ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠬᠣᠶᠠᠷ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -2
139ᠭᠠᠮᠢᠩ ᠤᠨ ᠳᠣᠭᠰᠢᠷᠠᠭᠰᠠᠨ ᠨᠢ
ᠡᠭᠦᠨ ᠦ᠌ ᠨᠥᠭᠦᠭᠡ ᠲᠠᠯᠠ ᠪᠠᠷ ᠭᠠᠮᠢᠩ ᠤ᠋ᠨ ᠪᠠᠢᠳᠠᠯ ᠡᠷᠡᠰ ᠬᠤᠷᠴᠠᠳᠤᠨ ᠰᠢᠷᠦᠭᠦᠰᠦᠯᠡ᠃ ᠬᠦᠷᠢᠶᠡ ᠲᠣᠭᠣᠷᠢᠨ ᠬᠡᠳᠦᠨ ᠳᠠᠪᠬᠤᠷ ᠬᠠᠷᠠᠭᠤᠯ ᠮᠠᠨᠠᠭᠠ ᠪᠠᠷ ᠪᠦᠰᠡᠯᠡᠭᠳᠡᠵᠦ᠂ ᠣᠷᠣᠬᠤ ᠭᠠᠷᠬᠤ ᠬᠣᠶᠠᠷ ᠲᠤ ᠬᠥᠮᠦᠰ ᠥᠮᠥᠳᠥ ᠪᠡᠨ ᠲᠠᠢᠯᠬᠤ ᠰᠢᠬᠠᠮ ᠪᠣᠯᠲᠠᠯᠠ ᠨᠡᠩᠵᠢᠭᠦᠯᠵᠦ ᠰᠢᠯᠭᠠᠭᠤᠯᠤᠭᠠᠳ ᠮᠤᠯᠲᠤᠷᠠᠨᠠ᠃ ᠬᠦᠷᠢᠶᠡᠨ ᠳᠣᠲᠣᠷᠠ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ᠂ ᠬᠠᠮᠢᠭᠠ ᠪᠣᠯ ᠬᠠᠮᠢᠭᠠ ᠮᠠᠨᠠᠭᠠ ᠴᠠᠭᠳᠠᠭᠤᠯ᠁ ᠭᠠᠮᠢᠩ ᠤ᠋ᠳ᠂ ᠪᠦᠬᠦ ᠣᠷᠣᠰᠢᠨ ᠰᠠᠭᠤᠭᠠ ᠡᠷᠡᠭᠲᠡᠢᠴᠦᠳ ᠦ᠋ᠨ ᠶᠡᠬᠡᠩᠬᠢ ᠬᠤᠪᠢ ᠶ᠋ᠢ ᠡᠵᠡᠯᠡᠭᠰᠡᠨ ᠯᠠᠮᠠ ᠨᠠᠷ ᠳᠡᠭᠡᠷᠡ ᠠᠩᠬᠠᠷᠤᠯ ᠲᠠᠯᠪᠢᠨ ᠲᠡᠳᠡᠨ ᠦ᠌ ᠴᠤᠭᠯᠠᠷᠠᠬᠤ ᠬᠤᠷᠠᠯ ᠨᠣᠮ ᠤ᠋ᠨ ᠴᠠᠭ ᠢ᠋ᠶ᠋ᠠᠷ ᠬᠡᠳᠦ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ ᠢᠷᠡᠨ᠂ ᠳᠤᠭᠠᠩ ᠰᠦᠮᠡ ᠪᠡᠷ ᠨᠢ ᠣᠷᠣᠨ ᠭᠠᠷᠤᠨ ᠶᠠᠪᠤᠨᠠ᠃ ᠰᠠᠩ ᠵᠢᠰᠠ ᠶ᠋ᠢᠨ ᠬᠢᠨᠢ ᠭᠠᠵᠠᠷ ᠢ᠋ ᠰᠠᠬᠢᠨ ᠬᠠᠮᠠᠭᠠᠯᠠᠬᠤ ᠨᠡᠷᠡᠢᠳᠦᠯ ᠢ᠋ᠶ᠋ᠡᠷ ᠨᠢᠭᠡ ᠫᠤᠤ ᠲᠠᠢ ᠭᠠᠮᠢᠩ ᠪᠠᠢᠩᠭᠤ ᠰᠠᠬᠢᠨ ᠰᠠᠭᠤᠨᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠯᠠᠮᠠ ᠨᠠᠷ ᠵᠥᠪ ᠵᠦᠭᠡᠷ ᠬᠠᠷᠢᠨ ᠲᠡᠳᠡᠨ ᠦ᠌ ᠦᠢᠯᠡ ᠠᠵᠢᠯᠯᠠᠭᠠ ᠶ᠋ᠢ ᠪᠠᠬᠠᠳᠤᠨ ᠰᠠᠢᠰᠢᠶᠠᠬᠤ ᠪᠠᠢᠳᠠᠯ ᠦᠵᠡᠭᠦᠯᠦᠨ ᠠᠯᠠᠭᠠ ᠬᠠᠪᠰᠤᠷᠤᠨ ᠮᠡᠬᠦᠯᠵᠡᠭᠡᠳ《ᠳᠣᠪᠲᠣᠯᠤᠨ ᠢᠷᠡᠬᠦ ᠳᠠᠢᠰᠤᠨ ᠤ᠋ ᠴᠣᠭ ᠵᠠᠯᠢ ᠶ᠋ᠢ ᠳᠣᠷᠣᠢᠲᠠᠭᠤᠯᠬᠤ ᠲᠦᠢ ᠳᠣᠭᠵᠢᠷ ᠭᠡᠭᠴᠢ ᠶ᠋ᠢ ᠵᠠᠯᠠᠶᠠ》 ᠭᠡᠵᠦ ᠭᠠᠮᠢᠩ ᠤ᠋ᠨ ᠶᠠᠮᠤᠨ ᠳ᠋ᠤ᠌ ᠪᠠᠢᠨ ᠪᠠᠢᠨ ᠠᠢᠯᠠᠳᠬᠠᠨ ᠵᠥᠪᠰᠢᠶᠡᠷᠡᠯ ᠠᠪᠤᠨᠠ᠃ ᠭᠡᠲᠡᠯᠡ ᠡᠨᠡ ᠲᠦᠢ ᠳᠣᠭᠵᠢᠷ ᠨᠢ ᠦᠨᠡᠬᠡᠷ ᠣᠩᠭᠧᠷᠡᠨ ᠦ᠌ ᠡᠰᠡᠷᠭᠦ ᠪᠢᠰᠢ᠂ ᠬᠠᠷᠢᠨ ᠥᠪᠡᠷᠰᠡᠳ ᠢ᠋ ᠨᠢ ᠳᠣᠷᠣᠢᠲᠠᠭᠤᠯᠬᠤ ᠶ᠋ᠢᠨ ᠲᠥᠯᠥᠭᠡ ᠪᠥᠭᠡᠳ᠄《ᠭᠠᠮᠢᠩ ᠤ᠋ᠳ》 ᠤᠳᠠᠬᠤ ᠦᠭᠡᠢ ᠰᠥᠨᠥᠨᠡ! ᠣᠳᠣ ᠶ᠋ᠢᠨ ᠬᠥᠮᠦᠨ ᠳ᠋ᠦ᠍᠂ ᠡᠳᠡᠨ ᠢ᠋ ᠡᠰᠡᠷᠭᠦᠴᠡᠨ ᠲᠡᠮᠡᠴᠡᠬᠦ ᠡᠴᠡ ᠥᠭᠡᠷᠡ ᠪᠤᠶᠠᠨ ᠠᠯᠠᠭᠠ᠃ ᠪᠠᠢᠯᠳᠤᠨ ᠲᠤᠯᠤᠯᠳᠤᠬᠤ ᠶ᠋ᠢ ᠪᠡᠯᠡᠳᠭᠡ! ᠦᠬᠦᠬᠦ ᠡᠴᠡ ᠪᠤᠤ ᠠᠶᠤ! ᠠᠮᠢ ᠰᠦᠨᠡᠰᠦ ᠶ᠋ᠢ ᠴᠢᠨᠢ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠬᠠᠮᠠᠭᠠᠯᠠᠨᠠ᠃ ᠦᠬᠦᠪᠡᠴᠦ ᠬᠠᠮᠢᠶᠠ ᠦᠭᠡᠢ᠂ ᠬᠣᠢᠲᠤ ᠨᠠᠰᠤᠨ ᠳ᠋ᠠᠭᠠᠨ ᠪᠤᠷᠬᠠᠨ ᠤ᠋ ᠣᠷᠣᠨ ᠳ᠋ᠤ᠌ ᠰᠠᠭᠠᠳ ᠦᠭᠡᠢ ᠣᠴᠢᠵᠤ ᠲᠥᠷᠥᠨᠡ!》 ᠭᠡᠵᠦ ᠰᠦᠰᠦᠭᠲᠡᠨ ᠣᠯᠠᠨ ᠢ᠋ ᠲᠠᠰᠤᠷᠠᠯᠲᠠ ᠦᠭᠡᠢ ᠢᠳᠬᠠᠨ᠂ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠪᠣᠢ ᠪᠣᠯᠤᠭᠰᠠᠨ ᠲᠡᠮᠡᠴᠡᠬᠦ ᠶᠡᠬᠡ ᠦᠢᠯᠡᠰ ᠢ᠋ ᠨᠢ ᠤᠯᠠᠮ ᠢ᠋ᠶ᠋ᠠᠷ ᠬᠥᠭᠵᠢᠭᠡᠨ ᠪᠠᠳᠠᠷᠠᠭᠤᠯᠤᠨᠠ᠃
ᠡᠯᠡ ᠳᠤᠮᠳᠠ ᠪᠠᠯᠳᠠᠨᠴᠡᠷᠢᠩ ᠣᠷᠴᠢᠨ ᠲᠣᠭᠣᠷᠢᠨ ᠳ᠋ᠠᠭᠠᠨ ᠶᠠᠭᠤ ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠶ᠋ᠢ ᠪᠤᠰᠤᠳ ᠤ᠋ᠨ ᠠᠳᠠᠯᠢ ᠮᠡᠳᠡᠵᠦ ᠪᠠᠢᠭᠠ ᠪᠢᠯᠡ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠪᠠᠯᠳᠠᠨᠴᠡᠷᠢᠩ ᠡᠨᠡ ᠲᠡᠷᠡ ᠶ᠋ᠢ ᠥᠭᠡᠷᠡ ᠪᠤᠰᠤᠳ ᠲᠠᠢ ᠠᠭᠤᠯᠵᠠᠨ ᠶᠠᠷᠢᠯᠴᠠᠵᠤ ᠮᠡᠳᠡᠭᠰᠡᠨ ᠪᠢᠰᠢ᠂ ᠥᠨᠥᠬᠢ ᠣᠷᠴᠢᠯᠠᠩ ᠠ᠋ᠴᠠ ᠲᠠᠰᠤᠷᠠᠭᠰᠠᠨ ᠮᠡᠲᠦ ᠬᠥᠮᠦᠨ ᠠᠮᠢᠲᠠᠨ ᠲᠠᠢ ᠨᠡᠢᠯᠡᠬᠦ ᠦᠭᠡᠢ ᠪᠣᠯᠤᠭᠰᠠᠨ ᠨᠢ ᠬᠡᠪ ᠢ᠋ᠶ᠋ᠡᠷ ᠪᠥᠭᠡᠳ ᠵᠥᠪᠬᠡᠨ ᠣᠳᠣ ᠤᠯᠤᠰ ᠣᠷᠣᠨ ᠤ᠋ ᠮᠢᠨᠢ ᠢᠷᠡᠭᠡᠳᠦᠢ ᠶ᠋ᠢᠨ ᠬᠤᠪᠢ ᠵᠠᠶᠠᠭᠠ ᠶᠠᠭᠤ ᠪᠣᠯᠬᠤ ᠨᠢ ᠪᠣᠢ? ᠭᠡᠳᠡᠭ ᠠᠰᠠᠭᠤᠳᠠᠯ ᠳ᠋ᠤ᠌ ᠪᠦᠬᠦ ᠰᠡᠳᠬᠢᠯ ᠨᠢ ᠲᠠᠲᠠᠭᠳᠠᠭᠠᠳ ᠲᠡᠷᠡ ᠵᠦᠭ ᠦ᠋ᠨ ᠶᠠᠭᠤᠮᠠ ᠶ᠋ᠢ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠰᠣᠨᠢᠷᠬᠠᠬᠤ ᠪᠣᠯᠤᠭᠰᠠᠨ ᠳ᠋ᠠᠭᠠᠨ᠂ ᠡᠳᠦᠷ ᠪᠦᠷᠢ ᠭᠠᠳᠠᠭᠤᠷ ᠭᠠᠷᠴᠤ ᠦᠨᠡᠨ ᠪᠣᠳᠠᠲᠤ ᠬᠡᠷᠡᠭ ᠢ᠋ ᠨᠢᠳᠦ ᠪᠡᠷ ᠦᠵᠡᠬᠦ᠂ ᠦᠯᠦ ᠦᠵᠡᠭᠳᠡᠬᠦ ᠶ᠋ᠢ ᠥᠭᠡᠷᠡ ᠪᠤᠰᠤᠳ ᠤ᠋ᠨ ᠶᠠᠷᠢᠶᠠ ᠶ᠋ᠢ ᠴᠢᠩᠨᠠᠨ ᠮᠡᠳᠡᠬᠦ ᠡᠢᠮᠦ ᠬᠣᠶᠠᠷ ᠤᠷᠤᠰᠬᠠᠯ ᠢ᠋ᠶ᠋ᠠᠷ ᠶᠠᠪᠤᠵᠤ ᠪᠠᠢᠭᠠ ᠪᠢᠯᠡ᠃
ᠨᠢᠭᠡ ᠡᠳᠦᠷ ᠪᠠᠯᠳᠠᠨᠴᠡᠷᠢᠩ ᠮᠥᠨ ᠯᠡ ᠭᠠᠳᠠᠭᠰᠢ ᠭᠠᠷᠪᠠ᠃ ᠵᠠᠮ ᠳᠡᠭᠡᠷᠡ ᠨᠢ ᠬᠡᠳᠦᠨ ᠬᠡᠦᠬᠡᠳ ᠲᠣᠭᠯᠠᠵᠤ ᠪᠠᠢᠭᠠ ᠲᠠᠭᠠᠷᠠᠯᠳᠤᠯᠠ᠃ ᠲᠡᠳᠡᠨ ᠦ᠌ ᠨᠢᠭᠡ ᠨᠢ ᠬᠤᠷᠢᠶᠠᠯᠲᠠ ᠲᠠᠢ ᠲᠦᠯᠡᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠨᠢᠭᠤᠭᠳᠠᠵᠤ᠂ ᠪᠤᠰᠤᠳ ᠨᠢ ᠨᠥᠭᠦᠭᠡ ᠲᠠᠯᠠ ᠠ᠋ᠴᠠ ᠳᠠᠪᠰᠢᠨᠠ᠃ ᠦᠵᠡᠲᠡᠯᠡ ᠲᠡᠳᠡ ᠥᠨᠥᠬᠢ ᠪᠠᠷᠤᠨ ᠣᠩᠭᠧᠷᠡᠨ ᠦ᠌ ᠦᠬᠡᠷ ᠫᠤᠤ ᠶ᠋ᠢᠨ ᠠᠷᠤ ᠳ᠋ᠤ᠌ ᠬᠠᠶᠠᠭᠳᠠᠭᠰᠠᠨ ᠮᠣᠩᠭᠣᠯ ᠡᠷᠡ᠂ ᠭᠠᠮᠢᠩ ᠤ᠋ᠨ ᠬᠣᠷᠢᠶᠠᠨ ᠳᠠᠷᠤᠭᠠ ᠶ᠋ᠢ ᠠᠯᠠᠭᠰᠠᠨ ᠪᠠᠬᠠᠳᠤᠯ ᠪᠣᠯᠭᠠᠨ ᠨᠠᠭᠠᠳᠤᠨᠠ᠃
ᠲᠦᠯᠡᠭᠡᠨ ᠦ᠌ ᠠᠷᠤ ᠳ᠋ᠤ᠌ ᠨᠢᠭᠤᠭᠳᠠᠭᠰᠠᠨ ᠵᠢᠭᠠᠯ ᠭᠡᠨᠡᠳᠲᠡ ᠭᠠᠷᠤᠨ ᠲᠦᠷᠦᠭᠦᠨ ᠢᠷᠡᠭᠰᠡᠨ ᠬᠡᠦᠬᠡᠳ ᠢ᠋ ᠪᠤᠭ ᠮᠠᠯ ᠤ᠋ᠨ ᠡᠷᠡᠦ ᠶ᠋ᠢᠨ ᠶᠠᠰᠤ ᠪᠠᠷ ᠱᠠᠭᠠᠢᠨ᠂ ᠠᠮᠠ ᠪᠠᠷ ᠢ᠋ᠶ᠋ᠠᠨ ᠫᠤᠤᠳᠠᠨ ᠤᠨᠠᠭᠠᠩᠭᠤᠲᠠ ᠪᠠᠨ《ᠵᠠ ᠮᠢᠨᠦ ᠬᠡᠷᠡᠭ ᠭᠦᠢᠴᠡᠯᠡ!》 ᠭᠡᠵᠦ ᠰᠢᠳᠦ ᠵᠠᠭᠤᠨ ᠥᠪᠡᠷ ᠢ᠋ ᠪᠡᠨ ᠫᠤᠤᠳᠠᠭᠰᠠᠨ ᠪᠣᠯᠤᠨ᠂ ᠲᠡᠷᠡᠢᠨ ᠤᠨᠠᠪᠠ᠃ ᠪᠠᠯᠳᠠᠨᠴᠡᠷᠢᠩ ᠲᠡᠳᠡᠨ ᠦ᠌ ᠬᠠᠵᠠᠭᠤ ᠪᠠᠷ ᠥᠩᠭᠡᠷᠡᠬᠦ ᠳ᠋ᠡᠭᠡᠨ᠄《ᠡᠨᠡ ᠴᠦ᠍ ᠯᠠᠪ ᠮᠣᠩᠭᠣᠯ ᠬᠥᠮᠦᠨ ᠦ᠌ ᠠᠮᠢ ᠬᠠᠢᠷᠠ ᠦᠭᠡᠢ ᠠᠯᠠᠯᠴᠠᠨ ᠲᠤᠯᠤᠯᠳᠤᠬᠤ ᠶ᠋ᠢᠨ ᠵᠦᠩ ᠪᠣᠢ》 ᠭᠡᠵᠦ ᠪᠣᠳᠣᠪᠠ᠃ ᠴᠠᠭᠠᠰᠢ ᠶᠠᠪᠤᠨ ᠵᠡᠭᠡᠯᠢ ᠳᠡᠭᠡᠷᠡ ᠣᠴᠢᠲᠠᠯᠠ᠂ ᠡᠨᠳᠡ ᠬᠥᠮᠦᠰ ᠪᠤᠰᠤᠳ ᠡᠳᠦᠷ ᠦ᠋ᠳ ᠦ᠋ᠨ ᠯᠡ ᠠᠳᠠᠯᠢ ᠴᠤᠭᠯᠠᠷᠠᠭᠰᠠᠨ ᠪᠠᠢᠭᠠ ᠪᠣᠯᠪᠠᠴᠤ ᠨᠢᠭᠡ ᠯᠡ ᠪᠢᠰᠢ᠂ ᠡᠨᠳᠡ ᠲᠡᠨᠳᠡ ᠦᠭᠡᠢ ᠤᠷᠤᠭᠤ ᠴᠢᠷᠠᠢ ᠲᠠᠢ ᠬᠥᠮᠦᠰ ᠬᠤᠳᠠᠯᠳᠤᠭᠠ ᠮᠠᠢᠮᠠᠢ ᠬᠡᠯᠡᠯᠴᠡᠨ᠂ ᠬᠥᠯ ᠬᠥᠭᠵᠢᠭᠡᠨ ᠪᠣᠯᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠡᠰᠡᠭ ᠪᠦᠯᠦᠭ ᠪᠣᠯᠤᠨ ᠪᠥᠭᠡᠮᠨᠡᠷᠡᠵᠦ ᠰᠢᠪᠠᠷ ᠠᠪᠢᠷ ᠶᠠᠷᠢᠯᠴᠠᠨᠠ᠃ ᠲᠡᠭᠦᠨ ᠢ᠋ ᠶᠠᠪᠤᠭᠤᠲᠠ ᠴᠢᠬᠢ ᠲᠠᠯᠪᠢᠨ ᠴᠢᠩᠨᠠᠬᠤ ᠳ᠋ᠤ᠌᠂《᠁ ᠪᠠᠷᠢᠭᠳᠠᠪᠠ᠁ ᠪᠠᠰᠠ ᠪᠠᠷᠢᠭᠳᠠᠭᠰᠠᠨ᠂ ᠪᠠᠷᠢᠭᠠᠳ ᠯᠠ ᠪᠠᠢᠭᠠ ᠭᠡᠨᠡ!》 