ᠴᠢᠮᠠ ᠲᠠᠢ ᠪᠠᠨ ᠬᠠᠮᠲᠤ – ᠠᠯᠳᠠᠬᠠᠭᠤᠯᠠ Чамтайгаа хамт – Алтхуул
183ᠴᠢᠮᠠ ᠲᠠᠢ ᠪᠠᠨ ᠬᠠᠮᠲᠤ
ᠬᠤᠪᠢ ᠲᠠᠪᠢᠯᠠᠩ ᠭᠡᠵᠦ ᠬᠣᠷᠸᠠ ᠶ᠋ᠢᠨ ᠠᠭᠤᠳᠠᠮ ᠵᠠᠢ ᠳ᠋ᠤ᠌ ᠬᠣᠶᠠᠷ ᠦᠭᠡᠢ ᠨᠢᠭᠡ ᠪᠡᠨ ᠣᠯᠵᠤ ᠤᠴᠠᠷᠠᠳᠠᠭ ᠨᠢ ᠭᠠᠢᠬᠠᠯᠲᠠᠢ ᠪᠢᠵᠡ ? ᠬᠥᠮᠦᠨ ᠦ᠌ ᠢᠷᠦᠭᠡᠯ ᠲᠠᠪᠢᠯᠠᠩ ᠭᠡᠵᠦ ᠳᠡᠭᠡᠳᠦ ᠲᠡᠭᠷᠢ ᠡᠴᠡ ᠬᠤᠪᠢᠶᠠᠵᠤ ᠥᠭᠭᠦᠭᠰᠡᠨ ᠤᠴᠠᠷᠠᠯ ᠪᠠᠢᠯᠲᠠᠢ᠃ ᠰᠡᠳᠬᠢᠯ ᠰᠦᠨᠡᠰᠦᠨ ᠡᠴᠡ ᠬᠣᠯᠪᠣᠭᠠᠰᠤ ᠲᠠᠢ ᠰᠠᠯᠤᠰᠢ ᠦᠭᠡᠢ᠂ ᠮᠠᠷᠲᠠᠭᠳᠠᠰᠢ ᠦᠭᠡᠢ᠂ ᠮᠠᠷᠲᠠᠵᠤ ᠴᠤ᠌ ᠴᠢᠳᠠᠰᠢ ᠦᠭᠡᠢ᠂ ᠰᠡᠳᠬᠢᠯ ᠦ᠋ᠨ ᠤᠭ ᠠ᠋ᠴᠠ ᠬᠣᠯᠪᠣᠭᠳᠠᠭᠰᠠᠨ ᠰᠣᠷᠢᠨᠵᠢᠨ ᠬᠦᠴᠦᠨ ᠭᠡᠯᠲᠡᠢ᠃
ᠢᠨᠠᠭᠰᠢᠵᠤ ᠶᠠᠪᠤᠭᠰᠠᠨ ᠴᠢᠮᠠ ᠳ᠋ᠤ᠌ ᠪᠠᠨ ᠡᠷᠬᠡᠯᠡᠵᠦ ᠨᠢᠯᠬᠠᠷᠠᠵᠤ ᠡᠷᠡ ᠪᠣᠯᠤᠭᠰᠠᠨ ᠶᠤᠮ ᠂ ᠢᠵᠢᠯᠢᠰᠢᠵᠦ ᠶᠠᠪᠤᠭᠰᠠᠨ ᠴᠢᠮᠠ ᠲᠠᠢ ᠪᠠᠨ ᠬᠠᠨᠢᠯᠠᠵᠤ ᠬᠠᠢᠷᠠᠯᠠᠯᠴᠠᠵᠤ ᠬᠥᠮᠦᠨ ᠪᠣᠯᠤᠭᠰᠠᠨ ᠶᠤᠮ᠃
