ ᠬᠡᠮᠡᠬᠦ ᠨᠡᠷᠡ ᠪᠡᠨ
ᠰᠠᠨᠰᠠᠷ ᠲᠤ᠌ ᠨᠢᠰᠦᠭᠰᠡᠨ ᠭᠠᠪᠢᠶᠠ ᠲᠠᠢ ᠨᠢ᠂ ᠠᠲᠠᠷ ᠬᠠᠭᠠᠯᠤᠭᠰᠠᠨ ᠲᠡᠦᠬᠡ ᠲᠡᠢ ᠨᠢ᠂
ᠰᠠᠢᠬᠠᠨ ᠪᠦᠬᠦᠨ ᠢ᠋ ᠨᠡᠮᠡᠵᠦ ᠪᠦᠲᠦᠭᠡᠭᠰᠡᠨ ᠲᠡᠢ ᠪᠡᠨ
ᠤᠷᠤᠭ ᠡᠯᠢᠭᠡᠨ ᠢ᠋ᠶ᠋ᠡᠨ ᠤᠯᠠᠮ ᠣᠯᠠᠨ ᠪᠣᠯᠭᠠᠵᠤ᠂
ᠤᠰᠤ ᠨᠤᠲᠤᠭ ᠢ᠋ᠶ᠋ᠠᠨ ᠤᠯᠠᠮ ᠰᠠᠢᠬᠠᠨ ᠪᠣᠯᠭᠠᠵᠤ᠂
ᠲᠩᠷᠢ ᠪᠡᠨ ᠴᠡᠯᠮᠡᠭ᠂ ᠨᠠᠷᠠ ᠪᠠᠨ ᠲᠤᠩᠭᠠᠯᠠᠭ ᠬᠦᠯᠢᠶᠡᠯᠭᠡᠵᠦ ᠥᠭᠭᠦᠨᠡ!
ᠡᠪᠦᠭᠡ ᠳᠡᠭᠡᠳᠦᠰ ᠡᠴᠡ ᠪᠡᠨ ᠬᠦᠯᠢᠶᠡᠵᠦ ᠠᠪᠤᠭᠰᠠᠨ ᠡᠬᠡ ᠣᠷᠣᠨ ᠰᠢᠦ!
ᠦᠷᠡ ᠠᠴᠢ ᠮᠢᠨᠢ ᠠ᠋!
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠢ·ᠰᠠᠷᠠᠨᠠ
ᠦᠰᠦᠭ ᠬᠠᠳᠠᠭᠴᠢ᠄ ᠪᠠᠢ᠂ ᠰᠠᠷᠠᠨᠠ
ᠬᠢᠨᠠᠭᠴᠢ᠄ ᠣᠳᠬᠠᠨᠰᠤᠠ᠂ ᠰᠣᠨᠢᠨᠪᠠᠶᠠᠷ