ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ – ᠳ᠋᠂ ᠨᠠᠮᠲᠠᠭ- ᠴᠠᠭ ᠲᠥᠷᠥ ᠶᠢᠨ ᠦᠢᠮᠡᠭᠡᠨ ᠂ᠬᠣᠶᠠᠳᠤᠭᠠᠷ ᠪᠦᠯᠦᠭ 〔ᠨᠢᠭᠡ〕 Цаг төрийн үймээн – Д ᠂ Намдаг - Цаг төрийн үймээн ᠂ хоёрдугаар бүлэг -1
217ᠶᠡᠷᠦ ᠪᠤᠰᠤ ᠶᠢᠨ ᠡᠳᠦᠷ
ᠬᠦᠷᠢᠶᠡᠨ ᠦ᠌ ᠤᠷᠢᠳᠤᠬᠢ ᠪᠣᠭᠳᠠ ᠠᠭᠤᠯᠠ ᠶ᠋ᠢᠨ ᠣᠢ᠂ ᠣᠷᠣᠢ ᠠ᠋ᠴᠠ ᠪᠠᠨ ᠡᠬᠢᠯᠡᠨ ᠰᠢᠷᠠᠯᠠᠭᠰᠠᠨ ᠲᠤᠬᠠᠢ ᠳ᠋ᠤ᠌ ᠡᠪᠦᠭᠡᠳ ᠬᠥᠭᠰᠢᠳ《ᠠ ᠳᠠ ᠠᠢᠬᠤᠪᠲᠤᠷ ᠵᠤᠳ ᠲᠤᠷᠠᠬᠠᠨ ᠪᠣᠯᠤᠨᠠ ᠪᠣᠢ?》 ᠭᠡᠬᠦ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠷᠭᠡᠴᠡᠭᠡ ᠪᠡᠷ《ᠡᠨᠡ ᠵᠢᠯ ᠪᠡᠴᠢᠨ ᠵᠢᠯ! ᠪᠡᠴᠢᠨ ᠵᠢᠯ ᠶᠡᠷᠦ ᠠᠮᠤᠷ ᠦᠭᠡᠢ ᠵᠤᠳ ᠲᠤᠷᠠᠬᠠᠨ ᠪᠣᠯᠬᠤ ᠲᠡᠳᠦᠢ ᠦᠭᠡᠢ ᠬᠠᠨᠢᠶᠠᠳᠤ ᠲᠣᠮᠣᠭᠣ ᠴᠤ᠌ ᠪᠣᠯᠬᠤ ᠨᠢ ᠭᠠᠷᠳᠠᠭ ᠰᠢᠦ ᠳᠡ》 ᠭᠡᠵᠦ ᠰᠡᠳᠬᠢᠯ ᠲᠦᠭᠰᠢᠨ ᠬᠡᠯᠡᠯᠴᠡᠨᠡ᠃ ᠬᠠᠷᠢᠨ ᠭᠠᠮᠢᠩ ᠤ᠋ᠨ ᠲᠤᠬᠠᠢ ᠭᠡᠪᠡᠯ᠂ ᠬᠡᠳᠦᠬᠡᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ ᠬᠦᠷᠲᠡᠯᠡ ᠬᠥᠮᠦᠨ ᠲᠣᠯᠣᠭᠠᠢ ᠲᠠᠢ ᠪᠦᠬᠦᠨ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠬᠠᠷᠢᠶᠠᠯ ᠵᠠᠨᠤᠯ᠂ ᠥᠰᠢᠶᠡ ᠬᠣᠷᠣᠰᠤᠯ᠁ ᠡᠯᠳᠡᠪ ᠮᠠᠭᠤ ᠪᠠᠷ ᠱᠠᠭᠰᠢᠨ ᠱᠤᠤᠭᠢᠳᠠᠭ ᠪᠠᠢᠭᠰᠠᠨ ᠢ᠋ᠶ᠋ᠠᠨ ᠣᠳᠣ ᠪᠣᠯᠬᠣᠷ᠂ ᠡᠨᠡ ᠳᠡᠢᠯᠦᠭᠳᠡᠰᠢ ᠦᠭᠡᠢ ᠶᠠᠭᠤᠮᠠ ᠶ᠋ᠢ ᠳᠡᠮᠡᠢ ᠲᠡᠭᠡᠬᠦ ᠶ᠋ᠢᠨ ᠬᠡᠷᠡᠭ ᠶᠠᠭᠤ ᠪᠢᠯᠡ ᠭᠡᠰᠡᠨ ᠰᠢᠭ ᠳᠠᠩ ᠶᠡᠬᠡ ᠶᠠᠭᠤᠮᠠ ᠶᠠᠷᠢᠬᠤ ᠪᠠᠨ ᠪᠣᠯᠢᠭᠰᠠᠨ ᠠᠵᠢ᠃ ᠭᠡᠪᠡᠴᠦ ᠭᠠᠮᠢᠩ ᠭᠡᠬᠦ ᠶ᠋ᠢᠨ ᠣᠷᠣᠨ ᠳ᠋ᠤ᠌《ᠴᠢᠨᠳᠠᠷᠤᠤ》 ᠭᠡᠵᠦ ᠨᠡᠷᠡᠯᠡᠨᠡ᠃ ᠬᠡᠳᠦᠨ ᠰᠠᠷᠠ ᠶ᠋ᠢᠨ ᠡᠮᠦᠨᠡ《ᠭᠠᠮᠢᠩ ᠤ᠋ᠳ ᠦᠨᠡᠰᠦ ᠴᠢᠨᠳᠠᠷᠤᠤ ᠰᠢᠭ᠋ ᠬᠡᠢᠰᠦᠨ ᠠᠷᠢᠯᠤᠭᠠᠰᠠᠢ!》 ᠭᠡᠵᠦ ᠵᠠᠨᠤᠯᠬᠢᠯᠠᠨ ᠬᠠᠷᠢᠶᠠᠭᠰᠠᠨ ᠨᠢ ᠬᠠᠵᠠᠭᠤ ᠶ᠋ᠢᠨ ᠬᠥᠮᠦᠨ ᠦ᠌ ᠪᠠᠬᠠ ᠬᠠᠩᠬᠤ ᠳ᠋ᠤ᠌ ᠬᠦᠷᠦᠭᠰᠡᠨ ᠪᠠᠢᠬᠤ ᠪᠥᠭᠡᠳ ᠲᠡᠭᠦᠨᠴᠡ ᠬᠣᠢᠰᠢ ᠣᠯᠠᠨ ᠤ᠋ ᠰᠡᠳᠬᠢᠯ ᠳ᠋ᠦ᠍ ᠦᠨᠡᠬᠡᠷ᠄《ᠦᠨᠡᠰᠦ ᠴᠢᠨᠳᠠᠷᠤᠤ》 ᠭᠡᠵᠦ ᠪᠠᠢᠪᠠᠯ ᠲᠡᠳᠡᠨ ᠦ᠌ ᠬᠤᠪᠢ ᠵᠠᠶᠠᠭᠠ ᠳᠣᠷᠣᠢᠲᠠᠬᠤ ᠪᠣᠯᠤᠨᠠ ᠭᠡᠵᠦ ᠪᠣᠳᠣᠭᠳᠠᠭᠰᠠᠨ ᠠ᠋ᠴᠠ ᠡᠢᠨᠬᠦ ᠨᠡᠷᠡᠯᠡᠬᠦ ᠪᠣᠯᠤᠭᠰᠠᠨ ᠠᠵᠢ᠃