ᠬᠤᠷᠠᠭᠠᠨ ᠤ᠋ ᠪᠡᠯᠴᠢᠭᠡᠷ ᠲᠦ᠍ ᠬᠣᠶᠠᠭᠤᠯᠠ ᠪᠠᠨ ᠡᠪᠦᠳᠦᠭ ᠲᠣᠬᠣᠢ ᠴᠤᠭᠤᠷᠳᠠᠯᠠ ᠪᠠᠷᠢᠯᠳᠤᠵᠤ ᠥᠭᠡᠬᠦᠨ ᠴᠢᠯᠠᠭᠤᠨ ᠪᠠᠶᠠᠨ ᠰᠦᠷᠦᠭ ᠲᠡᠢ《ᠠᠢᠯ ᠭᠡᠷ》 ᠪᠣᠯᠵᠤ ᠲᠣᠭᠯᠠᠵᠤ ᠥᠰᠦᠭᠰᠡᠨ ᠶᠦᠮ᠃ ᠭᠡᠬᠦ ᠳ᠋ᠦ᠍ ᠪᠡᠨ ᠨᠡᠷᠡ ᠶ᠋ᠢ ᠴᠢᠨᠢ ᠶᠡᠷᠦ ᠮᠡᠳᠡᠬᠦ ᠦᠭᠡᠢ ᠂ ᠵᠢᠰᠦ ᠶ᠋ᠢ ᠴᠢᠨᠢ ᠶᠠᠭ ᠦᠵᠡᠭᠡ ᠦᠭᠡᠢ ᠪᠢᠯᠡ᠃
ᠨᠢᠭᠡᠳᠦᠯ ᠦ᠋ᠨ ᠰᠤᠷᠭᠠᠭᠤᠯᠢ ᠳ᠋ᠤ᠌ ᠡᠷᠢᠶᠡᠨ ᠪᠣᠭᠴᠣ ᠲᠠᠢ ᠬᠠᠮᠲᠤ ᠣᠴᠢᠭᠠᠳ ᠡᠬᠡᠰᠢᠭ ᠤᠶᠠᠩᠭᠠ ᠲᠠᠢ《ᠴᠠᠭᠠᠨ ᠲᠣᠯᠣᠭᠠᠢ》 ᠨᠡᠷᠡ ᠶ᠋ᠢ ᠴᠢᠨᠢ《ᠰᠤᠷᠤᠭᠴᠢ》 ᠠᠯᠳᠠᠷ ᠲᠠᠢ ᠪᠢ ᠠᠩᠬᠠ ᠲᠠᠨᠢᠭᠰᠠᠨ ᠶᠤᠮ ᠃ ᠬᠠᠷᠠᠨᠳᠠ ᠳᠠᠰᠬᠠᠯ ᠤ᠋ᠨ ᠰᠢᠨᠡ ᠲᠠᠪᠴᠠᠩ ᠳᠡᠭᠡᠷᠡ ᠭᠠᠯᠪᠢᠷ ᠳᠦᠷᠢ ᠶ᠋ᠢ ᠴᠢᠨᠢ ᠠᠩᠬᠠ ᠦᠵᠡᠭᠰᠡᠨ ᠶᠦᠮ᠃ ᠤᠭ ᠠ᠋ᠴᠠ ᠬᠠᠨᠢᠯᠠᠭᠰᠠᠨ ᠤᠨᠠᠭᠠᠨ ᠨᠠᠢᠵᠠ ᠮᠢᠨᠢ ᠦᠷᠦ ᠵᠢᠷᠦᠬᠡᠨ ᠦ᠌ ᠬᠠᠢᠷᠠ ᠶ᠋ᠢᠨ ᠢᠨᠠᠭ ᠮᠢᠨᠢ᠂ ᠲᠡᠭᠡᠵᠦ ᠨᠢᠭᠡ ᠨᠡᠷᠡ ᠵᠢᠰᠦ ᠪᠡᠨ ᠲᠣᠳᠣᠬᠠᠨ ᠨᠠᠮᠠ ᠳ᠋ᠤ᠌ ᠲᠤᠰᠢᠶᠠᠭᠰᠠᠨ ᠠ᠋ᠴᠠ ᠬᠣᠢᠰᠢ ᠣᠨ ᠵᠢᠯ ᠦ᠋ᠨ ᠤᠷᠲᠤ ᠳ᠋ᠤ᠌ ᠥᠭᠡᠷᠡ ᠦᠭᠡᠢ ᠦᠨᠡᠨᠴᠢ ᠰᠡᠳᠬᠢᠯ ᠢ᠋ᠶ᠋ᠡᠷ ᠢ᠋ᠶ᠋ᠡᠨ ᠦᠶᠡᠷᠬᠡᠵᠦ ᠥᠰᠦᠭᠰᠡᠨ ᠨᠠᠮᠠ ᠶᠤᠭᠠᠨ ᠣᠯᠠᠨ ᠤ᠋ ᠰᠦᠷᠦᠭ ᠲᠦ᠍ ᠥᠩᠭᠡ ᠲᠡᠢ ᠳᠦᠷᠢ ᠲᠡᠢ᠂ ᠥᠪᠡᠷ ᠲᠡᠢ ᠪᠡᠨ ᠠᠳᠠᠯᠢ ᠪᠣᠰᠤᠭᠠ ᠰᠦᠷᠯᠢᠭ ᠶᠠᠪᠤᠭᠠᠷᠠᠢ ᠭᠡᠵᠦ ᠡᠳᠦᠷ ᠰᠥᠨᠢ ᠶ᠋ᠢᠨ ᠬᠣᠪᠢᠨ ᠳ᠋ᠤ᠌ ᠦᠷᠭᠦᠯᠵᠢ ᠰᠢᠪᠡᠨᠡᠵᠦ ᠰᠠᠨᠠᠭᠤᠯᠳᠠᠭ ᠪᠢᠯᠡ᠃
ᠬᠣᠯᠠ ᠶ᠋ᠢᠨ ᠬᠣᠯᠠ ᠶ᠋ᠢᠨ ᠲᠥᠷᠥᠯ ᠰᠠᠳᠤᠨ᠂ ᠨᠠᠢᠵᠠ ᠨᠥᠬᠥᠳ ᠲᠦ᠍ ᠮᠢᠨᠢ ᠠᠮᠤᠷ ᠮᠡᠨᠳᠦ ᠶ᠋ᠢᠨ ᠠᠰᠠᠭᠤᠯ ᠵᠥᠩᠨᠡᠯ ᠢ᠋ ᠮᠢᠨᠢ ᠠᠯᠭᠠᠰᠠᠯ ᠣᠰᠣᠯᠳᠠᠯ ᠦᠭᠡᠢ ᠠᠰᠠᠭᠤᠵᠤ ᠬᠦᠷᠭᠡᠵᠦ ᠥᠭᠳᠡᠭ ᠨᠢ ᠴᠢ ᠮᠢᠨᠢ ᠪᠠᠢᠭᠰᠠᠨ ᠶᠤᠮ᠃ ᠠᠬᠢᠭᠠᠳ ᠪᠤᠴᠠᠭᠠᠳ ᠮᠡᠨᠳᠦ ᠶ᠋ᠢᠨ ᠬᠠᠳᠠᠭ ᠲᠠᠢ ᠮᠥᠷᠥᠭᠡᠳᠦᠯ ᠦ᠋ᠨ ᠬᠠᠷᠢᠭᠤ ᠲᠠᠢ ᠬᠠᠷᠢᠵᠤ ᠢᠷᠡᠳᠡᠭ ᠨᠢ ᠪᠠᠰᠠ ᠯᠠ ᠴᠢ ᠮᠢᠨᠢ ᠪᠠᠢᠭᠰᠠᠨ ᠶᠤᠮ᠃
ᠴᠢᠮᠠ ᠲᠠᠢ ᠪᠠᠨ ᠬᠠᠮᠲᠤ ᠰᠣᠶᠣᠯ ᠤ᠋ᠨ ᠮᠥᠷ ᠬᠥᠭᠡᠭᠡᠭᠰᠡᠨ ᠡᠴᠡ ᠬᠠᠷᠠᠭᠠ ᠮᠢᠨᠢ ᠥᠷᠭᠡᠵᠢᠵᠦ᠂ ᠬᠠᠢᠷᠠ ᠮᠢᠨᠢ ᠳᠡᠯᠭᠡᠭᠳᠡᠵᠦ᠂ ᠬᠠᠨ ᠳᠡᠯᠡᠬᠡᠢ ᠶ᠋ᠢ ᠲᠠᠨᠢᠵᠤ ᠡᠬᠢᠯᠡᠭᠰᠡᠨ ᠶᠦᠮ᠂ ᠬᠠᠮᠤᠭ ᠪᠦᠬᠦᠨ ᠢ᠋ ᠣᠢᠯᠭᠠᠵᠤ ᠡᠬᠢᠯᠡᠭᠰᠡᠨ ᠶᠦᠮ᠃ ᠮᠥᠩᠬᠡ ᠲᠡᠭᠷᠢ ᠶ᠋ᠢᠨ ᠳᠣᠣᠷᠠ ᠮᠢᠩᠭᠠ ᠲᠦᠮᠡᠨ ᠬᠠᠪᠤᠷ ᠨᠠᠮᠤᠷ ᠢ᠋ ᠡᠯᠡᠭᠡᠭᠰᠡᠨ ᠮᠣᠩᠭᠣᠯ ᠤ᠋ᠨ ᠰᠠᠢᠬᠠᠨ ᠣᠷᠣᠨ ᠭᠡᠭᠴᠢ ᠮᠣᠷᠢ ᠲᠠᠢ ᠳᠡᠪᠡᠯ ᠲᠡᠢ ᠬᠥᠮᠦᠰ ᠦ᠋ᠨ ᠮᠥᠷ ᠢ᠋ᠶ᠋ᠡᠨ ᠲᠠᠮᠠᠭᠠᠯᠠᠵᠤ᠂ ᠦᠷᠡ ᠳ᠋ᠦ᠍ ᠪᠡᠨ ᠥᠪᠯᠡᠭᠦᠯᠦᠭᠰᠡᠨ ᠮᠥᠩᠬᠡ ᠵᠢᠷᠭᠠᠯ ᠤ᠋ᠨ ᠭᠣᠯᠣᠮᠲᠠ ᠶᠤᠮ ᠭᠡᠵᠦ ᠮᠥᠨ ᠴᠢ ᠮᠢᠨᠢ ᠨᠠᠮᠠ ᠳ᠋ᠤ᠌ ᠪᠠᠨ ᠶᠠᠷᠢᠵᠤ ᠥᠭᠭᠦᠭᠰᠡᠨ ᠠ᠋᠂ ᠴᠢ ᠮᠢᠨᠢ ᠨᠠᠮᠠ ᠳ᠋ᠤ᠌ ᠪᠠᠨ ᠵᠠᠬᠢᠵᠤ ᠲᠤᠰᠢᠶᠠᠭᠰᠠᠨ ᠠ᠋᠃ ᠭᠠᠷ ᠭᠠᠷ ᠢ᠋ᠶ᠋ᠠᠷ ᠬᠣᠯᠪᠣᠯᠴᠠᠵᠤ ᠮᠥᠷᠥ ᠵᠡᠷᠭᠡᠴᠡᠨ ᠲᠦᠮᠡᠨ ᠦ᠌ ᠳᠤᠮᠳᠠᠭᠤᠷ ᠠᠯᠬᠤᠯᠠᠵᠤ ᠶᠠᠪᠤᠬᠤ ᠳ᠋ᠤ᠌ ᠪᠠᠨ《ᠳᠡᠭᠡᠷᠡ ᠮᠥᠩᠬᠡ ᠬᠥᠬᠡ ᠲᠡᠭᠷᠢ ᠪᠣᠢ᠂ ᠳᠣᠣᠷᠠ ᠬᠥᠷᠥᠰᠥᠲᠦ ᠠᠯᠲᠠᠨ ᠳᠡᠯᠡᠬᠡᠢ ᠪᠣᠢ᠂ ᠬᠥᠮᠦᠨ ᠰᠣᠶᠣᠯ ᠬᠣᠶᠠᠷ ᠬᠣᠷᠸᠠ ᠳ᠋ᠤ᠌ ᠪᠣᠰᠤᠭᠠ ᠶᠠᠪᠤᠳᠠᠭ ᠶᠤᠮ ᠰᠢᠦ 》 ᠭᠡᠵᠦ ᠭᠠᠷ ᠢ᠋ ᠮᠢᠨᠢ ᠴᠢ ᠴᠢᠩᠭᠠ ᠠᠳᠬᠤᠵᠤ ᠂ ᠵᠣᠷᠢᠭ ᠢ᠋ ᠮᠢᠨᠢ ᠴᠢ ᠤᠯᠠᠮ ᠬᠥᠪᠴᠢᠯᠡᠵᠦ ᠥᠭᠭᠦᠭᠰᠡᠨ ᠶᠦᠮ᠃
ᠬᠥᠮᠦᠨ ᠦ᠌ ᠨᠡᠢᠭᠡᠮ ᠬᠥᠭᠵᠢᠨ ᠴᠡᠴᠡᠭᠯᠡᠵᠦ ᠺᠣᠮᠫᠢᠦ᠋ᠲ᠋ᠧᠷ ᠰᠦᠯᠵᠢᠶᠡ ᠲᠦᠭᠡᠮᠡᠯᠵᠢᠬᠦ ᠳ᠋ᠦ᠍ ᠴᠢ ᠬᠠᠮᠤᠭ ᠤ᠋ᠨ ᠤᠷᠢᠳ ᠢ᠋ᠶ᠋ᠠᠷ ᠵᠥᠭᠡᠯᠡᠨ ᠲᠣᠨᠣᠭ ᠲᠤ᠌ ᠠᠵᠢᠯᠯᠠᠵᠤ《ᠣᠷᠣᠨ ᠪᠠᠢᠷᠢ ᠪᠠᠨ ᠨᠠᠮᠠ ᠰᠢᠭ᠋ ᠡᠵᠡᠯᠡᠵᠦ᠂ ᠣᠯᠠᠨ ᠠ᠋ᠴᠠ ᠬᠣᠴᠣᠷᠤᠯ ᠦᠭᠡᠢ ᠴᠢᠷᠮᠠᠢᠵᠤ ᠶᠠᠪᠤ》 ᠭᠡᠵᠦ ᠰᠥᠨᠢ ᠶ᠋ᠢᠨ ᠭᠦᠨ ᠪᠣᠯᠲᠠᠯᠠ᠂ ᠦᠷ ᠦ᠋ᠨ ᠭᠡᠭᠡ ᠤᠭᠲᠤᠲᠠᠯᠠ ᠤᠨᠲᠠᠬᠤ ᠨᠣᠢᠷ ᠦᠭᠡᠢ ᠠᠵᠢᠯᠯᠠᠵᠤ ᠦᠵᠡᠭᠦᠯᠦᠭᠰᠡᠨ ᠠ᠋᠂ ᠤᠯᠤᠰ ᠨᠡᠢᠲᠡ ᠳ᠋ᠦ᠍ ᠥᠪᠡᠷ ᠢ᠋ ᠪᠡᠨ ᠳᠠᠬᠢᠨ ᠲᠠᠨᠢᠭᠤᠯᠵᠤ᠂ ᠥᠪᠴᠢ ᠰᠢᠨᠡ ᠪᠡᠷ ᠢᠨᠲ᠋ᠧᠷ ᠵᠠᠮ ᠢ᠋ᠶ᠋ᠠᠷ ᠥᠷᠯᠥᠭ ᠰᠣᠶᠣᠯ ᠢ᠋ᠶ᠋ᠠᠨ ᠠᠴᠢᠭᠠᠳ ᠮᠣᠷᠳᠠᠭᠰᠠᠨ ᠠ᠋᠃ ᠪᠢᠷ ᠴᠠᠭᠠᠰᠤ ᠰᠢᠤᠳᠠᠨ ᠭᠤᠷᠪᠠ ᠪᠠᠷ ᠳᠠᠮᠵᠢᠳᠠᠭ ᠬᠠᠭᠤᠴᠢᠨ ᠥᠷᠲᠡᠭᠡ ᠪᠡᠨ ᠬᠠᠯᠠᠵᠤ ᠬᠣᠷᠣᠮᠬᠠᠨ ᠵᠠᠭᠤᠷᠠ ᠬᠣᠷᠸᠠ ᠶ᠋ᠢ ᠲᠣᠭᠣᠷᠢᠳᠠᠭ ᠺᠣᠮᠫᠢᠦ᠋ᠲ᠋ᠧᠷ ᠢᠨᠲ᠋ᠧᠷ ᠢ᠋ᠶ᠋ᠡᠷ ᠵᠢᠭᠦᠷᠯᠡᠭᠡᠳ《ᠬᠤᠷᠳᠤᠨ ᠮᠣᠷᠳᠠ᠂ ᠬᠣᠴᠣᠷᠪᠠᠯ ᠪᠠᠯᠠᠷᠠᠨᠠ ᠰᠢᠦ !》 ᠭᠡᠵᠦ ᠱᠠᠯᠠᠪᠳᠠᠵᠤ ᠨᠠᠮᠠ ᠶ᠋ᠢ ᠪᠡᠨ ᠰᠦᠷᠡᠬᠡᠢ ᠱᠠᠭᠠᠷᠳᠠᠭᠰᠠᠨ ᠠ᠋᠃
ᠣᠨ ᠵᠢᠯ ᠦ᠋ᠨ ᠤᠷᠤᠰᠬᠠᠯ ᠪᠢᠳᠡᠨ ᠦ᠌ ᠥᠩᠭᠡᠷᠡᠭᠰᠡᠨ ᠣᠳᠣ ᠶ᠋ᠢ ᠬᠣᠯᠪᠣᠭᠠᠳ ᠢᠷᠡᠭᠡᠳᠦᠢ ᠵᠦᠭ ᠱᠤᠤᠭᠢᠨ ᠨᠢᠰᠬᠡᠵᠦ ᠪᠣᠢ᠃ ᠴᠢ ᠮᠢᠨᠢ ᠪᠠᠢᠭᠠ ᠪᠣᠯᠬᠣᠷ ᠪᠢ ᠰᠡᠳᠬᠢᠯ ᠪᠠᠶᠠᠨ ᠪᠠᠢᠨᠠ᠂ ᠴᠢ ᠮᠢᠨᠢ ᠮᠥᠩᠬᠡ ᠪᠣᠯᠬᠣᠷ ᠪᠢ ᠦᠷᠭᠦᠯᠵᠢ ᠵᠢᠷᠭᠠᠯᠲᠠᠢ ᠪᠠᠢᠳᠠᠭ᠃ ᠴᠢ ᠪᠣᠯ ᠮᠢᠨᠦᠬᠢ᠂ ᠪᠢ ᠴᠦ᠍ ᠴᠢᠨᠦᠬᠢ ᠶᠦᠮ᠃ ᠴᠡᠪᠡᠷ ᠠᠷᠢᠭᠤᠨ ᠬᠠᠢᠷᠠ ᠢᠲᠡᠭᠡᠯ ᠴᠢ ᠪᠢᠳᠡᠨ ᠢ᠋ ᠬᠠᠮᠲᠤᠳᠬᠠᠵᠤ ᠬᠤᠪᠢ ᠵᠠᠶᠠᠭᠠ ᠶ᠋ᠢ ᠮᠢᠨᠢ ᠨᠢᠭᠡᠳᠬᠡᠭᠰᠡᠨ ᠶᠦᠮ᠃ ᠬᠣᠶᠠᠭᠤᠯᠠ ᠪᠠᠨ ᠬᠠᠮᠲᠤ ᠪᠠᠢᠭᠰᠠᠨ ᠴᠠᠭ ᠲᠤ᠌ ᠬᠣᠷᠸᠠ ᠶ᠋ᠢᠨ ᠴᠢᠮᠡᠭ ᠬᠤᠭᠤᠷ ᠤ᠋ᠨ ᠡᠬᠡᠰᠢᠭ᠂ ᠬᠣᠩᠭᠣᠷ ᠰᠠᠯᠬᠢᠨ ᠤ᠋ ᠬᠥᠮᠡᠢ ᠶ᠋ᠢᠨ ᠤᠶᠠᠩᠭᠠ ᠲᠠᠰᠤᠷᠠᠬᠤ ᠤᠴᠢᠷ ᠦᠭᠡᠢ᠂ ᠮᠠᠷᠲᠠᠭᠳᠠᠬᠤ ᠶᠣᠰᠣ ᠦᠭᠡᠢ᠂ ᠦᠷᠭᠦᠯᠵᠢᠯᠡᠭᠰᠡᠭᠡᠷ ᠯᠡ ᠪᠠᠢᠬᠤ ᠤᠴᠢᠷ ᠲᠠᠢ᠃
ᠬᠠᠢᠷᠠᠲᠤ ᠮᠢᠨᠢ ᠠ᠋ ᠂ ᠬᠣᠶᠠᠭᠤᠯᠠ ᠪᠠᠨ ᠲᠦᠰᠢᠯᠴᠡᠵᠦ ᠡᠨᠡ ᠬᠣᠷᠸᠠ ᠶ᠋ᠢ ᠡᠯᠡᠭᠡᠵᠦ ᠬᠠᠮᠲᠤ ᠳ᠋ᠤ᠌ ᠪᠠᠨ ᠮᠥᠩᠬᠡᠷᠡᠶᠡ !
2020 .11.27 ᠬᠠᠯᠢᠭᠤᠲᠤ ᠳ᠋ᠤ᠌
ᠢᠷᠡᠯᠲᠡ᠄
ᠤᠷᠠᠳ ᠤ᠋ᠨ ᠤᠳᠬᠠ ᠤᠷᠠᠯᠢᠭ ᠲᠠᠪᠴᠠᠩ 2025 ᠣᠨ ᠤ᠋ 9 ᠰᠠᠷᠠ
ᠦᠰᠦᠭ ᠠᠮᠢᠯᠠᠭᠤᠯᠤᠭᠴᠢ ᠄ ᠭᠠᠸᠠ
ᠦᠰᠦᠭ ᠵᠠᠰᠠᠬᠤ ᠵᠠᠰᠠᠯᠲᠠ ᠶ᠋ᠢᠨ ᠰᠢᠰᠲ᠋ᠧᠮ ᠢ᠋ᠶ᠋ᠡᠷ ᠬᠢᠨᠠᠪᠠ᠃