ᠭᠡᠬᠦ ᠮᠡᠲᠦ ᠶ᠋ᠢᠨ ᠦᠭᠡᠰ᠂ ᠬᠠᠭᠠᠰ ᠬᠤᠭᠤᠰ ᠰᠣᠨᠣᠰᠤᠭᠳᠠᠬᠤ ᠠᠵᠢ᠃《ᠬᠡᠨ ᠨᠢ ᠬᠡᠨ ᠢ᠋ ᠪᠡᠨ ᠶᠠᠭᠤ ᠪᠣᠯᠤᠯᠠ ᠭᠡᠵᠦ ᠲᠡᠷᠡ ᠪᠣᠢ?》 ᠭᠡᠳᠡᠭ ᠠᠰᠠᠭᠤᠳᠠᠯ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠰᠡᠳᠬᠢᠯ ᠢ᠋ ᠰᠢᠨᠡ ᠪᠡᠷ ᠰᠡᠷᠭᠦᠭᠡᠪᠡ᠃ ᠬᠣᠶᠠᠷ ᠴᠢᠬᠢ ᠪᠡᠨ ᠠᠯᠢ ᠪᠠᠢᠳᠠᠭ ᠢ᠋ᠶ᠋ᠠᠷ ᠨᠢ ᠰᠤᠩᠭᠠᠨ᠂ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠭᠢᠰᠬᠢᠯᠲᠡ ᠶ᠋ᠢ ᠬᠢᠴᠢᠨᠡᠬᠡᠨ ᠠᠭᠠᠵᠢᠷᠠᠭᠤᠯᠪᠠᠴᠤ᠂ ᠤᠭ ᠬᠡᠷᠡᠭ ᠦ᠋ᠨ ᠤᠴᠢᠷ ᠦᠯᠦ ᠣᠯᠳᠠᠬᠤ ᠠᠵᠢ᠃ ᠲᠡᠭᠡᠬᠦ ᠪᠡᠷ ᠪᠠᠯᠳᠠᠨᠴᠡᠷᠢᠩ ᠳᠠᠷᠵᠢᠩ ᠬᠤᠪᠴᠠᠰᠤ ᠲᠠᠢ ᠬᠣᠶᠠᠷ ᠡᠪᠦᠭᠡᠨ ᠳᠡᠭᠡᠷᠡ ᠣᠴᠢᠪᠠ᠃ ᠣᠯᠠᠨ ᠠ᠋ᠴᠠ ᠣᠨᠴᠠᠭᠠᠢ ᠰᠠᠭᠤᠭᠠ ᠲᠡᠷᠡ ᠬᠣᠶᠠᠷ ᠡᠪᠦᠭᠡᠨ ᠮᠥᠨ ᠯᠡ ᠲᠡᠷᠡ ᠬᠡᠷᠡᠭ ᠦ᠋ᠨ ᠲᠤᠬᠠᠢ ᠶᠠᠷᠢᠯᠴᠠᠵᠤ ᠪᠠᠢᠬᠤ ᠠᠵᠢ᠃
— ᠬᠡᠨ ᠪᠠᠷᠢᠭᠳᠠᠭᠠ ᠪᠣᠢ? ᠭᠡᠬᠦ ᠳ᠋ᠦ᠍ ᠡᠪᠦᠭᠡᠳ ᠦ᠋ᠨ ᠨᠢᠭᠡ ᠨᠢ᠄
— ᠮᠠᠨ ᠤ᠋ ᠬᠠᠷᠢᠶᠠ ᠶ᠋ᠢᠨ ᠳᠠᠷᠢ ᠡᠬᠡ ᠯᠠᠮᠠᠲᠠᠨ ᠭᠡᠵᠦ ᠴᠡᠴᠡᠷᠬᠢᠯᠡᠭᠰᠡᠨ ᠬᠣᠭᠣᠯᠠᠢ ᠪᠠᠷ ᠥᠭᠦᠯᠡᠭᠡᠳ᠂ ᠦᠷᠴᠢᠭᠡᠢ ᠨᠢᠳᠦᠨ ᠡᠴᠡ ᠪᠡᠨ ᠨᠢᠯᠪᠤᠰᠤ ᠭᠠᠷᠭᠠᠪᠠ᠃
— ᠬᠡᠨ ᠲᠡᠭᠦᠨ ᠢ᠋ ᠶᠠᠭᠤ ᠪᠣᠯᠤᠭᠠ ᠭᠡᠵᠦ ᠪᠠᠷᠢᠭᠰᠠᠨ ᠬᠡᠷᠡᠭ ᠪᠣᠢ? ᠭᠡᠬᠦ ᠳ᠋ᠦ᠍᠂ ᠬᠣᠶᠠᠳᠠᠬᠢ ᠨᠢ᠄
— ᠮᠠᠭᠤ ᠰᠠᠢᠨ ᠴᠢᠨᠳᠠᠷᠤᠤ ᠨᠤᠭᠤᠳ ᠪᠠᠢᠬᠤ ᠦᠭᠡᠢ ᠤᠤ! ᠭᠡᠵᠦ ᠵᠠᠨᠤᠯᠲᠠᠢ ᠪᠠᠷ ᠥᠭᠦᠯᠡᠨ ᠲᠩᠷᠢ ᠰᠢᠷᠳᠡᠨᠡ᠃ ᠪᠠᠯᠳᠠᠨᠴᠡᠷᠢᠩ᠄《ᠬᠠᠷᠢᠶᠠ ᠶ᠋ᠢᠨ ᠳᠠᠷᠢ ᠡᠬᠡ ᠯᠠᠮᠠ ᠭᠡᠵᠦ ᠬᠡᠨ ᠪᠢᠯᠡ?》 ᠭᠡᠵᠦ ᠪᠣᠳᠣᠨ ᠳᠣᠷᠣᠭᠰᠢ ᠰᠢᠷᠳᠡᠪᠡ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠨᠢᠭᠡ ᠤᠳᠠᠭᠠ ᠳᠠᠭᠠᠷᠢᠯᠳᠤᠨ ᠪᠠᠷᠠ ᠶ᠋ᠢ ᠨᠢ ᠬᠠᠷᠠᠭᠰᠠᠨ ᠤ᠋ ᠬᠤᠪᠢ ᠳ᠋ᠤ᠌᠂ ᠭᠠᠯ ᠤᠯᠠᠭᠠᠨ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠬᠠᠷᠠᠬᠤ ᠨᠢᠳᠦ ᠰᠢᠷᠦᠭᠦᠨ ᠬᠤᠷᠴᠠ᠂ ᠬᠠᠮᠠᠷ ᠲᠣᠮᠣ ᠲᠠᠢ᠂ ᠴᠢᠷᠠᠢ ᠶ᠋ᠢᠨ ᠥᠩᠭᠡ ᠬᠦᠷᠡᠯᠭᠡᠷ ᠬᠦᠷᠡᠩ ᠪᠣᠯᠵᠤ ᠢᠷᠡᠭᠡᠳ ᠰᠦᠷᠡᠬᠡᠢ ᠪᠠᠶᠠᠷ ᠲᠠᠢ ᠪᠠᠢᠬᠤ ᠭᠡᠮᠡᠷ ᠲᠣᠮᠣ ᠪᠡᠶᠡ ᠲᠡᠢ᠂ ᠭᠤᠴᠢ ᠳᠥᠴᠢ ᠬᠣᠶᠠᠷ ᠤ᠋ᠨ ᠬᠣᠭᠣᠷᠣᠨᠳᠣ ᠨᠠᠰᠤᠨ ᠤ᠋ ᠬᠥᠮᠦᠨ ᠰᠠᠨᠠᠭᠠᠨ ᠳ᠋ᠤ᠌ ᠪᠠᠭᠤᠨᠠ᠃ ᠬᠥᠮᠦᠰ ᠦ᠋ᠨ ᠬᠡᠯᠡᠯᠴᠡᠬᠦ ᠪᠡᠷ ᠪᠣᠯ᠄ ᠡᠨᠡ ᠯᠠᠮᠠ ᠨᠠᠢᠷ ᠨᠠᠷᠭᠢᠶᠠᠨ ᠢ᠋ ᠲᠠᠭᠠᠯᠠᠨ ᠠᠷᠢᠬᠢ ᠰᠠᠷᠬᠤᠳ ᠵᠣᠭᠣᠭᠯᠠᠮᠠᠳᠠᠭᠠᠢ᠂ ᠬᠡᠳᠦ ᠵᠣᠭᠣᠭᠯᠠᠨ ᠬᠥᠯᠴᠥᠭᠦᠷᠡᠬᠦ ᠳ᠋ᠡᠭᠡᠨ ᠮᠠᠬᠠᠭᠠᠯᠠ ᠪᠤᠷᠬᠠᠨ ᠤ᠋ ᠳᠦᠷᠢ ᠪᠡᠷ ᠬᠢᠯᠢᠩᠨᠡᠨ ᠭᠠᠢ ᠪᠠᠷᠴᠢᠳ ᠢ᠋ ᠵᠠᠨᠴᠢᠬᠤ᠂ ᠬᠤᠪᠢ ᠵᠠᠶᠠᠭᠠᠳᠠᠨ ᠠᠪᠠᠬᠠᠢ ᠨᠠᠷ ᠢ᠋ ᠴᠦ᠍ ᠮᠥᠨ ᠵᠦᠭᠡᠷ ᠥᠩᠭᠡᠷᠡᠭᠦᠯᠳᠡᠭ ᠦᠭᠡᠢ ᠭᠡᠵᠦ ᠨᠢᠭᠡ ᠲᠠᠯᠠ ᠪᠠᠷ ᠠᠶᠤᠨ ᠰᠦᠷᠳᠡᠨᠡ᠃ ᠨᠥᠭᠦᠭᠡ ᠲᠠᠯᠠ ᠪᠠᠷ ᠮᠡᠷᠭᠡ ᠲᠥᠯᠭᠡ ᠦᠵᠡᠬᠦ᠂ ᠪᠠᠷᠴᠢᠳ ᠢ᠋ ᠦᠯᠢᠶᠡᠨ ᠲᠠᠷᠨᠢᠳᠠᠬᠤ᠂ ᠬᠠᠷᠢᠶᠠᠯ ᠵᠢᠳᠠᠭ ᠢ᠋ ᠬᠠᠷᠢᠭᠤᠯᠬᠤ᠂ ᠳᠣᠭᠰᠢᠨ ᠯᠤᠤᠰ ᠰᠠᠪᠳᠠᠭ ᠢ᠋ ᠨᠣᠮᠣᠬᠠᠳᠬᠠᠬᠤ ᠶᠣᠰᠣᠲᠠᠢ ᠠᠮᠢᠨᠳᠠᠭ ᠪᠤᠷᠬᠠᠨ ᠤ᠋ ᠪᠦᠷᠢᠯᠸᠠ ᠭᠡᠵᠦ ᠱᠠᠭᠰᠢᠨ ᠪᠢᠰᠢᠷᠡᠨᠡ᠃ ᠭᠡᠲᠡᠯᠡ ᠡᠨᠡ ᠬᠥᠮᠦᠨ ᠪᠠᠰᠠ ᠮᠣᠩᠭᠣᠯ ᠪᠢᠴᠢᠭ ᠮᠡᠳᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠬᠤᠪᠢ ᠪᠠᠷ ᠶᠤᠮ ᠤᠤ᠂ ᠡᠰᠡ ᠪᠣᠯ ᠨᠡᠷᠡ ᠠᠯᠳᠠᠷ ᠨᠢ ᠨᠢᠭᠡᠨᠲᠡ ᠳᠡᠭᠡᠷᠡ ᠭᠠᠷᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠦ᠋ᠲ᠋ᠣᠨᠣᠮᠢᠲᠤ ᠶ᠋ᠢᠨ ᠲᠥᠷᠥ ᠶ᠋ᠢ ᠠᠩᠬᠠ ᠪᠠᠢᠭᠤᠯᠬᠤ ᠠ᠋ᠴᠠ ᠡᠬᠢᠯᠡᠨ ᠲᠥᠷᠥ ᠶ᠋ᠢᠨ ᠬᠡᠷᠡᠭ ᠲᠦ᠍ ᠨᠡᠷᠡ ᠣᠷᠣᠯᠴᠠᠨ ᠴᠤᠤᠷᠢᠶᠠᠳᠠᠭᠰᠠᠭᠠᠷ ᠢᠷᠡᠭᠰᠡᠨ ᠠᠵᠢ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ ᠡᠨᠡ ᠬᠥᠮᠦᠨ ᠢ᠋ ᠪᠤᠰᠤᠳ ᠤ᠋ᠨ ᠠᠳᠠᠯᠢ ᠣᠨᠴᠠᠯᠠᠨ ᠦᠵᠡᠵᠦ ᠪᠠᠢᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠴᠦ᠍ ᠬᠤᠪᠢ ᠶ᠋ᠢᠨ ᠡᠷᠬᠡ ᠠᠰᠢᠭ ᠶᠤᠭᠠᠨ ᠡᠯᠳᠡᠪ ᠤᠪ ᠮᠡᠬᠡ ᠪᠡᠷ ᠮᠠᠨᠳᠤᠭᠤᠯᠬᠤ ᠶ᠋ᠢ ᠪᠣᠳᠣᠳᠠᠭ ᠵᠠᠯᠢᠲᠠᠨ ᠨᠤᠭᠤᠳ ᠤ᠋ᠨ ᠨᠢᠭᠡ ᠪᠣᠢ ᠵᠠ ᠭᠡᠵᠦ ᠳᠣᠲᠣᠷᠠ ᠪᠠᠨ ᠦᠯᠦ ᠲᠣᠭᠣᠮᠰᠠᠷᠯᠠᠳᠠᠭ ᠪᠠᠢᠯᠠ᠃ ᠣᠳᠣ ᠪᠣᠯᠬᠤᠯᠠᠷ ᠲᠡᠭᠦᠨ ᠢ᠋ ᠭᠠᠮᠢᠩ ᠤ᠋ᠨ ᠭᠠᠷ ᠲᠤ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠣᠷᠣᠭᠰᠠᠨ ᠤ᠋ ᠬᠢᠨᠢ ᠬᠤᠪᠢ ᠳ᠋ᠤ᠌ ᠭᠣᠣᠯ ᠬᠠᠷᠠᠯᠠᠨ᠂ ᠲᠣᠯᠣᠭᠠᠢ ᠳᠡᠭᠡᠭᠰᠢ ᠲᠡᠳᠡᠨ ᠠᠪᠴᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠪᠠ᠃ ᠲᠡᠭᠡᠭᠡᠳ ᠬᠡᠳᠦᠢ ᠤᠳᠠᠭᠠᠨ ᠭᠠᠵᠠᠷ ᠰᠢᠷᠳᠡᠭᠰᠡᠨ ᠢ᠋ᠶ᠋ᠡᠨ ᠥᠪᠡᠷ ᠢ᠋ᠶ᠋ᠡᠨ ᠡᠰᠡ ᠮᠡᠳᠡᠨᠡ᠃ ᠡᠪᠦᠭᠡᠳ ᠡᠴᠡ ᠬᠡᠵᠢᠶᠡ ᠪᠠᠷᠢᠭᠳᠠᠭᠰᠠᠨ ᠢ᠋ ᠨᠢ ᠠᠰᠠᠭᠤᠬᠤ ᠪᠠᠷ ᠬᠠᠷᠠᠪᠠᠯ ᠲᠡᠳᠡ ᠬᠡᠳᠦᠢᠨ ᠠᠯᠠᠭᠠ ᠪᠣᠯᠵᠠᠢ᠃
ᠡᠨᠳᠡ ᠡᠴᠡ ᠪᠠᠯᠳᠠᠨᠴᠡᠷᠢᠩ ᠰᠠᠨᠠᠭᠠ ᠠᠯᠲᠠᠨ ᠡᠷᠭᠢᠪᠡ᠃ ᠵᠡᠭᠡᠯᠢ ᠶ᠋ᠢᠨ ᠬᠥᠮᠦᠰ ᠮᠥᠨ ᠯᠡ ᠰᠢᠪᠡᠷ ᠠᠪᠢᠷ ᠶᠠᠷᠢᠯᠴᠠᠭᠰᠠᠭᠠᠷ ᠪᠠᠢᠭᠠ ᠰᠢᠭ᠋ ᠦᠵᠡᠭᠳᠡᠨᠡ᠃ ᠲᠡᠷᠡ ᠳᠣᠣᠷᠠ ᠠ᠋ᠴᠠ ᠨᠣᠣᠷᠠᠩᠬᠠᠢ ᠴᠢᠰᠴᠡᠦ ᠳᠡᠪᠡᠯ ᠲᠡᠢ ᠨᠢᠭᠤᠷ ᠴᠢᠷᠠᠢ ᠦᠰᠦ ᠰᠠᠬᠠᠯ ᠨᠢ ᠲᠣᠭᠣᠰᠣ ᠰᠢᠷᠣᠢ ᠬᠣᠶᠠᠷ ᠲᠤ ᠬᠡᠳᠦ ᠳᠠᠷᠤᠭᠳᠠᠭᠰᠠᠨ ᠶᠠᠩᠬᠢᠭᠠᠷ ᠲᠤᠷᠠᠩᠬᠠᠢ ᠬᠥᠮᠦᠨ᠄《ᠲᠠ ᠮᠢᠨᠢ ᠠ᠋᠁》 ᠭᠡᠵᠦ ᠬᠠᠰᠬᠢᠷᠤᠨ ᠠᠢᠰᠤᠢ᠃ ᠬᠥᠮᠦᠰ ᠲᠡᠭᠦᠨ ᠢ᠋ ᠰᠣᠨᠢᠷᠬᠠᠨ ᠵᠦᠭ ᠪᠦᠷᠢ ᠡᠴᠡ ᠤᠭᠲᠤᠨ ᠬᠦᠷᠢᠶᠡᠯᠡᠵᠦ ᠠᠪᠤᠪᠠ᠃ ᠥᠨᠥᠬᠢ ᠬᠥᠮᠦᠨ ᠭᠠᠷ ᠤ᠋ᠨ ᠢ᠋ᠶ᠋ᠠᠨ ᠤᠷᠲᠤ ᠬᠢᠮᠤᠰᠤ ᠲᠠᠢ ᠪᠣᠬᠢᠷ ᠬᠤᠷᠤᠭᠤ ᠨᠤᠭᠤᠳ ᠢ᠋ᠶ᠋ᠠᠨ ᠳᠡᠭᠡᠭᠰᠢ ᠰᠠᠷᠪᠠᠯᠵᠠᠭᠤᠯᠤᠨ᠄
— ᠵᠠᠯᠠᠬᠠᠵᠠ ᠬᠤᠲᠤᠭᠲᠤ ᠪᠠᠷᠢᠭᠳᠠᠭᠰᠠᠨ! ᠭᠡᠵᠦ ᠬᠠᠰᠬᠢᠷᠪᠠ᠃ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠳᠣᠲᠣᠷᠠ ᠫᠠᠯᠬᠢᠨ ᠠᠮᠢᠰᠬᠤᠯ ᠨᠢ ᠳᠠᠭᠵᠢᠷᠠᠪᠠ᠃ ᠥᠨᠥᠬᠢ ᠬᠥᠮᠦᠨ ᠰᠢᠳᠦ ᠬᠠᠪᠢᠷᠤᠨ ᠰᠣᠯᠢᠭᠤ ᠭᠠᠵᠢᠭᠤ ᠭᠢᠰᠬᠢᠯᠡᠬᠦ ᠪᠣᠯᠤᠭᠰᠠᠨ ᠬᠥᠯ ᠳᠡᠭᠡᠷᠡ ᠪᠡᠨ ᠨᠢᠭᠡ ᠦᠶᠡ ᠳᠡᠨᠵᠢᠭᠢᠨᠡᠨ ᠲᠡᠩᠴᠡᠭᠦᠷᠢ ᠪᠡᠨ ᠣᠯᠵᠤ ᠠᠪᠤᠭᠠᠳ᠄
— ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠠᠷᠵᠠᠪ᠂ ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦᠶ᠋ᠷᠦᠩᠲᠡᠨ ᠨᠠᠷ ᠪᠠᠰᠠ ᠪᠠᠷᠢᠭᠳᠠᠭᠰᠠᠨ! ᠭᠡᠵᠦ ᠬᠠᠰᠬᠢᠷᠪᠠ᠃ ᠪᠠᠯᠳᠠᠨᠴᠡᠷᠢᠩ ᠬᠠᠮᠤᠭ ᠰᠡᠳᠬᠢᠯ ᠮᠡᠳᠡᠷᠡᠯ ᠳᠠᠬᠢᠨ ᠬᠠᠷᠠᠩᠭᠤᠢᠯᠠᠵᠤ᠂ ᠨᠢᠭᠡ ᠦᠶᠡ ᠣᠷᠴᠢᠨ ᠤ᠋ ᠶᠠᠭᠤᠮᠠ ᠣᠷᠣ ᠲᠠᠰᠤ ᠦᠵᠡᠭᠳᠡᠬᠦ ᠦᠭᠡᠢ ᠪᠣᠯᠪᠠ᠃ ᠠᠯᠪᠠᠨ ᠬᠦᠴᠦ ᠪᠡᠷ ᠠᠮᠢᠰᠬᠤᠯ ᠠᠪᠤᠨ ᠨᠢᠳᠦᠨ ᠳ᠋ᠡᠭᠡᠨ ᠬᠤᠷᠠᠯᠳᠤᠭᠰᠠᠨ ᠬᠡᠰᠡᠭ ᠨᠢᠯᠪᠤᠰᠤ ᠶ᠋ᠢ ᠰᠢᠪᠬᠠᠨ ᠬᠠᠷᠠᠬᠤ ᠳ᠋ᠤ᠌ ᠥᠨᠥᠬᠢ ᠬᠥᠮᠦᠨ᠂ ᠬᠡᠳᠦ ᠠᠩᠭᠠᠢᠭᠰᠠᠨ ᠠᠮᠠ ᠪᠠᠨ ᠬᠠᠮᠬᠢᠨ ᠤᠷᠤᠭᠤᠯ ᠵᠢᠮᠢᠢᠬᠦ ᠶ᠋ᠢ ᠣᠷᠣᠯᠳᠣᠭᠰᠠᠨ ᠢ᠋ᠶ᠋ᠠᠨ ᠡᠰᠡ ᠴᠢᠳᠠᠨ ᠭᠠᠵᠠᠷ ᠨᠢᠯᠪᠤᠵᠤ᠄
— ᠲᠠ ᠮᠢᠨᠢ ᠠᠯᠠᠯᠴᠠᠶᠠ! ᠡᠨᠡ ᠮᠠᠭᠤ ᠰᠠᠢᠨ ᠴᠢᠨᠳᠠᠷᠤᠤ ᠨᠤᠭᠤᠳ ᠢ᠋ ᠵᠠᠬᠠ ᠠ᠋ᠴᠠ ᠠᠪᠤᠨ ᠬᠢᠳᠤᠶᠠ! ᠭᠡᠬᠦ ᠳ᠋ᠦ᠍᠂
ᠬᠠᠵᠠᠭᠤ ᠳ᠋ᠤ᠌ ᠨᠢᠭᠡ ᠬᠥᠮᠦᠨ᠄ ᠲᠠ ᠮᠢᠨᠢ ᠡᠨᠡ ᠴᠢᠨᠢ ᠭᠠᠯᠵᠠᠭᠤ ᠶᠠᠭᠤᠮᠠ ᠰᠢᠭ᠋ ᠪᠣᠢ? ᠭᠡᠬᠦ ᠰᠣᠨᠣᠰᠳᠠᠨᠠ᠃ ᠥᠭᠡᠷᠡ ᠨᠢᠭᠡ ᠬᠥᠮᠦᠨ ᠥᠨᠥᠬᠢ ᠶ᠋ᠢᠨ ᠡᠮᠦᠨᠡ ᠣᠴᠢᠨ᠄
— ᠪᠠᠭᠠᠲᠤᠷ ᠭᠤᠸᠠᠢ᠂ ᠲᠠ ᠲᠤᠩ ᠠᠢᠬᠤᠪᠲᠤᠷ ᠰᠣᠭᠲᠣᠵᠤ ᠰᠢᠦ! ᠣᠳᠣ ᠢᠩᠭᠢᠵᠦ ᠶᠠᠪᠤᠬᠤ ᠬᠡᠷᠡᠭ ᠦᠭᠡᠢ᠂ ᠵᠦᠭᠡᠷ ᠭᠡᠷ ᠲᠡᠭᠡᠨ ᠬᠠᠷᠢᠵᠤ ᠠᠮᠠᠷᠠ! ᠭᠡᠳ ᠰᠤᠭᠤᠳᠠᠨ ᠠᠪᠴᠤ ᠣᠯᠠᠨ ᠠ᠋ᠴᠠ ᠵᠠᠢᠯᠠᠭᠤᠯᠬᠤ ᠶ᠋ᠢ ᠣᠷᠣᠯᠳᠣᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠥᠨᠥᠬᠢ ᠬᠥᠮᠦᠨ ᠦ᠌ ᠨᠢᠳᠦ ᠰᠡᠷᠭᠦᠨ᠄
— ᠵᠠ ᠲᠡᠢᠮᠦ᠂ ᠪᠢ ᠪᠣᠯ ᠪᠠᠭᠠᠲᠤᠷ ᠬᠥᠮᠦᠨ! ᠲᠣᠭᠣᠷᠢᠨ ᠵᠣᠭᠰᠣᠭᠰᠠᠳ ᠢ᠋ ᠢᠨᠢᠶᠡᠨ ᠰᠢᠷᠳᠡᠭᠡᠳ᠄ ᠵᠠ ᠲᠠ ᠮᠢᠨᠢ ᠪᠣᠰᠤᠶᠠ᠂ ᠠᠯᠠᠯᠴᠠᠶᠠ! ᠪᠢᠳᠡᠨ ᠢ᠋ ᠫᠤᠤ ᠶ᠋ᠢᠨ ᠰᠤᠮᠤ ᠳᠠᠭᠠᠭᠠᠬᠤ ᠦᠭᠡᠢ᠂ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠬᠠᠮᠠᠭᠠᠯᠠᠨᠠ᠃
ᠬᠥᠮᠦᠰ ᠦᠭᠡ ᠳᠠᠭᠤ ᠦᠭᠡᠢ ᠪᠠᠢᠯᠠ᠃
— ᠲᠠ ᠮᠢᠨᠢ᠂ ᠲᠠ ᠨᠠᠷ ᠶᠠᠭᠠᠬᠢᠭᠠᠳ ᠳᠠᠭᠤ ᠦᠭᠡᠢ ᠪᠠᠢᠨᠠ ᠪᠣᠢ᠃ ᠠᠯᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠨᠠ ᠤᠤ? ᠡᠰᠡ ᠪᠣᠯ ᠲᠠ ᠨᠠᠷ ᠰᠢᠷᠠ ᠱᠠᠨᠵᠠᠪ ᠪᠠᠳᠮᠠᠳᠣᠷᠵᠢ ᠲᠠᠢ ᠰᠠᠨᠠᠯ ᠨᠢᠭᠡᠳᠦᠨ ᠤᠯᠤᠰ ᠣᠷᠣᠨ ᠢ᠋ᠶ᠋ᠠᠨ ᠬᠤᠳᠠᠯᠳᠤᠭᠰᠠᠨ ᠤᠯᠤᠰ ᠤᠤ?
ᠬᠥᠮᠦᠰ ᠮᠥᠨ ᠳᠠᠭᠤ ᠦᠭᠡᠢ᠂ ᠥᠨᠥᠬᠢ ᠰᠣᠭᠲᠣᠭᠤ ᠠᠭᠤᠷᠯᠠᠪᠠ᠃
— ᠲᠡᠢᠮᠦ ᠪᠠᠢᠯᠭᠦᠢ᠂ ᠰᠦᠨᠡᠰᠦ ᠪᠡᠨ ᠠᠯᠳᠠᠭᠰᠠᠨ ᠬᠠᠷᠠ ᠨᠣᠬᠠᠳ! ᠤᠳᠠᠬᠤ ᠦᠭᠡᠢ ᠲᠡᠷᠡ ᠴᠢᠨᠳᠠᠷᠤᠤ ᠨᠤᠭᠤᠳ ᠲᠠᠢ ᠪᠠᠨ ᠴᠣᠭ ᠦᠨᠡᠰᠦᠨ ᠴᠢᠨᠳᠠᠷᠤᠤ ᠪᠣᠯᠤᠨ ᠲᠣᠨᠢᠯᠬᠤ ᠪᠠᠨ ᠮᠡᠳᠡᠵᠦ ᠪᠠᠢᠨᠠ ᠤᠤ? ᠮᠢᠨᠦ ᠵᠠᠩᠵᠤᠨ ᠬᠠᠳᠠᠨ ᠪᠠᠭᠠᠲᠤᠷ ᠡᠭᠡᠯ ᠬᠥᠮᠦᠨ ᠪᠢᠰᠢ᠂ ᠲᠠᠨ ᠤ᠋ ᠲᠡᠷᠡ ᠭᠠᠮᠢᠩ ᠤ᠋ᠨ ᠱᠣᠷᠣᠩ ᠳ᠋ᠤ᠌ ᠲᠣᠭᠲᠠᠬᠤ ᠦᠭᠡᠢ᠂ ᠬᠡᠮᠬᠡ ᠢᠰᠬᠦᠯᠦᠨ ᠵᠠᠳᠠ ᠳᠠᠭᠠᠷᠢᠨ ᠭᠠᠷᠤᠨᠠ᠃ ᠬᠠᠷᠠᠭᠠᠷᠠᠢ! ᠠᠭᠤᠷ ᠬᠢᠯᠢᠩ ᠨᠢ ᠪᠠᠳᠠᠷᠠᠨ ᠬᠠᠨᠴᠤᠢ ᠰᠢᠮᠡᠯᠡᠵᠦ᠂ ᠬᠠᠷᠢᠶᠠᠯ ᠵᠦᠬᠡᠯ ᠦ᠋ᠨ ᠤᠯᠠᠮ ᠢ᠋ᠶ᠋ᠠᠷ ᠲᠣᠩᠭᠣᠴᠠᠵᠤ ᠭᠠᠷᠪᠠ᠃ ᠬᠥᠮᠦᠰ ᠮᠥᠨ ᠯᠡ ᠳᠠᠭᠤ ᠦᠭᠡᠢ᠂ ᠪᠣᠳᠣᠬᠤ ᠰᠣᠨᠢᠷᠬᠠᠬᠤ ᠬᠣᠶᠠᠷ ᠢ᠋ ᠡᠭᠡᠯᠵᠢᠯᠡᠭᠦᠯᠦᠨ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠭᠡᠨᠡᠳᠲᠡ ᠵᠠᠬᠠ ᠠ᠋ᠴᠠ ᠪᠠᠨ ᠳᠠᠷᠬᠠᠨ ᠪᠤᠲᠠᠷᠠᠵᠤ ᠡᠬᠢᠯᠡᠪᠡ᠃ ᠬᠡᠳᠦᠢ ᠳ᠋ᠦ᠍ ᠢᠷᠡᠭᠰᠡᠨ ᠢ᠋ ᠬᠡᠨ ᠮᠡᠳᠡᠯᠡ᠂ ᠬᠤᠪᠢᠩ ᠬᠡᠯᠪᠡᠷᠢ ᠶ᠋ᠢᠨ ᠳᠤᠭᠤᠢ ᠰᠠᠷᠠᠯ ᠮᠠᠯᠠᠭᠠᠢ ᠳᠡᠭᠡᠷᠡ ᠪᠡᠨ ᠴᠢᠭ ᠥᠭᠡᠳᠡ ᠭᠣᠵᠣᠢᠭᠰᠠᠨ ᠴᠢᠨᠳᠠᠭᠠᠨ ᠴᠠᠭᠠᠨ ᠤᠲᠤᠭᠠ ᠲᠠᠢ ᠭᠠᠮᠢᠩ ᠨᠣᠶᠠᠨ ᠲᠠᠰᠢᠶᠠᠨ ᠳ᠋ᠠᠭᠠᠨ ᠵᠡᠭᠦᠭᠰᠡᠨ ᠬᠢᠯᠠᠩ ᠴᠠᠭᠠᠨ ᠰᠡᠯᠡᠮᠡ ᠶ᠋ᠢᠨ ᠪᠠᠷᠢᠭᠤᠯ ᠢ᠋ ᠲᠠᠪᠤᠨ ᠬᠤᠷᠤᠭᠤᠨ ᠤ᠋ ᠪᠡᠭᠡᠯᠡᠢ ᠲᠡᠢ ᠭᠠᠷ ᠢ᠋ᠶ᠋ᠠᠷ ᠪᠠᠷᠢᠨ ᠵᠣᠭᠰᠣᠵᠤ ᠪᠠᠢᠪᠠ᠃ ᠬᠠᠵᠠᠭᠤ ᠳ᠋ᠤᠨᠢ ᠬᠡᠯᠡᠮᠦᠷᠴᠢ ᠪᠠᠢᠭᠠ ᠪᠥᠭᠡᠳ ᠬᠡᠯᠡᠮᠦᠷᠴᠢ ᠶ᠋ᠢᠨ ᠦᠭᠡ ᠬᠡᠯᠡᠬᠦ ᠶ᠋ᠢ ᠨᠣᠶᠠᠨ᠂ ᠲᠣᠯᠣᠭᠠᠢ ᠪᠠᠨ ᠵᠢᠭᠠᠬᠠᠨ ᠬᠠᠵᠠᠢᠯᠭᠠᠨ ᠴᠢᠩᠨᠠᠵᠤ᠂ ᠠᠭᠰᠤᠮᠨᠠᠨ ᠬᠠᠰᠬᠢᠷᠴᠤ ᠪᠠᠢᠭᠠ ᠰᠣᠭᠲᠣᠭᠤ ᠶ᠋ᠢ ᠬᠠᠷᠠᠭᠠ ᠰᠠᠯᠭᠠᠯ ᠦᠭᠡᠢ ᠰᠢᠷᠲᠡᠨᠡ᠃ ᠠᠷᠤ ᠳ᠋ᠤᠨᠢ ᠬᠣᠶᠠᠷ ᠭᠠᠮᠢᠩ ᠪᠡᠶᠡ ᠪᠡᠨ ᠴᠢᠩᠭᠠ ᠪᠠᠷᠢᠨ ᠵᠣᠭᠰᠣᠨᠠ᠃ ᠡᠢᠮᠦ ᠳ᠋ᠦ᠍ ᠲᠡᠳᠡᠨ ᠢ᠋ ᠬᠠᠷᠠᠭᠰᠠᠨ ᠪᠦᠬᠦᠨ ᠦ᠌ ᠨᠢᠷᠤᠭᠤ ᠤᠷᠤᠭᠤ ᠬᠦᠢᠲᠡᠨ ᠣᠷᠣᠬᠤ ᠪᠣᠯᠤᠯᠲᠠᠢ᠂ ᠴᠡᠭᠡᠵᠢ ᠳᠠᠷᠤᠨ ᠨᠠᠪᠲᠠᠰᠬᠢᠨ ᠰᠠᠮ ᠵᠠᠢᠯᠠᠨ ᠵᠢᠭᠤᠲᠠᠨᠠ᠃
ᠨᠣᠶᠠᠨ ᠳᠠᠭᠠᠯᠲᠠ ᠰᠡᠯᠲᠡ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠠᠯᠭᠤᠷ ᠭᠢᠰᠬᠢᠯᠡᠨ ᠣᠷᠣᠭᠰᠢ ᠳᠠᠪᠰᠢᠪᠠ᠃ ᠥᠨᠥᠬᠢ ᠰᠣᠭᠲᠣᠭᠤ ᠠᠵᠢᠭ ᠦᠭᠡᠢ ᠬᠡᠪ ᠢ᠋ᠶ᠋ᠡᠷ᠂ ᠳᠠᠯᠠᠨ ᠳᠣᠯᠣᠭᠠᠨ ᠶᠠᠭᠤᠮᠠ ᠪᠠᠨ ᠬᠠᠰᠬᠢᠷᠤᠭᠰᠠᠭᠠᠷ ᠪᠠᠢᠪᠠ᠃ ᠲᠡᠳᠡᠨ ᠢ᠋ ᠪᠦᠷ ᠡᠮᠦᠨᠡ ᠨᠢ ᠲᠤᠯᠤᠨ ᠣᠴᠢᠬᠤ ᠳ᠋ᠤ᠌ ᠭᠡᠨᠡᠳᠲᠡ ᠬᠠᠷᠠᠨ᠂
— ᠠ ᠵᠡᠪᠬᠡᠢ! ᠤᠤᠯᠭᠠ ᠠᠯᠲᠠᠨ ᠬᠣᠢᠰᠢ ᠤᠬᠤᠷᠢᠪᠠ᠃ ᠭᠡᠪᠡᠴᠦ ᠳᠠᠷᠤᠢ ᠠᠭᠤᠷ ᠣᠮᠣᠭ ᠨᠢ ᠰᠢᠲᠠᠬᠤ ᠠᠵᠢ᠃
— ᠴᠢᠨᠳᠠᠷᠤᠤ ᠴᠢ ᠶᠠᠭᠤᠨ ᠳ᠋ᠤ᠌ ᠨᠢᠭᠤᠷ ᠤᠷᠤᠭᠤ ᠮᠢᠨᠢ ᠬᠢᠯᠠᠮ ᠬᠢᠯᠠᠮ ᠰᠢᠷᠲᠡᠨᠡ ᠪᠣᠢ ᠭᠡᠳ ᠰᠢᠲᠦ ᠬᠠᠪᠢᠷᠤᠨ ᠲᠤᠯᠤᠨ ᠣᠴᠢᠭᠰᠠᠨ ᠢ᠋ᠶ᠋ᠠᠨ᠄
— ᠬᠤᠷᠠᠢ ᠲᠠ ᠮᠢᠨᠢ ᠡᠨᠡ ᠴᠢᠨᠳᠠᠷᠤᠤ ᠶ᠋ᠢ ᠠᠯᠠᠶᠠ! ᠭᠡᠵᠦ ᠬᠠᠷᠠ ᠲᠡᠩᠬᠡᠭᠡ ᠪᠡᠷ ᠢ᠋ᠶ᠋ᠡᠨ ᠬᠠᠰᠬᠢᠷᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠨᠣᠶᠠᠨ᠄ ᠵᠢᠦ ᠪᠠ! ᠭᠡᠵᠦ ᠬᠠᠰᠬᠢᠷᠪᠠ᠃
《ᠵᠢᠦ ᠪᠠ》 ᠭᠡᠵᠦ ᠶᠠᠭᠤ ᠪᠣᠢ? ᠡᠭᠦᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠡᠴᠡ ᠥᠭᠡᠷᠡ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠬᠥᠮᠦᠨ ᠦᠭᠡᠢ ᠪᠠᠢᠭᠠ ᠪᠣᠯᠪᠠᠴᠤ ᠬᠣᠶᠠᠷ ᠭᠠᠮᠢᠩ ᠤ᠋ᠨ ᠤᠷᠤᠭᠰᠢ ᠳᠡᠪᠰᠢᠯᠲᠡ ᠡᠴᠡ ᠰᠡᠩᠳᠡ ᠮᠡᠩᠳᠡ ᠵᠢᠭᠤᠲᠠᠵᠤ᠂ ᠬᠠᠷᠢᠨ ᠪᠠᠯᠳᠠᠨᠴᠡᠷᠢᠩ ᠭᠠᠭᠴᠠᠭᠠᠷ ᠦᠯᠡᠳᠡᠪᠡ᠃ ᠰᠣᠭᠲᠣᠭᠤ ᠬᠥᠮᠦᠨ ᠭᠠᠮᠢᠩ ᠤ᠋ᠳ ᠲᠠᠢ ᠰᠢᠢᠳᠮᠡᠭᠡᠢ ᠪᠡᠷ ᠪᠠᠷᠢᠯᠴᠠᠨ ᠠᠪᠤᠪᠠ᠃ ᠲᠦᠷᠦᠭᠦᠯᠡᠨ ᠢᠷᠡᠭᠰᠡᠨ ᠢ᠋ ᠭᠠᠵᠠᠷ ᠭᠤᠶᠠᠳᠠᠨ ᠬᠠᠶᠠᠭᠰᠠᠨ ᠢ᠋ᠶ᠋ᠠᠨ᠂ ᠶᠠᠩᠬᠢᠭᠠᠷ ᠴᠡᠭᠡᠵᠢ ᠪᠡᠨ ᠲᠡᠳᠡᠨ ᠠᠪᠴᠤ ᠴᠢᠳᠠᠯ ᠦᠭᠡᠢ ᠳᠡᠭᠡᠷᠡ ᠡᠴᠡ ᠨᠢ ᠳᠠᠷᠤᠨ ᠤᠨᠠᠭᠠᠳ᠂ ᠬᠣᠶᠠᠳᠠᠬᠢ ᠭᠠᠮᠢᠩ ᠤ᠋ᠨ ᠪᠠᠷᠢᠨ ᠠᠪᠬᠤ ᠳ᠋ᠤ᠌《ᠠ ᠬᠠᠷᠠ ᠬᠤᠮᠬᠤᠷᠤᠤᠰᠤ ᠨᠤᠭᠤᠳ ᠠ᠋!》 ᠭᠡᠵᠦ ᠬᠠᠷᠢᠶᠠᠯ ᠲᠠᠯᠪᠢᠨ᠂ ᠠᠷᠤ ᠥᠪᠥᠷ ᠬᠣᠶᠠᠷ ᠲᠠᠭᠠᠨ ᠬᠣᠶᠠᠷ ᠭᠠᠮᠢᠩ ᠲᠠᠢ ᠪᠣᠯᠤᠨ ᠪᠣᠰᠪᠠ᠃ ᠳᠡᠭᠡᠷᠡ ᠨᠢ ᠬᠡᠯᠡᠮᠦᠷᠴᠢ ᠨᠡᠮᠡᠭᠳᠡᠯᠡ᠃ ᠲᠡᠳᠡᠨ ᠭᠤᠳᠤᠮᠵᠢᠨ ᠳ᠋ᠤ᠌ ᠴᠢᠰᠤ ᠤᠷᠤᠰᠬᠠᠬᠤ ᠶ᠋ᠢ ᠦᠯᠦ ᠬᠢᠴᠢᠶᠡᠬᠦ ᠳ᠋ᠡᠭᠡᠨ ᠵᠠᠷ ᠵᠡᠪᠰᠡᠭ ᠢ᠋ᠶ᠋ᠡᠨ ᠭᠠᠵᠠᠷ ᠲᠠᠯᠪᠢᠭᠰᠠᠨ ᠪᠥᠭᠡᠳ ᠨᠢᠭᠡ ᠰᠣᠭᠲᠣᠭᠤ ᠲᠠᠢ ᠭᠤᠷᠪᠠᠭᠤᠯᠠ ᠨᠣᠴᠣᠯᠳᠤᠬᠤ ᠪᠣᠯᠪᠠᠴᠤ ᠨᠡᠮᠡᠷᠢ ᠠᠯᠠᠭᠠ᠂ ᠭᠠᠵᠠᠷ ᠥᠩᠬᠥᠷᠢᠨ ᠵᠢᠭᠤᠷᠠᠯᠳᠤᠵᠤ ᠥᠯᠥᠨ ᠰᠢᠷᠣᠢ ᠪᠤᠵᠢᠭᠢᠨᠠᠭᠤᠯᠤᠨᠠ᠃ ᠮᠠᠨ ᠤ᠋ ᠰᠣᠭᠲᠣᠭᠤ ᠨᠢᠭᠡ ᠤᠳᠠᠭᠠ ᠪᠦᠭᠦᠳᠡ ᠶ᠋ᠢᠨ ᠳᠣᠣᠷᠠ ᠣᠷᠣᠭᠰᠠᠨ ᠢ᠋ᠶ᠋ᠠᠨ᠄
— ᠠ ᠪᠣᠭᠳᠠ ᠶ᠋ᠢᠨ ᠰᠠᠬᠢᠭᠤᠰᠤ ᠠ᠋! ᠭᠡᠵᠦ ᠮᠠᠭᠤᠬᠠᠢ ᠳᠠᠭᠤ ᠪᠠᠷ ᠬᠠᠰᠬᠢᠷᠬᠤ ᠳ᠋ᠠᠭᠠᠨ ᠪᠣᠰᠤᠨ ᠬᠠᠷᠠᠢᠵᠤ᠂ ᠬᠣᠶᠠᠷ ᠢ᠋ ᠨᠢ ᠳᠣᠣᠷᠠ ᠪᠠᠨ ᠬᠢᠪᠡ᠂ ᠳᠠᠬᠢᠭᠠᠳ ᠯᠠ ᠳᠣᠣᠷᠠ ᠨᠢ ᠣᠷᠣᠨᠠ᠃ ᠬᠣᠶᠠᠳᠠᠬᠢ ᠳᠡᠭᠡᠷᠡ ᠪᠡᠨ᠂
— ᠠ ᠳᠠᠮᠳᠢᠨ ᠴᠣᠢᠵᠢ ᠶ᠋ᠢᠨ ᠰᠠᠬᠢᠭᠤᠰᠤ ᠠ᠋! ᠭᠡᠵᠦ ᠬᠠᠰᠬᠢᠷᠬᠤ ᠳ᠋ᠠᠭᠠᠨ ᠭᠤᠷᠪᠠᠨ ᠬᠥᠮᠦᠨ ᠢ᠋ ᠭᠤᠷᠪᠠᠨ ᠲᠡᠢᠰᠢ ᠥᠰᠥᠷᠬᠡᠨ ᠪᠣᠰᠪᠠ᠃ ᠭᠡᠪᠡᠴᠦ ᠨᠡᠮᠡᠷᠢ ᠠᠯᠠᠭᠠ ᠥᠪᠡᠷ ᠢ᠋ᠶ᠋ᠡᠨ ᠬᠥᠯ ᠠᠯᠲᠠᠨ ᠭᠡᠳᠡᠷᠭᠦ ᠪᠡᠨ ᠰᠠᠪᠠᠨ ᠤᠨᠠᠨᠠ᠃ ᠭᠠᠮᠢᠩ ᠳᠠᠷᠤᠭᠠ ᠬᠠᠵᠠᠭᠤ ᠳ᠋ᠤᠨᠢ᠂ ᠵᠡᠭᠦᠨ ᠭᠠᠷ ᠲᠠᠭᠠᠨ ᠰᠡᠯᠡᠮᠡ ᠶ᠋ᠢᠨ ᠢ᠋ᠶ᠋ᠡᠨ ᠪᠠᠷᠢᠭᠤᠯ ᠢ᠋ ᠪᠠᠷᠢᠭᠰᠠᠨ ᠬᠡᠪ ᠢ᠋ᠶ᠋ᠡᠷ᠂ ᠬᠥᠯ ᠠᠯᠴᠠᠢᠯᠭᠠᠨ ᠠᠵᠢᠭᠯᠠᠨᠠ᠃ ᠵᠠᠭᠤᠷᠠ ᠵᠠᠭᠤᠷᠠ ᠢᠨᠢᠶᠡᠮᠰᠦᠭᠯᠡᠬᠦ ᠶ᠋ᠢ ᠦᠵᠡᠬᠦ ᠳ᠋ᠦ᠍᠂ ᠡᠨᠡ ᠨᠣᠴᠣᠯᠳᠤᠭᠠᠨ ᠢ᠋ ᠠᠭᠤᠷ ᠬᠢᠯᠢᠩ ᠢ᠋ᠶ᠋ᠡᠷ ᠪᠢᠰᠢ᠂ ᠠᠯᠢᠶᠠ ᠨᠠᠭᠠᠳᠤᠮ ᠤ᠋ᠨ ᠴᠢᠷᠠᠢ ᠪᠠᠷ ᠦᠵᠡᠵᠦ ᠪᠠᠢᠭᠠ ᠨᠢ ᠢᠯᠡᠷᠬᠡᠢ᠃
ᠬᠡᠰᠡᠭ ᠭᠠᠮᠢᠩ ᠭᠦᠶᠦᠯᠳᠦᠨ ᠢᠷᠡᠵᠦ ᠬᠦᠴᠦ ᠨᠡᠮᠡᠪᠡ᠃ ᠭᠠᠭᠴᠠ ᠰᠣᠭᠲᠣᠭᠤ ᠶ᠋ᠢᠨ ᠮᠥᠴᠢ ᠪᠣᠯᠭᠠᠨ ᠳ᠋ᠤ᠌ ᠨᠢᠭᠡ ᠬᠥᠮᠦᠨ ᠣᠨᠣᠭᠳᠠᠭᠠᠳ ᠴᠠᠭᠠᠨᠠ ᠨᠢ ᠬᠣᠶᠠᠷ ᠬᠥᠮᠦᠨ ᠢᠯᠡᠭᠦᠦ ᠭᠠᠷᠤᠨᠠ᠃ ᠮᠠᠨ ᠤ᠋ ᠰᠣᠭᠲᠣᠭᠤ ᠨᠢᠭᠡ ᠬᠡᠰᠡᠭ᠄《ᠢᠷᠡ ᠬᠤᠷᠠᠢ!》 ᠭᠡᠵᠦ ᠬᠠᠰᠬᠢᠷᠤᠨ ᠪᠦᠬᠦ ᠬᠥᠳᠡᠯᠳᠡᠭ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠵᠡᠯᠴᠡᠭᠡᠳ ᠡᠴᠦᠰ ᠲᠦ᠋ᠨᠢ ᠳᠥᠷᠪᠡᠨ ᠮᠥᠴᠢ ᠪᠡᠷ ᠢ᠋ᠶ᠋ᠡᠨ ᠳᠠᠮᠵᠢᠯᠠᠭᠳᠠᠨ ᠶᠠᠪᠤᠬᠤ ᠳ᠋ᠠᠭᠠᠨ᠄
— ᠵᠠ ᠭᠠᠢᠭᠤᠢ᠂ ᠡᠭᠡᠵᠦ ᠲᠥᠷᠥᠭᠡᠳ ᠳᠠᠬᠢᠨ ᠦᠵᠡᠯᠴᠡᠨᠡ ᠳᠡ ᠭᠡᠵᠦ ᠰᠡᠳᠬᠢᠯ ᠪᠦᠷᠢᠮᠦᠰᠦᠨ ᠠᠮᠠᠷᠠᠭᠰᠠᠨ ᠪᠠᠢᠳᠠᠯ ᠢ᠋ᠶ᠋ᠠᠷ ᠥᠭᠦᠯᠡᠬᠦ ᠰᠣᠨᠣᠰᠳᠠᠪᠠ᠃
ᠪᠠᠯᠳᠠᠨᠴᠡᠷᠢᠩ ᠴᠦ᠍ ᠡᠨᠳᠡ ᠡᠴᠡ ᠶᠠᠪᠤᠯᠠ᠃ ᠲᠡᠭᠡᠬᠦ ᠳ᠋ᠡᠭᠡᠨ ᠭᠡᠷ ᠦ᠋ᠨ ᠵᠦᠭ ᠪᠢᠰᠢ᠂ ᠬᠣᠶᠠᠷ ᠬᠥᠯ ᠦ᠋ᠨ ᠢ᠋ᠶ᠋ᠡᠨ ᠬᠠᠨᠳᠤᠭᠰᠠᠨ ᠵᠦᠭ ᠢ᠋ ᠪᠠᠷᠢᠨ ᠳᠡᠮᠡᠢ ᠰᠠᠵᠢᠯᠠᠨᠠ᠃ ᠰᠡᠳᠬᠢᠯ ᠳ᠋ᠦ᠍ᠨᠢ ᠰᠠᠶᠢ ᠶ᠋ᠢᠨ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠨ ᠦ᠌ ᠶᠡᠷᠦ ᠪᠢᠰᠢ ᠶ᠋ᠢᠨ ᠨᠢᠭᠤᠷ ᠴᠢᠷᠠᠢ ᠡᠷᠭᠢᠯᠳᠦᠨ ᠦᠵᠡᠭᠳᠡᠵᠦ ᠪᠠᠢᠯᠠ᠃ ᠳᠣᠷᠣᠭᠰᠢ ᠤᠨᠠᠭᠠᠭᠰᠠᠨ ᠲᠣᠯᠣᠭᠠᠢ ᠪᠠᠨ ᠳᠡᠭᠡᠭᠰᠢ ᠲᠠᠲᠠᠬᠤ ᠳ᠋ᠤ᠌᠂ ᠨᠠᠷᠠ ᠶᠠᠭᠤ ᠶᠠᠭᠤ ᠦᠭᠡᠢ ᠵᠢᠷᠭᠠᠬᠤ ᠭᠡᠵᠦ ᠪᠠᠢᠬᠤ ᠪᠥᠭᠡᠳ ᠡᠨᠡ ᠨᠢ ᠮᠥᠨ ᠯᠡ ᠰᠠᠶᠢ ᠶ᠋ᠢᠨ ᠡᠷᠡ ᠶ᠋ᠢ ᠪᠣᠳᠣᠭᠳᠠᠭᠤᠯᠤᠨᠠ᠃ ᠲᠡᠭᠦᠨ ᠦ᠌ ᠬᠤᠪᠢ ᠵᠠᠶᠠᠭᠠ ᠡᠨᠡ ᠵᠢᠷᠭᠠᠬᠤ ᠨᠠᠷᠠᠨ ᠤ᠋ ᠠᠳᠠᠯᠢ ᠪᠣᠯᠬᠤ ᠠ᠋ᠴᠠ ᠥᠭᠡᠷᠡ ᠵᠠᠮ ᠪᠠᠢᠨᠠ ᠤᠤ? ᠭᠡᠵᠦ ᠭᠤᠨᠢᠭᠲᠠᠶᠠ ᠰᠠᠨᠠᠪᠠ᠃ ᠭᠡᠲᠡᠯᠡ ᠬᠠᠳᠠᠨ ᠪᠠᠭᠠᠲᠤᠷ ᠮᠠᠭᠰᠠᠷᠵᠠᠪ᠂ ᠮᠠᠩᠯᠠᠢ ᠸᠠᠩ ᠳᠠᠮᠳᠢᠨᠰᠦ᠋ᠷᠦᠩ ᠨᠠᠷ ᠤ᠋ᠨ ᠶᠠᠪᠤᠳᠠᠯ ᠰᠠᠨᠠᠭᠠᠨ ᠳ᠋ᠤ᠌ ᠣᠷᠣᠪᠠ᠃
ᠮᠠᠭᠰᠠᠷᠵᠠᠪ ᠪᠣᠯ ᠠᠦ᠋ᠲ᠋ᠣᠨᠣᠮᠢᠲᠤ ᠵᠠᠰᠠᠭ ᠢ᠋ ᠪᠠᠢᠭᠤᠯᠬᠤ ᠶ᠋ᠢᠨ ᠡᠮᠦᠨᠡ ᠡᠴᠡ ᠴᠡᠷᠢᠭ ᠳᠠᠭᠠᠭᠠᠨ᠂ ᠮᠠᠨᠵᠤ ᠬᠢᠲᠠᠳ ᠤ᠋ᠨ ᠡᠰᠡᠷᠭᠦ ᠪᠠᠢᠯᠳᠤᠨ ᠭᠠᠢᠬᠠᠮᠰᠢᠭᠲᠤ ᠢᠯᠠᠯᠲᠠ ᠨᠤᠭᠤᠳ ᠢ᠋ ᠪᠠᠢᠭᠤᠯᠤᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠠᠷᠠᠳ ᠲᠦᠮᠡᠨ ᠳ᠋ᠦ᠍ ᠬᠠᠢᠷᠠᠯᠠᠭᠳᠠᠭᠰᠠᠨ ᠬᠥᠮᠦᠨ᠃ ᠳᠠᠮᠳᠢᠨᠰᠦ᠋ᠷᠦᠩ ᠨᠢ ᠪᠠᠷᠭᠤ ᠬᠥᠮᠦᠨ᠂ ᠪᠦᠷ ᠳᠡᠭᠡᠷᠡ ᠴᠠᠭ ᠠ᠋ᠴᠠ ᠮᠠᠨᠵᠤ ᠶ᠋ᠢᠨ ᠡᠰᠡᠷᠭᠦ ᠬᠥᠳᠡᠯᠦᠨ ᠲᠡᠮᠡᠴᠡᠭᠴᠢ ᠪᠥᠭᠡᠳ ᠡᠴᠦᠰ ᠲᠦ᠋ᠨᠢ ᠬᠠᠯᠬᠠ ᠨᠤᠲᠤᠭ ᠲᠤ ᠣᠷᠣᠵᠤ ᠢᠷᠡᠨ ᠬᠠᠯᠬᠠ ᠶ᠋ᠢᠨ ᠲᠤᠰᠠᠭᠠᠷ ᠲᠣᠭᠲᠠᠨᠢᠯ ᠤ᠋ᠨ ᠲᠥᠯᠥᠭᠡ ᠠᠮᠢ ᠪᠡᠶᠡ ᠪᠡᠨ ᠬᠠᠢᠷᠠᠯᠠᠬᠤ ᠦᠭᠡᠢ ᠵᠢᠳᠬᠦᠭᠰᠡᠨ ᠭᠠᠢᠬᠠᠮᠰᠢᠭᠲᠤ ᠬᠥᠮᠦᠨ᠂ ᠣᠳᠣ ᠭᠡᠪᠡᠯ ᠲᠡᠭᠦᠨ ᠦ᠌ ᠨᠠᠰᠤ ᠥᠨᠳᠥᠷ ᠵᠢᠷᠠ ᠬᠦᠷᠴᠦ ᠪᠠᠢᠭᠠ ᠠᠵᠢ᠃ ᠡᠨᠡ ᠪᠦᠬᠦᠨ ᠢ᠋ ᠪᠠᠯᠳᠠᠨᠴᠡᠷᠢᠩ ᠰᠠᠢᠨ ᠮᠡᠳᠡᠬᠦ ᠲᠤᠯᠠ ᠤᠴᠢᠷ ᠳᠦᠷᠰᠦ ᠦᠭᠡᠢ ᠣᠯᠠᠨ ᠢ᠋ ᠪᠣᠳᠣᠨ ᠰᠡᠳᠬᠢᠯ ᠵᠣᠪᠠᠨᠠ᠃
ᠣᠷᠣᠢ ᠶ᠋ᠢᠨ ᠨᠠᠷᠠ ᠵᠢᠷᠭᠠᠵᠤ᠂ ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ ᠪᠣᠯᠵᠤ ᠡᠬᠢᠯᠡᠯᠡ᠃ ᠬᠦᠷᠢᠶᠡ ᠳᠠᠶᠠᠭᠠᠷ ᠬᠥᠮᠦᠨ ᠦ᠌ ᠬᠥᠯ ᠬᠥᠳᠡᠯᠬᠦ ᠪᠡᠨ ᠵᠣᠭᠰᠣᠵᠤ ᠵᠣᠯᠪᠢᠩ ᠨᠣᠬᠠᠳ ᠤ᠋ᠨ ᠱᠤᠤᠭᠢᠶᠠᠨ ᠳᠡᠭᠳᠡᠨᠡ᠃ ᠭᠡᠪᠡᠴᠦ ᠵᠡᠭᠦᠨ ᠬᠦᠷᠢᠶᠡᠨ ᠳ᠋ᠦ᠍ ᠪᠦᠷᠢᠶᠡᠨ ᠳᠠᠭᠤ ᠶᠡᠷᠦ ᠪᠢᠰᠢ ᠪᠡᠷ ᠬᠦᠩᠭᠢᠨᠡᠬᠦ ᠨᠢ ᠶᠠᠭᠤ ᠪᠣᠢ? ᠭᠡᠨᠡᠳᠲᠡ ᠶᠢᠨ ᠡᠨᠡ ᠶᠠᠪᠤᠳᠠᠯ ᠢ᠋ ᠬᠥᠮᠦᠨ ᠪᠦᠷᠢ ᠰᠣᠨᠢᠷᠬᠠᠨ ᠬᠠᠰᠢᠶᠠ ᠬᠣᠷᠢᠶᠠ ᠠ᠋ᠴᠠ ᠪᠠᠨ ᠭᠠᠷᠤᠨ ᠴᠢᠩᠨᠠᠬᠤ ᠪᠥᠭᠡᠳ ᠪᠠᠯᠳᠠᠨᠴᠡᠷᠢᠩ ᠴᠦ᠍ ᠮᠥᠨ ᠲᠡᠷᠡ ᠵᠦᠭ ᠬᠠᠨᠳᠤᠪᠠ᠃