ᠥᠨᠥᠳᠥᠷ ᠦ᠋ᠨ ᠲᠩᠷᠢ ᠮᠠᠰᠢ ᠰᠠᠢᠬᠠᠨ᠃ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡ ᠲᠡᠷᠡ ᠴᠢᠭ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠲᠤᠯᠭᠠ ᠶ᠋ᠢᠨ ᠭᠠᠯ ᠳ᠋ᠤ᠌ ᠡᠯᠢᠭᠡᠨ ᠪᠡᠶᠡ ᠪᠡᠨ ᠡᠭᠡᠭᠡᠵᠦ ᠪᠠᠢᠭᠠ ᠰᠢᠭ᠋ ᠨᠠᠮᠤᠷ ᠤ᠋ᠨ ᠣᠭᠣᠲᠣᠷ ᠰᠢᠷᠠ ᠨᠠᠷᠠᠨ ᠳ᠋ᠤ᠌ ᠳᠤᠯᠠᠭᠠᠴᠠᠵᠤ ᠪᠠᠢᠬᠤ ᠪᠥᠭᠡᠳ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠨᠠᠮ ᠲᠠᠢᠪᠤᠩ᠂ ᠬᠦᠷᠢᠶᠡᠨ ᠦ᠌ ᠬᠣᠢᠲᠠᠢ᠂ ᠤᠷᠢᠲᠠᠢ᠂ ᠪᠠᠷᠠᠭᠤᠨ ᠭᠤᠷᠪᠠᠨ ᠴᠢᠭᠯᠡᠯ ᠢ᠋ᠶ᠋ᠡᠷ ᠠᠶᠠᠨ ᠵᠠᠮ ᠤ᠋ᠨ ᠬᠥᠮᠦᠰ ᠨᠠᠭᠠᠰᠢ ᠴᠠᠭᠠᠰᠢ ᠬᠦᠪᠦᠷᠡᠯᠳᠦᠨᠡ᠃ ᠭᠠᠭᠴᠠᠬᠠᠨ ᠵᠡᠭᠦᠨ ᠡᠴᠡ ᠶᠠᠭᠤ ᠴᠦ᠍ ᠠᠯᠠᠭᠠ᠃ ᠶᠠᠭᠠᠬᠢᠭᠠᠳ ᠬᠥᠯ ᠬᠤᠷᠢᠶᠠᠭᠳᠠᠭᠰᠠᠨ ᠢ᠋ ᠱᠣᠬᠣᠭᠣᠷᠬᠠᠨ ᠰᠣᠨᠢᠷᠬᠠᠭᠰᠠᠨ ᠬᠥᠮᠦᠨ ᠴᠦ᠍ ᠲᠡᠳᠦᠢ ᠦᠭᠡᠢ ᠪᠠᠢᠯᠠ᠃
ᠵᠠᠬᠠ ᠵᠡᠭᠡᠯᠢ ᠳᠡᠭᠡᠷᠡ ᠵᠦᠢᠯ ᠪᠦᠷᠢ ᠶ᠋ᠢᠨ ᠬᠤᠳᠠᠯᠳᠤᠭᠠᠨ ᠤ᠋ ᠮᠠᠯ ᠬᠡᠳᠦᠨ ᠵᠠᠭᠤ ᠪᠠᠷ ᠪᠠᠭᠰᠢᠷᠠᠵᠤ᠂ ᠳᠡᠯᠭᠡᠭᠦᠷ ᠮᠠᠢᠮᠠᠢ ᠶ᠋ᠢᠨ ᠭᠠᠵᠠᠷ ᠪᠠᠷᠠᠭᠠ ᠲᠠᠸᠠᠷ᠂ ᠡᠯᠳᠡᠪ ᠡᠳ᠋᠂ ᠬᠡᠷᠡᠭᠯᠡᠭᠳᠡᠬᠦᠨ ᠦ᠌ ᠶᠠᠭᠤᠮᠠᠰ ᠵᠢᠰᠦᠨ ᠵᠦᠢᠯ ᠢ᠋ᠶ᠋ᠡᠷ ᠠᠯᠠᠭᠯᠠᠨ ᠲᠡᠭᠦᠪᠡᠷ ᠭᠡᠷᠦᠨ ᠬᠡᠰᠦᠨ ᠶᠠᠪᠤᠭᠠ ᠬᠥᠮᠦᠨ ᠪᠦᠬᠦᠨ ᠨᠢᠭᠡ ᠨᠢᠭᠡᠨ ᠡᠴᠡ ᠪᠡᠨ ᠬᠣᠨᠵᠢᠬᠤ ᠬᠣᠨᠵᠢᠭᠰᠠᠨ ᠵᠦᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠪᠠᠶᠠᠵᠢᠬᠤ ᠠ᠋ᠴᠠ ᠥᠭᠡᠷᠡ ᠶᠠᠭᠤ ᠴᠦ᠍ ᠡᠰᠡ ᠪᠣᠳᠣᠨ᠂ ᠢᠳᠡ ᠱᠠᠭᠰᠢᠭᠠᠨ ᠱᠤᠤᠭᠢᠶᠠᠨ ᠪᠣᠯᠵᠤ ᠪᠠᠢᠭᠠ ᠳ᠋ᠤ᠌ ᠪᠠᠯᠳᠠᠨᠴᠡᠷᠢᠩ ᠭᠡᠷ ᠲᠡᠭᠡᠨ ᠭᠠᠭᠴᠠᠭᠠᠷ ᠵᠢᠰᠦ ᠴᠢᠷᠠᠢ ᠨᠢ ᠴᠣᠩᠬᠢᠢᠨ᠂ ᠴᠠᠭᠠᠨ ᠪᠥᠭᠡᠳ ᠪᠡᠶᠡ ᠮᠠᠬᠠᠪᠣᠳ ᠨᠡᠯᠢᠶᠡᠳ ᠲᠤᠷᠠᠭᠰᠠᠨ ᠠ᠋ᠴᠠ ᠭᠠᠷ ᠤ᠋ᠨ ᠦᠶᠡ ᠪᠣᠯᠭᠠᠨ ᠤ᠋ ᠵᠠᠪᠰᠠᠷ ᠢ᠋ᠶ᠋ᠠᠷ ᠴᠢᠨᠠᠳᠤ ᠶᠠᠭᠤᠮᠠᠰ ᠳᠠᠷᠤᠢ ᠨᠡᠪᠲᠡ ᠬᠠᠷᠠᠭᠳᠠᠬᠤ ᠪᠣᠯᠵᠠᠢ᠃
ᠪᠠᠯᠳᠠᠨᠴᠡᠷᠢᠩ ᠣᠳᠣ ᠲᠡᠷᠡ ᠲᠤᠷᠠᠩᠬᠠᠢ ᠭᠠᠷ ᠢ᠋ᠶ᠋ᠠᠨ ᠬᠠᠨᠴᠤᠢ ᠳ᠋ᠠᠭᠠᠨ ᠵᠥᠷᠢᠭᠦᠯᠦᠨ ᠡᠯᠢᠭᠡ ᠪᠡᠨ ᠲᠡᠪᠡᠷᠢᠨ ᠰᠠᠭᠤᠬᠤ ᠪᠣᠯᠵᠠᠢ᠃ ᠤᠷᠢᠳᠤ ᠡᠮᠦᠨᠡ ᠪᠠᠯᠳᠠᠨᠴᠡᠷᠢᠩ ᠭᠡᠷ ᠡᠴᠡ ᠭᠠᠷᠪᠠᠯ ᠣᠴᠢᠬᠤ ᠠᠢᠯ ᠲᠠᠢ᠂ ᠬᠦᠷᠦᠭᠡᠳ ᠢᠷᠡᠳᠡᠭ ᠨᠠᠢᠵᠢ ᠨᠥᠬᠥᠳ ᠲᠡᠢ ᠠᠭᠰᠠᠨ ᠪᠣᠯ᠂ ᠬᠠᠢᠷᠠᠲᠠᠢ ᠠᠮᠠᠷᠠᠭ ᠢ᠋ᠶ᠋ᠠᠨ ᠠᠯᠳᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠬᠡᠨ ᠦ᠌ ᠳ᠋ᠦ᠍ ᠴᠦ᠍ ᠣᠷᠣᠳᠠᠭ ᠦᠭᠡᠢ᠂ ᠮᠥᠨ ᠬᠡᠨ ᠴᠦ᠍ ᠲᠡᠭᠦᠨ ᠦ᠌ ᠭᠡᠵᠦ ᠢᠷᠡᠳᠡᠭ ᠦᠭᠡᠢ᠂ ᠶᠣᠰᠣᠲᠠᠢ ᠭᠣᠣᠨᠢ ᠪᠡᠶᠡ ᠭᠣᠵᠣᠩ ᠲᠣᠯᠣᠭᠠᠢ ᠭᠡᠭᠴᠢ ᠪᠣᠯᠵᠠᠢ᠃ ᠥᠪᠡᠷ ᠲᠦ᠍ ᠲᠣᠬᠢᠶᠠᠯᠳᠤᠭᠰᠠᠨ ᠭᠠᠰᠢᠭᠤᠨ ᠬᠠᠭᠠᠴᠠᠯ ᠢ᠋ ᠥᠪᠡᠷ ᠦ᠋ᠨ ᠪᠡᠶᠡ ᠪᠡᠷ ᠠᠮᠰᠠᠵᠤ᠂ ᠪᠤᠰᠤᠳ ᠲᠤ ᠮᠡᠳᠡᠭᠳᠡᠭᠰᠡᠨ ᠵᠦᠢᠯ ᠦᠭᠡᠢ ᠪᠠᠢᠪᠠᠴᠤ ᠤᠭ ᠬᠡᠷᠡᠭ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ ᠬᠦᠷᠢᠶᠡ ᠳᠠᠶᠠᠭᠠᠷ ᠲᠤ ᠲᠦᠭᠡᠨ ᠲᠠᠷᠬᠠᠵᠤ᠂ ᠬᠥᠮᠦᠰ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠠᠮᠠ ᠳᠠᠮᠵᠢᠭᠤᠯᠤᠨ ᠶᠠᠷᠢᠬᠤ ᠳ᠋ᠠᠭᠠᠨ᠂ ᠪᠠᠯᠳᠠᠨᠴᠡᠷᠢᠩ ᠢ᠋ ᠤᠬᠠᠭᠠᠨ ᠰᠣᠯᠢᠶᠠ ᠲᠠᠢ ᠪᠣᠯᠤᠭᠰᠠᠨ ᠭᠡᠨᠡ ᠭᠡᠯᠴᠡᠬᠦ ᠲᠤᠯᠠ ᠲᠠᠨᠢᠯ ᠲᠠᠯᠠ ᠶ᠋ᠢᠨ ᠬᠥᠮᠦᠰ ᠳᠡᠮᠡᠢ ᠰᠡᠳᠬᠢᠯ ᠵᠣᠪᠠᠨᠢᠨ ᠣᠷᠣᠵᠤ ᠢᠷᠡᠵᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠤᠭᠰᠠᠨ ᠪᠠᠢᠪᠠ᠃ ᠢᠩᠭᠢᠭᠡᠳ ᠪᠠᠯᠳᠠᠨᠴᠡᠷᠩ ᠭᠡᠷ ᠲᠡᠭᠡᠨ ᠭᠠᠪ ᠭᠠᠭᠴᠠᠭᠠᠷ ᠢ᠋ᠶ᠋ᠠᠨ᠂ ᠰᠡᠳᠬᠢᠯ ᠳ᠋ᠦ᠍ᠨᠢ ᠵᠥᠪᠬᠡᠨ ᠣᠯᠠᠨ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠲᠠᠰᠤᠷᠠᠯᠲᠠ ᠦᠭᠡᠢ ᠡᠷᠭᠢᠯᠳᠦᠵᠦ ᠪᠠᠢᠭᠠ ᠭᠤᠨᠢᠭ ᠤ᠋ᠨ ᠬᠠᠷᠠ ᠲᠣᠯᠪᠣ ᠯᠠ ᠡᠷᠭᠢᠯᠳᠦᠨᠡ᠃ ᠴᠢᠬᠢᠨ ᠳ᠋ᠡᠭᠡᠨ ᠨᠢᠭᠡ ᠤᠳᠠᠭᠠ《ᠨᠦᠷᠬᠢᠭᠰᠡᠨ》 ᠣᠭᠵᠣᠮ ᠠᠪᠢᠶᠠ ᠭᠡᠨᠡᠳᠲᠡ ᠰᠣᠨᠣᠰᠳᠠᠬᠤ ᠳ᠋ᠤ᠌ ᠭᠠᠢᠬᠠᠨ ᠴᠢᠩᠨᠠᠪᠠ᠃ ᠥᠨᠥᠬᠢ ᠳᠠᠭᠤ ᠳᠠᠬᠢᠨ ᠭᠠᠷᠤᠭᠠᠳ᠂ ᠭᠤᠷᠪᠠᠳᠠᠬᠢ ᠳᠡᠭᠡᠷᠡ ᠪᠡᠨ ᠭᠠᠵᠠᠷ ᠳᠣᠩᠰᠣᠯᠭᠠᠨ ᠳᠤᠷᠭᠢᠯᠳᠤᠭᠤᠯᠬᠤ ᠳ᠋ᠤ᠌ ᠲᠡᠷᠡ ᠰᠠᠶᠢ ᠭᠡᠷ ᠡᠴᠡ ᠭᠠᠷᠪᠠ᠃ ᠭᠤᠳᠤᠮᠵᠢᠨ ᠳ᠋ᠤ᠌ ᠥᠪᠡᠷ ᠦ᠋ᠨ ᠬᠢᠨᠢ ᠠᠳᠠᠯᠢ ᠭᠠᠢᠬᠠᠭᠰᠠᠨ ᠬᠥᠮᠦᠰ ᠦᠢᠮᠡᠨ ᠱᠤᠤᠭᠢᠯᠳᠤᠵᠤ ᠪᠠᠢᠭᠠ ᠦᠵᠡᠭᠳᠡᠨᠡ᠃ ᠲᠡᠳᠡ ᠴᠥᠮ ᠵᠡᠭᠦᠨ ᠵᠦᠭ ᠲᠦ᠍ ᠠᠩᠬᠠᠷᠤᠯ ᠲᠠᠯᠪᠢᠨ᠄《ᠡᠨᠡ ᠶᠠᠭᠤ ᠪᠣᠯᠵᠤ ᠪᠠᠢᠨᠠ ᠪᠣᠢ?》 ᠭᠡᠵᠦ ᠪᠡᠶᠡ ᠡᠴᠡ ᠪᠡᠨ ᠠᠰᠠᠭᠤᠬᠤ ᠳ᠋ᠤ᠌᠄《ᠮᠡᠳᠡᠬᠦ ᠦᠭᠡᠢ! ᠮᠡᠳᠡᠬᠦ ᠦᠭᠡᠢ!》 ᠭᠡᠵᠦ ᠮᠢᠩᠭᠠ ᠳᠠᠬᠢᠨ ᠬᠠᠷᠢᠭᠤᠯᠤᠭᠠᠳ ᠳᠡᠮᠡᠢ ᠯᠡ ᠦᠷᠭᠦᠭᠰᠡᠨ ᠮᠠᠯ ᠰᠢᠭ᠋ ᠡᠢᠰᠢ ᠲᠠᠢᠰᠢ ᠬᠤᠢᠯᠠᠷᠠᠨ ᠱᠤᠤᠭᠢᠯᠳᠤᠬᠤ ᠠᠵᠢ!
ᠲᠡᠭᠡᠭᠰᠡᠨ ᠢ᠋ᠶ᠋ᠡᠨ《ᠲᠡᠢᠨ!》 ᠭᠡᠳᠡᠭ ᠦᠭᠡ ᠬᠥᠮᠦᠰ ᠦ᠋ᠨ ᠰᠡᠳᠬᠢᠯ ᠳ᠋ᠦ᠍ ᠪᠠᠭᠤᠵᠤ ᠢᠷᠡᠪᠡ᠃ ᠬᠠᠰᠢᠶᠠ ᠪᠠᠢᠰᠢᠩ ᠤ᠋ᠨ ᠣᠷᠣᠢ ᠳᠡᠭᠡᠷᠡ ᠭᠠᠷᠤᠨ ᠠᠯᠤᠰ ᠤ᠋ᠨ ᠪᠠᠷᠠ ᠬᠠᠷᠠᠵᠤ ᠪᠠᠢᠭᠠ ᠬᠥᠮᠦᠰ ᠦ᠋ᠨ ᠵᠠᠷᠢᠮ ᠨᠢ᠄
— ᠵᠡᠭᠦᠨ ᠲᠡᠢ ᠲᠡᠢᠨ! ᠭᠡᠵᠦ ᠳᠠᠭᠤ ᠠᠯᠳᠠᠬᠤ ᠳ᠋ᠤ᠌ ᠵᠠᠷᠢᠮ ᠨᠢ᠄
— ᠮᠠᠢᠮᠠᠢ ᠬᠣᠲᠠ ᠶ᠋ᠢᠨ ᠴᠠᠭᠠᠨᠠ᠂ ᠨᠢᠳᠦᠨ ᠦ᠌ ᠦᠵᠦᠭᠦᠷ ᠳᠥᠩᠭᠡᠵᠦ ᠬᠦᠷᠬᠦ ᠭᠠᠵᠠᠷ ᠤ᠋ᠨ ᠪᠠᠷᠤᠭᠴᠠᠭᠠᠨ ᠳ᠋ᠤ᠌ ᠴᠡᠩᠬᠡᠷ ᠤᠲᠤᠭᠠ ᠦᠷᠭᠦᠯᠵᠢᠯᠡᠨ ᠮᠠᠨᠠᠷᠠᠵᠤ ᠪᠠᠢᠨᠠ ᠭᠡᠵᠦ ᠰᠦᠷ ᠪᠠᠳᠠᠷᠠᠭᠤᠯᠤᠨ ᠲᠠᠢᠯᠪᠤᠷᠢᠯᠠᠨᠠ᠃ ᠳᠣᠣᠷᠠ ᠨᠢ ᠪᠠᠢᠭᠠ ᠬᠥᠮᠦᠰ᠄《ᠲᠡᠢᠨ!》 ᠭᠡᠳᠡᠭ ᠦᠭᠡ ᠶ᠋ᠢ ᠲᠡᠳᠦᠢ ᠯᠡ ᠦᠨᠡᠮᠰᠢᠬᠦ ᠦᠭᠡᠢ ᠪᠠᠢᠪᠠᠴᠤ《ᠬᠡᠨ ᠨᠢ ᠬᠡᠨ ᠲᠡᠢ ᠪᠡᠨ ᠳᠠᠢᠳᠤᠵᠤ ᠪᠠᠢᠨᠠ ᠪᠣᠢ?》 ᠭᠡᠵᠦ ᠭᠠᠢᠬᠠᠨᠠ᠃ ᠭᠡᠲᠡᠯᠡ ᠴᠣᠬᠣᠮ ᠬᠡᠨ ᠨᠢ ᠬᠠᠮᠢᠭᠠ ᠠ᠋ᠴᠠ ᠮᠡᠳᠡᠭᠰᠡᠨ ᠢ᠋ ᠪᠤᠤ ᠮᠡᠳᠡ!《ᠣᠷᠣᠰ᠂ ᠮᠣᠩᠭᠣᠯ ᠬᠣᠯᠢᠯᠳᠤᠭᠰᠠᠨ ᠪᠠᠬᠠᠨ ᠠᠮᠢᠲᠠᠳ ᠭᠠᠮᠢᠩ ᠢ᠋ ᠭᠡᠨᠡᠳᠲᠡ ᠳᠠᠭᠠᠷᠢᠨ ᠳᠠᠢᠳᠤᠪᠠ》 ᠭᠡᠰᠡᠨ ᠶᠠᠷᠢᠶᠠ ᠨᠥᠭᠦᠭᠡ ᠭᠤᠳᠤᠮᠵᠢᠨ ᠤ᠋ ᠬᠥᠮᠦᠰ ᠡᠴᠡ ᠳᠠᠮᠵᠢᠨ ᠢᠷᠡᠪᠡ᠃
ᠡᠨᠡ ᠪᠣᠯ ᠪᠠᠶᠠᠷ《ᠭᠠᠮᠢᠩ ᠲᠠᠢ ᠳᠠᠢᠳᠤᠪᠠ》 ᠭᠡᠰᠡᠨ ᠦ᠌ ᠬᠢᠨᠢ ᠬᠤᠪᠢ ᠬᠥᠮᠦᠰ ᠦ᠋ᠨ ᠴᠢᠷᠠᠢ ᠳ᠋ᠤ᠌ ᠢᠨᠢᠶᠡᠮᠰᠦᠭᠯᠡᠯ ᠲᠣᠳᠣᠷᠠᠪᠠ᠃ ᠢᠯᠠᠩᠭᠤᠶᠠ ᠪᠠᠯᠳᠠᠨᠴᠡᠷᠢᠩ ᠳ᠋ᠦ᠍ ᠡᠨᠡ ᠦᠭᠡ ᠰᠣᠨᠣᠰᠤᠭᠳᠠᠬᠤ ᠲᠠᠢ ᠪᠠᠨ ᠵᠡᠷᠭᠡ ᠣᠯᠠᠨ ᠬᠣᠨᠣᠭ ᠤ᠋ᠨ ᠲᠤᠷᠰᠢ ᠬᠠᠳᠠᠭᠠᠯᠠᠭᠳᠠᠭᠰᠠᠨ ᠭᠤᠨᠢᠭ ᠢ᠋ ᠨᠢ ᠣᠷᠣ ᠲᠠᠰᠤ ᠮᠠᠷᠲᠠᠭᠳᠠᠭᠤᠯᠤᠭᠠᠳ ᠣᠷᠣᠨ ᠳ᠋ᠤᠨᠢ᠄《ᠡᠨᠡ ᠭᠠᠮᠢᠩ ᠲᠠᠢ ᠳᠠᠢᠳᠤᠭᠴᠢ ᠨᠢ ᠬᠠᠮᠢᠭᠠᠬᠢ ᠶ᠋ᠢᠨ ᠬᠡᠨ ᠭᠡᠭᠴᠢ ᠪᠠᠢᠳᠠᠭ ᠶᠤᠮ ᠪᠣᠯ ᠳᠠ!》 ᠭᠡᠳᠡᠭ ᠪᠣᠳᠣᠯ ᠲᠥᠷᠥᠭᠦᠯᠪᠡ᠃ ᠥᠭᠡᠷᠡ ᠬᠥᠮᠦᠰ ᠴᠦ᠍ ᠥᠭᠡᠷᠡ ᠴᠦ᠍ ᠦᠭᠡᠢ ᠮᠥᠨ ᠯᠡ ᠡᠨᠡ ᠠᠰᠠᠭᠤᠳᠠᠯ ᠢ᠋ ᠭᠣᠴᠣ ᠭᠣᠢᠳᠠ ᠴᠢᠬᠢ ᠲᠠᠯᠪᠢᠨ ᠠᠩᠬᠠᠷᠴᠤ《ᠬᠠᠮᠢᠭᠠᠬᠢ ᠶ᠋ᠢᠨ ᠬᠡᠨ ᠭᠡᠭᠴᠢ ᠪᠣᠢ?》 ᠭᠡᠵᠦ ᠪᠡᠶᠡ ᠪᠡᠶᠡ ᠡᠴᠡ ᠪᠡᠨ ᠠᠰᠠᠭᠤᠨ ᠱᠤᠤᠭᠢᠯᠳᠤᠨᠠ᠃ ᠲᠡᠭᠡᠭᠡᠳ ᠤᠯᠠ ᠮᠥᠷ ᠢ᠋ ᠬᠡᠨ ᠴᠦ᠍ ᠣᠯᠵᠤ ᠠᠪᠴᠤ ᠴᠢᠳᠠᠭᠠ ᠦᠭᠡᠢ ᠪᠠᠢᠲᠠᠯᠠ᠂ ᠦᠶᠡ ᠦᠶᠡ ᠨᠦᠷᠭᠢᠯᠡᠵᠦ ᠪᠠᠢᠭᠰᠠᠨ ᠦᠬᠡᠷ ᠫᠤᠤ ᠶ᠋ᠢᠨ ᠴᠢᠮᠡᠭᠡ ᠲᠠᠭ ᠴᠢᠭ ᠪᠣᠯᠵᠤ᠂ ᠲᠤᠩᠭᠠᠯᠠᠭ ᠡᠳᠦᠷ ᠦ᠋ᠨ ᠨᠠᠷᠠ ᠴᠦ᠍ ᠪᠠᠷᠠᠭᠤᠨᠠ ᠤᠨᠠᠨ᠂ ᠶᠠᠭᠤ ᠶᠠᠭᠤ ᠦᠭᠡᠢ ᠵᠢᠷᠭᠠᠬᠤ ᠪᠣᠯᠪᠠ᠃