ᠵᠡᠭᠦᠨ ᠬᠦᠷᠢᠶᠡᠨ ᠳ᠋ᠡᠬᠢ《ᠪᠣᠭᠳᠠ ᠰᠢᠷᠠ ᠶ᠋ᠢᠨ ᠣᠷᠳᠣᠨ》 ᠭᠡᠳᠡᠭ ᠠᠯᠲᠠᠨ ᠳᠡᠭᠡᠪᠦᠷᠲᠦ ᠳᠤᠭᠠᠩ ᠤ᠋ᠨ ᠣᠷᠣᠢ᠂ ᠰᠢᠩᠭᠡᠭᠰᠡᠨ ᠨᠠᠷᠠᠨ ᠤ᠋ ᠭᠡᠷᠡᠯ ᠢ᠋ ᠥᠪᠡᠷ ᠲᠡᠭᠡᠨ ᠠᠪᠤᠨ ᠦᠯᠡᠳᠡᠭᠰᠡᠨ ᠮᠡᠲᠦ ᠬᠡᠷᠡᠯᠳᠦᠵᠦ ᠦᠶᠡ ᠦᠶᠡ ᠨᠢᠵᠢᠭᠢᠨᠡᠨᠡ᠃ ᠬᠥᠮᠦᠰ ᠴᠤᠭᠯᠠᠷᠠᠨ ᠳᠤᠭᠠᠩ ᠤ᠋ᠨ ᠡᠮᠦᠨᠡᠬᠢ ᠲᠠᠯᠠᠪᠠᠢ ᠶ᠋ᠢ ᠳᠦᠭᠦᠷᠬᠦ ᠳ᠋ᠦ᠍ ᠳᠤᠭᠠᠩ ᠤ᠋ᠨ ᠬᠠᠭᠠᠯᠭᠠ ᠪᠠᠷ ᠬᠣᠬᠢᠮᠠᠢ ᠲᠣᠯᠣᠭᠠᠢ ᠣᠷᠣᠢ ᠲᠠᠢ ᠭᠤᠷᠪᠠᠯᠵᠢᠨ ᠪᠠᠯᠢᠩ ᠢ᠋ ᠬᠦ ᠬᠤᠶᠠᠭ ᠪᠠᠭ ᠪᠠ ᠭᠠᠩ ᠳᠤᠭᠤᠯᠠᠭᠠ ᠡᠮᠦᠰᠦᠭᠰᠡᠨ ᠬᠣᠶᠠᠷ ᠬᠥᠮᠦᠨ ᠳᠠᠮᠨᠠᠨ ᠭᠠᠷᠴᠤ ᠢᠷᠡᠪᠡ᠃ ᠡᠨᠡ ᠪᠣᠯ ᠰᠤᠷ᠂ ᠭᠠᠢ ᠭᠠᠮᠰᠢᠭ ᠢ᠋ ᠵᠠᠢᠯᠠᠭᠤᠯᠬᠤ ᠪᠤᠶᠤ ᠬᠠᠨᠢᠶᠠᠳᠤ ᠲᠣᠮᠣᠭᠣ ᠶ᠋ᠢ ᠳᠠᠷᠤᠬᠤ ᠬᠢᠭᠡᠳ ᠬᠠᠷᠭᠢᠰ ᠳᠣᠭᠰᠢᠨ ᠳᠠᠢᠰᠤᠨ ᠤ᠋ ᠴᠣᠭ ᠵᠠᠯᠢ ᠶ᠋ᠢ ᠮᠣᠬᠣᠭᠠᠨ ᠦᠬᠦᠯ ᠦ᠋ᠨ ᠣᠷᠣᠨ ᠳ᠋ᠤ᠌ ᠲᠣᠨᠢᠯᠭᠠᠬᠤ ᠠᠤᠭᠠ ᠬᠦᠴᠦᠲᠡᠢ ᠶᠠᠭᠤᠮᠠ ᠪᠣᠯ ᠡᠨᠡ ᠰᠤᠷ ᠭᠡᠵᠦ ᠬᠤᠷᠠᠨ ᠴᠤᠭᠯᠠᠷᠠᠭᠰᠠᠳ ᠤ᠋ᠨ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠤᠬᠤ ᠠᠵᠢ᠃
ᠰᠤᠷ ᠤ᠋ᠨ ᠵᠡᠭᠦᠨ ᠪᠠᠷᠠᠭᠤᠨ ᠬᠣᠶᠠᠷ ᠲᠤ ᠮᠥᠨ ᠬᠤᠶᠠᠭ ᠳᠤᠭᠤᠯᠠᠭᠠ ᠡᠮᠦᠰᠦᠨ ᠭᠠᠷ ᠲᠠᠭᠠᠨ ᠠᠯᠢ ᠡᠷᠲᠡ ᠴᠠᠭ ᠤ᠋ᠨ ᠮᠣᠩᠭᠣᠯ ᠳᠠᠷᠬᠠᠨ ᠤ᠋ ᠭᠠᠷ ᠢ᠋ᠶ᠋ᠠᠷ ᠪᠦᠲᠦᠭᠡᠭᠳᠡᠭᠰᠡᠨ ᠣᠩᠭᠣᠷᠬᠠᠢ ᠠᠮᠠ ᠲᠠᠢ ᠠᠯᠲᠠ ᠭᠠᠷᠤᠢ ᠬᠡᠮᠵᠢᠶᠡᠨ ᠦ᠌ ᠬᠦᠨᠳᠦ ᠴᠠᠬᠢᠭᠤᠷ ᠫᠤᠤ ᠪᠠᠷᠢᠭᠰᠠᠨ ᠳᠥᠷᠪᠡᠨ ᠬᠥᠮᠦᠨ ᠶᠠᠪᠤᠨᠠ᠃ ᠡᠳᠡᠨ ᠦ᠌ ᠬᠣᠢᠨᠠ ᠠ᠋ᠴᠠ ᠰᠤᠷ ᠵᠠᠯᠠᠬᠤ ᠯᠠᠮᠠ ᠭᠠᠷᠴᠤ ᠢᠷᠡᠪᠡ᠃ ᠡᠨᠡ ᠯᠠᠮᠠ ᠲᠣᠯᠣᠭᠠᠢ ᠳ᠋ᠠᠭᠠᠨ ᠸᠴᠢᠷ᠂ ᠸᠴᠢᠷ ᠦ᠋ᠨ ᠳᠣᠣᠷᠠ ᠬᠣᠬᠢᠮᠠᠢ᠂ ᠲᠡᠭᠦᠨ ᠦ᠌ ᠳᠣᠣᠷᠠ ᠬᠤᠪᠠᠬᠠᠢ ᠶᠠᠰᠤᠨ ᠴᠡᠭᠡᠵᠢ ᠪᠦᠬᠦᠢ ᠬᠣᠬᠢᠮᠠᠢ ᠵᠢᠩᠰᠡ ᠲᠡᠢ ᠪᠥᠭᠡᠳ ᠲᠡᠭᠦᠨ ᠦ᠌ ᠬᠣᠶᠠᠷ ᠲᠠᠯᠠ ᠪᠠᠷ ᠤᠭ ᠮᠠᠯᠠᠭᠠᠢ ᠶ᠋ᠢᠨ ᠲᠣᠮᠣ ᠳᠤᠭᠤᠢ ᠬᠠᠷᠠ ᠬᠦᠷᠢᠶᠡᠨ ᠡᠴᠡ ᠠᠪᠤᠭᠠᠳ ᠣᠷᠣᠢ ᠶ᠋ᠢᠨ ᠸᠴᠢᠷ ᠬᠦᠷᠦᠭᠰᠡᠨ ᠭᠠᠯ ᠳᠥᠯᠥ ᠶ᠋ᠢᠨ ᠴᠢᠮᠡᠭᠲᠦ《ᠰᠢᠨᠠᠨ ᠤ᠋ ᠲᠠᠭ》 ᠭᠡᠳᠡᠭ ᠶᠡᠷᠦ ᠪᠢᠰᠢ ᠶ᠋ᠢᠨ ᠰᠦᠷᠲᠦ ᠮᠠᠯᠠᠭᠠᠢ ᠡᠮᠦᠰᠴᠦ᠂ ᠪᠡᠶᠡ ᠳ᠋ᠡᠭᠡᠨ ᠴᠠᠮ ᠤ᠋ᠨ ᠠᠳᠠᠯᠢ ᠳᠣᠷᠣᠭᠰᠢ ᠤᠨᠵᠢᠭᠰᠠᠨ ᠭᠤᠷᠪᠠᠯᠵᠢᠨ ᠲᠣᠮᠣ ᠬᠠᠨᠴᠤᠢ ᠲᠠᠢ ᠥᠪᠥᠷ ᠪᠡᠯᠭᠡᠭᠦᠰᠦᠨ ᠳ᠋ᠡᠭᠡᠨ ᠵᠠ ᠸᠠᠰᠠ ᠶ᠋ᠢᠨ ᠲᠣᠯᠣᠭᠠᠢ᠂ ᠳᠣᠭᠰᠢᠨ ᠳᠦᠷᠢ ᠶ᠋ᠢ ᠤᠷᠠᠯᠠᠨ ᠬᠠᠲᠠᠭᠰᠠᠨ ᠬᠠᠳᠬᠤᠮᠠᠯᠲᠤ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠠᠵᠢ᠃
ᠡᠢᠨᠬᠦ ᠰᠤᠷ ᠵᠠᠯᠠᠬᠤ ᠨᠢ ᠪᠠᠭᠠ ᠬᠡᠷᠡᠭ ᠪᠢᠰᠢ᠃ ᠪᠦᠬᠦ ᠳᠣᠭᠰᠢᠳ ᠪᠤᠷᠬᠠᠳ ᠤ᠋ᠨ ᠳᠣᠲᠣᠷᠠ ᠠ᠋ᠴᠠ ᠬᠠᠮᠤᠭ ᠤ᠋ᠨ ᠲᠣᠭᠰᠢᠨ《ᠵᠢᠭᠵᠢᠳ ᠦ᠋ᠨ》 ᠨᠢᠨᠴᠢᠨ(ᠶᠡᠬᠡ ᠨᠢᠮᠪᠠ) ᠶ᠋ᠢ ᠭᠤᠷᠪᠠᠨ ᠵᠢᠯ ᠲᠥᠪᠯᠡᠨ(ᠪᠢᠰᠢᠯᠭᠠᠨ) ᠶᠡᠷᠦ ᠪᠤᠰᠤ ᠶ᠋ᠢᠨ ᠰᠢᠳᠢ ᠣᠯᠤᠭᠰᠠᠨ ᠬᠥᠮᠦᠨ ᠯᠡ ᠵᠠᠯᠠᠵᠤ ᠴᠢᠳᠠᠨᠠ᠃
ᠰᠤᠷ ᠤ᠋ᠨ ᠯᠠᠮᠠ ᠶ᠋ᠢᠨ ᠠᠷᠤ ᠠ᠋ᠴᠠ ᠬᠡᠳᠦᠨ ᠠᠷᠪᠠᠨ ᠯᠠᠮᠠ ᠳ᠋ᠠᠭᠠᠨ ᠶᠠᠪᠤᠨᠠ᠃ ᠲᠡᠳᠡᠨ ᠦ᠌ ᠡᠮᠦᠰᠴᠦ ᠵᠡᠭᠦᠭᠰᠡᠨ ᠨᠢ ᠪᠠᠰᠠ ᠡᠩ ᠦ᠋ᠨ ᠪᠢᠰᠢ ᠡᠯᠢᠭᠡᠨ ᠬᠦᠷᠡᠩ ᠲᠠᠷᠠᠮᠠᠨ ᠣᠷᠬᠢᠮᠵᠢ ᠪᠠᠷ ᠪᠦᠬᠦ ᠪᠡᠶᠡ ᠪᠡᠨ ᠪᠢᠲᠡᠭᠦᠦ ᠣᠷᠢᠶᠠᠵᠤ᠂ ᠰᠢᠷᠠ ᠲᠣᠷᠭᠠᠨ ᠥᠨᠳᠥᠷ ᠣᠷᠣᠢ ᠲᠠᠢ ᠬᠢᠩᠭᠠᠨ ᠢᠷᠮᠡᠭ ᠲᠡᠢ ᠣᠪᠣᠭᠠᠲᠠᠢ ᠶ᠋ᠢ ᠣᠷᠣᠢ ᠳᠡᠭᠡᠷᠡ ᠪᠡᠨ ᠴᠣᠭᠴᠠᠯᠠᠭᠤᠯᠤᠭᠰᠠᠨ ᠢ᠋ ᠨᠢ ᠬᠡᠯᠡᠬᠦ ᠤᠤ! ᠦᠳᠡᠰᠢ ᠶ᠋ᠢᠨ ᠪᠦᠷᠦᠩᠬᠦᠢ᠂ ᠪᠦᠷᠢᠶᠡᠨ ᠳᠠᠭᠤᠨ ᠤ᠋ ᠬᠦᠨᠳᠦ ᠬᠦᠩᠭᠢᠨᠡᠯᠲᠡ᠂ ᠪᠢᠰᠬᠢᠭᠦᠷ ᠦ᠋ᠨ ᠠᠪᠢᠶᠠ ᠶᠠᠮᠠᠷ ᠨᠢᠭᠡ ᠦᠯᠦ ᠦᠵᠡᠭᠳᠡᠬᠦ ᠬᠡᠢ ᠠᠮᠢᠲᠠᠨ ᠢ᠋ ᠠᠷᠭᠠᠳᠠᠬᠤ ᠮᠡᠲᠦ ᠤᠶᠠᠩᠭᠠᠯᠠᠬᠤ᠂ ᠴᠠᠩ ᠬᠡᠩᠭᠡᠷᠭᠡ ᠣᠭᠲᠠᠷᠭᠤᠢ ᠶ᠋ᠢᠨ ᠭᠦᠨ ᠢ᠋ ᠢᠯᠡᠴᠢᠯᠡᠵᠦ ᠪᠠᠢᠨᠠ ᠤᠤ ᠭᠡᠮᠡᠷ ᠨᠦᠷᠵᠢᠭᠢᠨᠡᠬᠦ᠂ ᠡᠭᠦᠨ ᠦ᠌ ᠳᠡᠭᠡᠷᠡ ᠥᠨᠥᠬᠢ ᠬᠣᠬᠢᠮᠠᠢ ᠣᠷᠣᠢ ᠲᠠᠢ ᠭᠤᠷᠪᠠᠯᠵᠢᠨ ᠰᠤᠷ᠂ ᠠᠷᠤ ᠳ᠋ᠤ᠌ ᠶᠠᠪᠤᠭᠠ ᠵᠠᠯᠠᠭᠴᠢ ᠯᠠᠮᠠ᠂ ᠲᠡᠭᠦᠨ ᠦ᠌ ᠬᠣᠢᠨᠠ ᠠ᠋ᠴᠠ ᠳᠠᠭᠠᠭᠰᠠᠨ ᠬᠠᠮᠲᠤᠷᠠᠨ ᠵᠠᠯᠠᠭᠴᠢ ᠯᠠᠮᠠ ᠨᠠᠷ᠂ ᠲᠡᠭᠡᠭᠡᠳ ᠪᠠᠰᠠ ᠵᠦᠭ ᠦ᠋ᠨ ᠮᠠᠭᠤ ᠵᠡᠭᠦᠨ ᠤᠷᠢᠳᠤ ᠵᠦᠭ ᠢ᠋ ᠪᠠᠷᠢᠨ ᠠᠭᠠᠵᠢᠭᠤᠬᠠᠨ ᠲᠠᠪᠰᠢᠬᠤ ᠨᠢ ᠦᠨᠡᠬᠡᠷ ᠦᠯᠦ ᠢᠯᠠᠭᠳᠠᠬᠤ ᠳᠠᠢᠰᠤᠨ ᠢ᠋ ᠠᠪᠤᠷᠭᠤ ᠬᠦᠴᠦ ᠪᠡᠷ ᠳᠠᠷᠤᠨ ᠲᠣᠨᠢᠯᠭᠠᠬᠤ ᠰᠢᠨᠵᠢ ᠲᠥᠯᠥᠪ ᠢ᠋ ᠪᠦᠷᠢᠯᠳᠦᠭᠦᠯᠵᠡᠢ᠃
ᠬᠦᠷᠬᠦ ᠭᠠᠵᠠᠷ ᠨᠢ ᠰᠢᠷᠠ ᠣᠷᠳᠣᠨ ᠤ᠋ ᠵᠡᠭᠦᠨ ᠡᠮᠦᠨᠡ᠂ ᠬᠡᠳᠦᠨ ᠵᠠᠭᠤᠨ ᠠᠯᠬᠤᠮ ᠤ᠋ᠨ ᠲᠡᠷᠲᠡᠭᠡ᠃ ᠲᠡᠨᠳᠡ ᠡᠪᠡᠰᠦ ᠮᠣᠳᠣ ᠬᠣᠶᠠᠷ ᠢ᠋ᠶ᠋ᠠᠷ ᠪᠦᠷᠢᠭᠰᠡᠨ ᠲᠣᠮᠣ ᠣᠪᠣᠬᠠᠢ ᠪᠠᠢᠨᠠ᠃ ᠰᠤᠷ ᠢ᠋ ᠣᠴᠢᠮᠠᠭᠴᠠ ᠣᠪᠣᠬᠠᠢ ᠳ᠋ᠤ᠌ ᠭᠠᠯ ᠣᠷᠣᠭᠤᠯᠪᠠ᠃ ᠶᠡᠬᠡ ᠳᠥᠯᠥ ᠭᠡᠨᠡᠳᠲᠡ ᠪᠠᠳᠠᠷᠠᠨ ᠣᠢᠷᠠᠲᠤᠭᠰᠠᠨ ᠪᠦᠬᠦᠨ ᠦ᠌ ᠡᠯᠢᠭᠡᠨ ᠳ᠋ᠦ᠍ ᠤᠯᠠᠭᠠᠨ ᠰᠢᠷᠭᠠᠯ ᠲᠤᠶᠠᠭᠠ ᠪᠠᠨ ᠳᠤᠰᠬᠠᠨᠠ᠃ ᠣᠳᠣ ᠦᠵᠡᠪᠡᠯ ᠥᠨᠥᠬᠢ ᠰᠤᠷ᠂ ᠲᠡᠭᠦᠨ ᠦ᠌ ᠣᠷᠣᠢ ᠶ᠋ᠢᠨ ᠬᠣᠬᠢᠮᠠᠢ᠂ ᠬᠣᠶᠠᠷ ᠬᠠᠵᠠᠭᠤ ᠶ᠋ᠢᠨ ᠬᠢᠨᠢ ᠭᠠᠯ ᠤ᠋ᠨ ᠳᠥᠯᠥ ᠶ᠋ᠢᠨ ᠴᠢᠮᠡᠭᠯᠡᠯ ᠬᠢᠭᠡᠳ ᠳᠣᠣᠷᠠᠲᠤ ᠰᠠᠭᠤᠷᠢᠨ ᠳ᠋ᠤᠨᠢ ᠬᠡᠢ ᠳᠦᠭᠦᠷᠭᠡᠭᠰᠡᠨ ᠬᠣᠨᠢᠨ ᠤ᠋ ᠥᠯᠥᠨ ᠭᠡᠳᠡᠰᠦ ᠶ᠋ᠢ ᠮᠤᠰᠬᠢᠷᠠᠯᠳᠤᠭᠤᠯᠤᠨ ᠬᠡᠳᠦᠨ ᠳᠠᠪᠬᠤᠷ ᠣᠷᠢᠶᠠᠭᠰᠠᠨ ᠡᠨᠡ ᠲᠡᠷᠡ ᠨᠢ ᠪᠦᠷ ᠶᠡᠷᠦ ᠪᠢᠰᠢ᠂ ᠪᠦᠬᠦ ᠣᠷᠴᠢᠯᠠᠩ ᠤ᠋ᠨ ᠬᠠᠮᠤᠭ ᠭᠠᠢ ᠭᠠᠮᠰᠢᠭ ᠢ᠋ ᠰᠢᠩᠭᠡᠭᠡᠭᠰᠡᠨ ᠪᠣᠢ ᠵᠠ ᠭᠡᠵᠦ ᠯᠠᠪᠲᠠᠢ ᠢᠲᠡᠭᠡᠭᠳᠡᠨᠡ᠃ ᠠᠷᠤ ᠳ᠋ᠤ᠌ ᠶᠠᠪᠤᠭᠠ ᠵᠠᠯᠠᠭᠴᠢ ᠶ᠋ᠢ ᠳᠠᠬᠢᠨ ᠠᠵᠢᠪᠠᠯ ᠬᠣᠬᠢᠮᠠᠢ ᠶᠠᠰᠤᠨ ᠵᠢᠩᠰᠡᠲᠦ ᠰᠢᠨᠠᠨ ᠤ᠋ ᠲᠠᠭ ᠡᠮᠦᠰᠦᠭᠰᠡᠨ ᠦ᠌ ᠪᠡᠨ ᠳᠣᠣᠷᠠ ᠮᠠᠩᠨᠠᠢ ᠠ᠋ᠴᠠ ᠪᠠᠨ ᠠᠪᠤᠭᠠᠳ ᠬᠠᠮᠠᠷ ᠤ᠋ᠨ ᠢ᠋ᠶ᠋ᠠᠨ ᠦᠵᠦᠭᠦᠷ ᠢ᠋ ᠬᠦᠷᠲᠡᠯᠡ ᠬᠠᠷᠠ ᠪᠣᠳᠣᠭ ᠢ᠋ᠶ᠋ᠠᠷ ᠵᠤᠷᠪᠤᠰ ᠬᠠᠯᠵᠢᠯᠠᠭᠰᠠᠨ ᠨᠢ ᠶᠡᠬᠡ ᠭᠠᠯ ᠤ᠋ᠨ ᠭᠡᠷᠡᠯ ᠳ᠋ᠦ᠍ ᠠᠩᠬᠠ ᠲᠣᠳᠣᠷᠠᠨ ᠦᠵᠡᠭᠳᠡᠬᠦ ᠪᠥᠭᠡᠳ ᠲᠡᠷᠡ ᠯᠠᠮᠠ᠂ ᠬᠣᠶᠠᠷ ᠨᠢᠳᠦ ᠪᠡᠨ ᠳᠠᠩ ᠴᠠᠭᠠᠨ ᠢ᠋ᠶ᠋ᠠᠷ ᠡᠷᠭᠢᠯᠳᠦᠭᠦᠯᠦᠨ ᠭᠢᠯᠠᠯᠵᠠᠭᠤᠯᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠷᠭᠡᠴᠡᠭᠡ ᠪᠡᠷ ᠰᠢᠲᠦ ᠪᠡᠨ ᠬᠦᠴᠦᠯᠡᠨ ᠵᠠᠭᠤᠵᠤ᠂ ᠠᠮᠠ ᠪᠠᠨ ᠵᠨᠨᠤᠯᠲᠠᠢᠬᠠᠨ ᠢ᠋ᠶ᠋ᠠᠷ ᠦᠮᠦᠯᠵᠢᠭᠦᠯᠦᠨ ᠤᠩᠰᠢᠯᠭᠠ ᠪᠠᠨ ᠤᠩᠰᠢᠵᠤ᠂ ᠵᠡᠭᠦᠨ ᠭᠠᠷ ᠲᠠᠭᠠᠨ ᠠᠳᠬᠤᠭᠰᠠᠨ ᠰᠢᠩᠭᠡᠨ ᠳᠠᠭᠤᠲᠤ ᠬᠣᠩᠬᠣ ᠶᠤᠭᠠᠨ ᠵᠢᠩ ᠵᠢᠩ ᠳᠤᠤᠭᠠᠷᠭᠠᠨᠠ᠃ ᠢᠩᠭᠢᠬᠦ ᠳ᠋ᠦ᠍ ᠯᠠᠮᠠ ᠶ᠋ᠢᠨ ᠣᠶᠤᠨ ᠤᠬᠠᠭᠠᠨ ᠣᠷᠴᠢᠯᠠᠩ ᠠ᠋ᠴᠠ ᠠᠯᠢ ᠬᠡᠳᠦᠢᠨ ᠲᠠᠰᠤᠷᠠᠭᠠᠳ᠂ ᠦᠢ ᠲᠦᠮᠡᠨ ᠮᠠᠭᠤ ᠵᠦᠭ ᠦ᠋ᠨ ᠠᠮᠢᠲᠠᠳ ᠲᠠᠢ ᠠᠴᠤ ᠳᠠᠴᠤ ᠲᠤᠯᠤᠯᠳᠤᠵᠤ ᠪᠠᠢᠭᠠ ᠮᠡᠲᠦ ᠠᠵᠢ᠃
ᠭᠡᠲᠡᠯᠡ ᠥᠨᠥᠬᠢ ᠰᠤᠷ ᠤ᠋ᠨ ᠳᠣᠣᠷᠠᠳᠤᠬᠢ ᠬᠡᠳᠦᠨ ᠳᠠᠪᠬᠤᠷ ᠮᠤᠰᠬᠢᠷᠠᠯᠳᠤᠭᠰᠠᠨ ᠥᠯᠥᠨ ᠭᠡᠳᠡᠰᠦ ᠶ᠋ᠢᠨ ᠳᠤᠮᠳᠠ᠂ ᠬᠥᠮᠦᠰ ᠦ᠋ᠨ ᠵᠢᠵᠢᠭ ᠪᠠᠷᠢᠮᠠᠯ ᠳᠦᠷᠢ ᠣᠯᠠᠨ ᠰᠠᠭᠤᠯᠭᠠᠭᠰᠠᠨ ᠪᠠᠢᠬᠤ ᠨᠢ ᠶᠠᠭᠤ ᠪᠣᠢ? ᠲᠡᠷᠡ ᠪᠠᠷᠢᠮᠠᠯ ᠤ᠋ᠳ ᠨᠢᠭᠡ ᠵᠢᠭᠳᠡ ᠶ᠋ᠢᠨ ᠥᠨᠳᠥᠷ ᠴᠠᠮᠴᠠ ᠤᠷᠲᠤ ᠥᠮᠥᠳᠥ ᠲᠡᠢ ᠪᠥᠭᠡᠳ ᠲᠤᠰ ᠪᠦᠷᠢ ᠪᠡᠨ ᠫᠤᠤ ᠮᠡᠲᠦ ᠶ᠋ᠢ ᠪᠠᠷᠢᠭᠰᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠭᠠᠮᠢᠩ ᠤ᠋ᠳ ᠪᠠᠢᠬᠤ ᠠᠵᠢ᠃
— ᠦᠭᠡᠢ ᠲᠡᠷᠡ ᠴᠢᠨᠳᠠᠷᠤᠤ ᠨᠤᠭᠤᠳ ᠢ᠋ ᠬᠠᠷᠠᠵᠤ ᠪᠠᠢᠨᠠ ᠤᠤ? ᠭᠡᠬᠦ ᠰᠢᠪᠡᠭᠡᠨᠡᠨ ᠣᠯᠠᠨ ᠤ᠋ ᠳᠤᠮᠳᠠᠭᠤᠷ ᠨᠢᠭᠡ ᠶᠠᠪᠤᠭᠳᠠᠭᠠᠳ ᠳᠠᠷᠠᠭᠠ ᠨᠢ᠄
— ᠬᠠᠢᠷᠬᠠᠨ! ᠳᠡᠭᠡᠷᠡ ᠡᠴᠡ ᠲᠤᠢᠩᠬᠤᠷ ᠤ᠋ᠨ ᠳᠠ ᠯᠠᠮᠠᠳᠠᠨ ᠢ᠋ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠰᠤᠷ ᠵᠠᠯᠠᠨᠠ ᠭᠡᠵᠦ ᠵᠠᠷᠯᠢᠭ ᠪᠠᠭᠤᠯᠭᠠᠭᠰᠠᠨ ᠶᠤᠮ ᠰᠢᠦ ᠭᠡᠰᠡᠨ ᠬᠣᠶᠠᠳᠠᠬᠢ ᠰᠢᠪᠡᠭᠡᠨᠡᠨ ᠰᠣᠨᠣᠰᠤᠭᠳᠠᠨ ᠵᠠᠮᠬᠠᠷᠠᠪᠠ᠃
ᠰᠤᠷ ᠵᠠᠯᠠᠭᠴᠢ ᠲᠤᠢᠩᠬᠤᠷ ᠤ᠋ᠨ ᠳᠠ ᠯᠠᠮᠠ ᠡᠮᠦᠨᠡᠬᠢ ᠰᠤᠷ ᠢ᠋ᠶ᠋ᠠᠨ ᠤᠬᠤᠰᠬᠢᠨ ᠰᠢᠭᠦᠷᠦᠨ ᠠᠪᠤᠯᠠ᠃ ᠡᠨᠡ ᠬᠥᠮᠦᠨ ᠨᠢᠷᠤᠭᠤ ᠨᠠᠮ᠂ ᠦᠵᠡᠲᠡᠯᠡ ᠪᠢᠷᠠ ᠴᠢᠳᠠᠯ ᠪᠠᠭᠠ ᠲᠠᠢ ᠪᠠᠢᠮᠠᠷ ᠠᠲᠠᠯᠠ᠂ ᠬᠣᠶᠠᠷ ᠬᠥᠮᠦᠨ ᠦ᠌ ᠠᠷᠠᠢ ᠴᠢᠷᠠᠢ ᠳᠠᠮᠵᠢᠯᠠᠨ ᠠᠪᠴᠢᠷᠠᠭᠰᠠᠨ ᠬᠦᠨᠳᠦ ᠰᠤᠷ ᠢ᠋ ᠰᠡᠪ ᠬᠢᠯᠭᠡᠨ ᠳᠡᠭᠡᠷᠡ ᠡᠷᠭᠦᠬᠦ ᠨᠢ ᠦᠨᠡᠬᠡᠷ ᠢᠳᠡ ᠰᠢᠳᠢ ᠶ᠋ᠢ ᠦᠵᠡᠭᠦᠯᠬᠦ ᠰᠢᠭ᠃
ᠡᠨᠡ ᠳᠠᠷᠤᠢ ᠪᠦᠬᠦ ᠣᠷᠴᠢᠨ ᠥᠭᠡᠷᠡᠴᠢᠯᠡᠭᠳᠡᠯᠡ᠃ ᠰᠢᠷᠦᠭᠦᠨ ᠭᠠᠯ ᠤ᠋ᠨ ᠪᠠᠳᠠᠷᠠᠯᠲᠠ ᠲᠤᠢᠯ ᠳ᠋ᠠᠭᠠᠨ ᠭᠦᠷᠦᠨ ᠲᠣᠭᠰᠢᠨ ᠳᠥᠯᠥ ᠨᠢ ᠦᠶᠡ ᠦᠶᠡ ᠣᠷᠣᠢ ᠠ᠋ᠴᠠ ᠲᠠᠰᠤᠷᠠᠨ ᠬᠡᠢ ᠳ᠋ᠦ᠍ ᠵᠠᠮᠬᠠᠷᠠᠨᠠ᠃ ᠪᠦᠷᠢᠶᠡᠨ ᠳᠠᠭᠤ ᠬᠤᠪᠢᠷᠠᠨ ᠬᠦᠩᠭᠢᠨᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠶᠠᠷᠳᠠᠭᠯᠠᠨ ᠬᠠᠰᠬᠢᠷᠴᠤ᠂ ᠪᠢᠰᠬᠢᠭᠦᠷ ᠪᠠᠰᠠ ᠤᠶᠠᠩᠭᠠᠯᠠᠬᠤ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠠᠮᠤᠭ ᠤ᠋ᠨ ᠢ᠋ᠶ᠋ᠠᠨ ᠨᠠᠷᠢᠨ ᠬᠥᠭ ᠢ᠋ᠶ᠋ᠡᠷ ᠴᠠᠷᠭᠢᠨ ᠵᠢᠷᠭᠢᠵᠦ᠂ ᠴᠠᠩ ᠬᠡᠩᠭᠡᠷᠭᠡ ᠨᠢᠵᠢᠭᠢᠨᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌ ᠬᠠᠪᠢᠷᠤᠯᠳᠤᠨ ᠬᠠᠷᠰᠢᠯᠳᠤᠵᠤ᠂ ᠳᠡᠷᠭᠡᠳᠡ ᠪᠡᠨ ᠪᠠᠢᠭᠠ ᠬᠥᠮᠦᠰ ᠢ᠋ ᠭᠠᠭᠴᠠᠬᠠᠨ ᠠᠶᠤᠨ ᠰᠦᠷᠳᠡᠬᠦ ᠶ᠋ᠢᠨ ᠵᠦᠭ ᠠᠪᠴᠢᠷᠠᠨᠠ᠃ ᠭᠡᠲᠡᠯᠡ ᠡᠭᠦᠨ ᠦ᠌ ᠬᠠᠵᠠᠭᠤ ᠪᠠᠷ ᠭᠠᠨᠳᠠᠩ᠂ ᠶᠠᠰᠤᠨ ᠳ᠋ᠤ᠌ ᠬᠠᠲᠠᠬᠤ ᠵᠢᠪᠡᠭᠦᠨ ᠳᠠᠭᠤ ᠪᠠᠷ ᠡᠬᠡᠷ ᠲᠡᠳᠡᠨ ᠶᠠᠭᠰᠢᠬᠤ ᠨᠢ ᠡᠷᠯᠢᠭ ᠦ᠋ᠨ ᠡᠯᠴᠢ ᠨᠠᠷ ᠢ᠋ ᠤᠷᠢᠨ ᠳᠠᠭᠤᠳᠠᠵᠤ ᠪᠠᠢᠭᠠ ᠨᠢ ᠲᠡᠷᠡ ᠪᠠᠢᠯᠠ᠃
ᠶᠠᠭᠤᠮᠠ ᠪᠦᠷ ᠤᠴᠢᠷ ᠲᠠᠢ᠃ ᠳ᠋ᠠ ᠯᠠᠮᠠᠳᠠᠨ ᠳᠡᠭᠡᠷᠡ ᠡᠷᠭᠦᠭᠰᠡᠨ ᠰᠤᠷ ᠢ᠋ᠶ᠋ᠠᠨ ᠭᠠᠯ ᠤ᠋ᠨ ᠵᠦᠭ ᠣᠷᠣᠢ ᠪᠠᠷ ᠢ᠋ᠶ᠋ᠠᠨ ᠪᠥᠬᠥᠢᠯᠭᠡᠨ ᠭᠤᠳᠤᠷᠴᠤ ᠮᠤᠰᠬᠢᠨ᠂ ᠠᠭᠠᠷ ᠥᠷᠥᠮᠳᠡᠭᠰᠡᠨ ᠢ᠋ᠶ᠋ᠡᠨ ᠳᠡᠭᠡᠭᠰᠢ ᠲᠠᠲᠠᠪᠠ᠃ ᠳᠠᠬᠢᠨ ᠬᠣᠶᠠᠳᠠᠬᠢ ᠥᠷᠥᠮᠳᠡᠯᠭᠡ ᠳ᠋ᠡᠭᠡᠨ ᠬᠢᠯᠡ᠃ ᠭᠤᠷᠪᠠ ᠳᠠᠬᠢᠨ ᠬᠢᠬᠦ ᠳ᠋ᠦ᠍ᠨᠢ᠂ ᠪᠦᠬᠦ ᠬᠥᠭᠵᠢᠮ ᠦ᠋ᠨ ᠠᠪᠢᠶᠠ ᠪᠠᠰᠠ ᠬᠤᠪᠢᠷᠠᠭᠰᠠᠨ ᠨᠢ ᠪᠦᠷ ᠵᠢᠪᠡᠭᠦᠨ! ᠬᠥᠮᠦᠰ ᠦ᠋ᠨ ᠭᠣᠣᠯ ᠵᠢᠷᠦᠬᠡ ᠠᠮᠠᠨ ᠳᠡᠭᠡᠷᠡ ᠪᠡᠨ ᠢᠷᠡᠨᠡ᠃ ᠶᠡᠬᠡ ᠯᠠᠮᠠ ᠶ᠋ᠢᠨ ᠨᠢᠳᠦ ᠪᠡᠨ ᠲᠠᠰᠤ ᠠᠨᠢᠨ ᠴᠢᠷᠠᠢ ᠨᠢ ᠴᠠᠢᠬᠤ ᠬᠠᠷᠠᠯᠠᠬᠤ ᠬᠣᠶᠠᠷ ᠢ᠋ᠶ᠋ᠠᠷ ᠡᠭᠡᠯᠵᠢᠯᠡᠨ ᠬᠥᠯᠥᠰᠥ ᠳᠤᠰᠤᠯᠠᠭᠤᠯᠬᠤ ᠶ᠋ᠢ ᠬᠠᠷᠠᠵᠤ ᠡᠰᠡ ᠴᠢᠳᠠᠨᠠ᠃
ᠳᠥᠷᠪᠡᠳᠡᠬᠢ ᠳᠡᠭᠡᠷᠡ ᠪᠠᠨ ᠳᠠ ᠯᠠᠮᠠ ᠰᠤᠷ ᠢ᠋ᠶ᠋ᠠᠨ ᠭᠠᠯ ᠤᠷᠤᠭᠤ ᠭᠢᠯᠠᠰ ᠪᠠᠭᠤᠯᠭᠠᠨ ᠰᠢᠳᠡᠭᠡᠳ ᠬᠣᠢᠨᠠ ᠠ᠋ᠴᠠ ᠨᠢ ᠬᠠᠷᠠ ᠬᠠᠳᠠᠭ ᠤᠶᠠᠭᠰᠠᠨ ᠸᠴᠢᠷ ᠪᠠᠷᠢᠭᠤᠯᠲᠤ ᠫᠦᠷᠪᠦ ᠶ᠋ᠢ ᠡᠯᠢᠭᠡᠨ ᠳᠣᠣᠷᠠ ᠠ᠋ᠴᠠ ᠪᠠᠨ ᠰᠤᠭᠤ ᠲᠡᠳᠡᠨ ᠠᠪᠴᠤ ᠭᠤᠷᠪᠠᠨᠲᠠ ᠬᠡᠢ ᠲᠥᠷᠥᠬᠦ ᠪᠥᠭᠡᠳ ᠡᠨᠡ ᠳᠠᠷᠤᠢ ᠬᠤᠶᠠᠭ ᠳᠤᠭᠤᠯᠠᠭᠠᠲᠤ ᠳᠥᠷᠪᠡᠨ ᠡᠷᠡ ᠣᠩᠭᠣᠷᠬᠠᠢ ᠠᠮᠠᠲᠤ ᠬᠦᠨᠳᠦ ᠴᠠᠬᠢᠭᠤᠷ ᠫᠤᠤ ᠪᠠᠨ ᠨᠢᠭᠡ ᠵᠡᠷᠭᠡ ᠭᠠᠯ ᠤᠷᠤᠭᠤ ᠲᠣᠩᠭᠣᠢᠯᠭᠠᠨ ᠫᠢᠩ ᠪᠠᠭᠤᠯᠭᠠᠨᠠ᠃ ᠪᠦᠬᠦ ᠴᠢᠮᠡᠭᠡ ᠲᠠᠭ ᠲᠠᠰᠤᠷᠠᠯᠠ᠃
ᠶᠣᠰᠣᠲᠠᠢ ᠲᠠᠭ ᠴᠢᠭ᠂ ᠲᠤᠩ ᠰᠠᠶᠢᠬᠠᠨ ᠲᠤᠢᠯ ᠳ᠋ᠠᠭᠠᠨ ᠭᠦᠷᠦᠨ ᠳᠦᠷᠡᠯᠵᠡᠵᠦ ᠪᠠᠢᠭᠰᠠᠨ ᠭᠠᠯ ᠳᠣᠷᠣᠭᠰᠢ ᠰᠠᠭᠤᠨ ᠲᠡᠭᠦᠨ ᠬᠤᠷᠴᠠ ᠳᠥᠯᠥ ᠶ᠋ᠢᠨ ᠣᠷᠣᠨ ᠳ᠋ᠤ᠌᠂ ᠬᠠᠶᠠ ᠳᠠᠷᠢ ᠶ᠋ᠢᠨ ᠭᠠᠰᠢᠭᠤᠨ ᠤᠲᠤᠭᠠ ᠵᠦᠭ ᠪᠦᠷᠢ ᠳ᠋ᠡᠭᠡᠨ ᠬᠥᠮᠦᠰ ᠦ᠋ᠨ ᠬᠠᠮᠠᠷ ᠲᠤ ᠬᠦᠷᠦᠨᠡ᠃
ᠣᠳᠣ ᠦᠵᠡᠪᠡᠯ ᠰᠤᠷ ᠵᠠᠯᠠᠭᠰᠠᠨ ᠯᠠᠮᠠ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠪᠡᠶᠡ ᠡᠴᠡ ᠵᠠᠢᠯᠠᠨ ᠣᠳᠤᠭᠰᠠᠨ ᠠᠮᠢᠨ ᠰᠦᠨᠡᠰᠦ ᠪᠡᠨ ᠠᠷᠠᠢᠬᠠᠨ ᠡᠭᠡᠭᠦᠯᠦᠨ ᠠᠪᠴᠢᠷᠠᠬᠤ ᠪᠣᠯᠤᠯᠲᠠᠢ᠂ ᠲᠠᠰᠤ ᠠᠨᠢᠭᠰᠠᠨ ᠨᠢᠳᠦ ᠪᠡᠨ ᠨᠡᠭᠡᠭᠡᠨ ᠶᠡᠬᠡ ᠠᠮᠢᠰᠬᠤᠯ ᠠᠪᠤᠭᠠᠳ ᠠᠯᠢᠪᠠ ᠠᠮᠢᠲᠠᠳ ᠲᠤ ᠠᠮᠤᠷ ᠵᠢᠷᠭᠠᠯ ᠢ᠋ ᠲᠦᠭᠡᠭᠡᠬᠦ ᠢᠷᠦᠭᠡᠯ ᠦ᠋ᠨ ᠨᠣᠮ ᠢ᠋ ᠤᠶᠠᠬᠠᠨ ᠬᠣᠭᠣᠯᠠᠢ ᠪᠠᠷ ᠡᠬᠢᠯᠡᠨ ᠤᠩᠰᠢᠵᠤ ᠬᠣᠢᠰᠢ ᠡᠷᠭᠢᠨᠡ᠃ ᠪᠤᠰᠤᠳ ᠯᠠᠮᠠ ᠨᠠᠷ ᠮᠥᠨ ᠤᠩᠰᠢᠯᠴᠠᠨ ᠬᠠᠮᠲᠤ ᠶᠠᠪᠤᠨᠠ᠃ ᠲᠡᠳᠡᠨ ᠦ᠌ ᠠᠷᠤ ᠳ᠋ᠤ᠌ ᠶᠠᠭᠤ ᠦᠯᠡᠳᠡᠪᠡ ᠭᠡᠪᠡᠯ ᠳᠥᠯᠥ ᠨᠢ ᠪᠠᠷᠠᠭᠳᠠᠭᠰᠠᠨ ᠭᠠᠯ ᠤ᠋ᠨ ᠴᠢᠰ ᠤᠯᠠᠭᠠᠨ ᠴᠣᠭ ᠪᠥᠭᠡᠳ ᠬᠠᠷᠠᠩᠭᠤᠢ ᠳᠤᠮᠳᠠᠭᠤᠷ ᠭᠡᠷ ᠦ᠋ᠨ ᠵᠦᠭ ᠶᠠᠪᠤᠵᠤ ᠪᠠᠢᠭᠠ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍᠂ ᠪᠦᠬᠦ ᠭᠠᠮᠢᠩ ᠤ᠋ᠨ ᠰᠦᠨᠡᠰᠦ ᠰᠦᠯᠳᠡ ᠲᠩᠷᠢ ᠶ᠋ᠢᠨ ᠢ᠋ᠶ᠋ᠡᠨ ᠬᠠᠮᠲᠤ ᠦᠭᠡᠢ ᠪᠣᠯᠪᠠ᠃ ᠣᠳᠣ ᠲᠡᠳᠡᠨ ᠦ᠌ ᠳᠤᠮᠳᠠ ᠬᠠᠨᠢᠶᠠᠳᠤ ᠲᠣᠮᠣᠭᠣ ᠳᠠᠷᠬᠠᠨ ᠦᠢ ᠣᠯᠠᠨ ᠢ᠋ᠶ᠋ᠠᠷ ᠢ᠋ᠶ᠋ᠠᠨ ᠬᠢᠶᠠᠷᠠᠨᠠ ᠪᠣᠢ ᠭᠡᠰᠡᠨ ᠨᠢᠭᠡ ᠭᠣᠷᠢᠳᠠᠯᠭᠠ ᠡᠷᠭᠢᠯᠳᠦᠨᠡ᠃