ᠲᠡᠭᠡᠬᠦ ᠳ᠋ᠦ᠍ ᠬᠥᠮᠦᠰ ᠮᠥᠨ ᠯᠡ ᠭᠤᠳᠤᠮᠵᠢ ᠵᠡᠭᠡᠯᠢ ᠳ᠋ᠡᠭᠡᠨ᠂ ᠨᠢᠯᠬᠠ ᠨᠢᠷᠠᠢ ᠪᠠᠭᠠᠴᠤᠳ ᠲᠠᠢ ᠪᠣᠯᠪᠠᠴᠤ ᠲᠡᠭᠦᠨ ᠢ᠋ᠶ᠋ᠡᠨ ᠲᠡᠪᠡᠷᠢᠨ ᠰᠡᠳᠬᠢᠯ ᠲᠦᠭᠰᠢᠨ ᠵᠡᠭᠦᠨ ᠢ᠋ ᠰᠢᠷᠲᠡᠨᠡ᠃ ᠣᠷᠣᠢ ᠶ᠋ᠢᠨ ᠨᠠᠷᠠ ᠵᠢᠷᠭᠠᠬᠤ ᠶ᠋ᠢᠨ ᠡᠮᠦᠨᠡᠬᠡᠨ ᠠᠰᠢᠭᠦᠢ ᠨᠢᠭᠡ ᠮᠡᠳᠡᠭᠡ ᠢᠷᠡᠭᠦᠯᠬᠦ ᠳ᠋ᠡᠭᠡᠨ᠄《ᠴᠠᠭᠠᠨ ᠣᠷᠣᠰ ᠤ᠋ᠨ ᠶᠡᠬᠡ ᠵᠠᠩᠵᠤᠨ ᠪᠠᠷᠤᠨ ᠣᠩᠭ᠌ᠸᠷᠠᠨ ᠭᠡᠭᠴᠢ ᠭᠠᠮᠢᠩ ᠲᠠᠢ ᠳᠠᠢᠳᠤᠭᠰᠠᠨ ᠭᠡᠨᠡ!》 ᠭᠡᠳᠡᠭ ᠶᠠᠷᠢᠶᠠ ᠳᠡᠭᠳᠡᠪᠡ᠃《ᠲᠡᠭᠡᠭᠡᠳ ᠶᠠᠭᠤ ᠪᠣᠯᠭᠠᠪᠠ? ᠭᠠᠮᠢᠩ ᠤ᠋ᠳ ᠢ᠋ ᠳᠡᠢᠯᠦᠭᠡ ᠤᠤ?》 ᠭᠡᠬᠦ ᠳ᠋ᠦ᠍ ᠪᠠᠰᠠ ᠴᠦ᠍ ᠲᠠᠪᠠᠲᠠᠢ ᠭᠣᠢᠳᠠ ᠬᠠᠷᠢᠭᠤ ᠠᠯᠠᠭᠠ᠃ ᠵᠥᠪᠬᠡᠨ《ᠭᠠᠮᠢᠩ ᠤ᠋ᠳ ᠡᠳᠦᠷ ᠲᠡᠳᠦᠢ ᠪᠡᠷ ᠢ᠋ᠶ᠋ᠡᠨ ᠬᠢᠳᠤᠭᠳᠠᠭᠰᠠᠨ ᠪᠣᠢ!》 ᠭᠡᠳᠡᠭ ᠶᠠᠷᠢᠶᠠ ᠪᠣᠢ ᠪᠣᠯᠤᠭᠰᠠᠨ ᠢ᠋ᠶ᠋ᠠᠨ ᠲᠡᠷᠡ ᠳᠣᠣᠷᠠᠬᠠᠨ ᠢ᠋ᠶ᠋ᠠᠨ《ᠪᠣᠢ!》 ᠭᠡᠰᠡᠨ ᠬᠦᠰᠡᠮᠵᠢᠯᠡᠯ ᠦ᠋ᠨ ᠦᠭᠡ《ᠭᠡᠨᠡ ᠠ᠋》 ᠪᠣᠯᠤᠨ ᠬᠤᠪᠢᠷᠠᠪᠠ᠃
ᠰᠥᠨᠢ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠨᠣᠢᠷ ᠬᠤᠯᠵᠢᠯᠠ᠃ ᠤᠷᠢᠳ ᠤᠷᠢᠳᠤᠬᠢ ᠶ᠋ᠢᠨ ᠰᠥᠨᠢ ᠨᠦ᠍ᠭᠦᠳ ᠲᠦ᠍᠄ ᠮᠢᠨᠦ ᠢᠷᠡᠭᠡᠳᠦᠢ ᠶ᠋ᠢᠨ ᠠᠮᠢᠳᠤᠷᠠᠯ ᠳ᠋ᠤ᠌ ᠵᠢᠷᠭᠠᠬᠤ ᠴᠡᠩᠭᠡᠬᠦ᠂ ᠢᠨᠢᠶᠡᠨ ᠪᠠᠶᠠᠰᠬᠤ ᠶᠠᠭᠤ ᠴᠦ᠍ ᠪᠠᠢᠬᠤ ᠦᠭᠡᠢ᠃ ᠪᠠᠢᠬᠤ ᠠ᠋ᠴᠠ ᠵᠥᠪᠬᠡᠨ ᠭᠠᠰᠠᠯᠠᠩ ᠳ᠋ᠤ᠌ ᠳᠠᠷᠤᠭᠳᠠᠭᠰᠠᠨ ᠪᠦᠭᠴᠢᠮ ᠠᠮᠢᠰᠬᠤᠯ᠂ ᠵᠣᠪᠠᠯᠠᠩ ᠳ᠋ᠤ᠌ ᠨᠡᠷᠪᠡᠭᠳᠡᠭᠰᠡᠨ ᠵᠣᠪᠠᠯᠭᠠᠨ ᠪᠡᠶᠡ ᠯᠡ ᠪᠠᠢᠨᠠ ᠭᠡᠵᠦ ᠪᠣᠳᠣᠳᠠᠭ ᠪᠠᠢᠭᠰᠠᠨ ᠨᠢ ᠣᠳᠣ ᠣᠷᠣ ᠮᠥᠷ ᠦᠭᠡᠢ ᠪᠣᠯᠵᠤ᠂ ᠣᠷᠣᠨ ᠳ᠋ᠤᠨᠢ ᠡᠳᠦᠷ ᠦ᠋ᠨ ᠪᠣᠯᠤᠭᠰᠠᠨ ᠲᠡᠢᠨ ᠦ᠌ ᠴᠤᠤᠷᠢᠶᠠ ᠲᠡᠭᠦᠨ ᠦ᠌ ᠤᠳᠠᠭᠠ ᠳᠠᠷᠠᠭᠠᠯᠠᠨ ᠰᠣᠨᠣᠰᠤᠭᠳᠠᠭᠰᠠᠨ ᠦᠬᠡᠷ ᠫᠤᠤ ᠶ᠋ᠢᠨ ᠠᠪᠢᠶᠠ ᠠ᠋ᠴᠠ ᠡᠬᠢᠯᠡᠭᠡᠳ᠄《ᠡᠨᠡ ᠴᠠᠭᠠᠨ ᠣᠷᠣᠰ ᠤ᠋ᠨ ᠬᠡᠨ ᠬᠠᠮᠢᠭᠠ ᠠ᠋ᠴᠠ ᠭᠡᠨᠡᠳᠲᠡ ᠭᠠᠷᠤᠭᠠᠳ ᠢᠷᠡᠪᠡ? ᠡᠳᠡᠨ ᠦ᠌ ᠡᠴᠦᠰ ᠦ᠋ᠨ ᠵᠣᠷᠢᠯᠭᠠ ᠴᠣᠬᠣᠮ ᠶᠠᠭᠤ ᠪᠠᠢᠵᠤ ᠲᠠᠭᠠᠷᠠᠬᠤ ᠪᠣᠢ?》 ᠭᠡᠬᠦᠴᠢᠯᠡᠨ᠂ ᠡᠯᠳᠡᠪ ᠤᠴᠢᠷ ᠨᠢ ᠦᠯᠦ ᠣᠯᠳᠠᠬᠤ ᠡᠳᠦᠢ ᠲᠡᠳᠦᠢ ᠶᠠᠭᠤᠮᠠ ᠶ᠋ᠢ ᠵᠠᠢ ᠵᠠᠪᠰᠠᠷ ᠦᠭᠡᠢ ᠪᠣᠳᠣᠬᠤ ᠪᠣᠯᠪᠠ᠃ ᠰᠥᠨᠢ ᠳᠤᠮᠳᠠ ᠠ᠋ᠴᠠ ᠬᠣᠢᠰᠢ ᠠᠷᠠᠢᠬᠠᠨ ᠤᠨᠲᠠᠭᠠᠳ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠴᠤ ᠭᠠᠳᠠᠭᠰᠢ ᠭᠠᠷᠤᠯᠠ᠃ ᠲᠡᠭᠦᠨ ᠦ᠌ ᠡᠢᠨᠬᠦ ᠡᠷᠲᠡᠯᠡᠨ ᠭᠠᠷᠤᠭᠰᠠᠨ ᠤᠴᠢᠷ ᠶᠠᠭᠤ ᠪᠣᠢ ᠭᠡᠪᠡᠯ ᠤᠷᠢᠳ ᠰᠥᠨᠢ ᠶ᠋ᠢᠨ ᠢ᠋ᠶ᠋ᠡᠨ ᠪᠣᠳᠣᠭᠰᠠᠨ ᠤ᠋ ᠤᠴᠢᠷ ᠢ᠋ ᠣᠯᠬᠤ ᠶ᠋ᠢ ᠯᠡ ᠬᠦᠰᠡᠵᠡᠢ᠃ ᠥᠪᠡᠷ ᠦ᠋ᠨ ᠢ᠋ᠶ᠋ᠡᠨ ᠭᠤᠳᠤᠮᠵᠢ ᠶ᠋ᠢ ᠠᠷᠤ ᠳ᠋ᠠᠭᠠᠨ ᠣᠷᠬᠢᠨ᠂ ᠥᠭᠡᠷᠡ ᠭᠤᠳᠤᠮᠵᠢᠨᠠ ᠣᠷᠣᠩᠭᠤᠲᠠ ᠪᠠᠨ ᠡᠪᠦᠭᠡᠨ ᠡᠮᠡᠭᠡᠨ ᠬᠣᠶᠠᠷ ᠤ᠋ᠨ ᠠᠭᠤᠷ ᠬᠢᠯᠢᠩ ᠪᠣᠯᠤᠨ ᠬᠡᠷᠡᠯᠳᠦᠵᠦ ᠪᠠᠢᠭᠠ ᠲᠠᠢ ᠳᠠᠭᠠᠷᠢᠯᠳᠤᠪᠠ᠃ ᠡᠳᠡᠨ ᠦ᠌ ᠶᠠᠪᠤᠳᠠᠯ ᠢ᠋ ᠰᠣᠨᠣᠰᠬᠤ ᠳ᠋ᠤ᠌ ᠡᠮᠡᠭᠡᠨ ᠨᠢ᠂ ᠥᠷᠯᠥᠭᠡᠨ ᠦ᠌ ᠪᠡᠨ ᠴᠠᠢ ᠶ᠋ᠢᠨ ᠳᠡᠭᠡᠵᠢ ᠡᠷᠭᠦᠵᠦ ᠪᠠᠢᠬᠤ ᠳ᠋ᠤᠨᠢ ᠡᠪᠦᠭᠡᠨ ᠳᠠᠭᠠᠷᠢᠯᠳᠤᠪᠠ᠃
— ᠦᠭᠡᠢ ᠴᠢ ᠵᠦᠭ ᠦ᠋ᠨ ᠮᠠᠭᠤ ᠵᠡᠭᠦᠨ ᠤᠷᠤᠭᠤ ᠴᠠᠢ ᠡᠷᠭᠦᠬᠦ ᠴᠢᠨᠢ ᠶᠠᠭᠤ ᠪᠣᠢ? ᠭᠡᠰᠡᠨ ᠠᠵᠢ᠃ ᠬᠠᠷᠢᠭᠤ ᠳ᠋ᠤᠨᠢ ᠡᠮᠡᠭᠡᠨ᠄
— ᠵᠦᠭ ᠦ᠋ᠨ ᠮᠠᠭᠤ ᠵᠡᠭᠦᠨ ᠬᠣᠢᠰᠢ ᠭᠡᠬᠦ ᠶᠠᠭᠤ ᠪᠠᠢᠬᠤᠪ᠂ ᠵᠦᠭᠡᠷ ᠥᠴᠥᠭᠡᠳᠦᠷ ᠦ᠋ᠨ ᠭᠠᠮᠢᠩ ᠲᠠᠢ ᠳᠠᠢᠳᠤᠭᠰᠠᠨ ᠴᠠᠭᠠᠨ ᠤ᠋ ᠬᠢᠨ ᠭᠡᠭᠴᠢ ᠳ᠋ᠦ᠍ ᠯᠡ ᠳᠡᠭᠡᠵᠢ ᠡᠷᠭᠦᠵᠦ ᠪᠠᠢᠨᠠ ᠭᠡᠰᠡᠨ ᠪᠣᠯᠤᠯᠲᠠᠢ᠂ ᠭᠡᠲᠡᠯᠡ ᠡᠪᠦᠭᠡᠨ᠄
— ᠡᠷᠭᠦᠵᠦ ᠪᠠᠢᠭᠠ ᠡᠨᠡ ᠳᠡᠭᠡᠵᠢ ᠴᠢᠨᠢ ᠴᠠᠭᠠᠰᠢ ᠪᠠᠨ ᠶᠠᠪᠤᠴᠢᠬᠠᠭᠰᠠᠨ ᠴᠠᠭᠠᠨ ᠤ᠋ ᠬᠢᠨ ᠳ᠋ᠦ᠍ ᠪᠢᠰᠢ᠂ ᠨᠠᠭᠠᠨᠠ ᠨᠢ ᠪᠠᠢᠭᠠ ᠭᠠᠮᠢᠩ ᠤ᠋ᠨ ᠲᠥᠯᠥᠭᠡ ᠪᠣᠯᠬᠤ ᠪᠢᠰᠢᠦ? ᠭᠡᠵᠦ ᠳᠣᠭᠣᠭᠢᠯᠠᠭᠰᠠᠨ ᠠ᠋ᠴᠠ ᠬᠡᠷᠡᠭᠦᠯ ᠡᠭᠦᠰᠦᠭᠰᠡᠨ ᠪᠠᠢᠪᠠ᠃ ᠬᠠᠷᠢᠭᠤ ᠳ᠋ᠤᠨᠢ ᠪᠠᠯᠳᠠᠨᠴᠡᠷᠢᠩ᠄
— ᠬᠥᠮᠦᠨ᠂ ᠬᠥᠮᠦᠨ ᠦ᠌ ᠪᠣᠳᠣᠯ ᠬᠦᠰᠡᠯ ᠶᠠᠭ ᠯᠠ ᠲᠡᠷᠡ ᠬᠥᠮᠦᠨ ᠳ᠋ᠡᠭᠡᠨ ᠵᠥᠪ ᠲᠡᠢ! ᠭᠡᠳ ᠴᠠᠭᠠᠨ ᠣᠷᠣᠰ ᠤ᠋ᠨ ᠴᠠᠭᠠᠰᠢ ᠪᠠᠨ ᠲᠠᠯᠢᠢᠨ ᠣᠳᠤᠭᠰᠠᠨ ᠢ᠋ ᠣᠯᠵᠤ ᠮᠡᠳᠡᠭᠰᠡᠨ ᠢ᠋ᠶ᠋ᠡᠨ ᠣᠯᠵᠠᠭᠤᠷᠬᠠᠨ ᠨᠥᠭᠦᠭᠡ ᠬᠣᠶᠠᠷ ᠠ᠋ᠴᠠ ᠬᠣᠯᠠᠳᠤᠨ ᠶᠠᠪᠤᠯᠠ᠃
ᠶᠡᠷᠦ ᠤᠷᠢᠳ ᠰᠥᠨᠢ ᠪᠣᠭᠳᠠ ᠶ᠋ᠢᠨ ᠬᠦᠷᠢᠶᠡᠨ ᠦ᠌ ᠬᠢᠨ ᠪᠠᠯᠳᠠᠨᠴᠡᠷᠢᠩ ᠦ᠋ᠨ ᠠᠳᠠᠯᠢ ᠡᠯᠳᠡᠪ ᠢ᠋ ᠪᠣᠳᠣᠨ ᠨᠣᠢᠷ ᠮᠠᠭᠤᠲᠠᠢ ᠬᠣᠨᠣᠭᠠᠳ᠂ ᠥᠷᠯᠥᠭᠡ ᠡᠷᠲᠡ ᠪᠣᠰᠤᠨ᠂ ᠠᠭᠤᠯᠵᠠᠯᠳᠤᠵᠤ ᠤᠴᠢᠷ ᠶᠠᠪᠤᠳᠠᠯ ᠢ᠋ ᠪᠦᠷᠢᠨ ᠮᠡᠳᠡᠬᠦ ᠭᠡᠰᠡᠨ ᠪᠣᠯᠤᠯᠲᠠᠢ᠂ ᠨᠠᠷᠠ ᠳᠥᠩᠭᠡᠵᠦ ᠭᠠᠷᠤᠮᠠᠭᠴᠠ ᠭᠤᠳᠤᠮᠵᠢ ᠪᠣᠯᠭᠠᠨᠠ ᠬᠥᠮᠦᠨ ᠪᠣᠢ ᠪᠣᠯᠤᠨ ᠬᠡᠳᠦ ᠭᠤᠷᠪᠠ ᠪᠠᠷ ᠢ᠋ᠶ᠋ᠠᠨ ᠪᠥᠭᠡᠮᠨᠡᠷᠡᠨ ᠬᠡᠯᠡᠯᠴᠡᠨᠡ᠃ ᠡᠳᠡᠨ ᠦ᠌ ᠳᠤᠮᠳᠠ ᠪᠠᠯᠳᠠᠨᠴᠡᠷᠢᠩ ᠦᠭᠡ ᠴᠢᠩᠨᠠᠨ ᠵᠠᠭᠤᠷᠠ ᠵᠠᠭᠤᠷᠠ ᠵᠣᠭᠰᠣᠨ ᠶᠠᠪᠤᠭᠰᠠᠭᠠᠷ ᠡᠳᠦᠷ ᠳᠤᠮᠳᠠ ᠬᠦᠷᠪᠡ᠃ ᠡᠨᠡ ᠵᠠᠭᠤᠷᠠ ᠪᠠᠯᠳᠠᠨᠴᠡᠷᠢᠩ᠄ ᠴᠠᠭᠠᠨ ᠣᠷᠣᠰ ᠤ᠋ᠨ ᠵᠠᠩᠵᠤᠨ ᠪᠡᠷᠤᠨ ᠣᠩᠭ᠌ᠸᠷᠠᠨ ᠭᠡᠭᠴᠢ ᠣᠷᠣᠰ᠂ ᠮᠣᠩᠭᠣᠯ ᠴᠡᠷᠢᠭ ᠲᠡᠢ ᠪᠡᠷ ᠮᠠᠢᠮᠠᠢ ᠬᠣᠲᠠ ᠶ᠋ᠢᠨ ᠵᠡᠭᠦᠨ ᠬᠣᠢᠲᠤᠬᠢ ᠤᠯᠢᠶᠠᠰᠤᠲᠠᠢ ᠶ᠋ᠢᠨ ᠠᠮᠠ ᠶ᠋ᠢ ᠤᠷᠤᠭᠤᠳᠠᠨ ᠭᠡᠨᠡᠳᠲᠡ ᠣᠷᠣᠵᠤ ᠢᠷᠡᠨ ᠭᠠᠮᠢᠩ ᠢ᠋ ᠳᠣᠪᠲᠣᠯᠬᠤ ᠳ᠋ᠤ᠌ ᠥᠭᠡᠳᠡ ᠡᠴᠡ ᠨᠢ ᠭᠠᠮᠢᠩ ᠤ᠋ᠨ ᠭᠠᠭᠴᠠ ᠬᠣᠷᠢᠶᠠ ᠤᠭᠲᠤᠨ ᠪᠠᠢᠯᠳᠤᠵᠤ ᠪᠤᠴᠠᠭᠠᠭᠰᠠᠨ ᠢ᠋ ᠲᠣᠳᠣᠷᠬᠠᠢ ᠮᠡᠳᠡᠪᠡ᠃ ᠲᠡᠭᠡᠭᠡᠳ ᠴᠣᠬᠣᠮ ᠬᠡᠨ ᠨᠢ ᠬᠡᠨ ᠢ᠋ ᠪᠡᠨ ᠬᠣᠬᠢᠷᠠᠭᠠᠭᠰᠠᠨ ᠢ᠋ ᠨᠢ ᠰᠣᠨᠢᠷᠬᠠᠨ ᠴᠢᠬᠢ ᠲᠠᠯᠪᠢᠬᠤ ᠳ᠋ᠤ᠌《ᠭᠠᠮᠢᠩ ᠤ᠋ᠳ ᠡᠳᠦᠢ ᠲᠡᠳᠦᠢ ᠪᠡᠷ ᠢ᠋ᠶ᠋ᠡᠨ ᠬᠢᠳᠤᠭᠳᠠᠭᠰᠠᠨ ᠭᠡᠨᠡ》 ᠭᠡᠬᠦ ᠡᠴᠡ ᠥᠭᠡᠷᠡ ᠭᠣᠢᠳᠠ ᠶᠠᠭᠤᠮᠠ ᠬᠡᠨ ᠴᠦ᠍ ᠦᠯᠦ ᠶᠠᠷᠢᠬᠤ ᠠᠵᠢ᠃ ᠭᠡᠪᠡᠴᠦ ᠪᠠᠯᠳᠠᠨᠴᠡᠷᠢᠩ᠂ ᠪᠠᠷᠤᠨ ᠤᠩᠭᠧᠷᠠᠨ ᠤ᠋ ᠪᠤᠴᠠᠨ ᠣᠳᠤᠭᠰᠠᠨ ᠢ᠋ᠶ᠋ᠠᠷ ᠨᠢ ᠲᠡᠭᠦᠨ ᠦ᠌ ᠬᠦᠴᠦᠨ ᠮᠡᠬᠦᠰᠳᠡᠨ ᠠᠶᠠ ᠦᠭᠡᠢ ᠪᠣᠯ ᠤᠬᠠᠭᠠᠨ ᠵᠢᠯᠣᠭᠣ ᠦᠭᠡᠢ ᠵᠢᠭᠤᠲᠠᠭᠰᠠᠨ ᠬᠡᠷᠡᠭ ᠪᠣᠯᠪᠠ ᠤᠤ ᠭᠡᠵᠦ ᠳᠣᠲᠣᠷᠠ ᠪᠠᠨ ᠰᠠᠨᠠᠨ ᠰᠡᠵᠢᠭᠯᠡᠪᠡ᠃ ᠭᠡᠲᠡᠯᠡ ᠬᠥᠮᠦᠰ ᠦ᠋ᠨ ᠶᠠᠷᠢᠶᠠᠨ ᠡᠢᠮᠦ ᠪᠢᠰᠢ᠂《ᠡᠨᠡ ᠮᠠᠭᠤ ᠴᠢᠨᠳᠠᠷᠤᠤ ᠨᠤᠭᠤᠳ ᠥᠪᠡᠷ ᠦ᠋ᠨ ᠡᠷᠬᠡ ᠦᠭᠡᠢ ᠰᠥᠨᠥᠨᠡ》 ᠭᠡᠵᠦ ᠪᠠᠶᠠᠷ ᠬᠥᠷ ᠪᠣᠯᠬᠤ ᠶ᠋ᠢᠨ ᠢ᠋ᠶ᠋ᠡᠨ ᠵᠡᠷᠭᠡᠴᠡᠭᠡ ᠪᠡᠷ ᠪᠠᠷᠤᠨ ᠤᠩᠭᠧᠷᠠᠨ ᠢ᠋ ᠣᠳᠣ ᠬᠡᠵᠢᠶᠡ ᠬᠡᠵᠢᠶᠡ ᠦᠭᠡᠢ ᠢᠷᠡᠨᠡ ᠭᠡᠵᠦ ᠵᠡᠭᠦᠨ ᠵᠦᠭ ᠢ᠋ ᠪᠠᠢᠨ ᠪᠠᠢᠨ ᠰᠢᠷᠲᠡᠬᠦ ᠠᠶᠠᠲᠠᠢ ᠪᠠᠢᠬᠤ ᠠᠵᠢ᠃
ᠡᠴᠦᠰ ᠲᠦ᠋ᠨᠢ ᠪᠠᠯᠳᠠᠨᠴᠡᠷᠢᠩ ᠭᠡᠳᠡᠷᠭᠦ ᠪᠤᠴᠠᠬᠤ ᠵᠠᠮ ᠳ᠋ᠠᠭᠠᠨ ᠨᠢᠭᠡ ᠭᠤᠳᠤᠮᠵᠢᠨ ᠤ᠋ ᠪᠤᠯᠤᠩ ᠳᠡᠭᠡᠷᠡ᠂ ᠪᠤᠰᠤᠳ ᠢ᠋ ᠪᠣᠳᠣᠪᠠᠯ ᠠᠪᠤᠨ ᠰᠠᠪᠤᠨ ᠳᠡᠮᠡᠢ ᠶᠠᠷᠢᠮᠠ ᠦᠭᠡᠢ ᠪᠠᠢᠳᠠᠯ ᠲᠠᠢ ᠬᠣᠶᠠᠷ ᠬᠥᠮᠦᠨ ᠦ᠌ ᠰᠠᠭᠤᠨ ᠶᠠᠷᠢᠯᠴᠠᠵᠤ ᠪᠠᠢᠭᠰᠠᠨ ᠠ᠋ᠴᠠ ᠨᠢᠭᠡ ᠵᠦᠢᠯ ᠢ᠋ ᠲᠣᠳᠣᠷᠬᠠᠢ ᠣᠯᠵᠤ ᠰᠣᠨᠣᠰᠪᠠ᠃ ᠡᠨᠡ ᠨᠢ᠂
— ᠪᠠᠷᠤᠨ ᠤᠩᠭᠧᠷᠠᠨ ᠤ᠋ ᠬᠢᠨ ᠬᠣᠢᠰᠢ ᠤᠬᠤᠷᠢᠬᠤ ᠳ᠋ᠠᠭᠠᠨ ᠵᠢᠷᠭᠤᠭᠠᠨ ᠮᠣᠷᠢ ᠬᠥᠯᠦᠭᠰᠡᠨ ᠨᠢᠭᠡ ᠦᠬᠡᠷ ᠫᠤᠤ ᠪᠠᠨ ᠨᠠᠮᠤᠭ ᠲᠤ ᠰᠢᠭᠢᠳᠬᠡᠵᠦ ᠣᠷᠬᠢᠭᠠᠳ ᠳᠥᠩᠭᠡᠵᠦ ᠮᠣᠷᠢᠳ ᠢ᠋ᠶ᠋ᠠᠨ ᠰᠠᠯᠠᠭᠠᠨ ᠠᠪᠴᠤ ᠠᠮᠵᠢᠵᠤ ᠰᠢᠦ᠃ ᠭᠡᠲᠡᠯᠡ ᠡᠷᠡᠰ ᠦ᠋ᠨ ᠰᠠᠢᠨ ᠨᠢ ᠲᠡᠢᠨ ᠪᠣᠢ ᠠ᠋ ᠭᠡᠳ ᠭᠠᠭᠴᠠᠭᠠᠷ ᠢ᠋ ᠨᠢ ᠬᠠᠶᠠᠭᠠᠳ ᠶᠠᠪᠤᠴᠢᠬᠠᠭᠰᠠᠨ ᠪᠠᠢᠪᠠ ᠭᠡᠵᠦ ᠬᠥᠬᠡ ᠴᠢᠰᠴᠡᠦ ᠳᠡᠪᠡᠯ ᠲᠡᠢ ᠳᠡᠭᠡᠳᠦ ᠤᠷᠤᠭᠤᠯ ᠳ᠋ᠠᠭᠠᠨ ᠰᠢᠨᠡᠬᠡᠨ ᠬᠠᠷᠠ ᠰᠠᠬᠠᠯ ᠲᠠᠢ ᠬᠥᠮᠦᠨ ᠦ᠌ ᠬᠡᠯᠡᠬᠦ ᠳ᠋ᠦ᠍ ᠶ᠋ᠢᠨ ᠬᠠᠵᠠᠭᠤ ᠬᠢᠨᠢ ᠠᠷᠠᠢ ᠠᠬᠢᠮᠠᠭ ᠨᠠᠰᠤᠲᠠᠢ᠂ ᠬᠦᠷᠡᠩ ᠲᠣᠷᠭᠠᠨ ᠳᠡᠪᠡᠯ ᠲᠡᠢ ᠬᠥᠮᠦᠨ᠄
— ᠫᠧᠢ ᠠ᠋! ᠭᠡᠵᠦ ᠲᠣᠯᠣᠭᠠᠢ ᠰᠡᠭᠰᠦᠷᠦᠨ ᠭᠠᠰᠠᠯᠤᠭᠠᠳ᠄ ᠦᠭᠡᠢ ᠲᠡᠭᠡᠭᠡᠳ ᠲᠡᠷᠡ ᠡᠷᠡ ᠶᠠᠭᠠᠬᠢᠭᠠ ᠪᠣᠯ?