ᠡᠨᠡ ᠰᠥᠨᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠨᠣᠢᠷ ᠳᠠᠬᠢᠨ ᠬᠤᠯᠵᠢᠯᠠ᠃ ᠶᠡᠷᠦ ᠭᠠᠮᠢᠩ ᠤ᠋ᠨ ᠡᠰᠡᠷᠭᠦ ᠲᠡᠮᠡᠴᠡᠬᠦ ᠶᠠᠪᠤᠳᠠᠯ ᠳ᠋ᠤ᠌ ᠰᠤᠷ ᠵᠠᠯᠠᠬᠤ ᠨᠢ ᠳᠡᠮᠡᠢ ᠰᠡᠳᠬᠢᠯ ᠢ᠋ᠶ᠋ᠡᠨ ᠬᠠᠭᠤᠷᠤᠭᠰᠠᠨ ᠠ᠋ᠴᠠ ᠥᠭᠡᠷᠡ ᠦᠨᠡᠨ ᠪᠣᠳᠠᠲᠤ ᠶᠠᠭᠤᠮᠠ ᠪᠣᠯᠬᠤ ᠤᠤ ᠭᠡᠵᠦ ᠪᠣᠳᠣᠵᠤ ᠡᠬᠢᠯᠡᠭᠰᠡᠨ ᠨᠢ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠲᠡᠷᠡ ᠬᠦ᠌ ᠪᠣᠳᠣᠯ ᠬᠤᠯᠵᠢᠨ ᠣᠴᠢᠵᠤ ᠤᠳᠠᠭᠠ ᠳᠠᠷᠠᠭᠠ ᠶ᠋ᠢᠨ ᠪᠠᠷᠢᠭᠳᠠᠭᠰᠠᠨ ᠬᠥᠮᠦᠰ ᠢ᠋ ᠳᠤᠷᠠᠰᠤᠨ ᠪᠣᠳᠣᠵᠤ ᠲᠡᠳᠡᠨ ᠦ᠌ ᠲᠥᠯᠥᠭᠡ ᠭᠠᠰᠢᠭᠤᠳᠠᠬᠤ ᠬᠠᠷᠠᠮᠰᠠᠬᠤ᠂ ᠭᠤᠨᠢᠨ ᠭᠤᠲᠤᠷᠠᠬᠤ ᠴᠥᠮ ᠨᠡᠢᠯᠡᠨ ᠲᠦᠮᠡᠨ ᠵᠦᠢᠯ ᠦ᠋ᠨ ᠵᠣᠪᠠᠯᠠᠩ ᠪᠣᠯᠤᠨ ᠡᠷᠭᠢᠯᠳᠦᠨᠡ᠃ ᠡᠴᠦᠰ ᠲᠦ᠋ᠨᠢ ᠪᠠᠯᠳᠠᠨᠴᠡᠷᠢᠩ ᠶᠠᠭᠤ ᠴᠣ ᠪᠣᠳᠣᠬᠤ ᠦᠭᠡᠢ ᠪᠠᠢᠬᠤ ᠶ᠋ᠢᠨ ᠲᠥᠯᠥᠭᠡ ᠲᠡᠮᠡᠴᠡᠪᠡ᠃ ᠡᠯᠳᠡᠪ ᠢ᠋ ᠪᠣᠳᠣᠬᠤ ᠨᠢ ᠵᠥᠪᠬᠡᠨ ᠭᠠᠳᠠᠭᠰᠢ ᠭᠠᠷᠤᠨ ᠣᠯᠵᠤ ᠰᠣᠨᠣᠰᠤᠭᠰᠠᠨ ᠤ᠋ ᠬᠢ ᠪᠠᠢᠬᠤ ᠲᠤᠯᠠ ᠪᠠᠯᠳᠠᠨᠴᠡᠷᠢᠩ ᠭᠠᠳᠠᠭᠰᠢ ᠭᠠᠷᠬᠤ ᠪᠠᠨ ᠪᠠᠢᠶᠠ ᠭᠡᠵᠦ ᠪᠣᠳᠣᠨᠠ᠃ ᠬᠡᠪᠲᠡᠭᠡᠳ ᠪᠠᠢᠬᠤ ᠶᠤᠮ ᠬᠣᠨᠳᠠ ᠭᠡᠵᠦ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠪᠣᠳᠣᠬᠤ ᠪᠣᠯᠪᠠᠴᠤ ᠮᠠᠷᠭᠠᠰᠢ ᠨᠢ ᠴᠢᠬᠢᠨ ᠳ᠋ᠦ᠍ ᠴᠢᠮᠡᠭ ᠲᠡᠢ ᠶᠠᠭᠤᠮᠠ ᠳᠤᠭᠤᠯᠳᠠᠬᠤ ᠶᠠᠭᠤ ᠮᠠᠭᠠᠳ ᠭᠡᠵᠦ ᠭᠣᠷᠢᠳᠠᠨ ᠮᠥᠨ ᠯᠡ ᠭᠠᠷᠤᠭᠰᠠᠨ ᠠᠵᠢ᠃ ᠭᠡᠲᠡᠯᠡ ᠪᠠᠰᠠ ᠯᠠ ᠬᠦᠩ ᠵᠢᠭ᠌ᠮᠡᠳᠲᠣᠷᠵᠢ ᠪᠠᠷᠢᠭᠳᠠᠵᠠᠢ᠃ ᠯᠠᠮᠠ ᠴᠡᠩᠳᠡ ᠤᠷᠭᠤᠵᠠᠢ᠃ ᠪᠠᠪᠤᠤ ᠭᠡᠭᠴᠢ ᠴᠦ᠍ ᠪᠠᠷᠢᠭᠳᠠᠭᠰᠠᠨ ᠪᠣᠯᠤᠯᠲᠠᠢ᠃ ᠪᠠᠰᠠ ᠵᠠᠪ᠂ ᠳᠠᠰᠢ ᠨᠠᠷ ᠠᠯᠠᠭᠠ ᠯᠠ ᠭᠡᠨᠡ᠃ ᠮᠠᠭᠰᠤᠷ ᠬᠤᠭᠤᠷᠴᠢ ᠶ᠋ᠢᠨ ᠬᠦᠦ ᠳᠤᠭᠠᠷᠵᠠᠪ ᠤᠷᠭᠤᠭᠰᠠᠨ ᠯᠠ ᠭᠡᠨᠡ᠃
ᠬᠠᠮᠢᠭᠠ ᠪᠣᠯ ᠬᠠᠮᠢᠭᠠ ᠠᠭᠤᠷ ᠪᠤᠬᠢᠨᠢᠳᠤᠯ ᠪᠣᠯᠤᠨ ᠬᠥᠮᠥᠰᠬᠡ ᠵᠠᠩᠭᠢᠳᠤᠭᠰᠠᠨ ᠬᠥᠮᠦᠰ ᠪᠠᠷᠢᠭᠳᠠᠭᠰᠠᠨ ᠵᠢᠭᠤᠲᠠᠭᠰᠠᠨ ᠬᠣᠶᠠᠷ ᠤ᠋ᠨ ᠲᠥᠯᠥᠭᠡ ᠰᠡᠳᠬᠢᠯ ᠵᠣᠪᠠᠨ ᠰᠢᠪᠡᠷ ᠢᠪᠢᠷ ᠬᠡᠯᠡᠯᠴᠡᠨᠡ᠃ ᠨᠢᠭᠡ ᠮᠡᠳᠡᠬᠦ ᠳ᠋ᠦ᠍ ᠵᠠᠮᠢᠶᠠᠨ ᠬᠦᠩ ᠦ᠋ᠨ ᠨᠡᠷᠡ ᠳᠤᠭᠤᠯᠳᠠᠬᠤ ᠰᠢᠭ᠋᠃
— ᠵᠠᠮᠢᠶᠠᠨ ᠬᠦᠩ ᠶᠠᠭᠠᠬᠢᠭᠰᠠᠨ ᠭᠡᠪᠡ? ᠭᠡᠵᠦ ᠰᠣᠴᠢᠨ ᠠᠰᠠᠭᠤᠬᠤ ᠳ᠋ᠤ᠌ ᠥᠭᠡᠷᠡ ᠬᠥᠮᠦᠨ ᠲᠡᠢ ᠴᠠᠭᠠᠰᠢ ᠬᠠᠷᠠᠨ ᠶᠠᠷᠢᠵᠤ ᠪᠠᠢᠭᠠ ᠬᠥᠮᠦᠨ ᠠᠬᠢᠨ᠄
— ᠠᠯᠢ ᠬᠡᠳᠦᠢᠨ ᠪᠠᠷᠢᠭᠳᠠᠭᠰᠠᠨ᠂ ᠣᠳᠣ ᠠᠷᠪᠠᠭᠠᠳ ᠬᠣᠨᠣᠵᠤ ᠪᠠᠢᠭᠠ ᠪᠣᠯ ᠤᠤ᠂ ᠫᠤᠤ ᠲᠠᠢ ᠭᠠᠮᠢᠩ ᠤ᠋ᠳ ᠳᠤᠮᠳᠠ ᠪᠠᠨ ᠬᠢᠨ ᠶᠠᠪᠤᠵᠤ ᠪᠠᠢᠬᠤ ᠲᠠᠢ ᠨᠢ ᠪᠢ ᠳᠠᠭᠠᠷᠢᠯᠳᠤᠭᠰᠠᠨ ᠭᠡᠵᠡᠢ᠃
ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠴᠢᠷᠠᠢ ᠬᠣᠬᠢᠨ ᠴᠠᠭᠠᠨ ᠪᠣᠯᠤᠨ ᠭᠡᠷ ᠦ᠋ᠨ ᠵᠦᠭ ᠶᠠᠭᠠᠷᠠᠨ ᠡᠷᠭᠢᠪᠡ᠃ ᠶᠠᠭᠤᠨ ᠳ᠋ᠤ᠌ ᠡᠨᠡ ᠪᠣᠢ? ᠪᠤᠤ ᠮᠡᠳᠡ᠂ ᠥᠪᠡᠷ ᠢ᠋ᠶ᠋ᠡᠨ ᠦᠯᠦ ᠮᠡᠳᠡᠨᠡ᠃ ᠭᠠᠮᠢᠩ ᠤ᠋ᠳ ᠶᠠᠭᠤ ᠬᠢᠵᠦ ᠪᠠᠢᠨᠠ ᠪᠣᠢ? ᠠᠯᠢ ᠵᠢᠳᠬᠦᠯᠲᠡᠨ ᠪᠦᠬᠦᠨ ᠢ᠋ ᠬᠠᠮᠤᠨ ᠪᠡᠷᠢᠯᠡᠵᠦ ᠪᠠᠢᠭᠠ ᠨᠢ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠲᠣᠳᠣᠷᠬᠠᠢ ᠠᠵᠢ᠃ ᠭᠤᠷᠪᠠᠨ ᠬᠣᠨᠣᠭ ᠭᠡᠷ ᠲᠡᠭᠡᠨ ᠰᠢᠭᠢᠳᠦᠭᠡᠳ᠂ ᠣᠳᠣ ᠶᠠᠭᠤ ᠳᠤᠭᠤᠯᠳᠠᠬᠤ ᠪᠣᠯ ᠭᠡᠵᠦ ᠳᠠᠬᠢᠨ ᠭᠠᠷᠬᠤ ᠳ᠋ᠤ᠌ ᠪᠠᠰᠠ ᠯᠠ ᠪᠠᠷᠢᠭᠳᠠᠵᠤ ᠭᠡᠨᠡ ᠯᠡ ᠭᠡᠯᠴᠡᠬᠦ ᠶᠦᠮ᠃ ᠵᠠ ᠬᠡᠨ ᠪᠠᠷᠢᠭᠳᠠᠪᠠ ᠭᠡᠬᠦ ᠳ᠋ᠦ᠍ ᠲᠤᠢᠩᠬᠤᠷ ᠤ᠋ᠨ ᠳᠠ ᠯᠠᠮᠠ ᠶ᠋ᠢᠨ ᠨᠡᠷᠡ ᠴᠦ᠍ ᠭᠠᠷᠤᠯᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ ᠪᠠᠰᠠ ᠰᠦᠬᠡᠪᠠᠭᠠᠲᠤᠷ ᠢ᠋ ᠪᠠᠷᠢᠭᠰᠠᠨ ᠬᠥᠮᠦᠨ ᠳ᠋ᠦ᠍ ᠠᠷᠪᠠᠨ ᠮᠢᠩᠭᠠᠨ ᠶᠠᠩᠴᠢᠶᠠᠨ ᠥᠭᠭᠦᠨᠡ ᠭᠡᠵᠦ ᠭᠠᠮᠢᠩ ᠤ᠋ᠨ ᠶᠠᠮᠤᠨ ᠠ᠋ᠴᠠ ᠵᠠᠷ ᠲᠠᠷᠬᠠᠭᠠᠭᠰᠠᠨ ᠭᠡᠨᠡ᠃ ᠪᠣᠳᠤᠤ᠂ ᠳ᠋ᠠᠨᠽᠡᠨ᠂ ᠯᠣᠰᠣᠯ᠂ ᠲᠣᠭᠰᠣᠮ᠂ ᠱᠠᠭᠳᠠᠷᠵᠠᠪ᠂ ᠴᠣᠢᠪᠠᠯᠰᠠᠩ ᠨᠠᠷ ᠢ᠋ ᠪᠠᠷᠢᠵᠤ ᠠᠪᠴᠢᠷᠠᠭᠰᠠᠨ ᠬᠥᠮᠦᠨ ᠢ᠋ ᠬᠥᠬᠢᠭᠦᠯᠦᠨ ᠱᠠᠩᠨᠠᠬᠤ ᠭᠡᠨᠡ ᠴᠦ᠍ ᠭᠡᠬᠦ ᠰᠢᠭ᠁ ᠬᠥᠮᠦᠰ ᠦ᠋ᠨ ᠶᠠᠷᠢᠶᠠ ᠡᠢᠮᠦ ᠪᠠᠢᠬᠤ ᠶ᠋ᠢᠨ ᠵᠡᠷᠭᠡᠴᠡᠭᠡ ᠪᠡᠷ᠄《ᠪᠣᠭᠳᠠ ᠯᠠᠮᠠᠳᠠᠨ ᠢ᠋ ᠶᠠᠭᠠᠬᠢᠬᠤ ᠪᠣᠯ?》 ᠭᠡᠰᠡᠨ ᠨᠢᠭᠡ ᠲᠦᠭᠰᠢᠭᠦᠷᠢᠲᠦ ᠶᠠᠷᠢᠶᠠ ᠪᠠᠢᠨ ᠪᠠᠢᠨ ᠳᠠᠭᠠᠷᠢᠯᠳᠤᠨᠠ᠃ ᠥᠩᠭᠡᠷᠡᠭᠰᠡᠨ ᠬᠠᠪᠤᠷ ᠭᠠᠮᠢᠩ ᠤ᠋ᠳ ᠪᠣᠭᠳᠠ ᠶ᠋ᠢ ᠪᠠᠷᠢᠨ ᠬᠣᠷᠢᠭᠠᠳ᠂ ᠣᠯᠠᠨ ᠤ᠋ ᠰᠡᠳᠬᠢᠯ ᠠᠢᠬᠤᠪᠲᠤᠷ ᠠᠯᠳᠠᠭᠳᠠᠨ ᠠᠶᠤᠯ ᠭᠠᠷᠴᠤ ᠮᠠᠭᠠᠳ ᠦᠭᠡᠢ ᠪᠣᠯᠵᠤ ᠢᠷᠡᠬᠦ ᠳ᠋ᠦ᠍ ᠰᠤᠯᠠᠯᠠᠭᠰᠠᠨ ᠪᠥᠭᠡᠳ ᠲᠡᠭᠡᠬᠦ ᠳ᠋ᠡᠭᠡᠨ ᠮᠥᠨ ᠣᠯᠠᠨ ᠤ᠋ ᠰᠡᠳᠬᠢᠯ ᠢ᠋ ᠥᠪᠡᠷ ᠲᠡᠭᠡᠨ ᠲᠠᠲᠠᠬᠤ ᠭᠡᠵᠦ ᠲᠤᠭ ᠬᠢᠬᠢᠷᠡᠢ ᠬᠡᠢᠰᠬᠡᠨ ᠪᠦᠷᠢᠶᠡ ᠪᠥᠮᠪᠥᠷ ᠨᠢᠵᠢᠭᠢᠨᠡᠭᠦᠯᠦᠨ ᠶᠡᠬᠡᠳᠡ ᠬᠦᠨᠳᠦᠳᠬᠡᠬᠦ ᠮᠠᠶᠢᠭ ᠭᠠᠷᠭᠠᠨ ᠣᠷᠳᠣᠨ ᠳ᠋ᠤ᠌ ᠵᠠᠯᠠᠭᠰᠠᠨ ᠠᠵᠢ᠃ ᠭᠡᠰᠡᠨ ᠴᠦ᠍ ᠠᠷᠠᠳ ᠣᠯᠠᠨ ᠭᠠᠮᠢᠩ ᠤ᠋ᠨ ᠲᠡᠷᠡ ᠠᠷᠭᠠ ᠤᠬᠠᠭᠠᠨ ᠳ᠋ᠤ᠌ ᠠᠪᠲᠠᠭᠳᠠᠭᠰᠠᠨ ᠵᠦᠢᠯ ᠦᠭᠡᠢ᠂ ᠬᠠᠷᠢᠨ ᠭᠠᠮᠢᠩ ᠤ᠋ᠳ ᠪᠣᠭᠳᠠ ᠯᠠᠮᠠᠳᠠᠨ ᠤ᠋ ᠠᠮᠢᠳᠤ ᠪᠤᠷᠬᠠᠨ ᠪᠣᠯᠬᠤ ᠶ᠋ᠢ ᠣᠳᠣ ᠮᠡᠳᠡᠨ᠂ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠮᠥᠷᠭᠥᠨ ᠰᠥᠭᠥᠳᠪᠡ ᠭᠡᠵᠦ ᠦᠵᠡᠭᠰᠡᠨ ᠪᠠᠢᠨᠠ᠃ ᠥᠨᠥ ᠴᠦ᠍ ᠭᠡᠰᠡᠨ ᠲᠡᠷᠡ ᠪᠣᠳᠣᠯ ᠨᠢ ᠬᠡᠪ ᠢ᠋ᠶ᠋ᠡᠷ ᠪᠥᠭᠡᠳ ᠭᠠᠮᠢᠩ ᠤ᠋ᠳ ᠪᠠᠷᠢᠬᠤ ᠦᠭᠡᠢ ᠳᠠᠭ ᠠ᠋ ᠭᠡᠵᠦ ᠪᠡᠶᠡ ᠪᠡᠶᠡ ᠶ᠋ᠢᠨ ᠰᠡᠳᠬᠢᠯ ᠢ᠋ ᠠᠷᠭᠠᠳᠠᠨ ᠲᠠᠢᠳᠬᠤᠷᠠᠭᠤᠯᠤᠨᠠ᠃ ᠭᠡᠲᠡᠯᠡ ᠪᠠᠰᠠ《ᠪᠣᠭᠳᠠ ᠶ᠋ᠢᠨ ᠣᠷᠳᠣᠨ ᠬᠡᠳᠦᠨ ᠳᠠᠪᠬᠤᠷ ᠭᠠᠮᠢᠩ ᠤ᠋ᠨ ᠮᠠᠨᠠᠭᠠ ᠪᠠᠷ ᠬᠦᠷᠢᠶᠡᠯᠡᠭᠳᠡᠨ ᠬᠥᠮᠦᠨ ᠠᠮᠢᠲᠠᠨ ᠣᠷᠣᠵᠤ ᠭᠠᠷᠴᠤ ᠪᠣᠯᠬᠤ ᠦᠭᠡᠢ ᠪᠠᠢᠨᠠ》 ᠭᠡᠵᠦ ᠬᠡᠯᠡᠯᠴᠡᠬᠦ ᠨᠢ ᠶᠠᠭᠤ ᠪᠣᠢ?