— ᠲᠡᠷᠡ ᠡᠷᠡ ᠬᠠᠷᠠᠮᠰᠠᠯᠲᠠᠢ ᠨᠢ ᠠᠷᠭᠠ ᠦᠭᠡᠢ ᠪᠣᠯᠪᠠᠴᠤ ᠮᠥᠨ ᠪᠠᠬᠠᠳᠤᠯᠲᠠᠢ! ᠭᠡᠳ ᠴᠠᠰᠢ ᠬᠡᠯᠡᠬᠦ ᠳ᠋ᠡᠭᠡᠨ᠄ ᠭᠠᠮᠢᠩ ᠤ᠋ᠨ ᠪᠠᠷᠤᠨ ᠤ᠋ ᠥᠭᠡᠳᠡ ᠡᠴᠡ ᠭᠠᠷᠤᠨ ᠪᠠᠢᠯᠳᠤᠭᠰᠠᠨ ᠬᠣᠷᠢᠶᠠᠨ ᠳᠠᠷᠤᠭᠠ ᠥᠪᠡᠷᠰᠡᠳ ᠦ᠋ᠨ ᠢ᠋ᠶ᠋ᠡᠨ ᠵᠠᠩᠰᠢᠯ ᠢ᠋ᠶ᠋ᠠᠷ ᠳᠠᠢᠰᠤᠨ ᠤ᠋ ᠦᠬᠡᠷ ᠫᠤᠤ ᠶ᠋ᠢ ᠭᠠᠷ ᠢ᠋ᠶ᠋ᠠᠷ ᠣᠯᠵᠠᠯᠠᠨ ᠠᠪᠬᠤ ᠭᠡᠵᠦ ᠪᠦᠬᠦ ᠳᠣᠣᠷᠠᠲᠤ ᠳᠠᠷᠤᠭᠠ ᠨᠠᠷ ᠢ᠋ᠶ᠋ᠠᠨ ᠳᠠᠭᠠᠭᠤᠯᠤᠨ ᠣᠴᠢᠭᠠᠳ ᠮᠣᠷᠢᠨ ᠠ᠋ᠴᠠ ᠪᠠᠨ ᠪᠠᠭᠤᠨ ᠣᠷᠣᠭᠰᠢ ᠲᠠᠪᠰᠢᠬᠤ ᠳ᠋ᠤᠨᠢ ᠥᠨᠥᠬᠢ ᠮᠣᠩᠭᠣᠯ ᠡᠷᠡ ᠦᠬᠡᠷ ᠫᠤᠤ ᠶ᠋ᠢᠨ ᠠᠷᠤ ᠶ᠋ᠢᠨ ᠲᠡᠷᠡ ᠳᠠᠷᠤᠭᠠ ᠶ᠋ᠢ ᠫᠤᠤᠳᠠᠨ ᠠᠯᠠᠭᠠᠳ᠂ ᠳᠠᠷᠠᠭᠠ ᠨᠢ ᠥᠪᠡᠷ ᠢ᠋ ᠪᠡᠨ ᠫᠤᠤᠳᠠᠨ ᠥᠩᠭᠡᠷᠡᠵᠦ ᠰᠢᠦ ᠭᠡᠵᠦ ᠢᠨᠢᠶᠡᠮᠰᠦᠭᠯᠡᠨ ᠬᠡᠯᠡᠭᠰᠡᠨ ᠳ᠋ᠦ᠍ ᠬᠠᠵᠠᠭᠤ ᠠ᠋ᠴᠠ ᠨᠢ ᠪᠠᠯᠳᠠᠨᠴᠡᠷᠢᠩ᠄
— ᠦᠭᠡᠢ ᠮᠥᠨ ᠰᠠᠢᠨ ᠡᠷᠡ! ᠭᠡᠵᠦ ᠥᠪᠡᠷ ᠦ᠋ᠨ ᠮᠠᠲᠠᠯ ᠦᠭᠡᠢ ᠳᠠᠭᠤ ᠠᠯᠳᠠᠪᠠ᠃ ᠡᠨᠡ ᠳᠠᠷᠤᠢ ᠨᠥᠭᠦᠭᠡ ᠬᠣᠶᠠᠷ ᠰᠣᠴᠢᠨ ᠪᠠᠯᠳᠠᠨᠴᠡᠷᠢᠩ ᠢ᠋ ᠬᠠᠷᠠᠪᠠ᠃ ᠵᠢᠰᠦ ᠴᠢᠷᠠᠢ ᠴᠣᠩᠬᠢᠷ ᠪᠣᠯᠤᠭᠠᠳ᠂ ᠦᠰᠦ ᠰᠠᠬᠠᠯ ᠬᠣᠶᠠᠷ ᠨᠢ ᠵᠢᠭᠲᠡᠢᠬᠡᠨ ᠤᠷᠭᠤᠭᠰᠠᠨ ᠤ᠋ ᠳᠡᠭᠡᠷᠡ ᠣᠯᠠᠨ ᠬᠣᠨᠣᠭ ᠭᠠᠵᠠᠷ ᠰᠢᠷᠲᠡᠨ ᠭᠥᠯᠢᠷᠡᠭᠰᠡᠨ ᠨᠢᠳᠦ ᠨᠢ ᠬᠡᠳᠦᠢᠪᠡᠷ ᠢᠨᠢᠶᠡᠮᠰᠦᠭᠯᠡᠬᠦ ᠪᠣᠯᠪᠠᠴᠤ ᠬᠠᠷᠠᠭᠰᠠᠨ ᠵᠦᠭ ᠤᠷᠤᠭᠤ ᠪᠠᠨ ᠥᠷᠤᠮᠳᠤᠬᠦ ᠮᠡᠲᠦ ᠬᠤᠷᠴᠠ ᠲᠣᠰᠣᠨ ᠪᠦᠯᠲᠡᠢᠬᠦ ᠨᠢ ᠨᠢᠳᠦᠨ ᠳ᠋ᠦ᠍ ᠡᠷᠡᠭᠦᠯ ᠪᠢᠰᠢ ᠶ᠋ᠢᠨ ᠰᠢᠨᠵᠢ ᠲᠥᠯᠥᠪ ᠢ᠋ ᠦᠵᠡᠭᠦᠯᠦᠭᠰᠡᠨ ᠪᠠᠢᠵᠤ ᠮᠠᠭᠠᠳ᠃ ᠲᠡᠳᠡ ᠪᠠᠯᠳᠠᠨᠴᠡᠷᠢᠩ ᠢ᠋ ᠰᠣᠴᠢᠨ ᠠᠵᠢᠭᠰᠠᠨ ᠤ᠋ ᠳᠠᠷᠠᠭᠠ᠂ ᠪᠡᠶᠡ ᠪᠡᠨ ᠬᠠᠷᠠᠭᠠᠳ ᠦᠭᠡ ᠳᠠᠭᠤ ᠦᠭᠡᠢ ᠪᠣᠰᠤᠨ ᠶᠠᠪᠤᠪᠠ᠃
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ᠄ ᠪᠠᠭᠠᠲᠤᠷ