ᠪᠠᠯᠳᠠᠨᠴᠡᠷᠢᠩ᠂ ᠪᠣᠭᠳᠠ ᠴᠦ᠍ ᠮᠥᠨ ᠪᠠᠷᠢᠭᠳᠠᠭᠠᠳ ᠪᠠᠢᠭᠠ ᠶᠤᠮ ᠪᠠᠢᠨᠠ ᠭᠡᠵᠦ ᠪᠣᠳᠣᠭᠰᠠᠭᠠᠷ ᠭᠡᠷ ᠲᠡᠭᠡᠨ ᠬᠠᠷᠢᠭᠠᠳ ᠲᠦᠰᠢᠬᠦ ᠲᠥᠷᠥ᠂ ᠲᠤᠯᠭᠠᠭᠤᠷᠢᠯᠠᠬᠤ ᠬᠠᠨᠢ ᠨᠥᠬᠥᠳ ᠦᠭᠡᠢ ᠬᠥᠮᠦᠨ ᠦ᠌ ᠶᠣᠰᠣᠭᠠᠷ ᠮᠥᠨ ᠯᠡ ᠡᠯᠢᠭᠡ ᠲᠡᠪᠡᠷᠢᠨ ᠭᠠᠵᠠᠷ ᠰᠢᠷᠳᠡᠨ ᠰᠠᠭᠤᠪᠠ᠃ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠬᠢᠬᠤᠲᠤᠨᠠᠨ ᠨᠡᠭᠡᠭᠡᠭᠳᠡᠬᠦ ᠳ᠋ᠦ᠍᠄《ᠠᠱᠶ᠋ᠭᠦᠢ ᠬᠠᠭᠤᠴᠢᠨ ᠲᠠᠨᠢᠯ ᠤ᠋ᠳ ᠠ᠋ᠴᠠ ᠮᠠᠨᠢ ᠢᠷᠡᠵᠦ ᠪᠠᠢᠭᠠ ᠪᠣᠯᠪᠠᠤ》 ᠭᠡᠵᠦ ᠭᠣᠷᠢᠳᠠᠨ ᠰᠡᠳᠬᠢᠯ ᠰᠡᠷᠭᠦᠪᠡ᠃ ᠬᠣᠶᠠᠷ ᠬᠥᠮᠦᠨ ᠦ᠌ ᠬᠥᠯ ᠦ᠋ᠨ ᠴᠢᠮᠡᠭᠡ ᠡᠭᠦᠳᠡᠨ ᠳᠡᠭᠡᠷᠡ ᠢᠷᠡᠬᠦ ᠳ᠋ᠦ᠍ ᠤᠭᠲᠤᠨ ᠠᠪᠬᠤ ᠭᠡᠵᠦ ᠥᠨᠳᠡᠢᠪᠡ᠃ ᠭᠡᠲᠡᠯᠡ ᠬᠣᠶᠠᠷ ᠭᠠᠮᠢᠩ ᠪᠠᠢᠪᠠ᠃ ᠲᠦᠷᠦᠭᠦᠴᠢ ᠶ᠋ᠢᠨ ᠬᠢᠨᠢ ᠭᠠᠮᠢᠩ ᠳᠠᠷᠤᠭᠠ᠂ ᠳᠠᠷᠠᠭᠠᠴᠢ ᠶ᠋ᠢᠨ ᠬᠢᠨᠢ ᠬᠠᠷᠠᠴᠢᠨ ᠮᠣᠩᠭᠣᠯ ᠬᠡᠯᠡᠮᠦᠷᠴᠢ ᠠᠵᠢ᠃ ᠭᠠᠮᠢᠩ ᠳᠠᠷᠤᠭᠠ ᠮᠠᠰᠢ ᠲᠤᠷᠠᠩᠬᠠᠢ᠂ ᠨᠢᠳᠦ ᠨᠢ ᠤᠬᠤᠷᠬᠠᠢ ᠳ᠋ᠠᠭᠠᠨ ᠰᠢᠭᠢᠳᠴᠦ ᠰᠢᠨᠠᠨ ᠤ᠋ ᠶᠠᠰᠤ ᠭᠠᠷ ᠲᠡᠭᠡᠭᠯᠡᠮᠡ ᠶᠣᠷᠳᠣᠭᠣᠷ ᠪᠥᠭᠡᠳ ᠭᠠᠤᠯᠢᠨ ᠰᠢᠷᠭᠠᠯ ᠴᠢᠷᠠᠢ ᠶ᠋ᠢᠨ ᠬᠢᠨᠢ ᠨᠢᠮᠭᠡᠨ ᠤᠷᠤᠭᠤᠯ ᠳ᠋ᠤ᠌ ᠠᠷᠠᠮᠠᠭ ᠲᠠᠷᠠᠮᠠᠭ ᠬᠦᠷᠡᠩ ᠰᠠᠬᠠᠯ ᠪᠤᠷᠵᠢᠢᠨᠠ᠃ ᠬᠤᠪᠴᠠᠰᠤ ᠶ᠋ᠢᠨ ᠬᠢᠨᠢ ᠵᠠᠬᠠ ᠬᠦᠵᠦᠭᠦᠨ ᠳ᠋ᠡᠭᠡᠨ ᠬᠡᠳᠦ ᠡᠯᠪᠡᠭᠳᠡᠭᠰᠡᠨ ᠳᠥᠴᠢ ᠡᠷᠭᠢᠮᠡ ᠨᠠᠰᠤᠨ ᠤ᠋ ᠬᠥᠮᠦᠨ ᠪᠠᠢᠯᠠ᠃ ᠡᠨᠡ ᠬᠥᠮᠦᠨ ᠭᠡᠷ ᠦ᠋ᠨ ᠳᠣᠲᠣᠷᠠᠬᠢ ᠶ᠋ᠢ ᠤᠢᠳᠬᠠᠷ ᠲᠠᠢ ᠨᠢᠳᠦ ᠪᠡᠷ ᠰᠠᠨᠠᠭᠠ ᠠᠯᠲᠠᠨ ᠡᠷᠭᠢᠭᠦᠯᠵᠦ ᠲᠣᠭᠣᠷᠢᠭᠤᠯᠤᠨ ᠬᠠᠷᠠᠭᠠᠳ ᠬᠡᠯᠡᠮᠦᠷᠴᠢ ᠪᠡᠨ ᠴᠢ ᠶᠠᠷᠢ ᠭᠡᠬᠦ ᠮᠡᠲᠦ ᠨᠢᠭᠤᠷ ᠢ᠋ ᠨᠢ ᠰᠢᠷᠳᠡᠪᠡ᠃ ᠬᠡᠯᠡᠮᠦᠷᠴᠢ᠄
— ᠲᠠ ᠪᠠᠯᠳᠠᠨᠴᠡᠷᠢᠩ ᠮᠥᠨ ᠤᠤ?
— ᠮᠥᠨ᠂ ᠪᠢ ᠪᠠᠯᠳᠠᠨᠴᠡᠷᠢᠩ ᠪᠠᠢᠨᠠ᠃
— ᠲᠠ ᠠᠦ᠋ᠲ᠋ᠣᠨᠣᠮᠢᠲᠤ ᠶ᠋ᠢᠨ ᠭᠠᠳᠠᠭᠠᠳᠤ ᠶᠠᠮᠤᠨ ᠳ᠋ᠤ᠌ ᠭᠠᠳᠠᠭᠠᠳᠤ ᠬᠡᠷᠡᠭ ᠢ᠋ ᠡᠷᠬᠢᠯᠡᠭᠰᠡᠨ ᠲᠦᠰᠢᠮᠡᠯ ᠦ᠋ᠨ ᠠᠯᠪᠠᠨ ᠬᠠᠭᠠᠵᠤ ᠪᠠᠢᠭᠰᠠᠨ ᠪᠠᠢᠬᠠ᠂ ᠲᠡᠢᠮᠦ ᠤᠤ?
— ᠲᠡᠢᠮᠦ ᠠ᠋᠂ ᠬᠠᠭᠠᠵᠤ ᠪᠠᠢᠭᠰᠠᠨ᠁ ᠬᠡᠯᠡᠮᠦᠷᠴᠢ ᠨᠢ ᠳᠠᠷᠤᠭᠠ ᠳ᠋ᠠᠭᠠᠨ ᠰᠠᠶᠢ ᠶ᠋ᠢᠨ ᠢ᠋ᠶ᠋ᠡᠨ ᠶᠠᠷᠢᠭᠰᠠᠨ ᠢ᠋ ᠣᠢᠯᠠᠭᠠᠭᠤᠯᠤᠨ ᠳᠠᠮᠵᠢᠭᠤᠯᠪᠠ᠃ ᠳᠠᠷᠤᠭᠠ ᠨᠢ᠄《ᠣᠩ᠂ ᠣᠩ》 ᠳᠤᠤᠭᠠᠷᠤᠨ ᠰᠣᠨᠣᠰᠤᠭᠠᠳ᠄
— ᠲᠠᠨ ᠢ᠋ ᠮᠠᠨ ᠤ᠋ ᠰᠧᠯᠢᠩᠪᠦ ᠶ᠋ᠢᠨ ᠶᠠᠮᠤᠨ ᠳᠠᠭᠤᠳᠠᠪᠠ ᠭᠡᠵᠦ ᠬᠡᠯᠡ ᠭᠡᠪᠡ᠃ ᠲᠡᠭᠦᠨ ᠢ᠋ ᠨᠢ ᠪᠠᠯᠳᠠᠨᠴᠡᠷᠢᠩ ᠲᠣᠳᠣᠷᠬᠠᠢ ᠣᠢᠯᠠᠭᠠᠭᠰᠠᠨ ᠪᠣᠯᠪᠠᠴᠤ ᠬᠡᠯᠡᠮᠦᠷᠴᠢ ᠪᠡᠷ ᠵᠣᠷᠢᠭᠤᠳᠠ ᠳᠠᠪᠲᠠᠭᠤᠯᠪᠠ᠃ ᠲᠡᠷᠡ ᠵᠠᠭᠤᠷᠠ ᠪᠠᠨ᠄《ᠨᠠᠮᠠᠶ᠋ᠢ ᠪᠤᠰᠤᠳ ᠢ᠋ ᠪᠠᠢᠴᠠᠭᠠᠨ ᠰᠢᠭᠦᠬᠦ ᠥᠨᠥᠬᠢ ᠬᠡᠷᠡᠭ ᠲᠡᠭᠡᠨ ᠠᠰᠢᠭᠯᠠᠬᠤ ᠨᠢ》 ᠭᠡᠵᠦ ᠲᠠᠭᠠᠪᠤᠷᠢᠯᠠᠨ ᠬᠡᠷᠬᠢᠨ ᠮᠤᠯᠲᠤᠷᠠᠬᠤ ᠲᠤᠬᠠᠢ ᠪᠣᠳᠣᠪᠠ᠃ ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ《 ᠵᠠ᠂ ᠵᠠ》 ᠭᠡᠳ ᠮᠠᠯᠠᠭᠠᠢ ᠠᠪᠤᠨ ᠪᠣᠰᠬᠤ ᠳ᠋ᠤ᠌ ᠬᠡᠯᠡᠮᠦᠷᠴᠢ᠄
— ᠦᠭᠡᠢ ᠲᠠ ᠪᠠᠢᠵᠠ! ᠪᠣᠳᠣᠪᠠᠯ ᠲᠠ ᠲᠡᠨᠳᠡ ᠭᠡᠵᠦ ᠬᠡᠴᠢᠨᠡᠭᠡᠨ ᠴᠦ᠍ ᠬᠣᠨᠣᠵᠤ ᠮᠠᠭᠠᠳ ᠦᠭᠡᠢ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠠᠪ! ᠭᠡᠪᠡ᠃
ᠪᠠᠯᠳᠠᠨᠴᠡᠷᠢᠩ ᠰᠠᠶᠢ ᠤᠴᠢᠷ ᠢ᠋ ᠪᠦᠷᠢᠨ ᠣᠢᠯᠠᠭᠠᠮᠠᠭᠴᠠ ᠠᠭᠱᠠᠨ ᠵᠠᠭᠤᠷᠠ ᠶ᠋ᠢᠨ ᠳᠣᠲᠣᠷᠠ ᠪᠦᠬᠦ ᠪᠡᠶᠡ ᠵᠢᠷᠢᠰᠬᠢᠨ ᠵᠢᠷᠦᠬᠡᠨ ᠦ᠌ ᠴᠣᠬᠢᠯᠲᠠ ᠲᠠᠷᠢᠬᠢᠨ ᠳᠣᠲᠣᠷᠠ ᠪᠠᠨ ᠲᠠᠰᠤᠷᠠᠬᠤ ᠰᠢᠭ᠋ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ《ᠵᠠ ᠶᠠᠭᠠᠬᠢᠮᠤᠢ! ᠡᠳᠦᠷ ᠳᠣᠳᠣᠮ ᠤᠯᠤᠰ ᠣᠷᠣᠨ ᠤ᠋ ᠲᠡᠷᠢᠭᠦᠨ ᠦ᠌ ᠬᠥᠮᠦᠰ ᠦ᠋ᠨ ᠡᠳᠦᠢ ᠲᠡᠳᠦᠢ ᠪᠡᠷ ᠢ᠋ᠶ᠋ᠡᠨ ᠪᠠᠷᠢᠭᠳᠠᠬᠤ ᠶ᠋ᠢ ᠰᠣᠨᠣᠰᠤᠨ ᠲᠠᠷᠴᠢᠯᠠᠵᠤ ᠰᠠᠭᠤᠭᠰᠠᠨ ᠠ᠋ᠴᠠ ᠨᠢᠭᠡᠨ ᠠᠳᠠᠯᠢ ᠪᠠᠷᠢᠭᠳᠠᠨ ᠬᠠᠮᠲᠤ ᠰᠠᠭᠤᠵᠤ ᠪᠠᠢᠭᠰᠠᠨ ᠨᠢ ᠳᠡᠭᠡᠷᠡ》 ᠭᠡᠵᠦ ᠪᠣᠳᠣᠭᠳᠠᠬᠤ ᠲᠠᠢ ᠵᠡᠷᠭᠡ ᠰᠡᠳᠬᠢᠯ ᠣᠩᠭᠣᠢᠵᠤ ᠨᠢᠭᠡ ᠯᠡ ᠶᠡᠬᠡ ᠰᠠᠢᠬᠠᠨ ᠪᠣᠯᠬᠤ ᠰᠢᠭ᠋ ᠪᠣᠯᠪᠠ᠃ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠶᠠᠭᠠᠷᠠᠨ ᠬᠠᠭᠤᠯᠤᠨ ᠠᠪᠤᠭᠰᠠᠨ ᠳ᠋ᠤ᠌ ᠭᠠᠮᠢᠩ ᠳᠠᠷᠤᠭᠠ᠄《ᠲᠠ ᠪᠢᠲᠡᠭᠡᠢ ᠶᠠᠭᠠᠷᠠ! ᠴᠠᠢ ᠬᠣᠭᠣᠯᠠ ᠪᠠᠨ ᠠᠶᠠᠲᠠᠢ ᠲᠠᠪᠠᠲᠠᠢ ᠢᠳᠡᠵᠦ ᠤᠤᠭᠤᠬᠤ ᠶ᠋ᠢ ᠴᠦ᠍ ᠪᠢ ᠵᠥᠪᠰᠢᠶᠡᠷᠡᠨᠡ》 ᠭᠡᠪᠡ᠃ ᠡᠭᠦᠨ ᠳ᠋ᠦ᠍ ᠪᠠᠯᠳᠠᠨᠴᠡᠷᠢᠩ ᠪᠠᠶᠠᠷᠯᠠᠵᠤ᠂《ᠦᠨᠡᠬᠡᠷ ᠬᠢᠲᠠᠳ ᠤ᠋ᠨ ᠠᠷᠠᠳ ᠲᠦᠮᠡᠨ ᠪᠢᠳᠡᠨ ᠦ᠌ ᠬᠣᠭᠣᠷᠣᠨᠳᠣ ᠥᠰᠢᠶᠡ ᠬᠣᠨᠵᠢᠶᠠᠨ ᠪᠠᠢᠬᠤ ᠦᠭᠡᠢ ᠰᠢᠦ ᠳᠡ!》 ᠭᠡᠳᠡᠭ ᠨᠢᠭᠡ ᠰᠢᠨᠡ ᠪᠣᠳᠣᠯ ᠲᠥᠷᠥᠪᠡ᠃ ᠬᠥᠨᠵᠢᠯᠡ ᠳᠡᠪᠢᠰᠬᠡᠷ ᠢ᠋ᠶ᠋ᠡᠨ ᠰᠤᠭᠤᠪᠴᠢᠯᠠᠨ ᠭᠠᠷᠬᠤ ᠳ᠋ᠤ᠌ ᠭᠡᠷ ᠦ᠋ᠨ ᠬᠠᠭᠠᠯᠭᠠᠨ ᠤ᠋ ᠬᠣᠶᠠᠷ ᠲᠠᠯᠠ ᠠ᠋ᠴᠠ ᠬᠣᠶᠠᠷ ᠭᠠᠮᠢᠩ ᠫᠤᠤ ᠲᠣᠩᠭᠣᠢᠯᠭᠠᠨ ᠤᠭᠲᠤᠨ ᠠᠪᠴᠤ ᠠᠷᠤ ᠠ᠋ᠴᠠ ᠨᠢ ᠳᠠᠭᠠᠵᠤ ᠡᠬᠢᠯᠡᠪᠡ᠃ ᠬᠠᠰᠢᠶᠠᠨ ᠤ᠋ ᠬᠠᠭᠠᠯᠭᠠ ᠪᠠᠷ ᠭᠠᠷᠬᠤ ᠳ᠋ᠤ᠌ ᠪᠠᠰᠠ ᠬᠣᠶᠠᠷ ᠭᠠᠮᠢᠩ ᠤᠭᠲᠤᠨ ᠠᠪᠴᠤ ᠡᠮᠦᠨᠡ ᠨᠢ ᠣᠷᠣᠪᠠ᠃
ᠣᠳᠣ ᠯᠠ ᠪᠠᠯᠳᠠᠨᠴᠡᠷᠢᠩ ᠥᠪᠡᠷ ᠢ᠋ ᠪᠡᠨ ᠬᠡᠴᠢᠨᠡᠭᠡᠨ ᠰᠦᠷᠡᠬᠡᠢ ᠲᠣᠮᠣ ᠬᠥᠮᠦᠨ ᠪᠣᠯᠬᠤ ᠪᠠᠨ ᠮᠡᠳᠡᠪᠡ᠃ ᠤᠷᠢᠳ ᠡᠮᠦᠨᠡ ᠥᠪᠡᠷ ᠢ᠋ ᠪᠡᠨ ᠲᠤᠩ ᠶᠠᠯᠢᠭᠦᠢ ᠪᠠᠭᠠ᠂ ᠬᠦᠴᠦ ᠴᠢᠳᠠᠯ ᠢ᠋ᠶ᠋ᠠᠷ ᠪᠣᠯᠪᠠᠴᠤ ᠳᠣᠷᠣᠢ ᠣᠶᠤᠨ ᠤᠬᠠᠭᠠᠨ ᠤ᠋ ᠲᠠᠯᠠ ᠪᠠᠷ ᠴᠦ᠍ ᠭᠡᠪᠡᠯ ᠪᠤᠭᠤᠷᠤᠯ ᠲᠣᠯᠣᠭᠠᠢ ᠲᠠᠢ᠂ ᠨᠢᠳᠦᠨ ᠦ᠌ ᠬᠢᠨᠢ ᠵᠣᠪᠬᠢ ᠪᠠᠭᠤᠭᠰᠠᠨ ᠡᠪᠦᠭᠡᠳ ᠦ᠋ᠨ ᠳᠡᠷᠭᠡᠳᠡ ᠶᠠᠭᠤ ᠴᠦ᠍ ᠪᠢᠰᠢ ᠭᠡᠵᠦ ᠪᠡᠶᠡ ᠪᠡᠨ ᠲᠤᠩ ᠪᠠᠭᠠ ᠳ᠋ᠤ᠌ ᠠᠪᠠᠴᠢᠨ ᠪᠣᠳᠣᠳᠠᠭ ᠠᠵᠢ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠳᠠᠪᠰᠢᠯᠲᠦ